YOHOSKIOL

YOHOSKIOL

¹ - ³ Tontok di tadau’d kolimo di tulan do kaapat, di toun do kotolu nohopod, di kolimo’d toun do mantad di natanggayan i Raja’ Yoyakin dot id pomogunan do pisangod, om maso ku, iyoho’ i Yohoskiol, it Imam, i tanak di Bus, do poingiyon do hilo’d somok di Bawang do Kibar, do hilo’d Babil, do poinsugku’ di tulun do Yohudi do suwai di nangatanggayan do pisangod. Om sigog i’ do koukab ilo tawan om kokito ku no o pinointalang do pasal do Kinorohingan. Om korongou ku no o TUHAN do minoro-boros doho’ om kopurimanai ku no o sinundu dau. ⁴ Tingaha’ oku no om kokito ku o tongus do mantad hilo’d utara. Mingkalab po o kodumaat do mantad id haun dit akapal, om mogulinau po o hiri’d posorili’ di haun. Om haro’ddi o malab-kalab do miagal do tambaga’ do mantad hiri’d kodumaat. ⁵ Om hiri nopod tanga-tanga’ di tongus nga’ haro o nokito ku dot apat o kerub, i koiyo-iyo’d tulun, ⁶ nga’ saraapatan nopo iyolo’d rabas om saraapatan do talad. ⁷ Otulid nopo o gakod diyolo’ om kisondulu do miagal do sondulu’d sapi’. Om okilou nopo i gakod do miagal di tambaga’ do kinisasan. ⁸ Om suwai no ko’ mantad di rabas diyolo’ dot apat om talad dot apat, om saraapatan po iyolo’d longon do miagal do longon do tulun, dot id sahau do pointikid-tikid di talad diyolo’. ⁹ Iri nopo i duwo talad do pointikid-tikid di koiyo-iyo do tulun diri nga’ poungkalad, om pabasagi’ diri iyolo’ tu’ kopogitopis-topis i’ i tompok do talad diyolo’. Om soira’ nopo do mamanau iyolo’ nga’ oinsanan nopo iyolo’d mamanau om a’ no minog do pokokoson o tinan. ¹⁰ Pointikid-tikid di koiyo-iyo’d tulun diri om saraapatan nopod rabas di mogisuayan: rabas do tulun ot id toguang, om rabas do singa o ponong id wanan, om rabas do sapi’ o ponong id gibang, om rabas do kondiu o ponong id likud. ¹¹ Pinoungkalad ponong id sawat o duwo di talad do pointikid-tikid di koiyo-iyo’d tulun diri, gisom do kotopis o tompok di talad diyolo’ di talad di tiso’ di hiri’d toning, om iri no duwo kawagu talad om pointokop do tinan diyolo’. ¹² Sompori-pori nopo i koiyo-iyo’d tulun diri do potoguang dot id apat o kotoguangon, om milo indo ngai’ iyolo’ do mongoi’d honggo nopo o ngoyon diyolo’ om a’ no minog do kumokos o tinan. ¹³ Id tanga-tanga’ nopo di koiyo-iyo’d tulun diri nga’ haro o miagal-agal do tata’ di kitapui di miwor-hiwor nopo. Om mikit-sikit i tapui do papakalab do kodumaat dot a’ nopo otingkod-tingkod. ¹⁴ Om iri nogi’ i koiyo-iyo’d tulun diri nga’ mintulud nopo do kumaa ponong hilo’ om kumaa ponong hiti do miagal pod kodumaat kosiau. ¹⁵ Om tontok di maso ku do poingontong dit apat o koiyo-iyo’d tulun diri om kokito ku ot apat o ruda’ do poinsondot do hilo’d tana’, dot id toning do pointikid-tikid di koiyo-iyo’d tulun diri. ¹⁶ Mogiagal nopo it apat o ruda’ddi om ongokilou ngai’ do miagal do watu dit olumis dit agayo o gatang, om soroisaan pori do ruda’ do suwai ko’ iri do poindokot do hiri’d tanga’ di ruda’. ¹⁷ Om milo indo i ruda’ddi do kumaa do honggo nopo dit apat o kotoguangon diri. ¹⁸ Iri nopo i riim di ruda’ nga’ noponu’ do mato. ¹⁹ Om soira’ nopod kumakat i koiyo-iyo’d tulun diri do mantad hiri’d tana’ om kumakat no i ruda’. ²⁰ Honggo nopo o korohian di koiyo-iyo’d tulun diri dot ongoyon diyolo’, om iri ruda’ nga’ tumanud no diyolo’, tu’ iri i’ i koiyo-iyo’d tulun o momohuruan diyolo’. ²¹ Om soira’ nopoddi do mamanau ko’ mundorong ko’ kumakat i koiyo-iyo’d tulun diri om i ruda’ nga’ moyo’ no diyolo’. ²² Hiri nod sawa-sawat di tulu di koiyo-iyo’d tulun diri om haro o poillokou-lokou do kristal di mogulinau tomod do winonsoi. ²³ Om iri nopo i koiyo-iyo’d tulun diri nga’ songingkakat dot id sahau di poillokou-lokou, om soroduwaan iyolo’d talad do poungkalad om mogitotopis i tompok di talad, om iri no i duwo kawagu talad om pointokop di tinan diyolo’. ²⁴ Om norongou ku o kapo di talad diyolo’ do tontok di tumulud iyolo’ do miagal pod ngorod do rahat o karangahan, om miagal do lotung do laang do soudor dit ogumu’, om miagal do tuni’d boros do Kinorohingan dit Osundu Kopio. Om soira’ di kotingkod iyolo’d tumulud, om potokopon nondo diyolo’ i talad diyolo’ dot id tinan diyolo’, ²⁵ nga’ haro kasai’ i’ o tuni do mantad hiri’d poillokou-lokou di hiri’d sawa-sawat do tulu diyolo’. ²⁶ Hiri nopod sawa-sawat di poillokou-lokou’ddi om haro o miagal-agal do tirikohonon do raja’ di watu nilam do winonsoi. Om haro o poirikau dot id tirikohonon diri do koiyo-iyo’d tulun, ²⁷ dit okilou poo o kokitanan do miagal di tambaga’ do poinsubo’d tapui. Om mogulinau nopo i koiyo-iyo’d tulun diri ²⁸ do miagal po di buluntung tu’ mogisuayan nopo o warna’. Iri nopo tulinau’ddi nga’ popointalang do kagayaan do TUHAN di nakarapou’d hiri.

¹ Soira’ di nokito ku’ri om kotungub oku nopo do hiri’d tana’. Om korongou ku noddi o boros do minomoros do poingkaa, ’’Oi tulun, ingkakat no. Tu’ moro-boros oku diya’,’’ ka. ² Om tontok di moro-boros i boros diri, om suang no dot id doho’ i Rusod do Kinorohingan om poingkakato’ oku no dau. Om korongou ku po kawagu i boros do minoro-boros kawagu do poingkaa, ³ ’’Oi tulun, suhuon ku iya’ do mongoi’d hilo’d tulun dot Israil di suminaap doho’ om i tuminolikud doho’, om maso po diyolo’ do sumaap doho’ do miagal di taki-aki diyolo’ di gulu po. ⁴ Okodou tomod o ginawo diyolo’ om a’ momusou doho’, om iri noddi o koponuhuan ku diya’ do mongoi pomisunud diyolo’ diti poboroson ku, dot id diyolo’, iyoho’ i TUHAN, i Kinorohingan dit Asawat Kopio. ⁵ Mokinongou tuu i sumosongkiwal diri ko’ amu’ nga’ oilaan po diyolo’ do haro o nabi do nokoongoi dot id pogialatan diyolo’. ⁶ Nga’ iya’ nopo, oi tulun, om kada’ no kopio poddosi diyolo’, ko’ ooris po di poboroson diyolo’. A’ ko i’ moti’ diyolo’ pokonunu-nunuon om saapon ko diyolo’; om miagal ko pondod poingiyon dot id rolot do tompoluluhu. Nga’ poingkuro piya, nga’ kada’ no poddosi di sumosongkiwal diri ko’ ooris po di poboroson diyolo’. ⁷ Sunudan nopo iyolo’ do nunu nopo i ponuhuan ku diya’ do poposunud, do mokinongou tuu iyolo’ ko’ amu’. Sorohon no do sumosongkiwal mantad i’ iyolo’. ⁸ Oi tulun, pokinongou no diti poboroson ku diya’. Kada’ omit diyolo’ tu’ osongkiwal. Tungkabang, om kanon i’ iti patahakon ku diya’,’’ ka dau. ⁹ Om kokito ku no o longon do pointuduk dot id doho’ do kiinigit do karatas di linopi. ¹⁰ Om ungkayao’ noddi i karatas do linopi diri om kokito ku do notulisan o miampaping. Om tinulisan iri do koihadan om katangaban om kawagatan do ginawo.

¹ Om boros kad Kinorohingan dot id doho’, ’’Oi tulun, kano’ no iti karatas do linopi om mongoi nogindo boro-boros di tulun dot Israil,’’ ka dau. ² Om potungkabango’ ku no o kabang ku om patahako’ nod Kinorohingan doho’ i karatas di linopi do paakanan doho’. ³ Boros ka dau, ’’Oi tulun, kano’ no iti karatas do linopi diti patahakon ku diya’; ponuo’ nodti o tian nu,’’ ka dau. Om kano’ ku no i karatas diri, om miagal pod paha’ koomis o kaakanan ku’ddi. ⁴ Om boros kaddi kawagu’d Kinorohingan, ’’Oi tulun, ongoi do hilo’d tulun dot Israil om poboroson no dot id diyolo’ o koinsanai di ponuhuan ku diya’ do poboros dot id diyolo’. ⁵ A’ ku i’ iya’ suhuon do mongoi dot id bansa’ di suwai o boros om it apagon do momit, nga’ suhuon ku i’ iya’ do mongoi dot id bansa’d Israil. ⁶ Ondung suhuon ku daa iya’ dot id bansa’ dit agayo om i suwai o boros om it a’ nu osuhutan o boros, om mokinongou i’ iyolo’ diya’. ⁷ Nga’ aiso’ i’ moti’ tiso’ di tulun dot Israil dot orohian do mokinongou; tu’ iyoho’ piya nga’ a’ i’ diyolo’ pokinongohon. Oinsanan nopo iyolo’ dot ongokodou o ginawo om ongosurilog. ⁸ Om silihon ku’ndo iya’ do miagal diyolo’ tu’ osurilog om okodou o ginawo. ⁹ Pogiroton tiya’ nondo do miagal di tontolob kogirot, om pokodohon ku iya’ do miagal di mutiara’ kokodou; nga’ kada’ poddosi di tulun di sumosongkiwal diri,’’ ka dau. ¹⁰ Om boro-boros po kawagu o Kinorohingan, ’’Oi tulun, pokinongou no kopio om sorohon ngai’ no iti poboroson ku diya’. ¹¹ Om mongoi nogindo do hilo’d tulun di bansa’ nu di hilo’d pomogunan do pisangod om sunudan no iyolo’ di poboroson ku dot id diyolo’, iyoho’ i TUHAN it Asawat Kopio. Sunudan nopo iyolo’, do mokinongou tuu ko’ amu’,’’ ka dau. ¹² Om poinsawato’ oku noddi di Rusod do Kinorohingan, om korongou ku no o boros dot opuhod kopio dot id dolikudan ku do minomoros do poingkaa, ’’Royoho’ no i kagayaan do TUHAN di hilo’d surga,’’ ka. ¹³ Om korongou ku no i talad di koiyo-iyo’d tulun diri do kopogitapap-tapap do mingkapo, om korongou ku i kudarak di ruda’ do miagal pod guyuon o tana’ kopuhod. ¹⁴ Om rikot no dot id doho’ i sinundu’d TUHAN dot opuhod kopio do ruminikot, om soira’ di pinoinsawat oku om di tinanggayan oku di Rusod dau, om araat tomod diri o kopurimanan ku, om otogod oku. ¹⁵ Om korikot oku noddi do hilo’d Til-Abib, it id toning di Bawang do Kibar, i kinoiyonon di tulun di tinanggayan do pisangod. Om undorong oku nod hiri do solinaid do turu’ o tadau, tu’ naranaban kopio oku di nokito ku om i norongou ku. ¹⁶ Om katalib poddi o turu’ o tadau om boro-boros no o TUHAN dot id doho’ do poingkaa, ¹⁷ ’’Oi tulun, silihon ku iya’ do madtatamong diti bansa’ dot Israil. Om polombuson no dot id diyolo’ iti boros do popoinsan, di poboroson ku diya’. ¹⁸ Ondung poboroson ku do haro o tulun dot araat dot oruhai nod matai, nga’ a’ nu indo iyau ngoyon sunudai do poposimban do kowoyo-woyoon dau om apasi i’ iyau; om apatai nondo iyau dot id suang do dusa dau. Om iya’ nondo o potonggungan ku di kinapatayon dau. ¹⁹ Nga’ ondung poinsanon nu i tulun dit araat diri, nga’ a’ indo iyau tumingkod do momonsoi’d araat, om apatai nondo iyau dot id suang do dusa dau. Nga’ iya’ nopo om apasi i’. ²⁰ Ondung haro o tulun dit osonong, do tumimpuun do momonsoi’d dusa om pokoyoon ku iyau dot id kinoiyonon di kikoligagaanan kopio, om apatai no iyau ondung a’ nu no iyau ngoyon poinsano’. Apatai nondo iyau dot obungou di dusa dau, om a’ ku no sorohon it ongosonong do winonsoi dau dit id gulu ko’ iri, nga’ iya’ indo o potonggungon ku di kinapatayan dau. ²¹ Nga’ ondung ongoyon nu poinsano’ i tulun dit osonong diri gisom dot a’ nondo iyau momonsoi’d dusa, om mokinongou no iyau do nosihat nu, om a’ ku no iyau hukuman, om iya’ nga’ apasi no,’’ ka dau. ²² Om kopurimanai ku no i sinundu’d TUHAN di hino’d hiri, om korongou ku no iyau do minoro-boros doho’ do poingkaa, ’’Ingkakat no om mongoi i’ do hilo’d rantai. Om hilo’ nondo do moro-boros oku diya’,’’ ka. ²³ Om ongoi oku no do hiri’d rantai, om kokito ku no i kagayaan do TUHAN do mogulinau tomod, i tanda’ do nakarapou o TUHAN do hilo’, do miagal nopo di nokito ku di hilo’d toning di Bawang do Kibar. Om kotungub oku nopo do hiri’d tana’, ²⁴ nga’ suang noddi dot id doho’ i Rusod do Kinorohingan om poingkakato’ oku no dau. Om boros kad TUHAN dot id doho’, ’’Uli’ do hilo’d walai om moguung nod hiri’d suang. ²⁵ Om kagasan ko nondod tali, oi tulun, om a’ ko nondo milo’d sumoliwan do mongoi solowot do tulun. ²⁶ Om posokoton ku’ndo ino dila’ nu do hino’d kahad nu gisom dot a’ ko milo’d popoinsan diti tulun di sumosongkiwal. ²⁷ Om soira’ nopondod moro-boros kawagu oku diya’ om poboroson ku nogindo iya’ kawagu, om sunudan nondo iyolo’ di poboroson ku dot id diyolo’, iyoho’ i TUHAN, it Asawat Kopio. Mokinongou indo o wookon diyolo’, nga’ a’ i’ mokinongou diya’ o wookon, tu’ iyolo’ nopo om bansa’ i’ di sumosongkiwal,’’ ka dau.

¹ Om boros kad Kinorohingan, ’’Oi tulun, ongoi anu dot iso’ o bata’ om poilihon i’ dot id toguang nu. Om pinggorisan no o hiri’d sakai’ddi do poiyo-iyoon di bandar do Yorusalim. ² Om ralan nod popointalang do noturungku’ do pisangod o bandar diri, om ukadan do liang, om oligon do tana’, om wansayan do kokiiman om wansayan do pakakas do pomohusu, o posorili’ di bata’. ³ Om mongoi no anu do sangwatang o basi’ dit alabi’ om poturidongon nori do miagal-agal do tolig dot id pialatan nu om i bandar. Om tumoguang no dot id bandar diri do miagal-agal dot iya’ o monurungku’ddi. Om iti nondo o sumiliu do tanda’ dot id bansa’ dot Israil. ⁴ - ⁵ Om lumii nondo do potogiging ponong id gibang nu, om pababaan ku indo diya’ i kasalaan do bansa’d Israil. Om poingiyo ko nondoddi do potogiging do solinaid do 390 o tadau om oinggorit ko di kasalaan diyolo’. Om sangadau ko nopo do poinglii do miagal diri om tanda’ do sontoun o tulun dot Israil do hukuman. ⁶ Om owonsoi nu pondo o miagal diri, om tumogiging nogi’ do ponong id wanan nu, om purimonon no i pomohukum di kasalaan do Yohuda do solinaid dot apat nohopod o tadau, do sangadau nopo om tanda’ do sontoun do hukuman iyolo’. ⁷ Antangan no kopio i pinonurungku’ do Yorusalim. Poonggomon no o tonggom nu om paakangon no dot id bandar diri. Om poboroson no iti boros ku do pasal do hukuman dot id diyolo’. ⁸ Kagasan ku nondo iya’ om a’ ko i’ milo do mitogiging-giging dot a’ po opupusan i maso do monurungku’ddi. ⁹ Om baino’ nodti, om ongoi anu do gandum, om barli, om kasang dot aragang dit angagayo, om kasang dot aragang dit ongokooro’, om luong, om sadur. Om pogirolo-roloton ngai’ nondo iri om wonsoyon nod roti. Om iri nondo o takanon nu do solinaid do 390 o tadau di maso nu do poillii do potogiging do ponong id gibang nu. ¹⁰ Om bohogion no i roti, om kanon nu nopondo do monikid tadau om 230 o gram, om a’ no koino-ino dot lobi ko’ iri. ¹¹ Om waig do tinumon nu dot insan o tadau nga’ haro i’ o gisom tu’ duwo no o sangkir. ¹² Om pomurakit nu nopod tapui om i taii’ do tulun di nokodou no, om onsokon nu nogindo i roti nu’d hiri, om akanon no i roti nu’ddi dot id dokito do koinsanai’d tulun,’’ ka dau. ¹³ Om boros kad TUHAN, ’’Iyo noddi o ralan di tulun dot Israil do mangakan do taakanon di pogoduhan daa di Tourat di Musa, do tontok di potompiason ku iyolo’ dot id pomogunan do suwai,’’ ka dau. ¹⁴ Nga’ boros kangku’d suminimbar, ’’A, a’ oku i’, oi TUHAN, it Asawat Kopio. Tu’ a’ oku i’ insan ponosomu’ do tinan ku, do mantad poddi tanak oku po om gisom do dinondo nga’ a’ oku i’ insan kapangakan do tonsi do nintorusan di napatai toomod ko’ i pinatai’d nintorusan dit orongit. A’ oku i’ insan kapangakan do taakanon di sosomu’,’’ kangku. ¹⁵ Om boros kaddi do Kinorohingan, ’’Ookuro katuu. Pologoson ku i’ iya’ do manganu’ddi taii’ do sapi’ do ponowoli di taii’ do tulun. Om onsokon nu indo i roti nu’d hiri,’’ ka dau. ¹⁶ Om boros ka kawagu dau, ’’Oi tulun, raagon ku nondo i taakanon do Yorusalim. Om atangkabo nondo i tulun do hilo’ om tumongob do tontok di kikiton diyolo’ do mangakan i taakanon dot akanon diyolo’ om i waig dit inumon diyolo’. ¹⁷ Om ooyian nopondo iyolo’d roti om waig; om tumongob nondo iyolo’, om apatai iyolo’ tu’ obungou di dusa diyolo’,’’ ka dau.

¹ Om boros kad TUHAN, ’’Oi tulun, ongoi anu do gayang dit atarom om bugaron iddi o ganggut nu om tobuk nu. Om timbangon nogindo i tobuk nu’ddi dot id ponimbangan om bohogion do tolu o bahagi’. ² Om tutudan no i sompitolu’ddi do hiri’d tanga-tanga’ di bandar do katalib i monurungku’. Om onuon no kawagu i koduwo di bohogian di sompitolu om pintotokon nogindo di gayang nu do maso nu do mimpanau do minsorili’ di bandar. Om iri no kotolu do bohogian di sompitolu om potiason nopo do powoyoon di tongus om gusaon ku indo iri di gayang ku. ³ Nga’ poolu’ no dot ongokuuri’ di tobuk nu’ddi om polopoton no do hiri’d lupi di rasuk nu. ⁴ Om posoliwanon nondo o tongokuuri’ddi om pataamon i’ dot id tapui, om pologoson nopori dot osorob. Om mantad nondod hiri do tumongkop o tapui dot id koinsanai’d bansa’ dot Israil,’’ ka dau. ⁵ Om boros kad TUHAN, it Asawat Kopio, ’’Ontong pogi’ do Yorusalim. Pinoiyon ku iti bandar diti do hiti’d tanga-tanga’ do pomogunan om nosorilian do piro-piro o pomogunan do suwai. ⁶ Nga’ suminurilog i’ o Yorusalim di pinonuhuan ku om pinopointalang dot araat po iyau ko’ mantad di bansa’d suwai, om osongkiwal kopio ko’ mantad di pomogunan di posorili’ dau. Tinolibambanan do Yorusalim i pinonuhuan ku om a’ minumboyo’ dit oturan ku,’’ ka dau. ⁷ Om boros kad TUHAN, it Asawat Kopio, ’’Pokinongou no diti poboroson ku, oi Yorusalim. A’ ko i’ minumboyo’ di ponudukan ku om a’ ko minomogompi’ dit oturan ku, om ogumu-gumu’ noddi o karaato’ nu ko’ mantad di bansa’ di posorili’ diya’. Tu’ tuminanud ko di kowoyo-woyoon do bansa’d suwai. ⁸ Om gowoi poddi om posunudon ku no diya’ do nosiliu oku nod pisangod nu, iyoho’ i TUHAN, it Asawat Kopio. Om porotuan ku nondo iya’ do hukuman dot antang-antangan do bansa’d suwai. ⁹ Om hukuman ku nondo o tulun do Yorusalim, do hukuman dit a’ ku po insan porotuo’, om it a’ ku no wonsoyon kawagu tu’ karaatan ngai’ ku i’ i wonsoyon nu. ¹⁰ Om gowoi pondo om kanon do molohing i tangaanak diyolo’, om kanon di tangaanak i molohing diyolo’. Om iyo noddi o pomohukum ku diyolo’, om potongkopon ku do popotompias o koinsanai di poimpasi-pasi. ¹¹ Iyoho’ no o Kinorohingan di poimpasi, i TUHAN dit Asawat Kopio. Om poingkaa no o boros ku. Raagon ku nondo iya’ om a’ ku insianan tu’ sinosomu’ nu i’ i walai ku di wowonsoyon nu dit araat, om i kososomu’ kopio. ¹² Sompitolu nopo do tulun nu om apatai do toruol om lous do hiri’d bandar; om sompitolu no kawagu om apatai do gayang do hiri’d soliwan di bandar; om pasasadon ku nondo i sompitolu kawagu dit id tohuri no do moyo’ dilo tongus om gusaon ku nogindo do gayang ku. ¹³ Om opurimanan nu nondo kopio o kawagato’ do kototogod om kalalasu’ do ginawo ku do gisom dot opurintadan oku. Om osiliu ngai’ nopondo iti om oilaan nu nogindo kopio dot iyoho’, i TUHAN o pinopoboros diti dot id diya’ tu’ otogod oku no kopio dot a’ ko tuminorodok. ¹⁴ Om oinsanan nopondo o tulun do mantad id bansa’ di posorili’ diya’ do momohingi-hingi om minsodu’ diya’ do tontok di tumalib iyolo’. ¹⁵ Om soira’ nopo dot otogod om alasu’ kopio o ginawo ku om momohukum oku no diya’, om ooris ngai’ nopondo i bansa’ di posorili’ diya’. Om araatan tomod nondo iyolo’ do kokito diya’ om momohingi-hingi iyolo’ diya’. ¹⁶ Om raagon ku nondo i taakanon dokoyu om pologoson ngai’ ku i tulun do hiti do louson. Om opurimanan nu nondo i koruolo’ do louson do miagal pod pana’ dit alahis do tumobok do mamatai diya’. ¹⁷ Om porikot oku nondod mononglous om nintorusan dit orongit do mongoi pamatai di tangaanak nu, om porikot oku do toruol, om kororongit, om pisangadan do pamatai di tulun do poingiyon do hiti. Iyoho’ no i TUHAN, o minomoros diti,’’ ka dau.

¹ Om boro-boros no o TUHAN dot id doho’ do poingkaa, ² ’’Oi tulun, ontong no ponong id konuluhanan dot Israil om sunudan no iyolo’ di boros ku do pasal do hukuman dot id diyolo’. ³ Sunudan no i konuluhanan dot Israil do mokinongou do boros ku iyoho’ i TUHAN, it Asawat Kopio, om sunudan ngai’ i nulu-nulu, om it ongotidong, om i rantai: Poporikot oku nondod gayang do mongoi pamaraag di tiyonon do tulun do tumuku’ dot id tingolig. ⁴ Habaon ngai’ nopondo i pananaraban do porsombahan om babakon i podtutudan do kominyan. Om oinsanan nopondo i tulun do hilo’ dot apatai dot id toguang di piro-piro o tingolig diyolo’. ⁵ Om pasasadon ngai’ ku nondo i rata’ di tulun dot Israil; om pasasadon ku i tulang diyolo’ do pointutuk di pananaraban do porsombahan. ⁶ Araag ngai’ nopondo i kabandaran dot Israil, om kotonggoi ngai’ dot ongomumuk i pananaraban diyolo’ do porsombahan om i piro-piro o tingolig diyolo’, om omumuk i poiyanan diyolo’d kominyan, om atagak ngai’ nopondo i winonsoi diyolo’. ⁷ Pointongkop nopondo o tulun dot apatai, om iri nopondo it a’ apatai om koilo nondo kopio dot iyoho’ no o TUHAN. ⁸ Pologoson ku indo o wookon diyolo’ do kopoggidu’ do mantad id pamatayan diri om kasasad i’ iyolo’ dot id pogialatan do piro-piro o bansa’. ⁹ Om koiyon nondo iyolo’ dot id pomogunan do pisangod. Om hilo’ nondo dot osorou oku diyolo’ om oilaan diyolo’ dot iyoho’ i minomohukum om minongintingayam diyolo’, tu’ a’ i’ iyolo’ tuminorodok dot id doho’ om tuminongkiad doho’, om pinokouhang nogi’ diyolo’ i tingolig ko’ iyoho’. Om araatan nondo iyolo’ do tinan diyolo’ tu’ araat tomod i’ o winonsoi diyolo’ om kointingayam kopio. ¹⁰ Om oilaan nondo kopio diyolo’ dot iyoho’ no o TUHAN, om oilaan diyolo’ dot okon i’ ko’ ponompurolosi ku no toomod i boros ku do pinopoinsan diyolo’,’’ ka dau. ¹¹ Om boros kad TUHAN, it Asawat Kopio, ’’Tongob kou no! Ihad kou no! Pingihad no dot atatangaban tu’ araat i’ kopio om kointingayam i winonsoi do tulun dot Israil. Om apatai no moti’ iyolo’ dot id suang do pisangadan, om mononglous, om toruol. ¹² Iyolo’ nopo i hilo’d sodu’ om sumakit nondo om apatai; om iyolo’ no i hiti’d somok om apatai dot id pisangadan; om iri no i toolu-olu’ om apatai dot olikapan. Om opurimanan nondo kopio diyolo’ o kawagato’ do kototogod ku. ¹³ Om poinsasad nopondo o rata’ diyolo’ dot id pogialatan di piro-piro o tingolig om posorili’ di piro-piro o pananaraban do porsombahan, om poinsasad dot id timpak do pointikid-tikid do nulu-nulu dit akawas, om id timpak do pointikid-tikid do nuluhon, om id sahau do pointikid-tikid do kayu dit okohob, om id pointikid-tikid do kinoiyonon di pinodtutudan diyolo’ do porsombahan dot id piro-piro o tingolig diyolo’. Om koilo ngai’ nogindo o tulun dot iyoho’ no o TUHAN. ¹⁴ Atantu’ no do paakangon ku nondo o longon ku do mamaraag do pomogunan diyolo’, gisom dot oingou nopondo, do mantad po do hilo’d tana’ do kowotuan di hilo’d salatan om gisom do hilo’d bandar do Ribla di hilo’d utara. Om aiso’ no ot a’ ku raagon dot id pogialatan di kinoiyonon di tulun dot Israil. Om koilo ngai’ nondo o tulun dot iyoho’ no o TUHAN,’’ ka dau.

¹ Om boro-boros no o TUHAN dot id doho’ do poingkaa, ² ’’Oi tulun. Iti no o poboroson ku, iyoho’ i TUHAN, it Asawat Kopio, dot id pomogunan dot Israil: Iti no o kopupuson do pomogunan diti!’’ ka. ³ Boros kad TUHAN, ’’Oi Israil, norikot no o karaagan nu. Om opurimanan nu nondo o kototogod ku tu’ butusan ku no iya’ do miontok di nongowonsoi nu dit angaraat kopio. Sulian ku nondo iya’ tu’ araat i’ o winonsoi nu. ⁴ A’ ku nondo iya’ insianan om a’ ku ompunan. Hukuman tiya’ no kopio do miontok di winonsoi nu dit angaraat; om oilaan nu indo kopio dot iyoho’ no o TUHAN,’’ ka dau. ⁵ Poingkaa no o boros do TUHAN, it Asawat Kopio, dot id bansa’ dot Israil, ’’Mogisuhu-suhut nopondo o kosusaan do rumikot dot id dokoyu. ⁶ Norikot no kopupuson. Iti no o karaagan nu. Aiso’ noddi o soro-sorohon nu. ⁷ Rumikot no i kopupuson dot id dokoyu, i bansa’ di poingiyon do hiti’d pomogunan diti. Aiso’ noddi o rumamai do hilo’d podsubakan do hilo’d nuluhon, tu’ angagangau ngai’ poo. ⁸ Oruhai nod kopuriman kou do kawagato’ do kototogod ku. Butusan ku nondo iyokoyu do miontok di nowonsoi dokoyu, om sulian ku iyokoyu tu’ angaraat i’ kopio i winonsoi dokoyu. ⁹ Om a’ ku no iyokoyu insianan om a’ ku ompunan. Hukuman ku no iyokoyu do miontok di nongowonsoi dokoyu dit araat kopio, om koilo kou indo dot iyoho’ no o TUHAN, om iyoho’ i minomohukum dokoyu,’’ ka. ¹⁰ Rumikot no i tadau do kosusaan do bansa’d Israil. Tu’ muhang-ruhang po o kororongit. Om kasasawat do ginawo nga’ nokototos no kopio. ¹¹ Om iri no kororongit o popoinggumu’ do kararaat. Om aiso’ nondo ot oolu’ dot id diyolo’; di kakayaan diyolo’, om i kagayaan diyolo’, om i kobontugo’ diyolo’. ¹² Rumikot no o maso. Osomok no i tadau dot aiso’ ot aanu-anu di mogiboli-boli om i mogidagang-dagang tu’ oontok ngai’ nopondo iyolo’ do hukuman do Kinorohingan. ¹³ Om aiso’ no ot otogui di dumadagang do gisom do koguli’ i kinorugian dau, tu’ oontok ngai’ nopo do kototogod do Kinorohingan o pointikid-tikid do tulun. Om a’ no apasi i tulun dot angaraat. ¹⁴ Nokouni no i torumpit, om nokosodia’ ngai’ no o tulun. Nga’ aiso’ indo o tongoiso’d tulun do koongoi kasangod tu’ oontok ngai’ nopo do kototogod do Kinorohingan, o koinsanai’d tulun. ¹⁵ Haro o mogiuumang do hilo’d karalan-ralanan do hilo’d bandar, om mononglous om ongkioruol o hiri’d suang do walai. Om isai nopo i hilo’d soliwan do bandar om apatai no dot id pisangadan, om isai nopo i hiri’d suang di bandar om apatai no do toruol om mononglous. ¹⁶ Om haro indo o wookon do mogidu’ do hilo’d konuluhanan do miagal di punai dit uyungon do mantad id rantai. Om songgiak-giak pondo iyolo’ do kosorou di dusa diyolo’. ¹⁷ Ongolomok ngai’ nopondo o longon do tulun, om gagaran o totud diyolo’. ¹⁸ Om manampakai nondo iyolo’ do pakayan do mogihad om songgogor-gogor po iyolo’. Om obugaran nondo o tulu diyolo’ om ointingayam iyolo’. ¹⁹ Om pataamon nopondo diyolo’ i tamas om pirok diyolo’ do hiri’d ralan do miagal di rinomos, do tontok di pourobuson do TUHAN i kototogod dau. A’ no kapasi diyolo’ i tamas om i pirok diyolo’ tu’ pinopohudsu nogi’ diyolo’ iri. Om a’ nori milo do panganu di korohian do tinan diyolo’ om a’ milo’d ponuang do tian diyolo’. ²⁰ Oondos tomod daa iyolo’ di pongillumis do tinan diyolo’ di gulu po, nga’ winonsoi iddi diyolo’ iri do tingolig di koindaraat kopio. Om gowoi poddi om siniliu’d TUHAN do korolosi diyolo’ i dapu’ diyolo’ddi. ²¹ Boros kad TUHAN dot id bansa’ dot Israil, ’’Pologoson ku nondo o bansa’d suwai do mongoi panakau do dapu’ dokoyu, om ngoyon ngai’ nopondo di tulun dot araat ahawo’ i dapu’ dokoyu om sosomuon ngai’ nogindo diyolo’ iri. ²² Om a’ oku i’ monongkoilo do ngoyon piya’d tulun sosomuo’ i Walai’d Sasambayangan dot Agayo, om tontok di raagon di gampanakau iri. ²³ Tu’ agangau ngai’ nopondo o pointongkop diti pomogunan. Noponu’ pod mogipapatai i bandar om noponu’ do kororongit i pomogunan. ²⁴ Porikoton ku nondod hiri i bansa’ dit ongorongit kopio om pologoson ku iyolo’ do mongoi ponolod di walai dokoyu. Om lumuhoi tomod nopondo o ginawo di tulun nu dit okoris piya kopio do pologoson ku i bansa’d suwai do mongoi pamaraag di kinoiyonon dot iyonon dokoyu’d sumambayang. ²⁵ Rumikot no o katangaban om kosusaan. Mingihum kou daa’ndo do kosimbayanan nga’ aiso’ no ot okito dokoyu. ²⁶ Mogisuhu-suhut nopondo o kosusaan, om a’ opupus-pupusan o habar dot araat do rumikot. Om minsonsog kou pondo di piro-piro o nabi do poposunud mantad dit okito diyolo’ do pasal dit osiliu dot id dosunsudan. Nga’ aiso’ nondo o milo di piro-piro ot imam do potudukon di tulun, om aiso’ o nosihat do patahakon di piro-piro o boyoon. ²⁷ Mihad pondo i raja’, om aiso’ o pokukurayan di tanak do raja’, i posowolion mantad di raja’, om i tulun nga’ pananggagaran ngai’ pondo dot opopoddosian. Om hukuman ku nondo iyokoyu do miontok di nongowonsoi dokoyu, om butusan ku iyokoyu do miagal di pinomutus dokoyu do tulun do suwai. Om koilo kou nogindo dot iyoho’ no o TUHAN,’’ ka dau.

¹ Tontok di tadau’d kolimo di tulan do koonom, di koonom do toun dahai dot id pomogunan do pisangod, om songirikau ngai’ iyahai di piro-piro o boyoon do Yohuda di nangatanggayan do pisangod do hiri’d walai ku. Om sigog i’ do porintao’ oku di Rusod do TUHAN, it Asawat Kopio. ² Tingaha’ oku no om kokito ku o koiyo-iyo’d tulun dot id suang do pinointalang. Mantad nopod hiri’d tawak dau om gisom do hiri’d siriba’ om miagal pod tapui o kokitanan, om mantad nod hiri’d tawak om gisom do hiri’d sawat om mogulinau poo do miagal do tambaga’ di kinisasan o kokitanan. ³ Om poroloyo’ no dau o koiyo-iyo’d longon om ngoyo’ no gayato’ o tobuk ku. Om id suang nopod pinointalang diti nga’ pinoinsawat oku di Rusod do Kinorohingan om tanggayai oku no do hilo’d Walai’d Sasambayangan dot Agayo di hilo’d Yorusalim. Om pokoyoo oku no dau do hiri’d wawayaan di ponong id utara di Walai’d Sasambayangan dot Agayo. Om haro o tingolig di katagadan kopio’d Kinorohingan do hiri. ⁴ Om hilo’ nod nokito kawagu ku i tulinau do kosorong kopio do popointalang do nakarapou o Kinorohingan dot Israil, do miagal nopo di nokito ku do tontok di hilo’ oku’d tisan di Bawang do Kibar. ⁵ Om boros kad Kinorohingan dot id doho’, ’’Oi tulun, ontong ponong hilo’d utara,’’ ka dau. Om ontong oku no. Om kokito ku no i tingolig do katagadan kopio’d Kinorohingan do hiri’d toning di pananaraban do porsombahan dit id toning di wawayaan di suangon. ⁶ Om boros kad Kinorohingan dot id doho’, ’’Oi tulun, okito nu i’ it osiliu do dinondo? Antangai pogi’ iti piningwansayan do tulun dot Israil do hiti dit araat kopio, i moguyung diri doho’ do minsodu’ diti walai ku. Om haro po o tokito nu do pokitanan ku diya’ dot araat ko’ mantad diti,’’ ka dau. ⁷ Om igitai oku no dau do hiri’d wawayaan di natad ponong id soliwan om pointongo’ oku no dau do luang do hiri’d tolig. ⁸ Om boros ka dau, ’’Oi tulun, raladai iti luang diti,’’ ka dau. Om raladai ku no iri om kokito ku no o wawayaan. ⁹ Om boros ka dau dot id doho’, ’’Suang pogi’ om antangan i’ o karaaton om i kososomu’ tomod do pingwonsoyon diyolo’d hiti,’’ ka dau. ¹⁰ Om soruang oku no om pingontong oku no. Om notongkop pod lukisan do mogisuayan o tulanut om nintorusan di sosomu’ om piro-piro o lukisan do tingolig di tukuon do tulun dot Israil, o hiri’d limput. ¹¹ Haro o turu’ nohopod o boyoon do tulun dot Israil do hiri, om hiri nogi’ i Yaasania, i tanak di Sapan. Om ongkiinigit ngai’ nopo iyolo’ do podtutudan do kominyan, om mogolisun tomod i kominyan. ¹² Om uhoto’ oku nod Kinorohingan do poingkaa, ’’Oi tulun, okito nu no iti lisok-lisokon do tulun dot Israil do momonsoi? Sumambayang ngai’ nopo iyolo’ dot id bilik di noponu’ pod tingolig. Om ponguwaan nopo diyolo’ nga’ poingkaa, ’A’ no iyahai’d TUHAN okito! Tu’ notongkiadan no dau iti pomogunan diti,’ ka diyolo’,’’ ka dau. ¹³ Om boros kaddi do TUHAN dot id doho’, ’’Okito nu pondo iyolo’ do mingwonsoi dit araat ko’ mantad dilo’,’’ ka. ¹⁴ Om pokoyoo’ oku no dau do hiri’d wawayaan ponong id utara di Walai’d Sasambayangan dot Agayo om pointongo’ oku no dau do tongoondu’ do mogihad do kinapatayan di Tamus, i ponokokinorohingan diyolo’. ¹⁵ Om uhoto’ oku nod TUHAN, ’’Oi tulun, okito nu i’ ilo’? Om haro po o tokito nu dit araat ko’ mantad diti,’’ ka dau. ¹⁶ Om pokoyoo’ oku no dau do hiri’d natad di ponong id suang di Walai’d Sasambayangan dot Agayo. Om hilo’ no dot id toning di wawayaan di sumuang di bilik dit olidang, it id pialatan di pananaraban do porsombahan om i ralan, do haro o duwo nohopod om limo o tulun. Songintolikud iyolo’ di bilik dot olidang om songingotud ngai’ do potimbaba’ ponong id koulayon do tumuku’ dot id tadau di mulai nogi’. ¹⁷ Om boros kad TUHAN dot id doho’, ’’Oi tulun, nokito nu i’ iri? A’ nopo apaas-paasan iti tulun do Yohuda do mingwonsoi di wowonsoyon di koindaraat tomod do miagal di nokito nu, om a’ iyolo’ apaasan do popintongkop do kororongit do hiti’d pomogunan. Tu’ rumikot po iyolo’ do hiti’d walai ku do mingwonsoi do miagal diri, gisom do monubuan po do kototogod ku. Antangai pogi’ nga’ magaayi-ayi’ no moti’ kopio iyolo’ do mongindaraat doho’ tu’ mingwonsoi po diti kososomu’ kopio. ¹⁸ Om opurimanan nondo diyolo’ o kawagato’ do kototogod ku. Om a’ ku no iyolo’ insianan om a’ ku ompunan. Om tumotos piya daa iyolo’ do popinggiak do sambayang diyolo’ dot id doho’ nga’ a’ oku no mokinongou,’’ ka dau.

¹ Om korongou ku noddi o Kinorohingan do minomoros dot opuhod do poingkaa, ’’Kainou do hiti, oi tulun di mongoi paparatu’ do pomohukum ku diti bandar. Om igitan ngai’ no i rapo-rapo dokoyu,’’ ka. ² Om insan-insan nopo do ruminikot ot onom o tulun do mantad hiri’d soliwan di wawayaan ponong id utara di Walai’d Sasambayangan dot Agayo, om ongkiinigit ngai’ nopo iyolo’ do rapo-rapo. Om moyo-woyo’ nopo diyolo’ nga’ songulun i kirasuk do kain linan, om kiinigit di maan do ponulis. Om suang ngai’ nopo iyolo’ om ingkakat no do hiri’d toning di pananaraban do porsombahan di tambaga’ do winonsoi. ³ Om kakat noddi i tulinau di kosorong di tanda’ do nakarapou o Kinorohingan dot Israil do mantad hiri’d kerub, it ongkitalad di koiyo- iyo’d tulun, i hiri’d niyonon mantad diri, om pakayaai no do hiri’d wawayaan di Walai’d Sasambayangan dot Agayo. Om lohowo’ nod TUHAN, i tulun di kirasuk do linan diri do poingkaa, ⁴ ’’Ongoi tongkop diti bandar do Yorusalim om tandaan no o turos do pointikid-tikid di tulun dit osusa’ om i tumongob do gama’ di kangaraaton do pingwonsoyon do tulun do hiti’d bandar diti,’’ ka. ⁵ Om korongou ku no o Kinorohingan do minomoros dot id piro-piro o tulun do suwai do poingkaa, ’’Tanud kou dau do tumongkop diti bandar, patayon no o pointikid-tikid di tulun. Om kada’ no iyolo’ ompunai. ⁶ Patayon no i kongomolohingan, om i tongomulok po, om i tongoondu’, om i tongokusai om i tongotapa’ om i tongotina’, om i tangaanak. Nga’ kada’ dokoyu ngoyo’ kuroi-kuroyo’ i tulun di kitanda’ o turos. Impuunon nopo dokoyu o hiti’d Walai’d Sasambayangan dot Agayo,’’ ka dau. Om timpuun no iyolo’ do minamatai ngai’ di boyoon dot Israil di songingkakat do hiri’d Walai’d Sasambayangan dot Agayo. ⁷ Om boros kad Kinorohingan dot id diyolo’, ’’Raagon nopo i Walai’d Sasambayangan dot Agayo. Om ponuon nopo do rata’ i natad di walai’ddi. Timpuun kou no do kumaraja’ do dinondo!’’ ka dau. Om timpuun no iyolo’ do minimpatai di tulun do hiri’d bandar diri. ⁸ Om soira’ di maso diyolo’ do mimpatai, om iso-iso’ oku noddi. Om otud oku no do hiri’d tana’ om pomoros oku no dot opuhod do poingkaa, ’’Oi TUHAN, it Asawat Kopio, adalaan ko no kopio dot otogod do Yorusalim gisom do patayon ngai’ nu nopo i tulun di noolu-olu’ do hiti’d Israil,’’ kangku. ⁹ Om boros kad Kinorohingan do suminimbar, ’’Kasala’ o tulun dot Israil om Yohuda tu’ miningwonsoi iyolo’d dusa dit agayo kopio. Minimpatai iyolo’d tulun do pointongkop diti pomogunan om sinosomu’ diyolo’ do karaaton o Yorusalim. Boros ka diyolo’ om tinongkiadan ku kaka o pomogunan diyolo’ om a’ oku no kaka’ddi kokito di wonsoyon diyolo’. ¹⁰ Nga’ a’ ku no iyolo’ insianan; wonsoyon ku no dot id diyolo’ o miagal di winonsoi diyolo’ dot id tulun do suwai,’’ ka dau. ¹¹ Om guli’ noddi i tulun di kirasuk do kain linan diri om posunudo’ no dau dot id TUHAN i winonsoi dau. Boros ka dau, ’’Nowonsoi ngai’ ku no i pinonuhuan nu oi TUHAN,’’ ka.

