SUSUI

SUSUI

¹ Oi Tiopilus, Iri nopo i nokotulis ku dot id buuk ku di koiso’, om pinotulis ku o koinsanai di nongowonsoi om i pinotuduk di Yesus do mantad di timpuun i’ iyau do kuminaraja’, ² om gisom di pinoinsawat iyau do hilo’d surga. Tontok dit a’ po iyau nokoinsawat do hilo’d surga om binilinan dau do mikuwo’d kuasa’ di Rusod do Kinorohingan o koinsanai di tulun di pinili’ dau do sumiliu’d rasul dau. ³ Om di nopo di napatai i Yesus om asaru’ iyau do popoilo dot atarang kopio dot id rasul dau do poimpasi kopio iyau, do solinaid dot apat nohopod o tadau. Om nokito nogi diyolo’ iyau. Om pinoboros dau dot id diyolo’ o kowoyo-woyoo’ do Pomorintaan do Kinorohingan. ⁴ Om tontok di poingamung po iyau diyolo’ om bilinai no dau iyolo’ do poingkaa, ’’Kada’ kou po tongkiad do hilo’d Yorusalim. Mandad kou nopod hilo’ do gisom do katahak di Tapa’ dot id dokoyu i nakabatos mantad dau, i nokoboros mantad ku dokoyu di gulu po. ⁵ Tu’ i Yohanis nopo om waig no o pinamatis do tulun, nga’ iyokoyu nopo om oruhai no do botisan do Rusod do Kinorohingan,’’ ka. ⁶ Om tontok di pointimung i piro-piro rasul do poingamung diyolo’ i Yesus, om ponguhot no iyolo’ di Yesus, ’’Oi Tuhan, poingkokoton nu’ddi kawagu o Pomorintaan do bansa’ dot Israil do baino’?’’ ka diyolo’. ⁷ Om boros ka di Yesus do suminimbar, ’’A’ kou i’ minog do koilo do pasal diri, tu’ i Tapa’ ku o manantu’ do tadau om maso’ddi tu’ iyau no o kikuasa’ do manantu’ddi. ⁸ Nga’ kaanu kou nondod kuasa’ do korikot i Rusod do Kinorohingan dot id dokoyu. Om popinsusui kou nondo do pasal doho’ do hilo’d Yorusalim, om pointongkop do pomogunan do Yudia, om hilo’d Samaria, om gisom do korikot do hilo’d tisan do tana’,’’ ka dau. ⁹ Om koboros poddi di Yesus iri, om poinsawato’ no iyau do hilo’d surga di songingontong iyolo’ dau om kokuluputai noddi iyau do haun om a’ noddi diyolo’ iyau nokito. ¹⁰ Om maso po diyolo’ do songintingaha’ do hilo’d tawan, di nokoinsawat i Yesus, om sigog id haro o duwo o tulun di kipakayan dot opurak do poingkakat do hiri’d toning diyolo’. ¹¹ Om boros ka di duwo o tulun diri, ’’Oi tulun do Galilia, nokuro tu’ songingkakat kou’d hiti do songintingaha’ do hilo’d tawan? Dot i Yesus nopo i nokito dokoyu do pinoinsawat do hilo’d surga dit antang-antangan dokoyu om gumuli’ indo kawagu do miagal di nokito dokoyu di tiinu’ o kowoyo-woyoo’ dau’d gumuli’,’’ ka diyolo’. ¹² Om guli’ noddi i piro-piro tulun di sinuhu’ddi do hilo’d Yorusalim do mantad hilo’d Nulu-Nulu do Saitun. Iri nopo nulu-nulu’ddi om songkilomito i’ doti’ o kosoduwo’ do mantad hilo’d Yorusalim. ¹³ Om ongoi noddi iyolo’ do hiri’d walai di niyonon diyolo’ di hilo’d Yorusalim, om salakoi no iyolo’ do hiri’d bilik di hiri’d sawat. Iri nopo i piro-piro tulun di sinuhu’ddi om: i Pitrus, i Yohanis, i Yakub, i Andarias, i Pilipus om i Tumas, i Bartolomius, i Matius, i Yakub i tanak di Alpius, i Simun i roitan dot i Patriot, om i Yudas i tanak di Yakub. ¹⁴ Om iso-iso’ kasai’ nopo o ginawo diyolo’ do tumimung do sumambayang. Om mogiaamung nopo iyolo’ di tongoondu’ do sumambayang, om hino nogi’ i Maria i tina’ di Yesus om i tongotobpinai di Yesus. ¹⁵ Insan o tadau, di songintimung no iyolo’ — om haro i’ doti’ o hatus om duwo nohopod o tulun di pointimung do hiri — om ingkakat noddi i Pitrus do minoro-boros. Boros ka dau, ¹⁶ ’’Oi tobpinai-tobpinai! Nunu nopo i nokotulis dot id Buuk do Kinorohingan om mositi’ nod abayaan. Di nopo di gulu po om nokoboros no do Rusod do Kinorohingan di pinolombus di Daud do pasal di Yudas, i boyoon di tulun di minanangkap di Yesus. ¹⁷ I Yudas nopo om mantad i’ dot id pogialatan toko’, om nopili’ iyau do moyo’ dati’ do kumaraja’,’’ ka dau. ¹⁸ (I Yudas nopoddi nga’ nakaanu do tana’ do pamalabangan dau do gadsi’ di winonsoi dau dot araat o pinomoli dau di tana’. Om naratu’ iyau om kapatai no do noulayak o tian dau, om gisom do nongkosoliwan ngai’ o tinaii’ dau. ¹⁹ Om koinsanai’d tulun do hilo’d Yorusalim nga’ nongkoilo ngai’ no do hal diri. Om iri noddi o kinopomungaranan diyolo’ di tana’ddi dot Akildama, dot id suang do boros diyolo’. Komoyon nopoddi om ’’Tana’ do Raha’ ’’.) ²⁰ ’’Tu’ haro i’ o nokotulis dot id Buuk do Sinding do poingkaa, ’Pologoson nopo i kinoiyonon dau’ddi dot oingou gisom dot aiso’ no ot ongoiso’ pod miyon do hiri,’ ka. Om haro nogi’ kawagu o nokotulis do poingkaa, ’Pologoson nopo o tulun do suwai do sumowoli di karaja’ dau,’ ka. ²¹ - ²² Om iyo nopoddi, om mositi’ no do haro ot iso’ o tulun do kumoruhang dati’ do sumiliu’d sasi’ di popinsusui do napasi kawagu i Tuhan Yesus do mantad id kapatayon. pilion toko’ nopo o mantad id pogialatan di tulun di moyo-woyo’ kasai’ dati’ do solinaid di moyo-woyo’ toko’ di Tuhan Yesus do hinonggo nopo o tongoyon dau do mantad di tuminimpuun i’ i Yohanis do minamatis om gisom di pinoinsawat i Yesus do hilo’d surga do mantad id pogialatan toko’,’’ ka di Pitrus. ²³ Om poboroso’ noddi di tulun di hino’d hiri o duwo o tulun. Iri nopo i duwo o tulun diri om: i Yusup i roitan dot i Barsabas (om roitan nogi’ iyau dot i Yustus), om i Matias. ²⁴ - ²⁵ Om sambayang noddi iyolo’ do poingkaa, ’’Oi Tuhan, oilaan ngai’ nu i’ ot id suang do ginawo do koinsanai’d tulun om noidu’ noddi i Yudas do mantad id karaja’ dau do don rasul, om napatai iyau. Om potuduko’ no dot id dahai i pilion do Tuhan dot id pialatan diti duwo o tulun diti dot onuan do karaja’dti do sumowoli di Yudas,’’ ka diyolo’. ²⁶ Om kasambayang poddi iyolo’, om undio’ no diyolo’ i duwo’ o ngaran do tulun diri, om i Matias o noundi’. Om iyau noddi o nopili’ do sumiliu’d rasul do rumuhang di hopod om iso’ o rasul di suwai.

¹ Om korikot poddi i tadau’d Pintakosta, om timung ngai’ no i tulun di notumbayaan do Tuhan dot id iso’ o kinoiyonon. ² Om sigog id korongou diyolo’ o tuni do mantad hilo’d tawan do miagal do tongus dot opuhod kopio o karangahan. Om koponu’ nopo i walai di niyonon diyolo’ do tuni’ddi. ³ Om kokito no diyolo’ o piro-piro koiyo-iyo’d binandak do tapui di koiyo-iyo’d dila’ do tuminikid do minongoi timpak do tulu diyolo’. ⁴ Om koporinta’ ngai’ nopo iyolo’d Rusod do Kinorohingan. Om timpuun noddi iyolo’ do mimboros do mogisuayan o bansa’d boros. Om mimboros nopo iyolo’ do tumanud di boros do pinatahak di Rusod diri dot id diyolo’. ⁵ Om tontok nopoddi om ogumu’ o tulun do Yohudi dit ongotorodok dot id Kinorohingan, di poundorong do hilo’d Yorusalim. Tadon nopo diyolo’ddi om mogisuayan o kinoiyonon do pointongkop diti pomogunan. ⁶ Om tontok di norongou i tuni’ddi, om ogumu’ tomod diri o tulun do minongoi gurumung do hiri. Om ongosuayan diri iyolo’ do korongou di tulun di nongotumbayaan di mimboros di diyolo’d boros di mogisuayan o bansa’. ⁷ Om ongosuayan tomod diri iyolo’ om ongoimayaan. Om boros ka diyolo’, ’’Okon toi ko’ tulun ngai’ id Galilia ilo tulun do mimboros do miagal dilo’? ⁸ Om poingkuro’ddi kopio tu’ orongou ngai’ toko’ do mimboros iyolo’ do boros toko’ di mogisuayan o bansa’? ⁹ Tu’ iyati’ nopo om tulun do mantad id pomogunan do Partia, om Midia, om Ilam; om Misopotamia, om Yudia, om Kapadokia, om Pontus, om Asia, ¹⁰ om Pirgia, om Pampilia, om Masir, om mantad id piro-piro watas do Libia i tidsomok do Kirini, om haro nogi’ ot id pogialatan toko’ do mantad hilo’d Rum, ¹¹ om haro o tulun do Yohudi om haro nogi’ o bansa’d suwai di nokosuang do tugama’ do Yohudi; om haro nogi’ o mantad hilo’d Krita om hilo’d Arab. Om orongou ngai’ toko’ nopo iyolo’ do mimboros do boros toko’ di mogisuayan o bansa’ do monusui di nongowonsoi do Kinorohingan di kongoimayaan kopio!’’ ka diyolo’. ¹² Om osuayan ngai’ nopoddi iyolo’, om ongoimayaan om mogiuhot-uhot po iyolo’ dot, ’’Poingkukuro ma kopio iti?’’ ka. ¹³ Nga’ haro nogi’ o wookon di tulun do mongirak-irak. Boros ka diyolo’, ’’Nangaawuk i’ bo ilo tulun dilo’!’’ ka. ¹⁴ Om ingkakat noddi i Pitrus om i hopod om iso’ o rasul. Om boro-boros noddi iyau dot opuhod dot id tulun dot ogumu’ddi do poingkaa, ’’Oi tobpinai-tobpinai, i tulun do Yohudi, om koinsanai di tulun di poundorong do hiti’d Yorusalim! Pokinongou kou no kopio. Tu’ apatut no kopio do poiloon ku iyokoyu do hal diti. ¹⁵ Tu’ iti nopo tulun diti om a’ i’ angaawuk, do miagal dit osorou dokoyu. Tu’ dinondo nopo om jam kosiam nogi’ do dongkosuabon. ¹⁶ Nga’ iti nopo om nokoboros mantad no do Kinorohingan do pinolombus di Nabi Yoil do poingkaa: ¹⁷ Boros kad Kinorohingan, ’Oruhai nopondod kopupuson diti pomogunan, om potuntugon ku nondo o Rusod ku dot id koinsanai’d tulun. Om i tangaanak dokoyu’d tongokusai om i tangaanak dokoyu’d tongoondu’ nga’ momisunud nondo dokoyu do koinsanai di posunudon ku dot id diyolo’. Om i tulun dit ongomulok po nga’ kokito nondo do pinointalang om i kongomolohingan dokoyu nga’ mongipi nondo di poipian ku diyolo’. ¹⁸ Om i susuhuon ku di tongokusai om i tongoondu’ nga’ tuntugan ku i’ do Rusod ku do tontok do tadau’ddi. Om popinsunud nondo iyolo’ di posunudon ku dot id diyolo’. ¹⁹ Om momonsoi oku nondo do kongoimayaan do hilo’d tawan; om momonsoi oku di kongosuayan kopio do hiti’d pomogunan; om haro nondo o raha’ om tapui om haro o lisun dot akapal. ²⁰ Om ilo tadau nga’ tumuong nondo, om ilo tadau nga’ rumagang do miagal do raha’ dit a’ po orikot o Tadau do Tuhan, i Tadau dit agayo om i kikagayaan. ²¹ Om tontok nopondoddi om posion indo i tulun di lumohou do Tuhan,’ ka. ²² Oi tobpinai-tobpinai, i tulun dot Israil! Pokinongoho’ no dokoyu iti poboroson ku: i Yesus nopo i tulun do Nasarit diri, om nonuan do Kinorohingan do karaja’ do bagi’ dokoyu om nokointalang no kopio iri dot id dokoyu dot i kongoimayaan om i kongosuayan kopio di winonsoi’d Kinorohingan dot id pogialatan dokoyu do pinawaya’ dau di Yesus. Om koinsanai’ddi om noilaan ngai’ no dokoyu. ²³ Om tontuo’ nod Kinorohingan do patahakon dau i Yesus dot id dokoyu do tumanud di natantu’ mantad dau. Om tontok di pinatahak dau iyau, om patayo’ no dokoyu iyau tu’ pinologos dokoyu i tulun dit angaraat do pinapasalib dau. ²⁴ Nga’ pinasi i’ kawagu iyau’d Kinorohingan do mantad id pogialatan di tulun di napatai. Notolon no daa iyau do kapatayon, nga’ pinoidu’ i’ iyau’d Kinorohingan, tu’ a’ i’ iyau milo do porintaon kasai’ do kapatayon. ²⁵ Om nokoumbal nogi’ i Daud do minomoros do pasal di Yesus do poingkaa, ’Okito ku i’ kasai’ o Tuhan dot id dotoguangan ku; moyo-woyo’ i’ iyau doho’, om a’ noddi milo o tulun do mamagangau doho’. ²⁶ Om iri no o kataadan do ginawo ku, om popoboros kasai’ oku do pamarayou om iti tinan ku nga’ osimbayan nopondo do mandad do hiri’d lobong. ²⁷ Tu’ a’ oku i’ diya’ pologoson do potimporon do hilo’d pomogunan do tulun di napatai. a’ nu i’ pologoson dot apasa’ do hiri’d lobong i susuhuon nu dit otorodok. ²⁸ Tinudukan oku i’ diya’ do ralan do kumaa dot id koposion dit otopot kopio. Om a’ no orumpo-rumpos dot id ginawo ku o kataadan ku, tu’ moyo-woyo’ kasai’ ko i’ doho’,’ ka. ²⁹ Oi tobpinai-tobpinai, pologoso’ oku no do poposondot kopio do popoboros do pasal di Daud, i taki-aki toko’. Napatai no iyau, om nolobong no; om hino kasai’ pod hiti ilo lobong dau do gisom do dinondo. ³⁰ Om nakapamatos no o Kinorohingan dot id di Daud do mikuwo’d sumpa’ do haro o songulun dot id sinakagon di Daud do silihon do Kinorohingan do raja’. Tu’ i Daud nopo om nokoilo no di batos diri, tu’ iyau nga’ nabi i’; ³¹ om koilo nogi’ iyau do nunu i wonsoyon do Kinorohingan dot id dabantalan. Om nokoboros mantad no di Daud dot apasi indo kawagu i Raja’ do Gampamasi, i pinabatos do Kinorohingan diri, do mantad id kapatayon. Boros kad i Daud, ’A’ i’ iyau pologoson do potimporon dot id pomogunan di tulun di nangapatai; a’ i’ apasa’ o tinan dau do hiri’d lobong,’ ka. ³² Om i Yesus no i komoyon diri di pinasi kawagu’d Kinorohingan do mantad id kapatayon. Om nongkokito ngai’ toko’ddi. ³³ Om pinoinsawat do Kinorohingan o pangkat dau om nonuan iyau do kuasa’ om kaanu noddi iyau do Rusod do Kinorohingan di pinabatos mantad di Tapa’. Om iti nopo it orongou dokoyu om iti tokito dokoyu do baino’dti om iri i Rusod di pinotuntug dau dot id dahai. ³⁴ I Daud nopo om a’ i’ pinoinsawat do hilo’d surga, nga’ minomoros i’ iyau do poingkaa, ’Boros kad Tuhan dot id Tuhan ku: Irikau no dot id dawananan ku, ³⁵ gisom do poinsiribaon ngai’ ku dot id diya’ i pisangod nu!’ ka. ³⁶ Om apatut no do koilo kopio o koinsanai’d tulun dot Israil dot i Yesus nopo i pinasalib dokoyu’ddi, om iyau no i pinabatos do Kinorohingan do sumiliu’d Tuhan om Raja’ do Gampamasi,’’ kad Pitrus. ³⁷ Om soira’ddi nongkorongou i tulun diri di pinoboros di Pitrus, om tumongob tomod diri iyolo’. Om ponguhot noddi iyolo’ di Pitrus om i piro-piro rasul di suwai, ’’Oi tobpinai-tobpinai, nunu nondo ot apatut dahai’d wonsoyon diti?’’ ka diyolo’. ³⁸ Om boros ka di Pitrus do suminimbar, ’’Rumologo kou no di dusa dokoyu. Om mokibatis ngai’ kou no dot id suang do ngaran di Yesus Kristus, om ongoompunan i’ o dusa dokoyu. Om kaanu kou indo do Rusod do Kinorohingan, i popuhawangon do Kinorohingan. ³⁹ Tu’ iri nopo pinabatos do Kinorohingan diri nga’ patahakon dot id dokoyu om id sinakagon dokoyu om id tulun di poingiyon do hilo’d sodu’ — iri no i koinsanai’d tulun di nolohou’d Kinorohingan i Tuhan toko’ do rumikot dot id dau,’’ ka dau. ⁴⁰ Om iyo noddi i Pitrus do pinopoilo kopio’ddi dot id diyolo’. Om ogumu’ddi o boros di Pitrus do suwai do minonuhu’ diyolo’ do tumongkiad do mantad id tulun dit angaraat diri, om a’ indo iyolo’ ohukuman do Kinorohingan do miagal di pomohukum do Kinorohingan di tulun dit angaraat diri. ⁴¹ Om ogumu’ddi o tulun do notumbayaan di pinoboros di Pitrus, om botisai noddi iyolo’. Om tadau iddi do noruhangan kawagu i tulun do notumbayaan do tolu noribu o tulun. ⁴² Om ongotorodok iyolo’ do mokituduk kasai’ di piro-piro rasul om tumimung kasai’ iyolo’. Om mogitotorungak iyolo’d makan, om mogiaamung do sumambayang. ⁴³ Om ogumu’ tomod diri o koimayaan do nongowonsoi di piro-piro o tulun di sinuhu’ddi, gisom dot oinsanan nopo i tulun dot ongoimayaan om ongooris. ⁴⁴ Mogiuulud kasai’ nopoddi i tulun di nongotumbayaan diri, om sogiaan nopo diyolo’ o nunu nopo o haro dot id diyolo’. ⁴⁵ Om sorompori-pori nopoddi iyolo’ do papadagang di piro-piro o konunu-nunuan om i dapu’ diyolo’, om pogibohogi-hogion nogindo diyolo’ i tusin do gatang diri do tumanud do kogunaan do pointikid-tikid diyolo’. ⁴⁶ Om monikid tadau nopoddi iyolo’ do tumimung do hiri’d Walai’d Sasambayangan dot Agayo, om mogitotorungak do makan do hiri’d walai diyolo’, om ongotood ngai’ iyolo’ om ongosiriba’ o ginawo. ⁴⁷ Om mamarayou kasai’ nopo iyolo’d Kinorohingan. Om asanangan ngai’ nopo o tulun diyolo’. Om monikid tadau nopo dot oruhangan o ginumu’ diyolo’, tu’ onuan i’ iyolo’d Tuhan do tulun di posion do Kinorohingan.

¹ Insan o tadau om ongoi no i Pitrus om i Yohanis do hiri’d Walai’d Sasambayangan dot Agayo, di jam kotolu nod sosodopon, i maso do kasambayangan do tulun. ² Om haro’ddi ot iso’ o kusai dit a’ koundaliu do mantad di kosususu, do poirikau do hiri’d toning di wawayaan dit agayo, i roitan do ’’Wawayaan dot Olumis’’. Om monikid tadau nopo iyau do pootodon do tulun do hiri, do mokipuhawang di tulun di sumuwang do hiri’d Walai’d Sasambayangan dot Agayo. ³ Om tontok di nokito di tulun diri i Pitrus om i Yohanis do motisuang no di Walai’d Sasambayangan dot Agayo, om pokipuhawang no iyau diyolo’. ⁴ Om sonsod no iyolo’ dau, om boro-boros noddi i Pitrus dau do poingkaa, ’’Ontong pogi’ dahai!’’ ka. ⁵ Om ontong noddi i tulun diri dot id diyolo’, dot osorou nopo dau om haro o patahakon diyolo’ dau. ⁶ Nga’ boro-boros nogi’ i Pitrus dau do poingkaa, ’’Aiso’ i’ kopio o tusin ku. Nga’ nunu nopo i haro dot id doho’, om iri no o patahakon ku diya’: Iri no tu’ id suang do kuasa’ di Yesus Kristus i tulun do Nasarit diri, om suhuon ku iya’ do mamanau!’’ ka dau. ⁷ Om igitai no di Pitrus o longon do wanan di tulun dit a’ koundaliu’ddi, om poingkakato’ no dau iyau. Om pitilombus nopoddi do nokokoris i gakod om i tampangil di tulun diri. ⁸ Om silok nopo iyau do miningkakat, om pimpanau no. Om woyo’ noddi iyau di Pitrus om i Yohanis do suminuang do hiri’d Walai’d Sasambayangan dot Agayo, om mimbul-simbul nopo iyau do mamanau om mayou-rayou’d Kinorohingan. ⁹ Om oinsanan nopo i tulun do kokito dau do manau-panau do mayou-rayou’d Kinorohingan. ¹⁰ Om kotutunai noddi diyolo’ dot iyau no i poirikau kasai’ do hiri’d toning di wawayaan di roitan do ’’Wawayaan dot Olumis’’, di hiri’d Walai’d Sasambayangan dot Agayo do mokipuhawang do tulun do suwai. Om osuayan ngai’ diri iyolo’ mikuwo’d ongoimayaan do nokokito di nosiliu dot id tulun diri. ¹¹ Om manud-tanud nopoddi i tulun diri di Pitrus om i Yohanis. Om tontok di nokorikot iyolo’d tolu do hiri’d kakilima di roitan do ’’Kakilima di Suliman’’, om ongopusahan diri i tulun om oinsanan nopoddi i tulun do minongoi gurumung diyolo’. ¹² Om tontok di nokito di Pitrus i tulun diri om boro-boros no iyau dot id diyolo’ do poingkaa, ’’Oi tulun dot Israil, nokuro tu’ ongosuayan kou di nosiliu do miagal diri? Nokuro tu’ sumonsod kou dahai? Andasan daa dokoyu om dahai’d sinundu ko’ kotorodoko’ dahai dot id Kinorohingan o nokolingos diti tulun diti? ¹³ I Kinorohingan di tukuon di Abraham, om i Isak, om i Yakub, i taki-aki toko’ o pinopoinggayo di Yesus i susuhuon dau. I Yesus no i pinatahak dokoyu dot id porinta, om i sinaap dokoyu dot id toguang di Pilatus, do tontok di poiduwo daa di Pilatus iyau. ¹⁴ Iyau nopo om olidang i’ om osonong, nga’ sinaap i’ dokoyu iyau om sinansagan dokoyu i Pilatus do papalabus di songulun o gampamatai. ¹⁵ Om pinatai dokoyu i Yesus. Om iyau nogi’ daa o tadon do koposion do koinsanai’d tulun. Nga’ pinasi i’ iyau kawagu’d Kinorohingan do mantad id kapatayon. Om nokokito i’ kopio iyahai’ddi. ¹⁶ Nokokito kou no ondung nunu o nosiliu dot id tulun dit a’ koundaliu’ddi. Nokokoris no iyau om nolingasan tu’ notumbayaan i’ iyau di Yesus om i kuasa’ dau. Om iri no i kotumbayaan di tulun diri dot id di Yesus o nokolingos dau dot antang-antangan ngai’ dokoyu. ¹⁷ Oi tobpinai-tobpinai! Oilaan ku noddi dot it aiso’ o toila-ilaan dokoyu om i piro-piro boyoon dokoyu o nokowonsoi-wonsoi dokoyu’d miagal diri dot id di Yesus. ¹⁸ Om iri no o nakabaya-bayaan di pinoboros do Kinorohingan di gulu po do pinolombus di piro-piro nabi dau, tu’ a’ no milo dot a’ oinggorit i Raja’ do Gampamasi, i pinabatos diri. ¹⁹ Om iyo nopoddi oi tobpinai-tobpinai, om rologo kou no di dusa dokoyu, om guli’ kou no dot id Kinorohingan, om tonuson i’ dau o koinsanai di dusa dokoyu. ²⁰ Om rumikot nondo o Tuhan dot id dokoyu, om kopuriman kou nondo do kokorisan di don rusod. Om suhuon nondo do Tuhan i Yesus do rumikot dot id dokoyu, tu’ natantu’ mantad no iyau’d Kinorohingan do sumiliu’d Raja’ do Gampamasi dokoyu. ²¹ Om mositi’ no do poundorong kasai’ iyau do hilo’d surga do gisom dot orikot o kopoingwoguan ngai’ do Kinorohingan do koinsanai’d nunu nopo, do miagal di pinoboros do Kinorohingan di pinolombus di piro-piro nabi dau di gulu po. ²² Tu’ nokoumbal i’ i Musa do minomoros do poingkaa, ’Monuhu’ nondo o Kinorohingan, i Tuhan dokoyu, do songulun o nabi do mantad id bansa’ dokoyu, do miagal di minonuhu’ iyau doho’. Om mositi’ no do pokinongohon dokoyu o koinsanai di poboroson di nabi diri dot id dokoyu. ²³ Tulun nopo dit a’ mokinongou di poboroson di nabi diri, om potongkiadon nondo iyau do mantad id tulun di songonuon do Kinorohingan om patayon nondo,’ ka. ²⁴ Om iri nogi’ i piro-piro nabi di suwai, do tuminimpuun do mantad id di Nabi Somuil do habar do mantad id Kinorohingan, nga’ nokoponusui nogi’ do pasal dot osiliu diti maso’d baino’. ²⁵ Om iri nopo i piro-piro batos do Kinorohingan di pinolombus di piro-piro nabi diri, om iyokoyu nogi’ ot onuan diri, oi tobpinai-tobpinai. Id suang nopo di tumpongo do Kinorohingan dot id taki-aki dokoyu, om minomoros o Kinorohingan dot id taki-aki dokoyu, om minomoros o Kinorohingan dot id di Abraham do poingkaa, ’Iri no i sinakagon nu o pawayaan ku do mamarakat do koinsanai’d bansa’ do hiti’d pomogunan,’ ka. Om i tumpongo’ddi nga’ bagi’ nogi’ dokoyu. ²⁶ Om iri noddi o kinopomilian om kinoponuhuan do Kinorohingan di susuhuon dau do rumikot po dot id dokoyu’d gulu, om abarakatan kou i’ dau. Om ralan nopo dau do mamarakat dokoyu nga’ monuhu’ dokoyu do rumologo do mantad id kowoyo-woyoon dokoyu dot angaraat,’’ kad Pitrus.

