KOLOSI

KOLOSI

¹ - ² Oi tobpinai-tobpinai i hiti’d Kolosi, iyokoyu i tulun di songonuon do Kinorohingan om it ongotorodok do poingiso’ dot id Kristus. Mogondos oku, iyoho’ i Paulus, i pinili’ do Kinorohingan do sumiliu’d rasul do Kristus Yesus, om i Timotius i tobpinai toko’ dot onuan kou do Kinorohingan Tapa’ do barakat om kosimbayanan do ginawo. ³ Momoros kasai’ iyahai dot ounsikou dot id Kinorohingan, i Tapa’ do Tuhan toko’ i Yesus Kristus, do tontok do sumambayang iyahai do bagi’ dokoyu, ⁴ tu’ nokorongou iyahai di kotumbayaan dokoyu dot id Kristus Yesus om i kosianan dokoyu do koinsanai’d tulun di songonuon do Kinorohingan. ⁵ Otumbayaan kou om osianan kou, tu’ soro-sorohon kopio dokoyu i nokosodia’ do Kinorohingan do hilo’d surga do patahakon dau iri dot id dokoyu. Om nokorongou kou no do pasal diri do tontok di pinosusui dot id dokoyu i Habar dot Osonong dit otopot. ⁶ Om nokotongkop no do hiti’d pomogunan i habar do mantad id Kinorohingan, om abarakatan kasai’ di habar diri o koposi-posion do tulun, do miagal di koposi-posion dokoyu di nabarakatan do mantad di tadau di korongou kou i’ do pasal do kosianan do Kinorohingan, om di nosuhutan kopio dokoyu iri. ⁷ Iri nopo om pinotuduk di Ipapras, i tambalut dahai di kosianan dahai. Iyau nopo om otorodok do momonsoi di karaja’ di dong Kristus do maan do koinsanangan toko’. ⁸ Om iyau no o kinarangahan dahai do mogiinsian-sian kou tu’ i kuasa’ do Rusod do Kinorohingan o pinopomilo dokoyu do mogiinsian-sian. ⁹ Om mantad poddi di nokorongou iyahai do pasal do kosianan dokoyu, om sumambayang kasai’ no iyahai do bagi’ dokoyu. Om pokionuon dahai dot id Kinorohingan dot onuan kou do Rusod do Kinorohingan do toilaan om ginawo dit obinsuhut, gisom do koilo kopio kou do koinsanai di korohian do Kinorohingan. ¹⁰ Om katanud i’ di korohian do Kinorohingan o koposi-posion dokoyu om kohubayaan kasai’ kou i’ dau, om osonong kasai’ ot owonsoi dokoyu dot id suang do nunu nopo. Om muhang-ruhang i’ o toilaan dokoyu do pasal do Kinorohingan. ¹¹ Om iri no i kuasa’ do mantad id Kinorohingan di kikagayaan o popokoris dokoyu, om otial kou i’ om alanut o ginawo om otood dot id suang do koinsanai’d koinggoritan, ¹² om mikuwo’d momoros kou dot ounsikou dot id Tapa’. Tu’ iri no i Tapa’ o pinoposorupai dokoyu do kaanu di nokosodia’ mantad do Kinorohingan do patahakon dot id tulun di songonuon dau dot id suang do pomorintaan dau dit anawau. ¹³ Om iyau no o pinopoidu’ dati’ do mantad id kuasa’ do totuong, om pinoposuang dati’ dot id pomorintaan di Tanak dau di kosianan dau. ¹⁴ Om iri no i Tanak dau o pinopoidu’ dati’; komoyon nopoddi om nongoompunan no o koinsanai di dusa toko’. ¹⁵ Kinorohingan nopo om a’ i’ okito nga’ Kristus no o pinopointalang kopio do Kinorohingan. Om Kristus no i tanak dot id dotuo, it agayo ko’ mantad do koinsanai di winonsoi do Kinorohingan. ¹⁶ Kinorohingan no o minomonsoi, dot i Kristus o pinopomonsoi, do koinsanai do nunu nopo do hilo’d surga om hiti’d pomogunan, om koinsanai dit okito om it a’ okito, om kohompit ngai’ nogi’ i rusod di kikuasa’ om i momorinta’. Om winonsoi do Kinorohingan, dot i Kristus o pinopomonsoi do koinsanai diti