GOMPONUDUK

GOMPONUDUK

¹ Iti ngai’ no o boros di Tulun dit Aralom o Toilaan, i tanak di Daud, i nosiliu’d raja’ do hilo’d Yorusalim do suminowoli di Daud. ² Boros ka di Tulun dit Aralom o Toilaan: Koinsanai do nunu nopo, om aiso’ i’ o kotutuk-tutukon! Koposi-posion nopod tulun om aiso’ i’ o guna’, om aiso’ o komoyon. ³ Kumaraja’ toko’ nopo do gisom do tikapatai, do gisom dot aayi-ayi’ o goos toko’. Nga’ nunu nondo ot aanu-anu toko’ di kaandasan toko’? ⁴ Sinakagon nopo om mogisowoli-woli i’ tu’ matai no it id gulu om haro no o sinakagon do wagu, nga’ iti nopo pomogunan om a’ i’ sumimban. ⁵ Ilo tadau nga’ mimbulai po kasai’ om tumonob. Om ohuyan poo do gumuli’ do hiri’d tadon dau om mulai no kawagu. ⁶ Tumongus no ilo ribut do kumaa do hilo’d salatan, om tumongus nod kumaa do hilo’d utara; om sumorili’ no kawagu om koguli’ i’ do hiri’d tadon mantad. ⁷ Oinsanan nopo o bawang do hilo’d rahat o koluyungon, nga’ a’ i’ oponu-ponu’ ilo rahat. Gumuli’ i’ kawagu i waig do hilo’d tudan do bawang, om lumuyung no kawagu. ⁸ Kapaasan ngai’ i’ iri, om a’ no milo’d boroson o kapaasanon. Mato toko’ nga’ a’ nopo ababas-babasan do mintong; om tolingo toko’ nga’ a’ nopo ababas-babasan do mokinongou. ⁹ Nunu nopo i nosiliu di gulu, nga’ osiliu i’ kawagu. Nunu nopo i nowonsoi di gulu, om owonsoi i’ kawagu. Asio’ i’ o tiso’ di wagu kopio do hiti’d pomogunan. ¹⁰ Haro i’ o tulun do momoros dot, ’’Intangai pogi’, nga’ wagu moti’ iti,’’ ka. Nga’ okon i’ ko’ wagu iri. Tu’ hino nori dit a’ toko’ po nosusu. ¹¹ A’ i’ do tulun osorou i nongosiliu di maso di notoliban. Om iyo nogi’ moti’ddi tu’ iti nopo nongosiliu’d baino’ om it osiliu do koimbagu nga’ a’ i’ osorou do tulun di sumusuhut. ¹² Iyoho’ no, it Aralom o Toilaan, om raja’ dot Israil do momorinta’ do hilo’d Yorusalim. ¹³ Tuminorodok oku no kopio do minonorisid om mininsingilo do koinsanai dit ongosiliu do hiti’d pomogunan. Kosunsudon toko’ nopo do natantu’ mantad do Kinorohingan om katangkabo i’ kopio. ¹⁴ Nokito ngai’ ku no i nongosiliu do hiti’d pomogunan. Nga’ kotumbayaai no, dot aiso’ ngai’ i’ o kinotutuk-tutukon diri. Iyo noddi mumbal do manabpo’d ribut. ¹⁵ Iri nopo poingkilong, om a’ no milo’d tulidon, om it aiso’ nga’ a’ no milo’d pointobon. ¹⁶ Poingkaa daa o tosorou ku, ’’Oilo oku no kopio, om iyoho’ no it oilo kopio ko’ mantad do toinsanan di raja’ do nokopomorinta’ do hiti’d Yorusalim dit id gulu ko’ iyoho’. Kosuhut oku i’ do komoyon do toilaan om i boros dot angaralom,’’ kangku. ¹⁷ Om tumotos oku no kopio do mongilo do pisuayan do toilaan om kababasug, om pisuayan di pomusarahan dit atarom om i kowowongo. Nga’ koilaai ku nogiddi dot iyo oku no di manabpo do ribut. ¹⁸ Tu’ ogumu-gumu’ o toilaan toko’, nga’ ogumu-gumu’ no o katangkabaan toko’. Om ogumu-gumu’ o tosuhutan toko’, nga’ ogumu-gumu’ no o toruol toko’.

¹ Om pomusorou oku noddi do sumimbayan, om kosuhut oku i’ do komoyon do kosimbayanan. Nga’ iri piya nga’ aiso’ i’ o kinotutuk-tutukon. ² Koilaai ku noddi dot iri nopo i koirakan nga’ kababasug i’; om iri kosimbayanan nga’ aiso’ i’ o guna’. ³ Om pomusorou oku nod sumimbayan om minginum do waig dot anggur om rumamai, tu’ oodsuur oku di korohiano’ ku do sumiliu’d tulun dit oilo. Ondos ku daa om iri no o ralan do tulun dot osonong kopio do momuriman do kosonongo’d koposi-posion dau dit oniiba’ do hiti’d pomogunan. ⁴ - ⁵ Nongowonsoi ku no it angagayo kopio. Nokopomonsoi oku no do piro-piro o walai ku. Om nokopomukabun oku’d bunga om anggur om piro-piro o bansa’d tua-ua’. ⁶ Nokopongukad oku nod piro-piro o kulam do pomuwaig ku di kabun do bunga ku om i kabun do kouwaan ku. ⁷ Ogumu’ o turipon ku dot i binoli ku om i nosusu dot id walai ku. Om tayam-tayam ku nga’ ogumu’ no kopio ko’ mantad dot isai nopo di nokoumbal do nokoiyon do hiti’d Yorusalim. ⁸ Ogumu’ o tamas om pirok do notimung ku do mantad id piro-piro o raja’ do pomogunan di porintaon ku. Om poposonong do ginawo ku i sinding di piro-piro o modsisinding do tongokusai om tongoondu’. Om milo oku nogi’ do manganu do tongoondu’ do piro nopo o kogumuo’ do korohian ku do maan ku’d panakasawo. ⁹ Otopot no kopio dot abantug oku po ko’ isai nopo di nokoumbal do nokoiyon do hiti’d Yorusalim, om a’ insan do mongiman-iman o koiloo’ ku. ¹⁰ Tu’ nunu nopo o kouhangan ku nga’ aanu ku no. A’ oku insan do momusus do korohian ku do mongoi pomonsoi di kasanangan ku. Oondos oku i’ do koinsanai di naanu-anu ku di pininghuyanan ku, om iri no ot isomuli’ doho’. ¹¹ Nga’ id tohuri noddi om sorisido’ ngai’ ku no o koinsanai di nongowonsoi ku, om i huyan ku’d minomongo do koinsanai’ddi, om koilaai ku nogiddi dot aiso’ ngai’ i’ o komoyon diri. Aiso’ i’ o kinotutuk-tutukon di huyan ku’ddi, tu’ iyo nod manabpo do ribut. ¹² Poingkuro piya nga’ iri no i nongowonsoi di piro-piro o raja’ dit id gulu ko’ iyau, o milo di raja’ do wonsoyon. Om timpuun oku noddi do momusorou ondung poingkuro o kootuson dot oilo daa ko’ bungou-bungou ko’ basug o tulun. ¹³ Atantu’ no dot oilaan ku i’ do, ’’Toilaan nopo om osonong i’ ko’ i kababasug, do miagal do tanawau tu’ osonong i’ ko’ i totuong. ¹⁴ Tulun nopo di kitoilaan om oilaan i’ dau ondung hinonggo ot ongoyon dau, nga’ tulun nopo di basug om momihawor i’ do mamanau. Nga’ oilaan ku i’ do kotutukon ngai’ nopo diyolo’ddi om oiyo i’! ¹⁵ Poingkaa o tosorou ku, ’Iri kotutukon ku iyoho’ nga’ iyo i’ di kotutukon di tulun di basug. Om nunu noddi o guna’ do koinsanai di toilaan ku?’ Om koilaai ku noddi dot aiso’ i’ kopio o guna’ do koinsanai’ddi. ¹⁶ Oruuhai dot olihuan i tulun do basug, nga’ i tulun do kitoilaan nga’ a’ i’ ahandaman kasai’. Tu’ alaid nopondo om olihuan ngai’ toko i’. A’ toko’ i’ milo dot a’ matai, dot i tulun di kitoilaan ko’ iri po i tulun do basug. ¹⁷ Gowoi poddi, om aiso’ no o komoyon ku do poimpasi, tu’ poporikot nod kosusaan dot id doho’ iti tongosiliu do hiti’d pomogunan, om aiso’ i’ o suwai do korikot. Aiso’ ngai’ nopo o kotutuk-tutukon diri, ribut noo o tinabpaan ku. ¹⁸ Koinsanai di hasil do karaja’ ku om i nangaanu-anu ku nga’ aiso’ i’ o guna’ dot id doho’, tu’ otongkiadan ngai’ ku i’ iri om katahak dot id tulun di sumowoli doho’. ¹⁹ Nga’ isai o koilo, ondung oilo tuu ko’ basug i sumowoli doho’? Nga’ poingkuro piya nga’ mositi’ no dot iyau o kotungkus do hasil di pininghuyanan ku om i naanu-anu ku do solinaid ku’d poimpasi do hiti’d pomogunan; i noongoi- ongoi di huyan om koiloo’ ku. Om iri piya’ddi nga’ aiso’ i’ o kinotutuk-tutukon. ²⁰ Om baino’ noddi om monosol oku i’ dot iyo kopio oku’ddi do minonotos do kuminaraja’. ²¹ Tu’ tulun nopo om tumotos do kumaraja’ do tumanud do toilaan, om pomusarahan dau’d atarom, om i koiloo’ dau. Om owonsoi indo dau i pokiwawansayan dau. Nga’ id tohuri nondo om tongkiadan i’ dau i hasil di pininghuyanan dau’ddi om patahakon iri di tulun dit a’ i’ nokoulai o lasu’ do minogihum diri. ²² Tikapatai id tulun do tumotos do kumaraja’ om oudipon tomod, nga’ nunu noo o hasil di huyan dau di milo dau’d kaandasan? ²³ Solinaid toko’ nopod poimpasi, om koinsanai di wonsoyon toko’ nga’ pokoruol nod ginawo om monginggorit dati’. Pitangatuong piya nga’ agangau i’ o ginawo toko’. Om koinsanai’ddi nga’ aiso’ i’ o kotutuk-tutukon. ²⁴ Aiso’ no ot osonong kopio do wonsoyon do tulun, suwai ko’ makan poo om minum, om momurimon di kosonongo’ di nongowonsoi dau om i hasil di karaja’ dau. Oilaan ku noddi do nipuhawang ngai’ id Kinorohingan iri. ²⁵ Isai daa o kaanu’d kaakan-akanan om kosimbayanan, ondung aiso’ daa o Kinorohingan? ²⁶ Onuan id Kinorohingan do toilaan, om pomusarahan dit atarom, om kosimbayanan i tulun di poposonong do ginawo dau. Nga’ tulun nopo di kidusa om suhuon dau’d kumaraja’ do mogihum do kaakan-akanan om monimung do hasil di karaja’ dau do patahakon di tulun di poposonong do ginawo’d Kinorohingan. Nga’ koinsanai’ddi om aiso’ i’ o kotutuk-tutukon; miagal noddi minghuyan do manabpo do ribut,’’ ka.

¹ Koinsanai do nunu nopo do hiti’d pomogunan diti, om osiliu i’ do tontok di maso di natantu’ mantad do Kinorohingan. ² Natantu’ nod Kinorohingan o maso do kosusuan om maso do kapatayan, maso do kapananaman om maso do kapangamatan, ³ maso do kapamatayan om maso do kopomolingasan, maso do kopomohuyasan om maso do kapamansayan. ⁴ Tinantu’ nogi’d Kinorohingan o maso do tumongob om maso dot otood, maso do mogihad om maso do manari’, ⁵ om maso do miuhang-uhang om maso do momusus do korohiano’ do miuhang- uhang, om maso do miburung-burung om maso dot a’ mungkomi. ⁶ Tinantu’ nogi’d Kinorohingan o maso do koonuan om maso dot atagakan, om maso do poopi’ om maso do momorubat, ⁷ om maso do momohurak om maso do monombir, om maso dot a’ mungkomi om maso do mimboros. ⁸ Tinantu’ nogi’d Kinorohingan o maso dot osianan om maso dot araatan, om maso do misangod om maso do miulud. ⁹ Nunu nondo ot aanu-anu toko’ do mantad di huyan toko’ddi? ¹⁰ Oilaan ku i’ do pinababaan toko’d Kinorohingan do binabo dit awagat kopio. ¹¹ Tinantu’ i’ dau o maso di koontok do kosilihan do koinsanai’d nunu nopo. Nonuan toko’d Kinorohingan do korohian do siilo ondung poingkukuro o maso dit id dabantalan, nga’ a’ toko’ i’ dau pologoson do kosuhut kopio do gisom dot arantaban daa o ginawo toko’ do mongilo do toinsanan di wonsoyon dau. ¹² Oilaan ku i’ dot id dati’ nopo om aiso’ no it osonong ko’ mantad dot otood om momurimon do koposi-posion do solinaid toko’ po do poimpasi. ¹³ Apatut ngai’ toko’ i’ do makan om minum om momurimon di hasil do karaja’ toko’. Tu’ iri nopo om nipuhawang id