DANIOL

DANIOL

¹ Tontok di kotolu nod toun di Raja’ Yoyakim do momorinta’ do Yohuda, om ngoyo’ nod i Nobukadnisar i raja’ do Babil, songodo’ o Yorusalim om tinurungku’ dau i bandar diri. ² Om pologoso’ no iyau’d TUHAN do minanangkap di Raja’ Yoyakim om minagahau do wookon di dapu’ dot angagayo gatang do mantad hiri’d Walai’d Sasambayangan dot Agayo. Om minononggoi nogi’ iyau do piro-piro o tulun di nangatangkap dau, om poiyono’ no dau iyolo’ do hiri’d walai di ponokokinorohingan dau do hilo’d Babil. Om poopio’ no dau i dapu’ do nahau dau’ddi do hiri’d walai di tingolig dau. ³ Om suhuo’ noddi di raja’ i Aspinas, i boyoon do walai’d raja’ do momili’ do piro-piro o tulun dot id pogialatan di tulun dot Israil di nangatanggayan diri; i piro-piro o tangaanakwagu do sinakagon do raja’ om i sinakagon do tangaanak do raja’. ⁴ Om mositi’ nod oligkang, om oilo, om i nokopinsingilo do nunu nopo om it opintar, om it ogumu’ o toilaan, om aiso’ o bohiton do tinan, o tangaanakwagu’ddi, om osorupai i’ do kumaraja’ do hiri’d walai di raja’. Om sinuhu’ nogi’ i Aspinas do monuduk diyolo’ do mambasa’ om monulis do boros do Babil. ⁵ Om minonuhu’ nogi’ i Raja’ do manahak diyolo’ do taakanon om waig dot anggur dot inumon do miagal di patahakon di tulun do suwai do hiri’d walai di raja’, do pointikid do tadau. Om atalib pondo o tolu o toun do kopinsingilaan diyolo’, om potimbabaon nogindo iyolo’ di raja’. ⁶ Iri nopo wookon di tangaanakwagu di nopili’ddi nga’ i Daniol, i Hanania, i Misail om i Asaria, i mantad ngai’ nopo id payat do Yohuda. ⁷ Om pungaranai no iyolo’ di boyoon do walai’d raja’ do ngaran do wagu: i Biltisasar, i Sadrak, i Misak, om i Abidnigo, o pinomungaran diyolo’. ⁸ Om tontuo’ no di Daniol dot id suang do ginawo dau dot a’ iyau monosomu’ do tinan dau, dot i taakanon om i waig dot anggur do mantad hiri’d walai di raja’ o kososomu’. Om pokianu noddi iyau di Aspinas do taakanon do suwai. ⁹ Om polisiho’ noddi do Kinorohingan di Daniol i Aspinas. Om nuhupan i’ i Daniol do Kinorohingan tu’ ninsianan iddi iyau di Aspinas. ¹⁰ Nga’ moddosi i’ i Aspinas di raja’, om boros kaddi dau dot id di Daniol, ’’Natantu’ mantad no di raja’ o taakanon om tinumon nu, om ondung a’ koiyo di tangaanakwagu’d suwai o kosonongo’ do tinan nu, om atantu’ no do patayon oku di raja’,’’ ka dau. ¹¹ Om ongoi noddi i Daniol boro-boros di tulun do sinuhu’ di Aspinas do madtamong dau om i tolu o tambalut dau’d suwai. Boros kad Daniol, ¹² ’’Toinuon nopo iyahai do solinaid do hopod o tadau; onuan nopo iyahai’d rinapa’ dot akanon om waig toomod do tinumon. ¹³ Om pataladon nogindo iyahai di tangaanakwagu’d suwai di mangakan do taakanon di natantu’ mantad di raja’, om poboroson nopondo o tosorou nu do miontok di kokitanan nu dahai,’’ ka dau. ¹⁴ Om pangakun no iyau dot umbalan diyolo’ o miagal diri do solinaid do hopod o tadau. ¹⁵ Om katalib noddi o hopod o tadau, om osonong-sonong nogiddi o kokitanan do tinan diyolo’ om okoris ko’ mantad di tulun do suwai di minangakan di taakanon di don raja’. ¹⁶ Om mantad poddi om pologoso’ no iyolo’ di madtatamong do mangakan do rinapa’, om monginum do waig toomod, om a’ mangakan di taakanon do patahakon di raja’ dot id diyolo’. ¹⁷ Om onuwai nod Kinorohingan it apat o tangaanakwagu’ddi do toilaan om koiloo’ do mambasa’ om mongilo do komoyon di songintulis dot id buuk om komiloo’ do momusorou. Om suwai no ko’ mantad diri, om onuwai po dau i Daniol do toilaan do mongilo do komoyon dit okito dot id pinointalang om nipi. ¹⁸ Om katalib poddi i tolu o toun di tinantu’ di raja’ do kopinsingilaan diyolo’, om potimbabao’ no di Aspinas o koinsanai di tangaanakwagu’ddi dot id di Raja’ Nobukadnisar. ¹⁹ Om boro-boros ngai’ nopo iyolo’ di raja’, nga’ i Daniol no, om i Hanania, om i Misail, om i Asaria o poimaha’ o toilaan dot id suang do nunu nopo ko’ mantad di tulun do suwai. Om pilio’ noddi iyolo’ do kumaraja’ do hiri’d walai di raja’. ²⁰ Om nunu nopo o tuhoton dot uhoton di raja’, ko’ nunu nopo o kosusaan di poboroson dau, nga’ iti nopo tapat o tangaanakwagu om inghopod po karalom o toilaan ko’ mantad di mogogontong om i bobolian do pointongkop do pomorintaan di raja’. ²¹ Om pakaraja’ kasai’ no i Daniol do hiri’d walai di raja’ do gisom do naala’ di Koris i raja’ do Porsia, o Babil.

¹ Tontok di koduwo nod toun di Raja’ Nobukadnisar do momorinta’, om pongipi no iyau. Om atangkabo tomod diri iyau do kosorou di nipi dau, gisom dot a’ no iyau koodop. ² Om lohowo’ noddi dau i mogogontong, om i piro-piro bobolian, om i mogogontong do nasip, om it ongoilo do limu’, do mongoi poilo dau do komoyon di nipi dau’ddi. Om soira’ddi minongoi rapou di raja’ i piro-piro tulun diri, ³ om boros ka dau dot id diyolo’, ’’Atangkabo tomod oku do kosorou di nipi ku. Om mokiilo oku ondung nunu o komoyon diri,’’ ka. ⁴ Om boros ka diyolo’ do minomoros do boros dot Aram, ’’Maha’ daa om otogui o raja’! Susuyo’ no ino nipi nu om poboroson i’ dahai o komoyon diri dot id diya’,’’ ka diyolo’. ⁵ Om boros ka di raja’ dot id diyolo’, ’’Natantu’ ku no dot id suang do ginawo ku dot iyokoyu o monusui di nipi ku om sunudan oku nogindo do komoyon diri. Ondung a’ kou koilo, om pogitobilang-bilangon ku nopondo o tinan dokoyu om huyason ku o walai dokoyu. ⁶ Nga’ ondung koilo kou do momisunud doho’ di nipi ku om i komoyon diri, om somulian ku nondo iyokoyu dot ipuhawang om pangkat dot asawat. Sunudai oku nod dinondo ondung nunu i nipi ku’ddi om ondung nunu o komoyon diri,’’ ka dau. ⁷ Om boros ka kawagu diyolo’ dot id raja’, ’’Ondung susuyan daa iyahai do Tuan Raja’ di nipi’ddi, om posunudon i’ dahai o komoyon diri,’’ ka. ⁸ Om boros ka di raja’, ’’Otopot no kopio i tosorou ku! Orohian kou nod mangayi’d maso, tu’ noilaan no dokoyu do nokopomusorou oku no dot ⁹ iyoon ku o pomohukum dokoyu ondung a’ dokoyu posusuyon dot id doho’ i nipi ku. Nokopogipapakat kou no do mongudut doho’ tu’ mogondos kou nopo daa do posimbanon ku i natantu’ mantad ku. Sunudai oku pogi’ di nipi, om oilaan ku nogindo do milo kopio kou do posunud do komoyon diri,’’ ka dau. ¹⁰ Om boros kaddi di mogogontong dot id raja’, ’’Iso’ piya’d tulun do pointongkop diti pomogunan nga’ aiso’ i’ o milo do posunud dot id Tuan Raja’ di pokionuon nu. Aiso’ i’ o nokoumbal dot ongoiso’ piya’d raja’, dot iri piya it agayo om it okoris kopio, do monuhu’ di mogogontong, om i bobolian, om it ongoilo do limu’, do momonsoi’d miagal diti. ¹¹ Iti nopo ponuhuan do Tuan Raja’ om adalaan no kopio kapagon, om aiso’ no songulun piya do milo’d momonsoi’ddi do suwai ko’ kinorohingan, nga’ a’ i’ iyolo’ poingiyon dot id rolot do tulun,’’ ka diyolo’. ¹² Om gowoi poddi do kotogod no tomod i raja’ do nokorongou’ddi. Om ponuhu’ no iyau do mamatai ngai’ di tulun dit ongoilo kopio do hilo’d Babil. ¹³ Om poboroso’ noddi di raja’ i tisuhu’ dau do mamatai ngai’ diyolo’, om kohompit nogi’ i Daniol om iri ngai’ i tambalut dau do patayon. ¹⁴ Om ongoi noddi i Daniol solowot di Ariok, i boyoon do madtatamong di raja’, om i nosuhu’ do mongoi pamatai. ¹⁵ Om boro-boros noddi iyau dot opian do minuhot di Ariok ondung nokuro tu’ minonuhu’ i raja’ do momonsoi’d miagal kopio’ddi karaat. Om sunudai nod i Ariok i Daniol di nosiliu. ¹⁶ Om tilombus nopoddi i Daniol do minongoi pokianu’d maso dot anaru-naru do mongoi solowot di raja’ om osunudan i’ dau i raja’ do komoyon di nipi’ddi. ¹⁷ Om uli’ noddi i Daniol do minongoi pomisunud di piro-piro tambalut dau: i Hanania, i Misail om i Asaria, di nosiliu’ddi. ¹⁸ Om sunudai no dau iyolo’ do sumambayang dot id Kinorohingan di hilo’d surga do mokiinsian dau om potudukon i’ dau i nipi dit a’ oilaan diri dot id diyolo’, om a’ indo iyolo’ apatai do kotonggoi di tulun do suwai dot ongoilo do hilo’d Babil. ¹⁹ Om totuong poddi om pointalango’ nod Kinorohingan it a’ oilaan diri dot id di Daniol dot id pinointalang. Om royoho’ noddi dau i Kinorohingan do hilo’d surga. ²⁰ Boros ka dau, ’’Kinorohingan nopo om kitoilaan i’ om kisinundu, royohon no iyau do gisom dot alaid. ²¹ Iyau no i manantu’ do maso om kooyu-oyuo’ do talun, om iyau o posiliu om iyau o mongidu’ do raja’. Iyau no i manahak do toilaan, om pomusarahan di kosuhut. ²² Popointalang iyau di songinlisok dit angaralom kopio. Oilaan i’ dau i poinlisok dot id totuong, om nosorilian iyau do tanawau. ²³ Royohon ku iya’, om pusohon ku iya’, oi Kinorohingan di komolohingan ku. Nonuan oku diya’ do toilaan om kokorisan, om nosimbar nu o sambayang ku. Om notudukan nu iyahai ondung nunu o posunudon dahai dot id raja’,’’ ka dau. ²⁴ Om ongoi noddi i Daniol solowot di Ariok, i sinuhu’ di raja’ do mongoi pamatai di tulun dot ongoilo’ddi. Om boros kad i Daniol dot id di Ariok, ’’Kada’ iyolo’ patayo’. Ngoyo’ oku posolowoto’ di raja’, om sunudan ku i’ iyau do komoyon di nipi dau,’’ ka dau. ²⁵ Om tilombus nopo i Ariok do minongoi posolowot di Daniol di Raja’ Nobukadnisar, om sunudai no dau i raja’ do poingkaa, ’’Haro o nabantalan ku’d iso’ di tulun do Yohudi di nangatanggayan do hiti do koilo’d posunud do komoyon di nipi do Tuan Raja’,’’ ka dau. ²⁶ Om boros ka di raja’ dot id di Daniol, i pinungaranan dot i Biltisasar, ’’Milo ko i’ do momisunud doho’ di nipi ku om komoyon diri?’’ ka dau. ²⁷ Om boros kad Daniol, ’’Oi Tuan Raja’, aiso’ i’ o tulun dit oilo, om i mogogontong, om i mogogontong do nasip, om i mongingilo do komoyon do rombituon do milo’d posunud diri dot id Tuan Raja’. ²⁸ Nga’ haro i’ o Kinorohingan do hilo’d surga do popointalang do koinsanai di poillisok. Sinunudan ko dau, oi Tuan Raja’, dit osiliu do koimbagu. Om sunudan ku nondo iya’ di nipi, om i pinointalang do nokito nu di maso nu’d koodop. ²⁹ Tontok di koodop ko oi Tuan Raja’, om nokoipi ko do pasal dit id dabantalan. Om pinointalangan ko’d Kinorohingan, i popointalang do koinsanai di poinlisok, dit osiliu do koimbagu. ³⁰ Om iri nopo i poinlisok daa’ddi nga’ pinointalang i’ dot id doho’, om okon i’ ko’ aralom o toilaan ku ko’ isai nopo, nga’ popoilo no do Tuan Raja’ do komoyon di nipi nu om kosuhut ko i’ di pomusarahan do nosorou nu, oi Tuan Raja’. ³¹ Oi Tuan Raja’, id suang nopo di pinointalang do nokito nu’ddi om nokokito ko do tininganak dot agayo do poingkakat dot id toguang nu. Om mogulinau tomod iri, nga’ koronob iddi kopio o kokitanan. ³² Iri nopo tulu di tininganak diri nga’ tamas di nosompipi’ do winonsoi; om iri no kangkab om longon om pirok do winonsoi; om iri no tawak om poo om tambaga’ do winonsoi; ³³ om iri nopo gakod om basi’ do winonsoi, om iri no lapap om basi’ do winonsoi o sampaping, om lagit do winonsoi o sampaping. ³⁴ Om soira’ddi poingontong ko daa di tininganak diri, om liid no o watu dot agayo do mantad hiri’d rungas, om aiso’ i’ o tulun do minongoi kimbir-kimbir diri. Om koonong no di watu’ddi i lapap do basi’ om lagit di tininganak, om komumuk nopo. ³⁵ Om tontok iddi do nahaba’ i tininganak diri, om nosiliu do kinotimungon do basi’ om lagit, om tambaga’ om pirok, om tamas, do miagal poddi pupuk do hilo’d pamagamasan do gandum do dongmagadau. Om kotilib ngai’ nopo do tongus i pointimung diri, om aiso’ no o noolu-olu’. Nga’ suminiliu iddi do nuluhon i watu dot agayo, i minamahaba’ di tininganak diri do gisom dot irad do nuluhon kagayo om nokoponu’ diti pomogunan. ³⁶ Iri no i nipi nu’ddi, oi Tuan Raja’, om sunudan ku nondo o Tuan Raja’ do komoyon diri. ³⁷ Oi Tuan Raja’, iya’ no o raja’ dit agayo kopio. Siniliu ko’d Kinorohingan di hilo’d surga do raja’ dot id sawat do koinsanai’d raja’, om nonuan ko dau diti pomorintaan diti, om nonuan ko do kuasa’, om kokorisan, om kobontugan. ³⁸ Siniliu ko dau do pomorinta’ do koinsanai’d kinoiyonon di kitulun do hiti’d pomogunan om pomorinta’ dot id sawat do koinsanai’d tombolog om nintorusan do suwai. Iya’ no i tulu do tamas di tininganak diri. ³⁹ Nga’ opupusan nopondo o pomorintaan nu, om haro po kawagu o pomorintaan do suwai do sumusuhut, nga’ a’ no koiyo diti pomorintaan nu kagayo. Om sumusuhut noddi, om haro po o pomorintaan do kotolu, i pomorintaan dot i tambaga’ o pinoiyaan, i momorinta’ do pointongkop diti pomogunan. ⁴⁰ Om haro pondo o pomorintaan do kaapat, i miagal do basi’ kokodou, tu’ kababak om kopurok do nunu nopo. Om poingkuro nopo do momurok om mamaraag i basi’ do nunu nopo, om miagal noddi i pomorintaan do kaapat diri do momurok om mamaraag do koinsanai’d pomorintaan do suwai. ⁴¹ Om nokito nu nogi’ iri dot i nopo lapap om i tunturu’d lapap do tininganak diri nga’ lagit o sampaping om basi’ o sampaping. Om komoyon nopodti nga’ mibahagi’ nondo o pomorintaan diri do koimbagu. Nga’ haro i’ o kokorisan do pomorintaan diri tu’ kirolot i’ do basi’ i lagit. ⁴² Iri nopo i tunturu’d lapap di basi’ o wookon om lagit o wookon, om komoyon nopoddi nga’ okoris o sombohogian di pomorintaan nga’ oluhoi i’ o sombohogian. ⁴³ Om nokito nu nogi’ do pinorolot i basi’ di lagit. Komoyon nopodti nga’ mumbal daa i pomorinta’ do pomorintaan diri do popogiso-iso’ di sompiiyon diyolo’, tu’ mumbal daa iyolo’ do mogikawin-kawin nga’ aiso’ i’ o kotutukon di wonsoyon diyolo’ do miagal diri, do miagal nod basi’ tu’ a’ i’ milo no do poroloton kopio’d lagit. ⁴⁴ Om tontok nondo do maso di piro-piro o raja’ddi do momorinta’ do popoingkakat i Kinorohingan do hilo’d surga do pomorintaan dit a’ milo dot opupusan do gisom dot alaid, om a’ insan dot aala’ dot isai nopo o bansa’. Om magayi-ayi’ nopondo o pomorintaan diri do mamaraag do koinsanai’d pomorintaan di suwai. ⁴⁵ Om nokito nu nogi’ do liid tomod nopo i watu do mantad hiri’d rungas, om aiso’ i’ o tulun do nokokimbir-kimbir diri, om minongoi diri otung di tininganak di basi’, om tambaga’, om lagit, om pirok, om tamas do winonsoi. Om kopurok nopoddi i tininganak diri. Sunudan ko do Kinorohingan dit agayo, dit osiliu dot id dabantalan. Om nosunudan ku no o Tuan Raja’ do nipi do Tuan Raja’ddi, om nokoboros ku nogi’ o komoyon diri dit otopot,’’ ka dau. ⁴⁶ Om otud noddi i Raja’ Nobukadnisar do hiri’d toguang di Daniol om ponuhu’ di rayat do sumuwau om papatahak do porsombahan di sorobon dot id di Daniol, om papatahak do piro-piro o porsombahan do suwai. ⁴⁷ Om boros ka di raja’, ’’Otopot no, dot iri no i Kinorohingan nu ot agayo kopio dot id pogialatan do koinsanai’d ponokokinorohingan do suwai, om iyau o pomorinta’ dot id sawat do koinsanai’d raja’, om i popointalang do koinsanai’ddi poinlisok. Oilaan ku no kopio iti tu’ minilo ko i’ do pinopotuduk do komoyon di poinlisok diri,’’ ka dau. ⁴⁸ Om onuwai noddi dau i Daniol do pangkat dot asawat, om pinuhawangan dau iyau do piro-piro o nipuhawang dit olumis, om siniliu iyau do gobunor di watas do Babil, om siniliu do boyoon dit id sawat kopio do koinsanai di gomponosihat di raja’. ⁴⁹ Om pokionuo’ no di Daniol, om siliho’ noddi di raja’ i Sadrak, om i Misak, om i Abidnigo do pomorinta’ di watas do Babil, om i Daniol nopo om minundorong i’ do hiri’d walai di raja’.

¹ Insan o maso, om ponuhu’ no i Raja’ Nobukadnisar do minomonsoi dot iso’ o tininganak do tamas do kasawato’ nopo nga’ 27 o mito om kalaabo’ no om oruhai nod 3 o mito. Om pinoingkakat dau iri do hilo’d rantai do Dura it id watas do Babil. ² Om suhuo’ no di raja’ o koinsanai di pagawai dau do tumimung — i tangaanak do raja’ di ponokowakil dau, om i gobunor, om i wakil di gobunor om i ponosihat do pomorinta’, om i popoopi’ do tusin, om i gompomutus, om i mongilo-ilo dit otulid, om i koinsanai di boyoon do pagawai dau’d suwai do hiri’d piro-piro o watas. Om mositi’ nod karapou ngai’ iyolo’ di kapanambayangan di tininganak do pinoingkakat di Raja’ Nobukadnisar. ³ Om soira’ di nokotimung ngai’ i pagawai do ruminapou di kapanambayangan diri om songingkakat diri iyolo’ dot id toguang di tininganak, ⁴ om haro’ddi o tulun do pinopoilo do kopoilaan do mantad id raja’ dot opuhod o boros do poingkaa, ’’Oi tulun do mantad id koinsanai’d pomogunan, om bansa’ om boros! Pokinongou kou no do ponuhuan do raja’ do poingkaa: ⁵ Korongou kou nopondo do tuni do torumpit, om susuhutonon do tuni do suling, om rebab, om gambus, om kecapi, om serdam, om koinsanai’d tuunion do suwai, om mositi’ nod motud kou do tumuku’ di tininganak do tamas di pinoingkakat di Raja’ Nobukadnisar diri. ⁶ Isai nopo it a’ motud do tumuku’ om tilombuson nopo do papataam do hilo’d tapui di molob-ngolob,’’ ka dau. ⁷ Om korongou poddi i tuni di tuunion om otud no o koinsanai di tulun do mantad id toinsanan o pomogunan, om bansa’, om boros do tuminuku’ di tininganak do tamas. ⁸ Om tontok noddi do maso’ddi do minanganu’d ralan i piro-piro di tulun do Babil do papasala’ di tulun do Yohudi. ⁹ Boros ka diyolo’ do pinoposunud dot id di Raja’ Nobukadnisar, ’’Maha’ daa om otogui o Tuan Raja’! ¹⁰ Nokoponuhu’ no o Tuan Raja’ do kotimpuun nopod monguni i tuunion, om motud ngai’ no o tulun do tumuku’ di tininganak do tamas, ¹¹ om isai nopo it a’ motud do tumuku’ddi om pataamon no dot id tapui di molob-ngolob. ¹² Nga’ haro o piro-piro o tulun do Yohudi, i siniliu nu’d boyoon do watas do Babil, i Sadrak, i Misak, om i Abidnigo, dot a’ minumboyo’ di pinonuhuan do Tuan Raja’. A’ iyolo’ tuminuku’ dot id kinorohingan nu om a’ iyolo’ tuminuku’ dot id tininganak do tamas di pinoingkakat nu,’’ ka diyolo’. ¹³ Om kotogod noddi tomod i raja’ do nokorongou’ddi, om ponuhu’ no iyau do posolowot dau di tolu o tulun diri. ¹⁴ Om boros ka dau dot id diyolo’, ’’Sadrak, Misak, Abidnigo! Otopot toi do mada’ kou do tumuku’ dot id kinorohingan ku om a’ kou motud do tumuku’ di tininganak do tamas do pinoingkakat ku? ¹⁵ Baino’ nopo, om orongou nopo dokoyu i tuni do tuunion, om motud kou no om tumuku’ no di tininganak diri. Tu’ ondung amu’ om tilombuson kou nopo moti’ do papataam do hiri’d tapui di molob-ngolob. Ondos daa dokoyu om haro po o kinorohingan do milo do mamasi dokoyu do mantad id kuasa’ ku?’’ ka dau. ¹⁶ Om boros kad Sadrak, om i Misak, om i Abidnigo, do suminimbar, ’’Oi Tuan Raja’, a’ i’ iyahai mumbal do popotopot do tinan dahai. ¹⁷ Ondung milo i Kinorohingan di tukuon dahai do mamasi dahai do mantad id tapui di molob-ngolob diri, om mantad id kuasa’ nu, om atantu’ no do wonsoyon i’ dau o miagal diri. ¹⁸ Nga’ mulong piya dot a’ dau wonsoyon o miagal diri, nga’ ilaai no oi Tuan Raja’, dot a’ i’ kopio iyahai tumuku’ dot id kinorohingan nu, om a’ iyahai tumuku’ di tininganak do tamas di pinoingkakat nu,’’ ka diyolo’. ¹⁹ Om a’ noddi di Raja’ Nobukadnisar nopusus o kototogod dau, om aragang po o rabas dau dot atatagadan di Sadrak, om i Misak, om i Abidnigo. Om suhuo’ noddi dau i tulun dau do poposikit di tapui do gisom diri dot inturu’ kalasu’ ko’ mantad di koubasanan. ²⁰ Om suhuo’ noddi dau o piro-piro di tulun dit ongokoris kopio dot id pogialatan di soudor dau do mongogos di Sadrak, om i Misak, om i Abidnigo, om papataam diyolo’ do hiri’d tapui di molob-ngolob dit alasu’ kopio. ²¹ Om kagasai no diyolo’ i tolu o tulun diri, om aiso’ i’ o nidu’ di pakayan diyolo’, tu’ kirasuk i’ iyolo’ dit oniiba’ om kirasuk dit anaru, om kitupi’, om poimpakai ngai’ diyolo’ o pakayan diyolo’d suwai, om pataamo’ noddi iyolo’ do hiri’d tapui di molob-ngolob diri. ²² Om kosorob diri di linasu’ di tapui i piro-piro o tulun di pinapataam di Sadrak, om i Misak, om i Abidnigo, do hiri’d tapui, tu’ minonuhu’ i’ i raja’ do poposikit kopio di tapui do gisom dot alasu’ po ko’ mantad di koubasanan. ²³ Om karatu’ nopo i Sadrak, om i Misak, om i Abidnigo do hiri’d tanga’ di tapui do molob-ngolob diri, om songingkogos iyolo’. ²⁴ Om sigog iddi do kosimbul i Raja’ Nobukadnisar do nosusuayan. Om uhoto’ no dau i pagawai dau, ’’Okon toi ko’ tolu no tulun diri do kinagasan toko’ om pinataam do hilo’d tapui di molob-ngolob,’’ ka dau. Om boros ka diyolo’ do suminimbar, ’’Oo, oi Tuan Raja’,’’ ka. ²⁵ Om boros ka di raja’, ’’Nga’ nokuro tu’ apat o tulun dot okito ku do sampanau-panau do hilo’d tanga’ dilo tapui? Om a’ i’ iyolo’ kinagasan, om miagal dit a’ i’ iyolo’ orualan! Om ilo no kaapat om miagal-agal do kinorohingan o kokitanan,’’ ka dau. ²⁶ Om ongoi noddi i Nobukadnisar do hiri’d somok di wawayaan do kinoiyonon di tapui’ddi om pomolohou no dot opuhod do poingkaa, ’’Sadrak, Misak, Abidnigo, iyokoyu no o susuhuon do Kinorohingan dit Asawat Kopio! Soliwan kou no do mantad hino’d tapui!’’ ka dau. Om olomus nopoddi iyolo’ do suminoliwan. ²⁷ Om oinsanan nopo i tangaanak do raja’ di ponokowakil om i gobunor, om i wakil do gobunor, om i piro-piro o pagawai dau’d suwai do guminurumung do minongoi ontong di tolu o tulun dit a’ i’ nokuro-kuro di tapui. A’ i’ nongosorob i tobuk diyolo’ om a’ nosorob i rasuk diyolo’, om a’ i’ iyolo’ osingud do lisun. ²⁸ Om boros ka di raja’, ’’Royohon no i Kinorohingan do tukuon di Sadrak, om i Misak, om i Abidnigo! Tu’ sinuhu’ dau i moloikat dau do minongoi pamasi di tolu o susuhuon dau di monongkuyaan dau. Kada’ nopo iyolo’ umboyo’ di nisuhu’ ku tu’ pinokouhang no diyolo’ dot apatai o tinan diyolo’ ko’ modsubak po om tumuku’ dot id kinorohingan do suwai ko’ i diyolo’d Kinorohingan. ²⁹ Om dinondo nodti om poboroson ku dot ondung haro o songulun do mantad id nunu nopo o pomogunan, ko’ bansa’, om boros, do mongindaraat do Kinorohingan di tukuon di Sadrak, om i Misak, om i Abidnigo, om pogitobilang-bilangon nopondo o tinan dau, om huyason o walai dau do gisom dot osiliu pondo do kinotimungon do kinaraagan. Tu’ aiso’ no o kinorohingan do suwai di milo do mamasi do miagal diti,’’ ka dau. ³⁰ Om poinsawato’ no di raja’ o pangkat di Sadrak, om i Misak, om i Abidnigo do hiri’d watas do Babil, gisom do nosiliu diri iyolo’ do pagawai dit angasawat kopio o pangkat.

