ISTO

ISTO

¹ - ² Hilo’ nod Susan, i bandar dot agayo do Porsia, o niyon di Raja’ Ahaswiros do momorinta’ di hatus om duwo nohopod om turu’ o watas do mantad hilo’d India om gisom do hilo’d Etiopia. ³ Tontok di kotolu do toun di Raja’ Ahaswiros do momorinta’, om papaharo no iyau do poginakanan do pinangalapan do koinsanai di pagawai dau om i tulun dit ongkipangkat. Om nakarapou ngai’ nogi’ i soudor do Porsia om Modia, om i gobunor om i boyoon do watas dot id poginakanan diri. ⁴ Om onom kopio o tulan di raja’ do popingontong di kakayaan do hiri’d walai dau di don raja’ om i kagayaan om i kobontugo’ di pomorintaan dau. ⁵ Om katalib poddi iri, om papaharo po i raja’ do poginakanan do pinangalapan do koinsanai di tulun do kaya’ om i tulun do mosikin do hilo’d Susan, i bandar dot agayo. Koloido’ nopoddi om sominggu’, om niyon nopo nga’ hiri’d natad do walai di raja’. ⁶ Om linumis tomod i kinoiyonon diri do tabir do kain linan dit otomou om opurak, i kinagasan do tali do kain linan dit aalus dit otomou daragang- ragang, om pinokogos dot id pondulung do pirok do hiri’d torigi do marmar. Om pinosodiaan nogi’ do tirikohonon dit anganaru, i tamas om pirok do winonsoi, o hiri’d natad di walai di raja’. Iri nopo natad nga’ linopikan do marmar dot opurak dot opurak, om hablur dot aragang, om kulit do mutiara dit okolong, om watu do pirus dit otomou. ⁷ Om a’ no aayi-ayi’ o waig dot anggur do pinosurung di raja’. Om pinoninggorungan nopo di tinumon om sangkir do tamas di mogisuayan nopo o korupa-rupao’. ⁸ Om aiso’ nopo o poolu-oluon di waig dot anggur di tinumon, tu’ nosunudan ngai’ no di raja’ i susuhuon do hiri’d walai do raja’ do manahak do pointikid-tikid do tulun do tinumon do gisom dot abagalan iyolo’. ⁹ Om tontok iddi do pinapaharo i Raja’ Wasti do poginakanan do hiri’d suang di walai do raja’ do pinangalapan dau di tongoondu’. ¹⁰ Om tontok di tadau’d koturu’ do moginakan om osonong tomod diri o kopurimanan di raja’ om minginum iyau di tinumon. Om lohowo’ noddi dau i turu’ o susuhuon dau di nongoinggolian, i susuhuon kasai’ dau. Ngaran nopo diyolo’ om: i Mohuman, i Bista, i Harbona, i Bigta, i Abagta, i Sitar om i Karkas. ¹¹ Om suhuo’ no dau iyolo’ do mongoi pangangat di Raja’ Wasti do mongoi solowot dau do mikuwo’d monontupi’ di tupi’ do don raja’. Iri nopo raja’ do tondu’ddi nga’ olumis kopio koondu’, om orohian daa’ddi i raja’ do popoontong di kolumiso’ di raja’d tondu’ dot id koinsanai di pagawai om i tulun di nalap dau. ¹² Nga’ tontok di sinunudan di susuhuon i Raja’ Wasti di ponuhuan di Raja’ Ahaswiros diri, om a’ iddi nokotumboyo’ i Raja’ Wasti do mongoi solowot di Raja’ Ahaswiros. Om kotogod tomod noddi i raja’. ¹³ Om koubasanan no di raja’ do moguho-guhot ondung poingkuro ot osorou di tulun dit ongoilo do pasal dot undang-undang om oturan. Om lohowo’ noddi dau i piro-piro o ponosihat dau, i tulun dit ongkoilo ondung nunu ot apatut do wonsoyon dot id suang do hal diri. ¹⁴ Om kosoruan nopo dau do mokinosihat om i Karsina, i Sitar, i Admata, i Tarsis, i Miris, i Marsina, om i Momukan, i turu’ o pagawai do Porsia om Modia dit angasawat kopio o pangkat dot id pomogunan diri. ¹⁵ Om boros ka dau dot id turu’ o tulun diri, ’’Iyoho’ no, i Raja’ Ahaswiros, o minonuhu’ di susuhuon ku do mongoi popoilo di Raja’ Wasti do mongoi solowot doho’, nga’ a’ i’ dau numboyo’ iri! Tumanud nopo dot undang-undang om nunu ot apatut do wonsoyon toko’ dot id dau?’’ ka dau. ¹⁶ Om boros ka di Momukan dot id raja’ om id piro-piro pagawai di raja’, ’’Okon nopo ko’ raja’ noo o nindaraat di Raja’ Wasti nga’ oinsanan nogi’ i pagawai do raja’, om oinsanan o tongokusai do hiti’d pomorintaan nu! ¹⁷ Oinsanan nopondo o tongoondu’ do hiti’d pomorintaan nu dot a’ momusou do sawo diyolo’ do korongou iyolo’ di nowonsoi di raja’d tondu’. Mimboros nondo iyolo’ dot, ’Sinuhu’ di Raja’ Ahaswiros i Raja’ Wasti do rumikot do mongoi solowot dau nga’ a’ i’ iyau minumboyo’,’ ka nondo diyolo’. ¹⁸ Korongou ngai’ nopondo i sawo do koinsanai di pagawai do raja’ do Porsia om Modia do kowoyo-woyoon di raja’d tondu’ddi, om atantu’ no dot olomus nopo iyolo’ do momisunud di sawo diyolo’ do pasal diri. Om kootuson nopondo nga’ sumaap nondo i tondu’ di kusai om i kusai nga’ tumogod nondo di tondu’. ¹⁹ Ondung kohubayaan do Tuan Raja’, om ponulis no do maan do kopoilaan dot a’ nondo koino-ino do mongoi timbaba’ do raja’ i Wasti do mantad do tadau’d baino’. Om potulison nori dot id suang dot undang-undang do Porsia om Modia, om a’ i’ osimbanan do gisom dot alaid. Om patahakon nogindo ilo pangkat dau do raja’d tondu’ dot id tondu’ dit osonong ko’ iyau. ²⁰ Om kopinsunud nopondo i kopoilaan nu’ddi dot id pointongkop diti pomorintaan nu dot agayo kopio, om oinsanan nopondo o tongoondu’ do momusou do sawo diyolo’, dot i tulun di kaya’ om i mosikin,’’ ka dau. ²¹ Om nosokodungan i’ di raja’ om i pagawai dau i boros di Momukan diri, om wonsoyo’ noddi di raja’ o miagal di pinoboros di Momukan. ²² Om tikidai nopoddi dau do kopoilaan i watas dot id suang do pomorintaan dau do tinulis dot id suang do boros do hiri’d watas diri om tumanud do kowoyo-woyoon do ponunulis do watas diri. Iri nopo pinotulis nga’ apatut no dot i kusai o boyoon do sompiiyon dau om iyau o moro-boros kopio do manantu’ dit apatut do wonsoyon.

