PONUGUTAN

PONUGUTAN

¹ Id suang nod buuk diti o pinotulisan do koinsanai di pinosunud di Musa dot id bansa’ dot Israil di hilo’ iyolo’ id tana’ do kowotuan, i ponong id koulayon do mantad di Bawang do Yordan. Tontok nopoddi om hilo’ iyolo’ id Rantai do Yordan it id somok do bandar do Sup, it id piolitan do bandar do Paran, i bandar di ponong id sampaping di nundorong diyolo’, om i bandar do Topil, om bandar do Laban, om bandar do Hasirot om bandar do Disahab, o ponong id sampaping diyolo’. ² (Hopod om iso’ o tadau do koloidon do mamanau do mantad hilo’d Nuluhon do Sinai do kumaa do hilo’d Kadis Barnia do maya’ di konuluhanan do pomogunan dot Idom.) ³ Tontok di tadau do koiso’ di tulan do kohopod om iso’ do toun di kaapat nohopod do mantad di kinosoliwanan di tulun dot Israil do mantad id pomogunan do Masir, om posunudo’ no di Musa dot id diyolo’ o koinsanai di pinonuhuan do Kinorohingan di Musa do poposunud dot id tulun dot Israil. ⁴ Tontok nopoddi om naala’ nod TUHAN i Raja’ Sihon, i bansa’ dot Amori, i minomorinta’ do bandar do Hisbon, om naala’ nogi’ dau i Raja’ Og, i mantad hilo’d Basan, i minomorinta’ do bandar dot Astarot, om Idroi. ⁵ Om timpuun no i Musa do poposuhut do komoyon dit oturan om i ponuhuan do TUHAN di hilo’ po i tulun dot Israil id ponong id koulayon do mantad id Yordan, it id watas do Muab. Boros ka di Musa, ⁶ ’’Tontok di hilo’ toko’ pod Nuluhon do Sinai, om minomisunud o TUHAN i Kinorohingan toko’ do poingkaa, ’Laid kou noddi do poundorong do hiti’d nuluhon diti. ⁷ Om iduwon ngai’ no dokoyu i kiim dokoyu om lumombus kou do mamanau do kumaa do hilo’d konulu-nuluan do pomogunan do tulun dot Amori, om hilo’d kinoiyonon dit id posorili’ do kinoiyonon diri, i hilo’d Rantai do Yordan, om hilo’d konulu-nuluan, om hilo’d rantai, om hilo’d kinoiyonon di ponong id salatan, om hilo’d tisan di Rahat do Tanga’. Ongoi kou no iyon do hilo’d tana’ do Kanaan do gisom do katalib di konuluhanan do Libanon om gisom do korikot di bawang dot agayo, i bawang dot Iprat. ⁸ Iri ngai’ no i pomogunan di nakabatos ku do patahakon ku, iyoho’ i TUHAN o papatahak, dot id komolohingan dokoyu: i Abraham, i Isak, om i Yakub, om potungkusan ku di sinakagon diyolo’. Ongoi kou no pomogun do hilo’d pomogunan diri,’ ka dau,’’ ka di Musa. ⁹ Boros kaddi di Musa dot id tulun dot ogumu’ddi, ’’Tontok di hilo’ toko’ pod Nuluhon do Sinai, om minoro-boros oku dokoyu do poingkaa, ’Awagat kopio o tonggungan ku do momoyo’ dokoyu dot opurimanan ku. Om a’ oku no kooyit dot iso-iso’ kopio oku. ¹⁰ Tu’ siniliu kou do TUHAN, i Kinorohingan dokoyu do miagal dilo rombituon do hilo’d tawan kogumu’. ¹¹ Om maha’ daa om poinggumuon kou do Kinorohingan di komolohingan dokoyu, do kopiluap do piro-piro kawagu noribu o kogumuon dokoyu, om posimbayanon kou do miagal di pinabatos dau! ¹² Nga’ poingkukuro oku po do kooyit do tonggungan dot iyo kopio’ddi kawagat do manalasai di pogisosongkiwalan dokoyu? ¹³ Nga’ osonong do momili’ kou do piro-piro o tongokusai di kitoilaan om it obinsuhut, om it ogumu’ o nopinsingilaan, do mantad id pointikid-tikid do payat, om silihon ku nogindo iyolo’ do boyoon dokoyu,’ kangku. ¹⁴ Om nokotumboyo’ kou i’ dot osonong do wonsoyon o miagal diri. ¹⁵ Om siliho’ ku noddi i tongokusai dit ongkitoilan om it ogumu’ no o nopinsingilaan diri, i nongopili’ dokoyu do mantad id pointikid-tikid do payat do sumiliu’d boyoon dokoyu. Om haro o boyoon do soribu o tulun, om haro o boyoon do hatus o tulun, om haro o boyoon do limo nohopod o tulun, om haro o boyoon do hopod o tulun. Om minomili’ oku po do piro-piro o tulun do siniliu ku do boyoon do mongilo-ilo dot id pointikid-tikid di payat. ¹⁶ Tontok nopoddi om sinunudan ku iyolo’ do poingkaa, ’Pokinongohon no kopio dokoyu i pogisosongkiwalan dot id pogiolitan do tulun dokoyu. Om salasayon no do tumanud di pomumutus dot otulid o pointikid-tikid di haro o pogisosongkiwalan dot id pogialatan tuu dokoyu ngai’ ko’ id pogialatan po di bansa’d suwai di poundorong dot id rolot dokoyu. ¹⁷ Nga’ kada’ kou no kopio panampaping do momutus; iyoon no kopio dokoyu o pomumutus dot isai nopo o tulun. Kada’ kou poddosi dot isai nopo o tulun, tu’ nunu nopo it ibutus dokoyu om mantad nori dot id Kinorohingan. Ondung haro ot apangkal kopio do manalasai, om porikoton nopo dokoyu iri dot id doho’, om iyoho’ indo o manalasai,’ kangku. ¹⁸ Om sinunudan ku nogi’ iyokoyu do koinsanai dit apatut do wonsoyon dokoyu,’’ ka di Musa. ¹⁹ Om boros ka kawagu di Musa, ’’Nowonsoi toko’ no i pinonuhuan do TUHAN toko’. Tuminongkiad toko’ di Nuluhon do Sinai om minaya’ toko’ di tana’ do kowotuan dit agayo om i korolosi kopio di pinakayaan toko’ do hilo’d konuluhanan do pomogunan do tulun dot Amori. Om soira’ di nokorikot toko’ do hilo’d Kadis Barnia, ²⁰ - ²¹ om boros kangku, ’Baino’ noddi, om nokorikot kou no do hiti’d konuluhanan do pomogunan dot Amori, i patahakon do TUHAN, i Kinorohingan di komolohingan toko’ dot id dati’. Ontong kou pogi’ nga’ hoodi’ no moti’, okito no dokoyu. Ongoi kou no pomogun do hilo’ do tumanud di pinonuhuan do TUHAN. Kada’ kou no poddosi ko’ mikoduwo po o ginawo,’ kangku. ²² Nga’ rikot kou po dot id doho’ om boro-boros kou no do poingkaa, ’Osonong do monuhu’ toko’ po do piro-piro o tulun do mongoi ponoluku’ dilo pomogunan, om milo i’ iyolo’ do momisunud dati’ ondung honggo o ralan dot osonong do wayaan toko’ do kumaa’d hilo’ om koilo toko’ do kowoyo-woyoo’ di kabandaran do hilo’,’ ka dokoyu. ²³ Om osonong i’ do wonsoyon o miagal diri dot osorou ku iyoho’, om pomili’ oku noddi do hopod om duwo o tulun, do songulun o mantad id pointikid-tikid do payat. ²⁴ Om ongoi no iyolo’ do hilo’d konuluhanan do gisom do nokorikot do hilo’d Rantai dot Iskol do mongoi ponoluku’ di pomogunan diri. ²⁵ Om igit no iyolo’ do tua-ua’ di nanu diyolo’ do mantad hilo’ do pinatahak diyolo’ dati’ di guminuli’ iyolo’, om posunudo’ no diyolo’ dot iri nopo pomogunan do patahakon do TUHAN, i Kinorohingan toko’ om oluhub kopio o tana’. ²⁶ Nga’ suminaap kou i’ di pinonuhuan do TUHAN, i Kinorohingan dokoyu om minada’ kou do mongoi do hiri’d pomogunan diri. ²⁷ Om sontogod-togod kou tu’ boros ka dokoyu om ’Otogod o TUHAN dati’. Kinopolobusan nopo dau dati’ do mantad id pomogunan do Masir, om maan no do tahakon dot id tulun dot Amori, om apatai toko’ indo diyolo’. ²⁸ Nokuro daa tu’ mongoi toko’d hilo’? Moddosi i’ iyahai, tu’ iri nopo i gomponoluku’ di sinuhu’ dahai om minomisunud do tulun nopod hilo’ om okoris om osiou ko’ iyahai. Om poingiyon iyolo’ dot id bandar di kitolig do korikot do hilo’d tawan kasawato’. Om haro o nokito diyolo’ do tulun do hilo’ dit angagayo kopio koulun,’ ka no dokoyu. ²⁹ Nga’ boros kangku do minomisunud dokoyu, ’Kada’ kou poddosi di tulun do hilo’. ³⁰ Tu’ woyoon kou i’ do TUHAN i Kinorohingan dokoyu. Muhup i’ iyau dokoyu do sumaap do miagal di nokito dokoyu di hilo’d Masir, ³¹ om di hilo’d tana’ do kowotuan. Nokopuriman kou no do kinowoyo-woyoo’ do Kinorohingan do minomoyo’ dokoyu do kuminaa’d hiti, om ginompi’ kou dau do hilo’ do miagal pod songulun o tapa’ do mamabo di tanak dau,’ kangku. ³² Nga’ mulong pod nokoboros ku no o miagal diri dot id dokoyu nga’ a’ kou i’ otumbayaan do TUHAN, ³³ mulong piya do minogulu kasai’ iyau dokoyu do mogihum do tiyonon dokoyu do momukiim. Om minogulu iyau dokoyu do potunud do ralan dokoyu, do miagal do tapui di poorigi do dongotuong, om miagal do haun di poorigi do dangadau,’’ ka dau. ³⁴ Om boros ka kawagu di Musa, ’’Norongou i’ do TUHAN i boros dokoyu do sontogod-togod om kotogod noddi iyau. Om boros kaddi dau, ³⁵ ’Aiso’ no o songulun piya dot id pogialatan dokoyu do mantad id sinakagon diti tangaraat do maso’d baino’ do kosuang do hilo’d pomogunan dot oluhub o tana’, i nakabatos mantad ku di taki-aki dokoyu. ³⁶ I Kalib noo i tanak di Yopuni o koongoi do hilo’. Iyau nopo om otorodok i’ dot id doho’ om patahakon ku indo dot id dau om id sinakagon dau i tana’ di nongoi dau homboo’,’ ka dau. ³⁷ Om otogod iddi o TUHAN dot id doho’ dot iyokoyu o nokobungou, om boros ka dau, ’Iya’ piya oi Musa, nga’ a’ i’ kosuang do hilo’d pomogunan diri. ³⁸ Nga’ pogiroton no o ginawo di Yosua i tanak di Nun, i mongunguhup diya’ddi. Tu’ iyau no o boyoon do tulun dot Israil do mongoi ponolod do pomogunan diri,’ ka dau. ³⁹ Om boros kaddi do TUHAN dot id koinsanai dati’, ’Ilo’ nopo tangaanak dokoyu dit ongokoro’ po, it a’ po koilo dit otopot om it araat om kosuang i’ do hilo’d pomogunan diri, i tangaanak di komoyon dokoyu dot angatanggayan do pisangod dokoyu. Iyolo’ no ot onuan ku do pomogunan diri, om iyolo’ no o kopomogun do hilo’. ⁴⁰ Nga’ iyokoyu nopo, om poguliai no dokoyu kawagu do hilo’d tana’ do kowotuan do maya’ di ralan do kumaa do hilo’d Suok dot Akaba,’ ka dau. ⁴¹ Om boros ka dokoyu do suminimbar do tontok diri, ’Oi Musa, nokowonsoi no iyahai do dusa dot id toguang do TUHAN. Nga’ baino’ nopo om mongoi no iyahai sangod do tumanud di pinonuhuan do TUHAN, i Kinorohingan dot id dahai,’ ka dokoyu. Om sorompori-pori kou nopoddi do suminodia’ do mongoi sangod, om minomusorou kou dot a’ i’ osusa’ do mongoi panangod do pomogunan dit id konuluhanan. ⁴² Nga’ boros kad TUHAN dot id doho’, ’Oduhan no iyolo’ do mongoi sangod, tu’ a’ oku no momoyo’ diyolo’, om aala’ indo iyolo’ do pisangod,’ ka dau. ⁴³ Om nosunudan ku i’ iyokoyu di boros do TUHAN, nga’ a’ kou i’ minamadul diri. Suminaap kou i’ dau. Om oondos tomod kou do tuminakad do hilo’d konuluhanan. ⁴⁴ Om soliwan noddi i tulun dot Amori di poundorong do hilo’d konuluhanan diri, do miagal pod sangkawad o moningot do ruminuba’ dokoyu. Om gusao’ kou nopo diyolo’ do gisom do nokorikot do hilo’d Horma, om kaala’ kou no do hilo’d konuluhanan do tana’ dot Idom. ⁴⁵ Om songihad-ihad kou poddi do mokiuhup daa do TUHAN, nga’ a’ no iyau minokinongou om a’ minamadul dokoyu,’’ ka. ⁴⁶ ’’Om gowoi poddi om a’ no milo dot a’ toko’ minundorong do hilo’d

¹ Om boro-boros po kawagu i Musa, ’’Alaid noddi om guli’ toko’ no om ongoi toko’ no do hilo’d tana’ do kowotuan, it id doindalanan do kumaa do hilo’d Suok dot Akaba, do tumanud di pinonuhuan do TUHAN. Om alaid toko’ i’ do minghombo do hilo’d konuluhanan do pomogunan dot Idom. ² Om sunudai oku noddi do TUHAN do ³ laid toko’ no kopio’ddi do minghombo dot id konuluhanan diri om mongoi toko’ nondo do ponong id utara. ⁴ Om sinuhu’ oku dau do momisunud dokoyu diti tituduk do poingkaa, ’Oruhai kou no do kawaya’ diti konuluhanan di pinomogunan do tulun dot Idom, i kinoiyonon di kowori-worisan dokoyu, i sinakagon di Isau. Om moddosi indo iyolo’ dokoyu, ⁵ nga’ kada’ kou nogi’ sangod diyolo’, tu’ a’ oku i’ manahak dokoyu do bahagi’ dot ongosarangau piya di tana’ diyolo’. Tu’ nakatahak ku no o pomogunan dot Idom dot id sinakagon di Isau. ⁶ Nga’ taakanon nopo om waig om koino-ino i’ do bolion dokoyu do mantad id diyolo’,’ ka dau. ⁷ Soroho’ no dokoyu ondung poingkuro o TUHAN i Kinorohingan dokoyu do minamarakat dot id suang do nunu nopo i winonsoi dokoyu. Ginompi’ kou i’ do solinaid dokoyu do mimpanau do hilo’d tana’ do kowotuan dit agayo. Om nintirungan kou dau do solinaid dit apat nohopod o toun, om nangaanu ngai’ i’ dokoyu o nunu nopo it apatut dokoyu’d aanu. ⁸ Om pamanau toko’ noddi do luminombus om tongkiad toko’ no di ralan di mantad id kabandaran dot Ilat om Ision-Gibir, i poingkaa do hilo’d Rahat do Napatai, om pahamadai toko’ noddi do ponong id koulayon do pongid utara, do kuminaa do hilo’d tana’ do kowotuan do Muab. ⁹ Om boros ka do TUHAN dot id doho’, ’Kada’ kou pamagangau di tulun do Muab, i sinakagon di Lut, om kada’ kou sangod diyolo’. Tu’ nakatahak ku no diyolo’ iti bandar dot Ar, om a’ oku no mamahagi’ dokoyu dot ongokooro’ piya diti tana’ diyolo’,’ ka dau,’’ ka di Musa. ¹⁰ (Di nopo di gulu po om bansa’ do tulun dit angagayo koulun, i roitan dot Imim o minomogun do hilo’d Ar. Iyolo’ nopo om angaranggou, dot iyo po di tulun dot Inakim, it iso’ kawagu o bansa’ do tulun dit angagayo koulun. ¹¹ Tulun nopo dot Inak om tulun dot Imim om roitan do Ropaim, nga’ pomungaran nopo do tulun do Muab diyolo’ om Imim. ¹² Iri daa i tulun do Hori nga’ hilo’ nogid Idom do minomogun di gulu po, nga’ nuyung iyolo’ di sinakagon di Isau om pinunso diyolo’ o bansa’ddi. Om sowolio’ noddi di sinakagon di Isau do minomogun i pinomogunan diyolo’ do miagal di tulun dot Israil di koimbagu tu’ minonguyung di piro-piro pisangod diyolo’ do mantad hiri’d pomogunan di pinatahak do TUHAN dot id diyolo’.) ¹³ Om boros ka kawagu di Musa, ’’Om soborong toko’ noddi di Bawang do Sirid do tuminanud di pinonuhuan do TUHAN dot id dati’. ¹⁴ Tontok nopoddi om tolu no nohopod om walu’ o toun do mantad di tongkiad toko’ i’ do hilo’d Kadis Barnia. Om oinsanan nopo i soudor do mantad id sinakagon diri do nangapatai do miontok di nokoboros mantad do TUHAN. ¹⁵ Om saapo’ kasai’ nopod TUHAN iyolo’ do gisom do nangapatai ngai’ dau iyolo’. ¹⁶ Soira’ poddi di nangapatai ngai’ iyolo’, ¹⁷ om boro-boros no o TUHAN dot id dati’ do poingkaa, ¹⁸ ’Tadau nod baino’ do mamanau kou do tumalib di watas do Muab do maya’ do hilo’d bandar dot Ar. ¹⁹ Om koinsomok kou nondo do hilo’d tana’ dot Amon, i pinomogunan di sinakagon di Lut. Kada’ dokoyu iyolo’ gangaho’ om kada’ kou sangod diyolo’, tu’ a’ ku no iyokoyu bohogian dot ongokooro’ piya di tana’ do pinatahak ku dot id diyolo’,’ ka dau,’’ ka di Musa. ²⁰ (Iri nopo watas diri om nabantug nogi’ do pinomogunan di tulun do Ropaim, i ngaran do bansa’ di poingiyon do hilo’ di gulu po. Nga’ pomungaran nopod tulun dot Amon do bansa’ddi om Samsumim. ²¹ Iyolo’ nopo om angaranggou koulun do miagal di tulun dot Inak, om ongokoris om asapou daa. Nga’ patayo’ no iyolo’d TUHAN om sowoli noddi i bansa’ dot Amon do minomogun do hiri’d pomogunan diyolo’. ²² Om iyo nogiddi o winonsoi’d TUHAN dot id tulun dot Idom, i sinakagon di Isau, i minomogun do hilo’d konuluhanan dot Idom. Tu’ pinatai’d TUHAN i tulun do Hori, om kopomogun-mogun indo i tulun dot Idom do hiri’d pomogunan diri do gisom do baino’. ²³ Di nopo di gulu po om iri nopo tana’ do poingompus do tisan di Rahat do Tanga’ om nongoi iyono’ di tulun do mantad hilo’d pulou do Krita. Om pinatai diyolo’ i tulun dot Awi, i tulun mantad do hilo’, om iyono’ noddi diyolo’ i pomogunan diri do gisom do korikot do hilo’d bandar do Gasa, i ponong id salatan.) ²⁴ ’’Om boros kaddi do TUHAN di notoliban toko’ o watas do Muab, ’Baino’ nopo om pamanau kou no om sumoborong i’ di Bawang dot Arnon. Om paalaan ku nondo dokoyu i Sihon i raja’ dot Amori, i momorinta’ do hilo’d Hisbon, om potonggoyon ku i pomogunan dau. Songodon no dokoyu iyau, om iyonon no dokoyu i pomogunan dau. ²⁵ Om mantad pod tadau baino’ om popoddosion ku no ngai’ dokoyu o tulun do hinonggo-honggo nopo. Gagaran ngai’ nopondo do moddosi o koinsanai’d tulun do hinonggo nopo do soira’ nopo do korongou iyolo’ dot oroitan o ngaran dokoyu,’ ka dau,’’ ka di Musa. ²⁶ Om boros ka kawagu di Musa, ’’Om ponuhu’ oku noddi do piro-piro di tulun ku do mantad hilo’d tana’ do kowotuan do Kidimot do kuminaa do hilo’d di Sihon, i raja’ do Hisbon, do poporomut do boros do monokiulud do poingkaa, ²⁷ ’Potumboyoo’ no iyahai do maya’ diti pomogunan nu oi Tuan. Om tumilombus nopo iyahai do mamanau om a’ i’ iyahai sumala’ di ralan. ²⁸ Om bolion i’ dahai o nunu nopo i taakanon dot aakan dahai, om i waig dot oinum dahai. Maya’ no toomod iyahai diti pomogunan nu, ²⁹ do gisom do kosoborong iyahai di Bawang do Yordan do pakayaan do hilo’d pomogunan di patahakon do TUHAN i Kinorohingan dahai dot id dahai. Tu’ iri nopo sinakagon di Isau di momogun do hilo’d Idom, om i tulun do Muab i poingiyon do hilo’d Ar om pinopotumboyo’ i’ dahai do minaya’ di watas diyolo’,’ ka. ³⁰ Nga’ a’ i’ pinopotumboyo’ dati’ i Raja’ Sihon do maya’ di pomogunan dau, tu’ pinokodou do TUHAN i Kinorohingan dokoyu, o ginawo di Raja’ Sihon, om pinologos dau i raja’ do suminaap dati’, gisom do naala’ toko’ iyau om nosolod toko’ iddi i pinomogunan dau om iyon-iyonon toko’ po do gisom do baino’. ³¹ Om boros kaddi do TUHAN dot id doho’, ’Intong pogi’ nga’ nakatahak ku no diya’ i Raja’ Sihon om i tana’ do pinomogunan dau. Solodo’ no ilo tana’ do pinomogunan dau om momogun nod hilo’!’ ka dau. ³² Om pamanau no daa’ddi i Raja’ Sihon do miwoyo’ di soudor dau do minongoi sangod dati’ do hilo’d somok do bandar do Yahas. ³³ Nga’ diri noddi do pinatahak do TUHAN i Kinorohingan toko’ i raja’ddi dot id dati’. Om patayo’ toko’ noddi iyau, om i tangaanak dau om koinsanai di soudor dau. ³⁴ Tontok nogiddi do sinolod om rinaag toko’ o pointikid-tikid di bandar, om pinatai toko’ nogi’ o pointikid-tikid do tulun — do kusai om tongoondu’ do mitonggoi di tangaanak. Aiso’ no o songulun piya do pinasi toko’. ³⁵ Tayam-tayam diyolo’ nga’ nanu ngai’ toko’, om i hiri’d bandar diyolo’ nga’ pininganu ngai’ toko’ i konunu-nunuan do hiri. ³⁶ TUHAN no, i Kinorohingan toko’ o pinopokoris dati’ do gisom do naanu ngai’ toko’ i bandar do mantad pod hilo’d Aroir, it id dompok do Rantai dot Arnon, om i bandar dit id tanga’ di rantai do gisom do nokorikot do hilo’d Giliad. Om aiso’ no tiso’ di bandar dit ongkitolig dot a’ toko’ nosolod. ³⁷ Nga’ a’ toko’ i’ minongoi insomok di watas do tulun dot Amon, ko’ hiri’d tisan do Bawang do Yabok ko’ hiri’d kabandaran di hilo’d konuluhanan, om i kinoiyonon do suwai di pinogoduhan do TUHAN i Kinorohingan toko’ do mongoi,’’ ka di Musa.

¹ Om boros ka kawagu di Musa, ’’Katalib nori om pamanau toko’ no do kuminaa ponong id utara do poingkaa ponong id watas do Basan, om rikot no i Raja’ Og i raja’ do miwoyo’ do koinsanai di soudor dau do minongoi panangod dati’ do hilo’d somok di bandar dot Idroi. ² Nga’ boros kad TUHAN dot id doho’, ’Kada’ poddosi dau, oi Musa, tu’ patahakon ku i’ iyau om i soudor dau, om koinsanai di tana’ di pinomogunan dau dot id diya’. Wonsoyo’ no dot id dau o miagal di winonsoi nu dot id di Sihon i raja’ dot Amori, i minomorinta’ do hilo’d Hisbon,’ ka dau. ³ Om iyo noddi o TUHAN do pinapatahak di Raja’ Og om koinsanai di tulun dau dot id dati’, gisom do nangapatai ngai’ toko’ iyolo’. ⁴ Om tontok iddi do nosolod ngai’ toko’ i kabandaran dau dot onom nohopod o bandar do koinsanai dot id watas dot Argob, i porintaon daa di Raja’ Og. Aiso’ no tiso’ piya di bandar diri dot a’ toko’ nosolod. ⁵ Oinsanan nopo i kabandaran diri do kitolig dot akawas, om ongkiwawayaan om kisalampad do basi’ do pongontiil di totobon. Nga’ hiri nopod kokompungan om ogumu’ i’ it aiso’ o tolig. ⁶ Insanai toko’ nopo i kabandaran do minamaraag om koinsanai nopo o tongokusai om tongoondu’ om tangaanak diyolo’ do pinatai toko’ do miagal di winonsoi toko’ dot id kabandaran di porintaon daa di Raja’ Sihon, i hilo’d Hisbon. ⁷ Om onuo’ ngai’ toko’ nopo i tayam-tayam diyolo’, om pininganu toko’ i konunu-nunuan di hiri’d kabandaran diyolo’. ⁸ Tontok noddi do sinolod toko’ i pomogunan do porintaon daa di duwo o raja’ do tulun dot Amori, i hilo’d ponong id koulayon do mantad id Bawang do Yordan, do mantad hilo’d Bawang dot Arnon om gisom do korikot do hilo’d Nuluhon do Hormon. ⁹ (Pomungaran nopo di tulun do Sidon di Nuluhon do Hormon om Sirion, om pomungaran nod tulun dot Amori di nuluhon diri om Sonir.) ¹⁰ Om solodo’ toko’ no o koinsanai di tana’ do pinomogunan di Og, i raja’ do Basan; i kabandaran do hiri’d tana’ dit apatau, om pointongkop di watas do Giliad om Basan, om gisom do nokorikot do hilo’d kabandaran do Salka om Idroi, i ponong id koulayon,’’ ka di Musa. ¹¹ (I Raja’ Og nopo om tulun do Ropaim dit id tohuri no kopio. Iri nopo lungun dau om watu do winonsoi, om kalaabon nopo om oruhai nod duwo o mito, om konoruo’ no om apat o mito do tumanud do poninipong di koubasanan. Okito po iti do gisom piya’d baino’ do hilo’d bandar do Raba, it id pinomogunan do tulun dot Amon.) ¹² Om boros ka kawagu di Musa, ’’Tontok di nasanganu toko’ i pomogunan diri, om patahako’ ku no di payat do Rubin om payat do Gad i watas do ponong id utara do bandar dot Aroir, it id somok do Bawang dot Arnon, om pinatahak ku diyolo’ o sombohogian di konuluhanan do Giliad, om kohompit nogi’ i kabandaran do hilo’. ¹³ Om iri no i tana’ do Giliad di noolu’, om koinsanai do watas do Basan, i nokoiyonon di Raja’ Og do momorinta’ di gulu po, om koinsanai do watas dot Argob, om patahakon ku dot id songintanga’ di payat di Manasi,’’ ka dau. (Basan nopo om rinoitan do pomogunan do tulun do Ropaim. ¹⁴ I Yair no, i songulun do mantad id payat do Manasi o nakasanganu do koinsanai dit id watas dot Argob, i hilo’d Basan, do gisom do korikot dot id piwolitan do Gosur om Maaka. Om pungaranai no dau i kokompungan diri do pinasangai do ngaran dau, om gisom piya do baino’ nga’ roitan kasai’ po iri do kokompungan do Yair.) ¹⁵ ’’Om iri nopo watas do Giliad om pinatahak ku di sinompuruan do sompiiyon di Makir, i mantad id payat do Manasi. ¹⁶ Om iri no watas do mantad hilo’d Giliad om gisom do korikot do hilo’d Bawang dot Arnon, om pinatahak ku dot id payat do Rubin om payat do Gad. Piwolitan nopo diyolo’ do ponong id salatan om i piintangaan di Bawang dot Arnon, om wolit no diyolo’ do ponong id utara om i Bawang do Yabok, i wolit do watas do tana’ do tulun dot Amon o somputul. ¹⁷ Om ponong id kotonobon noo, om poiralad po i tana’ diyolo’ do gisom do korikot do hilo’d Bawang do Yordan. Iri nopo Bawang do Yordan om poingudan di Tasik Galilia do ponong id utara om lumuyung do poingkaa do hilo’d Rahat do Napatai di ponong id salatan, om poingkaa dot id guas do Nuluhon do Pisga o ponong id koulayon. ¹⁸ Tontok nogiddi do minomisunud oku diyolo’ diti ponuhuan do poingkaa, ’Nakatahak nod TUHAN i Kinorohingan toko’, iti tana’ do ponong id koulayon do mantad id Bawang do Yordan do maan dokoyu do pomogun-mogunan. Baino’ nondo om onuwai no dokoyu do rapo-rapo do sumangod ilo soudor dokoyu, om suhuon nogindo iyolo’ do sumoborong dilo Bawang do Yordan, do mogulu-gulu dilo piro-piro payat do suwai, do mongoi ponguhup diyolo’ do monolod di pomogunan do maan do diyolo’d pomogun-mogunan. ¹⁹ Ilo’ nopo sawo, om tangaanak om tayam-tayam dokoyu dit ogumu’ om poundorongon nopo dot id kabandaran di pinatahak ku dot id dokoyu. ²⁰ Uhupan no dokoyu i bansa’ dot oiyo ko’ tulun dot Israil do gisom do koundorong iyolo’ do hilo’d tana’ di patahakon do TUHAN dot id diyolo’, i ponong id kotonobon do mantad id Bawang do Yordan, om gisom dot oonuan iyolo’d TUHAN do kosimbayanan do poingiyon do hilo’ do miagal di winonsoi dau dot id dokoyu do hiti. Ongowonsoi ngai’ pondo iri om sorompori-pori kou nogindo do gumuli’ do hilo’d tana’ di pinatahak ku dot id dokoyu,’ kangku. ²¹ Om boros kangku’ddi dot id di Yosua, ’Nongokito ngai’ nu no i winonsoi do TUHAN i Kinorohingan nu dot id di Sihon om id di Og, i duwo o raja’ddi. Om iyo iddi o wonsoyon do TUHAN dot id piro-piro o raja’ do suwai di singolodon dokoyu o pomogunan. ²² Kada’ poddosi diyolo’ tu’ TUHAN i’ i Kinorohingan nu o mogobi’ diya’ do sumangod,’ kangku,’’ ka. ²³ Om boros ka kawagu di Musa, ’’Tontok nopoddi om nokototos oku no kopio do suminambayang dot id TUHAN ²⁴ do poingkaa, ’Oi TUHAN it Agayo Kuasa’, oilaan ku dot iri nopo pinokitanan nu doho’ om timpuunon nogi’ di wonsoyon nu dot angagayo kopio om i kongopusahan kopio. Aiso’ no o ponokokinorohingan do hilo’d tawan om hiti’d tana’ do milo do momonsoi do koinsanai di kopusahan di winonsoi nu. ²⁵ Om potumboyoo’ oku no do sumoborong dilo Bawang do Yordan, oi TUHAN, do mongoi intong di tana’ dot oluhub do hilo’d soborong, i watas do konulu-nuluan dit olumis kopio om i Konuluhanan do Libanon,’ kangku. ²⁶ Nga’ iyokoyu i’ o nokobungou gisom do kinatagadan oku’ddi do TUHAN, om a’ iddi iyau suminimbar di pinokianu ku. Tu’ boros kad TUHAN, ’Ula’ no! Kada’ no pingroitai ino, oi Musa. ²⁷ Ongoi nogi’ do hilo’d timpak do Nuluhon do Pisga om mintong i’ do ponong id utara, om ponong id salatan, om ponong id koulayon, om ponong id kotonobon. Om sonsodon no kopio it ongokito nu’d hilo’, tu’ a’ ko no koongoi do hilo’d soborong do Yordan. ²⁸ Tudukai no i Yosua, om pogiroton no o ginawo dau tu’ iyau no o sumiliu do boyoon dilo bansa’ do sumoborong dilo bawang do mongoi ponolod dilo pomogunan dit okito nu,’ ka dau. ²⁹ Om iri noddi o kinoundarangan toko’ do hiti’d rantai dit id hapak do bandar do Bait-Pior,’’ ka di Musa.

