IBRANI

IBRANI

¹ Di nopo di gulu po om kosoruan nod Kinorohingan do moro-boros dot id taki-aki toko’ do mogisuayan o ralan do moro-boros, dot i piro-piro o nabi o popolombus dot id diyolo’. ² Nga’ dinondo nopo tu’ motingkopupus no o pomogunan om moro-boros iyau dati’ dot i Tanak dau o popolombus. Om iri no Tanak dau o pinawayaan do Kinorohingan do minomonsoi do tawan om pomogunan. Om natantu’ nod Kinorohingan dot iri no Tanak dau ot osorupai do sumanganu do koinsanai’d nunu nopo. ³ Iyau no i popointalang do kagayaan do Kinorohingan dit anawau kopio; om iyau no o popointalang do kowoyo-woyoo’ do Kinorohingan. Om iyau o momogompi’ do koinsanai’d tawan om pomogunan om i songingiyon do hilo’, dot i boros dau di kikuasa’ kopio o pomogompi’. Om koidu’ poddi dau o tulun do mantad id dusa diyolo’, om irikau no iyau dot id tirikohonon do pomorintaan do hilo’d surga do pointalad do Kinorohingan, i Pomorinta’ dit id sawat kopio. ⁴ Iri nopo Tanak diri om pinoinggayo po o pangkat ko’ i pangkat di moloikat, om i ngaran di pinatahak do Kinorohingan dot id dau nga’ agayo po ko’ i ngaran di nakatahak dau di moloikat. ⁵ A’ i’ insan o Kinorohingan pomoros do miagal diti dot id ongoiso’ piya o moloikat, ’’Iya’ no o Tanak ku; om tadau nod baino’ do nosiliu oku’d Tapa’ nu,’’ ka. Om a’ o Kinorohingan insan pomoros do miagal diti do pasal dot isai nopo o moloikat, ’’Osiliu oku nondo do Tapa’ dau, om osiliu iyau do Tanak ku,’’ ka. ⁶ Nga’ tontok di sinuhu’ do Kinorohingan i Tanak dau dit id gulu do lumintuhun do hiti’d pomogunan, om poingkaa o pinoboros do Kinorohingan dot id dau, ’’Mositi’ no do tumuku’ ngai’ o moloikat do Kinorohingan dot id Tanak diri,’’ ka. ⁷ Nga’ poingkaa o pinoboros do Kinorohingan do pasal ngai’ di moloikat, ’’Siniliu ngai’d Kinorohingan do tongus i moloikat dau, om siniliu ngai’ dau’d sinikit do tapui i susuhuon dau,’’ ka. ⁸ Nga’ poingkaa o boros do Kinorohingan dot id Tanak diri, ’’Hino kasai’ indo do gisom dot alaid i tirikohonon nu’d momorinta’, oi Kinorohingan. Otulid i’ o pomorintaan nu. ⁹ Iya’ nopo om orohian i’ dit otulid, om araatan dit a’ otulid; om iri no o kinopomilian do Kinorohingan diya’, i Kinorohingan nu, om nonuan ko dau’d pangkat di poporikot do kataadan, dot agayo ko’ i pangkat di piro-piro o tambalut nu,’’ ka. ¹⁰ Om boros ka kawagu’d Kinorohingan, ’’Iya’ no, oi Tuhan, o minomonsoi diti pomogunan di timpuun i’, om diya’ kopio’d longon o minomonsoi’d tawan. ¹¹ Tumanus ngai’ indo iri, om rumomuk do miagal do kain; nga’ iya’ nopo om a’ i’ sumimban. ¹² Lopion nu nopondo iti tawan om pomogunan do miagal di rasuk, om tingalanan nu nondo do suwai. Nga’ iya’ nopo om a’ i’ insan simban, om a’ opupusan o koposion nu,’’ ka. ¹³ A’ i’ insan pomoros o Kinorohingan do miagal diti dot id tongoiso’ piya o moloikat, ’’Irikau no do hiti’d dawananan ku, gisom dot apapalan ngai’ ku diya’ i pisangod nu,’’ ka. ¹⁴ Iyo nopoddi, om nunu kopio ngai’ i moloikat diri? Iyolo’ nopo om rusod noo di mogobi-obi’ do Kinorohingan, om i suhuon do Kinorohingan do monguhup do tulun di kaanu do koposion.

¹ Om iri no o kopongigitan kopio toko’ di piro-piro o ponudukan di norongou toko’, om a’ toko’ i’ oilihan i kotumbayaan toko’. ² Nokointalang no dot otopot i’ kopio i piro-piro o bilin do pinosunud di piro-piro o moloikat dot id taki-aki toko’. Om iri nopondo tulun dit a’ tumanud ko’ it a’ mumboyo’ddi om ohukuman no do miontok di nowonsoi dau. ³ Om okon-okon pondo i koposion dit agayo ko’ i piro-piro o bilin diri! Ondung a’ toko’ podulon i koposion diri, om atantu’ no dot a’ toko’ koidu’ do mantad id hukuman. Tu’ Tuhan no ot id gulu kopio popoboros do pasal di koposion diri, om nokointalang no kopio dot id dati’ di piro-piro o tulun dit id gulu korongou’ddi dot otopot i’ kopio iri. ⁴ Om suwai no ko’ iri, om pinogirot pod Kinorohingan i pinasasi’ di piro-piro o tulun diri tu’ minomonsoi iyau do piro-piro o kowoyoon do koimayaan om i kongosuayan kopio, om pinotikid dau o piro-piro o nipuhawang do mantad id Rusod do Kinorohingan, do tumanud di korohian dau. ⁵ A’ ngai’ i’ i moloikat kaanu do kuasa’ do mantad id Kinorohingan do momorinta’ dot id pomogunan di wagu di rumikot do sumonu’, iri no i pomogunan di pimboroson toko’ do dinondo. ⁶ Suwai ko’ haro nogi’ o nokotulis dot id iso’ o bohogian dot id suang do Buuk do Kinorohingan do poingkaa, ’’Nunu kopio toi o tulun, oi Kinorohingan, tu’ podulon nu iyau? Tulun nopo om tulun no toomod, nga’ podulon nu i’ iyau! ⁷ Pinoinsiriba’ nu iyau dot oruhai ko’ mantad di moloikat. Om nonuan nu iyau do kagayaan om pangkat di don raja’. ⁸ Om siniliu nu iyau do pomorinta’ do koinsanai’d nunu nopo,’’ ka. Om ondung nokoboros do siniliu’d Kinorohingan o tulun do ’’pomorinta’ do koinsanai’d nunu nopo’’, om komoyon nopoddi nga’ aiso’ no o tiso’ po dot okon ko’ id suang do kuasa’d tulun. Nga’ iyo piya’ddi, nga’ a’ toko’ i’ okito do dinondo do kikuasa’ o tulun dot id sawat do koinsanai’d nunu nopo. ⁹ Nga’ nokito toko’ no i Yesus do kikuasa’! Pinoinsiriba-riba’ iyau dot oruhai do mantad ko’ i moloikat, om apatai indo iyau do sumowoli do koinsanai’d tulun, om iri nopoddi om mantad i’ do kosonongo’d Kinorohingan. Om baino’ nopoddi om okito toko’ no iyau do noonuan do pangkat di kikagayaan om i suahon tu’ noinggorit no iyau do gisom do napatai. ¹⁰ Om atantu’ no dot apatut i’ o Kinorohingan — i minomonsoi do koinsanai’d nunu nopo do maan do dau’d kogunaan — do minoniliu di Yesus do gampamasi di milo kopio’d mamasi dot i noinggorit iyau o kinoponilihan. Om iri no o komilo-milo’d Kinorohingan do mangangat dot ogumu’ o tulun do poinggoyoon do potonggoyon di Yesus. Tu’ i Yesus no i minongigit diyolo’ dot id koposion. ¹¹ Linihungan di Yesus o tulun do mantad id koinsanai’d dusa diyolo’; om iyau i minomolihung, om iyolo’ i linihungan nga’ iso-iso’ i’ o Tapa’. Om iri no ot a’ di Yesus kointingayaman do popoboros do tobpinai dau iyolo’. ¹² Boros ka di Yesus dot id Kinorohingan, ’’Popinsusuyon ku nondo dot id piro-piro o tobpinai ku o pasal diya’. Royohon ku nondo iya’ dot id pitimungan diyolo’,’’ ka dau. ¹³ Om nokoboros i’ i Yesus dot, ’’Mogondos oku nondod Kinorohingan,’’ ka. Om minomoros po iyau dot, ’’Diya oku, do miwoyo’ di tangaanak do pinatahak do Kinorohingan dot id doho’,’’ ka. ¹⁴ Om siliu noddi i Yesus do miagal do tulun om iyo do don tulun o kowoyo-woyoo’, tu’ iri nopo tulun di roitan do tanak diri om tulun i’ dit apatai. Om winonsoi pogi’ dau o miagal diri nga’ iri nondo i kapatayon dau o pangala’ dau’d Rogon, i monguasa’ do kapatayon. ¹⁵ Om iyo noddi o ralan dau do pinopoidu’ do tulun di nosiliu’d turipon do solinaid diyolo’ do poimpasi tu’ moddosi iyolo’ do kapatayon. ¹⁶ Om nokointalang no kopio dot okon i’ ko’ moloikat o tinulung dau, suwai ko’ i sinakagon di Abraham. ¹⁷ Om komoyon nopoddi nga’ a’ no iyau milo’d a’ miyo di piro-piro o tobpinai dau dot id suang do koinsanai’d nunu nopo. Om iri noddi o kinopomilian dau do suminiliu’d Boyoon dot Agayo dot Imam dit otorodok om i kikosianan. Om iri no i winonsoi dau o komilo-milo’d oompunan o dusa’d tulun. ¹⁸ Om iyau piya nga’ nokoumbal i’ do noinggorit om nopogumbalan, om milo iddi iyau do monguhup do tulun dit oontok do pogumbalan tu’ iyau piya nga’ nokoumbal i’ do nopogumbalan om noinggorit.

