YAKUB

YAKUB

¹ Oi tobpinai-tobpinai, i tulun ngai’ do songonuon do Kinorohingan, i nokopogitompias-pias do pointongkop do pomogunan. Tumabi’ oku, iyoho’ i Yakub, i susuhuon do Kinorohingan om i susuhuon di Tuhan Yesus Kristus. ² Oi tobpinai-tobpinai! Ondung oontok kou do mogisuayan o pogumbalan, om sorohon nopo dokoyu do kountungan dokoyu iri. ³ Tu’ oilaan i’ dokoyu, dot ondung otumbayaan kasai’ kou do Tuhan do tontok piya dot oontok kou do pogumbalan, om kootuson nopoddi om alanut nondo o ginawo dokoyu. ⁴ Om igitan no kopio dokoyu iri, om murut-surut kasai’ i’ o kolonuto’ do ginawo dokoyu do gisom dot aiso’ no o bohiton dokoyu om aiso’ ot okurang dokoyu dot id suang do nunu nopo. ⁵ Ondung haro o tongoiso’ dot id pogialatan dokoyu dot a’ sumongkuro o toilaan, om apatut do mokianu iyau do toilaan do mantad id Kinorohingan, om onuan indo iyau’d Kinorohingan do toilaan; tu’ osianan i’ iyau om manahak do pointikid-tikid do tulun. ⁶ Nga’ tulun nopo di mokianu, om mositi’ no dot otumbayaan kopio; om a’ mikoduwo o ginawo. Tu’ tulun nopo di mikoduwo o ginawo om miagal no di tumbak do rahat dot opitanggai-tanggayan do tongus. ⁷ - ⁸ Tulun nopo do miagal diri om a’ atantu’ o pomusarahan; om a’ iyau milo do manantu’ do nunu nopo o wonsoyon dau. Iyo nopoddi, om kada’ no dau soro-soroho’ do kaanu iyau do nunu nopo do mantad id Tuhan. ⁹ Tulun nopod Kristian di mosikin om mositi’ no dot otood dot ondung poinggoyoon no iyau’d Kinorohingan. ¹⁰ Om i tulun do Kristian di kaya’ nga’ mositi’ no dot otood dot ondung poinsiribaon no iyau do Kinorohingan. Tu’ tulun nopo do kaya’ om tumanus indo do miagal do tusak do sakot. ¹¹ Koulai nopo o tadau dit alasu’ om kumoring nondo i sakot, om lumotu’ no i tusak om atanus no i linumis di tusak diri. Om iyo nogiddi i tulun do kaya’ tu’ apatai nondo di maso dau do kumaraja’. ¹² Olumaag no i tulun dit otorodok kasai’ dot oontok piya iyau do pogumbalan. Tu’ soira’ nopo dot atahan iyau dot id suang do pogumbalan diri om kaanu nondo iyau dot isomuli’, iri no i koposion di pinabatos do Kinorohingan dot id tulun dit osianan do Kinorohingan. ¹³ Ondung haro o tulun dot abayayat di pogumbalan do miagal diri, om kada’ pomoros dot, ’’Iti nopo kabayayat diti om mantad id Kinorohingan,’’ ka, tu’ Kinorohingan nopo om a’ i’ abayayat dit araat, om a’ nogi’ iyau mogumbal do tongosongulun piya. ¹⁴ Nga’ abayayat no o tulun dot id pogumbalan ondung agayat iyau om katanud iyau di korohian dau’d araat. ¹⁵ Om ondung atanud dau i korohian dau dit araat diri, om kowonsoi no iyau do dusa; om ondung koinggayo i dusa’ddi om kootuson nopo nga’ kapatayon. ¹⁶ Kada’ kou no kopio kotipu’, oi tobpinai-tobpinai di kosianan ku. ¹⁷ Pointikid-tikid di popuhawangon dit osonong om i patahakon dit osonong kopio, om mantad i’ do hilo’d surga, i pinolintuhun do Kinorohingan, i minomonsoi do koinsanai di tanawau do hilo’d tawan. Om iyau no o Kinorohingan dit a’ sumimban om a’ iyau poporikot dot