¹ Boros kaddi di Musa dot id tulun dot Israil, ’’Tonudon ngai’ no dokoyu iti toturan do potudukon ku, om angapasi kou i’ om kopomogun kou do hilo’d pomogunan di patahakon do TUHAN i Kinorohingan di komolohingan dokoyu, dot id dokoyu. ² Om kada’ dokoyu ruhangai do nunu nopo iti ponuhuan ku’dti, om kada’ dokoyu poingkurio’ iti. Tonudon ngai’ no dokoyu i ponuhuan do TUHAN i Kinorohingan, di pinatahak ku dot id dokoyu. ³ Nokokito kou i’ iyokoyu di winonsoi’d TUHAN di hilo’d Nuluhon do Pior. Pinatai ngai’ dau o koinsanai di tulun di tuminuku’ dot id tingolig do Baal do hilo’. ⁴ Nga’ iyokoyu nopo it otorodok dot id TUHAN i Kinorohingan dokoyu om poimpasi po kasai’ do gisom do baino’. ⁵ Nokotuduk ku no ngai’ dokoyu it oturan do miagal di pinonuhuan do TUHAN i Kinorohingan ku do wonsoyon ku. Om tonudon ngai’ no dokoyu iri do hilo’ kou id pomogunan di ngoyon dokoyu solodo’. ⁶ Tumorodok kou no kopio do tumanud diri. Om iri nondo o popointalang dot id bansa’d suwai dot ongoilo kou, om momoros nondo iyolo’ do poingkaa, ’Aralom no kopio o toilaan om ogumu’ ot osuhutan do bansa’ dot agayo diti,’ ka nondo diyolo’. ⁷ Aiso’ no tiso’d bansa’, do mulong piya do bansa’ dot angagayo di haro o ponokokinorohingan dit id somok kopio do lohowon do tontok do mokiuhup iyolo’ do koiyo do TUHAN i Kinorohingan toko’. Tu’ iyau nopo om sumimbar i’ dati’ do tontok do mokiuhup toko’ dau. ⁸ Aiso’ no o tiso’ do bansa’, do mulong piya do bansa’ dit agayo, do haro ot oturan do miagal diti toturan di nokotuduk ku dokoyu baino’ tu’ otulid. ⁹ Insan-insanon no om soro-sorohon no, do solinaid nopo dokoyu do poimpasi om kada’ no kopio dokoyu lihuwai i nongokito dokoyu. Susuyan no dokoyu i tangaanak om i tongomanangaki dokoyu do pasal ¹⁰ di tadau do nokotimbaba’ kou do TUHAN i Kinorohingan dokoyu di hilo’ kou id Nuluhon do Sinai, do tontok di minoro-boros o TUHAN dot id doho’ do poingkaa, ’Timungo’ ngai’ no iti tulun. Tu’ orohian oku do korongou iyolo’ diti poboroson ku om kopinsingilo i’ iyolo’ do mumboyo’ doho’ do solinaid diyolo’ do poimpasi, om tudukan indo diyolo’ i tangaanak diyolo’ do tumorodok do mumboyo’ doho’,’ ka dau. ¹¹ Om susuyon no dot id diyolo’ ondung poingkuro-kuro kou do minongoi ingkakat do hiri’d guas do nuluhon di nokulumutan do lisun dit oitom do miagal do haun dot akapal, om tontok di molob-ngolob o tapui do gisom do korikot do hilo’d tawan. ¹² Om sunudan no iyolo’ ondung poingkuro o TUHAN do minoro-boros dokoyu do mantad hiri’d tapui, om ondung poingkuro kou do nokorongou di boros dau do mulong piya dot a’ dokoyu nokito kopio o tinan dau. ¹³ Sinunudan kou do TUHAN ondung nunu o wonsoyon dokoyu do pomogompi’ di tumpongo do TUHAN dot id dokoyu’ddi — iri no tu’ sinuhu’ dau do tumanud di Hopod ot Oturan di tinulis dau dot id duwo o kaping do watu. ¹⁴ Sinuhu’ oku do TUHAN do popotuduk dot id dokoyu do koinsanai dit oturan dit apatut dokoyu do tonudon do hilo’ kou id pomogunan di ngoyon dokoyu solodo’ do maan dokoyu do pomogun-mogunan,’’ ka di Musa. ¹⁵ Om boros ka kawagu di Musa, ’’Sorohon no dokoyu, do tontok di minoro-boros o TUHAN dot id dokoyu do mantad hiri’d tapui di hilo’d Nuluhon do Sinai, om aiso’ i’ o nokito dokoyu ondung okuro-kuro o koinan-inano’ dau. ¹⁶ Iyo nopoddi, om antaan-taan no kopio do kopomonsoi kou do dusa dot i momonsoi’d tininganak do tukuon dokoyu do poingkuro nopo o kokitanan, do kusai tuu ko’ tondu’ po o poiyaan. ¹⁷ Ko’ miagal pod nintorusan ko’ tombolog, ¹⁸ ko’ miagal pod nintorusan di monungkamang ko’ sada’ po. ¹⁹ Kada’ kou kabayayat do tumuku’ om modsubak dit ongokito dokoyu do hilo’d tawan, dot ilo tuu tadau ko’ ilo tulan om i rombituon. Tu’ momonsoi kou nopo do miagal diri om kowonsoi kou nod dusa. Tu’ iri nopo om pinatahak ngai’ do TUHAN i Kinorohingan dokoyu do maan do pagandasan om tukuon do bansa’d suwai. ²⁰ Nga’ iyokoyu nopo om bansa’ i’ di pinosoliwan do TUHAN do mantad hilo’d Masir, i kinoiyonon do noinggorit kopio kou. TUHAN no o pinoposoliwan dokoyu do mantad id pomogunan diri do silihon kou dau do tulun di songonuon dau do miagal diti baino’. ²¹ Om kotogod noddi doho’ i TUHAN i Kinorohingan dokoyu, do nobungou dokoyu, om gisom do suminumpa’ iyau dot id doho’ dot a’ oku no posoborongon di Bawang do Yordan do kumaa do hilo’d tana’ dot oluhub, i tana’ do patahakon dau dot id dokoyu. ²² Hiti nod pomogunan diti o kapatayon ku om a’ oku no kosoborong dilo bawang. Nga’ iyokoyu nopo om oruhai nod sumoborong do mongoi pomogun do hilo’d tana’ dit oluhub. ²³ Nga’ antaan-taan no kopio dokoyu dot olihuan i tumpongo, om podulon no i pinogoduhan dau dokoyu, dot a’ momonsoi do tingolig do poingkuro nopo o koinan-inano’. ²⁴ Tu’ TUHAN nopo, i Kinorohingan dokoyu om miagal pod tapui do monorob, om a’ i’ iyau orohian do haro o mongoi iyo-iyo dau. ²⁵ Tontok piya dit alaid kou no do poundorong dot id pomogunan diri, gisom dot ongkiangaanak kou no om haro o manangaki dokoyu nga’ kada’ kou no kopio pomonsoi’d dusa do momonsoi’d tingolig do poingkuro nopo o koinan-inano’. Araat no kopio o miagal diri dot okito’d TUHAN, tu’ iri no o popotogod kopio dau. ²⁶ Ondung sumongkiwal kou doho’, om lohowon ku no o tawan om tana’ do baino’ do sumiliu’d sasi’ do papasala’ dokoyu, om a’ indo alaid om a’ kou no hino dot id pomogunan diri. Om a’ kou indo alaid do poingiyon dot id pomogunan dit id soborong do Bawang do Yordan. Tu’ patayon ngai’ kou nopondo. ²⁷ Potompiason kou motindo do TUHAN dot id pomogunan do suwai. Om okuri’ nondo ot id pogialatan dokoyu dot apasi. ²⁸ Modsubak kou motindo do tingolig di winonsoi’d tulun, i kayu om watu do winonsoi, i tingolig dit a’ kokito om a’ korongou, om a’ milo’d makan om a’ kosingud. ²⁹ Hilo’ no motindo do mogihum kou do TUHAN i Kinorohingan dokoyu, om ondung mogihum kou dau dot aayi-ayi’ kopio o ginawo dokoyu om okito i’ dokoyu iyau. ³⁰ Soira’ nopo dot agangau kou, om ongosiliu ngai’ i kosusaan diri dot id dokoyu om diri nondo do gumuli’ kou dot id TUHAN om mumboyo’ kou dau. ³¹ Iyau nopo om Kinorohingan dit obinsianan kopio. Om a’ kou i’ dau tongkiadan om a’ kou patayon. Om a’ i’ dau olihuan i tumpongo di winonsoi dau dot id taki-aki dokoyu. ³² Ponguho-nguhot kou no do pasal di gulu-gulu po, tontok dit a’ kou po nopogkosusu, di winonsoi nogi’ do Kinorohingan o tulun do hiti’d pomogunan. Sorisido’ no o pointongkop diti pomogunan. Haro toi o nosiliu do miagal diti kagayo do mantad di gulu po? Haro toi o nokorongou do miagal diti do mantad di gulu po? ³³ Haro toi o bansa’d tulun do napasi do tontok do nokorongou do boros do Kinorohingan do moro-boros do mantad id tapui do miagal di noumbalan dokoyu? ³⁴ Haro toi o ponokokinorohingan do nakasaap do mangangat do bansa’d tulun do lumabus do mantad id pomogunan do suwai, do siniliu’ddi dau do tulun di songonuon dau do miagal di winonsoi do TUHAN i Kinorohingan dokoyu, dot id dokoyu di hilo’ kou id Masir? Nokito no kopio do mato dokoyu do pinopoimbulai iyau do sinundu om kinoris dau dit agayo kopio; om pinorikot dau o toruol om pisangadan, om minomonsoi po iyau do kongopusahan om i kongoimayaan kopio, om minomonsoi di korolosi kopio. ³⁵ Kinapamansayan nopo do Kinorohingan do miagal diri om popointalang kopio dot iyau no o Kinorohingan om aiso’ no o suwai ko’ iyau. ³⁶ Pinologos kou i’ do Kinorohingan do korongou do boros dau do mantad hilo’d tawan, om milo indo iyau do monuduk dokoyu; om hiti nod pomogunan diti do pinologos kou dau do kokito di tapui dau dit olidang om minoro-boros iyau dokoyu do mantad hiri’d tapui’ddi. ³⁷ Tu’ osianan i’ kopio iyau di komolohingan dokoyu, om pilio’ kou noddi dau. Om iri kuasa’ dau dit agayo o pinoposoliwan dau dokoyu do mantad hilo’d Masir. ³⁸ Om tontok di minongoi kou sangod, om iyau i’ o minonguyung di piro-piro bansa’ dot angagayo om ongokoris ko’ iyokoyu, om kaatod kou indo dau do hiri’d pomogunan diyolo’, i patahakon dau dot id dokoyu. Om gisom piya’d baino’ nga’ iyokoyu kasai’ po o sanganu do pomogunan diri. ³⁹ Iyo nopoddi, om soro-soroho’ no dokoyu, om kada’ no kopio dokoyu lihuwai: Do TUHAN noo o Kinorohingan do hilo’d tawan om hiti’d pomogunan, om aiso’ no o suwai. ⁴⁰ Tonudon ngai’ no dokoyu o koinsanai dit oturan dau di nokotuduk ku dokoyu baino’, om ongosonong-sonong kou indo om ongosonong-sonong i sinakagon dokoyu. Om kotilombus kou i’ do momogun-mogun do hilo’d tana’ di patahakon do TUHAN dot id dokoyu, do maan do potungkusan dokoyu do gisom dot alaid,’’ ka di Musa. ⁴¹ Om potobilango’ no di Musa o tolu o bandar do hiri’d ponong id koulayon do mantad di Bawang do Yordan, ⁴² i pogintirungan do tulun di nakapamatai do tulun do suwai dot a’ dau tinomod do minamatai, it okon ko’ pisangod dau. Milo indo i tulun diri do mongoi dot id iso’ di bandar diri om a’ indo iyau apatai. ⁴³ Poobion nopo di payat do Rubin om i bandar do Bisir i hilo’d kapatahan do tana’ do kowotuan. Om poobion no di payat do Gad om i bandar do Ramot it id watas do Giliad, om poobion no di payat do Manasi om i bandar do Golan it id watas do Basan. ⁴⁴ Om patahako’ noddi di Musa dot id tulun dot Israil it oturan om ponudukan do Kinorohingan. ⁴⁵ - ⁴⁶ Pinatahak nopo dau diyolo’ o toturan diti om di nokosoliwan no i tulun dot Israil do mantad hilo’d Masir, di hilo’ no iyolo’d rantai dit id hapak do bandar do Bait-Pior; i ponong id koulayon do mantad di Bawang do Yordan. Iri nopo om id suang do watas di songonuon daa di Raja’ Sihon, i bansa’ dot Amori di minomorinta’ do hilo’d bandar do Hisbon di gulu po. Om naala’ di Musa om i tulun dot Israil i raja’ddi di nokosoliwan iyolo’ do mantad hilo’d Masir. ⁴⁷ Om solodo’ no diyolo’ i pinomogunan di Raja’ Sihon om i pinomogunan di Raja’ Og, i mantad hilo’d Basan, i tiso’ di raja’ dot Amori do poingiyon do hiri’d ponong id koulayon do mantad di Bawang do Yordan. ⁴⁸ Kogoyoo’ nopo do tana’ddi om mantad di bandar dot Aroir, it id disan di Bawang dot Arnon, om poingkaa ponong id utara do gisom do korikot do hilo’d Nuluhon do Sirion, i roitan do Nuluhon do Hormon. ⁴⁹ Nokosuang nogi’ o koinsanai do watas di ponong id koulayon do mantad di Bawang do Yordan do gisom do korikot do hilo’d Rahat do Napatai do ponong id salatan om korikot di guas do Nuluhon do Pisga.

¹ Om timungo’ ngai’ nod Musa i tulun dot Israil om boro-boros no iyau diyolo’ do poingkaa, ’’Oi tulun dot Israil, pokinongou ngai’ kou no diti toturan do patahakon ku dokoyu do tadau’d baino’. Pinsingilaan ngai’ no dokoyu iti om torodokon no kopio dokoyu do tumanud. ² Minomonsoi o TUHAN i Kinorohingan toko’ do tumpongo do hilo’d Nuluhon do Sinai, ³ dot okon nopo ko’ id komolohingan toko’ noo di gulu po, suwai ko’ id dati’ nogi’ i songimpasi do dinondo. ⁴ Mantad nod hiri’d tapui di hilo’d timpak di nuluhon do minoro-boros o TUHAN dot id dokoyu do potimbaba’ kopio. ⁵ Tontok nopoddi om iyoho’ no o poingkakat dot id piolitan dokoyu om TUHAN, do popolombus dot id dokoyu di boros dau. Tu’ minodosi kou i’ di tapui gisom dot a’ kou kasaap do tumakad do hiri’d timpak di nuluhon. Boros kad TUHAN, ⁶ ’Iyoho’ no o TUHAN i Kinorohingan dokoyu, i pinoposoliwan dokoyu do mantad hilo’d Masir, i pomogunan di kinosilihan dokoyu’d turipon di gulu po. ⁷ Kada’ kou tuku’ dot id ponokokinorohingan do suwai, suwai ko’ iyoho’ noo o tukuon. ⁸ Kada’ kou pomonsoi do nunu nopo o tininganak do poiyo-iyoon di hilo’d tawan ko’ i hiti’d tana’, ko’ i hilo’d saalom do waig dit id saalom do tana’. ⁹ Kada’ kou podsubak do nunu nopo i rait ko’ tingolig, om kada’ kou tuku’ dot id tingolig diri tu’ iyoho’ no o TUHAN i Kinorohingan dokoyu, om a’ oku i’ orohian do haro o mongoi iyo-iyo doho’. Tulun nopo dit araatan doho’ om hukuman ku no, om hukuman ku i manangaki dau do gisom dot intolu om ingapat kopilombus o sinakagon dau. ¹⁰ Nga’ pointalangon ku indo o kosianan ku dot id tulun dit osianan doho’ om it otorodok do tumanud ngai’ di ponuhuan ku, do gisom dot impiro-piro noribu pilombus o sinakagon dau. ¹¹ Kada’ kou pamarait do ngaran ku dot araat o kopomoroitan, tu’ iyoho’ nopo, i TUHAN i Kinorohingan dokoyu, om momohukum i’ dot isai nopo i mamarait do ngaran ku dot araat o kopomoroitan. ¹² Poinggoyoon no om pusohon no i tadau’d Sabat, om silihon nori do tadau dit olidang do tumanud di pinonuhuan do TUHAN i Kinorohingan dokoyu, dot id dokoyu. ¹³ Onuan ku iyokoyu dot onom o tadau do kakarajaan. ¹⁴ Nga’ iri nopondo tadau di koturu’ om tadau no do koundarangan di nokotobilang do maan do doho’. Tontok nopo do tadau’ddi om aiso’ no o songulun piya do koino-ino do kumaraja’ — dot iyokoyu tuu ko’ i tangaanak dokoyu ko’ i turipon dokoyu, ko’ i tayam-tayam dokoyu, ko’ i bansa’d suwai di momogun-mogun dot id pomogunan dokoyu. Turipon piya dokoyu nga’ poundorongon i’ do miagal dokoyu. ¹⁵ Hondomo’ no dokoyu do nosiliu kou i’ do turipon do hilo’d pomogunan do Masir di gulu po, om iyoho’ no i TUHAN i Kinorohingan dokoyu o pinoposoliwan dokoyu dot i kuasa’ om i kokorisan ku dit agayo kopio o pinoposoliwan ku dokoyu. Om iri no o koponuhuan ku dokoyu do momusou kopio di tadau’d Sabat. ¹⁶ Pusohon no dokoyu i tapa’ om tina’ dokoyu, do tumanud di ponuhuan ku dokoyu, om osonong-sonong kou indo om alaid kou do poingiyon dot id pomogunan di patahakon ku dot id dokoyu. ¹⁷ Kada’ kou pamatai. ¹⁸ Kada’ kou pagampahu’. ¹⁹ Kada’ kou panakau. ²⁰ Kada’ kou pasala’ do tulun do suwai dot a’ otopot o kapasalaan. ²¹ Kada’ kou korohiai di sawo do kusai’d suwai. Om kada’ kou korohiai di walai dau, ko’ i tana’ dau, ko’ i turipon dau, ko’ i sapi’ dau ko’ i kaladai dau, ko’ nunu nopo i dau’d songonuon,’ kad TUHAN. ²² Iri ngai’ no o toturan do TUHAN do pinatahak dau dot id dokoyu do tontok di songintimung kou do hiri’d nuluhon. Iti ngai’ no o toturan do pinatahak dau, om aiso’ no o suwai do tontok di minoro-boros iyau dot opuhod do mantad hiri’d tapui di mantad id haun dit akapal. Om pokikiro’ nogiddi dau it oturan diri dot id duwo o kaping do watu om patahako’ noddi dot id doho’,’’ ka di Musa. ²³ Om boros ka kawagu di Musa, ’’Tontok di notongkop do tapui i nuluhon om di nokorongou kou do boros do mantad hiri’d dotuong, om rikot ngai’ no dot id doho’ i molohing-lohingon om i boyoon do payat dokoyu. ²⁴ Om boro-boros no iyolo’ do poingkaa, ’Pinopointalang dot id dahai i TUHAN i Kinorohingan do kuasa’ om kagayaan dau do tontok di norongou dahai iyau do minoro-boros do mantad hiri’d tapui! Om koilo noddi iyahai do baino’ do mulong piya do koponokiboro-boros o Kinorohingan do tulun nga’ a’ i’ o tulun apatai. ²⁵ Nga’ nokuro tu’ minsomok po kawagu iyahai do kapatayon? Apatai indo doti’ iyahai di tapui di korolosi kopio’ddi. Om atantu’ no dot angapatai toko’ no do korongou toko’ kawagu’d TUHAN i Kinorohingan toko’ do moro-boros. ²⁶ Haro toi o tulun do nokoumbal dot a’ napatai do korongou do Kinorohingan di poimpasi do moro-boros do mantad id tapui? ²⁷ Poguliai no kawagu, oi Musa, om pokinongohon ngai’ no i poboroson do TUHAN i Kinorohingan toko’. Om pogulian nogindo do hiti’d dahai, om sunudan no iyahai do nunu nopo i pinoboros dau dot id diya’, om mokinongou i’ iyahai om tonudon dahai iri,’ ka diyolo’. ²⁸ Tontok di norongou do TUHAN iri om boro-boros no iyau dot id doho’ do poingkaa, ’Nongorongou ku no i pinoboros diti tulun. Om otopot i’ iri. ²⁹ Oondos oku no do kopuriman kasai’ daa iyolo’ do miagal diri! Om oondos oku do momusou kasai’ daa iyolo’ doho’ om otorodok do mumboyo’ do koinsanai di pinonuhuan ku, om osonong-sonong ngai’ i’ daa’ndo iyolo’ om i sinakagon diyolo’ do gisom dot alaid. ³⁰ Pamanau no, om suhuon no iyolo’ do muli’ do hilo’d kokiiman diyolo’. ³¹ Nga’ iya’ nopo, oi Musa, om mundorong nopo do hiti’d sugku’ ku. Om patahakon ngai’ ku indo diya’ it oturan om i ponuhuan ku. Om potudukon nori dot id diyolo’ om tumorodok i’ iyolo’ do tumanud diri do hilo’ iyolo’d pomogunan di patahakon ku dot id diyolo’,’ kad TUHAN. ³² Oi tulun dot Israil, tonudon no kopio dokoyu o koinsanai di pinonuhuan do TUHAN i Kinorohingan dokoyu, dot id dokoyu. Kada’ dokoyu songkiwalo’ o tongoiso’ piya dit oturan dau. ³³ Tonudon ngai’ no dokoyu iri om osonong-sonong kou i’ om kopomogun kasai’ kou do hilo’d pomogunan di ngoyon dokoyu pomogun-mogunai,’’ ka di Musa.

¹ Om boros ka kawagu di Musa, ’’Iti ngai’ no o toturan do pinonuhuan do TUHAN i Kinorohingan dokoyu do potudukon ku dot id dokoyu. Tumorodok kou no do tumanud do koinsanai’dti do hilo’ kou id pomogunan dit oruhai no dokoyu’d aanu do maan dokoyu do pomogun-mogunan. ² Solinaid nopo dokoyu do poimpasi om mositi’ no do momusou kou’d TUHAN i Kinorohingan dokoyu, om tumorodok do tumanud do koinsanai dit oturan dau di pinotuduk ku dokoyu, om alaid kou i’ do poingiyon do hilo’d pomogunan diri. Om i sinakagon dokoyu nga’ apatut nogi’ do momonsoi do miagal diri. ³ Soro-sorohon ngai’ no kopio dokoyu i ponudukan diri om tumorodok kou no do tumanud diri! Om ongosonong-sonong kou i’, om osiliu kou dot iso’ o bansa’ dit okoris, om kopomogun kou indo do hilo’d pomogunan di kaya’ om it oluhub o tana’, do miagal di pinabatos do TUHAN i Kinorohingan di komolohingan toko’. ⁴ Soro-sorohon no dokoyu, oi tulun dot Israil! TUHAN no, om TUHAN noo, o Kinorohingan toko’! ⁵ Kosianai kou nod TUHAN i Kinorohingan dokoyu do mikuwo’d aayi-ayi’ o ginawo om pointalangon no dokoyu iri dot id suang do kowoyo-woyoon dokoyu, om pointalangon dot id suang do wonsoyon dokoyu. ⁶ Kada’ no kopio dokoyu kolihuwai iti ponuhuan di pinatahak ku dot id dokoyu di tadau baino’. ⁷ Potudukon noti dot id tangaanak dokoyu. Piguli-gulian noti do popotuduk dot id diyolo’ do hilo’ kou id walai, ko’ hilo’d kinoiyonon do suwai, ko’ di poundorong kou, ko’ di maso dokoyu do kumaraja’. ⁸ Poogkoson no it oturan diri dot id longon dokoyu, om poogkoson do ponong id turos dokoyu do maan do poposorou dokoyu. ⁹ Potulison no it oturan diri do hiri’d torigi do wawayaan do walai dokoyu om id torigi di wawayaan do tansar di walai dokoyu,’’ ka dau. ¹⁰ Om boros ka kawagu di Musa, ’’Poingkuro nopo o TUHAN i Kinorohingan dokoyu do minamatos dot id komolohingan dokoyu, dot id di Abraham, om id di Isak, om id di Yakub, om bayaanon no dau do papatahak dot id dokoyu i pomogunan di kibandar dot angagayo om ongosonong diri, it okon ko’ iyokoyu o minomonsoi. ¹¹ Iri piya’ndo i kawalayan do hiri nga’ nongoponu’ pod dapu’ dit ongosonong nga’ okon i’ ko’ iyokoyu o pinoposuang do hiri. Om ogumu’ o torobong dit okon ko’ iyokoyu o minongukad om ongkitanom dot anggur om saitun dit okon ko’ iyokoyu o minananom. Om soira’ nopondo do kaatod kou’d TUHAN do hilo’d pomogunan diri, om haro ngai’ nopondo dot id dokoyu o nunu nopo i korohian dokoyu’d mangakan. ¹² Om soro-sorohon no kopio dokoyu om a’ i’ dokoyu olihuan o TUHAN, i pinoposoliwan dokoyu do mantad hilo’d Masir, i pomogunan di minonguripon dokoyu di gulu po. ¹³ Koronok kou nod TUHAN i Kinorohingan dokoyu, om sumambayang kou no dot id dau, om id dau noo, om soira’ nopod mamatos kou do mikuwo’d sumpa’, om mamatos kou no dot id suang nod ngaran dau. ¹⁴ Kada’ kou tuku’ dot id ponokokinorohingan di tukuon do tulun di hiti’d posorili’ dokoyu. ¹⁵ Ondung tumuku’ kou dot id ponokokinorohingan do suwai om rumikot no o kototogod do TUHAN dot id dokoyu do miagal do tapui di monorob ngai’ dokoyu, tu’ TUHAN nopo i Kinorohingan dokoyu om a’ i’ orohian do haro o mongoi iyo-iyo dau. ¹⁶ Kada’ dokoyu pogumbalai o TUHAN i Kinorohingan dokoyu, do miagal di winonsoi dokoyu di hilo’d Masa. ¹⁷ Soro-sorohon no kopio dokoyu do tumorodok do tumanud do koinsanai di toturan do pinatahak do TUHAN dot id dokoyu. ¹⁸ Wonsoyo’ ngai’ no dokoyu i pinoboros do TUHAN dit ongotulid om ongosonong, om ongosonong-sonong kou i’. Om iyokoyu indo o kasanganu di tana’ dot oluhub di pinabatos do TUHAN dot id komolohingan dokoyu. ¹⁹ Om ouyung ngai’ indo dokoyu i pisangod dokoyu do miagal di pinabatos mantad do TUHAN. ²⁰ Koimbagu nopondo, om muhot nondo i tangaanak dokoyu do poingkaa, ’Nokuro o TUHAN i Kinorohingan toko’ tu’ monuhu’ dati’ do tumorodok do tumanud ngai’ diti toturan?’ ka. ²¹ Om simbaron no dokoyu iyolo’ do poingkaa, ’Iyahai nopo di gulu po om nosiliu do turipon di raja’ do Masir, nga’ pinosoliwan i’ iyahai do TUHAN do mantad hilo’ dot i sinundu dau dit agayo kopio o pinoposoliwan. ²² Iyahai no kopio o nokokito do TUHAN do minomonsoi do kopusahan om i kotompurolosi kopio dot id tulun do Masir, om id raja’ diyolo’ om id koinsanai di pagawai di raja’. ²³ Om posoliwano’ no iyahai do TUHAN do mantad hilo’d Masir om angatai no iyahai dau do kuminaa’d hiti om patahako’ no dau dot id dahai iti tana’ do miagal di nakabatos mantad dau dot id taki-aki toko’. ²⁴ Om suhuo’ noddi iyahai do TUHAN i Kinorohingan toko’ do tumorodok kopio do tumanud ngai’ diti toturan dau, om momusou dau, om ondung wonsoyon toko’ o miagal diri om gompion indo kasai’ dau iti bansa’ toko’ om osimbayan toko’ do momogun-mogun. ²⁵ Om asanangan nondo dati’ o TUHAN i Kinorohingan ondung otorodok toko’ no do tumanud do koinsanai di pinonuhuan dau,’ kanto dokoyu,’’ ka di Musa.

¹ Om boros ka kawagu di Musa, ’’TUHAN indo i Kinorohingan dokoyu o momoyo’ dokoyu do sumuang di pomogunan dot ongoyon dokoyu pomogun-mogunai, om iyau nogi’ o monguyung di piro-piro o bansa’ di momogun mantad do hilo’. Om soira’ nopo do mongoi kou sangod, om uyungon indo dau o turu’ o bansa’ dit angagayo om ongokoris do mantad ko’ iyokoyu dot antang-antangan dokoyu; iri no i tulun do Hit, om Girgasi, om Amori, om Kanaan, om Poris, om Howi, om Yobus. ² Om soira’ nopondo do patahakon do TUHAN i Kinorohingan dokoyu, dot id dokoyu i piro-piro o bansa’ddi om aala’ ngai’ dokoyu iyolo’, om oiyon no kopio dokoyu iyolo’d mamatai. Kada’ kou no kopio ponokitaru’ diyolo’ om kada’ dokoyu insianai iyolo’. ³ Om kada’ kou kawin diyolo’, om kada’ dokoyu pologoso’ o tangaanak dokoyu do mangawin dot isai nopo dot id pogiolitan diyolo’. ⁴ Tu’ iyolo’ no moti’ o kabayayat do tangaanak dokoyu do tumuku’ dot id ponokokinorohingan do suwai, om tumongkiad do mantad id TUHAN. Om tumogod nondo o TUHAN dot id dokoyu, om ondung wonsoyon dokoyu o miagal diri om diiri indo om diiri do patayon kou dau. ⁵ Iyo nopoddi, om raagon no dokoyu o koinsanai di pananaraban diyolo’ do podsubak do tingolig, om mumukon nopo i torigi do watu di pokolidangon diyolo’, om tagadon i tanda’ di tingolig dot Asira, om tutudan ngai’ i tingolig di tukuon diyolo’. ⁶ Wonsoyon ngai’ no dokoyu o miagal diri, tu’ iyokoyu nopo om TUHAN no i Kinorohingan o sanganu. Id pialatan nopo do koinsanai’d bansa’d tulun do hiti’d pomogunan, om iyokoyu no o pinili’d TUHAN do sumiliu’d tulun dau di dau kopio do songonuon. ⁷ Okon i’ ko’ kosopoho’ dokoyu ko’ mantad do bansa’d suwai o kinosianan om kinopomilian do TUHAN dokoyu, tu’ iyokoyu no it okuri’ kopio do hiti’d pomogunan. ⁸ Nga’ nosianan i’ o TUHAN dokoyu om pilio’ kou noddi dau tu’ orohian iyau do mamayaan di batos dau dot id taki-aki dokoyu. Om iri no o kinopomosian dau dokoyu dot i sinundu dau dit agayo kopio o pinamasi, om pinoidu’ kou nogi’ dau do mantad id turiponon di raja’ do Masir. ⁹ Soro-sorohon no dokoyu, do TUHAN nopo i Kinorohingan dokoyu om iso’ noo, om iyau noo o Kinorohingan, om otorodok kopio iyau. Om sulungon i’ kopio dau i batos dau om pointalang iyau do kosianan dau dit aiso’ o kopupuson dot id rinibuan o sinakagon do tulun dit osianan dau om it otorodok do tumanud ngai’ di ponuhuan dau. ¹⁰ Nga’ a’ no iyau opogong do momohukum do tulun dit araatan dau. ¹¹ Iyo nopoddi, om tonudo’ no kopio dokoyu o nunu nopo i nokotuduk dot id dokoyu, om torodok kou no kopio do tumanud do koinsanai dit oturan om i ponudukan di nakatahak ku dokoyu di tadau baino’,’’ ka di Musa. ¹² Om boros ka kawagu di Musa, ’’Ondung mokinongou kopio kou diti ponuhuan om otorodok kou do tumanud do koinsanai’dti, om TUHAN i Kinorohingan dokoyu nga’ otorodok no do mongigit di tumpongo do winonsoi dau dot id dokoyu, om pointalangan kou dau do kosianan dau do miagal di pinabatos ku dot id taki-aki dokoyu. ¹³ Osianan indo iyau dokoyu om barakatan kou dau, om sumapou kou indo om ogumu’ o tangaanak dokoyu. Om barakatan indo dau o tumo dokoyu om kaanu kou i’ do gandum om anggur, om tumau do saitun. Om barakatan kou dau gisom dot onuan kou dau do sapi’ om dumba’ dot ogumu’. Om patahakon ngai’ nopondo dau dokoyu o koinsanai’dti barakat do hilo’ kou’d pomogunan di pinabatos do TUHAN di komolohingan dokoyu do patahakon dot id dokoyu. ¹⁴ Aiso’ no o bansa’d tulun do suwai do hiti’d pomogunan dot onuan dau do barakat dot ogumu’ dot iyo di patahakon dau dot id dokoyu. Aiso’ i’ o songulun piya dot id pogialatan dokoyu ko’ id pogialatan po di tayam-tayam dokoyu dot a’ maganak. ¹⁵ Intirungan kou i’ dau do mantad id toruol dot araat om mantad id koinsanai’d kosusaan do miagal di noumbalan dokoyu di hilo’d Masir. Nga’ iri nopo pisangod dokoyu om pologoson i’ dau dot oontok do koinsanai di kosusaan diri. ¹⁶ Patayon ngai’ no dokoyu i bansa’ di patahakon do TUHAN i Kinorohingan dokoyu dot id longon dokoyu, om kada’ dokoyu iyolo’ insianai. Om kada’ kou tuku’ dot id ponokokinorohingan diyolo’ tu’ iri no moti’ o kapatai dokoyu. ¹⁷ Kada’ dokoyu soroho’ dot ogumu’ o nintaban diyolo’ do mantad ko’ iyokoyu, om a’ kou kotori’ do monguyung diyolo’. ¹⁸ Kada’ kou poddosi diyolo’. Sorohon nopo i winonsoi’d TUHAN i Kinorohingan dokoyu dot id raja’ do Masir diri om id koinsanai di tulun dau. ¹⁹ Sorohon ngai’ nopo i kosusaan dit angawagat kopio di nokito dokoyu, om i kongopusahan om i kongoimayaan di winonsoi’d TUHAN i Kinorohingan dokoyu do mikuwo’d sinundu om kokorisan dau dit agayo kopio do pinoposoliwan dokoyu. Om iyo nogiddi o wonsoyon dau dot id koinsanai di bansa’ di poddosi dokoyu do baino’ tu’ patayon ngai’ indo dau iyolo’ do miagal di tulun do Masir. ²⁰ Om gangahon nondo dau iyolo’ gisom dot iri piya tulun di mogidu’ do mongoi lisok nga’ patayon i’ do TUHAN i Kinorohingan dokoyu. ²¹ Kada’ kou poddosi di piro-piro o bansa’ddi. Tu’ TUHAN i’ i Kinorohingan dokoyu o mongintirung dokoyu; iyau no o Kinorohingan dit agayo, om it apatut dokoyu’d poddosi. ²² Borinuton indo do TUHAN do monguyung i piro-piro o bansa’ddi do tontok do mongoi kou sangod. Tu’ a’ kou i’ kopunso diyolo’ dot insan-insan kopio o maso, tu’ ondung iyo’dion daa om gumumu’ nondo o nintorusan dot angaraat, om iri indo o sumiliu do koligagaanan dokoyu. ²³ Posuangon indo do TUHAN dot id longon dokoyu i piro-piro pisangod dokoyu om tompurolosion dau iyolo’ do gisom dot angapatai iyolo’. ²⁴ Om iri ngai’ i raja’ diyolo’ nga’ patahakon i’ do TUHAN dot id dokoyu. Om patayon nondo dokoyu iyolo’ om olihuan nondo o ngaran diyolo’. Om aiso’ no o songulun piya do kasaap dokoyu tu’ patayon ngai’ nopondo dokoyu o pointikid-tikid do tulun. ²⁵ Sorobon ngai’ no dokoyu i tingolig di tukuon diyolo’. Om kada’ kou korohiai di tamas om i pirok di poinsokot di tingolig, om kada’ dokoyu onuo’ iri, tu’ ondung onuon dokoyu om iri no o kapatai dokoyu, do TUHAN nopo om araatan i’ kopio do tingolig. ²⁶ Om kada’ kou pongigit dot ongoiso’ piya di tingolig do hiri’d walai dokoyu. Ondung mongigit kou om poingkuro nopo i nokousung diyolo’ om iri no o kousung dokoyu. Karaatai kou no di tingolig diri om pakaraaton no dokoyu, tu’ iri nopo om napapalan nod TUHAN,’’ ka di Musa.

