YOROMIA

YOROMIA

¹ Iti nopo buuk diti om pinotulisan di pinoboros di Yoromia i nabi, i tanak di Hilkia, i mantad hilo’d bandar dot Anatot, it id watas do Binyamin. ² Minoro-boros o TUHAN dot id di Yoromia do tontok di kohopod om tolu do toun di Yosia, i tanak di Amon, do raja’ do Yohuda. ³ Om asaru’ po o TUHAN do minoro-boros dot id dau do suwai ko’ mantad diri, do mantad di minomorinta’ i Yoyakim i tanak di Yosia, om gisom di kohopod om iso’ do toun di Sodokia i tanak di Yosia, do momorinta’. Om tontok di tulan do kolimo do toun diri om katanggayai no i tulun do Yorusalim do kuminaa dot id pomogunan do pisangod. ⁴ Om boro-boros no o TUHAN dot id doho’ do poingkaa, ⁵ ’’Nopili’ mantad ku no iya’ dit a’ ku po iya’ nowonsoi do hiri’d tian di tina’ nu, om tontok dit a’ ko po nosusu; om nopili’ mantad ku no iya’ do silihon do nabi ku do kumaa dot id koinsanai’d bansa’,’’ ka dau. ⁶ Om boros kangku, ’’Oi TUHAN, it Asawat Kopio, a’ oku i’ milo do mimboros tu’ omulok oku po kopio,’’ kangku. ⁷ Nga’ boros kad TUHAN dot id doho’, ’’Kada’ pomoros dot, ’Omulok oku po,’ ka. Tu’ honggo nopo o kinoiyonon do bansa’d tulun do ponuhuan ku diya’d mongoi om mositi’ nod mongoi ko, om nunu nopo i ponuhuan ku diya’ do poboros, om mositi’ nod poboroson nu dot id diyolo’. ⁸ Kada’ kooris diyolo’ tu’ manud-tanud oku i’ diya’ do mongintirung diya’. Iyoho’ no i TUHAN, o minomoros diti!’’ ka dau. ⁹ Om poroloyo’ noddi do TUHAN o longon dau, om ngoyo’ no dau kamao’ o munung ku, om boro-boros no dot id doho’ do poingkaa, ’’Pokinongoho’ no iti boros do poboroson ku, om popinsunudon noti. ¹⁰ Om tadau nod baino’ dot onuan ku iya’ do kuasa’ dot id sawat do koinsanai’d bansa’ om pomorintaan, do mongutus om mamahaba’, om mamaraag om paparatu’, om momonsoi om mananom,’’ ka dau. ¹¹ Om uhoto’ oku nod TUHAN, ’’Nunu o tokito nu, oi Yoromia?’’ ka. Om boros kangku, ’’Okito ku o raan do kayu badam, oi TUHAN,’’ kangku. ¹² Om boros kaddi do TUHAN dot id doho’, ’’Otopot no i pinoboros nu, om piantangan ku no kopio, om ongowonsoi ngai’ i’ i nokoboros ku’ddi,’’ ka dau. ¹³ Om ponguhot po kawagu o TUHAN dot id doho’, ’’Nunu po o tokito nu?’’ ka. Om boros kangku, ’’Okito ku o balanga’ do molok-golok tomod do mantad hilo’d utara, om motituntug no do ponong hiti,’’ kangku. ¹⁴ Om boros kad TUHAN dot id doho’, ’’Lumabai nondo o kosusaan do mantad hilo’d utara dot id koinsanai’d tulun di poingiyon do hiti’d pomogunan diti. ¹⁵ Suhuon ngai’ ku nondod rumikot o koinsanai’d bansa’ do ponong hilo’d utara. Om momorinta’ nondo iyolo’ do Yorusalim. Om solodon diyolo’ o koinsanai di wawayaan om tolig di posorili’ di bandar, om koinsanai di bandar do suwai do hilo’d Yohuda. ¹⁶ Om hukuman ku nondo i tulun ku tu’ minomonsoi i’ iyolo’d dusa, om tuminolikud iyolo’ doho’. Om pinapatahak iyolo’ do porsombahan di sumbolion dot id tingolig, om minomonsoi iyolo’ do tingolig do maan diyolo’d tukuon. ¹⁷ Nga’ iya’ nopo oi Yoromia, om sumodia’ no; om ngoyon no iyolo’ sunudai do koinsanai di ponuhuan ku diya’d poboros. Kada’ kooris diyolo’, om a’ ku i’ iya’ pologoson dot ooris do potimbaba’ ko diyolo’. ¹⁸ - ¹⁹ Pokinongou no, oi Yoromia! Koinsanai di hiti’d pomogunan, koinsanai di raja’ do Yohuda, om i pagawai, om it imam om i rayat, nga’ sumaap ngai’ nopondo diya’. Nga’ tadau nod baino’ dot onuan ku iya’ do kokorisan do tumimbaba’ diyolo’; om miagal ko nondo di bandar di kitolig, om miagal di torigi do basi’, om miagal di limput do tambaga’. A’ indo iyolo’ kaala’ diya’, tu’ manud-tanud oku i’ diya’ do mongintirung diya’. Iyoho’ no, i TUHAN, o minomoros diti,’’ ka dau.

¹ Om suhuo’ oku nod TUHAN do ² mongoi posunud do boros diti dot id koinsanai’d tulun di hilo’d Yorusalim, ’’Oi Israil, osorou ku po i kotorodoko’ nu dit omulok ko po; om i kogoyoo’ do kosianan nu doho’ di wagu to po kopikawin. Om tuminanud ko i’ doho’ do minaya’ di tana’ do kowotuan, i kinoiyonon dit aiso’ o tanom. ³ Oi Israil, iyoho’ noo o sanganu diya’, om iya’ no i koupusan kopio ku. Om pinorotuan ku do kosusaan o koinsanai di minonginggorit diya’, Iyoho’ no i TUHAN, o minomoros diti,’’ ka. ⁴ Pokinongou kou no do boros do TUHAN, iyokoyu i sinakagon di Yakub, iyokoyu i payat dot Israil! ⁵ Boros kad TUHAN, ’’Nunu kopio o sala’ ku do nokito di komolohingan dokoyu gisom do minongindaraat iyolo’ doho’? Tu’ tuminuku’ iyolo’ di tingolig dit aiso’ o guna’, om iyolo’ddi nga’ aiso’ no o guna’. ⁶ Om a’ oku no diyolo’ pinadul; iyoho’, i minomoyo’ diyolo’ do suminoliwan do mantad hilo’d pomogunan do Masir; om i pinopotunud diyolo’ do minaya’ do hilo’d tana’ do kowotuan; i kinoiyonon dot aiso’ o tanom, om i mogisimpurugu-rugu’, i tana’ dot otuu om kikoligagaanan, i tana’ dot a’ iyonon do tulun om a’ wayaan do tulun! ⁷ Pinaatod ku iyolo’ do kuminaa dot id tana’ dit oluhub do mongoi pomurimon kopio do kosonongo’ di tua-ua’ do hilo’, nga’ maha’ di nokoiyon iyolo’d hilo’ om rinaag iddi diyolo’ i tana’ ku; om sinosomu’ diyolo’ i pomogunan do pinatahak ku dot id diyolo’. ⁸ A’ no minuhot it imam ondung hinonggo oku, i TUHAN diyolo’. Tu’ iri piya it imam di mogobi-obi’ doho’ nga’ a’ i’ kotutun doho’. Om i boyoon nga’ suminaap i’ doho’; iri piya i nabi nga’ minimboros ngai’ i’ dot id suang do ngaran di Baal om tuminuku’ dot id tingolig dit aiso’ o guna’,’’ ka dau. ⁹ Boros kad TUHAN, ’’Om moro-boros oku po kawagu do pasala’ di tulun ku, om butusan ku i sinakagon diyolo’. ¹⁰ Pakayaai pogi’ dokoyu do hilo’d Siprus, i ponong hilo’d kotonobon, om ponuhu’ kou’d tulun do kumaa do hilo’d pomogunan do Kidar, i ponong hilo’d koulayon. Om okito indo kopio dokoyu, dot aiso’ i’ o nosiliu do miagal diri do mantad po di gulu po. ¹¹ Aiso’ i’ o bansa’d suwai do nokoumbal do pinopoolon di ponokokinorohingan diyolo’, do mulong piya dot okon iri ko’ Kinorohingan dit otopot. Nga’ tulun ku nopo om minagada’ i’ doho’, i Kinorohingan di minanahak diyolo’ do karayahan, om tuminuku’ nogiddi dot id tingolig dit a’ milo do momonsoi’d nunu-nunu. ¹² Om suhuon ku nondo ilo tawan do gumuyu’, om gumogor dot osuayan ¹³ tu’ duwo noddi o dusa do nowonsoi di tulun ku: tuminongkiad iyolo’ doho’, i tudan do waig di manahak do koposion dot id tulun; om minongukad iyolo’d kulam do maan diyolo’ do diyolo’, i kulam dit a’ timparanan do waig,’’ ka dau. ¹⁴ ’’Okon i’ ko’ turipon ot Israil, om okon ko’ tanak do turipon. Nga’ nokuro’ddi tu’ gusaon iyau di pisangod dau? ¹⁵ Miagal pod singa i pisangod dau do minggarom, om siniliu diyolo’ do tana’d kowotuan i tana’ dau, om i kabandaran dau nga’ naayi’ pod nosorob, om nopogitotongkiadan. ¹⁶ Om iri no tulun do Mimpis om Tapanhis o minamalagas do tulu dot Israil. ¹⁷ Okon toi ko’ iya’ i’ o pinoporikot diti dot id tinan nu, tu’ tuminongkiad ko i’ doho’, i TUHAN om Kinorohingan nu, di maso ku do minomoyo’ diya’ do hilo’d ralan? ¹⁸ Nunu daa o nongoi nu do hilo’d Masir? Mongoi ko daa inum do waig di Bawang do Nil? Om nunu daa o nongoi nu do hilo’d Asur? Mongoi ko daa inum di waig di Bawang dot Iprat? ¹⁹ Iri i karaaton nu o momohukum diya’, om i monginggorit diya’ nga’ iri i minagada’ ko doho’. Om koilo ko nogindo ondung songkuro noo o kosusao’ om karaato’ do tumongkiad doho’ om a’ momusou doho’, i TUHAN om Kinorohingan nu. Iyoho’ no i TUHAN, i Kinorohingan nu, o minomoros diti; iyoho’ no i TUHAN, i Kinorohingan dit Asawat Kopio om it Osundu Kopio,’’ ka dau. ²⁰ Boros kad TUHAN, ’’Laid ko no dot a’ minsiriba’ dot id doho’, a’ ko mumboyo’ doho’ om a’ ko tumuku’ dot id doho’. Tu’ id pointikid-tikid do nulu-nulu dit akawas, om id sahau do koinsanai’d kayu dit okohob om hiri ko nod tumuku’ dot id tingolig di kororombung. ²¹ Tinanom ku iya’ do mantad id guas dot anggur di nopili’ no o kosonongo’. Nga’ antangai pogi’ o kinosilihon nu! Nosiliu ko iddi do guas dot anggur dit a’ osonong, om it aiso’ o guna’. ²² Om mulong piya dot isuon nu daa o kasalaan nu do sabun di koisu’ no kopio, nga’ okito kasai’ ku i’ i kasalaan nu. ²³ Om poingkuro ko’ddi do momoros dot a’ nu nososomu’ o tinan nu, om a’ ko insan tuku’ dot id Baal? Antangai ngai’ pogi’ i dusa nu do hilo’d rantai; soroho’ no ondung nunu i winonsoi nu. Miagal ko pod unta do tondu’ di lalang do mintangkus do mokiontoluhan, ²⁴ om i tumangkus do hilo’d tana’ do kowotuan dit oingou. Isai poddi o kopusus diti unta do tontok di maso kopio’ddi do mokiontoluhan? A’ no minog do minsusa’ do mogihum i tontoluhan di rumohian dau; tu’ posodia’ kasai’ nopo iyau do ngoyon solowoto’. ²⁵ Oi Israil, soroho’ no, kada’ pologoso’ dot apalasan o lapap nu, kada’ pologoso’ do tumuu o tatalanan nu dot ouru do minggusa’ do ponokokinorohingan. Boros ka nu, ’A! A’ oku no milo’d gumuli’. Tu’ osianan oku no di ponokokinorohingan ku, om woyo’ oku no diyolo’,’ ka nu,’’ ka dau. ²⁶ Boros kad TUHAN, ’’Poingkuro nopo dot ointingayam i gampanakau dit atangkap iyau, om miagal kou nogiddi iyokoyu, oi tulun dot Israil, om kohompit nogi’ i raja’ dokoyu, om i pagawai dokoyu, om it imam dokoyu om i nabi di tuuhoton dokoyu! ²⁷ Ointingayam ngai’ kou nopondo, iyokoyu i momoros do kayu o tapa’ dokoyu, om i watu o tina’ dokoyu. Osiliu nondo o miagal diti tu’ minogidu’ kou i’ do mantad id doho’, om a’ kou nogi’ guminuli’ dot id doho’. Nga’ soira’ nopo dot id suang kou’d kosusaan om minomolohou kou i’ doho’ do mongoi pamasi dokoyu. ²⁸ Hinonggo ngai’ no toi i tingolig di winonsoi dokoyu’ddi? Om soira’ nopo dot id suang kou’d kosusaan om pologoson nopo i tingolig dokoyu’ddi do mongoi pamasi dokoyu, do milo no iyolo’! Irad pod ginumu’ do bandar dokoyu o kogumuo’ do tingolig dokoyu, oi tulun do Yohuda! ²⁹ Nunu kopio o sala’ ku, gisom do suminaap kou doho’? ³⁰ Hinukuman ku daa iyokoyu nga’ aiso’ i’ o kinoonong-onongon; tu’ mada’ kou i’ do tudukan ku. Miagal kou po di singa di mumang, do minamatai di nabi di tuuhoton dokoyu. ³¹ Oi tulun dot Israil, pokinongou kou pogi’ do boros ku. Nokoumbal oku toi do miagal do tana’ di kowotuan dit otuong om i kikoligagaanan dot id dokoyu? Nga’ nokuro tu’ momoros kou dot, ’Nakalabus no iyahai, om a’ no iyahai rumikot dot id diya’,’ ka. ³² Kolihu toi o sumandak di pongillumis dau, om kolihu toi o tondu’ do kumawin di gaun dau do dong kumawin? Nga’ tulun ku nopo om a’ no ointob-intob o tadau do koloido’ do nokolihu doho’. ³³ Koilo kopio ko daa do mamayayat do ginawo di kouhangan nu. Om iri piya tongoondu’ do sundal dit araat no kopio nga’ kopinsingilo i’ do mantad id dokoyu. ³⁴ Notounan pod raha’ do tulun do mosikin om tulun dit aiso’ o sala’ ino pakayan nu; om okon i’ ko’ i raha’ do tulun di mananakau. Nga’ mulong piya do miagal kopio’ddi, ³⁵ nga’ momoros kou i’ dot, ’Aiso’ i’ o sala’ dahai om atantu’ no dot a’ i’ otogod o TUHAN dahai,’ ka dokoyu. Nga’ hukuman ku i’ iyokoyu tu’ olimon i’ dokoyu do nokowonsoi kou’d dusa. ³⁶ Pinoinsiriba’ dokoyu o ngaran dokoyu tu’ minokiuhup kou i’ do ponokokinorohingan do bansa’d suwai. Atantu’ no dot iman-imanon kou do Masir, do miagal di niman-iman kou dot Asur. ³⁷ Om mogidu’ kou indo do mantad id Masir, om pointudu’ pondo o tulu dokoyu dot ointingayaman! Tu’ iyoho’ no, i TUHAN, o minagada’ di sinondiu dokoyu; aiso’ indo o taanu-anu dokoyu do mantad id diyolo’,’’ ka dau.

¹ Boros kad TUHAN, ’’Ondung magada’ o kusai do sawo dau om tumongkiad nondo i tondu’, om osiliu do sawo do kusai’d suwai, om a’ noddi sawo dau di gulu koino-ino do ngoyon kawagu i tondu’ddi; tu’ kososomu’ iri diti pomogunan. Nga’ iya’ nopo oi Israil, om ogumu’ no kopio o nongoi nu uhang-uhango’, nga’ gumuli’ ko i’ daa’ddi kawagu dot id doho’! ² Antangai ngai’ pogi’ ilo timpak do konulu-nuluan. Haro po toi o kinoiyonon dot a’ nu noongoi kopogompohuwai do miagal do tondu’d sundal? Miagal ko po di tulun dot Arab do poirikau do hilo’d tana’ do kowotuan tu’ poirikau ko po do magandad do tulun di monokiuhang diya’ do hilo’d toning do ralan. Nososomu’ nu no kopio dino tampahu’ nu iti pomogunan. ³ Om iri noddi o kaantob-antob do rasam do mantad hilo’d tawan, om iri piya rasam di rumikot kasai’ do dongkararasaman nga’ a’ i’ korikot. Om kokitanan piya diya’ nga’ miagal poddi tondu’ do sundal; tu’ a’ ko no milo dot ointingayaman. ⁴ Om baino’ noddi om momoros ko i’ dot, ’Iya’ no o tapa’ ku, om nosianan ko doho’ do mantad dit okoro’ oku po. ⁵ Om a’ ko i’ bo otogod kasai’; om a’ ko araatan doho’ do gisom dot alaid,’ ka nu. Iyo noddi o boros nu, oi Israil, nga’ minagayi-ayi’ ko i’ do miningwonsoi dit araat,’’ ka dau. ⁶ Tontok dit i Yosia o raja’, om boro-boros no o TUHAN dot id doho’ do poingkaa, ’’Nokito nu no i winonsoi dot Israil, i tondu’ dot a’ otorodok diri? Tuminongkiad iyau doho’, om miagal pod wowonsoyon do tondu’d sundal o wonsoyon dau do hilo’d timpak di konulu-nuluan dot asawat om id sahau do pointikid-tikid do kayu dit okohob. ⁷ Ondos ku daa om gumuli’ nondo iyau dot id doho’ do nongowonsoi ngai’ dau o miagal diri. Nga’ a’ i’ iyau guminuli’, om i Yohuda, i tobpinai dau’d tondu’ dit a’ otorodok, nga’ nokokito nogi’ ngai’ddi. ⁸ Om nokito nogi’ do Yohuda do nadaan ku ot Israil om pinotongkiad ku tu’ suminiliu i’ iyau do sundal. Nga’ a’ nogi’ ooris o Yohuda, i tobpinai dot Israil do tondu’, suwai ko’ suminiliu nogiddi iyau do sundal, ⁹ om a’ i’ iyau ointingayaman. Sinosomu’ dau iti pomogunan om minagampahu’ iyau tu’ tuminuku’ i’ iyau do watu om kayu. ¹⁰ Om mulong piya do miagal tomod diri o nowonsoi dau, nga’ minsorupai-rupai po o Yohuda, i tobpinai dot Israil do tondu’, do gumuli’ dot id doho’; nga’ maan i’ toomod dau iri om aiso’ i’ o katapatan. Iyoho’ no, i TUHAN o minomoros diti,’’ ka dau. ¹¹ Om sunudai oku noddi do TUHAN do mulong piya do nokotongkiad dau ot Israil nga’ osonong-sonong po ot Israil ko’ mantad do Yohuda, i tondu’ dot a’ otorodok diri. ¹² Om suhuo’ oku nod TUHAN do mongoi polombus do boros dot id Israil do poingkaa, ’’Oi Israil, it a’ otorodok, guli’ no dot id doho’. Tu’ obinsianan oku i’ om a’ oku i’ tumogod diya’ do gisom dot alaid. ¹³ Nga’ okuno’ no do nakasala’ ko om okuno’ no do suminaap ko’d TUHAN, i Kinorohingan nu. Okuno’ no do pinatahak nu dot id ponokokinorohingan do bansa’d suwai o kosianan nu di hilo’ ko’d sahau do pointikid-tikid do kayu dit okohob, om okuno’ no dot a’ ko minumboyo’ do pinonuhuan ku. Iyoho’ no i TUHAN, o minomoros diti,’’ ka dau. ¹⁴ ’’Guli’ kou no dot id doho’, oi tulun dit a’ otorodok. Tu’ iyoho’ i’ o sanganu dokoyu. Om ongoyon ku indo o tiso’ dokoyu do mantad id pointikid-tikid do bandar, om duwo o tulun do mantad id pointikid-tikid do payat. Om pogulion ku nogindo iyokoyu do hilo’d Nuluhon do Sion. ¹⁵ Om onuan ku indo iyokoyu do pomorinta’ dit otorodok dot id doho’. Om momorinta’ nondo iyolo’ dokoyu do mikuwo’d toilaan om ginawo di kosuhut. ¹⁶ Om kogumu’ kou nopondo do hiti’d pomogunan diti om a’ nondo o tulun mimboros do pasal di Kaban do Tumpongo’d TUHAN. Om a’ iyolo’ kosorou’ddi; tu’ a’ no iyolo’ minog do momonsoi kawagu do Kaban do Tumpongo. ¹⁷ Om orikot nopondo o maso’ddi om roitan nondo o Yorusalim do ’Tirikohonon do TUHAN di don raja’’ om oinsanan nopondo o bansa’ do tumimung do hiri do tumuku’ dot id doho’. Om a’ nondo iyolo’ momonsoi do tumanud dit osorou diyolo’ dit araat om it obinsurilog. ¹⁸ Om sumugku’ nondo ot Israil do Yohuda, om miandad nopondo iyolo’d muli’ do mantad id pomogunan di pinananggayan do pisangod di hilo’d utara. Om gumuli’ nondo iyolo’ do hilo’d pomogunan di pinatahak ku di taki-aki dokoyu do maan do tungkusan,’’ ka dau. ¹⁹ Boros kad TUHAN, ’’Orohian oku daa do manganu diya’, oi Israil, do maan ku do tanak ku, om orohian oku do patahak dot id diya’ do pomogunan dit osonong kopio, i pomogunan dit olumis no kopio do hiti’d pomogunan. Orohian oku daa do roitan oku diya’ do tapa’ nu, om a’ ko nondo tumongkiad doho’. ²⁰ Nga’ miagal ko nopo di tondu’ dot a’ otorodok dot id sawo dau tu’ a’ ko i’ tuminorodok dot id doho’. Iyoho’ no i TUHAN, o minomoros diti,’’ ka. ²¹ Haro o tohio dot orongou do hilo’d timpak do konulu-nuluan; iri nopo nga’ tihad do tulun dot Israil do mokitulung tu’ linihuan i’ diyolo’ o TUHAN, i Kinorohingan diyolo’. ²² Guli’ kou no, iyokoyu i tuminongkiad do TUHAN; tu’ lingasan kou i’ dau om potorodokon kou dau. Boros ka dokoyu, ’’Hati no iyahai, rumikot no iyahai dot id TUHAN, tu’ iyau no o Kinorohingan dahai. ²³ A’ tomod i’ iyahai notulung di podsusubak dahai do hilo’d timpak do konulu-nuluan. Tu’ tadon nopo di monulung dot Israil om mantad no dot id TUHAN, i Kinorohingan dahai. ²⁴ Nga’ iri nopo podsubak do Baal, i tingolig di mongintingayam diri, om minanagak noo do koinsanai di piningudipanan di taki-aki dahai do minanganu do mantad poddi gulu po; i baanan do dumba’ om sapi’, om i tangaanak dahai do kusai om tondu’. ²⁵ Om pologoso’ nopo iyahai do mamabo do kointingayaman, om pologoso’ nopo iyahai dot oindaraat. Tu’ nokowonsoi no iyahai’d dusa dot id TUHAN, i Kinorohingan dahai — iyahai om i taki-aki dahai; om a’ i’ iyahai insan umboyo’ di ponuhuan dau,’’ ka diyolo’.

¹ Boros kad TUHAN, ’’Oi tulun dot Israil, ondung orohian kou’d gumuli’, om guli’ kou no dot id doho’. Om ondung pataamon dokoyu i tingolig di karaatan ku, om tumorodok kou dot id doho’, ² om milo kou no do sumumpa’ dot id suang do ngaran ku. Om oinsanan nopondo o bansa’ do mokibarakat doho’, om mamarayou nondo iyolo’ doho’,’’ ka dau. ³ Boros kad TUHAN dot id tulun do Yohuda om id tulun do Yorusalim, ’’Roduwo’ no dokoyu i tana’ dokoyu dit a’ po naradu; om kada’ kopio dokoyu pasasado’ i linsou dot id pogialatan do rugi. ⁴ Sulungon no kopio dokoyu i batos dokoyu dot id doho’, i TUHAN dokoyu, om patahakon no dokoyu o tinan dokoyu dot id doho’, oi koinsanai’d tulun do Yohuda om tulun do Yorusalim. Tu’ ondung amu’, om sumikit nondo do miagal do tapui i kototogod ku tu’ araat i’ i nongowonsoi dokoyu. Om sumikit nondo iri om aiso’ no o milo do momisok,’’ ka dau. ⁵ Pounio’ no i torumpit do pointongkop diti pomogunan! Pomoros no dot opuhod om it oimuayan kopio. Suhuon no i tulun do Yohuda om i tulun do Yorusalim do manangkus do mongoi’d hilo’d kabandaran di kitolig. ⁶ Potuduko’ no i ralan do kumaa do hilo’d Sion, i nulu-nulu do TUHAN, kolomus no do mongoi’d hiri’d aiso’ o koligagaanan. Kada’ no pingkalaid! Tu’ porikot o TUHAN do kosusaan om karaagan dit awagat kopio do mantad hilo’d utara. ⁷ Miagal pod singa di mimbulai do mantad hiri’d linisok dau i gampamaraag do bansa’ do rumikot. Rumikot no iyau do mongoi pamaraag do Yohuda. Om osiliu pondod pogun i bandar do Yohuda om aiso’ o miyon do hilo’. ⁸ Iyo nopoddi om panampakai kou nod pakayan do mogihad, ihad kou no, om minglompud nod mihad tu’ a’ po nokotongkiad do Yohuda i kototogod do TUHAN dit a’ ogina-gina’. ⁹ Boros kad TUHAN, ’’Tadau nopondoddi om atagakan nopo do kosioho’ i raja’ om i pagawai diyolo’; om iri piya it imam nga’ gagaran i’ om i nabi nga’ ongosuayan nopondo ngai’,’’ ka dau. ¹⁰ Om boros kangku’ddi, ’’Naakalan nu no kopio iti tulun do Yohuda om tulun do Yorusalim, oi TUHAN, it Asawat Kopio. ’Haro kosimbayanan,’ ka nu, om maso ko’ potipatayon no iyahai di gayang,’’ kangku. ¹¹ Om rumikot nondo o maso dot osunudan iti tulun do Yohuda om tulun do Yorusalim do rumikot i tongus dot alasu’ kopio do mantad hilo’d tana’ do kowotuan do pakayaan ponong id diyolo’. Om okon no ko’ i ribut di koubasanan, i maan nod ponilib di tapol, ¹² tu’ iri nopo tongus dot opuhod do rumikot om suhuon id TUHAN. Tu’ TUHAN no o paratu’ do hukuman dot id tulun dau. ¹³ Antangai pogi’, nga’ miagal po moti’d haun i pisangod do rumikot. Om iri nopo korita’-kuda’ diyolo’ do don sumasangod nga’ miagal pod ribut di monomporiu-riu, om i kuda’ nga’ ongosiau po ko’ kondiu. Obungou toko’ no! Apatai toko’ no! ¹⁴ Oi Yorusalim, pataamo’ no it araat do mantad id ginawo nu om apasi ko i’. Songkuro po o koloido’ nu do poopi’ dit araat do hino’d ginawo nu? ¹⁵ Nokorikot no i tulun do poporomut do habar do mantad hilo’d bandar do Dan om i mantad hilo’d konuluhanan dot Ipraim do mongoi posunud do habar dot araat. ¹⁶ Nokorikot no iyolo’ do mongoi popoinsan do koinsanai’d bansa’ om momisunud do tulun do hilo’d Yorusalim do haro o pisangod do rumikot do mantad id pomogunan dot osodu’. Om mimpangkis nondo i pisangod do pangkis do monokisangod dot id bandar do Yohuda ¹⁷ om turungkuon nondo diyolo’ o Yorusalim do miagal pod tulun di madtamong do tumo, tu’ suminaap i’ do TUHAN i bandar do Yohuda. TUHAN no o minomoros diti. ¹⁸ Oi Yohuda, iya’ i’ o pinoporikot diti kosusaan dot id diya’. Iri i kowoyo-woyoo’ do koposi-posion nu o nokobungou do koinsanai’d koinggoritan do minonobok do ginawo nu. ¹⁹ Tumongob no kopio o ginawo ku om oudipon o topurimanan ku. A’ oku no milo’d mundorong tomod motod-kotod poo o kangkab ku tu’ orongou ku no o torumpit om i pinongkisan do mongoi sangod. ²⁰ Mogisuhu-suhut nopo o kosusaan do rumikot, naayi’ pod nangaraag o pointongkop diti pomogunan. Tu’ sigog i’ do nongoi raago’ i kiim ku, om nopogikinis-kinis nopo i kain di kiim. ²¹ Songkuro po o koloido’ ku’dti do montong-ontong do tulun do mogisasangod om mongou-rongou do tuni do torumpit di kobosuk o kopuhodo’? ²² Boros kad TUHAN, ’’Basug no kopio i tulun ku tu’ a’ i’ iyolo’ kotutun doho’. Miagal no iyolo’d tangaanak di basug, tu’ aiso’ i’ o toila-ilaan. Ongoilo tomod daa iyolo’ do mingwonsoi dit angaraat, nga’ aiso’ indo o toila-ilaan do momonsoi’d osonong,’’ ka dau. ²³ Ontong oku nodti pomogunan, om aiso’ no o suang, otuu po tomod. Tingaha’ oku nod hilo’d tawan, om aiso’ no o tanawau. ²⁴ Ontong oku no di konuluhanan dit angakawas, om mingguyu’ po tomod, om i konulu-nuluan nga’ iyo pod kiat-kiatan do gumuyu’. ²⁵ Aiso’ no o tulun dot okito ku; om iri piya tombolog nga’ nongkotulud ngai’ no. ²⁶ Nosiliu pod kowotuan i tana’ dot oluhub; om i kabandaran nga’ nangaraag, tu’ otogod no kopio o TUHAN di tulun dau. ²⁷ (Nokoboros nod TUHAN dot oinsanan nopondo iti pomogunan dot osiliu do tana’ dit a’ sunian, nga’ a’ i’ mando dau raagon kopio.) ²⁸ Tumongob nondo iti pomogunan; om tumuong ilo tawan. Tu’ nokoboros nod TUHAN om a’ no dau simbanan i natantu’ mantad dau do wonsoyon dau. Natantu’ no dau i wonsoyon dau om a’ no kopio dau wolihan iri. ²⁹ Om mogidu’ ngai’ nopondo o tulun om songhika-hika poo do korongou do tulun di songinsakai’d kuda’ om i tulun do mamamana’. Haro i’ diyolo’ o mongoi’d hilo’d puru’, om haro o mongoi indakod di kapampangan. Opogiiduan pondo i kabandaran, om aiso’ no o miyon kawagu’d hiri. ³⁰ Obungou ko no, oi Yorusalim! Nokuro tu’ aragang o pakayon nu? Nokuro tu’ manampakai ko’d rasuk dot aragang, om mongillumis do tinan do tamas om pirok o pongillumis, om nokuro tu’ saaton nu o mato nu? Aiso’ no o kootuk-otukon dino pongillumis nu! Tu’ nadaan ko no di minongoi daa uhang-uhang diya’, om pokipapatayan ko noddi diyolo’. ³¹ Nokorongou oku do giniakan do miagal di giak do tondu’ do mogkosusu, i giniakan do miagal do tondu’ dit omulok po do mogkosusu di tanak dau dot id gulu. Iri no o giniakan do Yorusalim do mabang-kabang poo do momuhobo, i popinghiwor pod longon do mimboros do, ’’Nobungou oku no! Tu’ rumikot no iyolo’ do mongoi pamatai doho’,’’ ka.

¹ Pingwayaai ngai’ no dokoyu i ralan do hino’d bandar dokoyu, oi tulun do Yorusalim! Pikoroontong kou no dot id posorili’ dokoyu! Antangai no kopio dokoyu! Haro toi o nokito dokoyu dot ongosongulun piya dit otulid o ginawo om i tumotos do tumorodok dot id Kinorohingan? Ondung haro o tokito dokoyu om ompunan i’ do TUHAN o Yorusalim. ² Mulong piya do momoros kou do tumuku’ kou dot id TUHAN nga’ maan i’ dokoyu toomod iri. ³ Otopot nopo kopio om kotorodoko’ o tihumon do TUHAN. Binobog kou dau nga’ a’ i’ dokoyu pinusou iri; om pinokorualan kou dau nga’ minada’ kou i’ do tudukan. Tu’ pinokodou tomod nogi’ dokoyu o ginawo dokoyu om a’ kou kuminorologo do dusa dokoyu. ⁴ Om pomusorou oku noddi do poingkaa, ’’A, iyolo’ nopodti om rayat noo, om aiso’ i’ o toila-ilaan. Tu’ dangkababasug i’ do kowoyo-woyoon diyolo’; om a’ iyolo’ koilo do korohian do Kinorohingan diyolo’, om i ponuhuan do TUHAN diyolo’d momonsoi. ⁵ Mongoi oku nondo solowot di tulun dit angagayo o pangkat om moro-boros oku nondo diyolo’. Tu’ atantu’ no do koilo i’ iyolo’ ondung nunu i korohian do Kinorohingan diyolo’ om i ponuhuan do TUHAN diyolo’d momonsoi,’’ kangku. Nga’ iyolo’ nogi’ nga’ oinsanan nopo do mada’ do porintaon do TUHAN om a’ iyolo’ mumboyo’ dau. ⁶ Om gowoi poddi om patayon iyolo’ di singa di mantad hilo’d gouton; om ngoyon iyolo’ pogianato’ di toni do mantad hilo’d tana’ do kowotuan do gisom dot opogitobilang-bilang iyolo’. Om iri tontokinon nga’ minghombo nondo do hiri’d bandar diyolo’ do mogihum do takanon. Ondung sumoliwan o tulun do mantad id walai diyolo’ om opogianat no tu’ adalaan no kogumu’ i dusa diyolo’ om asaru’ iyolo’ do tumongkiad do Kinorohingan. ⁷ Om ponguhot no o TUHAN do poingkaa, ’’Nokuro daa tu’ ompunan ku po o dusa di tulun ku? Tu’ notongkiadan oku no diyolo’ om tuminuku’ nogiddi iyolo’ dit okon ko’ Kinorohingan. Nonuan ku i’ i tulun ku do taakanon do gisom do nayahan tomod iyolo’, nga’ minagampahu’ i’ iyolo’, om hiri no iyolo’d walai di sundal do monorimo-rimo. ⁸ Miagal po iyolo’ di kuda’ do tontoluhan dit olomu’ om it a’ ogina-gina’ do rumahi do mokiongoondu’; tu’ orohian ngai’ nopo iyolo’ do sawo di tambalut diyolo’d kusai. ⁹ Om a’ ku po tuu daa hukuman iyolo’ dot iyo kopio’ddi o winonsoi diyolo’ om a’ oku po tuu daa sumuli’ do bansa’ do miagal diri? ¹⁰ Porikoton ku nondo o pisangod do mongoi pongumpadan di guas dot anggur diyolo’, nga’ a’ indo momunso kopio. Suhuon ku nondo i pisangod do monutu’ di raan dot anggur tu’ okon i’ ko’ doho’ di raan. ¹¹ Tu’ minagakal no kopio doho’ i tulun dot Israil om i tulun do Yohuda. Iyoho’ no i TUHAN, o minomoros diti,’’ ka dau. ¹² Suminaap do TUHAN i tulun do songonuon do TUHAN. Boros ka diyolo’, ’’Aiso’ i’ bo ot oontok do kosusaan om aiso’ o mogisasangod om mononglous,’’ ka. ¹³ - ¹⁴ Minomoros iyolo’ dot iri nopo nabi om miagal nod ribut om pinoboros diyolo’ dot aiso’ o boros do TUHAN do norongou diyolo’. Om boros kaddi do TUHAN, it Osundu Kopio, dot id doho’, ’’Oi Yoromia, silihon ku nondo do miagal do tapui o boros ku do hino’d kabang nu tu’ iyo kopio iddi o pinoboros di tulun ku. Om iti nopondo bansa’ om miagal po di siduwon: om sorobon nondo iyolo’ di tapui do gisom dot ouu,’’ ka dau. ¹⁵ Oi tulun dot Israil, porikot no o TUHAN dot iso’ o bansa’ do mantad hilo’d sodu’ do mongoi panangod dokoyu. Bansa’ nopoddi om hino no do mantad poddi gulu po, om boros diyolo’ nga’ a’ i’ dokoyu osuhutan. Iyolo’ nopo om ongokoris kopio koulun. ¹⁶ Om iri nopo gampamana’ diyolo’ nga’ gunsiou ngai’ nopo, om mimpatai nopo iyolo’ om aiso’ o kosianan. ¹⁷ Om kanon ngai’ nopondo diyolo’ i tua’ do tanom-tanom dokoyu om i taakanon dokoyu; om patayon diyolo’ i tangaanak dokoyu’d kusai om tondu’. Sumbolion ngai’ nondo diyolo’ i baanan do dumba’ om sapi’ dokoyu, om ngoyon diyolo’ umpadano’ i kabun dot anggur om kayu sedar dokoyu. Om iri po bandar dit ongkitolig di sondi-sondihon daa dokoyu nga’ raagon ngai’ nopondo diyolo’. ¹⁸ Boros kad TUHAN, ’’Nga’ tontok piya do maso’ddi nga’ a’ ku i’ punsoon kopio i tulun ku. ¹⁹ Nga’ muhot nopo iyolo’ ondung nokuro tu’ winonsoi ngai’ ku o miagal diri om sunudan no iyolo’, oi Yoromia, do poingkuro nopo iyolo’ do tuminongkiad doho’ om minodsubak do ponokokinorohingan do bansa’d suwai di hilo’ pod pomogunan diyolo’, om miagal no iyolo’ddi dot osiliu’d turipon do bansa’d suwai dot id pomogunan dit okon ko’ diyolo’,’’ ka dau. ²⁰ Boros kad TUHAN, ’’Sunudan no i sinakagon di Yakub, i poundorong do hilo’d Yohuda do poingkaa: ²¹ Pokinongou kou no kopio, iyokoyu i tulun do basug om lowong! Iyokoyu i kimato nga’ a’ i’ kokito, om i kitolingo nga’ a’ i’ korongou. ²² Iyoho’ no i TUHAN; nokuro tu’ a’ kou oronok doho’? Nokuro tu’ a’ kou i’ gagaran dot ooris dot id toguang ku? Okon toi ko’ iyoho’ o minomonsoi dilo pasir do hilo’d tisan do rahat do sumiliu do wolit dilo rahat, i wolit dot a’ milo’d tolibambanan do gisom dot alaid? Mulong piya do gumayo o tumbak nga’ a’ i’ katalib di wolit diri. ²³ Nga’ iyokoyu nopo om okodou i’ o ginawo om obinsaap. Suminansala’ kou nogi’ om tuminongkiad kou doho’. ²⁴ A’ kou i’ minomusorou do momusou doho’ do mulong piya do porikoton ku i rasam do tontok di lumahanggang o roun do kayu, om tontok di momiroun kawagu o kayu, om onuan ku iyokoyu do maso do kapangamatan do pointikid do toun. ²⁵ Nga’ iri i dusa dokoyu o minangantob ngai’ dit ongosonong do rumikot dot id dokoyu, gisom dot a’ kou’ddi nokopuriman do kosonongo’ddi. ²⁶ Oi tulun ku, haro o tulun dot araat do poinrolot dokoyu. Om poingkuro nopo i tulun do madtamong do lawa’ di pamalawa’ dau do tombolog, om iyo no iyolo’ddi do pataan do lawa’ do pamalawa’ do tulun. ²⁷ Tu’ poingkuro nopo i tulun di mamalawa’ do tombolog do momonu’ di kukurungan do tombolog, om iyo noddi iyolo’ do momonu’ di walai diyolo’ do konunu-nunuan di pinanakau diyolo’. Om iyo noddi o kinosilihan diyolo’d tulun di kikuasa’ om kaya’; ²⁸ om nongkolombon diri iyolo’ om osimbayan. Aiso’ no o kopupuson di wowonsoyon diyolo’ dot araat. A’ i’ iyolo’ papatahak dot id tangaanak dit aiso’ o molohing dit apatut daa diyolo’ dot aanu om a’ iyolo’ mogobi’ do tulun dit ulak-ulakan. ²⁹ Nga’ iyoho’ nondo, i TUHAN, o momohukum diyolo’ tu’ iri ngai’ o kopomohukuman ku, om sulian ku o bansa’dti. ³⁰ Nosiliu no it araat kopio om i koronob kopio do hiti’d pomogunan diti; ³¹ tu’ aiso’ no o poboroson do nabi dot okon ko’ tudut; om iri po imam nga’ moyo’ nopo di ponuhuan di nabi, om iyokoyu i tulun ku nga’ orohian i’ do miagal diri. Nga’ nunu no ma daa’ndo o wonsoyon dokoyu dot opupusan ngai’ iri,’’ ka dau.

¹ Oi tulun do Binyamin, panangkus kou no do mongoi intirung! Poggidu’ kou no do mantad id Yorusalim! Pounio’ no o torumpit do hilo’d Tokua om polisuno’ no dokoyu o tapui do maan do pogintutunan do hilo’d Bait-Kirim. Tu’ motirikot no o kosusaan om i mamaraag do mantad hilo’d utara. ² Olumis tomod daa i bandar do Sion, nga’ oruhai no dot araag iri. ³ Om rikoton nondo iri do raja’ do miwoyo’ di soudor diyolo’. Om powonsoyon nondo diyolo’ o kiim diyolo’ do pointutuk di bandar, om sompori-pori nopondo do powonsoi’d kiim do hiri’d kinoiyonon do korohian diyolo’. ⁴ Om momoros nondo iyolo’ do poingkaa, ’’Sodia’ no do mongoi sangod do Yorusalim! Ngoyo’ toko’ iyolo’ songodo’ do pitangaadau’d baino’!’’ ka no diyolo’. Nga’ momoros indo iyolo’ do, ’’Nakalaid noti, tu’ osiriba’ no ilo tadau, om sangai nga’ anaru no, tu’ osodop noddi. ⁵ Mongoi toko’ i’ sangod do dongotuong; om raagon toko’ i’ i kuta’ do pogintirungan do hiri’d bandar,’’ ka diyolo’. ⁶ Tu’ nosuhu’ nod TUHAN, it Osundu Kopio, i piro-piro raja’ do managad do kayu om potimbun do tana’ do maan do tolig om oturungku’ i’ o Yorusalim. Om nokoboros no o TUHAN do poingkaa, ’’Hukuman ku nondo iti bandar tu’ ogumu’ no kopio o tulun do mongulok-ulok. ⁷ Poingkuro nopo i tudan do waig do poluyung kasai’ do waig dit oniting om iyo nogiddi o Yorusalim do posoliwan kasai’ dit araat. Kororongit po om karaagon ot orongou ku dot id bandar diri; toruol po om suhat o tokito ku do hinonggo nopo. ⁸ Oi tulun do Yorusalim, pologoso’ no do sumiliu do popoinsan diya’ o koinsanai’d kosusaan diri, tu’ ondung amu’ nga’ tongkiadan ku no moti’ iyokoyu; om silihon ku do tana’ dit a’ sunian om aiso’ o tulun do mongiyon-ngiyon diti bandar dokoyu,’’ ka dau. ⁹ Boros kad TUHAN, it Osundu Kopio, dot id doho’, ’’Aayi’ nopondo ot Israil dot upuon do tulun, do miagal di guas dot anggur do hiri’d kabun di naayi’ do mongupu’ o tua’. Iyo nopoddi, om ngoyon ngai’ no posio’ i tulun do daamot pod haro o maso,’’ ka dau. ¹⁰ Om boros kangku do suminimbar, ’’Isai daa o mokinongou doho’ do moro-boros oku piya do popoinsan diyolo’, oi TUHAN? Ongokodou ngai’ i’ o ginawo diyolo’ om mada’ do mokinongou’d boros nu; pingirakan nogi’ diyolo’ i ponuhuan nu doho’d popoboros. ¹¹ Iyoho’ nga’ a’ no kogintoron tu’ iyoho’ piya nga’ obinsuhu’ i’ di kototogod nu diyolo’, oi TUHAN,’’ kangku. Om boros kaddi do TUHAN dot id doho’, ’’Pourobuson nopo i kototogod ku dot id tangaanak di hilo’d ralan om id tangaanakwagu di mogititimung. Atanggayan ngai’ nopondo i mogisawo-sawo om iri piya i komolohingan no nga’ aiso’ no ot oluon. ¹² Tahakon nondo i walai diyolo’ dot id tulun do suwai, om iyo nogiddi i koumaan om i sawo diyolo’. Om hukuman ngai’ ku no i tulun do hiti’d pomogunan diti. ¹³ Oinsanan nopo o tulun dit angagayo om it ongokoro’ po dot a’ otulid o pogigihum do tusin; iri piya nabi om it imam nga’ monipu’ i’ di tulun. ¹⁴ Miagal pod nagaru-garut no toomod i suhat do tulun ku do sorohon diyolo’; pagaan-gaanon diyolo’. ’Osonong-sonong ngai’ i’ bo,’ ka no diyolo’, om maso ka dot aiso’ nogi’ o kasanang-sanangai. ¹⁵ Apatut daa dot ointingayaman iyolo’ tu’ minomonsoi i’ iyolo’ di wowonsoyon dit araat. Nga’ a’ tomod i’ iyolo’ ointingayaman; mogot po om karagang po o rabas diyolo’ dot ointingayaman. Om gowoi pondo om ahaba’ iyolo’ do miagal di tulun do suwai di nahaba’; om soira’ nopod hukuman ku iyolo’ om iri no o kopupuson do topud-opud diyolo’. Iyoho’ no i TUHAN, o minomoros diti,’’ ka dau. ¹⁶ Boros kad TUHAN dot id tulun dau, ’’Ingkakat kou no do hilo’d pogitotongkiadan do ralan om antangan no kopio i ralan. Uhoton no i ralan di gulu-gulu po om uhoton i ralan dit osonong kopio. Susui no do ralan diri om osimbayan i’ o koposi-posion nu,’’ ka dau. Nga’ boros ka diyolo’, ’’A, a’ i’ iyahai sumusui do ralan diri,’’ ka. ¹⁷ Om pomili’ noddi o TUHAN do tulun do sumiliu do madtatamong om popoinsan diyolo’ do mokinongou do tuni di torumpit do pogintutunan. Nga’ boros ka diyolo’, ’’A’ i’ iyahai mokinongou,’’ ka. ¹⁸ Om boros kaddi do TUHAN, ’’Pokinongou kou pogi’, oi koinsanai’d bansa’! Om ilaan no ondung nunu it osiliu dot id tulun ku. ¹⁹ Pokinongou no, oi pomogunan! Pomohukum ku nopo dit osorou diyolo’ do wonsoyon diyolo’, om karaagon tu’ minada’ i’ iyolo’ di ponudukan ku om a’ minumboyo’ di boros ku. ²⁰ Nunu daa o kopusou-pusou ku di kominyan di mantad hilo’d Siba di patahakon diyolo’ doho’, om i rampa do mantad hilo’d pomogunan dit osodu’? A’ oku i’ rumamit di porsombahan diyolo’ om a’ oku orohian di porsombahan di sorobon diyolo’. ²¹ Om gowoi pondo om potohubon ku om porotuon ku o tulun diti. Om matai ngai’ nopondo i tapa’ om i tangaanak, om i tambalut om i songkoduwo diyolo’,’’ ka dau. ²² Boros kad TUHAN, ’’Rumikot o tiso’ o bansa’ dit okoris do mantad id pomogunan do ponong hilo’d utara. Posodia’ no iyolo’ do mongigit di rapo-rapo do sumangod. ²³ Nongoigitan no diyolo’ i pana’ om i gayang; orongit tomod iyolo’ om aiso’ o kosianan diyolo’. Miagal pod ngorod do rahat o karangahan diyolo’ do songinsakai’d kuda’. Posodia’ no iyolo’ do mongoi panangod do Yorusalim,’’ ka dau. ²⁴ ’’Norongou no dahai i habar diri,’’ ka di tulun do Yorusalim, ’’om olomok po tomod ot opurimanan dahai tu’ aiso’ no o pokukurayan dahai. Poimponu’ po iyahai’d kopoddosian om toruol do miagal di tondu’ do mogkosusu. ²⁵ A’ no iyahai kobulun do mongoi’d hiri’d koomulakan do mongoi pimpanau do hiri’d ralan, tu’ ongkirapo-rapo ngai’ nopo i pisangod do posorili’ dahai om korolosi no kopio iyolo’ dahai,’’ ka diyolo’. ²⁶ Boros kad TUHAN dot id tulun dau, ’’Panampakai kou nod pakayan do mogihad om isis kou nod hilo’d pupuk. Pinglompud kou nod mihad do miagal do pogihad dokoyu do tanak do napatai dit iso’ i’ daa, tu’ sigog i’ moti’ do rumikot do mongoi panangod i mongoi pamaraag dokoyu,’’ ka dau. ²⁷ Om boros kaddi do TUHAN dot id di Yoromia, ’’Toinuo’ no i tulun ku, oi Yoromia, do miagal di monompipi’ ko’d basi’, om ilaan no kopio ondung okuro- kuro o kowoyo-woyoon diyolo’! ²⁸ Oinsanan nopo iyolo’ do tulun di sumasaap om osurilog, om i miagal pod tambaga’ om basi’ kokodou o ginawo. Angaraat ngai’ nopo o kowoyo-woyoon diyolo’, tu’ minghombo poo iyolo’ do mongoi popimboros di ponompuraraat do wokon. ²⁹ Alasu’ no tomod i puputan nga’ a’ i’ lumanak i basi’ dit a’ osonong om a’ midu’. Aiso’ i’ o koonong-onongon do momolidang do tulun ku tu’ a’ i’ poinsoduwon i tulun dit angaraat do hilo’. ³⁰ Om roitan nondo iyolo’ do rinomos, tu’ iyoho’ no i TUHAN, o magada’ diyolo’,’’ ka dau.

