GOMPOMUTUS

GOMPOMUTUS

¹ Tontok di napatai i Yosua, om uhot no i tulun dot Israil do TUHAN do poingkaa, ’’Oi TUHAN, disai tuu’d payat dot id pogialatan dahai ot apatut do mogulu do mongoi panangod di tulun do Kanaan?’’ ka. ² Om boros kad TUHAN do suminimbar, ’’I payat do Yohuda o mogulu. Tu’ noonuan ku no iyolo’ do kuasa’ do mangala’ do pomogunan diri,’’ ka. ³ Om boros kaddi di tulun do Yohuda dot id tulun do Simion, ’’Tanud kou pogi’ dahai do mongoi panangod di tulun do Kanaan om mongoi ponolod di tana’ do natantu’ mantad do TUHAN do patahakon dot id dahai. Om iyahai nga’ mongoi indo tanud dokoyu do mongoi kou ponolod di tana’ do natantu’ mantad do TUHAN do patahakon dot id dokoyu,’’ ka. Om ongoi noddi i payat do Simion ⁴ om i payat do Yohuda sangod; om piwoyo’ nopo iyolo’. Om onuwai no iyolo’d TUHAN do kamanangan do suminangod di tulun do Kanaan om i tulun do Poris. Om kapatai no o hopod noribu o tulun do pisangod do hilo’d Bisik. ⁵ Om ngoyo’ no di duwo o payat diri songodo’ i raja’ do pomogunan diri, i roitan dot i Adonibisik. ⁶ Om poggidu’ no daa iyau, nga’ gusao’ no diyolo’ iyau om kokosupai iddi diyolo’. Om potodo’ noddi diyolo’ o posolon do lapap om posolon do palad dau. ⁷ Om boros kad i Adonibisik, ’’Di nopoddi gulu po, om nakapamatod oku do posolon do lapap om posolon do palad do turu’ nohopod o raja’. Om pinologos ku nogi’ iyolo’ do mangakan di mumu’ do taakanon dit aratu’ do mantad id mija’ ku. Om baino’ noddi, om wonsoyon noddid Kinorohingan dot id doho’ o miagal di winonsoi ku dot id diyolo’,’’ ka dau. Om tanggayai noddi diyolo’ i Adonibisik do hilo’d Yorusalim, om hilo’ no o nakapatayon dau. ⁸ Om ngoyo’ no di tulun do Yohuda songodo’ o Yorusalim, om kosolod no diyolo’ i bandar diri. Om tutudai noddi diyolo’ i bandar om patayo’ i tulun do poingiyon do hiri. ⁹ Om ongoi poddi kawagu iyolo’ panangod di tulun do Kanaan di momogun-mogun do hiri’d watas do konulu-nuluan, om i hiri’d guas do nulu-nulu; om i nogi’ i momogun-mogun do hilo’d kinoiyonon dit otuu di ponong id salatan, ¹⁰ om i hilo’d bandar do Hibron, i bandar do pinungaranan do Kiriat Arba di gulu po. Om hilo’ no do naala’ di tulun do Yohuda i pinuruan do sompiiyon di Sisai, om i Ahiman om i Talmai. ¹¹ Om mantad nod hilo’d Hibron, om ngoyo’ no di tulun do Yohuda songodo’ i bandar do Dobir, i roitan do Kiriat Sipir do tontok diri. ¹² Om boros kad songulun do mantad id payat do Yohuda, i roitan dot i Kalib, ’’Isai nopo o kaala’ do Kiriat Sipir, om kakawin no di tanak ku’d tondu’, i roitan dot i Aksa,’’ ka. ¹³ Om kosolod no di Otniol i bandar diri. I Otniol nopo om tanak di tadi’ di Kalib, i roitan dot i Kinas. Om pokowinai noddi di Kalib di Otniol i Aksa. ¹⁴ Om tontok di tadau do minikawin iyolo’ om sansagai nod i Otniol i Aksa do mokianu di tapa’ dau do songkoiyonon o tumo. Om lintuhun noddi i Aksa do mantad hiri’d kaladai dau, om uhoto’ no iyau di Kalib ondung nunu o pokionuon dau. ¹⁵ Om boros kad i Aksa do suminimbar, ’’Mokianu oku daa do piro-piro o tudan do waig, tu’ iri nopo tana’ di pinatahak nu doho’ om hilo’d kinoiyonon dit otuu,’’ ka dau. Om iri noddi o kinapatahakan di Kalib di tudan do waig di hiri’d sokid om i tudan do waig di hiri’d siba’ dot id di Aksa. ¹⁶ Iri nopo sinakagon di tiwanon di Musa, i tulun do Kini diri, om tuminanud di tulun do Yohuda do suminoliwan do mantad id Yorikou, i bandar dit ogumu’ o guas do kurma, om pakayaai no diyolo’ dot id kinoiyonon dit aiso’ o sumuni, i ponong id salatan dot Arad, i hilo’d Yohuda. Om hilo’ no o pinomogun-mogunan diyolo’ dot id rolot di tulun dot Amalik. ¹⁷ Om piwoyo’ noddi i payat do Simion om i payat do Yohuda do minongoi panangod om minongoi pangala’ di tulun do Kanaan di poundorong do hilo’d bandar do Sipat. Om papalai noddi diyolo’ o bandar diri, om raago’ nogiddi diyolo’. Om pungaranai no do Horma i bandar diri. ¹⁸ - ¹⁹ Om nuhupan i’ do TUHAN i tulun do Yohuda gisom do nosolod diyolo’ i hiri’d watas do konulu-nuluan. Nga’ a’ no iyolo’ nokosolod do Gasa, om Askilon om Ikron, om i piro-piro o watas do hiri’d posorili’. Tu’ iri nopo tulun di poingiyon do hiri’d poingompus di tisan do rahat nga’ ongkikorita’- kuda’ di don sumasangod di basi’ do winonsoi. Om iri no ot a’ di tulun do Yohuda nakasaapan do monguyung diyolo’. ²⁰ Om Hibron nopo nga’ pinatahak dot id di Kalib, do tumanud di pinonuhuan di Musa. Tu’ nopo di gulu po, om nuyung di Kalib o tolu pinuruan do sompiiyon di sinakagon di Inak do mantad id bandar diri. ²¹ Om a’ i’ i payat do Binyamin nokouyung di tulun do Yobus do mantad id bandar do Yorusalim. Om gowoi poddi om poinsugku’ kasai’ po i tulun do Yobus di tulun do Binyamin do momogun-mogun do hilo’. ²² - ²³ Om ngoyo’ no di payat dot Ipraim om i payat do Manasi — i sinakagon di Yusup diri — songodo’ i bandar do Baitol, i roitan do Lus do maso’ddi. Om nuhupan i’ iyolo’d TUHAN. Om tontok di pakayaan no di piro-piro o gomponoluku’ di sinuhu’ddi do hiri’d bandar, ²⁴ om kosolowot no iyolo’d songulun o kusai di tumongkiad no di bandar. Om boros ka diyolo’ dot id dau, ’’Ondung tudukan nu iyahai’d ralan do sumuang diti bandar, om a’ i’ iyahai momonsoi’d araat dot id diya’,’’ ka. ²⁵ Om tudukai noddi di tulun iyolo’ do ralan do sumuang di bandar. Om suang noddi di bandar i tulun dot Ipraim om Manasi, om patayo’ ngai’ nopo diyolo’ i tulun do hiri. Nga’ a’ i’ diyolo’ pinatai i tulun di nosolowot diyolo’ddi om i sompiiyon dau. ²⁶ Om undaliu noddi i tulun diri do hilo’d pomogunan do tulun do Hit. Om pomonsoi no iyau dot iso’ o bandar do hilo’, om pungaranai no dau do Lus. Om iri kasai’ po o ngaran di bandar diri. ²⁷ Om a’ i’ di payat do Manasi nouyung i tulun mantad do hilo’d bandar do Bait-Sian, om Taanak, om Dor, om Yibliam, om Mogido, om i hiri’d kokompungan dit id somok. Om hilo’ kasai’ poddi i tulun do Kanaan do poingiyon. ²⁸ Nga’ di nopoddi nokokoris ko’ mantad di timpuun i’ i tulun dot Israil, om sansagai noddi diyolo’ i tulun do Kanaan do kumaraja’ dot id diyolo’. Nga’ a’ i’ diyolo’ ninsanan kopio do monguyung i tulun do Kanaan do mantad hilo’. ²⁹ Om a’ i’ di payat dot Ipraim nouyung do posoliwan i tulun do Kanaan, i tulun mantad do hiri, do mantad id bandar do Gisir. Om hilo’ kasai’ poddi i tulun do Kanaan do poingiyon, do poinsugku’ diyolo’. ³⁰ Om i tulun mantad do bandar do Kitron om Nahalol nga’ a’ i’ di payat do Sibulon nouyung do sumoliwan. Om gowoi poddi do momogun-mogun kasai’ po i bansa’d Kanaan do hilo’ do poinsugku’ diyolo’. Nga’ sinansagan i’ maddi diyolo’ i tulun do Kanaan do kumaraja’ dot id diyolo’. ³¹ Om i tulun mantad do hilo’d bandar dot Ako, Sidon, Ahlab, Aksib, Hilba, Apik om Rihob, nga’ a’ i’ di payat dot Asor nuyung do sumoliwan. ³² Om gowoi poddi om poingiyon kasai’ po i tulun do Kanaan dot id piro-piro o bandar diri do poinsugku’ di tulun dot Asor. ³³ Om i tulun mantad do hilo’d bandar do Bait-Simis om Bait-Anat nga’ a’ i’ di payat do Naptali nouyung do sumoliwan. Om poingiyon kasai’ po i tulun do Kanaan do hiri’d kabandaran diri do poinsugku’ di tulun do Naptali, nga’ sinansagan no ma diyolo’ i tulun diri do kumaraja’ dot id diyolo’. ³⁴ - ³⁵ Iri tulun dot Amori nga’ poingiyon kasai’ po do hilo’d Ayalon, om hilo’d Saalbim, om hilo’d Nuluhon do Hiris. Tu’ sinansagan diyolo’ i payat do Dan do kumaa do hiri’d watas do konulu-nuluan, om a’ i’ diyolo’ pinologos do rumuhuk do hiri’d rantai di hiri’d siba’. Nga’ poinsuang i’ ma do pomorintaan do payat dot Ipraim om payat do Manasi i tulun dot Amori, om sinansagan do kumaraja’ dot id duwo o payat diri. ³⁶ Hiri nopod ponong id utara do Sila, om wolit nopo di pomogunan dot Idom om kawaya’ di Takadon dot Akrabim.

¹ Om tongkiad no i moloikat do TUHAN do mantad hilo’d Gilgal om pakayaai no do hilo’d Bokim. Om boro-boros no iyau dot id tulun dot Israil do poingkaa, ’’Nokosoliwan ku no iyokoyu do mantad hilo’d Masir, om nakaatod ku no iyokoyu do hiti’d pomogunan di pinabatos ku dot id taki-aki dokoyu. Om nokoboros ku nogi’ o poingkaa, ’A’ ku i’ raagon i tumpongo ku dot id dokoyu. ² Om iri no ot a’ dokoyu koina-inaan do momonsoi do nunu nopo o pitoruan dot id tulun mantad do pomogunan diti. Om mositi’ nod raagon ngai’ dokoyu i pananaraban diyolo’ do porsombahan,’ kangku. Nga’ a’ i’ dokoyu winonsoi i pinonuhuan ku’ddi. Suwai ko’ pasansala’ nogi’ o winonsoi dokoyu! ³ Pokinongou kou nod dinondo! A’ ku nondo uyungon do sumoliwan iti tulun mantad do pomogunan diti do tontok do mongoi kou sangod diyolo’. Osiliu nondo iyolo’ do pisangod dokoyu om aakalan kou nondo gisom dot iyokoyu nga’ tumuku’ nondo di ponokokinorohingan diyolo’,’’ ka dau. ⁴ Om koboros poddi di moloikat i boros do miagal diri, om ihad ngai’ nopo i tulun dot Israil. ⁵ Om iri no o kinopomungaranan do kinoiyonon diri do Bokim. Om hilo’ no i tulun dot Israil do pinapatahak dot id TUHAN do porsombahan di sinumbali’. ⁶ Om kosuhu’ poddi di Yosua i tulun dot Israil do mamanau, om pamanau ngai’ noddi iyolo’ do minongoi pomogun-mogun do hiri’d tana’ di pinaangkib dot id diyolo’. ⁷ Om solinaid nopo di poimpasi po i Yosua, om sumambayang kasai’ i’ dot id TUHAN i tulun dot Israil. Om di napatai no i Yosua nga’ sumambayang kasai’ po iyolo’ dot id TUHAN do solinaid po dot i tulun di nongkokito kopio di koimayaan do winonsoi’d TUHAN dot id tulun dot Israil, o boyoon diyolo’. ⁸ Om kapatai no i Yosua i tanak di Nun, i susuhuon do TUHAN diri, di hatus om hopod o toun dau. ⁹ Om lobongo’ noddi iyau do hiri’d tana’ dau di hilo’d Timnat Sira, it id konulu-nuluan dot Ipraim, i ponong id utara do Nuluhon do Gaas. ¹⁰ Om kapatai ngai’ noddi i komolohingan, om i nopoddi i sukod wagu om a’ no kotutun do TUHAN, tu’ a’ i’ iyolo’ nokopuriman di winonsoi’d TUHAN dot id tulun dot Israil. ¹¹ - ¹⁴ Om pomonsoi nod dusa dot id TUHAN i tulun dot Israil. Om a’ noddi iyolo’ sumambayang dot id TUHAN, i Kinorohingan di taki-aki diyolo’, i Kinorohingan di pinoposoliwan diyolo’ do mantad hilo’d Masir. Om timpuun no iyolo’ do tumuku’ dot id Baal om id Astorit, om id piro-piro o ponokokinorohingan di tulun di hiri’d posorili’ diyolo’. Om kotogod noddi o TUHAN di tulun dot Israil om pologoso’ nopoddi dau o piro-piro sinompuruan do tulun do mongoi panangod diyolo’ om mongoi panakau do konunu-nunuan diyolo’, gisom dot a’ no iyolo’ kogoos do sumangod di pisangod di hiri’d posorili’ diyolo’. ¹⁵ Om pointikid-tikid do mongoi iyolo’ sangod om saapon kasai’ nopo iyolo’d TUHAN, do miagal di nokoinsan mantad do TUHAN dot id diyolo’. Om oinggorit tomod diri iyolo’. ¹⁶ Om onuwai noddi iyolo’d TUHAN do boyoon di popoidu’ diyolo’ do mantad id sinompuruan do tulun do manakau. ¹⁷ Nga’ a’ i’ di tulun dot Israil pinusou i piro-piro o boyoon diri. Om a’ i’ iyolo’ tumorodok dot id TUHAN, suwai ko’ tumuku’ nogi’ iyolo’ do tingolig. Om a’ iyolo’ minusui di kowoyo-woyoon di taki-aki diyolo’ dit obingumboyo’ do ponuhuan do TUHAN. ¹⁸ Om soira’ nopod patahak o TUHAN do boyoon dot id tulun dot Israil, om uhupan kasai’ nopo do TUHAN i boyoon diri. Om solinaid nopo do poimpasi i boyoon diri, om poiduwon no do TUHAN i tulun dot Israil do mantad id pisangod diyolo’, tu’ osianan i’ iyau diyolo’ do tontok dit orongou dau iyolo’ do songodoi-odoi poo dot ouru dot inggoriton om udiponon. ¹⁹ Nga’ apatai nopondo i boyoon diri, om rumaat no o kowoyo-woyoon di tulun dot Israil ko’ mantad di komolohingan diyolo’. Modsubak iyolo’ om tumuku’ dot id tingolig. Om guminuli’ iyolo’ di kongoubasanan dit angaraat om a’ no diyolo’ tongkiadan iri. ²⁰ Om iri no o kinatagadan kopio do TUHAN di tulun dot Israil. Om boro-boros no iyau do poingkaa, ’’Nosuhu’ ku no i taki-aki do bansa’dti do mongigit kasai’ di tumpongo ku dot id diyolo’. Nga’ naraag noddi diti bansa’ i tumpongo’ddi, tu’ tuminolibamban i’ iyolo’ do boros ku. ²¹ Om baino’ nopondo om a’ ku no uyungon o nunu nopo o bansa’d tulun di noolu’ dot id pomogunan diti do mantad di napatai i Yosua. ²² Om iri nondo bansa’ddi o maan ku’d pogumbal di bansa’d Israil, om oilaan ku indo ondung orohian i tulun dot Israil do tumanud di ponuhuan ku do miagal di taki-aki diyolo’, ko’ amu’ po,’’ ka. ²³ Om iri no ot a’ do TUHAN kinapanahakan do kamanangan dot id di Yosua do suminangod di piro-piro o bansa’ddi. Suwai ko’ pinologos nogi’ do TUHAN i piro-piro o bansa’ddi do momogun-mogun dot id pomogunan diri, om a’ i’ dau iyolo’ narau-arau do minonguyung.

¹ Om pologoso’ noddi do TUHAN o piro-piro o bansa’d tulun do miyon dot id pomogunan diri, do maan do pogumbal di tulun dot Israil dit a’ nokoumbal do pisangadan do hilo’d Kanaan. ² Om winonsoi pogi’ do TUHAN o miagal diri nga’ maan dau do ponuduk do pointikid-tikid di sukodwagu dot Israil do minsingilo do pisangadan, om okon- okon po om i tulun dit a’ insan koumbal do mongoi sangod. ³ Om iri nopo bansa’d tulun di poingiyon po kasai’ dot id pomogunan diri om: i tulun di poingiyon do hiri’d limo o bandar do Pilistin, om koinsanai di tulun do Kanaan, om Sidon, om i tulun do Howi di poingiyon do hilo’d konuluhanan do Libanon, do mantad pod hilo’d Nuluhon do Baal Hormon om gisom do korikot do hilo’d ralan di poingkaa do hilo’d Hamat. ⁴ Hilo’ pogi’ iyolo’ nga’ iyolo’ no o sumiliu’d pogumbal di tulun dot Israil. Om iyo noddi o koilo-ilo ondung tumanud i tulun dot Israil do koinsanai di ponuhuan, i pinoboros do TUHAN dot id taki-aki diyolo’ do pinolombus di Musa ko’ amu’. ⁵ Om iri no o kokuwaan do poundorong kasai’ po i tulun do Kanaan, om Hit, om Amori, om Poris, om Howi, om Yobus dot id pomogunan diri, do poinsugku’ di tulun dot Israil. ⁶ Om pogikakawin noddi i tulun dot Israil om i piro-piro o bansa’ddi. Om ponokitanud noddi i tulun dot Israil do tumuku’ di tingolig diyolo’. ⁷ Om pomonsoi po kawagu’d dusa i tulun dot Israil dot id TUHAN, i Kinorohingan diyolo’. Om nokolihu noddi kopio iyolo’ dau, gisom do tuminuku’ iyolo’ dot id tingolig do Baal om Asira. ⁸ Om kotogod no o TUHAN di tulun dot Israil, om pologoso’ nopoddi dau iyolo’ dot aala’ om oporinta’ di Raja’ Kusan Risataim, i mantad hilo’d Misopotamia, do solinaid do walu’ o toun. ⁹ Om pomolohou noddi do TUHAN i tulun dot Israil do mokitulung dau. Om patahako’ noddi do TUHAN dot id diyolo’ i Otniol do popoidu’ diyolo’. (I Otniol nopo om tanak di Kinas, i tadi’ di Kalib). ¹⁰ Om porintao’ noddi i Otniol do Rusod do TUHAN, om kosiliu noddi iyau do boyoon di tulun dot Israil. Om ongoi no iyau sangod, om onuwai no iyau’d TUHAN do kamanangan do suminangod di raja’ do Misopotamia. ¹¹ Om osimbayan noddi o pomogunan diri do solinaid dot apat nohopod o toun. Om kapatai noddi i Otniol. ¹² Om pomonsoi po kawagu’d dusa dot id TUHAN i tulun dot Israil. Om pokoriso’ noddi do TUHAN i Iglon, i raja’ do Muab, gisom dot okoris iyau ko’ mantad di tulun dot Israil. ¹³ Om sokodung no i Iglon di tulun dot Amon om Amalik, om kaala’ noddi i tulun dot Israil. Om kosolod no dau o Yorikou, i bandar dot ogumu’ o guas do kurma. ¹⁴ Om hopod om walu’ o toun di tulun dot Israil do porintaon di Iglon. ¹⁵ Nga’ tontok di luminohou o tulun dot Israil do TUHAN do minokiuhup dau, om porikoto’ no dau dot id diyolo’ i Ihud do popoidu’ diyolo’. I Ihud nopoddi nga’ golibang; om iyau nopo om tanak di Gira, i mantad id payat do Binyamin. Om i Ihud no o popiatod di patahakon do tulun dot Israil dot id di Raja’ Iglon. ¹⁶ Insan o tadau om pomonsoi no i Ihud dot iso’ o gayang. Om iri nopo gayang diri nga’ miampaping nopo o tarom, om oruhai nod satanga mito o konoruo’: Om obilo’ no di Ihud i gayang diri do ponong id wanan, do pinasaalom di pakayan dau. ¹⁷ Om ngoyo’ nogiddi dau patahako’ dot id di Iglon i patahakon do mantad id tulun dot Israil. I Iglon nopoddi nga’ olombon kopio. ¹⁸ Om katahak poddi di Ihud iri, om suhuo’ ngai’ no dau i tulun di minanaan di tamas diri do minuli’. ¹⁹ - ²⁰ Nga’ soira’ddi nokorikot iyolo’ do hilo’d kowotuan di kinikiran, it id somok do Gilgal, om undorong no iyau. Om poguliai no dau dot id di Iglon, i hiri’d bilik dot osogit do maso’ddi, it id sawat kopio di walai dau di don raja’. Om boros ka di Ihud dot id di Iglon, ’’Oi Tuan Raja’! Haro o poboroson ku diya’ dit a’ koino-ino’d haro o wokon do korongou!’’ ka dau. Om suhuo’ ngai’ no di raja’ i susuhuon dau do sumoliwan. Om iri poddi raja’ om i Ihud o hiri. Om insomok no i Ihud di raja’ di poirikau, om boro-boros no iyau do poingkaa, ’’Haro o boros do Kinorohingan do bagi diya’!’’ ka dau. Om korongou poddi di raja’ ot iyo’ddi, om ingkakat no iyau. ²¹ - ²² Om olomus nopo i Ihud do minongodong di gayang dau, i poingabil dau do ponong id wanan, dot i longon dau’d gibang o pinongodong. Om potoboko’ no dau i gayang do gisom do nakaralom tomod do hiri’d tian di raja’. Om katanom nopo i gayang, tu’ iri piya tulu nga’ nakatanom i’ do hiri’d lunok do tian di raja’, om gisom do nokolopuson do hiri’d likud. Om pologoso’ nopo di Ihud i gayang do poingiyo’ddi, ²³ om soliwan nogiddi iyau. Om tabanai noddi dau om ontiilai dau i bilik diri. ²⁴ Om pamanau noddi iyau. Om tontok di minongoi’d hiri i susuhuon di raja’, om nokito diyolo’ do poontiil ngai’ i wawayaan di bilik, om ondos daa diyolo’ om hiri kasai’ po i raja’, nga’ gisom i’ om minongoi pagawas. ²⁵ Nga’ alaid nopoddi kopio iyolo’ do poingandad om a’ iddi di raja’ niwangan i wawayaan, om ngoyo’ no diyolo’ i kunsi’ om iwangai no i wawayaan. Om poingiliu no do hiri’d siliu i raja’ diyolo’ do napatai. ²⁶ Om di nopo daamot diyolo’ do poingandad om nokopoggidu’ no i Ihud do hilo’d Soira, do minaya’ di kowotuan do kinikiran. ²⁷ Om korikot poddi iyau do hilo’d konulu-nuluan dot Ipraim, om pounio’ no dau i torumpit do pomolohou di tulun dot Israil do mongoi sangod. Om rikot ngai’ no iyolo’. Om iyau no o boyoon diyolo’ do ruminuhuk do mantad hiri’d konulu-nuluan. ²⁸ Om boros ka dau dot id diyolo’, ’’Tanud kou doho’, tu’ naala’ nod TUHAN i tulun do Muab, i pisangod dokoyu’ddi tu’ minongobi’ iyau dokoyu,’’ ka. Om ruhuk ngai’ noddi i tulun dot Israil di konulu-nuluan. Om kosolod no diyolo’ i sosoborongon di tulun do Muab do hilo’d Bawang do Yordan. Om iso’ po di pisangod nga’ aiso’ no o pinologos do suminoborong. ²⁹ Om id suang nopod pinisangadan diri om haro i’ o hopod noribu soudor do Muab dit ongosiou kopio do pinatai diyolo’; om iso’ po nga’ aiso’ no o napasi. ³⁰ Om tontok nod tadau’ddi do naala’ dot Israil o Muab. Om osimbayan noddi o pomogunan diri do solinaid do walu’ nohopod o toun. ³¹ Om iri no boyoon do suminusuhut om i Samgar i tanak di Anat. Om iyau nga’ pinopoidu’ nogi’ do tulun dot Israil. Iri no i kayu do pomimikot do sapi’ o pinamatai dau dot onom nahatus o tulun do Pilistin.

