YOSAYA

YOSAYA

¹ Iti nopo buuk diti om pinotulisan do piro-piro o boros do pasal do Yohuda om Yorusalim, do pinointalang do Kinorohingan dot id di Yosaya, i tanak di Amos, do tontok dit i Usia, om i Yotam, om i Ahas, om i Hiskia o raja’ do hilo’d Yohuda. ² Boros kad TUHAN, ’’Oi tawan, om pomogunan, pokinongou kou no diti poboroson ku! Pinapagayo oku do tangaanak om ginompi’ ku iyolo’ nga’ suminaap iddi iyolo’ doho’. ³ Kotutun i’ o sapi’ di sanganu dau, nga’ Israil nopo om a’ i’. Om kaladai nga’ kotutun i’ di sanganu dau, nga’ iti nopo tulun ku om aiso’ i’ ot osuhut- suhutan,’’ ka dau. ⁴ Obungou kou no, oi bansa’ di kidusa, i tulun di nawagatan do kasalaan, om sinakagon dit angaraat kopio, om tangaanak dit angaraat o wonsoyon! Tuminongkiad kou’d TUHAN, om nindaraat dokoyu i Kinorohingan dot Israil dit Olidang Kopio, om tinolikudan dokoyu iyau, it apatut daa dokoyu’d tukuon. ⁵ Nokuro tu’ sumongkiwal kasai’ kou? Orohian kou po dot awagat ko’ iri o pomohukum dokoyu? Notongkop nod suhat o tulu dokoyu om ginawo dokoyu nga’ oluhoi no. ⁶ Aiso’ no ot osonong-sonong do mantad hino’d lapap om korikot do hino’d tulu dokoyu; tu’ notongkop pod linonit, om kogom om suhat. A’ noudasan, om a’ norilitan, om a’ noubatan i suhat dokoyu. ⁷ Oingou po tomod o pomogunan dokoyu, om i piro-piro o bandar nga’ naayi’ pod nosorob. Poontong-ontongon ku nopo iyokoyu do ngoyon do bansa’d suwai onuo’ i hasil do tana’ dokoyu. Om aiso’ no ot a’ diyolo’ raagon. ⁸ Iso’ po o Yorusalim o noolu’, om miagal pori do sulap-sulap do hiri’d kabun dot anggur om miagal do kuhub-kuhub do hiri’d pinomutanaman do sangop, om miagal do bandar di noturungku’ do pisangod. ⁹ Ondung aiso’ daa o tulun do pinologos do TUHAN dit Osundu Kopio, do napasi, om miagal toko’ no daa do Sodom om Gomura. ¹⁰ Oi boyoon om rayat do Yorusalim, i miagal di tulun di hilo’d Sodom om Gomura! Pokinongou kou no di poboroson do TUHAN dot id dokoyu. Podulon no i potudukon do Kinorohingan dot id dokoyu. ¹¹ Boros kad TUHAN, ’’Ondos daa dokoyu om orohian kopio oku di porsombahan di popintahakon dokoyu doho’? Apaasan oku no di porsombahan dokoyu do dumba’ di sorobon om i lunok do tanak do sapi’. A’ oku no orohian di raha’ do sapi’d tontoluhan, om i raha’ do dumba’ om kambing dokoyu. ¹² Isai daa o minonuhu’ dokoyu do minongigit ngai’ di porsombahan diri do tontok di mongoi kou sambayang dot id doho’? Om isai o minonuhu’ dokoyu do mongoi pimpanau do hiri’d Walai’d Sasambayangan dot Agayo? ¹³ Aiso’ i’ o guna’ dokoyu do migit di porsombahan diri, tu’ araatan oku i’ do kosingud diri. Om tontok di mamaramai kou do Tulan do Wagu om tadau’d Sabat ko’ di papaharo kou do pogititimungan do don tugama’, om a’ oku no kososou do montong diri tu’ nososomu’ ngai’ pori do dusa. ¹⁴ Araatan oku i’ do kokito di karamayan dokoyu do Tulan do Wagu om i pogititimungan do don tugama’, tu’ nosiliu ngai’ nori do miagal do binabo ku dit awagat, om ohuyan oku no do mamabo’ddi. ¹⁵ Tontok di poinsawaton dokoyu o longon dokoyu do sumambayang, om a’ oku no montong dokoyu. Om asaru’ kou piya do sumambayang nga’ a’ ku no pokinongohon, tu’ ogumu’ no o napatai do longon dokoyu. ¹⁶ Ongoi kou no pomoug, om lidangan no o tinan dokoyu, om tingkadan no i wowonsoyon dokoyu dot araat dit okito ku. Tingkod kou nod momonsoi dot araat. ¹⁷ Om minsingilo kou no do momonsoi’d osonong. Wonsoyon no dokoyu it otulid, om tulungon no i tulun dit ulak-ulakan, om obian no i tangaanak dit aiso’ o molohing, om obian i tongoondu’ di nongopuadan,’’ ka dau. ¹⁸ Boros kad TUHAN, ’’Kainou salasayo’ toko’! Tu’ mulong piya daa dot aragang po tomod o dusa dokoyu, do minonosomu’ dokoyu nga’ lihungan ku indo iyokoyu do gisom dot opurak kou do miagal do gapas. Mulong piya dot adalaan daa kopio kogumu’ o dusa dokoyu om angawagat kopio iri, nga’ ompunan ngai’ ku i’ iri. ¹⁹ Ondung mumboyo’ kou doho’ om orohian kou do mokinongou doho’, om kaakan kou indo do hasil dot osonong do tana’ddi. ²⁰ Nga’ ondung sumaap kou doho’, om apatai kou no dot id pisangadan. Iyoho’ no i TUHAN o minomoros diti,’’ ka dau. ²¹ Nokuro iti, tu’ iri nopo bandar dit otorodok di gulu po om nosiliu’ddi do sundal do baino’! Ongotulid i’ daa o kowoyo-woyoon do tulun di poingiyon do hiri di gulu po, nga’ baino’ noddi om noponu’ pod tulun di gampamatai. ²² Oi Yorusalim, iyo ko i’ daa do pirok di gulu po, nga’ baino’ noddi om aiso’ no o gatang nu, iyo ko i’ daa do waig dot anggur dit osonong di gulu po, nga’ baino’ noddi om miagal ko po di waig toomod. ²³ Iri nopo i piro-piro o boyoon do tulun nu om sumasaap ngai’ i’ om sumokodung di gampanakau. Orohian ngai’ nopo iyolo’ do rumamit do tusin di ponisip om i patahak-tahakon. A’ i’ iyolo’ insan do mogobi’ do tangaanak dit aiso’ o molohing dot id pogibisaraan, om a’ diyolo’ pokinongohon i tongoondu’ do nongopuadan do tontok di posunud iyolo’ do hal diyolo’. ²⁴ Iyo nopoddi, om pokinongoho’ no dokoyu iti boros do TUHAN, it Osundu Kopio, i Kinorohingan dot Israil do poingkaa, ’’Sulian ku nondo iyokoyu, oi pisangod ku, om a’ kou indo koponusa’ doho’. ²⁵ Haro nondo o wonsoyon ku dot id dokoyu. Sompipian ku nondo iyokoyu do miagal di ponompipi’ do pirok, om iduwon ngai’ ku it oromos do mantad id dokoyu. ²⁶ Om onuan ku nondo iyokoyu do pomorinta’ om ponosihat do miagal di gulu po. Om roitan nondo o Yorusalim do bandar dit otulid om bandar dit otorodok,’’ ka. ²⁷ Otulid i’ o TUHAN, om posion indo dau o Yorusalim om koinsanai di tulun do hilo’ di kumorologo. ²⁸ Nga’ tulun nopo di sumaap om i kidusa om oinsanan no do patayon; om i tulun di tumongkiad dau nga’ patayon no. ²⁹ Om monosol kou indo tu’ tuminuku’ kou i’ di guas do kayu om pinosongonuan ngai’ dokoyu do tingolig i kabun dokoyu. ³⁰ Om osiliu kou nondo do miagal di guas do kayu di noriou, om osiliu kou do miagal do kabun dit a’ opisiram. ³¹ Om poingkuro nopo i sakot do nokoring dot osorob do tanak ngapui, om iyo noddi i tulun do kidusa dot apatai di wowonsoyon diyolo’ dot angaraat, om aiso’ no o milo do moningkod di mamatai’ddi.

¹ Iti no o boros do pinointalang do Kinorohingan dot id di Yosaya, i tanak di Amos, do pasal do Yohuda om Yorusalim: ² Koimbagu nopondo om iri no i nuluhon di kinoiyonon di Walai’d Sasambayangan dot Agayo ot asawat kopio dot id pogialatan di nulu-nulu’d suwai. Om ogumu’ nondo o bansa’d tulun do mogiwoyo-woyo’ do mongoi’d hilo’, ³ om momoros ngai’ nondo iyolo’ do poingkaa, ’’Kainou tumakad do hilo’d Nuluhon do TUHAN! hilo’d walai do Kinorohingan dot Israil. Om otudukan toko’ i’ dau dit apatut toko’d wonsoyon. Om moyo’ toko’ indo di ralan di nopili’ dau, tu’ tadon nopod ponudukan do TUHAN om hilo’ id Yorusalim, om moro-boros o TUHAN dot id tulun dau do mantad hilo’d Sion,’’ ka. ⁴ Om butusan nondo dau o hal di piro-piro o bansa’d tulun. Om supuon nondo diyolo’ i gayang diyolo’ do silihon do radu, om iri no tandus om silihon do pisau di panatas do tolid. Om a’ nondo mogisasangod o bansa’, om a’ iyolo’ minsingilo do sumangod. ⁵ Oi sinakagon di Yakub, kainou no mamanau dot id suang do tanawau’d TUHAN! ⁶ Oi Kinorohingan, notongkiadan nu no i tulun nu, i sinakagon di Yakub. Notongkop poo iti pomogunan do tulun di momurinait do miagal di tulun do Pilistin, om i tulun do ponong id koulayon. Momit i rayat do kaadat-adato’ do bansa’d suwai. ⁷ Noponu’ pod tamas om pirok i pomogunan diyolo’ om a’ no aayi-ayi’ i dapu’ diyolo’, om a’ ointob-intob i korita’-kuda’ diyolo’, om kuda’ nga’ ogumu’ no kopio. ⁸ Noponu’ pod tingolig i pomogunan diyolo’, om tumuku’ iyolo’ di tininganak di winonsoi diyolo’. ⁹ Om indaraaton ngai’ nopondo o tulun om intingayamon. Kada’ iyolo’ ompunai oi TUHAN! ¹⁰ Om mongoi nondo iyolo’ lisok dot id koluang-luangan do hiri’d konulu-nuluan di kapampangan, ko’ mongukad do luang do hiri’d tana’ do mogidu’ do mantad id kototogod do TUHAN om mantad id sinundu om kagayaan dau. ¹¹ - ¹² Om orikot nondo o maso do poinsiribaon i tulun dot asawat o ginawo, om raagon i kopinggaya-gayaan do tulun. Om TUHAN pondo o poinggoyoon. Om tontok nod tadau’ddi do poinsiribaon do TUHAN it Agayo o Sinundu, o koinsanai di tulun di kikuasa’, om it asawat o ginawo om i minggayo-gayo. ¹³ Om raagon ngai’ nondo i kayu sedar dit angakawas do hilo’d Libanon, om i kayu dot angagayo di hilo’d Basan. ¹⁴ Om lampayon ngai’ i nuluhon om i nulu-nulu dit angakawas. ¹⁵ Om habaon ngai’ i walai dot angakawas om koinsanai di tolig dot ogirot. ¹⁶ Om lonsodon ngai’ i kapal dit angagayo om it ongolumis. ¹⁷ - ¹⁸ Om poinsiribaon nondo i tulun dit asawat o ginawo, om alaon i tulun di minggayo-gayo. Om atanus ngai’ nondo o tingolig do hiti’d pomogunan. Om TUHAN pondo o poinggoyoon do tontok do tadau’ddi. ¹⁹ - ²¹ Tontok nopondo do rumikot o TUHAN do mongoi pomoguyu’ diti pomogunan, om lumisok nondo o tulun dot id koluang-luangan do hilo’d konulu-nuluan di kapampangan, om mongukad do luang do hilo’d tana’ do mogidu’ do mantad id kototogod do TUHAN om lumisok do mantad id sinundu om kagayaan dau. Orikot nopondo o tadau’ddi om tongkiadan tomod nopo diyolo’ i piro-piro o tingolig do pirok om tamas di winonsoi diyolo’, om maan pondo di tikus om pungit. ²² Iyo nopoddi, om kada’ no kopio pogondos do tulun tu’ iyau nopo om atantu’ no do matai’ i’, tu’ aiso’ i’ o gatang.

¹ Antangai pogi’, nga’ potiiduwon no moti’d TUHAN, it Osundu Kopio, do mantad hilo’d Yorusalim om hilo’d Yohuda o koinsanai di koburu-buruon diyolo’, om kohompit ngai’ no o taakanon om tinumon diyolo’. Om oinsanan nogi’ i tulun di sondihon diyolo’, ² i gunsiou, i tulun do sumasangod, i gompomutus, i nabi, i mogogontong do nasip, i boyoon do pomorinta’, ³ i boyoon do soudor, i boyoon do rayat, i tulun dot id suang do pulitik, om i tulun di koilo do momolimu’ do nunu nopo it ongosiliu do hiti’d pomogunan. ⁴ Om silihon nondod TUHAN do boyoon diyolo’ i tangaanakwagu dit a’ po nongosukod. ⁵ Om oinsanan nopondo o tulun do manganu do kountungan do mantad id tulun do suwai. Om sumaap nondo i tongomulok po di komolohingan, om sumaap i tulun dot aiso’ o ngaran-ngaran di tulun di kipangkat. ⁶ Om orikot nondo o maso do pilion nopod tulun o tiso’ di koobpinayan dau, om moro-boros nod, ’’Iya’ poo o kipakayan dot osonong-sonong; siliu nogi’ do boyoon dahai do tontok do maso diti tosusa’,’’ ka. ⁷ Nga’ sumimbar nondo iyau do poingkaa, ’’Kada’ oku pilio’! Tu’ aiso’ i’ o takanon om aiso’ o pakayan ku. Kada’ oku nogi’ kopio siliho’ do boyoon diti tulun, tu’ a’ oku i’ milo do monulung dokoyu,’’ ka. ⁸ Naratu’ no kopio o Yorusalim! Om Yohuda nga’ nahaba’ no. Tu’ sumaap i’ do TUHAN i koboro-boroso’ om i wowonsoyon diyolo’, om mongindaraat iyolo’d Kinorohingan. ⁹ Iri kowoyo-woyoo’ diyolo’ dit orohian do mogipori-pori nga’ popointalang no di karaaton diyolo’. Om miagal nopo iyolo’ di tulun do Sodom di gulu po tu’ pingroitan nopo i dusa diyolo’, om a’ no olim-olimon. Obungou no o tulun do miagal diri! Tu’ iyolo’ i’ om iyolo’ o pinoporikot do hukuman dot id tinan diyolo’. ¹⁰ Boros kad TUHAN, ’’Posunudo’ no di tulun di mumboyo’ doho’, dot osimbayan i’ om apasi iyolo’ tu’ kaakan i’ iyolo’ do hasil di huyan diyolo’. ¹¹ Nga’ obungou no i tulun dot araat! Tu’ poingkuro nopo o winonsoi diyolo’ dot id wokon om iyoon no iyolo’ iyau’ddi do baino’. ¹² Ulak-ulakan nondo do tangaanak iti tulun ku om porintaon iyolo’ do tongoondu’. Om polidon nondo di piro-piro o boyoon iti tulun ku, gisom dot a’ no iyolo’ koilo ondung honggo o ralan do susuyon diyolo’,’’ ka. ¹³ Nokosodia’ no o TUHAN do popoboros do poboroson dau om momutus do tulun dau. ¹⁴ Om TUHAN no o gompomutus di piro-piro o boyoon di tulun dau. Iti no o boros do TUHAN do papasala’ diyolo’, ’’Iyokoyu no i minanakau do hasil di kabun dot anggur ku, om noponu’ no i walai dokoyu di dapu’ do nahau dokoyu do mantad id tulun di mosikin. ¹⁵ A’ kou i’ apatut do mongulok-ulok di tulun ku om mongudipon di tulun do mosikin. Iyoho’ no i TUHAN it Asawat Kopio, om Osundu Kopio, o minomoros diti,’’ ka. ¹⁶ Boros kad TUHAN, ’’Antangai pogi’ o kasasawat do ginawo di tongoondu’ do Yorusalim! Mamanau piya iyolo’ nga’ mokirayou-rayou i’, om milik-silik o mato; om monginsonong iyolo’d tinan, om posonong-sonongon diyolo’ o pamalaang-laang, gisom do marak-ngarak nopo i lungkaki’ diyolo’. ¹⁷ Nga’ tongkopon ku indod gandas i tulu diyolo’ do gisom dot a’ sunian do tobuk. Iri no o pomohukum ku diyolo’,’’ ka dau. ¹⁸ Om orikot indo o maso do ngoyon ngai’d TUHAN do mantad id tongoondu’ do Yorusalim, o nunu nopo i kaandasan diyolo’, i pomolumis do tulu, i lungkaki’, i karo, ¹⁹ i golong, i tudung, ²⁰ i tupi’, i gimat do hiri’d poingkogos do longon diyolo’, ²¹ om i pondulung, om i tanting-anting do todung, ²² om i pakayan do dong moginakan dit ongolumis, om i gaun, om i kantung, ²³ om i rasuk dit onipis, om i pakayan di kain linan do winonsoi, om i tudung dit oniiba’ om i tudung diyolo’ dit anaru. ²⁴ Om osonong po daa o kosingudan diyolo’ do baino’ poo nga’ outong nondo o kosingudan diyolo’ do koimbagu. Om ponowoli no di tagkos diyolo’ dit ataandai om tali dit aparad. Om iri tulu diyolo’ di kitobuk dot olumis nga’ alagasan nondo. Om ponowoli no di pakayan diyolo’ dit ongolumis om pakayan di gansing. Olumis po daa iyolo’ do dinondo; nga’ ara-raat nondo iyolo’ do koimbagu. ²⁵ Om apatai nondo dot id pisangadan i tongokusai, dot iri piya i gunsiou. ²⁶ Om mogihad ngai’ pondo om tumongob o tulun do hiri’d piro-piro o wawayaan do bandar, om osiliu pondo do miagal do tondu’ di poillabas tomod do poirikau do hiri’d tana’ o bandar diri.

¹ Om tontok nopondo do maso’ddi om pususon nopo do turu’ o tondu’ ot iso’ o kusai om moro-boros nod, ’’Koihum i’ iyahai do takanon om pakayan dahai, nga’ pologoso’ po daa iyahai do mamarait diya’ do sawo dahai, om a’ indo iyahai ointingayam dot a’ kasawo,’’ ka. ² Orikot indo o maso do porombungon om polumison do TUHAN o koinsanai do totonomon om kayu dot id pomogunan diti. Om tadau nopondoddi om ongotood nondo i tulun dot Israil om ongoondos tu’ haro no o tua’ di tinanom diyolo’. ³ Om pointikid-tikid do tulun di noolu’ do hilo’d Yorusalim om i nopili’ do Kinorohingan do maan posio’, om roitan no dot olidang. ⁴ Om butusan indod TUHAN om lidangan dau di sinundu dau i tulun do songonuon dau. Om lihungan dau o Yorusalim do mantad id kasalaan dau om mantad id raha’ do tulun dit aiso’ o sala’ di pinatai dot id bandar diri. ⁵ Om polintuhun nondo o TUHAN do haun do dangadau, om lisun om tapui di mikit-sikit do dongotuong do hilo’d timpak do Nuluhon do Sion om poinsahau do koinsanai’d tulun di pointimung do hilo’. Om Kinorohingan no o monirung om mongintirung do pointongkop do bandar diri dot i sinundu dau o ponirung. ⁶ Om polungungon i’ dau i bandar do tontok dit alasu’ kopio di dangadau, om silihon dau do kinoiyonon dit aiso’ o koligagaanan, om ointirungan do mantad id rasam om tongus dit opuhod.

¹ Pokinongoho’ oku nod modsinding do pasal di kabun dot anggur di tambalut ku. Iri nopo tambalut ku om kikabun dot anggur do hilo’d guas do nulu-nulu dit oruak o tana’. ² Songkulo’ no dau i tana’ om pingiduwai nod watu. Om tanamai no dau do guas dot anggur di nopili’ no kosonong, om wansayai no dau do sulap dit akawas do maan do padtamangan. Om pongukad no iyau do luang dot iyonon do mamaga’ di tua’ dit anggur, om ongoi noddi iyau pogihum do tua’ dit anggur di noonsok, nga’ oonsom ngai’ nopo i tua’ dit anggur di nokito dau. ³ Om boro-boros noddi i tambalut ku do poingkaa, ’’Pokionuon ngai’ ku iyokoyu i tulun do hiti’d Yorusalim om hiti’d Yohuda, do momisara’ doho’ om i kabun dot anggur ku. ⁴ Nunu po daa ot apatut do wonsoyon dot id kabun dot anggur ku’ddi dit a’ nowonsoi? Nokuro tu’ ongoonsom ngai’ o tua’ dit anggur, om okon nogi’ ko’ tua’ dit osonong do miagal di soro-sorohon mantad ku? ⁵ Iyo nopoddi, om poingkaa no o wonsoyon ku dot id kabun dot anggur ku’ddi: iduwon ku nondo i pagar di pointutuk om habaon ku i tolig di mongintirung diri, om pologoson ku o nintorusan do mangakan om mingulok di kabun diri. ⁶ Om pologoson ku dot okurumbutan do gouton. A’ ku nondo songkulon i tana’ om a’ ku punggulan i guas dot anggur om a’ ku buatan, gisom dot osunian do rugi om sakot. Om oduhan ku o haun do poposondot do rasam do hiri,’’ ka. ⁷ Kabun nopod anggur do TUHAN it Osundu Kopio, om iri no i tulun dot Israil; om iri tulun do Yohuda i guas dot anggur di tinanom dau. Iri daa it osonong o soro-sorohon dau do wonsoyon diyolo’, nga’ kokito nogi’ dau do mogipapatai iyolo’. Soro-sorohon daa dau do popogirot iyolo’ dit otopot, nga’ korongou nogi’ iyau do giniakan do mokianu dit otulid. ⁸ Obungou kou no! Mimboli kou nopod walai om tumo do pomoruhang di dapu’ dokoyu. Om a’ no alaid om aiso’ no o tiyonon do tulun do suwai om iyokoyu pondo o momogun-mogun do hiti’d pomogunan diti. ⁹ Orongou ku o TUHAN it Osundu Kopio, do moro-boros do poingkaa, ’’Oingou nopondo tu’ aiso’ no o songingiyon diti walai dit angagayo om ongolumis. ¹⁰ A’ nondo sumonong o totonomon. Tu’ iri nopo kabun dot anggur do hopod o hiktar o kogoyoo’ om hopod po lito do waig dot anggur do hasil, om i hatus o lito do tonomon nga’ hopod po o lito do gandum do hasil,’’ ka. ¹¹ Obungou kou no! Iyokoyu i moginum nod tiinumon do kaawuk, om i magauk noo o karaja’ do mantad do kosuabon om gisom do totuong. ¹² Haro ngai’ nopo o tuni do kecapi, om gambus, om rebana, om suling om haro o waig dot anggur dot id poginakanan dokoyu. Nga’ a’ i’ dokoyu podulon o korohian do TUHAN om i wonsoyon dau dot id dokoyu. ¹³ Om gowoi pondo om gayaton kou di pisangod do tumongkiad do mantad hiti. Om lous nondo om tuuhan o kapatai ngai’ di boyoon om i rayat. ¹⁴ Om potungkabangon nondo do kapatayon o kabang dau do gisom id agayo tomod o kotungkabangon do monolon di tulun dit ongkipangkat do hilo’d Yorusalim do mitonggoi di rayat dit oubas do rumamai. ¹⁵ Om ointingayam nondo o pointikid-tikid do tulun, om oinsanan i tulun dot asawat o ginawo do poinsiribaon. ¹⁶ Nga’ TUHAN nopo, it Osundu Kopio om pointalang i’ do kagayaan dau do tontok do momonsoi iyau dit otopot. Pointalangon nondo dau o kolidango’ dau do tontok do momutus iyau di bansa’ di nasanganu dau. ¹⁷ Om mangakan-ngakan nondo do hiri’d kinaraagan do bandar i tangaanak do dumba’ om kambing, om a’ iyolo’ ooyian do kanon. ¹⁸ Obungou kou no! Iyokoyu it a’ milo do tumingkod do momonsoi’d dusa. ¹⁹ Boros ka no dokoyu om, ’’Pologoson nopo o TUHAN i Kinorohingan dot Israil dit olidang do powonsoi kopio di natantu’ mantad dau do wonsoyon, om oilaan toko’ i’ o komoyon dau,’’ ka. ²⁰ Obungou kou no! Iyokoyu i mamarait dot osonong it araat, om anawau it otuong, om oomis it opoit. ²¹ Obungou kou no, tu’ momusorou kou dot oilo om opintar kou. ²² Obungou kou no, iyokoyu i huruan do moginum do waig dot anggur. Osiou tomod kou daa om aiso’ o poddosi do momonsoi’d tiinumon do kaawuk! ²³ Nga’ mokiaanu kou nopo do tusin di ponisip, om poiduwon nopo dokoyu i tulun di kisala’, om antaban dokoyu i tulun dot aiso’ o sala’ do kaanu dot ibutus dit otulid. ²⁴ Gowoi poddi do poingkuro nopo i paka’ om i sakot do nokoring dot ouu dot osorob do tapui, om iyo noddi o gamut dokoyu do rumomuk, om lumotu’ i tusak dokoyu om otilib ngai’ do ribut, tu’ minagada’ kou i’ di ponudukan do TUHAN, it Osundu Kopio, i Kinorohingan dot Israil dit olidang. ²⁵ Gowoi poddi om otogod o TUHAN do tulun dau. Om posodia’ no iyau do momohukum diyolo’. Om gumuyu’ ngai’ nondo o nuluhon; om songingiliu i rata’ do miagal pod rinomos do hiri’d tanga’d ralan. Nga’ mulong pod miagal diri o nowonsoi dau nga’ a’ po natanus o kototogod do TUHAN, om momohukum kasai’ po iyau. ²⁶ Om lohowon nondod TUHAN i bansa’d tulun di hilo’d sodu’, om osiau nopondo iyolo’ do rumikot! ²⁷ Posodia’ kasai’ nopo iyolo’ do sumangod om aiso’ ot ohuyan dot aiso’ piya o kotingkadan do sumangod. ²⁸ Angatarom ngai’ nopo o pana’ diyolo’, om posodia’ kasai’ i pawakasan diyolo’d pana’, om i sondulu do kuda’ diyolo’ nga’ miagal pod watu do pangasaan kokodou, om i ruda’ do korita’-kuda’ diyolo’ nga’ miagal po di ribut kosiau do tumolong. ²⁹ Om minggarom ngai’ poo i soudor do miagal do singa di wagu po kapanabpo do maan dau akano’, om igitan nondo dau iri dot id kinoiyonon dit aiso’ o koligagaanan, om a’ i’ oongoi kaahau. ³⁰ Om tontok nopondo do tadau’ddi om iyo pod ngorod do rahat o pangkis do mogisasangod dot orongou do pointongkop dot Israil. Antangai pogi’, nga’ otuong poo o pointongkop di pomogunan om noponu’ do kosusaan. Om iri piya tanawau nga’ suminiliu i’ do totuong.

¹ Tontok do toun di kinapatayon di Raja’ Usia, om kokito ku no o TUHAN do poirikau do hiri’d tirikohonon dau di don raja’ dit asawat om kikagayaan. Om katakapai nopo di rasuk dau dot anaru i Walai’d Sasambayangan dot Agayo. ² Om iri nopo i piro-piro o moloikat di roitan do Serapim di sangkalab-kalab do miagal do tapui, nga’ songingkakat do hiri’d posorili’ dau, om saraanaman nopo iyolo’d talad. Duwo o talad do ponirung do rabas diyolo’, om duwo o talad do ponirung do tinan diyolo’ om duwo o talad do maan do tumulud. ³ Om mogisimbar-simbar nopo iyolo’ do momoros do poingkaa, ’’Olidang, olidang, olidang. Olidang no o TUHAN it Osundu Kopio. Noponu’ pod kagayaan dau iti pomogunan!’’ ka. ⁴ Om koguyu’ nopo i pinoimpahan di Walai’d Sasambayangan dot Agayo do noguyu’ di kopuhodo’ do boros diyolo’, om noponu’ do lisun i Walai’d Sasambayangan dot Agayo. ⁵ Om boros kangku’ddi, ’’Obungou oku no! Apatai oku no! Tu’ iyoho’ nopo om dusa ngai’ nopo o koboro-boroso’, om poingiyon oku dot id rolot do tulun do miagal diri. Om okon-okon oku poddi iyoho’, nga’ obungou no kopio tu’ nokokito oku i’ di Raja’, i TUHAN, it Osundu Kopio,’’ kangku. ⁶ Nga’ lintuhun no do minongoi’d hiri’d doho’ o tiso’ di moloikat di roitan do Serapim do kiinigit do popou, i nongoi dau songgipo’ do sanggip do mantad hiri’d pananaraban do porsombahan. ⁷ Om potopiso’ no dau i popou’ddi dot id munung ku om boro-boros nod poingkaa, ’’Antangai pogi’, nga’ nokotopis nod munung nu iti popou, om noidu’ noddi o kasalaan nu om noompunan do TUHAN o dusa nu,’’ ka. ⁸ Om korongou ku noddi o TUHAN do minomoros do poingkaa, ’’Isai ma o suhuon ku? Om isai ot orohian do sumiliu’d popinsusui di boros toko’?’’ ka. Om boros kangku, ’’Diya oku. Suhuo’ oku nopo!’’ kangku. ⁹ Om boros ka dau, ’’Pamanau no om sunudan ngai’ no i tulun do poingkaa, ’Korongou kasai’ kou i’ nga’ a’ kou i’ kosuhut di komoyon. Om poingontong kasai’ kou, nga’ a’ kou i’ koilo ondung nunu i nosiliu,’ kanto,’’ ka dau. ¹⁰ Om boros kaddi dau dot id doho’, ’’Pobosugon ngai’ nopo o pomusarahan do tulun diti, om bosukon nopo o tolingo diyolo’ om bolohon o mato diyolo’, om a’ i’ iyolo’ korongou, om a’ kosuhut, om a’ kokito, om a’ i’ koguli’ dot id doho’ om a’ olingasan,’’ ka. ¹¹ Om uhot oku noddi, ’’Songkuro o koloido’, do miagal diti ot osiliu oi TUHAN?’’ kangku. Om boros ka dau, ’’Gisom pod angaraag ngai’ i bandar, om ongoingou, om gisom dot otongkiadan ngai’ i walai, om aiso’ o tanom do hiri’d tana’ tu’ a’ no sunian. ¹² Om gisom dot ouyung ngai’ ku o tulun do pokoyoon do hilo’d sodu’, om gisom dot otongkiadan kopio o pomogunan diti. ¹³ Tu’ haro piya daa o tongosongulun dot id pialatan do hopod o tulun dot oolu’ dot id pomogunan diti, nga’ iri piya nga’ patayon i’. Om iyo pondo iyau di tuod di kayu dit agayo di nokotontod o pananagad,’’ ka dau. (Iri nopo tuod diri nga’ poiyaan do kotimpuunon do koposi-posion do wagu di tulun di nasanganu’d Kinorohingan.)

¹ Tontok di maso do pomorintaan di Raja’ Ahas, i tanak di Yotam, i manangaki di Usia, i raja’ do Yohuda, om kotimpuun no o pisangadan. Rikot no i Rosin, i raja’ do Siria do miwoyo’ di Pika i tanak di Rimalia, i raja’ dot Israil, do mongoi panangod do bandar do Yorusalim, nga’ a’ i’ iyolo’ nakaala’ do bandar diri. ² Om soira’ di nosunudan i raja’ do Yohuda do nokorikot dot id watas dot Israil i soudor do Siria, om moddosi tomod diri iyau om koinsanai di rayat. Miagal po iyolo’ di kayu do songguyu-guyu’ dot oguyu’ do ribut. ³ Om boros kaddi do TUHAN dot id di Yosaya, ’’Angatai i Siar Yasub i tanak nu, do mongoi solowot di Raja’ Ahas. Osolowot nu indo iyau do hilo’d tiyonon di mangangawol do mangawol, it id dompok di liang di koluyungon do waig di mantad id kulam dit id sokid. ⁴ Om sunudan no i raja’ do mumbangan-bangan, om a’ gumangau, om a’ moddosi om a’ oborulong. Tu’ iri nopo kototogod di Raja’ Rosin om i soudor dau i tulun do Siria’ddi, om i kototogod di Raja’ Pika diri om miagal nod duwo siduwon di misun-lisun noo. ⁵ Nokopogipapakat no o Siria om Israil om i raja’ do hilo’ do momonsoi dot araat dot id diya’. ⁶ Mongoi iyolo’ panangod do Yohuda om monompurolosi do bansa’ddi om sumokodung i’ daa’ndo iyolo’ diyolo’, om silihon nogindo diyolo’ do raja’ i Tabiil. ⁷ Nga’ iyoho’ no i TUHAN, o popoboros dot a’ i’ osiliu o miagal diri. ⁸ Tu’ Siria nopo om a’ i’ okoris ko’ Damsik, i bandar dot agayo do hilo’, om Damsik nga’ a’ i’ okoris ko’ i Raja’ Rosin. Om Israil no, om onom po nohopod om limo toun om ourias no, om okon nondo ko’ iso’ o bansa’ di momorinta’. ⁹ Israil nopo om a’ i’ okoris ko’ Samaria, i bandar dot agayo do hilo’, om Samaria nga’ a’ i’ okoris ko’ i Raja’ Pika. Ondung a’ kou otumbayaan kopio doho’, om a’ kou no kopio kotori’,’’ ka. ¹⁰ Om sunudai po kawagu’d TUHAN do boros dau i Ahas, do poingkaa, ¹¹ ’’Pokianu nod tanda’ do mantad id TUHAN, i Kinorohingan nu, om onuan ko i’ dau do tanda’, do mantad tuu do hilo’d saalom kopio, i hilo’d kinoiyonon do tulun di napatai ko’ mantad pod hilo’d surga i hilo’d sawat,’’ ka. ¹² Nga’ boros kad i Ahas do suminimbar, ’’A’ oku i’ mokianu do tanda’ tu’ a’ oku i’ mogumbal do TUHAN,’’ ka dau. ¹³ Om boros kaddi di Yosaya, ’’Ondung iyo’ddi, om pokinongou pogi’, oi sinakagon di Raja’ Daud! A’ nu po ula’ do mogumbal do kolonuto’ do ginawo’d tulun, tu’ umbalan nu po daa o kolonuto’ do ginawo’d Kinorohingan? ¹⁴ Nga’ TUHAN nondo o manahak diya’ do tanda’: Haro nondo o sumandak do monontian om osusu do tanak do kusai. Om pungaranan nondo i tanak diri dot i Imanuil. ¹⁵ Om agayo nopondo iyau om di milo iyau’d mimpori-pori do momusorou, om osimbayan nondo o hiri’d pomogunan diri. ¹⁶ Om a’ po orikot o maso’ddi om aiso’ no o tulun do poingiyon dot id pomogunan di duwo o raja’ di poddosi nu’ddi. ¹⁷ Om porikoton nondod TUHAN dot id diya’, om id rayat nu, om id sompiiyon nu o maso dit osusa’ kopio, it a’ po insan korikot do mantad di minitongkiad i’ ot Israil om Yohuda, tu’ porikoton nondo dau i raja’ dot Asur. ¹⁸ - ¹⁹ Om tontok nopondo do tadau’ddi om lohowon nondod TUHAN i tulun do Masir om i tulun dot Asur, om rumikot nondo i duwo o bansa’ddi do miagal pod langau om moningot dit ogumu’, do tumaun do hilo’d rantai di mogikubong-kubong om id pogiolit-olitan do pampang; om atakapan ngai’ nopo diyolo’ i korugian om hiri’d kasakat-sakatan. ²⁰ Om pakayon nondod TUHAN o raja’ dot Asur do mangala’ om mongindaraat om mamaraag do bansa’ dot Israil. Om iri nopondo raja’ dot Asur om iyo po di tulun di momumugar di momugar ngai’ do tobuk om hulu’d tinan, dot id Israil. ²¹ Om tontok nopondo do tadau’ddi om mulong piya dot iso’ po sapi’ dit okoro’ po, om duwo tinan do kambing do tayam-tayam dot iso’ o gompongumo, ²² nga’ iri nopondo susu di tayam-tayam diri om talib i’ do kabagal di gompongumo tu’ okuri’ no o tulun do poingiyon do hiri’d pomogunan diri. Otopot no kopio dot iri nopo tulun dit okuri’ no do poingiyon do hiri’d pomogunan diri om kaakan i’ do susu om paha’. ²³ Tontok nopondo do tadau’ddi om iri nopo kinoiyonon di pinananaman daa do soribu o guas dot anggur om i gatang do soribu o tusin do pirok, om rugi po om sakot o sumuni’d hiri. ²⁴ Om tulun nopo di mongoi’d hiri om a’ i’ kobulun dot a’ migit do pana’ om pawakasan do pana’ tu’ notongkop pod sakot om rugi o pomogunan diri. ²⁵ Om a’ nondo o tulun kobulun do mongoi’d hiri’d konulu-nuluan di pinsongkulan daa om pinintanaman di gulu po tu’ notongkop pori do sakot om rugi. Om pinghambaan poo om pangakan-ngakanan do sapi’ om dumba’ o hiri,’’ ka dau.

¹ Om boro-boros no o TUHAN dot id doho’ do poingkaa, ’’Ongoi anu do watu di ponunulisan dot agayo om potulison nod hiri o hurup dit angagayo o ponunulis do poingkaa, ’Opusik do Magahau; Olomus do Manakau,’ ka. ² Om momolohou nod duwo o tulun do sasi’ di milo do ponongkuyaanan; i Uria it Imam om i Sakaria, i tanak di Yorobikia,’’ ka. ³ Om alaid-laid noddi, om ponontian no i sawo ku om kosusu nod tanak do kusai. Om boro-boros no o TUHAN dot id doho’ do poingkaa, ’’Pungaranai iyau dot i ’Opusik do magahau, Olomus do manakau,’ ka. ⁴ Tu’ tontok dit a’ po milo iti tanak do momolohou dot ’Apa’ om Ina’’ ka, om oigitan ngai’ no di Raja’ Asur o kakayaan do Damsik om i dapu’ do pinanakau do Samaria,’’ ka. ⁵ Om boro-boros po kawagu o TUHAN dot id doho’, ⁶ boros ka dau, ’’Minada’ iti bansa’ di waig do Bawang do Siloa dit oloyo’ om nasanangan tomod iyolo’ di Raja’ Rosin om i Raja’ Pika. ⁷ Om gowoi poddi om porikatan ku iyolo’, iyoho’ i TUHAN o poporikot, di raja’ dot Asur om koinsanai di soudor dau do mongoi panangod do Yohuda. Om rumikot nondo iyolo’ do miagal poddi waig do mangampad do mantad id Bawang dot Iprat om lumampai do gisom do kotolibamban di tisan do bawang. ⁸ Om rumudsu’ nopo iyolo’ do sumuang do Yohuda, do miagal po di luyud di mayo-gayo nopo do gisom do korikot dot id lihawa, om oolitan ngai’ nopondo,’’ ka. Moyo-woyo’ i’ o TUHAN dati’! Mongintirung i’ diti pomogunan i talad dau di poungkalad. ⁹ Timung kou no do mikuwo’d ooris, oi koinsanai’d bansa’! Pokinongou kou no, oi pomogunan dit id sodu’. Sodia’ nod mongoi sangod, nga’ kooris kou no! Sodia’ no kopio nga’ poddosi kou no! ¹⁰ Pomusorou mantad nod wonsoyon nu, nga’ a’ i’ mando owonsoi kopio iri. Poboroso’ nopo o korohian nu’d momonsoi! Nga’ a’ i’ iri owonsoi, tu’ moyo-woyo’ i’ dahai o Kinorohingan! ¹¹ Om porintao’ oku nod TUHAN om poinsano’ oku no dau dot a’ tumanud di kowoyo-woyoon do bansa’ddi. Boros ka dau, ¹² ’’Kada’ ongoi ponokiupakat diyolo’ om kada’ poddosi di poddosi diyolo’. ¹³ Sorohon no dot iyoho’ nopo, i TUHAN om olidang i’, om iyoho’ noo ot apatut nu’d poddosi. ¹⁴ Om osiliu oku nondod watu do kosoduwon di rayat do Yohuda, om Israil om Yorusalim. Om iyo oku pondod lawa’ do kosulungon diyolo’ tu’ olidang oku i’ kopio. ¹⁵ Om ogumu’ nondo ot id pogialatan diyolo’ do kasadu om osuhat, om alawaan di lawa’,’’ ka dau. ¹⁶ Poopion no kopio dokoyu om gompion no i boros do Kinorohingan dot id doho’, oi dokoyu i tumatanud doho’. ¹⁷ Nokolisok no daa o TUHAN do mantad id tulun dau, nga’ iyoho’ nopo om otumbayaan i’ dau om mogondos oku dau. ¹⁸ Diya oku no, do miwoyo’ diti tangaanak di nakatahak do TUHAN doho’. Om iyahai no o sasi’ di poimpasi do hiti’d pogialatan do tulun dot Israil do mantad id TUHAN, it Osundu Kopio, i momorinta’ do hilo’d Nuluhon do Sion. ¹⁹ Nga’ suhuon kou nondod tulun do mongoi pokituduk di piro-piro o bobolian di mopi-kopi noo om muol-nguol. Om moro-boros ngai’ nondo o tulun diri do poingkaa, ’’A’ toi apatut toko’ i’ do mokituduk do tingolig do maan do koinsanangan di tulun do poimpasi?’’ ka. ²⁰ Posimbaron no o poingkaa, ’’Pokinongou nod ponudukan do TUHAN! Kada’ pokinongoho’ i piro-piro o bobolian. Tu’ iri nopo poboroson diyolo’ om aiso’ i’ o guna’ dot id diya’,’’ ka. ²¹ Om minghombo pondo do hiri’d pomogunan diri i tulun di norutum om louson. Om adalaan nondo kopio iyolo’ do louson om tumogod gisom do momopol iyolo’ do raja’ om Kinorohingan diyolo’. Om honggo nopo ot antangan diyolo’, do hilo’ tuu id tawan ko’, ²² hiti pod pomogunan, nga’ aiso’ no ot okito diyolo’ do suwai ko’ kosusaan, om totuong, om kopoddosian, om hiri no o paangayan diyolo’.