¹ Om alaid noddi, tontok di nakatanus-tanus no o kototogod di raja’, om momusorou kasai’ po iyau di nowonsoi di Wasti om i pinoboros dau do wonsoyon dot id di Wasti. ² Om boro-boros noddi o piro-piro di ponosihat di raja’, it ongoubas kopio di raja’. Boros ka diyolo’, ’’Osonong nogi’ do mogihum ko do kosumandakan dit ongolumis. ³ Om milo ko i’ do momili’ do piro-piro pagawai dot id pointikid-tikid do watas diti pomorintaan nu, om suhuon nondo iyolo’ do papaatod do kosumandakan dit ongolumis do hiti’d poiiyanan nu do tongoondu’ nu do hiti’d Susan, i bandar dot agayo. Om i Higai nondo, i susuhuon nu di noinggolian om i madtatamong di walai di tiiyonon di tongoondu’ o mongilo-ilo diyolo’. Om onuan nogindo iyolo’ do pongillumis do tinan. ⁴ Om isai nopo i tondu’ do korohian kopio nu om iri no ot onuon, om potingolonon di Wasti do sumiliu do raja’d tondu’,’’ ka diyolo’. Om kotumboyo’ i’ i raja’ di nosihat diri om tonudo’ noddi dau. ⁵ Om haro o songulun o bansa’d Yohudi do poingiyon do hilo’d Susan. Ngaran nopo dau om i Mordikai, i tanak di Yair. Iyau nopo om sinakagon di Kis om i Simoi, i mantad id payat do Binyamin. ⁶ Tontok di naala’ di Raja’ Nobukadnisar i raja’ do Babil, o Yorusalim, om tanggayai no dau i Mordikai do mogiwoyo-woyo’ di Raja’ Yoyakim, i raja’ do Yohuda, om ogumu’ po o tulun do suwai. ⁷ Om haro o pinsan dau dot i Isto o ngaran. Nga’ ngaran nopo di Isto do don Ibrani om i Hadasa. Iyau nopoddi om olumis kopio om osonong o koinan-inano’. Om tontok di napatai goduwo i molohing di Isto om nongoi’ddi iyau di Mordikai gompio’ om siniliu dau iyau do miagal do dau kopio’d tanak. ⁸ Tontok di nokosoliwan di raja’ i kopoilaan diri om ogumu’ tomod diri o kosumandakan do pinakaa do hilo’d Susan. Om i Isto nga’ hiri nogi’. Om iyau nga’ pinosuang nogi’ di walai’d raja’, om pinatamangan di Higai, i boyoon di poiiyanan di raja’ do tongoondu’. ⁹ Om i Isto nopoddi nga’ kasanangan kopio om kosianan di Higai. Om tilombusai nopo dau i Isto do manahak di pongillumis do tinan. Om nonuan dau iyau di maan do pongillumis om nonuan do taakanon dit osonong kopio. Om nonuan nogi’ dau i Isto do tiyonon dit osonong kopio do hiri’d poiiyanan di raja’ do tongoondu’. Om sinuhu’ dau o turu’ o tongoondu’ di pinili-pili’ no do mantad hiri’d walai’d raja’ do mogobi-obi’ di Isto. ¹⁰ Om a’ i’ di Isto pinoboros do tulun iyau’d Yohudi, tu’ iri no o bilin di Mordikai dot id dau. ¹¹ Om monikid tadau nopo i Mordikai do mongoi pipanau-panau do hiri’d natad, di hiri’d dotimbabaan di poiiyanan di raja’ do tongoondu’ do mongoi pongilo ondung poingkuro-kuro no i Isto om ondung nunu ot osiliu dot id dau. ¹² Om koubasanan nopo do mongillumis do tongoondu’ om sontoun o koloido’: onom o tulan do pinggihilan do tumau di rinalatan do kominyan om onom kawagu o tulan do luhadon do tumau di rinalatan do pomowongi’ di suwai. Om katalib pondo iri om ngoyon nogindo posolowoto’ di Raja’ Ahaswiros o pointikid-tikid di tongoondu’. ¹³ Tontok nopo do tadau di ngoyon i tondu’ posolowoto’ di raja’, om di tumongkiad iyau do mantad hiri’d poiiyanan do tongoondu’ om mongoi nondo do hiri’d walai di raja’, om nunu nopo i korohian dau om milo ngai’ nopo dau do pakayon. ¹⁴ Om mongoi i tondu’ddi do hiri di dongsosodopon om kosuabon pondo om ngoyon nondo iyau poiyono’ dot id iso’ o poiiyanan do tongoondu’ di tamangan di Saagas, i kusai do noinggolian, i madtatamong di tongoondu’ di panakasawo di raja’. Om a’ nondo i tondu’ koongoi kosolowot kawagu di raja’ ondung a’ no iyau korohian kopio di raja’, om a’ no olohou o ngaran dau. ¹⁵ Om korikot noddi o maso di Isto do ngoyon posolowoto’ di raja’. I Isto — i tanak di Abihail, i pinsan di Mordikai. I Mordikai no o minomogompi’ di Isto do siniliu dau do dau’d tanak; i Isto — i kolumisan ngai’ nopo do pointikid-tikid do tulun di kokito dau. Tontok di norikot i kasalawatan di Isto di raja’, om pakayo’ nopo dau i pinotuduk di Higai, i kusai di noinggolian i boyoon di poiiyanan do tongoondu’. ¹⁶ Om tontok di koturu’d toun do pomorintaan di Ahaswiros, di tulan do kohopod, i tulan do Tibit, om ngoyo’ no i Isto posolowoto’ di Raja’ Ahaswiros do hiri’d walai di raja’. ¹⁷ Om iyau no o kinorohian kopio di raja’ do mantad ko’ i kosumandakan do suwai. Om iyau no o kinosianan kopio om kinohubayaan di raja’. Om potupiyai no dau di Isto i tupi’ do raja’ om siliho’ no dau iyau do raja’d tondu’ do suminowoli di Wasti. ¹⁸ Om papaharo noddi i raja’ do poginakanan dot agayo do pomusou di Isto. Om alapo’ ngai’ no dau i pagawai om i tulun dau dit ongkipangkat. Om poboroso’ no dau do tadau’d koundarangan o tadau’ddi dot id pointongkop di pomorintaan dau. Om popintikid no iyau dot ogumu’ o nipuhawang di mogisuayan do maan do pomuhawang di tulun do pointongkop di pomorintaan dau. ¹⁹ Om daamot nopoddi om pinili’ di raja’ i Mordikai do sumiliu’d pagawai do pomorinta’. ²⁰ Om i Isto no om a’ po dau nokosunud do bansa’ iyau do Yohudi, tu’ binilinan iyau di Mordikai dot a’ momisunud dot isai nopo o tulun do bansa’ dau. Om numboyo’ i’ dau iri do miagal di pongumboyo’ dau dit okoro’ po iyau, di poinsugku’ po iyau di Mordikai. ²¹ Om tontok di pakaraja’ i Mordikai do hiri’d walai di raja’ om karaatai no i Bigtan om i Tiris di Raja’ Ahaswiros, om pipakat no daa iyolo’ do mongoi pamatai di Raja’ Ahaswiros. Iyolo’ nopo goduwo’dti om kusai di noinggolian, om madtamong di wawayaan do kumaa do hiri’d kobilik-bilikan di raja’. ²² Om koilaai noddi di Mordikai i pakat diri, om posunudo’ no dau di Raja’ Isto. Om sunudai noddi di Isto i raja’ di noilaan di Mordikai. ²³ Om sorisido’ noddi kopio do mongilo i hal diri, om koilaai no dot otopot i’ kopio i pinosunud diri. Om giiso’ goduwo nopoddi i duwo o tulun diri. Om ponuhu’ no i raja’ do potulis diri dot id buuk di monusui do pasal di pomorintaan dau.

