GALATIA

GALATIA

¹ - ³ Oi tobpinai-tobpinai ku, it id piro-piro sidang dot id watas do Galatia. Mogondos oku no, iyoho’ i Paulus, om koinsanai di koobpinayan do suwai di sompi’ ko’ Kristian, dot onuan kou’d Kinorohingan, i Tapa’ toko’, om i Tuhan Yesus Kristus, do barakat om kosimbayanan do ginawo. Nokosiliu-siliu ku nopod rasul om okon i’ ko’ tulun o pinoposiliu doho’ om okon ko’ pinili’ oku’d tulun, suwai ko’ pinoposiliu nopo doho’d rasul om i Yesus Kristus i’ om Kinorohingan, i Tapa’ toko’, i minamasi kawagu di Yesus Kristus do mantad id kapatayon. ⁴ Tonudo’ nopo do Kristus o korohian do Kinorohingan, i Tapa’ toko’, om patahako’ nopo dau o tinan dau do siniliu’d porsombahan di sinumbali’ om oompunan i’ o dusa toko’, om apasi toko’ indo do mantad id maso dot araat diti. ⁵ Royohon no o Kinorohingan do gisom do poingompus! Amin. ⁶ Osuayan oku no kopio dokoyu oi tobpinai-tobpinai! Linohou kou’d Kinorohingan dot i kosianan do Kristus o kinapamalahawan, nga’ baino’ noddi om a’ po alaid om tumongkiad kou nogiddi do Kinorohingan om tumanud kou nogi’ di ’’habar dot osonong’’ do suwai ko’ i Habar dot Osonong di mantad id Kinorohingan. ⁷ Otopot nopo kopio om aiso’ no o ’’habar dot sonong’’ do suwai. Nga’ haro o piro-piro o tulun di poposusui do ’’Habar dot Osonong’’ do pasal do Kristus di sinomputul diyolo’, om gowoi poddi om ongoborulong kou. ⁸ Iri nopo tulun di poposusui do ’’habar dot osonong’’ do suwai ko’ i Habar dot Osonong di pinosusui dahai, om pologoson nopo do hukuman do Kinorohingan — dot iyahai piya tuu ko’ moloikat po do mantad hilo’d surga, i tulun diri! ⁹ Nokoboros no dahai di gulu po, om poboroson po kawagu dahai do dinondo: dot iri nopo tulun di poposusui dot id dokoyu do ’’habar dot osonong’’ di suwai ko’ i Habar dot Osonong di norongou dokoyu do mantad id dahai, om apatut nod hukuman do Kinorohingan! ¹⁰ Mokisokodung tuu do tulun o kapamarasan ku do miagal diri? Amu’, a’ i’ kopio! Soro-sorohon ku nopo kopio’dti om kohubayaan oku daa do Kinorohingan. Tumotos oku tuu’dti do mamagayat do ginawo’d tulun om kasanangan oku indod tulun? Ondung iyo’ddi o wonsoyon ku om okon oku i’ ko’ susuhuon do Kristus. ¹¹ Apatut i’ do koilo kou, oi tobpinai-tobpinai, dot iri nopo Habar dot Osonong di posusuyon ku’ddi om okon i’ ko’ mantad id tulun. ¹² Okon i’ ko’ tulun o kinoonuan ku di habar diri, om aiso’ i’ o tiso’ pod tulun do pinopotuduk diri dot id doho’. I Yesus Kristus i’ o pinoposunud do tonsi di Habar dot Osonong diri dot id doho’. ¹³ Atantu’ no do nokorongou kou do kowoyo-woyoo’ ku di tumanud oku po di tugama’ do Yohudi. Om nokoilo kou di kororongit ku dot id sidang do Kinorohingan om i winonsoi ku dit a’ no ogina-gina’ o karaato’ do mumbal daa do mananus diri. ¹⁴ Id suang nopo do pananud-tanud ku do tugama’ do Yohudi; om poimaha’ oku no iyoho’ ko’ mantad do kogumuan do tulun do Yohudi di rampam-rampam ku. Ogirot tomod oku do tuminanud di tadat om koubasanan di taki-aki dahai. ¹⁵ Nga’ mantad i’ do kosianan do Kinorohingan, do pinili’ oku dau dit a’ oku po nosusu, om linohou oku’ddi dau do momonsoi’d karaja’ dau. ¹⁶ Om pinointalang do Kinorohingan i Tanak dau dot id doho’, om kopinsusui ku i’ i Habar dot Osonong do pasal di Tanak dau dot id tulun dit okon ko’ Yohudi. Tontok nopoddi om a’ oku i’ minongoi solowot dot ongoiso’ piya do tulun do mongoi pokinosihat. ¹⁷ Om a’ oku minongoi solowot di tulun do hilo’d Yorusalim, i nokopogulu doho’ do nosiliu’d rasul. Suwai ko’ ongoi oku nogi’ do hilo’d pomogunan dot Arab, om poguliai ku nogiddi kawagu do hilo’d Damsik. ¹⁸ Tolu noddi o toun do mantad di notumbayaan oku om ongoi oku no do hilo’d Yorusalim do minongoi intutun di Pitrus. Om hopod no om limo tadau ku do poinsugku’ dau. ¹⁹ Om a’ oku i’ nokosolowot di piro-piro o rasul do suwai, do suwai’ndo ko’ i Yakub, i tobpinai di Tuhan. ²⁰ Otopot i’ kopio iti tulison ku’dti. Om oilaan id Kinorohingan dot a’ oku mongudut! ²¹ Om pakayaai ku nogiddi do hilo’d piro-piro o watas do Siria om Kilikia. ²² Om tontok nopoddi nga’ a’ po i sidang do Kristian di hilo’d Yudia kotutun kopio doho’. ²³ Norongou nopo diyolo’ om iri no i popimboroson do tulun do suwai do poingkaa, ’’Iri nopo tulun di monginggorit dahai di gulu po, om popinsusui noddi di kotumbayaan di pokitotonusan daa dau di gulu po,’’ ka. ²⁴ Om pamarayou noddi iyolo’d Kinorohingan dot iyoho’ o kinapamarayahan.

