HOSIA

HOSIA

¹ Iti no i boros do TUHAN do pinoboros dau dot id di Hosia, i tanak di Biiri, do tontok di maso di Usia, om i Yotam, om i Ahas, om i Hiskia do raja’ do Yohuda, om di maso di Yirobiam i tanak di Yihoas, do raja’ dot Israil. ² Tontok di boro-boros i’ o TUHAN dot id bansa’ dot Israil do pinolombus di Hosia, om poingkaa o boros do TUHAN, ’’Oi Hosia, ongoi panansawo do tondu’d sundal om iri’ndo i tangaanak nu nga’ miagal nopondo dau. Om iyo no di sawo nu i tulun ku do tuminongkiad doho’ om a’ tuminorodok dot id doho’,’’ ka dau. ³ Om kowino’ noddi di Hosia ot iso’ o tondu’ di roitan dot i Gomor, i tanak di Diblaim. Om kosusu noddi i tanak diyolo’ di koiso’, om kusai i tanak diri. ⁴ Om boro-boros noddi o TUHAN dot id di Hosia, ’’Pungaranai dot i Yisriil ilo tanak nu tu’ a’ no alaid do hukuman ku i raja’ dot Israil tu’ minimpatai i’ do tulun i Yohu, i taki dau, do hilo’d Yisriil. Pupusan ku no o pomorintaan di sinakagon di Yohu. ⁵ Om hilo’ nondod Rantai do Yisriil do raagon ku i kinoris do soudor dot Israil do tontok do maso’ddi,’’ ka dau. ⁶ Om haro po kawagu o tanak di Gomor do koduwo; om iti no om tondu’. Om boros kad TUHAN dot id di Hosia, ’’Pungaranan no ino tanak nu dot it ’A’ Insianan’, tu’ a’ ku nondo insianan i tulun do bansa’ dot Israil om a’ ku iyolo’ ompunan. ⁷ Nga’ insianan ku indo i tulun do Yohuda. Om iyoho’ no i TUHAN, i Kinorohingan diyolo’, o mamasi diyolo’, nga’ okon i’ ko’ pisangadan o pawayaan ku do mamasi diyolo’, om okon ko’ gayang ko’ pana’ ko’ kuda’ ko’ tulun di sumasakai do kuda’,’’ ka dau. ⁸ Om soira’ di nokotingkod di Gomor do sumusu i tanak dau, om ponontian no kawagu iyau. Om iti noo om kusai. ⁹ Om boros kad TUHAN dot id di Hosia, ’’Pungaranan no ino tanak nu dot it ’Okon ko’ Tulun Ku’, tu’ okon no ko’ tulun ku i tulun dot Israil. Om iyoho’ nga’ okon no ko’ Kinorohingan diyolo’,’’ ka dau. ¹⁰ Om miagal nondod pasir do rahat o kogumuo’ do tulun dot Israil, tu’ a’ no ointob-intob. Om poingkaa o boros do Kinorohingan dot id diyolo’, ’’Okon kou no ko’ tulun ku,’’ ka. Nga’ rumikot indo i tadau do kapamarasan dau dot id diyolo’ do poingkaa, ’’Iyoho’ no o Kinorohingan di poimpasi, om iyokoyu no o tangaanak ku,’’ ka. ¹¹ Om opisugku’ nondo kawagu i tulun do Yohuda om i tulun dot Israil. Om momili’ nondo iyolo’d songulun o boyoon diyolo’, om gumumu’ nondo iyolo’ om osimbayan kawagu do hilo’d pomogunan diyolo’. Tadau nopo do Yisriil om atantu’ no do tadau dit agayo!

¹ Iyo nopoddi om roitan no i sompi’ ko’ tulun dot Israil do ’’Tulun do Songonuon do Kinorohingan’’ om it ’’Insianan do TUHAN,’’ ka dau. ² Om boros kad TUHAN, ’’Oi tangaanak ku, lugu-lugutai no ilo tina’ dokoyu do mulong piya dot okon ku noddi ko’ sawo iyau, om okon oku ko’ sawo dau. Lugu-lugutan no iyau do tumingkod do magampahu’ om tumingkod do sundal. ³ Tu’ ondung a’ iyau tumingkod do sundal, om labasan ku no iyau do miagal di pogkosusuo’ i’ iyau. Om silihon ku nondo iyau do miagal do tana’ dit otuu om it a’ sunian, om apatai nondo iyau dot otutuuhanan. ⁴ - ⁵ Om a’ nondo insianan i tangaanak dau tu’ iyolo’ nopo om tangaanak i’ do mantad id kosusundal dau. Om tina’ diyolo’ nga’ sundal dit a’ no milo dot ointingayaman. Om boros ka dau, ’Mongoi oku nondod hilo’d kongouhangan ku tu’ manahak i’ iyolo’ doho’ do taakanon om tinumon, om hulu do dumba’ om kain linan om tumau do saitun om waig dot anggur,’ ka. ⁶ Om gowoi pondo, om pagaron ku iyau do rugi om momonsoi oku’d tolig do pagantob do ralan dau. ⁷ Om gumusa’ no daa’ndo iyau di kongouhangan dau nga’ a’ no dau okosupan iyolo’. Om pingihumon nondo dau iyolo’ nga’ a’ no dau okito iyolo’. Om momoros nondo iyau do poingkaa, ’Gumuli’ oku nogi’ dot id sawo ku dit id gulu, osonong-sonong oku nogi’ di hilo’ oku po ko’ iti baino’,’ ka. ⁸ Om a’ no di tina’ nu okunon dot iyoho’ o minanahak dau di gandum, om i waig dot anggur, om i tumau do saitun, om koinsanai di pirok om tamas di pakayon dau do tumuku’ dot id Baal. ⁹ Om gowoi pondo om dongmongomot nopo om ngoyon ku nondo kawagu i pinopuhawang ku, dot i gandum om anggur, om i hulu’d dumba’ om i kain linan di pinatahak ku dau do rosukon dau. ¹⁰ Labasan ku nondo iyau do hiri’d toguang di kongouhangan dau, om aiso’ nondo o songulun piya diyolo’ do milo do popoidu’ dau do mantad id kuasa’ ku. ¹¹ Om tingkodon ku nondo o koinsanai di poginakanan dau, i poginakanan dau do monikid toun om monikid tulan om i karamayan do tadau’d Sabat, om koinsanai’d tadau’d agayo do don tugama’. ¹² Om raagon ku nondo i guas dot anggur om i guas dot ara dau, i pinatahak di kongouhangan dau dot id dau do gadsi’ dau do mogobi-obi’ diyolo’. Om silihon ku nondod gouton i kabun dau’d anggur om i kabun dau’d ara, om raagon iri do nintorusan. ¹³ Om hukuman ku nondo iyau tu’ nokolihu i’ iyau doho’ do piro-piro o koloido’, om minodtutud iyau do kominyan dot id Baal om minanampakai iyau do tamas do mongoi gusa’ di kongouhangan dau. Iyoho’ no i TUHAN o minomoros diti,’’ ka dau. ¹⁴ Boros kad TUHAN, ’’Iyo nopoddi om tanggayan ku nondo kawagu iyau do hilo’d tana’ do kowotuan om hilo’ nondo dot insasamadan ku iyau om sunudan ku iyau dot osianan oku dau. ¹⁵ Om pogulion ku nondo kawagu dot id dau i kabun dot anggur om silihon ku do wawayaan do pagandasan i Kubong do Kosusaan. Om hilo’ nondo do rumamit iyau doho’ do miagal di winonsoi dau dit omulok po iyau, tontok di kososoliwan dau do mantad hilo’d Masir. ¹⁶ Om roitan oku nondo dau do sawo dau, om a’ oku nondo dau roitan do Baal. ¹⁷ Om a’ ku nondo kawagu iyau pologoson do mamarait do ngaran do Baal. ¹⁸ Om tontok nopondo do maso’ddi om momonsoi oku nondod tumpongo dot id nintorusan om id tombolog, om a’ i’ iyolo’ pokoruol do tulun ku. Om iduwon ngai’ ku nogi’ o koinsanai’d rapo-rapo do sumangod do mantad id pomogunan diri, om koinsanai’d gayang om pana’, om tingkodon ku o koinsanai’d pisangadan om osimbayanan i’ om aiso’ o koligagaanan di tulun ku do momogun-mogun do hilo’. ¹⁹ Oi Israil, silihon ku nondo iya’ do sawo ku; otulid oku i’ om otorodok oku. Pointalangan kasai’ ku i’ iya’ do kosianan om kolisihan om iyoho’ nondo o sanganu diya’ do gisom dot alaid. ²⁰ Sulungon ku indo i batos ku om songonuon ku iya’, om okunon nu nondo dot iyoho’ o TUHAN nu. ²¹ - ²² Tontok nopondo do maso’ddi om simbaron ku indo o sambayang dot Israil i tulun ku. Om pasandatan ku’d rasam iti tana’ om posuni’ nondod gandum om anggur om saitun iti tana’. ²³ Pomogun-mogunon ku nondo i tulun ku do hiri’d pomogunan diyolo’, om posimbayanon ku iyolo’. Pointalangan ku nondo do kosianan i tulun di roitan dot ’A’ Insianan’ om iri nogi’ i tulun di roitan dot ’Okon ko’ Tulun Ku’ nga’ roitan ku nondo dot ’Iyokoyu no o Tulun Ku’ om sumimbar nondo iyolo’ dot ’Iya’ no o Kinorohingan dahai,’ ka,’’ ka dau.