¹ Om tontok di napatai i Ihud, om pomonsoi po kawagu’d dusa dot id TUHAN i tulun dot Israil. ² Om pologoso’ nopoddi do TUHAN iyolo’ do naala’ di Yabin, i raja’ do Kanaan di poingiyon do hilo’d bandar do Hasor. Om boyoon nopo di soudor dau nga’ i Sisora, i poingiyon do hilo’d Harosit Hagoyim. ³ I Yabin nopoddi nga’ kikorita’-kuda’ di don sumasangod, do basi’ do winonsoi, do siam nahatus o kogumuo’. Om duwo nohopod o toun dau do momorinta’ di tulun dot Israil dot araat tomod o pomomorinta’. Om pomolohou noddi do TUHAN i tulun dot Israil do mokitulung dau. ⁴ Boyoon nopod tulun dot Israil do tontok diri om songulun o nabi do roitan dot i Dibora, i sawo di Lapidot. ⁵ Om koubasan nod i Dibora do mirikau dot id sahau di guas do kurma, it id piolitan do Rama om Baitol, i hilo’d watas do konulu-nuluan dot Ipraim. Om hiri no o rikoton di tulun dot Israil do mongoi pokinosihat dau. ⁶ Insan tadau, om ponuhu’ no iyau’d tulun do minongoi pomolohou di Barak, i tanak di Abinoam, do mantad hilo’d bandar do Kidis, it id watas do Naptali. Om boros kaddi dau dot id di Barak, ’’Iti no o ponuhuan do TUHAN, i Kinorohingan dot Israil dot id diya’, ’Monimung nod hopod noribu o tongokusai do mantad id payat do Naptali om Sibulon, om woyoon no iyolo’ do mongoi’d hilo’d Nuluhon do Tabor. ⁷ Om suhuon ku nogindo i Sisora, i boyoon do soudor di Yabin, do mongoi sangod dokoyu do hilo’d Bawang do Kison, do miwoyo’ di soudor om korita’-kuda’ dau di don sumasangod. Nga’ onuan ku i’ iyokoyu do kamanangan dot id pisangadan diti,’ ka,’’ ka dau. ⁸ Om boros kad i Barak dot id di Dibora, ’’Ondung moyo’ ko iya’, om mongoi oku i’. Nga’ ondung amu’, om iyoho’ nga’ a’ i’ mongoi,’’ ka dau. ⁹ Om boros ka di Dibora do suminimbar, ’’Moyo’ oku i’! Nga’ sorohon no, dot okon indo ko’ iya’ o kaanu’d kobontugan. Tu’ tondu’ i’ o pakayon do TUHAN do mangala’ di Sisora,’’ ka dau. Om pamanau no i Dibora do miniwoyo’ di Barak do minongoi’d hilo’d Kidis. ¹⁰ Om lohowo’ nod i Barak i payat do Sibulon om i payat do Naptali do minongoi’d hilo’d Kidis. Om kogumuon nopod tulun do tuminanud di Barak om i Dibora do tontok diri om hopod noribu o tulun. ¹¹ Om tontok nopoddi nga’ tuminongkiad i Hibir, i tulun do Kini, do mantad id bansa’ dau. (Iri nopo bansa’d Kini om sinakagon di Hobab, i tipagon di Musa.) I Hibir nopodti nga’ minongoi pomukiim do hiri’d somok di koguasan do kayu di roitan do tarbantin do hilo’d Saanaim, it a’ i’ osodu’ no do mantad hilo’d Kidis. ¹² Om korongou nopoddi i Sisora do nokoongoi no i Barak do hiri’d Nuluhon do Tabor, ¹³ om timungo’ no dau i siam nahatus o korita’-kuda’ dau do don sumasangod, i basi’ do winonsoi, om tinimung dau o koinsanai di soudor dau. Om suhuo’ no dau iyolo’ do mamanau do mantad hilo’d Harosit Hagoyim do kumaa do hilo’d Bawang do Kison. ¹⁴ Om boros kaddi di Dibora dot id di Barak, ’’Kono, mamanau! TUHAN i’ o momoyo’ diya’. Om tadau nod baino’ dot onuan ko dau do kamanangan do sumangod di Sisora,’’ ka. Om ruhuk noddi i Barak di Nuluhon do Tabor do miwoyo’ di hopod noribu o tulun dau, ¹⁵ om ngoyo’ no diyolo’ songodo’ i Sisora. Om gangaho’ noddi do TUHAN o koinsanai di soudor di Sisora om i korita’-kuda’ dau do don sumasangod, gisom do lintuhun nopo i Sisora do mantad hiri’d korita’-kuda’ dau, om pamanaho’ nopoddi dau do minogidu’. ¹⁶ Om gusao’ nod i Barak i korita’-kuda’ di don sumasangod om i soudor do pisangod diri, do gisom do nokorikot do hilo’d Harosit Hagoyim. Om patayo’ ngai’ nopoddi dau i soudor di Sisora; om iso’ po nga’ aiso’ no o pinologos do poimpasi. ¹⁷ Om daamot nopoddi nga’ nokoongoi no i Sisora do hiri’d kiim di Yail, i sawo di Hibir, i tulun do Kini, tu’ i Raja’ Yabin nopo, i mantad hilo’d Hasor diri om tambalut di sompiiyon di Hibir. ¹⁸ Om soira’ di ruminikot i Sisora, om ngoyo’ no iyau di Yail ropoho’, om boro-boros no iyau do poingkaa, ’’Kono oi Tuan, suang nopo diti kiim ku; kada’ poddosi,’’ ka dau. Om suang noddi i Sisora di kiim, om lisoko’ no iyau di Yail do hiri’d dotirung di tabir. ¹⁹ Om boros ka di Sisora dot id di Yail, ’’Onuwai oku daa diya’ do waig dot ongokooro’ dot inumon ku, tu’ tuuhan oku,’’ ka dau. Om ukabai nod i Yail i kantung do kulit, i poiiyanan do susu. Om koonuwai poddi dau i Sisora do tinumon om polisoko’ no kawagu dau i Sisora do hiri’d dotirung di tabir. ²⁰ Om boros kad i Sisora dot id di Yail, ’’Ongoi ingkakat do hilo’d wawayaan diti kiim. Om haro nopo o tulun do rumikot do monguhot diya’ ondung haro o tulun do hiti, om poboroson no dot aiso’,’’ ka dau. ²¹ Om nohuyan no kopio i Sisora om siodop tomod diri iyau. Om koodop noddi iyau gisom do nokoolong tomod. Om ongoi no i Yail panganu do dunsul do basi’ om iso’ o papak do kiim. Om pomirulan-rulan noddi iyau do minongoi insomok di Sisora, om papapako’ nogiddi dau i papak do hiri’d poriling di Sisora, do gisom do nokolopuson do hiri’d tana’. Om iyo noddi o pinamatai di Yail di Sisora. ²² Om soira’ddi ruminikot i Barak do minongoi pogihum di Sisora, om ngoyo’ no iyau di Yail ropoho’ om boro-boros no iyau, ’’Kaino pogi’, om potudukon ku i’ diya’ i tulun dit ihumon nu,’’ ka dau. Om suang noddi i Barak do minoyo’ di Yail, om kokito no dau do napatai no i Sisora, do poingiliu’d hiri’d tana’, om poimpapak i papak do kiim do hiri’d poriling dau. ²³ Om tontok nod tadau’ddi do nonuan do TUHAN do kamanangan i tulun dot Israil do suminangod di Yabin, i raja’ do Kanaan. ²⁴ Om maid-laid nga’ moris-koris i tulun dot Israil do sumaap di raja’, gisom dot alaid nopoddi om kapatai no diyolo’ i raja’.

¹ Om tontok nod tadau’ddi do minodsinding i Dibora om i Barak, i tanak di Abinoam, diti sinding do poingkaa: ² Royohon no o TUHAN! Iso-iso’ no kopio o ginawo di tulun dot Israil do sumaap; agaan nopo o ginawo di tulun do minongoi sangod. ³ Pokinongou kou no, oi koinsanai’d raja’! Pokinongou kou no, oi koinsanai’d pomorinta’! Modsinding oku, om pouni oku’d tuunion dot id Kinorohingan dot Israil, i TUHAN. ⁴ Oi TUHAN, tontok di tuminongkiad ko di konuluhanan do Soir, om tontok di suminoliwan ko do pomogunan dot Idom, om gogor nopo iti tana’, om sondot no o rasam do mantad hilo’d tawan. Om kasaug nopo o waig do mantad hilo’d haun. ⁵ Guminogor ngai’ o nuluhon dot id toguang do TUHAN do Sinai, id toguang do TUHAN, i Kinorohingan dot Israil. ⁶ Tontok di poimpasi po i Samgar, i tanak di Anat, om di poimpasi po i Yail om aiso’ no o tulun do monompogunan do maya’ di pomogunan, om aiso’ o tulun do mimpanau do hiri’d ralan magayo. ⁷ Nopogiiduan i kabandaran dot Israil, oi Dibora. Ongoingou nopo, dit a’ ko po nokorikot do suminiliu’d tina’ do tulun dot Israil. ⁸ Haro’ddi o pisangadan do hiri’d pomogunan do tontok di tuminuku’ i tulun dot Israil do ponokokinorohingan do suwai. Iso’ po nga’ aiso’ no o kikolid ko’ kitandus, dot id pogialatan dit apat nohopod noribu o tulun do hilo’d Israil. ⁹ Id boyoon pod soudor dot Israil o ginawo ku, id tulun dit angagaan o ginawo do minongoi sangod. Royohon no o TUHAN! ¹⁰ Iyokoyu i poinsakai’d kaladai dot opurak, iyokoyu i poirikau dot id tirikohonon dit osonong, om iyokoyu ngai’ nogi’ i mamanau’d gakod do hinonggo nopo o pakayaan. Popimboroso’ no dokoyu o kinamanangan diri. ¹¹ Pokinongou pogi’! Ohiyo i tulun dot ogumu’ do posorili’ di torobong do popinsusui’d kinamanangan di pinatahak do TUHAN dot id tulun dot Israil! Om pamanau ngai’ noddi do ruminuhuk i tulun do songonuon do TUHAN do mantad id kabandaran diyolo’ do kuminaa do hiri’d wawayaan do bandar. ¹² Ingkakat no, oi Dibora, ingkakat no! Pamanau nod momoyo’, om modsinding no, ingkakat no, oi Barak i tanak di Abinoam, gayato’ no o tulun di naala’ nu! ¹³ Om rikot noddi i tulun dit ongotorodok dot id boyoon diyolo’, ruminikot i tulun di songonuon do TUHAN dot id dau do posodia’ nod mongoi sangod. ¹⁴ Hilo’d Ipraim o tadon diyolo’ do ruminuhuk do hiri’d rantai, do muhut-suhut di payat do Binyamin. Ruminuhuk ngai’ i boyoon do soudor do mantad hilo’d Makir, om ruminuhuk ngai’ i woyo-woyoon do soudor do mantad hilo’d Sibulon. ¹⁵ Ruminikot ngai’ i boyoon dot Isakar do tuminanud di Dibora, ruminikot i Isakar, om i Barak nga’ ruminikot nogi’, om tuminanud iyolo’ dau do gisom do nokorikot do hiri’d rantai. Nga’ mogisuwai-suwai ot osorou di payat do Rubin; a’ iyolo’ milo do poboros ondung mongoi tuu ko’ amu’. ¹⁶ Nokuro tu’ minundorong iyolo’ dot id pogialatan di dumba’? Orohian no tuu iyolo’ do mokinongou di gompomogompi’d dumba’ do momolohou di dumba’ diyolo’? Otopot no kopio do mogisuwai-suwai ot osorou di payat do Rubin, a’ iyolo’ milo’d poboros ondung mongoi tuu ko’ amu’ po. ¹⁷ Iri nopo payat do Gad om minundorong do hilo’d ponong id koulayon do mantad id Yordan, om minundorong i payat do Dan do hiri’d somok di kapal do rahat dot ogumu’. Om minundorong i payat dot Asor do hiri’d tisan do rahat; minundorong iyolo’ do hiri’d tisan di suok do rahat. ¹⁸ Nga’ iri nopo payat do Sibulon om i payat do Naptali om a’ no minomusorou do koposion do tinan diyolo’ do monokisangod dot id pisangadan. ¹⁹ Hilo’ nod Taanak, it id somok di bawang do Mogido, do minogisasangod i raja’; suminangod i raja’ do Kanaan, nga’ a’ i’ iyolo’ minononggoi’d pirok. ²⁰ Iri rombituon do hilo’d tawan nga’ suminaap i’; sinangod diyolo’ i Sisora, do tontok di duminarapas iyolo’d tawan. ²¹ Norulun iyolo’ do luyud di bawang do Kison — i bawang do Kison dit ologod. Mamanau oku po, om tumilombus oku pod mamanau do mikuwo’d kokorisan! ²² Om rikot no i kuda’ dot ongosiau tomod olotung poo o tana’ dot oulakan di sondulu di kuda’. ²³ ’’Usungon no i Miros,’’ ka di moloikat do TUHAN, ’’Usungon no i tulun di poingiyon do hilo’. Tu’ a’ iyolo’ minongoi uhup do TUHAN, do miagal do gunsiou,’’ ka dau. ²⁴ Olumaag ko no, oi Yail, i sawo di Hibir, i tulun do Kini, olumaag ko no dot id pogialatan do koinsanai’d tongoondu’ di poingiyon dot id kokiiman. ²⁵ Minokianu i Sisora do waig, nga’ nonuan nogi’ dau iyau do susu; nonuan dau iyau do susu di kilunok dot id suang do sangkir dit olumis. ²⁶ Om iso’ nopod longon dau nga’ kiinigit do papak; om iri no longon dau’d tiso’ om kiinigit do dunsul do basi’; dinunsul di Yail o tulu di Sisora do gisom do nababak; linopuson dau do mamapak o tulu di Sisora. ²⁷ Nohunduk iyau, om aiso’ no o ginawo dot id toning do gakod di Yail. Poingiliu po iyau do hiri’d tana’ tu’ napatai no! ²⁸ Luminiga’ i tina’ di Sisora do hiri’d liligaon; poingontong po iyau do mantad hiri’d tinimpusod. ’’Nokuro tu’ alaid kopio do korikot i korita’-kuda’ — Nokuro tu’ ongogonoi kopio o kuda’ dau?’’ ka dau do minuhot. ²⁹ Om simbar no dau i susuhuon dau’d tongoondu’ dit angapandai, nga’ piguli-guli’ po dau do mimboros dot id suang do ginawo dau o poingkaa, ³⁰ ’’Maso po diyolo’d mogihum do konunu-nunuan dit onuon om pogiduwo-duwoon, iso’ ko’ duwo o sumandak dot aanu do pointikid-tikid do soudor, om kain dit agayo o gatang do patahakon di Sisora, om kulabai di rinindaan do mogisuayan o patahakon di sawo do raja’,’’ ka. ³¹ Angapatai po daa o koinsanai di pisangod nu do miagal di Sisora, oi TUHAN, nga’ iri nopo tambalut nu om mulinau i’ do miagal di tadau! Om osimbayan noddi o hiri’d pomogunan diri do solinaid dot apat nohopod o toun.