¹ Hopod noddi om apat o toun do mantad diri, om poguliai ku no do hilo’d Yorusalim do miwoyo’ di Barnabas, om pinowoyo’ ku nogi’ i Titus. ² Minongoi oku pogi’ do hilo’d Yorusalim nga’ nokointalang nod Kinorohingan dot id doho’ dot apatut oku do mongoi’d hilo’. Om patarango’ ku noddi i Habar dot Osonong di popinsusuyon ku dot id tulun dit okon ko’ Yohudi do tontok di suminolowot oku di piro-piro o boyoon do hilo’. Tu’ mada’ oku i’ dot aiso’ o kokoyo-koyoon di karaja’ ku di gulu, om iti karaja’ ku do dinondo. ³ I Titus nopo, i minongoruhang doho’, om tulun i’ do Yunani, nga’ a’ i’ iyau sinansagan do tumanud di toturan do monunat, ⁴ do mulong piya daa do haro o piro-piro o tulun di mononsog do momonsoi’d miagal diri. Iyolo’ no i tulun di mongoi ponoluku’ dot id suang do sinompuruan toko’, om i minsorupai-rupai do sompi’ ko’ tulun di nongotumbayaan. Momolisok-lisok i’ iyolo’ do sumuang do mongoi ponoinu’ do kosimbayano’ toko’ di nokoiso’ toko’ dot id Kristus Yesus. Pogulion toko’ daa kawagu diyolo’ di kowoyo-woyoo’ toko’ di gulu po, di turipon toko’ po, ⁵ nga’ a’ i’ iyahai mininsiriba’ dot id diyolo’, tu’ gompion i’ kopio dahai i Habar dot Osonong, om a’ i’ iri osimbanan do korikot dot id dokoyu. ⁶ Nga’ iyo piya’ddi, nga’ aiso’ i’ o ponudukan di wagu do pinoboros diyolo’ dot id doho’, iyolo’ i tulun di sorohon do boyoon — nga’ id doho’ nopo om aiso’ i’ o pisuayan do boyoon tuu iyolo’ ko’ okon, tu’ Kinorohingan nopo om a’ i’ montong do pangkat do tulun. ⁷ Nga’ iri nogi’ i tulun di sorohon do boyoon o nokosokodung do nonuan oku’d Kinorohingan do karaja’ do poposusui di Habar dot Osonong dot id tulun dit okon ko’ Yohudi, do miagal di minonuhu’ o Kinorohingan di Pitrus do poposusui di Habar dot Osonong dot id tulun do Yohudi. ⁸ Tu’ Kinorohingan i’ o minoniliu di Pitrus do rasul dot id tulun do Yohudi, om iyau nogi’ o minoniliu doho’ do rasul dot id tulun dit okon ko’ Yohudi. ⁹ I Yakub, om i Pitrus, om i Yohanis, i nosiliu do boyoon do sidang nga’ nokopuriman i’ om nokosokodung do nonuan oku’d Kinorohingan do karaja’dti. Om tuminabi’ iyolo’ dahai di Barnabas do popointalang do kosokodung iyolo’. Om kongotumboyo’ noddi iyolo’ om iyahai ngai’ dot iyahai o kumaraja’ dot id pogialatan di tulun dit okon ko’ Yohudi; om iyolo’ o kumaraja’ dot id pogialatan di tulun do Yohudi. ¹⁰ Iso’ noo o pinokianu diyolo’ dahai; iri no tu’ mamadul iyahai di tulun di mosikin. Om orohian oku nogi’ kopio do momonsoi’d miagal diri. ¹¹ Di nopo di minongoi i Pitrus do hilo’d Antiokia, om timbabao’ ku nopo kopio iyau do minonogod, tu’ kasala’ i’ o winonsoi dau. ¹² Tu’ di nopo di timpuun i’ om tuminorungak i’ iyau do makan di tulun dot okon ko’ Yohudi di sompi’ do notumbayaan. Nga’ korikot poddi i piro-piro o tulun di sinuhu’ di Yakub, om tongkiad no iyau di tulun dit okon ko’ Yohudi, om a’ noddi iyau mongoi torungak diyolo’d makan, tu’ ooris iyau di tulun di monuhu’ do monunat do koinsanai’d tulun. ¹³ Om iri tulun do Yohudi di suwai di nongotumbayaan nga’ omit ngai’ nopo di Pitrus do mininsorupai-rupai, gisom dot i Barnabas piya nga’ nokotonggoi i’ daa diyolo’ dot iyo’ddi o kowoyo-woyoon. ¹⁴ Om kokito ku poddi iyolo’ dot a’ miontok di Habar dot Osonong dit otopot o kowoyo-woyoon, om boros kangku’ddi dot id di Pitrus dot id toguang do koinsanai di tulun do nakarapou, ’’Ondung nokoiyo do don tulun dit okon ko’ Yohudi o kowoyo-woyoon nu om tulun ko i’ daa do Yohudi, om nokuro’ddi tu’ mononsog ko do tulun do suwai do miyo iyolo’ di kowoyo-woyoon do tulun do Yohudi?’’ kangku. ¹⁵ Tumanud nopod bansa’, om tulun mantad i’ iyahai do Yohudi di pogkosusuo’ nogi’ iyahai, om okon i’ iyahai ko’ ’’tulun dit okon ko’ Yohudi di kidusa’’. ¹⁶ Nga’ iyo piya’ddi, nga’ oilaan i’ dahai do koulud-ulud nopo kawagu do tulun dot id Kinorohingan om iri no it otumbayaan iyau di Yesus Kristus, om okon i’ ko’ i tumanud iyau di Tourat. Iyahai piya nga’ notumbayaan i’ di Yesus Kristus, om nokoulud iddi iyahai kawagu dot id Kinorohingan dot i kotumbayaan dahai o nokoulud-ulud dahai, om okon i’ ko’ i tuminanud iyahai di Tourat. Tu’ tumanud nopo di Tourat om iso’ pod tulun nga’ aiso’ i’ o milo do koulud kawagu dot id Kinorohingan. ¹⁷ Tumotos i’ iyahai do mulud kawagu dot id Kinorohingan di nokoiso’ iyahai dot id Kristus. Nga’ ondung owonsoi dahai o miagal diri, om kointalang kasai’ po do maso dahai do ’’tulun di kidusa’’ om miagal kasai’ iyahai di tulun dot okon ko’ Yohudi, om Kristus tuu o nokobungou dahai do momonsoi’d dusa? Iyo tuu’ddi o komoyon diri? Atantu’ nod a’ i’! ¹⁸ Ondung mumbal oku kawagu do popogirot di kowoyo-woyoo’ do Tourat di rinaag ku di gulu, om pointalang oku no do nosiliu oku do sumasaap di toturan. ¹⁹ Nga’ napatai oku no dot id Tourat — dot iri i Tourat diri o nakapatai doho’ — om milo oku indod masi do bagi’d Kinorohingan. Nakasalib oku no do nokotonggoi di Kristus. ²⁰ Om dinondo nopoddi om okon no ko’ iyoho’ o poimpasi, nga’ Kristus o poimpasi dot id suang ku. Om iti nopo kowoyo-woyoo’ do koposion ku do dinondo om poingimpou po di kotumbayaan ku di Tanak do Kinorohingan, i nosianan doho’ om i minatai do suminowoli doho’. ²¹ A’ ku i’ pagaan-gaanon i kosianan do Kinorohingan. Ondung tumanud di Tourat o ralan do tulun do koulud dot id Kinorohingan, om komoyon nopoddi nga’ aiso’ i’ o guna’ di kinapatayon di Kristus.

¹ Oi tobpinai-tobpinai ku, i tulun do Galatia! Basug kou no kopio! Isai kopio toi o nakabayayat dokoyu? Tu’ nakatarang ku no kopio dot id dokoyu om nokoingod tomod ku o ponunuduk ku dot id dokoyu do pasal di kinapatayon di Kristus do hiri’d salib. ² Sunudai oku daa dokoyu do pasal diti hal dot iso’ noo. Tuminanud toi di Tourat o nakaanu-anu dokoyu di Rusod do Kinorohingan, ko’ mantad po do nokorongou kou di Habar dot Osonong do mantad id Kinorohingan om i notumbayaan kou di Kristus? ³ Nokuro tu’ iyo kopio kou’dti kabasug? Nokotimpuun kou no do poimpasi dot id suang do koposi-posion do wagu do woyoon di Rusod do Kinorohingan, om kokorisan nogi’ tuu’ndo dokoyu o popotilombus kopio dokoyu di koposion do wagu’ddi gisom do kooyion do tumur dokoyu? ⁴ Aiso’ ngai’ i’ tuu o guna’ di nongopurimanan dokoyu’ddi? Nga’ kadsai ma dot aiso’ o guna’! ⁵ Noonuan kou nod Kinorohingan di Rusod dau om minomonsoi iyau do piro-piro koimayaan dot id pogialatan dokoyu. Iri tuu tuminanud kou di Tourat o kinapamansayan do Kinorohingan do miagal diri ko’ iri po i nokorongou kou di Habar dot Osonong om notumbayaan kou’ddi di Kristus? ⁶ Iti nopo om miagal i’ di nokotulis dot id suang do Buuk do Kinorohingan do pasal di Abraham do poingkaa, ’’Notumbayaan i Abraham do Kinorohingan, om iri no i kotumbayaan dau o nokoromi-romitan do Kinorohingan dau, om kohubayaan diri iyau’d Kinorohingan,’’ ka. ⁷ Om mositi’ no dot oilaan kopio dokoyu dot iri nopo tulun dit otopot-topot kopio do sinakagon di Abraham om iri no i tulun dit otumbayaan do Kinorohingan. ⁸ Nokoboros mantad no dot id suang do Buuk do Kinorohingan do ralan nopod Kinorohingan do popoulud kawagu dot id dau di tulun dot okon ko’ Yohudi om it otumbayaan iyolo’ dau. Nokosunud mantad no i Habar dot Osonong diri dot id di Abraham dot id suang do batos diti, ’’Iya’ no o pawayaan do Kinorohingan do mamarakat do koinsanai’d tulun do hiti’d pomogunan,’’ ka. ⁹ Om notumbayaan i’ i Abraham, om nabarakatan iddi iyau. Om iyo nogiddi o koinsanai di tulun dot otumbayaan, tu’ abarakatan indo do miagal di Abraham. ¹⁰ Koinsanai di tulun di poinsondiu do Tourat om nangapapalan no. Tu’ nokotulis no dot id suang do Buuk do Kinorohingan o poingkaa, ’’Iri nopo tulun dit a’ otorodok do tumanud ngai’ di nokotulis dot id suang di Tourat, om papalan nod Kinorohingan!’’ ka. ¹¹ Iso’ pod tulun nga’ aiso’ i’ o nokoulud dot id Kinorohingan do tumanud di Tourat o ralan do minulud. Nokotuduk nori dot id suang do Buuk do Kinorohingan, ’’Iri no tulun dit otumbayaan do Kinorohingan do gisom do koulud kawagu iyau dot id Kinorohingan ot apasi!’’ ka. ¹² Nga’ iri nopo Tourat om okon i’ ko’ kotumbayaan o pinoimpahan. Nokotulis no dot id suang do Buuk do Kinorohingan dot iri nopo tulun di tumanud do toinsanan di Tourat, om iri no i Tourat diri o kapasi dau. ¹³ Nga’ nokoidu’ toko’ nod Kristus do mantad id popol di Tourat diri. Om ralan nopo dau do minongidu’ddi nga’ pinologos dau o tinan dau do nousung do suminowoli dati’. Tu’ nokotulis no dot id suang do Buuk do Kinorohingan o poingkaa, ’’Nousung no o tulun di patayon do pogiison dot id kayu,’’ ka. ¹⁴ Om winonsoi pogi’ di Kristus o miagal diri nga’ papatahak po iyau di barakat di nakabatos do Kinorohingan dot id di Abraham dot id tulun dit okon ko’ Yohudi. Om iri noddi o kaanu-anu toko’ iyati’, it otumbayaan do Kinorohingan, di Rusod di pinabatos do Kinorohingan diri. ¹⁵ Oi tobpinai-tobpinai! Manganu oku’d poiyaan do mantad id kowoyo-woyoo’ do pointikid do tadau. Ondung momonsoi o tulun do tumpongo om di nokogirot i tumpongo’ddi, om aiso’ no o tiso’ pod tulun do milo do pakaiso’ di tumpongo’ddi, ko’ momoruhang po di tumpongo. ¹⁶ Winonsoi do Kinorohingan i piro-piro o tumpongo dau dot id di Abraham. Om a’ i’ nokotulis dot id Buuk do Kinorohingan o poingkaa, ’’om id koinsanai di tulun do sinakagon di Abraham,’’ ka, do komoyon nopo nga’ ogumu’ o tulun. Iri nopo nokotulis om poingkaa, ’’om id tulun di sinakagon nu,’’ ka, do komoyon nopo om iso’ no o tulun, iri no i Kristus. ¹⁷ Patarangon ku nopodti om: i batos do Kinorohingan di winonsoi dau om i pinogirot mantad dau di gulu po. Om a’ no katanus di batos ko’ koidu’ po di batos do Kinorohingan i Tourat, i pinatahak dit 430 o toun dot id tohuri ko’ iri. ¹⁸ Tu’ ondung i Tourat o pinoimpahan di nipuhawang do Kinorohingan, om okon noddi ko’ i nipuhawang di pinabatos i nipuhawang diri. Tu’ pinatahak pogi’ do Kinorohingan dot id di Abraham iri, nga’ nakabatos no dau do patahakon dau iri dot id di Abraham. ¹⁹ Ondung iyo’ddi, om nunu po o kinapatahakan di Tourat? Ponimbar nopodti om pinoruhang pogi’ i Tourat nga’ popointalang do kasalaan do tulun. Iri nopo Tourat om tonudon no do gisom do korikot i songulun o sinakagon di Abraham, i noroitan dot id batos do Kinorohingan dot id di Abraham diri. Iri nopo Tourat diri om moloikat i’ o pinoporomut dot id iso’ o tulun di popolombus nondoddi dot id tulun do suwai. ²⁰ Haro po o duwo o tulun om minog nogi’ do haro o momiolitan. Nga’ Kinorohingan nopo om a’ i’ minog do haro o momiolitan, tu’ pimpori-porianai nopo dau do momonsoi i wonsoyon dau. ²¹ Iyo nopoddi, om misaap tuu o Tourat om i batos do Kinorohingan? Atantu’ nod a’ i’! Tu’ ondung momuhawang do tulun do koposion o kinapatahakan di toturan do tugama’, om milo no o tulun do mulud kawagu dot id Kinorohingan dot i toturan do tugama’ o popoulud. ²² Nga’ id suang nopod Buuk do Kinorohingan om nokotulis no dot oinsanan nopo o tulun do porintaon do dusa. Iyo nopoddi, om iri nopo nipuhawang di