¹ Om boros kad TUHAN dot id doho’, ’’Pamanau po kawagu, om pointalangon i’ o kosianan nu dot id tondu’ di magampahu’. Om mositi’ no dot osianan ko dau do miagal doho’ tu’ osianan do tulun dot Israil, do mulong piya do tuminongkiad iyolo’ doho’ om tuminuku’ iyolo’ dot id tingolig om papatahak do porsombahan do roti do kismis dot id tingolig,’’ ka dau. ² Om pabayaro’ ku noddi o hopod om limo o tusin do pirok om hatus om limo nohopod o kilogram do barli do pinomoli ku di tondu’ddi. ³ Om sinunudan ku iyau dot alaid nondo iyau dot a’ ku toningon nga’ solinaid nopodti om a’ no iyau koino-ino do magampahu’ ko’ sumiliu pod sundal, om tontok no do maso’dti dot andadon ku iyau. ⁴ Om miagal nondodti o tulun dot Israil do momogun-mogun do piro-piro o koloido’, dot aiso’ o raja’ om aiso’ o boyoon, om aiso’ o porsombahan do sumbolion om aiso’ o torigi’d watu di don tingolig, om aiso’ o tingolig, om aiso’ o gimat di pongilaan dit osiliu dot id dosunsudan. ⁵ Nga’ rumikot nondo o maso do gumuli’ kawagu i tulun dot Israil dot id TUHAN, i Kinorohingan diyolo’, om gumuli’ iyolo’ dot id iso’ o sinakagon di Daud, i raja’ diyolo’. Om oronok nondo om momusou iyolo’d TUHAN om kaanu iyolo’ do barakat do mantad id TUHAN.

¹ Haro o kapasalaan do TUHAN do tulun di poingiyon do hiti’d pomogunan diti. Pokinongou kou no do poboroson dau, oi Israil, ’’Aiso’ no o kotorodoko’ om kosianan do hiti’d pomogunan, om ilo tulun do hiti nga’ a’ magakun do Kinorohingan oku. ² Mimbatos iyolo’ nga’ a’ indo diyolo’ sulungon; om mongudut iyolo’ om mamatai, om manakau, om magampahu’. Muhang-ruhang nopo o karaaton om tulun di patayon nga’ mogisuhut-suhut nopo. ³ Gowoi pondo om tumuu i tana’ do pomogunan diri om matai ngai’ i songingiyon do hilo’. Oinsanan nopondo i nintorusan om i tombolog dot apatai om iri piya sada’ nga’ apatai i’,’’ ka. ⁴ Om boros kad TUHAN, ’’Kada’ pologoso’ do haro o papasala’ ko’ monogod po di tulun ku, tu’ pasalaon ku nopo om iyokoyu it imam. ⁵ Mingwonsoi kou nopo di kasala’ do tadau om totuong, om iri nabi nga’ miagal nopo dokoyu. Gowoi pondo om patayon ku ot Israil, i tina’ nu. ⁶ Obungou no o tulun ku tu’ a’ i’ iyolo’ minamadul doho’ om iyokoyu nogi’ it imam nga’ a’ i’ minamadul doho’ om minagada’ kou di ponudukan ku, om gowoi pondo om iyadaan ku iyokoyu om a’ ku okunon do sumiliu’d imam di mogobi-obi’ doho’ i tangaanak dokoyu. ⁷ Ogumu-gumu’ kou ot imam, nga’ ogumu-gumu’ no o dusa dokoyu dot id doho’, om silihon ku nondo do kointingayaman i ngaran dokoyu’d osonong. ⁸ Kuminaya’ kou tu’ i dusa do tulun ku o nakakaya-kaya’ dokoyu, om orohian kou nopoddi do momonsoi kasai’ iyolo’d dusa. ⁹ Om miagal nopondo o hukuman do karatu’ dot id dokoyu om id rayat! Hukuman ku nondo iyokoyu do miontok di nowonsoi dokoyu. ¹⁰ Kaakan kou piya di dokoyu’d bahagi’ di porsombahan nga’ louson kou pondo kasai’. Om tumuku’ kou piya dot id tingolig di kororombung nga’ aiso’ kasai’ i’ o tanak dokoyu, tu’ tuminongkiad kou i’ doho’; om tuminuku’ kou nogi’ dot id tingolig,’’ ka dau. ¹¹ Om boros kad TUHAN, ’’Managak do pomusarahan dot osonong do tulun ku o waig dot anggur di wagu om i laid! ¹² Mokianu kou’d pinointalang do mantad id sallangod o kayu-kayu! Sukud noo o momisunud dokoyu di pokiilaan dokoyu! Nokotongkiad kou no doho’. Nakatahak no dokoyu o tinan dokoyu dot id tingolig, do miagal po di tondu’ di suminiliu’d sundal. ¹³ Papatahak kou do porsombahan di sinumbali’ dot id kinoiyonon do modsubak do tingolig do hilo’d timpak do nulu-nulu, om modtutud kou do kominyan dot id sahau di kayu dit okohob tu’ osonong tomod i’ o hiri’d dolungungan diri! Om gowoi poddi om suminiliu ngai’ do sundal i tangaanak dokoyu’d tondu’ om iri tongoondu’ di monongiwan dokoyu nga’ magampahu’ ngai’ nopo. ¹⁴ Nga’ a’ ku i’ iyolo’ hukuman dot iyo piya’dti o winonsoi diyolo’, tu’ iyokoyu nga’ mongoi i’ dudun do sundal di mogobi-obi’ do tingolig, om mogiwoyo-woyo’ kou nopo diyolo’ do papatahak do porsombahan di sinumbali’ dot id tingolig, om otopot no kopio i boros do komolohingan do poingkaa, ’Tulun nopo dit atagakan do pomusarahan dot osonong om araag no,’ ka. ¹⁵ Mulong piya dot a’ otorodok o tulun dot Israil dot id doho’, nga’ maha’ daa om a’ iyo’ddi o kasalaan do tulun do Yohuda. Kada’ ongoi sambayang do hilo’d Gilgal ko’ hilo’ pod Baitol, ko’ mimbatos pod hilo’ dot id suang do ngaran do TUHAN di poimpasi. ¹⁶ Miagal pod kaladai kosurilog i tulun dot Israil. Om poingkuro oku po daa’ndo do momogompi’ dokoyu do miagal di dumba’ do paakan-akanon do hiri’d kobuturan? ¹⁷ Nolimu’ tomod nopod tingolig i tulun dot Israil. Pologoson nopo iyolo’ do tumanud do korohian diyolo’. ¹⁸ Om aawuk nopondo iyolo’ do koinum do waig dot anggur, om asanangan tomod nondo iyolo’d sumiliu’d sundal, om pokouhangon nogindo diyolo’ o kointingayaman ko’ ngaran dot osonong. ¹⁹ Om gowoi pondo om atanus iyolo’ do miagal pod notilib do ribut, ointingayam nondo iyolo’ tu’ pinapatahak i’ iyolo’ do porsombahan di sinumbali’ dot id tingolig,’’ ka dau.

