HABAKUK

HABAKUK

¹ Iti no o boros do TUHAN do pinoboros dau dot id di Nabi Habakuk. ² Oi TUHAN, piro po o koloido’ ku do millohou do mokitulung? Soira’ ko’d mokinongou om popoidu’ dahai do mantad id kororongit? ³ Nokuro tu’ pokitonon oku diya’ do karaaton do miagal kopio’dti? Poingkuro kopio ko iya’d kotoron do montong do kowoyo-woyoon dot araat do miagal kopio’dti? Posorili’ nopo doho’ i mamaraag om kororongit, om pointongkop nopo o mogiumang om mogisosongkiwal. ⁴ A’ no podulon it oturan, tu’ a’ no insan do wonsoyon it otulid. Iri nogi’ i tulun dot araat o kamanang om okon nogi’ ko’ i tulun dot otulid o ginawo. Nosomputul tomod nopo it otulid. ⁵ Om boros kaddi do TUHAN dot id tulun dau, ’’Piantangan no kopio o koinsanai di bansa’ dit id posorili’ dokoyu, om kotigowo kou i’ motindo dit okito dokoyu. Tu’ haro nondo o wonsoyon ku dit a’ daa dokoyu ponongkuyaan dit orongou i’ dokoyu. ⁶ Silihon ku nondo do bansa’ di kikuasa’ kopio i bansa’d Babil, i tulun dit orongit om it a’ kogintoron. Maso no diyolo’ do manangod om mangala’ do piro-piro o bansa’ do hiti’d pointongkop do pomogunan. ⁷ Potongkop no iyolo’ do kopoddosian om i korolosi. Iyadaan ngai’ nopo diyolo’ ot oturan tu’ asawat no kopio o ginawo diyolo’. Om iri po it oturan di korohian diyolo’ o tonudon diyolo’. ⁸ Osiau po ko’ rimau i kuda’ diyolo’ om orongit iri ko’ i toni di louson do dongotuong. Tadon nopo di tulun diyolo’ di songinsakai’d kuda’ om hilo’d pomogunan dit id sodu’. Om miagal po iyolo’d kondiu do sumondot do mongoi ponimbit di kosiakanan diyolo’. ⁹ Songodon di soudor diyolo’ o piro-piro pomogunan om alaon diyolo’ do mikuwo’d kororongit diyolo’. Om gagaran ngai’ po o tulun do kokito diyolo’d rumikot. Miagal pod togis kogumu’ i tulun do natangkap diyolo’. ¹⁰ Indaraaton diyolo’ o koinsanai’d raja’ om hingi-hingion ngai’ diyolo’ i pagawai dot angasawat o pangkat. Aiso’ no tiso’ pod kuta’ do pogintirungan do kaantob diyolo’, tu’ timbunan nopo diyolo’d tana’ o posorili’ddi om solodon no diyolo’. ¹¹ Om miagal po iyolo’d tongus kosiau do tumalib do piro-piro o pomogunan, iyolo’ i monginorohingan di kokorisan diyolo’,’’ ka dau. ¹² Oi TUHAN, mantad poddi gulu po om Kinorohingan ko no. Iya’ no o Kinorohingan ku dit olidang om it aiso’ o kopupuson. Oi TUHAN, i Kinorohingan ku om i mongintirung doho’, nopili’ nu no i tulun do Babil om pinokoris nu iyolo’ om milo iddi iyolo’ do momohukum dahai. ¹³ Nokuro tu’ pologoson nu nopo i tulun dit angaraat? A’ ko toi olidang i’ kopio, om a’ ko siontong dit araat? A’ ko toi araatan dit a’ otulid? Nga’ nokuro’ddi tu’ aiso’ i’ o wonsoyon nu do tontok do pimpatayon do tulun dit angaraat i tulun dit ongosonong? ¹⁴ Poingkuro ko iya’d popoiyo do tulun do miagal do sada’ do hilo’d rahat om i songrinayatan o kilau tu’ aiso’ o boyoon? ¹⁵ Tapon o panangkap do tulun do Babil do tulun, tu’ sada-sadaon nopo diyolo’ i tulun. Rambatan nopo diyolo’ i tulun om mimpangkis pondo iyolo’d atataadan di naanu diyolo’. ¹⁶ Om iri piya’ndo rambot diyolo’ nga’ tukuon i’ diyolo’ om onuan diyolo’d porsombahan di sumbolion tu’ iri no i manahak diyolo’d koinsanai’d nunu nopo it osonong. ¹⁷ Pakayon kasai’ nopo tuu diyolo’ i gayang diyolo’ddi dot aiso’ o kotingkadan, om tumilombus nopod mamatai do tulun om a’ no mangampun?