¹ Boros ka kawagu di Musa, ’’Tumorodok kou no do tumanud do koinsanai dit oturan do pinatahak ku dokoyu di tadau baino’, om apasi kou i’, om muhang- ruhang o kosopoho’ dokoyu, om kopomogun kou indo do hilo’d tana’ di pinabatos mantad do TUHAN dot id komolohingan dokoyu. ² Sorohon no i kinowoyo-woyoo’ do TUHAN, i Kinorohingan dokoyu do minomoyo’ dokoyu dot id tindalanon dit osodu’ do minaya’ di tana’ do kowotuan do solinaid dot apat nohopod o toun di nakatalib; om i kinowoyo-woyoo’ dau do pinoporikot do kosusaan do pogumbal dau dokoyu, om oilaan i’ ot id suang do ginawo dokoyu ondung tumorodok kopio kou do tumanud di ponuhuan dau. ³ Pinologos kou dau do louson, om onuwai kou nogiddi dau do manna do maan dot akanon, it a’ po dokoyu om i komolohingan dokoyu noumbalan do mangakan do gulu. Kinapamansayan nopod TUHAN do miagal diri om monuduk dokoyu dot okon i’ ko’ taakanon noo o kapasi do tulun, suwai ko’ koinsanai di boros do poboroson do TUHAN. ⁴ Solinaid nopo dit apat nohopod o toun om a’ i’ nohurak o pakayan dokoyu, om a’ luminonit o lapap dokoyu. ⁵ Soro-sorohon no dokoyu, do TUHAN i Kinorohingan dokoyu nga’ mamalapos i’ do monuduk dokoyu do miagal di songulun o tapa’ do mamalapos do monuduk di tangaanak dau. ⁶ Iyo nopoddi, om wonsoyon no dokoyu o nunu nopo i pinonuhuan do TUHAN. Tonudon ngai’ no dokoyu it oturan dau, om koronok kou no dau om pusohon no dokoyu iyau. ⁷ Maso no do TUHAN, i Kinorohingan dokoyu do momoyo’ dokoyu do kumaa do hilo’d tana’ dit oluhub, i tana’ dot ogumu’ o bawang om palu, om tudan do waig do mantad hilo’d saalom do tana’ di lumuyung do hiri’d rantai om hiri’d konulu-nuluan. ⁸ Om iri no o tana’ di sunian do gandum om barli om anggur, om haro o tua’ dot ara om tua’ do delima, om guas do saitun, om ogumu’ po o paha’. ⁹ Hilo’ nopo om a’ kou no koumbal do louson ko’ ooyian pod nunu nopo. Watu nopod hilo’ om kirolot do basi’, om haro o tambaga’ dot aanu dokoyu do mantad hiri’d konuluhanan. ¹⁰ Nunu nopo i kosiakanan dokoyu om haro ngai’ nopo. Om mongunsikou kou nondo do TUHAN, i Kinorohingan dokoyu di tana’ dit oluhub do pinatahak dau dot id dokoyu,’’ ka di Musa. ¹¹ Boros ka kawagu di Musa, ’’Antaan-taan no kopio dokoyu, om a’ kou i’ kolihu do TUHAN, i Kinorohingan dokoyu. Kada’ nod haro o tiso’ dit oturan dau dot a’ dokoyu tonudon, it oturan di pinatahak ku dokoyu di tadau baino’. ¹² Om soira’ nopondo dot angaanu ngai’ dokoyu i korohian dokoyu do mangakan, om ongkoingkakat dokoyu o walai dokoyu dit olumis dot iyonon dokoyu, ¹³ om di koinggumu’ o sapi’, om dumba’ dokoyu, om tamas om pirok dokoyu, om koinsanai do dapu’ dokoyu’d suwai, ¹⁴ om soro-sorohon no kopio dokoyu om a’ kou i’ osiliu do tulun dit oondos, gisom dot olihuan dokoyu o TUHAN, i Kinorohingan dokoyu, i pinoposoliwan dokoyu do mantad hilo’d pomogunan do Masir, i pomogunan di minonguripon dokoyu di gulu po. ¹⁵ TUHAN no o minangahak dokoyu do tuminalib do hilo’d tana’ do kowotuan dot agayo, i kinoiyonon do kotompurolosi kopio tu’ ogumu’ o tulanut di kapatai o tindukon, om ogumu’ o tompoluluhu. Tontok di hilo’ kou id tana’ dit otuu om it aiso’ o waig, om pinoimbulai i’ do TUHAN o waig do mantad hiri’d tontolob do pinoinuman dokoyu do gisom do nongourudtuu kou. ¹⁶ Om tontok di hilo’ kou id tana’ do kowotuan om nonuan kou i’ dau do manna, i taakanon dit a’ insan koumbalai di taki-aki dokoyu do mangakan. Hilo’ no do pinorikot dau o kosusaan dot id dokoyu do pogumbal dokoyu, om popoinsiriba’ do ginawo dokoyu, om owonsoi indo dau it osonong dot id dokoyu dot atalib iri. ¹⁷ Iyo nopoddi om kada’ no kopio dokoyu soroho’ dot iri nopo kakayaan dokoyu om mantad i’ do koporuo’ om kokoriso’ dokoyu. ¹⁸ Sorohon no do TUHAN i’, i Kinorohingan dokoyu o minanahak dokoyu di kakayaan diri. Winonsoi pogi’ dau o miagal diri nga’ otorodok kasai’ i’ iyau dot id tumpongo di winonsoi dau dot id taki-aki dokoyu do gisom piya do baino’. ¹⁹ Kada’ no kopio dokoyu kolihuwai o TUHAN, i Kinorohingan dokoyu, om kada’ kou guli’ do tumuku’ om modsubak do ponokokinorohingan do suwai. Ondung momonsoi kou do miagal diri, om poinsanon mantad ku no iyokoyu do tadau do baino’ dot atantu’ no do patayon kou do TUHAN. ²⁰ Tu’ ondung a’ kou otorodok do tumanud do boros do TUHAN, om patayon kou no dau do miagal di piro-piro o bansa’ di pinatai dau dot antang-antangan dokoyu,’’ ka di Musa.

¹ Om boros ka kawagu di Musa, ’’Pokinongou kou no, oi tulun dot Israil! Baino’ nopodti om oruhai kou no do sumoborong dilo Bawang do Yordan do mongoi pomogun do hilo’d tana’ di piro-piro o bansa’d suwai dit angasapou om ongokoris ko’ iyokoyu. Om bandar diyolo’ nga’ angagayo om kitolig di korikot do hilo’d tawan o kasawato’. ² Om iri piya i tongoulun do hilo’ nga’ angaranggou om ongokoris; iyolo’ nopo om angagayo koulun, om nokorongou kou nogi’ dot aiso’ no o songulun piya do kasaap diyolo’. ³ Nga’ oilaan indo dokoyu do baino’, do mogulu dokoyu o TUHAN, i Kinorohingan dokoyu, do miagal po di tapui do monorob. Alaon indo do TUHAN iyolo’ dot antang-antangan dokoyu, om ouyung indo dokoyu iyolo’ om oruhai dokoyu iyolo’ dot apatai do miagal di nakabatos do TUHAN. ⁴ - ⁵ Om ouyung nopondo iyolo’ do TUHAN, i Kinorohingan dokoyu, do mantad id dokoyu, om kada’ kou pomusorou do kinapaatadan nopod TUHAN dokoyu do hilo’ do mongoi panganu di tana’ddi om i kosonongo’ dokoyu om i kosorupayan dokoyu do kaanu’ddi. Tu’ a’ i’ kopio iyo’ddi, nga’ nuyung pogi’ do TUHAN i tongobansa’ddi do mogobi’ dokoyu nga’ i karaato’ diyolo’ o kinoponguyungan. Kapalagasan nopod TUHAN dokoyu do mongoi panganu di tana’ do pinomogunan diyolo’ nga’ mamayaan o TUHAN di pinabatos dau dot id taki-aki dokoyu, i Abraham, om i Isak om i Yakub. ⁶ Kotumbayaai kou no kopio do kapatahakan nopod TUHAN dot id dokoyu di tana’ dot oluhub diri om okon i’ ko’ i kosorupayan dokoyu do kaanu’ddi. Tu’ iyokoyu nopo om bansa’ i’ dit ongokodou o ginawo. ⁷ Kada’ dokoyu kolihuwai i winonsoi dokoyu di pinopotogod do TUHAN, i Kinorohingan dokoyu, di hilo’d tana’ do kowotuan. Tu’ mantad nopo di tadau do suminoliwan kou do mantad hilo’d Masir om gisom do nokorikot do tadau di kinorikatan dokoyu’d hiti, om a’ kou no impiro-piro saap do TUHAN. ⁸ Tontok piya di hilo’d Nuluhon do Sinai nga’ minomonsoi kou i’ di katagadan do TUHAN, gisom do patayon kou daa’ddi do TUHAN. ⁹ Tontok nopoddi om tuminakad oku do hiri’d timpak do nuluhon diri do minongoi ramit di duwo o kaping do watu do pinotulisan di tumpongo do TUHAN dot id dokoyu. Om minundorong oku do hiri do solinaid dot apat nohopod o tadau om apat nohopod o totuong dot a’ minakan om a’ mininum. ¹⁰ Om patahako’ noddi do TUHAN dot id doho’ i duwo o kaping do watu, i tinulisan do longon kopio dau o minonulis, do koinsanai di pinoboros dau dot id dokoyu do mantad hiri’d tapui do tontok di songintimung kou do hiri’d guas di nuluhon. ¹¹ Om katalib poddi ot apat nohopod o tadau om apat nohopod o totuong om patahako’ nogiddi do TUHAN dot id doho’ i duwo o kaping do watu, i pinotulisan dau di tumpongo’ddi. ¹² Katalib poddi iri om boro-boros no o TUHAN dot id doho’ do poingkaa, ’Ruhuk nogi’ kopio do hilo’d siba’, tu’ ilo nopo tulun dot ogumu’ di winoyo’ nu do suminoliwan do mantad hilo’d Masir om nokowonsoi no dot araat. Nakasansala’ no iyolo’ do mantad di pinonuhuan ku diyolo’, om pomonsoi nogiddi iyolo’ do tingolig do tukuon diyolo’,’ ka dau. ¹³ Om minoro-boros po o TUHAN dot id doho’ do poingkaa, ’Oilaan ku no o kokodoho’ do ginawo do tongoulun diti. ¹⁴ Om kada’ no umbal do mogodu doho’. Tu’ nokopomusorou oku no do mamatai diyolo’, om aiso’ nondo o tongosongulun piya do kohondom diyolo’. Om iya’ nondo o silihon ku do tapa’ dot iso’ o bansa’ dit agayo om ongokoris ko’ mantad diyolo’,’ ka dau. ¹⁵ Om ruhuk oku noddi di nuluhon do poingigit ku i duwo o kaping do watu do pinotulisan di tumpongo. Om molob-ngolob poo o tapui do hiri’d nuluhon. ¹⁶ Om kokito ku no do notolibambanan no dokoyu i ponuhuan di pinatahak do TUHAN, i Kinorohingan dokoyu, dot id dokoyu om nokowonsoi kou’d dusa dot id TUHAN, tu’ minomonsoi kou i’ do tingolig di tamas do winonsoi di pinoiyo-iyo do sapi’. ¹⁷ Om tontok noddi do pinodumpau ku i duwo o kaping do watu’ddi dot id toguang dokoyu do gisom do nomumuk. ¹⁸ Om ongoi oku poddi kawagu otud dot id toguang do TUHAN do hiri’d timpak di nuluhon diri dot apat nohopod o tadau om apat nohopod o totuong do koloido’ dot a’ minakan om a’ mininum. Winonsoi ku pogi’ o miagal diri nga’ minomonsoi kou i’ do dusa dot id toguang do TUHAN om pinopotogod kou dau. ¹⁹ Moddosi oku no kopio di kototogod do TUHAN dit a’ ogina-gina’ tu’ gisom do patayon kou daa’ddi dau. Nga’ pinokinongou oku po kawagu do TUHAN. ²⁰ A’ no daa ogina-gina’ o kotogodo’ do TUHAN di Harun do gisom do patayon no daa do TUHAN i Harun. Om iri no o kinasambayangan ku do bagi’ di Harun do tontok diri. ²¹ Om ngoyo’ ku no i winonsoi dokoyu di miagal-agal do sapi’ddi, i tamas do winonsoi, om pataamo’ ku no iri do hiri’d tapui. Om mumuko’ ku noddi om tutuo’ ku no do gisom do noutok dot iyo po di pupuk, om pataamo’ ku nogiddi do hiri’d palu di lumuyung do mantad hiri’d nuluhon. ²² Tontok di hilo’ kou id Tabira, om hilo’d Masa om hilo’d Kibrot Taawa, om pinotogod i’ dokoyu o TUHAN, i Kinorohingan dokoyu. ²³ Om tontok di sinuhu’ kou dau do mamanau do mantad hilo’d Kadis Barnia do mongoi panganu di tana’ do patahakon dau dot id dokoyu, om diri nga’ suminongkiwal kou i’ di pinonuhuan dau. A’ kou minogondos dau om a’ kou minumboyo’ di pinoboros dau. ²⁴ Mantad poddi nokotutun oku i’ dokoyu om a’ kou no impiro-piro saap do TUHAN. ²⁵ Om otud oku noddi dot id toguang do TUHAN do solinaid dot apat nohopod o tadau om apat nohopod o totuong, tu’ oilaan ku no kopio dot iso-iso’ no o ginawo dau do mamatai daa dokoyu. ²⁶ Om sambayang oku noddi dot id dau do poingkaa, ’Oi TUHAN it Asawat Kopio, kada’ patayo’ iti tulun nu, i tulun nu di pinasi nu om i pinosoliwan nu do mantad hilo’d Masir, dot i kinoris om i sinundu nu dot agayo o pinoposoliwan. ²⁷ Hondomo’ no i susuhuon nu, i Abraham, om i Isak, om i Yakub, om kada’ ontong dilo kokodoho’ do ginawo, om kangaraato’ om dusa do tulun diti. ²⁸ Tu’ ondung patayon nu iti tongoulun diti om haro nondo o pounayan di tulun do Masir do mimboros dot a’ ko nokogoos do pinoporikot dilo tulun nu do hilo’d tana’ di pinabatos nu dot id diyolo’. Momoros nondo iyolo’ do kinoposoliwanan nu nopo di tulun nu om pokoyoon nu do hilo’d tana’ do kowotuan, om apatai nu indo iyolo’ tu’ araatan ko i’ diyolo’. ²⁹ Nga’ soroho’ no, dot okon toi ko’ iti nogi’ i tulun di pinili’ nu do silihon nu do tulun nu om i pinosoliwan nu do mantad hilo’d Masir, dot i sinundu nu om i kinoris nu dot agayo o pinoposoliwan?’ kangku,’’ ka di Musa.

¹ Om boros ka kawagu di Musa, ’’Om boros kaddi do TUHAN dot id doho’, ’Ongoi no pomonsoi do duwo o kaping do watu do sangkapon do manganu om wonsoyon i’ do miagal dit id gulu, om momonsoi nod kaban do poiyanan diri. Om mongoi nogindo rapou doho’ do hilo’d timpak dilo nuluhon. ² Om tulisan ku nogindo o hiri’d duwo o kaping do watu’ddi do miagal di pinotulis ku dot id watu di binabak nu. Om otulisan pondo om mositi’ no do poopion dot id suang di kaban,’ ka dau. ³ Om pomonsoi oku noddi dot iso’ o kaban, do kayu di roitan dot akasia o winonsoi ku, om pomonsoi oku do duwo o kaping do watu do miagal dit id gulu, om igitai ku nori do hiri’d timpak di nuluhon. ⁴ Om tulisai noddi do TUHAN i duwo o kaping do watu’ddi do miagal di boros do pinotulis dau di tinsan i’, iri no i Hopod ot Oturan di pinatahak dau dot id dokoyu do tontok di norongou dokoyu iyau do minoro-boros do mantad hiri’d tapui do tontok di songintimung kou do hiri’d guas di nuluhon. Om patahako’ no do TUHAN dot id doho’ i watu’ddi. ⁵ Om ruhuk oku noddi di nuluhon. Om iri no duwo o kaping do watu om pinoopi’ ku do hiri’d suang di kaban di winonsoi ku do miagal di pinonuhuan do TUHAN dot id doho’, om hiri noddi kasai’ i watu’ddi do gisom do baino’,’’ ka di Musa. ⁶ (Om pamanau no i tulun dot Israil do mantad hiri’d torobong do tulun do Yaakan om pakayaai no diyolo’ do hilo’d Mosira. Om hilo’ nod Mosira o kinapatayon om pinamalabangan di Harun. Om iri noddi i tanak dau, i Iliasar, o suminowoli dau do suminiliu dot imam. ⁷ Om mantad nod hilo’ om pakayaai no diyolo’ do hilo’d Gudgod om hilo’d Yotbata, i tana’ dot osima’ do waig. ⁸ Om hiri nod timpak di nuluhon diri do pinotobilang do TUHAN o piro-piro o tongokusai do mantad id payat do Liwi do momogompi’ di Kaban do Tumpongo, om sumiliu dot imam do momonsoi’d karaja dau, om popoboros do barakat dot id suang do ngaran do TUHAN. Gisom piya do baino’ nga’ iri kasai’ po o karaja’ di tulun do Liwi. ⁹ Iri no ot a’ kinoonuan di payat do Liwi do bahagi’ do tana’ do maan do tungkusan do miagal di payat do suwai, tu’ naanu nopo diyolo’ do ponokotungkusan om i kinosilihan diyolo’ dot imam do mogobi-obi’d TUHAN, i kaanu do bahagi’ di porsombahan do patahakon dot id TUHAN, do miagal di pinabatos do TUHAN, i Kinorohingan dokoyu.) ¹⁰ Minundorong oku do hiri’d timpak di nuluhon do solinaid dot apat nohopod o tadau om apat nohopod o totuong do miagal di winonsoi ku di koinsan i’. Om pinokinongou oku i’ kawagu do TUHAN om nakaakun iyau dot a’ mamatai dokoyu. ¹¹ Om suhuo’ oku noddi dau do mongoi pomoyo’ dokoyu, om aanu i’ dokoyu i pomogunan do nakabatos dau do patahakon dot id komolohingan dokoyu,’’ ka di Musa. ¹² Om boros ka kawagu di Musa, ’’Om dinondo no, oi tulun dot Israil, om pokinongou kou no diti pokionuon do TUHAN, i Kinorohingan dokoyu, do mantad id dokoyu: Sambayang kou no dot id TUHAN, i Kinorohingan dokoyu, om wonsoyon ngai’ no dokoyu i ponuhuan dau. Kosianai kou no dau, om sumambayang kou no dot id dau do mikuwo’d aayi-ayi’ o ginawo om pomusorou dokoyu. ¹³ Om tumorodok kou no do tumanud do koinsanai di ponuhuan dau. Om patahakon ku dokoyu iti do tadau baino’ do maan do koinsanangan dokoyu. ¹⁴ Ilo’ piya tawan dit asawat kopio nga’ TUHAN i’ o sanganu. Om iti tana’, om koinsanai di hiti nga’ iyau nogi’ o sanganu. ¹⁵ Nga’ agayo i’ kopio o kosianan do TUHAN di komolohingan dokoyu gisom do pinili’ kou dau do mantad id pogialatan do koinsanai’d bansa’. Om iyokoyu kasai’ po o tulun di nopili’ dau. ¹⁶ Iyo nopoddi, om mantad do baino’, om mositi’ no do tumorodok kou dot id TUHAN, om kada’ kou nondo kokodou o ginawo. ¹⁷ Tu’ TUHAN nopo, i Kinorohingan dokoyu om id sawat i’ ko’ mantad do toinsanan o ponokokinorohingan om agayo o kuasa’ dau ko’ mantad do koinsanai’d kuasa’d suwai. Iyau nopo om Kinorohingan dit agayo om okoris, om apatut no do mumboyo’ ngai’ dau. Iyau nopo om a’ i’ manampaping om a’ rumamit do ponisip. ¹⁸ Om antaan-taan i’ kopio dau, om otulid indo o wonsoyon dot id tangaanak dit aiso’ o molohing om id tongoondu’ di nopuadan. Om osianan i’ iyau di tulun do bansa’d suwai di poinsugku’ do tulun toko’ do momogun-mogun, tu’ onuan i’ dau iyolo’ do taakanon om pakayan. ¹⁹ Iyo nopoddi om pointalango’ no dokoyu o kosianan dokoyu dot id tulun do sompogunan diri tu’ iyokoyu nga’ sompogunan i’ do hilo’d Masir di gulu po. ²⁰ Umboyo’ kou nod boros do TUHAN, i Kinorohingan dokoyu, om sumambayang kou no dot id dau, om id dau noo. Kotorodok kou no dot id dau. Om mamatos kou nopo do mikuwo’d sumpa’ om mositi’ no dot id suang no do ngaran dau. ²¹ Royohon no iyau, tu’ iyau noo o Kinorohingan dokoyu, om nokito no dokoyu o koinsanai di nongowonsoi dau dot id dokoyu di kongopusahan kopio. ²² Tontok di minongoi do hilo’d Masir i taki-aki dokoyu di gulu po om turu’ no iyolo’ nohopod o tulun do koinsanai. Nga’ baino’ noddi om pinoinggumu’ kou do TUHAN, i Kinorohingan dokoyu do miagal dilo rombituon do hilo’d tawan kogumu’,’’ ka di Musa.

¹ Om boros ka kawagu di Musa, ’’Kosianai kou nod TUHAN, i Kinorohingan dokoyu, om tumorodok kasai’ kou no do tumanud do koinsanai dit oturan dau. ² Sorohon no dokoyu do tadau’d baino’ i nongoilaan dokoyu do pasal do TUHAN do mantad id nongopurimanan dokoyu. Tu’ iyokoyu no kopio i nokopuriman diri om okon i’ ko’ i tangaanak dokoyu. Nokito no dokoyu i kogoyoo’ do TUHAN om i kokoriso’ dau om i sinundu dau, ³ om i kongopusahan do winonsoi dau. Om nokito dokoyu i winonsoi dau dot id raja’ do Masir om id pointongkop do pomogunan do raja’ddi. ⁴ Nokito nogi’ dokoyu ondung poingkuro o TUHAN do minomunso di soudor do Masir do mogitonggoi-tonggoi di kuda’ om i korita’-kuda’ diyolo’, tu’ linondod dau iyolo’ do hilo’d Rahat dot Aragang do tontok di minomogusa’ daa iyolo’ dokoyu. ⁵ Om noilaan dokoyu i winonsoi do TUHAN dot id dokoyu di hilo’ kou pod tana’ do kowotuan, dit a’ kou po nokorikot do hiti. ⁶ Om ahandaman i’ dokoyu i winonsoi do TUHAN dot id di Datan om id di Abiram, i tangaanak di Iliab, i mantad id payat do Rubin. Tu’ iyolo’ nopo sanganak-anak om tinolon do tana’ di minipitas, do mogitonggoi-tonggoi di kiim diyolo’ om i susuhuon diyolo’ om i tayam-tayam diyolo’. ⁷ Iyokoyu no kopio o nokokito do koinsanai di nongosiliu di koimayaan kopio do winonsoi’d TUHAN,’’ ka di Musa. ⁸ Om boros ka kawagu di Musa, ’’Tumorodok kou no do mumboyo’ do koinsanai di ponuhuan di pinoboros ku dokoyu di tadau baino’. Om kosoborong kou indo di bawang om kosuang kou di pomogunan dit oruhai no dokoyu’d oiyon. ⁹ Om alaid kou indo do momogun-mogun do hilo’d pomogunan di kaya’ om it oluhub o tana’, i pinabatos mantad do TUHAN do patahakon dot id komolohingan dokoyu om id sinakagon diyolo’. ¹⁰ Ilo’ nopo tana’ di rikoton dokoyu do maan dokoyu’d pomogun-mogunan om a’ i’ miagal di pomogunan do Masir, i hilo’d kinoundorongon dokoyu di gulu po. Hilo’ nopod Masir om soira’ nopo do mananom kou do gandum om ohuyan kou po do momuwaig di tana’. ¹¹ Nga’ ilo’ nopo tana’ dot ongoyon dokoyu pomogun-mogunai om tana’ do konuluhanan om rantai, i tana’ dit opiyopos kasai’ do rasam. ¹² TUHAN i’, i Kinorohingan dokoyu o migompi’ do tana’ddi do tikoompus do toun. ¹³ Iyo nopoddi, om tumorodok kou no do tumanud di ponuhuan di pinoboros ku dokoyu di tadau baino’. Kosianai kou no do TUHAN, i Kinorohingan dokoyu om sumambayang kou no dot id dau do mikuwo’d aayi-ayi’ o ginawo om pomusorou dokoyu. ¹⁴ Ondung momonsoi kou do miagal diri om pasandatan indo do TUHAN do rasam i tana’ dokoyu do tontok di kararasaman, do tontok di dongkaamatan dokoyu, om tontok di tumimpuun kou’d mananom. Om haro indo o gandum, om waig dot anggur, om tumau do saitun dokoyu. ¹⁵ Om haro o sakot do kanon di tayam-tayam dokoyu. Om haro ngai’ nopo dot id dokoyu i taakanon di korohian dokoyu. ¹⁶ Kada’ kou nogi’ kapalid do gisom do tumolikud kou’d TUHAN, om tumuku’ kou nondo om modsubak kou do ponokokinorohingan do suwai. ¹⁷ Ondung momonsoi kou do miagal diri om otogod nondo o TUHAN dokoyu. Om a’ nondo dau parasamon, om tana’ nopondo dokoyu om adalaan no kotuu gisom dot a’ no sumuni o totonomon. Om a’ pondo alaid om angapatai kou nod hilo’ do mulong piya daa do tana’ iri dot osonong, i tana’ do patahakon do TUHAN dot id dokoyu. ¹⁸ Soro-sorohon no kasai’ dokoyu iti ponuhuan diti, om podulon no kopio dokoyu. Om pokogoson noti dot id longon dokoyu om pokogoson do ponong id turos dokoyu om ahandaman indo dokoyu. ¹⁹ Om potudukon noti ponuhuan diti dot id tangaanak dokoyu. Piguli-gulian no dokoyu do monusui o ponuhuan diti do tontok do poundorong kou do hilo’d walai, om di maso dokoyu dot id kinoiyonon do suwai, om di maso dokoyu do poundorong om di maso dokoyu do kumaraja’. ²⁰ Potulison noti ponuhuan diti do hiri’d torigi di wawayaan do walai om id torigi di wawayaan do tansar do walai dokoyu. ²¹ Om alaid kou indo di tangaanak dokoyu do momogun-mogun do hilo’d tana’ di pinabatos do TUHAN, i Kinorohingan dokoyu dot id komolohingan dokoyu. Om hilo’ kou nondo do momogun-mogun do solinaid po do hino ilo tawan dot id sawat diti tana’. ²² Tumorodok kou no do tumanud do koinsanai dit oturan di pinatahak ku dokoyu: Kosianai no do TUHAN, i Kinorohingan dokoyu, om wonsoyon ngai’ no dokoyu i pinonuhuan dau, om tumorodok kou no dot id dau. ²³ Om uyungon indo dau o koinsanai di bansa’d suwai do tontok do ngoyon dokoyu iyolo’ songodo’, om kopomogun kou i’ do hilo’d tana’ di piro-piro o bansa’d tulun dit angagayo om ongokoris ko’ iyokoyu. ²⁴ Om oinsanan nopondo i tana’ dit oulakan dokoyu dot asanganu dokoyu. Kogisomon nopondo do tana’ dot aanu dokoyu om mantad hilo’d tana’ do kowotuan di ponong id salatan om gisom do korikot do hilo’d Konuluhanan do Libanon do ponong id utara, om mantad hilo’d Bawang dot Iprat do ponong id koulayon om gisom do korikot do hilo’d Rahat do Tanga’ do ponong id kotonobon. ²⁵ Aiso’ nondo o songulun piya do kasaap dokoyu. Tu’ hinonggo nopo o ngoyon dokoyu dot id pomogunan diri, om TUHAN no, i Kinorohingan dokoyu o momorolosi ngai’ di tulun do gisom do moddosi iyolo’ dokoyu do miagal di pinabatos mantad do TUHAN. ²⁶ Tadau nopod baino’ om pologoson ku nopo iyokoyu do momili’ ondung barakat o pilion dokoyu ko’ iri po i kousungan — ²⁷ barakat nopo o pilion dokoyu om tumorodok kou no do tumanud di ponuhuan do TUHAN, i Kinorohingan dokoyu, i pinoboros ku dokoyu di tadau baino’. ²⁸ Nga’ kousungan no ot aanu dokoyu ondung a’ kou no otorodok do tumanud di ponuhuan diri, om sumansala’ kou no di ponuhuan, om tumolikud kou nogindo doho’ do mongoi sambayang dot id ponokokinorohingan do suwai dit a’ dokoyu insan tukuo’ do sumambayang. ²⁹ Soira’ nopondo do porikoton kou do TUHAN do hilo’d pomogunan di ngoyon dokoyu pomogun-mogunai, om poboroson no i barakat do mantad hiri’d timpak di Nuluhon do Gorisim om iri no i kousungan om poboroson do mantad hiri’d timpak di Nuluhon dot Ibal. ³⁰ (Iti nopo duwo o nuluhon diti om hilo’ goduwo id sampaping ponong id kotonobon do mantad id Bawang do Yordan, i hilo’d watas do tulun do Kanaan di poingiyon do hilo’d Rantai do Yordan. Niyonon nopo diyolo’ om ponong id kotonobon om a’ i’ osodu’ no do mantad di koguasan do kayu di tiiyonon do sumambayang do hilo’d Mori, it id somok di bandar do Gilgal.) ³¹ Oruhai kou no do sumoborong di Bawang do Yordan do mongoi pomogun-mogun do hilo’d tana’ di patahakon do TUHAN, i Kinorohingan dokoyu, dot id dokoyu. Om soira’ nopondo dot osolod dokoyu i tana’ddi om di kopomogun kou’d hilo’, ³² om tonudon no kopio dokoyu o koinsanai dit oturan di pinatahak ku dokoyu di tadau baino’,’’ ka di Musa.