Kinorohingan. ¹⁴ Oilaan ku i’ do hino kasai’ o koinsanai di pinowonsoi’d Kinorohingan do gisom dot alaid. A’ i’ o tulun milo do momoruhang ko’ mongingkuri’ po di winonsoi’ddi, dot ongokoro’ piya. Om iyo pogi’ddi o winonsoi’d Kinorohingan nga’ orohian iyau do rumonok toko’ dau. ¹⁵ Tu’ nunu nopo i nosiliu do dinondo, nga’ nosiliu nori di gulu po. Om iri haro do koimbagu nga’ laid nori do hino. Om natantu’ mantad nod Kinorohingan dot osiliu kawagu i nongosiliu di gulu po. ¹⁶ Haro po o nokito ku do hiti’d pomogunan do miagal diti; hinonggo nopo it apatut daa do haro it otulid om osonong, om hiri nogi’ do haro o karaaton. ¹⁷ Momusorou oku, do butusan id Kinorohingan i tulun dot osonong om i tulun dot araat, tu’ koinsanai do hal om wonsoyon nga’ osiliu i’ do tontok di maso do natantu’ mantad do Kinorohingan. ¹⁸ Osorou ku nopo nga’ poingkaa: pogumbalan toko’d Kinorohingan do popointalang dot aiso’ i’ o pisuayan do kotutukon toko’ om i kotutukon do nintorusan. ¹⁹ Poingkuro piya nga’ miagal i’ o kotutukon do tulun om nintorusan. Tu’ apatai goduwo i’, om winonsoi goduwo. Om a’ i’ poimaha’ o tulun ko’ i nintorusan, tu’ aiso’ goduwo i’ o kotutuk-tutukon do koposion diyolo’. ²⁰ Iso-iso’ i’ o koiyonon do koongoyon diyolo’. Tu’ iyolo’ nopo om mantad i’ dot id tana’; om gumuli’ indo kawagu dot id tana’. ²¹ A’ toko’ toi koilo, do rusod nopod tulun om minsawat i’ do hilo’d sawat nga’ ginawo no di nintorusan om sumarasap do hilo’d saalom do tana’? ²² Om iri no o nokoilo-ilo ku, dot aiso’ no it osonong kopio’d wonsoyon do tulun, suwai ko’ momurimon do hasil di karaja’ dau. Suwai nopo ko’ iri om aiso’ no o milo dau’d wonsoyon. A’ i’ iyau koilo ondung nunu ot osiliu dot apatai iyau.

¹ Om piantangai ku noddi o koinsanai dit a’ otulid dit osiliu do hiti’d pomogunan. Mihad ngai’ poo i tulun dit ulak-ulakan, om aiso’ i’ ot orohian do monulung diyolo’. Iso’ pod tulun nga’ aiso’ i’ ot orohian do monguhup diyolo’, tu’ agayo i’ o kuasa’ di tulun di mongulok-ulok diyolo’. ² Atayaan oku no di tulun di laid no kapatai tu’ osimbayan nogi’ iyolo’ ko’ mantad di tulun di maso pod poimpasi. ³ Nga’ osimbayan nopo kopio om i tulun dit a’ nosusu do hiti’d pomogunan, tu’ a’ po iyolo’ nokoumbal do nokokito dit araat di wonsoyon do hiti’d pomogunan. ⁴ Oilaan ku nogi’, do katatasan nopod tulun do kumaraja’ nga’ atayaan do kokito do hasil do karaja’ di songkoduwo dau. Nga’ aiso’ ngai’ i’ o kotutuk- tutukon diri. Tu’ iyo nod tumotos do manabpo do ribut. ⁵ Tu’ tulun no kaka di basug o mirikau do momigapus om i popologos do tinan dau dot apatai dot olikapan. ⁶ Otopot i’ doti’ ot iyo’ddi, nga’ osonong nogi’ dot okuri’ o dapu’ dot osimbayan po o pomusarahan, ko’ mantad di tulun dit aiso’ nopo o kotingkadan do minghuyan do kumaraja’ om aiso’ indo o kotutuk-tutukon tu’ iyo nod minanabpo do ribut. ⁷ Haro po o suwai dit aiso’ o kotutuk-tutukon dot id suang do koposi-posion do tulun. ⁸ Haro i’ o tulun dot iso-iso’; aiso’ o tanak om aiso’ o tobpinai. Nga’ mulong po dot iyo’ddi nga’ a’ i’ iyau tumingkod do kumaraja’. A’ po iyau manangkabagalan di dapu’ dau. Isai nondo o potungkusan dau dit aanu-anu dau do pomolosuan do kumaraja’ om gisom do magada’ ngai’ di kasanang-sanangan? Iri nga’ aiso’ i’ o kotutuk-tutukon, om oinggorit o koposi-posion dau. ⁹ Osonong nogi’ do duwo o tulun ko’ mantad do songulun-ngulun. Tu’ kumaraja’ nopo i duwo o tulun om osonong-sonong no iyolo’d kumaraja’. ¹⁰ Tu’ ondung aratu’ i tiso’, nga’ tulungon i’ iyau di tiso’ dau. Nga’ aratu’ nopo it iso-iso’, om obungou no, tu’ aiso’ no o milo’d monulung dau. ¹¹ Tontok nopo dit osogit do dongotuong, om milo i’ i duwo tulun do midudun do modop om kopilasu’ indo o tinan, nga’ songulun-ngulun nopondo kopio om poingkukuro pondo iyau do papalasu’ do tinan dau? ¹² Songulun-ngulun nopo om oruhai dot aala’, nga’ duwo nopo o tulun do mitanud do mamanau om kaala’ i’ di sumaap. Tali nopod tolu santabid om alanut i’ om apagon dot oputut. ¹³ - ¹⁴ Tulun piya do mosikin nga’ milo i’ dot osiliu do raja’; om iri i mantad id giil nga’ milo i’ do koongoi do hiri’d tirikohonon do raja’. Nga’ molohing nopondo i raja’ om a’ no iyau orohian do rumamit do nosihat, om basug no kopio iyau, tu’ kotutukon nopo dau om araat po ko’ i kotutukon di tanak di mosikin daa nga’ kitoilaan i’. ¹⁵ Om soroho’ ku no o koinsanai’d tulun do hiti’d pomogunan, om oilaan ku no kopio do haro o songulun o tanakwagu dot id pialatan diyolo’ do kosowoli di raja’. ¹⁶ Ginumu’ nopod tulun di porintaon dau om a’ i’ doti’ daa ointob-intob, nga’ okon nopondo ko’ iyau o momorinta’ om aiso’ no o songulun piya do milo’d mongunsikou dau di nowonsoi dau dit ongosonong. Iri nogi’ nga’ aiso’ i’ o kotutuk-tutukon, tu’ miagal no di manabpo do ribut.