¹ Om maso po di Pitrus om i Yohanis do moro-boros di tulun dot ogumu’ddi, om rikot no dot id diyolo’ i piro-piro boyoon dot imam, om i boyoon do madtatamong di Walai’d Sasambayangan dot Agayo, om i tulun do Saduki. ² Om ongotogod tomod diri iyolo’ di Pitrus om i Yohanis tu’ minonusui iyolo’ dot id tulun dot ogumu’ddi do napasi kawagu i Yesus do mantad id kapatayon. Tu’ iri no o popointalang kopio dot apasi kawagu i tulun do napatai. ³ Om tangkapo’ noddi diyolo’ goduwo i rasul diri, om pogiilo’ no do gisom do nosuaban tu’ otuong no do maso’ddi. ⁴ Nga’ ogumu’ i’ o tulun do nongotumbayaan do nokorongou di ponudukan di piro-piro tulun di sinuhu’ddi, om koruhangai noddi o ginumu’ diyolo’ gisom dot oruhai no do limo noribu o tulun. ⁵ Om tadau noddi kawagu om timung no do hilo’d Yorusalim i piro-piro boyoon do Gompomutus do Don Tugama’, om i piro-piro boyoon do tulun do Yohudi, om i piro-piro guru do Tourat. ⁶ Om ongoi no iyolo’ solowot di Hanas i Boyoon dot Agayo dot Imam, om i Kayapas, om i Yohanis, om i Aliksandor om koinsanai dit id sompiiyon di Boyoon dot Agayo dot Imam diri. ⁷ Om ngoyo’ no i Pitrus om i Yohanis potimbabao’ diyolo’, om uhoto’ no diyolo’ iyo Pitrus di Yohanis do poingkaa, ’’Poingkuro o ralan dokoyu do minomolingos di tulun dit a’ koundaliu’ddi? Disai’d kokorisan om disai’d kuasa’ dokoyu do minomonsoi do miagal diri?’’ ka diyolo’. ⁸ Om simbar noddi i Pitrus, i noporinta’ no do Rusod do Kinorohingan do poingkaa, ’’Oi tuan i boyoon do bansa’, om koinsanai di Gompomutus do Don Tugama’. ⁹ Ondung butusan iyahai do baino’, dot i minomonsoi dot osonong do minonulung di tulun dit a’ koundaliu, om i mokiilo kou do poingkuro i tulun diri do nolingasan, o kopomutusan dokoyu dahai, ¹⁰ om ilaai ngai’ no kopio dokoyu, om koinsanai do bansa’ dot Israil do nokolingos nopodti tulun di poingkakat do dinondo’dti dot id toguang dokoyu, om mantad id kokorisan om kuasa’ di Yesus Kristus i tulun do Nasarit diri. Om pinasalib dokoyu i Yesus, nga’ pinasi i’ iyau kawagu’d Kinorohingan. ¹¹ I Yesus no o komoyon dit ayat dot id suang do Buuk do Kinorohingan diri do poingkaa, ’Iri nogi’ i watu di niadaan dokoyu, iyokoyu i mamamaal do walai, o nosiliu do watu dot agayo kopio o guna’,’ ka. ¹² I Yesus noo o milo’d mamasi’d tulun. Tu’ pointongkop nopo diti pomogunan dot id pogialatan do tulun om aiso’ no ot ongoiso’ piya’d tulun do suwai do nakaanu do kuasa’ do mantad id Kinorohingan do mamasi dati’,’’ ka di Pitrus. ¹³ Om ongosuayan ngai’ nopoddi i tulun di hiri’d suang di pitimungan do momumutus do nokokito di Pitrus om i Yohanis do katama’ tomod, om okon-okon poddi di nokoilo iyolo’ dot iri nopo i duwo o tulun di sinuhu’ddi om tulun i’ toomod om aiso’ i’ o sikul. Om kotutunai nogiddi diyolo’ dot iri nopo duwo o tulun do sinuhu’ddi nga’ i tulun di minoyo’ di Yesus. ¹⁴ Om aiso’ noddi o milo diyolo’d poboroson, tu’ poingkakat i’ do hiri’d dotoguangan diyolo’ i tulun di nolingasan diri do pointoning di Pitrus om i Yohanis. ¹⁵ Om suhuon’ noddi diyolo’ i duwo o tulun do sinuhu’ddi do sumoliwan do mantad hiri’d niyonon diyolo’d tuminimung. Om pogiboro-boros noddi iyolo’. ¹⁶ Boros ka diyolo’, ’’Nunu po o wonsoyon toko’ dot id tulun diri? Do koinsanai’d tulun do hiti’d Yorusalim om nongkoilo no di koimayaan di winonsoi diyolo’ddi. Om a’ toko’ no milo dot olimon iri. ¹⁷ Nga’ rolosion nogi’ iyolo’ goduwo’ddi om a’ po daa kopintongkop kopio iti habar dot id tulun do suwai. Om sunudan toko’ nondo kopio iyolo’ dot a’ no iyolo’ koino-ino do moro-boros kawagu dot id ongoiso’ piya o tulun do rumait do ngaran di Yesus,’’ ka diyolo’. ¹⁸ Om lohowo’ noddi kawagu diyolo’ i duwo o tulun di sinuhu’ddi do sumuwang kawagu, om sunudai no diyolo’ dot a’ no kopio iyolo’ koino-ino do mamarait ko’ monuduk po do rumait do ngaran di Yesus. ¹⁹ Nga’ boros kad Pitrus om i Yohanis do suminimbar, ’’Oi tuan, soroho’ no kopio dokoyu ondung hinonggo ot otopot dot id toguang do Kinorohingan: i tuu tumanud di ponuhuan dokoyu ko’ tumanud po di ponuhuan do Kinorohingan. ²⁰ Tu’ a’ no dahai milo do tingkadan do popimboros it iyahai kopio o nokokito om nokorongou,’’ ka diyolo’. ²¹ Om aiso’ noddi o paantakan di tulun dit id pitimungan diri do momohukum di Pitrus om i Yohanis. Nga’ rolosio’ noddi kawagu diyolo’ i duwo o tulun di sinuhu’ddi. Om posoliwano’ noddi diyolo’ iyolo’ do mantad hiri, tu’ oinsanan nopo i tulun do mamarayou’d Kinorohingan do nongkokito di nosiliu’ddi. ²² Iri nopo i tulun di nokopuriman do kolingasan di koimayaan kopio’ddi om lobi no dot apat nohopod o toun do tumur dau. ²³ Om kalabus poddi i Pitrus om i Yohanis, om guli’ no iyolo’ do hiri’d tambalut diyolo’ om susuyo’ ngai’ noddi diyolo’ i pinoboros di piro-piro boyoon dot imam om i piro-piro tulun do Yohudi dot id diyolo’. ²⁴ Om korongou poddi di tambalut diyolo’ iri, om insan-insan nopo iyolo’ do suminambayang dot id Kinorohingan, do mikuwo’d iso-iso’ o ginawo. Boros ka diyolo’, ’’Oi Tuhan, iya’ no o minomonsoi’d tawan om pomogunan om rahat om koinsanai di songingiyon do hilo’. ²⁵ Nokoumbal ko i’ do minoro-boros dot i Rusod nu o pinopoboros do pinolombus di Daud i taki-aki dahai, i susuhuon nu’ddi do poingkaa, ’Nokuro tu’ ongotogod i tulun dit okon ko’ Yohudi; om nokuro ngai’ i bansa’ tu’ mogipapakat dot aiso’ o kotutuk-tutukon. ²⁶ Nokosodia’ ngai’ no i raja’ do hiti’d pomogunan do mongoi sangod, om nokopogisosokodung no i boyoon do sumaap do Tuhan om i Raja’ do Gampamasi!’ ka. ²⁷ Tu’ otopot id nokopogiboro-boros no i Horudis om i Pontius Pilatus di tulun dit okon ko’ Yohudi om i tulun dot Israil di hiti’d bandar diti. Om mogiupakat iyolo’ do sumaap di Yesus i susuhuon nu dit olidang, i nopili’ nu do sumiliu’d Raja’ do Gampamasi. ²⁸ Om mogisosokodung nopo iyolo’ do momonsoi do koinsanai’ddi, i natantu’ mantad nu no di gulu po dot ongosiliu. Om tinantu’ nu’ri do mikuwo’d kuasa’ nu om id suang do korohian nu. ²⁹ Intangai pogi’ o pomorolosi diyolo’ dahai do baino’dti, oi Tuhan. Om pologoso’ no iyahai i susuhuon nu dot a’ moddosi do popinsusui di boros nu. ³⁰ Om tulungo’ no iyahai om olingasan i’ i tulun dot ongkitoruol om kointalang i’ i kongoimayaan om i kongosuayan do mikuwo’d kuasa’ om kokorisan dot id suang do ngaran di Yesus, i susuhuon nu dit olidang,’’ ka diyolo’. ³¹ Om kasambayang poddi iyolo’, om koguyu’ nopo i niyonon diyolo’d tuminimung. Om koporinta’ ngai’ noddi iyolo’ do Rusod do Kinorohingan, om angkatama’ tomod diri iyolo’ do popinsusui di boros do Kinorohingan. ³² Om iso-iso’ nopoddi o ginawo om pomusorou do koinsanai di tulun di nongotumbayaan diri. Om aiso’ no tiso’ diyolo’ do momusorou dot iyau no o sanganu di haro dot id dau. Om sogiyaan nopo diyolo’ o nunu nopo i haro dot id diyolo’. ³³ Om popinsusuyon nopoddi di piro-piro rasul do mikuwo’d kuasa’ dit agayo kopio, do napasi no kawagu i Yesus. Om barakatai noddi kopio’d Kinorohingan iyolo’. ³⁴ Om aiso’ no o tongosongulun piya dot id pogialatan diyolo’ do haro o kokurangan. Tu’ isai nopo diyolo’ o kitana’ ko’ kiwalai om padagangon no diyolo’ i tana’ ko’ i walai diyolo’ddi, om igitan nondo diyolo’ i tusin di gatang diri, ³⁵ om patahakon nondo di piro-piro rasul. Om pogibohogi-hogion nogindo di piro-piro rasul i tusin diri do potikidon di tulun do miontok di kogunaan diyolo’. ³⁶ - ³⁷ Om i Yusup nga’ minomonsoi nogi’ do miagal diri. Tu’ iyau nga’ pinapadagang i’ di tana’ dau om patahako’ nogiddi dau di piro-piro rasul i tusin di gatang di tana’ddi. I Yusup nopoddi om sinakagon di Liwi, om roitan iyau di piro-piro rasul dot i Barnabas (komoyon nopoddi nga’ Gomponginsasamod).

¹ Nga’ haro ot iso’ o kusai dot i Ananias o ngaran, om i Sapira o ngaran di sawo dau. Om pinapadagang iyolo’ do songkoiyonon o tana’ diyolo’. ² Om pipakat noddi iyolo’ di sawo dau do manganu di songintanga’ di tusin di gatang di tana’ddi, om igitai no di Ananias i songintanga’ di tusin diri do pinatahak di piro-piro rasul. ³ Om boros kaddi di Pitrus dot id dau, ’’Oi Ananias, nokuro tu’ pinologos nu o rogon do momorinta’ do ginawo nu, gisom do minongudut ko dot id Rusod do Kinorohingan, tu’ lisok-lisokon nu i’ do manganu i songintanga’ di tusin di gatang di tana’ nu? ⁴ Okon toi ko’ diya’ iddi tana’ddi, dit a’ nu po nakadagang? Om diri piya di nakadagang nu no i tana’ddi nga’ diya’ kasai’ po di tusin. Om nokuro tu’ minomusorou ko do momonsoi’d miagal diri? Om okon i’ ko’ tulun o pinongudutan nu’ddi, nga’ Kinorohingan,’’ ka. ⁵ Om korongou poddi di Ananias i boros diri, om kohunduk no iyau, om kapatai no. Om moddosi ngai’ nopoddi i tulun do nokorongou di nosiliu do miagal diri. ⁶ Om ngoyo’ noddi di tangaanakwagu lopoto’ i rata’ di Ananias diri, om antayango’ no diyolo’ do pinoposoliwan do ngoyon lobongo’. ⁷ Om haro no doti’ o tolu o jam do mantad diri, om suang no i sawo di Ananias. a’ i’ iyau nokoilo di nosiliu’ddi. ⁸ Om boros ka di Pitrus dot id dau, ’’Poiloo’ oku daa: ondung otopot dot iti-iti no o gatang di tana’ di pinadagang di sawo nu’ddi?’’ ka dau. Om boros ka di Sapira do suminimbar, ’’Otopot, ino-ino no i gatang diri,’’ ka. ⁹ Om boros kaddi kawagu di Pitrus dot id dau, ’’Nokuro tu’ miniupakat kou di sawo nu do mogumbal do Rusod do Tuhan? Pokinongoho’ pogi’ nga’ nokoguli’ no ilo tulun do minongoi pomolobong di sawo nu. Om iya’ moti’ nga’ antayangon i’ diyolo’ do poposoliwan,’’ ka dau. ¹⁰ Om diiri i’ om diiri om kohunduk no i sawo di Ananias, om kapatai no dot id toguang di Pitrus. Om tontok di suminuang i tangaanakwagu’ddi, om kabantalai no diyolo’ iyau do napatai no. Om antayango’ no diyolo’ i rata’ddi do suminoliwan om ngoyo’ no diyolo’ lobongo’ do hiri’d doros di lobong di sawo dau. ¹¹ Om kongooris ngai’ nopoddi i tulun do sidang om i tulun do suwai do nokorongou di nosiliu do miagal diri. ¹² Om ogumu’ddi o kosuayan kopio om i koimayaan do nongowonsoi di piro-piro rasul, dot id pogialatan di tulun dot ogumu’. Om iso-iso’ nopoddi o ginawo di tulun di notumbayaan do tuminimung do hiri’d kakilima’ di Suliman di hiri’d Walai’d Sasambayangan dot Agayo. ¹³ Om a’ no katama’ i tulun dit a’ notumbayaan do mongoi amung di tulun di nongotumbayaan diri. Nga’ pusohon i’ kopio di tulun dot ogumu’ i tulun di nongotumbayaan. ¹⁴ Om muhang-ruhang nopoddi o tulun dot otumbayaan do Tuhan — do tongokusai om tongoondu’. ¹⁵ Om gisom do pootodo’ noddi diyolo’ do hiri’d ralan i tulun dit ongkitoruol do songinglii dot id toodopon ko’ id galam, om olindungan pondo iyolo’ di sangai di Pitrus do tumalib iyau’d hiri. ¹⁶ Om ogumu’ tomod diri o tulun do ruminikot do mantad hiri’d kabandaran di posorili’ do Yorusalim, do pinapaatod do tulun do kitoruol om i norusadan do rusod dot araat. Om nongolingasan ngai’ nopoddi i tulun diri. ¹⁷ Om ongosolon diri i Boyoon dot Agayo dot imam om i piro-piro o tumatanud dau, iri no i tulun do Saduki. Om pomusorou noddi iyolo’ ondung nunu it apatut do wonsoyon diyolo’. ¹⁸ Om tangkapo’ noddi diyolo’ i piro-piro tulun di sinuhu’ddi om pogiilo’ no do hiri’d pogigiilan do tulun dot ogumu’. ¹⁹ Nga’ totuong iddi om ngoyo’ no dot iso’ o moloikat do Tuhan iwangai ngai’ i wawayaan di giil, om angatai no dau i tulun di sinuhu’ddi do sumoliwan. Om boro-boros no i moloikat dot id diyolo’ do poingkaa, ²⁰ ’’Mongoi kou no ingkakat do hilo’d Walai’d Sasambayangan dot Agayo, om poboroson no dokoyu dot id tulun o pasal diti koposion do wagu’dti,’’ ka dau. ²¹ Om osuab poddi di kosuabon om ongoi no iyolo’ do hiri’d Walai’d Sasambayangan dot Agayo, om timpuun no iyolo’ do monuduk di tulun do hiri. Tu’ minumboyo’ iyolo’ di pinoboros di moloikat dot id diyolo’. Nga’ korikot noddi i Boyoon dot Agayo dot imam om i piro-piro tumatanud dau, om papaharo no iyolo’ do pitimungan do momisara’ dot iyolo’ ngai’ di piro-piro boyoon do tulun do Yohudi. Om ponuhu’ noddi iyolo’ do tulun do mongongoi di piro-piro tulun di sinuhu’ddi do mantad hiri’d giil do ngoyon potimbabao’ diyolo’. ²² Nga’ tontok di nokorikot i tulun di sinuhu’ di piro-piro boyoon diri do hiri’d giil, om a’ no hino’d hiri i rasul. Om poguliai noddi diyolo’ do minongoi poposunud diri do hiri’d pitimungan do momisara’. Boros ka diyolo’, ²³ ’’Tontok di nokorikot iyahai do hiri’d giil, om poontiil i’ kopio i wawayaan di giil om songintamong ngai’ i madtatamong di giil. Nga’ soira’ddi niwangan dahai i wawayaan diri, om aiso’ no o tulun do hiri’d suang,’’ ka diyolo’. ²⁴ Om tontok di norongou di boyoon do soudor di madtatamong di Walai’d Sasambayangan dot Agayo, om i piro-piro boyoon dot imam i boros diyolo’ddi, om oborulong nopo iyolo’ do momusorou ondung poingkuro kopio o nosiliu dot id piro-piro tulun di sinuhu’ddi. Om ooris diri iyolo’ do haro o wonsoyon dot id diyolo’. ²⁵ Om rikot noddi ot iso’ o kusai do minongoi pomisunud diyolo’. Boros ka dau, ’’Pokinongou kou no, oi tuan, dot iri nopo i tulun di pinogiil dokoyu’ddi om maso no do monuduk do tulun dot ogumu’ do hilo’d Walai’d Sasambayangan dot Agayo!’’ ka. ²⁶ Om pogiwoyo-woyo’ noddi i boyoon do soudor di madtatamong di Walai’d Sasambayangan dot Agayo om i piro-piro soudor do suwai do minongoi pangangat di piro-piro tulun di sinuhu’ddi. Nga’ a’ i’ diyolo’ potogod-togodon o pangangat tu’ ooris iyolo’ di tulun dot ogumu’; tu’ a’ i’ oila-ilaan do momodumpau nopo diyolo’d watu i tulun dot ogumu’. ²⁷ Om ngoyo’ noddi diyolo’ potimbabao’ i piro-piro tulun di sinuhu’ddi do hiri’d pomisaraan, om pinguhatai noddi iyolo’ di Boyoon dot Agayo dot imam. ²⁸ Boros ka dau, ’’Nooduhan no kopio dahai iyokoyu dot a’ monuduk do tulun do pasal di tulun diri. Nga’ nunu’ddi iti winonsoi dokoyu’d baino’? Pinopintongkop dokoyu do hiti’d Yorusalim o ponudukan dokoyu, om monondos kou dahai do minamatai di tulun diri,’’ ka dau. ²⁹ Om boros ka di Pitrus om i piro-piro tulun di sinuhu’d suwai do suminimbar, ’’ Kinorohingan no ot apatut dahai’d umboyoon, om okon i’ ko’ tulun. ³⁰ Tu’ i Yesus nopo i pinasalib dokoyu’ddi om napasi no kawagu do mantad id kapatayon do pinasi’d Kinorohingan di taki-aki toko’. ³¹ Om noonuan no iyau’d Kinorohingan do pangkat om kuasa’ dit asawat, tu’ iyau no o Boyoon om Gampamasi; om oonuan i’ o bansa’ dot Israil do maso do kumorologo do mantad id dusa diyolo’, om kaanu indo iyolo’ do koompunan. ³² Om iyahai no o sasi’ do koinsanai’ddi — iyahai om iri nogi’ i Rusod do Kinorohingan di pinatahak do Kinorohingan dot id tulun di tumanud di ponuhuan dau,’’ ka diyolo’. ³³ Om korongou poddi di tulun di hiri’d pitimungan do Gompomutus do Don Tugama’ i boros di piro-piro tulun di sinuhu’ddi om kotogod noddi kopio iyolo’, om pogipapakat no iyolo’ do mamatai di piro-piro tulun di sinuhu’ddi. ³⁴ Nga’ ingkakat no ot iso’ o tulun dot id pogialatan di tulun di momisara’ddi, i roitan dot i Gamaliol. Iyau nopo om tulun do Parisi om guru do Tourat, om pusohon kopio iyau do koinsanai’d tulun. Om ponuhu’ noddi iyau do tulun do poposoliwan kopio’d oruhai di piro-piro o tulun di sinuhu’ddi. ³⁵ Om boro-boros no iyau di tulun di Gompomutus do Don Tugama’ddi do poingkaa, ’’Oi tobpinai-tobpinai, i tulun dot Israil! Momusorou kou no kopio ondung nunu o wonsoyon dokoyu dot id tulun diri. ³⁶ Tu’ di nopo di gulu om ruminikot i Tiudas do mininggayo-gayo, gisom do haro i’ doti’ ot apat nahatus o tulun do tuminanud dau. Nga’ pinatai iddi iyau. Om koinsanai di tumatanud dau nga’ nokopogitongkiad-kiad iddi. Om aiso’ i’ o kinootus-otuson di winonsoi diyolo’ddi. ³⁷ Om rikot po kawagu i Yudas, i tulun do Galilia, do tontok di haro o pongintaban do tulun. Om ogumu’ddi o tulun do tuminanud dau tu’ nabayayat iyolo’ dau. Om iyau nogi’ nga’ pinatai i’, om i tulun di tuminanud dau nga’ nokopogitongkiad-kiad nogi’. ³⁸ Om iti noddi nosiliu’d baino’, om poingkaa o doho’d nosihat: Kada’ dokoyu kuroi-kuroyo’ i tulun diri, suwai ko’ pologoson nopo iyolo’. Tu’ mantad nopo dot id tulun i ponudukan om i pingwonsoyon diyolo’ om tumanus indo i ponudukan om i wonsoyon diyolo’ddi do koimbagu. ³⁹ Nga’ mantad nopo dot id Kinorohingan om a’ kou i’ kaala’ diyolo’. suwai ko’ kointalang nogi’ doti’ do sumaap kou’d Kinorohingan,’’ ka dau. Om tonudo’ no di tulun di momutus diri i pinoboros di Gamaliol. ⁴⁰ Om lohowo’ noddi diyolo’ i piro-piro tulun di sinuhu’ddi, om pinglapasai no diyolo’, om oduhai nogiddi diyolo’ iyolo’ do popotuduk kawagu do pasal di Yesus. Om posoliwano’ nogiddi iyolo’. ⁴¹ Om ongotood nopoddi i piro-piro tulun di sinuhu’ddi do tuminongkiad di tiyonon do Gompomutus do Don Tugama’ tu’ pinosorupai i’ iyolo’d Kinorohingan dot indaraaton dot i tumanud iyolo’ di Yesus o kopongindaraatan. ⁴² Om monuduk kasai’ nopo iyolo’ do pointikid-tikid do tadau do hiri’d Walai’d Sasambayangan dot Agayo, om hiri’d piro-piro walai’d tulun. Iri nopo i potudukon om i popinsusuyon diyolo’ddi om i Habar dot Osonong dot i Yesus no i Raja’ do Gampamasi di pinabatos diri.

¹ Om maid-laid nga’ muhang-ruhang nopo o ginumu’ di tumatanud di Yesus. Tontok nopoddi om iri nopo tulun do Yohudi di dong Yunani do boros om a’ asanangan di tulun do Yohudi dit a’ nakakaa dot id pomogunan do suwai. Boros ka di tulun di dong Yunani do boros, ’’Iri nopo i tongoondu’ dahai di nongopuadan om a’ i’ nobohogian di ponulung di potikidon dot id tulun di pointikid-tikid do tadau,’’ ka. ² Om timungo’ noddi di hopod om duwo o rasul o koinsanai di tumatanud. Om boro-boros no i piro-piro rasul diri dot id diyolo’, ’’A’ i’ osonong do tumingkod iyahai’d popinsusui do boros do Kinorohingan dot i mongilo-ilo do taakanon o kotingkadan. ³ Osonong nogi’ do momili’ kou do turu’ o tulun dot id pogialatan dokoyu dit osonong o kowoyo-woyoon om i noporinta’ do Rusod do Kinorohingan om it oilo, i milo dahai do suhuon do kumaraja’ do mongilo-ilo do hal diri, ⁴ tu’ iyahai nopo om sumambayang no om popotuduk do boros do Kinorohingan,’’ ka diyolo’. ⁵ Om kookunai ngai’ nopoddi di tulun i pinoboros di piro-piro o nabi diri. Om pilio’ noddi diyolo’ i Stipanus, dot iyau nopo om ogirot kopio o kotumbayaan dot id di Yesus, om noporinta’ iyau’d Rusod do Kinorohingan. Om nopili’ nogi’ i Pilipus, om i Prokorus, om i Nikanor, om i Timon, om i Parminas, om i Nikolaus, i mantad hilo’d Antiokia, iyau nopo om okon i’ ko’ tulun do Yohudi nga’ nokosuang iyau’d tugama’ do Yohudi. ⁶ Om posolowoto’ noddi diyolo’ di piro-piro rasul i turu’ o tulun diri. Om sambayang noddi i tulun di sinuhu’ddi do minokianu’d Tuhan do barakat do bagi’ diyolo’. ⁷ Om iyo noddi i habar do mantad id Kinorohingan do nokotongkop, om muhang-ruhang nopoddi o kogumuon do tumatanud di Yesus do hilo’d Yorusalim. Om ogumu’ nogi’ o tulun do notumbayaan di Yesus. ⁸ Om binarakatan kopio’d Kinorohingan i Stipanus, gisom dot ogumu’ddi o nowonsoi dau do kosuayan om koimayaan dot id pogialatan di tulun dot ogumu’. ⁹ Nga’ haro’ddi o piro-piro tulun do suminaap dau; iyolo’ nopo om mantad id sasambayangan di roitan do Walai’d Sasambayangan do Tulun di Nongkoidu’. Iri nopo tulun do Yohudi di mantad id Walai’d Sasambayangan diri nga’ mantad hilo’d Kirini om hilo’d Aliksandria om iyolo’ no di tulun do Yohudi di mantad hilo’d Kilikia om hilo’d Asia o suminongkiwal di Stipanus. ¹⁰ Nga’ a’ i’ iyolo’ kosongkiwal di Stipanus, tu’ kitoilaan i’ iyau do mimboros do mantad id Rusod do Kinorohingan. ¹¹ Om ponisip noddi iyolo’ do piro-piro tulun do sinuhu’ diyolo’d popoboros do poingkaa, ’’Nokorongou iyahai diti tulun diti do mongindaraat di Musa om Kinorohingan,’’ ka. ¹² Om iyo noddi iyolo’ do minominsuhu’ di tulun dot ogumu’, om i boyoon do Yohudi om i piro-piro guru do Tourat. Om tangkapo’ noddi diyolo’ i Stipanus, om ngoyo’ no diyolo’ potimbabao’ di Gompomutus do Don Tugama’. ¹³ Om angatai noddi diyolo’ i piro-piro tulun do sasi’ di popoboros dit a’ otopot do pasal di Stipanus. Boros ka di piro-piro sasi’ddi, ’’Iti nopo tulun diti om managalai nopo do mongindaraat di Walai’d Sasambayangan dot Agayo dit olidang, om mongindaraat di Tourat di Musa. ¹⁴ Om norongou dahai iyau do minomoros do raagon nondo di Yesus, i mantad hilo’d Nasarit iti Walai’d Sasambayangan dot Agayo, om simbanan ngai’ nogindo dau i kaadat-adato’ di pinotuduk di Musa dati’!’’ ka diyolo’. ¹⁵ Om ontong ngai’ nopo di Stipanus i tulun di hino’d hiri’d pitimungan di Gompomutus do Don Tugama’. Om tontok noddi do nokito diyolo’ i rabas di Stipanus do miagal pod rabas do moloikat.

