IPOSUS

IPOSUS

¹ Kumaa id tulun di songonuon do Kinorohingan di hiti’d Iposus, it otorodok dot id Kristus Yesus! ² Mogondos oku, iyoho’ i Paulus, i nosiliu’d rasul do Kristus Yesus do tumanud do korohian do Kinorohingan, i Tapa’ toko’ om i Tuhan Yesus Kristus dot onuan kou do barakat dau om kosimbayanan do ginawo. ³ Royohon no o Kinorohingan, i Tapa’ do Tuhan toko’ i Yesus Kristus! Iyau no o minamarakat dati’ do koinsanai di barakat do don rusod di mantad hilo’d surga, tu’ nokoiso’ toko’ no dot id Kristus. ⁴ Tontok dit a’ po nowonsoi iti pomogunan, om nopili’ mantad toko’ nod Kinorohingan dot id suang do Kristus. Om osiliu toko’ i’ kopio do dau’d songonuon, om aiso’ o sala’ dot id toguang dau. Tu’ mantad no do kosianan do Kinorohingan, ⁵ do tinantu’ mantad toko’ dau do silihon do tangaanak dau dot id suang di Yesus Kristus. Om iri kopio o korohian dau’d momonsoi. ⁶ Royohon no o Kinorohingan i kikagayaan kopio, tu’ id suang no di tanak dau di kosianan kopio dau do nosianan kopio iyau dati’. ⁷ Tu’ iri no i kinapatayan do Kristus o kinopoiduan do Kinorohingan dati’, komoyon nopoddi om noompunan no dau i dusa toko’. ⁸ Winonsoi pogi’ dau o miagal diri nga’ osianan kopio i’ iyau dati’, om poluyungo’ no dau i kosianan dau dit a’ ogina-gina’ dot id dati’ do mikuwo’d toilaan om komiloo’ dau dit aralom kopio. ⁹ Om posunudo’ noddi do Kinorohingan dot id dati’ i natantu’ mantad dau do wonsoyon dau, om it a’ mantad daa dau pinosunud tu’ iyo noddi o korohian dau. Om tinantu’ dau do pongoon nondo i natantu’ mantad dau do wonsoyon dot i Kristus o momongo’ddi. ¹⁰ Iri nopo i natantu’ mantad dau’ddi do pongoon om iri no tu’ popiiso’ dot id Kristus do koinsanai di hilo’d surga om i hiti’d pomogunan, om Kristus no o sumiliu do boyoon. Om wonsoyon nondo do Kinorohingan iri dot orikot i maso dau do momonsoi. ¹¹ Koinsanai’d nunu nopo om wonsoyon ngai’ nopod Kinorohingan do tumanud di natantu’ mantad dau om i korohian dau. Mantad poddi timpuun i’ om nopili’ mantad toko’ nod Kinorohingan, tu’ orohian i’ iyau dot osiliu toko’ do tulun di songonuon dau do koiso’ toko’ dot id Kristus. ¹² Kainou no mamarayou’d Kinorohingan, iyati’ i nokopogulu do mogondos do Kristus, dot i kagayaan do Kinorohingan o kapamarayahan. ¹³ Om iyokoyu nga’ nosiliu nogi’ do tulun di songonuon do Kinorohingan do tontok di nokorongou kou di boros do Kinorohingan, iri no i Habar dot Osonong, i manahak dokoyu do koposion. Om onuwai kou noddi do Kinorohingan do Rusod dau di pinabatos dau, do tanda’ do songonuon kou dau, tu’ otumbayaan kou i’ di Yesus Kristus. ¹⁴ Om iri no i Rusod diri o pamajamin do kaanu toko’ nondo di pinabatos mantad do Kinorohingan dot id tulun di songonuon dau. Om iri no i popogirot kopio do ginawo toko’ do monongkuyaan do poiduwon indo do Kinorohingan i tulun di songonuon dau. Royohon no o Kinorohingan dot i kagayaan dau o kapamarayahan! ¹⁵ Om mantad poddi di nokorongou oku do notumbayaan kou di Tuhan Yesus, om pasal di kosianan dokoyu dot id koinsanai do tulun di songonuon do Kinorohingan, ¹⁶ om a’ oku nopoddi otingkod do mongunsikou dot id Kinorohingan dot iyokoyu o kopongunsikahan ku. Om roiton kasai’ ku o ngaran dokoyu do tontok do sumambayang oku. ¹⁷ Om pokionuon ku o Kinorohingan di Tuhan toko’ i Yesus Kristus, i Tapa’ di kikagayaan do papatahak di Rusod dau dot id dokoyu. Om iri no i Rusod diri o manahak dokoyu do toilaan om popointalang do Kinorohingan dot id dokoyu do gisom do kotutun kopio kou dau. ¹⁸ Om pokionuon ku no dot ukaban do Kinorohingan o pomusarahan dokoyu om kokito kou i’ di tanawau dau. Om kosuhut kou i’ ondung nunu i soro-sorohon dokoyu’ddi do mantad id Kinorohingan i minomolohou dokoyu. Om koilo kou i’ do barakat dit ongosonong kopio dit a’ aayi-ayi’ di pinosodia’ do Kinorohingan do patahakon di tulun di songonuon dau; ¹⁹ om i kogoyoo’ do kuasa’d Kinorohingan di kumaraja’ dot id suang toko’, iyati’ i notumbayaan. Iri nopo i kuasa’d Kinorohingan diri nga’ miagal di kogoyoo’ do kuasa’ dau, ²⁰ di pinasi kawagu dau i Kristus do mantad id kapatayon. Om onuwai noddi do Kinorohingan iyau do pangkat dit asawat kopio do poinsugku’ dau do hilo’d surga. ²¹ Iri nopo i pangkat do Kristus diri om asawat i’ kopio ko’ i pangkat do koinsanai’d pomorinta’, om koinsanai di monguasa’ om koinsanai di boyoon om koinsanai di woyo-woyoon om koinsanai di tulun dit ongkipangkat; dot iri tuu i poimpasi do maso’d baino’ ko’ iri po i poimpasi do maso’d tabantalan. ²² Om koinsanai’d nunu nopo nga’ nokoinsiriba’ ngai’ no do Kinorohingan dot id kuasa’ do Kristus om patahakon dau o Kristus dot id sidang do sumiliu’d boyoon do koinsanai do nunu nopo. ²³ Iri no i sidang o tinan do Kristus, om iri nopo i momongo kopio’ddi om iyau i momongo do koinsanai do nunu nopo do hinonggo nopo.