¹ Antaan-taan no kopio do tontok do mongoi ko do hilo’d Walai’d Sasambayangan dot Agayo. Osonong nogi’ do mongoi pinsingilo o kaangayan do hilo’ ko’ mantad do papatahak do porsombahan di sumbolion do miagal di wonsoyon do tulun do basug. Tu’ tulun nopo di basug om a’ i’ koilo do pisuayan dit otopot om i kasala’. ² Momusorou po kopio dot a’ ko po kopomoros. Om kada’ kolomus do mamatos dot id Kinorohingan. Tu’ Kinorohingan nopo moti’ om hilo’d surga, nga’ iya’ nopo om hiti id pomogunan. Iyo nopoddi, om kada’ no kopio kadala’ o boros. ³ Tumangkabo ko nogi’ moti’, om okon nogi’ do koipi ko dot araat. Ogumu- gumu’ moti’ o boros nu nga’ ogumu-gumu’ no o kosoliwan do boros di dongkababasug. ⁴ Iyo nopoddi, om soira’ ko nopo do mamatos dot id Kinorohingan, om lomusan nod mamayaan i pinabatos nu’ddi. Tu’ a’ i’ iyau orohian do tulun di mimbasug- basug. Sulungon no kopio i batos nu. ⁵ Osonong nogi’ moti’ dot a’ mamatos ko’ mantad do mamatos om a’ indo bayaanon iri. ⁶ Kada’ pologoso’ i boros nu do powonsoi diya’d dusa, gisom do momoros ko nondo dot id imam di momonsoi’d karaja’d TUHAN, do noborulong ko do minamatos. Nunu noo ot aanu-anu do popotogod do Kinorohingan diya’, om gowoi pondo om raagon dau i hasil do karaja’ nu? ⁷ Poingkuro nopo dot aiso’ o komoyon dot ogumu’ piya o nipi, om iyo nogiddi tu’ aiso’ i’ o guna’ dot adala’ o boros. Nga’ koronok nod TUHAN. ⁸ Kada’ kosuayai do kokito ko piya di pomorinta’ do mongulok-ulok do tulun do mosikin, om magahau di diyolo’d songonuon, om a’ wonsoyon it otulid dot id diyolo’. Tu’ pointikid-tikid do pagawai om intirungan i’ di boyoon dit id sawat ko’ iyau, om intirungan goduwo iyolo’ di boyoon dit asawat po ko’ diyolo’d pangkat. ⁹ Koposi-posion piya di raja’ nga’ poinsondiu i’ di tomoton. ¹⁰ Iri nopo tulun dit orohian do haro o tusin dot ogumu’, om a’ nopondo insan do kabagal o tusin dau; om iri tulun dit adalaan dot orohian do kakayaan, nga’ a’ i’ insan dot abagalan di kakayaan dau. Aiso’ ngai’ nopo o kotutuk-tutukon diti. ¹¹ Maya-kaya’ ko nga’ mumu-gumu’ no o tulun dit apatut nu’d paakanon. Aiso’ i’ o kountungan di sanganu’ddi, tu’ koilo no iyau do kaya’ iyau. ¹² Tulun nopo di pakaraja-raja’ no om misomonu-monu’ i’ doti’ dot a’ osukup do makan, nga’ tontok nopod modop iyau om oolong i’. Nga’ sorohon nopondo i tulun do kaya’, om a’ nopo iyau koodop tu’ atangkabo nopo. ¹³ Haro o nokito ku do hiti’d pomogunan di popotongob kopio do ginawo: i tulun di monimung do dapu’ do maan do tontok di haro o kokurangan. ¹⁴ Nga’ atagak ngai’ nopondo i dapu’ dau’ddi dot id suang dot iso’ noo o kinosusaan, gisom dot aiso’ no o potungkusan dau di tangaanak dau. ¹⁵ Poillabas toko’ i’ di pinogkosusu toko’ i’, om iyo toko’ nogindo’ddi do tumongkiad toko’ diti pomogunan, tu’ aiso’ i’ ot oigitan toko’ di naanu-anu toko’ di pininghuyanan toko’. ¹⁶ A’ i’ otulid o miagal diri! Tu’ mamanau toko’ nopondo om miagal no di rikot toko’ i’. Mingudipon toko’ no toomod do manabpo do ribut, om nunu noddi o kotutuk-tutukon diri? ¹⁷ Solinaid toko’ nopod poimpasi om id suang toko’ nod totuong, om kosusaan, om kakanggahan, om katagadan om korualan. ¹⁸ Osonong nopo kopio do noilaan ku’d wonsoyon toko’ om makan no, om minum om momurimon do hasil di karaja’ toko’ do solinaid diti tumur toko’ dot oniiba’ di pinatahak do Kinorohingan dot id dati’; iri no o kotutukon toko’. ¹⁹ Ondung onuan do Kinorohingan do dapu’ om kakayaan ot iso’ o tulun, om pohubayaan no dau iyau do koumbal ngai’ do kosonongo’ do kakayaan diri, om mongunsikou no om purimonon no o koinsanai di hasil do karaja’ nu. Iri nga’ nipuhawang id Kinorohingan. ²⁰ Ponuon id Kinorohingan do kosimbayanan o ginawo dau, om a’ indo iyau atangkabo do kosorou dot oniba’ o tumur dau.

¹ Nokito ku nogi’ it a’ otulid dit araat kopio do hiti’d pomogunan. ² Haro i’ o maso do manahak o Kinorohingan do kakayaan, om karayahan om dapu’ dot id iso’ o tulun, do gisom dot aiso’ no o kosionuan dau’d suwai. Nga’ a’ i’ iyau’d Kinorohingan pologoson do koumbal di pinopuhawang diri. Om iri nogindo i tulun dot a’ dau otutunan o kotungkus di kakayaan diri. Om iri nga’ aiso’ i’ o kotutuk-tutukon om a’ otulid. ³ Mulong pod haro daa o tulun do kitanak do hatus o tulun, om anaru o tumur dau, nga’ ondung a’ indo osimbayan o ginawo dau, om a’ iyau olobong kosonong-sonong, nga’ osorou ku nopo iyoho’, om iri nopo i ragang dit osusu do nolombus om osonong nogi’ o kinotutukon ko’ mantad di tulun diri. ⁴ Iri nopo i tanak diri om a’ i’ monguro dot osusu tuu iyau ko’ amu’; tu’ kumaa nopo iyau dot id totuong, om olihuan nondo. ⁵ A’ po iyau nokoumbal do nokokito dilo tinitiu’d tadau, om a’ kosuhut do komoyon do poimpasi, om osimbayan pogi’ndo iyau do poundorong. ⁶ Om osonong nogi’ iri ko’ mantad di tulun do duwo nahatus o toun do poimpasi, nga’ a’ i’ nokoumbal dot osimbayan. Okon toi ko’ iso’ i’ o kinoiyonon do kokoyoon diyolo’ goduwo? ⁷ Kakarajaan nopod tulun om mogihum nod kaakan-akanan, nga’ a’ i’ iyau insan kopuriman dot oiyahan. ⁸ Om nunu noddi ot aanu-anu di tulun dit oilo do pataladon di tulun do basug? Om nunu no o guna’ do milo piya i tulun do mosikin do tumimbaba’ do koposi-posion dau do hiti’d pomogunan? ⁹ Aiso’ ngai’ i’ o kotutukon diri, tu’ iyo noddi tumotos do manabpo do ribut. Osonong nogi’ dot abagalan toko’ do nunu nopo i haro dot id dati’, mantad ko’ i haro kasai’ nopo o kosionuan do pomoruhang di haro dot id dati’. ¹⁰ Koinsanai di haro do dinondo, om haro mantad no di gulu po. Om oilaan toko’ i’ dot a’ kasaap o tulun do monokisongkiwal do tulun dit okoris ko’ iyau. ¹¹ Alaid-laid iyau do monokisongkiwal, nga’ mumu-gumu’ no o boros dau dit aiso’ o komoyon; om aiso’ i’ o nunu-nunu dot aanu dau. ¹² Poingkukuro o tulun do koilo ondung nunu it osonong kopio dot id dau dot id suang diti koposi-posion dit oruhai do katalib, i miagal nod sangai? Poingkukuro o tulun do koilo ondung nunu ot osiliu do hiti’d pomogunan dot apatai iyau?