¹ Om potongkopo’ no di Raja’ Nobukadnisar o boros diti dot id koinsanai’d tulun do mantad id koinsanai’d pomogunan, om bansa’, om boros do pointongkop di pomogunan. Poingkaa i boros diri, ’’Tumabi’ oku ngai’ dokoyu! ² Pokinongou kou nodti susuyon ku do pasal do koimayaan om i kosuayan kopio do pinointalang di Kinorohingan dot Asawat kopio dot id doho’. ³ Koimayaan no kopio i winonsoi dau! Koronob no kopio i kongosuayan do wonsoyon dau! Kinorohingan no o momorinta’ do gisom do poingompus. Iyau no o kikuasa’ do gisom dot alaid. ⁴ Osimbayan tomod oku do poingiyon do hiri’d walai ku do don raja’, om kaya’ oku. ⁵ Nga’ insan o totuong om nokoipi oku di korolosi kopio om nokokito oku do pinointalang di kotompurolosi kopio di maso ku’d koodop. ⁶ Om ponuhu’ oku no do poposolowot ngai’ doho’ do koinsanai di tulun dit ongoilo do hiti’d Babil om osunudan oku i’ diyolo’ do komoyon di nipi ku’ddi. ⁷ Om porikoto’ ngai’ nopoddi i mogogontong do nasip, om i bobolian, om i koilo do limu’, om i koilo do komoyon do rombituon. Om sunudai ku no iyolo’ di nipi ku nga’ aiso’ i’ o tiso’ diyolo’ do milo do posuhut doho’ do komoyon di nipi ku’ddi. ⁸ Om korikot noddi i Daniol, i pinungaranan dot i Biltisasar do pinasangai di ngaran do kinorohingan ku. I Daniol nopo om noporinta’ do rusod di piro-piro o kinorohingan dit olidang. Om sunudai ku noddi iyau di nipi ku. Boros kangku dot id dau, ⁹ ’Oi Biltisasar, i boyoon do mogogontong, oilaan ku no do porintaon ko di rusod do piro-piro o kinorohingan dit olidang, gisom diri do kosuhut ko do koinsanai di poillisok. Pokinongou nodti nipi ku, om sunudan oku no do komoyon diti. ¹⁰ Tontok di maso ku’d koodop om haro o nokito ku do songguas o kayu dot agayo do hiti’d tanga’ do pomogunan. ¹¹ Om kawas-kawas nopoddi i kayu’ddi do gisom do nokorikot do hilo’d tawan om okito ngai’ nopod tulun do hiti’d pomogunan. Om agayo o guas di kayu’ddi om ogirot. ¹² Roun nopo di kayu’ddi om ongolumis, om nawagatan pod tua’, om kabagal i’ do kanon do koinsanai’d tulun do hiti’d pomogunan. Mintilungung ngai’ nopo o nintorusan do hiri’d linungung di kayu’ddi, om pomirumunan do tombolog i karaan-raanan, om koinsanai nopo di songimpasi do mangakan di tua’ di kayu. ¹³ Om soira’ddi maso ku do momusorou do pasal di nokito ku’ddi, om kokito ku o moloikat do lumintuhun do mantad hilo’d surga, i posodia’ kasai’ om poingontong kasai’. ¹⁴ Om poboroso’ no dau dot opuhod o poingkaa, ’Tagado’ ilo kayu om tutuon ilo raan, om anggagon ngai’ o roun om pasasadon o tua’. Uyungon ngai’ i nintorusan do hiri’d lungung om ugadan ngai’ i tombolog di hiri’d karaanan. ¹⁵ Nga’ pologoson piya i tuod dot a’ utuson, nga’ kagasan iri do rantai’d basi’ om tambaga’. Om pologoson nopo iri do hilo’d talun dot id rolot di sakot. Om pologoson nopo iri dot abalabahan, om pologoson do poirolot do nintorusan om tanom-tanom. ¹⁶ Om turu’ nondo o toun dau do dong nintorusan do pomusarahan, om okon no ko’ don tulun do pomusarahan. ¹⁷ Iti no o natantu’ dahai, i moloikat di posodia’ kasai’ om i poingontong kasai’. Om koilo indo o koinsanai’d tulun do honggo nopo do kikuasa’ i Kinorohingan dit Asawat Kopio dot id sawat do pomorintaan do tulun om milo iyau do papatahak do pomorintaan dot id isai nopo i pilion dau, do tulun piya dit aiso’ kopio o ngaran-ngaran!’ ka. ¹⁸ Iyo noddi i nipi ku, om sunudai oku nondo do komoyon diri, oi Biltisasar. Aiso’ i’ o tiso’ piya di tulun dit ongoilo do hiti’d pomorintaan ku do milo do popoilo doho’ do komoyon diri, nga’ milo ko i’ iya’ tu’ noporinta’ ko i’ di rusod di piro-piro o kinorohingan dot olidang,’’ ka dau. ¹⁹ Om kotigowo tomod diri i Daniol, i roitan dot i Biltisasar, do nokorongou’ddi, gisom dot a’ no iyau nokoboros do piro-piro o saat. Om boros ka di Raja’ Nobukadnisar dot id dau, ’’Oi Biltisasar, kada’ kooris di nipi om i komoyon diri,’’ ka dau. Om boros kad i Biltisasar do suminimbar, ’’Oi Tuan Raja’, osonong no daa kopio dot i pisangod nu ot oontok di komoyon di nipi nu, om okon daa ko’ iya’. ²⁰ Iri nopo i kayu di nokito nu’ddi nga’ akawas kopio, gisom do nokorikot do hilo’d tawan, om okito ngai’ do tulun do hiti’d pomogunan. ²¹ Om i roun di kayu’ddi nga’ ongolumis tomod, om kabagal i’ do kanon do koinsanai’d suang diti pomogunan i tua’ di kayu’ddi. Om lumungung ngai’ o nintorusan do hiri’d sahau om momirumun o tombolog do hiri’d karaanan. ²² Oi Tuan Raja’, iya’ no i kayu’ddi, it akawas om ogirot, om nakabantug tomod ko do gisom do nokorikot do hilo’d tawan o kobontugo’ nu, om pomorintaan nu nga’ nokotongkop diti pomogunan. ²³ Om soira’ di poingontong ko, oi Tuan Raja’, om lintuhun no o moloikat do mantad hilo’d surga, om pomoros nod poingkaa, ’Tagado’ ilo kayu om raagon i’, nga’ pologoson piya i tuod do poingudong do hilo’d tana’. Om kagasan nori do rantai’d basi’ om tambaga’ om pologoson nopo do poirolot di sakot do hilo’d talun. Om pologoson nopo dot abalabahan om pologoson do poirolot do nintorusan do solinaid do turu’ o toun,’ ka. ²⁴ Poingkaa o komoyon diri, oi Tuan Raja’, om iri no o pinoboros do Kinorohingan it Asawat Kopio do pasal dit osiliu dot id diya’ do koimbagu. ²⁵ Ouyung ko nondo do mantad id pogialatan do tulun om miyon ko nondo do hilo’d talun do poirolot do nintorusan. Om turu’ nondo o toun nu do mangakan do sakot do miagal di sapi’, om hilo’d liwan o toodopon nu, om abalabahan ko nondo. Om okunon nu nogindo do Kinorohingan it Asawat Kopio, o kikuasa’ dot id sawat do koinsanai’d pomorintaan do tulun, om milo iyau do papatahak di pomorintaan diri dot id isai nopo i pilion dau. ²⁶ Pinoboros i’ di moloikat do pologoson i tuod do poingudong do hiri’d tana’. Om komoyon nopoddi nga’ osiliu ko i’ kawagu do raja’ dot aakun nu do Kinorohingan o momorinta’ do koinsanai diti pomogunan. ²⁷ Iyo nopoddi, om osonong daa kopio do tumanud ko do nosihat ku, oi Tuan Raja’. Kada’ nondo pomonsoi kawagu’d dusa, suwai ko’ wonsoyon no it osonong om it otulid, om insianan no i tulun do mosikin. Om osimbayan ko indo kasai’,’’ ka dau. ²⁸ Om kosiliu ngai’ nopo o miagal diri dot id doho’, iyoho’ i Raja’ Nobukadnisar. ²⁹ Hopod poddi om duwo o tulan do mantad diri, do tontok di mimpanau oku do hiri’d tinanaman do bunga dit id sakai di taap do walai ku do don raja’ do hilo’d Babil, ³⁰ om pomoros oku no do poingkaa, ’’Antangai pogi’, nga’ agayo no moti’ o bandar do Babil! Om winonsoi ku iti bandar ku’d agayo do popointalang do kuasa’ om kokoriso’ om kagayaan, om kobontugo’ ku,’’ kangku. ³¹ Nga’ maha’ dit a’ ku po nopupusan i boros ku, om korongou ku no o boros do mantad hilo’d surga do poingkaa, ’’Oi Raja’ Nobukadnisar, pokinongou nodti poboroson ku! Baino’ nopo om noongoi no do mantad id diya’ o kuasa’ nu do don raja’. ³² Om uyungon ko nondo do mantad id pogialatan do tulun om poinsugku’ ko pondo do nintorusan do hilo’d talun. Om mangakan ko nondo do sakot do miagal di sapi’ do solinai’d do turu’ o toun. Om okunon nu nogindo do haro o kuasa’ do Kinorohingan it Asawat Kopio dot id sawat do pomorintaan do tulun om milo iyau do papatahak di pomorintaan diri dot id disai nopo i pilion dau,’’ ka dau. ³³ Om diiri i’ om diiri do nabayaan i boros diri. Tu’ nouyung oku’ddi, iyoho’ i Nobukadnisar, do mantad id pogialatan do tulun om mangakan oku’ddi do sakot do miagal do sapi’. Om oyopos poddi do bolobou o tinan ku, om i tobuk ku nga’ numinaru’ddi do rompok di talad do kondiu, om sondulu ku nga’ nakanaru do miagal pod sondulu do tombolog. ³⁴ Om katalib poddi i turu’ o toun, om tingaha’ oku no do hilo’d tawan, om koguli’ no i pomusarahan ku dit osonong. Om royoho’ ku no i Kinorohingan dit Asawat Kopio om pinusou ku om pinoinggayo ku iyau, i poimpasi do gisom do poingompus. Kinorohingan no o momorinta’ do gisom dot alaid. Om iyau o kikuasa’ do gisom do poingompus. ³⁵ Aiso’ i’ toomod o kuasa’ do tulun do hiti’d pomogunan dot id pagantangan dau. Id suang ngai’ i’ do kuasa’ dau o moloikat do hilo’d surga om tulun do hiti’d pomogunan. Aiso’ i tiso’ do tulun do milo do sumaap do korohian dau, ko’ katama’ po do monguhot ondung nunu o wonsoyon dau. ³⁶ Soira’ di nokoguli’ i pomusarahan ku dit osonong, om iri nogi’ i kobontugo’ ku om i kagayaan ku om i kobontugo’ do pomorintaan ku nga’ pinoguli’ ngai’ nogi’ dot id doho’. Rinamit oku i’ do koinsanai di pagawai ku om i tulun ku dit ongkipangkat. Om pinatahak kawagu dot id doho’ i pomorintaan ku. Om abantug oku poddi ko’ mantad di gulu po. ³⁷ Om baino’ noddi, om iyoho’ no i Nobukadnisar, o mamarayou om popoinsawat, om popoinggayo di Raja’ do Surga. Koinsanai’ddi wonsoyon dau nga’ otopot i’ om otulid, om milo iyau do popoinsiriba’ dot isai nopo o tulun di minggayo-gayo,’’ ka.