¹ Ontong oku no di poillokou-lokou di hiri’d sawa-sawat di tulu di kerub, i kitalad dit ongkoiyo-iyo’d tulun, om haro’ddi o miagal-agal do tirikohonon do raja’ do hiri’d mahau-sahau diyolo’, do watu nilam do winonsoi. ² Om boros kad Kinorohingan dot id tulun di kirasuk do linan diri, ’’Ongoi do hilo’d pialatan dilo ruda’ dot id siriba’ dilo koiyo-iyo’d tulun, om manu nod popou dot ongosongonggom. Om potiason nogindo i popou’ddi do pointongkop di bandar,’’ ka. Om tonudo’ no dau iri om piantangan ku iyau. ³ Iri nopo it ongkitalad di koiyo-iyo’d tulun diri nga’ songingkakat do ponong hiri’d salatan di Walai’d Sasambayangan dot Agayo do tontok di suminuang iyau, om haro’ddi o haun do minomonu’ di natad di ponong hiri’d suang, om minomonu’ do koinsanai di Walai’d Sasambayangan dot Agayo. ⁴ Om undaliu noddi i tulinau di kosorong kopio, i tanda’ do nakarapou o TUHAN, do mantad hiri’d ongkitalad di koiyo-iyo’d tulun diri, om ongoi no do hiri’d wawayaan di Walai’d Sasambayangan dot Agayo. Om koponu’ noddi do haun i Walai’d Sasambayangan dot Agayo, om mogulinau poddi tomod o hiri’d natad. ⁵ Om iri nopo kapo di talad di koiyo-iyo’d tulun diri nga’ rongo-rongohon do hiri’d natad di ponong id soliwan. Om miagal-agal do tuni’d boros do Kinorohingan, it Osundu Kopio, o karangahan diri. ⁶ Om soira’ di sinuhu’d TUHAN i tulun di kirasuk do linan diri do mongoi panganu di popou do mantad hiri’d piolitan di ruda’ dit id sahau dit ongkitalad do koiyo-iyo’d tulun diri, om suang no i tulun om ingkakat no dot id toning do tiso’ di ruda’. ⁷ Om poroloyo’ no di tiso’ di koiyo-iyo’d tulun o longon dau do hiri’d tapui dit id rolot diyolo’, om anu nod popou, om pakahangai no dau iri di tulun di kirasuk do linan. Om onuo’ noddi di tulun i popou’ddi om tongkiad no. ⁸ Om kokito ku do haro ngai’ nopo o longon do miagal do don tulun it ongkitalad di koiyo-iyo’d tulun diri, do hiri’d dalakapan di talad diyolo’. ⁹ - ¹⁰ Om nokito ku nogi’ do haro ot apat o ruda’, do mogiagal nopo; om iso’ nopo i koiyo-iyo’d tulun diri om iso’ no o ruda’ do pointoning. Om mogulinau tomod i ruda’ do miagal pod watu dit olumis dit agayo o gatang. Om nadakatan ngai’d ruda’ do suwai o pointikid-tikid di ruda’ddi. ¹¹ Om soira’ di mamanau i koiyo-iyo’d tulun diri om milo i’ iyolo’ do mongoi do hinonggo nopo o kotoguangon diyolo’, om milo iyolo’ do mongoi do honggo nopo o korohian diyolo’, om a’ no iyolo’ minog do kumokos. ¹² Om notongkop nopod mato i tinan, om likud, om longon, om talad, om i ruda’ diyolo’. ¹³ Om iri nopo ruda’ddi nga’ miagal nopo di ruda’ di nokito ku dot id pinointalang dit insan ku i’ kokito. ¹⁴ Saraapatan nopod rabas i koiyo-iyo’d tulun diri. Iri nopo rabas do koiso’ nga’ koiyo-iyo’d rabas do sapi’, om iri no koduwo om koiyo-iyo’d rabas do tulun, om iri no kotolu om koiyo-iyo’d rabas do singa, om iri no kaapat om koiyo-iyo’d rabas do kondiu. ¹⁵ Iri nopo koiyo-iyo’d tulun diri nga’ iri i koiyo-iyo’d tulun di nokito ku di hilo’d disan do Bawang do Kibar. Soira’ nopod tumulud i koiyo-iyo’d tulun diri, ¹⁶ om di mundaliu iyolo’, om tumanud nopo i ruda’ diyolo’. Om soira’ nopod poungkaladon diyolo’ i talad diyolo’ do tumulud, om iri ruda’ nga’ moyo’ no diyolo’. ¹⁷ Om soira’ di mundorong i koiyo-iyo’d tulun diri, om mundorong no i ruda’; om soira’ di tumulud i koiyo-iyo’d tulun diri om moyo’ no i ruda’ diyolo’, tu’ iri i’ i koiyo-iyo’d tulun o momohuruan. ¹⁸ Om tongkiad noddi di wawayaan di Walai’d Sasambayangan dot Agayo i tulinau di kosorong kopio, di tanda’ do nakarapou o TUHAN. Om pakayaai noddi di tulinau’ddi do hiri’d sawa-sawat di koiyo-iyo’d tulun diri. ¹⁹ Om poungkalado’ no diyolo’ i talad diyolo’ om tulud no do mantad hiri’d tana’ di maso ku do poingontong, om iri ruda’ nga’ tuminanud nogi’ diyolo’. Om undorong-dorong no iyolo’ do hiri’d wawayaan do ponong id koulayon di Walai’d Sasambayangan dot Agayo, om hiri’d sawa-sawat diyolo’ i tulinau di kosorong tomod. ²⁰ Om kotutunai ku no iyolo’ dot iri i koiyo-iyo’d tulun di nokito ku dot id sahau’d Kinorohingan dot Israil, di hilo’d Bawang do Kibar. ²¹ Om saraapatan nopo iyolo’d rabas, om saraapatan do talad, om kilongon ngai’ iyolo’ do miagal-agal do longon do tulun, dot id dalakapan di talad diyolo’. ²² Om iri rabas diyolo’ nga’ aiso’ no o pisuayan di rabas di nokito ku di hilo’d toning do Bawang do Kibar. Om kumaa ngai’ nopo do ponong id dosunsudan i koiyo-iyo’d tulun diri.

¹ Om poinsawato’ oku no di Rusod do Kinorohingan om tanggayai oku nod kumaa do hiri’d wawayaan di ponong id koulayon di Walai’d Sasambayangan dot Agayo. Om kokito ku no o duwo nohopod om limo o tulun do hiri’d toning di wawayaan. Om i Yaasania, i tanak di Asur, om i Pilasa, i tanak di Bonaya, i boyoon goduwo do bansa’ nga’ hiri nogi’. ² Om boros kad Kinorohingan dot id doho’, ’’Oi tulun, minsorou ngai’ nopod araat o tulun diti, om poboros do nosihat di kapalid do hiti’d bandar diti. ³ Tu’ boros ka diyolo’, ’Oruhai toko’ nod momonsoi kawagu do walai. Miagal daa do lansang iti bandar om miagal toko’ do daging do hiri’d suang, nga’ maha’ po katuu dot otirung toko’ po di lansang, om a’ toko’ iddi osondikot di tapui,’ ka. ⁴ Iyo nopoddi, om pasalao’ no iyolo’, om sunudan no iyolo’ do pasal di pomohukum ku diyolo’, oi tulun,’’ ka dau. ⁵ Om porintao’ oku noddi di Rusod do TUHAN om sunudai oku nod TUHAN do popoboros do boros diti dot id tulun diri, ’’Oi tulun dot Israil, oilaan ku i’ ino pimboroson dokoyu om ino pinsarahan dokoyu do wonsoyon dokoyu. ⁶ Adalaan no kopio kogumu’ o tulun do napatai nu do hiti’d bandar diti gisom do noponu’ pod rata’ ilo karalan-ralanan do hiti. ⁷ Om poingkaa’ddi o poboroson ku, iyoho’ i TUHAN it Asawat Kopio, dot id dokoyu. Otopot nogi’ do lansang iti bandar, nga’ nunu ma i daging dit id suang di lansang diri? Iri nopo om i rata’ do tulun di pinimpatai dokoyu! Om okon kou nondo ko’ hiti tu’ uyungon ku nondo iyokoyu do sumoliwan diti bandar! ⁸ Moddosi kou’d gayang? Porikot oku nondod tulun dit ongkigayang do mongoi panangod dokoyu. ⁹ Posoliwanon ku nondo iyokoyu diti bandar om patahakon ku iyokoyu dot id bansa’d suwai. Norotuan ku no iyokoyu do hukuman do kapatayon. ¹⁰ Om aala’ kou pondo dot id pisangadan do hiti’d pomogunan dokoyu, om koilo ngai’ nogindo o tulun dot iyoho’ no o TUHAN. ¹¹ A’ kou i’ ointirungan diti bandar diti do miagal di daging dit id suang di lansang dot ointirungan di lansang. Tu’ honggo kou nopondod poundorong do hiti’d pomogunan dot Israil nga’ gusaon ku i’ om hukuman ku iyokoyu. ¹² Om oilaan nogindo dokoyu dot iyoho’ no o TUHAN, om oilaan dokoyu do hukuman ku pogi’ iyokoyu nga’ tuminolibamban kou i’ dit oturan ku om suminurilog kou di pinonuhuan ku do tontok di tuminanud kou dot oturan di piro-piro o bansa’ dit id posorili’ dokoyu,’’ ka. ¹³ Om tontok di mimboros oku do boros diri om sigog nopo om kahaba’ no i Pilasa om kapatai noddi iyau. Om otud oku nopoddi do hiri’d tana’ om pinggarang oku no do poingkaa, ’’Atuukoi, TUHAN it Asawat Kopio! Maan ngai’ nu no kopio patayo’ o koinsanai’d tulun di noolu-olu’ do hiti’d Israil?’’ kangku. ¹⁴ Om boro-boros po kawagu o TUHAN dot id doho’ do poingkaa, ¹⁵ ’’Oi tulun, mimboros po do pasal diya’ om pasal di tulun dot Israil do suwai dit id pomogunan do pisangod i tulun do hilo’d Yorusalim. Boros ka no diyolo’, ’Adalaan no kopio kosodu’ i tulun di natanggayan do pisangod do mongoi sambayang dot id TUHAN do hiti’d Yorusalim. Om iyati’ no o nonuan do TUHAN do koinsanai’dti tana’ dot Israil,’ ka no. ¹⁶ Iyo nopoddi, om sunudai ngai’ no i tambalut nu di nangatanggayan do pisangod diti poboroson ku. Iyoho’ no, i pinopoongoi om i pinopoundorong diyolo’ dot id pomogunan dit id sodu’ om iyoho’ i pinopotompias diyolo’ dot id pomogunan do suwai. Nga’ daamot nopod hilo’ iyolo’, om moyo-woyo’ oku i’ diyolo’ do hilo’d pomogunan di nokoongoyon diyolo’. ¹⁷ Iyo nopoddi, om sunudan no iyolo’ diti poboroson ku, iyoho’, i TUHAN it Asawat Kopio. Timungon ku indo iyolo’ om posoliwanon ku iyolo’ do mantad hiri’d pomogunan di pinotompiasan ku diyolo’, om patahakon ku nondo kawagu diyolo’ i tana’ dot Israil. ¹⁸ Om koguli’ nopondo iyolo’, om pataamon ngai’ nondo diyolo’ o koinsanai di tingolig dot araat om i kososomu’ kopio dit okito diyolo’. ¹⁹ Om onuan ku’ndo iyolo’ do ginawo do wagu om pomusarahan do wagu. Om iduwon ku’ndo i ginawo diyolo’ dit okodou om it osurilog, om onuan ku iyolo’d ginawo di mumboyo’ doho’. ²⁰ Om umboyoon nondo diyolo’ it oturan ku om otorodok iyolo’ do tumanud do koinsanai di ponuhuan ku. Om osiliu nondo iyolo’d tulun ku, om iyoho’ nga’ osiliu nondod Kinorohingan diyolo’. ²¹ Nga’ hukuman ku’ndo i tulun dit orohian do tumuku’ dot id tingolig dit araat om i kososomu’ kopio. Hukuman ku nondo iyolo’ tu’ araat i’ o kowoyo-woyoon diyolo’,’’ ka dau. Iyo noddi o boros do pinoboros do TUHAN, it Asawat Kopio. ²² Om timpuun noddi do tumulud it ongkitalad di koiyo-iyo’d tulun diri om woyo’ no diyolo’ i ruda’. Om mahau-sahau diyolo’ i tulinau di kosorong tomod do tanda’ do nakarapou o Kinorohingan dot Israil. ²³ Om tongkiad noddi di bandar do Yorusalim i tulinau di kosorong tomod diri om pakayaai no do hiri’d nuluhon di ponong id koulayon do mantad id bandar diri. ²⁴ Om poinsawato’ oku noddi di Rusod do Kinorohingan om pogulio’ oku no do hiri’d tulun di hilo’d Babil i pomogunan do pisangod, dot id suang do pinointalang diri. Om tanus noddi i pinointalang diri. ²⁵ Om sunudai ngai’ ku noddi i tulun dit id pomogunan do pisangod diri, do koinsanai di pinointalang do TUHAN dot id doho’.

¹ Om boro-boros no o TUHAN dot id doho’ do poingkaa, ² ’’Oi tulun, iya’ nopondo om poingiyon ko dot id rolot do tulun dit obinsaap. Kimato i’ daa iyolo’; nga’ a’ i’ iyolo’ kokito. Om kitolingo iyolo’ nga’ a’ i’ iyolo’ korongou, tu’ obinsaap i’ iyolo’. ³ Iyo nopoddi, om posuangon no i konunu-nunuan nu do hiri’d simpulan om piwongkoson nori oi tulun, do miagal di wonsoyon do tulun di mogidu’, om mamanau no dot a’ po otuong. Pokitonon ngai’ no o tulun do tumongkiad ko om mongoi ko dot id kinoiyonon do suwai. Om nunu koilo-ilo nga’ kokito nopondo diya’ i tulun di sumosongkiwal diri, om kopuriman i’ daa’ndo iyolo’ di kosongkiwalo’ diyolo’. ⁴ Rumpasan no om wongkoson no i simpulan nu dit anawau po, om okito ko i’ diyolo’, om pologoson iyolo’ do miontong diya’ di mamanau ko do dongsosodopon do miagal-agal do tanggayan ko dot id pomogunan do pisangod. ⁵ Om tontok di poingontong iyolo’ om lobuon no i limput di walai nu om poulaon no di luang diri i simpulan nu. ⁶ Om pokitonon no iyolo’ do sandangon nu i simpulan nu, om mamanau no dot otuong om somponon o mato nu, om a’ ko i’ kokito di ralan do wayaan nu. Om iri nondo i wonsoyon nu’ddi o sumiliu’d popoinsan di tulun dot Israil,’’ ka dau. ⁷ Om wonsoyo’ ku no o miagal di pinonuhuan do TUHAN doho’ do momonsoi. Om tadau iddi dit anawau po do minonuang-suang oku om linopot ku’ddi iri do simpulan do miagal di wonsoyon do tulun di mogidu’. Om tontok di tumuong no, om lobuo’ ku no i limput do walai ku do longon ku o pinomolobu ku, om soliwan oku noddi do minaya’ di luang di linobu ku. Om soira’ di songingontong ngai’ doho’ i tulun om sandango’ ku no i simpulan ku om pamanau oku no. ⁸ Om kosuabon noddi om boro-boros no o TUHAN dot id doho’ do poingkaa, ⁹ ’’Oi tulun, baino’ noddi tu’ moguhot ilo tulun dot Israil di sumasaap, ondung nunu ino wonsoyon nu, ¹⁰ om sunudan no iyolo’ do moro-boros oku diyolo’, iyoho’ i TUHAN, it Asawat Kopio. Iti nopo boros ku’dti nga’ poboroson ku dot id raja’ do Yorusalim om id koinsanai di tulun di songingiyon do hilo’d bandar diri. ¹¹ Sunudan no iyolo’ dot iri nopo winonsoi nu nga’ poiyaan dit osiliu dot id diyolo’ tu’ mogidu’ nondo iyolo’ om angatangkap do pisangod. ¹² Sandangon nondo di raja’ diyolo’ i simpulan dau do dongotuong om mogidu’ nondo iyau do maya’ di luang di linobu di tulun do hiri’d tolig do sumoliwan. Om somponon nondo dau o mato dau om a’ i’ iyau kokito di wayaan dau. ¹³ Nga’ pawaladon ku nondo i rambot ku do pamagamit ku dau om kosulung indo iyau’d hiri. Om tanggayan ku nogindo iyau do hilo’d bandar do Babil, om hilo’ no o kapatayon dau, dot a’ piya iyau insan kokito do bandar diri. ¹⁴ Om potompiason ku nopondo do hinonggo nopo o kokoyoon o koinsanai di tulun do hiri’d walai di raja’ om kohompit no i piro-piro o ponosihat om i madtatamong di raja’, om ihumon nondo iyolo’d tulun do maan patayo’. ¹⁵ Om soira’ pondod potompiason ku iyolo’ dot id pogialatan do bansa’d suwai om pomogunan do suwai om oilaan nogindo diyolo’ dot iyoho’ no o TUHAN. ¹⁶ Om pologoson ku indo ot okuuri’ diyolo’ dot a’ apatai dot id pisangadan, om a’ apatai do mononglous om toruol, om hiri pondo iyolo’d rolot di bansa’d suwai om oilaan nogi’ diyolo’ o karaato’ di kowoyo-woyoo’ diyolo’ om mangakun nondo iyolo’ dot iyoho’ no o TUHAN,’’ ka dau. ¹⁷ Om boro-boros no o TUHAN dot id doho’ do poingkaa, ¹⁸ ’’Oi tulun, gagarai no do maso nu’d makan om gagarai no dot opopoddosian do maso nu’d minum. ¹⁹ Sunudan no o koinsanai di bansa’ dot iti no o boros ku, iyoho’ i TUHAN, it Asawat Kopio, dot id tulun do Yorusalim di maso pod poundorong do hilo’d pomogunan diyolo’. Gagaran nondo iyolo’ do maso diyolo’d makan om gagaran dot opopoddosian do tontok do minum iyolo’. Om a’ nopondo sunian i tana’ diyolo’, tu’ tuminolibamban ngai’ nopo dit oturan i tulun do poingiyon do hilo’. ²⁰ Om angaraag nondo i kabandaran di poimponu’d tulun do dinondo, om osiliu do tana’ dit a’ sunian i koumaan do hilo’. Om koilo nogindo iyolo’ dot iyoho’ no, i TUHAN,’’ ka dau. ²¹ Om boro-boros no o TUHAN dot id doho’ do poingkaa, ²² ’’Oi tulun, nokuro tu’ orohian o tulun dot Israil do mirrait do suriban diti, ’Alaid noddi om aiso’ i’ o nangabayaan di pinoboros mantad dot osiliu dot id dabantalan,’ ka? ²³ Ngoyo’ no iyolo’ sunudai diti tisimbar ku, iyoho’ i TUHAN, it Asawat Kopio, do pasal diri. Tonuson ku nondo i suriban diri, om a’ nondo iri pimboroson do hilo’d Israil. Sunudan no iyolo’ do ponowoli nopoddi om poingkaa, ’Nokorikot no i maso om abayaan ngai’ no i pinoboros mantad dit osiliu dot id dosunsudan!’ ka. ²⁴ Om aiso’ nondo o pinointalang dit a’ otopot om aiso’ i’ o poboroson do pasal dit osiliu dot id dosunsudan do hilo’d Israil. ²⁵ Iyoho’ nondo i TUHAN, it Asawat Kopio o moro-boros dot id bansa’ dot Israil, om nunu nopo i poboroson ku nga’ owonsoi ngai’ no, om a’ no popiurut-uruton. Pokinongou no, oi bansa’ dit obinsaap, wonsoyon ngai’ ku nondo i nokoinsan mantad ku dot id dokoyu dot osiliu do solinaid dokoyu’d poimpasi. Iyoho’ no, i TUHAN, it Asawat Kopio, o minomoros diti,’’ ka dau. ²⁶ Om boros kad TUHAN dot id doho’, ²⁷ ’’Oi tulun, osorou nopo di tulun dot Israil om abayaan nopo i pinointalang dot id diya’ om i pinoboros nu do pasal dit osiliu dot id dosunsudan om sumonu’. ²⁸ Iyo nopoddi, om sunudan no iyolo’ do momoros oku, iyoho’ i TUHAN, it Asawat Kopio do poingkaa: Nunu nopo i nokoboros ku om atantu’ no dot abayaan, om a’ no popiurut-uruton. Iyoho’ no, i TUHAN, it Asawat Kopio, o minomoros diti!’’ ka dau.

¹ Om boro-boros no o TUHAN dot id doho’ do poingkaa, ² ’’Oi tulun, pasalao’ ngai’ no i nabi do hilo’d Israil di popimboros do pasal dit osiliu dot id dosunsudan di pinsarahan i’ toomod diyolo’. Suhuon no iyolo’ do mokinongou’d boros ku,’’ ka dau. ³ Poingkaa no o boros do TUHAN, it Asawat Kopio, ’’Obungou ngai’ no i nabi di basug! Iri nopo i toilaan diyolo’ om mantad i’ dot id pomusarahan diyolo’, om i pinointalang do poboroson diyolo’ nga’ a’ i’ otopot. ⁴ Oi tulun dot Israil, iri ngai’ nopo i nabi do mantad id dokoyu’ddi om aiso’ i’ o guna’, tu’ miagal no di toni di songingiyon dot id pogialat-alatan di kinaraagan do bandar. ⁵ Tu’ a’ i’ iyolo’ madtamong do hiri’d kinoiyonon di nangaraag o tolig om a’ diyolo’ wonsoyon kawagu i tolig. Om a’ iddi ointirungan ot Israil do rumikot o pisangadan do tontok di tadau do rumikot oku, iyoho’ i TUHAN, do mongoi pomohukum dokoyu. ⁶ A’ ngai’ i’ otopot i pinointalang do poboroson diyolo’, om a’ otopot i poboroson diyolo’ do pasal dit osiliu dot id dosunsudan. Poboroson diyolo’ do mantad id doho’ i boros di popimboroson diyolo’ nga’ a’ oku i’ nokoponuhu’ diyolo’ do moro-boros. Om sorohon indo daa diyolo’ dot abayaan i boros diyolo’! Nga’ poingkuro kaka daa dot abayaan iri? ⁷ Sunudan ku no iyolo’ dot: Iri nopo i pinointalang dot okito diyolo’ddi om a’ i’ otopot, om iri poboroson diyolo’ do pasal dit osiliu dot id dosunsudan nga’ tudut ngai’ i’. Posongonuan daa diyolo’ doho’ i boros diri, om a’ oku i’ insan kopomoros dot id diyolo’,’’ ka dau. ⁸ Gowoi poddi om poingkaa o boros do TUHAN, it Asawat Kopio dot id diyolo’, ’’A’ i’ otopot ino boros dokoyu, om ino pinointalang nga’ tudut ngai’ i’. Saapon ku no iyokoyu. ⁹ Hukuman ku nondo iyokoyu, i piro-piro o nabi di popimboros do pinointalang di pininsarahan i’ toomod om popoboros do pasal dit osiliu dot id dosunsudan dit a’ otopot. A’ kou nondo koino-ino do mongoi rapou do tontok do tumimung i tulun ku do mogiupakat do momonsoi’d nunu nopo. Om oidu’ nondo o ngaran dokoyu do mantad id bansa’ dot Israil, om a’ kou no koguli’ dot id pomogunan dokoyu. Om oilaan nogindo dokoyu dot iyoho’ no o TUHAN, it Asawat Kopio. ¹⁰ Oi koinsanai di nabi di goudut! Pinalid dokoyu i tulun ku tu’ mimboros kou dot ongosonong ngai’ i’ om aiso’ o koligagaanan. Nga’ otopot nopo kopio om a’ i’ iyo’ddi. Pinopoingkakat i tulun ku do tolig dit ongoluwau o watu, om rikot kou no iyokoyu do minongoi panaat diri dot opurak. ¹¹ Oi koinsanai di nabi di goudut, humaba’ indo i tolig dokoyu’ddi. Tu’ porikot oku nondod rasam dit asapou. Ootungan nondo’ri do karambatu om obuntul do tongus dot opuhod. ¹² Om ahaba’ nondo i tolig, om muhot ngai’ nopondo o tulun dokoyu ondung nunu noo kinootuk-otukon do sinaat dot opurak i tolig diri,’’ ka. ¹³ Om poingkaa no o boros do TUHAN, it Asawat Kopio, ’’Porikot oku nondod tongus dit opuhod dot atatagadan oku, om porikot oku’d rasam dot asapou om karambatu do pamaraag di tolig. ¹⁴ Nokopomusorou mantad oku nod raagon ku i tolig di sinaat dokoyu’d opurak diri, om babakon ku’ri, gisom dot iri pondo watu do pinoimpahan ot oolu’. Apatai ngai’ kou nopondo dot ahabaan di tolig. Om koilo ngai’ kou nogindo dot iyoho’ no o TUHAN. ¹⁵ Om kopuriman nondo do kawagato’ do kototogod ku i tolig om i tulun di minanaat dot opurak di tolig diri. Om sunudan ku nogindo iyokoyu dot a’ no hino i tolig diri do miagal dokoyu i minanaat diri tu’ a’ nondo hino. ¹⁶ Oi koinsanai di nabi di goudut! Pinoboros dokoyu dot ongosonong-sonong ngai’ om aiso’ o koligagaanan do Yorusalim, om maso ka dot aiso’ nogi’ o kasanang-sanangan!’’ ka. Miagal noddi o boros do TUHAN, it Asawat Kopio. ¹⁷ Boros kad TUHAN, ’’Dinondo no, oi tulun, om antangan no i tongoondu’ dit id pogialatan do tulun nu di popimboros dit osiliu dot id dosunsudan. Pasalaon no iyolo’. ¹⁸ Om sunudan no iyolo’ diti poboroson ku, iyoho’ i TUHAN, it Asawat Kopio, dot id diyolo’. Obungou kou no, iyokoyu i tongoondu’ di popimboros dit osiliu dot id dosunsudan. Monombir kou’d kain do poriliton dot id lunggayan do maan do gimat om momonsoi kou’d kulu di kilimu’ do maan do kuluonon do tulun, om kikuasa’ i’ i tulun di mamakai’ddi dot id koposi-posion do tulun do suwai. Orohian kou do kaanu’d kuasa’ dot id koposi-posion om kapatayon do tulun ku om pakayon dokoyu i kuasa’ddi do maan dokoyu’d kountungan dokoyu. ¹⁹ Minongindaraat kou doho’ dot id toguang do tulun ku do mokimaanu-anu kou dit a’ i’ kopiro tonggom do barli om a’ kopiro o liob do roti. Patayon nogi’ dokoyu i tulun dit aiso’ o sala’, om posion nogi’ dokoyu i tulun dit apatut daa do patayon. Om pingudutan dokoyu i tulun ku, om monongkuyaan nondo iyolo’ dokoyu,’’ ka dau. ²⁰ Om poingkaa no o boros do TUHAN, it Asawat Kopio, dot id tongoondu’ di popimboros dit osiliu dot id dosunsudan, ’’Araatan oku do kokito di gimat do poriliton dot id lunggayan, i pakayon dokoyu do maan daa do pongigit do koposion om kapatayon di tulun ku. Gayaton ku nondo i gimat di poriliton diri do mantad id longon dokoyu om poiduwon ku i tulun di kuasaon daa dokoyu. ²¹ Undaton ku nondo i kulu dokoyu di kilimu’, om poiduwon ku i tulun ku do mantad id karaato’ dokoyu gisom dot a’ nondo dokoyu aanu kawagu iyolo’ do gisom dot alaid. Om koilo kou nogindo dot iyoho’ no o TUHAN. ²² Poluhoyon dokoyu o ginawo do tulun dit ongosonong, i tulun dit a’ ku i’ daa pokorualan dot ino tudut dokoyu o maan dokoyu’d popoluhoi. Posonongon dokoyu o ginawo di tulun dot araat gisom dot a’ nondo iyolo’ tumingkod do momonsoi’d dusa om a’ iyolo’ apasi. ²³ Baino’ nopondo, om opupusan no i pinointalang om i popimboroson dokoyu dit a’ otopot do pasal dit osiliu dot id dosunsudan. Poiduwon ku no i tulun ku do mantad id kuasa’ dokoyu dit araat. Om koilo kou indo dot iyoho’ no o TUHAN,’’ ka dau.

¹ Haro o piro-piro di boyoon do tulun dot Israil do minongoi ponguhot doho’ do pasal do korohian do TUHAN. ² Om boro-boros noddi o TUHAN dot id doho’ do poingkaa, ³ ’’Oi tulun, nakatahak ngai’ nodti tulun o koposion diyolo’ dot id tingolig om gowoi poddi om nabayayat iyolo’ do momonsoi’d dusa. Om ondos daa diyolo’ om sumimbar oku po diyolo’? ⁴ Iyo nopoddi, om ongoi no boro-boros diyolo’, om sunudan no iyolo’ diti poboroson ku, iyoho’ i TUHAN, it Asawat Kopio, dot id diyolo’ do poingkaa, ’Pointikid-tikid do tulun dot Israil di pinapatahak do tinan dau dot id tingolig om i nagayat diri do momonsoi’d dusa, om mongoi i’ daa’ndo pokinosihat do nabi, om simbaron ku no dot isimbar dit apatut dot aanu ngai’ di tingolig dau dit ogumu’ kopio! ⁵ Pinopotongkiad ngai’ no di tulun ku do mantad id doho’ i tingolig, nga’ maha’ daa om gumuli’ kawagu iyolo’ dot id doho’ dot osimbar ku iyolo’ do miagal diti,’ kanto. ⁶ Om sunudan nogi’ i tulun dot Israil diti poboroson ku iyoho’ i TUHAN, it Asawat Kopio, do poingkaa, ’Rologo kou no di dusa dokoyu, om tongkiadai ngai’ no dokoyu i tingolig dokoyu di kososomu’ kopio,’ kanto. ⁷ Soira’ nopo do haro o tongoiso’ di tulun dot Israil ko’ ongoiso’ di bansa’d suwai di poingiyon do poirrolot di tulun dot Israil, do tumongkiad doho’ om tumuku’ do tingolig, nga’ mongoi i’ daa’ndo pokinosihat di nabi, om iyoho’ nondo o sumimbar dau! ⁸ Saapon ku nondo iyau, om silihon ku iyau do poiyaan dot id tulun do suwai. Om potongkiadon ku nondo iyau do mantad id tulun ku, om koilo indo i tulun ku dot iyoho’ no o TUHAN. ⁹ Ondung aakalan o nabi, gisom do kopolombus iyau dot isimbar dit a’ otopot, om iyoho’ i’ o minagakal dau’ddi. Om potongkiadon nondo iyau do mantad id tulun dot Israil, dot iyoho’ i TUHAN, it Asawat Kopio, o popotongkiad. ¹⁰ Miagal nopo o hukuman do porotuon dot id nabi om id tulun di mongoi pokinosihat di nabi. ¹¹ Wonsoyon ku pogi’ o miagal diri nga’ maan ku’d pangantob di tulun dot Israil do tumongkiad doho’ om pangantob ku diyolo’ do monosomu’ do tinan diyolo’ dot i dusa diyolo’ o kososomu’. Om osiliu nondo iyolo’d tulun ku, om osiliu oku do Kinorohingan diyolo’. Iyoho’ no i TUHAN, it Asawat Kopio, o minomoros diti,’’ ka dau. ¹² Om boro-boros no o TUHAN dot id doho’ do poingkaa, ¹³ ’’Oi tulun, ondung momonsoi’d dusa o tiso’ o pomogunan om a’ tumorodok dot id doho’, om hukuman ku no o pomogunan diri. Om raagon ku i taakanon do songingopi’d hiri. Poporikot oku nondod mononglous om patayon ku o tulun om nintorusan do hiri. ¹⁴ Om mulong piya daa do songingiyon do hilo’ i Nuu, om i Danil om i Ayub, nga’ iyolo’ nod tolu ot apasi di kosonongo’ diyolo’. Iyoho’ no, i TUHAN it Asawat Kopio, o minomoros diti. ¹⁵ Ko’ poporikot oku pod nintorusan dit orongit do mongoi pamatai di tulun do poingiyon dot id pomogunan diri, gisom do kikoligagaanan nondo i pomogunan diri, om gowoi pondo om aiso’ no o songulun piya do kobulun do maya’d hiri. ¹⁶ Om mulong piya do poingiyon daa i Nuu, om i Danil om i Ayub do hilo’, nga’ sumumpa’ oku no dot id suang do ngaran ku, iyoho’ i Kinorohingan di poimpasi, i TUHAN dit Asawat Kopio, dot iri piya i tangaanak diyolo’ nga’ a’ i’ diyolo’ apasi. Iyolo’ noo ot apasi, om iri nopondo pomogunan om osiliu i’ do tana’ dit a’ sunian. ¹⁷ Ko’ poporikot oku pod pisangadan dot id pomogunan diri, om porikot oku do rapo-rapo do don sumasangod di mamaraag om momunso do tulun om nintorusan. ¹⁸ Om mulong piya do poingiyon daa’d hilo’ i tolu o tulun diri, nga’ sumumpa’ oku no dot id suang do ngaran ku, iyoho’ i Kinorohingan di poimpasi, i TUHAN dit Asawat Kopio, dot a’ i’ iyolo’ milo do mamasi dot isai nopo, dot iri piya i tangaanak diyolo’, nga’ a’ i’ apasi. Tu’ iyolo’ noo ot apasi. ¹⁹ Ko’ poporikot oku do toruol di mogkoroliu dot id pomogunan diri, om pourobusan ku do kototogod ku, gisom do patayon ngai’ ku nopo o tulun om nintorusan. ²⁰ Om mulong piya daa do poingiyon i Nuu, om i Danil om i Ayub do hilo’, nga’ sumumpa’ oku no dot id suang do ngaran ku, iyoho’ i Kinorohingan di poimpasi, i TUHAN dit Asawat Kopio, dot a’ i’ iyolo’ kapasi do tulun do suwai, tu’ iri piya tangaanak diyolo’ nga’ a’ i’ diyolo’ apasi. Diyolo’ nod ginawo ot apasi di kosonongo’ diyolo’,’’ ka dau. ²¹ Poingkaa no o boros do TUHAN, it Asawat Kopio, ’’Porotuon ku nondo it apat o hukuman ku dit awagat kopio dot id Yorusalim do mamatai do tulun om nintorusan: pisangadan, om mononglous, om nintorusan dit orongit om toruol. ²² Om ondung haro o toolu-olu’ diyolo’ om i kapasi do tangaanak diyolo’, om antangan no kopio iyolo’ do mongoi iyolo’ solowot diya’. Antangan no i kararaat diyolo’, om kopuriman indo i tulun ku dot apatut i’ i hukuman do pinorikot ku dot id Yorusalim. ²³ Om oilaan nogindo diyolo’ dot otopot ngai’ i’ i paantakan do kinapamansayan ku do miagal diri. Iyoho’ no, i TUHAN, it Asawat Kopio, o minomoros diti,’’ ka dau.

¹ Om boro-boros no o TUHAN dot id doho’ do poingkaa, ² ’’Oi tulun, nunu o pisuayan do guas dot anggur om i guas do kayu’d suwai do hilo’d gouton? Nunu o poimaha’ di guas dot anggur do pataladon di kokoyuan do hilo’d gouton? ³ Milo toi i guas dot anggur diri do wonsoyon do nunu nopo? Milo toi iri do wonsoyon do pososoitan do pakakas? ⁴ Iri nopo om milo nod maan do siduwon om aiso’ no o guna’d suwai ko’ iri, om osorob nopondo o misingompok om oohun o hiri’d tanga-tanga’ om haro po tuu o guna’ddi? ⁵ Aiso’! Tontok piya dit a’ po otutudan nga’ aiso’ mantad no o guna’ddi. Om okon-okon poddi do nosorob om nouu,’’ ka dau. ⁶ Om gowoi poddi om poingkaa o poboroson do TUHAN, it Asawat Kopio, ’’Poingkuro nopo i guas dot anggur dot onuon do mantad hilo’d talun om tutudan nondo, om iyo nogiddi o wonsoyon ku dot id tulun di hilo’d Yorusalim! ⁷ Om hukuman ku nondo iyolo’. Nokopoggidu’ piya daa iyolo’ do mantad id tapui di koinsan i’ nga’ tapui kasai’ indo o monorob diyolo’ do baino’. Om koilo nogindo iyolo’ dot iyoho’ no o TUHAN. ⁸ Silihon ku nondo o pomogunan diti do tana’ dit a’ sunian tu’ a’ i’ iyolo’ tuminorodok dot id doho’. Iyoho’ no, i TUHAN it Asawat Kopio, o minomoros diti,’’ ka dau.