¹ Ngaran nopo dit osonong om osonong i’ ko’ mantad do tumau dit amahal o gatang; om tadau di kapatayon nga’ osonong nogi’ ko’ tadau do kinosusuon. ² Osonong nogi’ do mongoi’d hiri’d walai di haro o katangaban, ko’ mongoi dot id kinoiyonon di maso do rumamai. Tu’ mositi’ no dot osorou kasai’ toko’ i’ do poingandad o kapatayon do pointikid-tikid do tulun. ³ Osonong nogi’ o katangaban ko’ mantad do koirakan om kataadan. A’ i’ monguro dot olunggui piya o rabas, do muhang-ruhang po ot osuhutan. ⁴ Tulun nopod basug om mogihum nopod kosimbayanan. Tulun nopo di kitoilaan om kapatayon kasai’ i’ o sorohon. ⁵ Osonong nogi’ do sunudan ko di tulun di kitoilaan do nakasala’ ko’, ko’ mantad do royohon ko di tulun do basug. ⁶ Iri nopo i tulun do basug do koirak, om miagal no di kuropit do korugian di tutudan, tu’ aiso’ i’ o komoyon. ⁷ Monipu’ nopo o tulun di kitoilaan, om miagal no di tulun do basug o kowoyo-woyoon dau. Om rumamit nopo o tulun do tusin do ponisip om karaag nori do ngaran dau dit osonong. ⁸ Kopongoon nopod nunu nopo om osonong nogi’ ko’ mantad di koimpuunon nogi’. Om it alanut o ginawo nga’ osonong nogi’ ko’ mantad dit asawat o ginawo. ⁹ Kada’ kobintogod; om kada’ pimbasug-basug do popoopi’ do katagadan. ¹⁰ Kada’ ponguhot do, ’’Nokuro i kowoyo-woyoon di gulu po tu’ ongosonong nogi’ ko’ iti kowoyo-woyoon do dinondo?’’ ka. Tu’ ponguhatan nopod miagal diti om iri no i tulun do basug o monguhot. ¹¹ Apatut i’ do kitoilaan o tulun do daamot dau do poimpasi, tu’ gatang nopod toilaan om irad i’ di dapu’ do tungkusan; ¹² om iyo di tusin tu’ milo do moningolig do koposi-posion nu. Isai nopo o haro o pomusarahan dot atarom om toilaan, om apasi no. ¹³ Antangan no i wonsoyon do Kinorohingan. Haro po toi o tulun do milo’d monulid di pinokilong mantad do Kinorohingan? ¹⁴ Om kumotood no dot osonong-sonong ko po. Nga’ ondung oontok ko’d kosusaan, om kada’ kolihuwai do Kinorohingan i’ o pinapatahak goduwo’ddi. Om a’ toko’ i’ koilo ondung nunu ot osiliu dot id dosunsudan. ¹⁵ Aiso’ i’ o guna’ do koposi-posion ku, nga’ nokito ngai’ ku i’ iri do solinaid ku’d poimpasi. Haro i’ do matai i tulun dit osonong do kikotumbayaan piya iyau. Nga’ iri nogindo tulun dot araat om ongotogui i’, dot a’ piya iyolo’ tumingkod do mingwonsoi’d dusa. ¹⁶ Kada’ piya kadalaai kosonong, om kada’ padalaai kogumu’ o toilaan. Nunu noo ot aanu-anu do kumiros? ¹⁷ Kada’ kadalaai karaat om kada’ kadalaai kabasug. Nunu noddi o guna’ do matai dot a’ po orikot o kapatai-patayan? ¹⁸ Ilagon no i duwo o kowoyoon di misuwai kopio’ddi. Ondung oronok toko’d Kinorohingan, om atantu’ no dot apasi toko’. ¹⁹ Toilaan nopo om haro nogi’ o guna’ dot id tulun di kitoilaan, ko’ mantad do hopod o pomorinta’ do momorinta’ dot iso’ o bandar. ²⁰ Aiso’ i’ o songulun piya do hiti’d pomogunan dit aiso’ o bohiton, om it osonong kasai’ nopo o wonsoyon om a’ insan kowonsoi’d dusa. ²¹ Kada’ korohiai do mokinongou do nunu nopo o boros do tulun, tu’ nunu o koilo-ilo nga’ maso ko no doti’ do papalan di susuhuon nu. ²² Om kopuriman ko nogindo, do wokon nga’ noumbalan nu i’ do momopol. ²³ Iri i toilaan ku o pinongilo kopio ku do koinsanai’ddi. Nga’ maha’ nogi’ dot ihumon ku i toilaan, om okon nogi’d minsodu’ do mantad id doho’. ²⁴ Isai noo o koilo do komoyon kopio diti koposi-posion do tulun? Adalaan no kopio karalom iri om a’ no osuhutan! ²⁵ Nga’ minsingilo oku i’ kasai’ om mogihum oku do toilaan, om kaanu oku i’ do toilaan dit aralom om isimbar do koinsanai di tuhoton. Om kosuhut oku i’ do dusa nopo om kababasug i’, om kobubungou o karaaton. ²⁶ Koilaai ku noddi do tongoondu’ nopo om araat po ko’ kapatayon. Iri nopo pongunguhang do tondu’ om miagal po di rambot om i lawa’ di pointaan no do maan do pamalawa’. Iri nopo i pamagapus di tondu’ nga’ iyo pod kogos dit oogot. Iri nopo i tulun di momonsoi’d korohian do Kinorohingan om koilag i’ di lawa’ddi, nga’ iri nopo tulun do kidusa om atantu’ no dot alawaan. ²⁷ Antangai pogi’, ka di Tulun dit Aralom o Toilaan: Noilaan ngai’ ku iddi iri, do sinoriso-iso’ ku do mogihum ot isimbar. ²⁸ Maso ku pod mogihum dot isimbar di suwai, nga’ aiso’ no o noilaan ku. Id pogialatan nopod soribu o tulun, om iso’ no o kusai do nabantalan ku di milo ku’d royohon. Nga’ id pogialatan nopo diyolo’, om iso’ pod tondu’ nga’ aiso’ i’ o nokito ku di milo ku’d pusohon. ²⁹ Iti noo o noilaan ku: Osonong i’ daa om koubasanan o pinomonsoi’d Kinorohingan dati’. Nga’ iyati’ i’ om iyati’ o monusa’ om momorulong do koposi-posion toko’.