¹ Boros kad TUHAN, ’’Pokinongou kou nodti, iyokoyu it imam! Mokinongou kou no kopio, oi tulun dot Israil! Pokinongou kou no, iyokoyu i sinakagon do raja’. Otopot nopo kopio om apatut daa dot otulid o pomumutus dokoyu, nga’ a’ i’, om gowoi pondo om porotuan ku iyokoyu do hukuman! Nosiliu kou nogi’ do lawa’ do hilo’d Mispa, om nosiliu kou’d kasip do hilo’d nuluhon do Tabor. ² Om nosiliu kou’d luang dit aralom do hilo’d Bandar do Sitim, om gowoi pondo om hukuman ngai’ ku iyokoyu. ³ Oilaan ngai’ ku i’ o wonsoyon dot Israil, tu’ a’ i’ iyau milo’d popolisok do nunu nopo do mantad id doho’. A’ iyau tuminorodok dot id doho’ om iri tulun dau nga’ a’ no osorupai do tumuku’ dot id doho’,’’ ka dau. ⁴ Mangantob no di tulun do gumuli’ dot id Kinorohingan i karaaton do winonsoi diyolo’. Naanggaman no kopio iyolo’ di podsusubak diyolo’d tingolig gisom dot a’ no iyolo’ mamadul do TUHAN. ⁵ Atalang tomod i koondos do tulun dot Israil, om iri no i popointalang kopio di dusa diyolo’. Papatahub om paparatu’ diyolo’ i dusa diyolo’, om iri poddi tulun do Yohuda nga’ kotonggoi i’ diyolo’ dot aratu’. ⁶ Om ihumo’ po daa diyolo’ o TUHAN do ralan nopod minogihum om pinapatahak do dumba’ om sapi’ do numaan do porsombahan di sinorob, nga’ aiso’ no o guna’ddi. Tu’ notongkiadan no iyolo’d TUHAN, om a’ no diyolo’ oihum iyau. ⁷ Tu’ a’ i’ iyolo’ tuminorodok dot id TUHAN; om okon noddi ko’ iyau o sanganu di tangaanak diyolo’. Om gowoi poddi om oruhai no iyolo’d araag do mitonggoi di koumaan diyolo’. ⁸ Pounio’ no i torumpit do momolohou’d mongoi sangod do hilo’d Gibia! Pounio’ no i maan do popoinsan do mongoi sangod do hilo’d Rama! Popongkiso’ no i pangkis do mongoi sangod do hilo’d Baitol! Ongoi no sangod, oi tulun do Binyamin! ⁹ Rumikot no i tadau do kopomohukuman, om apatai nondo o tulun dot Israil. Atantu’ no dot osiliu iti, oi tulun dot Israil! ¹⁰ Boros kad TUHAN, ’’Otogod oku tu’ sinangod i’ do boyoon do Yohuda ot Israil om nongoi diyolo’ solodo’ i tana’ diyolo’. Om gowoi pondo om rotuan ku iyolo’d hukuman di miagal pod luyud. ¹¹ Oinggorit tomod ot Israil dot ulak-ulakan; om naahawan iyau do tana’ di dau’d tinungkusan tu’ suminonsog i’ iyau do minongoi pokiuhup do tulun dit a’ milo’d monguhup dau. ¹² Om porikatan ku nondod karaagan ot Israil om porikatan ku’d kapatayon o tulun do Yohuda. ¹³ Soira’ddi nopurimanan dot Israil dot adalaan tomod iyau do sumakit, om di nokito’d Yohuda i dau’d suhat, om ongoi noddi ot Israil do hilo’d Asur do mongoi pokiuhup di raja’ dot agayo, nga’ a’ i’ iyau kolingos om a’ koubat di suhat diyolo’. ¹⁴ Om iyo oku pondod singa do mongoi saap di tulun dot Israil om Yohuda. Om iyoho’ nondo o popogitobilang-bilang do tinan diyolo’ om tongkiadan ku nogindo. Om soira’ nopondod gayaton ku iyolo’ do mogidu’, om aiso’ nondo o tongoiso’ piya’d tulun do milo’d mamasi diyolo’. ¹⁵ Om tongkiadan ku nondo i tulun ku do gisom pod ongopurimanan ngai’ diyolo’ i koinggoritan do nobungou di dusa diyolo’ om rumikot nogi’ daa’ndo iyolo’ do mongoi pogihum doho’. Tu’ mumbal i’ doti’ daa’ndo iyolo’ do mogihum doho’ dot id suang iyolo’d koinggoritan,’’ ka dau.