¹ Oi tobpinai-tobpinai dit oiyo ko’ Kristian di nolohou do Kinorohingan! Umbal kou pogi’ do paparalom-ralom do pomusorou dokoyu do pasal di Yesus! Kinoporikatan nopo kopio’d Kinorohingan dau om siniliu’d Boyoon dot Agayo dot Imam dot id suang do tugama’ di tonudon toko’. ² Om otorodok i’ iyau dot id Kinorohingan, i minomili’ dau do momonsoi’d karaja’ddi, do miagal di Musa di gulu po tu’ otorodok do minomonsoi di karaja’ dau dot id koinsanai’d tulun di songonuon do Kinorohingan. ³ Nga’ i Yesus nopo om apatut i’ do kaanu’d pangkat dit agayo mantad ko’ i pangkat di Musa. Tu’ iri nopo i minomonsoi di walai om royohon no ko’ mantad di walai. ⁴ Otopot i’ do haro ngai’ o minomonsoi do pointikid-tikid do walai, nga’ iri nopo minomonsoi do koinsanai’d nunu nopo om Kinorohingan i’. ⁵ I Musa nopo om otorodok i’ dot id suang do karaja’ dau do mogobi-obi’ do koinsanai di tulun do songonuon do Kinorohingan, om pinopolombus iyau di posunudon do Kinorohingan do pasal dit id dabantalan. ⁶ Nga’ Kristus nopo om otorodok i’ do mongilo-ilo di dong Kinorohingan do tulun, tu’ Tanak i’ iyau dau. Om iyati’ no i tulun di songonuon do Kinorohingan diri, ondung ogirot kasai’ toko’ no om ogirot o ginawo toko’ do mogondos do kaanu di soro-sorohon toko’! ⁷ Iyo nopoddi, om poingkuro nopo i pinoboros do Rusod do Kinorohingan dot, ’’Ondung korongou kou’d boros do Kinorohingan do tadau’d baino’, ⁸ om kada’ dokoyu pokodoho’ o ginawo dokoyu, do miagal di taki-aki dokoyu, do tontok di suminaap iyolo’d Kinorohingan, om di minogumbal iyolo’d Kinorohingan di hilo’d tana’ do kowotuan. ⁹ ’Hilo’ no i piro-piro i taki-aki dokoyu do minogumbal doho’, om minonoinu’ doho’,’ kad Kinorohingan, ’om inda’ ka do nokokito no daa iyolo’ di winonsoi ku do solinaid dot apat nohopod o toun,’ ka. ¹⁰ Om iri no o kinatagadan ku diyolo’ om boros kangku’ddi, ’A’ kasai’ nopo iyolo’ otorodok, om a’ mumboyo’ di pinonuhuan ku,’ kangku. ¹¹ Om kotogod oku noddi om sumpa’ oku no do poingkaa, ’A’ nondo kopio iyolo’ kosuang di pomogunan diri di koonuan daa diyolo’ do kosimbayanan do poinsugku’ doho’,’ kangku,’’ ka dau. ¹² Oi tobpinai-tobpinai ku, antaan-taan no kopio dokoyu om aiso’ indo o tongoiso’ do tulun dot id pogialatan dokoyu di kipomusarahan dot araat kopio, gisom dot atanus nondo o kotumbayaan dau, om gowoi pondo om sumunsuri iyau om minsodu’ do Kinorohingan di poimpasi! ¹³ Iyo nopoddi, om poginosihat-nosihat kou no do pointikid do tadau, do solinaid toko’ po do poimpasi dot id suang do maso di roitan do ’’Tadau’d Baino’ ’’ dot id suang do Buuk do Kinorohingan. Om aiso’ indo o tongosongulun piya dot id pogialatan dokoyu dot apalid do dusa om gisom do sumaap nondod Kinorohingan. ¹⁴ Iyati’ nopodti om tambalut ngai’ i’ di Kristus, ondung ogirot kasai’ toko’ no do mongigit di kotumbayaan di naanu toko’ do mantad di timpuun i’, om gisom do kopupuson. ¹⁵ Poingkaa o nokotulis dot id suang do Buuk do Kinorohingan, ’’Ondung korongou kou’d boros do Kinorohingan do tadau’d baino’, om kada’ nogi’ dokoyu pokodoho’ o ginawo dokoyu do miagal di taki-aki dokoyu, do tontok di suminaap iyolo’d Kinorohingan,’’ ka. ¹⁶ Om isai toi i tulun di nokorongou’d boros do Kinorohingan diri om i suminongkiwal dau? Okon toi’ ko’ iyolo’ nopo om i tulun di winoyo’ di Musa do suminoliwan do mantad hilo’d Masir? ¹⁷ Om isai toi o kinatagadan do Kinorohingan do solinaid dot apat nohopod o toun? Okon toi ko’ i tulun di kidusa, i nangapatai do hilo’d tana’ do kowotuan? ¹⁸ Tontok di suminumpa’ o Kinorohingan do poingkaa, ’’A’ nondo kopio iyolo’ kosuang di pomogunan diri di koonuan daa’ndo diyolo’d kosimbayanan do poinsugku’ doho’,’’ ka, — om isai no ma o komoyon do Kinorohingan diri? Okon toi ko’ komoyon nopo dau om i tulun di suminaap do Kinorohingan? ¹⁹ Om osuhutan toko’ noddi do baino’, dot a’ pogi’ iyolo’ nokosuang nga’ a’ i’ iyolo’ notumbayaan do Kinorohingan.

¹ Om iyati’ nga’ sinunudan id Kinorohingan di batos dau’ddi, om kaanu toko’ indo iyati’ di kosimbayanan di pinabatos dau. Om iyo nopoddi, om antaan-taan toko’ no kopio, om aiso’ indo o tongoiso’d tulun dot id pogialatan dokoyu dot a’ kaanu di kosimbayanan di pinabatos diri. ² Tu’ nokosusui no i Habar dot Osonong diri dot id dati’ do miagal di nokosusui dot id diyolo’. Nga’ aiso’ i’ o guna’ di habar diri dot id diyolo’. Tu’ tontok di nokorongou iyolo’ddi om a’ i’ iyolo’ minonongkuyaan. ³ Nga’ iyati’ nopo i monongkuyaan om kaanu no di kosimbayanan di pinabatos do Kinorohingan diri. Om miontok no kopio iri di pinoboros do Kinorohingan do poingkaa, ’’Tuminogod oku om suminumpa’ oku dot, a’ nondo kopio iyolo’ kosuang di koonuan daa’ndo di kosimbayanan do poinsugku’ doho’,’’ ka dau. Pinoboros do Kinorohingan o miagal diri do mulong piya do nopongo no daa dau o karaja’ dau di wonsoyo’ i’ dau iti pomogunan. ⁴ Tu’ haro i’ o nokotulis dot id suang do Buuk do Kinorohingan do pasal di tadau’d koturu’, do poingkaa, ’’Om undorong noddi o Kinorohingan di tadau’d koturu’!’’ ka. ⁵ Om haro po o nokotulis do pasal diri do poingkaa, ’’A’ nondo kopio iyolo’ kosuang do pomogunan diri di koonuan daa’ndo diyolo’ di kosimbayanan do poinsugku’ doho’,’’ ka. ⁶ Om iri nopoddi tulun dit id gulu korongou di Habar dot Osonong diri, om a’ i’ nakaanu di kosimbayanan diri tu’ a’ i’ iyolo’ minonongkuyaan. Iyo nopoddi om nokointalang no kopio do haro indo o tulun do suwai do kaanu di kosimbayanan diri. ⁷ Tu’ natantu’ no kawagu’d Kinorohingan ot iso’ kawagu o tadau di suwai, i roitan do ’’Tadau’d Baino’ ’’. Om piro-piro noddi o toun do mantad diri om minomoros i’ o Kinorohingan dot iri i’ o komoyon, do pinolombus di Daud, dot id suang dit ayat di noroitan di tiinu’, do poingkaa, ’’Ondung korongou kou do boros do Kinorohingan do tadau’d baino’, om kada’ no kopio dokoyu pokodoho’ o ginawo,’’ ka. ⁸ Ondung noonuan daa di Yosua i tulun diri di kosimbayanan di pinabatos do Kinorohingan diri, om a’ no daa o Kinorohingan moro-boros kawagu do pasal dot iso’ o tadau di suwai. ⁹ Iyo nopoddi, om bagi nopo di dong Kinorohingan do tulun om haro kasai’ po o batos do haro o kosimbayanan do miagal do Kinorohingan tu’ minundorong om osimbayan di tadau’d koturu’. ¹⁰ Tu’ iri nopo tulun di kaanu’d kosimbayanan di pinabatos do Kinorohingan dot id dau’ddi, om koundorong no do mantad id koinsanai’d karaja’ dau, do miagal do Kinorohingan tu’ minundorong. ¹¹ Iyo nopoddi, om tumotos toko’ no kopio do manganu di kosimbayanan di pinabatos do Kinorohingan diri. Om aiso’ indo o tongoiso’ dati’ dot a’ kaanu’ddi do miagal diyolo’ di gulu po, tu’ a’ i’ iyolo’ minonongkuyaan do Kinorohingan. ¹² Boros nopod Kinorohingan om poimpasi i’ om kikuasa’, om atarom ko’ i gayang do duwo o tarom. Om tumanom nopo i boros diri do gisom do korikot dot id pitongkiadan do ginawo om rusod; om gisom do korikot dot id langaban om tutok do tulang, om gisom do kosorisid ngai’ do pomusarahan om korohian do ginawo’d tulun. ¹³ Aiso’ i’ o tiso’ piya di kipinuhobo dot a’ okito’d Kinorohingan. Tu’ oinsanan nopo do songingungkaya’ om songintalang dot id toguang do Kinorohingan. Om id toguang no dau do susuyon ngai’ toko’ o koinsanai di nongowonsoi toko’! ¹⁴ Om iri no o kopongigitan kopio toko’ di kotumbayaan di naakun toko’ dot otopot. Tu’ haro no o Boyoon dot Agayo dot Imam toko’ dit agayo kopio, i suminuang do gisom do nokotimbaba’ kopio’d Kinorohingan — om iyau nopo om i Yesus i Tanak do Kinorohingan. ¹⁵ Iri nopo i Boyoon dot Agayo dot Imam toko’ddi om okon i’ ko’ imam dit a’ kopuriman do koinsanai di koluhayan toko’. Suwai ko’, iyau nga’ nopogumbalan no dot id suang do nunu nopo, do miagal dati’; nga’ a’ pondo iyau nokowonsoi’d dusa! ¹⁶ Iyo nopoddi, om kada’ toko’ kooris do minsomok do Kinorohingan tu’ osonong i’ o kowoyo-woyoo’ dau do momorinta’. Om insianan toko’ indo do Kinorohingan om barakatan toko’ dau om otulung toko’ i’ do tontok di maso do mokitulung toko’.

¹ Pointikid-tikid do boyoon dot agayo dot imam om pilion i’ dot id pogialatan di bansa’ dau, om silihon do mogobi-obi’ do Kinorohingan do ponokowakil diyolo’. Karaja’ nopo dau om papatahak dot id Kinorohingan do koinsanai di porsombahan om i porsombahan di sumbolion do maan do pangampun do dusa. ² Iri piya i boyoon dot agayo dot imam diri nga’ ogumu’ i’ o koluhayan, om iri no o komilo-milo dau dot alamaya’ dot id tulun dit aiso’ o toila-ilaan om id tulun di napalid. ³ Om a’ iddi milo dot a’ iyau papatahak do porsombahan di sumbolion, dot okon nopo ko’ i dusa do tulun dot ogumu’ o kapatahakan, nga’ iri nogi’ i dau’d dusa, tu’ oluhoi i’ iyau. ⁴ Aiso’ i’ o tiso’ piya’d tulun do mimpori-pori do sumiliu’d boyoon dot agayo dot imam. Osiliu nopo o tulun do boyoon dot agayo dot imam om lohowon iyau’d Kinorohingan do momonsoi do karaja’ddi — do miagal di Harun. ⁵ Om i Kristus nga’ iyo nogiddi. A’ i’ iyau minimpori-pori do suminiliu do Boyoon dot Agayo dot Imam. Kinorohingan i’ o minomili’ dau. Boros kad Kinorohingan dot id dau, ’’Iya’ no o Tanak ku; om tadau nod baino’ do nosiliu oku’d Tapa’ nu,’’ ka. ⁶ Om boros ka kawagu’d Kinorohingan dot id ayat do suwai om, ’’Iya’ no ot imam do gisom do poingompus do miagal di Milkisidik it Imam diri,’’ ka. ⁷ Tontok di poimpasi po i Yesus do hiti’d pomogunan, om suminambayang iyau do minokianu do mikuwo’d mininggarang om minihad dot id toguang do Kinorohingan, i milo do mamasi dau do mantad id kapatayon. Om pinokinongou iddi iyau tu’ mininsiriba’ i’ iyau do Kinorohingan do mikuwo’d ginawo di momusou kopio. ⁸ I Yesus nopo om Tanak i’ do Kinorohingan, nga’ iyo piya’ddi nga’ mininsingilo i’ iyau do minihuboyo-boyo’ dot id suang di kinoinggoritan dau. ⁹ Om kosiliu poddi iyau do gampamasi di milo kopio’d mamasi, om kosiliu noddi iyau do tudan do koposion di poingompus do kumaa id koinsanai’d tulun dit otorodok dot id dau. ¹⁰ Om pinoboros kopio’d Kinorohingan dot iyau no i Boyoon dot Agayo dot Imam, do miagal di Imam Milkisidik! ¹¹ Ogumu’ daa i posunudon dahai dokoyu do pasal di karaja’ di Yesus di dong Boyoon dot Agayo dot Imam, nga’ apagon i’ iyahai do popotuduk diri tu’ alaid kopio kou i’ do kosuhut. ¹² Otopot nopo kopio om norikot no daa o maso dokoyu do sumiliu’d guru, nga’ atalang i’ kopio do minog kou po do minsingilo do mantad id tulun do suwai do pasal di ponudukan do Kinorohingan dit oribau po, i ponudukan dit id gulu i’ potuduko’. A’ kou po milo do rumamit di taakanon dit okodou; tu’ susu po kasai’ o tinumon dokoyu. ¹³ Iri nopo tulun di susu po o tinumon, om komoyon nopoddi nga’ ragang po iyau; om aiso’ po o toila-ilaan dau ondung nunu it otopot om i kasala’. ¹⁴ Iri nopo taakanon dit okodou om iri no tulun di nongosukod o kaakan, tu’ iyolo’ nopo om oubas nod mongilo ondung honggo it osonong om honggo it araat.

