KINOSOLIWANAN

KINOSOLIWANAN

¹ Tangaanak nopo di Yakub di tuminanud dau do minongoi do hilo’d pomogunan do Masir do mogitonggoi-tonggoi di sompiiyon diyolo’ om: ² i Rubin, i Simion, i Liwi, i Yohuda, ³ i Isakar, i Sibulon, i Binyamin, ⁴ i Dan, i Naptali, i Gad, om i Asor. ⁵ Kogumuon nopo do sinakagon di Yakub om turu’ nohopod o tulun. I Yusup nopo om nokopogulu mantad no do hilo’d Masir. ⁶ Alaid noddi om kapatai no i Yusup om i tobpinai ngai’ dau om koinsanai di tulun di rampam-rampam dau. ⁷ Nga’ guminumu’ tomod diri i sinakagon diyolo’, i tulun dot Israil, om oruhai po om koponu’ nod sinakagon diyolo’ i pomogunan do Masir tu’ muhang- ruhang nopo o kogumuo’ do sinakagon diyolo’. ⁸ Alaid noddi om timpuun nod momorinta’ do pomogunan do Masir o songulun o raja’ di kawawagu, it a’ i’ nokoilo-ilo do pasal di Yusup. ⁹ Om boros ka di raja’ dot id rayat dau, ’’Adalaan noddi kopio kogumu’ iti tulun dot Israil om ongokoris po kanogi’ iyolo’, om sumiliu i’ iyolo’ do koligagaanan toko’. ¹⁰ Sokiro-kiro nopo do haro o pisangadan om mongoi i’ doti’ndo iyolo’ ponokiuhup di pisangod do sumaap dati’, om mogidu’ nondo iyolo’ do mantad hiti’d pomogunan diti. Nga’ mogihum toko’ nogi’ kopio’d ralan do mangantob diyolo’ do sumapou,’’ ka dau. ¹¹ Om iri noddi o nokopomilian di tulun do Masir do piro-piro o mandur do monginggorit di tulun dot Israil. Om sinansagan diri i tulun dot Israil do momonsoi di bandar do Pitom om Raamsis, i bandar do poopian do rapo-rapo di don sumasangod do don raja’. ¹² Nga’ maha’ nogi’ di pawagaton kopio di tulun do Masir o ponginggorit diyolo’ di tulun dot Israil, om okon nogi’ do muhang-ruhang o kogumuo’ diyolo’ om modu-sodu’ o kotongkopon diyolo’ do hiri’d pomogunan diri, gowoi poddi om moddosi i tulun do Masir di tulun dot Israil. ¹³ Om okon nogiddi do pinadalaan kopio di tulun do Masir do monginggorit i tulun dot Israil, ¹⁴ om nudipon tomod di tulun do Masir o koposi-posion diyolo’. Om sinansagan diyolo’ i tulun dot Israil do kumaraja’ dit angawagat kopio, tu’ sinuhu’ iyolo’ do momonsoi’d bata’ do maan do walai, om sinuhu’ do momonsoi do mogisuayan o karaja’ do hiri’d koumaan diyolo’. Om aiso’ no o kosianan diyolo’ dot id tulun dot Israil. ¹⁵ Om boro-boros noddi i raja’ do Masir dot id di Sipra om id di Pua, i duwo bidan di moninikou di tongoondu’ dot Ibrani do tontok do mogkosusu. ¹⁶ Boros ka di raja’ do Masir dot id duwo o bidan diri, ’’Mongoi kou nopo ponikou di tongoondu’ dot Ibrani di mogkosusu iyolo’, om soro-sorohon no kopio dokoyu iti: kusai nopo i tanak om patayon no! Nga’ tondu’ nopo om pologoson id poimpasi,’’ ka dau. ¹⁷ Nga’ moddosi i’ do Kinorohingan i duwo o bidan diri om a’ i’ diyolo’ tinanud i boros di raja’. Pinologos i’ diyolo’ do poimpasi i tangaanak do kusai. ¹⁸ Om lohowo’ noddi di raja’ i duwo o bidan diri om uhoto’ no dau. Boros ka dau, ’’Nokuro tu’ pologoson dokoyu do poimpasi i tangaanak do kusai?’’ ka dau. ¹⁹ Om boros ka diyolo’ do suminimbar, ’’Iri nopo tongoondu’ dot Ibrani om a’ i’ miagal di tongoondu’ do Masir, tu’ iyolo’ nopo om osonong i’ do mogkosusu; a’ po iyolo’ orikatan do bidan do papaanak om asawa’ no i ragang,’’ ka diyolo’. ²⁰ - ²¹ Om osonong iddi o winonsoi do Kinorohingan dot id duwo o bidan diri, om nonuan dau iyolo’ do sinakagon, tu’ nooris i’ iyolo’ do Kinorohingan. Om iri’ddi tulun dot Israil nga’ mumu-gumu’ nopo om muhang-ruhang o kokoriso’. ²² Om poboroso’ po kawagu di raja’ o ponuhuan do miagal diti dot id koinsanai di rayat dau, ’’Koinsanai di tangaanak do kusai di tulun dot Ibrani di wagu po kosusu om mositi’ no do pataamon do hilo’d Bawang do Nil, nga’ iri nopo tangaanak do tongoondu’ om pologoson ngai’ i’ do poimpasi,’’ ka dau.

¹ Tontok nopo do maso’ddi om haro o songulun o kusai do mantad id payat do Liwi do minangawin do tondu’ di mantad i’ dot id payat do Liwi. ² Om paganak noddi i tondu’ddi dot iso’ o kusai. Om soira’ di nokito dau dot olumis kopio i tanak dau, om lisoko’ no dau iyau do solinaid do tolu o tulan. ³ Nga’ soira’ddi dit a’ dau milo do lisokon i tanak, om panganu no iyau do balatak di bundusan do winonsoi, om sorokoto’ no dau iri do tir om a’ i’ osuangan do waig. Om posuango’ noddi dau i tanak diri do hiri’d balatak om igitai no do hiri’d bawang om poiliho’ no do hiri’d rolot di bundusan do hiri’d tisan di bawang. ⁴ Om iri nopoddi i taka’ di tanak diri om miningkakat do hiri’d sodu-odu’ do miontong ondung poingkuro ot osiliu dot id tadi’ dau’ddi. ⁵ Om sondot no i tanak do tondu’ di raja’ do hiri’d bawang diri do minongoi podsu’, do daamot di piro-piro o susuhuon dau’d tongoondu’ do mimpanau do hiri’d tisan di bawang. Nga’ sigog id kokito di tanak do raja’ i balatak do hiri’d rolot di bundusan. Om suhuo’ no dau o tiso’ di susuhuon dau’d tondu’ do mongoi panganu di balatak. ⁶ Om ukabai noddi di tanak di raja’ i balatak, om kokito no dau o tanak do kusai do hiri’d suang. Om mihad-ihad i tanak, om kosianai noddi iyau di tanak diri. Boros ka dau, ’’Iti nopo om tanak do tulun dot Ibrani,’’ ka dau. ⁷ Om uhoto’ noddi di tobpinai di tanak diri i tanak do raja’, boros ka dau, ’’Orohian i’ tuu daa o tanak do Raja’ do mongoi oku pogihum do tondu’ dot Ibrani do posusu diti tanak?’’ ka dau. ⁸ Om boros ka di tanak do raja’ do suminimbar, ’’Orohian oku i’. Ongoi nopo pogihum,’’ ka dau. Om pamanau no i sumandak diri do minongoi pomolohou di tina’ di tanak. ⁹ Om boro-boros no i tanak do raja’ dot id molohing diri, boros ka dau, ’’Ngoyo’ ilo tanak om maan no doho’ posusuo’ om godsian ku indo iya’,’’ ka dau. Om tanggayai noddi di molohing i tanak om posusuo’ no dau. ¹⁰ Om maha’ dit agayo-gayo noddi i tanak om ngoyo’ no di molohing di tanak pootodo’ i tanak diri do hiri’d tanak di raja’. Om siliho’ noddi di tanak do raja’ i tanak diri do tanak dau. Om boros ka dot id suang do ginawo di tanak do raja’ddi, ’’Pungaranan ku dot i Musa iti tanak tu’ pinotindal ku i’ do mantad id waig,’’ ka. ¹¹ Tontok di nosukod noddi i Musa, om ongoi no iyau kakap di bansa’ dau, iri no i tulun dot Ibrani. Om kokito no dau do pinsansagan po tomod iyolo’ do kumaraja’ dit angawagat. Om nokito nogi’ dau o songulun o bansa’ do Masir do minamatai do songulun o bansa’ dot Ibrani, i bansa’ di Musa. ¹² Om pikoroontong no i Musa dot id posorili’ dau, om soira’ di nokito dau dot aiso’ o tulun do kokito, om patayo’ no dau i tulun do Masir om lisoko’ no dau i rata’ do hiri’d pasir. ¹³ Tontok di minongoi iyau kakap kawagu di tadau kawagu om kokito no iyau do duwo o tulun dot Ibrani do miumang. Om boros ka dau dot id tulun di nakasala’, ’’Nokuro tu’ mumang ko do sompi’ ko’ tulun dot Ibrani?’’ ka dau. ¹⁴ Om boros ka di tulun do suminimbar, ’’Isai o pinoposiliu diya’ do pomorinta’ om gompomutus dahai? Maan oku po daa diya’ patayo’ do miagal di tulun do Masir tu’ pinatai nu?’’ ka dau. Om moddosi diri i Musa tu’, ’’Noilaan i’ pama do tulun i winonsoi ku’ddi,’’ ka dot osorou dau. ¹⁵ - ¹⁶ Om soira’ di nokorongou i raja’ di nosiliu do miagal diri, om umbal no daa iyau do mogihum do ralan do mamatai di Musa. Nga’ poggidu’ no i Musa om ongoi no iyau iyon do hilo’d pomogunan do Midian. Iri nopo imam do hilo’d Midian, i roitan dot i Yitro om kianak do turu’ o tongoondu’. Insan tadau, di poirikau i Musa dot id toning do torobong, om rikot no i turu’ o tanak di Yitro do tongoondu’ do minongoi panganu di waig do posuangon di poiinuman di dumba’ om kambing di tapa’ diyolo’. ¹⁷ Nga’ haro’ddi o piro-piro do gompomogompi’d dumba’ do suwai do minongoi ponguyung di tangaanak di Yitro. Om ngoyo’ noddi di Musa uhupai i tongoondu’ddi om poinumo’ ngai’ no dau i tayam-tayam diyolo’. ¹⁸ Om soira’ di nokoguli’ iyolo’ do hiri’d tapa’ diyolo’ om uhoto’ no iyolo’ di tapa’ diyolo’, ’’Nokuro tu’ osopung kopio kou do nokouli’ baino’?’’ ka dau. ¹⁹ Om boros ka diyolo’ do suminimbar, ’’Haro o tulun do Masir do minongintirung dahai do mantad id gompomogompi’ do dumba’ di suwai. Om iyau i’ o minonimbauk di waig om pinopoinum di tayam-tayam toko’,’’ ka diyolo’. ²⁰ ’’Hinonggo noddi ino tulun?’’ ka di Yitro do minonguhot di tangaanak dau. ’’Nokuro tu’ tinongkiadan dokoyu’d hilo’ ino tulun? Ngoyo’ dokoyu lohowo’ iyau om potorungakon i’ dati’d makan,’’ ka dau. ²¹ Om korohiai noddi i Musa do mundorong do hiri, om pokowinai nod i Yitro di Musa i Sipora, i tanak dau’d tondu’. ²² Om paganak noddi i Sipora, om kusai o tanak dau. Om poingkaa diri ot osorou di Musa, ’’Iyoho’ nopodti om sompogunan i’ do hiti’d pomogunan diti,’’ ka. Om iri noddi o kinopomungaranan dau di tanak dau’ddi dot i Girsom. ²³ Piro-piro noddi o toun do mantad diri, om kapatai no i raja’ do Masir. Nga’ maso po di tulun dot Israil do songodoi-odoi dot oinggoritan do siniliu’d turipon, om minggiak poddi iyolo’ do mokitulung. Om korikot noddi dot id Kinorohingan i giniakan diyolo’. ²⁴ Om pinokinongou i’ do Kinorohingan i giak diyolo’ om nosorou i’ dau i batos dau dot id di Abraham, om id di Isak, om id di Yakub. ²⁵ Om nokito i’ dau i tulun dot Israil do siniliu’d turipon, om monongkoilo iddi iyau diyolo’.

¹ Insan o tadau, di maso di Musa do madtamong di dumba’ om kambing di Yitro, i tiwanon dau, it imam do hilo’d Midian, om woyoo’ no dau i tayam-tayam diri do duminarapas di tana’ do kowotuan, om korikot no iyau do hilo’d Sinai, i nuluhon dot olidang. ² Om hilo’ no i moloikat do TUHAN do minintalang dot id di Musa do miagal do sinikit do tapui do hiri’d tanga’ di bulungkut. Om okito no kopio di Musa do molob-ngolob o tapui do hiri’d bulungkut nga’ a’ indo sumorob i bulungkut. ³ ’’Suwai-suwai iddi kopio iti,’’ ka dot osorou dau. ’’Nokuro malo’ tu’ a’ osorob ilo bulungkut? Nga’ mongoi oku nogi’ kopio ontong do hilo’d somok dilo’,’’ ka dot osorou dau. ⁴ Om soira’ di nokito’d TUHAN do minsomok i Musa di kinoiyonon diri, om pomolohou no o TUHAN do mantad hiri’d tanga’ di bulungkut, ’’Musa! Musa!’’ ka dau. ’’Hooi, diiya oku i’,’’ ka di Musa do suminimbar. ⁵ Om boros kad Kinorohingan, ’’Kada’ no insomok. Iduwo’ ino kasut nu tu’ iti nopo tana’ do kinoingkokoton nu om olidang. ⁶ Iyoho’ no i Kinorohingan do tukuon di komolohingan nu, i Kinorohingan di Abraham, om i Isak, om i Yakub,’’ ka dau. Om sompono’ nod Musa o rabas dau tu’ ooris iyau do montong do Kinorohingan. ⁷ Om boro-boros noddi o TUHAN do poingkaa, ’’Nokito ku no i koinggoritan do tulun ku do hilo’d Masir. Norongou ku no iyolo’ do minggiak do mokilabus do mantad id tulun di monginggorit diyolo’. Om oilaan ngai’ ku i’ i koinggoritan diyolo’. ⁸ Om iri noddi o kinolintuhunan ku tu’ mongoi oku palabus diyolo’ do mantad id longon do tulun do Masir, om momoyo’ oku diyolo’ do sumoliwan do mantad id pomogunan diri do kumaa dot id iso’ o pomogunan dit agayo. Tana’ nopo do pomogunan diri om oluhub om oruak, i pomogun-mogunan do tulun do Kanaan, Hit, om Amori, om Poris, om Howi, om Yobus do dinondo. ⁹ Norongou ku no i tihad do tulun ku om nokito ku nogi’ i ponginggorit di tulun do Masir diyolo’. ¹⁰ Om suhuon ku’ddi iya’ do mongoi solowot di raja’ do Masir, om owoyo’ nu i’ i tulun ku do sumoliwan do mantad id pomogunan diri,’’ ka dau. ¹¹ Nga’ boros kad Musa dot id Kinorohingan, ’’Isai kopio oku daa giya diti tu’ milo do mongoi solowot di raja’ om momoyo’ di tulun dot Israil do sumoliwan do mantad hilo’d Masir?’’ ka dau. ¹² Om boros kad Kinorohingan do suminimbar, ’’Moyo-woyo’ oku i’ diya’. Om soira’ nopondo do posoliwanon nu i tulun dot Israil do mantad hilo’d Masir, om sumambayang ko nondo dot id doho’ do hiti’d nuluhon diti. Om iri no o koilaan kopio dot iyoho’ o minonuhu’ diya’,’’ ka dau. ¹³ Nga’ boros kad Musa do suminimbar, ’’Nga’ mongoi oku nopondo solowot di tulun dot Israil om poboroson ku dot ’Sinuhu’ oku di Kinorohingan do komolohingan dokoyu do mongoi solowot dokoyu,’ kangku nopo, om monguhot nondo iyolo’ doho’ dot, ’Isai o ngaran dau?’ ka, om isai nondo o ngaran do posunudon ku?’’ ka dau. ¹⁴ Om boros kad Kinorohingan, ’’Iyoho’ nopo om IYOHO’ I HINO KASAI’. Om poboroson no o poingkaa dot id diyolo’, ’I roitan dot IYOHO’ I HINO KASAI’ o minonuhu’ doho’ do minongoi’d hiti’d dokoyu,’ kanto. ¹⁵ Om sunudan no i tulun dot Israil dot iyoho’ no, i TUHAN i Kinorohingan di tukuon di komolohingan diyolo’, i Kinorohingan di Abraham, om i Isak om i Yakub, o minonuhu’ diya’ do minongoi’d hilo’d diyolo’. Iri no o ngaran ku do gisom do poingompus; om iri nondo o pamarait doho’ do koinsanai’d sinakagon di sumusuhut. ¹⁶ Ngoyo’ ngai’ no timungo’ i boyoon do tulun dot Israil om sunudan no iyolo’ dot iyoho’, i TUHAN, i Kinorohingan di tukuon do komolohingan diyolo’, i Kinorohingan di Abraham, om i Isak, om i Yakub, o minintalang dot id diya’. Sunudan no iyolo’ do nokorikot oku no dot id diyolo’, om nokito ku i pingwonsoyon do tulun do Masir dot id diyolo’. ¹⁷ Om natantu’ ku no do posoliwanon ku iyolo’ do mantad hilo’d Masir, i kinoiyonon do pinginggoriton iyolo’. Om angatan ku nondo iyolo’ do kumaa do hilo’d pomogunan di kaya’ om oluhub — i pomogunan do tulun do Kanaan, om Hit, om Amori, om Poris, om Howi, om Yobus. ¹⁸ Mokinongou indo i tulun ku di poboroson nu dot id diyolo’. Om mongoi ngai’ kou nogindo di boyoon do tulun dot Israil solowot di raja’ do Masir om poboroson no o miagal diti dot id dau, ’Nokointalang no dot id dahai o TUHAN, i Kinorohingan do tulun dot Ibrani. Om potumboyoo’ no iyahai do mamanau do solinai’d do tolu tadau do kumaa do hilo’d tana’ do kowotuan do mongoi patahak do porsombahan di sumbolion dot id TUHAN, i Kinorohingan dahai,’ kanto dokoyu,’’ ka dau. ¹⁹ Om boros ka kawagu do Kinorohingan, ’’Oilaan ku i’ dot a’ i’ i raja’ do Masir potumboyo’ dokoyu do mamanau ondung a’ iyau sansagan. ²⁰ Nga’ pakayon ku indo o kuasa’ ku om hukuman ku nondo o pomogunan do Masir om mingwonsoi oku do piro-piro o kosusaan di korolosi kopio do hilo’. Om owonsoi ngai’ pondo iri, om potumboyo’ nogi’ iyau dokoyu do mamanau. ²¹ Om binsuhuon ku indo i tulun do Masir do momusou dokoyu do gisom do tumongkiad nopondo i tulun ku, om a’ indo iyolo’ mamanau tomod nopo dot aiso’ kopio ot atanggai-tanggayan diyolo’. ²² Pointikid-tikid do tondu’ dot Israil om mongoi nondo songkoduwo do hiri’d tulun do Masir, om sumolowot dot isai nopo o tondu’ do Masir di poingiyon do hiri’d walai dau, om mokianu nogindo iyolo’ di tongoondu’ do Masir diri do pakayan, om tamas, om pirok do pongillumis do tinan. Om papakayan nondo di tulun dot Israil iri di tangaanak diyolo’d kusai om tondu’, om iyo noddi iyolo’ do mononggoi do kakayaan do tulun do Masir,’’ ka dau.

¹ Om boros kaddi di Musa do suminimbar do TUHAN, ’’Nga’ ondung a’ monongkuyaan doho’ i tulun dot Israil om a’ mokinongou di poboroson ku, om nunu nondo o wonsoyon ku do poboroson no diyolo’ dot a’ ko minintalang dot id doho’?’’ ka dau. ² Om uhoto’ noddi iyau do TUHAN, ’’Nunu ino poingigit nu?’’ ka dau. ’’Sukud,’’ kad Musa do suminimbar. ³ Om boros kad TUHAN, ’’Poloposo’ ino do hilo’d tana’,’’ ka dau. Om poloposo’ noddi di Musa i sukud diri, om siliu nori do tulanut, om panangkus no i Musa do mininsodu’ di tulanut. ⁴ Om boros kaddi do TUHAN dot id di Musa, ’’Ngoyo’ igitai o hilo’d pongid tikiu,’’ ka dau. Om ngoyo’ noddi di Musa tabpaai i tulanut, om kosiliu no kawagu do sukud di poingigit dau. ⁵ Om boros kad TUHAN, ’’Wonsoyon no o miagal diri do pointalang kopio dot id tulun dot Israil do TUHAN, i Kinorohingan di tukuon di komolohingan diyolo’, i Kinorohingan di Abraham, om i Isak, om i Yakub, o minintalang dot id diya’,’’ ka dau. ⁶ Om boro-boros po kawagu o TUHAN dot id di Musa, ’’Pokokogo’ do hino’d rasuk nu ino palad nu,’’ ka dau. Om wonsoyo’ nod Musa o miagal diri; om soira’ di pinokodong di Musa i palad dau, om kitoruol noddi, tu’ notongkop po do miagal di tinudu-tudu’ dit iyo pod kapas kopurak o palad dau. ⁷ Om boros kaddi do TUHAN, ’’Pokokog-kokogo’ po ino palad nu do hino’d rasuk nu,’’ ka dau. Om wonsoyo’ noddi di Musa o miagal diri. Nga’ soira’ di pinokodong dau i palad dau, om notonduli’ noddi do miagal di kulit do tinan dau. ⁸ Om boros kad TUHAN, ’’Ondung a’ iyolo’ monongkuyaan diya’ ko’ a’ po oimayaan di koimayaan di koiso’, om monongkuyaan nondo kopio iyolo’ do kokito di koimayaan do koduwo. ⁹ Ondung a’ po iyolo’ monongkuyaan diya’ do kokito piya di duwo o koimayaan diri, om ondung a’ po kasai’ iyolo’ mokinongou do poboroson nu, om mongoi no anu do waig do mantad hiri’d Bawang do Nil, om potuntugon i’ do hiri’d tana’. Om sumiliu indo do raha’ i waig diri,’’ ka dau. ¹⁰ Om boros kad Musa, ’’A’ oku i’, oi TUHAN. Kada’ oku suhuo’. Tu’ a’ oku i’ oilo do mimboros, om mantad nopo di nokoboro-boros o TUHAN doho’ om gisom do dinondo om a’ kasai’ oku i’ koilo do mimboros. A’ oku i’ kopio iyoho’ koilo do mimboros, tu’ a’ oku abalantas do mimboros om moo’ oku po,’’ ka dau. ¹¹ Om boros kad TUHAN dot id dau, ’’Isai o minanahak do tulun do kabang? Isai o popobosuk ko’ popobobou do tulun? Isai o popoungkalat ko’ momolou do tulun? Okon toi ko’ iyoho’ i’ tu’ TUHAN? ¹² Ongoi nopo do dinondo! Om uhupan ku i’ iya’ do mimboros, om sunudan tiya’ i’ ondung nunu ot apatut nu’d poboroson,’’ ka dau. ¹³ Nga’ boros kad Musa do suminimbar, ’’A’ oku i’ kopio, oi TUHAN. Ponuhu’ nogi’ do tulun do suwai,’’ ka dau. ¹⁴ Om kotogod noddi o TUHAN di Musa, om boro-boros nod, ’’Poingkuro no i Harun, i tobpinai nu, i tulun do Liwi diri? Oilaan ku i’ dot oilo iyau do mimboros. Om dinondo nopodti om mongoi no iyau ruba’ diya’, om asanangan tomod iyau do kosolowot diya’. ¹⁵ Om moro-boros no dau om sunudan no iyau ondung nunu it apatut dau do poboroson. Om uhupan ku indo iyokoyu goduwo om tudukan ku iyokoyu ondung nunu it apatut dokoyu’d poboroson om it apatut dokoyu’d wonsoyon. ¹⁶ Iyau nondo o popilombus do boros nu om mogobi’ diya’ do moro-boros dot id toguang di tulun dot ogumu’. Om iya’ nopondo om miagal-agal do Kinorohingan tu’ misunud dau ondung nunu it apatut dau’d poboroson. ¹⁷ Igitan no iti sukud, tu’ iti no o pomonsoi nu do piro-piro o koimayaan,’’ ka dau. ¹⁸ Om guli’ noddi i Musa do hiri’d walai di Yitro, i tiwanon dau, om boro-boros no iyau, ’’Potumboyoo’ oku daa do gumuli’ do hilo’d koobpinayan ku di hilo’d Masir do mongoi kakap ondung songimpasi po iyolo’,’’ ka dau. Om potumboyoo’ no di Yitro i Musa, om boros ka dau, ’’Sumonong-sonong do mamanau,’’ ka. ¹⁹ Tontok di hilo’ pod Midian i Musa, om boros kad TUHAN dot id dau, ’’Guli’ no do hilo’d Masir, tu’ nangapatai ngai’ no i mamatai daa diya’,’’ ka. ²⁰ Om angatai no di Musa i sawo dau om i tangaanak dau’d kusai, om pasakayo’ no dau iyolo’ do kaladai. Om pamanau ngai’ no iyolo’ do kumaa do hilo’d Masir, om nigitan di Musa i sukud di pinonuhuan do Kinorohingan dau do mongigit. ²¹ Om boro-boros po o TUHAN dot id di Musa, ’’Noonuan ku no iya’ do kuasa’ do momonsoi do piro-piro o koimayaan. Om koguli’ ko nopondo do hilo’d Masir, om wonsoyon ngai’ no iti koimayaan diti dot id toguang di raja’ do Masir. Nga’ pokodohon ku indo o ginawo di raja’, om a’ indo dau potumboyoon i tulun dot Israil do mamanau. ²² Om mositi’ nod sunudan nu i raja’ dot iyoho’, i TUHAN, o minomoros do poingkaa, ’Israil no o tanak ku’d kusai dit id dotuo. ²³ Sinunudan ku iya’ do potumboyo’ di tanak ku do mamanau, om koongoi i’ iyau kasambayang dot id doho’, nga’ a’ ko i’ pinopotumboyo’. Om patayon ku nondo i diya’d tanak do kusai dit id dotuo,’ kanto,’’ ka dau. ²⁴ Nga’ tontok di hilo’ no iyolo’d tanga’d ralan do kumaa do hilo’d Masir, di hilo’ no iyolo’d iso’ o kinoiyonon di pawawansayan do kiim, om rikot no o TUHAN dot id di Musa, om umbalai no daa iyau do TUHAN do mamatai. ²⁵ - ²⁶ Om ongoi noddi i Sipora, i sawo di Musa, anu do watu dit atarom, om sinsibo’ no dau i kulit di tanak dau, i kulit di sisinsibon do monunat. Om gihilai noddi dau di kulit di sininsib dau o lapap di Musa. Om iri no i minonunat o nakabara-barasan di Sipora do miagal diti dot id di Musa, ’’Poboroson ku do mikuwo’d raha’ diti dot iya’ no o sawo kopio ku,’’ ka dau. Om pinasi iddi do TUHAN i Musa. ²⁷ Nga’ daamot nopoddi om nosunudan nod TUHAN i Harun do poingkaa, ’’Ongoi no solowot di Musa do hilo’d tana’ do kowotuan,’’ ka. Om pamanau noddi i Harun do minongoi solowot di Musa do hilo’d nuluhon dit olidang; om kosolowot poddi di Harun i Musa, om tungubai no dau iyau. ²⁸ Om posunudo’ ngai’ noddi di Musa dot id di Harun i pinoboros do TUHAN, do tontok di sinuhu’ iyau do TUHAN do gumuli’ do hilo’d Masir; om sinusui ngai’ dau i piro-piro o koimayaan do pinonuhuan do TUHAN do momonsoi. ²⁹ Om pamanau noddi iyo Musa di Harun do minongoi do hilo’d Masir, om timungo’ ngai’ no diyolo’ i boyoon do tulun dot Israil. ³⁰ Om poboroso’ ngai’ noddi di Harun dot id diyolo’ i pinoboros do TUHAN dot id di Musa, om wonsoyo’ no di Musa o koinsanai di koimayaan do hiri’d toguang di tulun diri. ³¹ Om kongotumbayaai ngai’ no iyolo’ddi, om soira’ di norongou diyolo’ do nokorikot o TUHAN dot id diyolo’, om nokito ngai’ dau i koinggoritan diyolo’, om otud noddi iyolo’ do suminambayang.

¹ Om ongoi noddi i Musa om i Harun solowot di raja’ do Masir, om boro-boros no iyolo’ do poingkaa, ’’Poingkaa no o boros do TUHAN, i Kinorohingan do tulun dot Israil, ’Posoliwanon no i tulun ku, om koongoi i’ iyolo’ kasambayang dot id doho’ do hilo’d tana’ do kowotuan,’ ka dau,’’ ka diyolo’. ² ’’Isai toi o TUHAN?’’ ka di raja’ do Masir do minuhot, ’’Nokuro tu’ suhuon oku do tumanud do boros dau om poposoliwan do tulun dot Israil? A’ oku i’ kotutun do TUHAN; om a’ ku i’ pabanaron o tulun dot Israil do sumoliwan,’’ ka dau. ³ Om boros ka diyo’ Musa di Harun, ’’Minintalang o Kinorohingan do tulun dot Israil dot id dahai. Om mokibanar diri iyahai do mamanau do tolu o tadau do koloido’ do kumaa do hilo’d tana’ do kowotuan, tu’ hilo’ no o tiyonon dahai do papatahak do porsombahan di sumbolion dot id TUHAN, i Kinorohingan dahai. Ondung a’ iyahai mongoi, nga’ porikatan nondo iyahai dau do toruol ko’ pisangadan po do pamatai dau dahai,’’ ka diyolo’. ⁴ Om boros ka di raja’ dot id di Musa om id di Harun, ’’Nunu daa’ddi o tosorou-sorou dokoyu do papaada’ dilo tulun dilo karaja’ diyolo’? Suhuo’ nogi’ kawagu ilo piro-piro o turipon do mongoi karaja’! ⁵ Nintaban nopo do bansa’ dokoyu om ogumu’ po ko’ bansa’ do Masir. Om tumingkod kou nogi’ daa’ddi do kumaraja’ do baino’!’’ ka dau. ⁶ Om tadau iddi do sinunudan di raja’ i tulun do Masir i boyoon do mandur, om i piro-piro o mandur do bansa’ dot Israil do poingkaa, ⁷ ’’Kada’ nondo dokoyu onuwai iyolo’ do rahami do wonsoyon do bata’. Suhuon nopo iyolo’ do mongoi pogihum do rahami. ⁸ Nga’ suhuon i’ mando kasai’ iyolo’ do momonsoi do bata’ do miagal di gulu kogumu’; kada’ nod haro o tongoiso’ piya do kokuri’ ko’ mantad di gulu. A’ i’ diyolo’ kabagal o buruon diyolo’; gowoi poddi om mokibanar nopo iyolo’ doho’ do mongoi papatahak do porsombahan di sumbolion dot id Kinorohingan diyolo’! ⁹ Ruhangan nogi’ o kawagato’ do karaja’ diti tongoulun diti, do gisom id akagasan iyolo’ di buruon diyolo’, om aiso’ indo o maso diyolo’ do mokinongou do susuyon dit a’ otopot,’’ ka dau. ¹⁰ Om pamanau ngai’ noddi i boyoon do mandur di bansa’ do Masir, om i mandur di bansa’ dot Israil do minongoi pomisunud ngai’ di tulun do poingkaa, ’’Nokoboros no moti’ di raja’ dot a’ noddi iyau manahak dokoyu do rahami. ¹¹ Boros ka dau, om iyokoyu no o mimpori-pori do mongoi pogihum do hinonggo nopo o haro o pongonuan dokoyu’d rahami. Nga’ iri kasai’ i’ ma o ginumu’ do bata’ do wonsoyon dokoyu, dot irad di wonsoyon kasai’ dokoyu di gulu,’’ ka diyolo’. ¹² Gowoi poddi om pogitotongkiad nopo i tulun dot Israil do tuminongkop di pomogunan do Masir do mongoi pogihum do guas do gandum do maan do ponokorahami. ¹³ Om sansagan i’ kasai’ di boyoon do mandur i turipon do momonsoi’d bata’ do pointikid-tikid do tadau dot irad do kogumuon do bata’ dit onuan po iyolo’ do rahami. ¹⁴ Om pimbabagan po di boyoon do mandur do bansa’ do Masir i mandur do bansa’ dot Israil, i siniliu diyolo’ do mongilo-ilo di karaja’ di turipon. Boros ka diyolo’, ’’Nokuro tu’ a’ kou momonsoi’d bata’ dot irad di gulu kogumu’?’’ ka. ¹⁵ Om ongoi ngai’ noddi i mandur dot Israil solowot di raja’ do minongoi posunud do poingkaa, ’’Nokuro tu’ iyoon iyahai diya’dti, oi Tuan Raja’? ¹⁶ A’ i’ iyahai onuan do rahami, om sansagan kasai’ iddi iyahai do momonsoi’d bata’. Om pimbabagan diri’ddi iyahai do baino’! Iya’ no o monongkoilo diti,’’ ka diyolo’. ¹⁷ Om boros ka di raja’ do suminimbar, ’’Gungkaul kou no om tukono’ kou nopo do kumaraja’, om iri no daa o kopokibanaran dokoyu doho’ do poposoliwan dokoyu do mongoi papatahak do porsombahan di sumbolion dot id TUHAN dokoyu. ¹⁸ Guli’ kou nogi’ do mongoi karaja’! A’ kou no onuan do rahami, nga’ iri kasai’ i’ mando o kogumuon do bata’ do wonsoyon dokoyu,’’ ka dau. ¹⁹ Om kopurimanai ngai’ noddi di mandur dot id suang iyolo’ do kosusaan di nosunudan iyolo’ di raja’ dot irad kasai’ di gulu po o kogumuon do bata’ do wonsoyon diyolo’. ²⁰ Om soira’ di tumongkiad no iyolo’ di raja’, om kosolowot no diyolo’ iyo Musa di Harun do poingandad diyolo’. ²¹ Om boros ka diyolo’ dot id di Musa om id di Harun, ’’Nokito nod TUHAN i nowonsoi dokoyu. Hukuman kou no tu’ iyokoyu no o nokobungou di raja’ om i piro-piro o pagawai dau dot ongotogod dahai. Noonuan no dokoyu iyolo’ do ponguwaan do mamatai dahai,’’ ka diyolo’. ²² Om rikot noddi kawagu i Musa dot id TUHAN, om boros ka dau, ’’Oi TUHAN, nokuro tu’ pinorikatan nu’d kosusaan i tulun nu? Nokuro tu’ sinuhu’ oku diya’ do mongoi’d hiti? ²³ Tu’ mantad poddi minongoi oku polombus do boros nu dot id raja’, om diri no do nintonod dau do minonginggorit di tulun nu. Om aiso’ iddi o wonsoyon nu do ponulung diyolo’!’’ ka dau.