¹ Om alaid-laid poddi do mantad diri om poinsawato’ noddi di Raja’ Ahaswiros o pangkat do songulun di roitan dot i Haman, do siniliu do Boyoon do Montiri’. I Haman nopo om tanak di Hamidata, i sinakagon di Agag. ² Om sinuhu’ ngai’ di raja’ i pagawai dau do motud om tumuku’ dot id di Haman do popointalang do momusou iyolo’ dau. Om oinsanan nopoddi iyolo’ do tuminanud di pinonuhuan diri, nga’ i Mordikai poo ot a’ tuminanud. ³ Om uhoto’ no di pagawai di raja’ i Mordikai ondung nokuro tu’ sumurilog iyau di pinonuhuan di raja’. ⁴ Om monikid tadau nopo daa iyolo’ do mononsog di Mordikai do momonsoi do miagal diri, nga’ a’ nopo dau pokinongohon iyolo’. Boros ka dau, ’’Iyoho’ nopo om tulun do Yohudi, om a’ oku i’ koino-ino do tumuku’ dot id tulun,’’ ka dau. Om sunudai noddi diyolo’ i Haman do pasal diri, tu’ orohian iyolo’ do koilo ondung nunu o wonsoyon dau dot id di Mordikai. ⁵ Om notogod tomod diri i Haman di nokoilo iyau dot a’ i Mordikai motud om a’ tumuku’ dot id dau. ⁶ Om soira’ di noilaan dau do bansa’d Yohudi i Mordikai, om pomusorou no iyau do momohukum di Mordikai, om okon nopo ko’ i Mordikai noo o patayon, suwai ko’ minomusorou nogi’ iyau do mamatai ngai’ do tulun do Yohudi do pointongkop di pomorintaan do Porsia. ⁷ Om tontok di kohopod om duwo do toun di Raja’ Ahaswiros do momorinta’, do koontok di tulan do koiso’, i tulan do Nisan, om ponuhu’ no i Haman do tulun do mongundi’ (iri nopo tundi’ om roitan do ’’Purim’’) do mongilo ondung nunu o tadau om tulan dot osonong do popowonsoi dit osorou dau dot araat. Om nopili’ nopo nga’ tadau do kohopod om tolu do tulan do kohopod om duwo, i tulan dot Adar. ⁸ Om sunudai noddi di Haman i raja’, boros ka dau, ’’Haro ot iso’ o bansa’ do tulun do hiti’d pointongkop diti pomorintaan nu om haro ngai’ nopo i bansa’ddi dot id pointikid-tikid do watas. Om suwai kopio o tadat do woyoon diyolo’ do mantad ko’ i tadat do bansa’d suwai. Om kawagu po nga’ a’ iyolo’ mumboyo’ dot undang-undang diti pomorinta’, om a’ no kopio osonong do posimboyonon tomod nu iyolo’ do miagal diri. ⁹ Om ondung kohubayaan do Tuan Raja’, om monulis nod surat do monuhu’ do mamatai diyolo’. Tu’ ondung kaakun ko daa, om jominon ku i’ do koposuang oku do lobi ko’ 340,000 kilogram do pirok do hilo’d kousinan do raja’ do maan do pakayon do hiti’d pomorintaan nu,’’ ka dau. ¹⁰ Om korongou noddi di raja’ iri, om oluso’ no dau i pondulung dau, i pananaap do popogirot di tinulis di maan popinsunudo’, om patahako’ noddi dau iri dot id di Haman, i pisangod dot agayo do bansa’d Yohudi. ¹¹ Om boros kaddi di raja’ dot id dau, ’’Patahakon ngai’ ku no diya’ i bansa’ddi om i tusin diyolo’. Wonsoyon nopo i korohian nu’d wonsoyon dot id diyolo’,’’ ka dau. ¹² Om tontok di tadau di kohopod om tolu di tulan do koiso’, om lohowo’ no di Haman o koinsanai di gomponulis di raja’ om suhuo’ no dau iyolo’ do monulis di boros dau, om papasalin diri dot id pointikid-tikid do boros om kowoyo-kowoyoon do ponunulis do hiri’d pomorintaan di raja’, om pokirimon nogindo dot id koinsanai do pomorinta’, om gobunor, om pagawai. Iri nopo om tinulis dot id suang do ngaran di Raja’ Ahaswiros om sinaapan di pondulung dau. ¹³ Om ngoyo’ no di tulun dit ongosiau do manangkus popintikido’ i surat diri dot id pointikid-tikid do watas di porintaon di raja’. Om suang nopo di surat diri nga’ monuhu’ do mamatai do koinsanai di tulun do Yohudi — it ongomulok po om i komolohingan no, om i tongoondu’ om i tangaanak — dot insan i’ o tadau do kapamatayan, iri no i tadau do kohopod om tolu do tulan dot Adar. Om mositi’ nod patayon ngai’ iyolo’ om aiso’ no ot insianan, om onuon ngai’ nopo i dapu’ diyolo’. ¹⁴ Om mositi’ no do popinsunudon dot id tulun dot ogumu’ i boros diri dot id pointikid-tikid do watas, om kosodia’ ngai’ indo o tulun dot orikot o tadau’ddi. ¹⁵ Om ponuhu’ no i raja’ do popinsunud di boros diri dot id tulun dot ogumu’ do hilo’d Susan, i bandar dot agayo, om ngoyo’ no di tulun dit ongosiau do manangkus popingotodo’ iri dot id pointikid-tikid do watas. Om irikau no i raja’ om i Haman om inum no iyolo’ do daamot di bandar do Susan dot angagangau do nongkoilo di boros diri.