¹ Iyokoyu nopo di gulu po om poimpatai o rusod tu’ nokowonsoi kou i’ do dusa om tuminolibamban kou do koinsanai dit oturan do Kinorohingan. ² Tontok nopoddi om tuminanud kou di koubasanan do dom pomogunan. Komoyon nopoddi om tuminanud kou di monguasa’ do hilo’d tawan, iri no i rusod di maso do momorinta’ do ginawo di tulun dit a’ mumboyo’ do Kinorohingan. ³ Om iyati’ di gulu po nga’ iyo ngai’ i’ diyolo’; tu’ tuminanud toko’ di kowoyo-woyoo’ toko’ di don tulun om miningwonsoi toko’ di korohian do tinan om i pomusorou toko’. Om iyati’ nogi’ nga’ tulun i’ di katagadan do Kinorohingan do tontok poddi, do miagal di tulun do suwai. ⁴ Nga’ agayo no kopio o kosianan do Kinorohingan! Nosianan no kopio iyau dati’, ⁵ gisom do pinasi kawagu toko’ dau do pinotonggoi do Kristus, do tontok di poimpatai po o rusod toko’ tu’ tuminolibamban toko’ i’ dit oturan diri. Om iri po kopio kosianan do Kinorohingan o kinopomosian dau dokoyu. ⁶ Om pinasi toko’ pogi’ kawagu do Kinorohingan do pointonggoi do Kristus, nga’ nokoiso’ toko’ no dot id Kristus Yesus. Om kopomorinta’ toko’ nondo do poinsugku’ dau do hilo’d surga. ⁷ Winonsoi pogi’ do Kinorohingan o miagal diri nga’ popokito do tulun do kogoyoo’ do kosianan do Kinorohingan do tontok do maso’d tabantalan. Iri nopo i kosianan diri om pinointalang do Kinorohingan tu’ osonong i’ iyau dot id dati’ dot i Kristus Yesus o popointalang. ⁸ - ⁹ Om nosianan i’ o Kinorohingan dokoyu, om iri no o kinopomosian dau dokoyu tu’ notumbayaan kou i’ di Yesus. Iri nopo koposion dokoyu’ddi om okon i’ ko’ mantad di winonsoi dokoyu. Iri nopo om nipuhawang id Kinorohingan. Iyo nopoddi om aiso’ no o tiso’ piya’d tulun do milo do minggayo-gayo do pasal diri. ¹⁰ Iyati’ nopodti om winonsoi do Kinorohingan, om winonsoi toko’ dau dot id suang di Kristus Yesus om momonsoi toko’ indo dit ongosonong, i nokosodia’ no dau do bagi’ dati’. ¹¹ Oi tobpinai-tobpinai, iyokoyu it okon ko’ tulun do Yohudi! Soroho’ no dokoyu o kowoyo-woyoo’ dokoyu di gulu po: Iyokoyu nopo om roitan do ’’tulun dit a’ nosunatan’’, dot i tulun do Yohudi di mangakun do nongosunatan o mamarait dokoyu do miagal diri. (Komoyon nopoddi om nakaanu do tanda’ di winonsoi do tulun dot id tinan diyolo’.) ¹² Tontok nopoddi om a’ kou po nokoiso’ dot id Kristus, om tulun kou pod suwai, it a’ nokohompit do tulun di nopili’ do Kinorohingan. Om a’ kou i’ nokosuang di tumpongo di winonsoi’d Kinorohingan dot id tulun di songonuon dau. Om poimpasi kou do hiti’d pomogunan diti dot aiso’ o pagandasan om aiso’ o Kinorohingan dokoyu. ¹³ Nga’ iyokoyu’ddi it osodu’ di gulu po, nga’ nokoinsomok noddi do baino’ dot i kinapatayon do Kristus o pinopoinsomok. Tu’ nokoiso’ kou no dot id Kristus Yesus. ¹⁴ Kristus no o pinopiulud dati’. Iyau no o pinopiiso’ di tulun do Yohudi om it okon ko’ tulun do Yohudi do sumiliu dot iso’ poo o bansa’. Om iri i tolig di pinopitongkiad diyolo’, iri no i pisangadan nga’ naraag no di Kristus do tontok di pinatahak dau o tinan dau do maan patayo’. ¹⁵ I Tourat om i ponuhuan om i kaadat-adato’ diyolo’ nga’ natanus ngai’ no di Kristus, om osiliu i’ i duwo o bansa’ddi dot iso’ poo o bansa’ do tulun do wagu di nokoiso’ dot id Kristus. Om iyo noddi o Kristus do pinopiulud. ¹⁶ Om iri no i kinapatayon do Kristus do hiri’d salib o pinopiiso’ di duwo o bansa’ddi, om pinopoulud diyolo’ dot id Kinorohingan gisom do katanus nopoddi i pisangadan diri. ¹⁷ Om iri noddi o kinorikatan do Kristus do mongoi poposusui do Habar dot Osonong do pasal do kopiuludan dot id dokoyu, iyokoyu i tulun dot okon ko’ Yohudi, it osodu’ do Kinorohingan