¹ Om pomonsoi po kawagu’d dusa dot id TUHAN o tulun dot Israil. Om pologoso’ nopoddi do Kinorohingan o tulun do Midian do momorinta’ diyolo’ do solinaid do turu’ o toun. ² Om iri nopo tulun do Midian nga’ ongokoris po ko’ mantad di tulun dot Israil, gisom do mongoi po i tulun dot Israil lisok do hiri’d koluang-luangan do pampang om hiri’d kinoiyonon do suwai dit aiso’ o ligogon do hiri’d konulu-nuluan. ³ Om soira’ nopod mananom-tanom o tulun dot Israil, om rumikot no i tulun do Midian do miwoyo’ di tulun dot Amalik om i tulun di mantad hiri’d kowotuan do mongoi panangod diyolo’. ⁴ Om momukiim no i tulun diri do hiri’d pomogunan dot Israil om pingraagon no diyolo’ i tanom-tanom do hiri, om gisom do korikot do hiri’d watas di posorili’ do Gasa, i ponong id salatan. Om tanggayan ngai’ nopo diyolo’ i tayam-tayam do tulun dot Israil, dot i dumba’, om i sapi’, om i kaladai diyolo’. Om aiso’ no o tongosonginan piya do pooluon gisom dot aiso’ no o kaakan-akanan di tulun dot Israil. ⁵ Soira’ nopod rumikot iyolo’ om mogitonggoi-tonggoi nopo iyolo’ dit unta om kiim diyolo’ dit ogumu’ tomod, om a’ no ointob o kogumuo’. Om rumikot iyolo’ do mongoi pamaraag di pomogunan diri. ⁶ Om aiso’ no o pokukurayan di tulun dot Israil do sumaap diyolo’. ⁷ Om pomolohou noddi do TUHAN i tulun dot Israil, do mokitulung dau do sumaap di tulun do Midian. ⁸ Om ponuhu’ no o TUHAN do songulun o nabi do ruminikot dot id diyolo’. Om boros ka di nabi, ’’Poingkaa o boros do TUHAN, i Kinorohingan dot Israil, ’Pinoidu’ ku iyokoyu do mantad id ponguripanan do hilo’d Masir. ⁹ Om pinasi ku iyokoyu do mantad id tulun do Masir om mantad id tulun di minanangod dokoyu di poingiyon do hiti’d pomogunan diti. Om nuyung ku nogi’ iyolo’ do mantad id pomogunan diti di minongoi kou sangod diyolo’, om patahako’ ku noddi dokoyu iti pomogunan diyolo’. ¹⁰ Om nokoboros ku no dot id dokoyu dot iyoho’ no o TUHAN, i Kinorohingan dokoyu, om a’ kou koino-ino do tumuku’ dot id ponokokinorohingan do tulun dot Amori, i sanganu daa diti pomogunan do tiyonon dokoyu’d baino’. Nga’ a’ kou i’ minumboyo’ di boros ku,’ ka,’’ ka dau. ¹¹ Insan tadau om rikot no o moloikat do TUHAN do hilo’d kawalayan dot Opra, om irikau no do hiri’d sahau do guas do kayu di roitan do tarbantin. Sanganu nopo di kayu do tarbantin diri om i Yoas, i mantad id pinuruan do sompiiyon di Abiosor. Iri nopo tanak di Yoas, i roitan dot i Gidion, om maso do momogomos do gandum do hiri’d pamagaan dot anggur. Om poillisok-lisok iyau do momogomos tu’ ooris dot okito di tulun do Midian. ¹² Om rikot no i moloikat do TUHAN dot id di Gidion om boro-boros nod poingkaa, ’’Oi tanakwagu dit osiou om okoris! Moyo-woyo’ i’ o TUHAN diya’!’’ ka. ¹³ Om boros kad i Gidion, ’’Oi Tuan, koino-ino oku id muhot? Ondung otopot do moyo-woyo’ o TUHAN dahai, om nokuro’ddi tu’ oontok iyahai do miagal diti? Honggo ngai’ noddi i koimayaan di noumbalan do TUHAN do minomonsoi di gulu po, i pininsusui di taki-aki dahai do pasal do karalan-ralano’d TUHAN do pinoposoliwan diyolo’ do mantad hilo’d Masir? Nga’ baino’ nopoddi om notongkiadan no iyahai’d TUHAN om pologoson tomod nopoddi iyahai do porintaon dilo tulun do Midian,’’ ka dau. ¹⁴ Om suhuo’ noddi do TUHAN i Gidion, boros ka dau, ’’Oi-oiyon no o kinoris nu om ngoyon i’ poiduwo’ iti tulun dot Israil do mantad id pomorintaan do tulun do Midian. Tu’ iyoho’ i’ o monuhu’ diya’,’’ ka. ¹⁵ Om boros kad i Gidion do suminimbar, ’’Nokuro tu’ iyoho’, oi TUHAN? Poingkuro oku daa’d poidu’ do tulun dot Israil do mantad id pomorintaan do tulun do Midian? Tu’ id suang nopod payat do Manasi om pinuruan nod sompiiyon ku ot oluhoi kopio. Om id suang nopod sompiiyon ku om iyoho’ no kopio it aiso’ o ngaran-ngaran,’’ ka dau. ¹⁶ Om boros kad TUHAN do suminimbar, ’’Atantu’ no do milo ko i’ do poidu’! Tu’ iyoho’ i’ o monguhup diya’. A’ ko i’ osusa’ do mangala’ di tulun do Midian tu’ iyo nod sumaap ko dot iso’ o tulun,’’ ka. ¹⁷ Om boros kad i Gidion do suminimbar, ’’Ondung kohubayaan kopio oku diya’, om onuwai oku daa do tanda’ do pongilaan ku ondung TUHAN kopio o minoro-boros dot id doho’. ¹⁸ Om kada’ po daa tongkiad dot a’ ku po iya’ osurungan do porsombahan do taakanon,’’ ka dau. Om boros kad TUHAN do suminimbar, ’’Hiti oku i’ do gisom pod koguli’ ko,’’ ka. ¹⁹ Om uli’ no i Gidion om pogonsok no iyau do songinan o kambing dit okoro’ po, om ongoi iyau panganu do tapung do hopod o kilogram, om pomonsoi nogiddi iyau do roti dit a’ rinalatan do pangambang. Om posuango’ noddi dau i tikanas dot id balatak, om posuango’ dau dot id lansang i waig di tikanas. Om igitai ngai’ nopo dau iri om posurungo’ no dot id moloikat do TUHAN di poingandad do hiri’d sahau di kayu do roitan do tarbantin. ²⁰ Om boros ka di moloikat do TUHAN, ’’Poiliho’ ino tikanas om ino roti do hiti’d sakai diti watu, om potunguhon nod hiti ino waig di tikanas,’’ ka. Om wonsoyo’ nod Gidion i pinonuhuan diri. ²¹ Om poroloyo’ nod TUHAN o longon dau, om potuduwo’ no dau di tikanas om i roti i tompok di kayu di poingigit dau. Om sikitai nopoddi i watu. Om kosorob nopoddi i tikanas om i roti. Om a’ noddi nokitanan i moloikat. ²² Om kopurimanai noddi di Gidion do moloikat kopio id TUHAN i ruminikot dot id dau. Om ooris tomod diri i Gidion, om boros ka dau, ’’Obungou oku no, oi TUHAN it Asawat Kopio! Tu’ nokotimbaba’ kopio oku i’ di moloikat nu!’’ ka. ²³ Nga’ boros kad TUHAN dot id dau, ’’Kada’ katangkabo! Kada’ poddosi. Tu’ a’ ko i’ apatai,’’ ka. ²⁴ Om pomonsoi noddi i Gidion dot iso’ o pananaraban do porsombahan do hiri om pungaranai no dau iri do ’’TUHAN o Tadon do Kosimbayanan’’. Om hino kasai’ po i pananaraban do porsombahan diri do hilo’d Opra, i hiri’d kawalayan do pinuruan do sompiiyon di Abiosor do gisom do baino’. ²⁵ Om boro-boros no o TUHAN dot id di Gidion do tontok do totuong diri, do poingkaa, ’’Ongoi di sapi’ do tontoluhan di tapa’ nu, i sapi’ di turu’ no o toun do tumur. Om raagon no i pananaraban do porsombahan di winonsoi di tapa’ nu dot id Baal, om habaon ngai’ i torigi di panakatanda’ di Asira, i ponokokinorohingan diri, it id sampaping di pananaraban do porsombahan. ²⁶ Om wansayan nod pananaraban do porsombahan dit osonong o pomomonsoi, o hiri’d kinotimungon di rinaag. Om sorobon nondo i sapi’ do tontoluhan diri, do songkoyuon nopod monorob, om a’ i’ popoton, do maan do porsombahan dot id TUHAN. Om maan nopod pogudung om i torigi di panakatanda’ dot Asira, i ponokokinorohingan diri di hinaba’ nu,’’ ka dau. ²⁷ Om angatai nod i Gidion o hopod di susuhuon dau om ngoyo’ no dau wonsoyo’ i pinonuhuan do TUHAN dot id dau. Nga’ a’ i’ iyau nakasaap do momonsoi’ddi do dangadau tu’ ooris iyau di sompiiyon dau om i tulun do hiri’d kawalayan. Om dongotuong diri do winonsoi dau. ²⁸ Om soira’ddi nongkotungag i tulun do hiri’d kawalayan di kosuabon, om kokito no diyolo’ do nangahaba’ no i pananaraban do porsombahan dot id Baal om i torigi do panakatanda’ dot Asira, i ponokokinorohingan diyolo’. Om nokito nogi’ diyolo’ do nawansayan nod pananaraban do porsombahan o hiri’d kinoiyonon diri, om napanaraban nod songinan o sapi’ do tontoluhan, do numaan do porsombahan di sinumbali’. ²⁹ Om pogiuhot-uhot noddi iyolo’ do poingkaa, ’’Isai kopio o minomonsoi’dti?’’ ka no diyolo’. Om kopinguhot poddi, om koilaai nogi’ diyolo’ dot i Gidion, i tanak di Yoas o minomonsoi’ddi. ³⁰ Om boros kaddi diyolo’ dot id di Yoas, ’’Rinaag di tanak nu i pananaraban do porsombahan dot id Baal om hinaba’ i torigi do panakatanda’ dot Asira, i ponokokinorohingan, it id sampaping di pananaraban do porsombahan diri. Posoliwano’ pogi’ i tanak nu’d hiti, om apatai i’ dahai iyau!’’ ka. ³¹ Nga’ boros kad i Yoas do suminimbar di tulun di sumaap dau, ’’Sumokodung kou’d Baal? Obian dokoyu o Baal? Isai nopo i sumokodung do Baal, om patayon nod baino’! Ondung kinorohingan kopio i Baal, om pologoson nopo iyau do mongintirung do tinan dau, tu’ dau i’ di pananaraban do porsombahan di rinaag,’’ ka dau. ³² Tu’ boros kad i Yoas, ’’Pologoson nopo dot i Baal o mimpori-pori do sumaap di Gidion, tu’ naraag nod Gidion i pananaraban do porsombahan dot id Baal,’’ ka dau. Om mantad poddi om i Yorubaal no o pinomungaran do tulun di Gidion. ³³ Om tontok nopoddi nga’ nokotimung ngai’ no i tulun do Midian om Amalik, om i piro-piro o payat do tulun do mantad hilo’d tana’ do kowotuan di ponong id koulayon do mantad id Yordan. Om soborong no iyolo’ di Bawang do Yordan, om pomukiim no do hiri’d Rantai do Yisriil. ³⁴ Nga’ porintao’ no i Gidion do Rusod do TUHAN, gisom do pinopouni iyau do torumpit do pomolohou di tulun dot id suang do pinuruan do sompiiyon di Abiosor do rumikot do mongoi sokodung dau. ³⁵ Om minonuhu’ nogi’ iyau’d tulun do minongoi’d hiri’d payat dot Asor, om payat do Sibulon om payat do Naptali om hilo’d watas do Manasi di ponong id koulayon do mantad id Bawang do Yordan. Om iyolo’ nga’ ruminikot ngai’ do minongoi tanud dau. ³⁶ Om boros kaddi di Gidion dot id Kinorohingan, ’’Oi TUHAN, nokoboros nu no dot iyoho’ o pakayon nu do popoidu’ do tulun dot Israil. ³⁷ Om nokoiliu ku no o hulu’d dumba’ do hiti’d tana’, it iyonon kasai’ dahai do momogomos do gandum. Om ondung iri no hulu’d dumba’ ot oyopos do bolobou do kosuabon do suab, om iri no o kointalangan kopio do pakayon oku diya’ do popoidu’ do tulun dot Israil,’’ ka dau. ³⁸ Om kosiliu noddi o miagal diri. Di nopoddi nokotungag i Gidion di kosuabon, om pagao’ no dau i hulu’d dumba’, om samangkuk nopo o waig do napaga’ do mantad hiri. ³⁹ Om boros kaddi dau dot id Kinorohingan, ’’Oi TUHAN, kada’ kotogod do moro-boros oku piya kawagu. Potumboyoo’ oku nod mongilo kawagu dot iti hulu’d dumba’ o pongilaan ku. Nga’ baino’ nopo om iti nopo hulu’d dumba’ ot otuu, nga’ oyopos indo i tana’,’’ ka. ⁴⁰ Om wonsoyo’ nod Kinorohingan i pinokianu di Gidion do tontok do totuong diri. Om kosuabon noddi om otuu kopio i’ i hulu’d dumba’, nga’ iri nopo tana’ om noyopos i’ do bolobou.

¹ Insan tadau dit osuab po om tungag no i Gidion om koinsanai di tulun di tumatanud dau, om ongoi no iyolo’ pomukiim do hiri’d toning di tudan do waig do Harod. Iri nopo pinomukiiman di tulun do Midian nga’ ponong id utara diyolo’, hiri’d rantai dit id somok do Nulu-Nulu do Mori. ² Om boros kad TUHAN dot id di Gidion, ’’Adalaan kopio kogumu’ ino tulun do manud-tanud diya’. Om a’ oku i’ milo’d manahak diyolo’d kamanangan do sumangod di tulun do Midian, tu’ momusorou dotindo iyolo’ do nakamanang-manangan nopo diyolo’ om mantad i’ do kokoriso’ diyolo’, om a’ indo iyolo’ mamarayou doho’. ³ Om poboroson no o poingkaa dot id tulun di manud-tanud diya’, ’Isai nopo i moddosi, om mositi’ nod tumongkiad diti Nuluhon do Giliad, om gumuli’ nopo do hilo’d walai dau,’ kanto,’’ ka dau. Om uli’ no o duwo nohopod om duwo noribu di tulun; om hopod poddi noribu o tulun do noolu’. ⁴ Om boro-boros po kawagu o TUHAN dot id di Gidion do poingkaa, ’’Adalaan po kasai’ kogumu’ ilo tulun do manud-tanud diya’. Om angatan no iyolo’ do hilo’d kinoiyonon di kiwaig. Om sompipion ku nogindo diya’ iyolo’. Ondung otuduk ku o tiso’ o tulun do tumanud diya’, om mositi’ nod tumanud iyau. Nga’ ondung otuduk ku o tiso’ tulun dot a’ koino-ino do tumanud diya’, om a’ no iyau koino-ino do tumanud,’’ ka. ⁵ Om angatai ngai’ nod Gidion i tulun do minongoi’d hiri’d kinoiyonon di kiwaig. Om boro-boros noddi o TUHAN dot id di Gidion do poingkaa, ’’Iri nopo tulun di poingkakat do minum dot iyo di ponginginum do tasu tu’ silaan, om posuwai-suwayon no do mantad id tulun di motud do minum,’’ ka dau. ⁶ Om iri nopo tulun di miningkakat do mininum, do tinimbauk do palad i waig om sinilaan do minonginum, om tolu nahatus o tulun; om iri ngai’ nopo i suwai om songingotud do mininum. ⁷ Om boros kaddi do TUHAN dot id di Gidion, ’’Iri no tolu nahatus o tulun, i poingkakat do mininum, o pakayon ku do popoidu’ dokoyu om pakayon ku do manahak do kamanangan dot id diya’ do sumangod di tulun do Midian. Suhuon ngai’ nopo i tulun do suwai do muli’,’’ ka dau. ⁸ Om suhuo’ ngai’ noddi di Gidion i tulun dot Israil di suwai do minuli’; noolu’ nopo om iri po i tolu nahatus o tulun. Nga’ pinoiliu ngai’ i’ diyolo’ i kokoriu om i torumpit diyolo’. Om iri nopo kokiiman di tulun do Midian nga’ hiri’d rantai dit id dosibaan diyolo’. ⁹ Om boro-boros no o TUHAN dot id di Gidion do tontok do totuong diri do poingkaa, ’’Tungag oi Gidion! Ngoyo’ no songodo’ ilo kokiiman do tulun do Midian. Om onuan ku i’ iya’ do kamanangan do sumangod diyolo’. ¹⁰ Nga’ ondung ooris ko, om angatan no i Pura, i susuhuon nu’ddi, do tumanud diya’ do mongoi’d hilo’d kokiiman dilo pisangod. ¹¹ Om korongou ko indo di pogibara-barasan di pisangod, om iri nondo o poposiou diya’ do mongoi sangod,’’ ka. Om ongoi no iyo Gidion di Pura, do hiri’d tisan di kokiiman di pisangod diyolo’. ¹² Om iri nopo tulun do Midian, om tulun dot Amalik, om i tulun mantad do hiri’d tana’ do kowotuan om pointongkop nopo di rantai. Om iyo pod katat dit ogumu’ do tuminokop, o kokiiman diyolo’. Om it unta diyolo’ nga’ iyo pod togis do hilo’d tisan do rahat kogumu’. ¹³ Om soira’ddi nokorikot i Gidion do hiri, om korongou no dau o songulun o kusai do maso’d monusui do nipi dau dot id tambalut dau. Om poingkaa o pinoboros di tulun diri, ’’Nokoipi oku do haro nogi’ o sombulugu’ o roti barli do miid-liid om kosuang no diti kokiiman toko’ om koontok no o tiso’ di kiim. Om kahaba’ nopo nogi’ i kiim om kalapik nopo do hiti’d tana’,’’ ka dau. ¹⁴ Om boros ka di tambalut dau do suminimbar, ’’Atuukoi, om iri no moti’ kopio gayang di Gidion ino, i tanak di Yoas, i bansa’ dot Israil. Om komoyon nopondo nga’ noonuan no iyau’d Kinorohingan do kamanangan do sumangod do tulun do Midian om sumangod do koinsanai’dti tulun toko’ di mongoi sangod!’’ ka dau. ¹⁵ Om korongou poddi di Gidion i nipi di tulun diri, om i komoyon di nipi’ddi, om otud no iyau do suminambayang dot id Kinorohingan. Om guli’ nogiddi iyau do hiri’d kokiiman di tulun dot Israil om boro-boros no iyau’d poingkaa, ’’Sodia’ kou no! Tu’ noonuan kou nod TUHAN do kamanangan do sumangod di soudor do Midian,’’ ka dau. ¹⁶ Om bohogio’ nod i Gidion i tulun dau di tolu nahatus diri do tolu o posukan. Om nonuan ngai’ nopo o pointikid-tikid di tulun do torumpit om iso’ o kakanan do kisuang do tata’ di kiapui. ¹⁷ Om boros kad i Gidion dot id diyolo’, ’’Korikot oku nopondo do hilo’d tisan dilo kokiiman do tulun do Midian, om antangan oku no kopio dokoyu, om wonsoyon no dokoyu o miagal di wonsoyon ku. ¹⁸ Soira’ nopod pounion ku o torumpit do mogiaandad di tulun dot id posukan ku, om mositi’ nod pounion dokoyu i dokoyu’d torumpit, om pagarangon dokoyu do hiri’d posorili’ di kokiiman o boros do poingkaa, ’Don TUHAN om di Gidion!’ ka,’’ ka dau. ¹⁹ Om maha’ di pitangatuong noddi, om korikot no i Gidion om i tulun dau do hiri’d tisan di kokiiman di pisangod. Tontok nopoddi nga’ wagu po kosowoliai i tulun di madtatamong. Om pounio’ no di Gidion om i tulun dit id posukan dau o torumpit diyolo’, om babako’ no diyolo’ i kakanan diyolo’. ²⁰ Om iri i duwo posukan do suwai nga’ iyo nogiddi o winonsoi. Om poinsawato’ ngai’ no diyolo’ i tata’ do poingigit do longon diyolo’d gibang, om pounio’ diyolo’ i torumpit di poingigit do longon diyolo’d wanan. Om pamagarang nogiddi iyolo’ do poingkaa, ’’Gayang do TUHAN om gayang di Gidion!’’ ka. ²¹ Om sompori-pori nopo iyolo’d miningkakat do hiri’d kinoiyonon diyolo’ do pointutuk di kokiiman. Om oinsanan nopoddi i soudor do pisangod do minanangkus do minogidu’ do mikuwo’d songgiak-giak poo. ²² Om tontok di popinguni i Gidion om i tulun dau di torumpit diyolo’, om binsuhuo’ ngai’ noddi do TUHAN i soudor do pisangod do mogititibas do gayang dot iyolo’ i’ om iyolo’. Om panangkus no iyolo’ do mogidu’ do kuminaa ponong id Sirira om gisom do nokorikot do hilo’d Bait-Sita om hilo’d bandar dot Abil Mihola, i hilo’d somok do Tabat. ²³ Om lohowo’ ngai’ noddi i payat do Naptali, om Asor, om Manasi di ponong id koulayon om Manasi di ponong id kotonobon do mantad id Bawang do Yordan. Om gusao’ ngai’ no diyolo’ i soudor do Midian. ²⁴ Om pinopinsunud nogi’ di Gidion dot id pointongkop di watas do konulu-nuluan dot Ipraim i boros do momolohou do poingkaa, ’’Kainou rumuhuk do mongoi sangod di tulun do Midian. Tamangan no i Bawang do Yordan om koinsanai di luyu’ do bawang do gisom do korikot do hilo’d Bait-Bara. Kada’ nogi’ kopio dokoyu pologoso’ do sumoborong do hilo’ i tulun do Midian,’’ ka dau. Om iri’ddi tulun dot Ipraim nga’ tinimung ngai’ nogi’. Om tamangai no diyolo’ i Bawang do Yordan om koinsanai di luyu’ do bawang do gisom do korikot do hilo’d Bait-Bara. ²⁵ Om katangkap no diyolo’ i duwo o boyoon do tulun do Midian, i Orib om i Siib. Om patayo’ noddi i Orib do hilo’d Watu dot Orib, om i Siib no om pinatai do hilo’d pamagaan dot anggur do Siib. Om tilombus po i tulun dot Ipraim do minomogusa’ di tulun do Midian. Om pootodo’ noddi diyolo’ i tulu di Orib om i Siib dot id di Gidion do hilo’d soborong do Yordan di ponong id koulayon.

¹ Om boros ka di tulun dot Ipraim dot id di Gidion, ’’Nokuro tu’ a’ nu iyahai nangatan di minamanau ko i’ do minongoi sangod di tulun do Midian? Nokuro tu’ niyo nu iyahai’ddi?’’ ka. Om iyo noddi iyolo’ do mimboros dot otogod di Gidion. ² Nga’ boros kad i Gidion do suminimbar, ’’Iri nopo doho’d winonsoi om okooro’ do katalad di dokoyu’d winonsoi. Okooro’ doti’ daa i dokoyu’d winonsoi nga’ iri nopo it okooro’ddi om agayo i’ ko’ mantad di winonsoi do koinsanai di soudor do mantad id pinuruan do sompiiyon ku. ³ Iyokoyu nogi’ i nakaanu do kuasa’ do mantad id Kinorohingan, gisom do nakapatai kou di Orib om i Siib, i duwo o boyoon do tulun do Midian diri! Om pataladon nopoddi, om nunu noo o doho’d nowonsoi?’’ ka dau. Om koboros poddi di Gidion o miagal diri om a’ noddi iyolo’ otogod. ⁴ Om tontok nopoddi nga’ nokorikot no i Gidion om i tolu nahatus o tulun dau do hiri’d soborong di Bawang do Yordan. Om ohuyan no daa tomod iyolo’ nga’ momogusa’ kasai’ po iyolo’ di pisangod. ⁵ Om korikot noddi iyolo’ do hilo’d Sukot. Om boros kad i Gidion dot id tulun di poingiyon do hiri’d bandar diri, ’’Onuwai daa doho’ ilo tulun ku’d taakanon dot ongokuuri’. Tu’ nohuyan no tomod iyolo’, om inda’ ka do maso po dahai’d momogusa’ di Siba om i Salmuna, i duwo o raja’ do Midian,’’ ka dau. ⁶ Nga’ boros ka di boyoon di hilo’d Sukot do suminimbar ’’A, a’ po giya dokoyu natangkap iyo Siba di Salmuna dino, om mokianu kou no daa’d taakanon! Nunu daa’ddi o kapanahakan do taakanon dot id tulun nu?’’ ka diyolo’. ⁷ Om boros kad i Gidion, ’’Ookuro i’ katuu! Oonuan oku pod TUHAN do kamanangan do sumangod di Siba om i Salmuna, om bobogon ku nogindo iyolo’d rugi om i kohorob do mantad hilo’d tana’ do kowotuan!’’ ka. ⁸ Om tilombus noddi i Gidion do minamanau om korikot no do hilo’d Ponuil. Om hilo’ nga’ minokianu i’ daa iyau’d taakanon do patahakon dau di tulun dau. Nga’ iyo i’ di pinonimbar di tulun do hilo’d Sukot o pinosimbar di tulun do hilo’d Ponuil. ⁹ Om iri no o kinapabarasan di Gidion dot id diyolo’ do poingkaa, ’’Osonong-sonong oku i’ moti’dti do gumuli’. Om diri nopondo om habaon ku no iti walai’d akawas dot id bandar diti!’’ ka. ¹⁰ Om tontok nopoddi nga’ hilo’d Karkor i Siba om i Salmuna do mogiwoyo-woyo’ do koinsanai di soudor diyolo’. Om id pogialatan nopo di tulun do mantad hilo’d tana’ do kowotuan om haro po doti’ o hopod om limo noribu o tulun do noolu’; tu’ napatai no o hatus om duwo nohopod noribu di soudor diyolo’. ¹¹ Om susui nopo i Gidion di tisan do tana’ do kowotuan, i ponong id koulayon do mantad id Noba om Yogbiha, om potigowoo’ no dau do minanangod i pisangod. ¹² Om poggidu’ no daa i Siba om i Salmuna, i duwo o raja’ do Midian diri, nga’ gusao’ id Gidion iyolo’ om katangkap iddi dau iyolo’. Om a’ noddi oila-ilaan o kokoyo-koyoon di soudor do Midian tu’ angadalaan nod moddosi. ¹³ Om tontok di minuli’ iyolo’ do mantad id pisangadan, om susui no i Gidion di ralan do kawaya’ di Takadon do Hiris. ¹⁴ Om hilo’ no o pinanangkapan dau do songulun o tanakwagu do mantad hilo’d Sukot, om uhoto’ no dau ondung isai ngai’ o ngaran di boyoon do hilo’d Sukot. Om tuliso’ ngai’ no di tanakwagu i ngaran di boyoon do pinatahak dau di Gidion. Oinsanan nopo nga’ turu’ nohopod om turu’ o tulun. ¹⁵ Om ongoi noddi i Gidion solowot di boyoon diri do hiri’d bandar om boro-boros no iyau’d poingkaa, ’’Ontong kou pogi’, nga’ diya no i Siba om i Salmuna. Om atantu’ nod osorou kasai’ po dokoyu dit a’ kou minonulung dahai, tu’ a’ ku po giya naanu iyolo’, koii? A’ kou i’ minanahak do taakanon dot id tulun ku do tontok do maso’ddi, om ohuyan no daa tomod iyolo’,’’ ka dau. ¹⁶ Om ngoyo’ noddi di Gidion i rugi om i kohorob do mantad hilo’d tana’ do kowotuan, om bobogo’ ngai’ no dau i boyoon do bandar do Sukot dot i rugi om i kohorob diri o pinomobog. ¹⁷ Om hilo’d Poniol nga’ hinaba’ no kopio dau i walai’d akawas om pinatai ngai’ dau i tongokusai dot id bandar diri. ¹⁸ Om uhoto’ noddi di Gidion i Siba om i Salmuna, do poingkaa, ’’Ongokuro-kuro ngai’ i tulun di pinatai dokoyu’d hilo’d Tabor?’’ ka. Om boros ka diyolo’ do suminimbar, ’’Koiyo-iyo ngai’ iyolo’ diya’ — iyo ngai’ nopo iyolo’d tanak do raja’,’’ ka. ¹⁹ Om boros kad i Gidion, ’’Iyolo’ no i tobpinai ku, i tangaanak di tina’ ku. Ondung a’ daa dokoyu pinatai iyolo’ddi, om a’ ku i’ daa iyokoyu patayon,’’ ka dau. ²⁰ Om boros kaddi di Gidion dot id di Yitir, i tanak dau dot id dotuo, ’’Ngoyo’ iyolo’ patayo’!’’ ka. Nga’ i Yitir nopoddi om omulok po. Om ooris po iyau, om a’ iddi dau kinodong i gayang dau do maan do pamatai. ²¹ Om boros kad i Siba om i Salmuna dot id di Gidion, ’’Iya’ nopo pogi’ o mamatai dahai. Pointalango’ pogi’ do kusai kopio ko!’’ ka diyolo’. Om patayo’ noddi di Gidion iyolo’ om onuo’ ngai’ no dau i pongillumis dit id liou dit unta diyolo’. ²² Om boros kaddi di tulun dot Israil dot id di Gidion, ’’Nokoidu’ nu noddi iyahai do mantad id pomorintaan do tulun do Midian. Om siliu no do boyoon dahai — iya’ om sinakagon nu,’’ ka. ²³ Nga’ boros ka di Gidion do suminimbar, ’’A’ oku i’. A’ oku i’ sumiliu’d boyoon dokoyu; om iti tanak ku nga’ a’ i’. TUHAN o sumiliu’d boyoon dokoyu,’’ ka dau. ²⁴ Nga’ boros ka kawagu di Gidion, ’’Iso’ noo o pokionuon ku; iri ngai’ nopo tanting di naanu dokoyu do mantad id pisangod om mositi’ nod patahakon ngai’ dokoyu dot id doho’,’’ ka. (Iri nopo tulun do Midian om ongoubas do mananganting do tamas; do miagal di tulun do suwai di momogun-mogun do hilo’d tana’ do kowotuan.) ²⁵ Om boros ka diyolo’ do suminimbar, ’’Oo. Osonong i’ o ginawo dahai do patahak diri dot id diya’,’’ ka. Om pawalado’ no diyolo’ ot iso’ o kain, om oinsanan nopoddi i tulun do minongoi poiliu do tanting di naanu diyolo’ do mantad id pisangod. ²⁶ Om oinsanan nopo i tanting do tamas di pinatahak dot id di Gidion om osomok nod duwo nohopod o kilogram do kawagato’, om a’ po kohompit i pongillumis do suwai, om i karo, om i kain dot aragang doitom-itom, i pinakai di raja’ do Midian, om i karo di poinsulung di liou dit unta diyolo’. ²⁷ Om wonsoyo’ noddi di Gidion do tingolig i tamas diri, om poiyono’ no dau do hilo’d Opra, i kampung dau. Om oinsanan nopoddi i tulun dot Israil do minongoi’d hilo’ do minongoi tuku’ di tingolig diri gisom dot a’ noddi diyolo’ osorou o Kinorohingan. Om iri no o nosiliu’d lawa’ dot id di Gidion om id sompiiyon dau. ²⁸ Om a’ noddi korolosi i tulun do Midian; tu’ naala’ no iyolo’ di tulun dot Israil. Om osimbayan noddi o pomogunan diri do solinaid dot apat nohopod o toun, di daamot pod poimpasi i Gidion. ²⁹ Om katalib poddi i pinisangadan, om uli’ no i Gidion do hiri’d kampung dau, om undorong no iyau’d hiri. ³⁰ Om kogumuo’ nopod tanak dau’d kusai om turu’ nohopod o tulun tu’ ogumu’ i’ o sawo dau. ³¹ Om haro po o panakasawo dau do hilo’d Sikim, om kianak diri iyolo’ do songulun o kusai di pinungaranan dau dot i Abimilik. ³² Om kolohing poddi kopio i Gidion, i tanak di Yoas diri, om kapatai nogi’ iyau. Om lobongo’ no iyau do hilo’d pinamalabangan di Yoas, i tapa’ dau. Iri nopo kalabangan diri om hilo’d Opra, i kawalayan di pinuruan do sompiiyon di Abiosor. ³³ Om di nopoddi napatai i Gidion, om a’ noddi i tulun dot Israil otorodok dot id Kinorohingan. Om tumuku’ diri iyolo’ dot id tingolig di Baal om siniliu diyolo’d ponokokinorohingan o Baal-Borit. ³⁴ Om a’ noddi iyolo’ sumambayang dot id TUHAN, i Kinorohingan diyolo’, i pinopoidu’ diyolo’ do mantad id koinsanai’d pomorintaan do pisangod diyolo’ di hiri’d posorili’ diyolo’. ³⁵ Om a’ iyolo’ ounsikahan di sompiiyon di Gidion dot i nongowonsoi’d Gidion dot ongosonong kopio dot id tulun dot Israil o kopongunsikahan.