¹ Iyo nopoddi, om kainou no tumilombus do minsingilo di piro-piro o ponudukan di poiralom-ralom do pasal do tumuo dot id suang do koposi-posion do dong Kristus, om okon indo ko’ iri no i ponudukan do tugama’ toko’ dit ongoribau po, it id gulu i’ potuduko’ o toilaan toko’! Kada’ toko’ no gulio’ kawagu do minsingilo i ponudukan di koimpuunon nogi’ dot apatut o tulun do tumingkod do momonsoi do nunu nopo it aiso’ o guna’ om mositi’ do monongkuyaan do Kinorohingan, ² ko’ iri ponudukan di koimpuunon i’ do pasal do botisan ko’ pasal di monukabai’d tulu, ko’ pasal dit apasi kawagu do mantad id kapatayon, ko’ pasal di hukuman do poingompus. ³ Kainou no tumilombus do minsingilo di piro-piro o ponudukan di poiralom-ralom po, do korohian nod Kinorohingan! ⁴ Tu’ iri nopo tulun di tuminongkiad do mantad id kinotumbayaan, om a’ no milo dot angatan do gumuli’ kawagu. Di nopo di gulu po om id suang no daa iyolo’ di tanawau do mantad id Kinorohingan, om nokopuriman di pinopuhawang dau. Om iyolo’ nga’ noporinta’ no daa di Rusod do Kinorohingan. ⁵ Om koilo no iyolo’ do mantad id nongoumbalan diyolo’ dot osonong i boros do Kinorohingan, om nokopuriman iyolo’ di piro-piro o nipuhawang di poimponu’d kuasa’ di maso dot id dabantalan. ⁶ Nga’ adaai iddi diyolo’ i kotumbayaan diyolo’! Om a’ no kopio iyolo’ milo do pogulion kawagu do rumologo do mantad id koinsanai di dusa diyolo’. Tu’ posolibon kawagu’ddi diyolo’ i Tanak do Kinorohingan om indaraaton diyolo’ iyau dot id toguang do tulun dot ogumu’! ⁷ Iri nopo tana’ dit asarabak do rasam di kosondot kasai’d hiri, om i posuni nondo do totonomon di haro o guna’ dot id tulun di minananom om nabarakatan nod Kinorohingan i tana’ddi. ⁸ Nga’ ondung paka’ nogi’ om rugi o sumuni do hiri’d tana’ddi, om aiso’ i’ o guna’ di tana’ om papalan indod Kinorohingan do koimbagu om uuhon do monorob do sumonu’. ⁹ Nga’ iyo piya’ddi o boros dahai, oi tobpinai-tobpinai di kosianan ku, nga’ oilaan i’ kopio dahai dot a’ kou i’ iyokoyu iyo’ddi. Oilaan i dahai do nakaanu kou dit ongosonong ko’ iri, iri no i piro-piro o barakat do kotonggoi di koposion do naanu dokoyu. ¹⁰ Kinorohingan nopo om okon i’ ko’ Kinorohingan dit a’ otulid. A’ i’ dau olihuan i winonsoi dokoyu do bagi’ dau, om i kosianan dokoyu dot id dau di pinointalang dokoyu do tontok di minonulung kou di tulun dit iso-iso’ o kinotumbayaan, di gulu po om dinondo. ¹¹ Orohian kopio iyahai do sompori-pori kou nopo dot ogirot kasai’ do gisom do kopupuson, om aanu indo dokoyu i soro-sorohon dokoyu’ddi. ¹² Mada’ i’ iyahai do kumaul kou. Nga’ orohian kopio iyahai dot iyo kou di tulun di nakaramit di pinabatos do Kinorohingan, tu’ minonongkuyaan i’ iyolo’ dau om alanut o ginawo do minagandad. ¹³ Tontok di minamatos o Kinorohingan dot id di Abraham, om suminumpa’ iyau do momonsoi di nakabatos dau. Om sumpa’ nopo iyau dot id suang do ngaran dau tu’ aiso’ no ot id sawat ko’ mantad do Kinorohingan. ¹⁴ Boros ka dau, ’’Mamatos oku do mamarakat diya’ om papasapou do sinakagon nu,’’ ka. ¹⁵ Om andado’ nopo di Abraham iri do mikuwo’d alanut o ginawo, om kaanu iddi dau i pinabatos do Kinorohingan dot id dau. ¹⁶ Ondung sumumpa’ o tulun, om sumumpa i’ iyau dot id suang do ngaran do tulun do suwai dit id sawat ko’ iyau, om iri no sumpa’ddi o moningkod do koinsanai’d boros dit a’ daa sumokodung diri. ¹⁷ Om orohian o Kinorohingan do poingod kopio dot id tulun di karamit di batos dau’ddi, dot a’ kopio dau simbanan i natantu’ mantad dau do wonsoyon dau. Om iri no kinopomoruhangan dau do sumpa’ dot id batos dau’ddi. ¹⁸ Om a’ no milo’d simbanan i duwo o hal diti: A’ i’ kopio o Kinorohingan milo do mongudut dot id batos om sumpa’ dau’ddi. Iyo nopoddi, om iyati’ no i nokointirung dot id Kinorohingan, ot odsuuron kopio do mongigit di soro-sorohon di posodia’ no dot id toguang toko’! ¹⁹ Iri nopo soro-sorohon toko’ddi om iyo po di limbagat do parau’ di nakaralom tomod o kinotodsokon, om iri no o toidon toko’ dit ogirot om aiso’ nondo o ligogon dot id koposi-posion toko’. Om iri nopo soro-sorohon diri om katalib i’ di tirai di Bilik dit Olidang Kopio do hiri’d Walai’d Sasambayangan dot Agayo do hilo’d surga. ²⁰ Om noiwangan no di Yesus o ralan toko’ do kumaa dot id kinoiyonon diri, om nokosuang no iyau’d hiri do suminiliu’d Boyoon dot Agayo dot Imam do bagi’ dati’ do gisom do poingompus, do miagal di Imam Milkisidik.

¹ I Milkisidik nopo om raja’ do mantad hilo’d Salim om imam do pinili’ do Kinorohingan it Asawat Kopio. Tontok di nokoguli’ i Abraham do mantad id pinisangadan, di naala’ dau i piro-piro o raja’, om rikot no i Milkisidik do minongoi ruba’ dau om minamarakat iyau dau. ² Om patahako’ no di Abraham dot id di Milkisidik o sompihopod do koinsanai di nangaahau dau. (Komoyon nopo di ngaran di Milkisidik do koiso’ om, ’’Raja’ dit Otulid’’; om komoyon no kawagu di ngaran dau om ’’Raja’ do Kosimbayanan’’, tu’ raja’ i’ iyau do mantad hilo’d Salim.) ³ I Milkisidik nopoddi om aiso’ i’ o nokotulis do honggo nopo do popoilo ondung kitapa’ iyau ko’ kitina’ ko’ kitaki-aki iyau; om aiso’ o nokoboros do pasal do kinosusuon dau ko’ kinapatayan po dau. Iyau nopo om miagal po do Tanak do Kinorohingan; om iyau no it imam do gisom do poingompus. ⁴ Om oilaan toko’ no dot agayo kopio i Milkisidik diri; om agayo no kopio iyau gisom dot onuwai nopo iyau di Abraham, i taki-aki do bansa’ toko’, do sompihopod do koinsanai di naanu dau do mantad id pinisangadan diri. ⁵ Id suang nopod Tourat, om natantu’ no dot i piro-piro ot imam di sinakagon di Liwi it apatut do monimung do sompihopod do koinsanai dit aanu di tulun dot Israil, i tobpinai i’ diyolo’, do sinakagon ngai’ piya daa iyolo’ di Abraham. ⁶ I Milkisidik nopo om okon i’ ko’ sinakagon di Liwi, nga’ nakaanu i’ iyau do sompihopod do koinsanai di nangaahau di Abraham, om minamarakat iyau di Abraham, i noonuan no di batos do Kinorohingan. ⁷ Om atantu’ no dot iri nopo tulun di barakatan om osiriba’ no ko’ i tulun di mamarakat dau. ⁸ Iri nopo i piro-piro ot imam di kaanu di sompihopod diri om apatai i’. Nga’ tumanud nopo dot id suang do Buuk do Kinorohingan, om i Milkisidik nopoddi, i nonuan di sompihopod diri om poimpasi kasai’ i’. ⁹ Om milo id komoyon, dot i Liwi nopo — i sanganu di sinakagon di monimung do porsombahan di sompihopod do mantad id tulun dot Israil — om minambayar i’ di bohogian diri do nokotonggoi di Abraham, do tontok di pinabayar di Abraham iri dot id di Milkisidik. ¹⁰ Mulong piya dot a’ po i Liwi nopogkosusu, nga’ milo nod komoyon dot id suang no iyau do tinan di Abraham i taki-aki dau, do tontok di suminolowot i Milkisidik di Abraham. ¹¹ Om pinatahak i Tourat dot id tulun dot Israil dot i piro-piro ot imam do mantad