¹ Osonong no kopio o ginawo di tulun do kitoilaan. Tu’ koilo i’ iyau dot isimbar do koinsanai do nunu nopo. Iri no i toilaan o popokusum dau dot atataadan, gisom dot aiso’ no i kurudot do turos dau. ² Wonsoyon no i ponuhuan do raja’, om kada’ pamatos dot id Kinorohingan dot a’ ko po kopomusorou kopio. ³ Milo i’ i raja’ do momonsoi’d nunu nopo i korohian dau, om ondung a’ iyau ohubayaan diya’, om osonong nogi’ do minsodu’ ko dau. ⁴ Kikuasa’ i’ o raja’ do momonsoi di wonsoyon dau; om aiso’ no o kasaap do sumurilog dau! ⁵ Tulun nopo di mumboyo’ dau, om osimbayan i’ om aiso’ o koligagaanan. Iri nopo tulun do kitoilaan om koilo i’ ondung soira’ om poingkuro do mumboyo’ di raja’. ⁶ Haro i’ o maso di kopunong om ralan di koontok do momonsoi do koinsanai’d nunu nopo, nga’ okuuri’ kopio ot osuhutan toko’! ⁷ Iso’ pod tulun nga’ aiso’ i’ o koilo ondung nunu o kotutukon do poingandad dau, om aiso’ o milo’d poboros ondung nunu ot osiliu dot id dabantalan. ⁸ Iso’ pod tulun nga’ aiso’ i’ o milo’d momusus ko’ papalaid pod kapatayon dau. Iti no o pisangadan dit a’ milo dot ilagon, om a’ milo’d mogidu’ do mantad diti do monipu’ piya daa ko’ magakal o ralan do mogidu’. ⁹ Iti ngai’ no o nokito ku do tontok di miontong oku do koinsanai dit ongosiliu do hiti’d pomogunan. Haro i’ do pakayon do tulun o kuasa’ dau do ponginggorit do sompi’ ko’ iyau ngai’. ¹⁰ Nokoumbal oku i’ do nokokito’d tulun dit araat do napatai om linobong. Nga’ di nopoddi minuli’ oku do mantad hiri’d kalabangan, om korongou ku nod royohon i’ iyau di tulun di hiri’d bandar di pinamansayan dau dot araat. Om iti nga’ aiso’ i’ o kotutuk-tutukon. ¹¹ Nokuro tu’ aiso’ kopio o koontob-ontobon do tulun do momonsoi dit araat? Kobungou nopoddi nga’ a’ olomus do hukuman i tulun di nakasala’. ¹² Mulong piya do hatus no o karaaton do nowonsoi di songulun i kidusa, nga’ poimpasi kasai’ i’ iyau om otogui. Isai nopo kaka i mumboyo’d Kinorohingan, om osonong ngai’ no ot id suang do koposi-posion dau. ¹³ Nga’ iri nopondo i tulun dot araat om ogumu’ no kaka o kosusaan. Oruhai do tumalib o koposi-posion dau tu’ iyo noddi sangai. Omulok po iyau om matai no tu’ a’ i’ iyau minumboyo’ do Kinorohingan dau. ¹⁴ Nga’ aiso’ i’ o suang do boros diri. Antangai nopo pogi’ iti tosiliu do hiti’d pomogunan: Haro i’ o tulun dit osonong, do hukuman dot iyo po di tulun dot araat, om haro o tulun dot araat di somulian do miagal dit isomuli’ do tulun dit osonong, om iti nga’ aiso’ i’ o kotutuk-tutukon. ¹⁵ Kinopupuson nopod pomusarahan ku om mositi’ nod kumotood o tulun. Tu’ id suang nopod koposi-posion dau do hiti’d pomogunan om aiso’ no it osonong dot id dau suwai ko’ makan, om minum om rumamai. Iri noo i milo kopio’d purimonon o kosonongo’ do daamot dau dot ohuyan om oudipon, dot id suang diti koposi-posion do pinatahak do Kinorohingan dot id dau. ¹⁶ Tontok di tuminotos oku’d mogihum do toilaan, om piantangai ku no o koinsanai dit osiliu do hiti’d pomogunan, om kopurimanai ku noddi do kumaraja’ toko’ piya do tadau om totuong dot aiso’ o koundarangan, ¹⁷ nga’ a’ kasai’ toko’ i’ kosuhut di wonsoyon do Kinorohingan. Poingkuro toko’ piya do tumotos do minsingilo’ddi, nga’ a’ kasai’ toko’ i’ kosuhut. Mangakun i tulun di kitoilaan do koilo iyau, nga’ otopot nopo kopio om a’ i’ iyau koilo.