¹ - ³ Sinuhu’ oku’d TUHAN do mongoi do hiri’d wawayaan di Walai’d Sasambayangan dot Agayo, i hiri’d kosolokoyon do tulun do Yohuda do mongoi sambayang. Sinuhu’ oku dau do mingkakat do hiri om popolombus di poboroson do TUHAN, it Osundu Kopio, i Kinorohingan dot Israil, dot id diyolo’ do poingkaa, ’’Simbanai no ino kowoyo-woyoon dokoyu om ino kowoyo-woyoo’ do koposi-posion dokoyu, om pologoson ku i’ iyokoyu do miyon kasai’d hiti. ⁴ Kada’ ponongkuyaai di boros do tulun di magakal dokoyu do poingkaa, ’Aiso’ i’ o koligagaanan toko’! Tu’ iti nopo om Walai i’ do Sasambayangan dot Agayo di don TUHAN. Walai i’ kopio do TUHAN iti,’ ka diyolo’. ⁵ Posimbano’ no ino kowoyo-woyoo’ do koposi-posion dokoyu, om ino kowoyo-woyoon dokoyu. Wonsoyon no dokoyu it otulid dot id pogialatan dokoyu. ⁶ Tumingkod kou no do mongulok-ulok do bansa’d suwai, om i tangaanak dit aiso’ o molohing, om i tongoondu’ do nopuadan. Kada’ kou pamatai do tulun dit aiso’ o sala’ dot id pomogunan diti. Kada’ kou tuku’ dot id tingolig, tu’ karaag i’ moti’ dokoyu iri. ⁷ Ondung posimbanon dokoyu o kowoyo-woyoo’ do koposi-posion dokoyu om ino kowoyo-woyoon dokoyu, om pologoson ku no iyokoyu do momogun-mogun do hiti’d pomogunan di pinatahak ku dot id taki-aki dokoyu do sumiliu’d diyolo’d songonuon do gisom dot alaid. ⁸ Antangai pogi’ nga’ sumondiu kou i’ do boros dit a’ otopot. ⁹ Om manakau kou, om mamatai, om magampahu’, om mimboros dit a’ otopot, om papatahak kou do porsombahan dot id Baal, om tumuku’ kou dot id tingolig dit a’ dokoyu notutunan do mantad di gulu po. ¹⁰ Mingwonsoi kou po di wowonsoyon do karaatan ku, om rumikot kou nogindo do mongoi ingkakat do hiri’d toguang ku do hilo’d walai ku om momoros kou dot, ’Aiso’ i’ o koligagaanan dahai,’ ka dokoyu. ¹¹ Ondos daa dokoyu om lilisokon do gampanakau i Walai ku? Nokito ngai’ ku no i wonsoyon dokoyu. ¹² Ongoi kou no do hilo’d Silo, i kinoiyonon di pinili’ ku dit id gulu i’ kopio do tiyonon do sumambayang dot id doho’, om antangan no i winonsoi ku dot id kinoiyonon diri, tu’ minomonsoi id dusa i tulun dot Israil, i tulun ku. ¹³ Winonsoi ngai’ po dokoyu o dusa’ddi do mulong piya dot asaru’ tomod oku do momoros dokoyu, nga’ a’ kou i’ minokinongou. Om a’ kou suminimbar di linohou ku iyokoyu. ¹⁴ Iyo nopoddi om nunu nopo i winonsoi ku do hilo’d Silo om iri no o wonsoyon ku dot id Walai’d Sasambayangan dot Agayo diti sondihon daa dokoyu. Hiti nod kinoiyonon di pinatahak ku daa dot id taki-aki dokoyu do wonsoyon ku o miagal di winonsoi ku do hilo’d Silo di gulu po. ¹⁵ Om uyungon ku nondo iyokoyu do mantad id doho’ do miagal di minonguyung oku di tobpinai dokoyu, oi tulun dot Israil. Tu’ iyoho’ no i TUHAN, o minomoros diti,’’ ka dau. ¹⁶ Boros kad TUHAN, ’’Oi Yoromia, kada’ no sambayangai iti tulun. Kada’ no obiai iyolo’ do sumambayang, om kada’ pononsog doho’ tu’ a’ oku no mokinongou diya’. ¹⁷ Tu’ a’ nu toi okito ilo pingwonsoyon diyolo’ do hilo’d bandar do Yohuda om hilo’d karalan-ralanan do Yorusalim? ¹⁸ Mintimung pod siduwon i tangaanak, om modsidu i tongokusai, om iri no tongoondu’ om minggaur do tapung do wonsoyon do roti do patahakon di ponokokinorohingan di roitan diyolo’ do Raja’d Tondu’ do Surga. Om popintungu nogi’ iyolo’ do porsombahan do waig dot anggur do patahakon dot id ponokokinorohingan do mokimohilo-hilo’d pokoruol do ginawo ku. ¹⁹ Nga’ iyoho’ kopio tuu daa i pokorualan diyolo’ddi? Okon, suwai ko’ iyolo’ i’ om iyolo’ o pokorualan diyolo’ om it intingayamon diyolo’. ²⁰ Om gowoi pondo dot iyoho’ nondo, i TUHAN, it Asawat Kopio, o pourabus do kototogod ku dit a’ ogina-gina’ do hiti’d Walai’d Sasambayangan dot Agayo diti. Om pourobuson ku nogi’ iri dot id tulun om id tayam-tayam, om hiri piya’d kayu om hiri’d tanom-tanom nga’ pourobusan ku i’ do kototogod ku. Miagal pondo do tapui di molob-ngolob om it a’ milo’d pisokon o kototogod ku. ²¹ Oi tulun ku, haro i’ daa o porsombahan dit oyion nopod monorob do hiri’d pananaraban do porsombahan, om haro i’ daa i milo dokoyu’d akanon o wookon. Nga’ poboroson ku nopo iyoho’, i TUHAN, om mogot nogi’ do kanon ngai’ nopo dokoyu iri. ²² A’ ku i’ nonuan i taki-aki dokoyu dot oturan do pasal do porsombahan do sorobon ko’ nunu nopo o kowoyoon do porsombahan do suwai di pinosoliwan ku i’ iyolo’ do mantad hilo’d Masir. ²³ Nga’ sinuhu’ ku i’ iyolo’ do mumboyo’ doho’ om osiliu oku i’ do Kinorohingan diyolo’, om osiliu iyolo’ do tulun ku. Om sinunudan ku nogi’ iyolo’ do tumanud di pinonuhuan ku diyolo’, om osimbayan indo kasai’ iyolo’. ²⁴ Nga’ a’ i’ iyolo’ minumboyo’ om a’ minamadul diri. Suwai ko’ miningwonsoi nogi’ iyolo’ do nunu nopo i korohian do ginawo diyolo’ dit okodou om araat, om ruminuhang nogiddi o kararaat diyolo’ om a’ nogi’ iyolo’ suminonong. ²⁵ Mantad poddi suminoliwan do mantad hilo’d Masir i taki-aki dokoyu om gisom do baino’ om a’ oku no notingkod do popingrikot do susuhuon ku, i nabi ku dot id dokoyu. ²⁶ Nga’ aiso’ i’ o tiso’ dokoyu do minokinongou om aiso’ o minamadul. Tu’ ruminuhang nogi’ o kokodoho’ do ginawo dokoyu om pointalib nogiddi o karaato’ dokoyu ko’ i taki-aki dokoyu,’’ ka dau. ²⁷ Om boros kaddi do TUHAN dot id di Yoromia, ’’Poboroson ngai’ nu piya iti boros ku dot id tulun ku, oi Yoromia, nga’ a’ i’ iyolo’ mokinongou diya’; om lohowon nu no daa’ndo iyolo’ nga’ a’ i’ iyolo’ sumimbar. ²⁸ Iyo nopoddi om sunudan no iyolo’ dot iyolo’ no o bansa’ dit a’ mumboyo’ doho’, iyoho’ i TUHAN om Kinorohingan diyolo’; om a’ iyolo’ minsingilo do mantad id hukuman di pinaratu’ dot id diyolo’. Natagak no kopio o kotorodoko’ diyolo’. Tu’ a’ no diyolo’ insan do pinroitan iri,’’ ka dau. ²⁹ Boros kad TUHAN, ’’Pogihad kou no, oi tulun do Yorusalim! Pampadai no dokoyu ino tobuk dokoyu om taamon i’ do hilo’d tana’. Podsinding kou no do sinding do mogihad do hilo’d timpak do nulu-nulu. Tu’ pinotogod oku dokoyu, iyoho’ i TUHAN, om gowoi poddi om nadaan ngai’ ku o tulun ku. ³⁰ Araat tomod o winonsoi di tulun do Yohuda. Tu’ pinoiyon diyolo’ i tingolig diyolo’, i karaatan kopio ku do hiri’d Walai ku, om nososomu’ddi diyolo’ iri. ³¹ Minomonsoi iyolo’ do pananaraban do porsombahan di roitan do Topit do hilo’d Rantai do Hinom, do panaraban di tangaanak diyolo’ do maan do porsombahan di sorobon. Nga’ a’ ku i’ iyolo’ sinuhu’ do momonsoi do miagal diri, a’ oku i’ nokopomusorou do miagal diri. ³² Om gowoi pondo do rumikot o maso dot a’ roitan do Topit om a’ roitan do Rantai do Hinom o hilo’, suwai ko’ roitan nondo do Rantai do Pinonumbolian. Om hilo’ nondo o pamalabangan diyolo’ do tulun tu’ aiso’ no o pamalabangan do suwai. ³³ Om taakanon pondod tombolog om nintorusan i rata’ om aiso’ i’ o mongugad. ³⁴ Osiliu nondo do tana’ dit a’ sunian o pomogunan diri. Om pupusan ku nondo i pangkis dot otood om it ongosonong o ginawo om i karamayan do moginakan do dong kumawin do hiri’d bandar do Yohuda om hiri’d karalan-ralanan do Yorusalim.

¹ Tontok nopondo do maso’ddi om posoliwanon nondo do mantad hiri’d lobong diyolo’ o tulang di raja’ om i pagawai do Yohuda, om i tulang dit imam om i nabi om i tulun do suwai di poingiyon do hilo’d Yorusalim. ² A’ nogi’ otimung om a’ olobong i tulang diri suwai ko’ poinromos nopo do hiri’d tana’ do miagal pod rinomos. Songinsasad pondo iri dot id dotimpalangan do tadau, om tulan, om rombituon, i kinosianan om i sinubak di tulun diri di gulu po, om i nongoi diyolo’ pokitudukai om i tinuku’ diyolo’. ³ Om iri nopondo tulun di noolu-olu’ do mantad id bansa’ dot araat diri, i songingiyon dot id kinoiyonon di pinotompiasan ku diyolo’ om orohian nogi’ daa’ndo do matai ko’ mantad do poimpasi. Iyoho’ no i TUHAN, it Osundu Kopio, o minomoros diti,’’ ka dau. ⁴ Sinuhu’ oku’d TUHAN do momisunud di tulun dau do poingkaa, ’’Soira’ nopo dot aratu’ o tulun, om a’ toi iyau tumungag i’ kawagu? Om apalid nopod ralan o tulun om a’ toi iyau gumuli’ i’ kawagu? ⁵ Nga’ nokuro’ddi oi tulun ku, tu’ mogidu’ kou do mantad id doho’ om a’ no gumuli-guli’? Sumokot tomod kou nogi’ di tingolig dokoyu om mada’ nogi’ do gumuli’ dot id doho’. ⁶ Minokinongou tomod oku i’ daa, nga’ a’ kou i’ minomoros dit otopot. Aiso’ i’ o tiso’ dokoyu do monosol di kararaat dokoyu, om aiso’ o minuhot dot, ’Nunu o nowonsoi ku di nakasala’?’ ka. Tu’ sorompori-pori kou nopo do tumanud do korohian dokoyu, do miagal poddi kuda’ do tumangkus dot id pisangadan. ⁷ Iri piya i tombolog do roitan do luungon nga’ koilo i’ do maso do koulian, i sikukur, om i kolumpisau, om i wodik, nga’ koilo i’ do maso do koundolihan do tiyonon. Nga’ iyokoyu nopo, i tulun ku, om a’ i’ koilo dot oturan di ponuduk ku dokoyu. ⁸ Om poingkuro’ddi do momoros kou dot ongkitoilaan kou, om koilo kou dot oturan ku? Antangai pogi’ nga’ nosimbanan no moti’ di piro-piro gomponuduk do tugama’ di goudut i toturan ku. ⁹ Ointingayam nondo i tulun dokoyu dit ongoilo; om oborulong nopondo o pomusorou diyolo’ om kosulung iyolo’ do lawa’. Naadaan no diyolo’ i boros ku; om nunu po kaka daa’ddi o toilaan diyolo’? ¹⁰ Om gowoi pondo om patahakon ku’d wokon i tumo diyolo’ om patahakon ku dot id kusai’d suwai i sawo diyolo’. Tu’ oinsanan nopo, i tulun dot angagayo om it ongokoro’ po dot araat o ralan do mogihum do tusin. Iri piya nabi om it imam nga’ mongudut i’ di rayat. ¹¹ Om miagal pod nagaru-garut no toomod i suhat di tulun ku dot osorou diyolo’, tu’ pagaan-gaanon diyolo’. ’Osonong-sonong ngai’ i’ bo,’ ka no diyolo’, om maso ka dot aiso’ nogi’ o kasanang-sanangai. ¹² Oi tulun ku, nointingayaman kou i’ di nongowonsoi dokoyu dit angaraat tomod? Amu’! A’ tomod kou i’ nointingayaman; a’ i’ nakaragang o rabas dokoyu dot ointingayaman. Om gowoi pondo om ahaba’ kou do miagal di wokon tu’ nahaba’; om soira’ nopo do hukuman ku iyokoyu, om iri nondo o kopupuson do topud-opud dokoyu. Iyoho’ no i TUHAN, o minomoros diti. ¹³ Orohian oku daa do monimung di tulun ku, do miagal do tulun di monimung di tomoton; nga’ iyolo’ nopo om miagal noddi guas dot anggur dit aiso’ o tua’, om i guas dot ara dit a’ mongua’; om iri piya roun nga’ nongoriou no. Om gowoi poddi om pinologos ku o bansa’d suwai do mongoi pomorinta’ do pomogunan diyolo’,’’ ka dau. ¹⁴ ’’Nokuro tu’ poundorong tomod toko’?’’ ka di tulun di dong Kinorohingan do minonguhot. ’’Kainou pogi’ manangkus do mongoi’d hilo’d bandar dit ongkitolig, om baya’ nopod apatai toko’ do hilo’. Tu’ hukuman toko’ nod TUHAN, i Kinorohingan toko’, om noonuan toko’ no dau di kawanit do maan dot inumon, tu’ minomonsoi toko’ i’ do dusa dot id dau. ¹⁵ Minagandad toko’ daa do kosimbayanan om kolingasan nga’ aiso’ tomod nopo o kinotutukon diri, tu’ iri nogi’ it orongit o ruminikot. ¹⁶ Hilo’ nod bandar do Dan i pisangod toko’; om orongou toko’ no i gongus do kuda’ diyolo’. Gagaran ngai’ nopo o pointongkop diti pomogunan do korongou di gongus do kuda’ diyolo’. Tu’ nokorikot no i pisangod toko’ do mongoi pamaraag do pomogunan toko’ om i bandar toko’ om koinsanai di tulun do hilo’,’’ ka diyolo’. ¹⁷ Boros kad TUHAN, ’’Antang-antangan no, tu’ porikot oku do tulanut dot id pogialatan dokoyu, i tulanut do kapatai om it a’ milo’d limuon, om tindukon kou nondoddi,’’ ka dau. ¹⁸ A’ no milo do lingoson o katangaban ku; tu’ norualan no kopio o ginawo ku. ¹⁹ Pokinongou pogi’! Pointongkop nopodti pomogunan dot orongou ku i tulun ku do minggarang dot, ’’Okon noddi ko’ hilo’d Sion o TUHAN? Okon noddi ko’ hilo’ i raja’ do Sion?’’ ka no. Om boros kad TUHAN, i raja’ diyolo’ do suminimbar, ’’Nokuro giya tu’ pinotogod oku dokoyu? Tu’ tuminuku’ kou di tingolig dokoyu om tuminuku’ kou dot id ponokokinorohingan dit aiso’ o guna’?’’ ka dau. ²⁰ Om boros ka di tulun dot Israil, ’’Nakatalib no i maso do magadau, om nakatalib no i maso do mongomot, nga’ a’ toko’ po noongoi kapasi,’’ ka diyolo’. ²¹ Tumongob po tomod o ginawo ku tu’ norualan i’ i bansa’ ku; mogihad oku po tu’ aiso’ no o pokukurayan ku. ²² Aiso’ toi o tubat do hilo’d Giliad? om aiso’ toi o dokutur do hilo’? om nokuro’ddi tu’ a’ nolingasan o bansa’ ku?

¹ Torobong daa giya do waig iti tulu ku’dti, om tudan do romou iti mato ku, om milo oku i’ do mihad do tadau om totuong do mogihad di tulun ku di nangapatai do pisangod. ² Haro daa giya o tiyonon ku’dti do hilo’d tana’ do kowotuan om kotongkiad oku i’ diti bansa’ ku. Tu’ oinsanan nopo iyolo’ dot a’ otorodok, om sinompuruan do tulun di popohudsu. ³ Posodia kasai’ nopo iyolo’ do mongudut, tudut poo o momorinta’ di pomogunan, okon no ko’ katapatan. Boros kad TUHAN, ’’Pogisuhut-suhuton nopo do tulun ku do momonsoi it araat, om a’ no iyolo’ magakun do Kinorohingan oku diyolo’,’’ ka dau. ⁴ A’ no milo dot a’ mumbangan-bangan o koinsanai do tulun di tambalut piya dau, tu’ aiso’ no o milo do ponongkuyaanan di tobpinai piya dau, tu’ miagal ngai’ nopo di Yakub koudut, om monipu’ ngai’ o tulun di tambalut piya kopio diyolo’. ⁵ - ⁶ Mamalid ngai’ nopo iyolo’ di tambalut piya kopio diyolo’, om aiso’ no tiso’ piya di momoros dot otopot tu’ noubas no i dila’ diyolo’ do minsingudut om mada’ no kopio iyolo’ do tumingkod do momonsoi’d dusa. Pogisuhut-suhuton nopo diyolo’ do momonsoi i ponginggorit diyolo’d wokon, om a’ nopo otingkod i poninipu’ diyolo’, om notongkiadan no kopio diyolo’ o TUHAN. ⁷ Om gowoi poddi om minomoros o TUHAN, it Osundu Kopio do poingkaa, ’’Sompipion ku nondo iti tulun ku do miagal di monompipi’ do basi’, om umbalan ku iyolo’. Tu’ nokowonsoi no dot araat o tulun ku om nunu po daa’ddi o milo ku’d wonsoyon dot id diyolo’? ⁸ Miagal pod pana’ di kapatai o dila’ diyolo’, tu’ tudut kasai’ nopo o poboroson. Osonong tomod i’ o poboroson diyolo’ dot id songkoduwo diyolo’, nga’ otopot nopo kopio om papataan i’ iyolo’ do lawa’ do maan do pamalawa’. ⁹ Om a’ ku po tuu daa hukuman iyolo’ diti nongowonsoi diyolo’dti? Om a’ ku po tuu daa sulian o bansa’ do miagal diti? Iyoho’ no i TUHAN o minomoros diti,’’ ka dau. ¹⁰ Boros kangku, ’’Pogihadan ku nondo ilo tulun om pogihadan ku ilo kobuturan, tu’ nongoriou po ngai’ om aiso’ no o tulun do maya’ do hilo’. Aiso’ no ot orongou do tuni do tayam-tayam om i tuni do tombolog, om i nintorusan nga’ nongkopoggidu’ ngai’ no,’’ ka. ¹¹ Boros kad TUHAN, ’’Silihon ku nondo o Yorusalim do kinotimungan do kinaraagan, om kinoiyonon di lilisokon do toni; om silihon ku do kinoiyonon dot oingou o kabandaran do Yohuda, om it a’ iyonon do tulun,’’ ka dau. ¹² Om ponguhot oku no, ’’Oi TUHAN, nokuro tu’ naraag po tomod om otuu po do miagal do kowotuan iti tana’, gisom dot aiso’ no o maya’? Isai poddi o kitoilaan do mongilo do komoyon diti? Isai no o pinosuhut nu’dti om milo i’ daa iyau do momisunud do tulun do suwai?’’ ka dau. ¹³ Om boros kad TUHAN, ’’Nosiliu pogi’ o miagal diti nga’ a’ id tulun tinanud i ponudukan ku di pinatahak ku diyolo’. Om a’ iyolo’ minumboyo’ doho’ om a’ diyolo’ winonsoi i pinonuhuan ku. ¹⁴ Tu’ pinokodou nogi’ diyolo’ o ginawo diyolo’ om tuminuku’ dot id tingolig do Baal do tumanud di ponudukan di komolohingan diyolo’. ¹⁵ Iyo nopoddi, om pokinongou no diti wonsoyon ku, iyoho’ i TUHAN it Osundu Kopio, i Kinorohingan dot Israil. Onuan ku nondo i tulun ku do rarapaon dit opoit do maan diyolo’d kanon om onuan ku iyolo’ do tinumon di kawanit. ¹⁶ Om potompiason ku nondo iyolo’ dot id pogialatan do bansa’ dit a’ diyolo’ otutunan om it a’ notutunan di komolohingan diyolo’. Om poporikot oku nondo do soudor do mongoi panangod diyolo’ do gisom dot angapatai ngai’ iyolo’,’’ ka dau. ¹⁷ Boros kad TUHAN, it Osundu Kopio dot id tulun dau, ’’Antangai pogi’ ondung nunu’ddi o nosiliu! Pomolohou kou no di mogigihad, om porikoton no i tongoondu’ do modsisinding do sinding do mogihad,’’ ka dau. ¹⁸ Om boros kaddi di tulun do Yohuda, ’’Sunudan no iyolo’ do marau-arau do mongoi podsinding do sinding do mogihad dahai, gisom dot oponu’ do romou o mato dahai, om gisom dot oyopos o pingas dahai,’’ ka dau. ¹⁹ Pokinongou pogi’ dilo tihad do hilo’d Sion, ’’Naraag no kopio iyahai! Nointingayam no kopio iyahai! Om a’ no milo dot a’ iyahai tumongkiad do pomogunan dahai, tu’ nangaraag no o walai dahai,’’ ka. ²⁰ Om boros kangku, ’’Pokinongou kou nod boros do TUHAN, oi dokoyu i tongoondu’, om ilaan no kopio i boros dau. Tudukan no i tangaanak dokoyu’d tongoondu’ do sinding do mogihad, om tudukan i tambalut dokoyu do modsinding do sinding do mogihad. ²¹ Tu’ nokosuang no o kapatayon do minaya’ di liligaon toko’, om nokosuang nori di walai do raja’ toko’; naayi’ nod natabpaan i tangaanak do hilo’d ralan om natabpaan ngai’ i tangaanakwagu do hilo’d pogititimungan do tulun. ²² Pointongkop nopo o rata’ do poinsasad do hiri’d tana’, do miagal pod rinomos, om miagal do winangkasan do gandum di hiri’d notoliban di mongomot om aiso’ no o mongoi di gandum. Iti no o pinonuhuan do TUHAN doho’ do popoboros,’’ ka dau. ²³ Boros kad TUHAN, ’’A’ i’ apatut dot oondos i tulun dot ongoilo di toilaan diyolo’, om a’ apatut dot oondos i tulun dot okoris di kinoris diyolo’, om a’ apatut dot oondos i tulun do kaya’ di kakayaan diyolo’. ²⁴ Nga’ ondung haro o tulun dot orohian dot oondos, om apatut no dot oondos iyau tu’ kotutun i’ iyau om kosuhut iyau di natantu’ mantad ku do wonsoyon ku, tu’ kosianan ku nopo om aiso’ i’ o kopupuson om iri wonsoyon ku nga’ otulid i’ om otopot. Miagal no ngai’ddi o korohian ku. Iyoho’ no i TUHAN, o minomoros diti,’’ ka dau. ²⁵ - ²⁶ Boros kad TUHAN, ’’Rumikot nondo o maso do hukuman ku i tulun do Masir, om i tulun do Yohuda, om i tulun dot Idom, om i tulun dot Amon, om i tulun do Muab, om i tulun di momogun-mogun do hilo’d tana’ do kowotuan, i nangapampadan o tobuk. Nosunatan ngai’ i’ iti tulun nga’ a’ i’ iyolo’ tuminanud di tumpongo ku, i komoyon kopio di sunat diri. Aiso’ i’ o tiso’ di tulun diri om aiso’ o mantad id tulun dot Israil do tuminanud di tumpongo ku,’’ ka dau.

¹ Oi tulun dot Israil, pokinongou kou nodti boros do TUHAN dot id dokoyu. ² Boros ka dau, ’’Kada’ kou tanud di kowoyo-woyoon do bansa’d suwai; om kada’ kou kagangau do kokito piya do kopusahan do hilo’d tawan, do mulong piya dot ongooris ngai’ o bansa’d suwai. ³ Tu’ kotumbayaan nopo do tulun diti nga’ aiso’ tomod i’ o suang. Mongoi no tulun panagad do kayu do hilo’d gouton om patahakon no di mongingikir, om wonsoyon no dau iri do tininganak; ⁴ om lumison nondo iri do pirok om tamas. Om lantakon nondo do paku’ om a’ i’ ahaba’. ⁵ Tingolig nopo do miagal diri om miagal noddi tinulun-tulun do pinotondu’ do hiri’d tumo di tinanaman do sangop, tu’ a’ i’ koboros; om minog i’ do gantayon do tulun tu’ a’ i’ kapanau. Kada’ kou kooris diti: tu’ a’ i’ milo do pokoruol dokoyu, om a’ milo do momonsoi dit osonong dot id dokoyu,’’ ka dau. ⁶ Aiso’ no o koiyo diya’, oi TUHAN, tu’ okoris ko no kopio, om ngaran nu nga’ abantug om kikuasa’. ⁷ Isai po daa’ddi ot a’ rumonok diya’, tu’ raja’ do koinsanai’d bansa’? Apatut no do royohon ko. Tu’ aiso’ no o koiyo diya’ dot id pogialatan do koinsanai di tulun dot ongoilo do mantad id toinsanan o bansa’, ko’ id pogialatan po di raja’ diyolo’. ⁸ Basug ngai’ nopo om lowong iyolo’. Nunu no kaka daa o toilaan diyolo’ do mantad id tingolig diyolo’ di kayu i’ toomod, tu’ a’ i’ iri milo do monuduk di kiguna’. ⁹ Iri nopo tingolig diyolo’ nga’ nurogupan do pirok do mantad hilo’d Sepanyol, om nurogupan do tamas do mantad hilo’d bandar dot Upas, om iri nopo tingolig diri nga’ wonsoi ngai’ i’ di tulun dit ongoilo, om pinakayan do pakayan dit oitom o karagango’ om otomou daragang-ragang do nawol di mangangawol dit ongoilo. ¹⁰ Nga’ iya’ no oi TUHAN, i Kinorohingan dot otopot, iya’ no i Kinorohingan do manahak do koposion, om i raja’ dot aiso’ o kopupuson. Om soira’ nopo dot otogod ko nga’ kogogor nopo iti pomogunan; a’ i’ kasangal do kototogod nu o koinsanai do bansa’. ¹¹ (Poingkaa no ot apatut do poboroson dokoyu dot id diyolo’: Iri nopo ponokokinorohingan dit a’ minomonsoi diti pomogunan om tawan om atanus no do mantad hiti’d pomogunan om mantad hiti’d linungung do tawan.) ¹² Winonsoi do TUHAN iti tana’ dot i sinundu dau o pinomonsoi, om winonsoi dau iti pomogunan om pinawalad dau ilo tawan dot i toilaan dau o pinapawalad. ¹³ Soira’ nopo do monuhu’ iyau om kumahas nopo i waig do hilo’d soibau dilo tawan; om porikot iyau do haun do mantad hilo’d tisan diti pomogunan. Pakalabon dau i kodumaat do maso do rumasam om porikot iyau do tongus do mantad hiri’d pinoopian do tongus. ¹⁴ Basug po om aiso’ o toila-ilaan do kopurimanan do tulun do kokito do miagal diri; om ointingayaman tomod nopondo i gompomonsoi do tingolig tu’ iri nopo ponokokinorohingan diyolo’ om a’ i’ otopot om aiso’ o pinuhobo. ¹⁵ Aiso’ ngai’ i’ o suang diri, om apatut no dot intingayamon om hingi-hingion, om raagon nondo ngai’ iri do korikot o TUHAN do mongoi pomohukum diyolo’. ¹⁶ Nga’ a’ i’ miagal diri i Kinorohingan di Yakub; tu’ iyau no i minomonsoi do koinsanai do nunu nopo, om nopili’ no dau ot Israil do sumiliu do tulun dau. Ngaran nopo dau nga’ TUHAN it Osundu Kopio. ¹⁷ Oi tulun do Yorusalim, timungo’ no dokoyu o konunu-nunuan dokoyu, tu’ noturungku’ kou no! ¹⁸ Pataamon kou moti’d TUHAN do mantad id pomogunan diti; om pokorualan kou dau do gisom dot aiso’ nondo o tiso’ dokoyu dot oolu’. Tu’ TUHAN no o pinopoboros diti. ¹⁹ Om pomogiak no i tulun do hilo’d Yorusalim do poingkaa, ’’Nadalaan tomod iyahai do norualan! A’ no lumingos iti suhat dahai. Ondos daa dahai om asangalan dahai iti, nga’ a’ i’ dahai asangalan! ²⁰ Nangaraag no o kiim dahai, om noputut ngai’ no i tali di pinongogos diri. Nokopoggidu’ ngai’ no i tangaanak dahai, om aiso’ no o noolu’ do popowonsoi kawagu di kiim dahai; om aiso’ no o noolu’ do popowonsoi di tirai di kiim,’’ ka. ²¹ Om boros kangku do suminimbar, ’’Basug ngai’ nopo i boyoon toko’; tu’ a’ iyolo’ mokituduk do TUHAN. Iri noddi ot a’ diyolo’ kinoundar-undaran, om o1+asasad diri o tulun toko’. ²² Pokinongou tomod i bansa’ do ponong hilo’d utara; om silihon nondo di soudor diyolo’ i kabandaran do Yohuda do kowotuan dit oingou om a’ iyonon do tulun; tu’’toni poo o miyon do hilo’,’’ kangku. ²³ Oi TUHAN, oilaan ku i’ dot aiso’ i’ o tongosongulun piya do kikuasa’ do manantu’ do kootuson do koposi-posion dau; om aiso’ o tiso’d tulun do koporinta’ do kowoyo-woyoo’ dau. ²⁴ Tudukai no iyahai i tulun nu, oi TUHAN; kada’ indo iyahai pokorualai kopio. Om kada’ iyahai hukumai di maso nu dot otogod; tu’ opunso moti’ndo kopio iyahai. ²⁵ Porikoton no ino kototogod nu dot id bansa’ dit a’ tumuku’ dot id diya’, om id tulun di magada’ diya’. Tu’ minamatai iyolo’ do tulun nu; om pinadalaan kopio iyahai diyolo’ do minamaraag gisom do nangaraag ngai’ po o pomogunan dahai.

¹ Boros kad TUHAN dot id doho’, ² ’’Pokinongohon no o kowoyo-woyoo’ diti tumpongo ku. Om sunudan no i tulun do Yohuda om i tulun do Yorusalim ³ do napapalan ku no, iyoho’ i TUHAN i Kinorohingan dot Israil, o pointikid-tikid do tulun dit a’ mumboyo’ do kowoyo-woyoo’ diti tumpongo ku’dti. ⁴ Iti no i tumpongo do pinoumpongo ku dot id taki-aki diyolo’ do tontok di pinosoliwan ku iyolo’ do mantad hilo’d Masir, i pomogunan do miagal do naraka dot id diyolo’. Sinuhu’ ku iyolo’ do mumboyo’ doho’ om tumanud do koinsanai di ponuhuan ku. Om sinunudan ku nogi’ iyolo’ dot ondung mumboyo’ iyolo’ doho’ om osiliu no iyolo’ do tulun ku om osiliu oku do Kinorohingan diyolo’. ⁵ Om bayaanon ku indo i batos ku di pinabatos ku dot id taki-aki diyolo’ tu’ patahakon ku indo diyolo’ i pomogunan di kaya’ om oruak, ondung tonudon ngai’ no diyolo’ i ponuhuan ku. Om nasanganu no diyolo’ iri do baino’,’’ ka dau. Boros kangku, ’’Iyo noddi, oi TUHAN.’’ ⁶ Om boros kaddi do TUHAN dot id doho’, ’’Ongoi no do hilo’d kabandaran do Yohuda om hilo’d karalan-ralanan do Yorusalim. Om poboroson no i boros ku do hilo’ om sunudan i tulun do mokinongou di kowoyo-woyoo’ di tumpongo ku’ddi om sunudan iyolo’ do mumboyo’ddi. ⁷ Tu’ tontok di pinosoliwan ku i taki-aki diyolo’ do mantad hilo’d Masir, om pinoinod tomod ku o pinomoros ku diyolo’ dot apatut no do mumboyo’ iyolo’ doho’, om kakal ku i’ do popoinsan diti tulun ku do pasal diri do gisom piya do baino’. ⁸ Nga’ a’ i’ iyolo’ minokinongou om a’ minumboyo’. Suwai ko’ sompori-pori nogi’ iyolo’ do potilombus di kosongkiwalo’ om karaato’ diyolo’. Nosuhu’ ku no iyolo’ do mumboyo’ di tumpongo ku nga’ minada’ i’ iyolo’. Om gowoi poddi om porotuo’ ngai’ ku nopo dot id diyolo’ i hukuman do noboros do hiri’d tumpongo’ddi,’’ ka dau. ⁹ Om boros kaddi kawagu do TUHAN dot id doho’, ’’Mogiupakat no i tulun do Yohuda om i tulun do Yorusalim do sumaap doho’. ¹⁰ Om nokoguli’ no iyolo’ do momonsoi do dusa di komolohingan diyolo’ tu’ mada’ i’ iyolo’ do momonsoi di ponuhuan ku; tumuku’ noddi iyolo’ dot id ponokokinorohingan do suwai om amu’ tumanud di ponuhuan ku. Om nokotolibamban goduwo nopo ot Israil om Yohuda, di tumpongo do winonsoi ku dot id taki-aki diyolo’. ¹¹ Om baino’ noddi, om poinsanon ku no iyolo’ do porikoton ku nondo, iyoho’ i TUHAN o poporikot, do kosusaan dot id diyolo’, om a’ no iyolo’ milo do mogidu’ do mantad hiri. Om soira’ nopo do momolohou daa iyolo’ doho’ do mokitulung, om a’ ku no iyolo’ pokinongohon. ¹² Om mongoi no daa’ndo o tulun do Yohuda om tulun do Yorusalim do hiri’d tingolig di subakon diyolo’ do porsombahan do sumbolion om minglohou pondo iyolo’ do mokitulung. Nga’ a’ i’ milo do monulung diyolo’ i tingolig diri do rumikot i kosusaan. ¹³ Irad po do kogumuon do bandar do Yohuda o kogumuo’ do tingolig diyolo’, om i tulun do hilo’d Yorusalim nga’ nokopoingkakat no do pananaraban do porsombahan do patahakon dot id Baal, i tingolig di kososomu’ kopio’ddi, dot irad poddi kogumuo’ do ralan do hiri’d bandar. ¹⁴ Oi Yoromia, kada’ no sambayang dot id doho’ om kada’ oku lugu-lugutai do mogobi’ diti tulun. Tu’ soira’ nopo dot id suang iyolo’d kosusaan om momolohou daa iyolo’ doho’ do mokitulung nga’ a’ oku no mokinongou diyolo’,’’ ka dau. ¹⁵ Boros kad TUHAN, ’’Mingwonsoi dot araat i tulun di kosianan ku. Om nunu po daa’ddi o kosorupayan diyolo’ do mongoi’d hiti’d walai ku? Ondos daa diyolo’ om kaantob do kosusaan i mimbatos om papatahak do tayam-tayam do maan do porsombahan? Popotood tu daa diyolo’ iri? ¹⁶ Rinoitan ku daa iyolo’ do kayu saitun dit okohob, om i nolimbagatan do tua’ dit ongosonong, nga’ baino’ noddi om ongorod oku pondo do moro-boros om ngoyon ku pintipuwai i raan, om ngoyon ku tutudai i roun. ¹⁷ Iyoho’ no, i TUHAN it Osundu Kopio o pinopoingkakat dot Israil om Yohuda; nga’ baino’ noddi om nokopomusorou oku no kopio do poporikot do kosusaan dot id diyolo’. Iyolo’ i’ om iyolo’ o pinoporikot diti dot id diyolo’ tu’ nokowonsoi i’ iyolo’ do sala’; pinotogod oku diyolo’ tu’ pinapatahak i’ iyolo’ do porsombahan dot id Baal,’’ ka dau. ¹⁸ Sinunudan oku’d TUHAN di pakat dot araat di pisangod ku dot id doho’. ¹⁹ Miagal oku pod tanak do dumba’ dit alaya’ do maan daa patayo’. Om a’ ku i’ daa oilaan dot iyoho’ i pogiupakatan diyolo’ddi. Mimboros po iyolo’ do poingkaa, ’’Mangai toko’ pogi’ tagado’ i kayu do maso poddi kayu do mongua’; maan toko’ nopo iyau patayo’ om olihuan id tulun o ngaran dau,’’ ka no diyolo’. ²⁰ Om sambayang oku noddi do poingkaa, ’’Oi TUHAN, it Osundu Kopio, iya’ nopo om gompomutus dit otulid; om oilaan nu i’ i pomusorou om ginawo do tulun. Nakatahak ku no dot id diya’ iti hal ku, pologoson oku nopondo do miontong diya’ do sumuli’ diti tulun,’’ kangku. ²¹ Pokipapatayan oku daa di tulun do hilo’d bandar dot Anatot om sinunudan oku diyolo’ dot ondung a’ oku tumingkod do popimboros do boros do TUHAN, om patayon oku no diyolo’. ²² Om boros kaddi do TUHAN, it Osundu Kopio, ’’Hukuman ku i’ iyolo’! Apatai indo i tangaanakwagu diyolo’ dot id pisangadan; om i tangaanak diyolo’ nga’ angapatai dot olikapan. ²³ Tu’ natantu’ mantad ku no o maso do koporikatan ku do kosusaan dot id tulun dot Anatot, om soira’ nopondo dot orikot o maso’ddi, om aiso’ no o tiso’ diyolo’ do kopoggidu’!’’ ka dau.

¹ Oi TUHAN, ondung sumongkiwal oku daa diya’, om atantu’ no dot iya’ i’ ot otopot. Nga’ poingkuro piya nga’ muhot kasai’ oku i’ diya’ do pasal dit otulid. Nokuro tu’ kumaya’ tomod o tulun dot araat? Om nokuro tu’ koundar ngai’ i tulun dit a’ otulid o ginawo? ² Tonomon nu no iyolo’ do miagal di totonomon, om sumuni no iyolo’ om mongua’ no. Boros nopo diyolo’ om pokosonong diya’, nga’ a’ i’ mando iyolo’ osianan kopio diya’. ³ Nga’ otutunan kopio oku i’ diya’, oi TUHAN; okito nu i’ o wonsoyon ku, om oilaan nu i’ dot osianan oku diya’. Ngoyo’ gayato’ iti tulun dot araat diti om posoliwanon no do miagal di dumba’ do ngoyon sumbolio’; om tamangan no iyolo’ do gisom id orikot i maso do koponumbolian diyolo’. ⁴ Songkuro po koloido’ dot otuu o tana’ toko’, om poinriou o sakot do hilo’d dumo? Matai ngai’ no o tombolog om nintorusan tu’ i kararaat do tulun toko’, i tulun do momoros dot, ’’A’ i’ do Kinorohingan okito o kotutukon toko’,’’ ka. ⁵ Om boros kad TUHAN, ’’Oi Yoromia, ondung ohuyan ko do monokilumbo do tulun, om poingkuro ko nogi’ daa’ndo do monokilumbo do kuda’? Ondung a’ ko milo do mamanau do hilo’d padang, om milo ko nogi’ tuu daa’ndo do mamanau do hilo’d puru’ dit id toning do Bawang do Yordan? ⁶ Iri piya tobpinai nu’d kusai, om i tilang-ilang nu nga’ magakal ngai’ i’ diya’; muhup ngai’ nopo iyolo’ do sumaap diya’. Kada’ nogi’ kopio ponongkuyaai diyolo’, do mulong piya daa dot aambalut o koboro-boroso’ diyolo’,’’ ka dau. ⁷ Boros kad TUHAN, ’’Notongkiadan ku no ot Israil, naadaan ku no i bansa’ di nopili’ ku. Nokosuang ku no dot id kuasa’ do pisangod diyolo’ i tulun di kosianan ku. ⁸ Sumaap diri doho’ i tulun di nopili’ ku; miagal po iyolo’d singa do hiri’d gouton do minggarom do sumaap doho’, om gowoi poddi om araatan oku diyolo’. ⁹ Iri nopo tulun di nopili’ ku nga’ miagal pod tombolog di nokurumunan do kondiu. Lohowo’ ngai’ no i nintorusan do hilo’d gouton do mongoi sapul do mangakan diyolo’! ¹⁰ Ogumu’ no o pomorinta’ do bansa’d suwai do nakapamaraag do kabun dot anggur ku; om piningulakan diyolo’ i tumo ku; om siniliu diyolo’ do tana’ dit a’ sunian i tana’ ku dit oruak. ¹¹ Siniliu diyolo’ iri do kowotuan; om poillogos tomod nopo iri dot id toguang ku. Oinsanan nopo i tana’ddi do nosiliu do kowotuan, om aiso’ no o monongkoilo. ¹² Nokorikot no o tulun do mongoi pamaraag do mantad ponong id sampaping di konuluhanan do tana’ do kowotuan. Pinorikot ku o pisangadan do mamaraag do koinsanai diti pomogunan; om aiso’ no o tongosongulun piya dot osimbayan o koposi-posion. ¹³ Gandum i’ o tinanom di tulun ku, nga’ paka’ iddi o tomoton; noudipon tomod iyolo’ do kuminaraja’, nga’ aiso’ iddi o naanu-anu diyolo’. A’ minotus i tanom-tanom diyolo’ tu’ otogod oku no kopio diyolo’,’’ ka dau. ¹⁴ Boros kad TUHAN, ’’Haro o poboroson ku do pasal di pomorintaan di posorili’ dot Israil, i minamaraag di tana’ do pinatahak ku dot Israil, i tulun ku. Poggiduon ku nondo i tulun dot araat diri do mantad id pomogunan diyolo’, gisom do miagal po iyolo’ di tanom di noutus, om poiduwon ku nondo o Yohuda do mantad id longon diyolo’. ¹⁵ Nga’ kopoggidu’ ku nopondo iyolo’, om insianan ku indo kawagu iyolo’; pogulion ku indo o pointikid-tikid di bansa’ dot id tana’ om pomogunan diyolo’. ¹⁶ Om ondung aayi-ayi’ o ginawo diyolo’ do tumanud di kotumbayaan do tulun ku om orohian do sumumpa’ dot id suang do ngaran ku do poingkaa, ’Id suang do ngaran do TUHAN di poimpasi,’ ka, do miagal di minonuduk iyolo’ di tulun ku do sumumpa’ dot id suang do ngaran di Baal di gulu po om iyolo’ nondo nga’ kohompit no do tulun ku om kaanu do kosimbayanan. ¹⁷ Nga’ ondung haro o tiso’ do bansa’ dot a’ mumboyo’ doho’ om utuson ku nondo kopio iri do miagal di tanom dot utuson, om punsoon ku. Iyoho’ no i TUHAN, o minomoros diti,’’ ka dau.