¹ Om uhoto’ noddi di Boyoon dot Agayo dot Imam i Stipanus, ’’Otopot ngai’ i’ i pinoboros di tulun diri?’’ ka. ² Om boros kad Stipanus do suminimbar, ’’Oi tobpinai-tobpinai, om i molohing-lohingon! Pokinongou kou daa diti poboroson ku. Tontok dit a’ po nokoundaliu i Abraham i taki-aki toko’ do kuminaa do hilo’d Haran di poundorong po iyau do hilo’d Misopotomia, om intalang no o Kinorohingan i kikagayaan dot id dau. ³ Om boros ka dau, ’Tongkiadai noti pomogunan nu om koobpinayan nu. Om mongoi i’ do hilo’d pomogunan do potudukon ku diya’,’ ka. ⁴ Om tongkiad noddi i Abraham di pomogunan do Kasdim, om ongoi noddi iyau do hilo’d Haran. Om kapatai poddi i tapa’ di Abraham om poundoliho’ nogid Kinorohingan i Abraham do pinakaa do hilo’d pomogunan di nokoiyonon dokoyu’d baino’. ⁵ Tontok nopo do maso’ddi om aiso’ i’ o tongosongkoiyonon piya’d tana’ do pinatahak do Kinorohingan dot id di Abraham do sumiliu’d dau’d songonuon dot id pomogunan diti. Nga’ pamatos noddi o Kinorohingan dot id di Abraham do papatahak diti tana’ diti do sumiliu do songonuon dau om songonuon di sinakagon dau. Om tontok nopoddi om aiso’ po o tanak di Abraham. ⁶ Nga’ minoro-boros i’ o Kinorohingan dot id dau do poingkaa, ’Koundorong nondo o sinakagon nu dot id pomogunan do bansa’d suwai, om silihon nondo iyolo’d tulun do hiri’d pomogunan diri do turipon, om inggoriton nondo iyolo’ do solinaid dot apat nahatus o toun. ⁷ Nga’ hukuman ku nondo i bansa’ di monguripon diyolo’, om kosoliwan nondo iyolo’ do mantad id pomogunan diri om sumambayang dot id doho’ do hiti’d pomogunan diti,’ ka. ⁸ Om pogiroto’ noddi do Kinorohingan i tumpongo dau’ddi do sunat o pinomogirot. Om sunatai noddi di Abraham i Isak i tanak dau di walu’ nogi’ o tadau do tumur. Om i Isak nga’ minonunat nogi’ di Yakub i tanak dau. Om i Yakub nga’ minonunat nogi’ di hopod om duwo o tanak dau, om iri no o nosiliu do taki-aki do bansa’d Yohudi. ⁹ Om iri nopo i taki-aki toko’ nga’ nosolon di Yusup, gowoi poddi om dagango’ no diyolo’ i Yusup do sumiliu do turipon do hilo’d Masir. Nga’ moyo-woyo’ i’ o Kinorohingan dau, ¹⁰ om pinoidu’ id Kinorohingan i Yusup do mantad id koinsanai di kosusaan dau. Om nonuan iyau’d Kinorohingan do kowoyo-woyoon dot osonong om toilaan do tontok di pinotimbaba’ iyau di Piraun, i raja’ do Masir. Om siliho’ noddi di Piraun i Yusup do gobunor do hiri’d pomogunan do Masir, om mongilo-ilo do hiri’d walai di Raja’ Piraun. ¹¹ Om pononglous noddi dot adalaan kopio o pointongkop do pomogunan do Masir om Kanaan gisom dot ongoinggorit tomod poo o tulun. Om aiso’ noo o takanon di taki-aki toko’. ¹² Om tontok di nokorongou i Yakub do haro o gandum do hilo’d Masir om suhuon’ no dau i tangaanak dau, iri no i taki-aki toko’ do mongoi’d hilo’. Om koinsan nogi’ diyolo’ddi do minongoi’d hilo’. ¹³ Om koinduwo poddi diyolo’ do minongoi’d hilo’, om posunudo’ nogi’ di Yusup di tongotobpinai dau dot i Yusup iyau. Om koilaai nogiddi di raja’ do Masir i sompiiyon di Yusup. ¹⁴ Om pomilin noddi i Yusup do popoongoi di Yakub i tapa’ dau, om koinsanai di sompiiyon di tapa’ dau do mongoi’d hilo’d Masir. Kogumuon’ nopo diyolo’ddi do kuminaa do hilo’d Masir om turu’ nohopod om limo o tulun. ¹⁵ Om undaliu noddi i Yakub do kuminaa do hilo’d Masir, om hilo’ no o kinapatayon dau om i komolohingan toko’. ¹⁶ Nga’ iri nopo i rata’ diyolo’ om nigitan i’ kawagu do pinakaa do hilo’d Sikim, om lobongo’ no do hiri’d pamalabangan di binoli di Abraham do mantad id bansa’ do Himor di hilo’d Sikim, do tusin o pinomoli dau. ¹⁷ Om tontok dit oruhai noddi o kapamayaan do Kinorohingan di nabatos dau dot id di Abraham, om nokoinggumu’ noddi o bansa’ toko’ do hilo’d Masir. ¹⁸ Om alaid noddi om haro’ddi ot iso’ o raja’ do suwai do momorinta’ do hilo’d Masir dit a’ nokotutun di Yusup. ¹⁹ Om mongulok-ulok diri i raja’ddi di bansa’ toko’ om orongit tomod iyau dot id taki-aki toko’. Gisom do minononsog iyau diyolo’ do papataam do tangaanak diyolo’ di wagu po kosususu, om apatai indo. ²⁰ Om tontok nogi’ do maso’ddi do nosusu i Musa; i Musa nopoddi om olumis kopio o kinaanak-anako’. Om tolu no o tulan dau do poinggompi’ iyau di molohing dau do hiri’d walai dau. ²¹ Om tontok di nakataam iyau, om ngoyo’ no iyau di tanak di Piraun do tondu’, om gompio’ no dau iyau do siniliu’d tanak kopio dau. ²² Om tudukai noddi diyolo’ i Musa do koinsanai di toilaan do bansa’ do Masir, gisom do nosiliu iyau’d tulun di kikuasa’ kopio o boros om wonsoyon. ²³ Om tontok dit apat noddi nohopod o toun do tumur di Musa, om kosorou’ddi iyau dot orohian do mongoi ontong do koiyon-iyono’ di tulun dot Israil i bansa’ dau. ²⁴ Om kokito noddi dau o songulun o bansa’ dot Israil dot inggoriton do tulun do Masir, om patayo’ no dau i tulun do Masir diri, tu’ minogobi’ iyau di tulun dit inggoriton diri. ²⁵ Ondos nopo daa di Musa om kosuhut i bansa’ dau do pakayon iyau’d Kinorohingan do popoidu’ diyolo’. Nga’ a’ i’ iyolo’ kosuhut. ²⁶ Om sinuabon noddi om kokito po dau o duwo o tulun dot Israil do miodu om tumotos no daa i Musa do popiulud diyolo’. Boros ka dau, ’Iyokoyu nopondo om miobpinai i’. Nokuro tu’ miodu kou?’ ka dau. ²⁷ Nga’ sudsuro’ nogi’ di tulun di minomobog di tambalut dau i Musa, om boro-boros nod, ’Isai o minomili’ diya’ do sumiliu’d boyoon om minomili’ do sumiliu’d gompomutus dahai? ²⁸ Patayon oku po daa iyoho’ diya’ do miagal di tulun do Masir di pinatai nu konihab?’ ka dau. ²⁹ Om tontok di norongou di Musa i boros di tulun diri, om poggidu’ no iyau do mantad hilo’d Masir om ongoi noddi iyau iyon do hilo’d pomogunan do Midian. Om hilo’ no iyau do gisom do duwo o tanak dau. ³⁰ Apat poddi nohopod o toun do mantad diri, om rikot no o tiso’ o moloikat dot id di Musa do hilo’d tana’ do kowotuan do hilo’d somok do Nuluhon do Sinai. Iri nopo moloikat diri om ruminikot dot id suang do tapui di molob-ngolob dot id bulungkut. ³¹ Om osuayan diri i Musa do nokokito’ddi, om ongoi no iyau insomok do mongoi pogontong ondung nunu kopio iri. Om korongou noddi dau o boros do Tuhan do poingkaa, ³² ’Iyoho’ no o Kinorohingan di taki-aki nu; iyoho’ no i Kinorohingan di Abraham, om i Isak, om i Yakub,’ ka. Om gagarai nopo i Musa dot opopoddosian, om a’ noddi iyau kasaap do montong di bulungkut diri. ³³ Om boro-boros po kawagu o Tuhan dot id dau do poingkaa, ’Iduwo’ ino kasut nu, tu’ iti nopo tana’ di ningkokoton nu om tana’ dit olidang. ³⁴ Nokito ku no om nongoilaan ku no o koinggoritan di tulun ku do hilo’d Masir. Om norongou ku no o todoi diyolo’, om nokolintuhun oku no do mongoi popoidu’ diyolo’. Baino’ nopodti om suhuon ku iya’ do gumuli’ kawagu do hilo’d Masir,’ ka. ³⁵ I Musa nopodti om niada’ do bansa’ dot Israil, om a’ diyolo’ rinamit tu’ minomoros i’ iyolo’ do poingkaa, ’Isai o minomili’ diya’ do sumiliu do boyoon om gompomutus dahai?’ ka. Nga’ iyau nogi’ kopio i tulun di sinuhu’d Kinorohingan do sumiliu do boyoon om i gampamasi do nuhupan di moloikat di minintalang dot id dau di hiri’d bulungkut di molob-ngolob o tapui. ³⁶ Om i Musa no o minomoyo’ do bansa’ dot Israil do suminoliwan do mantad hilo’d Masir, mikuwo’d minomonsoi do kongosuayan om koimayaan do hilo’d Masir, om hilo’d Rahat dot Aragang, om hilo’d tana’ do kowotuan do solinaid dot apat nohopod o toun. ³⁷ Om i Musa nogi’ o minomoros dot id bansa’ dot Israil do poingkaa, ’Onuan kou nondod Kinorohingan do songulun o nabi di pilion do mantad id pogialatan dokoyu, do miagal di minomili’ iyau doho’,’ ka. ³⁸ Om i Musa nogi’ i poinsugku’ di bansa’ dot Israil di hilo’d tana’ do kowotuan, i suminiliu do popiromut dot id moloikat om id taki-aki toko’ do tontok di minoro-boros i moloikat dot id dau di hilo’d Nuluhon do Sinai. Om iyau nogi’ i nakaramit di habar dit a’ tumanus do mantad id Kinorohingan, i polombuson dot id dati’. ³⁹ Nga’ mulong po dot iyo’ddi nga’ a’ i’ minumboyo’ dau i taki-aki toko’. Om niada’ i’ diyolo’ i Musa, om siguli’ nogiddi iyolo’ do hilo’d Masir. ⁴⁰ Om boro-boros no iyolo’ di Harun do poingkaa, ’Pamansayai nogi’ iyahai do tininganak, om iri indo i tininganak o momoyo’ dahai. Tu’ a’ no dahai oilaan ondung nunu o nosiliu dot id di Musa, i minomoyo’ dahai do suminoliwan do mantad hilo’d Masir,’ ka diyolo’. ⁴¹ Om pomonsoi noddi iyolo’ do tininganak do pinoiyo-iyo do tanak do sapi’, om pinapatahak iyolo’ do porsombahan di sinumbali’ dot id tininganak diri, om minoginakan iyolo’ do pamarayou di tininganak di winonsoi diyolo’. ⁴² Om tongkiadai noddi iyolo’d Kinorohingan, om pologoso’ no dau iyolo’ do tumuku’ do rombituon di hilo’d tawan. Iri nopo om miontok nopo kopio di nokotulis dot id piro-piro buuk do nabi do poingkaa, ’Oi tulun dot Israil! Okon i’ ko’ id doho’ o kinoponumbolian om kinapatahakan dokoyu di tayam-tayam di solinaid dot apat nohopod o toun di hilo’d tana’ do kowotuan. ⁴³ Om piniigit-igitan dokoyu i kiim di tingolig di Molok, om i tininganak di pinoiyo-iyo do rombituon di roitan do Ripan, om iri no i tininganak di winonsoi dokoyu o maan dokoyu’d tukuon, om iri o kapakayaan ku dokoyu do hilo’d pomogunan do Babil, i hilo’d sodu’ kopio,’ ka. ⁴⁴ Om haro o kiim di taki-aki toko’ do hilo’d tana’ do kowotuan, i Koropohon do Kinorohingan do tontok di rumikot iyau dot id tulun. Om pinomonsoi nopoddi kiim diri om tumanud di pinonuhuan do Kinorohingan di Musa, om pinoomit di pinokitanan do Kinorohingan dot id di Musa. ⁴⁵ Om nigitan nogi’ di taki-aki toko’ i kiim diri do tontok di winoyo’ iyolo’ di Yosua do minongoi pagahau do pomogunan toko’dti do mantad id kuasa’ do piro-piro bansa’d suwai di momorinta’ mantad do pomogunan diti, i nuyung do Kinorohingan di ruminikot iyolo’. Om hiri kasai’ po i kiim diri do gisom di hino no i Daud. ⁴⁶ I Daud nopo om kohubayaan do Kinorohingan. Om pokionuon no dau do pologoson iyau’d Kinorohingan do popoingkakat iyau dot iso’ o walai do dong Kinorohingan di tukuon di Yakub. ⁴⁷ Nga’ i Suliman iddi o pinopoingkakat di walai do Kinorohingan diri. ⁴⁸ Nga’ a’ i’ minundorong i Kinorohingan dit Agayo Kopio dot id suang di walai di winonsoi’d tulun; tu’ nokotulis no dot id buuk do nabi o poingkaa, ⁴⁹ ’Ilo tawan o tirikohonon ku do momorinta’, om iti pomogunan o koulokon do lapap ku. Okuro-kuro daa o walai do wonsoyon dokoyu doho’? Hinonggo o tiyonon ku’d mundorong? ⁵⁰ Okon toi ko’ iyoho’ i’ o minomonsoi do koinsanai’d nunu nopo?’ kad boros do Kinorohingan. ⁵¹ Ongokodou no kopio o ginawo dokoyu oi tobpinai-tobpinai, om apagon kou no kopio do mumboyo’ do Kinorohingan! Om iyo kou pod bosukon dot a’ korongou di boros do Kinorohingan! Miagal kou nopo di taki-aki dokoyu; i sumaap kasai’ do Rusod do Kinorohingan! ⁵² Inggorito’ ngai’ nopo di taki-aki dokoyu i nabi. Om pinatai diyolo’ i susuhuon do Kinorohingan di gulu po i pinopoboros do korikatan di susuhuon do Kinorohingan dit otopot. Om iyokoyu nga’ pinapadagang i’ om minamatai di susuhuon do Kinorohingan diri. ⁵³ Om naramit no dokoyu i Tourat do Kinorohingan, i pinaatod do piro-piro moloikat, nga’ a’ i’ dokoyu tinanud iri!’’ ka di Stipanus. ⁵⁴ Om kongotogod noddi i piro-piro Gompomutus do Don Tugama’ diri do nokorongou di boros di Stipanus, om karaatai noddi kopio iyolo’ dau. ⁵⁵ Nga’ tingaha’ noddi do hilo’d tawan i Stipanus i noporinta’ do Rusod do Kinorohingan. Om kokito no dau o kagayaan do Kinorohingan, om i Yesus do poingkakat do hiri’d dawananan do Kinorohingan i tiyonon di noonuan do kuasa’. ⁵⁶ Om boro-boros no i Stipanus do poingkaa, ’’Intong pogi’, okito ku o surga do noiwangan, om poingkakat i Tanak do Tulun dot id dawananan do Kinorohingan!’’ ka dau. ⁵⁷ Om sonsongo’ ngai’ nopo di tulun di gompomutus diri o tolingo diyolo’ do mikuwo’d songgiak-giak, om insan-insan nopo iyolo’ bontol do tuminabpo di Stipanus. ⁵⁸ Om gayato’ no diyolo’ iyau do poposoliwan di bandar om pindumpahai no diyolo’ iyau’d watu. Om iri nopo i piro-piro tulun di minongoi ontong di nosiliu’ddi nga’ pinatamangan diyolo’ i pakayan diyolo’ do songulun o tanakwagu dot i Saulus o ngaran. ⁵⁹ Om di nopo di maso no diyolo’ do mindumpau di Stipanus, om pomomoros no i Stipanus dot opuhod do poingkaa, ’’Oi Tuhan Yesus, romito’ no o rusod ku!’’ ka dau. ⁶⁰ Om otud noddi iyau om boro-boros no dot opuhod do poingkaa, ’’Oi Tuhan, kada’ pababaai diyolo’ iti dusa diyolo’!’’ ka. Om koboros poddi di Stipanus o miagal diri om kapatai no iyau.

¹ Om i Saulus nga’ nokotumboyo’ i’ di pinamatayan diri. Om tontok nod tadau’ddi do tuminimpuun o koinggoritan do sidang do hilo’d Yorusalim. Om koinsanai nopo i tulun di notumbayaan do nopogitongkiad-kiad dot id pointongkop do watas do Yudia om Samaria, om iri poddi piro-piro rasul ot amu’ nopogitongkiad-kiad. ² Om lobongo’ noddi di tulun dit oronok do Kinorohingan i Stipanus. Om pogihadai no diyolo’ iyau do mikuwo’d tuminongob tomod iyolo’. ³ Nga’ i Saulus nopo om a’ nopo tumingkod do mananus di sidang. Om tikidon nopo dau i walai do minsalakoi do mongoi pamagayat do poposoliwan di tulun di nongotumbayaan om pogiilon nondo dau iyolo’. ⁴ Om iri nopoddi tulun di nongotumbayaan di nopogitongkiad-kiad diri, nga’ popinsusui nopoddi di Habar dot Osonong do mantad id Kinorohingan do hinonggo- honggo nopo. ⁵ Om ongoi no i Pilipus do hiri’d bandar do Samaria om susuyai no dau i tulun do hiri do pasal di Raja’ do Gampamasi di pinabatos do Kinorohingan. ⁶ Om soira’ddi nokorongou i tulun di pinoboros di Pilipus diri om di nongkokito iyolo’ di kongoimayaan do winonsoi dau, om ogumu’ddi o tulun do mokinongou kopio di poboroson di Pilipus. ⁷ Tu’ songgiak-giak po i rusod dot araat do sumoliwan do mantad id ogumu’ o tulun di nongorusadan do rogon. Om ogumu’ nogi’ o tulun dit a’ koundaliu om i kimpo’ do nongolingasan. ⁸ Om ongotood nopoddi kopio i tulun do hilo’d bandar do Samaria. ⁹ Hiri nopod bandar diri om haro o songulun o kusai dot i Simun o ngaran. Iyau nopo om haro o toilaan di dong bobolian om iri no o pakayon dau do pamayayat di tulun do Samaria do piro-piro no o koloido’. Om poboroson dau dot id diyolo’ dot iyau nopo om aiso’ no o tulun do koiyo. ¹⁰ Om oinsanan nopo i tulun do hiri’d bandar diri dot it aiso’ o ngaran- ngaran om it ongkipangkat do mokinongou kopio dau. Om somboro-boros po iyolo’ do poingkaa, ’’Nokolintuhun no i ponokokinorohingan di roitan do kuasa’ dit Agayo, om iti no tulun diti iri,’’ ka no diyolo’. ¹¹ Om mokinongou kopio’ddi iyolo’ di poboroson dau tu’ alaid no iyau do mamayayat diyolo’ dot i kuasa’ di toilaan dau o pamayayat. ¹² Nga’ susuyai noddi di Pilipus iyolo’ di Habar dot Osonong do pasal di Pomorintaan do Kinorohingan, om sinusuyan dau iyolo’ do pasal di Yesus Kristus, i Raja’ do Gampamasi. Om kotumbayaai noddi iyolo’ di habar di pinosusui di Pilipus diri. Om botisai noddi iyolo’ — dot i tongokusai om i tongoondu’. ¹³ Om i Simun nga’ notumbayaan nogi’. Om tanud noddi iyau di Pilipus di nobotisan iyau. Om osuayan diri i Simun do kokito di kongoimayaan di nongosiliu’ddi. ¹⁴ Om korongou noddi di piro-piro rasul di poundorong do hilo’d Yorusalim do notumbayaan i tulun do Samaria do boros do Kinorohingan, om suhuon’ noddi diyolo’ i Pitrus om i Yohanis do mongoi’d hilo’. ¹⁵ Om korikot poddi i Pitrus om i Yohanis do hilo’, om sambayangai no diyolo’ i tulun do Samaria’ddi om kaanu i’ iyolo’ di Rusod do Kinorohingan, ¹⁶ tu’ a’ po nokolintuhun i Rusod do Kinorohingan do momorinta’ dot ongosongulun piya dot id pogialatan diyolo’; nongobotisan nogi’ iyolo’ dot id suang do ngaran do Tuhan Yesus. ¹⁷ Om sukabayai noddi di Pitrus om i Yohanis i tulun do Samaria’ddi, om karamit noddi iyolo’ di Rusod do Kinorohingan. ¹⁸ Om kokito noddi di Simun do nangkaramit i tulun diri do Rusod do Kinorohingan di nosukabayan iyolo’ di piro-piro rasul, om panahak no daa’ddi i Simun do tusin dot id di Pitrus om i Yohanis, ¹⁹ om boro-boros nod, ’’Onuwai oku daa iyoho’d kuasa’ do miagal diri, om isai nopondo ot osukabayan ku om karamit nondo iyolo’d Rusod do Kinorohingan,’’ ka dau. ²⁰ Nga’ boros kad Pitrus do suminimbar, ’’Kopitonggoi kou nopondo tusin nu’d obungou! Ondos nu nopo daa om milo’d bolion do tusin o nipuhawang do Kinorohingan? ²¹ Aiso’ i’ o diya’d kosorupayan do momonsoi’dti karaja’ dahai, tu’ a’ i’ otopot o ginawo nu dot id toguang do Kinorohingan. ²² Iyo nopoddi om rologo no do mantad id pomusarahan nu dit araat, om sambayang no dot id Tuhan do mokiampun dau di pomusarahan nu dit araat diri! ²³ Tu’ oilaan ku i’ do poimponu’ pod kaasalan o ginawo nu om nosiliu ko’d turipon do dusa,’’ ka di Pitrus. ²⁴ Om boros kaddi di Simun do suminimbar di Pitrus om i Yohanis, ’’Tulungo’ oku no do mokianu dot id Tuhan om aiso’ i’ o tongoiso’ piya di pinoboros dokoyu’ddi dot osiliu dot id doho’ oi tobpinai-tobpinai,’’ ka dau. ²⁵ Om koboros poddi diyo Pitrus di Yohanis iri om di nokopinsusui diyolo’ i boros do Tuhan om poguliai no diyolo’ do hilo’d Yorusalim. Om ogumu’ po o kampung do hilo’d Samaria di nawayaan diyolo’ do nopinsusuyan diyolo’ di Habar dot Osonong diri. ²⁶ Om boro-boros no o tiso’ o moloikat do Tuhan dot id di Pilipus do poingkaa, ’’Sumodia’ no, om mamanau i’ do kumaa ponong id salatan do kumaa do hilo’d ralan di wayaan do mongoi’d hilo’d Gasa do mantad hilo’d Yorusalim,’’ ka. Iri nopo ralan diri nga’ oingou. ²⁷ - ²⁸ Om sodia’ noddi i Pilipus om pamanau no iyau. Om tontok nopoddi om haro o songulun o pagawai do hiri’d walai’d raja’ dot Itiopia di poulian no do hilo’d pomogunan dau. Om iri nopo tulun diri nga’ pagawai dit asawat kopio o pangkat, i mongilo-ilo do koinsanai’d kakayaan di Kandiki, i raja’d tondu’ do pomogunan dot Itiopia. Om iri nopo tulun diri nga’ minongoi do hilo’d Yorusalim do minongoi sambayang dot id Kinorohingan. Om tontok nopoddi om poulian no dau do poinsakai di korita’-kuda’ dau. Om mambasa’ iyau di Buuk di Nabi Yosaya, di poirikau iyau do hiri’d suang di korita’-kuda’ dau. ²⁹ Om boro-boros no o Rusod do Kinorohingan dot id di Pilipus do poingkaa, ’’Ongoi insomok dilo korita’-kuda’,’’ ka. ³⁰ Om ongoi noddi i Pilipus insomok di korita’-kuda’ddi, om korongou no dau i tulun diri do mambasa’ di Buuk di Yosaya. Om uhoto’ no di Pilipus i tulun diri do poingkaa, ’’Oi tuan, kosuhut ko indo basaon nu?’’ ka dau. ³¹ Om boros kaddi tulun diri do suminimbar, ’’Poingkuro oku’d kosuhut dot aiso’ o tulun do papatarang diti dot id doho’?’’ ka dau. Om angatai noddi dau i Pilipus do sumakai di korita’-kuda’ om patalado’ no dau iyau do mirikau. ³² Ayat nopod basaon dau dot id buuk diri om poingkaa, ’’Miagal iyau di dumba’ di nongoi gayato’ do maan sumbolio’, miagal iyau di tanak do dumba dit a’ i’ monguni di maso’d guntingon o hulu, om iyo noddi iyau tu’ a’ i’ mungkomi. ³³ Hiningi-hingi iyau om a’ otulid o winonsoi dot id dau, om pinatai iyau, om aiso’ i’ o tongoiso’ piya’d tulun di milo do monusui’d sinakagon dau,’’ ka. ³⁴ Om boro-boros noddi di Pilipus i pagawai dit asawat o pangkat diri, i mantad hilo’d Itiopia, do poingkaa, ’’Sunudai oku daa ondung isai o komoyon di nabi diti. Iyau tuu ko’ tulun do suwai?’’ ka dau. ³⁵ Om susuyai noddi di Pilipus i pagawai dit asawat o pangkat diri di Habar dot Osonong do pasal di Yesus dot it ayat diri o pinoimpuunan do minonusui. ³⁶ Om tontok di manau-panau iyolo’ om korikot no iyolo’ dot id iso’ o kinoiyonon di haro o waig, om boro-boros no i pagawai, ’’Hoodi daa o waig! Nunu po o koontobon do mamatis doho’?’’ ka dau. [ ³⁷ Om boros kad Pilipus do suminimbar, ’’Ondung aayi-ayi’ kopio o ginawo nu dot otumbayaan oi tuan, om milo ko nod botisan,’’ ka dau. Om boros kaddi pagawai dit asawat o pangkat, i mantad hilo’d Itiopia’ddi, ’’Otumbayaan oku no dot i Yesus Kristus nopo om Tanak do Kinorohingan,’’ ka dau.] ³⁸ Om ponuhu’ noddi i pagawai do popoundorong di korita’-kuda’ dau, om lintuhun goduwo no iyolo’ di Pilipus. Om ongoi no iyolo’ tabung do hiri’d waig om botisai noddi di Pilipus i pagawai’ddi. ³⁹ Om kotindal poddi iyolo’ do mantad hiri’d waig, om ngoyo’ nod Rusod do Kinorohingan i Pilipus do mantad hiri, om a’ noddi iyau nokito di pagawai dit asawat o pangkat di mantad hilo’d Itiopia’ddi. Om otood nopoddi o ginawo di pagawai’ddi do luminombus do minamanau. ⁴⁰ Om puriman kad Pilipus nga’ hilo’ no iyau id Asdod. Om tontok di luminombus iyau’d minamanau, om pintikid no iyau dot id koinsanai di bandar do popinsusui di Habar dot Osonong do pasal di Yesus, do gisom do nokorikot iyau do hilo’d Kaisaria.