¹ Nga’ a’ no alaid om koidu’ no iyolo’ do mantad id kosusaan diri. Iri nopo kinoiyonon di payat do Sibulon om Naptali di gulu po om roitan daa dot ara-raat kopio. Nga’ koimbagu nopondo om pusohon nondo o pointongkop do watas diri, i kinoiyonon do mantad hiri’d Rahat do Tanga’ om gisom do korikot di tana’ do ponong id soborong do Yordan, i ponong id koulayon, om gisom do hilo’d Galilia i kinoiyonon do tulun do bansa’d suwai. ² Iri nopo bansa’ di poimpasi dot id dotuong, nga’ nokokito no do tanawau dit anawau kopio. Iri nopo i poingiyon dot id sahau do kapatayon, nga’ notitihan noddi do tanawau. ³ Oi TUHAN, nonuan nu iyolo’ do kataadan dit agayo, om pinosimbayan kopio nu iyolo’. Iri no i kosonongo’ nu o kataadan diyolo’, do miagal pod kotoodo’ do tulun di dongmongomot, om miagal pod kotoodo’ di mogibahagi-hagi’ do dapu’ di naahau. ⁴ Noongoi nu no i binabo dot awagat, notipu’ nu i bobobog di pomobog do lihawa diyolo’. Naala’ nu no i bansa’ di mongulok-ulok om i mongudipon do tulun nu. Do miagal di nala’ nu i soudor do Midian di gulu po. ⁵ Tu’ iri nopondo i kasut do soudor di kosuton do sumangod, om i rasuk di notounan do raha’ nga’ sorobon ngai’ nopo om maan do pogudung di tapui do gisom dot ouu. ⁶ Tu’ nosusu no ot iso’ o tanak do bagi’ dati’, noonuan toko’ nod iso’ o tanak do kusai. Om iyau no o sumiliu do boyoon toko’. Ngaran nopo dau om: ’’Gomponosihat dit Oilo’’ om, ’’Kinorohingan dit Okoris’’ om, ’’Tapa’ di Poingompus’’ om, ’’Raja’ do Kouludan’’. ⁷ Momorinta’ iyau do hiri’d tirikohonon di Daud do don raja’; om muhang-ruhang o kuasa’ dau. Osimbayan kasai’ nopo o pomogunan dau: om pinoimpahan nopod kuasa’ dau nga’ otulid do mantad do baino’ om gisom dot alaid. Om atantu’ no dot owonsoi ngai’ do TUHAN iti, iyau it Osundu Kopio. ⁸ Norotuan nod TUHAN do hukuman o pomorintaan dot Israil. ⁹ Om oinsanan nopondo o bansa’ dot Israil om tulun do Samaria do koilo do TUHAN o pinaparatu’ddi. Minggayo-gayo tomod daa om asawat o ginawo diyolo’ do baino’ poo. Boros ka no diyolo’ om, ¹⁰ ’’Nangahaba’ no i walai do bata’ do winonsoi, nga’ sowolian toko’ i’ do walai di watu o wonsoyon. Nangatagad no i guas dot ara, nga’ sowolian toko’ i’ do kayu sedar do Libanon dit osonong kopio,’’ ka. ¹¹ Nga’ notingkau nod TUHAN o ginawo di pisangod do sumaap diyolo’. ¹² Om Israil nopondo om songodon om alaon di bansa’ do Siria, i mantad ponong hilo’d koulayon, om i tulun do Pilistin, i mantad ponong hilo’d kotonobon. Nga’ mulong pod ongowonsoi ngai’ o miagal diri nga’ a’ po atanus o kototogod do TUHAN, om momohukum kasai’ po iyau. ¹³ Nga’ a’ kasai’ po monosol i bansa’ dot Israil, do nohukuman piya iyolo’d TUHAN it Osundu Kopio, om a’ iyolo’ tumanud di ponuhuan dau. ¹⁴ Gowoi pondo om insan indo tadau do kopomohukuman ngai’d TUHAN di boyoon dot Israil om i rayat diyolo’. Puloson nondo dau om taamon dau o tulu om tikiu diyolo’. ¹⁵ Iri nopo i tulu diyolo’, nga’ i molohing-lohingon om i tulun dit ongkipangkat, om iri no tikiu om i piro-piro o nabi di mintuduk do ponudukan di kapalid! ¹⁶ Iri nopo i piro-piro o boyoon do bansa’ddi om minamalid om minamagangau di rayat. ¹⁷ Gowoi pondo om aiso’ no ot ongoiso’ piya di tangaanakwagu diyolo’ do poiduwon do TUHAN, om a’ iyau olisiu di tangaanak dit aiso’ o molohing om i tongoondu’ do nongopuadan, tu’ oinsanan nopo o bansa’ddi dot a’ monong Kinorohingan om nokowonsoi dot araat, om angaraat ngai’ o koboro-boroso’. Nga’ mulong pod owonsoi ngai’ iri nga’ a’ po atanus o kototogod do TUHAN, om momohukum kasai’ po iyau. ¹⁸ Tu’ iri nopo karaaton do bansa’ddi nga’ sumikit nopo do miagal do tapui di monorob do sakot om rugi. Kosikito’ nopo om iyo po di gouton dot osorob, tu’ muntu-nguntu’ po o lisun. ¹⁹ Otogod no kopio o TUHAN, it Osundu Kopio, om iri nopo pomohukum dau om iyo po di tapui di molob-ngolob, om iri no i bansa’ddi o ponokosiduwon dau do gisom dot ouu. Om aiso’ no ot osianan di tobpinai dau. ²⁰ Om pointongkop nopod pomogunan diri do mikoroihum o tulun om mingakan daa do nunu nopo i milo diyolo’d akanon, nga’ a’ i’ iyolo’ ayahan. Om kanon nopondo diyolo’ o tanak piya diyolo’! ²¹ Misaap nondo o tulun do Manasi om Ipraim, om miuhup nogindo iyolo’ do sumaap do Yohuda. Nga’ mulong pod owonsoi ngai’ iri nga’ a’ po atanus o kototogod do TUHAN om momohukum kasai’ po iyau.

¹ Obungou kou no! Tu’ momonsoi kou dot oturan dit a’ otulid, do pongulok-ulok di tulun ku. ² Om iyo noddi o ralan dokoyu do mangantob do tulun do mosikin do kaanu dit otulid om it apatut diyolo’ dot aanu, om magahau di dapu’ do tongoondu’ di nongopuadan om i tangaanak dot aiso’ o molohing! ³ Nunu pondo o wonsoyon dokoyu do tontok do kopomohukuman do Kinorohingan dokoyu? Nunu pondo o wonsoyon dokoyu do porikoton dau o kosusaan do mantad hilo’d pomogunan dit id sodu’? Om hinonggo pondo o polisakan dokoyu di kakayaan dokoyu? ⁴ Aiso’ no milo dokoyu’d wonsoyon tu’ apatai kou po dot id pisangadan, ko’ atanggayan do pisangod. Nga’ mulong pod ongowonsoi ngai’ iri nga’ a’ po atanus o kototogod do TUHAN, om momohukum kasai’ po iyau. ⁵ Boros kad TUHAN, ’’Asur no o maan ku do bobobog do pomobog ku di tulun di katagadan ku. ⁶ Suhuon ku ot Asur do sumaap do tulun ku dit a’ monong Kinorohingan, om i pinopotogod doho’, suhuon ku ot Asur do mongoi panakau om mongoi pagahau, om mongoi pongulok di tulun ku do miagal di pupuk do hilo’d ralan,’’ ka. ⁷ Nga’ haro mantad no nosorou di raja’ dot Asur do wonsoyon dau dot araat kopio. Tu’ korohian nopo dau nga’ mamatai om momunso dot ogumu’ o bansa’. ⁸ Tu’ boros ka dau do mokirayou-rayou, ’’Okon toi ko’ raja’ ngai’ i boyoon do soudor ku’ddi! ⁹ Solodon ku o bandar do Karkomis om Kalno, om Hamat om Arpad. Solodon ku po o bandar do Samaria om Damsik. ¹⁰ Alaon ku o piro-piro o pomorintaan di modsubak do tingolig dit agayo o sinundu ko’ mantad di hilo’d Yorusalim om hilo’d Samaria. ¹¹ Naraag ku no o Samaria om koinsanai di tingolig do hilo’, om miagal iddi o wonsoyon ku do hilo’d Yorusalim om id koinsanai di tingolig do tukuon do hilo’,’’ ka. ¹² Nga’ boros kad TUHAN, ’’Opongo ngai’ ku nopondo do momonsoi i karaja’ ku do hilo’d Nuluhon do Sion om i hilo’d Yorusalim, om hukuman ku nondo i raja’ dot Asur tu’ i kasawato’ do ginawo dau om i kobinggoyo-goyoo’ dau,’’ ka. ¹³ Tu’ mimboros poo iyau do poingkaa, ’’Nowonsoi ngai’ ku iri dot i kokoriso’ ku o pinomonsoi ku. Okoris oku om oilo oku, om opintar oku. Nongoidu’ ku no i wolit di momialatan do piro-piro o bansa’, om napanakau ku no i pinosodia’ mantad diyolo’. Om iyo oku pod gonsukod do mingulok ngai’ di tulun di momorinta’. ¹⁴ Iti ngai’ nopo bansa’ do hiti’d pomogunan om miagal nod rumun do tombolog; om osoonong oku do mongoi panganu di dapu’ diyolo’, do miagal nod tulun di mongoi pongokog do tontolu’ do hiri’d rumun. Aiso’ i’ o kapo do talad do miningkarab do minomorolosi doho’, om aiso’ o pinopotungkabang do tinduk do minamagarang doho’!’’ ka. ¹⁵ Nga’ boros kad TUHAN, ’’Minggayo-gayo toi i kapak dot id toguang di tulun di papakapak diri, om agayo toi i garagadi’ ko’ i tulun di papagaragadi’? Tu’ okon i’ ko’ i bobobog o pobilid do tulun, suwai ko’ i tulun o pobilid di bobobog,’’ ka. ¹⁶ Om porikatan nondod TUHAN, it Osundu Kopio do toruol i piro-piro o boyoon do soudor dit ongolombon do baino’, do pomohukum dau diyolo’, tu’ mininggayo-gayo i’ o tulun dot Asur. Om lumasu’ nondo o tinan diyolo’ dot iyo pod tapui do molob-ngolob o kolosuo’. ¹⁷ Om sumiliu nondod miagal do sinikit do tapui i tanawau dot Israil, i Kinorohingan dit olidang kopio, do monorob do koinsanai’d nunu nopo, om monorob di korugian dot insan noo tadau. ¹⁸ Om osorob ngai’ nopondo i puru’ om i koumaan dit ongoruak, do miagal pod tulun dit apatai do toruol dit araat. ¹⁹ Om iri nopondo noolu-olu’ di kayu do hiri’d puru’ nga’ ointob- intob no; tu’ iri piya tanak poo nga’ kointob i’. ²⁰ Om korikot indo o maso dot iri nopo tulun dot Israil di noolu-olu’, om a’ nondo sumondiu di bansa’ di momorinta’ dit oruhai no daa do nakapatai diyolo’. Nga’ sumondiu nondo iyolo’d TUHAN, it olidang kopio, i Kinorohingan dot Israil. ²¹ Om tumorodok indo kawagu dot id Kinorohingan dit okoris, i noolu-olu’ do bansa’d Israil dit okuuri’ no. ²² Tu’ mulong pod miagal daa di pasir do hilo’d rahat o kogumuo’d tulun dot Israil, nga’ a’ no kopiiro i koguli’ kawagu. Osomok no kopio o kosusaan, om apatut no do raagon o bansa’ddi. ²³ Om atantu’ no kopio do TUHAN, it Osundu Kopio, o mamaraag do pointongkop di pomogunan; tu’ iri no o natantu’ mantad do TUHAN, om a’ no milo’d simbanan. ²⁴ Om boros kad TUHAN it Osundu Kopio dot id tulun dau di poundorong do hilo’d Sion, ’’Kada’ kou poddosi do tulun dot Asur dot ulak-ulakan kou piya diyolo’, do miagal di winonsoi di tulun do Masir dot id dokoyu di gulu po. ²⁵ Tu’ oruhai nod opupusan o pomohukum ku dokoyu, om iyolo’ nondo o katagadan ku om patayon ku. ²⁶ Om bobogon ku nondo iyolo’ diti bobobog ku, iyoho’ i TUHAN, it Osundu Kopio, o momobog diyolo’ do miagal di pinomobog ku di tulun do Midian di gulu po di hilo’d Nuluhon do Pampang dot Orib. Om hukuman ku nondo ot Asur do miagal di pinomohukum ku do Masir. ²⁷ Om tontok nopondo do maso’ddi om polobuson ku nondo iyokoyu do mantad hilo’d Asur, om a’ nondo iyolo’ momorinta’ dokoyu,’’ ka dau. ²⁸ Nosolod nod soudor dot Asur o bandar dot Ayat! Notoliban no diyolo’ o Migron! Nokoiliu no diyolo’ o kokoriu om rapo-rapo diyolo’ do hilo’d Mikmas! ²⁹ Nakadarapas no iyolo’ di darapason do hiri’d tumakad om modop iyolo’ do hilo’d Giba! Gagaran ngai’ po o tulun do hilo’d bandar do Rama, om mogidu’ no i tulun di hilo’d Gibia, i bandar di Raja’ Saul. ³⁰ Pomogiak kou no, oi tulun do Galim! Pokinongou kou no, oi tulun do Laisa! Simbar kou no, oi tulun dot Anatot! ³¹ Ongosodu’ o pinogidu’ di tulun di hilo’d Madmina, om i hilo’d Gobim. ³² Tadau nopod baino’ om hilo’ nod bandar do Nob i pisangod, om sangakang-akang no iyolo’ do hilo’d Nuluhon do Sion, i bandar do Yorusalim. ³³ Nga’ habaon indo iyolo’d TUHAN, it Osundu Kopio, do miagal di raan do tatason do mantad hiri’d guas di kayu. Tu’ tagadon ngai’ nopo it angakawas, om ongolumis, om intingayamon. ³⁴ Om habaon nondo iyolo’d TUHAN do miagal di kayu dot id tanga’d puru’ do tagadon do kapak. Mulong piya dot okoris daa iyolo’ do miagal di kayu dit agayo do hilo’d Libanon, nga’ aratu’ indo iyolo’!

¹ Sinakagon nopo di Raja’ Daud om miagal do kayu di natagad. Nga’ poingkuro nopo i tuod do tolidan kawagu, om iyo nogiddi i sinakagon di Daud tu’ haro indo o raja’ do mantad id sinakagon diri. ² Om woyoon iyau di Rusod do TUHAN. Om kitoilaan indo iyau om atarom o pomusarahan, om koilo do momusorou dit apatut dau’d wonsoyon, om wonsoyon dau iri, om kotutun iyau do korohian do Kinorohingan om oronok iyau dau. ³ Iri no i mumboyo’d TUHAN o sumiliu’d kataadan kopio dau. Okon i’ ko’ tumanud dit okito dau o poimpahan dau do mamatos om a’ iyau paparatu’ do hukuman do tumanud do boros do tulun. ⁴ Nga’ butusan ngai’ i’ dau i tulun do mosikin do tumanud dit otulid; om obian dau i tulun dit aiso’ o pokukurayan do gisom do kamanang i tulun diri. Om monuhu’ iyau do momohukum do tulun di kisala’, om patayon i tulun dot araat. ⁵ Otulid indo om oiyo o pomorinta’ dau, om a’ iyau momogibang-gibang. ⁶ Miulud indo i dumba’ om i toni, om i bohuang nga’ lumii nopo dot id toning di kambing. Om i tanak do sapi’ om i tanak do singa nga’ mitoning nopod mangakan-ngakan do sakot, om momogompi’ nopo diyolo’ nga’ tanak dit okoro’ po. ⁷ Mitoning nopondo do mangakan-ngakan do sakot i sapi’ om i bohuang, om mitoning do modop i tanak diyolo’. Om i singa nga’ mangakan nondod sakot do nokoring do miagal di sapi’. ⁸ Iri piya tanak di sumusu po nga’ a’ i’ okurai-kurayan dot id toning piya di modsoding. ⁹ Om hilo’ nopondo id Sion, i Nuluhon dot Olidang, do Kinorohingan, om aiso’ no it araat om aiso’ o ligogon, tu’ oponu’ pondod toilaan do pasal do Kinorohingan iti pomogunan, do miagal po di waig di momonu’ do rahat. ¹⁰ Om orikot nondo o maso do pusohon do koinsanai’d bansa’ o songulun o raja’ do mantad id sinakagon di Daud. Om tumimung ngai’ nondo iyolo’ do hiri’d bandar di tiyonon dau’d momorinta’ do mongoi suwau dau. ¹¹ Tontok nopondo do tadau’ddi om pakayon pondo kawagu’d TUHAN o sinundu dau om poulion dau i tulun dau di nongoolu-olu di hilo’d Asur om i hilo’d Masir, om: hilo’d piro-piro o watas do Patros, om i hilo’d Etiopia, om i hilo’d Ilam, om i hilo’d Babil, om i hilo’d Hamat om i hilo’d piro-piro o pulou di hilo’d rahat. ¹² Om poinsawaton nondod TUHAN o tiso’ o bondira’ do popointalang dot id koinsanai’d bansa’, do timungon dau kawagu i bansa’ do Yohuda om Israil di nokopogitompias-pias dot id apat o linsuk diti pomogunan. ¹³ Om a’ nondo mosol do Yohuda i pomorintaan dot Israil, om a’ sumangod dot Israil o Yohuda. ¹⁴ Om miwoyo’ nopondo iyolo’ do mongoi sangod di tulun do Pilistin di hilo’d ponong id kotonobon, om mitanud do mongoi pagahau do dapu’ di piro-piro o bansa’d tulun di ponong id koulayon, om alaon nondo diyolo’ o bansa’ dot Idom om Muab, om porintaon diyolo’ o bansa’ dot Amon. ¹⁵ Om rasakan nondod TUHAN o Suok do Suis. Om potonguson dau i tongus dot alasu’ do gisom dot otuu i Bawang dot Iprat, om osiliu nondod turu’ o bawang dot ongokooro’, om kosoborong ngai’ indo o tulun diri. ¹⁶ Om kokito nondod ralan i tulun dot Israil di noolu-olu’ do sumoliwan do mantad hilo’d Asur do miagal di soliwan i’ i taki-aki diyolo’ do mantad hilo’d pomogunan do Masir.

¹ Om orikot nondo o maso do modsinding ngai’ o tulun do poingkaa, ’’Mongunsikou oku diya’, oi TUHAN, tu’ monginsasamod ko doho’. Tu’ mulong pod notogod ko doho’ di gulu, nga’ natanus noddi o kototogod nu. ² Gampamasi ku nopo om Kinorohingan, om iyau no o pagandasan ku. Aiso’ no o korolosi doho’, tu’ iyau no o manahak doho’ do kokorisan. Gampamasi ku nopo om Kinorohingan, iyau no o kopodsindingan ku. ³ Poingkuro nopo i waig dot osogit, do kourudtuu di tulun dot ohuyan, om iyo noddi o kototood do tulun di nasanganu do Kinorohingan, do tontok di posion dau iyolo’,’’ ka. ⁴ Om orikot indo o maso do modsinding ngai’ o tulun do poingkaa, ’’Pongunsikou nod TUHAN, om lohou nod ngaran dau do mokiuhup. Posusuyo’ no i nongowonsoi dau om i kobontugo’ dau, dot id koinsanai’d bansa’. ⁵ Podsinding no dot id TUHAN, tu’ momonsoi i’ iyau dot ogumu’ o koimayaan. Pologoson no do korongou do koinsanai di winonsoi dau o pointongkop diti pomogunan. ⁶ Suhuon ngai’ no i tulun di songingiyon do hilo’d Sion, do mamangkis om modsinding dot atataadan. Tu’ kikagayaan i’ kopio o Kinorohingan dot Israil dit olidang, om poundorong iyau dot id pogialatan di bansa’ di songonuon dau,’’ ka.

¹ Iti no o boros do Kinorohingan do pasal do Babil do pinointalang dau dot id di Yosaya, i tanak di Amos: ² Poinsawato’ no o bondira’ do don sumasangod do hilo’d timpak do nulu-nulu dit aiso’ o sumuni! Pinglohou no di piro-piro o soudor, om popingkopoiyo’ no o palad nu do maan do tanda’ dot apatut nod ngoyon diyolo’ songodo’ i bandar di minggayo-gayo om ngoyon ngai’ raago i totobon di wawayaan di bandar. ³ Nosuhu’ ngai’ nod TUHAN i gunsiou dit ongokoris di nongopili’ dau, i tulun dit a’ oluhoi o ginawo, om i milo do kaandasan do mongoi sangod om sinuhu’ dau iyolo’ do momohukum ngai’ di tulun di katagadan dau. ⁴ Pokinongou no dit ohiyo do hilo’d konuluhanan, i miagal do kohiyoo’ do tulun dot ogumu’, ohiyo tomod o piro-piro o bansa’ om pomorintaan di minogititimung. Posodiawon nod TUHAN, it Osundu Kopio, i piro-piro o soudor dau do mongoi sangod. ⁵ Mantad ngai’ iyolo’ do hilo’d pomogunan dit osodu’, i hilo’d tisan do pomogunan. Om raagon nod TUHAN o pointongkop do pomogunan tu’ atatagadan no kopio iyau. ⁶ Pillompud nod mihad, tu’ oruhai no o tadau do TUHAN. Om tontok nod tadau’ddi do poporikot it Osundu Kopio, do karaagon. ⁷ Lumuhoi ngai’ nopondo o longon om ginawo do pointikid-tikid do tulun. ⁸ Ongooris ngai’ nondo iyolo’ om ongorualan tomod, do miagal pod tondu’ dit orualan do mogkosusu. Om mogiontong-ontong pondo iyolo’ om angaragang o rabas dot ointingayaman. ⁹ Atantu’ nod rumikot o tadau’d TUHAN do miwoyo’d korongito’ om kototogod om kolosuo’ do ginawo dau dit a’ ogina-gina’. Om osiliu nondo iti pomogunan do tana’ dit a’ sunian do nunu-nunu, om apatai ngai’ o tulun di kidusa. ¹⁰ Tu’ iri rombituon om i pinuruan do rombituon do hilo’d tawan nga’ a’ nondo poulinau do tulinau diyolo’, om i tadau di mulai nogi’ nga’ osiliu nopo do totuong, om i tulan nga’ a’ nondo mogulinau. ¹¹ Om boros kad TUHAN, ’’Porikatan ku nondod kosusaan iti pomogunan om hukuman ngai’ ku i tulun dot araat tu’ i dusa diyolo’ o kopomohukuman ku. Poinsiribaon ku nondo o koinsanai’d tulun di minggayo-gayo, om hukuman ku o tulun dit asawat o ginawo om it ongorongit. ¹² Om okuri’ pondo ko’ tamas dit osompipi’ o tulun di kopoggidu’. ¹³ Om pogogoron ku’ndo o tawan, om guyuon ku o pomogunan do mantad id kinoiyonon diyolo’, do tontok di tadau ku, i kopointalangan ku di kototogod ku iyoho’ i TUHAN, it Osundu Kopio. ¹⁴ Om miagal pondo iyolo’ di tambang di mogidu’ dot osuon, om miagal di baanan do dumba’ dit aiso’ o gompomogompi’, tu’ sompori-pori nopondo i tulun do bansa’d suwai di poingiyon do hilo’d Babil do mongoi’d hiri’d pomogunan diyolo’. ¹⁵ Om isai nopo diyolo’ it okosupan om otobok no do gisom dot apatai. ¹⁶ Poontong-ontongon nopondo iyolo’ do popingloposon i tangaanak diyolo’ di ragang po, om panakahon it id suang do walai diyolo’, om pingkosohon o sawo diyolo’,’’ ka. ¹⁷ Om boros kad TUHAN, ’’Tingkahon ku o ginawo do bansa’d Madai do sumaap do Babil. Iyolo’ nopo om a’ i’ milo’d sisipan do pirok, ko’ tamas. ¹⁸ Om iri no pana’ diyolo’ o pamatai diyolo’ do tulun dit ongomulok po, om aiso’ o kosianan diyolo’ dot id tanak di ragang po, om aiso’ o kolisihan diyolo’ do tangaanak dot ongokoro’. ¹⁹ Om Babil piya, tu’ it olumis no kopio dot id pogialatan do pomorintaan, om i kaandasan do tulun do hilo’, nga’ osiliu id miagal do Sodom om Gomura, tu’ raagon ku i’ iri, iyoho’ i TUHAN. ²⁰ Om aiso’ nondo o tiso’ piya’d tulun do momogun-mogun do hilo’. Om iri tulun dot Arab di mombo-hombo nga’ a’ no powonsoi do kiim diyolo’ dot id kinoiyonon diri, om i piro-piro o gompomogompi’d dumba’ nga’ a’ no paakan-akan di tayam-tayam diyolo’d hilo’. ²¹ Om mongiyon-ngiyon nopondod hilo’ om iri po i nintorusan. Pomirumunan pondod longkug, om iyonon do burung unta o hilo’. Om pinghambaan di kambing talun o hiri’d kinaraagan. ²² Om iri pondo tasu di mombo-hombo o mingusig do hiri’d walai dit angakawas, om i toni o mongiyon-ngiyon do hiri’d walai’d raja’ do Babil dit ongolumis tomod daa. Oruhai no o maso do karaagan do pomorintaan diri. Ointob- intob no o tadau dau,’’ ka.

¹ Om osianan indo o TUHAN dot Israil, i bansa’ di songonuon dau, om pilion kawagu dau ot Israil do sumiliu’d dau’d songonuon. Om poiyonon dau kawagu iyolo’ do hilo’d pomogunan diyolo’. Om mongoi nondo sugku’ diyolo’ i piro-piro o bansa’d suwai om miyon do poinrolot diyolo’. ² Om ogumu’ nondo o bansa’d suwai do monulung dot Israil do gumuli’ do hilo’d pomogunan di pinatahak do TUHAN dot id diyolo’, om hilo’ no i piro-piro o bansa’ddi do sumiliu do susuhuon dot Israil. Om tangkapon nondo dot Israil i minanangkap diyolo’ om porintaon diyolo’ i minongulok-ulok diyolo’ di gulu po. ³ Om poiduwon nondod TUHAN o bansa’ dot Israil do mantad id toruol om koinggoritan, om mantad id buruon dit awagat di pinosonsog dot id diyolo’. ⁴ Om wonsoyon nopondod TUHAN o miagal diri, om mositi’ no dot untotorion diyolo’ i raja’ do Babil do poingkaa, ’’Naratu’ noddi i raja’ dot orongit! A’ noddi iyau kopongulok-ulok. ⁵ Nopupusan nod TUHAN o pomorintaan di piro-piro o pomorinta’ dit araat, ⁶ it a’ otingkod-tingkod do mongulok-ulok om monginggorit di piro-piro o bansa’ di naala’ dau. ⁷ Om id tohuri nopondo, om aiso’ no o kagangahan do pointongkop diti pomogunan, om modsinding ngai’ dot atataadan o pointikid-tikid do tulun. ⁸ Om iri piya guas do kayu sanobar om kayu sedar do Libanon nga’ ongotood ngai’ i’ tu’ naratu’ no i raja’ dit orongit, tu’ a’ nopoddi iyau hino, om aiso’ noddi o monuhu’ do mongoi panagad diyolo’! ⁹ Om nokosodia’ no o hilo’d pomogunan do tulun do napatai do rumuba’ di raja’ do Babil. Om kongoposik ngai’ nopo i rusod di tulun di momorinta’ di hilo’ pod pomogunan; om ingkakat ngai’ nopo i rusod di piro-piro o raja’ do mantad id tirikohonon diyolo’ di don raja’. ¹⁰ Om moro-boros ngai’ nopondo iyolo’ dot id dau do poingkaa, ’Iya’ nga’ oluhoi noddi do miagal dahai, om aiso’ no o pokukurayan! ¹¹ Suahon ko i’ daa do tuni do kecapi di gulu po, nga’ baino’ noddi om nokoinsiriba’ ko no do hiti’d pomogunan do tulun do napatai, i kinoiyonon dit oingou; toodopon nu nopo om i giuk, om kumut nu no om i tonggiluang,’ ka. ¹² Oi raja’ do Babil, naratu’ ko noddi do mantad hilo’d tawan, oi rombituon di mulai di dongminsusuab dit agayo o tulinau! Nakataam ko noddi do hilo’d tana’, iya’ i minangala’ daa do piro-piro o bansa’! ¹³ Iya’ nogi’ daa i minomusorou do sumalakoi do hilo’d tawan, om popoiyon do tirikohonon nu di don raja’ dot id sawat po ko’ i rombituon dit asawat kopio! Om osorou nu daa do koirikau ko i’ do miagal do raja’ dot id timpak di nuluhon do ponong hilo’d utara, i pogititimungan do ponokokinorohingan. ¹⁴ Om minomoros ko do sumoibau ko di haun om koiyo ko indo dit Asawat Kopio. ¹⁵ Nga’ haro nogiddi, tu’ hilo’ nogiddi id kinoiyonon do tulun do napatai dit id saalom kopio o pinolintuhunan diya’. ¹⁶ Om iri nopondo i tulun do hiri di kokito diya’ om songinsonsod pondo do poingontong diya’. Boros ka’ndo diyolo’ do muhot, ’Iti bo i tulun di minomoguyu’ diti pomogunan, om i pinopogogor do piro-piro o pomorintaan? ¹⁷ Iti bo i tulun di minoniliu diti pomogunan do tana’ do kowotuan, om minangala’ do piro-piro o bandar, om it a’ pinopoidu’ om a’ pinopologos di tulun di nangatangkap dau do gumuli’ do hiri’d pomogunan diyolo’?’ ka. ¹⁸ Songinsonong ngai’ id poillii do hiri’d lobong diyolo’ dit ongolumis i raja’ do pomogunan di gulu po. ¹⁹ Nga’ iya’ nopo om aiso’ i’ o lobong; pataamo’ tomod nopo i rata’ nu, om pinologos do minutong om noolitan di rata’ do piro-piro o soudor di nangapatai dot id pisangadan i rata’ nu’ddi, om pinodumpau do hiri’d suang do luang do watu do nokotonggoi di rata’ di piro-piro o soudor om piulak-ulakan poo. ²⁰ A’ ko i’ lobongon do miagal di piro-piro o raja’ do suwai, tu’ minamaraag ko i’ do pomogunan nu om minamatai ko do rayat nu. Om songulun po do mantad id sompiiyon nu dit araat nga’ aiso’ no ot apasi. ²¹ Oruhai nod timpuunan o kapamatayan! Angapatai ngai’ nondo i tangaanak nu’d kusai dot i dusa di taki-aki nu o kapatai. Om aiso’ i’ o songulun piya diyolo’ do kopomorinta’ do hiti’d pomogunan ko’ kopomonsoi pod kabandaran,’’ ka. ²² Om boros kad TUHAN, it Osundu Kopio, ’’Ngoyon ku nondo saapo’ o Babil om raagon ku. Om songulun po nga’ aiso’ no o posion ku, om iri piya tangaanak nga’ a’ ku i’ pologoson do poimpasi. Iyoho’ no, i TUHAN, o minomoros diti. ²³ Silihon ku nondo o Babil do buyut om tiiyonon do puok. Imuhawan ku nopo kopio om tonuson ku o bandar do Babil. Iyoho’ no i TUHAN, it Osundu Kopio, o minomoros diti,’’ ka. ²⁴ Om sumpa’ no o TUHAN, it Osundu Kopio do poingkaa, ’’Atantu’ nod osiliu o miagal di nosorou mantad ku do wonsoyon ku. ²⁵ Patayon ku nondo i tulun dot Asur di hiti’d pomogunan ku, i hiti’d Israil, om pingulakan ku i tulun dot Asur do hilo’d nuluhon ku. Om poiduwon ku nondo i tulun ku do mantad id binabo di pinosonsog di tulun dot Asur dot id diyolo’. ²⁶ Iri no i nosorou mantad ku do wonsoyon ku dot id koinsanai diti pomogunan, om poingakang no o longon ku do momohukum do koinsanai’d bansa’,’’ ka. ²⁷ Natantu’ nod TUHAN, it Osundu Kopio do wonsoyon dau o miagal diri. Nakaakang no o longon dau do momohukum, om iso’ pod tulun nga’ aiso’ no o milo’d mogodu dau. ²⁸ Iti no o boros do pinosunud do tontok di toun di kinapatayon di Raja’ Ahas. ²⁹ Oi tulun do Pilistin, mulong piya do notipu’ no daa i bobobog do pinomobog diya’, nga’ kada’ kotood, tu’ ondung haro o tulanut dot apatai, om haro po o tulanut dit araat ko’ iri do sumowoli’ddi, tu’ aansa’ nopo i tontolu’ di tulanut, om naga’ di kitalad o suang. ³⁰ Om oontok kou nondod mononglous dit adalaan kopio, om iso’ pod tulun nga’ aiso’ no o kopoggidu’. Om TUHAN nondo ot osiliu’d gompomogompi’ do tulun di mosikin dot id pogialatan di tulun do songonuon dau. Om gompion dau o koposi-posion diyolo’. Om osimbayan i’ om aiso’ o koligagaanan diyolo’. ³¹ Pingihad no, om pinggiak no, do mokitulung oi kabandaran do Pilistin! Pananggagarai ngai’ kou no dot opopoddosian! Tu’ nakakapal no o lisohu do mantad ponong hilo’d utara do koilaan do korikatan do soudor dit ongosiou; om aiso’ i’ o tiso’ diyolo’ do moddosi. ³² Om nunu’ddi o posimbaron toko’ dot id piro-piro o susuhuon di bansa’ do Pilistin? Poboroson toko’ nondo diyolo’ do nokogirot nod TUHAN o Sion, om hilo’ no o pogintirungan di piro-piro o tulun dau dit oinggorit.

¹ Iti no o boros do TUHAN do pasal do Muab. Naraag no o bandar dot Ar om Kir, dot insan-insan nopo o tuong do naraag, om oingou poddi o pomogunan do Muab. ² Tuminakad i tulun do Dibon do hiri’d nulu-nulu do mongoi pogihad do hiri’d podsubakan do tingolig. Minogihad i tulun do Muab do bandar do Nibo om Modiba, do mikuwo’d tumongob tomod iyolo’. Binugar diyolo’ o tobuk om ganggut diyolo’ do tanda’ do tumongob om mogihad iyolo’. ³ Kipakayan ngai’ o tulun do rasuk do mogihad do hilo’d karalan-ralanan. Mingihad po o tulun dot id sakai’d taap do walai om hiri’d soliwan. ⁴ Mompud-lompud pod mihad o tulun do Hisbon om Iliali, om orongou i’ do hilo’d Yahas i tihad diyolo’. Om iri piya i piro-piro o soudor nga’ gagaran ngai’ no; tu’ katagak nopo i kosioho’ diyolo’. ⁵ Osianan oku no kopio’d Muab! Hilo’d Soar om hilo’d Iglat Solisia o pinogidu’ di tulun mantad do hilo’. Om sanggarang-garang po iyolo’d mihad do tumakad do sumusui di ralan do kumaa do hilo’d Luhit, om haro o minogidu’ do hilo’d Horonaim do mikuwo’d minggarang do mihad. ⁶ Notuu no i waig do bawang do hilo’d Nimrim, om noriou no i sakot di hiri’d tisan di bawang diri, om aiso’ no o sakot dit ongorombung do hiri. ⁷ Om dumarapas ngai’ no o tulun di Rantai do Haarabim om tumotos do mamasi do tinan diyolo’ do mitonggoi do koinsanai di dapu’ diyolo’. ⁸ Tihad poo ot orongou do poingompus di piwolitan do Muab. Om orongou i’ i tihad diyolo’ do hilo’ piya’d Iglaim, om hilo’d Biir-Ilim. ⁹ Nasabak pod raha’ i waig do bawang do hilo’d kampung do Dibon, om aragang poddi. Nga’ haro po o porikoton do Kinorohingan dot id tulun do hilo’, dot araat ko’ iri. Om iri nopo i gampamatai di porikoton dau om mamatai do koinsanai di tulun do Muab di nongoolu-olu’ do hilo’.

¹ Pinapaatod i bansa’ do Muab do tanak do dumba’ do mantad hilo’d bandar do Sila, i hilo’d tana’ do kowotuan do pinatahak di pomorinta’ do hilo’d Yorusalim. ² Iyo poddi tombolog do nugadan do mantad id rumun i tulun do Muab do songingandad do hiri’d tisan di Bawang dot Arnon, om mimpanau poo iyolo’ do posulakan no om pougusan no. ³ Om boros ka diyolo’ dot id bansa’ do Yohuda, ’’Sunudai iyahai dit apatut dahai’d wonsoyon. Intirungai no iyahai dokoyu, do miagal di kayu do momolungung do tontok dit alasu’ o tadau di pitangaadau, om pologoso’ no iyahai do poillungung dokoyu. Iyahai nopodti om tulun di minogidu’; om lisoko’ no iyahai om a’ i’ iyahai okito’d tulun. ⁴ Pologoso’ no iyahai do mundorong do hiti’d pomogunan dokoyu. Om intirungai no iyahai do mantad id tulun di mongoi pamatai dahai,’’ ka diyolo’. (Otingkod indo i mongulok-ulok om opupusan i karaagon; om kopoggidu’ i tulun di mamaraag do pomogunan dot Israil. ⁵ Om osiliu nondod raja’ o tiso’ di sinakagon di Daud. Om porintaon nondo dau i bansa’ dau do mikuwo’d otorodok om osianan. Om olomus iyau do momonsoi dit otopot, om ilaan i’ kopio dau om owonsoi i’ it otulid.) ⁶ Boros ka di tulun do Yohuda, ’’Nokorongou no iyahai do kasawato’d ginawo di tulun do Muab. Obingondos om obinggayo-gayo tomod daa iyolo’ nga’ aiso’ tomod i’ o suang di boros diyolo’,’’ ka diyolo’. ⁷ Om mihad pondo i tulun do Muab dot i koinggoritan diyolo’ o koihadan. Mihad ngai’ nopondo iyolo’ do tontok dit osorou diyolo’ i taakanon dit angawasiu di koubasan diyolo’d mangakan do hilo’d bandar do Kir-Harisit. Om aiso’ nondo o pokukurayan diyolo’ om somboro-boros poo iyolo’ dot ouudipanan. ⁸ Nangaraag no i koumaan di hilo’d somok do Hisbon om i kokobunan dot anggur do hilo’d Sibma, iri no i kabun diri o koonuan do waig dot anggur dit osonong do pangawuk ngai’ di pomorinta’ di piro-piro o bansa’. Di nopo di gulu po om nokoumbal id korikot do hilo’d bandar do Yaisor o kotongkopon di kabun dot anggur om kakaa do hilo’d tana’ do kowotuan do ponong id koulayon, om kakaa do hiri’d soborong do Rahat do Napatai do ponong id kotonobon. ⁹ Om mogihad oku’ddi do kabun dot anggur do Sibma do miagal do mogihad oku’d Yaisor. Ongkoturu’ po o romou ku do kosorou’d Hisbon om Iliali tu’ aiso’ noddi o tomoton do popotood do ginawo di bansa’. ¹⁰ Aiso’ noddi o tongosongulun piya dot ongotood do hiri’d tumo dit ongoluhub. Aiso’ noddi o mimpangkis ko’ minsinding do hilo’d kabun dot anggur. Aiso’ noddi o mamaga’ do tua’ dot anggur do manganu di waig dot anggur. Nopupusan ku no i pinongkisan diyolo’ dot atataadan. ¹¹ Oruol poo o ginawo ku’d kokito do hilo’d Muab om hilo’d Kir-Harisit. ¹² Minghuyan noo i tulun do Muab do tumakad di nulu-nulu do hiri’d sasambayangan diyolo’ do mongoi sambayang tu’ aiso’ i’ ot aanu-anu diyolo’. ¹³ Iri no i boros do pinoboros do TUHAN do pasal do Muab di gulu po. ¹⁴ Nga’ baino’ noddi om poingkaa o boros do TUHAN dot id diyolo’, ’’Tolu po kopio o toun om atagak no o kakayaan do Muab. Okuri’ nondo o toolu’ di tulun do hilo’ dot ogumu’ piya daa mantad, om osompipi’ pondo it ongoluhoi no,’’ ka dau.

¹ Boros kad TUHAN, ’’Okon nondo ko’ bandar po o Damsik, suwai ko’ kinotimungon pod kinaraagan. ² Om i kabandaran do Siria nga’ otongkiadan no kasai’ do gisom dot alaid. Osiliu pondod pangakan-ngakanan do dumba’ om sapi’ o kinoiyonon diri; om aiso’ no o tulun do moguyung di tayam-tayam diri. ³ Aiso’ nondo o pokukurayan dot Israil, om Damsik nga’ oporinta’ nondod bansa’d suwai. Om iri nopondo noolu-olu’ do tulun do Siria om ointingayam po tomod do miagal di tulun dot Israil. Iyoho’ no, i TUHAN it Osundu Kopio, o minomoros diti,’’ ka dau. ⁴ Boros kad TUHAN, ’’Rumikot nondo o maso dot opupusan o kosimbayanan dot Israil, om kakayaan dau nga’ osowolian do korurutum. ⁵ Israil nopondo om miagal po di tumo do hilo’d Rapaim di nongoomot ngai’ o gandum. ⁶ Okuri’ no o tulun dot apasi do hilo’d Israil, do miagal po di guas do saitun di nopua’ ngai’ o tua’. Tu’ haro po o duwo ko’ tolu o noolu’ do hiri’d raan dit id sawat kopio, om piro-piro o tua’ do hiri’d raan dit id siriba’. Iyoho’ no, i TUHAN, i Kinorohingan dot Israil, o minomoros diti,’’ ka dau. ⁷ Orikot nopondo o tadau’ddi om gumuli’ ngai’ nondo o tulun do mokitulung di Minomonsoi diyolo’, iri no i Kinorohingan dot Israil dit olidang. ⁸ A’ nondo iyolo’ sumondiu di pananaraban do kominyan om i patung dot Asira di winonsoi diyolo’. ⁹ Tontok nopondod tadau’ddi om miagal pondod pogun dit oingou i bandar diyolo’ dit ongogirot, om miagal di kabandaran do tinongkiadan di tulun do Howi om Amori di minogidu’ iyolo’ do mantad id tulun dot Israil. ¹⁰ Oi Israil, nolihuan nu no o Kinorohingan, i minamasi diya’ om i minongintirung diya’ do miagal di pampang dot ogirot. Tu’ minananom ko nogi’d kabun do podsubak di piro-piro o tingolig. ¹¹ Nga’ mulong piya do mitilombus nopo iri do momutolid om mongusak do tontok di tadau do tonomon nu, nga’ aiso’ i’ kasai’ o tua’ do tomoton. Kosusaan no om toruol dit a’ milo do lingoson ot opurimanan nu do tontok do tadau’ddi. ¹² Ohiyo po tomod o piro-piro o bansa’ dit ongokoris, do miagal pod ngorod do rahat, om miagal do kahas di tumbak dit opuhod. ¹³ Miagal pod ruab di tumbak dit opuhod i bansa’ddi do rumikot. Nga’ pinoinsan i’ iyolo’d Kinorohingan om guli’ no iyolo’, do miagal po di pupuk do hiri’d tidong ko’ iyo di tapol dot otilib do ribut. ¹⁴ Korolosi tomod o wonsoyon diyolo’ di dongsosodopon poo, nga’ kosuabon nopondo om a’ no iyolo’ hino. Iyo noddi o kotutukon do pointikid-tikid do tulun di mongoi panakau do hiti’d pomogunan toko’.