¹ Poingkaa o boros do TUHAN dot id doho’, ’’Ongoi no boli do gonob do kain linan dit oniba’, om gonobon nori, nga’ kada’ poobugo’ do waig,’’ ka dau. ² Om ongoi oku noddi boli om gonobo’ ku no. ³ Om boro-boros po kawagu o TUHAN dot id doho’ do poingkaa, ⁴ ’’Ongoi do hilo’d Bawang dot Iprat om polisokon i’ i gonob diri do hiri’d luang dit id pogiolit-olitan do tontolob,’’ ka dau. ⁵ Om ongoi oku no om polisoko’ ku nori do hiri’d toning di Bawang dot Iprat. ⁶ Om a’ po alaid do mantad diri om suhuo’ oku nod TUHAN do gumuli’ do hilo’d Bawang dot Iprat do mongoi panganu di gonob. ⁷ Om poguliai ku no, om soira’ddi nabantalan ku i pinolisakan ku, om kokito ku noddi do noromuk no i gonob om a’ no milo’d pakayon. ⁸ Om boro-boros noddi kawagu o TUHAN dot id doho’. Boros ka dau, ⁹ ’’Miagal nodti o pamaraag ku do koondos do Yohuda om i koondos do Yorusalim dit a’ ogina-gina’. ¹⁰ A’ iti tulun dot araat minumboyo’ doho’. Om miagal kasai’ nopoddi o kokodoho’ do ginawo om kararaat diyolo’, om tuminuku’ po iyolo’ om minodsubak do tingolig. Om gowoi pondo om miagal iyolo’ diti gonob tu’ aiso’ no o guna’. ¹¹ Poingkuro nopo i gonob do poinsiwot dot id tawak om iyo no daa’ddi ot osorou ku do koiyon-iyono’ do koinsanai di tulun dot Israil om Yohuda tu’ poinsokot no kopio doho’. Winonsoi ku pogi’ o miagal diri nga’ poposiliu oku daa diyolo’ do tulun ku om porikot indo iyolo’ do karayahan om kosuahan dot id ngaran ku; nga’ a’ i’ iyolo’ minumboyo’ doho’,’’ ka dau. ¹² Boros kad TUHAN i Kinorohingan dot id doho’, ’’Oi Yoromia, sunudan ngai’ no i tulun dot Israil do momonu’ ngai’ di luping do waig dot anggur. Om sumimbar nondo iyolo’ do poingkaa, ’Dot a’ kopio tuu daa iyahai koilo dot apatut do ponuon do waig dot anggur o pointikid-tikid di luping?’ ka. ¹³ Om sunudan nogindo iyolo’ dot iyoho’ nondo, i TUHAN, o momonu’ do koinsanai’d tulun do hiti’d pomogunan do waig dot anggur, gisom id aawuk iyolo’: kohompit no i raja’, i sinakagon di Daud, om it imam, om i nabi, om koinsanai di tulun do Yorusalim. ¹⁴ Om pogiduduntukon ku nogindo iyolo’ do miagal di luping, dot i tongomolohing no om i tongomulok po. Patayon ku nopo iyolo’ om a’ oku no olisiu om a’ oku osianan diyolo’. Iyoho’ no i TUHAN, o minomoros diti,’’ ka dau. ¹⁵ Oi tulun dot Israil, nokopomoros no o TUHAN, Kumosiriba’ no o ginawo om mokinongou kou no dau. ¹⁶ Pusohon no o TUHAN, i Kinorohingan dokoyu, dot a’ po iyau koporikot do totuong, gisom do kasadu kou nondo do hiri’d nuluhon; dot a’ po dau osiliu do totuong dit odondom kopio i tanawau di pinagandasan dokoyu. ¹⁷ Ondung a’ kou mokinongou om lumisok oku nondo do mihad tu’ asawat kopio i’ o ginawo dokoyu; tumongob oku no kopio, om lumuyung po o romou ku tu’ natangkap no om natanggayan do pisangod i tulun do nasanganu’d TUHAN. ¹⁸ Boros kad TUHAN dot id doho’, ’’Sunudan no i raja’ om i tina’ dau do lumintuhun do mantad hiri’d tirikohonon diyolo’ do don raja’, tu’ naratu’ no i tupi’ diyolo’ do don raja’ dit olumis kopio do mantad id tulu diyolo’. ¹⁹ Noturungku’ nod pisangod i kabandaran do ponong hilo’d salatan do Yohuda; om aiso’ no o tulun do katalib di pisangod. Koinsanai nopo i tulun do Yohuda do tinanggayan do kuminaa dot id pomogunan do pisangod,’’ ka dau. ²⁰ Boros kad TUHAN dot id tulun di hilo’d Yorusalim, ’’Ontong pogi’, oi tulun do Yorusalim! Rumuhuk no i pisangod dokoyu do mantad hilo’d utara! Honggo ngai’ no i tulun di pinokiintirungan dokoyu, i tulun di kaandasan tomod dokoyu? ²¹ Nunu nondo o poboroson dokoyu dot aala’ kou om oporinta’ kou’d tulun di ponokotambalut dokoyu? Atantu’ no do miagal kou pondod tondu’ dit orualan tomod do mogkosusu. ²² Ondung muhot kou ondung nokuro tu’ nosiliu ngai’ o miagal diti dot id dokoyu, om ondung nokuro tu’ nohurak o pakayan dokoyu, om nakasou kou, om nokobungou nopoddi om i dusa dokoyu dit awagat kopio. ²³ Milo po toi o tulun dit oitom do monimban di koitomo’ do kulit dau, om milo toi o rimau do mongidu’ di buris dau? Ondung milo iyolo’ om milo kou no daa iyokoyu do posimban do kowoyo-woyoon dokoyu, iyokoyu it aiso’ no o wonsoyon do suwai ko’ araat, om momonsoi kou nondo dit osonong. ²⁴ Potompiason ku nondo iyokoyu do miagal di tapol dit otilib do ribut do hilo’d tana’ do kowotuan. ²⁵ Natantu’ mantad ku no dot iti no o kotutukon dokoyu, tu’ linihuan oku i’ dokoyu om minogondos kou nogi’ di tingolig. ²⁶ Iyoho’ nondo o momohurak do pakayan dokoyu om poillabas kou pondo om ointingayam kou. ²⁷ Nokito ku no iyokoyu do mingwonsoi di karaatan ku. Nokito ku no iyokoyu do minongoi gusa’ di tingolig do hiri’d nulu-nulu, om hiri’d koumaan, do miagal pod kusai di rumahi tomod di sawo do tulun do suwai, om miagal di kuda’ do tontoluhan di momogusa’ di kuda’ do tondu’. Nobungou kou no, oi tulun do Yorusalim! Songgira’ kou toindo do koidu’ do mantad id karaaton?’’ ka dau.

¹ Poingkaa no o boros do TUHAN dot id doho’ do pasal di magadau dit adalaan kopio, ² ’’Mihad po o Yohuda; om i kabandaran do hilo’ nga’ motipatai no, songinlii po do hiri’d tana’ i tulun dot atatangaban, om Yorusalim nga’ minglohou poo do mokitulung. ³ Suhuon no di tulun do kaya’ i susuhuon diyolo’ do mongoi’d waig, om mongoi no iyolo’ do hiri’d torobong, nga’ aiso’ i’ o tokito diyolo’d waig, om gumuli’ nondo iyolo’ om aiso’ i’ o suang di luping diyolo’. Om somponon pondo diyolo’ o rabas diyolo’ tu’ aiso’ no o pokukurayan diyolo’ om adalaan iyolo’d tumongob. ⁴ Otuu po tomod o tana’ tu’ aiso’ i’ o rasam om aiso’ no o pokukurayan di gompongumo gisom do somponon po diyolo’ o rabas diyolo’. ⁵ Hilo’ nod gouton om tongkiadan nopo di paus i tanak dau di kosususu tu’ aiso’ no o sakot. ⁶ Om i kaladai di lalang nga’ songingkakat pod hiri’d timpak do nulu-nulu, om sangkabang-kabang poo do momuhobo do miagal po di toni; om mato diyolo’ nga’ a’ no kokito tu’ aiso’ no o kanon diyolo’. ⁷ Minglohou po doho’ i tulun ku do poingkaa, ’Mulong piya do pasalaon iyahai di dusa dahai, nga’ tulungo’ i’ daa iyahai, oi TUHAN, do miagal di nakabatos nu. Asaru’ no iyahai do tuminongkiad diya’; om nokowonsoi iyahai’d dusa dot id diya’. ⁸ Nga’ iya’ poo o kosondi-sondihon dot Israil; om iya’ no i milo do poidu’ dahai do mantad id kosusaan. Nga’ nokuro tu’ miagal ko’d sompogunan do hiti’d pomogunan dahai, om miagal do tulun di monompogunan tu’ koumbaya’ noo? ⁹ Nokuro tu’ miagal ko’d tulun dit oborulong, om miagal do soudor dit a’ milo’d monulung? Nga’ atantu’ no do manud-tanud ko i’ dahai, oi TUHAN! Tu’ iyahai nopo om tulun nu i’, om kada’ no kopio iyahai tongkiadai,’ ka diyolo’,’’ ka dau. ¹⁰ Poingkaa o boros do TUHAN do pasal do tulun diti, ’’Asanangan nopo iyolo’ do tumongkiad doho’, om a’ no diyolo’ opusus o korohian do tinan diyolo’. Om gowoi poddi om a’ oku orohian diyolo’. Om sorohon kasai’ ku nondo i nongowonsoi diyolo’ dot araat om hukuman ku iyolo’ tu’ i dusa diyolo’ o kopomohukuman ku,’’ ka dau. ¹¹ Boros kad TUHAN dot id doho’, ’’Kada’ oku diya’ suhuo’ do monulung do tulun diti. ¹² Tu’ mulong piya do puasa iyolo’ nga’ a’ oku i’ mokinongou do lolohou diyolo’ do mokitulung; om mulong piya do papatahak iyolo’ dot id doho’ do porsombahan di sorobon om papatahak do porsombahan do gandum nga’ a’ oku i’ kasai’ asanangan diyolo’. Suwai ko’ patayon ku i’ iyolo’ dot id pisangadan, om patayon ku’d lous om toruol,’’ ka dau. ¹³ Om boros kangku’ddi, ’’Oi TUHAN, it Asawat Kopio, oilaan nu i’ do pinsunudan dilo nabi ilo tulun, dot aiso’ o pisangadan om aiso’ o mononglous tu’ nakabatos ko i’ do haro kasai’ o kosimbayanan do hiti’d pomogunan dahai,’’ kangku. ¹⁴ Nga’ boros kad TUHAN do suminimbar, ’’Mingudut i’ nabi diri dot id suang do ngaran ku; a’ oku i’ nokoponuhu’ diyolo’, om a’ oku nokoponuhu’ diyolo’d mimboros om a’ oku pinopoboros dot ongoiso’ piya o boros dot id diyolo’. Okon i’ ko’ mantad id doho’ i pinointalang do popimboroson diyolo’; iri nopo popimboroson diyolo’ddi dit osiliu dot id dosunsudan om pininsarahan i’ toomod diyolo’ om aiso’ o kotutuk-tutukon. ¹⁵ Iyoho’ no i TUHAN, o momisunud diya’ do wonsoyon ku dot id nabi dit a’ ku sinuhu’ddi, nga’ i mimboros indo dot id suang do ngaran ku, om mimboros dot a’ oontok do pisangadan om mononglous o pomogunan diti! Patayon ku nondo iyolo’ dot id suang do pisangadan om mononglous. ¹⁶ Om iri tulun do nosunudan diyolo’ do miagal diri nga’ iyo nogiddi o kapatai. Pataamon nondo i rata’ diyolo’ do hiri’d karalan-ralanan do Yorusalim, om aiso’ i’ o mongoi pomolobong diyolo’. Miagal ngai’ nopodti ot osiliu dot id toinsanan diyolo’, do kohompit no i sawo om i tangaanak diyolo’. Popurimonon ku nondo iyolo’ do kootuson di kararaat diyolo’,’’ ka dau. ¹⁷ Sinuhu’ oku’d TUHAN do momisunud di tulun dau di katangaban ku om popoboros do poingkaa, ’’Kiromou kasai’ nopo o mato ku do tadau om totuong, om aiso’ nopo o kotingkadan ku’d mihad tu’ nadalaan tomod nod suhat om norualan i bansa’ ku. ¹⁸ Soira’ nopod mongoi oku do hilo’d koomulakan, om rata’ pod tulun di napatai dot id pisangadan o tokito ku; om soira’ di mongoi oku’d hilo’d bandar om tulun poddi motipatai no dot ololousanan o tokito ku. Om iri nabi om it imam nga’ momonsoi nopo di karaja’ diyolo’ nga’ a’ i’ iyolo’ kosuhut kopio di wonsoyon diyolo’ddi,’’ kangku. ¹⁹ Niadaan nu no kopio o Yohuda, oi TUHAN? Araatan ko no kopio’d tulun do Sion? Nokuro tu’ pinokorualan kopio nu iyahai om gisom diri dot a’ no iyahai milo’d lingasan; kolingasan daa o piandad-andad dahai nga’ kosusaan nogi’ o rumikot. ²⁰ Nokowonsoi no iyahai’d dusa dot id diya’, oi TUHAN, om okunon no dahai o dusa dahai, om i dusa do taki-aki dahai. ²¹ Soroho’ no i batos nu om kada’ iyahai indaraato’; kada’ intingayamo’ o Yorusalim, i kinoiyonon do tirikohonon nu di kikagayaan. Kada’ raago’ i tumpongo nu dot id dahai. ²² Aiso’ i’ o milo di tingolig do piro-piro o bansa’ddi do porikot do rasam, om ilo tawan nga’ a’ i’ milo do porikot do rasam do hiti’d pomogunan. Nga’ iya’ no o pagandasan dahai, oi TUHAN, i Kinorohingan dahai, tu’ iya’ no o miningwonsoi ngai’ddi.

¹ Om boros kaddi do TUHAN dot id doho’, ’’Mulong piya do poingkakat daa i Musa om i Somuil do hiti do mokiinsian doho’ do bansa’dti nga’ a’ oku no monginsian. Poggiduo’ nogi’ o bansa’dti tu’ a’ oku no siontong diyolo’. ² Soira’ nopod muhot iyolo’ ondung honggo o ngoyon diyolo’ om sunudan no iyolo’ do nokoboros ku no o poingkaa: Haro i’ o natantu’ mantad dot apatai do toruol — om iri no o kapatai diyolo’! Iri no suwai om natantu’ mantad no dot apatai dot id pisangadan — om hilo’ no iyolo’ dot apatai! Om haro i’ o natantu’ mantad dot apatai dot olikapan — om iri no o kapatai diyolo’! Om iri no suwai om natantu’ mantad no dot atanggayan do pisangod do kumaa dot id pomogunan do pisangod — om hilo’ no o koongoyon diyolo’! ³ Natantu’ mantad ku no, iyoho’ i TUHAN, do haro nondo ot apat i korolosi kopio do korikot dot id diyolo’: apatai nondo iyolo’ dot id pisangadan; om gayaton do tasu o rata’ diyolo’; om kanon nondo iyolo’d tombolog om unsimoton di nintorusan i nongoolu-olu’. ⁴ Om pologoson ku nondo dot araatan ngai’ diyolo’ o koinsanai’d bansa’ do hiti’d pomogunan tu’ i winonsoi di Manasi, i tanak di Hiskia, di nosiliu iyau’d raja’ do hilo’d Yorusalim, i hilo’d Yohuda, o kapalagasan ku,’’ ka dau. ⁵ Boros kad TUHAN, ’’Isai daa ot olisiu dokoyu, iyokoyu i tulun do Yorusalim? Isai po daa o mumbaya’ do mongoi pongimuhot ondung osonong-sonong kou? ⁶ Naadaan oku no dokoyu, om notongkiadan oku dokoyu. Om paakango’ ku noddi o longon ku do pokoruol dokoyu tu’ apaasan oku no do momusus do kototogod ku. ⁷ Pinopintias ku iyokoyu do miagal di sakot do nokoring, iyokoyu i mantad id pointikid-tikid do bandar dot id pomogunan diti. Pinatai ku iyokoyu, do tulun ku piya daa iyokoyu, om pinatai ku o tangaanak dokoyu tu’ a’ kou i’ tuminingkod do momonsoi’d araat. ⁸ Ogumu’ nogi’ o tongoondu’ di nopuadan do hilo’d pomogunan dokoyu ko’ mantad di togis do hilo’d tisan do rahat. Pinatai ku i tangaanakwagu dokoyu di nosukod nogi’ daa kopio om ninggorit ngai’ ku i tina’ diyolo’. Potigowoo’ ku nopo do pinoporikot do katangaban om kopoddosian dit a’ ogina-gina’ dot id diyolo’. ⁹ Nahadan i tina’ di natagakan do turu’ o tangaanak dau, om mobo-hobo poo iyau. Nosiliu nod totuong i tanawau dau, om nointingayam po tomod iyau om aiso’ no o milo’d pokukurayan. Pologoson ku nondo i pisangod dokoyu do mamatai dokoyu, iyokoyu i maso do poimpasi. Iyoho’ no i TUHAN, o minomoros diti,’’ ka dau. ¹⁰ Aiso’ no kopio o doho’ iyo’d kataadan. Nokuro tu’ pinogkosusu oku di tina’ ku do hiti’d pomogunan? Tu’ a’ oku no milo dot a’ monokisurilog om monokisongkiwal do koinsanai’d tulun do hiti’d pomogunan. A’ oku i’ insan poolos do tusin om a’ oku insan olos; nga’ oinsanan i’ o tulun do momopol doho’. ¹¹ Pologoson nopo dot abayaan ngai’ i popol diyolo’, ondung a’ no osonong o winonsoi ku dot id diya’, oi TUHAN, om ondung a’ oku no minongobi’ di pisangod ku dot id toguang nu do tontok dit id suang iyolo’d kosusaan om kagangahan. ¹² (Aiso’ no o kotipu’d basi’, okon po om i basi’ di mantad hilo’d utara tu’ minirolot do tambaga’.) ¹³ Boros kad TUHAN dot id doho’, ’’Porikot oku nondod pisangod do mongoi pononggoi di kakayaan om dapu’ do tulun ku do pomohukum ku diyolo’ tu’ minomonsoi i’ iyolo’d dusa do pointongkop diti pomogunan. ¹⁴ Om silihon ku nondo iyolo’d turipon di pisangod diyolo’ dot id pomogunan do suwai, tu’ miagal pod tapui iti kototogod ku om a’ no atanus do gisom dot alaid,’’ ka dau. ¹⁵ Om boros kangku’ddi, ’’Oi TUHAN, iya’ nopo om koilo i’ kopio. Soroho’ oku no om uhupai oku no. Suliai no doho’ i tulun do mongulok-ulok doho’. Kada’ no padalaai kalanut o ginawo nu dot id diyolo’ do gisom nondo dot apatai oku kopio diyolo’. Soroho’ no dot iya’ i’ o kopongindaraatan diyolo’ doho’. ¹⁶ Minomoros ko dot id doho’ om pinokinongou ngai’ ku i’ o pointikid-tikid di boros nu. Iya’ no o sanganu doho’, oi TUHAN, i Kinorohingan dit Osundu Kopio, om i boros nu o popotood om poposimbayan doho’. ¹⁷ A’ oku i’ minagayi’ do maso do poinsugku’ di tulun do suwai do mingirak om mogiongkoringau. Miningiso-iso’ oku i’ tu’ tuminanud oku i’ di pinonuhuan nu om otogod tomod oku. ¹⁸ Nokuro tu’ mompus-ompus nopo dot oinggorit oku? Nokuro tu’ a’ milo’d lingoson i suhat ku? Nokuro tu’ a’ iri milo’d lumingos? Nokopomusorou ko no kopio do mongiman-iman doho’ do miagal di bawang di rumasak do dongmagadau?’’ kangku. ¹⁹ Om simbar noddi o TUHAN do poingkaa, ’’Ondung gumuli’ ko, om romiton ku i’ iya’ kawagu om osiliu ko indo kawagu’d susuhuon ku. Om ondung popimboros ko’d boros di kisuang om a’ mimboros dit aiso’ o komoyon om osiliu ko indo kawagu’d nabi ku. Om rumikot indo kawagu o tulun dot id diya’, om a’ ko i’ minog do mongoi sungod diyolo’. ²⁰ Om silihon ku nondo iya’ do limput di nosompipi’ do tambaga’ dot id toguang diti bansa’. Sumaap daa’ndo iyolo’ diya’, nga’ a’ i’ iyolo’ kaala’ diya’. Om moyo-woyo’ oku indo diya’ do momogompi’ om mongintirung diya’. ²¹ Om poiduwon ku indo iya’ do mantad id kuasa’ di tulun dot araat om orongit. Iyoho’ no i TUHAN, o minomoros diti,’’ ka dau.

¹ Om boro-boros po kawagu o TUHAN dot id doho’ do poingkaa, ² ’’Kada’ panansawo om kada’ paganak dot id kinoiyonon do miagal diti. ³ Sunudan ku i’ iya’ ondung nunu ot osiliu dot id tangaanak dot osusu’d hiti om it osiliu dot id molohing diyolo’. ⁴ Apatai nondo iyolo’ tu’ oontok iyolo’ do toruol dit araat kopio, om aiso’ nondo o mogihad om aiso’ o momolobong diyolo’. Miagal pondod rinomos i rata’ diyolo’ do songingiliu do hiri’d tana’. Apatai nondo iyolo’ dot id pisangadan om apatai dot olikapan, om taakanon pondod tombolog om nintorusan i rata’ diyolo’. ⁵ Kada’ nogi’ kopio salakoi do walai’d tulun di maso’d mogihad. Kada’ pogihadai ot isai nopo. Tu’ a’ ku nondo barakatan o tulun ku do kosimbayanan om a’ ku pointalangan do kosianan om kolisihan. ⁶ Matai ngai’ nopondo i tulun do kaya’ om i tulun do mosikin dot id pomogunan diti nga’ aiso’ no o mogihad om aiso’ o momolobong diyolo’. Aiso’ no o minsuhat do tinan om aiso’ o momugar do tulu do pointalang do mogihad iyolo’. ⁷ Aiso’ no o mongoi ruhang do makan ko’ minum do monginsasamod do tulun di napatayan di kosianan kopio dau. Aiso’ no o monginsian, om iri piya napatayan do tapa’ om tina’ dau nga’ aiso’ no o monginsian. ⁸ Kada’ nogi’ kopio ongoi salakoi do walai di maso’d moginakan o tulun do hiri. Kada’ torungak diyolo’d makan om minum. ⁹ Nga’ pokinongou nodti poboroson ku, iyoho’ i TUHAN it Osundu Kopio, i Kinorohingan dot Israil. Tu’ tingkodon ngai’ ku nondo i kataadan om kaarapadan om karamayan do poginakanan do dong kumawin. Om kokito po iti tulun do hiti dot osiliu o miagal diri. ¹⁰ Soira’ nopondod sunudan nu iyolo’ do koinsanai’dti om muhot dotindo iyolo’ ondung nokuro tu’ minomusorou kopio oku do momohukum diyolo’ do miagal diri kawagat. Om muhot dotindo iyolo’ ondung nunu kopio o kinasalaan om dusa di nowonsoi diyolo’ dot id TUHAN, i Kinorohingan diyolo’. ¹¹ Om sunudan no iyolo’ do nokoboros ku no o poingkaa, ’Tuminongkiad doho’ i komolohingan dokoyu om tuminuku’ iyolo’ om minodsubak do tingolig. Tinongkiadan oku diyolo’ om a’ iyolo’ minumboyo’ dit oturan ku. ¹² Nga’ araat po ko’ iri o dokoyu’d nowonsoi. Okodou ngai’ nopo o ginawo dokoyu. Om tumanud kou di korohian dokoyu’d araat. Om a’ kou minumboyo’ doho’. ¹³ Om gowoi pondo om uyungon ku iyokoyu do mantad id pomogunan diti om pokoyoon ku iyokoyu dot id pomogunan dit a’ i’ dokoyu om a’ di komolohingan dokoyu noila-ilaan do gulu. Om hilo’ nondod modsubak kou do tingolig do tadau om totuong, om a’ ku i’ iyokoyu insianan,’ kanto,’’ ka dau. ¹⁴ Boros kad TUHAN, ’’Rumikot indo o maso dot a’ o tulun sumumpa’ dot id suang do ngaran ku, i Kinorohingan di poimpasi, i pinoposoliwan do tulun dot Israil do mantad hilo’d pomogunan do Masir. ¹⁵ Nga’ sumumpa’ nondo iyolo’ dot id suang do ngaran ku, i Kinorohingan do poimpasi di pinoposoliwan do tulun dot Israil do mantad id pomogunan do hilo’d utara om mantad id koinsanai’d pomogunan di pinotompiasan ku diyolo’. Om pogulion ku nondo kawagu iyolo’ dot id pomogunan diyolo’, i pomogunan di pinatahak ku dot id komolohingan diyolo’. Iyoho’ no i TUHAN, o minomoros diti,’’ ka dau. ¹⁶ Boros kad TUHAN, ’’Porikot oku nondo dot ogumu’ o tulun do monginginsada’ do mongoi panangkap do tulun diti. Om porikot oku nogindo do magagasu do mongoi pagasu diyolo’ do miruhuk-ruhuk do konuluhanan om konulu-nuluan om hilo’d koluang-luangan do pampang. ¹⁷ Okito ngai’ ku i’ o wonsoyon diyolo’. Om aiso’ o poillisok di dusa diyolo’ddi dot id doho’. ¹⁸ Om induwo nondo piluap o pomohukum ku di dusa om karaaton diyolo’ tu’ sinosomu’ i’ diyolo’ iti tana’ ku di tingolig dot ogumu’, i miagal nod rata’ tu’ aiso’ i’ o pinuhobo, om pinonu’ diyolo’ iti tana’ ku di ponokokinorohingan diyolo’,’’ ka dau. ¹⁹ Oi TUHAN, iya’ no i mongintirung doho’ om i manahak doho’ do kokorisan; om monguhup ko doho’ do maso ku’d haro o kosusaan. Om rumikot nondo dot id diya’ o koinsanai’d bansa’ do mantad hilo’d tisan diti pomogunan om momoros iyolo’ do poingkaa, ’’Iri nopo taki-aki dahai om iri no kinorohingan dit a’ otopot om tingolig dit aiso’ o guna-guna’ o haro dot id diyolo’, om aiso’ no suwai ko’ iri. ²⁰ Milo toi o tulun do momonsoi’d kinorohingan dau? Amu’, nga’ ondung milo daa iyau, om okon i’ ko’ Kinorohingan kopio iri,’’ ka. ²¹ Boros kad TUHAN, ’’Iyo nopoddi om popurimonon ku nondo kopio i bansa’ddi do sinundu om kinoris ku do baino’, om koilo indo kopio iyolo’ dot iyoho’ no o TUHAN,’’ ka dau.

¹ Boros kad TUHAN, ’’Oi tulun do Yohuda, notulis no i dusa dokoyu, do pinsil do basi’ o pinonulis; nokokikir nori do hino’d ginawo dokoyu do lahis do mutiara’ o pinongikir om nokokikir nogi’ do hiri’d sunduk di pananaraban do porsombahan. ² Tumuku’ o tulun nu do hiri’d pananaraban do porsombahan om hiri’d torigi di pinoudong do pomusou di Asira, i ponokokinorohingan dokoyu, dot id toning do pointikid-tikid do guas do kayu dit okohob om id pointikid-tikid do timpak do nulu-nulu, ³ om hilo’d timpak do konuluhanan dot id soliwan do bandar. Om patahakon ku nondo di pisangod dokoyu i kakayaan om i dapu’ dokoyu tu’ minomonsoi kou i’ do dusa do hiti’d pointongkop diti pomogunan. ⁴ Om a’ nondo milo’d a’ dokoyu patahakon i tana’ do pinotungkusan ku daa dokoyu, om pologoson ku nondo iyokoyu dot osiliu’d turipon di pisangod dokoyu dot id pomogunan dit a’ dokoyu noila-ilaan do gulu, tu’ miagal pod tapui di mikit-sikit o kototogod ku. Om a’ nori atanus do gisom dot alaid,’’ ka dau. ⁵ Boros kad TUHAN, ’’Hukuman ku nondo i tulun di mogidu’ do mantad id doho’, om i sumondiu do kinoris do tulun. ⁶ Tulun nopo do miagal diri om miagal nod kayu-kayu di poinsuni do hilo’d tana’ do kowotuan, om id tana’ dit oosin, tu’ a’ no sunian do tanom do suwai. ⁷ Nga’ barakatan kasai’ ku indo i tulun di mogondos doho’. ⁸ Tu’ iri nopo tulun diri om miagal po di kayu di poinsuni dot id tisan do bawang, om i poiroloi do hiri’d waig o gamut. A’ i’ iyau moddosi do dongmagadau piya, tu’ otomou kasai’ i’ o roun dau, om a’ iyau atangkabo dot aiso’ piya o rasam tu’ mongua’ kasai’ i’ iyau. ⁹ Isai po o kosuhut do ginawo’d tulun? Tu’ aiso’ no o goudut kopio ko’ mantad diti, om adalaan noti karaat. ¹⁰ Iyoho’ no i TUHAN, o monorisid do ginawo om mongilo kopio do lugu’ do ginawo’d tulun. Om sulian ku indo o pointikid-tikid do tulun do miontok di kowoyo-woyoon dau, om i winonsoi dau,’’ ka dau. ¹¹ Tulun nopo dit a’ otulid o ralan do mogihum do kakayaan om miagal nod tombolog di mongomut do tontolu’ dit okon ko’ iyau o minogontolu’. Tu’ tangaumur nogi’ om atagakan ngai’ no iyau di kakayaan dau om kooyion nopondod tumur dau om kointalang nondo do tulun iyau’d basug. ¹² Iri nopo Walai’d Sasambayangan toko’ dit Agayo, om miagal do tirikohonon do raja’ di kikagayaan dot id timpak do nuluhon dit akawas do mantad di timpuun i’. ¹³ Oi TUHAN, iya’ no o pagandasan dot Israil; om ointingayam ngai’ nopondo i tumongkiad diya’. Tumagak tomod nopondo iyolo’ do miagal di ngaran do pinotulis dot id pupuk, tu’ tuminongkiad i’ iyolo’ diya’ oi TUHAN, i tudan do waig do koposion. ¹⁴ Oi TUHAN, lingasai oku no om olingasan oku indo kopio, posio’ oku no om apasi oku indo kopio. Tu’ iya’ noo o royohon ku! ¹⁵ Boros ka di tulun dot id doho’, ’’Honggo ngai’ no i pinonompurolosi do TUHAN dati’? Mangai pogi’ kopio dau powonsoyo’ iri do dinondo!’’ ka diyolo’. ¹⁶ Nga’ a’ oku i’ insan pongodsuur diya’ do porikot do kosusaan dot id diyolo’ oi TUHAN. Om a’ oku nogi’ orohian dot oontok iyolo’d kosusaan. Oilaan nu i’ oi TUHAN; oilaan nu i’ i pinoboros nu. ¹⁷ Kada’ siliu do kopoddosian ku; tu’ iya’ no o pogintirungan ku do tontok do haro o kosusaan do rumikot. ¹⁸ Intingayamo’ ngai’ no i minonginggorit doho’, nga’ kada’ oku i’ iyoho’ intingayamo’, oi TUHAN. Ponuo’ no iyolo’ do kopoddosian, nga’ kada’ oku i’ iyoho’ tompurolosio’. Porikatai no iyolo’d kosusaan om patayon no iyolo’. ¹⁹ Boros kad TUHAN dot id doho’, ’’Oi Yoromia, pamanau no om ngoyon i’ poboroso’ iti boros ku do hilo’d wawayaan di roitan do Wawayaan do Rayat, i wawayaan di raja’ do Yohuda do sumuang om sumoliwan di bandar, om mongoi nogindo dot id koinsanai’d wawayaan do suwai di hilo’d Yorusalim. ²⁰ Sunudan ngai’ no i raja’ om koinsanai di tulun do Yohuda om koinsanai di poingiyon do hilo’d Yorusalim di sumuang do wawayaan diri do mokinongou diti poboroson ku. ²¹ Sunudan no iyolo’ dot ondung osianan iyolo’ do tinan diyolo’, om a’ no iyolo’ koino-ino do sumaan do nunu nopo do tontok do tadau’d Sabat; om a’ koino-ino do mongigit do nunu nopo do sumuang di wawayaan do Yorusalim, ²² om a’ koino-ino do mongigit do nunu nopo do sumoliwan di walai diyolo’ do tontok do tadau’d Sabat. Om a’ iyolo’ koino-ino do momonsoi’d nunu nopo o karaja’ do tontok do tadau’d Sabat; tu’ apatut nod pusohon diyolo’ o tadau’d Sabat do silihon do tadau di potobilangon do maan do don TUHAN, do miagal di pinonuhuan ku di komolohingan diyolo’. ²³ Nga’ a’ i’ minokinongou doho’ om a’ minamadul doho’ i komolohingan diyolo’. Suwai ko’ pinokodou nogi’ diyolo’ o ginawo diyolo’; om a’ iyolo’ minumboyo’ doho’ om mada’ iyolo’d tudukan ku. ²⁴ Sunudan no i tulun dot apatut i’ iyolo’d mumboyo’ do koinsanai di ponuhuan ku. Om kada’ nod haro o tiso’ diyolo’ do sumaan do nunu nopo do sumuang do wawayaan do bandar diti do tontok do tadau’d Sabat. Apatut nod pusohon diyolo’ o tadau’d Sabat do silihon do tadau di potobilangon do maan do don TUHAN, om a’ no koino-ino do momonsoi iyolo’d karaja’ do nunu nopo do tontok do tadau’ddi. ²⁵ Om sumuang nondo i raja’ om i tangaanak do raja’ diyolo’ di wawayaan do Yorusalim om kaanu nondo iyolo’d kuasa’ do don raja’ do miagal di naanu di Daud. Om sumakai nondo iyolo’d korita’-kuda’ om kuda’ do miwoyo’ di tulun do Yohuda om Yorusalim, om oponu’ kasai’ nopondod tulun i bandar do Yorusalim. ²⁶ Om rumikot nondo o tulun do mantad id bandar do Yohuda om mantad id kawalayan di posorili’ do Yorusalim; om haro rumikot do mantad id watas do Binyamin, om mantad hilo’d guas do nulu-nulu, om mantad hilo’d konuluhanan, om mantad hilo’d Yohuda di ponong id salatan. Om migit nondo iyolo’d porsombahan di sorobon om porsombahan do sumbolion, om porsombahan do gandum om kominyan, om iri nogi’ i porsombahan do kounsikahan, do mongoi’d hiri’d Walai’d Sasambayangan dot Agayo. ²⁷ Nga’ apatut nod mumboyo’ iyolo’ doho’ om momusou do tadau’d Sabat do silihon do tadau di nokotobilang do maan do don TUHAN. Kada’ nod haro o tiso’ diyolo’ do sumaan do nunu nopo do sumuang di wawayaan do Yorusalim do tontok do tadau’d Sabat, tu’ ondung tumolibamban iyolo’ di boros ku’ddi, om tutudan ku no i wawayaan do Yorusalim. Om osorob nondo i walai do raja’ do hilo’d Yorusalim, om aiso’ nondo o kopisok diri,’’ ka dau.

¹ Om boros kad TUHAN dot id doho’, ² ’’Ongoi do hilo’d walai di gompomorun do kuron om sunudan ku indo iya’ di poboroson ku do hilo’,’’ ka dau. ³ Om ongoi oku noddi do hiri om kokito ku no i gompomorun do maso’d momorun. ⁴ Om soira’ nopo dot a’ osonong o kawansai-wansayan di kuron di worunon dau om worunon pondo kawagu dau i lagit diri. ⁵ Om boros kaddi do TUHAN dot id doho’, ⁶ ’’A’ oku toi milo do momonsoi’d miagal di winonsoi di gompomorun do lagit diri, dot id tulun dot Israil? Iri nopo tulun ku om miagal no di lagit do poingonggom di gompomorun do poingonggom ku. ⁷ Soira’ nopod koboros oku do mongutus ko’ mamahaba’, ko’ mamaraag do bansa’ ko’ pomorintaan, ⁸ nga’ kumorologo indo i bansa’ddi di dusa diyolo’, om a’ ku indo wonsoyon i nokoboros ku’ddi. ⁹ Om haro i’ do koboros oku do poingkakaton ku om pokorison ku o bansa’ ko’ pomorintaan, ¹⁰ nga’ ondung a’ indo i bansa’ddi mumboyo’ doho’, tu’ mingwonsoi nogi’ dot araat om a’ ku indo wonsoyon i nokoboros ku’ddi. ¹¹ Iyo nopoddi om sunudan no i tulun do Yohuda om i tulun do Yorusalim do maso ku no do momusorou do sumaap diyolo’ om sumodia’ oku no do momohukum diyolo’. Sunudan no iyolo’ do kumorologo do mingwonsoi dit araat, om sunudan iyolo’ do poposonong do kowoyo-woyoon om i wonsoyon diyolo’. ¹² Nga’ sumimbar indo iyolo’ do poingkaa, ’Nokuro daa tu’ momonsoi iyahai do miagal diri? Tu’ orohian ngai’ nopo iyahai do tumanud di korohian dahai dit araat,’ ka,’’ ka diyolo’. ¹³ Boros kad TUHAN, ’’Tikido’ daa do monguhot o koinsanai’d bansa’ ondung haro o nosiliu do miagal diri do mantad di gulu po. Araat tomod o nowonsoi di tulun dot Israil! ¹⁴ Nokoumbal toi dot aiso’ o salju do hilo’d konuluhanan do Libanon? Om nokoumbal toi do narasak i luyu-luyu’ dit osogit o waig do hilo’d konuluhanan? ¹⁵ Nga’ iri nopo i tulun ku om nokolihu i’ doho’, om modtutud diri iyolo’ do kominyan dot id tingolig. Nakasadu iyolo’ do hiri’d ralan di gulu po, it apatut daa do susuyon diyolo’, om a’ noddi iyolo’ sumusui’ddi suwai ko’ suminansala’ nogi’ iyolo’ om suminusui do ralan dit a’ nosonong. ¹⁶ Siniliu diyolo’ do kopoddosian iti pomogunan diti; om intingayamon diri do gisom dot alaid. Om kotigowo ngai’ nopondo i montinalib do kokito’ddi; om mingog-bingog pondo o tulu diyolo’ dot araranaban. ¹⁷ Potompiason ku nondo iti tulun ku dot id toguang do pisangod diyolo’, dot iyo po di pupuk dot otilib di tongus do mantad id koulayon. Tolikudan ku nondo iyolo’, om a’ ku no iyolo’ uhupan do rumikot i kosusaan dot id diyolo’,’’ ka dau. ¹⁸ Om boros kaddi di tulun, ’’Kainou mogipapakat do sumaap di Yoromia! Tu’ haro i’ bo kasai’ ot imam do monuduk dati’, om haro o tulun dot ongoilo do manahak dati’ do nosihat, om haro o nabi do popolombus dot id dati’ do boros do Kinorohingan. Dawahon toko’ nopo iyau om kada’ toko’ pokinongou di boros dau,’’ ka diyolo’. ¹⁹ Om sambayang oku nod poingkaa, ’’Oi TUHAN, pokinongoho’ noti poboroson ku om pokinongohon i pimboroson do pisangod ku dot iyoho’ o komoyon. ²⁰ Araat toi o tisomuli’ dot osonong? Nga’ iyolo’ nopo om nokopongukad nod luang do porotuan doho’. Soroho’ pogi’ di minongoi oku ingkakat dot id toguang nu om di minoro-boros oku do mogobi’ diyolo’, om a’ ko i’ tumogod diyolo’. ²¹ Nga’ baino’ nopondo oi TUHAN, om pologoson nopo i tangaanak diyolo’ dot apatai dot olikapan, om pologoson nopo iyolo’ dot apatai dot id pisangadan. Pologoson nopo dot angatagakan i tongoondu’ do sawo diyolo’ om angatagakan do tangaanak diyolo’; pologoson nopo dot apatai do toruo-ruol i kokusayan diyolo’ om angapatai dot id pisangadan i tangaanakwagu diyolo’. ²² Porikatan nopo iyolo’d sinompuruan do tulun di mananakau di monigowo do mongoi panakau do hiri’d walai diyolo’; om pologoson nopo iyolo’ do minggiak dot opopoddosian. Tu’ nokopongukad no iyolo’d luang do porotuan doho’ om nakapataan iyolo’d lawa’ do pamalawa’ doho’. ²³ Nga’ oilaan ngai’ nu i’ i pakat diyolo’ do mamatai daa doho’, oi TUHAN. Om kada’ no ompunai i kararaat diyolo’ om kada’ tonuso’ i kasalaan diyolo’. Pologoson nopo iyolo’ dot aratu’ om aala’ di maso nu dot otogod diyolo’,’’ ka dau.

¹ Poingkaa no o boros do TUHAN dot id doho’, ’’Ongoi boli do kuron, om angatan nod moyo’ diya’ o piro-piro di boyoon di tulun om piro-piro ot imam di molohing no, ² om maya’ kou no di wawayaan di roitan do Wawayaan do Pomorunan do kumaa’d hilo’d Rantai do Hinom. Om poboroson nondo i boros di poboroson ku diya’ do korikot do hilo’. ³ Poboroson no o poingkaa, ’Oi raja’ do tulun do Yohuda, om i tulun do Yorusalim, pokinongou kou nodti poboroson ku, i TUHAN dot Osundu Kopio, i Kinorohingan dot Israil. Atantu’ no do porikatan ku do karaagan o kinoiyonon diti do gisom i’ dot aranaban po ngai’ i tulun di korongou do pasal diri. ⁴ Wonsoyon ku no o miagal diti tu’ tuminongkiad i’ doho’ i tulun om minonosomu’ iyolo’ do kinoiyonon diti tu’ minodsubak iyolo’ do ponokokinorohingan dit a’ diyolo’ om a’ di komolohingan diyolo’ om a’ di raja’ do Yohuda notutun-tutunan do gulu. Om sinosomu’ po diyolo’ do raha’d tulun dit aiso’ o sala’ o kinoiyonon diti, ⁵ om minomonsoi po iyolo’ do pananaraban do porsombahan dot id Baal om katahak indo diyolo’d hiri i tangaanak diyolo’ do maan do porsombahan di sorobon. Om a’ oku i’ nokoponuhu’ diyolo’ do minomonsoi’dti; om a’ oku nokopomusorou do miagal diri. ⁶ Om gowoi pondo om rumikot o maso dot okon nondo ko’ Topit o pamarait do Rantai do Hinom suwai ko’ roitan nondo do Rantai do Pinamatayan. ⁷ Om hiti nod raagon ngai’ ku i nongosorou-sorou mantad daa di tulun do Yohuda om i tulun do Yorusalim do wonsoyon diyolo’. Pologoson ku nondo i pisangod diyolo’ do kamanang om mamatai diyolo’ dot id pisangadan. Om paakanan ku nondod tombolog om nintorusan i rata’ diyolo’. ⁸ Om raagon ku nondo kopio iti bandar diti gisom dot angaranaban poo om ongkotigowo i montinalib do kokito’ddi. ⁹ Om turungkuon nondo di pisangod i bandar om umbalan diyolo’d mamatai i tulun do hiri. Om adalaan tomod nondo kawagat o kosusaan om koinggoritan gisom dot iri piya i mogiambalut nga’ mogipapatai i’ do mogiakan-akan om iri piya tangaanak diyolo’ nga’ kanon nopo diyolo’,’ ka,’’ ka dau. ¹⁰ Om suhuo’ oku noddi do TUHAN do mamabak di kuron dot id dotoguangan di tulun di tuminanud doho’, ¹¹ om minomisunud diyolo’ do nokoboros nod TUHAN, it Osundu Kopio, o poingkaa, ’’Mumukon ku nondo iti tulun om iti bandar, om miagal pondo diti kuron tu’ a’ no milo’d pogitopil-topilon kawagu. Om hilo’ piya’ndod Topit nga’ pamalabangan i’ diyolo’ di nangapatai tu’ aiso’ no o pamalabangan do suwai. ¹² Om silihon ku nondo do miagal do Topit iti bandar diti om i songingiyon do hiti. ¹³ Om miagal ngai’ nopondod Topit kososomu’ o koinsanai di walai di hiti’d Yorusalim, om i walai do raja’ do Yohuda, om iri nogi’ i walai di pinodtutudan do kominyan o hiri’d sakai’d taap do walai do patahakon dot id rombituon, i ponokokinorohingan diyolo’ do hilo’d tawan, om i pinotuntugan do waig dot anggur do pinodsubak do ponokokinorohingan do suwai,’’ ka dau. ¹⁴ Om tongkiad oku noddi do hilo’d Topit, i pinonuhuan do TUHAN doho’ do popolombus di boros dau. Om ongoi oku no ingkakat do hiri’d natad di Walai’d Sasambayangan dot Agayo om sunudai ngai’ ku no i tulun do nokopomoros no i TUHAN, it Osundu Kopio, om i Kinorohingan dot Israil do poingkaa, ¹⁵ ’’Porikatan ku nondo do hukuman di natantu’ mantad ku o bandar diti om koinsanai di kawalayan do hiti’d posorili’ tu’ osurilog kou i’ om a’ kou minokinongou di pinoboros ku,’’ ka dau.

¹ Om soira’ di nokorongou i Pasur it Imam, i tanak di Imor, i boyoon di mongilo-ilo di Walai’d Sasambayangan dot Agayo, do mimboros oku do miagal diri, ² om poboroso’ no dau do bobogon oku om kagasan o gakod ku do hiri’d toning di wawayaan di roitan do wawayaan do Binyamin di ponong id sokid do mantad hiri’d Walai’d Sasambayangan dot Agayo. ³ Om kosuabon noddi kawagu, di nokoidu’ oku di Pasur do poingkogos om boro-boros oku no dau do poingkaa, ’’Okon no ko’ i Pasur o pomungaran do TUHAN diya’, suwai ko’ i ’Pointongkop o Kopoddosian’. ⁴ Poingkaa o nokoboros do TUHAN, ’Silihon ku nondo iya’ do kopoddosian do tinan nu om i tambalut nu, om okito ngai’ nu nondo iyolo’ dot apatai di pisangod diyolo’. Posuangon ngai’ ku nondo dot id pomorintaan do raja’d Babil o koinsanai di tulun do Yohuda; om tanggayan nondo dau o wookon diyolo’ do hilo’d pomogunan dau do silihon do turipon, om iri no suwai om maan dau patayo’. ⁵ Om pologoson ku nogindo i pisangod diyolo’ do mongoi pagahau do koinsanai di kakayaan do bandar diti om koinsanai di dapu’ di raja’ do Yohuda, om suhuon ku iyolo’ do mongigit diri do hilo’d Babil. ⁶ Om iya’ no, oi Pasur, om tanggayan ko nondo do miwoyo’ di sompiiyon nu do hilo’d Babil. Om hilo’ nondo o kapatayon nu om pamalabangan diya’ do miwoyo’ do koinsanai di tambalut nu di piningudutan nu,’ ka,’’ kangku. ⁷ Nudutan oku diya’, oi TUHAN, om nakalan oku diya’. Okoris ko i’ ko’ iyoho’, om naala’ oku iddi diya’. Oinsanan nopo o tulun do mongirak-irak doho’; om monongodou-ngodou nopo iyolo’ do momohingi-hingi doho’. ⁸ Pointikid-tikid do moro-boros oku, om a’ oku no milo dot a’ popogiak do, ’’Kororongit! Karaagon!’’ ka. Tu’ a’ oku no otingkad-tingkadan do minguntotori’ om momohingi-hingi tu’ popoboros oku i’ do boros nu, oi TUHAN. ⁹ Nga’ pointikid-tikid do moro-boros oku dot id suang do ginawo ku do, ’’Lihuan ku nopo o TUHAN, om tumingkod oku nondo do mimboros dot id suang do ngaran dau,’’ kangku, om miagal pod tapui i boros nu do sumikit dot id lugu’ do ginawo ku. ¹⁰ Om mogikonos-konos ngai’ po o tulun dot orongou ku, om boros ka no diyolo’, ’’Pointongkop nopo o kopoddosian! Kainou ngoyo’ toko’ iyau posunudo’ dot id pomorinta’!’’ ka no. Om iri piya tambalut kopio ku nga’ mandad-andad i’ do kaalaan ku. ’’Milo i’ bo iyau dot akalan,’’ ka no diyolo’ do mimboros; ’’om aala’ toko’ indo iyau, om kosuli’ toko’ dau,’’ ka no diyolo’. ¹¹ Nga’ mobi’ ko i’ doho’, oi TUHAN, iya’ i’ it okoris om kisinundu, om aiso’ indo ot owonsoi di monginggorit daa doho’. Om ointingayam nondo iyolo’ do gisom dot alaid, tu’ aiso’ i’ o nabayaan diyolo’d momonsoi di nosorou daa diyolo’d wonsoyon diyolo’. A’ nondo milo’d olihuan i kointingayamo’ diyolo’. ¹² Nga’ otulid i’ o pongingilo nu’d tulun, oi TUHAN, it Osundu Kopio, koilo ko i’ dit id suang do ginawo om it id suang do pomusarahan diyolo’. Om pologoso’ oku no do kokito diya’ do sumuli’ di pisangod ku, tu’ nakatahak ku no iti hal ku dot id diya’. ¹³ Podsinding no dot id TUHAN! Royoho’ no o TUHAN! Tu’ pinoidu’ dau i tulun do mosikin do mantad id longon do tulun di momonsoi’d araat. ¹⁴ Ousung no i tadau do nokosusuon ku! Lihuan nopo i tadau di pinogkosusu oku di tina’ ku! ¹⁵ Ousung no i tulun di pinopotood di tapa’ ku do tontok di pinoporomut iyau di habar dot, ’’Kusai! Kusai o tanak nu!’’ ka. ¹⁶ Koiyo po daa i tulun diri dilo kabandaran di rinaag do TUHAN om a’ no insian-sianan. Korongou po daa iyau do todoi dot orurualan do dongkosuabon om korongou do pangkis di mogisasangod do dong pitangaadau, ¹⁷ tu’ a’ oku i’ dau pinatai di ponontianon oku nogi’. Tu’ iri i’ daa’ndo i tian do tina’ ku o lobong ku. ¹⁸ Nokuro tu’ pinogkosusu oku? Mokimohilo-hilo’ no daa do kokito oku’d kosusaan om katangaban om gisom indo do tikapatai ku dot ointingayam oku?

