AYUB

AYUB

¹ Haro o songulun o kusai do roitan dot i Ayub do poingiyon do hilo’d tana’ do Us I Ayub nopo om sumasambayang dot id Kinorohingan om otorodok kopio iyau dot id dau, om osonong kopio iyau koulun, om a’ momonsoi do nunu nopo it araat. ² I Ayub nopo om kianak do turu’ o kusai om tolu o tondu’, ³ om ogumu’ nogi’ o turipon dau, om kidumba’ iyau do turu’ noribu o tinan, om kiunta do tolu noribu o tinan, om kisapi’ do soribu o tinan, om kikaladai do limo nahatus o tinan. Iyau no o tulun dit akaya’ kopio dot id pogialatan di tulun di poingiyon dot id watas di ponong hilo’d Koulayon. ⁴ Iri nopo tangaanak dau’d kusai om oubas do mogisowoli-woli do papaharo do poginakanan, om mogialap-alap iyolo’, om iri nogi’ i tangaanak di Ayub do tongoondu’ nga’ alapon i’ diyolo’ do mongoi amung di poginakanan. Om moginakan ngai’ nopondo iyolo’. ⁵ Pointikid-tikid do kopongo iyolo’ do moginakan, om osuab kasai’ nopo i Ayub do tumungag do papatahak do porsombahan di sumbolion do pogobi’ dau do pointikid-tikid di tangaanak dau. Om oompunan i’ iyolo’d Kinorohingan. Kapamansayan nopo di Ayub do miagal diri nga’ osorou dau do nokopomonsoi doti’d dusa di mongindaraat do Kinorohingan o tiso’ dot id pogialatan di tangaanak dau, dot a’ piya doti’ daa diyolo’ tinomod. ⁶ Insan tadau om rikot no i piro-piro o susuhuon do Kinorohingan do hilo’d surga, do hiri’d toguang do TUHAN, om ponokitanud no i Gampamalid. ⁷ Om uhoto’ nod TUHAN i Gampamalid, ’’Hinonggo tadon nu?’’ ka. Om boros ka di Gampamalid do suminimbar, ’’Wagu oku po kopimpanau do mikaa-kaa do hilo’ om hiti do mintongkop diti pomogunan,’’ ka dau. ⁸ Om uhoto’ no kawagu iyau’d TUHAN, ’’Nokokito ko i’ nangku di Ayub, i susuhuon ku? Aiso’ no o tulun do hilo’d pomogunan dot otorodok om osonong kopio do miagal dau,’’ ka dau. ⁹ Nga’ boros ka di Gampamalid, ’’Orohian i’ tuu i Ayub do sumambayang dot id diya’ dot aiso’ daa ot aanu-anu dau? ¹⁰ Okon toi giya ko’ intirungan kasai’ nu i’ iyau, om i sompiiyon dau om koinsanai di dau’d songonuon? Om binarakatan nu i’ o koinsanai di wonsoyon dau, om nonuan nu iyau do tayam-tayam dot ogumu’ do gisom do koponu’ diti pomogunan. ¹¹ Nga’ ondung onuon ngai’ nu daa i haro dot id dau, om atantu’ no do timbabaon ko nopo dau do momopol!’’ ka dau. ¹² Om boros kad TUHAN do suminimbar di Gampamalid, ’’Ba, om ngoyo’ ngai’ no onuo’ i kakayaan di Ayub, nga’ kada’ po kopio iyau pokorualai,’’ ka dau. Om tongkiad noddi i Gampamalid do mantad id toguang do TUHAN. ¹³ Alaid-laid noddi, om maso di tangaanak di Ayub do moginakan do hiri’d walai di tobpinai diyolo’ dit id dotuo, ¹⁴ om sigog i’ do mangkus-tangkus o songulun do minongoi rapou di Ayub. Boros ka dau, ’’Maso dahai do mamaradu do hilo’d tumo dot i sapi’ o pamaradu dahai, om i kaladai nga’ hiri ngai’ id somok do mangakan-ngakan, ¹⁵ om sigog id rikot o tulun do Shiba do minongoi pongumang dahai, om tanggayai ngai’ nopo diyolo’ i tayam-tayam. Om pinatai ngai’ diyolo’ i susuhuon nu, om iyoho’ po o nokopoggidu’ do minongoi pomisunud diya’, oi Tuan,’’ ka. ¹⁶ Om a’ po dau nopupusan do monusui iri, om korikot no kawagu o songulun di susuhuon do suwai, om boro-boros nod, ’’Sinisian ngai’ i dumba’ do mitonggoi di madtatamong di dumba’, om kapatai ngai’ nopo iyolo’. Om songulun oku pod nokopoggidu’ do minongoi pomisunud diya’, oi Tuan,’’ ka dau. ¹⁷ Om a’ po dau nopupusan do monusui iri, om korikot no kawagu o tulun do kotolu, om boro-boros nod, ’’Haro o tolu sinompuruan do tulun do Kasdim di mananakau do minongoi panakau dit unta nu, om pinatai ngai’ nogi’ diyolo’ i susuhuon nu’d suwai; om iyoho’ po o nokopoggidu’ do minongoi pomisunud diya’, oi Tuan,’’ ka dau. ¹⁸ Om a’ po dau nopupusan do monusui iri, om korikot po kawagu o songulun di susuhuon dau, om boro-boros nod, ’’Maso daa di tangaanak nu’d moginakan do hiri’d walai di tanak nu dot id dotuo oi Tuan, ¹⁹ nga’ sigog nopo om rikot no o tongus dot opuhod do mantad ponong hilo’d tana’ do kowotuan do minamahaba’ di walai, om kangapatai ngai’ nopo i tangaanak nu, oi Tuan, om iyoho’ po o nokopoggidu’ do minongoi pomisunud diya’, oi Tuan,’’ ka dau. ²⁰ Om ingkakat noddi i Ayub om hurako’ no dau i rasuk dau do natatangaban. Om bugaro’ dau o tobuk dau om tungub no do hiri’d tana’. Om boro-boros nod, ²¹ ’’Di nopo di pinaganak oku i’ om aiso’ i’ o nunu-nunu do tonggoi ku; om matai oku nga’ iyo nogiddi tu’ aiso’ i’ o nunu-nunu dot atanggayan ku. TUHAN i’ o pinapatahak diri, om baino’ noddi om noongoi no dau kawagu iri. Royohon no o ngaran dau!’’ ka dau. ²² Om otopot no kopio do nosiliu ngai’ piya iri, nga’ a’ i’ i Ayub minomonsoi’d dusa om a’ iyau pinapasala’d TUHAN.

¹ Soira’ di norikot i tadau do korikatan kawagu di piro-piro o susuhuon do Kinorohingan di hilo’d surga dot id toguang do TUHAN, om i Gampamalid nga’ nokorikot nogi’ do poirolot diyolo’. ² Om uhoto’ nod TUHAN i Gampamalid, ’’Hinonggo o nongoi nu?’’ ka. Om boros ka di Gampamalid, ’’Minongoi oku pimpanau do ponong hilo’ om ponong hiti do mintongkop diti pomogunan,’’ ka dau. ³ Om ponguhot no o TUHAN, ’’Nokito nu i’ i Ayub, i susuhuon ku? Aiso’ no o tulun do hiti’d pomogunan dot iyo dau kotorodok om iyo dau kosonong. Sumambayang i’ iyau dot id doho’, om a’ kopio momonsoi dot araat. Otorodok kasai’ i’ iyau dot id doho’ do nasansagan oku piya daa diya’ do potumboyo’ diya’ do monusa’ dau, dot aiso’ o pinaantakan,’’ ka dau. ⁴ Nga’ boros ka di Gampamalid, ’’Ginawo nopo om kosonong-sonongo’d tinan om agayo i’ o gatang ko’ mantad do dapu’. Om uhang id tulun do katahak ngai’ dau o nunu nopo i haro dot id dau, dot apasi po iyau. ⁵ Nga’ ondung inggoriton nu o tinan dau, om atantu’ nod timbabaon ko nopo dau do momopol!’’ ka dau. ⁶ Om boros kad TUHAN dot id Gampamalid diri, ’’Ba, om wonsoyo’ nopo o nunu nopo dot id dau, nga’ kada’ po iyau patayo’,’’ ka dau. ⁷ Om tongkiad noddi i Gampamalid diri do mantad id toguang do TUHAN, om poimbulayai no dau do gandas o pointongkop do tinan di Ayub do mantad pod hiri’d lapap om gisom do hiri’d tulu dau. ⁸ Om ongoi no i Ayub irikau do hiri’d somok di patataaman do rinomos om pingkukut no di gandas dau dot i babak do kuron o pongukut. ⁹ Om boros ka di sawo di Ayub dot id dau, ’’Tumorodok kasai’ ko po dot id Kinorohingan? Papalai pogi’ o Kinorohingan! Om matai nopo iya’!’’ ka dau. ¹⁰ Om boros ka di Ayub, ’’Miagal po di tulun do basug o koboro-boroso’ nu! Do nokuro daa tu’ iri no it ongosonong o korohian toko’d rumamit do mantad id Kinorohingan, om iyadaan toko’ indo it araat?’’ ka dau. Om mulong pod miagal diri o koinggoriton di Ayub nga’ iso’ pod boros dau do tumogod do Kinorohingan nga’ aiso’ i’. ¹¹ Haro’ddi o tolu di tambalut di Ayub, i Ilipas, i mantad id bandar do Toman, i Bildad, i mantad id pomogunan do Sua, om i Sopar, i mantad id pomogunan do Naama. Tontok di nokorongou iyolo’ di koinggoritan di Ayub, om pogipapakat no iyolo’ do mongoi kakap om mongoi ponginsasamod di Ayub. ¹² Nga’ tontok dit osodu’ po iyolo’ om kokito no diyolo’ i Ayub, om oruhai no daa iyolo’ dot a’ nokotutun dau. Om ronggung nopoddi iyolo’ do minihad om hurako’ no diyolo’ i pakayan diyolo’ do natatangaban, om popintias no iyolo’d pupuk do hilo’d sawat om popingarab di pupuk dot id tulu diyolo’. ¹³ Om irikau no iyolo’ do hiri’d tana’ do hiri’d toning di Ayub, do solinaid do turu’ o tadau om turu’ o totuong, om a’ minomoros dot ongoiso’ piya o boros, tu’ oilaan no diyolo’ dot a’ no ogina-gina’ o koinggoriton di Ayub.

¹ Om id tohuri noddi ko’ iri om boro-boros no i Ayub do minomopol di tadau di kinosusuon dau. ² - ³ Oi Kinorohingan, papalai no i tadau di kinosusuon ku; papalai no i totuong di ponontiano’ oku i’. ⁴ Siliho’ no i tadau’ddi do totuong, oi Kinorohingan. Kada’ no hondomo’ kawagu i tadau’ddi, kada’ no pologoso’ dot oulinahan do tulinau o tadau’ddi. ⁵ Poluhungo’ no i tadau’ddi, do gisom dot aiso’ ot okito-kito; likupai nod haun i tadau om tirungo’ no i tinitiu di tadau. ⁶ Iduwon nopo i totuong diri do mantad id tulan om toun diri; kada’ no kawagu iri pohompito’ do mongintob; ⁷ podondomo’ no o totuong diri, om pologoson nopo dot aiso’ o kosimbayanan, om aiso’ o kataadan. ⁸ Suhuo’ ngai’ no i bobolian do momopol do tadau’ddi, iyolo’ i koilo do monuhu’ di Lowiatan! ⁹ Kada’ poulinaho’ i rombituon di mulai kasai’ do dongminsusuab; pologoson nopo o totuong diri dot oiman-iman do magandad do korikatan do tadau’d wagu om pagandasan do wagu. ¹⁰ Papalai no i totuong diri tu’ pinopologos doho’ do pinogkosusu, om pinopologos doho’ dot osusa’ om tumongob. ¹¹ Songkuro daa kosonongo’ ondung napatai oku dit id suang oku pod tian di tina’ ku, ko’ tontok po di kasawa’ oku i’ do napatai oku. ¹² Nokuro tu’ ginapus oku om kinibit oku di tina’ ku? Nokuro tu’ pinosusu oku po dau di susu dau? ¹³ Ondung napatai oku daa do tontok do maso’ddi, om osimbayan oku no daa do poundorong do dinondo, ¹⁴ om koodop do miagal ngai’ di raja’ om i pomorinta’, i minomonsoi kawagu di walai do raja’ di gulu po. ¹⁵ Koodop oku no daa’ndo do miagal di tanak do raja’, i minomirumpos do tamas om pirok do gisom do nokoponu’ di walai diyolo’, ¹⁶ ko’ koodop po daa do miagal di tanak di nolombus dot aiso’ o ginawo di kasawa’ i’. ¹⁷ Id suang nopod lobong, om i tulun dot araat nga’ kotingkod no do mingwonsoi dit araat, om i mororobuat di nongohuyan, nga’ koundorong no. ¹⁸ Om iri piya i tulun do songinggiil nga’ koumbal no do haro kosimbayanan, tu’ kalabus no do mantad id koinggoritan do togodon om pinggarangan do monuhu’. ¹⁹ Hilo’ nopo om oiyo nopo o tulun; dot i tulun dit angabantug om it aiso’ o ngaran-ngaran, om i turipon nga’ koidu’ nondo do mantad id ponguripanan. ²⁰ Nokuro ma o tulun dit oinggorit tu’ pologoson pod poimpasi? Nokuro ma i tulun do tumongob tu’ onuan pod tanawau? ²¹ Tu’ iyolo’ nopo om magandad po daa do kapatayon, nga’ a’ i’ rumikot o kapatayon; orohian nogi’ iyolo’ dot apatai, ko’ mantad do haro o dapu’. ²² Koumbal nopo iyolo’ dot otood om dit apatai om olobong iyolo’. ²³ Lisokon do Kinorohingan it id dosunsudan diyolo’. Om noturungku’ no dau iyolo’. ²⁴ A’ oku no milo’d makan, tu’ mihad oku po, om a’ oku no milo’d tumingkod do mingodoi. ²⁵ Korikot ngai’ nopo dot id doho’ i kopoddosian om katangkabaan ku. ²⁶ Aiso’ no o kosimbayanan, om aiso’ o kataadan ku tu’ a’ nopo otingkod-tingkod o koinggoritan ku.

¹ - ² Ayub, otogod ko tuu do moro-boros oku? A’ oku no kotoron dot a’ koungkomi. ³ Nokoponuduk ko nod tulun dot ogumu’, om pinopokoris ko di tulun dit oluhoi. ⁴ Soira’ nopod haro o tulun do katahub, om oluhoi, om ohuyan, om koingkakat indo iyolo’ dot oodsuur di boros nu. ⁵ Baino’ noddi om iya’ o noontok do kosusaan, nga’ adalaan ko iddi kopio do moddosi, om a’ ko milo’d tumimbaba’ diri. ⁶ Suminambayang ko i’ dot id Kinorohingan, om aiso’ o kabara-barasan do koposi-posion nu. Om apatut no dot ogirot o ginawo nu om haro o pagandasan nu. ⁷ Soroho’ pogi, haro toi o tulun dit aiso’ o sala’ do nokoumbal do noontok do kosusaan om kagangahan? ⁸ Nokokito oku i’ do tulun do papasasad do karaaton, om mananom do kousungan do miagal do linsou; om baino’ noddi om mongomot i tulun diri do kosusaan om kagangahan. ⁹ Iyo pod tongus dot opuhod, o Kinorohingan do mamatai diyolo’ tu’ atatagadan no kopio iyau. ¹⁰ Iri nopo i tulun dot araat om minggarom po om minguni do miagal do singa, nga’ tiningkod i’ iyolo’d Kinorohingan do minguni, om tinipu’ dau o nipon diyolo’. ¹¹ Iyo po iyolo’ di singa do minatai dot aiso’ o kanon, om tangaanak diyolo’ nga’ nokopogitongkiad-kiad poo. ¹² Nokoumbal o boros dot opiiyan do nokorikot dot id doho’, om opian no kopio, tu’ gisom dot oruhai ku nod a’ orongou. ¹³ Miagal po i boros diri do nipi dit araat tu’ minamagangau doho’ do koodop. ¹⁴ Gagaran oku do nakapagag; songgogor-gogor poo o tinan ku dot ouru’d moddosi. ¹⁵ Haro o ribut dot opiiyan do nokosowogi’ do rabas ku, om sorimbutuon oku poddi dot opopoddosian. ¹⁶ Haro nogi’ ot okito ku’d poingkakat do hiri; om sonsodo’ ku no nga’ a’ ku i’ otutunan ondung nunu kopio iri. Om korongou ku noddi o boros do tontok dit aiso’ i’ ot ohiyo do poingkaa, ¹⁷ ’’Milo i’ tuu o tulun dot aiso’ kopio o kasalaan dot id pagantangan do Kinorohingan? Milo i’ tuu iyau do lumidang dot id toguang di Minomonsoi dau? ¹⁸ A’ id Kinorohingan milo do ponongkuyaanan i susuhuon dau do hilo’d surga; iri ngai’ piya i moloikat dau nga’ haro i’ o kasalaan dot okito dau. ¹⁹ Om ondos nu daa do monongkuyaan kopio iyau dit ongkipinuhobo di tana’ do winonsoi, i milo i’ do pisoson do miagal do kolibobog? ²⁰ Poimpasi po doti’ o tulun do dongkosuabon poo, nga’ a’ i’ iyau oilaan do matai dit a’ po orikot o sosodopon. ²¹ Om katagak ngai’ nopo i dau’d songonuon, om apatai no iyau, om aiso’ po daa o toila-ilaan dau,’’ ka.

¹ Pillohou no, oi Ayub, om pokinongohon no ondung haro o sumimbar. Haro po toi o moloikat do pokitulungan nu? ² Iri no tulun do basug ot apatai dot it araatan o kapatai. ³ Nokoumbal oku’d nokosolowot do tulun do basug, di kokitanan nopo om osimbayan tomod o koposi-posion, nga’ sigog i’ dot usungo’ ku i walai di tiyonon diyolo’. ⁴ Aiso’ no o kointirungon di tangaanak dau, om aiso’ o mogobi’ diyolo’ do hilo’d pomisaraan. ⁵ Iri indo tulun di louson o mangakan di tinanom-tanom di tulun do basug. Iri piya i gandum di sumuni do hiri’d salag di rugi, nga’ aanu ngai’ i’ di tulun dit aiso’ o suang do tian. Om sianu i tulun di tuuhan do kakayaan, di dapu’ om i kakayaan dau. ⁶ Karaaton nopo om a’ i’ sumuni do hilo’d tana’, kosusaan nga’ a’ i’ mimbulai do mantad id tana’. ⁷ A’ i’ kopio! Suwai ko’ tulun i’ o poporikot do kosusaan dot id tinan dau, miagal di tanak ngapui tu’ mantad i’ do hiri’d tapui. ⁸ Iyoho’ nopo daa ot iyo diya’, om lumohou oku nod Kinorohingan, om patahakon ku o hal ku dot id dau. ⁹ Iyati’ nopo om a’ i’ kosuhut di kongoimayaan do wonsoyon dau. A’ no ointob om a’ opupusan i kongopusahan do wonsoyon dau. ¹⁰ Pinorikatan dau’d rasam o hiti’d tana’, om linuyungan ngai’ dau’d waig i koumaan. ¹¹ Iyau no i Kinorohingan di popoinsawat di tulun dot aiso’ o ngaran- ngaran, om manahak do kaarapadan dot id tulun di mihad do tumongob. ¹² - ¹³ Raagon dau i tosorou do tulun dit ongkipomusarahan dot araat, om lawaan dau om pohudsuon dau i tulun dit apandai, gisom dot aiso’ no ot abayaan di wonsoyon diyolo’, om kosulung iyolo’ di takal diyolo’. ¹⁴ Tontok piya do pitangaadau nga’ momihawor i’ iyolo’ do miagal do dongotuong. ¹⁵ Nga’ posion id Kinorohingan i tulun dot orutum, do mantad id kapatayon. Om poiduwon dau i tulun dit aiso’ o ngaran-ngaran do mantad id koinggoritan. ¹⁶ Onuan dau do pagandasan i tulun do mosikin, om tingkodon dau o boros di tulun dot araat. ¹⁷ Olumaag no i tulun di tudukan do Kinorohingan! Om kada’ kaus do tontok do togodon ko dau. ¹⁸ Ubatan i’ do Kinorohingan i suhat di sinuhat dau; om longon i’ dau o pokoruol diya’, om longon nogi’ dau o momolingos diya’. ¹⁹ Poiduwon kasai’ ko i’ dau do mantad id koligagaanan; ²⁰ tontok nopod mononglous, om posion ko i’ dau, om tontok do haro o pisangadan, nga’ intirungan ko i’ dau do mantad id kapatayon. ²¹ Poiduwon ko i’ dau do mantad id tudut om pongindaraat, om a’ ko ooris do tumimbaba’ do kosusaan om kagangahan. ²² Koirak ko i’ do rumikot piya ot orongit om mononglous, om a’ ko moddosi do tumimbaba’ di nintorusan dit orongit. ²³ Aiso’ nondo o watu di tumo do roduwon nu; om a’ ko nondo ngoyon tabpaai do nintorusan dit ongorongit. ²⁴ Osimbayan ko nondo do poingiyon dot id suang di kiim nu, om soira’ nopo do mongoi ko ontong di dumba’ nu, nga’ okito nu indo dot ongosonong-sonong ngai’ i’ iri. ²⁵ A’ nondo ointob-intob o sinakagon nu, miagal pondo di sakot do hilo’d kobuturan o kogumuo’ diyolo’. ²⁶ Miagal di gandum do noonsok, dit omoton do tontok do kapangamatan, om iya’ nga’ iyo nogiddi tu’ otogui do gisom do kolohing. ²⁷ Ayub, alaid no iyahai do minsingilo ngai’ diti. Iti nopo om otopot i’ kopio, iyo nopoddi, om romito’ nopo.