¹ Om boro-boros po kawagu o TUHAN dot id doho’ do poingkaa, ² ’’Oi tulun, pointalango’ no dot id Yorusalim i nongowonsoi dau dit araat kopio,’’ ka. ³ Om suhuo’ oku nod TUHAN, it Asawat Kopio, do popoboros do boros diti dot id Yorusalim, ’’Oi Yorusalim, iya’ nopo om pinaganak do hilo’d pomogunan do Kanaan. Tapa’ nu nopo om tulun dot Amori om tina’ nu no om tulun do Hit. ⁴ Tontok nopo di pinogkosusu ko, om aiso’ i’ o minongimpusod diya’, om aiso’ o minomodsu’ diya’, om aiso’ o minomoluhad diya’d silaon, om aiso’ o minongumut diya’. ⁵ Aiso’ i’ o songulun piya do nosianan diya’ do gisom do sipomonsoi do miagal diri dot id diya’. Tontok di pinogkosusu ko, om aiso’ i’ ot osianan diya’. Pataamo’ ko nopo do hiri’d talun. ⁶ Om talib oku noddi om kokito tiya’ no do mura-gura’ do poirrolot di raha’ nu. Notongkop ko po daa’d raha’, nga’ mada’ oku i’ do matai ko. ⁷ - ⁹ Om ongoi oku noddid waig om isuo’ ku no i raha’ dot id tinan nu. Om luhado’ ku’d tumau do saitun o tinan nu. Om pogoyoo’ ku no iya’ do miagal do tanom dit orombung o sunion. Om oruuhai ko’d suminuni, om osonong o tinan nu om aranggou ko, om nokosumandak ko. Om gumayo noddi o susu nu om anaru o tobuk nu, nga’ poillabas ko i’. Om soira’ddi tuminalib kawagu oku, om kokito ku no do norikot no o maso nu do monokiuhang-uhang. Om porosukai ku no diya’ i rasuk ku tu’ poillabas ko i’ om pamatos oku nod papatahak do kosianan ku dot id diya’. Pinogirot ku o batos ku do mangawin diya’, om nosiliu ko do doho’d songonuon. Iyoho’ no, i TUHAN it Asawat Kopio, o minomoros diti. ¹⁰ Om rosukai tiya’ noddi do gaun di rinindaan om nonuan ku iya’ do kasut di kulit dit osonong kopio do winonsoi, om kulu do kain linan, om kulabai do sutara’. ¹¹ Om nonuan ku iya’ do watu dot olumis dit agayo o gatang, om nonuan tiya’ do golong om karo do maan do pongillumis. ¹² Nonuan ku iya’ do tanting do todung, om tanting do tolingo om tupi’ do dong raja’ dit olumis. ¹³ Pongillumis nu nopo om tamas ngai’ nopo om pirok do winonsoi, om posokoton nu nga’ kain linan kasai’ nopo om sutara’ di norindaan. Roti di kanon nu nga’ tapung kasai’ nopo dit osonong kopio o wonsoyon, om haro o paha’ om tumau do saitun do kanon nu. Kosorong poo o kolumiso’ nu om nosiliu ko’ddi do raja’d tondu’. ¹⁴ Om nabantug ko’ddi dot id pointikid-tikid do bansa’ tu’ i kolumiso’ nu dit aiso’ o bohiton o pinapabantug diya’, om iyoho’ no o pinopolumis diya’. Iyoho’ no i TUHAN, it Asawat Kopio, o minomoros diti. ¹⁵ Nga’ pinokirayahan nu i’ i kolumiso’ nu om i kobontugo’ nu, om duminudun ko’d modop dot isai nopo o tongokusai di katalib. ¹⁶ Nanu nu’ddi o wookon di rasuk nu do pinongillumis di tiyonon nu do tumuku’ dot id tingolig nu, om patahako’ nu nopo o tinan nu dot id koinsanai di tongokusai, do miagal po di tondu’d sundal. ¹⁷ Om nongoi nu i pongillumis di tamas om pirok do winonsoi, i pinatahak ku diya’, om winonsoi nu’ddi iri do piro-piro o tininganak do kusai, om minonokiampahu’ ko’ddi di tininganak diri. ¹⁸ Om ngoyo’ nu no i rasuk di rinindaan di tinahak ku diya’ om porosukai nu no di piro-piro o tininganak, om pinatahak nu diyolo’ i tumau do saitun om i kominyan di pinatahak ku diya’. ¹⁹ Nonuan ku iya’ do takanon dot i tapung dit osonong no kopio o winonsoi, om i tumau do saitun dit osompipi’, om paha’, nga’ pinosubak ngai’ nu i’ iri do numaan do porsombahan do pomolumbok do ginawo di piro-piro o tingolig. Iyoho’ no, i TUHAN it Asawat Kopio, o minomoros diti. ²⁰ Om ngoyo’ nu noddi i tangaanak to’d kusai om tondu’ om patahako’ nu no do numaan do porsombahan di sumbolion dot id tingolig. A’ toi ula’ no o karaato’ dot a’ tumorodok dot id doho’, ²¹ dot a’ piya daa ngoyon i tangaanak to do patahakon dot id piro-piro o tingolig? ²² Tontok di maso nu’d sundal, i koposi-posion nu di kososomu’ kopio, om a’ nu i’ insan kosorou i nosiliu dot id diya’ di tanak ko po, do tontok di poillabas ko po, om mura-gura’ ko po do poirrolot di raha’ nu,’’ ka dau. ²³ Om boros kad TUHAN, it Asawat Kopio, ’’Nobungou ko no! Nobungou ko no kopio! Tu’ piningwonsoi ngai’ nu i’ it angaraat. ²⁴ Pomonsoi ko pod tiyonon do tumuku’ dot id tingolig do hilo’d toning do ralan om pagampahu’ ko nogi’. ²⁵ Sinosomu’ nu i kolumiso’ nu. Om isai nopo i tongokusai do tumalib nga’ patahakan nu no do tinan nu. Om muhang-ruhang nopoddi o kosusundal nu do pointikid do tadau. ²⁶ Pinologos nu i tulun do Masir, i songkoduwo nu dit ongoorot-orot kopio om i bonduwon do mongoi dudun diya’d modop. Om iri no i kosusundal nu o pinoningkau nu do kototogod ku. ²⁷ Om baino’ noddi om iduwon ku no i bahagi’ di barakat ku, om hukuman tiya’ nondo. Om nakatahak ku no iya’ dot id tulun do Pilistin, it araatan diya’ om i sosomuan do kokito dino kowoyo-woyoon nu do sosomu’. ²⁸ A’ ko i’ ouru-uru di suwai, om ongoi ko poddi gusa’ di tulun dot Asur. Om nosiliu ko’ddi do sundal diyolo’ nga’ iyolo’ piya nga’ a’ i’ nokouru diya’. ²⁹ Om nokoumbal ko i’ do suminiliu’d sundal dot id tulun do Babil, i bansa’ do dumadagang diri, nga’ iyolo’ piya nga’ a’ i’ nokouru diya’,’’ ka dau. ³⁰ Poingkaa no o boros do TUHAN, it Asawat Kopio, ’’Miagal ko po di sundal dit aiso’ o tingayam do miningwonsoi ngai’ddi. ³¹ Tikido’ nu nopo i ralan do winansayan do tiyonon do tumuku’ dot id tingolig om iyonon do minsundal. Nga’ okon i’ ko’ tusin o tihumon nu do miagal di sundal do koubasanan. ³² Nga’ iya’ nopo om miagal do tondu’ di magampahu’ dot id kusai’d suwai om a’ nogi’ orohian di dau’d sawo. ³³ Iri nopo sundal om bayaran i’, nga’ iya’ nopo om minomuhawang nogi’ do koinsanai di kongouhangan nu om sinisipan nu iyolo’ do tusin, om rumikot indo iyolo’ do mantad id piro-piro o kinoiyonon do mongoi dudun diya’d modop. ³⁴ Suwai-suwai no kopio o diya’d kosusundal. Tu’ aiso’ i’ o minononsog diya’ do sumiliu’d sundal. Om a’ ko binayaran; tu’ iya’ nogi’ o minambayar diyolo’! Suwai-suwai ko no kopio iya’!’’ ka dau. ³⁵ Iyo nopoddi om pokinongoho’ no iti boros do TUHAN, it Asawat Kopio, oi Yorusalim, i sundal! ³⁶ Poingkaa no o boros do TUHAN, it Asawat Kopio, ’’Nidu’ ngai’ nu i rasuk nu, om pinatahak nu o tinan nu dot id kongouhangan nu om id koinsanai di tingolig nu di kososomu’ kopio, om pinatai nu i tangaanak nu do siniliu’d porsombahan dot id piro-piro o tingolig nu. ³⁷ Gowoi poddi om porikoton ngai’ ku nondo i tuhang-uhang nu di gulu po, i korohian nu om i karaatan nu. Om songintutuk nopondo diya’ iyolo’ do songingkakat, om labasan tiya’ nogindo om kokito i’ iyolo’ diya’ do poillabas. ³⁸ Om pasalaon ku nondo iya’ tu’ i tampahu’ nu om i minamatai ko o kapasalaan ku. Om hukuman ku iya’ do kapatayon tu’ atatagadan oku no om alasu’ o ginawo ku. ³⁹ Om posuangon ku nondo iya’ dot id kuasa’ diyolo’, om huyason nondo diyolo’ i tiyonon nu do magampahu’ om tumuku’ dot id tingolig. Om onuon ngai’ nondo diyolo’ i pakayan nu om i pongillumis nu, gisom do poillabas ko pondo tomod. ⁴⁰ Om suhuon nondo diyolo’ i tulun dot ogumu’ do momodumpau diya’d watu, om pimpopoton ko nondo diyolo’ di gayang diyolo’. ⁴¹ Om tutudan nondo diyolo’ i walai nu om pologoson o tongoondu’ dot ogumu’ do miontong di pomohukum diya’. Om tingkodon ku nondo iya’ do magampahu’ om tingkodon ku iya’ do papatahak dot ipuhawang dot id kongouhangan nu. ⁴² Om katalib pondo o kototogod ku, om koundorong oku nogindo. Om a’ oku nondo otogod om a’ oku moguhang. ⁴³ Nolihuan nu i pinomogompi’ ku diya’ dit okoro’ ko po, om hinukuman ku’ddi iya’ tu’ i piningwonsoi nu o kinopomohukuman ku, om pinotogod oku diya’ dino pingwonsoyon nu dit angaraat. Nokuro toi tu’ ruhangan nu pod tampahu’ o koinsanai di piningwonsoi nu do kososomu’ kopio? Iyoho’ no, i TUHAN it Asawat Kopio, o minomoros diti,’’ ka dau. ⁴⁴ Boros kad TUHAN, ’’Popimboroson nondod tulun o suriban diti do pasal diya’, oi Yorusalim, ’Poingkuro nopo i tina’ om iyo noddi i tanak dau,’ ka nondo diyolo’. ⁴⁵ Tanak ko no kopio’d tondu’ di tina’ nu. Tu’ araatan iyau do kokito di sawo dau om i tangaanak dau. Om miagal ko nopo di tongotobpinai nu’d tondu’ tu’ araatan di sawo diyolo’ om i tangaanak diyolo’. Tina’ nu nopo om i tongotobpinai nu, iri no i piro-piro o bandar do suwai, om bansa’ do Hit, om tapa’ no dokoyu om i bansa’ dot Amori. ⁴⁶ Taka’ nu nopod tondu’ om Samaria, i ponong hilo’d utara, om i kawalayan do hilo’. Om tadi’ nu nod tondu’ om Sodom. Om koinsanai di kawalayan do hilo’, i ponong hilo’d salatan. ⁴⁷ Nabagalan ko no toi do tuminanud di diyolo’d kowoyo-woyoo’ om minomit di pingwonsoyon diyolo’ di kososomu’ kopio? Amu’, tu’ a’ no alaid om araat po ko’ i diyolo’d kowoyo-woyoo’ o koinsanai di diya’d wowonsoyon,’’ ka dau. ⁴⁸ Boros kad TUHAN, it Asawat Kopio, ’’Sumumpa’ oku no, dot id suang do ngaran ku, i Kinorohingan di poimpasi, dot a’ nogi’ kopio insan pomonsoi i tobpinai nu; i Sodom om koinsanai di kawalayan do hilo’, di karaaton do miagal di diya’d winonsoi om i kawalayan nu. ⁴⁹ Oondos tomod o Sodom om i kawalayan do hilo’ tu’ osima’ i’ iyolo’d kanon om osimbayan do momogun-mogun tu’ aiso’ no o kagangau, nga’ a’ i’ iyolo’ minomogompi’ di tulun do mosikin om i tulun dot oinggorit. ⁵⁰ Ongoondos kopio iyolo’ om ongosurilog om mingwonsoi di katagadan ku om gowoi poddi om rinaag ku iyolo’; om iya’ nga’ koilo iddi. ⁵¹ A’ i’ kosongintanga-tanga’ di diya’d dusa, o dusa do Samaria. Om araat ko no kopio iya’ ko’ iyau. Om pitaladon kou nopo nga’ miagal pod aiso’ o kasalaan di piro-piro o tobpinai nu’d tondu’ do katalad di diya’d kararaat. ⁵² Om baino’ noddi om boboon nu no o kointingayamo’ nu. Tu’ araat no kopio i diya’d dusa ko’ mantad di dusa di piro-piro o tobpinai nu’d tondu’, om gisom do miagal pod aiso’ o kasalaan diyolo’ dot ataladan di diya’d dusa. Kointingayamai no om boboon no o tingayam nu tu’ miagal pod aiso’ o bohiton di piro-piro o tobpinai nu do katalad diya’,’’ ka dau. ⁵³ Om boros kad TUHAN dot id Yorusalim, ’’Tondulion ku indo om posimbayanon ku kawagu o Sodom om i kawalayan do hilo’, om Samaria om i kawalayan do hilo’. Om iya’ nogi’ nga’ tondulion ku i’ om posimbayanon ku kawagu. ⁵⁴ Om ointingayaman ko nondo, om iri no i kointingayamo’ nu o popointalang do nokoundar ngai’ i tobpinai nu’d tondu’. ⁵⁵ Om osimbayan nondo kawagu iyolo’ om iya’ om i kawalayan nu nga’ otonduli’ indo kawagu. ⁵⁶ A’ ko toi minomohingi-hingi do Sodom do tontok dit oondos ko po om tontok dit a’ po nokointalang i karaato’ nu? ⁵⁷ Baino’ nopoddi om miagal ko nopo dau tu’ tiirak-irak po di tulun dot Idom, om i tulun do Pilistin, om i songkoduwo nu’d suwai dit araatan diya’. ⁵⁸ Om mositi’ no dot oinggorit ko tu’ sosomu’ i’ kopio om koindaraat tomod i nowonsoi nu. Iyoho’ no i TUHAN o minomoros diti,’’ ka dau. ⁵⁹ Boros kad TUHAN, it Asawat Kopio, ’’Wonsoyon ku nondo dot id diya’ o miontok di nowonsoi nu, tu’ a’ nu i’ sinulung om tinolibambanan nu i tumpongo ku. ⁶⁰ Nga’ pusohon ku i’ i tumpongo di pinoumpongo ku diya’ dit okoro’ ko po, om momonsoi oku do tumpongo di poingompus dot id diya’. ⁶¹ Om osorou nu nondo i kowoyo-woyoon nu om ointingayaman ko do koguli’ i taka’ nu om i tadi’ nu’d tondu’. Om silihon ku nondo iyolo’ do miagal do tanak nu’d tondu’, do mulong piya dot a’ i’ daa iri poinsuang di tumpongo ku dot id diya’. ⁶² Om inwoguan ku nondo i tumpongo ku dot id diya’ om oilaan nu nogindo dot iyoho’ no o TUHAN, ⁶³ om ompunan ngai’ ku nondo i kasalaan do nowonsoi nu, nga’ osorou kasai’ nu indo ngai’ iri, om a’ ko nondo milo do momoros do nunu nopo tu’ ointingayaman ko po. Iyoho’ no i TUHAN it Asawat Kopio, o minomoros diti,’’ ka dau.

¹ Om boro-boros no o TUHAN dot id doho’ do poingkaa, ² ’’Oi tulun, sunudan no i tulun dot Israil do poinukadan diti, ³ do popoilo diyolo’ do poboroson ku, iyoho’ i TUHAN, it Asawat Kopio, dot id diyolo’: Haro o kondiu dot agayo di kitalad dot olumis om agayo om okoris. Om tulud nori do kuminaa do hilo’d konuluhanan do Libanon om ponipu’ no do tunduk do kayu sedar. ⁴ Om tanggayai no dau iri do hiri’d bandar dit ogumu’ o tulun do dumadagang. ⁵ Om ongoi noddi iyau panganu do sompuun o totonomon dit okoro’ po do mantad hilo’d pomogunan dot Israil, om potonomo’ no dau iri do hiri’d tana’ dit oruak, it opiyopos kasai’ do waig. ⁶ Om suni no i tinanom diri, om guas iddi dot anggur dit osiriba’. Om agayo o kinoroloyon di raan. Om kuminawas diri i raan diri do pointuduk ponong id kondiu’ddi, om nokogirot tomod o gamut diri do hiri’d tana’. Om okohob tomod o tuntu di guas dot anggur diri. ⁷ Om haro po kawagu o kondiu dit agayo om alaab o talad om akapal o hulu. Om poroloyo’ no di guas dot anggur o gamut dau do poinroloi do ponong id kondiu’ddi, om pinotimbaba’ ngai’ i raan dot id kondiu’ddi, tu’ mokimamaha’ dot oonuan do waig dit agayo ko’ mantad di hiri’d kabun di pinatanaman dau. ⁸ Nga’ iri nopo guas dot anggur diri om nakatanom no dot id tana’ dit oruak, om osima’ do waig, om okohob diri o tuntu, om mongua’ dot asapou, om nosiliu do guas dot anggur dit osonong kopio. ⁹ Om ponguhot oku noddi, iyoho’ i TUHAN, it Asawat Kopio, do poingkaa: Sumuni i’ tuu om kumohob i’ ilo guas dot anggur dilo’? A’ i’ tuu di kondiu dit id gulu, ngoyon utuso’ ilo’, om ngoyon upuo’ i tua’, om ngoyon tipuo’ i raan do gisom dot oriou? Tu’ a’ i’ mokimokoris do tulun om a’ mokimokoris do bansa’ do mongutus diri. ¹⁰ Apanggor nogi’ o pinananom diti, nga’ sumuni i’ tuu om kumohob iti? A’ i’ tuu rumiou iti dot oontok di tongus do mantad id koulayon? A’ i’ tuu rumiou ilo’ do hilo’d pinatanaman do dinondo?’’ ka dau. ¹¹ Om boros kad TUHAN dot id doho’, ¹² ’’Uhoto’ daa iti sumosongkiwal ondung koilo iyolo’ do komoyon di poinukadan diri. Sunudan no iyolo’, do minongoi’d hilo’d Yorusalim i raja’ do Babil om tinanggayan dau i raja’ do Yohuda om i piro-piro o pagawai do Yohuda do kuminaa do hilo’d Babil. ¹³ Om ngoyo’ no dau o songulun do mantad hiri’d sompiiyon di raja’ do Yohuda’ddi, om ponokiumpongo no iyau dau, om suhuo’ no dau iyau do sumumpa’ do tumorodok dot id dau. Om tinanggayan di raja’ do Babil i tulun dit angabantug. ¹⁴ Om a’ indo koingkakat i bansa’ do Yohuda om ogirot nondo om osulung i piniumpangaan diri. ¹⁵ Nga’ suminaap i’ i raja’ do Yohuda om minonuhu’ nogi’ iyau’d tulun do minongoi’d hilo’d Masir do mongoi panganu do kuda’ om soudor dit ogumu’. Kamanang i’ tuu iyau’ddi? Milo i’ tuu iyau do mogidu’? Ondung rinaag dau i piniumpangaan diri om atantu’ no dot ohukuman iyau. ¹⁶ Sumumpa’ oku no, dot id suang do ngaran ku, iyoho’ i Kinorohingan di poimpasi, i TUHAN dit Asawat Kopio, dot apatai nondo i raja’ do Yohuda do hilo’d Babil, tu’ a’ i’ dau sinulung i sumpa’ om i tumpongo di pinoboros dau dot id raja’ do Babil, i pinoposiliu dau’d raja’. ¹⁷ Om iri piya i piro-piro o soudor do Masir dit okoris nga’ a’ no milo do monguhup dau do sumaap di tulun do Babil. Tu’ momonsoi nondo iyolo’ do tolig do ponurungku’, om mongukad do parit, om ogumu’ i’ o tulun dot apatai’d hiri. ¹⁸ A’ dau sinulung i sumpa’ dau om i tumpongo do winonsoi dau. Om a’ no iyau kopoggidu’ tu’ winonsoi i’ dau o miagal diri,’’ ka dau. ¹⁹ Boros kad TUHAN, it Asawat Kopio, ’’Sumumpa’ oku no, dot id suang do ngaran ku, i Kinorohingan di poimpasi, do hukuman ku no i raja’ do Yohuda tu’ a’ i’ dau sinulung i tumpongo di pinoboros dau dot id suang do ngaran ku dot id raja’ do Babil. ²⁰ Om pataanon ku nondo o lawa’ om atangkap ku i’ iyau. Om tanggayan ku nondo iyau do hilo’d Babil om hukuman ku iyau’d hilo’ tu’ a’ i’ iyau tuminorodok dot id doho’. ²¹ Om angapatai ngai’ nondo i soudor dau dit ongosiou dot id pisangadan, om iri no i toolu-olu’ om pointongkop nopondo o kotompiason. Om oilaan nogindo di tulun ku dot iyoho’ no i TUHAN, o minomoros diti,’’ ka dau. ²² Iti no pinoboros do TUHAN, it Asawat Kopio, ’’Onuon ku nondo i tunduk do kayu sedar dit akawas om monipu’ oku do raan dit okooro’; om tonomon ku nondo iri dot id nuluhon dit akawas. ²³ Potonomon ku’ri dot id nuluhon dot Israil dit akawas kopio. Om momuraan nondo iri om mongua’ om osiliu do kayu sedar dit akawas. Om mogisuayan nopondo o tombolog do miyon do hiri om mintulungung do hiri’d dolungungan diri. ²⁴ Om oinsanan nopondo i kayu do hiri’d pomogunan diri do koilo dot iyoho’ no o TUHAN. Tagadon ku nondo i kayu dot angakawas om posunion ku do gisom dot angakawas i kayu dit ongoniiba’. Riohon ku nondo i kayu dot ongotomou om potolidon ku om pokohobon ku i kayu di nongoriou. Iyoho’ no i TUHAN, o minomoros diti. Om wonsoyon ku i’ o miagal di pinoboros ku do wonsoyon ku,’’ ka dau.

¹ Om boro-boros no o TUHAN dot id doho’ do poingkaa, ² ’’Nokuro tu’ pinghulitan kopio iti suriban diti do hilo’d pomogunan dot Israil? ’Iri molohing o mangakan di tua’ dot oonsom, nga’ iri nondo tangaanak ot angaro,’ ka no diyolo’. ³ Sumumpa’ oku, dot id suang do ngaran ku, iyoho’ i TUHAN it Asawat Kopio, dot a’ nondo pinghulitan iti suriban do hilo’d Israil. ⁴ Tu’ iyoho’ ngai’ i’ o sanganu do ginawo’d tulun, i ginawo di molohing om i ginawo di tanak dau. Om isai nopo i kowonsoi’d dusa om iri no o matai. ⁵ Ondung haro o tulun dit osonong, om it otopot om it otulid o ginawo, ⁶ om a’ i’ iyau tumuku’ dot id tingolig do tulun dot Israil om a’ iyau mangakan di taakanon di nokosubak dot id podsusubakan do tingolig. Om a’ iyau insan ongoi pangasou do sawo do kusai’d suwai om a’ iyau mongoi dudun do tondu’ di maso’d pomulanan. ⁷ Om a’ iyau insan do monipu’, om a’ manakau. Om pogulion kasai’ dau i konunu-nunuan di pinasanda’ do tulun di kiutang dot id dau. Om paakanon dau i tulun do louson om onuan dau do pakayan i tulun dit aiso’ o pakayan. ⁸ Om a’ iyau mokibunga di paalasan dau. Om a’ iyau momonsoi dot araat, om otulid kasai’ o pomumutus dau do nunu nopo o pisongkiwalan. ⁹ Mumboyo’ i’ iyau do ponuhuan ku om tumanud dit oturan ku. Om tulun no do miagal diri ot otulid o ginawo om apasi. Iyoho’ no i TUHAN it Asawat Kopio, o minomoros diti. ¹⁰ Nga’ ondung kianak o tulun diri, om iri nopo tanak dau nga’ manakau om mamatai, om mingwonsoi nopo dit angaraat do suwai ko’ iri, ¹¹ it a’ di tapa’ dau insan kowonsoi. Om mangakan iyau do taakanon di nokosubak dot id podsusubakan do tingolig. Om mongoi iyau ponugku’ om mongoi dudun do sawo do kusai’d suwai. ¹² Om monipu’ iyau di tulun do mosikin, om manakau om onuon dau i konunu-nunuan di pinasanda’ do tulun di kiutang dot id dau. Om mongoi iyau do hiri’d podsusubakan do tulun dit a’ kotutun do TUHAN, om tumuku’ iyau dot id tingolig di kososomu’ kopio. ¹³ Om mokibunga iyau di tusin di paalasan dau. Apasi i’ tuu o tulun do miagal diri? Amu’, a’ i’ iyau apasi. Tu’ nowonsoi ngai’ no dau i wowonsoyon di kososomu’ kopio om poingkuro piya nga’ matai kasai’ no iyau! ¹⁴ Om ondung kianak i tulun di miningwonsoi dot araat diri, om nokito ngai’ di tanak i dusa di piningwansayan di tapa’ dau nga’ a’ i’ iyau minomit diri. ¹⁵ Om a’ i’ iyau tumuku’ dot id tingolig di tulun dot Israil, om a’ iyau mangakan di pinosubak dot id podsusubakan do tingolig. Om a’ iyau mongoi pangasou do sawo do kusai’d suwai. ¹⁶ Om a’ iyau mongulok-ulok dot isai nopo om a’ iyau manakau. Om pogulion dau i konunu-nunuan di pasandaon do tulun di kiutang dot id dau. Om paakanon dau i tulun di louson, om onuan dau do pakayan i tulun dit aiso’ o pakayan. ¹⁷ Om a’ iyau insan do momonsoi dot araat om a’ mokibunga di tusin di paalasan dau. Om a’ i’ i tanak diri apatai dot obungou di dusa di tapa’ dau, suwai ko’ apasi i’ iyau. ¹⁸ Nga’ iri nopo tapa’ dau, i minonipu’ om minanakau, om i miningwonsoi dot araat do suwai ko’ iri, om apatai no dot obungou di dusa dau. ¹⁹ Nga’ haro i’ doti’ daa o tulun do muhot ondung nokuro tu’ a’ humompit i tanak do mamabo di dusa di tapa’ dau. Om isimbar nopoddi nga’ iri nopo tanak om osonong i’ om otulid o ginawo. Tinanud i’ dau it oturan ku om otorodok i’ om otulid o ginawo. Tinanud i’ dau it oturan ku om otorodok iyau do minumboyo’ddi, om atantu’ no dot apasi i’ iyau. ²⁰ Isai nopo o tulun di momonsoi’d dusa om iri no ot apatai. A’ i’ apatut do mamabo’ i tanak do kootuson di dusa di tapa’ dau, om i tapa’ nga’ a’ i’ apatut do mamabo do kootuson di dusa di tanak dau. Tu’ tulun nopo dit osonong om somulian no dot osonong tu’ minomonsoi i’ iyau dit osonong. Om tulun no dit araat om oinggorit no tu’ araat i’ o winonsoi dau. ²¹ Ondung tumingkod do momonsoi’d dusa i tulun dot araat, om tumanud nondo dit oturan ku, om ondung momonsoi nondo iyau dit otopot om osonong, om a’ no iyau apatai. ²² Om oompunan ngai’ indo o dusa dau; om apasi iyau tu’ otopot i’ o winonsoi dau. ²³ Ondos nu daa om orohian kopio oku iyoho’ i TUHAN, it Asawat Kopio, do kokito di tulun dot araat dot apatai? A’ oku i’ kopio orohian! Tu’ orohian oku nogi’ kopio do kokito dau do tumongkiad di dusa dau om apasi i’ iyau. ²⁴ Nga’ ondung haro o tulun dit osonong, do tumingkod do momonsoi dit osonong, tu’ momonsoi nogindo iyau dit araat, om i kososomu’ kopio, i koubasanan do tulun dot araat do mingwonsoi, om apasi kasai’ po tuu i tulun diri? Amu’! Tu’ aiso’ nondo o tiso’ po di winonsoi dau dit osonong do sorohon kawagu. Om apatai nondo iyau tu’ minomonsoi i’ iyau’d dusa om a’ tuminorodok dot id doho’. ²⁵ Om haro i’ doti’ o momoros do poingkaa, ’A’ i’ otulid i winonsoi’d TUHAN!’ ka. Pokinongou kou no, oi tulun dot Israil! A’ toi otulid i winonsoi ku? Iyokoyu nogi’ it a’ otulid o wonsoyon. ²⁶ Soira’ nopod tumingkod i tulun dot osonong do momonsoi dot osonong, tu’ momonsoi nogindo iyau dit araat, om apatai no iyau, tu’ araat i’ o winonsoi dau. ²⁷ Nga’ ondung tumingkod i tulun dot araat do momonsoi’d dusa, om momonsoi nondo iyau dit otopot om it osonong, om apasi no iyau. ²⁸ Tu’ nopurimanan ngai’ no dau i wonsoyon dau, om tumingkod nondo iyau’d momonsoi’d dusa. Om atantu’ no dot a’ iyau apatai suwai ko’ apasi no iyau. ²⁹ Om boros ka daa dokoyu, oi tulun dot Israil, ’A’ otulid iti wonsoyon nu oi TUHAN,’ ka. Nga’ ino nogi’ dokoyu’d wonsoyon ot a’ otulid,’’ ka dau. ³⁰ Om boros kad TUHAN, it Asawat Kopio, ’’Oi tulun dot Israil, butusan ku nondo o pointikid-tikid do tulun do miontok di nowonsoi dau. Rologo kou no di dusa dokoyu. Om kada’ pologoso’ ino dusa dokoyu do mamaraag do koposi-posion dokoyu. ³¹ Tingkadai ngai’ no dokoyu o koinsanai dit araat di pingwonsoyon dokoyu, om pologoson no do koinwagu o pomusorou om ginawo dokoyu. Nokuro toi tu’ uhang dokoyu’d matai kou? ³² A’ oku i’ orohian do haro ot ongoiso’ piya’d tulun dot apatai. Tongkiadai ngai’ no dokoyu i dusa dokoyu, om apasi kou i’. Iyoho’ no, i TUHAN it Asawat kopio, o minomoros diti,’’ ka dau.

¹ Om suhuo’ oku nod Kinorohingan do modsinding diti sinding do pogihad, do pogihad do duwo o raja’ dot Israil: ² Tina’ nu nopo om iyo po di singa do tondu’ dit oilo kopio om i suwai kopio ko’ i koubasanan. Ginompi’ dau i tangaanak dau dot id rolot do singa dit ongorongit. ³ Tinudukan dau o tiso’ di tanak dau do mongintorus; om nosiliu’ddi iyau do singa dit orongit om i mangakan do tulun. ⁴ Om iri nopo piro-piro o bansa’ do nokorongou do pasal dau, om popouni no do tuunion di popoilo do haro o koligagaanan. Om kosuang no iyau dot id luang, om tangkapo’ noddi, om godingai noddi diyolo’ iyau om gayato’ no do hilo’d Masir. ⁵ Om andad nopo daa i molohing di singa, di tanak dau, om koilaai noddi dau dot aiso’ no ot andadon dau. Om tudukai no dau i tanak dau di suwai, do sumiliu’d singa dit orongit om okoris. ⁶ Om soira’ di nakagayo i tanak di singa’ddi, om rolot no iyau di singa do suwai. Om mininsingilo iyau do mongintorus, om suminiliu do mangangakan do tulun. ⁷ Minomohuyas iyau do kuta’ do pogintirungan, om minamaraag iyau do piro-piro o bandar. Om ongooris ngai’ nopo i tulun do hiri’d pomogunan do nokorongou di garom dau. ⁸ Om pogisokodung ngai’ no i bansa’ do mongoi saap dau. Honggo nopo o tadon nga’ nokorikot ngai’ no. Om pataano’ no diyolo’ i garing do panganu dau, om kaanu no diyolo’ iyau. ⁹ Om pokurungo’ no diyolo’ iyau do hiri’d kukurungan do singa om pootodo’ no do hilo’d pomogunan do Babil, do nongoi posolowoto’ di raja’. Om tamangai no kopio diyolo’ iyau, om a’ i’ orongou kawagu i garom dau do hilo’d konulu-nuluan dot Israil dit angakawas. ¹⁰ Iri nopo tina’ nu nga’ miagal pod guas dot anggur do pointanom do hiri’d kabun dit id toning do luyu’. Om orombung o sunion diri om mongua’ tu’ osima’ i’ do waig o hiri. ¹¹ Iri nopo raan dau nga’ ongokodou, om a’ obintipu’, gisom do nosiliu do sukud do raja’ di momorinta’. Om kuminawas i tuntu dau do nokorikot do hilo’d haun, om koimayaan ngai’ nopo iyau’d tulun tu’ akawas i’ iyau om okohob o tuntu dau. ¹² Nga’ nongoi iddi iyau utuso’ do longon di tulun dit otogod, om lonoto’ no di ribut do mantad id koulayon i tua’ dau. Om iri raan dau nga’ nongotipu’, om koriou noddi om tutudai no. ¹³ Om baino’ noddi om pointanom iyau do hilo’d tana’ do kowotuan, i tana’ dit otuu om aiso’ o waig. ¹⁴ Om kotutudai no i guas dot anggur diri, om kosorob ngai’ nopo i raan om i tua’ dau. Om a’ noddi okodou i raan dau, om a’ no milo’d silihon do sukud do raja’ di momorinta’. Iti no o sinding do pogihad di pihulit-hulit di tulun do modsinding.

¹ Tontok nopo di tadau’d kohopod do tulan di kolimo, di koturu’ nod toun dahai dot id pomogunan do pisangod, om haro’ddi o piro-piro di boyoon do tulun dot Israil do minongoi ponguhot doho’ ondung poingkuro o korohian do TUHAN, om irikau no iyolo’ dot id toguang ku. ² Om boro-boros noddi o TUHAN doho’ do poingkaa, ³ ’’Oi tulun, boro-boros no dot id piro-piro o boyoon diri om sunudan no iyolo’ diti poboroson ku, iyoho’ i TUHAN, it Asawat Kopio do poingkaa: Minongoi kou daa uhot ondung poingkuro o korohian ku koii? Nga’ sumumpa’ oku no dot id suang do ngaran ku, i Kinorohingan di poimpasi, dot a’ ku i’ iyokoyu pologoson do monguhot doho’ do nunu nopo. Iyoho’ no i TUHAN, it Asawat Kopio, o minomoros diti. ⁴ Oi tulun, nokosodia’ ko nod paratu’ do hukuman dot id diyolo’? Ondung nokosodia’ ko om wonsoyo’ no o miagal diri. Posoroho’ no iyolo’ di piningwansayan di komolohingan diyolo’ di koindaraat tomod di gulu po. ⁵ Sunudan no iyolo’ diti poboroson ku. Tu’ tontok di pinili’ ku ot Israil, om minomonsoi oku do tumpongo dot id diyolo’. Om minintalang oku dot id diyolo’ di hilo’d Masir, om sinunudan ku iyolo’ dot, ’Iyoho’ no i TUHAN, i Kinorohingan dokoyu,’ kangku. ⁶ Om tontok nogiddi do minamatos oku do posoliwan diyolo’ do mantad hilo’d Masir om pakaa diyolo’ dot id pomogunan di nopili’ ku do pomogun-mogunan diyolo’, i pomogunan di kaya’ om oruak o tana’, i tana’ dit osonong no kopio do pointongkop diti pomogunan. ⁷ Om sinuhu’ ku nogi’ iyolo’ do papataam di tingolig di kososomu’ kopio i koupusan tomod daa diyolo’, om a’ i’ diyolo’ ososomu’ o tinan diyolo’ do tumuku’ di ponokokinorohingan do Masir, tu’ iyoho’ no i TUHAN, o Kinorohingan diyolo’. ⁸ Nga’ suminongkiwal nogi’ iyolo’ doho’ om a’ minokinongou doho’. A’ i’ diyolo’ pinataam i tingolig diyolo’ di kososomu’ kopio’ddi, om a’ iyolo’ tuminingkod do tumuku’ dot id ponokokinorohingan do tulun do Masir. Om posodia’ oku no daa’ddi do popurimon kopio diyolo’ do kawagato’ do kototogod ku di maso po diyolo’ do hilo’d Masir. ⁹ Nga’ a’ ku iddi winonsoi o miagal diri om a’ i’ ointingayam di piro-piro o bansa’ o ngaran ku do hiri’d kinoiyonon diyolo’. Tu’ nokoboros ku no dot id tulun dot Israil, dot id toguang di tulun do hilo’d Masir do posoliwanon ku iyolo’ do mantad id pomogunan diri. ¹⁰ Om posoliwano’ ku noddi iyolo’ do mantad hilo’d Masir om pokoyoo’ ku no iyolo’ do hilo’d tana’ do kowotuan. ¹¹ Om poboroso’ ku no diyolo’ i ponuhuan ku om potuduko’ ku it oturan ku, tu’ tulun nopo di mumboyo’ddi om apasi no. ¹² Om sinuhu’ ku iyolo’ do momusou di tadau’d Sabat do tanda’ di tumpongo ku dot id diyolo’, om poposorou diyolo’ dot iyoho’ no, i TUHAN o pinopotobilang diyolo’ do songonuon ku. ¹³ Nga’ tontok piya di hilo’ iyolo’d tana’ do kowotuan nga’ suminongkiwal i’ iyolo’ doho’. Tinolibambanan i’ diyolo’ it oturan ku om a’ tinanud i pinonuhuan ku, i mamajamin dot apasi no i tulun di mumboyo’ddi. Nga’ nindaraat tomod nogi’ om sinosomu’ diyolo’ i tadau’d Sabat. Om posodia’ oku no daa’ddi do popuriman diyolo’ di kawagato’ do kototogod ku di hilo’ iyolo’d tana’ do kowotuan om apatai i’ daa iyolo’. ¹⁴ Nga’ a’ ku iddi winonsoi o miagal diri tu’ kointingayam nopo do ngaran ku dot id pogialatan di bansa’ di nokokito doho’ do pinoposoliwan dot Israil do mantad hilo’d Masir. ¹⁵ Om pamatos oku noddi dot id diyolo’ di hilo’d tana’ do kowotuan dot a’ ku iyolo’ poongoyon do hilo’d tana’ di pinosodia’ ku do patahakon ku diyolo’, i pomogunan di kaya’ om oruak o tana’, i tana’ dit osonong no kopio do pointongkop diti pomogunan. ¹⁶ Minamatos oku do miagal diri tu’ a’ i’ diyolo’ tinanud i pinonuhuan ku, om sinurilog diyolo’ it oturan ku, om sinosomu’ i tadau’d Sabat. Uhang nogi’ diyolo’ do tuminuku’ dot id tingolig diyolo’. ¹⁷ Nga’ kosianai oku iddi diyolo’. Om a’ ku iddi iyolo’ pinatai do hilo’d tana’ do kowotuan. ¹⁸ Suwai ko’ poinsano’ mantad ku nopoddi i sukodwagu dit id pogialatan diyolo’. Boros kangku, ’Kada’ dokoyu tonudo’ it oturan do winonsoi di komolohingan dokoyu; om kada’ kou usui di koubasanan diyolo’ om kada’ dokoyu sosomuo’ o tinan dokoyu dot i tumuku’ dot id tingolig diyolo’ o ponosomu’. ¹⁹ Tu’ iyoho’ no o TUHAN, i Kinorohingan dokoyu. Umboyo’ kou no dit oturan om i ponuhuan ku. ²⁰ Om pusohon no dokoyu i tadau’d Sabat, om osiliu i’ iri do tanda’ di tumpongo ku dot id dokoyu, om poposorou dokoyu dot iyoho’ no o TUHAN, i Kinorohingan dokoyu,’ kangku. ²¹ Nga’ iri sukodwagu’ddi nga’ suminongkiwal i’ doho’. Tuminolibamban i’ iyolo’ dit oturan ku om a’ tuminanud di pinonuhuan ku, i mamajamin dot apasi ot isai nopo o tulun di mumboyo’ddi. Om posodia’ oku no daa’ddi do popuriman diyolo’ do kawagato’ do kototogod ku di hilo’d tana’ do kowotuan om patayon ngai’ ku daa iyolo’. ²² Nga’ a’ ku iddi winonsoi o miagal diri tu’ kointingayam nori do ngaran ku dot id pogialatan di bansa’ di nokokito doho’ do pinoposoliwan dot Israil do mantad hilo’d Masir. ²³ Om pobotoso’ ku po kawagu ot iso’ kawagu o batos do suwai di hilo’d tana’ do kowotuan, tu’ suminumpa’ oku do potompias diyolo’ do pointongkop diti pomogunan. ²⁴ Winonsoi ku o miagal diri tu’ a’ i’ diyolo’ tinanud i pinonuhuan ku, om tinolibambanan diyolo’ it oturan ku, om minonosomu’ iyolo’ di tadau’d Sabat, om tuminuku’ iyolo’ do tingolig di tinuku’ di komolohingan diyolo’ di gulu po. ²⁵ Om onuwai ku noddi iyolo’ dot oturan dit a’ osonong om nonuan ku iyolo’ do ponuhuan dit a’ kapasi. ²⁶ Pologoso’ ku nopoddi iyolo’ do monosomu’d tinan diyolo’, do monumbali’ di tangaanak diyolo’d kusai dit id dotuo do maan do podsubak di tingolig. Tu’ iti no o pomohukum ku diyolo’ om popointalang dot id diyolo’ dot iyoho’ no o TUHAN. ²⁷ Om baino’ nodti, oi tulun, om sunudan no i tulun dot Israil diti poboroson ku, iyoho’ i TUHAN, it Asawat Kopio, dot id diyolo’. Om iri po kawagu it a’ iyolo’ tuminorodok dot id doho’ o pinongindaraat di komolohingan diyolo’ doho’. ²⁸ Om pootodo’ ku no iyolo’ dot id pomogunan di pinabatos ku do patahakon ku diyolo’. Om soira’ di nokito diyolo’ i nulu-nulu dit angakawas om i kayu dot ongokohob, om siliho’ ngai’ nopo diyolo’ iri do podsusubakan. Om pinopotogod tomod diri iyolo’ doho’ tu’ pinapatahak i’ iyolo’ do porsombahan di sorobon om porsombahan do waig dot anggur do hiri. ²⁹ Om uhoto’ ku no iyolo’, ’Nunu toi iti kinoiyonon dot angakawas diti tu’ rikoton dokoyu?’ kangku. Om mantad poddi om roitan nod ’Kinoiyonon dit Angakawas’, o kinoiyonon diri. ³⁰ Om baino’ nondo om sunudan no i tulun dot Israil diti poboroson ku, iyoho’ i TUHAN, i Kinorohingan it Asawat Kopio, dot id diyolo’ do poingkaa: Nokuro tu’ wonsoyon po dokoyu i dusa do miagal di winonsoi di komolohingan dokoyu om tumanud kou di piro-piro o tingolig diyolo’ di kososomu’ kopio? ³¹ Om dinondo piya nga’ posubak kou i’ do porsombahan do miagal diri om monosomu’ kou do tinan dokoyu dot i tingolig o ponosomu’, tu’ patahakon i’ dokoyu i tangaanak dokoyu do maan do porsombahan di sumbolion dot id tingolig. Om rumikot kou i’ daa’ndo, iyokoyu i tulun dot Israil, do mongoi ponguhot ondung poingkuro o korohian ku! Sumumpa’ oku no, dot id suang do ngaran ku, iyoho’ i Kinorohingan di poimpasi, i TUHAN dit Asawat Kopio, dot a’ ku no kopio iyokoyu pologoson do monguhot doho’ do pasal do nunu nopo. ³² Tu’ iso-iso’ no o ginawo dokoyu dot orohian do momit di bansa’d suwai, do miagal di tulun di songingiyon dot id pomogunan do suwai tu’ tumuku’ dot id kayu om id tontolob. Nga’ a’ i’ diyolo’ aanu i pokioonuan diyolo’ do miagal diri,’’ ka dau. ³³ Boros kad TUHAN, ’’Poinsanon ku no iyokoyu dot id suang do ngaran ku, i Kinorohingan di poimpasi, i TUHAN dit Asawat Kopio, dot awagat nondo om oruol o pomomorinta’ ku dokoyu. ³⁴ Om popurimonon ku nondo iyokoyu do kuasa’ ku om kototogod ku do timungon ku iyokoyu kawagu om pogulion ku iyokoyu do mantad id koinsanai’d pomogunan di nokotompiason dokoyu. ³⁵ Om pokoyoon ku nondo iyokoyu do hilo’d ’Tana’ do Kowotuan do Piro-Piro o Bansa’’, om hilo’ nondo do hukuman ku iyokoyu. ³⁶ Om hukuman ku nondo iyokoyu do baino’ do miagal di pinomohukum ku di komolohingan dokoyu di hilo’d tana’ do kowotuan do Sinai. Iyoho’ no, i TUHAN it Asawat Kopio, o minomoros diti. ³⁷ Om porintaon ku nondo kopio iyokoyu om mumboyo’ kou i’ di tumpongo ku. ³⁸ Om potongkiadon ku nondo dokoyu i tulun dit obinsaap om it araat. Om posoliwanon ku iyolo’ do mantad id pomogunan dit iyonon diyolo’ do dinondo, om a’ ku iyolo’ pologoson do gumuli’ do hilo’d pomogunan dot Israil. Om oilaan nogindo dokoyu dot iyoho’ no o TUHAN,’’ ka dau. ³⁹ Om boros kad TUHAN, it Asawat Kopio, ’’Dinondo nodti, oi tulun dot Israil, om wonsoyon nopo dokoyu i korohian dokoyu! Tilombus kou nopo do momonsoi’d dusa do modsubak di piro-piro o tingolig dokoyu! Nga’ poinsanon mantad ku iyokoyu dot atalib pondo iti om a’ no milo dot a’ kou mumboyo’ doho’ om tumingkod do mongindaraat do ngaran ku dit olidang, dot ino podsusubak dokoyu’d tingolig o pongindaraat. ⁴⁰ Om oinsanan kou nopondo, i tulun dot Israil, do tumuku’ dot id doho’ do hilo’d pomogunan diri, do hiri’d timpak di nuluhon ku dit olidang, i nuluhon dot akawas do hilo’d Israil. Om asanangan oku nondo dokoyu om piontong ku iyokoyu do papatahak dot id doho’ di porsombahan dokoyu, i porsombahan dit osonong kopio, om i porsombahan di potobilangon do maan do doho’. ⁴¹ Kosoliwan ku nopondo iyokoyu do mantad hilo’d pomogunan di kinotompiason dokoyu, om otimung ngai’ ku iyokoyu, om romiton ku nondo i porsombahan di sorobon dokoyu, om koilo nondo o koinsanai’d bansa’ dot iyoho’ noo o Kinorohingan. ⁴² Om koguli’ ku nopondo iyokoyu do hilo’d Israil, i pomogunan di nakabatos ku do patahakon ku dot id komolohingan dokoyu, om koilo kou nogindo dot iyoho’ no o TUHAN. ⁴³ Om osorou ngai’ nogindo dokoyu i piningwonsoi dokoyu dit araat tomod diri om i pinonosomu’ dokoyu do tinan dokoyu. Om araatan tomod kou nondo do tinan dokoyu tu’ angaraat i’ i piningwansayan dokoyu. ⁴⁴ Om soira’ nopondod haro o wonsoyon ku do maan do kosuahan do ngaran ku, om oilaan nogindod tulun dot Israil, om oilaan ngai’ dokoyu, dot iyoho’ no o TUHAN, tu’ a’ ku i’ wonsoyon dot id dokoyu o miontok kopio di kowoyo-woyoon dokoyu dot araat. Iyoho’ no, i TUHAN it Asawat Kopio, o minomoros diti,’’ ka dau. ⁴⁵ Om boro-boros no o TUHAN dot id doho’ do poingkaa, ⁴⁶ ’’Oi tulun, ontong no do ponong hilo’d salatan. Om pasalaon no i tana’ do ponong id salatan om i puru’ do hilo’. ⁴⁷ Sunudan no i puru’ do ponong hilo’d salatan do mokinongou diti poboroson ku, iyoho’ i TUHAN, it Asawat Kopio. Antangai pogi’! Nga’ popurakit oku moti’d tapui, om monorob nondo’ri do koinsanai’d kayu do hilo’ dot i tuu it otomou po ko’ i noriou no. Om aiso’ nondo o kopisok diri. Om rumalad nondo’ri do mantad hilo’d salatan do kumaa ponong id utara, om kopuriman ngai’ nopondo o tulun do kolosuo’ddi. ⁴⁸ Om oinsanan nopondo iyolo’ do koilo dot iyoho’ no, i TUHAN, o minomurakit di tapui’ddi, om aiso’ no o kopisok diri,’’ ka dau. ⁴⁹ Nga’ a’ oku i’ nakaakun. Om boros kangku, ’’Oi TUHAN, it Asawat Kopio, kada’ oku sansagai do momonsoi’ddi! Tu’ somboro-boros ngai’ no o tulun dot a’ monongkorohian tu’ poinukadan kasai’ i’ o poboroson ku,’’ kangku.