¹ Haro o pomogunan di hilo’d soborong do bawang do Etiopia dit abantug kopio tu’ it orongou o kapo do talad dau o kabantug-bantug. ² Om haro o piro-piro o wakil do pomogunan do mantad id pomogunan diri do minugus di Bawang do Nil do suminakai’d gakit di bundusan do winonsoi. Uli’ kou no, oi wakil dit ongosiau! Om igitai no dokoyu o habar do gumuli’ do hilo’d pomogunan dokoyu di nopipitas do bawang, om kumaa id bansa’ dokoyu dit okoris om ongogirot, om kumaa id tulun dokoyu dit angaranggou om ongolunau o kulit, i tulun do koorisan do pointongkop diti pomogunan. ³ Pokinongou kou no, oi koinsanai dokoyu i poingiyon do hiti’d pomogunan! Antangan no dokoyu i bondira’ do pobondiraon do hilo’d timpak do konuluhanan! Pokinongou kou no di torumpit do pounion. ⁴ Om boros kad TUHAN dot id doho’, ’’A’ oku indo ohiyo do lumuung do mantad hilo’d sawat, do miagal di bolobou di sumiliu nogi’d bolobou do tontok do totuong dot alasu’ di dongmongomot tu’ a’ i’ ohiyo, om osuwau oku do miagal di tulinau’d tadau do dong pitangaadau. ⁵ Tontok dit a’ po daa aanu i tua’ dot anggur, di nangatatak nogi’ o bunga di nuwaan om tumimpuun nogi’ daa do monsok i tua’, om ngoyon nod pisangod patayo’ i tulun dot Etiopia, do miagal pod dangol do patatason do raan dot anggur. ⁶ Om iri nopondo i rata’ do piro-piro o soudor diyolo’ om potimalag tomod nopo do kanon do tombolog om nintorusan. Om ngoyon nondo di tombolog iri kano’ di maso dot alasu’ om tontok no di maso dot osogit om i nintorusan o mongoi pangakan,’’ ka dau. ⁷ Rumikot nondo o maso dot onuan o TUHAN, it Osundu Kopio, do porsombahan do mantad id pomogunan di nopipitas do bawang, om mantad id bansa’ dit okoris om osiou, i tulun dit angaranggou om ongokoris, om i tulun dit ongolunau o kulit, om i poddosi do pointongkop diti pomogunan. Om pootodon nondo diyolo’ i porsombahan diri do hilo’d Nuluhon do Sion, i kinoiyonon do tumuku’ do TUHAN, it Osundu Kopio.

¹ Iti no o boros do pasal do Masir. Rumikot no o TUHAN do hilo’d Masir, do poinsakai’d haun dit osiau tomod. Om ongooris ngai’ po i tingolig do Masir dot id toguang dau, om i tulun do Masir nga’ aiso’ no o pokukurayan dot opopoddosian. ² Boros kad TUHAN, ’’Gangahon ku’ndo o hilo’d Masir gisom do haro o pogisasangadan do sompi’ ko’ iyolo’ ngai’. Misaap nondo i miobpinai om misaap i mitimbang o walai. Mogisasangod nondo i bandar di mogitotogod, om mogiaahau do kuasa’ i raja’ di mogitotogod. ³ Raagon ku’ndo i nongosorou mantad daa di tulun do Masir do wonsoyon diyolo’, om tonuson ku i kosioho’ diyolo’. Om kouhup nondo iyolo’ di tingolig diyolo’ do mongoi iyolo’ pokituduk di bobolian om mongoi pokianu do nosihat di rusod do tulun di napatai. ⁴ Om patahakon ku’ndo i tulun do Masir dot id raja’ dit araat kopio, i momorinta’ diyolo’ dot araat kopio o pomomorinta’. Iyoho’ no, i TUHAN it Osundu Kopio, o minomoros diti,’’ ka dau. ⁵ Kumoro’ nondo i waig do hilo’d Bawang do Nil, om monguyat nondo do rumasak. ⁶ Om outong nondo i liang do waig di mantad hiri’d bawang, dot arasak i waig. Om rumiou ngai’ nondo i bundusan om i sakot do hiri. ⁷ Om rumiou ngai’ i totok di pinototok do poingompus di tisan di Bawang do Nil, om aayi’ nopondo iri dot otilib do ribut. ⁸ Mihad ngai’ pondod tumongob i monginginsada’ do hiri’d Bawang do Nil, tu’ aiso’ no o guna’ di tapon om rambot diyolo’. ⁹ Om aiso’ nondo o pokukurayan di gompomonsoi do kain linan; ¹⁰ om i mangangawol om i piro-piro o tukang do suwai nga’ tumongob ngai’ nopondo om aiso’ no o pokukurayan diyolo’. ¹¹ Basug ngai’ no kopio i boyoon do bandar do Soan! Om i tulun dot oilo no kopio do hilo’d Masir nga’ dongkololowong i’ do ponosihat. Om katama’ kopio i’ daa iyolo’ do momoros dot id raja’ do sinakagon iyolo’ do tulun dit ongoilo om sinakagon di piro-piro o raja’ di gulu po. ¹² Oi raja’ do Masir, honggo ngai’ no i gomponosihat nu dit ongkitoilaan? Koilo i’ doti’ daa iyolo’ do momisunud diya’ di natantu’ mantad do TUHAN, it Osundu Kopio, do wonsoyon dau do hiti’d Masir. ¹³ Basug ngai’ nopo i boyoon do hilo’d Soan om Mimpis. A’ nogi’ iyolo’ minomoyo’ di bansa’ tu’ minamalid nogi’ iyolo’. ¹⁴ Tinomod i’ do TUHAN do pinopoboros iyolo’ do nosihat di koborulong. Om gisom do kasala’ ngai’ nopoddi o wonsoyon do tulun do Masir, om mikorobibi’ pod mamanau do miagal di tulun do naawuk di kosunsuya’ di tilob dau. ¹⁵ Aiso’ no o milo’d monulung do Masir dot id pialatan do boyoon ko’ i rayat, om i tulun do kipangkat ko’ i tulun toomod. ¹⁶ Rumikot nondo o maso dot osiliu do miagal do tondu’ dit obintingayaman om obingoris o bansa’ do Masir. Pananggagaran pondo iyolo’d moddosi do kokito’d longon do TUHAN, it Osundu Kopio do poingakang nod momohukum diyolo’. ¹⁷ Om ooris nondo iyolo’d Yohuda do soira’ nopo dot osorou diyolo’ i natantu’ mantad do wonsoyon do TUHAN, it Osundu Kopio, dot id diyolo’. ¹⁸ Om orikot nopondo o maso’ddi om iri nondo boros dot Ibrani o boros dot id limo o bandar do hilo’d Masir. Om sumumpa’ nondo iyolo’ dot id suang do ngaran do TUHAN, it Osundu Kopio. Om roitan nondo o tiso’ di bandar diri do ’’Bandar do Tadau’’. ¹⁹ Om orikot nopondo o maso’ddi om haro nondo o pananaraban do porsombahan dot id TUHAN do hilo’d pomogunan do Masir. Om haro o torigi do watu di pinotobilang dot id TUHAN do hiri’d wolit di pomogunan. ²⁰ Om iri nondo i pananaraban do porsombahan om i torigi do watu o sumiliu’d tanda’ do hino o TUHAN, it Osundu Kopio do hilo’d Masir. Om soira’ nopo do minglohou ngai’ i tulun do hilo’ do mokitulung do TUHAN, tu’ ulak-ulakan iyolo’, om porikatan indo dau iyolo’ do songulun do mongoi pamasi diyolo’. ²¹ Om mintalang nondo o TUHAN dot id bansa’ do Masir, om kotutun indo iyolo’ dau, om tumuku’ iyolo’ dot id dau, om papatahak iyolo’ do porsombahan di sumbolion om porsombahan do suwai dot id dau. Om monokibatos nondo iyolo’ dau do mikuwo’d sumpa’. ²² Om hukuman nondod TUHAN i bansa’ do Masir, nga’ id tohuri nopondo om lingasan i’ dau iyolo’. Om gumuli’ nondo iyolo’ dot id TUHAN om pokinongohon indo dau o sambayang diyolo’ om lingasan dau iyolo’. ²³ Orikot nopondo o maso’ddi om haro nondo o ralan magayo dot id pialatan do Masir om Asur. Om milo nondo o tulun dot Asur do sumuang do Masir om milo o tulun do Masir do sumuang dot Asur. Om misugku’ nopondo iyolo’ do sumambayang. ²⁴ Om orikot nopondo o maso’ddi om koiyo nondod Masir om Asur ot Israil, om sumiliu nondo i tolu o bansa’ddi do barakat do pointongkop diti pomogunan. ²⁵ Om barakatan nondo iyolo’d TUHAN, it Osundu Kopio, om moro-boros iyau do poingkaa, ’’Barakatan ku o Masir, i tulun ku, om barakatan ku ot Asur, i winonsoi ku, om barakatan ku ot Israil, i tulun di pinili’ ku,’’ ka.

¹ Om suhuo’ no di Sargon, i raja’ dot Asur, i boyoon do soudor dau do mongoi panangod dot Asdod, i bandar do Pilistin. ² Tontok di tolu po toun dot id gulu ko’ iti om boro-boros no o TUHAN dot id di Yosaya, i tanak di Amos, do poingkaa, ’’Pamanau no, om iduwon i’ ino pakayan do mogihad do poimpakai nu om iduwon ino kasut nu,’’ ka. Om wonsoyo’ no di Yosaya o miagal diri om pamanau no iyau do poillabas om aiso’ o kasut. ³ Om tontok di noturungku’ nod pisangod o bandar dot Asdod, om boro-boros no o TUHAN do poingkaa, ’’Minimpanau i Yosaya, i susuhuon ku do poillabas om aiso’ o kasut do solinaid do tolu o toun. Om iti no tanda’ dit osiliu do hilo’d Masir om hilo’d Etiopia. ⁴ Om tanggayan nopondo di Raja’ dot Asur i tulun do nangatangkap dau do mantad hilo’d Masir om mantad hilo’d Etiopia. Om i tongomulok po om i komolohingan no nga’ aiso’ ngai’ nopondo o kasut do mamanau om songillabas, om songingulai o pakou, do pongintingayam do Masir. ⁵ Om iri tulun di suminondiu daa do Etiopia om poondos-ondos do Masir nga’ moddosi indo om oiman-iman. ⁶ Om orikot nopondo o maso’ddi om boros kando di tulun di momogun-mogun do hilo’d poingompus do tisan do rahat do hilo’d Pilistin, ’Antangai pogi’ i nosiliu dot id piro-piro o tulun di sinondiu toko’ daa do mongintirung dati’ do mantad id raja’ dot Asur. Poingkuro toko’ podti dot apasi?’ ka no diyolo’,’’ ka dau.

¹ Iti no o boros do pasal dit osiliu dot id Babil: Miagal pod ribut do monomporiu-riu do kawaya’ do tana’d kowotuan o kosusaan dit awagat kopio do rumikot do mantad id pomogunan di kotompurolosi. ² Nokokito oku do pinointalang do pasal dit ongosiliu dit araat kopio; om pasal di magakal om mamatai. Ongoi no sangod, oi soudor dot Ilam! Ngoyo’ no turungkuo’ i kabandaran, oi soudor do Madai! Tu’ pupusan nod Kinorohingan i koinggoritan di winonsoi’d Babil. ³ Om iri nopo nokito ku’ddi nga’ nokorolosi tomod doho’, om gisom dot oruol ngai’ poddi o tinan ku, do miagal po di tondu’ dot orualan do mogkosusu. ⁴ Ooris po tomod o ginawo ku, om pananggagaran oku po dot opopoddosian. Orohian oku nopo daa dot otuong nga’ aiso’ i’ o nanu-anu ku, suwai ko’ kopoddosian noo. ⁵ Om haro nogi’ o moginakan do hiri’d pinointalang di nokito ku; nongkosodia’ no o poirikahanan ngai’ di tulun do nalap. Om makan no om minum iyolo’. Nga’ sigog id haro o minonuhu’ do poingkaa, ’’Oi boyoon do soudor! Sodia’ kou no do mongoi sangod, om ngoyon no i kolid dokoyu!’’ ka. ⁶ Om boros kad TUHAN dot id doho’, ’’Ponuhu’ dot iso’ o tulun do mongoi padtamong do hilo’d tiiyonon do madtamong om sunudan no iyau do posunud dit okito dau. ⁷ Ondung kokito iyau do duwo o tulun do mitanud-tanud do poinsakai goduwo’d kuda’, om tulun di songinsakai’d kaladai om unta, om suhuon no iyau do mogontong kopio’ddi,’’ ka. ⁸ Om polohowo’ no di tulun do minadtamong o boros do poingkaa, ’’Oi Tuan, poingkakat kasai’ oku i’ do minadtamong do hiti’d padtamangan ku do tadau om totuong,’’ ka. ⁹ Om sigog iddi do korikot iyolo’! Soroduwo-duwo nopo o tulun do mitanud do poinsakai goduwo’d kuda’. Om boros kaddi di madtatamong, ’’Naala’ no o Babil! Om koinsanai di tingolig do tukuon diyolo’ nga’ nongopurok no om songinsasad poo do hilo’d tana’,’’ ka. ¹⁰ Oi Israil, i bansa’ ku! Miagal kou po daa do tua’ do gandum do piningulakan, nga’ baino’ nopo om sunudan ku iyokoyu do habar dot osonong di norongou ku do mantad id TUHAN, it Osundu Kopio, i Kinorohingan dot Israil. ¹¹ Iti no o boros do pasal dot Idom. Haro o tulun do minomolohou doho’ do mantad hilo’d Idom do poingkaa, ’’Oi madtatamong, songkuro po o koloido’ om katalib nogi’ o totuong? Piro po o jam om anawau nogi’?’’ ka. ¹² Om boros kangku do suminimbar, ’’Rumikot i’ o kosuabon, nga’ rumikot i’ kawagu o totuong. Ondung orohian ko kawagu’d muhot om gumuli’ no do mongoi uhot,’’ kangku. ¹³ Iti no o boros do pasal dot Arab. Oi tulun do Didan, pinopowonsoi ngai’d kiim i kapila nu do hilo’d tana’ dot Arab dit aiso’ o sumuni. ¹⁴ Panahak kou nod waig dot id tulun di tuuhan di rumikot dot id dokoyu. Om iyokoyu i tulun do Tima, nga’ manahak kou nod taakanon dot id tulun di minogidu’. ¹⁵ Tu’ minogidu’ ngai’ o tulun diri do mantad id gayang di nokodong no, om mantad id pana’ di posodia’ nod papanaon, om mantad id koinsanai’d koligagaanan do pisangadan. ¹⁶ Om boros kaddi do TUHAN dot id doho’, ’’Sontoun po kopio om opupusan no o kosimbayanan do payat do Kidar. ¹⁷ Iti nopo tulun di mamamana’ do hilo’d Kidar om gunsiou kopio, nga’ okuri’ nondo diyolo’ o kopoggidu’. Iyoho’ no, i TUHAN om Kinorohingan dot Israil, o minomoros diti,’’ ka dau.

¹ Iti no o boros do pasal di rantai di roitan do Rantai do Pinointalang. Oi tulun do Yorusalim, nokuro tu’ mongoi ngai’ kou do hilo’d sakai’d taap do walai dokoyu? ² A’ i’ apatut do moginakan om rumamai o pointongkop diti bandar. Tu’ okon i’ ko’ suminangod o kinapatayan di piro-piro o gunsiou dokoyu. ³ Minogidu’ ngai’ i boyoon do soudor dokoyu om natangkap iyolo’ dit a’ po nakapana’ ot ongoiso’ piya di pana’ diyolo’. ⁴ Pologoso’ oku dot iso-iso’ do mogihad di tulun ku di nangapatai. Kada’ kou umbal do monginsasamod doho’. ⁵ Iti no o tadau di natantu’ mantad do TUHAN, it Asawat Kopio, om it Osundu Kopio do tadau do kaalaan, om kagangahan, om koorisan do hiti’d rantai di roitan do Rantai do Pinointalang! Nangahaba’ no i tolig do bandar toko’, om mulinggou po i giniakan do mokitulung do hilo’d konulu-nuluan. ⁶ Rumikot ngai’ no i soudor do mantad hilo’d Siria do songinsakai’d kuda’ om korita’-kuda’. Om ongkiinigit i tulun dot Ilam do pana’ om pawakasan do pana’. Om i piro-piro o soudor do mantad hilo’d Kir nga’ nokoposodia’ nod kolid. ⁷ Noponu’ pod korita’-kuda’ i rantai do Yohuda dit ongoluhub; om nogurumungan pod soudor di songinsakai’d kuda’ i wawayaan dot angagayo do hilo’d Yorusalim. ⁸ Om naraag ngai’ no o pogintirungan do Yohuda. Om tontok nopondoddi om mongoi kou nondo panganu do rapo-rapo’d sumangod do mantad hiri’d poopian do rapo-rapo. ⁹ - ¹⁰ Om kokito no dokoyu dot ogumu’ no o nangababak di tolig do bandar do Yorusalim, dit apatut do sonongon. Om pingantangan ngai’ no dokoyu i walai do hilo’d Yorusalim om raagon no dokoyu o wookon di walai om aanu i’ i watu di walai do pomonsoi do tolig di bandar. Om ponimungan nopo dokoyu’d waig om ¹¹ momonsoi kou’d kulam do ponimungan do waig di lumuyung do mantad hiri’d kulam di laid do hiri’d suang di bandar. Nga’ a’ kou i’ minomusou’d Kinorohingan, i minanantu’ mantad dot owonsoi o miagal diti di gulu po om i pinopologos dot owonsoi o miagal diri. ¹² Tontok nopoddi nga’ sinuhu’ kou’d TUHAN, it Asawat Kopio, om it Osundu Kopio do mihad om millompud do mihad, om momugar do tulu dokoyu om manampakai do pakayan do mogihad. ¹³ Nga’ minoginakan kou nogi’ om ruminamai kou. Minogkorot kou nogi’d dumba’ om sapi’ do maan dokoyu’d kanon, om minonginum kou do waig dot anggur. Tu’ boros ka dokoyu, ’’Kainou, moginakan om moginum! Tu’ matai toko’ nod suab!’’ ka. ¹⁴ Om boros kad TUHAN, it Osundu Kopio, om it Asawat Kopio, dot id doho’ di minintalang iyau, ’’A’ ku no ompunan iti karaaton diyolo’ do gisom do tikapatai diyolo’. Iyoho’ no, i TUHAN, o minomoros diti,’’ ka dau. ¹⁵ Om suhuo’ oku nod TUHAN, it Asawat Kopio om it Osundu Kopio, do mongoi solowot di Sibna, i boyoon do walai’d raja’, do momisunud dau do boros do TUHAN do poingkaa, ¹⁶ ’’Isai ko daa dot osorou nu? Nunu kopio o kosorupayan nu do popoluang do lobong nu do hiti’d pampang? ¹⁷ - ¹⁸ Antaan-taan no, tu’ pataamon ku nondo iya’ do hilo’d sodu’. Om anggaman ku nondo iya’ om buluguon ku. Om pataamon ku nondo iya’ do hilo’d pomogunan dit agayo. Om hilo’ ko nondo dot apatai dot id toning di piro-piro o korita’-kuda’ di kaandasan kopio nu. Minongindaraat ko nod ngaran di sompiiyon di tuan nu. ¹⁹ Om iduwon ku nondo iya’ do mantad id karaja’ nu om poinsiribaon ku o pangkat nu dit asawat. ²⁰ Tontok nopondod maso’ddi, om lohowon ku’ndo i susuhuon ku, i Iliakim, i tanak di Hilkia. ²¹ Om porosukan ku’ndo dau ino rasuk nu do kumaraja’, om paagkasan ku dau ino tagkos nu, om patahakon ngai’ ku dau ino kuasa’ nu. Om osiliu nondo iyau do panakatapa’ do tulun do Yorusalim om Yohuda. ²² Om iyau no o kikuasa’ kopio dot id siriba’ di raja’ di sinakagon di Daud. Om iyau no o migit di kunsi’ do pomorinta’. Om nunu nopo it ukaban dau nga’ aiso’ no o milo’d potobon, om nunu nopo i tabanan dau nga’ aiso’ no o milo’d mongiwang. ²³ Om onuan ku’ndo iyau do pangkat dit asawat om ogirot do miagal di posoitan dit ogirot o pinapalantak dot id limput dit ogirot. Om oinsanan nopondo o sompiiyon dau do suahon, tu’ iyau o koponuahan. ²⁴ Nga’ osiliu i’ do binabo dau i koobpinayan dau om i tulun di sumondiu dau. Miagal pondo iyolo’d lansang om balanga’ di songinsait do hiri’d posoitan do sumondiu dau. ²⁵ Om tontok nopondod maso’ddi om lumuwau nondo om kumodong i posoitan di pinalantak dot ogirot diri. Om iri-iri nondo o kopupuson di koobpinayan dau om i tulun di suminondiu dau. Iyoho’ no i TUHAN, o minomoros diti,’’ ka dau.

¹ Iti no o boros do pasal do Tirus. Ihad kou no, iyokoyu i papapanau do kapal do Tarsis do hilo’d rahat om i lumayag do mantad hilo’d Siprus! Tu’ naraag no o Tirus, i bandar do podompiran dokoyu. Naraag ngai’ no o walai om i podompiran dokoyu’d kapal do rahat. ² Ihad kou no, iyokoyu i dumadagang do hilo’d Sidon! Tu’ koubasanan no dokoyu do monuhu’d tulun ³ do mongoi’d hilo’d pomogunan do suwai, i hilo’d soborong do rahat, do mongoi pomoli om mongoi padagang do gandum do mantad hilo’d Masir, om mongoi pongindapu’ dot id pomogunan do piro-piro o bansa’. ⁴ Nointingayam no kopio o bandar do Sidon! Tu’ ilo piya rahat om ilo rinalom do rahat dot agayo nga’ a’ no manansanganu diya’. Boros ka diyolo’, ’’A’ oku i’ insan do haro o tanak. Om a’ oku i’ pinapagayo do tangaanak do kusai ko’ tondu’ po,’’ ka. ⁵ Om iri piya tulun do Masir nga’ nongkotigowo i’ om tumongob do nokoilo do naraag o Tirus. ⁶ Ihad kou no, om poggidu’ kou no do kumaa do hilo’d Sepanyol, oi tulun di poingiyon do hilo’d tisan do rahat! ⁷ Antangai pogi’ o Tirus, i bandar dokoyu di hino no do mantad di gulu po. Iti toi i bandar dit oubas do rumamai? Iti toi i bandar di minonuhu’ do tulun do mongoi’d hilo’d soborong do rahat do mongoi popoingkakat do pomorintaan diyolo’d hilo’? ⁸ Isai o minomusorou do mamaratu’ do Tirus, i bandar dot agayo o kuasa’ddi, om i tangaanak do raja’ o dumadagang, i tulun do suahon kopio do hiti’d pomogunan? ⁹ TUHAN no, it Osundu Kopio o minomonsoi ngai’ddi. Natantu’ mantad no dau do wonsoyon dau o miagal diri om opupusan i’ i koondos do tulun di songingiyon do hilo’, dot i nongowonsoi diyolo’ o kaandasan, om poinsiribaon dau i tulun dit ongkipangkat dot id pogialatan diyolo’. ¹⁰ Ngoyo’ no dokoyu umoo’ i tana’ dokoyu, oi tulun di poingiyon do hilo’d Sepanyol, tu’ aiso’ noddi o podompiran do kapal do rahat. ¹¹ Nakaakang nod TUHAN o longon dau dot id rahat, om rinaag ngai’ dau o pomorintaan; om nokoponuhu’ no iyau do mamaraag di piro-piro o kuta’ do pogintirungan do Ponisia. ¹² Boros kad TUHAN, ’’Nopupusan no o kataadan nu, oi bandar do Sidon. Om ulak-ulakan nondo o tulun nu. Om mogidu’ piya daa iyolo’ do hilo’d Siprus nga’ a’ kasai’ i’ iyolo’ koidu’ do mantad id koligagaanan,’’ ka dau. ¹³ (Okon i’ ko’ Asur, suwai ko’ Babil, o pinapatahak di bandar do Tirus dot id nintorusan dit orongit. Iri i tulun do Babil o minomonsoi ngai’ di walai dit akawas do padtalob di pisangod; om iyolo’ no i minamahaba’ di kuta’ do pogintirungan do hilo’, om i pinopologos do bandar diri dot araag.) ¹⁴ Ihad kou no, oi papapanau do kapal do rahat, tu’ naraag no i bandar di sondihon dokoyu. ¹⁵ Om orikot indo o maso dot olihuan o Tirus do solinaid do turu’ nohopod o toun, dot irad di konoruo’ do tumur do raja’. Nga’ katalib pondo o turu’ nohopod o toun om osiliu nondo o Tirus do miagal di tondu’ do sundal, dot id suang do sinding diti: ¹⁶ Anu do kecapi, om sorili’ nodti bandar, oi sundal di nolihuan! Kombiton no i kecapi, om modsinding no kawagu, om osorou ko indo kawagu. ¹⁷ Om katalib pondo o turu’ nohopod o toun, om osorou nogindo kawagu’d TUHAN o Tirus, om pologoson dau o Tirus do momonsoi di karaja’ mantad dau di gulu po. Om monokidagang-dagang nondo iyau dot id koinsanai’d pomorintaan do hiti’d pomogunan. ¹⁸ Nga’ iri nopondo kountungan dau om it aanu-anu dau om patahakon ngai’ nopo dot id TUHAN, om a’ i’ iri timungon ko’ poopion po do gisom dot ogumu’. Suwai ko’ iri nopo om patahakon dot id tulun di sumambayang dot id TUHAN, do maan do pomoli do takanon om pakayan dit apatut dot aanu diyolo’.

¹ Raagon nondod TUHAN iti pomogunan, gisom dot a’ sunian do nunu nopo om oingou. Om porumpadon dau ot id sakai diti pomogunan om pogitotongkiadon dau i tulun do poingiyon do hiri. ² Om oiyo nopondo o kotutukon do tulun — i tulun toomod om it imam, om i turipon do kusai om i tuan dau, om i turipon do tondu’ om i tondu’ do sanganu di karajaon dau, om i momoli om i padagang, om i molos om i poolos, om i kaya’ om i mosikin. ³ Om aiso’ nopondo o sumuni do nunu nopo do hiti’d pomogunan. Nokoboros nod TUHAN, om atantu’ no dot osiliu o miagal diri. ⁴ Rumiou nondo om kumoring o pomogunan, om lumuhoi ngai’ nopo o pointongkop do pomogunan, om ilo tawan om iti pomogunan nga’ rumomuk goduwo nopo. ⁵ Sosomu’ no o pomogunan tu’ ososomu’ di tulun di songingiyon do hiri, tu’ tuminolibamban iyolo’ di pinonuhuan do Kinorohingan om a’ suminulung di tumpongo’d Kinorohingan dot id diyolo’, i tumpongo do gisom dot alaid. ⁶ Gowoi poddi om pinapalan do TUHAN iti pomogunan om hinukuman dau o tulun do hiri, tu’ i winonsoi diyolo’ o kinopomohukuman. Om sorobon nondo iyolo’, om okuri’ nondo diyolo’ ot apasi. ⁷ Rumiou nondo i guas dot anggur, om apagon do kaanu’d waig dot anggur. Om i tulun dit ongotood di gulu po nga’ tumongob ngai’ nopondo. ⁸ Notingkod noddi i tuni do rebana, om notingkod i tuni do kecapi di popotood do ginawo. ⁹ Aiso’ noddi o tulun do mondig-tondig do monginum do waig dot anggur, om aiso’ o momurimon do kowosiho’ di tiinumon do kaawuk. ¹⁰ Agangau nopo o pointongkop di bandar, om nongontiilan ngai’ i totobon do walai tu’ ongooris po ngai’ i tulun do hiri. ¹¹ Minggiak po ngai’ i tulun do hilo’d karalan-ralanan tu’ aiso’ no o waig dot anggur. Aiso’ noddi o kataadan do gisom dot alaid, om natanus no o karamayan do pointongkop diti pomogunan. ¹² Naraag noddi kopio i bandar, om nohuyas i totobon do wawayaan di bandar. ¹³ Om miagal noddi ot osiliu dot id pointikid-tikid do bansa’ do pointongkop diti pomogunan. Miagal pori do momua’ di tua’ do saitun di dongmongua’ om miagal do mongupu’ di tua’ dot anggur di noolu-olu’, dit id tohuri no dot upuon. ¹⁴ Om modsinding nondo dot atataadan i tulun dit a’ nangapatai. Om popinsunudon nondo di tulun do ponong hilo’d kotonobon o kobontugo’d TUHAN. ¹⁵ Om royohon iyau di tulun do ponong hilo’d koulayon. Om poinggoyoon di tulun do poingiyon do hilo’d tisan do rahat, o TUHAN i Kinorohingan dot Israil. ¹⁶ Orongou nondo o sinding do mamarayou do mantad hilo’d tisan do pomogunan. I sinding do mamarayou dot Israil, i bansa’ dit otulid. Nga’ aiso’ no o soro-sorohon ku iyoho’! Obungou oku no! Tu’ maso ku po dot akalan di tulun di magakal om i mongindaraat. Om muhang-ruhang ka nogi’ o kararaat diyolo’. ¹⁷ Pokinongou ngai’ kou no, i tulun do hiti’d pomogunan! Poingandad no dokoyu o lawa’ om luang do korotuon dokoyu; oontok kou nod kosusaan. ¹⁸ Tulun nopo di mumbal daa do mogidu’ do mantad id kosusaan om aratu’ no dot id luang, om iri no tulun di mogidu’ do mantad id luang om kosulung nod lawa’. Miagal pondod potuntugon o rasam do mantad hilo’d tawan, om oguyu’ nondo o pinoimpahan do pomogunan. ¹⁹ Om agaang nondo o tana’ om opitas, om otuhan. ²⁰ Iti po pomogunan nga’ mikorobibi’ pondod miagal do tulun di naawuk om maba-haba’ poo do miagal di sulap dot oontok do tongus dot opuhod. Nawagatan tomod do dusa iti pomogunan, om iri no o kahaba-haba’dti. Araag nopondo kopio iti pomogunan om a’ no owonsoi kawagu. ²¹ Om tontok nopondod tadau’ddi om hukuman ngai’ nondod TUHAN i monguasa’ do hilo’d sawat om i raja’ do hiti’d pomogunan. ²² Om rubpuon nopondod TUHAN dot id luang o koinsanai di raja’ do miagal pod tulun di songinggiil. Om tabanan nopo dau iyolo’ do hiri’d giil do gisom dot orikot i maso do kopomohukuman dau diyolo’. ²³ Om tumuong nondo ilo tulan om a’ nondo mulinau o tadau, tu’ TUHAN no it Osundu Kopio o raja’ di momorinta’. Momorinta’ nondo iyau do hilo’d Yorusalim do hilo’d Nuluhon do Sion, om kokito ngai’ nondod sinundu dau i boyoon do bansa’.

¹ Oi TUHAN, iya’ no o Kinorohingan ku, pusohon ku iya’ om royohon ku o ngaran nu. Nowonsoi nu no i kongopusahan kopio. Om otorodok ko i’ do minomonsoi di nosorou mantad nu’d wonsoyon nu do mantad di gulu po. ² Nangaraag ngai’ nu no o bandar, om nongomumuk ngai’ nu i kuta’ do pogintirungan diyolo’. Natanus ngai’ noddi i walai’d raja’ di winonsoi do pisangod, om a’ no wonsoyon kawagu do gisom dot alaid. ³ Royohon ko nondod bansa’ dit ongokoris, om poddosi ko di piro-piro o bansa’ dit orongit. ⁴ Id diya’ ngai’ no o pakayaan di tulun do mosikin om it aiso’ o pokukurayan, om iya’ no ot intirungon diyolo’ do tontok do haro o kosusaan. Intirungan nu i’ iyolo’ do mantad id tongus dit opuhod, om lungungan nu do mantad id kolosuo’d tadau dit a’ ogina-gina’. Miagal pod tongus di maso do dongrumasam i tulun dot araat do mongumang, ⁵ miagal po iyau di ribut dot alasu’ do tumongus do hilo’d kasakat-sakatan. Nga’ tiningkod nu i’ i pisangod dahai do minghiyo, om tiningkod nu i pinongkisan do tulun dit angaraat, do miagal pod haun tu’ momolungung do tontok di tadau dit alasu’ kopio. ⁶ Posodia’ nondo o TUHAN, it Osundu Kopio, do poginakanan do hilo’d Nuluhon do Sion, do maan do koinsanai’d bansa’ do hiti’d pomogunan. Posurungon dau i taakanon dit awasiu no kopio om waig dot anggur dit osonong no kopio. ⁷ Om sigog indo dot iduwon dau i haun do katangaban di monguluput do koinsanai’d bansa’ do hiri’d timpak do nuluhon diri. ⁸ Om tonuson nondod TUHAN it Osundu Kopio, o kapatayon do gisom do poingompus. Pihidan nondo dau o romou do pointikid-tikid do tulun om iduwon dau i tingayam do poimbabo di tulun dau do pointongkop diti pomogunan. Tu’ nokoboros nod TUHAN o miagal diri, om atantu’ no dot osiliu iri. ⁹ Om tontok nopondod maso’ddi om momoros nondo o tulun do poingkaa, ’’Iyau no kopio o Kinorohingan toko’. Iyau no i nandad toko’ do mamasi dati’. Iyau no kopio o TUHAN, iyau no o pagandasan toko’. Otood noddi iyahai do baino’ om osonong o ginawo dahai, tu’ pinasi i’ iyahai dau,’’ ka. ¹⁰ Intirungan indod TUHAN o Nuluhon do Sion, nga’ tulun nopod Muab om pingulakan pondo do miagal di sakot do nokoring tu’ pingulakan do hiri’d kinotimungon do rinomos. ¹¹ Om poroloyon no daa’ndo di tulun do poingiyon do hilo’ o longon diyolo’ do miagal-agal do tulun di mumbal daa do kumaau, nga’ intingayamon indo iyolo’d TUHAN om katawos nopondo o longon diyolo’, tu’ oluhoi no o longon diyolo’. ¹² Raagon nondo dau i kuta’ do pogintirungan do tulun do Muab do mitonggoi di tolig dit angakawas, om omumuk nopondo iri om osiliu’d pupuk.

¹ Tontok nopondod tadau’ddi om sindingon nondo di tulun o sinding diti do hilo’d pomogunan do Yohuda, ’’Ogirot no kopio o bandar toko’; Kinorohingan i’ o minomonsoi di tolig, om hiti toko’ no dot osimbayan om aiso’ o koligagaanan. ² Iwangai ngai’ no i wawayaan dot agayo di bandar, om pologoso’ nod sumuang i piro-piro o bansa’ dit otorodok, i bansa’ do momonsoi’d korohian do Kinorohingan diyolo’. ³ Iya’ no, oi TUHAN, o manahak do kosimbayanan do tulun dit ogirot o ginawo, tu’ mogondos i’ iyolo’d TUHAN. ⁴ Pogondos kasai’ nod TUHAN, om gompion toko’ indo kasai’ dau do gisom dot alaid. ⁵ Poinsiribaon dau i tulun dit angasawat o ginawo, om raagon dau i bandar diyolo’ dit ogirot, om nahaba’ no dau i tolig di bandar do gisom do nangkataam. ⁶ Om ulak-ulakan nondo i bandar diri di tulun do mosikin om it ongoinggorit. ⁷ Oi TUHAN, iya’ no o mononong do ralan do tulun dit otulid o ginawo, om otulid i’ o ralan do susuyon do tulun dit otulid o ginawo. ⁸ Tumanud i’ iyahai do korohian nu, oi TUHAN, om iya’ no o pagandasan dahai om kalangadan kopio dahai. ⁹ Aayi-ayi’ no o ginawo ku do lumangad diya’ do tontok do dongotuong; om soira’ nopondod butusan nu iti pomogunan, om oilaan nondo di tulun do hiti’d pomogunan o komoyon do kotulido’ nu. ¹⁰ Mulong piya’d osonong ko dot id tulun dit araat, nga’ a’ i’ iyolo’ milo do minsingilo do momonsoi dit osonong. Hiti piya’d pomogunan di haro o toturan nga’ momonsoi kasai’ i iyolo’ dot araat, a’ i’ iyolo’ monongkuyaan do kuasa’d TUHAN. ¹¹ A’ i’ koilo i piro-piro o pisangod nu, do hukuman nu iyolo’. Oi TUHAN, intingayamo’ no iyolo’, om pologoso’ no iyolo’ dot oinggorit, pologoso’ no iyolo’ dot orotuan do hukuman di nokosodia’ mantad nu. Pointongon no iyolo’ do kogoyoo’d kosianan nu dot id tulun nu. ¹² Oi TUHAN, iya’ no o poposimbayan dahai, tu’ koinsanai dit owonsoi dahai nga’ iya’ i’ kopio o minomonsoi’ddi do bagi’ dahai. ¹³ Oi TUHAN, i Kinorohingan dahai, nokoumbal i’ iyahai do noporinta’ do piro-piro o tuan do suwai, nga’ iya’ noo o TUHAN dahai. ¹⁴ Nga’ baino’ noddi om napatai no iyolo’, om a’ no masi kawagu, om i rusod diyolo’ nga’ a’ no tumungag. Tu’ nohukuman nu no iyolo’ om napatai nu iyolo’, om natanus nu do mantad id pomusarahan nu. ¹⁵ Oi TUHAN, pinasapou nu iti bansa’ dahai, om pinoinggayo nu o kinoiyonon do tana’ diyolo’, om iri no o kopoinggayaan diya’. ¹⁶ Hinukuman nu iyahai, oi TUHAN gisom do noinggorit iyahai, om pogihum noddi iyahai diya’ om sambayang no iyahai. ¹⁷ Poingkuro nopo i tondu’ do monohoruol no, tu’ oruhai nod osusu om minggiak poo dot orurualan, om iyo no iyahai’ddi dot id toguang nu, oi TUHAN. ¹⁸ Monontian iyahai, om monohoruol iyahai dot id suang do koinggoritan, nga’ aiso’ i’ o pogkosusuon dahai. A’ i’ iyahai kapanahak do koposion dot id pomogunan, a’ i’ iyahai nokopomoruhang do tulun do hiti’d pomogunan. ¹⁹ Iri nopo tulun nu di nangapatai nga’ masi i’ kawagu, om i rata’ diyolo’ nga’ tumungag i’ kawagu. Om i nongolobong do hiri’d lobong, nga’ tumungag indo om modsinding dot atataadan. Tu’ poingkuro nopo i bolobou do popoluhub diti tana’, om miagal noddi o TUHAN do monungag kawagu di laid no kangapatai,’’ ka. ²⁰ Suang kou no do hino’d walai dokoyu, oi bansa’ ku, om tabanan no i totobon. Lumisok kou pod daamot, do gisom pod atanus i kototogod do TUHAN. ²¹ Tu’ atantu’ no do lumintuhun o TUHAN do mantad hilo’d kinoiyonon dau do hilo’d surga do mongoi pomohukum do tulun do hiti’d pomogunan tu’ i dusa diyolo’ o kopomohukuman. Om iti tana’ nga’ a’ nondo polisok di raha’ do tulun di napatai. Om pointalangon nondo i tulun di luminisok do minamatai.

¹ Tontok nopondo do maso’ddi om pakayon nondod TUHAN i gayang dau dit okodou om atarom do pomohukum di Lowiatan, i tulanut di mingurilong om mingkinol. Om patayon nogi’ dau i naga’ do rahat. ² Om tontok nopondo do maso’ddi om poboroson nondod TUHAN o poingkaa, ’’Podsinding no do pasal di kabun dot anggur ku dit osonong. ³ Iyoho’ no i TUHAN, o gompomogompi’ddi; om pisiraman kasai’ ku, om a’ id tulun ngoyon umpadano’ tu’ tamangan kasai’ ku i’ do tadau om totuong. ⁴ A’ oku noddi otogod. Nga’ ondung haro o sakot ko’ rugi dot okito ku, om ngoyon ku no kopio iyolo’ songodo’, om insanan ku nopod monorob. ⁵ Nga’ ondung rumikot do mongoi pokiintirung doho’ i piro-piro o pisangod do tulun ku, om pologoso’ no iyolo’ do monokiulud doho’, pologoso’ no iyolo’ do monokiulud doho’,’’ ka. ⁶ Koimbagu nopondo om gumamut nondo o bansa’ dot Israil. Minggayo nondo om momutolid ot Israil. Om oponu’ nopondo iti pomogunan do tua’ diyolo’. ⁷ A’ i’ koirad do winagat di pinomohukum do TUHAN di piro-piro o bansa’ do suminangod do bansa’d Israil o pinomohukum dau dot Israil. Om iri nopo tulun dot Israil di napatai om a’ i’ koirad do kogumuo’ di pisangod do napatai. ⁸ Pinomohukum nopod TUHAN di tulun dau nga’ pinataam dau iyolo’ dot id pomogunan do suwai. Nuyung dau iyolo’ dot i tongus dot araat do mantad id koulayon o pinonguyung. ⁹ Nga’ ompunan nopo o dusa dot Israil om omumuk ngai’ i pananaraban do porsombahan dot id tingolig do gisom do miagal do kapur di tinutu. Om iri nogi’ i pananaraban do kominyan om i tanda’ dot Asira, i ponokokinorohingan diri nga’ mumukon i’. ¹⁰ Pogun poddi i bandar di kitolig. Om notongkiadan do miagal do tana’ dit aiso’ o nunu-nunu do sumuni. Nosiliu poddi do pangakan-ngakanan do sapi’, om tiyonon di sapi’ i bandar diri. ¹¹ Ongoriou nopondo om ongotipu’ i raan di kayu, om timungon nondo di tongoondu’ do maan do siduwon. Aiso’ i’ o tosuhut-suhutan do bansa’ddi om a’ no iyolo’d Kinorohingan, i Minomonsoi diyolo’, insianan om a’ dau iyolo’ kolisihan. ¹² Tontok nopondo do maso’ddi om soriso-isoon nondod TUHAN do monimung i tulun dau, do mantad pod hilo’d Bawang dot Iprat om korikot do hilo’d piwolitan do Masir. Om miagal po iyau’d tulun di monompipi’ do gandum di poinrolot do tapol. ¹³ Om orikot nopondo o maso’ddi om pounion nondo o torumpit do pomolohou do popoguli’ do koinsanai di tulun dot Israil di nangkataam do hilo’d Asur om hilo’d Masir. Om rumikot nondo iyolo’ do mongoi sambayang dot id TUHAN do hilo’d Yorusalim do hiri’d nulu-nulu dau dit olidang.