¹ Insan o tadau om pangalap no i Raja’ Bilsasar do soribu o tulun dau dit ongkipangkat do rumapou dot id poginakanan dot agayo, om ponginum no iyolo’ do waig dot anggur. ² Om soira’ di maso diyolo’d minum, om ponuhu’ no i Bilsasar do mongongoi di sangkir om mangkuk do tamas om pirok, i tinanggayan di Nobukadnisar i tapa’ dau, do mantad hiri’d Walai’d Sasambayangan dot Agayo di hilo’d Yorusalim. Pinokianu pogi’ di Raja’ Bilsasar iri nga’ koinum indo iyau, om i tulun dau di kipangkat, om iri ngai’ i sawo dau, om i tongoondu’ do ponokosawo dau dot i sangkir diri o ponginuman. ³ Om olomus nopo do nongoi patahako’ dot id di Bilsasar i sangkir om i mangkuk do tamas diri, om ponginumai no diyolo’ iri do waig dot anggur. ⁴ Om pamarayou no iyolo’ di ponokokinorohingan di pirok, tambaga’, basi’, kayu om watu do winonsoi. ⁵ Om sigog id intalang o palad do tulun om pintulis nori do hiri’d limput di walai’d raja’ do hiri’d kotitihon kopio di lampung. Om kokito’ddi di raja’ i palad diri do maso nod monulis. ⁶ Om koposi’ nopo iyau dot opopoddosian, om totud po dau nga’ gagaran po tomod. ⁷ Om pomogiak no iyau do minomolohou do songulun do mongoi pomolohou di bobolian, om it ongoilo do limu’, om i milo do mogontong do komoyon do rombituon. Om soira’ddi nakasalakoi iyolo’ om boros ka di raja’ dot id diyolo’, ’’Isai nopo i milo do mambasa’ diti tulis om i milo do momisunud doho’ do komoyon diti, om rosukan ku no do rasuk do don raja’ dit otomou daragang-ragang, om sulungan ku’d karo do tamas, do maan do pomusou, om silihon ku do pomorinta’ dit id siriba-riba’ di wakil ku,’’ ka dau. ⁸ Om insomok ngai’ no i tulun dit ongoilo, nga’ aiso’ i’ o tiso’ piya diyolo’ do kabasa’ di tulis diri ko’ milo po do momisunud di raja’ do komoyon diri. ⁹ Om oposi’ poddi tomod i raja’ dot adalaan do moddosi, om iri tulun dau dit ongkipangkat nga’ aiso’ no o pokukurayan diyolo’. ¹⁰ Om korongou’ddi di tina’ di raja’ dot ohiyo i raja’ om i tulun dit ongkipangkat, om suang no iyau do hiri’d kinoiyonon do moginakan. Om boros ka dau, ’’Maha’ daa om otogui o raja’! Kada’ kopio katangkabo om kada’ umposi’. ¹¹ Tu’ haro i’ o songulun o kusai do hiti’d pomorintaan nu di porintaon do rusod do piro-piro kinorohingan dit olidang. Tontok di maso pod raja’ i tapa’ nu om nokointalang kopio dot oilo om obinsuhut om kitoilaan dot aralom do miagal do toilaan do kinorohingan i tulun diri. Om siniliu nogi’ di Raja’ Nobukadnisar i tapa’ nu, i tulun diri do boyoon di mogogontong do nasip, om i bobolian, om it ongoilo do limu’, om i mongingilo do komoyon do rombituon. ¹² Aralom no kopio ko’ dombokon o toilaan dau, om atarom o pomusarahan, om oilo do komoyon do nipi, om milo do sumimbar dit angapagon, om milo do popotuduk do komoyon di songinlisok. Lohowo’ no o tulun diri, i roitan dot i Daniol, om pinungaranan nogi’ iyau di raja’ dot i Biltisasar, om sunudan ko indo dau do komoyon diti tulis,’’ ka dau. ¹³ Om diiri i’ om diiri do nongoi posolowoto’ di raja’ i Daniol. Om boros ka di raja’ dot id dau, ’’Iya’ nogi’ i roitan dot i Daniol, i tulun do Yohudi do tinanggayan di tapa’ ku do hiti do mantad hilo’d Yohuda? ¹⁴ Nokorongou oku do porintaon ko di rusod do kinorohingan dot olidang, om oilo ko, om obinsuhut ko om kitoilaan dot aralom. ¹⁵ Nongolohou ngai’ ku no i tulun dit ongoilo, om i mogogontong, do mongoi pambasa’ diti tulis diti om momisunud daa doho’ do komoyon diti, nga’ aiso’ i’ o koilo diyolo’ do komoyon diti. ¹⁶ Om nokorongou oku’ddi do koilo ko do popointalang di songinlisok om milo ko do sumimbar di tuhoton dit angapagon. Ondung milo ko do mambasa’ diti tulis om milo ko do momisunud doho’ do komoyon diti, om rosukan tiya’ no do rasuk do don raja’ dit otomou daragang-ragang, om sulungan tiya’ do karo do tamas do tanda’ do pomusou, om silihon tiya’ do pomorinta’ dit id siriba-riba’ di wakil ku,’’ ka dau. ¹⁷ Om boros kad Daniol do suminimbar, ’’A’ i’ minog do patahakon doho’ ino tipuhawang nu, patahakon nopo iri dot id tulun do suwai. Basaon ku i’ diya’ i nokotulis oi Tuan Raja’, om sunudan ku iya’ do komoyon diri. ¹⁸ Siniliu do Kinorohingan, it Asawat Kopio, i Nobukadnisar i tapa’ nu do raja’ dot agayo om nonuan dau iyau do kagayaan om kobontugan. ¹⁹ Iyau nopo om abantug kopio, gisom dot oinsanan nopo o tulun do mantad id koinsanai’d pomogunan, om bansa’, om boros do moddosi dau, om gisom do pananggagaran po iyolo’ dot opopoddosian. Ondung sipamatai iyau dot isai nopo o tulun, om ngoyon no kopio dau patayo’. Om ondung sipamasi iyau dot isai nopo o tulun, om posion no kopio dau. Isai nopo o korohian dau do momusou, om pusohon no dau, om iri no i karaatan dau om intingayamon no dau, do tumanud do korohian do ginawo dau. ²⁰ Nga’ tontok di mininggayo-gayo iyau, om di kuminodou o ginawo dau om ruminongit iyau, om koidu’ noddi iyau do mantad hiri’d tirikohonon dau do don raja’, om natagakan iyau di kobontugo’ dau. ²¹ Nouyung diri iyau do mantad id pogialatan do tulun, om nosiliu’ddi do miagal do pomusarahan do nintorusan o pomusarahan dau. Om poirolot diri iyau di kaladai do lalang om mangakan iyau do sakot do miagal do sapi’, om modop nopo iyau do hiri’d liwan, om aiso’ i’ o ponokop piya do tinan dau dit abalabahan. Om alaid noddi om okuno’ nogi’ dau do Kinorohingan dit Asawat Kopio o kikuasa’ dot id sawat do koinsanai’d pomorintaan do tulun om milo iyau do papatahak di pomorintaan diri dot id disai nopo i pilion dau. ²² Nga’ iya’ tu’ tanak dau, om i nongkoilo ngai’ do pasal diti, nga’ a’ i’ mininsiriba’ o ginawo. ²³ Suminaap ko i’ do TUHAN di hilo’d surga, tu’ nongoi nu i sangkir om i mangkuk di nanu do mantad hilo’d Walai’d Sasambayangan dot Agayo. Pinonginuman dokoyu di tulun nu dit ongkipangkat, om i piro-piro sawo nu, om i tongoondu’ di ponokasawo nu do waig dot anggur, i sangkir diri. Om pamarayou kou nogiddi di ponokokinorohingan di winonsoi do mantad id tamas, om pirok, om tambaga’, om basi’, om kayu, om watu, i ponokokinorohingan dit a’ kokito om a’ korongou, om it aiso’ o toila-ilaan. Om a’ ko nogi’ minomusou do Kinorohingan di mongilo ondung masi ko ko’ matai po, om i manantu’ do koinsanai’d wonsoyon nu. ²⁴ Om iri no o kinoponuhuan do Kinorohingan di palad do minongoi ponulis do boros dau’ddi. ²⁵ Poingkaa no i tulis diri, ’Intobo’, intobo’, timbango’, bohogio’,’ ka. ²⁶ Om poingkaa o komoyon diri, ’Intobo’’, nointob nod Kinorohingan o tadau do koloido’ do pomorintaan nu om pupusan no dau; ²⁷ ’Timbango’’, notimbang ko no dot id ponimbangan om noilaan no dot adalaan kopio ko kagaan; ²⁸ ’bohogio’’, nabahagi’ no o pomorintaan nu om patahakon no dot id tulun do Modia om tulun do Porsia,’’ ka. ²⁹ Om olomus nopoddi i Bilsasar do minonuhu’ di piro-piro o pagawai dau do mamarasuk di Daniol do rasuk di don raja’ dit otomou daragang-ragang, om mangaro dau do karo do tamas. Om siniliu’ddi dau iyau do pomorinta’ dit id siriba-riba’ di wakil di raja’. ³⁰ Nga’ totuong iddi do pinatai i Bilsasar, i raja’ do Babil diri.

¹ Om di nopoddi napatai i Bilsasar, om ahawo’ no di Darius i tulun do Modia, i pomorintaan di Bilsasar. Tontok nopoddi om onom no nohopod om duwo o toun dau. ² Om bohogio’ no di Darius i pomorintaan dau do hatus om duwo nohopod o watas. Om ongkigobunor ngai’ do momorinta’ o hiri’d pointikid-tikid di watas. ³ Om suwai no ko’ mantad diri, om pinili’ nogi’ dau i Daniol, om duwo o tulun do suwai do mitoinu’ di piro-piro o gobunor diri om a’ i’ orugi’ i raja’. ⁴ Om a’ po alaid nga’ koilaai no do poimaha’ o di Daniol do toilaan do kumaraja’ ko’ mantad di piro-piro o pagawai om i piro-piro o gobunor do suwai. Om pomusorou noddi i raja’ do moniliu di Daniol do mongilo-ilo ngai’ do koinsanai di pomorintaan do raja’, tu’ poimaha’ i’ kopio ko’ i wokon o toilaan di Daniol. ⁵ Om umbal no daa’ddi i piro-piro pagawai do suwai om i piro-piro gobunor do suwai do mogihum do kasalaan do karaja’ di Daniol dot id pomorinta’, nga’ aiso’ i’ ot okito diyolo’ tu’ i Daniol nopo nga’ otulid i’ koulun, om otorodok om a’ insan do momonsoi di kasala’ ko’ it araat. ⁶ Om boros kaddi diyolo’ do mogiboro-boros, ’’Aiso’ i’ o nunu-nunu dot okito toko’ do kapasalaan di Daniol ondung okon ko’ kagait do tugama’ dau,’’ ka diyolo’. ⁷ Om ongoi noddi iyolo’ solowot di raja’ om boro-boros no do poingkaa, ’’Oi Raja’ Darius, maha’ daa om otogui ko! ⁸ Oinsanan nopo iyahai, i mongilo-ilo dot id pomorintaan nu dot i mongilo- ilo om i gobunor, om i wakil do gobunor, om i piro-piro o pagawai’d suwai, do nokopogipapakat dot apatut do pokirim ko dot iso’ o surat di potulisan do ponuhuan om apatut do torodokon kopio iri do tumanud. Monuhu’ no, do solinaid nopo do tolu nohopod o tadau om aiso’ no o tiso’ piya’d tulun do pologoson do mokianu do nunu nopo do mantad id nunu nopo o kinorohingan ko’ mantad po dot isai nopo o tulun, do suwai ko’ mantad id Tuan Raja’. Om isai nopo ot a’ tumanud diti ponuhuan diti om pataamon no dot id luang di noponu’d singa. ⁹ Om iyo nopoddi om pokionuon no dahai o Tuan Raja’ do manain di surat diri, om ogirot i’ kopio do sumiliu dot oturan do Modia om Porsia, it a’ no milo’d simbanan,’’ ka diyolo’. ¹⁰ Om soinai noddi di Raja’ Darius i surat di pinotulisan di ponuhuan diri. ¹¹ Om soira’ di nokoilo i Daniol do nosoinan i surat do tinulis diri, om uli’ no iyau do hiri’d walai dau. Om hiri nopod bilik dit id sawat di walai dau nga’ haro o liligaon di poingiwang ponong hilo’d Yorusalim. Om otud no iyau do suminambayang dot id Kinorohingan dau do hiri’d toning di liligaon di pongiwang diri, dot intolu do sangadau do miagal di koubasanan dau. ¹² Om soira’ di nokito di pisangod di Daniol i Daniol do sumambayang dot id Kinorohingan dau, ¹³ om oinsanan nopo iyolo’ do minongoi solowot di raja’ do mongoi papasala’ di Daniol. Boros ka diyolo’, ’’Oi Tuan Raja’, nosoinan nu no i surat di tinulisan dot id suang nopo do tolu nohopod o tadau’dti, om isai nopo i mokianu do nunu nopo do mantad id isai nopo o kinorohingan ko’ mantad id isai nopo o tulun do suwai ko’ iya’, om pataamon no dot id luang di noponu’d singa,’’ ka diyolo’. Om boros ka di raja’, ’’Otopot iri. Iri nopo nga’ ponuhuan dit apatut do tonudon, tu’ nosiliu nori dot oturan do tulun do Modia om