¹ Nga’ daamot nopoddi om a’ nopo tumingkod i Saulus do momorolosi om mongoi pamatai di tumatanud di Tuhan Yesus. Om ongoi no iyau solowot di Boyoon dot Agayo dot Imam, ² do mongoi pokianu’d surat kuasa’ do pokitanan dau di piro-piro boyoon do sasambayangan do tulun do Yohudi do hilo’d Damsik. Om ondung haro ot osolowot dau do tulun di notumbayaan di Yesus do hilo’, om milo nondo iyau’d manangkap diyolo’ om papakaa diyolo’ do hilo’d Yorusalim. ³ Nga’ tontok di manau-panau i Saulus do kumaa’d hilo’d Damsik, dit osomok no iyau di bandar diri, om sigog id haro o tulinau do mantad hilo’d tawan do tuminitiu do posorili’ dau. ⁴ Om karatu’ nopo i Saulus do hiri’d tana’ om korongou noddi dau do haro o minoro-boros dau do poingkaa, ’’Saulus, Saulus! Nokuro tu’ monginggorit ko doho’?’’ ka. ⁵ Om ponguhot noddi i Saulus do poingkaa, ’’Isai ko, oi tuan ?’’ ka. Om simbar no i minoro-boros diri, ’’Iyoho’ no i Yesus, it inggoriton nu. ⁶ Nga’ ingkakat nod dinondo om mongoi i’ do hilo’d bandar, om sunudan ko indo’d hilo’ ondung nunu it apatut nu’d wonsoyon,’’ ka. ⁷ Om i tulun di moyo-woyo’ di Saulus nga’ dodog ngai’ nopo do nongkotigowo tu’ nokorongou iyolo’ di boros, nga’ aiso’ i’ o tulun do nokito diyolo’. ⁸ Om ingkakat noddi i Saulus om ungkalat no daa iyau, nga’ a’ no iyau kokito. Om ahako’ noddi diyolo’ i Saulus do ruminikot do hilo’d Damsik. ⁹ Om tolu’ddi o tadau di Saulus dot a’ kokito, om solinai’d nopoddi om a’ no iyau minakan om a’ mininum. ¹⁰ Hilo’ nopod Damsik om haro o songulun o tumatanud di Tuhan Yesus dot i Ananias o ngaran. Om intalang no o Tuhan dot id dau, om boro-boros nod, ’’Ananias!’’ ka. ’’Hiti oku i’, oi Tuhan!’’ ka dau do suminimbar. ¹¹ Om boros kaddi do Tuhan dot id dau, ’’Sodia’ no om mamanau i’ do mongoi’d hilo’d walai di Yudas, i hilo’d ralan di roitan do Ralan dot Otulid. Om ihumon nod hilo’ o songulun di roitan dot i Saulus, i mantad hilo’d bandar do Tarsus. Tu’ dinondo nopo om maso no dau do sumambayang, ¹² om kokito nondo iyau dot id suang do pinointalang do songulun o kusai dot i Ananias o ngaran do rumikot do mongoi ponukabai dau om kokito indo kawagu iyau,’’ ka. ¹³ Om boros kad Ananias do suminimbar, ’’Oi Tuhan, ogumu’ no o tulun do norongou ku’d mimboros do pasal do tulun diri, dot a’ no ogina-gina’ o ponginggorit dau do tulun di songonuon nu di hilo’d Yorusalim. ¹⁴ Om haro o kabanaran dau do mantad id piro-piro boyoon dot imam do rumikot do hiti do mongoi panangkap do koinsanai’d tulun di notumbayaan diya’,’’ ka dau. ¹⁵ Nga’ boros ka kawagu’d Tuhan dot id dau, ’’Ongoi nopo, tu’ nopili’ ku no iyau do sumiliu’d susuhuon ku, om popinsusui nondo iyau’d pasal doho’ dot id bansa’d suwai, om id piro-piro o raja’ om id tulun nogi’ dot Israil. ¹⁶ Om sunudan ku nondo iyau do koinsanai’d koinggoritan dit a’ no milo dot a’ dau opurimanan dot iyoho’ o koponginggoritan,’’ ka dau. ¹⁷ Om ongoi noddi i Ananias do hiri’d walai’ddi, om sukabayai no dau i Saulus do mikuwo’d minoro-boros do poingkaa, ’’Oi Saulus, i tobpinai ku. Iri no Tuhan Yesus di nokito nu di maso nu’d manau-panau do pakayaan do hiti o minonuhu’ doho’ do rumikot do hiti, om kokito ko indo kawagu, om oporinta’ ko do Rusod do Kinorohingan,’’ ka dau. ¹⁸ Om diiri i’ om diiri do haro o nolungkab do koiyo-iyo’d sisi’ do sada’ do mantad id mato di Saulus, om kokito noddi iyau kawagu. Om ingkakat noddi iyau om pokibatis no. ¹⁹ Om kaakan poddi i Saulus om kokoris nogi’ kawagu iyau. Om undorong no i Saulus do hilo’d Damsik do piro-piro tadau do poinsugku’ di piro-piro tumatanud di Yesus. ²⁰ Om tilombus nopoddi iyau do minongoi do hiri’d piro-piro walai’d sasambayangan, om timpuun no iyau do poposusui dot i Yesus no i Tanak do Kinorohingan. ²¹ Nga’ ongosuayan ngai’ nopo i tulun do nokorongou di boros di Saulus. Om mogiuhot-uhot po iyolo’ do poingkaa, ’’Okon toi ko’ iyau nogi’ i minamatai ngai’ di tulun di notumbayaan di Yesus do hilo’d Yorusalim? Om okon toi ko’ kinaangayan nopo dau’d hiti om mongoi panangkap diyolo’, om tanggayan nondo do ngoyon potimbabao’ di piro-piro boyoon dot imam?’’ ka diyolo’. ²² Nga’ muhang-ruhang nopoddi o kuasa’ di ponudukan di Saulus. Om atarang kopio o ponudukan dau do pinopoingod kopio dot i Yesus no i Raja’ di Gampamasi, gisom dot aiso’ no o posimbaron di tulun do Yohudi di poingiyon do hilo’d Damsik. ²³ Om piro-piro noddi o tadau do mantad diri, om pogiupakat no i tulun do Yohudi do mamatai di Saulus. ²⁴ Nga’ noilaan i’ di Saulus i pakat diyolo’ddi. Om poingawang kasai’ nopo iyolo’ do hiri’d wawayaan dot agayo di bandar diri do tadau om totuong do mamatai daa di Saulus. ²⁵ Nga’ insan o totuong om ongoyo’ no i Saulus di piro-piro tumatanud dau, om pouluho’ no diyolo’ iyau do pinawaya’ do hiri’d luang do tolig di bandar do pinosuang iyau do balatak. ²⁶ Om ongoi noddi i Saulus do hilo’d Yorusalim, om ongoi no daa iyau amung di tumatanud di Yesus do hilo’. Nga’ moddosi i’ daa’ddi iyolo’ dau, tu’ a’ i’ iyolo’ otumbayaan dot otopot kopio do nosiliu iyau’d tumatanud di Yesus. ²⁷ Om ongoi noddi i Barnabas solowot di Saulus om angatai no dau iyau do mongoi solowot di piro-piro tulun di sinuhu’ddi. Om susuyo’ no di Barnabas dot id diyolo’ ondung poingkukuro i Saulus do nokokito’d Tuhan di maso dau do manau-panau do kumaa’d hilo’d Damsik, om ondung poingkuro o Tuhan do minoro-boros dot id dau. Om sinusui dau i kasangango’ di Saulus do monuduk dot id suang do ngaran di Yesus do hilo’d Damsik. ²⁸ Om undorong noddi i Saulus do poinsugku’ diyolo’d hilo’, om a’ nopo iyau moddosi do monuduk dot id suang do ngaran do Tuhan do pointongkop do hilo’d Yorusalim. ²⁹ Om minoro-boros i Saulus om minonokisimbar-simbar iyau di tulun do Yohudi di dong Yunani do boros. Nga’ pokipapatayan kasai’ i’ diyolo’ iyau. ³⁰ Om koilaai poddi di tulun di notumbayaan o pasal diri, om angatai no diyolo’ i Saulus do mongoi’d hilo’d Kaisaria, om pokoyoon nogindo diyolo’ iyau do hilo’d Tarsus. ³¹ Om ongosimbayan nopoddi o sidang do pointongkop do pomogunan do Yudia om Galilia, om Samaria. Om muhang-ruhang o ginumu’ om kogiroto’ di piro-piro o sidang diri, om ongoronok iyolo’d Kinorohingan tu’ uhupan i’ iyolo’d Rusod do Kinorohingan. ³² Om mimpanau nopoddi i Pitrus do mongoi pogompuya’ di piro-piro o sidang. Insan o tadau om ongoi no iyau do hilo’d Lida do minongoi pogompuya’ di tulun di songonuon do Tuhan do hilo’. ³³ Om kosolowot no dau’d hilo’ o songulun o kusai dit a’ koundaliu dot i Inias o ngaran, om walu’ no o toun do koloido’ dau dot a’ nopo kotungag do poillii do hiri’d toodopon dau. ³⁴ Om boro-boros no i Pitrus di Inias do poingkaa, ’’Oi Inias, lingasan ko i’ di Yesus Kristus. Tungag no, om sonongon i’ ino toodopon nu,’’ ka dau. Om diiri i’ om diiri do tuminungag i Inias. ³⁵ Om koinsanai nopo i tulun do hiri’d Lida om Saron do notumbayaan do Tuhan do nokokito di Inias do nolingasan. ³⁶ Om haro o songulun o tondu’ do hilo’d Yopa dot i Tabita o ngaran. (Ngaran nopo dau do dong Yunani om i Dorkas, om komoyon nopoddi om ’’tambang’’.) Iyau nopo om otumbayaan kopio di Yesus. Om osonong kasai’ o wonsoyon dau om monulung iyau di tulun do mosikin. ³⁷ Om tontok nopoddi om suminakit iyau om kapatai noddi iyau. Om kopodsu’ poddi diyolo’ i rata’ dau om ngoyo’ no diyolo’ posuango’ di bilik dit id sawat. ³⁸ Bandar nopod Yopa om osomok i’ do hilo’d bandar do Lida. Om tontok di nokorongou i tumatanud di Yesus di hilo’d Yopa do hilo’d Lida i Pitrus do tontok diri, om ponuhu’ noddi iyolo’d duwo o tulun do mongoi pomisunud di Pitrus do poingkaa, ’’Lomusan no do mongoi’d hiti,’’ ka. ³⁹ Om olomus nopo i Pitrus do miningkakat om tanud no iyau diyolo’ do minamanau. Om korikot poddi i Pitrus do hilo’, om angatai no iyau do mongoi do hiri’d bilik di hiri’d sawat. Om ogumu’ddi o tongoondu’ di nopuadan do guminurumung di Pitrus om songihad-ihad, om popingontong iyolo’ di Pitrus di rasuk diyolo’ om i rasuk diyolo’ dit id soibau di tinombir di Dorkas, do pinatahak dau diyolo’ di poimpasi po iyau. ⁴⁰ Om suhuon’ ngai’ noddi di Pitrus iyolo’ do sumoliwan, om otud no iyau do suminambayang. Om toguang no iyau di rata’ di Dorkas, om boro-boros no iyau’d poingkaa, ’’Oi Tabita, tungag no!’’ ka. Om ungkalat no i Dorkas, om kokito no dau i Pitrus om irikau noddi iyau. ⁴¹ Om igitai noddi di Pitrus o longon di Dorkas do pinopoingkakat dau. Om lohowo’ ngai’ noddi di Pitrus i tongoondu’ di nopuadan om i tulun do suwai di notumbayaan, om patahako’ no dau diyolo’ i Dorkas, i noposian noddi. ⁴² Om kotongkop noddi o habar do pasal di koimayaan di nosiliu’ddi do pointongkop do Yopa om ogumu’ddi o tulun do notumbayaan dot i Yesus i Raja’ do Gampamasi diyolo’. ⁴³ Om undorong noddi i Pitrus do hiri do piro-piro tadau do koloido’, do hiri’d walai do songulun o tukang kulit dot i Simun o ngaran.

¹ Hilo’ nopod Kaisaria om haro o songulun o kusai dot i Kornolius o ngaran. Iyau nopo om boyoon do soudor di roitan do ’’Posukan dot Italia’’. ² Om iyau nopo om tulun dit oronok do Kinorohingan, om tumuku’ dot id Kinorohingan o koinsanai di sompiiyon dau. Om asaru’ iyau do monulung di tulun do Yohudi di mosikin, om sumambayang kasai’ iyau dot id Kinorohingan. ³ Om insan o tadau di jam kotolu no doti’d sosodopon, om kokito no dau ot iso’ o moloikat do Kinorohingan dot id suang do pinointalang om lohowo’ no iyau di moloikat diri, ’’Oi Kornolius!’’ ka. ⁴ Om ontong no i Kornolius di moloikat do mikuwo’d ooris, om boro-boros no iyau dot, ’’Nunu ri oi tuan ?’’ ka dau. Om boros ka di moloikat do suminimbar, ’’Norongou nod Kinorohingan i sambayang nu om noilaan dau i kopuhawango’ nu, om simbaron ko nod Kinorohingan. ⁵ Om ponuhu’ nod tulun do kumaa do hilo’d Yopa do mongoi pangangat di Simun, i roitan nogi’ dot i Simun Pitrus. ⁶ Niyonon nopo dau om hiri’d walai do songulun o tukang kulit dot i Simun o ngaran. Walai nopoddi om hiri’d tisan do rahat,’’ ka. ⁷ Om kotongkiad poddi i moloikat di minoro-boros di Kornolius diri om pomolohou no i Kornolius do duwo o tulun di susuhuon dau om songulun o soudor di madtatamong dau dit otumbayaan do Kinorohingan. ⁸ Om susuyo’ noddi di Kornolius i nosiliu’ddi dot id diyolo’, om suhuon’ nogiddi dau iyolo’ do mongoi’d hilo’d Yopa. ⁹ Om tadau noddi kawagu di manau-panau iyolo’ dit oruhai no iyolo’d korikot do hilo’d Yopa, om ongoi no i Pitrus salakoi do hiri’d taap di walai do mongoi sambayang. ¹⁰ Om louson noddi tomod i Pitrus, om mokiaakan no daa iyau. Om daamot po di tulun do poposodia’ di taakanon, om haro’ddi o pinointalang do nokito dau. ¹¹ Om kokito no dau ilo tawan do noiwangan om kokito no dau o miagal do kain dot alaab do pinoulu do hiti’d pomogunan do nigitan o hiri’d apat o sunduk di kain do pinopoulu. ¹² Om hiri nopod suang diri, om hino ngai’ nopo o bansa’ do nintorusan, it apat o gakod om i sangkamang-kamang do hiti’d tana’ om i piro-piro tombolog. ¹³ Om korongou no di Pitrus o moro-boros do poingkaa, ’’Oi Pitrus, ingkakat om sumbolion i’ ilo’ om akanon i’!’’ ka. ¹⁴ Om boros kad Pitrus do suminimbar, ’’Mada’ oku i’ oi Tuhan! Tu’ a’ oku po insan pangakan di nintorusan di pogoduhan do mangakan om i sosomu’,’’ ka dau. ¹⁵ Nga’ boro-boros po kawagu i minoro-boros diri do poingkaa, ’’Nunu nopo i poboroson do Kinorohingan dot olidang om kada’ no soroho’ do sosomu’,’’ ka. ¹⁶ Om intolu dau kokito i pinointalang diri, om poinsawato’ nogiddi i kain do hilo’d surga. ¹⁷ Om oborulong nopo i Pitrus do momusorou ondung nunu o komoyon di nokito dau dot id suang do pinointalang diri. Om maso po di Pitrus do momusorou do pasal diri, om korikot no do hiri’d walai di Simun i tulun di sinuhu’ di Kornolius diri, om hiri no iyolo’d wawayaan di walai. ¹⁸ Om pomolohou no iyolo’d tulun om ponguhot no iyolo’, ’’Haro o tulun do nakaapit do hiti do roitan dot i Simun Pitrus?’’ ka. ¹⁹ Om daamot nopoddi om momusorou kasai’ po i Pitrus ondung nunu kopio o komoyon di pinointalang di nokito dau’ddi. Om boro-boros no o Rusod do Kinorohingan dot id dau do poingkaa, ’’Oi Pitrus, haro o tolu o tulun do mogihum diya’. ²⁰ Lintuhun kopio do hilo’d siriba’ om kada’ pikoduwo o ginawo do tumanud diyolo’, tu’ iyoho’ i’ o minonuhu’ diyolo’ddi,’’ ka. ²¹ Om lintuhun noddi i Pitrus om boro-boros no di tulun diri do poingkaa, ’’Iyoho’ no it ihumon dokoyu’ddi oi tobpinai-tobpinai. Nunu o kinaangayan dokoyu’d hiti?’’ ka dau. ²² Om boros ka diyolo’d suminimbar, ’’Sinuhu’ iyahai di Kornolius i boyoon do soudor do mongoi’d hiti. Iyau nopo om osonong kopio koulun om oronok iyau’d Kinorohingan, om pusohon kopio iyau do koinsanai’d tulun do Yohudi. Om sinuhu’ iyau dot iso’ o moloikat do Kinorohingan do poongoi diya’ do hilo’d walai dau. Om sinuhu’ iyau do mokinongou di poboroson nu dot id dau, tu’ iri no o tisimbar di sambayang dau,’’ ka diyolo’. ²³ Om angatai noddi di Pitrus iyolo’ do sumalakoi om modop pondod hiri. Om tadau poddi kawagu om pamanau noddi i Pitrus do tuminanud di tulun diri. Om haro nogi’ o piro-piro tulun di notumbayaan do mantad hilo’d Yopa do tuminanud diyolo’. ²⁴ Om sangadau poddi do mantad diri om korikot nogi’ iyolo’ do hilo’d Kaisaria. Om songintimung nod hiri i Kornolius om i koobpinayan dau om i piro-piro tambalut dau do linohou dau, do magandad do korikatan di Pitrus. ²⁵ Om korikot poddi i Pitrus do hiri, om ongoyo’ no di Kornolius rubao’ iyau om otud no dot id toguang di Pitrus. ²⁶ Nga’ poingkakato’ no di Pitrus iyau, om boro-boros nod, ’’Ingkakat no, dot iyoho’ nga’ tulun i’ toomod,’’ ka dau. ²⁷ Om maso po di Pitrus do moro-boros di Kornolius, om salakoi no iyolo’ do hiri’d walai. Om kokito no dau o tulun dot ogumu’ do songintimung nod hiri. ²⁸ Om boro-boros noddi i Pitrus diyolo’ do poingkaa, ’’Oi tobpinai- tobpinai, iyokoyu nga’ nokoilo id ponudukan nopod tugama’ do Yohudi om oduhan i tulun do Yohudi do mongoi amung ko’ mongoi ambalut di bansa’d suwai. Nga’ tinudukan oku’d Kinorohingan dot a’ oku i’ apatut do pokososomu’ ko’ a’ pokolidang dot isai nopo. ²⁹ Om iri noddi o kinaangayan ku’d hiti do soira’ do nokorongou oku di boros do tuan do pinopoongoi doho’. Om muhot oku’ddi ondung nunu o kinapaangayan do tuan doho’ do hiti,’’ ka di dau. ³⁰ Om boros kad i Kornolius do suminimbar, ’’Di nopo di tolu no o tadau’d nakatalib, di dongiyo’dti doti’ddi di jam do kotolu do sosodopon, do suminambayang oku do hiti’d walai ku, om sigog id haro o songulun o kusai do poingkakat do hiri’d dotoguangan ku, do mogulinau tomod o pakayan dau. ³¹ Om boro-boros no iyau doho’ do poingkaa, ’Oi Kornolius! Norongou nod Kinorohingan i sambayang nu, om osorou dau i kopuhawango’ nu. ³² Om ponuhu’ nod tulun do mongoi do hilo’d Yopa do mongoi pangangat di tulun di roitan dot i Simun Pitrus. Poingiyon iyau do hiri’d walai di songulun o tukang kulit, i roitan dot i Simun. Walai nopo dau om hiri’d tisan do rahat,’ ka. ³³ Om olomus oku nopoddi do minonuhu’ do tulun do mongoi pangangat diya’, oi tuan . Om osonong i’ kopio o ginawo do tuan do ruminikot do hiti. Om dinondo’dti om songintimung ngai’ no iyahai dot id toguang do Kinorohingan do mokinongou do koinsanai di ponuhuan do Kinorohingan diya’ do popoboros dot id dahai,’’ ka dau. ³⁴ Om boro-boros noddi i Pitrus do poingkaa, ’’Nosuhutan ku nogi’ kopio’d baino’ do Kinorohingan nopo om oiyo i’ o wonsoyon dot id koinsanai’d tulun. ³⁵ Om a’ i’ o Kinorohingan momili’ do bansa’d tulun, suwai ko’ isai nopo it otumbayaan dau om momonsoi dot otopot om romiton ngai’ no dau. ³⁶ Om nongkoilo kou i’ di komoyon kopio di habar do pinorikot do Kinorohingan dot id bansa’ dot Israil, iri no i Habar dot Osonong do pasal do kosimbayanan, dot i Yesus Kristus, i Tuhan do koinsanai’d tulun o poposimbayan. ³⁷ Om nokongoilo kou nogi’ di nongosiliu do pointongkop do hilo’d Yudia, i tuminimpuun do hilo’d Galilia di nokoponuduk i Yohanis do pasal do botisan. ³⁸ Om kongoilo kou nogi’ do nopili’ do Kinorohingan i Yesus, i tulun do Nasarit diri, om nonuan iyau’d Rusod do Kinorohingan om kuasa’. Om koilo kou nogi’ do mimpanau i Yesus do tuminongkop do hinonggo nopo do mingwonsoi dot ongosonong om minomolingos do koinsanai’d tulun di norusadan do rogon, tu’ moyo-woyo’ kasai’ i’ o Kinorohingan dau. ³⁹ Om iyahai nogi’ i nokokito kopio do koinsanai di winonsoi dau do hilo’d pomogunan do tulun do Yohudi, om hilo’d Yorusalim. Nga’ mulong po dot iyo kopio’ddi nga’ pinasalib i’ diyolo’ iyau do minamatai dau. ⁴⁰ Nga’ pinasi i’ iyau’d Kinorohingan di kotolu’d tadau om pinointalang dau iyau dot id tulun. ⁴¹ Nga’ a’ i’ oinsanan o tulun do nokokito dau, suwai ko’ iyahai noo i nopili’ mantad do Kinorohingan do sumiliu’d sasi’ dau. Om nokotorungak po iyahai dau do makan om minum di napasi kawagu iyau do mantad id kapatayon. ⁴² Om sinuhu’ iyahai dau do popinsusui do Habar dot Osonong dot id tulun om popoilo diyolo’ do nopili’ iyau’d Kinorohingan do sumiliu’d Gompomutus di tulun di nangapatai. ⁴³ Om oinsanan nopo i nabi do nokopomoros do pasal dau. Om minomoros iyolo’ dot iri ngai’ nopo i tulun dit otumbayaan di Yesus om oompunan no o dusa dau, dot i kuasa’ di Yesus o kaampun,’’ ka dau. ⁴⁴ Om daamot po di Pitrus do moro-boros, om lintuhun no o Rusod do Kinorohingan do minomorinta’ do koinsanai di tulun di mokinongou di habar diri. ⁴⁵ Om ongosuayan diri i tulun do Yohudi di notumbayaan di Yesus, i mantad hilo’d Yopa di minoyo’ di Pitrus, do nokokito di tulun dit okon ko’ Yohudi do nonuan do Kinorohingan do Rusod dau. ⁴⁶ Tu’ norongou diyolo’ i tulun diri do mimboros do boros do mogisuayan o bansa’ om mamarayou do kogoyoo’d Kinorohingan. Om boro-boros noddi i Pitrus dot id diyolo’ do poingkaa, ⁴⁷ ’’Intangai pogi’ dokoyu, nga’ nakaramit nod Rusod do Kinorohingan iti tulun diti do miagal dati’. Iyo nopoddi om milo po toi o tulun do mangantob diyolo’ do mokibatis do waig,’’ ka dau. ⁴⁸ Om suhuon’ noddi di Pitrus iyolo’ do mokibatis dot id suang do ngaran di Yesus Kristus. Om pokionuo’ poddi di tongoulun i Pitrus do mundorong do hiri’d poinsugku’ diyolo’ do piro-piro tadau’d koloido’.