¹ - ² Ondung timbangon daa dot id ponimbangan iti kosusaan om katangaban ku, om atantu’ no dot awagat po ko’ togis do rahat. ³ Om kada’ kou kosuayai dot a’ piya oila-ilaan o koboro-boroso’ ku. ⁴ Nokotodok dot id tinan ku i pana’ do Kinorohingan dit Osundu Kopio. Om i paliu di pana’ nga’ nokotongkop nod tinan ku. Korolosi no kopio o kosunduwo’ do Kinorohingan, om sumaap iyau doho’ do miagal di soudor do pisangod. ⁵ Abagalan i’ o kaladai do kaakan do sakot, om sapi’ nga’ kododog i’ do kaakan do sakot di nokoring. ⁶ Nga’ isai o mangakan do takanon dot ayami, it a’ noosin? Poingkuro daa do haro o maro-maro di topurak do tontolu’? ⁷ A’ oku no siakan do taakanon do miagal diri, om nunu nopo o kanon ku nga’ siilob ngai’ oku nopod kaakan. ⁸ Nokuro o Kinorohingan tu’ a’ pohubayaan i pokionuon ku? Nokuro ma tu’ a’ iyau sumimbar do sambayang ku? ⁹ Orohian oku nogi’ daa do patayon oku dau do dinondo! ¹⁰ Ondung oilaan ku daa do wonsoyon dau o miagal diri, nga’ minsimbul oku nopo daa dot ounsikahan, do mulong piya dot oruol ot opurimanan ku. Oilaan ku i’ do Kinorohingan nopo om olidang. Om a’ oku i’ insan do sumongkiwal dit isuhu’ dau. ¹¹ Honggo po o kokorisan ku do potilombus doho’ do poimpasi? Nokuro tu’ minog po do poimpasi oku, dot aiso’ o pagandasan ku? ¹² Winonsoi toi o tinan ku do miagal do watu kokoris? Tambaga’ toi iti tinan ku? ¹³ Aiso’ no o kokorisan ku do pamasi diti tinan ku; aiso’ no o milo ku’d pokiuhupan. ¹⁴ Id suang nod katangaban do miagal diti dot orohian kopio oku daa do haro o tambalut ku dit otorodok, do nokotongkiad oku tuu do Kinorohingan ko’ amu’. ¹⁵ Nga’ iyokoyu nopo, oi kongoombolutan ku, om posiwot nogi’ doho’ do miagal di palu dit arasak do tontok dot aiso’ o rasam. ¹⁶ Miagal kou nod waig do palu di nokodou, tu’ noponu’ do salju om ais, ¹⁷ nga’ orikot nopo i maso dot alasu’, om atagak nopo i salju om it ais. Om koimbulai nondo i nanad di palu, tu’ aiso’ no o waig om otuu tomod. ¹⁸ Apalid i’ i sinompuruan do tulun di mimpanau do tontok do mogihum do waig, mimpanau iyolo’ do gisom dot apatai do hilo’d tana’ do kowotuan. ¹⁹ I sinompuruan do tulun do mantad hilo’d Shiba om mantad hilo’d Tima nga’ ruminikot do minongoi pogihum di waig di soro-sorohon no daa diyolo’. ²⁰ Nga’ katanus tomod nopo o ginawo diyolo’ do morou-sorou do hiri’d tisan di palu, di narasak o waig. ²¹ Iyokoyu no o miagal di palu diri, oi koombolutan ku. Suminunsuri kou om minodosi kou do nokokito do koinggoritan ku. ²² Nokuro? Nokoumbal oku toi do nokopokianu dokoyu do nunu-nunu? Ko’ nokoponuhu’ oku toi dokoyu do monisip do tulun do suwai do mogobi’ doho’? ²³ Ko’ nokopokipasi oku toi dokoyu do mantad id pisangod dit orongit? ²⁴ Nga’ tudukai oku nopo, pointalango’ nopo o kinasalaan ku! Mundorong oku i’ om mokinongou oku do boros nu. ²⁵ Iri nopo boros di mantad kopio dot id ginawo om koinsasamod i’ do ginawo, nga’ iri nopo boros dokoyu om maan i’ dokoyu toomod, aiso’ i’ o komoyon. ²⁶ Ondos nopo daa dokoyu om mimboros oku dot aiso’ o suang! Nga’ nokuro tu’ simbaron po dokoyu i boros ku om aiso’ no o pokukurayan ku? ²⁷ Undion i’ dokoyu ondung poingkukuro o kotutukon di tanak dit aiso’ o molohing, i nosiliu nod turipon. Om maan dokoyu do papakaya’ dokoyu i tambalut kopio dokoyu! ²⁸ Antangai kopio oku pogi’. Do mongudut kopio oku tuu daa dokoyu? ²⁹ Adalaan no i pinoboros dokoyu. Om tingkod kou no do momonsoi dit a’ otulid Kada’ kou pasala’ doho’. Tu’ aiso’ i’ kopio o sala’ ku. ³⁰ Nga’ maso po dokoyu do momusorou do goudut oku — tu’ osorou nopo dokoyu om a’ oku no koilo do pisuayan dit otopot om i kasala’.

¹ Koposi-posion nopod tulun, om miagal do koposi-posion do soudor di sinansagan do kumaraja’, tu’ oudipon om oinggorit do miagal do koposi-posion do turipon, ² miagal di turipon do langadon do lungungon, miagal di mororobuat di mandad-andad nod gadsi’. ³ Poingompus nopod tulan dot aiso’ o guna’ ku do poimpasi, om pointikid-tikid do totuong do tumongob oku. ⁴ Tontok nopo do mongoi oku odop, om anaru tomod o totuong dot opurimanan ku. Langadon oku nod kosuabon, tu’ a’ oku nopo kogintoron do poillii. ⁵ Tinan ku nopo om noponu’ pod giuk; notongkop oku pod kogom; om nana’ nga’ lumuyung poo do mantad id gandas ku. ⁶ Osiau nopod tumalib o maso ku do tontok dit aiso’ o pagandasan do kumaa id koompokon, dot osiau po ko’ i porilitan do banang do mangangawol. ⁷ Soroho’ no, oi Kinorohingan do koposion ku nopo om iyo no di pinuhobo di pohoboon; om i kosimbayanan ku nga’ nopupusan no. ⁸ Kokito ko po doho’ do dinondo poo, nga’ a’ ko nondo kokito kawagu doho’. Mogihum ko piya daa doho’ nga’ a’ oku no hino’. ⁹ - ¹⁰ Miagal no di haun do tumanus om it a’ nondo okito, o tulun do matai tu’ a’ no gumuli’ kawagu; om olihuan nondo iyau do tulun di kotutun mantad dau. ¹¹ Iri no ot a’ ku komilaan dot a’ mungkomi! A’ ku no milo do pakangkabon o kototogod om koruolo’ do ginawo ku. A’ oku no milo dot a’ moro-boros, do popolombus dit id suang do ginawo ku. ¹² Nokuro tu’ tamangan oku diya’? Osorou nu daa do naga’ oku dit orongit do hilo’d rahat? ¹³ Lumii oku no daa do mundorong-dorong. Tu’ mogihum oku do koinggaan-gaanan diti toruol ku. ¹⁴ Nga’ tompurolosion oku i’ diya’ do nipi, pilodopon oku diya’ om porikatan oku do soroyoon dit araat, ¹⁵ gisom dot orohian oku nogi’ do kotolon om apatai i’, ko’ mantad do poimpasi dot id tinan di noponu’ do koinggoritan. ¹⁶ Ohuyan oku no om apaasan oku nod poimpasi, orohian oku nogid matai! Pologoso’ oku nopo, tu’ aiso’ no o guna’ ku’d poimpasi. ¹⁷ Nokuro tu’ posuulon kopio nu o tulun dot id toguang nu? Nokuro tu’ imparasan kopio nu o wonsoyon dau? ¹⁸ Pisorisidan nu iyau do monikid do kosuabon, om pogumbalan nu iyau do pointikid do maso, do pongilo kopio nu dau. ¹⁹ Soira’ ko do tumolikud doho’, om otolon ku i’ daa’ndo o tiou ku? ²⁰ Norualan ko toi di dusa ku, oi tulun di madtamong doho’ do poinggiil? Nokuro tu’ iyoho’ o maan nu’d pinsingilaan do manangod? ²¹ A’ ko no kopio milo do mangampun do dusa ku? A’ nu no kopio tonuson i kasalaan ku? A’ oku no alaid om kolii no dot id lobong, om ihumon oku piya daa diya’ nga’ a’ oku no hino.

¹ - ² Songkuro po o koloido’ nu do mimboros dot iyondo? Miagal po do ribut dit okohus ino boros nu. ³ A’ i’ o Kinorohingan insan ponomputul do katapatan. A’ i’ iyau insan kopinduwaai do momonsoi dit otopot. ⁴ Nokowonsoi doti’d dusa dot id Kinorohingan i tangaanak nu om osorupai no do hukuman iyolo’d TUHAN, do miontok di nowonsoi diyolo’. ⁵ Nga’ guli’ nogi’ om lumohou i’ do Kinorohingan dit Osundu Kopio, do mokiinsian om mokianu do koompunan. ⁶ Ondung otopot kopio dot olidang om otulid o ginawo nu, om olomus indo o Kinorohingan do monguhup diya’, om tondulion kawagu dau o sompiiyon nu dot isomuli’ diya’. ⁷ Om koinsanai di dapu’ nu di natagak diri nga’ a’ i’ kopikuro-kuro do pitaladon di patahakon do Kinorohingan dot id diya’ do koimbagu. ⁸ Soroho’ pogi’ dot ongoruhai i toilaan do tulun dit ongoilo di gulu- gulu po. Soroho’ pogi’ i nongoumbalan di komolohingan toko’. ⁹ Koposi-posion toko’ nopo om oniiba’ om aiso’ i’ o toila-ilaan toko’. Miagal toko’ nod sangai do tumalib do hiti’d pomogunan. ¹⁰ Nga’ pokinongoho’ pogi’ i boros di tulun dot ongoilo di gulu po. Poingkaa o potudukon diyolo’ diya’, ¹¹ ’’Hiri nod kiwaig-waig o sunion di bundusan; a’ i’ insan i bundusan dot abantalan do poinsuni dot okon ko’ id buyut- buyut. ¹² Ondung arasak i waig om iri no i bundusan ot id gulu kopio koriou. Nga’ omulok po kopio om a’ po norikot i kapanatasan om a’ po milo dot onuon. ¹³ Tulun nopo dit aiso’ o Kinorohingan om miagal no di bundusan; aiso’ no o kotutukon di pagandasan diyolo’ dot olihuan diyolo’ o Kinorohingan. ¹⁴ Mogondos nogi’ iyolo’ di banang dot atandai, it iyo no di tompulawa-lawa’ katandai. ¹⁵ Ogirot toi i tompulawa-lawa’ do sondihon? Alanut toi i banang do toidon? ¹⁶ Tulun nopo dot araat om iyo pod sakot do sumuni dit id dotimpalangan do tadau, iyo po di sakot di rumoloi do tumongkop do pomutanam-tanaman. ¹⁷ Iri nopo gamut di sakot om nongkorilit po di watu, om ogirot tomod do pointapil di kowotuan. ¹⁸ Nga’ utuso’ pogi’ daa i sakot diri do dinondo, nga’ a’ i’ okito o pinongutusan. ¹⁹ Pointantu’ no dot iyo-iyo noddi o kaarapadan do tulun dot angaraat, baino’ noddi om tulun nod suwai o sumowoli diyolo’. ²⁰ Nga’ tulun nopo dot otorodok om a’ id Kinorohingan insan dot iduan, om a’ iyau insan ponguhup do tulun dit araat. ²¹ Poirakon indo kawagu dau o kabang nu, om popimpongkison ko dot atataadan. ²² Nga’ intingayamon i’ om poinsiribaon dau it araatan diya’. Om walai nopod tulun dot araat om raagon do gisom dot ohuyas,’’ ka.

¹ - ² Oilaan ku i’ dot a’ kasala’ ino boros nu. Nga’ poingkukuro o tulun do sumurilog do kumotopot dot id Kinorohingan? ³ Poingkukuro po ma o tulun toomod do monokisongkiwal dau? Milo i’ o Kinorohingan do moguhot do soribu o poguhatan, om iso’ po nga’ aiso’ i’ ot osimbar do tulun. ⁴ Kinorohingan nopo om oilo kopio om osundu; isai po daa o kobulun do sumaap dau? ⁵ A’ id tulun oilaan o Kinorohingan do pawaliu do nuluhon, om raagon nopo dau iri do tontok di tumogod iyau. ⁶ Guyuon do Kinorohingan iti pomogunan om pogogoron dau iti tana’, om iyogon dau o torigi diti pomogunan. ⁷ Milo i’ o Kinorohingan do mogodu dilo tadau do mimbulai do dongkosuabon, om milo do mogodu dilo rombituon do mulinau do dongotuong. ⁸ Aiso’ i’ o minonguhup do Kinorohingan do minomonsoi dilo tawan, om aiso’ o nokowoyo’ dau do miningulok di likud di naga’ do rahat. ⁹ Kinorohingan i’ o pinopoiyon dilo rombituon do hilo’d tawan — i roitan do soguwanggo’, om Balatik, om Muru-Puru om koinsanai di rombituon di ponong id salatan. ¹⁰ Iyati’ nopo om a’ i’ kosuhut di winonsoi dau dit angagayo, om a’ toko’ kointob di kongoimayaan do wonsoyon dau. ¹¹ Tumalib no o Kinorohingan, nga’ a’ oku i’ kokito dau. ¹² Om onuon nopo dau o nunu nopo i korohian dau, om iso’ pod tulun nga’ aiso’ i’ o kasaap do muhot dau do poingkaa, ’’Nunu ino wonsoyon nu?’’ ka. ¹³ A’ nod Kinorohingan pinusus o kototogod om kolosuo’ do ginawo dau. Iri piya i minonguhup di Rahab nga’ mininsiriba’ i’ dot id dau. ¹⁴ Om poingkukuro oku po daa do sumurilog dau? Nunu po daa o poboroson ku do ponimbar dau? ¹⁵ Mulong po dot aiso’ o sala’ ku, nga’ kumukuro oku po daa, do suwai ko’ mokiinsian do Kinorohingan, i gompomutus doho’. ¹⁶ Mulong po dot iyo’ddi, nga’ ondung pologoson oku daa dau do mimboros, om a’ oku i’ monongkuyaan do pokinongohon oku dau. ¹⁷ Pinorikot dau o tongus dot opuhod do minomuntul om pinopokoruol doho’, om aiso’ i’ o pinaantakan. ¹⁸ A’ oku i’ dau pologoson do momuhobo dot ongoruhai piya; pinonu’ po dau’d koinggoritan o koposi-posion ku. ¹⁹ Monokiingkodou oku tuu dau? Nga’ antangai pogi’ o kokoriso’ dau dit a’ ogina-gina’! Angatan ku tuu iyau do mibisara’. Nga’ isai daa o katama’ do momolohou dau dot id pibisaraan? ²⁰ Otorodok oku i’ om a’ oku nokowonsoi’d dusa, nga’ karangahan nopodti boros ku om kasala’ oku i’, om koinsanai’d boros ku nga’ iyo pod papasala’ doho’. ²¹ - ²² Aiso’ i’ daa o sala’ ku, nga’ uhang ngai’ ku no. Apaasan oku nod poimpasi. Aiso’ no i poimaha-maha’; tu’ it otopot om i nakasala’, nga’ miagal nopo o kootuson: tu’ patayon goduwo id Kinorohingan. ²³ Soira’ nopo do monigowo dot apatai i tulun dot aiso’ o sala’, om koirak nogi’ o Kinorohingan do monguntotogod dau. ²⁴ Pinatahak do Kinorohingan iti pomogunan dot id tulun dit angaraat, om binolou ngai’ dau o mato di gompomutus. Om Kinorohingan ngai’ i’ o minomonsoi’ddi. Tu’ ondung okon ko’ iyau, om isai poo? ²⁵ Oruhai do tumalib o tadau di maso ku’d poimpasi, aiso’ i’ o tiso’ piya di tadau’ddi dot osonong. ²⁶ Osiau tomod do tumalib o maso ku’d poimpasi do miagal po di parau’ dit osiau, iyo po di kosiaho’ do kondiu do monimbit do tikus. ²⁷ - ²⁸ Ondung kokusum oku om umbalan ku daa do momolihu iti toruol ku, nga’ gumuli’ ngai’ i’ iti koinggoritan ku do momigangau doho’. Oilaan ku i’ do pasalaon oku po kasai’d Kinorohingan. ²⁹ Pasalaon oku nopod Kinorohingan, om uhang ngai’ ku no. ³⁰ Aiso’ no o sabun do koisu’ do dusa ku. ³¹ Nokososok oku nod Kinorohingan dot id saalom di sosomu’, gisom dot iri piya i pakayan ku nga’ sosomuan i’ doho’. ³² Ondung tulun daa o Kinorohingan, om milo oku i’ daa’d sumimbar dau; milo i’ daa iyahai do mongoi’d hilo’d pomisaraan do manalasai ngai’ di pisongkiwalan dahai. ³³ Nga’ aiso’ no o milo do momiolitan dahai. Aiso’ no o milo’d momutus dot id pialatan ku om Kinorohingan. ³⁴ Tingkod nod momohukum doho’, oi Kinorohingan! Poinsoduwo’ no i kororongit nu! ³⁵ A’ oku i’ moddosi. Mimboros oku i’, tu’ oilaan ku i’ ot id suang do ginawo ku.

¹ Apaasan oku nod poimpasi. Poboroson ngai’ ku no it araat dot opurimanan ku. ² Kada’ oku no pasalao’, oi Kinorohingan; sunudai oku no ondung nunu kopio o poguhangan nu doho’. ³ Apatut i’ toi dot orongit kopio ko, om magada’ di winonsoi nu? Nunu noddi ot aanu-anu do sokodungon nu ot osorou om i korohian do tulun dot araat? ⁴ Iyo i’ toi do dahai ot okito nu? ⁵ Iyo i’ toi do dahai koniba’ o tumur nu? ⁶ Ondung amu’, om nokuro tu’ ihumon ngai’ nu o dusa ku, om imbulayan ngai’ nu o sala’ ku? ⁷ Oilaan nu i’ dot aiso’ o sala’ ku, om aiso’ o milo do popoidu’ doho’ do mantad id diya’. ⁸ Longon nu i’ o minomonsoi doho’, om nokuro daa’ddi do baino’ tu’ patayon oku diya’ dot i longon nu di pinomonsoi nu doho’ o pamatai nu? ⁹ Hondomo’ no dot iya’ i’ o minomorun doho’ do mantad id tana’, om mumukon oku i’ nangku’ndo diya’ om silihon kawagu’d pupuk do tana’? ¹⁰ Iya’ i’ o minanahak di tapa’ ku do kokorisan do pinoposiliu doho’, om iya’ o pinapagayo doho’ dot id suang do tian di tina’ ku. ¹¹ Iya’ i’ o minomonsoi do tinan ku do kinuwaan do tulang om tuhat, om linopot nu o tulang ku do tonsi om kulit. ¹² Nonuan oku diya’ do koposion om osianan kasai’ ko i’ doho’. Om gompi’ nu i’ o nakapasi doho’. ¹³ Nga’ baino’ nopoddi om oilaan ku nogi’, do solinaid nopoddi om maso nu i’ do momusorou’d ralan do pokoruol doho’. ¹⁴ Pitoinuan oku diya’ ondung kowonsoi oku’d dusa, om a’ oku indo diya’ ompunan. ¹⁵ Kowonsoi oku nopod dusa, om pasalaon oku no diya’, nga’ tontok nod kowonsoi oku dot otopot om roitan kasai’ oku i’ do nokowonsoi’d dusa! A’ oku no kasaap do humangog tu’ tumongob oku om ointingayaman oku. ¹⁶ Ondung kourut-urut oku dot ongokooro’ nga’ osuon oku no diya’ do miagal do magasu do singa; om poimbulayon nu i sinundu nu do maan do pokoruol doho’. ¹⁷ Haro kasai’ nopo o sasi’ nu do muhup diya’ do papasala’ doho’, om i kototogod nu doho’ nga’ muhang-ruhang nogi’; om momusorou ko nopod ralan do suwai do sumaap doho’. ¹⁸ Nokuro tu’ pinologos oku diya’ do pinogkosusu, oi Kinorohingan? Osonong nogi’ daa do napatai oku dit aiso’ po tiso’ do tulun do nokokito doho’. ¹⁹ Om iyo po daa’ndo dot a’ oku nopogkosusu, tu’ pitilombuso’ nopo do minomolobong do mantad id tian. ²⁰ A’ oku toi oruhai nod matai? Pologoso’ oku nopo dot iso-iso’. Om osimbayan oku i’ do momurimon diti maso ku’d poimpasi dot oruhai no. ²¹ Oruhai oku nod mamanau om a’ oku no koguli’ kawagu do kumaa oku id pomogunan dit otuong om aiso’ o kataadan. ²² Pomogunan dit aiso’ o tulinau, i noponu’ pod sangai om kagangahan, tu’ iri piya tulinau nga’ otuong i’.