¹ Insan tadau om ongoi no i Abimilik, i tanak di Gidion diri, do hilo’d bandar do Sikim, i tadon di koobpinayan di tina’ dau. Om hilo’ nod minoro-boros iyau diyolo’ do poingkaa, ² ’’Ngoyo’ daa dokoyu uhoto’ ngai’ iti tulun do hiti’d Sikim, ondung honggo’ddi ot osonong: Porintaon di turu’ nohopod o tanak di Gidion ko’ porintaon po do songulun noo? Om posorohon no iyolo’ dot iyoho’ nga’ koobpinayan kasai’ po diyolo’,’’ ka dau. ³ Om ongoi no i koobpinayan di tina’ di Abimilik solowot di tulun do hilo’d Sikim om polombuso’ no diyolo’ i boros di Abimilik dot id tulun do hilo’. Om pokouhango’ noddi di tulun do Sikim do tumanud di Abimilik tu’ tobpinai i’ diyolo’ iyau. ⁴ Om onuwai noddi diyolo’ i Abimilik do turu’ nohopod o tusin do pirok, i nanu do mantad id walai di tingolig do Baal-Borit. Om iri no i tusin do pinamagadsi’ di Abimilik dot iso’ o sinompuruan do tulun dot angaraat do sumokodung dau, ⁵ om ongoi nogiddi i Abimilik do hilo’d Opra, i kampung mantad di tapa’ dau. Om hilo’ no, dot id sakai dot iso’ noo o watu do pinatai dau o turu’ nohopod di tobpinai dau. Nga’ i Yotam nopo, i tanak di Gidion do komulakan, om a’ i’ napatai tu’ minongoi iyau lisok. ⁶ Om timung ngai’ noddi i tulun do Sikim om i tulun do Bait-Milo, om ongoi no iyolo’ do hiri’d guas do kayu do tarbantin di pokolidangon di hilo’d Sikim. Om hilo’ no o pinonilihan diyolo’d i Abimilik do raja’. ⁷ Om soira’ di nokorongou i Yotam do hal diri, om ongoi no iyau ingkakat do hiri’d timpak di Nuluhon do Gorisim. Om garangai no dau i tongoulun diri do poingkaa, ’’Pokinongou kou no doho’, oi tulun do Sikim, om orongou kou indo do Kinorohingan! ⁸ Insan o maso om timung ngai’ no i kokoyuan do momili’ do raja’ diyolo’. Om boros ka diyolo’ dot id guas do saitun, ’Siliu do raja’ dahai,’ ka. ⁹ Om boros ka di guas do saitun do suminimbar, ’A, a’ oku i’. Tu’ ondung sumiliu oku’d raja’ dokoyu, om a’ no milo’d a’ oku tumingkod do popoimbulai do tumau’d saitun, i pakayon do ponuwau do tingolig om tulun!’ ka. ¹⁰ Om boros ka di kokoyuan dot id kayu ara, ’Iya’ no o sumiliu’d raja’ dahai,’ ka. ¹¹ Nga’ boros ka di guas dot ara, ’A’ oku i’, tu’ osiliu oku nopod raja’ dokoyu nga’ kotingkod oku nondo do mongua’ di tua’ dot ara dit ongoomis,’ ka. ¹² Om boro-boros noddi i kokoyuan dot id guas dot anggur, ’Iya’ nopo o sumiliu’d raja’ dahai,’ ka. ¹³ Nga’ boros ka di guas dot anggur do suminimbar, ’Tumingkod oku tuu daa toomod do mongua’ dot anggur di poposonong do ginawo’d tingolig om tulun, do sumiliu nod raja’ dokoyu o kotingkadan,’ ka. ¹⁴ Om iri noddi o kinapabarasan do koinsanai di kayu dot id guas do rugi do poingkaa, ’Iya’ nopo o sumiliu’d raja’ dahai!’ ka. ¹⁵ Om boros ka di guas do rugi, ’Ondung iso-iso’ kopio o ginawo dokoyu do poposiliu doho’d raja’, om ongoi kou no lungung doho’. Nga’ ondung amu’, om haro’ndo o tapui do mimbulai do mantad id raan ku dit ongkirugi do monorob do koinsanai di koguasan dot aras do hilo’d Libanon,’ ka,’’ ka dau. ¹⁶ Om boros ka kawagu di Yotam, ’’Iso-iso’ no kopio o ginawo om otulid no kopio o ginawo dokoyu do momili’ di Abimilik do raja’? Nowonsoi no dokoyu it apatut do wonsoyon dot id di Gidion, i tapa’ ku’ddi, om id sompiiyon dau? Nosomulian no dokoyu i winonsoi di tapa’ ku dit ongosonong diri, ¹⁷ i minongoi iyau sangod do minogobi’ dokoyu? Sorohon no dokoyu, dot a’ no dau sinorou o dau’d tinan do pinopoidu’ dokoyu do mantad id pomorintaan do tulun do Midian. ¹⁸ Nga’ baino’ noddi om sumaap kou nogi’ di sompiiyon do tapa’ ku. Patayo’ ngai’ nopo dokoyu i tangaanak dau — koinsanai nopo o turu’ nohopod o tulun dot id sakai dot iso’ noo o watu. I Abimilik nopo om tanak no di tapa’ ku di susuhuon dau’d tondu’. Nga’ siniliu i’ dokoyu iyau do raja’ do Sikim, tu’ tobpinai po giya’ndo dokoyu iyau. ¹⁹ Ondung otulid om iso-iso’ kopio o ginawo dokoyu do minomonsoi’d miagal diti dot id tapa’ ku di tadau baino’, om kumosonong kou nopo dot id di Abimilik, om pologoson iyau do kumosonong dot id dokoyu. ²⁰ Nga’ ondung a’ iyo’ddi, om koimbulai po daa o tapui do mantad id di Abimilik do monorob do koinsanai’dti tulun do hiti’d Sikim om i tulun do Bait-Milo. Om koulai po daa o tapui do mantad id tulun do Sikim om Bait-Milo do monguu do monorob di Abimilik,’’ ka dau. ²¹ Om poggidu’ noddi i Yotam, om ongoi no iyau undorong do hilo’d Biir, tu’ minodosi iyau di Abimilik, i tobpinai dau’ddi. ²² Om i Abimilik no o minomorinta’ dot Israil do solinaid do tolu o toun. ²³ Om poimbulayo’ noddi do TUHAN o pitagadan dot id piolitan di Abimilik om i tulun do Sikim, gisom do suminaap iyolo’ di Abimilik. ²⁴ Om nosiliu pogi’ o miagal diri nga’ ponuli’ di karaaton di Abimilik om i tulun do Sikim di minominsuhu’ dau do mamatai di turu’ nohopod o tangaanak di Gidion. ²⁵ Om ponuhu’ no i tulun do Sikim do tulun do magawang do hiri’d timpak di konuluhanan do manangkap di Abimilik. Om isai nopo o tulun do kawaya’d hiri nga’ panakahan no di tulun di songingawang. Om posunudo’ noddi iri dot id di Abimilik. ²⁶ Tontok nopoddi nga’ nokorikot no i Gaal, i tanak di Ibid, do mogitanud-tanud di tongotobpinai dau do minongoi iyon do hilo’d Sikim; om iyau noddi o pagandas-gandasan di tulun do Sikim. ²⁷ Om ongoi ngai’ nopo iyolo’ do hiri’d kokobunan diyolo’d anggur, do mongoi pamaga’ do waig dot anggur do maan dot inumon, om papaharo do poginakanan. Om moginakan nondo iyolo’ om moginum do hiri’d tiyonon do tumuku’ di tingolig diyolo’, om mikuwo’d mimpopol di Abimilik. ²⁸ Om boros ka nod i Gaal, ’’Isai kopio daa i Abimilik diri, om isai toko’ iyati’ i tulun do Sikim? Okon toi ko’ tanak iyau di Gidion? A’ toi daa apatut nopo om osiliu daa’d susuhuon di Hamor, i tapa’ di Sikim, i Gidion om i wakil dau di roitan dot i Sibul! Om nokuro’ddi tu’ mokiporinta’ toko’ dau? ²⁹ Ondung iyoho’ daa o boyoon di tulun do Sikim, om atantu’ no do nopupusan ku no o surupu di Abimilik! Om poboroson ku nondo dot id dau o poingkaa, ’Kaino pogi’! Timungo’ ngai’ o soudor nu om mongoi to i’ pisaap!’ kangku nondo,’’ ka dau. ³⁰ Om kotogod no i Sibul, i momorinta’ di bandar do Sikim diri, do tontok di nokorongou iyau di popimboroson di Gaal. ³¹ Om ponuhu’ no iyau’d tulun do minongoi do hiri’d di Abimilik, i hilo’d Aruma do tontok diri, do mongoi popoboros do poingkaa, ’’Nokorikot no i Gaal, i tanak di Ibid, do mogitanud-tanud di tongotobpinai dau do hiti’d Sikim, om mominsuhu’ diri iyau do tulun do hiti do sumaap diya’. ³² Iyo nopoddi, om mongoi kou no di tulun nu lisok do hilo’d dumo do totuong. ³³ Om kosuabon pondod suab, di koulai o tadau, om tigowoon nod mongoi panangod i bandar. Om ondung sumoliwan i Gaal om i tulun dau do mongoi saap diya’, om iri no o maso nu do manangod dau!’’ ka dau. ³⁴ Om pamanau noddi i Abimilik om koinsanai di tulun dau do tontok di dongotuong. Om pogibahagi-hagi’ no iyolo’ dot apat o posukan om ongoi no lisok do hiri’d soliwan di bandar do Sikim. ³⁵ Om kokito poddi di Abimilik om i tulun dau i Gaal do sumoliwan om miningkakat do hiri’d wawayaan di bandar, om soliwan ngai’ no iyolo’ do mantad hiri’d linisok diyolo’. ³⁶ Om kokito nod i Gaal iyolo’, om boro-boros no iyau di Sibul, ’’Ontong pogi’! Nga’ haro moti’ o tulun do rumuhuk do hiti do mantad hilo’d timpak do nuluhon!’’ ka dau. Nga’ boros ka di Sibul, ’’Okon i’ ko’ tulun ilo’. Sangai-sangai no toomod ilo’ do hilo’d nuluhon,’’ ka dau. ³⁷ Om boros ka kawagu di Gaal, ’’Ontong pogi’! Rumuhuk nolo tulun do hilo’d guas dilo nulu-nulu, om haro po kawagu o sinompuruan do tulun do suwai do rumikot do hiti do mantad hilo’d guas do tarbantin di tulun di mogogontong do nasip!’’ ka dau. ³⁸ Om boros kaddi di Sibul dot id dau, ’’Honggo noddi i koburuako’ nu’ddi? Tu’ boros ka nu di guulu om ’Nokuro tu’ mokiporinta’ toko’ di Abimilik?’ ka nu. Ilo’ no ngai’ i tulun dit untotorion nu’ddi. Ngoyo’ pogi’ iyolo’ songodo’ do dinondo!’’ ka dau. ³⁹ Om angatai noddi di Gaal i tulun do Sikim do suminoliwan, om ngoyo’ no diyolo’ songodo’ i Abimilik. ⁴⁰ Nga’ saapo’ no di Abimilik i Gaal do gisom do minogidu’ iyau. Om songingiliu poddi i nangapatai do hiri’d dotimbabaan di wawayaan di bandar. ⁴¹ Om poguliai noddi di Abimilik do hilo’d Aruma, om uyungo’ no di Sibul i Gaal om i tongotobpinai di Gaal do suminoliwan do hilo’d Sikim. Om a’ noddi iyolo’ koino-ino do miyon do hilo’. ⁴² Om tadau noddi kawagu om timpuun no i tulun do Sikim do tumongkiad di bandar do mongoi do hiri’d koumaan. Om posunudo’ no o hal diri dot id di Abimilik. ⁴³ Om timungo’ nod i Abimilik i tulun dau, om bohogio’ no do tolu o bohogian. Om ongoi no iyolo’ lisok do hiri’d koumaan do madtamong. Om tontok di nokito dau do pakayaan no di tulun do bandar diri do hiri’d koumaan, om soliwan no iyau do mantad hiri’d linisok dau, om ngoyo’ no dau iyolo’ patayo’. ⁴⁴ Om daamot nopod i Abimilik om i tulun dau do minarau-arau do minongoi padtamong di wawayaan do bandar, om iri nopo duwo o bohogian do tulun dau om minggusa’ om mimpatai di tulun di minogidu’ do hiri’d koumaan. ⁴⁵ Om ponongodou nopo i Abimilik do suminangod do tadau’ddi, om kosolod noddi dau i bandar diri; om patayo’ no dau i tulun do hiri, om raago’ dau i bandar om sasadai nogiddi dau do silaon. ⁴⁶ Om soira’ di nokorongou i tulun di hiri’d suang di kuta’ do bandar do Sikim do pasal diri, om ongoi no iyolo’ intirung do hiri’d luang dot id siriba’ di walai’d tingolig dot Ilbirit. ⁴⁷ Om haro’ddi o tulun do minomisunud di Abimilik do nokotimung no i tulun do Sikim do hiri. ⁴⁸ Om ongoi noddi i Abimilik om i tulun dau do hilo’d Nuluhon do Salmon. Om hilo’ nod minintutu’ iyau do raan do kayu, do kapak o pinonutu’. Om saano’ nogiddi dau iri. Om suhuo’ no dau i tulun dau do lumomus do momonsoi’d miagal di winonsoi dau. ⁴⁹ Om oinsanan nopoddi i tulun do minintutu’ di raan do kayu, om tanud no di Abimilik. Om potimungo’ nopo diyolo’ i raan do kayu’ddi do hiri’d kabang di luang dit id siriba’ di walai’d tingolig. Om tutudai noddi diyolo’ di maso di tulun do Sikim do hiri’d suang di luang. Om kapatai ngai’ noddi i tulun do Sikim do haro i’ doti’ o soribu o tongokusai om tongoondu’. ⁵⁰ Om ongoi noddi i Abimilik do hilo’d Tibis. Om tutukai no dau i bandar om kosolod no dau. ⁵¹ Hiri nopod tanga’ di bandar om haro o walai’d watu dit akawas; om ongoi ngai’ nopoddi i tulun do bandar diri do hiri’d walai’d akawas. Om suang no iyolo’d hiri, om ontiilai no, om ongoi no iyolo’ do hiri’d sakai di taap. ⁵² Om rikot noddi i Abimilik do hiri do mongoi panangod di walai’d akawas. Nga’ tontok di nokorikot iyau do hiri’d wawayaan di walai’d akawas do mongoi daa podtutud diri, ⁵³ om paratu’ no o songulun o tondu’ do watu di maan do pongisar, do pinootung di tulu di Abimilik, gisom do kababak nopo i korulung do tulu dau. ⁵⁴ Om olomus nopo i Abimilik do minomolohou di tanakwagu di sumaan di rapo-rapo dau, boros ka dau, ’’Kodongo’ kopio ino gayang nu om patayon oku i’; tu’ mada’ oku i’ do boro-boroson do tondu’ o minamatai doho’,’’ ka dau. Om toboko’ noddi iyau di tanakwagu do gisom do napatai i Abimilik, om uli’ ngai’ noddi iyolo’. ⁵⁵ Om soira’ di nokito di tulun dot Israil do napatai i Abimilik, om uli’ ngai’ noddi iyolo’. ⁵⁶ Om iyo noddi o pinonuli’ do Kinorohingan di Abimilik di karaaton do nowonsoi dau dot id tapa’ dau, do tontok di minamatai iyau di turu’ nohopod o tobpinai dau. ⁵⁷ Om hinukuman nogid TUHAN i tulun do Sikim dot i karaato’ diyolo’ o kinopomohukuman. Om miontok nopoddi di pinoboros di Yotam, i tanak di Gidion diri, i nosiliu dot id diyolo’ do tontok di pinapalan dau iyolo’.

¹ Om di nopoddi napatai i Abimilik, om kosiliu no i Tola, i tanak di Pua, do boyoon do pinopoidu’ di tulun dot Israil do mantad id pisangod. I Tola nopoddi nga’ manangaki di Dodo, i mantad id payat dot Isakar. Om poingiyon iyau do hilo’d Samir, it id watas do konulu-nuluan dot Ipraim. ² Koloido’ nopo dau do boyoon do tulun dot Israil om duwo nohopod om tolu o toun. Om kapatai noddi iyau om lobongo’ no do hilo’d Samir. ³ Om suminusuhut nopod i Tola do suminiliu’d boyoon do tulun dot Israil, om i Yair, do solinaid do duwo nohopod om duwo o toun. I Yair nopo om mantad hilo’d Giliad. ⁴ Tangaanak nopo dau’d kusai om tolu nohopod o tulun. Om kogumuon nopod kaladai do sasakayon diyolo’ om tolu nohopod o tinan om tolu nohopod o kampung diyolo’ do hilo’d watas do Giliad. Om roitan kasai’ pod kokompungan do Yair o kokompungan diri. ⁵ Om kapatai no i Yair, om lobongo’ no do hilo’d Kamon. ⁶ Om pomonsoi no kawagu’d dusa dot id TUHAN i tulun dot Israil. Om a’ no diyolo’ pusohon o TUHAN om nokotingkod no iyolo’ do sumambayang dot id dau. Sambayangan nopo diyolo’ om i tingolig di Baal om Astorit, om i tingolig do tulun do Siria, om Sidon, om Muab, om Amon, om Pilistin. ⁷ Om iri no o kinatagadan do TUHAN di tulun dot Israil gisom do pologoso’ nopo dau i tulun do Pilistin om tulun dot Amon do momorinta’ diyolo’. ⁸ Om hopod nopo om walu’ o toun di duwo o bansa’ddi do mongulok-ulok di tulun dot Israil di momogun-mogun do hilo’d Giliad, i watas di tulun dot Amori do ponong id koulayon do mantad id Bawang do Yordan. Om ninggorit tomod diyolo’ i tulun dot Israil. ⁹ Om soborong po i tulun dot Amon di Bawang do Yordan do minongoi panangod di payat do Yohuda, om Binyamin om Ipraim, do gisom do noinggorit tomod diri i tulun dot Israil. ¹⁰ Om pomolohou noddi do TUHAN i tulun dot Israil. Boros ka diyolo’, ’’Nokowonsoi no iyahai’d dusa dot id diya’, tu’ a’ iyahai minomusou diya’, i Kinorohingan dahai, om tuminuku’ nogi’ iyahai di tingolig do Baal,’’ ka. ¹¹ - ¹² Om boros kad TUHAN do suminimbar, ’’Di nopoddi gulu po, om pinorinta’ kou di tulun do Masir, om Amori, om Amon, om Pilistin, om Sidon, om Amalik om i tulun do Maon. Om pomolohou kou noddi doho’ do mokitulung, koii? Om a’ ku toi iyokoyu tinulung do minidu’ do mantad id pomorintaan diyolo’? ¹³ Nga’ iyo piya’ddi nga’ tuminolikud kou po doho’, om minongoi kou nogi’ tuku’ di tingolig. Om a’ oku noddi poidu’ dokoyu’d baino’. ¹⁴ Ongoi kou nopo pomolohou di tingolig di pinili’ dokoyu. Pologoson nopo i tingolig diri do monulung dokoyu do tontok dot id suang kou’d kosusaan,’’ ka dau. ¹⁵ Nga’ boros ka di tulun dot Israil dot id TUHAN, ’’Nokowonsoi no iyahai’d dusa, oi TUHAN. Om wonsoyo’ nopo i korohian nu do tulungon nu po daa iyahai’d baino’,’’ ka diyolo’. ¹⁶ Om pataamo’ ngai’ noddi diyolo’ i tingolig, om sambayang no iyolo’ dot id Kinorohingan. Om a’ iddi kotoron o Kinorohingan do kokito di tulun dot Israil dot id suang do kosusaan. ¹⁷ Om tontok nopoddi nga’ sumodia’ ngai’ no i soudor dot Amon do mongoi sangod, om maso no diyolo’ do powonsoi’d kiim do hilo’d Giliad. Om i tulun dot Israil nga’ nokotimung no, om maso no do powonsoi’d kiim do hilo’d Giliad. ¹⁸ Om hilo’ noddi do minogiboro-boros i tongoulun om i boyoon do payat dot Israil do poingkaa, ’’Isai nopo o kasaap do sumiliu’d boyoon do momoyo’ diti tulun do mongoi sangod di tulun dot Amon, om silihon no do boyoon do koinsanai diti tulun do hiti’d Giliad,’’ ka.