pinabatos diri, om patahakon no dot id tulun dit otumbayaan, dot i kotumbayaan diyolo’ dot id di Yesus Kristus o kapatahakan. ²³ Di nopo dit a’ po norikot i maso do tulun do monongkuyaan di Kristus, om giniil toko’ di Tourat; om iyo pod nuung toko’ do gisom do nokorikot i maso do nokointalang i kotumbayaan. ²⁴ Om iyo noddi o Tourat do nosiliu’d madtatamong dati’ do gisom do nokorikot o Kristus do pinopoulud kawagu dati’ dot id Kinorohingan, di notumbayaan toko’ di Kristus. ²⁵ Om baino’ nopoddi, tu’ norikot o maso do milo o tulun dot otumbayaan di Kristus, om a’ toko’ noddi pitamangan di Tourat. ²⁶ Nokoiso’ kou no dot id Kristus Yesus tu’ notumbayaan kou i’ dau; om nosiliu kou noddi do tangaanak do Kinorohingan. ²⁷ Nobotisan ngai’ kou no dot id suang do ngaran di Kristus, om naramit no dokoyu i kowoyo-woyoo’ do Kristus dot id suang do koposi-posion dokoyu. ²⁸ Om aiso’ noddi o pisuayan do tulun do Yohudi om i tulun dot okon ko’ Yohudi, om aiso’ o pisuayan di turipon om it okon ko’ turipon, om aiso’ o pisuayan do kusai om tondu’. Kopogiiso’ ngai’ kou noddi tu’ nokoiso’ kou no dot id Kristus Yesus. ²⁹ Ondung Kristus o sanganu dokoyu, om sinakagon kou no kopio di Abraham. Om aanu nondo dokoyu i pinabatos do Kinorohingan diri.

¹ - ² Nga’ poingodon ku po kopio: do solinaid nopo dot a’ po osukup o tumur di tanak di tumungkus di dapu’, om haro i’ o tulun do miontong dau om mongilo-ilo di dapu’ dau do gisom pod orikot i tumur di tanak diri di natantu’ mantad di tapa’ dau do kaanu i tanak. Om tontok nopoddi om maso po dau do poiyoon do turipon, do mulong piya daa dot iyau kopio o sanganu do koinsanai di dapu’ddi. ³ Iyati’ nga’ iyo nogiddi: Di nopo dit a’ toko’ po nokotuo dot id suang di don rusod om nosiliu toko’ do turipon di rusod di momorinta’ do pomogunan diti. ⁴ Nga’ korikot poddi i maso di natantu’ mantad, om porikoto’ nod Kinorohingan i Tanak dau do hiti’d pomogunan. Iri nopo Tanak dau’ddi nga’ pinogkosusu do songulun o tondu’, om guminayo dot id siriba’ di Tourat. ⁵ Om iyo noddi iyau do pinopoidu’ di tulun di poimpasi dot id siriba’ di Tourat; om osiliu toko’ indo iyati’ do tangaanak do Kinorohingan. ⁶ Om suhuo’ noddi do Kinorohingan i Rusod di Tanak dau do sumuang dot id ginawo dokoyu om id ginawo ku iyoho’, tu’ iyokoyu no o tangaanak do Kinorohingan. Sinuhu’ nopo dau om i Rusod di millohou dot, ’’Apa’, oi Apa’ ku,’’ ka. ⁷ Iyo nopoddi, om okon kou noddi ko’ turipon, suwai ko’ tanak kou no. Om onuan kou nondod Kinorohingan do koinsanai di pinosodia’ dau do patahakon di tangaanak dau. ⁸ Di nopo di gulu po om a’ kou i’ kotutun do Kinorohingan, om gowoi poddi om nosiliu kou’d turipon di piro-piro o kuasa’ di roitan do ponokokinorohingan nga’ okon i’ ko’ Kinorohingan kopio. ⁹ Baino’ nopoddi om kotutun kou nod Kinorohingan, ko’ otopot nopo kopio om notutunan kou nod Kinorohingan. Nga’ nokuro’ddi tu’ gumuli’ kou po dot id rusod do pomogunan diti, it ongoluhoi om aiso’ o pokukurayan? Nokuro tu’ sumiliu kou pod turipon di rusod diri? ¹⁰ Popoinggayo kou do piro-piro o tadau di tinantu’ mantad, om piro-piro tulan om piro-piro toun di tinantu’ mantad. ¹¹ Nga’ ooris oku dot aiso’ o kotutuk-tutukon di huyan ku do kuminaraja’ dot id pogialatan dokoyu. ¹² Oi tobpinai-tobpinai! Pokionuon ku no kopio do momit kou doho’. Tu’ iyoho’ nga’ miniyo i’ dokoyu. Om aiso’ i’ o tiso’ do kasala’ di winonsoi dokoyu dot id doho’. ¹³ Atantu’ no dot osorou po dokoyu i nakaangayan ku koponusuyai di Habar dot Osonong diri dot id dokoyu di timpuun i’. Kinaangayan ku nopo om iri i suminakit oku. ¹⁴ Tontok nopoddi om a’ kou i’ sosomuan doho’, do