¹ Om boros ka kawagu di Musa, ’’Pokinongoho’ ngai’ no dokoyu o koinsanai diti toturan dit apatut dokoyu do tonudon do solinaid dokoyu do momogun-mogun do hilo’d tana’ di patahakon do TUHAN, i Kinorohingan di tukuon di komolohingan dokoyu, dot id dokoyu. ² Korikot kou nopondo do hilo’d pomogunan diri om raagon ngai’ no dokoyu i tiyonon do tulun do modsubak di ponokokinorohingan diyolo’ di hilo’d konuluhanan dot akawas, om hiri’d konulu-nuluan, om it id sahau do koguasan do kayu dit ongokohob o tuntu. ³ Huyason ngai’ no dokoyu i pananaraban do podsubak do tingolig diyolo’, om babakon no i torigi’d watu di pokolidangon diyolo’ di pinoodsuk diyolo’. Om sorobon ngai’ no dokoyu i ponokokinorohingan diyolo’, i roitan dot Asira, om mumukon ngai’ no i tininganak diyolo’, om a’ indo osubak kawagu i ponokokinorohingan diri dot id kinoiyonon diri. ⁴ Kada’ kou sambayang dot id TUHAN, i Kinorohingan dokoyu do miagal do kowoyo-woyoo’ do tulun diri do sumambayang dot id ponokokinorohingan diyolo’. ⁵ Mantad nopo do koinsanai di watas do pomogunan di payat dot Israil om pilion indo do TUHAN o tiso’ o koiyonon do tulun toko’ do sumambayang dot id TUHAN. ⁶ Om hilo’ kou nondo do papatahak do porsombahan di sorobon om i porsombahan do suwai di sumbolion, om i porsombahan dokoyu di sompihopod, om i porsombahan dokoyu do suwai om i porsombahan dokoyu do pamayaan di batos dokoyu do mikuwo’d sumpa’ dot id TUHAN, om i porsombahan do patahakon do tumanud do kagaanan do ginawo, om i tanak do sapi’ om dumba’ om kambing dokoyu dit id gulu kosusu. ⁷ Hilo’ nod toguang do TUHAN, i Kinorohingan dokoyu do kanon dokoyu om i sompiiyon dokoyu o koinsanai di hasil do karaja’ dokoyu do mikuwo’d otood o ginawo tu’ binarakatan i’ iri do TUHAN. ⁸ Om soira’ nopondo dot orikot o maso’ddi om kada’ kou no pomonsoi do miagal diti wonsoyon dokoyu do dinondo. Tu’ gisom piya do baino’ nga’ maso po dokoyu do sumambayang do tumanud do kowoyo-woyoo’ di korohian dokoyu. ⁹ Tu’ a’ kou po nokorikot do hilo’d tana’ di patahakon do TUHAN, i Kinorohingan dokoyu, dot id dokoyu, i kinoiyonon dot aiso’ o koligagaanan do momogun-mogun. ¹⁰ Om soira’ nopondo do kosoborong kou di Bawang do Yordan, om pologoson kou indo do TUHAN do kasanganu om kopomogun-mogun do hiri’d pomogunan diri. Om iyau no o mongintirung dokoyu do mantad id koinsanai do pisangod dokoyu om osimbayan kou indo do momogun-mogun do hiri om aiso’ o koligagaanan dokoyu. ¹¹ Momili’ indo o TUHAN do tiso’ o tiyonon do sumambayang dot id dau. Om mositi’ no do pootodon dokoyu do hilo’ o koinsanai di pinonuhuan ku dokoyu: i porsombahan dokoyu di sorobon, om i porsombahan do suwai di sumbolion, om porsombahan dokoyu do sompihopod om i porsombahan dokoyu’d suwai, om i porsombahan di pinotobilang dokoyu, i nakabatos dokoyu do patahakon dot id TUHAN. ¹² Kumotood kou no dot id toguang dau do hiri’d kinoiyonon diri do mogiwoyo-woyo’ di tangaanak dokoyu, om i susuhuon dokoyu, om i tulun do Liwi di poingiyon dot id kabandaran dokoyu; hondomon no dokoyu dot iri nopo tulun do Liwi om aiso’ i’ o tana’ do diyolo’ kopio’d songonuon. ¹³ Kada’ dokoyu patahako’ i porsombahan dokoyu do hinonggo nopo o kinoiyonon di pilion dokoyu. ¹⁴ Mositi’ no do patahakon dokoyu iri dot id kinoiyonon di tontuon do TUHAN, dot id watas do tiso’ di payat dokoyu. Hilo’ noo o patahakan dokoyu di porsombahan di sorobon om hilo’ o tiyonon dokoyu do momonsoi do koinsanai di pinonuhuan ku dokoyu. ¹⁵ Nga’ koino-ino kou i’ do monumbali’ om mangakan di tayam-tayam dokoyu do hinonggo nopo o kinoiyonon dokoyu. Om mangakan kou nopo do songkuro nopo o kogumuon do tumanud di patahakon do TUHAN dot id dokoyu. Oinsanan kou nopo, dot it olidang ko’ it a’ olidang dot id pagantangan do tugama’ do koino-ino do mangakan diri do miagal nod mangakan kou do tonsi do paus om tambang. ¹⁶ Nga’ kada’ no kopio dokoyu kano’ i raha’ di tayam-tayam diri. Paawason no dokoyu iri do hiri’d tana’ do miagal do waig. ¹⁷ Kada’ dokoyu kano’ o nunu nopo di patahakon dokoyu dot id TUHAN, dot id kinoiyonon dokoyu: dot iri po tuu i porsombahan do sompihopod di gandum dokoyu ko’ i waig dot anggur, ko’ i tumau do saitun, ko’ iri po tanak do sapi’ om dumba’ dokoyu dit id gulu kosusu, ko’ i porsombahan do pamayaan di nakabatos dokoyu do mikuwo’d sumpa’ dot id TUHAN, ko’ i porsombahan dokoyu do tumanud do kagaanan do ginawo — om nunu nopo o porsombahan do suwai. ¹⁸ Pangakanan nopo dokoyu’ddi om hiri nod kinoiyonon do sumambayang di tontuon do TUHAN, i Kinorohingan dokoyu. Mangakan nopoddi om iyokoyu om i tangaanak dokoyu, om i susuhuon dokoyu om i tulun do Liwi di poingiyon dot id kabandaran dokoyu. Om kumotood ngai’ kou no do hiri kou id kinoiyonon diri dot i nongowonsoi dokoyu o kataadan. ¹⁹ Om soro-sorohon dokoyu dot a’ mangada-ada’ di tulun do Liwi do solinaid dokoyu do poingiyon dot id pomogunan diri. ²⁰ Soira’ nopondo do poinggoyoon do TUHAN, i Kinorohingan dokoyu i watas dokoyu, do miagal di nakabatos mantad dau om koino-ino kou no do mangakan do daging do soira-ira’ nopo do tumanud do korohian dokoyu. ²¹ Ondung adalaan kosodu’ i kinoiyonon di tinantu’ do tiyonon do sumambayang, om koino-ino kou i’ do monumbali’ do sapi’ om dumba’ ko’ kambing di nakatahak do TUHAN dot id dokoyu do honggo nopo o kinoiyonon do soira-ira’ nopo dot orohian kou. Om koino-ino kou i’ do mangakan di daging diri dot id walai dokoyu do miagal di nokosunud ku dokoyu. ²² Isai nopo o tulun, dot olidang tuu ko’ amu’ dot id pagantangan do tugama’ nga’ koino-ino i’ do mangakan do daging diri do miagal di mangakan iyau do daging do paus om tambang. ²³ Nga’ kada’ kou po pangakan do tonsi dit a’ nakaawas o raha’ tu’ tiyonon nopod ginawo om hiri’d raha’, om a’ kou i’ koino-ino do mangakan do ginawo do mitonggoi di tonsi. ²⁴ Kada’ dokoyu kano’ i raha’; suwai ko’ paawason no dokoyu iri do hilo’d tana’ do miagal di waig. ²⁵ Ondung tonudon dokoyu o ponuhuan diti, om asanangan indo o TUHAN om ongosonong-sonong ngai’ kou om osimbayan kou om i sinakagon dokoyu. ²⁶ Igitan ngai’ no dokoyu do hiri’d kinoiyonon di tinantu’ dot iyonon do sumambayang i porsombahan dokoyu om i porsombahan di nakabatos dokoyu do patahakon dot id TUHAN. ²⁷ Iri nopo porsombahan di sorobon om i porsombahan di kanon o tonsi om mositi’ no do patahakon do maan do porsombahan do hiri’d sakai di pananaraban do porsombahan dot id TUHAN, om potuntugon i raha’ di maan do porsombahan diri do hiri’d sakai di pananaraban do porsombahan. ²⁸ Umboyoon no kopio dokoyu o koinsanai di pinonuhuan ku dokoyu om kopomonsoi kou i’ dit osonong om i korohian do TUHAN i Kinorohingan dokoyu, om osonong-sonong kou indo di sinakagon dokoyu, om osimbayan kou do gisom do poingompus,’’ ka di Musa. ²⁹ Om boros ka kawagu di Musa, ’’Rumikot kou nopondo dot id pomogunan diri, om patayon indo do TUHAN i Kinorohingan dokoyu i piro-piro o bansa’d tulun di poingiyon do hilo’, gisom dot osolod nondo dokoyu om opomogun-mogunan dokoyu i pomogunan diri. ³⁰ Om angapatai ngai’ nopondo i bansa’ do tulun diri, om antaan-taan no kopio dokoyu. Kada’ kou nogi’ kopio omit diyolo’ do tumuku’ dot id ponokokinorohingan do suwai tu’ iri nopo wonsoyon do miagal diri om porikot nod kosusaan. ³¹ Kada’ kou sambayang dot id TUHAN, i Kinorohingan dokoyu, dot iyo di kowoyo-woyoo’ diyolo’ do tumuku’ dot id ponokokinorohingan diyolo’ o kowoyo-woyoo’. Tu’ tontok nopo di tumuku’ iyolo’ dot id ponokokinorohingan diyolo’ om mingwonsoi iyolo’ dit angaraat kopio, i karaatan do TUHAN. Om iri piya tangaanak diyolo’ nga’ sorobon i’ diyolo’ do hiri’d pananaraban do porsombahan diyolo’ do maan do porsombahan di sinumbali’ dot id ponokokinorohingan diyolo’. ³² Wonsoyon ngai’ no dokoyu i pinonuhuan ku dokoyu; om kada’ dokoyu ruhangai i pinonuhuan diri, om kada’ dokoyu ingkuriai,’’ ka di Musa.

¹ Om boros ka kawagu di Musa, ’’Haro i’ doti’ndo o nabi ko’ i tulun di popoilo do komoyon do nipi do mamatos do haro o kopusahan om koimayaan ² do maan do pamalid dokoyu, gisom do tumuku’ kou nondo om modsubak kou do ponokokinorohingan dit a’ dokoyu notutunan do mantad di gulu. Om mulong piya dot abayaan i pinabatos di tulun diri, ³ nga’ kada’ kou pokinongou dau. Tu’ pakayon i’ do TUHAN, i Kinorohingan dokoyu i tulun diri do pogumbal dokoyu, do pongilo ondung osianan kou’d TUHAN do mikuwo’d aayi-ayi’ kopio o ginawo dokoyu ko’ amu’. ⁴ - ⁵ Patayon no dokoyu o tulun di poposunud do komoyon do nipi om i nabi di monuhu’ dokoyu do sumaap do TUHAN, i pinoposoliwan dokoyu do mantad hilo’d Masir, i pomogunan di minonguripon dokoyu di gulu po. Tulun nopo do miagal diri om araat no kopio tu’ mumbal do potongkiad dokoyu do mantad id kowoyo-woyoo’ di pinonuhuan do TUHAN dokoyu do tumanud. Om mositi’ no do patayon o tulun diri, om oidu’ i’ do mantad id dokoyu o karaaton diri. Nga’ iyokoyu nopo om tumanud kou nod TUHAN om pusohon no dokoyu iyau; umboyo’ kou no do boros dau om tonudon no i ponuhuan dau; sumambayang kou no dot id dau om tumorodok dot id dau. ⁶ - ⁷ Om iri piya doti’ i tobpinai dokoyu’d kusai ko’ i tanak dokoyu’d kusai ko’ i tanak dokoyu’d tondu’ ko’ i sawo dokoyu di kosianan dokoyu ko’ i tambalut kopio dokoyu nga’ momolisok-lisok i’ do mongodsuur dokoyu do tumuku’ dot id ponokokinorohingan do suwai, it a’ dokoyu om a’ di taki-aki dokoyu notutunan do mantad di gulu po, om i ponokokinorohingan do tulun di poingiyon dot id somok dokoyu ko’ iri po i ponokokinorohingan do tulun di poingiyon do hilo’d sodu’. ⁸ Nga’ kada’ iyau pologoso’ do mononsog dokoyu; kada’ kou pokinongou dau. Kada’ dokoyu iyau insianai om kada’ kou kolisiu dau, om kada’ dokoyu intirungai iyau. ⁹ Patayon nopo kopio dokoyu iyau! Om mogulu kou no do momodumpau dau’d watu om pologoson nogindo ngai’ o tulun do suwai do momodumpau dau’d watu do gisom dot apatai iyau. ¹⁰ Dumpahon no iyau do watu do gisom dot apatai! Tu’ mumbal daa iyau do popotongkiad dokoyu do mantad id TUHAN, i Kinorohingan dokoyu, i pinoposoliwan dokoyu do mantad hilo’d Masir, i pomogunan di minonguripon dokoyu di gulu po. ¹¹ Om korongou ngai’ indo o tulun dot Israil di nosiliu do miagal diri; om moddosi nondo iyolo’ om aiso’ nondo o tiso’d tulun do momonsoi dot iyo kopio’ddi karaat. ¹² Soira’ nopondo do poingiyon kou dot id kabandaran di patahakon do TUHAN, i Kinorohingan dokoyu, dot id dokoyu, om korongou kou dotindo ¹³ do haro o piro-piro o tulun dot araat do mantad id bansa’ dokoyu do minamalid di tulun do hiri’d bandar diyolo’ gisom do tumuku’ diri iyolo’ dot id kinorohingan dit a’ dokoyu notutunan do gulu. ¹⁴ Ondung korongou kou do habar do miagal diri, om sorisidon no kopio dokoyu do mongilo iri; om ondung otopot do nosiliu o miagal kopio’ddi karaat ¹⁵ om patayon ngai’ nopo dokoyu i tulun dot id bandar diri, om patayon ngai’ nogi’ i tayam-tayam diyolo’. Om raagon nopo kopio i bandar. ¹⁶ Timungon ngai’ nopo i dapu’ di tulun di poingiyon do hiri om potimungon do hiri’d padang dit id suang di bandar do maan do porsombahan dot id TUHAN, i Kinorohingan dokoyu. Om pologoson nopo do poingraag i bandar diri do gisom dot alaid om a’ no koino-ino do wonsoyon kawagu. ¹⁷ Kada’ kou panganu do nunu nopo i natantu’ do raagon, om a’ indo o TUHAN otogod dokoyu om insianan kou dau. Insianan kou indo dau om silihon kou do tulun dit asapou do miagal di pinabatos dau dot id taki-aki dokoyu, ¹⁸ ondung tonudon ngai’ no dokoyu i ponuhuan dau di pinosunud ku dot id dokoyu di tadau baino’, om wonsoyon ngai’ no dokoyu i ponuhuan dau’ddi,’’ ka di Musa.

¹ Om boros ka kawagu di Musa, ’’Iyokoyu no o tulun di songonuon do TUHAN, i Kinorohingan dokoyu. Om soira’ nopo do mogihad kou di tulun do napatai, om kada’ dokoyu pinsuhato’ o tinan dokoyu om kada’ dokoyu bugaro’ o tobuk dit id bangku’ do tulu dokoyu, do miagal di wonsoyon do tulun di bansa’d suwai. ² Iyokoyu nopo om songonuon do TUHAN, i Kinorohingan dokoyu, om nopili’ kou no dau do silihon do tulun dau dot id pogialatan do koinsanai’d bansa’ do hiti’d pomogunan,’’ ka dau. ³ Om boros ka kawagu di Musa, ’’Kada’ kou pangakan do nunu nopo o nintorusan di nokoboros do TUHAN do sosomu’. ⁴ Koino-ino kou i’ do mangakan do nintorusan diti: sapi’, dumba’, kambing, ⁵ paus, dumba’ di hilo’d gouton, kambing di hilo’d gouton, om tambang — ⁶ nunu nopo o nintorusan di nopilapak o sondulu om manapa’ di kanon dau. ⁷ Nga’ kada’ kou pangakan do nunu nopo o nintorusan dit a’ nopilapak o sondulu om it a’ manapa’ di kanon dau. Kada’ kou pangakan dot unta, om i tikus balanda’ om i landak. Iti nopo om nintorusan di sosomu’; tu’ manapa’ piya daa iri di kanon diyolo’ nga’ a’ i’ nopilapak o sondulu. ⁸ Kada’ kou pangakan do wogok. Tu’ iti nopo om nintorusan di sosomu’; tu’ nopilapak i’ daa o sondulu nga’ a’ i’ manapa’ dit akanon dau. Kada’ kou pangakan do tonsi do wogok om kada’ kou ongoi kama’ do wogok di napatai. ⁹ Koino-ino kou i’ do mangakan do nunu nopo o sada’ di kisorod om kisisi’, ¹⁰ nga’ nunu nopo i poingiyon do hilo’d waig dit aiso’ o sorod om aiso’ o sisi’ om a’ no koino-ino do kanon. Tu’ iri nopo om mositi’ no do pokososomuon. ¹¹ Koino-ino kou i’ do mangakan do nunu nopo o tombolog dot a’ sosomu’. ¹² - ¹⁸ Nga’ iti no ngai’ o bansa’ do tombolog dot a’ dokoyu koino-ino do kanon: kondiu, puok, simpupulu, kondiu baras om i suwai-suwai kokondiu, bangkahak, i tombolog di roitan do tombolog dot unta, putik rahat, luungon, montis om i tongotombolog do suwai di miagal do montis, tombolog di roitan dot undan om kasa, om gair. ¹⁹ Om koinsanai di sontulud-tulud dit ongokooro’; om sosomu’ ngai’ no, kada’ dokoyu kano’ iri. ²⁰ Nga’ koino-ino kou i’ do mangakan do nunu nopo i sontulud-tulud dit ongokooro’ dit a’ sosomu’. ²¹ Kada’ kou pangakan do nunu nopo o nintorusan dit apatai toomod dot aiso’ o minumang. Pologoson nopo i sompogunan di poirolot dokoyu do mangakan diri, ko’ pobolion dokoyu iri dot id sompogunan. Nga’ iyokoyu nopo om TUHAN i’ i Kinorohingan dokoyu o manansanganu; iyokoyu no o tulun di songonuon dau. Kada’ dokoyu onsoko’ o tanak do dumba’ ko’ tanak do sapi’ dot i gatas di molohing do tayam-tayam diri o pogonsok,’’ ka dau. ²² Om boros ka kawagu di Musa, ’’Potobilang kou no do porsombahan do sompihopod do mantad id toinsanan do hasil di tumo dokoyu do pointikid do toun. ²³ Om mongoi kou nogindo do hiri’d tiyonon do sumambayang di tinantu’ do TUHAN, i Kinorohingan dokoyu, do tiyonon do sumambayang dot id dau. Om hilo’ nondo, dot id toguang do TUHAN, do kanon dokoyu i porsombahan do sompihopod do mantad id gandum om waig dot anggur, om tumau do saitun, om i tanak do sapi’ om tanak do dumba’ dokoyu dit id gulu kosusu. Om wonsoyon no dokoyu o miagal diri om kopinsingilo kou i’ do momusou kasai’ do TUHAN, i Kinorohingan dokoyu. ²⁴ Ondung adalaan kosodu’ i tiyonon do sumambayang diri do mantad id walai dokoyu do paatadan dokoyu di sompihopod do mantad id hasil di pinabarakat do TUHAN dot id dokoyu, om wonsoyon no dokoyu o miagal diti. ²⁵ Pobolion no i hasil di naanu dokoyu’ddi om igitan no i tusin do hiri’d tiyonon do sumambayang di tinantu’ddi. ²⁶ Om pakayon nopo i tusin diri do pomoli do nunu nopo o korohian dokoyu — do tonsi tuu do sapi’, ko’ tanak do dumba’, ko’ waig dot anggur ko’ tiinumon di kaawuk — om hilo’ nondod kinoiyonon diri dot id toguang do TUHAN, i Kinorohingan dokoyu, o pangakanan dokoyu om i sompiiyon dokoyu do taakanon diri. Om rumamai kou nogindo do hiri. ²⁷ Kada’ dokoyu kada-kadaai i tulun do Liwi di poingiyon do hiri’d bandar dokoyu; tu’ aiso’ i’ o tana’ diyolo’ di diyolo’ kopio. ²⁸ Pointikid-tikid do kooyion do kotolu’d toun om mositi’ nod igitan ngai’ dokoyu i sompihopod do mantad id koinsanai di tua’ di totonomon dokoyu om poopion no do hiri’d kabandaran dokoyu. ²⁹ Iti nopo taakanon diti om patahakon dot id tulun do Liwi tu’ aiso’ i’ o tana’ diyolo’, om patahakon di sompogunan om i tangaanak dot aiso’ o molohing om i tongoondu’ do nopuadan di poingiyon dot id bandar dokoyu. Om koino-ino i’ iyolo’ do mongoi anu’ddi do gisom do kabagal diyolo’. Wonsoyon no dokoyu o miagal diti om barakatan kou indo do TUHAN, i Kinorohingan dokoyu do nunu nopo o wonsoyon dokoyu,’’ ka dau.

¹ Om boros ka kawagu di Musa, ’’Pointikid-tikid do kooyion do toun do koturu’, om mositi’ nod tonuson dokoyu i tutang do tulun di kiutang dot id dokoyu. ² Poingkaa o kowoyo-woyoo’ do mananus diri. Pointikid-tikid do tulun dot Israil di nokopoolos do tusin dot id sompi’ ko’ bansa’ dau om mositi’ no do tonuson nopo dau i tutang diri, om a’ no iyau koino-ino do mongoi pokibayar di tusin; tu’ tumanud nopo di nokoboros do TUHAN om natanus no i tutang diri. ³ Nga’ koino-ino kou i’ do mokibayar di tutang do tulun di bansa’d suwai dot id dokoyu, nga’ kada’ kou no kopio pokibayar do nunu nopo di noutang do bansa’ dokoyu dot id dokoyu. ⁴ Om barakatan kou indo do TUHAN, i Kinorohingan dokoyu do hilo’d pomogunan di patahakon dau dot id dokoyu. Aiso’ indo o tiso’d tulun di bansa’ dokoyu do mosikin ⁵ ondung wonsoyon ngai’ no dokoyu i pinonuhuan do TUHAN di pinoboros ku dokoyu di tadau baino’. ⁶ Om barakatan kou indo do TUHAN do miagal di nakabatos dau. Om kopoolos kou indo do tusin dot id ogumu’ o bansa’d tulun nga’ a’ kou indo iyokoyu minog do molos do mantad id isai nopo; om iyokoyu nondo o momorinta’ dot ogumu’ o bansa’d tulun, nga’ aiso’ indo o bansa’d tulun do momorinta’ dokoyu. ⁷ Ondung haro o tulun di sompi’ ko’ bansa’ dot Israil di haro o kosusaan do poingiyon do hinonggo nopo o bandar dot id pomogunan di patahakon do TUHAN, i Kinorohingan dokoyu, dot id dokoyu, om kada’ kou katamaha’ om kada’ kou kopogong do monulung dau. ⁸ Suwai ko’ kumopuhawang kou no om pooloson no iyau do gisom di kabagal dau. ⁹ Kada’ kou nogi’ dot a’ poolos dau do nunu nopo, do muhai-ruhai piya i toun do kopononusan do tutang. Kada’ pologoso’ do kosuang dot id pomusarahan dokoyu o pomusorou dot iyo kopio’ddi karaat. Ondung a’ kou poolos om momolohou indo do TUHAN o tulun diri do papasala’ dokoyu, om iyokoyu indo o pasalaon. ¹⁰ Momuhawang no do tulun diri do mikuwo’d osonong om osinggawa’ o ginawo, om barakatan kou i’ do TUHAN do nunu nopo o wonsoyon dokoyu. ¹¹ Haro kasai’ i’ o piro-piro o tulun dot Israil do mosikin om i haro o kokurangan, om iri no o koponuhuan ku dokoyu do kumopuhawang dot id diyolo’,’’ ka dau. ¹² Om boros ka kawagu di Musa, ’’Ondung haro o tulun do sompi’ ko’ bansa’ dot Israil, do kusai tuu ko’ tondu’, di papadagang do tinan dau dot id dokoyu do sumiliu do turipon dokoyu, om mositi’ no do poiduwon dokoyu iyau do kakaraja’ iyau dot id dokoyu do solinaid dot onom o toun. Om orikot nopondo i toun do koturu’, om poiduwon no kopio dokoyu iyau. ¹³ Soira’ nopo do poiduwon dokoyu i turipon diri, om kada’ nogi’ dokoyu suhuo’ do mamanau dot aiso’ kopio o tonggoi. ¹⁴ Kumopuhawang kou no do manahak dau do mantad id nunu nopo i nakabarakat do TUHAN dot id dokoyu, dot i dumba’ om i gandum om i waig dot anggur. ¹⁵ Sorohon no dokoyu dot iyokoyu nga’ turipon i’ do hilo’d Masir di gulu po om TUHAN i’, i Kinorohingan dokoyu o pinoposoliwan dokoyu; om iri no o kopomisunudan ku dokoyu diti ponuhuan diti. ¹⁶ Nga’ a’ i’ dotindo sitongkiad i turipon dokoyu’ddi, tu’ osianan i’ doti’ iyau dokoyu om i sompiiyon dokoyu, om orohian do mundorong do poinsugku’ dokoyu. ¹⁷ Iyo nopoddi om angatan no iyau do mongoi do hiri’d wawayaan do walai dokoyu om luangan no o tolingo dau. Om osiliu nondo iyau do turipon dokoyu do solinaid dau do poimpasi. Om iri turipon dokoyu do tondu’ nga’ iyoon iddi. ¹⁸ Kada’ kou kotogod do tontok do papalabus kou do turipon dokoyu, tu’ onom no o toun dau do pakaraja’ dot id dokoyu om songintanga’ noo do gadsi’ do susuhuon o pinamagadsi’ dokoyu dau. Wonsoyon no o miagal diri om barakatan kou i’ do TUHAN, i Kinorohingan dokoyu do nunu nopo o wonsoyon dokoyu,’’ ka dau. ¹⁹ Om boros ka kawagu di Musa, ’’Potobilangon no do maan do don TUHAN, i Kinorohingan dokoyu, o koinsanai’d tanak do sapi’ do tontoluhan om tanak do dumba’ do tontoluhan dit id gulu kosusu; kada’ dokoyu porobuato’ o sapi’ om kada’ dokoyu bugarai o dumba’ddi. ²⁰ Pointikid-tikid do toun om mositi’ no do kanon dokoyu om i sompiiyon dokoyu i tayam-tayam diri dot id toguang do TUHAN do hilo’d tiyonon do sumambayang di natantu’ mantad. ²¹ Nga’ ondung haro o bohiton do tinan di tayam-tayam diri, do kimpo’ tuu ko’ bolou ko’ haro o bohiton do suwai dit araat kopio, om kada’ no dokoyu patahako’ iri dot id TUHAN, i Kinorohingan dokoyu. ²² Koino-ino kou i’ do mangakan do tayam-tayam diri dot id walai dokoyu. Om koino-ino ngai’ o tulun dit olidang om i sosomu’ dot id pagantangan do tugama’ do mangakan do tayam-tayam diri, do miagal do mangakan kou do paus om tambang. ²³ Nga’ kada’ dokoyu kano’ i raha’ di tayam-tayam diri, suwai ko’ paawason no dokoyu i raha’ do hilo’d tana’ do miagal do waig,’’ ka dau.

¹ Om boros ka kawagu di Musa, ’’Pusohon no dokoyu o TUHAN, i Kinorohingan dokoyu, do ralan nopod momusou dau om mamaramai di tadau dot agayo do Paska do tontok di tulan dot Abib tu’ tontok nod tulan diri di dongotuong do pinosoliwan kou dau do mantad hilo’d Masir. ² Mongoi kou no do hiri’d natantu’ mantad do tiyonon do sumambayang om sumbolion nod hiri ot ongoiso’ di dumba’ ko’ i sapi’ dokoyu do maan do porsombahan do Paska do pomusou’d TUHAN, i Kinorohingan dokoyu. ³ Mangakan kou nopod porsombahan do Paska diri om kada’ kou pangakan do roti di naralatan do pangambang. Turu’ o tadau dokoyu do mangakan do roti dit a’ rinalatan do pangambang do miagal di nakan dokoyu do tontok di naarau-arau kou do tuminongkiad do pomogunan do Masir. Om mangakan kou no do roti do miagal diri — i roitan do roti do koinggoritan — om osorou kasai’ indo dokoyu i tadau di kinosoliwanan dokoyu do mantad hilo’d Masir, i kinoiyonon dokoyu do noinggorit do solinaid dokoyu’d poimpasi. ⁴ Om turu’ nondo o tadau dot a’ koino-ino do haro o tulun do kipangambang do roti do hiri’d walai dau; om iri nopondo tonsi di tayam-tayam di sinumbali’ do tontok do sosodopon di tadau do koiso’ om mositi’ no dot oiyon do mangakan do totuong diri. ⁵ - ⁶ Ngoyon no dokoyu sumbolio’ i tayam-tayam di maan do tontok do Tadau’d Agayo do Paska do hiri’d tiyonon do sumambayang di natantu’ mantad — om a’ no koino-ino do sumbolion iri dot id kinoiyonon do suwai dot id pomogunan di nakatahak do TUHAN, i Kinorohingan dot id dokoyu. Sumbolion no dokoyu iri do tontok di tumonob o tadau do miagal di maso di tuminongkiad kou i’ do pomogunan do Masir. ⁷ Losuon no dokoyu i tonsi do tayam-tayam diri om kanon no dokoyu do hiri’d tiyonon do sumambayang di natantu’ mantad, om kosuabon pondo om muli’ kou no dot id walai dokoyu. ⁸ Om a’ kou no koino-ino do mangakan do roti di rinalatan do pangambang do solinaid dot onom o tadau. Om koturu’ nopondod tadau om tumimung kou no do sumambayang dot id TUHAN, i Kinorohingan dokoyu, om kada’ kou karaja’ do nunu nopo do tontok do tadau’ddi,’’ ka dau. ⁹ Om boros ka kawagu di Musa, ’’Intobon no o turu’ o minggu’ do mantad di timpuun kou do mongomot do gandum, ¹⁰ om ramayon nogindo dokoyu i Tadau dot Agayo do Dongmongomot, do maan do pomusou’d TUHAN. Om papatahak kou no do porsombahan do tumanud do kagaanan do ginawo dokoyu do tontok do tadau’d agayo diri, do miontok di barakat do nakatahak do TUHAN dot id dokoyu. ¹¹ Kotood kou no dot id toguang do TUHAN, dot iyokoyu ngai’ di tangaanak dokoyu, om i susuhuon dokoyu, om i tulun do Liwi, om i tulun do bansa’d suwai, om i tangaanak dot aiso’ o molohing, om i tongoondu’ do nopuadan di songingiyon do hiri’d kabandaran dokoyu. Om wonsoyon no dokoyu o miagal diri do hilo’d tiyonon do sumambayang di natantu’ddi. ¹² Tumorodok kou no kopio do tumanud do koinsanai di ponuhuan diri; om kada’ dokoyu kolihuwai do turipon kou i’ iyokoyu do hilo’d Masir di gulu po,’’ ka dau. ¹³ Om boros ka kawagu di Musa, ’’Ogomos ngai’ nopondo dokoyu i gandum dokoyu om apaga’ ngai’ i tua’ dot anggur, om ramayon no kopio dokoyu i Tadau dot Agayo do Kinuhub-Kuhub do solinaid do turu’ o tadau. ¹⁴ Ramayon no dokoyu iri dot iyokoyu ngai’ di tangaanak dokoyu, om i susuhuon dokoyu, om i tulun do Liwi, om i tulun do bansa’d suwai, om i tangaanak dot aiso’ o molohing, om i tongoondu’ do nopuadan di poingiyon dot id kabandaran dokoyu. ¹⁵ Pusohon no dokoyu o TUHAN, i Kinorohingan dokoyu; do ralan nopod momusou om mamaramai do tadau dot agayo diti do solinaid do turu’ o tadau do hilo’d tiyonon do sumambayang di natantu’ mantad. Om kotood kou no tu’ nabarakatan nod TUHAN i tinanom dokoyu om i karaja’ dokoyu. ¹⁶ Oinsanan nopo i tongokusai do bansa’ dokoyu dot apatut do mongoi sambayang dot id TUHAN dot intolu do sontoun do hilo’d tiyonon do sumambayang di natantu’ mantad do tontok di Tadau’d Agayo do Paska, om di Tadau dot Agayo do Dongmongomot, om di Tadau dot Agayo do Kinuhub-Kuhub. Om mositi’ no do migit ngai’ do porsombahan o pointikid-tikid di tongokusai, ¹⁷ do songkuro nopo i milo dau do patahakon do miontok di barakat do nakatahak do TUHAN, i Kinorohingan dokoyu dot id dau,’’ ka dau. ¹⁸ Om boros ka kawagu di Musa, ’’Momili’ kou no do gompomutus om piro-piro o pagawai’d suwai dot id pointikid-tikid do bandar di patahakon do TUHAN, i Kinorohingan dokoyu, dot id dokoyu. Iti nopo tulun diti om manalasai do hal di rayat dot otulid o pananalasai. ¹⁹ A’ i’ iyolo’ koino-ino dot a’ otulid o pomumutus ko’ manampaping po do tontok do momutus; a’ i’ iyolo’ koino-ino do rumamit do tusin di ponisip. Tu’ tulun piya daa dit oilo om it otulid o ginawo, nga’ osompon indo di ponisip o mato diyolo’ gisom dot a’ nondo otulid o pomumutus diyolo’. ²⁰ Mositi’ no dot otulid kasai’ o pomumutus dokoyu om a’ manampaping, om kopomogun-mogun kou indo do hilo’d pomogunan di patahakon do TUHAN, i Kinorohingan dokoyu, dot id dokoyu, om hilo’ kasai’ kou nondo do momogun-mogun dot id suang do kosimbayanan. ²¹ Soira’ nopo do momonsoi kou do pananaraban do porsombahan dot id TUHAN, i Kinorohingan dokoyu, om kada’ dokoyu patalado’ddi i kayu do panakatanda’ di Asira, i ponokokinorohingan diri. ²² Om kada’ kou poudong do nunu nopo o torigi do watu do pakayon do tontok do tumuku’ dot id ponokokinorohingan do suwai. Tu’ iri nopo om karaatan kopio do TUHAN.