¹ Om boros kaddi do TUHAN dot id di Musa, ’’Kokito ko indo bo ondung nunu o wonsoyon ku dot id raja’ do Masir. Sansagan ku indo iyau do poposoliwan dilo tulun ku. Om sansagan ku iyau do monguyung diyolo’ do mantad id pomogunan diti,’’ ka dau. ² Om boro-boros no o Kinorohingan dot id di Musa do poingkaa, ’’Iyoho’ no o TUHAN. ³ Nokointalang oku no dot id di Abraham, om id di Isak, om id di Yakub, dot iyoho’ no o Kinorohingan dit Agayo Kopio o Kuasa’. Nga’ a’ oku i’ pinopointutun diyolo’ do ngaran ku dit olidang, iri no i TUHAN. ⁴ Om nokopongumpongo oku nogi’ dot id diyolo’, do papatahak dot id diyolo’ di pomogunan do Kanaan, i kinoiyonon diyolo’ do tuminindapou. ⁵ Norongou ku noddi o todoi do tulun dot Israil, i nuripon do tulun do Masir, om nosorou ku i tumpongo ku. ⁶ Iyo nopoddi, om sunudan no i tulun dot Israil, om poboroson no diyolo’ do poingkaa o boros ku, ’Iyoho’ no o TUHAN; poiduwon ku i’ iyokoyu om polobuson ku iyokoyu do mantad id tulun do Masir di monguripon dokoyu. Paakangon ku nondo iti longon ku’d okoris do poporikot do hukuman dit awagat kopio dot id tulun do Masir, nga’ iyokoyu nopo om posion ku i’. ⁷ Silihon ku nondo iyokoyu do tulun ku om iyoho’ nondo ot osiliu do Kinorohingan dokoyu. Oilaan indo dokoyu dot iyoho’ i TUHAN o Kinorohingan dokoyu do kalabus ku iyokoyu do mantad id ponguripanan do hilo’d pomogunan do Masir. ⁸ Om angatan ku nondo iyokoyu do kumaa do hilo’d pomogunan di nakabatos ku do mikuwo’d sumpa’ do patahakon ku di Abraham, om i Isak, om i Yakub, do maan do dokoyu kopio’d songonuon. Iyoho’ no o TUHAN,’ ka dau, kanto dokoyu,’’ ka dau. ⁹ Om poboroso’ no di Musa iri dot id tulun dot Israil nga’ a’ noddi iyolo’ mokinongou dau tu’ aiso’ no o pokukurayan dot osorou diyolo’ dot ouru di pongunguripon di koinggorit tomod diyolo’. ¹⁰ Om boro-boros noddi o TUHAN dot id di Musa do poingkaa, ¹¹ ’’Ngoyo’ sunudai i raja’ do Masir dot a’ no milo dot a’ dau pabanaron i tulun dot Israil do sumoliwan do mantad id pomogunan dau,’’ ka dau. ¹² Nga’ boros kad Musa do suminimbar, ’’Iri piya i tulun dot Israil nga’ a’ i’ mokinongou do boros ku, om mokinongou nogindo tuu kopio i raja’ do Masir? Tu’ a’ oku i’ koilo do mimboros,’’ ka dau. ¹³ Om suhuo’ nod TUHAN iyo Musa di Harun, boros ka dau, ’’Sunudan no i tulun dot Israil om i raja’ do Masir, do nosuhu’ ku no iyokoyu do momoyo’ dilo tulun dot Israil do sumoliwan do mantad id pomogunan do Masir,’’ ka dau. ¹⁴ I Rubin nopo, i tanak di Yakub dot id gulu, om kianak dot apat o kusai: i Hinok, i Palu, i Hisron om i Karmi; iyolo’ no i taki-aki di pinuruan do sompiiyon dot id payat di Rubin, i pinungaranan do ngaran diyolo’. ¹⁵ I Simion no om kianak dot onom o kusai: i Yomuil, i Yamin, i Ohad, i Yakin, i Sohar om i Saul, i tanak do tondu’ do bansa’ do Kanaan; om iyolo’ no i taki-aki di pinuruan do sompiiyon dit id payat di Simion, i pinungaranan do ngaran diyolo’. ¹⁶ I Liwi no om kianak do tolu o kusai: i Girson, i Kohat, om i Morari; iyolo’ no i taki-aki di pinuruan do sompiiyon dot id suang do payat di Liwi, i pinungaranan do ngaran diyolo’. Om hatus om tolu nohopod om turu’ o toun di Liwi do poimpasi. ¹⁷ I Girson no om kianak do duwo o kusai: i Libni om i Simoi; om ogumu’ o sinakagon diyolo’. ¹⁸ I Kohat no om kianak dot apat o kusai: i Amram, i Yisar, i Hibron, om i Usiol. Om hatus om tolu nohopod om tolu o toun di Kohat do poimpasi. ¹⁹ I Morari no om kianak do duwo o kusai: i Mali om i Musi. Iri ngai’ no o pinuruan do sompiiyon om i sinakagon ngai’ diyolo’ dot id payat di Liwi. ²⁰ Om kowino’ no di Amram i Yokubid, i tadi’ di tapa’ dau. Om paganak no iyolo’ om i Harun, om i Musa. Om hatus om tolu nohopod om turu’ o toun di Amram do poimpasi. ²¹ I Yisar no om kianak do tolu o kusai: i Kora, i Nipig, om i Sikri. ²² I Usiol nogi’ nga’ kianak i’ do tolu o kusai: i Misail, i Ilsapan om i Sitri. ²³ Om kowino’ no di Harun i Ilisiba, i tanak di Aminadab. I Ilisiba nopo om tobpinai di Nason do tondu’. Om tangaanak nopo diyo Ilisiba di Harun om i Nadab, i Abihu, i Iliasar om i Itamar. ²⁴ I Kora nopo om kianak do tolu o kusai: i Yasir, i Ilkana om i Abiasap; om iyolo’ no i taki-aki di piro-piro o koisaan do sompiiyon do suminolusuk di pinuruan do sompiiyon di Kora. ²⁵ Om kowino’ no di Iliasar o tiso’ di tanak di Putiol do tondu’. I Iliasar nopo om tanak di Harun do kusai. Om paganak no iyo Iliasar di sawo dau om i Pinihas. Iyolo’ no ngai’ i boyoon do sompiiyon om pinuruan do sompiiyon dot id payat di Liwi. ²⁶ Om iyo Harun no di Musa o sinunudan do TUHAN do poingkaa, ’’Woyoon no iti tulun dot Israil do sumoliwan do mantad id pomogunan do Masir,’’ ka. ²⁷ Om iyolo’ no goduwo i minonuhu’ di raja’ do Masir do poposoliwan di tulun dot Israil. ²⁸ Tontok di minoro-boros o TUHAN dot id di Musa di hilo’ pod pomogunan do Masir, ²⁹ om boros ka dau, ’’Iyoho’ no o TUHAN. Sunudan no i raja’ do Masir do koinsanai di pinoboros ku diya’,’’ ka. ³⁰ Nga’ boros kad Musa do suminimbar, ’’Oilaan nu i’ dot a’ kopio oku koilo do mimboros; om nokuro tuu daa i raja’ tu’ mokinongou kopio do boros ku?’’ ka dau.

¹ Om boros kad TUHAN dot id di Musa, ’’Silihon ku indo iya’ do miagal do Kinorohingan dot id toguang di raja’, om i Harun i tobpinai nu o silihon ku do miagal do nabi nu, do popolombus di boros nu dot id raja’. ² Posunudon ngai’ no dot id di Harun iti ponuhuan ku diya’, om i Harun nondo o monuhu’ di raja’ do papabanar di tulun dot Israil do sumoliwan do mantad id pomogunan dau. ³ Nga’ pokodohon ku nondo o ginawo di raja’, om a’ indo iyau mokinongou do nunu nopo o poboroson nu do mulong piya dot ogumu’ o porikoton ku do kosusaan dit awagat kopio do hilo’d Masir. ⁴ Om porikatan ku nondo do hukuman dit awagat kopio o hilo’d Masir, om posoliwanon ku nogindo o koinsanai’d tulun dot Israil, i tulun ku, do mantad id pomogunan do Masir. ⁵ Om koilo nogindo i tulun do Masir dot iyoho’ o TUHAN, do tontok do hukuman ku iyolo’ om posoliwanon ku o tulun dot Israil do mantad id pomogunan diyolo’,’’ ka dau. ⁶ Om wonsoyo’ noddi diyo Musa di Harun o koinsanai di pinonuhuan do TUHAN. ⁷ Tumur nopo di Musa om walu’ no nohopod o toun, om di Harun no om walu’ no nohopod om tolu o toun do tontok dit ongoi iyolo’ boro-boros di raja’ do Masir. ⁸ Om boros kad TUHAN dot id di Musa om id di Harun, ⁹ ’’Ondung suhuon kou di raja’ do momonsoi do koimayaan, om suhuon no i Harun do manganu di sukud dau om papataam diri do hiri’d dotoguangan di raja’, om sumiliu indo do tulanut i sukud,’’ ka dau. ¹⁰ Om ongoi noddi iyo Musa di Harun solowot di raja’ om wonsoyo’ no diyolo’ o miagal di pinonuhuan do TUHAN dot id diyolo’. ¹¹ Om lohowo’ noddi di raja’ i tulun dau dit ongkitoilaan om i bobolian, om wonsoyo’ no diyolo’ o miagal di winonsoi di Harun tu’ iyolo’ nga’ ongkitoilaan i’. ¹² Poloposo’ no diyolo’ i sukud diyolo’, om siliu ngai’ nopo iri do tulanut. Nga’ pintalanai noddi di sukud di Harun i diyolo’d sukud. ¹³ Nga’ okodou kasai’ i’ o ginawo di raja’ do miagal di nokoboros mantad do TUHAN, om a’ i’ i raja’ mokinongou do boros diyo Musa di Harun. ¹⁴ Om boro-boros noddi o TUHAN dot id di Musa do poingkaa, ’’Okodou po kasai’ o ginawo di raja’, om a’ i’ kasai’ iyau papabanar di tulun dot Israil do sumoliwan. ¹⁵ Nga’ mongoi-ongoi po solowot di raja’ do kosuabon do suab, di sumondot iyau do hilo’d Bawang do Nil. Om igitan no i sukud nu di noumbalan do poposiliu do tulanut, om andadon no iyau do hiri’d tisan di bawang. ¹⁶ Om poboroson no di raja’ o poingkaa, ’Sinuhu’ oku’d TUHAN, i Kinorohingan do tulun dot Ibrani, do momisunud diya’ do papabanar di tulun dau do sumoliwan, om koongoi indo iyolo’ kasambayang dot id dau do hilo’d tana’ do kowotuan. Nga’ gisom piya do baino’ nga’ a’ ko i’ minokinongou dau. ¹⁷ Gowoi poddi, om baino’ nopondo, oi Tuan Raja’, om nokoboros nod TUHAN dot oilaan nu indo ondung isai kopio iyau do kokito ko di wonsoyon dau. Intong pogi’, bobogon ku nondo diti sukud ku iti waig do bawang om osiliu indo do raha’ ilo waig. ¹⁸ Om angapatai ngai’ nopondo i sada’ do hilo’d bawang, om outong tomod nondo gisom dot a’ no milo di tulun do Masir dot inumon iti waig,’ ka,’’ ka dau. ¹⁹ Om boros kad TUHAN dot id di Musa, ’’Suhuon no i Harun do popobilid di sukud dau do hiri’d soibau do koinsanai’d bawang, om liang om kulam do hilo’d Masir. Om osiliu ngai’ nopondo do raha’ i waig do pointongkop do pomogunan do Masir, om iri piya i waig do hiri’d tuung do kayu om i hiri’d luping nga’ osiliu ngai’ id raha’,’’ ka. ²⁰ Om wonsoyo’ noddi diyo Musa di Harun o koinsanai di pinonuhuan do TUHAN. Om pobilido’ no di Harun i sukud dau om bobogo’ no dau i bawang, do songingontong ngai’ i raja’ om i pagawai dau. Om kosiliu nopoddi do raha’ i waig di bawang. ²¹ Om kangapatai ngai’ noddi i sada’ do hiri’d bawang, om ongoutong tomod diri gisom dot a’ no milo di tulun do Masir dot inumon i waig. Om raha’ ngai’ nopoddi o waig do hilo’d Masir. ²² Om pomonsoi no do miagal diri i bobolian di raja’ do minamakai di toilaan diyolo’ di dong bobolian. Om okodou iddi kasai’ o ginawo di raja’ do miagal di gulu. Om a’ i’ i raja’ minokinongou di boros diyo Musa di Harun do miagal di nokoboros mantad do TUHAN. ²³ Okon nogi’ do toingud nopo i raja’ om pouliai no dau do hiri’d walai dau, om a’ i’ iyau opusou do nokokito’ddi. ²⁴ Om oinsanan nopoddi i tulun do Masir do minongukad do torobong do poingompus di tisan do bawang, do pongonuan diyolo’ do waig do tinumon, tu’ a’ no milo dot inumon i waig do bawang. ²⁵ Om turu’ noddi o tadau do mantad di pinapalan do TUHAN i Bawang do Nil.

¹ Om boro-boros noddi o TUHAN dot id di Musa do poingkaa, ’’Mongoi no solowot di raja’ om poboroson no do poingkaa o boros do TUHAN, ’Pabanaro’ no ilo tulun ku do sumoliwan, om koongoi i’ iyolo’ kasambayang dot id doho’. ² Tu’ ondung a’ nu uhang om hukuman ku motindo iti pomogunan nu; om ponuon ku nopondo do bonong iti pomogunan nu tu’ iri no o pomohukum ku. ³ Om adalaan nopondo koponu’ do bonong ilo Bawang do Nil, om tumindal nondo i bonong do mongoi do hilo’d walai nu di dong raja’, om sumuang di bilik nu, om mongoi do hiri’d kawalayan di tongomontiri’ nu om i rayat nu, om hiri piya’d pagansakan nu’d roti om hiri’d poriuk nu nga’ ngoyon ngai’ i’ iyono’. ⁴ Om sonsimbul-simbul nopo motindo i bonong diri dot id tinan nu, om id tinan do toinsanan di rayat nu, om id toinsanan di montiri’ nu,’ kanto,’’ ka dau. ⁵ Om boros kad TUHAN dot id di Musa, ’’Suhuo’ i Harun do popobilid dilo sukud dau dot id soibau do koinsanai’d bawang, om liang, om kulam, om mimbulai i’ o bonong do momonu’ diti pomogunan do Masir,’’ ka dau. ⁶ Om pobilido’ noddi di Harun i sukud dau dot id soibau do koinsanai di kinoiyonon do waig, om songulai-ulai nopoddi o bonong do minomonu’ do pointongkop do pomogunan diri. ⁷ Nga’ pakayo’ no di bobolian i diyolo’d toilaan, om iyolo’ddi nga’ milo i’ do pinopoimbulai do bonong do hiri’d pomogunan do Masir. ⁸ Om lohowo’ no di raja’ i Musa om i Harun om boro-boros no do poingkaa, ’’Sambayang no dot id TUHAN do mokiidu’ dilo bonong, om pabanaron ku indo ilo tulun dokoyu do mamanau do mongoi papatahak do porsombahan di sumbolion dot id TUHAN,’’ ka dau. ⁹ Om boros ka di Musa do suminimbar, ’’Osonong i’ o ginawo ku do sumambayang do bagi do Tuan ku. Tontuon nopo o maso do kapanambayangan ku diya’, om sambayangan ku indo o Tuan ku, om iri ngai’ i pagawai nu om i rayat nu. Om oidu’ nondo do mantad id Tuan ku i bonong, om aiso’ nondo ot oolu’, do suwai nondo ko’ i hiri’d Bawang do Nil,’’ ka dau. ¹⁰ Om boros ka di raja’, ’’Sambayangan oku no do suab,’’ ka dau. Om boros ka di Musa, ’’Wonsoyon ku i’ ino pokionuon nu, om koilo ko i’ dot aiso’ no o Kinorohingan do suwai do koiyo do TUHAN, i Kinorohingan dahai. ¹¹ Om aiso’ nondo o bonong do mamagangau diya’, om i tongomontiri’ nu, om i rayat nu. Om aiso’ nondo o toolu’ di bonong do suwai nondo ko’ i hilo’d Bawang do Nil,’’ ka dau. ¹² Om pamanau noddi i Musa om i Harun do tuminongkiad di raja’, om sambayang no i Musa dot id TUHAN do minokiidu’ di bonong di pinorikot do TUHAN dot id raja’ diri. ¹³ Om pohubayaai nod TUHAN i pinokianu di Musa, om kangapatai ngai’ noddi i bonong di hiri’d kawalayan, om i hiri’d natad, om i hiri’d koumaan. ¹⁴ Om untuno’ noddi di tulun do Masir i bonong di nangapatai, om asawat tomod diri o nokountunon do gisom do noponu’ po do nutong di bonong o hiri’d pomogunan diri. ¹⁵ Nga’ soira’ di nokito di raja’ do nangapatai i bonong, om pokodoho’ i’ kawagu di raja’ o ginawo dau, do miagal di nokoboros mantad do TUHAN; om a’ iddi i raja’ minokinongou di boros diyo Musa di Harun. ¹⁶ Om boros kad TUHAN dot id di Musa, ’’Suhuo’ i Harun do popobobog di sukud dau do hilo’d tana’, om osiliu i’ do togondui ilo pupuk do tana’ do pointongkop diti pomogunan do Masir,’’ ka dau. ¹⁷ Om bobogo’ noddi di Harun di sukud dau i tana’, om koinsanai nopoddi i lisohu do tana’ do suminiliu do togondui, om ongoi ngai’ nori taun do tulun om tayam-tayam. ¹⁸ Om umbal no daa i bobolian do mamakai di toilaan diyolo’, nga’ aiso’ i’ o togondui do minimbulai. Om hinonggo-honggo nopoddi nga’ haro ngai’ nopo o togondui. ¹⁹ Om boros kaddi di bobolian dot id raja’, ’’Kinorohingan no moti’ kopio o pinopoimbulai diti togondui diti,’’ ka diyolo’. Nga’ okodou kasai’ i’ o ginawo di raja’ do miagal di nokoboros mantad do TUHAN, om a’ i’ i raja’ minokinongou do boros diyo Musa di Harun. ²⁰ Om boros kad TUHAN dot id di Musa, ’’Osuab pod suab, om mongoi no solowot di raja’ do sumondot iyau do hilo’d bawang, om sunudan no iyau do boros do TUHAN do poingkaa, ’Pabanaron no i tulun ku do sumoliwan, om koongoi i’ iyolo’ kasambayang dot id doho’! ²¹ Ondung a’ ko pabanar, om poinsanon mantad ku iya’, do hukuman tiya’ no moti’ tu’ porikatan ku nondo iyokoyu do langau, iya’ om i tongomontiri’ nu om i rayat nu. Kawalayan nopondod tulun do Masir om ongoponu’ po do langau, om tana’ piya nga’ olikupan nopondo do langau. ²² Nga’ a’ ku i’ pohompiton o watas do Gusin, i kinoiyonon di tulun ku, om aiso’ indo o langau do hilo’. Om koilo kou i’ dot iyoho’ i TUHAN, o miwonsoi’ddi do hiti’d pomogunan diti. ²³ A’ ku indo piiyoon i tulun ku om i rayat nu. Om iti nopo koimayaan diti om osiliu nod suab,’ kanto,’’ ka dau. ²⁴ Om porikatai noddi do TUHAN do langau dot ogumu’ kopio o hiri’d walai di raja’, om hiri’d kawalayan di tongomontiri’ dau. Om ongoinggorit ngai’ nopoddi o pointongkop di pomogunan do Masir tu’ nongourunan pod langau. ²⁵ Om lohowo’ noddi di raja’ i Musa om i Harun, om boro-boros no do poingkaa, ’’Pamanau kou, om mongoi i’ patahak do porsombahan di sumbolion, dot id Kinorohingan dokoyu do hiti’d pomogunan diti,’’ ka dau. ²⁶ Om boros kad Musa do suminimbar, ’’A’ i’ osonong do momonsoi do miagal diri. Tu’ iri nopo i porsombahan dahai dot id TUHAN, i Kinorohingan dahai, om karaatan i’ do tulun do Masir. Tu’ ondung monumbali’ iyahai do tayam-tayam do maan do porsombahan do sumbolion do montong-ontong i tulun do Masir, om angaraatan nondo iyolo’ dahai, om dumpahon no dotindo iyahai diyolo’d watu do gisom dot angapatai iyahai. ²⁷ A’ no milo dot a’ iyahai mongoi do hilo’d tana’ do kowotuan do tolu o tadau do mamanau do kosoduwo’, om hilo’ nondo iyahai do papatahak do porsombahan di sumbolion, dot id TUHAN, i Kinorohingan dahai, do miagal di pinonuhuan dau dahai,’’ ka dau. ²⁸ Om boros ka di raja’, ’’Pabanaron ku i’ iyokoyu’d mongoi do hilo’d tana’ do kowotuan do mongoi papatahak do porsombahan di sumbolion dot id TUHAN, i Kinorohingan dokoyu, nga’ kada’ po do minsodu’ kopio kou. Om sambayangan oku no dokoyu,’’ ka dau. ²⁹ Om boros kad Musa do suminimbar, ’’Kotongkiad oku po diya’dti om sumambayang oku no dot id TUHAN, om kopoggidu’ ngai’ indo ilo langau do tadau’d suab do mantad id diya’, om mantad id tongomontiri’ nu, om mantad id rayat nu. Nga’ kada’ nondo pagakal dahai om kada’ antabai ilo tulun dot Israil do mongoi papatahak dot id TUHAN do porsombahan di sumbolion,’’ ka dau. ³⁰ Om tongkiad noddi i Musa di raja’ om sambayang no iyau dot id TUHAN. ³¹ Om pohubayaai nod TUHAN i pinokianu di Musa. Om poggidu’ ngai’ noddi i langau do mantad id raja’, om mantad id tongomontiri’ dau, om mantad id rayat dau; om aiso’ no o minolu’ dot ongoiso’ piya di langau. ³² Nga’ baino’ nga’ pinokodou po di raja’ o ginawo dau, om a’ i’ dau pinabanar i tulun dot Israil do mamanau.

¹ Om boros kad TUHAN dot id di Musa, ’’Ongoi-ongoi po solowot di raja’ om sunudan no iyau do boros do TUHAN, i Kinorohingan do tulun dot Ibrani, do poingkaa, ’Pabanaron no i tulun ku do mamanau, om koongoi i’ iyolo’ kasambayang dot id doho’. ² Ondung a’ kasai’ ko pabanar do mamanau iyolo’, ³ om hukuman ku no moti’ iya’. Porikatan ku motindo do toruol ilo tayam-tayam nu, — i kuda’, om i kaladai, om it unta, om i sapi’, om i dumba’, om i kambing nu. ⁴ A’ ku indo piiyoon ilo tayam-tayam do tulun dot Israil om ilo tayam-tayam do tulun do Masir. Tu’ ilo’ nopondo tayam-tayam do tulun dot Israil om aiso’ i’ o tongoiso’ piya dot apatai. ⁵ Tu’ iyoho’ no i TUHAN, o minanantu’ do suab no do wonsoyon ku iti komoyon ku,’ kanto,’’ ka dau. ⁶ Tadau poddi kawagu, om wonsoyo’ nod TUHAN o miagal di pinoboros dau, om koinsanai nopo i tayam-tayam di tulun do Masir do nangapatai. Nga’ iri nopo i tayam-tayam di tulun dot Israil om aiso’ i’ o tongoiso’ piya do napatai. ⁷ Om ponguhot noddi i raja’ ondung nunu o nosiliu, om kosunudai no iyau dot iso’ po di tayam-tayam di tulun dot Israil nga’ aiso’ i’ o napatai. Nga’ pinokodou po kawagu di raja’ o ginawo dau, om mada’ kasai’ i’ iyau do mamanau i tulun dot Israil. ⁸ Om boros kad TUHAN dot id diyo Musa di Harun, ’’Ongoi kou anu do piro-piro tonggom do tauu do mantad hilo’d ropuhan; om potiason nondo di Musa i tauu diri do hiri’d sawat dot id toguang di raja’. ⁹ Om tumongkop nondo i tauu do miagal do soliohuk do hilo’d pomogunan do Masir. Om iri nondo o popokupos di gumandas dot id tinan do koinsanai’d tulun om tayam-tayam,’’ ka dau. ¹⁰ Om ongoi noddi iyo Musa di Harun panganu do tauu, om ingkakat no iyolo’ do hiri’d toguang di raja’. Om potiaso’ no di Musa i tauu diri do hilo’d sawat, om iri noddi o pinopokupos di gumandas dot id tinan di tulun om i tayam-tayam. ¹¹ Om a’ noddi i bobolian kosonsog do mongoi solowot di Musa, tu’ nopuli po iyolo’d kupos do miagal di tulun do Masir do suwai. ¹² Nga’ pinokodou i’ do TUHAN o ginawo di raja’, gisom dot a’ i’ iyau minokinongou di boros diyo Musa di Harun, do miagal di nokoboros mantad do TUHAN. ¹³ Om boros kaddi do TUHAN dot id di Musa, ’’Mongoi no solowot di raja’ dot osuab pod suab om sunudan no iyau diti boros do TUHAN, i Kinorohingan do tulun dot Ibrani, do poingkaa, ’Pabanaro’ no ilo tulun ku do mamanau, om koongoi i’ iyolo’ kasambayang dot id doho’. ¹⁴ Tu’ baino’ nopo moti’, om okon no ko’ iri no i tongomontiri’ nu, om i rayat nu o hukuman ku, suwai ko’ iya’ nga’ hukuman ku i’. Om koilo ko indo dot aiso’ no o koiyo doho’ do pointongkop do hiti’d pomogunan. ¹⁵ Tu’ ondung hinukuman tiya’ daa om i rayat nu do toruol, om noinsanan kou no daa do napatai. ¹⁶ Nga’ pinologos ku i’ iya’ do poimpasi om kokito ko i’ do kogoyoo’ do sinundu ku. Om kotongkop i’ do hiti’d pomogunan o kogoyoo’ do ngaran ku. ¹⁷ Nga’ iyo piya’ddi nga’ asawat kasai’ po o ginawo nu om a’ ko pabanar di tulun ku do mamanau. ¹⁸ Nga’ kosuabon nopondod suab, om porikoton ku motindo o karambatu di korolosi kopio, it a’ po nokoumbal do nosiliu do hiti’d Masir do mantad di gulu. ¹⁹ Nga’ ponuhu’ no do poposusut di tayam-tayam nu, om koinsanai di diya’ do songonuon di hilo’d soliwan. Tu’ asandatan motindo do karambatu o koinsanai’d tulun om tayam-tayam di hilo’d liwan dit aiso’ o kolungung, om angapatai nondo iyolo’,’ kanto,’’ ka dau. ²⁰ Om ongooris diri o wookon di montiri’ di raja’, om ngoyo’ no diyolo’ posuango’ do hiri’d walai i turipon om i tayam-tayam diyolo’. ²¹ Nga’ iri nopo i tulun do suwai om a’ i’ minomusou di boros do TUHAN, om pologoso’ nopo i turipon om i tayam-tayam diyolo’ do hiri’d labus dot aiso’ o kolungung. ²² Om boros kaddi do TUHAN dot id di Musa, ’’Pobilido’ ino longon nu do pointuduk do hilo’d tawan, om sumondot i’ o karambatu do pointongkop do pomogunan do Masir do mongotung do tulun, om tayam-tayam, om koinsanai di tanom-tanom do hilo’d dumo,’’ ka dau. ²³ Om pobilido’ noddi di Musa i sukud dau do pointuduk do hilo’d tawan, om porikoto’ noddi do TUHAN o tinggoron om karambatu, om kodumaat nga’ mungkad-sungkad po do hiti’d tana’. Om posondoto’ noddi do TUHAN ²⁴ o rasam do karambatu dit asapou kopio, do mitonggoi’d kodumaat di malab-kalab poo. Om tontok nogiddi do haro o tongus dot araat kopio do nokorikot do hilo’d Masir, do diri nogindo do nosiliu do mantad di gulu. ²⁵ Om karaag ngai’ nopo di karambatu o nunu nopo i hiri’d labus do pointongkop di pomogunan do Masir; do kohompit ngai’ no o tulun om nintorusan. Om nangaraag ngai’ nogi’ i tanom-tanom do hiri’d dumo om nangasakat ngai’ o kayu. ²⁶ Hilo’ pod pomogunan do Gusin, i kinoiyonon do tulun dot Israil, ot aiso’ o karambatu. ²⁷ Om lohowo’ noddi di raja’ i Musa om i Harun, om boro-boros nod poingkaa, ’’Iti nopo baino’ om nokowonsoi oku nod dusa; TUHAN no ot otopot, om iyahai nodti rayat ku o nakasala’. ²⁸ Sambayang no dot id TUHAN! Tu’ norikot no kopio o koinggorito’ dahai dot ouru diti tinggoron om karambatu. Mamatos oku no kopio do papabanar dokoyu do mamanau, om a’ kou no minog do mundorong do hiti,’’ ka dau. ²⁹ Om boros ka di Musa dot id dau, ’’Kosoliwan oku podti bandar om poinsawaton ku no o longon ku do sumambayang dot id TUHAN. Om otingkod nondo ilo tinggoron om otodu’ ilo karambatu, om koilo ko i’ dot iti nopo pomogunan om TUHAN i’ o sanganu. ³⁰ Nga’ oilaan ku i’ dot a’ ko po oronok, om ilo tongomontiri’ nu nga’ a’ po oronok do TUHAN, i Kinorohingan,’’ ka dau. ³¹ Om karaag ngai’ nopoddi i guas do gapas om i barli, tu’ kumupang no daa i barli om momiunduk nogi’ i gapas. ³² Nga’ iri po i gandum ot a’ naraag tu’ a’ po noonsok do tontok diri. ³³ Om tongkiad noddi i Musa di raja’ om soliwan no di bandar. Om poinsawato’ no di Musa o longon dau do suminambayang dot id TUHAN, om tingkod nopoddi i tinggoron, om i karambatu, om i rasam. ³⁴ Om soira’ di nokito di raja’ i nosiliu do miagal diri om pomonsoi po kawagu iyau do dusa. Om pinokodou i’ di raja’ o ginawo dau om i tongomontiri’ dau nga’ pinokodou i’ diyolo’ o ginawo diyolo’ do miagal di gulu. ³⁵ Om a’ iddi di raja’ pinabanar i tulun dot Israil do mamanau, do miagal di nokoboros mantad do TUHAN, do pinolombus di Musa.

¹ Om boro-boros noddi o TUHAN dot id di Musa do poingkaa, ’’Mongoi no solowot di raja’. Om pinokodou ku po o ginawo di raja’ om i tongomontiri’ dau, om owonsoi ku i’ iti piro-piro o koimayaan dot id pogialatan diyolo’, ² om osusui indo dokoyu dot id tangaanak om id tongomanangaki dokoyu ondung poingkukuro oku do minonguntotogod di tulun do Masir do tontok di wonsoyo’ ku iti piro-piro o koimayaan. Om oinsanan kou indo do koilo dot iyoho’ no o TUHAN,’’ ka dau. ³ Om ongoi noddi iyo Musa di Harun solowot di raja’, om boros ka diyolo’, ’’Poingkaa o boros do TUHAN, i Kinorohingan do tulun dot Ibrani, ’Soira’ ko toindo do minsiriba’ dot id doho’? Pabanaro’ no i tulun ku do mamanau om koongoi i’ iyolo’ kasambayang dot id doho’. ⁴ Ondung a’ kasai’ ko kaakun, om poporikot oku no moti’ do katat do hiti’d pomogunan nu do suab. ⁵ Om adalaan nondo kopio kogumu’ o katat, gisom dot a’ no okito iti tana’. Om kanon ngai’ nopondo di katat it a’ naraag di karambatu, om iri piya i kayu di nongoolu-olu’ nga’ kanon ngai’ i’. ⁶ Om ponuon nopondo di katat i walai nu, om i kawalayan di tongomontiri’ nu, om i kawalayan di rayat nu. Om iti nopo katat diti nga’ araat po ko’ i nongokito di komolohingan nu,’ ka dau,’’ ka diyolo’. Om tolikud noddi i Musa om tongkiad no di raja’. ⁷ Om boro-boros noddi di raja’ i tongomontiri’ dau, boros ka diyolo’, ’’Songkuro po o koloido’ do tulun diti do mamagangau dati’? Pologoson nopo ilo tulun dot Israil do mamanau om koongoi i’ iyolo’ kasambayang dot id TUHAN, i Kinorohingan diyolo’. A’ nu po okito do naraag noti pomogunan do Masir?’’ ka diyolo’. ⁸ Om lohowo’ poddi kawagu iyo Musa di Harun do minongoi solowot di raja’. Om boros ka di raja’ dot id diyolo’, ’’Mongoi ngai’ kou nopo katuu sambayang dot id TUHAN, i Kinorohingan dokoyu. Nga’ isai ngai’ kopio toi dokoyu o mongoi?’’ ka dau. ⁹ Om boros ka di Musa do suminimbar, ’’Mongoi ngai’ nopo iyahai, om katanud ngai’ o tangaanak om i tongomolohing no. Angatan ngai’ nopo dahai o tangaanak dahai’d kusai om tangaanak dahai’d tondu’, om koinsanai di dumba’ om kambing, om sapi’ dahai, tu’ a’ no milo dot a’ iyahai papaharo do poginakanan do pomusou do TUHAN,’’ ka dau. ¹⁰ Om boros ka di raja’, ’’Sumumpa’ oku no dot id TUHAN dot a’ pabanar dokoyu do patanud do tongoondu’ om tangaanak dokoyu! Atalang no kopio do haro o pakat dokoyu’d sumaap. ¹¹ A’ oku i’ kopio pabanar! Kokusayan no o pabanaron ku do mamanau do mongoi sambayang dot id TUHAN, dot iri kopio o pokionuon dokoyu!’’ ka dau. Om uyungo’ noddi iyo Musa di Harun do mantad hiri’d walai di raja’. ¹² Om boro-boros noddi o TUHAN dot id di Musa do poingkaa, ’’Pobilido’ ino longon nu dot id sawat diti tana’ do Masir do poporikot do katat. Om rumikot indo o katat do mongoi pangakan do koinsanai di songinsuni dit a’ naraag di karambatu,’’ ka dau. ¹³ Om pobilido’ noddi di Musa i sukud dau om porikoto’ nod TUHAN i tongus do mantad id koulayon do tuminongus do tuminongkop di pomogunan do nosongodou do tadau’ddi om gisom do nosuaban. Om minnanawau nogiddi nga’ korikot ngai’ no i katat. ¹⁴ Om ogumu’ tomod diri o katat do ruminikot om tuminokop do pointongkop do pomogunan diri. Om a’ po insan o tulun do nokokito’d katat do miagal kopio’ddi kogumu’ om aiso’ no ot okito kawagu do miagal kopio’ddi dot id maso do tabantalan. ¹⁵ Om tokop nopo i katat do hiri’d tana’ gisom dot oitom po o kokitanan; om kaakan ngai’ nopo di katat it a’ nangaraag di karambatu, om nangaakan ngai’ i tua’ do kayu. Om aiso’ no ot otomou do noolu’ do hiri’d guas do kayu, ko’ id totonomon do pointongkop do pomogunan do Masir, tu’ nangaayi’ no di katat do mangakan. ¹⁶ Om olomus nopoddi i raja’ do minomolohou di Musa om i Harun om boro-boros no iyau diyolo’ do poingkaa, ’’Nokowonsoi oku nod dusa dot id TUHAN, i Kinorohingan nu om nokowonsoi oku do dusa dot id diya’. ¹⁷ Ompunai po kopio doho’ iti dusa ku do baino’, om sambayang no dot id TUHAN, i Kinorohingan nu do mongidu’ diti hukuman do kapatai do mantad id doho’,’’ ka dau. ¹⁸ Om tongkiad no i Musa do mantad hiri’d raja’ om sambayang no iyau dot id TUHAN. ¹⁹ Om posimbano’ noddi do TUHAN o kotonguson di tongus do mantad id koulayon om siliho’ no do tongus di mantad id kotonobon dit opuhod tomod. Om kotonggoi noddi i katat di tongus do mantad id kotonobon. Om kotilib no do hiri’d Suok do Suis. Iso’ po di katat nga’ aiso’ no o noolu’ do hilo’d pomogunan do Masir. ²⁰ Nga’ pinokodou i’ kawagu do TUHAN o ginawo di raja’, gisom dot a’ i’ iyau papabanar di tulun dot Israil do mamanau. ²¹ Om boros kad TUHAN dot id di Musa, ’’Poinsawato’ ino longon nu do pointuduk do hilo’d tawan, om otuong indo o pointongkop do pomogunan do Masir,’’ ka dau. ²² Om potuduko’ noddi di Musa do hilo’d tawan i longon dau, om tuong no dot odondom tomod o pointongkop do pomogunan do Masir do solinaid do tolu o tadau. ²³ Om a’ noddi i tulun do Masir kopogikikito, om iso’ pod tulun nga’ aiso’ no o suminoliwan do mantad id walai diyolo’ do solinaid diri. Nga’ haro kasai’ i’ o tanawau do hiri’d kinoiyonon di tulun dot Israil. ²⁴ Om lohowo’ noddi di raja’ i Musa om boro-boros no do poingkaa, ’’Pamanau kou nopo do mongoi sambayang dot id TUHAN, om potonudon ngai’ nopo dokoyu i tongoondu’ om i tangaanak dokoyu. Nga’ poopungon ngai’ po dokoyu do hiti i dumba’, om kambing, om sapi’ dokoyu,’’ ka dau. ²⁵ Om boros ka di Musa do suminimbar, ’’Iyo nopoddi om onuan nu no iyahai’d tayam-tayam do maan do porsombahan om porsombahan di sorobon do patahakon dot id TUHAN, i Kinorohingan dahai. ²⁶ Tanggayan ngai’ i’ dahai i tayam-tayam dahai; om iso’ po nga’ aiso’ i o poopungon dahai. Om iyahai i’ ot apatut do momili’ di tayam-tayam do patahakon dahai dot id TUHAN, i Kinorohingan dahai. Om a’ po dahai oilaan ondung honggo’ddi o tayam-tayam do patahakon dahai dot id TUHAN, dot a’ po iyahai korikot do hilo’,’’ ka dau. ²⁷ Om pokodoho’ pod TUHAN o ginawo di raja’, gisom dot a’ i’ iyau pinapabanar diyolo’ do mamanau. ²⁸ Om boros ka di raja’ dot id di Musa, ’’Poggidu’ do mantad hiti! A’ oku no siontong diya’! Ondung kopisolowot to kawagu, om apatai ko no,’’ ka dau. ²⁹ Om boros ka di Musa, ’’Iyo nogiddi. A’ ko no bo kokito kawagu doho’,’’ ka dau.

¹ Om boros kaddi do TUHAN dot id di Musa, ’’Iso’ po o hukuman do porikoton ku dot id raja’ do Masir om id rayat dau. Katalib pondo iri om pabanaron kou nondo dau do mamanau. Om uyungon ngai’ kou nopondo dau do mantad hiti. ² Boro-boros nogi’ dilo tulun dot Israil, om sunudan ngai’ no iyolo’ do mongoi pokianu do tamas om pirok do pongillumis do tinan do mantad id songkoduwo diyolo’,’’ ka dau. ³ Om binsuhuo’ nod TUHAN i tulun do Masir do rumonok di tulun dot Israil. Om agayo tomod diri o ngaran di Musa dot osorou di tongomontiri’ om koinsanai di tulun. ⁴ Om boros kaddi di Musa dot id raja’, ’’Poingkaa o boros do TUHAN, ’Pitangatuong nopondo om tumongkop oku do pomogunan do Masir, ⁵ om apatai ngai’ nopondo i tanak do kusai dit id gulu kosusu do hiti’d Masir, do mantad nopo di tanak do kusai di raja’ dit id gulu kosusu, i sumowoli daa do momorinta’, om gisom di tanak do kusai dit id gulu kosusu di turipon do tondu’ di monnunutu do gandum. Om tanak do tayam-tayam dit id gulu kosusu nga’ angapatai ngai’ nogi’. ⁶ Om orongou nondo do pointongkop do pomogunan do Masir o giak do mogihad dot opuhod tomod, it a’ po insan kosiliu om it a’ nondo osiliu kawagu do koimbagu. ⁷ Nga’ id pogialatan nopo do tulun om id pogialatan do tayam-tayam do tulun dot Israil om aiso’ i’ o mamagangau. Om oilaan nu nogindo do pisuwayon ku o tulun do Masir om tulun dot Israil,’ ka do TUHAN,’’ ka dau. ⁸ Om pupusai noddi di Musa i boros dau, boros ka dau, ’’Rumikot ngai’ nopondo i montiri’ nu om tumuku’ iyolo’ dot id toguang ku, om monuhu’ nondo iyolo’ doho’ do mangangat do toinsanan do tulun ku do mogidu’, om mamanau nogindo iyahai,’’ ka dau. Om tongkiad noddi i Musa do mantad hiri’d raja’ do mikuwo’d otogod tomod. ⁹ Nokoboros no do TUHAN dot id di Musa o boros do poingkaa, ’’Sumurilog kasai’ indo i raja’ do boros nu, om kointalang ku indo o piro-piro o koimayaan do hiti’d pomogunan do Masir,’’ ka. ¹⁰ Om pointalango’ ngai’ no diyo Musa di Harun i kongoimayaan diri do hiri’d toguang di raja’, nga’ pinokodou i’ do TUHAN o ginawo di raja’, om a’ iddi di raja’ pinabanar i tulun dot Israil do tumongkiad di pomogunan dau.