¹ Obungou no i Pomorintaan dot Israil! Tu’ iri nopo kagayaan dau nga’ rumiou no do miagal di bunga do poinsigar di piro-piro o boyoon diyolo’ di nangaawuk. Noumahan tomod i’ daa do tumau dit osonong o kosingudan i tulu diyolo’, nga’ songinglii no ma iyolo’ dot iyo poddi napatai do noowukan. ² Haro i’ o tulun dit okoris om ogirot do suhuon do TUHAN do mongoi panangod diyolo’. Iyo po iyau di karambatu do rumikot, om miagal do rasam dit asapou, om miagal do lumpadang di lumampai do mamaraag di tana’. ³ Pingulakan nondo i kaandasan do ginawo di piro-piro o boyoon di nangaawuk diri. ⁴ Om iri nopondo kobontugo’ di piro-piro o boyoon dit ongoondos di motitanus noddi om tumagak nondo om iyo pondo dot a’ iyolo’ nokoumbal dot abantug do miagal di tua’ dot ara dit id gulu tu’ oonsok po om upuon no do maan dot akanon, dot iyo po dot aiso’ mantad o tua’ dit ara. ⁵ Rumikot nondo o maso’d TUHAN it Osundu Kopio om iyo pod bunga dit olumis do poinsigar di tulun dau di noolu-olu’. ⁶ Om onuan ngai’ nondod TUHAN do ginawo do koilo dit otulid i gompomutus, om onuan dau do kosioho’ i tulun di madtatamong di wawayaan do bandar do mantad id pisangod. ⁷ Iri piya i piro-piro o nabi om i piro-piro ot imam nga’ sombibi-bibi’ po dot oowukan. Om a’ no oila-ilaan o kotohubon diyolo’ tu’ agayo kopio o waig dot anggur om tiinumon di kaawuk do noinum diyolo’. Nadalaan no do naawuk i piro-piro o nabi do gisom dot a’ no iyolo’ kosuhut di pointalangon do Kinorohingan dot id diyolo’, om i piro-piro ot imam nga’ nadalaan nod naawuk gisom dot a’ no iyolo’ milo’d momutus do hal di porikoton dot id diyolo’. ⁸ Om iri piya mija’ diyolo’ nga’ notongkop pod tilob, om aiso’ no ot opulang-pulang. ⁹ Om mimboros nondo iyolo’ dot araatan doho’. Boros ka diyolo’, ’’Isai daa ot osorou dau do tudukan dau. Isai ma daa o mokinongou di ponudukan dau? Iri nopo om maan nod tangaanak dit ongokoro’ po! ¹⁰ Mumbal daa iyau do monuduk dati’ do soriso-isoon i’ o hurup, om boros, om baris do boros,’’ ka. ¹¹ Ondung a’ kou mokinongou doho’ om iri nondo i bansa’d suwai om i suwai o boros, o suhuon do TUHAN do monuduk dokoyu. ¹² Nonuan kou daa do kosimbayanan om koinsasamadan nga’ mada’ kou i’ do mokinongou dau. ¹³ Om iri noddi o koponudukan do TUHAN dokoyu do soriso-isoon i’ o hurup, om boros, om baris do boros. Om kasadu kasai’ kou nopondo do monikid do lumaang kou. Om osuhat kou nondo om alawaan, om atanggayan kou do pisangod. ¹⁴ Pokinongou nod boros do TUHAN, oi tulun dit angasawat o ginawo, i momorinta’ do rayat do hiti’d Yorusalim! ¹⁵ Oondos kou daa om mimboros do poingkaa, ’’Nokopiumpongo no iyahai do kapatayon, om nokopitaru’ no iyahai do pomogunan do tulun di napatai. Om soira’ nopod rumikot o kosusaan dit awagat om a’ i’ iyahai oontok, tu’ sumondiu i’ iyahai do tudut om takal dot araat do maan dahai do pogintirungan,’’ ka. ¹⁶ Gowoi poddi om poingkaa o poboroson do TUHAN, it Asawat Kopio, ’’Poilihan ku nondod watu dit okodou om ogirot o hilo’d Sion. I watu di ponginggirot, it agayo gatang, do maan do sasi’ dot, ’Isai nopo o monongkuyaan kopio om a’ no arau-arau,’ ka. ¹⁷ Tali nopo do ponipong om it otulid, om tali nod pomoloting om i kotulido’ do ginawo,’’ ka. Imuhawon nondod karambatu i tudut di sondihon daa dokoyu, om rulunon do luyud it intirungon dokoyu. ¹⁸ Tonuson nondo i piniumpangaan dokoyu do kapatayon, om a’ bayaanon i pinitoruan dokoyu do pomogunan do tulun do napatai, om soira’ nopondod korikot o kosusaan dit awagat kopio, om oontok kou no. ¹⁹ Om oontok kasai’ kou nopondoddi do pointikid do tadau. Om boboon no dokoyu iri do dongkosuabon, om dong pitangaadau, om dongotuong. Om pointikid-tikid do boros di poboroson do Kinorohingan om porikot nod kopoddosian do suwai. ²⁰ Om miagal kou nondo di tulun di mumbal do modop dot id toodopon dit oniiba’ kopio, gisom dot a’ i’ iyau kalatan, om miagal do tulun di monongkumut do kumut dit a’ i’ kotokop dau. ²¹ Tu’ sumaap nondo o TUHAN do miagal di suminaap iyau di hilo’d Nuluhon do Porasim om hilo’d Rantai do Gibion, do powonsoi di nosorou mantad dau do wonsoyon, i wonsoyon dau di kosuayan kopio’d tulun. Nga’ pongoon i’ dau i wonsoyon dau, i wonsoyon dau di koimayaan kopio. ²² Kada’ pongirak-irak diti popoinsan do poboroson ku dokoyu! Tu’ ondung mongirak-irak kou, om okon nogi’ dot apagon kou do mogidu’. Tu’ nokorongou oku nod boros do TUHAN, it Asawat Kopio om it Osundu Kopio, do mamaraag do koinsanai diti pomogunan. ²³ Pokinongou nodti poboroson ku, pokinongohon no kopio iti bilin ku. ²⁴ Aiso’ i’ o gompongumo do mamaradu nopo kasai’ di tumo dau do maan tanamai. ²⁵ Suwai ko’ aradu po dau i tana’, om tanaman no dau do linsou, dot iri tuu linsou do jintan dot oitom ko’ iri linsou do jintan dit opurak. Om mananom iyau do gandum om barli; om hiri nopod ponong id disan om suwai no o tonomon dau. ²⁶ Koilo i’ iyau do morobuat tu’ notudukan no iyau do Kinorohingan. ²⁷ Tu’ a’ i’ dau tutuon di toolu dot adalaan kawagat i linsou do jintan dot opurak ko’ i linsou do jintan dit oitom. Suwai ko’ i toolu dit okooro’ om agaan o ponutu dau. ²⁸ A’ i’ dau padalaan do momogomos i gandum do gisom dot omumuk, om koilo i’ iyau do potunud di guyudan dot id sakai di gandum om a’ indo omumuk i watu di gandum. ²⁹ Om iti toilaan diti nga’ mantad i’ dot id TUHAN, it Osundu Kopio. Tu’ kopunong ngai’ i’ om haro o kotutukon di natantu’ mantad do TUHAN do wonsoyon dau.

¹ Obungou no o bandar do Yorusalim, i roitan do pananaraban do porsombahan dot id Kinorohingan! Obungou no i bandar di pinomukiiman di Daud! Pologoson nopo do mogisowoli-woli o toun om mogisowoli-woli o karamayan. ² Nga’ porikatan nondo do Kinorohingan do kosusaan o bandar diri. Om haro nondo o tulun do mihad om haro o tulun do mogihad do hilo’! Om miagal pondo do pananaraban do porsombahan di notounan do raha’ o pointongkop do bandar diri. ³ Om songodon nondo do Kinorohingan o bandar diri om turungkuon dau. ⁴ Om Yorusalim nopo om iyo pondo di tombiruo di tumotos do poporongou do boros dau do mantad hilo’d saalom do tana’, i boros dit oiyo-iyo pod orongou do mantad hilo’d pupuk. ⁵ Nga’ atagak nopondo do miagal do pupuk dit angatandai i pisangod nu dit ongorongit, om otilib do miagal di tapol do tilibon do ribut. Om sigog pondo, om a’ i’ daa insan-insanon ⁶ do poiduwon do TUHAN, it Osundu Kopio o bandar diri do mantad id pisangod, do tinggoron om guyu’ do tana’ dot opuhod kopio o ralan do popoidu’. Om poporikot nondo iyau do tongus do monomporiu-riu do mantad id rahat, om poporikot iyau do tapui dit osikit kopio do monorob. ⁷ Om oinsanan nopondo dot atanus i soudor do piro-piro o bansa’ di sumaap do Yorusalim, i bandar do pananaraban do porsombahan dot id Kinorohingan, om atagak ngai’ nopondo i rapo-rapo om i koburu-buruon diyolo’, do miagal no di nipi do dongotuong. ⁸ Oinsanan nopo i bansa’ di tuminimung do mongoi panangod do Yorusalim do miagal do songulun di louson do koipi do maso dau do makan, nga’ oposik nopondo iyau om louson kasai’ i’, ko’ miagal do songulun di tuuhan do koipi do maso dau do minum, nga’ oposik nopondo om tuuhan kasai’ po, om otuu po o tatalanan dau. ⁹ Potilombuso’ nopo ino wonsoyon dokoyu do dongkababasug; pimbolou-bolou kou nopo! Pagawuk kou nopo, nga’ okon i’ ko’ waig dot anggur o kaawuk. Pikorobibi’ kou nopo do mamanau, nga’ okon i’ ko’ tiinumon do kaawuk o kobibi-bibian dokoyu. ¹⁰ Tu’ pinosiodop om pinoolong kou do TUHAN. Om pinoungkodom dau o mato di piro-piro nabi, it apatut daa do sumiliu do panakamato di rayat, om tinirung dau o rabas do mogogontong. ¹¹ Olisok nondo do mantad id dokoyu o komoyon do pointikid-tikid do pinointalang, do miagal no di buuk do sinaapan dit a’ koino-ino dot ukaban. Om ondung patahakon dokoyu i buuk di kisaap diri dot id tulun di milo do mambasa’ om suhuon nu no daa’ndo iyau do mambasa’, nga’ sumimbar nondo iyau do poingkaa, ’’A, a’ oku i’ tu’ nasaapan giya no,’’ ka. ¹² Om ondung patahakon nu i buuk diri dot id tulun dit a’ milo do mambasa’, om suhuon nu no daa’ndo iyau do mambasa’, nga’ sumimbar nondo iyau do poingkaa, ’’A, a’ oku i’ koilo do mambasa’,’’ ka. ¹³ Om boros kad TUHAN, ’’Boros no toomod diti tulun do tumuku’ dot id doho’. Tu’ ginawo nopo diyolo’ om osodu’ i’ doho’. Tugama’ nopo diyolo’ om aiso’ i’ o suwai ko’ it oturan do tulun di naapal diyolo’. ¹⁴ Gowoi pondo om pokorualan ku iyolo’ om a’ ku iyolo’ tingkadan do momobog, om it a’ i’ diyolo’ insan-insanon. Om tulun nopo di kiakal om osiliu nondod tulun do basug, om aiso’ o kotutuk-tutukon di toilaan diyolo’,’’ ka dau. ¹⁵ Obungou no i tulun di mumbal daa do momolisok do mantad id TUHAN dit osorou dau do wonsoyon dau! Lumisok-lisok i’ iyolo’ do mingwonsoi’ddi om ondos daa’ndo diyolo’ om aiso’ o kokito diyolo’ ko’ koilo ondung nunu o wonsoyon diyolo’. ¹⁶ Somputulon ngai’ nopo diyolo’ o nunu nopo. Nga’ nunu toi i poimaha-maha’, i gompomorun ko’ iri po lagit? Milo toi i winorun do tulun do moro-boros dot id dau dot, ’’Okon i’ ko’ iya’ o minomonsoi doho’,’’ ka? Ko’ milo toi iri do momoros dot id dau dot, ’’A’ ko i’ koilo diti wonsoyon nu,’’ ka? ¹⁷ Haro i’ o boros do komolohingan dot, ’’A’ no alaid om umoon no ilo gouton, om osiliu kawagu do gouton i noumo,’’ ka. ¹⁸ Tontok nopondod tadau’ddi om iri piya bosukon nga’ korongou i’ do tontok do basaon o buuk dot opuhod o pambasa’, om iri bolou, it otuong o koposi-posion nga’ koungkalat nondo o mato om kokito. ¹⁹ Iri piya tulun dit oudipon om i ruminutum nga’ kaanu nondo kawagu do kaarapadan di patahakon do TUHAN, i Kinorohingan dot Israil dit olidang. ²⁰ Om iri nondo o kopupuson do tumur di tulun di mongulok-ulok do wokon om i mongindaraat nopo do Kinorohingan. Patayon ngai’ nopondo do Kinorohingan i tulun do kidusa, ²¹ om i tulun di pakaraat do wokon dot aiso’ o paantakan, om i tulun di mada’ do hukuman o tulun dot araat, om i tulun di popotongkop do tudut om gisom dot aantaban i tulun dit otopot do kaanu dit otulid. ²² Gowoi poddi om poingkaa no o boros do TUHAN, i Kinorohingan dot Israil, i pinopoidu’ di Abraham do mantad id kosusaan, ’’Oi tulun ku, mantad do baino’ om a’ kou nondo indaraaton om a’ mumang posi’ o rabas dokoyu dot ointingayaman. ²³ Om soira’ nopondo dot okito dokoyu i tangaanak do patahakon ku dokoyu, om okunon nogindo dokoyu dot iyoho’ no i Kinorohingan dot Israil dit olidang. Om pusohon oku nondo dokoyu om oronok kou doho’. ²⁴ Om i tulun di basug nga’ kosuhut nondo, om i muol-nguol nopod araatan nga’ orohian nondod tudukan,’’ ka.

¹ Poingkaa no o boros do TUHAN, ’’Obungou ngai’ no i boyoon do Yohuda, tu’ sumaap i’ iyolo’ doho’. Tuminanud iyolo’ do pomusorou dit okon ko’ mantad id doho’, om minomonsoi iyolo’ do pinitoruan dit okon i’ ko’ korohian ku. Om muhang-ruhang nopoddi o dusa diyolo’. ² Minongoi iyolo’ do hilo’d Masir, om a’ i’ iyolo’ minuhot ondung poingkuro o doho’d tosorou. Orohian iyolo’ do mintirung do Masir om sumondiu dot id raja’ do Masir. ³ Nga’ aiso’ i’ o pokukurayan di raja’ do Masir do monulung diyolo’, om kosusaan no o kootuson di pongintirung do Masir diyolo’. ⁴ Mulong pod nokorikot no do hilo’d bandar do Soan om Hanis, i hilo’d Masir, i piro-piro o wakil do Yohuda, ⁵ nga’ ointingayam indo o tulun do Yohuda tu’ minogondos i’ iyolo’ di bansa’ dit a’ milo’d sondihon. Naanu nopo diyolo’ om okon i’ ko’ i kouhup, suwai ko’ pongindaraat nogi’,’’ ka dau. ⁶ Iti no o boros do TUHAN do pasal di nintorusan di poingiyon do hilo’d tana’ do kowotuan do ponong hilo’d salatan, ’’Minaya’ i piro-piro o wakil do pomogunan di watas do kikoligagaanan, i tiiyonon do singa om i haro o tulanut di kapatai om naga’ di kitalad. Om ginandaran diyolo’ i kaladai om unta diyolo’ do patahak-tahakon dit angagayo o gatang do patahakon dot id bansa’ dit a’ i’ kopio milo do monulung diyolo’. ⁷ Aiso’ i’ guna’ di ponulung do Masir. Om pungaranai ku noddi o Masir do, ’Naga’ dit a’ korolosi,’ ka,’’ ka dau. ⁸ Om suhuo’ oku nod Kinorohingan do popotulis dot id iso’ o buuk di karaato’ di tulun dau, do maan do koilaan dit ogirot kopio, ⁹ tu’ sumongkiwal nopo iyolo’d Kinorohingan, om mongudut, om mada’ kasai’ nopod mokinongou’d ponudukan do TUHAN. ¹⁰ Noduhan diyolo’ i piro-piro o nabi do mimboros. Boros ka diyolo’, ’’Kada’ iyahai sunudai dit ongotopot. Nga’ sunudai nogi’ iyahai di korohian dahai’d mokinongou. Pologoso’ nopo iyahai’d lumoyong o pomusorou. ¹¹ Poggidu’ kou, kada’ kou ongoi pangantob dahai. A’ i’ iyahai orohian do korongou do pasal do Kinorohingan dokoyu, i Kinorohingan dot Israil dit olidang,’’ ka no diyolo’. ¹² Nga’ poingkaa o boros do Kinorohingan dot Israil dit olidang, ’’A’ kou minamadul di boros ku om sumondiu kou nogi’ do kororongit om poninipu’. ¹³ Boboo’ nopo dokoyu o kasalaan dokoyu. Miagal kou pod tolig di nagaang do mantad pod hiri’d sawat om gisom do kosondot do hiri’d siriba’; om sigog indo dot ahaba’ kou. ¹⁴ Om omumuk kou nondod miagal do kuron. Om i nadalaan no komumuk do gisom dot aiso’ no o milo di kinomumukan diri do panganu do popou ko’ ponimbauk do waig do mantad id luping,’’ ka. ¹⁵ Boros kad TUHAN, it Asawat Kopio, i Kinorohingan dot Israil dot olidang, dot id tulun dau, ’’Uli’ kou no do mikuwo’d osinonod o ginawo, om posion ku i’ iyokoyu. Ponongkuyaai kou no doho’ do mikuwo’d ginawo dit osimbayan, om pokorison ku indo iyokoyu,’’ ka. Nga’ minada’ kou i’ do momonsoi’d miagal diri! ¹⁶ Tu’ minomusorou kou nogi’ do sumakai’d kuda’ dit ongosiau om mogidu’ do mantad id pisangod dokoyu. Osonong no! Tu’ a’ no bo milo dot a’ kou mogidu’! Nga’ ondos daa dokoyu om osiau no i kuda’ dokoyu, nga’ osiau-siau moti’ i momogusa’ dokoyu! ¹⁷ Manangkus nopod mogidu’ o tongosoribu dokoyu do kokito do songulun o soudor do pisangod. Om limo nopo soudor do pisangod nga’ ula’ nod popoggidu’ ngai’ dokoyu. Om aiso’ nondo ot oolu’ di soudor dokoyu suwai ko’ iso’ po i pinorilitan do bondira’ do hiri’d timpak do nulu-nulu! ¹⁸ Nga’ mulong pod miagal diri nga’ poingandad i’ o TUHAN do popointalang do kosianan dau dot id dokoyu. Om posodia’ no iyau do monginsian dokoyu tu’ osonong kasai’ i o wonsoyon dau. Olumaag no i tulun di mogondos do TUHAN. ¹⁹ A’ kou nondo mihad, iyokoyu i songingiyon do hiti’d Yorusalim. Tu’ obinsianan i’ o TUHAN, om soira’ nopod lumohou kou dau do mokitulung om simbaron kou i’ dau. ²⁰ Pologoson kou’d TUHAN do koumbal dit osusa’ do ponuduk dau dokoyu. Nga’ baino’ noddi om iyau no o moyo-woyo’ dokoyu om a’ kou nondo minog do mogihum dau. ²¹ Ondung kasala’ daa o ralan dokoyu nga’ orongou indo dokoyu o boros dau dot id tohuri-huri dokoyu do poingkaa, ’’Diiya iti ralan. Susui kou do ralan diti,’’ ka. ²² Om ngoyon ngai’ nondo dokoyu i tingolig dokoyu di nurogupan do pirok om tamas, om pataamon nondo dokoyu iri do miagal pod rinomos. Om boros kando dokoyu, ’’Poggidu’ no do mantad id doho’,’’ ka. ²³ Om soira’ nopo do patanom kou do linsou do totonomon om poporikot indo o TUHAN do rasam do poposuni’ddi. Om osonong indo o tonomon dokoyu, om ogumu’ o sakot do pangakan-ngakanan do tayam-tayam dokoyu. ²⁴ Iri nopo sapi’ do tontoluhan om i kaladai do mamaradu do tumo dokoyu, om mangakan nondo di taakanon do tayam-tayam dit osonong kopio, i tinomod no do poposodia’ do maan do paakanan. ²⁵ Om tontok nopondod tadau dit oturungku’ i kuta’ do pogintirungan di pisangod dokoyu om angapatai nondo iyolo’, om lumuyung nondo o bawang do mantad id pointikid-tikid do nuluhon om nulu-nulu. ²⁶ Om miagal pondod tadau i tulinau di tulan, om inturu’ po kanawau ko’ mantad dilo kanawaho’ do dinondo ilo tadau; miagal pod tinitiu do turu’ o tadau do pogisusugkuon. Om osiliu ngai’ nondo iti do tontok do rilitan do TUHAN om lingoson dau i suhat do tulun di pinokorualan dau. ²⁷ Hilo’d sodu’ nga’ okito i’ o sinundu om kagayaan do TUHAN. Tapui om lisun o pointalang di kototogod dau. Om tontok do moro-boros iyau nga’ miagal pod tapui i boros dau do monorob. ²⁸ Om suhuon dau i tongus do mogulu dau. Om miagal pori do luyud di momorulun do koinsanai’d nunu nopo. Oinsanan nopo o bansa’ dot angapatai om opupusan nondo i tongosorou diyolo’ dit araat. ²⁹ Nga’ iyokoyu nopo, i tulun do songonuon do Kinorohingan, om ongooropod i’ om modsinding kou nondo do miagal di koubasanan dokoyu do tontok do totuong do tadau dot agayo di karamayan do don tugama’. Om ooropod kou’ndo do miagal di tulun di manau-panau do mambat di tuni do suling do mongoi’d hiri’d Walai’d TUHAN, i mogobi’ dot Israil. ³⁰ Om porongohon ngai’ nondod TUHAN o tulun di boros dau dit abantug, om popurimonon dau iyolo’ di kototogod dau dit a’ ogina-gina’. Om porikot nondo iyau do tapui di kosorob, om tongus dot opuhod, om karambatu om rasam dit asapou. ³¹ Om moddosi nondo i tulun dot Asur do korongou iyolo’ di boros do TUHAN om kopuriman di kawagato’ do pomohukum dau diyolo’. ³² Om daamot di piguli-guli’ iyolo’d TUHAN do momobog, om iri nopondo tulun do songonuon do TUHAN om mambat-ambat di tuni di gandang om kecapi. Tu’ Kinorohingan no o sumaap di tulun dot Asur. ³³ Mantad poddi gulu po do nokosodia’ mantad no o tapui do ponutudan do panaraban di raja’ dot Asur. Agayo o kinoiyonon diri om nudungan do siduwon dot ogumu’. Om popuhoboon nondod TUHAN o pinuhobo dau do paparakit di tapui.

¹ Obongou ngai’ no i tulun do mongoi pokitulung do Masir! Sumondiu daa iyolo’ di kokoriso’ do soudor do Masir, om i kuda’ dot ogumu’, om korita’- kuda’, om i piro-piro o soudor di songinsakai’d kuda’ dit ogumu’. Nga’ a’ nogi’ iyolo’ mogondos do TUHAN, i Kinorohingan dot Israil dit olidang, om a’ mokitulung dau. ² Oilo i’ o TUHAN om oilaan i’ dau i wonsoyon dau! Poporikot iyau do kosusaan, om porikoton dau i nokoboros dau do wonsoyon dau dot id tulun dit angaraat do maan do pomohukum diyolo’, om pomohukum di tulun di manahak diyolo’d kointirungan. ³ Iri nopo tulun do Masir om okon i’ ko’ Kinorohingan suwai ko’ tulun i’ toomod iyolo’. Om i kuda’ diyolo’ nga’ okon i’ ko’ suwai ko’ mantad di koubasanan, a’ i’ osundu. Tu’ soira’ nopod haro o wonsoyon do TUHAN, om iri piya bansa’ dit okoris nga’ aratu’ i’, om kotonggoi nopo dot aratu’ i bansa’ dot oluhoi di nuhupan daa di bansa’ddi. Apatai goduwo nopo iyolo’. ⁴ Boros kad TUHAN dot id doho’, ’’Poingkuro piya daa i madtatamong do dumba’ do minggiak om minggarang, nga’ a’ no iyolo’ korolosi di singa do nakapanabpo nod dumba’ dot akanon dau. Om miagal oku nogi’ iyoho’ddi, i TUHAN dit Osundu Kopio, tu’ a’ oku no ooduhan do momogompi’ do Nuluhon do Sion. ⁵ Tu’ poingkuro nopo i tombolog do mintulud do mahau-sahau do rumun dau do madtamong di tangaanak dau, om iyo oku noddi iyoho’, i TUHAN dit Osundu Kopio, do mogobi’ om mongintirung do Yorusalim,’’ ka dau. ⁶ Boros kad TUHAN, ’’Oi bansa’ dot Israil, nokowonsoi kou nod dusa dot id doho’ om suminaap kou doho’. Nga’ baino’ nopo, om guli’ kou no dot id doho’! ⁷ Om orikot indo o maso do pataamon ngai’ dokoyu i tingolig dokoyu di pirok om tamas do winonsoi, i pinopowonsoi dokoyu’d dusa. ⁸ Raagon nondo ot Asur dot id pisangadan nga’ okon i’ ko’ kinoris do tulun o karaag. Mogidu’ nondo i tulun dot Asur do mantad id pisangadan om osiliu do turipon i tangaanakwagu diyolo’. ⁹ Om mogidu’ nondo i raja’ diyolo’ dot opopoddosian. Om adalaan nondod moddosi i piro-piro o boyoon do soudor diyolo’ gisom do tongkiadan nopo diyolo’ i bondira’ diyolo’ do don sumasangod,’’ ka dau. Nokopomoros no o TUHAN, i TUHAN di tukuon do hilo’d Yorusalim om i sanganu di tapui di monorob do porsombahan do hiri’d pananaraban do porsombahan.

¹ Koimbagu nopondo om haro nondo o raja’ dit otulid o pomomorinta’, om momonsoi dit otulid o koinsanai di boyoon do bansa’. ² Oinsanan nopo iyolo’ do miagal do pogintirungan do mantad id ribut om tongus dot opuhod. Om miagal iyolo’ do bawang di lumuyung dot id tana’ do kowotuan, om miagal do linungung do tontolob dit agayo dot id tana’ dit aiso’ o sumuni. ³ Om i tulun di kokito nga’ a’ i’ monompon do mato dau, om i korongou nga’ mamadul indo. ⁴ Om a’ nondo iyolo’ ohurolo, om a’ ahago-hago nga’ momusorou kopio iyolo’ do tontok do momonsoi do nunu nopo om otulid o ginawo do tontok do moro-boros. ⁵ Om aiso’ nondo o momusorou dot osonong i basug, ko’ momoros dot otulid i monipu’. ⁶ Koboro-boroso’ nopod tulun do lowong om dongkababasug noo, om momusorou no dit angaraat do wonsoyon diyolo’. Koinsanai di wonsoyon om i poboroson diyolo’ nga’ koindaraat ngai’ nopod Kinorohingan. Om a’ i’ iyolo’ insan do papaakan di tulun do louson om a’ insan poinum di tulun do tuuhan. ⁷ Tulun nopo di basug om araat no, om angaraat o wonsoyon dau. Om mogihum nopo iyau’d ralan do mamaraag di tulun do mosikin do tudut o pamaraag, om mangantob iyau diyolo’ do manganu dit apatut diyolo’d aanu. ⁸ Nga’ tulun nopo dit osonong om otulid i’ o kowoyo-woyoon om okoris do mogobi’ dit otopot. ⁹ Oi tongoondu’ dit ongosimbayan o koposi-posion, it aiso’ o kosusaan, pokinongou kou nodti poboroson ku. ¹⁰ Osimbayan kou daa do dinondo po, nga’ haro po o sontoun om aiso’ nondo o pokukurayan dokoyu tu’ aiso’ no o tua’ dot anggur dot upuon dokoyu. ¹¹ Osimbayan tomod daa o koposi-posion dokoyu do gisom do baino’, om aiso’ i’ o kosusaan; nga’ gagarai kou no dot opopoddosian! Iduwo’ no ino pakayan dokoyu om poogkoso’ no i kain do papakayon do mogihad do hino’d tawak dokoyu. ¹² Lompud kou nod mihad tu’ naraag no o tumo dokoyu dit ongoluluhub, om i kabun dot anggur dokoyu. ¹³ Om rugi poddi o sumuni do hilo’d tana’ do bansa’ ku. Pogihadai no dokoyu i walai dit iyonon do tulun di rumamai om i bandar di poimponu’d karamayan. ¹⁴ Iri piya walai do raja’ nga’ tongkiadan indo om pogiiduan i bandar dot agayo. I kawalayan om i kuta’ do pogintirungan di madtamong daa di bandar nga’ poingraag no kasai’ do gisom dot alaid. Om iri pondo kaladai di lalang o minghombo do hiri, om pangakan-ngakanan do dumba’. ¹⁵ Nga’ insan po kawagu do polintuhunan toko’d Kinorohingan di Rusod dau. Om oluhub nondo i tana’ dit okorop, om tumo nga’ ongosonong o tua’ do totonomon. ¹⁶ Om owonsoi nondo it otopot om it otulid do pointongkop di pomogunan. ¹⁷ Om momonsoi ngai’ nopondo dit osonong o tulun om haro nondo o kosimbayanan om aiso’ o koligagaanan do gisom dot alaid. ¹⁸ Om aiso’ nondo o kosusaan do tulun di songonuon do Kinorohingan, om poingiyon iyolo’ dot id kinoiyonon di haro o kosimbayanan om kouludan. ¹⁹ - ²⁰ Olumaag ngai’ kou no tu’ kabagal i’ o waig do momoyopos di totonomon dokoyu, om i tayam-tayam dokoyu nga’ kapangakan-ngakan nondo do honggo nopo, om aiso’ o koligagaanan. Nga’ iri nopo pisangod om iyo poddi gouton dot asandatan do karambatu om araag o bandar diyolo’.

¹ Obungou no i pisangod toko’! Tu’ minanakau om minagakal iyolo’, mulong piya dot a’ i’ daa iyolo’ napanakahan ko’ naakalan. Nga’ opupusan indo i maso diyolo’ do manakau om magakal, om iyolo’ nondo ot apanakahan om aakalan. ² Oi TUHAN, insianai no iyahai, iya’ no o pagandasan dahai. Gompio’ no iyahai do pointikid do tadau om poiduwon no iyahai do tontok do haro o kosusaan. ³ Soira’ nopo do sumaap ko do bagi’ dahai, om mogidu’ ngai’ nopo i bansa’ do mantad id kohiyoo’ do pisangadan. ⁴ Om iri nopondo konunu-nunuan diyolo’ nga’ aanu ngai’ nopo om atanggayan do pisangod. ⁵ Abantug no kopio o TUHAN! Iyau no o momorinta’ do koinsanai do nunu nopo. Om pogiroton dau it otulid om it otopot do hilo’d Yorusalim, ⁶ om manahak iyau do kosimbayanan di bansa’. Gompion kasai’ i’ dau i tulun dau, om onuan dau iyolo’ do toilaan om pomusarahan dot atarom. Momusou i’ iyolo’d TUHAN; om iri no o panakadapu’ diyolo’ dit agayo kopio. ⁷ Minglohou poo do mokiuhup i tulun di gunsiou. Om i piro-piro o wakil do pomorinta’ di mumbal daa do papaharo do kouludan nga’ mingihad po tomod. ⁸ Om i ralan magayo nga’ noponu’ pod koligagaanan gisom dot aiso’ no o tulun do maya’d hiri. I pinogibatas-batasan nga’ a’ no sulungon om i pinitoruan nga’ tolibambanan. Aiso’ no o pusohon. ⁹ Om aiso’ noddi ot ohiyo do hiri’d pomogunan tu’ nopogitotongkiadan po. Nongoriou ngai’ no i puru’ do Libanon, om i rantai do Saron dit oluhub nga’ miagal pod tana’ do kowotuan. Om tumatak ngai’ po o roun do kayu do hilo’d Basan om hilo’d Nuluhon do Karmol. ¹⁰ Boros kad TUHAN dot id piro-piro o bansa’ddi, ’’Powonsoyon ku nondo do dinondo i wonsoyon ku. Om pokitonon ku iyokoyu do kogoyoo’ do sinundu ku. ¹¹ Aiso’ i’ o kotutukon di pinsorohon dokoyu do wonsoyon dokoyu, om aiso’ o guna’ do koinsanai di wonsoyon dokoyu. Om iri no i kototogod dokoyu di miagal pod tapui, o kapatai dokoyu. ¹² Om aapu kou nopondo do miagal di kakahut do sorobon di wonsoyon do tapu, om miagal di rugi tu’ aawu nopo dot osorob. ¹³ Pologoson no it id somok om it id sodu’ do korongou di nowonsoi ku om otumbayaan di kuasa’ ku,’’ ka dau. ¹⁴ Songgogor-gogor po dot opopoddosian i tulun do kidusa do hilo’d Sion. Boros ka diyolo’, ’’Ibutus nopod Kinorohingan nga’ miagal po di tapui dit aiso’ o kotingkadan do molob-ngolob. Haro po tuu daa’ndo dati’ ot apasi do mantad id tapui do miagal diri?’’ ka diyolo’. ¹⁵ Apasi kou i’ ondung poboroson dokoyu it otopot om wonsoyon dokoyu it osonong. Kada’ dokoyu pakayo’ ino kuasa’ dokoyu do pagakal do tulun di mosikin, om kada’ kou ramit do tusin di ponisip do tulun dokoyu. Kada’ kou ponokitanud di tulun di momusorou do mamatai’d wokon ko’ i momusorou do momonsoi dot araat. ¹⁶ Om osimbayan kou indo om aiso’ no o koligagaanan dokoyu, tu’ miagal po do poinsuang kou’d kuta’ do pogintirungan dit ogirot. Om haro indo o takanon do kanon dokoyu om haro o waig dot inumon. ¹⁷ Orikot indo o maso do kokito kou do songulun o raja’ do momorinta’ do mikuwo’d kagayaan dau, dot id pomogunan dit agayo kopio. ¹⁸ Om iri nopo kopoddosian dokoyu di bansa’d suwai di monimung do sukai om tulun di mongoi ponoluku’ nga’ susui-susui poo di maso’d nakatalib. ¹⁹ Om a’ kou nondo kokito di bansa’d suwai dit angasawat o ginawo do mimboros do boros dit a’ dokoyu osuhutan. ²⁰ Ontong pogi’ do Sion, i bandar do pamaramayan toko’ di tadau dot agayo do tugama’ toko’. Antangai pogi’ o Yorusalim! Osiliu nondo iri do tiyonon dit aiso’ o koligagaanan! Osiliu nondo iri do miagal do kiim dit a’ insan poundoliho’, it a’ i’ insan kokodong i pinakagasan do tali, om a’ insan koputut i tali. ²¹ Om pokitonon toko’ nondod TUHAN do kagayaan dau. Om miyon toko’ nondo dot id toning do bawang dit agayo, nga’ a’ i’ koongoi do hiri i kapal do rahat di pisangod. ²² - ²³ TUHAN no o raja’ toko’, om TUHAN no o momorinta’ om mamasi dati’ do mantad id pisangod. Aiso’ no o guna’ di koburu-buruon di hiri’d kapal do rahat diyolo’; om a’ no milo dot ungkaladon i layar di kapal diyolo’. Om tontok nopondoddi om pogibohogi-hogion nondod tulun i nangaahau diyolo’ do mantad id pisangod. Om iri piya i tulun do kakung nga’ kaanu id bahagi, tu’ ogumu’ kopio i’ i dapu’ do nangaanu diyolo’ do mantad id soudor do pisangod. ²⁴ Om aiso’ nondo o tongosongulun piya di tulun di poingiyon do hiri’d pomogunan toko’ do momoros do kitoruol iyau, om koinsanai’d dusa do tulun do hiri nga’ ongoompunan ngai’ nondo.

¹ Kainou no, oi tulun do mantad id koinsanai’d bansa’! Timung ngai’ kou nod hiti do mongoi pokinongou. Mongoi ngai’ nod hiti o pointongkop do pomogunan om koinsanai di poingiyon do hiri do mongoi pokinongou. ² Otogod o TUHAN do koinsanai’d bansa’ om koinsanai do soudor diyolo’. Om nohukuman no dau iyolo’ do kapatayon. ³ Om a’ indo olobong o rata’ diyolo’, suwai ko’ poingiliu tomod nopo do mumang pasa’ om mutong. Om aragang ngai’ pondo i nuluhon do notounan do raha’. ⁴ Om tumanus ngai’ nopondo i tadau, om i tulan, om i rombituon. Om tumagak nondo ilo tawan do miagal do karatas di linopi, om ilo rombituon nga’ rumatu’ ngai’ nondo do miagal do roun do kayu di lumoho. ⁵ Nokosodia’ nod TUHAN i gayang dau do hilo’d surga om sumondot nondo iri dot id tulun dot Idom, i tulun di natantu’ mantad nod hukuman om patayon. ⁶ Om otounan pondod raha’ om lunok diyolo’, i gayang do TUHAN do miagal pod raha’ om lunok do tayam-tayam do maan do porsombahan do sumbolion. Om posodia’ nondo o TUHAN do porsombahan do sumbolion do hilo’d bandar do Bosra, om iti no o ponumbolian dot agayo kopio do hilo’d tana’ dot Idom. ⁷ Om patayon nopondo i tulun do miagal do sapi’ di lalang om sapi’ dit ongokoro’ po. Om otongkop pondod raha’ om lunok iti pomogunan. ⁸ Om iti no o maso’d posion do TUHAN o Sion om sulian ngai’ dau i pisangod dau. ⁹ Om sumiliu nondod tir o kabawang-bawangan dot Idom om i tana’ nga’ sumiliu’d tana’ do kitapui. Om miagal pondod tir o pointongkop di pomogunan do sumikit. ¹⁰ Om sumikit nondo iri do tadau om totuong, om misun-lisun nondo do gisom dot alaid. Om aiso’ nondo o tanom-tanom om aiso’ o sumuni do hiri’d tana’ diri do solinaid do piro-piro nahatus o toun, om aiso’ nondo o tulun do mumbal do maya’ do hiri. ¹¹ Puok po om bangkahak o mongiyon-ngiyon di pomogunan diri. Om silihon nondo kawagu’d TUHAN do tana’ dit aiso’ o sumuni o kinoiyonon diri, do miagal di wonsoyo’ i’ dau. ¹² Om aiso’ nondo o raja’ do momorinta’ di pomogunan diri, om i piro-piro o boyoon nga’ a’ ngai’ no hino’d hiri. ¹³ Rugi pondo o sumuni do hiri’d walai do raja’ om hiri’d bandar di kitolig, om puok pondo om toni o mongiyon-ngiyon do hiri. ¹⁴ Om iri po nintorusan o minghombo’d hiri, om mogilohou-lohou pondo i tomburio. Om rumikot nondod hiri i tomburio do dongotuong do mongoi pogihum dot undorongon dau’d hiri. ¹⁵ Om momonsoi nondod rumun i puok, om mogontolu’, om mangadsa’ di tontolu’ dau. Om hilo’ no o pomogompian dau di tangaanak dau. Om mogisuhut-suhut nopondo i tombolog di mangangakan do daging do tumimung do hilo’. ¹⁶ Ihumo’ pogi’ om basaon no i buuk do TUHAN. Aiso’ i’ o tiso’ piya di songimpasi dot atagak ko’ aiso’ o koruhang. Tu’ iyo noddi o pinonuhuan do TUHAN, om iyau no o monimung diyolo’. ¹⁷ TUHAN no o mamahagi’ di tana’ do poikidon dot id diyolo’. Tikidan nopo dau iyolo’ddi. Om hilo’ nondo o tiyonon diyolo’ do gisom do kopogisowoli-woli o sinakagon, om iyolo’ nondo o sanganu’ddi do gisom dot alaid.

¹ Ooropod nondo i tana’ do kowotuan, om mungkaya’ nondo o tusak do bunga do hiri’d tana’ dot otuu om kowotuan. ² Modsinding nondo, om mimpangkis dot atataadan i tana’ do kowotuan, om olumis iri do miagal do Nuluhon do Libanon, om oluhub do miagal di rantai do Karmol om Saron. Om kokito ngai’ nopondo o tulun di kagayaan do TUHAN om i kobontugo’ dau om i sinundu dau. ³ Pokoriso’ no o longon di lopuhon, om poponggoron i totud di gagaran. ⁴ Sunudan ngai’ no i tulun dit oluhoi o ginawo do poingkaa, ’’Pogiroton no dokoyu o ginawo dokoyu om kada’ kou poddosi, tu’ rumikot i’ o Kinorohingan do mongoi popoidu’ dokoyu, om rumikot do mongoi pomohukum di pisangod dokoyu,’’ kanto. ⁵ Om kokito nondo i bolou, om korongou i bosukon. ⁶ Om minsimbul nondo i kakung do miagal po di tambang, om i tulun di bobou nga’ mimpangkis dot atataadan. Om lumuyung nondo o bawang do hilo’d tana’ do kowotuan. ⁷ Sumiliu nondod kulam di poimponu’d waig i pasir dit alasu’, om otongkop do tudan do waig i tana’ dot otuu. Om iri nopo kinoiyonon di pinghambaan do toni di gulu po, nga’ sunian nondod sakot om bundusan. ⁸ Om haro’ndo o ralan magayo do hilo’, do roitan do, ’’Ralan do kumaa id koposion’’. Aiso’ i’ o tulun do kidusa do maya’ do ralan diri, om aiso’ o tulun do basug do mongoi pamalid di tulun do sumusui do ralan diri. ⁹ Aiso’ i’ o singa do hiri’d ralan diri, om nintorusan dit araat nga’ aiso’ i’. Om iri nopo tulun di nangapasi do TUHAN, om iri no ralan diri o wayaan do muli’. ¹⁰ Om ongotood nopondo iyolo’ do korikot do hilo’d Yorusalim, om minsinding po om mimpangkis dot atataadan. Om otood nondo iyolo’ do gisom do poingompus, om koidu’ do mantad id katangaban om kosusaan do ginawo.