¹ Kada’ kou papatahak dot id TUHAN, i Kinorohingan dokoyu do sapi’ ko’ dumba’ di haro o bohiton do tinan; tu’ iri nopo om karaatan kopio’d TUHAN. ² Ondung korongou kou do haro o piro-piro o tongokusai ko’ tongoondu’ di poingiyon dot id tongoiso’ di bandar dokoyu do nokowonsoi’d dusa dot id TUHAN, om tuminolibamban di tumpongo do TUHAN, ³ tu’ tuminuku’ iyau om minodsubak do ponokokinorohingan do suwai ko’ tuminuku’ do tadau ko’ tulan ko’ rombituon, it a’ miontok di pinonuhuan do TUHAN. ⁴ Ondung korongou kou do habar do miagal diri, om sorisidon no kopio dokoyu do mongilo iri. Om ondung otopot kopio do nosiliu o miagal diri karaat do hiti’d Israil, ⁵ om ngoyon nopo i tulun diri om posoliwanon no di bandar, om dumpahon nondo do watu do gisom dot apatai. ⁶ Nga’ haro po o duwo o tulun do sasi’ do papasala’ di tulun diri om patayon nogi’ i tulun diri; iso-iso’ nopo o tulun do sasi’ do papasala’ di tulun diri om a’ i’ iyau koino-ino do patayon. ⁷ Om iri no tulun di sasi’ddi o mogulu do momodumpau dau do watu, om momodumpau ngai’ nogindo di tulun diri i tulun do suwai. Om iti no o ralan dokoyu do mongidu’ do karaaton diri. ⁸ Haro i’ dotindo o piro-piro hal dit apagon do manalasai dot i gompomutus toomod o manalasai. Miagal ko’ i pigulatan do sanganu do tana’ ko’ i kopokoruol do tulun do suwai, ko’ i hal do popisuwai di monomod do mamatai om it a’ tomodon do mamatai. Haro nopo ot osiliu do miagal diri, om mositi’ nod mongoi kou do hiri’d tiyonon do sumambayang di natantu’ mantad do TUHAN, i Kinorohingan dokoyu. ⁹ Om poboroson no i hal diri dot id tongoimam di mantad id payat do Liwi om id tulun di nopili’ do siniliu’d gompomutus do tontok do maso’ddi, om pologoson no iyolo’ do manalasai do hal diri. ¹⁰ Om iyolo’ nondo o momutus diri, om mositi’ no do wonsoyon dokoyu o miontok di pinomutus diyolo’. ¹¹ Romiton nopo i pomutus diyolo’ om tonudon ngai’ no i ponudukan diyolo’ do sorisidon kopio’d tumanud. ¹² Isai nopo o tulun di katama’ daa do sumongkiwal di gompomutus ko’ it imam di maso do pakaraja’ do tontok diri om mositi’ no do hukuman do kapatayon; om iti no o ralan do mongidu’ do karaaton diri do mantad id Israil. ¹³ Om korongou ngai’ nondo o tulun do pasal diri om ongooris nondo iyolo’, om aiso’ nondo o tulun do katama’ do momonsoi do miagal diri,’’ ka dau. ¹⁴ Om boros ka kawagu di Musa, ’’Aanu nopondo dokoyu i pomogunan di patahakon do TUHAN, i Kinorohingan dokoyu dot id dokoyu, om kopomogun-mogun kou’d hilo’ om orohian kou dotindo do haro o raja’ dokoyu do miagal di tulun do bansa’d suwai dit id posorili’ dokoyu. ¹⁵ Om ilaan no kopio dokoyu do mositi’ no dot i pilion do TUHAN i tulun di pilion dokoyu do sumiliu’d raja’. Om mositi’ no do bansa’ dokoyu o tulun diri; om kada’ kou pomili’ do bansa’d suwai do silihon do raja’ dokoyu. ¹⁶ A’ i’ koino-ino dot ogumu’ o kuda’ di raja’ do patahakon dot id tongosoudor dau, om a’ iyau koino-ino do monuhu’ do tulun do mongoi boli do kuda’ do hilo’d Masir, tu’ nokoboros nod TUHAN dot a’ no kopio koino-ino do gumuli’ kawagu i tulun dau do hilo’d Masir. ¹⁷ Om a’ i’ koino-ino dot ogumu’ o sawo di raja’ tu’ iri no motindo o popotongkiad dau do mantad id TUHAN, om a’ iyau koino-ino do momogumu’ do pirok om tamas do maan do papakaya’ dau. ¹⁸ Osiliu nopondo do raja’ o tulun diri, om mositi’ no do haro o solinan dau di buuk do pinotulisan dit oturan do Kinorohingan om i ponudukan do Kinorohingan, i sinalin do mantad id pinotulisan mantad, i pinoopi’ di tongoimam do mantad id payat do Liwi. ¹⁹ Om mositi’ no dot id toning kasai’ dau i buuk diri om mambasa’ iyau do buuk diri do solinaid dau do poimpasi. Om koilo indo iyau do momusou do TUHAN, om tumorodok do tumanud do koinsanai di pinonuhuan di pinotulis do hiri. ²⁰ Ondung tumorodok iyau do mambasa’ddi, om a’ indo iyau momusorou do poimogo-mogot iyau ko’ i sompi’ ko’ tulun dot Israil do suwai om a’ iyau sumurilog di ponuhuan do TUHAN do pasal do nunu nopo. Om momorinta’ indo iyau dot Israil, i bansa’ dau, do piro-piro o toun do koloido’, om kopomorinta’ nogi’ dot Israil i sinakagon dau do solinaid do piro-piro o sinakagon do mogilombu-lombus,’’ ka dau.

¹ Om boros ka kawagu di Musa, ’’Iri nopo payat do Liwi, i nongosiliu ngai’ dot imam diri, om a’ i’ kaanu do bahagi’ di tana’ do hilo’d Israil; tu’ kaakan-akanan nopo diyolo’ om mantad no di porsombahan om i piro-piro o porsombahan di sumbolion di patahakon dot id TUHAN. ² A’ i’ iyolo’ kaanu do bahagi’ do tana’ do miagal di naanu di payat do suwai; bahagi’ nopo dot aanu diyolo’ om iri no i kinosilihan diyolo’ dot imam do mogobi-obi’d TUHAN, i kaanu do bahagi’ di porsombahan do patahakon dot id TUHAN, do miagal di nakabatos mantad do TUHAN. ³ Soira’ nopo do papatahak kou do sapi’ ko’ dumba’, om mositi’ no do patahakon dot id tongoimam i toliip, om i roo, om i tian di tayam-tayam diri. ⁴ Om mositi’ no do patahakon dot id diyolo’ i gandum dit id gulu koomot, om i waig dot anggur om i tumau do saitun, om i hulu do dumba’ dit id gulu kaanu. ⁵ Mantad nopo dot id pogialatan di payat dokoyu om iri no payat do Liwi o pinili’ do TUHAN do sumiliu’d imam di mogobi-obi’ dau do gisom dot alaid. ⁶ Isai nopo o tulun do Liwi do mantad id honggo nopo o bandar dot Israil, it orohian do mongoi do hiri’d tiyonon do sumambayang di natantu’ mantad do TUHAN om koino-ino no ⁷ do maganu-anu do hiri do sumiliu’d imam di mogobi-obi’ do TUHAN, i Kinorohingan dau, do miagal di tulun do Liwi do suwai di maganu-anu’d hiri. ⁸ Om mositi’ no do kaanu iyau do taakanon dot irad dit aanu di tongoimam do suwai, om koino-ino i’ iyau do popoopi’ do nunu nopo i pootodon di sompiiyon dau dot id dau,’’ ka dau. ⁹ Om boros ka kawagu di Musa, ’’Kopomogun-mogun kou nopondo do hilo’d pomogunan di patahakon do TUHAN, i Kinorohingan dokoyu, dot id dokoyu, om kada’ kou omit di pingwonsoyon di piro-piro o bansa’d tulun di poingiyon do hilo’ dit angaraat kopio. ¹⁰ Kada’ dokoyu patahako’ i tangaanak dokoyu do maan do porsombahan di sorobon do hiri’d pananaraban do porsombahan; om kada’ dokoyu pologoso’ o tongoiso’ piya di tulun dokoyu do minsingilo do toilaan di tulun do mogogontong ko’ mogihum po do pogintutunan ko’ mamakai po do toilaan di dong bobolian, ¹¹ ko’ mamakai do gimat, om kada’ iyolo’ pologoso’ do momolohou di rusod do tulun do napatai. ¹² Araatan i’ o TUHAN, i Kinorohingan dokoyu, do wowonsoyon dit araat kopio do miagal diri. Om iri no o koponguyungan dau di piro-piro o bansa’ddi do mantad id pomogunan diri do tontok do rumikot kou do mongoi panangod diyolo’. ¹³ Tumorodok kou no kopio do tumanud do TUHAN, i Kinorohingan dokoyu do mikuwo’d aayi-ayi’ o ginawo dokoyu,’’ ka dau. ¹⁴ Om boros ka kawagu di Musa, ’’Hilo’ nopod pomogunan di potiongoyon no dokoyu pomogun-mogunai, om iri nopo tulun do hilo’ nga’ tumanud do nosihat do tongobobolian om mogihum iyolo’ do pogintutunan, nga’ mada’ i’ o TUHAN, i Kinorohingan dokoyu do momonsoi kou iyokoyu do miagal diri. ¹⁵ Suwai ko’ porikot nondo iyau do songulun o nabi do miagal doho’ do mantad id pogialatan do bansa’ dokoyu, om mositi’ no do mumboyo’ kou do boros dau. ¹⁶ Tontok di tadau di pointimung kou do hilo’d Nuluhon do Sinai, om pinokianu kopio dokoyu dot a’ kou korongou kawagu do TUHAN do moro-boros om a’ kou kokito di tapui do tanda’ do nakarapou iyau, tu’ ooris kou dot apatai kou. ¹⁷ Om boros kaddi do TUHAN dot id doho’, ’Kopunong no kopio i pinokianu diyolo’ddi. ¹⁸ Porikatan ku indo iyolo’ do songulun o nabi di miagal diya’ do mantad id pogialatan do bansa’ diyolo’, om sunudan ku indo iyau dit apatut do poboroson dau dot id diyolo’, om sunudan dau iyolo’ do koinsanai di ponuhuan ku. ¹⁹ Om moro-boros indo iyau dot id suang do ngaran ku, om hukuman ku ot isai nopo o tulun dit a’ mumboyo’ do boros dau. ²⁰ Nga’ ondung haro o nabi di katama’ do mimboros dot id suang do ngaran ku om a’ oku i’ nokoponuhu’ dau, om mositi’ no do hukuman iyau do kapatayon, om iyoon nogiddi ot isai nopo o nabi di mimboros dot id suang do ngaran do ponokokinorohingan do suwai. ²¹ Muhot kou doti’ ondung poingkuro kou do mongilo ondung mantad kopio dot id TUHAN i poboroson do songulun o nabi ko’ okon,’ ka. ²² Ondung haro o nabi do moro-boros dot id suang do ngaran do TUHAN om a’ indo abayaan i pinoboros dau, om okon no ko’ mantad id TUHAN i boros dau’ddi. Tu’ mantad i’ do toilaan di nabi diri i boros di pinoboros dau, om a’ kou i’ minog do moddosi dau,’’ ka dau.

¹ Om boros ka kawagu di Musa, ’’Angapatai pondo do TUHAN, i Kinorohingan dokoyu i piro-piro o bansa’d tulun di sanganu daa di pomogunan do patahakon do TUHAN dot id dokoyu, om osolod nopondo dokoyu i kabandaran diyolo’ om i kawalayan diyolo’, om koundorong kou nopondo kopio do hilo’, ² - ³ om bohogion no dokoyu o pomogunan diri do tolu o bohogian, om otikid nopo dot iso’ o bandar do pogintirungan dit id somok. ⁴ Om haro nopondo o tulun di kapamatai do tulun do suwai dot a’ tinomod do minamatai, it okon ko’ pisangod dau, om milo i’ i tulun diri do mogidu’ om mongoi dot id iso’ di bandar do pogintirungan diri do mongoi intirung do hiri. ⁵ - ⁶ Miagal ko’, haro nopo o duwo o tulun do mongoi panagad do kayu do hilo’d gouton, om maha’ di managad nod kayu o tiso’ diyolo’, om sigog pondo dot otongos o tulu di kapak dau om oontok nondo i tiso’ dau, gisom dot apatai i tulun diri, om milo i’ i tulun di nakapamatai nga’ it a’ i’ tinomod do mamatai do mongoi dot id iso’ di tolu o bandar diri tu’ aiso’ i’ o sala’ dau, om aiso’ indo o koligagaanan dau. Ondung iso-iso’ o bandar do pogintirungan, om adalaan i’ dotindo kosodu’ iri, om okosupan nondo i tulun diri di koobpinayan di tulun do napatai, i koobpinayan dit apatut do momolokop do kinapatayan di tobpinai dau, om kapamatai nondo o tulun diri do tulun dit aiso’ o sala’ dot atatagadan iyau. ⁷ Om iri no o koponuhuan ku dokoyu do potobilang do tolu o bandar. ⁸ Soira’ nopondo do poinggoyoon do TUHAN, i Kinorohingan dokoyu o pomogunan dokoyu, do miagal di nakabatos dau dot id komolohingan dokoyu do wonsoyon dau, om katahak ngai’ dau dot id dokoyu i tana’ do nakabatos dau, ⁹ om momili-mili’ kou po do tolu kawagu o bandar. (Om patahakon i’ dau i tana’ddi ondung wonsoyon ngai’ no dokoyu i ponuhuan ku dokoyu di tadau baino’, om ondung osianan kou no do TUHAN i Kinorohingan dokoyu, om miontok no di ponudukan dau o kowoyo-woyoon dokoyu.) ¹⁰ Wonsoyon no dokoyu o miagal diri om a’ i’ apatai o tulun dit aiso’ o sala’. Om a’ kou indo iyokoyu kasala’ do kapamatai diyolo’ dot id pomogunan di patahakon do TUHAN dot id dokoyu. ¹¹ Nga’ ondung haro o tulun do tumomod do mamatai di pisangod dau di karaatan dau om mogidu’ no daa’ndo dot id tiso’ di bandar do pogintirungan diri do mongoi pokiintirung, ¹² om mositi’ no dot i tongoboyoon do hiri’d bandar dau o monuhu’ do poposoliwan dau om patahakon indo dot id koobpinayan di tulun di pinatai it apatut do momolokop do kinapatayan di tobpinai diyolo’, om apatai indo diyolo’ i tulun do minamatai’ddi. ¹³ Kada’ no kopio dokoyu insianai o tulun do miagal diri. Poiduwon no kopio ot Israil do mantad id pinamatayan diri om osimbayan kou indo,’’ ka dau. ¹⁴ Om boros ka kawagu di Musa, ’’Kada’ dokoyu poundoliho’ i wolit do tana’ di songkoduwo dokoyu, i wolit di natantu’ mantad di gulu po do hilo’d pomogunan di patahakon do TUHAN, i Kinorohingan dokoyu, dot id dokoyu,’’ ka dau. ¹⁵ Om boros ka kawagu di Musa, ’’A’ i’ kabagal o songulun-ngulun do monondos dot iso’ o tulun do nakasala’ o tulun diri; mositi’ no do duwo o tulun do sasi’ do popointalang kopio do kasala’ o tulun diri. ¹⁶ Ondung haro o songulun do mumbal do pokoruol do ginawo do tulun do suwai tu’ tondoson dau i tulun diri do nakasala’ nga’ a’ i’ ma otopot kopio i ponondos dau’ddi, ¹⁷ om mositi’ no do mongoi goduwo i tulun diri do hiri’d tiyonon do sumambayang di natantu’ mantad do TUHAN, om butusan nogindo iyolo’ dit imam om i gompomutus di pakaraja’ do maso’ddi. ¹⁸ Mositi’ no do sorisidon kopio dit imam do mongilo o hal diri; om ondung haro o tulun do minongudut do pinapasala’ di songulun di sompi’ ko’ tulun dot Israil, ¹⁹ om mositi’ no do porotuan iyau do hukuman di porotuon mantad daa dot id tulun di pinasala’. Om iyo noddi o ralan do mongidu’ do karaaton diri. ²⁰ Om korongou ngai’ indo o tulun do suwai di nosiliu do miagal diri; om ooris nondo iyolo’, om aiso’ nondo o tongosongulun piya do kasaap do momonsoi do miagal kopio’ddi karaat. ²¹ Kada’ kou no kopio ponginsian do tulun do miagal diri; tu’ pomohukum nopo om ginawo o pomolokop do ginawo, om mato o pomolokop do mato, om nipon o pomolokop do nipon, om longon o pomolokop do longon, om gakod o pomolokop do gakod,’’ ka dau.

¹ Om boros ka kawagu di Musa, ’’Soira’ nopo do mamanau kou do mongoi sangod do pisangod dokoyu om kokito kou do korita’-kuda’, om kuda’, om soudor dit ogumu’ ko’ i dokoyu, om kada’ kou poddosi’ddi. Tu’ moyo-woyo’ i’ dokoyu o TUHAN, i Kinorohingan dokoyu, om monguhup iyau dokoyu, iyau i pinoposoliwan dokoyu do mantad hilo’d Masir. ² Tontok dit a’ kou po koongoi kasangod, om mositi’ no do haro ot imam do mongoi pomoros dot id tongosoudor do poingkaa, ³ ’Oi tulun dot Israil, pokinongou kou no. Tadau nod baino’ do mongoi kou sangod. Om kada’ kou kooris di pisangod dokoyu, om kada’ dokoyu poluhoyo’ o ginawo, om kada’ kou kagangau. ⁴ Tu’ woyoon kou i’ do TUHAN, i Kinorohingan dokoyu, om monguhup iyau dokoyu, om onuan kou i’ dau do kamanangan,’ ka. ⁵ Om sunudan nondo di pagawai i soudor do poingkaa, ’Haro o tulun do hiti di wagu po kowonsoi’d walai, om a’ po dau noiyon i walai dau’ddi? Ondung haro, om mositi’ no do muli’ o tulun diri. Tu’ ondung amu’, om apatai nopondo iyau dot id pisangadan om tulun nod suwai o koiyon di walai dau. ⁶ Haro o tulun do hiti di wagu po kapananom do kabun dot anggur, om a’ poddi nokoumbal do mongupu’ do tua’ dit anggur dau? Ondung haro, om mositi’ nod muli’ o tulun diri. Tu’ a’ nopo, om apatai nopondo iyau dot id pisangadan, om tulun nod suwai o mimbangat di waig dot anggur dau. ⁷ Haro o tulun do hiti di nokotunang nogi’? Ondung haro om mositi’ no do muli’ iyau. Tu’ a’ nopo, om apatai nopondo iyau dot id pisangadan, om tulun nod suwai o mangawin di tondu’ di notunangan dau,’ ka. ⁸ Om mositi’ no do poboroson po di pagawai dot id soudor diri o boros do poingkaa, ’Haro o tulun do hiti dit oluhoi no o ginawo om i moddosi? Ondung haro, om mositi’ no do muli’ o tulun diri. Tu’ a’ nopo, om kotonggoi nondo dau do moddosi i tulun do suwai,’ ka. ⁹ Kopongo pondo i pagawai do moro-boros dot id soudor diri, om momili’ nogindo do boyoon do pointikid-tikid do posukan. ¹⁰ Soira’ nopo do mongoi kou panangod dot iso’ o bandar, om umbalan po do monuhu’ i tulun do hiri do tumahak dot id dokoyu. ¹¹ Ondung iwangan diyolo’ i wawayaan di bandar om tumahak no iyolo’ dot id dokoyu, om osiliu ngai’ nopondo iyolo’ do turipon dokoyu om sansagan do kumaraja’ dot id dokoyu. ¹² Nga’ ondung a’ tumahak dot id dokoyu i tulun do hiri’d bandar diri, tu’ uhang nogi’ diyolo’ do sumaap, om turungkuon no dokoyu do soudor dokoyu o bandar diri. ¹³ Om katahak nopondo do TUHAN i Kinorohingan dokoyu i bandar diri dot id dokoyu, om mositi’ nod patayon ngai’ dokoyu i tongokusai do hiri’d bandar diri. ¹⁴ Nga’ koino-ino kou i’ do mononggoi di tongoondu’, om i tangaanak, om i tayam-tayam, om nunu nopo it id suang do bandar diri. Om pakayon nopo o nunu nopo o dapu’ di pisangod dokoyu. ¹⁵ Om iyoon no dokoyu’ddi i kabandaran dit id sodu’ di pomogunan do koundorongon dokoyu. ¹⁶ Nga’ ondung koponolod kou do bandar do hiri’d pomogunan di patahakon do TUHAN, i Kinorohingan dokoyu, dot id dokoyu, om mositi’ nod patayon ngai’ nopo o tulun do hiri. ¹⁷ Punsoon nopo do mamatai o koinsanai di bansa’d tulun do hiri: i tulun do Hit, Amori, Kanaan, Poris, Howi, om Yobus, do miagal di pinonuhuan do TUHAN dot id dokoyu. ¹⁸ Patayon no dokoyu iyolo’, om a’ i’ iyolo’ kopominsuhu’ dokoyu do momonsoi’d dusa dot id TUHAN, tu’ monuduk moti’ndo iyolo’ dokoyu do momonsoi do koinsanai di sosomu’, i wonsoyon diyolo’ do tontok do tumuku’ dot id ponokokinorohingan diyolo’. ¹⁹ Soira’ nopo do mumbal kou do monolod do bandar, om kada’ dokoyu tagado’ i tongotua-ua’ do hiri, do mulong piya dot alaid kou do monurungku’ do bandar diri. Kanon nopo dokoyu i tua’ nga’ kada’ dokoyu umpadano’ i guas; tu’ okon i’ ko’ i guas do kouwaan o pisangod dokoyu. ²⁰ Nga’ koino-ino kou i’ do managad di kayu do suwai om pakayon nopo do maan do ponurungku’ di bandar do gisom dot osolod dokoyu o bandar diri,’’ ka dau.

¹ Om boros ka kawagu di Musa, ’’Ondung haro o tulun dot abantalan do pinatai dot id tumo do hilo’d pomogunan di patahakon do TUHAN, i Kinorohingan dokoyu, dot id dokoyu, om a’ i’ dokoyu oilaan ondung isai o minamatai do tulun diri, ² om mositi’ no do ngoyon di boyoon om i gompomutus tipongo’ o kosoduwo’ do mantad hiri’d kinoilihon di tinan di tulun diri om gisom do korikot dot id pointikid-tikid di bandar dit id somok. ³ Om momili’ nondo i boyoon di hiri’d bandar dit id somok kopio di kinoilihon di tinan do tulun diri do songinan o sapi’ dit okoro’ po, it a’ po insan porobuato’. ⁴ Om gayaton nondo diyolo’ iri dot id iso’ o kinoiyonon dit id toning do bawang dit a’ insan karasak, om it a’ insan karadu om a’ insan kopomutanamai i tana’d hiri. Om hiri nondo do tipuon diyolo’ o liou di sapi’ddi. ⁵ Om mositi’ no do mongoi ngai’d hiri it imam do mantad id payat do Liwi, tu’ iyolo’ no o momutus do nunu nopo o hal di kagait do kororongit. Om iyolo’ o nopili’d TUHAN, i Kinorohingan dokoyu do momonsoi’d karaja’ do TUHAN om popoboros do barakat dot id suang do ngaran do TUHAN. ⁶ Om oinsanan nopondo i boyoon do mantad hiri’d bandar dit id somok kopio di kinoiyonon do kinabantalan di tulun do pinatai, do mongoug do palad diyolo’ do pasahawon di sapi’ddi, ⁷ om momoros do poingkaa, ’A’ i’ iyahai minamatai dilo tulun om a’ iyahai koilo ondung isai kopio o tulun do minamatai. ⁸ Oi TUHAN, ompunai no i tulun dot Israil i tulun nu, i pinosoliwan nu do mantad hilo’d Masir. Ompunai no iyahai om kada’ iyahai poboboo’ diti pinamatayan do tulun dit aiso’ o sala’,’ ka. ⁹ Om owonsoi pondo i ponuhuan do TUHAN diri, om a’ kou nogindo apababaan di pinamatayan do tulun diri,’’ ka dau. ¹⁰ Om boros ka kawagu di Musa, ’’Soira’ nopo dot onuan kou do TUHAN, i Kinorohingan dokoyu do kamanangan dot id pisangadan om mononggoi kou nondo do tulun do mantad id pisangadan diri. ¹¹ Om haro i’ dotindo o tokito dokoyu do tondu’ dit olumis dot id pogialatan diyolo’ om i korohian dokoyu do mangawin. ¹² Om angatan nopo i tondu’ddi do hiri’d walai dokoyu. Om pampadan nondo dau o tobuk dau om pampadan o sondulu, ¹³ om tingalanan dau o pakayan dau. Om mundorong nondo iyau do hiri’d walai dokoyu om mogihad iyau di molohing dau do solinaid do sombulan; om atalib pondo iri om kowinon nogindo dokoyu i tondu’ddi. ¹⁴ Koimbagu nopondo, om ondung a’ kou orohian di tondu’ddi, om pologoson nopo iyau do tumongkiad. A’ kou i’ koino-ino do moniliu dau do turipon ko’ papadagang po dau tu’ sinansagan i’ dokoyu i tondu’ddi do dumudun dokoyu,’’ ka dau. ¹⁵ Om boros ka kawagu di Musa, ’’Ondung haro o kusai do duwo o sawo om kianak goduwo nopod kusai i sawo dau’ddi nga’ okon i’ ko’ i sawo di kosianan kopio dau o sanganak di tanak do kusai dot id gulu kosusu. ¹⁶ Om soira’ nopondo do momusorou i tapa’ do ralan dau do mamahagi’ di dapu’ dau dot id tangaanak dau, om a’ i’ iyau koino-ino do mogobi’ di tanak do kusai di sawo di kosianan dau, gisom do patahakon dau dot id tanak do kusai di sawo do kosianan dau i tungkusan dit apatut daa dot aanu di tanak do kusai dit id gulu kosusu. ¹⁷ Mositi’ no do patahakon dau o duwo tintanga’ di dapu’ dau dot id tanak do kusai dit id gulu kosusu, do mulong piya dot okon iyau ko’ tanak di sawo di kosianan dau. Mositi’ no do pusohon di tapa’ i tanak dau’d kusai dit id gulu kosusu, om patahakon dot id dau i tungkusan dit apatut dot aanu do tanak diri,’’ ka dau. ¹⁸ Om boros ka kawagu di Musa, ’’Ondung haro o molohing di kianak do kusai dit obinsongkiwal om it a’ milo’d sunudan, i tanak dit a’ nopo tumanud do boros di molohing dau, do pikoton piya daa diyolo’ iyau do monuduk. ¹⁹ Om mositi’ no do pootodon di molohing i tanak diri dot id tongoboyoon di bandar di kinoiyonon diyolo’ om bisaraon nogindo. ²⁰ Om poboroson nondo di molohing dot id tongoboyoon diri o boros do poingkaa, ’A’ nopo milo’d sunudan iti tanak dahai, om obinsongkiwal om a’ tumanud do boros dahai; momirubat no ilo’ do tusin om mogiginum,’ ka. ²¹ Om iri nondo i tongoboyoon do bandar diri o momodumpau di tanak diri do watu o pomodumpau, do gisom dot apatai i tanak, om oidu’ indo dokoyu o karaaton diri. Om korongou ngai’ nopondo i hilo’d Israil di nosiliu do miagal diri, om ooris nondo iyolo’,’’ ka dau. ²² Om boros ka kawagu di Musa, ’’Ondung haro o tulun do hinukuman do kapatayon tu’ nokowonsoi i’ iyau’d sala’, om pinogiis i tinan dau dot id kayu di pinoodsuk, ²³ om kada’ nogi’ dokoyu pologoso’ do poingiyo’ddi i tinan diri do gisom dot osuaban. Mositi’ no do lobongon iri do tontok do tadau’ddi, tu’ rata’ nopod tulun do poinggiis dot id kayu om poporikot do popol do Kinorohingan dot id pomogunan diri. Ngoyon no dokoyu lobongo’ i rata’, om a’ i’ dokoyu ososomu’ i tana’ di pinatahak do TUHAN, i Kinorohingan dokoyu, dot id dokoyu.