¹ Om korongou noddi i piro-piro rasul om i tulun di notumbayaan di pointongkop do pomogunan do Yudia dot i tulun dot okon ko’ Yohudi nga’ nakaramit id boros do Kinorohingan. ² Om tontok di nokorikot i Pitrus do hilo’d Yorusalim, om pasalao’ no i Pitrus di piro-piro tulun do Yohudi di nongotumbayaan no. Iyolo’ nopo nga’ monuhu’d monunat di tulun dit okon ko’ Yohudi. Boros ka diyolo’, ³ ’’Nokuro tu’ mongoi ko salakoi dot id walai do tulun dit okon ko’ Yohudi om it a’ po nosunatan? Om minilang ko po diyolo’d makan!’’ ka. ⁴ Om impuuno’ noddi di Pitrus do monusui dot id diyolo’ o koinsanai di nongosiliu. Boros ka dau, ⁵ ’’Tontok di suminambayang oku do hilo’d bandar do Yopa, om haro o nokito ku dot id suang do pinointalang do koiyo-iyo’d sombidang o kain dot alaab do pinoulu do mantad hilo’d tawan do nigitan o hiri’d apat o sunduk di kain do pinopoulu, do pinoulu dot id toning ku. ⁶ Om ngoyo’ ku no kopio antangai o hiri’d suang diri, om kokito ku no do poinsuang do hiri ot ogumu’ o nintorusan dit apat o gakod, om nintorusan dit ongorongit, om i nintorusan di sangkamang-kamang om tombolog. ⁷ Om korongou ku noddi do haro o minoro-boros doho’ do poingkaa, ’Ingkakat no oi Pitrus, ngoyo’ sumbolio’ ilo’ om akanon i’!’ ka. ⁸ Nga’ boros kangku’d suminimbar, ’Mada’ oku i’, oi Tuhan! Tu’ a’ oku i’ insan pangakan do taakanon di pogoduhan ko’ i sosomu’,’ kangku. ⁹ Om boros ka di minoro-boros do mantad hilo’d tawan do suminimbar, ’Nunu nopo it olidang do poboroson do Kinorohingan om kada’ no soroho’ do sosomu’,’ ka. ¹⁰ Om intolu ku nopo kokito i pinointalang diri, om poinsawato’ ngai’ nogiddi kawagu iri do hilo’d surga. ¹¹ Om tontok nogi’ do maso’ddi do haro o tolu o tulun do mantad hilo’d Kaisaria, i sinuhu’ do mongoi solowot doho’, do nokorikot do hiri’d walai di niyon ku. ¹² Om suhuon’ oku noddi do Rusod do Kinorohingan do tumanud diyolo’ do mikuwo’d a’ mikoduwo’ o ginawo. Om tanud noddi doho’ iti onom o tulun diti do kuminaa do hilo’d Kaisaria, om salakoi ngai’ no iyahai do hiri’d walai di Kornolius. ¹³ Om susuyo’ no di Kornolius dot id dahai do nokokito iyau dot iso’ o moloikat do poingkakat do hiri’d walai dau, om minoro-boros i moloikat diri do poingkaa, ’Ponuhu’ nod tulun do mongoi do hilo’d Yopa do mongoi pangangat di songulun o kusai do roitan dot i Simun Pitrus. ¹⁴ Tu’ poporongou nondo iyau diya’ do habar di mamasi diya’ om i sompiiyon nu,’ ka dau. ¹⁵ Om tontok di tuminimpuun oku nogi’ do moro-boros dot id diyolo’, om lintuhun no o Rusod do Kinorohingan dot id diyolo’ do miagal di nosiliu dot id dati’ di timpuun i’. ¹⁶ Om kosorou ku noddi i nokoboros mantad do Tuhan do poingkaa, ’I Yohanis nopo om waig no o pamatis nga’ iyokoyu nopo om obotisan nondo do Rusod do Kinorohingan,’ ka. ¹⁷ Om atalang no kopio do manahak i’ o Kinorohingan do nipuhawang dot id tulun dit okon ko’ Yohudi do miagal di pinopuhawang dau dot id dati’ do tontok di notumbayaan toko’ do Tuhan Yesus Kristus. Iyo nopoddi, om poingkuro oku daa do mogodu do Kinorohingan!’’ ka dau. ¹⁸ Om korongou poddi diyolo’ iri, om a’ noddi iyolo’ pinapasala’ di Pitrus. Om pamarayou noddi iyolo’ do Kinorohingan. Boros ka diyolo’, ’’Iyo nopoddi, om onuan id Kinorohingan do maso it okon ko’ tulun do Yohudi do rumologo di dusa diyolo’ om kaanu nondo iyolo’ di koposion dit otopot kopio,’’ ka. ¹⁹ Om di nopoddi napatai i Stipanus, om pinggusaan diri i tulun di nongotumbayaan di Yesus do gisom do nokopogitongkiad-kiad iyolo’ om nakakaa dot id piro-piro kinoiyonon. Om haro o minogidu’ do pinakayaan do hilo’d Pinisia, om haro o kuminaa do hilo’d Siprus om hilo’d Antiokia. Om popinsusui no iyolo’d habar dot osonong do mantad id Kinorohingan dot id pogialatan di tulun do Yohudi. ²⁰ Nga’ iri nopo i tulun di notumbayaan di mantad hilo’d Siprus om hilo’d Kirini om haro i’ o piro-piro dot id pogialatan diyolo’ do kuminaa do hilo’d Antiokia. Om pinoposusui iyolo’ do Habar dot Osonong do pasal di Yesus dot id tulun dit okon ko’ Yohudi. ²¹ Om ogumu’ddi o tulun do notumbayaan, om tuminahak kopio dot id Tuhan. Tu’ kikuasa’ i’ do mantad id Tuhan i tulun di pinopopinsusui’ddi. ²² Om karangahai noddi di sidang do hilo’d Yorusalim i habar diri. Om suhuon’ no diyolo’ i Barnabas do mongoi do hilo’d Antiokia. ²³ Om tontok di nokorikot i Barnabas do hilo’, om otood tomod diri iyau do nokokito di kowoyo-woyoo’ do Kinorohingan do minamaramit di tulun diri. Om odsuuro’ noddi dau iyolo’ do magayi-ayi’ do ginawo do tumorodok dot id Tuhan. ²⁴ I Barnabas nopodti om osonong koulun om noporinta’ do Rusod do Kinorohingan, om otumbayaan kopio’d Tuhan, gisom dot ogumu’ddi o tulun do notumbayaan do Tuhan do naangatan dau. ²⁵ Om ongoi noddi i Barnabas do hilo’d Tarsus do minongoi pogihum di Saulus. ²⁶ Om kosolowot poddi dau i Saulus om angatai no dau iyau do mongoi do hilo’d Antiokia, om sontoun kopio’ddi o koloido’ diyolo’ do poinsugku’ di sidang do hilo’, om ogumu’ o tulun do tudukan diyolo’d hilo’. Om hilo’ nod Antiokia o kinoimpuunon do rinoitan do tulun do Kristian o tulun di notumbayaan di Yesus. ²⁷ Om tontok nopoddi om haro o piro-piro nabi do mantad hilo’d Yorusalim do minongoi do hilo’d Antiokia. ²⁸ Om haro’ddi ot id pogialatan di nabi diri dot i Agabus o ngaran, do pinopoboros do mononglous nondo dot adalaan kopio o pointongkop do pomogunan. Tu’ bininsuhu’ iyau do Rusod do Kinorohingan do popoboros diri. (Om nosiliu i’ kopio o miagal diri dit i Kaisar Klaudius o momorinta’.) ²⁹ Om pogiupakat noddi i tumatanud di Yesus do manahak do nunu nopo i dau’d patahakon do ponulung di tulun di poundorong do hilo’d Yudia, om sorompori-pori nopoddi iyolo’ do pinapatahak do songkuro nopo i milo diyolo’d patahakon. ³⁰ Om kopogiokun-okunai iddi diyolo’ do momonsoi o miagal diri, om suhuon’ no diyolo’ i Barnabas om i Saulus do mongoi papaatod di pinonulung diyolo’ddi dot id piro-piro boyoon do sidang.

¹ Om tontok noddi do tuminimpuun i Raja’ Horudis do monginggorit di piro-piro tulun dot id suang do sidang. ² Om ponuhu’ no iyau do mamatai di Yakub, i tobpinai di Yohanis do gayang o pamatai. ³ Om soira’ di nokito di Horudis do kohubayaan do tulun i winonsoi dau do miagal diri, om ponuhu’ no kawagu iyau do tulun do manangkap di Pitrus do tontok di Tadau’d Agayo do Roti dit A’ Kipangambang. ⁴ Om katangkap poddi i Pitrus om pogiilo’ no iyau. Om patamangai no i Pitrus dot apat o posukan do soudor, do mogisowoli-woli do madtamong — dot iso’ nopo o posukan do soudor om apat o tulun. Tu’ osorou nopo di Raja’ Horudis om katalib po i Tadau’d Agayo do Paska om butusan nogi’ i Pitrus do hiri’d toguang do tulun dot ogumu’. ⁵ Om iri no o nokopogiilan di Pitrus; nga’ iri nopo tulun di hiri’d sidang om sumambayang kasai’ nopo dot id Tuhan do bagi’ di Pitrus do mikuwo’d aayi- ayi’ kopio o ginawo do sumambayang. ⁶ Nopo di totuong di sinuabon pondo om ongoyon no di Horudis potimbabao’ i Pitrus dot id tulun dot ogumu’ do maan butusai, om koodop i Pitrus do kinagasan do duwo o rantai do piniompopingan iyau do duwo o soudor di madtamong. Om iri no wookon di soudor om pointamong do hiri’d wawayaan di giil. ⁷ Om sigog id ingkakat o moloikat do Tuhan do hiri’d doros di Pitrus om tuminitiu o tulinau do hiri’d suang di giil. Om guyuon’ no di moloikat i Pitrus do momosik dau. Om boro-boros noddi i moloikat dot id dau do poingkaa, ’’Oi, posik kopio,’’ ka. Om diiri iddi om diiri om koidu’ no i rantai’d basi’ di poingkogos di longon di Pitrus. ⁸ Om boros kaddi di moloikat diri, ’’Pakayo’ ilo pakayan nu om pokogoso’ ino tali do kasut nu,’’ ka. Om pakayo’ noddi di Pitrus i pakayan dau om pokogoso’ no dau i tali di kasut dau. Om boros ka kawagu di moloikat, ’’Rosuko’ ino rasuk nu dit id soibau om tumanud i’ doho’,’’ ka dau. ⁹ Om tanud noddi i Pitrus di moloikat diri do suminoliwan di giil. Nga’ a’ i’ di Pitrus oilaan dot otopot kopio i winonsoi di moloikat diri. Tu’ osorou nopo dau om id suang id pinointalang. ¹⁰ Om katalib poddi iyolo’ di wawayaan di tamangan di soudor dit id gulu kobontol om i koduwo, om korikot noddi iyolo’ do hiri’d wawayaan do kitotobon do basi’, i wawayaan do sumuwang do hiri’d bandar. Om iwang tomod nopo i wawayaan diri dot aiso’ i’ o tulun do minongiwang, om soliwan noddi iyolo’, om susui noddi iyolo’ dit iso’ o ralan. Om sigog iddi do tongkiad di Pitrus i moloikat. ¹¹ Om koilaai nogiddi kopio di Pitrus i nosiliu dot id dau. Om boro-boros noddi iyau do poingkaa, ’’Noilaan ku noddi kopio do sinuhu’d Tuhan i moloikat dau do popoidu’ doho’ do mantad id kuasa’ di Horudis om mantad id koinsanai di wonsoyon daa di tulun do Yohudi dot id doho’,’’ ka. ¹² Om koilaai poddi kopio di Pitrus i nosiliu do miagal diri, om ongoi no iyau do hiri’d walai di Maria, i tina’ di Yohanis i roitan nogi’ dot i Markus. Om ogumu’ddi o tulun do pointimung do hiri do maso’d sumambayang. ¹³ Om koritiko’ no di Pitrus i totobon di wawayaan, om ongoi noddi i Rodi, i songulun o susuhuon do tondu’ do hiri’d wawayaan do mongoi daa pongiwang di wawayaan. ¹⁴ Om kotutunai no dau o boros di Pitrus, om a’ no dau noiwangan i totobon tu’ atataadan no kopio iyau, om osiau nogiddi iyau do guminuli’ kawagu do minongoi pomisunud di tulun do hiri do hino nod hiri’d soliwan i Pitrus. ¹⁵ Om boros ka diyolo’, ’’Mulau ko no!’’ ka. Nga’ osonsog i’ i Rodi do momoros dot otopot kopio dot i Pitrus iri. Om boros kaddi diyolo’, ’’Moloikat id Pitrus ino,’’ ka. ¹⁶ Om a’ i’ tumingkod i Pitrus do mogkoritik di totobon. Om ngoyo’ noddi diyolo’ iwangai i totobon di wawayaan om kokito no diyolo’ i Pitrus, om ongosuayan noddi kopio iyolo’. ¹⁷ Om pobilido’ no di Pitrus o longon dau do popotingkod diyolo’ do minghiyo. Om susuyo’ no dau dot id diyolo’ ondung poingkukuro o Tuhan do pinoposoliwan dau do mantad id giil. Om suhuon’ nogiddi dau iyolo’ do poporongou di Yakub om i piro-piro tobpinai do suwai do habar diri. Om tongkiad noddi i Pitrus do mantad hiri do minongoi dot id kinoiyonon do suwai. ¹⁸ Om kosuabon noddi om angagangau tomod diri i piro-piro soudor di madtamong di giil, om oborulong nopo iyolo’d momusorou ondung poingkuro o nosiliu dot id di Pitrus. ¹⁹ Om ponuhu’ noddi i Horudis do tulun do mogihum di Pitrus, nga’ a’ i’ diyolo’ nokito iyau. Om ponuhu’ noddi i Horudis do monguhot kopio di piro-piro soudor di minadtamong diri, om patayo’ nogiddi iyolo’. Om tongkiad noddi i Horudis do mantad hilo’d Yudia. Om ongoi no iyau do hilo’d Kaisaria do piro-piro koloido’. ²⁰ Om kotogod noddi kopio i Horudis di tulun do hiri’d Tirus om Sidon. Om insan-insan nopoddi iyolo’ do minongoi solowot di Horudis. Nga’ ngoyo’ poddi diyolo’ lugu-lugutai i Blastus, i boyoon do hiri’d walai di Horudis di don raja’, do gisom do suminokodung i Blastus diyolo’. Om ongoi nogiddi iyolo’ solowot di Horudis do mongoi daa ponokiulud dau, tu’ mantad i’ do hiri’d pomogunan di Horudis o koonuan diyolo’d taakanon. ²¹ Om tontok di tadau di natantu’ mantad, om pamakai noddi i Horudis di pakayan dau do don raja’, om ongoi no iyau irikau do hiri’d tirikohonon dau di don raja’, om timpuun no do moro-boros dot id toguang di rayat. ²² Om boros ka di rayat do nokorongou di boros di Horudis, ’’Okon i’ ko’ tulun ilo mimboros, suwai ko’ boros id di ponokokinorohingan,’’ ka. ²³ Om diiri i’ om diiri om tapapo’ no di moloikat do Tuhan i Horudis, tu’ a’ i’ iyau momusou’d Kinorohingan. Om kapatai noddi i Horudis tu’ nakan iyau’d tonggiluang di hiri’d tian dau. ²⁴ Om mumu-gumu’ nopoddi o tulun do nokorongou do boros do Kinorohingan, om minonongkuyaan iyolo’ddi. ²⁵ Om kopongo poddi di Barnabas om i Saulus i karaja’ diyolo’, om poguliai no diyolo’ do mantad hilo’d Yorusalim, om angatai no diyolo’ i Yohanis i roitan dot i Markus do tuminanud diyolo’.

¹ Hiri nopod sidang dot Antiokia om haro o piro-piro nabi om gomponuduk, iyolo’ nopoddi om: i Barnabas om i Simion i pinungaranan dot it Oitom, om i Lukius i mantad hilo’d Kirini, om i Minahim i guminayo do poinsugku’ di Raja’ Horudis, om i Saulus. ² Om tontok di maso diyolo’ do sumambayang dot id Tuhan do mikuwo’d puasa, om boro-boros no o Rusod do Kinorohingan dot id diyolo’ do poingkaa, ’’pilion no i Barnabas om i Saulus do potobilangon do bagi’ doho’, om owonsoi i’ diyolo’ i karaja’ di natantu’ mantad ku do wonsoyon diyolo’,’’ ka. ³ Om kasambayang poddi iyolo’ do mikuwo’d puasa, om sukabayai no diyolo’ i Barnabas om i Saulus om suhuon’ goduwo nogiddi iyolo’ do mamanau. ⁴ Om pamanau noddi i Barnabas om i Saulus do kuminaa do hilo’d Siliukia. Tu’ sinuhu’ iyolo’d Rusod do Kinorohingan do mongoi’d hilo’. Om hilo’ noddi o tadon diyolo’ do kuminaa do hilo’d Pulou do Siprus do suminakai do kapal do rahat. ⁵ Om korikot poddi iyolo’ do hilo’d Salamis, om poposusui no iyolo’ do boros do Kinorohingan do hiri’d piro-piro walai’d sasambayangan do tulun do Yohudi. Om i Yohanis i roitan dot i Markus o monulung diyolo’ do tontok di mimpanau iyolo’. ⁶ Om pimpanau nopo iyolo’ do tuminongkop di pulou diri, gisom do nokorikot do hilo’d Papos. Om hilo’ no do nosolowot iyolo’ do songulun o tulun do Yohudi dot i Bar Yesus o ngaran. Iyau nopo om bobolian om mangakun do nabi. ⁷ I Sorgius Paulus nopo i gobunor do hiri’d pulou’ddi om tambalut kopio di bobolian diri. Iri nopo i gobunor diri om oilo kopio om opintar. Om lohowo’ no di gobunor i Barnabas om i Saulus, tu’ orohian iyau do mokinongou’d boros do Kinorohingan. ⁸ Nga’ i Barnabas nopo om i Saulus om sinongkiwal daa di Ilimas i bobolian diri, tu’ tumotos daa i Ilimas (iri no o ngaran dau do dong Yunani) do mogodu di gobunor dot otumbayaan di Yesus. ⁹ Nga’ i Saulus nopo i rinoitan dot i Paulus diri om noporinta’ do Rusod do Kinorohingan gisom do sonsodo’ nopo dau i bobolian diri, ¹⁰ om boro-boros no iyau do poingkaa, ’’Oi gomponipu’ i tanak dit araat! Iya’ no o pisangod do koinsanai dit ongosonong. Nokuro tu’ a’ ko tumingkod do mamaraag di natantu’ mantad do Kinorohingan do wonsoyon dau do mamasi’d tulun? ¹¹ Dinondo no moti’ do hukuman ko’d Tuhan! Om obolou ko nondo, om a’ ko nondo kokito do tinitiu dilo tadau do daamot,’’ ka dau. Om diiri i’ om diiri do tuminuong o nokito di Ilimas, om mikorobibi’ poddi iyau do mawor-hawor do mogihum do tulun do mangahak dau. ¹² Om kotumbayaai nopoddi di Yesus i gobunor diri do nokokito di nosiliu’ddi, tu’ oimayaan no kopio iyau di ponudukan do pasal do Tuhan. ¹³ Om pamanau noddi i Paulus om i piro-piro tambalut dau do suminakai’d kapal do rahat do mantad hilo’d Papos do kuminaa do hilo’d Pirga it id pomogunan do Pampilia. Om hilo’ noddi i Yohanis i roitan dot i Markus do tuminongkiad diyolo’, om poguliai no dau do hilo’d Yorusalim. ¹⁴ Nga’ iyolo’ nopo om tuminilombus pod minamanau do mantad hilo’d Pirga do kuminaa do hilo’d bandar dot Antiokia i hilo’d pomogunan do Pisidia. Om ongoi noddi iyolo’ suang do hiri’d walai’d sasambayangan di norikot i tadau’d Sabat. ¹⁵ Om kotingkod poddi i tulun do mambasa’ di Tourat di Musa om i piro-piro buuk do nabi om ponuhu’ no i piro-piro boyoon do sasambayangan diri do tulun do mongoi boro-boros di Paulus om i piro-piro tambalut di Paulus, do poingkaa, ’’Ondung haro o potudukon do tobpinai- tobpinai dot id tulun diti om poboroson nopo,’’ ka diyolo’. ¹⁶ Om ingkakat no i Paulus om pobilido’ no dau o longon dau, om boro-boros nod poingkaa, ’’Oi tobpinai-tobpinai ku, i bansa’ dot Israil om koinsanai di tobpinai- tobpinai ku’d hiti dit okon ko’ do Yohudi, dit otorodok dot id Kinorohingan! Pokinongou kou nodti poboroson ku. ¹⁷ Kinorohingan nodti bansa’ dot Israil o minomili’ di taki-aki toko’, om pinoposiliu do bansa’dti do bansa’ dot agayo di poundorong po iyolo’ do hilo’d Masir, i pomogunan do sompogunan. Om kuasa’ id Kinorohingan dot agayo o pinoposoliwan diyolo’ do mantad hilo’d Masir. ¹⁸ Om alanut i’ o ginawo’d Kinorohingan do kokito di kowoyo-woyoon diyolo’ di solinaid dot apat nohopod o toun do koloido’ diyolo’ do hilo’d tana’ do kowotuan. ¹⁹ Om pinatai nogi’ dau o turu’ o bansa’ do tulun do hilo’d Kanaan om pogiongkib-ongkibo’ nogiddi i tana’ddi do pinatahak dot id bansa’ dot Israil, om asanganu i’ diyolo’ i pomogunan diri. ²⁰ Om nosiliu ngai’ iri do solinaid dot apat nahatus om limo nohopod o toun do koloido’. Om kopogiangkib-angkib poddi i tana’ do pomogunan do Kanaan diri, om onuwai nogid Kinorohingan iyolo’ do piro-piro gompomutus. Om i Somuil no i Nabi, o nosiliu do gompomutus di kolimpupuson no kopio. ²¹ Om pokianu noddi iyolo’ do tulun do sumiliu’d raja’ diyolo’. Om patahako’ nod Kinorohingan diyolo’ i Saul i tanak di Kis, i mantad id sinakagon di Binyamin do sumiliu’d raja’ diyolo’ do solinaid dot apat nohopod o toun. ²² Om iduwo’ noddi do Kinorohingan iyau do mantad id pangkat dau do raja’, om pilio’ nogiddi do Kinorohingan i Daud do suminiliu do raja’ diyolo’. Om iti noddi o pinoboros do Kinorohingan do pasal di Daud, ’Noilaan ku no i Daud i tanak di Isai diri, do tulun di kohubayaan kopio ku. Om iyau nondo o popowonsoi do koinsanai di korohian ku,’ ka. ²³ Om id pogialatan nod sinakagon di Daud o pinongonuan do Kinorohingan do songulun o Raja’ do Gampamasi do bagi’ di bansa’ dot Israil do miagal di nakabatos mantad dau. Om i Yesus no i Raja’ do Gampamasi’ddi. ²⁴ Nga’ tontok dit a’ po nokotimpuun i Yesus do kuminaraja’ om nokoponuduk no i Yohanis do tulun dot Israil do rumologo di dusa diyolo’ om mokibatis. ²⁵ Tontok dit oruhai no di Yohanis dot aayi’ i karaja’ dau, om boro-boros no iyau di tulun diri do poingkaa, ’Isai oku dot osorou dokoyu? Iyoho’ nopo om okon i’ ko’ it andad-andadon dokoyu, nga’ iyau nopo om rumikot nogindo do sumusuhut doho’; om mongiad piya do tali do kasut dau nga’ a’ oku i’ osorupai,’ ka dau. ²⁶ Oi tobpinai-tobpinai ku, i sinakagon di Abraham, om koinsanai dit okon ko’ Yohudi dit ongotorodok dot id Kinorohingan! Iyati’ no moti’ o pinorikatan do Kinorohingan di habar do pasal do koposion, ²⁷ tu’ i nopo i tulun do hiti’d Yorusalim om i piro-piro boyoon diyolo’ om a’ i’ iyolo’ nokoilo dot i Yesus no i Gampamasi’ddi. Om a’ i’ iyolo’ nokosuhut di ponudukan di piro-piro nabi di basaon kasai’ do monikid do tadau’d Sabat, gisom do hinukuman diyolo’ i Yesus. Om iri noddi do nabayaan i nokoboros mantad di piro-piro nabi diri. ²⁸ Nga’ mulong piya dot aiso’ i’ o noilaan diyolo’ do kopomohukuman di Yesus do kapatayon nga’ pokionuo’ i’ diyolo’ i Pilatus do momohukum dau do kapatayon. ²⁹ Om kowonsoi ngai’ poddi diyolo’ o koinsanai di nokotulis dot id suang do Buuk do Kinorohingan do pasal di Yesus, om polintuhuno’ nogi’ diyolo’ i rata’ di Yesus do mantad hiri’d kayu salib om lobongo’ nogiddi diyolo’. ³⁰ Nga’ pinasi i’ kawagu iyau’d Kinorohingan do mantad id kapatayon, ³¹ om haro poddi o piro-piro tadau do minintalang iyau dot id tulun di minoyo’ dau do mantad id Galilia do kuminaa do hilo’d Yorusalim. Om iyolo’ noddi o popinsusui do pasal di Yesus dot id bansa’ dot Israil do baino’. ³² Om iyahai’dti nga’ poporongou nogi’ dokoyu di Habar dot Osonong diri do dinondo: iri nopo i nakabatos mantad do Kinorohingan dot id taki-aki toko’, ³³ om nowonsoi no dau dot id dati’ tu’ napasi no kawagu dau i Yesus do mantad id kapatayon. Tu’ haro i’ o nokotulis dot id Buuk do Sinding di koduwo do poingkaa, ’Iya’ no o Tanak ku, om tadau nod baino’ do nosiliu oku do Tapa’ nu,’ ka. ³⁴ Om napasi no iyau kawagu’d Kinorohingan do mantad id kapatayon, om a’ noddi iyau apatai kawagu, om a’ olobong. Om poingkaa o nokoboros do Kinorohingan do pasal diri, ’Patahakon ku nondo dot id diya’ i batos dit olidang dit atantu’ no do bayaanon, i nakabatos mantad ku dot id di Daud,’ ka. ³⁵ Om miagal nogiddi o nokoboros dot id ayat do suwai, ’A’ nu i’ pologoson dot apasa’ do hiri’d lobong i susuhuon nu dit otorodok,’ ka. ³⁶ Om kowonsoi poddi di Daud i pinonuhuan do Kinorohingan dot id dau, om kapatai nogiddi iyau. Om lobongo’ no iyau do hiri’d toning di pinamalabangan di taki-aki dau. Om kapasa’ noddi i rata’ di Daud. ³⁷ Nga’ i Yesus nopo i pinasi kawagu’d Kinorohingan do mantad id kapatayon, om a’ i’ napasa’. ³⁸ - ³⁹ Om iyo nopoddi om mositi’ no do koilo kou oi tobpinai-tobpinai dot i Yesus no o pinawayaan di habar do pasal do koompunan do dusa di pinosusui dot id dokoyu. Om mositi’ no do koilo kou dot isai-isai nopo o tulun dot otumbayaan di Yesus om koidu’ no do mantad id koinsanai’d dusa, nga’ iri nopo Tourat di Musa om amu’ i’ milo’d popoidu’ dokoyu do mantad id dusa. ⁴⁰ Om iyo nopoddi om antaan-taan no kopio dokoyu om a’ i’ osiliu dot id dokoyu o miagal di nokoboros di piro-piro nabi do poingkaa, ⁴¹ ’Antaan-taan no dokoyu oi tulun dit orohian do mongindaraat! Ongosuayan kou nondo om apatai kou! Tu’ wonsoyon ku no do dinondo it a’ dokoyu iyokoyu ponongkuyaanan, do mulong pod haro o tulun do popotuduk diri dot id dokoyu,’ ka,’’ ka di Paulus. ⁴² Om tontok di sumoliwan no i Paulus om i Barnabas do hiri’d walai’d sasambayangan diri, om pomoros po i tulun di hiri’d sasambayangan do popoguli’ kawagu diyolo’ do hiri dot orikot kawagu o tadau’d Sabat do mongoi popotuduk kawagu diyolo’ di sinusui diyolo’ddi. ⁴³ Om kosoliwan poddi i tulun do mantad hiri’d walai’d sasambayangan diri, om ogumu’ddi o tulun do Yohudi om i tulun dit okon ko’ Yohudi di nokosuang do tugama’ do Yohudi, do tuminanud di Paulus om i Barnabas. Om sunudai noddi iyolo’ di piro-piro rasul do tumilombus do sumondiu kopio di kosonongo’d Kinorohingan. ⁴⁴ Om korikot noddi i tadau’d Sabat, om oruhai no do noinsanan i tulun di hiri’d bandar diri do minongoi pokinongou do boros do Tuhan. ⁴⁵ Nga’ tontok di nokito di tulun do Yohudi i tulun dot ogumu’ddi, om osolon tomod diri iyolo’. Om suminongkiwal tomod iyolo’ do koinsanai di pinoboros di Paulus om nindaraat diyolo’ iyau. ⁴⁶ Nga’ okon nogi’ dot osiou i Paulus om i Barnabas do poposondot kopio di posunudon diyolo’. Boros ka diyolo’, ’’Otopot i’ dot iyokoyu ot apatut do gulu kosusuyai do boros do Kinorohingan. Nga’ iyo nopoddi tu’ a’ kou ruminamit diri, om natantu’ noddi dokoyu dot a’ kou apatut do kaanu do koposion dit otopot kopio om i poingompus, om tumongkiad no iyahai dokoyu’dti, om mongoi no iyahai do hilo’d tulun dit okon ko’ Yohudi. ⁴⁷ Tu’ iti no o nisuhu’ do Tuhan dot id dahai. Boros kad Tuhan, ’Nopili’ ku no iyokoyu do sumiliu do tanawau dot id tulun dit okon ko’ Yohudi om iyokoyu no o poporikot di koposion dot id pointongkop diti pomogunan,’ ka,’’ ka diyolo’. ⁴⁸ Om ongotood nopoddi i tulun dit okon ko’ Yohudi do nokorongou di boros diri, mikuwo’d minamarayou di boros do Tuhan. Om kotumbayaai noddi i tulun di natantu’ mantad do Kinorohingan do kaanu’d koposion dit otopot kopio om i poingompus. ⁴⁹ Om kotongkop noddi i boros do Tuhan dot id watas diri. ⁵⁰ Nga’ borulongo’ noddi di tulun do Yohudi i piro-piro boyoon do bandar diri om i tongoondu’ dit okon ko’ Yohudi dit ongkingaran-ngaran dit oronok do Kinorohingan. Om timpuun noddi iyolo’ do monginggorit di Paulus om i Barnabas om uyungo’ no diyolo’ iyolo’ do popoggidu’ do mantad id watas diri. ⁵¹ Om tantago’ noddi di duwo o tulun di sinuhu’ddi o pupuk dot id lapap diyolo’ dot id toguang di tulun diri do maan do popoinsan diyolo’; om pamanau noddi iyolo’ do kuminaa do hilo’d Ikonium. ⁵² Om iri nopoddi i piro-piro tumatanud diri di hiri’d Antiokia om ongotood tomod, om nongoporinta’ do Rusod do Kinorohingan.