¹ Nosorisid ngai’ ku no iri do momusorou. Uludon id Kinorohingan o koposi-posion do tulun dit osonong om i kitoilaan. Om iri piya kosianan om karaatan diyolo’ nga’ Kinorohingan i’ o monongkoilo. Aiso’ i’ o koilo ondung nunu ot osiliu dot id dosunsudan dau. ² Oiyo i’ o kotutukon do pointikid-tikid do tulun; tulun dit otulid om tulun dit araat, tulun dit olidang om i tulun di sosomu’, i tulun di papatahak do porsombahan do sumbolion, om i tulun dit a’ papatahak. A’ i’ poimogo-mogot i tulun dot osonong ko’ mantad di tulun do kidusa, iri tulun di mamatos do mikuwo’d sumpa’ nga’ miagal nopo di tulun dit a’ mamatos do mikuwo’d sumpa’. ³ Om oiyo i’ o kotutukon diyolo’. Om a’ i’ otulid iri, do miagal ngai’ dit ongosiliu do hiti’d pomogunan tu’ a’ i’ otulid. Solinaid nopod tulun do poimpasi om noponu’ no iyau do kouulau, om noponu’ do kababasug o pomusarahan dau. Om sigog ka nopondo om apatai no iyau. ⁴ Nga’ solinaid nopod poimpasi, om solinaid noddi do haro o soro-sorohon. A’ toi koundar nogi’ i tasu ko’ mantad di singa, dot ondung poimpasi i tasu om poimpatai i singa? ⁵ Tu’ iri nopo i tulun do poimpasi om koilo i’ do poingandad dau o kapatayon, nga’ iri nopondo i tulun do napatai om aiso’ noo o toila-ilaan dau. Aiso’ no ot isomuli’ dau, om ngaran dau nga’ nolihuan no. ⁶ I kopurimanan dot osianan, om araatan om i korohian do tinan dau, nga’ nokotonggoi ngai’ no dau’d napatai, om a’ no iyau kokuro-kuro do nunu nopo it ongosiliu do hiti’d pomogunan. ⁷ Kainou nopo, om sumimbayan, inumo’ no ino waig dot anggur nu do mikuwo dot otood o ginawo. A’ i’ mogodu o Kinorohingan, suwai ko’ asanangan nogi’ iyau. ⁸ Pologoso’ no dot otood om osimbayan o kokitanan do rabas nu. ⁹ Purimonon no o kosonongo’d koposi-posion nu do poinsugku’ ko di sawo nu di kosianan kopio nu do solinaid nu’d poimpasi dot id suang do koposi-posion dit aiso’ o kotutuk-tutukon, i pinatahak do Kinorohingan dot id diya’ do hiti’d pomogunan. Purimonon no o kosonongo’ do pointikid-tikid do tadau dot aiso’ piya daa o guna’. Tu’ isomuli’ nopo di huyan nu’ddi om i koudiponon nu om iri-iri noo. ¹⁰ Tumotos nod momonsoi do koinsanai di karaja’ nu. Tu’ koimbagu nopondo om aiso’ no ot osorou om aiso’ o karaja’. Aiso’ i’ o toilaan om pomusarahan dot atarom do hilo’d pomogunan di tulun di napatai. Om hilo’ no o koongoyon nu. ¹¹ Haro po ot okito ku do hiti’d pomogunan: Okon i’ ko’ iri kasai’ no mananangkus dit osiau o kamanang dot id pilumbaan, om okon ko’ iri kasai’ i tulun dot okoris o kamanang dot id pisaapan. A’ i’ kaanu kasai’ do pogihuman do kaakan-akanan i tulun dit oilo. Om a’ i’ kaanu kasai’ do kakayaan i tulun di kitoilaan. Om iri tulun dit oilo kopio nga’ a’ i’ kabantug kasai’ no o ngaran dau. Tu’ isai nopo nga’ oontok i’ do kosusaan dit araat kopio. ¹² A’ i’ koilo o tulun ondung soira’ dot orikot o maso dau. Poingkuro nopo i tombolog dot alawaan, om i sada’ dot arambatan, om iyo noddi o tulun dot oontok do kosusaan do tontok di maso dit a’ i’ daa dau soro-sorohon. ¹³ Hiti nopod pomogunan om haro i’ o tokito ku do poiyaan dit osonong do pasal do toilaan dot osorou’d tulun: ¹⁴ Haro o tiso’ o bandar dit okooro’ om okuuri’ o tulun do poingiyon do hiri. Insan tadau om rikot no o raja’ dit abantug do minongoi panangod do bandar diri. Om turungkuo’ no dau i bandar diri om sodia’ nod mamaraag di tolig di bandar. ¹⁵ Id suang nopod bandar diri om haro o songulun dit oilo kopio. Om iyau poddi o nakapasi di bandar. Nga’ oruuhai do nolihuan i winonsoi dau dot osonong om iso’ pod tulun nga’ aiso’ no o kosorou dau tu’ mosikin i’ iyau. ¹⁶ Om otopot no i nosorou ku do kosoibau id kuasa’ o toilaan. Iyo piya’ddi nga’ a’ i’ pusohon o toilaan do tulun do mosikin. Om iso’ po di boros dau nga’ aiso’ i’ o podulon. ¹⁷ Osonong nogi’ do mokinongou do boros dit opiiyan do poboroson di tulun di kitoilaan ko’ mantad do mokinongou do giniakan do pomorinta’ dot id tinimungan do tulun do basug. ¹⁸ Haro nogi’ o guna’ do toilaan ko’ rapo-rapo; sontiri’ nopo o nila nga’ karaag nod sambalanga’ o susu.

¹ Iso’ nopo o langau di napatai, nga’ koutong i’ do sombutul o tumau dit osonong o kosingudan, okooro’ nopo do kababasug nga’ katagak nod toilaan dit asawat. ² Koubasanan id tulun di kitoilaan do momonsoi dot osonong, om koubasanan di tulun do basug do momonsoi dot araat. ³ Oilaan no kopio o kababasug dau dot id sompogunan piya dit osolowot dau do hilo’d tanga’d ralan om popinsunudon dau o kababasug dau dot id toinsanan o tulun. ⁴ Ondung togodon ko di raja’, om kada’ pokitingkod do kumaraja’. Tu’ agayo piya o kinasalaan nu, nga’ oompunan ko i’ ondung alanut o ginawo nu om a’ nu pimbarasan iri. ⁵ Haro po it araat kopio dot okito ku do hiti’d pomogunan, iri no i piro-piro o raja’ om i pomorinta’ dit a’ otulid. ⁶ Onuan nogi’ do pangkat i tulun do basug, om a’ nogi’ podulon i tulun do kaya’. ⁷ Nokoumbal oku i’ do nokokito’d turipon do poinsakai’d kuda’, om mamanau nogi’d gakod i tulun di kipangkat dot iyo poddi turipon. ⁸ Isai nopo i mongukad do luang, om aratu’ nod hiri; isai nopo i mamabak do tolig om otinduk nod tulanut di kapatai. ⁹ Isai nopo o kakaraja’ do hilo’d pamabakan do watu, om kaahid no di watu om osuhat. ¹⁰ A’ nopo kotogu’ o dangol nu om a’ nu ngoyon asao’, om oudipon ko nod kumaraja’. Momusorou no kopio, om sorohon mantad no o wonsoyon nu. ¹¹ Ondung moninduk i tulanut dot a’ po alaya’ di pomolimu’, om aiso’ no o guna’ di mamalaya’ do tulanut. ¹² Iri i boros di tulun do kitoilaan o kopomusahan do tulun dau, nga’ iri nopo tulun do basug om iri i’ i boros dau o karaag dau. ¹³ Mogkoringau noo o timpuunon dau do moro-boros, nga’ alaid nopondo om iyo poddi mulau o koboro-boroso’ dau. ¹⁴ Atantu’ no, dot adala’ o boros di tulun do basug. Poillisok i’ it id dosunsudan ngai’ toko’. Aiso’ i’ o milo’d posunud ondung nunu ot osiliu dot apatai toko’. ¹⁵ Iri no tulun do basug ot a’ kotunud do ralan do kumaa do hiri’d walai dau, kumaraja’ nopo iyau dot aiso’ o kotingkadan. ¹⁶ Obungou no i pomogunan dit omulok po o raja’, om monuaban do rumamai i piro-piro o boyoon. ¹⁷ Olumaag no i pomogunan di kikuasa’ kopio i raja’ do hiri, om koontok o maso do kaakanan di piro-piro o boyoon, it a’ orohian dot aawuk om milo’d momusus do korohian do tinan. ¹⁸ Turuon i’ o taap do walai ondung a’ wonsoyon, om alaid nopondo om ahaba’ indo i walai do gama’ do kokoulo’. ¹⁹ Popoirak o karamayan, om popotood i waig dot anggur. Nga’ mositi’ nod haro o tusin do pomoli’ddi. ²⁰ Kada’ pakaraat do raja’, dot id suang piya’d ginawo nu. Kada’ pakaraat di tulun do kaya’, do hilo’ ko piya’d bilik do toodopon nu. Tu’ haro i’ doti’ o tombolog do korongou di boros nu, om poromuton nondo dot id tulun di boro-boroson nu.