id payat do Liwi o pinopotuduk diri. Om iri nopo i piro-piro ot imam do mantad id payat do Liwi di gulu poddi om a’ i’ milo do momonsoi dit apatut diyolo’d wonsoyon do gisom dot aiso’ kopio o bohiton, om gowoi poddi om minog i’ do haro ot imam do suwai, i miagal di Imam Milkisidik, om okon noddi ko’ mantad id sinompuruan di Imam Harun. ¹² Om ondung osimbanan it apatut do sumiliu’d imam, om i Tourat nga’ apatut nogi’ do simbanan. ¹³ Om komoyon nopoddi nga’ i Tuhan toko’: Iyau nopo om mantad i’ do payat do suwai, om a’ po insan do haro o tulun do mantad id payat dau do nosiliu dot imam. ¹⁴ Koilo ngai’ i’ o tulun dot iri nopo Tuhan toko’ om mantad i’ dot id payat di Yohuda; om a’ i’ di Musa insan koroitai i payat diri do tontok di minomoros iyau do pasal do piro-piro ot imam. ¹⁵ Om atarang poddi ko’ mantad di gulu po i pinoboros diri, di nokorikot o songulun ot imam do suwai, i miagal di Milkisidik. ¹⁶ Kinoponilihan nopo dau dot imam om a’ i’ pinoimpou dot id toturan do tulun, suwai ko’ pinoimpou di koposi-posion dau di kikuasa’ om it aiso’ o kopupuson. ¹⁷ Tu’ haro no o nokoboros dot id suang do Buuk do Kinorohingan do poingkaa, ’’Iya’ no ot imam do gisom do poingompus, do miagal di Imam Milkisidik,’’ ka. ¹⁸ Baino’ nopoddi, om iri nopo toturan di laid diri om nadaan noddi, tu’ a’ i’ ogirot om aiso’ o guna’. ¹⁹ Iri nopo Tourat di Musa om a’ i’ milo do poposonong do nunu nopo do gisom dot aiso’ o bohiton. Om iri no o kinapanahakan dati’ dot iso’ o soro-sorohon dit osonong ko’ iri; om milo toko’ indo do minsomok do Kinorohingan. ²⁰ Kawagu po, om iri ngai’ nopoddi om pinitonggoi i’ do sumpa’ do mantad id Kinorohingan. Aiso’ i’ o sumpa’ do miagal diri do tontok di pinili’ i piro-piro ot imam do suwai. ²¹ Nga’ i Yesus nopo om siniliu dot imam do pinitonggoi’d sumpa’, do tontok di minoro-boros o Kinorohingan dot id dau do poingkaa, ’’Nokosumpa’ no o Tuhan, om a’ no dau simbanan i nokoboros dau do poingkaa, ’Iya’ no ot imam do gisom do poingompus,’ ka,’’ ka dau. ²² Om iri noddi o nokosiliu-siliu di Yesus do pamajamin dot iso’ o tumpongo dit osonong ko’ iri. ²³ Om haro po kawagu o hal do suwai: iri nopo piro-piro ot imam di suwai’ddi om ogumu’ i’; tu’ minatai ngai’ i’ iyolo’ om gisom dot a’ milo do popotilombus di karaja’ diyolo’. ²⁴ Nga’ i Yesus nopo om poimpasi i’ do gisom do poingompus, om iri nopoddi karaja’ dau di dong imam om a’ i’ pinatahak dot id tulun do suwai. ²⁵ Om iri noddi o komilo-milo di Yesus do mamasi kasai’ di tulun di rumikot dot id Kinorohingan dot iyau o poporikot, tu’ poimpasi kasai’ i’ iyau do gisom do poingompus do popoboros di pokionuon di tulun diri dot id Kinorohingan. ²⁶ Iyo nopoddi, om i Yesus no o Boyoon dot Agayo dot Imam di milo kopio do monulung dati’. Iyau nopo om olidang i’; om aiso’ o kasalaan om dusa dau. Pinotongkiad iyau do mantad id tulun di kidusa, om pinoinsawat iyau do hilo’d kinoiyonon dit asawat po ko’ koinsanai’d tawan. ²⁷ Iyau nopo om a’ i’ iyo di piro-piro o boyoon dot agayo dot imam di suwai, i monikid tadau nopo do papatahak do porsombahan di sumbolion dot iri po dusa diyolo’ o kapanahakan, om iri nogindo i dusa di tulun dot ogumu’. I Yesus nopo om insan noo papatahak do porsombahan di sinumbali’, i kabagal do gisom do poingompus, do tontok di pinatahak dau o tinan dau do siniliu do porsombahan di sinumbali’. ²⁸ Iri nopo Tourat di Musa om momili’ i’ di tulun di haro piya o bohiton do silihon do boyoon dot agayo dot imam. Nga’ id tohuri noddi ko’ i Tourat diri, om pamatos no o Kinorohingan do mikuwo’d suminumpa’ do silihon nondo dau do Boyoon dot Agayo dot Imam, i Tanak di nakabatos no mantad do silihon do Gampamasi di milo kopio’d mamasi, do gisom do poingompus.

¹ Tonsi nopo kopio do koinsanai’dti poboroson dahai’dti om: Haro i’ o dati’ do Boyoon dot Agayo dot Imam do miagal diri, i poirikau do momorinta’ do poinsugku’ do Kinorohingan, it Agayo Kopio do hilo’d surga. ² Om iyau no i momonsoi do karaja’ di dong Boyoon dot Agayo dot Imam do hiri’d Bilik dit Olidang Kopio, i hiri’d Kiim do Tuhan dit otopot kopio, i winonsoi’d Tuhan, om okon i’ ko’ winonsoi’d tulun. ³ Pointikid-tikid do boyoon dot agayo dot imam om pilion i’ do papatahak do porsombahan di sumbolion ko’ i porsombahan do suwai dot id Kinorohingan. Om iyo nogiddi i dati’ do Boyoon dot Agayo dot Imam; tu’ mositi’ i’ do haro o patahakon dau do maan do porsombahan. ⁴ Ondung hiti daa iyau id pomogunan, om a’ i’ iyau osiliu dot imam, tu’ haro no ot imam di papatahak do porsombahan di sumbolion, i ponuhuan di Tourat do tulun do Yohudi. ⁵ Iri nopo karaja’ di dong imam di wonsoyon diyolo’ om otopot nopo kopio om poiyaan noo om sangai-sangai noo di hilo’d surga. Om nokosunud nod Kinorohingan iri dot id di Musa di gulu po, do tontok di winonsoi di Musa i Kiim do Tuhan. Poingkaa o pinoboros do Kinorohingan dot id di Musa, ’’Soro-sorohon no! Mositi’ nod wonsoyon ngai’ nu’ri do tumanud di poiyaan di pinokitanan diya’ di hilo’d nuluhon,’’ ka. ⁶ Nga’ baino’ noddi om nakaanu no i Yesus do karaja’ di dong imam dit agayo po ko’ i winonsoi di piro-piro ot imam diri. Tu’ iri nopo tumpongo di winonsoi dau dot id pialatan do Kinorohingan om tulun, om osonong po ko’ i tumpongo di gulu, tu’ pinoimpou i’ di boros do pasal do piro-piro o hal dit osonong ko’ iri. ⁷ Ondung aiso’ daa o bohiton di tumpongo dit id gulu, om a’ i’ daa minog do haro o tumpongo di koduwo. ⁸ Nga’ haro i’ o kasalaan do nokito’d Kinorohingan do nowonsoi di tulun dau, gisom do minomoros o Kinorohingan do poingkaa, ’’Ilaai no, do rumikot indo o maso, do momonsoi oku do tumpongo di wagu dot id bansa’ dot Israil, om id bansa’ do Yohudi. ⁹ Om a’ i’ iri miagal di tumpongo di winonsoi ku dot id taki-aki diyolo’ do tontok di winoyo’ ku iyolo’ do suminoliwan do mantad id pomogunan do Masir. A’ i’ iyolo’ tuminorodok dot id tumpongo di winonsoi ku dot id diyolo’; om iri no ot a’ ku kinopomodulan diyolo’. ¹⁰ Nga’ baino’ nopondo, om iti no o tumpongo do wonsoyon ku dot id tulun dot Israil do koimbagu, kad Tuhan: Posuangon ku nondo o toturan ku dot id suang do pomusarahan diyolo’, om potulison ku dot id ginawo diyolo’. Osiliu oku nondo do Kinorohingan diyolo’, om osiliu iyolo’ do tulun ku. ¹¹ Om a’ no iyolo’ minog do monuduk di tulun dit id suang do pomogunan diyolo’, ko’ momisunud po di tobpinai dau do poingkaa, ’Intutun nod Tuhan,’ ka. Tu’ oinsanan nopondo iyolo’, dot it angagayo om it ongokoro’, do kotutun doho’. ¹² Om ompunan ku nondo o kasalaan diyolo’, om a’ ku sorohon kawagu i dusa diyolo’,’’ ka. ¹³ Om di nopoddi pinoboros do Kinorohingan i tumpongo do wagu’ddi, om rinoitan diri dau do laid iri om rinoitan dau do noromuk, om a’ no alaid om tumanus no.