di gulu po, om i tulun do Yohudi dit osomok do Kinorohingan. ¹⁸ Om Kristus no o minomialatan dati’ ngai’ — i tulun do Yohudi om it okon ko’ Yohudi — do gisom do nokoinsomok di Tapa’ dot i Rusod do Kinorohingan dit iso’ noo o pinopoinsomok dati’. ¹⁹ Iyo nopoddi, om iyokoyu i tulun dot okon ko’ Yohudi nga’ a’ noddi poinghompit do tulun do suwai ko’ sompogunan po. Baino’ nopoddi om oiyo toko’ no do tulun di songonuon do Kinorohingan. Om id suang kou do sompiiyon do Kinorohingan. ²⁰ Om iyokoyu nga’ winaal i’ do pinoimpou dot id piro-piro o rasul om i piro-piro nabi, dot i Yesus Kristus o watu di pinomogirot. ²¹ Om iyau no o pinopogituma-tuma’ do koinsanai di waalon diri gisom do nosiliu do Walai’d Sasambayangan dot Agayo di don Tuhan kopio’d songonuon. ²² Om iyokoyu nga’ maso nogi’ do waalon do miwoyo’ di tulun do suwai do silihon do walai’d Kinorohingan, tu’ nokoiso’ kou no dot id Kristus. Om hiri no o Kinorohingan do miyon do miwoyo’ di Rusod dau.

¹ Iri no o nokogiil-giilan ku iyoho’, i Paulus, dot i Yesus Kristus o kinopogiilan do maan do koinsanangan dokoyu it okon ko’ tulun do Yohudi. ² Atantu’ no do nokorongou kou i’ do nonuan oku’d Kinorohingan do karaja’ diti tu’ i kosonongo’ dau o kinapanahakan dau diti do maan do koinsanangan dokoyu. ³ Pinointalang do Kinorohingan i natantu’ mantad dau do wonsoyon dau dit a’ daa dau pinosunud dot id tulun, nga’ pinosunud iddi dau dot id doho’. (Om nokoponulis oku no do pasal diri dot oniiba’, ⁴ om ondung mambasa’ kou’dti om kosuhut kou i’ do pasal do Kristus dit a’ daa pinoilaan mantad, do miagal doho’ tu’ nokosuhut.) ⁵ Iri nopo it a’ mantad daa pinoilaan diri di gulu po om a’ i’ insan posunudo’ dot id tulun. Nga’ baino’ nopoddi om nokointalang ngai’ no di Rusod do Kinorohingan iri dot id piro-piro o rasul om id piro-piro o nabi dau. ⁶ Iri nopo it a’ mantad daa pinoilaan diri om iti no: i mantad id Habar dot Osonong diri o kinoonu-onuan do tulun dit okon ko’ Yohudi do barakat do Kinorohingan di pinosodia’ no daa do patahakon di tulun do Yohudi di gulu po. Om iri’ddi i tulun dot okon ko’ Yohudi nga’ nosiliu no do pakakas do tinan dit iso’ noo. Om kaanu di pinabatos do Kinorohingan dot id suang di Kristus Yesus. ⁷ Nonuan oku’d Kinorohingan do nipuhawang — iri no i karaja’ do popinsusui di Habar dot Osonong. Naanu ku i nipuhawang diri do pinawaya’ di kuasa’ do Kinorohingan i kumaraja’ dot id suang ku. ⁸ Iyoho’ no it aiso’ kopio o ngaran-ngaran dot id pogialatan do koinsanai’d tulun di songonuon do Kinorohingan. Nga’ mulong po do miagal diri nga’ nonuan oku id Kinorohingan do nipuhawang diti: i karaja’ do popinsusui di Habar dot Osonong do pasal do kakayaan do Kristus dit aiso’ o kooyion, dot id tulun dit okon ko’ Yohudi; ⁹ om koilo indo o koinsanai’d tulun dot iyoho’ o koilaan, do kowoyo-woyoo’ do Kinorohingan i minomonsoi do pomogunan om koinsanai do nunu nopo, do popowonsoi di natantu’ mantad dau do wonsoyon dau dit a’ daa mantad pinointalang do hiti’d pomogunan do mantad di gulu po. ¹⁰ Kinopongiyo’ddian nopod Kinorohingan diri om iri nondo i sidang o popoilo do baino’ dot id koinsanai do pomorinta’ do hilo’d tawan do komiloo’ do Kinorohingan di mogisuwai-suwai o kowoyoon. ¹¹ Om winonsoi do Kinorohingan iri dot id suang di Kristus Yesus i Tuhan toko’ do tumanud di natantu’ mantad dau do wonsoyon dau dit aiso’ o kopupuson. ¹² Om aiso’ noddi o kaantob dati’ do minsomok do Kinorohingan do mikuwo’d otumbayaan kopio, tu’ notumbayaan toko’ no di Kristus om nokoiso’ toko’ dot id dau. ¹³ Iyo nopoddi, om pokionuon ku dot a’ kou atangkabo diti koinggoritan