¹ Tontok di kohopod om apat do toun do momorinta’ i Raja’ Hiskia do hilo’d Yohuda, om rikot no i Raja’ Sanhorib do minongoi panangod om minongoi panganu di bandar dot ongkitolig do hilo’d Yohuda. I Sanhorib nopo om raja’ dot Asur. ² Om suhuo’ noddi dau i monininggarung do tinumon dau, i mantad hilo’d Lakis do mongoi’d hilo’d Yorusalim do miwoyo’ do soudor dot ogumu’ do mongoi pononsog di Hiskia do minsiriba’ dot id dau. Om awang noddi iyolo’ do hilo’d ralan dit id toning do pomuru-buruan di gompomonsoi’d kain, om i haro o solunsug do waig do mantad hiri’d kulam di ponong id sokid. ³ Om ngoyo’ no i monininggarung do tinumon di raja’ solowoto’ do tolu o pagawai di Hiskia. Iyolo’ nopo nga’ i Iliakim i tanak di Hilkia, i boyoon do walai’d raja’, i Sibna, i gomponulis do pomorinta’, om i Yoa i tanak di Asap, i popoopi’ do tusin do pomorinta’. ⁴ Om sunudai no di monininggarung iyolo’ dot orohian i raja’ dot Asur do koilo ondung nokuro tu’ asangal kopio i Raja’ Hiskia. ⁵ Om boros ka kawagu dau, ’’Ondos daa dokoyu om kaala’ do toilaan om posukan do soudor di kirapo-rapo o boros no toomod? Isai daa o tosorou dokoyu do monguhup dokoyu do sumaap dot Asur? ⁶ Minogondos kou daa dot itulung do mantad hilo’d Masir: nga’ iyokoyu nopo om miagal nod tulun di kisukud do sumbiling. Tu’ otipu’ nondori om iri i longon di tulun di kisukud o tosuhak. Iyo noddi sumbiling diri i Raja’ do Masir dot id koinsanai’d tulun di sumondiu dau,’’ ka. ⁷ Om boros ka kawagu di pagawai dot Asur diri, ’’Ko’ poboroson daa dokoyu do mogondos kou’d TUHAN, i Kinorohingan dokoyu? Nga’ okon toi ko’ i Hiskia nogi’ i miningraag di tiyonon do papatahak do porsombahan om i pananaraban do porsombahan dot id TUHAN, om i minonuhu’d tulun do Yohuda om Yorusalim do tumuku’ dot id dotimbabaan dot iso’ noo o pananaraban do porsombahan di hilo’d Yorusalim? ⁸ Monokitaru’ oku diya’ dot id suang do ngaran di raja’ dot Asur, dot onuan ku iya’ do duwo noribu o kuda’ do haro no tulun nu dot irad diri kogumu’ do sumakai’ddi. ⁹ A’ kou i’ kasaap di pagawai dot Asur dit osiriba’ piya kopio o pangkat om mogondos kou po daa’ndo do paatod o tulun do Masir dot id dokoyu do soudor di kikuda’ om it ongkikorita’-kuda’! ¹⁰ Ondos daa dokoyu om mongoi toomod oku panangod diti pomogunan dokoyu’dti dot a’ o TUHAN monulung doho’? TUHAN i’ o minonuhu’ doho’ do mongoi panangod om mongoi pamaraag diti pomogunan diti,’’ ka dau. ¹¹ Om boros kaddi di Iliakim, om i Sibna, om i Yoa dot id monininggarung do tinumon diri, ’’Oi Tuan, boro-boros nopo dahai dot id suang do boros dot Aram tu’ kosuhut i’ iyahai do boros diri. Kada’ pimboros do boros dot Ibrani. Tu’ kosuhut ngai’ nondo ilo tulun do hodi’d timpak do tolig do bandar,’’ ka diyolo’. ¹² Om boros ka di monininggarung do tinumon do suminimbar, ’’Ondos daa dokoyu om sinuhu’ oku di raja’ dot Asur do poboros diti dot id dokoyu noo om id raja’ dokoyu. Amu’. Poboroson ku nogi’ iti dot id tulun dilo songirikau do hodi’d timpak do tolig tu’ iyolo’ nga’ kotonggoi indo dokoyu do mangakan do taii’ om monginum do sobu diyolo’,’’ ka dau. ¹³ Om ingkakat noddi i monininggarung om pimboros no iyau do boros dot Ibrani dot opuhod kopio. Boros ka dau, ’’Pokinongou kou no do boros di raja’ dot Asur dot id dokoyu! ¹⁴ Popoinsan iyau dokoyu om a’ kou i’ aakalan di Hiskia. Tu’ a’ i’ kapasi dokoyu i Hiskia. ¹⁵ Om kada’ kou tanud di boros do monuhu’ do mogondos do TUHAN. Kada’ dokoyu soroho’ do kapasi o TUHAN dokoyu, ko’ kaantob po iyau do soudor dot Asur do mongoi ponolod do bandar dokoyu. ¹⁶ Kada’ kou pokinongou di Hiskia. Monuhu’ dokoyu i raja’ dot Asur do sumoliwan do mantad id bandar dokoyu om minsiriba’ dot id dau. Tu’ pologoson ngai’ kou i’ dau do mangakan do tua’ dot anggur do mantad id guas dot anggur dokoyu om mangakan di tua’ dot ara dokoyu. Om pologoson kou dau do monginum do waig do mantad id torobong dokoyu, ¹⁷ do gisom do kawaliu kou dau dot id iso’ o pomogunan di miagal-agal do pomogunan dokoyu, i kikabun dot anggur om kigandum do wonsoyon do roti do kanon dokoyu. ¹⁸ Kada’ kou nogi’ kopio kaakalai di Hiskia om kada’ kou pomusorou do mamasi dokoyu o TUHAN. Honggo o tingolig do nokoumbal do minamasi do pomogunan dau do mantad id raja’ do pomogunan dot Asur? ¹⁹ Honggo ngai’ noddi i tingolig do Hamat om Arpad do baino’? Om honggo ngai’ no i tingolig do Soparwaim? Haro toi o minongoi pamasi do Samaria? ²⁰ Aiso’ po o tiso’ di tingolig diyolo’ do nakapasi do pomogunan dau do mantad id raja’ dahai. Om nokuro’ddi tu’ momusorou kou do kapasi o TUHAN do Yorusalim?’’ ka dau. ²¹ Om kada’ nopo ungkomi i rayat tu’ iyo noddi o pinonuhuan di Hiskia. Aiso’ nopo o boros diyolo’. ²² Om hurako’ nopo di Iliakim, om i Sibna om i Yoa o pakayan diyolo’ dot atatangaban. Om uli’ no iyolo’ om posunudo’ no diyolo’ dot id raja’ i pinoboros di monininggarung do tinumon di raja’ dot Asur diri.

¹ Om tontok di norongou di Raja’ Hiskia i pinoboros di tolu o tulun diri om hurako’ nopo dau o pakayan dau dot atatangaban. Om panampakai no iyau di pakayan do mogihad om ongoi no do hiri’d Walai’d Sasambayangan dot Agayo. ² Om suhuo’ no dau i Iliakim, i boyoon do walai’d raja’, om i Sibna, i gomponulis do pomorinta’, om i piro-piro ot imam di molohing no do mongoi solowot di Nabi Yosaya, i tanak di Amos. Om iyolo’ nga’ minanampakai nogi’ do pakayan do mogihad. ³ Om poingkaa o boros do pinonuhuan di Hiskia diyolo’ do popoboros dot id di Yosaya, ’’Tadau nod baino’ o tadau do koinggoritan; tu’ hinukuman toko’ om nintingayam toko’. Miagal toko’ po di tondu’ di mogkosusu daa nga’ adalaan no kopio koluhoi. Om a’ noddi milo do mogkosusu. ⁴ Sinuhu’ di Raja’ dot Asur i monininggarung do tinumon dau do mongindaraat do Kinorohingan di poimpasi. Om maha’ daa do norongou’d TUHAN, i Kinorohingan nu, i pinongindaraat diyolo’ddi om hukuman dau i tulun di minimboros do miagal diri. Om sambayang no dot id Kinorohingan do bagi’ diti tulun toko’ di maso do poimpasi,’’ ka. ⁵ Om soira’ di norongou di Yosaya i habar do mantad id di Hiskia diri, ⁶ om simbaro’ no dau do poingkaa, ’’Momisunud o TUHAN diya’ dot a’ moddosi di tulun dot Asur do nokoboros piya iyolo’ dot a’ kapasi diya’ o TUHAN. ⁷ Tu’ pologoson nondod TUHAN i raja’ dot Asur do korongou’d habar do gisom do gumuli’ nondo iyau do hilo’d pomogunan dau. Om patayon nondo iyau’d hilo’,’’ ka. ⁸ Om koilaai noddi di monininggarung do tinumon do raja’ dot Asur diri do nokotongkiad no i raja’ dau do mantad hilo’d Lakis om maso no dau do sumangod do bandar do Libna, i bandar dit osomok do mantad hiri. Om ongoi noddi i monininggarung do tinumon diri solowot di raja’ dau do hilo’. ⁹ Om maso iddi do nokorongou i tulun dot Asur do habar do maso nod mongoi panangod diyolo’ i soudor do Masir, do winoyo’ di Tirhaka, i raja’ dot Etiopia. Om tontok di norongou di raja’ dot Asur o habar diri om pokirim no iyau do surat dot id di Hiskia, ¹⁰ i raja’ do Yohuda. Poingkaa o suang di surat dau, ’’Minomisunud daa diya’ o Kinorohingan nu, i sondihon nu’ddi dot a’ tiya’ aala’, nga’ kada’ nogi’ kaakalai’ddi. ¹¹ Tu’ nokorongou ko no di winonsoi di raja’ dot Asur dot id koinsanai’d pomogunan di korohian dau do mamaraag. Osorou nu daa do koidu’ ko iya’? ¹² Tu’ iri taki-aki ku nga’ minamaraag nogi’ do bandar do Gosan, om Haran om Risip; om pinatai diyolo’ i tulun do hilo’d Idon, i songingiyon do hilo’d Tolasar. Aiso’ i’ o tiso’ di ponokokinorohingan diyolo’ do nakapasi diyolo’. ¹³ Honggo ngai’ i raja’ do bandar do Hamat, om Arpad, om Soparwaim, om Hina om Iwa do baino’?’’ ka. ¹⁴ Om romito’ no di Hiskia i surat diri do mantad id piro-piro o tulun di pinapaatod diri om basao’ noddi dau, om ongoi no iyau do hiri’d Walai’d Sasambayangan dot Agayo. Om poungkalado’ no dau i surat diri dot id toguang do TUHAN. ¹⁵ Om sambayang no iyau do poingkaa, ¹⁶ ’’Oi TUHAN it Osundu Kopio, i Kinorohingan dot Israil, i poirikau dot id sakai di moloikat di roitan do kerub! Iya’ noo o Kinorohingan di momorinta’ do koinsanai’d pomorintaan do hiti’d pomogunan. Om iya’ o minomonsoi do tawan om pomogunan. ¹⁷ Pokinongoho’ no iyahai do dinondo, oi TUHAN, om antangai noti nosiliu dot id dahai. Pokinongohon ngai’ no i pinimboros di Sanhorib do mongindaraat diya’, i Kinorohingan do poimpasi. ¹⁸ Koilo ngai’ no iyahai, oi TUHAN, do nakapamatai do piro-piro ginumu’ do bansa’d tulun i piro-piro o raja’ dot Asur, om nakapamaraag do piro-piro o pomogunan, ¹⁹ om tinutudan nogi’ diyolo’ i ponokokinorohingan di piro-piro o bansa’ddi — it okon i’ ko’ kinorohingan kopio tu’ aiso’ i’ o kuasa’, tu’ iri nopo om winonsoi-wonsoi nod tulun do kayu om watu do winonsoi. ²⁰ Iyo nopoddi, oi TUHAN, i Kinorohingan dahai, om poiduwo’ no iyahai do mantad id tulun dot Asur diri, om koilo ngai’ indo o bansa’ do hiti’d pomogunan dot iya’ noo, oi TUHAN, o Kinorohingan,’’ ka dau. ²¹ Om ponuhu’ noddi i Yosaya, do tulun do mongoi solowot di Hiskia om momisunud dau dot isimbar di sambayang di raja’, ²² do pasal di Sanhorib, i raja’ dot Asur. Om poingkaa o pinoboros do TUHAN, ’’Oi Sanhorib, irak-irakan ko nondo di bandar do Yorusalim, om hingi-hingion ko. ²³ Isai daa i nindaraat om nuntotori’ nu dot osorou nu, oi Sanhorib? Iyoho’ no i nindaraat nu’ddi, iyoho’ i Kinorohingan dot Israil, i Kinorohingan dit Olidang Kopio. ²⁴ Sinuhu’ nu i piro-piro o susuhuon nu do mongoi pokirayou-rayou dot id toguang ku do naala’ nu no o konuluhanan dit angakawas do hilo’d Libanon dot i piro-piro o korita’-kuda’ nu di don sumasangod o pinangala’ nu. Om minokirayou-rayou ko nogi’ do nakatagad ko di kayu sedar dit angakawas kopio om it ongolumis kopio, om nakawaya’ ko di puru’ dit akapal kopio. ²⁵ Om oondos ko nogi’ do nokopongukad ko’d torobong om nokoinum ko’d waig dot id pomogunan do suwai om narasak nu i Bawang do Nil do nopingulakan di piro-piro o soudor nu. ²⁶ A’ ko toi nokorongou do natantu’ mantad ku no do mantad di gulu po do wonsoyon ku o miagal diti? Om wonsoyon ku noddi iti do baino’. Nonuan ku iya’ do kuasa’ do mamaraag do piro-piro o bandar dit ongkitolig do gisom dot osiliu iri do pogun. ²⁷ Om aiso’ no pokukurayan di tulun do songingiyon do hilo’; moddosi po ngai’ om angagangau. Miagal po iyolo’ di sakot do hilo’d kobuturan om miagal di sakot do sumuni do hiri’d sakai’d taap do walai tu’ a’ po kosuni kopio om okoring no do tontok dot oontok di tongus dot alasu’ do mantad id koulayon. ²⁸ Nga’ oilaan ngai’ ku i’ o pasal diya’, i wonsoyon nu om it ongoyon nu. Om oilaan ku i’ dot otogod ko doho’. ²⁹ Norongou ku no o boros do minomisunud do sumaap ko om mokirayou-rayou ko. Om gowoi pondo om godingan ku o todung nu om kakangan ku o kabang nu, om poulion tiya’ nogindo do sumusui di ralan do winayaan nu di ruminikot ko i’,’’ ka. ³⁰ Om poingkaa’ddi o pinobilin di Yosaya dot id di Raja’ Hiskia, ’’Iti no o pogintutunan dit osiliu dot id dabantalan. Toun nopod baino’ om toun dot id dosunsudan om iri po taakanon do hilo’d gouton o kanon dokoyu, nga’ toun nopo kawagu om kapananom kou no do gandum om anggur om kaakan kou do tua’ddi. ³¹ Om iri nopondo tulun dot olu-olu’ do hilo’d Yohuda om osimbayan nondo dot iyo po di tanom di nakaralom o gamut om mongua’. ³² Om haro indo o tulun dot oolu’ do hilo’d Yorusalim om hilo’d Nuluhon do Sion tu’ nosorou mantad nod TUHAN, it Osundu Kopio, dot owonsoi o miagal diri. ³³ Iti no o pinoboros do TUHAN do pasal di raja’ dot Asur, ’A’ i’ iyau kosuang diti bandar ko’ kapapana’ dot ongoiso’ piya o pana’ dot id bandar diti. Om aiso’ i’ o soudor di kikolid do koinsomok-somok diti bandar, om aiso’ o tana’ do potimbunon do maan do ponurungku’. ³⁴ Suwai ko’ gumuli’ nopo iyau do sumusui di ralan di winayaan dau di minongoi i’ iyau’d hiti, om a’ i’ iyau kosuang diti bandar. Tu’ iyoho’ no, i TUHAN, o minomoros diti. ³⁵ Intirungan ku i’ iti bandar om tamangan ku tu’ i kosuahan ku om i batos do nokoboros ku dot id di Daud, i susuhuon ku o kopongintirungan ku,’ ka,’’ ka dau. ³⁶ Om ongoi no o moloikat do TUHAN do hiri’d kiim di tulun dot Asur om patayo’ no dau o 185,000 o soudor. Om kosuabon poddi, di tadau kawagu om songingiliu poo do nangapatai i soudor diri. ³⁷ Om pamanau noddi i Raja’ Sanhorib, i raja’ dot Asur, om poguliai no dau do hilo’d Niniwi. ³⁸ Insan tadau, di maso dau do sumambayang do hiri’d walai di Nisro, i ponokokinorohingan dau, om patayo’ no iyau di Adramilik om i Sarisir, i tangaanak dau, do gayang o pinamatai. Om poggidu’ noddi iyolo’ do hilo’d pomogunan dot Ararat. Om kosiliu noddi do raja’ i Isarhadon, i tanak di Sanhorib do suwai do suminowoli dau.

¹ Om tontok noddi do suminakit i Hiskia om oruhai no daa iyau dot apatai. Om rikot no i Nabi Yosaya, i tanak di Amos do minongoi kakap dau, om boro-boros no dot id dau do poingkaa, ’’Suhuon ko’d TUHAN do mongintod-intod do sompiiyon nu tu’ matai ko no; a’ ko no olingasan,’’ ka dau. ² Om togiging no i Hiskia do tuminoguang di limput om sambayang no iyau dot id TUHAN. ³ Boros ka dau, ’’Soroho’ no, oi TUHAN, dot otorodok kasai’ oku i’ dot id diya’ om otulid o winonsoi ku, om tuminotos oku do minomonsoi di korohian nu,’’ ka. Om pingihad no tomod iyau. ⁴ Om suhuo’ no kawagu’d TUHAN i Yosaya ⁵ do minongoi solowot di Hiskia do posunud do boros dau do poingkaa, ’’Norongou ku no i sambayang nu, om nokito ku i romou nu, iyoho’ i TUHAN, i Kinorohingan di tukuon di Daud, i taki-aki nu. Om pologoson ku i’ iya’ do poimpasi do solinaid do hopod om limo toun. ⁶ Om poiduwon ku i’ iya’ om iti bandar do Yorusalim do mantad id raja’ dot Asur om intirungan kasai’ ku iti bandar,’’ ka dau. ⁷ Om boros ka di Yosaya, ’’Iti no o pogintutunan nu do wonsoyon kopio’d TUHAN i nakabatos dau. ⁸ Pologoson do TUHAN do kosunsuri do hopod o garis i sangai do hilo’d pagantangan do kasawato’d tadau di winonsoi di Raja’ Ahas,’’ ka dau. Om sunsuri noddi do hopod o garis i sangai do pogontong do kasawato’d tadau. ⁹ Om soira’ di nolingasan i Hiskia om ponulis no iyau do sinding do pamarayou. Iti no i tinulis dau: ¹⁰ Ondos ku no daa om kumaa oku do hilo’d pomogunan do tulun do napatai di tangaumur oku nogi’, om a’ oku no koumbal do kolohing. ¹¹ Ondos ku daa om a’ oku no kokito’d TUHAN do maso ku po do hiti’d pomogunan do tulun do poimpasi, om a’ kokito do tulun di poimpasi do hiti’d pomogunan. ¹² Nongoi onuo’ o pinuhobo ku, do miagal pod kiim di hinunduk do tulun; om miagal di kain di ginunting do mantad hiri’d pinorilitan di pangawalan; ondos ku daa om pupusan nod Kinorohingan o koposion ku. ¹³ Monuaban oku nopod mihad dot orurualan, do miagal po di tipu-tipuon do singa o tulang ku; om ondos ku daa om pupusan nod Kinorohingan o koposion ku. ¹⁴ Opian no om oluhoi no o boros ku, om modoi-odoi oku po do miagal di punai. Opodi’ poddi o mato ku dot ouru’d montong do hilo’d sawat, oi TUHAN, poiduwo’ oku no do mantad id koinsanai’d kosusaan diti. ¹⁵ Nunu po o poboroson ku? Tu’ TUHAN i’ o pinoporikot diti; om araat tomod diri o ginawo ku om a’ oku no koodop. ¹⁶ Oi TUHAN, masi oku i’ do bagi’ diya’, om lingasai oku no om ponoruo’ no o tumur ku. ¹⁷ Om osiliu indo do kosimbayanan i koinggoritan ku, tu’ pinoidu’ oku i’ diya’ do mantad id koligagaanan; om nompunan ngai’ nu o dusa ku. ¹⁸ Aiso’ no o milo’d mamarayou diya’ do hilo’d pomogunan do tulun do napatai, a’ no milo’d sumondiu do kotorodoko’ nu i tulun di nangapatai. ¹⁹ Iri no i tulun di poimpasi o milo do mamarayou diya’, do miagal diti wonsoyon ku’d dinondo. Sunudan nondo di piro-piro o molohing i tangaanak diyolo’, do kotorodoko’ nu. ²⁰ Oi TUHAN, nolingasan oku no diya’, om pouni nondo iyahai do kecapi om modsinding iyahai do mamarayou diya’, do hiri’d Walai’d Sasambayangan dot Agayo do solinaid dahai do poimpasi. ²¹ Om ponuhu’ noddi i Yosaya do tulun do mongoi poluhad do tua’ dot ara di hinotok do hiri’d kupos di Hiskia. ²² Om ponguhot no i Raja’ Hiskia, ’’Nunu o koilaan kopio do lingasan oku’d TUHAN om koongoi oku indo kawagu do hilo’d Walai’d Sasambayangan dot Agayo?’’ ka.

¹ Om tontok no do maso’ddi do nokorongou i raja’ do Babil, i Mirodak- Baladan, i tanak di Baladan, do suminakit i Hiskia nga’ nolingasan iddi iyau. Om pokirimai no dau iyau do surat om ipuhawang. ² Om posolokoyo’ no di Hiskia i piro-piro o susuhuon diri om pointongo’ no dau iyolo’ di kakayaan dau, i pirok om i tamas dau, om i rampa om i tumau dau dit osonong o kosingudan, om koinsanai di rapo-rapo do soudor dau. Om aiso’ no o hiri’d poopian dau ko’ hiri pod pomogunan di porintaon dau dot a’ dau pinokitanan diyolo’. ³ Om ongoi noddi i Nabi Yosaya do hiri’d di Raja’ Hiskia, om ponguhot no iyau’d poingkaa, ’’Hinonggo o tadon di piro-piro o tulun diri om nunu ka diyolo’ dot id diya’?’’ ka dau. Om boros ka di Hiskia, ’’Mantad iyolo’d hilo’d Babil, i pomogunan di hilo’d sodu’ kopio,’’ ka dau. ⁴ ’’Nunu no o nokito diyolo’d hiti’d walai’d raja’?’’ ka kawagu di Yosaya do minonguhot. Om boros ka di Hiskia, ’’Nokito ngai’ no diyolo’. Aiso’ no ot a’ ku pinokitanan diyolo’ do hilo’d poopian,’’ ka dau. ⁵ Om sunudai noddi di Yosaya i raja’, boros ka dau, ’’Boros kad TUHAN, it Osundu Kopio om, ⁶ rumikot nondo o maso dot atanggayan ngai’ do hilo’d Babil o koinsanai di hiti’d walai nu, om koinsanai di nokoopi’ di taki-aki nu do gisom do tadau’d baino’. Aiso’ no ot oolu’ddi. ⁷ Om iri piya sinakagon nu nga’ atanggayan i’ o wookon diyolo’ do hilo’d Babil om silihon do pagawai di raja’ do Babil do hiri’d walai’d raja’,’’ ka dau. ⁸ Om boros ka di Hiskia dot id di Yosaya, ’’Osonong no i boros do TUHAN do pinoboros dot id doho’ddi,’’ ka dau. Tu’ osorou nopo dau om poingkaa, ’’Haro po o kosimbayanan om aiso’ o koligagaanan do solinaid ku pod poimpasi,’’ ka.

¹ Boros kad Kinorohingan toko’, ’’Insasamadai no i tulun ku, insasamadan no iyolo’! ² Odsuuro’ no i tulun do hilo’d Yorusalim, om sunudan no iyolo’ dot ula’ no o koloido’ diyolo’ dot oinggorit. Om noompunan ku noddi i dusa diyolo’, nopupusan no o pomohukum ku di dusa diyolo’,’’ ka. ³ Haro o tulun do millohou do poingkaa, ’’Wansayan mantad nod ralan do wayaan do TUHAN o hilo’d tana’ do kowotuan. Om potingon no o ralan do hilo’d tana’ do kowotuan, do wayaan do Kinorohingan toko’. ⁴ Olitan ngai’ no o kubong, om lampayon ngai’ o nulu-nulu. Osiliu nondod rantai ilo nuluhon, om i ralan di mingkilong nga’ opoting nondo. ⁵ Om pointalangon nondo, o kagayaan do TUHAN. Om okito ngai’ nondod tulun iri, tu’ nakabatos mantad nod TUHAN iti,’’ ka. ⁶ Haro o tulun do millohou do poingkaa, ’’Popinsunudo’ no i habar,’’ ka. ’’Nunu o habar do popinsunudon ku?’’ kangku do minuhot. ’’Popinsunudo’ no, tu’ koinsanai’d tulun om miagal nod sakot, om a’ i’ iyolo’ otogui ko’ mantad di tusak do bunga do hilo’d gouton. ⁷ Rumiou i’ o sakot om tusak do bunga nga’ lumoho i’ do tontok do potonguson do TUHAN i ribut. Tulun nga’ a’ i’ otogui ko’ mantad di sakot. ⁸ Rumiou i’ o sakot om lumoho o tusak do bunga, nga’ boros nopod Kinorohingan om hino kasai’ i’ do gisom do poingompus,’’ ka. ⁹ Takad no do nuluhon dit akawas om popinsunudon no i habar dot osonong dot id Yorusalim. Pinglohou no dot opuhod, om popinsunudon no i habar dot osonong dot id Sion. Sunudan no i bandar do hilo’d Yohuda do rumikot i Kinorohingan diyolo’. ¹⁰ Rumikot no o TUHAN, i Kinorohingan do mongoi pomorinta’ do mikuwo’d sinundu om kokoriso’ dau do miwoyo’ do tulun di napasi dau. ¹¹ Om gompion i’ dau i tulun dau do miagal di gompomogompi’ do dumba’, om timungon ngai’ dau i tangaanak do dumba’; om kibiton dau, om woyoon dau kosonong-sonong i molohing do dumba’. ¹² Haro toi o tulun do milo do magadang dilo rahat do palad o ponimbauk, ko’ milo po do mamarangau dilo tawan do tunturu’ o pamarangau? Haro toi o tulun do milo’d posuang do tana’ diti pomogunan dot id sangkir, ko’ milo pod monimbang dilo nuluhon om nulu-nulu dot id ponimbangan? ¹³ Haro toi o tulun do milo’d momisunud di Rusod do TUHAN dit apatut dau’d wonsoyon? Isai no o milo do monuduk dau ko’ monosihat po dau? ¹⁴ Isai no o ponokiboro-boros do Kinorohingan, om koilo i’ iyau do ralan dit otulid, om kosuhut iyau om kopinsingilo ondung poingkuro o pomomonsoi do nunu nopo? ¹⁵ Koinsanai do bansa’d tulun om aiso’ i’ toomod dot id TUHAN, tu’ miagal nod sontiri’ o waig; om i piro-piro o pulou di hilo’d sodu’ nga’ miagal nod liohuk kagaan. ¹⁶ A’ i’ kabagal do maan do porsombahan do sorobon, do toinsanan piya i nintorusan do hilo’d puru’ do Libanon. Om oinsanan piya i kayu, nga’ okuri’ i’ kopio do maan do siduwon do pomurakit di tapui. ¹⁷ Koinsanai’ddi bansa’, nga’ aiso’ i’ toomod dot id dau. ¹⁸ Isai poo o poiyaan do Kinorohingan, poingkuro ko’d poboros do korupa-rupao’ dau? ¹⁹ A’ i’ iyau miagal di tininganak di wonsoyon do tulun, it urogupan do tamas om poimpohon nogindo dot id pirok. ²⁰ Om iri no i tulun dit a’ kaanu do pirok ko’ tamas, om momili’ do kayu dit a’ obingromuk. Om mogihum nondo iyau do tukang do momonsoi di tininganak, om a’ i’ iri ahaba’. ²¹ A’ kou toi koilo? A’ kou toi nosunudan di gulu po? A’ kou toi nokoilo, ondung poingkuro do minomonsoi diti pomogunan? ²² Minomonsoi nopodti om i poirikau do hiri’d tirikohonon dau do don raja’ dit id sawat ko’ iti pomogunan om id sawat ko’ ilo tawan, om tulun nopo do hiti’d pomogunan om miagal nod kilau kokoro’. Om pawalado’ no dau ilo tawan do miagal do kain, om miagal do kiim di tiyonon do tulun. ²³ Poinsiribaon ngai’ dau i pomorinta’ dit angagayo o kuasa’, om gisom dot aiso’ nondo o kuasa’ diyolo’, om aiso’ o pokukurayan. ²⁴ Miagal po iyolo’d tanom-tanom dit okoro’ po, i wagu po kosobul om a’ po nokopomugamut. Tu’ soira’ nopod porikoton do TUHAN o tongus, om rumiou nopo om otilib do miagal do sakot di nokoring. ²⁵ Isai poo o milo do poiyaan do Kinorohingan dit Olidang Kopio, haro toi o suwai do miagal dau? ²⁶ Tingaha’ pogi’ do hilo’d tawan, isai o minomonsoi di rombituon dot okito dokoyu? Iri nopo i momoyo’ diyolo’ do miagal do soudor, om koilo i’ ondung piro o kogumuo’ddi, om kotutun do ngaran do pointikid-tikid di rombituon. Ayago i’ kopio o kuasa’ dau, gisom dot iso’ po nga’ aiso’ i’ ot atagak diri. ²⁷ Oi Israil, nokuro tu’ muol-nguol ko nopo do moguhang dot iyo pod a’ do TUHAN oilaan o kosusaan nu, om a’ mamadul dot oinggorit ko, om a’ manahak dit otulid? ²⁸ A’ ko toi koilo? Om a’ ko toi nokorongou? TUHAN nopo om Kinorohingan i’ di poingompus. Om iyau no o minomonsoi do koinsanai diti pomogunan, a’ i’ iyau insan dot ohuyan ko’ apaasan. Om aiso’ i’ o tongosongulun piya do kosuhut do pomusarahan dau. ²⁹ Onuan dau do kokorisan i tulun dot oluhoi, om i tulun dit a’ kogoos. ³⁰ Iri piya it omulok po nga’ lumuhoi i’, om tangaanakwagu nga’ ahaba’ i’ dot adalaan kohuyan. ³¹ Nga’ tulun nopo di mogondos do TUHAN, om i mokiuhup dau, om kaanu i’ do kokorisan do wagu. Om minsawat nondo iyolo’ do tumulud, do kitalad do miagal di dongkondiu. Om manangkus iyolo’ nga’ a’ i’ iyolo’ ohuyan, om mamanau iyolo’ nga’ a’ i’ iyolo’ lumuhoi.

¹ Boros kad Kinorohingan, ’’Kada’ kohiyo, om mokinongou no doho’, oi pomogunan dit ongosodu’! Sodia’ nod poboros do hal nu dot id pogibisaraan tu’ onuan ko i’ do maso do moro-boros. Kainou mogitimbaba-baba’, om oilaan i’ ondung isai ot otopot om isai i kasala’. ² Isai o pinoporikot di pomorinta’ do mantad hilo’d koulayon, om i pinapamanang dau do honggo nopo o pakayaan dau? Isai o minanahak dau do kamanangan do suminangod do raja’ om piro-piro o bansa’? Tobok-tobokon nopo dau iyolo’ di gayang do miagal po di pupuk toomod. Om pogitotompiason nopo dau iyolo’ dot i pana’ dau o popogitompias-pias, do miagal po di sakot do nokoring dot otilib do tongus. ³ Gusaon dau iyolo’ om osimbayan nopo iyau do mamanau; om osiau tomod iyau, hano-hano nod a’ kosondot do tana’ do mamanau. ⁴ Isai o pinopologos dot osiliu o miagal diri; isai i minanantu’ mantad dit ongosiliu do hiti’d pomogunan? Iyoho’ no i TUHAN, i hino mantad di timpuun i’, om iyoho’ i TUHAN, o hino kasai’ do gisom do kopupuson. ⁵ Nokokito no di nongowonsoi ku, i tongoulun do hilo’d pomogunan dit id sodu’. Om moddosi iyolo’, om pananggagaran poo dot opopoddosian. Gowoi poddi om timung ngai’ nopo iyolo’, om rikot ngai’ no iyolo’. ⁶ Mogiuhup-uhup poo, om mogiodsuur-suur i piro-piro o tukang. ⁷ Boros ka di tukang kayu, dot id tukang amas, ’Osonong no,’ ka. Odsuuron di tulun di monguragup di tininganak i tulun di popogidoko-dokot di tininganak. Boros ka diyolo’, ’Osonong no,’ ka. Om pokuan nondo diyolo’ i tininganak do popoudong om a’ i’ ahaba’. ⁸ Nga’ iyokoyu nopo, oi Israil, i susuhuon ku, om tulun i’ di nopili’ ku, i sinakagon di Abraham, i tambalut ku. ⁹ Nigitan ku iyokoyu do mantad hilo’d tisan diti pomogunan, linohou ku iyokoyu do mantad hilo’d kinoiyonon dit id sodu’ no kopio. Om boros kangku dot id dokoyu, ’Iyokoyu no o susuhuon ku,’ kangku; a’ ku i’ iyokoyu niada’ tu’ pinili’ ku i’ iyokoyu. ¹⁰ Kada’ kou poddosi, tu’ moyo-woyo’ oku i’ dokoyu, iyoho’ no o Kinorohingan dokoyu, om kada’ pologoso’ do haro o korolosi dokoyu. Pokorison ku i’ iyokoyu, om uhupan ku iyokoyu, intirungan ku i’ iyokoyu om posion ku iyokoyu. ¹¹ Tulun nopo dit otogod dokoyu, om ointingayam indo tu’ aala’ i’ iyolo’. Om tulun di sumaap dokoyu, nga’ apatai indo. ¹² Ihumon ngai’ ku po daa i pisangod dokoyu, nga’ a’ ku no iyolo’ okito. I nokoumbal do suminaap dokoyu dot id pisangadan, nga’ nangapatai noddi om a’ hino do hiti’d pomogunan. ¹³ Iyoho’ no o TUHAN, i Kinorohingan dokoyu; pokorison ku i’ iyokoyu om momoros oku do, ’Kada’ poddosi tu’ uhupan ku i’ iyokoyu,’ ka,’’ kangku. ¹⁴ Boros kad TUHAN, ’’Mulong piya dot oluhoi ko, om aiso’ o pokukurayan nu, oi Israil, nga’ kada’ i’ poddosi tu’ uhupan ku i’ iya’. Iyoho’ no, i Kinorohingan dot Israil dit olidang o mamasi diya’. ¹⁵ Silihon ku iya’ do miagal di papan do pamagamasan, di wagu po konipanai om atarom po i nipon. Gomoson ngai’ nu nondo i nuluhon om raagon nu’ri, om i konulu-nuluan nga’ osiliu tomod nopod tapol. ¹⁶ Om paatapon nu nondo iyolo’, om otilib nondo iyolo’d ribut om kotias do tongus; om otood ko nondo, tu’ iyoho’ i’ o Kinorohingan nu. Om royohon oku nondo diya’, iyoho’, i Kinorohingan dot Israil dit olidang. ¹⁷ Soira’ di mogihum do waig i tulun ku, om soira’ dit otuu o tatalanan diyolo’ dot otutuuhanan, om simbaron ku i’, iyoho’, i TUHAN, i sambayang diyolo’, om a’ ku i’, iyoho’ i Kinorohingan dot Israil, tongkiadan iyolo’, i tulun di songonuon ku. ¹⁸ Poluyungon ku nondo o bawang dot id pogialatan di nulu-nulu dit aiso’ o sumuni, om poluyungon ku o tudan do waig do hiri’d kokubangan. Silihon ku o tana’ do kowotuan do kulam do poimponu’d waig, om silihon ku i tana’ dot otuu do luyu’ di songluyung-luyung. ¹⁹ Posunion ku o kayu sedar do hilo’d tana’ do kowotuan, om posunion ku’d hilo’ i kayu akasia, om kayu murad om kayu saitun. Iri tana’ dot aiso’ o sumuni nga’ osiliu nondod puru’ do kayu sedar, om kayu sanobar om kayu berangan. ²⁰ Om okito nondod tulun iti om koilo nondo dot iyoho’, i TUHAN, o minomonsoi’ddi. Om kosuhut nondo iyolo’, do Kinorohingan no dot Israil it olidang o pinapatantu’ dot osiliu o miagal diri,’’ ka. ²¹ Poingkaa no o boros do TUHAN, i raja’ dot Israil dot id koinsanai di tingolig, ’’Poboroso’ no o hal dokoyu, koinsanai di tingolig di piro-piro o bansa’d tulun, poboroson ngai’ no i korohian dokoyu’d popoboros. ²² Kainou’d hiti om poboroson no it osiliu dot id dabantalan, om oilaan toko’ indo ondung soira’ iri dot osiliu. Susuyon no dot id pomisaraan i nongosiliu di gulu po, om sunudan no iyahai do komoyon diri. ²³ Sunudan no iyahai ondung nunu it osiliu dot id dabantalan, om oilaan indo dahai do kinorohingan kopio kou. Pomonsoi kou daa dit osonong, porikot kou daa do kosusaan, ponuo’ daa iyahai do kopoddosian om kosuayan. ²⁴ Iyokoyu nopo om koinsanai di wonsoyon dokoyu om aiso’ i’ o komoyon om aiso’ o suang, om i tulun do tumuku’ dot id dokoyu nga’ kososomu’ tomod. ²⁵ Nokopomili’ oku nod tulun di poingiyon do hilo’d koulayon, om porikoton ku’ndo do mantad hilo’d utara do mongoi sangod. Pingulakan nondo dau i tulun di momorinta’ do miagal pod burutak, om miagal po di momorun do kuron do mingulok di lagit. ²⁶ Isai dokoyu o pinopoboros mantad dot osiliu o miagal diti, om milo indo iyahai do popoboros dot otopot ko? Aiso’ i’ tiso’ dokoyu do minomoros do pasal diri, aiso’ i’ o nokorongou dokoyu do minungkomi kou dot ongoiso’ piya o boros. ²⁷ Iyoho’ no, i TUHAN, ot id gulu kopio pomisunud do bandar do Sion do habar diri minonuhu’ oku’d tulun do pinapahabar do hilo’d Yorusalim do poingkaa, ’Rumikot no i tulun nu, muli’ no iyolo’!’ ka. ²⁸ Soira’ di minontong oku do koinsanai di tingolig, om aiso’ i’ o tiso’ diyolo’ do milo do moro-boros, om aiso’ ot iso’ diyolo’ do kosimbar, di tuhoton ku. ²⁹ Aiso’ ngai’ no kopio guna-guna’ diti tingolig, do ponokokinorohingan. Ongoluhoi ngai’ i’ iti tininganak, om aiso’ o pokukurayan,’’ ka.

¹ Boros kad TUHAN, ’’Iti no i susuhuon ku, i pinokoris ku, i nopili’ ku, om i korohian ku. Noponu’ ku no iyau do kuasa’ ku, om poporikot nondo iyau dit otulid dot id pointikid-tikid do bansa’. ² A’ i’ iyau minggiak ko’ popuhod pod boros dau, ko’ mimboros po dot opuhod do hiri’d tanga’d ralan. ³ A’ i’ iyau monipu’ do poring di poinglayuk, ko’ momisok pod lampung dit okoro’ no o binandak. Om otorodok iyau do popointalang do katapatan. ⁴ A’ i’ otingkod o ginawo dau do mogondos om a’ lumuhoi o ginawo dau; tu’ popogirot i’ iyau dit otopot do hiti’d pomogunan. Om sangandad-andad nopod ponudukan dau i hilo’d pomogunan dit osodu’,’’ ka. ⁵ Kinorohingan no o minomonsoi om pinapawalad dilo tawan, om iyau o minomorun diti pomogunan om koinsanai di poinsuni do hiti. Nonuan dau do koposion om pinuhobo o koinsanai di tulun dau, om moro-boros diri o TUHAN, i Kinorohingan dot id susuhuon dau do poingkaa, ⁶ ’’Iyoho’ no, i TUHAN, o minomolohou diya’, om onuan ku iya’ do kuasa’ do momonsoi dit otulid. Om iya’ no o pawayaan ku do monokiumpongo dot id koinsanai’d tulun, om iya’ no o pawayaan ku do tulinau dot id koinsanai’d bansa’ om woyoon ku iya’ om gompion ku. ⁷ Poungkalaton nu’ndo i mato do tulun do bolou, om poiduwon nu i tulun do songinsuang dot id giil dit otuong. ⁸ Iyoho’ no, i TUHAN i Kinorohingan nu, aiso’ i’ o ponokokinorohingan di milo do poinggoyoon do suwai ko’ iyoho’. Om a’ ngai’ ku i’ pologoson i tingolig do kaanu do bahagi’ di pamarayou doho’. ⁹ Nongosiliu noddi i pinoboros ku di gulu po, om baino’ nodti om sunudan ku iyokoyu do hal do wagu, mulong piya dot a’ po nokotimpuun iti dot osiliu,’’ ka. ¹⁰ Podsinding nod sinding do wagu dot id TUHAN, royoho’ no iyau, oi koinsanai’d pomogunan. Royoho’ no iyau, oi dokoyu i lumayag do hilo’d rahat, royoho’ no iyau, oi koinsanai di songingiyon do hilo’d rahat, podsinding kou no, oi koinsanai’d pulou di hilo’d sodu’ om koinsanai di tulun di poingiyon do hino. ¹¹ Pologoson no do mamarayou’d Kinorohingan i tana’ do kowotuan om i bandar do hilo’, pologoson nod mamarayou dau i tulun do hilo’d Kidar. Pologoson no do mimpangkis dot atataadan, do hilo’d timpak do nuluhon i tulun do hilo’d bandar do Sila. ¹² Pologoson no do mamarayou om popoinggayo’d TUHAN, i tulun do poingiyon do hilo’d pomogunan dot osodu’. ¹³ Antangai pogi’, nga’ sumoliwan no o TUHAN do mongoi sangod, miagal po iyau do songulun o gunsiou, posodia’ no iyau om agayo o ginawo dau do mongoi sangod. Mamangkis iyau do tanda’ do mongoi sangod, om popointalang iyau do sinundu dau dot id pisangod. ¹⁴ Poingkaa no o boros do Kinorohingan, ’’Alaid oku no dot a’ minungkomi, om a’ oku suminimbar di tulun ku. Nga’ nokorikot noddi o maso ku do powonsoi di wonsoyon ku do baino’, om momogiak oku do miagal do tondu’ dit orualan do mogkosusu. ¹⁵ Raagon ku’ndo ilo nulu-nulu om ilo nuluhon, om riohon ku ilo sakot om kayu. Om silihon ku do kowotuan ilo bawang, om rasakan ku i kulam di poimponu’d waig. ¹⁶ Woyoon ku’ndo i tulun ku di bolou, do sumusui do ralan dit a’ diyolo’ insan kawayaai. Om silihon ku’ndo do tanawau i totuong dot id diyolo’, om potingon ku i kawayaon diyolo’ di mogikilong-kilong. Iti no o batos ku dot id diyolo’, om atantu’ no do sulungon ngai’ ku’ti. ¹⁷ Koinsanai di mogondos do tingolig, om i mamarait do kinorohingan diyolo’ i tingolig, om ountotori’ no om ointingayam,’’ ka dau. ¹⁸ Boros kad TUHAN, ’’Pokinongou ngai’ kou, oi tulun di bosukon, montong no pogi’ kopio oi koinsanai di bolou. ¹⁹ Haro po toi o tulun di bolou po ko’ mantad di susuhuon ku, om i bosukon po ko’ Israil i susuhuon ku? ²⁰ Oi Israil, ogumu’ no kopio o nokito nu, nga’ a’ nu i’ pinadul kopio iri, haro i’ o tolingo dokoyu, nga’ a’ kou i’ minokinongou kopio,’’ ka dau. ²¹ TUHAN nopo om Kinorohingan dit orohian kopio do mamasi, om orohian iyau do pusohon om poinggoyoon it oturan dau. ²² Nga’ baino’ noddi om napanakahan ngai’ no i tulun dau, om nongkosuang no iyolo’ do giil, nalawaan no iyolo’ om naratu’, om aiso’ i’ o minongoi ponulung diyolo’. ²³ Isai nopo o mokinongou diti, om tumorodok no do mokinongou’dti do mantad do baino’. ²⁴ Isai o pinapatahak dot Israil dot id tulun di minanakau dau? TUHAN i’, tu’ nokowonsoi toko’ i’ do dusa dot id dau. Om a’ toko’ minumboyo’ di ponuhuan dau, om a’ toko’ tuminanud di ponudukan dau. ²⁵ Gowoi poddi do popurimonon toko’ dau do kototogod dau, om minoningkau iyau do pisangadan do ponginggorit dati’. Om miagal pod tapui i kototogod dau do monorob do pointongkop dot Israil, nga’ a’ toko’ i’ koilo ondung nunu i nosiliu’ddi om a’ toko’ mininsingilo do mantad di nongosiliu’ddi.