pomogunan do patahakon dau do Kristus. ¹⁷ Hino mantad no o Kristus dit aiso’ po o nunu nopo. Om oulud i’ o koinsanai do nunu nopo dot id kinoiyonon diyolo’ tu’ nokoiso’ no iyolo’ dot id Kristus. ¹⁸ Om iyau no o tulu di tinan dau, iri no i sidang, tu’ iyau no o tadon do koposion di sidang diri. Om iyau no o tanak dot id dotuo, om iyau nogi’ ot id gulu posio’ do mantad id kapatayon, om iyau indo, om iyau noo ot agayo ko’ mantad do koinsanai do nunu nopo. ¹⁹ Om haro ngai’ nopo dot id Tanak dau o nunu nopo di haro dot id Kinorohingan tu’ iri no o korohian do Kinorohingan. ²⁰ Om id suang no di Tanak diri do tinantu’ do Kinorohingan do mulud kawagu dot id dau o koinsanai do nunu nopo — do hiti’d pomogunan om hilo’d surga. Ralan nopod Kinorohingan do minomonsoi’ddi om pinawaya’ di kinapatayon di Tanak dau do hiri’d kayu salib. ²¹ Iyokoyu nopo di gulu po om osodu’ do Kinorohingan, om pisangod kou dau, tu’ araat i’ o kowoyo-woyoo’ om pomusorou dokoyu. ²² Nga’ baino’ noddi om nokoulud kou nod Kinorohingan dot id dau dot i kinapatayon di Tanak dau o pinopoulud. Om olidang kou i’ om aiso’ o kabara-barasan, om aiso’ o sala’ dokoyu do tontok do potimbabaon kou do Kinorohingan. ²³ Nga’ mositi’ no do tumorodok kou dot otumbayaan, om gumirot kopio dot id kinotumbayaan dokoyu. Om a’ i’ dokoyu oilihan i pagandasan di nakatahak dot id dokoyu do tontok di ruminamit kou i’ di Habar dot Osonong do mantad id Kinorohingan. Iri nopo i habar diri om nokosusui no dot id pointikid-tikid do tulun do pointongkop do hiti’d pomogunan. Om iri noddi o kinosilihan ku iyoho’, i Paulus, do susuhuon. ²⁴ Baino’ noddi om otood i’ o ginawo ku dot oinggorit oku piya, do maan do koinsanangan dokoyu. Tu’ iri no i koinggoritan do tinan ku o pomongo ku iyoho’ di koinggoritan do Kristus dit apatut dot opurimanan dau do bagi’ di sidang dau, iri no i tinan dau. ²⁵ Sinuhu’ oku’d Kinorohingan do sumiliu do susuhuon di sidang dau do maan do koinsanangan dokoyu. Om mositi’ no do potudukon ngai’ ku i habar do mantad id Kinorohingan; ²⁶ iri no it a’ daa do Kinorohingan pinoilaan dot id isai nopo o tulun di piro-piro no koloido’ di gulu po, nga’ baino’ nopoddi om nokointalang no dau iri dot id tulun di songonuon dau. ²⁷ Om id tulun no di songonuon dau o pointalangan do Kinorohingan di kosonongo’ dau om i kagayaan dit a’ mantad dau pinointalang di pinosodia’ dau do bagi’ do koinsanai’d tulun. Iri nopo it a’ mantad pinoilaan diri om: iri no i Kristus i hino’d suang dokoyu, komoyon nopoddi om iyokoyu nondo nga’ kaanu i’ di kagayaan do Kinorohingan. ²⁸ Om i Kristus no o popinsusuyon dahai dot id pointikid-tikid do tulun. Om pinosorou dahai iyolo’ om pinotuduk ngai’ dahai iri dot id diyolo’ do mikuwo’d naayi-ayi’ dahai o toilaan dahai do pinopotuduk. Kinoponudukan nopo dahai’ddi om milo indo o pointikid-tikid do tulun do potimbabaon do Kinorohingan do miagal do tulun di nongkotuo dot id suang di don rusod. Tu’ nokoiso’ no iyolo’ dot id Kristus. ²⁹ Om tumotos oku’ddi do kumaraja’ om aanu ku i’ iri. Om kumaraja’ oku do mikuwo’d oiyo-iyon ku o kokorisan ku di tinahak do Kristus dot id doho’, i maso po do kumaraja’ dot id suang ku om i kikuasa’ kopio.