¹ - ² A’ no tuu simbaron i boros dot aiso’ o komoyon diri? Milo tuu i kobolotoko’ do popotopot do tulun? ³ Ayub, osorou nu daa dot a’ no iyahai koilo do sumimbar diya’? Om osorou nu daa dot obobou nopo iyahai dot ouru di ponguntotori’ nu? ⁴ Osorou nu nopo daa dot a’ kasala’ i boros nu. Om osorou nu dot olidang ko dot id toguang do Kinorohingan. ⁵ Orohian oku no daa do Kinorohingan kopio o sumimbar diya’! ⁶ Om poiloon ko i’ daa dau do toilaan nopo om ogumu’ i’ o kowoyoon, om a’ i’ osuhutan do tulun. Om purimono’ no dot a’ nogi’ kosongkuro no ino koinggoritan nu, do pataladon di hukuman dit apatut daa do porotuon dot id diya’. ⁷ Oilaan nu i’ tuu o kogisomon do kogoyoo’d Kinorohingan, om kogoyoo’ do sinundu’d Kinorohingan? ⁸ Asawat i’ ko’ ilo tawan o sinundu do Kinorohingan. Nga’ a’ ko i’ korikot do hilo’. Aralom i’ ko’ pomogunan do tulun do napatai o sinundu dau, poingkuro piya nga’ a’ ko i’ kosuhut. ⁹ Sinundu nopod Kinorohingan om osinggawa’ po ko’ iti pomogunan om alaab ko’ ilo rahat. ¹⁰ Ondung tangkapon ko’d Kinorohingan om igitan ko nogindo dot id bisara’; om isai po daa o kasaap do mogodu dau? ¹¹ Oilaan id Kinorohingan i tulun dot aiso’ o kootuk-otukon, okito ngai’ i’ dau o wonsoyon diyolo’ dit angaraat. ¹² Tulun piya’d basug nga’ opintar nondo, dot osusu no i kaladai do lalang, do kaladai dit alaya’. ¹³ Posinondoto’ no o ginawo nu, oi Ayub. Kumorologo no! Sambayang no dot id Kinorohingan. ¹⁴ Iduwo’ no o dusa do mantad id ginawo nu om poinsoduwo’ no o karaaton do mantad id walai nu! ¹⁵ Om milo ko indo do tumoguang do koposi-posion do hiti’d pomogunan do mikuwo’d alanut om okoris o ginawo. Ogirot ko indo om a’ minog do kumanggau. ¹⁶ Om olihuan nu indo i katangaban nu, do miagal di luyud di nononos no tu’ olihuan nod tulun. ¹⁷ Om koposi-posion nu nondo nga’ anawau po ko’ i tinitiu’d tadau di dangadau, om iri nondo it otuong dot id koposi-posion nu nga’ mulinau do miagal do dongkosuabon. ¹⁸ Om osimbayan ko indo do poimpasi, om poimponu’ ko’d pagandasan, om intirungan ko indod Kinorohingan do gisom dot osimbayan ko. ¹⁹ A’ ko nondo moddosi dot isai nopo o pisangod, om ogumu’ nondo o tulun do mokiuhup diya’. ²⁰ Nga’ iri nopondo tulun dot angaraat om mikorowo-rowo poo tu’ aiso’ no o pokukurayan, om aiso’ o ralan do lumabus. Om iso’ poo o soro-sorohon diyolo’, tu’ mokimohilo-hilo’ po do korikot o kapatayon.

¹ - ² Iya’ no kopio o minogobi’ di tulun dot ogumu’ do mimboros. Om soira’ nopo dot apatai ko, om toilaan nu nga’ kotonggoi nod apatai. ³ Iyoho’ nga’ tulun i’ di kitoilaan, om a’ i’ poingharo-haro o toilaan nu ko’ mantad do doho’d toilaan, om koilo ngai’ no o tulun di nongkoboros nu. ⁴ Iri piya kongoombolutan ku nga’ mongirak-irak iddi doho’ do baino’, mulong piya dot otopot om aiso’ o sala’ ku. Nokoumbal i’ di gulu po do sinimbar do Kinorohingan o sambayang ku. ⁵ Iya’ nopo om aiso’ i’ o kosusaan, nga’ mongumang-umang ko i’ daa doho’, bobogon nu nogi’ o tulun di motingkaratu’ no. ⁶ Nga’ iri piya i mananakau om i tulun dit aiso’ o Kinorohingan nga’ osimbayan id poimpasi, mulong piya do tingolig noo o pagandasan diyolo’ om iri noo i kokoris diyolo’. ⁷ Ilo’ piya tombolog om nintorusan nga’ ogumu’ po o potudukon dot id dokoyu, ⁸ pokianu nod toilaan do mantad id ongkipinuhobo dit id tindal om i hilo’d rahat. ⁹ Koinsanai diyolo’ om kongoilo’ i’ do longon do Kinorohingan o minomonsoi diyolo’. ¹⁰ Kinorohingan i’ o mongilo-ilo do koposi-posion do toinsanan dit ongkipinuhobo, om koposi-posion nopo do pointikid-tikid do tulun om id suang i’ do palad dau. ¹¹ Nga’ poingkuro nopo o dila’ nu do kopuriman di takanon, om iyo nogiddi o tolingo nu dot orohian do mokinongou do boboroson. ¹² - ¹³ Tulun nopo di molohing no om haro i’ o toilaan; nga’ Kinorohingan noo o kitoilaan om kisinundu. Tulun nopo di molohing no om haro i’ o pomusarahan dit atarom; nga’ Kinorohingan noo o haro o pomusarahan dot atarom om kisinundu do popowonsoi’ddi. ¹⁴ Soira’ nopod raagon do Kinorohingan, om isai poo o koilo do momonsoi kawagu’ddi? Om isai poo o popoidu’d tulun di pinogiil do Kinorohingan? ¹⁵ Magadau no do pususon do Kinorohingan o rasam; om rumikot o tampad do pologoson dau do lumuyung o waig. ¹⁶ Kinorohingan nopo om okoris om kamanang kasai’, i monipu’ om i tinipu’ nga’ id suang goduwo i’ do kuasa’ dau. ¹⁷ Iyau no i mongidu’ do toilaan do pomorinta’, om silihon po dau do koirakan i boyoon. ¹⁸ Iduwon dau o pangkat di raja’ om pogiilon dau iyolo’; ¹⁹ om poinsiribaon ngai’ dau it imam om i tulun dit ongkipangkat. ²⁰ Tingkodon dau do mimboros o tulun di milo’d sondihon, om iduwon dau o toilaan di tulun di molohing no. ²¹ Intingayamon dau i tulun di kikuasa’, om pupusan dau o kinoris do tulun di momorinta’. ²² Porikatan dau’d tulinau ot id koiyonon di totuong do miagal pod kapatayon. ²³ Pogiroton om pobontugon ngai’ dau o bansa’, nga’ id tohuri nondo om poinsiribaon i’ om raagon dau iyolo’. ²⁴ Pobosugon ngai’ dau i boyoon diyolo’, om pologoson dau iyolo’ do minghombo tu’ noborulong om napalid iyolo’. ²⁵ Momihawor po iyolo’ dot id dotuong, om mikorobibi’ do miagal do tulun di naawuk.

¹ Koinsanai di pinoboros nu om nokito ngai’ no di gulu po, om osuhutan ngai’ ku. ² Nunu nopo i noilaan dokoyu, om iyoho’ nogi’ nga’ koilo i’. Kada soroho’ dot aala’ oku diya’. ³ Nga’ monokiboro-boros oku dit Osundu Kopio. Pouhoton ku’d Kinorohingan iti hal ku. ⁴ Tu’ somponon dokoyu do tudut ino kababasug dokoyu. Miagal kou nopo di dokutur dit a’ milo do mongubat. ⁵ A’ kou nopo daa mimboros, om sorohon kou nogi’ doti’ daa’d tulun dot ongoilo. ⁶ Pokinongoho’ no iti hal ku do poboroson ku. ⁷ Milo kou toi do mongudut dot id Kinorohingan? Ondos daa dokoyu om ino nopo tudut dokoyu om kountungan dot id Kinorohingan? ⁸ Milo kou tuu do mogobi’ do Kinorohingan? Ongoyon daa dokoyu salasayo’ i hal dau dot id pomisaraan? ⁹ Ondung potorungak kopio o Kinorohingan do mogintong diya’, om haro tuu ot okito dau dot osonong dot id diya’? Milo kou toi do magakal do Kinorohingan do miagal do magakal do tulun? ¹⁰ Mulong pod lumisok-lisok kou do tumongkiad, nga’ porikatan kou id Kinorohingan do hukuman dit awagat. ¹¹ Ooris ko di kogoyoo’ do sinundu dau. A’ toi kotompurolosi diya’ i kokoriso’ dau? ¹² Koinsanai di nosihat nu om miagal po di liohuk do tana’ dot aiso’ no o kootuk-otukon. Om i boros nu di popotopot diya’ nga’ miagal po di tana’ tu’ oruhai dot omumuk. ¹³ Tingkod nod mimboros om pologoso’ oku no iyoho’ dot osimbayan do mimboros! Uhang ngai’ ku i’ do poingkuro nopo o kootuson! ¹⁴ Nokosodia’ oku nod papatahak diti ginawo ku. ¹⁵ Natagakan oku nod pagandasan! Ondung patayon oku’d Kinorohingan, om uhang ku no. Pointalangon ngai’ ku i’ iti hal ku dot id dau. ¹⁶ Ulan toi’ om iti katamao’ ku o kapasi-pasi doho’, do tulun nopod araat om a’ i’ katama’ do monokitimbaba’d Kinorohingan. ¹⁷ Pokinongoho’ no kopio iti boros ku do papatarang do dinondo. ¹⁸ Nokosodia’ oku nod popointalang diti hal ku, otumbayaan oku i’ dot a’ oku no milo’d pasalaon! ¹⁹ Oi Kinorohingan, ondung rumikot ko do mongoi ponondos doho’ do kasala’ oku, om mundorong oku nopod magandad do kapatayon ku. ²⁰ Nga’ patahako’ no doho’ iti duwo o pokionuon ku, om kasaap oku i’ do sumolowot kawagu diya: ²¹ tingkod nod monginggorit doho’ om kada’ oku no padalaai do momorolosi! ²² Oi Kinorohingan, boro-boros no, om simbaron ku i’. Ko’ pologoson oku do momoros om simbaron nu nogindo! ²³ Songkuro toi o kogumuon do kasalaan om dusa do nowonsoi ku? Roito’ ngai’ nopo i dusa ku! ²⁴ Nokuro tu’ mongilag ko om minsodu’ ko doho’? Nokuro tu’ sorohon oku diya’ do miagal do pisangod nu? ²⁵ Iyoho’ nopo om miagal po di roun do rumatu’ dot otilib do ribut, om rolosion oku po daa diya’! Iyoho’ nopodti om miagal po di rahami di nolonot om nokoring. Om a’ no daa apatut do gusaon oku diya’. ²⁶ Pinologos nu o koposi-posion ku dot oinggorit, tu’ sinulian ngai’ nu i kasalaan ku do mantad dit omulok oku po. ²⁷ Kinagasan nu do rantai’d basi’ o gakod ku; om antangan ngai’ nu o kalaang-laango’ ku, sorisidon nu do mogontong o nulokon ku. ²⁸ Om nomumuk oku no do miagal di kayu do noromuk, om miagal di kain do naakan do tanai tu’ noromuk no.

¹ Mantad poddi pogkosusuon i’ o tulun om oluhoi mantad no om aiso’ o pokukurayan, om oruhai iyau do poimpasi, om oinggorit po. ² Sumuni o tulun do miagal di bunga om olubok do miagal di tusak do bunga, om tumagak do miagal di sangai. ³ Oi Kinorohingan, siontong ko po tuu doho’, om poongoyon oku po tuu diya’ do hilo’d pomisaraan nu? ⁴ Milo toi do momonsoi dit olidang o tulun do kidusa? ⁵ Natantu’ mantad nu no o tumur do tulun — ondung piro noo tulan dau do poimpasi. Natantu’ nu no o koompokon do tumur dau, om a’ nori milo’d simbanan. ⁶ Tongkiadai nopo iyau, pologoson nopo iyau do mundorong, om kopuriman i’ iyau do kosimbayanan do koposi-posion dau do gisom dot opongo i wonsoyon dau. ⁷ Guas nopo di tinagad om haro po o soro-sorohon. Tu’ tolidan po om momuraan. ⁸ Mulong piya do nokoring no o gamut dau do hiri’d saalom do tana’, om i tuod nga’ noromuk no, ⁹ nga’ oluyungan nopod waig om sumuni i’ kawagu, do miagal di tanom-tanom di wagu po katanom tu’ tolidan i’. ¹⁰ Nga’ soira nopo dot apatai o tulun, om iri no o koompokon dau; apatai nopo iyau, om hinonggo no ma iyau’ddi? ¹¹ Iyo po di bawang do tumingkod do lumuyung, om iyo di torobong dot arasakan, ¹² o tulun di napatai, tu’ a’ no iyau kotungag kawagu. A’ no i tulun diri tumungag kawagu do solinaid pod haro o tawan; a’ no iyau mosik. ¹³ Pologoso’ oku nod lumisok dot id suang do pomogunan di tulun di napatai. Intirungai oku no do gisom dot otingkod o kototogod nu. Tontuon no o maso do kopomuhandaman nu doho’. ¹⁴ Ondung apatai o tulun om milo po tuu iyau do masi kawagu? Nga’ iyoho’ nopo om monikid tadau oku nopod magandad dot opupusan i maso ku’d oinggorit. ¹⁵ Om momolohou ko nondo doho’ om sumimbar oku indo diya’, om olisiu ko indo doho’ i tulun di winonsoi nu. ¹⁶ Om piantangan nu nondo o laang ku, om a’ nu nondo sorohon i dusa ku. ¹⁷ Om ompunan nu nondo om poinsoduwon nu i dusa ku, om tonuson nu nogindo o koinsanai do kasalaan di nongowonsoi ku di gulu po. ¹⁸ Om otuhan ngai’ nondo o nuluhon, om pampang dit agayo nga’ koundaliu nondo do mantad hiri’d kinoiyonon mantad di pampang. ¹⁹ Om akanon nondo di waig dot opuhod i watu, om atanggayan di rasam dit asapou i tana’, om iyo ko noddi do mamaraag di soro-sorohon do tulun. ²⁰ Iya’ no o mangala’ do tulun do gisom dot alaid. Om paraaton nu o rabas dau om suhuon nu iyau’d mogidu’ do magandad do kapatayon dau. ²¹ Tangaanak nopondo dau om sumiliu do tulun dit abantug, nga’ a’ no iyau koilo’ddi, om a’ nogi’ iyau koilo ondung soira’ dot intingayamon iyolo’, tu’ aiso’ i’ o pinopoilo. ²² Dau nod tinan ot opurimanan dau do kitoruol, om i katangkabaan do ginawo dau o koinggorit dau.

¹ - ² A’ i’ koontok ino boros nu, oi Ayub. ³ Tulun nopo dit oilo om a’ i’ sumimbar dot a’ koontok o ponimbar. Om a’ popotopot do tinan dau dot i boros dit aiso’ o suang o maan do popotopot. ⁴ Ondung tonudon ino korohian nu, om aiso’ no o songulun piya dot oronok do Kinorohingan, om aiso’ o sumambayang dot id Kinorohingan. ⁵ I koboro-boroso’ nu o popointalang do kisala’ ko, nga’ umbalan nu i’ iri do monompon di koiloo’ nu’d mimboros. ⁶ A’ no minog do pasalaon tiya’, tu’ iri no i boros nu o papasala’ diya’. ⁷ Andasan nu nopo daa om iya’ no o tulun dit id gulu kopio pogkosusuo’? Hino ko no tuu do tontok di winonsoi ngai’d Kinorohingan i nuluhon? ⁸ Nokorongou ko toi ondung nunu i nosorou mantad do Kinorohingan do wonsoyon dau? Iya’ no toi o nakaanu’d toilaan do tulun? ⁹ Koinsanai di noilaan nu, nga’ nongoilaan ngai’ i’ dahai. ¹⁰ Kinoonuan nopo dahai’d toilaan om mantad id tulun dit opurak no o tobuk, i tulun di hino no dit a’ po nosusu i tapa’ nu! ¹¹ Nokuro tu’ adaan nu i ponginsasamod do Kinorohingan diya’? Nokopomoros no iyahai dot id suang do ngaran dau do boros dit osonong om koinsasamod. ¹² Nga’ lumasu’ nogi’ o ginawo nu dot otogod dahai, om atarom nopo o mato nu’d montong dahai. ¹³ Tumogod ko nogid Kinorohingan, om sumurilog ko dau. ¹⁴ Milo i’ tuu o tulun do lumidang kopio? Milo tuu o tulun do kumotopot kopio dot id Kinorohingan? ¹⁵ Dot iri piya i moloikat nga’ a’ id Kinorohingan ponongkuyaanan, om a’ i’ iyolo’ olidang dot id pagantangan do Kinorohingan. ¹⁶ Om okon-okon pondo i tulun dot araat, tu’ monolon do karaaton do miagal po di monginum do waig, araat no kopio o tulun, om aiso’ o guna’. ¹⁷ Pokinongou nodti poboroson ku, oi Ayub, ¹⁸ i pinotuduk do tulun dit oilo dot id doho’. Iri nopo ponudukan diri nga’ mantad id taki-aki diyolo’, om pinotuduk dot id sinakagon dau. ¹⁹ Tontok nopoddi nga’ aiso’ po o bansa’d suwai do hiti’d pomogunan diyolo’; aiso’ i’ o mamalid diyolo’ do mantad id Kinorohingan. ²⁰ Tulun nopo dit araat, it orohian do monginggorit, om oinggorit nod gisom do tikapatai dau. ²¹ Gumarang nondo o boros di korolosi dot id tolingo dau, om saapon iyau di manakau do tontok dit osimbayan iyau dot osorou dau. ²² A’ no kopio iyau milo do mogidu’ do mantad id totuong, tu’ poingkodong no gayang do maan do pamatai dau. ²³ Om tombolog di mangangakan do rata’ nga’ poingandad nod kapatayon dau, do mongoi pangakan di rata’ dau. Noilaan no dau dot otuong ot id dabantalan dau. ²⁴ Miagal pod raja’ dit osiou o kosusaan do posodia’ nod mongoi panangod dau. ²⁵ Iyo nodti o kootuson do tulun di sumaap do Kinorohingan, i katama’ do sumaap dit Osundu Kopio. ²⁶ - ²⁷ Oondos iyau, om sumaap iyau’d Kinorohingan, om pobilidon dau o kolid dau, tu’ mada’ i’ iyau dot aala’. ²⁸ Miniyon iyau dot id bandar di nangaraag, om hiri’d walai di pinogiiduan do sanganu, i bandar di natantu’ mantad nod raagon. ²⁹ Kakayaan nopod tulun diri om tumagak i’, koinsanai dilo dapu’ dau om a’ i’ potilombus, ³⁰ om a’ iyau koidu’ do mantad id totuong. Om miagal po iyau’d kayu di nosorob o raan, om araag nondo iyau dot oobusan do pinuhobo’d Kinorohingan. ³¹ Ondung otumbayaan iyau dit araat, om araat no ot aanu dau. ³² A’ po orikot o maso dau, om apatai no iyau; do miagal di raan di noriou tu’ a’ no tumomou kawagu. ³³ Miagal pondo iyau di guas dot anggur di marab o tua’, om miagal di guas do saitun di lumopuk o tua’. ³⁴ Tulun nopo dot aiso’ o Kinorohingan om aiso’ no o sinakagon, om tapui nondo o monorob di walai di winonsoi dau do tusin di pinonisip o pinomonsoi. ³⁵ Iyolo’ no i tulun di minsorou dit araat om i minomonsoi dot angaraat. Om ginawo nopo diyolo’ om poimponu’ kasai’ nopod poninipu’.

¹ - ² Asaru’ oku no do korongou’d boros do miagal dino, ino nopo ponginsasamod nu om koinggorit nogi’ doho’. ³ Soira’ dokoyu do tingkadan i koboro-boroso’ dokoyu dit aiso’ o suang? Nunu o mominsuhu’ dokoyu do sumimbar? ⁴ Ondung iyokoyu daa o miagal doho’, om iyoho’ o miagal dokoyu, om iyoho’ nga’ milo id momoros do miagal diri. Milo oku i’ do popimbingog do tulu ku, om olitan ku iyokoyu do boros do monogod. ⁵ Milo oku i’ daa’ndo do mimboros do popogirot do ginawo dokoyu, om a’ tumingkod-tingkod do monginsasamod dokoyu. ⁶ Mimboros oku, nga’ aiso’ i’ o guna’, om a’ mungkomi nga’ a’ i’ kolingos diti toruol ku. ⁷ Pinoluhoi nu o tinan ku, oi Kinorohingan, om pinologos nu o sompiiyon ku do nangapatai ngai’. ⁸ Suminaap ko doho’ om tinangkap oku diya’. Mogioput-oput poo o tulang ku do gama’ do kogohuyo’ ku. Om iri no o kabara-barasan do tulun dot ogumu’ do nokowonsoi oku’d dusa. ⁹ Rutao’ nopod Kinorohingan o tinan ku tu’ otogod i’ iyau doho’; atarom po o mato dau do poingontong doho’ tu’ araatan no kopio iyau. ¹⁰ Hingi-hingion oku pod tulun; om urugunai oku nopo diyolo’, om pinintompilingan diyolo’ o rabas ku. ¹¹ Pinatahak oku’d Kinorohingan dot id tulun dit angaraat. ¹² Di nopo di gulu po om osimbayan oku i’ do poimpasi, nga’ minonigowo o Kinorohingan do suminaap doho’, om pinataam oku dau. Siniliu dau o tinan ku do maan do pinsingilaan do mamana’. ¹³ Om pimpanaon oku poddi dau, gisom do noulayak o tinaii’ ku. Om a’ i’ iyau osianan doho’. ¹⁴ Suminaap iyau doho’ do miagal po di soudor, om piguli-gulian oku po dau do pokoruol. ¹⁵ Manampakai oku’d karung do tanda’ do tumongob, om poirikau oku do hiti’d pupuk tu’ naala’ oku no. ¹⁶ Mihad-ihad oku do gisom do nakaragang o rabas ku, do nouru’d mingihad. Om nokobongkung o mato ku om nokoitom o posorili’ do mato ku. ¹⁷ Nga’ a’ oku i’ ruminongit, om iso-iso’ o ginawo ku’d sumambayang dot id Kinorohingan. ¹⁸ Oi tana’, kada’ no lisoko’ i karaaton di winonsoi dot id doho’. Om apatai oku piya nga’ kada’ tingkodo’ o giak ku do mokianu dit otulid! ¹⁹ Oilaan ku i’ dot iri nopo mogobi’ doho’ om hino i’ do hilo’d surga, iyau no o popoilo dot aiso’ i’ o dusa ku. ²⁰ Hingi-hingion oku om irak-irakan oku di kongoombolutan ku. Om mihad-ihad oku pod rumikot dot id Kinorohingan do mokitulung dau. ²¹ Maha’ i’ daa om obian oku’d Kinorohingan dot id toguang dau. Do miagal di tulun dit orohian do mogobi’ di tambalut dau. ²² Oruhai no dot aayi’ o tumur ku, om a’ no alaid om mamanau oku no om a’ oku no koguli’ kawagu.