otuong di poingkukuro nopo. ¹⁸ Om siniliu toko’d Kinorohingan do tangaanak dau do tumanud di korohian dau, dot i boros dau dit otopot o pinoposiliu. Om winonsoi pogi’ dau o miagal diri nga’ manahak iyau dati’ do pangkat dit asawat kopio dot id pogialatan do koinsanai di winonsoi dau. ¹⁹ Sorohon no kopio dokoyu iti, oi tobpinai-tobpinai di kosianan ku! Pointikid-tikid do tulun om mositi’ no dot oining do mokinongou nga’ kada’ kolomus do moro-boros om kada’ kolomus do tumogod. ²⁰ Tulun nopo dit otogod om a’ no milo do momonsoi dit osonong, i kohubayaan do Kinorohingan. ²¹ Iyo nopoddi, om iyadaan no dokoyu o koinsanai di koubasanan di sosomu’ om it araat. Om romiton no i boros di pinatanom do Kinorohingan dot id suang do ginawo dokoyu, do mikuwo’d osiriba’ o ginawo, tu’ iri nopo i boros diri om haro i’ o kuasa’ do mamasi dokoyu. ²² Om mositi’ no do wonsoyon dokoyu i nokoboros do Kinorohingan, om okon i’ ko’ pokinongohon no toomod, tu’ ondung pokinongohon no toomod dokoyu om monipu’ kou no do tinan dokoyu. ²³ Tulun nopo di mokinongou do boros do Kinorohingan nga’ a’ indo dau wonsoyon iri, om miagal no iyau di tulun di magatul do rabas dau dot id soromin. ²⁴ Tu’ kapagatul nopondo iyau om mamanau no iyau om mipuwoyo’ nopo dot olihuan dau ondung okuro-kuro i karaba-rabaso’ dau. ²⁵ Oturan nopod Kinorohingan om osonong i’ kopio om haro o kuasa’ do popoidu’ do tulun. Om iri nopo tulun di monorisid kopio om mamadul kopio om tumanud dit oturan diri, om barakatan nod Kinorohingan o nunu nopo o wonsoyon dau tu’ a’ i’ iyau minokinongou noo om a’ iyau minomolihu’ddi. ²⁶ Om ondung haro o tulun do momusorou dot otorodok iyau dot id tugama’, nga’ a’ indo dau oporinta’ o dila’ dau, om monipu’ no iyau’d tinan dau; om aiso’ i’ o guna’ di kotorodoko’ dau dot id tugama’ dau. ²⁷ Kotorodoko’ nopo dot id tugama’ dit olidang om it otopot kopio dot id pagantangan do Kinorohingan Tapa’ om: monulung di tangaanak dit aiso’ o molohing om monulung di tongoondu’ di nongopuadan dit oinggorit, om momogompi’ do dau’d tinan, om a’ i’ ososomu’ do korohian diti pomogunan.

¹ Oi tobpinai-tobpinai ku! Iyokoyu nopo i notumbayaan do Tuhan Yesus Kristus, i Tuhan di Kikagayaan, om kada’ kou pomogibang-gibang do tulun do tumanud dit okito dokoyu. ² Tu’ ondung haro o tulun do kaya’ di kipondulung do tamas om kipakayan dit osonong do rumikot dot id pitimungan dokoyu, om rumikot no o songulun o mosikin di nongohurak-hurak no o pakayan dau, ³ om suahon nondo kopio dokoyu i tulun di kipakayan dot olumis diri, om moro-boros kou nondo dot id dau do poingkaa, ’’Irikau do hiti’d tirikohonon dot osonong oi Tuan,’’ ka. Nga’ iri nopo i tulun di mosikin om moro-boros kou nondo dot, ’’Ingkakat nopo do hino,’’ ka, ko’, ’’Dumansaran nopod mirikau,’’ ka. ⁴ Om iyo nopoddi o winonsoi dokoyu, om popisuwai kou no di tulun dit id pogialatan dokoyu. Om mogontong kou do kosonongo’d tulun do tumanud di pomusarahan dokoyu dot araat. ⁵ Sorohon no