¹ Tontok di nokoilo i Mordikai do koinsanai di nongowonsoi do miagal diri, om hurako’ nopo dau o rasuk dau dot atatangaban. Om panampakai no iyau’d pakayan do mogihad, om arabai no dau do pupuk o tulu dau, om pimpanau no do mintongkop di bandar do mikuwo’d mompud-lompud om marang-garang do mihad ² gisom do nokorikot iyau do hiri’d wawayaan di walai do raja’. Om a’ i’ iyau suminuang tu’ a’ i’ koino-ino o tulun do kipakayan do pakayan do mogihad do sumuang do hiri. ³ Om honggo nopo o pinabarasan di boros di raja’ do pointongkop di watas, om hiri no i tulun do Yohudi do sanggarang-garang do mihad. Om puasa ngai’ nopo iyolo’ om minglompud do mihad, om kogumuan nogi’ diyolo’ do minanampakai do pakayan do mogihad om minisis dot id pupuk. ⁴ Om soira’ di sinunudan di susuhuon di Isto do tongoondu’ om tongokusai do noinggolian, i Isto do pasal di wonsoyon di Mordikai, om atangkabo tomod diri iyau. Om paatadai no daa dau do pakayan i Mordikai do maan pakayo’ do poningolon di pakayan do mogihad, nga’ minada’ i’ i Mordikai. ⁵ Om lohowo’ noddi di Isto i Hatak, it iso’ di tongokusai di noinggolian do hiri’d walai di raja’, om i pinili’ di raja’ do sumiliu do susuhuon di Isto, om suhuo’ no dau iyau do mongoi solowot di Mordikai om moguho-guhot ondung nokuro tu’ iyo’ddi o wonsoyon dau. ⁶ Om ongoi no i Hatak solowot di Mordikai do hiri’d titimungon do tulun do hiri’d bandar, i ponong id wawayaan di walai do raja’. ⁷ Om posunudo’ ngai’ nopo di Mordikai i nosiliu dot id dau om i kogumuo’ do tusin do pirok do nakabatos di Haman do posuangon do hiri’d kousinan do raja’, ondung angapatai ngai’ i tulun do Yohudi. ⁸ Om nonuan nogi’ di Mordikai i Hatak do solinan di surat di raja’, i tinulis do hilo’d Susan do monuhu’d mamatai do tulun do Yohudi. Om suhuo’ noddi di Mordikai i Hatak do mongoi patahak diri dot id di Isto, om poposunud kopio di hal diri dot id dau, om monuhu’ dau do mongoi pomolugu-lugut di raja’ om pokionuon kopio dot osianan i raja’ di bansa’ di Isto. ⁹ Om ongoi noddi i Hatak do hiri’d di Isto do mongoi poposunud di boros di Mordikai dot id dau. ¹⁰ Om suhuo’ no kawagu di Isto i Hatak do mongoi poposunud do boros diti dot id di Mordikai, ¹¹ ’’Ondung haro o tulun, do kusai tuu ko’ tondu’, do mongoi solowot di raja’, dot a’ di raja’ linohou, om hukuman nod kapatayon i tulun diri. Iri no ot undang-undang, om koinsanai di tulun do mantad po di ponosihat di raja’ om i rayat dot id pointongkop do watas nga’ koilo ngai’ noddi. Iso’ poo o ralan dot a’ oontok dot undang-undang diri, tu’ ondung poroloyon di raja’ o longon dau do poingigit i sukud do tamas dot id tulun diri om a’ no apatai i tulun. Nga’ sombulan no dot a’ oku di raja’ nolohou,’’ ka. ¹² Om soira’ do nokoboros di Hatak i boros di Isto diri dot id di Mordikai, ¹³ om poinsano’ no di Mordikai i Isto do poingkaa, ’’Kada’ nogi’ soroho’ dot osimbayan ko ko’ i tulun do Yohudi do suwai, do hino ko piya’d walai di raja’! ¹⁴ Ondung a’ ko mungkomi do tontok do maso’d miagal diti, om rumikot i’ ot itulung do mantad hilo’d surga do kumaa dot id tulun do Yohudi, om apasi indo iyolo’, nga’ apatai ko indo iya’ om opupusan no o sompiiyon di tapa’ nu. Nga’ nunu o koilo-ilo do bagi’ nogi’ do maso’d miagal diti o kinoposilihan diya’ do raja’d tondu’!’’ ka dau. ¹⁵ Om ponuhu’ no i Isto do poposunud dot isimbar dau do miagal diti dot id di Mordikai, ¹⁶ ’’Ngoyo’ ngai’ timungo’ i tulun do Yohudi do hiti’d Susan om sumambayang kou no do bagi’ doho’. Kada’ kou no akan om kada’ kou inum do solinaid do tolu o tadau om tolu o totuong. Om iyoho’ om iri ngai’ i susuhuon ku’d tongoondu’ nga’ a’ nogi’ makan om a’ minum do solinaid diri. Om atalib pondo iri om mongoi oku nogi’ solowot di raja’, do mulong piya do kotolibamban daa iri dot undang-undang. Ondung apatai oku do momonsoi’d miagal diri o kapatai-patayan, om pokoino i’ dot apatai oku piya,’’ ka dau. ¹⁷ Om pamanau noddi i Mordikai om wonsoyo’ no dau o koinsanai di pinonuhuan di Isto dot id dau.