¹ Om orohian oku do koilo kou dot aayi-ayi’ no kopio o ginawo ku do kumaraja’ do bagi’ dokoyu, om bagi’ di tulun do hilo’d Laodikia om koinsanai di tulun dit a’ po nokotutun kopio doho’. ² Wonsoyon ngai’ ku nopo o miagal diti om kokoris i’ o ginawo diyolo’ om mogiinsian-sian indo iyolo’ om ogirot o piuludan diyolo’. Om kosuhut indo kopio iyolo’ om monongkuyaan kopio om kotutun dit a’ mantad do Kinorohingan pinoilaan, iri no i Kristus. ³ Om Kristus no o pinopointalang do koinsanai do komiloo’ om toilaan do Kinorohingan di poinlisok di gulu po. ⁴ Kinoposunudan ku nopodti om a’ kou i’ aakalan dot isai nopo o tulun di momolumbok dokoyu. ⁵ Tu’ mulong piya dot osodu’ oku dokoyu, nga’ sorohon nopo dokoyu do poinsugku’ oku i’ dokoyu. Om otood oku no do kokito di kouludo’ dokoyu om i kogiroto’ do kotumbayaan dokoyu dot id Kristus. ⁶ Poingkuro kou nopo do ruminamit di Kristus Yesus do sumiliu’d Tuhan dokoyu, om iyo nogindo’ddi tu’ mositi’ no do poisoon dokoyu o koposi-posion dokoyu dot id dau. ⁷ Om gumamut kou no dot id suang dau. Om pogiroton no dokoyu o koposi-posion dokoyu do poimpohon dot id Kristus. Om pogiroton no dokoyu o kotumbayaan dokoyu dot id Kristus do miagal di nokotuduk dot id dokoyu. Om mositi’ no do poimponu’ kasai’ do kounsikahan o ginawo dokoyu. ⁸ Mumbangan-bangan kou no om aiso’ i’ ot id pogialatan dokoyu dot abayayat do toilan di don tulun dit aiso’ o guna’, i mamalid noo. Tu’ iri nopo i toilaan diri om okon i’ ko’ mantad id Kristus, suwai ko’ mantad no dot id pomusarahan do tulun om mantad id rusod di monguasa’ diti pomogunan. ⁹ Tu’ koinsanai do kowoyo-woyoo’ do Kinorohingan om haro ngai’ no dot id Kristus, it id suang do kowoyo-woyoo’ dau di don tulun. ¹⁰ Om nonuan kou’ddi di koposion di haro ngai’ no om aiso’ no o bohiton. Tu’ nokoiso’ no dot id Kristus o koposi-posion dokoyu. Kristus no o boyoon do pointikid-tikid di rusod di kikuasa’ om i momorinta’. ¹¹ Om nosunatan kou noddi tu’ nokoiso’ kou no dot id Kristus, nga’ okon i’ ko’ i sunat di winonsoi’d tulun, suwai ko’ i sunat di winonsoi do Kristus, i pinopoidu’ dokoyu do mantad id kuasa’ di kowoyo-woyoon di kidusa. ¹² Tu’ tontok di botisai kou, om iri nod nokotonggoi kou do Kristus do linobong; om id suang nogi’ di botisan diri do nokotonggoi kou do Kristus do pinasi kawagu, tu’ notumbayaan kou i’ di kuasa’ do Kinorohingan do minamasi kawagu di Kristus do mantad id kapatayon. ¹³ Iyokoyu nopo di gulu