¹ Om boro-boros no o TUHAN dot id diyo Musa di Harun do hilo’d pomogunan do Masir. Boros ka dau, ² ’’Tulan nodti o sumiliu do tulan do koiso’ do koimpuunon do toun dokoyu. ³ Poboroson ngai’ noti ponuhuan dot id toinsanan o tulun dot Israil. Tontok nopo do tadau do kohopod do tulan diti om mositi’ no do momili’ o pointikid-tikid do kusai do songinan o tanak do dumba’ ko’ songinan o tanak do kambing do maan di sompiiyon dau. ⁴ Ondung okuri’ kopio iyolo’ songilang-ilang om a’ no kaayi’ do mangakan do songinan o tanak do dumba’ ko’ tanak do kambing, om pokoino i’ do piilangan diyolo’ di songkoduwo diyolo’ i songinan o tanak do dumba’ ko’ tanak do kambing, do miontok di kogumuon do tulun, om kogoyoo’ do pangakan do tikanas do pointikid-tikid di tulun. ⁵ Nunu nopo o pilion dokoyu, dumba’ tuu ko’ kambing po nga’ mositi’ no do tontoluhan di sontoun nogi’ o tumur, om it aiso’ o bohiton do tinan. ⁶ Om totuong nopondo di tadau do kohopod om apat do tulan diti om mositi’ no dot oinsanan nopo o tulun dot Israil do monumbali’ do dumba’ ko’ kambing. ⁷ Om pogihilon nondo ot ongokooro’ di raha’ di sinumbali’ do hiri’d miampaping di wawayaan, om hiri’d sawat di wawayaan do pointikid-tikid do walai di pangakanan di sinumbali’. ⁸ Om tontok i’ do totuong diri do luguon i tonsi di sinumbali’ om kanon nondo do mitonggoi di rapaon dit opoit om roti dit a’ naralatan do pangambang. ⁹ Kada’ matao’ iri do mangakan om kada’ losuo’, suwai ko’ luguon do mitonggoi di tulu om gakod om i suang do tian. ¹⁰ Kada’ no do haro ot oolu’ do gisom do kosuabon, ondung haro ot oolu’ om sorobon ngai’ nopo. ¹¹ Om lomusan no do mangakan diri, tu’ apatut do kapanampakai mantad kou no do maan do mamanau om kikasut kou no, om poingigit no dokoyu o sukud. Tu’ tadau nopoddi om Tadau’d Agayo do Paska do maan do pomusou doho’, i TUHAN. ¹² Tontok nopondo do totuong diri om tumongkop oku nondo do pomogunan do Masir do mamatai do koinsanai di tanak do kusai dit id gulu, om koinsanai di tanak do tontoluhan do tayam-tayam dit id gulu kosusu. Om hukuman ngai’ ku nondo i ponokokinorohingan do hilo’d Masir, tu’ iyoho’ no o TUHAN. ¹³ Iri nondo i raha’ di pinogihil do hiri’d wawayaan di walai dokoyu o tanda’ di walai do niyonon dokoyu. Om soira’ nopondo dot okito ku i raha’ diri, om toliban ku indo iyokoyu, om a’ ku i’ iyokoyu patayon do tontok do momohukum oku do pomogunan do Masir. ¹⁴ Ramayon no kopio dokoyu o tadau dot agayo diri do miagal do tadau dot agayo di don TUHAN, do kopomuhandaman di nowonsoi ku, iyoho’ i TUHAN. Ramayon kasai’ no dokoyu o tadau’ddi do gisom dot alaid,’’ ka dau. ¹⁵ Om boros ka do TUHAN, ’’Turu’ o tadau do koloido’ dot a’ kou koino-ino do mangakan do roti di rinalatan do pangambang — iri no i roti dit a’ rinalatan do pangambang ot akanon dokoyu. Tontok nopo di tadau do koiso’ om taamon ngai’ no dokoyu i pangambang di songingopi’ do hiri’d walai dokoyu, tu’ ondung haro o tulun do kapangakan do roti di naralatan do pangambang do solinaid di turu’ o tadau’ddi, om a’ no iyau kohompit do tulun ku. ¹⁶ Tontok nopo di tadau do koiso’ om di tadau do koturu’, om mositi’ no do tumimung kou do sumambayang. A’ no koino-ino do haro o buruon dokoyu do suwai do tontok do tadau’ddi, nga’ koino-ino kou indo do mogonsok do takanon. ¹⁷ Hondomon no kasai’ dokoyu iti tadau dot agayo diti, tu’ tontok no do tadau diti do posoliwanon ku o koinsanai’d bansa’ dokoyu do mantad id pomogunan do Masir. Om poinggoyoon kasai’ no dokoyu o tadau diti do miagal do tadau dot agayo do gisom dot alaid. ¹⁸ Om kada’ kou no pangakan do roti di rinalatan do pangambang do mintonod di tadau do kohopod om apat do tulan do koiso’ om gisom do tadau do koduwo nohopod om iso’ do tulan diri. ¹⁹ - ²⁰ Om turu’ o tadau dot a’ kou koino-ino do poopi’ do pangambang do roti dot id walai dokoyu. Tu’ ondung haro o tulun do mangakan do roti di naralatan do pangambang, do tulun tuu dot Israil ko’ tulun pod bansa’d suwai, om a’ no kohompit do tulun ku,’’ ka dau. ²¹ Om lohowo’ no di Musa o koinsanai di boyoon do tulun dot Israil, om boro-boros no iyau dot id diyolo’ do poingkaa, ’’Momili’ kou no do tanak do dumba’ ko’ tanak do kambing do maan sumbolio’, om aramai i’ di sompiiyon dokoyu i tadau do Paska. ²² Mongoi kou no panganu do songwongkos o sakot do hisop om potobungon no do hiri’d raha’ di tayam-tayam, i poinsuang di mangkuk, om pogihilon nogindo i raha’ do hiri’d miampaping di wawayaan om hiri’d sawat di wawayaan di walai dokoyu. Om kada’ nod haro o tongosongulun piya do sumoliwan do mantad hiri’d walai do gisom do kosuabon. ²³ Soira’ nopondo do tumongkop o TUHAN do pomogunan do Masir do mongoi pamatai di tulun do Masir, om okito nondo dau i raha’ do hiri’d miampaping di wawayaan, om hiri’d sawat di wawayaan do walai dokoyu. Om a’ indo do TUHAN pologoson i Moloikat di Mamatai do sumuang di walai do mongoi pamatai dokoyu. ²⁴ Mositi’ no do tonudon dokoyu om tonudon di tangaanak dokoyu o toturan diti do gisom dot alaid. ²⁵ Soira’ nopondo do sumuang kou di pomogunan di nakabatos do TUHAN do patahakon dot id dokoyu, om mositi’ no do wonsoyon dokoyu iti natantu’ mantad do wonsoyon do tontok do Paska. ²⁶ Soira’ nopod muhot i tangaanak dokoyu do poingkaa, ’Nunu o komoyon diti wonsoyon do miagal diti?’ ka, ²⁷ om sunudan no dokoyu do poingkaa, ’Iti nopo om porsombahan di sorobon do dong Paska do maan do pomusou do TUHAN, tu’ tinoliban i’ dau i kawalayan do tulun dot Israil di hilo’d Masir. Om pinatai dau i tulun do Masir, nga’ iyati’ nopo om pinologos i’ dau do poimpasi,’ kanto dokoyu,’’ ka dau. Om otud noddi i tulun dot Israil do tuminuku: ²⁸ Om pamanau noddi iyolo’ om wonsoyo’ no diyolo’ i pinonuhuan do TUHAN diyo’ Musa di Harun. ²⁹ Pitangatuong noddi om patayo’ ngai’ no do TUHAN o tanak do kusai dit id dotuo di tulun do Masir. Impuuno’ nopo i tanak do kusai di raja’ dot id gulu, i sumowoli mantad daa do sumiliu do raja’, om gisom di tanak do kusai dit id gulu do tanak di tulun di songinggiil; om koinsanai di tanak do tayam-tayam dit id gulu kosusu nga’ pinatai nogi’. ³⁰ Tontok nopoddi do totuong diri om koposikai no i raja’ om i tongomontiri’ di raja’ om koinsanai di tulun do Masir. Om lompud poddi do tihad o torongou do pointongkop do pomogunan do Masir, tu’ aiso’ no o tiso’ pod walai dot a’ napatayan do tanak do kusai. ³¹ Om totuong iddi do linohou di raja’ iyo Musa di Harun, om boro-boros no iyau do poingkaa, ’’Poggidu’ ngai’ kou do mantad hiti, iyokoyu i tulun dot Israil! Tongkiad kou no diti pomogunan ku; ongoi kou nopo sambayang dot id TUHAN dokoyu do miagal di pinokianu dokoyu. ³² Igitan ngai’ nopo dokoyu i dumba’ om kambing, om sapi’ dokoyu, om tumongkiad no do mantad hiti. Om pokionuan oku no iyoho’ do barakat,’’ ka dau. ³³ Om odsuuron tomod diri di tulun do Masir i tulun dot Israil do marau-arau do sumoliwan di pomogunan diyolo’. Boros ka no diyolo’, ’’Apatai ngai’ no iyahai dot a’ kou no tumongkiad do mantad hiti,’’ ka no. ³⁴ Om ponuo’ noddi di tulun dot Israil do tapung dit a’ naralatan do pangambang, om i nobulugu’ mantad no, i pagansakan diyolo’ do roti, om lopoto’ no diyolo’d kain i pagansakan diri, om saano’ nogiddi diyolo’. ³⁵ Om nowonsoi ngai’ no diyolo’ i nokoboros di Musa, om nokopokianu no iyolo’ do tamas om pirok do pongillumis do tinan om pakayan do mantad id tulun do Masir. ³⁶ Om pinoronok diri do TUHAN i tulun do Masir dot id toguang di tulun dot Israil, om nunu nopoddi i pinokianu di tulun dot Israil nga’ patahako’ ngai’ nopo di tulun do Masir dot id diyolo’. Om iyo noddi i tulun dot Israil do minononggoi do kakayaan do tulun do Masir, do suminoliwan do mantad id pomogunan diri. ³⁷ Om pamanau nopod gakod i tulun dot Israil do mantad id bandar do Raamsis do kuminaa do hilo’d bandar do Sukot. Kogumuon nopo diyolo’ nga’ haro i’ doti’ ot onom nahatus noribu o tongokusai nogi’ om a’ po kohompit i tongoondu’ om i tangaanak. ³⁸ Om ogumu’ po o tulun do bansa’d suwai do nakatanud diyolo’, om ogumu’ o dumba’ om kambing, om sapi’ do nigitan diyolo’. ³⁹ Om onsoko’ noddi diyolo’ i tapung di nobulugu’ mantad noddi, it a’ rinalatan do pangambang, i nigitan diyolo’ do mantad hilo’d Masir. A’ no naralatan do pangambang i tapung diri om a’ no diyolo’ nosodia’ i takanon diyolo’, tu’ narau-arau tomod no iyolo’ do nuyung do mantad id pomogunan do Masir. ⁴⁰ Koloidon nopo di tulun dot Israil do poundorong do hilo’d Masir om apat nahatus om tolu nohopod o toun. ⁴¹ Om tontok di norikot i tadau do kinopupuson dit apat nahatus om tolu nohopod o toun, om soliwan ngai’ noddi i don TUHAN do tulun do mantad hilo’d Masir. ⁴² Tontok no do totuong diri do tinamangan do TUHAN iyolo’ do pinoposoliwan diyolo’ do mantad id pomogunan do Masir; om iri nogi’ o totuong di pinotobilang do maan do don TUHAN do sumiliu do kopomuhandaman do gisom dot alaid. Om tontok no do totuong diri dot apatut do mumbangan-bangan i tulun dot Israil. ⁴³ Om boros kad TUHAN dot id diyo Musa di Harun, ’’Iti no ot oturan do pasal do tadau dot agayo do Paska: Tulun nopo di bansa’d suwai, om a’ i’ koino-ino do mangakan di taakanon do don Paska. ⁴⁴ Nga’ iri nopo i turipon di noboli dokoyu om koino-ino i’ do mangakan, do nosunatan no iyau. ⁴⁵ Tulun nopo di nokoumbaya’ no toomod om i tulun di pakaraja’ do gumadsi’ om a’ i’ koino-ino do mangakan diri. ⁴⁶ Akanon ngai’ no i taakanon diri do hiri’d suang di walai di pinagansakan; tu’ a’ i’ koino-ino iri do tanggayan do sumoliwan. Om kada’ nod haro ot otipu’ do tulang di tayam-tayam di sumbolion diri. ⁴⁷ Om mositi’ no do ramayon do koinsanai’d tulun dot Israil o tadau dot agayo diti. ⁴⁸ Nga’ tulun nopo dit a’ po nosunatan om a’ i’ koino-ino do mangakan diri. Ondung haro o tulun do bansa’d suwai do poingiyon dot id rolot dokoyu dit orohian do tumanud do mamaramai di tadau do Paska do maan do pomusou do TUHAN, om sunatan po dokoyu ngai’ i tongokusai do hiri’d sompiiyon dau. Om poiyoon nogindo dokoyu iyolo’ do miagal do tulun kopio dot Israil. Om koino-ino nondo iyolo’ do tumanud do mamaramai di tadau’d Paska. ⁴⁹ Iyo ngai’ nopoddi ot oturan do tonudon do tulun dot Israil om i tulun do bansa’d suwai di poinsugku’ dokoyu,’’ ka dau. ⁵⁰ Om oinsanan nopo i tulun dot Israil do minumboyo’ om minomonsoi do koinsanai di pinonuhuan do TUHAN dot id di Musa om id di Harun. ⁵¹ Om tontok nod tadau’ddi do pinosoliwan do TUHAN o koinsanai di tulun dot Israil do mantad id pomogunan do Masir.

¹ Om boros ka do TUHAN dot id di Musa, ² ’’Patahakon no dot id doho’ o koinsanai di tanak do kusai dit id gulu kosusu do maan do porsombahan. Tu’ koinsanai’d tanak do kusai do tulun dot Israil dit id gulu, om koinsanai’d tanak do tontoluhan di tayam-tayam dit id gulu kosusu nga’ doho’ ngai’ no,’’ ka dau. ³ Om boros ka di Musa dot id bansa’ dot Israil, ’’Soro-sorohon no o tadau’dti — tu’ tadau do kinotongkiadan dokoyu di pomogunan do Masir, i pomogunan di nokoiyonon dokoyu do siniliu’d turipon. Tadau nodti do pinosoliwan kou do TUHAN, dot i kuasa’ dau dot agayo o pinoposoliwan. Kada’ kou pangakan do roti di rinalatan do pangambang. ⁴ Om tontok no do tadau’dti, i tadau do koiso’ do tulan dot Abib, i tulan do koiso’, do tuminongkiad kou do mantad id pomogunan do Masir. ⁵ Nokosumpa’ no o TUHAN dot id taki-aki dokoyu do papatahak dot id dokoyu di pomogunan do tulun do Kanaan, om Hit, om Amori, om Howi, om Yobus. Om soira’ nopondo do kaatod kou’d TUHAN do hilo’d pomogunan di kaya’ om oluhub diri, om ramayon no dokoyu iti tadau dot agayo diti do pointikid-tikid do toun, do tontok di tulan do koiso’. ⁶ Kanon nopo dokoyu do solinaid do turu’ o tadau om roti dit a’ rinalatan do pangambang, om tontok nopondo di koturu’ do tadau om papaharo kou nondo do karamayan do pomusou’d TUHAN. ⁷ Kada’ kou pangakan do roti di naralatan do pangambang do solinaid do turu’ o tadau. Om kada’ nod haro o pangambang om roti di naralatan do pangambang dot id pointongkop do pomogunan dokoyu. ⁸ Tontok nopo do tumimpuun o karamayan diti om posuhuton no dokoyu i tangaanak dokoyu, do wonsoyon pogi’ dokoyu o koinsanai’ddi nga’ maan do kopomuhandaman di winonsoi’d TUHAN dot id dokoyu do tontok di suminoliwan kou do mantad id pomogunan do Masir. ⁹ Iti nopo karamayan diti nga’ sumiliu do poposorou dokoyu, do miagal dot iso’ o tanda’ di poingkogos dot id longon ko’ i poingkogos do ponong id turos dokoyu; iti no o poposorou dokoyu do mangapal om minsingilo do koinsanai di Tourat do TUHAN, tu’ iri no i sinundu do TUHAN dit agayo kopio o pinoposoliwan dokoyu do mantad hilo’d Masir. ¹⁰ Ramayon no o tadau’ddi do tontok di maso do natantu’ mantad do pointikid do toun,’’ ka dau. ¹¹ Om boros kad Musa dot id tulun dot Israil, ’’Pootodon kou nondo do TUHAN do hilo’d pomogunan do tulun do Kanaan, i nakabatos mantad dau do mikuwo’d sumpa’ do patahakon dot id dokoyu om id taki-aki dokoyu. Patahakon nopondo dau iri dot id dokoyu, ¹² om patahakon no dokoyu dot id TUHAN o koinsanai di tanak do kusai dit id gulu kosusu, om koinsanai di tontoluhan do tayam-tayam dokoyu dit id gulu kosusu, tu’ koinsanai’ddi om don TUHAN ngai’ no. ¹³ Nga’ bolion i’ dokoyu kawagu do mantad id TUHAN o koinsanai di tontoluhan do kaladai dit id gulu kosusu, do pomoli nopo om tanak do dumba’ di patahakon dokoyu do maan do porsombahan di sumbolion. Ondung a’ dokoyu bolion kawagu i kaladai’ddi om tipuon no o liou di kaladai. Bolion no kawagu dokoyu o koinsanai di tanak dokoyu’d kusai dit id gulu kosusu. ¹⁴ Koimbagu nopondo, do muhot i tangaanak dokoyu do komoyon diti toturan, om posimbaron nopondo dokoyu om poingkaa, ’Pinosoliwan toko’d TUHAN dot i kuasa’ dau dot agayo o pinoposoliwan dati’ do mantad hilo’d Masir, i kinoiyonon toko’ do siniliu do turipon. ¹⁵ Tontok di pinokodou di raja’ do Masir o ginawo dau, om dit a’ iyau pinapabanar dati’ do mamanau, om patayo’ noddi do TUHAN o koinsanai di tanak do kusai dit id gulu kosusu, om koinsanai di tanak do tontoluhan do tayam-tayam dit id gulu kosusu do pointongkop do pomogunan do Masir. Om iri noddi o kapatahakan toko’ do pointikid-tikid di tontoluhan do tayam-tayam dit id gulu kosusu, do maan do porsombahan di sumbolion do patahakon dot id TUHAN, nga’ bolion indo kawagu i tangaanak toko’d kusai dit id gulu kosusu. ¹⁶ Iti nopo karamayan diti om poposorou dati’ do miagal dot iso’ o tanda’ do poingkogos do longon toko’ ko’ poingkogos do ponong id turos toko’; om iti no o poposorou dati’ do pinosoliwan toko’d TUHAN do mantad hilo’d Masir dot i kuasa’ dau dit agayo o pinoposoliwan,’ kanto dokoyu,’’ ka dau. ¹⁷ Tontok di pinabanar di raja’ do Masir i tulun dot Israil do mamanau, om a’ id Kinorohingan pinosusui iyolo’ di ralan di potoropis do tisan do rahat, i poingkaa do hilo’d pomogunan do Pilistin, do mulong piya dot iri daa o ralan dit opoting. Osorou nopod Kinorohingan om poingkaa, ’’Mada’ oku i’ dot opinduwaan ilo tongoulun, om gumuli’ nondo kawagu iyolo’ do hilo’d Masir dot okito diyolo’ dot a’ iyolo’ milo dot a’ monokisangod,’’ ka. ¹⁸ Om posorilio’ noddi dau iyolo’ do pinawaya’ di tana’ do kowotuan do poingkaa do hiri’d Rahat dot Aragang. Om ongkirapo-rapo nod don sumasangod i tulun dot Israil. ¹⁹ Om tanggayai noddi di Musa i tulang di Yusup do mantad hilo’d Masir, tu’ tontok nopoddi poimpasi po i Yusup om sinuhu’ dau i tulun dot Israil do suminumpa’ do momonsoi do miagal diri. Poingkaa o bilin di Yusup, ’’Posoliwanon kou nopondo do Kinorohingan, om tanggayan no kopio dokoyu o tulang ku do mantad id kinoiyonon diti,’’ ka. ²⁰ Om tongkiad noddi i tulun dot Israil do mantad hilo’d Sukot om powonsoyo’ no diyolo’ o kiim diyolo’ do hilo’d bandar dot Itam, it id tisan di tana’ do kowotuan. ²¹ Tontok nopo do dangadau om mogulu o TUHAN diyolo’ do miagal-agal do haun do poorigi do popotunud diyolo’ do ralan di susuyon diyolo’, om dongotuong no om miagal-agal iyau’d tapui do poorigi do hiri’d gulu-gulu diyolo’ do monitiu om popotunud diyolo’, om milo iddi iyolo’d mamanau do dangadau om dongotuong. ²² Om iri nopo haun do poorigi diri nga’ hiri kasai’ nopod gulu-gulu di tulun dot Israil do dangadau, om dongotuong nondo om i tapui di poorigi ot id gulu-gulu diyolo’.

¹ Om boro-boros noddi o TUHAN dot id di Musa do poingkaa, ² ’’Suhuon no ilo tulun dot Israil do gumuli’ kawagu do gisom do korikot do hilo’d dotimbabaan di bandar do Pi-Hahirot, it id piolitan di bandar do Migdol om Rahat dot Aragang, it id somok do bandar do Baal-Sipon, om suhuon no iyolo’ do popowonsoi do kiim diyolo’ do hilo’. ³ Om momusorou nondo i raja’ do Masir do maso diti tulun dot Israil do minghombo do hiti’d pomogunan diti, do nosorilian diti tana’ do kowotuan. ⁴ Pokodohon ku nondo o ginawo dau gisom do mongoi nondo iyau pomogusa’ dokoyu, om kamanang oku indo dot id sawat di raja’ do Masir om i piro-piro o soudor dau. Om iri nondo i kamanangan ku’ddi o kopobontugan do tulun doho’, om iri tulun do Masir nga’ koilo nondo dot iyoho’ o TUHAN,’’ ka dau. Om wonsoyo’ noddi di tulun dot Israil o miagal di pinonuhuan do TUHAN dot id diyolo’. ⁵ Om soira’ di nosunudan i raja’ do Masir do nokopoggidu’ i tulun dot Israil, om ponosol noddi iyau om i montiri’ dau, om boros ka diyolo’, ’’Nunu’ddi kopio iti winonsoi toko’dti? Tu’ pinologos toko’ i tulun dot Israil do minogidu’, om aiso’ noddi o turipon toko’!’’ ka diyolo’. ⁶ Om posodiawo’ ngai’ noddi di raja’ i korita’-kuda’ dau di don sumasangod om i soudor dau. ⁷ Om pamanau noddi iyau do miwoyo’ do koinsanai di korita’-kuda’ dau om kohompit nogi’ it onom nahatus o korita’-kuda’ dit ongosonong kopio do nigitan di piro-piro o gunsiou dau. ⁸ Om pokodoho’ noddi do TUHAN o ginawo di raja’, om ngoyo’ no di raja’ gusao’ i tulun dot Israil, i maso no do manau-panau do mogidu’ do mantad id pomogunan diri, do pointirung do TUHAN. ⁹ Om gusao’ no iyolo’ di soudor do Masir dit ongkikuda’ om it ongkikorita’-kuda’, om kokosupai no iyolo’ do hiri’d pinawansayan diyolo’ do kiim, it id toning di Rahat dot Aragang, it id somok do bandar do Pi-Hahirot om bandar do Baal Sipon. ¹⁰ Om tontok di nokito di tulun dot Israil i raja’ do Masir om i piro-piro o soudor dau do momok-somok diyolo’, om moddosi tomod diri iyolo’ om pomolohou no iyolo’d TUHAN do mokitulung dau. ¹¹ Om boros ka diyolo’ dot id di Musa, ’’Aiso’ toi o kalabangan do hilo’d Masir? Tu’ minog kopio ko do minangangat dahai do hiti’d tana’ do kowotuan do mongoi patai do hiti? Antangai pogiddi o kinootuson diti winonsoi nu tu’ nongoi nu i’ iyahai posoliwano’ do mantad hilo’d Masir! ¹² A’ toi dahai iya’ nosunudan no mantad dit a’ toko’ po nakapamanau dot osiliu o miagal diti? Nosunudan i’ dahai iya’ do monongkiad dahai om popologos dahai do turipon kasai’ do tulun do Masir. Osonong-sonong nogi’ do turipon kasai’ do hilo’ ko’ apatai do hiti’d tana’ do kowotuan,’’ ka no diyolo’. ¹³ Om boros kad Musa do suminimbar, ’’Kada’ kou poddosi! Pogiroton nopo o ginawo, om kokito kou indo ondung nunu o wonsoyon do TUHAN do pamasi dau dokoyu do baino’; tu’ a’ kou nondo bo kokito kawagu diti tulun do Masir. ¹⁴ TUHAN i’ o sumaap do mogobi’ dokoyu, om iyokoyu nopo om a’ i’ minog do momonsoi do nunu nopo,’’ ka dau. ¹⁵ Om boros kad TUHAN dot id di Musa, ’’Nokuro tu’ millohou ko do mokitulung? Suhuo’ nogi’ ilo tulun dot Israil do lumombus do mamanau. ¹⁶ Pobilido’ ino sukud nu om potudukon i’ dot id soibau dilo rahat. Om migirang indo ilo waig, om milo i’ ilo tulun dot Israil do sumoborong dilo rahat, do maya’ di tana’ di narasakan do waig. ¹⁷ Om pokodohon ku nondo o ginawo dilo tulun do Masir gisom do mongoi po iyolo’ pomogusa’ do tulun dot Israil, om kamanang oku indo dot id sawat do raja’ do Masir om i piro-piro o soudor dau, om i piro-piro o soudor dau dit ongkikorita’-kuda’. Om iri nondo i kamanangan ku o kopobontugan do tulun doho’; ¹⁸ om iri nondo o koilaan di tulun do Masir dot iyoho’ no o TUHAN,’’ ka dau. ¹⁹ Om ongoi noddi i moloikat do Kinorohingan, i hiri daa id gulu-gulu di soudor dot Israil, do hiri’d ponong id tohuri. Om iri nogi’ i haun di poorigi nga’ minundaliu do kuminaa do hiri’d ²⁰ piolitan di tulun do Masir om i tulun dot Israil. Om otuong diri i haun do ponong hiri’d tulun do Masir nga’ mogulinau i’ i haun do ponong hiri’d tulun dot Israil. Om a’ iddi kopiinsomok i duwo o posukan do soudor do solinaid do totuong diri. ²¹ Om potuduko’ no di Musa o longon dau do hiri’d soibau di rahat, om popuhodo’ nod TUHAN i tongus do mantad id koulayon do gisom do noimpit i waig do rahat. Om mongus-tongus nopoddi i tongus do solinaid do totuong diri gisom do notuu i rahat. Om nopigirang diri i waig, ²² om darapas no i tulun dot Israil di rahat do minaya’ di tana’ di narasakan do waig; om iri nopo waig di rahat nga’ poingolig do hiri’d miampaping diyolo’. ²³ Om gusa’ noddi di tulun dot Israil do hiri’d rahat i tulun do Masir do mogiwoyo-woyo’ do koinsanai di kuda’, om i soudor dit ongkikorita’-kuda’. ²⁴ Om maha’ di minnanawau no om ontong no o TUHAN do mantad hiri’d tapui om i haun di poorigi, do minontong di soudor do Masir, om gangaho’ no dau iyolo’. ²⁵ Om pasangato’ ngai’ nod TUHAN i ruda’ di korita’-kuda’ diyolo’, gisom dot osusa’ tomod diri iyolo’ do mamanau. Om boros ka di tulun do Masir, ’’Obian i’ pama do TUHAN o tulun dot Israil do sumaap dati’. Kainou, poggidu’ toko’ nogi’ do mantad hiti!’’ ka. ²⁶ Om boros kad TUHAN dot id di Musa, ’’Potuduko’ ino longon nu do hilo’d soibau dilo rahat, om mikintup i’ kawagu ilo waig do mangalit dilo tulun do Masir, om ilo soudor diyolo’ dit ongkikorita’-kuda’,’’ ka dau. ²⁷ Om potuduko’ no di Musa o longon dau do hiri’d soibau di rahat, om kotonduli’ noddi kawagu i waig do miagal di timpuun i’, di mingungulai o tadau. Om umbal no daa i tulun do Masir do mogidu’ do mantad hiri’d rahat nga’ pataamo’ nogi’ iyolo’d TUHAN do hiri’d rahat. ²⁸ Om kopikintup noddi i waig om koolitai ngai’ nopo i korita’-kuda’, om i popotunud di korita’-kuda’, om koinsanai di soudor do Masir di suminusuhut daa di tulun dot Israil do hiri’d rahat; om iso’ po diyolo’ nga’ aiso’ no o napasi. ²⁹ Nga’ iri nopo tulun dot Israil om otuu i’ o tana’ do winayaan do suminoborong di rahat, om poingolig i waig do rahat do miampaping diyolo’. ³⁰ Om tontok no do tadau’ddi do pinasi do TUHAN i tulun dot Israil do mantad id tulun do Masir, om songingiliu poddi i rata’ di tulun do Masir do hiri’d tisan di rahat do nokito di tulun dot Israil. ³¹ Om soira’ di nokito di tulun dot Israil i kuasa’ do TUHAN dit agayo kopio’ddi, om i pinangala’ dau di tulun do Masir, om oimayaan tomod diri iyolo’ om oronok iyolo’ do TUHAN; om otumbayaan noddi iyolo’ do TUHAN om monongkuyaan iyolo’ di Musa, i susuhuon do TUHAN.

¹ Om sindingo’ noddi di Musa om i tulun dot Israil iti sinding diti dot id TUHAN, ’’Modsinding oku dot id TUHAN, tu’ agayo o kinamanangan dau. Pinataam ngai’ dau i kuda’ om i songinsakai di kuda’ do hilo’d rahat. ² TUHAN no it okoris do mongintirung doho’; iyau no i minamasi doho’. Iyau no o Kinorohingan ku, om royohon ku no iyau, iyau no o Kinorohingan di tapa’ ku, om sindingon ku no o kogoyoo’ dau. ³ TUHAN nopo om gunsiou; TUHAN no o ngaran dau. ⁴ Pinataam ngai’ dau i soudor do Masir om i korita’-kuda’ diyolo’ do hilo’d rahat. Nongolondod do hilo’d Rahat dot Aragang i gunsiou diyolo’ dit ongokilos. ⁵ Noolitan iyolo’ di rahat dot aralom, om nolonsod iyolo’ do gisom do nakananad do miagal do watu. ⁶ Agayo o kuasa’ do longon nu’d wanan, oi TUHAN, komumuk do pisangod i longon nu. ⁷ Agayo no o kinamanangan nu pogitotongkiadon nu nopo o pisangod nu. Iyo pod tapui i kototogod nu do sumikit, do monorob diyolo’ do miagal do rahami. ⁸ Sougio’ nu no i rahat, om lingkum no i waig do mininsawat. Minolig i waig do miagal do tolig, om milo diri do winayaan i hiri’d nanad. ⁹ Boros ka di pisangod, ’Gusaon ku nondo iyolo’ om ingkosupan ku, bohogion ku nondo i dapu’ diyolo’, om onuon ngai’ ku i korohian ku. Kodongon ku nondo o gayang ku, om ahawon ngai’ ku o koinsanai di dapu’ diyolo’,’ ka. ¹⁰ Nga’ insan ko no pomuhobo, oi TUHAN, om kongolondod ngai’ no i tulun do Masir. Iyo po iyolo’ do gundol do nolonsod do hiri’d waig di korolosi kopio. ¹¹ Oi TUHAN, isai poo o ponokokinorohingan do koiyo diya’? Isai poo o koiyo diya’ tu’ kikagayaan om olidang? Isai poo o milo do momonsoi do koimayaan om momonsoi dit angagayo kopio do miagal di winonsoi nu? ¹² Potuduko’ nu no o longon nu’d wanan, om tolono’ nopo do tana’ i pisangod dahai. ¹³ Winoyo’ nu i tulun di pinasi nu, tu’ sumulung ko i’ di batos nu. Nintirungan nu iyolo’ di kokorisan nu dot agayo, om winoyo’ nu iyolo’ do gisom do nokorikot do hilo’d tana’ nu dit olidang. ¹⁴ Nokorongou ngai’ no i bansa’ do suwai, om gagaran po iyolo’ dot opopoddosian. Ongooris po tomod i tulun do Pilistin, ¹⁵ moddosi ngai’ po i boyoon dot Idom. Gagaran ngai’ po i gunsiou do Muab, a’ no kotori’ i tulun do Kanaan. ¹⁶ Noponu’ po iyolo’ do kopoddosian om koorisan, nokokito iyolo’ di kokoriso’ nu, oi TUHAN. Aiso’ no o pokukurayan diyolo’ dot opopoddosian, do gisom do nakatalib do minamanau i tulun nu — i tulun di pinoidu’ nu do mantad id ponguripanan. ¹⁷ Pootodo’ nu no iyolo’, om poundorongo’ nu no do hilo’d nuluhon nu dit olidang, i kinoiyonon do nopili’ nu dot iyonon nu, oi TUHAN, i Walai’d Sasambayangan dot Agayo di winaal nu. ¹⁸ Iya’ no, oi TUHAN, o raja’ do gisom dot alaid,’’ ka diyolo’. ¹⁹ Om darapas no i tulun dot Israil di rahat dot i tana’ di nopigirangan di waig do rahat o winayaan. Nga’ soira’ di duminarapas di rahat i tulun do Masir do mogiwoyo-woyo’ di korita’-kuda’, om i popotunud di korita’-kuda’, om poluyungo’ no kawagu’d TUHAN i waig, om koolitai no iyolo’. ²⁰ Om ngoyo’ no di Miriam i tamburin dau. I Miriam nopo om nabi, i tobpinai di Harun do tondu’. Om tanud ngai’ no dau i tongoondu’ do monuntung di tamburin om santari-tari’ iyolo’. ²¹ Om podsindingai no di Miriam iyolo’ do sinding do poingkaa, ’’Kainou modsinding dot id TUHAN royoho’ toko’ no om pobontugo’ toko’ no iyau. Pinataam ngai’ dau do hilo’d rahat i kuda’ om i songinsakai di kuda’,’’ ka dau. ²² Om woyoo’ no di Musa i tulun dot Israil do minundaliu do mantad hilo’d Rahat dot Aragang om pakayaai noddi diyolo’ do hilo’d tana’ do kowotuan do Sur. Om tolu no tadau diyolo’ do manau-panau do hiri’d tana’ do kowotuan nga’ aiso’ i’ o waig do nabantalan diyolo’. ²³ Om korikot noddi iyolo’ dot id iso’ o kinoiyonon di roitan do Mara, nga’ iri nopo waig do hiri om adalaan tomod kopoit, om a’ no diyolo’ milo dot inumon. Om iri no o kinopomungaranan do kinoiyonon diri do Mara, tu’ komoyon nopoddi om opoit. ²⁴ Om sontogod-togod nopo di Musa i tulun, om ponguhot no iyolo’, ’’Nunu no o tinumon toko’?’’ ka no diyolo’. ²⁵ Om sambayang no i Musa dot id TUHAN do mikuwo’d iso-iso’ no kopio o ginawo dau, om potuduko’ noddi do TUHAN dot id di Musa o sallangod o kayu. Om pataamo’ no di Musa i kayu’ddi do hiri’d waig, om osonong noddi dot inumon i waig. Om hilo’ nod kinoiyonon diri do nonuan iyolo’d TUHAN do piro-piro o toturan om hilo’ nogi’ do pinogumbalan iyolo’ do TUHAN. ²⁶ Boros ka do TUHAN, ’’Umboyoon ngai’ no dokoyu o boros ku om wonsoyon it osonong dot id pagantangan ku, om tonudon no o koinsanai di pinonuhuan ku. Ondung wonsoyon dokoyu o miagal diri, om a’ kou no ohukuman di toruol di pinorikot ku dot id tulun do Masir. Iyoho’ no o TUHAN, i momolingos dokoyu,’’ ka dau. ²⁷ Om korikot no iyolo’ dot id iso’ o kinoiyonon di roitan dot Ilim. Om hiri nopo nga’ haro o hopod om duwo o tudan do waig om haro turu’ nohopod o guas do kurma. Om powonsoyo’ no diyolo’ o kiim diyolo’ do hiri’d doros di waig.