¹ Om iyo iddi gulu o nosiliu dot id di Paulus om id di Barnabas di hilo’ iyolo’d Ikonium. Om ongoi no iyolo’ do hiri’d walai’d sasambayangan do tulun do Yohudi, om atarang kopio i pinoboros diyolo’ om oingod, gisom dot ogumu’ddi o tulun do Yohudi om it okon ko’ Yohudi do notumbayaan di Yesus. ² Nga’ iri nopoddi i tulun do Yohudi dit a’ notumbayaan om minongoi pamayayat di tulun dit okon ko’ Yohudi gisom do naraatan diri iyolo’ di tulun di notumbayaan di Yesus. ³ Om iri noddi o kinoundarangan di Paulus om i Barnabas dot alaid-laid do hilo’ om a’ iyolo’ ooris do popinsusui do pasal do Tuhan. Om onuwai noddi do Tuhan iyolo’ do kuasa’ do momonsoi do kongoimayaan om kongosuayan kopio do popointalang dot otopot kopio i ponudukan diyolo’ do pasal do kosianan do Tuhan. ⁴ Nga’ mogisuwai-suwai nopoddi o korohian di tulun do hiri’d bandar diri, wokon nopo diyolo’ om sumokodung di tulun do Yohudi, om wookon no om sumokodung di piro-piro tulun di sinuhu’ddi. ⁵ Om pogiupakat noddi i tulun do Yohudi om i piro-piro boyoon diyolo’, om i tulun dit okon ko’ Yohudi do monginggorit di duwo o rasul diri om momodumpau diyolo’d watu. ⁶ Nga’ koilaai noddi di duwo o tulun di sinuhu’ddi o hal diri, om poggidu’ no iyolo’ do kuminaa do hilo’d Listra om hilo’d Dorbi, i kabandaran di hilo’d Likaunia, om kuminaa do hiri’d watas dit id posorili’. ⁷ Om popinsusui po iyolo’ do Habar dot Osonong do hilo’. ⁸ Om hilo’ nopod Listra om haro o songulun o kusai dit olomok o gakod do mantad di kosususu, om a’ no iyau kapanau. ⁹ Om poirikau iyau do mokinongou di Paulus do moro-boros. Om kokito noddi di Paulus dot otumbayaan i tulun diri, om milo iyau do lingasan di toruol dau tu’ otumbayaan i’ iyau. Om ontong noddi i Paulus dau. ¹⁰ Om boro-boros no i Paulus dot opuhod do poingkaa, ’’Ingkakat no!’’ ka. Om silok nopo i tulun diri do miningkakat om pamanau no. ¹¹ Om kokito poddi di tulun dot ogumu’ i winonsoi di Paulus diri om gara’ nopo iyolo’ do minomoros dot id suang do boros do Likaunia do poingkaa, ’’Nokolintuhun no do hiti’d pomogunan i ponokokinorohingan do miniyo do tulun,’’ ka. ¹² Om pungaranai noddi diyolo’ i Barnabas dot i Sius, om i Paulus no om pinungaranan diyolo’ dot i Hormis, tu’ iyau no o moro-boros kopio. ¹³ Om it imam di mogobi-obi’ di Sius i ponokokinorohingan diri, i potimbaba’ di bandar o walai do poningoligan, nga’ ruminikot i’ do hiri’d wawayaan di bandar do kiginayat do piro-piro sapi’ do tontoluhan om kiinigit do bunga dot ogumu’. Om orohian iyau do tumanud di tulun dot ogumu’ do papatahak do porsombahan do sumbolion dot id piro-piro tulun di sinuhu’ddi. ¹⁴ Om tontok di norongou di Barnabas om i Paulus i wonsoyon daa di tulun diri, om kiniso’ no diyolo’ i pakayan diyolo’, om panangkus no iyolo’ do minongoi intanga’ di tulun dot ogumu’ddi, om boro-boros no dot opuhod do poingkaa, ¹⁵ ’’Nokuro tu’ momonsoi kou do miagal diti? Iyahai nga’ tulun i’ do miagal dokoyu! Kinaangayan nopo dahai’d hiti om mongoi poposusui dot id dokoyu diti Habar dot Osonong. Om tumongkiad kou i’ diti wowonsoyon dokoyu dit aiso’ o kootuk-otukon. Om rumikot kou indo dot id Kinorohingan di poimpasi, i minomonsoi do tawan om tana’ om ilo rahat om koinsanai di songingiyon do hilo’. ¹⁶ Di nopo di gulu po om pinologos id Kinorohingan o piro-piro bansa’ do momonsoi di diyolo’d korohian. ¹⁷ Nga’ mulong po dot iyo’ddi nga’ a’ i’ iyau nokolihu do pinopointalang do kowoyo-woyoo’ dau dot i winonsoi dau’d osonong o pinopointalang. Om minanahak iyau dokoyu do rasam do mantad hilo’d tawan om nonuan kou do tua’ do totonomon do tontok di maso do koponguaan. Om nonuan kou dau do takanon om pinoposonong iyau do ginawo dokoyu,’’ ka diyolo’. ¹⁸ Nga’ mulong piya dot iyo’ddi i boros di duwo o tulun di sinuhu’ddi nga’ a’ i’ daa milo dot oduhan i tulun diri do papatahak do porsombahan di sumbolion dot id diyolo’. ¹⁹ Om rikot noddi o piro-piro tulun do Yohudi do hilo’d Listra, i mantad hilo’d Antiokia i hilo’d pomogunan do Pisidia, om mantad hilo’d Ikonium do minongoi pamayayat di tulun dot ogumu’ddi, do gisom do suminokodung diri diyolo’ i tulun dot ogumu’ddi. Om pindumpahai noddi diyolo’ i Paulus do watu, om gayato’ no diyolo’ iyau do poposoliwan do mantad hiri’d bandar. Tu’ osorou nopo diyolo’ om napatai no i Paulus. ²⁰ Nga’ tungag noddi i Paulus di nokotimung i tulun di notumbayaan do hiri’d posorili’ dau, om poguliai noddi kawagu dau do hiri’d bandar. Om sinuabon poddi om pamanau nogi’ iyau om i Barnabas do kuminaa do hilo’d Dorbi. ²¹ Om poposusui no i Paulus om i Barnabas do Habar dot Osonong do hilo’d Dorbi om ogumu’ddi o tulun do notumbayaan di Yesus. Om guli’ nogiddi iyolo’ do hilo’d Listra, om ongoi no iyolo’ do hilo’d Ikonium om pakayaai nogiddi diyolo’ do hilo’d Antiokia, i hilo’d pomogunan do Pisidia. ²² Om sunudai noddi diyolo’ i tumatanud di Yesus di hilo’d kabandaran diri do popogirot do kotumbayaan diyolo’ om mogondos kopio di Yesus. Boros ka diyolo’, ’’Mositi’ no do kopuriman toko’ po dot ogumu’ o koinggoritan, om kosuang nogindo di Pomorintaan do Kinorohingan,’’ ka di piro-piro rasul do minonuduk di tumatanud di Yesus di hiri’d kabandaran diri. ²³ Om pomili’ noddi i Paulus om i Barnabas do tulun do sumiliu’d boyoon dot id pointikid-tikid do sidang diri. Om sambayang noddi iyolo’ do mikuwo’d puasa do pinapatahak di piro-piro boyoon diri dot id Tuhan i kinotumbayaan diyolo’ddi. ²⁴ Om lombus nogiddi i Paulus om i Barnabas do kuminaa do hilo’d Pampilia do minaya’ do hiri’d watas do Pisidia. ²⁵ Om koponusui po iyolo’ do boros do Kinorohingan do hilo’d Pirga, om pakayaai nogi’ diyolo’ do hilo’d Atalia. ²⁶ Om mantad noddi do hilo’ do suminakai iyolo’ do kapal do rahat do guminuli’ do hilo’d Antiokia. Om hiri nod bandar diri di gulu po do pinatahak iyolo’ dot id Kinorohingan do pokigompian do Kinorohingan. Om owonsoi i’ diyolo’ i karaja’ di nopongo noddi diyolo’d baino’. ²⁷ Om korikot poddi iyolo’ do hilo’d Antiokia om timungo’ no diyolo’ i tulun do mantad id sidang diri, om susuyo’ ngai’ no diyolo’ i winonsoi’d Kinorohingan dot iyolo’ o pinawayaan do minomonsoi, om i kinowoyo-woyoo’ dau do minongiwang do ralan di tulun dot okon ko’ Yohudi do notumbayaan. ²⁸ Om alaid diri i Paulus om i Barnabas do poundorong do hilo’ do poingamung di tulun di nongotumbayaan.

¹ Om haro’ddi o piro-piro tulun do mantad hilo’d Yudia do nokorikot do hilo’d Antiokia om ponuduk no iyolo’ di tulun di notumbayaan di hilo’d Antiokia dot a’ nopo osunatan nga’ a’ nod Kinorohingan posion do tumanud di Tourat di Musa. ² Om suminongkiwal tomod diri i Paulus om i Barnabas di ponudukan do miagal diri. Om tontuo’ noddi di Paulus om i Barnabas om piro-piro tulun do suwai do mantad hilo’d Antiokia do mongoi popoboros do kosusaan diri dot id piro-piro rasul om id piro-piro boyoon do hilo’d Yorusalim. ³ Om pootodo’ no iyolo’ di tulun di hiri’d sidang dot Antiokia do gisom do nokorikot iyolo’ do hiri’d soliwan di bandar, om pamanau noddi iyolo’ do minaya’ do hilo’d Pinisia om Samaria. Om hilo’ no iyolo’d pinoposusui ondung poingkukuro i tulun dit okon ko’ Yohudi do notumbayaan do Kinorohingan. Om otood tomod diri i tulun di nongotumbayaan do nokorongou’d habar diri. ⁴ Om korikot noddi iyolo’ do hilo’d Yorusalim, om ongosonong o ginawo di tulun dit id sidang do hilo’ om i piro-piro rasul om i piro-piro boyoon do sidang do ruminamit diyolo’. Om susuyo’ noddi diyolo’ dot id tulun diri o koinsanai di winonsoi’d Kinorohingan, dot iyolo’ o minomonsoi dot id suang do kuasa’d Kinorohingan. ⁵ Nga’ haro’ddi o piro-piro o tulun do Parisi di notumbayaan do miningkakat om minoro-boros do poingkaa, "Tulun nopod okon ko’ Yohudi om mositi’ nod sunatan om suhuon do tumanud di Tourat di Musa," ka. ⁶ Om timung noddi i piro-piro rasul om i piro-piro boyoon do mogiboro-boros do pasal do hal diri. ⁷ Om alaid poddi iyolo’d mogiuhot-uhot do pasal diri, om ingkakat noddi i Pitrus om boro-boros no iyau’d poingkaa, ’’Oi tobpinai-tobpinai, noilaan no dokoyu dot alaid oku no kopili’d Kinorohingan do mantad id pogialatan dokoyu do poposusui’d Habar dot Osonong dot id tulun dit okon ko’ Yohudi, om korongou i’ iyolo’ om otumbayaan indo. ⁸ Om Kinorohingan i’, i koilo do ginawo’d tulun o pinopointalang do romiton dau i tulun dot okon ko’ Yohudi; tu’ nonuan i’ dau iyolo’d Rusod do Kinorohingan do miagal di tinahak dau dot id dati’. ⁹ Id Kinorohingan nopo om aiso’ i’ o pisuwayan toko’ diyolo’. Tu’ nolidangan nod Kinorohingan o ginawo diyolo’ tu’ notumbayaan i’ iyolo’ dau. ¹⁰ Iyo nopoddi om nokuro tu’ sumaap kou’d Kinorohingan tu’ monuhu’ kou i’ di piro-piro tumatanud diri do tumanud dit oturan dot awagat, it a’ di taki- aki toko’ om a’ toko’ iyati’ agaasan do tumanud? ¹¹ Nga’ notumbayaan toko’ i’ om pinasi toko’ tu’ nosianan i’ o Tuhan Yesus dati’; om iyolo’ nga’ iyo nogiddi,’’ ka di Pitrus. ¹² Om a’ nopoddi minungkomi i tulun di songintimung do hiri do nokorongou’ddi. Om pokinongou noddi iyolo’ di Barnabas om i Paulus do minonusui do koinsanai di kosuayan om i koimayaan kopio do winonsoi’d Kinorohingan, dot iyolo’ o pinawayaan do minomonsoi dot id pogialatan di tulun dit okon ko’ Yohudi. ¹³ Om kotingkod poddi iyolo’ do minoro-boros, om boro-boros no i Yakub do poingkaa, ’’Oi tobpinai-tobpinai, pokinongou kou nodti poboroson ku. ¹⁴ Wagu po i Simun ponusui do kinoimpuunon do Kinorohingan do pinopointalang do kosianan dau dot id tulun dit okon ko’ Yohudi, dot i minomili’ o Kinorohingan do piro-piro tulun do mantad id pogialatan diyolo’ do silihon do tulun di dau’d songonuon o pinopointalang. ¹⁵ Iri no o miontok kopio di nokoboros mantad di piro-piro nabi, i nokotulis do poingkaa, ¹⁶ ’Boros kad Tuhan, katalib pondo iri om rumikot oku nondo kawagu do momonsoi kawagu di walai’d Daud di nahaba’; om sonongon kawagu ku i nangaraag om poingkakaton kawagu ku. ¹⁷ Om mogihum indod Tuhan o koinsanai’d tulun di nongoolu’, koinsanai’d tulun dit okon ko’ Yohudi, i nolohou ku do sumiliu’d tulun di doho’d songonuon,’ ka. Om iyo noddi o boros do Tuhan, ¹⁸ i pinoposunud mantad diri di gulu po,’’ ka di Yakub. ¹⁹ Om boro-boros po kawagu i Yakub do poingkaa, ’’Osorou ku nopo iyoho’ om a’ toko’ i’ milo’d monusa’ di tulun dit okon ko’ Yohudi dit otumbayaan do Kinorohingan. ²⁰ Nga’ apatut nopo om monulis toko’ nopod surat do patahakon diyolo’ do mogodu diyolo’d mangakan di taakanon di sosomu’ do tumanud dot oturan do tugama’, i nokosubak dot id tingolig, om a’ mangakan do nintorusan di napatai’d linawaan om a’ mangakan do raha’. Om sunudan iyolo’ dot a’ magampahu’. ²¹ Tu’ mantad po di gulu po do basaon kasai’ i Tourat di Musa do hiri’d walai’d sasambayangan do monikid do tadau’d Sabat, om popinsusuyon nogi’ iri dot id koinsanai’d bandar,’’ ka dau. ²² Om iso-iso’ nopoddi o ginawo di piro-piro rasul om i piro-piro boyoon om koinsanai di sidang do momili’ do piro-piro tulun do suhuon do kumaa do hilo’d Antiokia do tumanud di Paulus om i Barnabas. Om i Silas diri om i Yudas i roitan dot i Barsabas, o nopili’ diyolo’. Om boyoon goduwo nopo iyo Silas di Yudas di pusohon kopio dot id pogialatan di tulun di nongotumbayaan do hilo’d Yorusalim. ²³ Om poigitai no diyolo’ di tulun di nopili’ diyolo’ddi i surat di tinulisan do poingkaa, ’’Oi tobpinai-tobpinai di nongotumbayaan, i mantad id tulun dit okon ko’ Yohudi di hilo’d Antiokia om hilo’d Siria om hilo’d Kilikia. Tumabi’ ngai’ iyahai dokoyu, om tumabi’ nogi’ dokoyu i piro-piro rasul om i piro-piro boyoon do sidang, i tobpinai-tobpinai dokoyu. ²⁴ Nokorongou iyahai do haro o piro-piro tulun do mantad id pogialatan dahai do minongoi’d hino’d dokoyu do minonuduk dokoyu di ponudukan di monusa’ om koborulong dokoyu. Nga’ a’ i’ dahai sinuhu’ iyolo’ddi do momonsoi’d miagal diri. ²⁵ Om kaakun ngai’ nopoddi iyahai do minomili’ do piro-piro tulun do suhuon dahai do kumaa’d hino’d dokoyu. Iyolo’ nopoddi om tumanud di Barnabas om i Paulus, i tobpinai di kosianan dahai. ²⁶ Iri nopo duwo o tulun diri nga’ nokoumbal no dot oruhai nod apatai, tu’ minomonsoi i’ iyolo’ do karaja’d Tuhan toko’, i Yesus Kristus. ²⁷ Om iri no o kinoponuhuan dahai di Yudas om i Silas do mongoi’d hiti’d dokoyu tu’ iyolo’ no o popoboros dot id dokoyu di pinotulis dot id suang do surat diti. ²⁸ Tu’ kinohubayaan nod Rusod do Kinorohingan om kinohubayaan nogi’ dahai dot a’ kou no onuan dot oturan dit awagat, do suwai mantad ko’ iti toturan diti, it apatut kopio dokoyu’d tonudon. ²⁹ Iri no tu’ kada’ kou pangakan do taakanon di nokosubak dot id tingolig, om kada’ kou pangakan do raha’ om i nintorusan do napatai’d linawaan. Om kada’ kou pagampahu’. Om ondung a’ kou momonsoi’d miagal diri, om osonong no o nowonsoi dokoyu. Iti-iti no, sumonong-sonong kou!’’ ka. ³⁰ Om kopogiintod-intod poddi iyolo’, om pamanau nogiddi i tulun di pinoigitan di surat diri do kumaa’d hilo’d Antiokia. Om korikot noddi iyolo’d hilo’ om lohowo’ no diyolo’ o koinsanai di tulun do sidang do tumimung om patahako’ no diyolo’ i surat diri. ³¹ Om ongotood tomod diri o koinsanai di tulun do sidang do nakabasa’ di surat diri tu’ koinsasamod kopio iri do ginawo diyolo’. ³² Om i Yudas om i Silas nga’ alaid nogi’ do moro-boros di tulun di nongotumbayaan do hilo’d Antiokia do mongodsuur diyolo’ om popogirot do ginawo diyolo’. I Yudas nopo di Silas diri om nabi i’. ³³ Om koundorong poddi i Yudas om i Silas do hilo’ do piro-piro o koloido’, om suhuon’ nogi’ iyolo’ di tulun di nongotumbayaan do hilo’d Antiokia do gumuli’ dot id tulun di minonuhu’ diyolo’, om minonuhu’ nogi’ iyolo’ do poporikot do tabi’ diyolo’ dot id tulun di minonuhu’ diyolo’ddi. ³⁴ [Nga’ i Silas nopo om minundorong po do hilo’d Antiokia.] ³⁵ Om i Paulus di Barnabas nga’ minundorong nogi’ do hilo’d Antiokia do piro-piro koloido’. Om minonuduk po iyolo’ om pinoposusui do boros do Tuhan dot iyolo’ ngai’ di piro-piro tulun do suwai. ³⁶ Om a’ poddi alaid do mantad diri om boro-boros no i Paulus di Barnabas, ’’Ongoyon to no gulio’ do mongoi pogompuya’ i tobpinai-tobpinai di nongotumbayaan di Yesus do hilo’d pointikid-tikid do bandar di nosusuyan to do boros do Tuhan; om oilaan to i’ ondung poingkuro-kuro no iyolo’,’’ ka dau. ³⁷ Nga’ sipangangat daa’ddi kawagu i Barnabas di Yohanis, i roitan dot i Markus. ³⁸ Nga’ osorou nopod Paulus om a’ i’ osonong dot angatan i Markus tu’ a’ i’ iyau tuminanud kasai’ diyolo’ do kuminaraja’ om tuminongkiad iyau diyolo’ di hilo’d Pampilia. ³⁹ Om iri noddi o kinoimpuunon di Paulus om i Barnabas do minisongkiwal tomod, om pitongkiad noddi iyolo’. Om angatai noddi di Barnabas i Markus do suminakai’d kapal do rahat do kuminaa do hilo’d Siprus. ⁴⁰ Om pilio’ noddi di Paulus i Silas. Om piwoyo’ no iyolo’d minamanau di nakatahak iyolo’ di piro-piro tobpinai di hilo’d Antiokia dot id Tuhan, do pokigompian do Tuhan. ⁴¹ Om pimpanau noddi iyolo’d tuminongkop do hilo’d Siria om hilo’d Kilikia do popogirot do kotumbayaan di sidang do hilo’.

¹ Om lombus noddi i Paulus do kuminaa do hilo’d Dorbi, om ongoi nogiddi iyau do hilo’d Listra. Om hilo’ nopo nga’ haro o songulun o tumatanud di Yesus dot i Timotius o ngaran. Tina’ nopo dau om tulun do Yohudi di notumbayaan di Yesus; om tapa’ no dau om tulun do Yunani. ² Om i Timotius no ot abantug dot osonong koulun dot id pogialatan do tulun di nongotumbayaan do hilo’d Listra om hilo’d Ikonium. ³ Om orohian diri i Paulus do mangangat di Timotius do tumanud dau; om sunatai noddi di Paulus i Timotius. Winonsoi pogi’ dau o miagal diri nga’ nongkoilo no i tulun do Yohudi di hiri’d watas diri do tulun do Yunani o tapa’ di Timotius. ⁴ Om pointikid-tikid di bandar dit oongoi diyolo’, om poiloon ngai’ nopo diyolo’ i tulun di notumbayaan do pasal di nangatantu’ di piro-piro rasul om i piro-piro boyoon do hilo’d Yorusalim. Om suhuon nogi’ diyolo’ i tulun di nongotumbayaan diri do tumanud dit oturan diri. ⁵ Om muhang-ruhang nopoddi o kogiroto’ do kotumbayaan di tulun do hiri’d sidang, om monikid tadau nopo dot oruhangan o ginumu’ diyolo’. ⁶ Om pamanau noddi i Paulus om i Silas do minongoi do hilo’d watas do Prigia om Galatia, tu’ noduhan iyolo’d Rusod do Kinorohingan do poporongou do boros do Kinorohingan do hiri’d pomogunan dot Asia. ⁷ Om korikot poddi iyolo’ do hilo’d wolit do pomogunan do Misia, om umbal noddi daa iyolo’d sumuwang do pomogunan do Bitinia, nga’ noduhan i’ iyolo’ di Rusod di Yesus do mongoi’d hiri. ⁸ Om lombus noddi iyolo’ do hilo’d Truas do minaya’ do hilo’d Misia. ⁹ Om totuong iddi di hilo’ iyolo’d Truas, om kokito no i Paulus dot iso’ o pinointalang. Id suang nopo di pinointalang diri om nokokito iyau do songulun o tulun do Makidunia do poingkakat dot id dotimbabaan dau do mangangat kopio dau do mongoi’d hilo’d Makidunia do mongoi ponulung diyolo’. ¹⁰ Kokito poddi di Paulus i pinointalang diri, om tilombus nopo iyahai do suminodia’ do mamanau do mongoi do hilo’d Makidunia, tu’ otumbayaan no kopio iyahai do suhuon iyahai’d Kinorohingan do mongoi poposusui di Habar dot Osonong dot id tulun do hilo’. ¹¹ Om sakai noddi iyahai’d kapal do rahat do mantad hilo’d Truas om pakayaai no dahai do hilo’d bandar do Samotraki. Om sinuabon noddi om lombus no iyahai do kuminaa do hilo’d Niapolis. ¹² Om mantad nod hilo’ om lombus po iyahai do kuminaa do hilo’d Pilipi, i bandar dit id watas do koiso’ do hilo’d Makidunia. Pilipi nopo om porintaon do pomorintaan do Rum. Om minundorong iyahai’d hilo’ do piro-piro tadau do koloido’. ¹³ Om tontok di tadau’d Sabat, om ongoi no iyahai do hiri’d tisan do bawang di hiri’d soliwan di wawayaan di bandar tu’ oilaan dahai do hiri nopo om haro o tiiyonon do tulun do Yohudi do sumambayang. Om hiri no iyahai’d songirikau do monokiboro-boros di tongoondu’ di songintimung do hiri. ¹⁴ Om haro’ddi o songulun o tondu’ dot id pogialatan diyolo’ dot i Lidia o ngaran. Iyau nopo om mantad hilo’d Tiatira om papadagang iyau do kain dit otomou daragang-ragang. Om iyau nopo om osianan kopio’d Kinorohingan. Om tingkaho’ noddi do Tuhan o ginawo dau do rumamit di ponudukan di potudukon di Paulus. ¹⁵ Om kobotisai noddi i Lidia, om koinsanai di tulun dit id suang do walai dau. Om kobotisai poddi iyolo’ om angatai noddi iyahai dau do mongoi’d hiri’d walai dau. Boros ka dau, ’’Ondung okito do tobpinai-tobpinai do notumbayaan kopio oku di Yesus, om kainou ongoi kou odop do hilo’d walai ku,’’ ka dau. Om sansagai noddi iyahai dau do tumumboyo’ dau. ¹⁶ Insan o tadau, di maso dahai do manau-panau do kumaa’d hiri’d tiiyonon do sumambayang, om kosolowot no dahai o songulun o tondu’; om iyau nopoddi nga’ turipon. Om iri nopo tondu’ddi om noporinta’ do rusod dot araat, om koilo iyau do popoboros dit osiliu dot id dosunsudan. Om iri no komiloo’ dau do popoilo dit osiliu dot id tulun dot id dosunsudan o koonu-onuan di tuan dau do tuntung dot ogumu’. ¹⁷ Om tilombus nopoddi i tondu’ddi do tuminanud dahai diyo Paulus do mikuwo’d marang-garang do mimboros do poingkaa, ’’Iti nopo tulun diti om susuhuon do Kinorohingan dit agayo kopio! Om ruminikot iyolo’ do mongoi popoilo do tobpinai-tobpinai ondung poingkuro o ralan dokoyu dot apasi!’’ ka dau. ¹⁸ Om marang-garang kasai’ nopo i tondu’ddi dot iyo kasai’ddi o popigarang-garangon dau do piro-piro tadau do koloido’. Om karaatai noddi i Paulus, om koili no iyau, om boro-boros no iyau di rusod diri do poingkaa, ’’Id suang do ngaran di Yesus Kristus om suhuon tiya’ do sumoliwan do mantad id tondu’dti!’’ ka. Om diiri i’ om diiri do suminoliwan i rusod diri do mantad id tondu’ddi. ¹⁹ Nga’ tontok di nongkoilo ngai’ i tuan di tondu’ddi dot aiso’ noddi o pakayon diyolo’ do mogihum do tusin, om tangkapo’ no diyolo’ i Paulus om i Silas om gayato’ no diyolo’ do pakaa do hiri’d tiiyonon do momisara’ di hiri’d tomu do nongoi potimbabao’ di tulun di kikuasa’. ²⁰ Om ngoyo’ noddi diyolo’ potimbabao’ i Paulus om i Silas di piro-piro pagawai do pomorinta’ do Rum, om boro-boros noddi iyolo’d poingkaa, ’’Iti nopo tulun diti om tulun do Yohudi. Om iyolo’ no o mamagangau do hiti’d bandar toko’. ²¹ Tu’ mangangat iyolo’d tulun do tumanud di kaadat-adato’ dit a’ miontok dit oturan toko’, iyati’ i tulun do Rum. Om a’ toko’ i’ milo do rumamit ko’ tumanud di kaadat-adato’ddi,’’ ka. ²² Om i tulun dot ogumu’ nga’ sumaap i’ di Paulus om i Silas. Om gayato’ no di piro-piro pagawai do pomorinta’ do minongidu’ i pakayan di Paulus om i Silas, om ponuhu’ nogiddi iyolo’d tulun do momobog goduwo diyolo’. ²³ Om kadalaai poddi iyolo’d pinimbabagan om pogiilo’ nogiddi iyolo’. Om suhuon’ noddi i boyoon do hiri’d giil do madtamong kopio diyolo’. ²⁴ Om posuango’ noddi di boyoon di hiri’d giil i Paulus om i Silas do hiri’d bilik dit id gogok kopio di giil, om rangkapo’ nogiddi do papan o gakod diyolo’. ²⁵ Om di nopoddi pitangatuong no doti’ddi, om maso di Paulus om i Silas do sumambayang om modsinding do mamarayou’d Kinorohingan. Om i tulun do suwai di songinggiil nga’ mokinongou diyolo’d modsinding. ²⁶ Om sigog id guyu’ o tana’ dot opuhod kopio, gisom do noguyu’ i pinawaalan di giil. Om koiwangai ngai’ nopo i wawayaan di giil om i rantai di pinamarangkap ngai’ di tulun di songinggiil nga’ kalangkang ngai’ nopo. ²⁷ Om koposik noddi i boyoon di madtatamong di giil do nokotigowo. Om tontok di nokito dau do noiwangan ngai’ i wawayaan di giil, om kodongo’ nopo dau i gayang dau do kumiros daa tu’ osorou nopo dau om nongkopoggidu’ ngai’ no i tulun di songinggiil. ²⁸ Nga’ pomolohou no i Paulus dot opuhod do poingkaa, ’’Kada’ kiros! Hiti ngai’ i’ iyahai’dti!’’ ka dau. ²⁹ Om pokianu no i boyoon di giil diri do lampung om panangkus nogiddi iyau do suminuang do hiri’d giil do mikuwo’d gagaran tomod, om otud noddi iyau dot id toguang di Paulus om i Silas. ³⁰ Om angatai noddi dau iyolo’ do sumoliwan, om boro-boros no iyau’d poingkaa, ’’Oi tuan, nunu ot apatut ku’d wonsoyon om apasi oku i’?’’ ka. ³¹ Om boros ka di Paulus om i Silas do suminimbar, ’’Kotumbayaai nod Tuhan Yesus, om apasi ko i’ om koinsanai’d tulun di hiri’d walai nu!’’ ka. ³² Om susuyai noddi di Paulus om i Silas do boros do Tuhan i boyoon do madtamong do giil diri, om koinsanai di tulun di hiri’d walai dau. ³³ Om tontok id totuong diri do nangatan dau iyolo’ do minoyo’ dau om udasai noddi dau i suhat diyolo’. Om botisai noddi iyau om koinsanai’d tulun di hiri’d walai dau. ³⁴ Om angatai noddi dau i Paulus om i Silas do mongoi’d hiri’d walai dau om paakano’ noddi dau iyolo’. Om otood tomod diri iyau om koinsanai di sompiiyon dau tu’ notumbayaan noddi iyolo’d Kinorohingan. ³⁵ Kosuabon noddi om ponuhu’ nod pulis i pagawai do pomorinta’ do Rum do mongoi’d hiri’d giil do mongoi ponuhu’ do poposoliwan di Paulus om i Silas do mantad hiri’d giil. ³⁶ Om sunudai noddi di boyoon di madtatamong di giil i Paulus di ponuhuan diri, ’’Oi tuan, monuhu’ i piro-piro pagawai do pomorinta’ do poposoliwan dokoyu. Om koino-ino kou nod muli’, om sumonong-sonong kou’d mamanau,’’ ka dau. ³⁷ Nga’ boros ka di Paulus dot id pulis diri, ’’A’ po iyahai nobutusan om pimbabagai no iyahai dot id toguang do tulun dot ogumu’, om rayat i’ iyahai’d Rum. Om pogiilo’ noddi iyahai diyolo’. Baino’ noddi om lisok-lisokon iddi iyahai diyolo’d poposoliwan. a’ i’ iyahai sumoliwan. suhuon po i piro-piro pagawai do pomorinta’ddi do rumikot do hiti do mongoi poposoliwan dahai,’’ ka dau. ³⁸ Om posunudo’ noddi di pulis i boros di Paulus diri dot id piro-piro pagawai do pomorinta’ do Rum. Om ongooris diri i piro-piro pagawai’ddi do nokorongou do rayat do Rum i Paulus om i Silas. ³⁹ Om ongoi noddi iyolo’ pokiampun di Paulus om i Silas. Om woyoo’ noddi diyolo’ i Paulus om i Silas do sumoliwan di giil om suhuon’ no diyolo’ iyolo’ do mogidu’ do mantad hiri’d bandar diri. ⁴⁰ Om tongkiad noddi i Paulus om i Silas do mantad hiri’d giil om pamanau no iyolo’ do minongoi’d hiri’d walai di Lidia. Om kongosolowot poddi i Paulus om i Silas di tulun di nongotumbayaan do hiri, om di nokoboro-boros iyolo’ do mongodsuur diyolo’, om pamanau nogiddi iyolo’.