Porsia, om it a’ no milo’d simbanan,’’ ka dau. ¹⁴ Om boros kaddi diyolo’ dot id raja’, ’’I Daniol nopo, i tulun do tinanggayan do mantad hilo’d Yohuda, om a’ i’ momusou do Tuan Raja’ om a’ mumboyo’ di boros nu. Intolu kasai’ i’ iyau do sumambayang do sangadau,’’ ka diyolo’. ¹⁵ Om soira’ di norongou di raja’ iri, om tuminongob diri om tuminangkabo iyau om tuminotos daa do mogihum do ralan do mamasi di Daniol. Om umbal i’ daa iyau do mogihum do ralan do gisom do nosodop. ¹⁶ Om guli’ noddi i tulun diri do hiri’d raja’, om boro-boros no dot, ’’Oilaan id Tuan Raja’ do tumanud nopo dot oturan do Modia om Porsia, om aiso’ no ot oturan di nokoboros do raja’ do milo’d simbanan,’’ ka diyolo’. ¹⁷ Om ponuhu’ noddi i raja’ do manangkap di Daniol, om pataamo’ noddi i Daniol do hiri’d luang do singa. Om boros ka di raja’ dot id di Daniol, ’’Maha’ daa om posion ko di Kinorohingan nu di tukuon nu do mikuwo’d otorodok kopio,’’ ka dau. ¹⁸ Om sinompon diri do watu dot agayo i kabang di luang, om sinaapan di raja’ do saap do don raja’ om sinaapan di saap do tulun dau dit ongkipangkat i watu diri, om aiso’ no o tulun do milo do mongoi popoidu’ di Daniol do mantad id singa’ddi. ¹⁹ Om guli’ noddi i raja’ do hiri’d walai dau, om a’ nopo iyau nokoodop di totuong om a’ minakan om a’ milo dot insasamadan. ²⁰ Om osuab poddi om tungag no i raja’ om arau-arau no iyau do minongoi do hiri’d luang do singa. ²¹ Om soira’ di nokorikot iyau do hiri om pillohou no iyau do mikuwo’d tumongob om awagat o ginawo dau. ’’Oi Daniol, i susuhuon do Kinorohingan do poimpasi! Napasi ko i’ di Kinorohingan nu di tukuon nu do mikuwo’d otorodok kopio, do mantad id singa,’’ ka dau. ²² Om korongou noddi dau o boros di Daniol do suminimbar do poingkaa, ’’Maha’ daa om otogui o Tuan Raja’. ²³ Sinuhu’ id Kinorohingan ku i moloikat dau do minongoi polantom do kabang di singa om a’ i’ iyolo’ minanabpo doho’! Pinasi oku i’ do Kinorohingan tu’ oilaan i’ dau dot aiso’ o sala’ ku dot id dau om a’ oku nakasala’ dot id diya’, oi Tuan Raja’,’’ ka dau. ²⁴ Om osonong tomod diri o ginawo di raja’ om ponuhu’ no iyau do papalabus di Daniol do mantad hiri’d luang diri. Om posoliwano’ no diyolo’ iyau om kokito no diyolo’ dot a’ i’ nosuhat i Daniol, tu’ minogondos i’ iyau do Kinorohingan dau. ²⁵ Om ponuhu’ noddi i raja’ do mongoi panangkap do koinsanai di tulun di pinapasala’ di Daniol. Om pataamo’ noddi iyolo’ do mitonggoi ngai’ di sawo om tangaanak diyolo’ do hiri’d luang di noponu’d singa. Om a’ po iyolo’ nokosondot kopio do hiri’d luang, om natabpaan no iyolo’ di singa, om kotipu’ ngai’ nopo o tulang diyolo’. ²⁶ Om ponulis noddi i Raja’ Darius do surat do patahakon dot id koinsanai’d tulun, do mantad id koinsanai do pomogunan, om bansa’, om boros do hiti’d pomogunan do poingkaa, ’’Tumabi’ oku dot id dokoyu! ²⁷ Monuhu’ oku do koinsanai’d tulun do pointongkop do pomogunan di porintaon ku dot apatut do rumonok om momusou do Kinorohingan di tukuon di Daniol! Iyau no o Kinorohingan di poimpasi do gisom do poingompus, om iyau no o momorinta’ do gisom do kopupuson diti pomogunan. A’ i’ araag o pomorintaan dau, om a’ aayi’ o kokoriso’ dau. ²⁸ Mamasi iyau om popoidu’, momonsoi iyau do koimayaan om kopusahan do hilo’d surga om hiti’d pomogunan. Ginompi’ i’ dau i Daniol gisom dot a’ iyau napatai di singa,’’ ka. ²⁹ Om asawat kasai’ i’ o pangkat di Daniol do solinaid do pomorintaan di Darius om pomorintaan di Koris, i tulun do Porsia.

¹ Tontok di sontoun nogi’ i Bilsasar do raja’ do Babil, om minongipi oku, om nokokito oku do pinointalang do tontok dot insan o tuong. Om tuliso’ ku no i noipi ku, om iti no o tinulis ku ² do pasal di nokito ku dot id pinointalang diri: Tumongus tomod nogi’ dot opuhod om posorili’ nopo o tadon di tongus gisom do guminayo diri i tumbak do rahat. ³ Om imbulai no ot apat o nintorusan dit angagayo do mantad hilo’d rahat, om mogisuayan o bansa’ di nintorusan diri. ⁴ Iri nopo koiso’ nga’ miagal-agal do singa o kokitanan nga’ kitalad i’ do miagal do dong kondiu. Om di nopo di maso ku do poingontong diri om sigog id kouul i talad di nintorusan diri. Om koinsawat noddi i nintorusan diri do mantad hiri’d tana’ om poingkakato’ no do miagal do tulun tu’ duwo o gakod. Om onuwai nori do pomusarahan do don tulun. ⁵ Iri no nintorusan do koduwo om miagal-agal do bohuang, om poingkakat iri do duwo no o gakod. Om kitinangau iri do tolu o tulang do tikagang, om haro’ddi o boros do minomoros dot id nintorusan diri do poingkaa, ’’Pimbangat nopod mangakan do daging!’’ ka nogi’. ⁶ Om maso ku po do poingontong diri nga’ imbulai po kawagu o nintorusan do suwai. Iri no om miagal-agal do tontokinon nga’ haro iddi ot apat o talad do hiri’d likud, do miagal-agal do talad do tombolog, om apat o tulu di nintorusan diri. Om kokitanan nopo nga’ miagal do haro o kuasa’. ⁷ Om tontok di poingontong oku’ddi om imbulai no kawagu o nintorusan di kaapat. Om iri nopo nga’ okoris kopio om orongit om korolosi. Ogop-ogopon nopo di nintorusan diri i nintorusan di kanon dau, tu’ angagayo i’ o nipon dau om okodou do miagal do basi’, om pingulakan nopo dau i topod dau do minangakan. Nga’ iri nopo om suwai no ko’ mantad di piro-piro nintorusan dit id gulu ko’ iri, tu’ iri nopo om kisangau do hopod. ⁸ Om tontok di poinsonsod oku di sangau, om kokito ku ot iso’ o sangau do suwai dit okooro’ do suminuni dot id pogialatan di sangau. Om iduwo’ nopo di sangau dot okooro’ddi o tolu dot id pogialatan di sangau mantad. Iti nopo sangau dot okooro’dti nga’ kimato do miagal do don tulun, om kikabang di mimboros tomod do minggayo-gayo. ⁹ Tontok di maso ku do poingontong diri om haro nogiddi o piro-piro o tirikohonon do raja’ do nongoi posodiawo’. Om ongoi no irikau dot id tiso’ di tirikohonon do raja’ i poimpasi do gisom do poingompus. Iri nopo pakayan om tobuk dau nga’ miagal pod gapas kopurak. Om iri no tirikohonon dau om kiruda’ di kitapui do molob-ngolob. ¹⁰ Om iyo pod poluyungon i tapui do lumabus do mantad hiri’d tirikohonon di don raja’ddi. Om rinibuan po o tulun do mogobi-obi’ dau’d hiri, om bojuta-juta o tulun do songingkakat dot id toguang dau. Om timpuun noddi i bisara’ om ukabai ngai’ no i buuk. ¹¹ Om tontok di maso ku do poingontong, om rongo-rongohon ku i sangau dit okooro’ddi do mimboros tomod do mokirayou-rayou om minggayo-gayo. Om poingontong oku do nongoi patayo’ i nintorusan di kaapat, om pinataam diri i tinan dau do hiri’d sinikit do tapui om hiri no o kinopupuson diri. ¹² Nga’ iri nopo nintorusan do suwai om nongoi no iduwo’ i kuasa’ diyolo’, om pinologos i’ do poimpasi do gisom dot orikot i maso di natantu’ mantad. ¹³ Om id suang nopod pinointalang di nokito ku di totuong diri om nokokito oku do miagal-agal do tulun. Om mongoi nogi’ rapou doho’ i tulun diri, om nosorili’ po nogid haun i tulun diri. Om ongoi no iyau insomok di poimpasi do gisom do poingompus om pinointutun diri iyau dot id poimpasi di gisom do poingompus. ¹⁴ Om nonuan diri iyau do kuasa’ om karayahan, om kuasa’ do don raja’, om oinsanan indo o tulun do mantad id koinsanai’d pomogunan, om bansa’, om boros do mogobi-obi’ dau. Om mompus-ompus nondo kasai’ o kuasa’ dau om a’ aala’ o pomorintaan dau. ¹⁵ Om nokoborulong diri doho’ i nongokito ku dot id pinointalang diri, om agangau tomod o ginawo ku. ¹⁶ Om ongoi oku no rapou di songulun dit id pogialatan di songingkakat do hiri om pokisunud oku no do komoyon ngai’ddi. Om sunudai oku no dau do komoyon diri. ¹⁷ Om boros ka dau, ’’Iri nopo it apat o nintorusan dit angagayo’ddi nga’ apat o pomorintaan do mingkakat do hiti’d pomogunan. ¹⁸ Om kaanu nondod kuasa’ do momorinta’ i tulun do songonuon do Kinorohingan dit Asawat Kopio, om mompus-ompus o pomorintaan diyolo’,’’ ka dau. ¹⁹ Om orohian oku pod koilo do komoyon di nintorusan di kaapat, tu’ suwai kopio iri ko’ mantad di nintorusan do suwai, i nintorusan di kotompurolosi om it ogop-ogopon nopo i nintorusan dit atabpaan dau, dot i sondulu do tambaga’ om nipon do basi’ o pomoruta’ dau, om pingulakan nogindo i topod dau’d mangakan. ²⁰ Om mokiilo oku po do pasal di hopod o sangau do hiri’d tulu di nintorusan diri om i sangau dit okooro’ di suminusuhut do minimbulai, i minongidu’ do tolu di sangau mantad. Iri nopo nga’ kimato om kikabang di mimboros po tomod do minggayo-gayo. Om korolosi no kopio iri ko’ mantad di sangau’d suwai. ²¹ Om tontok di maso ku do poingontong, om sangod no i sangau’ddi di tulun do songonuon do Kinorohingan, om kaala’ no dau iyolo’. ²² Om rikot noddi i poimpasi do gisom do poingompus do minongoi popoboros dot ibutus di popotopot di tulun di songonuon do Kinorohingan dit Asawat Kopio. Om nokorikot no i maso do koonuan di tulun di songonuon do Kinorohingan do kuasa’ do momorinta’. ²³ Om poingkaa no o komoyon diri do pinosusui dot id doho’, ’’Iri nopo nintorusan do kaapat nga’ pomorintaan di kaapat do hiti’d pomogunan, om i suwai kopio ko’ mantad do pomorintaan di suwai. Om mumukon nopondo om raagon di pomorintaan diri o pointongkop diti pomogunan om pingulakan dau it ongoolu’ dau. ²⁴ Iri nopo i hopod o sangau’ddi om hopod o raja’ do momorinta’ do pomorintaan diri. Om haro nondo o tiso’ o raja’ do mimbulai; om iyau nopo om suwai kopio ko’ mantad di piro-piro raja’ dit id gulu, om mangala’ iyau do tolu o raja’. ²⁵ Om mimboros nondo iyau do sumaap do Kinorohingan dit Asawat Kopio om mongulok-ulok iyau do tulun di songonuon do Kinorohingan. Om umbalan nondo dau do monimban it oturan om i tadau’d agayo do tugama’ diyolo’, om id suang nondod kuasa’ dau i tulun di songonuon do Kinorohingan do solinaid do tolu o toun om satanga’. ²⁶ Om tumimung nondo i momumutus di hilo’d surga, om iduwon nondo i kuasa’ dau, om patayon nopondo kopio iyau. ²⁷ Om patahakon nondo i kuasa’ om kagayaan do koinsanai di pomorintaan do hiti’d pomogunan dot id tulun di songonuon do Kinorohingan dit Asawat Kopio. Om a’ nondo opupus-pupusan i kuasa’ diyolo’ do don raja’ om oinsanan nopondo o pomorinta’ do hiti’d pomogunan do mogobi-obi’ om mumboyo’ diyolo’,’’ ka. ²⁸ Iri-iri no i susuyon diri. Om moddosi tomod oku’ddi do gisom do minumposi’ oku, om pakangkabo’ ngai’ ku nopori. Aiso’ i’ o tiso’ piya’d tulun do sinunudan ku’ddi.