¹ Oi Israil, pokinongou nod boros do TUHAN, ’’Kada’ poddosi, tu’ posion ku i’ kopio iya’. Om nolohou ku no iya’ do ngaran nu o rinait ku, tu’ iya’ no i winonsoi ku om songonuon ku. ² Om soira’ nopod sumoborong ko do waig dot aralom om woyoon ku i’ iya’, om a’ ko i’ oolitan do kosusaan; om soira’ nopo do sumalag ko’d tapui om a’ ko i’ osorob, a’ ko i’ orualan di pogumbalan dot awagat do rumikot dot id diya’. ³ Tu’ iyoho’ no i TUHAN, i Kinorohingan nu. I Kinorohingan dot Israil dit olidang, i mamasi diya’. Patahakon ku nopo o Masir do potingolonon diya’, om patahakon ku o Etiopia om Siba do posowolion diya’. ⁴ Patahakon ku nopo o koinsanai’d tulun do posowolion diya’, tu’ kigatang kopio ko i’ dot id doho’, om osianan oku i’ diya’ om pusohon ku iya’, iri no o kapatahakan ngai’ ku do bansa’ do posowolion diya’ do matai. ⁵ Kada’ poddosi om kada’ koluhoi o ginawo, tu’ moyo-woyo’ oku i’ diya’ do mongintirung diya’. Om suhuon ku nondo do tumimung, i tulun nu do mantad hilo’d koulayon om mantad hilo’d kotonobon. ⁶ Suhuon ku nondo i pomogunan do hilo’d utara do popologos diyolo’ do mamanau, om oduhan ku i pomogunan do hilo’d salatan do momusus diyolo’. Pologoso’ nod gumuli’ i tangaanak ku do mantad hilo’d pomogunan dit osodu’, om mantad do hilo’d tisan do pomogunan. ⁷ Tu’ iyolo’ no o tulun ku di pinungaranan do ngaran ku, om winonsoi ku iyolo’ do popoinggayo doho’,’’ ka. ⁸ Boros kad Kinorohingan, ’’Lohowo’ no i tulun ku do mongoi do hilo’d pomisaraan; kimato i’ daa iyolo’ nga’ a’ i’ kokito, kitolingo i’ daa nga’ a’ i’ iyolo’ korongou. ⁹ Suhuon ngai’ no i bansa’ do tumimung, suhuon ngai’ no i payat do mogititimung. Isai no diyolo’ o milo do poposunud dit osiliu dot id dabantalan? Isai no diyolo’ i pinoposunud mantad dit osiliu do dinondo? Pologoson no i piro-piro o sasi’ do mokinongou om poboroson dot otopot iyolo’. ¹⁰ Oi tulun dot Israil, iya’ no o sasi’ ku, pinili’ ku iya’ do sumiliu’d susuhuon ku, om kotutun ko indo doho’ om otumbayaan ko, om kosuhut ko dot iyoho’ no o Kinorohingan om aiso’ no o suwai ko’ iyoho’. Iyoho’ noo o Kinorohingan, aiso’ i’ o ponokokinorohingan do suwai ko’ iyoho’ di gulu om aiso’ do koimbagu. ¹¹ Iyoho’ noo o TUHAN, om iyoho’ noo o kapasi dokoyu. ¹² Pinoboros mantad ku it osiliu dot id dabantalan, om ruminikot oku do minonulung dokoyu. Aiso’ i’ o kinorohingan do suwai do nokoumbal do minomonsoi’d miagal diti, iyokoyu no o sasi’ ku. ¹³ Iyoho’ no o Kinorohingan, om Kinorohingan kasai’ oku no. Aiso’ i’ o koidu’ do mantad id kuasa’ ku, om aiso’ o milo do monimban di natantu’ mantad ku do wonsoyon ku,’’ ka dau. ¹⁴ Poingkaa no o boros do Kinorohingan dot Israil dit olidang, i TUHAN do minamasi diya’, ’’Monuhu’ oku do soudor do mongoi pamasi dokoyu do mantad id tulun do Babil, habaon ku nondo i wawayaan do bandar, om osiliu nondod tihad i pinongkisan do tulun do Babil dot atataadan. ¹⁵ Iyoho’ no o TUHAN, i Kinorohingan nu dit olidang, winonsoi ku iya’, oi Israil, om iyoho’ no o raja’ nu,’’ ka dau. ¹⁶ Tontok di gulu po om winansayan do TUHAN do ralan o padarapas dilo rahat, i ralan di kawaya’ do waig di kitumbak dot agayo. ¹⁷ Pinatai dau o soudor dit ogumu’ kopio, soudor di kikorita’-kuda’ om i kikuda’. Kapatai nopo iyolo’, om a’ no nokotungag kawagu, miagal po iyolo’ di tapui do pinisok. ¹⁸ Nga’ boros kad TUHAN, ’’Kada’ sondiu di nongosiliu di maso di notoliban, ko’ minsorou po di nongosiliu di gulu po. ¹⁹ Suwai ko’ piontong kou nodti wonsoyon ku dot id dabantalan, tumimpuun no dot okito dokoyu do dinondo! Momonsoi oku nondod ralan do hilo’d tana’ do kowotuan, om poluyungon ku nondo o bawang do hilo’. ²⁰ Om iri piya’ndo nintorusan nga’ momusou i’ doho’, om i toni om i burung unta nga’ mamarayou i’ doho’, do tontok di popoluyung oku do bawang do hilo’d tana’ do kowotuan, do manahak do waig dot id tulun di nopili’ ku. ²¹ Iyolo’ no i tulun do winonsoi ku do bagi’ doho’, om modsinding nondo iyolo’ do mamarayou doho’,’’ ka dau. ²² Poingkaa no o boros do TUHAN, ’’Nga’ apaasan kou’ddi doho’, oi Israil; a’ kou noddi tumuku’ dot id doho’. ²³ A’ kou pinapatahak do dumba’ dot id doho’ do maan do porsombahan di sorobon, om a’ kou minomusou doho’ dot i porsombahan dokoyu di sumbolion o maan do pomusou. A’ oku i’ minononsog dokoyu do papatahak dot ogumu’ o porsombahan di sumbolion, om a’ oku minokianu do kominyan do pongudipon ku dokoyu. ²⁴ A’ kou i’ minomoli do kominyan do patahakon dot id doho’, om a’ kou pinoposonong do ginawo ku dot i lunok di tayam-tayam dokoyu o maan do poposonong do ginawo ku. Suwai ko’ winagatan oku nogi’ dokoyu do dusa dokoyu, om nuru oku dokoyu do kasalaan dokoyu. ²⁵ Nga’ iyoho’ i’, i Kinorohingan o mangampun do dusa dokoyu, om mangampun oku pogi’ nga’ iyo noddi o kowoyo-woyoon ku. Om a’ ku i’ sorohon kasai’, i dusa dokoyu. ²⁶ Kainou mongoi do hilo’d pomisaraan; om poboroson ngai’ no i poboroson dokoyu, poboroson no i hal dokoyu, om pointalangon no dot a’ kou kasala’. ²⁷ Nokowonsoi’d dusa i taki-aki dokoyu dit id gulu i’ kopio, om nokowonsoi ngai’d dusa dot id doho’ i boyoon dokoyu. ²⁸ Om minonosomu’ ngai’ it imam dokoyu di kinoiyonon ku, om iri noddi o kinapalagasan ku do naraag ot Israil, om pinologos ku’ddi i tulun ku do nindaraat,’’ ka dau.

¹ Boros kad TUHAN, ’’Pokinongou no do dinondo, oi Israil, i susuhuon ku, om i tulun do nopili’ ku, i sinakagon di Yakub. ² Iyoho’ no i TUHAN o minomonsoi diya’, om mantad po di pinogkosusu ko om nuhupan ku no iya’. Kada’ no poddosi, tu’ iya’ no o susuhuon ku, om i tulun di nopili’ ku om i kosianan ku. ³ Onuan ku indod waig i tana’ di tuuhan, om popoluyung oku’d bawang dot id tana’ dit otuu. Om potuntugon nondo o sinundu ku dot id tangaanak nu, om potuntugon ku o barakat ku dot id sinakagon nu. ⁴ Om sumuni nondo iyolo’ do miagal di sakot dot opiyopos, om miagal di guas do gandarusa do hiri’d tisan do bawang. ⁵ Om sorompori-pori nopondo i tulun do bansa’d suwai do momoros do ’TUHAN o sanganu doho’,’ ka. Om rumikot nondo iyolo’ do mongoi sugku’ di tulun dot Israil. Om sorompori-pori nopondo iyolo’ do potulis do ngaran do TUHAN do hiri’d longon diyolo’, om mangakun do tulun iyau di songonuon do Kinorohingan,’’ ka. ⁶ Poingkaa no o boros do TUHAN it Osundu Kopio, i raja’, om i mongintirung dot Israil, ’’Iyoho’ no it id gulu kopio, om iyoho’ it id tohuri kopio, iyoho’ noo o Kinorohingan, aiso’ no o Kinorohingan do suwai ko’ iyoho’. ⁷ Haro tu’ daa o suwai do minilo do minomonsoi di nowonsoi ku? Isai tuu daa o milo do pinopoboros mantad dit osiliu dot id dosunsudan, do mantad di timpuun i’, om gisom do kooyion do maso? ⁸ Kada’ poddosi, oi tulun ku; oilaan nu i’ do nokoboros mantad ku no, it osiliu dot id dabantalan do mantad poddi gulu po kopio om gisom do dinondo, om iyokoyu no o sasi’ ku. Haro po toi o Kinorohingan do suwai ko’ iyoho’? Haro po toi o Kinorohingan do suwai di kisinundu dit a’ ku insan korongou?’’ ka dau. ⁹ Koinsanai di tulun di momonsoi do tingolig om tulun no dit aiso’ o guna’, om i ponokokinorohingan diyolo’ dit iupus-upus kopio diyolo’ nga’ aiso’ i’ tomod o guna’. Tulun nopo di tumuku’ dot id ponokokinorohingan do miagal diri om aiso’ i’ o toila-ilaan om bolou om ointingayam nondo iyolo’ do koimbagu. ¹⁰ Aiso’ i’ tomod ot aanu-anu do momonsoi do tingolig do tambaga’ om tumuku’ nondo dot id tingolig diri do maan do ponokokinorohingan! ¹¹ Koinsanai do tulun di tumuku’ dot id tingolig diri om ointingayam nondo. Tulun nopo di momonsoi’d tingolig om tulun i’ toomod, a’ i’ poimaha’ ko’ wokon. Pologoso’ no iyolo’ do rumikot dot id bisara’ om atantu’ no dot ooris iyolo’ om ointingayam. ¹² Manu no i tukang tambaga’ do tambaga om lanakon no dot id tapui. Poingigit di longon dau dot okoris o tukul do ponukul di tambaga’ om owonsoi nondo iri. Om tontok di momonsoi iyau’ddi om louson i’ iyau, om tuuhan om ohuyan. ¹³ Tipongon no di tukang kayu i kayu, om lukisan no dau iri do poiyaan, do kapur o pomolukis. Om kikiran nondo dau iri dot i pakakas dau o pongikir om wonsoyon nori do miagal-agal do tulun dit oligkang kopio o koinan-inano’, om poilihon nondo dau iri do hiri’d walai dau. ¹⁴ Haro i’ do kayu sedar o ngoyon dau tagado’ do maan do wonsoyon diri, om haro i’ do kayu sedar, ko’ kayu ok do mantad hilo’d gouton. Om haro id mananom iyau do kayu sipres om mandad i’ do rasam do poposuni’ddi. ¹⁵ Somputul nopo di kayu’ddi om maan do tulun do siduwon, om somputul no om wonsoyon do tingolig. Iri nopo i somputul di kayu nga’ maan do pogomutan, om maan do pogonsok do roti, om iri no somputul om maan do ponokokinorohingan do tukuon dau. ¹⁶ Somputul nopo di kayu nga’ pogudung do tapui, om pogonsok dau do tikanas. Kanon nondo dau i tikanas diri om ayahan nondo ot opurimanan. Om magamut no iyau om momoros nod, ’’Osonong nod alasu-lasu’! Osonong noti tapui do pogomutan!’’ ka. ¹⁷ Nga’ iri no noolu-olu’ di kayu’ddi om wonsoyon dau do tingolig, om motud nondo iyau do tumuku’ddi. Om sumambayang nondo iyau dot id tingolig diri do poingkaa, ’’Iya’ no o kinorohingan ku — posion oku no!’’ ka dau. ¹⁸ Tulun nopo do miagal diri om adalaan no kopio kabasug gisom dot a’ no iyolo’ kosuhut di wonsoyon diyolo’. Somponon nopo diyolo’ o mato om pomusarahan diyolo’ do mantad id katapatan. ¹⁹ Om i gompomonsoi’d tingolig nga’ a’ no kopio milo’d momusorou om a’ koilo do momoros do poingkaa, ’’Sinorob ku i’ o somputul dilo kayu. Pinogonsok ku do roti om pinomoluguan ku’d daging di nakan ku. Om iri no topod di kayu’ddi om winonsoi ku do tingolig. Om diya oku noddi do tumuku’ dot id kayu i’ tomood!’’ ka. ²⁰ Osonong nogi’ do mangakan do pupuk o tulun diri ko’ momonsoi do miagal diri. Napalid no kopio iyau di pomusorou dau do dongkababasug gisom dot a’ no iyau milo’d tulungon. Om a’ no dau okunon dot iri nopo i tingolig di poingigit dau om okon i’ ko’ Kinorohingan kopio. ²¹ Boros kad TUHAN, ’’Soroho’ noti, oi Israil, soroho’ no do susuhuon ku iya’. Winonsoi ku iya’ do sumiliu’d susuhuon ku, om a’ ku i’ iya’ lihu-lihuan. ²² Natanus ku no i dusa nu do miagal noddi haun, do natanggayan do tongus. Guli’ no dot id doho’, tu’ iyoho’ no i mamasi diya’,’’ ka dau. ²³ Oi tawan, pimpangkis no dot atataadan, oi kinoiyonon dot id saalom diti tana’, pimpangkis kou no. Oi nuluhon, om pointikid-tikid do kayu do hilo’d puru’, nokointalang nod TUHAN o kogoyoo’ dau tu’ pinasi dau ot Israil, i tulun dau. ²⁴ Iyoho’ no o TUHAN, i Gampamasi diya’; Iyoho’ no i minomonsoi diya’. Iyoho’ no o TUHAN, i minomonsoi do koinsanai’d nunu nopo. Iyoho’ noo o pinapawalad dilo tawan. Om tontok di winonsoi ku iti pomogunan, om aiso’ i’ o minuhup doho’. ²⁵ Pobosugon ngai’ ku i mogogontong do nasip, om a’ ku pologoson dot abayaan i posunudon di tulun di mogogontong dit osiliu dot id dabantalan. Songkiwalon ku i boros do tulun dit oilo, om pointalangon ku dot iri nopo toilaan diyolo’ nga’ kababasug i’ toomod. ²⁶ Nga’ soira’ nopod poposunud i susuhuon ku dit osiliu dot id dabantalan, om soira’ nopo do suhuon ku i susuhuon ku do pointalang dit osorou ku do wonsoyon ku, om bayaanon ku no kopio i pinosunud diyolo’ddi dot id dabantalan. Sunudan ku o Yorusalim do miyon indo kawagu o tulun do hilo’, om sunudan ngai’ ku i bandar do Yohuda dot owonsoi kawagu iyolo’, tumungag ngai’ indo kawagu i bandar diri do mantad id kinaraagan. ²⁷ Iso’ nopo o boros do monuhu’ nga’ arasak no ilo rahat, om rasakan ngai’ ku ilo bawang nu. ²⁸ Boros kangku dot id di Koris, ’Iya’ no o momorinta’ do bagi’ doho’, om wonsoyon nu i’ i ponuhuan ku diya’ do momonsoi. Monuhu’ ko nondo do momonsoi kawagu do Yorusalim, om powonsoyon i poimpahan do walai ku,’ kangku,’’ ka dau.

¹ Nopili’ nod TUHAN i Koris do sumiliu’d raja’! Nopili’ no dau iyau do mangala’ do koinsanai’d bansa’. Sinuhu’ dau iyau do mongidu’ do kuasa’ di piro-piro o raja’ om iwangan id TUHAN o wawayaan do bandar do wayaan dau, gisom dot a’ nondo atabanan kawagu. Boros kad TUHAN dot id di Koris, ² ’’Iyoho’ no o mongiwang do ralan nu, om lampayon ku o konuluhanan om konulu-nuluan. Habaon ku o totobon do tambaga’, om tipuon ku o salampad do basi’. ³ Onuan ku iya’, do dapu’ do mantad id kinoiyonon dit otuong om poillisok, om oilaan nu nogindo do TUHAN oku, om oilaan nu do nolohou do Kinorohingan dot Israil o ngaran nu. ⁴ Pilion ku iya’ do monguhup dot Israil, i susuhuon ku, tu’ iyolo’ no o tulun di nopili’ ku. Noonuan ku no iya’ do pangkat dot agayo, mulong piya dot a’ ko kotutun doho’. ⁵ Iyoho’ no o TUHAN, om aiso’ no o kinorohingan do suwai. Onuan ku i’ iya’ do kokorisan dit apatut dot aanu nu, mulong piya dot a’ ko kotutun do ngaran ku. ⁶ Wonsoyon ku o miagal diri, om koilo ngai’ i’ o tulun do mantad hilo’d koulayon om korikot do hilo’d kotonobon dot iyoho’ no o TUHAN, om aiso’ no o kinorohingan do suwai ko’ iyoho’. ⁷ Iyoho’ i’ o minomonsoi do totuong om tanawau, iyoho’ i’ o poporikot do barakat om kousungan. Iyoho’ noo, i TUHAN, o minomonsoi do koinsanai’ddi. ⁸ Poporikot oku nondod kamanangan do mantad hilo’d tawan do miagal do rasam, om romiton nondod pomogunan o koposion. Om kopuriman nondod kosimbayanan om it otulid o hiti’d pomogunan, iyoho’ no i TUHAN, o posiliu’dti,’’ ka dau. ⁹ Sumaap toi i kuron di minomorun dau, i kuron di miagal no di kuron do suwai? Muhot toi i kuron dot id tulun di minomonsoi dau dot, ’’Nunu o wonsoyon nu’ndo?’’ ka. Milo toi i kuron do moguhang dot a’ oilo i minomonsoi dau? ¹⁰ Katama’ i’ toi o tanak do muhot di tapa’ dau do, ’’Nokuro tu’ miagal diti o pinomonsoi nu doho’?’’ ka. ¹¹ Poingkaa no o boros do TUHAN, i Kinorohingan dot Israil, om i TUHAN do manantu’ dot id dosunsudan. ’’Aiso’ i’ o kosorupayan nu do monguhot doho’ do pasal do tangaanak ku, ko’ momisunud po doho’ ondung nunu ot apatut ku’d wonsoyon. ¹² Iyoho’ no i TUHAN, o minomonsoi diti pomogunan, om iyoho’ nogi’ o minomonsoi do tulun, om i pinopologos diyolo’ do miyon do hiti’d pomogunan. Pinawalad ku o tawan do mikuwo’d sinundu ku, om kikuasa’ oku i’ dot id sawat do tadau, om tulan om rombituon. ¹³ Iyoho’ no i minonuhu’ di Koris do pinopowonsoi’ddi, om popowonsoi di komoyon ku om kogirot i’ it otulid. Om lampayon ngai’ ku nopo o ralan dit awayaan dau. Wonsoyon nondo kawagu dau o Yorusalim, i bandar ku. Om poiduwon dau i tulun ku di nangatangkap, aiso’ i’ o mamagadsi’ dau ko’ monisip po dau, do popowonsoi do hal diti,’’ kad TUHAN, it Osundu Kopio. ¹⁴ Poingkaa no o boros do TUHAN dot id Israil, ’’Asanganu nu nondo o kakayaan do Masir om Etiopia. Om i tulun do Siba dit angara-ranggou om angagayo o kinoulunan nga’ osiliu nondo do turipon nu, om moyo’ nopondo iyolo’ diya’ di songingkogos po iyolo’. Om motud nondo iyolo’ dot id toguang nu, om okunon diyolo’ do moyo-woyo’ o Kinorohingan diya’, om okunon diyolo’ do TUHAN noo o Kinorohingan. ¹⁵ Kinorohingan nopo dot Israil i minamasi do tulun dau, om Kinorohingan i’ di lumisok. ¹⁶ Iri nopo i tulun di momonsoi do tingolig, nga’ ointingayam nondo, intingayamon nondo om indaraaton ngai’ iyolo’. ¹⁷ Nga’ Israil nopo om napasi nod TUHAN, om mompus-ompus i’ i kamanangan diyolo’. A’ i’ kopio intingayamon i tulun dau, do gisom dot alaid, ka nondo diyolo’,’’ ka dau. ¹⁸ TUHAN no o minomonsoi do tawan, om iyau noo o Kinorohingan. Iyau o minomorun om minomonsoi diti pomogunan, om otiru’ i’ om ogirot o pinomonsoi dau. Winonsoi dau iti do poiyanan do tulun, om okon i’ ko’ iso’ o kinoiyonon di poinsuwai-suwai kopio. Iyau no i minomoros dot, ’’Iyoho’ no o TUHAN, om aiso’ no o kinorohingan do suwai. ¹⁹ A’ oku i’ poillisok do moro-boros, om a’ oku pinopolisok di natantu’ mantad ku do wonsoyon ku. A’ i’ minog o tulun dot Israil, do mogihum doho’ do hiri’d kinoiyonon di posuwai-suwai, om it oingou. Iyoho’ no o TUHAN, om otopot i’ o poboroson ku, om iri no it otulid o pointalangon ku,’’ ka dau. ²⁰ Poingkaa no o boros do TUHAN, ’’Kainou tumimung, oi koinsanai dokoyu i nokopoggidu’ do mantad id piro-piro o bansa’; rikot ngai’ kou no dot id bisara’! I piro-piro o tulun di papabaris di tininganak diyolo’ di kayu do winonsoi, om i sumambayang dot id ponokokinorohingan, dit a’ kapasi diyolo’ — aiso’ i’ o toila-ilaan do tulun do miagal diti. ²¹ Kainou, om poboroson no o hal dokoyu do hilo’d pomisaraan; om pologoson nopo do mogiboro-boros i mogobi’ dokoyu. Isai i pinopoboros mantad dot osiliu dot id dosunsudan di gulu po? Okon toi ko’ iyoho’, i TUHAN dit otulid, om i Kinorohingan di mamasi do tulun ku? Aiso’ no o kinorohingan do suwai ko’ iyoho’. ²² Guli’ kou no dot id doho’, oi koinsanai’d bansa’ do hiti’d pointongkop do pomogunan, om apasi kou i’. Iyoho’ noo o Kinorohingan. ²³ Otopot i’ o batos ku, om a’ minsimban, sumumpa’ oku dot id tinan ku: dot oinsanan nopondo o tulun do rumikot om motud dot id toguang ku, om mamatos nondo iyolo’ do tumorodok do tumanud doho’. ²⁴ Okunon nondo diyolo’, dot iyoho’ noo o koonuan do kamanangan om kokorisan. Nga’ koinsanai dit araatan doho’, om ointingayam no. ²⁵ Iyoho’ no, i TUHAN, o mamasi do koinsanai di sinakagon di Yakub, om royohon oku indo diyolo’,’’ ka dau.

¹ Iti no o kopupuson di piro-piro o tingolig do Babil; tinuku’ daa di gulu po i Bil om i Nibo, nga’ baino’ nopoddi om pagandaron poddi iyolo’ dot id kaladai om osiliu po do ginandar do hiri’d likud do tayam-tayam dit ongohuyan no. ² A’ i’ milo do mamasi diyolo’ i piro-piro o tingolig diyolo’, natangkap no iyolo’ om natanggayan. Iti no o kopupuson di piro-piro o tingolig do Babil. ³ Pokinongou kou no doho’, oi sinakagon di Yakub, koinsanai di tulun ku, di noolu-olu’. Ginompi’ ku i’ iyokoyu, do mantad po di ponontianon kou nogi’. ⁴ Iyoho’ no o Kinorohingan dokoyu di momogompi’ dokoyu do gisom do molohing kou om kopurak o tobuk dokoyu. Winonsoi ku i’ iyokoyu om gompion kasai’ ku iyokoyu, uhupan kasai’ ku i’ iyokoyu om posion ku iyokoyu. ⁵ Boros kad TUHAN, ’’Isai po daa o poiyaan dokoyu doho’? Haro po toi o suwai do koiyo doho’? ⁶ Ukaban nod tulun o poiyanan diyolo’d tusin om posoliwanon no o tamas, om timbangon no diyolo’ o pirok do hiri’d timbangan. Om mamagadsi’ no iyolo’d tukang amas do momonsoi’d tingolig, om motud nondo iyolo’ do tumuku’ dot id tingolig diri. ⁷ Saanon no diyolo’ i tingolig, om poingkokoton no diyolo’ iri do hiri’d poiiyanan om hiri nondo iri do poingkakat; om a’ no milo do mundaliu do mantad id kinoiyonon diri. Om ondung haro o sumambayang dot id tingolig diri om a’ i’ milo do sumimbar i tingolig diri, om a’ milo do popoidu’ dau do mantad id kosusaan. ⁸ Soroho’ noti, oi tulun do kidusa, sorohon no kopio i nowonsoi ku. ⁹ Hondomon ngai’ no i nosiliu di gulu po, om okuno’ no dot iyoho’ noo o Kinorohingan. Om okuno’ no dot aiso’ no o suwai do miagal doho’. ¹⁰ Mantad po di timpuun i’ om nokoboros mantad ku no i kootuson, om mantad po di gulu po om nokoboros mantad ku no it osiliu dot id dabantalan. Nokoboros ku i’ dot iri nopo i natantu’ mantad ku do wonsoyon ku om abayaan i’ kopio, om a’ no milo dot antaban. ¹¹ Momolohou oku’d tulun do mantad hilo’d koulayon, om rumikot nondo iyau do mantad hilo’d sodu’, do sumaap do miagal do tombolog dit orongit, om wonsoyon ngai’ nondo dau i natantu’ mantad ku do wonsoyon dau. Iyo noddi o boros ku, om atantu’ no dot abayaan iri. ¹² Pokinongou kou no doho’, oi tulun dit angasawat o ginawo, i momusorou dot osodu’ po o kamanangan. ¹³ Poinsomokon ku no i tadau do kamanangan om a’ nori osodu’, a’ no oinloidan i kamanangan ku. Posion ku i’ o Yorusalim, om pusohon ku ot Israil,’’ ka dau.

¹ Poingkaa no o boros do TUHAN, ’’Oi Babil, lintuhun no do mantad hino’d tirikohonon nu di don raja’, om irikau no do hilo’d pupuk do tana’. Di nopo di gulu po om miagal ko pod sumandak kolumis, om pomorintaan ko dit a’ aala’, nga’ baino’ noddi om naala’ ko no om nosiliu ko’d turipon. ² Ongoi ponutu do tapung do watu o ponutu, om iduwo ino tudung nu; om oluso’ ino rasuk nu dit ongolumis, kongkongo’ ino gaun nu do sumoborong dilo bawang. ³ Okito ko nondo’d tulun do poillabas, om indaraaton ko nondo om intingayamon. Om sumuli’ oku nondo diya’, om aiso’ no o tongosongulun piya do koodu doho’,’’ ka dau. ⁴ Pinopoidu’ nopo dati’ om i Kinorohingan dot Israil dit olidang, ngaran nopo dau om TUHAN it Osundu Kopio. ⁵ Boros kad TUHAN dot id Babil, ’’Kada’ kohiyo, irikau nopod hino’d totuong, a’ ko nondo roitan do ’Raja’d tondu’ do piro-piro o bansa’.’’ ⁶ Tontok dit otogod oku do tulun ku, om a’ ku no iyolo’ nakun do tulun ku iyolo’. Pinatahak ku iyolo’ dot id suang do kuasa’ nu, nga’ a’ ko i’ minonginsian diyolo’, tu’ iri ngai’ piya i molohing no nga’ ninggorit nu i’. ⁷ Ondos nu daa om raja’ kasai’ ko nopo do gisom dot alaid, a’ nu i’ sinorou kopio iti, om a’ nu sinorou mantad o kootuson diti. ⁸ Pokinongou pogi’dti, oi tulun dit asanangan do sumimbayan, ondos nu daa om aiso’ no o koligagaanan nu om osimbayan ko no. Sorohon nu daa dot agayo no kopio o kuasa’ nu, om aiso’ no koiyo diya’. Minomusorou ko daa dot a’ ko i’ osiliu do tondu’ di nopuadan, om a’ ko atagakan do sinakagon nu. ⁹ Nga’ sansaat noo, om insan no tadau, dot osiliu goduwo o miagal diri. Mamakai ko piya daa do toilaan do bobolian om limu’, nga’ atagakan kasai’ ko nod sawo nu om tangaanak nu. ¹⁰ Osimbayan tomod daa o topurimanan nu dot id suang do karaaton; ondos nu daa om aiso’ i’ o kokito di wonsoyon nu. Napalid ko di toilaan om i kopintaro’ nu, om boros ka nu’ddi, ’Iyoho’ no o kinorohingan om aiso’ no o miagal doho’,’ ka nu. ¹¹ Orikatan ko nondo do kosusaan dit awagat kopio, om aiso’ no tiso’ di toilaan nu di dong bobolian do koodu’ddi. Tumigowo nopondo o karaagan do rumikot dot id diya’ — i karaagon dit a’ nu i’ daa soro-sorohon! ¹² Poopio’ ngai’ nopo i limu’ nu om i gimat nu, tu’ mantad po dit okoro’ ko po om iri ngai’ no o pinakai nu. Milo i’ doti’ iri do monulung diya’ om nunu koilo-ilo, nga’ milo ko i’ dotindo do monompurolosi di pisangod nu. ¹³ Aiso’ no o pokukurayan nu, do mulong piya do nosihatan ko. Porikoto’ nopo i mogogontong, do mongoi pamasi diya’. Om porikoton i tulun di minsingilo dilo rombituon, om i mongilo do karalan-ralano’ om wolit dilo tawan, om i monikid tulan nopo do momisunud diya’ ondung nunu it osiliu dot id diya’, dot id maso’d tabantalan. ¹⁴ Iyo pondo iyolo’d sakot do nokoring di sorobon do tapui, om a’ no iyolo’ kapasi do tinan diyolo’. Adalaan nondo kalasu’ i sinikit do tapui dot id diyolo’, om okon no ko’ tapui di pogomutan. ¹⁵ Iri-iri no it osonong do milo diyolo’d wonsoyon dot id diya’, i mogogontong, di pinagandasan nu do solinaid nu do poimpasi. Tumongkiad ngai’ nopondo iyolo’ om sompori-pori nopod mogidu’, om aiso’ no o tiso’ diyolo’ dot oolu’ do monulung diya’,’’ ka dau.

¹ Pokinongou pogi’dti, oi tulun dot Israil, om iyokoyu i sinakagon do Yohuda, sumumpa’ kou dot id suang do ngaran do TUHAN, om momoros kou do tumuku’ kou dot id Kinorohingan dot Israil, nga’ aiso’ i’ o tiso’ di pinoboros dokoyu’ddi do topoton kopio dokoyu. ² Nga’ oondos tomod kou indo do momoros, do tulun kou di poingiyon dot id bandar dit olidang, om mogondos kou do Kinorohingan dot Israil, i TUHAN, it Osundu Kopio. ³ Boros kad TUHAN dot id Israil, ’’Nokoboros mantad ku no di gulu po it osiliu dot id maso do tabantalan, om sigog iddi do wonsoyo’ kopio ku iri. ⁴ Oilaan ku i’ dot osurilog ko, om miagal po di basi’ om tambaga’ kokodou o ginawo nu. ⁵ Om gowoi poddi do pinoboros mantad ku di gulu po it id dosunsudan nu, pinosunud mantad ku i piro-piro hal dot osiliu dot id dabantalan, om aantaban ko i’ do momoros dot iri i tingolig nu o pinoposiliu’ddi. ⁶ Koinsanai’ddi pinoboros mantad ku di gulu po om nabayaan ngai’ noddi do baino’; om iyokoyu nga’ mangakun no dot otopot ngai’ i nokoboros mantad ku di gulu po. Om sunudan ku nondo iyokoyu do hal do wagu, i piro-piro ot osiliu dit a’ ku po insan pointalango’ di gulu. ⁷ Iti nogindo dinondo do wonsoyon ngai’ ku iti; aiso’ i’ o nosiliu do miagal diti di maso do notoliban. Ondung haro daa om atantu’ no do momoros ko do noilaan ngai’ nu no o pasal diti. ⁸ Oilaan ku’ i’ dot a’ ko milo do ponongkuyaanan, tu’ nabantug ko no do sumasaap. Om iri noddi ot a’ nu nokorongou-rongou do pasal diti, om iso’ poddi o boros di habar diri nga’ aiso’ i’ o nokorikot dot id tolingo nu. ⁹ Pususon ku i’ o kototogod ku, om a’ ku i’ iyokoyu patayon, om royohon indod tulun o ngaran ku. ¹⁰ Noumbalan tiya’ no dot id tapui do koinggoritan, do miagal di pirok tu’ sompipion do tapui. Nga’ noilaan ku noddi, dot aiso’ i’ kopio o guna’ nu. ¹¹ Iri nopo i winonsoi ku’ddi om iyolo’ i’ o kinapamansayan ku. Tu’ mada’ oku i’ dot a’ pusohon o ngaran ku, om mada’ oku do haro o kabahagi’ do kagayaan ku, dit apatut do doho’, tu’ doho’ noddi,’’ ka dau. ¹² Poingkaa no o boros do TUHAN, ’’Pokinongou no doho’, oi Israil, i tulun di linohou ku. Iyoho’ no o Kinorohingan nu, it id gulu kopio, om it id tohuri kopio, iyoho’ noo o Kinorohingan. ¹³ Longon ku i’ o minomonsoi do pinoimpahan diti pomogunan om i pinapawalad dilo tawan. Tontok do lohowon ku o pomogunan om tawan, om olomus nopo iyolo’d rumikot. ¹⁴ Timung ngai’ kou, om mokinongou kou no! Aiso’ i’ o tiso’ di tingolig do milo do poboros mantad dot iri nopo tulun di nopili’ ku om mongoi panangod do Babil; om nunu nopo i ponuhuan ku dau’d momonsoi, om iri no o wonsoyon dau. ¹⁵ Iyoho’ no i pinopoboros diri om i minomolohou dau; woyoon ku i’ iyau, do gisom dot owonsoi dau i nosorou mantad dau do wonsoyon dau. ¹⁶ Insomok ngai’ kou no doho’, om mokinongou kou no diti poboroson ku; mantad poddi gulu po om poinsondot i’ o pomomoros ku, om binayaan kasai’ ku i’ i boros ku,’’ ka dau. Om baino’ noddi om suhuon oku’d TUHAN, it Asawat Kopio, do mamanau, om nonuan oku dau di rusod dau. ¹⁷ Poingkaa o boros do Kinorohingan dot Israil dit olidang, i minamasi diya’, ’’Iyoho’ no o TUHAN, i Kinorohingan nu. Orohian oku do monuduk diya’ di popoinsonong diya’, om potunud oku diya’ dot id ralan dit apatut nu’d susuyon. ¹⁸ Ondung otorodok ko’d mumboyo’ dit oturan ku, om lumuyung nondo o barakat dot id dokoyu do miagal di bawang dot a’ rumasak. Om a’ ko apagon do kaanu’d kamanangan, do miagal no di tumbak do rahat di rumuab dot id tisan do rahat. ¹⁹ Om sinakagon nu nga’ miagal pod togis kogumu’, om piantangan kopio ku iyolo’ om a’ i’ iyolo’ apatai,’’ ka dau. ²⁰ Soliwan no do mantad hilo’d Babil, poggidu’ no, popinsunudo’ no do mikuwo’d otood, popinghabaro’ noti do hinonggo nopo: ’’Napasi nod TUHAN ot Israil i susuhuon dau!’’ kanto. ²¹ Tontok di pinawaya’d TUHAN i tulun dau do hilo’d tana’ do kowotuan dit alasu’, om a’ i’ iyolo’ noinggorit do tuuhan. Tu’ pinoluyung i’ dau o waig do mantad id tontolob do tinumon diyolo’, pinitas dau i tontolob, om luyung nopoddi o waig do mantad hiri. ²² ’’Aiso’ i’ o kosimbayanan do tulun di kidusa,’’ kad boros do TUHAN.