¹ Om boros ka ngai’ di tulun, ’’Kainou gumuli’ dot id TUHAN. Tu’ norualan toko’ no daa dau, nga’ atantu’ no do lingasan toko’ i’ dau; om sinuhat toko’ daa dau, nga’ rilitan i’ bo dau i suhat toko’ddi. ² Duwo no ko’ tolu tadau, om posonongon toko’ no dau kawagu om poimpasi toko’ indo do pigompian dau. ³ Kainou pogi’ tumotos do mintutun do TUHAN. Tu’ atantu’ no do rumikot i’ iyau do miagal di tadau do dongkosuabon tu’ rumikot i’, om miagal di rasam tu’ rumikot i’ do momoyopos diti pomogunan do tontok di kararasaman,’’ ka diyolo’. ⁴ Nga’ boros kad TUHAN, ’’Oi Israil om Yohuda, kukuroyon ku no ma iyokoyu’ndo? Tu’ miagal nod bolobou do dongkosuabon o kosianan dokoyu dot id doho’ tu’ osuab po om otuu no, om miagal di haun do dongkosuabon tu’ oruhai om atanus no. ⁵ Om iri no o kinoporikatan ku di piro-piro o nabi do boros ku dot id dokoyu do popolombus di boros ku do momohukum om mamaraag. Om osuhutan i’ om atarang i pokionuon ku do mantad id dokoyu. ⁶ Pokionuon ku nopo dokoyu om osianan kasai’ kou doho’, om okon i’ ko’ i porsombahan dokoyu di sumbolion. Orohian oku nogid kotutun kou doho’ ko’ mantad do papatahak kou do porsombahan di sorobon dot id doho’. ⁷ Nga’ iyo kou i’ di Adam tu’ tinolibambanan i’ dokoyu i tumpongo ku dot id dokoyu. ⁸ Giliad nopo om bandar di noponu’ do tulun dot araat om gampamatai. ⁹ Iri ngai’ nopo it imam om miagal pod sinompuruan do gampanakau do magawang do tulun di tumalib. Hilo’ piya’d ralan di poingkaa do hilo’d kinoiyonon dot olidang di hilo’d Sikim nga’ mamatai i’ iyolo’d tulun. Om tomodon ngai’ i’ diyolo’d momonsoi it angaraat diri. ¹⁰ Araat no kopio i nokito ku do hilo’d Israil: minonosomu’ i tulun ku do tinan diyolo’ tu’ tuminuku’ i’ iyolo’ dot id tingolig. ¹¹ Om iyokoyu nogi’, i tulun do Yohuda, nga’ haro no o maso do natantu’ ku do kopomohukuman ku dino wonsoyon dokoyu,’’ ka dau.

¹ ’’Pointikid-tikid dot orohian oku daa do momolingos dot Israil, i tulun ku, om mononduli’ do koiyon-iyono’ diyolo’, om okito ku nopo nga’ iri po karaato’ om i kasalaan diyolo’. Mogiudut-udut nopo iyolo’, dot iyolo’ ngai’; om monoruang iyolo’d walai do tulun do mongoi panakau; om ngoyon diyolo’ panakahai i tulun do sampanau-panau do hilo’d ralan. ² A’ i’ daa diyolo’ osorou-sorou dot osorou ngai’ ku i karaaton diri; nga’ nosorili’ po iyolo’ di dusa diyolo’, om atalang tomod i’ iri dot okito ku,’’ ka dau. ³ Om boros kad TUHAN, ’’Akalan do tulun i raja’ diyolo’ om i piro-piro o pagawai di raja’ dot i pakat diyolo’d araat o pagakal. ⁴ Araat ngai’ nopo iyolo’ om a’ otorodok dot id doho’. Iri nopo kararaat do ginawo diyolo’ nga’ miagal po di tapui do hiri’d ropuhan, tu’ a’ i’ di mogogonsok siduan dot a’ po posodia’ i roti dot onsokon. ⁵ Tontok di tadau do karamayan di raja’, om numaan diyolo’ owuko’ di waig dot anggur i raja’ om koinsanai di pagawai di raja’, om gisom do mingwonsoi poddi iyolo’ di dongkababasug. ⁶ Om alaid noddi, om monokiambalut tomod diri i raja’ di tulun dot angaraat diri. Iyo po di tapui do hiri’d ropuhan i korohian diyolo’d araat do mikit-sikit dot id ginawo diyolo’ di dongotuong, om kosuabon nopondo nga’ molob-ngolob poo do miagal di tapui. ⁷ Om soira’ddi nokototos noddi kopio o kototogod diyolo’ om patayo’ nopo diyolo’ i boyoon diyolo’. Om mogisuhut-suhut nopo i raja’ diyolo’ do numaan diyolo’ patayo’, nga’ iyo piya kopio’ddi karaat i nosiliu, nga’ aiso’ i’ o tiso’ diyolo’ do suminambayang do mokiuhup doho’,’’ ka dau. ⁸ Om boros kad TUHAN, ’’Iri nopo tulun dot Israil om miagal do roti di sampaping no o noonsok tu’ monokisokodung i’ iyolo’ di piro-piro o bansa’ di posorili’ diyolo’. ⁹ Om a’ i’ iyolo’ kopuriman dot atagak o kinoris diyolo’ do tontok do monokisokodung iyolo’ di piro-piro o bansa’ddi, oruhai no o kapatayan diyolo’, nga’ a’ i’ diyolo’ oilaan iri. ¹⁰ Iri i kasawato’ do ginawo do tulun dot Israil o papasala’ diyolo’. Om mulong piya do nongosiliu ngai’ o miagal diri, nga’ a’ po iyolo’ guminuli’ dot id doho’, i TUHAN i Kinorohingan diyolo’. ¹¹ Minghombo po ot Israil do miagal di punai do basug; mongoi po pokiuhup do Masir i tulun dau, om tumangkus do mongoi pokiuhup dot Asur! ¹² Nga’ pataan oku nondod lawa’ om agamit i’ iyolo’ do miagal do tombolog, do tumalib iyolo’. Hukuman ku nondo iyolo’ tu’ araat i’ i winonsoi diyolo’. ¹³ Nobungou no iyolo’! Tu’ tuminongkiad i’ iyolo’ doho’ om suminaap doho’. Apatai no moti’ iyolo’ddi. Posion ku i’ daa iyolo’, nga’ maan i’ diyolo’ toomod i pananambayang diyolo’ dot id doho’. ¹⁴ A’ i’ iso-iso’ o ginawo diyolo’ do suminambayang dot id doho’, tu’ luminapos nogi’ iyolo’ om miningihad do miagal di tulun dit a’ kotutun doho’. Om tontok di sumambayang iyolo’ do mokianu’d gandum om waig dot anggur, om pinsuhaton nopo diyolo’ o tinan diyolo’ do miagal do wonsoyon di tulun do modsubak do tingolig. Sumasaap no kopio iyolo’! ¹⁵ Om mulong piya dot iyoho’ o pinapagayo om pinopokoris diyolo’, nga’ mogiupakat i’ iyolo’ do sumaap doho’. ¹⁶ A’ no iyolo’ tumingkod do mogidu’ do mantad id doho’, om kumaa nogi’ dot id ponokokinorohingan dit aiso’ o sinundu. Miagal no kopio iyolo’ do pawakasan do pana’ di poingkilong tu’ a’ no milo’d pakayon. Om araat nondo o kapatai- patayo’ diyolo’, tu’ minggayo-gayo kopio i’ o koboro-boroso’ di boyoon diyolo’. Om tiirak-irak pondo iyolo’ di tulun do Masir,’’ ka dau.