kopio dokoyu iti, oi tobpinai-tobpinai di kosianan ku! Tulun nopo di mosikin do hiti’d pomogunan diti, om pinili’ do Kinorohingan do sumiliu’d tulun do kaya’ dot id suang do kotumbayaan. Om iyolo’ no i tulun di silihon do tulun do songonuon do Kinorohingan do miagal di pinabatos do Kinorohingan di tulun dit osianan dau. ⁶ Nga’ iyokoyu nopo om mongindaraat nogi’ di tulun do mosikin, om iri nogi’ daa i tulun do kaya’ o mongulok-ulok dokoyu om mamagayat dokoyu dot id pomisaraan! ⁷ Om iyolo’ no i mongindaraat do ngaran dokoyu dit osonong, i naanu dokoyu do mantad id Kinorohingan! ⁸ Otopot no i wonsoyon dokoyu, ondung wonsoyon no dokoyu it oturan di Pomorintaan diri di nokotulis dot id Buuk do Kinorohingan do poingkaa, ’’Kosianai nod tulun do suwai do miagal dot osianan ko do diya’d tinan,’’ ka. ⁹ Nga’ ondung momogibang-gibang kou’d tulun do tumanud dit okito dokoyu, om kowonsoi kou nod dusa, om iri no i Tourat o popointalang do tumolibamban kou di Tourat diri. ¹⁰ Tulun nopo di tumolibamban dot ongoiso’ nopo di Tourat, om komoyon nopoddi om nokotolibamban ngai’ no iyau di Tourat diri. ¹¹ Iri nopo i momoros dot, ’’Kada’ pagampahu’,’’ ka, om iri i’ o minomoros do, ’’Kada’ pamatai,’’ ka. Iyo nopoddi, om ondung a’ kou magampahu’ nga’ mamatai kou i’, om nokotolibamban kou no dit oturan diri. ¹² Tontok nopo do moro-boros kou om momonsoi kou do nunu nopo om sorohon no dokoyu do butusan kou i’ do tumanud dit oturan do Kinorohingan di popoidu’ do tulun. ¹³ Tu’ a’ i’ monginsian o Kinorohingan di tulun dit a’ monginsian do tulun do suwai. Nga’ kosianan nopo om okoris i’ ko’ i pomohukum! ¹⁴ Oi tobpinai-tobpinai! Nunu o guna’ do tulun do momoros dot, ’’Otumbayaan oku,’’ ka, om aiso’ indo o wonsoyon dau do popointalang di kotumbayaan dau? Kapasi i’ tuu dau i kotumbayaan dau do miagal diri? ¹⁵ Ondung haro o tobpinai do kusai ko’ tobpinai do tondu’ dot aiso’ o pakayan om a’ kabagal o takanon dau do monikid tadau, ¹⁶ om nunu’ddi o guna’ dokoyu do momoros do, ’’Manampakai no di pakayan dit angakapal, om makan no!’’ ka — om a’ kou indo manahak diyolo’ di koburu-buruon kopio diyolo’? ¹⁷ Om iyo nogiddi o kotumbayaan tu’ ondung a’ pointalangon dot id wonsoyon, om aiso’ i’ o guna’ di kotumbayaan diri. ¹⁸ Om haro i’ doti’ o tulun do momoros do poingkaa, ’’Haro i’ o tulun do sumondiu di kotumbayaan dau om haro o tulun do sumondiu di wonsoyon dau,’’ ka. Simbaron ku iri do poingkaa, ’’Potuduko’ daa doho’ ondung poingkuro o tulun do kikotumbayaan dot a’ miwoyo’ do wonsoyon, om pointalangon ku nondo dot id wonsoyon ku do haro o kotumbayaan ku,’’ kangku nondo. ¹⁹ Otumbayaan kou i’ dot iso’ noo o Kinorohingan, a’ toi? Nga’ i rusod dot araat nga’ otumbayaan i’ om gagaran po iyolo’ dot opopoddosian! ²⁰ Basug kou no kopio! Minog ku po tuu do pointalangon dot id dokoyu dot aiso’ i’ o guna’ do kikotumbayaan dot a’ miwoyo’ do wonsoyon? ²¹ Antangai pogi’ i Abraham i taki-aki toko’. Rinamit i’ iyau’d Kinorohingan