¹ Om suhuo’ no di Raja’ Sodokia, iyau i raja’ do Yohuda, i Pasur it Imam i tanak di Malkia, om i Sipania it Imam, i tanak di Maasiya do mongoi solowot doho’ do poporomut do pokionuon do poingkaa, ² ’’Uhoto’ daa o TUHAN do bagi’ dati’ tu’ noturungku’ no di Raja’ Nobukadnisar i raja’ do Babil, om i soudor dau iti bandar. Om ulan toi’ om wonsoyon do TUHAN o tongoiso’ di kopusahan dau do bagi’ dati’ om tumongkiad indo i Nobukadnisar,’’ ka. ³ Om boro-boros noddi o TUHAN dot id doho’, om sunudai ku no i tulun diri ⁴ do momisunud di Sodokia, di pinoboros do TUHAN, i Kinorohingan dot Israil do poingkaa, ’’Oi Sodokia, alaon ku nondo i soudor nu do maso do monokisangod di raja’ do Babil om i soudor dau. Timungon ku nopondo i rapo-rapo di soudor nu do hilo’d tanga’ diti bandar. ⁵ Tumotos oku nondo do sumaap dokoyu, oiyo-iyon ku no o kinoris ku om kototogod ku dit a’ ogina-gina’. ⁶ Patayon ngai’ ku nopondo i songingiyon do hiti’d bandar, do tulun tuu ko’ nintorusan nga’ apatai ngai’ nopo do toruol dit araat. ⁷ Nga’ iya’ nopo om i pagawai nu om i tulun dit a’ napatai dot id pisangadan, om i noolu-olu’ di mononglous om i toruo-ruol om pologoson ngai’ ku nopo iyokoyu dot atangkap di Raja’ Nobukadnisar om i pisangod dokoyu, di mamatai dokoyu. Patayon kou nondo di Nobukadnisar. Aiso’ no o tolu-oluon dau om aiso’ ot insianan om aiso’ o kolisihan dau. Iyoho’ no i TUHAN, o minomoros diti,’’ ka dau. ⁸ Om sunudai oku noddi do TUHAN do momoros dot id tulun dau do poingkaa, ’’Pokinongou kou no! Iyoho’ no o TUHAN, o popinsimpili’ dokoyu do sumusui do ralan do kumaa id koposion ko’ sumusui do ralan do kumaa dot id kapatayon. ⁹ Isai nopo i tumimporon do hiti’d bandar om apatai no dot id pisangadan ko’ apatai do mononglous ko’ apatai do toruo-ruol dit araat. Nga’ isai nopo i sumoliwan om tumahak dot id tulun do Babil, i maso do monurungku’ do bandar diti om a’ no patayon om a’ apatai. ¹⁰ Tu’ nosorou mantad ku no dot a’ mongolu’ diti bandar suwai ko’ maan ku nopo kopio raago’. Patahakon nondo iti bandar dot id raja’ do Babil, om tutudan nondo dau iti do gisom dot ouu. Iyoho’ no i TUHAN, o minomoros diti,’’ ka dau. ¹¹ - ¹² Om suhuo’ oku nod TUHAN do polombus dot id sompiiyon di raja’ do Yohuda, iri no i sinakagon di Daud, diti boros do poingkaa, ’’Pokinongou nodti poboroson ku, iyoho’ i TUHAN o popoboros. Tumotos no kopio om owonsoi i’ it otulid do pointikid do tadau. Om poiduwon no i tulun dit ulak-ulakan do mantad id tulun di mongulok-ulok dau. Ondung a’ dokoyu wonsoyon o miagal diri om monubuan no kopio iri do kototogod ku gisom do miagal pondo do tapui dit a’ milo’d pisokon o kototogod ku,’’ ka dau. ¹³ Om boros kaddi do TUHAN dot id Yorusalim, ’’Iya’ nopo, oi Yorusalim, om id sawat i’ ko’ iti tana’ do poingrantai. Nga’ saapon ku indo iya’. Tu’ osorou nu nopo daa om aiso’ i’ o kasaap diya’ om aiso’ o kolopuson di tolig nu. ¹⁴ Nga’ hukuman ku indo iya’ tu’ i nongowonsoi nu o kopomohukuman ku. Tutudan ku nondo i walai do raja’ nu, om osorob ngai’ nopondo o posorili’ddi. Iyoho’ no i TUHAN, o minomoros diti,’’ ka dau.

¹ - ² Om suhuo’ oku nod TUHAN do mongoi do hiri’d walai di raja’ do Yohuda, iri no i sinakagon di Daud. Om hilo’ oku nondo do monuhu’ di raja’, om i pagawai dau, om i tulun do Yorusalim, do mokinongou di boros do pinoboros do TUHAN dot id diyolo’. ³ Poingkaa no i boros do TUHAN dot id diyolo’, ’’Iyoho’ no i TUHAN, o monuhu’ dokoyu do momonsoi dit otulid om it otopot. Poiduwon no i tulun dit ulak-ulakan do mantad id tulun di mongulok-ulok dau. Kada’ dokoyu tompuraraato’ om kada’ dokoyu inggorito’ o tulun di bansa’d suwai, om i tangaanak dot aiso’ o molohing, om i tongoondu’ do nopuadan; om kada’ kou pamatai do tulun dit aiso’ o sala’ do hiti’d kinoiyonon diti. ⁴ Ondung wonsoyon dokoyu o miagal di pinonuhuan ku’ddi om raja’ no kasai’ i sinakagon di Daud. Om maya’ indo kasai’ iyolo’ do wawayaan diti walai do raja’ do miwoyo’ di pagawai om i tulun diyolo’ do songinsakai do korita’-kuda’ om kuda’, do gisom dot alaid. ⁵ Nga’ ondung a’ kou mumboyo’ do ponuhuan ku om sumumpa’ oku no dot id dokoyu dot araag nondo iti walai do raja’. Iyoho’ no i TUHAN, o minomoros diti. ⁶ Id doho’ nopo daa om miagal po di tana’ do Giliad om i konuluhanan do Libanon o kolumiso’ diti walai do raja’ do Yohuda, nga’ silihon ku nondo iti do kinoiyonon dit oingou om it a’ iyonon do tulun. ⁷ Porikot oku nondo do tulun do mongoi pamaraag diti. Igitan ngai’ nopondo diyolo’ i kapak diyolo’ om pinglongodon no i torigi do kayu sedar om pataamon nondo iri dot id tapui. ⁸ Om koimbagu nopondo om mogiuhot-uhot nopo i tulun di bansa’d suwai di montinalib do hiri, ondung nokuro tu’ miagal kopio’ddi o winonsoi ku, iyoho’ i TUHAN, dot id bandar dot olumis diti. ⁹ Om sumimbar nondo o tulun do nokobungou nopo nga’ tuminolibamban kou i’ di tumpongo dokoyu dot id doho’, i Kinorohingan dokoyu, om tuminuku’ kou om minodsubak kou do tingolig,’’ ka. ¹⁰ Oi tulun do Yohuda, kada’ dokoyu pogihadai i Raja’ Yosia; kada’ kou pogihad do kinapatayan dau. Nga’ pogihadai nogi’ dokoyu i Yoahas, i tanak dau’d kusai, tu’ tanggayan diyolo’ iyau om a’ no koguli’ kawagu; a’ no iyau koguli’ kawagu do mongoi ontong do pomogunan di kinosusuon dau. ¹¹ Boros kad TUHAN do pasal di Yoahas i tanak di Yosia, i suminiliu do raja’ do Yohuda do suminowoli di tapa’ dau, ’’Nokopoggidu’ no iyau do hiti om a’ no iyau koguli’ kawagu. ¹² Hilo’ nod pomogunan di pinananggayan diyolo’ dau o kapatayon dau om a’ no iyau kokito kawagu do pomogunan diti,’’ ka dau. ¹³ Obungou no i tulun di momonsoi do walai dau dot it a’ otulid o pinoimpahan om tudut o pinopoinggayo. Obungou no i tulun di monuhu’ do tulun do kumaraja’, om a’ indo dau godsian. ¹⁴ Obungou no i tulun di momoros do, ’’Momonsoi oku nondod walai ku dot agayo, om it ogumu’ o bilik do hiri’d sawat,’’ ka. Om wansayan no dau do liligaon i walai dau’ddi om limputon no dau do kayu sedar do Libanon om saaton dau dot aragang. ¹⁵ Poposonong toi diya’ ko’ mantad do raja’d suwai dot ondung kawaal ko do walai nu do kayu sedar do Libanon dit osonong kopio o wonsoyon, om it olumis ko’ dombokon? Otogui i’ i tapa’ nu. Om otulid i’ om a’ manampaping i tapa’ nu; om osonong ngai’ nopo o kinootuson do nunu nopo i winonsoi dau. ¹⁶ Otulid i’ o pinomutus dau di tulun do mosikin, om osonong-sonong iddi kasai’ iyau. Iyo noddi o tulun di kotutun do TUHAN. ¹⁷ Nga’ iya’ nopo om a’ i’ iyo’ddi tu’ iri no i diya’d korohian o tihumon nu; om mamatai ko do tulun dit aiso’ o sala’. Om padalaan nu do mongulok-ulok i tulun nu. Iyoho’ no i TUHAN, o minomoros diti. ¹⁸ Om gowoi poddi om poingkaa o boros do TUHAN do pasal di Yoyakim i tanak di Yosia do kusai, ’’Aiso’ i’ o mogihad do kapatayon dau. Om aiso’ o momoros dot, ’Adai, oi tambalut ku,’ ka. Om aiso’ o tumongob om aiso’ o momoros do, ’Kosian-sian giya diya’ddi oi raja’ ku,’ ka. ¹⁹ Miagal nod pomolobong do kaladai o pomolobong di Yoyakim, tu’ gayaton nopo iyau om pataamon no do hiri’d soliwan do wawayaan do Yorusalim,’’ ka. ²⁰ Boros kad TUHAN, ’’Oi tulun do Yorusalim, ongoi kou pinggiak do hilo’d Libanon, ongoi kou pingihad do hilo’d tana’ do Basan; pinglohou kou no do mantad hilo’d konuluhanan do Muab tu’ nangahaba’ no i sumokodung dokoyu. ²¹ Minoro-boros oku dot id diya’ di maso nu po dot osimbayan, nga’ a’ ko i’ minokinongou. Miagal noddi o winonsoi nu do solinaid nu do poimpasi, tu’ a’ ko i’ minumboyo’ doho’. ²² Otilib nondod tongus i boyoon nu, om angatanggayan do pisangod i sumokodung diya’, om ointingayam om oindaraat i bandar nu tu’ araat i’ i nongowonsoi nu. ²³ Osimbayan tomod o kopurimanan nu dot id pogialatan di kayu sedar do hilo’d Libanon, nga’ a’ nondo ogina-gina’ o todoi nu dot orikatan ko di toruol; i miagal po di toruol do tondu’ do mogkosusu,’’ ka dau. ²⁴ Boros kad TUHAN dot id di Raja’ Yoyakin, i tanak di Raja’ Yoyakim, i raja’ do Yohuda, ’’Poboroson ku dot id suang do ngaran ku iyoho’ i Kinorohingan do poimpasi, dot oluson ku iya’ dot iyo ko piya daa di pondulung di pononoop do poinsulung di tunturu’ do longon ku’d wanan, ²⁵ om patahakon tiya’ nondo dot id tulun di poddosi nu, i tulun dit orohian do mamatai diya’. Patahakon tiya’ nondo dot id di Raja’ Nobukadnisar, i raja’ do Babil om id soudor dau. ²⁶ Pataamon tiya’ nopondo om i tina’ nu dot id pomogunan dit okon ko’ kinosusuon dokoyu, om hilo’ nondo goduwo o kapatayon dokoyu. ²⁷ Orohian ko i’ daa’ndo tomod do kokito kawagu do pomogunan diti nga’ a’ kou no koguli’ kawagu,’’ ka dau. ²⁸ Boros kangku, ’’Miagal toi do kuron di nababak i Raja’ Yoyakin, tu’ pataamon poo om niada-ada’ do tulun? Iri toi o kopoguyungan nu dau om i tangaanak dau dot id pomogunan dit a’ dau noongoi-ongoi do gulu?’’ kangku. ²⁹ Oi pomogunan ku, pokinongou nodti pinoboros do TUHAN, ³⁰ ’’Napapalan no i tulun diri dot atatagadan do tangaanak dau, om a’ kasai’ iyau koundar. Aiso’ nondo o sinakagon dau do momorinta’ kawagu do hilo’d Yohuda, om i koirikau do hiri’d tirikohonon di Daud do momorinta’. Iyoho’ no i TUHAN, o minomoros diti,’’ ka dau.

¹ - ² Boros kad TUHAN, i Kinorohingan dot Israil, ’’Obungou no i boyoon di mamaraag om i popogitompias-pias di tulun ku! Iyokoyu nogi’ daa it apatut do momogompi’ di tulun ku. Nga’ a’ i’ dokoyu ginompi’ i tulun ku, tu’ pinogitompias-pias nogi’ dokoyu om nuyung dokoyu iyolo’. Om hukuman ku nondo iyokoyu tu’ i kararaat dokoyu o kopomohukuman ku. ³ Timungon ngai’ ku nondo i tulun ku do mantad id koinsanai di pomogunan di pinotompiasan ku diyolo’, om pogulion ku nondo kawagu iyolo’ do hiti’d pomogunan mantad diyolo’. Om ogumu’ nondo o tangaanak diyolo’ om gumumu’ iyolo’. ⁴ Om momili’ oku nondo do boyoon do momogompi’ diyolo’. Om a’ nondo moddosi ko’ otompurolosi i tulun ku, om iso’ pondo diyolo’ nga’ aiso’ i’ ot atagak. Iyoho’ no i TUHAN, o minomoros diti,’’ ka dau. ⁵ Boros kad TUHAN, ’’Rumikot nondo o maso do momili’ oku do songulun o raja’ dit otulid do mantad id sinakagon di Daud. Momorinta’ nondo i raja’ddi do mikuwo’d toilaan om momonsoi iyau dit otopot om it otulid do pointongkop diti pomogunan. ⁶ Soira’ nopondo do momorinta’ iyau, om aiso’ nondo o koligagaanan di tulun do Yohuda, om haro o kosimbayanan do tulun dot Israil. Roitan nondo i raja’ddi dot ’I TUHAN i Koposion Toko’’. ⁷ Rumikot nondo o maso dot a’ i tulun sumumpa’ dot id suang do ngaran ku iyoho’, i Kinorohingan do poimpasi, i pinoposoliwan dot Israil do mantad hilo’d pomogunan do Masir. ⁸ Suwai ko’ sumumpa’ nondo iyolo’ dot id suang do ngaran ku, iyoho’ i’ Kinorohingan do poimpasi, i pinopoidu’ do tulun dot Israil do mantad hilo’d pomogunan di ponong id utara om mantad id koinsanai do pomogunan do suwai di pinotompiasan ku diyolo’. Om momogun-mogun nondo iyolo’ do hiri’d pomogunan diyolo’,’’ ka dau. ⁹ Iti no o boros ku do pasal di nabi: Nokoruol tomod o ginawo ku, om gagaran oku po tomod, tu’ TUHAN no om i boros dau dit olidang o pinoposiliu doho’ do miagal di tulun do naawuk, i tulun di nadalaan do minonginum do waig dot anggur. ¹⁰ Noponu’ pod tulun dit a’ otorodok dot id TUHAN iti pomogunan toko’, angaraat o kowoyo-woyoon diyolo’ om kasala’ o pamamakai diyolo’ do kuasa’ diyolo’. Om mihad poddi iti pomogunan tu’ napapalan nod TUHAN, om ilo kasakatan nga’ nongoriou po ngai’. ¹¹ Boros kad TUHAN, ’’A’ i’ mumboyo’ doho’ ilo nabi om ilo imam di mogobi-obi’ doho’; tu’ nokosupan ku i’ iyolo’ do mingwonsoi dot araat do hilo’ piya’d walai ku. ¹² Alamou nondo om otuong i ralan do susuyon diyolo’; posoduwon ku nondo iyolo’ om porotuon ku. Porikatan ku nondo iyolo’ do kosusaan; dot orikot i maso do kopomohukuman ku diyolo’. Iyoho’ no i TUHAN, o minomoros diti. ¹³ Nokito ku no i dusa di nabi do hilo’d Samaria; tu’ minimboros iyolo’ dot id suang do ngaran do Baal om minamalid iyolo’ di tulun ku, ¹⁴ Nga’ ara-raat i nabi di hilo’d Yorusalim do nokito ku: tu’ magampahu’ om mongudut iyolo’; om monguhup nogi’ iyolo’ di tulun do momonsoi dit araat, gisom iddi dot aiso’ nopo o tiso’d tulun do tumingkod do momonsoi’d araat. Id doho’ nopo om miagal nopo iyolo’ di tulun do Sodom om Gomora karaat,’’ ka dau. ¹⁵ Om gowoi pondo om poingkaa o poboroson ku, iyoho’ i TUHAN it Osundu Kopio, do pasal di nabi do hilo’d Yorusalim, ’’Onuan ku nondo iyolo’d totonomon dit opoit do maan dot akanon, om poinumon ku iyolo’ do waig di kawanit tu’ iyolo’ no i minamayayat do tulun do pointongkop diti pomogunan dot a’ momusou doho’,’’ ka dau. ¹⁶ Om boros kad TUHAN, it Osundu Kopio dot id tulun do hilo’d Yorusalim, ’’Kada’ kou pokinongou do poboroson di nabi; tu’ manahak no iyolo’ dokoyu do pagandasan di maan toomod. Iri i’ i pininsorou toomod diyolo’ o posunudon diyolo’ dokoyu om okon i’ ko’ i nokoboros ku. ¹⁷ Pimbarasan diyolo’ i tulun di mada’ do mokinongou di pinoboros ku dot, ’Osonong-sonong kou i’ bo,’ ka no diyolo’. Om tikid-tikidon nopo diyolo’ do momisunud i tulun dot okodou o ginawo dot, ’A’ kou i’ bo oontok do kosusaan,’ ka,’’ ka dau. ¹⁸ Boros kangku, ’’Aiso’ i’ o tiso’ diti nabi do nokoilo do pomusarahan do TUHAN. Om aiso’ i’ o tiso’ diyolo’ do nokorongou ko’ nokosuhut po di natantu’ mantad dau do wonsoyon dau, om aiso’ o minokinongou om aiso’ o minamadul di pinoboros dau. ¹⁹ Kototogod nopod TUHAN om miagal po do tongus dit opuhod kopio do kobuntul di tulun dot araat, ²⁰ om a’ i’ iri tumingkod dot a’ po owonsoi ngai’ i natantu’ mantad dau do wonsoyon dau. Om osuhutan nopondo kopio di tulun dau iti om koimbagu,’’ kangku. ²¹ Boros kad TUHAN, ’’A’ ku i’ sinuhu’ do rumikot iti nabi nga’ ongoi toomod nopo iyolo’. Om a’ ku i’ iyolo’ sinunudan do poboroson nga’ mimboros i’ iyolo’ dot id suang do ngaran ku. ²² Nga’ ondung nokoilo daa iyolo’ do pomusorou ku om milo i’ daa iyolo’ do popimboros di boros ku dot id tulun ku om milo daa do monuhu’ diyolo’ do kumorologo do momonsoi’d dusa, om tumingkod di wowonsoyon diyolo’ dot araat. ²³ Iyoho’ nopo om Kinorohingan i’ di hino do hinonggo-honggo nopo om okon i’ ko’ hino dot id iso’ no o kinoiyonon. ²⁴ Aiso’ i’ o milo do lumisok do gisom dot a’ ku iyau okito. Tu’ a’ kou toi koilo do hinonggo-honggo nopo do hilo’d surga om hiti’d pomogunan nga’ hino oku i’? ²⁵ Oilaan ku i’ i pinoboros di nabi di mingudut dot id suang do ngaran ku, om i momoros do sinunudan ku iyolo’ do boros ku dot id suang do nipi diyolo’. ²⁶ Songkuro po daa koloido’ di piro-piro nabi do mimpalid di tulun ku, dot i boros di pininsarahan toomod diyolo’ o pamalid? ²⁷ Ondos daa diyolo’ om popolihu di tulun ku doho’ i nipi di pinsusuyon diyolo’ do miagal di komolohingan diyolo’ tu’ nokolihu doho’ om tuminuku’ diri dot id di Baal. ²⁸ Iri nopo nabi di haro o nipi om apatut i’ do poboroson dau do nipi i’ toomod iri. Nga’ iri nopo i nabi di nakaramit do boros ku om apatut no do tumorodok do popinsunud do boros diri. Tu’ nunu toi kopio o bundusan tu’ milo daa do poiyo-iyoon do gandum? ²⁹ Tu’ okon toi ko’ miagal do tapui o boros ku om miagal do dunsul di mamabak do watu? ³⁰ Saapon ku indo i nabi di popolombus do boros do mantad id nabi do suwai, om popinsunudon nondo do boros ku kaka iri. ³¹ Om saapon ku nogi’ i nabi di momoros do boros ku i popimboroson diyolo’ om inda’ ka do diyolo’ tomod i’ di boros. ³² Pokinongou kou no do poboroson ku, iyoho’ i TUHAN! Saapon ku i nabi di minsusui do nipi diyolo’ di nongoponu’ do tudut. Popinsusuyon diyolo’ i nipi diyolo’ om gowoi pondo om apalid i tulun ku, dot i tudut om i boboroson diyolo’ o kapalid. A’ ku i’ iyolo’ sinuhu’, tu’ aiso’ i’ o guna’ diyolo’ dot id tulun ku. Iyoho’ no i TUHAN, o minomoros diti,’’ ka dau. ³³ Boros kad TUHAN dot id doho’, ’’Oi Yoromia, ondung haro o muhot diya’ do tongoiso’ di tulun ku, ko’ i nabi, ko’ i tulun dit imam, do poingkaa, ’Nunu kad boros do TUHAN?’ ka, om sunudan no iyau dot, ’Iya’ no o nosiliu do binabo do TUHAN om potitaamon ko no dau,’ kanto. ³⁴ Ondung haro o tiso’ di tulun ku, ko’ ongoiso’ di nabi ko’ it imam do momoros dot, ’i binabo’d TUHAN,’ ka, om hukuman ku no iyau om i sompiiyon dau. ³⁵ Suwai ko’ apatut daa do monguho-nguhot iyau di tambalut dau om i songkoduwo dau do, ’Nunu no o nisimbar do TUHAN?’ ka, ko’ ’Nunu o pinoboros do TUHAN?’ ka. ³⁶ Om a’ no iyolo’ koino-ino do momoros kawagu do boros dot, ’I binabo do TUHAN,’ ka, tu’ ondung haro o momoros do miagal diri, om silihon ku nondo kopio do binabo dau i boros ku. Tu’ pinasansala’ di tulun dot Israil i boros do Kinorohingan diyolo’, i Kinorohingan do poimpasi, om i TUHAN dit Osundu Kopio. ³⁷ Uhoton no do poingkaa i nabi, oi Yoromia, ’Nunu o nisimbar do TUHAN dot id dokoyu? Nunu o pinoboros do TUHAN?’ kanto. ³⁸ Om ondung a’ diyolo’ tonudon i pinonuhuan ku om mimboros no dot, ’i binabo do TUHAN,’ ka, om sunudan no iyolo’ do ³⁹ ngoyon kopio ku nondo iyolo’ puhuo’ om pataamon ku nondo iyolo’, om i bandar di pinatahak ku diyolo’ om i komolohingan diyolo’ do hilo’d sodu’. ⁴⁰ Om indaraaton ku nondo iyolo’ om intingayamon ku iyolo’ do gisom dot alaid om a’ nondod tulun olihuan i kinootuson diyolo’ddi,’’ ka dau.

¹ Om tontok di natanggayan no di Raja’ Nobukadnisar do hilo’d Babil, i Raja’ Yoyakin, om i piro-piro o boyoon do Yohuda, om i tulun dit ongoilo om it angabaal do monukang do mantad hilo’d Yorusalim, om pointongo’ oku nod TUHAN do duwo o balatak do noponu’d tua’ dot ara do hiri nogid dotimbabaan di Walai’d Sasambayangan dot Agayo, dot id suang do pinointalang. (I Raja’ Nobukadnisar nopo om raja’ do Babil. I Raja’ Yoyakim nopo om raja’ do Yohuda, om tanak iyau di Yoyakim.) ² Iri nopo balatak do koiso’ om kisuang do tua’ dot ara dit ongosonong, i tua’ dit id gulu koonsok; nga’ iri no balatak di koduwo om kisuang do tua’ dot ara di nongomomos no, om a’ no milo’d kanon. ³ Om boros kaddi do TUHAN dot id doho’, ’’Nunu o tokito nu, oi Yoromia?’’ ka dau. Om boros kangku do suminimbar, ’’Tua’ dot ara, oi TUHAN. Ilo’ nopo tongosonong nga’ osonong no kopio, om ilo’ no nongomomos om nomomos no kopio, om a’ no milo’d kanon,’’ kangku. ⁴ Om boros kaddi do TUHAN dot id doho’, ⁵ ’’Iyoho’ no i TUHAN, om Kinorohingan dot Israil o momoros dot iri nopo tulun di natanggayan do hilo’d Babil om iyo nodti tua’ dot ara dot osonong, om osonong oku indo dot id diyolo’. ⁶ Gompion ku i’ iyolo’ om pogulion kawagu ku iyolo’ do hiti’d pomogunan diti. Wonsoyon ku i’ iyolo’ om a’ ku i’ iyolo’ raagon; tonomon ku i’ iyolo’ om a’ ku i’ iyolo’ utuson. ⁷ Om onuan ku indo iyolo’ do ginawo dit orohian do koilo dot iyoho’ no o TUHAN. Om osiliu nondo iyolo’ do tulun ku om osiliu oku do Kinorohingan diyolo’, tu’ aayi-ayi’ nondo o ginawo diyolo’ do gumuli’ dot id doho’. ⁸ Nga’ i Raja’ Sodokia noo, i raja’ do Yohuda, om i boyoon do tulun dit id toning dau, om i tulun do Yorusalim do suwai di minundorong do hiti’d pomogunan diti ko’ i minundaliu do hilo’d Masir, om iyoho’ no, i TUHAN, o poposiliu ngai’ diyolo’ do miagal diti tua’ dot ara di nomomos, om a’ no milo’d kanon. ⁹ Porikatan ku nondo iyolo’d kosusaan dit awagat kopio gisom dot aranaban ngai’ o bansa’ do hiti’d pomogunan. Hingi-hingion nondo iyolo’ do tulun, om maan do tiirak-irak, om untotogodon iyolo’, om silihon do pomomopol i ngaran diyolo’ do honggo nopo o potompiasan ku diyolo’. ¹⁰ Om porikoton ku nondo o pisangadan om mononglous, om toruol dot id diyolo’ gisom dot aiso’ no tiso’ diyolo’ dot oolu’ do hiri’d pomogunan di tinahak ku diyolo’ om tinahak ku di komolohingan diyolo’ di gulu po,’’ ka dau.

¹ Tontok di kaapat do toun di Yoyakim i tanak di Yosia, do nosiliu’d raja’ do Yohuda, om karamit oku nod boros do mantad id TUHAN do pasal do koinsanai’d tulun do Yohuda. Maso nopodti nga’ koiso’ nogid toun di Nobukadnisar do raja’ do Babil. ² Boros kangku dot id koinsanai’d tulun do Yohuda om Yorusalim, ³ ’’Solinaid nopo do duwo nohopod om tolu o toun do mantad di kohopod nogi’ om tolu do toun di Yosia, i tanak di Amon, do raja’ do Yohuda om gisom do tadau’d baino’, om moro-boros kasai’ no o TUHAN dot id doho’, om popilombu-lombuson kasai’ ku i’ iri dot id dokoyu. Nga’ a’ kou i’ minomonsoi’ddi. ⁴ A’ kou i’ minokinongou piya om a’ kou minamadul do mulong piya dot aiso’ o kinotingkadan do TUHAN do pinoporikot di susuhuon dau, i nabi dau dot id dokoyu. ⁵ Sinunudan kou diyolo’ do tumongkiad di kowoyo-woyoon dokoyu dot araat om tumingkod do momonsoi’d dusa, om poingiyon kasai’ kou i’ daa do hiti’d pomogunan di pinatahak do TUHAN dot id dokoyu om id komolohingan dokoyu do sumiliu’d tungkusan dokoyu do gisom dot alaid. ⁶ Sinunudan kou di nabi dot a’ tumuku’ om a’ modsubak do ponokokinorohingan om a’ popotogod do TUHAN dot i podsusubak dokoyu do tingolig di winonsoi dokoyu o popotogod dau. Ondung minumboyo’ kou daa di ponuhuan do TUHAN diri om a’ kou i’ daa dau hinukuman. ⁷ Nga’ TUHAN piya nga’ koboros no dot a’ kou minokinongou dau. Tu’ pinotogod nogi’ dokoyu iyau dot ino tingolig dokoyu o pinopotogod. Om iyokoyu iddi om iyokoyu o pinoporikot do hukuman dau dot id dokoyu. ⁸ Om gowoi poddi om poboroson do TUHAN it Osundu Kopio o miagal diti, tu’ a’ kou i’ minokinongou dau. Boros ka dau, ⁹ ’Porikoton ngai’ ku nondo i tulun do mantad hilo’d utara om porikoton ku i susuhuon ku, i Raja’ Nobukadnisar, i raja’ do Babil. Porikoton ku iyolo’ do mongoi panangod do Yohuda om i songingiyon do hilo’ om mongoi panangod do koinsanai’d bansa’ di hiri’d posorili’. Raagon ku nondo i pomogunan di bansa’ di hiri’d posorili’ om pologoson ku nopondo iyolo’ do poinraag do gisom dot alaid, om gisom do koronob om kotompurolosi o kokitanan. Iyoho’ no i TUHAN, o minomoros diti. ¹⁰ Om tingkodon ngai’ ku nondo i pinongkisan diyolo’ dot atataadan om asasanangan, om i karamayo’ do poginakanan do kumawin. Om tumau piya nondod lampung diyolo’ om gandum nga’ aiso’ noo. ¹¹ Poinglogos tomod nopondo do poingraag o pointongkop diti pomogunan om koronob tomod dot okito om oingou, om i bansa’ do hiti’d posorili’ nga’ minsiriba’ ngai’ nopo di raja’ do Babil do solinaid do turu’ nohopod o toun. ¹² Om katalib pondo iri om hukuman ku nogindo o bansa’d Babil om i raja’ do Babil dot i dusa diyolo’ o kopomohukuman ku. Raagon ku nondo i pomogunan do Babil om pologoson ku do poingraag do gisom dot alaid. ¹³ Porotuon ku nondo dot id Babil o koinsanai’d kosusaan di pinoboros ku do porotuon ku dot id koinsanai’d bansa’ do tontok di minoro-boros oku di Yoromia — oinsanan nopo i kosusaan di nokotulis dot id buuk diti. ¹⁴ Sulian ku nondo i tulun do Babil di piningwansayan diyolo’ om ogumu’ nondo o bansa’ om raja’ dot angagayo do moniliu diyolo’ do turipon,’ ka dau,’’ kangku. ¹⁵ Boros kad TUHAN, i Kinorohingan dot Israil dot id doho’, ’’Onuo’ iti sangkir di ponginuman do waig dot anggur do noponu’d kototogod ku. Igitai noti do kumaa dot id koinsanai’d bansa’ di ponuhuan ku diya’ do mongoi, om poinuman no diyolo’ iti. ¹⁶ Om soira’ nopondod koinum iyolo’dti om mikorobibi’ nondo iyolo’ om atagakan do pomusorou tu’ porikatan ku iyolo’ do pisangadan,’’ ka dau. ¹⁷ Om onuo’ ku no i sangkir diri do mantad id longon do TUHAN om sansagai ku no do popoinum diri o koinsanai di bansa’ di pinonuhuan do TUHAN doho’d mongoi. ¹⁸ Sinansagan diri o Yorusalim om koinsanai di bandar do hilo’d Yohuda, om koinsanai di raja’ om boyoon do hiri do monginum diri, om osiliu i’ iyolo’ do tana’ dit a’ sunian om i koronob, om kotompurolosi kopio o kokitanan, om silihon nondod tulun do pomopol o ngaran diyolo’, do miagal di wonsoyon diyolo’ do gisom do baino’. ¹⁹ - ²⁶ Iti ngai’ no o ngaran do tulun do suwai di poinumon do mantad id sangkir diri: i raja’ do Masir om i pagawai dau om i boyoon; koinsanai di tulun do Masir om koinsanai di bansa’d suwai di hilo’d Masir; koinsanai di raja’ do pomogunan dot Us; koinsanai di raja’ do Pilistin do hilo’d bandar dot Askilon, om bandar do Gasa, om bandar dot Ikron; om koinsanai di tulun di nongoolu-olu’ do hilo’d Asdod; koinsanai di tulun dot Idom, om Muab om Amon; koinsanai di raja’ do Tirus om Sidon; koinsanai di raja’ do hilo’d tisan do Rahat do Tanga’; i bandar do Didan, om Tima, om Bus; koinsanai di tulun di momompod do tobuk; koinsanai di raja’ dot Arab; koinsanai di raja’ do payat do tulun do hilo’d tana’ do kowotuan; koinsanai di raja’ do Simri, Ilam om Madai; koinsanai di raja’ do ponong hilo’d utara; it id somok om it id sodu’, do pogisuhu-suhuton nopo. Koinum ngai’ nopod suang di sangkir diri o koinsanai do bansa’ do hiti’d pomogunan. Om kolimpupuson nopondo do monginum diri, om i raja’ do Babil. ²⁷ Om boros kaddi do TUHAN dot id doho’, ’’Sunudan ngai’ no i tulun dot iyoho’ no i TUHAN it Osundu Kopio, i Kinorohingan dot Israil, o monuhu’ diyolo’ do monginum diri do gisom id aawuk om koilob iyolo’, om gisom dot ahaba’ om a’ iyolo’ kotungag kawagu, dot i pisangadan do porikoton ku dot id diyolo’ o kobungou. ²⁸ Om ondung mada’ iyolo’ do rumamit di sangkir diri do potunuyon nu om mada’ iyolo’ do monginum diri, om sunudan no iyolo’ do nokoboros no o TUHAN, it Osundu Kopio, do poingkuro piya nga’ a’ no milo dot a’ iyolo’ monginum do suang di sangkir diri, tu’ iyo noddi o ponuhuan do TUHAN. ²⁹ Timpuunan ku no do mamaraag o hiti’d bandar ku. Om ondos daa diyolo’ om a’ iyolo’ iyau ohukuman? Atantu’ no dot ohukuman i’ iyolo’ tu’ porikatan ku i’ do pisangadan o koinsanai’d tulun do hiti’d pomogunan. Iyoho’ no i TUHAN, it Osundu Kopio, o minomoros diti. ³⁰ Iya’ no oi Yoromia, o popoboros do koinsanai diti nokoboros ku. Sunudan ngai’ no iti tulun do poingkaa, ’Ongorod nopo o boros do TUHAN do mantad hilo’d surga. Mamagarom iyau do sumaap di tulun dau; om mamangkis iyau do miagal do tulun di mamaga’ do tua’ dot anggur. Korongou ngai’ nopo dau o koinsanai do tulun do hiti’d pomogunan, ³¹ om mulinggou o boros dau do gisom do korikot do hilo’d tisan diti pomogunan. Haro o hal do kapasalaan do TUHAN do koinsanai’d bansa’. Om oinsanan nopondo o tulun do butusan om hukuman do kapatayon i tulun dot angaraat,’ ka,’’ ka dau. ³² Boros kad TUHAN, it Osundu Kopio, ’’Mogisuhu-suhut nopo i bansa’ dot orikatan do kosusaan, om rumikot no o tongus dot opuhod kopio do mantad hilo’d tisan diti pomogunan,’’ ka dau. ³³ Tontok nopo do tadau’ddi om songinsasad pondo i rata’ di tulun di pinatai’d TUHAN do pointongkop diti pomogunan. Aiso’ no o mogihad diyolo’ om a’ no oongoi kolobong i rata’ diyolo’. Poingiliu tomod nopori do hiri’d tana’ do miagal pod kinotimungon do rinomos. ³⁴ Ihad kou no, iyokoyu i boyoon, i gompomogompi’ do tulun di songonuon do TUHAN. Ihad kou no om isis no do hilo’d pupuk. Tu’ nokorikot no o maso do kapamatayan dokoyu, om pogitompias-piason i kopoggidu’. Om iyo kou do kuron dit amahal kopio, dit aratu’ om ababak. ³⁵ Aiso’ no o ralan dokoyu do mogidu’. ³⁶ - ³⁷ Mingodoi kou po om mingihad dot atatangaban tu’ pinatai nod TUHAN i bansa’ dokoyu, om rinaag dau o pomogunan dokoyu dit osimbayan. ³⁸ Notongkiadan nod TUHAN i tulun dau do miagal do singa di tuminongkiad do luang dau. Tu’ nosiliu’ddi do miagal do tana’ do kowotuan o pomogunan diti do nobungou di pisangadan dit adalaan kopio om i kototogod do TUHAN dit a’ ogina-gina’.

¹ Tontok dit oruhai po do kinosilihan di Yoyakim i tanak di Yosia do kusai, do raja’ do Yohuda, ² om boro-boros no o TUHAN dot id doho’ do poingkaa, ’’Ongoi ingkakat do hilo’d natad di Walai’d Sasambayangan dot Agayo om poboroson no o koinsanai di pinonuhuan ku diya’ do popoboros dot id tulun di rumikot do mantad hilo’d kabandaran do Yohuda do mongoi sambayang do hilo’. Kada’ nod haro o tiso’ di boros diri dot a’ polombuson. ³ Tu’ ulan toi’ om mokinongou daa i tulun om tumingkod di kowoyo-woyoon diyolo’ dot araat. Ondung tumingkod iyolo’ om wolihan ku indo o pomusorou ku di mamaraag mantad daa diyolo’ tu’ araat i’ o pingwonsoyon diyolo’,’’ ka dau. ⁴ Om sinuhu’ oku’d TUHAN do popoboros dot id tulun diri do poingkaa, ’’Iyoho’ no i TUHAN, i minomoros dot apatut kou do mumboyo’ doho’, om tumanud do koinsanai dit oturan di pinatahak ku dokoyu, ⁵ om mamadul kopio do boros di susuhuon ku, i nabi, di popingrikoton ku dot id dokoyu. Nga’ a’ kou i’ insan umboyo’ di pinoboros diyolo’ddi. ⁶ Ondung tumilombus kou dot a’ mumboyo’ om wonsoyon ku nondo dot id Walai’d Sasambayangan dot Agayo diti o miagal di winonsoi ku di hilo’d Silo, om oinsanan nopondo o bansa’ do hiti’d pomogunan do mamarait do ngaran do bandar do Yorusalim do maan do pomopol,’’ ka dau. ⁷ Nokorongou ngai’ nopo it imam, om i nabi om koinsanai di tulun do mimboros oku’dti do hiri’d Walai’d Sasambayangan dot Agayo. ⁸ Om kopupusai ngai’ ku po do popoboros i pinonuhuan do TUHAN doho’ do popoboros, om gayato’ oku no diyolo’ om pinggarang no iyolo’ do poingkaa, ’’Apatut no do patayon ko! ⁹ Nokuro tu’ minomoros ko dot id suang do ngaran do TUHAN dot a’ no alaid om koiyo no di hilo’d Silo iti Walai’d Sasambayangan dot Agayo’dti, om pinoboros nu nogi’ dot iti bandar nga’ araag om aiso’ nondo o miyon do hiti?’’ ka diyolo’. Om gurumungai oku noddi di tulun dot ogumu’. ¹⁰ Om soira’ di nokorongou i boyoon do Yohuda di nosiliu do miagal diri, om arau-arau nopo iyolo’ do suminoliwan do mantad hiri’d walai do raja’ om ongoi no iyolo’ do hiri’d Walai’d Sasambayangan dot Agayo, om ongoi no irikau do hiri’d wawayaan di roitan do Wawayaan do Wagu di Walai’d Sasambayangan dot Agayo. ¹¹ Om boros ka dit imam om i nabi dot id boyoon, om id koinsanai di tulun, ’’Apatut no do hukuman do kapatayon iti tulun diti tu’ pinapasala’ i’ iyau do bandar diti. Om iyokoyu nogi’ nga’ nokorongou i’ dau do minomoros do miagal diri,’’ ka diyolo’. ¹² Om boros kangku’ddi, ’’Sinuhu’ oku’d TUHAN do mongoi popoboros do koinsanai di norongou dokoyu do pinoboros ku do papasala’ diti Walai’d Sasambayangan dot Agayo om papasala’ diti bandar. ¹³ Iyo nopoddi om simbanai nogi’ kopio dokoyu ino kowoyo-woyoon dokoyu om ino pingwonsoyon dokoyu, om apatut no do mumboyo’ kou’d TUHAN, i Kinorohingan dokoyu. Tu’ ondung mumboyo’ kou daa dau, om wolihan indo dau o pomusarahan dau di poporikot mantad daa do kapatayon dot id dokoyu. ¹⁴ Nga’ iyoho’ nopo, om id suang oku nod longon dokoyu. Wonsoyon nopo dokoyu dot id doho’ i korohian dokoyu. ¹⁵ Nga’ ilaan no kopio dokoyu iti: ondung patayon oku dokoyu om kasala’ kou no om koinsanai di tulun do hiti’d bandar tu’ mamatai do tulun dit aiso’ o sala’, tu’ otopot i’ kopio do TUHAN o minonuhu’ doho’ do mongoi popoinsan dokoyu,’’ kangku. ¹⁶ Om boros kaddi di boyoon om i rayat dot id imam om id nabi, ’’Iti nopo tulun om minomoros i’ dot id suang do ngaran do TUHAN om Kinorohingan toko’, om a’ i’ iyau apatut do hukuman do kapatayon,’’ ka diyolo’. ¹⁷ Om ingkakat po kawagu o piro-piro o molohing-lohingon do minoro-boros dot id tulun di nokotimung do hiri do poingkaa, ¹⁸ ’’Tontok dit i Hiskia po o raja’ do Yohuda om sunudai no di Mika i nabi diri, i tulun do mantad hilo’d Morisit, o koinsanai di tulun do boros do TUHAN it Osundu Kopio do poingkaa, ’Roduwon nondo o Sion do miagal do tumo, om osiliu do kinotimungon do kinaraagan o Yorusalim, om i nuluhon do kinoiyonon di Walai’d Sasambayangan dot Agayo nga’ osiliu nondod puru’,’ ka. ¹⁹ Om a’ i’ di Hiskia om i tulun do Yohuda pinatai i Mika. Suwai ko’ nooris i’ i Hiskia do TUHAN om minokiinsian iyau dau. Om wolihai noddi do TUHAN o pomusarahan dau di poporikot mantad daa do kosusaan do pamatai diyolo’. Nga’ iyati’ nodti om poporikot toko’ i’ daa do kosusaan dot id dati’,’’ ka diyolo’. ²⁰ Om boros kangku’ddi, Haro nogi’ kawagu o tulun do suwai do minomoros dot id suang do ngaran do TUHAN do papasala’ di bandar om i bansa’ do miagal di pinoboros ku. Ngaran nopo dau nga’ i Uria, i tanak di Somaya, i mantad hilo’d Kiriat Yiarim. ²¹ Om soira’ di nokorongou i Raja’ Yoyakim om i boyoon do soudor dau om i pagawai dau di pinoboros di Uria, om umbalan daa’ddi di raja’ do mamatai iyau. Nga’ nokoilo i’ i Uria do pasal diri om poggidu’ no iyau do hilo’d Masir do nopopoddosian. ²² Nga’ ponuhu’ po i Raja’ Yoyakim di Ilnatan i tanak di Akbor om piro-piro tulun do suwai do mongoi do hilo’d Masir do mongoi pangangat di Uria. ²³ Om ngoyo’ no diyolo’ i Uria do mantad hilo’d Masir om pootodo’ no diyolo’ dot id di Raja’ Yoyakim. Om ponuhu’ no i raja’ddi do tulun do mamatai di Uria om pataamo’ noddi i rata’ dau do hiri’d pamalabangan do tulun toomod. ²⁴ Nga’ iyoho’ nopo, i Yoromia om sokodungon i’ di Ahikam, i tanak di Sapan, om a’ oku iddi pinatahak dot id tulun om a’ oku pinatai.

¹ Tontok dit oruhai po o kinosilihan di Sodokia i tanak di Yosia, do raja’ do hilo’d Yohuda, om sunudai oku nod TUHAN ² do momonsoi do poku’ do kayu o wonsoyon om pongogos nopoddi om kulit di tinali om popokuon nogindo iri dot id liou ku. ³ - ⁴ Om sunudai oku noddi do TUHAN, it Osundu Kopio, i Kinorohingan dot Israil do popolombus do boros dau dot id raja’ dot Idom, om Muab, om Amon, om Tirus om Sidon. Om poporomut nopo di boros diri nga’ i wakil diyolo’ di nokorikot do hilo’d Yorusalim do mongoi solowot di Raja’ Sodokia. Om poingkaa o boros do TUHAN diri, ⁵ ’’Winonsoi ku iti pomogunan do mikuwo’d kinoris ku om sinundu ku dit agayo kopio om winonsoi ku nogi’ o tulun om koinsanai do nintorusan di poimpasi do hiti’d pomogunan; om milo oku i’ do papatahak diri dot id isai nopo i korohian ku’d patahakan. ⁶ Iyoho’ no, i pinapatahak do koinsanai do bansa’ diti dot id suang do kuasa’ di susuhuon ku, i Nobukadnisar, i raja’ do Babil, om iri piya nintorusan nga’ pinatahak ku i’ dot id dau. ⁷ Oinsanan nopo o bansa’ do mininsiriba’ dot id dau, om minsiriba’ po kawagu iyolo’ dot id dau om id manangaki dau do gisom dot orikot i maso do kaalaan di bansa’ dau. Om iri nondo i bansa’ do Babil o minsiriba’ dot id bansa’ dit ongokoris om id raja’ dit angabantug dot orikot o maso’ddi. ⁸ Nga’ ondung haro o bansa’ ko’ pomorintaan dot a’ minsiriba’ dot id pomorintaan di Nobukadnisar, om hukuman nondo i bansa’ddi do pisangadan, om mononglous, om toruol do gisom id minsiriba’ nondo o bansa’ddi dot id dau. ⁹ Kada’ kou pokinongou di nabi di tuuhoton dokoyu ko’ isai nopo i magakun do milo do poposunud dit osiliu dot id dosunsudan dot id nipi ko’ momolohou do rusod do tulun do napatai ko’ mamakai po do toilaan do bobolian. Mogodu ngai’ nopo daa iyolo’ dokoyu do minsiriba’ dot id raja’ do Babil. ¹⁰ Mongudut i’ iyolo’ dokoyu om popotongkiad dokoyu do mantad id pomogunan dokoyu om koongoi kou nondo do hilo’d sodu’. Om uyungon ku iyokoyu om apatai kou nondo. ¹¹ Nga’ ondung haro o bansa’ di minsiriba’ om mokiporinta’ di raja’ do Babil om pologoson ku indo i bansa’ddi do mundorong do hiri’d pomogunan diyolo’, om mongumo om momogun-mogun do hiri. Iyoho’ no i TUHAN, o minomoros diti,’’ ka dau. ¹² Om miagal nogiddi o pinoboros ku dot id di Sodokia i raja’ do Yohuda, ’’Insiriba’ no dot id raja’ do Babil. Umboyo’ no dau om i tulun dau om apasi ko i’! ¹³ Nokuro tu’ uhang nu’d apatai ko om i tulun nu dot id suang do pisangadan om mononglous om toruol? Iri no o nokoboros do TUHAN dot osiliu dot id nunu nopo o bansa’ di mada’ do minsiriba’ dot id raja’ do Babil. ¹⁴ Kada’ pokinongou di nabi di momisunud diya’ dot a’ minsiriba’ dot id dau. Mongudut ngai’ i’ iyolo’ diya’ddi. ¹⁵ Tu’ TUHAN no o minomoros dot okon i’ ko’ iyau o pinoporikot diyolo’ddi, om pinoboros nogi’ dau do mingudut no iyolo’ do tontok di pinoboros diyolo’ do momoros iyolo’ dot id suang do ngaran do TUHAN. Gowoi pondo om potompiason om patayon ko’d TUHAN do mitonggoi di nabi di minongudut diya’, oi Tuan Raja’,’’ kangku. ¹⁶ Om sunudai ku noddi it imam om koinsanai di rayat di boros do TUHAN do poingkaa, ’’Kada’ kou pokinongou di nabi di mimboros dot oruhai nod koguli’ kawagu i pakakas di hiri’d Walai’d Sasambayangan dot Agayo do mantad hilo’d Babil. Mingudut i’ iyolo’ dokoyu’ddi. ¹⁷ Kada’ kou pokinongou diyolo’! Insiriba’ kou nogi’ kopio dot id raja’ do Babil diri, om apasi kou i’! Nokuro nanu’ tu’ uhang nu’d araag iti bandar? ¹⁸ Ondung otopot do nabi kopio iyolo’ om monongkuyaan di boros ku om atantu’ no do pokionuon i’ daa kopio diyolo’ doho’, iyoho’ i TUHAN it Osundu Kopio, dot a’ popologos di pakakas di poingopi’ do hilo’d Walai’d Sasambayangan dot Agayo om i hiri’d poiyanan dit id walai’d raja’, dot atanggayan do hilo’d Babil,’’ ka dau. ¹⁹ - ²⁰ (Tontok di tinanggayan di Raja’ Nobukadnisar do hilo’d Babil i raja’ do Yohuda, i Yoyakin i tanak di Yoyakim, om i boyoon do tulun do hilo’d Yohuda om hilo’d Yorusalim, om a’ i’ dau tinanggayan i torigi, om i tangki’ do tambaga’, om i korita’-kuda’ om i piro-piro o pakakas di suwai di hiri’d Walai’d Sasambayangan dot Agayo.) ²¹ Om boros ka kawagu’d TUHAN, ’’Pokinongou nod poboroson ku, iyoho’ i TUHAN it Osundu Kopio, om i Kinorohingan dot Israil, do pasal di pakakas di noolu’ do hiri’d Walai’d Sasambayangan dot Agayo, om i hiri’d poiyanan dit id walai do raja’ do Yorusalim. ²² Atanggayan ngai’ nopondo iri do hilo’d Babil om hilo-hilo’ nori do gisom po do podulon ku kawagu iri. Om pogulion ku nogindo kawagu iri om potondulion ku dot id kinoiyonon diti. Iyoho’ no i TUHAN, o minomoros diti,’’ ka dau.