¹ Om boros kad TUHAN, ’’Pounio’ no i pouunion do popoinsan do haro o koligagaanan. Tu’ miagal pod kondiu do monimbit di kanon dau o pisangod do mongoi panangod do pomogunan ku! Om iri tulun ku nga’ tuminolibamban di tumpongo ku dot id diyolo’ om suminaap iyolo’ di ponudukan ku. ² Om mulong piya do roitan oku diyolo’d Kinorohingan diyolo’ om magakun iyolo’ do tulun ku om kotutun iyolo’ doho’, ³ nga’ niada’ i’ diyolo’ it osonong. Om gowoi pondo om gusaon iyolo’ di pisangod diyolo’. ⁴ Minomili’ i tulun ku do raja’, nga’ pimpori-pori nopo iyolo’ om a’ i’ minuhot doho’. Pomili’ nopo iyolo’ do boyoon om a’ oku po nakaakun. Nongoi diyolo’ i pirok om i tamas diyolo’ do winonsoi diyolo’d tingolig, om iri no o mamaraag diyolo’. ⁵ Araatan tomod oku’ddi di tingolig do tamas do pinoiyo-iyo do sapi’ di tukuon di tulun do hilo’d bandar do Samaria. Otogod oku no kopio diyolo’. Songkuro po tuu o koloido’ om iyadaan nogi’ diyolo’ i tingolig diyolo’ddi? ⁶ Tukang i’ do bansa’d Israil o minomonsoi di tingolig diri, om okon i’ ko’ Kinorohingan! Omumuk nopondo i sapi’ do tamas di tukuon do hilo’d Samaria! ⁷ Soira’ nopod patanom iyolo’d ribut, om omoton nopondo diyolo’ om tongus dot opuhod! Gandum nopo dit a’ monsok om a’ i’ milo’d wonsoyon do roti. Om oonsok piya daa iri nga’ bansa’ id suwai o mongoi panganu! ⁸ Aiso’ noddi o pisuayan dot Israil om i bansa’d suwai, om miagal po ot Israil di lansang di lawasan tu’ aiso’ no o guna’. ⁹ Sumunsud nopo iyolo’ do momonsoi di diyolo’d korohian, tu’ miagal po iyolo’ di kaladai di lalang kosurilog. Minongoi iyolo’ pokiuhup dot Asur, om ginodsian ngai’ diyolo’ o piro-piro o bansa’d suwai do mongintirung diyolo’. ¹⁰ Nga’ timungon ku nondo iyolo’ om hukuman ku. Oruhai nod modos-lodos iyolo’ dot orurualan tu’ rumikot no i raja’ dot Asur do mongoi ponginggorit diyolo’. ¹¹ Ogumu-gumu’ o pananaraban do porsombahan do wonsoyon di tulun dot Israil do maan kaka daa do pongidu’d dusa, nga’ ogumu-gumu’ no o kinoiyonon diyolo’ do momonsoi’d dusa! ¹² A’ no ointob-intob o ponudukan do tinulis ku do patahakon ku daa diyolo’, nga’ niada’ i’ diyolo’ iri, tu’ suwai-suwai kopio kaka iri om okon ko’ miagal di koubasanan diyolo’. ¹³ Papatahak i’ daa iyolo’ do porsombahan di sinumbali’ dot id doho’, om kanon diyolo’ i tonsi di sinumbali’ddi. Nga’ a’ oku i’, iyoho’ i TUHAN, orohian di porsombahan di sinumbali’ddi. Sorohon ku indo i dusa diyolo’ om hukuman ku iyolo’ dot i dusa diyolo’ o kopomohukuman ku, om pogulion ku nondo iyolo’ kawagu do hilo’d Masir! ¹⁴ Nokopomonsoi no i tulun dot Israil do walai’d raja’ nga’ nolihuan iddi diyolo’ i Minomonsoi diyolo’. I tulun do Yohuda nga’ nokowonsoi nod bandar do kitolig. Nga’ porikot oku nondod tapui do monorob di walai’d raja’ diyolo’ om i kabandaran diyolo’ddi,’’ ka dau.

¹ Oi bansa’ dot Israil, tingkod kou no do mamaramai di poginakanan dokoyu do miagal di piro-piro bansa’d suwai. Nokoinsodu’ kou noddi do Kinorohingan dokoyu, om a’ kou tuminorodok dot id dau. Pointongkop nopodti pomogunan dot id pointikid-tikid do pamagamasan do gandum do pinapadagang kou do tinan dokoyu do miagal do sundal dot id tingolig do Baal, i ponokokinorohingan dokoyu, om nasanangan tomod kou di gandum di sorohon dokoyu do pinamagadsi’ di tingolig diri dot id dokoyu. ² Nga’ oruhai no dot a’ kabagal o gandum om tumau do saitun dokoyu, om aiso’ nondo o waig dot anggur dokoyu. ³ Om okon nondo ko’ hilo’ kasai’d pomogunan di pinatahak do TUHAN dot id bansa’d Israil o tiyonon dokoyu, tu’ koguli’ kou nondo kawagu do hilo’d Masir, om kaakan kou nondo do taakanon di sosomu’ dot id pagantangan do tugama’, do hilo’d Asur. ⁴ Om hilo’ kou nopondod pomogunan do bansa’d suwai, om a’ kou no milo’d patahak do porsombahan do waig dot anggur om porsombahan do sorobon do maan do poposonong do ginawo’d TUHAN. Iri nopondo taakanon dokoyu nga’ kososomu’ ngai’ nopo di tulun di mangakan, tu’ miagal po iri do taakanon dit akanon do tontok do haro tulun dot apatai. Iri nopo taakanon diri om maan no dokoyu’d kanon; om aiso’ i’ ot igitan do maan do porsombahan dot id Walai’d Sasambayangan dot Agayo. ⁵ Om tontok nopo di piro-piro tadau dot agayo do don tugama’ di pomusou’d TUHAN, om aiso’ nondo o milo dokoyu’d wonsoyon do pamaramai’ddi. ⁶ Om korikot nopondo i koinggoritan, om pokoyoon kou dot id pomogunan do suwai, om iri nopondo it oolu-olu’ dot id pogialatan dokoyu om timungon nondo di tulun do Masir do maan patayo’ om lobongon do hilo’d Mimpis! Om sunian nondo do rugi om sakot o hiri’d winaalan di walai dokoyu di gulu po om i konunu-nunuan dokoyu di pirok dit agayo gatang do winonsoi. ⁷ Norikot noddi i maso do kopomohukuman, i maso do koonuan do tulun dot isomuli’ do miontok di kowoyo-woyoon dau. Om osiliu pondo o miagal diri, om kopuriman nogindo ot Israil! Boros ka dokoyu, ’’Iti nopo nabi diti om basug. Iti nopo tulun do noporinta’ do rusod diti om mulau,’’ ka no daa dokoyu. Mimboros kou pogi’ do miagal diri nga’ araatan tomod kou doho’ om agayo kopio o dusa dokoyu. ⁸ Sinuhu’ oku’d Kinorohingan do sumiliu’d nabi do popoinsan dokoyu, i tulun dau. Nga’ honggo nopo o ngoyon ku, nga’ mumbal kou nopo daa do mamalawa’ doho’ do miagal oku po di tombolog. Id suang piya’d pomogunan di songonuon do Kinorohingan nga’ pisangod i’ do nabi i tulun do hiri. ⁹ Araat no kopio o wowonsoyon dokoyu, aiso’ nopo o pisuayan di winonsoi di tulun do hilo’d Gibia. Om atantu’ no dot osorou id Kinorohingan i kasalaan dokoyu’ddi om hukuman kou nondo dau dot i dusa dokoyu o kopomohukuman. ¹⁰ Om boros kad TUHAN, ’’Di nopo di kabantalai ku i’ ot Israil om otood oku nopo, dot iyo pod tulun di nokobontol do guas dot anggur di kitua’ di poinsuni do hilo’d tana’ do kowotuan. Di nopoddi kokito ku i’ i komolohingan dokoyu, om otood oku nopo do miagal pod tulun di nokokito do tua’ dot ara di gulu i’ do hilo’d Nuluhon do Pior, om timpuun no iyolo’ do tumuku’ dot id Baal, om a’ po alaid om kosiliu no iyolo’ do miagal di ponokokinorohingan di tukuon diyolo’ tu’ kososomu’ tomod. ¹¹ Om tumulud nondo i kobontugo’ dot Israil do miagal do tombolog, om aiso’ nondo o monontian om aiso’ o tangaanak dot opogkosusu. ¹² Om mulong piya daa do haro o tangaanak diyolo’ do kagayo diyolo’ nga’ ngoyon ku i’ iyolo’ tanggayai om aiso’ no tiso’ piya dot oluon ku do poimpasi. Om tongkiadan ku nopondo o tulun dot Israil, om angaraat tomod nondo ot osiliu dot id diyolo’,’’ ka dau. ¹³ Oi TUHAN, okito ku no i tangaanak diyolo’ do gusaon om patayon. ¹⁴ Nunu po daa o pokionuon ku diya’ do bagi’d tulun diti? Kada’ ponontiano’ i tongoondu’ diyolo’! Pologoso’ nopo dot a’ iyolo’ koposusu di tangaanak diyolo’! ¹⁵ Om boros kad TUHAN, ’’Tinimpuun nopo kopio do kowoyo-woyoon diyolo’d araat om hilo’d Gilgal. Om hilo’ no o kinoimpuuno’ ku dot araatan diyolo’. Om uyungon ku nondo iyolo’ do mantad hiti’d tana’ ku tu’ araat i’ kopio i winonsoi diyolo’. Om a’ oku osianan diyolo’ tu’ suminaap ngai’ doho’ i boyoon diyolo’. ¹⁶ Iri nopo tulun dot Israil nga’ miagal do tanom di nokoring o gamut om it a’ mongua’. Om a’ nondo iyolo’ maganak. Om maganak piya daa iyolo’ nga’ patayon ku i’ i tangaanak di koupusan tomod diyolo’,’’ ka dau. ¹⁷ Om iyadaan nondo di Kinorohingan di pogobi-obian ku i tulun dau tu’ a’ i’ iyolo’ minokinongou dau. Om mimpanau pondo iyolo’ dot id pogialatan do piro-piro o bansa’.