¹ Ondung kokito kou do sapi’ ko’ dumba’ do tulun di sompi’ ko’ bansa’d Israil do nokoidu’, om kada’ dokoyu pologoso’ tomod iri; ngoyon no dokoyu iri pogulio’ dot id sanganu. ² Nga’ ondung osodu’ o walai di sanganu ko’ ondung a’ kou koilo do sanganu’ddi, om igitan nopori do muli’. Om korikot nopondo i sanganu do mongoi pogihum diri, om patahakon no dokoyu iri dot id dau. ³ Om iyo nogiddi o wonsoyon dokoyu ondung kobontol kou no do kaladai, ko’ kain, ko’ nunu nopo i natagak do sompi’ ko’ bansa’ dot Israil. ⁴ Ondung haro o kaladai ko’ sapi’ di sompi’ ko’ bansa’ dot Israil do kogupu’ do hilo’d ralan, om kada’ dokoyu pologoso’ tomod iri, suwai ko’ uhupan no dokoyu i sanganu do potungag kawagu’ddi. ⁵ Tongoondu’ nopo om a’ i’ koino-ino do manampakai do pakayan do tongokusai, om tongokusai nga’ a’ i’ koino-ino do manampakai do pakayan do tongoondu’; tu’ araatan i’ o TUHAN, i Kinorohingan dokoyu, do tulun di momonsoi do miagal diri. ⁶ Ondung kobontol kou do rumun do tombolog dot id kayu ko’ hilo’d tana’ do maso di molohing di tombolog do momut, ko’ poinsugku’ i molohing di tombolog di tangaanak dau, om kada’ dokoyu ngoyo’ i molohing di tombolog. ⁷ Koino-ino kou i’ do manganu di tanak do tombolog, nga’ poiduwon no dokoyu i molohing, om otogui kou i’ om osimbayan kou do momogun-mogun. ⁸ Soira’ nopo do momonsoi kou do walai’d wagu, om wansayan no kopio dokoyu do tolig o pointutuk di tisan di taap. Om a’ kou indo pasalaon do haro piya o tulun dot aratu’ do mantad hiri om gisom dot apatai. ⁹ Kada’ kou pananom do totonomon do suwai do poirolot di pinatanaman dokoyu dot anggur; ondung wonsoyon dokoyu o miagal diri, om a’ kou no koino-ino do manganu do tua’ dit anggur om i tua’ di totonomon do suwai di tinanom dokoyu’d hiri. ¹⁰ Kada’ dokoyu pokuwai dot iso-iso’ o poku’ do sapi’ om kaladai do maan do pamaradu. ¹¹ Kada’ kou panampakai do kain di piniawol do hulu’d dumba’ om banang do linan. ¹² Tombiran no dokoyu do raboi-raboi o hiri’d apat o sunduk do pakayan dokoyu,’’ ka dau. ¹³ Om boros ka kawagu di Musa, ’’Ondung haro o kusai di mangawin dot iso’ o tondu’, om alaid nondo om a’ indo i kusai orohian di tondu’, ¹⁴ om mongudut nondo i kusai do papasala’ di tondu’, tu’ tondoson dau do nodudun do kusai dot id gulu i tondu’ dit a’ po iyolo’ nokopikawin. ¹⁵ Ondung haro ot osiliu do miagal diri, om mositi’ no do ngoyon di molohing di tondu’ i lapik do toodopon di noturuan do raha’ di tadau do kinopikowinan, do popointalang dot a’ i tondu’ nodudun do kusai dot id gulu. Om mositi’ no do pointalangon diyolo’ i kain diri dot id tongoboyoon di bandar do hiri’d bisara’. ¹⁶ Om poboroson nondo di tapa’ di tondu’ dot id diyolo’ o poingkaa, ’Pinatahak ku i’ iti tanak ku’d tondu’ do kowinon diti kusai nga’ baino’ noddi om niada’ i’ dau iti tondu’. ¹⁷ Om minongudut iyau do papasala’ diti tondu’, tu’ minomoros iyau do nodudun do kusai iti tondu’ dit a’ po iyolo’ nokopikawin. Nga’ diya iti kointalangan kopio dot a’ ilo tanak ku nodudun do kusai dot id gulu; ontong kou pogi’ dilo noturuan do raha’ do hiti’d lapik do toodopon do tontok di minikawin iyolo’!’ ka nondo dau. ¹⁸ Om ngoyon nondo di tongoboyoon do bandar i kusai om bobogon nondo diyolo’ iyau. ¹⁹ Om rugion nondo i kusai’ddi do hatus o tusin do pirok om patahakon iri dot id tapa’ di tondu’, tu’ nintingayam i’ di kusai o songulun o tondu’ dot Israil. Om sawo indo kasai’ di kusai i tondu’ddi, om a’ i’ koino-ino dot adaan di kusai do solinaid di kusai do poimpasi. ²⁰ Nga’ ondung otopot i boros do pinonondos om aiso’ o kointalangan kopio dot a’ nodudun do kusai i tondu’ dot id gulu, ²¹ om mositi’ no dot angatan diyolo’ i tondu’ do hiri’d wawayaan do walai di tapa’ dau, om dumpahon nondo di tongokusai do hiri’d bandar i tondu’ddi, do watu o pomodumpau, do gisom dot apatai i tondu’. Minomonsoi i tondu’ddi di kointingayam kopio dot id pogialatan do bansa’ toko’ tu’ nodudun no iyau’d kusai dit a’ po iyau nakakawin, om di maso po dau do poingiyon dot id walai di tapa’ dau. Om iyo nodti o ralan do mongidu’ do karaaton diri. ²² Ondung haro o kusai dot okosupan do maso do poindudun do sawo do kusai’d suwai, om mositi’ no do hukuman goduwo nopo iyolo’ do kapatayon. Om iyo nodti o ralan do mongidu’ do karaaton diri. ²³ Ondung haro o kusai dot okosupan do poindudun do tondu’ di notunangan nod tulun do suwai dot id iso’ o bandar, ²⁴ om posoliwanon nopo dokoyu iyolo’ goduwo om dumpahon nod watu do gisom dot apatai. Om patayon no i tondu’ tu’ a’ i’ iyau mininggiak do minokitulung om hiri i’ daa iyau id bandar, om norongou i’ daa iyau do tulun do suwai. Om iri kusai nga’ patayon no tu’ minongoi i’ dudun do tondu’ di kitunang no. Om iyo nodti o ralan do mongidu’ do karaaton diri. ²⁵ Ondung haro o kusai do mongoi pangasou do tondu’ do hilo’d talun, dot i tondu’ di notunangan no do kusai’d suwai, om iri no i kusai o patayon. ²⁶ Om a’ indo kuroi-kuroyon i tondu’ tu’ a’ i’ iyau nokowonsoi do dusa dit apatut do hukuman do kapatayon. Iti nopo om miagal nopo di ngoyon do songulun o kusai saapo’ o tiso’ o kusai om patayon nondo dau i kusai’ddi. ²⁷ Tu’ hiri id talun o pinangasahan di kusai di tondu’ddi, om mininggiak piya daa i tondu’ do mokitulung nga’ aiso’ i’ o tulun do milo do mongoi ponulung dau. ²⁸ Ondung haro o kusai dot okosupan do poindudun do tondu’ dit aiso’ o tunang, ²⁹ om mositi’ no do bayaran di kusai i tapa’ di tondu’ddi do limo nohopod o tusin do pirok, it irad di topungon kasai’. Om mositi’ no do kowinon kopio di kusai i tondu’ddi tu’ sinansagan i’ dau do dumudun dau. Om a’ no i kusai koino-ino do magada’ di tondu’ddi do solinaid dau do poimpasi. ³⁰ A’ i’ kopio koino-ino ot isai nopo o kusai do mongindaraat di tapa’ dau do mongoi dudun dot isai nopo di sawo di tapa’ dau, o pongindaraat,’’ ka dau.

¹ Om boros ka kawagu di Musa, ’’Kusai nopo di noidu’ o tontolu ko’ napampadan o wayaan do sobu, om a’ no pohompiton do tulun di songonuon do TUHAN. ² Tulun nopo di nosusu dot a’ po nokopikawin i molohing dau, om a’ no pohompiton do tulun di songonuon do TUHAN. Om iri piya sinakagon dau do gisom do korikot di linombusan do sinakagon di koinghopod nga’ a’ i’ pohompiton. ³ Tulun nopo dot Amon om Muab om i sinakagon diyolo’, dot iri piya i linombusan do sinakagon di koinghopod nga’ a’ i’ pohompiton do tulun di songonuon do TUHAN. ⁴ Tu’ a’ i’ iyolo’ minanahak dokoyu do taakanon om waig do tontok di hilo’ kou id tindalanon di kososoliwan dokoyu do mantad hilo’d Masir. Om minamagadsi’ po iyolo’ di Biliam i tanak di Bior, i mantad hilo’d bandar do Pitor, i hilo’d Misopotamia, do momopol dokoyu. ⁵ Nga’ a’ i’ do TUHAN, i Kinorohingan dokoyu pinokinongou i Biliam, suwai ko’ siniliu nogi’ dau do barakat i popol, tu’ osianan i’ iyau dokoyu. ⁶ Kada’ kou nogi’ kopio pomonsoi do nunu nopo do ponguhup om poposimbayan do bansa’ddi do solinaid diyolo’ do poimpasi. ⁷ Kada’ dokoyu poinsiriba-ribao’ i tulun dot Idom tu’ waris i’ dokoyu iyolo’. Om kada’ dokoyu poinsiriba-ribao’ i tulun do Masir, tu’ nokoumbal kou i’ do nokoiyon do hilo’d pomogunan diyolo’ di gulu po. ⁸ Om pohompiton nopo do tulun di songonuon do TUHAN o sinakagon diyolo’ do mantad di linombusan do sinakagon di kointolu om gisom dot impiro-piro kawagu pilombus o sinakagon diyolo’,’’ ka dau. ⁹ Om boros ka kawagu di Musa, ’’Soira’ nopo dot id suang kou do kiim do tontok do haro o pisangadan, om ilagon no kopio dokoyu o nunu nopo i monosomu’ dokoyu dot id pagantangan do tugama’. ¹⁰ Ondung haro o songulun o kusai dot id pogialatan dokoyu dot ososomu’ dot id pagantangan do tugama’ tu’ nokoposoliwan iyau do narot di dongotuong, om mositi’ no do sumoliwan iyau di kiim om mundorong nondo do hiri’d soliwan. ¹¹ Osodop pondo om mositi’ nod modsu’ iyau, om otonob pondo o tadau om koino-ino nogi’ iyau do gumuli’ do hiri’d kokiiman. ¹² Mositi’ no do haro ot iso’ o kinoiyonon do ngoyon dokoyu pagawasai do hiri’d soliwan di kokiiman. ¹³ Migit kou no do kayu-kayu do ponokopakakas dokoyu, om mongoi kou nopondo taii’ om milo i’ dokoyu do maan do pongukad do luang i kayu-kayu’ddi, om olitan nogindo kawagu i luang. ¹⁴ Gompion no i kokiiman dokoyu om olidang i’ dot id pagantangan do tugama’, tu’ moyo-woyo’ i’ dokoyu o TUHAN, i Kinorohingan dokoyu, do hiri’d kokiiman do mongintirung dokoyu om manahak dokoyu do kamanangan do sumaap ngai’ di pisangod dokoyu. Kada’ kou pomonsoi do nunu nopo it a’ osonong, dot i popotongkiad do TUHAN do mantad id dokoyu,’’ ka dau. ¹⁵ Om boros ka kawagu di Musa, ’’Ondung haro o turipon do mogidu’ do mantad id tuan dau om rumikot nondo dot id dokoyu do mongoi pokiintirung, om kada’ dokoyu iyau pogulio’ dot id tuan dau. ¹⁶ Om koino-ino i’ iyau do miyon do hinonggo nopo o bandar di korohian dau, om kada’ kou korongit dot id dau. ¹⁷ A’ no kopio koino-ino do haro o tulun dot Israil do kusai ko’ tondu’ po do sumiliu’d sundal dot id walai do tingolig. ¹⁸ Om a’ kou koino-ino do papatahak do tusin dot i suminiliu’d sundal o ralan do kinoonuan di tusin, do hiri’d Walai’d Sasambayangan do TUHAN, i Kinorohingan dokoyu, do maan do pamayaan do batos di mikuwo’d sumpa’. Tu’ araatan i’ kopio o TUHAN do sundal dot id walai’d tingolig. ¹⁹ Soira’ nopo do popoolos kou do tusin ko’ taakanon ko’ nunu nopo dot id sompi’ ko’ tulun dot Israil, om kada’ dokoyu iyau suhuo’ do mambayar do bunga di nolos dau. ²⁰ Koino-ino kou i’ do mokibunga di paalasan dokoyu dot id tulun do bansa’d suwai, nga’ a’ kou i’ koino-ino do mokibunga di paalasan dokoyu dot id sompi’ ko’ tulun dot Israil. Tonudo’ no dokoyu ot oturan diti, om barakatan indo do TUHAN, i Kinorohingan dokoyu, o nunu nopo o wonsoyon dokoyu do hilo’ kou id pomogunan di ngoyon dokoyu pomogun-mogunai. ²¹ Soira’ nopo do mamatos kou dot id TUHAN, i Kinorohingan dokoyu, om kada’ dokoyu popiloid-loido’ do momonsoi i nakabatos dokoyu; tu’ uhoton kou indo do TUHAN di batos dokoyu, om dusa no dokoyu ondung a’ no dokoyu bayaanon i batos dokoyu’ddi. ²² Okon i’ ko’ dusa dot a’ kou piya mamatos dot id TUHAN. ²³ Nga’ mamatos kou nopo do mantad id kosinggawaan do ginawo dokoyu, om bayaanon no kopio dokoyu iri. ²⁴ Soira’ nopo do sumusui kou do ralan di kawaya’ do kabun dot anggur do tulun do suwai, om koino-ino kou i’ do mangakan di tua’ dot anggur do gisom dot ayahan kou nga’ kada’ kou posuang di tua’ dot anggur dot id balatak dokoyu dot igitan do mamanau. ²⁵ Soira’ nopo do sumusui kou do ralan di kawaya’ do tumo do tinanaman do gandum do tulun do suwai, om koino-ino kou i’ do mangakan di gandum di kotuon dokoyu nga’ kada’ kou po panganu di gandum do goribon do manganu,’’ ka dau.

¹ Om boros ka kawagu di Musa, ’’Ondung haro o kusai di mangawin dot iso’ o tondu’, om alaid nondo om mada’ indo iyau di tondu’ddi tu’ haro no ot a’ dau korohian, om monulis nondo iyau do surat do kopiadaan om patahakon no dot id tondu’ddi, om uyungon nondo dau i tondu’ do mantad id walai dau. ² Om ondung akawin kawagu do kusai’d suwai i tondu’ do nadaan diri, ³ om iri piyando i kusai’ddi nga’ a’ i’ orohian di tondu’ dot alaid-laid. Om monulis nondo i kusai do surat do kopiadaan om patahakon no dot id tondu’ddi, om uyungon nondo dau i tondu’ do mantad id walai dau. Ko’ amu’ no iyo’ddi, om apatai doti’ i sawo di tondu’ di koduwo. ⁴ Nga’ poingkuro nopo ot osiliu, nga’ a’ no koino-ino i sawo di tondu’ dot id gulu do mangawin kawagu di tondu’ddi; tu’ mositi’ no do sorohon di kusai do nososomu’ i tondu’ddi. Ondung kowinon kawagu di sawo di tondu’ dot id gulu i tondu’ddi, om iti no o karaatan kopio do TUHAN. Kada’ kou nogi’ kopio pomonsoi do dusa dot iyo kopio’ddi karaat do hilo’d pomogunan di patahakon do TUHAN, i Kinorohingan dokoyu, dot id dokoyu,’’ ka dau. ⁵ Om boros ka kawagu di Musa, ’’Kusai nopo di wagu po kakawin, om a’ i’ koino-ino dot onuon do sumiliu’d soudor ko’ posuangon do nunu nopo o karaja’ di pogiuhupan do kumaraja’; a’ i’ iyau koino-ino do lohowon do momonsoi do karaja’ddi do solinaid do sontoun, om koundorong i’ iyau do hiri’d walai dau om milo indo do popotood di sawo dau. ⁶ Soira’ nopo do popoolos kou do nunu nopo dot id isai nopo o tulun, om kada’ dokoyu ngoyo’ i watu di pongisar dau di gandum dau do maan do pasandaon. Tu’ aahawan nondo i sompiiyon dau di koburu-buruon diyolo’ do poposodia’ do taakanon, i koposi-posion diyolo’. ⁷ Isai nopo o mongoi panangkap do sompi’ ko’ tulun dot Israil do silihon do turipon dau ko’ padagangon po dau dot id ponguripanan om mositi’ no do hukuman do kapatayon o tulun diri. Om iyo nodti o ralan do mongidu’ do karaaton diri. ⁸ Soira’ nopo do haro o toruol dit araat kopio dot id kulit dokoyu, om wonsoyon no kopio o miontok di ponuhuan di tongoimam do mantad id payat do Liwi; wonsoyon no dokoyu it apatut do wonsoyon do miontok di pinosunud ku dot id diyolo’. ⁹ Soroho’ no dokoyu i winonsoi do TUHAN, i Kinorohingan dokoyu, dot id di Miriam do tontok di nokosoliwan kou no do mantad hilo’d Masir. ¹⁰ Soira’ nopo do poolos kou do nunu nopo dot id iso’ o tulun, om kada’ kou ongoi suang di walai dau do mongoi panganu di rasuk dau di pasandaon mantad dau; ¹¹ mandad kou nopo do hiri’d soliwan om pologoson nopo i tulun diri do mongoi papatahak di rasuk dau dot id dokoyu. ¹² Ondung tulun iyau do mosikin, om kada’ dokoyu poopio’ i rasuk dau’ddi do gisom dot osuaban; ¹³ popiguli-gulion no dokoyu i rasuk diri do monikid sosodopon, om haro i’ o rasuk dau do modop. Om ounsikou indo iyau om asanangan o TUHAN, i Kinorohingan dokoyu, dokoyu. ¹⁴ Kada’ kou ponipu’ do susuhuon di mosikin om it aiso’ o pokukurayan, do tulun tuu dot Israil ko’ bansa’d suwai di poingiyon dot id bandar dokoyu. ¹⁵ Godsian kasai’ no dokoyu iyau do monikid tadau do gontok di karaja’ dau do tadau’ddi, dot a’ po otonob o tadau; tu’ momoguna’ i’ kopio iyau di tusin, om piimanan no dau dot aanu dau iri. Ondung a’ dokoyu iyau godsian, om momolohou nondo iyau do TUHAN do papasala’ dokoyu, om iyokoyu nondo o pasalaon tu’ nokowonsoi kou i’ do dusa. ¹⁶ A’ i’ koino-ino do hukuman do kapatayon i molohing dot i kasalaan do nowonsoi di tangaanak dau o kapamatayan; om tangaanak nga’ a’ i’ koino-ino do hukuman do kapatayon dot i kasalaan di molohing diyolo’ o kapamatayan; pointikid-tikid do tulun om milo nopod hukuman do kapatayon om iri dau’d kasalaan o kopomohukuman. ¹⁷ Kada’ dokoyu ahawai dit apatut dot aanu diyolo’ i tulun do bansa’d suwai om i tangaanak dot aiso’ o molohing; kada’ dokoyu onuo’ i rasuk do tondu’ do nopuadan do maan do pasandaon do nokoutang piya iyau dot id dokoyu. ¹⁸ Hondomo’ no dokoyu dot iyokoyu nga’ turipon i’ do hilo’d Masir di gulu po om TUHAN i’, i Kinorohingan dokoyu o pinoposoliwan dokoyu do mantad hilo’; om iri no o kinapatahakan ku dokoyu dot oturan diti. ¹⁹ Tontok nopo do timungon dokoyu i tomot dokoyu, om haro nondo o wookon di gandum di naanu dokoyu dot a’ dokoyu oigitan, om kada’ no dokoyu ngoyo’ gulio’ iri. Pologoson nopori do maan di tulun di bansa’d suwai, om i tangaanak dot aiso’ o molohing, om i tongoondu’ do nopuadan, om barakatan kou indo do TUHAN, i Kinorohingan dokoyu, do nunu nopo o wonsoyon dokoyu. ²⁰ Noongoi nopo dokoyu koupu’ i tua’ do saitun, om kada’ kou no guli’ do mongoi pongupu’ di nongoolu’; tu’ iri nopo om maan po di tulun do bansa’d suwai, om i tangaanak dot aiso’ o molohing, om i tongoondu’ do nopuadan. ²¹ Noongoi nopo dokoyu koupu’ i tua’ dot anggur dokoyu, om kada’ kou no guli’ kawagu do mongoi pogontong do tua’ do hiri’d guas dit anggur, tu’ iri nopo tua’ dot anggur di noolu’ om maan po di tulun do bansa’d suwai om i tangaanak dot aiso’ o molohing, om i tongoondu’ di nopuadan. ²² Kada’ kopio dokoyu kolihuwai do turipon kou do hilo’d Masir di gulu po; om iri no o kinapatahakan ku dot oturan diti dot id dokoyu.

¹ Ondung haro o duwo o tulun dot Israil do mongoi dot id kut do mongoi pisalasai do hal, om oilaan nondo dot iri nopo tiso’ om aiso’ o sala’ om iri no tiso’ om kisala’. ² Ondung loposon o pomohukum di tulun di kisala’, om mositi’ no do suhuon di gompomutus i tulun diri do tuminggoub om loposon nogindo. Om songkuro nopo o kawagato’ do kasalaan do nowonsoi dau, om irad noddi o kosoruo’ do pamalapos. ³ Nga’ a’ i’ koino-ino dot lobi’ ko’ ingapat nohopod loposo’. Tu’ asaru’ nopo ko’ iri, om iyo pod intingayamon kopio o tulun diri dot id toguang do tulun dot ogumu’. ⁴ Kada’ dokoyu kakangai o kabang do sapi’ di maso do mongulok do gandum do potobilang di tua’ do mantad id rawo,’’ ka dau. ⁵ Om boros ka kawagu di Musa, ’’Ondung haro o duwo o kusai do miobpinai do poingiyon dot id iso’ o kinoiyonon, om apatai nondo ot iso’ diyolo’. Om aiso’ po o tanak dau’d kusai, om iri nopondo sawo dau om a’ i’ koino-ino do kowinon do tulun dit okon ko’ id suang do sompiiyon di sawo mantad dau. Apatut nopo do mangawin di tondu’ddi om i tobpinai di sawo di tondu’. ⁶ Om iri nopondo tanak diyolo’ do kusai dit id gulu kosusu om sorohon i’ do tanak di tulun di napatai, om haro i’ o sinakagon do tulun diri dot id pogialatan do tulun dot Israil. ⁷ Nga’ ondung a’ i’ tulun diri mangawin di sawo daa di tobpinai dau di napatai, om mositi’ no do mongoi i tondu’ solowot di tongoboyoon do bandar om moro-boros nondo do poingkaa, ’A’ i tobpinai di sawo ku momonsoi di tonggungan dau do manahak do sinakagon di tobpinai dau dot id pogialatan do tulun dot Israil,’ ka. ⁸ Om mositi’ nod lohowon di tongoboyoon do bandar i kusai’ddi om moro-boros iyolo’ dot id dau. Ondung mada’ kasai’ i kusai’ddi do momonsoi di tonggungan dau, ⁹ om mositi’ no do ngoyon di sawo di tobpinai dau insamakai i kusai’ddi dot id toguang di tongoboyoon di bandar, om ngoyon dau iduwo’ o kasut di kusai, om dulaan nogindo o rabas di kusai, om moro-boros do poingkaa, ’Iyo nodti o wonsoyon dot id tulun dit a’ manahak do sinakagon dot id tobpinai dau,’ ka. ¹⁰ Om sompiiyon nopondo di kusai’ddi om roitan do ’sompiiyon do tulun di nongoi iduwo’ o kasut’ do hilo’d Israil,’’ ka dau. ¹¹ Om boros ka kawagu di Musa, ’’Ondung haro o duwo kusai do miumang, om mumbal nondo i sawo di tiso’ do kusai’ddi do mongoi ponguhup di sawo dau tu’ ngoyon dau songgolo’ o wayaan do sobu di ponokiumang di sawo dau, ¹² om potodon nopo o longon di tondu’ddi, om kada’ no iyau insianai. ¹³ - ¹⁴ Kada’ ponipu’, do mamakai do ponimbang om pagadang dit a’ koontok o ralan do monipu’. ¹⁵ Mamakai no di ponimbang om pagadang di koontok om otogui kou i’ do poingiyon do hiri’d pomogunan di patahakon do TUHAN i Kinorohingan dokoyu dot id dokoyu. ¹⁶ Araatan i’ kopio o TUHAN i Kinorohingan dokoyu, do tulun di monipu’,’’ ka dau. ¹⁷ Om boros ka kawagu di Musa, ’’Sorohon no dokoyu i winonsoi do tulun dot Amalik do tontok di hilo’ kou id tanga’d ralan di kososoliwan dokoyu do mantad hilo’d Masir. ¹⁸ A’ i’ iyolo’ oronok do Kinorohingan, om hiri iyolo’d tohuri do minongoi panangod dokoyu do tontok dit ohuyan kou no om a’ kou no kogoos. Om patayo’ ngai’ noddi diyolo’ i tulun dokoyu di hiri’d tohuri, i tulun dit a’ no angkapanau. ¹⁹ Iyo nopoddi, om katahak nopondo do TUHAN, i Kinorohingan dokoyu, o pomogunan diri dot id dokoyu, om aiso’ o ligogon dokoyu do mantad id pisangod di poingiyon dot id posorili’ dokoyu, om mositi’ no do patayon ngai’ dokoyu i tulun dot Amalik om gisom dot a’ nondo iyolo’ ahandaman. Soro-sorohon no kopio dokoyu iti!’’ ka dau.

¹ Om boros ka kawagu di Musa, ’’Soira’ nopondo do korikot kou do hilo’d pomogunan di patahakon do TUHAN, i Kinorohingan dokoyu, dot id dokoyu, om kopomogun-mogun kou’d hilo’, ² om mositi’ no do sompori-pori kou nopo do posuang dot id balatak do bahagi’ di koiso’ do mantad id pointikid-tikid do tua’ di totonomon di nomot dokoyu, om pootodon nondo dot id tiyonon do sumambayang di natantu’ mantad. ³ Mongoi kou no solowot dit imam di maso do maganu-anu do tontok diri om poboroson no dot id dau o poingkaa, ’Dinondo no do pointalangon ku dot id TUHAN, i Kinorohingan ku do nokosuang oku no di pomogunan di pinabatos dau dot id komolohingan toko’ do patahakon dot id dati’,’ ka. ⁴ Om romiton nondo dit imam i balatak di poingigit dokoyu om poilihon nondo dau do hiri’d dotimbabaan di pananaraban do porsombahan dot id TUHAN, i Kinorohingan dokoyu. ⁵ Om poboroson nondo dokoyu o boros do miagal diti dot id toguang do TUHAN, ’Oi TUHAN, taki ku nopo om bansa’ dot Aram di mombo-hombo. Om angatai no dau i sompiiyon dau do mongoi do hilo’d Masir do mongoi iyon-iyon do hilo’. Tontok di minongoi i’ iyolo’d hilo’, om okuuri’ iyolo’, nga’ kosiliu noddi iyolo’ do bansa’ dit agayo om okoris. ⁶ Om orongit tomod i tulun do Masir dot id dahai om sinansagan iyahai diyolo’ do kumaraja’ do miagal do turipon. ⁷ Om pillohou noddi iyahai do mokitulung diya’, oi TUHAN, i Kinorohingan di taki-aki dahai. Om norongou nu i’ i lolohou dahai om nokito nu i koinggoritan, om kosusaan, om koudipono’ dahai. ⁸ Om pinosoliwan nu i’ iyahai do mantad hilo’d Masir dot i sinundu om kokorisan nu dit agayo kopio o pinoposoliwan nu dahai. Om minomonsoi ko do piro-piro o koimayaan om kosuayan, om minomonsoi ko do piro-piro i minomorolosi kopio do pisangod. ⁹ Om pootodo’ nu noddi iyahai do hiti, om patahako’ nu no dahai iti pomogunan di kaya’ om it oluhub o tana’. ¹⁰ Om iri noddi o kapatahakan ku diti bahagi’ do koiso’ do mantad id tomot di pinatahak nu dot id doho’, oi TUHAN,’ ka. Om iyo noddi o papatahak dokoyu di balatak diri dot id TUHAN. Om owonsoi pondo dokoyu o miagal diri om sumambayang kou nogindo dot id dau do hiri. ¹¹ Om mongunsikou kou no do koinsanai dit ongosonong do nakatahak do TUHAN, i Kinorohingan dokoyu, dot id dokoyu om id sompiiyon dokoyu. Om angatan no i tulun do Liwi om i tulun di bansa’d suwai di poingiyon dot id pogialatan dokoyu do mamung dokoyu dot id karamayan diri. ¹² Pointikid-tikid do kotolu’d toun, om mositi’ no do patahakon dokoyu i porsombahan dokoyu di sompihopod, iri no i sompihopod di tomot dokoyu. Onuan nopo dokoyu’ddi om it imam di mantad id payat do Liwi, om i tulun di bansa’d suwai, om i tangaanak dit aiso’ o molohing om i tongoondu’ di nopuadan, om haro indo o taakanon dot aanu diyolo’ do mantad id pointikid-tikid do bandar. Om owonsoi nopondo dokoyu o miagal diri, ¹³ om moro-boros kou no dot id TUHAN do poingkaa, ’Aiso’ no ot ongokuri’ piya di sompihopod do tua’ do totonomon do nokoolu’ do hilo’d walai ku, it apatut do patahakon dot id diya’, oi TUHAN; nakatahak ngai’ ku nori dot id tulun do Liwi, om id tulun di bansa’d suwai, om id tangaanak dit aiso’ o molohing om id tongoondu’ di nopuadan, do miagal di pinonuhuan do TUHAN dot id doho’. Om iso’ po di ponuhuan do TUHAN do pasal di porsombahan di sompihopod nga’ aiso’ i’ o notolibambanan ku. ¹⁴ Om aiso’ i’ ot ongokooro’ piya di porsombahan do sompihopod diri do nakan ku do tontok di mogihad oku do tulun do napatai; ko’ pinosoliwan ku po di walai ku do tontok di maso ku do sosomu’ dot id pagantangan do tugama’, ko’ numaan ku do podsurung di tulun do napatai. Otorodok oku i’ do minumboyo’ diya’, oi TUHAN, tu’ nowonsoi ngai’ ku i’ i pinonuhuan nu do pasal do porsombahan di sompihopod. ¹⁵ Om ontong no om barakatan no ot Israil, i tulun nu, do mantad hino’d kinoiyonon nu dit olidang, do hino’d surga; om barakatai noti pomogunan di kaya’ om it oluhub di pinatahak nu dot id dahai, do tumanud di batos nu dot id taki-aki dahai,’ kantondo dau,’’ kad i Musa. ¹⁶ Om boros ka kawagu di Musa, ’’Tadau nod baino’ do suhuon kou’d TUHAN, i Kinorohingan dokoyu do mumboyo’ do koinsanai dit oturan dau; om tumorodok kou no do tumanud diri do mikuwo’d aayi-ayi’ o ginawo dokoyu. ¹⁷ Tadau nod baino’ do nakun dokoyu o TUHAN do sumiliu’d Kinorohingan dokoyu. Om minamatos kou do mumboyo’ do boros dau om momonsoi do koinsanai dit oturan om ponuhuan dau. ¹⁸ Om tadau nod baino’ do rinamit kou do TUHAN do sumiliu’d tulun dau do miagal di pinabatos dau dot id dokoyu, om sinuhu’ kou dau do tumanud do koinsanai dit oturan dau. ¹⁹ Om silihon kou nondo dau do bansa’ dit agayo ko’ mantad do bansa’ do suwai di winonsoi dau, om royohon kou nondo om pusohon Om osiliu kou nondo do tulun do songonuon do TUHAN, do miagal di nakabatos dau,’’ ka dau.

¹ Om polombuso’ noddi di Musa om i piro-piro o boyoon dot Israil dot id bansa’ddi o boros do poingkaa, ’’Tonudon no dokoyu o koinsanai diti ponuhuan di pinoboros ku di tadau baino’. ² Tontok nopondo do tadau di sumoborong kou di Bawang do Yordan do rumikot do hilo’d pomogunan di patahakon do TUHAN, i Kinorohingan dokoyu, dot id dokoyu, om poudong kou no do piro-piro o watu dit angagayo om saaton nori dot opurak. ³ Om potulison no dot id watu’ddi o pointikid-tikid di boros dot oturan diri. Om korikot kou nopondo do hilo’d pomogunan di kaya’ om it oluhub o tana’, i pinabatos do TUHAN, i Kinorohingan di tukuon di taki-aki dokoyu, ⁴ om di kosoborong kou di Bawang do Yordan, om mositi’ nod mongoi kou do hiri’d Nuluhon dot Ibal. Om id timpak nod nuluhon diri o poudangan dokoyu di watu, om panaatan di watu’ddi do miagal di pinonuhuan ku dokoyu di tadau baino’. ⁵ Om hiri nod kinoiyonon diri o pamansayan dokoyu dot iso’ o pananaraban do porsombahan, do wonsoyon nopo om i watu dit a’ i’ noumbalan do mamabak do pakakas do basi’ o pinamabak. ⁶ Tu’ pointikid-tikid do pananaraban do porsombahan di wonsoyon do maan do don TUHAN, i Kinorohingan dokoyu, om mositi’ nod watu dit a’ binabak o maan do wonsoyon. Om id sakai no di pananaraban do porsombahan diri o patahakan dokoyu di porsombahan do sorobon. ⁷ Om patahakon nogi’ i porsombahan do piuludan om makan kou no dot id kinoiyonon diri om kumotood kou no dot id toguang do TUHAN, i Kinorohingan dokoyu. ⁸ Om tarangon no dokoyu o ponunulis do pointikid-tikid di boros dot oturan do Kinorohingan do hiri’d piro-piro o watu di sinaat dot opurak diri,’’ kad i Musa. ⁹ Om boros kaddi di Musa om i piro-piro ot imam do mantad id payat do Liwi dot id koinsanai di tulun dot Israil, ’’Kada’ kou kohiyo, oi tulun dot Israil, pokinongou kou no kopio! Tadau nod baino’ do nosiliu kou do tulun do songonuon do TUHAN, i Kinorohingan dokoyu. ¹⁰ Iyo nopoddi om umboyo’ kou nod boros do TUHAN om tonudon no o koinsanai dit oturan dau, i pinoboros ku dot id dokoyu di tadau baino’,’’ ka diyolo’. ¹¹ Om boros kaddi di Musa dot id bansa’ dot Israil, ¹² ’’Kosoborong kou nopondo di Bawang do Yordan, om mositi’ no do mingkakat ot id timpak di Nuluhon do Gorisim i payat di Simion, om Liwi, om Yohuda, om Isakar, Yusup, om Binyamin, do tontok do poboroson i boros do pamarakat do bansa’ diti. ¹³ Om tontok nopondo do poboroson i boros do pomopol om mositi’ no do mingkakat do hilo’d timpak do Nuluhon dot Ibal i payat do Rubin, om Gad, om Asor, om Sibulon, om Naptali. ¹⁴ Om poboroson nondo di tulun do Liwi dot opuhod o boros diti, om sumimbar nondo i tulun dot Israil dot, ’Amin,’ ka. ¹⁵ Poboroson nopo di tulun do Liwi om poingkaa, ’Ousung po i tulun di momonsoi do tininganak do watu, om kayu ko’ basi o wonsoyon, om i momolisok-lisok do tumuku’ dot id tininganak diri; tu’ araatan i’ kopio o TUHAN do tulun di tumuku’ dot id tingolig!’ ka. Om posimbaron nopo do koinsanai di tulun om, ’Amin!’ ka. ¹⁶ ’Ousung po i tulun dit a’ momusou do molohing dau om i popologos tomod diyolo’!’ ka. ’Amin!’ ka. ¹⁷ ’Ousung po i tulun di popoundaliu do wolit di tana’ do songkoduwo dau!’ ka. ’Amin!’ ka. ¹⁸ ’Ousung po i tulun di mamalid do tulun do bolou,’ ka. ’Amin!’ ka. ¹⁹ ’Ousung po i tulun di magahau dit apatut dot aanu do tulun di bansa’d suwai, om i tangaanak dit aiso’ o molohing om i tongoondu’ di nopuadan,’ ka. ’Amin!’ ka. ²⁰ ’Ousung po i tulun di mongindaraat do tapa’ dau tu’ mongoi iyau dudun dot iso’ di sawo di tapa dau,’ ka. ’Amin!’ ka. ²¹ ’Ousung po i tulun di monokisabu do nintorusan,’ ka. ’Amin!’ ka. ²² ’Ousung po i tulun di mongoi dudun di tobpinai dau’d tondu’ di toput dau’d pusod, ko’ iri tobpinai dau’d tondu’ dit iso-iso’ no tapa’ ko’ iso-iso’ o tina’,’ ka. ’Amin!’ ka. ²³ ’Ousung po i tulun di mongoi dudun di tiwanon dau’d tondu’,’ ka. ’Amin!’ ka. ²⁴ ’Ousung po i tulun di momolisok-lisok do mamatai’d tulun,’ ka. ’Amin!’ ka. ²⁵ ’Ousung po i tulun di rumamit do tusin do ponisip do pamatai do tulun dit aiso’ o sala’,’ ka. ’Amin!’ ka. ²⁶ ’Ousung po i tulun dit a’ mumboyo’ ngai’ dit oturan om ponudukan do Kinorohingan,’ ka. ’Amin!’ ka,’’ ka dau.