¹ Id suang nopo di tumpongo di koiso’ om haro o piro-piro o toturan do sumambayang, om haro o tiyonon do sumambayang di winonsoi’d tulun. ² Haro ot iso’ kiim do winonsoi do rinoitan do Bilik dit Olidang, i hiri’d gulu kopio kobontol. Om hiri nopod suang di bilik diri nga’ haro o potimpakan do lampung, om haro o mija’ di pinasakayan do roti, do patahakon dot id Kinorohingan. ³ Om hiri nod ponong id suang, it id dotirung di tirai di koduwo om haro o kinoiyonon di roitan do Bilik dit Olidang Kopio. ⁴ Hiri nopod bilik diri om haro o pananaraban do kominyan, i tamas do winonsoi, om haro o Kaban do Tumpongo, i kotongkop nopod nurogupan do tamas. Id suang nopo di Kaban diri om haro o balanga’ do tamas do sinuangan do manna, om hiri i sukud di Harun di tinolidan, om hiri i duwo o kaping do watu do ponunulisan, i tinulisan di hopod o toturan do mantad id Kinorohingan. ⁵ Hiri nopod sawa-sawat di Kaban diri om haro o duwo o koiyo-iyo do moloikat di roitan do kerub, i tanda’ do nakarapou o Kinorohingan. Om iri nopo duwo talad di kerub diri om poungkalad dot id sakai di sompon di Kaban, i tiyonon do mangampun do dusa. Nga’ a’ no osorisid ngai’ do papatarang iri do dinondo. ⁶ Om iyo noddi o poiiyon ngai’ddi. Monikid tadau nopo i piro-piro ot imam do mongoi do hiri’d kinoiyonon dit id gulu kobontol di kiim diri do mongoi pomonsoi di karaja’ diyolo’. ⁷ Nga’ iri nopo sumuang do hiri’d ponong id gogok kopio di kiim om iri no i Boyoon dot Agayo dot Imam. Om insan nod sontoun do mongoi iyau’d hiri. Om tontok nopo di mongoi iyau’d hiri om migit iyau do raha’ do maan patahako’ dot id Kinorohingan do bagi’d tinan dau om bagi’d dusa di bansa’ddi dit a’ diyolo’ tinomod do momonsoi. ⁸ Om atarang no kopio i potudukon di Rusod do Kinorohingan do haro nopo o toturan do miagal diri, om solinaid nopo do poingkakat i kiim dit id gulu kobontol diri, om a’ po noiwangan o ralan do sumuang do hiri’d Bilik dit Olidang Kopio. ⁹ Iri no o poiyaan diti maso do dinondo; om komoyon nopoddi om a’ i’ milo do poposonong kopio do kopurimanan do ginawo di tulun do pinapatahak di porsombahan, i piro-piro o porsombahan om i piro-piro o tayam-tayam di maan do porsombahan do sumbolion. ¹⁰ Tu’ iri ngai’ nopo i wonsoyon do tumanud do toturan diri om pasal no do taakanon, om tinumon, om piro-piro o kowoyoon do toturan do momolidang do tinan. Om iri ngai’ nopoddi om toturan no do don tinan om i tonudon do gisom no dot orikot i maso do papaharo o Kinorohingan do koinwoguan. ¹¹ Nga’ i Kristus nopo om nokorikot no do sumiliu’d Boyoon dot Agayo dot Imam do koinsanai dit ongosonong di haro do dinondo. Iri nopo Kiim do Tuhan dit iyonon dau do momonsoi di karaja’ dau di dong Boyoon dot Agayo dot Imam om abantug i’ om aiso’ o bohiton do katalad di kiim dit id gulu. Iri nopo om okon i’ ko’ tulun o minomonsoi; komoyon nopo nga’ okon i’ ko’ iti pomogunan di winonsoi o tadon diri. ¹² Insan noo i Kristus do suminuang di Bilik dit Olidang Kopio’ddi, om diri-diri no, om a’ nondo iyau sumuang kawagu do gisom dot alaid. Om tontok nopoddi om okon i’ ko’ raha’ do kambing di tontoluhan ko’ raha’ do tanak do sapi’ o nigitan dau do numaan do porsombahan; suwai ko’ nigitan nopo dau om iri i dau’d raha’, om iri noddi o pinopoidu’ dau dati’ do gisom dot alaid. ¹³ Iri no raha’ di kambing om i sapi’ di tontoluhan o powowoson, om i tauu di tanak di sapi’ di sinorob do numaan do porsombahan, o paarabon dot id tulun di nososomu’ dot id pagantangan do toturan do tugama’, om olidang indo iyolo’. Om ondung koidu’ di kososomu’ di tulun diri i raha’ om i tauu diri, ¹⁴ om okon-okon pondo i raha’ di Kristus! Om iri no i Rusod di hino kasai’ o pinawayaan di Kristus do pinapatahak do tinan dau dot id Kinorohingan do suminiliu’d porsombahan di sinumbali’ dit aiso’ o bohiton. Om iri no i raha’ dau o momolidang do kopurimanan do ginawo toko’ do mantad id toturan do tugama’ dit aiso’ o guna’, om milo toko’ indo do mogobi-obi’ do Kinorohingan di poimpasi. ¹⁵ Om iri no o kinosilihan do Kristus do Momialatan do momonsoi dot iso’ o tumpongo di wagu, om kaanu i’ i tulun di nolohou do Kinorohingan di barakat dit aiso’ o kopupuson, i pinabatos do Kinorohingan. Om nosiliu ngai’ i’ o miagal diri tu’ haro no i minatai, iri no i Kristus; om iri no i kinapatayon dau o pinopoidu’ do tulun do mantad id koinsanai’d kasalaan di nowonsoi diyolo’ di maso po do kikuasa’ i tumpongo dit id gulu. ¹⁶ Ondung haro o surat do kopotungkusan do dapu’, om mositi’ no do haro o kointalangan kopio do napatai i minonulis di surat diri. ¹⁷ Tu’ aiso’ po o komoyon di surat do popotungkus diri do poimpasi po i tulun di minomonsoi’ddi. Haro nopo kopio o komoyon di surat diri om apatai i tulun diri. ¹⁸ Iyo nopoddi, om iri piya i tumpongo dit id gulu nga’ mositi’ i’ do pogiroton do raha’ o pomogirot. ¹⁹ Id gulu nopo do winonsoi di Musa om pinopolombus iyau do koinsanai di toturan dit id suang do Tourat dot id tulun dot Israil. Om ngoyo’ nogiddi di Musa i raha’ di tanak do sapi’ om i raha’ di kambing do tontoluhan, om ralatai no dau iri do waig, om powowoso’ nogiddi dau do hiri’d buuk do Tourat om pinowowos dau dot id koinsanai’d tulun dot Israil, dot i koiyo-iyo do rongilut om i hulu do dumba’ dit oitom o karagango’ o pinakai dau do pinopowowos diri. ²⁰ Om boros ka di Musa di maso dau do popingwowos diri om, ’’Iti no i raha’ di popogirot di tumpongo do mantad id Kinorohingan, om iti no it apatut dokoyu do tonudon,’’ ka dau. ²¹ Om iyo iddi o kowoyo-woyoo’ di Musa do pinopowowos di raha’ddi dot id Kiim do Tuhan om id koinsanai di pakakas do sumambayang. ²² Om otopot i’ kopio, do tumanud nopo do Tourat, om oruhai nod raha’ ngai’ o pomolidang do koinsanai’d nunu nopo, om dusa nga’ oompunan nopo om haro o raha’ do kalawas. ²³ Om iyo noddi o kowoyo-woyoo’ do pomolidang ngai’ di konunu-nunuan di pinoiya-iyaan di hilo’d surga. Nga’ maan nopo di hilo’d surga om mositi’ no do haro o porsombahan di sumbolion dot osonong ko’ i koubasanan. ²⁴ Tu’ Kristus nopo om okon i’ ko’ i Bilik dit Olidang di winonsoi’d tulun o suangon tu’ iri nopo om poiyaan no di Bilik dot Olidang dit otopot kopio. Hilo’ i’ kopio id surga o sinuang di Kristus; om hilo’ no iyau do dinondo do tumimbaba’ do Kinorohingan do mobi’ dati’. ²⁵ Iri nopo Boyoon dot Agayo dot Imam di tulun do Yohudi om monikid toun nopo do sumuang do hiri’d Bilik dit Olidang Kopio, i hiri’d Walai’d Sasambayangan dot Agayo, om migit iyau do raha’ do songinan o tayam-tayam. Nga’ Kristus nopo om a’ i’ miniguli-guli’ do suminuang do pinapatahak do tinan dau. ²⁶ Tu’ ondung iyo’ddi, om asaru’ no iyau do noinggorit do pointonodon di wonsoyo’ i’ iti pomogunan. Nga’ nokointalang no kopio, do tontok i’ di motingkopupus no o pomogunan, do ruminikot iyau dot insan noo do minongoi pananus do dusa, tu’ pinatahak i’ dau o tinan dau do siniliu’d porsombahan di sinumbali’. ²⁷ Om natantu’ nod Kinorohingan dot insan noo o tulun do matai, om sumusuhut nopondo om butusan po iyolo’d Kinorohingan. ²⁸ Om iyo nogiddi o Kristus tu’ insan noo patahako’ do numaan do porsombahan di sinumbali’ do mananus do dusa do tulun dot ogumu’. Om rumikot indo kawagu iyau, nga’ okon no ko’ mongoi pamabo do dusa, suwai ko’ mongoi pamasi ngai’ do tulun di mandad-andad do korikatan dau.

¹ Iri nopo Tourat do tulun do Yohudi om poiya-iyaan noo do koinsanai dit ongosonong di rumikot do koimbagu. Nga’ a’ i’ atarang noti do maan do poiyaan. Om a’ i’ kopio milo i Tourat diri do momolidang kopio di tulun di rumikot do mongoi sambayang dot id Kinorohingan, do mongigit do porsombahan, do mulong piya do monikid toun nopo do papatahak do porsombahan di sumbolion dit iyo kasai’ddi. ² Ondung nolidangan kopio daa do mantad id dusa i tulun do tumuku’ dot id Kinorohingan diri, om aiso’ no daa o kopurimanan do ginawo diyolo’ do kidusa iyolo’, om a’ no daa papatahak kawagu do porsombahan di sumbolion. ³ Nga’ kointalang i’ kopio dot iri nopo porsombahan di sumbolion di patahakon do pointikid do toun om poposorou nogi’ do tulun di dusa diyolo’, ⁴ tu’ a’ i’ kopio katanus do dusa i raha’ do sapi’ om i raha’ do kambing do tontoluhan. ⁵ Om kaa pogi’ do tontok nopo di ruminikot i Kristus do hiti’d pomogunan, om poingkaa o pinoboros dau dot id Kinorohingan, ’’A’ ko i’ orohian do porsombahan di sumbolion om i porsombahan do suwai; nga’ nonuan oku nogi’ diya’ do tinan. ⁶ A’ ko’ i’ orohian do porsombahan di sorobon ko’ iri po porsombahan do pangampun do dusa. ⁷ Om boros kangku’ddi, ’Hati’ oku no, oi Kinorohingan! Om ruminikot oku do mongoi pomonsoi di korohian nu, do miagal di nokotulis do pasal doho’ dot id suang do buuk do Tourat,’ kangku,’’ ka. ⁸ Id gulu nopo do pinoboros di Kristus om poingkaa, ’’A’ ko i’ orohian do porsombahan di sumbolion om i porsombahan do suwai; a’ ko i’ orohian di tayam-tayam di sorobon do maan do porsombahan, om a’ ko orohian di porsombahan di sumbolion do maan do pangampun do dusa,’’ ka dau. Om iyo iddi o pinoboros di Kristus, do mulong piya do tumanud di Tourat o kowoyo-woyoo’ do papatahak do koinsanai di porsombahan di sumbolion. ⁹ Om poboroso’ nogiddi di Kristus o poingkaa, ’’Hati oku no, oi Kinorohingan! Om ruminikot oku do mongoi pomonsoi di korohian nu,’’ ka dau. Om tonuso’ noddi do Kinorohingan o koinsanai di porsombahan di sumbolion dit id gulu, om sowoliai no dau di Kristus, i numaan do porsombahan di sinumbali’. ¹⁰ Nowonsoi no di Yesus Kristus i korohian do Kinorohingan om pinatahak dau o tinan dau do suminiliu’d porsombahan di sumbolion. Om iri no i porsombahan diri, i winonsoi dau dot i tinan dau o pinatahak dot insan noo do maan do gisom dot alaid, do nolidangan ngai’ toko’ddi do mantad id dusa. ¹¹ Pointikid-tikid dot Imam di tulun do Yohudi om momonsoi kasai’ i’ di karaja’ dau do dong imam do pointikid do tadau, om miguli-guli’ iyau do papatahak do porsombahan di sumbolion dit iyo kasai’ nopoddi. Nga’ iri nopo porsombahan di sumbolion diri om a’ i’ kopio katanus do dusa. ¹² Suwai ko’, iso’ noo o porsombahan di sumbolion do pinatahak di Kristus do maan do pangampun do dusa, om poinggirot kasai’ no i porsombahan do sinumbali’ddi do gisom dot alaid. Om katahak poddi i porsombahan di sinumbali’, om irikau no i Kristus dot id dawananan do Kinorohingan om momorinta’ diri iyau do poinsugku’ do Kinorohingan. ¹³ Om dinondo nopodti om mandad po o Kristus do poinsiribaon ngai’ do Kinorohingan dot id dau i pisangod dau. ¹⁴ Om iso’ noo o porsombahan di sinumbali’ do pinomolidang di Kristus do koinsanai’d tulun di nolihungan do mantad id dusa, gisom dot olidang kopio iyolo’. ¹⁵ Om popoingod i’ dati’ i Rusod do Kinorohingan do pasal diri. Boros ka di Rusod do Kinorohingan, ¹⁶ ’’Boros kad Tuhan, ’Iti no o tumpongo di wonsoyon ku dot id diyolo’ do koimbagu. Posuangon ku nondo dot id ginawo diyolo’ i toturan ku om tulison ku’ri dot id suang do pomusarahan diyolo’,’ ka,’’ ka dau. ¹⁷ Om nokoboros i’ o Kinorohingan do poingkaa, ’’Lihuan ku nondo o koinsanai di dusa om i karaaton diyolo’,’’ ka. ¹⁸ Iyo nopoddi, om iri ngai’ nopo i dusa om i karaaton diri, om noompunan no. Om a’ no minog do papatahak kawagu do porsombahan do sumbolion do maan do pangampun do dusa. ¹⁹ Baino’ nopoddi, oi tobpinai-tobpinai ku, om katama’ toko’ noddi do sumuang di Bilik dit Olidang Kopio tu’ napatai no i Yesus. ²⁰ Noiwangan no di Yesus ot iso’ o ralan di wagu do wayaan toko’, iri no i ralan di manahak do koposion. Iri nopo i ralan diri om kawaya’ i’ di tirai, iri no i tinan di Yesus. ²¹ Om baino’ nopoddi om haro no o Boyoon dot Agayo dot Imam toko’, i mongilo-ilo di tulun do songonuon do Kinorohingan. ²² Iyo nopoddi, om kainou no minsomok do Kinorohingan do mikuwo’d ginawo dit otulid om ogirot o kotumbayaan; om mikuwo’d kopurimanan do ginawo di nolidangan no do mantad id taraat, om mikuwo’d tinan di nolihungan no di waig dot oniniting. ²³ Om igitan toko’ no kopio i soro-sorohon di ponongkuyaan toko’, tu’ Kinorohingan nopo om milo i’ do ponongkuyaanan do mamayaan kasai’ di batos dau. ²⁴ Om pogipadul-padul toko’ no, om kopogiodsuur-suur toko’ i’ do mogiinsian-sian dot iyati’ ngai’, om kopomonsoi toko’ dit ongosonong. ²⁵ Om kumaparu’ toko’ no do mogititimung, om a’ tukono’ do miagal di tulun do suwai. Om apatut nogi’ do ruhangan toko’ o kotorodoko’ toko’ om mogiodsuur-suur toko’, tu’ oilaan toko’ i’ dot a’ no alaid do rumikot o Tuhan. ²⁶ Tu’ ondung nokosusui no dot id dati’ i habar dot otopot do mantad id Kinorohingan nga’ tumilombus toko’ indo do momonsoi’d dusa di tomodon do momonsoi, om aiso’ no o porsombahan di sumbolion do koidu’ di dusa toko’ do miagal diri. ²⁷ Tu’ osunsudan toko’ nopo om tumimbaba’ pod Kinorohingan do momutus om tumimbaba’ di tapui do kototogod dau, i monorob ngai’ di tulun di sumaap dau do gisom dot ouu. ²⁸ Iri nopo tulun dit a’ tumanud di Tourat di Musa, om hukuman nopo do kapatayon, om aiso’ no o koompunan, do kointalang kopio do nakasala’ iyau, do pasalaon do duwo ko’ tolu o tulun do sasi’. ²⁹ Om okon-okon pondo o kawagato’ do hukuman do porotuon dot id tulun di mongulok-ulok di Tanak do Kinorohingan. Tu’ tulun nopo do miagal diri om papagaan-gaan di raha’ do tumpongo do Kinorohingan, iri no i kinapatayon di Kristus, i momolidang daa dau do mantad id dusa. Om mongindaraat iyau di Rusod di manahak do nipuhawang. ³⁰ Om koilo toko’ i’ ondung isai i minomoros do poingkaa, ’’Sumuli’ oku indo! Momohukum oku indo!’’ ka, om i minomoros dot, ’’Butusan indod Tuhan i tulun do songonuon dau,’’ ka. ³¹ Korolosi no moti’ kopio dot aratu’ o tulun dot id longon do Kinorohingan di Poimpasi! ³² Soroho’ no dokoyu o kowoyo-woyoo’ dokoyu di gulu po. Tontok nopoddi, di notitihan kou di tanawau do Kinorohingan, om ogumu’ tomod daa o kinoinggoritan dokoyu; nga’ ogirot kasai’ kou i’ om aparu’ kou do kuminaraja’. ³³ Koumbal i’ dot indaraaton kou om a’ kopio osonong-sonong o wonsoyon diyolo’ dot id dokoyu dot id toguang do tulun dot ogumu’. Om koumbal i’ do kotonggoi kou di tulun do suwai dot oinggorit do tontok dot inggoriton iyolo’, ³⁴ om tumonggoi kou di tulun do poinggiil do tumongob. Om ngoyon ngai’ nopo ahawo’ do mantad id dokoyu i dokoyu’d songonuon, om osonong i’ o ginawo dokoyu do tumimbaba’ddi, tu’ oilaan i’ dokoyu do haro po dot id dokoyu it osonong ko’ iri, it a’ rumaag do gisom do poingompus. ³⁵ Iyo nopoddi, om kada’ kou kapaasai, tu’ ondung otumbayaan kasai’ kou, om haro i’ ot isomuli’ddi dit agayo! ³⁶ Mositi’ no do polonuton dokoyu o ginawo dokoyu, om milo kou i’ do momonsoi di korohian do Kinorohingan om kaanu kou indo di pinabatos dau. ³⁷ Tu’ nokotulis no dot id suang do Buuk do Kinorohingan o poingkaa, ’’A’ no alaid, dot iri nopondo i rumikot mantad diri, om rumikot nod oruhai; a’ no dau popiurut-uruton o korikatan dau. ³⁸ Om iri nopondo i tulun di doho’ kopio’d songonuon om otumbayaan indo om apasi; nga’ ondung haro ot id pogialatan diyolo’ do sumunsuri, om a’ oku no asanangan do tulun diri,’’ ka. ³⁹ Iyati’ nopodti om okon i’ ko’ tulun di suminunsuri om i napalid. Suwai ko’ iyati’ nopo om tulun i’ dit otumbayaan do Kinorohingan om napasi toko’.

¹ Komoyon nopo dot otumbayaan om atantu’ kopio o ginawo do monongkuyaan dot abayaan kopio i soro-sorohon toko’, om komoyon nopoddi nga’ haro kopio o ponongkuyaanan dot otopot i’ kopio do haro it a’ toko’ okito. ² Kinohubayaan i’ do Kinorohingan i tulun di gulu po, tu’ kikotumbayaan i’ iyolo’. ³ Oilaan toko’ i’ dot i boros do Kinorohingan o minomonsoi diti pomogunan, tu’ otumbayaan toko’ i’; om komoyon nopoddi, nga’ iri nopo it okito om winonsoi dot it a’ okito o numaan wonsoyo’. ⁴ Om pinapatahak i Habil dot id Kinorohingan, do porsombahan di sinumbali’ dit osonong ko’ i di Kain, tu’ kikotumbayaan i’ iyau. Om iri no i kotumbayaan di Habil diri o kinopomoromitan do Kinorohingan di Habil do pinoiyo do tulun dit osonong, tu’ nokointalang no do rinamit do Kinorohingan i porsombahan dau. Om napatai no daa i Habil nga’ moro-boros kasai’ po iyau do gisom piya do dinondo, tu’ kikotumbayaan i’ iyau. ⁵ Om i Hinok nopo om a’ i’ napatai tu’ kikotumbayaan i’ iyau om poinsawato’ nopoddi iyau do pinakaa dot id Kinorohingan. Aiso’ i’ o tiso’ pod tulun do nokokito dau do nihum piya daa iyau, tu’ nokoinsawat no iyau do Kinorohingan. Om nokotulis i’ dot id suang do Buuk do Kinorohingan do kinohubayaan do Kinorohingan i Hinok, do tontok dit a’ po iyau nokoinsawat. ⁶ Aiso’ i’ o tiso’ pod tulun do kohubayaan do Kinorohingan, ondung aiso’ o kotumbayaan do tulun diri. Tu’ iri nopo tulun di rumikot dot id Kinorohingan om mositi’ no do monongkuyaan do haro o Kinorohingan, om monongkuyaan do monomuli’ iyau do tulun di mogihum dau. ⁷ Om sinunudan pogi’d Kinorohingan i Nuu do pasal dit ongosiliu dot id maso dot abantalan, it a’ po dau okito, nga’ kikotumbayaan i’ iyau. Om minumboyo’ i Nuu do Kinorohingan gisom do minomonsoi iyau dot iso’ o kapal do rahat. Om id tohuri noddi om iri no i kapal diri o nakapasi dau om i sompiiyon dau. Om hukumai noddi o pomogunan, nga’ i Nuu nopo om pinoboros i’ do Kinorohingan do tulun dit osonong, tu’ haro i’ o kotumbayaan dau. ⁸ Om umboyo’ nopo i Abraham do Kinorohingan do tontok di lohowo’ iyau do Kinorohingan om di sinuhu’ iyau do kumaa dot id iso’ o pomogunan di pinabatos do Kinorohingan dot id dau, tu’ kikotumbayaan i’ iyau. Om pamanau nopoddi i Abraham dot a’ piya dau oilaan ondung hinonggo o pakayaan dau. ⁹ Om undorong nopo i Abraham do miagal do tulun di sompogunan do hiri’d pomogunan di pinabatos do Kinorohingan dot id dau’ddi, tu’ kikotumbayaan i’ iyau. Om undorong nopo i Abraham do hiri do poingiyon dot id kiim. Om iyo iddi o winonsoi di Isak om i Yakub, i nakaramit di batos do miagal diri do mantad id Kinorohingan. ¹⁰ Tu’ mandad-andad no i Abraham di bandar di tinantu’ mantad do wonsoyon om i winonsoi’d Kinorohingan do pinoimpou do pinoimpahan dit ogirot. ¹¹ Om haro i’ o sinakagon di Abraham do mantad id di Sara, do mulong piya do molohing no daa kopio iyau, om a’ maganak i Sara, tu’ kikotumbayaan i’ iyau. Oilaan no kopio di Abraham do bayaanon do Kinorohingan