po om napatai no dot id suang do rusod tu’ kidusa kou i’ om okon ko’ tulun do Yohudi om a’ kou koilo di Tourat di Musa. Nga’ baino’ nopoddi om napasi kou nod Kinorohingan do pinotonggoi di Kristus. Om noompunan nod Kinorohingan o koinsanai di dusa toko’. ¹⁴ Om nangatanus dau i tutang toko’ di nongkotulis, om natanus dau it oturan di tutang di kokogos dati’, tu’ pinasalib dau i surat diri do hiri’d kayu salib do ralan do Kinorohingan do minananus do koinsanai di pinamadawa dati’. ¹⁵ Om hiri nod salib do nidu’ do Kristus o kuasa’ do koinsanai do rusod di momorinta’ om i kikuasa’. Om paantangan poddi iyolo’ do tulun dot ogumu’ do tontok di tinanggayan do Kristus iyolo’ do moyo’ di baris di popointalang do kinamanangan dau, tu’ nangatangkap no dau iyolo’. ¹⁶ Iyo nopoddi, om kada’ no pologoso’ o tulun do papasala’ dokoyu do pasal do taakanon ko’ tinumon, ko’ pasal po do tadau’d agayo do tugama’ ko’ pasal po do karamayan do tontok do tulan do wagu, ko’ pasal po do tadau’d Sabat. ¹⁷ Koinsanai’ddi om sangai-sangai no di rumikot do koimbagu; nga’ kointalangon ngai’ nopoddi om id Kristus. ¹⁸ Kada’ dokoyu pologoso’ o tulun di minsorupai-rupai do tulun dit osiriba’ o ginawo om i tumuku’ dot id piro-piro o moloikat do papasala’ dokoyu. Tulun nopo do miagal diri om minggayo-gayo i’ dot i pomusarahan diyolo’ di dom pomogunan o kopinggaya-gayaan. Om oondos iyolo’ di nokito diyolo’ di kosuayan kopio, ¹⁹ gisom dot a’ noddi iyolo’ sumondiu do Kristus i nosiliu do boyoon. Om ogompi’ nondo o koinsanai do pakakas do tinan om opogituma-tuma’ iri di langaban, om sumuni indo do tumanud do korohian do Kinorohingan do woyoon do Kristus. ²⁰ Nokotonggoi kou no do Kristus do napatai, om nokoidu’ kou no do mantad id kuasa’ di piro-piro rusod di momorinta’ diti pomogunan, om nokuro tu’ iyo po di kowoyo-woyoon di tulun di maso po do porintaon diti pomogunan o kowoyo-woyoon dokoyu? Om nokuro tu’ tumanud kou po dot oturan do miagal diti, ²¹ ’’Kada’ kama’ diti’,’’ ka, om, ’’Kada’ tiim dilo’,’’ ka, om, ’’Kada’ igit dilo’,’’ ka no. ²² Koinsanai dot oturan do miagal diri om pasal i’ dit apakai nopo om aiso’ nondo o guna’. Tu’ iri nopo om oturan i’ om ponudukan di winonsoi do tulun. ²³ Otopot i’ kopio dot oilo o kokitanan diri tu’ monuhu’ do tulun do tumuku’ dot id moloikat om monuhu’ do minsiriba’ om monginggorit do tinan, nga’ koinsanai’ddi om aiso’ i’ o guna’ do maan do pomusus di korohian do don tinan.