ku dot iyokoyu o koponginggoritan, tu’ koinsanai’dti om koinsanangan i’ dokoyu. ¹⁴ Om iri no o kootudan ku dot id toguang do Tapa’. ¹⁵ Om iyau no o koonuan do koinsanai dit ongkipinuhobo di hilo’d surga om i hiti’d pomogunan do pinuhobo diyolo’. ¹⁶ Om pokionuon ku no dot id Kinorohingan i kikagayaan do popogirot do ginawo dokoyu dot i Rusod dau o popogirot. ¹⁷ Om miyon i’ o Kristus dot id ginawo dokoyu tu’ notumbayaan kou i’ dau, om poingimpou i’ do kosianan o koposi-posion dokoyu, om oporinta’ do kosianan. ¹⁸ Om pokionuon ku dot id suang do sambayang ku, om kosuhut kou i’ kopio om i koinsanai di tulun di songonuon do Kinorohingan do kalaabo’ om konoruo’ om kasawato’ om korolomo’ do kosianan do Kristus, ¹⁹ it a’ i’ kopio milo dot osuhutan do pomusarahan do tulun. Om kosuhut kou i’ di kosianan do Kristus diri, om oponu’ kou indo do koinsanai di kowoyo-woyoo’ do Kinorohingan. ²⁰ Tu’ iri no i kuasa’ do Kinorohingan di kumaraja’ dot aiso’ o kotingkadan dot id suang toko’ o pawayaan do Kinorohingan do momonsoi dot ogumu’ po ko’ mantad di nopokianu ko’ i nosorou toko’. ²¹ Om Kinorohingan no ot apatut do poinggoyoon dot id suang do sidang do gisom do mogisolusuk-lusuk o sinakagon, dot id suang do Kristus Yesus. Royohon no o Kinorohingan do gisom do poingompus! Amin.

¹ Om iri noddi o koponuhuan kopio ku dokoyu — iyoho’ i nokogiil, dot i momonsoi’d karaja’ do Tuhan o nokogiilan — do poingkaa: Koposi-posion nopo dokoyu om mositi’ no do miontok di kowoyo-woyoon di tulun di nolohou do Kinorohingan. ² Om mositi’ no dot osiriba’ o ginawo dokoyu om alamaya’ kou om alanut o ginawo. Om pointalangon no o kosianan dokoyu dot i mogiuhup-uhup kou o kointalangan. ³ Om tumotos no kopio do monokiulud, om ogompi’ i’ o kopiisaan di pinatahak do Rusod do Kinorohingan. ⁴ Iso’ noo o tinan, om iso’ o Rusod. Om iyo kou nogiddi tu’ nolohou kou dot id iso’ noo o pagandasan. ⁵ Iso’ noo o Tuhan, om iso’ o kotumbayaan om iso’ o botisan, ⁶ om iso’ o Kinorohingan i nosiliu do Tapa’ do koinsanai’d tulun. Om iyau no o Tuhan do koinsanai do nunu nopo, om iyau i kumaraja’ dot id suang do koinsanai’ddi, om i kikuasa’ dot id suang do koinsanai’ddi. ⁷ Om nakaanu ngai’ toko’ no do nipuhawang do tumanud di pinatahak do Kristus. ⁸ Tu’ nokotulis no dot id Buuk do Kinorohingan o poingkaa, ’’Tontok di mininsawat iyau do kuminaa do hilo’d kinoiyonon dit asawat kopio, om minononggoi iyau dot ogumu’ o tulun di naanu dau, om papatahak iyau dot ogumu’ o nipuhawang dot id tulun,’’ ka. ⁹ Ondung noboros do ’’mininsawat iya’’, om komoyon nopoddi nga’ nokolintuhun no iyau do hiti’d kinoiyonon dit osiriba’ kopio do hiti’d pomogunan diti di gulu po. ¹⁰ Om iyau no i luminintuhun diri om mininsawat do hilo’d kinoiyonon dit asawat po kopio ko’ mantad do koinsanai do tawan, gisom dot oponu’ nopo do kagayaan di koropohon dau o pointongkop diti pomogunan. ¹¹ Om iyau no o ’’minomuhawang do tulun do nipuhawang dot ogumu’ ’’; i pinili’ dau do sumiliu’d rasul o wookon, om iri no suwai om siniliu do nabi, om popinsusui do Habar dot Osonong o wookon. Om iri no suwai om siniliu dau do gomponuduk om gompomogompi’ do sidang. ¹² Winonsoi pogi’ dau o miagal diri nga’ poposodia’ do koinsanai’d tulun di songonuon do Kinorohingan do momonsoi do karaja’ do don Tuhan, om mamaal do tinan do Kristus. ¹³ Om osiliu toko’ indo dot iso-iso’ dot it iso-iso’ o kinotumbayaan om it iso-iso’ o nosuhutan toko’ do pasal do Tanak do Kinorohingan o pinopiiso’ dati’. Om osiliu toko’ indo do tulun dit ongoilo. Om maid-laid nga’ miyo-iyo o kowoyo-woyoo’ toko’ di kowoyo-woyoo’ di