i batos dau. ¹² Mulong piya daa dot iyo pod napatai o tinan di Abraham do maso’ddi, nga’ ogumu’ i’ o sinakagon dau, gisom dot a’ no ointob o kogumuo’ diyolo’. Iyo po iyolo’ di rombituon do hilo’d tawan om iyo di togis do hilo’d tisan do rahat kogumu’, tu’ kikotumbayaan i’ iyau. ¹³ Om kikotumbayaan kasai’ i’ o koinsanai di tulun diri do gisom piya do kinapatayon diyolo’. A’ i’ diyolo’ naramit i pinabatos do Kinorohingan diri, suwai ko’ nokito noo diyolo’, nga’ pinusou i’ diyolo’ iri do hiri piya’d sodu’. Om iri no o kinapamarasan diyolo’ do sompogunan no toomod iyolo’ om mombo-hombo do hiti’d pomogunan. ¹⁴ Om tulun nopo do momoros do miagal diri om popointalang no kopio do maso diyolo’ do mogihum do pomogunan dit osiliu’d pomogunan kopio diyolo’. ¹⁵ Om okon i’ ko’ i pomogunan di tinongkiadan diyolo’ o sorohon diyolo’. Tu’ ondung iri daa, om milo i’ daa iyolo’ do gumuli’ dot id pomogunan diri. ¹⁶ Nga’ nokointalang no kopio do langadon i’ iyolo’ dot iso’ o pomogunan dit osonong ko’ iri, iri no i pomogunan do hilo’d surga. Om iri no ot a’ do Kinorohingan kointingayaman do roitan piya diyolo’ iyau do tapa’ diyolo’, tu’ nokosodia’ nod Kinorohingan ot iso’ o bandar do patahakon dau dot id diyolo’. ¹⁷ Om iri i kotumbayaan di Abraham o kinapatahakan dau di Isak do maan do porsombahan do tontok di tinoinu’ iyau do Kinorohingan. I Abraham no o nonuan do Kinorohingan di batos dau, nga’ posodia’ i’ i Abraham do papatahak di tanak dau dit iso’ noo. ¹⁸ Om nokoboros nod Kinorohingan o poingkaa dot id di Abraham, ’’I Isak no o koonuan nu do sinakagon di pinabatos ku diya’,’’ ka. ¹⁹ Oilaan no kopio di Abraham do milo o Kinorohingan do mamasi kawagu di Isak do mantad id kapatayon, om milo nod poboroson, do naanu no kawagu di Abraham i Isak do mantad id kapatayon. ²⁰ Om pinabatos di Isak dot id di Yakub om id di Isau i barakat di rumikot do koimbagu, tu’ kikotumbayaan i’ iyau. ²¹ Om di nopo dit a’ po i Yakub napatai om pinatahak dau o barakat dau dot id tangaanak di Yusup, tu’ kikotumbayaan i’ iyau — om tontok nopoddi om posikoron po iyau di tulu di sukud dau om tuminuku’ iyau dot id Kinorohingan. ²² Om iri i kotumbayaan di Yusup — do tontok dit oruhai no iyau do matai — o kinapabarasan dau do pasal do kosoliwanan di tulun dot Israil do mantad hilo’d Masir, om pinobilin dau it apatut do wonsoyon dot id rata’ dau. ²³ Om i kotumbayaan di molohing di Musa o kinopolisakan dau di Musa do solinaid do tolu o tulan do mantad di kinosusuon dau. Om nokito diyolo’ dot olumis kopio kaanak i Musa, om a’ iddi iyolo’ nooris do tuminolibamban di pinonuhuan di raja’. ²⁴ Om i kotumbayaan di Musa o kinaadaan dau do roitan do tanak iyau do raja’ do Masir dit agayo iyau. ²⁵ Pinokouhang nogi’ dau dot oinggorit do tumonggoi di tulun do songonuon do Kinorohingan ko’ mantad do haro o kosimbayanan dit oruuhai dot id suang do koposi-posion di kidusa. ²⁶ Noilaan i’ di Musa dot agayo nogi’ kopio o komoyon dot indaraaton piya dot i Raja’ do Gampamasi di pinabatos do Kinorohingan o kopongindaraatan ko’ mantad do kaanu do koinsanai di kakayaan do pomogunan do Masir. Tu’ i Musa nopo om kosorou kasai’ i’ dit isomuli’ do koimbagu. ²⁷ Om tongkiad no i Musa do mantad hilo’d Masir, om a’ i’ iyau moddosi dot otogod piya i raja’, tu’ haro i’ o kotumbayaan dau. Om pamanau nopo i Musa do ruminikot do hiri’d tongoyon dau dot iyo pod nokokito no iyau do Kinorohingan, it a’ okito’ddi. ²⁸ Om papaharo no i Musa do Paska om ponuhu’ no do popowowos do raha’ do hiri’d wawayaan di walai do tulun dot Israil om a’ i’ di Moloikat di Mamatai apatai i tanak diyolo’ dit id gulu, tu’ haro i’ o kotumbayaan di Musa. ²⁹ Om i tulun dot Israil nga’ nokosoborong i’ di Rahat dot Aragang, dot iyo pod minamanau iyolo’ dot id tana’ dit otuu, tu’ kikotumbayaan i’ iyolo’, nga’ iri nopo tulun do Masir om koolitai nopo di rahat, do tontok di minumbal daa iyolo’ do suminoborong di rahat. ³⁰ Om kahaba’ nopo di tulun dot Israil i tolig do bandar do Yorikou di nokotutuk iyolo’ di bandar diri do solinaid do turu’ o tadau, tu’ haro i’ o kotumbayaan diyolo’. ³¹ Om i Rahab, i tondu’ do sundal diri nga’ a’ i’ napatai do nokotonggoi di tulun di suminaap do Kinorohingan, tu’ kikotumbayaan i’ iyau; om osonong o ginawo dau do pinapasalakoi di tulun dot Israil di minongoi ponoluku’. ³² Om milo oku i’ daa do minsusui nopo, nga’ aiso’ no o maso ku. Tu’ a’ ku po noroitan i Gidion, om i Barak, om i Simson, om i Yipta, om i Daud, om i Somuil, om i piro-piro o nabi. ³³ Om nangaala’ i’ diyolo’ o piro-piro o pomorinta’, tu’ kikotumbayaan i’ iyolo’. Om winonsoi i’ diyolo’ it otopot, om naanu iddi diyolo’ i pinabatos do Kinorohingan. Om nakalantom diyolo’ o kabang do singa. ³⁴ Om nokopisok iyolo’ do tapui di molob-ngolob, om nokoidu’ iyolo’ di tibason daa iyolo’ do gayang. Oluhoi i’ daa iyolo’, nga’ nokokoris iddi iyolo’; om ongosiou iyolo’ dot id pisangadan, gisom do naala’ ngai’ diyolo’ i soudor do bansa’d suwai. ³⁵ Om aanu i’ kawagu di tongoondu’ i tobpinai diyolo’ di napasi kawagu do mantad id kapatayon, tu’ haro i’ o kotumbayaan di tongoondu’. Om haro i’ i pokilogos nopo dot inggoriton do gisom piya dot apatai, om minada’ do polobuson, tu’ orohian i’ iyolo’ do posion kawagu dot id koposion dit osonong ko’ iri. ³⁶ Om haro i’ i hiningi-hingi om i binobog, om i kinagasan do rantai om i pinogiil. ³⁷ Om dinumpau iyolo’ do watu do gisom do napatai, om haro i pinapas do garagadi’, om haro i pinatai do gayang o pinamatai. Om minghombo poo iyolo’ do pakayan nopo om kulit pod dumba’ ko’ kulit do kambing do winonsoi; om mosikin iyolo’, om nudipon om ninggorit. ³⁸ Iti nopo pomogunan om a’ i’ osorupai do maan diyolo’d tiyonon. Minghombo nopo iyolo’ do hilo’d tana’ do kowotuan om hilo’d konulu-nuluan, om miyon iyolo’ dot id luang do nuluhon om id luang do tana’. ³⁹ Agayo no kopio o kinamanangan do tulun diri tu’ kikotumbayaan i’ iyolo’! Nga’ a’ i’ diyolo’ naanu i pinabatos do Kinorohingan, ⁴⁰ tu’ haro i’ o natantu’ mantad do Kinorohingan do patahakon dot id dati’ dit osonong ko’ mantad diri. Om iri nopo i natantu’ mantad dau’ddi om opongo nopo kopio o kosonongo’ diyolo’ om kosugku’ toko’ iyati’ diyolo’.

¹ Iyati’ noo, om nosorilian toko’ no dot ogumu’ o sasi’! Iyo nopoddi, om pataamo’ ngai’ toko’ no i kawagat dati’ om i dusa di sumokot kopio daa dot id dati’. Om tumotos toko’ no do manangkus dot id pilumbaan dit id dabantalan toko’. ² Om montong toko’ no kopio di Yesus, tu’ iyau no i minonimpuun do kotumbayaan toko’ om i momogompi’ddi do mantad di koimpuunon i’ om gisom do kopupuson. I Yesus nopo om nokotial i’ do ninggorit do hiri’d kayu salib! Om uhang ngai’ i’ dau do kointingayam piya dot apatai do hiri’d kayu salib. Tu’ sinorou nopo dau om i kataadan dau do katalib iri. Om dinondo noddi om poirikau no iyau dot id dawananan di tirikohonon do Kinorohingan do momorinta’, om momorinta’ iyau do poinsugku’ do Kinorohingan. ³ Umbalai pogi’ do momusorou i kinoinggoritan di Yesus do tuminimbaba’ di tulun di kidusa, it ongorongit tomod do suminaap dau! Om kada’ no poluhoyo’ o ginawo om kada’ panangkapaasai. ⁴ Tu’ solinaid nopo dokoyu do sumaap do dusa, om a’ kou po nokoumbal do sumaap do gisom do patayon kou. ⁵ Om kada’ dokoyu lihuwai iti nosihat do Kinorohingan, i pinatahak dot id dokoyu, i tangaanak dau, ’’Oi tanak ku, podulon no kopio i ponudukan do Tuhan, om kada’ kaus dot otogod piya iyau diya’. ⁶ Tu’ tudukan id Tuhan o pointikid-tikid do tulun di kosianan dau, om loposon dau o pointikid-tikid do tulun di songonuon dau do tanak dau,’’ ka. ⁷ Om mositi’ no do romiton dokoyu i pamalapos do Kinorohingan dokoyu do miagal do ponudukan do mantad id tapa’. Tu’ haro toi o tanak dot a’ nokoumbal do linapos di tapa’ dau? ⁸ Ondung a’ kou loposon do miagal di tangaanak dau’d suwai, om komoyon nopoddi nga’ okon kou i’ ko’ tangaanak kopio dau, suwai ko’ a’ i’ oilaan o dokoyu’d molohing. ⁹ Kitapa’ toko’ i’ do hiti’d pomogunan, om monuduk i’ iyau dati’, om pusohon toko’ i’ iyau, om okon-okon pondo i Tapa’ toko’ di don rusod, iyau i hilo’d surga, nga’ atantu’ no do minsiriba’ kopio toko’ dot id dau, om apasi toko’ i’. ¹⁰ Iri nopo molohing toko’ do hiti’d pomogunan om daamot noo do monuduk dati’, do tumanud dit osonong dot okito diyolo’. Nga’ Kinorohingan nopo do monuduk dati’ om maan i’ do koinsanangan toko’, om olidang toko’ indo do miagal dau. ¹¹ Otopot i’ do tontok nopo di maso toko’ do tudukan, om a’ i’ poposonong do ginawo toko’ i pamalapos, suwai ko’ popotongob noo. Nga’ id tohuri nondo ko’ iri, om iyati’ nopo i notudukan, om iri nopo i pinamalapos diri, om mongodsuur i’ dati’ do tumanud di korohian do Kinorohingan, dot id suang do koposi-posion toko’, om popoimbulai do kosimbayanan do ginawo toko’. ¹² Iyo nopoddi, om pokorison no o longon dokoyu di lopuhon, om i totud dokoyu di gagaran! ¹³ Mamanau kasai’ kou no do sumusui do ralan dit alampai, om a’ i’ okinsol o gakod dokoyu di kimpo’, suwai ko’ olingos nogindo. ¹⁴ Tumotos kou no do monokiulud do koinsanai’d tulun. Om