¹ Oniba’ no o tumur ku, om oruhai oku nod a’ kopuhobo, lobong po o poingandad doho’. ² Hingi-hingion oku pod tulun; om opurimanan ku o pongumang-umang do tulun doho’. ³ Otopot oku i’, oi Kinorohingan. Ponongkuyaai nod boros ku! Isai po o milo’d sumokodung do boros ku. ⁴ Iya’ no o pinopotuong do pomusorou diyolo’ gisom dot a’ iyolo’ kosuhut; kada’ no iyolo’ pologoso’ do kaala’ doho’ do baino’!. ⁵ Boros ka do tinukadan di dong gulu-gulu; om haro nopo o songulun do minonipu’ di tambalut dau do sianu’d tusin o kinoponipuan, om iri no moti’ndo i tangaanak di tulun diri ot ogulian diri. ⁶ Baino’ nopoddi om iyoho’ no o posuribanan di tinukadan diri, gowoi poddi om rumikot nopo o tulun dot id doho’ om momodula’ nod rabas ku. ⁷ Oruhai nod obolou o mato ku dot adalaan do tumongob, om tinan ku nga’ nakagahui no tomod. ⁸ Om nongkotigowo ngai’ i tulun dit ongotorodok; om monondos ngai’ nopo i tulun dit aiso’ o sala’ dot aiso’ o kinorohingan ku. ⁹ Iri nopo i tulun di momusorou dot osonong om aiso’ o sala’ diyolo’ om otumbayaan no kopio do korohian do Kinorohingan o kowoyo-woyoon diyolo’. ¹⁰ Nga’ ondung rumikot ngai’ iyolo’ dot id doho’, om aiso’ i’ o songulun piya dot oilaan ku dot oilo. ¹¹ Nakatalib no o maso ku, om koinsanai di soro-sorohon ku nga’ a’ noddi nabayaan, natagak no i soro-sorohon ku. ¹² Nga’ iri nopo i kongoombolutan ku om moro-boros dot, ’’Totuong nga’ anawau i’, om osomok no o tanawau,’’ ka. Nga’ iyoho’ nopo om maso po dot id dotuong. ¹³ Soro-sorohon ku nopo om aiso’ no suwai ko’ i pomogunan do tulun di napatai, om hilo’ oku nod poingodop dot id suang do totuong. ¹⁴ Poboroson ku nondo dot iri no lobong o tapa’ ku, om i giuk di mangakan do tinan ku o tina’ ku, om koobpinayan ku’d tongoondu’. ¹⁵ Nunu poo o soro-sorohon ku? Isai po o manahak doho’d kosimbayanan? ¹⁶ Aiso’ noddi o soro-sorohon ku do koongoi oku do hilo’d pomogunan do tulun do napatai.

¹ - ² Ayub, soira’ ko’ndo do tumingkod do mimboros? Ula’ po nod boros, om iyahai no o moro-boros diya’. ³ Nokuro tu’ sorohon nu do miagal iyahai’d sapi’ kabasug? ⁴ Ino i’ kototogod nu o kosubu dino toruol do tinan nu. Tongkiadan no tuu’d tulun iti pomogunan dot otogod ko? Powolihon no tuu’d Kinorohingan ilo nuluhon dot iya’ noo o kopowolihan? ⁵ Lampung nopod tulun dot araat om atantu’ nod pisokon, om tapui dau nga’ a’ nondo obuhang. ⁶ Lampung do hiri’d kiim dau nga’ kumoro’ nondo o tulinau; om a’ nondo obuhang. ⁷ Pamalaang-laang nopo dau di gulu po, om apanggor i’, nga’ mikarasadu nondo do baino’, om naratu’ iyau do nobungou di pinsarahan dau do wonsoyon dau. ⁸ Nokosuang iyau do lawa’ om nakagasan o gakod dau. ⁹ Nakagasan do lawa’ o tatad dau, om a’ddi iyau koidu’. ¹⁰ Nakataan ngai’ no o lawa’ do songillisok-lisok do hilo’d tana’, om songingunda’ no o gama-gama’ do hilo’d tindalanon dau. ¹¹ Posorili’ no di tulun dot araat o korolosi do magandad dau; om manud-tanud dau iri do pointikid-tikid do lumaang iyau. ¹² Iyau nopo di gulu po om kaya’ kopio, nga’ baino’ noddi om louson iyau; poingkakat no o kosusaan do magandad do hiri’d toning dau. ¹³ Notongkop poo o tinan dau do toruol dit aiso’ o pomolingos, om iri no o nakapasa’ di longon om gakod dau. ¹⁴ Ginayat iyau do pinoposoliwan do mantad hiri’d kiim di niyonon dau dit osimbayan, om potoguango’ noddi iyau do kapatayon. ¹⁵ Baino’ nopoddi om isai nopo nga’ koino-ino nod miyon do hilo’d kiim dau. Do notiasan di tana’ di kiapui do pananus di toruol dau. ¹⁶ Sompiiyon nopo dau om miagal po di gamut di napatai; om sinakagon no dau om miagal di raan di noriou. ¹⁷ Natanus no i kobontugo’ dau do hirid walai om id kinoiyonon dit id soliwan do bandar dau; om aiso’ no o tongosongulun piya do kohondom dau. ¹⁸ Uyungon nondo iyau do mantad hiri’d tana’ di tulun di poimpasi, om poundolihon do mantad id tanawau om pokoyoon dot id dotuong. ¹⁹ Iyau nopo om aiso’ no o tangaanak om aiso’ o sinakagon; om tobpinai dau nga’ aiso’ no. ²⁰ Mantad pod hilo’d koulayon om korikot do hilo’d kotonobon o tulun do nangkapagag om songgogor-gogor poddi do moddosi do nokorongou di kinowoyo-woyoo’ do kinootuson do koposi-posion dau. ²¹ Iti no kootuson do tulun dit angaraat, om it a’ momusou’d Kinorohingan.

¹ - ² Nokuro kou tu’ a’ tumingkod do mimboros do ponginggorit doho’? ³ Asaru’ kou nod pokoruol do ginawo ku, om a’ kopuriman dot ointingayaman do monginggorit doho’. ⁴ Ondung nokowonsoi oku daa’d sala’, om a’ i’ korugi’ dokoyu iri. ⁵ Andasan nopo daa dokoyu om osonong kou iyokoyu ko’ mantad doho’, om momusorou kou dot iti nopo koinggoritan ku nga’ popointalang do kisala’ oku. ⁶ Ilaai no dokoyu do Kinorohingan i’ o monginggorit doho’; pinosulung oku dau di lawa’ dau. ⁷ Suminaap oku di kororongit dau, nga’ aiso’ i’ o mokinongou doho’, ’’Hinonggo no it otulid,’’ kangku, nga’ aiso’ i’ o nokorongou. ⁸ Nantaban do Kinorohingan o ralan ku, om a’ oku’ddi milo’d tumalib, tu’ pinotuong dau i wayaan ku. ⁹ Nahau ngai’ dau i kakayaan ku, om rinaag dau o ngaran ku dit osonong. ¹⁰ Sorilion oku nopo dau’d momobog. Nutus dau i pagandasan ku, om pinologos oku’d noriou gisom do napatai. ¹¹ Tuminogod no kopio o Kinorohingan doho’; siniliu oku po dau do pisangod dau. ¹² Pinaatod dau o soudor dau do mongoi panangod doho’; mingukad iyolo’ do liang do pinonurungku’ di kiim ku. ¹³ Pinoinsodu’ do Kinorohingan dot id doho’ i koobpinayan ku; om miagal oku pod sompogunan dot id tulun di kotutun doho’. ¹⁴ Om sompiiyon om tambalut ku nga’ mininsodu’ ngai’. ¹⁵ I tulun di sumosongkoduwo dot id walai ku nga’ nokolihu no doho’, om i susuhuon ku di tongoondu’ nga’ a’ noddi monongkotutun doho’; paabalon oku nopo diyolo’ do tulun dit a’ diyolo’ otutunan. ¹⁶ Soira’ do momolohou oku di susuhuon ku, om a’ no iyau sumimbar, mulong piya dot insasamadan ku i’ iyau. ¹⁷ I sawo ku nga’ soluhan do kosingud do nutong do pinuhobo ku, om i koobpinayan ku’d kusai nga’ a’ no kasaap do minsomok doho’. ¹⁸ Hingi-hingion oku po di tangaanak do hilo’d ralan, om mingkakat oku nopo nga’ irak-irakan oku nogi’ diyolo’. ¹⁹ I tambalut kopio ku nga’ sosomuan pod kokito doho’; om iri piya tambalut ku di kosianan kopio ku nga’ tumolikud nopo doho’ do minsodu’ doho’. ²⁰ Santaid-taid po o kulit do tinan ku; oruhai oku no dot apatai. ²¹ Oi kongoombolutan ku, kosianai kou no doho’! Tu’ binobog oku’d Kinorohingan. ²² Nokuro tu’ monginggorit kou do tinan ku do miagal di ponginggorit do Kinorohingan doho’? A’ po dokoyu ula’ i ponginggorit dokoyu doho’? ²³ Osonong no daa kopio ondung haro o popotulis diti boros ku, om osorou kasai’ i’. ²⁴ Ko’ pokikiron po daa iti pinoboros ku dot id watu, om potulison nogi’ om a’ i’ atagak do gisom dot alaid. ²⁵ Nga’ oilaan ku i’ do haro o hilo’d surga do mogobi’ doho’, om rumikot indo iyau do mongoi ponguhup doho’. ²⁶ Mulong piya do notongkop do gandas o kulit ku, nga’ solinaid ku nopo do haro o tinan om kokito oku i’ do Kinorohingan. ²⁷ Mato kopio ku indo o kokito dau, om okon nondo iyau ko’ sompogunan. Nokoluhoi o ginawo ku tu’ minomoros kou do poingkaa, ²⁸ ’’Poingkukuro tuu o ralan toko’ do monginggorit dau?’’ ka. Minogihum kou do paantakan do sumaap doho’. ²⁹ Nga’ baino’ nopo om poddosi kou no dilo gayang! Tu’ otogod o Kinorohingan, om momohukum iyau di tulun do kidusa, om kongoilo kou i’ do haro o Kinorohingan di momutus do koinsanai’d kowoyo-woyoon do tulun.

¹ - ² Iya’ no kopio o pinopotogod doho’, oi Ayub. A’ ku noddi opusus o ginawo ku do sisimbar. ³ Iri nopo i pinoboros nu’ddi om monguntotogod no daa kopio, nga’ koilo oku i’ do sumimbar diri. ⁴ A’ nu toi noilaan dot i nopo di gulu po, di pinoiyon i’ o tulun do hiti’d pomogunan, ⁵ om aiso’ i’ o songulun piya dit araat dot alaid dot osimbayan. Om okirapan noo o kataadan di tulun di sumaap. ⁶ Mulong piya dot a’ no milo’d boroson o kogoyoo’ dau, gisom do kosunggu do hilo’d tawan o tulu dau. ⁷ Nga’ otilib indo iyau do miagal di pupuk, om atagak tomod nopo iyau do hiti’d pomogunan do gisom dot alaid. Om iri ngai’ nopondo i tulun dit ongoubas dau om songuhot-uhot po dot, ’’Hinonggo o pinakayaan dau?’’ ka. ⁸ Tumagak nondo iyau do miagal do nipi, om miagal do soroyoon di dongotuong. ⁹ A’ nondo iyau okito, om a’ iyau hino do hiri’d tiyonon dau. ¹⁰ Om pogulion nondo di tangaanak dau’d tongokusai i pinanakau dau do mantad id tulun do mosikin. ¹¹ Mulong piya dot omulok po daa iyau om okoris po, nga’ a’ no alaid om osiliu no iyau do pupuk. ¹² - ¹³ Oomis nopo i karaaton dot opurimanan dau, gisom dot orubatan iyau do monolon diri. Om untomon nopo dau do hiri’d kabang dau tu’ momurimon kopio iyau ondung okuro-kuro iri. ¹⁴ Nga’ kosuang nopondo do tian dau i taakanon diri, om mumang nondo poit do miagal do kopoito’ di kawanit tu’ kapatai. ¹⁵ Iri nopo dapu’ di pinanakau om nongotolon no dau, nga’ ilobon indo dau, tu’ posoliwanon id Kinorohingan do mantad id tian dau. ¹⁶ Om nunu nopo i notolon di tulun dit angaraat nga’ miagal pod kawanit; tu’ iri no o mamatai dau, do miagal di tindukon do tulanut di kapatai. ¹⁷ A’ no iyau kaanu do tumau do saitun dit a’ aayi-ayi’ om a’ kaanu di susu om paha’ di poluyungon. ¹⁸ A’ no milo dot a’ dau patahakon o nunu nopo di naanu dau, om a’ nondo iyau koumbal do momurimon di kakayaan dau. ¹⁹ Tu’ adalaan kopio o pinonginggorit dau’d tulun do mosikin, om minonolod iyau do walai dit okon ko’ iyau o minomonsoi. ²⁰ Iyau nopo om tulun di tamaha’ kopio, om a’ insan dot oumbagalan! ²¹ Tontok nopod makan iyau om oiyon ngai’ nopo dau do mangakan, nga’ a’ no iyau alaid dot osimbayan. ²² Mulong piya dot osimbayan daa iyau, nga’ rumikot indo i koinggoritan om katangaban dot id dau. ²³ Tontok dit agangau kopio iyau do mogihum do taakanon di korohian dau, om otogod kopio nondo o Kinorohingan om hukuman dau iyau. ²⁴ Soira’ nopo do mumbal daa iyau do mongilag di gayang do basi’, nga’ apana’ indo iyau di pana’ do tambaga’. ²⁵ Nosuhat po o tinan dau do napana’ di pana’, kolopuson nopo dot id tian dau i lahis di pana’ dit akalab, om poimponu’ po do kopoddosian o ginawo dau. ²⁶ Koinsanai di dapu’ di nongotimung dau nga’ nangaraag ngai’ no, i tapui dit okon ko’ tulun o pinaparakit o monorob do tinan dau om koinsanai’d sompiiyon dau. ²⁷ Ilo tawan o popoimbulai do kasalaan di tulun diri, om iti tana’ o sumaap dau. ²⁸ Tonuson ngai’ nopondo o kakayaan dau, tu’ adalaan no kopio o kototogod do Kinorohingan. ²⁹ Iyo noddi o kootuson do tulun dit araat, Kinorohingan i’ o pinapatantu’ mantad do kootuson diyolo’.

¹ - ² Pokinongou nodti poboroson ku; tu’ iri poo o pokionuon ku di koinsasamod doho’. ³ Posowoliono’ oku no iyoho’ do moro-boros, om soira’ pondo do kongoboros ku o poboroson ku om poingkuro nopondo o pongumang-umang nu nga’ poboroson nopo. ⁴ Ponokisongkiwal ku nopo om okon i’ ko’ tulun; otopot i’ kopio do haro o paantakan ku dot a’ ku opusus o ginawo ku. ⁵ Ontong pogi’ doho’. A’ ko po nanu’ kapagag do kokito’dti tinan ku, gisom dot a’ ko no daa’ndo koungkomi? ⁶ Soira’ nopo dot osorou ku i nosiliu dot id doho’, om gagaran oku po dot aranaban. ⁷ Nokuro tu’ pologoson do Kinorohingan dot otogui o tulun dit araat, om pologoson do muhang-ruhang o dapu’ diyolo’? ⁸ Om otogui iyolo’ do gisom do kokito po iyolo’ do manangaki diyolo’, om kokito iyolo’ do gisom dot angkagayo i manangaki diyolo’. ⁹ Osimbayan tomod o sompiiyon diyolo’, tu’ a’ i’ iyolo’ insan koumbal do kopuriman do koinggoritan di porikoton do Kinorohingan. ¹⁰ Om tayam-tayam diyolo’ nga’ osonong nopod gumumu’, om ongosonong dot osusu. ¹¹ Tangaanak diyolo’ nga’ santangkus-tangkus nopo dot atataadan, do miagal do tangaanak do dumba’. ¹² Om songigol-igol om sonsinding-sinding iyolo’ dot ompoton do rebana, om kecapi om suling. ¹³ Ongosimbayan nopo iyolo’ do poimpasi, om a’ i’ oinggorit do tintod do matai. ¹⁴ Inda’ ka do nokoboros no iyolo’ dot id Kinorohingan do poingkaa, ’’Tongkiadai nopo iyahai! Tu’ a’ no iyahai orohian do koilo’d korohian nu dot id suang do koposi-posion dahai,’’ ka. ¹⁵ Tu’ poingkaa ot osorou diyolo’, ’’Aiso’ i’ o guna’ do mogobi-obi’d Kinorohingan, om aiso’ o kootuk-otukon do sumambayang dot id Kinorohingan. ¹⁶ Okon toi ko’ mantad id kokorisan toko’ o kinoonu-onuan toko’dti,’’ ka diyolo’. Nga’ iri nopo pomusarahan diyolo’ do miagal diri om a’ oku no kopio kosokodung. ¹⁷ Nokoumbal i’ toi do pinisok i lampung do tulun dit angaraat, om nokoumbal i’ toi o songulun dot id pogialatan diyolo’ dot oontok do kosusaan? Nokoumbal toi o Kinorohingan dot otogod diyolo’, gisom do hinukuman dau iyolo’? ¹⁸ Om nokoumbal toi o Kinorohingan do pinoposiliu do tulun diri, do miagal di sakot di nokoring om pupuk di tilibon do tongus? ¹⁹ Om moro-boros kou do poingkaa, ’’Hukuman do Kinorohingan o tanak dot i dusa di tapa’ dau o kopomohukuman,’’ ka. Nga’ osonong nogi’ dot i tulun di nokowonsoi’d dusa o hukuman do Kinorohingan, om kopuriman no iyau dot i dusa dau o kopomohukuman do Kinorohingan dau. ²⁰ Pologoson nopo o tulun di kidusa do mamabo do hukuman di dusa dau, pologoson nopo iyolo’d kopuriman do kototogod do Kinorohingan, it Asawat Kopio. ²¹ Ondung aayi’ o maso’d tulun do hiti’d pomogunan, om milo po tuu iyau do momusorou di tangaanak dau do mongilo ondung osonong-sonong ko’ oinggorit iyolo’? ²² Milo i’ tuu o tulun do monuduk do Kinorohingan, tu’ Kinorohingan i’ o momutus di songingiyon do hilo’d surga? ²³ - ²⁴ Haro i’ o tulun dot osonong kasai’ o tinan do gisom do tikapatai dau; tu’ tinan nopo diyolo’ nga’ ongokoris, om a’ i’ iyolo’ oinggorit do tintod do matai. ²⁵ Nga’ haro i’ o tulun dot apatai do poimponu’d koinggoritan, om a’ i’ insan koumbal dot osimbayan. ²⁶ Nga’ oiyo i’ iyolo’ dot angapatai om lobongon ngai’, om akanon ngai’ iyolo’d tonggiluang om giuk. ²⁷ Oilaan ngai’ ku i’ ino sorohon dokoyu om koinsanai di karaato’ do pomusarahan dokoyu. ²⁸ Monguhot kou do poingkaa, ’’Hinonggo no ma o walai di tulun dit abantug diri, i tulun di miningwonsoi dot angaraat?’’ ka. ²⁹ A’ kou po toi insan koumbal do monokiboro-boros di tulun di mononompogunan? A’ kou toi otumbayaan di pinoboros diyolo’? ³⁰ Boros ka diyolo’, ’’Tontok di momohukum o Kinorohingan, om iri nogi’ i tulun dot araat ot apasi,’’ ka. ³¹ Aiso’ i’ o monondos di tulun dot araat, om aiso’ o sumuli’ di karaaton dau. ³² Soira’ nopo do pokoyoon iyau do hiri’d kalabangan, om posuangon no iyau do hiri’d lobong, om tamangan kopio i lobong dau. ³³ Rinibuan i’ o tulun do rumikot do hiri’d pamalabangan dau, om iri piya tana’ nga’ ongorulan do malit di tinan dau. ³⁴ Iri nopo ponginsasamod nu doho’ om maan i’ toomod. Om koinsanai di pinosimbar nu nga’ tudut ngai’ i’!