¹ Om boros ka kawagu di Musa, ’’Ondung mumboyo’ kou’d TUHAN, i Kinorohingan dokoyu, om otorodok kou do momonsoi do koinsanai di ponuhuan dau di pinoboros ku dot id dokoyu di tadau baino’, om silihon kou nod TUHAN do bansa’ dit abantug kopio do hiti’d pomogunan. ² Umboyo’ kou nod TUHAN, i Kinorohingan dokoyu, om katahak ngai’ indo dot id dokoyu o barakat diti: ³ Barakatan indod TUHAN i kabandaran om i koumaan dokoyu. ⁴ Barakatan indod TUHAN, gisom dot ogumu’ o tangaanak dokoyu, om ogumu’ o tomot dokoyu, om gumumu’ o sapi’ om dumba’ dokoyu. ⁵ Barakatan indod TUHAN i tua’ do gandum dokoyu om i taakanon di wonsoyon dokoyu do mantad id gandum. ⁶ Barakatan indod TUHAN o koinsanai do karaja’ dokoyu. ⁷ Om alaon indod TUHAN i piro-piro o pisangod dokoyu do tontok do ngoyon kou diyolo’ songodo’. Poundaron tomod daa diyolo’ o ralan diyolo’ do manangod, nga’ a’ nopondo oila-ilaan o kotongkus-tongkuso’ diyolo’ do mogidu’. ⁸ Barakatan indod TUHAN, i Kinorohingan dokoyu, i karaja’ dokoyu om suangan dau do gandum i sulap dokoyu. Om barakatan kou indo dau do hilo’d pomogunan di patahakon dau dot id dokoyu. ⁹ Ondung mumboyo’ kou’d TUHAN, i Kinorohingan dokoyu, om wonsoyon dokoyu o koinsanai di ponuhuan dau, om silihon kou nondo dau do tulun di songonuon dau do miagal di nakabatos dau. ¹⁰ Om kokito ngai’ indo o bansa’ do hiti’d pomogunan dot iyokoyu no o bansa’ di nopili’ do TUHAN, om poddosi kou nondo diyolo’. ¹¹ Om puhawangan kou nondod TUHAN do tanak dot ogumu’. Om ogumu’ nondo o tayam-tayam dokoyu om ogumu’ o tomot dokoyu do hilo’d pomogunan di pinabatos do TUHAN dot id taki-aki dokoyu, do patahakon dot id dokoyu. ¹² Om porikot indo o TUHAN do rasam do tontok di dong kararasaman, i rasam do mantad id pinoiyanan do rasam dit osima’ do hilo’d tawan. Om barakatan indo dau o koinsanai di karaja’ dokoyu, gisom do milo kou do popoolos dot id ogumu’ o bansa’, nga’ iyokoyu nopo om a’ i’ minog do molos do mantad id isai nopo. ¹³ Om silihon kou nondod TUHAN, i Kinorohingan dokoyu, do boyoon dot id pogialatan do bansa’, om okon kou i’ ko’ tumatanud no toomod. Ondung otorodok kou do tumanud do koinsanai di ponuhuan do TUHAN di pinoboros ku dot id dokoyu di tadau baino’, om muhang-ruhang nopondo o kosimbayano’ dokoyu, om a’ kou koumbal do lumuhoi. ¹⁴ Kada’ no kopio dokoyu surilogo’ i ponuhuan diri do poingkuro nopo o kowoyoon do sumurilog. Om kada’ kou nogi’ kopio tuku’ om kada’ kou podsubak do ponokokinorohingan do suwai,’’ kad i Musa. ¹⁵ Om boros ka kawagu di Musa, ’’Nga’ ondung a’ kou mumboyo’ do TUHAN, i Kinorohingan dokoyu, om a’ kou otorodok do momonsoi do koinsanai di ponuhuan om it oturan dau di pinoboros ku dot id dokoyu di tadau baino’, om oontok kou no do koinsanai do popol diti: ¹⁶ Ousung ngai’ po i bandar om i koumaan dokoyu. ¹⁷ Ousung po i tua’ di gandum dokoyu om i taakanon di wonsoyon dokoyu do mantad id gandum. ¹⁸ Ousung kou po, gisom dot okuuri’ndo o tangaanak dokoyu, om okuri’ o tomot om sapi’ om dumba’ dokoyu. ¹⁹ Ousung po o koinsanai di karaja’ dokoyu. ²⁰ Ondung momonsoi kou dot araat om magada’ kou’d TUHAN, om porikot indo iyau do karaagon dit agayo kopio, om kagangahan, om kosusaan dot id suang do nunu nopo o wonsoyon dokoyu om oruhai pondo om punsoon kou no. ²¹ Om mogisuhut-suhut nopondo o toruol do koontok dokoyu, gisom dot aiso’ nondo o songulun piya dokoyu dot oolu’ do momogun-mogun do hilo’d pomogunan di potiongoyon no dokoyu pomogun-mogunai. ²² Om hukuman kou nondod TUHAN do toruol-ruol di mogkoroliu, om i lumonit om sogiton. Om pagadahon dau om poporikot iyau do tongus dit alasu’, gisom dot angaraag o tomoton dokoyu. Om managalai nopondo o karaagan diti do rumikot dot id dokoyu, do gisom i’ dot angapatai kou. ²³ Om aiso’ nondo o rasam, om iyo pondod watu kokodou ilo tana’ dokoyu. ²⁴ Om okon nogindo ko’ rasam o porikoton do TUHAN suwai ko’ tongus do mitonggoi do soliohuk om togis do gisom i’ dot angapatai ngai’ kou. ²⁵ Ondung a’ kou mumboyo’ do TUHAN, i Kinorohingan dokoyu, om pologoson kou’ndo dau dot aala’ di piro-piro o pisangod dokoyu. Om poingundar piya o karalan-ralano’ dokoyu do mongoi sangod, nga’ a’ nopondo oila-ilaan o kotongkus-tongkuso’ dokoyu do mogidu’. Om ongooris ngai’ nopondo o bansa’ do hiti’d pomogunan do kokito di kosusaan dokoyu. ²⁶ Om apatai kou nopondo om osiliu po do taakanon do tombolog om nintorusan dit orongit o rata’ dokoyu, om aiso’ i’ o tongosongulun piya do monguyung di nintorusan diri. ²⁷ Om hukuman kou nondod TUHAN do kupos do miagal do gandas om gurap dit akatol o tinan dokoyu om aiso’ no o koubat diri. ²⁸ Om ulahon kou nondod TUHAN, om bolohon kou om borulongon kou. ²⁹ Om pitangaadau piya’ndo nga’ mikarahawor kou i’ do miagal di tulun do bolou, nga’ a’ kou i’ kobontol do ralan. Om aiso’ nopondo o koundar do wonsoyon dokoyu. Om managalai-galai kou nopondo dot ulak-ulakan om panakahan, om aiso’ no o tiso’ piya’d tulun do monguhup dokoyu. ³⁰ Ondung a’ kou mumboyo’ do TUHAN, i Kinorohingan dokoyu, om iti ngai’ no o koontok dot id dokoyu. Kotunang kou no daa dot id iso’ o tondu’ nga’ tulun id suwai o kakawin di tunang dokoyu. Momonsoi kou no daa do walai nga’ a’ kou i’ koiyon do hiri. Om mananom kou no daa dot anggur nga’ a’ kou i’ kaakan do tua’ dit anggur. ³¹ Om montong-ontong kou i’ do sumbolion i sapi’ dokoyu nga’ a’ kou indo kaakan do tonsi di sapi’ddi. Om montong-ontong kou do ngoyon tanggayai do mogidu’ i kaladai dokoyu, om a’ nori koguli’ kawagu. Om patahakon nondo dot id piro-piro o pisangod dokoyu i dumba’ dokoyu, om aiso’ i’ o monulung dokoyu. ³² Om montong-ontong kou do patahakon dot id sompogunan i tangaanak dokoyu do silihon do turipon. Om opodi’ poo o mato dokoyu do mogihum di tangaanak dokoyu do monikid do tadau, nga’ aiso’ no ot okito dokoyu tu’ a’ no iyolo’ koguli’ kawagu. ³³ Om sompogunan indo o kaanu do koinsanai di tua’ do totonomon dokoyu, i pininghuyanan dokoyu do minomogompi’, nga’ iyokoyu nopondo om aiso’ i’ ot aanu-anu suwai ko’ pongulok-ulok noo om kororongit o managalai-galai dot aanu dokoyu. ³⁴ Om oulau kou nondo di koinggoritan dit opurimanan dokoyu do miagal diri. ³⁵ Om tongkopon nopondod TUHAN o gakod dokoyu do gandas dit oruol om it a’ milo do lingoson; om otongkop nopondod kupos o mantad id gakod om gisom do korikot dot id tulu dokoyu. ³⁶ Ondung a’ kou mumboyo’ do TUHAN, i Kinorohingan dokoyu, om pokoyoon kou nondod TUHAN, om i raja’ dokoyu dot id pomogunan do suwai, dit a’ dokoyu noongoi’d gulu, om it a’ di taki-aki dokoyu noongoi. Om hilo’ kou nondo do modsubak do ponokokinorohingan di kayu om watu do winonsoi. ³⁷ Om hilo’ nopondod piro-piro o pomogunan di potompiasan do TUHAN dokoyu, om kotigowo nondo o tulun do kokito dokoyu; om hingi-hingion kou nondo om irak-irakan kou diyolo’. ³⁸ Ogumu’ i’ daa o linsou do potonomon dokoyu nga’ okuri’ indo o hasil dot aanu dokoyu tu’ aayi’ i’ dot aakan do katat i totonomon dokoyu’ddi. ³⁹ Mananom kou no daa’ndo dot anggur om pigompian dokoyu iri, nga’ a’ kou i’ kopongupu’ do tua’ dit anggur om a’ kou koinum di waig dot anggur, tu’ aayi’ indo dot aakan do giuk i guas dit anggur. ⁴⁰ Om sinunian ngai’ nopo daa do saitun ot id pointongkop di pomogunan dokoyu, nga’ lumopuk ngai’ indo i tua’ di saitun gisom dot a’ kou i’ kaanu do tumau do mantad id tua’ di saitun. ⁴¹ Kianak kou daa’ndo do tongokusai om tongoondu’ nga’ atangkap indo iyolo’ do pisangod do tontok do pisangadan, om aiso’ indo o tangaanak dokoyu. ⁴² Om aayi’ nopondo dot aakan do mangakan-ngakan i tua-ua’ om i totonomon dokoyu. ⁴³ Om muhang-ruhang nopondo o kuasa’ di tulun do bansa’d suwai, i poundorong dot id pomogunan dokoyu, nga’ muhoi-luhoi nopondo o dokoyu’d kuasa’. ⁴⁴ Iyolo’ nopo om kiusin i’ do paalasan dot id dokoyu, nga’ iyokoyu nopo om aiso’ i’ o nunu-nunu do paalasan dot id diyolo’. Om alaid nondo om iyolo’ no o momorinta’ dokoyu. ⁴⁵ Om korikot ngai’ nopondo i kosusaan diri dot id dokoyu, om managalai nopondo iri do mamagangau dokoyu do gisom dot apatai kou, tu’ a’ kou i’ minumboyo’ do TUHAN, i Kinorohingan dokoyu, om a’ kou tuminanud dit oturan di pinatahak dau dot id dokoyu. ⁴⁶ Om iri ngai’ no kosusaan diri o kointalangan kopio do hukuman do TUHAN dot id dokoyu om id sinakagon dokoyu do gisom dot alaid. ⁴⁷ Nabarakatan kou nod TUHAN dot id suang do koinsanai’d nunu nopo, nga’ a’ kou i’ orohian do sumambayang dot id dau do mikuwo’d ginawo dit otood om iso- iso’ kopio o ginawo. ⁴⁸ Iyo nopoddi om mositi’ no do sumiliu kou do susuhuon di piro-piro o pisangod di porikoton do TUHAN do mongoi panangod dokoyu. Om louson kou nondo om tuuhan, om poillabas om aiso’ ngai’ o nunu nopo. Om awagat tomod nondo o ponginggorit do TUHAN dokoyu do gisom dot angapatai kou. ⁴⁹ Om haro nondo o tiso’ o bansa’ dit a’ dokoyu osuhutan o boros do porikoton do TUHAN do mantad id tisan diti pomogunan do mongoi panangod dokoyu. Om iyo pondo iyolo’d kondiu do mongoi ponimbit dokoyu. ⁵⁰ Iyolo’ nopo om ongorongit kopio om a’ monginsian dot isai nopo, dot iri tuu i molohing no ko’ iri po it omulok po. ⁵¹ Om oiyon nopondo diyolo’ i tayam-tayam om i tomot dokoyu. Aiso’ no ot ongokuri’ piya do pooluon diyolo’ di gandum, om waig dot anggur, om tumau do saitun, om sapi’, om kambing om dumba’ dokoyu; gisom dot angapatai kou nondo dot olikapan. ⁵² Om songodon nondo diyolo’ o pointikid-tikid do bandar do hilo’d pomogunan di patahakon do TUHAN, i Kinorohingan dokoyu, dot id dokoyu. Om angahaba’ ngai’ nopondo i tolig di bandar dit angakawas om i ninggiratan om i sondihon daa dokoyu. ⁵³ Om daamot nopondo di piro-piro o pisangod dokoyu do monurungku’ di kabandaran dokoyu, om aiso’ nondo o pokukurayan dokoyu dot ololousanan kou gisom dot iri piya’ndo i tangaanak dokoyu nga’ kanon i’ dokoyu, i tangaanak di pinopuhawang do TUHAN, i Kinorohingan dokoyu, dot id dokoyu. ⁵⁴ - ⁵⁵ Om iri piya i sinakagon do raja’ dit otulid kopio daa o ginawo nga’ aiso’ nondo o pokukurayan do solinaid do turungkuon do pisangod, gisom do kanon nopo dau o piro-piro di tangaanak dau tu’ aiso’ no o takanon do suwai. Om aiso’ i’ ot ongokoro’ piya dot akanon dau’ddi do patahakon dau dot id tobpinai dau ko’ id sawo dau di kosianan kopio dau ko’ id tangaanak dau di maso do poimpasi. ⁵⁶ - ⁵⁷ Om iri piya tondu’ do sinakagon do raja’ dit otulid kopio daa o ginawo om i kaya’ tomod gisom dot a’ i’ daa nokoumbal do mamanau’d gakod do mongoi’d honggo nopo nga’ momonsoi i’ do miagal diri. Tontok nopondo do turungkuon do pisangod i bandar om aiso’ nondo o pokukurayan do tondu’ddi dot ololousanan, gisom do lumisok-lisok nopo iyau do mangakan di tanak dau di kosususu do mitonggoi do pusod di tanak. Om aiso’ i’ ot ongokoro’ piya dit akanon dau’ddi do patahakon dau dot id sawo dau di kosianan dau ko’ patahakon po dot id tangaanak dau. ⁵⁸ Ondung a’ kou otorodok do tumanud do koinsanai dit oturan do TUHAN, i Kinorohingan dokoyu, i nongkotulis dot id buuk diri, om a’ kou momusou do TUHAN, i Kinorohingan dokoyu dit abantug om i koimayaan kopio, ⁵⁹ om porikatan kou nod TUHAN om i sinakagon dokoyu do toruol-ruol dit a’ milo do lingoson om i toruol do mogkoroliu dit a’ milo do tingkodon. ⁶⁰ Om oontok kou nondo di toruol-ruol dit araat kopio, i nongokito dokoyu di hilo’ kou pod Masir om a’ kou nondo olingasan. ⁶¹ Om poporikot po o TUHAN do piro-piro o bansa’d toruol om toruol di mogkoroliu, it a’ noroitan dot id suang do buuk diti, i buuk dot Oturan do TUHAN, om patayon kou nogindo dau. ⁶² Om mulong piya dot ogumu’ kou no daa do miagal po di rombituon do hilo’d tawan kogumu’, nga’ okuri’ nondo ot oolu’ dokoyu do poimpasi tu’ a’ kou i’ minumboyo’ do TUHAN, i Kinorohingan dokoyu. ⁶³ Om poingkuro nopo o TUHAN dot orohian do manahak do kosimbayanan dot id dokoyu om popoinggumu’ dokoyu, om iyo nogiddi o korohiano’ dau do mamatai om momunso dokoyu. Om ouyung kou nondo do mantad id pomogunan di potirikoton no dokoyu. ⁶⁴ Om potompiason kou nondod TUHAN dot id pogialatan do bansa’ do hiti’d pointongkop do pomogunan. Om hilo’ kou nondo do tumuku’ dot id piro-piro o ponokokinorohingan di kayu om watu do winonsoi, i ponokokinorohingan dit a’ dokoyu om a’ di taki-aki dokoyu notutunan do mantad di gulu. ⁶⁵ Aiso’ i’ o kosimbayanan dokoyu do hinonggo-honggo kou piya, om aiso’ o kinoiyonon do milo dokoyu do komoyon do dokoyu’d songonuon, tu’ potongkoboon kou nondod TUHAN gisom dot aiso’ o pokukurayan dokoyu tu’ aiso’ no o pagandasan. ⁶⁶ Om haro kasai’ nopondo o ligogon dokoyu dot id suang do koposi-posion dokoyu. Om monikid tadau nopondo om monikid totuong dot ooris kou om moddosi kou dot apatai. ⁶⁷ Om motod-kotod pondo o kangkab dokoyu dot opopoddosian do kokito do nunu nopo. Dongkosuabon nopo om orohian kou nopo daa dot oruhai’d tumuong, om dongotuong nondo om orohian kou nopo daa dot oruhai do numawau. ⁶⁸ Om poongoyon kou nondo kawagu do TUHAN do hilo’d Masir do kapal do rahat o pasakayan; mulong piya daa do nokoboros no dau dot a’ popoguli’ kawagu dokoyu dot id pomogunan diri, om hilo’ no daa’ndo do tumotos kou do padagang do tinan dokoyu do sumiliu’d turipon dot id pisangod dokoyu, nga’ aiso’ i’ o songulun piya do sipomoli dokoyu,’’ kad i Musa.

¹ Iri ngai’ no i boros dot id suang di tumpongo do pinonuhuan do TUHAN di Musa do popoboros dot id tulun dot Israil do tontok di hilo’ iyolo’ id pomogunan do Muab. Om iri nopo tumpongo’ddi om poruhangon di tumpongo do winonsoi’d TUHAN dot id diyolo’ di hilo’d Nuluhon do Sinai. ² Om suhuo’ noddi di Musa o koinsanai di tulun dot Israil do tumimung, om boro-boros no iyau dot id diyolo’ do poingkaa, ’’Iyokoyu i’ kopio o nokokito di winonsoi’d TUHAN dot id raja’ do Masir om id piro-piro o pagawai dau, om id pomogunan dau. ³ Om nokokito kou nogi’ di kosusaan di korolosi kopio om i kongoimayaan, om i kongopusahan di winonsoi’d TUHAN. ⁴ Nga’ gisom piya do tadau’d baino’ nga’ a’ kou i’ dau pinosuhut ngai’ do komoyon di nongoumbalan dokoyu’ddi. ⁵ Apat nopo nohopod o toun do koloido’d TUHAN do minomoyo’ dokoyu do minaya’ di tana’ do kowotuan, nga’ a’ i’ noromuk o pakayan om kasut dokoyu. ⁶ Aiso’ i’ daa o roti dot akanon dokoyu om aiso’ o waig dot anggur ko’ tiinumon do kaawuk dot inumon dokoyu, nga’ pinatahak ngai’ i’ do TUHAN dot id dokoyu o koinsanai di pokionuon dokoyu om koilo kou i’ dot iyau no o Kinorohingan dokoyu. ⁷ Om tontok di nokorikot toko’ do hiti’d kinoiyonon diti, om ngoyo’ toko’ no daa songodo’ di Raja’ Sihon, i mantad hilo’d Hisbon, om i Raja’ Og, i mantad hilo’d Basan, nga’ naala’ toko’ i’ iyolo’. ⁸ Om kosolod toko’ noddi i tana’ diyolo’ om pobohogio’ toko’ no dot id payat do Rubin om payat do Gad, om id songintanga’ do payat do Manasi. ⁹ Om tumorodok kou no do tumanud do koinsanai di tumpongo’ddi, om koundar kou i’ do nunu nopo o wonsoyon dokoyu. ¹⁰ Om tadau nod baino’ do songingkakat ngai’ kou dot id toguang do TUHAN, i Kinorohingan dokoyu, iyokoyu ngai’ i boyoon om i pagawai, om koinsanai do tongokusai, ¹¹ om tongoondu’, om tangaanak om koinsanai’d tulun di bansa’d suwai di poingiyon dot id rolot dokoyu, i monguhup dokoyu do mongoi pokisiduwon om mongoi sago’. ¹² Om dinondo no do momonsoi o TUHAN do tumpongo dot id dokoyu, om hiti ngai’ kou no do songingkakat do popogirot di tumpongo’ddi om mangakun kou do momonsoi di ponuhuan di tumpongo. ¹³ Om tadau nod baino’ do silihon kopio kou’d TUHAN do bansa’ di songonuon dau, dot i tumpongo’ddi o poposiliu, om iyau no ot osiliu do Kinorohingan dokoyu do miagal di nakabatos dau dot id dokoyu om id taki-aki dokoyu, i Abraham, i Isak om i Yakub. ¹⁴ Om iri nopo tumpongo’ddi om i ponuhuan di tumpongo, om okon nopo ko’ winonsoi do TUHAN dot id dokoyu noo, ¹⁵ suwai ko’ winonsoi nogi’ dau dot id pointikid-tikid do tulun di songingkakat do hiti’d toguang dau do tadau baino’, om id piro-piro o sinakagon toko’ do koimbagu,’’ ka dau. ¹⁶ Om boros ka kawagu di Musa, ’’Ahandaman po dokoyu i kinowoyo-woyoo’ toko’ di hilo’d Masir om okuro-kuro o nopurimanan toko’ do nokopingwaya’ do pomogunan di piro-piro o bansa’d suwai. ¹⁷ Om nokokito kou di piro-piro o tingolig di kososomu’ kopio do tukuon diyolo’; i tingolig di kayu om watu, om pirok om tamas do winonsoi. ¹⁸ Iyo nopoddi, om antaan-taan no kopio dokoyu om aiso’ i’ o tongosongulun piya dot id pogialatan dokoyu, do kusai tuu ko’ tondu’, om sompiiyon tuu ko’ payat, di songingkakat do hiti, do tumongkiad do TUHAN, i Kinorohingan toko’, om tumuku’ nogindo dot id ponokokinorohingan do bansa’d suwai. Tu’ iri nopo wonsoyon do miagal diri om iyo di gamut di sumuni do sumiliu’d tanom dit opoit om kawanit. ¹⁹ Om id pogialatan nopo dokoyu di songingkakat do hiti, i nongkorongou di ponuhuan dit awagat kopio’ddi, om kada’ no kopio do haro o momusorou dot osonong kasai’ o koposi-posion dau, do momonsoi kasai’ piya iyau di dau’d korohian. Tu’ iri no moti’ o kapatai ngai’ dokoyu, iyokoyu i tulun dot araat om i tulun dit osonong. ²⁰ Tulun nopo do miagal diri om a’ nod TUHAN ompunan. Tu’ oontok no iyau do kototogod do TUHAN dit a’ ogina-gina’, om orotuan iyau do koinsanai di kosusaan dit awagat kopio di nongkotulis dot id suang do buuk diti, do gisom do patayon iyau’d TUHAN. ²¹ Om iyau nondo o silihon do TUHAN do poiyaan dot id koinsanai’d payat dot Israil, om hukuman iyau’d TUHAN di popol di nongoroitan dot id suang do tumpongo di nokotulis dot id suang do buuk diti, i buuk dot Oturan do TUHAN. ²² Koimbagu nopondo, om kokito nondo i sinakagon dokoyu om i piro-piro o bansa’d suwai do mantad id piro-piro o pomogunan di hilo’d sodu’ di kosusaan om koinggoritan do porikoton do TUHAN dot id pomogunan dokoyu. ²³ Om osiliu nondo do tana’ dit a’ sunian i tana’ dokoyu om otongkop do tana’ do kitapui om silaon, om a’ nondo milo do tanaman i tana’ dokoyu, om sakot piya nga’ a’ no sumuni do hiri. Om iri nopo pomogunan dokoyu om iyo pondo di bandar do Sodom om Gomura, om Adma om Siboim, i rinaag do TUHAN do tontok dit a’ no ogina-gina’ o kototogod dau. ²⁴ Om muhot ngai’ nopondo o pointongkop diti pomogunan do poingkaa, ’Nokuro tu’ iyo’ddi o winonsoi’d TUHAN dot id pomogunan diyolo’? Nokuro tu’ iyo kopio’ddi o kototogod dau?’ ka. ²⁵ Om isimbar nopondo om poingkaa, ’Iyo pogi’ddi o winonsoi’d TUHAN nga’ sinurilog diyolo’ i tumpongo do TUHAN, i Kinorohingan di taki-aki diyolo’, i winonsoi dau dot id diyolo’ do tontok di pinosoliwan dau iyolo’ do mantad hilo’d Masir. ²⁶ Minodsubak nogi’ iyolo’ do ponokokinorohingan dit a’ diyolo’ notutun-tutunan do gulu, om oduhan nogi’ daa iyolo’d TUHAN do tumuku’ dot id ponokokinorohingan diri. ²⁷ Om iri no o kinatagadan do TUHAN di tulun dau, om kinoporikatan dau do koinsanai di kosusaan dit awagat kopio di nongkotulis dot id suang do buuk diti. ²⁸ Om kotogod noddi kopio o TUHAN, om uyungo’ nopoddi do TUHAN i tulun dot Israil do mantad id pomogunan diyolo’ tu’ atatagadan no kopio iyau, om pataamo’ noddi dau iyolo’ do hilo’d pomogunan do suwai. Om gowoi poddi om hilo’ iyolo’ do dinondo,’ ka. ²⁹ Haro i’ o piro-piro hal do lisokon do TUHAN, i Kinorohingan toko’; nga’ iri nopo Tourat dau om nokointalang no dau dot id dati’, om mositi’ no do tumorodok toko’ om i piro-piro o sinakagon toko’ do tumanud diri do gisom dot alaid,’’ ka dau.

¹ Om boros ka kawagu di Musa, ’’Pilio’ no dokoyu i korohian dokoyu do dinondo; do barakat tuu ko’ popol po o pilion dokoyu, do miagal di pinoboros ku dot id dokoyu. Om opurimanan ngai’ pondo dokoyu i koinggoritan diri om koiyon kou dot id pogialatan di piro-piro o bansa’d suwai, i potompiasan do TUHAN dokoyu, om ahandaman nogindo dokoyu iti pilion di poboroson ku dot id dokoyu. ² Ondung orohian kou om orohian i piro-piro o sinakagon dokoyu do gumuli’ dot id TUHAN, om iso-iso’ no kopio o ginawo dokoyu do mumboyo’ ngai’ di ponuhuan dau di pinoboros ku dot id dokoyu di tadau baino’, ³ om insianan kou indo do TUHAN, i Kinorohingan dokoyu. Om poulion kou indo dau do mantad id piro-piro o bansa’d tulun di pinotompiasan dau dokoyu, om posimbayanon kawagu kou dau. ⁴ Om mulong piya do kopogitongkiad-kiad kou do pointongkop diti pomogunan nga’ timungon kou indo do TUHAN, i Kinorohingan dokoyu om pogulion kawagu kou dau. ⁵ Om aanu indo dokoyu kawagu i tana’ di pinomogunan di taki-aki dokoyu di gulu po. Om poingurut pondo o kosimbayano’ dokoyu om asapou kou ko’ mantad di komolohingan dokoyu. ⁶ Om onuan kou nondo do TUHAN, i Kinorohingan dokoyu do ginawo dit obintanud, om i sinakagon dokoyu nga’ onuan nogi’ dau do ginawo dit obintanud, gisom dot osianan kou nondo dau do mikuwo’d aayi-ayi’ o ginawo dokoyu, om kopomogun kasai’ kou dot id pomogunan diri. ⁷ Om oinsanan nopondo i popol diri do porotuon dot id piro-piro o pisangod dokoyu dit araatan om i mongulok-ulok dokoyu. ⁸ Om tumorodok kou indo kawagu dot id TUHAN om wonsoyon ngai’ dokoyu i ponuhuan dau di pinoboros ku dot id dokoyu di tadau baino’. ⁹ Om poundaron ngai’ indo do TUHAN o nunu nopo o wonsoyon dokoyu; om ogumu’ indo o tangaanak dokoyu om ogumu’ o tayam-tayam; om a’ indo aayi-ayi’ o tua’ di totonomon dot id koumaan dokoyu. Om asanangan indo o TUHAN do poposimbayan dokoyu do miagal di gulu tu’ nasanangan iyau do pinoposimbayan di komolohingan dokoyu. ¹⁰ Nga’ mositi’ no do mumboyo’ kou dau om tumanud do koinsanai dit oturan di pinotulis dot id buuk diti, i buuk dot Oturan do TUHAN. Om mositi’ no do gumuli’ kou dot id dau do mikuwo’d aayi-ayi’ o ginawo dokoyu. ¹¹ Iti nopo ponuhuan di poboroson ku dot id dokoyu om a’ i’ adalaan kawagat om okon i’ ko’ ponuhuan dit a’ milo’d wonsoyon. ¹² Okon i’ ko’ hilo’d tawan o pinoiyanan di ponuhuan diri. Om a’ kou i’ minog do muhot do poingkaa, ’Isai no ma o minsawat do mongoi’d hilo’ om oongoi i’ iri, om katahak indo dot id dati’, om korongou toko’ indo’ddi om atanud toko’?’ ka. ¹³ Om okon i’ ko’ hilo’d soborong do rahat o pinoiyanan di ponuhuan diri. Om a’ kou i’ minog do muhot do poingkaa, ’Isai no ma o sumoborong dilo rahat om oongoi i’ iri, om korongou toko’ indo om katanud toko’ddi?’ ka. ¹⁴ Kada’ kou ponguhot do miagal diri tu’ hiti nod dokoyu i ponuhuan diri. Naapal no dokoyu i ponuhuan diri om milo kou no do poboros dot a’ piya mintong di pointulis, om iso’ ko’ wonsoyon po daa dokoyu. ¹⁵ Om tadau nod baino’ do momili’ kou di pilion dokoyu, dot iri tuu it osonong ko’ iri po it araat, om koposion tuu ko’ kapatayon po. ¹⁶ Ondung osianan kou’d TUHAN, i Kinorohingan dokoyu, om mumboyo’ kou no dau, om tumanud do koinsanai dit oturan om ponuhuan dau di pinoboros ku dot id dokoyu di tadau baino’, om osimbayan kou no om osiliu kou do bansa’ dit agayo. Om barakatan kou indo do TUHAN, i Kinorohingan dokoyu do hilo’ kou id pomogunan di potiongoyon no dokoyu. ¹⁷ Nga’ ondung a’ kou mumboyo’ om a’ kou mokinongou, om mokilogos kou dot apalid do gisom do tumuku’ kou nondo dot id ponokokinorohingan do suwai, ¹⁸ om atantu’ no do patayon ku iyokoyu. Soro-sorohon no dokoyu! Nokoboros ku no ngai’ iri dot id dokoyu di tadau baino’ do popoinsan dokoyu. Om a’ indo anaru o tumur dokoyu do hilo’d pomogunan dit id soborong diti Bawang do Yordan, i potisolodon no dokoyu. ¹⁹ Om pilio’ nopo dokoyu i pilion dokoyu do dinondo; do koposion tuu ko’ kapatayon o pilion dokoyu; barakat tuu do TUHAN ko’ popol po dau. Om lohowon ku no o tawan om pomogunan do sumiliu’d sasi’ ondung nunu i pilion dokoyu. Pilio’ no dokoyu o koposion. ²⁰ Kosianai kou nod TUHAN, i Kinorohingan dokoyu, om umboyo’ kou no dau, om tumorodok kou no dot id dau. Om alaid kou indo om alaid i piro-piro o sinakagon dokoyu do poingiyon do hilo’d pomogunan di pinabatos do TUHAN dot id taki-aki dokoyu, i Abraham, i Isak om i Yakub,’’ ka dau.