¹ Sumalakoi oku nondo do hiri’d pogigimpaan ku om mandad oku nopo ondung nunu o poboroson do TUHAN dot id doho’ om ondung nunu o ponimbar dau di tuhoton ku. ² Om posimbaro’ nod TUHAN o miagal diti dot id doho’, ’’Tarangon no o ponunulis dot id lagit di potutulisan diti pointalangon ku dot id diya’, om osonong i’ do mambasa’. ³ Potulison noti, tu’ a’ po norikot o maso do wonsoyon iti. Nga’ oruhai nod korikot i maso’ddi, om atantu’ nod abayaan iti pointalangon ku dot id diya’. Koiyo-iyo doti’ daa dot alaid po dot abayaan iti, nga’ andadon nopo, tu’ atantu’ no dot abayaan iti om a’ no popiloid-loidon. ⁴ Om iti no i boros di potulison, ’Tulun nopo dit araat om a’ no apasi, nga’ tulun nopo di momonsoi’d korohian do Kinorohingan om apasi i’ tu’ otorodok i’ iyolo’ dot id Kinorohingan,’ ka,’’ ka dau. ⁵ Popohudsu nod tulun o kakayaan. Tulun nopo di tamaha’ om asawat no o ginawo om a’ kogintoron. Om miagal po iyolo’d kapatayon tu’ a’ milo dot oumbagalan. Om iri no o kokuwaan do mogisuhut-suhut nopo o pomogunan dot alaon diyolo’. ⁶ Om indaraaton nondo di tulun di nangatangkap i tulun di minanangkap diyolo’, om pointalangon nopondo kopio diyolo’ o kototogod diyolo’. Om momoros nondo iyolo’ do poingkaa, ’’Mongoi kou panganu dit okon ko’ dokoyu, nga’ nobungou kou no bo! Songkuro po o koloido’ dokoyu do kumaya’ do ralan nopod kumaya’ om mononsog di tulun di kiutang dot id dokoyu do mambayar di tutang diyolo’?’’ ka dau. ⁷ Nga’ a’ i’ dokoyu opurimanan dot iyokoyu piya nondo i minangala’ do tulun do suwai nga’ kiutang i’. Om sansagan kou nondod mambayar do bunga di nutang dokoyu’ddi. Rumikot nondo o pisangod do mongoi panakau do dapu’ dokoyu gisom do gagaran kou pondo dot opopoddosian. ⁸ Ogumu’ no tulun do mantad id piro-piro o bansa’ do pinanakahan dokoyu, nga’ ngoyon kou nondo iyokoyu panakahai di tulun di nongoolu-olu’ tu’ minimpatai kou id tulun om orongit kou dot id tulun di hiri’d pomogunan om id kabandaran diyolo’. ⁹ Ousung kou no! Tu’ pinakaya’ dokoyu o sompiiyon dokoyu di pininganu dokoyu dot orongit o ralan dokoyu do minanganu. Om minumbal kou daa do posimbayan di sompiiyon dokoyu om popoinsodu’ diyolo’ do mantad id kosusaan om karaagon. ¹⁰ Nga’ minoningayam noddi sompiiyon dokoyu i nosorou dokoyu’ddi tu’ pinoporikot kou nod korugian dot id dokoyu do tontok di minongoi kou panakau do dapu’ do piro-piro o ginumu’ do bansa’d tulun. ¹¹ Ilo’ piya watu do hilo’d tolig nga’ minggiak i’ do momopol dokoyu, om poulinggohon di torigi do walai o giniakan diri. ¹² Ousung kou no! Tu’ winonsoi dokoyu i bandar do pinoimpou do karaaton om i mamatai’d tulun. ¹³ Aiso’ nopo o kinootuk-otukon di huyan do bansa’ di nangaala’ dokoyu, tu’ nosorob ngai’ nopo i piningwonsoi diyolo’. Om iyo noddi o korohian do TUHAN, it Osundu Kopio. ¹⁴ Nga’ oponu’ nondod toilaan do pasal do TUHAN om kuasa’ dau iti pomogunan do miagal dilo rahat tu’ noponu’d waig. ¹⁵ Ousung kou no! Tu’ tontok di natatagadan kou om tiningayam om nindaraat dokoyu i songkoduwo dokoyu; iyokoyu no o pinopokorobibi’ diyolo’ gisom do miagal po iyolo’d tulun di naawuk. ¹⁶ Om iyokoyu nondo ot intingayamon om a’ pusohon. Om monginum kou nondoddi do gisom dot aawuk om mikorobibi’ kou pondo. Iyokoyu nondo o sansagan do TUHAN do monginum do mantad hiri’d sangkir di noponu’d pomohukum do TUHAN dokoyu. ¹⁷ Tinagad nu i puru’ do Libanon; om baino’ nondo om iyokoyu no ot atagad. Pinatai ngai’ dokoyu i nintorusan; om baino’ nondo om orolosi kou no di nintorusan. Om osiliu nondo o miagal diti tu’ minamatai kou i’ do tulun om orongit kou dot id tulun dit id kabandaran do hiti’d pomogunan. ¹⁸ Nunu kopio o guna’ do tingolig? Iri nopoddi om winonsoi-wonsoi id tulun, om aiso’ i’ o posunudon diri dot id dokoyu do suwai ko’ tudut. Nunu daa kopio ot osonong do nowonsoi’ddi, do gisom do milo’d pagandasan di tulun di minomonsoi’ddi. Iri nopo om tingolig i’ dit a’ milo do moro-boros! ¹⁹ Ousung kou no! Tu’ boros ka no dokoyu dot id sallangod o kayu om, ’’Posik!’’ ka, om id watu no om, ’’Tungag!’’ ka. Haro toi o nunu-nunu do pointalangon di tingolig dot id dokoyu? Nourogupan i’ doti’ daa iri do pirok om tamas, nga’ aiso’ i’ o pinuhobo’ddi. ²⁰ Hilo’ nod Walai’d Sasambayangan dot Agayo dit olidang, o TUHAN; mositi’ nod kumadada’ ngai’ nopo o tulun do hiti’d pomogunan dot id toguang dau.