¹ - ² Id pogialatan nopod tulun, om aiso’ i’ o tongosongulun piya do kiguna’ dot id Kinorohingan. Mulong piya do kitoilaan kopio o tulun, nga’ id dau nod tinan do kiguna’ iyau. ³ Kountung i’ tuu do Kinorohingan i wowonsoyon nu dot otopot, om kouhup i’ tuu dau i kosonongo’ nu? ⁴ Okon i’ ko’ i koronoko’ nu’d Kinorohingan o kapanandasan dau diya’ do nakasala’ ko. ⁵ Suwai ko’ i kogumuo’ do dusa nu, om koinsanai di karaaton di nongowonsoi nu. ⁶ Ondung a’ di tobpinai nu olopusan i tutang dau, om ngoyon nu no ahawo’ o koinsanai di pakayan dau. ⁷ Om i tulun di nohuyan nga’ a’ nu i’ pinoinum, om a’ nu onuan do takanon i tulun di louson. ⁸ Pinakai nu o pangkat om kuasa’ nu do minonolod do koinsanai diti pomogunan. ⁹ Okon nopo ko’ mada’ ko’d monguhup di tongoondu’ do nopuadan, nga’ monginggorit ko po di tangaanak dit aiso’ o molohing. ¹⁰ Om iri no o kokuwaan do notutukan ko pod luang do korotuon, om sigog nopo om kopuriman ko do moddosi. ¹¹ Maid-laid nga’ muong-tuong do gisom dot a’ ko noddi kokito, om olondod ko do luyud dot agayo. ¹² Okon toi ko’ poundorong o Kinorohingan do hilo’d tawan dit id sawat kopio, om poilluung iyau dilo rombituon di hilo’d sawat? ¹³ Nga’ poingkaa indo o boros nu do monguhot, ’’Nunu o koilo-ilo do Kinorohingan? Tu’ iyau nopo om hilo’d notirung dilo haun dot akapal, om a’ milo do momutus dati’?’’ ka. ¹⁴ Ondos nu daa om ilo’ nopo haun dot akapal om kotirung do mato dau, do tontok di mimpanau iyau do hilo’d piolitan do tawan om tana’. ¹⁵ Potilombuson nu po o korohian nu do sumusui do ralan do tulun dot araat? ¹⁶ Mulong piya dot a’ po norikot o maso do kapatayan diyolo’, nga’ rinulun i’ iyolo’ do lumpadang. ¹⁷ Om iyolo’ no i magada’ do Kinorohingan, om momusorou dot a’ milo o Kinorohingan do momonsoi do nunu nopo dot id diyolo’. ¹⁸ Om inda’ ka do Kinorohingan i’ o pinapakaya’ diyolo’! A’ oku no kopio kosuhut do pomusarahan do tulun dit angaraat. ¹⁹ Iri nopo tulun dot ongosonong, om kongoirak i’ dot atataadan do kokito di tulun dit angaraat do hukuman. ²⁰ Koinsanai do dapu’ di tulun dit angaraat om tonuson indo, om sorobon do tapui o nunu nopo i nongoolu-olu’. ²¹ Baino’ nodti oi Ayub, om mulud no dot id Kinorohingan, om kada’ nondo pomusorou do miagal iyau’d pisangod, ondung miagal diri o wonsoyon nu, om atantu’ no do barakatan ko dau. ²² Romito’ no o ponudukan di potudukon dau dot id diya’, poopio’ no i boros dau dot id suang do ginawo nu. ²³ Guli’ no dot id Kinorohingan do mikuwo’d kumosiriba’ o ginawo, om tingkadai ngai’ no i karaaton di winonsoi dot id suang do walai nu. ²⁴ Taamo’ no i tamas nu, om potiason no do hiri’d nanad di bawang do narasakan i tamas nu dit osompipi’. ²⁵ Pologoso’ no it Osundu Kopio do sumiliu do tamas nu, om iyau o sumiliu do pirok nu dit osonong kopio. ²⁶ Om monongkuyaan ko indo kasai’ do Kinorohingan, om oilaan nu nondo dot iyau no o tadon do kataadan nu. ²⁷ Om soira’ nopod sumambayang ko, om simbaron ko i’ dau, om osulung nu indo i batos nu di pinabatos nu dot id dau. ²⁸ Om koundar ngai’ indo o nunu nopo o wonsoyon nu, om tumitiu indo o tulinau do hiri’d ralan nu. ²⁹ Poinsiribaon i’ do Kinorohingan i tulun di minggayo-gayo, nga’ posion i’ do Kinorohingan i tulun dit osiriba’ o ginawo. ³⁰ Tulungon ko i’ do Kinorohingan ondung aiso’ no o sala’ nu, om ondung momonsoi ko di korohian dau.

¹ - ² A’ oku no milo dot a’ sumaap om a’ moguhang do Kinorohingan, a’ oku no milo do tumingkod do mingodoi. ³ Ondung koilo oku daa do tiyonon dau, om koongoi oku i’ daa kosolowot dau. ⁴ Oiyo-iyon ku nopo daa do monusui iti kowoyo-woyoon ku dot id toguang do Kinorohingan, om poboroson ku i kosongkiwalan ku do pongobi’ ku doho’. ⁵ Orohian oku daa do koilo ondung poingkuro o poboroson dau doho’, om poingkukuro ot isimbar dau. ⁶ Orohian tuu o Kinorohingan do mangayi-ayi’ do kinoris dau do sumaap doho’? Amu’, iyau nopo om atantu’ no do mokinongou i’ do poboroson ku. ⁷ Iyoho’ nopo om otulid i’, om koilo oku i’ do monokisimbar-simbar do Kinorohingan, om poboroson oku indo dau dot a’ nakasala’, om a’ no osimbanan iri. ⁸ - ⁹ Nokopogihum oku nod Kinorohingan do hilo’d koulayon om hilo’d kotonobon, om hilo’d salatan, om hilo’d utara, nga’ a’ i’ hino o Kinorohingan do hilo’, om a’ oku i’ nokosolowot dau. ¹⁰ Nga’ oilaan id Kinorohingan ot ongoyon ku; ondung umbalan oku dau do miagal do tamas om oilaan i’ dau dot olidang oku. ¹¹ Otorodok oku i’ do mumboyo’ dau, om a’ oku i’ koumbal do sumala’ do sumusui do ralan di pinotuduk dau. ¹² Tonudon kasai’ ku i’ i tisuhu’ do Kinorohingan doho’, tumanud oku i’ do korohian dau, om okon i’ ko’ i korohian ku o tonudon ku. ¹³ Kinorohingan nopo om a’ i’ insan do sumimban, om aiso’ i’ o kasaap dau. Wonsoyon nopo dau i korohian dau. ¹⁴ Wonsoyon i’ kopio dau i nosorou mantad dau do wonsoyon dot id doho’; om ogumu’ po o suwai ko’ iri dot osorou dau do wonsoyon dau. ¹⁵ Om gagaran oku poddi do moddosi dau. ¹⁶ - ¹⁷ It Osundu Kopio o minananus di kosioho’ ku. Kinorohingan o poddosi ku, om okon i’ ko’ i totuong o monompurolosi doho’, mulong piya dot id suang oku’d totuong, om nobolou oku di totuong.

¹ Nokuro tu’ a’ do Kinorohingan tontuon kopio o tadau do kopomutusan, om obutusan i’ do tumanud dit otulid i tulun di kotutun dau? ² Pinawaliu do tulun i watu do piwolitan do tana’ do popoinggayo do tana’ dau; om minanakau iyolo’ do dumba’ om pinosugku’ddi diyolo’ iri di diyolo’d baanan. ³ Nongoi diyolo’ tanggayai i kaladai di tangaanak dit aiso’ o molohing, om hirion diyolo’d diyolo’ i sapi’ di tondu’ do nopuadan do gisom dot aayi’ di tondu’ do mamalapus i tutang dau. ⁴ Antaban diyolo’ i tulun di mosikin do manganu dit apatut diyolo’d aanu, om mononsog iyolo’ di tulun dit aiso’ o konunu-nunuan do mogidu’ om mongoi lisok. ⁵ Gowoi poddi, om sampanau-panau po i tulun do mosikin do hilo’d tana’ do kowotuan dit otuu do mogihum do kaakan-akanan do miagal po di kaladai do lalang dit aiso’ no o pogihuman do paakan di tanak diyolo’. ⁶ Morobu-robuat poddi iyolo’ dot id tumo’d tulun do suwai; om mongungupu’ do tua’ dot anggur di tulun dot angaraat. ⁷ Aiso’ no pakayan diyolo’ om aiso’ o kumut diyolo’ do tontok do modop iyolo’ do dongotuong. ⁸ Nga’ noruyut po iyolo’d rasam dot asapou do hiri’d nuluhon, om mongoi po iyolo’ susut do hiri’d pampang do mintulungung. ⁹ Ngoyon di tulun dot angaraat siliho’d turipon i tangaanak dit aiso’ o molohing om onuon diyolo’ i tangaanak di tulun do mosikin di nokopongutang dot id diyolo’. ¹⁰ Om i tulun do mosikin nga’ sansagan nopo diyolo’d sumoliwan do mulong piya dot aiso’ o pakayan, om mongoi nopo iyolo’ pongomot do gandum do louson piya iyolo’. ¹¹ Mamaga’ i’ iyolo’ do tua’ do saitun do maan do tumau, om mamaga’ do tua’ dot anggur do maan dot inumon, nga’ iyolo’ nopo om tuuhan i’. ¹² Hilo’ nopod bandar om korongou kou do tihad do tulun dit oinggorit, om tulun do nongosuhat nga’ millohou do mokiubat, nga’ a’ id Kinorohingan pokinongohon o sambayang diyolo’. ¹³ Haro i’ o tulun dot a’ orohian do tanawau, a’ iyolo’ kosuhut ondung nunu i tanawau’ddi, om a’ iyolo’ sumusui di ralan di tanawau. ¹⁴ Tontok di dongkosuabon po om tumungag no om sumoliwan i gampamatai do mongoi pamatai di tulun do mosikin, om di dongotuong nga’ mongoi po iyau panakau. ¹⁵ Tulun nopo do gampahu’ om magandad nopo do kotuangan, om kuluputan dau o rabas dau om a’ no iyau otutunan do tulun do suwai. ¹⁶ Tontok nopod dongotuong om mongoi iyau panakau om mamaraag iyau’d walai, nga’ dangadau nopondo om mongoi iyau lisok tu’ mada’ i’ dot oulinahan di tanawau. ¹⁷ Ooris iyau do tulinau do dangadau, nga’ dongotuong nopo om aiso’ i’ o poddosi dau. ¹⁸ Tulun nopo dot araat om orulun i’ do luyud, om tana’ di naanu dau nga’ papalan id Kinorohingan, om a’ nondo iyau morobuat do hiri’d kabun dot anggur dau. ¹⁹ Poingkuro nopo i salju do lumanak dot alanak di kolosuo’ di dongmagadau, om alanak dot osidangan do tadau, om iyo no moti’ddi o tulun do kidusa do tumagak do hiti’d pomogunan tu’ kumaa nondo do hilo’d pomogunan do tulun do napatai. ²⁰ Aiso’ nondo o tongosongulun piya do momusorou dau, dot iri piya i tina’ dau, tu’ tonggiluang po o mangakan do tinan dau, om miagal po iyau di kayu di nahaba’. ²¹ Nongosiliu pogi’ o miagal diri nga’ minonginggorit iyau do tondu’ di nopuadan, om a’ osianan do tongoondu’ dit aiso’ o tanak. ²² Kinorohingan nondo tu’ kisinundu o mamatai do tulun dit ongosiou, om haro nopondo o wonsoyon do Kinorohingan, om aiso’ nondo o pokukurayan di tulun di kidusa. ²³ Nga’ pologoson po doti’ do Kinorohingan i tulun diri dot osimbayan do poimpasi, nga’ toinuon i’ ma kasai’ do Kinorohingan i tulun diri. ²⁴ Tulun nopo dot araat om oruhai do haro o kosimbayanan, om tumagak nondo iyau do gisom dot alaid, om okoring iyau do miagal di sakot dit aiso’ o guna’, om miagal do rawo do parai di kotuon. ²⁵ Milo i’ tuu do tulun do poboroson dot a’ otopot iti? Milo i’ tuu o tulun do pointalang kopio do tudut iti pinoboros ku?

¹ - ² Kinorohingan nopo om osundu i’ kopio, om apatut no dot oronok ngai’ dau o tulun. Iyau no o poposimbayan do pomorintaan dau do hilo’d surga. ³ Isai o kointob do moloikat di nosiliu do susuhuon dau? Haro po o kinoiyonon dot a’ oulinahan di tulinau do Kinorohingan? ⁴ Haro i’ toi o tulun do milo do tumopot om lumidang dot id pagantangan do Kinorohingan? ⁵ Id pagantangan nopod Kinorohingan om ilo’ piya tulan nga’ a’ i’ atalang o tulinau, om ilo rombituon nga’ a’ i’ anawau o tulinau. ⁶ Iyo nopoddi om okuro-kuro nogi’ o tulun tu’ iyo nod tonggiluang om kamang-kamang? Songkuro no o gatang do tulun dot id pagantangan do Kinorohingan?

¹ - ² Ondos nu daa om oilo kopio ko do monguhup doho’ — i tulun dot oluhoi om it aiso’ ot agaagaasan! ³ Ondos nu daa om osonong i ponudukan om i nosihat di pinoboros nu dot id doho’, i tulun do basug. ⁴ Isai po o tosorou nu do mokinongou do koinsanai di poboroson nu? Isai o mominsuhu’ diya’ do mimboros do miagal dino? ⁵ Gagaran ngai’ po i rusod di tulun di nangapatai do hilo’d waig dit id saalom diti tana’. ⁶ Om i pomogunan di nangapatai nga’ songingukab i’ dot id toguang do Kinorohingan, om aiso’ no o kotirung-tirung diri dot id pagantangan do Kinorohingan. ⁷ Pinawalad do Kinorohingan ilo tawan do ponong id utara, om pinogiis do Kinorohingan o pomogunan do hilo’d mawo-dawo. ⁸ Kinorohingan i’ o monuang dilo haun do waig do gisom do mabai-labai, nga’ a’ i’ okinis ilo haun om a’ oloput. ⁹ Lisokon dau ilo tulan do hilo’d tirung dilo haun. ¹⁰ Nurugan dau o hilo’d waig do rahat, do potongkiad do tanawau do mantad id totuong. ¹¹ Tagadon nopo dau i torigi dilo tawan, om gumogor ngai’ nopori om gumuyu’ dot opopoddosian. ¹² Iri no i sinundu dau o nakaala’ dilo rahat, om iri koiloo’ dau o nakapatai di Rahab. ¹³ Pinuhobo i’ dau o papanawau dilo tawan, om longon dau o minamatai di naga’ dit oruhai no daa do kopoggidu’. ¹⁴ Nga’ iri ngai’ nopoddi om tinatak-tatak nogi’ di sinundu dau, iri nopo om pinokonos nogi’ dot id tolingo toko’. Isai ma o koilo kopio do kogoyoo’d Kinorohingan?

¹ - ² Sumumpa’ oku no dot id Kinorohingan, it Osundu Kopio, i Kinorohingan do poimpasi, it a’ manahak dit otulid dot id doho’, om i popotongob kopio do ginawo ku, ³ do daamot ku po dot onuan do Kinorohingan do pinuhobo, om damot po do kiginawo o tinan ku, ⁴ dot a’ no momoros dot araat o kabang ku, om iti dila’ ku nga’ a’ no mongudut. ⁵ A’ oku i’ momoros dot ongotopot kou; poboroson ku i’ dot a’ oku nakasala’ do gisom do tikapatai ku. ⁶ A’ oku i’ tumingkod do momoros dot otopot oku; tu’ osonong i’ ot opurimanan do ginawo ku. ⁷ Maha’ daa om hukuman ngai’ i pisangod ku do miagal di tulun di poposiwot, om obobog i tulun dot araatan doho’ do miagal di tulun dit araat. ⁸ Haro po toi o pagandasan do tulun dit aiso’ o Kinorohingan, do tontok dot onuon kawagu’d Kinorohingan o ginawo diyolo’? ⁹ Orikot nopondo o maso do kosusaan, om olisiu po tuu o Kinorohingan do korongou di tihad diyolo’? ¹⁰ Apatut daa do norohian iyolo’ di kataadan do tahakon do Kinorohingan, om kuminaparu’ daa iyolo’ do suminambayang dot id Kinorohingan. ¹¹ Pologoso’ oku bo do monuduk dokoyu do kogoyoo’ do sinundu’d Kinorohingan, om popoilo di nosorou mantad do Kinorohingan do wonsoyon dau, iyau it Osundu Kopio. ¹² Nga’ a’ piya, tu’ nokokito ngai’ i’ o mato dokoyu; om nokuro tu’ mimboros kou po dit aiso’ o komoyon? ¹³ Poingkaa no o kowoyo-woyoo’ do Kinorohingan, it Osundu Kopio do momohukum ngai’ di tulun dit orongit. ¹⁴ Ogumu’ i’ doti’ daa o tanak diyolo’d kusai, nga’ angapatai ngai’ nopondo dot id pisangadan; om a’ nopondo insan dot osukupan do takanon i tangaanak diyolo’. ¹⁵ Om iri no i poimpasi om angapatai do toruol, om iri piya i sawo diyolo’ nga’ a’ no mogihad do tontok dot apatai i sawo diyolo’. ¹⁶ Iri nopo i tulun dot araat om kipirok doti’ dot ogumu’, om a’ no ointob-intob, om pakayan nga’ ogumu’ po doti’ ko’ i koubasan do tulun do mamakai. ¹⁷ Nga’ iri indo i tulun dit osonong o kapanampakai di pakayan diri, om i tulun dit otulid o ginawo o kaanu di pirok dau. ¹⁸ Walai nopod tulun dot araat om iyo no di walai’d korut, ko’ iyo di kinuhub-kuhub do turipon di madtatamong do tumo. ¹⁹ Insan noo iyolo’d modop do miagal do tulun do kaya’, om diri-diri noo, tu’ oposik pondo iyolo’ om natagak ngai’ no o kakayaan diyolo’. ²⁰ Iri no i koinggoritan om monigowo nopo do rumikot do miagal di lumpadang; om otilib iyolo’ di tongus do dongotuong; ²¹ i tongus do mantad id koulayon o monilib diyolo’ do mantad id walai diyolo’. ²² Ontokon nopo kopio iyolo’ do monilib, om a’ no insianan, do mogihum piya daa iyolo’ dot intirungon. ²³ Okohus po i tongus do koontok diyolo’ do tontok di manangkus iyolo’, monompurolosi diyolo’ i tongus diri do mikuwo’d kinoris di karaag.

¹ Haro o piro-piro nukadan dot id pongukadan do pirok; om haro o tiyonon do ponompipian do tamas. ² Ukadon do tulun o basi’ do mantad id tana’ om lanakon o tambaga’ di mantad id watu. ³ Nohombo nod tulun i kinoiyonon dit otuong no kopio, nosorisid no diyolo’ do mogintong o hiri’d tana’ dit id saalom kopio. Hiri nod dotuong o pongukadan diyolo’ do mogisuayan o watu. ⁴ Id sodu’ do mantad id kinoiyonon do tulun, it a’ insan koulakai do tulun, o pongukadan do tulun do luang dot aralom. Om hilo’ no iyolo’d kumaraja’ dot aiso’ o torongou-rongou, do tumaid pod tali do hiri’d luang. ⁵ Taakanon nopo om sumuni i’ do mantad hiri’d tana, nga’ id saalom i’ do tana’ddi dot ukadon ngai’ om mumukon o koinsanai do nunu nopo. ⁶ Iri nopo watu di hiri’d tana’ om kilugu’ do watu di kitulinau dot otomou, om iri no pupuk om kirolot do tamas. ⁷ Aiso’ i’ o sikokondiu do kokito di ralan do kumaa do hiri’d luang di nukadan, om aiso’ o kondiu do koumbal do mintulud do kasahau di luang. ⁸ Aiso’ i’ o singa ko’ nunu nopo nintorusan dit orongit do nokoumbal do sumusui di ralan dit oingou do kumaa’d hiri. ⁹ Nukad do tulun i watu dit ongokodou no kopio, nukad diyolo’ o nuluhon do gisom do hiri’d guas di nuluhon. ¹⁰ Tontok di minsangkap iyolo’ do maan do wawayaan do hiri’d pogialatan di watu, om kokito no iyolo’ do watu dit agayo o gatang. ¹¹ Miningukad iyolo’ do gisom do nokorikot do hiri’d tudan do bawang om kongokito noddi diyolo’ i songillisok. ¹² Nga’ hinonggo o pogihuman do toilaan? Hinonggo toko’ do minsingilo om kosuhut toko’ i’? ¹³ Toilaan nopo om okon i’ ko’ id pogialatan do tulun o kokitanan; aiso’ i’ o tongosongulun piya do koilo do mamagatang kopio do toilaan. ¹⁴ Ilo nanad do rahat om i rahat dot agayo nga’ minomoros i’ do toilaan nopo om okon i’ ko’ hilo’. ¹⁵ Toilaan nopo om a’ i’ milo do bolion do pirok ko’ tamas. ¹⁶ Tamas piya di nosompipi’ om watu dit agayo gatang nga’ a’ i’ koiyo do gatang do toilaan. ¹⁷ Gatang nopo do toilaan om agayo i’ ko’ gatang do tamas, om agayo ko’ gatang do kakanan do tamas om kasa’ dit olumis kopio. ¹⁸ Gatang nopo do toilaan om agayo po ko’ gatang do karang dit aragang, om watu dit agayo o gatang dit oliting o kopurako’, om mutiara’. ¹⁹ Iri piya watu dit agayo gatang dit osilou o kokitanan dit aiso’ o rolot, om i tamas do nosompipi’, nga’ a’ i’ koiyo-iyo do gatang do toilaan. ²⁰ Hinonggo o tadon do toilaan? Hinonggo o pokitudukan toko’ om kosuhut toko’ i’? ²¹ Aiso’ i’ o tiso’ dit ongkipinuhobo do kokito do toilaan, iri piya tombolog di sontulud-tulud nga’ a’ i’ kokito. ²² Kapatayon piya om karaagon nga’ minomoros i’ do susui-susui noo o diyolo’d norongou. ²³ Kinorohingan noo o koilo do kinoiyonon do toilaan, iyau noo o koilo’d ralan do mongoi’d hilo’. ²⁴ Tu’ Kinorohingan nopo om kokito i’ do hilo’d tisan do tana’, om kokito do koinsanai di hiri’d siriba’ do tawan. ²⁵ Tontok di nonuan do Kinorohingan do sinundu i ribut om di tinantu’ dau o wolit di waig do rahat; ²⁶ Tontok di tinantu’ do Kinorohingan o pasandatan dau do rasam, om i ralan do susuyon di kodumaat om tinggoron, ²⁷ Om tontok no do maso’ddi do nokito dau o toilaan om noumbalan dau ondung songkuro no o gatang di toilaan, om kohubayaai noddi iyau’ddi. ²⁸ Boros kad Kinorohingan dot id tulun, ’’Ralan nopo do kaanu’d toilaan, om mositi’ no do rumonok do Kinorohingan. Orohian nopod kosuhut, om mositi’ no do tumongkiad do mantad id karaaton,’’ ka.