¹ Napasi kou noddi kawagu do nokotonggoi do Kristus. Iyo nopoddi om mositi’ no do monotos kou kopio do manganu di haro do hilo’d surga, i kinoiyonon do Kristus do momorinta’ do poinsugku’ do Kinorohingan. ² Om potumpuon no o pomusarahan dokoyu di haro do hilo’d surga, om kada’ dokoyu potumpuo’ o pomusarahan dokoyu di nunu nopo i haro do hiti’d pomogunan. ³ Tu’ napatai kou no, om koposion nopoddi dokoyu om poillisok no do mitonggoi do Kristus dot id suang do Kinorohingan. ⁴ Om Kristus no o tadon do koposion dokoyu dit otopot kopio, om soira’ nopondo do kointalang o Kristus om iyokoyu nga’ kointalang nogindo do miwoyo’ dau dot id suang do kagayaan dau! ⁵ Iyo nopoddi, om tonuson ngai’ no dokoyu i kouhangan do dom pomogunan, i mominsuhu’ dot id suang do ginawo dokoyu: i magampahu’, om i kowoyo-woyoon dit a’ osonong, om i korohian di don tinan, om i korohian dit araat om i tamaha’, (tu’ tamaha’ nopo om miagal nopo do tumuku’ dot id tingolig.) ⁶ Iri ngai’ no o moningkau do kototogod do Kinorohingan dot id tulun dit a’ mumboyo’ dau ⁷ Om iyokoyu nga’ mingwonsoi i’ di korohian do miagal diri di gulu po, di maso po dokoyu do porintaon diri. ⁸ Nga’ baino’ nopoddi om iyadaan ngai’ no dokoyu it angaraat dot id suang do ginawo dokoyu: om kada’ kou no kobintogod, om kada’ kou uhod, om kada’ kou karaatai do tulun do suwai. Om kada’ kou kopio pimboros di boros di pomomopol om i boros di kososomu’. ⁹ Kada’ kou pogiudut-udut, tu’ naadaan no dokoyu i kowoyo-woyoon do koposi-posion di laid om koinsanai di kowoyo-woyoon do miagal diri. ¹⁰ Baino’ noddi om noonuan kou no do kowoyo-woyoon di wagu. Om tulun kou noddi do wagu, it iwoguan kasai’ di minomonsoi dokoyu, iri no i Kinorohingan, do poiyoon di dau’d kowoyo-woyoon. Om kotutun toko’ indo kopio do Kinorohingan. ¹¹ Kootuson ngai’ nopoddi om aiso’ nondo o pisuayan do tulun do Yohudi om it okon ko’ Yohudi, om aiso’ o pisuayan di tulun di nosunatan om it a’ nosunatan, om aiso’ o pisuayan di tulun di nakamaju’ om i tulun dit a’ po nakamaju’; om aiso’ o pisuayan di turipon om it okon ko’ turipon, tu’ Kristus nopo om Kristus dot id koinsanai diyolo’, om id suang no o Kristus diyolo’. ¹² Om iyokoyu no o tulun di songonuon do Kinorohingan. Nosianan o Kinorohingan dokoyu om pinili’ kou dau do sumiliu’d dau kopio’d songonuon. Om iri noddi o kopointalangan dokoyu do kosianan, om mositi’ no dot opuhawang kou, om osiriba’ o ginawo, om alamaya’ om alanut o ginawo dot id suang do koinggoritan. ¹³ Om mositi’ no dot alanut o ginawo dokoyu dot id tulun do suwai, om miampun-ampun kou do haro no