dot i winonsoi dau o kinopomoromitan di tontok di pinatahak daa dau i Isak, i tanak dau dot id Kinorohingan dot id sakai di pananaraban do porsombahan. ²² Om iti no o koilo-ilo kopio do mositi’ no do pointalangon dot id wonsoyon i kotumbayaan om kointalang i’ dot otopot kopio i kotumbayaan diri. ²³ Iyo noddi o miontok di nokotulis dot id Buuk do Kinorohingan do poingkaa, ’’I Abraham nopo om notumbayaan i’ do Kinorohingan, om rinamit do Kinorohingan iyau do miagal di tulun di momonsoi do korohian do Kinorohingan tu’ kikotumbayaan i’ iyau,’’ ka. Om iri noddi o kinopomoroitan dot i Abraham nopo om, ’’Tambalut do Kinorohingan’’. ²⁴ Om oilaan noddi kopio dot iri nopo i tulun do romiton do Kinorohingan, om i winonsoi di tulun diri o koporomitan, om okon i’ ko’ iri no i kotumbayaan dau. ²⁵ Soroho’ pogi’ i Rahab, i tondu’ do sundal diri. Rinamit i’ iyau do Kinorohingan tu’ i winonsoi di Rahab o kinopomoromitan do tontok di pinapasalakoi iyau do hiri’d walai dau di piro-piro o gomponoluku’ do bansa’d Israil, om tontok di minonulung iyau diyolo’ do minogidu’ do minaya’ do ralan do suwai. ²⁶ Iyo nopoddi om poingkuro nopo dot apatai o tinan dot aiso’ o rusod, om iyo nogiddi o kotumbayaan dot a’ miwoyo’ do wonsoyon tu’ poimpatai i’ i kotumbayaan.

¹ Oi tobpinai-tobpinai ku! Kada’ kogumu’ ot id pogialatan dokoyu dot orohian do sumiliu’d gomponuduk. Oilaan i’ dokoyu dot iyati’ nopo i sumiliu’d gomponuduk om butusan toko’ nondo dot awagat po ko’ mantad di pomumutus do tulun do suwai. ² Koinsanai dati’ om asaru’ i’ do kowonsoi di kasala’. Nga’ tulun nopo dit a’ insan kasala’ dot id koboro-boroso’ dau om tulun no iyau dit aiso’ o bohiton, i milo do momorinta’ do koinsanai do pakakas do tinan dau. ³ Om ondung kakangan toko’ i kuda’ do papatanud di kuda’ di dati’ do korohian, om milo toko’ no do porintaon i kuda’ddi! ⁴ Om onuon toko’ pogi’ i kapal do rahat do maan do poiyaan. Mulong po do miagal diri kagayo i kapal om it atanggayan di tongus dot opuhod nga’ oporinta’ i’ iyau di komudi’ dit okooro’ do tumanud di korohian di mongomudi’. ⁵ Iyo nogiddi o dila’ toko’; tu’ mulong po dot okoro’ i dila’ toko’ddi, nga’ milo i’ do minggayo-gayo do pasal di hal dit angagayo. Om soroho’ pogi’ i gouton dit agayo piya nga’ osorob i’ di tapui dit okoro’! ⁶ Dila’ moti’ nga’ miagal i’ do tapui. Id tinan nopo om dila’ no o tadon ngai’ do karaaton, i popotongkop do karaaton dot id koinsanai’d tinan toko’. Om kosorob nogi’ i dila’ do koinsanai’d koposi-posion toko’ dot i tapui do mantad hilo’d naraka o ponorob. ⁷ Milo ngai’ id ubason o koinsanai’d nintorusan dit ongorongit, om i tombolog om i nintorusan di sangkamang-kamang om sada’ nga’ noumbalan nogid tulun do mongubas. ⁸ Nga’ dila’ nopod tulun om aiso’ no o songulun piya do milo’d mongubas. Tu’ dila’ nopo om araat kopio om a’ milo do porintaon; om poimponu’ do rasun di kapatai. ⁹ Dila’ i’ o pakayon toko’ do mongunsikou’d Tuhan i Tapa’ toko’, om dila’ i’ o