¹ Om pamanau ngai’ noddi i tulun dot Israil do tuminongkiad dot Ilim, om tontok di kohopod om limo do tadau di tulan do koduwo, do mantad di kinosoliwanan diyolo’ do hilo’d Masir, om korikot no iyolo’ do hilo’d tana’ do kowotuan do Sin, it id piolitan dot Ilim om i Nuluhon do Sinai. ² Om di nopoddi hilo’ iyolo’d tana’ do kowotuan om sontogod-togod poddi iyolo’ diyo Musa di Harun. ³ Boros ka diyolo’, ’’Orohian nogi’ daa iyahai do pinatai iyahai do TUHAN di hilo’ po iyahai id Masir. Tu’ hilo’ nopo om koirikau-rikau po iyahai do mangakan do tikanas om kopimbangat do mangakan do taakanon do suwai. Nga’ ngoyon nu no iyahai polikapai do hiti’d tana’ do kowotuan do gisom dot angapatai ngai’ iyahai,’’ ka diyolo’. ⁴ Om boros kad TUHAN dot id di Musa, ’’Porikoton ku no o taakanon dit a’ aayi-ayi’ do miagal pod rasam do mantad hilo’d tawan do patahakon ku dokoyu do baino’. Om sumoliwan ngai’ nondo i tulun do pointikid-tikid do tadau do mongoi pomuhu’ddi do gisom do kabagal do tadau’ddi. Om iti no o ralan ku do mogumbal diyolo’ do pongilo ku ondung tumanud kopio iyolo’ do boros ku. ⁵ Tontok nopo do tadau do koonom om piluapon diyolo’ ko’ i puhuon kasai’ ot onuon, om sodiaon i taakanon diri,’’ ka dau. ⁶ Om boros kaddi diyo Musa di Harun dot id toinsanan do tulun dot Israil, ’’Sosodopon nopod baino’, om koilo kou nondo do TUHAN i’ kopio o pinoposoliwan dokoyu do mantad hilo’d Masir. ⁷ Kosuabon nopondo om kokito kou di tulinau di kosorong kopio do mantad id koropohon do TUHAN. Norongou no dau i boros dokoyu do sontogod-togod dot id dau — iyau i’ o katagadan dokoyu, tu’ iyahai nopo om momonsoi no di ponuhuan dau,’’ ka diyolo’. ⁸ Om boros kaddi di Musa, ’’TUHAN indo o manahak dokoyu’d tikanas do kanon do dongsosodopon, om manahak do roti do songkuro nopo o kogumuon do korohian dokoyu do dongkosuabon. Tu’ norongou kou nod TUHAN do sontogod-togod dot id dau. Tontok nopo di mogod-togod kou dahai, om otopot nopo kopio om mogod-togod kou’d TUHAN diri,’’ ka dau. ⁹ Om boros kaddi di Musa dot id di Harun, ’’Sunudan ngai’ no i tulun do mongoi timbaba’ do TUHAN, tu’ norongou no dau i boros diyolo’d mogod-togod,’’ ka. ¹⁰ Om daamot po di Harun do mimboros om ontong ngai’ no i tulun do ponong hiri’d tana’ do kowotuan, om sigog ka nopo dot intalang i tulinau do TUHAN di kosorong tomod do hiri’d haun. ¹¹ Om boros kad TUHAN dot id di Musa, ¹² ’’Norongou ku no i boros do tulun dot Israil do sontogod-togod. Om sunudan no iyolo’ do dongsosodopon nopo om kaakan no iyolo’d tikanas, om dongkosuabon no om kaanu iyolo’ do songkuro nopo kogumuon do roti do korohian diyolo’. Om koilo nogindo iyolo’ dot iyoho’ no i TUHAN, o Kinorohingan diyolo’,’’ ka dau. ¹³ Sosodopon noddi om sondot no o tombolog dot ogumu’ di roitan do burung puyuh do kotokop di pinomukiiman diyolo’ o kogumuo’, om kosuabon no om haro o bolobou do pointongkop di pinomukiiman. ¹⁴ Om soira’ddi di notuu i bolobou, om haro’ddi ot oniipis do koiyo-iyo do sisi’ do hiri’d soibau di tana’ do kowotuan. Om kokitanan nopoddi nga’ miagal do bolobou di nosiliu dot ais do mogibulugu-lugu’ dot ongokooro’. ¹⁵ Om soira’ di nokito di tulun dot Israil iri om a’ i’ iyolo’ koilo ondung nunu o ngaran diri, om pogiuhot-uhot no iyolo’, ’’Nunu malo’?’’ ka diyolo’. Om boros ka di Musa dot id diyolo’, ’’Ilo’ no i takano’ do pinatahak do TUHAN dot id dokoyu, do maan dokoyu’d kanon. ¹⁶ Pinonuhuan nopo do TUHAN om momuhu ngai’ kou nopo do songkuro nopo o kabagal dokoyu, do duwo o lito do puhuon do pointikid-tikid do tulun do mantad id iso’ o sompiiyon,’’ ka dau. ¹⁷ Om tonudo’ noddi di tulun dot Israil i pinonuhuan diri, om haro i’ o lobi do duwo o lito do notimung om haro ot okuri’ ko’ iri. ¹⁸ Om tontok di nadang diyolo’ i pinuhu diyolo’ddi, om i tulun dit ogumu’ o nopuhu nga’ a’ i’ adalaan kogumu’ o naanu, om it okuri’ o nopuhu nga’ a’ i’ adalaan kokuri’ o naanu. Miniumbagal-bagal no kopio o nopuhu do pointikid-tikid diyolo’. ¹⁹ Om boros ka di Musa dot id diyolo’, ’’A’ i’ koino-ino do haro o tongosongulun piya do popoopi’ diti do gisom do tadau’d suab,’’ ka dau. ²⁰ Nga’ haro i’ o piro-piro diyolo’ dot a’ minokinongou di boros di Musa, om poopio’ i’ diyolo’ o wookon di roti’ddi. Kosuabon noddi om noponu’ pod giuk om outong o kosingudan di takanon diri. Om otogod diri i Musa diyolo’. ²¹ Pointikid-tikid do kosuabon om mongoi ngai’ nopo i tulun pomuhu di takanon diri do gisom do kabagal diyolo’; om alasu’ nopondo o tadau, om tumonu’ nopo i noolu-olu’ do hiri’d tana’. ²² Tontok nopo di tadau’d koonom, om induwo piluap o kogumuon do pinuhu diyolo’; apat o lito do puhuon dot iso’ o tulun. Om rikot ngai’ nopo i boyoon di tulun dot Israil do minongoi pomisunud di Musa do pasal diri. ²³ Om boros ka dau dot id diyolo’, ’’Nokoboros nod TUHAN do suab nopo om tadau do koundarangan om tadau dit olidang, i nokotobilang do maan do don TUHAN. Luguon nod baino’ i luguon dokoyu, om losuon do baino’ i losuon dokoyu. Om honggo nopondo it oolu’, om poopion no do maan do suab,’’ ka dau. ²⁴ Om poopio’ no diyolo’ i noolu’ do maan do tadau kawagu, do miagal di pinonuhuan di Musa, om a’ i’ nounos i pinoopi’ diri om a’ giniukon. ²⁵ Om boros kad Musa, ’’Iti no o takanon dokoyu’d baino’, tu’ baino’ nopo om tadau’d Sabat, i tadau’d koundarangan do nokotobilang do maan do pomusou’d TUHAN, om aiso’ no o taakanon dot okito dokoyu do hilo’d liwan diti kokiiman. ²⁶ Momuhu kou nopo do taakanon do solinaid dot onom o tadau nga’ tontok nopo di koturu’ do tadau, i tadau do koundarangan, om aiso’ no o ngoyon puhuo’,’’ ka dau. ²⁷ Tontok di koturu’ do tadau, om haro po daa o piro-piro di tulun dot Israil do minongoi pomuhu do taakanon nga’ aiso’ no o nokito diyolo’. ²⁸ Om boros kaddi do TUHAN dot id di Musa, ’’Soira’ kou mando do mumboyo’ do ponuhuan ku? ²⁹ Soroho’ no dokoyu, dot iyoho’ i’ i TUHAN, o minanahak dokoyu do tadau do koundarangan, om iri no o kapanahakan ku dokoyu do taakanon do tontok di tadau do koonom di kabagal do duwo o tadau. Tontok nopo di tadau do koturu’, om mundorong ngai’ nopo o tulun do hiri’d kiim diyolo’, om a’ no sumoliwan,’’ ka dau. ³⁰ Om a’ ngai’ noddi kuminaraja’ i tulun di tadau do koturu’. ³¹ Om roitai noddi di tulun dot Israil i taakanon diri do manna. Iri nopo nga’ koiyo-iyo do linsou dit opurak dot okooro’, om kaakanan nopo nga’ koiyo-iyo di roti do rinalatan do paha’. ³² Om boros kad Musa, ’’Minonuhu’ o TUHAN dati’ do popoopi’ dot ongokuuri’ diti manna do maan di sinakagon toko’, om kokito i’ iyolo’ di taakanon di pinatahak do TUHAN dot id dati’ do kanon toko’ do hiti’d tana’ do kowotuan, do tontok di pinosoliwan toko’ dau do mantad hilo’d Masir,’’ ka dau. ³³ Om boros kad Musa dot id di Harun, ’’Ongoi anu do kakanan, om suangan i’ do manna do duwo lito o kogumuo’, om poilihon nori do hilo’d kinoiyonon do koropohon do TUHAN do poopion do maan di sinakagon toko’,’’ ka dau. ³⁴ Om poiliho’ no di Harun i kakanan diri do hiri’d dotimbabaan di Kaban do Tumpongo do poopion do hiri do tumanud di pinonuhuan do TUHAN dot id di Musa. ³⁵ Om manna poddi o kanon di tulun dot Israil do solinaid dit apat nohopod o toun di nosunsudan do gisom do nokorikot iyolo’ do hilo’d pomogunan do Kanaan, i kinoundorongon kopio diyolo’. ³⁶ (Iri nopo i pagagadang do nunu nopo it ongotuu do tontok do maso’ddi om orumpos o duwo nohopod o lito.)

¹ Om oinsanan nopoddi i tulun dot Israil do tuminongkiad di tana’ do kowotuan do Sin, om miundaliu-daliu nopo iyolo’ do mantad id iso’ o kinoiyonon om kumaa no dot id kinoiyonon do suwai, do tumanud do ponuhuan do TUHAN. Om powonsoyo’ no diyolo’ o kiim diyolo’ do hilo’d Rapidim, nga’ aiso’ i’ o waig do tinumon do hilo’. ² Om mogod-togod no iyolo’ di Musa, boros ka diyolo’, ’’Onuwai iyahai do waig dot inumon,’’ ka no. Om boros ka di Musa do sumimbar, ’’Nokuro tu’ mogod-togod kou doho’? Nokuro tu’ mogumbal kou’d TUHAN?’’ ka dau. ³ Nga’ tuuhan no kopio i tulun om mogod-togod nopoddi kasai’ iyolo’ di Musa. Boros ka diyolo’, ’’Nokuro tu’ pinosoliwan nu iyahai do mantad hilo’d Masir? Mongoi ko no pomungou dahai om iti tangaanak dahai om iti tayam-tayam dahai, gisom dot apatai dot otutuuhanan!’’ ka. ⁴ Om sambayang no i Musa dot id TUHAN do mikuwo’d aayi’-ayi’ no kopio o ginawo dau, boros ka dau, ’’Kukuroyon ku po’ti tulun diti? Tu’ oruhai no iyolo’ do momodumpau doho’d watu,’’ ka. ⁵ Om boros kad TUHAN dot id di Musa, ’’Angatai o piro-piro dilo boyoon do tulun dot Israil do moyo’ diya’, om mogulu kou i’ diti tulun dot ogumu’. Om igitan no i sukud di pinobobog nu di Bawang do Nil. ⁶ Om mingkakat oku indo dot id dotimbabaan nu dot id sakai dot iso’ o tontolob, do hilo’d Nuluhon do Sinai. Bobogon no i tontolob diri om kosoliwan i’ o waig do mantad hiri do tinumon di tulun,’’ ka dau. Om wonsoyo’ nod Musa o miagal diri dot id toguang ngai’ di boyoon do tulun dot Israil. ⁷ Om pungaranai noddi i kinoiyonon diri do Masa, tu’ hilo’ no i tulun dot Israil do minogumbal do TUHAN, do tontok di minuhot iyolo’ do poingkaa, ’’Moyo-woyo’ tuu o TUHAN dati’ diti ko’ amu’?’’ ka. Om pinungaranan po kawagu do Moriba i kinoiyonon diri tu’ hilo’ no i tulun do sontogod-togod do minsosol. ⁸ Om rikot noddi i tulun dot Amalik do minongoi panangod di tulun dot Israil do hilo’d Rapidim. ⁹ Om boros ka di Musa dot id di Yosua, ’’Momili’ nod piro-piro o tulun do mongoi sangod di tulun dot Amalik do suab. Om mongoi oku indo ingkakat do hilo’d timpak do nulu-nulu om igitan ku i sukud di pinonuhuan doho’d TUHAN do migit,’’ ka dau. ¹⁰ Om tonudo’ no di Yosua i pinonuhuan di Musa dau. Om ongoi no iyau sangod di tulun dot Amalik, om i Musa no om i Harun, om i Hur, o tuminakad di nulu- nulu do gisom do nokosigampot. ¹¹ Solinaid nopo do poinsawat goduwo i longon di Musa, om kamanang no i tulun dot Israil nga’ ondung poinsiribaon dau o longon dau, om kamanang no i tulun dot Amalik. ¹² Om tontok di lopuhon goduwo o longon di Musa do poinsawat, om ongoi no iyo’ Harun di Hur dot iso’ o watu do poirikahanan di Musa; om ingkakat no iyolo’ do miampaping di Musa do popoinsawat di longon dau do gisom do notonob o tadau. ¹³ Om iyo noddi i Yosua do minangala’ di tulun dot Amalik. ¹⁴ Om boros kaddi do TUHAN dot id di Musa, ’’Tulison no dot id buuk o pasal do kinamanangan diti, om osorou kasai’ i’. Sunudan no i Yosua do punsoon ku i’ kopio i tulun dot Amalik,’’ ka dau. ¹⁵ Om pomonsoi no i Musa dot iso’ o pananaraban do porsombahan om pungaranai no dau iri do, ’’TUHAN no o Bondira’ ku’’. ¹⁶ Om boros ka di Musa, ’’Poinsawaton no o pongingigit do bondira’ do TUHAN! Songodon i’ kasai’d TUHAN o tulun dot Amalik do gisom dot alaid!’’ ka dau.

¹ Om korongou noddi i Yitro, i tiwanon di Musa, do koinsanai di winonsoi’d Kinorohingan dot id di Musa om id tulun dot Israil, do tontok di pinosoliwan do Kinorohingan iyolo’ do mantad hilo’d Masir. I Yitro nopoddi om imam do hilo’d Midian. ² Om ongoi no i Yitro solowot di Musa, om pinowoyo’ nogi’ dau i Sipora, i sawo di Musa, i poundorong po do hilo’d Midian, ³ om i Girsom om i Iliosor, i tangaanak di Sipora do kusai. Pinungaranan pogi’ dot i’ Girsom it id dotuo nga’ boros kad Musa om, ’’Sompogunan oku i’ do hiti’d pomogunan do suwai,’’ ka dau; ⁴ om iri no tanak do koduwo om pinungaranan dot i Iliosor tu’ boros kad Musa om, ’’Tinulung oku i’ do Kinorohingan di tapa’ ku, gisom dot a’ oku iddi napatai di raja’ do Masir,’’ ka dau. ⁵ Om rikot no i Yitro do hiri’d tana’ do kowotuan di pinomukiiman di Musa, i hiri’d toning di nuluhon dot olidang, do miwoyo’ di sawo di Musa om i duwo o tanak di Musa. ⁶ Om nokoponuhu’ no i Yitro do tulun do momisunud di Musa do rumikot iyolo’, ⁷ om soliwan noddi i Musa do minongoi solowot dau. Om otud no i Musa dot id toguang di Yitro, om tungubai no dau i Yitro. Om piuhot-uhot no iyolo’ ondung osonong-sonong ngai’ iyolo’, om suang nogiddi iyolo’ do hiri’d kiim di Musa. ⁸ Om posunudo’ ngai’ nopo di Musa di Yitro i winonsoi’d TUHAN dot id raja’ om id tulun do Masir, do tontok di pinosoliwan dau o tulun dot Israil. Om sinunudan nogi’ dau i Yitro di kinosusaan do tulun dot Israil do hiri’d tindalanon om i kinaralan-ralano’ do TUHAN do minamasi diyolo’. ⁹ Om soira’ di norongou ngai’ di Yitro iri om osonong tomod diri o ginawo dau, ¹⁰ om boros ka dau, ’’Royohon no o TUHAN i pinopoidu’ diya’ do mantad id longon di raja’ do Masir om mantad id tulun do Masir! Royohon no o TUHAN, i pinopoidu’ do tulun dot Israil do mantad id kouripanan! ¹¹ Oilaan ku noddi do baino’ dot agayo no kopio o TUHAN ko’ mantad do koinsanai di ponokokinorohingan do suwai, tu’ winonsoi ngai’ dau o miagal diri do tontok dit ulak-ulakan kopio di tulun do Masir i tulun dot Israil,’’ ka dau. ¹² Om papatahak noddi i Yitro do piro-piro o porsombahan di sorobon om piro-piro o porsombahan di sumbolion do patahakon dot id Kinorohingan; om tanud no dau i Harun om koinsanai di boyoon dot Israil do minongoi pangakan di taakanon dot id poginakanan do maan do pomusou. ¹³ Om tadau noddi kawagu om maso di Musa do manalasai do piro-piro ot a’ kopogiuludan dot id pogialatan di tulun dot Israil, om agangau nopoddi iyau do mantad pod kosuabon om gisom do totuong. ¹⁴ Om soira’ di nokito di Yitro o koinsanai dit apatut do wonsoyon di Musa, om uhot no iyau do poingkaa, ’’Nunu ngai’ nopo iti wonsoyon nu dot id tulun dot ogumu’dti? Nokuro tu’ iso-iso’ ko do momonsoi’dti, om gisom dot ilo’ piya mongoi no pokianu do nosihat nu nga’ songingkakat nopod hiti?’’ ka dau. ¹⁵ Om boros ka di Musa do suminimbar, ’’A’ ku no milo dot a’ wonsoyon o miagal diti tu’ rumikot ngai’ nopo dot id doho’ i tulun dot orohian do koilo do korohian do Kinorohingan. ¹⁶ Soira’ nopod haro o pigulatan do duwo o tulun, om rumikot no iyolo’ dot id doho’, om iyoho’ no o momutus ondung isai diyolo’ it otopot. Om sunudan ku nondo iyolo’ do koinsanai di ponuhuan om it oturan do Kinorohingan,’’ ka dau. ¹⁷ Om boros kaddi di Yitro, ’’A’ i’ koontok o karalan-ralano’ do miagal diri. ¹⁸ Tu’ iyo nopoddi om diya’d tinan nga’ ouruan dot ohuyan, om iti tulun nga’ ongohuyan. ¹⁹ Nga’ tonudo’ pogi’ daa iti nosihat ku om woyoon ko i’ do Kinorohingan. Osonong nogi’ kopio do wokilon nu iti tulun do tumimbaba’ do Kinorohingan om porikoton nu i pogigugulatan diyolo’ dot id dau. ²⁰ Apatut nogi’ kopio do tudukan nu iyolo’ do koinsanai di ponuhuan do Kinorohingan om posuhuton nu do kowoyo-woyoon dit osonong om it apatut diyolo’d wonsoyon. ²¹ Nga’ suwai no ko’ iri, om apatut nogi’ do momili’ ko do piro-piro o tongokusai dit ongoilo, om silihon iyolo’ do boyoon di tulun: boyoon do sororibu-ribu tulun, om sorohatus-hatus, om sorolimo-limo nohopod, om sorohopod-hopod o tulun. Om iti nopo tulun do pilion nga’ it ongoronok do Kinorohingan, om i milo do ponongkuyaanan, om it a’ rumamit do ponisip. ²² Om suhuon no iyolo’ do sumiliu do gompomutus diti tulun do tumikid di sinompuruan do tulun di diyolo’d ilo-iloon. Om mositi’ no dot osonong o pomonsoi diyolo’ di karaja’ diyolo’ddi. Om iri nopo hal dit angagaan-gaan om iyolo’ no o manalasai. Om iyo nopodti om oinggaan-gaanan ko no tu’ kouhup noddi iyolo’ diya’. ²³ Ondung wonsoyon nu’ti ponuhuan do Kinorohingan diti, om a’ ko no adalaan dot ohuyan, om iti tongoulun nga’ ongkouli’ no do mikuwo dot osimbayan o ginawo tu’ angasalasai no i pogigugulatan diyolo’,’’ ka dau. ²⁴ Om tonudo’ no di Musa i nosihat di Yitro, ²⁵ om pomili’ no iyau do tongokusai dit ongoilo dot id pogialatan di tulun dot Israil. Om siniliu dau iyolo’ do boyoon do sororibu-ribu o tulun, om sorohatus-hatus, om sorolimo-limo nohopod, om sorohopod-hopod o tulun. ²⁶ Om nosiliu’ddi iyolo’ do gompomutus do tulun do solinaid diyolo’ do poimpasi. Om iri nopo hal dot angawagat om porikoton i’ diyolo’ dot id di Musa, nga’ iri nopo it agaan-gaan om iyolo’ no o manalasai. ²⁷ Om pologoso’ noddi di Musa i Yitro do minamanau, om uli’ no i Yitro do hilo’d pomogunan dau.

¹ - ² Om tongkiad noddi i tulun dot Israil do hilo’d Rapidim, om tontok di tadau do koiso’ do tulan di kotolu, do mantad di kinotongkiadan diyolo’ do hilo’d Masir, om korikot no iyolo’ do hilo’d tana’ do kowotuan do Sinai. Om powonsoyo’ no diyolo’ o kiim diyolo’ do hiri’d guas di Nuluhon do Sinai. ³ Om takad no i Musa di Nuluhon do Sinai do mongoi solowot do Kinorohingan. Om lohowo’ nod TUHAN i Musa do mantad hiri’d nuluhon diri, om suhuo’ no iyau do popoboros dot id tulun dot Israil, i sinakagon di Yakub, diti boros do poingkaa, ⁴ ’’Nokokito kou i’ di winonsoi ku, iyoho’ i TUHAN, dot id tulun do Masir, om i kinowoyo-woyoo’ ku do pinoporikot dokoyu dot id doho’ dot id kinoiyonon diti do mikuwo’d kuasa’ dit agayo, do miagal di kondiu do papasakai di tanak dau do hiri’d talad dau. ⁵ Baino’ nopondo, om ondung mumboyo’ kou doho’ om otorodok kou dot id tumpongo ku, om osiliu kou no do tulun ku. Doho’ ngai’ idti pomogunan, nga’ iyokoyu no o tulun di pinili’ ku, ⁶ i tulun di nokotobilang do maan ku do doho’d tulun, om osiliu kou nondo dot imam do momonsoi do karaja’ ku,’’ ka dau. ⁷ Om ruhuk noddi i Musa om lohowo’ ngai’ no dau i boyoon di tulun om sunudai no dau iyolo’ do koinsanai di pinonuhuan do TUHAN dot id dau. ⁸ Om oinsanan nopoddi i tulun do suminimbar do poingkaa, ’’Wonsoyon ngai’ i’ dahai i nongkoboros do TUHAN,’’ ka diyolo’. Om posunudo’ no di Musa dot id TUHAN i pinosimbar diyolo’ddi. ⁹ Om boros kad TUHAN dot id di Musa, ’’Rumikot oku nondo dot id diya’ do pokuluput do haun dit akapal, om korongou ngai’ i’ ilo tulun doho’ do monokiboro-boros diya’, om mantad nopondoddi om monongkuyaan kasai’ nondo iyolo’ diya’,’’ ka dau. Om sunudai no di Musa o TUHAN di pinosimbar ngai’ di tulun, ¹⁰ om boros kad TUHAN dot id dau, ’’Ongoi solowot ngai’ di tulun om sunudan no iyolo’ do momolidang do tinan diyolo’ do baino’ om suab, tu’ sumodia’ do mongoi sambayang. Suhuon no iyolo’ do momupu’ do pakayan diyolo’, ¹¹ om mositi’ no do kosodia’ iyolo’ do suabdiino. Tu’ tadau nopoddi om lumintuhun oku do hilo’d Nuluhon do Sinai, om kokito ngai’ i’ doho’ i tulun. ¹² Wansayan nod tanda’ o posorili’ di nuluhon, om iri no o ponokowolit dot a’ di tongoulun koino-ino do tolibambanan. Om sunudan no iyolo’ dot a’ tumakad di nuluhon om a’ mongoi insomok diri. Ondung haro o tulun do kotolibamban di tanda’ diri, om patayon nopo; ¹³ do dumpahon tuu do watu ko’ panaon do mamatai i tulun, nga’ kada’ no do haro o koigit dau. Iyoon ngai’ nopoddi o tulun om nintorusan; tu’ koinsanai di tumolibamban di tanda’ diri om mositi’ no do hukuman do kapatayon. Nga’ kouni nopondo i torumpit om mositi’ no do tumakad ngai’ i tulun,’’ ka dau. ¹⁴ Om ruhuk no i Musa di nuluhon om sunudai ngai’ no dau i tulun do sumodia’ do mongoi sambayang. Om pupuwai no diyolo’ o pakayan diyolo’, ¹⁵ om boros ka di Musa dot id diyolo’, ’’Mositi’ no do kosodia’ kou dot orikot o suabdiino, om kada’ kou ongoi dudun do tongoondu’ do daamot podti,’’ ka dau. ¹⁶ Tontok di kosuabon do tadau’d kotolu om haro’ddi o tinggoron om kodumaat. Om imbulai no o haun dot akapal do hiri’d sakai di nuluhon, om haro o tuni do torumpit dot opuhod do norongou diyolo’. Om sanggagaran ngai’ poddi do moddosi i tulun do hiri’d kokiiman. ¹⁷ Om woyoo’ no iyolo’ di Musa do sumoliwan do mantad hiri’d kokiiman do mongoi solowot do Kinorohingan. Om songingkakat diri iyolo’ do hiri’d guas di nuluhon. ¹⁸ Om nolikupan pod lisun i nuluhon do Sinai, tu’ luminintuhun o TUHAN do hiri dot id suang do sinikit do tapui. Om miagal pod lisun do modtutud i lisun do muntu-nguntu’ do minsawat. Om oinsanan nopo i tulun do pananggagaran tomod do moddosi. ¹⁹ Om muhod-puhod diri i tuni di torumpit. Om moro-boros no i Musa om simbaron no iyau’d Kinorohingan do miwoyo’ do tinggoron. ²⁰ Om lintuhun no o TUHAN do hiri’d timpak di Nuluhon do Sinai om lohowo’ no dau i Musa do mongoi do hiri’d timpak di nuluhon diri. Om sigampot noddi i Musa, ²¹ om boros kad TUHAN dot id dau, ’’Ruhuk po do mongoi popoinsan dilo tulun dot a’ tumolibamban di tanda’ do mongoi ontong doho’; tu’ ondung tumolibamban iyolo’ om ogumu’ nondo ot apatai diyolo’. ²² Om iri piya tongoimam nga’ apatut i’ do momolidang pod tinan diyolo’ do mongoi no iyolo’ insomok doho’, tu’ a’ nopo nga’ hukuman ku no iyolo’,’’ ka dau. ²³ Om boros ka di Musa dot id TUHAN, ’’A’ i’ katakad ilo tongoulun tu’ sinuhu’ nu i’ iyahai do pokolidang diti nuluhon om momonsoi do tanda’ do posorili’ diti,’’ ka dau. ²⁴ Om boros kad TUHAN do suminimbar, ’’Ruhuk po, om powoyoon i’ i Harun do kumaa’d hiti. Nga’ iri nopo i tongoimam om i tulun dot ogumu’ om a’ i’ koino-ino do tumolibamban diti tanda’ do mongoi do hiti’d doho’. Tu’ tumolibamban nopo iyolo’ om hukuman ku no iyolo’,’’ ka dau. ²⁵ Om ruhuk noddi i Musa do hiri’d tulun dot ogumu’ om sunudai no dau iyolo’ di pinoboros do TUHAN.

¹ Om boro-boros noddi o Kinorohingan, om iti no ngai’ i pinoboros dau, ² ’’Iyoho’ no o TUHAN, i Kinorohingan dokoyu, i pinoposoliwan dokoyu do mantad hilo’d Masir, i kinoiyonon do siniliu kou do turipon. ³ Kada’ kou sambayang dot id kinorohingan do suwai, suwai ko’ id doho’ noo o sambayangan. ⁴ Kada’ kou pomonsoi do tininganak do poiyoon do nunu nopo i hilo’d tawan, ko’ i hiti’d pomogunan, ko’ i hilo’d waig dot id saalom diti tana’. ⁵ Kada’ kou otud do tumuku’ dot id tingolig om kada’ kou sambayang dot id tingolig diri, tu’ iyoho’ no o TUHAN, i Kinorohingan dokoyu, om mada’ oku i’ do haro o mongoi iyo-iyo doho’. Iri nopo tulun dit araatan doho’ om hukuman ku no do gisom do sinakagon diyolo’ di kointolu om koingapat. ⁶ Nga’ pointalangan ku i’ do kosianan ku i piro-piro noribu o sinakagon do tulun dit osianan doho’ om i mumboyo’ dot oturan ku. ⁷ Kada’ dokoyu roito’ o ngaran ku dot araat o kopomoroitan. Tu’ iyoho’ no i TUHAN, i Kinorohingan dokoyu, o momohukum dot isai nopo i kasala’ o pamamakai do ngaran ku. ⁸ Poinggoyoon no o tadau’d Sabat om pokolidangon no o tadau’ddi. ⁹ Nonuan kou dot onom o tadau do kakarajaan dokoyu, ¹⁰ nga’ iri nopo tadau’d koturu’ om tadau do koundarangan, om i nokotobilang do doho’d tadau. Tontok nopo do tadau’ddi om kada’ nod haro o tongoiso’ piya do tulun do kumaraja’, dot iyokoyu tuu ko’ i tangaanak dokoyu, ko’ i turipon dokoyu, ko’ i tayam-tayam dokoyu, ko’ i tulun do bansa’d suwai di poingiyon dot id pomogunan dokoyu. ¹¹ Onom no tadau ku, iyoho’ i TUHAN, do minomonsoi diti pomogunan, om tawan, om rahat, om koinsanai dit id suang ngai’ddi, om tontok di tadau do koturu’ om undorong oku noddi. Om iri no o kinapamarakatan ku, iyoho’ i TUHAN, di tadau’d Sabat om kinopotobilangan ku’ddi do doho’d tadau. ¹² Pusohon no o tapa’ om tina’ dokoyu, om otogui kou i’ do poingiyon do hilo’d pomogunan di patahakon ku dokoyu. ¹³ Kada’ kou pamatai. ¹⁴ Kada’ kou pagampahu’. ¹⁵ Kada’ kou panakau. ¹⁶ Kada’ kou popoboros dit a’ otopot do papasala’ do tulun do suwai do tontok dot onuon kou do sasi’. ¹⁷ Kada’ nod haro o ginawo dokoyu do sianu di dombokon: dot iri tuu i walai diyolo’, ko’ i sawo diyolo’, ko’ i turipon diyolo’, ko’ i tayam-tayam diyolo’, ko’ i kaladai diyolo’, ko’ nunu nopo i haro dot id diyolo’,’’ ka dau. ¹⁸ Tontok di norongou di tulun dot ogumu’ i tinggoron om i tuni di torumpit, om di nokito diyolo’ i kodumaat om i nuluhon do mogolisun, om pananggagaran poddi iyolo’ dot opopoddosian, om hiri’ddi iyolo’d sodu’ do songingkakat. ¹⁹ Om boros ka diyolo’ dot id di Musa, ’’Ondung iya’ o moro-boros dahai om mokinongou i’ iyahai; nga’ TUHAN nopo o moro-boros dahai om ooris i’ iyahai dot apatai’,’’ ka diyolo’. ²⁰ Om boros ka di Musa do suminimbar, ’’Kada’ kou kooris tu’ kinorikatan nopo do Kinorohingan om mogumbal no dokoyu, om mumboyo’ kasai’ kou indo dau, om a’ kou i’ kopomonsoi do dusa,’’ ka dau. ²¹ Nga’ hiri kasai’ id sodu’ o ningkakat di tulun dot ogumu’, om i Musa noo o minongoi insomok di haun dot otuong, i kinoiyonon do Kinorohingan. ²² Om suhuo’ no do TUHAN i Musa do popoboros dot id tulun dot Israil do boros do poingkaa, ’’Nokokito kou noddi ondung poingkuro oku, iyoho’ i TUHAN, do minoro-boros dokoyu do mantad hilo’d surga. ²³ Kada’ kou pomonsoi do ponokokinorohingan do pirok ko’ tamas o wonsoyon do maan dokoyu do sambayangan do suwai ko’ iyoho’. ²⁴ Momonsoi kou no do pananaraban do porsombahan dot id doho’, dot ilo tana’ o wonsoyon, om poilihon nogindo do hiri i dumba’ om i sapi’ dokoyu do maan do porsombahan di sorobon om porsombahan do pogiombolutan. Om honggo nopo o kinoiyonon di tontuon ku dot iyonon dokoyu do sumambayang dot id doho’, om rumikot oku no dot id dokoyu do mongoi pamarakat dokoyu. ²⁵ Ondung watu o wonsoyon dokoyu do pananaraban do porsombahan dot id doho’, om kada’ dokoyu sangkapo’ i watu tu’ ondung mamakai kou do sangkap do pamabak di watu, om a’ nori milo do pakayon do maan do panaraban do porsombahan dot id doho’. ²⁶ Kada’ kou pomonsoi do pananaraban do porsombahan dot id doho’ dit asawat, i minog om tukadan, om a’ i’ okito i bohogian do tinan dokoyu dit a’ osorupai dot okito,’’ ka dau.