¹ Iri nopo tulun dot Israil om miagal do guas dot anggur di nolimbagatan do tua’. Ogumu-gumu’ o kakayaan diyolo’ nga’ ogumu-gumu’ no o pananaraban do porsombahan do wonsoyon diyolo’. Om ogumu-gumu’ o hasil di tana’ diyolo’ nga’ pamaha-mahaon no diyolo’ o pomolumis di torigi’d watu do tingolig di tukuon diyolo’. ² Om a’ no milo dot a’ oinggorit i tulun dot oudut tu’ i dusa diyolo’ o koponginggoritan. Om babakon nondod Kinorohingan i pananaraban do porsombahan om raagon dau i torigi’d watu do tingolig diyolo’. ³ Om a’ po alaid om mimboros nondo iti tulun do poingkaa, ’’Aiso’ pogi’ o raja’ toko’ nga’ gama’ nod a’ toko’ ruminonok do TUHAN. Nga’ nunu po daa’ddi o milo’d raja’ do wonsoyon dot id dati’, do sokiro piya’d haro?’’ ka nondo diyolo’. ⁴ Boros nopod pimboroson diyolo’ om i boros dot aiso’ o suang, om mamatos iyolo’ nga’ a’ i’ diyolo’ sulungon om momonsoi iyolo’d tumpongo dit aiso’ o guna’. Somputulon diyolo’ it oturan om gowoi poddi om iri nopo it a’ otulid nga’ miagal pod sakot di kawanit do poinsuni dot id tumo di naradu no. ⁵ Om moddosi nondo i tulun do poingiyon do hilo’d bandar do Samaria, om mogihad iyolo’ di sapi’ do tamas, tu’ a’ noddi iri hino do hilo’d Baitol. Om pogihadan pondo diyolo’ om it imam di modsubak di tingolig i tingolig diri. Minggarang pondo iyolo’d mihad, tu’ aiso’ noddi o kagayaan di tingolig diyolo’. ⁶ Om atanggayan nondo i tingolig diri do hilo’d Asur do maan dot ipuhawang dot id raja’ dot agayo. Om oindaraat nondo om ointingayam ot Israil tu’ tuminanud i’ di tingolig diri. ⁷ Om iri i raja’ dau nga’ atanggayan indo do miagal pod giniab do kayu dot orulun do waig. ⁸ Om angaraag nondo i kinoiyonon do modsubak di hilo’d timpak do nulu-nulu do Baitol, i kinoiyonon do tulun dot Israil do tumuku’ dot id tingolig. Om okurumbutan pondod sakot om rugi i pananaraban do porsombahan diyolo’. Om millohou ngai’ pondo i tulun di nuluhon dot, ’’Lisoko’ iyahai!’’ ka no, om millohou di konulu-nuluan dot, ’’Tirungo’ iyahai!’’ ka. ⁹ Om boros kad TUHAN, ’’A’ po notingkod do momonsoi’d dusa do sumaap doho’ ilo tulun dot Israil do mantad poddi pomonsoi iyolo’d dusa di hilo’d Gibia. Om hilo’ nondod Gibia dot okosupan iyolo’ do pisangadan. ¹⁰ Saapon ku nondo om hukuman ku iti tulun do kidusa. Om mogiuhup nopondo o piro-piro o bansa’ do sumaap diyolo’, om ohukuman nondo iyolo’ tu’ ogumu’ i’ o dusa diyolo’. ¹¹ Di nopoddi gulu po om miagal po daa’d sapi’ dit okoro’ po om i noubas no tomod, om i posodia’ no om orohian do momogomos do gandum. Nga’ pinokuan ku’ddi i liou dau dot olumis om sinansagan ku do kumaraja’ dot awagat. Pinagayat ku o Yohuda di radu om pinagayat ku ot Israil di ragus. ¹² Om boros kangku, ’Pamaradu no do tana’d wagu do maan dokoyu, om patanom no do katapatan, om mongomot kou indo do barakat do kootuson di kotorodoko’ dokoyu dot id doho’. Norikot noddi o maso dokoyu do gumuli’ dot id doho’, i TUHAN dokoyu, om rumikot oku indo do mongoi potuntug do barakat dot id dokoyu,’ kangku. ¹³ Nga’ karaaton nogi’ o pinatanom dokoyu, om it a’ otulid o nomot dokoyu. Naakan noddi dokoyu i tua’ do tudut dokoyu,’’ ka dau. Boros ka kawagu’d TUHAN, ’’Oi tulun dot Israil, suminondiu kou di korita’- kuda’ dokoyu di don sumasangod om i kogumuo’ do soudor dokoyu. ¹⁴ Gowoi pondo om orikatan nondod pisangadan i tulun dokoyu, om araag ngai’ nopondo i kuta’ do pogintirungan dokoyu. Om miagal pondo iri di tadau di rinaag di Raja’ Salman i bandar do Bait-Arbil di maso do pisangadan, tu’ nangapatai ngai’ddi i tina’ om i tangaanak diyolo’. ¹⁵ Om miagal noddi ot osiliu dot id dokoyu, oi tulun do Baitol, tu’ araat i’ kopio i winonsoi dokoyu. Om kotimpuun nopo i pisangadan om matai no i raja’ dot Israil,’’ ka dau.