¹ Tontok nogi’ do toun diri, di tulan do kolimo do toun do kaapat do momorinta’ i Raja’ Sodokia do minongoi boro-boros doho’ do hiri’d Walai’d Sasambayangan dot Agayo i Hanania, i tanak di Asur, i songulun o nabi do mantad id bandar do Gibion. Om sinunudan oku dau do hiri’d toguang dit imam om i rayat ² do minomoros o TUHAN, it Osundu Kopio, i Kinorohingan dot Israil do poingkaa, ’’Noidu’ ku no o kuasa’ di raja’ do Babil. ³ Om id suang nodti duwo o toun do pogulion ku do hiti’d kinoiyonon diti o toinsanan di pakakas di mantad hilo’d Walai’d Sasambayangan dot Agayo di tinanggayan di Raja’ Nobukadnisar do hilo’d Babil. ⁴ Om pogulion ku nogi’ i raja’ do Yohuda, i Yoyakin i tanak di Yoyakim, do miwoyo’ do koinsanai di tulun do Yohuda di natanggayan do pisangod do hilo’d Babil. Iyoho’ no i TUHAN, o minomoros diti,’’ ka dau. ⁵ Om boros kangku’ddi dot id di Hanania dot id toguang dit imam om koinsanai di rayat di songingkakat do hiri’d Walai’d Sasambayangan dot Agayo, ⁶ ’’Osonong no! Maha’ daa om wonsoyon do TUHAN o miagal diri! Maha’ daa om potopoton kopio dau i pinoboros nu’ddi om pogulion o koinsanai di pakakas di hiri’d Walai’d Sasambayangan dot Agayo, om koinsanai di tulun do natanggayan do hilo’d Babil. ⁷ Nga’ pokinongou nodti poboroson ku dot id diya’ om id koinsanai diti tulun. ⁸ Iri nopo nabi di mimboros di gulu po, it id gulu po ko’ iyoho’ om iya’, om pinoboros mantad diyolo’ do haro nondo o pisangadan, om mononglous om toruo-ruol do rumikot dot id ogumu’ o bansa’ om id pomorintaan dit ogirot. ⁹ Nga’ tulun nopo di nabi di popoboros do kosimbayanan o rumikot dot id dabantalan om oilaan nopo kopio dot otopot do sinuhu’ iyau’d TUHAN om angabayaan i pinopimboros di nabi diri,’’ kangku. ¹⁰ Om ngoyo’ noddi di Hanania i poku’ di poimpoku’ ku om pintipuo’ no dau, ¹¹ om boro-boros no iyau dot id toguang do koinsanai di tulun di nokorikot do hiri do poingkaa, ’’Nokoboros nod TUHAN do miagal nodti o ponipu’ dau di poku’ di pinopoku’ di Raja’ Nobukadnisar do koinsanai di bansa’; om id suang no do duwo o toun diti do wonsoyon dau o miagal diri,’’ ka dau. Om koboros po dau iri om pamanau oku noddi. ¹² Om a’ poddi alaid do mantad diri om suhuo’ oku nod TUHAN do ¹³ mamanau om mongoi pomisunud di Hanania do poingkaa, ’’Boros kad TUHAN om milo ko i’ doti’ daa do monipu’ddi poku’ do kayu nga’ sowolian po dau iri do poku’ do basi’. ¹⁴ Nokoboros no o TUHAN, it Osundu Kopio, i Kinorohingan dot Israil do pokuan nondo dau do poku’ do basi’ o koinsanai di bansa’ diti om minsiriba’ i’ iyolo’ dot id di Nobukadnisar, i raja’ do Babil. Boros kad TUHAN om iri piya nintorusan nga’ poporintaan ngai’ i’ dau di Nobukadnisar,’’ ka. ¹⁵ Om posunudo’ ku noddi di Hanania iri, om pomoros oku po kawagu do poingkaa, ’’Pokinongou pogi’, oi Hanania! A’ ko i’ do TUHAN sinuhu’, om binsuhuon nu i’ daa iti tulun do monongkuyaan do tudut. ¹⁶ Om gowoi poddi om minomoros o TUHAN do mananus diya’ do hiti’d pomogunan. A’ po aayi’ o toun diti om apatai ko no tu’ sinuhu’ nu i’ iti tulun do sumaap do TUHAN,’’ kangku. ¹⁷ Om kapatai no i Hanania di tulan do koturu’ do toun diri.

¹ Om ponulis oku nod surat do patahakon dot id koinsanai dit imam om i nabi, om i boyoon do tulun, om id koinsanai di tulun do suwai di tinanggayan di Nobukadnisar do mantad hilo’d Yorusalim do kuminaa do hilo’d Babil. ² Tinulis ku iti surat di natanggayan nod pisangod i Raja’ Yoyakin om i tina’ dau, om i pagawai dau do hiri’d walai’d raja’, om i boyoon do Yohuda om Yorusalim, om iri ngai’ i tukang om i tulun dot angabaal. ³ Om patahako’ ku no i surat diri dot id di Ilasa, i tanak di Sapan om id di Gomaria, i tanak di Hilkia, i sinuhu’ di Sodokia, i raja’ do Yohuda, do mongoi solowot di Nobukadnisar, i raja’ do Babil. Suang nopo di surat diri om poingkaa, ⁴ ’’Boros kad TUHAN it Osundu Kopio, i Kinorohingan dot Israil, dot id koinsanai di tulun di pinologos dau do tinanggayan di Raja’ Nobukadnisar do mantad hiti’d Yorusalim do kuminaa do hilo’d Babil om, ⁵ ’Momogun-mogun kou nopod hiti. Maal kou nod walai dot iyonon dokoyu. Om mongumo kou no om kanon no dokoyu i tua’ di tinanom dokoyu. ⁶ Sumawo kou no om kianak kou i’. Om posowoon no i tangaanak dokoyu om haro i’ o diyolo’d tangaanak. Gumumu’ kou no, om kada’ kou kuri’. ⁷ Tumotos kou no do poposimbayan di bandar di pataaman ku dokoyu. Om sumambayang kou no dot id doho’ do bagi’d koinsanangan di kabandaran diri, tu’ ondung osimbayan i kabandaran diri om iyokoyu nga’ osimbayan no. ⁸ Iyoho’ no i TUHAN, it Osundu Kopio i Kinorohingan dot Israil o popoinsan dokoyu om a’ kou i’ oudutan di nabi di poirolot dokoyu ko’ isai nopo o tulun di mangakun do milo do poposunud dit osiliu dot id dosunsudan. Kada’ kou ponongkuyaai di nipi diyolo’. ⁹ Tu’ mamakai no iyolo’d ngaran ku do popinsunud dot id dokoyu dit a’ otopot. A’ oku i’ nokoponuhu’ diyolo’ do mimboros. Iyoho’ no i TUHAN, o minomoros diti,’ ka dau. ¹⁰ Boros ka kawagu’d TUHAN, ’Aayi’ pondo o turu’ nohopod o toun do Babil, om podulon ku nogindo kawagu iyokoyu om bayaanon ku i batos ku do popouli’ dokoyu do hiti’d kinoiyonon diti. ¹¹ Iyoho’ noo, om aiso’ i’ o suwai, do koilo di natantu’ mantad ku do wonsoyon ku dot id dokoyu, i manahak dokoyu do kosimbayanan om okon i’ ko’ kosusaan, om bayaanon ku nondo i soro-sorohon kopio dokoyu dot osiliu dot id dosunsudan dokoyu. ¹² Om momolohou kou nondo doho’ do mokitulung. Om rumikot kou nondo do sumambayang dot id doho’ om simbaron ku indo o sambayang dokoyu. ¹³ Ihumon oku nondo dokoyu om okito oku i’ dokoyu tu’ aayi-ayi’ i’ o ginawo dokoyu do mogihum doho’. ¹⁴ Pologoson ku i’ iyokoyu do kokito doho’ om timungon ku nondo iyokoyu do mantad id koinsanai do pomogunan om kinoiyonon di pinotompiasan ku dokoyu, om pogulion ku nogindo iyokoyu dot id pomogunan di tadon mantad dokoyu, om tondulion ku o koiyon-iyono’ dokoyu. Iyoho’ no i TUHAN, o minomoros diti,’ ka dau. ¹⁵ Boros ka dokoyu om nonuan kou’d TUHAN do nabi dau do hilo’d Babil. ¹⁶ Pokinongou kou pogi’ diti poboroson do TUHAN do pasal di raja’ di sinakagon di Daud, om pasal di tulun do hiti’d bandar, iri no i koobpinayan dokoyu, it a’ natanggayan do pisangod do nokotonggoi dokoyu. ¹⁷ Boros kad TUHAN, it Osundu Kopio, ’Poporikot oku nondo do pisangadan, om mononglous, om toruol dot id diyolo’, om silihon ku nondo iyolo’ do miagal do tua’ dot ara di nadalaan do nomomos gisom dot a’ no milo dot akanon. ¹⁸ Pogusaon ku nondo diyolo’ o pisangadan, om mononglous om toruol, om aranaban ngai’ nopondo o koinsanai’d bansa’ do hiti’d pomogunan do kokito di koiyon-iyono’ diyolo’. Om honggo nopondo o potompiasan ku diyolo’ om aranaban ngai’ nopondo om ooris o tulun do kokito di nosiliu dot id diyolo’. Om hingi-hingion nondo iyolo’ om maan do pomopol o ngaran diyolo’. ¹⁹ Osiliu pogi’ o miagal diti dot id diyolo’ nga’ a’ i’ iyolo’ minumboyo’ di boros di popinsunudon ku dot id diyolo’ do polombuson di nabi ku. A’ i’ iyolo’ minokinongou’ddi. ²⁰ Pokinongou kou no diti poboroson ku, iyoho’ i TUHAN, koinsanai dokoyu i pinataam ku do hilo’d Babil,’ ka dau. ²¹ Nokoboros no o TUHAN, it Osundu Kopio, i Kinorohingan dot Israil, do pasal di Ahab i tanak di Kolaya do kusai om pasal di Sodokia i tanak di Maasiya, i minamakai do ngaran do TUHAN do popinsunud dot id dokoyu dit a’ otopot. Nokoboros no dau do patahakon dau iyolo’ dot id suang do kuasa’ di Nobukadnisar, i raja’ do Babil. Om iyau nondo o mamatai diyolo’ dot antang-antangan dokoyu. ²² Soira’ nopo do momopol do tulun do suwai i tulun do mantad hilo’d Yorusalim, i natanggayan do pisangod do hilo’d Babil, om poingkaa nondo o poboroson diyolo’, ’Wonsoyon po daa’d TUHAN dot id diya’ o miagal di winonsoi dau dot id di Sodokia om id di Ahab, i miaho’ nopo di raja’ do Babil do minonutud!’ ka. ²³ Miagal noddi o kootuson diyolo’ tu’ minomonsoi i’ iyolo’ do dusa dit angagayo kopio di hilo’d Israil, om minagampahu’ iyolo’ om minamakai do ngaran do TUHAN do popinsunud dit a’ otopot. Okon i’ ko’ korohian do TUHAN o miagal diri; om oilaan i’ dau i nongowonsoi diyolo’ om iyau no o sasi’ do papasala’ diyolo’. Iyo noddi o boros do TUHAN,’’ ka. ²⁴ - ²⁵ Om sunudai oku nod TUHAN, it Osundu Kopio, i Kinorohingan dot Israil, do boros do poboroson dot id di Somaya, i tulun do Nihilam. Iyau nopo nga’ pinopokirim do surat dot id suang do ngaran dau do patahakon dot id toinsanan o tulun do Yorusalim om id di Sipania it Imam, i tanak di Maasiya, om id toinsanan dit imam do suwai. Tinulis nopo di Somaya dot id surat diri, i patahakon dot id di Sipania om poingkaa, ²⁶ ’’Siniliu ko’d TUHAN dot imam do suminowoli di Yoyada, om iya’ noddi o boyoon dit asawat o pangkat do hino’d Walai’d Sasambayangan dot Agayo. Om karaja’ nu nopo nga’ miontong ondung haro o tulun do mulau di minsorupai-rupai do nabi. Om ondung haro o tulun do miagal diri, om kagasan nod rantai do basi’ o liou. ²⁷ Nokuro tu’ a’ nu winonsoi o miagal diti dot id di Yoromia, i tulun dot Anatot, i minimboros do miagal do nabi dot id bansa’ toko’? ²⁸ Tingkodon no iyau do mingiyo’ddi tu’ sinunudan dau i tulun do hilo’d Babil dot alaid iyolo’ do poundorong do hilo’ om mogot nogi’ do mamaal iyolo’ do walai om miyon do hilo’, om mongumo om mangakan di tua’ di totonomon diyolo’,’’ ka. ²⁹ Om basao’ no di Sipania it Imam, i surat diri dot id doho’, ³⁰ om suhuo’ oku nod TUHAN ³¹ - ³² do popokirim do boros diti dot id toinsanan di tulun dot Israil di natanggayan do pisangod do hilo’d Babil do pasal di Somaya, ’’Iyoho’ no i TUHAN, o momohukum di Somaya om koinsanai di sinakagon dau. Tu’ okon i’ ko’ iyoho’ o minonuhu’ dau, nga’ minimboros i’ iyau dot id dokoyu do miagal pod nabi, om sinuhu’ kou dau do monongkuyaan dit a’ otopot. Aiso’ nondo o sinakagon dau dot id pogialatan dokoyu. A’ no iyau kokito dit ongosonong do wonsoyon ku dot id koinsanai’d tulun ku, tu’ sinuhu’ i’ dau iyolo’ do sumaap doho’. Iyoho’ no i TUHAN, o minomoros diti,’’ ka.

¹ Boros kad TUHAN, i Kinorohingan dot Israil ² dot id doho’, ’’Tulison ngai’ no dot id buuk o koinsanai di pinosunud ku diya’. ³ Tu’ rumikot nondo o maso do tondulion ku o koiyon-iyono’ di tulun ku, iri no i tulun dot Israil om Yohuda. Pogulion ku nondo iyolo’ kawagu dot id pomogunan di pinatahak ku dot id taki-aki diyolo’, om asanganu nondo kawagu diyolo’ iri. Iyoho’ no i TUHAN, o minomoros diti,’’ ka dau. ⁴ Boros kad TUHAN dot id tulun dot Israil om Yohuda, ⁵ ’’Norongou ku no o giniakan do tulun di moddosi, i giniakan dot opopoddosian om okon no ko’ osisimbayanan. ⁶ Undorong-dorong po pogi’ om momusorou i’! Milo toi do mogkosusu o kusai? Nga’ nokuro tu’ songigit-igit ngai’ nopod tian i tongokusai, do miagal po di tondu’ do mogkosusu? Nokuro tu’ ongoposi-posi’ po ngai’ o tulun? ⁷ Rumikot no o tadau dot araat kopio; om aiso’ no o tadau’d suwai di koiyo kopio’ddi. I maso do katangkabaan kopio do tulun ku, nga’ posion ku i’ iyolo’,’’ ka dau. ⁸ Boros kad TUHAN, it Osundu Kopio, ’’Orikot nopondo o tadau’ddi om tipuon ku nondo i poku’ di poimpoku’ diyolo’ om iduwon ku i rantai di pinongogos diyolo’, om okon nondo iyolo’ ko’ turipon do bansa’d suwai. ⁹ Suwai ko’ mogobi-obi’ nondo iyolo’ doho’, i TUHAN i Kinorohingan diyolo’, om mogobi-obi’ dot iso’ o sinakagon di Daud, i silihon ku’d raja’. ¹⁰ Kada’ kou kooris oi tulun ku! Kada’ kou korolosi, oi tulun dot Israil! Poiduwon ku i’ iyokoyu do mantad id pomogunan di hilo’d sodu’ om mantad id pomogunan di pinananggayan do pisangod dokoyu. Om koguli’ kou indo om osimbayan do momogun-mogun; om aiso’ indo o koligagaanan dokoyu, om aiso’ o monompurolosi dokoyu. ¹¹ Rumikot oku indo do mongoi pamasi dokoyu. Om raagon ngai’ ku indo i bansa’ di pinotompiasan ku dokoyu. A’ ku i’ iyokoyu poiduwon toomod dot a’ kou po ohukuman, tu’ apatut kou i’ do hukuman, nga’ soira’ nopod momohukum oku dokoyu om otulid i’ o pomohukum ku. Iyoho’ no i TUHAN, o minomoros diti,’’ ka dau. ¹² Boros kad TUHAN dot id tulun dau, ’’A’ no milo’d lingoson o suhat dokoyu, adalaan no kopio ino toruol dokoyu. ¹³ Aiso’ no o momogompi’ dokoyu, aiso’ no o tubat do kolingos dino toruol dokoyu, a’ kou no olingasan. ¹⁴ Nongolihuan ngai’ kou no di minuhang dokoyu; a’ noddi iyolo’ momusorou dokoyu. Sinaap ku iyokoyu do miagal do pisangod, om awagat o pinomohukum ku dokoyu tu’ ogumu’ i’ o dusa dokoyu om agayo kopio o kasalaan dokoyu. ¹⁵ Kada’ kou no pinggiak dot orurualan dino toruol dokoyu; tu’ aiso’ no o pomolingos dino toruol dokoyu. Hinukuman ku iyokoyu do miagal diti tu’ ogumu’ i’ o dusa dokoyu om agayo o kasalaan dokoyu. ¹⁶ Nga’ baino’ nopondo om oinsanan nopo i tulun di minonolon dokoyu dot otolon, om atanggayan ngai’ i pisangod dokoyu do silihon do turipon. Om koinsanai di mongulok-ulok dokoyu nga’ ulak-ulakan nondo, om koinsanai di minongoi panakau do dapu’ dokoyu nga’ apanakahan nondo. ¹⁷ Posonongon ku indo kawagu o tinan dokoyu; om lingoson ku i suhat dokoyu, do mulong piya do poingkaa daa o boros do pisangod dokoyu, ’Pinataam-taam po o Sion; om aiso’ no o momogompi’ dau,’ ka. Iyoho’ no i TUHAN o minomoros diti,’’ ka dau. ¹⁸ Boros kad TUHAN, ’’Pogulion ku i’ i tulun ku dot id pomogunan diyolo’ om insianan ku o pointikid-tikid do sompiiyon; owonsoi indo kawagu o Yorusalim, om owonsoi kawagu i walai’d raja’. ¹⁹ Om modsinding nondo do mamarayou doho’ i tulun do hilo’; mimpangkis pondo iyolo’ dot atataadan. Om gumumu’ nondo iyolo’ tu’ barakatan ku i’ iyolo’; om pusohon iyolo’ tu’ barakatan ku i’ iyolo’. ²⁰ Pogulion ku nondo o kuasa’ di bansa’ddi do miagal di gulu po om pogiroton ku, om ogirot nondo iri do gisom dot alaid; om hukuman ku nondo o koinsanai di minongulok-ulok diyolo’. ²¹ - ²² Mantad nondo dot id bansa’ diyolo’ o momorinta’ diyolo’, mantad i’ dot id tulun diyolo’ i raja’ diyolo’. Om rumikot iyau dot id doho’ do tontok do lohowon ku iyau, tu’ isai daa o katama’ do rumikot ondung a’ lohowon? Osiliu nondo iyolo’d tulun ku om iyoho’ o Kinorohingan diyolo’. Iyoho’ no i TUHAN, o minomoros diti,’’ ka dau. ²³ - ²⁴ Kototogod nopod TUHAN om miagal pod tongus, i tongus dit opuhod kopio do kobuntul di tulun dit araat. Om a’ i’ tumingkod iri dot a’ pod TUHAN owonsoi ngai’ i natantu’ mantad dau do wonsoyon dau. Om osuhutan nopondo kopio di tulun dau iti om koimbagu.

¹ Boros kad TUHAN, ’’Rumikot nondo o maso dot osiliu oku’d Kinorohingan do koinsanai di payat dot Israil, om iyolo’ nga’ osiliu nondod tulun ku. ² Pinopointalang oku i’ do kosianan ku dot id tulun di napasi do mantad id kapatayon di hilo’d tana’ do kowotuan. Om soira’ddi siundorong no i tulun dot Israil, ³ om minintalang oku i’ dot id diyolo’ dit osodu’ oku po. Oi tulun dot Israil, a’ oku i’ nokotingkod dot osianan dokoyu do mantad di gulu po, om tumilombus oku do popointalang kasai’ do kosianan ku dit aiso’ o kotingkadan dot id dokoyu. ⁴ Tondulion ku i’ kawagu o koiyon-iyono’ dokoyu om ngoyon nondo dokoyu i tamburin om mintari’ kou dot atataadan. ⁵ Om mananom kou nondo kawagu dot anggur do hilo’d konuluhanan do Samaria, om i minananom diri nga’ kaakan indo do tua’ dit anggur. ⁶ Rumikot nondo o maso do millohou o tulun di madtatamong do bandar do mantad hilo’d konuluhanan dot Ipraim do poingkaa, ’Kainou tumakad do hilo’d Sion, do kumaa dot id TUHAN, i Kinorohingan toko’,’ ka,’’ ka dau. ⁷ Boros kad TUHAN, ’’Kongotood kou no do modsinding do bagi’ dot Israil, i tulun ku, i bansa’ dot agayo kopio dot id pogialatan do koinsanai’d bansa’. Sindingo’ no dokoyu i sinding do pamarayou do poingkaa, ’Napasi nod TUHAN i tulun dau di noolu-olu’; om nokoidu’ no dau i tulun dot Israil di nongoolu-olu’,’ ka. ⁸ Pootodon ku nondo iyolo’ do mantad hilo’d utara om timungon ku iyolo’ do mantad id tisan diti pomogunan. Om tumanud indo diyolo’ i tulun do bolou om it a’ koundaliu, om i tongoondu’ di wagu po kosusu om i borosusuon no. Gumuli’ indo iyolo’ do miagal do bansa’ dit agayo dot id pomogunan diti. ⁹ Songihad-ihad pondo i tulun ku do gumuli’, om insasamadan ku i’ iyolo’, om woyoon ku. Om pawayaon ku nondo iyolo’ dot id kinoiyonon dit ogumu’ o bawang, om posusuyon ku iyolo’d ralan dit alana’, om a’ nondo iyolo’ katahub. Miagal oku pod tapa’ dot Israil, Ipraim no o tanak ku’d kusai dit id dotuo,’’ ka dau. ¹⁰ Boros kad TUHAN, ’’Oi koinsanai’d bansa’, pokinongou kou no doho’, om popinsusuyo’ no dokoyu o boros ku do hilo’d soborong do rahat. Pinotompias ku i tulun ku, nga’ timungon ku indo iyolo’ om gompion ku do miagal di gompomogompi’d dumba’ di momogompi’ di dumba’ dau. ¹¹ Nokoidu’ ku no o tulun dot Israil, om nakalabus ku do mantad id longon do tulun dit okoris ko’ mantad diyolo’. ¹² Rumikot nondo iyolo’ do mongoi podsinding dot atataadan do hilo’d Nuluhon do Sion, om otood nondo iyolo’ tu’ i nipuhawang ku dot id diyolo’ o kataadan — i gandum om i waig dot anggur om i tumau, om i dumba’ om i sapi’. Miagal nondo iyolo’ di kabun dit opiyopos do waig; tu’ haro ngai’ nopo dot id diyolo’ i korohian diyolo’. ¹³ Tontok nopondo do maso’ddi om mintari’ nondo om ongotood i kongosumandakan, om ongosonong o ginawo di tongokusai, om i tongomulok po om i kongomolohingan no. Tu’ insasamadan ku i’ iyolo’ om sowolian ku do kataadan i koihadan diyolo’. Om sowolian ku do kosimbayanan i katangaban diyolo’. ¹⁴ Om pakayahanon ku it imam do taakanon dit angawasiu, om patahakon ngai’ ku o koinsanai di pokionuon di tulun ku. Iyoho’ no i TUHAN o minomoros diti,’’ ka dau. ¹⁵ Boros kad TUHAN, ’’Pokinongou pogi’! Haro o tihad dot orongou do mantad hilo’d Rama tihad dit oruol kopio o pogigihad. Mogihad i Rasil di tangaanak dau; tu’ a’ no iyolo’ hino, om a’ no iyau milo dot insasamadan. ¹⁶ Tingkod nod mihad om pihidai no ino romou nu. Tu’ koinsanai di winonsoi nu dot id tangaanak nu nga’ somulian i’, gumuli’ i’ iyolo’ do mantad hilo’d pomogunan do pisangod. ¹⁷ Haro po o soro-sorohon dot id dosunsudan nu; tu’ gumuli’ i’ do hiti’d kinoiyonon nu i tangaanak nu. Iyoho’ no i TUHAN, o minomoros diti. ¹⁸ Orongou ku i’ i tulun dot Israil do mimboros dot atatangaban do poingkaa, ’Oi TUHAN, miagal daa iyahai di nintorusan di lalang, nga’ tinudukan nu i’ iyahai do mumboyo’. Pogulio’ no iyahai; tu’ posodia’ i’ iyahai do gumuli’ dot id diya’, oi TUHAN, i Kinorohingan dahai. ¹⁹ Tuminongkiad daa iyahai diya’, nga’ monosol i’ iyahai di winonsoi dahai’ddi. Tu’ tontok di nohukuman nu iyahai, om songintudu’ po iyahai dot atatangaban. Ointingayaman tomod iyahai om noindaraat iyahai, tu’ minomonsoi i’ iyahai’d dusa dit omulok po iyahai,’ ka. ²⁰ Oi Israil, iya’ no o tanak di koupusan kopio ku, i tanak do kolisihan kopio ku. Tu’ soira’ nopo do rolosion ku iya’ om osorou tiya’ no do mikuwo’d langadon oku diya’. Id diya’ poo o ginawo ku; om monginsian oku i’ diya’. ²¹ Popoingkakat nod pogintutunan, om tandaan no i ralan; ihumon no kawagu i ralan di tadon nu. Guli’ no, oi tulun dot Israil, guli’ no do hilo’d bandar di tadon dokoyu. ²² Songkuro po o koloido’ dokoyu do mikoduwo o ginawo, oi bansa’ dit a’ otorodok dot id doho’? Haro no o nowonsoi ku’d wagu om i suwai ko’ i gulu do hiti’d pomogunan, miagal pod tondu’ di mongintirung do kusai tu’ suwai no kopio!’’ ka dau. ²³ Boros kad TUHAN, it Osundu Kopio, i Kinorohingan dot Israil, ’’Soira’ nopondod pogulion ku i tulun ku do hilo’d pomogunan diyolo’ om momoros pondo kawagu i tulun do hilo’d pomogunan do Yohuda om id kawalayan do hilo’ do poingkaa, ’Pologoson nod barakatan do TUHAN i nulu-nulu dot olidang do hilo’d Yorusalim, i kinoiyonon di pinotobilang do maan do dau,’ ka. ²⁴ Momogun-mogun nondo o tulun do hilo’d Yohuda om hiri’d kawalayan do hilo’, om haro nondo o gompongumo, om gompomogompi’ do dumba’ om sapi’ diyolo’. ²⁵ Om pokorison ku nondo kawagu i tulun dit ohuyan om pakayahanon ku do taakanon o koinsanai’d tulun dit oluhoi dot ololousanan. ²⁶ Om momoros nondo o tulun do poingkaa, ’Koolong oku pod koodop om osonong nogi’ o topurimanan ku,’ ka. ²⁷ Iyoho’ no i TUHAN o momoros do rumikot nondo o maso do ponuon ku’d tulun om nintorusan iti pomogunan dot Israil om Yohuda. ²⁸ Om poingkuro nopo do rinulan-rulan ku do tontok di minongutus, om minamahaba’ om minangala’, om minamaraag, om minamatai oku diyolo’, om iyo oku nogiddi do mananom om popoingkakat diyolo’ tu’ rulan-rulanon ku i’ kopio. ²⁹ Om orikot nopondo o maso’ddi om a’ nondo o tulun momoros dot, ’Iri i molohing o minangakan di tua’ dot oonsom, nga’ iri i tangaanak dau o tangaro,’ ka. ³⁰ Suwai ko’ isai nopo i mangakan do tua’ dot oonsom, om iri no o tangaro; om apatai piya’ndo o tulun nga’ iri i dusa dau o kapatai dau,’’ ka. ³¹ Boros kad TUHAN, ’’Rumikot nondo o maso do momonsoi oku’d tumpongo do wagu dot id tulun dot Israil om id tulun do Yohuda. ³² Okon nondo ko’ miagal di tumpongo di gulu iti, i pinoumpongo ku dot id taki-aki diyolo’ do tontok di winoyo’ ku iyolo’ do suminoliwan do mantad hilo’d Masir. Tu’ mulong piya do miagal oku’d sawo diyolo’ nga’ a’ i’ diyolo’ ginompi’ i tumpongo ku dot id diyolo’. ³³ Nga’ poingkaa nondo i tumpongo do wagu do poumpongoon ku do tulun dot Israil: Posuangon ku nondo i toturan ku dot id lugu’ do ginawo diyolo’ om tulison ku iri dot id suang do ginawo diyolo’. Om osiliu oku nondo do Kinorohingan diyolo’ om iyolo’ nga’ osiliu nondod tulun ku. ³⁴ Om a’ nondo minog do monuduk iyolo’ do tulun di bansa’ diyolo’ do mintutun do TUHAN, tu’ oinsanan nopondo iyolo’ do kotutun doho’, dot it ongokoro’ po om it angagayo no, nga’ kotutun ngai’ nopondo doho’. Tu’ ompunan ku nondo o dusa diyolo’ om a’ ku nondo sorohon i kinasalaan diyolo’. Iyoho’ no, i TUHAN o minomoros diti,’’ ka dau. ³⁵ TUHAN i’ o minanahak dilo tadau do sumiliu’d tanawau do dangadau, om iyau o pinapatahak dilo tulan om rombituon do mogulinau do dongotuong. Gouron dau ilo rahat om rumuab nondo i tumbak, ngaran nopo dau om TUHAN it Osundu Kopio. ³⁶ Minamatos iyau do solinaid nopo dot a’ kosimban o toturan diti pomogunan di natantu’ mantad, om osiliu no kasai’d bansa’ dot agayo ot Israil. ³⁷ Ondung otipong daa ilo tawan do koimbagu, om osorisid o pinoimpahan diti pomogunan, om diri nogindo dot iyadaan ku o tulun dot Israil, tu’ angaraat i’ o winonsoi diyolo’. Iyoho’ no i TUHAN o minomoros diti,’’ ka dau. ³⁸ Boros kad TUHAN, ’’Rumikot nondo o maso dot owonsoi kawagu ot id pointongkop do Yorusalim do silihon do bandar ku, do mantad po di walai’d akawas di roitan do Walai’d Akawas do Hananil om gisom di wawayaan do roitan do Wawayaan do Linsuk di ponong id kotonobon. ³⁹ Om mantad nod hilo’ om poinlombus po i wolit do hilo’d nulu-nulu do Garib om kosorili’ nogindo do hilo’d Goa. ⁴⁰ Oinsanan nopo i rantai, i pinamalabangan di tulun di nangapatai om i pinataaman di rinomos, om koinsanai di koumaan di hilo’d tisan do bawang do Kidron om gisom do korikot do hilo’d wawayaan di roitan do Wawayaan do Kuda’ di ponong id koulayon, do potobilangon do maan do doho’. A’ nondo oumbalan kawagu do mamaraag ko’ mamahaba’ i bandar do Yorusalim,’’ ka dau.

¹ Om boro-boros no o TUHAN dot id doho’ di kohopod do toun do pomorintaan di Sodokia, i raja’ do Yohuda, om di kohopod om walu’ do toun di Raja’ Nobukadnisar do momorinta’ do Babil. ² Tontok nopo do maso’ddi nga’ songodon no di soudor di raja’d Babil o Yorusalim, om iyoho’ no om nontiilan do hiri’d natad di walai’d raja’. ³ Nontiilan oku di Raja’ Sodokia do hiri, tu’ tinondos oku dau do pinopimboros do boros do TUHAN do poingkaa, ’’Pologoson ku o raja’d Babil do mangala’ do bandar diti. ⁴ Om i Raja’ Sodokia nga’ a’ no milo’d mogidu’. Patahakon nondo iyau dot id raja’ do Babil; om kotimbaba’ nondo iyau do raja’ddi om koboro-boros iyau dau. ⁵ Om tanggayan nondo i Sodokia do hilo’d Babil om hilo’ nondo iyau do poundorong do gisom do hukuman ku iyau. Tu’ mulong piya do sumaap daa iyau di tulun do Babil nga’ a’ i’ iyau kamanang. Iyoho’ no i TUHAN o minomoros diti,’’ ka. ⁶ Sinunudan oku’d TUHAN, ⁷ do rumikot i Hanamiil, i tanak do kusai di Sulam, i tamanon ku, do mongoi solowot doho’ do popoboli di tana’ dau dot id doho’. Iri nopo tana’ dau om hilo’d Anatot, it id watas do Binyamin. Iyoho’ no ot osorupai do momoli di tana’ dau tu’ iyoho’ no o waris dau dit id somok po kopio. ⁸ Om rikot noddi i Hanamiil do minongoi solowot doho’ do hiri’d natad di walai’d raja’ om suhuo’ oku no dau do momoli di tana’ dau; kosiliu nopo o miagal di nokoboros mantad do TUHAN. Om oilaan ku noddi kopio do minoro-boros o TUHAN doho’. ⁹ Om bolio’ ku noddi i tana’ di Hanamiil om timbango’ ku no i tusin do patahakon ku dau. Om kogumuo’ nopo do pinomoli ku nga’ hopod om turu’ o tusin do pirok. ¹⁰ Om minomolohou oku do piro-piro o tulun do sasi’, om soinai ku noddi om saapai ku i surat di kinopomolian dot id toguang diyolo’. Om timbango’ ku noddi i tusin do hiri’d ponimbangan. ¹¹ Om onuo’ ku noddi goduwo i solinan di surat do kinopomolian — i tinulisan di piniokunan om i kinotontuan; i solinan di sinaapan om iri nogi’ it a’ sinaapan. ¹² Om patahako’ goduwo ku nori dot id di Baruk, i tanak di Noria, i manangaki di Maksia. Pinatahak goduwo ku i surat diri dot id dau dot id toguang di Hanamiil om i sasi’ di suminain di surat do kinopomolian om id toguang di tulun do songirikau do hiri’d natad di walai’d raja’. ¹³ Om boros kangku dot id di Baruk, dot id toguang ngai’ diyolo’, ¹⁴ ’’Sinuhu’ oku’d TUHAN, it Osundu Kopio, i Kinorohingan dot Israil, do manganu diti duwo o surat, i surat do kinopomolian di sinaapan om i solinan di surat dit a’ sinaapan, om poopion noti dot id suang do luping, om a’ i’ araag do piro-piro o toun. ¹⁵ Nokoboros nod TUHAN, it Osundu Kopio, i Kinorohingan dot Israil, dot oboli indo kawagu o walai om tana’ om kabun dot anggur do hiti’d pomogunan diti,’’ ka dau. ¹⁶ Tontok di nakatahak ku i surat do kinopomolian diri dot id di Baruk, om sambayang oku nod poingkaa, ¹⁷ ’’Oi TUHAN, it Asawat Kopio, winonsoi nu iti pomogunan om ilo tawan dot i sinundu nu om i kinoris nu dit agayo kopio o pinomonsoi; aiso’ i’ ot a’ nu milo’d wonsoyon. ¹⁸ Pinopointalang ko do kosianan nu di mompus-ompus dot id piro-piro noribu o tulun, nga’ momohukum ko i’ ma do tulun dot i dusa do komolohingan diyolo’ o kopomohukuman nu. Iya’ no o Kinorohingan dit abantug om okoris; ngaran nu nopo om TUHAN it Osundu Kopio. ¹⁹ Kopunong ngai’ i’ i tontuon mantad nu do wonsoyon nu, om koimayaan ngai’ i wonsoyon nu. Om okito ngai’ nu i’ o wonsoyon do tulun om somulian nu iyolo’ do miontok di wonsoyon diyolo’. ²⁰ Di nopo di gulu po om miningwonsoi ko do kopusahan om koimayaan do hilo’d Masir, om maso nu i’ do momonsoi ngai’ddi do gisom piya’d baino’ do hiti’d Israil om id pogialatan do koinsanai’d bansa’d suwai, gisom diri dot abantug ko do hinonggo-honggo nopo. ²¹ Pinosoliwan nu i tulun nu do mantad hilo’d Masir dot i kongopusahan om i kongoimayaan di pinonompurolosi nu di pisangod dahai, om i sinundu om kinoris nu o pinakai nu do pinoposoliwan diyolo’. ²² Pinatahak nu diyolo’ iti tana’ dot osonong om oluhub, do miagal di pinabatos nu dot id taki-aki diyolo’. ²³ Nga’ soira’ddi nokorikot iyolo’ do hiti’d pomogunan diti om di nasanganu diyolo’ iti, om a’ iddi iyolo’ minumboyo’ di pinonuhuan nu om a’ tuminanud di pinonudukan nu; aiso’ i’ o tiso’ di pinonuhuan nu diyolo’ do winonsoi diyolo’. Om porikoto’ ngai’ nu noddi iti kosusaan dot id diyolo’. ²⁴ Nokopoingkakat no i tulun do Babil do tolig do ponurungku’, om maso no diyolo’d sumaap. Kosuang nondo dot id longon diyolo’ iti bandar diti tu’ haro i’ o pisangadan, om mononglous, om toruo-ruol. Om okito nu i’ do nabayaan ngai’ no i pinoboros nu. ²⁵ Nga’ iya’ nogi’, oi TUHAN, it Asawat Kopio, o minonuhu’ doho’ do momoli di tana’ dot id toguang do piro-piro o sasi’, do mulong piya do potionuon nod tulun do Babil iti bandar,’’ kangku. ²⁶ Om boros kaddi do TUHAN dot id doho’, ²⁷ ’’Iyoho’ no i TUHAN, i Kinorohingan do koinsanai’d tulun. Aiso’ i’ ot apagon dot id doho’. ²⁸ Patahakon ku nondo iti bandar diti dot id di Raja’ Nobukadnisar, i raja’ do Babil, om id soudor dau; om aanu nondo diyolo’ iti ²⁹ om tutudan diyolo’. Sorobon nondo diyolo’ iti do mitonggoi’ddi kawalayan di tulun di pinopotogod doho’ tu’ mintutud i’ iyolo’ do kominyan dot id Baal do hiri’d sakai’d taap do walai diyolo’, om pinopotungu iyolo’ do waig dot anggur do maan do podsubak do tingolig. ³⁰ Mantad poddi nosiliu id bansa’ o tulun dot Israil om tulun do Yohuda, om pinaparaat no iyolo’ do ginawo ku om pinopotogod iyolo’ doho’ tu’ araat i’ o winonsoi diyolo’. ³¹ Mantad poddi tadau do kinapamansayan diti bandar om pinopotogod no om pinapalasu’ do ginawo ku i tulun do hiti’d bandar diti. Om gowoi poddi om raagon ku iti bandar ³² tu’ araat ngai’ i’ o winonsoi di tulun do Yohuda om i tulun do Yorusalim, om i raja’ om i boyoon diyolo’, om it imam om i nabi di tuhoton diyolo’. ³³ Tuminolikud iyolo’ doho’; om mulong piya dot a’ oku tuminingkod do minonuduk diyolo’ nga’ a’ i’ iyolo’ minokinongou om a’ kuminorologo. ³⁴ Om iri piya tingolig diyolo’ di kososomu’ kopio nga’ nongoi i’ poiyono’ do hiri’d Walai’d Sasambayangan dot Agayo, i tiyonon do sumambayang dot id doho’; om sinosomu’ diyolo’ o kinoiyonon diri. ³⁵ Pinopoingkakat nogi’ iyolo’ do pananaraban do porsombahan do sorobon dot id di Baal do hilo’d Rantai do Hinom, do maan do patahakan di tangaanak diyolo’d kusai om tondu’ dot id di Molok, i tingolig diyolo’. A’ ku i’ iyolo’ sinuhu’ do momonsoi’d miagal diri om a’ ku no daa soro-sorohon do momonsoi iyolo’ do miagal kopio’ddi karaat om gisom do nakabayayat diri di tulun do Yohuda do momonsoi’d dusa,’’ ka dau. ³⁶ Boros kad TUHAN, i Kinorohingan dot Israil, dot id doho’, ’’Oi Yoromia, mimboros i bansa’ dot Israil do pisangadan om mononglous om toruo-ruol o paparatu’ diti bandar dot id suang do longon do raja’d Babil. Om pokinongou-nongou po pogi’ diti poboroson ku do suwai ko’ iri. ³⁷ Timungon ku nondo o koinsanai di tulun do mantad id toinsanan o pomogunan di pinotompiasan ku diyolo’ tu’ notogod kopio oku no, om nakalasu’ o ginawo ku, om pogulion ku nondo kawagu iyolo’ do hiti’d kinoiyonon diti, om pologoson ku iyolo’ dot osimbayan do momogun-mogun do hiti. ³⁸ Om osiliu nondo iyolo’ do tulun ku om osiliu oku do Kinorohingan diyolo’. ³⁹ Om onuan ku nondo iyolo’ do koisa-isaan do ginawo om iso-iso’ o pokiririkatan dot id suang do koposi-posion diyolo’; om momusou indo kasai’ iyolo’ doho’ do gisom dot alaid. Om iti nondo o popoinsonong diyolo’ om i sinakagon diyolo’. ⁴⁰ Om momonsoi oku nondo do tumpongo di mompus-ompus dot id diyolo’, om a’ oku monolikud diyolo’, suwai ko’ mingwonsoi oku nondo kasai’ dit ongosonong dot id diyolo’; om onuan ku iyolo’ do ginawo dit oronok om momusou doho’ do mikuwo’d aayi-ayi’ kopio o ginawo, om a’ indo iyolo’ minsodu’ doho’. ⁴¹ Osonong indo o ginawo ku do mingwonsoi dot osonong dot id diyolo’ om otorodok oku om aayi-ayi’ kopio o ginawo ku do popoundorong diyolo’ do hiti’d pomogunan diti do gisom dot alaid. ⁴² Tu’ poingkuro nopo do pinoporikot oku do koinsanai di kosusaan dit awagat kopio dot id bansa’dti, om iyo oku noddi do poporikot do koinsanai dit ongosonong di pinabatos ku dot id diyolo’. ⁴³ Om momoli indo kawagu o tulun do tana’ do hiti’d pomogunan diti, i roitan daa dokoyu do, tana’ di kowotuan; it aiso’ o tulun om aiso’ o nintorusan, tu’ nakatahak no dot id tulun do Babil. Nga’ oboli indo kawagu o tana’ dot id pomogunan diti. ⁴⁴ Om momoli indo o tulun do tana’ do tusin do pirok o pomoli, om monulis do surat do kopomolian, om saapan diyolo’ iri do saap, om momolohou do sasi’ do hilo’d watas do Binyamin, om hilo’d posorili’ do Yorusalim, om id koinsanai’d bandar do Yohuda, om id bandar di hilo’d watas do konuluhanan, om id bandar di hilo’d guas do nuluhon, om i hilo’d ponong id salatan do Yohuda. Tu’ pogulion ku nondo iyolo’ dot id pomogunan diyolo’. Iyoho’ no i TUHAN o minomoros diti,’’ ka dau.

¹ Om tontok di poinggiil oku po do hiri’d natad di walai’d raja’, om boro-boros po kawagu o TUHAN dot id doho’. ² Minoro-boros o TUHAN dot id doho’, i minomonsoi om i pinopoiyon diti pomogunan. Boros ka dau, ³ ’’Pomolohou no doho’ om simbaron ku i’ iya’; om sunudan tiya’ di kopusahan kopio om i koimayaan kopio, it a’ nu po noilaan do gulu. ⁴ Tu’ poingkaa no o boros ku, iyoho’ i TUHAN, i Kinorohingan dot Israil, do pasal diti kawalayan do hiti’d bandar diti, om pasal di kawalayan do raja’ do hiti’d Yohuda, i raagon nondo om habaon do tontok do songodon om turungkuon iti bandar. ⁵ Om aiso’ no o guna’ do sumaap do tulun do Babil. Tu’ momonu’ nori diti bandar do rata’d tulun di patayon ku tu’ alasu’ no kopio o ginawo ku om otogod oku diyolo’. A’ oku no siontong diti bandar tu’ minomonsoi i’ dot araat o tulun do hiti. ⁶ Nga’ tondulion ku nondo o bandar diti om tondulion ku o koiyon-iyono’ di tulun do hiti, om onuan ku iyolo’ do kokorisan om posimbayanon kopio ku iyolo’ om aiso’ nondo o koligagaanan diyolo’. ⁷ Om tondulion ku nondo kawagu o kosimbayano’ dot Israil om Yohuda, om pogiroton ku kawagu iyolo’ do miagal di gulu po. ⁸ Om lihungan ku indo iyolo’ do mantad id koinsanai di dusa do nowonsoi diyolo’ dot id doho’, om ompunan ku iyolo’ di dusa diyolo’ do suminaap doho’. ⁹ Om osiliu nondo o bandar do Yorusalim do tadon do kataadan, om abantug, om osiliu do kaandasan ku; om oinsanan nopondo o bansa’ do hiti’d pomogunan do korongou do koinsanai dit ongosonong do winonsoi ku dot id bandar diti. Om moddosi nondo iyolo’ om gagaran om momusou doho’ do korongou do koinsanai di kosonongo’ om kosimbayano’ di patahakon ku dot id bandar diti,’’ ka dau. ¹⁰ Boros kad TUHAN, ’’Momoros o tulun do kinoiyonon nopodti om nosiliu pod tana’ do kowotuan; tu’ aiso’ no o tulun om aiso’ o nintorusan do poingiyon do hiti. Om otopot i’ o boros diyolo’ddi, tu’ iri nopo kabandaran do Yohuda om i karalan-ralanan do hilo’d Yorusalim om oingou po tomod, tu’ aiso’ no o tulun om aiso’ o nintorusan do poingiyon do hilo’. ¹¹ Nga’ hiti nogindod kinoiyonon diti dot orongou kawagu o pinongkisan dot aarapadan om kataadan do tontok do poginakanan do kumawin. Om orongou nondo o tulun do modsinding do tontok do papatahak iyolo’d porsombahan do kounsikahan do hilo’d Walai’d Sasambayangan dot Agayo. Om momoros nondo iyolo’ do poingkaa, ’Pongunsikou nod TUHAN, it Osundu Kopio, tu’ osonong i’ kopio iyau om mompus-ompus o kosianan dau,’ ka. Om tondulion ku indo o kosimbayano’ do pomogunan diti do miagal di gulu po. Iyoho’ no i TUHAN o minomoros diti,’’ ka dau. ¹² Boros kad TUHAN, it Osundu Kopio, ’’Hiti nod pomogunan diti, i nosiliu no daa do tana’ do kowotuan, om it aiso’ no o tulun om aiso’ o nintorusan do poingiyon, do haro nondo kawagu o sakot do paakan-akanan om poundarangan di gompomogompi’d dumba’ di dumba’ diyolo’. ¹³ Om hilo’d kabandaran di hilo’d watas do konuluhanan, om i hilo’d guas do nulu-nulu do ponong id kotonobon, om hilo’d ponong id salatan do Yohuda, om hilo’d watas do Binyamin, om hilo’d kawalayan di posorili’ do Yorusalim, om hilo’d kabandaran do Yohuda, do mongintob nondo kawagu i gompomogompi’d dumba’ di dumba’ diyolo’. Iyoho’ no i TUHAN o minomoros diti,’’ ka dau. ¹⁴ Boros kad TUHAN, ’’Rumikot nondo o maso do bayaanon ku i batos di pinoboros ku dot id tulun dot Israil om id tulun do Yohuda. ¹⁵ Tontok nopondo do maso’ddi om momili’ oku nondo do songulun o raja’ dit otulid do mantad id sinakagon di Daud. Om momonsoi nondo iyau dit otulid om otopot do pointongkop do pomogunan diti. ¹⁶ Om tontok nopondo do maso’ddi om koidu’ nondo o Yohuda om Yorusalim do mantad id pisangod, om osimbayan om aiso’ o koligagaanan diyolo’. Om iti nondo o ngaran do pomungaran do bandar do Yorusalim: ’TUHAN i gampamasi toko’’. ¹⁷ Iyoho’ no i TUHAN, o mamatos do haro kasai’ nopondo o sinakagon di Daud dot osiliu’d raja’ dot Israil. ¹⁸ Om haro kasai’ ot imam, i mantad id payat di Liwi, do mogobi-obi’ doho’ om papatahak do porsombahan di sorobon om papatahak do porsombahan do gandum om porsombahan di sumbolion,’’ ka dau. ¹⁹ Om boros kad TUHAN dot id doho’, ²⁰ ’’Nokopomonsoi oku nod tumpongo dot id tadau om id totuong, gisom do rumikot kasai’ nopo o dangadau om dongotuong do tontok di koririkatan kasai’; om a’ no milo do pakaisoon i tumpongo ku’ddi. ²¹ Om nokopomonsoi oku nogi’ do tumpongo dot id di Daud, i susuhuon ku, do haro kasai’ nopondo o sinakagon dau do sumiliu’d raja’, om nokopomonsoi oku do tumpongo dot id imam, i sinakagon di Liwi, do mogobi-obi’ kasai’ iyolo’ doho’. Om a’ no milo do pakaisoon i tumpongo ku’ddi. ²² Om posopohon ku nondo o sinakagon di Daud, i susuhuon ku, om it imam do mantad id payat di Liwi di mogobi-obi’ doho’, do gisom do miagal pod rombituon tu’ a’ no ointob-intob do hilo’d tawan, om miagal di togis do hilo’d tisan do rahat tu’ a’ no milo’d intobon,’’ ka dau. ²³ Om boros kad TUHAN dot id doho’, ²⁴ ’’A’ nu toi pinokinongou i pinimboros diti tulun do poingkaa, ’Naadaan nod TUHAN ot Israil om Yohuda, i duwo o bansa’ do pinili’ dau,’ ka. Om mongindaraat diri iyolo’ di tulun ku, tu’ sorohon no diyolo’ dot okon noddi ko’ bansa’ dot agayo i tulun do songonuon ku. ²⁵ Nga’ iyoho’ no i TUHAN, o nokopongumpongo do tadau om totuong, om iyoho’ o minomonsoi dit oturan do mongulud do tawan om pomogunan. ²⁶ Om poingkuro oku nopo do minomonsoi do miagal diri, om iyo oku nogiddi do popogirot di tumpongo ku dot id sinakagon di Yakub, om id di Daud, i susuhuon ku. Om pilion ku nondo o songulun di sinakagon di Daud do momorinta’ di sinakagon di Abraham, om i Isak, om i Yakub. Om insianan ku indo iyolo’, om posimbayanon kawagu ku iyolo’,’’ ka dau.