¹ Om boros kaddi do TUHAN dot id di Musa, ’’Patahakon no iti piro-piro o toturan dot id tulun dot Israil: ² Soira’ nopo do momoli kou do tulun di sompi’ ko’ bansa’ dot Ibrani do silihon do turipon om onom no toun dau dot apatut do silihon dokoyu do turipon. Om koturu’ nopondo do toun om mositi’ no do polobuson dokoyu iyau om a’ no iyau minog do mambayar do nunu-nunu dot id dokoyu. ³ Ondung aiso’ po o sawo dau di nosiliu i’ iyau do turipon dokoyu, om a’ i’ dau atanggayan i sawo dau di polobuson dokoyu iyau; nga’ ondung nakasawo no iyau di nosiliu i’ dokoyu iyau do turipon, om atanggayan no dau i sawo dau di polobuson dokoyu iyau. ⁴ Ondung nonuan iyau di tuan dau do sawo, om paganak noddi i sawo dau, om iri nopo sawo dau’ddi om i tangaanak dau om iri kasai’ po tuan dau o sanganu, om iso’ no i turipon o polobuson. ⁵ Nga’ ondung poboroson di turipon diri dot osianan iyau di sawo dau om i tangaanak dau, om i tuan dau, om mada’ no do polobuson, ⁶ om mositi’ no do ngoyon iyau di tuan dau hirio’d tiyonon do sumambayang. Om hiri nondo do suhuon di tuan i turipon dau’ddi do mingkakat do poinsondiu di totobon ko’ i tisan di wawayaan, om luangan nondo di tuan o tolingo di turipon dau. Om osiliu nondo iyau do turipon di tuan diri do solinaid dau do poimpasi. ⁷ Ondung haro o tulun do padagang di tanak dau’d tondu’ do silihon do turipon, om a’ no i tondu’ddi kalabus do katalib piya ot onom o toun; om miagal iddi o turipon do kusai. ⁸ Ondung padagangon i tondu’ dot id kusai di haro o ginawo do mangawin dau, nga’ a’ indo orohian i kusai di tondu’ diri, om mositi’ no do padagangon kawagu di kusai i tondu’ddi dot id tapa’ di tondu’. A’ i’ koino-ino do padagangon di kusai i tondu’ddi dot id tulun do bansa’d suwai tu’ a’ i’ otulid o winonsoi dau dot id tondu’ddi. ⁹ Ondung haro o tulun do momoli do turipon do tondu’ do silihon dau do sawo di tanak dau’d kusai, om mositi’ no dot iyoon dau do dau’d tanak i tondu’ddi. ¹⁰ Ondung manansawo kawagu i kusai’ddi, om mositi’ no dot onuan kasai’ dau i sawo dau dit id gulu do taakanon om pakayan om it apatut dot aanu di sawo dau’ddi do miagal di timpuun i’. ¹¹ Ondung a’ dau wonsoyon o tonggungan dau do miagal diri, om mositi’ no do polobuson dau i sawo dau dit id gulu diri, om a’ i’ kabayar i tondu’ddi do nunu-nunu dot id dau,’’ ka dau. ¹² Om boros ka kawagu do TUHAN dot id di Musa, ’’Isai nopo o momobog do tulun do gisom dot apatai i bobogon dau, om iyau nga’ hukuman no do kapatayon. ¹³ Nga’ ondung a’ daa dau tinomod do momobog i tulun diri, om aiso’ o ginawo dau do mamatai, om milo i’ iyau do mogidu’ dot id kinoiyonon di potudukon ku dokoyu, om hilo’ nopondo om aiso’ no o ligogon dau. ¹⁴ Nga’ ondung haro o tulun do tumogod om tomodon dau do mamatai o tulun do suwai, om hukuman nod kapatayon i tulun di minamatai do mulong piya do koongoi daa iyau do hiri’d pananaraban do porsombahan dot id doho’ do mongoi pokiintirung. ¹⁵ Isai nopo o momobog do tapa’ ko’ tina’ dau, om mositi’ no do hukuman do kapatayon. ¹⁶ Isai nopo o mongoi pononggoi do tulun do maan tuu pobolio’ ko’ maan po dau’d turipon, om mositi’ no do hukuman do kapatayon. ¹⁷ Isai nopo o momopol do tapa’ ko’ tina’ dau om mositi’ no do hukuman do kapatayon. ¹⁸ Ondung haro o miuhod, om dumpahon no di songulun do watu i tiso’ ko’ tumbukan po dau, nga’ a’ indo apatai, om a’ i’ hukuman o tulun diri. Nga’ ondung gisom dot a’ koundaliu i tulun do binobog diri, ¹⁹ nga’ alaid-laid nopondo om koingkakat indo om kapanau do mononsukud do mongoi’d hiri’d soliwan, om iri no tulun di minomobog dau o mambayar do korugian do solinaid dau dot a’ nakakaraja’, om iyau o momogompi’ di tulun diri do gisom do kosonong kawagu iyau. ²⁰ Isai nopo o momobog di turipon dau do tondu’ ko’ kusai, gisom dot apatai do diiri om diiri, om hukuman no o tulun diri. ²¹ Nga’ ondung a’ apatai i turipon diri do sangadau-ngadau poo ko’ duwo-duwo po tadau, om a’ i’ hukuman i tuan diri. Ula’ no do sumiliu do hukuman dau i natagakan iyau di turipon dau’ddi. ²² Ondung haro o piro-piro tongokusai do mogiuuhod om haro nondo o tiso’ diyolo’ do kopokoruol do tondu’ di monontian, gisom dot oiduan i tondu’ddi, nga’ aiso’ i’ o toruol do suwai di tondu’ddi, om apatut no do mambayar o tulun diri do danda’ do songkuro nopo i pokionuon di sawo di tondu’ om it ookunan do tongogompomutus. ²³ Nga’ ondung i tondu’ddi ot orualan, om pomohukum nopo om ginawo no o pomolokop do ginawo, ²⁴ om mato o pomolokop do mato, om nipon o pomolokop do nipon, om longon o pomolokop do longon, om gakod o pomolokop do gakod, ²⁵ om suhat o pomolokop do suhat, om sorobon o pomolokop di nosorob, om lonit o pomolokop do lonit. ²⁶ Isai nopo o monodsok do mato di turipon dau’d kusai ko’ i turipon dau’d tondu’, gisom dot obolou i turipon diri, om mositi’ no do polobuson i turipon diri do pomogontok di mato dau. ²⁷ Ondung haro o momobog do turipon dau do gisom dot ouud o nipon di turipon diri, om mositi’ no do polobuson i turipon diri do pomogontok di nipon dau di nouud,’’ ka dau. ²⁸ Om boros ka kawagu do TUHAN dot id di Musa, ’’Ondung haro o sapi’ do tontoluhan do monungu do tulun, gisom dot apatai i tulun diri, om mositi’ no do dumpahon do watu i sapi’ddi do gisom dot apatai, om a’ no koino-ino dot akanon i tonsi di sapi’; nga’ a’ i’ hukuman i sanganu di sapi’. ²⁹ Ondung asaru’ no do koponungu do tulun i sapi’ddi om nosunudan no i sanganu, nga’ a’ i’ di sanganu pakandangon i sapi’ — om koponungu nopo kawagu i sapi’ddi do gisom dot apatai i sunguon, om turubukon nopod watu i sapi’ do gisom dot apatai, om iri nogi’ i sanganu nga’ mositi’ nod hukuman nopo do kapatayon. ³⁰ Nga’ ondung pabanaron i sanganu do mambayar do danda’ do pamasi do tinan dau, om mositi’ no do bayaran ngai’ i danda’ do songkuro nopo i pokionuon. ³¹ Ondung koponungu i sapi’ do tanak do kusai ko’ tanak do tondu’ do gisom dot apatai i sinungu, om iyo iddi o pongoturan. ³² Ondung koponungu i sapi’ do turipon do kusai ko’ tondu’, gisom dot apatai i sinungu, om mositi’ nod bayaran di sanganu di sapi’ i tulun do sanganu di turipon diri do tolu nohopod o kaping do pirok, om i sapi’ nga’ dumpahon do watu do gisom dot apatai. ³³ Ondung haro o tulun do mongoi pongidu’ do sompon do torobong, ko’ ondung mongukad iyau do torobong om a’ indo somponon, om aratu’ nondod hiri o sapi’ ko’ kaladai, ³⁴ om mositi’ nod bayaran dau i sanganu di tayam-tayam diri. Nga’ iri nopo tayam-tayam di napatai’ddi om iri i sanganu di tayam-tayam di napatai o kaanu. ³⁵ Ondung haro o songulun do kisapi’ do gonsukod, om kapamatai nod sapi’ do gonsukod do tulun do suwai i sapi’ dau’ddi, om mositi’ nod padagangon di duwo o tulun i sapi’ di poimpasi om piduwoon diyolo’ i gatang; om iri tonsi di sapi’ di napatai nga’ piduwoon i’ diyolo’. ³⁶ Nga’ ondung nopiila-ilaan no do monunungu do sapi’ i sapi’ do gonsukod diri, om a’ iddi di sanganu pinakandang i sapi’, om mositi’ no do bayaran dau do songinan o sapi’ do tontoluhan di miyau i sanganu di sapi’ do napatai’ddi. Nga’ iri no i minambayar o kaanu di sapi’ di napatai,’’ ka dau.

¹ Om boros ka kawagu’d TUHAN dot id di Musa, ’’Ondung haro o tulun do manakau do songinan o sapi’ ko’ songinan o dumba’, om sumbolion nondo dau iri ko’ maan padagango’, om korugi’ nopo dau om limo o sapi’ do poningolon di songinan o sapi’ di pinanakau, om apat o dumba’ do poningolon di songinan o dumba’ do pinanakau. ² - ⁴ Mositi’ no do tingalanan dau i pinanakau dau. Om ondung aiso’ o nunu- nunu do poningolon dau, om dagangon no iyau do silihon do turipon do poningolon di nongoi dau panakaho’. Ondung poimiyau po i tayam-tayam do pinanakau dau, do sapi’ tuu ko’ kaladai, ko’ dumba’, dot abantalan do hiri’d dau, om mositi’ no do duwo o tinan do patahakon dau do poningolon do songinan di pinanakau dau. Ondung haro o tulun do manakau om okosupan do monoruang do walai do dongotuong, om apatai nondo iyau, om a’ i’ kasala’ i minamatai dau. Nga’ dangadau nopo do haro o tiyo’ddi, om kasala’ no i minamatai. ⁵ Ondung haro o tulun do papaakan-akan do tayam-tayam dot id dumo ko’ id kabun dot anggur om minsodu’ no i tayam-tayam diri om koongoi nondo kapangakan di tanom-tanom do hiri’d tumo do tulun do suwai, om mositi’ no do bayaran dau i nangaakan, do pambayar nopo om i tua’ di tanom-tanom do mantad hiri’d tumo dau ko’ i hiri’d kabun dot anggur dau. ⁶ Ondung haro o tulun do modtutud do hiri’d tumo dau om rumalad nori dot id tumo do tulun do suwai, tu’ opurokitan di sakot do hiri’d piolitan, om osorob nondo i gandum di piintangaan nogi’ do sumuni ko’ i koomot om it a’ po narangkat, om iri no i minodtutud o mambayar do korugian di sanganu. ⁷ Ondung haro o tulun do kaakun do popoopi’ do tusin ko’ barang dit agayo o gatang do tulun do suwai, om apanakau nori do hiri’d walai dau, om ondung okito i minanakau, om induwo nondo koirad di pinanakau o bayaran di tulun di minanakau’ddi. ⁸ Nga’ ondung a’ okito i minanakau, om angatan no i tulun di pinopoopi’ di barang dot agayo gatang diri do hiri’d tiyonon do sumambayang. Om hiri nondo iyau do sumumpa’ dot a’ iyau minanakau di barang diri. ⁹ Id suang nopo do nunu nopo o pigulatan do pasal do dapu’, do sapi’ tuu ko’ kaladai, ko’ dumba’, ko’ pakayan, ko’ nunu nopo o barang di natagak, nga’ nokito iddi kawagu, om iri nopo duwo o tulun di miahau do manansanganu’ddi om mositi’ no dot angatan dot id tiyonon do sumambayang. Om iri nopondo i pointalangon do Kinorohingan do nakasala’ om mositi’ no do mambayar dot induwo kogumu’ dot id tulun di ponokiahau dau. ¹⁰ Sokiro nopo do haro o tulun do mangakun do momogompi’ do kaladai, ko’ sapi’, ko’ dumba’, ko’ tayam-tayam di wokon o sanganu, om apatai nondo ko’ orualan i tayam-tayam diri, ko’ atanggayan do manakau, om ondung aiso’ o sasi’, ¹¹ om mositi’ no do mongoi i tulun diri do hiri’d tiyonon do sumambayang om sumumpa’ dot a’ iyau minanakau di tayam-tayam di pinokigompian do tulun do suwai dau’ddi. Ondung a’ napanakau i tayam-tayam diri, om mositi’ no do tonggungon di sanganu o korugian, om a’ i’ minog do mambayar dot id dau i tulun do minomogompi’ddi; ¹² nga’ ondung napanakau i tayam-tayam diri, om mositi’ no do bayaran di minomogompi’ i sanganu’ddi. ¹³ Ondung napatai i tayam-tayam diri do nintorusan dot orongit o minamatai, om mositi’ no dot igitan di minomogompi’ i noolu-olu’ do tinan di tayam-tayam do maan do popointalang kopio; om a’ i’ iyau kabayar di tayam-tayam di napatai do nintorusan dot orongit diri. ¹⁴ Ondung haro o tulun do molos dot ongoiso’ do tayam-tayam do tulun do suwai, om orualan nondo ko’ apatai iri do tontok dit a’ hino’d hiri i sanganu, om mositi’ nod bayaran di minolos i tayam-tayam diri. ¹⁵ Nga’ ondung osiliu o miagal diri do hino i sanganu, om a’ i’ minog do mambayar i minolos. Ondung posisiwaan i tayam-tayam diri, om id suang ngai’ no di pinoniwa’ o pambayar di korugian dau,’’ ka dau. ¹⁶ Om boros ka kawagu’d TUHAN dot id di Musa, ’’Ondung haro o kusai do mongoi pagampahu’ do sumandak dit aiso’ po o tunang, om mositi’ no do bayaran dau i topungon om kowinon dau i tondu’ddi. ¹⁷ Nga’ ondung mada’ i tapa’ di sumandak do kowinon di kusai i tanak dau’ddi om mositi’ no do bayaran di kusai i tapa’ di tondu’ddi do tusin dot irad do nopung do sumandak. ¹⁸ Mositi’ no do patayon o koinsanai’d tongoondu’ di bobolian. ¹⁹ Mositi’ no do patayon o koinsanai’d tulun di mongoi pagampahu’ do nintorusan. ²⁰ Isai nopo o tulun di papatahak do porsombahan di sumbolion dot id kinorohingan do suwai ko’ iyoho’, i TUHAN, om mositi’ no do hukuman do kapatayon. ²¹ Kada’ dokoyu ulak-ulakai om kada’ dokoyu inggorito’ o tulun do bansa’d suwai; soroho’ pogi’ dokoyu nga’ nokoumbal kou i’ do sompogunan do hilo’d Masir di gulu po. ²² Kada’ dokoyu ulak-ulakai ot isai nopo o tondu’ do nopuadan ko’ tanak dit aiso’ o molohing. ²³ Tu’ ondung ulak-ulakan dokoyu iyolo’ om iyoho’ indo, i TUHAN, o sumimbar diyolo’ do tontok do minggiak iyolo’ do mokitulung. ²⁴ Om otogod oku moti’ndo dokoyu om patayon ku iyokoyu dot id pisangadan. Om osiliu nondo do tongoondu’ do nopuadan o sawo dokoyu om tangaanak dokoyu nga’ aiso’ nondo o tapa’. ²⁵ Ondung poolos kou do tusin dot id isai nopo o tulun ku di mosikin, om kada’ kou omit di tulun di miuhot do tutang tu’ mokianu do bunga di tusin. ²⁶ Ondung manganu kou do kurilib do tulun do maan do sanda’ do bayaran kopio ko dau, om mositi’ no do pogulion dokoyu kawagu i kurilib diri dot id dau dot a’ po otonob o tadau, ²⁷ tu’ iri po i kurilibon dau do pongillasu-lasu’ do tinan dau. Nunu po daa’ndo o kumuton dau do modop? Ondung lumohou iyau doho’ do mokitulung, om simbaron ku i’ iyau tu’ obinsianan oku i’. ²⁸ Kada’ kou pomopol do Kinorohingan om kada’ kou pongusung do boyoon do bansa’ dokoyu. ²⁹ Patahakon no dot id doho’ do maan do porsombahan o wookon di gandum, om waig dot anggur, om tumau do saitun do tontok di maso do natantu’ mantad. Patahakon no dokoyu dot id doho’ i tangaanak dokoyu’d kusai dit id gulu kosusu. ³⁰ Patahakon no dokoyu dot id doho’ i tanak do sapi’ om dumba’ dokoyu dit id gulu kosusu. Pologoson po i tanak do tontoluhan dit id gulu kosusu do tumanud di molohing dau’d tondu’ do solinaid do turu’ o tadau, nga’ kawalu’ nopondod tadau om patahakon no doho’ iri do maan do porsombahan di sumbolion. ³¹ Iyokoyu nopo om tulun ku, om kada’ kou pangakan do tonsi do nunu nopo o nintorusan di pinatai do nintorusan dot orongit; patahakon nogi’ iri do tasu,’’ ka dau.

¹ Om boros ka kawagu’d TUHAN dot id di Musa, ’’Kada’ kou popimboros do boros dit a’ otopot, om kada’ kou popoboros dit a’ otopot do pogobi’ di tulun di kisala’. ² Kada’ kou ponokitanud di tulun dot ogumu’ do tontok do momonsoi iyolo’ di kasala’ ko’ di sumiliu iyolo’d sasi’ di goudut, gowoi pondo om a’ owonsoi it otulid. ³ Kada’ panampaping do tulun do mosikin do tontok do butusan iyau. ⁴ Ondung aampapan nu nod okito i sapi’ ko’ kaladai di pisangod nu do nokoidu’, om ngoyon no pogulio’ iri dot id dau. ⁵ Ondung kogupu’ i kaladai di pisangod nu dot awagatan kopio do ginandar, om uhupan no i pisangod nu do popoingkakat kawagu di kaladai dau; kada’ pamanau tomod do tumalib. ⁶ Kada’ olimo’ it otopot dot id tulun do mosikin do tontok do popoboros iyau di pokisalasayan dau dot id kut. ⁷ Kada’ ponondos dot a’ otopot, om kada’ hukumai do kapatayon o tulun dit aiso’ o sala’, tu’ usungon ku moti’ o tulun di momonsoi dot iyo kopio’ddi karaat. ⁸ Kada’ ramit do tusin di maan do ponisip, tu’ iri nopo i ponisip diri nga’ kosompon do mato do tulun, gisom dot a’ nondo iyolo’ kokito ondung honggo it otopot om aiso’ nondo o kotutuk-tutukon di pokisalasayan do tulun dit aiso’ o sala’. ⁹ Kada’ ulak-ulakai o sompogunan; tu’ koilo kou i’ ondung okuro-kuro ot opurimanan do sompogunan, tu’ nokoumbal kou i’ do sompogunan di hilo’d Masir di gulu po,’’ ka dau. ¹⁰ Om boros ka kawagu’d TUHAN dot id di Musa, ’’Solinaid nopo dot onom o toun om momutanom-tanom kou no do hiri’d tana’ dokoyu om omoton no i tua’ di tinanom dokoyu. ¹¹ Nga’ koturu’ nopo do toun om kada’ no kopio dokoyu tanamai i tana’, om kada’ no dokoyu omoto’ o tua’ do nunu nopo i songinsuni’d hiri. Nga’ iri nopo tulun do mosikin om koino-ino i’ do mongoi panganu di songinsuni’d hiri, om pologoson nopo i nintorusan do mongoi pangakan di noolu-olu’. Om i kabun dot anggur om i kabun do saitun nga’ iyoon nogiddi. ¹² Id suang nopod sominggu om kumaraja’ kou no do solinaid dot onom o tadau, nga’ koturu’ nopod tadau om kada’ kou no karaja’, om koundorong i’ i turipon, om i tulun do bansa’d suwai di kumaraja’ dot id dokoyu, om iri nogi’ i tayam-tayam dokoyu. ¹³ Pokinongohon no o koinsanai di pinoboros ku dot id dokoyu, iyoho’ i TUHAN dokoyu. Kada’ kou sambayang dot id kinorohingan do suwai; om rumait piya do ngaran diyolo’ nga’ a’ i’ koino-ino,’’ ka dau. ¹⁴ Om boros ka kawagu’d TUHAN dot id di Musa, ’’Ramayon no dokoyu o tolu o Tadau dot Agayo dot id suang do sontoun do pomusou doho’. ¹⁵ Id suang nopo do tulan dot Abib, i tulan di kinosoliwanan dokoyu do mantad hilo’d Masir, om ramayon no i Tadau’d Agayo do Roti dit A’ Kipangambang do tumanud di kowoyo-woyoon do mamaramai do pinonuhuan ku dokoyu. Kada’ kou pangakan do nunu nopo o roti di naralatan do pangambang do solinaid di turu’ o tadau do karamayan diti. Kada’ kou nogi’ kopio umbal do mongoi sambayang dot id doho’ dot aiso’ o porsombahan dot igitan dokoyu. ¹⁶ Ramayon no dokoyu i Tadau dot Agayo do Dongmongomot do tontok do tumimpuun kou do mongomot do tua’ di tinanom dokoyu. Ramayon no dokoyu o Tadau dot Agayo do Kinuhub-Kuhub do kooyi-oiyon do toun, di mongupu’ kou do tua’ dot anggur om tua’ di kouwaan dokoyu. ¹⁷ Pointikid-tikid do toun do koontok diti tolu o tadau dot agayo diti om mositi’ no do mongoi ngai’ i kokusayan dokoyu sambayang dot id doho’, i TUHAN, i Kinorohingan dokoyu. ¹⁸ Kada’ kou papatahak do roti di naralatan do pangambang do maan do porsombahan, do tontok do papatahak kou dot id doho’ do tayam-tayam do maan do porsombahan di sumbolion. Iri nopo lunok di tayam-tayam di patahakon dot id doho’ do maan do porsombahan do tontok do tadau dot agayo diti om a’ no koino-ino do poingolu’ do gisom do kosuabon. ¹⁹ Migit kou no di gandum dit id gulu dokoyu koomot do hilo’d walai do TUHAN, i Kinorohingan dokoyu, do pointikid-tikid do toun. Kada’ kou pogonsok do dumba’ ko’ kambing dit okoro’ po dot i gatas di molohing di dumba’ ko’ i kambing o pogonsok,’’ ka dau. ²⁰ Om boros ka kawagu’d TUHAN dot id di Musa, ’’Monuhu’ oku indo do moloikat do mogulu dokoyu do mongintirung dokoyu do tontok di manau-panau kou, om momoyo’ dokoyu do kumaa dot id tiyonon di nokosodia’ mantad ku. ²¹ Mokinongou kou no om mumboyo’ kou no dau, om kada’ kou saap dau, tu’ iyau no i sinuhu’ ku, om a’ no iyau mangampun di sumaap dau. ²² Nga’ ondung mumboyo’ kou dau om wonsoyon ngai’ dokoyu i ponuhuan ku, om iyoho’ indo o sumaap do koinsanai di pisangod dokoyu. ²³ Iri indo moloikat ku o mogulu dokoyu om paatod dokoyu do hilo’d pomogunan do tulun dot Amori, Hit, Poris, Kanaan, Howi, om Yobus. Om patayon ngai’ ku nopondo iyolo’. ²⁴ Kada’ kou otud do tumuku’ dot id ponokokinorohingan diyolo’, om kada’ kou omit di kowoyo-woyoon diyolo’d sumambayang. Raagon no dokoyu i ponokokinorohingan diyolo’ om tipuon ngai’ no i torigi di pakayon diyolo’ do sumambayang. ²⁵ Ondung sumambayang kou dot id doho’, i TUHAN om Kinorohingan dokoyu, om barakatan ku indo iyokoyu do taakanon om waig do tinumon, om lingoson ku o koinsanai do toruo-ruol dokoyu. ²⁶ Hilo’ nopondod pomogunan dokoyu om aiso’ no o tondu’ dot oiduan di ponontianon dau om aiso’ it a’ maganak. Om potoguyon ku po iyokoyu. ²⁷ Popoddosion ku nondo doho’ i tulun di sumaap dokoyu; om porikatan ku nondo do kagangahan i tulun di ponokisangod dokoyu, om popoggiduon ngai’ ku i pisangod do mantad id dokoyu gisom do santangkus-tangkus pondo iyolo’ do muli’ om mogidu’. ²⁸ Gangahon ngai’ ku nondo i pisangod dokoyu; om uyungon ku i tulun do Howi, om Kanaan, om Hit, om kolombus kou i’ do mamanau. ²⁹ Nga’ a’ ku i’ iyolo’ insan-insanan do monguyung dot id suang do sontoun; tu’ ondung wonsoyon ku o miagal diri, om otongkiadan tomod nopondo i tana’, om iri tomod indo i nintorusan ot ounsamangan. ³⁰ Nga’ borinuton ku iyolo’ do monguyung, do gisom do kogumu’ kou do sumanganu di tana’. ³¹ Om paraladon ku nondo i wolit do tana’ dokoyu do mantad hilo’d Suok dot Akaba om gisom do korikot di Bawang dot Iprat, om mantad hilo’d Rahat do Tanga’ om gisom do korikot do hilo’d tana’ do kowotuan. Om onuan ku nondo iyokoyu do kuasa’ dot id sawat di tulun mantad dot id pomogunan diri om ouyung indo dokoyu iyolo’ do korikot kou. ³² Kada’ kou pomonsoi do poingkuro nopo dot id diyolo’ ko’ id ponokokinorohingan diyolo’. ³³ Kada’ dokoyu pologoso’ o tongoulun diri do mundorong dot id pomogunan dokoyu; tu’ ondung pologoson dokoyu, om iyolo’ no o kobinsuhu’ dokoyu do momonsoi’d dusa dot id doho’. Ondung sumambayang kou dot id kinorohingan diyolo’ om iri no o lawa’ di kapatai dokoyu,’’ ka dau.

¹ Om boros kad TUHAN dot id di Musa, ’’Takad dilo nuluhon do mongoi do hiti’d doho’ om powoyoon no i Harun, om i Nadab, om i Abihu, om i turu’ nohopod o boyoon do tulun dot Israil; om hiri kou pod sodu-odu’ om motud kou no do tumuku’. ² Iso’ pod tulun nga’ aiso’ no o koino-ino do minsomok doho’ suwai ko’ iya’ noo. Nga’ iri nopo tulun do suwai om a’ i’ koino-ino do minsomok, om okon-okon pondo i rayat toomod nga’ a’ i’ koino-ino do tumakad piya di nuluhon,’’ ka. ³ Om ngoyo’ no di Musa sunudai i tulun dot ogumu’ do koinsanai di pinonuhuan do TUHAN om it oturan do TUHAN. Om oinsanan nopo i tulun do suminimbar do poingkaa, ’’Wonsoyon ngai’ i’ dahai i pinoboros do TUHAN,’’ ka. ⁴ Om tuliso’ ngai’ no di Musa i pinonuhuan do TUHAN diri. Om osuab po di kosuabon kawagu om pomonsoi no iyau do pananaraban do porsombahan do hiri’d guas di nuluhon diri, do hopod om duwo o watu di pinogititimpak; om iri ngai’ nopo watu’ddi nga’ ponokowakil di hopod om duwo o payat dot Israil. ⁵ Om ponuhu’ noddi i Musa do piro-piro o tangaanakwagu, om papatahak no iyolo’ dot id TUHAN do porsombahan di sorobon om ponumbali’ iyolo’ do piro-piro o sapi’ do maan do porsombahan do piombolutan. ⁶ Om onuo’ no di Musa o songintanga’ di raha’ di sapi’ddi om posuango’ no dau do mangkuk; om iri no songintanga’ om pinotuntug dau do hiri’d sakai di pananaraban do porsombahan. ⁷ Om ngoyo’ noddi dau i buuk do tumpongo, i pinotulisan do koinsanai di ponuhuan do TUHAN, om basao’ no dau dot opuhod dot id bansa’ddi. Om boros ka diyolo’, ’’Mumboyo’ i’ iyahai do TUHAN om wonsoyon i’ dahai o koinsanai di pinonuhuan dau,’’ ka. ⁸ Om ngoyo’ noddi di Musa i raha’ di hiri’d mangkuk om poiyaso’ no dau dot id tulun dot ogumu’ddi. Boros ka dau, ’’Iti no raha’ diti o popogirot di tumpongo do winonsoi’d TUHAN dot id dokoyu do tontok di pinatahak dau o koinsanai’dti ponuhuan,’’ ka. ⁹ Om takad noddi di nuluhon i Musa, om i Harun, om i Nadab, om i Abihu, om i turu’ nohopod o boyoon do tulun dot Israil, ¹⁰ om kokito no diyolo’ i Kinorohingan do tulun dot Israil. Hiri nopod koulokon di lapap do Kinorohingan nga’ koiyo-iyo do sirang di watu do roitan do nilam do winonsoi, i miagal pod tawan kotomou. ¹¹ A’ id Kinorohingan pinatai i boyoon do tulun dot Israil diri do nokokito piya iyolo’ do Kinorohingan. Om akan noddi om ponginum-nginum ngai’ iyolo’. ¹² Om boro-boros noddi o TUHAN dot id di Musa do poingkaa, ’’Takad diti nuluhon do mongoi do hiti’d doho’. Om daamot nu nopondod hiti om onuan ku iya’ do duwo o kaping do watu do poposorou diya’, i pinotulisan ngai’ ku dit oturan do ponuduk diti tulun dot ogumu’,’’ ka. ¹³ Om sodia’ noddi i Musa om i Yosua, i mongunguhup dau, om timpuun no i Musa do tuminakad di nuluhon dot olidang. ¹⁴ Om boros kad Musa dot id boyoon do tulun dot Israil, ’’Andad kou nopo do hiti’d pinomukiiman diti do gisom do koguli’ iyahai. Om hiti iyo Harun di Hur do koruhang dokoyu, om isai nopo o haro o pigulatan do pokisalasayan om mongoi nopo solowot diyolo’,’’ ka dau. ¹⁵ Om takad no i Musa di Nuluhon do Sinai, om kolikupai nod haun i nuluhon diri. ¹⁶ - ¹⁷ Om sondot no dot id nuluhon diri i tanawau do kosorong tomod do tanda’ do nakarapou o TUHAN. Om kokitanan nopo di tulun dot Israil di tanawau’ddi om miagal do tapui di molob-ngolob do hiri’d timpak di nuluhon. Om iri nopo nuluhon diri nga’ nolikupan di haun do solinaid dot onom o tadau. Om koturu’ noddi do tadau om lohowo’ nod TUHAN i Musa do mantad hiri’d haun. ¹⁸ Om takad po i Musa di nuluhon diri do gisom do nolikupan iyau di haun. Om hiri noddi iyau do minundorong do solinaid dot apat nohopod o tadau om apat nohopod o totuong.

¹ Om boros kad TUHAN dot id di Musa, ² ’’Sunudan no i tulun dot Israil do papatahak do porsombahan dot id doho’. Romiton no o nunu nopo o porsombahan di korohian diyolo’ do papatahak dot id doho’. ³ Iri nopo porsombahan do patahakon om: tamas, pirok, tambaga’; ⁴ om kain dit opurak dit aalus, om kain di kihulu-hulu dit otomou, om aragang doitom-itom, om aragang, om kain di hulu do kambing do winonsoi; ⁵ om i kulit do dumba’ do tontoluhan di sinasakan dot aragang; om kulit dit osonong om kayu di roitan dot akasia; ⁶ om tumau do lampung, om rampa do poroloton di tumau do ponununtug, om i poroloton di kominyan dit owongi’ ⁷ om piro-piro o watu dit agayo o gatang do podokoton do pongillumis dit ipod di Boyoon dot Agayo dot Imam, om podokoton di polokopon do kangkab dau. ⁸ Suhuon no iyolo’ do momonsoi do kiim do maan ku’d doho’, om koiyon oku i’ dot id pogialatan diyolo’. ⁹ Om wonsoyon no i kiim diri om koinsanai di pakakas do suwai do tumanud di natantu’ mantad ku do pokitanan ku diya’,’’ ka. ¹⁰ Om boros ka kawagu’d TUHAN dot id di Musa, ’’Momonsoi no dot iso’ o kaban do kayu di roitan dot akasia o wonsoyon. Konoruo’ nopo di kaban diri om hatus om hopod o sontimito; om kalaabo’ no om onom nohopod om onom o sontimito, om kasawato’ nga’ onom i’ nohopod om onom o sontimito. ¹¹ Urogupan no do tamas dit osompipi’ o hiri’d suang om hiri’d soibau di kaban, om oligon no do tamas o mitingisan. ¹² Wansayan no dot apat o tontolingo do tamas do posulungan do pagantayang om podokoton no do hiri’d apat o sunduk di ponong id gakod di kaban do sopiduwo o tontolingo do miampaping di kaban. ¹³ Momonsoi no do pagantayang do kayu di roitan dot akasia o wonsoyon, om urogupan nod tamas. ¹⁴ Om posusukon nondo i kayu di pagantayang do hiri’d tontolingo di miampaping di kaban. ¹⁵ Om potimporonon nopo i kayu do pagantayang do poinsusuk di tontolingo; tu’ a’ nori koino-ino do kodongon kawagu. ¹⁶ Om posuangon nogindo di kaban diri i duwo o kaping do watu di patahakon ku diya’, i pinotulisan do koinsanai dit oturan ku. ¹⁷ Wansayan nod sompon i kaban diri do tamas di nosompipi’ o wonsoyon. Konoruo’ nopo om hatus om hopod o sontimito om onom nohopod om onom o sontimito do kalaabo’. ¹⁸ Momonsoi nod duwo o kerub do tamas di tinantan o wonsoyon ¹⁹ do piomputulon di sompon di kaban. Torodokon no kopio do momonsoi i poiyo-iyoon do moloikat di roitan do kerub diri om kopisagalai i’ di sompon. ²⁰ Om mositi’ nod potimbabaon i duwo o koiyo-iyo do moloikat di roitan do kerub diri do miomputul di sompon, om potokopon no di sompon i talad di koiyo- iyo’d moloikat di roitan do kerub. ²¹ Posuangon no i duwo o kaping do watu do hiri’d kaban om posomponon no i sompon di kaban. ²² Om hiri nondo do sumolowot oku diya’, om hiri’d sakai di sompon, it id piolitan di duwo o koiyo-iyo’d moloikat di roitan do kerub o patahakan ku diya’ do koinsanai dit oturan ku do patahakon nu diti tulun dot Israil,’’ ka. ²³ Om boros ka kawagu’d TUHAN dot id di Musa, ’’Momonsoi no dot iso’ o mija’ do kayu di roitan dot akasia o wonsoyon. Konoruo’ nopo om walu’ nohopod om walu’ o sontimito, om kalaabo’ no om apat nohopod om apat o sontimito, om kasawato’ no om onom nohopod om onom o sontimito. ²⁴ Tongkopon nod monguragup do tamas di nosompipi’ i mija’ddi, om oligon do tamas o hiri’d mitingisan. ²⁵ Isanan nod tamas o pointutuk di mija’ddi do turu’ nohopod om limo o milimito do kalaabo’. Om oligon no i pinongisan di mija’ do tamas o pongolig. ²⁶ Momonsoi nod apat o tontolingo do tamas o wonsoyon, do posusukan di pagantayang, om poikidon nori dit apat o sunduk di pinadakatan di gakod di mija’. ²⁷ Iri nopo tontolingo di posusukan di kayu do pagantayang om podokoton do hiri’d toning di tolig di mitingisan. ²⁸ Iri nopo pagantayang diri om mositi’ no dot i kayu di roitan dot akasia o wonsoyon, om urogupan nori do tamas. ²⁹ Momonsoi nod piring, om sangkir, om kakanan, om mangkuk, do pakayon do tontok do papatahak do porsombahan do waig dot anggur. Koinsanai’dti om mositi’ nod tamas dit osompipi’ o wonsoyon. ³⁰ Iti nopo mija’ diti om poiyonon do hiri’d dotimbabaan di Kaban do Tumpongo. Om mositi’ nod haro kasai’ o roti dit olidang do hiri’d sakai di mija’ do maan do porsombahan dot id doho’,’’ ka dau. ³¹ Om boros ka kawagu’d TUHAN dot id di Musa, ’’Momonsoi nod iso’ o potitimpakan do lampung do tamas di nosompipi’ o wonsoyon. Wonsoyon nopod puun om guas di potitimpakan do lampung om tamas di tinantan om pasagalayon no di puun om i guas i koiyo-iyo do tusak di pomolumis, om kohompit ngai’ no i koiyo-iyo do tusak dit a’ po noungkalad om i koiyo-iyo do tusak di noungkalad no. ³² Om wansayan dot onom o raan i guas do sopitolu o raan do miampaping. ³³ Pointikid-tikid dit onom o raan diri om wansayan do tolu o koiyo-iyo’d tusak do maan do pongillumis, do poiyo-iyoon do tusak di kayu di roitan do badam; om wansayan do koiyo-iyo di tusak dit a’ po noungkalad om koiyo-iyo di tusak di noungkalad no. ³⁴ Om wansayan nod apat o koiyo-iyo’d tusak o hiri’d guas di potitimpakan do lampung do maan do pongillumis. Iri nopo tusak diri om poiyo-iyoon di tusak do kayu di roitan do badam dit a’ po noungkalad om i noungkalad no. ³⁵ Om hiri nopod puun do pointikid-tikid di tolu o raan do miampaping diri, om wansayan dot iso’ o koiyo-iyo do tusak dit a’ po noungkalad. ³⁶ Iri nopo koiyo-iyo’d tusak dit a’ po noungkalad diri om i raan di potitimpakan di lampung om songwatang noo o tamas dit osompipi’ di tinantan o wonsoyon. ³⁷ Momonsoi nod turu’ o lampung do potimpakon do hiri’d potitimpakan do lampung, om oulinahan i’ o hiri’d ponong id gulu. ³⁸ Momonsoi nod piro-piro o pananggip di lampung om piro-piro o talam do tamas dit osompipi’ o wonsoyon, ³⁹ om kogumuon nopod tamas dit osompipi’, do wonsoyon do potitimpakan do lampung om iri ngai’ pakakas diri om tolu nohopod om limo o kilogram. ⁴⁰ Torodokon no kopio do momonsoi iti do poiyoon di natantu’ mantad ku di pinokitanan ku diya’ di hilo’d nuluhon,’’ ka dau.