¹ Om boros kad TUHAN, ’’Tontok di tanak po ot Israil, om ninsianan ku i’ iyau om linohou ku do suminoliwan do mantad hilo’d Masir, do miagal po iyau do tanak kopio ku. ² Nga’ asaru-saru’ oku do momolohou dau, nga’ modu-sodu’ nogi’ iyau do mantad id doho’. Pinapatahak i tulun ku do porsombahan do sinumbali’ dot id Baal; om minodtutud iyolo’ do kominyan dot id tingolig. ³ Om inda’ ka dot iyoho’ i’ o minonuduk dot Israil do mamanau, kinibit ku i’ i tulun ku, om kinosianan ku, nga’ a’ i’ diyolo’ okunon dot iyoho’ o minomogompi’ diyolo’. ⁴ Pinoinsomok ku iyolo’ doho’ do mikuwo’d osianan om olisiu oku diyolo’. Kinibit ku iyolo’ om tinunguban ku; om minirikau oku do pinapaakan diyolo’. ⁵ Minada’ iyolo’ do gumuli’ dot id doho’ om gowoi poddi om a’ no milo dot a’ iyolo’ gumuli’ do hilo’d Masir, om bansa’ nondod Asur o momorinta’ diyolo’. ⁶ Tumongkop nopondo di bandar diyolo’ o pisangadan om angahaba’ ngai’ o totobon di bandar. Om iri nondo o karaag di tulun ku tu’ momonsoi i’ iyolo’ di diyolo’d korohian. ⁷ Osonsog i’ iyolo’ do tumolikud doho’. Om minggiak pondo iyolo’d oinggoritan, nga’ aiso’ i’ o milo do mongoi poidu’ diyolo’,’’ ka dau. ⁸ Boros kad TUHAN, ’’Poingkuro oku daa do magada’ kopio diya’, oi Israil? Poingkuro oku daa do monongkiad tomod diya’? Milo oku i’ tuu daa do mamaraag diya’ do miagal di winonsoi ku dot id Adma ko’ momohukum po diya’ do miagal di pinomohukum ku do Siboyim? A’ i’ kopio ooyit o ginawo ku do wonsoyon ku o miagal diri! Tu’ adalaan i’ kopio kagayo o kosianan ku diya’. ⁹ A’ ku i’ iyokoyu hukuman dot otogod oku piya; a’ ku nondo raagon kawagu ot Israil. Tu’ iyoho’ nopo om Kinorohingan i’, om okon oku i’ ko’ tulun. Moyo-woyo’ oku i’ dokoyu, iyoho’ it Olidang kopio. Om a’ oku no otogod dokoyu,’’ ka dau. ¹⁰ Boros kad TUHAN, ’’Om tumanud indo doho’ i tulun ku do mamagarom oku do miagal do singa do momorolosi di pisangod diyolo’. Om olomus nopondo iyolo’d rumikot dot id doho’ do mantad hilo’d kotonobon. ¹¹ Om rumikot nondo iyolo’ do mantad hilo’d Masir do miagal pod tombolog kosiau, om miagal do punai dot ogumu’ do rumikot do mantad hilo’d Asur. Pogulion ku nondo kawagu iyolo’ do hilo’d walai diyolo’. Iyoho’ no, i TUHAN o minomoros diti,’’ ka dau.

¹ Om boros kad TUHAN, ’’Nosorilian oku pod tulun dot Israil do tudut om poninipu’, om maso di tulun do Yohuda do sumaap doho’, i Kinorohingan dot Olidang om otorodok. ² Koinsanai di wonsoyon do tulun dot Israil do mantad do kosuabon om gisom do totuong nga’ aiso’ ngai’ nopo o kootuk-otukon, om karaag iri do miagal di tongus do mantad id koulayon. Muhang-ruhang nopo o kororongit om kouudut diyolo’. Om monokitaru’ iyolo’ dot Asur om monokidagang-dagang do Masir,’’ ka dau. ³ Pasalaon do TUHAN o tulun do Yohuda; om Israil nogi’ nga’ hukuman i’ dau tu’ i kowoyo-woyoon di tulun dau’ddi o kopomohukuman. Sulian nondo dau i nongowonsoi diyolo’. ⁴ I Yakub nopo, i taki-aki diyolo’, om suminolod no mantad di tapid dau, di hiri pod tian di tina’ dau. Om soira’ dit agayo i Yakub om minonokigogol po iyau’d Kinorohingan. ⁵ Minonokigogol iyau do moloikat om nakamanang i’ iyau. Om minihad diri iyau do minokianu’d barakat. Om rikot no o Kinorohingan dot id di Yakub, i taki-aki toko’, do hilo’d Baitol, om boro-boros no iyau dau. ⁶ Iyau no i TUHAN i Kinorohingan dit Osundu Kopio — om TUHAN no o ngaran dau. Om pokionuon dau o tulun do tumuku’ dot id ngaran dau’ddi. ⁷ Iyo nopoddi, oi sinakagon di Yakub, om pogondos kou no dot id Kinorohingan dokoyu do dinondo, om guli’ kou no dot id dau. Tumorodok kou no, om wonsoyon no dokoyu it otulid, om polonuton no dokoyu o ginawo do mandad do Kinorohingan dokoyu do momonsoi dit apatut dau’d wonsoyon. ⁸ Om boros kad TUHAN, ’’Iri nopo tulun dot Israil om miagal po di tulun do Kanaan kobinguduto’; asanangan nopo iyolo’ do monipu’ di tulun do mongoi boli dot id diyolo’ tu’ mamakai iyolo’d timbangan dit a’ koontok. ⁹ ’Kaya’ toko’ no,’ ka no diyolo’. ’Ogumu’ no o dapu’ toko’. Om aiso’ no o milo’d papasala’ dati’ dot a’ piya otulid o karalan-ralano’ toko’ do kuminaya’,’ ka no diyolo’. ¹⁰ Nga’ iyoho’ indo, i TUHAN i Kinorohingan dokoyu, i pinapalabus dokoyu do mantad hilo’d Masir, o popoiyon kawagu dokoyu dot id kiim do miagal di ruminikot oku dot id dokoyu di hilo’d tana’ do kowotuan. ¹¹ Minoro-boros oku dot id piro-piro o nabi om haro piro-piro o pinointalang ku dot id diyolo’. Om pinawaya’ ku di piro-piro o nabi diri o boros ku do popoinsan di tulun ku. ¹² Nga’ maso id tukuon i tingolig do sapi’ do hilo’d Giliad om isai nopo i tumuku’ dot id tingolig diri nga’ apatai no. Sapi’ nga’ pinatahak i’ do maan do porsombahan do sinumbali’ do hilo’d Gilgal, om osiliu pondod kinotimungon do watu i pananaraban do porsombahan do hilo’d koumaan,’’ ka dau. ¹³ Om minogidu’ diri i Yakub, i taki-aki toko’ do hilo’d pomogunan do Misopotamia. Om hilo’ no iyau’d kuminaraja’ dot id iso’ o tulun, do madtamong do dumba’ om kaanu i’ iyau’d sawo. ¹⁴ Om ponuhu’ no o TUHAN do nabi do mongoi poidu’ di tulun dot Israil do mantad id ponguripanan do hilo’d Masir om momogompi’ diyolo’. ¹⁵ Nga’ pinotogod tomod di tulun dot Israil o TUHAN; om apatut no daa do hukuman iyolo’ dot i kararaat diyolo’ o kopomohukuman. Om atantu’ nod hukuman do TUHAN iyolo’ tu’ nindaraat i’ diyolo’ iyau.