¹ Om boro-boros po kawagu i Ayub. ² Koguli’ po daa kawagu i koiyon-iyono’ do koposi-posion ku do miagal di gompion oku pod Kinorohingan! ³ Tontok nopoddi om moyo-woyo’ kasai’ i’ doho’ o Kinorohingan, om onuan oku dau’d tulinau do tontok di tumalib oku dot otuong. ⁴ Tontok noddi dot osimbayan oku, tu’ piombolutan dahai do Kinorohingan o mongintirung do walai ku. ⁵ Tontok nopoddi om mitanud-tanud po doho’ o Kinorohingan, it Osundu Kopio, om tangaanak ku nga’ posorili’ ngai’ po doho’. ⁶ I sapi’ om i kambing ku nga’ ogumu’ po susu dot aanu ku, om i guas do saitun ku nga’ ogumu’ i’ o tumau do tonomon piya dot id tana’ di kowotuan. ⁷ Om soira’ nopod haro pogibara-barasan di kongomolohingan do bandar, om di mongoi oku amung diyolo’, ⁸ om mingisan nopo i tangaanakwagu do tontok di kokito iyolo’ doho’, om i komolohing-lohingan nga’ mingkakat ngai’ nopo do sumuwau doho’. ⁹ Om tumingkod ngai’ nopo i boyoon di tulun do mogiboro-boros; ¹⁰ om iri piya tulun dit angasawat o pangkat nga’ tumingkod nopo do mimboros. ¹¹ Om pointikid-tikid di tulun di kokito ko’ i korongou di winonsoi ku dit ongosonong, om mamarayou ngai’ nopo om ongoimayaan di winonsoi ku. ¹² Om soira’ nopo do mokitulung i tulun do mosikin; om uhupan ku i’ iyolo’, om i tangaanak dit aiso’ o molohing, nga’ tulungon ku i’. ¹³ Iri piya tulun dit osusa’ kopio nga’ rumayou i’ doho’, om uhupan ngai’ ku i’ i tongoondu’ do nongopuadan do gisom do kaanu iyolo’ do kosimbayanan. ¹⁴ Otulid kasai’ i’ o wonsoyon ku om a’ oku manampaping. ¹⁵ Iyoho’ no o panakamato di tulun do bolou, om panakagakod di tulun do kakung. ¹⁶ Iyoho’ no o panakatapa’ di tulun do mosikin, om mogobi’ di tulun do bansa’d suwai do tontok dot id suang iyolo’d kosusaan. ¹⁷ Nidu’ ku i kuasa’ do tulun dit ongorongit, om pinasi ku i tulun di tinangkap diyolo’. ¹⁸ Osorou ku nopo daa nga’ anaru o surupu ku, om osonong o kapatai-patayo’ ku dot id suang do walai ku. ¹⁹ Miagal oku po di guas do kayu dit orombung o ponuni-suni, it opiwoigan o gamut, om it opiyopos do bolobou o raan. ²⁰ Oinsanan nopo o tulun do rumayou kasai’ doho’, om a’ oku insan dot oluhoi. ²¹ Om soira’ nopo do monosihat oku nga’ tumingkod ngai’ nopo o tulun do mimboros tu’ mokinongou no kopio iyolo’ di poboroson ku. ²² Om kopongo oku nopondo do mimboros, om aiso’ no o boros do poruhangon diyolo’ di boros ku; iri nopo boros ku om sumarabak nopo do miagal di tinuru’ do rasam. ²³ Ongotood ngai’ nopo o tulun do rumamit do boros ku, miagal po di tulun do mongungumo do rumamit do rasam do tontok di maso do mogiompongusak o kayu. ²⁴ Irakon ku i’ iyolo’ do tontok dit aiso’ no o pokukurayan diyolo’; om iri po kosimbayanan dot id rabas ku o koodsuur diyolo’. ²⁵ Iyoho’ no o woyoon, om i mongilo kopio ondung nunu ot apatut do wonsoyon. Woyoon ku iyolo’ do miagal do raja’ di momoyo’ di soudor dau, om iyoho’ nogi’ o monginsasamod diyolo’ do tontok do tumongob iyolo’.

¹ Nga’ baino’ noddi om tulun piya dit ongomulok po ko’ iyoho’ nga’ monguntotori’ i’ doho’. Di nopo di gulu po om aiso’ no kopio o guna’ di tapa’ diyolo’ dot okito ku, gisom dot a’ ku i’ potumboyoon do moyo’ di tasu ku do mongoi padtamong di dumba’. ² Iyolo’ nopo om aiso’ no o guna’ dot id doho’ tu’ adalaan no kopio iyolo’ koluhoi do kumaraja’ do nunu nopo i ponuhuan ku. ³ Mosikin no kopio iyolo’ om louson, gowoi poddi om manapa’ po iyolo’d gamut di nokoring do hilo’d tana’ di kowotuan dit otuong om oingou. ⁴ Mongoi po iyolo’ pingutus do sakot do hilo’d tana’ do kowotuan, om kanon ngai’ nopo diyolo’ i roun om i gamut di sakot. ⁵ Gumara’ ngai’ nopo o tulun do popoggidu’ diyolo’, do miagal pod mamagarang iyolo’d tulun di manakau. ⁶ A’ noddi milo dot a’ iyolo’ miyon dot id luang do watu, id suang do luang di pinoluang dot id kangkab do pampang. ⁷ Iyo po iyolo’d nintorusan do millahung do hilo’d talun, om id kobulungkutan o titimungon diyolo’. ⁸ Iyolo’ no o sinompuruan do tulun dit aiso’ kopio o guna’! Iyolo’ no i nuyung do sumoliwan do mantad id pomogunan diyolo’. ⁹ Nga’ baino’ noddi om ruminikot iyolo’ do mongoi pongirak-irak doho’, om osiliu oku poddi do koirakan diyolo’. ¹⁰ Araa-raat oku noddi kopio om sosomu’ dot osorou diyolo’, om kopurimanan nopo diyolo’ do tinan diyolo’ nga’ osonong no kopio, om pindulaan poddi diyolo’ o rabas ku. ¹¹ Tuminotos tomod diri iyolo’ do mintogod do sumaap doho’, tu’ pinologos oku id Kinorohingan dot oluhoi om aiso’ o pokukurayan. ¹² Iri nopo tulun dot angaraat diri nga’ rikot nopo do hiri’d dotoguangan ku do mongoi pongumang doho’; gisom do manangkus oku po dot opopoddosian. Noihum mantad no diyolo’ o ralan do mangala’ doho’. ¹³ Om antaban diyolo’ o ralan ku do mogidu’ om apatai oku i’. Iso’ pod tulun nga’ aiso’ i’ o mogodu diyolo’ do tontok di mongoi iyolo’ pongumang; ¹⁴ iyo po iyolo’d luyud do rumudsu’ di tolig do pogintirungan ku. Ogumu’ tomod iyolo’ santanud do mongoi pongonsit doho’; ¹⁵ poimponu’ oku poddi do kopoddosian. Iyo pod kohus do ribut i ngaran ku’d osonong do tuminagak; iyo pod haun di tumalib i kakayaan ku do tuminanus. ¹⁶ Baino’ nopoddi om oruhai oku nod apatai; tu’ a’ i’ nokoinggaan-gaan iti koinggoritan ku. ¹⁷ Tontok nopod dongotuong nga’ oruol ngai’ nopo o tulang ku; om a’ nopo otingkod-tingkod o toruol ku. ¹⁸ Ginayat do Kinorohingan o hiri’d liou di rasuk ku, gisom do nakagasan oku di pakayan ku. ¹⁹ Om pataamo’ oku noddi dau do hiri’d burutak; om miagal oku poddi do rinomos! ²⁰ Lumohou oku diya’, oi Kinorohingan, nga’ a’ ko i’ sumimbar; om soira’ nopod sumambayang oku nga’ a’ ko i’ mokinongou. ²¹ Orongit ko noddi kopio dot id doho’; om oiyo-iyon nu no kopio o kinoris nu do monginggorit doho’. ²² Pologoson nu nopo i tongus do monilib doho’; om pindohuluyan oku poddi do tongus dit opuhod tomod. ²³ Oilaan ku no do pokoyoon oku diya’ dot id kapatayon, i kotimungon do koinsanai’d tulun. ²⁴ Nokuro tu’ saapon nu o tulun di nobungou, it aiso’ no o milo do pokukurayan, suwai ko’ mokiinsian po daa? ²⁵ A’ oku toi minihad do tuminonggoi di tulun do tumongob? Om a’ oku toi nosianan di tulun di haro o kokurangan? ²⁶ Morou-sorou oku no daa do haro o kosimbayanan om tanawau, nga’ korikatai oku nogi’ diti kosusaan om totuong. ²⁷ Noponu’ oku pod katangaban om toruo-ruol; muhang-ruhang nopo o koinggoritan ku do monikid tadau. ²⁸ Mimpanau oku po dot id dotuong, tu’ aiso’ no o tulinau do tadau; mingkakat oku nopo dot id pogialatan do tulun dot ogumu’ do mokitulung. ²⁹ Boros ku nga’ poimponu’ pod katangaban o karangahan, miagal pod lahung do toni om tuni di tombolog dot unta. ³⁰ Oitom poo o kulit ku, om iyo pod sorobon o tinan ku dot ouru’d sogiton. ³¹ Di nopo di gulu po om tuunion i’ do rumamai ot opirongou ku, nga’ baino’ nopoddi om iri po i garang om tihad do tulun di mogihad ot orongou ku.

¹ Nakabatos oku no do mikuwo’d sumpa’, dot a’ rumohian do kokito do sumandak. ² Nunu toi o wonsoyon do Kinorohingan, it Osundu Kopio, dot id dati’? Poingkukuro iyau do sumuli’ di wonsoyon do tulun? ³ Porikatan dau do kagangahan om karaagon i tulun di mingwonsoi do karaaton. ⁴ Oilaan ngai’ i’ do Kinorohingan o wonsoyon ku, okito ngai’ i’ dau o kalaang-laango’ ku. ⁵ Sumumpa’ oku no dot a’ oku i’ insan pomonsoi dot araat, om a’ oku insan koumbal do monipu’ do tulun do suwai. ⁶ Pologoson nopo o Kinorohingan do monimbang doho’ dot id timbangan di koontok, om oilaan indod Kinorohingan dot aiso’ o sala’ ku. ⁷ Ondung nokotongkiad oku di ralan dot otopot, ko’ nabayayat o ginawo ku dit araat, om ondung nososomu’ do dusa o longon ku, ⁸ om pologoson nopo dot araag ngai’ i tanom-tanom ku, om pologoson o tulun do suwai do mangakan di tua’ do tanom-tanom ku. ⁹ Ondung nokoumbal oku do rumohian di sawo do songkoduwo ku, om luminisok oku do magandad do hiri’d soliwan di wawayaan do walai dau, ¹⁰ om posimboyonon nopo i sawo ku do mogonsok do taakanon do kusai’d suwai, om modop dot id toodopon do kusai’d kusai. ¹¹ Ondung nokowonsoi oku’d dusa do miagal diri, om apatut i’ do hukuman oku. ¹² Dusa nopo do miagal diri om iyo pod tapui do naraka do monorob do koinsanai di doho’d songonuon. ¹³ Ondung haro o songulun dot id pogialatan di susuhuon ku do haro o poboroson dot id doho’, tu’ haro o poguhangan dau doho’ om pokinongohon ku i’ iyau om wonsoyon ku it otulid dot id dau. ¹⁴ Ondung a’ ku wonsoyon o miagal diri, om poingkukuro oku daa’ndo do tumoguang do Kinorohingan? Nunu daa’ndo o posimbaron ku do rumikot o Kinorohingan do mongoi pomutus doho’? ¹⁵ Kinorohingan i’ o minomonsoi doho’, om iyau nogi’ o minomonsoi di susuhuon ku. ¹⁶ A’ oku i’ insan dot a’ koponulung di tulun do mosikin, om a’ oku insan do popologos tomod di tongoondu’ do nopuadan dot aiso’ o pokukurayan, ¹⁷ ko’ popologos tomod po di tangaanak dot aiso’ o molohing do pomolouson do maso ku iyoho’ do haro taakanon. ¹⁸ Ginompi’ ku i’ iyolo’ do mantad dit okoro’ po iyolo’; om tinulung ku iyolo’ do solinaid ku do poimpasi. ¹⁹ Soira’ nopo do kosolowot oku’d tulun dit aiso’ o konunu-nunuan, om adalaan no kopio komosikino’ gisom dot a’ i’ koboli do pakayan, ²⁰ om onuan ku i’ iyolo’ do rasuk di winonsoi do mantad id hulu do dumba’ ku. Om royohon oku nondo diyolo’ do mikuwo’d aayi-ayi’ o ginawo diyolo’. ²¹ Ondung nokoumbal oku do magakal di tanak dot aiso’ o molohing, tu’ oilaan ku no dot iyoho’ o kamanang dot id pibisaraan, ²² om pologoson nopo do tipuon o longon ku, om giiyon nopo do mantad id lihawa ku. ²³ Nga’ moddosi oku i’ do hukuman do Kinorohingan, om a’ oku i’ katama’ do momonsoi do miagal diri. ²⁴ A’ oku i’ insan pogondos do kakayaan, ²⁵ ko’ mokirayou-rayou po di dapu’ ku. ²⁶ A’ oku i’ insan tuku’ dilo tadau dot anawau piya daa o tinitiu dilo tadau, om a’ oku insan tuku’ dot id tulan dot olumis piya daa ilo tulan. ²⁷ A’ oku i’ insan kabayayat do momusou’ddi, ko’ minonungub pod palad ku do maan do pomusou’ddi. ²⁸ Dusa nopo do miagal diri om apatut no do kapatayon o pomohukum; tu’ iyo nopoddi om mogolim nod Kinorohingan, it Osundu Kopio. ²⁹ A’ oku i’ insan kotood do tontok dit oinggorit o pisangod ku, ko’ ooropod po do tontok do koumbal iyolo’ dot oontok do kosusaan. ³⁰ A’ oku i’ insan kowonsoi’d dusa dot i sumambayang do mokipatai diyolo’ o kowonsoi-wonsoi ku’d dusa. ³¹ Koinsanai di tulun do mororobuat do hilo’d doho’ nga’ koilo i’ do papasalakoi kasai’ oku’d tulun dit a’ ku piya otutunan. ³² Tulun dit id tanga’d tindalanon diyolo’ nga’ pinasalakoi ku i’ do hiri’d walai ku, om a’ oku i’ insan do popologos tomod diyolo’ do modop do hiri’d soliwan. ³³ Tulun nopod suwai om mumbal daa do popolisok do dusa, nga’ iyoho’ nopo om a’ oku i’ insan do popolisok do dusa ku. ³⁴ A’ oku i’ insan poddosi do pimboroson do tulun; om a’ oku insan dot a’ minungkomi ko’ minonginduwalai po dot ooris di pongindaraat diyolo’ doho’. ³⁵ Aiso’ no tuu kopio o mokinongou diti poboroson ku? Sumumpa’ oku no do koinsanai diti boros ku nga’ ongotopot i’. Simbaron oku po daa do Kinorohingan, it Osundu Kopio. Ondung nongotulis ngai’ i ponondos doho’ di pisangod ku gisom dot okito ku iri, ³⁶ om oondos oku i’ do pokulabai’ddi dot id lihawa ku om tupion ku do maan do ponokotupi’ di don raja’. ³⁷ Posunudon ngai’ ku indod Kinorohingan i nongowonsoi ku, om humangog oku dot id toguang dau do mikuwo’d otood o ginawo ku. ³⁸ Ondung sinolod ku i tana’ di pinongumaan ku baino’, om nanu ku nori do mantad id sanganu kopio di tana’, ³⁹ om ondung naakan ku i tua’ di suminuni do hiri’d tana’ddi, om pinologos ku nogi’ i mororobuat di minananom diri do louson, ⁴⁰ om pologoson nopo o sakot om rugi do sumuni do hilo’d tumo, do sumowoli di gandum om barli. Iti no o pinongolimpupus di Ayub di boros dau.

¹ Oilaan no kopio di Ayub dot aiso’ o sala’ dau, gisom dot a’ noddi suminimbar dau i tolu o tambalut dau. ² Nga’ haro o songulun do poingkakat do hiri, dot i Ilihu o ngaran, dot a’ no kopusus do ginawo dau dot atatagadan, tu’ pokotopot i’ i Ayub do tinan dau om papasala’ nogi’ do Kinorohingan. I Ilihu nopo om tanak di Barakil, om sinakagon di Bus, i mantad id pinuruan do sompiiyon di Ram. ³ Om otogod nogi’ iyau di tolu o tambalut di Ayub, tu’ a’ i’ iyolo’ nokosimbar di Ayub, gowoi poddi om iyo pod Kinorohingan o nakasala’. ⁴ I Ilihu no ot omulok kopio do hiri, om andado’ poddi dau do gisom do notingkod ngai’ iyolo’ do mimboros. ⁵ Nga’ soira’ di nokito dau dot a’ kosimbar di Ayub i tolu o tulun diri, om kotogod no iyau, ⁶ om timpuun no iyau do minoro-boros do poingkaa, Iyoho’ nopo om omulok po, om iyokoyu no om molohing no, om iri no kopoddosian ku do popoboros dot id dokoyu di doho’ dot osorou. ⁷ Osorou ku nopo daa om iyokoyu no ot osorupai do moro-boros, om iri daa it id dotuo ot oluda’ do momiduwo do toilaan. ⁸ Nga’ iri i Rusod do Kinorohingan, it Osundu Kopio o manahak do tulun do toilaan. ⁹ Okon i’ ko’ i kotuoho’ do tumur o poposiliu’d tulun, do tulun di kitoilaan, ko’ monguhup po diyolo’ do mongilo dit ongotopot. ¹⁰ Iyo nopoddi, om pokinongou kou no doho’, pologoso’ oku no do poposunud diti doho’ dot osorou. ¹¹ Pokinongou oku nopo do tontok di minoro-boros kou, om andad oku nopo di daamot dokoyu do minogihum do boros di haro o komoyon. ¹² Pinokinongou ku i’ kopio, om korongou ku noddi do naala’ kou; a’ kou i’ minilo do pinopointalang do kasalaan di boros di Ayub. ¹³ Poingkukuro kou do momoros do nakaanu kou’d toilaan? Kinorohingan no o sumimbar di Ayub, tu’ naala’ kou i’. ¹⁴ Iyokoyu daa o binarasan di Ayub, om okon i’ ko’ iyoho’, nga’ doho’ nopod ponimbar om a’ i’ iyo di dokoyu do pinonimbar. ¹⁵ A’ i’ iyolo’ milo’d suminimbar, oi Ayub, tu’ aiso’ no o milo diyolo’d poboroson. ¹⁶ Mandad oku po tuu daa do nokotingkod iyolo’d moro-boros? Poingkakat tomod po iyolo’d hilo’ tu’ aiso’ no o milo diyolo’d poboroson. ¹⁷ Amu’, poboroson ku i’ iti doho’ do ponimbar, om sunudan tiya’ di doho’ dot osorou. ¹⁸ A’ oku no kaandad-andad do sipoboros, a’ ku no milo do pususon iti poboroson ku. ¹⁹ Ondung a’ oku iyoho’ koboro-boros, om oloput oku no, do miagal di kantung do kulit di kisuang do waig dot anggur di wagu po. ²⁰ Moro-boros oku no kopio, om osimbayan i’ o ginawo ku. ²¹ A’ oku i’ momogibang-gibang dot isai nopo dot id suang diti pisimbar-simbaran, om a’ oku nogi’ mamarayou dot isai-isai. ²² Om a’ oku nogi’ koilo do mamarayou-rayou, tu’ ondung mamarayou-rayou oku, om pologoson nopo o Kinorohingan do momohukum doho’ dot oruhai.