¹ Om boro-boros no o TUHAN dot id doho’ do poingkaa, ² ’’Oi tulun, papalai no o Yorusalim. Om papalan i kinoiyonon do tulun do sumambayang. Om poinsanon no i pomogunan dot Israil. ³ Tu’ momoros oku no, iyoho’ i TUHAN, do poingkaa: Pisangod oku noddi dokoyu. Om kodongon ku nondo i gayang ku om patayon ngai’ ku nopo iyokoyu, dot iri tuu it osonong ko’ iri po it araat. ⁴ Om songodon ku nondo o koinsanai’d tulun do mantad pod hilo’d utara om gisom do korikot do hilo’d salatan, dot i gayang ku o panangod ku. ⁵ Om koilo ngai’ nondo o tulun dot iyoho’ no, i TUHAN, i nokopongodong di gayang ku om a’ ku no paangkapon kawagu iri. ⁶ Oi tulun pingodoi no do miagal pod aiso’ o pokukurayan nu. Om pingodoi no dot atatangaban do hilo’d kinoiyonon dit okito ngai’ ko’d tulun dot Israil. ⁷ Om soira’ nopondod monguhot iyolo’ ondung nokuro tu’ mingodoi ko, om sunudan no iyolo’ dot i habar do pasal di rumikot dot oruhai o kopingadayan nu. Tu’ korikot nopondo’ri om moddosi ngai’ pondo iyolo’, om lumomok ngai’ o longon, om lumuhoi o ginawo, om gagaran o totud diyolo’. Nokorikot no i maso’ddi; om osiliu ngai’ nondo iri. Iyoho’ no, i TUHAN, it Asawat Kopio, o minomoros diti,’’ ka dau. ⁸ Om boros kad TUHAN dot id doho’, ⁹ ’’Oi tulun, poboroso’ no it osiliu dot id dosunsudan. Om sunudan ngai’ no ilo tulun diti poboroson ku, iyoho’ i TUHAN, do poingkaa, ’Haro o gayang, i gayang do nataraman. I gayang di naasa’, om it akalab. ¹⁰ Nasa’ iri do maan do pamatai, om kinisasan, om akalab i’. Aiso’ no o kataadan di tulun ku tu’ aiso’ nopo o pinadul diyolo’ di pinopoinsan om i pinomohukum ku diyolo’. ¹¹ Nasa’ i gayang, om posodia’ kasai’ i’ do pakayon. Om patahakon nogindod tulun di gampamatai. ¹² Pingihad no dot atatangaban, oi tulun, pinggarang no, tu’ iti nopo gayang om panangod di tulun ku om panangod do koinsanai di boyoon dot Israil. Patayon ngai’ no iyolo’ do mitonggoi do koinsanai di bansa’. Duntungo’ no o kangkab nu dot atatangaban tu’ aiso’ no o pokukurayan! ¹³ Pogumbalan ku o tulun ku, om ondung a’ iyolo’ kumorologo, om abayaan ngai’ noti dot id diyolo’,’ ka,’’ ka dau. ¹⁴ ’’Om dinondo nodti, oi tulun, om poboroson no it osiliu dot id dosunsudan. Pitapapo’ no o palad nu do maan do tanda’ do tumimpuun nod mimpatai i gayang. Iri nopo nga’ gayang di mamatai, om gayang di kooris kopio. ¹⁵ Mongoris iri do tulun ku do gisom do katahub iyolo’. Akangan ku’d gayang i bandar diyolo’, dot i gayang di mingkalab do miagal po di kodumaat om i posodia’ nod mamatai. ¹⁶ Pintibas no do hilo’d wanan om hilo’d kotimbabaon nu, om honggo nopo o korohian nu. ¹⁷ Om iyoho’ nondo nga’ popitapap i’ do palad om atanus indo o kototogod ku. Iyoho’ no, i TUHAN, o minomoros diti,’’ ka dau. ¹⁸ Om boro-boros no o TUHAN dot id doho’ do poingkaa, ¹⁹ ’’Oi tulun, pilio’ no duwo ralan di milo di raja’d Babil do wayaan do rumikot do kiinigit di gayang dau. Om koimpuunon nopo goduwo di ralan diri om iso’ i’ o pomogunan. Om poturidangan nod papan di popotuduk o hiri’d pitongkiadan di ralan. ²⁰ Iso’ nopoddi nga’ popotunud di raja’ di ralan do kumaa’d hilo’d bandar do tulun dot Amon, i bandar do Raba, om iri no tiso’ di ralan om kumaa do hilo’d Yohuda, om poirikot do hilo’d Yorusalim, i bandar di kitolig. ²¹ Om mingkakat nondo i raja’ do Babil do hiri’d toning di papan do popotuduk, i hiri’d pitongkiadan di ralan. Om kungguon nondo dau i pana’; om uhoton dau i tingolig dau, om antangan i tundu-undu’ di nintorusan di pinosubak dau. ²² Om iri nopo longon dau’d wanan nga’ kiinigit di pana’ di tinandaan do ’Yorusalim’! Om iri no o momisunud dau do mongoi panangod do bandar do Yorusalim, om mongoi posodia’ do pakakas do pomohuyas, om mamangkis do mangangat do mongoi sangod, om mongoi posodia’ do pakakas do pamaraag do hiri’d wawayaan dot agayo, om popotimbun do tana’ do maan do tolig do ponurungku’, om mongukad do parit. ²³ Om a’ i’ daa otumbayaan i tulun do Yorusalim diti tu’ haro i’ o tumpongo do winonsoi diyolo’ dot id Babil. Nga’ iti nopo pinoboros do pasal dit osiliu dot id dosunsudan om popoinsan diyolo’ dot atangkap iyolo’ tu’ nokowonsoi i’ iyolo’d dusa. ²⁴ Om poboroson ku no, iyoho’ i TUHAN, it Asawat Kopio, do nongoilaan no i dusa dokoyu. Om koilo ngai’ no do nakasala’ kou. Tu’ nunu nopo o wonsoyon dokoyu nga’ kointalang no i dusa dokoyu. Norikot no o maso do kopomohukuman ku dokoyu, om patahakon ku no iyokoyu dot id pisangod dokoyu. ²⁵ Om poingkaa o boros ku dot id raja’ dot Israil, ’Rumikot no i tadau do kopogoyi-oyian ku do momohukum diya’, oi raja’ dit araat om sosomu’! ²⁶ Iyoho’ no, i TUHAN, it Asawat Kopio, o minomoros diti. Iduwo’ ino tupi’ do don raja’ om ino sigar nu. Aiso’ nondo o miagal di gulu po, tu’ kosimban ngai’ nopondo. Onuwai no do kuasa’ i mosikin! Om poinsiribaon no i pomorintaan di tulun di maso’d momorinta’! ²⁷ Raagon ku nondo kopio o bandar diti, gisom do pointongkop poo o kinaraagan. Nga’ a’ po osiliu iti dot a’ po korikot i tulun di nopili’ ku do momohukum diti bandar. Om patahakon ku nondo iti dot id dau,’ ka,’’ ka dau. ²⁸ Om boros kad TUHAN, ’’Oi tulun, poboroso’ no it osiliu dot id dosunsudan. Popimboroso’ no iti poboroson ku, iyoho’ i TUHAN, it Asawat Kopio, dot id tulun dot Amon, i mongindaraat dot Israil. Poboroson no dot id diyolo’ o poingkaa, ’Posodia’ no o gayang do monumbali’; naasa’ nori do maan do pamatai om akalab poo do miagal di kodumaat. ²⁹ Tudut ngai’ i’ i pinointalang do nokito nu, om iri pimboroson nu dot osiliu dot id dosunsudan nga’ aiso’ i’ ot otopot. Araat ko i’ om orongit ko, om rumikot no i tadau do kopogoyi-oyian ku do momohukum diya’. Sumondot no dot id liou nu i gayang. ³⁰ Oi tulun dot Amon! Paangkapo’ no i gayang dokoyu! Butusan ku nondo iyokoyu do hilo’d kinoiyonon di pinamansayan dokoyu, om i hilo’d pomogunan di kinosusuon dokoyu. ³¹ Om opurimanan nondo dokoyu i kototogod ku do pourobuson kopio ku dot id dokoyu do miagal di tapui do molob-ngolob. Om patahakon ku nondo iyokoyu dot id tulun dit orongit kopio, it ongoilo kopio do mamatai. ³² Om osorob kou nondod tapui. Om kotuntug o raha’ dokoyu dot id pomogunan dokoyu, om aiso’ nondo o songulun piya do kosorou dokoyu. Iyoho’ no i TUHAN, o minomoros diti,’’ ka dau.

¹ Om boro-boros no o TUHAN dot id doho’ do poingkaa, ² ’’Oi tulun, nokosodia’ ko nod momisara’ di bandar di noponu’d gampamatai? Poboroson no dot id dau o koinsanai di nongowonsoi dau di kososomu’ kopio. ³ Sunudan no i bandar diti poboroson ku, iyoho’ i TUHAN, it Asawat Kopio, do poingkaa: Norikot no o maso do kopomisaraan diya’ tu’ ogumu’ kopio i’ i napatai nu di tulun nu om sinosomu’ nu o tinan nu tu’ tuminuku’ ko i’ dot id tingolig. ⁴ Kasala’ ko no tu’ minamatai ko i’ om nososomu’ ko di tingolig di winonsoi nu, om gowoi poddi om rumikot no o maso do kopomisaraan diya’, om nopupusan no o surupu’ nu! Om iri noddi o kinapalagasan ngai’ ku di bansa’ do mongirak-irak diya’ om koinsanai di pomogunan do monguntotori’ diya’. ⁵ Momohingi-hingi ngai’ nopo diya’ i pomogunan do hilo’d sodu’ om hiti’d somok tu’ suminurilog ko i’ dit oturan om i ponudukan. ⁶ Sumondiu ngai’ nopo i boyoon dot Israil di kinoris diyolo’, om mamatai iyolo’. ⁷ Aiso’ no tiso’d tulun do hiri’d bandar do momusou do molohing dau. Om monipu’ kou do bansa’d suwai om mongulok-ulok kou do tongoondu’ di nopuadan om i tangaanak dit aiso’ o molohing tu’ maan no dokoyu’d ponginguntungan iyolo’. ⁸ Sinosomu’ dokoyu i tiyonon do sumambayang, om a’ dokoyu pinusou o tadau’d Sabat. ⁹ Haro o piro-piro tulun dot id pogialatan di tulun nu do mingudut do pasal do tulun do suwai, do mokimohilo-hilo’ dot apatai o tulun diri. Om haro nogi’ diyolo’ o mangakan do taakanon di nokosubak dot id tingolig. Om haro it orohian nopod momonsoi di korohian do tinan diyolo’. ¹⁰ Om haro diyolo’ o mongoi dudun di monohonok diyolo’, i sawo do tapa’ diyolo’. Om haro o mononsog do tongoondu’ do dumudun diyolo’d modop do maso piya do pomulanan di tongoondu’. ¹¹ Haro o magampahu’, om haro o mongoi pangasou di tongoondu’ do monongiwan diyolo’, ko’ i tobpinai diyolo’d tongoondu’, dit iso-iso’ o tapa’ nga’ misuwai po o tina’. ¹² Om haro nogi’ o piro-piro di tulun nu do mamatai tu’ mokianu do gadsi’. Om haro o mokibunga do tontok do popoolos do tusin dot id sompi’ ko’ tulun dot Israil; om kumaya’ tomod nondo tu’ monipu’ i’ iyolo’ di tulun diri. Nolihuan oku noddi kopio diyolo’. Iyoho’ no, i TUHAN, it Asawat Kopio, o minomoros diti. ¹³ Om bobogon ku nondo iyokoyu tu’ manakau kou i’ om mamatai kou. ¹⁴ Ondos daa dokoyu om kasaap kou po om okoris kou po do popoinsawat do longon, dot ohukuman ku iyokoyu? Iyoho’ no, i TUHAN, it Asawat Kopio, o minomoros diti, om bayaanon ku i’ o boros ku. ¹⁵ Potompiason ku nondo o tulun nu dot id pointikid-tikid do pomogunan om bansa’; om tingkodon ku i pingwonsoyon dokoyu dit araat. ¹⁶ Om hingi-hingion kou nondo do bansa’d suwai, om oilaan nogindo dokoyu dot iyoho’ no o TUHAN,’’ ka dau. ¹⁷ Om boros kad TUHAN dot id doho’, ¹⁸ ’’Oi tulun, aiso’ no o guna’ do tulun dot Israil, dot id doho’. Iyolo’ nopo om miagal pod kinikis do tambaga’, om tin, om basi’, om gundol, tu’ iri po i noolu-olu’ di nosompipi’ i pirok do hiri’d tapui. ¹⁹ Om baino’ no, om sunudan ku iyolo’, iyoho’ i TUHAN, it Asawat Kopio, do miagal po iyolo’ddi tu’ aiso’ no o guna’. Om timungon ku nondo iyolo’ do hilo’d Yorusalim ²⁰ do miagal di monimung do kinikis do pirok, om tambaga’ om basi’, om gundol, om tin do maan posuboo’ di tapui do ponompipi’. Om iri nondo kototogod ku om i kolosuo’ do ginawo ku o mamalanak diyolo’, do miagal di kinikis do basi’ tu’ lanakon do tapui. ²¹ Timungon ku nondo iyolo’ do hilo’d Yorusalim om siduan ku iyolo’ om lanakon ku iyolo’ di tapui di kototogod ku. ²² Om alanak nondo iyolo’ do hilo’d Yorusalim, do miagal poddi pirok tu’ alanak dot id tapui. Om oilaan nogindo diyolo’ dot iyoho’ no, i TUHAN, o pinopourabus di kototogod ku dot id diyolo’,’’ ka dau. ²³ Om boro-boros po kawagu o TUHAN dot id doho’ do poingkaa, ²⁴ ’’Oi tulun, sunudan no i tulun dot Israil do nososomu’ no i pomogunan diyolo’, om hukuman ku noddi tu’ atatagadan oku no. ²⁵ Iri nopo i piro-piro o boyoon nga’ iyo pod singa do minggarom di nakapamatai do nintorusan. Mamatai iyolo’ di rayat, om magahau do koinsanai’d tusin om dapu’ dit aahau-ahau diyolo’, om ogumu’ o tongoondu’ do nopuadan tu’ minimpatai i’ iyolo’d tulun. ²⁶ Iri piya it imam nga’ tumolibamban ngai’ i’ dit oturan ku om monosomu’ di nongkotobilang do maan do doho’. Id diyolo’ nopo om aiso’ no o pisuayan di nongkotobilang do maan do doho’, om it a’ nongkotobilang do maan do doho’. Om a’ iyolo’ popotuduk do pisuayan dit olidang om it a’ olidang do tumanud dot oturan do tugama’. Om a’ diyolo’ podulon i tadau’d Sabat. Om indaraaton oku di tulun dot Israil. ²⁷ Om iri piya i piro-piro o pagawai do pomorinta’ nga’ iyo pod toni do popogitobilang-bilang di nintorusan do napatai diyolo’. Mamatai nopo iyolo’ do mokikakaya’. ²⁸ Om iri po i piro-piro o nabi nga’ minomolisok i’ diti dusa, do miagal di tulun di minanaat do limput di sosomu’ do saat dot opurak. Iri nopo pinointalang dot okito diyolo’ om aiso’ i’ ot otopot om iri pimboroson diyolo’ do pasal dit osiliu dot id dabantalan nga’ tudut ngai’ i’. Popimboroson diyolo’ do TUHAN, it Asawat Kopio, o tadon di boros diyolo’, nga’ a’ oku i’ iyoho’ i TUHAN, nokoboro-boros diyolo’. ²⁹ Mintipu’ poo om mimpanakau i tulun do kaya’. Om a’ diyolo’ pokonunu-nunuon i tulun do mosikin om ponginguntungan diyolo’ i bansa’d suwai. ³⁰ Om pogontong oku no daa do tulun di milo do momonsoi’d tolig, om i milo do mingkakat do hiri’d kinoiyonon di nohuyas o tolig do madtamong di pomogunan, do tontok di potiraagon nod kototogod ku’ri, nga’ aiso’ i’ o tiso’d tulun do nokito ku. ³¹ Om urobu-robuson ku nondo o kototogod ku dot id diyolo’, om miagal oku pondod tapui do mamaraag diyolo’ tu’ iyo kopio iddi o nongowonsoi diyolo’. Iyoho’ no i TUHAN, it Asawat Kopio, o minomoros diti,’’ ka dau.

¹ Om boro-boros no o TUHAN dot id doho’ do poingkaa, ² ’’Oi tulun, haro o duwo tondu’ do miadi-adi’ di gulu po. ³ Om tontok dit okoro’ po iyolo’ om poingiyon iyolo’ do hilo’d Masir. Om hilo’ no iyolo’ do notoning do tongokusai, om suminiliu diri iyolo’d sundal. ⁴ Iri nopo it id dotuo nga’ i Ohola o pinomungaran om iri no it id domulok om pinungaranan dot i Oholiba. I Ohola nopo nga’ poiyaan do Samaria om i Oholiba no om poiyaan do Yorusalim. Om kowino’ goduwo ku no iyolo’ om paganak noddi iyolo’. ⁵ Om mulong piya daa do sawo ku i Ohola, nga’ a’ i’ iyau tuminingkod do sundal om rumohian tomod nogi’ iyau di kongouhangan dau do mantad hilo’d Asur. ⁶ Iyolo’ nopo nga’ soudor di kipakayan dit oiyo nopo, dot otomou daragang- ragang; om sinakagon iyolo’d raja’, om angasawat o pangkat diyolo’ dot id pomorinta’, om oinsanan nopo iyolo’ dot ongoligkang om soudor dit ongkikuda’. ⁷ Om minagampahu’ i Ohola do koinsanai di pagawai dot Asur, om kabayayat no iyau di korohian do tinan dau do tumuku’ di piro-piro o tingolig dot Asur. ⁸ Om tilombus nopo iyau do suminiliu’d sundal do mantad poddi tuminimpuun i’ iyau do suminiliu’d sundal di hilo’ pod Masir. Om mantad po dit okoro’ po iyau om dudun-dudunon no iyau do tongokusai, om ponokosundal no diyolo’ iyau. ⁹ Om patahako’ ku noddi iyau di tulun dot Asur, i kongouhangan dau di koupusan kopio dau. ¹⁰ Om labasai no diyolo’ iyau, om ngoyo’ ngai’ diyolo’ i tangaanak dau’d kusai om tondu’, om patayo’ nogiddi diyolo’ iyau do gayang o pinamatai. Om oinsanan nopo o tongoondu’ do somboro-boros do pasal di kinootuson dau dot araat diri. ¹¹ Om mulong piya’d nokokito i tadi’ dau, i Oholiba do hal diri, nga’ okon- okon o dau do kosusundal om pagagampahu’ ko’ di Ohola. ¹² I Oholiba nogi’ nga’ rumohian tomod i’ di tulun dot Asur di sinakagon do raja’, om i piro-piro o pagawai, om i piro-piro o soudor dit ongkipinakai do pakayan dit oiyo nopo dot otomou daragang-ragang; iri no i tongokusai dit ongoligkang om i piro-piro o soudor di kikuda’. ¹³ Om nokito ku nogi’ do kusayon tomod iyau, do miagal di taka’ dau. ¹⁴ - ¹⁵ Om maid-laid nga’ muhang-ruhang o kararaat dau. Om otohirik tomod iyau di gambar di piro-piro o pagawai do Babil dit ongkipangkat, i pinokikir do hiri’d tolig om i sinaat do saat dit osindak o karagango’, om it ongkitagkos om ongkisigar dot olumis. ¹⁶ Om maha’ di nokito kopio dau i gambar diri om a’ no ogina-gina’ iyau do rumohian diyolo’. Om ponuhu’ no iyau do piro-piro o gunsiou do mongoi solowot diyolo’ do hilo’d Babil. ¹⁷ Om rikot noddi i tulun do Babil dot id dau om ongoi no dudun dau’d minodop. Om pinadalaan tomod iddi diyolo’ o pinangasou om pinonosomu’ diyolo’ dau, gisom do naraatan diri iyau diyolo’. ¹⁸ Om pointalango’ nopoddi kopio dau dot id kogumuan do sundal iyau, om gisom dot aiso’ no ot a’ koilo do sundal iyau. Om araatan tomod oku’ddi dau, do miagal di naraatan oku di taka’ dau. ¹⁹ Om maid-laid nga’ maru-saru’ iyau do magampahu’. Om kowoyo-woyoon nopo dau, om miagal nopo kopio di kowoyo-woyoon dau dit okoro’ po iyau, di maso po dau’d sundal do hilo’d Masir. ²⁰ Om poimponu’ po iyau’d korohian do rumahi di tongokusai dit a’ milo dot uruon o korohiano’ do dumudun do tongoondu’ om i miagal pod dongkuda’ om dongkaladai o kowoyo-woyoon, tu’ a’ nopo milo dot ouru,’’ ka dau. ²¹ (Oi Oholiba, orohian ko pod gumuli’ di kosusundal nu dit okoro’ ko po di hilo’d Masir, tontok di pingigitan pod tongokusai o susu nu om piningkasou ko do tongokusai’d Masir.) ²² Om boros kad TUHAN, it Asawat Kopio, ’’Oi Oholiba, apaasan ko no daa’ddi di kongouhangan nu nga’ potogodon ku nondo iyolo’ diya’ om porikoton ku iyolo’ do mongoi ponurungku’ diya’. ²³ Porikoton ngai’ ku nopondo i kongouhangan nu do mantad hilo’d Babil om hilo’d Kaldia, om hilo’d Pikod, om Soa, om Koa, om koinsanai di tulun dot Asur. Om timungon ngai’ ku nopondo i tangaanakwagu i sinakagon ngai’ do raja’, om i piro-piro o pagawai, om koinsanai di pagawai dit angabantug om i pagawai do soudor di kikuda’ dit angasawat o pangkat. ²⁴ Om ngoyon ko nondo diyolo’ songodo’ do mantad ponong hilo’d utara, om ogumu’ o soudor diyolo’ di kikorita’-kuda’ do don sumasangod om i kikorita’-kuda’ di pinasakayan do kokoriu. Om ongkikolid om ongkitupi’ kolidar iyolo’ do mongoi sangod dokoyu. Om patahakon tiya’ nondo dot id diyolo’, om butusan ko nondo do tumanud dit oturan diyolo’. ²⁵ Om pologoson ku nondo iyolo’ do mingwonsoi do nunu nopo dot id diya’ tu’ atatagadan oku no diya’. Om sinsibon nondo diyolo’ o todung nu om tolingo nu om patayon diyolo’ o tangaanak nu. Ngoyon nondo diyolo’ i tangaanak nu do mantad id diya’ om maan nondo diyolo’ miaho’ do monutud. ²⁶ Om labasan ko nopondo diyolo’ om onuon ngai’ diyolo’ i pongillumis nu’d tinan nu. ²⁷ Om tingkodon ku nondo i korohian do tinan nu om i kosusundal nu di piningwonsoi nu do mantad po di hilo’ ko pod Masir. Om a’ ko nondo montong do nunu nopo o tingolig om a’ ko sumondiu do Masir,’’ ka dau. ²⁸ Poingkaa o boros do TUHAN, it Asawat Kopio, ’’Patahakon tiya’ nondo dot id tulun di karaatan kopio nu. ²⁹ Om ngoyon ngai’ nopondo diyolo’ o koinsanai di pininghuyanan nu’d minogihum, om pologoson ko nopondod poillabas, do miagal pod sundal, tu’ araatan no iyolo’ diya’. Iri no i korohian do tinan nu om i kosusundal nu, ³⁰ o pinoporikot diti dot id diya’. Nosiliu ko pod sundal di piro-piro o bansa’ddi om sinosomu’ nu o tinan nu di tingolig diyolo’. ³¹ Susui ko nopo di nulokon di taka’ nu, om gowoi pondo om miagal nopo di pinomohukum ku di taka’ nu o pomohukum ku diya’,’’ ka dau. ³² Om boros kad TUHAN, it Asawat Kopio, ’’Minum ko nondo do mantad id sangkir di taka’ nu, i sangkir dit agayo om aralom. Om oinsanan nopondo o tulun do momohingi-hingi, om mongindaraat diya’; tu’ iri no o suang di sangkir diri. ³³ Aawuk ko nondo om oinggorit dot obungou’ddi, i hukuman di mamaraag om kooris kopio, i hukuman do nokoontok do Samaria, i taka’ nu. ³⁴ Om inumon nu nopondo’ri do gisom dot aayi’, om iri nondo i kinababakan di sangkir nu o kosuhat do kangkab nu. Iyoho’ no, i TUHAN, it Asawat Kopio, o minomoros diti,’’ ka dau. ³⁵ Poingkaa no o boros do TUHAN, it Asawat Kopio, ’’Iyo nopoddi tu’ linihuan oku om tinolikudan oku diya’, om oinggorit ko no do gama’ di korohian do tinan nu dot araat om i kosusundal nu,’’ ka dau. ³⁶ Om boros kad TUHAN dot id doho’, ’’Oi tulun, nokosodia’ ko nod momohukum di Ohola om i Oholiba? Pasalao’ no iyolo’ tu’ araat kopio i’ o piningwonsoi diyolo’. ³⁷ Minagampahu’ iyolo’ om minamatai; minagampahu’ iyolo’ di tingolig om minamatai di tangaanak ku di pinaganak diyolo’. Pinatahak diyolo’ dot id tingolig diyolo’ do siniliu’d porsombahan di sumbolion i tangaanak ku. ³⁸ Om okon i’ ko’ iri-iri o winonsoi diyolo’. Tu’ minonosomu’ po iyolo’ di Walai’d Sasambayangan dot Agayo om sinosomu’ diyolo’ i tadau’d Sabat, i tinantu’ mantad ku do potobilangon do maan do doho’. ³⁹ Om tontok di tadau di pinatai diyolo’ i tangaanak ku do numaan do porsombahan do sinumbali’ dot id tingolig, om ongoi goduwo no iyolo’ do hiri’d Walai’d Sasambayangan dot Agayo do minongoi ponosomu’ddi! ⁴⁰ Miguli-guli’ nopo iyolo’ do monuhu’d tulun do mongoi pomolohou do tongokusai do mantad hilo’d sodu’, om rumikot nondo i tongokusai’ddi. Om modsu’ no i duwo tondu’ do miobpinai’ddi om mamadak no, om manampakai nod pongillumis do tinan do sumuwau di tongokusai. ⁴¹ Om mirikau nondo iyolo’ dot id toodopon dot olumis do potorungak do mija’ di noponu’d taakanon dit angawasiu, om hiri nogi’ i kominyan om i tumau do saitun di pinatahak ku diyolo’. ⁴² Om orongou nondo o hiyo do tulun dot ogumu’, i tongokusai dot ogumu’ do mantad hilo’d tana’ do kowotuan. Om sulungan no diyolo’d golong i longon di duwo o tondu’ di miobpinai’ddi om tupian diyolo’d tupi’ dit olumis. ⁴³ Om momusorou oku’ddi do ponokosundal poo diyolo’ i tongoondu’ di nouru-uru pod tampahu’. ⁴⁴ Om miguli-guli’ nopo i tongokusai’ddi dot id duwo o sundal diri. Miguli-guli’ nopo iyolo’ dot id di Ohola om id di Oholiba, i tongoondu’d sundal diri. ⁴⁵ Om pasalaon nondo iyolo’d tulun dit otopot dot i tampahu’ om i pamamatai diyolo’; tu’ magampahu’ nopo iyolo’ om notounan do raha’ o palad diyolo’,’’ ka dau. ⁴⁶ Poingkaa no o boros do TUHAN, it Asawat Kopio, ’’Porikot nod sonsinompuruan o tulun do mongoi ponginggorit diyolo’ om mongoi panakau do konunu-nunuan diyolo’. ⁴⁷ Om pologoson nopo i tulun dot ogumu’ddi do momodumpau diyolo’d watu, om mamatai diyolo’ do gayang o pamatai, om mamatai di tangaanak diyolo’, om modtutud di walai diyolo’. ⁴⁸ Om tingkodon ku nondo o pogioompohuan do pointongkop diti pomogunan do maan do popoinsan do koinsanai di tongoondu’ dot a’ magampahu’ do miagal di nowonsoi diyolo’. ⁴⁹ Om iyokoyu nod miadi-adi’, oi Ohola, om oi Oholiba, om hukuman ku no tu’ minagampahu’ kou i’ om minomonsoi kou’d dusa tu’ tuminuku’ kou i’ dot id tingolig. Om oilaan nogindo dokoyu dot iyoho’ no o TUHAN, it Asawat Kopio,’’ ka dau.

¹ Om tontok di tadau’d kohopod di tulan do kohopod di kosiam do toun dahai dot id pomogunan do pisangod, om boro-boros no o TUHAN dot id doho’ do poingkaa, ² ’’Oi tulun, tuliso’ no o haribulan do tadau’d baino’, tu’ tadau nod baino’ do tumimpuun i raja’ do Babil do monurungku’ do Yorusalim. ³ Om sunudan no i tulun ku dit obinsongkiwal diti ponukadan do poboroson ku, iyoho’, i TUHAN, do poingkaa: Parakano’ i lansang do hilo’d sagang, om ponuon nori do waig. ⁴ Om potobungon no i tonsi dit osonong kopio, i tonsi do toliip om i tonsi do poo, om ponuon di popot dit osonong di kitulang. ⁵ Onuon no i tonsi di dumba’ dit olomu’ om it okoro’ po, gumuon no kayu do pogudung. Om pogolokon no i waig; om onsokon no i tulang om i tonsi,’’ ka. ⁶ Poingkaa o boros do TUHAN it Asawat Kopio, ’’Obungou no i bandar di noponu’ do gampamatai! Tu’ miagal po di lansang di togoron, om it a’ insan kokisasai. Om soriso-isoon i tonsi do mononduk, om aiso’ no tiso’ dot oolu’. ⁷ Haro o mimpatai do tulun do hiri’d bandar nga’ a’ i’ pinoluyung do hiri’d tana’ i raha’ suwai ko’ pinoluyung nogi’ do hiri’d tontolob di potimpalang tomod. Gowoi poddi om a’ milo dot olitan i raha’. ⁸ Om pologoso’ ku no i raha’ddi do hiri, om okito i’ om kopokilokop indo!’’ ka dau. ⁹ Poingkaa no o boros do TUHAN, it Asawat Kopio, ’’Obungou no iti bandar di noponu’ do gampamatai! Om iyoho’ no o mogudung do tapui do ponorob diti. ¹⁰ Ongoi-ongoi po do pogudung! Siduwai no i tapui! Onsokon no i tonsi! Timbubusan no! Om pokogutan no i tulang! ¹¹ Om parakanon nondo i lansang do tambaga’ dit aiso’ o suang diri do hiri’d tapui do gisom id karagang, om opulang nogindo kawagu i lansang diri do tumanud dot oturan do tugama’. ¹² Nga’ a’ indo osorob ngai’ i togor diri do hiri’d tapui. ¹³ Oi Yorusalim, nososomu’ tomod ko no di kowoyo-woyoon nu dit araat. Om mulong piya do minumbal oku daa do minomolidang diya’ nga’ a’ no milo dot iduwon o kososomuo’ nu. Om a’ ko no olidangan kawagu dot a’ ko po kopuriman do kawagato’ do kototogod ku. ¹⁴ Iyoho’ no, i TUHAN it Asawat Kopio, o minomoros diti. Norikot noddi o maso ku do momonsoi di wonsoyon ku. A’ ku no lihuan i dusa nu, om a’ oku mangampun om a’ oku monginsian diya’. Om ohukuman ko nondo do miontok di winonsoi nu. Iyoho’ no i TUHAN it Asawat Kopio, o minomoros diti,’’ ka dau. ¹⁵ Om boro-boros no o TUHAN dot id doho’ do poingkaa, ¹⁶ ’’Oi tulun, sigog indo do ngoyon ku i tulun di koupusan kopio nu do potigowoon ku o pongongongoi. Om kada’ pimboros dot atatangaban, om kada’ ihad om kada’ pomuromou. ¹⁷ Kada’ pologoso’ dot orongou ko’d wokon di mingut-singut ko. Kada’ lagasai o tulu nu om kada’ pimpanau dot aiso’ o kasut do popointalang do tumongob ko. Kada’ sompono’ o rabas nu om kada’ pangakan di taakanon di mogigihad,’’ ka dau. ¹⁸ Om tontok dit osuab po om monokiboro-boros oku no di bansa’ddi. Om totuong poddi om kapatai no i sawo ku. Om tadau po kawagu om wonsoyo’ ku no o miagal di pinonuhuan doho’. ¹⁹ Om ponguhot no doho’ i piro-piro o tulun, ’’Nokuro tu’ mingiyo ko’dti, oi aman? Nunu o komoyon diti dot id dahai?’’ ka diyolo’. ²⁰ Om boros kangku, ’’Sinuhu’ oku’d TUHAN, ²¹ do poposunud do boros diti dot id dokoyu: Oondos kou do kogiroto’ di Walai’d Sasambayangan dot Agayo. Orohian kou do mintong om mongoi suang diri, nga’ maan nondod TUHAN sosomuo’ iri. Om angapatai nondo dot id pisangadan i tongomulok po dot id sompiiyon dokoyu, i nokoundorong do hilo’d Yorusalim. ²² Om wonsoyon nondo dokoyu o miagal di winonsoi ku. A’ indo dokoyu somponon o rabas dokoyu om a’ kou mangakan di taakanon do mogigihad. ²³ Om a’ dokoyu lagasan o tulu dokoyu, om a’ kou mongidu’d kasut do tontok do mamanau om a’ kou mihad om a’ kou mogihad. Om oinggorit kou nondo dot obungou di dusa dokoyu om songodoi-odoi kou pondo. ²⁴ Om iyoho’ nondo ot osiliu dot omitan dokoyu; om wonsoyon ngai’ nopondo dokoyu o miagal di nowonsoi ku. Om boros kad TUHAN om osiliu nopondo o miagal diri, om oilaan nogindo dokoyu dot iyau no o TUHAN dit Asawat Kopio,’’ kangku. ²⁵ Om boros kad TUHAN dot id doho’, ’’Oi tulun, raagon ku’ndo i Walai’d Sasambayangan dot Agayo, it apanggor diri om i nosiliu do kaandasan om kaarapadan diyolo’, om i korohian diyolo’ do mongoi salakoi. Om ngoyon ngai’ ku i tangaanak diyolo’d kusai om tondu’. ²⁶ Om tontok nopondo di tadau do wonsoyon ku’ti, om haro nondo o songulun di kopoggidu’ do mantad id karaagan diri do mongoi pomisunud diya’ do pasal diri. ²⁷ Om tontok indod tadau’ddi do koboros ko kawagu, om a’ ko nondo bobou. Om moro-boros ko nondo di tulun diri. Om iri nondo o sumiliu’d tanda’ dot id diyolo’, om koilo nogindo iyolo’ dot iyoho’ no o TUHAN,’’ ka dau.

¹ Om boro-boros no o TUHAN dot id doho’ do poingkaa, ² ’’Oi tulun, papalai no o pomogunan dot Amon. ³ Om sunudan no iyolo’ do mokinongou diti boros ku, iyoho’ i TUHAN, it Asawat Kopio, do poingkaa, ’Norohian tomod kou daa do nokokito di Walai’d Sasambayangan dot Agayo do nososomu’, om i pomogunan dot Israil do naraag, om bansa’ do Yohudi do natanggayan do pisangod. ⁴ Om gowoi pondo, om pologoson ku i piro-piro payat do tulun do mantad hilo’d tana’ do kowotuan di ponong id koulayon, do mongoi panangod dokoyu. Om powonsoyon nondo diyolo’ o kiim diyolo’ do hino’d pomogunan dokoyu om mundorong iyolo’d hino. Om mingakan nondo iyolo’ di tua-ua’ dokoyu om monginum iyolo’ di susu di tayam-tayam dokoyu. ⁵ Om silihon ku’ndo i bandar do Raba do poiiyanan dot unta, om oinsanan i pomogunan dot Amon do silihon ku’d pomogompian do dumba’, om koilo kou indo dot iyoho’ no o TUHAN,’ kanto,’’ ka dau. ⁶ Poingkaa no o boros do TUHAN it Asawat Kopio, ’’Minomitapap ko daa’d palad om mininsayau ko do natataadan. Om minonguntotori’ ko do pomogunan dot Israil. ⁷ Om gowoi pondo om patahakon ku iya’ dot id bansa’d suwai, i mongoi panakau om mongoi pagahau do konunu-nunuan nu. Om padalaan ku nopondo kopio iya’ do mamaraag gisom dot okon ko nondo ko’ bansa’ dot agayo om aiso’ o pomogunan nu. Om koilo ko nogindo dot iyoho’ no o TUHAN,’’ ka dau. ⁸ Om boros kad TUHAN, it Asawat Kopio, ’’Iri no i minomoros o Muab dot iyo ngai’ nod bansa’d suwai o Yohuda, ⁹ o kapalagasan ku di piro-piro bandar di mongintirung daa di wolit do Muab dot asangod do pisangod, om kohompit ngai’ no i bandar dit ongolumis — i bandar do Bait-Yosimot, om Baal-Mion, om Kiriataim. ¹⁰ Om pologoson ku nondo i piro-piro o bansa’d tulun di mantad hilo’d tana’ do kowotuan di ponong id koulayon do mangala’ do Muab, om Amon, om opunso indo o tulun do Muab. ¹¹ Hukuman ku nondo o Muab, om koilo indo iyolo’ dot iyoho’ no o TUHAN,’’ ka dau. ¹² Om boros kad TUHAN, it Asawat Kopio, ’’Nakasala’ no kopio ot Idom tu’ orongit i’ iyau dot id Yohuda do tontok di suminuli’ iyau. ¹³ Om baino’ nodti om poboroson ku do hukuman ku no ot Idom om oyion ku nopod mamatai i tulun om nintorusan do hilo’. Om raagon ku nondo o pointongkop do pomogunan diri do mantad pod hilo’d bandar do Timan om korikot di bandar do Didan. Om angapatai ngai’ nondo i tulun dot id pisangadan om oingou nondo o hilo’. ¹⁴ Om iri no i tulun ku, i tulun dot Israil, o pakayon ku do monuli’ dot Idom, om popurimonon nondo kopio diyolo’ ot Idom di kototogod ku dit a’ ogina-gina’. Om koilo nogindo ot Idom do komoyon dot orotuan do kototogod ku. Iyoho’ no, i TUHAN it Asawat Kopio, o minomoros diti,’’ ka dau. ¹⁵ Om boros kad TUHAN, it Asawat Kopio, ’’Oruol tomod o pinonuli’ di tulun do Pilistin di pisangod diyolo’ di mantad po di gulu po. Pinatai diyolo’ iyolo’ tu’ atatagadan no kopio iyolo’. ¹⁶ Om gowoi pondo om poboroson ku do songodon ku’ndo o tulun do Pilistin om patayon ku iyolo’. Om patayon ngai’ ku nopo i tulun di poingiyon do hilo’d tisan do rahat do Pilistin. ¹⁷ Om padalaan ku nondo kopio iyolo’ do momohukum om magayi-ayi’ oku do sumuli’ diyolo’. Om opurimanan pondo kopio diyolo’ o kototogod ku, om oilaan nogindo diyolo’ dot iyoho’ no o TUHAN,’’ ka dau.

¹ Tontok di tadau’d koiso’ do tulan di natantu’, di kohopod om iso’ do toun dahai dot id pomogunan do pisangod, om boro-boros no o TUHAN dot id doho’ do poingkaa, ² ’’Oi tulun, iti no o popinggarangon di tulun do hilo’d Tirus, ’Naraag noddi o Yorusalim! Natagak noddi o kuasa’ dau dot id pogidagang-dagangan! Aiso’ noddi o monokialib-alib dati’,’ ka,’’ ka dau. ³ Om boro-boros noddi o TUHAN, it Asawat Kopio do poingkaa, ’’Pisangod oku noddi diya’, oi bandar do Tirus. Om poporikot oku’ndod pisangod dot ogumu’ do mongoi panangod diya’, om miagal pondo iyolo’ di tumbak do rahat do rumikot. ⁴ Om raagon nondo diyolo’ o tolig do bandar nu om huyason i walai nu dit angakawas. Om imuhawon ngai’ ku nogindo i pupuk, om tontolob pondo di pointalang tomod ot oolu’ do hiri’d tanga’d rahat. ⁵ Om posisidangan pondod tulun di monginginsada’ di rambot diyolo’ i tontolob diri. Iyoho’ no i TUHAN it Asawat Kopio, o minomoros diti. Ngoyon nondo do piro-piro o bansa’ patayo’ o tulun do Tirus. ⁶ Om pimpanakahan nondo diyolo’ om pimpatayan diyolo’ di gayang diyolo’ i tulun do poingiyon do hiri’d kabandaran do rantai’d Tirus. Om koilo ngai’ nogindo i tulun do hilo’d Tirus dot iyoho’ no o TUHAN,’’ ka dau. ⁷ Om boros kad TUHAN, it Asawat Kopio, ’’Porikoton ku nondo i Raja’ Nobukadnisar do mantad hilo’d Babil, do mongoi panangod diya’, oi Tirus. Om rumikot nondo i raja’ dot okoris kopio do mantad ponong hilo’d utara do miwoyo’ do soudor dau dit ogumu’, om kuda’ om korita’-kuda’, om soudor di songinsakai’d kuda’. ⁸ Om angapatai nondo dot id pisangadan i tulun do songingiyon do hiri’d kabandaran dit id rantai. Om mongukad nondo i pisangod do parit, om popoolig do tana’ do maan do tolig do ponurungku’, om popogitatalad do kolid dit angagayo do maan do pogintirungan do sumaap diya’. ⁹ Om lopusonon nondo diyolo’ i tolig nu do pakakas do pamaraag o pomolopuson, om huyason diyolo’ i walai nu dit angakawas do basi’ o pomohuyas. ¹⁰ Om otounan ko nopondo di pupuk dot ounggar di kuda’ diyolo’ dit ogumu’. Om koguyu’ iddi tolig nu i karatak di kuda’ do mamagayat do korita’-kuda’ di don sumasangod om i korita’ di poiyanan do kokoriu do tontok di tumalib iyolo’ di piro-piro o wawayaan di bandar do naraag diri. ¹¹ Om tumias nopondo i soudor diyolo’ di songinsakai’d kuda’ do tumongkop di karalan-ralanan nu do mimpatai di tulun nu, dot i gayang diyolo’ o pamatai. Om angkataam ngai’ do hiri’d tana’ i torigi nu dit ongolumis om it angapanggor. ¹² Om panakahon ngai’ nopondo di pisangod dokoyu i kakayaan om i dapu’ do dagangon dokoyu. Om raagon nopondo diyolo’ i tolig nu om huyason i walai dokoyu dit ongolumis. Om pataamon ngai’ nopondo diyolo’ do hilo’d rahat i watu om i papan om i tana’ di pinomonsoi do walai dokoyu. ¹³ Om tingkodon ku’ndo i sinding nu, om i tuni do kecapi nu. ¹⁴ Om tontolob pondo dit aiso’ i’ o nunu-nunu do sumuni o pooluon ku do maan poddi gomponginsada’ do posidangan di rambot diyolo’. A’ nondo owonsoi kawagu i bandar diri. Iyoho’ no, i TUHAN it Asawat Kopio, o minomoros diti,’’ ka dau. ¹⁵ Poingkaa o poboroson do TUHAN it Asawat Kopio, dot id bandar do Tirus, ’’Ngoyon ko nopondo songodo’ om ongorolosi pondo i tulun di poingiyon do hilo’d tisan do rahat do korongou di giniakan do tulun di pimpatayon. ¹⁶ Om oinsanan nopondo i raja’ di poingiyon do hilo’d tisan do rahat do lumintuhun do mantad id tirikohonon diyolo’ di don raja’. Om iduwon nopondo diyolo’ i rasuk diyolo’ di don raja’ om i rasuk di norindaan om pananggagaran pondo iyolo’ do poirikau do hiri’d tana’. Om adalaan pondo tomod iyolo’ dot orolosi di nosiliu dot id diya’, gisom dot a’ no iyolo’ otingkod do gagaran. ¹⁷ Om sindingon nondo diyolo’ iti sinding do pogihad diya’: Naraag no i bandar dot abantug! Noidu’ ngai’ no i kapal dau do hilo’d rahat; kikuasa’ daa do hilo’d rahat o tulun do bandar diti, om minonompurolosi iyolo’ do koinsanai’d tulun di poingiyon do hilo’d tisan do rahat. ¹⁸ Nga’ baino’ noddi om naala’ ko no, om pananggagaran ngai’ po i tulun do hilo’d piro-piro pulou, om ongkotigowo po ngai’ iyolo’ do kokito di kinaraagan nu dit a’ no ogina-gina’,’’ ka dau. ¹⁹ Om boros kad TUHAN, it Asawat Kopio, ’’Silihon tiya’ nondod pogun do miagal di bandar dit a’ iyonon do tulun. Om olitan ku iya’ do waig do rahat. ²⁰ Om pokoyoon ku’ndo iya’ do hilo’d pomogunan do tulun do napatai, om kosugku’ ko i’ di tulun di poimpasi di gulu po. Om pologoson tiya’ do poundorong do hilo’d pomogunan do tulun do napatai dot id pogialatan di kinaraagan, i poinraag kasai’ do gisom dot alaid do poinsugku’ di tulun di napatai. Om gowoi pondo om a’ nondo oiyon kawagu’d tulun i pomogunan nu om aiso’ o koiyonon nu dot id pomogunan di tulun di poimpasi. ²¹ Om silihon ku’ndo iya’ do poiyaan di koronob kopio, om iri nondo o kopupuson do surupu nu. Om umbalan ko i’ daa’d tulun do mogihum nga’ a’ ko no okito kawagu, iyoho’ no i TUHAN, it Asawat Kopio, o minomoros diti,’’ ka dau.