¹ I Yipta nopo om soudor dit osiou kopio do poingiyon do hilo’d Giliad. Tapa’ nopo dau om i Giliad nga’ tina’ no dau om tondu’d sundal. ² Om haro i’ o tangaanak di tapa’ dau do tongokusai do tina’ nopo om i sawo kopio di tapa’ dau. Om tontok di nongosukod i tangaanak, om sansagai no diyolo’ i Yipta do tumongkiad di walai diyolo’. Boros ka diyolo’, ’’A’ ko i’ kaanu do nunu-nunu’d tungkusan do mantad id tapa’ dahai, tu’ iya’ nopo om tondu’ id suwai o sanganak!’’ ka. ³ Om iri noddi o kinopoggiduan di Yipta do mantad id tongotobpinai dau om ongoi no iyau iyon do hilo’d watas do Tob. Om hilo’ no do haro ot iso’ o sinompuruan do tulun dot angaraat do minongoi sugku’ dau, om ongoi noddi iyolo’ pimpanakau. ⁴ Om alaid-laid noddi om ngoyo’ no di tulun dot Amon songodo’ i tulun dot Israil. ⁵ Om tontok di nosiliu o miagal diri, om ngoyo’ no di boyoon do tulun dot Israil, di hilo’d Giliad, angatai i Yipta do muli’ do mantad hilo’d watas do Tob. ⁶ Om boros ka diyolo’, ’’Woyoo’ iyahai do mongoi sangod di tulun dot Amon,’’ ka. ⁷ Nga’ boros kad i Yipta do suminimbar, ’’Araatan kou i’ kopio doho’ddi, om sinansagan oku dokoyu do tuminongkiad di walai di tapa’ ku. Om nokuro noddi do baino’ tu’ rumikot kou i’ dot id doho’ dot id suang kou’d kosusaan?’’ ka dau. ⁸ Om boros ka diyolo’ do suminimbar, ’’Ruminikot pogi’ iyahai nga’ orohian iyahai’d moyo’ ko dahai do mongoi sangod di tulun dot Amon, om iya’ o boyoon do koinsanai di tulun do Giliad,’’ ka. ⁹ Om boros kad i Yipta do suminimbar, ’’Ondung pogulion oku dokoyu do hilo’d Giliad do mongoi sangod di tulun dot Amon, om onuan toko’ nopod TUHAN do kamanangan, om iyoho’ no ot osiliu’d pomorinta’ dokoyu,’’ ka dau. ¹⁰ Om boros ka diyolo’ do suminimbar, ’’Kaakun i’ iyahai. Om TUHAN no o sumiliu’d sasi’ dahai,’’ ka. ¹¹ Om pamanau no i Yipta do mogiwoyo-woyo’ di boyoon do Giliad. Om siliho’ no iyau di tulun do Giliad do pomorinta’ om boyoon. Om poboroso’ ngai’ no di Yipta i pokionuon dau di tulun do Giliad do hilo’d Mispa dot id toguang do TUHAN. ¹² Om ponuhu’ nogiddi i Yipta do tulun do minongoi solowot di raja’ dot Amon do mongoi poboros do poingkaa, ’’Nunu o sala’ dahai tu’ mongoi ko panangod do pomogunan dahai?’’ ka. ¹³ Om boros ka di raja’ dot Amon do suminimbar di tulun diri om, ’’Tontok di ruminikot i’ i tulun dot Israil do mantad hilo’d Masir, om nongoi diyolo’ solodo’ i tana’ dahai, do mantad pod hilo’d Bawang dot Amon om gisom do korikot do hilo’d Bawang do Yabok om Bawang do Yordan. Pogulio’ no dokoyu iri kosonong-sonong,’’ ka diyolo’. ¹⁴ Om ponuhu’ po kawagu i Yipta do tulun do minongoi solowot di raja’ dot Amon ¹⁵ do mongoi poboros dot isimbar do poingkaa, ’’A’ i’ i tulun dot Israil minonolod di tana’ do tulun do Muab ko’ iri po tana’ do tulun dot Amon. ¹⁶ Tontok di tuminongkiad do mantad hilo’d Masir o tulun dot Israil, om pakayaai no diyolo’ do hilo’d Suok dot Akaba, do minaya’ di tana’ do kowotuan om korikot noddi iyolo’ do hilo’d Kadis. ¹⁷ Om ponuhu’ noddi iyolo’d tulun do minongoi solowot di raja’ dot Idom do mokibanar daa do maya’ di pomogunan dau. Nga’ a’ i’ dau iyolo’ pinabanar. Om pokionuo’ po diyolo’ o miagal diri dot id raja’ do Muab, nga’ a’ i’ iyau pinapabanar diyolo’ do maya’ di pomogunan dau. Om iri noddi o kinoundarangan di tulun dot Israil do hilo’d Kadis. ¹⁸ Om tilombus nogiddi iyolo’d minamanau do minaya’ di tana’ do kowotuan, nga’ a’ no nakawaya’ do pomogunan dot Idom om Muab, suwai ko’ suminusui iyolo’ di ralan di kosorili’ do gisom do nokorikot do hilo’d ponong id koulayon do mantad id Muab, it id soborong do Bawang dot Arnon. Om pomukiim no iyolo’d hilo’, nga’ a’ i’ suminoborong di bawang tu’ kosuang nod pomogunan do Muab o hiri. ¹⁹ Om ponuhu’ noddi i tulun dot Israil do tulun do minongoi solowot di Sihon, i raja’ do tulun dot Amori do hilo’d Hisbon, do mokibanar daa do maya’ di pomogunan dot Amori, tu’ mongoi iyolo’ do hiri’d diyolo’d watas. ²⁰ Nga’ a’ i’ di Sihon pinabanar iyolo’ tu’ lohowo’ ngai’ nogi’ dau i soudor dau om pomukiim no iyolo’ do hilo’d Yahas om ngoyo’ nogiddi diyolo’ songodo’ i tulun dot Israil. ²¹ Nga’ nonuan i’ do TUHAN, i Kinorohingan do tulun dot Israil, do kamanangan i tulun dot Israil do suminangod di Sihon om i soudor dau. Om iyo noddi o nakaanu-anu di tulun dot Israil do koinsanai di tana’ do tulun dot Amori di poingiyon dot id pomogunan diri. ²² Om iri nopo tana’ do tulun dot Amori di naanu om noiyon diyolo’ nga’ mantad pod hilo’d Arnon do ponong id salatan, om gisom do hilo’d ponong id utara di Bawang do Yabok, om mantad di tana’ do kowotuan do ponong id koulayon do mantad id Yordan om gisom do hilo’d ponong id kotonobon do mantad id Bawang do Yordan. ²³ Om TUHAN i’, i Kinorohingan do tulun dot Israil, o minonguyung di tulun dot Amori do maan do koinsanangan di tulun do songonuon do TUHAN. ²⁴ Om umbalan nu po daa’ddi do mongoi panganu kawagu iri? Iri nopo tana’ di pinatahak di Kamos, i tingolig dokoyu’ddi, dot id dokoyu, om koino-ino i’ dot onuon kasai’ dokoyu. Nga’ iri nopo pinatahak do TUHAN, i Kinorohingan dahai, dot id dahai, om onuon kasai’ no dahai. ²⁵ Ondos nu daa om osonong-sonong ko iya’ ko’ mantad di Balak, i tanak di Sipor, i raja’ do Muab diri? I Balak nopo om a’ i’ nokoumbal do suminaap ko’ minanangod dahai. ²⁶ Tolu no nahatus o toun dot Israil do momogun-mogun do hilo’d Hisbon om hilo’d Aroir, om hiri’d kawalayan dit id posorili’, om hiri’d kabandaran do poinsusui di Bawang dot Arnon. Om nokuro tu’ a’ nu nongoi kawagu iri do solinaid diri? ²⁷ A’ i’ iyahai nakasala’ dot id diya’. Iya’ nogi’ i nakasala’ tu’ minongoi panangod dahai. Om TUHAN no o gompomutus. Om iyau no o momutus diti hal dot id pialatan do tulun dot Israil om tulun dot Amon do tadau’d baino’,’’ ka. ²⁸ Nga’ a’ i’ di raja’ dot Amon pinusou i boros di Yipta diri. ²⁹ Om porintao’ noddi di Rusod do TUHAN i Yipta. Om pamanau no i Yipta do minongoi ompuya’ do hiri’d watas do Giliad om Manasi, om poguliai nogiddi dau do hilo’d Mispa, i hilo’d Giliad. Om mantad nod hilo’ om lombus po iyau do minamanau do kuminaa do hilo’d pomogunan do tulun dot Amon. ³⁰ Om pomonsoi no i Yipta do batos dot id TUHAN do poingkaa, ’’Ondung potumboyoon oku’d TUHAN do mangala’ di tulun dot Amon, ³¹ om kamanang oku no om isai nopo it id gulu soliwan di walai ku do mongoi rapou doho’ di koguli’ oku om patahakon ku no dot id TUHAN do maan do porsombahan do sorobon,’’ ka. ³² Om soborong noddi i Yipta di Bawang do Yordan do minongoi sangod di tulun dot Amon. Om onuwai no iyau’d TUHAN do kamanangan. ³³ Om insanai nopo iyolo’d i Yipta do minamatai do mantad pod hilo’d Aroir om gisom do korikot do hilo’d watas di posorili’ do Minit — oinsanan nopo nga’ duwo nohopod o bandar — om gisom do nokorikot do hilo’d Abil-Kiramim. Om ogumu’ tomod o tulun dot Amon do napatai, om naala’ iyolo’ di tulun dot Israil. ³⁴ Om tontok di minuli’ i Yipta do hilo’d Mispa, om ongoi no i tanak dau’d sumandak ruba’ dau do mikuwo’d mari-tari’ om popouni do rebana. Om iso’ nori o tanak dau. ³⁵ Om kokito nopoddi di Yipta i tanak dau om tuminongob tomod diri iyau gisom do pininghurak dau o pakayan dau. Om boro-boros no iyau do poingkaa, ’’Atuukoi, oi tanak ku, oruol no kopio o ginawo ku! Nokuro tu’ iya’ no kopio o popotongob do ginawo ku? Tu’ nokosumpa’ oku no dot id TUHAN om a’ ku no milo dot a’ bayaanon iri!’’ ka dau. ³⁶ Om boros kaddi di sumandak dot id di Yipta, ’’Nokosumpa’ ko no dot id TUHAN oi Apa’, om TUHAN nga’ pinopotumboyo’ i’ diya’ do minonuli’ di karaaton do tulun dot Amon, i pisangod nu’ddi om nunu nopo i pinabatos nu om wonsoyon nopo,’’ ka. ³⁷ Nga’ boros ka kawagu di sumandak, ’’Nga’ iso’ poo o pokionuon ku: Onuwai oku po daa diya’d maso do duwo o tulan do mongoi pimpanau do hilo’d konulu-nuluan do mogiwoyo-woyo’ di tambalut ku. Om hilo’ nondo do mogihad oku diti nasip ku, tu’ sumandak oku po daa, om matai oku no,’’ ka dau. ³⁸ Om potumboyoo’ iddi iyau di tapa’ dau, om pologoso’ nod minamanau. Om ongoi noddi i sumandak om i tambalut dau do hiri’d konulu-nuluan do mongoi pogihad do hilo’, tu’ a’ po iyau kasawo om aiso’ po tanak om matai no. ³⁹ Om katalib poddi o duwo o tulan om guli’ no iyau dot id tapa’ dau, om wonsoyo’ noddi di tapa’ dau i pinabatos dau dot id TUHAN. Om kapatai noddi i tondu’ di sumandak po daa iyau. Om iri no o kinoimpuunon dot id pogialatan do tulun dot Israil, do koubasanan nod ⁴⁰ tumongkiad i kosumandakan do walai diyolo’ do solinaid dot apat o tadau do pointikid do toun do mikuwo’d tumongob do momusorou di tanak di Yipta di hilo’d Giliad.

¹ Om tontok noddi do suminodia’ i payat dot Ipraim do mongoi sangod. Om soborong noddi iyolo’ di Bawang do Yordan do pakayaan do hilo’d Sapon. Om boros ka diyolo’ dot id di Yipta, ’’Nokuro tu’ ongoi ko nopo sangod di tulun dot Amon om a’ nu i’ iyahai nangatan? Tutudan no dahai iya’ om koinsanai dit id suang do walai nu’d baino’,’’ ka diyolo’. ² Om boros kad i Yipta, ’’Haro o pitagadan dot id pialatan dahai, i tulun do Giliad om i tulun dot Amon. Om nolohou ku i’ iyokoyu do rumikot do mongoi ponguhup dahai do midu’ do mantad id pomorintaan di tulun dot Amon diri, nga’ a’ kou i’ ruminikot. ³ Om soira’ nopoddi do noilaan ku dot a’ kou rumikot do mongoi ponguhup dahai, om ongoi oku nopoddi sangod di tulun dot Amon, om a’ ku no pinadul o tinan ku dot apatai piya. Om onuwai oku noddi do TUHAN do kamanangan do suminangod diyolo’. Om nokuro’ddi tu’ rumikot kou do mongoi saap doho’?’’ ka dau. ⁴ Om timungo’ ngai’ noddi di Yipta i tulun do Giliad om songodo’ no diyolo’ i tulun dot Ipraim, om kaala’ no diyolo’. (Iri nopo tulun do Giliad di poundorong do hilo’d watas dot Ipraim om Manasi nga’ tondoson di tulun dot Ipraim do tuminongkiad do mantad id Ipraim, i payat mantad diyolo’.) ⁵ Om tamangai no di tulun do Giliad di maso do sumangod i hiri’d sosoborongon di Bawang do Yordan, om atalaban i’ diyolo’ i tulun dot Ipraim di mogidu’ daa. Om pointikid-tikid do haro o tulun dot Ipraim di mogidu’ do muhot daa ondung koino-ino do sumoborong, om uhoton ngai’ nopo di tulun do Giliad do poingkaa, ’’Tulun ko dot Ipraim?’’ ka. Ondung ’’Okon,’’ ka do posimbaron di tulun, ⁶ om suhuon no diyolo’ i tulun do momoros di boros dot ’’Syibolit,’’ ka. Om pomomoros nopo di tulun nga’ ’’Sibolit,’’ ka tu a’ i’ kadawot no kopio di boros diri. Om tangkapon nondo diyolo’ i tulun om patayon no dot id iso’ o kinoiyonon do hiri’d sosoborongon. Om kapatai no ot apat nohopod om duwo noribu o tulun dot Ipraim do tontok diri. ⁷ Om koloido’ nopo di Yipta do nosiliu’d boyoon di tulun dot Israil om onom o toun. Om kapatai noddi iyau om lobongo’ no do hilo’d kampung dau do hilo’d bandar do Mispa, di hilo’d Giliad. ⁸ Om suminusuhut nopo di Yipta do nosiliu’d boyoon do tulun dot Israil om i Ibsan, i mantad hilo’d Baitlahim. ⁹ I Ibsan nopodti nga’ kianak do tolu nohopod o tongokusai om tolu nohopod o tongoondu’. Om iri nopo tangaanak dau’d tongoondu’ nga’ pinasawaan dau do tulun do mantad id payat do suwai. Om panganu no iyau’d tolu nohopod o sumandak do mantad id payat do suwai do pinokowinan di tangaanak dau’d tongokusai. Om koloido’ nopo di Ibsan do nosiliu’d boyoon di tulun dot Israil om turu’ o toun. ¹⁰ Om kapatai noddi iyau om lobongo’ no do hilo’d Baitlahim. ¹¹ Om suminusuhut no di Ibsan do nosiliu’d boyoon do tulun dot Israil om i Ilon, i mantad id payat do Sibulon. Om hopod o toun dau do boyoon di tulun dot Israil. ¹² Om kapatai noddi iyau om lobongo’ no do hilo’d Ayalon, it id watas do Sibulon. ¹³ Om suminusuhut nod i Ilon do nosiliu’d boyoon do tulun dot Israil om i Abdon, i tanak di Hilil, i mantad hilo’d Piraton. ¹⁴ Om kogumuon nopod tanak dau’d tongokusai om apat nohopod o tulun, om iri no manangaki dau do tongokusai om tolu nohopod o tulun. Om otikid nopo iyolo’d kaladai do sakayon. Om walu’ o toun di Abdon do boyoon di tulun dot Israil. ¹⁵ Om kapatai noddi iyau om lobongo’ no do hilo’d Piraton, i hilo’d watas dot Ipraim, it id watas do konulu-nuluan do tulun dot Amalik.

¹ Om pomonsoi po kawagu’d dusa dot id TUHAN i tulun dot Israil. Om pologoso’ noddi do TUHAN i tulun do Pilistin do momorinta’ diyolo’ do solinaid dot apat nohopod o toun. ² Om tontok nopoddi nga’ haro o songulun o kusai do hilo’d kampung Sora. Ngaran nopo dau om i Manua, i mantad id payat do Dan. Iri nopo sawo dau om a’ maganak. ³ Nga’ insan o tadau om rikot no o moloikat do TUHAN dot id sawo dau om boro-boros nod poingkaa, ’’Solinaid nopodti om aiso’ i’ o tanak nu, nga’ a’ no alaid om monontian ko no. Om osusu ko nondo do tanak do kusai. ⁴ Nga’ antaan-taan no kopio, kada’ no kopio ponginum do waig dot anggur ko’ i tiinumon do kaawuk, ko’ mangakan po do nunu nopo i sosomu’; ⁵ tu’ natantu’ mantad no i tanak di ponontianon nu do sumiliu’d tulun do Nasir. Iyo nopoddi, om osusu nopondo i tanak nu om kada’ no kopio pampadai o tobuk dau. Tu’ iyau no o popoidu’ do tulun dot Israil do mantad id pomorintaan do tulun do Pilistin,’’ ka. ⁶ Om ongoi noddi i sawo di Manua solowot di Manua, om boros ka dau, ’’Haro moti’ o susuhuon do Kinorohingan do ruminikot dot id doho’. Om rabas nopo dau nga’ miagal do moloikat do Kinorohingan, om nooris tomod oku. Om a’ ku i’ nuhot ondung honggo o tadon dau, om a’ iyau pinoposunud do ngaran dau dot id doho’. ⁷ Nga’ boros ka dau om monontian oku kakando om osusu do tanak do kusai. Om boros ka kawagu dau, om a’ oku koino-ino do monginum do waig dot anggur ko’ iri po tiinumon do kaawuk ko’ mangakan po do nunu nopo i sosomu’, tu’ iri nopo tanak diri nga’ mositi’ nod patahakon dot id Kinorohingan do sumiliu’d tulun do nasir do solinaid dau do poimpasi,’’ ka. ⁸ Om korongou poddi di Manua iri, om sambayang no iyau dot id TUHAN do poingkaa, ’’Oi TUHAN, porikot-rikoto’ po daa i susuhuon nu’ddi dot id dahai do mongoi pomisunud dahai ondung nunu ot apatut do wonsoyon dahai dot id tanak diri dot osusu,’’ ka. ⁹ Om pinokinongou i’ do Kinorohingan i pinokianu di Manua. Om rikot po kawagu i moloikat do TUHAN do tontok di poirikau i sawo di Manua do hiri’d dumo. Om tontok nopoddi nga’ okon ko’ hiri i sawo dau, ¹⁰ om panangkus noddi iyau do minongoi posunud di sawo dau do pasal diri. Boros ka dau, ’’Kaino pogi’ mongoi ontong, tu’ nokorikot no kawagu i tulun di minongoi solowot doho’ di guulu!’’ ka dau. ¹¹ Om olomus nopoddi i Manua do minongoi tanud di sawo dau. Om ongoi no iyau insomok di tulun diri om ponguhot no do poingkaa, ’’Iya’ nogi’ i minoro-boros di sawo ku?’’ ka dau. ’’Oo,’’ ka dau do suminimbar. ¹² Om uhot noddi i Manua do poingkaa, ’’Osiliu nopondo i pinoboros nu’ddi, om nunu nondo o wonsoyon di tanak? Poingkuro-kuro nondo o koposi-posion dau?’’ ka. ¹³ Om boros ka di moloikat do TUHAN do suminimbar, ’’Mositi’ nod soro-sorohon kopio di sawo nu do tumanud do koinsanai di pinoboros ku dot id dau. ¹⁴ A’ iyau koino-ino do monginum do waig dot anggur ko’ iri po tiinumon do kaawuk, om a’ nogi’ koino-ino do mangakan do nunu nopo i mantad id guas dot anggur, om a’ koino-ino do mangakan do nunu nopo i sosomu’. Om mositi’ nod tonudon ngai’ dau i pinoboros ku’ddi,’’ ka. ¹⁵ Om boros kaddi di Manua dot id dau, ’’Andad-andad po daa dot ongoruhai. Pagansakan po dahai iya’ do kambing dit okoro’ po,’’ ka. ¹⁶ - ¹⁷ Nga’ boros ka di moloikat do TUHAN, ’’Mandad oku piya’d hiti nga’ a’ oku i’ mangakan di taakanon do posurungon nu. Nga’ ondung orohian ko do posurung, om posodiawon nopo do maan do porsombahan di sorobon, om patahakon nori dot id TUHAN,’’ ka dau. Om a’ pod i Manua oilaan do moloikat do TUHAN i moro-boros dau’ddi. Om boro-boros noddi i Manua do poingkaa, ’’Sunudai daa giya iyahai’d ngaran nu, oi Tuan, om kapatahak i’ iyahai do maan do pongunsikou diya’ dot osiliu i pinoboros nu’ddi,’’ ka. ¹⁸ Om uhot noddi i moloikat do TUHAN do poingkaa, ’’Nokuro tu’ orohian ko’d koilo do ngaran ku? Ngaran ku nopo om ngaran di koimayaan,’’ ka. ¹⁹ Om ongoi noddi i Manua panganu do songinan o kambing dit okoro’ po do mitonggoi’d gandum dot okuuri’, om pasakayo’ no dau di watu om patahako’ no dot id TUHAN, i TUHAN di momonsoi do koimayaan. ²⁰ - ²¹ Om tontok di minsawat no i lisun di porsombahan do mantad id pananaraban do porsombahan diri, om kokito no di Manua om i sawo dau i moloikat do TUHAN do mininsawat do poirolot di sinikit do tapui, do pakayaan do hilo’d tawan. Om koilaai nogiddi di Manua do moloikat do TUHAN iri, om otud noddi iyau om i sawo dau do tuminuku’. Om a’ noddi hino i moloikat om a’ no iyolo’ nokokito kawagu di moloikat diri. ²² Om boros kaddi di Manua dot id sawo dau, ’’Atantu’ no dot apatai to tu’ nokokito to i’ di Kinorohingan!’’ ka. ²³ Om boros ka di sawo dau do suminimbar, ’’Ondung patayon to daa’d TUHAN, om atantu’ nod a’ dau romiton i porsombahan di pinatahak to’ddi dot id dau; om a’ daa dau pinotuduk ngai’ iri dot id dato om a’ pinoposunud di piro-piro o hal di pinoboros dau dot id dato’ddi,’’ ka dau. ²⁴ Om alaid noddi om kosusu no i sawo di Manua dot iso’ o tanak do kusai, om pungaranai no dau dot i Simson. Om mayo-gayo nopoddi i tanak om binarakatan do TUHAN; ²⁵ om tontok di hilo’ iyau’d kokiiman di payat do Dan, it id pialatan do Sora om Istaol, om timpuun no o Rusod do TUHAN do minanahak dau do kokorisan.