¹ Om boro-boros no o TUHAN dot id doho’ do tontok di sumaap no do Yorusalim om i kabandaran do hiri’d posorili’ i Raja’ Nobukadnisar, i raja’ do Babil do miwoyo’ do koinsanai di soudor dau, om koinsanai di pomorintaan om bansa’ di porintaon dau. ² Om suhuo’ oku nod TUHAN, i Kinorohingan dot Israil do mongoi pomisunud di Sodokia, i raja’ do Yohuda do poingkaa, ’’Iyoho’ no i TUHAN, o papatahak diti bandar dot id raja’ do Babil, om maan nondo dau tutudai iti. ³ Om iya’ piya nga’ a’ no milo do mogidu’, tu’ atantu’ no dot atangkap ko om katahak ko dot id dau. Om kosolowot ko nondo dau om koboro-boros kopio ko dau; om koongoi ko nondo do hilo’d Babil. ⁴ Nga’ pokinongou pogi’ diti poboroson ku do pasal diya’, oi Sodokia. A’ ko indo apatai dot id pisangadan, ⁵ tu’ osonong i’ o kapatai-patayo’ nu. Om poingkuro nopo i rayat do minodtutud do kominyan do pomusou di komolohingan nu di minomorinta’ dot id gulu ko’ iya’ do tontok di linobong iyolo’, om iyo nogiddi iyolo’ do momusou diya’, tu’ modtutud i’ iyolo’ do kominyan do pomusou diya’. Om mogihad nondo iyolo’ om momoros dot, ’Adai, napatai no i raja’ toko’,’ ka. Iyoho’ no i TUHAN o minomoros diti,’’ ka dau. ⁶ Om poboroso’ ku no i boros do TUHAN diri dot id di Raja’ Sodokia, di hilo’d Yorusalim, ⁷ do tontok di songodon no di raja’ do Babil o bandar diri. Om songodon nogi’ di soudor diri o bandar do Lakis om Asika, om iri po daa o bandar di kitolig do hilo’d Yohuda. ⁸ Om nakapamatos no i Raja’ Sodokia om i tulun do hilo’d Yorusalim do popoidu’ ⁹ di turipon diyolo’ di bansa’ dot Ibrani, i tongokusai om i tongoondu’; om aiso’ indo o tongosongulun piya do bansa’ dot Israil do moniliu do turipon di sompi’ ko’ dau’d bansa’. ¹⁰ Om oinsanan nopoddi i rayat om i boyoon diyolo’ do minomonsoi do tumpongo do popoidu’ di turipon diyolo’ om a’ nondo moniliu kawagu diyolo’ do turipon. Om poiduwo’ ngai’ no diyolo’ i turipon diyolo’ddi. ¹¹ Nga’ alaid-laid noddi om wolihai po kawagu diyolo’ o pomusorou diyolo’, om ngoyo’ no kawagu diyolo’ i turipon di pinoidu’ daa diyolo’ddi om sansagai po kawagu diyolo’ iyolo’ do sumiliu’d turipon. ¹² - ¹³ Om suhuo’ oku noddi do TUHAN, i Kinorohingan dot Israil do popoboros dot id tulun diri do poingkaa, ’’Minomonsoi oku do tumpongo dot id komolohingan dokoyu di gulu po di pinosoliwan ku i’ iyolo’ do mantad hilo’d Masir, om di pinoidu’ ku iyolo’ do mantad id pinonguripanan. Om sunudai ku no iyolo’ do, ¹⁴ pointikid-tikid do koturu’d toun, om apatut nod poiduwon diyolo’ o koinsanai di tulun dot Ibrani di nosiliu do turipon diyolo’ do solinaid dot onom o toun. Nga’ a’ i’ minokinongou om a’ minamadul di pinoboros ku i kongomolohingan dokoyu di gulu po. ¹⁵ Om tontok di piro-piro o tadau do nakatalib om sinimbanan dokoyu o kowoyo-woyoon dokoyu om minomonsoi kou di korohian ku. Oinsanan kou nopo do nakaakun do popoidu’ di tulun dot Israil di nosiliu’d turipon, om minomonsoi kou do tumpongo dot id toguang ku do hilo’d Walai’d Sasambayangan dot Agayo, i tiyonon do sumambayang dot id doho’. ¹⁶ Nga’ tontok di winolihan kawagu dokoyu o pomusorou dokoyu om minongindaraat kou’ddi doho’. Tu’ oinsanan kou nopo do minongoi panganu kawagu di turipon di tongoondu’ om tongokusai di pinalabus daa dokoyu om pinologos do mongoi do honggo nopo o korohian diyolo’. Nga’ sinansagan iddi dokoyu kawagu iyolo’ do sumiliu’d turipon dokoyu. ¹⁷ Om gowoi poddi do momoros oku, iyoho’ i TUHAN, dot a’ kou minumboyo’ do boros ku, om a’ kou pinopoidu’ di sompi’ ko’ bansa’ dot Israil. Om iyo nopoddi, om poiduwon ku no kopio iyokoyu’d baino’. Om aala’ kou indo dot id pisangadan, om oontok kou’d toruo-ruol om mononglous. Om poronobon ngai’ ku nopondo o koinsanai’d bansa’ do hiti’d pomogunan do kokito di wonsoyon ku dot id dokoyu. ¹⁸ - ¹⁹ Iri nopo i boyoon do Yohuda om Yorusalim om i pagawai do walai’d raja’, om it imam om koinsanai’ddi boyoon, om nokopomonsoi no do tumpongo dot id doho’. Om nokogirot no diyolo’ i tumpongo’ddi. Pinopogirot nopoddi om minonumbali’ iyolo’d sapi’, om pipapaso’ no, om pamanau no iyolo’ do hiri’d pialatan di duwo o papas. Nga’ tinolibambanan iddi diyolo’ i tumpongo’ddi om a’ tinanud it oturan di tumpongo. Gowoi pondo om wonsoyon ku dot id diyolo’ o miagal di winonsoi diyolo’ dot id sapi’ddi. ²⁰ Om patahakon ku nondo iyolo’ dot id pisangod dit orohian do mamatai diyolo’. Om osiliu pondo do taakanon do tombolog om nintorusan o rata’ diyolo’. ²¹ Om patahakon ku nondo i Sodokia, i raja’ do Yohuda, om i pagawai dau dot id pisangod diyolo’ dit orohian do mamatai diyolo’. Patahakon ku nondo iyolo’ dot id soudor do raja’ do Babil, i nokotongkiad no dokoyu. ²² Moro-boros oku nondod monuhu’, om gumuli’ nondo iyolo’ do hiti’d bandar diti. Om songodon nondo diyolo’ iti bandar, om solodon, om tutudan diyolo’. Om silihon ku nondod tana’ dit a’ sunian o hilo’d kabandaran do Yohuda om a’ iyonon do tulun. Iyoho’ no i TUHAN, o minomoros diti,’’ ka dau.

¹ Tontok di nosiliu i Yoyakim i tanak di Yosia, do raja’ do Yohuda, om boro-boros no o TUHAN dot id doho’ do poingkaa, ² ’’Ongoi no boro-boros di tulun do Rikab, om angatan i’ iyolo’ do mongoi do hilo’d Walai’d Sasambayangan dot Agayo, om sumuang kou no dot id iso’ o bilik, om poinumon nogindo iyolo’ do waig dot anggur,’’ ka dau. ³ Om ngoyo’ ku no angatai i Yaasania, (i tanak di Yoromia, i manangaki di Habisinia) om miwoyo’ do koinsanai di tobpinai dau om i tangaanak dau do tongokusai; oinsanan nopo it id payat do Rikab do nangatan ku. ⁴ Om angatai ku no iyolo’ do mongoi’d hiri’d Walai’d Sasambayangan dot Agayo om suang no iyahai do hiri’d bilik di tumatanud di Nabi Hanan, i tanak di Yogdalia. Iri no i bilik dit id somok di bilik do pagawai’d suwai, it id sawa-sawat di bilik di Maasiya, i tanak di Sulam. I Maasiya nopo nga’ pagawai dit asawat o pangkat do hiri’d Walai’d Sasambayangan dot Agayo. ⁵ Om posurung oku noddi do sangkir om galas di noponu’ do waig dot anggur dot id tulun do Rikab diri. Om boro-boros oku no dot id diyolo’ do poingkaa, ’’Inum kou!’’ kangku. ⁶ Nga’ boros ka diyolo’, ’’A, a’ i’ iyahai monginum do waig dot anggur tu’ nosunudan no iyahai di Yonadab i tanak di Rikab, i taki-aki dahai, dot a’ iyahai om i sinakagon dahai koino-ino do monginum do waig dot anggur. Om a’ kasai’ no iyahai koino-ino do monginum diri do gisom dot alaid. ⁷ Om a’ nogi’ iyahai koino-ino do momutanom ko’ mananom po ko’ momoli do kabun dot anggur. Om a’ iyahai koino-ino do momonsoi’d walai do solinaid dahai do poimpasi, suwai ko’ miyon kasai’ nopo iyahai dot id kiim, om koundorong i’ iyahai do hiti’d pomogunan diti do miagal do sompogunan. ⁸ Om noumboyo’ ngai’ i’ dahai i boros di Yonadab. Tu’ a’ i’ iyahai, om i sawo dahai, om i tangaanak dahai monginum do waig dot anggur do solinaid dahai do poimpasi. ⁹ - ¹⁰ Om a’ iyahai momonsoi do walai do tiyonon dahai, suwai ko’ miyon nopo iyahai dot id kiim. Om aiso’ o kabun dot anggur dahai ko’ tumo ko’ gandum po do maan do tonomon. Nangatanud ngai’ nopo dahai i pinonuhuan di Yonadab i taki dahai, dot id dahai, om aiso’ no o tiso’ dot a’ dahai natanud. ¹¹ Nga’ soira’ di ruminikot i Nobukadnisar i raja’ do Babil, do mongoi panangod diti pomogunan, om kopogiokunai no dahai do mogidu’ do mantad id soudor do Babil om mantad id soudor do Siria, om ongoi no iyahai do hiti’d Yorusalim. Om iri no o kinoiyan-iyanan dahai do hiti,’’ ka diyolo’. ¹² - ¹³ Om suhuo’ oku noddi do TUHAN, it Osundu Kopio, i Kinorohingan dot Israil do mongoi solowot di tulun do Yohuda om Yorusalim om moro-boros dot id diyolo’ do poingkaa, ’’Muhot oku, iyoho’ i TUHAN, ondung nokuro tu’ a’ kou mokinongou doho’ om a’ tumanud do ponuhuan ku. ¹⁴ Noduhan di Yonadab i sinakagon dau do monginum do waig dot anggur, om numboyo’ i’ diyolo’ i pinogoduhan diri. Om gisom do baino’ nga’ aiso’ i’ o tiso’ diyolo’ do monginum do waig dot anggur. Nga’ iyokoyu nopo om a’ i’ minokinongou doho’ mulong piya dot aiso’ a kotingkadan ku do minsunud dokoyu. ¹⁵ A’ oku nopo otingkod-tingkod do popingrikot di susuhuon ku, i nabi, dot id dokoyu. Om nonuan kou diyolo’ do nosihat do poposonong do kowoyo-woyoon dokoyu om tumingkod do momonsoi’d araat. Om pinoinsan kou diyolo’ dot a’ tumuku’ dot id tingolig om a’ modsubak diri, om koundorong kasai’ kou i’ do hiti’d pomogunan di pinatahak ku dot id dokoyu om id taki-aki dokoyu. Nga’ a’ kou i’ minamadul diri om a’ kou minokinongou doho’. ¹⁶ Iri nopo sinakagon di Yonadab om minumboyo’ i’ kopio do boros di taki- aki diyolo’, nga’ iyokoyu nopo om a’ i’ mokinongou doho’! ¹⁷ Gowoi pondo om iyoho’ no i TUHAN, it Osundu Kopio, i Kinorohingan dot Israil, o poporikot dot id dokoyu, i tulun do Yohuda om Yorusalim do koinsanai di kosusaan do porotuon ku dot id dokoyu, do miagal di nokoboros ku. Om wonsoyon ku pogi’ o miagal diri nga’ a’ kou i’ minokinongou do tontok di minoro-boros oku dokoyu om a’ kou suminimbar do tontok di linohou ku iyokoyu,’’ ka dau. ¹⁸ Om boro-boros oku noddi dot id tulun di mantad id payat do Rikab do poingkaa o boros do TUHAN, it Osundu Kopio, i Kinorohingan dot Israil, dot id diyolo’, ’’Minumboyo’ kopio kou i’ do koinsanai di boros di Yonadab, i taki- aki dokoyu, om tinanud dokoyu o koinsanai di pinonuhuan dau om winonsoi dokoyu o miontok di boros dau dot id dokoyu. ¹⁹ Om iri no o kapamatasan ku, iyoho’ i TUHAN it Osundu Kopio, i Kinorohingan dot Israil, do haro kasai’ nopondo o kusai do mantad id sinakagon di Yonadab i tanak di Rikab, do mogobi-obi’ doho’,’’ ka.

¹ Tontok di kaapat nod toun di Yoyakim i tanak di Yosia, do raja’ do Yohuda, om boro-boros no o TUHAN dot id doho’ do poingkaa, ² ’’Ongoi anu dot iso’ o karatas do linopi om potulison i’ do hiri o koinsanai di boros di pinoboros ku diya’ do pasal dot Israil, om Yohuda om koinsanai’d bansa’. Tulison ngai’ no i boros ku do mantad po di minoro-boros oku i’ diya’ dit insan i’, di maso pod i Raja’ Yosia o momorinta’ om gisom do baino’. ³ Tu’ nunu koilo-ilo do korongou nopondo i tulun do Yohuda do koinsanai di kosusaan di porotuon ku dot id diyolo’, om tumingkod i’ dotindo iyolo’ do momonsoi’d araat. Om ompunan ku indo i kasalaan om i dusa diyolo’,’’ ka dau. ⁴ Om lohowo’ ku noddi i Baruk i tanak di Noria, om tuliso’ ngai’ no dau i boros di pinoboros do TUHAN dot id doho’, do maso ku do popoboros diri. Om potuliso’ no dau do hiri’d karatas di linopi. ⁵ Om sunudai ku noddi i Baruk do poingkaa, ’’A’ oku noddi pologoson do sumuang di Walai’d Sasambayangan dot Agayo. ⁶ Nga’ tontok nopondo do puasa o tulun, om basaon no dot opuhod i pinoboros ku di tinulis nu, om koinsanai di pinoboros do TUHAN dot id doho’. Basaon nori dot id kinoiyonon di korongou ngai’ o koinsanai’d tulun, om iri nogi’ i tulun do Yohuda di rumikot do mantad id kawalayan diyolo’. ⁷ Om iri i’ daa’ndo o koodsuur diyolo’ do sumambayang dot id TUHAN om kumorologo do mantad id kowoyo-woyoon diyolo’ dot araat. Tu’ otogod no kopio o TUHAN diyolo’ om orison dau iyolo’,’’ ka dau. ⁸ Om wonsoyo’ ngai’ nopo di Baruk o miontok di pinonuhuan ku dau. Tu’ basao’ ngai’ nopo dau i boros do TUHAN do hiri’d Walai’d Sasambayangan dot Agayo. ⁹ Om tontok di toun do kolimo di tulan do kosiam do pomorintaan di Yoyakim, i raja’ do Yohuda, om puasa noddi o koinsanai di rayat do mokiinsian do TUHAN. Om iri tulun di poingiyon do hilo’d Yorusalim om koinsanai di rayat do mantad id kawalayan do Yohuda di ruminikot do hilo’, nga’ puasa ngai’ nogi’. ¹⁰ Om basao’ noddi di Baruk i boros ku di pinotulis do hiri’d karatas di linopi, om oinsanan nopo i tulun do minokinongou’ddi. Binasa’ dau iri do hiri’d Walai’d Sasambayangan dot Agayo, do hiri’d bilik di Gamaria, i tanak di Sapan, i gomponulis do pomorinta’. Iri nopo bilik dau om hiri’d natad di ponong id sokid, it id toning di ralan do sumuang do hiri’d wawayaan di roitan do Wawayaan do Wagu di Walai’d Sasambayangan dot Agayo. ¹¹ Om soira’ di norongou di Mikaya i tanak di Gamaria, i manangaki di Sapan, o koinsanai di boros do TUHAN di pointulis do hiri’d karatas di linopi diri, i binasa’ di Baruk, ¹² om ongoi no iyau do hiri’d bilik di gomponulis do pomorinta’, i hiri’d walai do raja’. Om songirikau ngai’ nod hiri i piro-piro pagawai: i Ilisama i gomponulis do pomorinta’, om i Dilaya i tanak di Somaya, om i Ilnatan i tanak di Akbor, om i Gomaria i tanak di Sapan, om i Sodokia i tanak di Hanania om koinsanai di pagawai do suwai. ¹³ Om posunudo’ ngai’ no di Mikaya diyolo’ o koinsanai di boros do norongou dau di binasa’ di Baruk do hiri’d Walai’d Sasambayangan dot Agayo. ¹⁴ Om suhuo’ noddi di piro-piro pagawai i Yohudi, (i tanak di Nitania, i manangaki di Solomia, i manangaki di Kusi) do mongoi popoboros dot id di Baruk do poingkaa, ’’Ngoyo’ i surat di linopi di binasa’ nu dot id tulun dot ogumu’ddi, om mongoi nod hiti,’’ ka. Om ngoyo’ no di Baruk i surat di linopi’ddi om ongoi no iyau do hiri’d diyolo’. ¹⁵ Om boros ka diyolo’ dot id dau, ’’Irikau, om basaon i’ dot id dahai ino surat do linopi,’’ ka. Om basao’ no di Baruk iri. ¹⁶ Om tontok di nabasa’ dau iri, om kooris no iyolo’, om pogiboro-boros noddi iyolo’ do poingkaa, ’’Apatut moti’ do ngoyon toko’ sunudai i raja’ do koinsanai’d boros diri dot oruhai,’’ ka. ¹⁷ Om uhoto’ no diyolo’ i Baruk, ’’Sunudai bo iyahai ondung poingkuro ko do minonulis ngai’ do boros diti? Pinoboros di Yoromia dot id diya’ iti, om tuliso’ nu noddi?’’ ka diyolo’. ¹⁸ Om boros kad i Baruk do suminimbar, ’’Oo, koinsanai diti boros diti om pinoboros ngai’ di Yoromia om pitulis-tulis ku do hiti’d karatas do pinsil dawat o pinonulis ku,’’ ka dau. ¹⁹ Om boros kaddi di piro-piro pagawai dot id di Baruk, ’’Pamanau nogi’ kopio, om mongoi kou i’ di Yoromia lisok. Om kada’ nod haro o songulun piya do koilo di lisokon dokoyu,’’ ka diyolo’. ²⁰ Om poopio’ no di piro-piro pagawai i surat do linopi diri do hiri’d bilik di Ilisama, i gomponulis do pomorinta’ om ongoi noddi iyolo’ solowot di raja’, om posunudo’ ngai’ nopo diyolo’ i boros diri dot id dau. ²¹ Om suhuo’ noddi di raja’ i Yohudi do mongongoi di surat di linopi’ddi, om ngoyo’ no dau do mantad id bilik di Ilisama, om basao’ noddi di Yohudi dot id raja’ om id toinsanan di pagawai di songingkakat do hiri’d posorili’ di raja’. ²² Tontok nopoddi nga’ tulan do kosiam, om poirikau i raja’ do hiri’d walai do raja’ di maso dot osogit. Om mikit-sikit o tapui do hiri’d ropuhan dot id dotoguangan dau. ²³ Om pointikid-tikid dot aayi’ di Yohudi do mambasa’ o tolu ko’ apat o kinoiyonon om pompodon no di raja’ iri do pisau dot okooro’ o pomompod, om pataamon no dau do hiri’d tapui, do gisom do nosorob ngai’ i surat di linopi’ddi do hiri’d tapui. ²⁴ Om aiso’ i’ o tiso’ piya diyolo’, i raja’ ko’ iri po pagawai dau do nooris do nokorongou di boros diri, om aiso’ i’ ot id pogialatan diyolo’ do pinopointalang do monosol. ²⁵ Nga’ minogodu tomod i’ daa i Ilnatan om i Dilaya om i Gamaria di raja’ do monorob di surat di linopi’ddi, nga’ a’ i’ di raja’ pinokinongou iyolo’. ²⁶ Om suhuo’ no daa’ddi di raja’ i Yiramiil i tanak di raja’, om i Soraya, i tanak di Asriol om i Solomia i tanak di Abdiil do mongoi panangkap doho’ om i Baruk, i gomponulis ku. Nga’ linisok i’ iyahai’d TUHAN. ²⁷ Om soira’ di notutudan di raja’ i surat di linopi’ddi, i pinotulisan di Baruk di boros di pinoboros ku, om suhuo’ oku nod TUHAN ²⁸ do mongoi panganu kawagu do karatas do suwai di linopi om tulisan i’ iri do koinsanai di pinotulis di hiri’d karatas di linopi di koinsan i’. ²⁹ Om suhuo’ oku nod TUHAN do popoboros dot id raja’ do poingkaa, ’’Tinutudan nu i surat di linopi’ddi, om minonguhot ko di Yoromia ondung nokuro tu’ pinotulis dau do hiri dot atantu’ no do rumikot i raja’ do Babil do mongoi pamaraag do pomogunan diti om mongoi pamatai do tulun om nintorusan do hiti. ³⁰ Om iri noddi o kapamarasan ku, iyoho’ i TUHAN, dot id diya’, oi Raja’ Yoyakim, dot aiso’ no o tiso’ do sinakagon nu do kopomorinta’ do pomorintaan di Daud. Om i rata’ nu nga’ pataamon nopo om osidangan do tadau do dangadau om abalabahan do dongotuong. ³¹ Om hukuman ku nondo iya’, om i sinakagon nu om i piro-piro pagawai nu, tu’ nokowonsoi ngai’ kou i’ do dusa. Om porikatan ku nondo iyokoyu om koinsanai di tulun do poingiyon do hilo’d Yorusalim, om i tulun do Yohuda, do koinsanai di kosusaan di pinoboros ku do porikoton ku dot id dokoyu, tu’ a’ kou i’ minamadul di pinongoris ku dokoyu,’’ ka. ³² Om anu oku noddi do karatas do suwai di linopi om patahako’ ku no dot id di Baruk, i gomponulis ku. Om popitulis-tulison diri dau do hiri i boros do poboroson ku. Om pinotulis ngai’ nogi’ di Baruk do hiri o koinsanai di boros di hiri’d surat di linopi dit id gulu, om rinuhangan do piro-piro kawagu o boros do miagal diri.

¹ Om pilio’ no di Nobukadnisar i raja’ do Babil, i Sodokia, i tanak di Yosia, do sumiliu do raja’ do hilo’d pomogunan do Yohuda do suminowoli di Yoyakin i tanak di Yoyakim, i nidu’ dau do raja’. ² Nga’ a’ i’ i Sodokia om i piro-piro pagawai dau, om i rayat do pomogunan diri minumboyo’ di boros do TUHAN di pinosunud ku. ³ Nga’ insan o maso, om ponuhu’ no i Raja’ Sodokia di Yukal, i tanak di Solomia, om i Sipania it Imam, i tanak di Maasiya do mongoi ponuhu’ doho’ do sumambayang dot id TUHAN, i Kinorohingan dahai do mogobi’ di bansa’. ⁴ Om tontok nopo do maso’ddi om a’ oku po nokogiil om osimbayan oku po do mimpanau dot id pogialatan di rayat. ⁵ Maso no daa di soudor do Babil do monurungku’ do Yorusalim, nga’ tontok di nokorongou iyolo’ do nakapamanau no i soudor do Masir do mantad hilo’d Masir do mongoi sangod, om poggidu’ noddi iyolo’. ⁶ Om suhuo’ oku noddi do TUHAN, i Kinorohingan dot Israil do popoboros ⁷ dot id di Sodokia do poingkaa, ’’Hilo’ nod tanga’d ralan i soudor do Masir do mongoi daa ponguhup diya’, nga’ gumuli’ indo kawagu iyolo’. ⁸ Om gumuli’ indo kawagu i soudor do Babil do mongoi panangod diti bandar, om aala’ indo diyolo’ iti, om tutudan diyolo’. ⁹ Iyoho’ no, i TUHAN, o popoinsan dokoyu, dot a’ posiwot do ginawo dokoyu, do gisom do momusorou kou dot a’ gumuli’ kawagu i soudor do Babil, tu’ gumuli’ i’ moti’ iyolo’. ¹⁰ Om aala’ piya daa dokoyu o koinsanai di soudor do Babil, do gisom dot iri po i nongosuhat ot oolu’ diyolo’, om hiri ngai’ po iyolo’d kiim do songillii, nga’ mingkakat i’ moti’ iyolo’ddi do mongoi ponutud diti bandar do gisom dot ouu,’’ ka dau. ¹¹ Om poggidu’ noddi do mantad hilo’d Yorusalim i soudor do Babil tu’ pakayaan no di soudor do Masir dot id bandar diri. ¹² Om tongkiad oku no do mantad hilo’d Yorusalim om ongoi oku no do hilo’d watas do Binyamin do mongoi panganu do tintanga’ ku di tana’ do potungkusan di sompiiyon ku. ¹³ Nga’ tontok di nokorikot oku do hiri’d wawayaan di roitan do Wawayaan do Binyamin, om talabai oku no di boyoon do soudor di madtamong do hiri, om boro-boros nod, ’’Mogidu’ ko daa om mongoi ko daa’ddi sugku’ dilo tulun do Babil,’’ ka dau. (Iri nopo boyoon do soudor diri nga’ roitan dot i Yoria; iyau nopo om tanak di Solomia om manangaki di Hanania.) ¹⁴ Om boros kangku do suminimbar, ’’A’ i’ otopot ino! Tu’ a’ oku i’ mongoi sugku’ dilo pisangod,’’ kangku. Nga’ a’ no i Yoria minokinongou. Om tangkapo’ oku nopo om ngoyo’ oku no dau posolowoto’ di pagawai do pomorinta’. ¹⁵ Om kotogod tomod no iyolo’ doho’, om ponuhu’ no iyau do momobog doho’ om mongontiil doho’ do hiri’d walai di Yonatan, i gomponulis do hiri’d walai do raja’. Iri nopo walai’ddi nga’ siniliu do giil. ¹⁶ Om pinosuang oku dot id pomogiilan di pinoukad dot id saalom do tana’. Om alaid oku i’ do poundorong do hiri. ¹⁷ Om ponuhu’ noddi i Raja’ Sodokia do tulun do mongoi doho’ posolowot dau do hiri’d walai do raja’. Om pomolisok-lisok iddi i raja’ do minonguhot doho’ do hiri ondung haro po o boros do mantad id TUHAN. ’’Haro,’’ kangku do suminimbar. Om boros kangku kawagu, ’’Katahak ko nondo dot id longon do raja’ do Babil!’’ kangku. ¹⁸ Om boros kangku’ddi do minonguhot, ’’Nunu kopio toi o kasalaan do nowonsoi ku dot id diya’, om id pagawai nu om id rayat do gisom do pinosuang oku dot id giil? ¹⁹ Hinonggo ngai’ no toi i nabi di tuuhoton nu di mimboros dot id diya’ dot a’ rumikot do mongoi panangod diya’ om iti pomogunan diti i raja’ do Babil? ²⁰ Nga’ pokinongou pogi’ kopio oi Tuan ku Raja’! Pokinongoho’ no iti pokionuon ku diya’. Kada’ oku no kopio pogulio’ do hilo’d giil di hilo’d walai di Yonatan, tu’ apatai oku moti’ndo do hilo’,’’ kangku. ²¹ Om ponuhu’ noddi i Raja’ Sodokia do popogiil doho’ do hiri’d natad di walai do raja’. Om hiri oku noddi om pionuan oku do roti do mantad hiri’d pamansayan do roti do gisom do norikot o maso dit aiso’ no o roti do hiri’d bandar diri.

¹ - ³ Om suhuo’ oku nod TUHAN do popoboros do boros dot id rayat do poingkaa, ’’Patahakon ku nondo o bandar diti dot id soudor do Babil, om aala’ nondo diyolo’ iti. Om isai nopo o mundorong do hiti’d bandar, om apatai no dot id pisangadan, ko’ apatai do louson om toruol. Nga’ isai nopo o sumoliwan diti bandar om tumahak dot id tulun do Babil, om a’ no apatai; om apasi indo iyau,’’ ka. Om norongou ngai’ i’ di Sopasa, i tanak di Matan, om i Godalia i tanak di Pasur, om i Yukal i tanak di Solomia, om i Pasur i tanak di Malkia i pinoboros ku’ddi. ⁴ Om ongoi no i pagawai solowot di raja’ om poboroso’ no diyolo’ o poingkaa, ’’Apatut nod hukuman do kapatayon iti tulun diti! Tu’ mimboros nopo iyau dot iyo’ddi om popoluhoi no iyau do ginawo di soudor om i tulun di maso do poundorong do hiti’d bandar. A’ nogi’ iyau monguhup do rayat, nga’ momungou nogi’ iyau diyolo’,’’ ka. ⁵ Om boros ka di Raja’ Sodokia do suminimbar, ’’Wonsoyo’ nopo dokoyu i korohian dokoyu do wonsoyon dot id dau. Tu’ a’ oku i’ milo do mogodu dokoyu,’’ ka dau. ⁶ Om ngoyo’ oku noddi diyolo’, om pouluho’ oku no do tali o pinongulu do hiri’d torobong di Malkia, i tanak di raja’ddi. Iri nopo torobong diri nga’ hiri’d natad di walai do raja’. Aiso’ no o waig di torobong diri, nga’ kiburutak i’, om katanom oku nopo do hiri’d burutak. ⁷ Tontok nopoddi nga’ haro o songulun o bansa’ dot Etiopia do pakaraja’ do hiri’d walai do raja’. Ngaran nopo dau om i Ibidmilik. Om korongou no iyau do pinosuang oku do hiri’d torobong diri. Om tontok di maso di raja’ do mongigit do pogibara-barasan do hiri’d wawayaan di roitan do Wawayaan do Binyamin ⁸ om ongoi no i Ibidmilik do hiri, om boro-boros no iyau di raja’ do poingkaa, ⁹ ’’Oi Tuan ku Raja’, a’ i’ osonong o winonsoi do tulun diri. Tu’ pinosuang diyolo’ i Nabi Yoromia dot id torobong. Om apatai no moti’ iyau’ddi dot ololousanan do hilo’ tu’ aiso’ no o taakanon do hiti’d bandar,’’ ka dau. ¹⁰ Om suhuo’ noddi di raja’ i Ibidmilik, boros ka dau, ’’Ongoi pangangat do tolu o tulun om ngoyon i’ posoliwano’ i Yoromia do mantad id torobong diri dot a’ po iyau apatai!’’ ka dau. ¹¹ Om angatai noddi di Ibidmilik i tolu o tulun diri om ongoi no do hiri’d walai di raja’, om ongoi no iyolo’ panganu do kain di nangagansing no do mantad hiri, om pouluho’ no dot id doho’ do tali o pinongulu do hiri’d torobong. ¹² Om suhuo’ oku no di Ibidmilik do paampin di gansing diri dot id pokilok ku, om a’ oku i’ apalasan di tali. Om wonsoyo’ ku no o miagal diri. ¹³ Om gayato’ oku no diyolo’ do pinopoinsawat, do sumoliwan di torobong diri. Om hiri noddid natad di walai do raja’ o pinoundarangan diyolo’ doho’. ¹⁴ Insan no kawagu o maso, om ponuhu’ no i Raja’ Sodokia do tulun do mongoi pangangat doho’ do mongoi solowot dau do hiri’d wawayaan do kotolu di Walai’d Sasambayangan dot Agayo. Om boro-boros no i raja’ dot id doho’ do poingkaa, ’’Haro o tuhoton ku diya’; om posimbaron no it otopot, kada’ nod haro o lisok- lisokon do mantad id doho’,’’ ka dau. ¹⁵ Om boros kangku do suminimbar, ’’Ondung posunudon ku it otopot dot id diya’, om atantu’ no do hukuman oku diya’ do kapatayon. Om ondung nosihatan ku iya’, nga’ a’ ko i’ tumanud do nosihat diri,’’ kangku. ¹⁶ Om pomolisok-lisok no i Raja’ Sodokia do minamatos dot id doho’ do poingkaa, ’’Sumumpa’ oku dot id suang do ngaran do Kinorohingan di poimpasi, i manahak dati’ do ginawo, dot a’ ku iya’ patayon om a’ ku iya’ patahakon dot id tulun di sipamatai diya’,’’ ka dau. ¹⁷ Om sunudai ku noddi i Sodokia do boros do TUHAN, it Osundu Kopio, i Kinorohingan di tukuon do tulun dot Israil do poingkaa, ’’Ondung tumahak ko dot id boyoon do soudor do raja’ do Babil, om a’ ko i’ patayon, om iti bandar nga’ a’ i’ tutudan. Om apasi ko i’ om apasi o sompiiyon nu. ¹⁸ Nga’ ondung a’ ko tumahak dot id diyolo’, om katahak nondo iti bandar dot id longon do tulun do Babil, om tutudan nondo diyolo’ iti do gisom dot ouu; om iya’ nga’ a’ no kopoggidu’ do mantad id diyolo’,’’ ka dau. ¹⁹ Om boros kaddi di Raja’ Sodokia do suminimbar, ’’Ooris oku di tulun toko’ di minongoi sugku’ di tulun do Babil. Tu’ patahakon oku dotindo dot id diyolo’ om inggoriton oku nondo diyolo’,’’ ka dau. ²⁰ Om boros kangku do suminimbar, ’’A’ ko i’ patahakon dot id diyolo’. Nga’ pokionuon ku no daa kopio do mumboyo’ ko do boros do TUHAN; om aiso’ indo o kosusaan nu, om a’ ko i’ patayon. ²¹ Nga’ ondung a’ ko tumahak, om nokointalang no do TUHAN dot id doho’ it osiliu. ²² Nokito ku dot id pinointalang diri do posoliwanon ngai’ nopondo i tongoondu’ di nongoolu-olu’ do hiri’d walai do raja’ do Yohuda, om ngoyon no patahako’ dot id boyoon do soudor di raja’ do Babil. Om mimboros nondo i tongoondu’ dot id diya’ do poingkaa, ’Naakalan i raja’ di tambalut kopio dau, om noporinta’ iyau diyolo’. Nga’ maha’ddi nakatanom dot id burutak o gakod dau, om tongkiad ngai’ nopoddi iyolo’,’ ka,’’ ka dau. ²³ Om boros kangku’ddi kawagu, ’’Oinsanan nopondo i sawo om i tangaanak nu do posoliwanon om ngoyon patahako’ di tulun do Babil. Om iya’ nga’ a’ no kopoggidu’ do mantad id diyolo’, tu’ atangkap ko nondo di raja’ do Babil. Om iti bandar nga’ otutudan nondo do gisom dot ouu,’’ kangku. ²⁴ Om boros kaddi di Sodokia, ’’Kada’ posunudo’ dot id ongoiso’ piya o tulun diti pinibara-barasan to, om a’ ko i’ apatai. ²⁵ Om ondung koilo i pagawai do nokorumo oku diya’, om rumikot nondo iyolo’ dot id diya’ do mongoi uhot ondung nunu o pinibara-barasan to. Om mamatos nondo iyolo’ dot a’ mamatai diya’ ondung posusuyon ngai’ nu no iri dot id diyolo’. ²⁶ Nga’ sunudan nopo iyolo’ do minomolugu-lugut ko doho’ dot a’ popoguli’ diya’ do hilo’d giil do mongoi patai do hilo’,’’ ka dau. ²⁷ Om a’ po alaid do mantad diri, om rikot kopio i’ daa i piro-piro pagawai do minongoi ponguhot doho’. Nga’ simbaro’ ku nopo iyolo’ do miagal di pinonuhuan di raja’ do posimbaron. Om aiso’ iddi o milo diyolo’d winonsoi tu’ aiso’ i’ o nokoilo dot ongoiso’ piya o tulun di pinibara-barasan dahai di raja’. ²⁸ Om hiri kasai’ oku pod natad di walai do raja’ do gisom do norikot i tadau do nosolod do pisangod o Yorusalim.

¹ Tontok di toun do kosiam di tulan do kohopod do pomorintaan di Sodokia, i raja’ do Yohuda, om rikot no i Nobukadnisar i raja’ do Babil do miwoyo’ do koinsanai di soudor dau do minongoi panangod do Yorusalim. ² Om tontok di tadau do kosiam, di tulan do kaapat, di kohopod om iso’ do toun do pomorintaan di Raja’ Sodokia, om kolopuson nod pisangod i tolig do bandar diri. ³ Om kosolod no o Yorusalim. Om rikot no i boyoon do soudor di raja’ do Babil dit angasawat o pangkat, om ngoyo’ no diyolo’ solodo’ i wawayaan di roitan do Wawayaan dit id Tanga’. Id pogialatan nopo diyolo’ddi nga’ i Norgal Sarisir, i Samgar Nibo, i Sarsokim i boyoon do walai’d raja’, om i Norgal Sarisir Rabmag om i piro-piro o boyoon do soudor do suwai. ⁴ Om soira’ di nokito di Raja’ Sodokia om i soudor dau i nosiliu do miagal diri, om umbal no daa iyolo’ do mogidu’ do kumaa do hilo’d Rantai do Yordan do totuong diri. Om waya’ no iyolo’ di ralan do kawaya’ di kabun do raja’, om soliwan no iyolo’ do minaya’ di wawayaan di kopiromutan di duwo o tolig dot id kinoiyonon diri. ⁵ Nga’ gusao’ no iyolo’ di soudor do Babil om kokosupai no i Sodokia do hilo’d Rantai do Yorikou. Om tangkapo’ no diyolo’ iyau om pootodo’ no dot id di Nobukadnisar i raja’ do Babil, do hilo’d bandar do Ribla, it id watas do Hamat. Om hukumai noddi iyau do kapatayon. ⁶ Om hiri nogi’d bandar diri o pinamatayan di tangaanak dau dot antang-antangan dau. Om iri i pagawai do Yohuda nga’ pinatai ngai’ nogi’. ⁷ Om irulo’ noddi o mato di Sodokia om kagasai no iyau om tanggayai no do hilo’d Babil. ⁸ Om tutudai noddi di tulun do Babil i walai do raja’ om i kawalayan di rayat, om pingraago’ diyolo’ i tolig do Yorusalim. ⁹ Om id tohuri noddi om pokoyoo’ no di Nobusaradan i boyoon do soudor do Babil, do hilo’d Babil i noolu-olu’ do rayat do hiri’d bandar diri, om i tulun di minogidu’ do minongoi sugku’ di tulun do Babil. ¹⁰ Nga’ iri nopo wookon di rayat, i tulun di mosikin kopio, it aiso’ o dapu’, om pinologos i’ di Nobusaradan do mundorong do hilo’d pomogunan do Yohuda. Om onuwai no dau iyolo’ do kabun dot anggur om tumo. ¹¹ Om nosuhu’ no di Raja’ Nobukadnisar i Nobusaradan, i boyoon do soudor dau do poingkaa, ¹² ’’Ngoyon no ihumo’ i Yoromia, om gompion no kopio iyau. Kada’ iyau kuroi-kuroyo’, suwai ko’ wonsoyon no dot id dau o nunu nopo i pokionuon dau dot id diya’,’’ ka dau. ¹³ Om ongoi noddi i Nobusaradan om i duwo o boyoon do soudor dau dit asawat o pangkat, i Nobusasban om i Norgal Sarisir, om i boyoon do soudor do Babil do suwai, ¹⁴ do hiri’d natad di walai do raja’ do minongongoi doho’. Om patahako’ oku noddi diyolo’ dot id di Godalia, i tanak di Ahikam, i manangaki di Sapan, it apatut do mongilo-ilo doho’ om aiso’ i’ o koligagaanan ku do muli’. Om poundorong oku noddi do hiri’d rolot di rayat. ¹⁵ Tontok di maso ku pod poundorong do nontiilan do hiri’d natad di walai do raja’, om suhuo’ oku nod TUHAN do ¹⁶ mongoi popoboros dot id di Ibidmilik, i tulun dot Etiopia diri do boros do TUHAN, it Osundu Kopio, i Kinorohingan dot Israil do poingkaa, ’’Poingkuro nopo i nokoboros ku di gulu po, om poporikot oku no do kosusaan dot id bandar diti, om okon i ko’ kosimbayanan. Om kokito ko indo dot osiliu o miagal diri. ¹⁷ Nga’ iyoho’ indo, i TUHAN o mongintirung diya’ om a’ ko indo patahakon dot id tulun di poddosi nu. ¹⁸ Om a’ ko indo patayon tu’ posion ku i’ iya’. Om apasi ko i’ tu’ mogondos ko i’ doho’. Iyoho’ no i TUHAN, o minomoros diti,’’ ka dau.

¹ Om boro-boros no o TUHAN dot id doho’, di nakalabus oku do mantad hilo’d Rama, do pinalabus oku di Nobusaradan, i boyoon do soudor. Tinanggayan oku do hilo’ do kinagasan do mogiwoyo-woyo’ di tulun do suwai do nangatangkap do mantad hilo’d Yorusalim om hilo’d Yohuda, i tanggayan nod pisangod do kumaa’d hilo’d Babil. ² Om lohowo’ oku noddi di boyoon do soudor dot iso-iso’ oku om boro-boros nod, ’’Nokoboros nod TUHAN, i Kinorohingan nu do raagon dau o pomogunan diti. ³ Om baino’ noddi om nabayaan nod TUHAN iri tu’ minomonsoi id dusa i bansa’ nu om a’ minumboyo’ dau. ⁴ Nga’ baino’ nopo om poiduwon ku no iya’ om iduwon ku o kogos do longon nu. Moyo’ nopo doho’ do kumaa do hilo’d Babil dot orohian ko no, om gompion ku i’ iya’; nga’ ondung a’ ko mongoi, om a’ i’ monguro. Om osimbayan ko i’ do mongoi do hinonggo nopo o ngoyon nu do pointongkop do pomogunan diti,’’ ka dau. ⁵ Nga’ tontok dit a’ po i Nobusaradan nakapamanau, om boro-boros no iyau do poingkaa, ’’Ondung orohian ko, om gumuli’ nopo do hilo’d di Godalia i tanak di Ahikam, i manangaki di Sapan. Tu’ iyau no o pinili’ di raja’ do Babil do sumiliu do gobunor do kabandaran do Yohuda. Om sumugku’ nopo dau dot id pogialatan diti rayat, ko’ mongoi nopo do honggo nopo o korohian nu,’’ ka dau. Om onuwai oku noddi dau do takanon do maan ku’d kokoriu om pinuhawangan oku dau, om pologoso’ oku nogiddi dau do minamanau. ⁶ Om ongoi oku noddi do hiri’d di Godalia, do hilo’d Mispa, om undorong oku no do poinsugku’ dau dot id pogialatan di rayat di pinologos do poundorong do hilo’d pomogunan do Yohuda. ⁷ Om nopili’ no di raja’ do Babil i Godalia do sumiliu’d gobunor do hilo’d Yohuda do momorinta’ do koinsanai’d tulun di nongoolu’ do hilo’d Yohuda, iri no i tulun di mosikin no kopio. Om korongou’ddi o wookon di boyoon do soudor om i soudor do Yohuda dit a’ tuminahak dot id Babil, do nopili’ no i Godalia do sumiliu’d gobunor. ⁸ Om ongoi no iyolo’ solowot di Godalia do hilo’d Mispa. Iyolo’ nopo nga’ i Ismail i tanak di Nitania, om i Yohanan i tanak di Karia, om i Soraya i tanak di Tanhumit, om i tangaanak di Ipai i mantad hilo’d Nitopa, om i Yisania i mantad hilo’d Maaka, om miwoyo’ di tulun diyolo’. ⁹ Om boro-boros no i Godalia dot id diyolo’ do poingkaa, ’’Kada’ kou kooris do tumahak dot id tulun do Babil. Undorong kou nopo do hiti’d pomogunan toko’ om minsiriba’ nopo dot id raja’ do Babil. Om jominon ku i’ dot apasi kou. ¹⁰ Om hiti oku id Mispa, om wokilon ku indo iyokoyu do rumikot i tulun do Babil do hiti. Monimung kou nopo om poopi’ di tua’ dot anggur om i tua-ua’, om i tumau do saitun, om mundorong nopo do hilo’d kawalayan di korohian dokoyu’d mundorong,’’ ka dau. ¹¹ Om daamot nopoddi nga’ nongkorongou ngai’ no i tulun dot Israil di hilo’d Muab, om i hilo’d Amon, om i hilo’d Idom, om i hilo’d piro-piro o pomogunan do suwai do pinopologos i raja’ do Babil do wookon di tulun dot Israil do mundorong do hilo’d Yohuda, om pinili’ dau i Godalia do gobunor diyolo’. ¹² Om guli’ ngai’ noddi i tulun dot Israil do mantad id koinsanai di kinoiyonon di pinotompiasan diyolo’, om guli’ no iyolo’ do hilo’d Yohuda. Om ongoi no iyolo’ do hiri’d di Godalia do hilo’d Mispa. Om ponimung no iyolo’ do tua’ dot anggur om i tua-ua’ dot ogumu’ kopio. ¹³ Katalib poddi iri, om rikot no i Yohanan om i piro-piro boyoon do soudor dit a’ tuminahak dot id pisangod, dot id di Godalia do hilo’d Mispa. ¹⁴ Om boros ka diyolo’ dot id dau, ’’Koilo ko i’ do sinuhu’ di Baalis i raja’ dot Amon, i Ismail do mongoi pamatai diya’?’’ ka diyolo’. Nga’ a’ i’ i Godalia monongkuyaan di boros diyolo’. ¹⁵ Om pomolisok-lisok noddi i Yohanan do minomisunud di Godalia do poingkaa, ’’Pologoso’ oku pogi’ do mongoi pamatai di Ismail, nga’ aiso’ i’ moti’ o tiso’ pod tulun do koilo ondung isai o minamatai dau. Nokuro tu’ pologoson iyau do mamatai diya’, gisom dot opogitompias-pias pondo kawagu i tulun do Yohuda di nokotimung do hiti’d sugku’ nu, om gisom dot angapatai ngai’ i noolu-olu’ di rayat do hiti’d Yohuda?’’ ka dau. ¹⁶ Nga’ boros ka di Godalia do suminimbar, ’’Kada’ nogi’ kopio wonsoyo’ o miagal diri. Tu’ a’ i’ otopot i pinoboros nu’ddi do pasal di Ismail,’’ ka dau.