¹ Pokinongou kou no do boros ku, oi koinsanai’d bansa’ di hino’d sodu’. Iyokoyu i songingiyon do hilo’d piro-piro o pulou dit id sodu’ kopio. Tontok dit a’ oku po nopogkosusu om nopili’ mantad oku nod TUHAN, om nolohou oku dau do sumiliu’d susuhuon dau. ² Pinatarom dau i boros ku gisom do miagal pod gayang katarom, tinirung oku dau di longon dau. Siniliu oku dau do miagal do pana’ dit alahis om i posodia’ nod papanaon. ³ Boros ka dau dot id doho’, ’’Oi Israil, iya’ no o susuhuon ku, om royohon oku nondod tulun dot iya’ o kapamarayahan,’’ ka. ⁴ Boros kangku, ’’Miningudipon tomod oku, om aiso’ i’ o kinotutuk-tutukon, nokototos oku no, gisom do naayi’ o goos ku om aiso’ i’ o naanu-anu ku,’’ kangku. Nga’ otumbayaan oku i’ kopio do mogobi’ o TUHAN doho’, somulian oku i’ dau do miontok di nongowonsoi ku. ⁵ Tontok dit a’ oku po nopogkosusu om nopili’ mantad oku nod TUHAN, siniliu oku dau do susuhuon dau do momoyo’ di tulun dau’d muli’; om popogisosompuru di tulun dot Israil di nokotompias. Onuan oku id TUHAN do kosuahan, om iyau no o tadon do kinoris ku. ⁶ Boros kad TUHAN dot id doho’, ’’Haro po o karaja’ dit awagat ko’ iri do patahakon ku diya’, oi susuhuon ku. Okon nopo ko’ mononduli’ ko di kagayaan do tulun dot Israil di nongoolu-olu’, nga’ silihon ku nogi’ iya’ do tulinau dot id koinsanai’d bansa’, om apasi ngai’ ku i’ iti pomogunan,’’ ka dau. ⁷ Boros kad Kinorohingan dot Israil, iyau i gampamasi, dot id tulun dit indaraaton om i karaatan do koinsanai’d bansa’, i susuhuon do piro-piro o pomorinta’, ’’Kokito ngai’ nondo i raja’ do wonsoyon ku, om mingkakat nondo iyolo’ do sumuwau doho’. Om i piro-piro o pomorinta’ nga’ motud ngai’ nopondo do tumuku’; tu’ iyolo’ nga’ kokito indo’ddi,’’ ka dau. Osiliu pogi’ o miagal diri nga’ pinili’ nod TUHAN i susuhuon dau dit otorodok, minomili’ nopo om i Kinorohingan dot Israil dit olidang. ⁸ Boros kad TUHAN dot id tulun dau, ’’Orikot nopondo o maso ku do mamasi dokoyu, om pointalangon ku nondo o kosianan ku, om simbaron ku o sambayang dokoyu do mokitulung. Gompion ku i’ om intirungan ku iyokoyu, om momonsoi oku nondod tumpongo dot id koinsanai’d bansa’, dot iyokoyu o pawayaan ku. Om pologoson kawagu ku’ndo iyokoyu do momogun-mogun do hilo’d tana’ dokoyu di notongkiadan tomod do dinondo. ⁹ Polobuson ku nondo i tulun di songinggiil, om angatan ku dot id tanawau i tulun dit id suang do totuong. Om hiri piya iyolo’d nulu-nulu dit aiso’ o sumuni, nga’ haro ngai’ i’ diyolo’. ¹⁰ Om a’ indo iyolo’ insan do louson ko’ tuuhan po, a’ i’ iyolo’ orualan di kolosuo’d tadau om a’ orualan di kolosuo’d tana’ do kowotuan. Tu’ woyoon ku i’ iyolo’, iyoho’ it osianan diyolo’, woyoon ku i’ iyolo’ do kumaa dot id kinoiyonon dit ogumu’ o tudan do waig. ¹¹ Momonsoi oku nondod ralan do poinsusui di konuluhanan, om potingon ngai’ ku o ralan. ¹² Somirikot no i tulun ku do mantad hilo’d sodu’ do mantad hilo’d utara, om hilo’d kotonobon, om hilo’d Sinim, i ponong hilo’d salatan,’’ ka dau. ¹³ Oi tawan, podsinding no, oi pomogunan pamangkis no dot atataadan, oi konuluhanan, podsinding no dot aarapadan. Rumikot no o TUHAN do mongoi ponginsasamod di tulun dau, om insianan i’ dau i tulun dau dit oinggorit. ¹⁴ Nga’ boros ka di tulun do Yorusalim, ’’Notongkiadan toko’ nod TUHAN, om nolihuan toko’ no dau,’’ ka. ¹⁵ Nga’ boros kad TUHAN, ’’Kolihu toi o tina’ di tanak dau, om a’ toi iyau osianan di tanak do pinogkosusu dau? Mulong piya daa dot olihuan do tina’ i tanak dau, nga’ iyoho’ nopo, i TUHAN, om a’ i’ kolihu dokoyu. ¹⁶ Oi Yorusalim, a’ ku i’ kopio iya’ olihuan, tu’ nokotulis ku no o ngaran nu dot id palad ku. ¹⁷ Oruhai nod korikot i mononduli’ kawagu diya’, oruhai no kopio, om tumongkiad no i minamaraag diya’. ¹⁸ Pikoroontong pogi’ do hino’d posorili’ nu, om antangan no ondung nunu o nosiliu, tumimung no i tulun om poulian no diyolo’. Om moro-boros oku dot id suang do ngaran ku, iyoho’ i Kinorohingan do poimpasi, dot atantu’ no dot oondos ko di tulun nu, do miagal poddi tondu’ do kumawin tu’ oondos di pongillumis do tinan dau. ¹⁹ Naraag daa om nopogitotongkiadan i pomogunan nu, nga’ baino’ noddi om adalaan iddi kokoro’ i pomogunan diri do tiyonon di tulun di rumikot do mongoi pomogun-mogun do hilo’. Tu’ iri nopo i tulun di minamaraag diya’, om nokoinsodu’ ngai’ no diya’. ²⁰ Om iri nopondo i tangaanak nu di pinogkosusu do hilo’d pomogunan di pinananggayan do pisangod, om momoros nondo dot id dokoyu do poingkaa, ’Adalaan no kopio kokoro’ iti pomogunan, manu po iyahai’d tana’ dit agayo-gayo do maan dahai’d pomogun-mogunan,’ ka nondo diyolo’. ²¹ Om moro-boros nondo ot id suang do ginawo nu do poingkaa, ’Honggo ngai’ o tadon diti tangaanak? Isai o minogkosusu diyolo’? Isai o pinapagayo diyolo’? A’ toi nangatagak ngai’ do tinanggayan do pisangod i tangaanak ku, om notingkod oku noddi do maganak?’ ka,’’ ka. Nuyung oku do pinakaa do hilo’d pomogunan do pisangod, om iso-iso’ oku no. ²² Boros kad TUHAN, it Asawat Kopio, dot id tulun dau, ’’Poinsawaton ku nondo o longon ku do pogintutunan do koinsanai’d bansa’, om koinsanai’d bansa’ di kokito do pogintutunan diri, om popoguli’ nondo di tangaanak nu. ²³ Miagal pondod tapa’ dokoyu i piro-piro o raja’, om miagal do tina’ dokoyu i piro-piro o raja’d tondu’. Tumuku’ nondo iyolo’ do sumuwau diya’, om minsiriba’ dot id toguang nu. Om oilaan nu nogindo dot iyoho’ no o TUHAN; om isai nopo i mogondos doho’ om a’ no oiman-iman,’’ ka dau. ²⁴ Nga’ boros ka dokoyu, ’’Aanu po tuu kawagu i dapu’ di nangaanu di soudor do pisangod? Koidu’ po tuu i tulun do natangkap do tulun dit orongit?’’ ka. ²⁵ Poingkaa o tisimbar ku, iyoho’ i TUHAN, ’’Iyo noddi ot osiliu. Koidu’ i’ i tulun do nangatangkap do soudor do pisangod. Om aanu i’ kawagu i dapu’ do nangaanu di tulun dot orongit. Saapon ngai’ ku i’ i pisangod nu, om poiduwon ku i tangaanak nu. ²⁶ Binsuhuon ngai’ ku nondo i pisangod dokoyu do gisom do mogipapatai iyolo’ do sompi’ ko’ iyolo’, om aawuk nondo iyolo’d raha’. Om oinsanan nopondo o tulun do koilo dot iyoho’ no o TUHAN, i minamasi diya’, it okoris kopio, iyoho’ i Kinorohingan di Yakub om i pinopoidu’ diya’,’’ ka.

¹ Poingkaa no o boros do TUHAN, ’’Ondos daa di tulun ku om nuyung ku iyolo’ do miagal do kusai di magada’d sawo dau? Ondung iyo daa’ddi, om hinonggo o surat do nokopiadaan? Ondos daa diyolo’ om pinadagang ku iyolo’ dot id pisangod do miagal di tanak do padagangon do silihon do turipon? A’ i’ kopio miagal diri! Natanggayan pogi’ iyolo’ dot id ponguripanan, nga’ nobungou i’ di dusa om karaaton diyolo’. ² Nokuro tu’ aiso’ i’ o tongoiso’ piya di tulun ku, do ruminikot do tontok di ruminikot oku di minongoi oku pomolohou diyolo’? Nokuro tu’ a’ iyolo’ suminimbar do tontok di linohou ku iyolo’? Ondos daa diyolo’ om adalaan oku koluhoi gisom dot a’ oku no kapasi diyolo’? Milo oku i’ do mamarasak dilo rahat do boros ku nod monuhu’ o pamarasak ku, om milo oku do posiliu di bawang do tana’ dot otuu, gisom dot apatai ngai’ i sada’d hiri. ³ Milo oku i’ do potuong dilo tawan, gisom dot iyo pondod mogihad do tulun di napatai,’’ ka dau. ⁴ Tinudukan oku’d TUHAN, it Asawat Kopio, do moro-boros, om milo oku i’ do popokoris do tulun dit ongoluhoi. Om monikid kosuabon nopo iyau do papalangad doho’, do mokinongou di potudukon dau doho’. ⁵ Nonuan oku’d TUHAN do pomusarahan dit obinsuhut, om a’ oku i’ suminaap dau ko’ tuminolikud po dau. ⁶ Pataano’ ku nopo o likud ku dot id tulun di momobog doho’, om a’ ku i’ noduhan iyolo’ do tontok di minongindaraat iyolo’ doho’, om tontok di ginayat diyolo’ o ganggut ku, om dinulaan o rabas ku. ⁷ Nga’ a’ i’ kopokoruol doho’ i pongindaraat diyolo’, tu’ tulungon oku id TUHAN, i Kinorohingan. Om pogiroton ku nopo om polonuton ku o ginawo ku, tu’ oilaan ku i’ dot a’ oku ointingayam. ⁸ Tu’ osomok no o Kinorohingan, om pokotopoton oku i’ dau. Haro toi daa i katama’ kopio do papasala’ doho’? Kainou mongoi pogiboro-boros do hilo’d pomisaraan, om pologoson nopo iyau do popoboros di kapasalaan dau doho’! ⁹ TUHAN i’, i Kinorohingan dit Asawat Kopio, o mogobi’ doho’, om isai po daa’ndo o milo do papasala’ doho’? Tumagak ngai’ nopondo i papasala’ doho’, tumanus nopo iyolo’ do miagal di kain di kanon do tanai. ¹⁰ Oi dokoyu i sumuwau do TUHAN, i Kinorohingan, om i mumboyo’ do boros di susuhuon dau, mulong piya’d odondom o kotuongo’ di ralan do wayaan dokoyu, nga’ pogondos kou nod TUHAN, om sondiu kou no dau! ¹¹ Koinsanai dokoyu i mogipapakat daa do mamaraag do tulun do suwai, nga’ angaraag ngai’ nopondo di pakat dokoyu dot araat. Tu’ TUHAN indo o momonsoi’d miagal diri, om padalaan kou nondo dau do monginggorit.

¹ Poingkaa no o boros do TUHAN, ’’Pokinongou kou no doho’. Iyokoyu i rumikot dot id doho’ do mongoi pokitulung om it orohian do posion. Soroho’ no i tontolob di tadon nu, om i luang do pinongonuan do watu, di tadon nu. ² Soroho’ no i taki nu, i Abraham, om i Sara; tontok di lohowo’ ku i’ i Abraham om aiso’ i’ o tanak dau. Nga’ barakatai ku noddi iyau om onuwai ku no iyau’d tanak, om nonuan ku iyau do sinakagon dot ogumu’. ³ Insasamadan ku i’ iya’, oi Yorusalim, om koinsanai di poingiyon do hiri’d pogun nu. Mulong piya’d tana’ do kowotuan o pomogunan diri, nga’ silihon ku indod kabun, do miagal di tinanom ku do hilo’d Idon. Om hilo’ nondo o tulun dot ongotood, om modsinding do mamarayou’d TUHAN diyolo’. ⁴ Pokinongou kou no doho’, oi tulun ku, pokinongou kou nodti poboroson ku. Patahakon ku’ti toturan ku dot id koinsanai’d bansa’, tu’ poporikot i’ do tanawau i ponudukan ku dot id diyolo’. ⁵ Oruhai oku nod rumikot do mongoi pamasi diyolo’, osomok no i tadau do kamanangan ku. Om iyoho’ nondo o momorinta’ do koinsanai’d bansa’, sangandad-andad no o pomogunan do hilo’d sodu’ do korikatan ku, poingandad no iyolo’ om mogondos iyolo’ do ngoyon ku iyolo’ posio’. ⁶ Tingaha’ pogi’ do hilo’d tawan, om luung do hiti’d pomogunan, tu’ tumagak nondo ilo tawan do miagal do lisun. Om iti pomogunan nga’ rumomuk do miagal do kain di nagansing, om matai ngai’ i tulun do poingiyon do hilo’ do miagal di langau. Nga’ mompus-ompus kasai’ i’ i koposion do patahakon ku, om a’ i’ opupusan i kamanangan ku. ⁷ Oi tulun ku, pokinongou kou no doho’, iyokoyu i koilo dit otopot. Iyokoyu i poopi’ do ponudukan ku dot id suang do ginawo dokoyu, kada’ kou poddosi do mulong piya do togodon kou ko’ indaraaton kou’d tulun. ⁸ Tu’ tumagak indo iyolo’, do miagal di kain do kanon do tanai. Nga’ mompus-ompus kasai’ i’ i koposion do patahakon ku, om a’ i’ opupusan i kamanangan ku,’’ ka dau. ⁹ Tungag no, oi TUHAN, om tulungo’ no iyahai, pakayo’ no i sinundu nu do pamasi dahai. Pointalango’ no i sinundu nu do miagal di gulu po, tontok di tinotok nu i Rahab, i naga’ do rahat diri. ¹⁰ Om iya’ i’ i minamarasak di rahat; om winansayan nu’d ralan o hiri’d waig, om aiso’ i’ o kinoligagaanan diyolo’. ¹¹ Om iri nopondo i tulun do pinoidu’ nu, oi TUHAN, om ongotood nopod muli’ do hilo’d Yorusalim. Om sonsinding-sinding iyolo’ om sampangkis-pangkis dot atataadan, om otood nondo iyolo’ do gisom do poingompus tu’ aiso’ no o katangaban om aiso’ o kosusaan diyolo’. ¹² Boros kad TUHAN, ’’Iyoho’ no i popokoris dokoyu. Nokuro tu’ moddosi kou’d tulun tu’ matai i’ do miagal do sakot? ¹³ Iyo do nolihuan nu no o TUHAN, i Minomonsoi diya’, om i pinapawalad dilo tawan, om i minomonsoi do pinoimpahan diti pomogunan? Nokuro tu’ moddosi ko do ponompurolosi di tulun do mongulok-ulok diya’? Nokuro tu’ moddosi ko di tulun di mamatai diya’? Tu’ a’ no korikot dot id diya’ i kororongit diyolo’ dit a’ ogina-gina’. ¹⁴ Oruhai nod poiduwon i tulun do nangatangkap do pisangod, om osimbayan nondo o koposi-posion diyolo’ om osima’ iyolo’d taakanon. ¹⁵ Tu’ iyoho’ no o Kinorohingan nu; ngaran ku nopo om TUHAN, it Osundu Kopio, tingkahon ku nondo ilo rahat, gisom dot akahas po i tumbak. ¹⁶ Tudukan ku iya’ diti boros ku, om intirungan ku iya’ do longon ku, iyoho’, i pinapawalad dilo tawan do hilo’d sawat om i pinopowonsoi di pinoimpahan diti pomogunan. Om okunon ku nondo o Sion do tulun di nasanganu ku,’’ ka dau. ¹⁷ Posik no, oi Yorusalim, urolos no om tumungag i’! Tu’ noumbalan ngai’ nu no i hukuman do pinaratu’ do TUHAN dot id diya’, tu’ otogod iyau gisom diri do mikorobibi’ ko po. ¹⁸ Aiso’ no o tulun do popotunud diya’, aiso’ no o tiso’ po di tulun do poingiyon do hino do mangahak diya’. ¹⁹ Duwo o kowoyoon do kosusaan do nokoontok diya’; naraag do pinisangadan o pomogunan nu, om nangapatai do nolikapan o tulun nu. Om aiso’ i’ ot osianan diya’. ²⁰ Songingiliu po ngai’ i tulun nu do hilo’d linsuk do ralan, tu’ a’ no iyolo’ kogoos. Om miagal po iyolo’ di paus di nokosulung do lawa’, tu’ nopurimanan no diyolo’ i kototogod do TUHAN dit a’ ogina-gina’. ²¹ Oi tulun do Yorusalim, awagat no kopio o koinggoritan do boboon dokoyu, gisom dot iyo kou poddi tulun do naawuk do mikorobibi’. ²² Poingkaa no o boros do TUHAN dokoyu, i Kinorohingan di mogobi’ dokoyu, ’’Iduwon ku no i koinggoritan di pinaratu’ ku dot id dokoyu do tontok dit otogod oku. Om a’ kou nondo minog do monginum di waig dot anggur di popokorobibi’ dokoyu. ²³ Nga’ patahakon ku nondo iri dot id tulun di minongulok-ulok dokoyu, i minonuhu’ dokoyu do lumii dot id pupuk, om i pinopologos dokoyu do pingulakan do tulun, dot iyo kou po di rinomos do hilo’d ralan,’’ ka dau.

¹ Tungag no, oi Yorusalim, tungag no! Panampakai nod pakayan dit olumis! Oi Yorusalim, i bandar dot olidang, polonuto’ no o ginawo nu, tu’ aiso’ i’ o tongosongulun piya di sosomu’ do kosuang do wawayaan nu. ² Oi Yorusalim, ingkakat no do mantad hino’d pupuk, tantago’ no ino pupuk do nokosokot diya’. Oi tulun do Sion di nangatangkap do pisangod, iduwo’ no ino rantai do pinongogos do liou dokoyu. ³ Tu’ poingkaa no o boros do TUHAN dot id tulun dau, ’’Tontok di siniliu kou i’ do turipon om aiso’ i’ o tusin do pinamagatang dokoyu, om miagal nogindoddi tu’ aiso’ i’ o bayaran do popoidu’ dokoyu. ⁴ Tontok di minongoi kou iyon do hilo’d Masir om iyokoyu i’ o norohian do mongoi’d hilo’, nga’ sinansagan kou i’ dot Asur do mogidu’ do mantad id pomogunan dokoyu, om aiso’ i’ o pinamagatang diyolo’ dokoyu. ⁵ Om baino’ do hilo’d Babil nga’ miagal iddi ot osiliu: tu’ tinangkap kou di tulun do Babil om aiso’ i’ o pinamagatang diyolo’ dokoyu. Om iri nopo tulun di mongulok-ulok dokoyu nga’ minggayo-gayo nopo om mokirayou-rayou, om aiso’ o kotingkadan do mongindaraat doho’. ⁶ Om rumikot indo o maso do mangakun kou do Kinorohingan oku, om kosuhut kou indo dot iyoho’ i minoro-boros dot id dokoyu,’’ ka dau. ⁷ Songkuro’ddi o kosonongo’ do kokito’d tulun di poporomut do habar do mamanau do sumusui di konuluhanan. Mongigit iyau do habar dot osonong, i habar do kosimbayanan, poposunud iyau do habar do kamanangan. Om popoboros dot id Sion do poingkaa, ’’Iri no Kinorohingan o kikuasa’,’’ ka. ⁸ Mimpangkis po i tulun do madtatamong di bandar dot atataadan! Tu’ iyolo’ no kopio o nokokito do nokogulian do TUHAN do hilo’d Sion. ⁹ Pimpangkis kou nod atataadan, oi kinaraagan do hiti’d Yorusalim! Tu’ poiduwon id TUHAN i bandar dau, om insasamadan dau i tulun dau. ¹⁰ Pointalangon indod TUHAN o sinundu dau dot antang-antangan do koinsanai’d bansa’. Om kokito ngai’ indo o pointongkop diti pomogunan, do rumikot o TUHAN do mongoi pamasi. ¹¹ tongkiad kou no kopio’d Babil, koinsanai dokoyu i mananaan do pakakas do Walai’d Sasambayangan dot Agayo! Om kada’ kou ongoi igit di konunu-nunuan do sosomu’; lidangai no dokoyu o tinan dokoyu do tintod do mamanau. ¹² Nga’ tontok nopodti om a’ kou no minog dot arau-arau do mamanau, om a’ mumbal do mogolim-olim do mogidu’. Tu’ woyoon kou id TUHAN, i Kinorohingan dokoyu, om posorili’ iyau dokoyu do mongintirung dokoyu. ¹³ Boros kad TUHAN, ’’Haro i’ o kootuson do wonsoyon di susuhuon ku, om poinggoyoon indo iyau, om royohon. ¹⁴ Ogumu’ o tulun do nokotigowo do nokokito dau di gulu po, tu’ ara-raat no kopio o tinan dau gisom dot okon no ko’ tulun o kokitanan. ¹⁵ Nga’ baino’ noddi om ogumu’ o bansa’ dot oimayaan dau, om iri pondo piro-piro o raja’ nga’ aiso’ no o koungkomi, tu’ oimayaan po. Om kokito nondo iyolo’ om kosuhut dit a’ diyolo’ noilaan di gulu po,’’ ka dau.

¹ Om boros ka di tulun do suminimbar, ’’Isai poddi o monongkuyaan diti posunudon dahai? Om isai o nokokito do sinundu’d TUHAN dit agayo kopio? ² Orohian o TUHAN dot iri nopo susuhuon dau om miagal di tanom di momutolid dot id tana’ dit okorop, om aiso’ i’ o kagayaan dau ko’ koligkango’ po di kobinsuhu’d tulun do momusou dau. Aiso’ i’ o nunu-nunu dot id dau di kabayayat do ginawo toko’ do rumohian dau. ³ Nindaraat toko’ iyau om niada’ toko’ iyau, nga’ binabo i’ dau i koinggoritan om i toruol. Aiso’ i’ o tongosongulun piya dot orohian do montong dau, om aiso’ o momusou dau. ⁴ Nga’ binabo i’ dau i koinggoritan dit iyati’ daa o mamabo, om tinanggung dau i toruol dit apatut daa dot iyati’ o tumanggung. Nga’ ondos toko’ daa om hukuman do pinorikot do Kinorohingan i koinggoritan dau’ddi. ⁵ Nga’ nosuhat pogi’ iyau nga’ gama’ i’ di dusa toko’, om binobog iyau do gama’ di karaaton toko’. Om hinukuman iyau, om apasi toko’ i’, om i suhat dau o nokolingos dati’. ⁶ Napalid ngai’ toko’ nopo do miagal di dumba’, sompori-pori toko’ nopo do mogihum do ralan. Nga’ pinaratu’ i’ do TUHAN dot id dau, i hukuman dit apatut daa do porotuon dot id dati’. ⁷ Ninggorit tomod iyau, nga’ minokilogos i’ iyau, om a’ i’ iyau minungkomi. Miagal po iyau di tanak do dumba’ di potikoroton no, om miagal do dumba’ di potiguntingan no o hulu, tu’ a’ i’ iyau minungkomi. ⁸ Tinangkap iyau om pinorotuan do hukuman, om nigitan do hiri’d pamatayan. Nga’ aiso’ i’ o tongosongulun piya do momusorou do kootuson do koposion dau, napatai pogi’ iyau nga’ i dusa do bansa’ toko’ o kinapatayan. ⁹ Lobong nopo dau om id rolot do tulun dit araat, om linobong iyau dot id sugku’ do tulun do kaya’, do mulong piya dot a’ iyau insan pomonsoi dot araat, om a’ insan pongudut,’’ ka. ¹⁰ Boros kad TUHAN, ’’Korohian ku i’ do noinggorit iyau, om apatai do sumiliu do porsombahan di sumbolion do maan do pangampun do dusa. Otogui indo iyau, om kokito di sinakagon dau, om owonsoi indo i korohian do TUHAN do pawayaon dot id dau. ¹¹ Om katalib pondo i koinggoritan dau, om otood nondo kawagu iyau; om oilaan i’ dau dot okon i’ ko’ aiso’ toomod o komoyon di koinggoritan dau. Iri nopo susuhuon ku dit otorodok diri, om kasanangan kopio ku i’, om binabo dau o hukuman do tulun dot ogumu’, om ompunan ku indo iyolo’ dot iyau o kopongompunan ku. ¹² Norohian i’ iyau do pinapatahak do koposion dau, om nokopuriman do kootuson di tulun dot araat, binabo dau o dusa do tulun dot ogumu’ om suminambayang iyau do bagi’ diyolo’ om kaanu i’ iyolo’ do koompunan. Om onuan ku indo iyau do kinoiyonon dit asawat kopio, i kinoiyonon dot id pogialatan do tulun dit angabantug om i kikuasa’,’’ ka dau.

¹ Oi Yorusalim, miagal ko daa di tondu’ dit a’ maganak di gulu po. Nga’ baino’ nopo om milo ko nod modsinding, om mimpangkis dot atataadan! Tu’ tangaanak nu nopo om ogumu’ po, ko’ tangaanak do tondu’ dit a’ insan kotongkiadai do sawo dau. ² Poinggoyoo’ no i kiim do tiyonon nu; ponoru-noruon po i tali om pogiroton no i pakagasan di tali. ³ Tu’ paraladon ku nondo i tana’ nu do ponong id wanan om ponong id gibang, om asanganu kawagu nu nondo i pomogunan di noiyon do bansa’d suwai. Om oponu’ nondo kawagu’d tulun i piro-piro o bandar di nopogitotongkiadan. ⁴ Kada’ kooris, tu’ a’ ko nondo ointingayam kawagu, om a’ ko ohingi-hingi. Olihuan nu indo i kointingayamo’ nu di sumandak ko po, om i koingoho’ nu di nopuadan ko. ⁵ Tu’ iyo pondod sawo nu i minomonsoi diya’, ngaran nopo dau om TUHAN, it Osundu Kopio. Gampamasi nu nopo om i Kinorohingan dot Israil dit olidang, iyau no i momorinta’ do pointongkop diti pomogunan. ⁶ Oi Israil, iya’ nopo om miagal do tondu’ dit omulok po di tinongkiadan do sawo dau om it adalaan tomod diri do tumongob. Nga’ lohowon ko i’ kawagu’d TUHAN do gumuli’ dot id dau. Om mikuwo’d momoros iyau do poingkaa, ⁷ ’’Tinongkiadan ku daa iya’ dot oruuhai, nga’ romiton ku i’ iya’ kawagu do mikuwo’d osianan kopio oku diya’. ⁸ Tuminongkiad oku dot oruhai tu’ otogod oku no kopio, nga’ pointalangon kasai’ ku indo dot id diya’ o kosianan ku,’’ ka dau. Iyo noddi o boros ku, iyoho’ i Kinorohingan, i Gampamasi diya’. ⁹ ’’Tontok nopo di poimpasi po i Nuu, om minamatos oku dot a’ poluyud kawagu diti pomogunan. Om miagal nogiddi do baino’ tu’ mamatos oku dot a’ tumogod kawagu diya’, om a’ oku nondo monogod om a’ oku momohukum kawagu diya’. ¹⁰ Tu’ mulong piya’d otuhan ngai’ ilo nuluhon om ilo nulu-nulu, nga’ a’ i’ otingkod o kosianan ku dot id diya’, om i batos ku do monokiulud nga’ igitan kasai’ ku i’,’’ ka dau. Iyo noddi o boros do TUHAN dit osianan diya’. ¹¹ Boros kad TUHAN, ’’Oi Yorusalim, i bandar dot oinggorit, om it aiso’ o pokukurayan, om it aiso’ o monginsasamod. Wonsoyon ku indo kawagu i pinoimpahan diya’, dot i watu dot olumis dit agayo o gatang o maan ku’d poimpahan. ¹² Wonsoyon ku indo i walai nu dit akawas dot i watu do delima o powonsoyon ku, om wonsoyon ku i wawayaan nu dot i watu di mogulinau o powonsoyon ku, om wonsoyon ku i tolig do pointutuk diya’ dot i watu dot agayo o gatang, om i watu di mogulinau do miagal do sinikit do tapui o powonsoyon ku. ¹³ Om iyoho’ indo o monuduk di tulun nu, om onuan ku iyolo’ do kosimbayanan om kouludan. ¹⁴ Iri nondo it otulid om it otopot o popogirot diya’, om poinsoduwon ko do mantad id kopoddosian om i mongulok-ulok. ¹⁵ Ondung ngoyon kou’d tulun saapo’, om okon i’ ko’ iyoho’ o monuhu’ diyolo’, om isai nopo o sumaap diya’ nga’ aala’ indo. ¹⁶ Iyoho’ i’ o minomonsoi di tulun do modsusupu’, i tulun di magapui om i modsupu’ di rapo-rapo do sumasangod. Nga’ iyoho’ nogi’ o minomonsoi di soudor, i mamakai di rapo-rapo’ddi do maan do pamatai. ¹⁷ Nga’ aiso’ nondo o tiso’ pod rapo-rapo do sumangod do kopokoruol diya’; om haro kasai’ nopondo o ponimbar nu do koinsanai’d tulun di pasala’ diya’. Obian ngai’ ku i’ i susuhuon ku om onuan ku iyolo’ do kamanangan,’’ ka dau. Iri no o pinoboros do TUHAN.

¹ Boros kad TUHAN, ’’Kainou, koinsanai dokoyu i tuuhan, inum kou no diti waig do nokosodia’. Kainou, koinsanai dokoyu it aiso’ o tusin! Pomoli kou nod gandum om kanon nopo dokoyu iri! Nokosodia’ no ot anggur om susu, dit a’ pokibolian. ² Nokuro toi tu’ popimbolion dokoyu o tusin dokoyu dit a’ kayahan? Om nokuro toi tu’ oiyon dokoyu o gadsi’ dokoyu do pomoli do taakanon dit a’ kayahan? Pokinongou kou pogi’ doho’ om tonudon no o ponuhuan ku, om kaanu kou i’ dit osonong, om koumbal kou do mangakan do taakanon dit awasiu kopio. ³ Pokinongou kou pogi’, oi tulun ku, om rikot kou no dot id doho’, rikot kou no dot id doho’ om onuan ku i’ iyokoyu do koposion dit otopot. Tu’ momonsoi oku nondod tumpongo dot id dokoyu, dot i kosianan ku’d ogirot dot id di Daud i susuhuon ku, o kopongumpangaan ku. ⁴ Siniliu ku iyau do boyoon do soudor, om iyau no o sumiliu do sasi’ dot id koinsanai’d bansa’. ⁵ Om momolohou kou nondo do bansa’d suwai, iyolo’ nopo om a’ i’ daa kotutun mantad dokoyu, nga’ baino’ nopondo om manangkus nopo iyolo’ do mongoi sugku’ dokoyu. Iyoho’ no, i TUHAN om Kinorohingan dokoyu, i Kinorohingan dot Israil dit olidang o posiliu do miagal diri; tu’ pusohon ku i’ om royohon ku iyokoyu,’’ ka dau. ⁶ Ihumo’ no o TUHAN, om sambayang no dot id dau do maso pod osomok iyau. ⁷ Osonong nod simbanan di tulun dot araat i kowoyo-woyoon diyolo’, om posimbanon diyolo’ o pomusarahan diyolo’. Pologoson nod gumuli’ iyolo’ dot id TUHAN, i Kinorohingan, tu’ monginsian i’ iyau om olomus iyau do mangampun. ⁸ Boros kad TUHAN om, ’’Pomusorou ku nopo, om okon i’ ko’ miagal do pomusorou nu, om i kowoyo-woyoo’ ku nga’ suwai i’ ko’ mantad di kowoyo-woyoo’ nu. ⁹ Tu’ poingkuro nopo i tawan dot id sawat ko’ iti pomogunan, om iyo nogiddi o pomusorou ku tu’ asawat i’ ko’ mantad do pomusorou nu, om kowoyo-woyoo’ ku nga’ suwai i’ kopio ko’ i kowoyo-woyoo’ nu. ¹⁰ Boros ku nopo om miagal di rasam, tu’ sumondot do mantad hilo’d tawan do momoyopos diti pomogunan, posuni iri do totonomon om manahak do linsou’ do maan do tonomon, om manahak do takanon dot akanon. ¹¹ Om miagal nogiddi i boros do poboroson ku, tu’ a’ i’ gumuli’ dot id doho’ dot aiso’ o kotutuk-tutukon; tu’ aiso’ i’ ot a’ owonsoi di natantu’ mantad ku’d wonsoyon, wonsoyon ngai’ nopo di boros ku o koinsanai di pinonuhuan ku’d momonsoi. ¹² Om tumongkiad kou nondod Babil do mikuwo’d otood kou, om posoliwanon kou di bandar dot id suang do kosimbayanan, om modsinding ngai’ nondo i nuluhon om i nulu-nulu, om mimpangkis dot atataadan i kokoyuan. ¹³ Iri nopo korugian do dinondo om sowolian nondo do kayu sanobar, om kosowoli noddi sakot om kayu murad. Om iti nondo o tanda’ di hino kasai’ do poposorou dokoyu di nowonsoi ku, iyoho’ i TUHAN, dot id dokoyu,’’ ka dau.

¹ Poingkaa no o boros do TUHAN dot id tulun dau, ’’Wonsoyo’ no dokoyu it otulid om i miontok do korohian ku, tu’ oruhai oku nod mongoi pamasi dokoyu. ² Barakatan ku i’ i tulun di momusou do tadau’d Sabat om it a’ kasala’ o pamamakai’ddi; om tulun nopo dit a’ momonsoi dot araat om osonong i’ o wonsoyon ku dot id dau,’’ ka dau. ³ Iri nopo bansa’d suwai di nakaamung do tulun di nasanganu’d TUHAN om a’ no minog do momoros dot, ’’Mada’ i’ o TUHAN do moyo’ oku di tulun dau do tumuku’ dot id dau,’’ ka. Om i kusai di noinggolian nga’ a’ no minog do momusorou dot a’ iyau kohompit di tulun do nasanganu’d TUHAN, dot it a’ iyau maganak o kopomusarahan do miagal diri. ⁴ Tu’ boros kad TUHAN dot id kusai do miagal diri, ’’Ondung pusohon oku diya’ dot i momusou ko do tadau’d Sabat o ralan nu’d momusou doho’, om ondung wonsoyon nu i korohian ku om otorodok ko do momogompi’ di tumpongo ku, ⁵ om osorou kasai’ nondo o ngaran nu dot id suang do Walai’d Sasambayangan dot Agayo om id pogialatan do tulun ku, ko’ mantad do kianak ko piya do tongokusai om tongoondu’. A’ ko indo olihuan,’’ ka. ⁶ Om boros kad TUHAN dot id tulun di bansa’d suwai di minamung di tulun dau, om i tumuku’ dot id dau, om i momusou do tadau’d Sabat om it otorodok kasai’ dot id tumpongo dau, ⁷ ’’Angatan ku nondo iyokoyu do hilo’d Sion, i nulu-nulu dot olidang. Om onuan ku iyokoyu do kataadan do hiri’d Walai’d Sasambayangan dot Agayo. Om romiton ku indo o porsombahan di sumbolion di patahakon dokoyu dot id pananaraban do porsombahan ku. Om roitan nondo i walai ku do Walai’d Sasambayangan do koinsanai’d tulun do mantad id koinsanai’d bansa’,’’ ka. ⁸ Nakabatos no o TUHAN, it Asawat Kopio, i pinopoguli’ di tulun dau, i bansa’d Israil do mantad hilo’d pinananggayan do pisangod, do poporikot po kawagu iyau’d tulun do bansa’d suwai do mongoi sugku’ diyolo’. ⁹ Sinuhu’d TUHAN i piro-piro o bansa’d suwai do rumikot do miagal do nintorusan dit orongit do mongoi panabpo di tulun dau. ¹⁰ Boros kad TUHAN, ’’Bolou ngai’ nopo i boyoon dit apatut daa do popoinsan di tulun ku! Aiso’ i’ o toila-ilaan diyolo’. Miagal ngai’ nopo iyolo’ di tasu dit a’ musig. Milii-lii no iyolo’ om mogunipi. Modop no o korohian diyolo’! ¹¹ Miagal ngai’ nopo iyolo’ di tasu do godoot, it a’ nopo milo dot ayahan. Aiso’ i’ o tosuhut-suhutan do boyoon diri. Sorompori-pori nopo iyolo’ do momonsoi di korohian diyolo’ om mogihum di diyolo’d kountungan. ¹² ’Kainou monginum do waig dot anggur,’ ka no di magagauk, ’Om monotos toko’ no do moginum! Tu’ osonong-sonong po moti’ o suab ko’ mantad do tadau’d baino’!’ ka no diyolo’,’’ ka dau.

¹ - ² Soira’ nopod apatai o tulun dit osonong om koidu’ no iyolo’ do mantad id kosusaan om osimbayan do poundorong, do mulong piya dot aiso’ o mamadul diyolo’. ³ Nga’ iyokoyu nopo, i tulun di kidusa, om rikot nod hiti om butusan i’! Tu’ iyokoyu nopo om miagal nopo di bobolian, om i gampahu’ om i sundal, om i tulun dot araat! ⁴ Isai daa ot irak-irakan dokoyu? Isai daa o hingi-hingion dokoyu? Okon kou toi ko’ tulun di sumasaap om i goudut? ⁵ Kowoyo-woyoon nopo dokoyu do modsubak di ponokokinorohingan dokoyu di kororombung om mogiampahu’ kou do hiri’d lungung di kayu di pokolidangon dokoyu. Om sumbolion nogi’ dokoyu i tangaanak dokoyu do maan do porsombahan do sumbolion do hiri’d koluang-luangan do pampang do hiri’d toning di tudan do bawang. ⁶ Om manganu kou no do watu dit olunau do mantad hiri’d kinoiyonon diri om tumuku’ kou nondoddi do maan dokoyu do ponokokinorohingan. Potuntug kou do waig dot anggur do maan do porsombahan dot id watu’ddi om subakon dokoyu do porsombahan do gandum. Ondos kopio daa dokoyu om asanangan oku ngai’ddi? ⁷ Tumakad kou do hilo’d nuluhon dot angakawas do mongoi patahak do porsombahan do sumbolion om mongoi pogiampahu’ do hiri’d timpak di nuluhon. ⁸ Pinoiyon dokoyu i piro-piro o tingolig dokoyu di kososomu’ kopio do hiri’d wawayaan do walai dokoyu. Nokotongkiad kou no doho’; oluson nopo dokoyu o pakayan dokoyu om sumalakoi kou no do hiri’d toodopon dokoyu dit angagagayo do miwoyo’ di piro-piro o tulun di kouhangan dokoyu, i godsian dokoyu do dumudun dokoyu. Om hiri nondo do tumotos kou do momonsoi do korohian do tinan dokoyu. ⁹ Mongumau kou om momowongi-wongi’ om mongoi kou nogindo tuku’ dot id di Molok, i tingolig dokoyu. Om monuhu’ kou do piro-piro o susuhuon dokoyu do mongoi pogihum do tingolig do maan dokoyu do tukuon; om kopiriko-rikot iyolo’ do hilo’d sodu’, om hilo’ piya id pomogunan do tulun do napatai nga’ orikot i’ diyolo’. ¹⁰ Ohuyan kou piya tomod do mongoi pogihum do ponokokinorohingan, nga’ a’ kou i’ ababasan. Tu’ osorou nopo dokoyu dot onuan kou di tingolig dokoyu do kokorisan, om a’ kou i’ oluhoi. ¹¹ Boros kad TUHAN, ’’Isai kopio toi i ponokokinorohingan di monompurolosi dokoyu, gisom do mongudut kou nopo om olihuan oku dokoyu? Alaid oku nopo dot a’ mungkomi om tumingkod kou no do tumuku’ dot id doho’? ¹² Ondos daa dokoyu om koontok kopio i wonsoyon dokoyu’ddi. Nga’ pointalangon ku i’ bondo kopio ino kowoyo-woyoon dokoyu, om iri ngai’ piya’ndo tingolig dokoyu nga’ a’ no milo do monguhup dokoyu. ¹³ Soira’ nopo do minglohou kou do mokitulung om pologoson ngai’ nopo i tingolig dokoyu do mongoi pamasi dokoyu! Nga’ alambayan nopo iri do ribut om otilib no! Nga’ tulun nopo di mogondos doho’ om kopomogun i’ do hiri’d pomogunan diri om sumambayang dot id doho’ do hiri’d Walai’d Sasambayangan dot Agayo,’’ ka dau. ¹⁴ Boros kad TUHAN, ’’Pologoso’ no i tulun ku do gumuli’ dot id doho’. Iduwon ngai’ no i koontobon do hiri’d ralan diyolo’! Rontisan no i ralan om sonongon no! ¹⁵ Iyoho’ no o Kinorohingan dit Asawat Kopio om it Olidang, i kikuasa’ do gisom do poingompus. Poingiyon oku dot id kinoiyonon dit id sawat om it olidang kopio, nga’ poinsugku’ oku i’ do tulun dit osiriba’ o ginawo om i kumorologo do dusa dau, om kogirot ku i’ kawagu o kotumbayaan diyolo’ om pagandasan diyolo’. ¹⁶ Okon i’ ko’ poompus-ompuson ku o kototogod ku om a’ oku papasala’ diyolo’, tu’ onuan ku i’ iyolo’ do koposion. ¹⁷ Hinukuman ku iyolo’ om tinongkiadan ku tu’ i dusa om i katamahao’ diyolo’ o kinopomohukuman ku. Nga’ osurilog i’ iyolo’ om wonsoyon kasai’ diyolo’ i diyolo’d korohian. ¹⁸ Nokito ku no i kowoyo-woyoon diyolo’ nga’ lingasan ku i’ iyolo’. Om woyoon ku indo iyolo’ om tulungon ku, om insasamadan ku i tumongob. ¹⁹ Onuan ku indo do kosimbayanan o koinsanai’d tulun di hilo’d sodu’ om i hiti’d somok! Lingasan ku indo o tulun ku. ²⁰ Nga’ tulun nopo dot araat om iyo po di rahat tu’ a’ nopo kododog, om iyo di tumbak dit a’ nopo tumingkod do rumuab do mononggoi do rinomos om tana’. ²¹ Aiso’ no o kosimbayanan do tulun di kidusa,’’ kad TUHAN.

¹ Boros kad TUHAN, ’’Puhadai nod minggarang! Sunudai no ot Israil, i tulun ku, di dusa diyolo’. ² Aiso’ i’ o guna’ diyolo’ do sumambayang dot id doho’ do monikid tadau, om momoros dot orohian kopio’d koilo do karalan-ralano’ ku om orohian do mumboyo’ do ponuhuan ku. Momoros iyolo’ dot orohian dot onuan ku dot oturan dit otulid om asanangan kopio do tumuku’ dot id doho’,’’ ka dau. ³ Om ponguhot no i bansa’ddi do poingkaa, ’’Nokuro tu’ minog toko’ pod puasa ondung a’ toko’d TUHAN antangan? Nokuro daa tu’ minog toko’ po do minsiriba’ o ginawo ondung a’ toko’ dau pusohon?’’ ka diyolo’. Om boros kad TUHAN dot id diyolo’, ’’Otopot nopo kopio om tontok di puasa kou om mogihum kou nod kountungan dokoyu om mongudipon kou di susuhuon dokoyu. ⁴ Poporongit no dokoyu i puasa gisom do mogisosongkiwal kou no om mogiuuhod. Ondos daa dokoyu om moningkau do ginawo ku dot orohian do mokinongou do sambayang dokoyu, i puasa’ dokoyu’ddi? ⁵ Tontok nopo di puasa kou om inggoriton dokoyu o tinan dokoyu; om potukuon dokoyu o tulu dokoyu do gisom do miagal pod roun do sakot. Om pawalad kou do karung om papasasad kou’d pupuk do maan dokoyu’d todopon. Iri toi o komoyon dokoyu do puasa? Ondos daa dokoyu om orohian kopio oku di wonsoyon dokoyu do miagal diri? ⁶ Puasa nopo do korohian ku om miagal diti: Iduwon ngai’ i pongulok-ulok di kokogos om it a’ otulid di kawagat kopio, om poiduwon ngai’ i tulun dit ulak-ulakan dokoyu. ⁷ Piduwaan no dokoyu do takanon i tulun di louson om posolokoyon no dot id walai dokoyu i tulun dit aiso’ o walai om i mosikin. Om onuan no do pakayan i tulun dit aiso’ o pakayan, om kada’ pangada-kada’ do monulung di koobpinayan nu di mokitulung diya’. ⁸ Om mulinau indo dot id dokoyu i kosianan ku do miagal di tadau di mulai nogi’ do dongkosuabon, om iri suhat dokoyu nga’ oruhai dot olingos. Om moyo-woyo’ kasai’ oku nopondo dokoyu do mamasi dokoyu; om iri no i karapahan ku o sumiliu do kointirungon dokoyu do posorili’ dokoyu. ⁹ Tontok do sumambayang kou, om simbaron ku i’ iyokoyu. Om soira’ nopo do momolohou kou doho’ do mokitulung om sumimbar oku i’. Tingkod kou nod mongulok-ulok do wokon, om tumingkod do rumongit, om tumingkod do mimboros dot araat. ¹⁰ Onuan nod takanon i tulun di louson, om tulungon no o tulun di haro o kosusaan. Ondung wonsoyon dokoyu o miagal diri om osiliu nopondod tanawau do miagal do tanawau di pitangaadau i totuong do posorili’ dokoyu. ¹¹ Om woyoon kasai’ ku nopondo iyokoyu om pingyahanon ku iyokoyu do koinsanai dit ongosonong. Om gompion ku indo iyokoyu om osonong-sonong kasai’ kou i’ om okoris kou. Om miagal kou nondod kabun dit opiyopos kasai’d waig om miagal di tudan do waig dit a’ insan dot arasak. ¹² Om wonsoyon nondo kawagu diyolo’ i bandar di laid no kosiliu’d pogun, om poimpahan nopo kawagu diyolo’ i pinoimpahan di gulu po. Om abantug kou nondo do tulun di minomonsoi kawagu di tolig om walai di nangaraag,’’ ka dau. ¹³ Boros kad TUHAN, ’’Pusohon no o tadau’d Sabat, i tadau di pinotobilang do maan do don TUHAN. Kada’ kou pomonsoi di dokoyu’d buruon do tontok do tadau’ddi. Pusohon no kopio o tadau’ddi tu’ iri no o tadau do koundarangan, do ralan nopo dokoyu’d momusou om a’ mimpanau do kumaa id kinoiyonon do suwai, om a’ kumaraja’ om a’ mimboros di maan toomod. ¹⁴ Om otood kou nondo tu’ sumambayang kou i’ dot id doho’. Om silihon ku nondo iyokoyu do tulun di pusohon do koinsanai do hiti’d pomogunan, om osimbayan kou nondod poingiyon do hiri’d pomogunan di pinatahak ku di Yakub, i taki-aki dokoyu. Iyoho’ no, i TUHAN, o minomoros diti,’’ ka dau.