¹ Insan tadau om ongoi no i Simson do hilo’d Timna. Om hilo’ no o kinokitanan dau do songulun o sumandak do Pilistin. ² Om uli’ noddi iyau om boro-boros no iyau di tapa’ om i tina’ dau. Boros ka dau, ’’Haro o sumandak do Pilistin do korohian kopio ku do hilo’d Timna. Om ngoyon no daa dokoyu doho’ iyau atadai’d tunang,’’ ka. ³ Nga’ boros ka di tapa’ om i tina’ dau, ’’Nokuro tu’ minog do mogongoi do tondu’d Pilistin do maan do sawo, tu’ a’ i’ miagal o tugama’ toko’? Aiso’ no kopio o tondu’ do korohian nu dot id suang do pinuruan do sompiiyon toko’ om id suang diti bansa’ toko’?’’ ka . Om boros kad i Simson dot id tapa’ dau, ’’Nga’ iri no sumandak do Pilistin o korohian ku. Om ngoyon no doho’ iyau paatadai’d tunang, oi apa’,’’ ka. ⁴ Nga’ a’ i’ di molohing di Simson oilaan do TUHAN i’ o mominsuhu’ di Simson do momonsoi’d miagal diri. Tu’ mogihum no o TUHAN do ralan do sumangod di tulun do Pilistin. Tontok nopoddi om i tulun do Pilistin o momorinta’ di tulun dot Israil. ⁵ Om ongoi no i Simson do hilo’d Timna do miwoyo’ di tapa’ om tina’ dau. Om tontok di nakawaya’ iyolo’ dot iso’ o kabun dot anggur, om korongou no i Simson do garom do songinan o singa dit okoro’ po. ⁶ Om sigog iddi dot okoris i Simson do pinokoris di kuasa’d TUHAN, gisom do longono’ nopo dau do pinopogitobilang-bilang i singa, do miagal nod kambing i singa. Om a’ i’ dau pinosusui iri di tapa’ om i tina’ dau. ⁷ Om ongoi no i Simson solowot di sumandak, om pogkorumo no dau, tu’ orohian no kopio i Simson di sumandak diri. ⁸ Om alaid noddi do mantad diri, om ongoi no kawagu i Simson do hiri do minongoi pangawin di sumandak. Om tontok di hiri iyolo’d tindalanon, om sala’ no iyau di ralan, do minongoi pogontong di kinapasaan di singa di pinatai dau. Nga’ soira’ddi nokorikot iyau’d hiri om kokito no dau dot ogumu’ tomod o potiukan do hiri’d kinapasaan di tinan di singa, om haro o paha’ di potiukan do hiri. ⁹ Om ngoyo’ no dau kokogo’ i paha’, om kahangai nopo dau do minongigit om tilombus nogiddi do minamanau do makan-akan di paha’. Om guli’ noddi iyau do hiri’d tapa’ om tina’ dau, om patahako’ no dau diyolo’ o wookon di paha’. Om kano’ no diyolo’ iri nga’ a’ i’ di Simson sinunudan iyolo’ do mantad id kinapasaan do tinan do singa o nangayan dau’ddi. ¹⁰ Om kaatadai poddi di tapa’ dau do tunang i sumandak diri do hiri’d walai di sumandak om papaharo noddi i Simson do poginakanan do hiri do tumanud do koubasanan di tangaanakwagu. ¹¹ Om soira’ddi nokito iyau di tulun do Pilistin, om ponuhu’ no iyolo’d tolu nohopod o tangaanakwagu do mongoi do hiri’d dau. ¹² Om boros kaddi di Simson dot id diyolo’, ’’Haro o sundoiton ku. Om ondung arait dokoyu iri, om tikidan ku nopondo iyokoyu’d kain linan dit aalus om sapasang o pakayan dit osonong. Om onuan ku iyokoyu’d maso do turu’ o tadau do momusorou’d kosondoton diri, do solinaid diti poginakanan do nokopikowinan. ¹³ Nga’ ondung a’ dokoyu arait iri om manahak ngai’ kou doho’ do kain linan dit aalus om pakayan dit osonong,’’ ka dau. Om boros kaddi di tolu nohopod o tanakwagu do Pilistin diri, ’’Ba! Poboroso’ daa ino sundoiton nu,’’ ka. ¹⁴ Om boros kad Simson, ’’Mantad nopo di mangakan, om minimbulai i taakanon; mantad no dit okoris, om minimbulai ot oomis,’’ ka. Om natalib noddi o tolu tadau nga’ a’ po diyolo’ narait i sundait diri. ¹⁵ Om kaapat noddi do tadau om ongoi no iyolo’ boro-boros di sawo di Simson, boros ka diyolo’, ’’Lugu-lugutan no kama i sawo nu om posunud i’ iyau do kosondoton di sundait. A’ nopo moti’ om tutudan no dahai iya’ om koinsanai dit id suang do walai’d tapa’ nu. Tu’ oilaan i’ dahai do linohou nu pogi’ iyahai nga’ mokimaanu-anu ko i’ do kountungan do mantad id dahai!’’ ka diyolo’. ¹⁶ Om ongoi noddi i sawo di Simson solowot di Simson do mikuwo’d mihad-ihad poo, om boro-boros nod poingkaa, ’’Oilaan ku i’ dot a’ ko osianan doho’. Nokuro tu’ minonundait ko dot id tambalut ku om a’ ko i’ poilo doho’ do kosondoton diri? Antangai pogi’ nga’ araatan kopio ko i’ doho’!’’ ka dau. Om boros kad Simson, ’’Pokinongou pogi! Iri piya tapa’ om tina’ ku nga’ a’ ku i’ sinunudan. Om nokuro daa’ndo tu’ sunudan ku iya’?’’ ka dau. ¹⁷ Om mihad-ihad nopoddi kasai’ i sawo di Simson do solinaid di turu’ o tadau do moginakan. Om mugut-lugut i’ kasai’ddi i sawo di Simson om posunudo’ noddi di Simson o kosondoton di sundait di koturu’d tadau. Om posunudo’ no di sawo di Simson iri dot id tulun do Pilistin diri. ¹⁸ Om tontok di koturu’d tadau, dit a’ po i Simson nokoongoi do hiri’d bilik do toodopon dau, om boros ka di tulun do bandar diri dot id dau, ’’Nunu po ot oomis ko’ paha’? Om nunu po ot okoris ko’ singa?’’ ka. Om boros kad i Simson do suminimbar, ’’Ondung a’ daa dokoyu tinompurolosi i sawo ku om a’ i’ daa dokoyu noilaan o kosondoton di sundait!’’ ka dau. ¹⁹ Om sigog nopoddi dot okoris i Simson dot i kuasa’d TUHAN o pinopokoris dau, om ongoi no iyau do hilo’d Askilon. Om hilo’ no o pinamatayan dau do tolu nohopod o tongokusai dit ongkipakayan dot ongosonong, om onuo’ no dau i pakayan om patahako’ no di tolu nohopod o tangaanakwagu di nakarait di sundait. Om uli’ noddi iyau do hiri’d walai dau do mikuwo’d monosol tomod iyau. ²⁰ Om patahako’ noddi di tiwanon di Simson do kusai i sawo di Simson dot id tulun di minomoyo’ di Simson do tontok di kuminawin.

¹ Piro-piro noddi o koloido’ do mantad diri, di dongmongomot nod gandum, om ongoi no i Simson ompuya’ di sawo dau do mikuwo’d minigit do songinan o kambing dot okoro’ po do patahakon di sawo dau. Om boros kad i Simson dot id tiwanon dau’d kusai, ’’Mongoi oku’d hilo’d bilik di sawo ku,’’ ka. Nga’ a’ i’ iyau di tiwanon dau’d kusai pinotumboyo’. ² Tu’ boros ka dau dot id di Simson, ’’Ondos ku daa om araatan ko no kopio dau, om nakatahak ku noddi iyau dot id tambalut nu. Nga’ ngoyon nopo i tadi’ dau. Olumis-lumis nogi’ iri,’’ ka dau. ³ Om boros kaddi di Simson, ’’Iti nopo wonsoyon ku dot id tulun do Pilistin do baino’ om okon no ko’ doho’d sala’!’’ ka dau. ⁴ Om ongoi noddi iyau pamagamit do tolu nahatus o toni. Om pikogoso’ no dau o tikiu di toni, do sinoroduwo-duwo; om posusukai no dau’d tata’ o hiri’d pinikagasan di tikiu. ⁵ Om tutudai nogiddi’ dau i tata’ om poiduwo’ ngai’ no dau i toni do hiri’d koumaan di tulun do Pilistin. Om kosorob ngai’ nopo i gandum di nongoomot no daa do hiri’d dumo; om okon nopo ko’ iri noo nga’ iri piya i gandum di songinsuni om i kokobunan dot anggur nga’ nangaalab ngai’ nogi’. ⁶ Om ongoi noddi i tulun do Pilistin pinguhot ondung isai o minomonsoi’ddi. Om haro’ddi o tulun do minomisunud diyolo’ dot i Simson o minonimpuun diri tu’ pinatahak i’ di tiwanon dau’d kusai i sawo di Simson dot id tambalut di Simson. Om iri noddi o nakaangayan di tulun do Pilistin kopodtutudai di tondu’ di sawo daa di Simson om koinsanai dit id suang do walai di tapa’ dau do gisom do nangapatai ngai’ iyolo’. ⁷ Om boros kaddi di Simson dot id tulun do Pilistin diri, ’’Dot iyo pama’dti o winonsoi dokoyu? Sumumpa’ oku no dot a’ oku po mundorong dot a’ ku po iyokoyu osulian diti!’’ ka dau. ⁸ Om ngoyo’ noddi dau iyolo’ saapo’ om ogumu’ tomod diri o pinatai dau tu’ orongit tomod diri iyau. Om pamanau nogiddi iyau do minongoi undorong dot id iso’ o luang do pampang do hiri’d nulu-nulu do hilo’d Itam. ⁹ Om rikot no i tulun do Pilistin do hiri’d watas do Yohuda om pomukiim no iyolo’ do hilo’. Om ngoyo’ nogiddi diyolo’ songodo’ i kampung do Lihi. ¹⁰ Om uhoto’ no di tulun do Yohuda i tulun do Pilistin, ’’Nokuro tu’ mongoi kou panangod dahai?’’ ka. Om boros ka diyolo’ do suminimbar, ’’Kinorikatan nopo dahai om mongoi panangkap di Simson om owonsoi i’ dahai dot id dau o miagal di winonsoi dau dot id dahai,’’ ka. ¹¹ Om korongou poddi diyolo’ o miagal diri, om ongoi no o tolu noribu di tulun do Yohuda do hiri’d luang do pampang di hilo’d Itam. Om hilo’ poddi om boro-boros no iyolo’ dot id di Simson do poingkaa, ’’Kinukuro nu iyahai? A’ ko po koilo do tulun do Pilistin o momorinta’ dati’?’’ ka diyolo’. Om boros kad i Simson do suminimbar, ’’Suminuli’ oku noddi winonsoi diyolo’ dot id doho’,’’ ka. ¹² Om boros ka diyolo’, ’’Kinorikatan nopo dahai’d hiti om mongoi pongogos diya’ om katahak indo dahai iya’ dot id tulun do Pilistin,’’ ka. Om boros kad Simson, ’’Pamatos kou po dot a’ kou iyokoyu mamatai doho’,’’ ka. ¹³ Om boros ka diyolo’, ’’Ba, mongoi no bo iyahai’dti pongogos diya’, om katahak i’ dahai iya’ dot id tulun do Pilistin. A’ i’ iyahai mamatai diya’,’’ ka. Om kagasai noddi diyolo’ i Simson do tali di wagu po, om angatai nod tuminongkiad di luang do pampang. ¹⁴ Om soira’ddi nokorikot i Simson do hilo’d Lihi, om santangkus-tangkus poddi i tulun do Pilistin do minongoi ruba’ dau do mikuwo’d pininggarangan diyolo’ i Simson. Om sigog nopoddi dot okoris i Simson dot i kuasa’d TUHAN o pinopokoris. Om pimpututo’ nopoddi dau i tali di pinongogos di longon dau dot iyo poddi nosorob i tali. ¹⁵ Om kokito noddi iyau do tulang do roo do kaladai di wagu-wagu po kapatai. Om ngoyo’ no dau i tulang om iri no o pinamatai dau do soribu o tulun. ¹⁶ Om podsinding noddi i Simson do poingkaa, ’’Roo nod kaladai o pinamatai ku’d soribu o tulun; roo nod kaladai o pinopountun ku di rata’ diyolo’,’’ ka. ¹⁷ Om kopodsinding poddi iyau, om taamo’ no dau i tulang do roo’ddi. Om iri no o kinopomungaranan do kinoiyonon diri do Ramat Lihi. ¹⁸ Om kopuriman noddi i Simson do tuuhan tomod, gisom do luminohou iyau do TUHAN. Boros ka dau, ’’Oi TUHAN, katatahak nu dot id doho’ iti kamanangan dot agayo om dinondo nodti om matai oku no tuu’ndo dot otutuuhanan, om atangkap nondo dilo tulun do Pilistin dit a’ kotutun do TUHAN!’’ ka dau. ¹⁹ Om ukabai nod Kinorohingan ot iso’ o luang do hiri’d tana’ om soliwan no o waig do mantad hiri’d luang diri. Om inum no i Simson, om osonong-sonong nogiddi ot opurimanan dau. Om iri noddi o kinopomungaranan do tudan do waig diri do tudan do Waig do Hakor. Om hino kasai’ po i tudan do waig diri do hilo’d Lihi. ²⁰ Om i Simson no o boyoon di tulun dot Israil do solinaid do duwo nohopod o toun do tontok di porintaon iyolo’ di tulun do Pilistin.

¹ Insan o tadau om ongoi no i Simson do hilo’d Gasa. Om hilo’ no o kinasalawatan dau do songulun o tondu’d sundal. Om ongoi no iyau sugku’ di tondu’ddi do minodop. ² Om kongoilo noddi i tulun do hilo’d Gasa do hiri i Simson. Om tutukai noddi diyolo’ i kinoiyonon diri om awangai no diyolo’ i Simson do hiri’d wawayaan di bandar do gisom do nosuaban. Om tontok nopoddi do totuong diri om aiso’ no o winonsoi diyolo’ tu’ koihi pod momusorou do poingkaa, ’’Mulai nopo o tadau om patayon toko’ no iyau,’’ ka no. ³ Nga’ a’ i’ i Simson nosuaban do minodop do hiri. Tu’ pitangatuong poddi om tungag no iyau om ongoi no do hiri’d wawayaan di bandar. Om sakato’ no dau i totobon di tolig di bandar — dot i totobon, om i torigi, om i salampad do pogitonggoi-tonggoyo’ ngai’ nopo dau iri do minanakat. Om saano’ noddi dau iri do minongoi do hiri’d timpak di nulu-nulu di koimpa’ do Hibron. ⁴ Alaid-laid noddi om haro o tondu’ do mantad do hilo’d Rantai do Sorik do kinouhangan di Simson. Ngaran nopo di tondu’ddi om i Dolila. ⁵ Om rikot no o limo o raja’ do Pilistin do minongoi solowot di tondu’ddi, om boro-boros nod, ’’Lugu-lugutan no i Simson om koilo ko i’ do tadon di kokorisan dau, om ralan do popoluhoi dau. Om rumikot nogindo iyahai do mongoi pongogos om mongoi pangala’ dau. Om patahak ngai’ nopondo iyahai do sororibuan om hatus o tusin do pirok dot id diya’,’’ ka diyolo’. ⁶ Om boros kaddi di Dolila dot id di Simson, ’’Simson, nokuro tu’ okoris kopio ko? Nunu kopio o popokoris diya’, posunudo’ daa! Nunu poo o pongogos diya’ om oluhoi ko indo?’’ ka dau. ⁷ Om boros kad i Simson do suminimbar, ’’Ondung kagasan oku’d turu’ o tali di sagalai di pomoloting do pana’ di wagu po, it a’ po notuu kopio om oluhoi oku no, om iyo oku pondo do tulun ngai’,’’ ka dau. ⁸ - ⁹ Om onuwai noddi di piro-piro o raja’ do Pilistin i Dolila do turu’ o tali di sagalai’d pomoloting do pana’ di wagu po, it a’ po notuu kopio. Om daamot nopoddi di tulun do Pilistin do poingandad dot id bilik do suwai, om kagasai nod i Dolila i Simson di tali’ddi. Om polohowo’ nogiddi dau o poingkaa, ’’Simson! Hodi tulun do Pilistin do rumikot!’’ ka dau. Nga’ pututo’ nopod i Simson i tali di sagalai’d pomoloting do pana’ddi. Om kongoputut nopo i tali dot iyo pod banang dit oputut dot osorob do tapui. Om a’ poddi kasai’ noimbulayan i tadon do kokorisan di Simson. ¹⁰ Om boros kaddi di Dolila dot id di Simson, ’’A! Goudut ko! Monguntotogod ko no doho’! Sunudai oku daa giya kopio ondung nunu noo o kokogos diya’!’’ ka dau. ¹¹ Om boros kad i Simson do suminimbar, ’’Ondung kagasan oku’d tali di wagu po, it a’ po insan kapakai, om oluhoi oku no, om iyo oku pondo do tulun ngai’,’’ ka dau. ¹² Om daamot nopo di tulun do Pilistin do poingandad dot id bilik do suwai, om ongoi no i Dolila do piro-piro o tali di wagu po, om kagasai no dau i Simson. Om polohowo’ nogiddi dau o poingkaa, ’’Simson! Hodi tulun do Pilistin do rumikot!’’ ka dau. Nga’ pututo’ nopod i Simson i tali’ddi do poingkogos do longon dau dot iyo nod momutut do banang. ¹³ Om boros kaddi di Dolila dot id di Simson, ’’A, antangai pogi’ nga’ nuntotogod oku po moti’ diya’ kawagu. Goudut ko. Sunudai oku pogi’ ondung nunu poo o kokogos diya’!’’ ka dau. Om boros kad i Simson do suminimbar, ’’Ondung pogisolopid-lopidon iti turu’ o kinawangkasan do tobuk ku, om pokogoson nogindo do papak om oluhoi oku no, om iyo oku pondo do tulun ngai’,’’ ka dau. ¹⁴ Om poodopo’ noddi di Dolila i Simson om solopido’ no dau i turu’ o kinawangkasan di tobuk dau; gisom dot iso’ poddi o kinosolopidan. Om pokogoso’ nogiddi dau do papak om polohowo’ no dau o poingkaa, ’’Simson! Hodi tulun do Pilistin do rumikot!’’ ka dau. Om tungag no i Simson om kagayat no dau i tobuk dau gisom do noidu’ do mantad hiri’d papak. ¹⁵ Om boros kaddi di Dolila dot id dau, ’’Antangai pogi’, nga’ muhang oku diya’, ka nu, om a’ ko i’ muhang kopio! Intolu ko noddi ponguntotogod doho’, om gisom piya’d baino’ nga’ a’ oku po diya’ nosunudan do tadon dino kokorisan nu,’’ ka dau. ¹⁶ Om monikid tadau nopoddi i Dolila do mugut-lugut do mononsog, gisom dot apaasan noddi i Simson do korongou dau. ¹⁷ Om alaid noddi om posunudo’ nod i Simson i tadon do kokorisan dau. Boros ka dau, ’’Iti nopo tobuk ku om a’ i’ insan kopompod. Om nakatahak oku no dot id Kinorohingan do pinotobilang do sumiliu’d dau’d songonuon. Om mantad poddi pogkosusuo’ oku i’, om nosiliu oku no do tulun do Nasir. Ondung pompodon iti tobuk ku om atagak no o kokorisan ku om oluhoi oku nondo, om iyo oku pondo do tulun ngai’,’’ ka dau. ¹⁸ Om koilaai noddi di Dolila do nokosunud no di Simson it otopot. Om poporomut noddi iyau’d boros dot id piro-piro o raja’ do Pilistin do poingkaa, ’’Riko-rikot kou po do baino’ poo. Tu’ nokosunud nod i Simson it otopot,’’ ka dau. Om rikot noddi iyolo’ do mikuwo’d minongigit do tusin do patahakon dot id di Dolila. ¹⁹ Om puayai noddi di Dolila i Simson do gisom i’ do nokoodop do hiri’d poo dau. Om pomolohou noddi iyau’d tulun om suhuo’ no dau do minomompod di turu’ o kinawangkasan do tobuk di Simson. Om katagakai noddi i Simson di kokorisan dau. Om untotogodo’ noddi di Dolila i Simson, ²⁰ boros ka dau, ’’Simson! Hodi tulun do Pilistin do rumikot,’’ ka. Om tungag no i Simson om ondos daa dau om koidu’ i’ iyau do miagal di gulu. Tu’ a’ i’ dau noilaan do nokotongkiad no o TUHAN do mantad id dau. ²¹ Om tangkapo’ noddi iyau di tulun do Pilistin om irulo’ no diyolo’ o linso’ do mato dau. Om pokoyoo’ no diyolo’ iyau do hilo’d Gasa om kagasai no do rantai’d tambaga’. Om posuango’ nogiddi iyau dot id giil. Om hiri noddi do sinuhu’ iyau do mongisar. ²² Nga’ daamot nopoddi om sumuni no kawagu i tobuk dau. ²³ Insan o tadau om timung ngai’ no i raja’ do Pilistin do mongoi poginakan om mongoi papatahak do porsombahan dit ogumu’ kopio dot id Dagon, i tingolig diyolo’. Om podsinding no iyolo’ do poingkaa, ’’Noonuan toko’ no diti tingolig toko’ do kamanangan do suminaap di Simson, i pisangod toko’!’’ ka diyolo’. ²⁴ - ²⁵ Om adalaan noddi kopio o kotoodo’ diyolo’ gisom do minomoros iyolo’ do poingkaa, ’’Angatan daa i Simson do hiti, om ountotogod toko’ i’ iyau!" ka. Om ngoyo’ no diyolo’ i Simson do mantad hiri’d giil, om suhuo’ no diyolo’ iyau do mingkakat dot id piolitan do duwo o torigi dit agayo, om untotogodo’ nogiddi diyolo’ iyau. Om soira’ddi di nokito di tulun dot ogumu’ i Simson, om royoho’ no diyolo’ i Dagon, om podsinding no iyolo’ do poingkaa, ’’Noonuan toko’ no di tingolig toko’ do kamanangan do suminaap di pisangod di minamaraag diti pomogunan toko’ om i minamatai di tulun toko’ dot ogumu’ tomod,’’ ka. ²⁶ Om boros kad i Simson dot id tanak do kusai di mangahak dau, ’’Ngoyo’ oku daa diya’ poigito’ di torigi do pinomogirot diti walai, om kosondiu oku i’ do hiri,’’ ka dau. ²⁷ Iri nopo walai’d agayo’ddi nga’ nosolot po tomod do tulun. Om iri nogi’ i limo o raja’d Pilistin nga’ hiri i’. Om hiri nopod tingkat dit id sawat di walai om haro i’ doti’ o tolu noribu o tulun. Om songingontong ngai’ nopo iyolo’ di Simson om minguntotori’ iyolo’ dau. ²⁸ Tontok noddi do suminambayang i Simson, boros ka dau, ’’Oi TUHAN, it Asawat Kopio, soroho’ oku no diya’. Onuwai oku no do kokorisan do baino’ poo, oi Kinorohingan, om osulian ku i’ i tulun do Pilistin di minongirul di duwo o linso’d mato ku,’’ ka dau. ²⁹ Om kabayai goduwo noddi di Simson i duwo o torigi di pinomogirot di walai dot agayo’ddi. Om sudsuro’ noddi dau di longon dau’d gibang i tiso’ di torigi om iri longon dau’d wanan o pinonudsur dau di torigi’d koduwo. ³⁰ Om poboroso’ noddi dau dot opuhod o poingkaa, ’’Baya’ nopod kotonggoi oku diti tulun do Pilistin do matai!’’ ka. Om ponotos tomod noddi iyau do minonudsur di duwo o torigi’ddi do gisom do nahaba’. Om kahabaai nopoddi i limo o raja’ do tulun do Pilistin do mitonggoi’d toinsanan di tulun do hiri. Om i Simson nga’ nokotonggoi nogi’ do napatai. Nga’ tontok nopoddi kinapatayo’ dau, om ogumu’ nogi’ o napatai dau do tontok diri ko’ mantad di napatai dau di poimpasi po iyau. ³¹ Om rikot ngai’ noddi i tobpinai dau om koinsanai di koobpinayan dau do suwai do minongoi di rata’ dau. Om poulio’ noddi diyolo’ i rata’ dau, om lobongo’ no do hiri’d pinamalabangan di Manua, i tapa’ dau. Iri nopo kalabangan diri nga’ hiri’d piolitan do Sora om Istaol. Om i Simson no o nosiliu’d boyoon di tulun dot Israil do solinaid do duwo nohopod o toun.