¹ Iti no o sambayang di Nabi Habakuk. ² Nokorongou oku no di winonsoi nu, oi TUHAN, om poimponu’ oku pod koimayaan. Wonsoyo’ no kawagu do baino’ i pingwonsoyon nu dit angagayo, do miagal di winonsoi nu di gulu po. Insianai no iyahai do mulong piya dot otogod ko. ³ Rumikot no kawagu o Kinorohingan it Olidang Kopio do mantad hilo’d Timan; rumikot no o Kinorohingan dit olidang do mantad hilo’d konuluhanan do Paran. Koponu’ do tawan i kagayaan dau; om iti pomogunan nga’ poimponu’ pod pamarayou dau. ⁴ Rumikot iyau do mikuwo’d tulinau di kosorong; om malab-kalab o tulinau do mantad hiri’d palad dau, i pinolisakan dau do sinundu dau. ⁵ Sinuhu’ dau i toruo-ruol do mogulu dau, om sinuhu’ dau o kapatayon do sumusuhut dau. ⁶ Soira’ nopo do mundorong iyau, om gumuyu’ noti pomogunan; om alambayan nopod mato dau nga’ pananggagaran no i bansa’. Otuhan i’ i konuluhanan di hino kasai’ piya, om minsiriba’ i konulu-nuluan dit a’ piya tumanus, i konulu-nuluan di pinimpanahan dau di gulu po. ⁷ Moddosi po i tulun do Kusan dot okito ku om sanggagaran i tulun do Midian. ⁸ Ilo’ toi bawang o pinopotogod diya’, oi TUHAN? Ilo’ toi rahat o pinapalasu’ do ginawo nu? Suminakai ko do haun; om korita’-kuda’ nu nopo di don sumasangod om i haun do mitonggoi’d tongus; do tontok di minanahak ko do kamanangan dot id tulun nu. ⁹ Nokounda’ nu no i pana’ nu, om posodia’ ko no do papana’ di pana’ nu. Pinitas nu iti pomogunan dot i kodumaat nu o pinomitas nu. ¹⁰ Soira’ di nokokito diya’ i konuluhanan, om koguyu’ nopo iri; om miagal pod posougon o waig do rasam do mantad hilo’d tawan. Ongorod po i waig dot id saalom diti tana’, om agayo tomod i tumbak. ¹¹ Mundorong nopo ilo tadau om tulan dot okohusan di pana’ nu dit osiau om akalaban di tandus nu dit okilou. ¹² Mindarapas ko podti pomogunan dot atatagadan; om pingulakan nu i bansa’ dot atatagadan ko. ¹³ Suminoliwan ko do minongoi pamasi di tulun nu, om mongoi pamasi di raja’ di nopili’ nu. Pinaratu’ nu i boyoon di tulun dot angaraat om pinunso nu i soudor di tuminanud dau. ¹⁴ Notobok di pana’ nu i boyoon di soudor do pisangod do tontok di ruminikot iyolo’ do mongoi popogitompias-pias dati’, om mingirak iyolo’ do monguntotogod do miagal poddi tulun do momolisok-lisok i’ do mongulok-ulok di tulun do mosikin. ¹⁵ Piningulakan di kuda’ nu i rahat, gisom do mogimputa’ poddi i waig do rahat. ¹⁶ Gagaran oku po do tontok di nokorongou ngai’ oku’ddi; munung ku nga’ gagaran poo dot opopoddosian. Lumomok nopo o tinan ku, om kasadu o gakod ku, om a’ oku no kapanau. Mundorong oku nopondo do magandad di maso do kopomohukuman do Kinorohingan di manangod dati’. ¹⁷ Mulong pod aiso’ o tua’ di guas dot ara om aiso’ o tua’ di guas dot anggur, om mulong piya dot aiso’ o hasil di saitun om a’ sunian do gandum o hilo’d dumo, om mulong piya do matai ngai’ o dumba’ om aiso’ o suang di kandang do tayam-tayam, ¹⁸ nga’ otood kasai’ oku i’, tu’ TUHAN no i Kinorohingan o gampamasi doho’. ¹⁹ Onuan oku’d TUHAN do kokorisan. Pokorison dau o gakod ku do miagal do gakod do tambang. Gompion oku i’ diya’, om aiso’ indo o koligagaanan ku do tontok do mamanau oku do hilo’d konuluhanan.