¹ Om boro-boros no o TUHAN, it Asawat Kopio dot id doho’ do poingkaa, ² ’’Oi tulun, podsinding nod sinding do pogihad do Tirus, ³ i bandar di hilo’d tisan do rahat om i monokidagang dot id tulun di songingiyon dot id poingompus do tisan do rahat. Om sunudan no iyau diti boros ku, iyoho’ i TUHAN, it Asawat Kopio, do poingkaa: Oi Tirus, oondos ko dino kolunduso’ nu. ⁴ Walai nu nopo nga’ ilo rahat. Om winonsoi ko do miagal di kapal do rahat dit olumis. ⁵ Iri nopo numaan diyolo’d tolig nu nga’ i kayu sedar do mantad hilo’d nuluhon do Hormon. Om i kayu sedar do Libanon o numaan do torigi. ⁶ I kayu dot angagayo do mantad hilo’d Basan o winonsoi diyolo’ do pangayu nu; om i kayu sedar do mantad hilo’d Siprus o winonsoi do taap nu, om linopisan ko po do lamai dit agayo o gatang. ⁷ Iri nopo layar nu nga’ kain linan do winonsoi, i kain linan do rinindaan do mantad hilo’d Masir, iri nopo tanda’ nu nga’ kain dit osonong kopio do winonsoi, i kain dot otomou daragang-ragang do mantad hilo’d Siprus. ⁸ Iri nopo tulun do mangangayu diya’ nga’ mantad hilo’d bandar do Sidon om Arwad. Om iri no papamanau do kapal om i tulun nu dit ongoilo kopio. ⁹ Iri no tukang kayu di minomonsoi di kapal nu om tulun dit ongoilo do mantad hilo’d Gibal. Om oinsanan nopo i papamanau’d kapal do mantad id pointikid-tikid do pomogunan do sumakai di kapal do rahat do mongoi pomoli-moli do hiri’d kadai nu. ¹⁰ Soudor nu nopo nga’ tulun do mantad hilo’d Porsia, om Lidia, om Libia. Om songinsait i kolid om tupi’ kolidar diyolo’ do hiri’d tolig nu. Iyolo’ no i minonguhup diya’ do minangala’ ngai’ di pisangod nu, om pinapabantug diya’. ¹¹ I piro-piro o soudor do mantad hilo’d Arwad o madtamong di tolig nu, om i tulun do mantad hilo’d Gamad o madtamong di walai nu dit angakawas. Om songinsait i kolid diyolo’ do hiri’d tolig nu. Iyolo’ no i tulun di minongillumis diya’. ¹² Minongoi ko pongindapu’ do hilo’d Sepanyol om minigit ko do pirok, om basi’ om tin om gundol di numaan do pambayar di dapu’ nu dot ogumu’. ¹³ Minongindapu’ ko do hilo’d Yunani, om hilo’d Tubal, om hilo’d Misik, om pinoolon nu i dapu’ nu do turipon om i pakakas do tambaga’. ¹⁴ Om padagango’ nu no i dapu’ nu do numaan do pomoli do korita’-kuda’, om kuda’ do sakayon di sumasangod, om bagal, do mantad hilo’d Bait-Togarma. ¹⁵ Iri nogi’ i tulun do Rodus nga’ minonokidagang-dagang i’ diya’; ogumu’ o tulun do mantad id kinoiyonon dot id tisan do rahat do minanahak diya’ do lamai; om kayu dit oitom do maan do pogolon di dapu’ nu. ¹⁶ Om iri tulun do Siria nga’ minomoli nogi’ di dapu’ do padagangon nu, om i winonsoi nu di mogisuayan dit ogumu’. Om pinomoli nopo diyolo’ di dapu’ nu om kain dot otomou daragang-ragang, om rinda’, om kain linan dit aalus, om karang, om watu delima. ¹⁷ Pinomoli nod Yohuda om Israil di dapu’ nu, om gandum, om paha’, om tumau do saitun, om rampa. ¹⁸ - ¹⁹ Om iri tulun do Damsik nga’ minomoli nogi’ di dapu’ do dagangon nu om i winonsoi nu di mogisuayan nopo. Pinomoli nopo diyolo’ nga’ waig dot anggur do mantad hilo’d Hilbon, om hulu’d dumba’ do mantad hilo’d Sahar. Om pinoolon diyolo’ di dapu’ nu i basi’ do tinantan om i rampa diyolo’. ²⁰ Om pinomoli no di tulun do Didan di dapu’ nu, om i kain do wonsoyon do pakol. ²¹ Om pinomoli no di tulun dot Arab om i piro-piro o pomorinta’ do pomogunan do Kidar di dapu’ do dagangon nu, om tanak do dumba’, om dumba’ do tontoluhan om kambing. ²² Om pinomoli nopo di piro-piro o dumadagang do mantad hilo’d Siba om Raima di dapu’ nu, om i pongillumis do tinan dit agayo o gatang, om tamas om rampa dit ongosonong kopio. ²³ Duminagang nogi’ om minomoli do mantad id diya’ i kabandaran do Haran, om Kani, om Idon, om i piro-piro o dumadagang do mantad hilo’d Siba, om i kabandaran dot Asur om Kilmad. ²⁴ Pinapadagang iyolo’ do pakayan dit agayo o gatang, om kain dit otomou daragang-ragang, om kain di kirinda’, om i pamalapik do sirang di mogisuayan nopo o bunga, om tali di pongogos dit alanut. ²⁵ Iri nopo dumadagang nu nga’ poinsakai’d kapal do rahat di dong dumadagang dit angagayo. Miagal ko no kopio’d kapal do hilo’d rahat dot agayo, i poimponu’d dapu’ dit angawagat. ²⁶ Tontok di nayu ko di mangangayu diya’, do kumaa’d hilo’d rahat, om raago’ ko nod tongus do mantad hilo’d koulayon di hilo’ ko pod tanga’d rahat. ²⁷ Koinsanai nopo i dapu’ do dagangon nu, om koinsanai nopo i papamanau di kapal nu, i tukang kayu, om i dumadagang, om koinsanai di soudor do poinsakai, do natagak do nolonsod do hilo’d rahat, do tontok di naraag om nolonsod i kapal nu. ²⁸ Iri nopo giniakan di papamanau di kapal do rahat do tontok di motilonsod no, om orongou i’ do hiri’d tisan di rahat. ²⁹ Notongkiadan ngai’ noddi o kapal, om nokoongoi ngai’ nod hilo’d katanaan i papamanau do kapal. ³⁰ Mogihad ngai’ poddi iyolo’ diya’, popingarab po iyolo’ do pupuk do hiri’d tulu diyolo’ om mingisis do hiri’d pupuk do pointalang dot adalaan iyolo’d tumongob. ³¹ Linagasan diyolo’ o tulu diyolo’ dot iya’ o kinapamalagasan. Om minanampakai iyolo’ do pakayan do mogihad. Om tumongob tomod iyolo’ di maso diyolo’d mogihad diya’. ³² Om modsinding iyolo’ do sinding do pogihad diya’ do poingkaa, ’Isai po o koiyo do Tirus, Tirus it aiso’ noddi o komi do hilo’d nanad do rahat? ³³ Soira’ di minongoi do hilo’d soborong do rahat i tulun nu di dumadagang do poinsakai’d kapal do rahat di poimponu’d dapu’ di dagangon, om pinatahak ngai’ nu i’ i pinokianu do koinsanai’d bansa’. Nangkakaya’ nu o raja’, tu’ ogumu’ kopio i’ o dapu’ nu. ³⁴ Om baino’ noddi om poingraag ko po do hilo’d rahat; om nolonsod ko do hilo’d rahat dit aralom om i dapu’ nu om i tulun do pakaraja’ dot id diya’, nga’ natagak ngai’ no do nokowoyo’ diya’ do nolonsod do hilo’d rahat,’ ka. ³⁵ Kotigowo ngai’ nopo i tulun di songingiyon do hilo’d tisan do rahat do korongou di kinootuson nu. Om iri piya raja’ diyolo’ nga’ ongooris i’, om moddosi ngai’ poo o kokitanan do rabas diyolo’. ³⁶ Natagak ko no, om a’ ko no hino do gisom dot alaid, om ongooris po o koinsanai’d tulun di dumadagang do pointongkop diti pomogunan; tu’ ooris iyolo’ dot iyo di diya’ o kootuson diyolo’,’’ ka dau.

¹ Om boro-boros no o TUHAN dot id doho’ do poingkaa, ² ’’Oi tulun, sunudan no i raja’ do Tirus diti poboroson ku dau, iyoho’ i TUHAN it Asawat Kopio, do poingkaa: Asawat tomod o ginawo nu, om momoros ko daa do kinorohingan ko. Boros ka nu om miagal ko pod kinorohingan do poirikau dot id tirikohonon do don raja’, do kikuasa’ dot id sawat do koinsanai’d rahat. Om minsorupai-rupai ko daa do kinorohingan ko, nga’ okon ko i’ ko’ kinorohingan, tu’ tulun ko i’ toomod. ³ Om ondos nu daa om oilo ko po ko’ i Danil, om aiso’ o milo’d lisokon do mantad id diya’. ⁴ Iri no i toilaan nu om i koiloo’ nu o pinapakaya’ diya’, gisom do kidapu’ ko, om kitamas om kipirok ko. ⁵ Om oilo ko do mongingusin om haro kasai’ nopo o tuntung nu. Om oondos tomod ko’ddi di kakayaan nu! ⁶ Iyo nopoddi, om pokinongou no diti boros ku, iyoho’ i TUHAN, it Asawat Kopio. Tu’ momusorou ko daa dot iyo ko’d Kinorohingan. ⁷ Om porikot oku nondod pisangod dit ongorongit do mongoi panangod diya’. Om raagon ngai’ nondo diyolo’ o koinsanai di dapu’ dit ongolumis di nangaanu nu tu’ oilo ko i’ om opintar ko. ⁸ Om patayon ko nondo diyolo’ om lobongon ko do hilo’d rahat. ⁹ Om rumikot nopondo iyolo’ do mongoi pamatai diya’ om momoros ko pod Kinorohingan ko? Kotimbaba’ ko nopondo di mamatai diya’ om tulun ko indo toomod, om okon ko i’ ko’ Kinorohingan. ¹⁰ Om patayon ko nondo do miagal pod tulun dit aiso’ o ngaran-ngaran, tu’ iri i tulun di bansa’d suwai, it a’ kotutun do Kinorohingan o mamatai diya’. Iyoho’ no, i TUHAN it Asawat Kopio, o minomoros diti,’’ ka dau. ¹¹ Om boro-boros po kawagu o TUHAN dot id doho’ do poingkaa, ¹² ’’Oi tulun, pogihadai no o raja’ do Tirus. Om sunudan no iyau diti poboroson ku dot id dau, iyoho’ i TUHAN, it Asawat Kopio, do poingkaa: Di nopo di gulu po om iya’ no o poiyaan dit aiso’ o bohiton. Tu’ oilo ko om oligkang ko! ¹³ Poingiyon ko do hilo’d Idon, i kabun do Kinorohingan, om pakayan nu nga’ linumis do watu dit agayo o gatang, di mogisuayan, i watu do delima, om mutiara’, om topas, om pirus, om Yakut, om ratna, om cempaka, om nilam, om samrud, om watu alkali dit aragang. Om ogumu’ o tamas do pongillumis nu. Iri nopo om winonsoi do bagi diya’ do tontok di tadau do winonsoi ko. ¹⁴ Om minonuhu’ oku do moloikat di koronob kopio do madtamong diya’ do hilo’. Om poingiyon ko dot id nuluhon ku dit olidang. Om mimpanau ko dot id pogialatan di watu dot olumis dit angagayo o gatang di songkilou-kilou. ¹⁵ Aiso’ i bohi-bohiton do kowoyo-woyoo’ nu dit a’ po norikot i tadau di tuminimpuun ko do momonsoi’d araat. ¹⁶ Agangau ko pod mongingusin; om iri no o nokobungou diya’ do ruminaat om minomonsoi’d dusa. Om uyungo’ ku noddi iya’ do mantad hiri’d nuluhon ku dit olidang, om i moloikat di madtamong diya’ nga’ minonguyung i’ diya’ do mantad hiri’d watu dit olumis dit angagayo o gatang di songkilou-kilou’ddi. ¹⁷ Pinopoondos diya’ i koligkango’ nu, om pinapabasug diya’ i kobontugo’ nu. Om gowoi poddi om pinodumpau ku iya’ do hilo’d tana’, om siniliu ku iya’ do popoinsan di piro-piro o raja’ do suwai,’’ ka dau. ¹⁸ Om boro-boros no kawagu o TUHAN do poingkaa, ’’Oi Tirus araat tomod o kowoyo-woyoo’ nu do padagang om momoli gisom dot iri piya tiyonon nu’d sumambayang nga’ nososomu’ ngai’ i’. Om tutudai ku noddi i bandar gisom dot naawu. Om tauu ko poddi dot okito do koinsanai’d tulun. ¹⁹ Natagak ko noddi, om a’ ko no hino do gisom dot alaid. Om oinsanan nopo i bansa’ di nokotutun diya’ dot ongooris, tu’ moddosi dot oontok do miagal di nokoontok diya’,’’ ka dau. ²⁰ Om boro-boros no o TUHAN dot id doho’ do poingkaa, ²¹ ’’Oi tulun, papalan no o bandar do Sidon. ²² Sunudan no i tulun do hilo’ diti poboroson ku dot id diyolo’, iyoho’ i TUHAN, it Asawat Kopio, do poingkaa: Iyoho’ no o pisangod nu, oi Sidon; om royohon oku nondod tulun dot i wonsoyon ku dot id diya’ o kapamarayahan. Om koilo nondo iyolo’ dot iyoho’ no o TUHAN it olidang om araatan dit angaraat, do tontok do hukuman ku i tulun di songingiyon do hilo’. ²³ Om porikatan ku nondo iyokoyu do toruol om poluyungon ku o raha’ do hilo’d karalan-ralanan. Om tutukan kou nopondod tulun do manangod, om angapatai nondo o tulun nu. Om koilo ko nogindo dot iyoho’ no o TUHAN,’’ ka dau. ²⁴ Om boros kad TUHAN, ’’Aiso’ nondo o tiso’ di pomogunan do posorili’ dot Israil, i minongulok-ulok daa dot Israil, do koumbal kawagu do miagal do rugi om sakot di kohorob do pokoruol dot Israil. Om koilo nondo iyolo’ dot iyoho’ no o TUHAN it Asawat Kopio,’’ ka dau. ²⁵ Om boros kad TUHAN it Asawat Kopio, ’’Pogulion ku nondo kawagu i tulun dot Israil do mantad id koinsanai’d pomogunan di hilo’d sodu’ di pinotompiasan ku diyolo’. Om koilo ngai’ nogindo i bansa’ dot olidang oku. Om miyon nondo kawagu i tulun dot Israil do hilo’d pomogunan diyolo’, i pomogunan di pinatahak ku dot id di Yakub, i susuhuon ku. ²⁶ Om aiso’ indo o koligagaanan diyolo’ do poingiyon do hilo’. Om mamaal nondo iyolo’ do walai om mananom do kabun dot anggur. Om hukuman ngai’ ku nondo i songkoduwo diyolo’, i nokoumbal do minongulok-ulok diyolo’, om osimbayan nondo ot Israil. Om koilo kou nogindo dot iyoho’ no i TUHAN, i Kinorohingan,’’ ka dau.

¹ Tontok di tadau’d kohopod om duwo, di tulan do kohopod, om toun di kohopod do hiri iyahai’d pomogunan do pisangod, om boro-boros no o TUHAN dot id doho’ do poingkaa, ² ’’Oi tulun, pasalao’ no i raja’ do Masir. Sunudan no iyau do hukuman iyau om koinsanai di tulun do hilo’d pomogunan do Masir,’’ ka dau. ³ Om suhuo’ oku nod TUHAN it Asawat Kopio, do popoboros dot id raja’ do Masir diti boros dau do poingkaa, ’’Iyoho’ no o pisangod nu, oi buayo dit agayo, i poillatan do hilo’d bawang. Boros ka nu, om iya’ no o sanganu di Bawang do Nil, om iya’ o minomonsoi’ddi. ⁴ Koiton ku nondod tapon ino roo nu om posokoton ku do sisi’ nu i sada’ do hilo’d bawang. Om gayaton ku nondo iya’ do tumindal di Bawang do Nil do mitonggoi di sada’ di songinsokot do sisi’ nu. ⁵ Om pataamon ku nondo iya’ do hilo’d tana’ do kowotuan do mitonggoi di sada’ do poinsokot diya’. Om poingiliu pondo do hiri’d tana’ o tinan nu, om aiso’ o tulun do mongoi pomolobong. Om patahakon ku nondo iri dot id tombolog om id nintorusan do maan diyolo’d kanon. ⁶ Om koilo ngai’ nogindo i tulun do hilo’d Masir dot iyoho’ no o TUHAN,’’ ka dau. Boros kad TUHAN, ’’Suminondiu daa i tulun dot Israil dokoyu, oi bansa’ do Masir, nga’ miagal ko nod sukud dit opihoi. ⁷ Soira’ di suminondiu iyolo’ diya’ om kotipu’ ko no, om kotodok o pokilok diyolo’, gisom do mitohirod-hirod po iyolo’. ⁸ Om gowoi poddi om sunudan ku iya’, iyoho’ i TUHAN it Asawat Kopio: do porikot oku nondod soudor do mongoi panangod diya’ do gayang o panangod. Om patayon nondo diyolo’ i tulun nu om i tayam-tayam nu. ⁹ Om osiliu nondo o Masir do pogun dit oingou. Om koilo kou nogindo dot iyoho’ no o TUHAN,’’ ka dau. Om boros kad TUHAN, ’’Oi raja’ do Masir, minomoros ko do diya’ di Bawang do Nil, om iya’ o minomonsoi’ddi. ¹⁰ Om osiliu oku nondod pisangod nu om pisangod di Bawang do Nil. Silihon ngai’ ku nopondod pogun o pointongkop do Masir do mantad pod hilo’d bandar do Migdol, i ponong hilo’d utara om gisom di bandar dot Aswan do ponong id salatan, om poingompus di wolit dot Etiopia. ¹¹ Om aiso’ nondo o tulun ko’ nintorusan do maya’d hiri. Om aiso’ o tulun do miyon do hiri do solinaid dot apat nohopod o toun. ¹² Om silihon ku nondo o Masir do pomogunan dit oingou kopio, dot id pogialatan do pomogunan do suwai dit ongoingou. Om poinraag nopondo i kabandaran do Masir do solinaid dot apat nohopod o toun, om i naraag no kopio ko’ mantad di suwai. Om silihon ku nondo i tulun do Masir do tulun dit aiso’ o pomogunan. Mogidu’ nondo iyolo’ do kumaa dot id pointikid-tikid do pomogunan om miyon do poinsugku’ do bansa’d suwai,’’ ka dau. ¹³ Om boros kad TUHAN, it Asawat Kopio, ’’Katalib pondo ot apat nohopod o toun om pogulion ku nogi’ kawagu i tulun do Masir do mantad id pomogunan di pinotompiasan ku diyolo’. ¹⁴ Om pologoson ku nogindo iyolo’ do momogun-mogun do hilo’d Masir do ponong id salatan, i pinomogun-mogunan mantad diyolo’. Om oluhoi nondo o pomorintaan diyolo’ do hilo’. ¹⁵ I pomorintaan dit oluhoi no kopio do pointongkop diti pomogunan. Om a’ nondo iyolo’ momorinta’ do bansa’d suwai. Om poluhoyon ku nondo kopio iyolo’ gisom dot a’ no iyolo’ milo do mononsog do nunu nopo o bansa’d suwai do tumanud do diyolo’d korohian. ¹⁶ Om Israil nga’ a’ nondo mumbal do sumondiu diyolo’. Tu’ iri nondo i kinootuson do Masir o poposorou dot Israil do kasala’ do sumondiu diyolo’. Om koilo nogindo ot Israil dot iyoho’ no o TUHAN, it Asawat Kopio,’’ ka dau. ¹⁷ Tontok di tadau’d koiso’ do tulan do koiso’, di koduwo nohopod om turu’ do toun dahai do hiri’d pomogunan do pisangod, om boro-boros no o TUHAN dot id doho’ do poingkaa, ¹⁸ ’’Oi tulun, noongoi no di Raja’ Nobukadnisar, i mantad hilo’d Babil, kasangod o Tirus. Sinuhu’ dau i piro-piro o soudor dau do sumaan dit awagat kopio do gisom do nongouul o tobuk do tulu diyolo’ do nokisasan, om nongosuhat o lihawa diyolo’. Nga’ aiso’ i’ o naanu-anu di raja’ om i piro-piro o soudor dau dot iyo tomod piya’ddi o kinoudipono’ diyolo’. ¹⁹ Om gowoi poddi do poingkaa o poboroson ku, iyoho’ i TUHAN, it Asawat Kopio: Patahakon ku i pomogunan do Masir dot id di Raja’ Nobukadnisar. Om solodon ngai’ nopondo dau i kakayaan do Masir om tanggayan ngai’ dau iri do maan do pamagadsi’ di piro-piro o soudor dau. ²⁰ Patahakon ku o Masir dot id dau do maan ku do pamagadsi’ di karaja’ dau, tu’ kuminaraja’ i’ i piro-piro o soudor dau dot id doho’. Iyoho’ no i TUHAN, it Asawat Kopio, o minomoros diti. ²¹ Om osiliu nopondo o miagal diri, om pokorison ku nondo o tulun dot Israil om pologoson ku iya’, oi Yohoskiol, do mimboros dot opuhod om it id dorongou ngai’d tulun om koilo i’ iyolo’ dot iyoho’ no o TUHAN,’’ ka dau.

¹ Om boro-boros po kawagu o TUHAN dot id doho’ do poingkaa, ² ’’Oi tulun, poboroso’ no it osiliu dot id dabantalan om popimboroson no iti boros ku, iyoho’ i TUHAN, it Asawat Kopio, dot id bansa’d Masir. Poboroson no dot id diyolo’ o poingkaa do mikuwo’d mihad: Rumikot no o tadau’d TUHAN, i tadau di kopoddosian kopio. ³ Oruhai no i tadau’ddi, i tadau do kapamansayan do TUHAN di wonsoyon dau, mituong nondo o tadau’ddi om tadau’d kosusaan dot id piro-piro o bansa’ dit orotuan do hukuman. ⁴ Haro nondo o pisangadan do hilo’d Masir, om haro o koinggoritan do hilo’d Etiopia. Ogumu’ nondo ot apatai do hilo’d Masir. Apanakahan nondo i pomogunan diri om osiliu’d pogun. ⁵ Om angapatai ngai’ nondo dot id pisangadan diri i soudor di ginodsian di mantad hilo’d Etiopia, om hilo’d Lidia, Libia, om hilo’d Arab, om hilo’d Kub, om mantad id pogialatan di tulun ku,’’ ka dau. ⁶ Om boros kad TUHAN it Asawat Kopio, ’’Mantad po do hilo’d Migdol i ponong hilo’d utara om gisom do hilo’d Aswan i ponong hilo’d salatan, om oinsanan nopo i soudor di sumokodung do Masir dot apatai dot id pisangadan. Iyoho’ no i TUHAN, it Asawat Kopio, o minomoros diti,’’ ka dau. ⁷ ’’Om osiliu nondo o pomogunan diri do pomogunan dit oingou kopio dot id pogialatan di pomogunan do suwai dit ongoingou. Om osiliu’d pogun i kabandaran do hilo’. ⁸ Om otutudan ku pondo o Masir om angapatai ngai’ i sumokodung dau om koilo nogindo iyolo’ dot iyoho’ no o TUHAN. ⁹ Orikot nopo o tadau’ddi om araag o Masir, om monuhu’ oku nondod tulun do mongoi poporomut di habar, om sumakai iyolo’ do kapal do rahat. Om tigowoon nondo diyolo’ i tulun dot Etiopia dit a’ i’ nokoinsan mantad, om moddosi nondo iyolo’. Rumikot no i tadau’ddi!’’ ka dau. ¹⁰ Om boros kad TUHAN it Asawat Kopio, ’’Pakayon ku’ndo i Nobukadnisar, i raja’ do Babil do mamaraag do koinsanai di kakayaan do Masir. ¹¹ Rumikot nondo i Nobukadnisar do miwoyo’ do koinsanai di soudor dau dit a’ mangampun do mongoi pamaraag do pomogunan diri. Songodon nondo diyolo’ do gayang o Masir, om oponu’ pondod rata’ i pomogunan diri. ¹² Om rasakan ku’ndo i Bawang do Nil om patahakon ku nondo o koinsanai do Masir dot id tulun dit araat diri. Om bansa’ nondod suwai o suhuon ku’d mamaraag do pointongkop do pomogunan diri. Iyoho’ no i TUHAN, o minomoros diti,’’ ka dau. ¹³ Om boros kad TUHAN it Asawat Kopio, ’’Raagon ngai’ ku’ndo i tingolig om i tininganak do hilo’d Mimpis. Om aiso’ nondo o raja’ do Masir, om rolosion ngai’ ku i tulun do hilo’. ¹⁴ Poingohon ku nopondo o pointongkop do Masir i ponong id salatan om tutudan ku i bandar do Soan i ponong hilo’d utara. Om hukuman ku nondo o Tibi i bandar dot agayo. ¹⁵ Om raagon ku o kakayaan dau. Popurimonon ku’ndo kopio di kototogod ku i bandar do Polusium, i kuta’ do pogintirungan do Masir. ¹⁶ Tutudan ku nondo o Masir, om oinggorit pondo o bandar do Polusium. Araag nondo i tingolig do bandar do Tibi om oluyudan i bandar diri. ¹⁷ Angapatai nondo dot id pisangadan i tangaanakwagu do bandar do Hiliopolis om Bubastis, om angatanggayan do pisangod i tongoondu’. ¹⁸ Om tumuong nondo o bandar do Tapanhis dot aala’ ku o Masir om araag ku i kuasa’ diyolo’ di tiondos-ondos kopio diyolo’. Om olikupan nondod haun o Masir, om oinsanan nopondo i tongoondu’ do kabandaran do hilo’ dot atanggayan do pisangod. ¹⁹ Om ohukuman ku pondo o Masir do miagal diti om koilo nogindo iyolo’ dot iyoho’ no o TUHAN,’’ ka dau. ²⁰ Tontok di tadau do koturu’, di tulan do koiso’, di kohopod om iso’ do toun dahai dot id pomogunan do pisangod, om boro-boros no o TUHAN dot id doho’ do poingkaa. ²¹ ’’Oi tulun, notipu’ ku no i longon di raja’ do Masir. Om aiso’ i’ o minongoi pomorilit di longon dau om aiso’ o minongoi pongurut do momolingos om okoris i’ daa kawagu do mongigit do gayang. ²² Om gowoi poddi do poingkaa o poboroson ku, iyoho’ i TUHAN it Asawat Kopio: Nosiliu oku nod pisangod di raja’ do Masir. Om ngoyon ku po kawagu tipuo’ goduwo i longon dau, dot it a’ notipu’, om i notipu’ no mantad om oilihan nopondo dau i gayang. ²³ Om potompiason ku nondo i tulun do Masir do pointongkop diti pomogunan. ²⁴ Om pokorison ku nondo o longon di raja’ do Babil om poigitan ku dau i gayang ku. Nga’ tipuon ku’ndo goduwo i longon di raja’ do Masir, om modoi-odoi pondo iyau om apatai dot id toguang di raja’ do Babil i pisangod dau. ²⁵ Poluhoyon ku’ndo i raja’ do Masir om pokorison ku i raja’ do Babil. Om patahakon ku nopondo dau i gayang ku om paakangon no dau do hilo’d Masir, om koilo ngai’ nogindo o tulun dot iyoho’ no o TUHAN. ²⁶ Om potompiason ku nondo i tulun do Masir do pointongkop diti pomogunan. Om koilo nogindo iyolo’ dot iyoho’ no o TUHAN,’’ ka dau.

¹ Tontok di tadau’d koiso’, di tulan do kotolu, di kohopod om iso’ do toun dahai dot id pomogunan do pisangod, om boro-boros no o TUHAN dot id doho’ do poingkaa, ² ’’Oi tulun, poboroson no iti boros ku dot id raja’ do Masir om id koinsanai’d tulun dau: Okoris kopio ko’, oi Masir! Nunu po daa o poiyaan ku diya’? ³ Iyo ko di kayu sedar do Libanon, ogumu’ om olumis o raan nu, om orindog o guas nu, om korikot i’ do hilo’d haun o kakawaso’ nu. ⁴ Haro i’ o waig do poposuni’ddi, om haro o waig do hiri’d tana’ do poporombung diri. Siniram diyolo’ o hiri’d puun di kayu. Om siniram ngai’ i kayu’d suwai. ⁵ Akawas iddi ko’ i kayu’d suwai i kayu’ddi di nokosuni kopio, tu’ osima’ i’ do waig. Angagayo om anganaru i raan dau. ⁶ Mogisuayan nopo o bansa’ do tombolog do momirumun do hiri; om paganakan do nintorusan o hiri’d dolungungan. Minundorong ngai’ i bansa’ dot angagayo do pointongkop diti pomogunan dot id dolungungan di kayu’ddi. ⁷ Olumis tomod dot okito i kayu’ddi. Orindog o guas, om gamut nga’ nakaladsong do hilo’d saalom do gisom do nokorikot di tudan do waig do hilo’d saalom do tana’. ⁸ Aiso’ i’ o kayu sedar do hiri’d kabun do Kinorohingan do koiyo’ddi. Aiso’ i’ o kayu sanobar ko’ kayu berangan do miagal di kayu’ddi kanaru o raan. ⁹ Iyoho’ i’ o pinopolumis diri, gisom dot anganaru o raan. Mosol ngai’ nopo di kayu’ddi i kayu do hilo’d Idon, i kabun do Kinorohingan. ¹⁰ Nga’ baino’ nopondo, om sunudan ku iya’, iyoho’ i TUHAN, it Asawat Kopio o momisunud, dit osiliu dot id kayu’ddi, i suminuni do gisom do nokorikot do hilo’d haun. Soira’ di mawas-kawas i kayu’ddi do sumuni om mawat-sawat no o ginawo dau. ¹¹ Om gowoi poddi om niadaan ku iyau om patahakon ku dot id bansa’d suwai. Om wonsoyon nondo dau dot id kayu’ddi o miontok di nowonsoi dau dot araat. ¹² Tagadon nondo iri om tongkiadan di soudor do bansa’d suwai dit a’ mangampun. Om rumatu’ nondo i raan di kayu’ddi dot id pointikid-tikid do nuluhon om kubong do hiri’d pomogunan diri. Om mogidu’ ngai’ nopondo i bansa’ di songillungung daa do hiri’d sahau’ddi. ¹³ Om mongoi nondo sako i tombolog do hiri’d kayu di nahaba’ddi, om pingulakan di nintorusan i raan. ¹⁴ Gowoi pondo om mantad nopod baino’, om aiso’ nondo o kayu dot iyo kopio’ddi o kakawaso’; om aiso’ no o kayu di korikot do hilo’d haun dot osima’ piya daa’d waig. Oinsanan nopo iyolo’ do matai do miagal do tulun toomod, om koongoi kosugku’ di tulun di lumintuhun do hilo’d pomogunan do tulun do napatai,’’ ka dau. ¹⁵ Iti no o poboroson do TUHAN, it Asawat Kopio, ’’Tontok nopondo di tadau do mongoi i kayu do hilo’d pomogunan do napatai, om pooliton ku nondo di kayu i waig dit id saalom do tana’, do tanda’ do mogihad. Om wokokon ku nondo i bawang om a’ ku poluyungon i luyu-luyu’. Om potuongon ku nondo o hilo’d Libanon om riohon ngai’ ku i kayu do hiri’d puru’, tu’ napatai no i kayu’ddi. ¹⁶ Om tontok nopondod pokoyoon ku i kayu’ddi do hilo’d pomogunan do tulun do napatai, om iri po i kurubut dau do humaba’ nga’ popogogor i’ do koinsanai’d bansa’. Om oinsanan nopondo i kayu dot Idon dit ongosonong kopio om i kayu dit opiyopos do waig do hilo’d Libanon di nokoongoi no do hilo’d pomogunan do tulun do napatai dot angasanangan do nahaba’ i kayu’ddi. ¹⁷ Om tumanud nondo iyolo’ddi do mongoi do hilo’d pomogunan do tulun do napatai, do mongoi sugku’ di nokopogulu nod nahaba’. Om oinsanan nopondo i minongoi daa intulungung di kayu’ddi do kotias dot id piro-piro o bansa’. ¹⁸ Iri nopo kayu’ddi nga’ poiyaan di raja’ do Masir om koinsanai di rayat dau. Aiso’ i’ o koiyo’ddi kakawas om kolumis di kayu do hilo’d Idon. Nga’ baino’ nopoddi om iyo i’ di kayu di hilo’d Idon i kayu’ddi tu’ koongoi i’ do hilo’d pomogunan di tulun do napatai om kosugku’ di tulun dit a’ kotutun do Kinorohingan om i nangapatai dot id pisangadan. Iyoho’ no i TUHAN, it Asawat Kopio, o minomoros diti,’’ ka dau.

¹ Tontok di tadau’d koiso’, di tulan do kohopod om duwo, di kohopod om duwo’d toun dahai dot id pomogunan do pisangod, om boro-boros no o TUHAN dot id doho’ do poingkaa, ² ’’Oi tulun, poinsanon no kopio i raja’ do Masir. Sunudan no iyau diti boros do mantad id doho’ do poingkaa: Mingiyo-iyo ko daa di singa dit okoro’ po dot id pogialatan do bansa’, nga’ iyo ko nogi’ di buayo di mingkurabug do hilo’d bawang. Lobohon nu do gakod nu i waig om sosomuon nu o koinsanai di bawang. ³ Om soira’ nopondod tumimung ngai’ o bansa’, om gomiton ku nondo iya’ do hiri’d rambot ku om pologoson ku nogindo iyolo’ do mamagayat di rambot diri do potindal. ⁴ Om podumpahon ku nondo iya’ do hiri’d tana’ om porikoton ngai’ ku nogindo i tombolog om nintorusan do pointongkop diti pomogunan do mongoi pangakan diya’. ⁵ Om tongkopon ku nopondo i konuluhanan om i kokubang-kubangan di rata’ nu di napasa’. ⁶ Om potuntugon ku i raha’ nu do gisom do koyopos di nuluhon om koponu’ di kabawang-bawangan. ⁷ Om soira’ nopondod patayon tiya’, om potuongon ku nondo ilo tawan om tirungon ku i rombituon. Om tumirung nondo ilo tadau di haun om a’ mogulinau i tulan. ⁸ Om pisokon ngai’ ku nondo i tulinau do hilo’d tawan om potuongon ku o pomogunan nu. Iyoho’ no i TUHAN, it Asawat Kopio, o minomoros diti. ⁹ Om ogumu’ nondo o pomogunan dot angagangau do potongkopon ku o habar do kinaraagan nu dot id piro-piro o pomogunan dit a’ nu po noilaan do gulu. ¹⁰ Om iti nopo wonsoyon ku dot id diya’ nga’ popotigowo dot ogumu’ o bansa’. Om soira’ di paakangon ku o gayang ku, om pananggagaran ngai’ pondo i raja’ dot opopoddosian. Om tontok nopondo di tadau do kahabaan nu, om oinsanan nopondo iyolo’ do gagaran dot ooris dot apatai,’’ ka dau. ¹¹ Om boros kad TUHAN it Asawat Kopio, dot id raja’ do Masir, ’’Akangan ko nondo di gayang do raja’ do Babil. ¹² Pologoson ku nondo i soudor do mantad id bansa’ dit ongorongit do mongodong do gayang diyolo’, om mamatai do koinsanai’d tulun nu. Oinsanan nopondo i tulun nu om oinsanan i kaandasan nu dot angaraag. ¹³ Sumbolion ngai’ ku nopondo i tayam-tayam nu dot id pointikid-tikid do bawang di tiinuman diyolo’. Aiso’ nondo o tiso’ pod tulun ko’ nintorusan po do momolobou di bawang. ¹⁴ Pologoson ku nondo do posinonod i waig nu om oniniting i’, om pologoson ku i bawang nu dot osimbayan do lumuyung. Iyoho’ no i TUHAN it Asawat Kopio, o minomoros diti. ¹⁵ Soira’ pondod silihon ku do tana’ dit a’ sunian dit oingou o Masir om patayon ngai’ ku i songingiyon do hilo’, om koilo nogindo iyolo’ dot iyoho’ no o TUHAN. ¹⁶ Om osiliu nondod sinding do pogihad iti boros do popoinsan. Om sindingon nondo di tongoondu’ di bansa’d suwai o sinding diti do pogihad do Masir om koinsanai di tulun do hilo’. Iyoho’ no i TUHAN, it Asawat Kopio, o minomoros diti,’’ ka dau. ¹⁷ Tontok di tadau’d kohopod om limo, di tulan do koiso’, di kohopod om duwo do toun dahai dot id pomogunan do pisangod, om boro-boros no o TUHAN dot id doho’ do poingkaa, ¹⁸ ’’Oi tulun, pogihadai no i tulun do Masir dit ogumu’ddi. Pokoyoo’ no iyolo’ om i bansa’d suwai dit ongokoris do hilo’d pomogunan do tulun di napatai. ¹⁹ Om sunudan no iyolo’ do poingkaa: Ondos nu daa om pointalib kopio ko’ wokon o diya’d kolumiso’? Kasaalom ko nondo do hilo’d pomogunan do tulun di napatai om poliiyon ko’d hilo’, do poinsugku’ di tulun dit a’ kotutun do Kinorohingan. ²⁰ Om angapatai nondo i tulun do Masir do kotonggoi di tulun dit angapatai dot id pisangadan. Posodia’ no o gayang do pamatai diyolo’. ²¹ Om iri po i piro-piro o gunsiou om i tulun di suminaap do minuhup do Masir dot id pisangadan nga’ sumuwau ngai’ nopondo di tulun do Masir di kumaa iyolo’ do hilo’d pomogunan do tulun do napatai. Minggiak pondo iyolo’ do poingkaa, ’Nokoongoi nod hiti it a’ kotutun do Kinorohingan, i nangapatai dot id pisangadan; om hiti nondo o liiyon diyolo’!’ ka. ²² - ²³ Asur nga’ hilo’ nogi’, om pointutuk nopo dau i lobong di piro-piro o soudor dau. Nangapatai ngai’ nopo i soudor dau dot id pisangadan, om songintutuk di pinamalabangan dau i diyolo’d lobong di hiri’d saalom kopio. Om nokoumbal i’ daa iyolo’ di poimpasi po iyolo’ do minongoris do tulun di hilo’ po iyolo’d pomogunan. ²⁴ - ²⁵ Ilam nga’ hilo’ nogi’, om pointutuk dau i lobong do soudor dau. Nangapatai ngai’ no iyolo’ dot id pisangadan dit a’ po iyolo’ nosunatan, om saalom ngai’ nopoddi iyolo’ do hilo’d pomogunan do tulun di napatai. Di nopo di poimpasi po iyolo’ om mongongoris iyolo’, nga’ baino’ nopoddi om napatai no iyolo’ om nointingayam do mitonggoi di tulun di nangapatai dot id pisangadan. ²⁶ Misik om Tubal nga’ hilo’ nogi’, om pointutuk diyolo’ i lobong do soudor diyolo’. A’ ngai’ nopo iyolo’ nosunatan, om nangapatai ngai’ dot id pisangadan. Nga’ nopo di songimpasi po iyolo’, om minongoris i’ daa iyolo’ do tulun di hilo’ po iyolo’d pomogunan. ²⁷ A’ i’ pinusou i kinapamalabangan diyolo’ do miagal di pomolobong do gunsiou di gulu po, tu’ tinanggayan ngai’ i’ di rapo-rapo do sumangod do tontok di linobong; pinoulunanan i gayang diyolo’ om pinasakai di tinan diyolo’ i kolid. Iti nopo piro-piro o gunsiou diti nga’ ongokoris kopio di poimpasi po iyolo’ do gisom do moddosi ngai’ nopo diyolo’ i tulun. ²⁸ Om iyo nondoddi i tulun do Masir do lobongon om poingiliu tomod dot id pogialatan do tulun dit a’ kotutun do Kinorohingan i tulun di nangapatai dot id pisangadan. ²⁹ Idom nga’ hilo’ nogi’ do mogiwoyo-woyo’ di piro-piro o raja’ om pomorinta’ dau. Soudor daa iyolo’ dit ongokoris di gulu po, nga’ baino’ noddi om songingiliu po iyolo’ do hilo’d pomogunan do tulun di napatai do poinrolot di tulun dit a’ kotutun do Kinorohingan, i nangapatai dot id pisangadan. ³⁰ Iri i piro-piro o pomorinta’ do ponong hilo’d utara om i tulun do Sidon nga’ hilo’ nogi’. Kooris tomod i kuasa’ diyolo’ di gulu po, nga’ baino’ noddi om nointingayam po tomod iyolo’ do poinrolot di tulun di nangapatai dot id pisangadan, om i songingiliu poo; om aiso’ i’ o nosunatan diyolo’. Om iyolo’ nga’ ointingayam no do miagal di tulun di nakakaa do hilo’d pomogunan do tulun di napatai. ³¹ Om oinsasamadan nondo i raja’ do Masir om i soudor dau do kokito di tulun di nangapatai dot id pisangadan. Iyoho’ no i TUHAN, it Asawat Kopio, o minomoros diti. ³² Di nopo gulu po om pinologos ku i’ o Masir do minongoris di tulun di songimpasi, nga’ angapatai indo i soudor dau, om iyau nogi’ nga’ apatai i’ om lobongon do poinsugku’ di tulun dit a’ kotutun do Kinorohingan, i nangapatai dot id pisangadan. Iyoho’ no i TUHAN, it Asawat Kopio, o minomoros diti,’’ ka dau.