¹ Di nopo di gulu po, om haro o songulun o kusai do roitan dot i Mika. Om poingiyon iyau do hilo’d watas do konulu-nuluan dot Ipraim. ² - ⁴ Insan tadau om boro-boros no iyau di tina’ dau, ’’Ina’, tontok di natagakan ko do soribu om hatus o tusin do pirok, om norongou ku do pinapalan nu i minanakau’ddi. Diya i tusin diri, oi ina’! Iyoho’ i’ i minanakau’ddi,’’ ka dau. Om pogulio’ noddi di Mika i tusin diri dot id tina’ dau. Om boros ka di tina’ dau do suminimbar, ’’Maha’ daa om barakatan ko’d TUHAN, oi tanak ku!’’ ka dau. Om onuo’ noddi di tina’ di Mika o duwo nahatus di tusin do pirok diri, om patahako’ no do songulun o tukang pirok. Om pomonsoi noddi i tukang pirok dot iso’ o tininganak do kayu o winonsoi, om urogupai nogiddi dau di pirok. Om patahako’ noddi di tina’ di Mika i tininganak diri dot id di Mika, om boro-boros nod, ’’Napakai ku no i tusin diri do pinomonsoi diti tininganak. Tu’ nakabatos oku no do papatahak di tusin diri dot id TUHAN, om koidu’ ko indo do mantad id popol di pinoboros ku’ddi, oi tanak ku,’’ ka dau. Om poopio’ noddi di Mika i tininganak diri do hiri’d walai dau. ⁵ Om i Mika nga’ haro i’ o tiyonon do sumambayang, om nokopomonsoi iyau do piro-piro o tininganak do tingolig om nokopomonsoi dot iso’ ot ipod. Om siniliu dau’d imam o tiso’ di tanak dau’d kusai. ⁶ Om tontok nopoddi nga’ aiso’ po o raja’ do tulun dot Israil, om sompori-pori nopo i tulun do tumanud di diyolo’d korohian dot id suang do koposi-posion diyolo’. ⁷ Om tontok nopoddi nga’ haro o songulun o tanakwagu do mantad id payat do Liwi, i mantad hilo’d kampung do Baitlahim, it id watas do Yohuda. ⁸ Om tuminongkiad iyau do mantad hilo’d Baitlahim om maso noddi do mimpanau do mogihum do kinoiyonon do suwai do pomogun-mogunan dau. Om hiri noddid tindalanon, om korikot no iyau do hiri’d walai di Mika, i hilo’d watas do konulu-nuluan dot Ipraim. ⁹ Om uhoto’ no iyau di Mika, ’’Tulun ko’d nunu, oi tobpinai?’’ ka dau. Om boros ka di tulun do suminimbar, ’’Iyoho’ nopo om tulun do Liwi, do mantad hilo’d Baitlahim, i hilo’d watas do Yohuda. Om maso ku’dti do mogihum do tiyonon do momogun-mogun,’’ ka dau. ¹⁰ Om boros kad i Mika, ’’Miyon nopod hiti om osiliu ko i’ do ponosihat om imam dahai. Om onuan ku indo iya’ do pakayan om takanon nu, om hopod o tusin do pirok do pointikid do toun,’’ ka dau. ¹¹ - ¹² Om kookunai i’ di tanakwagu do Liwi iri. Om siliho’ noddi iyau dot imam di mogobi-obi’ di Mika, om iyon no iyau do hiri’d walai di Mika, om iyo poddi iyau do tanak kopio di Mika. ¹³ Om boros kaddi di Mika, ’’Oilaan ku noddi kopio dot osonong o TUHAN dot id doho’ tu’ haro noddi o tulun do Liwi do nosiliu’d imam di mogobi-obi’ doho’,’’ ka dau.

¹ Om maso nopoddi om aiso’ po o raja’ do tulun dot Israil. Om maso nogiddi o payat do Dan do mogihum do tana’ do pomogun-mogunan diyolo’. Tu’ aiso’ po o tana’ diyolo’ dot id pogialatan di payat dot Israil. ² Om iri nopo sinompuruan do sompiiyon di poundorong do hilo’d Sora om Istaol om minomili’ iyolo’ do limo o tulun dit ongokoris om gunsiou do sinuhu’ do mongoi pogontong di pomogunan diri, om mongoi ponoluku’ di tulun do hiri. Om pamanau noddi i tulun di pinili’ddi. Om korikot no iyolo’ do hilo’d watas do konulu-nuluan di tana’ dot Ipraim, om ongoi no iyolo’ odop do hiri’d walai di Mika. ³ Tontok di hiri iyolo’d walai di Mika, om korongou no diyolo’ i tanakwagu do Liwi do moro-boros om kotutunai no diyolo’ i boros dau. Om ponguhot no iyolo’ dau, ’’Nokuro tu’ hiti ko? Nunu o maan nu’d hiti? Isai o minangangat diya’ do hiti?’’ ka. ⁴ Om boros ka di tanakwagu do suminimbar, ’’Iti no o korohian di Mika. Om godsian oku dau do sumiliu’d imam,’’ ka. ⁵ Om boros ka diyolo’, ’’Iyo nopoddi om tulungo’ daa iyahai do monguhot do Kinorohingan ondung osonong o kotutukon diti tongoyon dahai ko’ amu’,’’ ka. ⁶ Om boros ka dit imam do suminimbar, ’’Kada’ kou katangkabo tu’ korohian i’ do TUHAN iti tongoyon dokoyu,’’ ka dau. ⁷ Om pamanau noddi i limo o tulun diri do minongoi’d hilo’d Lais. Om hilo’ no iyolo’ do minonorisid do koposi-posion di tulun do hiri. Om kokito no diyolo’ o koposi-posion di tulun do Lais do miagal di koposi-posion do tulun do Sidon, do mulong piya dot osodu’ iyolo’ do mantad id tulun do Sidon, om poimpori-pori do mantad id bansa’d suwai, nga’ ongosimbayan i’ o koposi-posion diyolo’ tu’ aiso’ i’ o pisangod diyolo’ om haro ngai’ diyolo’. ⁸ Om koguli’ poddi i limo o tulun diri do hiri’d payat diyolo’ di hilo’d Sora om Istaol, om suhuo’ noddi iyolo’ di payat do Dan do poposunud di nokito diyolo’. ⁹ - ¹⁰ Om boros ka diyolo’, ’’Iri nopo pomogunan di nokito dahai om osonong, om agayo, om osimbayan, om haro ngai’ nopo. Kainou mongoi nogi’ do hilo’d Lais, om kada’ toko’ undorong tomod. Om ngoyon toko’ nogi’ kopio songodo’ iri dot oruhai om oiyon toko’ i’ i pomogunan diri, tu’ patahakon id Kinorohingan iri dot id dokoyu. Om soira’ nopo do korikot kou’d hilo’ om a’ i’ diyolo’ osorou do mongoi kou panangod diyolo’,’’ ka. ¹¹ Om pamanau noddi ot onom nahatus o tulun do mantad id payat do Dan do mantad hilo’d Sora om Istaol dot ongkirapo-rapo ngai’ do don sumasangod. ¹² Om ongoi no iyolo’ do hilo’d ponong id kotonobon do mantad id Kiriat Yiarim, it id watas do Yohuda, om pomukiim no iyolo’ do hilo’. Om iri no o kokuwaan do roitan kasai’ po do ’’Kokiiman do Dan’’ o kinoiyonon diri. ¹³ Om lombus po iyolo’ do minamanau do mantad hilo’ do kuminaa do hilo’d watas do konulu-nuluan dot Ipraim om korikot no iyolo’ do hiri’d walai di Mika. ¹⁴ Om boro-boros no i limo o tulun, i gomponoluku’ di sinuhu’ di gulu poddi dot id tambalut dau, ’’Koilo kou i’ do haro ot iso’ o walai dot id pogiolitan diti walai’dti do haro o tininganak do nurogupan do pirok? Om haro po o tininganak do suwai om haro ot ipod. Nunu ot osorou dokoyu dot apatut toko’d wonsoyon?’’ ka diyolo’. ¹⁵ Om ongoi noddi iyolo’ do hiri’d walai di Mika, i niyon di tanakwagu do Liwi, do mikuwo’d suminuwau iyolo’ dau. ¹⁶ Nga’ iri nopo it onom nahatus di soudor do payat do Dan dit ongkirapo-rapo’ddi om songingkakat no do hiri’d wawayaan di bandar. ¹⁷ Nga’ iri nopo i limo o gomponoluku’ om suminuang do hiri’d walai di Mika do minongoi panganu di tininganak di kayu do winonsoi do nurogupan do pirok, om i tininganak do suwai om it ipod. Nga’ maso nopoddi om iri nopo i tanakwagu do Liwi om hiri’d rolot dit onom nahatus o soudor di hiri’d wawayaan do bandar. ¹⁸ Om soira’ do nokosuang i limo o tulun do hiri’d walai di Mika do minongoi panganu dit ipod om i tininganak do tingolig om ponguhot no i tanakwagu do Liwi, ’’Nunu ot onuon dokoyu’d hiti?’’ ka. ¹⁹ Om boros ka diyolo’, ’’Kada’ pimboros. Kada’ no ponguhot. Woyo’ nopo dahai, om iya’ no o sumiliu’d imam om ponosihat dahai. Tu’ osonong nogid sumiliu’d imam dot iso’ o payat, ko’ sumiliu’d imam dot iso’ no o sompiiyon,’’ ka. ²⁰ Om asanangan iddi i tanakwagu di pinoboros diyolo’ddi. Om onuo’ no dau it ipod om i tininganak do tingolig om woyo’ no iyau diyolo’. ²¹ Om lombus no iyolo’d minamanau, om pinogulu diyolo’ i tangaanak om i tayam-tayam, om i konunu-nunuan diyolo’. ²² Om koinsodu’ poddi iyolo’ om pangangat no i Mika di tulun di hiri’d somo-somok dau do mongoi pomogusa’ di tulun do Dan. Om tontok di nokosupan diyolo’ i payat do Dan, ²³ om pinggiak no i Mika om i tongoulun dau. Om koili no i tulun do payat do Dan, om uhoto’ no diyolo’ i Mika, ’’Nunu’ri? Nokuro tu’ iyo kopio’llo o kogumuon dilo tulun?’’ ka. ²⁴ Om boros kad i Mika do suminimbar, ’’Kada’ kou nod a’ mingilo-ilo. Tu’ nanu ngai’ dokoyu i tininganak di winonsoi ku, om it imam ku nga’ natanggayan no dokoyu do mogidu’. Om aiso’ noddi o nunu-nunu ku!’’ ka dau. ²⁵ Om boros ka di tulun do Dan, ’’Kada’ nogi’ ungkomi. Tu’ mungkomi ko nopo moti’, om tumogod moti’ ilo tulun om sumaap nondo iyolo’ om patayon ko nopo om koinsanai di sompiiyon nu!’’ ka. ²⁶ Om lombus noddi i tulun do Dan do minamanau. Om kokito noddi di Mika dot osodu’ noddi iyolo’, om ongokoris ko’ iyau, om uli’ noddi i Mika. ²⁷ - ²⁸ Om kaanu poddi di tulun do Dan it imam diri om i konunu-nunuan di maan do sumambayang di winonsoi di Mika, om ngoyo’ nogiddi diyolo’ songodo’ o Lais, i kampung dit osimbayan om aiso’ o ligogon do tulun di poingiyon do hiri. (Iri nopo kampung diri nga’ hiri’d rantai do kinoiyonon do kampung do Bait-Rihob.) Om songodo’ noddi di tulun do Dan i tulun do Lais. Om tutudai nogiddi diyolo’ i kampung diri. Om aiso’ no o minongoi uhup di tulun do Lais tu’ poimpori-pori i’ iyolo’ om osodu’ do mantad id Sidon. Om wonsoyo’ noddi kawagu di tulun do Dan i kampung diri om pomogun-mogun no iyolo’ do hiri. ²⁹ Om powoliho’ noddi diyolo’ o ngaran di kampung diri, om pungaranai no do Dan, do pinasangai di ngaran di taki diyolo’ di roitan dot i Dan, i tanak di Yakub. ³⁰ Om poingkakato’ noddi diyolo’d hiri i tininganak do tingolig di nanu diyolo’ddi do maan diyolo’d tukuon. Om pilio’ no diyolo’ i Yonatan, i tanak di Girsom, i manangaki di Musa, do sumiliu’d imam diyolo’. Om iri no i sinakagon di Girsom o nosiliu’d imam do payat do Dan do gisom do norikot o nakapananggayan do pisangod di tulun dot Israil do pinakaa dot id pomogunan do suwai. ³¹ Om iri nopo i tininganak do tingolig di winonsoi di Mika diri nga’ hilo’ kasai’ id Lais do solinaid do hilo’d Silo i Kiim do tiyonon do sumambayang dot id Kinorohingan.

¹ Tontok dit aiso’ po o raja’ do tulun dot Israil, om haro o songulun o Liwi do poingiyon do hiri’d sokid, it id watas do konulu-nuluan dot Ipraim. Om pogongoi no iyau’d tondu’ do numaan dau do panakasawo, do mantad hilo’d Baitlahim, it id suang do watas do Yohuda. ² Nga’ kotogod noddi i tondu’ dot id dau, om uli’ no i tondu’ddi do hiri’d walai di tapa’ dau do hilo’d Baitlahim. Om maha’ dit apat noddi o tulan di tondu’ do poundorong do hiri, ³ om ongoi no i sawo dau pangangat do songulun di susuhuon dau om igitai dau o duwo o tinan di kaladai do minongoi suhut di sawo dau do mongoi popouli’ dau. Om tontok di nokorikot iyolo’ do hilo’ om ngoyo’ no di tondu’ posolowoto’ i sawo dau di tapa’ dau. Om tontok di nokito di tapa’ di tondu’ i sawo di tanak dau, om otood tomod diri iyau do suminuwau dau, ⁴ om sansagai no iyau di tapa’ di tondu’ do mundorong do hiri’d walai dau. Om undorong no iyau do hiri do solinaid do tolu o tadau. Om poinsugku’ noddi iyau di tondu’ di panakasawo dau do makan, om misugku’ iyolo’d modop. ⁵ Om maha’ dit osuab po di kaapat nod tadau om sodia’ no iyolo’d mamanau. Nga’ boro-boros nogi’ i tapa’ di tondu’ddi di tulun do Liwi, ’’Makan kou po om a’ kou i’ louson, om mamanau kou nogindo,’’ ka. ⁶ - ⁷ Om irikau noddi iyolo’, om pogiilang no iyolo’ do makan om minum. Nga’ maha’ di mamanau no daa iyolo’, om lugu-lugutai po di tapa’ di tondu’ i tulun do Liwi dot a’ mamanau. Boros ka dau, ’’A’ i’ bondo marau-arau, modop pod hiti’d baino’,’’ ka. Om undorong poddi do hiri i tulun do Liwi do totuong diri. ⁸ Om maha’ dit osuab po di kolimo nod tadau, om sumodia’ no iyolo’ do mamanau, om boro-boros po kawagu i tapa’ di tondu’ dot id tulun do Liwi, ’’Kainou, makan po; om mamanau kou id tiinu’,’’ ka. Om akan noddi iyolo’ om ponorimo-rimo po gisom do tumonob noddi o tadau. ⁹ Om tontok di mamanau no daa’ddi i tulun do Liwi om i panakasawo dau om i susuhuon dau, om boro-boros po kawagu i tapa’ di tondu’, ’’Osodop noti. Om a’ no alaid do tumuong. Osonong nogid modop kou pod hiti om a’ nogi’ arau-arau. Om sumuab kou i’ do mamanau’d suab do muli’ do hilo’d walai nu,’’ ka. ¹⁰ - ¹¹ Nga’ a’ noddi minundorong i tulun do Liwi. Om pamanau noddi iyau do miniwoyo’ di panakasawo dau om i susuhuon dau om i duwo o kaladai dau di pinakalan goduwo. Om tumuong noddi di nokorikot iyolo’ do hilo’d somok do bandar do Yobus (iri no i bandar do Yorusalim.) Om boro-boros no i susuhuon diri dot id tuan dau, ’’Tuan, kainou mundorong om modop toko’ nopo do hiti’d bandar do tulun do Yobus,’’ ka. ¹² - ¹³ Nga’ boros ka di tuan dau, ’’Amu’! A’ toko’ i’ milo do mundorong do hiti tu’ okon i’ ko’ pomogunan do tulun dot Israil. Kainou lombus toko’ nopod mamanau, om modop toko’ i’ do hilo’d Gibia ko’ hilo’d Rama!’’ ka dau. ¹⁴ Om lombus poddi iyolo’ do minamanau, om a’ no minundorong do hilo’d Yobus. Om notonob noddi o tadau om korikot nogi’ iyolo’ do hilo’d Gibia, it id watas do payat do Binyamin. ¹⁵ Om umbaya’ no daa’ddi iyolo’ do mongoi odop do hiri. Om suang noddi iyolo’ do hiri’d bandar diri. Nga’ aiso’ i’ o tongosongulun piya do pinapasalakoi diyolo’. Om ongoi noddi iyolo’ undorong do hiri’d talun-alun. ¹⁶ Om daamot di songirikau iyolo’d hiri, om rikot no o songulun o molohing no do koguguli’ do mantad id dumo. Tadon nopo kopio dau om hilo’d watas do konulu-nuluan dot Ipraim. Nga’ baino’ nopoddi om poingiyon no iyau do hiri’d Gibia. (Iri nopo tulun do suwai di poingiyon do hilo’ om mantad id payat do Binyamin.) ¹⁷ Om kokito noddi di tulun di molohing no i tulun do Liwi do hiri’d talun- alun, om uhoto’ no dau iyau, ’’Hinonggo tadon dokoyu, om hinonggo o pakayaan dokoyu?’’ ka dau. ¹⁸ Om boros ka di tulun do Liwi do suminimbar, ’’Koririkot dahai’dti do mantad hilo’d Baitlahim, i hilo’d watas do Yohuda, om poulian no dahai’dti do hilo’d sokid, i hilo’d konulu-nuluan dot Ipraim. Nga’ aiso’ i’ o tongosongulun piya do tulun do hiti’d bandar diti do popoodop dahai dot id walai diyolo’. ¹⁹ A’ i’ daa iyahai mokianu do nunu nopo; tu’ kabagal i’ dahai o kokoriu dahai. Haro i’ o sakot do nokoring om haro po taakanon do suwai do paakanan dahai dilo kaladai dahai. Om haro o roti om anggur dot akanon dahai dilo sawo ku om ilo susuhuon ku,’’ ka dau. ²⁰ Om boros kaddi di tulun di molohing noddi, ’’Kada’ katangkabo, tu’ tulungon ku i’ iyokoyu, om kada’ kou odop do hiti’d talun-alun,’’ ka dau. ²¹ Om angatai noddi dau iyolo’ do mongoi do hiri’d walai dau. Om sumado’ no dau i kaladai di tulun do Liwi. Om pongoug noddid lapap i tulun di molohing no, om i tulun di nangatan dau’d hiri, om akan nogiddi iyolo’. ²² Om daamot di mogirumo-rumo iyolo’ om sigog nopo om ngoyo’ di tongokusai’d sundal do mantad id bandar diri, tutukai i walai. Om sombobog-bobog nopoddi iyolo’ di totobon di walai, mikuwo’d minoro-boros di tulun di molohing no, do poingkaa, ’’Patahako’ dahai ino tongokusai di pinasalakoi nu do hino’d walai nu do maan dahai ompohuo’,’’ ka. ²³ Om soliwan no i tulun di molohing noddi, om boro-boros no diyolo’, ’’Kada’ kou no kopio, oi tobpinai-tobpinai. Pokionuon ku no, dot a’ kou momonsoi dit araat om it a’ kopio apatut. Tu’ iyolo’ nopo om nokoumbaya’ no toomod do hiti’d doho’. ²⁴ Patahakon ku nogi’ dot id dokoyu ilo tondu’ do panakasawo dau om i tanak ku’d sumandak. Om wonsoyon nopo o nunu nopo o korohian dokoyu dot id diyolo’, nga’ kada’ kou po pomonsoi dot araat dot id tongokusai diti nokoumbaya’ do hiti’d doho’,’’ ka dau. ²⁵ Nga’ ongosonsog kopio i tongokusai’d sundal diri; om posoliwano’ no di tulun do Liwi i tondu’ di panakasawo dau’ddi do pinatahak dot id diyolo’. Om ompohuo’ noddi diyolo’ i tondu’ddi do gisom do nosuaban. ²⁶ Om maha’ dit osuab po di kosuabon om guli’ no i tondu’ddi do hiri’d walai di tulun di molohing no, i niyonon di sawo dau. Om kahaba’ nopo iyau do hiri’d toning di wawayaan di walai. Om tontok di nokoulai no o tadau om hiri kasai’ po iyau. ²⁷ Om tontok di kosuabon diri, di nokotungag i sawo dau, om iwangai no di sawo dau i totobon di walai tu’ mamanau no daa iyau nga’ kokito nogi’ dau i tondu’ di panakasawo dau do poinglii do hiri’d toning di wawayaan om poingkabai o longon di totobon di walai. ²⁸ Om boros ka dau dot id tondu’ddi, ’’Tungag, kaino mamanau,’’ ka. Nga’ a’ no nokosimbar i tondu’, tu’ napatai no. Om kakato’ no dau i tondu’ddi om pasakayo’ no di kaladai, om pamanau noddi iyolo’ do minuli’ do hiri’d walai dau. ²⁹ Om korikot noddi iyau do hiri’d walai om panganu no iyau’d dangol om popoto’ no dau i rata’ di tondu’ddi do hopod om duwo o popot. Om popingotodo’ nogiddi i popot diri do hiri’d hopod om duwo o payat dot Israil, do soroisaan di popot. ³⁰ Om oinsanan nopo i tulun do nokokito’ddi do momoros do poingkaa, ’’A’ toko’ po nokokito do nosiliu do miagal diti do mantad di suminoliwan i’ o tulun dot Israil do mantad hilo’d Masir do gisom do baino’. A’ toko’ no milo’d mundorong toomod nopo. Mositi’ nod mogiboro-boros toko’ ondung nunu ot apatut do wonsoyon toko’!’’ ka diyolo’.