mulong piya do pogumbalan no daa’d agayo dot id dokoyu o kokitanan do tinan ku do tontok diri. Suwai ko’ romito’ oku nopo dokoyu dot iyo pod rumamit kou do moloikat do Kinorohingan ko’ rumamit di Kristus Yesus. ¹⁵ Osimbayan tomod o ginawo dokoyu do tontok poddi. Nga’ baino’ noddi om honggo no i kosimbayanan do ginawo dokoyu’ddi? Oilaan ku i’ do tontok nopoddi om uhang i’ dokoyu dot irulon piya o dokoyu’d mato do maan daa patahako’ doho’; do milo daa do wonsoyon o miagal diri. ¹⁶ Sorohon oku no tuu’ddi dokoyu do pisangod do baino’, do pinoboros ku dokoyu it otopot? ¹⁷ Aparu’ tomod daa i tulun do suwai do mogihum dokoyu, nga’ a’ i’ osonong o kopogihuman diyolo’ dokoyu. Orohian no iyolo’ do mamaraag do kouludan dokoyu dot id dahai, om orohian do minsimparu’ kou do tumanud diyolo’. ¹⁸ Atantu’ no dot osonong i’ kopio do minsimparu’ do momonsoi dit osonong, do momonsoi po kasai’ dot iyo’ddi, om okon i’ ko’ tontok no di poinsugku’ oku dokoyu do momonsoi do miagal diri. ¹⁹ Oi tangaanak ku di kosianan ku! Iyokoyu i’ o koinggorit doho’dti do dinondo. Iyo oku pod tondu’ dit oinggorit do tontok do mogkosusu om oinggorit oku po kasai’, ondung a’ po kogirot kopio o kowoyo-woyoo’ do Kristus dot id suang do koposi-posion dokoyu! ²⁰ Langadon oku no daa do poinsugku’ dokoyu do dinondo, om suwai i’ daa’ndo o poboroson ku dokoyu, tu’ a’ oku no koilo ondung poingkuro poo o wonsoyon ku dot id dokoyu! ²¹ Pokinongou kou bo doho’, iyokoyu it orohian do poimpasi dot id suang do kuasa’ di Tourat! Om sunudan ku i’ iyokoyu ondung poingkuro kopio i nokotulis dot id suang do Tourat di Musa. ²² Nokotulis do hiri do duwo o tanak di Abraham: Tina’ nopo di tiso’ di tanak om turipon, om tina’ no di tiso’ di tanak om okon ko’ turipon. ²³ Iri nopo tanak di tondu’ di turipon diri om koubasanan i’ o kinosusu-susuan tu’ mantad i’ do korohian do tulun. Nga’ iri nopo tanak di tondu’ dit okon ko’ turipon diri om mantad i’ do batos do Kinorohingan o kinosusu-susuan. ²⁴ Iti nopo om milo i’ do maan do poiyaan. Iri nopo duwo o tondu’ddi om poiyaan do duwo o tumpongo: iri nopo tiso’ om mantad hilo’d Nuluhon do Sinai — om i Hagar nori; om iri nopo tanak dau om nosusu dot id suang do ponguripanan. ²⁵ Om i Hagar nopoddi om i Nuluhon do Sinai, i hilo’d pomogunan dot Arab. Om iyau no o poiyaan di bandar do Yorusalim om koinsanai di tulun do hilo’ di nongosiliu do turipon do dinondo. ²⁶ Nga’ iri nopo Yorusalim di hilo’d surga om okon i’ ko’ turipon, om iri no o tina’ toko’. ²⁷ Tu’ nokotulis no dot id suang do Buuk do Kinorohingan o poingkaa, ’’Kotood no, oi tondu’ dot a’ maganak, om it a’ insan pogkosusu! Kumotood no om mimpangkis no dot atataadan, iya’ it a’ insan koumbal do monohoruol do mogkosusu! Tu’ ogumu’ nogindo o tanak di tondu’ di niduan di sawo dau ko’ i tondu’ di poinsugku’ di sawo dau,’’ ka. ²⁸ Oi tobpinai-tobpinai! Iyokoyu nga’ tangaanak i’ do Kinorohingan di pinogkosusu do mantad di batos do Kinorohingan; iyo kou nopo kopio di Isak. ²⁹ Tontok nopoddi om i tanak di nosusu do mantad id korohian do tulun o monginggorit di tanak di nosusu do mantad id korohian do Rusod do Kinorohingan. Om dinondo piya nga’ iyo iddi. ³⁰ Nga’ poingkuro toi o nokotulis dot id suang do Buuk do Kinorohingan? Poingkaa o nokotulis do hiri, ’’Uyungo’ no i tondu’ do turipon diri do miwoyo’ di tanak dau, tu’ a’ i’ i tanak di tondu’ do turipon diri kotungkus do dapu’ do miagal di tanak di tondu’ dot okon ko’ turipon,’’ ka. ³¹ Iyo nopoddi, oi tobpinai-tobpinai, om iyati’ nopo om okon i’ ko’ tangaanak do tondu’ di turipon; iyati’ nopo om tangaanak i’ do tondu’ dit okon ko’ turipon.