pakayon toko’ do momopol do tulun do suwai, i winonsoi’d Kinorohingan do pinoiyo do kowoyo-woyoo’ dau. ¹⁰ Iso-iso’ i’ o kabang do tadon do boros do mongunsikou om i boros do momopol. Nga’ a’ i’ kopio apatut do miagal diri! ¹¹ Tu’ aiso’ i’ o tudan do waig do popoluyung do waig dit aanau om waig dit opoit dot iso’ no o tudan do tadon. ¹² Oi tobpinai-tobpinai ku, a’ i’ mongua’ o guas dot ara do tua’ do saitun om a’ mongua’ o guas dot anggur do tua’ dot ara. Om i tudan di waig dot oosin nga’ a’ i’ milo do popoluyung do waig dit aanau. ¹³ Ondung haro ot id pogialatan dokoyu dot oilo om kitoilaan om mositi’ no do pointalangon dau iri dot id kowoyo-woyoon dot osonong, om momonsoi dit ongosonong do mikuwo’d osiriba’ o ginawo om kitoilaan. ¹⁴ Nga’ ondung osolon kou, om araatan, om dau nod tinan o sorohon om kada’ no koondos di toilaan dau’ddi, dot iyo nopoddi om monomputul kou i’ di habar dit otopot di mantad id Kinorohingan. ¹⁵ Toilaan nopo do miagal diri om okon i’ ko’ mantad hilo’d surga, suwai ko’ mantad i’ do hiti’d pomogunan, om mantad id korohian do tulun om mantad id rogon. ¹⁶ Hinonggo nopo o haro o mosol om momusorou no do dau’d tinan, om hiri no do haro o pogisasaapan om haro ngai’ i wonsoyon dot araat. ¹⁷ Nga’ tulun nopo di kitoilaan do mantad hilo’d sawat om koiso’ nopo kopio do kowoyo-woyoon dau om olidang, om orohian do monokiulud, om osuwau, om mihuboyo-boyo’ do tudukan, om poimponu’ iyau do kosianan om popointalang iyau do wowonsoyon dit osonong om a’ iyau momogibang-gibang om a’ minsorupai-rupai no toomod. ¹⁸ Om iri nopo it osonong om tua’ di linsou di kouludan di pinatanom di tulun dit orohian do kouludan!

¹ Honggo o tadon do koinsanai di pogisasaapan om pogisosongkiwalan dot id pogialatan dokoyu? Okon toi ko’ i kongorohian dokoyu o tadon diri, it a’ otingkod do misaap dot id suang do ginawo dokoyu do mokiaanu do kosimbayanan do hiti’d pomogunan. ² Haro daa o korohian dokoyu nga’ a’ i’ dokoyu aanu, om iri nondo o kapamatayan dokoyu’d tulun! Orohian kou daa do mogihum nga’ a’ i’ dokoyu okito i pokiihuman dokoyu, om iri nondo o kopogisosongkiwalan dokoyu om kopogisasaapan dokoyu. Aiso’ i’ ot aanu dokoyu tu’ a’ kou i’ mokianu dot id Kinorohingan. ³ Om mokianu kou piya daa nga’ a’ i’ dokoyu aanu tu’ kasala’ i’ i kopokionuan dokoyu tu’ maan no dokoyu do dokoyu’d koinsanangan o kopokionuan dokoyu. ⁴ Iyokoyu no i tulun dit a’ otorodok! Koilo kou i’ toi dot ondung monokiambalut kou diti pomogunan, om osiliu kou no do pisangod do Kinorohingan? ⁵ Kada’ soroho’ dot aiso’ o pinaantakan di boros dot id suang do Buuk do Kinorohingan do poingkaa, ’’Pinosuang do Kinorohingan dot id ginawo toko’ i rusod dit osonsog kopio,’’ ka. ⁶ Nga’ mulong po do miagal diri nga’ iri nopo i kosianan do Kinorohingan di pinatahak dot id dati’ om okoris i’ ko’ i korohian di rusod toko’ddi om iri nogi’ o nokoponulisan dot id Buuk do Kinorohingan do poingkaa, ’’Saapon do Kinorohingan i tulun di