¹ Om boro-boros po kawagu i Musa dot id tulun dot Israil. ² Boros ka dau, ’’Dinondo nopodti om hatus no om duwo nohopod o toun ku om a’ oku noddi kogoos do momoyo’ dokoyu. Om suwai no ko’ iri, om nokoboros nod TUHAN dot a’ oku no koino-ino do sumoborong di Bawang do Yordan. ³ Om TUHAN indo, i Kinorohingan dokoyu o mogulu dokoyu do mamanau om iyau o mamatai do koinsanai di bansa’d tulun di poingiyon do hilo’, gisom dot osingolod dokoyu i tana’ diyolo’. Om i Yosua no o silihon do boyoon dokoyu do miagal di nokoboros do TUHAN. ⁴ Om oiyon nopondo do TUHAN do mamatai i piro-piro o bansa’ddi do miagal di minangala’ iyau di Sihon om i Og, i duwo raja’ dot Amori, om di rinaag dau i pomogunan diyolo’. ⁵ Om onuan kou indo do TUHAN do kamanangan do sumaap diyolo’, om mositi’ no do wonsoyon dokoyu dot id diyolo’ o miagal di poboroson ku dot id dokoyu. ⁶ Pogiroton no dokoyu o ginawo dokoyu, om kumosiou kou no! Kada’ kou kooris diyolo’! Tu’ uhupan kou i’ do TUHAN, i Kinorohingan dokoyu. Om a’ kou i’ dau iman-imanon om a’ kou dau tongkiadan!’’ ka dau. ⁷ Om lohowo’ noddi di Musa i Yosua; om boro-boros no i Musa dot id di Yosua dot id toguang do koinsanai di tulun dot Israil. Boros ka dau, ’’Pogiroto’ no o ginawo nu, oi Yosua, om kumosiou no! Iya’ no o momoyo’ diti tulun do mongoi ponolod di pomogunan di pinabatos do TUHAN dot id taki-aki diyolo’. ⁸ TUHAN i’ o momoyo’ om monguhup diya’. Om a’ i’ iyau mongiman-iman diya’ om a’ monongkiad diya’. Iyo nopoddi, om kada’ no kopio kooris om kada’ koluhoi o ginawo,’’ ka dau. ⁹ Om tuliso’ noddi di Musa i Tourat do TUHAN, i Kinorohingan, om patahako’ no dau dot id piro-piro o imam do mantad id payat do Liwi, i nonuan do karaja’ do mongilo-ilo di Kaban do Tumpongo, om id piro-piro o boyoon dot Israil. ¹⁰ Om boros ka di Musa do minonuhu’ diyolo’, ’’Pointikid-tikid do kooyion do toun di koturu’, do tontok di toun do kopononusan do tutang, i tontok di Tadau dot Agayo do Kinuhub-Kuhub, ¹¹ om mositi’ no do basaon dokoyu o koinsanai diti Tourat dot opuhod o pambasa’ dot id tulun dot Israil di rumikot do mongoi sambayang dot id TUHAN, i Kinorohingan dokoyu do hilo’d tiyonon do sumambayang di natantu’ mantad. ¹² Om suhuon ngai’ no o tulun — dot i tongokusai om i tongoondu’ om i tangaanak, om i bansa’d suwai di poingiyon dot id kabandaran dokoyu do mongoi pokinongou di Tourat do basaon diri, om kopinsingilo i’ iyolo’ do momusou’d TUHAN, i Kinorohingan dokoyu, om tumorodok nondo do tumanud ngai’ di ponuhuan dau. ¹³ Om owonsoi nopo o miagal diri om iri piya’ndo tangaanak dokoyu dit a’ po nokorongou di Tourat do TUHAN, i Kinorohingan dokoyu, nga’ korongou indo om kopinsingilo do momusou’d TUHAN do solinaid diyolo’ do poimpasi dot id pomogunan di potisolodon no dokoyu; i tana’ di hilo’d soborong do Bawang do Yordan,’’ ka dau. ¹⁴ Om boro-boros noddi o TUHAN dot id di Musa do poingkaa, ’’Oniba’ no o tumur nu. Om lohowo’ nogi’ kopio i Yosua, om angatan i’ do mongoi’d hilo’d Kiim ku om otudukan ku i’ iyau,’’ ka dau. Om ongoi noddi iyo Musa di Yosua do hiri’d Kiim. ¹⁵ Om intalang no o TUHAN dot id diyolo’ dot id rolot do haun di poorigi do hiri’d somok do wawayaan di Kiim. ¹⁶ Om boros kad TUHAN dot id di Musa, ’’Oruhai ko noddi do matai. Om apatai ko nopondo om a’ nondo o tulun dot Israil otorodok dot id doho’, om tolibambanan diyolo’ i tumpongo di winonsoi ku dot id diyolo’. Om tumongkiad nondo iyolo’ doho’, om tumuku’ nogindo dot id ponokokinorohingan di tukuon di tulun do poingiyon do hilo’d pomogunan di potisolodon no diyolo’. ¹⁷ Ondung osiliu o miagal diri, om a’ nondo ogina-gina’ o kotogodo’ ku diyolo’. Om tongkiadan ku nondo iyolo’ om patayon ku, om ogumu’ nopondo o kosusaan dit angawagat kopio do koontok diyolo’, om opurimanan nogindo diyolo’ do nongosiliu ngai’ pogi’ iri dot id diyolo’ nga’ a’ oku noddi moyo-woyo’ diyolo’. ¹⁸ Om tontok nopondo do maso’ddi om a’ oku no monguhup diyolo’, tu’ tumuku’ i’ iyolo’ dot id ponokokinorohingan do suwai om mingwonsoi iyolo’ dot araat. ¹⁹ Om tuliso’ no iti sinding do dinondo. Om potudukon noti dot id bansa’ dot Israil do maan do ponokosasi’ dot id diyolo’. ²⁰ Om pokoyoon ku nondo iyolo’ do hilo’d pomogunan di kaya’ om it oluhub o tana’, do miagal di pinabatos ku di taki-aki diyolo’. Om haro ngai’ dot id diyolo’ o nunu nopo o taakanon di korohian diyolo’. Nga’ alaid nondo om sumansala’ po iyolo’ kawagu om tumuku’ dot id ponokokinorohingan. Om iyadaan oku nondo diyolo’ om tolibambanan diyolo’ i tumpongo ku. ²¹ Om ogumu’ nopondo o kosusaan dit angawagat do koontok diyolo’. Nga’ maso kasai’ indo do sindingon iti sinding om maan do ponokosasi’ dot id diyolo’. Om dinondo piya, tu’ a’ ku po iyolo’ nakakaa do hilo’d pomogunan di pinabatos ku nga’ oilaan ku no o pomusarahan diyolo’,’’ kad TUHAN. ²² Om tontok i’ do tadau’ddi do tinulis di Musa i sinding diri, om potuduko’ no dau dot id tulun dot Israil. ²³ Om boro-boros noddi o TUHAN dot id di Yosua, i tanak di Nun. Boros ka dau, ’’Pogiroto’ no o ginawo nu, oi Yosua, om kumosiou no! Iya’ no o momoyo’ diti tulun dot Israil do sumuang di pomogunan di pinabatos ku dot id diyolo’, om uhupan ku indo iya’,’’ ka. ²⁴ Om tuliso’ noddi di Musa i Tourat do Kinorohingan dot id iso’ o buuk. Om sinorisid tomod dau o pinonulis do mantad di timpuunon om gisom do nopupusan. ²⁵ Om kopongo poddi di Musa do minonulis iri, om boro-boros no iyau dot id piro-piro o imam di mantad id payat do Liwi, i nonuan do karaja’ do mongilo-ilo di Kaban do Tumpongo. Boros ka dau, ²⁶ ’’Ngoyo’ no dokoyu iti buuk do Tourat do Kinorohingan, om poilihon no dot id sampaping di Kaban do Tumpongo do TUHAN, i Kinorohingan dokoyu. Om hilo’ kasai’ indo do maan do ponokosasi’ do bansa’ diti. ²⁷ Om oilaan ku i’ dot ongosurilog kopio iyolo’ om obinsaap. Tu’ iti piya poimpasi oku po nga’ suminaap i’ iyolo’ do TUHAN; om okuro-kuro nogi’ tuu’ndo dot apatai oku! ²⁸ Suhuo’ ngai’ no i boyoon do bansa’ om i pagawai do soudor do tumimung dot id toguang ku do dinondo, om kolombus ku i’ dot id diyolo’ iti piro-piro hal. Om lohowon ku no o tawan om pomogunan do sumiliu’d sasi’ diyolo’. ²⁹ Oilaan ku no dot apatai oku nopondo, om rumaat ngai’ nondo o tulun diti om iyadaan diyolo’ i nokotuduk ku dot id diyolo’. Om oontok nondo iyolo’ do kosusaan dit awagat kopio, tu’ momonsoi i’ iyolo’ di pogoduhan do TUHAN, om i popotogod do TUHAN,’’ ka. ³⁰ Om basao’ noddi di Musa iti sinding do gisom do nopupusan, om mokinongou ngai’ nopo i bansa’ dot Israil. Poingkaa i sinding diri.

¹ ’’Oi tawan, pokinongou no, tu’ moro-boros oku, oi pomogunan pokinongou no kopio. ² Maha’ daa om iyo di rasam do sumondot iti ponudukan ku, om iyo di tinuru’ do bolobou iti boros ku, om iyo di rasam dot asapou dot id kobuturan, om iyo di tinuru’ do rasam dot id totonomon. ³ Royohon ku indo o ngaran do TUHAN. Popinsusuyo’ no o kogoyoo’ do Kinorohingan toko’! ⁴ TUHAN no, it okoris kopio o mogobi’ dokoyu, otulid ngai’ i’ om otopot i karalan-ralano’ dau. Otorodok i’ om otopot i Kinorohingan dokoyu, om momonsoi iyau dit osonong om it apatut. ⁵ Nga’ iyokoyu nopo om tulun dit a’ otorodok, om bansa’ di noponu’ do kouudut om dusa, om a’ no osorupai do roitan do tulun dau. ⁶ Iyo toi’ddi o ponomuli’ dokoyu di kosonongo’ do TUHAN, oi tulun di basug om aiso’ o toila-ilaan? Okon toi ko’ iyau no o Tapa’ dokoyu, om i Minamasi dokoyu, om i minoniliu dokoyu dot iso’ o bansa’? ⁷ Soroho’ no dokoyu i maso di nakatalib, di gulu po, suhuo’ no dokoyu i tapa’ dokoyu do momisunud dokoyu do koinsanai di nongosiliu, suhuo’ no dokoyu i kongomolohingan do momisunud dokoyu di nongosiliu di gulu po, om sunudan kou i’ diyolo’. ⁸ Tontok di binahagi’ dit Asawat Kopio i tana’ do maan do potungkusan, om tinantu’ mantad i’ o wolit do tana’ do pointikid-tikid do bansa’. Om iso’ no o Kinorohingan do momorinta’ ngai’ddi. ⁹ Nga’ iti nopo sinakagon di Yakub diti om pinili’ do TUHAN do sumiliu’d dau’d songonuon. ¹⁰ Nabantalan dau iyolo’ do minghombo, do hilo’d kinoiyonon dit oingou do hilo’d tana’ do kowotuan. Iyolo’ no o koupusan kopio dau, om intirungan dau iyolo’ om gompion dau. ¹¹ Poingkuro nopo i kondiu do monuduk di tanak dau do tumulud, om sumahau di tanak dau dot i talad dau do poungkalad o panahau. ¹² Om iyo noddi o TUHAN do momoyo’ di tulun dau, om a’ i’ iyau minog dot uhupan di piro-piro o ponokokinorohingan do suwai. ¹³ Kopomorinta’ i’ i tulun dau do hilo’d konuluhanan, om sumuni o kayu saitun do hiri’d tana’ di kiwatu, kaakan i’ iyolo’ do tua’ do totonomon do hiri’d koumaan, om koinum do paha’ do mantad id pogialat-alatan di watu. ¹⁴ Ogumu’ i’ o daging om susu dot aanu diyolo’ do mantad id tayam-tayam diyolo’; om it osonong kopio i gandum om i waig dot anggur dot aanu diyolo’. ¹⁵ Kuminaya’ i tulun do songonuon do TUHAN, nga’ obinsongkiwal i’, ongolombon po iyolo’ do nangayahan do takanon. Om tongkiadai noddi diyolo’ o Kinorohingan, i minomonsoi diyolo’. om niada’ diyolo’ i Gampamasi diyolo’ dit okoris kopio. ¹⁶ Tumuku’ iyolo’ dot id tingolig, om gowoi poddi om minoguhang o TUHAN, om kotogod noddi iyau do gama’ di karaaton diyolo’ddi. ¹⁷ Pinapatahak iyolo’d porsombahan dot id ponokokinorohingan dit a’ otopot, it a’ notutunan om it a’ tinuku’ di taki-aki diyolo’ di gulu po. ¹⁸ Tuminongkiad iyolo’ do Kinorohingan di mamasi; om nokolihu iyolo’ do TUHAN, i manahak do koposion. ¹⁹ Kokito poddi do TUHAN i kowoyo-woyoon di tangaanak dau om kotogod no o TUHAN, om iyadaai no dau iyolo’. ²⁰ Boros ka dau, ’Uhang ngai’ ku no; antangan nopo ondung poingkuro nondo ot osiliu. Tu’ osurilog i’ i bansa’ddi, om a’ iyolo’ otorodok. ²¹ Pinopotogod doho’ i tininganak di tukuon diyolo’, om osolon oku di roitan diyolo’ do ponokokinorohingan. Om potogodon ku nondo i bansa’ do songonuon ku di bansa’ dit okon i’ ko’ bansa’ kopio, om poosolon ku iyolo’ di tulun do basug. ²² Om iyo pondo do tapui do molob-ngolob o kototogod ku, i monorob do koinsanai’d nunu nopo do hiti’d pomogunan, i tapui di rumalad do gisom do korikot do hilo’d saalom do tana’, om monorob do konuluhanan do gisom do korikot do hiri’d gamut di nuluhon. ²³ A’ oku nopo tumingkod do poporikot do kosusaan dit awagat kopio, om saapon ku nondo iyolo’ di pana’ ku. ²⁴ Apatai nondo iyolo’ do toruol do sogiton om mononglous, om apatai do toruol dit araat kopio. Rumikot nondo o nintorusan dit orongit do mongoi panabpo diyolo’, om minggiak pondo iyolo’ dot otinduk do tulanut di kapatai. ²⁵ Poporikot o pisangadan do kapatayon do hiri’d karalan-ralanan, om iri piya i poundorong do hiri’d duwalai nga’ ongooris i’. Angapatai nondo i tangaanakwagu om i kosumandakan, om iri piya i ragang po om i molohing no nga’ angapatai ngai’ i’. ²⁶ Punsoon ku no daa kopio iyolo’, om olihuan indo iyolo’. ²⁷ Nga’ a’ i’ apatut o pisangod dot Israil dot oondos, dot iyo po daa’ndo do naala’ diyolo’ i bansa’ do songonuon ku; tu’ iyoho’ noo, om iyoho’ no kopio, o minomonsoi ngai’ddi,’ ka. ²⁸ Israil no o bansa’ dit aiso’ o toila-ilaan; om aiso’ o pongitungan diyolo’. ²⁹ A’ i’ iyolo’ kosuhut ondung nokuro tu’ naala’ iyolo’; a’ i’ iyolo’ kosuhut ondung nunu i nosiliu. ³⁰ Poingkukuro po daa o songulun-ngulun do momogusa’ do soribu o tulun, om momogusa’ o duwo tulun do hopod noribu o tulun. Nadagang no iyolo’ do TUHAN, i Kinorohingan diyolo’, notongkiadan no iyolo’ do Kinorohingan dit okoris. ³¹ Oilaan i’ di pisangod dot Israil dot a’ okoris i mongintirung diyolo’, om a’ i’ koiyo di Kinorohingan dot Israil dit okoris. ³² Iri nopo pisangod dot Israil om iyo pod Sodom om Gomura karaat, iyo po di guas dot anggur dit opoit om i kawanit o tua’. ³³ Waig nopod anggur diyolo’ om iyo pod paliu do tulanut di kapatai. ³⁴ Sorohon i’ do TUHAN i winonsoi di pisangod diyolo’, om hukuman indo dau iyolo’ dot orikot i maso do kopomohukuman. ³⁵ Sulian indo iyolo’ do TUHAN om hukuman dau iyolo’, om aratu’ nondo iyolo’, tu’ oruhai no o tadau do kapatayon diyolo’. ³⁶ Posion indod TUHAN i tulun dau, om insianan ngai’ dau i susuhuon dau, dot okito dau iyolo’ dot aiso’ o pokukurayan om a’ kogoos. ³⁷ Uhoton nondod TUHAN i tulun do songonuon dau, ’Hinonggo ngai’ no i ponokokinorohingan di mongintirung dokoyu? ³⁸ Paakanon dokoyu iyolo’ do porsombahan di kilunok, om agayo waig dot anggur do poinuman dokoyu. Pologoson nopo iyolo’ do monguhup dokoyu; sunudai nopo dokoyu iyolo’ do rumikot do mongoi pamasi dokoyu do dinondo,’ ka dau. ³⁹ ’Ontong pogi’, iyoho’ no o Kinorohingan dit Iso-Iso’, aiso’ no o suwai ko’ iyoho’. Mamatai oku om mamasi, monuhat oku om momolingos. Soira’ nopo do haro o wonsoyon ku, om aiso’ no o tongosongulun piya do kasaap doho’. ⁴⁰ Otopot no kopio dot iyoho’ i poimpasi, iyoho’ i Kinorohingan, om poinsawaton ku o longon ku do sumumpa’ do poingkaa: ⁴¹ Aasa’ ku pondo i gayang ku dit okilat, om wonsoyon ku nondo it otulid. Sulian ngai’ ku nondo i pisangod; om hukuman ku it araatan doho’. ⁴² Notounan pod raha’ diyolo’ i gayang ku, raha’ di tulun do natangkap om i tulun di nongosuhat. Patayon ngai’ nopo di gayang ku o koinsanai’d tulun di sumaap, a’ ku no posion i pisangod dit anganaru o tobuk,’ ka. ⁴³ Pimpangkis kou no, oi bansa’, dot i tulun do songonuon do TUHAN o kopomongkisan. Sulian dau i pisangod dau nga’ ompunan i’ dau o dusa di bansa’ do songonuon dau,’’ ka. ⁴⁴ Binasa’ di Musa om i Yosua i tanak di Nun o sinding diri, gisom do nokorongou ngai’ nopoddi i bansa’ dot Israil di sinding diri. ⁴⁵ Om koboros ngai’ poddi di Musa i ponudukan do TUHAN dot id bansa’ dot Israil, ⁴⁶ om boro-boros no iyau do poingkaa, ’’Antaan-taan no kopio dokoyu, om atanud ngai’ i’ dokoyu i ponuhuan di pinoboros ku dot id dokoyu di tadau baino’. Potudukon ngai’ no dokoyu iri dot id tangaanak dokoyu, om otorodok indo iyolo’ do numboyo’ do koinsanai dit oturan do TUHAN. ⁴⁷ Okon i’ ko’ boros toomod i ponudukan diri, suwai ko’ iri nopo om koposion dokoyu. Tonudon ngai’ no dokoyu i ponuhuan diri, om otogui kou i’ do hilo’d pomogunan dit oruhai no dokoyu dot aanu, i hilo’d soborong diti Bawang do Yordan,’’ kad i Musa. ⁴⁸ Om tontok i’ do tadau’ddi do minoro-boros o TUHAN dot id di Musa do poingkaa, ⁴⁹ ’’Ongoi no do hilo’d Konuluhanan dot Abarim, i hilo’d pomogunan do Muab, it id hapak do bandar do Yorikou. Om tumakad no di Nuluhon do Nibo, om mimpa’ no di tana’ do Kanaan, it a’ no alaid om patahakon ku no di bansa’ dot Israil. ⁵⁰ Om hilo’ nondod timpak do nuluhon diri o kapatayon nu, oi Musa, do miagal di Harun, i tobpinai nu, do minatai do hilo’d Nuluhon do Hor. ⁵¹ A’ goduwo kou nopo tuminorodok dot id doho’ om a’ kou minomusou doho’ dot id toguang di bansa’ dot Israil do tontok di hilo’ kou id tudan do waig do Moriba, i hilo’d somok do bandar do Kadis, it id tana’ do kowotuan do Sin. ⁵² Om iri no ot a’ nu koina-inaan do sumuang di pomogunan do patahakon ku dot id bansa’ dot Israil; koimpa’ ko no di pomogunan do mantad hiti’d sodu’,’’ kad TUHAN.

¹ Om barakatai nod i Musa, i susuhuon do Kinorohingan diri, i bansa’ dot Israil dit a’ po iyau napatai. Boros ka dau, ² ’’Rumikot o TUHAN do mantad hilo’d Nuluhon do Sinai; minulai iyau do hilo’d Idom do miagal do tadau. Minimbulai iyau do mantad hilo’d Nuluhon do Paran do mulinau dot id tulun dau. Winoyo’ iyau do hopod noribu o moloikat. Om iyo pod kodumaat o tapui do molob-ngolob do hiri’d ponong id wanan dau. ³ Osianan i’ o TUHAN di tulun dau, intirungan i’ dau i songonuon dau. Kainou motud do tumuku’ dot id toguang dau om mumboyo’ toko’ di ponuhuan dau. ⁴ Tonudon toko’ i’ i Tourat do pinatahak di Musa, i ponokodapu’ do bansa’ diti dit agayo kopio o gatang. ⁵ Tontok di tuminimung ot Israil do miwoyo’ di boyoon diyolo’, om TUHAN no o nosiliu do raja’ di tulun do songonuon dau,’’ kad i Musa. ⁶ Om boros ka di Musa do pasal di payat do Rubin, ’’Maha’ daa om a’ koumbal dot opunso i payat do Rubin, dot okuri’ piya i tulun dau,’’ ka dau. ⁷ Om boros ka di Musa do pasal di payat do Yohuda, ’’Oi TUHAN, pokinongoho’ no iyolo’ do tontok do lumohou iyolo’ do mokitulung, om kopiiso’ i’ iyolo’ di payat do suwai. Uhupai no iyolo’ do sumangod do pisangod dot id pisangadan,’’ ka dau. ⁸ Om boros ka di Musa do pasal di payat do Liwi, ’’Pointalangon nu, oi TUHAN, o korohian nu dot it Urim om id Tumim o popointalang, do pawayaon di tulun do Liwi, i susuhuon nu dit otorodok. Pinogumbalan nu iyolo’ di hilo’d Masa, om nilaan kopio nu iyolo’ ondung otorodok, di hilo’d torobong do Moriba. ⁹ Otorodok i’ kopio iyolo’ dot id diya’ om poinggayo po o kotorodoko’ diyolo’ dot id diya’ ko’ id nunu nopo o suwai, om poinggayo po ko’ kotorodoko’ dot id molohing om id tobpinai. Tinanud i’ diyolo’ i ponuhuan nu, om otorodok i’ iyolo’ dot id tumpongo nu. ¹⁰ Tudukan indo diyolo’ i tulun nu do mumboyo’ di Tourat nu, om pinapatahak iyolo’ do porsombahan di sorobon do hiri’d pananaraban do porsombahan nu. ¹¹ Oi TUHAN, uhupai no o payat diti om okoris i’ iyolo’, om asanangan ko indo di wonsoyon diyolo. Patayo’ ngai’ no i pisangod diyolo’; punsoo’ no kopio do gisom dot alaid,’’ kad i Musa. ¹² Om boros ka di Musa do pasal di payat do Binyamin, ’’Iti no o payat di kosianan do TUHAN. Intirungan i’ dau iyolo’ do tadau om totuong; om poingiyon iyau dot id pogialatan diyolo’,’’ ka. ¹³ Om boros ka di Musa do pasal di payat do Yusup, ’’Maha’ daa om barakatan do TUHAN i tana’ diyolo’, do waig do mantad id saalom do tana’ om rasam o pamarakat. ¹⁴ Maha’ daa om osima’ do tua-ua’ dit ongosonong kopio om nongoonsok i kouwaan. ¹⁵ Maha’ daa om otongkop do tua-ua’ di nopili-pili’ no kosonongo’ i konulu-nuluan do hilo’, i hino mantad no do mantad di gulu po. ¹⁶ Maha’ daa om barakatan do TUHAN i tana’ diyolo’ do gisom do mabai-labai o barakat, i TUHAN di moro-boros do mantad id bulungkut do kitapui di molob-ngolob o mamarakat. Iti no o barakat dot id di Yusup om id sinakagon dau, i Yusup no o boyoon dot id pogialatan di tobpinai dau. ¹⁷ I Yusup nopo om iyo pod sapi’ do gonsukod kokoris, sungu nopo dau om i piro-piro noribu o sinakagon di Manasi om Ipraim. Sunguon ngai’ dau i bansa’ do gisom do korikot do hilo’d tisan do pomogunan dot oimpit dau,’’ kad i Musa. ¹⁸ Om boros ka di Musa do pasal di payat do Sibulon om i payat dot Isakar, ’’Maha’ daa om kumaya’ i Sibulon do mantad id pogidagang-dagangan do hilo’d rahat, om rumuhang o kakayaan dot Isakar do hilo’d kinoiyonon diyolo’. ¹⁹ Alapon diyolo’ i bansa’d suwai do hilo’d nuluhon diyolo’; om patahakon diyolo’d hilo’ i porsombahan do sorobon dit apatut. Kaanu iyolo’d dapu’ do mantad hiri’d togis do poingompus di tisan do rahat,’’ kad i Musa. ²⁰ Om boros ka di Musa do pasal di payat do Gad, ’’Royohon no o Kinorohingan, i minanahak di Gad do tana’ dit agayo dot undorongon diyolo’. Poingandad no o Gad dot iyo di singa do momogii do longon om manganit do kulit do tulu. ²¹ Naanu no diyolo’ i tana’ dit osonong kopio, om iyolo’ no o nonuan di bahagi’ do dong boyoon. Numboyo’ i’ diyolo’ i ponuhuan om it oturan do TUHAN, do tontok di tuminimung ngai’ i boyoon dot Israil do mogiboro-boros,’’ kad i Musa. ²² Om boros ka di Musa do pasal di payat do Dan, ’’Dan nopo om iyo pod singa dit okoro’ po. Om sumimbul nopo iyau do sumoliwan do mantad hilo’d Basan,’’ ka. ²³ Om boros ka di Musa do pasal di payat do Naptali, ’’Ogumu’ no kopio o barakat dot id di Naptali, tu’ osianan i’ o TUHAN dau; watas nopo dau om mantad po di Tasik dot Agayo do Galilia om gisom do korikot do hilo’d salatan,’’ ka. ²⁴ Om boros ka di Musa do pasal di payat dot Asor, ’’Id pogialatan ngai’ nopo di payat dot Israil om payat nod Asor ot ogumu’ kopio o barakat dot aanu. Kolisihan kopio iyolo’ di piro-piro o tobpinai diyolo’, om osonong o sunion do saitun do hiri’d tana’ diyolo’. ²⁵ Nintirungan ngai’ do totobon do basi’ i bandar diyolo’ om osimbayan kasai’ i’ o koposi-posion diyolo’,’’ kad i Musa. ²⁶ Om boros ka kawagu di Musa, ’’Oi tulun dot Israil, ilaai no dokoyu, Kinorohingan nopo om agayo i’ ko’ koinsanai di ponokokinorohingan do suwai. Kadarapas i’ iyau dilo tawan dot id suang do kagayaan om kolopuson dilo haun do mongoi ponguhup dokoyu. ²⁷ Minogobi’ kasai’ i’ dokoyu o Kinorohingan; om iri longon dau i hino kasai’ o minangahang dokoyu. Nuyung dau o pisangod do mantad id dabantalan dokoyu, om sinuhu’ kou do mamatai do koinsanai di pisangod. ²⁸ Osimbayan indo do momogun-mogun i sinakagon di Yakub, om aiso’ o koligagaanan do hilo’d pomogunan dit osimbayan, om osima’ do gandum om waig dot anggur om oyopos i tana’ do bolobou di mantad hilo’d tawan. ²⁹ Oi Israil, osimbayan ko no kopio, aiso’ i’ o bansa’d suwai do pinasi dot iyo di bansa’ nu. TUHAN nopo om iyo pod kolid om gayang dot id diya’, tu’ mogobi’ iyau dokoyu om manahak do kamanangan. Rumikot ngai’ nondo i pisangod dokoyu do mokiinsian, nga’ pingulakan pondo dokoyu iyolo’,’’ kad i Musa.

¹ Om tongkiad noddi i Musa di rantai do Muab om takad no iyau di Nuluhon do Nibo, do gisom do nokorikot do hiri’d timpak do Nuluhon do Pisga, i ponong id koulayon do mantad id Yorikou. Om hilo’ no do pinotuduk do TUHAN dot id dau o koinsanai di pomogunan diri: i watas do Giliad do gisom do korikot do hilo’d bandar do Dan do ponong id utara, ² om koinsanai di watas do Naptali; om i watas dot Ipraim do gisom do korikot di Rahat do Tanga’; ³ om i ponong id salatan do watas do Yohuda om i rantai do mantad hilo’d Soar om gisom do korikot do hilo’d Yorikou, i bandar di notongkop pod kayu di roitan do kurma. ⁴ Om boros kaddi do TUHAN dot id di Musa, ’’Ilo’ no i pomogunan di pinabatos ku dot id di Abraham, om id di Isak om id di Yakub, do potungkusan di sinakagon diyolo’. Pokitonon ku iya’ dilo’, oi Musa, nga’ a’ ku i’ iya’ poongoyon do hilo’,’’ ka dau. ⁵ Om kapatai noddi i Musa, i susuhuon do TUHAN diri, do hilo’d tana’ do Muab, do miagal di nokoboros do TUHAN di gulu po. ⁶ Om lobongo’ no iyau’d TUHAN dot id iso’ o kubong do hilo’d Muab, it id hapak di bandar do Bait-Pior, nga’ gisom piya do tadau’d baino’ nga’ aiso’ i’ o tongosongulun piya do koilo kopio ondung hinonggo i lobong dau. ⁷ Di nopo di napatai i Musa om hatus no om duwo nohopod o toun do tumur dau. Om a’ i’ nokosimban o kokoriso’ do tinan dau, om pogogontong dau nga’ atarang po kasai’. ⁸ Om pogihad noddi i tulun dot Israil do solinaid do tolu nohopod o tadau do hilo’d rantai do Muab, tu’ napatai no i Musa. ⁹ Om ponuo’ no do TUHAN do toilaan i Yosua, i tanak di Nun, tu’ iyau no o pinili’ di Musa do sumowoli dau. Om minumboyo’ i’ i tulun dot Israil do boros di Yosua om winonsoi diyolo’ i ponuhuan do TUHAN di pinolombus di Musa. ¹⁰ Om aiso’ no o nabi do hilo’d Israil do miagal kopio di Musa tu’ nokotimbaba’ kopio do TUHAN do monokiboro-boros. ¹¹ Om aiso’ no o nabi do nokopomonsoi di piro-piro o koimayaan om kosuayan do miagal di winonsoi di Musa dot id pomogunan do Masir, om id raja’ do hilo’ om id tongopagawai di raja’ do miagal di pinonuhuan do TUHAN. ¹² Om aiso’ no o nabi do nokopomonsoi di koronob kopio om i korolosi kopio do miagal di winonsoi di Musa dot id toguang do koinsanai di bansa’ dot Israil.