¹ Pakayo’ no o tusin nu dot id pogidagang-dagangan do hilo’d pomogunan do suwai. Atantu’ nod kaanu ko i’ do tuntung do koimbagu. ² Pakayo’ no o tusin nu dot id piro-piro o pogidagang-dagangan; om mogihum no do ralan dot ogumu’ do poinggumuan di tusin. Tu’ mositi’ nod mumbangan-bangan o tulun, dot a’ po korikot o kosusaan. ³ Honggo nopo o kahabaon do kayu, om poingiliu kasai’ nod hiri’d kinahabaon. Poimponu’ nopod waig i haun, om asapou no o rasam do sumondot. ⁴ Isai nopo i magandad do kosonong kopio o ribut om talun, om a’ no kapananom om a’ kopongupu’ do tua’. ⁵ Kinorohingan i’ o minomonsoi do koinsanai’d nunu nopo, om a’ i’ o tulun kosuhut diri. A’ i’ iyau kosuhut ondung poingkuro dot osiliu o koposion do tanak do hiri’d paganakan do tondu’. ⁶ Mositi’ nod mananom ko do dongkosuabon, om iyo iddi o wonsoyon do dongotuong. Tu’ a’ toko’ i’ oilaan ondung honggo’ddi ot osonong o sunion. Om nunu koilo-ilo nga’ osonong goduwo i’ doti’ o sunion diri. ⁷ Popotood ilo tinitiu’d tadau; om a’ no ogina-gina’ o kosonongo’ do tontok do momurimon do kosonongo’ddi. ⁸ Mongunsikou nod tontok do tumuo o tumur nu. Nga’ sorohon no, dot alaid ko piya do poimpasi do hiti’d pomogunan, nga’ alaid-laid ko do hilo’d kinoiyonon di tulun di nangapatai. Om nunu po daa’ddi o soro-sorohon? Aiso’ ngai’ i’ o guna’ om aiso’ o kotutuk-tutukon. ⁹ Oi tulun dit omulok po, purimono’ no o kosonongo’ do koposi-posion nu di maso nu pod omulok. Kumotood no do solinaid nu po dot omulok. Ngoyon ngai’ no i korohian do ginawo nu, wonsoyon ngai’ no i kouhangan do ginawo nu, nga’ sorohon no, do Kinorohingan i’ i hilo’d surga, o momutus do koinsanai di wonsoyon nu. ¹⁰ Iduwo’ no o katangkabaan om kosusaan do mantad id suang do ginawo nu, tu’ oruuhai do tumalib o maso nu dot omulok.

¹ Sorohon no i Minomonsoi diya’ dot omulok ko po, dot a’ po orikot i piro-piro o toun do poimponu’d koinggoritan. Tontok nopondoddi om moro-boros ko nondo dot, ’’A’ osimbayan o koposi-posion ku,’’ ka. ² Orikot nopondo o maso’ddi om a’ no atarang ot okito nu, gisom dot atalup no o tulinau do tadau, om tulan om rombituon. Om iri haun di kirasam, nga’ moyo-woyo’ nopo diya’ do momorolosi diya’. ³ Gagaran poo o longon nu om a’ no kointirung. Om gakod nu nga’ oluhoi nondo, om aiso’ noo o kokorisan. A’ nondo hino ngai’ o nipon nu do pongogop do taakanon. Om ohour ot okito nu, gisom dot a’ ko no kokito kopio. ⁴ Oiyo-iyo nu pod orongou i karamayan do hilo’d ralan. Oruhai no dot a’ orongou i tuni do tuunion om i tuni di pongisar. Iri piya tuni do tombolog nga’ koposik i’ diya’. ⁵ Ooris ko do kinoiyonon dit asawat om momirulan-rulan ko po do mamanau. Opurak no o tobuk nu om gayaton nu po o gakod nu do tontok do mamanau ko. Om aiso’ no o korohian nu, om aiso’ o kasanangan nu. Kumaa toko’ do hilo’d kinoiyonon toko’ dit id tohuri no, mogihad poo om mogkorudu’ o tulun do poingompus do ralan. ⁶ Opogiputut-putut i rantai do pirok; om aratu’ i lampung do tamas do gisom dot ababak; oputut i tali di poninimbauk om araag; om opurok i kuron do gisom do mogiuriasan. ⁷ Gumuli’ indo o tinan toko’, do sumiliu’d tana’ do hiti’d pomogunan. Gumuli’ indo o pinuhobo do koposion toko’ dot id Kinorohingan. Iyau i’ o pinapatahak diri do pinopuhawang toomod. ⁸ Boros kangku, om otopot i’ kopio dot aiso’ ngai’ i’ o kotutukon diri, om oinsanan dot aiso’ o komoyon om aiso’ o guna’. ⁹ Kitoilaan i’ om atarom o pomusarahan di Tulun dit Aralom o Toilaan. Om potudukon diri dau dot id koinsanai’d tulun, i toilaan dau. Ogumu’ o boros dot angaralom do pinsingilaan dau om ilaan kopio dau o katapatan diri. ¹⁰ Tumotos iyau do mogihum do boros di koinsasamod, om otulid ngai’ o boros di tinulis dau. ¹¹ Boros nopod tulun dit oilo’ddi om iyo po di sukud do madtatamong do dumba’ katarom, i sukud di pinongintirung dau di dumba’ dau. Iti nopo pinotimungan do boros dot aralom om nosihat, om iyo poddi lantak dit ogirot o pinapalantak. Iri nga’ pinopuhawang ngai’ id Kinorohingan, i gompomogompi’ dati’ dit iso’ noo. ¹² Oi tanak ku, antaan-taan no kopio o pasal dot iso’ o hal. Aiso’ i’ o kopupuson do monulis do buuk, om adalaan nopod minsingilo om kohuyan id pomusarahan om tinan. ¹³ Om kosorisid ngai’ ku poddi iri do momusorou, om poingkaa diri o noilaan ku. Koronok nod Kinorohingan om tonudon ngai’ no o ponuhuan dau, tu’ iri no o kinapamansayan dau’d tulun. ¹⁴ Butusan indo’d Kinorohingan o koinsanai di wonsoyon toko’; it osonong om it araat, om i songillisok.