¹ Om rikot ngai’ no i tulun dot Israil, i mantad hilo’d Dan, i ponong id utara om gisom di hilo’d Borsiba, i ponong id salatan, om i mantad id Giliad, i ponong id koulayon do minumboyo’ di lolohou’ddi. Om timung ngai’ no iyolo’ do hilo’d Mispa dot id toguang do TUHAN. ² Kogumuon nopo diyolo’ddi om apat nahatus noribu o soudor di mamanau’d gakod. Om iri boyoon do pointikid-tikid do payat dot Israil nga’ hino ngai’ nogi’ do hiri. ³ - ⁴ Om daamot nopoddi om nokorongou no o tulun do Binyamin do nongkotimung ngai’ no i tulun dot Israil di suwai do hilo’d Mispa. Om uhot no i tulun dot Israil di tulun do Liwi di napatayan do panakasawo, ’’Susuyai daa iyahai ondung poingkuro kopio do nosiliu o kararaat do miagal diri!’’ ka diyolo’. Om boros ka di tulun do Liwi do suminimbar, ’’Minumbaya’ oku om i panakasawo ku do modop do hilo’d Gibia, it id watas do Binyamin. ⁵ Om maha’ di totuong no om rikot no i tulun do Gibia do mongoi pogihum doho’. Om tutukai nopo diyolo’ i walai di niyonon ku do mongoi daa pamatai doho’. Nga’ ngoyo’ noddi diyolo’ ompohuo’ i panakasawo ku do gisom do napatai iyau. ⁶ Om maai ku noddi popoto’ i rata’ dau om potikido’ ku no di hopod om duwo o payat dot Israil, do soroisaan nopo iyolo’ do popot. Om winonsoi ku pogi’ o miagal diri nga’ minomonsoi i’ i tulun do Gibia dot araat kopio, i mongintingayam do tulun dot Israil. ⁷ Om koinsanai dokoyu i hino’d hiti nga’ tulun ngai’ i’ dot Israil. Om mangangat oku’ddi dokoyu do momusorou ondung nunu it apatut toko’d wonsoyon!’’ ka dau. ⁸ Om insan-insan nopo i tulun di songintimung do hiri do miningkakat om minomoros do poingkaa, ’’Iso’ pod tulun dot id pogialatan dahai nga’ aiso’ no muli’ do hilo’d kiim ko’ hilo’d walai dahai. ⁹ Iti no o wonsoyon toko’. Momili’ toko’ nondo do tulun, dot undion o ralan do momili’, do mongoi sangod do tulun do Gibia. ¹⁰ Sompihopod nopodti tulun dot Israil om poposodia’ do taakanon di mongoi sangod. Om iri no suwai om mongoi panangod di tulun do Gibia do pomohukum di winonsoi diyolo’ dit araat kopio dot id pogialatan do tulun dot Israil,’’ ka diyolo’. ¹¹ Om iyo noddi o tulun dot Israil do minogisosokodung do manangod do bandar do Gibia. ¹² Om ponuhu’ noddi i tulun dot Israil do piro-piro o tulun do mongoi do hilo’d watas do payat do Binyamin do poporongou do habar diti, ’’Nunu kopio o winonsoi dokoyu’d araat? ¹³ Patahako’ no dahai i tongokusai’d sundal do mantad hino’d Gibia, om patayon i’ dahai do mananus di karaaton diri dot id pogialatan do tulun dot Israil,’’ ka diyolo’. Nga’ a’ i’ pinusou di tulun do Binyamin i pinoboros di tulun dot Israil do suwai’ddi. ¹⁴ Nga’ ongoi ngai’ nogi’ i tulun do Binyamin di mantad id koinsanai’d bandar dot id watas do Binyamin do hilo’d Gibia do mongoi sangod di tulun dot Israil do suwai. ¹⁵ - ¹⁶ Om tadau nogiddi do minonimung iyolo’ do duwo nohopod om onom noribu o soudor do mantad id kabandaran diyolo’. Om suwai no ko’ iri, om minonimung po o tulun do Gibia do turu’ nahatus o tulun di pinili-pili’ no kopio, om i golibang ngai’ nopo. Om oinsanan nopo iyolo’ddi dot ongotiru’ do popolositik do watu. Ondung momolositik iyolo’ om a’ i’ koumbal dot a’ koonong. ¹⁷ Om iri no tulun dot Israil di suwai om minonimung dot apat nahatus noribu o soudor di nokopinsingilo do sumangod. ¹⁸ Om ongoi noddi i tulun dot Israil do hilo’d tiiyonon do sumambayang do hilo’d Baitol, om ponguhot no iyolo’ do Kinorohingan, ’’Payat disai dot id pogialatan dahai ot apatut do mogulu do mongoi sangod do tulun do Binyamin?’’ ka diyolo’. Om boros kad TUHAN do suminimbar, ’’Payat di Yohuda,’’ ka. ¹⁹ Om kosuabon noddi kawagu om pamanau no i tulun dot Israil om pomukiim no iyolo’ do hilo’d somok di bandar do Gibia. ²⁰ Om potimbabao’ noddi diyolo’ di bandar i soudor diyolo’, om ngoyo’ no diyolo’ songodo’ i soudor do Binyamin. ²¹ Om soliwan noddi i soudor do Binyamin do minongoi panangod om kapatai nopo diyolo’ o duwo nohopod om duwo noribu di soudor do tulun dot Israil do tadau’ddi. ²² - ²³ Om ongoi po kawagu i tulun dot Israil do hiri’d tiiyonon do sumambayang, om ihad no iyolo’ dot id toguang do TUHAN do gisom do nasadapan, tu’ naala’ i’ iyolo’. Om uhoto’ po kawagu diyolo’ o TUHAN, ’’Mongoi po tuu iyahai sangod di koobpinayan dahai, i tulun do Binyamin?’’ ka diyolo’. Om boros kad TUHAN do suminimbar, ’’Oo, mongoi po,’’ ka. Om kokoris noddi kawagu o ginawo di soudor dot Israil. Om uludo’ no kawagu diyolo’ i soudor diyolo’ do sumodia’ do sumangod do miagal di pinongulud diyolo’ di tadau di nakatalib. ²⁴ Om koinduwo no diyolo’ddi do mongoi sangod di soudor do Binyamin. ²⁵ Om iri tulun do Binyamin nga’ koinduwo no do suminoliwan do mongoi sangod. Om patayo’ no diyolo’ o hopod om walu’ noribu o soudor dot Israil di nokopinsingilo do sumangod. ²⁶ Om ongoi po kawagu i tulun dot Israil do hilo’d Baitol do miningihad dot id toguang do TUHAN. Om hilo’ no iyolo’ do puasa do gisom do totuong. Om pinapatahak nogi’ iyolo’ dot id TUHAN di porsombahan do piombolutan om i porsombahan do sorobon. ²⁷ - ²⁸ Om maso nopoddi om hilo’d Baitol i Kaban do Tumpongo do Kinorohingan, om i Pinihas, i tanak di Iliasar, i manangaki di Harun, ot imam do hiri. Om uhoto’ no di piro-piro tulun diri o TUHAN, ’’Oi TUHAN, mongoi po tuu iyahai sangod di koobpinayan dahai, i tulun do Binyamin ko’ potingkodon dahai iti pisangadan diti?’’ ka diyolo’. Om boros kad TUHAN do suminimbar, ’’Ngoyon nopo dokoyu iyolo’ songodo’, tu’ suab nopo om onuan ku no iyokoyu do kamanangan,’’ ka dau. ²⁹ Om korongou noddi diyolo’ i pinosimbar do TUHAN, om ngoyo’ no diyolo’ poundorongo’ i soudor do hiri’d kinoiyonon di songillisok-lisok do hiri’d posorili’ di bandar do Gibia. ³⁰ Om tontok di kotolu’d tadau om ongoi noddi iyolo’ sangod di soudor do Binyamin, do pinopoulud nopo diyolo’ di soudor om miagal i’ di pinopoulud diyolo’ di piro-piro tadau do nakatalib, tu’ pinotimbaba’ di bandar do Gibia. ³¹ Om sangod no i tulun do Binyamin, gisom do noupanan iyolo’ do suminoliwan do mantad hiri’d bandar. Om timpuun noddi iyolo’ do minimpatai di tulun dot Israil di hiri’d soliwan di bandar do hiri’d ralan do kumaa do hilo’d Baitol om hiri’d ralan do kumaa do hilo’d Gibia, do miagal di winonsoi diyolo’ dit id gulu. Om tolu’ddi nohopod o tulun dot Israil do napatai. ³² Om iri no o kinapamarasan do tulun do Binyamin do poingkaa, ’’Naala’ toko’ no iyolo’ do miagal di gulu,’’ ka. Nga’ tuminomod i’ i soudor do tulun dot Israil do minogidu’ tu’ mongupan iyolo’ di soudor do Binyamin do mongoi’d hiri’d talun-alun dit id sodu’ di bandar. ³³ Om kotongkiad poddi i soudor do tulun dot Israil dit ogumu’, om timung no kawagu iyolo’ do hilo’d Baal Tamar. Om olomus nopoddi do suminoliwan i soudor diyolo’ di songillisok do hiri’d posorili’ di bandar. ³⁴ Om iyolo’ nopoddi nga’ iri tulun di nongopili-pili’ no do mantad id koinsanai do tulun dot Israil; kogumuon nopo diyolo’ om hopod noribu o tulun. Om kotimpuun noddi o pisangadan dot adalaan kopio do tontok di minongoi sangod do tulun do Gibia i hopod noribu o soudor do tulun dot Israil. Om a’ i’ di tulun do Binyamin soro-sorohon dot oruhai no iyolo’ dot aala’. ³⁵ Nga’ nonuan i’ do TUHAN do kamanangan i tulun dot Israil do suminangod di soudor do Binyamin, gisom do nakapamatai i tulun dot Israil do 25,100 o soudor do Binyamin. ³⁶ Om kopurimanai nogiddi di tulun do Binyamin do naala’ iyolo’. Om tuminomod i’ i soudor dot Israil dit ogumu’ do minogidu’ do mantad id tulun do Binyamin, tu’ mogondos no iyolo’ di soudor diyolo’ di songillisok do hiri’d posorili’ di bandar do Gibia. ³⁷ Om olomus nopo i soudor di songillisok diri do suminuang do minongoi panangod di bandar do Gibia, om tongkop nopo iyolo’ di bandar diri, om patayo’ ngai’ no diyolo’ i tulun do hiri’d bandar. ³⁸ Nga’ nokopogiupakat mantad no iyolo’ dot ondung haro ot okito do lisun dot akapal do minsawat do mantad hiri’d tanga’ di bandar, ³⁹ om mositi’ nod pogulian kawagu di soudor dot Israil dit ogumu’ do mongoi saap di pisangod. Om maso nopoddi om nakapamatai no o tulun do Binyamin do tolu nohopod o soudor dot Israil. Om boros ka di tulun do Binyamin, ’’Naala’ toko’ no iyolo’ do miagal di gulu,’’ ka. ⁴⁰ Nga’ sigog id haro o lisun do mininsawat do mantad hiri’d tanga’ di bandar do Gibia. Om kotigowo nopo i tulun do Binyamin di kuminoili iyolo’ om nokito do notutudan no i bandar diyolo’. ⁴¹ Om maso noddi do guminuli’ kawagu i soudor dot Israil dit ogumu’ do minongoi panangod, om a’ noddi oila-ilaan o kokoyo-koyoon di soudor do Binyamin, tu’ opurimanan no diyolo’ dot oruhai no iyolo’d aala’. ⁴² Om poggidu’ no iyolo’ do mantad id tulun dot Israil do kuminaa do hiri’d koomulakan, it id soliwan do bandar, nga’ a’ no iyolo’ milo do minogidu’. Tu’ nosorilian po iyolo’ di soudor dot Israil dit ogumu’ om i soudor di suminoliwan do mantad hiri’d bandar. Om agayo noddi kopio o kinaalaan di tulun do Binyamin. ⁴³ Om tutukai nopoddi di tulun dot Israil iyolo’ do minomogusa’ do gisom do nokorikot dot id iso’ o kinoiyonon di ponong id koulayon do mantad id Gibia. Om tontok di momogusa’ iyolo’ om kapatai no diyolo’ ⁴⁴ o hopod om walu’ noribu di soudor di nokopinsingilo do sumangod dit id pogialatan do soudor do Binyamin. ⁴⁵ Nga’ iri nopo i wookon di soudor do Binyamin om minanangkus do guminuli’ do minaya’ do hiri’d koomulakan do kumaa do hilo’d nuluhon di kapampangan do hilo’d Rimon. Nga’ iri nopo limo noribu do mantad id pogialatan diyolo’ om pinatai do hiri’d tanga’d ralan. Om iri no i noolu-olu’ om ginusa’ do gisom do nokorikot do hilo’d Gidiom. Om id pogialatan nopoddi om duwo noribu o tulun do pinatai. ⁴⁶ Iri nopo soudor do Binyamin di napatai do tadau’ddi om 25,000 o tulun — iri ngai’ nopo i soudor dit ongokoris om gunsiou. ⁴⁷ Nga’ iri nopo soudor diyolo’ di minogidu’ do minaya’ di koomulakan om i pinakayaan do hilo’d nuluhon do kapampangan do Rimon, om onom po nahatus o tulun do napasi. Om undorong no iyolo’ do hilo’d Rimon do solinaid dot apat o tulan. ⁴⁸ Om ngoyo’ po kawagu iyolo’ di soudor dot Israil songodo’ om pinatai diyolo’ o koinsanai di tulun do Binyamin di noolu-olu’ — i tongokusai om tongoondu’, om tangaanak om i tayam-tayam diyolo’. Om tutudai ngai’ nopoddi diyolo’ i bandar dot id watas diri.

¹ Om tontok di tuminimung i tulun dot Israil do hilo’d Mispa, om pamatos no iyolo’ dot id TUHAN do mada’ do haro o tongoiso’ piya di tanak diyolo’d tondu’ do pokowinon do tulun do Binyamin. ² Om ongoi noddi i tulun dot Israil do hilo’d Baitol om irikau no iyolo’ do hilo’ do mikuwo’d tumongob kopio dot id toguang do TUHAN do gisom do nasadapan. Om pingihad no iyolo’ om boro-boros nod opuuhod do poingkaa, ³ ’’Oi TUHAN, i Kinorohingan dot Israil, nokuro tu’ nosiliu o miagal diti? Tu’ payat nopod Binyamin om mantad id payat dahai, nga’ oruhai noddi iyolo’ dot opunso!’’ ka diyolo’. ⁴ Om kosuabon noddi kawagu dit osuab po om pomonsoi no i tulun dot Israil do pananaraban do porsombahan do hiri, om papatahak no iyolo’ dot id TUHAN do porsombahan di sorobon om porsombahan di piombolutan. ⁵ Om pinguhatai noddi diyolo’ ot id pogialatan di payat dot Israil, ondung haro o tulun dot a’ minongoi toguang do TUHAN do hilo’d Mispa. (Tontok nopoddi om suminumpa’ o tulun dot Israil dot isai nopo ot a’ mongoi tinong di lolohou do mongoi do hilo’d Mispa om mositi’ no do hukuman do kapatayon.) ⁶ Om ongosianan iddi i tulun dot Israil di tongotobpinai diyolo’, i tulun do Binyamin. Om boros ka diyolo’, ’’Baino’ nopoddi om natagakan toko’ nod iso’ o payat. ⁷ Nunu po o wonsoyon toko’ dot id tulun do Binyamin di nongoolu-olu’ om kasawo i’ iyolo’, tu’ nokosumpa’ toko’ no dot id TUHAN dot a’ toko’ pologoson o tangaanak toko’ di tongoondu’ do kowinon di tulun do Binyamin,’’ ka. ⁸ Om ihumo’ noddi diyolo’ ondung haro po o pinuruan do tulun do mantad id payat dot Israil dot a’ nokoongoi kotimung do hilo’d Mispa. Om koilaai noddi diyolo’ dot iri nopo tulun do hilo’d Yabis, i hilo’d Giliad, om aiso’ i’ o tongoiso’ piya do minongoi do hilo’d Mispa. ⁹ Om antangai no i pinonulisan do ngaran di nongkorikot, om koilaai nod aiso’ i’ o tongoiso’ piya do tulun di mantad hilo’d Yabis do nokoongoi. ¹⁰ Om ponuhu’ noddi iyolo’d hopod om duwo noribu o tulun dot id pogialatan diyolo’ di pointimung do hilo’d Baitol, om i piro-piro o gunsiou do mongoi pamatai do koinsanai di tulun do Yabis, om kohompit ngai’ nogi’ i tongoondu’ om i tangaanak. ¹¹ Om sinuhu’ nogi’ iyolo’ do mamatai do koinsanai di tongokusai om i tongoondu’ di nongodudun do kusai. ¹² Om id pogialatan nopo di tulun do Yabis om haro po ot apat nahatus o tongoondu’ dit a’ po nodudun do kusai. Om tanggayai no diyolo’ i tongoondu’ddi do hilo’d kokiiman do Silo, i hilo’d pomogunan do Kanaan. ¹³ Om ponuhu’ ngai’ noddi i tulun dot Israil do tulun diyolo’ do mongoi solowot di tulun do Binyamin di hilo’d nuluhon di kapampangan do hilo’d Rimon, do mongoi poporomut do boros dot orohian do monokiulud. ¹⁴ Om iri noddi o kinoulian di tulun do Binyamin. Om patahako’ noddi di tulun dot Israil i kosumandakan di mantad id Yabis, it a’ diyolo’ pinatai’ddi, do sumiliu’d sawo di tulun do Binyamin. Nga’ a’ i’ nokotikid di tulun do Binyamin i kosumandakan diri. ¹⁵ Om osianan iddi i tulun dot Israil di tulun do Binyamin tu’ naraag nod TUHAN o piuludan do payat dot Israil. ¹⁶ - ¹⁸ Om boro-boros noddi i piro-piro boyoon do suminangod di hilo’d Baitol do poingkaa, ’’Id suang nopo di payat do Binyamin om aiso’ no o tongoondu’. Nga’ kuroyon po tu’ a’ toko’ no milo do papakawin do tangaanak toko’ do tondu’ do tulun do Binyamin, tu’ nokosumpa’ toko’ no do momopol dot isai nopo ot id pogialatan toko’ do papakawin do tangaanak dau’d tondu’ dot id tulun do Binyamin! Om nunu poddi o wonsoyon toko’ dot id tulun do Binyamin om kakawin i’ iyolo’? Om a’ toko’ i’ atagakan dot iso’ o payat do mantad di hopod om duwo o payat. Om mositi’ nod mogihum toko’d ralan ondung poingkuro iyolo’ do kaanu do sinakagon,’’ ka diyolo’. ¹⁹ Om boros ka diyolo’, ’’Haro o tiso’ o ralan do tontok di tadau’d agayo do don TUHAN di ramayon do pointikid do toun do hilo’d Silo,’’ ka. (Ponong id salatan nopod Silo om i bandar do Baitol, om ponong id kotonobon nopo om haro o talun-alun di mantad hilo’d Baitol do poingkaa do hilo’d Sikim, om iri no i ponong id utara om bandar do Libona.) ²⁰ Om boro-boros ngai’ no i boyoon di hiri’d pinitimungan do hilo’d Baitol dot id tulun do Binyamin di nongoolu-olu’ddi, ’’Mongoi ngai’ kou no lisok do hilo’d kokobunan dot anggur di hilo’d Silo, ²¹ om tumamong kou nopod hiri. Om soira’ nopondo do sumoliwan i kosumandakan do Silo do mongoi panari’ do hiri’d karamayan do don TUHAN do monikid toun, om sumoliwan kou no do mantad hiri’d kabun dot anggur. Om sorompori-pori kou nopod mononggoi dot iso’ o sumandak. Om tanggayan no dokoyu iyolo’ do mongoi do hilo’d watas do Binyamin do maan dokoyu’d sawo. ²² Ondung rumikot i tapa’ ko’ i tobpinai di sumandak do mongoi pangangat di tondu’ om poboroson no dokoyu dot id diyolo’ o poingkaa, ’Pologoson nopo iyolo’ do hiti’d dahai. Tu’ a’ i’ dahai iyolo’ tinanggayan do mantad id pisangadan. Om a’ kou i’ kasala’ dot id sumpa’ dokoyu, tu’ okon i’ ko’ iyokoyu o pinapatahak diyolo’ dot id dahai,’ kanto dokoyu,’’ ka diyolo’. ²³ Om wonsoyo’ noddi di tulun do Binyamin i pinoboros diyolo’ddi. Om sorompori-pori nopoddi iyolo’ do minononggoi dot iso’ o sumandak dit id pogialatan di kosumandakan di manari’ di hilo’d Silo. Om tanggayai no diyolo’ do guminuli’ do hilo’d watas diyolo’. Om wonsoyo’ no kawagu diyolo’ i kabandaran diri om hilo’ no iyolo’ do minomogun-mogun. ²⁴ Om iri nogi’ i tulun dot Israil do suwai nga’ minogionguli’ noddi dot id tana’ di diyolo’d songonuon do hiri’d watas diyolo’ do tumanud di sinompuruan do sompiiyon, om i payat diyolo’. ²⁵ Om maso nopoddi om aiso’ po o raja’ do hilo’d Israil om sorompori-pori nopo o tulun do momonsoi di dau’d korohian.