¹ Om tontok di kotolu’d tadau di Isto do puasa om panampakai no iyau di pakayan dau do don raja’ om ongoi no iyau ingkakat do hiri’d natad do ponong id suang di walai’d raja’, do potimbaba’ di bilik do pinoiyanan di tirikohonon do raja’. ² Om tontok di nokito di raja’ i Raja’ Isto do poingkakat do hiri’d soliwan om kosianai no iyau dau, om poroloyo’ no dau i longon dau di kiinigit di sukud do tamas. Om ongoi noddi rapou i Isto om igit no iyau di tompok di sukud. ³ Om boros ka di raja’ do minonguhot, ’’Nunu o pokionuon nu oi Raja’ Isto? Sunudai oku nopo di pokionuon nu, mulong piya do songintanga’ diti pomorintaan ku o pokionuon nu nga’ patahakon ku i’ diya’,’’ ka dau. ⁴ Om boros ka di Isto, ’’Ondung kohubayaan do Tuan Raja’, om orohian oku daa do karapou kou di Haman dot id poginakanan do maan ku dokoyu do totuong do baino’,’’ ka dau. ⁵ Om suhuo’ noddi di raja’ i Haman do marau-arau do rumikot, om karapou i’ iyolo’ dot id poginakanan di pinosodia’ di Isto. Om ongoi no i raja’ om i Haman do hiri’d poginakanan diri. ⁶ Om uhoto’ no di raja’ i Isto di maso diyolo’d minum do waig dot anggur, boros ka dau, ’’Sunudai oku bo do pokionuon nu. Om patahakon ku i’ o pokionuon nu do mulong piya do songintanga’ diti pomorintaan ku,’’ ka dau. ⁷ Om boros ka di Isto, ⁸ ’’Ondung opuhawang kopio o Tuan Raja’ do papatahak do pokionuon ku om orohian oku po daa do karapou kou di Haman dot id poginakanan do pohoroon ku do totuong do suab do maan ku dokoyu. Om tontok pondoddi om sunudan tiya’ nogi’ do pokionuon ku,’’ ka dau. ⁹ Om tontok di tuminongkiad i Haman di poginakanan diri om osonong tomod o ginawo dau. Nga’ kokito no dau i Mordikai do hiri’d wawayaan di walai’d raja’ dot a’ miningkakat do sumuwau dau, om kotogod noddi kopio i Haman di Mordikai. ¹⁰ Nga’ pinusus i’ dau o ginawo dau om pouliai no dau do hiri’d walai dau. Om lohowo’ ngai’ noddi dau i tambalut dau do mongoi do hiri’d walai dau om nangatan nogi’ dau i Siris, i sawo dau do mongoi amung diyolo’. ¹¹ Om mokirayou-rayou tomod diri iyau dot id diyolo’ tu’ kaya’ kopio iyau om ogumu’ o tangaanak dau’d kusai, om pinoinsawat di raja’ o pangkat dau, om asawat o pangkat dau ko’ mantad di pagawai do suwai. ¹² Boros ka di Haman, ’’Pinapaharo i Raja’ Isto do poginakanan do maan no dahai di raja’, om nolohou po kawagu iyahai do totuong do suab. ¹³ Nga’ aiso’ nopo o komoyon diti dot id doho’ dot antang-antangan ku po i Mordikai, i tulun do Yohudi diri do poirikau do hilo’d wawayaan do walai’d raja’,’’ ka dau. ¹⁴ Om boros kaddi di sawo dau om i tongotambalut dau, ’’Ponuhu’ nopo pogi’ do poingkakat do torigi do duwo nohopod om duwo mito do kasawato’ do maan do pogiisan. Kosuabon pondod suab om pokionuon nogi’ di raja’ do pogiison i Mordikai do hiri. Om osonong indo o ginawo nu do mongoi rapou di poginakanan,’’ ka diyolo’. Om osonong i’ kopio o miagal diri do nosorou di Haman, om ponuhu’ no iyau do popoingkakat do torigi do pomogiisan.

¹ Om totuong nopoddi nga’ a’ tomod koodop i raja’, om ponuhu’ no iyau do mongoi di potutulisan do pasal di pomorintaan dau, om ponuhu’ no iyau’d tulun do mambasa’ddi dot id dau. ² Om iri nopo bohogian di binasa’ diyolo’ dot id dau nga’ pasal di Mordikai do pinopoimbulai di pakat do mamatai di raja’, i pakat di Bigtan om i Tiris, i duwo o kusai do noinggolian di madtatamong daa di kobilik-bilikan di raja’. ³ Om ponguhot no i raja’, ’’Poingkuro no o pinomusou om pinonomuli’ toko’ di Mordikai?’’ ka dau. Om boros ka di susuhuon dau, ’’Aiso’ i’ o nowonsoi dot id dau,’’ ka. ⁴ Om boros ka di raja’, ’’Haro o hino di pagawai ku do hiti’d walai ku’d dinondo?’’ ka dau. Om i Haman nopoddi nga’ kosusuang do hiri’d natad di walai do raja’ do mongoi daa pokibanar di raja’ do popogiis di Mordikai do hiri’d pogiisan di posodia’ no. ⁵ Om boros ka di susuhuon dau, ’’Hiti i’ i Haman do poingandad no do mongoi solowot diya’,’’ ka diyolo’. ’’Posolokoyo’ iyau,’’ ka di raja’. ⁶ Om salakoi no i Haman. Om boros ka di raja’ dot id dau, ’’Haro o songulun di korohian kopio ku’d momusou. Nunu tuu ot apatut do wonsoyon ku dot id tulun diri?’’ ka dau. Om poingkaa’ddi ot osorou di Haman, ’’Isai po tuu o pusohon kopio di raja’? Atantu’ no dot iyoho’,’’ ka. ⁷ - ⁸ Om boros ka dau do suminimbar di raja’, ’’Paatadan do pakayan do don raja’ o tulun diri, dot i pakayan di papakayon nu iya’. Om pakayan i kuda’ nu di tanda’ do don raja’. ⁹ Om suhuon nogindo o tiso’ di pagawai nu dit asawat o pangkat do mamakai di tulun diri di pakayan nu, om mikuwo’d momoyo’ dau, do poinsakai di kuda’ do maya’ do hilo’d titimungon do tulun dot ogumu’ do hilo’d bandar. Om popimboroson nogindo di tulun dot asawat o pangkat o boros do miagal diti do maso diyolo’d manau-panau, ’Antangai pogi’ o ponomuli’ di raja’ do tulun di pusohon dau!’ ka,’’ ka dau. ¹⁰ Om boros ka di raja’ dot id di Haman, ’’Ngoyo’ kopio i pakayan diri om i kuda’, om patahakon i’ iti tanda’ do pomusou di Mordikai, i tulun do Yohudi diri. Wonsoyon ngai’ nopo dot id dau i nongkoboros nu. Osolowot nu i’ iyau do poirikau do hilo’d wawayaan diti walai’d raja’,’’ ka dau. ¹¹ Om ngoyo’ noddi di Haman i pakayan diri om i kuda’, om porosukai no dau di Mordikai i pakayan. Om sakai noddi i Mordikai di kuda’ om woyoo’ no iyau di Haman do kuminaa do hiri’d titimungon do tulun dot ogumu’ do hiri’d bandar. Om popimboros diri i Haman di maso diyolo’ do manau-panau do poingkaa, ’’Antangai pogi’ o ponomuli’ di raja’ do tulun di korohian dau do momusou!’’ ka. ¹² Om poguliai noddi di Mordikai do hiri’d wawayaan di walai’d raja’, om arau-arau nopo i Haman do minuli’ do poinsompon po o rabas tu’ ointingayaman no kopio iyau. ¹³ Om sunudai no dau i sawo om i tongotambalut dau di nosiliu dot id dau. Om boro-boros noddi dot id dau i sawo dau om i tongotambalut dau dit ongoilo do momusorou, ’’Tumimpuun no dot aala’ di Mordikai i kokoriso’ nu. Iyau nopo om tulun i’ do Yohudi, om a’ ko i’ kaala’ dau. Atantu’ no dot aala’ ko dau,’’ ka diyolo’. ¹⁴ Om masaan diyolo’ do moro-boros di Haman nga’ korikot no i tongokusai di noinggolian do mantad hiri’d walai di raja’ do sangarau-arau tomod do minongoi pangangat di Haman do mongoi rapou di poginakanan di pinosodia’ di Isto.