¹ Om tontok di tulan do koturu’ do toun diri, om rikot no i Ismail i tanak di Nitania, i manangaki di Ilisama, do miwoyo’ do hopod o tulun do minongoi solowot di Godalia do hilo’d Mispa. (I Ismail nopodti nga’ sinakagon do raja’ om pagawai dit asawat o pangkat dot id pomorinta’.) Om tontok di mogitorungak iyolo’d makan, ² om ingkakat no i Ismail do miwoyo’ di hopod o tulun do koruhang dau om kodongo’ no diyolo’ o gayang diyolo’ om patayo’ no diyolo’ i Godalia. ³ Om pinatai nogi’ di Ismail o koinsanai di tulun dot Israil di poinsugku’ di Godalia do hilo’d Mispa, om koinsanai di soudor do Babil di nokoontok nod hilo’ do tontok diri. ⁴ Tadau noddi kawagu, di napatai i Godalia do tontok dit aiso’ po o tulun do nokoilo’ddi, ⁵ om rikot no o walu’ nohopod o tulun do mantad hilo’d Sikim, om hilo’d Silo om hilo’d Samaria. Om ganggut nopo diyolo’ nga’ nongobugar, om pakayan nga’ nongohurak, om tinan diyolo’ nga’ piningsuhatan diyolo’. Om minigit iyolo’ do porsombahan do gandum om kominyan do patahakon do hiri’d Walai’d Sasambayangan dot Agayo. ⁶ Om soliwan no i Ismail do mantad hilo’d Mispa, om mihad-ihad iyau do minongoi solowot diyolo’. Om soira’ddi nokobontol iyau diyolo’ om boros ka dau, ’’Kainou mongoi ontong di Godalia,’’ ka. ⁷ - ⁸ Nga’ soira’ddi nokorikot iyolo’ do hiri’d tanga’ di bandar, om timpuun no i Ismail om i tulun dau do minimpatai diyolo’. Nga’ haro o hopod o tulun dot id pogialatan diyolo’ do minomoros dot id di Ismail do poingkaa, ’’Kada’ iyahai patayo’! Tu’ haro po o gandum, om barli, om tumau do saitun om paha’ do pinolisok dahai do hilo’d soliwan diti bandar,’’ ka diyolo’. Om kada’ noddi di Ismail patayo’ iyolo’. Nga’ iri nopo suwai om patayo’ ngai’ nopo dau om pataamo’ noddi dau i rata’ diyolo’ do hiri’d suang do torobong. ⁹ Iri nopo torobong di pinataaman di Ismail di rata’ di tulun di pinatai dau, nga’ i torobong dit agayo di winonsoi di Raja’ Asa do tontok di sinangod iyau di Baisa, i raja’ dot Israil. ¹⁰ Om tangkapo’ ngai’ noddi di Ismail o koinsanai di tulun do nongoolu-olu’ do hilo’d Mispa om i tangaanak di raja’ di tongoondu’, i pinatahak di Nobusaradan dot id di Godalia, do pinatamangan dau. Om tangkapo’ ngai’ nopo di Ismail iyolo’, om tanggayai ngai’ no dau, om pamanau nod kuminaa dot id watas do tulun dot Amon. ¹¹ Om korongou no i Yohanan, om koinsanai di boyoon do soudor di moyo-woyo’ dau di karaaton do winonsoi di Ismail. ¹² Om ngoyo’ no diyolo’ om i tulun diyolo’ gusao’ i Ismail, om kokosupai no diyolo’ iyau do hilo’d kulam dot agayo di hilo’d Gibion. ¹³ Om soira’ di nokito di rayat di nangatangkap di Ismail, i Yohanan, om i boyoon do soudor do rumikot om ongotood tomod diri iyolo’. ¹⁴ Om oinsanan nopo i tulun di nangatangkap om i tinanggayan daa di Ismail do guminuli’ om tuminanud diri di Yohanan. ¹⁵ Nga’ i Ismail nopo om i hopod o tulun dau om nokopoggidu’ i’ do mantad id di Yohanan; om pakayaai no diyolo’ do hilo’d pomogunan do tulun dot Amon. ¹⁶ Om timungo’ noddi di Yohanan om i piro-piro o boyoon do soudor dau o koinsanai di soudor, om i tongoondu’, om i tangaanak om i pagawai do hiri’d walai do raja’, i tinangkap daa di Ismail di napatai dau i Godalia. ¹⁷ - ¹⁸ Om moddosi ngai’ nopo iyolo’ do tulun do Babil tu’ napatai no di Ismail i Godalia, i pinili’ di raja’ do Babil do sumiliu’d gobunor do pomogunan diri. Om pakayaai no diyolo’ do hilo’d Masir. Hilo’ noddid tanga’d ralan, om undorong no iyolo’ do hilo’d Kimham, it id somok do Baitlahim.

¹ Om rikot ngai’ noddi i tulun, dot it angagayo om it ongokoro’, do minoyo’ di piro-piro boyoon do soudor, do kohompit no i Yohanan i tanak di Karia, om i Asaria i tanak di Hosaya, ² dot id doho’, om boro-boros no iyolo’ do poingkaa, ’’Aman, okito nu i’ dot ogumu’ i’ daa iyahai di gulu po, nga’ baino’ noddi om okuri’ no iyahai. Om pokionuon no daa kopio dahai do sumambayang ko dot id TUHAN i Kinorohingan di tukuon nu, do sumambayang do bagi dahai. Sambayangan no kopio iyahai i noolu-olu’ diti, ³ om potudukon indo do TUHAN i Kinorohingan, dot id dahai ondung honggo o pakayaan dahai om it apatut dahai do wonsoyon,’’ ka. ⁴ Om boros kangku, ’’Oo. Wonsoyon ku i’ ino pokionuon dokoyu. Sumambayang oku i’ dot id TUHAN, i Kinorohingan toko’, om poingkuro nopo o tisimbar dau, om posunudon ngai’ ku i’. Om aiso’ i’ o lisokon ku dot id dokoyu dot ongoiso’ piya,’’ kangku. ⁵ - ⁶ Om boros ka diyolo’ dot id doho’, ’’Pokionuon pogi’ dahai iya’d sumambayang dot id TUHAN, i Kinorohingan toko’, nga’ orohian iyahai do mumboyo’ dau, om koinsonong i’ o koiyon-iyono’ dahai. Om osonong piya ko’ araat o boros do TUHAN nga’ tonudon i’ dahai. Om TUHAN no o sumiliu’d sasi’ dit otulid om otorodok dot id dahai dot a’ no iyahai tumanud ngai’ di ponuhuan do TUHAN dot id dahai do polombuson nu, oi Aman,’’ ka diyolo’. ⁷ Katalib poddi o hopod o tadau do mantad diri om boro-boros no o TUHAN dot id doho’. ⁸ Om lohowo’ ku no i Yohanan, om koinsanai di boyoon do soudor di moyo-woyo’ dau, om koinsanai di tulun di minoyo’ dau. ⁹ Om boros kangku dot id diyolo’, ’’Sinuhu’ oku dokoyu do popolombus do pokionuon dokoyu dot id TUHAN, i Kinorohingan dot Israil. Om poingkaa no o boros do TUHAN, ¹⁰ ’Ondung mundorong kou do hiti’d pomogunan diti om poingkakaton ku indo iyokoyu om a’ ku i’ iyokoyu porotuon; pogiroton ku i’ iyokoyu tu’ tumongob oku i’ kopio do pinoporikot di kosusaan diri dot id dokoyu. ¹¹ Kada’ kou no kooris di raja’ do Babil. Tu’ moyo-woyo’ oku i’ dokoyu om poiduwon ku i’ iyokoyu do mantad id kuasa’ dau. ¹² Om insianan ku indo iyokoyu, om poinsianon ku dokoyu i raja’ do Babil, om pologoson kou indo dau do muli’. Iyoho’ no i TUHAN, o minomoros diti,’ ka. ¹³ - ¹⁵ Nga’ kada’ kou saap do TUHAN i Kinorohingan dokoyu, iyokoyu i noolu-olu’ do hiti’d Yohuda, om kada’ kou pomoros dot, ’A’ i’ iyahai mundorong dot id pomogunan diti. Mongoi i’ iyahai iyon do hilo’d Masir. Tu’ hilo’ nopondo om a’ olohou do mongoi sangod, om a’ oinggorit do louson,’ ka. Om ondung pokodohon dokoyu o ginawo dokoyu om sumonsog kou do mongoi’d hilo’d Masir, do mongoi iyon do hilo’, om poingkaa no o boros do TUHAN, it Osundu Kopio, i Kinorohingan dot Israil dot id dokoyu, ¹⁶ ’Gusaon kou indo do pisangadan om mononglous di poddosi dokoyu do gisom do korikot kou do hilo’d Masir, om hilo’ nondo o kapatayon dokoyu. ¹⁷ Oinsanan nopondo i tulun di sumonsog do mongoi’d hilo’d Masir do mongoi iyon do hilo’, dot apatai dot id pisangadan, om apatai do lous, om apatai do toruol; om aiso’ nondo o tiso’ piya diyolo’ dot oolu’ ko’ koidu’ do mantad id kosusaan di porikoton ku; apatai ngai’ nopondo iyolo’. ¹⁸ Poingkuro oku nopo, iyoho’ i TUHAN, i Kinorohingan dot Israil do pinopourabus do kototogod ku om kolosuo’ do ginawo ku dot id tulun di poingiyon do hilo’d Yorusalim, om iyo oku nogiddi do popourabus do kototogod ku dot id dokoyu, i mongoi do hilo’d Masir. Om ongooris pondo o tulun do kokito dokoyu; om tingayamon kou nondo, om silihon do pomomopol o ngaran dokoyu. Om a’ kou nondo kokito kawagu diti pomogunan di kinosusuon dokoyu,’ ka dau,’’ kangku. ¹⁹ Om boros kangku kawagu, ’’Nosunudan kou nod TUHAN, iyokoyu i noolu-olu’ do hiti’d Yohuda, dot a’ mongoi do hilo’d Masir. Om iri no o kopoinsanan ku dokoyu do dinondo ²⁰ do nokowonsoi kou do kasalaan dit agayo. Tu’ minonuhu’ kou doho’d sumambayang dot id TUHAN i Kinorohingan toko’ do bagi’ dokoyu, om minamatos kou do momonsoi’d toinsanan di poboroson do TUHAN. ²¹ Om nosunudan ku noddi iyokoyu do boros do TUHAN i Kinorohingan toko’, nga’ a’ kou i’ tumanud di boros dau. ²² Iyo nopoddi om ilaai no kopio dokoyu dot apatai kou indo do pisangadan, om lous om toruol, do hilo’ kou id pomogunan di ngoyon dokoyu iyono’,’’ kangku.

¹ Om soira’ di nokosunud ngai’ ku di rayat i boros do TUHAN i Kinorohingan dot Israil, dit apatut ku’d polombuson dot id rayat, ² om boro-boros no dot id doho’ i Asaria, i tanak di Hosaya, om i Yohanan i tanak di Karia om koinsanai di tulun dot angasawat o ginawo. Boros ka diyolo’, ’’Mongudut ko i’! A’ i’ minonuhu’ diya’ o TUHAN i Kinorohingan dahai, do mogodu dahai do mongoi iyon do hilo’d Masir. ³ I Baruk i’ i tanak di Noria, o minominsuhu’ diya’ dot a’ sumokodung dahai, om aala’ indo iyahai di tulun do Babil, om patayon iyahai diyolo’ ko’ tanggayan do hilo’d Babil,’’ ka diyolo’. ⁴ Om a’ minumboyo’ do boros do TUHAN di monuhu’ diyolo’d mundorong do hilo’d Yohuda i Yohanan, om koinsanai di boyoon do soudor, om i rayat. ⁵ Om timungo’ ngai’ noddi di Yohanan om koinsanai di boyoon do soudor i noolu-olu’ do tulun do hilo’d Yohuda, om koinsanai di tulun di guminuli’ daa do minongoi iyon do hilo’d Yohuda do mantad id pomogunan do suwai di kinotompiason diyolo’. ⁶ Iri tongokusai, om i tongoondu’ om i tangaanak do raja’ di tongoondu’, i pinokigompian di Nobusaradan di Godalia, om iyoho’ nogi’ om i Baruk, nga’ tinanggayan i’ diyolo’ do hilo’d Masir. ⁷ Om pakayaai noddi diyolo’ do hilo’d Masir tu’ a’ i’ iyolo’ minokinongou di boros do TUHAN. Om korikot no iyolo’ do hilo’d Tapanhis. ⁸ Om boro-boros noddi o TUHAN dot id doho’ di hilo’ do poingkaa, ⁹ ’’Ongoi anu do piro-piro o watu dit angagayo om lobongon i’ do hiri’d tana’ dit id toning di wawayaan do sumuang di walai do pomorinta’ do hilo’d Tapanhis. Om mogihum no kopio’d ralan do momonsoi’ddi om kokito ngai’ i’ diya’ i tulun do Yohuda do momonsoi ko’ddi. ¹⁰ Om poboroson no dot id diyolo’ dot, iyoho’ no i TUHAN it Osundu Kopio, i Kinorohingan dot Israil o poporikot di Nobukadnisar i raja’ do Babil, i susuhuon ku, dot id kinoiyonon diti. Om popoingkakat nondo iyau do tirikohonon dau do momorinta’ dot id sakai di piro-piro o watu di pinolobong nu do hiti’d tana’, om pawaladon dau’d hiri i kiim dau do don raja’. ¹¹ Om rumikot nondo i Nobukadnisar do mongoi pangala’ do Masir. Om apatai ngai’ nondo i tulun di natantu’ mantad dot apatai do toruol. Om i natantu’ mantad dot atanggayan do pisangod nga’ atanggayan nod pisangod. Om iri no i natantu’ mantad dot apatai dot id pisangadan om apatai no dot id pisangadan. ¹² Om tutudan ku nondo i walai di tingolig do Masir om sorobon nondo di raja’ do Babil i tingolig do hiri’d walai do tingolig diri, ko’ tanggayan do hilo’d pomogunan dau. Om poingkuro nopo i gompomogompi’d dumba’ do momugag do kutu do mantad id pakayan dau, om iyo nogiddi i raja’ do Babil do mongimuhau do Masir do gisom dot alangga’ nopondo, om mamanau nogindo iyau tu’ nakamanang no iyau. ¹³ Om babakon nondo dau i torigi’d watu di ponokotingolig di hilo’d Hiliopolis, do hilo’d Masir, om sorobon dau i walai do tingolig do Masir,’’ ka dau.

¹ Om boro-boros no o TUHAN dot id doho’ do pasal di tulun dot Israil di poingiyon do hilo’d Masir; i hilo’d bandar do Migdol, om Tapanhis, om Mimpis, om i hilo’d watas do ponong id salatan. ² Iti no o boros do TUHAN, it Osundu Kopio, i Kinorohingan dot Israil, dot id diyolo, ’’Nokokito kou i’ do kosusaan di pinorikot ku dot id Yorusalim om id koinsanai’d bandar do Yohuda; om gisom piya do baino’ nga’ pogun po kasai’ i kabandaran diri om aiso’ o tulun do poingiyon do hilo’. ³ Nosiliu pogi’ o miagal diri nga’ araat i’ o winonsoi diyolo’ om pinapatahak iyolo’ do porsombahan om minodsubak iyolo’ do ponokokinorohingan dit a’ diyolo’ insan kotuku’ om a’ notuku’ di taki-aki diyolo’ do mantad di gulu po. ⁴ A’ oku i’ otingkod do popingrikot di susuhuon ku, i nabi, dot id dokoyu. Om mogodu iyolo’ dokoyu do mingwonsoi di wowonsoyon dot araat, om i karaatan kopio ku. ⁵ Nga’ a’ kou i’ minokinongou om a’ kou minamadul diri; tu’ a’ kou i’ tuminingkod do momonsoi dit araat, tu’ papatahak kou po do porsombahan di sumbolion dot id tingolig. ⁶ Om gowoi poddi om pourobuso’ ku no o kototogod ku om kolosuo’ do ginawo ku dot id kabandaran do Yohuda om id karalan-ralanan di hilo’d Yorusalim. Om sorobo’ ngai’ ku nopori gisom do pogun poddi o hilo’ om aiso’ o sumuni, do miagal dit okito dokoyu’d baino’. ⁷ Om baino’ noddi om monguhot oku, iyoho’ i TUHAN, it Osundu Kopio, i Kinorohingan dot Israil, ondung nokuro tu’ momonsoi kou dit araat kopio dot id tinan dokoyu. Orohian kou do momunso do tulun — tongokusai, om tongoondu’ om tangaanak, om i ragang po, gisom dot aiso’ no ot oolu’ di bansa’ dokoyu? ⁸ Nokuro tu’ momonsoi kou di popotogod doho’? Tu’ ongoi kou no iyon do hiti’d Masir, om tumuku’ kou noddi dot id tingolig om papatahak kou do porsombahan di sumbolion dot id tingolig do pomogunan diti! Nokuro tu’ momungou kou do tinan dokoyu? Orohian kou dot indaraaton do toinsanan do bansa’ do hiti’d pomogunan om silihon do pomomopol o ngaran dokoyu? ⁹ Nolihuan no dokoyu i kararaat do taki-aki dokoyu, om i kararaat do raja’ do Yohuda om i sawo diyolo’, om i kararaat dokoyu, om i sawo dokoyu di hilo’ kou pod pomogunan do Yohuda om di hilo’d karalan-ralanan do hilo’d Yorusalim? ¹⁰ Nga’ gisom piya’d baino’ nga’ a’ kou i’ minsiriba’. Om a’ kou momusou doho’, om a’ tumanud dit oturan ku om i ponudukan ku di pinatahak ku dot id dokoyu om id taki-aki dokoyu. ¹¹ Gowoi pondo om iyoho’, i TUHAN it Osundu Kopio, i Kinorohingan dot Israil, o sumaap dokoyu om raagon ku o pointongkop do Yohuda. ¹² Om ondung haro ot id pogialatan di tulun do Yohuda di noolu-olu’ do sumonsog do mongoi’d hilo’d Masir, do mongoi iyon do hilo’, om patayon ku no iyolo’. Om apatai ngai’ nopondo iyolo’ do hilo’d Masir, dot id pisangadan, ko’ mononglous po o kapatai. Iri tulun dot ongokoro’ po om it angagayo nga’ apatai ngai’ nopondo do miagal diri. Om ooris nondo o tulun do kokito diyolo’ om indaraaton o ngaran diyolo’. ¹³ Om hukuman ku nondo do gisom dot apatai dot id pisangadan, om apatai do mononglous om apatai do toruol i tulun do songingiyon do hilo’d Masir, do miagal di pinomohukum ku’d Yorusalim. ¹⁴ Om aiso’ nondo o tiso’ po di tulun do Yohuda di noolu-olu’, i minongoi iyon do hilo’d Masir do kopoggidu’ ko’ koguli’ po do hilo’d pomogunan do Yohuda, i kalangadan tomod daa diyolo’ do gulion om iyonon diyolo’. Aiso’ no kopio o koguli’ do suwai ko’ piro-piro po o tulun di mogidu’,’’ ka dau. ¹⁵ Om rikot noddi dot id doho’ o tulun dot ogumu’ kopio, iri no i tongokusai di koilo do papatahak do porsombahan di sumbolion dot id tingolig i sawo diyolo’, om i tongoondu’ di songingkakat do hiri, om kohompit nogi’ i tulun dot Israil di poingiyon do hilo’d Masir do ponong id salatan, om boros ka diyolo’ dot id doho’, ¹⁶ ’’A’ i’ iyahai mokinongou di pinoboros nu’ddi dot id suang do ngaran do TUHAN. ¹⁷ Tu’ tumilombus i’ iyahai do momonsoi ngai’ di nakabatos dahai. Papatahak kasai’ i’ iyahai do porsombahan di sumbolion dot id Raja’d Tondu’ do Surga, om popotungu iyahai do waig dot anggur do maan do porsombahan dot id dau do miagal di winonsoi dahai, om i winonsoi di taki-aki dahai, om i raja’ dahai om i tongoboyoon dahai do hilo’d kabandaran do Yohuda om hilo’d karalan-ralanan do Yorusalim. Tu’ tontok nopo do maso’ddi om osima’ i’ iyahai do taakanon om osimbayan iyahai om aiso’ o kosusaan dahai. ¹⁸ Nga’ mantad poddi tuminingkod iyahai do papatahak do porsombahan di sumbolion dot id Raja’d Tondu’ do Surga, om di tuminingkod iyahai do popotungu do porsombahan do waig dot anggur dot id dau, om mosikin noddi iyahai, om apatai o tulun dahai dot id pisangadan ko’ oontok do mononglous,’’ ka diyolo’. ¹⁹ Om boros kaddi di tongoondu’, ’’Kaakun i’ i sawo dahai do momonsoi iyahai do roti do poiyo-iyoon di Raja’d Tondu’ do Surga om monorob do porsombahan di sumbolion, om papatahak do waig dot anggur dot id tingolig dahai,’’ ka. ²⁰ Om boros kangku’ddi dot id toinsanan di tongokusai om tongoondu’ di suminimbar doho’ do miagal diri, ²¹ ’’Ondos daa dokoyu om a’ do TUHAN oilaan ko’ nolihuan dau i porsombahan do sinumbali’ di pinatahak do hilo’d kabandaran do Yohuda om hilo’d karalan-ralanan do Yorusalim di pinatahak dokoyu, om i komolohingan dokoyu, om i raja’ dokoyu, om i boyoon dokoyu om i rayat do pomogunan diri? ²² - ²³ A’ no o TUHAN kotoron do montong-ontong dokoyu do papatahak do porsombahan di sumbolion dot id tingolig. Araat no kopio om kointingayam i wonsoyon dokoyu. Nokowonsoi kou nod dusa dot id TUHAN om a’ kou minumboyo’ di ponuhuan dau. Om gowoi poddi om naraag noddi o pomogunan dokoyu om a’ no milo dot iyonon om pomomopol poddi o ngaran diri. Ooris ngai’ poo o tulun do kokito’ddi,’’ ka dau. ²⁴ - ²⁵ Om sunudai ngai’ ku noddi i tulun, om okon-okon po om i tongoondu’, do boros do TUHAN it Osundu Kopio, dot id tulun do Yohuda di poingiyon do hilo’d Masir, do poingkaa, ’’Nokosumpa’ kou no om i sawo dokoyu dot id Raja’d Tondu’ do Surga do papatahak kou do porsombahan di sumbolion om papatahak kou do waig dot anggur dot id dau. Om nabayaan noddi dokoyu i batos dokoyu’ddi. Osonong no! Wonsoyon nopo dokoyu i pinabatos dokoyu! ²⁶ Nga’ pokinongoho’ po dokoyu iti boros ku, iyokoyu ngai’ i tulun dot Israil do poingiyon do hiti’d Masir: Sumumpa’ oku, iyoho’ i TUHAN, dot id suang do ngaran ku dit abantug dot a’ ku nondo iyokoyu pologoson do mamarait do ngaran ku do tontok do mamatos kou. A’ kou no milo’d momoros do, ’Sumumpa’ oku dot id suang do ngaran do Kinorohingan di poimpasi,’ ka. ²⁷ Tu’ tumotos oku nondo kopio do momungou dokoyu om a’ kou i’ osimbayan, do gisom i’ dot apatai ngai’ kou dot id pisangadan tuu ko’ apatai po do toruol. ²⁸ Om okuri’ nondo kopio i kopoggidu’ do mantad hilo’d Masir, om koguli’ kawagu do hilo’d pomogunan do Yohuda. Om oilaan ngai’ nogindo diyolo’ ondung disai’d boros dot osiliu, iri boros ku ko’ iri boros diyolo’. ²⁹ Om porikatan ku nondo iyokoyu do kosusaan do hiti’d kinoiyonon diti do popointalang kopio dot id dokoyu, dot abayaan i’ kopio i hukuman di natantu’ mantad ku do porotuon ku dot id dokoyu. ³⁰ Patahakon ku nondo i Hopra, i raja’ do Masir dot id longon di pisangod dau di sipamatai dau, do miagal di pinapatahak oku di Sodokia i raja’ do Yohuda dot id di Nobukadnisar, i raja’ do Babil, i pisangod di sipamatai dau,’’ ka dau.

¹ Tontok di toun do kaapat do pomorintaan di Yoyakim, i tanak di Yosia do hilo’d Yohuda, om tuliso’ no di Baruk i boros di pinolombus ku dot id dau. Om polombuso’ ku no dot id dau, ² o boros do TUHAN i Kinorohingan dot Israil. Boros kad TUHAN, ’’Oi Baruk, ³ mimboros ko dot, ’Obungou oku no tu’ rinuhangan nogi’d TUHAN do koinggoritan o kosusaan ku dit ogumu’. Ohuyan oku po do mingodoi om aiso’ no o kosimbayanan ku,’ ka nu. ⁴ Oi Baruk! Iyoho’ no, i TUHAN, o mamahaba’ di winonsoi ku om mongutus di tinanom ku do pointongkop diti pomogunan. ⁵ Om orohian ko po daa’ndo do posuulon ko iya’? Kada’ nogi’ kopio dot iyo’ddi, oi Baruk! Tu’ hukuman ngai’ ku i’ do kosusaan o koinsanai’d tulun om iya’ nga’ kohompit i’. Osonong po tu’ a’ ko napatai. Honggo-honggo piya o ngoyon nu, nga’ apasi kasai’ ko i’. Iyoho’ no, i TUHAN o minomoros diti,’’ ka dau.

¹ Om boro-boros no o TUHAN dot id doho’ do pasal do koinsanai’d bansa’, ² do minimpuun do Masir. Iti no o pinoboros dau do pasal di soudor di Niko i raja’ do Masir, i naala’ do hilo’d Karkomis, it id somok do Bawang dot Iprat; i naala’ di Nobukadnisar, i raja’ do Babil, di toun do kaapat do pomorintaan di Yoyakim i raja’ do Yohuda, ³ - ⁴ ’’Mamagarang no do monuhu’ do sumodia’ i piro-piro boyoon do soudor do Masir! ’Asao’ no i tandus! Panampakai nod rasuk do basi’ om tupi’ kolidar! Ngoyo’ no i kolid om mongoi i’ baris! Powonsoyo’ no dokoyu o pakol, iyokoyu i sumakai’d kuda’! Sakai kou no di kuda’ dokoyu, om pamanau kou no do mongoi sangod!’ ka. ⁵ Nga’ okito ku dot ooris i’ iyolo’ om gumuli’ oi TUHAN, manangkus pod opopoddosian i soudor diyolo’, om a’ no kumoili tu’ naala’ no iyolo’. ⁶ Iri piya soudor dit osiau do manangkus nga’ a’ no kopoggidu’ do mantad id pisangod. Om hilo’ nod utara, it id tisan do Bawang dot Iprat, o kosoduwon om kahabaon diyolo’. ⁷ - ⁸ Isai iti gumayo do miagal di Bawang do Nil om miagal di bawang do lumuyud? Iri no i pomogunan do Masir. Boros kad Masir, ’Mingkakat oku nondo do gisom id oporinta’ ku iti pomogunan. Om raagon ku nondo o kabandaran om i songingiyon do hiri. ⁹ Panangkus kou no, oi kuda’! Kosiau kou no, oi korita’-kuda’! Pamanau no do mongoi sangod, oi gunsiou do mantad hilo’d Etiopia, om iyokoyu i mongingigit do kolid di mantad hilo’d Libia om i mamamana’ do mantad hilo’d pomogunan do Lidia,’ ka,’’ kangku. ¹⁰ Iti no o tadau’d Kinorohingan, it Asawat Kopio; tadau nodti do sumuli’ o TUHAN, it Osundu Kopio, do koinsanai di pisangod dau. Mingyahan nondo do mangakan diyolo’ i gayang dau, om monginum iri do raha’ diyolo’ do gisom dot abangat. Tadau nod baino’ it Osundu Kopio do monumbali’ di sumbolion dau do hilo’d utara, it id tisan di Bawang dot Iprat. ¹¹ Oi tulun do Masir, a’ no kolingos dokoyu i tubat dokoyu. Ongoi kou nogi’ do hilo’d Giliad do mongoi pogihum do tubat! ¹² Nongoilaan ngai’ nod bansa’ o koiyon-iyono’ nu di kointingayam kopio. Norongou nod hiti’d pointongkop diti pomogunan o giniakan nu. Kopogitahub- tahub po i soudor; om aandad nopondo dot ahaba’ do hiri’d tana’. ¹³ Tontok di ruminikot i Nobukadnisar, i raja’ do Babil do minongoi panangod do Masir, om boro-boros no o TUHAN dot id doho’. Boros ka dau, ¹⁴ ’’Popinsunudo’ no o habar diti do hilo’d Masir, dot id kabandaran do Mimpis om Migdol om Tapanhis, ’Sumodia’ nod mongintirung do tinan, tu’ oinsanan nopondo i dapu’ dokoyu dot araag dot id pisangadan. ¹⁵ Nokuro tu’ minogidu’ i Apis, i ponokokinorohingan nu dit okoris? Naala’ no iyau do TUHAN!’ ka. ¹⁶ Ogumu’ no o soudor nu di nakasadu om nahaba’. Om mogiboro-boros poo iyolo’ do, ’Kainou muli’ do hilo’d bansa’ toko’, om kopoggidu’ toko’ i’ do mantad id gayang do pisangod di kooris kopio,’ ka. ¹⁷ Pungaranan no i raja’ do Masir do ngaran do wagu dot: ’It Opuhod no Boros Nga’ Popologos i’ do Katalib o Maso do Kapamansayan Diri’. ¹⁸ Iyoho’ no o Kinorohingan di Poimpasi, iyoho’ no o raja’ i TUHAN dit Osundu Kopio. Poingkuro nopo i Nuluhon do Tabor dot akawas ko’ i konuluhanan do suwai, om asawat ko’ i rahat i Nuluhon do Karmol, om iyo nogiddi o kokoriso’ di mongoi sangod dokoyu. ¹⁹ Sodia’ kou no, oi tulun do Masir, tu’ atangkap kou no om atanggayan kou po! Tu’ oingou nondo o Mimpis om osiliu’d pogun dit aiso’ o tulun do poingiyon. ²⁰ Masir nopo om miagal pod tanak do sapi’ dit olomu’, nga’ gangahon i’ iyau do langau dit agayo do mantad hilo’d utara. ²¹ Iri piya i soudor di ginodsian dau nga’ miagal po di tangaanak do sapi’ dit ongolomu’ tu’ a’ no koundaliu; om iyolo’ nga’ pogulian ngai’ nopondo om mogitanud-tanud do mogidu’ do mokipapasi tu’ a’ no iyolo’ kogoos. Nokorikot no i tadau do kopomohukuman diyolo’; norikot no i maso do korikatan do kosusaan dot id diyolo’. ²² Iyo po di tulanut do tumokon o Masir do mogidu’ do mantad id soudor do pisangod dit osomok no. Om songodon diyolo’ iyau do kapak dot iyo po di tulun do managad do kayu ²³ om langgaan nopondo diyolo’ o puru’ di himbaan. Ogumu’ no kopio i soudor do pisangod, ogumu’ po ko’ i katat. Iyoho’ no i TUHAN o minomoros diti. ²⁴ Intingayamon nondo i tulun do poingiyon do hilo’d Masir, tu’ aala’ no iyolo’ di tulun do mantad hilo’d utara. Iyoho’ no i TUHAN o minomoros diti,’’ ka. ²⁵ Boros kad TUHAN, it Osundu Kopio, i Kinorohingan dot Israil, ’’Hukuman ku nondo ot Amon, i ponokokinorohingan do Tibi, om hukuman ku o pointongkop do Masir, om i ponokokinorohingan, om i raja’ do Masir. Om i Raja’ do Masir om i tulun di sumondiu dau ²⁶ nga’ patahakon ku nondo dot id di Nobukadnisar i raja’ do Babil, om i soudor dau di sipamatai diyolo’. Nga’ katalib pondo iri, om iyonon indo kawagu o pomogunan do Masir do miagal di gulu po. Iyoho’ no i TUHAN o minomoros diti,’’ ka dau. ²⁷ Boros kad TUHAN, ’’Oi Israil, i tulun ku, kada’ gagarai dot opopoddosian! Tu’ poiduwon ku i’ iyokoyu do mantad id pomogunan dit osodu’ di pinananggayan do pisangod dokoyu. Kouli’ kou indo om koiyon kou dot id pomogunan dokoyu om aiso’ no o koligagaanan dokoyu. Osimbayan kou nondo do momogun-mogun om aiso’ o poddosi dokoyu. ²⁸ Kada’ kou no kooris, iyokoyu i tulun di songonuon ku, tu’ rumikot oku i’ do mongoi pamasi dokoyu. Tu’ raagon ngai’ ku indo o koinsanai di bansa’ di pinotompiasan ku dokoyu, nga’ iyokoyu nopo om a’ ku i’ iyo’dion. Nga’ hukuman ku i’ ma iyokoyu tu’ nokowonsoi kou i’ do sala’, nga’ okon indo ko’ it adalaan koruol o pomohukum ku. Iyoho’ no i TUHAN o minomoros diti,’’ ka dau.

¹ Tontok dit a’ po di raja’ do Masir nasangod o Gasa, om boro-boros no o TUHAN dot id doho’ do pasal do pomogunan do Pilistin. ² Boros kad TUHAN, ’’Antangai pogi’ ilo waig do lumuyung do mantad ponong hilo’d utara, om gumayo do miagal di bawang di lumuyud do mamalampai do pointongkop do pomogunan om i songingiyon do hiri, om mamalampai di kabandaran om i tulun di poingiyon do hilo’. Om minggiak pondo o tulun do mokitulung om mogihad o koinsanai’d tulun do hiri’d pomogunan diri. ³ Korongou nondo iyolo’d kuda’ do mamanau, om i ngarak do korita’-kuda’, om i karatak do ruda’ di korita’-kuda’. A’ no kosorou di tangaanak diyolo’ i komolohingan tu’ olomok po tomod iyolo’. ⁴ Nokorikot no o maso di bansa’ do Pilistin dot oiyon do mamaraag do gisom dot a’ no ouhupan do Tirus om Sidon. Patayon ngai’ ku nopondo o tulun do Pilistin di mantad hilo’d Krita. Iyoho’ no i TUHAN, o momonsoi’ddi. ⁵ Noontok o tulun do Gasa do katangaban dit awagat kopio; om aiso’ no o komi do tulun dot Askilon. Songkuro po o koloido’ di tulun do Pilistin di noolu-olu’ do tumongob? ⁶ Minggarang kou doti’ dot, ’Gisom toi do soira’ do manangod ko, oi gayang do TUHAN? Guli’ nogi’ do hilo’d tangkap nu om kada’ nondo pinggangau, mundorong nopod hilo’,’ ka doti’ dokoyu. ⁷ Nga’ poingkuro daa’ri do mundorong ondung nosuhu’ ku do manangod dot Askilon om i tulun do hilo’d tisan do rahat?’’ ka dau.

¹ Iti no o pinoboros do TUHAN, it Osundu Kopio, i Kinorohingan dot Israil, do pasal do Muab, ’’Nobungou no o tulun di hilo’d Nibo, tu’ naraag no i bandar! Nosolod no o Kiriataim, om nomumuk i tolig dit ogirot, gisom do nointingayam diri i tulun do hilo’, ² tu’ natanus no i kaandasan do Muab! Nosolod nod pisangod o Hisbon, om momusorou no i pisangod do momunso do toinsanan di tulun do hilo’d Muab. Aiso’ no o tulun dot orongou do mimboros do hilo’d bandar do Madmin, tu’ nasangod nod soudor o bandar diri. ³ Pokinongou pogi’ do giniakan do tulun do hilo’d Horonaim! ’Kagangahan! Karaagan!’ ka. ⁴ Naraag no o Muab! Orongou i’ do hilo’d Soar o giniakan do tulun do hilo’. ⁵ Pokinongoho’ no i tihad do tulun do tumakad di ralan do kumaa do hilo’d Luhit, om i tihad do tulun do rumuhuk do hilo’d ralan do kumaa do hilo’d Horonaim. ⁶ Boros ka diyolo’, ’Siahai no, om apasi ko i’! Panangkus no do miagal di kaladai do lalang do hilo’d tana’ do kowotuan,’ ka. ⁷ Oi Muab, suminondiu ko daa di kinoris nu om i kakayaan nu. Nga’ baino’ nopondo, om iya’ nondo ot aala’. Om i Kamos i ponokokinorohingan nu, om it imam di mogobi-obi’ dau om i sinakagon do raja’ nga’ atanggayan ngai’ nopondo dot id pomogunan do pisangod. ⁸ Oinsanan nopondo o bandar dot araag, om aiso’ no tiso’ do bandar dot a’ araag. Kubong piya om rantai nga’ araag ngai’ nopo. Iyoho’ no i TUHAN, o minomoros diti. ⁹ A’ no alaid om araag no o Muab. Om angaraag i kabandaran do hilo’, om iso’ pod tulun nga’ aiso’ no o koiyon do hilo’,’’ ka dau. ¹⁰ (Ousung no i tulun dit a’ iso-iso’ o ginawo do momonsoi’d karaja’d TUHAN. Ousung no i tulun dit a’ mongodong do gayang dau do maan do pamatai!) ¹¹ Boros kad TUHAN, ’’Mantad po di gulu po om osimbayan no kasai’ o koposi-posion do tulun do Muab. Om a’ i’ insan katanggayai dot id pomogunan do pisangod. Osimbayan nopo iyolo’ do miagal po di waig dot anggur do hiri’d pinoiyanan mantad, tu’ a’ i’ kopintungu dot id poiyanan do waig dot anggur do suwai. Owongi’ po om osonong o koinuman di waig dot anggur. ¹² Nga’ nokorikot noddi o maso do monuhu’ oku do popotuntug do Muab do miagal di waig dit anggur, om potuntugon ngai’ o suang di pinoiyanan om babakon nogindo. ¹³ Om oiman-iman indo o Muab di Kamos i ponokokinorohingan diyolo’, do miagal di tulun dot Israil tu’ noiman-iman do Baitol, i sondihon daa diyolo’. ¹⁴ Nokuro tu’ moro-boros o tongokusai do Muab dot, ’Iyahai nopo om gunsiou, i soudor do nongoubas do sumangod?’ ka. ¹⁵ Naraag no o Muab om i kabandaran do hilo’, om nangapatai i tangaanakwagu, di nongopili’ no o kosonongo’. Iyoho’ no o minomoros diti. Iyoho’ no o raja’, i TUHAN dit Osundu Kopio. ¹⁶ Motirikot no o mamaraag do Muab om a’ no alaid om omumuk no o Muab. ¹⁷ Pogihadai no dokoyu o Muab, koinsanai dokoyu i pomogunan do posorili’ do Muab di koilo do kobontugo’ dau! Poboroson no dot aiso’ no o kuasa’ do Muab om natanus no o kobontugo’ om kokoriso’ dau! ¹⁸ Oi tulun do Dibon, lintuhun no do mantad hino’d kinoiyonon nu di pusohon kopio; irikau no do hilo’d pupuk do tana’. Tu’ nokorikot no i mongoi pamaraag do Muab i pomogunan nu, om i mamaraag do koinsanai di tolig nu. ¹⁹ Ingkakat no do hilo’d tisan do ralan, om antangan no kopio, oi dokoyu i poingiyon do hilo’d Aroir! Uhoto’ no i tulun di minogidu’ do, ’Nunu o nosiliu,’ kanto. ²⁰ Om sumimbar nondo iyolo’ do, ’Nointingayam no o Muab, tu’ naratu’ no iyau! Pogihadai no iyau. Popinsunudo’ no do poingompus do Bawang dot Arnon do naraag o Muab!’ ka. ²¹ Norotuan nod hukuman o hilo’d kabandaran dit id watas do nuluhon dit angapatau: i hilo’d Holon, om Yahas, om Mipaat, ²² om Dibon, om Nibo, om Bait-Diblataim, ²³ om Kiriataim, om Bait-Gamul, om Bait-Mion, ²⁴ om Kiriot, om Bosra. Koinsanai di bandar do pomogunan do Muab di hilo’d sodu’ om it id somok nga’ nohukuman ngai’ no. ²⁵ Noidu’ no i kokorisan do Muab, om naraag i pomorintaan dau. Iyoho’ no, i TUHAN o minomoros diti,’’ ka dau. ²⁶ Boros kad TUHAN, ’’Owuko’ no o Muab, tu’ sumaap i’ iyau doho’. Om mingluhad pondo o Muab do hiri’d tilob dau, om irak-irakan pondo iyau’d tulun. ²⁷ Okon toi ko’ Israil i piningirakan do Muab di gulu po, om it iyoon po do gampanakau di nokosupan do manakau? ²⁸ Tongkiadai no dokoyu o kabandaran dokoyu, om mongoi i’ iyon do hilo’d kapampangan, oi dokoyu i songingiyon do hilo’d Muab! Omit kou no di punai di momirumun dot id kangkab do rungas. ²⁹ Adalaan kou no kopio do minggayo-gayo! Nokorongou oku no do kobinggoyo-goyoo’ dokoyu, om kasawato’ do ginawo dokoyu, om i pokirayou-rayou dokoyu, om koondoso’ dokoyu! ³⁰ Oilaan ku i’ i koondos dokoyu, iyoho’ i TUHAN, o koilo. Om a’ i’ otopot i boros dokoyu, om aiso’ o kotutuk-tutukon do wonsoyon dokoyu. ³¹ Om mogihad oku nondo dokoyu om i tulun do hilo’d Kirhiris, i bandar dokoyu’d agayo. ³² Pogihadan ku pondo kopio o tulun do hilo’d Sibma ko’ mantad di tulun do Yaisir. Iri nopo bandar do Sibma om miagal do guas dot anggur di ruminoloi o raan do gisom do nokoroloi do hilo’d soborong do Rahat do Napatai, om korikot do hilo’d Yaisir. Nga’ nangaraag noddi i kouwaan di mongua’ do maso’d alasu’ om i tua’ dot anggur dau. ³³ Natanus no o kaarapadan om kataadan do ginawo do hilo’d pomogunan do Muab dit oluhub. Om notingkod ku no i waig dot anggur do lumuyung do mantad hiri’d pamagaan do tua’ dot anggur; aiso’ no o tulun do mamaga’ do waig dot anggur om aiso’ o mimpangkis dot aarapadan. ³⁴ Mingihad po i tulun do Hisbon om Iliali; om orongou i’ i tihad diyolo’ do hilo’d Yahas, om orongou po di tulun do hilo’d Soar, om hilo’d Horonaim, om hilo’d Iglat-Silisia. Mihad iyolo’ tu’ iri piya Bawang do Nimrim nga’ narasak i’. ³⁵ Tingkodon ku nondo i tulun do hilo’d Muab do modtutud do porsombahan dot id kinoiyonon di podsubakan diyolo’ om tingkodon ku do papatahak do porsombahan di sumbolion dot id tingolig diyolo’. Iyoho’ no i TUHAN o minomoros diti. ³⁶ Natanus ngai’ no i kakayaan do Kirhiris om pointongkop do Muab. Tumongob oku no do kokito do koiyon-iyono’ diyolo’ do miagal diri; iyo oku pod tulun di monuling dot i lagu’ di kosudu’ kopio o sulingon ku. ³⁷ Nongogolisan ngai’ nopo diyolo’ o tulu diyolo’, om nongobugar o ganggut; om longon diyolo’ nga’ pininghorob diyolo’ om kipinakai iyolo’d pakayan do mogihad do popointalang do tumongob iyolo’. ³⁸ Hilo’ nopod sakai do taap do walai om hilo’d padang om aiso’ no ot orongou, suwai ko’ mogihad poo. Tu’ nomumuk ku no o Muab do miagal di luping di niada’. ³⁹ Nopurok no kopio o Muab, om mihad poo iyau tu’ ointingayaman no kopio iyau. Ooris poo o Muab om aiso’ no o pokukurayan, om gowoi poddi om irak- irakan poo iyau do koinsanai’d bansa’. Iyoho’ no, i TUHAN o minomoros diti,’’ ka dau. ⁴⁰ Boros kad TUHAN, ’’Iyo pondo do kondiu di poungkalad o talad, o tiso’ o bansa’ do rumikot do mongoi ponimbit do Muab. ⁴¹ Om ongosolod nondo i kabandaran do hilo’ om i piro-piro kuta’ do pogintirungan. Om ooris nondo kopio i gunsiou do Muab, gisom dot iyo po iyolo’ di tondu’ di mogkosusu. ⁴² Om araag nopondo o Muab, om okon no ko’ bansa’ dit agayo tu’ suminaap i’ iyolo’ doho’. ⁴³ Om iri pondo kopoddosian, om luang, om lawa’ ot abantalan diyolo’. ⁴⁴ Iri nopondo tulun di mogidu’ do mantad id kopoddosian om aratu’ no dot id luang, om iri no i koidu’ do mantad hiri’d luang om kosulung no do lawa’; tu’ natantu’ ku no o maso do kapamaraagan do Muab. ⁴⁵ Mokiintirung nondo do Hisbon i bandar di noporinta’ di Raja’ Sihon di gulu po, i tulun di minogidu’ dit a’ no kogoos. Nga’ iri piya bandar diri nga’ sumorob no. Naraag nod tapui i watas dit id piwolitan om i konuluhanan do Muab, i pomogunan do tulun dit orohian do sumangod. ⁴⁶ Obungou no o Muab! Nangapatai no i tulun do hilo’, i tumuku’ dot id Tingolig do Kamos; nangatangkap no om natanggayan dot id pomogunan do pisangod i tangaanak diyolo’. ⁴⁷ Nga’ tondulion indo do TUHAN o koiyon-iyono’ do pomogunan do Muab do koimbagu,’’ ka dau. Om iri no o pinoboros do TUHAN do pasal dit osiliu dot id Muab.