¹ Di nopo di gulu po, om moro-boros nopo ot Ipraim om ooris nopo i payat dot Israil do suwai; tu’ suahon i’ diyolo’ ot Ipraim. Nga’ minomonsoi iddi do dusa i payat dot Ipraim, tu’ tuminuku’ iyolo’ dot id Baal, om gowoi poddi om angapatai iyolo’. ² Aiso’ i’ o kotingkadan diyolo’ do momonsoi’d dusa tu’ momonsoi kasai’ nopo iyolo’d tininganak do pirok do maan diyolo’d tukuon, i winonsoi do longon do tulun. Om momoros nogindo iyolo’ do poingkaa, ’’Papatahak nod porsombahan di sumbolion dot id tingolig diti,’’ ka no. Poingkuro’ddi kopio do milo o tulun do tumungub dot id tingolig diri, tu’ iri nopo tingolig diri om pinoiyo- iyo i’ do sapi’. ³ Om gowoi pondo om tumagak ngai’ o tulun diti do miagal di haun do dongkosuabon om miagal di bolobou tu’ osuab po om atanus no. Om miagal iyolo’ di rahami di tilibon do ribut do mantad hiri’d pamagamasan, om miagal do lisun do mantad hiri’d kawayaon do lisun. ⁴ Om boros kad TUHAN, ’’Iyoho’ no i TUHAN, i Kinorohingan dokoyu, i pinoposoliwan dokoyu do mantad hilo’d Masir. Aiso’ no o Kinorohingan dokoyu’d suwai ko’ iyoho’. Iyoho’ no o gampamasi dokoyu. ⁵ Ginompi’ ku i’ iyokoyu do hilo’d tana’ dit a’ sunian do hilo’d tana’ do kowotuan. ⁶ Nga’ soira’ddi nokosuang kou di pomogunan dot osonong, om nayahan kou, om osonong o kopurimanan dokoyu, om mininggayo-gayo kou iddi, om kolihuwai oku no dokoyu. ⁷ Om gowoi pondo om iyo oku pod bohuang do sumaap dokoyu. Om miagal oku pondod singa do magawang dokoyu do hiri’d ralan. ⁸ Om saapon ku nondo iyokoyu do miagal po di bohuang di natagakan do tanak, om pogitobilang-bilangon ku nopondo iyokoyu. Om miagal oku pondod singa do mangakan dokoyu do hiri’d pinanabpaan ku dokoyu, om pogitobilang-bilangon ku nopondo iyokoyu do miagal di wonsoyon do nintorusan dot orongit. ⁹ Patayon ku nondo iyokoyu, oi tulun dot Israil! Om isai po daa’ndo o milo’d monguhup dokoyu? ¹⁰ Minokianu kou do raja’ om boyoon nga’ poingkuro daa iyolo’d kapasi di rayat diyolo’? ¹¹ Otogod oku i’ di pinapatahak oku dokoyu’d raja’, om alasu’ i’ o ginawo ku di nidu’ ku iyolo’d raja’. ¹² Nongotulis no i dusa om kasalaan dot Israil, om nokoopi’ ngai’ no i pinotulisan diri. ¹³ Milo po daa’d masi ot Israil, nga’ mada’ i’ iyau do poimpasi do gama’ di kababasug dau, do miagal po iyau di ragang di pogkosusuon no daa, nga’ mada’ i’ do sumoliwan do mantad hiri’d tian di tina’ dau. ¹⁴ Om a’ ku i’ posion o tulun diti do mantad id pomogunan do tulun do napatai om a’ ku iyolo’ poiduwon do mantad id kuasa’d dusa. Porikoto’ no i pamamatai nu, oi kapatayon! Porikoto’ no i karaagan, oi pomogunan do tulun do napatai! Tu’ a’ ku no insianan o bansa’dti. ¹⁵ Om mulong piya do miagal po di sakot dot orombung o kosimbayano’ dot Israil, nga’ porikot oku indo do tongus dot alasu’ do mantad hilo’d koulayon, i mantad hilo’d tana’ do kowotuan, om arasak ngai’ indo i bawang om torobong diyolo’. Om atanggayan ngai’ nopondo i kiguna’.

¹ Mositi’ nod hukuman o Samaria tu’ suminaap i’ iyau doho’. Apatai indo i tulun dau dot id pisangadan; om pataamon nopondo i ragang po do hilo’d tana’, om ulayakon nopondo o tian di tongoondu’ di monontian,’’ ka dau. ² Guli’ kou no dot id TUHAN, i Kinorohingan dokoyu, oi tulun dot Israil. Iri no i dusa dokoyu o pinapasadu om pinaparatu’ dokoyu. ³ Guli’ kou no dot id TUHAN, om silihon no o sambayang diti do ponokoporsombahan dot id dau, ’’Ompunai ngai’ no i dusa dahai, om romito’ no iti sambayang dahai, om royohon indo dahai iya’ do miagal di nakabatos dahai. ⁴ A’ i’ milo’d mamasi dahai ot Asur, om a’ milo’d mongintirung dahai o kuda’ do don sumasangod. Om a’ nondo iyahai momoros do kinorohingan dahai i tingolig di winonsoi dahai. Oi TUHAN, pointalang ko i’ do kosianan dot id tulun dit aiso’ o sondihon,’’ kanto dokoyu. ⁵ Om boros kad TUHAN, ’’Pogulion ku i’ i tulun ku dot id doho’, i tulun ku di suminansala’. Om aayi-ayi’ indo o ginawo ku dot osianan diyolo’; a’ oku noddi otogod diyolo’. ⁶ Om iyo oku pondod rasam dot id tana’ dit otuu, dot id tulun dot Israil. Om mongusak nondo iyolo’ do miagal do bunga; om kagamut nondo kopio iyolo’ do miagal di kayu sedar do hilo’d Libanon. ⁷ Om apasi nondo iyolo’ kawagu om olumis do miagal di guas do saitun. Om owongi’ indo iyolo’ do miagal di kayu sedar do hilo’d Libanon. ⁸ Om poimpasi indo kawagu iyolo’, om intirungan ku iyolo’. Om osonong tomod nondo o sunion diyolo’, do miagal po di gandum di pointanom dot id tana’ dit oruak. Om abantug iyolo’ do miagal dit anggur do hilo’d Libanon. ⁹ Om taamon nondo di tulun dot Israil i tingolig diyolo’, om simbaron ku o sambayang diyolo’ om gompion ku iyolo’. Om intirungan ku nondo iyolo’ do miagal di kayu dit okohob o tuntu; iyoho’ no o tudan do koinsanai’d barakat diyolo’. Iyoho’ no i TUHAN, o minomoros diti,’’ ka dau. ¹⁰ Maha’ daa do kosuhut i tulun do kitoilaan di songintulis do hiti, om poopion kopio diyolo’ iti dot id suang do ginawo diyolo’. Otopot i’ o ponudukan do TUHAN, om apasi no i tulun dit otorodok dot id ponudukan do tumanud no iyolo’ddi. Nga’ tulun nopo di kidusa om kasadu i’ om aratu’ tu’ a’ i’ iyolo’ tumanud do ponudukan diri.