minggayo-gayo, nga’ kosianan i’ dau i tulun dit osiriba’ o ginawo,’’ ka. ⁷ Iyo nopoddi, om insiriba’ kou no dot id Kinorohingan om saapon no dokoyu o Rogon, om mogidu’ i’ i Rogon do mantad id dokoyu. ⁸ Insomok kou no do Kinorohingan, om minsomok i’ o Kinorohingan dokoyu! Ougai no dokoyu o palad dokoyu, iyokoyu i tulun dit ongkidusa! Om lidangai no o ginawo dokoyu, iyokoyu i mikoduwo o ginawo! ⁹ Mositi’ no do monosol kopio kou om mikuwo’d tumongob om mihad; om sowolian nod tihad i tirak dokoyu, om sowolian do katangkabaan i kataadan dokoyu! ¹⁰ Insiriba’ kou no dot id Tuhan, om poinggoyoon kou i’ dau. ¹¹ Oi tobpinai-tobpinai ku, kada’ kou pogindaraa-raat om kada’ kou pogisala-sala’. Tulun nopo di mongindaraat ko’ i papasala’ do tobpinai dau dit oiyo do Kristian, om mongindaraat no iyau om papasala’ di Tourat. Ondung papasala’ kou di Tourat, om miagal nod a’ kou tumanud di Tourat, tu’ sumiliu kou do gompomutus di Tourat diri. ¹² Nga’ iso’ noo o Kinorohingan di kikuasa’ do manahak do tulun dot oturan om momutus do tulun, om iyau no o Kinorohingan di kikuasa’ do mamasi om mamatai. Nga’ isai kopio kou tu’ papasala’ kou do tulun do suwai? ¹³ Iyokoyu nopo i momoros do, ’’Mongoi toko’ do hilo’d bandar do baino’ ko’ suab, om mundorong toko’d hilo’ dot ongosontoun do mongindapu’ om mogihum do tusin,’’ ka, — om pokinongoho’ no dokoyu iti nosihat ku. ¹⁴ A’ kou i’ koilo ondung nunu ot osiliu dot id dokoyu do suab! Iyokoyu nopo om miagal nod lisun tu’ oruhai dot okito, om atanus no. ¹⁵ Apatut nopod poboroson dokoyu om poingkaa, ’’Ondung korohian do Tuhan, om poimpasi toko’ po, om owonsoi toko’ indo iti ko’ owonsoi toko’ indo iri,’’ ka. ¹⁶ Nga’ asawat i’ o ginawo dokoyu om minggayo-gayo o koboro-boroso’ dokoyu. Om koboro-boroso’ nopo do miagal diri om kasala’ i’. ¹⁷ Iyo nopoddi, om tulun nopo di koilo dit osonong dot apatut dau’d wonsoyon, nga’ a’ indo dau wonsoyon iri, om kowonsoi nod dusa i tulun diri.

¹ Oi tobpinai-tobpinai, iyokoyu i tulun do kaya’! Pokinongoho’ no dokoyu iti nosihat ku. Tongob kou no om mihad kou no, tu’ oinggorit kou nondo do koimbagu. ² Naraag no i kakayaan dokoyu, om i pakayan dokoyu nga’ nangaakan nod tanai. ³ Togoron no i tamas om i pirok dokoyu; om iri no i togor diri o sumiliu’d sasi’ do sumaap dokoyu om akanon nogindo di togor o tinan dokoyu do miagal dot osorob do tapui. Nokoponimung kou no do dapu’ do tontok diti ponong id kopupuson no diti pomogunan. ⁴ A’ kou i’ minamagadsi’ di tulun di kumaraja’ do hilo’d tumo dokoyu. Dinondo nodti om pokinongoho’ no dokoyu o boros diyolo’ do papasala’ dokoyu. Tu’ norongou nod Kinorohingan i Tuhan dit Agayo o Kuasa’ i giniakan di tulun di minongomot do hiri’d tumo dokoyu do mokitulung dau. ⁵ Koposi-posion nopo dokoyu do hiti’d pomogunan diti om poimponu’ nod kakayaan om kosimbayanan. Om iyo kou po do popolombon do tinan dokoyu do maan sumbolio’ do tontok di tadau’d koponumbolian. ⁶ Momohukum kou om mamatai kou di tulun