o katagadan dokoyu dot id tulun do suwai. Tu’ norohian i’ o Tuhan do minangampun dokoyu, om iyokoyu nga’ apatut nogi’ do mogiampun-ampun. ¹⁴ Om agayo nopo kopio om iri no tu’: mositi’ no do mogiinsian-sian kou tu’ iri no i kosianan o popogiuulud kopio ngai’ dokoyu. ¹⁵ Mositi’ no do tontuon di kouludan di pinatahak do Kristus dot id suang do ginawo dokoyu i korohian dokoyu. Tu’ kinapamalahawan nopod Kinorohingan dokoyu om silihon do pakakas dot iso’ o tinan. Om poimpasi kou i’ dot id suang do kouludan di mantad id Kristus diri. Om mongunsikou kou no. ¹⁶ Poopion no dot id ginawo dokoyu i ponudukan do Kristus, i poimponu’ do barakat. Om oiyo-iyon no o toilaan dokoyu do mituduk-tuduk om moginosihat-nosihat. Sindingon no dokoyu i nokotulis dot id buuk do sinding, om sindingon i sinding di pamarayou, om sindingon i sinding di don rusod; om modsinding kou no dot id Kinorohingan do mikuwo’d ounsikou ot id suang do ginawo. ¹⁷ Om nunu nopo o wonsoyon dokoyu ko’ i poboroson, om wonsoyon ngai’ no dokoyu iri om poboroson dot id suang do ngaran do Tuhan Yesus. Om mongunsikou no dot id Kinorohingan Tapa’ do koinsanai di nowonsoi do Kristus dot id dokoyu. ¹⁸ Oi tongoondu’ di kisawo! Mumboyo’ kou no di sawo dokoyu, tu’ iyo noddi o kowoyo-woyoon dit apatut do tulun do Kristian. ¹⁹ Oi tongokusai di kisawo! Kosianai kou no di sawo dokoyu. Kada’ kou kobintogod diyolo’. ²⁰ Oi tangaanak, apatut kou i’ kopio do mumboyo’ kasai’ do tapa’ om tina’ dokoyu, tu’ nosiliu kou no do tulun do Kristian, dot iri no o kohubayaan do Kinorohingan. ²¹ Oi tobpinai-tobpinai i nosiliu nod tapa’, kada’ dokoyu toroo’ o tangaanak dokoyu do gisom do kakaus iyolo’. ²² Oi tobpinai-tobpinai i nosiliu do turipon, tonudon ngai’ no dokoyu o koinsanai di ponuhuan do tuan dokoyu di hiti’d pomogunan. Nga’ okon i’ ko’ tontok no di poingontong iyolo’ dokoyu do wonsoyon dokoyu i ponuhuan diyolo’, do mokimoroyo-royohon kou no, suwai ko’ tonudon no dokoyu i ponuhuan diyolo’ do mikuwo’d aayi-ayi’ o ginawo tu’ pomusou i’ dokoyu do Tuhan iri. ²³ Om oiyo-iyon no dokoyu o ginawo do momonsoi do nunu nopo o karaja’ di ponuhuan diyolo’ dokoyu do momonsoi, om sorohon no do Tuhan i’ o tumboyoon dokoyu’ddi, om okon i’ ko’ tulun noo. ²⁴ Soro-sorohon no dokoyu do kaanu kou indo dot isomuli’ di nokosodia’ mantad do Tuhan do patahakon di tulun di songonuon dau. Tu’ otopot nopo kopio om iri nopo i tuan di pongobi-obian dokoyu’ddi om Kristus i’. ²⁵ Isai nopo o tulun do momonsoi di kasala’, om iyau no o mamabo di kasalaan dau’ddi, tu’ oiyo i’ o pomumutus do Tuhan do koinsanai’d tulun.