¹ Om koinduwo no di raja’ om i Haman do minongoi rapou di poginakanan di pinosodia’ di Raja’ Isto. ² Om uhoto’ po kawagu di raja’ i Isto di masaan diyolo’d minum. ’’Nunu kopio o pokionuon nu, oi Raja’ Isto? Posunudo’ daa, om atantu’ no do patahakon ku i’ diya’. Songintanga’ piya diti pomorintaan ku o pokionuon nu nga’ patahakon ku i’ diya’,’’ ka dau. ³ Om boros ka di Raja’ Isto, ’’Ondung kohubayaan daa do Tuan Raja’ om pokionuon ku dot apasi o bansa’ ku. ⁴ Tu’ dinagang oku om i bansa’ ku do maan patayo’. Ondung dagangon daa iyahai dot id ponguripanan om a’ oku i’ daa mungkomi, om a’ oku i’ daa mamagangau diya’ do pasal diri, nga’ oruhai no iyahai do patayon om punsoon!’’ ka dau. ⁵ Om uhoto’ noddi di Raja’ Ahaswiros i Raja’ Isto, ’’Isai kopio daa o kasaap do momonsoi do miagal diri? Honggo o tulun diri?’’ ka dau. ⁶ Om boros ka di Isto, ’’Pisangod nopo dahai om i gomponginggorit dahai om iloi Haman, i tulun dot araat kopio!’’ ka dau. Om poinsonsod poddi i Haman di Raja’ om i Raja’ Isto dot opopoddosian. ⁷ Om ingkakat nopo i raja’ do natatagadan, om ongoi no do hiri’d natad di walai’d raja’. Om okito noddi di Haman dot iso-iso’ no kopio o ginawo di raja’ do momohukum dau dot i hal diri o kopomohukuman, om gowoi poddi om undorong po iyau do momolugu-lugut daa di Isto do mamasi dau. ⁸ Om haba’ nopo i Haman do hiri’d tirikohonon di Isto dit anaaru’ do mokiinsian, nga’ naampapan no do suminuang kawagu i raja’ do hiri’d bilik diri do mantad hiri’d natad di walai di raja’. Om soira’ di nokito di raja’ i Haman do miagal diri, om pamagarang no iyau, ’’Ngoyon po daa’dti kusai kosoho’ iti raja’d tondu’ do hiti’d toguang ku, om hiti’d suang do walai ku?’’ ka dau. Om koboros po di raja’ o miagal diri om ngoyo’ no di tongokusai di nongoinggolian kuluputai o tulu di Haman. ⁹ Om boros kaddi di tiso’ diyolo’, i roitan dot i Harbona, ’’Nokopoingkakat no moti’ daa i Haman do torigi do hilo’d walai dau do pogiisan di Mordikai, i minamasi do Tuan Raja’. Om kasawato’ nopo nga’ duwo nohopod om duwo o mito!’’ ka dau. Om boros ka di raja’, ’’Ngoyo’ i Haman pogiiso’ do hiri’d torigi’ddi!’’ ka. ¹⁰ Om pogiiso’ noddi i Haman do hiri’d torigi di winonsoi mantad daa dau do pogiisan di Mordikai. Om katanus-tanus nogiddi o kototogod di raja’.

¹ Om tontok i’ do tadau’ddi do pinatahak ngai’ di Raja’ Ahaswiros dot id di Raja’ Isto o koinsanai di dapu’ di Haman, i pisangod dot agayo di tulun do Yohudi. Om sunudai noddi di Isto do tikid i’ dau’d molohing i Mordikai, om mantad poddi om koino-ino no i Mordikai do mongoi solowot di raja’ dot a’ piya lohowon o ngaran dau. ² Om oluso’ noddi di raja’ i pondulung dau, i nanu kawagu dau do mantad id di Haman, om patahako’ no dau di Mordikai. Om suhuo’ no di Isto i Mordikai do mongilo-ilo di dapu’ di Haman. ³ Om ongoi po kawagu solowot i Isto di raja’. Om otud no iyau do mikuwo’d minihad do mokitulung di raja’ do mananus di pakat dot araat di Haman, i sinakagon di Agag, do mamatai di tulun do Yohudi. ⁴ Om poroloyo’ no di raja’ i sukud dau’d tamas dot id di Isto. Om ingkakat noddi i Isto, om boros ka dau, ⁵ ’’Ondung kohubayaan do Tuan Raja’, om ondung osianan kopio ko doho’, om pokionuon ku no daa do monuhu’ ko dot a’ mamayaan di pinonuhuan do hiri’d surat di Haman do mamatai do bansa’d Yohudi do hiti’d pomogunan diti. ⁶ Poingkuro oku pod kotoron, ondung osiliu o kosusaan diri dot id tulun ku, om iri pondo koobpinayan ku nga’ angapatai ngai’?’’ ka dau. ⁷ Om boros kaddi di Raja’ Ahaswiros dot id di Raja’ Isto om id di Mordikai, ’’Antangai pogi’ nga’ nokogiis ku no moti’ i Haman dot i pakat dau dot araat do mamatai di tulun do Yohudi o kinopogiisan, om nakatahak ku diloi Isto i dapu’ dau. ⁸ Nga’ boros nopo di pinotongkop dot id suang do ngaran do raja’ om nasaapan di saap do raja’, om a’ no milo’d simbanan. Nga’ pabanaron ku i’ iyokoyu do monulis do surat dot id tulun do Yohudi do poingkuro nopo it osonong dot osorou dokoyu. Om tulison nopo dokoyu i surat dot id suang do ngaran ku, om saapan nopo di saap di don raja’,’’ ka dau. ⁹ Om tontok nogi’ do tadau’ddi, di tadau’d koduwo nohopod om tolu do tulan do kotolu, i tulan do Siwan, do linohou di Mordikai i piro-piro gomponulis do raja’ om suhuo’ no dau iyolo’ do potulis di boros dau dot id surat do pokirimon dot id tulun do Yohudi, om id koinsanai’d gobunor, om boyoon, om pagawai di 127 o watas; do mantad pod hilo’d India om poingkaa do hilo’d Etiopia. Om iri nopo surat diri om tinulis do tumanud di boros om kowoyo-woyoo’ do ponunulis do pointikid-tikid di watas, om id suang do boros om kowoyo-woyoo’ do ponunulis di tulun do Yohudi. ¹⁰ Om iri nopo surat diri nga’ tinulis ngai’ nopo