¹ Om boro-boros no o TUHAN dot id doho’ do poingkaa, ² ’’Oi tulun, sunudan no i tulun nu dit osiliu do tontok do porikoton ku o pisangadan dot id iso’ o pomogunan. Poingkaa nondo ot osiliu: Momili’ nondo i rayat do songulun dot id pogialatan diyolo’ do sumiliu do madtatamong. ³ Om soira’ nopo dot okito dau i pisangod do rumikot, om pounion nondo dau i pouunion do momisunud do haro o koligagaanan, om koinsan ngai’ i’ o tulun. ⁴ Ondung haro o songulun do korongou’ddi pomisunud diri, om a’ indo mamadul diri, om rumikot nondo i pisangod do mongoi pamatai dau, om dau nod sala’ o kapatai dau. ⁵ Sala’ no dau o kapatai dau, tu’ a’ i’ iyau minamadul di pinomisunud dau, nga’ ondung minamadul daa iyau di pinomisunud diri om kopoggidu’ i’ doti’ daa iyau. ⁶ Nga’ ondung okito di madtatamong i pisangod do rumikot om a’ indo iyau popouni di pouunion do momisunud do haro o koligagaanan, om rumikot nondo i pisangod om patayon ngai’ no diyolo’ i tulun do kidusa’ddi. Nga’ iri indo i madtatamong o pababaan ku di kinapatayan diyolo’. ⁷ Om baino’ nodti, oi tulun, om silihon ku iya’ do madtatamong do bansa’ dot Israil. Om polombuson no dot id diyolo’ i boros ku do popoinsan do poingkaa, ⁸ ’Ondung poboroson ku do matai o songulun dot araat, om a’ nu i’ iyau ngoyon poinsano’ do posimban do kowoyo-woyoon dau, om apasi i’ iyau, om apatai nondo iyau, di maso dau do kidusa, om iya’ nondo o pababaan ku di kinapatayan dau. ⁹ Nga’ ondung ngoyon nu poinsano’ o tulun dit araat om tumomod indo o tulun diri dot a’ tumingkod do momonsoi’d dusa, om matai nondo iyau do maso dau do kidusa, nga’ iya’ nopondo om apasi i’,’ kanto,’’ ka dau. ¹⁰ Om boro-boros no o TUHAN dot id doho’ do poingkaa, ’’Oi tulun, poboroson no dot id tulun dot Israil i popimboroson dot id diyolo’ do poingkaa, ’Nawagatan po iyahai’d dusa dahai om i kasalaan do winonsoi dahai. Motipatai no iyahai. Poingkuro po iyahai’dti dot apasi?’ ka. ¹¹ Om sunudan no iyolo’ do sumumpa’ oku, dot id suang do ngaran ku, i Kinorohingan do poimpasi, i TUHAN it Asawat Kopio, dot a’ oku i’ moti’ kopio asanangan do kokito’d tulun di kidusa dot apatai. Orohian oku nogi’ daa kopio do kokito dau do rumologo’d dusa om apasi i’ iyau. Oi tulun dot Israil, rologo kou no koti’ do momonsoi’d araat. Nokuro tu’ uhang dokoyu’d apatai kou? ¹² Om dinondo no, oi tulun, om sunudan no i tulun dot Israil do soira’ nopo do momonsoi’d dusa i tulun dit osonong, om a’ no kapasi dau it ongosonong do nowonsoi dau dit id gulu. Om ondung tumingkod do momonsoi dot araat i tulun dot araat, om a’ no iyau ohukuman, om ondung tumimpuun i tulun dot osonong do momonsoi dot araat om a’ no iyau apasi. ¹³ Papabatos oku i’ doti’ daa do koposion dot id tulun dit osonong, nga’ ondung tumimpuun iyau do momusorou do kabagal no i kosonongo’ dau’ddi di maso di nakatalib, om momonsoi nondo iyau’d dusa, om a’ ku no sorohon it ongosonong do winonsoi dau. Om matai no iyau dot obungou di dusa dau. ¹⁴ Om haro i’ doti’ do nokoinsan ku no o tulun dot araat do matai no iyau, nga’ ondung tumingkod iyau do momonsoi’d dusa om momonsoi nondo dit otopot om it osonong, ¹⁵ do miagal ko’, ngoyon dau pogulio’ i pinasanda’ di tulun di minongutang dot id dau ko’ pogulion dau i pinanakau dau, om ondung tumingkod iyau do momonsoi’d dusa om tumanud nondo dit oturan di papakaa dot id koposion, om a’ indo iyau apatai, suwai ko’ apasi i’ iyau. ¹⁶ Om ompunan ku indo i dusa do nowonsoi dau, om apasi indo iyau, tu’ nowonsoi no dau it otopot om it osonong. ¹⁷ Om momoros po i bansa’ nu dot a’ otulid i wonsoyon ku do miagal diri. Nga’ iri nogi’ i diyolo’d winonsoi ot a’ otulid. ¹⁸ Om poboroson ku po kawagu do soira’ nopo do tumingkod o tulun dit osonong do momonsoi dit osonong om tumimpuun nogindo iyau do momonsoi’d araat, om apatai no iyau dot obungou’ddi. ¹⁹ Om soira’ nopo do tumingkod o tulun dot araat do momonsoi’d dusa om momonsoi nondo dit otopot om osonong, om apasi no iyau. ²⁰ Nga’ boros ka nu, oi Israil, om a’ i’ otulid i wonsoyon ku do miagal diri. Om butusan ku nondo iyokoyu do miontok di winonsoi dokoyu,’’ ka dau. ²¹ Tontok di tadau’d kolimo, di tulan do kohopod, di kohopod om duwo’d toun dahai dot id pomogunan do pisangod, om rikot no dot id doho’ ot iso’ o tulun, i nokopoggidu’ do mantad hilo’d Yorusalim, do minongoi pomisunud doho’ do naraag no i bandar do Yorusalim. ²² Di nopo totuong dit a’ po iyau nokorikot om nopurimanan ku no i sinundu do TUHAN. Om soira’ di nokorikot i tulun diri dot id doho’ di kosuabon, om koboros oku noddi kawagu om a’ oku no bobou. ²³ Om boro-boros no o TUHAN dot id doho’ do poingkaa, ²⁴ ’’Oi tulun, mimboros ngai’ po i tulun di songingiyon do hilo’d kinaraagan do kabandaran dot Israil do poingkaa, ’Songulun no i Abraham, om noinsanan i’ iti tana’ do pinatahak dot id dau. Om ogumu’ toko’ i’ iyati’, om dati’ noddi diti tana’’ ka diyolo’,’’ ka dau. ²⁵ Om gowoi poddi om suhuo’ oku nod TUHAN it Asawat Kopio do mongoi popoboros dot id diyolo’ diti boros dau do poingkaa, ’’Mangakan kou id daging di kiraha’ po. Om tumuku’ kou dot id tingolig. Om mamatai kou. Om nunu kopio daa’ddi o katama-tama’ dokoyu do manansanganu diti tana’? ²⁶ Sumondiu kou di gayang dokoyu. Om ino kowoyo-woyoon dokoyu nga’ koindaraat tomod. Magampahu’ ngai’ kou nopo. Om nunu kopio daa’ddi o katama- tama’ dokoyu do manansanganu diti tana’? ²⁷ Sunudan no iyolo’ do sumumpa’ oku, iyoho’ i TUHAN it Asawat Kopio dot id suang do ngaran ku i Kinorohingan do poimpasi, om poinsanon mantad ku iyolo’ dot iri ngai’ nopo tulun di poingiyon do hiri’d kinaraagan di bandar om angapatai nondo. Om iri no i songingiyon do hiri’d talun om angaakan do nintorusan. Om iri no songinlisok do hilo’d nuluhon om id luang do nuluhon om angapatai do toruo-ruol. ²⁸ Om silihon ku nondo do tana’ dit a’ sunian om oingou i pomogunan diri, om i kuasa’ di kaandasan tomod diyolo’ nga’ opupusan nondo. Om oingou tomod nondo i konuluhanan do hilo’d Israil om obulungkutan gisom dot aiso’ no o tongosongulun piya do kawaya’d hiri. ²⁹ Soira’ nopondod hukuman ku i tulun tu’ i dusa diyolo’ o kopomohukuman ku, om di silihon ku do pomogunan dot oingou i pomogunan diyolo’, om koilo nogindo iyolo’ dot iyoho’ no o TUHAN,’’ ka dau. ³⁰ Om boros kad TUHAN, ’’Oi tulun, iya’ po i pimboroson di tulun di bansa’ nu do tontok do kopogisosolowot iyolo’ do hilo’d toning do tolig do bandar om hilo’d wawayaan do walai diyolo’. Boros ka no diyolo’ do mogiboro-boros, ’Kainou mongoi pokinongou ondung nunu ka do boros do TUHAN do tadau’d baino’,’ ka. ³¹ Om gumurumung nopondo i tulun ku do mongoi pokinongou do poboroson nu, nga’ a’ i mando diyolo’ wonsoyon i ponuhuan nu diyolo’ do momonsoi. Osianan i’ o koboro-boroso’ diyolo’ nga’ ginawo nopo diyolo’ om poimponu’ nod korohian do mogihum do kountungan. ³² Id diyolo’ nopo om miagal ko no di modsisinding do minsinding do sinding do pasal do mogiuhang-uhang, om miagal di tulun dot oilo do mongombit do kecapi. Pokinongohon ngai’ i’ diyolo’ i boros nu nga’ aiso’ i’ tiso’ piya dot umboyoon diyolo’ddi. ³³ Nga’ soira’ pondo dot angabayaan i pinoboros nu, om atantu’ no dot angabayaan i’ iri, om oilaan nogindo diyolo’ do haro o nabi do nokoongoi dot id pogialatan diyolo’,’’ ka dau.

¹ Om boro-boros no o TUHAN dot id doho’ do poingkaa, ² ’’Oi tulun, pasalaon ngai’ no i raja’ dot Israil. Om sunudan no iyolo’ diti poboroson ku, iyoho’ i TUHAN it Asawat Kopio, dot id diyolo’, ’Nobungou kou no, iyokoyu i gompomogompi’ dot Israil! Tu’ gompion i’ dokoyu o tinan dokoyu nga’ a’ kou i’ insan do momogompi’ di dumba’ dokoyu. ³ Minginum kou id gatas di dumba’ om manampakai kou do pakayan do hulu di dumba’ do winonsoi, om mogkorot kou om mangakan kou di dumba’ dit olomu’. Nga’ a’ kou i’ insan do momogompi’ di dumba’ dokoyu. ⁴ A’ i’ dokoyu ginompi’ i dumba’ dit ongoluhoi, om a’ dokoyu nubatan i sumakit om a’ dokoyu rinilitan i nosuhat, om a’ dokoyu nongoi ihumo’ i napalid om i natagak. Suwai ko’ pinokorualan nogi’ dokoyu iyolo’. ⁵ Om kopogitongkiad-kiad nopoddi i dumba’ om naakan do nintorusan, tu’ aiso’ no o gompomogompi’ di dumba’. ⁶ Om gowoi poddi om mininghombo i dumba’ ku do hilo’d konuluhanan dit akawas. Om kotompias nopo iyolo’ do pointongkop diti pomogunan, om aiso’ i’ o tiso’ piya’d tulun do minongoi pogihum diyolo’ ko’ minumbal po do minongoi pogontong diyolo’. ⁷ Iyo nopoddi om pokinongou kou no, iyokoyu i gompomogompi’ do dumba’, diti poboroson ku dot id dokoyu, iyoho’ i TUHAN it Asawat Kopio. ⁸ Monuhu’ oku no dokoyu dot id suang do ngaran ku iyoho’ i Kinorohingan do poimpasi, do mokinongou kopio kou doho’. Nongoi tabpaai di nintorusan i dumba’ ku om pinatai om nakan diyolo’ tu’ aiso’ i’ o gompomogompi’. Om iri gompomogompi’ di dumba’ ku nga’ a’ i’ minumbal do minongoi pogihum di dumba’. Diyolo’ nod tinan o gompion diyolo’ om a’ i’ momogompi’ di dumba’. ⁹ Iyo nopoddi, om pokinongou kou no doho’, iyokoyu i gompomogompi’ do dumba’. ¹⁰ Poboroson ku dot id dokoyu do nosiliu oku nod pisangod dokoyu, iyoho’ i TUHAN it Asawat Kopio. Ngoyon ku nondo i dumba’ ku’ddi do mantad id dokoyu om a’ ku no pologoson do sumiliu kou do gompomogompi’ diyolo’; om iyokoyu nga’ a’ ku no pologoson do momogompi’ do tinan dokoyu. Poiduwon ku noddi i dumba’ ku do mantad id dokoyu om a’ ku iyokoyu pologoson do mangakan di dumba’ddi,’’ ka dau. ¹¹ Boros kad TUHAN, it Asawat Kopio, ’’Iyoho’ nondo o mogihum di dumba’ ku om iyoho’ o momogompi’ diyolo’. ¹² Do miagal di pomogompi’ di gompomogompi’d dumba’, di dumba’ dau, om i pogigihum dau di dumba’ dau di nokotompias gisom do notimung iddi kawagu dau iri. ¹³ Posoliwanon ku nondo iyolo’ do mantad id pogialatan do bansa’ om pomogunan do suwai, om timungon ku nondo iyolo’, om pogulion ku kawagu do hilo’d pomogunan diyolo’. Om woyoon ku nondo iyolo’ do gumuli’ do hilo’d konuluhanan om hilo’d kabawang-bawangan dot Israil, om paakan-akanon ku iyolo’ dot id kobuturan dit aiso’ o koligagaanan, om gompion ku iyolo’. ¹⁴ Om pologoson ku nondo iyolo’ dot osimbayan do mangakan-ngakan do hilo’d kobuturan dit orombung di hilo’d konuluhanan om i hilo’d rantai do pomogunan dot Israil. ¹⁵ Om iyoho’ nondo o gompomogompi’ di dumba’ ku, om pogihuman ku iyolo’ do tiyonon. Iyoho’ no i TUHAN, it Asawat Kopio, o minomoros diti. ¹⁶ Om ihumon ku nondo i nangatagak, om pogulion ku i nangapalid, om rilitan ku i nongosuhat, om ubatan ku i kitoruol; nga’ iri nopo it ongolomu’ om ongokoris om patayon ku no, tu’ iyoho’ nopo om gompomogompi’ i’ dit osonong. ¹⁷ Iyo nopoddi, om pokinongou kou no, oi baanan do dumba’ ku, do poboroson ku iyoho’ i TUHAN, it Asawat Kopio, dot id dokoyu. Soriso-isoon ku nopondo iyokoyu do momisara’ om pisuwai-suwayon ku it osonong om it araat, i dumba’ om i kambing. ¹⁸ Haro i’ o piro-piro dokoyu dot a’ abagalan do mangakan di sakot dot orombung; om pingulakan dokoyu it a’ dokoyu kanon! Om minum kou no di waig dit oniniting om lobohon nondo dokoyu it a’ dokoyu inumon! ¹⁹ Om iri pondo i sakot do piningulakan dokoyu o kanon di dumba’ ku’d suwai, om iri waig di linobou dokoyu ot inumon diyolo’. ²⁰ Gowoi poddi, do baino’ nopo om sunudan ku no iyokoyu do butusan ku nondo, iyoho’ i TUHAN, it Asawat Kopio, o momutus di dumba’ dit ongokoris om i dumba’ dit ongoluhoi. ²¹ Sinungu dokoyu om pinosuwai-suwai dokoyu i dumba’ di kitoruol do mantad hiri’d baanan. ²² Nga’ ngoyon ku indo posio’ i dumba’ ku’ddi, om a’ ku i’ iyolo’ pologoson dot inggoriton. Om butusan ku nondo o pointikid-tikid di dumba’ ku om pisuwai-suwayon ku it osonong om it angaraat. ²³ Om onuan ku nondo iyolo’ do raja’ do miagal di Daud, i susuhuon ku, do sumiliu’d gompomogompi’ diyolo’, om gompion indo dau iyolo’. Om iyau noo o gompomogompi’ diyolo’. ²⁴ Om iyoho’ nondo i TUHAN, o sumiliu’d Kinorohingan diyolo’, om haro nondo o raja’ do miagal di Daud, i susuhuon ku, do sumiliu’d raja’ diyolo’. Iyoho’ no o TUHAN, o minomoros diti. ²⁵ Om momonsoi oku nondod tumpongo dot id diyolo’ do papatantu’ do haro o kosimbayanan diyolo’. Om uyungon ngai’ ku nopondo i nintorusan dit orongit di hiri’d pomogunan diri, om aiso’ nondo o koligagaanan di dumba’ ku do mundorong do hiri’d kobuturan om modop do hiri’d gouton. ²⁶ Om barakatan ku nondo iyolo’ om pologoson ku do mundorong do hiri’d posorili’ di nuluhon ku dit olidang. Om hilo’ nondo dot onuan ku iyolo’ do rasam dit asapou do soira-ira’ nopod mokianu iyolo’. ²⁷ Om mongua’ nondo i kouwaan, om sunian do totonomon i tumo, om oinsanan nopondo o tulun dot osimbayan do poundorong do hiri’d tana’ diyolo’. Om soira’ nopondod pututon ku i rantai do poingkogos di tulun ku, om tontok di poiduwon ku iyolo’ do mantad id tulun di minoniliu diyolo’d turipon, om koilo nogindo kopio iyolo’ dot iyoho’ no o TUHAN. ²⁸ Om a’ nondo iyolo’ ngoyon panakahai di bansa’ dit a’ kotutun doho’, om a’ iyolo’ ngoyon patayo’ di nintorusan dot orongit. Osimbayan nopondo iyolo’, om aiso’ no o tiso’ piya’d tulun do korolosi diyolo’. ²⁹ Poruakon ku nondo i tumo diyolo’ gisom dot aiso’ nondo o mononglous do hiri’d pomogunan diri. Om a’ nondo iyolo’ hingi-hingion di bansa’d suwai. ³⁰ Om koilo ngai’ nopondo o tulun dot intirungan ku ot Israil om koilo iyolo’ do tulun ku iyolo’. Iyoho’ no i TUHAN, it Asawat Kopio, o minomoros diti. ³¹ Iyokoyu no kopio i dumba’ ku, om i baanan do sumadon ku. Om iyokoyu no o tulun ku, om iyoho’ o Kinorohingan dokoyu. Iyoho’ no o TUHAN, it Asawat Kopio, o minomoros diti,’’ ka dau.

¹ Om boro-boros no o TUHAN dot id doho’ do poingkaa, ² ’’Oi tulun, papalai no i pomogunan dot Idom. ³ Om sunudan ngai’ no i tulun do hilo’ diti poboroson ku, iyoho’ i TUHAN, it Asawat Kopio do poingkaa: Iyoho’ no o pisangod dokoyu, oi koinsanai’d tulun di poingiyon dot id konuluhanan dot Idom! Om silihon ku nondo iya’ do pomogunan dit oingou. ⁴ Raagon ngai’ ku nondo i bandar nu om a’ iyonon do tulun o pomogunan nu; om koilo ko nogindo dot iyoho’ no o TUHAN. ⁵ Sumangod kasai’ ko nopo dot Israil do mantad di gulu po. Om pologoson nu iyolo’ dot angapatai di maso diyolo’ dot oontok do kosusaan, i maso do kopomohukuman dit id tohuri no di dusa diyolo’. ⁶ Om gowoi poddi om sumumpa’ oku, dot id suang do ngaran ku iyoho’ i TUHAN, it Asawat Kopio, i Kinorohingan do poimpasi, do kapatayon no o kootuson dokoyu, om a’ ko no milo do mogidu’. Tu’ kasalaan nopo dokoyu nga’ minamatai kou, om musa-gusa’ nondo dokoyu o kapatayon. ⁷ Silihon ku nondo do kinoiyonon dit oingou o hiri’d konuluhanan dot Idom, om patayon ngai’ ku i tulun do kawaya’ do hilo’. ⁸ Om tongkopon ku nopondo do rata’ i konuluhanan, om iri pondo rata’ di tulun di nangapatai dot id pisangadan o pointongkop di nulu-nulu om i kokubangan. ⁹ Om silihon ku nondod tana’ dit a’ sunian o pomogunan nu do gisom dot alaid, om a’ nondod tulun iyonon. Om koilo kou nogindo dot iyoho’ no o TUHAN. ¹⁰ Poboroson dokoyu dot iri nopo tana’ do Yohuda om Israil om dokoyu i’, om iyokoyu o sanganu, do mulong piya dot iyoho’, i TUHAN o Kinorohingan diyolo’. ¹¹ Iyo nopoddi, om poboroson ku no dot id suang do ngaran ku, i Kinorohingan di poimpasi, i TUHAN dit Asawat Kopio, do sulian ku nondo iyokoyu, tu’ otogod kou i’, om osolon kou, om araatan kou di tulun ku. Om koilo nondo iyolo’ do hukuman ku pogi’ iyokoyu nga’ iyo iddi o winonsoi dokoyu dot id diyolo’. ¹² Om koilo kou nondo do norongou ku i’, iyoho’ i TUHAN, i pinomohingi-hingi dokoyu dot Israil do tontok di minomoros kou do poingkaa, ’Oingou noddi i konuluhanan dot Israil, om nakatahak iri dot id dati’ do maan toko’d dati’,’ ka dokoyu. ¹³ Oi tulun dot Idom, oburuak kopio kou daa om minggayo-gayo o koboro-boroso’ dokoyu dot id doho’. Nga’ norongou ngai’ ku i’ iri. ¹⁴ Om poingkaa no o poboroson ku, iyoho’ i TUHAN dit Asawat Kopio, ’Asanangan ngai’ nopondo o pointongkop diti pomogunan dot osiliu ku’d pomogunan dit oingou o pointongkop do pomogunan nu, ¹⁵ do miagal dokoyu tu’ nasanangan tomod do nokokito dot Israil, i doho’d songonuon, do nosiliu’d pomogunan dit oingou. Om i konuluhanan do Soir, om pointongkop di pomogunan dot Idom nga’ oingou nondo. Om koilo ngai’ nopondo o tulun dot iyoho’ no o TUHAN,’ kangku nondo,’’ ka dau.

¹ Om boros kad TUHAN, ’’Oi tulun, pomoros no dot id konuluhanan dot Israil, om sunudan no iyolo’ do mokinongou di boros do poboroson ku, ² dot id diyolo’, iyoho’ i TUHAN, it Asawat Kopio do poingkaa: Momohingi-hingi po i pisangod dot Israil om mimboros dot, ’Dahai noddi dilo konulu-nuluan di gulu-gulu po!’ ka no. ³ Poboroson no it osiliu dot id dabantalan om poboroson iti boros ku, iyoho’ i TUHAN it Asawat Kopio. Tontok di naala’ di bansa’ di hiri’d posorili’ i konuluhanan dot Israil, om oinsanan nopo iyolo’ do minongindaraat dot Israil. ⁴ Iyo nopoddi om pokinongou kou no do poboroson ku, iyoho’ i TUHAN it Asawat Kopio, oi dokoyu i nuluhon om nulu-nulu, om kabawang-bawangan, om kokubang-kubangan, om kabandaran do nangaraag, om bandar do nongotongkiadan om i napanakahan om nuntotori’ do koinsanai’d bansa’ dit id posorili’. ⁵ Nokolombus ku no, di maso ku dot otogod kopio do sumaap oku di bansa’ di posorili’, om okon-okon pondo om id Idom, tu’ songirak-irak poo om koindaraat tomod o kinowoyo-woyoo’ diyolo’ do minonolod di tana’ ku om minanansanganu di kobuturan do hilo’. ⁶ Iyo nopoddi om poboroso’ no it osiliu dot id dabantalan dot id pomogunan dot Israil; sunudan no i konuluhanan, om i konulu-nuluan, om i kabawang-bawangan, om i kokubang-kubangan, diti poboroson ku, iyoho’ i TUHAN it Asawat Kopio, tu’ otogod oku no kopio, do nindaraat om nulak-ulakan iyolo’ di piro-piro o bansa’. ⁷ Sumumpa’ oku no, iyoho’ i TUHAN, it Asawat Kopio, dot atantu’ no dot oindaraat i piro-piro o bansa’ dit id posorili’ diya’. ⁸ Nga’ hilo’ nopod konuluhanan dot Israil, om momutolid indo kawagu i kokoyuan om mongua’ do maan dokoyu’d kanon, oi Israil, i tulun ku. Om oruhai kou nod koguli’ kawagu. ⁹ Mogobi’ oku i’ dokoyu, om tontuon ku i’ kopio dot aradu kawagu i tana’ dokoyu, om atanaman kawagu do totonomon. ¹⁰ Pogumuon ku indo iyokoyu. Om miyon kou nondo kawagu do hilo’d kabandaran om sonongon dokoyu i nangaraag. ¹¹ Om pogumuon ku nondo o tulun om tayam-tayam. Om ogumu’ kou pondo ko’ mantad di gulu po, om ogumu’ o tangaanak dokoyu. Om poiyonon ku nondo iyokoyu’d hilo’ do miagal di koiyon-iyono’ dokoyu di gulu po, om posimbayanon ku iyokoyu ko’ mantad di kosimbayano’ dokoyu di gulu po. Om koilo kou nogindo dot iyoho’ no o TUHAN. ¹² Om pogulion ku nondo iyokoyu do mongoi iyon do hiri’d pomogunan diri, oi Israil, i tulun ku. Om asanganu nondo kopio dokoyu i tana’ om haro kasai’ o hasil diri do gisom dot a’ nondo louson i tangaanak dokoyu. ¹³ Poingkaa no o poboroson ku, iyoho’ i TUHAN it Asawat Kopio! Otopot nogi’ do roitan do tulun do mangangakan do tulun i pomogunan diri, om boroson diyolo’ do magagahau do tangaanak di tulun di poundorong do hilo’. ¹⁴ Nga’ mantad pondod baino’ om a’ nondo mangakan do tulun om a’ magahau do tangaanak dokoyu i pomogunan diri. Iyoho’ no i TUHAN, it Asawat Kopio, o minomoros diti. ¹⁵ A’ nondo korongou di piro-piro o bansa’ do monguntotori’ i pomogunan diri om a’ kokito do tulun do momohingi-hingi. Om a’ nondo i pomogunan diri magahau di tangaanak di tulun do poingiyon do hiri. Iyoho’ no, i TUHAN it Asawat Kopio, o minomoros diti,’’ ka dau. ¹⁶ Om boro-boros no o TUHAN dot id doho’ do poingkaa, ¹⁷ ’’Oi tulun, tontok di poingiyon po i tulun dot Israil do hilo’d pomogunan diyolo’, om sinosomu’ diyolo’ di kowoyo-woyoon om wowonsoyon diyolo’ o pomogunan diri. Om id pagantangan ku nopo nga’ miagal po di tondu’ do maso’d pomulanan o kososomuo’ di kowoyo-woyoon diyolo’. ¹⁸ Om pinologos ku’ddi iyolo’ do kopuriman do kawagato’ do kototogod ku tu’ ogumu’ i’ o tulun do pinatai diyolo’ om sinosomu’ diyolo’ i pomogunan diri di tingolig diyolo’. ¹⁹ Hinukuman ku iyolo’ tu’ araat i’ o kowoyo-woyoo’ om i pingwonsoyon diyolo’, om pinotompias ku’ddi iyolo’ dot id pomogunan do suwai. ²⁰ Om honggo nopo o nokokoyoon diyolo’ nga’ hilo’ no do noindaraat o ngaran ku dit olidang tu’ minimboros o tulun do poingkaa, ’Iti nopo tulun diti nga’ tulun do songonuon do Kinorohingan. Nga’ a’ no milo dot a’ iyolo’ tumongkiad di pomogunan di tinahak do Kinorohingan diyolo’ dot id diyolo’,’ ka. ²¹ Om iri noddi o nokobinsuhu’ doho’ do momusorou do pasal di ngaran ku dot olidang, tu’ honggo nopo o koongoyon di tulun dot Israil nga’ hiri no dot oindaraat i ngaran ku dit olidang. ²² Iyo nopoddi om polombuson no dot id tulun dot Israil, iti boros ku, iyoho’ i TUHAN it Asawat Kopio do poingkaa, ’Iti nopo wonsoyon ku om okon i’ ko’ iyokoyu o kapamansayan ku, oi tulun dot Israil, suwai ko’ iri i ngaran ku dit olidang, i nindaraat dokoyu do honggo nopo o koongoyon dokoyu, o kapamansayan ku. ²³ Soira’ nopod pointalangon ku dot id piro-piro o bansa’, i kolidango’ diti ngaran ku dit abantug, i ngaran di nindaraat dokoyu dot id pogialatan diyolo’, om koilo nogindo iyolo’ dot iyoho’ noo o TUHAN. Iyoho’ no, i TUHAN it Asawat Kopio, o minomoros diti. Om iyokoyu nondo o pakayon ku do popointalang dot id piro-piro o bansa’ dot olidang oku. ²⁴ Ngoyon ku nondo iyokoyu do mantad id pointikid-tikid do bansa’ om pomogunan, om pogulion ku iyokoyu do hilo’d pomogunan mantad dokoyu. ²⁵ Iyasan ku nondo iyokoyu’d waig dit oniniting do momolidang dokoyu do mantad id koinsanai di tingolig om koinsanai di nokososomu’ dokoyu. ²⁶ Om onuan ku nondo iyokoyu do ginawo’d wagu om pomusarahan do wagu. Om iduwon ku nondo i ginawo dokoyu dit okodou, i miagal pod watu kokodou. Om onuan ku nondo iyokoyu do ginawo dit obingumboyo’. ²⁷ Om posuangon ku nondo i Rusod ku dot id ginawo dokoyu om piantangan ku indo kopio om atanud i’ ngai’ dokoyu it oturan ku om atanud ngai’ dokoyu i pinonuhuan ku dokoyu. ²⁸ Om koiyon kou nogindo do hiri’d pomogunan di pinatahak ku di komolohingan dokoyu. Om osiliu kou nondod tulun ku, om osiliu oku do Kinorohingan dokoyu. ²⁹ Om poiduwon ku indo iyokoyu do mantad id koinsanai di nokososomu’ dokoyu. Om suhuon ku i gandum do rumombung om a’ kou i’ koumbal do mononglous. ³⁰ Om posopohon ku nondo o tua’ di tua-ua’ om poinggumuon ku o hasil di tumo dokoyu. Om a’ kou i’ koumbal do mononglous, i mongintingayam dokoyu dot id pogialatan do bansa’. ³¹ Om osorou nondo dokoyu i kowoyo-woyoon dokoyu dot araat om i nongowonsoi dokoyu dot araat, om araatan kou nondo do tinan dokoyu tu’ nokowonsoi kou i’ do dusa om it araat kopio. ³² Oi Israil, orohian oku do koilo kou dot okon i’ ko’ iyokoyu ngai’ o nakapamansayan ku do miagal diti. Suwai ko’ orohian oku do kopuriman kopio kou do kointingayamo’ om karaato’ di wonsoyon dokoyu. Iyoho’ no, i TUHAN it Asawat Kopio, o minomoros diti,’ ka,’’ ka dau. ³³ Boros kad TUHAN it Asawat Kopio, ’’Soira’ nopondod lidangan ku iyokoyu do mantad id koinsanai’d dusa dokoyu, om pologoson ku nogindo iyokoyu do miyon kawagu do hilo’d kabandaran dokoyu om momonsoi kawagu di nangaraag. ³⁴ Koinsanai di tulun dit oubas do tumalib di tumo dokoyu nga’ nokokito ngai’ no dot a’ no sunian do totonomon i tumo dokoyu’ddi, nga’ pologoson ku indo iyokoyu do mongumo kawagu’ddi. ³⁵ Om karait ngai’ nopondo o tulun dot iti nopo pomogunan di gulu po nga’ miagal pod tana’ dit a’ sunian, nga’ baino’ noddi om miagal pod kabun dot Idon. Om iri kabandaran di nangaraag om napanakahan om i pogun poo di gulu po, nga’ iyonon noddid tulun om apanggor o pinongolig do baino’. ³⁶ Om koilo ngai’ nogindo i bansa’ di noolu-olu’ do hilo’d posorili’ dot iyoho’ no, i TUHAN, o minomonsoi kawagu do bandar di nangaraag om mananom kawagu do tumo dit a’ sunian. Iyoho’ no, i TUHAN, o minamatos do wonsoyon ku o miagal diti, om atantu’ no do wonsoyon ku’ti,’’ ka dau. ³⁷ Om boros kad TUHAN, it Asawat Kopio, ’’Om pologoson ku nondo kawagu o tulun dot Israil do mokiuhup doho’, om pologoson ku iyolo’ do sumapou do miagal do baanan do dumba’. ³⁸ Om ilo’ pondo kabandaran di songingraag do dinondo nga’ oponu’ nondod tulun do miagal do Yorusalim di gulu po, tu’ poimponu’ do dumba’ di patahakon do maan do porsombahan do sumbolion, dot id poginakanan. Om koilo nogindo iyolo’ dot iyoho’ no o TUHAN,’’ ka dau.

¹ Om kopurimanai ku noddi o sinundu do TUHAN, om tanggayai oku no di rusod dau om poiliho’ oku no dot id kubong di noponu’d tulang di nongotuu no. ² Om pohomboo’ oku nod TUHAN di kubong diri om kokito ku no dot ogumu’ tomod o tulang di nongotuu no tomod. ³ Om boros kad TUHAN dot id doho’, ’’Oi tulun, milo po tuu do masi kawagu o tulang diti?’’ ka dau. Om boros kangku’d suminimbar, ’’Oi TUHAN it Asawat Kopio, iya’ noo o koilo!’’ kangku. ⁴ Om boros kaddi dau, ’’Poboroson no o boros ku do poingkaa dot id kotulang-tulangan diti. Sunudan no iti kotulang-tulangan do mokinongou do boros do TUHAN. ⁵ Sunudan no iyolo’ diti boros ku, iyoho’ i TUHAN it Asawat Kopio do poboroson ku dot id diyolo’: Onuan ku nondo iyokoyu do pinuhobo om posion ku iyokoyu kawagu. ⁶ Om onuan ku iyokoyu do tuhat, om tonsi, om likupan ku iyokoyu do kulit. Om onuan ku iyokoyu do pinuhobo om apasi kou i’ kawagu. Om koilo kou nogindo dot iyoho’ no o TUHAN,’’ ka dau. ⁷ Om pimboros oku noddi iyoho’ i Yohoskiol dot id kotulang-tulangan diri do miagal di pinonuhuan do TUHAN dot id doho’. Om soira’ di maso ku’d mimboros om korongou ku o sangarak-ngarak. Om timpuun no i tulang do minongoi pogituma-tuma’. ⁸ Om piantangan ku’ddi ngai’ i tulang diri do tinongkop do tuhat, om tonsi om linikupan do kulit. Nga’ aiso’ i’ o pinuhobo di tinan. ⁹ Om boros kad Kinorohingan dot id doho’, ’’Oi tulun, pimboros no dot id tongus. Om sunudan no i tongus do suhuon iyau’d TUHAN it Asawat Kopio, do rumikot do mantad id hinonggo nopo, do poposuang do pinuhobo dot id tinan di songimpatai’dti, om apasi indo kawagu iyolo’,’’ ka dau. ¹⁰ Om pimboros oku noddi do miagal di pinonuhuan do TUHAN dot id doho’. Om tongus no i tongus diri om kosuang noddi o pinuhobo dot id tinan diri om kangapasi no iyolo’. Om ingkakat noddi iyolo’. Om ogumu’ no kopio iyolo’ gisom do kabagal i’ do sonsinompuruan o soudor. ¹¹ Om boros kad Kinorohingan dot id doho’, ’’Oi tulun, iri nopo tulun dot Israil nga’ iyo ngai’ nod tulang diti. Tu’ boros ka diyolo’ om notuu no tomod iyolo’, om aiso’ no o kosunsudon om aiso’ o soro-sorohon dot id dosunsudan. ¹² Om iyo nopoddi om popimboroso’ no it osiliu dot id dabantalan dot id Israil, i tulun ku, om sunudan no iyolo’ dot iyoho’ no, i TUHAN it Asawat Kopio, o mongoi pongukab di lobong diyolo’. Om posoliwanon ku nondo iyolo’ do mantad hiri om pogulion ku do hilo’d pomogunan dot Israil. ¹³ Om soira’ nopondo dot ukaban ku i lobong di pinamalabangan diyolo’ i tulun ku, om tontok di posoliwanon ku iyolo’, om koilo nogindo iyolo’ dot iyoho’ no o TUHAN. ¹⁴ Om posuangon ku nondo o pinuhobo ku dot id diyolo’ om apasi indo kawagu iyolo’, om pologoson ku iyolo’ do miyon do hilo’d pomogunan mantad diyolo’. Om koilo nogindo iyolo’ dot iyoho’ no o TUHAN. Nakabatos ku no do wonsoyon ku o miagal diti, om atantu’ nod wonsoyon ku. Iyoho’ no, i TUHAN, o minomoros diti,’’ ka dau. ¹⁵ Om boro-boros po kawagu o TUHAN dot id doho’ do poingkaa, ¹⁶ ’’Oi tulun, ongoi anu dot iso’ o sukud, om tulisan id boros do poingkaa, ’Pomorintaan do Yohuda’’ ka. Om mongoi no anu kawagu dot iso’ o sukud do suwai, om tulisan iri do boros do poingkaa, ’Pomorintaan dot Israil,’ ka. ¹⁷ Om piromuton nondo o tompok di duwo o sukud diri dot igitan nu, om iso’ pondo o sukud do kokitanan. ¹⁸ Om soira’ nopondod mokituduk diya’ do komoyon diri, i bansa’ nu, ¹⁹ om sunudan no iyolo’ dot iyoho’ no, i TUHAN it Asawat Kopio, o manganu di sukud do poiyaan dot Israil do piisoon ku nondo iri di sukud di poiyaan do Yohuda. Om piisoon ku nondo i duwo o sukud di poingigit ku’ddi. ²⁰ Igitan no i duwo o sukud diri, om poontongon no di sukud diri i tulun dot ogumu’. ²¹ Om sunudan nondo iyolo’ dot iyoho no, i TUHAN it Asawat Kopio, o popoidu’ di tulun ku do mantad id piro-piro o bansa’ di nokoongoyon diyolo’, om timungon ku nondo iyolo’, om pogulion ku do hilo’d pomogunan mantad diyolo’. ²² Om silihon ku nondo iyolo’ dot iso’ o bansa’ do hilo’d pomogunan, om hilo’d konuluhanan dot Israil. Om iso’ pondo o raja’ do momorinta’ diyolo’, om a’ nondo opiduwo i bansa’ diyolo’, om a’ opisuwai-suwai o pomorintaan. ²³ Om a’ nondo diyolo’ sosomuon o tinan diyolo’ dot i tumuku’ dot id piro-piro o tingolig di kososomu’ o ponosomu’, om a’ iyolo’ momonsoi’d dusa. Om poiduwon ku indo iyolo’ do mantad id koinsanai do kowoyo-woyoon diyolo’ dit araat i kobinsuhu’ diyolo’ do mongindaraat doho’. Lidangan ku nondo iyolo’; om osiliu nondo iyolo’ do tulun ku, om osiliu oku do Kinorohingan diyolo’. ²⁴ Om haro nondo o raja’ do miagal di Daud, i susuhuon ku, dot osiliu do raja’ diyolo’ do gisom dot alaid. Om otorodok nondo iyolo’ do mumboyo’ dot oturan ku. ²⁵ Om miyon nondo iyolo’ do hilo’d tana’ di pinatahak ku dot id di Yakub, i susuhuon ku, om i tana’ do pinomogunan di komolohingan diyolo’. Om hilo’ kasai’ nondo o tiyonon diyolo’ do gisom dot alaid, om iri nogi’ tangaanak om sinakagon diyolo’ nga’ hilo’ no o tiyonon. Om iri nondo i raja’, i miagal di Daud, i susuhuon ku, o momorinta’ diyolo’ do gisom dot alaid. ²⁶ Om momonsoi oku nondo do tumpongo dot id diyolo’, i mamajamin dot osimbayan iyolo’ do gisom dot alaid. Om barakatan ku nondo iyolo’ om posopohon ku iyolo’, om hiloon ku’d pomogunan diyolo’ i Walai’d Sasambayangan dot Agayo, om hilo’ nondo kasai’ iri do gisom dot alaid. ²⁷ Om sumugku’ oku nondo diyolo’d miyon do hilo’; om osiliu oku nondo do Kinorohingan diyolo’ om osiliu iyolo’d tulun ku. ²⁸ Om soira’ nopondod hiloon ku i Walai’d Sasambayangan dot Agayo, om hiloon ku nod pogialatan diyolo’ iri do gisom dot alaid, om koilo ngai’ nogindo i bansa’d suwai do nopili’ ku, iyoho’ i TUHAN, ot Israil do sumiliu do tulun ku,’’ ka dau.

¹ Om boro-boros no o TUHAN dot id doho’ do poingkaa, ² ’’Oi tulun, papalai no i Gog, i boyoon do raja’ do pomorinta’ do bansa’d Misik, om Tubal do hilo’d pomogunan do Magog, ³ om sunudan no iyau dot iyoho’ no, i TUHAN it Asawat Kopio, o pisangod dau. ⁴ Pokokoson ku no iyau, om koiton ku di kakait o roo dau, om gayaton ku iyau do mamanau do miwoyo’ do koinsanai di soudor dau. Ogumu’ tomod i soudor om kuda’, om i soudor do songinsakai’d kuda’ dot oiyo o pakayan, om otikid do kolid om gayang i soudor dau. ⁵ Om tulun nopo do manud-tanud dau nga’ haro i’ o mantad do hilo’d Porsia, om Etiopia, om Libia, om ongkigayang ngai’ nopo iyolo’ om ongkitupi’ kolidar. ⁶ Om koinsanai nopo i tulun do sumasangod do mantad hilo’d pomogunan do Gomor, om hilo’d Bait-Togarma, i ponong hilo’d utara, do tuminanud dau. Om ogumu’ nogi’ o tulun do mantad id pomogunan do suwai. ⁷ Sunudan no iyau do sumodia’ om posodia’ ngai’ di soudor di minoyo’ dau. ⁸ Om katalib pondo o piro-piro o toun om suhuon ku nogindo iyau do mongoi panangod do pomogunan do tulun di tinimung do mantad id piro-piro o pomogunan, om it aiso’ no o koligagaanan do pisangadan. Om ngoyon nondo dau songodo’ i konuluhanan dot Israil, it aiso’ o sumuni om i laid no kotongkiadai’d tulun, om noponu’ poo do kinaraagan, nga’ it iyonon noddi do tulun om aiso’ no o koligagaanan do baino’. ⁹ Om sumangod nondo iyau, om i soudor dau, om i piro-piro o bansa’d suwai di moyo-woyo’ dau, om miagal pondo iyolo’d tongus dot opuhod do sumaap, om miagal do haun do tumokop di pomogunan,’’ ka dau. ¹⁰ Poingkaa no o boros do TUHAN it Asawat Kopio dot id di Gog, ’’Orikot nopondo o maso’ddi om tumimpuun ko nondo do minsorou do momonsoi dot araat. ¹¹ Momusorou ko nondo do mongoi panangod do pomogunan dit aiso’ o tolig; i pomogunan dit osimbayan om aiso’ o koligagaanan do tulun di songingiyon do hiri, i kabandaran dit aiso’ o tolig om aiso’ o madtatamong. ¹² Om ngoyon nu nondo soruango’ om ngoyon nu panakahai i tulun do songingiyon do hiri’d kabandaran di songinraag di gulu po. Tinimung-timung i’ iyolo’ do mantad id piro-piro o pomogunan, om baino’ noddi om ogumu’ noddi o tayam-tayam om dapu’ diyolo’, om poingiyon iyolo’ dot id ralan do pogirurubaan do hiti’d pomogunan. ¹³ Om muhot nondo diya’ i tulun do Siba om Didan, om i piro-piro i dumadagang do mantad hilo’d kabandaran do Sepanyol, do poingkaa, ’Notimung nu no i soudor nu do mongoi panangod, om mongoi ponoruang om kapanakau i’ iyolo’? Momusorou ko do mongoi panganu do pirok om tamas, om tayam-tayam om dapu’ om tanggayan ngai’ nu nogindo it angaanu nu’ddi?’ ka,’’ ka dau. ¹⁴ Om suhuo’ oku noddid TUHAN it Asawat Kopio, do mongoi pomisunud di Gog di boros dau do poingkaa, ’’Mamanau no do maso pod Israil, i tulun ku dot osimbayan do momogun-mogun. ¹⁵ Mamanau nod mantad hino’d kinoiyonon nu do ponong hino kopio’d utara, om woyoon i’ o soudor dit ogumu’ om it ongokoris do mantad id piro-piro o bansa’. Om i songinsakai ngai’ nopod kuda’. ¹⁶ Om miagal ko pondod tongus dit opuhod do tumongkop di pomogunan do manangod dot Israil, i tulun ku. Om orikot nopondo o maso’ddi, om porikoton ku nondo iya’ do mongoi ponolod di pomogunan ku om kointalang i’ dot id koinsanai’d bansa’ ondung isai oku, om popointalang do kolidango’ ku i wonsoyon ku do pawayaon ku diya’. ¹⁷ Iya’ no i komoyon ku di gulu poddi, do tontok di pinoboros ku do pinolombus di piro-piro o susuhuon ku, i piro-piro o nabi do mantad id Israil, do maso nopondo dot osunsudan om poporikot oku nondo do songulun do mongoi panangod dot Israil. Iyoho’ no, i TUHAN it Asawat Kopio, o minomoros diti,’’ ka dau. ¹⁸ Om boros kad TUHAN it Asawat Kopio, ’’Tontok nopondo di tadau do ngoyon di Gog songodo’ ot Israil, om tumogod oku nondo kopio. ¹⁹ Om poboroson ku nondo dot atatagadan oku do gumuyu’ nondo o tana’ do hilo’d Israil dot opuhod kopio do tontok do tadau’ddi. ²⁰ Om oinsanan nopondo o sada’ om tombolog, om nintorusan dit agayo om it okoro’, om pointikid-tikid do tulun do hiti’d pomogunan do gagaran tu’ ooris do tumimbaba’ doho’. Tumuhan nondo o nuluhon om rumulus o pampang om humaba’ ngai’ o tolig. ²¹ Om rolosion ku nondo i Gog do mogisuayan o kosusaan. Iyoho’ no, i TUHAN it Asawat Kopio, o minomoros diti. Om mogitotobok nondod gayang i tulun dau dot iyolo’ i’ om iyolo’. ²² Om hukuman ku nondo iyau do toruo-ruol om mogipapatai iyolo’, tu’ iri no o pomohukum ku diyolo’. Om sumondot nopondo dot id dau o rasam dit asapou om karambatu, om tapui, om i tana’ di kitapui. Om ootungan ngai’ nondoddi i soudor dau om i piro-piro o bansa’ di muhup dau. ²³ Om iti nondo o kopointalangan ku dot id koinsanai’d bansa’ dot abantug om olidang oku. Om koilo nogindo iyolo’ dot iyoho’ no o TUHAN,’’ ka dau.