¹ Om boros ka kawagu’d TUHAN dot id di Musa, ’’Iri nopo ponong id suang di Kiim dot Olidang, i Kiim ku, om hopod o bidang do kain linan dit aalus, i piniawol do kain di kihulu-hulu dit otomou, om aragang doitom-itom, om aragang o wonsoyon. Om rindaan nori do poiyo-iyoon di moloikat di roitan do kerub. ² Om mositi’ no dot iradon o kogoyo-goyoo’ di bidang di kain; konoruo’ nopod sombidang om hopod om duwo o mito om kalaabo’ no om duwo o mito. ³ Om pogitombir-tombiron no i limo o bidang di kain om asangkayu i’, om i limo o bidang do suwai nga’ iyoon iddi. ⁴ Wansayan nod posuluhan i duwo o kinotombiran do kain diri. Om wonsoyon nopod posuluhan om kain dit otomou. Om padakatan nopo di posuluhan om hiri’d tisan di kain. ⁵ Padakatan nod limo nohopod o posuluhan o hiri’d tiso’ di kinotombiran di kain, om limo kawagu nohopod o posuluhan do podokoton do hiri’d koduwo di kinotombiran di kain, om kopogiontok-ontok ngai’ i’ i posuluhan. ⁶ Momonsoi nod limo nohopod o pangait do tamas o wonsoyon do pokoiton di posuluhan di duwo o kinotombiran di kain, om kopiromut i’ i duwo o kinotombiran do kain diri. ⁷ Wansayan nod tokop i kiim do hopod om iso’ o bidang do kain di hulu do kambing do winonsoi, o wonsoyon. ⁸ Om mositi’ no dot iradon o kogoyo-goyoo’ di bidang di kain; konoruon nopo om hopod om tolu o mito om kalaabon no om duwo o mito. ⁹ Om pogitombir-tombiron no i limo o bidang do kain. Om iri nopo koonom di bidang do kain di pinotombir diri om pilikobon do maan do ponobon di ponong id wawayaan di Kiim. ¹⁰ Wansayan nod limo nohopod o posuluhan i tiso’ di kinotombiran di kain do podokoton do hiri’d tisan, om limo kawagu nohopod o posuluhan do podokoton do hiri’d tisan di koduwo di kinotombiran di kain. ¹¹ Momonsoi nod limo nohopod o pangait do tambaga’ o wonsoyon, om pokoiton no di posuluhan om opiromut i’ i duwo o kinotombiran do kain do ponokop di Kiim. ¹² Iri nopo songintanga’ di kain di poinghandui no om ponirung di ponong id tolikud di Kiim. ¹³ Om iri no kain di limo nohopod o sontimito do poinghandui do hiri’d miampaping di Kiim om pologoson nopo do poingiyo’ddi do ponirung di hiri’d tisan di Kiim. ¹⁴ Momonsoi pod duwo kawagu o ponokop di Kiim. Koiso’ nopo om kulit do dumba’ do tontoluhan di sinasakan dot aragang o wonsoyon, om iri no tiso’ om kulit dit osonong o wonsoyon, do maan do ponokop dit id soibau. ¹⁵ Momonsoi nod papan di poturidongon do kayu di roitan dot akasia o wonsoyon. ¹⁶ Pointikid-tikid di papan om apat ngai’ nopo o mito do konoruo’ om onom nohopod om onom o sontimito do kalaabo’. ¹⁷ Kakalan ngai’ no o hiri’d misingompok om milo i’ do pitumaon i papan. ¹⁸ Powonsoyon no o duwo nohopod o papan do poturidongon do hiri’d tisan ponong id salatan di Kiim. ¹⁹ Momonsoi nod apat nohopod o posungkadan do pirok o wonsoyon, do posungkadan di papan. Iso’ nopo o papan om posungkadon di posungkadan di misusun do duwo; om oinggiratan i’ i papan di kinakalan. ²⁰ Powonsoyon no o duwo nohopod o papan do hiri’d tisan ponong id utara di Kiim, ²¹ om apat nohopod o posungkadan do pirok o wonsoyon, om pisusunon do duwo o posungkadan dot iso’ o torigi. ²² Hiri nopod ponong id tolikud di Kiim, it id dompok ponong id kotonobon, om poturidangan no dot onom o papan ²³ om koduwoon o papan do hiri’d linsuk. ²⁴ Iri nopo papan di ponong id linsuk, om mositi’ no do piromuton o hiri’d siriba’ do gisom do koompus do hiri’d sawat. Om iyoon goduwo nopoddi i papan di hiri’d duwo o linsuk di Kiim. ²⁵ Om walu’ diri o papan do posungkadon do hopod om onom o posungkadan di pirok do winonsoi tu’ pisusunon nod duwo i posungkadan dot iso’ o papan. ²⁶ Momonsoi nod hopod om limo o tukod di potibabar do kayu di roitan dot akasia o wonsoyon; om podokoton no o limo di tukod diri do hiri’d limo o papan di pinoturidong, i ponong id rombu di Kiim dot id sampaping, ²⁷ om limo kawagu o tukod do podokoton dot id ponong id rombu dit id sampaping, om limo o tukod do podokoton di papan di pinoturidong di ponong id tolikud; i ponong id kotonobon. ²⁸ Iri nopo tukod di potibabar di hiri’d tanga-tanga’, om podokoton do hiri’d piintangaan di papan di pinoturidong, om podopiton nopo di papan di ponong id rombu di Kiim. ²⁹ Urogupan nod tamas i papan di pinoturidong di hiri’d Kiim om i tukod di potibabar. Om wansayan nod posusukan i papan di pinoturidong do posusukan di tukod do potibabar. Iri nopo posusukan diri om tamas o wonsoyon. ³⁰ Wonsoyon no i kiim do tumanud di poiyaan di natantu’ mantad ku, i pinokitanan ku diya’ di hilo’d nuluhon. ³¹ Momonsoi nod tabir, do wonsoyon nopo om kain linan dit osonong do piowolon do kain di kihulu-hulu dit otomou, om aragang doitom-itom om aragang. Rindaan no i tabir diri do poiyo-iyoon di moloikat di roitan do kerub. ³² Potoidon no i tabir do hiri’d apat o torigi do kayu di roitan dot akasia, i nurogupan do tamas, om i pinadakatan do pangait di tamas do winonsoi, om i pinosungkad dot apat o posungkadan di pirok do winonsoi. ³³ Podokoton no i tabir do hiri’d siriba-riba’ di rinuludan do pangait, i hiri’d taap di Kiim. Om poilihon no i Kaban do Tumpongo, i kisuang di duwo o kaping do watu do hiri’d dotirung di tabir. Om iri no i tabir diri o pomiolitan di Bilik dit Olidang om i Bilik dit Olidang Kopio. ³⁴ Om posomponon no i sompon di Kaban do Tumpongo. ³⁵ Iri nopo mija’ di pasakayan do porsombahan om hirion id soliwan di Bilik dit Olidang Kopio, do ponong id utara, om iri no potitimpakan do lampung om hirion id ponong id salatan, do hiri’d suang di Kiim dot Olidang. ³⁶ Om potoidon no do hiri’d wawayaan di Kiim, om tabir di kain linan dit osonong, i piowolon do kain di kihulu-hulu dit otomou, om aragang doitom-itom, om aragang, om rindaan iri. ³⁷ Om momonsoi nod limo o torigi, do kayu di roitan dot akasia o wonsoyon, do padakatan di tabir. Iri nopo torigi diri om urogupan do tamas om dakatan do limo o pangait do tamas; om wansayan do limo o posungkadan i torigi, do tambaga’ o wonsoyon,’’ ka dau.

¹ Om boros ka kawagu’d TUHAN dot id di Musa, ’’Momonsoi nod iso’ o pananaraban do porsombahan do kayu di roitan dot akasia o wonsoyon. Om posogion no o pomomonsoi, do 2.2 mito do konoruo’ om 2.2 mito do kalaabo’, om 1.3 mito do kasawato’. ² Wansayan nod sinangau-sangau o pointikid-tikid dit apat o sunduk di ponong id sawat di pananaraban do porsombahan, om tongkopon nori do monguragup do tambaga’. ³ Momonsoi nod poriuk do poiyanan do tauu om momonsoi do sikup, om momonsoi do mangkuk om totodok, om momonsoi do poiyanan do tapui. Koinsanai’dti om mositi’ nod tambaga’ ngai’ o wonsoyon. ⁴ Momonsoi nod pangabot di pananaraban do porsombahan do tambaga’ o wonsoyon, om padakatan do tontolingo o hiri’d pointikid-tikid di sunduk di pangabot, do posusukan di pagantayang. ⁵ Kasawaton nopo do paabatan di pangabot do hiri’d pananaraban do porsombahan om songintanga’ do kasawato’ di pananaraban do porsombahan, it id siriba’ di kabang di pananaraban do porsombahan. ⁶ Momonsoi nod pagantayang do kayu di roitan dot akasia o wonsoyon, om urogupan nori do tambaga’, ⁷ om posusukon nori do hiri’d tontolingo di miampaping di pananaraban do porsombahan. ⁸ Wonsoyon no i pananaraban do porsombahan diri do papan o wonsoyon om pologoson nopo do kiguang o hiri’d tanga’, do tumanud di poiyaan di natantu’ mantad ku di pinokitanan ku diya’ di hilo’d nuluhon,’’ ka dau. ⁹ Om boros ka kawagu’d TUHAN dot id di Musa, ’’Oluan nod natad i Kiim ku om rindingan nod tabir do kain linan dit osonong. Konoruo’ nopod tabir do hiri’d disan ponong id salatan om apat nohopod om apat o mito, ¹⁰ om tukodon iri do duwo nohopod o torigi do tambaga’ do posungkadon do duwo nohopod o posungkadan do tambaga’, om dakatan do pangait do pirok o wonsoyon. ¹¹ Om iyoon nogiddi it id disan ponong id utara di natad. ¹² Id bombong ponong id kotonobon no, om rindingan do tabir di duwo nohopod om duwo o mito do konoruo’ om tukodon do hopod o torigi do posungkadon do hopod o posungkadan. ¹³ Id bombong ponong id koulayon no, i winansayan do wawayaan, om duwo i’ nohopod om duwo o mito do kalaabo’ do panabir. ¹⁴ - ¹⁵ Miampaping nopo di wawayaan om rindingan do tabir dot 6.6 mito do konoruo’, om tukodon do tolu o torigi do posungkadon do tolu o posungkadan. ¹⁶ Om iri no wawayaan om wansayan do tabir do 9 o mito do konoruon do kain linan dit osonong, i piniawol do kain di kihulu-hulu dit otomou, om aragang doitom-itom, om aragang, om rindaan. Om tukodon nori dot apat o torigi do posungkadon dot apat o posungkadan. ¹⁷ Om pogiromu-romuton ngai’ no i torigi do pointutuk di natad dot i loting do pirok o popogiromu-romut; om iri nopo pokoiton di loting om pirok o wonsoyon, om iri no posungkadan om tambaga’ o wonsoyon. ¹⁸ Konoruo’ nopo do tansar do pointutuk di natad om 44 o mito, om 22 o mito do kalaabo’, om 2.2 o mito do kasawato’. Wonsoyon nopod panabir om kain linan dit osonong, om iri no posungkadan om tambaga’ o wonsoyon. ¹⁹ Koinsanai di pakakas do pakayon do hiri’d Kiim om koinsanai di gapit di Kiim om i torigi di ponukod nga’ tambaga’ ngai’ nopo o wonsoyon,’’ ka dau. ²⁰ Om boros ka kawagu’d TUHAN dot id di Musa, ’’Suhuon no i tulun dot Israil do mongoi papaatod diya’ do tumau do saitun dit osonong kopio do ponuang di lampung do hiri’d Kiim ku, om otutudan indo i lampung do pointikid do totuong. ²¹ Modtutud nopo di lampung om mositi’ no dot i Harun om i tangaanak dau. Poiyanan nopo di lampung diri om hiri’d soliwan di tabir di ponirung di Kaban do Tumpongo. Om mositi’ nod kitapui kasai’ i lampung diri do hiri’d koropohon ku do mantad do sosodopon om gisom do kosuabon. Om mositi’ nod wonsoyon kasai’ do tulun dot Israil om i sinakagon diyolo’ o ponuhuan diti do gisom dot alaid,’’ ka dau.

¹ Om boros ka kawagu’d TUHAN dot id di Musa, ’’Lohowo’ i Harun, i tobpinai nu, om i Nadab, om i Abihu, om i Iliasar, om i Itamar, i tangaanak di Harun. Posuwai-suwayon no iyolo’ do mantad id tulun dot Israil, do silihon do imam di momonsoi’d karaja’ ku. ² Wansayan no i Harun do pakayan di dong imam, om agayo i’ o ngaran dau om olumis o kokitanan. ³ Lohowon ngai’ no i mononombir di noonuan ku do toilaan. Om suhuon no iyolo’ do momonsoi’d pakayan di Harun, om kotobilang i’ iyau do sumiliu do doho’d songonuon, om sumiliu do imam di momonsoi’d karaja’ ku. ⁴ Suhuon no iyolo’ do momonsoi’d pomolokop do kangkab, om iso’ ot ipod om iso’ o rasuk dit anaru, om iso’ o rasuk dit oniba’ di rindaan, om iso’ o sigar om iso’ o tagkos. Om iyolo’ no o momonsoi diti pakayan do dong imam do pakayon di Harun i tobpinai nu, om i tangaanak dau, om osiliu i’ iyolo’ do imam di momonsoi’d karaja’ ku. ⁵ - ⁶ Iti nopo pakayan om mositi’ no dot i kain di kihulu-hulu dit otomou, om aragang doitom-itom om aragang, om banang do tamas om kain linan dit osonong, o wonsoyon. Om it ipod nga’ sagalai i’ do kain diri o wonsoyon om rindaan iri piya. ⁷ Om wansayan nod togiis o hiri’d miampaping di ponong id lihawa dit ipod do maan do pikogoson. ⁸ Om wansayan pod tagkos it ipod, do sagalai i’ dit ipod o kain dot owolon om kopisagalai indo dit ipod i tagkos. ⁹ - ¹² Manganu nod duwo o watu dit agayo o gatang di roitan do delima. Om mogihum nod tulun dit oilo do mongikir do tamas do popokikir do ngaran di hopod om duwo o tanak di Yakub do hiri’d watu’ddi do poiruson di tumur diyolo’, do sopionom o ngaran dot id iso’ o watu. Om podokoton nogindo i duwo o watu’ddi do hiri’d padakatan di tamas do winonsoi, om podokoton nori di togiis dit ipod di hiri’d ponong id lihawa do maan do ponokowakil di hopod om duwo o payat dot Israil. Om opiigit-igitan nondo di Harun i ngaran diyolo’ do hiri’d lihawa dau, om iyoho’ i TUHAN nga’ kosorou indo kasai’ diyolo’. ¹³ Suwai nopo ko’ i padadakatan di tamas do winonsoi, ¹⁴ om momonsoi pod duwo o rantai, do tamas dit osompipi’ o wonsoyon do pitobidon do miagal do tali, om podokoton nogindo i rantai’ddi do hiri’d padadakatan di tamas do winonsoi,’’ ka dau. ¹⁵ Om boros ka kawagu’d TUHAN dot id di Musa, ’’Momonsoi nod lokop do kangkab di Boyoon dot Agayo dot Imam do maan dau do pakayon do tontok do mongilo iyau do korohian do Kinorohingan. Om iri nopo kain do wonsoyon om sagalai i’ di kain di wonsoyon dot ipod, om i maan do pomorinda’ nga’ sagalai i’ di pinomorinda’ dit ipod. ¹⁶ Pomomonsoi nopoddi om posogion om pilopion. Konoruo’ nopo om duwo nohopod om duwo sontimito om kalaabo’ nga’ duwo i’ nohopod om duwo sontimito. ¹⁷ Padakatan no i lokop do kangkab diri dot apat o rulud do watu dit agayo o gatang; hiri nopod rulud do koiso’ om dakatan do watu di roitan do delima, topas om baiduri sepah. ¹⁸ Hiri nod rulud do koduwo om dakatan do watu di roitan do samrud, nilam om intan. ¹⁹ Hiri nod rulud do kotolu om dakatan do watu di roitan do lasuardi, akik, om kecubung. ²⁰ Hiri nod rulud do kaapat om dakatan do watu di roitan do pirus, yakut, om ratna cempaka. Om podokoton ngai’ nopo iti hopod om duwo o watu dot angagayo o gatang diti di padadakatan, di tamas do winonsoi. ²¹ Om pointikid-tikid di hopod om duwo o watu dot angagayo o gatang diri om kikiran do ngaran di tangaanak di Yakub, do ponokowakil di hopod om duwo o payat dot Israil. ²² Wansayan nod rantai i lokop do kangkab diri, do tamas dit osompipi’ o wonsoyon, om i pinitabid do miagal do tali. ²³ Momonsoi nod duwo o pondulung do tamas om podokoton no do hiri’d sunduk ponong id sawat di lokop do kangkab ²⁴ om posulungon nogindo i duwo o rantai do tamas do hiri’d duwo o pondulung do tamas diri. ²⁵ Om pokogoson no i duwo kawagu o tompok di duwo o rantai’ddi di lokop do kangkab di togiis di lihawa dit ipod. ²⁶ Momonsoi nod duwo kawagu o pondulung do tamas om podokoton no do hiri’d sunduk ponong id siriba’ di lokop do kangkab, do hiri’d ponong id saalom, i kotopis dit ipod. ²⁷ Momonsoi po kawagu do duwo o pondulung do tamas om podokoton do hiri’d siriba-riba’ di ponong id soibau di duwo o togiis di ponong id lihawa dit ipod, it id topis di lupi di tinombir, it id sawat di tagkos dit atandai o pinangawol. ²⁸ Ogiisanan no i pondulung di lokop do kangkab do tali dit otomou om pokogoson nondo i tali’ddi di pondulung di poindokot dit ipod, om id sawat kasai’ i’ di tagkos i lokop do kangkab, om a’ indo tumatak. ²⁹ Soira’ nopod sumuang i Harun di Bilik dot Olidang, om mositi’ nod pakayon dau i lokop do kangkab diri, i kinikiran do ngaran di hopod om duwo o payat dot Israil, om iyoho’ i TUHAN nga’ kosorou kasai’ indo di tulun ku. ³⁰ Posuangon no it Urim om i Tumim do hiri’d suang di lokop do kangkab, om oigitan i’ di Harun iri do tontok di mongoi iyau timbaba’ doho’. Om tontok nopo do maso’d miagal diri, om mositi’ nod pakayon kasai’ dau i lokop do kangkab, om oilaan i’ dau o korohian ku do bagi di tulun dot Israil,’’ ka dau. ³¹ Om boros ka kawagu’d TUHAN dot id di Musa, ’’Iri nopo rasuk dit anaru dit osoibahan dit ipod om kain di kihulu-hulu dit otomou o wonsoyon. ³² Om wansayan nod liou i rasuk diri, om awalan nod mongisan i liou di rasuk om a’ i’ ohurak. ³³ - ³⁴ Pointutuk nopo di lupi dit id siriba’ om dakatan di koiyo-iyo do tua’ do kayu di roitan do delima do wonsoyon nopoddi om i kain do kihulu-hulu dit otomou, om aragang doitom-itom, om aragang, om piolot-oloton do giring do tamas. ³⁵ Om mositi’ nod pakayon di Harun i rasuk dot anaru diri do soira-ira’ nopo do momonsoi iyau di karaja’ di dong imam. Om soira’ nopondo do mongoi iyau timbaba’ doho’ do hilo’d Bilik dit Olidang, ko’ di tumongkiad iyau do bilik diri om orongou indo i tuni di giring diri, om a’ indo iyau apatai. ³⁶ Momonsoi nod iso’ o pongillumis do tamas dit osompipi’ o wonsoyon om pokikiron no o poingkaa, ’Pinotobilang do maan do don TUHAN,’ ka. ³⁷ Pokogoson nori do hiri’d sigar do hiri’d ponong id turos, do tali dit otomou o pongogos. ³⁸ Om mositi’ nod posigaron di Harun i tamas di pongillumis diri do hiri’d turos dau, om romiton ku indo, iyoho’ i TUHAN, o koinsanai di porsombahan di patahakon di tulun dot Israil dot id doho’, do mulong piya do haro ot owonsoi diyolo’ do sala’ dit ongokooro’ do tontok do papatahak iyolo’ddi. ³⁹ Owolon nopo do maan do rasuk di Harun om kain linan dit osonong, om i wonsoyon do sigar nga’ kain linan i’ dit osonong o wonsoyon, om sagalai nogi’ do kain diri o wonsoyon do tagkos di rindaan. ⁴⁰ Wansayan nod rasuk, om tagkos, om tupi’ i tangaanak di Harun do kusai, om agayo i’ o ngaran om olumis o kokitanan diyolo’. ⁴¹ Papakayan no di Harun, i tobpinai nu om i tangaanak dau’d kusai i pakayan diri. Om tuntugan no iyolo’d tumau do saitun; om iyo noddi o pomimili’ diyolo’ do potobilangon do silihon do imam di momonsoi’d karaja’ ku. ⁴² Wansayan no iyolo’d soluar dit oniba’ o gakod do kain linan dit osonong o wonsoyon, do konoruo’ nopo om korikot dot id poo do mantad id tawak, om otirung i’ i bohogian do tinan diyolo’ dit a’ osorupai dot okito. ⁴³ Om mositi’ nod pakayon kasai’ di Harun om i tangaanak dau o pakayan diri do tontok do sumuang iyolo’ do hiri’d Kiim ku ko’ di mongoi iyolo’ insomok di pananaraban do porsombahan do mongoi pomonsoi di karaja’ di dong imam do hiri’d Bilik dit Olidang. Om a’ indo iyolo’ apatai tu’ a’ i’ okito o bohogian do tinan diyolo’ dit a’ osorupai dot okito. Om iti kasai’ no ot oturan dit apatut do tonudon di Harun om i sinakagon dau,’’ ka dau.

¹ Om boros ka kawagu’d TUHAN dot id di Musa, ’’Poingkaa no o kowoyo-woyoo’ do momili’ di Harun om i tangaanak dau do popotobilang diyolo’ do silihon do imam di momonsoi do karaja’ ku. Manganu no do songinan o sapi’ do tontoluhan dit okoro’ po om duwo o tinan do dumba’ do tontoluhan dit aiso’ o bohiton do tinan. ² Momolomok nod tapung do gandum dit osonong kopio, nga’ it a’ naralatan do pangambang. Om iri nopo wookon di tapung diri om wonsoyon do roti do ralatan do tumau do saitun, om iri no wokon di tapung om a’ ralatan do tumau, om iri nondo topod di tapung om wonsoyon do roti di gihilan do tumau. ³ Posuangon ngai’ no i roti do hiri’d balatak om patahakon nogindo dot id doho’ do mitonggoi di sapi’ do tontoluhan om i duwo o dumba’ do tontoluhan, i patahakon do maan do porsombahan di sumbolion. ⁴ Suhuon no i Harun om i tangaanak dau do mongoi’d hiri’d wawayaan di Kiim ku, om suhuon no iyolo’ do modsu’ do tumanud dit oturan di don tugama’. ⁵ Om pakayan nogindo i Harun di pakayan do dong imam — i rasuk dit anaru o longon, om it ipod, om i rasuk dot anaru dit alakapan dit ipod, om i lokop do kangkab, om i tagkos. ⁶ Posigaron no dau i sigar om pokogoson nod hiri i tanda’ dot olidang di kinikiran do poingkaa, ’Pinotobilang do maan do don TUHAN,’ ka. ⁷ Om ngoyon nogindo i tumau di ponununtug om potuntugon no do hiri’d tulu dau, do tanda’ do pilion iyau. ⁸ Om angatan no i tangaanak dau om porosukan no diyolo’ i rasuk dit anganaru o longon ⁹ om paagkasan no diyolo’ i tagkos om potupian i tupi’. Iyo noddi o kowoyo-woyoo’ do momili’ di Harun om i tangaanak dau. Om iyolo’ nondo om i sinakagon diyolo’ ot apatut do sumiliu’d imam di momonsoi do karaja’ ku do gisom dot alaid. ¹⁰ Om ngoyon nondo i sapi’ di tontoluhan diri om pohirion id dotimbabaan di Kiim ku. Om sunudan no i Harun om i tangaanak dau do pakabai do longon diyolo’ do hiri’d tulu di sapi’ddi. ¹¹ Om sumbolion no i sapi’ddi do hiri’d dotimbabaan ku; i hiri’d dotimbabaan di Kiim. ¹² Om manu nod ongokuuri’ do raha’ di sapi’ddi om potuduwon no di raha’ o tunturu’ nu om pogihilon nogindo di sinangau-sangau di pananaraban do porsombahan. Om potuntugon nogindo i raha’ di noolu’ do hiri’d douwahan di pananaraban do porsombahan. ¹³ Om onuon ngai’ nogindo i linuap di songinsokot di tinaii’, om i bohogian dot osonong kopio di tundu-undu’, om i duwo o lusou-lusou do mitonggoi di linuap di songinsokot. Om sorobon ngai’ nori do hiri’d pananaraban do porsombahan do maan do porsombahan dot id doho’. ¹⁴ Nga’ iri nopo tonsi, om i kulit, om i tinaii’ di sapi’ddi om mositi’ nod tutudan do hiri’d soliwan di kokiiman. Om iri no o porsombahan do pongidu’ do dusa di imam. ¹⁵ Om ngoyon nondo o tiso’ di dumba’ do tontoluhan diri. Om suhuon no i Harun om i tangaanak dau do pakabai do longon diyolo’ do hiri’d tulu di dumba’ddi. ¹⁶ Om sumbolion nondo i dumba’ddi om onuon i raha’ do maan poiyaso’ do hiri’d misingobik om hiri’d misingompok di pananaraban do porsombahan. ¹⁷ Om popoton no i dumba’ do tontoluhan diri. Om mositi’ no dot ougan i suang do tian om i gakod di dumba’, om pasakayon nogindo iri di tulu om i popot do suwai di dumba’ddi. ¹⁸ Om insanan nopo do monorob i popot di dumba’ do tontoluhan diri do hiri’d pananaraban do porsombahan do maan do porsombahan do taakanon. Om iri no i tawau di porsombahan do sinumbali’ddi o kasanangan ku. ¹⁹ Ngoyon no i tiso’ di dumba’ do tontoluhan diri, i dumba’ do maan do porsombahan. Om suhuon no i Harun om i tangaanak dau do pakabai do longon diyolo’ do hiri’d tulu di dumba’ddi. ²⁰ Om sumbolion nondo i dumba’ om manu no dot ongokooro’ di raha’ om pogihilon no do hiri’d tolingo’d wanan di Harun om i tangaanak dau, om pogihilon di posolon do tunturu’ do longon diyolo’d wanan, om pogihilon di posolon do lapap diyolo’d wanan. Om poiyason nondo i noolu’ di raha’ do hiri’d misingobik om hiri’d misingompok di pananaraban do porsombahan. ²¹ Manu no dot ongokooro’ di raha’ di hiri’d sakai di pananaraban do porsombahan om manu dot ongokooro’ di tumau di ponununtug, om powowoson nondo dot id di Harun om id pakayan dau om id pakayan di tangaanak dau. Om iyo noddi o ralan do popotobilang di Harun om i tangaanak dau, om i pakayan diyolo’ do maan do doho’d songonuon. ²² Onuon no i lunok di dumba’ do tontoluhan diri, om i tikiu di kilunok, om i linuap do poinsokot di suang do tian, om i bohogian dot osonong kopio di tundu-undu’, om i duwo o lusou-lusou do mitonggoi di linuap di songinsokot, om i poo do wanan. ²³ Om manu no di roti di hiri’d balatak di nakatahak no dot id doho’, dot iso’ ot onuon do pointikid-tikid di bansa’ di roti: iso’ ot onuon di roti di rinalatan do tumau do saitun, om iso’ ot onuon di roti dit a’ rinalatan do tumau, om iso’ ot onuon di roti. ²⁴ Pakahangan ngai’ nopo iti di Harun om i tangaanak dau, om suhuon no iyolo’ do papatahak diti dot id doho’ do maan do porsombahan di potobilangon do buntuk doho’. ²⁵ Om ngoyon nondo i roti di poingigit diyolo’ om sorobon no do hiri’d pananaraban do porsombahan do maan do porsombahan do taakanon do patahakon dot id doho’. Om iri no i tawau do porsombahan diri o kasanangan ku. ²⁶ Onuon no i kangkab di dumba’ do tontoluhan diri om patahakon no dot id doho’ do maan do porsombahan di potobilangon do buntuk doho’. Om iri nopo om diya’ no. ²⁷ Tontok nopo do momili’ do imam, om iri nopo kangkab om i poo di dumba’ do tontoluhan di maan do porsombahan do tontok diri om patahakon dot id doho’ do maan do porsombahan di potobilangon do buntuk doho’, om posuwai-suwayon nondo iri do patahakon di piro-piro o imam. ²⁸ Iti no o natantu’ ku dit a’ milo do simbanan: Tontok nopo do mongoi papatahak i tulun ku do porsombahan do piombolutan, om iri nopo kangkab om i poo di tayam-tayam om iri no imam o kaanu. Tu’ iri no o porsombahan di tulun ku dot id doho’. Iri no i natantu’ ku dit a’ milo do simbanan. Iyoho’ no o TUHAN. ²⁹ Apatai nopondo i Harun, om mositi’ no do potungkusan dau i pakayan dau dot id tangaanak dau do maan diyolo’ do pakayon dot opili’ iyolo’. ³⁰ Iri nopo tanak di Harun di sumowoli dau do sumiliu do imam, om i mongoi do hiri’d Kiim ku do momonsoi di karaja’ do dong imam do hiri’d Bilik dit Olidang, om mositi’ no do manampakai do pakayan diri do solinaid do turu’ o tadau. ³¹ Onuon no i tonsi di dumba’ do tontoluhan di pinatahak do numaan do porsombahan do tontok di pinili’ i Harun om i tangaanak dau om losuon no i tonsi’ddi dot id kinoiyonon dit olidang. ³² Om mositi’ no do kanon diyolo’ i tonsi’ddi do hiri’d wawayaan di Kiim ku om kanon i topod di roti di hiri’d balatak. ³³ Om mositi’ no do kanon diyolo’ i taakanon di pinatahak do numaan do porsombahan do tontok di pinapatahak do porsombahan do pongidu’d dusa do tontok di minomili’. Imam noo o koino-ino do mangakan di taakanon diri tu’ nokotobilang nori do patahakon dot id doho’. ³⁴ Ondung haro ot oolu’ di tonsi ko’ i roti’ddi do kosuabon kawagu, om mositi’ nod sorobon ngai’ i taakanon diri, om a’ no koino-ino dot akanon, tu’ olidang nori. ³⁵ Koloidon nopo do maso do momili’ di Harun om i tangaanak dau om turu’ o tadau, do miagal di pinonuhuan ku diya’. ³⁶ Pointikid-tikid do tadau om mositi’ no do papatahak do porsombahan do songinan o sapi’ do tontoluhan do maan do pongidu’ do dusa. Om iri no i porsombahan diri o kolidang di pananaraban do porsombahan. Om tuntugan no i pananaraban do porsombahan do tumau do saitun om kotobilang i’ iri do maan do doho’d songonuon. ³⁷ Wonsoyon no o miagal diri do pointikid do tadau do solinaid do turu’ o tadau. Om olidangan ngai’ nondo o pointongkop di pananaraban do porsombahan. Om isai nopondo ko’ nunu nopondo o kakama’ diri, om orualan no tu’ oontok di kuasa’ do kolidango’ di pananaraban do porsombahan,’’ ka dau. ³⁸ Om boros ka kawagu’d TUHAN dot id di Musa, ’’Pointikid-tikid do tadau do gisom dot alaid, om mositi’ nod papatahak do porsombahan do duwo o tinan do dumba’ di sontoun nogi’ o tumur do maan do porsombahan di sumbolion. ³⁹ Iri nopo songinan om maan do porsombahan do dongkosuabon om iri no tiso’ om maan do porsombahan do dongsosodopon. ⁴⁰ Iri nopo patahakon do maan do porsombahan do potonggoyon di dumba’ di koiso’, om songkilogram o tapung do gandum dit osonong kopio om piroloton do songlito o tumau do saitun dit osompipi’. Om papatahak po do songlito o waig dot anggur do maan do porsombahan. ⁴¹ Iri no tanak do dumba’ di koduwo om patahakon do maan do porsombahan do dongsosodopon do mitonggoi di songkilogram o tapung, om songlito o tumau do saitun, om songlito o waig dot anggur. Iri no o porsombahan do taakanon do patahakon dot id doho’. Om iri no tawau di porsombahan diri o kasanangan ku. Iyoho’ no o TUHAN. ⁴² Om iti nopo porsombahan do sorobon diti om mositi’ nod patahakon dot id toguang ku do hiri’d wawayaan di Kiim ku. Om hilo’ oku no do sumolowot di tulun ku om monokiboro-boros diya’. ⁴³ Om hilo’ oku nondo do sumolowot di tulun dot Israil, om iri indo i tanawau di karapou oku di kosorong kopio o momolidang do kinoiyonon diri. ⁴⁴ Om lidangan ku nondo i Kiim om i pananaraban do porsombahan, om potobilangon ku i Harun om i tangaanak dau do sumiliu do imam di momonsoi do karaja’ ku. ⁴⁵ Miyon oku nondo dot id pogialatan di tulun dot Israil, om iyoho’ nondo o Kinorohingan diyolo’. ⁴⁶ Om oilaan nondo diyolo’ dot iyoho’ o TUHAN, i Kinorohingan diyolo’, i pinoposoliwan diyolo’ do mantad hilo’d Masir, om koiyon oku i’ dot id pogialatan diyolo’. Iyoho’ no o TUHAN, i Kinorohingan diyolo’,’’ ka dau.

¹ Om boros ka kawagu’d TUHAN dot id di Musa, ’’Momonsoi no dot iso’ o mija’ do podtutudan do kominyan do kayu di roitan dot akasia o wonsoyon. ² Posogion no o pomonsoi’ddi; apat nohopod om limo sontimito do konoruo’ om kalaabo’ nga’ apat i’ nohopod om limo sontimito, om kasawato’ no om siam nohopod o sontimito. Om iri nopo sinangau-sangau do hiri’d apat o sunduk om pasagalayon no di mija’. ³ Urogupan nod tamas dit osompipi’ o hiri’d sakai, om hiri’d misingobik om hiri’d misingompok, om hiri’d sinangau-sangau di mija’ddi, om oligon no o hiri’d mitingisan. ⁴ Momonsoi nod duwo o tontolingo do tamas o wonsoyon do maan do posusukan. Om podokoton no do hiri’d siriba-riba’ di pinongolig di tisan do hiri’d miampaping di mija’, do posusukan di kayu do pagantayang di mija’. ⁵ Iri nopo pagantayang diri om kayu di roitan dot akasia o wonsoyon, om urogupan nod tamas. ⁶ Poilihan nopo di mija’ om hiri’d soliwan di tabir dit id dotimbabaan di Kaban do Tumpongo. Om hiri no o tiyonon ku do sumolowot diya’. ⁷ Pointikid do kosuabon, do tontok di mongoi i Harun posodia’ di lampung, om mositi’ no do modtutud iyau di kominyan dit osonong o kosingudan do hiri’d sakai di mija’ddi. ⁸ Om iyo iddi o wonsoyon dau di mongoi iyau podtutud do lampung di dongsosodopon. Om mositi’ nod papatahak kasai’ do porsombahan do kominyan do miagal diti do gisom dot alaid. ⁹ Kada’ papatahak do kominyan di pogoduhan do maan do porsombahan dot id mija’ddi, om kada’ papatahak do tayam-tayam do maan do porsombahan di sumbolion ko’ porsombahan pod gandum, om kada’ potungu do porsombahan do waig dot anggur do hiri. ¹⁰ Om mositi’ nod lidangan di Harun i mija’ddi do tumanud dit oturan do don tugama’, do kowoyo-woyoo’ nopo do momolidang om tiyasan do raha’ di tayam-tayam di pinatahak do numaan do porsombahan do maan do pongidu’d dusa it apat o sinangau-sangau, dot insan do sontoun, om mositi’ nod wonsoyon o miagal diti do pointikid do toun do gisom dot alaid. Om mositi’ nod olidang o pointongkop di mija’ddi om potobilangon iri do maan do doho’. Iyoho’ no o TUHAN,’’ ka dau. ¹¹ Om boros kad TUHAN dot id di Musa, ¹² ’’Tontok nopo dot intobon i tulun dot Israil, om mositi’ no do mambayar do tusin do pomogontok do tinan dau o pointikid-tikid do tongokusai, om a’ i’ iyau oontok do kosusaan do daamot di pongintaban. ¹³ Koinsanai’d tulun di kointob do tontok di pongintaban om mositi’ nod papatahak do tusin do tumanud di natantu’ mantad. Om mositi’ no do pabayaron i tusin diri do maan do porsombahan dot id doho’. ¹⁴ Iri nopo tulun di pointobon dot id pongintaban diri, om i tongokusai di duwo no nohopod o toun, ko’ it id sawat ko’ iri o tumur, om mositi’ nod papatahak do tusin dot irad diri dot id doho’. ¹⁵ A’ i’ poinggumu-gumu’ o pabayaron di tulun do kaya’, om a’ poingkuri-kuri’ o pabayaron di tulun do mosikin do tontok di mambayar iyolo’ do pomogontok do tinan diyolo’. ¹⁶ Timungon no i tusin diri do mantad id tulun dot Israil om pakayon nori do pomogompi’ di Kiim ku. Om iri no i sukai o pomogontok diyolo’ do tinan diyolo’, om osorou kasai’ ku indo iyolo’ do mongintirung,’’ ka dau. ¹⁷ Om boros kad TUHAN dot id di Musa, ¹⁸ ’’Momonsoi nod mimpun do tambaga’ om wansayan nori do poimpahan do tambaga’ i’ o wonsoyon. Om poilihon nori do hiri’d piolitan di Kiim om i pananaraban do porsombahan, om suangan nod waig. ¹⁹ Iri nopo waig diri om pongougan di Harun om i tangaanak dau do palad om lapap diyolo’ ²⁰ do tintod diyolo’ do sumuang di Kiim ko’ tintod do mongoi insomok di pananaraban do porsombahan do mongoi papatahak do porsombahan do taakanon. Om ondung owonsoi o miagal diri, om a’ no iyolo’ apatai. ²¹ Mositi’ no dot ougan diyolo’ o palad om lapap diyolo’, om a’ i’ iyolo’ apatai. Iti no o toturan dit apatut diyolo’d tonudon om tonudon di sinakagon diyolo’ do gisom dot alaid,’’ ka dau. ²² Om boros kad TUHAN dot id di Musa, ²³ ’’Manganu no do rampa dit ongosonong kopio — onom o kilo do mur dit alanggou, om tolu o kilo do kayu manis, om tolu o kilo do tobu dit osonong o kosingudan, ²⁴ om onom o kilo do kayu di roitan do tija (timbangon ngai’ nopo iti do tumanud di poninimbang di natantu’ mantad.) Om ruhangan nori dot apat o lito do tumau do saitun, ²⁵ om momonsoi nondo do tumau di ponununtug, do pogirolo-roloton do miagal do tumau dit osonong o kosingudan. ²⁶ Om iri no i pinogirolo-rolot diri o pongumau di Kiim ku, om i Kaban do Tumpongo, ²⁷ om i mija’ om koinsanai di pakakas do hiri, om i potitimpakan do lampung om koinsanai di pakakas do hiri, om i mija’ do podtutudan do kominyan, ²⁸ om i pananaraban do porsombahan di sorobon om koinsanai di pakakas do hiri, om i mimpun om i poimpahan di mimpun. ²⁹ Potobilangon ngai’ nori do maan do doho’d songonuon dot iyo’ddi o kowoyo-woyoo’ do popotobilang, om olidang ngai’ indo iri. Om isai nopo ko’ nunu nopo o koigit diri om orualan no dot oontok do kuasa’ di kolidango’ddi. ³⁰ Om tuntugan nu nogindo do tumau i Harun om i tangaanak dau, om pilion no iyolo’ do sumiliu do imam di momonsoi do karaja’ ku. ³¹ Om poboroson no o poingkaa dot id tulun dot Israil, ’Iti nopo tumau do ponununtug dot olidang diti om mositi’ no do pakayon do tontok do sumambayang dot id doho’ do gisom dot alaid. ³² Iti nopo om a’ i’ koino-ino do potuntugon dot id isai nopo o tulun. Om a’ i’ koino-ino dot iri kasai’ o pogirolo-roloton do momonsoi’d tumau do miagal diri. Iti nopo tumau’dti om olidang, om mositi’ no dot olidang o pamamakai nu’dti. ³³ Isai nopo i momonsoi do tumau do miagal diri, ko’ i popotuntug diri dot id isai nopo o tulun dit okon ko’ imam, om a’ no kohompit do tulun ku,’ kanto,’’ ka dau. ³⁴ Om boros kad TUHAN dot id di Musa, ’’Manganu no do rampa diti dot iradon nopo o kogumuon do panganganu — pulut do damar, om i kulit do lukan, om i pulut do kayu di roitan do rasamala om i kominyan dot aiso’ o rolot. ³⁵ Iri ngai’ no o pogirolo-roloton do wonsoyon do kominyan, do poiyoon di tumau dit osonong o kosingudan. Om ruhangan nori do silaon om osonong kasai’ i’ iri om olidang. ³⁶ - ³⁷ Iri nopo wookon di pinogirolo-rolot diri om tutuon do gisom dot outok. Om igitan nondo iri do hiri’d Kiim ku om pasasadon no do hiri’d dotimbabaan di Kaban do Tumpongo. Om sorohon no kopio dot iri nopo kominyan diri om olidang kopio, om i pinotobilang do maan do doho’. Kada’ panganu di pinogirolo-rolot diri do pomonsoi’d kominyan do sagalai’ddi do maan do dokoyu. ³⁸ Isai nopo o momonsoi do pomowongi-wongi’ do sagalai’ddi o wonsoyon, om a’ no kohompit do tulun ku,’’ ka dau.