¹ Om lombus no kawagu i Paulus om i Silas do minamanau. Om kawaya’ no iyolo’ do hilo’d Ampipulis om hilo’d Apolonia om korikot noddi iyolo’ do hilo’d Tosolunika. Hilo’ nopo om haro o walai’d sasambayangan do tulun do Yohudi. ² Om ongoi noddi i Paulus do hiri’d walai’d sasambayangan do tulun do Yahudi’ — do miagal di wonsoyon kasai’ dau — do minogiuhot-uhot di tulun do hiri do pasal di ayat dit id suang do Buuk do Kinorohingan. Om otuntud nopo dot intolu o tadau’d Sabat do minongoi i Paulus do hiri. ³ Om posondoto’ nopo kopio di Paulus do popoboros om pinointalang kopio dau do miontok dit ayat dit id suang do Buuk do Kinorohingan dot a’ milo dot a’ oinggorit i Raja’ do Gampamasi, i pinabatos do Kinorohingan. Om apasi kawagu iyau do mantad id kapatayon. Boros kad Paulus, ’’I Yesus nopo i posusuyon ku dokoyu, om Raja’ do Gampamasi di pinabatos,’’ ka dau. ⁴ Om haro’ddi o piro-piro tulun do notumbayaan. Om tanud noddi iyolo’ di Paulus om i Silas; om ogumu’ddi i tulun do Yunani dit oronok mantad do Kinorohingan do notumbayaan di Yesus, om ogumu’ o tongoondu’ dit angabantug do notumbayaan. ⁵ Nga’ osolon diri i tulun do Yohudi. Om pangangat no iyolo’ di tulun dot angaraat di sampanau-panau do minonimung do tulun dot ogumu’ do mamagangau do pointongkop di bandar diri. Om ngoyo’ noddi diyolo’ soruango’ i walai di Yason do mogihum di Paulus om i Silas do maan daa diyolo’ potimbabao’ di tulun dot ogumu’. I Yason nopo om tulun di notumbayaan no. ⁶ Nga’ a’ iddi diyolo’ nokito i Paulus om i Silas, om gayato’ noddi diyolo’ i Yason om i piro-piro tulun do suwai do nongotumbayaan do nongoi potimbabao’ di piro-piro pagawai di kikuasa’ do hiri’d bandar diri, do mikuwo’d minoro-boros iyolo’ dot opuhod do poingkaa, ’’Iti nopo tulun diti om mimpanau nopo do mamagangau, om nokorikot no iyolo’d hiti’d bandar toko’. ⁷ Om pinasalakoi iyolo’ di Yason do hilo’d walai dau. Om papasala’ iyolo’ dit oturan di Kaisar, i raja’ do Rum, tu’ momoros iyolo’ do haro po o raja’d suwai dot i Yesus o ngaran,’’ ka. ⁸ Om kongotogod noddi kopio i tulun dot ogumu’ om i piro-piro boyoon do hiri’d bandar diri do nokorongou’ddi. ⁹ Om suhuon’ noddi di tulun di kikuasa’ i Yason om i piro-piro tulun do suwai di notumbayaan do mambayar do tusin do pamajamin diyolo’ do tinan diyolo’, om posoliwano’ nogiddi iyolo’ do mantad hiri. ¹⁰ Om totuong iddi om suhuon’ no di tulun di nongotumbayaan dot id bandar diri i Paulus om i Silas do mongoi’d hilo’d Biria. Om korikot noddi iyolo’d hilo’ om ongoi no iyolo’ do hiri’d walai’d sasambayangan do tulun do Yohudi. ¹¹ Nga’ tulun nopod hiri om osonong i’ ko’ i tulun do hilo’d Tosolunika, tu’ nongkosodia’ no kopio o ginawo diyolo’ do mokinongou di habar do pasal di Yesus, om monikid tadau nopo iyolo’ do monorisid kopio do mambasa’ di Buuk do Kinorohingan do mongilo kopio ondung otopot i ponudukan di Paulus. ¹² Om ogumu’ddi o tulun dot id pogialatan diyolo’ do notumbayaan di Yesus, om ogumu’ nogi’ o tongokusai om tongoondu’ do tulun do Yunani dit angabantug do notumbayaan. ¹³ Nga’ koilaai noddi di tulun do Yohudi di hilo’d Tosolunika do monuduk i Paulus do boros do Kinorohingan do hilo’d Biria, om ongoi no iyolo’ suhut di Paulus om i Silas do hilo’ do minongoi pamayayat di tulun do hilo’ om pinapatangkabo iyolo’ do ginawo diyolo’. ¹⁴ Om ara-raho’ no di tulun do hilo’d Biria do papaatod i Paulus do hiri’d tisan do rahat, nga’ i Silas nopo di Timotius om poundorong i’ do hiri’d bandar diri. ¹⁵ Om kaatod poddi diyolo’ i Paulus do hilo’d Atina, om bilinai noddi di Paulus iyolo’ do momisunud di Silas om i Timotius do marau-arau do sumusuhut dau. ¹⁶ Om daamot poddi di Paulus do magandad di Silas om i Timotius do hilo’d Atina, om tumongob tomod diri iyau do kokito di bandar diri tu’ noponu’ pod tingolig. ¹⁷ Om ongoi noddi i Paulus ponokiboro-boros di tulun do Yohudi om it okon ko’ Yohudi di sumambayang dot id Kinorohingan do hiri’d walai’d sasambayangan. Om monikid tadau nogi’ iyau do mongoi ponokiboro-boros di tulun do hiri’d tomu. ¹⁸ Om haro nogi’ o piro-piro tulun di gomponuduk di tumanud di Ipikuros om i Stoa do suminongkiwal dau. Boros kad piro-piro diyolo’, ’’Nunu no o toilaan do tulun diti? Okuri i’ daa o toilaan dau nga’ adala’ i’ kopio o boros,’’ ka diyolo’. Om haro nogi’ o piro-piro tulun do suwai do momoros do poingkaa, ’’Iyo-iyo’d poposusui iyau do pasal do ponokokinorohingan do bansa’d suwai,’’ ka. Kapamarasan nopo diyolo’d miagal diri, om poposusui i Paulus do pasal di Yesus om pasal dot apasi kawagu i tulun do napatai. ¹⁹ Om angatai noddi diyolo’ i Paulus do hiri’d titimungon do tulun dot ogumu’ di roitan do Nulu-Nulu dot Ariopagus. Om hilo’ no iyolo’d minoro-boros di Paulus, ’’Mokiilo daa iyahai di ponudukan do wagu di pinotuduk nu’ddi. ²⁰ Tu’ minonusui ko dahai’d ponudukan di suwai kopio dot orongou dahai. Om mokiilo iyahai ondung nunu o komoyon diri,’’ ka diyolo’. ²¹ (Tu’ tulun nopod Atina om i tulun do bansa’d suwai di poundorong do hiri om ongorohian kopio’d mokinongou do tulun di popotuduk do ponudukan dit a’ po diyolo’ insan korongou om orohian iyolo’d mogiboro-boros do pasal diri.) ²² Om ingkakat noddi i Paulus do hiri’d dotoguangan di tulun do pointimung do hiri’d Ariopagus diri, om boro-boros no iyau’d poingkaa, ’’Oi tulun dot Atina! Okito ku do kitugama’ ngai’ kou i’. ²³ Tu’ tontok di mimpanau oku’d hiti’d bandar dokoyu, om di mingontong oku di tiyonon dokoyu’d sumambayang om nokokito oku dot iso’ o kinoiyonon dit iyonon dokoyu’d papatahak do porsombahan di sumbolion. Om tinulisan o kinoiyonon diri do poingkaa, ’Dong Kinorohingan Dit a’ Otutunan,’ ka. Om iri no i Kinorohingan di tukuon dokoyu’ddi, nga’ it a’ i’ dokoyu otutunan o posusuyon ku dot id dokoyu, ²⁴ Kinorohingan no o minomonsoi’dti pomogunan om koinsanai di hiti’d pomogunan, om iyau no o Tuhan do hilo’d tawan om hiti’d pomogunan. Om a’ i’ iyau miyon do hiri’d walai di ponokokinorohingan di winonsoi’d tulun. ²⁵ Om a’ nogi’ iyau minog do tulungon do tulun, tu’ iyau no o manahak do koposion om pinuhobo om koinsanai’d nunu nopo dot id tulun. ²⁶ Om mantad nod iso’ o tulun o pinawayaan dau do minomonsoi’d koinsanai’d bansa’d tulun, om sinuhu’ dau iyolo’ do miyon do pointongkop diti pomogunan. Om iyau nogi’ o minanantu’ do mantad di gulu po ondung soira’ iyolo’d poimpasi, om ondung hinonggo o koiyonon diyolo’. ²⁷ Om winonsoi pogi’d Kinorohingan o miagal diri nga’ ponuhu’ dau diyolo’ do mogihum dau. Om maha’ daa’ndo om osolowot diyolo’ iyau do tontok di mogihum iyolo’ dau. Nga’ otopot nopo kopio om a’ i’ osodu’ o Kinorohingan do mantad id pointikid-tikid dati’, ²⁸ do miagal di nokoboros do tulun do poingkaa, ’Poimpasi toko’ om mimpanau toko’ om hino toko’ do hiti’d pomogunan tu’ i kuasa’ dau o powonsoi do miagal diri,’ ka. Om miagal nogiddi i nokoboros di piro-piro tulun dit ongoilo do boros dit angaralom do poingkaa, ’Tangaanak ngai’ toko’ i’ dau,’ ka. ²⁹ Om iyo nopoddi tu’ tangaanak ngai’ toko’d Kinorohingan, om a’ i’ apatut do sorohon toko’ do Kinorohingan nopo om iyo noddi tingolig di tamas ko’ pirok ko’ watu do winonsoi, i winonsoi do tumanud do toilaan do tulun. ³⁰ Nga’ a’ nod Kinorohingan sorohon i maso pod aiso’ o toila-ilaan toko’, nga’ baino’ nopo om suhuon dau o koinsanai’d tulun do pointongkop diti pomogunan do kumorologo di dusa diyolo’. ³¹ Tu’ natantu’ no dau ot insan o maso do kopomutusan do pointikid-tikid do tulun do hiti’d pointongkop diti pomogunan do mikuwo’d otulid o pomumutus. Om i tulun di nopili’ mantad do Kinorohingan o momutus. Om iri no o koila-ilaan do koinsanai’d tulun dot otopot iri tu’ napasi no kawagu’d Kinorohingan i tulun diri do mantad id kapatayon,’’ ka di Paulus. ³² Nga’ haro’ddi o piro-piro tulun dot id pogialatan di tulun diri do mongirak-irak di Paulus do tontok di nokorongou iyolo’ do pasal dot apasi kawagu i tulun di napatai. Om haro nogi’ o tulun do momoros do poingkaa, ’’Orohian po kawagu iyahai’d korongou diya’ do popotuduk do pasal diri,’’ ka. ³³ Om tongkiad noddi i Paulus do mantad hiri’d tiiyonon do tulun do tumimung. ³⁴ Nga’ haro i’ ot id pogialatan diyolo’ do suminokodung di Paulus om notumbayaan di Yesus. Id pogialatan nopo diyolo’ddi om: i Dionisius, it iso’ o tulun dot id pogialatan di mongilo-ilo dit Ariopagus, om songulun o tondu’ dot i Damaris o ngaran, om haro po o piro-piro tulun do suwai.

¹ Om katalib poddi iri om tongkiad no i Paulus do hilo’d Atina om ongoi no iyau do hilo’d Korintus. ² Om hilo’ no o kinasalawatan dau do songulun o Yohudi dot i Akuila o ngaran. Om pomogunan nopo kopio di Akuila om hilo’d Pontus. Om koririkot dau do hilo’d Korintus do mantad hilo’d Italia do miwoyo’ di sawo dau. Ngaran nopo di sawo dau om i Priskila. Kinaangayan nopo diyolo’d hilo’d Korintus nga’ minonuhu’ i Kaisar Klaudius do poposoliwan ngai’ di tulun do Yohudi do mantad hilo’d Rum. Om ongoi noddi i Paulus solowot goduwo diyolo’. ³ Om undorong noddi i Paulus do poinsugku’ diyolo’d kumaraja’, tu’ miagal i’ o pogihuman diyolo’d tusin, do momomonsoi’d kiim. ⁴ Nga’ mongoi kasai’ nopo i Paulus do hiri’d walai’d sasambayangan do pointikid-tikid do tadau’d Sabat do mongoi ponokiboro-boros di tulun do Yohudi om i tulun do Yunani do mangangat diyolo’d monongkuyaan di Yesus. ⁵ Om korikot poddi i Silas om i Timotius do mantad hilo’d Makidunia, om popinsusui kasai’ nopoddi i Paulus dot id tulun do Yohudi di habar do mantad id Kinorohingan, dot i Yesus i Raja’ do Gampamasi di pinabatos do Kinorohingan. ⁶ Nga’ a’ nopo tumingkod do sumongkiwal di Paulus i tulun do Yohudi om papasala’ iyolo’ dau, om tantago’ noddi di Paulus i pupuk do mantad id pakayan dau do popointalang do kasala’ iyolo’. Om boro-boros nogiddi iyau diyolo’ do poingkaa, ’’Ondung ohukuman kou, om dokoyu nod sala’. a’ oku no iyoho’ monongkoilo dokoyu! Om mantad nod baino’ do mongoi oku nondod hilo’d tulun dit okon ko’ Yohudi,’’ ka dau. ⁷ Om tongkiad noddi i Paulus diyolo’ om ongoi no iyau undorong do hiri’d walai di hiri’d sampaping di walai’d sasambayangan. Sanganu nopo di walai’ddi om i Titius Yustus, i tulun dit okon ko’ Yohudi, nga’ sumambayang i’ iyau dot id Kinorohingan. ⁸ Om i Krispus i boyoon di walai’d sasambayangan diri om i sompiiyon dau nga’ otumbayaan i’ di Tuhan Yesus. Om ogumu’ o tulun do suwai do hiri’d Korintus do notumbayaan di Yesus, om minokibatis do nokorongou di pinosusui di Paulus. ⁹ Insan totuong om boro-boros no o Tuhan dot id di Paulus dot id suang do pinointalang, ’’Kada’ kooris! Popinsusui nopo. Om kada’ tingkod. ¹⁰ Tu’ moyo-woyo’ oku i’ diya’. Om aiso’ i’ o tongosongulun piya do milo’d momonsoi’d araat dot id diya’, tu’ ogumu’ i’ o tulun ku dot id suang do bandar diti,’’ ka. ¹¹ Om undorong noddi i Paulus do hilo’d Korintus do sontoun om satanga’ o koloido’ om monuduk iyau di tulun do hilo’ do boros do Kinorohingan. ¹² Nga’ tontok di nosiliu i Galio do gobunor do hilo’d Akaya, om pogiupakat noddi i tulun do Yohudi do sumongkiwal di Paulus om tangkapo’ no diyolo’ iyau do pinakaa do hiri’d pomisaraan. ¹³ Om boro-boros no iyolo’ do papasala’ di Paulus, ’’Iti nopo tulun diti om mamayayat do tulun do sumambayang dot id Kinorohingan do kasala’ dit oturan di Musa o kowoyo-woyoo’ do sumambayang!’’ ka. ¹⁴ Om sisimbar no daa i Paulus. Nga’ boro-boros nogiddi i Galio di tulun do Yohudi, ’’Oi tulun do Yohudi, ondung otopot do kasalaan ko’ karaaton iti pinoboros dokoyu’dti om apatut i’ daa do pokinongohon kopio ku. ¹⁵ Nga’ iti nopo om pogisosongkiwalan nod pasal do boros, om ngaran om oturan dokoyu om pimpori-porianan nopo dokoyu’d momutus iti. a’ oku i’ orohian do momutus do hal dot iyo’dti,’’ ka dau. ¹⁶ Om uyungo’ no di Galio iyolo’ do poposoliwan do mantad hiri’d pomisaraan. ¹⁷ Om tangkapo’ noddi diyolo’ i Sostinis, i boyoon do walai’d sasambayangan diri, om pimbabagai no diyolo’ iyau do hiri’d dotimbabaan di tiyonon do momutus. Nga’ a’ i’ di Galio pinusou i hal diri. ¹⁸ Om alaid poddi i Paulus do poundorong do hilo’d Korintus do mantad diri. Om pongintod-intod noddi iyau di tulun di nongotumbayaan do hiri. Om sakai nogiddi iyau’d kapal do rahat do minongoi do hilo’d Siria do miniwoyo’ diyo Priskila om i Akuila. Nga’ pokibugarai no di Paulus i tobuk dau di hilo’d Kingkria tu’ pinanaru dau i tobuk dau do pamayaan dau di batos dau do mikuwo’d sumpa’ dot id Tuhan. ¹⁹ Om korikot poddi iyolo’ do hilo’d Iposus, om tongkiad noddi i Paulus di Priskila om i Akuila, om ongoi no iyau do hiri’d walai’d sasambayangan do mongoi ponokiboro-boros di tulun do Yohudi. ²⁰ Om angatai no daa’ddi diyolo’ i Paulus do mundorong dot alaid-laid do hilo’d Iposus, do poinsugku’ diyolo’ nga’ a’ i’ i Paulus minundorong. ²¹ Nga’ mulong pod iyo’ddi, nga’ minoro-boros i’ iyau di tintod dau do minamanau do poingkaa, ’’Ondung korohian do Kinorohingan om gumuli’ oku i’ kawagu’d hiti,’’ ka dau. Om sakai noddi iyau’d kapal do rahat do mantad hilo’d Iposus di nokoboros dau o miagal diri. ²² Om korikot poddi iyau do hilo’d Kaisaria, om ongoi no iyau do hilo’d Yorusalim do minongoi poporikot do tabi’ dot id sidang do hilo’. Om lombus no iyau do hilo’d Antiokia. ²³ Om alaid poddi iyau do poundorong do hilo’d Antiokia, om ongoi nogiddi iyau pimpanau do hilo’d watas do Galatia om Prigia do mongoi popogirot do kotumbayaan di tulun di nongotumbayaan do hilo’. ²⁴ Om korikot no do hilo’d Iposus o songulun o tulun do Yohudi dot i Apolos o ngaran, i nosusu do hilo’d bandar dot Aliksandria. Iyau nopo om kosuhut kopio do komoyon di hiri’d suang do Buuk do Kinorohingan om oilo iyau’d mimboros, ²⁵ om notudukan iyau di ponudukan do pasal di Yesus. Om agayo kopio o ginawo dau do popotuduk dot osorisid kopio o ponunuduk do pasal di Yesus, do mulong piya dot iri nogi’ i botisan di Yohanis o noilaan dau. ²⁶ Om timpuun noddi iyau do monuduk di tulun do hiri’d walai’d sasambayangan. Om angatai noddi di Priskila om i Akuila i Apolos do hiri’d walai diyolo’ do nokorongou iyolo’ di ponudukan di Apolos. Om tudukai noddi kawagu diyolo’ i Apolos do pinopopunong kopio do pasal di natantu’ mantad do Kinorohingan do wonsoyon dau do mamasi’d tulun dot id suang di Yesus. ²⁷ Om orohian diri i Apolos do mongoi’d hilo’d Akaya. Om ponulis noddid surat i tulun di notumbayaan di Yesus do hilo’d Iposus do patahakon di tulun di nongotumbayaan do hilo’d Akaya do monuhu’ diyolo’ do rumamit di Apolos. Om di nopoddi nokorikot i Apolos do hilo’d Akaya om agayo no kopio o kinotulungan dau di tulun di notumbayaan di Yesus di hilo’, dot i kosonongo’d Kinorohingan dot id diyolo’ o nokotumbaya-bayaan diyolo’ di Yesus. ²⁸ Om kikuasa’ i’ kopio i Apolos do monokisimbar-simbar di tulun do Yohudi, gisom do nokosoibau iyau do suminimbar di tulun do Yohudi dot id toguang di tulun dot ogumu’. Om iri no it ayat do mantad id Buuk do Kinorohingan o rinait dau do pinopointalang kopio dot i Yesus no i Raja’ do Gampamasi di pinabatos mantad.