¹ Om boros kad TUHAN it Asawat Kopio, ’’Oi tulun, pasalaon no i Gog, i raja’ dot agayo do mantad id pomogunan do Misik om Tubal, om sunudan no iyau do pisangod oku dau. ² Pokoyoon ku nondo iyau dot id ralan do wagu om posoliwanon ku iyau do mantad hilo’d ponong id utara kopio, om pootodon nu nondo iyau do gisom do korikot do hilo’d konuluhanan dot Israil. ³ Om bobogon ku nogindo i pawakasan di pana’ di poingigit di longon dau’d gibang, om porotuon ku i pana’ di poingigit di longon dau’d wanan. ⁴ Om ahaba’ nopondo om apatai i Gog om i piro-piro o soudor dau do hilo’d konuluhanan dot Israil, om patahakon ku nondo i rata’ diyolo’ dot id koinsanai’d tombolog om nintorusan do maan diyolo’ dot akanon. ⁵ Om angapatai nondo iyolo’ do hiri’d koumaan. Iyoho’ no i TUHAN it Asawat Kopio, o minomoros diti. ⁶ Om popurakit oku nondod tapui do hilo’d pomogunan do Magog om hilo’d poinsusui dilo tisan do rahat, i pomogun-mogunan do tulun dit aiso’ o kagangau-gangau, om koilo ngai’ nogindo o tulun dot iyoho’ no o TUHAN. ⁷ Om poiloon ku indo kopio i tulun dot Israil, di ngaran ku dit olidang, om a’ ku nondo pologoson o ngaran ku dot oindaraat kawagu. Om koilo ngai’ nogindo o bansa’ dot iyoho’ no o TUHAN, i Kinorohingan dot Israil dit olidang,’’ ka dau. ⁸ Om boros kad TUHAN, it Asawat Kopio, ’’Atantu’ nod rumikot i tadau di komoyon ku’ddi. ⁹ Sumoliwan nondo i tulun do poingiyon do hilo’d kabandaran dot Israil do mogiwoyo-woyo’ nopo do mongoi ponimung di rapo-rapo do sumangod di nongotongkiadan, do maan do siduwon. Om poudungon nondo diyolo’d tapui i kolid, om i gayang, om i pawakasan do pana’, om i pana’, om i bobobog, om kabagal i’ iri do maan do siduwon do solinaid do turu’ o toun. ¹⁰ Om a’ no minog do mongoi iyolo’ pokisiduwon do hiri’d dumo ko’ mongoi panagad do kayu do hiri’d gouton do maan do siduwon, tu’ haro po i rapo-rapo do sumangod di nongotongkiadan diri do pogudung diyolo’. Om ngoyon nondo diyolo’ soruango’ om ngoyon diyolo’ panakaho’ o dapu’ di tulun di minonoruang diyolo’ om i minanakau di dapu’ diyolo’. Iyoho’ no o TUHAN it Asawat Kopio, o minomoros diti,’’ ka dau. ¹¹ Om boros kad TUHAN, ’’Abayaan ngai’ pondo iti, om onuan ku nondo i Gog do tana’ do pamalabangan do hilo’d tana’ dot Israil, i hilo’d rantai di roitan do Rantai do Sosoborongon, i ponong id koulayon do mantad id Rahat do Napatai. Lobongon nopondod hilo’ i Gog om i soudor dau, om roitan nondo i rantai’ddi do ’Rantai di Soudor di Gog’. ¹² Koloido’ nopondo di tulun dot Israil do momolobong ngai’ di rata’ diyolo’, om turu’ o tulan, om a’ indo sosomu’ i pomogunan. ¹³ Oinsanan nopondo o tulun do hiri’d pomogunan diri do muhup do momolobong, om pusohon nondo iyolo’ tu’ minomonsoi i’ iyolo’ddi do tontok do tadau’d kamanangan ku. Iyoho’ no, i TUHAN it Asawat Kopio, o minomoros diti. ¹⁴ Om katalib pondo o turu’ o tulan om haro nondo o piro-piro o tulun do suhuon do mamanau do tumongkop di pomogunan do mogihum om momolobong di rata’ di songingiliu po do hiri’d tana’, om olidangan indo kopio i pomogunan diri. ¹⁵ Om soira’ di tumongkop iyolo’ di pomogunan, om tandaan nondo diyolo’ ot id toning di tulang do tulun dot okito diyolo’, om oongoi i’ di momomolobong kolobong iri do hiri’d rantai di roitan do Rantai do Soudor di Gog. ¹⁶ (Om haro nondo o bandar do hiri’d rantai’ddi do pungaranan do ngaran di soudor di Gog do koimbagu.) Om iyo noddi o wonsoyon om olidangan i’ kawagu i pomogunan diri,’’ ka dau. ¹⁷ Om boros kad TUHAN it Asawat Kopio dot id doho’, ’’Oi tulun, tinongo’ ngai’ no i tombolog om i nintorusan do suwai do mongoi pangakan do porsombahan do sinumbali’ do patahakon ku diyolo’. Om iri no o poginakanan dot agayo do pohoroon ku do hilo’d konuluhanan dot Israil, tu’ hiri no do kaakan iyolo’d daging om koinum do raha’. ¹⁸ Om mangakan nondo iyolo’d tinan di soudor om monginum do raha’ di pomorinta’ do pomogunan, i nangapatai do miagal do dumba’ do tontoluhan om tanak do dumba’, om kambing do tontoluhan, om sapi’ dit olomu’! ¹⁹ Om soira’ nopondod patayon ngai’ ku i tulun diti do miagal do porsombahan di sumbolion, om kanon nondo di tombolog om i nintorusan om koinsanai di lunok diyolo’ do gisom dot abangat iyolo’ om inumon diyolo’ i raha’ do gisom dot aawuk iyolo’. ²⁰ Om mingakan nopondo iyolo’ do hiri’d mija’ ku do gisom dot oiyahan iyolo’ di kuda’ om i sumasakai di kuda’ om i soudor om i tulun di sumasangod. Iyoho’ no, i TUHAN it Asawat Kopio, o minomoros diti,’’ ka dau. ²¹ Om boros kad TUHAN, ’’Pokitonon ngai’ ku nondo ilo bansa’ do kagayaan ku om pointongon ku iyolo’ do kowoyo-woyoo’ ku do mamakai’d kuasa’ ku do popowonsoi di natantu’ ku do wonsoyon ku dit otulid. ²² Om mantad pondoddi om koilo no o tulun dot Israil dot iyoho’ no o TUHAN, i Kinorohingan diyolo’. ²³ Om koilo ngai’ nondo i bansa’ do nokoongoi dot id pomogunan do pisangod, i tulun dot Israil do gama’ di dusa do winonsoi diyolo’ dot id doho’. Tinongkiadan ku iyolo’ om pinologos ku i pisangod do minangala’ om minamatai diyolo’ dot id pisangadan. ²⁴ Winonsoi ku dot id diyolo’ o miontok di kososomuo’ om karaato’ di kowoyo-woyoon diyolo’, om tinongkiadan ku iyolo’,’’ ka dau. ²⁵ Om boro-boros no o TUHAN, it Asawat Kopio do poingkaa, ’’Nga’ baino’ noddi om osianan oku iddi do sinakagon di Yakub, i tulun dot Israil, om posimbayanon ku kawagu iyolo’. Om ogompi’ ku i’ o ngaran ku dit olidang om pusohon indo kasai’. ²⁶ Om soira’ nopondo dot osimbayan kawagu iyolo’ do momogun-mogun do hilo’d pomogunan diyolo’, dit aiso’ o monompurolosi diyolo’, om olihuan nondo diyolo’ i kinointingayamo’ diyolo’ di minongindaraat doho’. ²⁷ Om pointalangon ku nondo dot id ogumu’ o bansa’ dot olidang oku, om pogulion ngai’ ku nondo i tulun ku do mantad id koinsanai’d pomogunan do pisangod diyolo’. ²⁸ Om koilo nogindo o tulun ku dot iyoho’ no i TUHAN, i Kinorohingan diyolo’. Oilaan nondo diyolo’ iti, tu’ pinoongoi ku i’ iyolo’ dot id pomogunan do pisangod di gulu po, nga’ baino’ noddi om timungon ku no kawagu iyolo’ do pogulion do hilo’d pomogunan mantad diyolo’, om aiso’ no tiso’ diyolo’ dot a’ koguli’d hilo’. ²⁹ Om potuntugon ku nondo o Rusod ku dot id bansa’ dot Israil, om a’ ku nondo iyolo’ tongkiadan kawagu. Iyoho’ no, i TUHAN it Asawat Kopio, o minomoros diti,’’ ka dau.

¹ Tontok nopoddi nga’ tadau’d kohopod, di tulan di koiso’, i koduwo nohopod om limo do toun do mantad di natanggayan iyahai dot id pomogunan do pisangod, di kohopod om apat do toun do mantad di kinaalaan do Yorusalim. Om nopurimanan ku o sinundu’d TUHAN do tontok do tadau’ddi, om tanggayai oku no dau. ² Om kokito ku’ddi dot id pinointalang do tinanggayan oku’d Kinorohingan do hilo’d pomogunan dot Israil om pinakaa oku dot id nuluhon dit akawas. Om kokito ku no do haro o piro-piro o walai dot angagayo dot id dotoguangan ku, om koiyo-iyo iri do bandar. ³ Om poinsomoko’ oku no dau, om kokito ku o songulun o kusai do mogulinau do miagal do tambaga’. Om poingkakat iyau dot id toning do wawayaan. Om kiinigit iyau do tali do ponukat om kiinigit iyau do kayu do ponipong. ⁴ Om boros ka dau dot id doho’, ’’Ontong no kopio, oi tulun. Om mokinongou no om montong no kopio do koinsanai di pointangan ku diya’, tu’ iti no o kinapaangayan diya’d hiti. Om sunudan no i bansa’ dot Israil do koinsanai dit okito nu,’’ ka dau. ⁵ Nokito ku nopo nga’ i Walai’d Sasambayangan dot Agayo om haro nogi’ o tolig do pointutuk di walai’ddi. Om onuo’ no di kusai’ddi i kayu di ponipong dau, i tolu o mito do konoruo’, om tipongo’ no dau i tolig. Om kasawato’ nopo di tolig nga’ tolu o mito om kakapalo’ nga’ tolu i’ o mito. ⁶ Om ongoi noddi iyau do hiri’d wawayaan di potimbaba’ ponong id koulayon. Om salakoi no iyau di tukad, om hiri poddid sawat kopio, om tipongo’ nogi’ dau o kakapalo’ di wawayaan diri. Om kakapalo’ nopoddi nga’ tolu o mito. ⁷ Om hiri nopod dotolikudan di wawayaan nga’ haro o ralan, om nopiompopingan do tolu o bilik do madtatamong. Angabasagi’ ngai’ nopo i bilik diri, om sorotolu-tolu nopo mito do konoruo’ do pointikid-tikid di limput. Om iri no limput do pinanapad om duwo ngai’ nopo om satanga’ mito do kakapalo’. Om hiri nod tolikud di bilik do madtatamong om haro po o ralan do tolu mito do konoruo’. Om poinrikot iri dot id bilik dit agayo di potimbaba’ di Walai’d Sasambayangan dot Agayo. ⁸ - ⁹ Om tipongo’ no dau i bilik diri, om koilaai noddi dot apat o mito do kasawato’ddi. Om iti no it id dompok di wawayaan di poinsomok kopio di Walai’d Sasambayangan dot Agayo, om kakapalo’ nopo di limput di ponong id dompok no om somito. ¹⁰ (Iri nopo bilik do madtatamong di miampaping di ralan nga’ oiyo nopo o kogoyoo’, om oiyo o kakapalo’ di limput do pinanapad.) ¹¹ Om tipongo’ noddi di kusai o kalaabo’ di wawayaan; om kalaabo’ nopo nga’ onom om satanga’ mito, om konoruo’ no om limo o mito. ¹² Om hiri nopod dotimbabaan do pointikid-tikid di bilik do madtatamong diri, nga’ haro o limput dot osiriba’; do kasawato’ nopo om satanga’ mito i’. (Iri nopo bilik diri nga’ tolu o mito do konoruo’ do pointikid-tikid di limput.) ¹³ Om tipongo’ no dau o kosoduwo’ di limput di ponong id dolikud di bilik om gisom do korikot di limput di ponong id dolikud di bilik di hiri’d hapak, om kosoduwo’ nopo nga’ hopod om duwo om satanga’ mito. ¹⁴ Om iri no bilik do ponong id dompok no, i posongguyung di natad do ponong id soliwan, om tipongo’ no dau i bilik diri, om koilaai no do hopod o mito do konoruo’. ¹⁵ Om kosoduwo’ nopo do mantad id tolig di wawayaan ponong id soliwan om gisom do korikot di limput di bilik dit id dompok no kopio i potimbaba’ di Walai’d Sasambayangan dot Agayo, om duwo nohopod om limo mito. ¹⁶ Om haro ngai’ nopo o liligaon dot ongokooro’ di bilik diri do hiri’d limput ponong id soliwan, om haro nogi’ o liligaon do hiri’d limput di ponong id soruang, i pinanapad diri. Om haro o guas do kurma do pinokikir di wawayaan di ponong id soruang, i potimbaba’ di ralan. ¹⁷ Om angatai oku no di kusai’ddi do minaya’ di wawayaan om kuminaa do hiri’d natad di ponong id soliwan di Walai’d Sasambayangan dot Agayo. Om pointutuk nopoddi nga’ tolu nohopod o bilik di songinghapak di limput ponong id soliwan. Om hiri nod dotimbabaan di bilik diri om haro o sirang di linopisan do watu, ¹⁸ do pointutuk nopori di natad. Iti nopo natad ponong id soliwan nga’ poinsiriba-riba’ no ko’ mantad di natad do ponong id suang. ¹⁹ Om haro po o wawayaan di poinsawa-sawat do suangon do mongoi do hiri’d natad di ponong id suang. Om tipongo’ no di kusai o kosoduwo’ dot id pialatan di duwo o wawayaan diri; om koilaai no do limo nohopod o mito do kosoduwo’. ²⁰ Om tipongo’ noddi di kusai i wawayaan do ponong id utara, i wawayaan do kumaa do hiri’d natad di ponong id soliwan. ²¹ Iri nopo tolu bilik do madtatamong do miampaping di ralan, om i limput do pinanapad om i bilik dot agayo nga’ miagal ngai’ nopo di hiri’d wawayaan do ponong id koulayon o sukatan. Konoruo’ nopo di ralan nga’ duwo nohopod om limo mito om kalaabo’ no om hopod om duwo om satanga’ mito. ²² Miagal ngai’ nopo di hiri’d wawayaan di ponong id koulayon; i bilik dot agayo, om i liligaon, om i guas do kurma do pinokikir. Hiri nopo nga’ haro o turu’ o taang do tukad do poingkaa do hiri’d wawayaan, om iri nopo bilik dot agayo nga’ hiri’d dompok, om potimbaba’ di natad ponong id soliwan di Walai’d Sasambayangan dot Agayo. ²³ Om hiri nopod hapak diti natad do mantad id wawayaan ponong id utara om haro po kawagu o wawayaan do suangon do kumaa do hiri’d natad ponong id suang; do miagal nopo di hiri’d wawayaan ponong id koulayon. Om tipongo’ noddi di kusai’ddi o kosoduwo’ do pialatan di duwo o wawayaan diri, om koilaai no do limo nohopod o mito do kosoduwo’. ²⁴ Om angatai oku no di kusai’ddi do kuminaa do hiri’d wawayaan di ponong id salatan. Om haro po o wawayaan do nokito dahai’d hiri. Om tipongo no dau iri, om miagal nopo di wawayaan do suwai o sukatan. ²⁵ Om haro o liligaon do hiri’d bilik do ponong id wawayaan diti, do miagal nopo kopio di liligaon do suwai; konoruo’ nopo di ralan nga’ duwo nohopod om limo mito, om kalaabo’ no om hopod om duwo om satanga’ mito. ²⁶ Taang nopo di tukad di poirikot do hiri’d wawayaan nga’ turu’, om iri bilik dot agayo nga’ hiri nogid ponong id dompok do potimbaba’ di natad di ponong id soliwan di Walai’d Sasambayangan dot Agayo. Om haro o guas do kurma do pinokikir do hiri’d limput di ponong id suang, i potimbaba’ di ralan. ²⁷ Om hiti nogi’ nga’ haro o wawayaan do suangon do kumaa do hiri’d natad di ponong id suang. Om tipongo’ noddi di kusai’ddi o kosoduwo’ dot id pialatan di duwo o wawayaan diri; om koilaai no do limo nohopod o mito do kosoduwo’. ²⁸ Om angatai oku noddi di kusai do minaya’ di wawayaan di ponong id salatan do kumaa do hiri’d natad di ponong id suang. Om tipongo’ no dau i wawayaan di ponong id salatan diri, om miirad nopo di wawayaan di ponong id soliwan. ²⁹ - ³⁰ Om iri bilik do madtatamong, om i bilik dot agayo, om i limput di ponong id suang, nga’ irad ngai’ nopo di wawayaan do suwai o kogoyoo’. Om haro ngai’ nopo o liligaon di bilik diri. Om konoruo’ nopo di wawayaan diri nga’ duwo nohopod om limo o mito om kalaabo’ no om hopod om duwo om satanga’ mito. ³¹ Iri nopo bilik dot agayo nga’ potimbaba’ di natad di ponong id soliwan, om pinokikir o guas do kurma do hiri’d limput di ponong id suang do potimbaba’ di ralan. Iri nopo walu’ o taang do tukad diri om poingkaa do hiri’d wawayaan. ³² Om angatai oku noddi di kusai do minaya’ di wawayaan di ponong id koulayon do kumaa do hiri’d natad di ponong id suang. Om tipongo’ no dau i wawayaan diri om miirad nopo di wawayaan do suwai. ³³ Iri nopo i piro-piro o bilik di madtatamong, om i bilik dit agayo, om i limput di ponong id suang om irad i’ di hiri’d wawayaan do suwai o sukatan. Om winansayan ngai’ nopod liligaon o pointutuk di bilik diri, om hiri’d bilik dit agayo nga’ winansayan i’. Konoruo’ nopo do ralan diri om duwo nohopod om limo o mito om kalaabo’ no om hopod om duwo om satanga’ mito. ³⁴ Iri nopo i bilik dit agayo om potimbaba’ di natad do ponong id soliwan. Om kinikiran do guas do kurma o hiri’d limput do poingompus di ralan. Om walu’ o taang do tukad do poirikot dot id wawayaan diti. ³⁵ Om pokoyoo’ oku noddi di kusai’ddi do hiri’d wawayaan di ponong id utara. Om tipongo’ no dau iri, om sukatan nopoddi om miagal i’ di wawayaan di suwai. ³⁶ Om miagal nogi’ di suwai tu’ haro i’ o bilik do madtatamong, om haro o limput di kinikiran di ponong id suang, om haro o bilik dot agayo, om notutuk ngai’ iri do liligaon. Konoruo’ nopo di ralan diri nga’ duwo nohopod om limo mito, om kalaabo’ no om hopod om duwo om satanga’ mito. ³⁷ Iri nopo bilik dot agayo nga’ potimbaba’ di natad ponong id soliwan. Om kinikiran do guas do kurma i limput di ponong id suang do potimbaba’ di ralan. Walu’ o taang di tukad do poirikot di wawayaan diti. ³⁸ Iri nopo i natad di ponong id soliwan nga’ haro o tiso’ bilik do pinatambing do ponong hiri’d wawayaan ponong id utara, om haro o wawayaan do hiri’d bilik di pinatambing diri do poingkaa do hiri’d bilik dot agayo. Om hiri nod bilik dot agayo diri o pongougan do tulun do tayam-tayam di maan do porsombahan do sorobon. ³⁹ Om hiri nopod bilik dit agayo’ddi nga’ haro ot apat o mija’, do duwo o ponong id wanan om duwo o ponong id gibang. Om hiri nod sakai di mija’ddi o pagkaratan do tulun do tayam-tayam do patahakon do maan do porsombahan do sorobon, ko’ maan do porsombahan do pangampun do dusa ko’ maan pod porsombahan do pambayar do tutang. ⁴⁰ Om hiri’d soliwan di bilik dit agayo’ddi nga’ haro nogi’ ot apat o mija’ do miagal diri, om duwo o ponong id wanan om duwo o ponong id gibang di wawayaan do ponong id utara’ddi. ⁴¹ Oinsanan nopo nga’ haro o walu’ o mija’ do ponumbolian do tayam-tayam do maan do porsombahan do sumbolion: apat o hiri’d suang di bilik om apat o hiri’d natad ponong id soliwan. ⁴² Iri nopo it apat o mija’ di hiri’d bilik di pinatambing diri, om pakayon do posodia’ do porsombahan do sorobon dit insanan nopo do monorob, om watu ngai’ nopo di sinangkap iri do winonsoi. Kasawato’ nopo di mija’ddi nga’ satanga’ mito, om kogoyoo’ no om abasagi’ do turu’ nohopod om limo sontimito do konoruo’ om kalaabo’. Pasakayon ngai’ nopo do hiri’d mija’ddi o koinsanai di pakakas do pogkorot di tayam-tayam do maan do porsombahan do sumbolion. ⁴³ Om nisanan o pointutuk di mija’ddi do turu’ nohopod om limo milimito do kalaabo’. Om hirion ngai’ nopod sakai di mija’ddi i daging do maan do porsombahan do sinumbali’. ⁴⁴ Om angatai oku noddi di kusai’ddi do hiri’d natad di ponong id suang. Om haro o duwo o bilik do hiri, iso’ o potimbaba’ ponong hiri’d salatan, id toning di wawayaan do ponong id utara, om iri no tiso’ om potimbaba’ do ponong id utara, i hiri’d toning di wawayaan ponong id salatan. ⁴⁵ Om sunudai oku no di kusai, dot iri nopo bilik di potimbaba’ ponong id salatan diri nga’ maan di piro-piro ot imam di maganu-anu do hiri’d Walai’d Sasambayangan dot Agayo, ⁴⁶ om iri no i bilik di potimbaba’ ponong id utara om maan dit imam di maganu-anu do hiri’d pananaraban do porsombahan. Om mositi’ no do mantad ngai’ id sinakagon di Sadok o koinsanai dit imam diri, iri no i sinakagon di Sadok i mantad id payat di Liwi o koino-ino do tumimbaba’ do TUHAN do mogobi-obi’ dau do tontok do sumambayang. ⁴⁷ Om tipongo’ no di kusai’ddi i natad do ponong id suang om abasagi’ nopori do limo nohopod o mito. Iri nopo Walai’d Sasambayangan dot Agayo nga’ ponong hiri’d kotonobon, om id dotimbabaan nopoddi nga’ haro ot iso’ o pananaraban do porsombahan. ⁴⁸ Om angatai oku noddi di kusai’ddi do mongoi do hiri’d bilik di gulu kabantalai it id suang di Walai’d Sasambayangan dot Agayo. Om tipongo’ no dau i bilik diri om kalaabo’ nopo nga’ duwo om satanga’ mito, om konoruo’ no om turu’ o mito, om nopiompopingan iri do limput do somito om satanga’ o kakapalo’. ⁴⁹ Om haro o tukad do solokoyon do mongoi do hiri’d bilik diri, do konoruo’ nopo om hopod o mito om kalaabo’ no om onom o mito. Om haro o duwo o torigi do miampaping di bilik diri.

¹ Om angatai oku no di kusai’ddi do hiri’d bilik dit id tanga’, i roitan do Kinoiyonon dot Olidang. Om tipongo’ no dau i ralan do kumaa’d hiri: om konoruo’ nopo nga’ tolu o mito, ² om limo mito do kalaabo’, om nopiompopingan iri do limput do kakapalo’ nopo nga’ duwo om satanga’ mito. Om tipongo’ no dau i Kinoiyonon dot Olidang diri, om konoruo’ nopo nga’ duwo nohopod o mito, om kalaabo’ no om hopod o mito. ³ Om ongoi noddi iyau do hiri’d bilik di hiri’d gogok kopio. Om tipongo’ no dau i ralan do kumaa’d hiri, om somito o konoruo’ om tolu mito do kalaabo’, om nopiompopingan iri do limput do kakapalo’ nopo nga’ tolu om satanga’ mito. ⁴ Om tipongo’ no dau i bilik diri, om abasagi’ nopori do hopod o mito; hopod o mito do konoruo’ om hopod o mito do kalaabo’. Om boros kaddi dau dot id doho’, ’’Iti no i Kinoiyonon dot Olidang Kopio,’’ ka. ⁵ Om tipongo’ noddi di kusai’ddi o kakapalo’ di limput do ponong id suang di Walai’d Sasambayangan dot Agayo’ddi: om koilaai no do tolu o mito do kakapalo’. Om pointutuk nopodti Walai’d Sasambayangan dot Agayo’dti do pointopis di limput, nga’ haro o piro-piro o bilik do duwo no o mito do kalaabo’. ⁶ Iri nopo piro-piro o bilik diri nga’ tolu sontingkat, om iso’ nopo o tingkat nga’ winansayan do tolu nohopod o bilik, om irad ngai’ nopoddi o kogumuo’ do bilik do pointikid-tikid di tolu o tingkat. Iri nopo limput di ponong id soliwan do pointikid-tikid di tingkat diri nga’ onipis no ko’ mantad di limput di tingkat do hiri’d siriba’, gisom do milo i’ do potopison di limput i piro-piro o bilik diri. Om a’ i’ minog do luangan i limput di Walai’d Sasambayangan dot Agayo. ⁷ Om ondung antangan do mantad id soliwan nga’ oiyo nopo o kakapalo’ di limput di Walai’d Sasambayangan dot Agayo, do mantad hiri’d siriba’ om gisom do hiri’d sawat. Om pointopis no di limput di Walai’d Sasambayangan dot Agayo di ponong id soliwan, i ponong id soliwan di piro-piro o bilik diri om winansayan do duwo o tukad dit agayo, om osonong indo o tulun do sumalakoi do mantad hiri’d tingkat dot id siriba’ om kumaa do hiri’d tingkat di koduwo om kumaa do hiri’d tingkat di kotolu. ⁸ - ¹¹ Iri nopo limput do ponong id soliwan di piro-piro o bilik diri nga’ duwo om satanga’ mito do kakapalo’, om haro o tiso’ o wawayaan do hiri’d walai diri do kumaa do hiri’d piro-piro o bilik do ponong hiri’d utara di Walai’d Sasambayangan dot Agayo, om iso’ o wawayaan do kumaa do hiri’d piro-piro o bilik di ponong id salatan. Om kokito ku do haro o miagal do sibor do pointutuk di Walai’d Sasambayangan dot Agayo, do duwo om satanga’ mito do kalaabo’, om kasawato’ no om tolu o mito do poinrantai di pinoimpahan di piro-piro o bilik di hiri’d topis do limput di Walai’d Sasambayangan dot Agayo. Om id pialatan nopo di koiyo-iyo’d sibor diri om i bilik dit imam, om haro o kakilima’ do hopod o mito do kalaabo’, do miomputul di Walai’d Sasambayangan dot Agayo. ¹² Hiri nopod ponong id dompok di kakilima’ di hiri’d bombong ponong id kotonobon di Walai’d Sasambayangan dot Agayo om haro o walai dot agayo dot apat nohopod om limo o mito do konoruo’ om tolu nohopod om limo mito do kalaabo’; om kakapalo’ no di limput om duwo om satanga’ mito. ¹³ Om sukato’ no di kusai’ddi i ponong id soliwan di Walai’d Sasambayangan dot Agayo: om konoruo’ nopo nga’ limo nohopod o mito. Om mantad no do hiri’d tolikud di Walai’d Sasambayangan dot Agayo om gisom do korikot di limput dot id tolikud di walai dot agayo di ponong id kotonobon diri, om limo nohopod o mito. ¹⁴ Om kalaabo’ no di ponong id wawayaan di Walai’d Sasambayangan dot Agayo, di potimbaba’ ponong id koulayon do kohompit i kakilima’ di ponong id gibang om i kakilima’ di ponong id wanan, om limo nohopod o mito do kalaabo’. ¹⁵ Om tipongo’ no di kusai’ddi o konoruo’ di walai dot agayo di potimbaba’ di natad do kohompit i limput do ponong id gibang om i ponong id wanan, om limo nohopod o mito. Iri nopo i bilik di Walai’d Sasambayangan dot Agayo, om i bilik dit id gulu kabantalai om i Kinoiyonon dot Olidang, om i Kinoiyonon dot Olidang Kopio, ¹⁶ om linopisan ngai’ do kayu, do mantad po do hiri’d liligaon om kosondot do hiri’d siliu. Om iri ngai’ nopo liligaon nga’ milo ngai’ nopo do tabanan do tirai. ¹⁷ Iri nopo limput do ponong id suang di Walai’d Sasambayangan dot Agayo, gisom do hiri’d sawat di wawayaan, om notongkop nopo dot ukiran do pinoiyo-iyo ¹⁸ do guas do kurma om moloikat di roitan do kerub. Piniolot-olot nopo do pinopokikir i pinoiyo-iyo’d guas do kurma om i pinoiyo-iyo do moloikat di roitan do kerub. Om duwo ngai’ nopo o rabas di pinoiyo-iyo do moloikat di roitan do kerub diri: ¹⁹ rabas do tulun o potoguang di pinoiyo-iyo do guas do kurma di ponong id gibang, om rabas do singa o potoguang di pinoiyo-iyo do guas do kurma di ponong id wanan. Iyo ngai’ nopodti ot ukiran do pointutuk di limput ²⁰ do mantad hiri’d siliu om gisom do hiri’d sawat di wawayaan. ²¹ Angabasagi’ ngai’ nopo i torigi di wawayaan do hiri’d Kinoiyonon dot Olidang. Hiri nopod dotimbabaan di wawayaan do ponong id Kinoiyonon dot Olidang Kopio, nga’ haro o koiyo-iyo do pananaraban do porsombahan ²² di kayu do winonsoi. Kasawato’ nopoddi nga’ somito om satanga’, om kayu ngai’ nopod winonsoi i pinongorigi, om i tuwou, om i tolig di pananaraban do porsombahan diri. Om boros kaddi di kusai’ddi dot id doho’, ’’Iti no o mija’ di poilihon dot id dotimbabaan di koropohon do TUHAN,’’ ka dau. ²³ Hiri nopod dompok di ralan do poingkaa do hiri’d Kinoiyonon dot Olidang, om haro ot iso’ o wawayaan, om iyo nogiddi o hiri’d dompok di ralan do poingkaa do hiri’d Kinoiyonon dot Olidang Kopio. ²⁴ Om soroduwaan nopod totobon dot id tanga’ o pongukaban o pointikid-tikid di wawayaan diri. ²⁵ Iri nopo i totobon di wawayaan di Kinoiyonon dot Olidang diri nga’ kinikiran do pinoiyo-iyo do guas do kurma om moloikat di roitan do kerub do miagal di pinokikir di hiri’d limput. Om haro o ponirung do kayu do winonsoi do ponong id soliwan di wawayaan di bilik dit id gulu kabantalai. ²⁶ Om kililigaon nogi’ o miomputul di bilik diri, om iri limput nga’ nukiran nogi’ do pinoiyo-iyo do guas do kurma.

¹ Om angatai oku noddi di kusai’ddi do mongoi do hiri’d natad do ponong id soliwan om pootodo’ oku no dau dot id tiso’ o walai, i ponong id utara di Walai’d Sasambayangan dot Agayo, it a’ i’ osodu’ no do mantad hiri’d walai dit agayo, di ponong id kotonobon do mantad id Walai’d Sasambayangan dot Agayo. ² Iri nopo i walai’ddi nga’ limo nohopod o mito do konoruo’ om duwo nohopod om limo o mito do kalaabo’. ³ Id somputul nopo di walai’ddi nga’ potimbaba’ di kakilima’, i hopod o mito do kalaabo’, i pointoning di Walai’d Sasambayangan dot Agayo, om hiri nod somputul kawagu om potimbaba’ di sirang di linopisan do watu di hiri’d natad di ponong id soliwan. Iri nopo i walai’ddi nga’ tolu o tingkat. Om iri nopo tingkat dit id sawat nga’ okoro-koro’ no ko’ mantad di tingkat dit id siriba’. ⁴ Id dotimbabaan nopo di piro-piro o bilik diri, do ponong id suang nga’ haro o ralan do kalaabo’ nopo om limo o mito om konoruo’ no om limo nohopod o mito. Om iri nopo i piro-piro o wawayaan diri nga’ potimbaba’ ponong id utara. ⁵ Iri nopo piro-piro o bilik di hiri’d tingkat dot id sawat om poingkoro’-koro’ no ko’ mantad di piro-piro o bilik dit id tingkat di hiri’d siriba-riba’, tu’ iri nopo i ralan dit id dotimbabaan di piro-piro o bilik dit id sawat nga’ alaab-laab no ko’ mantad di ralan dit id siriba’. ⁶ Tolu ngai’ nopo sontingkat i piro-piro o bilik diri, om a’ i’ tinukod do torigi do miagal di walai di hiri’d liwan. ⁷ - ⁸ Hiri nopod sombohogian di tingkat dit id siriba, om poingolig nopo o limput do duwo nohopod om limo o mito do konoruo’, do songintanga’ kopio do konoruo’ di walai; om iri no bohogian di tiso’, om duwo nohopod om limo mito do konoruo’, om winansayan do piro-piro o bilik. Om hiri nopod tingkat dot id sawat kopio om winansayan do piro-piro o bilik di poingompus di walai’ddi. ⁹ - ¹⁰ Id siriba’ nopo di duwo o bilik dit id dompok do walai’dti, do ponong id salatan, do hiri’d pinoimpuunan di limput, om haro o wawayaan do kumaa do hiri’d natad ponong id soliwan. Hiri nopod bombong ponong id salatan di Walai’d Sasambayangan dot Agayo om haro po kawagu o walai do miagal diri, it a’ i’ osodu’ no do mantad di walai di ponong id kotonobon. ¹¹ Id dotimbabaan nopo di piro-piro o bilik diri nga’ haro o ralan do miagal nopo kopio di ralan di ponong id utara. Miirad nopo o sukatan, om miiyo o pinomonsoi, om miagal o wawayaan. ¹² Id siriba’ no di piro-piro o bilik dit id bombong ponong id salatan diri, om it id dompok ponong id koulayon, i hiri’d pinoimpuunan di limput, om haro po ot iso’ o wawayaan. ¹³ Om boros ka di kusai’ddi dot id doho’, ’’Ilo’ nopo duwo o walai dilo’ nga’ olidang goduwo nopo. Om hilo’ no o pangakanan di piro-piro ot imam, i koino-ino do sumuang dot id dotoguangan do koropohon do TUHAN, di porsombahan di sinumbali’ dit olidang kopio. Om hilo’ no o poiyanan dit imam di porsombahan do sinumbali’ dit olidang kopio. Iri no i porsombahan do gandum, om i porsombahan di pongidu’ do dusa ko’ i porsombahan do pambayar do tutang. ¹⁴ Ondung kopongo it imam do maganu-anu do hiri’d Walai’d Sasambayangan dot Agayo om siongoi no iyolo’ do hiri’d natad do ponong id soliwan, om mositi’ nod poilihon diyolo’ i rasuk di papakayon diyolo’ do maganu-anu do tontok do sumambayang dot id piro-piro o bilik diri. Om mositi’ no do manampakai iyolo’ do pakayan do suwai do tintod do sumoliwan do pakayaan do hiri’d kinoiyonon do titimungon do tulun dot ogumu’,’’ ka. ¹⁵ Om soira’ di nopongo di kusai’ddi do monukat i ponong id suang di Walai’d Sasambayangan dot Agayo, om angatai oku no dau do suminoliwan do minaya’ di wawayaan do ponong id koulayon om sukato’ noddi dau o pointutuk di Walai’d Sasambayangan dot Agayo. ¹⁶ Om ngoyo’ no dau i sukud di ponunukat dau om sukato’ no dau i bombong do ponong id koulayon. Om konoruo’ nopoddi nga’ duwo nahatus om limo nohopod o mito. ¹⁷ - ¹⁹ Om sukato’ no dau i bombong ponong id utara, om ponong id salatan, om i ponong id kotonobon; om oiyo nopo do duwo nahatus om limo nohopod o mito do konoruo’. ²⁰ Om pabasagi’ nopoddi o tana’ do nokoiyonon di Walai’d Sasambayangan dot Agayo, do duwo nahatus om limo nohopod o mito do kalaabo’ om irad iddi o konoruo’. Om nolig o posorili’ di tana’ddi do panapad di kinoiyonon di pinotobilang do maan do don TUHAN om i kinoiyonon di maan do dong kogumuan.

¹ Om angatai oku noddi di kusai’ddi do minongoi do hiri’d wawayaan di potimbaba’ ponong id koulayon. ² Om hiri no do nokito ku i tulinau di kosorong kopio do mantad ponong id koulayon do tanda’ do nakarapou o Kinorohingan dot Israil. Iri nopo boros do Kinorohingan nga’ miagal di ngorod do rahat o karangahan, om mogulinau po iti pomogunan dot otitihan di tulinau do kinarapahan do Kinorohingan. ³ Iti nopo nokito ku’dti nga’ miagal nopo di nokito ku di ruminikot o Kinorohingan do minongoi pamaraag do Yorusalim, om miagal di nokito ku di hilo’d toning do Bawang do Kibar. Om hunduk oku nopoddi do minotud do hiri’d tana’. ⁴ Om waya’ no i tulinau di kosorong kopio’ddi, di wawayaan di ponong id koulayon, om suang no di Walai’d Sasambayangan dot Agayo. ⁵ Om poinsawato’ oku no di Rusod do TUHAN, om tanggayai oku no do hiri’d natad di ponong id suang. Om hilo’ noddi do nokito ku do noponu’ pod tulinau do koropohon do TUHAN i Walai’d Sasambayangan dot Agayo. ⁶ Om tontok di poingkakat po i kusai’ddi do hiri’d toning ku, om korongou ku no o TUHAN do minoro-boros dot id doho’ do mantad hiri’d suang di Walai’d Sasambayangan dot Agayo. ⁷ Boros ka dau, ’’Oi tulun, hiti no o tirikohonon ku do dong raja’. Om hiti nondo o tiyonon ku do poinsugku’ di tulun dot Israil om momorinta’ oku diyolo’ do gisom dot alaid. Om a’ nondo koumbal i tulun dot Israil om i raja’ diyolo’ do mongindaraat do ngaran ku dit olidang, do tumuku’ dot id tingolig ko’ momolobong do rata’ di raja’ diyolo’ do hiti’d kinoiyonon diti o pongindaraat. ⁸ Pinamansayan nopo di piro-piro o raja’ di tuulokon om i torigi di wawayaan di walai diyolo’ do dong raja’ di gulu po om hiri kopio’d hapak di tuulokon om i torigi di walai’d Sasambayangan dot Agayo, gisom dot iso’ poo o limput do piolitan. Nindaraat tomod diyolo’ i ngaran ku dot olidang tu’ kososomu’ kopio i’ o winonsoi diyolo’, om gowoi poddi om pinatai ku iyolo’ do natatagadan oku. ⁹ Om baino’ nondo om mositi’ nod tumingkod iyolo’ do tumuku’ dot id tingolig om ngoyon powoliho’ i rata’ di piro-piro o raja’ diyolo’. Ondung wonsoyon diyolo’ o miagal diri, om mundorong oku nogindo do poinsugku’ diyolo’ do gisom dot alaid,’’ ka dau. ¹⁰ Om boros ka kawagu’d TUHAN, ’’Oi tulun, sunudan no i tulun dot Israil do pasal di Walai’d Sasambayangan dot Agayo, om popurimonon no iyolo’ do gisom id ointingayam iyolo’ di kowoyo-woyoon diyolo’ di mingwonsoi’d dusa. ¹¹ Om ointingayaman pondo iyolo’ di nowonsoi diyolo’, om tudukan nogindo iyolo’ do kowoyo-woyoon do momonsoi di Walai’d Sasambayangan dot Agayo: i pomomonsoi, i piro-piro o wawayaan do sumuang om sumoliwan, i koiyon-iyono’ do pomomonsoi, i pongungulud do koinsanai’d nunu nopo, om it oturan om i kowoyo-woyoo’ do hiri. Om tulison ngai’ noti do bagi’ diyolo’ om kokito indo kopio iyolo’ do kowoyo-woyoon do mongulud do koinsanai’ddi, om katanud iyolo’ do koinsanai dit oturan. ¹² Iti no o kowoyo-woyoo’ di Walai’d Sasambayangan dot Agayo: Oinsanan nopo i kinoiyonon do posorili’ di timpak do nuluhon diri dot olidang kopio,’’ ka dau. ¹³ Iti no o sukatan di pananaraban do porsombahan do tumanud di ponipong di pinonipong di Walai’d Sasambayangan dot Agayo. Posorili’ nopo di pinoimpahan di pananaraban do porsombahan om haro o parit do satanga’ mito o korolomo’ om satanga’ mito o kalaabo’. Iri nopo pinongisan di parit do ponong id soliwan om duwo nohopod om limo o sontimito do kasawato’. ¹⁴ Kasawato’ nopo do mantad hiri’d parit om gisom di hiri’d poingkorot di pananaraban do porsombahan dit id siriba’ kopio om somito. Om iri no poingkorot dot id tanga’ om duwo o mito do kasawato’, om satanga’ mito do poingkoro’ mantad ko’ i tutuk di pinoimpahan di pananaraban do porsombahan. Om iri nogi’ i poingkorot di kotolu it id sawat kopio nga’ satanga’ mito i’ o poingkoro’ do mantad ko’ i tutuk di poingkorot dit id tanga’. ¹⁵ Iri nopo poingkorot di ponong id sawat kopio, i poingkorot di kotolu’ddi om maan do pananaraban do porsombahan di sumbolion; om kasawato’ nopoddi nga’ duwo o mito. Om ongkilahis ngai’ nopo do koiyo-iyo’d sungu o hiri’d pointikid dit apat o sunduk. ¹⁶ Pabasagi’ nopo do soronom-onom o mito it apat o tisan dit id sawat kopio di pananaraban do porsombahan. ¹⁷ Iri nogi’ i poingkorot do hiri’d tanga-tanga’ nga’ pabasagi’ i’; do soroturu-turu’ o mito do pointikid-tikid dit apat o tisan, om haro o pinongisan do ponong id soliwan do kasawato’ nopo nga’ duwo nohopod om limo o sontimito. (Kalaabon nopo di parit nga’ satanga’ mito.) Iri nopo tukad do solokoyon do kumaa do hiri’d sakai di pananaraban do porsombahan nga’ id tisan ponong id koulayon di pananaraban do porsombahan. ¹⁸ Om boros kad TUHAN, it Asawat Kopio dot id doho’, ’’Oi tulun, pokinongou nodti poboroson ku diya’. Owonsoi nopondo i pananaraban do porsombahan, om sambayangan nori, do ralan nopod manambayang om panaraban do porsombahan di sinumbali’ o hiri’d sakai om wawasan do raha’ do tayam-tayam di numaan do porsombahan do sinumbali’ o hiri. ¹⁹ Om imam nopo do maganu-anu dot id toguang ku om iri no it imam do mantad id sinagakon di Liwi, om i suminolusuk di Sadok. Iyoho’ no, i TUHAN it Asawat Kopio, o monuhu’ do momonsoi do miagal diti. Om onuan no iyolo’ do songinan o sapi’ do tontoluhan dit okoro’ po do maan do porsombahan do pongidu’d dusa. ²⁰ Om manu nod ongokuuri’ do raha’ di sapi’ddi om pogihilon nori di sinangau-sangau di hiri’d apat o sunduk dit id sakai di pananaraban do porsombahan, om hiri’d sunduk di poingkorot dot id tanga’ di pananaraban do porsombahan, om hiri’d pointutuk di pinongisan di pananaraban do porsombahan. Om iyo nodti o ralan nu do momolidang om popotobilang di pananaraban do porsombahan diri do maan do doho’. ²¹ Om ngoyon nondo i sapi’ do tontoluhan, do patahakon do maan do pongidu’d dusa’ddi, om sorobon nondo do hiri’d kinoiyonon di natantu’ mantad, it id soliwan di kinoiyonon di Walai’d Sasambayangan dot Agayo. ²² Om tadau nopondo kawagu om mongoi no panganu do songinan o kambing do tontoluhan dit aiso’ i’ o bohiton do tinan om patahakon i’ do maan do porsombahan do pongidu’d dusa. Om lidangan no di raha’ di kambing diri i pananaraban do porsombahan do miagal di winonsoi nu dot id raha’ di sapi’ do tontoluhan dit okoro’ poddi. ²³ Om owonsoi nu pondo o miagal diri, om mongoi no anu do songinan o sapi’ do tontoluhan dit okoro’ po om songinan o kambing do tontoluhan dit okoro’ po, om it aiso’ goduwo nopo o bohiton do tinan. ²⁴ Om pootodon nogindo iri do hiti’d doho’. Om sasadan nondo di piro-piro ot imam, do silaon i duwo o tayam-tayam diri om sorobon nogindo do maan do porsombahan di sumbolion do patahakon dot id doho’. ²⁵ Monikid tadau nopondo, do solinaid do turu’ o tadau do papatahak kou do songinan o kambing, om songinan o sapi’ do tontoluhan, om songinan o kambing do tontoluhan, do maan do porsombahan do pongidu’d dusa. Om a’ i’ koino-ino do haro o bohiton do tinan di tayam-tayam diri. ²⁶ Om wonsoyon nondo dit imam i natantu’ mantad do wonsoyon do panambayang di pananaraban do porsombahan do solinaid do turu’ o tadau om mikuwo’d poposodia’ddi om milo indo do pakayon. ²⁷ Om atalib pondo o turu’ o tadau, om tumimpuun nogindo it imam do papatahak di porsombahan do sorobon, om i porsombahan do piombolutan, do hiri’d sakai di pananaraban do porsombahan do maan di tulun dot ogumu’. Om asanangan oku nogindo ngai’ dokoyu. Iyoho’ no, i TUHAN it Asawat Kopio, o minomoros diti,’’ ka dau.