¹ Pokinongohon no kopio o koinsanai diti poboroson ku do dinondo, oi Ayub. ² Posodia’ oku no do popoboros dit id suang mantad do pomusarahan ku. ³ Otulid i’ o ginawo ku do moro-boros, om iri it ongotopot o poboroson ku. ⁴ Rusod id Kinorohingan o minomonsoi doho’, om i minanahak doho’ do pinuhobo. ⁵ Simbaro’ nopo iti poboroson ku, do kosimbar ko no. Uludo’ mantad nopo o posimbaron nu. ⁶ Miagal to nopo dot okito’d Kinorohingan, oi Ayub, tu’ winonsoi to i’ do mantad id tana’. ⁷ Om a’ i’ minog do moddosi doho’; tu’ a’ oku i’ mangala’ diya’. ⁸ Poingkaa o norongou ku do pinoboros nu, ⁹ ’’Iyoho’ nopo om aiso’ i’ o sala’. Om a’ oku nokowonsoi do nunu nopo it araat. Aiso’ i’ o sala’ ku om aiso’ o dusa ku. ¹⁰ Nga’ Kinorohingan nogi’ o minogihum do pounayan do sumaap doho’, om iyoon oku poddi dau do pisangod dau. ¹¹ Kinagasan dau do rantai o gakod ku; om pitoinuan dau o nunu nopo o wonsoyon ku,’’ ka nu. ¹² Nga’ kasala’ i’ i boros nu, oi Ayub. Tu’ Kinorohingan nopo om osundu i’ ko’ mantad do tulun. ¹³ Nokuro tu’ monondos ko’d Kinorohingan, dot a’ mamadul di boros do tulun do moguhang? ¹⁴ Mulong piya do mogisuayan nopo o ralan do Kinorohingan do moro-boros, nga’ aiso’ i’ o tongoiso’ piya’d tulun do mokinongou kopio di poboroson dau. ¹⁵ Tontok nopo dot oolong do modop o tulun do dongotuong, om moro-boros i’ o Kinorohingan dot id suang do nipi om pinointalang. ¹⁶ Porongohon i’ iyolo’d Kinorohingan do boros dau, om moddosi iyolo’ di boros dau do popoinsan. ¹⁷ Moro-boros pogi’ o Kinorohingan nga’ poningkod dau diyolo’ do momonsoi’d dusa, om a’ i’ iyolo’ minggayo-gayo. ¹⁸ A’ i’ dau iyolo’ pologoson dot araag, poiduwon i’ dau iyolo’ do mantad id kapatayon. ¹⁹ Pomurologo nopod Kinorohingan do tulun om toruol, om oruol indo o topurimanan do tinan diyolo’. ²⁰ Tulun nopo di kitoruol om a’ no siakan do taakanon, iri piya i taakanon dit angawasiu, nga’ siilob i’ iyau do kokito. ²¹ Gumahui tomod nondo o tinan dau; om atalang ngai’ o tulang dau. ²² Om oruhai no iyau’d mongoi do hilo’d pomogunan do tulun do napatai. ²³ Haro i’ doti’ ot ongoiso’ di rinibuan do moloikat do Kinorohingan, do mongoi ponulung dau, i moloikat di popohondom do tulun do buruon diyolo’. ²⁴ Moro-boros nondo i moloikat do mikuwo’d osianan dau, do poingkaa, ’’Poiduwo’ iyau! A’ i’ iyau koongoi do hilo’d pomogunan do tulun do nangapatai. Diya o tusin do pamajamin do popoidu’ dau,’’ ka. ²⁵ Tinan nopondo dau om sumiliu do miagal dit omulok po om okoris nondo kawagu. ²⁶ Om Kinorohingan nga’ sumimbar indo do tontok di sumambayang iyau, tumuku’ indo iyau dot id Kinorohingan do mikuwo’d otood o ginawo dau; om pogulion indod Kinorohingan o koiyon-iyono’ do koposi-posion dau do miagal di gulu po. ²⁷ Moro-boros nondo i tulun dot id toguang do tulun dot ogumu’ do poingkaa, ’’Nokowonsoi oku nod dusa. Om nokowonsoi oku no daa’d sala’, nga’ pinoidu’ oku iddi do Kinorohingan. ²⁸ A’ oku i’ dau pinologos do nokoongoi do hilo’d pomogunan do tulun do nangapatai, om poimpasi oku poddi,’’ ka. ²⁹ Piguli’-guli’ nopod Kinorohingan do momonsoi o miagal diri; ³⁰ posion id Kinorohingan o tulun, om onuan dau do kosimbayanan do poimpasi. ³¹ Pokinongou no diti poboroson ku do dinondo, oi Ayub, kada’ no iya’ pimboros om pologoso’ oku nopo do moro-boros. ³² Nga’ ondung haro o korohian nu’d poboros, om porongoho’ oku no; om agaan i’ o ginawo ku do mangakun dot otopot ko. ³³ Nga’ ondung amu’, om kada’ kohiyo om pokinongou no do boros ku, om otudukan ku i’ iya’ do ralan do sumiliu do tulun di kitoilaan.

¹ - ² Iyokoyu no it ongkitoilaan, om ongopintar, pokinongou kou no diti poboroson ku. ³ Oilaan i’ do tulun i taakanon dit awasiu dot oumbalan diyolo’; om oilaan i boros do haro o komoyon do tontok dot orongou diyolo’ iri. ⁴ Mositi’ no do sorisidon toko’ o hal diti, om salasayon toko’ nogindo. ⁵ Okunon i’ di Ayub dot aiso’ o sala’ dau, om boroson dau dot a’ otulid o Kinorohingan dot id dau. ⁶ Minonguhot iyau do poingkaa, ’’Poingkukuro oku do mongudut do momoros dot aiso’ o dusa ku? Nadalaan oku no do noinggorit, nga’ a’ oku i’ nokowonsoi’d dusa,’’ ka dau. ⁷ Nokoumbal kou toi do nokokito’d tulun do miagal kopio di Ayub? Iyau no kopio ot a’ insan pomusou do Kinorohingan. ⁸ Orohian iyau do mambalut di tulun dot angaraat, om monokirolot-rolot iyau di tulun do kidusa. ⁹ Mimboros iyau dot aiso’ i’ o koonong-onongon dau do tumanud piya iyau do korohian do Kinorohingan. ¹⁰ Pokinongou kou no doho’, iyokoyu it ongkosuhut! Momonsoi tuu o Kinorohingan, it Osundu Kopio di kasala’? ¹¹ Somulian i’ dau o tulun do miontok di winonsoi diyolo’, om wonsoyon dau dot id diyolo’ o miontok di kowoyo-woyoon diyolo’. ¹² Kinorohingan nopo it Osundu Kopio om a’ i’ kopio momonsoi dit araat; om a’ i’ kopio iyau insan do momonsoi dit a’ otulid dot id disai nopo. ¹³ Mantad toi dot id disai o kinoonuan do Kinorohingan di sinundu dau? Haro toi o minanahak dau do karaja’ do mongigit diti pomogunan? ¹⁴ Ondung onuon kawagu do Kinorohingan o pinuhobo’d tulun, ¹⁵ om oinsanan nopo i songimpasi dot angapatai om osiliu kawagu’d pupuk. ¹⁶ Pokinongou kou no doho’, do kitoilaan kou no! ¹⁷ Pasalaon nu daa o Kinorohingan dit otopot? Ondos nu daa om araatan o Kinorohingan dit otulid? ¹⁸ Hukuman id Kinorohingan o raja’ om pomorinta’, do tontok dot araat om aiso’ o koonong-onongon do wonsoyon diyolo’. ¹⁹ Kinorohingan i’ o minomonsoi do pointikid-tikid do tulun; a’ i’ dau obian o pomorinta, ko’ pusohon po i tulun do kaharaan do mantad ko’ i tulun do rumutum. ²⁰ Haro i’ o tulun do sigog i’ dot apatai do dongotuong. Hukuman iyolo’d Kinorohingan gisom dot apatai iyolo’, a’ i’ iyau apagon do mamatai di gunsiou. ²¹ Piantangan i’ dau o koposi-posion do tulun, om okito dau o koinsanai do kalaang-laango’d tulun. ²² Aiso’ i’ o totuong di dondom piya kopio do kotirung do tulun di kidusa dot id Kinorohingan. ²³ A’ i’ o Kinorohingan minog do manantu’ do maso, do kaangayan do tulun kopokibutusai dau. ²⁴ A’ no o Kinorohingan minog do minguhot do monorisid, do mongidu’ do boyoon om moningolon diyolo’d tulun do suwai. ²⁵ Tu’ noilaan i’ dau o wonsoyon diyolo’, om iduwon nopondo dau iyolo’ om patayon dau iyolo’ do tontok do dongotuong. ²⁶ Hukuman ngai’ dau dot id toguang di tulun dot ogumu’, i tulun di kidusa, ²⁷ tu’ nokotingkod no iyolo’ do tumanud dau; om a’ diyolo’ pinadul i pinonuhuan dau. ²⁸ Iyolo’ no o nokobungou di tulun do mosikin do minglohou do Kinorohingan, om norongou i’ do Kinorohingan i lolohou di tulun do mosikin diri do mokitulung dau. ²⁹ Ondung poboroson do Kinorohingan dot aiso’ o wonsoyon dau, om aiso’ i’ o katama’ do mongindaraat dau. Ondung lisokon do Kinorohingan o rabas dau, om aiso’ no o kokito dau. ³⁰ Aiso’ no o milo’d wonsoyon di piro-piro o bansa’d tulun do mangantob dit ongorongit do momorinta’ diyolo’. ³¹ Ayub, naakun nu no dot id Kinorohingan i dusa nu, om nakabatos ko no dot a’ ko momonsoi kawagu’d dusa? ³² Nopokianu nu no do Kinorohingan do popointutun diya’ di kasalaan nu, om nokotumboyo’ ko no dot a’ ko kawagu momonsoi dot araat? ³³ Patahakon tuu daa giya’d Kinorohingan i pokionuon nu dot iya’ nga’ a’ i’ orohian di wonsoyon dau? Iya’ i’ o poboros ondung nunu ot osorou nu, om okon i’ ko’ iyoho’; poboroso’ nopo ot osorou nu! ³⁴ Pointikid-tikid do tulun dit oilo om kosokodung i’; om iri tulun dit opintar do korongou di poboroson ku nga’ moro-boros i’ ³⁵ do mimboros nopo i Ayub, om a’ i’ iyau kosuhut di poboroson dau, om aiso’ i’ o komoyon di boros di Ayub; ³⁶ Sorisidon nopo kopio i pinoboros di Ayub, nga’ oilaan i’ moti’, do koboro-boroso’ nopo dau om miagal do koboro-boroso’ do tulun dit araat. ³⁷ Ruhangan po dau do kososongkiwal i dusa dau; indaraaton nopo dau o Kinorohingan dot id toguang diyolo’.

¹ - ² Kasala’ ko id momoros do miagal dino, oi Ayub, tu’ pokotopot ko do tinan nu dot id pagantangan do Kinorohingan, ³ om kasala’ ko do monguhot do Kinorohingan do poingkaa, ’’Nunu o kohompi-hompit nu di dusa ku? Aiso’ i’ o kinountungan ku dot a’ oku piya momonsoi’d dusa,’’ ka nu. ⁴ Iyoho’ no o monimbar diya’ om monimbar di tambalut ngai’ nu. ⁵ Tingaha’ pogi’ dilo tawan! Antangai no ondung songkuro o kasawato’ dilo haun! ⁶ Ondung momonsoi ko’d dusa, om a’ i’ pokoruol do Kinorohingan iri. Ondung ogumu’ o kasalaan nu, om a’ i’ o Kinorohingan orolihan. ⁷ Ondung momonsoi ko’d osonong om kouhup ko no tuu daa do Kinorohingan? Aiso’ i’ o pokionuon do Kinorohingan do mantad id diya’. ⁸ Iyokoyu no sompi’ ko’ tulun ot oinggorit di dusa nu, om iyolo’ nogi’ ot oinsanangan di kosonongon nu. ⁹ Soira’ nopo dot ulak-ulakan o tulun om minggiak nondo iyolo’; om minglohou iyolo’ do mokitulung. ¹⁰ Nga’ a’ nogi’ iyolo’ momolohou’d Kinorohingan, tu’ minomonsoi diyolo’, i manahak diyolo’d pagandasan do tontok di tumongob iyolo’. ¹¹ A’ iyolo’ rumikot dot id Kinorohingan, i manahak dati’ do toilaan, i toilaan dit aralom ko’ toilaan do nintorusan om tombolog. ¹² Mihad po daa iyolo’ do mokitulung, nga’ a’ i’ o Kinorohingan sumimbar, tu’ ongoondos iyolo’ om angaraat. ¹³ Aiso’ i’ o guna’ diyolo’ do minglohou; tu’ a’ nod Kinorohingan dit Osundu Kopio antangan iyolo’ om a’ dau iyolo’ pokinongohon. ¹⁴ Ayub, boros ka nu om a’ ko kokito do Kinorohingan, nga’ kalanut no ginawo do magandad tu’ nokorikot no dot id dau i hal nu. ¹⁵ Ondos nu nopo daa om a’ o Kinorohingan momohukum, om pagaan-gaanon dau o dusa. ¹⁶ Aiso’ no guna’ nu do mimboros dot a’ otingkod-tingkod, tu’ atalang no dot iya’ piya nga’ a’ i’ koilo ondung nunu o komoyon dino poboroson nu.

¹ - ² Andad-andado’ po om mokinongou po dot ongoruhai diti poboroson ku do mantad id Kinorohingan. ³ Ogumu’ i’ o toilaan ku; om iri no o pakayon ku do popointalang do Kinorohingan nopo, i minomonsoi doho’ om otulid i’. ⁴ Aiso’ i’ moti’ kopio o tudut di nokoboros ku diya’; iri i’ i tulun dit oilo kopio o potimbaba’ diya’. ⁵ Kinorohingan nopo om okoris kopio! Om aiso’ i’ ot ada-daan dau; om aiso’ i’ ot a’ dau osuhutan. ⁶ A’ i’ dau pologoson dot alaid do poimpasi i tulun do kidusa. Om otulid kasai’ i’ o wonsoyon dau dot id tulun dit oinggorit. ⁷ Intirungan i’ dau i tulun dot otulid o ginawo; om pologoson dau iyolo’ do momorinta’ do miagal do raja’, om pologoson dau iyolo’ do suahon do gisom dot alaid. ⁸ Nga’ ondung kagasan o tulun do rantai do basi’, om oinggorit do nobungou di winonsoi diyolo’, ⁹ om popoilo no o Kinorohingan di karaaton om i koondos diyolo’ dot id diyolo’. ¹⁰ Sinuhu’ dau iyolo’ do mokinongou di boros dau di popoinsan diyolo’ om mokinongou di boros dau di monuhu’ do tumongkiad di karaaton diyolo’. ¹¹ Ondung tumanud iyolo’d boros do Kinorohingan om momonsoi di korohian dau, om osimbayan no iyolo’ do poimpasi om kumaya’ do solinaid diyolo’ do poimpasi. ¹² Nga’ ondung a’ iyolo’ mokinongou, om matai no iyolo’ do tontok dit aiso’ po o toila-ilaan diyolo’. ¹³ Tulun nopo dit aiso’ o Kinorohingan om poopi’ do katagadan, om ohukuman piya iyolo’d TUHAN nga’ a’ i’ iyolo’ sumambayang do mokiuhup. ¹⁴ Omulok po om apatai no iyolo’, tu’ poimponu’ po do kointingayaman o koposi-posion diyolo’. ¹⁵ Ponuduk nopod Kinorohingan do tulun om koinggoritan, om kosusaan o popopuriman dau diyolo’. ¹⁶ Kinorohingan i’ o pinapalabus diya’ do mantad id kosusaan, om pinopopuriman diya’ do kosimbayanan; mija’ nu nga’ nopudsuan do taakanon. ¹⁷ Nga’ baino’ noddi om hinukuman ko do miontok di karaato’ nu. ¹⁸ Antaan-taan no, kada’ pologoso’ i tusin do ponisip do monipu’ diya’, om kada’ pologoso’ o kakayaan do mamalid diya’. ¹⁹ Aiso’ i’ o guna’ nu do mihad do mokiuhup; oinsanan piya o kinoris nu nga’ a’ i’ milo do monguhup diya’ do baino’. ²⁰ Kada’ korohiai do rumikot o totuong, i maso’ dot angapatai ngai’ o bansa’. ²¹ Antaan-taan no, kada’ toguang dot id karaaton; tu’ kinoporikatan nopo diti koinggoritan dot id diya’ om potongkiad diya’ do mantad id karaaton. ²² Hondomo’ no o kogoyoo’ do sinundu do Kinorohingan; Kinorohingan no o gomponuduk dit aiso’ o koiyo. ²³ Aiso’ i’ o tongosongulun piya do milo do momisunud do Kinorohingan ondung nunu ot osonong do wonsoyon dau ko’ milo po do monondos dau do minomonsoi iyau dot araat. ²⁴ Pingroyohon kasai’ i’ iyau dot i winonsoi dau o kapamarayahan; om iya’ nga’ apatut i’ do mamarayou dau. ²⁵ Nokokito ngai’ i’ o tulun di winonsoi dau; nga’ aiso’ i’ o songulun piya do kosuhut ngai’ddi. ²⁶ A’ toko’ i’ osuhutan ngai’ o kagayaan do Kinorohingan, om a’ toko’ ointob ondung songkuro o ginumu’ do toun do tumur dau. ²⁷ Kinorohingan i’ o manganu do waig do mantad hiti’d tana’ om poposimban diri do sumiliu’d tinuru’ do rasam. ²⁸ Pologoson dau o rasam do tumuru’ do mantad id haun, do parasamon dau dot id toinsanan o tulun. ²⁹ Aiso’ i’ o songulun do koilo ondung poingkukuro ilo haun do mundaliu; om ondung poingkukuro i tinggoron do moningkohud do hilo’d tawan, i tiyonon do Kinorohingan. ³⁰ Nulinahan dau do kodumaat o pointongkop dilo tawan; nga’ id saalom nopod rahat om otuong i’ kasai’. ³¹ Iti no o karalan-ralano’ dau do papaakan do tulun dot ogumu’ om manahak do taakanon dit a’ aayi-ayi’. ³² Pususon nopo dau do longon dau i kodumaat, om suhuon nogindo do tumodsok do hiri’d natantu’ mantad do todsokon. ³³ Tinggoron nopo om momisunud do rumikot o tongus dot opuhod, om i sapi’ nga’ koilo i’ do korikatan di tongus.

¹ Iri tongus dot opuhod o popogogor do ginawo ku. ² Pokinongou ngai’ kou no do boros do Kinorohingan, om i tinggoron di sumoliwan do mantad id kabang dau. ³ Padarapason dau do tawan i kodumaat dau, do mantad hilo’d tisan do tana’ om kumaa ponong hilo’d sampaping. ⁴ Om korongou noddi i garom do boros dau, om solinaid nopoddi nga’ a’ no tumingkod-tingkod i kodumaat do mingkalab. ⁵ Koboros nopo o Kinorohingan do monuhu’ nga’ osiliu no o kopusahan kopio, i kongoimayaan dit a’ toko’ osuhutan. ⁶ Suhuon dau i salju do sumondot do hiti’d tana’, om porikot iyau do rasam dit asapou do momoyopos diti tana’. ⁷ Tingkodon dau o karaja’d tulun; om pointalangon dau dot id diyolo’ dot iyau o kumaraja’. ⁸ Muli’ ngai’ nopo i nintorusan dot id luang diyolo’. ⁹ Mantad hilo’d salatan i tongus dot opuhod, om mantad hilo’d utara i ribut dit osogit kopio. ¹⁰ Oobusan nopod pinuhobo do Kinorohingan om kumodou nopo i waig, om sumiliu dot ais dit okodou. ¹¹ Kumalab nopo o kodumaat do mantad hilo’d tawan, ¹² do tontok do mundaliu do tumanud di korohian do Kinorohingan. Wonsoyon ngai’ nopo diyolo’ o ponuhuan do Kinorohingan do hinonggo nopo do pointongkop diti pomogunan. ¹³ Porikoton do Kinorohingan o rasam do pomoyopos diti tana’; om koumbal i’ do porikoton dau o rasam do pomohukum do tulun, om popointalang nogi’ dot id diyolo’ do kogoyoo’ do kosianan dau dit a’ sumimban do gisom dot alaid. ¹⁴ Undorong po dot oruhai, om pokinongou po, oi Ayub; soroho’ po kopio i kongoimayaan do winonsoi’d Kinorohingan. ¹⁵ Koilo ko i’ ondung poingkukuro o Kinorohingan do minomisunud om minonuhu’ di kodumaat do kumalab do mantad hilo’d tawan? ¹⁶ Koilo ko i’ ondung poingkuro ilo haun do mamanau do hilo’d mawo-dawo, i kosuulo’ do toilaan do Kinorohingan di kosuayan kopio? ¹⁷ Amu’, milo ko no do mingodoi dot ololosuan, dot awayaan iti tana’ di tongus do mantad id salatan. ¹⁸ Milo ko i’ do muhup do Kinorohingan do papawalad dilo tawan om poposiliu dilo tawan do miagal di tambaga’ do tinantan tu’ okodou? ¹⁹ Tudukai no iyahai dit apatut do poboroson dot id Kinorohingan; tu’ natagakan no iyahai do pomusorou; om aiso’ no o poboroson dahai. ²⁰ A’ oku i’ mokianu’d maso do moro-boros do Kinorohingan, nokuro daa tu’ pologoson ku iyau do kipaantakan do mamaraag do tinan ku? ²¹ Dinondo noddi om kosorong tomod o tulinau dilo tawan, gisom dot opondou toko’; om ilo tawan nga’ alangga’ poo do nawayaan do ribut. ²² Haro o tulinau do miagal do tamas o kokitanan do hilo’d utara, om oimayaan toko’ po di kagayaan do Kinorohingan. ²³ Osundu no kopio o Kinorohingan toko’ gisom dot a’ toko’ no milo do minsomok dau; otopot i’ om otulid o wonsoyon dau dot id tulun. ²⁴ Om apatut no do pusohon iyau dot isai nopo o tulun, nga’ iri nopo tulun di mangakun do kitoilaan om a’ i’ dau podulon.