dot id suang do ngaran di raja’, om saapai nogiddi di saap do don raja’. Om ponuhu’ nogiddi i Mordikai do tulun do mongoi popotikid di surat diri dot id pointongkop do watas do pomorintaan, do sumakai’d kuda’ dit ongosiau di don raja’. ¹¹ Om iri ngai’ nopo i surat diri om pinoposunud do papabanar i raja’ di tulun do Yohudi dot id pointikid-tikid do bandar do mogiuulud do mongintirung do tinan diyolo’. Ondung ngoyon iyolo’ saapo’ di tulun di kirapo-rapo do mantad id nunu nopo o bansa’ do hinonggo nopo o watas do kinoiyonon diyolo’, om pokoino i’ iyolo’ do sumaap om mamatai diyolo’ do pitonggoyon di sawo om tangaanak diyolo’, om pokoino iyolo’ do mamatai ngai’ do pisangod diri om manganu di dapu’ diyolo’. ¹² Iti nopo pinoboros diti om mositi’ nod wonsoyon dot id pointongkop do pomorintaan do Porsia do tontok di tadau di natantu’ mantad daa di Haman do kapamatayan di tulun do Yohudi, iri no i tadau’d kohopod om tolu do tulan di kohopod om duwo, i tulan dot Adar. ¹³ Om mositi’ nod poboroson iri do miagal dot undang-undang om posunudon dot id koinsanai’d tulun dot id pointikid-tikid di watas, om kosodia’ i’ i tulun do Yohudi do sumaap di pisangod diyolo’ do tontok do tadau’ddi. ¹⁴ Om pamanau ngai’ noddi i tulun di sinuhu’ddi do suminakai’d kuda’ di don raja’. Om pinopinsunud nogi’ di tulun dot ogumu’ i boros diri do hilo’d Susan, i bandar dot agayo. ¹⁵ Om soliwan noddi i Mordikai do mantad hiri’d walai do raja’ do kipinakai do pakayan do don raja’ dit otomou om opurak, om kirasuk iyau dot anaaru do kain linan dit otomou daragang-ragang, om kitupi’ iyau do tupi’ di don raja’ di tamas do winonsoi dit olumis kopio. Om noponu’ pod pinongkisan dot atataadan o hiri’d bandar do Susan. ¹⁶ Om iri’ddi tulun do Yohudi nga’ ongosimbayan tomod tu’ aiso’ noddi o kagangahan diyolo’. ¹⁷ Om binasa’ nogi’ i boros di raja’ do hiri’d bandar om hiri’d watas om hilo’ no do pinapaharo i tulun do Yohudi do tadau do koundarangan, do mikuwo’d minoginakan om ongotood tomod iyolo’. Om ogumu’ diri o tulun do suwai do tuminanud do tugama’ do Yohudi, tu’ ooris iyolo’ di tulun do Yohudi.

¹ Om korikot noddi i tadau do kohopod om tolu do tulan dot Adar, i tadau do kapamansayan di boros do mantad id raja’, i tadau do soro-sorohon di pisangod di tulun do Yohudi do mangala’ di tulun do Yohudi. Nga’ iri nogiddi i tulun do Yohudi o minangala’ diyolo’. ² Om honggo nopo o kinoiyonon di tulun do Yohudi dot id pointikid-tikid do bandar do hiri’d pomorintaan di raja’, om hilo’ no do minogiuulud iyolo’ do tuminimung om minogisosokodung do sumaap dot isai nopo o tulun di sumaap do pokoruol diyolo’. Om ongooris ngai’ nopoddi diyolo’ i tulun do hinonggo nopo, om aiso’ no o tongosongulun piya do katama’ do sumaap diyolo’. ³ Om oinsanan nopo i pagawai do hiri’d watas om i gobunor, om i songingkaraja’ dot id pomorinta’ do suminokodung di tulun do Yohudi tu’ ongooris ngai’ iyolo’ di Mordikai. ⁴ Om nokotongkop noddi di pomorintaan di raja’ dot agayo o kuasa’ di Mordikai. ⁵ Om gowoi poddi om nunu nopo o korohian di tulun do Yohudi do wonsoyon dot id pisangod diyolo’ nga’ milo no diyolo’d wonsoyon. Ongkigayang nopoddi iyolo’ do minongoi saap om minamatai di pisangod diyolo’. ⁶ Om hilo’ nopod Susan, i bandar dot agayo, om limo nahatus o tulun do pinatai di tulun do Yohudi. ⁷ - ¹⁰ Om iri nopo wookon di nangapatai’ddi nga’ i hopod o tanak do kusai di Haman, i tanak di Hamidata, i pisangod dot agayo di tulun do Yohudi. Ngaran nopo di tangaanak di Haman diri om: i Parsandata, i Dalpon, i Aspata, i Porata, i Adalia, i Aridata, i Parmasta, i Arisai, i Aridai om i Waisata. Nga’ a’ i’ i tulun do Yohudi minongoi pagahau di dapu’. ¹¹ Om tontok i’ do tadau’ddi do pinosunud dot id raja’ o kogumuo’ do tulun di napatai do hilo’d Susan. ¹² Om boros kaddi dau dot id di Raja’ Isto, ’’Hiti nopod Susan om limo no nahatus o tulun do napatai di tulun do Yohudi, om kohompit ngai’ i hopod o tanak do kusai di Haman. Om okuro-kuro nopo tuu o winonsoi diyolo’ do hilo’d piro-piro o watas do suwai! Nunu po o pokionuon nu? Sunudai oku nopo do pokionuon nu om atantu’ no dot aanu nu i’ iri,’’ ka dau. ¹³ Om boros ka di Isto do suminimbar, ’’Ondung kohubayaan do Tuan Raja’, om pologo-logoso’ po i tulun do Yohudi do hiti’d Susan do momonsoi do miagal di winonsoi diyolo’ baino’ do tadau’d suab. Om monuhu’ do momogiis di rata’ di hopod o tanak di Haman do tongokusai do hilo’d pomogiisan,’’ ka dau. ¹⁴ Om ponuhu’ noddi i raja’ do powonsoi do miagal di pinokianu di Isto, om popinsunudo’ no i boros diri do hilo’d Susan. Om posoliwano’ noddi i rata’ di hopod o tanak di Haman do kusai do maan pogiiso’. ¹⁵ Tontok di tadau’d