¹ Om tontok di kotolu nod toun di Raja’ Bilsasar do momorinta’, om haro po kawagu o pinointalang dot id doho’. ² Id suang nopod pinointalang diri om hilo’ oku nogid bandar do Susan di kitolig, i bandar dot agayo do Porsia, it id watas dot Ilam, om poingkakat oku nogi’ do hiri’d toning di Bawang dot Ulai. ³ Om kokito ku no o songinan o dumba’ do tontoluhan do hiri’d tisan di bawang, do kisangau’d duwo dit anaaru. Nga’ iri nopo tiso’ di sangau, nga’ anaru-naru om wagu-wagu ko’ mantad di tiso’. ⁴ Om piantangan ku’ddi i dumba’ di tontoluhan diri do popinsungu di sangau dau do ponong id kotonobon, om ponong id utara, om ponong id salatan. Aiso’ no o tiso’d nintorusan do kasaap dau ko’ koidu’ po do mantad id kuasa’ dau. Mingwonsoi nopo iyau do tumanud di korohian dau om muhang-ruhang o kasasawat do ginawo dau. ⁵ Om tontok di minguhot ot id suang do ginawo ku ondung nunu o komoyon diri, om okohus nopo o songinan o kambing do tontoluhan do tuminangkus do mantad ponong hilo’d kotonobon. Om osiau tomod i kambing diri gisom dot a’ no kosondot do tana’ o gakod dau. Om haro nogi’ o sangau di kambing diri dit atalang tomod do hiri’d pialatan di duwo o mato dau. ⁶ Om pakayaai no di kambing do tontoluhan diri do ponong hiri’d dumba’ di tontoluhan, i nokito ku do poingkakat do hiri’d tisan di bawang. Om tohubai no di kambing i dumba’ddi do mikuwo’d naayi-ayi’ no o kinoris dau. ⁷ Om piantangan ku’ri do suminaap di dumba’ di tontoluhan diri. Om adalaan no kopio i kambing do tontoluhan do tumogod gisom do tohubai nopo dau i dumba’ do tontoluhan diri, gisom do kotipu’ goduwo nopo i sangau di dumba’ddi. Om a’ no kotori’ do sumaap i dumba’ do tontoluhan diri. Kataam nopo i dumba’ddi do hiri’d tana’ om nopingulakan, om aiso’ no tiso’ piya’d tulun do milo do monguhup dau. ⁸ Om muhang-ruhang nopoddi o kasasawat do ginawo di kambing do tontoluhan diri. Nga’ maha’ di nokoinggayo no kopio’ddi o kuasa’ dau, om kotipu’ no i sangau dau dit agayo. Nga’ sowoliai nori dot apat o sangau di suwai-suwai kopio, om i mogisuayan o kotudukon. ⁹ Om tolidai no o tiso’ di sangau’ddi do sangau dot okooro’. Om kuasa’ nopo di sangau dot okooro’ddi nga’ nokorikot do hilo’d salatan om hilo’d koulayon om ponong hilo’d Tana’ di Pinabatos. ¹⁰ Om ruminuhang iddi o kokoriso’ di sangau’ddi gisom do nakasaap iyau do soudor do surga, iri no i rombituon, om haro piro-piro di rombituon do pinataam dau do hilo’d tana’ om piningulakan diri dau. ¹¹ Om minongindaraat nogi’ iyau di boyoon do soudor do surga, om tiningkod dau i porsombahan do sumbolion di monikid tadau do patahakon dot id boyoon diri. Om hinuyas dau i Walai’d Sasambayangan dot Agayo. ¹² Om timpuun noddi i tulun do hilo’ do mingwonsoi’d dusa do hiri om a’ iyolo’ pinapatahak do porsombahan di sinumbali’ do miagal di natantu’ mantad do wonsoyon, om pinataam nogiddi diyolo’ do hilo’d tana’ i sambayang dit otopot. Om nunu nopo i wonsoyon di sangau’ddi nga’ owonsoi ngai’ nopo. ¹³ Om korongou ku’ddi o tiso’ o moloikat do minuhot di tiso’ dau do poingkaa, ’’Songkuro nopo o koloido’ di nongokito dot id pinointalang diri dot iyo’ddi? Songkuro nopo o koloido’ di dusa dot agayo’ddi do sumowoli di porsombahan di sumbolion do monikid tadau? Piro nopo o koloido’ di soudor do surga om ilo Walai’d Sasambayangan dot Agayo dot opingulakan?’’ ka dau. ¹⁴ Om korongou ku no i tiso’ di moloikat do suminimbar do poingkaa, ’’Miagal kasai’ nopondoddi do solinaid do soribu om hatus om limo nohopod o tadau, om solinaid nodti dot a’ katahak i porsombahan do sinumbali’ di dongkosuabon om i dongsosodopon. Om katalib pondo iti om owonsoi nogi’ kawagu i Walai’d Sasambayangan dot Agayo,’’ ka dau. ¹⁵ Om maso ku daa do mumbal do mongilo’d komoyon di nongokito ku dot id pinointalang diri om sigog id ingkakat o koiyo-iyo’d tulun do hiri’d dotoguangan ku. ¹⁶ Om korongou ku’ddi o boros do minomolohou do mantad hiri’d soborong do Bawang dot Ulai. Boros ka, ’’Oi Gabriol, sunudai iyau do komoyon di nongokito dau’ddi,’’ ka. ¹⁷ Om rikot no i Gabriol om ingkakat no do hiri’d toning ku, om ooris tomod oku’ddi gisom do kahaba’ oku nopo do hiri’d tana’. Om boros ka di Gabriol dot id doho’, ’’Oi tulun, ilaai no o komoyon di pinointalang diri. Iri nopo i pinointalang diri nga’ pasal do kopupuson diti pomogunan,’’ ka dau. ¹⁸ Om maso po dau do moro-boros nga’ kahaba’ oku no do hiri’d tana’ do nahadan. Nga’ nigitan oku i’ dau om pinoingkakat oku dau kawagu. ¹⁹ Om boros kaddi dau, ’’Sunudan tiya’ dit osiliu do kootuson di kototogod do Kinorohingan. Om iri nopo pinointalang diri nga’ pasal do kopupuson diti pomogunan. ²⁰ Iri nopo dumba’d tontoluhan di duwo o sangau di nokito nu’ddi om poiyaan di pomorintaan do Modia om Porsia. ²¹ Om iri no kambing do tontoluhan om poiyaan do pomorintaan do Yunani, om iri nopo sangau dit atalang kopio’ddi do hiri’d piolitan di duwo o mato dau nga’ i raja’ di koiso’ i’. ²² Om iri no it apat o sangau do minimbulai di notipu’ i sangau di koiso’, om poiyaan dit apat o pomorintaan dot abahagi’ i pomorintaan do Yunani. Om iso’ poddi nga’ a’ no koiyo do kokoriso’ di pomorintaan dit id gulu. ²³ Om soira’ nopondo dot oruhai-ruhai o kopupuson di piro-piro o pomorintaan diri om tontok di kototos kopio o kararaat diyolo’ om a’ nondo milo’d a’ iyolo’ hukuman, om haro nondo o songulun o raja’ dit okodou kopio o ginawo, om araat, om oilo kopio do magakal. ²⁴ Om kumoris nondo kopio iyau, nga’ okon i’ ko’ mantad dot id dau i kokorisan dau. Om porikot nondo iyau do karaagan di koronob kopio om nunu nopo i wonsoyon dau nga’ owonsoi ngai’ nopo. Om porikot nondo iyau do karaagan dot id tulun dit okoris om id tulun di songonuon do Kinorohingan. ²⁵ Om owonsoi ngai’ nopondo dau i wonsoyon dau do pagakal tu’ oilo i’ kopio iyau do momorulong. Om oondos nondo iyau om ogumu’ o tulun do patayon dau, om a’ i’ iyau popoinsan diyolo’. Om iri piya’ndo Raja’ dit Agayo Kopio nga’ saapon i’ dau, nga’ apatai indo iyau, nga’ okon i’ ko’ kinoris do tulun o kapatai dau. ²⁶ Iri nopo pinointalang do pasal di porsombahan do sumbolion do dongkosuabon om di dongsosodopon di pinosusui dot id diya’ddi om atantu’ no dot abayaan. Nga’ pakangkabon ngai’ nopori do baino’ poo, tu’ alaid pori dot abayaan. Om kada’ posunudo’ iri dot id ongoiso’ piya o tulun,’’ ka dau. ²⁷ Om tumongob oku’ddi om oluhoi oku om suminakit oku do piro-piro o tadau do koloido’. Om tungag oku noddi om guli’ oku no do minongoi pomonsoi di karaja’ di pinonuhuan di raja’ doho’. Nga’ maso ku pod atangkabo do kosorou di nongokito ku dot id pinointalang diri, om a’ oku kosuhut do komoyon diri.

¹ - ² Tontok di sontoun nogi’ i Darius, i tulun do Modia, i tanak do kusai di Ahaswiros, do momorinta’ do hilo’d Babil, om mimbasa’ oku di buuk do don tugama’. Om momusorou oku do pasal di turu’ nohopod o toun do poingraag o Yorusalim, do tumanud di pinosunud do TUHAN dot id di Yoromia. ³ Om sambayang oku noddi dot id TUHAN i Kinorohingan, do mikuwo’d aayi-ayi’ kopio o ginawo ku om mokiinsian kopio oku dau, om puasa oku, om minanampakai oku’d pakayan do mogihad, om minirikau oku do hiri’d pupuk. ⁴ Om sambayang oku no dot id TUHAN, i Kinorohingan ku om okuno’ ku no i dusa do bansa’ ku. Boros kangku, ’’Oi TUHAN, i Kinorohingan, iya’ nopo om agayo i’, om pusohon dahai iya’. Om otorodok ko dot id tumpongo nu om pointalang ko do kosianan nu dit aiso’ o kopupuson dot id tulun dit osianan diya’ om i momonsoi do ponuhuan nu. ⁵ Nokowonsoi no iyahai’d dusa, om araat iyahai, om nokowonsoi iyahai’d sala’. A’ dahai winonsoi i pinonuhuan nu dahai’d momonsoi om tuminongkiad iyahai do mantad id ponudukan nu dit ongotopot. ⁶ A’ iyahai minokinongou di susuhuon nu, i piro-piro di minimboros dot id suang do ngaran nu dot id piro-piro o raja’ dahai, om id pomorinta’ dahai, om id kongomolohingan dahai, om id koinsanai’d bansa’ dahai. ⁷ Iya’ nopo, oi TUHAN, om osonong kasai’ i’ om otulid o wonsoyon nu, nga’ iyahai nopo om managalai nopo do moningayam do tinan dahai. Miagal ngai’ nopoddi iyahai, i poingiyon do hilo’d Yudia om i hilo’d Yorusalim om koinsanai’d tulun dot Israil di pinotompias nu dot id pomogunan dit id sodu’, om it id somok tu’ a’ i’ iyolo’ otorodok dot id diya’. ⁸ Kointingayam tomod o kowoyo-woyoon do koinsanai’d raja’ om pomorinta’ om komolohingan dahai, om minomonsoi iyolo’d dusa dot id toguang nu, oi TUHAN. ⁹ Nga’ obinsianan ko i’ om obingampun ko do mulong piya do suminaap daa iyahai diya’. ¹⁰ A’ iyahai minokinongou diya’, oi TUHAN, i Kinorohingan dahai, do tontok di minomisunud ko dahai do tumanud dit oturan do pinatahak nu dahai, do pinolombus di piro-piro o nabi, i susuhuon nu’ddi. ¹¹ Oinsanan nopo o tulun dot Israil do tuminolibamban dit oturan nu om minada’ do mokinongou di pinoboros nu. Nokowonsoi iyahai’d dusa dot id toguang nu, om gowoi poddi om pinaratu’ nu dot id dahai i popol di nokotulis do hiri’d Tourat di Musa, i susuhuon nu’ddi. ¹² Om wonsoyo’ nu no o miagal di pinabatos nu do wonsoyon nu dot id dahai om id pomorinta’ dahai. Om awagat no kopio o pinomohukum nu’d Yorusalim ko’ mantad di bandar do suwai do hiti’d pomogunan. ¹³ Pinorikot ngai’ nu nopo dot id dahai o koinsanai di hukuman do nokotulis do hiri’d Tourat di Musa. Nga’ iyo piya’ddi, oi TUHAN i Kinorohingan dahai, nga’ a’ i’ kasai’ iyahai mumbal do tumongkiad do dusa ko’ mumbal pod tumanud di ponudukan nu, do poposonong do ginawo nu. ¹⁴ Iya’ no, oi TUHAN i Kinorohingan dahai, o minomohukum dahai di kosusaan di nokosodia’ mantad, tu’ osonong kasai’ i’ om otulid o wonsoyon nu, nga’ a’ i’ iyahai minokinongou diya’. ¹⁵ Oi TUHAN, i Kinorohingan dahai, pinointalang nu i kuasa’ nu do tontok di pinoposoliwan ko do tulun nu do mantad hilo’d Masir, om osorou kasai’ po i kuasa’ nu’ddi. Nokowonsoi no iyahai’d dusa, om nakasala’ iyahai. ¹⁶ Minogobi’ ko i’ dahai di gulu po, om iyo nopoddi om kada’ nondo kotogod do Yorusalim. Tu’ iri nopo om bandar nu i’ om nuluhon nu dit olidang. Om poinsiriba-ribaon poddi di tulun di hiri’d pomogunan do posorili’ do Yorusalim i tulun nu do gama’ di dusa dahai, om i karaaton di komolohingan dahai. ¹⁷ Oi Kinorohingan, pokinongoho’ no iti sambayang ku om iti pokionuon ku. Tondulio’ no i Walai’d Sasambayangan dot Agayo, i naraag diri; sonongo’ nori om koilo ngai’ i’ o tulun dot iya’ no o Kinorohingan. ¹⁸ Pokinongoho’ no iyahai, oi Kinorohingan; antangai no iyahai, om antangai no iti kosusaan dahai om i koinggoritan di bandar di pinungaranan do ngaran nu. Sumambayang iyahai dot id diya’ tu’ oilaan i’ dahai dot obinsianan ko, om okon i’ ko’ mantad do kosonongo’ do winonsoi dahai o poimpahan nu’d kosianan nu. ¹⁹ Oi TUHAN, pokinongoho’ no iyahai, om ompunai no iyahai om wonsoyo’ no kopio’d oruhai it apatut nu’d wonsoyon. Kada’ kalaid, om koilo ngai’ indo o tulun dot iya’ no o Kinorohingan. Tu’ diya’ i’ di bandar diri om diya’ di tulun,’’ kangku. ²⁰ Om a’ oku i’ tuminingkod do suminambayang, om mingakun do dusa ku om i dusa di bansa’ ku, iri no i bansa’ dot Israil, om mikuwo’d mokianu’d TUHAN i Kinorohingan ku, do tondulion dau i Walai’d Sasambayangan dot Agayo, it Olidang diri. ²¹ Om tontok di maso ku’d sumambayang, om rikot no i Gabriol, do mulud-tulud do hiri’d toning ku. Iyau no i nokito ku dot id pinointalang dit id gulu ko’ iti. Om maso nopoddi nga’ kapatahakan nod porsombahan di sumbolion di dongsosodopon. ²² Om boros ka dau, ’’Oi Daniol, ruminikot oku’d hiti do mongoi diya’ posuhut do komoyon di pinoboros do pasal dit osiliu dot id dabantalan. ²³ Tontok di tuminimpuun ko do mokianu do Kinorohingan om simbaro’ ko no dau. Osianan i’ iyau diya’, om nokorikot oku’ddi do mongoi pomisunud diya’ dit isimbar dau. Om dinondo nodti om mokinongou no do maso ku’d popoboros do komoyon di pinointalang diri. ²⁴ Iri nopo i maso do natantu’ do Kinorohingan do polobuson i bansa’ nu om i bandar dokoyu dot olidang do mantad id dusa om karaaton nga’ inturu’ o turu’ nohopod o toun. Ompunan nondo o koinsanai’d dusa om pogiroton do gisom do poingompus it otulid, om abayaan i’ i pinointalang om i pinoboros do pasal dit osiliu dot id dabantalan, om asambayangan indo kawagu do patahakon dot id TUHAN i Walai’d Sasambayangan dot Agayo, it olidang diri. ²⁵ Tuliso’ noti, om ilaan no kopio: Mantad nopo di maso do koponuhuan do mononduli’ do Yorusalim, om inturu’ pondo i turu’ o toun do koloido’. Om owonsoi nondo kawagu o Yorusalim om awansayan do ralan om tolig dit ogirot. Om poingiyo kasai’ nondoddi do solinaid dot inturu’ ot onom nohopod om duwo o toun, nga’ tontok nopondod maso’ddi om maso dit osusa’ kopio. ²⁶ Om kooyion nopondod maso’ddi om apatai nondo i boyoon do nopili’d Kinorohingan, nga’ aiso’ i’ o sala’ dau. Om araag nondo i bandar om i Walai’d Sasambayangan dot Agayo do raagon do soudor dit ongokoris kopio. Om miagal pondod luyud i kopupuson do pomogunan do rumikot tu’ mongigit do pisangadan om karaagan di natantu’ mantad nod Kinorohingan. ²⁷ Om haro nondo o piumpangaan do pomorinta’ diti, dit ogirot kopio dot id tulun dot ogumu’, do solinaid do turu’ o toun, om piintangaan nopondod maso’ddi, om tingkodon nondo dau o porsombahan di sumbolion om i piro-piro o porsombahan di suwai. Om poiyonon nondo i Karaaton di Mamaraag, do hiri’d Walai’d Sasambayangan dot Agayo, om hiri kasai’ nondo iri do gisom pod orikatan do kapatayon di natantu’ mantad do Kinorohingan i pinopoiyon diri do hiri,’’ ka dau.