¹ Nakalabus toko’ noddi do baino’, om okon toko’ no ko’ turipon, tu’ pinalabus toko’ di Kristus! Iyo nopoddi, om gompion no dokoyu i kinolobusan dokoyu do mantad id ponguripanan, om kada’ kou siliu kawagu do turipon. ² Soroho’ no dokoyu, dot ondung mokisunat kou, om komoyon nopoddi nga’ aiso’ i’ o guna’ do Kristus dot id dokoyu. Iyoho’ kopio, i Paulus, o momoros do miagal diti. ³ Om poinsanon ku po kawagu i tulun di mokisunat, dot a’ no milo’d a’ dau tonudon ngai’ i Tourat! ⁴ Ondung tumotos kou do mulud kawagu dot id Kinorohingan dot i Tourat o ralan do mulud, om komoyon nopoddi nga’ nokotongkiad kou no do mantad id Kristus. Iyo nopoddi om posoliwan no do kosianan do Kinorohingan o koposi-posion dokoyu. ⁵ Nga’ iyahai nopo, om mogondos nopo iyahai di Rusod do Kinorohingan di monguhup dahai, i kogirot do ginawo dahai dot i kotumbayaan dahai dot id Kristus, do pouludon iyahai do Kinorohingan dot id dau. ⁶ Tu’ ondung nokoiso’ toko’ dot id Kristus Yesus, om a’ no sumiliu’d kosusaan, do tumanud tuu’ ko’ a’ tumanud di toturan do sunat. Agayo nopo om i monongkuyaan di Kristus, om kointalang i’ iri dot id kosianan toko’ do tulun do suwai. ⁷ Di nopo di gulu po om aparu’ tomod kou i’ do momonsoi dit otopot! Nga’ baino’ noddi om nokuro tu’ a’ kou noddi mumboyo’ di korohian do Kinorohingan? Isai kopio o minamayayat dokoyu do minomonsoi do miagal diri? ⁸ Om atantu’ no dot okon i’ ko’ Kinorohingan di minomolohou dokoyu o minomonsoi’ddi. ⁹ Boros kad tulun om, ’’Okuuri’ o pangambang nga’ kakambang i’ di tapung,’’ ka. ¹⁰ Nga’ iyo piya’ddi nga’ monongkuyaan oku i’ dot a’ kou tumanud di kotumbayaan do suwai, tu’ nokoiso’ toko’ no dot id Kristus. Om otumbayaan oku i’ kopio dot isai nopo i minomorulong do pomusarahan dokoyu om hukuman nod Kinorohingan. ¹¹ Pasal no doho’, oi tobpinai-tobpinai, om nokuro tu’ saapon kasai’ oku ondung maso ku po do popinsusui dot apatut do tonudon i toturan do monunat? Ondung otopot daa do popinsusui oku do miagal diri, om a’ i’ daa poimbulai do poguhatan i popinsusuyon ku do pasal di salib do Kristus. ¹² Osonong nogi’ do tumilombus nopo kopio do sumoliwan do mantad id sidang i tulun di minomorulong do pomusarahan dokoyu! ¹³ Nolohou kou no do sumiliu’d tulun dit okon ko’ uriponon. Nga’ kada’ i’ dokoyu pakayo’ i kosimbayano’ dokoyu dot okon ko’ turipon do tumilombus do momonsoi do nunu nopo i korohian dokoyu’d momonsoi, suwai ko’ apatut nogi’ do mogiinsian-sian kou, om mogiuhup-uhup kou. ¹⁴ Nokotimung ngai’ no i Tourat dot id suang do ponuhuan diti tiso’ noodti, ’’Mogiinsian-sian kou no do miagal dot osianan kou do dokoyu’d tinan,’’ ka. ¹⁵ Nga’ ondung mogiumang kou om mogikokoruol do miagal di nintorusan dot orongit, om antaan-taan dokoyu, tu’ kopogipapatai kou moti’. ¹⁶ Komoyon ku nopo om poingkaa: Tanud kou no di korohian di Rusod do Kinorohingan om kada’ kou tanud di korohian do don tulun dot id suang do koposi-posion dokoyu. ¹⁷ Tu’ korohian nopod tulun om misaap i’ di korohian do Rusod do Kinorohingan, om iri korohian do Rusod do Kinorohingan nga’ misaap i’ di korohian do don tulun. Misaap i’ iti duwo o korohian, om kaa pogi’ dot a’ kou milo do momonsoi di dokoyu’d korohian. ¹⁸ Nga’ ondung i Rusod do Kinorohingan o momorinta’ dokoyu, om a’ kou no porintaon di Tourat. ¹⁹ Iri nopo korohian do don tulun om kointalang i’ dot id suang do wowonsoyon diti: magampahu’, om momonsoi di sosomu’, om it a’ apatut; ²⁰ om tumuku’ dot id tingolig om id toilaan do bobolian; om id pogisasangadan, om id pogitatagadan, om id kobimbioguho’, om id kobintogodo’, om i momusorou do dau nod korohian; om i mogipori-pori om aiso’ o kouludan, ²¹ om i mogiosol-osol, om i magauk, om it adalaan o pogiginakan om suwai- suwai ko’ iri. Om poinsanon ku po kawagu iyokoyu do dinondo, do miagal di pinopoinsan oku dokoyu di gulu po, dot iri nopo tulun di momonsoi do miagal diri om a’ no kasanganu di Pomorintaan do Kinorohingan. ²² Nga’ ondung porintaon o tulun di Rusod do Kinorohingan, om: Mogiinsian-sian iyolo’, om ongotood, om mogiuulud, om alanut o ginawo, om osonong o kowoyo-woyoon, om osonong dot id tulun do suwai, om otorodok, ²³ om osiriba’ o ginawo, om kopusus kasai’ do korohian do tinan. Aiso’ i’ o toturan do tugama’ do mogodu do momonsoi do miagal diri. ²⁴ Iri nopo tulun di nasanganu di Kristus Yesus, om napatai no diyolo’ i kowoyo-woyoo’ do don tulun om i korohian do don tinan om i korohian do don tulun. ²⁵ Noonuan toko’ no di Rusod do Kinorohingan do koposion di wagu; om kaa pogi’ddi dot iyau no ot apatut do momorinta’ do koposi-posion toko’. ²⁶ A’ toko’ i’ koino-ino do minggayo-gayo, om mogikoruo-ruol do ginawo, ko’ mogiosol-osol.