¹ Oi tobpinai-tobpinai i nongosiliu’d tuan, wonsoyon no dokoyu it otopot om it otulid dot id turipon dokoyu. Om sorohon no dokoyu dot iyokoyu nga’ haro i’ o tuan do hilo’d surga. ² Om tumorodok kou no do sumambayang, mikuwo’d mumbangan-bangan, om mongunsikou kou no dot id Kinorohingan. ³ Om sambayangan nogi’ iyahai, om onuan i’ iyahai’d Kinorohingan do maso dit osonong do mongoi popinsusui do habar do pasal do Kristus, it a’ mantad daa pinoilaan dot id tulun, om iri nogi’ o nokopogiilan doho’ do dinondo. ⁴ Om sambayangan oku no om milo oku i’ do papatarang kopio dit apatut ku do poboroson do pasal di habar dit a’ mantad daa pinoilaan diri. ⁵ Mositi’ no dot oilo kou dot id suang do nunu nopo o wonsoyon dokoyu dot id tulun dit a’ po notumbayaan, om mikuwo’d pakayon kopio o koinsanai’d maso do momonsoi dit apatut. ⁶ Om mositi’ no do poposonong kasai’ do ginawo om koinsasamod o poboroson dokoyu. Om mositi’ no do koilo kou do ponimbar do pointikid-tikid di ponguhatan do tulun. ⁷ I Tikikus indo i tobpinai di kosianan toko’ o monusui dot id dokoyu do koinsanai do pasal doho’. Tu’ iyau nopo om otorodok kopio do kumaraja’ do don Tuhan do muhup dahai. ⁸ Om iri no o kinoponuhuan ku dau do mongoi do hino’d dokoyu, tu’ popoilo dokoyu do habar dahai om oinsasamadan kou i’. ⁹ Koruhang nopo di Tikikus om i Onisimus, i tulun i’ do mantad hino’d dokoyu. Iyau nopo om otorodok kopio koulun, om osianan kopio iyahai dau. Om iyau no om i Tikikus o popoilo dokoyu do koinsanai di nosiliu do hiti’d kinoiyonon ku. ¹⁰ Porikot i Aristarkus do tabi’ dot id dokoyu. Iyau nopo om poinsugku’ doho’ dot id giil. Om i Markus i tikid do molohing di Barnabas, nga’ poporikot nogi’ do tabi’ dot id dokoyu. (Nosunudan kou no do mamaramit dau do korikot iyau do hino’d dokoyu.) ¹¹ Om i Yesus i roitan dot i Yustus nga’ poporikot id tabi’ dot id dokoyu. Om tolu no iyolo’ o tulun do Yohudi di notumbayaan di Tuhan Yesus o koruhang ku do momonsoi diti karaja’ do Pomorintaan do Kinorohingan. Om iyolo’ no i monulung kopio doho’. ¹² Om poporikot nogi’ i Ipapras do tabi’ dot id dokoyu, om iyau nga’ mantad i’ do hino’d dokoyu. Om susuhuon iyau do Kristus Yesus, it otorodok om asaru’ do sumambayang do bagi’ dokoyu, om pokionuon kopio dau do Kinorohingan dot ogirot o kotumbayaan dokoyu om kotuo o pomusorou dokoyu om atanud ngai’ indo dokoyu o kouhangan do Kinorohingan. ¹³ Nokito ku no kopio iyau do nokototos do kuminaraja’ do bagi’ dokoyu om bagi’ do tulun do hilo’d Laodikia om hilo’d Hiorapolis. ¹⁴ Om i Dokutur Lukas, i kosianan toko’, om i Dimas nga’ poporikot nogi’ do tabi’ dot id dokoyu. ¹⁵ Om porikoton no dokoyu o tabi’ dahai dot id tobpinai-tobpinai di sompi’ ko’ Kristian di hilo’d Laodikia; om porikoton nogi’ dot id di Nimpa om id sidang di sumasambayang do hiri’d walai dau. ¹⁶ Om abasa’ pondo dokoyu iti surat om pabasaan no kopio iti di sidang do hilo’d Laodikia. Om iyokoyu nga’ apatut nogi’ do mambasa’ di surat di pokirimon dot id dokoyu do mantad hilo’d Laodikia. ¹⁷ Om sunudan no dokoyu i Arkipus do poingkaa, ’’Pongoon no i karaja’ nu do don Tuhan di nakatahak dot id diya’,’’ kanto dokoyu. ¹⁸ Tabi’ do mantad id doho’ i Paulus. Iti nopo bohogian diti om iyoho’ i’ o minonulis. Kada’ dokoyu lihuwai do poinggiil oku po. Om pokionuon ku no o Tuhan do mamarakat dokoyu.