¹ Tontok di kotolu’d toun di Raja’ Koris do momorinta’ do Porsia, om haro o boros do pinointalang dot id di Daniol, i pinungaranan dot i Biltisasar. Iri nopo i boros diri om otopot i’ kopio nga’ apagon kopio do mongilo o komoyon. Om iri nopo komoyon di boros diri om pinotuduk dot id di Daniol dot id suang do pinointalang. ² Tontok nopoddi nga’ mogihad oku do solinaid do tolu kopio o minggu’. ³ Om a’ oku i’ minangakan do nunu nopo o taakanon dit awasiu ko’ tikanas po, om a’ oku minonginum do waig dot anggur, om a’ ku sinudai o tobuk ku dot a’ po natalib i tolu o minggu’. ⁴ Tontok di tadau’d koduwo nohopod om apat, di tulan do koiso’ do toun diri, om poingkakat oku do hiri’d tisan do Bawang do Tigris, i bawang dot agayo. ⁵ Tingaha’ oku no om kokito ku o songulun do kipakayan dot opurak om kitagkos do tamas di nosompipi’. ⁶ Om mogulinau nopo o tinan dau do miagal do watu dit olumis om it agayo o gatang. Om rabas dau nga’ miagal pod kanawaho’ do kodumaat, om iri mato dau nga’ abahang tomod do miagal do tapui. Om iri longon om gakod dau nga’ okolong poo do miagal do tambaga’ di kinisasan, om iri tuni do boros dau nga’ miagal pod boros do tulun dot ogumu’. ⁷ Om iso-iso’ oku do nokokito do pinointalang diri. Aiso’ i’ o nokokito di tulun di moyo-woyo’ doho’, nga’ nooris i’ ma iyolo’, om poggidu’ no iyolo’ do minongoi lisok. ⁸ Om iso-iso’ oku noddi do noolu’d hiri do miontong di pinointalang di kosuayan kopio’ddi. Om oluhoi no o tinan ku, om rabas ku po nga’ nokosimban tomod do gisom dot aiso’ no matuu daa o kotutun doho’ddi. ⁹ Om soira’ddi norongou ku i boros dau, om kahaba’ oku nopo do hiri’d tana’ do nahadan, om hiri oku noddi do pointungub. ¹⁰ Om haro’ddi o longon do minongoi kama’ doho’ om pinapakakat do longon om totud ku; nga’ gagaran kasai’ oku po. ¹¹ Om boros kaddi di moloikat dot id doho’, ’’Oi Daniol, osianan i’ o Kinorohingan diya’, ingkakat no om pokinongohon no kopio iti poboroson ku. Tu’ sinuhu’ oku do mongoi solowot diya’,’’ ka dau. Om soira’ddi nokoboros dau o miagal diri, om ingkakat oku no, nga’ maso ku pod gagaran. ¹² Om boros kaddi dau dot id doho’, ’’Oi Daniol, kada’ poddosi. Tu’ norongou id Kinorohingan i sambayang nu do mantad poddi tadau do mininsiriba’ ko do mokianu’d toilaan. Om ruminikot oku’ddi dot isimbar di sambayang nu. ¹³ Suminaap doho’ i moloikat do mongintirung do pomorintaan do Porsia do solinaid do duwo nohopod o tadau. Om rikot noddi i Mikail, i tiso’ di boyoon do moloikat, do minongoi uhup doho’, tu’ iso-iso’ oku no do noolu’ do hilo’d Porsia. ¹⁴ Nokorikot oku do mongoi popoilo diya’ ondung nunu ot osiliu dot id bansa’ nu dot id maso dot abantalan. Iti no o pinointalang do pasal dit osiliu dot id dabantalan,’’ ka dau. ¹⁵ Soira’ddi noboros dau o miagal diri, om tuku’ oku nopoddi, om a’ oku no nokoboros. ¹⁶ Om poroloyo’ noddi di moloikat, i koiyo-iyo do tulun diri, i longon dau, om ngoyo’ no kamao’ o munung ku. Om boros kangku dot id dau, ’’Oi Tuan, olomok oku po tomod do nokokito diti pinointalang, om a’ oku nopoddi otingkod do gagaran. ¹⁷ Miagal oku pod turipon do poingkakat dot id toguang di Tuan dau. Poingkuro oku pod moro-boros diya’dti oi Tuan, tu’ olomok oku no, om mumpak- sumpak poo o pinuhobo ku,’’ kangku. ¹⁸ Om ngoyo’ oku po kawagu dau kamao’ om okoris-koris noddi o nopurimanan ku. ¹⁹ Om boros ka dau, ’’Osianan i’ o Kinorohingan diya’, om kada’ pologoso’ o nunu nopo do katangkabo diya’ ko’ kooris po diya’,’’ ka dau. Om soira’ddi noboros dau o miagal diri om nokokoris oku poddi kawagu. Om boros kangku’ddi, ’’Oi Tuan, sunudai oku nopod poboroson nu. Tu’ nokokoris oku no diya’,’’ kangku. ²⁰ - ²¹ Om boros ka dau do suminimbar, ’’Oilaan nu i’ ondung nokuro tu’ ruminikot oku’d hiti’d diya’? Kinorikatan ku nopo om mongoi popoboros dot id diya’, di nokotulis do hiri’d Buuk do Katapatan. Om gumuli’ oku noddi do mongoi sangod di moloikat do mogintirung do Porsia. Om atalib nori, om rumikot no i moloikat do mongintirung do Yunani. Om aiso’ no o monguhup doho’ do suwai ko’ i Mikail, i moloikat do mongintirung dot Israil, i pomogunan nu.

¹ Iyau no i sinuhu’ do monguhup om mogobi’ doho’, do tontok di sontoun nogi’ i Darius, i tulun do Modia, do momorinta’. ² Om iti nopo posunudon ku diya’dti om otopot i’ kopio,’’ ka dau. Om boros ka di moloikat, ’’Tolu po o raja’d suwai do kopomorinta’ do Porsia, om susuhutonon no di raja’ do kaapat, i kaya’ kopio ko’ mantad di suwai. Om koinggayo nopondo kopio o kuasa’ dau om koinggumu’ o kakayaan dau om momusorou nondo iyau do manangod do Yunani. ³ Om mimbulai nondo o songulun o raja’ di gunsiou. Om agayo nondo o pomogunan do porintaon dau, om nunu nopo o korohian dau om iri no o wonsoyon dau. ⁴ Nga’ maha’ di koinggayo kopio o kuasa’ dau, om abahagi’ indo o pomorintaan dau dot apat o bohogian. Sumowoli nopondo dau do momorinta’ om raja’ dit okon ko’ mantad id sinakagon dau, nga’ a’ no iyolo’ koiyo dau kokoris. ⁵ Om kumoris nondo i raja’ do Masir. Nga’ haro nondo o tiso’ di boyoon do soudor dau dot okoris ko’ mantad dau, om agayo-gayo pondo o pomogunan do porintaon diri. ⁶ Om atalib pondo o piro-piro toun, om monokiambalut nondo i raja’d Masir di raja’ do Siria, om pokowinan dau di raja’ do Siria i tanak dau’d tondu’. Nga’ a’ i’ alaid i piombolutan diri, om patayon indo i tanak do tondu’ di raja’ddi, om i sawo dau, om i tanak dau, om koinsanai di susuhuon do tuminanud di tondu’. ⁷ Om a’ pondo alaid do mantad diri, om osiliu nod raja’ o tiso’ di koobpinayan di tanak do raja’d tondu’ddi. Om ngoyon nondo dau songodo’ i raja’ do Siria, om ngoyon soruango’ i kuta’ do pogintirungan diyolo’, om aala’ nondo dau iyolo’. ⁸ Om tanggayan nondo dau do hilo’d Masir i tininganak do tingolig di pisangod dau om i piro-piro o pakakas do tamas om pirok di nakatahak dot id tingolig diri. Om atalib pondo o piro-piro toun do haro o kosimbayanan, ⁹ om ngoyon nondo di raja’ do Siria songodo’ o Masir, nga’ aala’ i’ iyau, om koguli’ iyau do hilo’d pomogunan dau. ¹⁰ Om sumodia’ nondod mongoi sangod i tangaanak do kusai di raja’ do Siria, om monimung iyolo’ do soudor dot ogumu’. Om iri nopo tiso’ diyolo’ nga’ miagal pod luyud do rumudsu’, om ngoyon nondo dau soruango’ o kuta’ do pogintirungan di pisangod dau. ¹¹ Om atatagadan nopondo i raja’ do Masir om mongoi nondo iyau sangod di raja’ do Siria om aala’ nondo dau i soudor do Siria dit ogumu’ddi. ¹² Om oondos tomod nondo iyau di kinamanangan dau tu’ ogumu’ i’ o pisangod do napatai dau, nga’ a’ i’ mando iyau kamanang kasai’. ¹³ Om gumuli’ nondo i raja’ do Siria om monimung po kawagu iyau do soudor dit ogumu’ ko’ mantad di gulu. Om orikot pondo i maso, om pogulian no dau kawagu do miwoyo’ di soudor dit ogumu’ddi, om it ongkirapo-rapo ngai’ do mongoi sangod. ¹⁴ Om ogumu’ nondo o tulun do sumaap di raja’ do Masir. Om haro nondo o tulun dit ongorongit do mantad id bansa’ nu do sumaap, oi Daniol, tu’ nokokito i’ iyolo’ do pinointalang, nga’ aala’ i’ iyolo’. ¹⁵ Om turungkuon nondo di raja’ do Siria o tiso’ do bandar di kitolig, om aanu nondo diyolo’ iri. Om a’ nondo milo’d tumilombus do sumangod i soudor do Masir; tu’ iri piya it osiou kopio diyolo’ nga’ a’ nondo kogoos. ¹⁶ Om wonsoyon nopondo di raja’ do Siria o nunu nopo o korohian dau dot id diyolo’, om aiso’ i’ o kaantob-antob dau do momonsoi’ddi. Om osolod nondo dau i Tana’ di Pinabatos, om oporinta’ nopondo kopio dau iri. ¹⁷ Om suhuon poddi raja’ do Siria o koinsanai di soudor dau do mongoi panangod do Masir. Om ralan nopo dau do momorinta’ do koinsanai’d pomorintaan di pisangod dau, om monokiambalut iyau dau om pokowinan dau di raja’d Masir i tanak dau’d tondu’; nga’ aiso’ i’ mando o kotutuk-tutukon di wonsoyon dau’ddi. ¹⁸ Om katalib pondo iri om ngoyon nondo dau songodo’ i bansa’ do hilo’d potoropis do rahat om ogumu’ nondo ot aala’ dau. Nga’ haro nondo o songulun o boyoon do mantad id pomogunan do suwai do kaala’ dau om moningkod di pongindaraat dau; om iyau nondo ot indaraaton di boyoon di mantad id pomogunan do suwai’ddi. ¹⁹ Om gumuli’ nondo i raja’ do Siria do hiri’d kuta’ do pogintirungan do hiri’d pomogunan dau, nga’ aala’ no mando iyau, om aiso’ nondo o habar do pasal dau. ²⁰ Om sowolion nondo iyau dot iso’ kawagu o raja’, i monuhu’ do pagawai dau dit orongit do mongoi ponginggorit di tulun, tu’ sansagan dau iyolo’ do mambayar do sukai do pomoruhang di kakayaan do pomorintaan dau. Nga’ a’ pondo alaid om patayon no i raja’ddi, nga’ okon i’ ko’ id dokito’d tulun dot ogumu’, om okon ko’ id pisangadan o kapatayon dau,’’ ka dau. ²¹ Om posunudo’ po kawagu di moloikat dot id doho’, o poingkaa, ’’Iri nopo i raja’ do Siria di sumusuhut