Kristus. ¹⁴ Om a’ toko’ nondo miagal di tangaanak di kopiwoyo-woyo’ om it opitanggai-tanggayan di tumbak di ponudukan di mogisuayan, i potudukon di tulun di goudut. Om mamalid iyolo’ do tulun dot i toilaan diyolo’ o mamalid diyolo’. ¹⁵ Nga’ mositi’ no do pointalangon toko’ nogi’ ot ongotopot do mikuwo’d ginawo di poimponu’d kosianan, om maid-laid nga’ miyo-iyo toko’ nondo di Kristus dot id suang do koinsanai do nunu nopo. Om Kristus no o nosiliu do boyoon toko’, ¹⁶ om mantad no di pomomoyo’ dau do kopogituma-tuma’ o koinsanai di pakakas do tinan, om kopogiromu-romut di langaban o pointikid-tikid di pakakas. Om ondung kumaraja’ i pointikid-tikid di pakakas diri do tumanud dit apatut diyolo’d wonsoyon, om oinsanan nondo i tinan diri do sumuni do gisom do kagayo om kokoris dot id suang do kosianan. ¹⁷ Iyo nopoddi, om iti no o poboroson ku om poingodon kopio ku dot id dokoyu dot id suang do ngaran do Tuhan: kada’ kou nondo pomonsoi do miagal di wonsoyon di tulun dit a’ kotutun do Kinorohingan, i momusorou dit aiso’ o kootuk-otukon. ¹⁸ Om otuong o pomusarahan diyolo’. Om a’ i’ iyolo’ koilo di koposion di pinatahak do Kinorohingan tu’ aiso’ no kopio o toila-ilaan diyolo’ do pasal do Kinorohingan. Iyo pogiddi iyolo’ nga’ okodou no kopio o ginawo diyolo’. ¹⁹ Om a’ noddi iyolo’ kopuriman dot ointingayaman gisom do wonsoyon ngai’ nopo diyolo’ o koinsanai di korohian do tinan diyolo’, om magampahu’ nopo iyolo’ do tumanud di korohian diyolo’. ²⁰ Nga’ i Yesus Kristus nopo i notutunan dokoyu’ddi, om a’ i’ miagal diri! ²¹ Om nokorongou kou no do pasal dau; om notudukan kou nogi’ iyokoyu i tumatanud dau do pasal do kowoyo-woyoon do Kinorohingan di kointalang dot id di Yesus! ²² Iyo nopoddi, om tongkiadai no dokoyu i kowoyo-woyoo’ do tulun di laid, i momungou dokoyu do musui di kowoyo-woyoo’ dokoyu di gulu — i maso do raagon di kongorohian di kapalid. ²³ Om mositi’ no do poinwoguon ngai’ o ginawo om pomusarahan dokoyu. ²⁴ Om tumanud kou no di kowoyo-woyoo’ di tulun di wagu, i pinoiyo do kowoyo-woyoo’ do Kinorohingan; iri no i kowoyo-woyoo’ dit otopot om it otulid om it olidang. ²⁵ Iyo nopoddi, oi tobpinai ngai’ ku, om kada’ kou nondo pongudut. Om poboroson no it otopot dot id tulun do suwai, tu’ iyati’ nopodti om pakakas ngai’ i’ do tinan do Kristus. ²⁶ Om ondung otogod kou, om kada’ pologoso’ i kototogod diri do kobungou dokoyu do momonsoi’d dusa. Om kada’ kou kotogod do gisom dot asadapan. ²⁷ Om a’ i’ oonuan o Rogon do ralan do momonsoi di dau’d korohian. ²⁸ Om i tulun dit oubas do manakau nga’ mositi’ no do tumingkod do manakau. Om tumotos nogi’ do kumaraja’ om otulid no o ralan do koonu-onuan dau do kaakan-akanan dau, om koponulung indo iyau di tulun di kikokurangan. ²⁹ Ondung moro-boros kou, om kada’ kou pimboros di boros di sosomu’. Poboroson nopo i boros di kogirot do ginawo om i kotulung do tulun do suwai. Om boros nopo do miagal diri om popoinsonong i’ di tulun di korongou’ddi. ³⁰ Om kada’ kou popotongob do Rusod do Kinorohingan. Tu’ nasaapan kou no di Rusod do tanda’ do nosiliu kou do songonuon do Kinorohingan. Om iri nogi’ i Rusod diri o mamajamin do rumikot indo dot id dokoyu i Tadau di Kopoiduan. ³¹ Tonuson no o koinsanai di kopurimanan dit araatan om i sisuli’ om it otogod. Om kada’ kou nondo pimbalangas om kada’ pimpopol, om kada’ kou’d haro o kopurimanan dit araatan om i kopurimanan do suwai di miagal diri. ³² Suwai ko’ miinsian-sian kou no om kumosonong kou no dot id tulun do suwai, om mogiampun-ampun kou no do miagal do Kinorohingan tu’ minangampun dokoyu dot i Kristus o minangampun.