¹ Poingkaa no o pinoboros do TUHAN do pasal do bansa’ dot Amon, ’’Nokuro i tana’ do payat do Gad tu’ nosolod om noiyon do tulun di tumuku’ dot id Tingolig do Milkom? Aiso’ no kopio o tulun dot Israil do milo do mongintirung do kinoiyonon diri? ² Nga’ rumikot no o maso do porongohon ku do pinongkisan do sumangod i tulun do Raba, i bandar dot agayo do pomogunan dot Amon. Om osiliu nondo o bandar diri do pogun, om iri kawalayan do hiri’d posorili’ nga’ aayi’ nopondo dot osorob. Om aanu nondo kawagu dot Israil i tana’ dau do mantad id tulun di minonolod diri di gulu po. ³ Ihad kou no, oi tulun do Hisbon, tu’ naraag no o bandar dot Ai! Oi tongoondu’ do bandar do Raba, pogihad kou no om panampakai kou no do pakayan do mogihad do pointalang do tumongob kou. Pintangkus kou no tu’ noborulong kou no. Atanggayan no moti’ i Milkom i tingolig nu, dot id pomogunan do pisangod do miwoyo’ dit imam om i tulun dau di sinakagon di raja’. ⁴ Nokuro tu’ mokirayou kou, iyokoyu it a’ otorodok? Nokuro tu’ sumondiu kou do kinoris dokoyu di lumuhoi no? Poingkuro kopio kou do milo’d momoros dot aiso’ i’ o songulun piya do kasaap do manangod dokoyu? ⁵ Porikatan ku nondo iyokoyu’d kororongit do mantad id posorili’ dokoyu. Mogidu’ kou nondo, om sompori-pori kou nopo do mogihum do ralan do mamasi’d tinan dokoyu, om aiso’ no o mongoi ponimung kawagu dokoyu. ⁶ Nga’ koimbagu nopondo, om tondulion ku i’ kawagu o koiyon-iyono’ do bansa’d Amon. Iyoho’ no i TUHAN o minomoros diti,’’ ka dau. ⁷ Poingkaa no o pinoboros do TUHAN it Osundu Kopio do pasal dot Idom, ’’Aiso’ noddi toi o tulun dot Idom di milo do momusorou? A’ noddi iyolo’ nosihatan di tulun di mononosihat? ⁸ Oi tulun do Didan, guli’ no om mogidu’ i’! Ongoi no lisok! Raagon ku nondo o sinakagon di Isau tu’ norikot no o maso ku do momohukum diyolo’. ⁹ Ondung haro o tulun do mongupu’ do tua’ dot anggur, om haro kasai’ i’ o pooluon diyolo’, om ondung rumikot i manakau do dongotuong, om iri no i korohian dau ot onuon dau. ¹⁰ Nga’ naanu ngai’ ku no i songonuon di sinakagon di Isau om nokointalang ku i lilisokon diyolo’; gisom dot a’ no iyolo’ milo do lumisok. Nangapatai ngai’ no i sinakagon dau om iso’ pod tulun nga’ aiso’ no o nokopoggidu’. ¹¹ Oi Idom, tongkiadai nopo dokoyu i tangaanak dokoyu dot aiso’ o molohing, om gompion ku i’ iyolo’; om iri tongoondu’ dokoyu di nongopuadan nga’ milo i’ do sumondiu doho’. ¹² Iri piya i tulun dit a’ daa apatut do hukuman, nga’ oontok i’ do hukuman, om a’ kou nogindo daa iyokoyu? Atantu’ no dot iyokoyu nga’ hukuman i’. ¹³ Sumumpa’ oku no dot id suang do ngaran ku, dot osiliu nondo o bandar do Bosra do kinoiyonon di korolosi om i pogiiduan do tulun. Om irak-irakan nondod tulun o kinoiyonon diri om maan do pomomopol o ngaran dau. Om oinsanan nopondo i kawalayan do hiri’d posorili’ dot osiliu’d pogun do gisom dot alaid. Iyoho’ no i TUHAN, o minomoros diti,’’ ka dau. ¹⁴ Iyoho’ no i Yoromia, o minomoros dot, ’’Oi Idom, nakaramit oku do habar do mantad id TUHAN. Om nokoporikot no iyau do susuhuon dot id bansa’ do mongoi ponuhu’ diyolo’ do monimung do soudor om sumodia’ do mongoi panangod diya’. ¹⁵ Om silihon ko nondod TUHAN do pomogunan dit oluhoi om it indaraaton do tulun. ¹⁶ Noudutan ko di kasawato’ do ginawo nu. Aiso’ i’ o moddosi diya’ do miagal dit osorou nu. Poingiyon ko dot id pogialatan do pampang, om id timpak do nuluhon. Nga’ mulong piya do miagal di rumun do kondiu o kasawato’ do kinoiyonon nu nga’ polintuhunon ko i’ do TUHAN do mantad hiri. TUHAN no o pinopoboros ngai’ddi,’’ ka dau. ¹⁷ Boros kad TUHAN, ’’Osiliu nondo do kopoddosian ot Idom, om koinsanai’d tulun do tumalib do hilo’ nga’ aranaban ngai’ nopo om ooris tu’ adalaan no kopio kawagat i kosusaan do nokoontok dot Idom. ¹⁸ Tu’ poingkuro nopo o Sodom om Gomura do naraag do mitonggoi di kabandaran do hiri’d posorili’, om iyo nogiddi ot Idom dot araag. Om iso’ pod tulun nga’ aiso’ nondo o miyon do hilo’. Iyoho’ no, i TUHAN o minomoros diti. ¹⁹ Sigog indo dot uyungon ku o tulun dot Idom do mantad hiri’d pomogunan diyolo’, do miagal di singa do monigowo do lumabus do mantad id puru’ dit id somok do Bawang do Yordan, om mongoi nondo dot id tiyonon di dumba’ do mangakan-ngakan. Om momili’ oku nondo do songulun o boyoon do momorinta’ do pomogunan diri. Isai poo o milo do poiyoon doho’? Isai po o katama’ do sumaap doho’? Haro toi o boyoon do kasaap doho’? ²⁰ Iyo nopoddi om pokinongoho’ no i natantu’ mantad ku do wonsoyon ku dot id tulun dot Idom, om i wonsoyon ku dot id tulun do bandar do Timan. Iri piya i tangaanak diyolo’ nga’ gayaton i’ do mogidu’, om oinsanan nopondo o tulun do moddosi. ²¹ Om aratu’ nopondo ot Idom, om haro nondo ot orongou dot ohiyo dit opuhod kopio gisom dot oguyu’ nopo o pointongkop diti pomogunan; om orongou o giniakan di tulun do hilo’; do hilo’ piya’d Rahat dot Aragang. ²² Iyo poddi kondiu di poungkalad o talad di pisangod do monimbit do Bosra. Om tontok nopondo do tadau’ddi om iyo pondo do tondu’ di mogkosusu o soudor dot Idom dot opopoddosian,’’ ka dau. ²³ Poingkaa no o pinoboros do TUHAN do pasal do Damsik, ’’Atangkabo nondo om ooris o Hamat om Arpad tu’ nokorongou no iyolo’ do habar dot araat; songgogor-gogor po o ginawo diyolo’ tu’ aiso’ no o pokukurayan diyolo’, iyo po iyolo’ di tumbak do rahat dit a’ kosinonod. ²⁴ Oluhoi no o tulun do Damsik, om nokopoggidu’ no dot opopoddosian. Orualan poo iyolo’ om oinggorit do miagal do tondu’ di mogkosusu. ²⁵ Nopogitotongkiadan noddi i bandar di nabantug, i bandar di haro o kaarapadan. ²⁶ - ²⁷ Tontok nopondo do tadau’ddi om angapatai nondo i katangaanakwoguan do hiri’d karalan-ralanan, om angapatai ngai’ i soudor. Tutudan ku nondo i tingolig do Damsik, om uuhon ku do monorob i walai di Raja’ Binhadad. Iyoho’ no, i TUHAN it Osundu Kopio, o minomoros diti,’’ ka dau. ²⁸ Poingkaa no o pinoboros do TUHAN do pasal do payat do Kidar om i watas do porintaon di Hasor, i nosolod di Nobukadnisar, i raja’ do Babil, ’’Oi Nobukadnisar, songodon no o payat do Kidar, om patayon no i tulun di ponong hilo’d koulayon! ²⁹ Ahawon ngai’ no i dumba’ om unta, om i kiim diyolo’ do mitonggoi do koinsanai di poinsuang do hiri, om pagarangon no dot id diyolo’ dot, ’Osorilian kou nondo do kopoddosian!’ kanto. ³⁰ Oi tulun do Hasor! Iyoho’ no, i TUHAN o minomoros do poingkaa: Nokopomusorou no i Nobukadnisar i raja’ do Babil do mongoi panangod dokoyu. Boros ka dau, ³¹ ’Kainou! Ngoyo’ toko’ saapo’ i tulun dit osimbayan om it aiso’ o koligagaanan. Aiso’ i’ o kointirung di bandar diyolo’ tu’ aiso’ i’ o wawayaan di kitotobon om aiso’ o salampad di wawayaan,’ ka,’’ ka dau. ³² Boros ka kawagu’d TUHAN dot id di Nobukadnisar, ’’Ahawon ngai’ no it unta diyolo’ om i tayam-tayam diyolo’! Om potompiason ku nondo i tulun di pinampadan o tobuk. Om porikatan ku iyolo’ do kosusaan do mantad id posorili’ diyolo’. ³³ Osiliu pondo do lilisokon do toni o Hasor, om osiliu do kinoiyonon dit aiso’ o sumuni do gisom dot alaid; om iso’ pod tulun nga’ aiso’ no mundorong do hilo’. Iyoho’ no i TUHAN, o minomoros diti,’’ ka dau. ³⁴ Iti no o boros do TUHAN it Osundu Kopio dot id doho’ do pasal do pomogunan dot Ilam do tontok di koimpuunon nogi’ do pomorintaan di Sodokia i raja’ do Yohuda. ³⁵ Boros kad TUHAN, ’’Patayon ngai’ ku nondo i gampamana’ diyolo’ di popokoris kopio dot Ilam. ³⁶ Porikatan ku nondo ot Ilam do tongus do mantad id posorili’ dau, om potiason ku nondo i tulun do hilo’ do hinonggo-honggo nopo, gisom dot aiso’ no o pomogunan dot a’ orikatan do tulun di mogidu’ do mantad hilo’d Ilam. ³⁷ Om orison ku nondo o tulun dot Ilam dot id toguang di pisangod diyolo’, di sipamatai diyolo’. Om patayon ku nondo iyolo’, tu’ otogod oku no kopio diyolo’. Om suhuon ku nondo i soudor do mongoi panangod diyolo’, gisom dot opunso iyolo’. ³⁸ Poingkakaton ku nondo do hilo’d Ilam i tirikohonon ku do momorinta’, om hilo’ nondo do pimpatayan ku i raja’ om i boyoon diyolo’. ³⁹ Nga’ tondulion ku indo kawagu o koiyon-iyono’ dot Ilam do koimbagu. Iyoho’ no o TUHAN o minomoros diti,’’ ka dau.

¹ Poingkaa no o boros do TUHAN dot id doho’ do pasal do bandar do Babil, om i tulun di poingiyon do hilo’, ² ’’Powonsoyo’ no i tanda’ om popinghabaro’ no dot id pogialatan do bansa’, do naala’ no o Babil! Nomumuk no o Mirodak, i tingolig dau, om nangababak i tininganak dau di kososomu’, om i tingolig di koindaraat kopio. ³ Haro nondo o bansa’ do mantad hilo’d utara do mongoi panangod do Babil, i poposiliu’d pomogunan diri do tana’ dit a’ sunian. Om aiso’ nondo o miyon do hilo’, do tulun ko’ nintorusan poo, tu’ oinsanan nopo do mogidu’,’’ ka dau. ⁴ Boros kad TUHAN, ’’Tontok nopondo do maso’ddi, om rumikot nondo o tulun dot Israil om i tulun do Yohuda; om songihad-ihad pondo iyolo’ do rumikot do mogihum doho’, i Kinorohingan diyolo’. ⁵ Muhot nondo iyolo’ di ralan do kumaa do hilo’d Sion, om mamanau do sumusui do ralan diri. Om momonsoi nondo iyolo’ do tumpongo dot id doho’ dit ogirot om poingompus, om a’ diyolo’ tolibambanan iri. ⁶ Miagal po do dumba’ di natagak i tulun ku, tu’ pinologos di gompomogompi’ do mininghombo do hilo’d konuluhanan, om mingundaliu dot id piro-piro o nuluhon, gisom dot a’ no diyolo’ oilaan ondung honggo o walai diyolo’. ⁷ Om isai nopo i kobontol diyolo’ nga’ sumaap no diyolo’, om momoros i pisangod diyolo’ dot, ’A’ toko’ i’ kasala’ do momonsoi do miagal diti. Tu’ nokowonsoi i’ iyolo’ do dusa dot id TUHAN. Iri nopo taki-aki diyolo’ om notumbayaan id TUHAN, om apatut daa dot iyolo’ nga’ otorodok i’ dot id dau,’ ka diyolo’. ⁸ Oi tulun dot Israil, poggidu’ nod sumoliwan do Babil! Pogulu kou no do tumongkiad, om sumusuhut i’ i wokon. ⁹ Binsuhuon ku nondo o piro-piro o bansa’ dit ongokoris do mantad ponong hilo’d utara do sumaap do Babil. Om posodiawon nondo diyolo’ i soudor diyolo’ do mongoi sangod do Babil om aala’ i’ diyolo’ o Babil. Iyolo’ nopo om mamamana’ dit ongotiru’ om a’ insan dot a’ koonong i pana’ diyolo’. ¹⁰ Om apanakahan nondo o pomogunan do Babil, om ongkototos do minganu di dapu’ o koinsanai di tulun do mongoi panakau’d hilo’. Iyoho’ no i TUHAN o minomoros diti,’’ ka dau. ¹¹ Boros kad TUHAN, ’’Oi tulun do Babil, pinanakau dokoyu i tulun ku. Ooropod kopio kou daa do miagal po di kuda’ do minguni, om mimpanau kou nopo do miagal di sapi’ di momogomos do gandum. ¹² Nga’ ointingayam indo om oindaraat i bandar dokoyu dit agayo. Osiliu nondo o Babil do tana’ do kowotuan dit a’ sunian om otuu om it aiso’ no kopio o ngaran-ngaran dot id pogialatan do koinsanai’d pomogunan. ¹³ A’ nondo oiyon kawagu o pomogunan do Babil tu’ otogod oku no kopio, om osiliu pondo iri do pogun. Om aranaban ngai’ nopondo om ooris o tulun di katalib do hilo’. ¹⁴ Oi dokoyu i gampamana’! Sodia’ kou no do mongoi panangod do Babil, om turungkuon no dokoyu o bandar diri. Papanaon ngai’ no o pana’ dokoyu dot id Babil tu’ nokowonsoi i’ iyau do dusa dot id doho’. ¹⁵ Turungkuon no dokoyu o bandar diri om mimpangkis kou no do pangkis do sumangod, tu’ nokoinsiriba’ no iyau om mangakun do naala’. Nangahaba’ no om nangaraag i tolig do hilo’. Tu’ iri no o ponuli’ ku do Babil. Wonsoyo’ no dot id dau o miagal di winonsoi dau dot id tulun do suwai. ¹⁶ Kada’ pologoso’ o tulun do mananom do totonomon ko’ mongomot po dot id pomogunan diri. Oinsanan nopondo o tulun do bansa’d suwai di poundorong do hilo’ do gumuli’ dot id pomogunan mantad diyolo’ tu’ ooris iyolo’ di soudor do mongoi panangod,’’ ka dau. ¹⁷ Boros kad TUHAN, ’’Tulun nopod Israil om miagal po di dumba’ di nokopogitotongkiad do nouyung di singa. Tu’ id gulu nopo do suminaap diyolo’ nga’ i raja’ dot Asur om baino’ noddi om i Nobukadnisar, i raja’ do Babil o mongogop do tulang diyolo’. ¹⁸ Om gowoi poddi om iyoho’ no, i TUHAN it Osundu Kopio, i Kinorohingan dot Israil o momohukum di Raja’ Nobukadnisar om i pomogunan dau do miagal di pinomohukum ku di raja’ dot Asur. ¹⁹ Nga’ pogulion ku indo kawagu o tulun dot Israil do hilo’d pomogunan diyolo’. Om kaakan nondo iyolo’ do hasil di tana’ do hilo’d Nuluhon do Karmol om hilo’d Basan. Om ayahan indo iyolo’ di hasil do tana’ dit id watas dot Ipraim om Giliad. ²⁰ Tontok nopondo do maso’ddi, om olidangan nondo ot Israil om Yohuda do mantad id dusa diyolo’, tu’ ompunan ku i’ i tulun di pinasi ku. Iyoho’ no, i TUHAN, o minomoros diti,’’ ka dau. ²¹ Boros kad TUHAN dot id bansa’ di mantad hilo’d utara, ’’Ngoyon no songodo’ i tulun do hilo’d Mirataim, om i hilo’d Pikod. Patayon no, om punsoon no kopio iyolo’. Wonsoyon ngai’ no iti ponuhuan ku diya’,’’ ka dau. ²² Orongou no do hilo’d pomogunan diri o tuni do pisangadan, om nadalaan nod nangaraag o hilo’. ²³ Kotongkop nopo o pomogunan do binobog do Babil do gisom do nomumuk. Nga’ baino’ noddi om notipu’ no i bobobog dau! Oinsanan nopo o bansa’ do kotigowo do nokorongou di nosiliu dot id pomogunan diri. ²⁴ Boros kad TUHAN, ’’Oi Babil, suminaap ko doho’, om gowoi poddi om kosulung ko di lawa’ do pamalawa’ ku diya’, nga’ a’ ko i’ kopuriman. ²⁵ Noiwangan ku no i kinoiyonon do rapo-rapo ku, om nokosoliwan ku no i rapo-rapo ku’ddi, tu’ otogod oku no kopio tu’ haro o wonsoyon ku, do hilo’d Babil, iyoho’ i TUHAN it Asawat Kopio om it Osundu Kopio. ²⁶ Sorilian nopo o Babil do manangod. Habaon nopo i sulap do pinoiyanan do gandum dau! Om potimbunon nopo i konunu-nunuan di panganu do mantad id pisangod do miagal do potimbun kou do gandum! Raagon nopo kopio o pomogunan diti! Kada’ nod haro o poolu-oluon! ²⁷ Patayon ngai’ nopo i soudor dau. Alaon no iyolo’! Obungou no o bansa’ do Babil! Tu’ norikot no i maso do kopomohukuman diyolo’!’’ ka dau. ²⁸ (Iri nopo i tulun di minogidu’ do mantad hilo’d Babil om i kuminaa do hilo’d Yorusalim om minsusui no do kinowoyo-woyoo’ do TUHAN, i Kinorohingan toko’ do minonuli’ di tulun do Babil di winonsoi diyolo’ dot id Walai’d Sasambayangan dot Agayo.) ²⁹ Boros kad TUHAN, ’’Sunudan no i gampamana’ do manangod do Babil. Suhuon ngai’ nopo do mamana’ i milo do mamana’. Turungkuon no o bandar diri om kada’ nod haro o songulun do koidu’. Sulian no o koinsanai di nongowonsoi dau, om wonsoyon nopo dot id dau o miagal di winonsoi dau dot id wokon, tu’ suminawat o ginawo dau do suminaap doho’, it Olidang Kopio, i Kinorohingan dot Israil. ³⁰ Apatut no do patayon i tangaanakwagu dau do hilo’d karalan-ralanan do hilo’d bandar dau, om insanan i soudor dau do mamatai do tadau’ddi. Iyoho’ no, i TUHAN o minomoros diti. ³¹ Oi Babil, asawat kopio o ginawo nu! Om gowoi poddi om sumaap oku diya’, iyoho’ i TUHAN it Asawat Kopio, i Kinorohingan dit Osundu Kopio. Tu’ nokorikot no i maso do kopomohukuman ku diya’. ³² Katahub nondo om aratu’ i bansa’ nu di minggayo-gayo, om aiso’ no o monulung diya’ do monungag. Tutudan ku nondo i kabandaran nu, om araag ngai’ nopondo i hiri’d posorili’ddi,’’ ka dau. ³³ Boros kad TUHAN, it Osundu Kopio, ’’Noinggorit tomod i tulun dot Israil om tulun do Yohuda. Om koinsanai di minanangkap diyolo’ nga’ madtamong tomod diyolo’ om a’ no papalabu-labus diyolo’. ³⁴ Nga’ okoris oku i’, iyoho’ i mogobi’ diyolo’, ngaran ku nopo om TUHAN it Osundu Kopio. Om iyoho’ nondo o manalasai di hal diyolo’ om manahak do kosimbayanan do hiti’d pomogunan. Nga’ kosusaan i’ mando o porikoton ku dot id tulun do Babil,’’ ka dau. ³⁵ Boros kad TUHAN, ’’Apatut nod patayon o Babil! Om i rayat om i pomorinta’, om i tulun dit ongkitoilaan do hilo’. ³⁶ Apatut nod patayon i nabi di goudut — basug ngai’ nopo iyolo’! Apatut nod patayon ngai’ i soudor — ongooris no kopio iyolo’! ³⁷ Patayon ngai’ no i kuda’ om raagon i korita’-kuda’ dau! Om a’ no kogoos i soudor di godsian! Nangaraag ngai’ no i kakayaan do Babil, om nangapanakau i dapu’ dau. ³⁸ Apatut nod rumasak ngai’ i bawang do hilo’, tu’ noponu’ po o Babil do tingolig di kotompurolosi, i mongulau di tulun do modsubak diri. ³⁹ Gowoi pondo om osiliu do tiiyonon do rogon om rusod dot araat o hilo’d Babil om tiiyonon do tombolog di roitan do tombolog dot unta. Om a’ nondo do tulun iyonon o hilo’ do gisom dot alaid. ⁴⁰ Om miagal nondo di nosiliu dot id Sodom om Gomura do tontok di rinaag ku o bandar diri om i kawalayan do hiri’d posorili’, ot osiliu dot id Babil. Om aiso’ nondo o tongoiso’ piya do tulun do mongoi kawagu iyon do hilo’. Iyoho’ no i TUHAN o minomoros diti. ⁴¹ Rumikot no o bansa’ do mantad id pomogunan do hilo’d sodu’, i ponong hilo’d utara, i bansa’ dot okoris kopio. Rumikot iyolo’ do miwoyo’ do raja’ dot ogumu’. Om posodia’ no iyolo’ do sumangod. ⁴² Kipana’ iyolo’ om kigayang; ongorongit tomod iyolo’ om a’ mangampun. Miagal poddi ngorod do rahat o tuni do kuda’ diyolo’, do tontok di posiahon diyolo’ do mongoi panangod do Babil. ⁴³ Korongou nopo i raja’ do Babil do habar diri, nga’ lomok tomod nopo iyau. Noponu’ po iyau do kopoddosian, om oinggorit iyau do miagal di tondu’ do mogkosusu. ⁴⁴ Monigowo oku nopondo do rumikot, iyoho’ i TUHAN, do miagal do singa do sumoliwan do mantad id puru’ dit id somok do Bawang do Yordan om mongoi do hiri’d kobuturan di pangakan-ngakanan do dumba’. Om popoggiduon ku nondo i tulun do Babil do mantad id bandar diyolo’. Om iri nondo i boyoon di pilion ku o momorinta’ do pomogunan diri. Isai po o milo do poiyoon doho’? Isai po o katama’ do sumurilog doho’? Haro po toi o boyoon di kasaap doho’? ⁴⁵ Iyo nopoddi om pokinongou no di natantu’ mantad ku do wonsoyon ku dot id bandar do Babil, om i potiwonsoyon ku no dot id tulun do hilo’. Tu’ iri piya tangaanak diyolo’ nga’ angagayat ngai’ i’ do mogidu’, om oinsanan nopondo o tulun do moddosi. ⁴⁶ Aala’ nopondo o Babil, om haro nondo o kagangahan dit adalaan kopio, gisom dot oinsanan nopo iti pomogunan dot oguyu’, om i giniakan di tulun do hilo’ nga’ orongou i’ do bansa’d suwai,’’ ka dau.

¹ Boros kad TUHAN, ’’Poporikot oku nondo do tongus di mamaraag do tumongus do ponong id Babil om id tulun di poingiyon do hilo’. ² Poporikot oku nondo do tulun di bansa’d suwai do mongoi pamaraag do Babil, do miagal di tongus do monilib do tapol do gandum. Om orikot nopondo i tadau do kapamaraagan om tumutuk nopo iyolo’ do pomogunan diri do sumaap om gisom dot aiso’ no ot oolu-olu’ do hiri’d pomogunan diri. ³ Kada’ onuwai do maso i soudor do papapana’ di pana’ diyolo’ ko’ manampakai po di rorosukon diyolo’d sumangod. Kada’ dokoyu posio’ i tangaanakwagu! Punsoon ngai’ nopo i soudor diyolo’. ⁴ Ongosuhat nondo iyolo’ om angapatai do hiri’d karalan-ralanan di hilo’d bandar diyolo’. ⁵ A’ ku i’ tongkiadan ot Israil om Yohuda, iyoho’ i TUHAN, i Kinorohingan dit Osundu Kopio, i Kinorohingan dot Israil dit Olidang, do mulong piya do nokowonsoi iyolo’d dusa dot id doho’. ⁶ Poggidu’ no do mantad id Babil, om apasi kou i’! Kada’ kou hompit dot apatai tu’ kidusa i’ o Babil. Sumuli’ oku noddi om hukuman ku no o Babil do miontok di nowonsoi dau. ⁷ Miagal daa do sangkir do tamas o Babil do poingigit ku, do mangauk do koinsanai’d pomogunan. Minonginum ngai’ i bansa’d tulun do waig dot anggur do mantad id sangkir diri gisom do nongoulau ngai’ iyolo’. ⁸ Sigog iddi do karatu’ o Babil om kababak nopo! Pogihadai no iyau! Ongoi no pogihum do tubat do pongubat di suhat dau om ulan toi’ om olingasan iyau. ⁹ Boros ka di tulun do bansa’d suwai di poundorong do hilo’ do mogiboro-boros, ’Tuminotos toko’ i’ daa do minonguhup do Babil, nga’ alaid toko’ iddi kopio do nokorikot. Nga’ mogot nogi’ do tumongkiad toko’ do pomogunan diti om muli’ do hilo’d pomogunan toko’. Tu’ nohukuman nod TUHAN do hukuman dit awagat kopio, om kaayi’ nopoddi do naraag!’ ka diyolo’,’’ ka dau. ¹⁰ Om boros ka di tulun di songonuon do TUHAN, ’’Nokointalang nod TUHAN dot otopot toko’. Kainou ngoyo’ toko’ sunudai i tulun do hilo’d Yorusalim di nowonsoi’d TUHAN, i Kinorohingan toko’ dot id dati’,’’ ka diyolo’. ¹¹ Nobinsuhu’ nod TUHAN o ginawo di raja’ do Modia, tu’ potiraagon no dau o Babil. Om iyo noddi iyau do sumuli’ do winonsoi di tulun di minamaraag di Walai’d Sasambayangan dot Agayo. Om boros ka di boyoon do soudor, ’’Lohisai dokoyu o pana’ dokoyu! Om posodiawo’ dokoyu o kolid! ¹² Powonsoyo’ dokoyu i tanda’ do songodon o tolig do Babil. Pogiroto’ no i padtamangan! Suhuo’ nod mongoi tamong i tulun do madtatamong! Om ponuhu’ nod tulun do mongoi awang!’’ ka dau. Tu’ nowonsoi nod TUHAN i nokoboros dau do wonsoyon dau dot id tulun do Babil. ¹³ Ogumu’ daa o bawang om kaya’ o pomogunan diri, nga’ naayi’ no o maso dau do poimpasi, om norikot no o kopupuson do tumur dau. ¹⁴ Tu’ nokosumpa’ no o TUHAN, it Osundu Kopio, dot id suang do ngaran dau do poporikot iyau do tulun dot ogumu’ do mongoi sangod do Babil; i tulun di miagal pod katat kogumu’, om mimpangkis pondo iyolo’ tu’ nakamanang no iyolo’. ¹⁵ Winonsoi’d TUHAN iti tana’ dot i sinundu dau o pinomonsoi, om i toilaan dau o pinomonsoi dau diti pomogunan, om pinapawalad dilo tawan. ¹⁶ Om moro-boros nopo iyau do monuhu’ nga’ ongorod nopo i waig do hilo’d soibau dilo tawan om poporikot iyau do haun do mantad hilo’d tisan do tana’. Pakalab iyau do kodumaat di maso do rumasam, om posoliwan iyau di tongus do mantad id pinoiyanan dau. ¹⁷ Om kokito poddi o tulun do koinsanai’ddi om kopuriman nogiddi o tulun do basug iyau om aiso’ o guna’ dau. Om iri tulun di momonsoi do tingolig nga’ oiman-iman nopo tu’ iri nopo ponokokinorohingan diyolo’ om okon i’ ko’ Kinorohingan kopio, om aiso’ o pinuhobo. ¹⁸ Aiso’ i’ o kootuk-otukon diri om apatut no dot indaraaton om hingi-hingion, raagon indod TUHAN iyolo’ do korikot iyau do mongoi pamaraag diyolo’. ¹⁹ A’ i’ iyo di tingolig o Kinorohingan di Yakub; tu’ iyau no i minomonsoi do koinsanai’d nunu nopo, om nopili’ no dau ot Israil do sumiliu’d tulun dau. Ngaran nopo dau nga’ TUHAN it Osundu Kopio. ²⁰ Boros kad TUHAN, ’’Oi Babil, iya’ no o ponokodunsul ku, i pakakas ku’d sumangod. Pinakai ku iya’ do minanangod do piro-piro o bansa’ om pomorintaan. ²¹ Om minamatai do kuda’ om i tulun di songinsakai di kuda’, om minamaraag do korita’-kuda’ om minamatai di tulun di papamanau, ²² om minamatai do kusai om tongoondu’, om i komolohingan om i tongomulok po, om i tangaanakwagu om i kosumandakan. ²³ Om pinakai tiya’ do pinonumbali’ di gompomogompi’ do dumba’ om i baanan diyolo’, om i gompongumo om i sapi’ diyolo’ di pamaradu, i pomorinta’ om i pagawai dit asawat o pangkat,’’ ka dau. ²⁴ Boros kad TUHAN, ’’Okito oku indo diya’ do monuli’ do Babil om i tulun do hilo’, do koinsanai’ddi nongowonsoi diyolo’ dot araat dot id Yorusalim. ²⁵ Oi Babil, iya’ nopo om miagal do nuluhon di mamaraag do koinsanai diti pomogunan, nga’ iyoho’ no, i TUHAN o pisangod nu. Gayaton ku nondo iya’, om poisison ku iya’ do hilo’d tana’, om pologoson ku iya’ dot osorob do gisom dot aawu. ²⁶ Om aiso’ nondo o tiso’ di watu nu do hiri’d kinaraagan nu dot apakai kawagu do maan do pamaal. Osiliu ko nondo do miagal do tana’ do kowotuan do gisom dot alaid. Iyoho’ no i TUHAN, o minomoros diti. ²⁷ Oi raja’ do mantad id utara! Powonsoyo’ no i tanda’ do pogintutunan do mongoi sangod! Pounio’ no i torumpit om korongou ngai’ i’ i bansa’! Posodiawo’ no i bansa’ do sumaap do Babil! Sunudan no i pomorinta’ dot Ararat, om Mini, om Askinas do mongoi sangod. Pomili’ no dot iso’ o boyoon do momohuruan di pisangadan. Om ngoyo’ ngai’ no i kuda’, i miagal pod katat kogumu’. ²⁸ Posodiawo’ no i bansa’ do mongoi sangod do Babil. Porikoto’ no i raja’ do Modia, i boyoon diyolo’ om i pagawai, om i soudor do mantad id koinsanai di pomogunan do porintaon diyolo’. ²⁹ Gumogor po om gumuyu’ iti tana’ tu’ bayaanon ku no i natantu’ mantad ku do posiliu do Babil do tana’ dit a’ sunian, om it a’ iyonon do tulun. ³⁰ Nokotingkod no i soudor do Babil do monokisangod om songundorong no do hiri’d kuta’ do pogintirungan diyolo’. Natagakan no iyolo’ di kosioho’ diyolo’ om a’ no iyolo’ kogoos. Nangaraag no i totobon di bandar, om nongotutudan i kawalayan. ³¹ Mogisuhut-suhut nopo o tulun do mongoi pomisunud di raja’ do Babil do notutukan nod pisangod i bandar dau. ³² Nosolod no di pisangod i sosoborongon do hilo’d bawang om nongotutudan no o kuta’ di pogintirungan. Nangatagakan nopo do pomusorou i soudor do Babil. ³³ Om a’ no alaid dot alaon iyolo’ di pisangod diyolo’ om pingulakan nogindo iyolo’ do miagal di gandum do hiri’d pamagamasan. Iyoho’ no, i TUHAN it Osundu Kopio, i Kinorohingan dot Israil, o minomoros diti,’’ ka dau. ³⁴ Minumuk di raja’ do Babil o Yorusalim om akano’ nogiddi dau do gisom do naayi’. Pinasaug dau o suang di bandar do miagal do papasaug do suang do luping; om miagal po iyau do naga’ do minonolon do Yorusalim. Pininganu dau i korohian dau di hiri’d bandar om iri no suwai om pinintaam dau. ³⁵ Pologoson nod momoros i tulun do Sion dot, ’’Babil po daa o mamabo di kararaat do winonsoi dau dot id dahai!’’ ka. Pologoson nod momoros i tulun do Yorusalim do, ’’Babil po daa o mamabo di kinoinggoritan dahai!’’ ka. ³⁶ Om boros kaddi do TUHAN dot id tulun do Yorusalim, ’’Salasayon ku i’ i hal dokoyu om hukuman ku i pisangod dokoyu do gama’ di winonsoi diyolo’ dot id dokoyu. Rasakan ku nondo i tudan do waig do Babil om arasakan i’ i kabawang-bawangan do hilo’. ³⁷ Om osiliu nondo do kinotimungon do kinaraagan o pomogunan diri om tiiyonon pod nintorusan. Om araat tomod nondo o kokitanan diri; om aiso’ no o miyon do hilo’, om ongooris ngai’ nopondo i kokito’ddi. ³⁸ Om minggarom pondo i tulun do Babil do miagal do singa om minguni do miagal do tangaanak do singa. ³⁹ Tamaha’ no kopio iyolo’! Posodiaan ku indo iyolo’ do poginakanan om owukon ku nondo iyolo’ om posonongon ku o ginawo. Om koodop nondo iyolo’ om a’ nondo oposik kawagu. ⁴⁰ Om ngoyon ku nondo iyolo’ sumbolio’ do miagal do tanak do dumba’, om kambing om kambing di tontoluhan. Iyoho’ no i TUHAN, o minomoros diti,’’ ka dau. ⁴¹ Boros kad TUHAN do pasal do Babil, ’’Natangkap no i bandar di royohon daa do koinsanai do pomogunan! Korolosi tomod diri o kokitanan di bansa’ do Babil! ⁴² Nalampayan do rahat o Babil om noolitan di tumbak dit opuhod tomod o pomogunan diri. ⁴³ Korolosi tomod o kokitanan di kabandaran om miagal pod tana’ do kowotuan dit otuu tomod, om it a’ iyonon om a’ wayaan do tulun. ⁴⁴ Hukuman ku nondo o Bil, i ponokokinorohingan do Babil, om suhuon ku iyau do popoguli’ di dapu’ di pinanakau dau, om a’ indo tumuku’ dot id dau i piro-piro o bansa’d tulun. Nangaraag no i tolig do Babil. ⁴⁵ Poggidu’ kou no do mantad hiti, oi tulun dot Israil! Poggidu’ kou no om apasi kou i’ do mantad id kototogod ku dit a’ ogina-gina’. ⁴⁶ Kada’ koluhoi o ginawo om kada’ poddosi di habar dot orongou dokoyu. Tu’ minsuwai o habar dot orongou do monikid toun, i habar do pasal do kororongit do hilo’d pomogunan diri om i habar do pasal di raja’ do mogisasaap. ⁴⁷ Kotumbayaai no do rumikot no o maso do hukuman ku o tingolig do Babil. Om ointingayam ngai’ nopondo o pointongkop di pomogunan om aayi’ nopondo dot apatai i tulun do hilo’. ⁴⁸ Oinsanan nopondo do mimpangkis dot atataadan i hiti’d pomogunan om i hilo’d tawan dot aala’ o Babil di bansa’ di mongoi pamaraag diri, i mantad hilo’d utara. ⁴⁹ Babil i’ o nakapatai do tulun do pointongkop diti pomogunan, nga’ baino’ nondo om aala’ no o Babil tu’ iyau i’ o nakapatai dot ogumu’ o tulun dot Israil. Iyoho’ no i TUHAN, o minomoros diti,’’ ka dau. ⁵⁰ Boros kad TUHAN dot id tulun dot Israil di hilo’d Babil, ’’Nokoidu’ kou no do mantad id kapatayon! Om pamanau kou no do dinondo! Kada’ kou no andad! Tu’ mulong po dot osodu’ kou do mantad hilo’d pomogunan dokoyu nga’ soroho’ oku no, i TUHAN dokoyu, om soroho’ no o Yorusalim. ⁵¹ Boros ka dokoyu, ’Noindaraat om nointingayam iyahai; om aiso’ no o milo dahai do pokukurayan tu’ nosowoli no do bansa’d suwai i kinoiyonon dot olidang do hiri’d Walai’d Sasambayangan dot Agayo,’ ka dokoyu. ⁵² Iyo nopoddi om pokinongoho’ no dokoyu o poboroson ku do rumikot no o maso do hukuman ku i tingolig do Babil, om mingodoi pondo i tulun di nongorualan do pointongkop di pomogunan. ⁵³ Om mulong po do koindakod o Babil do hilo’d tawan om momonsoi do kuta’ do pogintirungan do hilo’, nga’ poporikot kasai’ oku i’ do tulun do mongoi pamaraag diri. Iyoho’ no i TUHAN, o minomoros diti,’’ ka dau. ⁵⁴ Boros kad TUHAN, ’’Pokinongoho’ no i tihad do tulun do hilo’d Babil, om i mogihad do kinaraagan do hilo’d pomogunan diri. ⁵⁵ Raagon ku no o Babil, om tingkodon ku it ohiyo do hilo’. Osiau nopo do sumuang i soudor do pisangod do miagal po di tumbak dot akahas, om ohiyo tomod iyolo’ do mongoi sangod. ⁵⁶ Ruminikot iyolo’ do mongoi pamaraag do Babil; nangatangkap no i soudor do Babil, om nongotipu’ no i rapo-rapo diyolo’. Iyoho’ no o TUHAN di momohukum dit araat, om wonsoyon ku nondo dot id Babil o miontok di nowonsoi dau. ⁵⁷ Owukon ku nondo i pomorinta’ do Babil, i tulun di kitoilaan, om i boyoon, om i soudor, do gisom do koodop iyolo’ om a’ nondo iyolo’ kotungag do gisom dot alaid. Iyoho’ no i raja’ o minomoros diti. Iyoho’ no i TUHAN, it Osundu Kopio. ⁵⁸ Kataam nondo do hilo’d tana’ i tolig do Babil, it ogirot daa’ddi, om i wawayaan dit akawas nga’ osorob nondo. Aiso’ i’ o kinootus-otuson di winonsoi di piro-piro o bansa’; tu’ nongosorob i’ i pininghuyanan diyolo’. Iyoho’ no i TUHAN, it Osundu Kopio o minomoros diti,’’ ka dau. ⁵⁹ Iri nopo madtatamong kasai’ di Raja’ Sodokia om i Soraya, i tanak di Noria, i manangaki di Maasiya. Om tontok di kaapat do toun dot i Sodokia o raja’ do Yohuda, om minoyo’ i Soraya di Sodokia do minongoi do hilo’d Babil, om onuwai ku noddi i Soraya dot iso’ o karaja’. ⁶⁰ Tinulis ku dot id iso’ o buuk o koinsanai di karaagan do rumikot dot id Babil, om kohompit nogi’ i piro-piro o hal do suwai do pasal do Babil. ⁶¹ Om bilinai ku noddi i Soraya do poingkaa, ’’Korikot ko nopondo do hilo’d Babil, om basaon no kopio dot opuhod o boros dot id tulun do hilo’ o koinsanai di nongotulis do hiti’d buuk diti. ⁶² Om sumambayang no dot, ’Oi TUHAN, nokoboros nu no do raagon nu iti kinoiyonon diti, om aiso’ no o songimpasi do poingiyon do hiti, aiso’ o tulun om aiso’ o nintorusan, om osiliu nondo do tana’ do kowotuan do gisom dot alaid!’ kanto. ⁶³ Om aayi’ nu nopondo do mambasa’ iti buuk, oi Soraya, om pokogoson noti dot id watu om pataamon no do hiri’d tanga’ di Bawang dot Iprat, ⁶⁴ om poboroson no o poingkaa, ’Iyo nodti ot osiliu dot id Babil — olonsod nondo iyau om a’ no kahampung kawagu, tu’ porikatan nod TUHAN do karaagon o bandar diti,’ kanto,’’ kangku. Hiti-hiti no o kooiyon do boros di Yoromia.

¹ Duwo nogi’ nohopod om iso’ o toun di Sodokia do tontok di nosiliu iyau do raja’ do Yohuda. Om hopod om iso’ o toun dau do minomorinta’ do hilo’d Yorusalim. Ngaran nopo di tina’ dau nga’ i Hamutal, i tanak di Yoromia, i poingiyon do hilo’d bandar do Libna. ² Om i Raja’ Sodokia nga’ minomonsoi i’ do dusa dot id TUHAN do miagal di nowonsoi di Raja’ Yoyakim. ³ Om notogod tomod diri o TUHAN di tulun do Yorusalim om tulun do Yohuda gisom dot a’ no dau podulon iyolo’. Om saap po i Sodokia di Raja’ Nobukadnisar i raja’ do Babil, ⁴ om gowoi poddi om rikot no i Nobukadnisar do miwoyo’ do koinsanai di soudor dau om ngoyo’ no diyolo’ songodo’ o Yorusalim di tadau’d kohopod di tulan do kohopod, di kosiam do toun do pomorintaan di Sodokia. Om undorong no iyolo’ do hiri’d soliwan di bandar om pomonsoi nod tolig do maan do ponurungku’ di bandar, ⁵ om pointutuk nopoddi kasai’ iyolo’ di bandar do gisom di kohopod om iso’ do toun di Sodokia do momorinta’. ⁶ Om tontok di tadau do kosiam di tulan do kaapat do toun diri, tontok dit adalaan noddi kopio do mononglous om aiso’ no o takanon do tulun, ⁷ om kolopuson noddi do pisangod i tolig di bandar. Nga’ mulong po do tinutukan di tulun do Babil i bandar diri nga’ oinsanan nopo i soudor do Yohuda do minogidu’ do tontok di dongotuong. Minogidu’ iyolo’ do minaya’ di kabun do raja’, om waya’ no di wawayaan di popiromut di duwo o tolig, om poggidu’ no iyolo’ do kuminaa ponong hiri’d Rantai do Yordan. ⁸ Nga’ ginusa’ i’ di soudor do Babil i Raja’ Sodokia, om katangkap no diyolo’ iyau di hilo’d Rantai do Yorikou, om tongkiad ngai’ nopo dau i soudor dau. ⁹ Om pootodo’ noddi i Raja’ Sodokia dot id di Raja’ Nobukadnisar, i hilo’d bandar do Ribla it id watas do Hamat, om hilo’ no do pinorotuan iyau do hukuman do kapatayon. ¹⁰ Om hilo’ nod Ribla do pinatai di Raja’ Nobukadnisar i tangaanak di Raja’ Sodokia, dot antang-antangan di Raja’ Sodokia. Om pinatai ngai’ nogi’ dau i pagawai do Yohuda. ¹¹ Om irulo’ noddi dau i mato di Raja’ Sodokia om kagasai no dau iyau om tanggayai no do hilo’d Babil. Om hiri noddid giil i Raja’ Sodokia do hilo’d Babil do gisom do kinapatayo’ dau. ¹² Tontok di tadau do kohopod di tulan do kolimo di kohopod om siam do toun di Raja’ Nobukadnisar do momorinta’ do Babil, om ongoi nod hilo’d Yorusalim i Nobusaradan, i ponosihat di raja’ om boyoon di soudor di Nobukadnisar. ¹³ Om tutudai no dau i Walai’d Sasambayangan dot Agayo om i walai di raja’, om i kawalayan do koinsanai di tulun dit ongkipangkat do hilo’d Yorusalim; ¹⁴ om raago’ no di soudor dau i tolig di bandar. ¹⁵ Om tanggayai no di Nobusaradan do hilo’d Babil i tulun di nongoolu-olu’ do hiri’d bandar, i piro-piro tukang om i tulun di minogidu’ om minongoi amung do tulun do Babil. ¹⁶ Nga’ pinoundorong i’ dau do hilo’d Yohuda i wookon do tulun di mosikin kopio, it aiso’ o dapu’, om suhuo’ no dau iyolo’ do morobuat do hiri’d kabun dot anggur om hiri’d koumaan. ¹⁷ Om mumuko’ nopo di tulun do Babil do minamabak i piro-piro torigi do tambaga’ om i korita’-kuda’ do hiri’d Walai’d Sasambayangan dot Agayo om i tangki’ do tambaga’ dit agayo, om igitai ngai’ nopo diyolo’ i tambaga’ddi do hilo’d Babil. ¹⁸ Om nigitan nogi’ diyolo’ i ponononduk do tana’, om i poiiyanan do tauu di pakayon do tontok di momolinahas di pananaraban do porsombahan, om i piro-piro pakakas do lampung, om i mangkuk di panahau di raha’ do mantad id porsombahan do sinumbali’, om i mangkuk di podtutudan do kominyan, om koinsanai di pakakas do tambaga’ do suwai di pakayon do sumambayang do hiri’d Walai’d Sasambayangan dot Agayo. ¹⁹ Om tinanggayan ngai’ nogi’ diyolo’ o koinsanai di tamas om pirok do winonsoi: i piro-piro mangkuk dit ongokooro’, om i talam di poiyanan do popou, om i mangkuk di poiyanan do raha’ di porsombahan di sinumbali’, om i poiyanan do tauu, om i potitimpakan do lampung, om i mangkuk do poiyanan do kominyan, om i mangkuk di ponimbauk do popotungu di porsombahan do waig dot anggur. ²⁰ Om iri nopo winonsoi di Raja’ Suliman do tambaga’ do winonsoi do maan do hiri’d Walai’d Sasambayangan dot Agayo, i duwo o torigi, i korita’-kuda’, i tangki’ dot agayo, om i hopod om duwo o sapi’ di pinoimpahan di tangki’ nga’ adalaan no kopio kawagat iri gisom dot a’ no milo’d timbangon. ²¹ - ²² Iri nopo duwo o torigi’ddi nga’ miirad nopo: sopiwalu’ o mito do kasawato’ om 5.3 o mito do kogoyoo’. Om haro o luang do hiri’d tanga’ di torigi’ddi, om kakapalo’ nopo di tambaga’ nga’ 75 o milimito. Om iri nopo pinongulu di duwo o torigi’ddi nga’ 2.2 o mito o kasawato’ om pointutuk nopo di pinongulu’ddi om winansayan do rinambo-rambot om linumis do pinoiyo-iyo do tua’ do delima, di tambaga’ ngai’ do winonsoi. ²³ Om sopihatus o pinoiyo-iyo do tua’ do delima do hiri’d rinambo-rambot di hiri’d pinongulu di duwo o torigi’ddi. Nga’ siam no nohopod om onom do mantad diti tua’ do delima diti ot okito do mantad hiri’d siriba’. ²⁴ Suwai no ko’ iri, om tinangkap po di Nobusaradan i Soraya i Boyoon dot Agayo dot Imam, om i Sipania i wakil di Soraya, om tolu o tulun di madtatamong di wawayaan di Walai’d Sasambayangan dot Agayo, ²⁵ om i turu’ o gomponosihat di raja’ di hiri’d bandar, om i boyoon di soudor, om i wakil di boyoon do soudor i mongilo-ilo di soudor, om onom nohopod o tulun do suwai dit angasawat o pangkat. ²⁶ Om tanggayai ngai’ nopo dau i tulun diri om pootodo’ no dot id di Raja’ Nobukadnisar do hilo’d bandar do Ribla, ²⁷ i hilo’d watas do Hamat. Om hilo’ no do ninggorit iyolo’, om patayo’ nogiddi. Om iyo noddi o kinowoyo-woyoo’ di tulun do Yohuda do tinanggayan do pisangod, do mantad hilo’d pomogunan diyolo’; ²⁸ - ³⁰ oinsanan nopo nga’ 4,600 o tulun. Om pogisuhut-suhuto’ nopo di Nobukadnisar do minononggoi iyolo’: 3,023 o tulun do tinanggayan do tontok di toun do koturu’ do pomorintaan dau, om 832 o tulun do mantad hilo’d Yorusalim do tinanggayan dau do tontok di toun do kohopod om walu’ do pomorintaan dau, om 745 o tulun do tinanggayan di Nobusaradan do tontok di koduwo nohopod om tolu do toun do pomorintaan di Nobukadnisar. ³¹ Om tontok di toun do nosiliu’d raja’ do Babil i Iwil-Mirodak, om ninsianan diri dau i Raja’ Yoyakin i raja’ do Yohuda, tu’ pinalabus dau iyau do mantad id giil. Winonsoi dau iti di tadau’d koduwo nohopod om limo do tulan di kohopod om duwo di kotolu nohopod om turu’ do toun do mantad di natanggayan i Yoyakin dot id pomogunan do pisangod. ³² Om osonong i’ o winonsoi di Mirodak dot id dau om nonuan dau iyau do pangkat dit asawat ko’ mantad di raja’d suwai di nangatanggayan do pisangod do hilo’d Babil. ³³ - ³⁴ Om a’ noddi iyau mamakai di pakayan di songinggiil, om makan kasai’ iyau do hiri’d walai di raja’, om onuan iyau do tusin do maan dau’d kosukup-sukupan do solinai’d dau’d poimpasi.