¹ Om boro-boros noddi o TUHAN do mantad hiri’d tongus dit opuhod do poingkaa: ² Isai ko, tu’ surilogon nu o toilaan ku dot i boros do dongkababasug om it aiso’ o komoyon do ponurilog nu? ³ Ingkakat no do dinondo do miagal do songulun o kusai, om simbaron i’ iti poguhatan ku diya’. ⁴ Hino ko no toi di tinaru’ ku i’ iti pomogunan? Ondung ogumu’ kopio o toilaan nu, om simbaro’ nori! ⁵ Isai o pinapatantu’ do kalaabo’ diti pomogunan? Isai o minonipong diti pomogunan? Koilo ko i’ do ponimbar ngai’ddi? ⁶ Nunu o kogirot di torigi do papapanggor diti pomogunan? Isai o pinopoiliu di watu do pinoimpahan diti pomogunan? ⁷ Tontok nopod kosuabon do tadau’ddi om mogioompot nopo i rombituon do modsinding, om mimpangkis ngai’ dot atataadan i susuhuon do Kinorohingan di hilo’d surga ⁸ Isai o minonompon di wawayaan do mangantob di waig do rahat do tontok di luminabus iri do mantad id saalom do tana’? ⁹ Iyoho’ i’ o minonokop dilo rahat do haun om minonguluput diri do totuong. ¹⁰ Iyoho’ nogi’ o minomonsoi do wolit dilo rahat om nantaban ku do totobon di kisalampad. ¹¹ Om sinunudan ku i rahat do poingkaa, ’’Gisom nod hiti! Kada’ no tolibai! Gisom nopod hiti o ruab do tumbak nu dit ologod,’’ kangku. ¹² Ayub, nokoumbal ko toi do minonuhu’ do kosuabon do rumikot do solinaid nu do poimpasi? ¹³ Nokoumbal ko toi do monuhu’ di kosuabon do mongonggom diti tana’ om monginggog di tulun dot angaraat do mantad hiri’d linisok diyolo’? ¹⁴ Tanawau no o popointalang do nuluhon om kubong, do gisom dot atalang no kopio dot iyo po di lupi do kain om iyo di saap dot id tana’. ¹⁵ Tulinau nopo di tanawau om anawau no kopio dot id tulun dot araat, om iri no i mangantob diyolo’ do mingwonsoi dit araat. ¹⁶ Nokoongoi ko no do hilo’d tudan do rahat, do hilo’d saalom do rahat? Nokopimpanau ko no do hilo’d nanad do rahat? ¹⁷ Haro toi o tulun do nokoumbal do nokoponuduk diya’ do wawayaan di madtamong do pomogunan di nangapatai? ¹⁸ Koilo ko no do kogoyoo’ diti pomogunan? Simbaro’ nori, do koilo ko no. ¹⁹ Koilo ko i’ ondung hinonggo o tadon do tanawau, ko’ tadon po do totuong? ²⁰ Milo ko i’ do monuduk ondung songkuro sinodu’ do tongoyon do tanawau om totuong, ko’ popoguli’ po kawagu’ddi? ²¹ Atantu’ no do milo ko i’, tu’ molohing ko no, om hino ko no di wonsoyo’ i’ iti pomogunan! ²² Nokoongoi ko no do hilo’d poopian, i pinotimungan ku do salju om karambatu? ²³ Nokosodia’ ku nori do maan do tontok do koinggoritan, om tontok do misaap om misangod. ²⁴ Nokoongoi ko no do hilo’d koulayon do tadau, om hilo’d tadon di ribut do koulayon do tumongus? ²⁵ Isai o minomoliang do luyungon di rasam dot asapou, om minamalangga’ do ralan di tinggoron om kodumaat? ²⁶ Isai o pinoposondot do rasam do hilo’d kinoiyonon dit aiso’ o tulun do poingiyon? ²⁷ Isai o minomoyopos di tana’ dit otuu om okodou, om sunian indo do sakot? ²⁸ Kitapa’ toi i rasam om i bolobou? ²⁹ Isai o tina’ dit ais om i bolobou do kumodou, ³⁰ i poposiliu do waig do miagal do watu om popokodou dilo waig do rahat? ³¹ Milo ko i’ do popogiaamung di rombituon di roitan do Walatik, om milo ko i’ do mongurias di rombituon di roitan do Muru-Puru? ³² Milo ko i’ do momoyo’ dilo rombituon do monikid do kowolihon do maso, om potunud di rombituon dit agayo om Rombituon dit okoro’ di roitan do Soguanggo’? ³³ Koilo ko i’ dit oturan di mongulud do hilo’d tawan, om koilo ko i’ do poontok diri do hiti’d pomogunan? ³⁴ Milo ko i’ do minggarang do moro-boros dilo haun, do monuhu’ do popolintuhun do rasam do pomodsu’ diya’? ³⁵ Om ondung suhuon nu i tungkilap do kumalab, om rumikot i’ tuu iri dot id diya’ om moro-boros do, ’’Tumanud i’ iyahai dot isuhu’ nu,’’ ka? ³⁶ Isai o momisunud di tombolog di roitan dot ibis, do lumuyud i Bawang do Nil? Isai o momisunud di tandaha’ do sumondot o rasam? ³⁷ Isai noo i kitoilaan kopio do mongintob dilo haun, om moninggoub di haun do poposondot do rasam, ³⁸ i rasam do mamalagit do pupuk do tana’ do gisom do mogisosokot? ³⁹ Milo ko i’ do mogihum do taakanon do ponumad do singa, om paakan di tanak do singa do gisom dot ayahan ⁴⁰ di maso diyolo’ do songillisok do hilo’d luang, ko’ maso po diyolo’ do songingodop do hilo’d kuang do tiiyonon diyolo’? ⁴¹ Isai o manahak do taakanon di tombolog di roitan do bangkahak do tontok do minghombo iyolo’ do mogihum do kanon, om tontok di minguni i tangaanak diyolo’ do mokianu’d takanon?

¹ Koilo ko i’ ondung soira’ i kambing do gouton do pinogkosusu? Nokoumbal ko i’ do miniontong do tontok do mogkosusu i tambang? ² Koilo ko i’ ondung songkuro koloido’ diyolo’ do monontian? Koilo ko i’ do maso do kasawaan di tanak dot id suang do tian diyolo’? ³ Koilo ko i’ ondung soira’ iyolo’d gumupu’ do mogkosusu di tangaanak diyolo’ do hiti’d pomogunan? ⁴ Hilo’ id tanga’d talun i tangaanak diyolo’ do gumayo om kumoris o tinan; om mimpanau nondo iyolo’ do hilo’d sodu’ om a’ no gumuli’ kawagu. ⁵ Isai o pinopologos di kaladai do lalang do poingidu’? Isai o pinopoidu’ di kaladai om pinopologos diri do minghombo? ⁶ Iyoho’ no o minanahak di kaladai do tana’ do kowotuan do maan diyolo’d tiyonon, om pinopologos diri do mundorong do hiri’d rantai dit oosin. ⁷ Minsodu’ i kaladai di kabandaran do tulun dit ongohiyo, om aiso’ o tongosongulun piya do koilo do mongubas di kaladai ko’ monuhu’ poddi do morobuat. ⁸ Ilo’ no nuluhon o pamayan-bayaanan di kaladai do mangakan-ngakan, i hilo’d pogihuman diyolo’d sakot dit ongotomou do maan diyolo’d akanon. ⁹ Orohian i’ tuu i sapi’ do lalang do porobuaton nu? Mongoi i’ tuu odop i sapi’d lalang do hiri’d suang do kandang do sapi’ nu? ¹⁰ Milo ko i’ tuu do mongogos do tiso’ di sapi’ do lalang om suhuon nogindo do mamaradu? Milo ko i’ tuu do monuhu’ di sapi’ddi do gumayat do ragus do pamaragus di tumo nu? ¹¹ Milo ko i’ tuu do tumalahan di kinoris di sapi’ om mogondos di sapi’ do momonsoi di karaja’ nu dit awagat? ¹² Piantangan nu daa i sapi’d lalang do monimung do tua’ di gandum, om popoopi’ di tupu’ddi do mantad hiri’d pinamagamasan nu? ¹³ Asarok no kopio o kapo do talad di tombolog dot unta, nga’ aiso’ i’ o tombolog dot unta do milo’d tumulud do miagal do podtutulud do tombolog di roitan do kandawai. ¹⁴ Iri nopo i tombolog dot unta om papadantak do tontolu’ dau do hiri’d tana’ do pokiuhuban dau di kolosuo’ di tana’. ¹⁵ A’ i’ di tombolog dot unta osorou dot iri nopo tontolu’ om ababak i’ dot oulakan, om ababak do nintorusan do suwai. ¹⁶ Sorohon nopo dau dot okon i’ ko’ iyau o sanganu di tontolu’, om a’ i’ dau sorohon i huyan dau dot aiso’ piya o kotutukon diri. ¹⁷ Iyoho’ i’ o pinapabasug di tombolog diri om a’ ku nonuan do toilaan. ¹⁸ Nga’ soira’ nopo do tumangkus i tombolog om aala’ i’ o kuda’ om i tulun do poinsakai’d kuda’. ¹⁹ Ayub, iya’ toi o minanahak do kinodsir di kuda’, om pinoposokot di tobuk dot olumis do hiri’d likud di kuda’? ²⁰ Iya’ toi o pinopokodsir di kuda’ do sumimbul do miagal di simpod do godu om minanahak di tungkobir di kuda’ di kotompurolosi do tulun? ²¹ Orohian tomod i kuda’ do mingkahu do tana’ do hiri’d rantai; om tumotos do manangkus do kumaa dot id pisangadan. ²² A’ i’ koilo i kuda’ do kopoddosian, om aiso’ i’ o gayang do kotompurolosi di kuda’. ²³ Rapo-rapo nopo do nigitan di sumasakai di kuda’ om monging-songing nopo om akalab dot otitihan do tadau. ²⁴ A’ no i kuda’ siundorong tu’ sitangkus no kopio, om santangkus-tangkus ngai’ no i kuda’ do sontimbaba’ dot id doburuan; om soira’ nopod pounion i torumpit om a’ no iyolo’ milo do poundorongon. ²⁵ Pointikid-tikid do pounion i torumpit om monungkobir no i kuda’; kosingud no i kuda’ do tawau di pisangadan dit osodu’ po, om korongou do garang di boyoon do monuhu’. ²⁶ Id diya’ toi o pinokitudukan di kondiu do kowoyo-woyoon do tumulud do tontok di papakapo i kondiu di talad dau do kumaa ponong id salatan? ²⁷ Magandad tuu i kondiu dot isuhu’ nu do mongoi pomonsoi’d rumun do hilo’d nuluhon dit angakawas kopio? ²⁸ Minomonsoi iyau do walai dau dot id sakai do pampang dit asawat, om hiri’d dompok di watu dit atarom o ponokotintirungon dau. ²⁹ Hiri no i kondiu do mogimpa’ ngai’ di hiri’d somok om i hiri’d sodu’ do nunu nopo i korohian dau do mamatai do maan dau dot akanon. ³⁰ Timungan nopo di kondiu i rata’ om inumon di tanak di kondiu i raha’.

¹ - ² Oi Ayub, suminongkiwal ko doho’, i Kinorohingan it Osundu Kopio; sumurilog ko po ko’ amu’? ³ - ⁴ Miagal oku po di tulun do basug do minoro-boros oi TUHAN. Nunu po o milo ku do posimbaron? Aiso’ no o milo ku do poboroson. ⁵ Ogumu’ no kopio i nokoboros ku. ⁶ Om boro-boros po kawagu o TUHAN dot id di Ayub do mantad hiri’d tongus dit opuhod. ⁷ Baino’ nopo om ingkakat no do miagal do songulun o kusai, om simbaro’ no iti ponguhatan ku. ⁸ Mogolim ko toi dot otulid oku, om popotopot ko do diya’d tinan? Om papasala’ doho’? ⁹ Okoris kopio ko toi do miagal doho’? Milo i’ toi dot iyo di doho’d boros o boros nu tu’ miagal pod tinggoron kopuhod? ¹⁰ Ondung koiyo ko’ddi, om ingkakat no do mikuwo’d kagayaan om koondoso’ nu; kulumutai no tinan nu do kobontugo’ om karayahan. ¹¹ Antangai ngai’ no i tulun dit ongoondos; om tuntugan no iyolo’ di kototogod nu om intingayamon no iyolo’. ¹² Ontong no diyolo’ om poinsiribao’ no iyolo’; om patayon no i tulun dot araat do hinonggo nopo iyolo’ do poundorong. ¹³ Lobongon ngai’ no iyolo’ dot id saalom do tana’; om kagasan no iyolo’ do hilo’d pomogunan di tulun di nangapatai. ¹⁴ Om iyoho’ nondo o mogulu do mamarayou diya’, om poboroson ku dot i kokorisan nu o nakamanang-manang nu. ¹⁵ Ontong pogi’ dilo Bihimot, i kuda’ do Nil dit agayo, tu’ iri nopo om winonsoi ku i’ do miagal diya’ tu’ winonsoi ku. Sakot i’ o taakanon dau, do miagal di sapi’ di koubasanan. ¹⁶ Nga’ antangai pogi’ o kokoriso’ dau, om kokodoho’ do masol dau. ¹⁷ Tikiu nopo dau om poturidong do miagal po di kayu sedar. Masol nod gakod dau om okodou kopio. ¹⁸ Tulang nopo dau om iyo pod tambaga’ kokodou, om gakod dau nga’ miagal pod basi’. ¹⁹ Iyau no o kopusahan kopio dot id pogialatan di winonsoi ku’d suwai. Iri po i minomonsoi dau o kotori’ dau. ²⁰ Hilo’d nuluhon, i kinoiyonon di nintorusan do mogiongkoringau om i sunian do sakot di taakanon dau. ²¹ Gugupuon nopo dau om hiri’d sahau do bulungkut dit ongkirugi, om lilisokon no dau om hiri’d salag do bundusan do hiri’d buyut. ²² Iri po i linungung di bulungkut do korugian ot intirungon dau. Om i koguasan do kayu do hiri’d tisan di bawang o lungungon dau. ²³ A’ i’ iyau moddosi di bawang do Yordan dit opuhod kopio, om poundorong iyau dot oolitan piya do waig o rabas dau. ²⁴ Isai o kasaap do momolou do mato dau, om isai o kasaap do mamagading do todung dau?

¹ Kagamit ko i’ tuu do buayo do Lowiatan, do tapon nod sada’ o pamagamit? Om mongogos di dila’ dau do tali noo o pongogos? ² Milo ko i’ tuu do mamagading do todung dau, om mangait do kabang dau do basi’ o pangait? ³ Milo i’ toi iyau do moro-boros do mokilabus diya’? Ko’ mokiinsian diya’? ⁴ Orohian tuu iyau do monokiupakat diya’ do momonsoi’d piuludan, om monokibatos dot orohian do sumiliu’d pomuru-buruon nu? ⁵ Orohian ko tuu do momogompi’ dau do miagal di tombolog di koupusan kopio nu, do maan nu’d ponompuyaaya’ di susuhuon nu’d tongoondu’? ⁶ Milo i’ tuu iyau do dagangon dot id tulun di monginsada’ om pogiduwo-duwoon nondo di dumadagang? ⁷ Milo nu i’ tuu do todsokon i kulit dau dot i tandus do ponginsada’ o ponodsok, ko’ monungkad do sarapang di tulu dau? ⁸ Kama’ pogi’ dau dot ongoinsan, om a’ ko nondo mogumbal kawagu om a’ nu nondo olihuan i pinisaapan diri do gisom dot alaid. ⁹ Isai nopo o kokito do Lowiatan, om lumomok nopo om ahaba’ no dot ahadan. ¹⁰ Soira’ nopo dot oposik iyau, om orongit moti’ iyau; om aiso’ nondo o tongosongulun piya do kasaap do rumapou dau. ¹¹ Isai po o kotori’ do monokisaap dau, om it a’ orualan? Aiso’ no hiti’d pomogunan do kasaap do momonsoi’d miagal diri. ¹² Momisunud oku po dokoyu kawagu ondung okuro-kuro o gakod do Lowiatan, om momuara’ oku dokoyu do kogoyoo’ om kokoriso’ dau. ¹³ Aiso’ no o tongosongulun piya do kohurak di rasuk dau dit id soibau, ko’ kolopuson di rasuk do don sumasangod di poingrasuk dau. ¹⁴ Isai poo o kasaap do monungkabang di roo dau, dit osisid pod nipon di kotompurolosi kopio. ¹⁵ Likud nopo dau om linopisan do kolid di tininopis do pinosokot, om okodou do miagal do watu. ¹⁶ Pinogiromu-romut iri dot ogirot kopio, tu’ ribut piya nga’ a’ no kawaya’ di piromutan. ¹⁷ Iri nopo kolid diri nga’ pinogiromu-romut do gisom dot a’ no milo’d pogitongkiad-kiadon. ¹⁸ Koontiho’ nopo i Lowiatan nga’ mimbulai nopo o tulinau, om mato dau nga’ mogulinau poo do miagal do tinitiu’d tadau di mulai nogi’. ¹⁹ Momorongila’ o tapui do mantad id kabang dau, om momuralakou o tanak ngapui do lumabus. ²⁰ Momurulon o lisun do lumabus do mantad id todung dau, do miagal po di lisun do sakot do tutudan dot id sahau di rinakan. ²¹ Pinuhobo nopo dau om kosidu i’ do tapui, mandak-bandak o tapui do lumabus do mantad id kabang dau. ²² Liou dau nga’ okoris kopio, om korolosi dot isai nopo o kosolowot dau. ²³ Aiso’ no ot ongokoro’ piya dot olomok do kulit dau; okodou ngai’ nopo om a’ ababak do miagal do basi’. Om a’ no otogu’ tu’ miagal pod basi’ kokodou. ²⁴ Ginawo nopo dau om a’ i’ kopuriman do moddosi, om okodou do miagal do watu di winonsoi do tosung. ²⁵ Soira’ nopod tumungag iyau, om iri piya it aiso’ no o koiyo do kokoriso’ nga’ moddosi i’; lumuhoi iyolo’ om a’ no milo’d sumaap. ²⁶ Aiso’ no karis do kotogu’ do tinan dau; barambang, om pana’, ko’ tandus nga’ a’ no kotogu’ dau. ²⁷ Basi’ piya nga’ miagal nod sakot toomod dot opurimanan dau, tambaga’ nga’ miagal no di kayu do noromuk. ²⁸ Aiso’ no o pana’ do milo’d popoggidu’ dau; watu piya dot okodou do pomodumpau dau nga’ miagal no di sakot toomod dot opurimanan dau. ²⁹ Bobobog nga’ piagalon no dau di roun do sakot, om tokonon iyau’d tulun nga’ koirak nogi’ iyau. ³⁰ Sisi’ nopo do tian dau om miagal di kinababakan do kuron katarom; oburutak nopo ot awayaan dau do miagal po dot aragus. ³¹ Gouron nopo dau ilo rahat nga’ miagal pod waig di gumolok, om momiputa’ do miagal do kuron di kisuang do tumau. ³² Anawau nopo ot otitiu di nulokon dau, om ilo rahat nga’ silihon dau do puta’ dot opurak. ³³ Aiso’ no koiyo dau dot id pomogunan diti; tu’ iyau no i nintorusan dit aiso’ o poddosi. ³⁴ Iri piya i nintorusan dit angagayo no kopio, nga’ intingayamon i’ dau. Iyau no o raja’ do koinsanai’d nintorusan dit ongorongit do hilo’d gouton.

¹ - ² Om simbar noddi i Ayub do TUHAN. Noilaan ku no, oi TUHAN, dot aiso’ i’ ot a’ angabayaan dit ongosorou nu; aiso’ i’ ot a’ nu milo’d wonsoyon. ³ Minonguhot ko doho’ ondung nokuro tu’ katama’ kopio oku do sumoibau do toilaan nu, tu’ iyoho’ nopo om basug i’. Pinoboros ku it a’ ku iyoho’ osuhutan, om i hal di kongopusahan ku. ⁴ Monuhu’ ko doho’ do mokinongou do tontok do moro-boros ko, om pokisimbaran nu doho’ i poguhatan nu. ⁵ Di nopo di gulu po om iri no i pinosunud do tulun do suwai dot id doho’ ot oilaan ku do pasal diya’, nga’ baino’ nopoddi om mato ku no kopio o kokito diya’. ⁶ Om ointingayaman oku no kopio do kosorou di boros ku di nongkoboros ku, om poirikau oku do hiti’d pupuk om tauu do mikuwo’d kumorologo oku. ⁷ Kongoboros ngai’ poddi do TUHAN iti dot id di Ayub, om boro-boros no iyau dot id di Ilipas do poingkaa, ’’Otogod oku diya’ om ilo duwo o tambalut nu, tu’ a’ kou i’ pinopoboros dit otopot do pasal doho’. Nga’ i Ayub nopo i susuhuon ku om a’ i’ iyo’ddi. ⁸ Baino’ nopo om igit no do turu’ o tinan do sapi’ do tontoluhan om turu’ o tinan do dumba’ do tontoluhan do hilo’d di Ayub. Om patahakon nori do maan do porsombahan di sorobon do maan do diya’. Om sumambayang nogindo i Ayub do bagi’ diya’, om romiton ku indo i sambayang dau, om a’ kou i’ ointingayam, do mulong piya dot apatut kou no daa do hukuman. Tu’ a’ kou i’ minomoros dit otopot do pasal doho’, do miagal di pinoboros di Ayub,’’ kad TUHAN. ⁹ Om tonudo’ ngai’ no di Ilipas om i Bildad om i Sopar o koinsanai di pinonuhuan do TUHAN, om pohubayaai nod TUHAN i sambayang di Ayub. ¹⁰ Om kasambayangai poddi di Ayub i tolu o tambalut dau’ddi, om pogulio’ no kawagu’d TUHAN i kakayaan di Ayub, om onuwai no dau iyau do dapu’ dot induwo kopiluap o kogumuo’ do mantad ko’ i gulu. ¹¹ Koinsanai di tobpinai di Ayub do kusai om tondu’, om i tambalut mantad dau nga’ ruminikot noddi do minongoi pogolimbuha’ dau om minoginakan iyolo’ do hiri’d walai di Ayub. Om minomoros nogi’ iyolo’ do tumonggoi iyolo’ di Ayub do tumongob tu’ pinorikatan i’ iyau’d TUHAN do koinsanai di kosusaan diri, om ninsasamadan diyolo’ iyau. Om sorompori-pori nopo iyolo’ do minanahak di Ayub do tusin om soroisaan do pondulung do tamas. ¹² Om binarakatan iddi do TUHAN o koposi-posion di Ayub dot agayo po ko’ i pinamarakat dau di Ayub dit a’ po iyau noontok di koinggoritan. Haro’ddi o baanan di Ayub do hopod om apat noribu o tinan do dumba’, om onom noribu tinan dot unta, om duwo noribu tinan do sapi’, om soribu tinan do kaladai. ¹³ Om kianak po i Ayub do turu’ o kusai om tolu o tondu’. ¹⁴ Om pungaranai no dau it id dotuo di tanak dau’d tondu’ dot i Yomima, om iri no i sumusuhut dau om i Kosia, om iri no i tomulok om i Kirinhapuk. ¹⁵ Om pointongkop nopod pomogunan diri om aiso’ no o koiyo do kolumiso’ di tolu o tangaanak di Ayub do tongoondu’ddi. Om nonuan nogi’ iyolo’ do tungkusan do mantad id tapa’ diyolo’ do miagal di tobpinai diyolo’d tongokusai. ¹⁶ Mantad nopoddi om hatus po om apat nohopod o toun di Ayub do poimpasi, do gisom do nokokito po iyau di manangaki dau om i tangaanak di manangaki dau. ¹⁷ Om molohing poddi kopio i Ayub om kapatai nogi’ iyau.