HAGAI

HAGAI

¹ Tontok di koduwo do toun di Darius do raja’ do Porsia, di tadau do koiso’ do tulan do koonom, om boro-boros no o TUHAN, do pinawaya’ dau di Nabi Hagai. Iri nopo boros diri nga’ poboroson dot id di Sorubabil i tanak di Sialtiol, i gobunor do Yohuda; om id di Yosua, i tanak di Yosadak i Boyoon dot Agayo dot Imam do maso’ddi. ² Boros kad TUHAN, it Osundu Kopio, dot id di Hagai, ’’Minomoros iti bansa’ dot a’ po norikot o maso do mamaal kawagu diti Walai’d Sasambayangan dot Agayo,’’ ka. ³ Om suhuo’ noddi do TUHAN i Hagai do popolombus do boros dau dot id tulun dau do poingkaa, ⁴ ’’Oi tulun ku, nokuro tu’ miyon kou no dot id walai’d ongolumis om ongogirot om maso pod poingraag i Walai’d Sasambayangan dot Agayo? ⁵ A’ toi dokoyu okito iti nosiliu dot id dokoyu? ⁶ Ogumu’ tomod o gandum do tinanom dokoyu nga’ okuri’ i’ o nomot dokoyu. Haro i’ daa o takanon dokoyu nga’ a’ i’ dokoyu kayahan. A’ i’ kouru dokoyu i waig dot anggur dokoyu! Om kipakayan kou i’ daa nga’ a’ i’ kalasu’ do tinan dokoyu. Om a’ kooput do koposi-posion di susuhuon o gadsi’ diyolo’. ⁷ A’ i’ dokoyu oilaan ondung nokuro tu’ nosiliu o miagal diti? ⁸ Ongoi kou no do hilo’d konulu-nuluan do dinondo om manganu nod kayu, om waalon i’ kawagu i Walai’d Sasambayangan dot Agayo; om asanangan oku nogindo om kasambayang kou dot id doho’ do tumanud di ralan di koontok. Antangai no kopio dokoyu ino koiyon-iyono’ dokoyu. ⁹ Soro-sorohon daa dokoyu dot ogumu’ o tomot dokoyu nga’ okuri’ i’ kopio o naanu dokoyu. Om soira’ di nigitan dokoyu’d muli’ i tomot dokoyu’ddi om maai ku po tilibo’d ribut do gisom do naayi’. Nokuro tu’ winonsoi ku o miagal diri? Isimbar nopo om poingkaa: Tu’ poingraag po kasai’ i Walai’d Sasambayangan dot Agayo, om iyokoyu no om agangau poo do momonsoi di walai dokoyu. ¹⁰ Iri no o kokuwaan dot aiso’ o rasam, om gowoi poddi om aiso’ no o sumuni do totonomon. ¹¹ Pinagadau ku o hiti’d pomogunan om hilo’d konulu-nuluan, om hilo’d koumaan, om hilo’d kabun dot anggur, om hilo’d kabun do saitun, om nadau ngai’ nopo o tanom-tanom di poinsuni do hiti’d tana’, om kohompit nogi’ o tulun om nintorusan, om koinsanai di totonomon di tonomon dokoyu,’’ ka dau. ¹² Om wonsoyo’ noddi di Sorubabil, om i Yosua, om koinsanai di tulun dot Israil di nokoguli’ do mantad hilo’d pomogunan do Babil i pomogunan do pisangod, i pinonuhuan do TUHAN diyolo’d momonsoi. Tu’ ongooris iyolo’ om umboyo’ noddi iyolo’ di boros di Nabi Hagai, i pinopolombus di boros do TUHAN. ¹³ Om polombuso’ noddi di Hagai i boros do TUHAN dot id tulun dot ogumu’ddi do poingkaa, ’’Mamatos oku do moyo-woyo’ oku i’ dokoyu,’’ ka dau. ¹⁴ Om tingkaho’ ngai’ noddi do TUHAN o ginawo di tulun do momonsoi di Walai’d Sasambayangan dot Agayo, dot i Sorubabil i gobunor do Yohuda om i Yosua, i Boyoon dot Agayo dot Imam, om koinsanai di tulun di nokoguli’ do mantad id pomogunan do pisangod. Om timpuun no iyolo’ do momonsoi di Walai’d Sasambayangan dot Agayo di don TUHAN, it Osundu Kopio, i Kinorohingan diyolo’, ¹⁵ do tontok di tadau do koduwo nohopod om apat do tulan di koonom, di koduwo do toun di Darius do nosiliu’d raja’.