¹ Om boros kad TUHAN dot id di Musa, ² ’’Nopili’ ku no i Bisaliil, i tanak di Uri, i manangaki di Hur, i mantad id payat di Yohuda, ³ om noponu’ ku no iyau do kuasa’ ku. Noonuan ku no iyau do pomusorou dit atarom, om toilaan, om komiloo’ do momonsoi do nunu nopo o buburuon — ⁴ do momolukis do maan do poiyaan, i mokimoilo kopio do momonsoi, om wonsoyon nogindo i linukis diri do tamas, om pirok om tambaga’ o wonsoyon; ⁵ om momolunau do watu dit agayo o gatang do maan podokoto’; om mongikir do kayu; om nunu nopo o buburuon di mokimoilo kopio do momonsoi. ⁶ Om nopili’ ku nogi’ i Oholiab i tanak di Ahisamak, i mantad id payat di Dan, do monguhup dau do kumaraja’. Om noonuan ku nogi’ do toilaan dit aralom o koinsanai di tulun do suwai di monunukang, om koilo i’ iyolo’ do momonsoi do koinsanai di ponuhuan ku do momonsoi: ⁷ i Kiim ku, om i Kaban do Tumpongo om i sompon di Kaban, om koinsanai di pakakas do hiri’d Kiim, ⁸ om i mija’ om koinsanai di pakakas do hiri, om i potitimpakan do lampung di tamas dot osompipi’ o wonsoyon om i piro-piro o pakakas di lampung, om i mija’ do podtutudan do kominyan, ⁹ om i pananaraban do porsombahan di sorobon om koinsanai di pakakas do hiri, om i mimpun om i pinoimpahan di mimpun, ¹⁰ om i pakayan di dong imam dit ongolumis, i pakayon di Harun om i tangaanak dau do tontok dot osiliu iyolo’ do imam di momonsoi do karaja’ ku, ¹¹ om i tumau do ponununtug, om i kominyan dit osonong o kosingudan, i hirion id Bilik dit Olidang. Om soira’ nopod momonsoi iyolo’dti, om poiyoon no kopio di pinonuhuan ku diya’,’’ ka dau. ¹² Om suhuo’ nod TUHAN i Musa do ¹³ popoboros dot id tulun dot Israil do boros do poingkaa, ’’Poinggoyoon no o tadau’d Sabat, i tadau do natantu’ ku do tadau do koundarangan. Tu’ iri no o tanda’ di tumpongo dot id pialatan ku om iyokoyu do gisom do poingompus, do popointalang dot iyoho’ no i TUHAN, o minoniliu dokoyu do tulun ku. ¹⁴ - ¹⁵ Pusohon no kopio dokoyu o tadau do koundarangan diti tu’ tadau dot olidang. Noonuan kou no dot onom o tadau do kakarajaan, nga’ iri nopo tadau do koturu’ om tadau dot agayo di pinotobilang do maan do doho’. Om isai nopo it a’ momusou do tadau’ddi, om i kumaraja’ do tontok do tadau’ddi, om hukuman no do kapatayon. ¹⁶ Mositi’ no do poinggoyoon do tulun dot Israil o tadau’ddi do maan do tanda’ di tumpongo toko’. ¹⁷ Tadau nopoddi om tanda’ dit ogirot dot id pialatan ku om i tulun dot Israil, tu’ iyoho’ i TUHAN, nga’ onom no tadau do minomonsoi do tawan om pomogunan. Om tontok di tadau do koturu’ om tingkod oku no do kumaraja’ om undorong oku no,’’ ka dau. ¹⁸ Om soira’ di nokopongo o Kinorohingan do moro-boros dot id di Musa do hiri’d Nuluhon do Sinai, om patahako’ no do Kinorohingan dot id di Musa i duwo o kaping do watu di pinotulisan do Kinorohingan do koinsanai di toturan diri.

¹ Om tontok di nopurimanan di tulun dot Israil dot alaid noddi kopio om a’ po i Musa nokoruhuk do mantad hiri’d nuluhon, om timungai no diyolo’ i Harun, om boro-boros no iyolo’ dot id dau do poingkaa, ’’A’ toko’ no oilaan ondung nunu o nosiliu dot id di Musa, i minomoyo’ dati’ do suminoliwan do mantad hilo’d Masir; nga’ kainou, momonsoi toko’ nogi’ dot iso’ o ponokokinorohingan di milo do momoyo’ dati’,’’ ka diyolo’. ² Om boros kaddi di Harun dot id diyolo’, ’’Iduwo’ ngai’ dokoyu o tanting do tamas di songimpakai do sawo om tangaanak dokoyu’d kusai om tondu’, om ngoyon i’ patahako’ doho’,’’ ka dau. ³ Om iduwo’ ngai’ nopoddi di tulun o tanting-anting diyolo’, om ngoyo’ no patahako’ di Harun. ⁴ Om romito’ ngai’ nod Harun i tanting-anting diri, om lanako’ no dau. Om potunguho’ nogiddi dau dot id pomorunan, om kowonsoi noddi i tamas diri do miagal-agal do sapi’. Om boros kaddi di tulun dot ogumu’, ’’Oi Israil, iti no i kinorohingan toko’, i pinoposoliwan dati’ do mantad hilo’d Masir!’’ ka diyolo’. ⁵ Om pomonsoi noddi i Harun dot iso’ o pananaraban do porsombahan do hiri’d dotoguangan di sapi’ do tamas diri, om poboroso’ no dau dot id tulun dot ogumu’ o poingkaa, ’’Suab nopondo om haro o poginakanan do maan do pomusou do TUHAN,’’ ka dau. ⁶ Om osuab poddi di tadau kawagu, om paatod no iyolo’ do piro-piro o tayam-tayam do maan do porsombahan di sorobon om iri no suwai om akanon do maan do porsombahan do pogiombolutan. Om poginakan noddi i tulun dot ogumu’, om minoginum iyolo’ do gisom do nangaawuk om minogiampahu’ iyolo’. ⁷ Om boros kad TUHAN dot id di Musa, ’’Ruhuk nogi’ kopio do dinondo, tu’ iri nopo tulun nu, i winoyo’ nu do suminoliwan do mantad hilo’d Masir, om nokopomonsoi nod dusa om minagada’ doho’. ⁸ Notongkiadan no diyolo’ i ralan di pinotuduk ku do susuyon diyolo’; om nokopomonsoi no iyolo’d sapi’ do tamas do linanak do minomonsoi. Om nokotuku’ no iyolo’ om nakapatahak do porsombahan dot id winonsoi diyolo’ddi. Om somboro-boros no iyolo’ dot iri no i kinorohingan di pinoposoliwan diyolo’ do mantad hilo’d Masir. ⁹ Oilaan ku no kopio o kokodoho’ do ginawo do tulun diti. ¹⁰ Baino’ nopo, om kada’ oku no diya’ oduhai. Tu’ otogod oku no kopio diyolo’, om patayon ku no iyolo’. Om silihon ku nogindo iya’ om i sinakagon nu do bansa’ dit agayo,’’ ka dau. ¹¹ Nga’ lugu-lugutai noddi di Musa o TUHAN, i Kinorohingan dau. Boros ka dau, ’’Oi TUHAN, nokuro tu’ otogod kopio ko diti tulun nu, i pinoidu’ nu do mantad hilo’d Masir dot i kokoriso’ om i kuasa’ nu o pinopoidu’ nu diyolo’? ¹² Tu’ ondung patayon ngai’ nu iyolo’, om mimboros nondo i tulun do Masir do kinopononudan nu nopo diti tulun dot ogumu’ do suminoliwan do mantad hilo’d Masir nga’ ngoyon no patayo’ do hiti’d konuluhanan, om opunso i’ kopio iyolo’. Kada’ kotogod, oi TUHAN. Posimbano’ no o pomusorou nu om kada’ kopio porikatai do kosusaan iti tulun nu. ¹³ Soroho’ no i susuhuon nu, i Abraham, om i Isak om i Yakub. Om soroho’ no do nakapamatos ko no dot id diyolo’ do mikuwo’d sumpa’ dot onuan nu iyolo’ do sinakagon do miagal di rombituon do hilo’d tawan kogumu’, om patahakon nu dot id sinakagon diyolo’ o koinsanai di tana’ di pinabatos nu do sumiliu do diyolo’d songonuon do gisom dot alaid,’’ ka dau. ¹⁴ Om posimbano’ iddi do TUHAN o pomusorou dau, om a’ iddi dau pinorikot i kosusaan di nokoboros dau’ddi dot id tulun dau. ¹⁵ Om ruhuk noddi i Musa di nuluhon, do kiinigit di duwo o kaping do watu, i pinotulisan do koinsanai dit oturan do Kinorohingan o hiri’d miampaping. ¹⁶ Om Kinorohingan i’ o minomonsoi di watu’ddi om iyau nogi’ o pinopokikir dit oturan do hiri’d watu. ¹⁷ Om tontok di rumuhuk no iyo Musa di Yosua, om korongou no di Yosua i tulun dot Israil do songgiak-giak, om boro-boros no iyau di Musa, ’’Haro ot orongou ku do miagal do giniakan do maso’d sumangod do hilo’d kokiiman,’’ ka dau. ¹⁸ Om boros ka di Musa, ’’A’ i’ miagal do pinongkisan do nakamanang o karangahan dilo’ om a’ miagal do giniakan di naala’; ilo’ nopo om tulun i’ do modsinding,’’ ka dau. ¹⁹ Om tontok dit osomok noddi i Musa di kokiiman om kokito no dau i sapi’ do tamas om i tulun do sontari-tari’. Om kotogod tomod noddi iyau. Om podumpaho’ no dau i watu di poingigit dau do hiri’d guas di nuluhon om kababak no i watu’ddi. ²⁰ Om ngoyo’ noddi dau i sapi’ di winonsoi di tulun dot Israil, om lanako’ no dau. Om tutuo’ nogiddi do gisom do naapu, om tunguho’ no dau do waig. Om suhuo’ nogiddi dau i tulun dot Israil do monginum diri. ²¹ Om boro-boros no iyau di Harun, ’’Nunu kopio o winonsoi diti tulun dot id diya’ tu’ pinologos nu iyolo’ do minomonsoi do dusa dot iyo kopio’dti kagayo?’’ ka dau. ²² Om boros ka di Harun do suminimbar, ’’Kada’ kotogod doho’; tu’ iya’ nga’ koilo i’ dot iso-iso’ no kopio o ginawo diti tulun do momonsoi’d araat. ²³ Boros ka diyolo’ dot id doho’, ’A’ toko’ no oilaan ondung nunu o nosiliu dot id di Musa, i minomoyo’ dati’ do suminoliwan do mantad hilo’d Masir; nga’ kainou, momonsoi toko’ nogi’ do ponokokinorohingan di milo do momoyo’ dati’’ ka diyolo’. ²⁴ Om suhuo’ ku noddi iyolo’ do papatahak ngai’ dot id doho’ di tamas diyolo’, om isai nopoddi i haro o tamas om oluso’ ngai’ nopo diyolo’ om patahako’ no doho’, om posuboo’ ngai’ ku no i tamas diri do hiri’d tapui, om kosiliu nopod miagal do sapi’!’’ ka dau. ²⁵ Om kopurimanai noddi di Musa do pinologos di Harun i tulun dot Israil do miagal di kuda’ do nokoidu’ do mantad id kandang tu’ a’ no opusus-pusus, om gisom do nosiliu poddi iyolo’d koirakan di pisangod diyolo’. ²⁶ Om ongoi noddi i Musa ingkakat do hiri’d dotimbabaan di wawayaan di kokiiman om pomoros no dot opuhod do poingkaa, ’’Isai nopo i tumanud do TUHAN, om kumaa nod hiti!’’ ka. Om ongoi ngai’ nopo timung i payat do Liwi do hiri’d posorili’ di Musa. ²⁷ Om boros ka di Musa dot id diyolo’, ’’Suhuon ngai’ kou nopod TUHAN, i Kinorohingan dot Israil, do mangabil do gayang om mongoi tongkop diti kokiiman do mantad id wawayaan diti om gisom do hilo’d wawayaan di suwai, om patayon ngai’ no i tobpinai dokoyu om i kongoombolutan om i songkoduwo dokoyu,’’ ka dau. ²⁸ Om wonsoyo’ noddi di payat do Liwi i pinonuhuan diri. Om tontok nopod tadau’ddi om haro i’ o tolu noribu o tulun do pinatai. ²⁹ Om boros ka di Musa dot id tulun di mantad id payat do Liwi, ’’Tadau nod baino’ do tuminobilang kou do sumiliu do imam di momonsoi do karaja’ do don TUHAN tu’ napatai no dokoyu i tangaanak om i tobpinai dokoyu. Om barakatan kou indo do TUHAN,’’ ka dau. ³⁰ Tadau noddi kawagu om boro-boros no i Musa dot id tulun dot Israil do poingkaa, ’’Nokowonsoi kou nod dusa dit agayo kopio. Nga’ baino’ nopo om tumakad oku po kawagu dilo nuluhon do mongoi solowot do TUHAN; om maha’ daa om kaanu oku do koompunan do dusa dokoyu,’’ ka dau. ³¹ Om guli’ noddi i Musa do minongoi solowot do TUHAN, om boro-boros no iyau do poingkaa, ’’Agayo no kopio o dusa do nowonsoi di tulun dot Israil. Tu’ minomonsoi iyolo’ do ponokokinorohingan do tamas o winonsoi, om tuminuku’ iyolo’ dot id ponokokinorohingan diri. ³² Pokionuon ku no kopio dot ompunan nu i dusa diyolo’; nga’ ondung amu’, om tonuson nopo o ngaran ku di nokotulis nu do hiri’d buuk di pinotulisan nu do ngaran do tulun nu,’’ ka dau. ³³ Om boros kad TUHAN, ’’Iri no ngaran do tulun di nokowonsoi’d dusa dot id doho’ o tonuson ku o ngaran dot id buuk ku. ³⁴ Nga’ pamanau nogi’, om woyoon i’ ilo tulun dot ogumu’ do kumaa do hilo’d kinoiyonon di pinosunud ku diya’. Sorohon no do woyoon ko i’ di moloikat ku, nga’ rumikot no o maso do kopomohukuman ku di tulun diri dot i dusa diyolo’ o kopomohukuman ku,’’ ka dau. ³⁵ Om porikatai noddi do TUHAN do toruol i tulun dot ogumu’, tu’ minononsog i’ iyolo’ di Harun do minomonsoi di sapi’ do tamas.

¹ Om boros kaddi do TUHAN dot id di Musa, ’’Mositi’ no do tumongkiad ko om koinsanai di tulun di winoyo’ nu do mantad hilo’d Masir, do kinoiyonon diti, om mongoi kou do hilo’d pomogunan di pinabatos ku dot id di Abraham, om id di Isak om id di Yakub, om id sinakagon diyolo’. ² Om suhuon ku indo i moloikat ku do momoyo’ dokoyu. Om uyungon ku indo i tulun do Kanaan, om Amori, om Hit, om Poris, om Howi om Yobus. ³ Om kumaa kou nondo dot id iso’ o pomogunan di kaya’ om oluhub. Nga’ a’ oku i’ iyoho’ moyo’ dokoyu, tu’ obinsurilog kopio kou i’ koulun, om ooris oku dot araag ku iyokoyu do hilo’d tanga’d ralan,’’ ka dau. ⁴ - ⁶ Om tontok di nokorongou i tulun dot ogumu’ di boros do TUHAN diri, om timpuun no iyolo’ do minihad. Om sinuhu’d TUHAN i Musa do popoboros dot id diyolo’ do poingkaa, ’’Iyokoyu no o tulun dit obinsurilog kopio. Ondung moyo’ oku daa dokoyu dot ongoruhai piya, nga’ aayi’ ku no doti’ iyokoyu do mamatai. Nga’ iduwo’ ngai’ nogi’ dokoyu ino pongillumis dokoyu’d tinan dokoyu om momusorou oku nogindo ondung nunu o wonsoyon ku dot id dokoyu,’’ ka dau. Om di nopoddi di nokotongkiad i tulun dot Israil do mantad hilo’d Nuluhon do Sinai, om a’ noddi iyolo’ manampakai di poingillumis do tinan. ⁷ Soira-ira’ nopo do popowonsoi i tulun dot Israil do kiim diyolo’, om ngoyon no di Musa i Kiim dit Olidang, om powonsoyon no dau do hiri’d sodu-odu’ di kokiiman diyolo’. Iri nopo kiim diri nga’ rinoitan do Kiim do TUHAN. Om isai nopo ot orohian do mokianu do nosihat do TUHAN om mongoi nod hiri. ⁸ Tontok nopo di mongoi i Musa dot id Kiim diri, om mingkakat ngai’ nopo i tulun do hiri’d wawayaan di kiim diyolo’ om sumonsod nopo di Musa do gisom do kosuang iyau di Kiim. ⁹ Kosuang pondo i Musa, om sumondot no i haun di poorigi om mundorong nod hiri’d wawayaan di Kiim. Om moro-boros nondo o TUHAN do mantad hiri’d haun dot id di Musa. ¹⁰ Om okito pondo di tulun dot ogumu’ i haun do poorigi do hiri’d wawayaan di Kiim, om motud ngai’ no iyolo’ do tumuku’. ¹¹ Om tumimbaba’ nopo o TUHAN do moro-boros di Musa, do miagal po di tulun do monokiboro-boros do tambalut dau. Om gumuli’ nondo i Musa do hiri’d kokiiman. Nga’ i Yosua nopo, i tanak di Nun, i tanakwagu do mongunguhup di Musa, om tumimporon i’ do hiri’d Kiim. ¹² Insan o tadau om boro-boros no i Musa dot id TUHAN do poingkaa, ’’Otopot nogi’ do sinuhu’ oku diya’ do momoyo’ diti tulun do kumaa dot id pomogunan di pinabatos nu’ddi, nga’ a’ ko i’ minomisunud ondung isai o suhuon nu do momoyo’ doho’. Om nokoboros nu no do kotutun kopio ko doho’ om kohubayaan oku diya’. ¹³ Iyo nopoddi, om sunudai oku daa di natantu’ mantad nu do wonsoyon nu, om kopomonsoi oku i’ di karaja’ nu, om koposonong kasai’ oku do ginawo nu. Om sorohon no do nopili’ nu no o bansa’ diti do sumiliu do diya’d songonuon,’’ ka dau. ¹⁴ Om boros kad TUHAN, ’’Woyoon ku i’ iyokoyu, om onuan ku iyokoyu do kamanangan,’’ ka. ¹⁵ Om boros ka di Musa do suminimbar, ’’Ondung a’ ko tumanud dahai, om kada’ no iyahai pologoso’ do tumongkiad do kinoiyonon diti. ¹⁶ Poingkuro daa’ndo o tulun do koilo dot ohubayaan ko diti tulun nu om ohubayaan ko doho’, dot a’ ko moyo-woyo’ dahai? Tu’ iri no i hino ko dot id pogialatan dahai o kopisuayan dahai di bansa’d suwai do hiti’d pomogunan,’’ ka dau. ¹⁷ Om boros kad TUHAN dot id di Musa, ’’Wonsoyon ku i’ ino pokionuon nu tu’ otutunan tiya’ i’ kopio om kohubayaan ku iya’,’’ ka. ¹⁸ Om boros kaddi di Musa do minokianu, ’’Pokitono’ oku po daa di tulinau do koropohon nu di kosorong kopio,’’ ka. ¹⁹ Om boros kad TUHAN do suminimbar, ’’Tumalib oku indo dot id toguang nu do mikuwo’d toinsanan di kagayaan ku, om poboroson ku nondo i ngaran ku dit olidang. Iyoho’ no o TUHAN, om popointalang oku i’ do kosianan om kolisihan dot id tulun di pilion ku. ²⁰ A’ ku indo pokitanan diya’ o rabas ku, tu’ aiso’ no ot apasi di kokito do rabas ku. ²¹ Nga’ haro i’ iti tontolob do hiti’d toning ku dot ingkokoton nu. ²² Om soira’ nopo do tumalib i tulinau ku di kosorong kopio, i tanda’ do nakarapou oku, om posuangon ku nondo iya’ dot id piolitan dilo tontolob om tirungon ku iya’ do palad ku do gisom do katalib oku. ²³ Om iduwon ku nogindo o palad ku om kokito ko indo do tinolikudon ku nga’ a’ ko no kokito do rabas ku,’’ ka dau.

¹ Om boros kad TUHAN dot id di Musa, ’’Manganu nod duwo o kaping do watu om sangkapon no do poiyoon dit id gulu, om tulisan ku i’ iri di boros di pinotulis do hiri’d watu dit id gulu, i binabak nu’ddi. ² Kosuabon nopod suab om mositi’ nod kosodia’ ko no, om tumakad no do hilo’d Nuluhon do Sinai do mongoi solowot doho’ do hilo’d dimpak. ³ Om iso’ pod tulun nga’ aiso’ i’ o koino-ino do moyo’ diya’ do tumakad; om kada’ nod haro o tulun do mongoi do hinonggo nopo do hiri’d nuluhon diri; om a’ koino-ino do haro o dumba’ ko’ sapi’ do mangakan-ngakan do hiri’d guas di nuluhon,’’ ka. ⁴ Om panganu noddi i Musa do duwo o kaping do watu om sangkapo’ no dau. Om osuab po di tadau kawagu om igitai no dau i watu’ddi do tuminakad di Nuluhon do Sinai, do tumanud di pinonuhuan do TUHAN. ⁵ Om rikot no o TUHAN dot id rolot do haun, om ingkakat no do tuminalad di Musa, om poboroso’ no dau i ngaran dau dit olidang, iri no i TUHAN. ⁶ Om talib noddi o TUHAN do hiri’d dotoguangan di Musa om boro-boros no dot opuhod do poingkaa, ’’Iyoho’ no o TUHAN, i Kinorohingan do poimponu’ do kosianan om kolisihan, it a’ obintogod, om i pointalang do kosianan om kotorodoko’. ⁷ Bayaanon ku i’ i batos ku dot id piro-piro noribu o sinakagon om mangampun oku do karaaton om dusa; nga’ a’ oku i’ kolihu do momohukum di tangaanak om i manangaki diyolo’ do gisom do korikot di sinakagon di kointolu om koingapat dot i dusa di molohing diyolo’ o kopomohukuman ku,’’ ka dau. ⁸ Om olomus nopo i Musa do minotud do tuminuku’. ⁹ Om boros ka dau, ’’Oi TUHAN, ondung ohubayaan kopio ko doho’ om pokionuon ku no daa iya’ do momoyo’ dahai. Obinsurilog no daa kopio iti tulun, nga’ ompunai no o kararaat om dusa dahai, om romito’ no iyahai do sumiliu’d tulun nu,’’ ka. ¹⁰ Om boros kad TUHAN dot id di Musa, ’’Baino’ nopodti, om momonsoi oku do tumpongo dot id tulun dot Israil. Om momonsoi oku nondo do piro-piro koimayaan dit a’ po nowonsoi do honggo nopo do hiti’d pomogunan dot id pogialatan do nunu nopo o bansa’ do tulun. Om oinsanan nopondo o tulun do kokito do kogoyoo’ di koimayaan di wonsoyon ku, iyoho’ i TUHAN, o momonsoi di koronob kopio dot id dokoyu. ¹¹ Tonudon no it oturan do patahakon ku dokoyu do tadau’d baino’. Uyungon ku indo i tulun dot Amori, om Kanaan, om Hit, om Poris, om Howi, om tulun do Yobus, do rumikot kou do mongoi sangod diyolo’. ¹² Kada’ kou pomonsoi do pitoruan dot id tulun do hilo’d pomogunan di ngoyon dokoyu, tu’ osiliu i’ moti’ndo iri do lawa’ di kapatai dokoyu. ¹³ Om kada’ kou no kopio pomonsoi do miagal diri, suwai ko’ raagon nogi’ dokoyu i poiyanan diyolo’ do porsombahan, om habaon ngai’ i torigi di ponokotingolig diyolo’ om tagadon ngai’ i torigi dot Asira, i ponokokinorohingan diyolo’. ¹⁴ Kada’ kou tuku’ dot id kinorohingan do suwai, tu’ iyoho’ nopo, i TUHAN, om a’ i’ orohian do haro o mongoi ponokiiyo-iyo doho’. ¹⁵ Kada’ kou pomonsoi do pitoruan dot id tulun do pomogunan diri. Tu’ soira’ nopo do mongoi iyolo’ tuku’ di ponokokinorohingan diyolo’ om di papatahak iyolo’ do porsombahan di sumbolion, om alapon kou nondo diyolo’ do mongoi amung diyolo’, om abayayat kou nondo do mangakan di taakanon di nokosubak diyolo’ dot id tingolig diyolo’. ¹⁶ Om mangawin doti’ndo i tangaanak dokoyu’d kusai di kosumandakan do bansa’d suwai, i mamayayat diyolo’ dot a’ tumorodok dot id doho’ om tumuku’ dot id ponokokinorohingan diyolo’. ¹⁷ Kada’ kou pomonsoi om kada’ kou tuku’ do tingolig di basi’ do winonsoi. ¹⁸ Poinggoyoon no dokoyu i Tadau’d Agayo do Roti dit A’ Kipangambang. Mangakan kou no do roti dit aiso’ o pangambang do solinaid do turu’ o tadau do tontok di tulan dot Abib, do miagal di pinonuhuan ku. Tu’ tulan noddi do tuminongkiad kou do mantad hilo’d Masir. ¹⁹ Pointikid-tikid do tanak do kusai dit id gulu kosusu, om i tontoluhan do tayam-tayam dokoyu dit id gulu kosusu, om doho’ ngai’ no. ²⁰ Nga’ bolion i’ kawagu dokoyu o pointikid-tikid di tontoluhan do kaladai dit id gulu kosusu, do pomoli nopo om tanak do dumba’ do patahakon do maan do porsombahan. Ondung a’ dokoyu bolion kawagu i kaladai, om tipuon no o liou’ddi. Bolion no dokoyu kawagu o koinsanai di tanak dokoyu’d kusai dit id gulu kosusu. Iso’ pod tulun nga’ aiso’ i’ o koino-ino do mongoi rapou doho’ dot aiso’ no o porsombahan dot igitan. ²¹ Noonuan kou no dot onom o tadau do kakarajaan dokoyu, om kada’ kou no karaja’ do tontok di tadau’d koturu’, do dongmamaradu piya daa ko’ dongmongomot nga’ kada’ kou no kopio karaja’. ²² Poinggoyoon no dokoyu i Tadau dot Agayo do Dongmongomot do tumimpuun kou do mongomot di tua’ do gandum dokoyu dit id gulu koonsok. Om ramayon no dokoyu i Tadau dot Agayo do Kinuhub-Kuhub do motingkaayi’ o toun, di mongupu’ kou do tua-ua’. ²³ Intolu do sontoun do mositi’ nod rumikot ngai’ i kokusayan dokoyu do mongoi sambayang dot id doho’, i TUHAN, i Kinorohingan dot Israil. ²⁴ Ouyung ngai’ ku nopondo i bansa’d suwai, it id doburuan dokoyu, om koinggayo ku o pomogunan dokoyu, om aiso’ nondo o mumbal do mongoi panangod do pomogunan dokoyu do tontok do mamaramai kou di tolu o poginakanan diri. ²⁵ Kada’ kou papatahak do roti di rinalatan do pangambang do tontok do papatahak kou di tayam-tayam do maan do porsombahan dot id doho’. Kada’ kou no poolu’ do nunu nopo o popot di tayam-tayam di sinumbali’ do tontok do Tadau’d Agayo do Paska do gisom do kosuabon. ²⁶ Paatod kou no di gandum di gulu dokoyu koomot do hilo’d Walai’d Sasambayangan dot Agayo, do pointikid do toun. Kada’ kou pogonsok do dumba’ ko’ kambing dit okoro’ po, dot i gatas di molohing dau o pongonsok,’’ ka. ²⁷ Om boros kad TUHAN dot id di Musa, ’’Tulison no i boros diri, tu’ iri no i boros diri o poimpahan ku do tumpongo di wonsoyon ku dot id diya’ om id tulun dot Israil,’’ ka. ²⁸ Om undorong noddi i Musa do hiri do poinsugku’d TUHAN do solinaid dot apat nohopod o tadau om apat nohopod o totuong. Om solinaid nopoddi om a’ i’ iyau minakan om a’ mininum. Om tuliso’ no dau do hiri’d watu di ponunulisan i boros di tumpongo, iri no i Hopod o Toturan do Kinorohingan. ²⁹ Tontok di ruminuhuk i Musa di Nuluhon do Sinai do kiinigit di Hopod o Toturan, om mogulinau nopo o rabas dau tu’ nokoponokiboro-boros no iyau’d TUHAN; nga’ a’ i’ dau oilaan do mogulinau o rabas dau. ³⁰ Om ontong no di Musa i Harun om koinsanai di tulun, om kokito no diyolo’ do mogulinau o rabas di Musa. Om ooris diri iyolo’ do mongoi insomok dau. ³¹ Nga’ lohowo’ nod Musa iyolo’, om ongoi noddi i Harun om i piro-piro o boyoon dot Israil insomok di Musa. Om boro-boros no i Musa diyolo’. ³² Om timung ngai’ nogiddi i tulun dot Israil do posorili’ di Musa. Om poboroso’ ngai’ no di Musa diyolo’ it oturan di pinatahak do TUHAN dot id dau di hilo’d Nuluhon do Sinai. ³³ Om kopongo poddi i Musa do moro-boros diyolo’, om tirungo’ no dau do kulu o rabas dau. ³⁴ Om soira’ nopo do sumuang i Musa di Kiim do TUHAN do mongoi boro-boros do TUHAN, om iduwon no dau i kulu do pointirung do rabas dau. Om sumoliwan nopondo iyau, om posunudon ngai’ no dau i boros do TUHAN dot id tulun dot Israil, ³⁵ om okito no diyolo’ do mogulinau i rabas dau. Om potirungon no kawagu di Musa i kulu dot id rabas dau do gisom dot orikot kawagu i kaangayan dau kabara-barasai do TUHAN.

¹ Om lohowo’ no di Musa o koinsanai di tulun dot Israil, om boro-boros no iyau diyolo’ do poingkaa, ’’Iti no o ponuhuan do TUHAN do wonsoyon dokoyu! ² Koino-ino kou i’ do kumaraja’ do solinaid dot onom o tadau, nga’ iri nopo tadau’d koturu’ om tadau dit olidang, i tadau do koundarangan, om i tadau do nokotobilang do don TUHAN. Isai nopo o kumaraja’ do tontok do tadau di koturu’ om hukuman no do kapatayon. ³ Magapui piya do hiri’d walai dokoyu nga’ a’ i’ koino-ino do tontok do tadau’d Sabat,’’ ka dau. ⁴ Om boros kad i Musa dot id toinsanan di tulun dot Israil, ’’Iti no o ponuhuan do TUHAN. ⁵ Papatahak kou nod porsombahan dot id TUHAN. Om isai nopo it orohian do manahak do porsombahan, om patahak nod tamas, om pirok, ko’ tambaga’, ⁶ ko’ kain linan dit osonong, ko’ i kain do kihulu-hulu dit otomou, om aragang doitom-itom, om aragang ko’ i kain do hulu do kambing o winonsoi; ⁷ om i kulit do dumba’ do tontoluhan di sinasakan dot aragang om i kulit dot osonong om i kayu di roitan dot akasia, ⁸ om tumau do ponuang do lampung; om rampa do pomorolot di tumau di ponununtug om i pomorolot di kominyan dit osonong o kosingudan; ⁹ om i watu dot agayo o gatang di roitan do delima, om i watu’d suwai dot angagayo o gatang do podokoton do hiri’d ipod, om hiri’d lokop do kangkab di Boyoon dot Agayo dot Imam,’’ ka dau. ¹⁰ Om boros ka kawagu’d TUHAN dot id di Musa, ’’Mositi’ no do rumikot ngai’ i tulun dit ongoilo do monukang dit id pogialatan dokoyu, do mongoi pomonsoi do koinsanai di pinonuhuan do TUHAN, iri no: ¹¹ i Kiim, om i taap di Kiim om i ponokop do ponong id soibau, i piro-piro o pangait, om i papan di poturidongon, om i tukod di potibabaron, om i pongorigi di wawayaan, om i posungkadan do torigi; ¹² om i Kaban do Tumpongo, om i kayu do pagantayang di Kaban, om i ponompon di Kaban, om i tabir di ponirung di Kaban; ¹³ om i mija’, om i kayu do pagantayang di mija’, om koinsanai di pakakas di mija’, om i roti di patahakon do maan do porsombahan dot id Kinorohingan; ¹⁴ om i potitimpakan do lampung do maan do ponitiu om koinsanai di pakakas do hiri; om koinsanai di lampung do mitonggoi di tumau di lampung; ¹⁵ om i mija’ do podtutudan do kominyan om i kayu do pagantayang di mija’; om i tumau do ponununtug; om i kominyan dit osonong o kosingudan; om i tabir di wawayaan di Kiim; ¹⁶ om i pananaraban do porsombahan di sorobon do mitonggoi di pinangabot di tambaga’ do winonsoi, om i kayu do pagantayang di pananaraban do porsombahan, om koinsanai di pakakas do suwai, om i mimpun di pongougan, om i pinoimpahan di mimpun; ¹⁷ om i tabir do pomorinding di natad, om i torigi om i posungkadan di torigi, om i tabir di wawayaan do hiri’d natad; ¹⁸ om i pamagapit om i tali di Kiim om i pomorinding di natad; ¹⁹ om i pakayan dit ongolumis di piro-piro o imam, i pakayon diyolo’ do tontok do momonsoi’d karaja’ ku do hiri’d Bilik dit Olidang, om i pakayon di dong imam do pakayon di Harun om i tangaanak dau,’’ ka dau. ²⁰ Om pamanau ngai’ no i tulun dot Israil do tuminongkiad di niyonon diyolo’ do tuminimung. ²¹ Om isai nopoddi i notingkau o ginawo do papatahak do porsombahan, om minongoi no paatod do porsombahan dot id TUHAN do pomonsoi di Kiim do TUHAN. Om igit ngai’ nopo iyolo’ do koinsanai di pakayon do sumambayang om i wonsoyon do pakayan do imam. ²² Om isai nopoddi it orohian do manahak, do tongokusai om tongoondu’, nga’ minigit ngai’ nopo do piin di maan do pomolumis, om tanting-anting, om pondulung, om karo, om mogisuayan nopo o bansa’ do tamas di maan do pomolumis, om patahako’ no diyolo’ iri dot id TUHAN. ²³ Pointikid-tikid do tulun di haro o kain linan dit osonong, om kain di kihulu-hulu dot otomou, om aragang doitom-itom om aragang, om kain di hulu do kambing do winonsoi, om kulit do dumba’ do tontoluhan di sinasakan dot aragang, ko’ kulit dit osonong, nga’ pinapatahak ngai’ nopoddi. ²⁴ Om koinsanai’d tulun di haro o pirok ko’ tambaga’ nga’ minigit ngai’ nopo do pinatahak dot id TUHAN. Om koinsanai’d tulun di haro o kayu di roitan dot akasia, di milo’d powonsoyon nga’ pinapatahak nogi’. ²⁵ Om oinsanan nopo i tongoondu’ dit ongoilo do mangawol do minigit do banang di tiningkor diyolo’ dot it opurak dit atandai om i banang dot asalau dit otomou, om aragang doitom-itom, om it aragang. ²⁶ Om minomonsoi nogi’ iyolo’ do banang do hulu do kambing o winonsoi. ²⁷ Om iri no i piro-piro o boyoon om pinapatahak do watu dit agayo o gatang di roitan do delima om piro-piro o watu dot agayo o gatang do suwai ko’ iri do podokoton do hiri’d ipod om hiri’d lokop do kangkab. ²⁸ Om minigit nogi’ iyolo’ do rampa om tumau do ponuang di lampung, om tumau di ponununtug, om kominyan dit osonong o kosingudan. ²⁹ Om oinsanan nopo i tulun dot Israil dot angagaan ngai’ o ginawo do pinapatahak di porsombahan diyolo’ dot id TUHAN do pomonsoi di pinonuhuan do TUHAN do pinolombus di Musa. ³⁰ Om boros kad Musa dot id tulun dot Israil, ’’Nopili’ nod TUHAN i Bisaliil, i tanak di Uri, i manangaki di Hur, i mantad id payat do Yohuda. ³¹ Noponu’ no iyau’d Kinorohingan do kuasa’ dau, om noonuan dau iyau do toilaan, om komiloo’ do kumaraja’, om pomusorou dit obinsuhut do momonsoi’d nunu nopo o buruon, ³² om momolukis do maan do poiyaan di mokimoilo kopio do momonsoi, om powonsoyon nogindo i linukis diri dot id pirok om id tambaga’; ³³ om momolunau di watu dit agayo o gatang do maan podokoto’, om mongikir do kayu, om nunu nopo o buburuon di mokimoilo kopio do momonsoi. ³⁴ Om noonuan nogi’ do TUHAN i Bisaliil om i Oholiab, i tanak di Ahisamak, i mantad id payat di Dan, do toilaan do monuduk do tulun do suwai di komilaan diyolo’d momonsoi. ³⁵ Om noonuan no iyolo’d TUHAN do toilaan do momonsoi do nunu nopo o buburuon do tulun dit oilo do manangkap do watu, om i mongingikir, om i mangangawol do kain linan dit osonong, om i kain do kihulu-hulu dit otomou, om aragang doitom-itom, om it aragang, om piro-piro o bansa’d kain do suwai. Milo ngai’ nopo iyolo’ do momonsoi do nunu nopo o buburuon di mogisuayan om ongoilo iyolo’ do momolukis do maan do poiyaan.