¹ Kada’ dokoyu soroho’ dot oluhoi no kopio o TUHAN do gisom dot a’ milo do mamasi dokoyu ko’ adalaan kopio kobosuk gisom dot a’ no iyau korongou do lolohou dokoyu do mokitulung. ² Nga’ iri i dusa dokoyu o kobungou gisom dot a’ iyau korongou dokoyu. Iri i dusa dokoyu i popotongkiad dokoyu do mantad id Kinorohingan do tontok di mumbal kou do sumambayang dot id dau. ³ Nakasala’ kou no tu’ mongudut kou i’, om orongit kou, om mamatai kou. ⁴ Mongoi kou no do hilo’d pomisaraan, nga’ a’ kou i’ sumokodung dit otulid. Tu’ sumondiu kou i’ do tudut do papamanang do hal dokoyu. Potilombuson nopo dokoyu do momonsoi i nosorou mantad dokoyu do pokoruol do tulun do suwai. ⁵ - ⁶ Iri nopo pakat dokoyu dot araat nga’ miagal poddi tontolu’ do tulanut di kapatai. Babako’ pogi’ i tontolu’ nga’ sumoliwan nopo moti’ o tulanut! Nga’ iri nopo i pakat dokoyu’ddi om aiso’ i’ kopio o guna’ dot id dokoyu, iyo noddi pakayan di pinuwalai’d korut do winonsoi. ⁷ Momusorou kou nopod momonsoi dit araat, om a’ kou no kaandad-andad do momonsoi’ddi. A’ kou no otungkong do mamatai’d tulun dit aiso’ o sala’. Honggo nopo o koongoyon dokoyu nga’ haro kasai’ nopo ot araag om oumpadan. ⁸ Om a’ kou no kopuriman do kosimbayanan. Aiso’ nopo ot otulid di wowonsoyon dokoyu. Mingkilong i ralan di susuyon dokoyu, om aiso’ no moti’ o songulun piya do kopuriman do kosimbayanan ondung sumusui do ralan diri. ⁹ Boros ka di tulun diri dot id Kinorohingan, ’’Oilaan nogiddi dahai ot a’ do Kinorohingan kopoiduan dahai do mantad id tulun di monginggorit dahai. Minogondos daa iyahai do tanawau do monitiu dahai’d mamanau, nga’ aiso’ i’, tu’ otuong ngai’ nopo, ¹⁰ om miagal poddi iyahai’d tulun do bolou do mikarahawor. Om pitangaadau piya nga’ kasadu i’ iyahai tu’ iyo pori do pitangatuong, om miagal po do hiri iyahai’d pomogunan do tulun do napatai dit otuong tomod do mogihum do ralan. ¹¹ Atangkabo po tomod iyahai om moddosi iyahai. Mandad-andad no daa iyahai diya’ oi Kinorohingan do mongoi popoidu’ dahai do mantad id koinggoritan nga’ aiso’ i’ o nunu-nunu do rumikot. ¹² Oi TUHAN, ogumu’ no kopio o kasalaan dahai dot id diya’. Om iri iddi dusa dahai o papasala’ dahai. Om opurimanan ngai’ i’ dahai iri. ¹³ Suminaap iyahai diya’, om nokowonsoi iyahai’d dusa dot id diya’, om minada’ iyahai do tumanud diya’. Minongulok-ulok iyahai’d tulun do suwai om tuminongkiad iyahai diya’. A’ ngai’ nopo otopot o pomusorou dahai; om tudut ngai’ o boros dahai. ¹⁴ Noidu’ no it oturan dot otulid, om it otulid nga’ nokoinsodu’ no. A’ pinadul it otulid om pinotongkiad i kotulido’ do ginawo. ¹⁵ Aiso’ no o tulun dot otulid o ginawo, gisom dot isai nopo i tumingkod daa do momonsoi dot araat om patayon nogi’ dit angaraat,’’ ka diyolo’. Nokito nod TUHAN iri om a’ i’ iyau orohian dot aiso’ o tulun dot otulid o pomumutus. ¹⁶ Kotigowo tomod iyau do kokito dot aiso’ o tulun do mongoi ponulung di tulun dot ulak-ulakan. Om pakayon nondo dau i sinundu dau do pamasi diyolo’ om onuan dau iyolo’ do kamanangan. ¹⁷ Om pakayon nondo dau it otulid do maan do panakarasuk do basi’ om tupion dau o kamanangan do ponokotupi’ kolidar. Om iso-iso’ no kopio o ginawo dau do poposonong do koinsanai’d nunu nopo, om momohukum om sumuli’ dit a’ otulid di koinggorit do tulun. ¹⁸ Om hukuman ngai’ nondo dau i pisangod dau do miontok di nowonsoi diyolo’, om iri ngai’ piya i bansa’ do hilo’d sodu’ o pomogunan nga’ hukuman ngai’ i’ dau. ¹⁹ Om mantad pondod hilo’d koulayon om korikot do hilo’d kotonobon o tulun dot ooris ngai’ dau om ooris di kogoyoo’ do kuasa’ dau. Tu’ rumikot nondo iyau do miagal do bawang dit ologod om miagal do tongus dit opuhod. ²⁰ Om boros kad TUHAN dot id tulun dau, ’’Rumikot oku nondod hilo’d Yorusalim do mongoi pogobi’ om mongoi pamasi ngai’ dokoyu, i kumorologo do mantad id dusa. ²¹ Om momonsoi oku do tumpongo dot id dokoyu: Onuan ku iyokoyu do kuasa’ om ponudukan ku. Soro-sorohon no om umboyoon no i ponudukan ku’ddi, om potudukon no dot id tangaanak dokoyu om id sinakagon dokoyu, om osorou indo diyolo’ iri om atanud,’’ ka.

¹ Tungag no, oi Yorusalim, om ulinau no do miagal dilo tadau, nokorikot no i tanawau do koposion nu! Poulinau no dot id diya’ o kagayaan do Kinorohingan. ² Oinsanan nopo o bansa’ do kuluputan do totuong, nga’ iya’ nopo om woyoon id TUHAN, om ulinahan di tanawau dau di kosorong. ³ Om agayat nondo o koinsanai’d bansa’ dot id tanawau nu, om iri nogi’ i piro-piro o raja’ nga’ agayat di tulinau nu di wagu. ⁴ Pikoroontong pogi’ dot id posorili’ nu om antangan no ondung nunu i nosiliu, tumimung ngai’ no i rayat do minuli’. Om i tangaanak nu’d kusai nga’ rumikot no do mantad hilo’d sodu’, om i tangaanak nu’d tongoondu’ nga’ songingkibit ngai’ diyolo’. ⁵ Om okito nopondo dokoyu iri om otood kou nondo, om kododog kou nopondo tu’ adalaan no kopio kotoodo’ dokoyu. Om pootodon nondo dot id dokoyu i kakayaan do koinsanai’d bansa’, do lumuyung nopo dot id dokoyu do mantad hilo’d soborong do rahat. ⁶ Ogumu’ nondo ot unta do rumikot, do mantad hilo’d Midian om hilo’d Ipa. Om haro nogi’ o tulun do hilo’d Siba do mongigit do tamas om kominyan, do mikuwo’d mamarayou di nongowonsoi’d TUHAN. ⁷ Oinsanan nopondo i dumba’ do Kidar om Nobayot do pootodon dot id dokoyu, do maan do porsombahan do sumbolion, do hiri’d sakai di pananaraban do porsombahan do patahakon dokoyu do tontok do sumambayang kou. Om orohian nondo o TUHAN diri om oruhangan o kolumiso’ di walai dau. ⁸ Nunu ilo tumalib do miagal do haun, om i tumulud do miagal do punai do gumuli’? ⁹ Ilo’ nopo nga’ kapal do rahat do mantad hilo’d pomogunan dit id sodu’, do mongigit di tulun di songonuon do Kinorohingan do gumuli’. Kiinigit nogi’ iyolo’ do pirok om tamas, do pamarayou’d TUHAN, i Kinorohingan; do patahakon di Kinorohingan dot Israil dit olidang, i posiliu di tulun dau do bansa’ di pusohon. ¹⁰ Tulun indo do bansa’d suwai o mononduli’ di tolig nu, om i piro-piro o raja’ o mogobi-obi’ diya’. Hinukuman ku iya’ di gulu tu’ atatagadan oku no, nga’ baino’ noddi om orohian oku do monginsian diya’. ¹¹ Om poingiwang kasai’ nopondo o wawayaan nu do tadau om totuong, om kaatod i’ di piro-piro o raja’ do piro-piro o bansa’ i kakayaan diyolo’ dot id diya’. ¹² Om iri nopondo bansa’ dit a’ minsiriba’ dot id diya’, om punsoon nopondo kopio. ¹³ Boros kad TUHAN dot id Yorusalim, i bandar dau, ’’Iri nopo kayu sedar, om kayu sanobar, om kayu berangan, i kayu dot osonong kopio do hilo’d puru’ do Libanon, om pootodon ngai’ nondo do maan do pononduli’ diya’, oi bandar dit olidang, om maan do pomolumis di Walai’d Sasambayangan dot Agayo om maan do pomolumis di poulakan ku’d lapap ku. ¹⁴ Om rumikot ngai’ nondo i tangaanak di minongulok-ulok diya’, om motud ngai’ nondo om minsiriba’ dot id diya’ i nongkoumbal do mongindaraat diya’. Om roitan ko nondo diyolo’ do, ’Sion’ om ’Bandar do Kinorohingan dot Olidang’, om ’Bandar do TUHAN’. ¹⁵ Om a’ ko nondo iyadaan om a’ ko karaatan, om a’ ko pologoson dot oingou. Pobontugon ku nondo iya’ om illumisan ku, om silihon tiya’ do kinoiyonon do kataadan do gisom do poingompus. ¹⁶ Om gompion ko nondo do piro-piro o bansa’ om raja’ do miagal di tina’ do momogompi’ do tanak dau. Om oilaan nu nogindo dot iyoho’ no, i TUHAN, o minamasi diya’, om i Kinorohingan dot Israil dit okoris o pinopoidu’ diya’. ¹⁷ Paatadan ku nondo iya’ do tamas do ponowoli do tambaga’, om paatod oku do pirok do ponowoli di basi’. Om paatod oku do tambaga’ do ponowoli di kayu. Om paatod oku do basi’ do ponowoli di watu, om osimbayan nondo om oulud, o pomogunan nu; om otulid o pomorintaan. ¹⁸ Aiso’ nondo ot orongou do habar do kororongit; om pomogunan nu nga’ a’ nondo araag. Tu’ intirungan ku indo iya’ do miagal di tolig; om royohon oku indo diya’ tu’ napasi tiya’ i’. ¹⁹ Okon nondo ko’ i tadau o sumiliu do tanawau nu do dangadau, om okon ko’ i tulan o tanawau nu do dongotuong. Tu’ iyoho’ no, i TUHAN, o sumiliu do tanawau nu do gisom do poingompus; tu’ mulinau nondo dot id diya’ i tanawau do kagayaan ku. ²⁰ Opupusan nondo i katangaban nu, tu’ iyoho’ no, o sumiliu do tanawau nu do gisom do poingompus, i poulinau kasai’ ko’ mantad dilo tadau om i tulan. ²¹ Om momonsoi ngai’ nopondo dit otulid i tulun nu, om kasanganu iyolo’ di pomogunan do gisom dot alaid. Tu’ winonsoi ku i’ iyolo’, om pinogirot ku do pointalang do kogoyoo’ ku. ²² Om iri piya’ndo i sompiiyon nu dit okuri’ no kopio om it aiso’ o ngaran- ngaran, nga’ sumiliu i’ do bansa’ dit agayo om kikuasa’, om soira’ nopondo dot orikot i maso di koontok, om powonsoyon ku nondo kopio iti. Iyoho’ no o TUHAN!’’ ka dau.

¹ Noporinta’ oku nod Rusod do TUHAN, it Asawat Kopio; nopili’ oku no dau om nosuhu’ oku do mongoi poposunud do habar dot osonong dot id tulun di mosikin om orutum, om momolingos do ginawo’d tulun dit adalaan do tumongob, om momisunud do kopolobusan dot id tulun di nangatangkap dot oruhai no iyolo’d polobuson, om momisunud di tulun di poinggiil do nakalabus no iyolo’. ² Sinuhu’ oku dau do mongoi poposunud, do norikot no o maso do kopomosian do TUHAN do tulun dau, om kapangalaan dau di pisangod diyolo’. Sinuhu’ oku dau do mongoi ponginsasamod do koinsanai’d tulun di tumongob, ³ om monginsasamod do ginawo di tumongob, om popotood dit osusa’. Om modsinding nondo iyolo’ do sinding do pamarayou, do ponowoli di tihad. Om miagal nondo iyolo’ do kayu, di tinanom do TUHAN. Om wonsoyon ngai’ diyolo’ i korohian do Kinorohingan, om abantug indo o Kinorohingan. ⁴ Om wonsoyon nondo diyolo’ kawagu, i bandar di laid nod poimpogun om oingou. ⁵ Oi tulun ku, gompion nondo do bansa’d suwai i tayam-tayam dokoyu, om buatan diyolo’ i kabun dot anggur dokoyu. ⁶ Om roitan kou nondo dot imam do mogobi-obi’ do TUHAN, om susuhuon do Kinorohingan toko’. Om kopuriman kou nondod kosonongo’ di kakayaan do piro-piro o bansa’, om oondos kou tu’ nasanganu no dokoyu iri. ⁷ Nopupusan no o kointingayaman dokoyu, om miyon kou nondo do hilo’d pomogunan dokoyu. Om opiluap nopondo o kogumuo’ do kakayaan dokoyu, om mompus-ompus o kaarapadan dokoyu. ⁸ Boros kad TUHAN, ’’Asanangan oku i’ dit otulid, nga’ araatan oku i’ di mongulok-ulok om it araat. Om otorodok oku i’ do monomuli’ di tulun ku, om momonsoi oku do tumpongo di poinggirot kasai’ dot id dokoyu. ⁹ Om abantug nondo o sinakagon diyolo’, dot id pogialatan do bansa’ do hinonggo-honggo nopo iyolo’. Om pointikid-tikid do tulun di kokito diyolo’, nga’ koilo nondo dot iyolo’ nopo nga’ bansa’ di nabarakatan ku,’’ ka dau. ¹⁰ Boros kad Yorusalim, ’’Otood oku tu’ TUHAN o kataadan ku, om Kinorohingan no o kataadan do ginawo ku. Miagal oku po do tondu’ di napakayan do pakayan di dong kumawin, pinakayan oku’d TUHAN do koposion om kamanangan. ¹¹ Tu’ poingkuro nopo i linsou do potonomon, do sumuni do sumiliu’d tanom, om poingkaa no o TUHAN, it Asawat Kopio do mamasi do tulun dau, om oinsanan nopondo o bansa’ do mamarayou dau,’’ ka.

¹ Moro-boros oku i’ do mongodsuur do Yorusalim, a’ oku i’ kumadada’ dot a’ po iyau apasi, om koulinau i’ i kamanangan dau do miagal do lampung di mulinau do dongotuong. ² Oi Yorusalim, okito ko nondo do koinsanai’d bansa’ do nakamanang ko, om kokito ngai’ nondo i raja’ diyolo’ do kobontugo’ nu. Om pungaranan ko nondod ngaran do wagu, i ngaran do patahakon do TUHAN. ³ Miagal ko nondod tupi’ do dong raja’ dit olumis do pointupi’ do TUHAN, i pongillumis dit agayo o gatang di dong Kinorohingan. ⁴ A’ ko nondo roitan dot ’’I Tinongkiadan’’, om a’ roitan i pomogunan nu dot ’’It Oingou’’. Roitan ko nondo dot ’’I Kolisihan do Kinorohingan’’, om i pomogunan nu nga’ roitan nondo dot ’’I Nakawin’’. Tu’ asanangan o TUHAN diya’, om miagal pondo iyau do kusai do sawo di pomogunan nu. ⁵ Poingkuro nopo i tanakwagu do mangawin di sumandak, om iyo nogiddi i Minomonsoi diya’ do mangawin diya’. Om poingkuro nopo i kusai di wagu po kakawin dot asanangan di sawo dau, om iyo nogiddi o Kinorohingan dot asanangan diya’. ⁶ Nopoiyanan ku nod tulun o hiri’d sakai di tolig nu, oi Yorusalim; om a’ i’ iyolo’ insan do mundorong do tontok do madtamong diya’ do tadau om totuong. Apatut no do posorohon diyolo’ o TUHAN di batos dau, om a’ i’ dau olihuan iri. ⁷ Om mositi’ no dot aiso’ o kotingkadan diyolo’ do mokianu, om otonduli’ i’ kawagu’d TUHAN o Yorusalim, om osiliu i’ o bandar diri do kaandasan do pointongkop do pomogunan. ⁸ Nakapamatos no o TUHAN do mikuwo’d sumpa’, om atantu’ nod wonsoyon dau iri do mikuwo di sinundu dau: A’ nondo di pisangod nu akanon i gandum dokoyu, om a’ oinum do bansa’d suwai i waig dot anggur dokoyu. ⁹ Nga’ iyokoyu no i minananom om i minongomot di gandum, o kaakan diri om mamarayou kou nondod TUHAN. Iyokoyu no, i minomogompi’ om minongupu’ di tua’ dot anggur, o koinum di waig dot anggur do hiri’d natad di Walai’d Sasambayangan dot Agayo,’’ ka. ¹⁰ Oi tulun do Yorusalim, soliwan kou no do maya’ di wawayaan dot agayo, om mamalana’ nod ralan do wayaan ngai’ di tulun di gumuli’. Pomonsoi nod ralan magayo; om iduan no iri’d watu, om poinsawat nod bondira’ om koilo i’ o koinsanai’d bansa’. ¹¹ Do poboros o TUHAN dot id pointongkop diti pomogunan do boros do poingkaa, ’’Sunudan ngai’ no i tulun do Sion do poingkaa, ’Rumikot no o TUHAN do mongoi pamasi dau, om powoyo’ iyau di tulun di nokoidu’ dau,’ kanto,’’ ka dau. ¹² Om roitan nondo iyolo’ do: ’’Tulun do Dong Kinorohingan’’, om ’’I Bansa’ do Pinasi do TUHAN’’. Om roitan nondo o Yorusalim do ’’Bandar di Kalangadan’’, om ’’I Bandar dot a’ Tinongkiadan do Kinorohingan’’.

¹ ’’Isai iti rumikot do mantad hilo’d bandar do Bosra i hilo’d Idom? Isai iti kirasuk dot aragang, om it olumis kopio, om i mamanau dot okoris kopio?’’ ka. ’’Iyoho’ no, i TUHAN, i milo do mamasi, om poposunud oku di kinamanangan ku,’’ ka dau. ² ’’Nokuro tu’ aragang kopio o pakayan nu, miagal pod pakayan do tulun di mamaga’ di tua’ dot anggur?’’ ka dau. ³ ’’Pinaga’ ngai’ ku i bansa’ do miagal do tua’ dot anggur, om aiso’ i’ o minongoi uhup doho’. Piningulakan ku iyolo’ tu’ otogod oku no kopio, om karamasai ngai’ nopoddi di raha’ diyolo’ o pakayan ku. ⁴ Natantu’ mantad ku no o maso do poidu’ di tulun ku; om norikot no o maso do poiduwon ku iyolo’. ⁵ Nosuayan oku tu’ tontok di kuminorowo oku om aiso’ i’ o monguhup doho’. Nga’ pinokoris oku i’ di kototogod ku, om iso-iso’ oku’ddi o nakamanang. ⁶ Pingulakai ngai’ ku nopo i bansa’ tu’ otogod oku no kopio, om minumuk ku iyolo’. Om potuntugo’ ku nopo, i raha’ diyolo’ do hilo’d tana’,’’ ka dau. ⁷ Popinsusuyon ku nondo i kosianan do TUHAN dit aiso’ o kotingkadan. Om royohon ku iyau tu’ i nongowonsoi dau dot id dati’ o kapamarayahan ku. Om mabai-labai po o pinamarakat dau dati’, i tulun dau, tu’ poimponu’ po iyau do kosianan, om aiso’ o kopupuson do kosianan dau. ⁸ Boros kad TUHAN, ’’Iyolo’ no kopio o tulun ku, om a’ i’ iyolo’ magakal doho’,’’ ka. Om poiduwo’ noddi dau iyolo’ ⁹ do mantad id koinsanai’d kosusaan diyolo’. Okon i’ ko’ susuhuon ko’ wakil po o sinuhu’d TUHAN, suwai ko’ iyau i’ kopio o pinopoidu’ diyolo’. Ginompi’ dau iyolo’ tu’ osianan i’ om olisiu iyau diyolo’. Om tontok piya di gulu po nga’ pinigompian i’ dau iyolo’. ¹⁰ Nga’ suminaap i’ iyolo’d TUHAN, om pinopotongob iyolo’ dau. Om gowoi poddi om nosiliu iyau do pisangod diyolo’, om suminaap diri iyau diyolo’. ¹¹ Om kosorou noddi diyolo’ i maso di gulu po, di poimpasi po i Musa, i susuhuon do TUHAN, om ponguhot no iyolo’ do poingkaa, ’’Hinonggo noddi i TUHAN do minomoyo’ ngai’ di boyoon toko’ di minaya’ di rahat dot opuhod? Om honggo noddi i TUHAN di pinapatahak do sinundu dau dot id di Musa? ¹² - ¹³ Honggo noddi i TUHAN di minomonsoi do piro-piro o kopusahan kopio, do mikuwo di sinundu dau do pinawaya’ di Musa, i minomitas di waig do rahat om i minomoyo’ do tulun dau do minaya’ di waig dot aralom, om i nakaanu do kobontugan dit aiso’ o kopupuson?’’ ka. Om miagal poddi iyolo’ do kuda’ kotimpas, om a’ i’ iyolo’ insan kasadu, tu’ winoyo’ i’ iyolo’d TUHAN. ¹⁴ Om poingkuro nopo i sapi’ do woyoon do mongoi pangakan-ngakan do hiri’d kobuturan, om iyo nogiddi o TUHAN do minomoyo’ di tulun dau do kuminaa dot id tana’ di pinabatos dau, om bontugon id tulun o ngaran dau. ¹⁵ Oi TUHAN, ontong no dahai do mantad hino’d surga, i tiyonon nu dit olidang om kikagayaan. Honggo noddi i kogoyoo’ do ginawo nu do mamadul dahai? Honggo noddi i sinundu nu? Kada’ kopio iyahai tolib-tolibai do momusorou. Kada’ undorong tomod. ¹⁶ Tu’ iya’ no o tapa’ dahai. A’ no kotutun dahai i Abraham om i Yakub, nga’ iya’ nopo oi TUHAN, om tapa’ i’ dahai, i minamasi dahai do mantad poddi gulu po. ¹⁷ Nokuro tu’ pologoson nu iyahai do sumansala’ di ralan nu? Nokuro tu’ pologoson nu iyahai do kumodou o ginawo gisom dot a’ iyahai tumanud? Guli’ no, oi TUHAN, dot i piro-piro o susuhuon nu, om i tulun di songonuon nu do mantad di gulu po, o kogulian. ¹⁸ Nokuro tu’ pinologos nu do nindaraat di tulun dot araat i Walai’d Sasambayangan dot Agayo, om pinologos nu iyahai i tulun nu, do natanggayan do pisangod do piro-piro o koloido’? ¹⁹ Miagal po iyahai do tulun dit a’ nu insan koporinta’ do mantad di gulu po, om miagal pod okon iyahai ko’ tulun nu.

¹ Piangkango’ ilo tawan om lumintuhun i’, oi TUHAN, pogogoro’ no ilo konuluhanan dot opopoddosian. ² Om miagal pondo i konuluhanan diri di waig do gumolok do poingrakan do hiri’d tapui dit osikit. Rikot no om pointalangon no o sinundu nu dot id pisangod nu, om pogogoro’ ngai’ no i bansa’ dot id toguang nu. ³ Haro o tinsan o maso do ruminikot ko do miningwonsoi do piro-piro o kopusahan di kotompurolosi kopio, om it a’ dahai insan-insanon; om soira’ddi nokito ko di konuluhanan om gogor ngai’ nopo iri dot opopoddosian. ⁴ Aiso’ i’ o tiso’ do nokokito, ko’ nokorongou do kinorohingan do suwai do miagal diya’, i mingwonsoi do miagal diri do bagi’ di tulun do mogondos diya’, do mantad di gulu po. ⁵ Orohian ko i’ di tulun dit asanangan do tumanud do korohian nu. Tinogod nu daa iyahai nga’ a’ i’ iyahai tuminingkod do mingwonsoi’d dusa, nga’ pinasi kasai’ nu i’ iyahai. ⁶ Kidusa ngai’ nopo iyahai; iri piya i kowoyo-woyoon dahai dit osonong nga’ nasabak i’ do kososomu’ om kasalaan, om miagal poddi iyahai do roun di kumoring om it otilib do ribut, tu’ tumanus no iyahai do gama’ di kararaat dahai. ⁷ Aiso’ no tiso’ do tulun do sumambayang dot id diya’, ko’ mokiuhup po diya’. Tu’ luminisok ko do mantad id dahai, om pinologos nu iyahai dot araag di dusa dahai. ⁸ Nga’ iya’ no o tapa’ dahai, oi TUHAN, iyahai nopo om lagit no toomod, om iya’ no i minomorun dahai. Winonsoi ngai’ nu i’ iyahai. ⁹ Iyo nopoddi om kada’ no kotogod doho’, oi TUHAN, kada’ no soroho’ i dusa dahai; ontong pogi’, nga’ tulun nu i’ iyahai. ¹⁰ Iri nopo kabandaran nu dit ongolidang om iyo pod tana’ do kowotuan, Yorusalim nga’ nosiliu nod tana’ dit a’ sunian om oingou. ¹¹ Iri nopo Walai’d Sasambayangan dot Agayo dit olidang om abantug i niyon di taki-aki dahai do minamarayou diya’, om naraag nod tapui; oinsanan nopo i kinoiyonon di korohian dahai do nangaraag. ¹² Okito ngai’ nu i’ iri, oi TUHAN, om amu’ ko nopo tuu mungkomi? Pologoson nu nopo tuu iyahai dot adalaan dot oinggorit?

¹ Boros kad TUHAN, ’’Posodia’ oku no daa do sumimbar do sambayang di tulun ku nga’ a’ i’ iyolo’ suminambayang. Posodia’ oku no dot ihumon diyolo’ nga’ a’ i’ iyolo’ minumbal do mogihum doho’. A’ i’ suminambayang dot id doho’ i bansa’ddi do mulong piya do posodia’ kasai’ oku do sumimbar do, ’Hati oku i’, tulungon ku i’ iya’’, kangku. ² Posodia’ kasai’ oku i’ daa do rumamit do tulun ku, do tumomod piya iyolo’ do momonsoi dit araat om mintanud do korohian diyolo’. ³ Popotogod kasai’ nopo iyolo’ doho’. Tu’ papatahak iyolo’ do porsombahan do sumbolion dot id kabun do podsubakan di piro-piro o tingolig, om monorob iyolo’ do kominyan dot id sakai di pananaraban do porsombahan do hiri. ⁴ Dongotuong no om mongoi iyolo’ do hilo’d luang do nulu-nulu om hilo’d kalabangan do mongoi pokinosihat di rusod do tulun di nangapatai. Mangakan iyolo’d wogok om monginum do sup do daging di nakatahak dot id piro-piro o tingolig. ⁵ Om momoros nogindo iyolo’ dot id tulun do suwai dot, ’Insodu’ kou no dahai; tu’ olidang no kopio iyahai om a’ no koino-ino dot oigitan dokoyu,’ ka. A’ oku no iyoho’ i TUHAN, milo do tumorunung kasai’ do tulun do miagal diri. Miagal pod tapui dit a’ milo do pisokon o kototogod ku diyolo’. ⁶ Natantu’ ku nod sulian ku i kararaat diyolo’, om notulis no i hukuman do porotuon ku dot id diyolo’. A’ ku i’ lihuan i nowonsoi diyolo’. Atantu’ nod hukuman ku, ⁷ i dusa diyolo’ om i dusa di taki-aki diyolo’. Tu’ minodtutud iyolo’ do kominyan do hiri’d podsubakan do tingolig do hilo’d timpak do nulu-nulu, om minimboros iyolo’ dot araat dot id doho’. Om hukuman ku nondo iyolo’ do miontok di nowonsoi diyolo’ di gulu po,’’ ka dau. ⁸ Om boros kad TUHAN, ’’Aiso’ i’ o papataam do tua’ dot anggur dit osonong do potonggoyon di tua’ di nomomos, tu’ wonsoyon i’ iri do waig dot anggur. Om miagal nogiddi tu’ a’ ku i’ raagon ngai’ i tulun ku, posion ku i’ i tulun di sumambayang dot id doho’. ⁹ Barakatan ku indo i tulun dot Israil di mantad id payat do Yohuda, om kasanganu i sinakagon diyolo’ di tana’ ku di hilo’d konuluhanan. Hilo’ nondo do momogun-mogun i tulun di nopili’ ku, om i sumambayang dot id doho’. ¹⁰ Sumambayang nondo iyolo’ dot id doho’ om woyoon diyolo’ i dumba’ om sapi’ diyolo’ do hiri’d pangakan-ngakanan do hilo’d Rantai do Saron di ponong id kotonobon om hilo’d rantai di roitan do Rantai do Kosusaan di ponong id koulayon. ¹¹ Nga’ suwai indo ko’ iri o kootuson do tulun di magada’ doho’, om it a’ mamadul do Sion, i nulu-nulu ku dot olidang, om i tumuku’ do Gad om Moni, i tingolig do nasip om kountungan. ¹² Om patayon kou nondo tu’ a’ kou i’ suminimbar di linohou ku iyokoyu. Om a’ kou minokinongou di minoro-boros oku dokoyu. Orohian kou nogi’ do sumaap doho’ om mingwonsoi dit araat. ¹³ Om atantu’ no dot iri nopo tulun di tumuku’ om mumboyo’ doho’ om osima’ i’ dot akanon om inumon, nga’ iyokoyu nopo om louson indo om tuuhan. Osimbayan indo iyolo’ nga’ iyokoyu nopo om ointingayam i’. ¹⁴ Iyolo’ nopo om modsinding i’ dot atataadan, nga’ iyokoyu nopo om mihad poo tu’ aiso’ no o pokukurayan. ¹⁵ Om roroiton pondo di tulun di nopili’ ku o ngaran dokoyu do maan do pomopol. Tu’ iyoho’ no, i TUHAN, it Asawat Kopio, o mamatai dokoyu. Nga’ onuan ku indod ngaran do wagu i tulun di mumboyo’ doho’. ¹⁶ Om isai nopondo o hiri’d pomogunan diri di mokianu do barakat nga’ mokibarakat nondo doho’, iyoho’ i Kinorohingan dit otorodok. Om isai nopo i sumumpa’ nga’ sumumpa’ nondo dot id suang do ngaran ku, iyoho’ i Kinorohingan dit otorodok. Om katalib nondo i kinosusaan di gulu om ongolihuan iri,’’ ka dau. ¹⁷ Boros kad TUHAN, ’’Momonsoi oku nondod pomogunan do wagu om tawan do wagu. Om koinsanai di nongosiliu di maso di notoliban om olihuan ngai’ nopondo. ¹⁸ Kumooropod no om kumotood no dot aiso’ o kopupuson dot iti wonsoyon ku o kataadan. Tu’ iri nopo Yorusalim do wagu do wonsoyon ku om oponu’ pondod kaarapadan, om i tulun di hiri nga’ ongotood ngai’ nopo o ginawo. ¹⁹ Om iyoho’ piya’ndo nga’ otood i’ tu’ Yorusalim om i tulun do hilo’ o kataadan ku. Om aiso’ nondo tulun do mihad om aiso’ o minglohou do mokiuhup do hilo’. ²⁰ Tangaanak nga’ a’ nondo matai do maso po dot okoro’, tu’ oinsanan nopondo i tulun dot ongotogui. Om iri piya i hatus no o toun do tumur dau nga’ omulok po o kasarahan. Tu’ ondung apatai o tulun dot a’ po orikot o tumur do miagal diri, om sorohon nod noontok do hukuman ku. ²¹ - ²² Momonsoi nondo o tulun do walai om iyolo’ no o miyon do hiri. Om a’ nod tulun do suwai oiyon. Om mananom nondo iyolo’ dot anggur om kopuriman iyolo’ do kowosiho’ di waig dot anggur; okon i’ ko’ wokon o koinum diri. Om otogui nondo i tulun ku do miagal di kayu do hilo’d gouton. Om kopuriman iyolo’ do kootuson di karaja’ diyolo’. ²³ Osonong ngai’ indo o kootuson di wonsoyon diyolo’, om i tangaanak diyolo’ om i sinakagon diyolo’ do gisom dot alaid. ²⁴ Om tontok piya dit a’ po opupusan o sambayang diyolo’ dot id doho’ nga’ osimbar ku no i sambayang diyolo’. ²⁵ Misugku’ nondo do mangakan-ngakan do sakot i toni om i dumba’; om i singa nga’ mangakan nondod sakot do miagal di sapi’; om tulanut nga’ a’ nondo korolosi. Om aiso’ nondo o nunu-nunu do pokoruol ko’ momonsoi dot araat do hilo’d Sion, i nulu-nulu dit olidang,’’ ka dau.

¹ Boros kad TUHAN, ’’Tawan no o tirikohonon ku di dong raja’, om pomogunan no o tuulokon ku. Om okuro-kuro daa’ndo o walai do wonsoyon nu doho’, om okuro-kuro daa o kinoiyonon dot iyonon ku? ² Tu’ iyoho’ i’ o minomonsoi do koinsanai’d nunu nopo. Nga’ orohian oku i’ do tulun dit osiriba’ o ginawo om i kumorologo do dusa dau, om it oronok om i mumboyo’ doho’. ³ Nga’ mingwonsoi nopo i bansa’ddi do korohian diyolo’. Id diyolo’ nopo om aiso’ i’ o pisuayan do monumbali’ do sapi’ do tontoluhan do maan do porsombahan om monumbali’ do tulun do maan do porsombahan; papatahak nopo iyolo’ do tanak do dumba’ do maan do porsombahan om iyo no do momutul iyolo’d liou’d tasu; om papatahak iyolo’d porsombahan do gandum nga’ iyo nod papatahak do raha’d wogok, om modtutud iyolo’d kominyan nga’ iyo nod tumuku’ iyolo’ dot id tingolig. ⁴ Om gowoi pondod porotuan ku iyolo’ do kosusaan! I kosusaan di poddosi no kopio diyolo’, tu’ aiso’ i’ o suminimbar di minomolohou oku om aiso’ o minokinongou di minoro-boros oku. Orohian nogi’ iyolo’ do sumaap doho’ om mingwonsoi dit araat,’’ ka dau. ⁵ Pokinongou kou nod poboroson do TUHAN, iyokoyu it oronok dau om i mumboyo’ dau, ’’Tu’ otorodok kou i’ dot id doho’. Om haro nondo o piro-piro o tulun do bansa’ dokoyu dot araatan dokoyu om a’ orohian do rumolot dokoyu, tu’ otorodok kou i’ dot id doho’. Hingi-hingion kou nondo diyolo’ om moro-boros iyolo’ do poingkaa, ’Pointalangon daa giya kopio’d TUHAN o kobontugo’ dau om posion kou dau, om kokito i’ iyahai dot ooropod kou,’ ka diyolo’. ⁶ Pokinongou pogi’! Ilo’ nopo tuni dot opuhod do hilo’d bandar om ilo tohio do hilo’d Walai’d Sasambayangan dot Agayo nga’ tuni ku i’ do momohukum di pisangod ku! ⁷ Bandar ku nopo dit olidang om miagal do tondu’ di sigog id osusu om a’ i’ minonohoruol. ⁸ Haro toi o nokokito ko’ nokorongou do hal do miagal diri? Haro toi o bansa’d tulun dot insan-insan o tadau do pinogkosusu? Nga’ bansa’ nopo dot Israil om nosusu do tontok di tumimpuun nogi’ o Sion do monohoruol. ⁹ Kada’ dokoyu soroho’ do pologoson ku nod orikot o kasawaan di tulun ku do mantad id tian, om a’ ku indo pologoson dot asawa’ kopio,’’ kad TUHAN do minomoros. ¹⁰ Tonggoi nod Yorusalim dot ooropod, kotood no dot iyau o kataadan! Kumooropod no do moyo’ dau do dinondo, oi koinsanai dokoyu i nokopogihad dau. ¹¹ Kopuriman kou indod kakayaan dau, do miagal di tanak di poinsusu do tina’ dau. ¹² Boros kad TUHAN, ’’Onuan ku nondo iyokoyu do kosimbayanan dit aiso’ o kopupuson. Om i kakayaan di piro-piro o bansa’ nga’ lumuyung nopondo dot id dokoyu do miagal do bawang dit a’ rumasak. Om miagal ko nondod tanak di posusuon do tina’ dau, om poingkibit, om i kolisihan kopio dau. ¹³ Om insasamadan ku indo iyokoyu do hilo’d Yorusalim do miagal do tina’ di monginsasamod do tanak dau. ¹⁴ Om soira’ nopondo dot okito dokoyu dot osiliu o miagal diti om ooropod kou nondo, om popokoris nondo om poposonong do tinan dokoyu iri. Om koilo kou nondo dot iyoho’ no, i TUHAN, o monulung do tulun di mumboyo’ doho’, om porotuan ku do kototogod ku i pisangod ku,’’ ka dau. ¹⁵ Rumikot nondo o TUHAN do mitonggoi do tapui. Om sumakai nondo iyau do talad do tongus dot opuhod do mongoi pomohukum ngai’ di tulun di katagadan dau. ¹⁶ Tapui nondo om gayang o pomohukum dau do koinsanai’d tulun do hiti’d pomogunan dit oilaan dau do haro o kasalaan, om ogumu’ nondo o tulun do hukuman do kapatayon. ¹⁷ Boros kad TUHAN, ’’Oruhai no o kopomohukuman di tulun di momolidang do tinan diyolo’ om i mogitanud-tanud nopo do mongoi podsubak do hiri’d kokobunan di dong tingolig. Nokosodia’ no o pomohukum ku di tulun di mangakan do wogok om tikus om i taakanon do suwai di sosomu’. ¹⁸ Oilaan ku i’ i pomusorou om wonsoyon diyolo’. Rumikot oku no do mongoi ponimung do tulun do mantad id koinsanai’d bansa’. Om soira’ nopod tumimung iyolo’, om kokito nondo iyolo’ do sinundu ku, ¹⁹ om koilo iyolo’ dot iyoho’ no i minomohukum diyolo’. Nga’ posion ku indo o wookon diyolo’ om pokoyoon ku iyolo’ do hilo’d bansa’d suwai om hilo’d pomogunan dot osodu’ dit a’ po insan korongou do pasal doho’ om a’ nokokito do kobontugo’ om sinundu ku: iri no i hilo’d Sepanyol, om hilo’d Libia, om hilo’d Lidia, i haro o mamamana’ dit ongotiru’, om hilo’d Tubal, om hilo’d Yunani. Om popinsunudon nondo diyolo’ o kobontugo’ ku dot id piro-piro o bansa’ diti. ²⁰ Om powoyoon nondo diyolo’ do gumuli’ o koinsanai di koobpinayan dokoyu do mantad id koinsanai’d bansa’ddi do maan do popuhawangon dot id doho’. Om pootodon nondo diyolo’ iyolo’ do hilo’d nulu-nulu ku dit olidang di hilo’d Yorusalim do songinsakai’d kuda’, om kaladai, om unta om korita’-kuda’ om guyudan, do miagal di koubasanan do tulun dot Israil do papaatod do porsombahan do gandum do pokoyoon do hiri’d Walai’d Sasambayangan dot Agayo dot id pinoiyanan di nongolidangan. ²¹ Om silihon ku nondo o wookon diyolo’ dot imam om tulun do Liwi. ²² Om poingkuro nopo i pomogunan do wagu om i tawan do wagu di winonsoi ku do hino kasai’ tu’ i sinundu ku o papaharo kasai’ddi, om miagal nogiddi i sinakagon nu om i ngaran nu do hino kasai’ do gisom do poingompus. ²³ Om pointikid-tikid do Tulan do Wagu, om tadau’d Sabat, om rumikot nondo o tulun do mantad id pointikid-tikid do bansa’ do mongoi tuku’ dot id doho’ do mikuwo’d opusou kopio, do hiti’d Yorusalim. ²⁴ Om soira’ nopondo do tumongkiad iyolo’, om okito nondo diyolo’ i rata’ do tulun di suminaap doho’ do songingiliu poo. Om a’ indo matai i giuk di mangakan di rata’ diyolo’ddi, om i tapui di monorob di rata’ddi nga’ a’ i’ opisok. Om oinsanan nopondo o tulun dot ooris do kokito’ddi,’’ ka dau.