¹ Iyokoyu nopo om tangaanak kou no do Kinorohingan di kosianan dau, iyo nopoddi om tumotos kou no do momit do kowoyo-woyoon do Kinorohingan. ² Om pokiporintaan no do kosianan ino koposi-posion dokoyu, do miagal do Kristus tu’ nosianan dati’. Om pinatahak dau o tinan dau do gisom do napatai dot iyati’ o kinapatahakan, do sumiliu do porsombahan dit osonong o wongi’ om i kohubayaan kopio do Kinorohingan. ³ Om nosiliu kou no do tulun di songonuon do Kinorohingan, iyo nopoddi om iri nopo i wowonsoyon di sosomu’ om it a’ apatut, om i tamaha’ om a’ no kopio apatut iri do wonsoyon dot id pogialatan dokoyu. Om aiso’ i’ o paantakan do tulun do suwai do mamarait do momonsoi kou do miagal diri. ⁴ Om a’ kou nogi’ apatut do mimboros di sosomu’, om i kagait do tampahu’ om it a’ apatut, suwai ko’ mongunsikou kou nogi’ do Kinorohingan. ⁵ Ilaai no dokoyu: do tulun nopo do magampahu’ om it a’ apatut o kowoyo-woyoon om i tamaha’ (om kowoyo-woyoon nopo do miagal diri, om miagal nopo do tumuku’ dot id tingolig) om tulun nopo do miagal diri om a’ i’ kaanu’d bahagi’ do hiri’d Pomorintaan do Kristus om Kinorohingan. ⁶ Om kada’ kou kaakalai di boboroson dit aiso’ o suang. Tu’ iri no o popotogod do Kinorohingan dot id tulun dit a’ mumboyo’ dau. ⁷ Iyo nopoddi, om kada’ kou no kopio ongoi sokodung do tulun do miagal diri. ⁸ Iyokoyu di gulu po nga’ hiri id suang do totuong. Nga’ baino’ nopoddi om hiri kou noddid suang do tanawau, tu’ nosiliu kou no do tulun di songonuon do Tuhan. Iyo nopoddi, om mositi’ no do poimpasi kou dot id suang do tanawau. ⁹ Tu’ iri no i tanawau’ddi o tadon do koinsanai do wonsoyon dit ongosonong om it otulid om it otopot dot id pagantangan do Kinorohingan. ¹⁰ Om tumotos kou no do mongilo ondung nunu i kohubayaan do Tuhan. ¹¹ Om kada’ kou no pomonsoi di wowonsoyon dit aiso’ o kotutuk-tutukon, i wowonsoyon di tulun di poimpasi dot id suang do totuong. Suwai ko’ poimbulayon ngai’ no dokoyu i wonsoyon do miagal diri dot id tanawau. ¹² (Tu’ mamarait piya toomod di lisokon diyolo’ do momonsoi nga’ kointingayam i’.) ¹³ Koinsanai di pointalangon dot id tanawau, om okito nondo kopio iri. ¹⁴ Tu’ koinsanai dit okito kopio om iri no o tanawau. Om iri noddi o nokoboro-boros do poingkaa, ’’Posik no, iya’ i koodop, om tungag no do mantad id kapatayon! Om kotitiu indo o Kristus dot id diya’,’’ ka. ¹⁵ Iyo nopoddi, om sorisidon no kopio o kowoyo-woyoo’ do koposi-posion nu. Om kada’ kou omit di kowoyo-woyoo’ do tulun di basug. Suwai ko’ omit kou no di kowoyo-woyoo’ di tulun dit oilo. ¹⁶ Om pakayon no kopio dokoyu kosonong-sonong o maso dokoyu tu’ maso nopodti om maso dot