¹ Tontok di tadau do koduwo nohopod om iso’ di tulan di koturu’ do toun diri, om boro-boros no kawagu o TUHAN dot id di Nabi Hagai. ² Om sinunudan dau i Hagai do mongoi boro-boros di Sorubabil i gobunor, om id di Yosua i Boyoon dot Agayo dot Imam, om id toinsanan o tulun. Om poboroson nopo dot id diyolo’ ngai’ nga’ poingkaa, ³ ’’Haro po ot id pogialatan dokoyu do kosorou do kolumiso’ di Walai’d Sasambayangan dot Agayo di gulu po? Okuro-kuro noddi iti dot okito dokoyu do baino’. ⁴ Nga’ kada’ nogi’ do haro o tiso’ dokoyu do lumuhoi o ginawo. Potilombuso’ nopo dokoyu iti buruon diti tu’ moyo-woyo’ oku i’ dokoyu. ⁵ Tontok di suminoliwan kou do mantad do hilo’d Masir om minamatos oku do moyo-woyo’ kasai’ oku dokoyu. Om moyo-woyo’ oku po kasai’ dokoyu diti dinondo, om kada’ kou no poddosi. ⁶ A’ no alaid om guyuon ku no o tawan om pomogunan, om katanaan om rahat. ⁷ Alaon ngai’ ku nondo o koinsanai’d bansa’, om oigitan ngai’ nopondo do hiti i dapu’ diyolo’, om oponu’ nopondo di dapu’ diyolo’ ilo Walai’d Sasambayangan dot Agayo. ⁸ Doho’ ngai’ i’ di pirok om tamas do hiti’d pomogunan. ⁹ Olumi-lumis pondo iti Walai’d Sasambayangan dot Agayo do wagu ko’ mantad dit id gulu, om hilo’ no dot onuan ku i tulun ku do kouludan om kosimbayanan,’’ ka dau. Iyo noddi o boros do TUHAN, it Osundu Kopio. ¹⁰ Tontok di tadau do koduwo nohopod om apat do tulan do kosiam di koduwo do toun do raja’ i Darius, om boro-boros po kawagu o TUHAN, it Osundu Kopio dot id di Nabi Hagai. ¹¹ Boros ka dau, ’’Ongoi pokianu dit imam dot oturan do pasal do hal diti: ¹² Sokiro do haro tulun do mongoi anu do sonsinsib o tonsi dit olidang tu’ nanu do mantad id porsombahan di sinumbali’ do maan do don TUHAN om polopoton nondo dau iri di rasuk dau om katahambai nondo i rasuk dau’ddi di roti, ko’ i taakanon di noonsok, ko’ waig dot anggur, ko’ tumau do saitun, ko’ nunu nopo o taakanon, om kotonggoi ngai’ no tuu’ndo iri dot olidang?’’ ka dau. Om soira’ di nongoi di Hagai uhoto’ iri om nisimbar nopo dit imam om, ’’Amu’,’’ ka. ¹³ Om ponguhot noddi kawagu i Hagai, ’’Sokiro no do haro o tulun do nososomu’ tu’ nakakama’ iyau do rata’, om ondung kakama’ nondo iyau do tongoiso’ diti taakanon diti, om kohompit no tuu’ndo dot ososomu’ i taakanon diri?’’ ka dau. Om boros ka dit imam do suminimbar, ’’Oo, ososomu’ nori,’’ ka diyolo’. ¹⁴ Om boros kaddi di Hagai, ’’Boros kad TUHAN om miagal nogiddi ot oturan dot id tulun dot Israil do hiti’d pomogunan diti, om id koinsanai di hasil diyolo’, om gowoi poddi om sosomu’ ngai’ nopo i patahakon diyolo’ do hiti’d pananaraban do porsombahan,’’ ka dau. ¹⁵ Om boros kad TUHAN, ’’A’ toi dokoyu okito iti nosiliu dot id dokoyu do dinondo? Tontok dit a’ kou po nokotimpuun do momonsoi kawagu di Walai’d Sasambayangan dot Agayo, ¹⁶ om mongoi kou no daa do hiri’d pinotimungan di gandum, dot osorou nopo daa dokoyu om haro o duwo nahatus o kilogram do tonsi di gandum, nga’ hatus no o kilogram do tonsi’ddi. Om mongoi kou no daa timbauk do hatus o lito do waig dot anggur do mantad hiri’d pinotimungan diri, nga’ apat po nohopod o lito di waig dot anggur do hiri. ¹⁷ Pinoporikot oku do tongus dot alasu’ om karambatu do pinamaraag ngai’ di totonomon dokoyu, nga’ a’ kou i’ guminuli’ dot id doho’. ¹⁸ Om tadau nopodti om tadau do koduwo nohopod om apat do tulan do kosiam, i tadau do kinapangaan di pinoimpahan diti Walai’d Sasambayangan dot Agayo. Om antangan nopo dokoyu ondung nunu ot osiliu do mantad do tadau’d baino’. ¹⁹ Mulong po dot aiso’ no o gandum do noolu’, om a’ po nokouwa’ it anggur, om it ara, om i delima, om i saitun, nga’ barakatan ku no iyokoyu do mantad do baino’,’’ ka dau. ²⁰ Om tontok i’ do tadau’ddi, di tadau do koduwo nohopod om apat do tulan do kosiam, om boro-boros po kawagu o TUHAN dot id di Hagai do koinduwo do poboroson ²¹ dot id di Sorubabil, i gobunor do Yohuda do poingkaa, ’’Oruhai ku no do guyuon o tawan om pomogunan. ²² Om raagon ku o pomorintaan om iduwon ku i kuasa’ diyolo’. Sombolikon ngai’ ku nondo i korita’-kuda’ om i papamanau’ddi, om angapatai nondo i kuda’, om mogipapatai i songinsakai’ddi. ²³ Tontok nopondo do tadau’ddi, om silihon ku nondo iya’ oi Sorubabil, i susuhuon ku do pomorinta’ do momorinta’ dot id suang do ngaran ku. Tu’ iya’ no i nopili’ ku,’’ ka dau. Iyo noddi o boros do TUHAN, it Osundu Kopio.