¹ Oi tobpinai-tobpinai! Ondung haro o tulun dot oilaan do momonsoi’d dusa, om mositi’ no do ngoyon dokoyu, iyokoyu i maso do tumanud di ponudukan di Rusod do Kinorohingan, potunudo’ kawagu i tulun diri dot id ralan dit otopot. Nga’ mositi’ no dot alamaya’ o koboro-boroso’ dokoyu do popotunud dau, om antaan-taan dokoyu do kotonggoi kou iyokoyu dau. ² Mogiuhup-uhup kou no do mamabo do binabo, om iri indo o katanud-tanud dokoyu di ponuhuan di Kristus. ³ Ondung haro o tulun do momusorou do poinggayo-gayo iyau, om a’ i’, om mongudut no o tulun diri dot id tinan dau. ⁴ Mositi’ no do sompori-pori nopo o tulun do monorisid do kowoyo-woyoon dau, ondung osonong tuu ko’ amu’ po o kowoyo-woyoon dau. Ondung osonong om apatut i’ iyau dot oondos. Nga’ a’ i’ iyau apatut do patalad di kowoyo-woyoon dau di winonsoi’d tulun do suwai. ⁵ Tu’ mositi’ nod sompori-pori o tulun do mamabo di dau’d binabo. ⁶ Iri nopo tulun di rumamit do ponudukan do Kristus, om mositi’ no do mamahagi’ di minonuduk dau do koinsanai dit ongosonong dot id dau. ⁷ Kada’ kou nogi’ koudutai. Kinorohingan nopo om a’ i’ milo’d hingi-hingion! Tu’ nunu nopo i potonomon, om iri no o tomoton. ⁸ Ondung patanom o tulun do tumanud di kowoyo-woyoon dau do don tulun, om kapatayon no o tomoton dau do mantad id kowoyo-woyoon dau do miagal diri. Nga’ ondung patanom iyau do tumanud di ponudukan do Rusod do Kinorohingan, om mongomot no iyau do koposion dit otopot kopio om i poingompus do mantad id Rusod do Kinorohingan. ⁹ Iyo nopoddi, om kada’ toko’ nogi’ kapaasai do momonsoi dit ongosonong, tu’ ondung a’ toko’ tumingkod do momonsoi do miagal diri, om oomot toko’ indo o tua’ddi do koimbagu. ¹⁰ Iyo nopoddi, om solinaid nopo do haro po o maso toko’; om mositi’ no dot osonong o wonsoyon toko’ dot id koinsanai’d tulun, om okon-okon po om id tobpinai toko’ di sompi’ ko’ iso-iso’ o kinotumbayaan. ¹¹ Podulon no kopio dokoyu o bohogian diti tulisan ku dot angagayo o tulis. ¹² Iri nopo tulun dit orohian do popoinggayo-gayo di kowoyo-woyoo’ do don tinan, om iyolo’ no i mononsog dokoyu do tumanud di toturan do monunat. Nga’ kapamansayan nopo diyolo’ddi om mada’ no iyolo’ dot oinggorit di tulun do Yohudi dot i salib di Kristus o koponginggoritan. ¹³ Iri piya tulun di tumanud do toturan do monunat nga’ a’ i’ tumanud di Tourat. Nga’ monuhu’ i’ iyolo’ dokoyu do mokisunat, om milo indo diyolo’ do pinggaya-gayaan do tuminanud kou di toturan diri. ¹⁴ Nga’ iyoho’ nopo om a’ oku i’ kopio popoinggayo-gayo do nunu nopo, do suwai ko’ i Tuhan toko’ i Yesus Kristus, i napatai dot id salib. Om iri no i kinapatayan dau do hiri’d salib o kinokuwaan dot aiso’ noddi o nunu-nunu’d komoyon diti pomogunan dot id doho’. Om iyoho’ nga’ iyo pod napatai dot id korohian do dom pomogunan. ¹⁵ A’ i’ monguro do nosunatan piya ko’ amu’. Tu’ agayo nopo kopio o guna’ om it osiliu do tulun do wagu. ¹⁶ Tulun nopo dit iyo’ddi o ponongkuyaanan, om id koinsanai’d tulun di songonuon do Kinorohingan, om mogondos oku nopod Kinorohingan do manahak diyolo’ do kosimbayanan do ginawo om kosianan di mantad id dau. ¹⁷ Om kada’ no daa’ndo do haro o tongoiso’ pod tulun do monusa’ kawagu doho’, tu’ haro no o kointalangan kopio do hiti’d tinan ku do tumatanud oku di Yesus. ¹⁸ Om pokionuon ku no o Tuhan toko’, i Yesus Kristus do mamarakat kasai’ dokoyu, oi tobpinai-tobpinai. Amin.