¹ I Bisaliil no, om i Oholiab, om koinsanai di tukang di nongoonuan do TUHAN do toilaan om pomusorou dit obinsuhut, it ongkoilo do momonsoi do koinsanai di gunaon do pomonsoi di Kiim do TUHAN. Om iyolo’ no o momonsoi do koinsanai’ddi do tumanud di pinonuhuan do TUHAN,’’ ka. ² Om lohowo’ no di Musa i Bisaliil, om i Oholiab, om koinsanai di tukang do suwai, i noonuan do TUHAN do komilaan om it ongorohian do muhup, om suhuo’ nod Musa iyolo’ do tumimpuun do kumaraja’. ³ Om karamit no diyolo’ do mantad id di Musa o koinsanai di pinatahak di tulun dot Israil do pomonsoi di Kiim dot Olidang. Nga’ monikid kosuabon kasai’ po i tulun dot Israil do mongoi papatahak di patahakon diyolo’ dot id di Musa. ⁴ Om ongoi ngai’ no i tukang di maso do kumaraja’, ⁵ solowot di Musa om posunudo’ no diyolo’ di Musa o poingkaa, ’’Ogumu’ no ko’ mantad di gunaon o nakatahak diti tulun, do pomonsoi di pinonuhuan do TUHAN do momonsoi,’’ ka. ⁶ Om poboroso’ noddi di Musa dot id pointongkop di kokiiman dot a’ no minog do haro o papatahak kawagu do pomonsoi di Kiim dot Olidang; om a’ noddi pinapaatod do porsombahan i tulun dot Israil. ⁷ Iri nopo nangkaatod om talib no do kabagal do pomongo do koinsanai di wonsoyon. ⁸ Id pogialatan nopo di tukang diri, om iri no tukang dit ongoilo kopio o minomonsoi di Kiim do TUHAN. Winonsoi nopo diyolo’d Kiim om hopod o bidang do kain linan dit osonong, i piniawol do kain di kihulu-hulu dot otomou, om it aragang doitom-itom, om it aragang. Om rinindaan iri do pinoiyo- iyo do moloikat di roitan do kerub. ⁹ Oirad nopo i bidang do kain: hopod om duwo mito do konoruo’ om duwo mito do kalaabo’. ¹⁰ Om pogitombir-tombiro’ no diyolo’ i limo o bidang di kain, om iso’ poddi o kinotombiran, om i limo kawagu bidang nga’ niyo iddi. ¹¹ Om wansayai no diyolo’ do posuluhan do kain dit otomou o winonsoi, o hiri’d tompok di ponong id soibau di duwo o kinotombiran do kain diri. ¹² Om padakatai no diyolo’ do limo nohopod o posuluhan i kinotombiran do kain di koiso’, ¹³ om limo i’ nohopod o posuluhan do pinodokot di kinotombiran do kain di koduwo, mipasang diri i duwo o kinotombiran di kain. ¹⁴ Om pomonsoi nogiddi iyolo’ do tokop di Kiim diri do hopod om iso’ o bidang do kain di hulu do kambing o winonsoi. ¹⁵ Om oirad nopo o pinomonsoi diyolo’ddi: hopod om tolu o mito do konoruo’ om duwo o mito do kalaabo’. ¹⁶ Om pogitombir-tombiro’ no diyolo’ i limo o bidang diri, om iri nogi’ it onom o bidang do noolu’ nga’ pinogitombir-tombir i’. ¹⁷ Om wansayai no diyolo’ do limo nohopod o posuluhan o hiri’d tompok di kinotombiran di kain di koiso’, om limo nohopod o posuluhan do pinodokot do hiri’d tompok di kinotombiran di kain di koduwo. ¹⁸ Om pomonsoi no iyolo’ do limo nohopod o pangait do tambaga’ o winonsoi do popiromut di duwo o kinotombiran di kain diri om kopisangkayu i’ do maan do tokop. ¹⁹ Om duwo po o tokop do suwai do winonsoi diyolo’. Iso’ nopo om kulit do dumba’ do tontoluhan di sinasakan dot aragang o winonsoi, om iri no tiso’ om kulit dit osonong o winonsoi do maan do tokop di posoibahon. ²⁰ Om wonsoyo’ no diyolo’ i padakatan di Kiim do papan do kayu di roitan dot akasia o winonsoi, om pinoturidong diyolo’ iri do pinopowonsoi. ²¹ Kasawato’ nopo do pointikid-tikid di papan diri om apat o mito, om kalaabo’ no om onom nohopod om onom o sontimito. ²² Om kinakalan ngai’ do duwo o kokol di mituma’ i papan, om milo indo do piromuton i papan. Om kinakalan ngai’ nopo do miagal diri o koinsanai di papan. ²³ Duwo nohopod o papan do pinowonsoi diyolo’ do pinoturidong dot id disan ponong id salatan di Kiim, ²⁴ om apat nohopod o posungkadan, do pirok do winonsoi, do posungkadan di papan, om iso’ nopo o papan om pinosungkad do duwo o posungkadan di misusun, om oinggiratan i’ i piniromutan di kokol. ²⁵ Om duwo nohopod o papan do pinowonsoi diyolo’ do pinoturidong dot id disan ponong id utara di Kiim, ²⁶ om apat nohopod o posungkadan, do pirok do winonsoi; om iso’ nopo o torigi om pinosungkad do duwo o posungkadan di misusun. ²⁷ Om ponong id tolikud no di Kiim diri, it id somputul ponong id kotonobon, om pinawansayan diyolo’ dot onom o papan di pinoturidong, ²⁸ om duwo o papan do pinowonsoi do pointikid di linsuk. ²⁹ Iri nopo papan di ponong id linsuk om piniromut o hiri’d siriba’ om gisom do koompus do hiri’d sawat. Om niyo goduwo nopoddi i duwo o linsuk di pinawansayan di duwo o papan. ³⁰ Om walu’ddi o papan om hopod om onom o posungkadan do pirok do winonsoi; om iso’ nopo o torigi om pinosungkad do duwo o posungkadan di misusun. ³¹ Om pomonsoi po iyolo’ do hopod om limo o tukod di potibabar do kayu di roitan dot akasia o winonsoi, om limo o pinodokot di papan di pinoturidong do hiri’d sampaping di Kiim, ³² om limo o pinodokot di papan di pinoturidong di hiri’d dosompopingan kawagu, om limo o pinodokot di papan di hiri’d somputul ponong id kotonobon, i hiri’d dolikudan di Kiim. ³³ Iri nopo tukod di potibabar di hiri’d tanga-tanga’, i pinodokot do hiri’d piintangaan di papan, om poindapit nopo di papan di ponong id rombu di Kiim. ³⁴ Om urogupai no diyolo’ do tamas i papan di songinturidong om winansayan do posusukan do tamas o winonsoi, do maan do posusukan di tukod di songintibabar, i nurogupan i’ do tamas. ³⁵ Om pomonsoi no iyolo’ do tabir do kain linan dit osonong, i piniawol do kain di kihulu-hulu dot otomou, om aragang doitom-itom, om it aragang do winonsoi, om rindaai no do pinoiyo-iyo do moloikat di roitan do kerub. ³⁶ Om pomonsoi no iyolo’ dot apat o torigi do kayu di roitan dot akasia o winonsoi, do potoidan di tabir. Om urogupai no diyolo’ iri do tamas, om padakatai nod pangait do tamas do winonsoi. Om pomonsoi no iyolo’ dot apat o posungkadan di torigi do pirok o winonsoi, do ponginggirot di torigi. ³⁷ Om wansayai no diyolo’ do tabir i wawayaan di Kiim do kain linan dit osonong o winonsoi, i piniawol do kain di kihulu-hulu dot otomou, om aragang doitom-itom, om it aragang, om rinindaan do minomolumis. ³⁸ Om pomonsoi no iyolo’ do limo o torigi di pinadakatan do pokoitan do tabir, i dinakatan do pangait om nurogupan do tamas o hiri’d dompok ponong id sawat di torigi om i pinomoloting. Om iri no limo o posungkadan di torigi om tambaga’ do winonsoi.

¹ Om wonsoyo’ no di Bisaliil i Kaban do Tumpongo do kayu di roitan dot akasia o winonsoi. Konoruo’ nopo di Kaban diri om hatus om hopod o sontimito, om kalaabo’ no om onom nohopod om onom o sontimito, om kasawato’ no om onom nohopod om onom o sontimito. ² Om urogupai no dau do tamas di nosompipi’ ot id suang om id soibau di Kaban diri, om nisanan dau do tamas o posorili’. ³ Om minomonsoi nogi’ iyau dot apat o tontolingo do tamas o winonsoi, do posusukan di pagantayang. Om podokoto’ no dau iri do hiri’d apat o gakod di Kaban, do sopiduwo o tontolingo do hiri’d miampaping di Kaban. ⁴ Om pomonsoi no iyau do kayu do pagantayang do kayu di roitan dot akasia o winonsoi, om urogupai no dau do tamas iri. ⁵ Om posusuko’ no dau di tontolingo di hiri’d miampaping di Kaban i pagantayang. ⁶ Om pomonsoi no iyau do sompon do tamas dit osompipi’ o winonsoi. Konoruo’ nopo di sompon om hatus om hopod o sontimito, om kalaabo’ no om onom nohopod om onom o sontimito. ⁷ Om pomonsoi po iyau do duwo o koiyo-iyo do moloikat di roitan do kerub, do tamas di tinantan o winonsoi, ⁸ do piniomputul di sompon di Kaban. Om pinomonsoi nopo dau’ddi nga’ pinasagalai di sompon. ⁹ Om mitimbaba’ i duwo o koiyo-iyo do moloikat di roitan do kerub do hiri’d miomputul di sompon, om poungkalad do pointokop di sompon i talad di koiyo-iyo do moloikat di roitan do kerub. ¹⁰ Om pomonsoi no i Bisaliil do mija’ do kayu di roitan dot akasia o winonsoi. Konoruo’ nopo di mija’ddi om walu’ nohopod om walu’ o sontimito, om kalaabo’ no om apat nohopod om apat o sontimito, om kasawato’ no om onom nohopod om onom o sontimito. ¹¹ Om urogupai no dau i mija’ddi do tamas dit osompipi’ om oligo’ no do tamas o hiri’d mitingisan. ¹² Om isanai no dau o pointutuk di mija’ddi do turu’ nohopod om limo o milimito do kalaabo’. Om oligo’ no dau do tamas o pointutuk di pinongisan di mija’ddi. ¹³ Om pomonsoi no iyau dot apat o tontolingo do tamas do maan do posusukan di pagantayang om podokoto’ no do hiri’d apat o sunduk, it id sawa-sawat di gakod di mija’. ¹⁴ Om iri nopo tontolingo di posusukan di kayu do pagantayang di mija’ddi om pinodokot do hiri’d toning di pinongolig di pinongisan. ¹⁵ Om iri nopo kayu di pagantayang om kayu di roitan dot akasia o winonsoi om nurogupan iri do tamas. ¹⁶ Om winonsoi nogi’ dau i pakakas di mija’ddi, do tamas dit osompipi’ o winonsoi: piring, om sangkir, om kakanan, om mangkuk di pakayon do papatahak do waig dot anggur do maan do porsombahan. ¹⁷ Om wonsoyo’ no di Bisaliil i potitimpakan do lampung do tamas dit osompipi’ o winonsoi. Iri nopo puun om i guas di lampung diri om tamas di tinantan o winonsoi. Iri nopo bunga di pinongillumis, do pinoiyo-iyo do tusak dit a’ po noungkalad om i tusak di noungkalad nga’ pasagalai nopo di guas di potitimpakan di lampung. ¹⁸ Om haro ot onom o raan do hiri’d guas di potitimpakan do lampung, do sopitolu o miampaping. ¹⁹ Om pointikid-tikid dit onom o raan diri om winansayan ngai’ nopo do tolu o koiyo-iyo do tusak do maan do pongillumis, do pinoiyo-iyo do tusak di kayu do roitan do badam, dot it a’ po noungkalad om i noungkalad no. ²⁰ Om iri nopo guas di potitimpakan do lampung diri om winansayan dot apat o bunga di pongillumis do pinoiyo-iyo do tusak do kayu di roitan do badam dit a’ po noungkalad om i noungkalad no. ²¹ Om hiri nopod puun do pointikid-tikid di tolu o raan do miampaping diri om haro ot iso’ o koiyo-iyo do tusak dit a’ po noungkalad. ²² Iri ngai’ nopo i tusak dit a’ po noungkalad om i raan, om i potitimpakan do lampung diri om iso’ no o watang do tamas di tinantan do winonsoi. ²³ Om minomonsoi iyau do turu’ o lampung do potimpakon di potitimpakan do lampung, om minomonsoi po iyau do sanggip om talam, do tamas dit osompipi’ o winonsoi. ²⁴ Om naayi’ nopo dau do pinomonsoi di potitimpakan do lampung diri om koinsanai di pakakas do hiri, om tolu nohopod om limo kilogram do tamas dit osompipi’. ²⁵ Om pomonsoi no i Bisaliil do mija’ do maan do podtutudan do kominyan, do kayu di roitan dot akasia o winonsoi. Om apasagi’ o pinomonsoi di mija’ do podtutudan diri; do konoruo’ nopo om apat nohopod om limo o sontimito, om apat i’ nohopod om limo o sontimito do kalaabo’, om kasawato’ no om siam nohopod o sontimito. Om pasagalai nopo di mija’ i sinangau-sangau di hiri’d apat o sunduk di mija’ddi. ²⁶ Om urogupai no dau do tamas dit osompipi’ i hiri’d sakai, om hiri’d misingobik om hiri’d misingompok, om i sinangau-sangau di mija’. Om oligo’ po dau do tamas o mitingisan di mija’ddi. ²⁷ Om pomonsoi no iyau do duwo o tontolingo do tamas, om podokoto’ no do hiri’d siriba-riba’ di pinongolig di mitingisan, do hiri’d miampaping di mija’, do maan do posusukan di kayu do pagantayang di mija’. ²⁸ Iri nopo kayu di pagantayang om kayu di roitan dot akasia o winonsoi, om nurogupan po dau iri do tamas. ²⁹ Om minomonsoi po i Bisaliil do tumau di ponununtug om i kominyan dit osonong o kosingudan, i pinogirolo-rolot do miagal di tumau dit osonong o kosingudan.

¹ Om pomonsoi no i Bisaliil do pananaraban do porsombahan di sorobon do kayu di roitan dot akasia o winonsoi. Om apasagi’ o pinomonsoi’ddi, do 2.2 mito do konoruo’ om 2.2 mito do kalaabo’, om 1.3 mito do kasawato’. ² Om pinasagalai dau di pananaraban do porsombahan o pinomonsoi di sinangau-sangau di hiri’d apat o sunduk dit id sakai di pananaraban do porsombahan. Om nurogupan ngai’ dau iri do tambaga’. ³ Om winonsoi nogi’ dau o koinsanai di pakakas di pananaraban do porsombahan: piro-piro poriuk, om sikup, om piro-piro mangkuk, om piro-piro totodok, om poiiyanan do tapui. Koinsanai’dti om tambaga’ ngai’ nopo do winonsoi. ⁴ Om pomonsoi no iyau do pangabot do tambaga’ o winonsoi, om pooboto’ no do hiri’d kopiintangaan do kasawato’ di pananaraban do porsombahan, dot id siriba’ di kabang di pananaraban do porsombahan. ⁵ Om pomonsoi no iyau dot apat o tontolingo om podokoto’ no do hiri’d apat o sunduk di pananaraban do porsombahan. ⁶ Om iri nopo kayu di pagantayang om kayu di roitan dot akasia o winonsoi, om nurogupan dau iri do tambaga’. ⁷ Om posusuko’ nogiddi dau di tontolingo do hiri’d miampaping di pananaraban do porsombahan i kayu do pagantayang. Iri nopo pananaraban do porsombahan diri om papan do winonsoi, om kiguang o hiri’d tanga’. ⁸ Om wonsoyo’ no di Bisaliil i mimpun do tambaga’, om i pinoimpahan di mimpun nga’ tambaga’ i’ do winonsoi. Iri nopo tambaga’ do pinomonsoi’ddi om i pogotulan i’ daa di tongoondu’ di maganu-anu do hiri’d wawayaan di Kiim do TUHAN. ⁹ Om rindingo’ no di Bisaliil o posorili’ di natad di Kiim do TUHAN. Pinomorinding nopo dau om kain linan dit osonong do winonsoi’d tabir. Konoruo’ nopo di tabir dit id disan ponong id salatan om apat nohopod om apat o mito, ¹⁰ do tinukod do duwo nohopod o torigi do tambaga’ di poinsungkad do duwo nohopod o posungkadan di tambaga’ do winonsoi, do mitonggoi di pangait om i loting di pirok do winonsoi. ¹¹ Om iyo iddi o winonsoi do hiri’d disan ponong id utara. ¹² Id bombong ponong id kotonobon no, om tinobiran do duwo nohopod om duwo mito do konoruo’, om pinawansayan do hopod o papan di pinoturidong do poinsungkad do hopod o posungkadan, om mitonggoi di pangait om i loting, i pirok do winonsoi. ¹³ Om i hiri’d bombong ponong id koulayon, i kiwawayaan, nga’ duwo i’ nohopod om duwo o mito do kalaabo’ di pinomorinding. ¹⁴ - ¹⁵ Hiri nopod miampaping di wawayaan om tinobiran do tabir dit 6.6 o mito do konoruo’, om norigianan do tolu o torigi do poinsungkad do tolu o posungkadan. ¹⁶ Koinsanai di tabir di pinomorinding di natad om kain ngai’ nopod linan dit osonong o winonsoi. ¹⁷ Iri nopo pinosungkadan di torigi om tambaga’ do winonsoi, om iri no pangait om i loting om i ponulob di tompok di torigi om pirok ngai’ nopo do winonsoi. Om pinogiromu-romut i torigi di pointutuk di natad dot i loting do pirok o pinopogiromu-romut. ¹⁸ Iri nopo tabir di wawayaan di pinomorinding di natad om kain linan dit osonong o winonsoi, i piniawol do kain di kihulu-hulu dot otomou, om it aragang doitom-itom, om it aragang; om rinindaan iri. Konoruo’ nopo di tabir diri om siam o mito, om kasawato’ no om duwo o mito; do pinoiyo di pinomorinding di natad. ¹⁹ Iri nopo tabir diri om tinukod dot apat o torigi do poinsungkad dot apat o posungkadan. Iri nopo pangait, om i pinonulob di torigi, om i pinomoloting om pirok ngai’ nopo do winonsoi. ²⁰ Nga’ iri nopo gapit di Kiim om gapit di pinomorinding om tambaga’ i’ do winonsoi. ²¹ Iti no o dopitar do kogumuo’ di pakakas dit ongokodou o winonsoi do pinakai do hiri’d Kiim do TUHAN, i pinoiyanan di duwo o kaping do watu di pinotulisan di Hopod ot Oturan do Kinorohingan. Minonuhu’ nopo do momonsoi di dopitar diri om i Musa, om minomonsoi nopoddi om i tulun do Liwi. Om woyoon nopo di tulun do Liwi do minomonsoi’ddi om i Itamar, i tanak di Harun. ²² Om wonsoyo’ ngai’ nopo di Bisaliil, (i tanak di Uri, i manangaki di Hur, i mantad id payat di Yohuda,) o koinsanai di pinonuhuan do TUHAN. ²³ I Oholiab nopo, i monguhup di Bisaliil, i tanak di Ahisamak, i mantad id payat di Dan, om mongingikir, om momolukis do maan do poiyaan, om mangangawol do kain linan dit osonong, om kain di kihulu-hulu dot otomou om aragang doitom-itom om it aragang. ²⁴ Koinsanai nopo di tamas di pinatahak dot id TUHAN do pomonsoi di Kiim dot Olidang om soribu o kilogram do kawagato’, do tinimbang do tumanud di poninimbang di natantu’ mantad. ²⁵ Iri nopo pirok do naanu do mantad id pinongintaban di tulun dot Israil om tolu noribu om apat nahatus om tolu nohopod o kilogram do kawagato’, do tinimbang do tumanud di poninimbang di natantu’ mantad. ²⁶ Kogumuon nopo di naanu’ddi om irad di kogumuo’ do pinabayar do koinsanai di tulun di nokointob dot id pinongintaban. Iso’ nopo o tulun om mambayar dot irad di pambayar di natantu’ mantad, om timbangon di poninimbang di natantu’ mantad. Nokohompit nopo dot id pinongintaban diri om onom nahatus om tolu noribu, om limo nahatus om limo nohopod o tongokusai di duwo nohopod o toun ko’ it id sawat ko’ iri o tumur. ²⁷ Iri nopo pirok diri, om tolu noribu om apat nahatus o kilogram do pinakai do pinomonsoi di hatus o posungkadan do torigi di Kiim dit Olidang om i tabir, do tolu nohopod om apat o kilogram do pinomonsoi do pointikid-tikid di posungkadan. ²⁸ Om iri nopoddi tolu po nohopod o kilogram do pirok do noolu’, om winonsoi di Bisaliil do panakong, om pangait do podokoton di torigi, om i pinosulob do hiri’d dompok di torigi. ²⁹ Kogumuon nopo di tambaga’ do pinatahak dot id TUHAN om duwo noribu om apat nahatus om duwo nohopod om limo kilogram. ³⁰ Om iri no tambaga’ddi o pinakai do pinomonsoi di pinosungkadan do hiri’d wawayaan di Kiim do TUHAN, om i pananaraban do porsombahan om i pangabot di pananaraban diri, om koinsanai di pakakas do hiri’d pananaraban do porsombahan, ³¹ om i pinosungkadan di pinangansar di natad, om i wawayaan di natad, om koinsanai di gapit di Kiim om i tabir di pinomorinding do pointutuk di Kiim.

¹ Om wonsoyo’ no diyo Bisaliil di Oholiab i pakayan do dong imam dit ongolumis, i papakayon di imam do tontok do maganu-anu iyolo’ do hiri’d Bilik dit Olidang. Om wonsoyo’ no diyolo’ i pakayan di Harun di dong imam do tumanud di pinonuhuan do TUHAN dot id di Musa. Winonsoi nopo diyolo’ do pakayan di dong imam diri om i kain do kihulu-hulu dit otomou, om aragang doitom-itom om aragang. ² Om wonsoyo’ no diyolo’ it ipod do kain linan dit osonong, om i kihulu- hulu dit otomou, om it aragang doitom-itom, om it aragang, om banang do tamas, o winonsoi. ³ Om tantano’ no diyolo’ o piro-piro kaping do tamas om pogiridi-ridiso’ no do soronipi-nipis do winonsoi do banang dit atandai. Om poowolo’ nogiddi iri di kain linan dot osonong, om i kain do kihulu-hulu dit otomou, om aragang doitom-itom om it aragang. ⁴ Om winansayan diyolo’d duwo o togiis o hiri’d miampaping di ponong id lihawa dit ipod, do pinodokot do hiri’d ponong id disan, om milo i’ do pikogoson. ⁵ Om iri nogi’ i tagkos dit atandai o pinangawol nga’ sagalai i’ di kain do winonsoi dot ipod o kain do winonsoi, om podokoto’ no do hiri’d ipod i tagkos om misagalai nopoddi, do miagal di pinonuhuan do TUHAN dot id di Musa. ⁶ Om lunaho’ noddi diyolo’ i watu dot agayo o gatang, i watu do roitan do delima, om podokoto’ no di padadakatan di tamas do winonsoi. Om pokikiro’ noddi diyolo’, dot osonong kopio o pinopokikir i ngaran di hopod om duwo o tangaanak di Yakub do hiri’d piro-piro o watu dit angagayo o gatang diri. ⁷ Om podokoto’ nogiddi i piro-piro o watu dit angagayo o gatang diri do hiri’d togiis do lihawa dit ipod do ponokowakil di hopod om duwo o payat dot Israil, do miagal di pinonuhuan do TUHAN dot id di Musa. ⁸ Om wonsoyo’ no diyo Bisaliil di Oholiab i lokop do kangkab. Om kain nopo do winonsoi diyolo’ddi om sagalai i’ di winonsoi dot ipod, om pinomorinda’ nga’ piagalo’ nopo. ⁹ Pinomonsoi nopo di lokop do kangkab om apasagi’ om pinilapis. Konoruo’ nopo om duwo nohopod om duwo o sontimito, om kalaabo’ nga’ duwo i’ nohopod om duwo o sontimito. ¹⁰ Om dakatai no diyolo’ i lokop do kangkab diri dot apat o rulud do watu dit angagayo o gatang. Hiri nopod rulud do koiso’ om dinakatan do watu di roitan do delima, om topas, om garnit. ¹¹ Hiri nod rulud do koduwo om dinakatan do watu di roitan do samrud, om nilam om mutiara’. ¹² Hiri nod rulud do kotolu om dinakatan do watu di roitan do lasuardi, akik, om kecubung. ¹³ Hiri nod rulud do kaapat om dinakatan do watu di roitan do pirus, yakut, om ratna cempaka. Om pinodokot ngai’ nopori dot id padadakatan, di tamas do winonsoi. ¹⁴ Om pointikid-tikid di hopod om duwo o watu’ddi nga’ kinikiran ngai’ nopo do ngaran di tangaanak di Yakub — iso’ nopo o watu om iso’ no o ngaran do pinokikir — do ponokowakil di hopod om duwo o payat dot Israil. ¹⁵ Om minomonsoi pod rantai do tamas dit osompipi’ o winonsoi, om pinitabid diri do miagal do tali. ¹⁶ Om pomonsoi po iyolo’ do duwo o pondulung do tamas do pinodokot do hiri’d sunduk ponong id sawat di lokop do kangkab. ¹⁷ Om iri nopo duwo o tompok di rantai’ddi om pinosulung do hiri’d duwo o pondulung, ¹⁸ om iri no duwo kawagu o tompok di suwai om pinokogos di padadakatan do watu dit agayo o gatang, om poingkogos di togiis do lihawa dit ipod. ¹⁹ Om pomonsoi po kawagu iyolo’ do duwo o pondulung do tamas do pinodokot do hiri’d sunduk ponong id siriba’ di lokop do kangkab, do hiri’d lupi di ponong id saalom, i pointopis dit ipod. ²⁰ Om pomonsoi po kawagu iyolo’ do duwo o pondulung do tamas do pinodokot do ponong id siriba’ di duwo o togiis di posoibau, i ponong id lihawa dit ipod, do hiri’d topis di lupi o pinadakatan, i hiri’d sawa-sawat di tagkos dit atandai o pinangawol. ²¹ Om pitokongo’ noddi diyolo’ i pondulung di lokop do kangkab om i pondulung dit ipod, do tali dit otomou o pinanakong, om id sawat kasai’ indo di tagkos i lokop do kangkab, om a’ i’ iri tumatak. ²² Om iri nopo rasuk dot anaru dit osoibahan dit ipod om kain ngai’ nopo di kihulu-hulu dit otomou o winonsoi. ²³ Om hiri nopod tisan di liou di rasuk om nawol do minongisan do pinomogirot, om a’ no oruhai dot ohurak. ²⁴ - ²⁶ Om pointutuk nopo do tompok di rasuk om pinadakatan do pongillumis di pinoiyo-iyo do tua’ do kayu di roitan do delima do kain linan dit osonong o winonsoi, om i kain do kihulu-hulu dit otomou, om aragang doitom-itom, om aragang; om piniolot-olot do giring do tamas do pinopodokot do tumanud di pinonuhuan do TUHAN do pinolombus di Musa. ²⁷ Om pomonsoi no iyolo’d rasuk do pakayon di Harun om i tangaanak dau, ²⁸ om minomonsoi nogi’ iyolo’ do sigar, om tupi’, om soluar dot oniba’ do kain linan o winonsoi, ²⁹ om tagkos do kain linan dit osonong, om kain di kihulu-hulu dot otomou, om aragang doitom-itom, om it aragang o winonsoi. Om rinindaan po diyolo’ iri do miagal di pinonuhuan do TUHAN dot id di Musa. ³⁰ Om pomonsoi po iyolo’ do pongillumis do tamas dit osompipi’ o winonsoi, do tanda’ do nokotobilang no iyolo’ do sumiliu do don TUHAN do songonuon. Om kikirai no diyolo’ i pongillumis diri do boros do poingkaa, ’’Pinotobilang do maan do don TUHAN,’’ ka. ³¹ Om pokogoso’ no diyolo’ iri do hiri’d sigar do hiri’d ponong id duros, do tali dit otomou o pinongogos, do miagal di pinonuhuan do TUHAN dot id di Musa. ³² Om kopongo ngai’ noddi i buruon do hiri’d Kiim do TUHAN. Om nowonsoi no di tulun dot Israil iri do tumanud di pinonuhuan do TUHAN dot id di Musa. ³³ Om ngoyo’ noddi diyolo’ pootodo’ dot id di Musa i Kiim om koinsanai di pakakas di Kiim; i pangait, om i tukod di potibabaron, om i papan di poturidongon, om i posungkadan di papan; ³⁴ om i ponokop, i kulit do dumba’ do tontoluhan do winonsoi, i sinasakan dot aragang, om i tokop, i kulit dit osonong do winonsoi; om i tabir do pinomorinding di Bilik dit Olidang Kopio; ³⁵ om i Kaban do Tumpongo, i pinoiyanan di duwo o kaping do watu om i sukud do pagantayang om i sompon di Kaban, ³⁶ om i mija’ om koinsanai di pakakas do hiri, om i roti di patahakon do maan do porsombahan dot id Kinorohingan; ³⁷ om i potitimpakan do lampung di tamas dot osompipi’ do winonsoi, om i piro-piro o lampung, om koinsanai di pakakas di lampung, om i tumau do ponuang di lampung; ³⁸ om i poiyanan do porsombahan di tamas do winonsoi, om i tumau do ponununtug, om i kominyan dit osonong o kosingudan, om i tabir di wawayaan di Kiim, ³⁹ om i pananaraban do porsombahan do mitonggoi di pinangabot, i tambaga’ do winonsoi, om i kayu do pagantayang, om koinsanai di pakakas di pananaraban do porsombahan; om i mimpun do pongougan om i poimpahan di mimpun, ⁴⁰ om i tabir do pomorinding di natad, om i torigi om i posungkadan di torigi, om i tabir di wawayaan di natad om i tali, om i gapit di Kiim, om koinsanai di pakakas do pakayon do hiri’d Kiim; ⁴¹ om i pakayan do dong imam dit ongolumis, i pakayon diyolo’ do hiri’d Bilik dot Olidang, om i pakayan di Harun di dong imam om i pakayan di tangaanak dau. ⁴² Om nowonsoi ngai’ no di tulun dot Israil i buruon diri do tumanud di pinonuhuan do TUHAN dot id di Musa. ⁴³ Om sorisido’ no di Musa do minogontong o koinsanai’ddi, om kokito no dau dot iyo ngai’ nopo di pinonuhuan do TUHAN o pinomonsoi diyolo’ddi. Om barakatai noddi di Musa iyolo’.

¹ Om boros kad TUHAN dot id di Musa, ² ’’Powonsoyon no i Kiim ku do tontok do tadau do koiso’ do tulan di koiso’. ³ Posuangon nod hiri’d Kiim i Kaban do Tumpongo, i kisuang di Hopod ot Oturan, om porindingon no i tabir do hiri’d dotimbabaan di Kaban. ⁴ Posuangon no i mija’ om pasakayon ngai’ nod hiri i pakakas do pointonggoi’ddi. Om posuangon nondo i potitimpakan do lampung om potimpakon ngai’ i lampung do hiri. ⁵ Poiyonon no i mija’ do tamas di podtutudan do kominyan do hiri’d dotimbabaan di Kaban do Tumpongo. Om porindingon no i tabir do hiri’d wawayaan di Kiim. ⁶ Iri nopo pananaraban do porsombahan di sorobon om hirion id dotimbabaan di Kiim. ⁷ Iri nopo mimpun do pongougan om hirion id piolitan di Kiim om i pananaraban do porsombahan. Om suangan nod waig i mimpun. ⁸ Powonsoyon no i pomorinding di natad om porindingon no i tabir do hiri’d wawayaan di natad. ⁹ Om patahakon no do maan do porsombahan dot id doho’ o koinsanai di pakakas di Kiim. Om ralan nopo do papatahak diri om tuntugan di tumau di ponununtug, om kotobilang indo ngai’ iri do maan do doho’. ¹⁰ Om patahakon no dot id doho’ i pananaraban do porsombahan om koinsanai di pakakas do pointonggoi’ddi. Ralan nopo do papatahak diri om tuntugan do tumau, om kotobilang indo ngai’ iri do maan do doho’. ¹¹ Om iyo iddi o papatahak di mimpun do pongougan om i poimpahan di mimpun. ¹² Om suhuon nondo i Harun om i tangaanak dau do mongoi do hiri’d wawayaan di Kiim, om suhuon iyolo’ do modsu’ do tumanud dit oturan do don tugama’. ¹³ Om rosukan nondo i Harun di pakayan do dong imam, om tuntugan no iyau do tumau. Iyo noddi o wonsoyon nu om kotobilang i’ iyau do sumiliu do imam do momonsoi’d karaja’ ku. ¹⁴ Angatan no i tangaanak di Harun om porosukan no diyolo’ i rasuk. ¹⁵ Om tuntugan nondo iyolo’ di tumau do miagal di pinonuntug nu di tapa’ diyolo’, om osiliu i’ iyolo’ do imam di momonsoi do karaja’ ku. Om iri no i tinuntugan iyolo’ do tumau o poposiliu diyolo’ do imam do gisom dot alaid,’’ ka dau. ¹⁶ Om wonsoyo’ ngai’ nopo di Musa o miagal diri do tumanud di pinonuhuan do TUHAN. ¹⁷ Om tontok di tadau do koiso’ di toun do koduwo do mantad di suminoliwan iyolo’ do mantad hilo’d Masir, om powonsoyo’ noddi i Kiim do TUHAN. ¹⁸ Om poiliho’ no di Musa i posungkadan, om poturidongo’ no i papan di poturidongon, om posusuko’ no i ponukod di potibabaron. ¹⁹ Om potokopo’ no dau di Kiim i ponokop di Kiim, om takapai no kawagu dau i tokop di posoibahon. ²⁰ Om ngoyo’ nogiddi dau i duwo o kaping do watu om posuango’ no di Kaban do Tumpongo. Om posusuko’ no dau i kayu do pagantayang do hiri’d tontolingo di Kaban, om posompono’ no dau i sompon di Kaban. ²¹ Om posuango’ noddi dau i Kaban do Tumpongo do hiri’d Kiim, om porindingo’ no dau i tabir. Om iyo noddi o ralan do monirung di Kaban do Tumpongo do tumanud di pinonuhuan do TUHAN dau. ²² Om posuango’ no dau i mija’ do hiri’d Kiim, do hiniri’d ponong id utara, dot id soliwan di tabir. ²³ Om pasakayo’ no dau di mija’ i roti di patahakon do maan do porsombahan dot id TUHAN. ²⁴ Om posuango’ no dau di Kiim i potitimpakan do lampung, om poiliho’ no do hiri’d ponong id salatan, do pinahapak di mija’. ²⁵ Om tutudai no dau i lampung do hiri’d kinoiyonon di Koropohon do TUHAN. ²⁶ Om posuango’ no dau di Kiim i mija’ do tamas, do pinohiri’d dotimbabaan di tabir, ²⁷ om tutudai no dau i kominyan dit osonong o kosingudan do miagal di pinonuhuan do TUHAN dot id di Musa. ²⁸ Om porindingo’ no dau i tabir do hiri’d wawayaan di Kiim, ²⁹ om poiliho’ no dau i pananaraban do porsombahan di sorobon do hiri’d dotimbabaan di tabir. Om patahako’ noddi i porsombahan do sorobon om i porsombahan do gandum do hiri’d sakai di pananaraban do porsombahan. ³⁰ Om poiliho’ no dau i mimpun do pongougan do hiri’d piolitan di Kiim om i pananaraban do porsombahan, om suangai no dau do waig i mimpun. ³¹ Om ougan kasai’ nopo di Musa, om i Harun, om i tangaanak di Harun o palad om lapap diyolo’ do hiri, ³² do soira’ nopo do sumuang iyolo’ di Kiim dot Olidang, ko’ mongoi insomok di pananaraban do porsombahan. ³³ Om hiri nopod posorili’ di Kiim om i pananaraban do porsombahan om rininding dau, om tinobiran dau o hiri’d wawayaan di natad. Om kopongo ngai’ noddi i buruon. ³⁴ Om sondot noddi o haun do minomolikup di Kiim dot Olidang om koponu’ nopo i Kiim do tulinau di kosorong tomod, i tanda’ do nakarapou o TUHAN. ³⁵ Om gowoi poddi om a’ i Musa milo do sumuang di Kiim. ³⁶ Om soira’ nopod minsawat i haun di hiri’d Kiim dot Olidang, om hiyason no di tulun dot Israil i kokiiman diyolo’, om kumaa nondo iyolo’ dot id kinoiyonon do suwai. ³⁷ Ondung hiri kasai’d sawa-sawat di Kiim dot Olidang i haun diri om hiri kasai’ po iyolo’d pinomukiiman diyolo’. ³⁸ Om solinaid nopo di tulun dot Israil do mombo-hombo, om okito kasai’ nopo i tanda’ do nakarapou o TUHAN do hiri’d sawa-sawat di Kiim diri, do kokitanan nopo do dangadau om miagal do haun, om kokitanan no do dongotuong om miagal do tapui di molob-ngolob.