tumotos kou no do popolidang do koposi-posion dokoyu, do Tuhan o kopomolidangan. Tu’ aiso’ i’ o tiso’ pod tulun do kokito’d Tuhan ondung a’ olidang o koposi-posion dau. ¹⁵ Antaan-taan no kopio dokoyu om aiso’ i’ o tongoiso’ do tulun do kosoliwan do mantad id kosianan do Kinorohingan. Om aiso’ indo o tulun dot osiliu do miagal di sakot di kawanit dot id pogialatan dokoyu, om gisom do monimpuun do kosusaan om mamaraag dot ogumu’ o tulun dot i kawanit o pamaraag. ¹⁶ Antaan-taan no dokoyu, om aiso’ i’ o tulun dit orohian do magampahu’ om it a’ momusou do kowoyo-woyoo’ di don rusod, do miagal di winonsoi di Isau. Tu’ padagango’ nopo dau i kuasa’ dau di don tanak do kotuahan, do pinoolon dau do samangkuk noo o taakanon. ¹⁷ Om oilaan i’ dokoyu dot id tohuri noddi ko’ iri om pokionuo’ po daa dau i barakat diri do mantad id tapa’ dau nga’ a’ no iyau nonuan. Tu’ mulong piya do mihad-ihad po daa’ddi iyau do popoontok di nasalaan dau, nga’ aiso’ noddi o maso do popoontok diri. ¹⁸ Timbabaon nopo dokoyu om okon i’ ko’ miagal di tinimbaba’ di bansa’ dot Israil di gulu po. Tinimbaba’ nopo diyolo’ om i milo do kamaon, iri no i Nuluhon do Sinai om i tapui di molob-ngolob do hiri; tuminimbaba’ iyolo’ do totuong, om odondom kopio o kotuongo’ om tongus dit opuhod; ¹⁹ om nokorongou iyolo’ do tuni do torumpit om boros dit opuhod kopio. Om tontok di norongou di tulun dot Israil i boros diri om pokionuo’ no kopio diyolo’ dot a’ moro-boros kawagu i minoro-boros diri dot id diyolo’. ²⁰ Tu’ a’ i’ iyolo’ kasaap do mokinongou di ponuhuan di pinoboros di minoro-boros diri. Tu’ boros ka di minoro-boros om, ’’Koinsanai di koulok do nuluhon diti, do nintorusan tuu ko’ isai nopo o tulun, nga’ mositi’ nod dumpahon do watu do gisom dot apatai,’’ ka. ²¹ Om koronob no kopio i nokito di tulun dot Israil diri gisom do minomoros i Musa do poingkaa, ’’Moddosi oku om gagaran oku po!’’ ka dau. ²² Nga’ iyokoyu nopo om nokorikot do hiti’d Nulu-Nulu do Sion om i bandar do Kinorohingan di poimpasi, iri no i Yorusalim di hilo’d surga, i kinoiyonon do rinibuan o moloikat dau. ²³ Iyokoyu nopo om ruminikot dot id iso’ o pitimungan di poimponu’ do kataadan — i pitimungan do koinsanai’d tangaanak do Kinorohingan dit id dotuo, i nongotulis o ngaran do hilo’d surga. Om mongoi kou timbaba’ do Kinorohingan, i Gompomutus do koinsanai’d tulun. Om tumimbaba’ kou do rusod di tulun dit ongosonong, it osonong no kopio om aiso’ no o bohiton. ²⁴ Ruminikot kou do mongoi timbaba’ di Yesus, i Momialatan do minomonsoi di Tumpongo do wagu’ddi; om tumimbaba’ kou di raha’ di powowoson, i pamajamin dit ongosonong ko’ mantad di jinamin di raha’ di Habil. ²⁵ Iyo nopoddi, om antaan-taan no dokoyu, om a’ kou i’ mada’ do mokinongou dau, i minoro-boros diri. Iri nopo tulun dit a’ minokinongou dau, i ruminikot do hiti’d pomogunan, om i pinopolombus di habar do mantad id Kinorohingan, om a’ no milo do mogidu’. Om okon-okon toko’ pondo iyati’ i nokorongou dau do minoro-boros do mantad hilo’d surga! Ondung a’ toko’ mokinongou dau, om poingkuro toko’ po daa’ndo do kopoggidu’! ²⁶ Tontok nopoddi om koguyu’ nopo di boros dau iti pomogunan. Nga’ baino’ noddi om minamatos iyau do, ’’Guyuon ku pondo kawagu iti pomogunan, om okon nopo ko’ iti noo, nga’ ilo’ nogi’ tawan,’’ ka dau. ²⁷ Iri nopo boros do, ’’kawagu,’’ ka, om popointalang dot oinsanan nopondo i nongowonsoi do guyuon om iduwon, om iri nopondo it oolu’ om iri po it a’ milo’d guyuon. ²⁸ Iyo nopoddi, om mongunsikou toko’ nod Kinorohingan, tu’ nakaanu toko’ no dot iso’ o pomorintaan do mantad id dau dit a’ milo do guyuon. Om mositi’ no do mongunsikou toko’ om tumuku’ toko’ dot id Kinorohingan do mikuwo’d opusou om oronok, do tumanud di kowoyo-woyoo’ di korohian dau. ²⁹ Tu’ iri nopo Kinorohingan toko’ om iyo po di tapui di monorob.

¹ Pogiinsian-sian kasai’ kou no do miagal do tulun do Kristian di mogiobpinai. ² Kada’ kou pikoduwo o ginawo do pasalakoi dot id walai dokoyu di tulun dit a’ piya dokoyu otutunan. Tu’ ondung momonsoi do miagal diri, om nokoumbal i’ o tulun do nakapasalakoi do moloikat dot id walai dau, nga’ a’ i’ dau oilaan do moloikat iri. ³ Kada’ dokoyu kolihuwai i tulun di songinggiil, om sorohon nopo dokoyu do poinggiil kou iyokoyu do poinsugku’ diyolo’. Om kada’ dokoyu kolihuwai i tulun dit inggoriton, om sorohon nopo dokoyu dot inggoriton kou iyokoyu do miagal diyolo’. ⁴ Mositi’ no do pokolidangon do koinsanai’d tulun o pikowinan. Om mositi’ no do mitorodok kopio i misasawo. Tu’ tulun nopo di momonsoi do sosomu’ om i magampahu’ om hukuman i’ do Kinorohingan. ⁵ Kada’ pologoso’ dot oporinta’ di rumohian do tusin o koposi-posion dokoyu, suwai ko’ poumbagalon nopo i haro dot id dokoyu. Tu’ nokoboros no o Kinorohingan do poingkaa, ’’A’ ku i’ iya’ pologoson tomod, om a’ ku iya’ tongkiadan,’’ ka. ⁶ Om iri noddi o katama-tama’ toko’ do momoros do poingkaa, ’’Tuhan no o Gomponguhup doho’, om a’ oku no moddosi. Om nunu po daa o milo’d tulun do wonsoyon dot id doho’?’’ ka. ⁷ Kada’ dokoyu kolihuwai i piro-piro o boyoon dokoyu di pinopolombus di boros do Kinorohingan dot id dokoyu. Soroho’ no dokoyu i kinowoyo-woyoo’ do koposi-posion diyolo’, om i kinowoyo-woyoo’ diyolo’ do napatai, om omit kou no di kotumbayaan diyolo’. ⁸ A’ i’ sumimban i Yesus Kristus, do mantad di gulu, om gisom do baino’, om gisom do poingompus. ⁹ Kada’ dokoyu pologoso’ do mamalid dokoyu o piro-piro o kowoyoon do ponudukan di suwai-suwai kopio. Mositi’ no do pokorison di kosonongo’ do Kinorohingan o ginawo toko’, tu’ iri no it osonong kopio; om okon i’ ko’ i piro-piro o toturan do pasal do taakanon o popokoris. Tu’ iri nopo tulun do tuminanud di piro-piro o toturan diri di gulu po om aiso’ i’ o nunu-nunu do kountungan do naanu diyolo’. ¹⁰ Om iri i piro-piro ot imam di maganu-anu do hiri’d Kiim do Tuhan nga’ aiso’ i’ o kosorupayan do mangakan di porsombahan do sinumbali’ di hiri’d sakai di pananaraban diri. ¹¹ Iri nopo raha’ di nintorusan di pinatahak do maan do porsombahan do pangampun do dusa, om igitan i’ di Boyoon dot Agayo dot Imam do mongoi do hiri’d Bilik dit Olidang Kopio, nga’ iri nopo tinan di nintorusan om sorobon i’ do hiri’d soliwan di kokiiman. ¹² Om i Yesus diri nga’ pinatai i’ do hiri’d soliwan di wawayaan dot agayo di bandar, do momolidang di tulun dau do mantad id dusa diyolo’, dot i raha’ dau o pinomolidang dau. ¹³ Iyo nopoddi, om kainou no rumikot dot id dau do hilo’d soliwan di kokiiman om tumonggoi toko’ i’ dau dot indaraaton. ¹⁴ Tu’ hiti nopod pomogunan om aiso’ i’ o tiyonon toko’ dit aiso’ o kopupuson; suwai ko’ mogihum toko’ di tiyonon di rumikot do koimbagu. ¹⁵ Iyo nopoddi, om mositi’ no do mamarayou kasai’ toko’d Kinorohingan, om i Yesus o popiromut di pamarayou toko’ddi dot id Kinorohingan; om iri no o ponokoporsombahan do kounsikahan toko’ dot id dau, om i patahakon toko’ dau do tontok di polombuson do kabang toko’ do popoinggayo do ngaran dau. ¹⁶ Kada’ kou kolihu do momonsoi dot osonong om mogiuhup-uhup, tu’ iti no o ponokoporsombahan di kohubayaan do Kinorohingan. ¹⁷ Tanud kou no do ponuhuan di piro-piro o boyoon dokoyu, om insiriba’ kou no dot id diyolo’. Tu’ momogompi’ kasai’ i’ iyolo’ do rusod dokoyu, om iyolo’ it apatut do poposusui dot id Kinorohingan do koinsanai di winonsoi diyolo’. Ondung mihuboyo-boyo’ kou diyolo’, om osimbayan no o ginawo diyolo’ do kumaraja’; nga’ ondung a’ kou mumboyo’, om tumongob no iyolo’ do kumaraja’, om a’ i’ iri poporikot do kountungan dot id dokoyu. ¹⁸ Sumambayang kasai’ kou no do bagi’ dahai. Om oilaan i’ kopio dahai dot osonong o kopurimanan do ginawo dahai, tu’ orohian kasai’ i’ iyahai do momonsoi dit otopot dot id suang do nunu nopo. ¹⁹ Om pokionuon kopio ku do sambayangan oku dokoyu om oruhai oku i’ do pogulion kawagu do Kinorohingan do hino’d dokoyu. ²⁰ Napasi no kawagu’d Kinorohingan do mantad id kapatayon i Tuhan toko’ i Yesus. Om iri no i kinapatayon dau o nokosiliu-siliu dau do gompomogompi’ dati’ dit Agayo Kopio, iyati’ i ponokodumba’ dau. Om iri nogi’ i kinapatayon dau o pinopogirot di tumpongo di poingompus, i winonsoi do Kinorohingan dot id dati’. ²¹ Om maha’ daa om onuan kou do Kinorohingan, i tadon do kosimbayanan do ginawo, do koinsanai dit apatut dot aanu dokoyu do momonsoi di korohian dau. Om maha’ daa om wonsoyon do Kinorohingan i korohian dau dot id dati’, dot i Yesus Kristus o pawayaan dau do momonsoi’ddi. Royohon no o Kristus do gisom do poingompus! Amin. ²² Om pokionuon ku no do podulon kopio dokoyu i piro-piro o nosihat ku’ddi do mikuwo’d alanut o ginawo, tu’ a’ i’ anaru no iti surat ku. ²³ Om poiloon ku iyokoyu do nakalabus no do mantad id giil i Timotius, i tobpinai toko’ddi. Korikot nopondo iyau do hiti’d kinoiyonon ku, om powoyoon ku indo iyau do mongoi ompuya’ dokoyu. ²⁴ Porikoton no o tabi’ dahai dot id koinsanai di boyoon dokoyu om id koinsanai di tulun di songonuon do Kinorohingan. Om romiton no dokoyu o tabi’ di piro-piro o tobpinai do hilo’d Italia. ²⁵ Om Tuhan no o mamarakat ngai’ dokoyu.