araat. ¹⁷ Om kada’ kou no kopio kabasug, suwai ko’ ilaan no dokoyu ondung nunu i korohian do Tuhan do wonsoyon dokoyu. ¹⁸ Om kada’ kou pagawuk do waig dot anggur, dot iri nopo om karaag i’ dokoyu; suwai ko’ mokiporinta’ kasai’ kou nogi’ do Rusod do Kinorohingan. ¹⁹ Pakayon no dokoyu i boros do mantad id sinding, om i mantad id sinding di pamarayou’d Tuhan, om i sinding di don rusod, do tontok do mogiboro-boros kou. Om modsinding kou no do mamarayou’d Tuhan do mikuwo’d otood o ginawo. ²⁰ Om mongunsikou kasai’ kou no do koinsanai do nunu nopo dot id Kinorohingan i Tapa’, dot id suang do ngaran di Yesus Kristus, i Tuhan toko’. ²¹ Piinsiriba-riba’ kou no, tu’ iri no o pomusou dokoyu do Kristus. ²² Oi tondu’, insiriba’ no dot id sawo nu, do miagal do minsiriba’ ko dot id Tuhan. ²³ Tu’ iri no kusai o boyoon di sawo dau, do miagal do Kristus tu’ boyoon do sidang. Om Kristus no o Raja’ do Gampamasi do sidang i nosiliu do tinan dau. ²⁴ Poingkuro nopo i sidang do minsiriba’ dot id Kristus, om iyo nogiddi i tondu’ tu’ mositi’ no do minsiriba’ dot id sawo dau dot id suang do nunu nopo. ²⁵ Oi kusai, kosianai no di sawo nu, do miagal do Kristus tu’ nosianan do sidang om pinatahak dau o tinan dau do gisom do napatai, dot i sidang o kinapatahakan. ²⁶ Winonsoi pogi’ do Kristus o miagal diri nga’ pomolihung dau di sidang diri, dot i ponudukan dau om i botisan dot id waig o pomolihung, om milo indo dau do patahakon i sidang diri dot id Kinorohingan. ²⁷ Om iyo noddi o Kristus do pinopoingkakat di sidang diri do mikuwo’d kikagayaan om olidang dot id toguang dau om aiso’ o bohi-bohiton om aiso’ o kabara-barasan do nunu nopo. ²⁸ Om iyo nogiddi i kusai tu’ mositi’ no dot osianan di sawo dau do miagal dot osianan iyau do dau’d tinan. Kusai nopo dit osianan do sawo dau om osianan no iyau do dau’d tinan. ²⁹ (Aiso’ i’ o tulun do nokoumbal dot araatan do dau’d tinan. Suwai ko’ pigompian i’ dau om antaan-taan dau o tinan dau do miagal do Kristus do momogompi’ di sidang dau. ³⁰ Om oilaan toko’ i’ iri, tu’ pakakas toko’ i’ do tinan do Kristus.) ³¹ Nokotulis no dot id Buuk do Kinorohingan o poingkaa, ’’Iyo nopoddi, om tumongkiad nondo i kusai di tapa’ om tina’ dau om sumugku’ nondo iyau di sawo dau, om osiliu i’ iyolo’ dot iso-iso’,’’ ka. ³² Iri nopo it ayat diri om aralom i’ kopio o komoyon. Om poiyoon ku nopo iri do piuludan do Kristus om i sidang. ³³ Nga’ it ayat diri nga’ milo i’ dot iyokoyu kopio o komoyon: Mositi’ no dot osianan o pointikid-tikid do kusai di sawo dau do miagal dot osianan do dau’d tinan. Om pointikid-tikid do tondu’ nga’ mositi’ no do tumotos do momusou di sawo dau.