dit aiso’ o sala’, om a’ i’ iyolo’ sumaap dokoyu. ⁷ Iyo nopoddi oi tobpinai-tobpinai ku, om polonuton no dokoyu o ginawo dokoyu do gisom do korikatan do Tuhan. Antangai pogi’ i tulun di gompongumo nga’ alanut i’ o ginawo do magandad do gisom do kopongua’ i tanom-tanom dau. Om alanut o ginawo do magandad do rasam di maso di lumahanggang o roun do kayu, om i rasam di maso do mongusak o kayu. ⁸ Om iyokoyu nga’ apatut nogi’ dot alanut o ginawo, om ogirot o ginawo tu’ oruhai no o korikatan do Tuhan. ⁹ Kada’ kou no piindaraa-raat om kada’ kou pogisala-sala’ om a’ kou i’ ohukuman do Kinorohingan. Om sorohon no dot osomok no i gompomutus om posodia’ no iyau do rumikot. ¹⁰ Oi tobpinai-tobpinai, sorohon no dokoyu i nabi di minoro-boros dot id suang do ngaran do Tuhan, do maan dokoyu’d omitan, tu’ alanut i’ om ogirot o ginawo diyolo’ do mulong piya dot oinggorit. ¹¹ Om rinoitan iyolo’ dot olumaag tu’ alanut i’ o ginawo diyolo’. Om nokorongou kou di kolonuto’ do ginawo di Ayub, om nokoilo kou nogi’ do binarakatan diri do Tuhan iyau dit id tohuri. Tu’ Tuhan nopo om obinsianan i’ kopio om osonong. ¹² Nga’ agayo nopo kopio om iri no tu’: Kada’ kou no kopio rait do tawan ko’ pomogunan ko’ nunu nopo do tontok di sumumpa’ kou. Suwai ko’ poboroson nopo ot, ’’Oo,’’ ka do kaakun ko no, om ’’Amu’,’’ ka dot a’ ko no kaakun; om a’ kou i’ ohukuman do Kinorohingan. ¹³ Ondung haro ot id pogialatan dokoyu do maso dot osusa’, om mositi’ no do sumambayang iyau. Ondung haro o tulun dit otood, om mositi’ no do modsinding iyau do mamarayou’d Kinorohingan. ¹⁴ Ondung haro ot id pogialatan dokoyu do sumakit, om mositi’ no do momolohou iyau di piro-piro boyoon do sidang. Om mositi’ no dot ongoyon di piro-piro boyoon diri sambayangai i tulun di sumakit diri, mikuwo’d momoluhad dau do tumau dot id suang do ngaran do Tuhan. ¹⁵ Ondung sumambayang iyolo’ do mikuwo’d otumbayaan kopio, om lingasan indo do Tuhan i tulun di sumakit diri, om ompunan do Tuhan o dusa di nongowonsoi dau. ¹⁶ Iyo nopoddi, om mositi’ no dot okunon dokoyu i kasalaan dokoyu dot id tulun do suwai, om mogisambayang-bayang kou no, om olingasan kou i’. Agayo i’ moti’ o kuasa’ do sambayang di tulun di tumanud do korohian do Kinorohingan. ¹⁷ I Ilia nga’ tulun i’ do miagal dati’. Om suminambayang iyau dot iso-iso’ o ginawo dot a’ paparasam, om a’ kopio noddi ruminasam, do solinaid do tolu o toun om satanga’. ¹⁸ Om sambayang poddi kawagu iyau, om rasam nogiddi om gisom do minongua’ ngai’ i tanom-tanom. ¹⁹ Oi tobpinai-tobpinai ku! Ondung haro ot id pogialatan dokoyu dot a’ dii tumanud do ponudukan do mantad id Kinorohingan, om haro nondo o tulun do suwai do popoguli’ kawagu do tulun diri dot id Kinorohingan, ²⁰ om sorohon no ot ayat diti: Tulun nopo di mangangat do tulun di kidusa do gumuli’ kawagu do mantad id ralan di nakasala’, om iri no o mamasi do ginawo di tulun do kidusa’ddi do mantad id kapatayon, om i poporikot do koompunan di dusa dot ogumu’.