kohopod om apat do tulan dot Adar om timung po kawagu i tulun do Yohudi do hilo’d Susan om pamatai po iyolo’ do tolu kawagu nahatus o tulun do hiri’d bandar diri. Nga’ a’ i’ iyolo’ minongoi pangahau di dapu’. ¹⁶ Om iri tulun do Yohudi do hiri’d watas do suwai nga’ tuminimung nogi’ om minogiuulud do mongintirung do tinan diyolo’. Om kaala’ no om kapatai diyolo’ o 75,000 o tulun dit araatan diyolo’. Nga’ a’ i’ iyolo’ minongoi pagahau di dapu’. ¹⁷ Miagal noddi o nosiliu di tadau do kohopod om tolu do tulan dot Adar. Nga’ tontok nopo di tadau do kohopod om apat om aiso’ no o pinatai, suwai ko’ rinamai’ddi diyolo’ o tadau’ddi do mikuwo’d ongotood ngai’ iyolo’ om minoginakan. ¹⁸ Nga’ iri nopo tulun do Yohudi di hilo’d Susan, om iri tadau do kohopod om limo o tadau do rinamai diyolo’ tu’ minamatai po iyolo’ di pisangod diyolo’ di tadau do kohopod om tolu om tadau do kohopod om apat. Om tontok nogiddi di tadau do kohopod om limo do tuminingkod iyolo’. ¹⁹ Om iri nopoddi tulun do Yohudi di songingiyon dot id bandar dot ongokooro’ om iri no tadau do kohopod om apat di tulan dot Adar o siniliu diyolo’ do tadau’d karamayan om tadau do kataadan, om maso do moginakan om kopogitahak-tahakan do taakanon. ²⁰ Om tuliso’ no di Mordikai i nongosiliu’ddi om popingkirim no iyau’d surat dot id toinsanan di tulun do Yohudi dit id somok om id sodu’ do pointongkop di pomorintaan do Porsia. ²¹ Suang nopo di surat diri nga’ monuhu’ diyolo’ do mamaramai di tadau do kohopod om apat om tadau do kohopod om limo do tulan dot Adar do pointikid do toun. ²² Tu’ tontok no do tadau’ddi do naala’ di tulun do Yohudi i pisangod diyolo’, om tontok no do tulan diri do nosowolian do kataadan om kosimbayanan o katangaban om katangkabaan. Om sinunudan iyolo’ do papaharo do poginakanan om karamayan, om maso do kopogitahak-tahakan do taakanon, om manahak nogi’ do nipuhawang dot id tulun do mosikin. ²³ Om tonudo’ no di tulun do Yohudi i boros di Mordikai, om kosiliu noddi do tadau’d karamayan o tadau’ddi do monikid toun. ²⁴ I Haman nopo, i tanak di Hamidata, i sinakagon di Agag, i pisangod dot agayo di tulun do Yohudi, om minongundi’ (i tundi’ di roitan do ’’purim’’) do mongilo do tadau do kapamatayan di tulun do Yohudi; tu’ maan daa dau iyolo’ punsoo’. ²⁵ Nga’ ongoi no i Isto solowot di raja’ om potongkopo’ noddi di raja’ o ponuhuan di tinulis dot id surat om gowoi poddi om i Haman nogi’ o noontok di kapatayon di wonsoyon daa dau dot id tulun do Yohudi, tu’ kogiis nopo iyau om i tangaanak dau’d kusai do hiri’d torigi di pogiisan. ²⁶ Om iri noddi o kinoroitan do tadau dot agayo’ddi do Purim. Om i surat di Mordikai, om koinsanai di nongosiliu dot id tulun do Yohudi, ²⁷ o nokoodsuur diyolo’ do momonsoi dot oturan di tonudon diyolo’ om tonudon di sinakagon diyolo’ om koinsanai di tulun do suwai do bansa’d Yohudi. Tumanud nopo dot oturan diri om mositi’ nod ramayon diyolo’ o duwo o tadau di tinantu’ di Mordikai do monikid toun. ²⁸ Om tinantu’ nogi’ do hondomon kasai’ om ramayon o tadau do Purim diri do pointikid-tikid do sompiiyon do Yohudi do mogisolusuk-lusuk do gisom dot alaid, dot id pointikid-tikid do watas om bandar. ²⁹ Om ponulis po i Isto, i tanak di Abihail, do pinoruhang di surat di Mordikai do popogirot di surat di Mordikai do pasal do Purim. ³⁰ Om pinokirim i surat diri dot id pointikid-tikid do tulun do Yohudi om kiniriman nogi’ do solinan i 127 o watas do hiri’d pomorintaan do Porsia. Om pinotulisan nogi’ i surat diri do sambayang do mokianu’d kosimbayanan om aiso’ indo o koligagaanan do tulun do Yohudi. ³¹ Om minonuhu’ diyolo’ om i sinakagon diyolo’ do momusou di tadau do Purim do tontok di maso di natantu’ mantad, do miagal di pomusou diyolo’ dit oturan do momusou di maso do puasa om i maso do mogihad. Om iri no o pinonuhuan di Mordikai om i Raja’ Isto dot id surat diri. ³² Om iri nopo pinonuhuan di Isto, i pinopogirot dit oturan do pasal do Purim, om pinotulis dot id suang do buuk.

¹ Om sansagai noddi di Raja’ Ahaswiros do kumaraja’ i tulun do poingiyon do hiri’d potoropis do rahat om i tulun di poingiyon dot id sodu’ di rahat, dit id suang do pomorintaan dau. ² Om oinsanan nopo i nongowonsoi dau dit angagayo om i kongopusahan kopio, om oinsanan i susuyon di pinopoinsawat iyau do pangkat di Mordikai, do nongkotulis do hiri’d suang do buuk di monusui do pasal ngai’ di raja’ do Porsia om Modia. ³ Om i Mordikai nopoddi, i tulun do Yohudi, om asawat no kopio o pangkat dau tu’ iri po raja’ ot id sawat ko’ iyau. Om pusohon tomod om korohian iyau di sompi’ ko’ tulun do Yohudi. Om kuminaraja’ iyau do popoinsonong di tulun dau om poposimbayan do koinsanai di sinakagon diyolo’.