¹ Oi tangaanak! Umboyo’ kou no do boros do molohing dokoyu, tu’ iri no ot apatut do wonsoyon dokoyu i tumatanud do Kristus. ² ’’Pusohon no o tapa’ om tina’ nu,’’ ka di ponuhuan do Kinorohingan dit id gulu kopio do noputan do batos do poingkaa, ³ ’’Om osimbayan ko i’ om otogui ko do hiti’d pomogunan,’’ ka. ⁴ Oi tobpinai-tobpinai, i tapa’ di tangaanak! Kada’ dokoyu wonsoyo’ dot id tangaanak dokoyu o nunu nopo i popotogod diyolo’. Suwai ko’ tudukan no iyolo’ di kowoyo-woyoon dit osonong om i ponudukan di don Tuhan. ⁵ Oi tobpinai-tobpinai i nosiliu do turipon! Wonsoyon no i ponuhuan di tuan nu di hiti’d pomogunan. Om wonsoyon nori do mikuwo’d momusou om mumboyo’ om aayi-ayi’ o ginawo do momonsoi, do sorohon nopo do wonsoyon dokoyu iri dot id Kristus. ⁶ Tu’ okon i’ ko’ tontok no di piantangan kou do momonsoi kou do miagal diri, do mokimarayou-rayou nod tulun o kapamansayan. Suwai ko’ wonsoyon no dokoyu iri do miagal do susuhuon do Kristus, i maso do tumanud do korohian do Kinorohingan do mikuwo’d aayi-ayi’ o ginawo. ⁷ Om wonsoyon no dokoyu i karaja’ dit apatut do wonsoyon di turipon do mikuwo’d otood o ginawo, om sorohon nopo do Tuhan i’ o pongobi-obian dokoyu’ddi, om okon i’ ko’ tulun noo. ⁸ Om sorohon no do pointikid-tikid do tulun di turipon tuu ko’ it okon ko’ turipon nga’ karamit indo dot isomuli’ do mantad id Tuhan do ponomuli’ di nongowonsoi dau dit ongosonong. ⁹ Oi tobpinai-tobpinai di nosiliu’d tuan, mositi’ no dot iyo nogiddi o kowoyo-woyoon dokoyu iyokoyu dot id turipon dokoyu, om kada’ kou nondo pomorolosi diyolo’, om sorohon no dot iyokoyu nopo di turipon dokoyu’ddi om iso-iso’ i’ o tuan, iri no i Tuhan di hilo’d surga. Om a’ i’ iyau montong do pangkat do tulun. ¹⁰ Iti no o poboroson ku dokoyu dot id tohuri no, iri no tu’ kokoris kou no kasai’ dot i kokorisan di naanu dokoyu do mantad id kuasa’d Tuhan o popokoris, tu’ nokoiso’ kou no dot id Tuhan. ¹¹ Om pakayo’ ngai’ no dokoyu o koinsanai di rapo-rapo do monokisangod, i pinatahak do Kinorohingan dot id dokoyu, om okoris kou i’ do sumaap do koinsanai do toilaan do Rogon dit araat. ¹² Tu’ okon i’ ko’ tulun i ponokisaap toko’, suwai ko’ monokisaap toko’ di kuasa’ do koinsanai do rogon di momorinta’ do maso dot araat diti. Om monokisaap toko’ di kuasa’ di rusod dit angaraat di momorinta’ do hilo’d tawan. ¹³ Iyo nopoddi, om pakayo’ ngai’ no dokoyu i rapo-rapo do monokisangod di dong Kinorohingan, om okoris kou i’ do monokisaap do pisangod dokoyu do tontok di tadau dot araat. Om tontok piya’ndo di kopongo kou do monokisangod nga’ okoris kasai’ kou i’. ¹⁴ Iyo nopoddi, om sumodia’ kou no kopio! Om pakayon no dokoyu i kotorodoko’ dot id Kinorohingan do panakatagkos, om i kotulido’ o panakarasuk do basi’ di don sumasangod. ¹⁵ Om i korohiano’ dokoyu do mongoi popinsusui do Habar dot Osonong di manahak do kosimbayanan do ginawo’d tulun o panakakasut dokoyu. ¹⁶ Om pakayon kasai’ no i kotumbayaan dokoyu dot id Tuhan do monikid do maso do ponokokolid; om iri no i kotumbayaan dokoyu’ddi o milo do momisok di pana’ di kitapui, i mantad id di Yaraat. ¹⁷ Pakayon no i koposion do ponokotupi’ kolidar, om i boros do Kinorohingan o panakagayang do mantad id Rusod do Kinorohingan. ¹⁸ Om wonsoyon ngai’ no dokoyu iri do mikuwo’d sumambayang do mokiuhup do Kinorohingan. Om sumambayang kasai’ kou no do pointikid-tikid do maso do tumanud dit ituduk do Rusod do Kinorohingan dot id dokoyu. Om sumodia’ kasai’ kou no om kada’ kou pokiala’. Om sumambayang kasai’ kou no do bagi’ do koinsanai’d tulun di songonuon do Kinorohingan. ¹⁹ Om sambayangan oku nogi’ iyoho’, om tudukan oku id Kinorohingan do popoboros di boros di koontok, om a’ oku i’ moddosi do popinsusui di tonsi kopio di Habar dot Osonong diri. ²⁰ Tu’ iri no i Habar dot Osonong o pinoposiliu doho’ do susuhuon do Kristus, om poinggiil oku poddi do dinondo. Om sambayangan oku no dokoyu om a’ oku i’ moddosi do popimboros dit apatut ku’d poboroson do pasal di Habar dot Osonong. ²¹ Om posusuyon indo di Tikikus i tobpinai toko’, i susuhuon dit otorodok dot id karaja’ di don Tuhan, o koinsanai do pasal doho’, om koilo kou i’ do koiyon-iyono’ ku om karaja’ ku. ²² Om iri no o koponuhuan ku dau do mongoi do hiti’d dokoyu, do momisunud ngai’ dokoyu do koiyon-iyono’ dahai, om ogirot i’ o ginawo dokoyu. ²³ Om pokionuon ku no i Kinorohingan Tapa’ om i Tuhan Yesus Kristus do popogiiso’ do koinsanai do sidang, om popogiinsian-sian diyolo’ om popogirot kasai’ do kotumbayaan diyolo’ dot id Kristus. ²⁴ Om pokionuon ku no o Kinorohingan do mamarakat do koinsanai di tobpinai- tobpinai dit osianan do Tuhan toko’ i Yesus Kristus do mikuwo’d kosianan dit a’ tumanus.