¹ Om pootodo’ oku no kawagu di kusai’ddi do hiri’d wawayaan di ponong id soliwan, i ponong id koulayon do mantad hiri’d kinoiyonon di Walai’d Sasambayangan dot Agayo. Om iri nopo wawayaan diri nga’ pointobon. ² Om boros kaddi do TUHAN dot id doho’, ’’Pointobon nondo kasai’ iti wawayaan diti om a’ no iwangan. A’ no koino-ino o tongoiso’ piya’d tulun do maya’dti tu’ nawayaan ku i’ iti, iyoho’ i TUHAN, i Kinorohingan dot Israil do suminuang diti Walai’d Sasambayangan dot Agayo. Pointobon nondo kasai’ iti. ³ Nga’ iri nopo i raja’ di momorinta’ om koino-ino i’ do mongoi do hiri’d ralan di kumaa do hiri’d wawayaan diri do mongoi pangakan do taakanon dit olidang dot id toguang ku. Om wayaan nopo dau do sumuang om sumoliwan om mositi’ no dot i wawayaan do kawaya’ di bilik dot agayo,’’ ka dau. ⁴ Om angatai oku noddi di kusai’ddi do minaya’ di wawayaan do ponong id utara, it id dotimbabaan di Walai’d Sasambayangan dot Agayo. Om soira’ di minontong kopio oku, om kokito ku do noponu’ pod tulinau di kosorong kopio, i tanda’ do karapahan do TUHAN, i Walai’d Sasambayangan dot Agayo. Om hunduk oku nopoddi do minotud. ⁵ Om boro-boros noddi o TUHAN dot id doho’ do poingkaa, ’’Oi tulun, ilaan no kopio o koinsanai dit okito om orongou nu. Sunudan ku iya’ do koinsanai dot oturan om kowoyo-woyoo’ do pasal diti Walai’d Sasambayangan dot Agayo. Om tulison no kosonong-sonong ondung isai i koino-ino do sumuang di Walai’d Sasambayangan dot Agayo om tulison ondung isai it a’ koino-ino do sumuang. ⁶ Sunudan no i tulun dot Israil, i tulun dot obinsongkiwal diri, dot a’ ku noddi iyoho’ i TUHAN, it Asawat Kopio, pologoson iyolo’ do momonsoi di sosomu’. ⁷ Sinosomu’ diyolo’ i Walai’d Sasambayangan dot Agayo, tu’ pinopologos iyolo’ do bansa’d suwai dit a’ nosunatan, i tulun dit a’ mumboyo’ doho’, do suminuang di Walai’d Sasambayangan dot Agayo, do tontok di maso do patahakon dot id doho’ i porsombahan do lunok om raha’. Om tinolibambanan diri di tulun ku i tumpongo ku dot id diyolo’, tu’ miningwonsoi i’ iyolo’ di kososomu’ kopio’ddi. ⁸ Okon nogi’ ko’ iyolo’ o minongilo-ilo di natantu’ mantad do wonsoyon dit ongolidang do hiri’d suang di Walai’d Sasambayangan dot Agayo, suwai ko’ iri nogi’ tulun di bansa’d suwai o sinuhu’ diyolo’ do momonsoi’ddi. ⁹ Iyoho’ no i TUHAN, it Asawat Kopio, o popoboros dot a’ koino-ino do sumuang di Walai’d Sasambayangan dot Agayo o bansa’d suwai dit a’ nosunatan, om i tulun dit a’ mumboyo’ doho’. Om iri piya i bansa’d suwai di momogun-mogun do poirolot dot Israil, i tulun ku nga’ a’ i’ koino-ino,’’ ka dau. ¹⁰ Om boros kad TUHAN dot id doho’, ’’Hukuman ku nondo i tulun do Liwi, tu’ miagal nopo iyolo’ di tulun dot Israil do suwai, do tuminongkiad doho’ om tuminuku’ dot id tingolig. ¹¹ Nga’ milo i’ iyolo’ do momonsoi’d karaja’ ku do hiri’d Walai’d Sasambayangan dot Agayo do madtatamong di wawayaan om maganu-anu do hiri. Om koino-ino i’ iyolo’ do mogkorot di tayam-tayam i patahakon di tulun dot ogumu’ do maan do porsombahan do sorobon om porsombahan do sumbolion, om mositi’ no do kumaraja’ kasai’ iyolo’ do mogobi-obi’ di tulun dot ogumu’. ¹² Ginayat ngai’ diyolo’ i tulun dot id suang do dusa tu’ minodsubak i’ iyolo’ do tingolig do mogobi’ di tulun dot Israil. Gowoi poddi om sumumpa’ oku no, iyoho’ i TUHAN, it Asawat Kopio, do mositi’ nod hukuman iyolo’. ¹³ A’ no iyolo’ koino-ino do sumiliu’d imam do mogobi-obi’ doho’ ko’ mongoi po insomok do nunu nopo it olidang dot id doho’, om a’ koino-ino do sumuang di Kinoiyonon dot Olidang Kopio. Iti no o pomohukum di winonsoi diyolo’ di kososomu’ kopio. ¹⁴ Buruon nopo do patahakon ku diyolo’ om iri po i buruon di koubasanan do hiri’d Walai’d Sasambayangan dot Agayo,’’ ka dau. ¹⁵ Om boros kad TUHAN, it Asawat Kopio, ’’Nga’ iri nopo it imam do mantad id sinakagon di Liwi, om i suminolusuk di Sadok, om otorodok i’ kasai’ do mogobi-obi’ doho’ do hiri’d Walai’d Sasambayangan dot Agayo do tontok di nokotongkiad no doho’ i tulun dot Israil di suwai. Om baino’ nondo om iyolo’ no it apatut do mogobi-obi’ doho’ om i minsomok dot id toguang ku do mongoi papatahak di lunok om i raha’ do tayam-tayam di numaan do porsombahan dot id doho’. ¹⁶ Iyolo’ poo o koino-ino do sumuang di Walai’d Sasambayangan dot Agayo, om i maganu-anu do hiri’d pananaraban do porsombahan di doho’, om momoyo’ do sumambayang do hiri’d Walai’d Sasambayangan dot Agayo. ¹⁷ Soira’ nopod sumuang iyolo’ di wawayaan di kumaa do hiri’d natad di ponong id suang di Walai’d Sasambayangan dot Agayo, om mositi’ nod manampakai iyolo’ do pakayan di kain linan. Om a’ no iyolo’ koino-ino do manampakai do pakayan di hulu’d dumba’ do winonsoi, do tontok do maganu-anu iyolo’ do hiri’d natad di ponong id suang ko’ hiri pod suang di Walai’d Sasambayangan dot Agayo. ¹⁸ Om mositi’ nod manampakai iyolo’d sigar do kain linan om soluar do kain linan, nga’ a’ indo manangagkos, om a’ i’ iyolo’ losuan. ¹⁹ Om tintod nopo diyolo’ do mongoi’d hiri’d natad di ponong id soliwan, i kotimungon do tulun dot ogumu’, om mositi’ nod iduwon po diyolo’ i pakayan diyolo’ di pinakai do maso’d maganu-anu do hiri’d Walai’d Sasambayangan dot Agayo, om poilihon iri do hiri’d bilik dit olidang. Om mositi’ nod manampakai iyolo’ do pakayan do suwai om a’ i’ koporikot do kosusaan dot id tulun dot ogumu’ i pakayan diyolo’ di papakayon do maganu-anu. ²⁰ Imam nopo om a’ i’ koino-ino do mamalagas do tulu om a’ koino-ino do papanaru kopio’d tobuk. Mositi’ no do pampadan dot oniba’ i tobuk diyolo’ do tumanud dit oturan di natantu’ mantad. ²¹ Om iri nopo it imam nga’ a’ no koino-ino do monginum do waig dot anggur do tintod do mongoi’d hiri’d natad di ponong id suang. ²² Om a’ koino-ino ot imam do manansawo do tondu’ di naadaan; tu’ koino-ino nopo dau do kowinon om sumandak nod Israil om i tondu’ do nakasawo’d gulu dot imam, nga’ napatai noddi i sawo dau. ²³ Om mositi’ nod tudukan dit imam i tulun ku do pisuayan di nokotobilang do maan do doho’ om it a’ nokotobilang, om pisuayan dit olidang om it a’ olidang do tumanud do toturan do tugama’. ²⁴ Soira’ nopod haro o pigulatan, om iri no it imam o momutus diri do miontok dit oturan ku. Om mositi’ nod gompion diyolo’ i tadau dot agayo do don tugama’ do miontok dit oturan om i ponuhuan ku, om mositi’ do pusohon kasai’ diyolo’ i tadau’d Sabat, i tadau di nokotobilang do maan do doho’. ²⁵ A’ i’ koino-ino it imam do monosomu’ do tinan dau dot i koigit do rata’ o kososomu’, ondung okon no ko’ rata’ di molohing dau, ko’ i tangaanak dau, ko’ i tobpinai dau’d kusai ko’ i tobpinai dau’d tondu’ dit a’ po nakasawo. ²⁶ Om soira’ nopondo dot olidang kawagu iyau, om mositi’ no do mandad po iyau do solinaid do turu’ o tadau, ²⁷ om mongoi nogindo iyau do hiri’d natad di ponong id suang di Walai’d Sasambayangan dot Agayo, om papatahak do porsombahan do pomolidang do tinan dau, om koino-ino indo kawagu iyau do maganu-anu do hiri’d Walai’d Sasambayangan dot Agayo. Iyoho’ no, i TUHAN it Asawat Kopio, o minomoros diti. ²⁸ Tungkusan nopo do pogitungkus-tungkusan dit imam om iri no i karaja’ diyolo’ do dong imam, tu’ iri no o tungkusan do pinatahak ku diyolo’ dot id pogialatan do tulun dot Israil. Om a’ iyolo’ koino-ino do manansanganu do nunu nopo do hilo’d Israil; tu’ iyoho’ no o ponokodapu’ diyolo’. ²⁹ Akanon nopo dit imam om i porsombahan do gandum, om i porsombahan do pongidu’d dusa, om i porsombahan do pambayar do tutang, om iyolo’ no o kaanu do koinsanai di nokotobilang do maan do doho’ do hilo’d Israil. ³⁰ Om iri no it imam o kaanu di tomot dot id gulu omoto’, it ongosonong kopio, om koinsanai di suwai do patahakon dot id doho’. Pointikid-tikid do momonsoi’d roti i tulun ku om mositi’ nod tahakon diyolo’ dit imam it id gulu kopio diyolo’ kowonsoi, om barakatan ku i’ i walai diyolo’. ³¹ Om iri nopo it imam nga’ a’ i’ koino-ino do mangakan do nunu nopo koombolog ko’ bansa’ do nintorusan di minatai toomod ko’ i pinatai do nintorusan do suwai,’’ ka dau.

¹ Bohogion nopondo i tana’ do potikidon do pointikid-tikid di payat, om mositi’ nod patahakon o sombohogian di tana’ddi dot id TUHAN. Konoruo’ nopod tana’ddi nga’ hopod om duwo om satanga’ kilomito om kalaabo’ no om hopod o kilomito. Om oinsanan nopo i kinoiyonon diri do poboroson dot olidang. ² Om hiri nod tana’ddi o pawansayan di Walai’d Sasambayangan dot Agayo. Om pabasagi’ nopo o kinoiyonon diri do duwo nahatus om limo nohopod o mito do konoruo’, om irad iddi o kalaabo’. Om obian do maan do liwan o hiri’d posorili’ddi do duwo nohopod om limo mito do kalaabo’. ³ Songintanga’ nopo do kinoiyonon diri, do hopod om duwo om satanga’ kilomito do konoruo’ om limo kilomito’ do kalaabo’, om maan do waalan di Walai’d Sasambayangan dot Agayo, i kinoiyonon dit olidang kopio. ⁴ Om iri nondo o tana’ dot olidang dot id suang do pomogunan diri, do potobilangon do maan dit imam, i mogobi-obi’ do TUHAN do hiri’d Walai’d Sasambayangan dot Agayo. Om hiri o koiyonon di kawalayan diyolo’, om sombohogian no di tana’ddi om waalan do Walai’d Sasambayangan dot Agayo. ⁵ Om iri no songintanga’ di tana’ddi do 12.5 o kilomito do kogoyoo’ om potobilangon do maan di tulun do Liwi, i mogobi-obi’ do hiri’d suang di Walai’d Sasambayangan dot Agayo. Om haro nondo o kabandaran do hiri dot iyonon diyolo’. ⁶ Om suwai no ko’ mantad di kinoiyonon dot olidang, om haro po tiso’ kawagu bohogian do tana’ do hopod om duwo om satanga’ kilomito do kalaabo’. Om potobilangon nori do wansayan do bandar do maan dot iyonon dot isai nopo di tulun dot Israil. ⁷ Om haro nogi’ o tana’ do potobilangon do patahakon di raja’. Iti nopo tana’dti nga’ poimpuunon di wolit di tana’ di pinotobilang do maan do don TUHAN om poillombus nopo do gisom do korikot di Rahat do Tanga’; om mantad no di wolit do ponong id koulayon do mantad di tana’ di pinotobilang diri, om poirikot nopo dot id wolit di pomogunan di ponong id koulayon. Om konoruo’ nopo do tana’dti nga’ irad di konoruo’ do tana’ di pinabahagi’ dot id pointikid-tikid di payat dot Israil. ⁸ Om iti no o kinoiyonon do tana’ dot aanu di raja’ do momorinta’ do hilo’d pomogunan dot Israil, om a’ indo iyau monginggorit di rayat, suwai ko’ pologoson i’ dau i kinoiyonon do tana’d suwai do hiri’d pomogunan diri dot asanganu di payat dot Israil do suwai. ⁹ Om boros kad TUHAN, it Asawat Kopio, ’’Alaid kou noddi kopio do momonsoi’d dusa, oi pomorinta’ dot Israil: Tongkiadai no dokoyu ino kororongit om ino pongulok-ulok dokoyu di rayat. Wonsoyon no dokoyu it otopot om it otulid. Om kada’ kou nondo kopio umbal do moguyung di tulun ku do mantad hilo’d pomogunan diyolo’. Iyoho’ no, i TUHAN it Asawat Kopio, o monuhu’ dokoyu do momonsoi’d miagal diti. ¹⁰ Mositi’ nod mamakai o pointikid-tikid do tulun do timbangan om pagadang di koontok: ¹¹ Iso’ nopo ot ipa do pagadang dit ongotuu om mositi’ no do miirad do suang dit iso’ o bat do pagadang di miagal-agal do waig. Popiirad nopo nga’ iso’ o homor. Om miagal diti o kopogiirad-iradan di pagagadang diri: 1 homor = 10 ipa = 10 bat ¹² Om ponimbang no dokoyu om miagal diti: 1 sikal = 20 gira. 1 Mina = 60 sikal. ¹³ - ¹⁵ Iti no o pagagadang di natantu’ mantad do pagadang di porsombahan: Gandum: 1/60 o bahagi di tomot dokoyu. Barli: 1/60 o bahagi di tomot dokoyu. Tumau do saitun: 1/100 o bahagi di tumau do kayu saitun. (Pagadang nopoddi nga’ i bat: 10 bat = 1 homor = 1 kor) Dumba’: 1 o dumba’ do mantad id pointikid-tikid do 200 o dumba’. Om papatahak kou nod porsombahan do gandum, om porsombahan di sorobon, om porsombahan di piombolutan, om oompunan i’ o dusa dokoyu. Iyoho’ no, i TUHAN it Asawat Kopio, o monuhu’ do momonsoi do miagal diti. ¹⁶ Om mositi’ nod papatahak o koinsanai’d tulun do hiri’d pomogunan diri do porsombahan diti dot id raja’ di momorinta’ dot Israil. ¹⁷ Om iyau no ot apatut do posodia’ do tayam-tayam do maan do porsombahan do sorobon, om i maan do porsombahan do gandum, om i porsombahan do waig dot anggur do maan do koinsanai di bansa’ dot Israil do tontok di piro-piro o tadau dot agayo, i Tadau dot Agayo do Tulan do Wagu, om tadau’d Sabat, om tontok di tadau dot agayo do suwai. Om iyau nogi’ o poposodia’ di maan do porsombahan do pangampun do dusa, om porsombahan do gandum, om porsombahan di sorobon, om porsombahan do piombolutan do maan do kopokiompunan do dusa di tulun dot Israil,’’ ka dau. ¹⁸ Om boros kad TUHAN, it Asawat Kopio dot id tulun dau, ’’Pointikid-tikid do tadau do koiso’, do tulan di koiso’, om papatahak kou no do sapi’ do tontoluhan dit aiso’ o bohiton do tinan do maan do porsombahan do sumbolion do pomolidang di Walai’d Sasambayangan dot Agayo. ¹⁹ Om manu nondo it imam di raha’ do mantad id porsombahan di pongidu’d dusa’ddi, om pogihilon nondo do hiri’d tisan di wawayaan di Walai’d Sasambayangan dot Agayo, om gihilan it apat o sunduk di pananaraban do porsombahan, om hiri’d tisan di wawayaan di suangon do kumaa do hiri’d natad di ponong id suang. ²⁰ Om tontok no do tadau’d koturu’ do tulan diri, om wonsoyon po kawagu dokoyu o miagal diri do bagi’d isai nopo o tulun di kowonsoi’d dusa dot a’ tomodon om i kowonsoi’d dusa tu’ a’ i’ nokoilo mantad. Om iti no o ralan dokoyu do momolidang kasai’ di Walai’d Sasambayangan dot Agayo. ²¹ Om tontok di tadau’d kohopod om apat, di tulan do koiso’, om tumimpuun kou no do mamaramai di Tadau dot Agayo do Paska. Om kanon nopo do koinsanai’d tulun do solinaid do turu’ o tadau om i roti dit a’ rinalatan do pangambang. ²² Om tontok di tadau’d koiso’ do karamayan diri, om mositi’ nod papatahak i raja’ do songinan o sapi’ do tontoluhan do maan do porsombahan do sumbolion do pongidu’d dusa dau om dusa do koinsanai di rayat dau. ²³ Pointikid-tikid do tadau do solinaid di turu’ o tadau’d karamayan diri, om mositi’ nod papatahak iyau dot id TUHAN do porsombahan do sumbolion do turu’ o sapi’ do tontoluhan om turu’ o dumba’ do tontoluhan dit aiso’ o bohiton do tinan, om songkoyuon ngai’ nopori do monorob. Om papatahak nogi’ iyau do porsombahan do sumbolion do songinan o kambing do tontoluhan do pointikid do tadau, do maan do pangampun do dusa. ²⁴ Om potonggoyon nopo do pointikid-tikid di songinan o sapi’ om 17.5 lito do gandum, om potonggoyon no do pointikid-tikid do songinan o dumba’ do tontoluhan om 3 o lito do tumau’d saitun. ²⁵ Om tontok no di Tadau dot Agayo do Kinuhub-Kuhub, i tumimpuun do tadau’d kohopod om limo di tulan do koturu’, om miagal iddi o porsombahan do patahakon di raja’ do pointikid-tikid do tadau do solinaid di turu’ o tadau, i porsombahan do pangampun do dusa, om i porsombahan do sorobon, om i porsombahan do gandum om i tumau do saitun,’’ ka dau.

¹ Om boros kad TUHAN, it Asawat Kopio, ’’Iri nopo wawayaan di ponong id koulayon, i wayaan do kumaa do hiri’d natad do ponong id suang om mositi’ nod tabanan do solinaid dit onom o tadau do koporobuatan, nga’ tontok nopo do tadau’d Sabat om di Tadau dot Agayo do Tulan do Wagu, om mositi’ nod iwangan iri. ² Om sumuang nondo i raja’ do momorinta’ do tontok do piro-piro o tadau’ddi, do hiri’d bilik dit agayo do mantad hiri’d natad dit id soliwan, om mongoi nondo iyau ingkakat do hiri’d toning di tisan do wawayaan, do daamot dit imam do monorob do koinsanai di porsombahan do sinumbali’ om i porsombahan do piombolutan di pinatahak di raja’. Om motud nondo i raja’ do tumuku’ dot id TUHAN do hiri’d wawayaan diri om sumoliwan nogindo iyau. Om a’ no koino-ino do tabanan i wawayaan diri do gisom do totuong. ³ Pointikid-tikid do tadau’d Sabat om Tadau dot Agayo do Tulan do Wagu, om oinsanan nopo i rayat dot apatut do mongoi otud do tumuku’ dot id TUHAN do hiri’d dotimbabaan di wawayaan diri. ⁴ Om tontok nopod tadau’d Sabat om mositi’ nod papatahak i raja’ dot id TUHAN do porsombahan do sorobon dot onom o tinan do tanak do dumba’ om songinan o dumba’ do tontoluhan, om it aiso’ ngai’ nopo o bohiton do tinan. ⁵ Om potonggoyon nopo do pointikid-tikid di dumba’ do tontoluhan diri, om porsombahan do gandum do 17.5 o lito do kogumuo’, om potonggoyon no do pointikid-tikid di tanak do dumba’ om songkuro nopo o kogumuo’ do gandum do korohian dau do papatahak. Om potonggoyon no do pointikid-tikid di porsombahan do gandum, om 3 o lito do tumau do saitun. ⁶ Om tontok no di Tadau dot Agayo do Tulan do Wagu om porsombahan nopo do patahakon om songinan o sapi’ do tontoluhan dit okoro’ po, om onom o tinan do tanak do dumba’, om songinan o dumba’ do tontoluhan, dit aiso’ ngai’ nopo o bohiton do tinan. ⁷ Om potonggoyon nopo do pointikid-tikid do songinan o sapi’ do tontoluhan om i kambing do tontoluhan, om porsombahan do gandum do 17.5 o lito do kogumuo’, om potonggoyon no do pointikid-tikid di dumba’ om songkuro nopo o kogumuo’ do porsombahan do korohian di raja’ do papatahak. Om tolu o lito do tumau’d saitun do patahakon do potonggoyon do pointikid-tikid do porsombahan do gandum. ⁸ Soira’ nopod mongoi i raja’ sambayang do hiri’d Walai’d Sasambayangan dot Agayo, om mositi’ nod maya’ iyau do hiri’d bilik dot agayo’ om sumoliwan nga’ maya’ i’ di wawayaan di winayaan dau di suminuang i’. ⁹ Soira’ nopod mongoi sambayang dot id TUHAN i tulun dot ogumu’ do tontok do tadau dot agayo do nunu nopo, om iri nopo i tulun do suminuang do minaya’ di wawayaan do ponong hiri’d utara, om mositi’ nod maya’ di wawayaan do ponong id salatan do sumoliwan, om iri no i minaya’ di wawayaan do ponong id salatan di suminuang i’ om mositi’ nod maya’ di wawayaan di ponong id utara do sumoliwan. Om a’ koino-ino do haro o songulun piya do maya’ kawagu di wawayaan di sinuang dau do sumoliwan iyau, suwai ko’ i wawayaan dit id hapak o wayaan dau. ¹⁰ Om iri nopo raja’ nga’ mositi’ nod sumuang di Walai’d Sasambayangan dot Agayo do poingandad di tulun dot ogumu’, om mandad iyau diyolo’ do sumoliwan. ¹¹ Tontok nopo di tadau dot agayo, om di moginakan, om porsombahan nopod gandum om 17.5 o lito do kogumuo’ do potonggoyon do pointikid-tikid do songinan o sapi’ do tontoluhan ko’ dumba’ do tontoluhan, om potonggoyon nopo di pointikid-tikid do songinan o tanak do dumba’, om songkuro nopo o korohian di tulun di sumambayang do papatahak. Om potonggoyon nopo do pointikid-tikid di porsombahan do gandum, om tolu o lito do tumau’d saitun. ¹² Soira’ nopo dot orohian i raja’ do papatahak do porsombahan dot iri tuu porsombahan do sorobon ko’ i porsombahan do piombolutan, om iwangan indo i wawayaan di ponong id koulayon, i wawayaan do kumaa do hiri’d natad di ponong id suang, do wayaan di raja’. Om kowoyo-woyoo’ nopo dau do papatahak di porsombahan di sumbolion diri nga’ miagal nopo di kowoyo-woyoo’ dau do papatahak do porsombahan do tontok do tadau’d Sabat. Om kosoliwan pondo iyau om lomusan no do monobon kawagu i wawayaan,’’ ka dau. ¹³ Om boros kad TUHAN, ’’Pointikid-tikid do kosuabon om mositi’ nod papatahak dot id TUHAN do tanak do dumba’ di sontoun nogi’ o tumur, om it aiso’ o bohiton do tinan do maan do porsombahan do sorobon. Om mositi’ nod patahakon o porsombahan diti do monikid kosuabon. ¹⁴ Om papatahak nogi’ do porsombahan do gandum do duwo kilogram do kogumuo’ do monikid kosuabon, om sonlito o tumau’d saitun do poroloton di gandum. Om oturan nopod pasal do porsombahan do gandum diti, i patahakon dot id TUHAN do pointikid do tadau, nga’ poinggirot kasai’ nopo do gisom dot alaid. ¹⁵ Mositi’ nod patahakon kasai’ dot id TUHAN o porsombahan diti do monikid kosuabon: songinan o tanak do dumba’, om gandum, om tumau’d saitun. Om mositi’ nod patahakon iti do monikid kosuabon do gisom dot alaid,’’ ka dau. ¹⁶ Om poingkaa no o ponuhuan do TUHAN it Asawat Kopio, ’’Ondung patahakon di raja’ o songkoiyonon di tana’ dau dot id tangaanak dau’d kusai do maan di tanak do tungkusan, om asanganu no di tanak iri, om osiliu do tungkusan di sompiiyon dau. ¹⁷ Nga’ ondung papatahak i raja’ do songkoiyonon di tana’ dau dot id iso’ di susuhuon dau, om koguli’ i’ kawagu dot id raja’ iri dot orikot i Toun do Kopogulian. Tu’ iri i raja’ o sanganu’ddi, om iyau no om i tangaanak dau’d kusai o kasanganu kasai’ddi do gisom dot alaid. ¹⁸ Om iri nopo raja’ nga’ a’ no kopio koino-ino do manganu di tinungkusan di rayat dau. Koinsanai di tana’ di patahakon dau dot id tangaanak dau’d kusai, om mositi’ no dot i tana’ di nokotobilang mantad do maan do dau om a’ i’ iyau koponginggorit dot isai nopo di tulun ku, om a’ iyolo’ kotongkiad di tana’ di tinungkusan diyolo’,’’ ka dau. ¹⁹ Om tanggayai oku noddi di kusai’ddi do kuminaa do hiri’d wawayaan di bilik dit olidang di potimbaba’ ponong id utara, it id toning di wawayaan do ponong id salatan di natad do ponong id suang. Iti nopo nga’ bilik dit imam. Om tuduko’ no dau ot iso’ o kinoiyonon dit id bombong di bilik do ponong id kotonobon, ²⁰ om boro-boros nod poingkaa, ’’Hiti nod kinoiyonon diti o pomolosuan dit imam do daging di pinatahak do maan do porsombahan do pongidu’d dusa om i porsombahan do pambayar do tutang. Om hiti o pagansakan di porsombahan do gandum, om aiso’ i’ ot ongokooro’ piya di porsombahan dot olidang dot oigitan do hilo’d natad di ponong id soliwan, om a’ i’ oontok do kosusaan i tulun dot ogumu’,’’ ka dau. ²¹ - ²² Om angatai oku noddi dau do hiri’d natad di ponong id soliwan om pointongo’ oku no dau dot otikid nopod natad dot ongokooro’ it apat o linsuk. Kogoyoo’ nopo di natad diri nga’ 20 o mito do konoruo’ om 15 o mito do kalaabo’. ²³ Om ongkitolig ngai’ nopod watu o pointutuk di natad diri, om kiropuhan do pointopis di tolig. ²⁴ Om boros ka di kusai’ddi dot id doho’, ’’Iti ngai’ no i dapur dot iyonon di susuhuon do hiti’d Walai’d Sasambayangan dot Agayo do mamalasu’ di porsombahan do sinumbali’, i pinatahak di tulun dot ogumu’,’’ ka dau.

¹ Om pogulio’ oku no kawagu di kusai’ddi do hiri’d wawayaan do sumuang di Walai’d Sasambayangan dot Agayo. Om kokito ku do lumuyung nopo o waig do mantad hiri’d siriba’ di wawayaan diri, om lumuyung do ponong id koulayon, i kotimbabaon di Walai’d Sasambayangan dot Agayo. Om lumuyung i waig diri do mantad ponong id salatan do hiri’d siriba’ di Walai’d Sasambayangan dot Agayo, om kawaya’ di pananaraban do porsombahan do ponong id salatan. ² Om posoliwano’ oku noddi di kusai’ddi do mantad hiri’d Walai’d Sasambayangan dot Agayo do minaya’ di wawayaan do ponong id utara om posorilio’ oku no do minongoi’d hiri’d wawayaan di potimbaba’ ponong id koulayon. Om haro o bawang dot okooro’ do lumuyung do sumoliwan do mantad ponong id salatan di wawayaan diri. ³ Om tipongo’ no di kusai di sukud do poninipong dau o poingugus di bawang dot okooro’ddi do limo nahatus o mito do kosoduwo’ do poingkaa ponong id koulayon, om sinuhu’ oku dau do sumoborong di bawang diri. Om korikot no dot id tampangil ku i waig do hiri. ⁴ Om tipongo’ no kawagu dau o limo nahatus o mito, om korikot noddi dot id totud ku i waig do hiri. Om tipongo’ no kawagu dau o limo nahatus o mito do poingugus om korikot noddi dot id tawak ku i waig do hiri. ⁵ Om tipongo’ no kawagu dau o limo nahatus o mito do mantad hiri, om aralom tomod diri i waig, gisom dot a’ oku no milo do mamanau. Om a’ no milo’d a’ kumaau do sumoborong diri. ⁶ Om boros ka dau dot id doho’, ’’Oi tulun, antangai ngai’ no kopio iti,’’ ka dau. Om tanggayai oku no kawagu dau do guminuli’ do hiri’d tisan di bawang, ⁷ om soira’ di nokorikot oku’d hiri, om kokito ku dot ogumu’ o kayu do hiri’d mitingisan di bawang. ⁸ Om boros ka dau dot id doho’, ’’Iti nopo waig om lumuyung do ponong id koulayon do mantad id pomogunan diti, om korikot do hilo’d Rantai do Bawang do Yordan om gisom do korikot di Rahat do Napatai. Om koluyung nopondo iti do hilo’d Rahat do Napatai om otingalanan nondod waig dot osonong i waig dot oosin do hilo’. ⁹ Om honggo nopo o koluyungon diti bawang diti, om hilo’ no o koiyonon do piro-piro o bansa’d nintorusan om sada’. Om osiliu nondo di bawang diri i Rahat do Napatai, do waig dit a’ oosin, om honggo nopo o koluyungon do waig diti, om haro no o koposion do hiri. ¹⁰ Om mantad poddi do hiri’d tudan do waig dot In-Gidi om poingompus nopo do gisom do korikot di tudan do waig dot In-Iglaim, om ogumu’ no o tulun do monginginsada’ do hiri’d tisan, om hilo’ no o pawaladan diyolo’ di rambot diyolo’. Om miagal pondo di hilo’d Rahat do Tanga’ o kogumuo’ do bansa’d sada’ do hilo’. ¹¹ Nga’ iri nopo waig di hiri’d buyut om i hiri’d botung do poingompus di tisan diri om oosin kasai’ i’ o waig. Iyo kasai’ iddi tu’ tadon do silaon. ¹² Om mitingisan nopo di bawang diri om mogisuayan nopondo o kayu do sumuni di taakanon o tua’. Om a’ i’ tumatak i roun di kayu’ddi om a’ tumingkod do mongua’. Haro kasai’ nopondo o tua’ tu’ mongua’ kasai’ nopo do monikid tulan, tu’ opiyopos i’ di waig do mantad hiri’d Walai’d Sasambayangan dot Agayo. Om iri nondo i tua’ di kayu’ddi o taakanon, om iri no roun om maan do tubat,’’ ka dau. ¹³ Om boros kad TUHAN, it Asawat Kopio, ’’Iti no o wolit di tana’ di bohogion do potikidon di hopod om duwo o payat dot Israil. Om iri nopo payat di Yusup nga’ kaanu do duwo o bahagi’. ¹⁴ Nokosumpa’ oku no dot id komolohingan dokoyu do patahakon ku diyolo’ iti tana’; iyo nopoddi, om onuo’ no iti tana’ om iyoon no o pamahagi’ dot id pogialatan dokoyu. ¹⁵ Iri nopo wolit do ponong id utara nga’ mimpuun di Rahat do Tanga’ om poingkaa ponong id koulayon do gisom do korikot di bandar do Hitlon, om poingkaa do hilo’d bandar do Hamat, om potilombus do hilo’d bandar do Sidad, ¹⁶ om poingkaa do hilo’d bandar do Birota, om bandar do Sibraim (i kabandaran do hilo’d pialatan do Bandar do Damsik om Bandar do Hamat), om poingkaa do hilo’d bandar do Hasar-Inan, it id piwolitan do bandar do Hauran. ¹⁷ Iri nopo wolit do ponong id utara om mimpuun do mantad di Rahat do Tanga’ om poingkaa ponong id koulayon, do gisom do korikot do hilo’d bandar do Hasar-Inan; om ponong id utara nopo do wolit diti nga’ i watas do Damsik om Hamat. ¹⁸ Om wolit nod ponong id koulayon, om poingkaa ponong id salatan, do pinoimpuun dot id iso’ o kinoiyonon dot id piolitan do watas do Damsik om watas do Hauran. Om iri no i Bawang do Yordan o ponokowolit di tana’ dot Israil do ponong id kotonobon, om Giliad o ponokowolit do ponong id koulayon, do gisom do hilo’d Tamar, i hilo’d tisan do Rahat do Napatai. ¹⁹ Om wolit no do ponong id salatan om poingkaa ponong id salatan do ponong id kotonobon, om mimpuun do hilo’d Tamar, om korikot do hilo’d tudan do waig do Kadis-Moriba, om wolit no do poingkaa do ponong id utara do pongid kotonobon do poinsusui di piwolitan do pomogunan do Masir, om gisom do korikot do hilo’d Rahat do Tanga’. ²⁰ Om wolit no do ponong id kotonobon om i tisan do Rahat do Tanga’, om poingkaa nondo do ponong id utara, do gisom do korikot dot id iso’ o kinoiyonon di ponong id kotonobon do mantad di ralan do kumaa do hilo’d Hamat. ²¹ Bohogion no i tana’ddi dot id pogialatan dokoyu, i payat dot Israil, ²² om iyokoyu no o kasanganu do tana’ddi do gisom dot alaid. Om iri nogi’ i bansa’d suwai di poingiyon dot id rolot dokoyu, om i hiti’d pomogunan diti o kinosusuon do tangaanak diyolo’, nga’ mositi’ nod kaanu do bahagi’ di tana’ do tontok do bohogion dokoyu. Om mositi’ nod poiyoon iyolo’ di bansa’ dot Israil, om kopongundi’ iyolo’ do manganu di bahagi’ di tana’ do miagal di payat dot Israil. ²³ Pointikid-tikid di bansa’d suwai di momogun-mogun do hiti’d pomogunan diti om mositi’ nod onuan do bahagi’ do miagal di payat dot Israil di kinosugkuon diyolo’. Iyoho’ no, i TUHAN it Asawat Kopio, o minomoros diti,’’ ka dau.

¹ - ⁷ Iri nopo wolit do ponong id utara om pinoimpuun do hiri’d Rahat do Tanga’; om poingkaa i wolit diri do ponong id koulayon, do gisom do korikot di bandar do Hitlon, om i ralan do kumaa do hilo’d Hamat, om i bandar do Hasar- Inan, om gisom do korikot di wolit dit id pialatan do bandar do Damsik om bandar do Hamat. Pointikid-tikid do payat diti om mositi’ no dot onuan do bahagi’ di tana’, do kogoyoo’ nopo om mantad di wolit ponong id koulayon om poingkaa ponong id kotonobon om gisom do korikot di Rahat do Tanga’, om mantad id utara om gisom dot id salatan do pogisuhut-suhuton do mamahagi’ do miagal diti: Dan Asur Naptali Manasi Ipraim Rubin Yohuda ⁸ Om iti no bahagi’d tana’ diti om mositi’ no do potobilangon do maan di natantu’ mantad. Om konoruo’ nopodti nga’ 12.5 o kilomito, do mantad id wolit di ponong id utara om gisom do ponong id salatan. Om miagal iddi o konoruo’ di wolit do ponong id koulayon, om i wolit do ponong id kotonobon, do miagal di bahagi’ do pinatahak di payat dot Israil. Om hiri no o pamaalan di Walai’d Sasambayangan dot Agayo. ⁹ Om hiri nopod tanga-tanga’ do bohogian do tana’dti om haro o songkoiyonon o tana’ do potobilangon do maan do don TUHAN, do 12.5 kilomito do konoruo’, om 10 o kilomito do kalaabo’. ¹⁰ Om mositi’ no do bohogian do tana’ it imam do mantad id tana’ dot olidang diti. Kogoyoo’ nopo di diyolo’d bahagi’ do mantad ponong id koulayon om poingkaa ponong id kotonobon om 12.5 o kilomito, om limo o kilomito do mantad ponong id utara om poingkaa ponong id salatan. Om hiri nod tanga-tanga’ do kinoiyonon do tana’dti o waalan di Walai’d Sasambayangan dot Agayo. ¹¹ Iti nopo kinoiyonon do tana’ dit olidang diti nga’ patahakon dit imam di sinakagon di Sadok. Tu’ otorodok kopio i’ iyolo’ do minogobi-obi’d TUHAN om a’ tuminanud di tulun dot Israil do suwai do minomonsoi dot araat, do miagal di tulun do suwai do mantad id payat di Liwi, i payat di tadon diyolo’. ¹² Om kaanu nondo i sinakagon di Sadok do kinoiyonon di potobilangon dot id toning di kinoiyonon do tana’ dot aanu di tulun do Liwi. Om iri nondo i tana’ do pinotobilang diri o kinoiyonon dit olidang kopio. ¹³ Om konoruo’ nopo di tana’ di tulun do Liwi om 12.5 o kilomito do mantad ponong id koulayon om korikot do ponong id kotonobon, om kalaabo’ no om limo o kilomito do mantad ponong id utara om korikot do ponong id salatan. Om pointalad iti di tana’ dit imam. ¹⁴ Iri nopo i tana’ di pinotobilang do maan do don TUHAN, om iri no i tana’ dit osonong kopio do hiri’d pomogunan diri, om a’ no koino-ino do padagangon o tongosanrangau piya di tana’ddi ko’ poolonon ko’ posongonuan do tulun do suwai. Tu’ iri nopo tana’ddi om nokotobilang no do maan do don TUHAN, om iyau no o sanganu’ddi. ¹⁵ Iri nopo noolu-olu’ di tana’ di pinotobilang diri, i 12.5 o kilomito do konoruo’ om 2.5 o kilomito do kalaabo’, i ponong id salatan, om a’ no olidang, om milo no di rayat do maan do pomogun-mogunan om paakan-akanan do tayam-tayam. Om mositi’ no do wansayan do bandar o hiri’d tanga-tanga’ddi. ¹⁶ Om pabasagi’ nondo i bandar diri do 2,250 o mito do konoruo’ om irad iddi o kalaabo’. ¹⁷ Om posorili’ nopo di bandar diri nga’ haro o linanggaan do 125 o mito do kalaabo’. ¹⁸ Om iri nopondo i tana’ dot oolu’ dot owonsoi i bandar diri, i tana’ di ponong id salatan kopio di kinoiyonon dot olidang diri, i limo po kilomito do konoruo’ om 2.5 o kilomito do kalaabo’ do ponong id koulayon, om limo kilomito do konoruo’ om 2.5 o kilomito do kalaabo’ do ponong id kotonobon, om patahakon di tulun di songingiyon do hiri’d bandar do maan diyolo’d pomutanam-tanaman. ¹⁹ Isai nopo i poingiyon do hiri’d bandar diri, do mantad id koinsanai’d payat dot Israil, om koino-ino i’ do momutanom do hiri’d tana’ddi. ²⁰ Om koinsanai nopo do tana’ddi, do kohompit i tana’ di pinotobilang, om i tana’ di wansayan do bandar, om pabasagi’ nopo do 12.5 o kilomito do konoruo’ om irad iddi o kalaabo’. ²¹ - ²² Ponong id kotonobon nopo om ponong id koulayon do mantad id tana’ di pinotobilang diri, dot i waalan di Walai’d Sasambayangan dot Agayo, om i tana’ dit imam, om i tana’ di tulun do Liwi, om i wansayan do bandar, om iri no i raja’ o sanganu. Hiri nopod ponong id koulayon do tana’ddi om poillombus nopo do gisom do korikot di piwolitan do ponong id koulayon; om ponong id kotonobon no om gisom do korikot di Rahat do Tanga’, dot id pialatan di tana’ do Yohuda om tana’ do Binyamin. ²³ - ²⁷ Ponong id salatan nopo di tana’ do pinotobilang diri, om bohogion do poikidon di piro-piro o payat dit a’ po nobohogian do tana’; i tana’ do mantad id wolit do ponong id koulayon om poingkaa ponong id kotonobon do gisom do korikot di Rahat do Tanga’, do pogisuhut-suhuton nopo do mamahagi’ do poikidon diyolo’ do mantad hiri’d utara’ om poingkaa ponong id salatan: Binyamin Simion Isakar Sibulon Gad ²⁸ Ponong id salatan nopo di tana’ do pinabahagi’ dot id di Gad, i mimpuun do mantad ponong id salatan do ponong id kotonobon do mimpuun do hilo’d Tamar, do kawaya’ di tudan do waig do Kadis-Moriba, om poingkaa nogindo do ponong id utara do ponong id kotonobon, do poinsusui di piwolitan do Masir do gisom do korikot di Rahat do Tanga’. ²⁹ Om boros kad TUHAN, it Asawat Kopio, ’’Iyo noddi o karalan-ralano’ do mamahagi’ di tana’ do potikidon di payat dot Israil do maan do diyolo’d songonuon,’’ ka dau. ³⁰ - ³⁴ Haro o hopod om duwo o wawayaan do sumuang di bandar do Yorusalim. Om oiyo nopo o konoruo’ dit apat o tolig di bandar diri, do 2.25 o kilomito, om sorotoluan do wawayaan o pointikid-tikid dit apat o tolig. Om pinasangai ngai’ nopo do ngaran di payat dot Israil o ngaran di wawayaan diri. Iri nopo piro-piro o wawayaan do ponong id utara nga’ pinungaranan do Rubin, om Yohuda, om Liwi; om iri no i piro-piro o wawayaan di hiri’d tolig do ponong id koulayon om pinungaranan do Yusup, Binyamin, om Dan; om iri no i piro-piro o wawayaan do hiri’d tolig do ponong id salatan om pinungaranan do Simion, Isakar om Sibulon; om iri no i piro-piro o wawayaan do hiri’d tolig do ponong id kotonobon om pinungaranan do Gad, om Asur om Naptali. ³⁵ Konoruo’ nopo do pointikid-tikid di tolig di bandar diri om 9 o kilomito. Om ngaran nopondoddi bandar diri do pomungaran do tulun do mantad do baino’ om: ’’Hino-o-TUHAN-do-Hiti’’!