om tulun dit araat, om it a’ i’ daa osorupai do sumiliu’d raja’, nga’ sigog i’ do rumikot iyau do mangahau’d kuasa’ di don raja’ tu’ magakal i’ iyau. ²² Om isai nopo i sumaap dau dot iri piya i Boyoon dot Agayo dot Imam, nga’ oimuhau tomod nopondo om apatai. ²³ Om monokitaru’ nondo iyau do maan do pagakal do bansa’d suwai. Om muhang- ruhang nopondo o kokoriso’ dau, do mulong piya dot okooro’ daa o pomogunan do porintaon dau. ²⁴ Om ngoyon nondo dau tigowoo’ do manangod i watas dit ongoluhub o tana’, om mingwonsoi nondo iyau dit a’ di komolohingan dau noumbalan do momonsoi. Om bohogion nondo dau dot id tulun di tuminanud dau i konunu-nunuan om i dapu’ do naanu dau dot id pisangadan. ²⁵ Om osiou tomod nondo iyau do mongoi sangod do raja’d Masir tu’ monimung i’ iyau do soudor dot ogumu’, nga’ iri raja’ do Masir nga’ posodia’ nogi’ do sumuli’d sumangod do miwoyo’ di soudor dau dit ogumu’ om ongorongit. Nga’ a’ i’ kamanang i raja’d Masir tu’ kosuang indo iyau’d takal. ²⁶ Om iri i gomponosihat dau dit ogirot kopio o piombolutan dot id dau o paparatu’ dau. Om ogumu’ nondo o soudor dau dot apatai, om aiso’ nondo o soudor dau. ²⁷ Om mitorungak nondod makan i duwo o raja’ddi nga’ sorohon nopo mandod ginawo diyolo’ om araat i’, tu’ sopiudut-udut nopo iyolo’ goduwo. Om a’ indo diyolo’ aanu i pokioonuan diyolo’ tu’ a’ po norikot i maso’ddi. ²⁸ Om gumuli’ nondo i raja’ do Siria do hilo’d pomogunan dau do mitonggoi di konunu-nunuan di nangaanu dau, tu’ iso-iso’ no kopio o ginawo dau do sipananus do tugama’ di tulun do songonuon do Kinorohingan. Om wonsoyon pondo dau i korohian dau om gumuli’ nogindo iyau do hilo’d pomogunan dau. ²⁹ Om alaid-laid pondo om ngoyon nogi’ dau kawagu songodo’ o Masir, nga’ diri nopondo om suwai no o kootuson. ³⁰ Tu’ rumikot nondo i tulun do Rum do songinsakai’d kapal do rahat do mantad hilo’d Siprus do mongoi panangod dau, om moddosi nondo tomod iyau. Om gumuli’ nondo iyau do mikuwo’d otogod tomod om mumbal no daa’ndo iyau do mananus do tugama’ do tulun di songonuon do Kinorohingan. Om tumanud nondo iyau’d nosihat do tulun di tuminongkiad do tugama’ddi. ³¹ Om haro nondo o piro-piro di soudor dau do mongoi ponosomu’ di Walai’d Sasambayangan dot Agayo. Om tingkodon nondo diyolo’ i porsombahan do sumbolion di patahakon do monikid tadau om poingkakaton nogindo diyolo’d hiri i Karaaton di Mamaraag. ³² Om sokodungon nondo i raja’ddi di tulun di tumongkiad di tugama’ diyolo’ tu’ kosuang tomod nopo iyolo’d takal, nga’ sumaap indo do sumuli’ i tulun di maso’d otorodok dot id Kinorohingan. ³³ Om potudukon nondo di piro-piro o boyoon dit ongoilo i toilaan diyolo’ dot id piro-piro tulun do suwai. Nga’ daamot nopondoddi, om haro nondo o wookon diyolo’ dot apatai dot id pisangadan om sorobon do gisom dot apatai, om haro ot apanakahan om maan pogiilo’. ³⁴ Om tontok di maso’d haro o mimpatai, om a’ indo kosongkuro o mongoi uhup di tulun do songonuon do Kinorohingan, om iri piya i koongoi kouhup diyolo’ nga’ obinsuhu’ i’ toomod di pokioonuan diyolo’ o kaangayan kouhupai. ³⁵ Om haro nondo o wookon di boyoon dot ongoilo’ddi dot apatai, nga’ iti nogindo o kolidang di tulun. Om miagal kasai’ nopondodti do gisom id orikot i maso do kopupuson do pomogunan, i maso do natantu’ mantad do Kinorohingan. ³⁶ Om mingwonsoi nopondo i raja’ do Siria do nunu nopo o korohian dau. Om oondos tomod nondo iyau tu’ agayo i’ iyau ko’ mantad do nunu nopo o ponokokinorohingan, om asawat ko’ mantad di Kinorohingan dot Asawat Kopio. Om milo po iyau do mingwonsoi do miagal diri dot a’ po orikot i maso dau do hukuman do Kinorohingan. Om wonsoyon indo do Kinorohingan o miagal di natantu’ mantad dau. ³⁷ Om a’ nondo di raja’ podulon i ponokokinorohingan di sinubak do komolohingan dau, om i ponokokinorohingan do subakon do tongoondu’. Om aiso’ nopo o ponokokinorohingan do podulon dau tu’ sorohon nopo dau dot agayo iyau ko’ mantad diyolo’. ³⁸ Nga’ pusohon nogindo dau i ponokokinorohingan do mongintirung do kuta’ di pogintirungan. Om patahak nondo iyau do porsombahan do tamas, om pirok, om watu dit olumis dit agayo gatang, om piro-piro o tipuhawang dit angagayo gatang dot id ponokokinorohingan dit a’ di komolohingan dau insan subako’. ³⁹ Om suhuon nondo dau o tulun do tumuku’ dot id ponokokinorohingan do suwai di mongintirung di kuta’ do pogintirungan dau. Om suahon tomod nondo dau i tulun di moniliu dau do raja’, om onuan dau iyolo’ do karaja’ dit asawat, om onuan dau do tana’ do maan do pamagadsi’. ⁴⁰ Om soira’ nopondod muhai-ruhai dot orikot o maso do kopupuson di pomorintaan di raja’ do Siria, om ngoyon nondo iyau songodo’ di raja’ do Masir, om tumotos no daa’ndo i raja’ do Siria do sumuli’ do mamakai di korita’-kuda’ om kuda’, om piro-piro o kapal do rahat. Om ngoyon nondo dau songodo’ o piro-piro o pomogunan do miagal po iyau’d luyud di rumudsu’. ⁴¹ Om iri piya i Tana’ do Pinabatos nga’ ngoyon i’ dau songodo’ om piro-piro nopondo nohopod noribu o tulun do patayon dau, nga’ iri nopondo pomogunan dot Idom, om Muab om i noolu-olu’ do pomorintaan dot Amon om a’ i’ dau ngoyon songodo’. ⁴² Om soira’ nopondod ngoyon ngai’ dau songodo’ o pomogunan diri, om osolod ngai’ dau iri, om Masir piya’ndo nga’ a’ no oolu’. ⁴³ Om tanggayan nondo dau i dapu’ do Masir di songinlisok, i tamas, om i pirok om i piro-piro o dapu’ do suwai dit agayo kopio o gatang. Om aala’ nondo dau o Libia om Etiopia. ⁴⁴ Om ooris nondo iyau di habar do mantad hilo’d koulayon om hilo’d utara, om tumotos nondo iyau’d sumangod, om ogumu’ tomod nondo o tulun dot apatai dau. ⁴⁵ Om gisom do powonsoyon dau i kiim dau don raja’ dit agayo om akawas do hiri’d pialatan di rahat om i nuluhon di pinoingkakatan di Walai’d Sasambayangan dot Agayo. Nga’ apatai i’ iyau, om aiso’ o tongosongulun piya’d hiri do monguhup dau,’’ ka dau.

¹ Om boros ka kawagu di moloikat di kipakayan dot opurak, ’’Tontok nopondod maso’ddi om mimbulai nondo i Mikail, i moloikat dot agayo’ddi, om i mongintirung do bansa’ nu. Om haro nondo o maso do kosusaan dit araat no kopio, om aiso’ no o koiyo’ddi do mantad di timpuun i’ do haro o bansa’ dot agayo. Om orikot nopondo o maso’ddi om apasi indo i tulun di mantad id bansa’ nu, i nongkotulis o ngaran do hiri’d buuk do Kinorohingan. ² Om ogumu’ nondo i nangapatai no dot apasi kawagu; haro nondo o kaanu do koposion dit aiso’ o kopupuson om haro o kaanu do kointingayaman dit aiso’ o kopupuson. ³ Om mogulinau ngai’ nopondo i boyoon dit ongoilo do miagal pod kanawaho’ do tawan. Om iri tulun di minonuduk do piro-piro o tulun do momonsoi’d otopot om it otulid nga’ mogulinau nondo do miagal do rombituon do gisom dot alaid,’’ ka dau. ⁴ Om boros ka di moloikat dot id doho’, ’’Posompono’ nondo ino buuk oi Daniol, om saapan no do monompon om poinsompon i’ kasai’ do gisom do kopupuson diti pomogunan. Nga’ daamot nopodti om ogumu’ nondo o tulun do mumbal do mongilo ondung nokuro tu’ miagal diri ot osiliu. Nga’ aiso’ i’ o kotutuk- tutukon di wonsoyon diyolo’ddi,’’ ka dau. ⁵ Om kokito ku’ddi o duwo o kusai do poingkakat dot id tisan do bawang, om miampaping nopo iyolo’ di tisan di bawang. ⁶ Om ponguhot no di moloikat di poingkakat do hiri’d sarayo-rayo di bawang, o tiso’ diyolo’. Boros ka, ’’Songkuro nopo o koloido’ do gisom dot opupusan iti piro-piro ot osiliu di kosuayan kopio’dti?’’ ka dau. ⁷ Om poinsawato’ goduwo no di moloikat o longon dau do pointuduk do hilo’d tawan om sumpa’ no dot id suang do ngaran do Kinorohingan di poingompus. Om norongou ku’ddi iyau do minomoros do poingkaa, ’’Tolu o toun om satanga’ o koloido’ dot osiliu o miagal diri. Opupusan pondod monginggorit i tulun do songonuon do Kinorohingan, om osiliu ngai’ nogi’ iti,’’ ka dau. ⁸ Om norongou ku i’ i pinoboros dau nga’ a’ oku i’ maddi kosuhut. Om ponguhot oku noddi do poingkaa, ’’Nga’ poingkuro nondo iri dot opupusan, oi Tuan’’ kangku. ⁹ Om boros ka dau, ’’Mamanau ko nondo, oi Daniol, tu’ iti nopo boros diti om a’ i’ popimboroson om lisokon do gisom pod orikot o kopupuson do pomogunan. ¹⁰ Om ogumu’ nondo o tulun dot olidangan. Om iri nopondo it angaraat om a’ i’ kosuhut, om tumilombus nopo iyolo’ do momonsoi dot araat; iri no i milo’d momusorou o kosuhut. ¹¹ Mantad nopondo di kinoponingkadan di porsombahan do sumbolion di patahakon do monikid tadau, om mantad di kopoingkakatan di Karaaton di Mamaraag, om 1,290 o tadau do koloido’. ¹² Om olumaag no i tulun dit otorodok kasai’ do gisom dot atalib o 1,335 o tadau! ¹³ Om tumorodok no do gisom do kopupuson, oi Daniol. Om matai ko nga’ tumungag ko indo kawagu do mongoi ramit di ponomuli’ diya’ do kopupuson do pomogunan,’’ ka dau.