¹ Om daamot po di Apolos do hilo’d Korintus, om tongkop no i Paulus do minimpanau do hiri’d kabandaran do ponong id sokid dot id suang do watas diri om korikot noddi iyau do hilo’d Iposus. Om hilo’ no do nokosolowot iyau do piro-piro tulun di notumbayaan di Yesus. ² Om uhoto’ no di Paulus iyolo’, ’’Nakaramit kou nod Rusod do Kinorohingan di kotumbayaai kou i’ di Yesus?’’ ka dau. Om boros ka diyolo’d suminimbar, ’’Amu’. a’ po iyahai insan korongou do haro o Rusod do Kinorohingan,’’ ka. ³ Om uhoto’ noddi kawagu di Paulus iyolo’, ’’Iyo nopoddi, om nunu o komoyon di binotisan kou do noilaan dokoyu?’’ ka dau. Om boros ka diyolo’d suminimbar, ’’Komoyon nopoddi om i botisan di pinoboros di Yohanis,’’ ka. ⁴ Om boros kaddi di Paulus, ’’I Yohanis nopo om minamatis do tulun do popointalang do nokorologo iyolo’ do koinsanai di dusa diyolo’. Nga’ tontok nogiddi do minomisunud i Yohanis di tulun dot Israil do mositi’ no dot otumbayaan iyolo’ di tulun di rumikot do sumusuhut dau, iri no i Yesus,’’ ka dau. ⁵ Om tontok di nokorongou iyolo’ddi, om botisai noddi iyolo’ dot id suang do ngaran di Tuhan Yesus. ⁶ Om tontok di sinukabayan di Paulus iyolo’, om koporinta’ noddi iyolo’ do Rusod do Kinorohingan, om timpuun noddi iyolo’ do mimboros do mogisuwai-suwai o bansa’d boros di kosuayan kopio, om popinsusui iyolo’ do habar do mantad id Kinorohingan. ⁷ Kogumuon’ nopo diyolo’ddi om haro i’ doti’ o hopod om duwo o tulun. ⁸ Om tolu o tulan do koloido’ di Paulus do monuduk kasai’ om a’ i’ iyau ooris do popimboros diri dot id tulun do hiri’d walai’d sasambayangan, om monokisimbar-simbar iyau diyolo’ do poposuhut kopio diyolo’ do pasal di Pomorintaan do Kinorohingan. ⁹ Nga’ haro i’ o piro-piro tulun dot id pogialatan diyolo’ dot okodou kopio o ginawo, om a’ otumbayaan. Om pasalaon nopo diyolo’ do hiri’d toguang do tulun di songintimung do hiri i ponudukan do pasal di natantu’ mantad do Kinorohingan do wonsoyon dau do mamasi’d tulun dot id suang di Yesus. Om iri noddi o kinotongkiadan di Paulus diyolo’, om ongoi no iyau do hiri’d piro-piro tumatanud di Yesus dit id suang di bilik dit agayo, i tiiyonon di Tiranus do monuduk do tulun dot ogumu’. Om hiri no i Paulus do monokisimbar-simbar do tulun do pointikid-tikid do tadau. ¹⁰ Om iyo kasai’ nopoddi o wonsoyon dau do solinaid do sontoun, gisom do nokorongou ngai’d boros do Tuhan i tulun do Yohudi om it okon ko’ Yohudi do hiri’d pointongkop do pomogunan dot Asia. ¹¹ Om pinakai’d Kinorohingan i Paulus do momonsoi di kongoimayaan kopio. ¹² Ondung patahakon dot id tulun di sumakit o somputangan ko’ tagkos di noumbalan di Paulus do mamakai om olingos nopo i toruol diyolo’ om i rusod do rogon nga’ sumoliwan nopo do mantad id tulun diri. ¹³ Nga’ haro o piro-piro tulun do Yohudi di bobolian do mimpanau nopo do mongoi poposoliwan do rusod dot araat do mantad id tulun. Om mumbal daa iyolo’d mamarait do ngaran do Tuhan Yesus do poposoliwan di rusod do rogon. Boros ka diyolo’ dot id rusod do rogon diri, ’’Id suang do ngaran di Yesus i posusuyon di Paulus, om posoliwanon ku iyokoyu!’’ ka. ¹⁴ Om iri nogi’ i turu’ o tangaanak do tongokusai di Skiwa, i boyoon dot imam diri nga’ minomonsoi nogi’ do miagal diri. ¹⁵ Nga’ boro-boros nogi’ i rusod do rogon do suminimbar diyolo’ do poingkaa, ’’Kotutun oku i’ di Yesus om i Paulus, nga’ isai kou iyokoyu?’’ ka. ¹⁶ Om simbul nopoddi i tulun di norusadan do rogon diri do tuminabpo diyolo’ do suminaap, om panangkus nopoddi iyolo’ do minogidu’ do mantad hiri’d walai, do nongosuhat poo om aiso’ o pakayan tu’ ginayat di tulun diri i pakayan diyolo’ om koidu’ nopo do poimpakai diyolo’. ¹⁷ Om ongooris tomod diri i tulun do Yohudi om it okon ko’ Yohudi di poundorong do hilo’d Iposus do nokorongou di habar diri, om royohon diri o ngaran do Tuhan Yesus. ¹⁸ Om ogumu’ddi o tulun di nongotumbayaan di Yesus do ruminikot do minangakun di nowonsoi diyolo’ di gulu po dot id toguang di tulun dot ogumu’. ¹⁹ Om ogumu’ nogi’ o tulun di bobolian do minonimung di buuk diyolo’ om tutudai nogiddi do hiri’d toguang di tulun dot ogumu’. Om haro i’ doti’ o limo nohopod noribu o tusin do pirok do gatang ngai’ddi. ²⁰ Om mumu-gumu’ nopoddi o tulun do korongou di boros do Tuhan om mumu-gumu’ o tulun dot otumbayaan diri. ²¹ Om katalib poddi i nongosiliu do miagal diri, om tontuo’ no di Paulus do mongoi iyau do hilo’d Makidunia om hilo’d Akaya om lumombus nogindo iyau do hilo’d Yorusalim. Om boros ka dau, ’’Koongoi ngai’ oku pondod hilo’, om mositi’ nod mongoi oku do hilo’d Rum,’’ ka. ²² Om suhuon’ noddi dau i Timotius om i Irastus, i duwo o tulun di mongunguhup dau do minogulu dau do mongoi’d hilo’d Makidunia do daamot dau’d poundorong do piro-piro tadau’d koloido’ do hiri’d pomogunan dot Asia. ²³ Tontok no doti’ddi do tuminimpuun o kagangahan dot agayo do hilo’d Iposus, dot i ponudukan do pasal di Yesus o kinoimpuunon. ²⁴ Tu’ hiri nopod bandar diri om haro o songulun o tukang pirok dot i Dimitrius o ngaran, i momomonsoi do winalai-walai di podsubakan di Artimis, i ponokokinorohingan diyolo’. Iri nopo wonsoyon di tulun diri om popountung kopio di tulun di pakaraja’ dot id dau. ²⁵ Om timungo’ noddi dau i tulun di songingkaraja’ dot id dau om i tulun di songingkaraja’ dot id piro-piro tukang pirok do suwai, om boro-boros no iyau dot id diyolo’ do poingkaa, ’’Oi tobpinai-tobpinai, koilo kou i’ dot iti no o karaja’dti o koonuan toko’d tuntung dot agayo. ²⁶ Om nokokito kou no om nokorongou kou di winonsoi’d i Paulus diri. Tu’ minomoros iyau dot iti nopo ponokokinorohingan di winonsoi’d tulun om okon i’ ko’ kinorohingan kopio. Om ogumu’ no o tulun do notumbayaan di ponudukan di Paulus, dot okon nopo ko’ hiti nod Iposus, nga’ oruhai nod kotongkop do hiti’d pomogunan dot Asia. ²⁷ Iyo nopoddi, om okon nopo ko’ iti no karaja’ toko’ ot oindaraat diri, suwai ko’ ilo’ piya walai di Artimis, i ponokokinorohingan toko’ di tukuon do koinsanai’d tulun do hiti’d Asia om hiti’d pointongkop do pomogunan nga’ a’ noddi pokonunu-nunuon om a’ iyau pusohon,’’ ka. ²⁸ Om kongotogod noddi i tulun dot ogumu’ do nokorongou di boros di pinoboros di tukang pirok diri, om boro-boros no iyolo’ dot opuhod do poingkaa, ’’Abantug i’ i Artimis, i ponokokinorohingan do tulun dot Iposus!’’ ka. ²⁹ Om kotongkop nopoddi do hiri’d bandar diri i kagangahan diri. Om tounai nopoddi diyolo’ do minanangkap i Gayus om i Aristarkus, i duwo o tulun do Makidunia, i koruhang di Paulus do mimpanau, om gayato’ no diyolo’ i duwo o tulun diri do kuminaa do hiri’d titimungon do tulun dot ogumu’ dot id bandar diri. ³⁰ Om sumuwang daa’ddi i Paulus do hiri do mongoi tanud diyolo’ nga’ oduhai no iyau di tulun di nongotumbayaan di Yesus. ³¹ Om haro’ddi o piro-piro tulun dit angasawat o pangkat do hiri’d pomogunan dot Asia do tambalut di Paulus do minonuhu’ do tulun do mongoi pogodu di Paulus do sumuwang do hiri’d titimungon do tulun dot ogumu’ddi. ³² Om agangau nopoddi i tulun di songintimung do hiri’d kinoiyonon diri, om mogisuwai-suwai nopo o popinggarangon diyolo’, tu’ kogumuan no diyolo’d a’ i’ koilo ondung nunu o kinotimungan diyolo’d hiri. ³³ Om suhuon’ noddi di tulun do Yohudi i Aliksandor do minongoi’d hiri’d dotoguangan di tulun dot ogumu’, om ondos daa di wookon di tulun dot ogumu’ddi om iyau o kinoimpuunon di kagangahan diri. Nga’ pobilido’ no daa’ddi di Aliksandor o longon dau do mogodu di tulun do minghiyo, om umbal no daa iyau’d moro-boros do poposunud dot aiso’ o sala’ dau. ³⁴ Om koilaai noddi diyolo’ do tulun iyau’d Yohudi, om insan-insan nopo iyolo’d pinapagarang do boros do poingkaa, ’’Abantug i’ i Artimis, i ponokokinorohingan do tulun dot Iposus!’’ ka. ³⁵ Om alaid noddi om kotingkod i’ di gomponulis do hiri’d bandar diri i tulun dot ogumu’ di sanggara-gara’. Om boro-boros noddi iyau do poingkaa, ’’Oi tulun dot Iposus, ongkoilo ngai’ i’ o tulun do bandar nod Iposus o momogompi’ di walai di Tingolig dot Artimis om i watu dit olidang di ruminatu’ do mantad hilo’d tawan. ³⁶ Om aiso’ i’ o songulun piya do milo’d sumurilog do hal diti. Om kada’ kou nondo kohiyo. Om kada’ kou pomonsoi do nunu nopo dot a’ po kopomusorou kopio. ³⁷ Om tinangkap dokoyu iti tulun diti om a’ i’ iyolo’ minanakau do hilo’d walai di ponokokinorohingan toko’ om a’ iyolo’ minongindaraat diri. ³⁸ Nga’ ondung haro o tulun do pasalaon di Dimitrius om i tulun di pakaraja’ dot id dau om osonong dot igitan o hal diri dot id pomisaraan. Tu’ poingiwang kasai’ i’ i pomisaraan om hino kasai’ id hilo’ i pagawai do pomorinta’. ³⁹ Om ondung haro i pokionuon dokoyu’d suwai, om mositi’ nod salasayon iri dot id pogititimungan do tulun dot ogumu’ di natantu’ mantad do tumanud dot oturan. ⁴⁰ Tu’ iti nopo nosiliu baino’dti om sumiliu i’ do koligagaanan toko’. Om aiso’ i’ o paantakan toko’ do mingwonsoi’d miagal diti. Om otondos toko’ i’ moti’dti do sumaap do porinta’, dot iti kagangahan diti o kapanandasan dati’,’’ ka dau. ⁴¹ Om kongoboros poddi di gomponulis do bandar diri o miagal diri om suhuon’ no dau’d muli’ i tulun dot ogumu’.

¹ Om kotingkod poddi i kagangahan do hilo’d Iposus, om lohowo’ noddi di Paulus i tulun do sidang do tuminimung om boro-boros no iyau diyolo’ do minongodsuur diyolo’. Om pongintod-intod noddi iyau diyolo’. Om pamanau noddi iyau do minongoi’d hilo’d Makidunia. ² Om pimpanau noddi i Paulus do tuminongkop do hiri’d watas do Makidunia do minongoi ponuduk di tulun di notumbayaan di Yesus, om minongodsuur iyau diyolo’. Om pamanau nogiddi iyau do kuminaa do hilo’d Yunani. ³ Om tolu o tulan do koloido’ dau do poundorong do hilo’. Om maha’ dit oruhai noddi o kapamanahan dau do mongoi’d hilo’d Siria, om korongou no dau o habar do mogiupakat i tulun do Yohudi do mamatai dau. Om tontuo’ noddi dau do gumuli’ kawagu iyau do kawaya’ kawagu do hilo’d Makidunia. ⁴ Om tanud noddi dau i Sopatir, i tanak di Pirus, i mantad hilo’d Biria; om tuminanud nogi’ i Aristarkus om i Sikundus i tulun do Tosolunika, om i Gayus i tulun do Dorbi, om i Timotius, om i Tikikus om i Tropimus, i piro-piro tulun do mantad hilo’d pomogunan dot Asia. ⁵ Om pogulu noddi iyolo’ dahai do minongoi’d hilo’d Troas, om hilo’ no iyolo’d minagandad dahai. ⁶ Om katalib poddi i Tadau dot Agayo do Roti dit A’ Kipangambang, om sakai noddi iyahai’d kapal do rahat do mantad hilo’d Pilipi. Om katalib poddi o limo tadau, om kosolowot nogi’ iyahai diyolo’ do hilo’d Troas. Om sominggu’ diri o koloido’ dahai do poundorong do hilo’. ⁷ Om tontok di totuong no di tadau’d koonom, om timung noddi iyahai do minakan do kopogiuludan, om pomoros no i Paulus di tulun do hiri do gisom do pitangatuong, tu’ osorou dau do lumombus no iyau’d mamanau di kosuabon. ⁸ Om ogumu’ddi o lampung do hiri’d bilik di hiri’d sawat di niyonon dahai’d tuminimung. ⁹ Om haro’ddi o tanakwagu dot i Iutikus o ngaran do poirikau do hiri’d liligaon. Om koodop noddi iyau do hiri’d liligaon dit alaid kopio i Paulus do moro-boros di tulun. Om karatu’ noddi i Iutikus do mantad hiri’d liligaon di bilik di hiri’d tingkat kotolu. Om ngoyo’ noddi daa iyau di tulun nga’ napatai no iyau. ¹⁰ Nga’ lintuhun noddi i Paulus, om loubai no dau i tanakwagu’ddi do minamagapus. Om boro-boros no i Paulus, ’’Kada’ kou katangkabo, tu’ poimpasi po iyau,’’ ka dau. ¹¹ Om salakoi noddi kawagu i Paulus do hiri’d sawat, om potikido’ no dau i roti om akan ngai’ noddi iyolo’. Om boro-boros poddi kawagu i Paulus di tulun do gisom do nosuaban. Om pamanau noddi i Paulus. ¹² Om angatai noddi di tulun i tanakwagu’ddi do minuli’ do hiri’d walai dau, tu’ noposian iddi kawagu iyau, om noinsasamadan tomod diri o ginawo diyolo’. ¹³ Om pamanau noddi iyahai do minogulu di Paulus do suminakai’d kapal do rahat do kuminaa do hilo’d bandar dot Asos do mongoi kunomo’ di Paulus do hilo’. Tu’ iyo noddi i pinonuhuan di Paulus. Tu’ iyau nopo om minaya’ do hiri’d katanaan do kuminaa’d hilo’. ¹⁴ Om kosolowot poddi i Paulus dahai di hilo’d Asos, om sakai noddi i Paulus di kapal do rahat om pamanau noddi iyahai do kuminaa do hilo’d Mitilini. ¹⁵ Om mantad nod hilo’ om pamanau no iyahai do poinsakai’d kapal do rahat om korikot noddi iyahai do hiri’d hapak di Pulou do Kiyos di sinuabon. Om tadau noddi kawagu, om korikot no iyahai do hilo’d Samos, om tadau poddi kawagu, om korikot nogiddi iyahai do hilo’d Militus. ¹⁶ Tu’ natantu’ nod Paulus dot a’ mumbaya’ do hilo’d Iposus, om a’ i’ kalaid kopio do hilo’d watas dot Asia. Tu’ arau-arau iyau do mokiririkot do hilo’d Yorusalim do mingkosup di Tadau’d Agayo do Pintakosta. ¹⁷ Om pomilin noddi i Paulus do popoongoi di piro-piro boyoon do sidang do hilo’d Iposus, do mongoi solowot dau do hilo’d Militus. ¹⁸ Om korikot poddi iyolo’, om boro-boros no i Paulus dot id diyolo’, ’’Oi tobpinai-tobpinai, kongoilo kou i’ ondung poingkuro-kuro o kowoyo-woyoon ku do solinaid ku’d poinsugku’ dokoyu do mantad di kinorikoto’ ku i’ do hilo’d Asia. ¹⁹ Om aayi-ayi’ no o kosiribao’ do ginawo ku om nokoturu’ tomod o romou ku do minomonsoi’d karaja’ di don Tuhan do tontok di noinggorit oku tu’ araat i’ o winonsoi di tulun do Yohudi dot id doho’. ²⁰ Om kongoilo kou nogi’ dot aiso’ i’ ot a’ ku nouyuhan do popotuduk dot id dokoyu di nunu nopo i kiguna’ dot id dokoyu. Om nokoponuduk oku nogi’ dokoyu dot id pogititimungan do tulun dot ogumu’ om id pointikid-tikid do walai. ²¹ Om asaru’ oku nogi’ do monuduk do tulun do Yohudi om it okon ko’ Yohudi, dot apatut iyolo’ do rumologo’d dusa diyolo’ om rumikot dot id Kinorohingan om otumbayaan do Tuhan Yesus. ²² Om baino’ nodti om kumaa oku nod hilo’d Yorusalim do tumanud dot isuhu’d Rusod do Kinorohingan. Om a’ oku i’ koilo ondung nunu ot osiliu dot id doho’ do korikot oku’d hilo’. ²³ suwai ko’ iri no o toilaan ku tu’ pointikid-tikid do bandar di koongoyon ku om popoinsan kasai’ nopo doho’ o Rusod do Kinorohingan do kogiil oku nondo om inggoriton oku. ²⁴ Nga’ a’ ku i’ sorohon o tinan ku dot apatai tuu ko’ amu’, dot opongo ku po daa iti karaja’ di pinonuhuan do Tuhan Yesus doho’, om otorodok oku pod poposusui diti Habar dot Osonong do pasal di kosonongo’d Kinorohingan dot id tulun do gisom do tikapatai ku. ²⁵ Om nokosolowot ngai’ oku no dokoyu om nokoponuduk oku dokoyu do pasal do Pomorintaan do Kinorohingan. Om opurimanan ku noddi dot a’ oku no kosolowot kawagu dokoyu, oi tobpinai-tobpinai ku. ²⁶ Om iti no o kapamarasan ku kopio’dti dot id dokoyu, tu’ okon no ko’ doho’d kasalaan do haro piya ot id pogialatan dokoyu dot apatai. ²⁷ Tu’ a’ oku i’ nokoumbal do tuminongkiad diti karaja’ ku do monuduk dokoyu do koinsanai di natantu’ mantad do Kinorohingan do wonsoyon dau. ²⁸ Mumbangan-bangan kou no, om gompion no dokoyu o koinsanai di sidang di pinatahak do Rusod do Kinorohingan do pogompian dokoyu; tu’ nopili’ kou no do mongilo-ilo do sidang diri. Om gompion no kopio dokoyu i sidang do Kinorohingan do miagal di gompomogompi’d dumba’ di momogompi’ kopio di dumba’ dau. Tu’ nasanganu nod Kinorohingan i sidang diri dot i kinapatayon di Tanak dau o kinopononsongonuan. ²⁹ Oilaan ku no do kapamanau oku podti om rumikot nondo i toni dit orongit dot id pogialatan dokoyu. Om akanon nondo di toni dit orongit i tulun di pigompian dokoyu’ddi. ³⁰ Om mimbulai nondo o tulun do mantad id pogialatan dokoyu do popoboros dit a’ otopot, do mamalid di tulun di nongotumbayaan di Yesus. Om gisom do tumanud nondo diyolo’ i tulun diri. ³¹ Iyo nopoddi, om umbangan-banganan no kopio dokoyu! Soroho’ no dokoyu do tolu o toun do koloido’ ku do mikuwo’d tihad ku, dot a’ nopo kotingkod do monuduk do pointikid-tikid dokoyu do tadau om totuong. ³² Baino’ nopodti om patahakon ku no iyokoyu dot id Kinorohingan om gompion kou i’ dau. Om otumbayaan kou i’ kopio di habar di norongou dokoyu do pasal do kosonongo’d Kinorohingan dot id dokoyu. Tu’ kikuasa’ i’ o Kinorohingan do popokoris dokoyu om manahak dokoyu do barakat di pinosodia’ mantad dau do patahakon do koinsanai’d tulun di songonuon dau. ³³ Om a’ oku i’ nokoumbal do rumohian do tusin ko’ pakayan po dot isai nopo o tulun. ³⁴ Om oilaan id tobpinai-tobpinai do kuminaraja’ oku i’ do mogihum do kosukup-sukupan ku, om kosukup-sukupan di piro-piro tambalut ku di tuminanud doho’. ³⁵ Nowonsoi ngai’ ku no i maan dokoyu dot omitanan, om mositi’ nod tumotos kou do kumaraja’ do monulung di tulun dit oluhoi. Tu’ mositi’ nod sorohon toko’ i pinoboros di Tuhan Yesus do poingkaa, ’Olumaag nogi’ i tulun di manahak ko’ i rumamit,’ ka,’’ ka dau. ³⁶ Om kopongo poddi i Paulus do minoro-boros, om otud noddi iyau om koinsanai di tulun do hiri do suminambayang. ³⁷ Om oinsanan nopoddi iyolo’ do minihad om minongoi gapus di Paulus om minongintod iyolo’ dau. ³⁸ Om tumongob diri iyolo’ tu’ minomoros i’ i Paulus dot id diyolo’ dot a’ no iyolo’ kosolowot kawagu dau. Om woyoo’ noddi diyolo’ i Paulus do gisom do nokorikot do hiri’d kapal do rahat.

¹ Om pongintod noddi iyahai di piro-piro boyoon do sidang di mantad hilo’d Iposus, om tongkiad nogiddi iyahai diyolo’. Om pamanau no iyahai do suminakai’d kapal do rahat do kuminaa do hilo’d Pulou Kos; om sinuabon noddi om korikot no iyahai do hilo’d Pulou Rodis. Om mantad nod hilo’ om pamanau no iyahai do suminakai’d kapal do rahat do ruminikot do hilo’d podompiran do kapal do hilo’d Patara. ² Om kokito noddi iyahai dot iso’ o kapal di hilo’d Patara do pakayaan do hilo’d Pinisia. Om sakai no iyahai di kapal diri om pamanau noddi iyahai. ³ Om korikot no iyahai dot id iso’ o kinoiyonon dit okito o pulou Siprus dot id dogibangan dahai, nga’ pamanau nopo iyahai do poinsakai di kapal do kuminaa do hilo’d Siria. Om lintuhun noddi iyahai do hilo’d Tirus, tu’ hilo’ no o pinolintuhunan di suang di kapal di sinakai dahai. ⁴ Om ongoi noddi iyahai solowot di tulun di nongotumbayaan di Yesus do hilo’, om undorong no iyahai do poinsugku’ diyolo’ do solinaid do sominggu’. Om tudukai noddi iyolo’ do Rusod do Kinorohingan do mogodu di Paulus do mongoi’d hilo’d Yorusalim. ⁵ Nga’ korikot no i maso di kapamanahan dahai kawagu, om tongkiadai noddi dahai iyolo’ do luminombus do minamanau, om mogianak-anak nopoddi iyolo’ do pinapaatod dahai do gisom do nokosoliwan iyahai di bandar. Om otud ngai’ noddi iyahai do hiri’d tisan di rahat do suminambayang. ⁶ Om kasambayang poddi iyahai, om pogitatabi’ no iyahai om sakai noddi iyahai di kapal, om poguliai no diyolo’ do hiri’d walai diyolo’. ⁷ Om pamanau noddi iyahai do mantad hilo’d Tirus, do kuminaa do hilo’d Ptolimais do suminakai’d kapal do rahat. Om hilo’ nod minongoi iyahai solowot di tulun di nongotumbayaan, do mongoi ompuya’ diyolo’, om sangadau’ddi iyahai do poinsugku’ diyolo’. ⁸ Om tadau poddi kawagu om lombus nogi’ iyahai do kuminaa do hilo’d Kaisaria. Om ongoi noddi iyahai salakoi do hiri’d walai di Pilipus, i tulun di popirongou do Habar dot Osonong. Iyau nopo om iso’ do mantad id pogialatan di turu’ o tulun di nopili’ do hilo’d Yorusalim. ⁹ Om kianak iyau dot apat o sumandak. Om nonuan ngai’ nopod Kinorohingan do toilaan do popinsusui do habar do mantad id Kinorohingan it apat o tangaanak dau’ddi. ¹⁰ Om piro-piro poddi o tadau do koloido’ dahai do poundorong do hilo’, om rikot no i nabi dot i Agabus o ngaran, do mantad hilo’d Yudia. ¹¹ Om ongoi no iyau do hiri’d dahai, om onuo’ no dau i tagkos di Paulus om kagasai no dau di tagkos diri o gakod om longon dau. Om boro-boros no iyau, ’’Iti no o pinoboros do Rusod do Kinorohingan: Iyo nodti o pongongogos di tulun do Yohudi do hilo’d Yorusalim di tulun di sanganu diti tagkos, om patahakon nogindo iyau dot id tulun dit okon ko’ Yohudi,’’ ka dau. ¹² Om oinsanan nopoddi iyahai om i tulun di hilo’d Kaisaria do mogodu daa kopio di Paulus do mongoi do hilo’d Yorusalim di nokorongou iyahai do miagal diri. ¹³ Nga’ boros ka di Paulus do suminimbar, ’’Nokuro tu’ miagal kopio’dti o pongingihad dokoyu, oi tobpinai-tobpinai, do gisom dot osudu’ o ginawo ku iyoho’? Tu’ okon nopo ko’ nokosodia’ oku’d tangkapon do hilo’ nga’ kosodia’ oku nogid patayon piya dot i Tuhan Yesus o kapamatayan doho’,’’ ka dau. ¹⁴ Om tingkod noddi iyahai do mogodu, tu’ a’ no i Paulus milo’d oduhan. Om boros kaddi dahai dot id dau, ’’Pologoson nopo o korohian do Tuhan dot osiliu,’’ ka. ¹⁵ Om piro-piro poddi o tadau dahai’d poundorong do hilo’, om pogopi-opi’ no iyahai do kuminaa do hilo’d Yorusalim. ¹⁶ Om tanud noddi dahai o piro-piro tulun do mantad hilo’d Kaisaria do pinapaatod dahai do hiri’d walai di Manason, tu’ hiri nod walai dau o tiyonon dahai. (I Manason nopo om tulun do Siprus dit alaid no do nosiliu’d tumatanud di Yesus.) ¹⁷ Tontok di nokorikot iyahai do hilo’d Yorusalim, om ongosuwau nopo i tulun do hilo’ do minongoi ruba’ dahai. ¹⁸ Om sinuabon noddi om tanud no i Paulus dahai do minongoi solowot di Yakub. Om i piro-piro boyoon do sidang nga’ hiri ngai’ nogi’. ¹⁹ Om katabi’ poddi i Paulus diyolo’, om susuyo’ ngai’ nogiddi dau dot id diyolo’ o koinsanai di nowonsoi’d Kinorohingan dot id pogialatan di tulun dit okon ko’ Yohudi, dot i Paulus o pinakai’d Kinorohingan do minomonsoi’ddi. ²⁰ Om pamarayou ngai’ nopoddi iyolo’ do Kinorohingan do nokorongou di sinusui di Paulus diri. Om boro-boros noddi iyolo’ dau do poingkaa, ’’Oi Paulus, ilaai no dot iri nopo i piro-piro noribu o tulun do Yohudi di notumbayaan di Yesus diri, om it otorodok kopio do tumanud di Tourat di Musa. ²¹ Om nokorongou no iyolo’ do monuduk ko do koinsanai di tulun do Yohudi di songingiyon do hilo’d pomogunan do tulun dit okon ko’ Yohudi, om monuhu’ ko diyolo’ do mangada’ di Tourat di Musa. Om mogodu ko diyolo’ do monunat di tangaanak diyolo’, om mogodu ko do tumanud di kaadat-adato’ do tulun do Yohudi. ²² Atantu’ no do nongkorongou noddi i tulun do Yohudi di nongotumbayaan diri. Iyo nopoddi, om poingkukuro no mando’dti? ²³ Osonong nogi’ do tumanud ko’dti boros dahai. Haro ot apat o tulun dot id pogialatan dahai do nakapamatos dot id Tuhan. ²⁴ Om osonong do tumanud ko diyolo’ do magadat do momolidang do tinan nu, om bayaran no i bayaran diyolo’, om obugaran indo o tobuk diyolo’. Om oilaan i’ do koinsanai’d tulun dot a’ otopot i norongou diyolo’ do pasal diya’ tu’ iya’ nga’ maso id tumanud di Tourat di Musa. ²⁵ Nga’ iri nopo tulun dit okon ko’ Yohudi di nongotumbayaan di Yesus, om noonuan no dahai iyolo’d surat do pinopoilo di noputus dahai dot a’ iyolo’ koino-ino do mangakan do taakanon di nokosubak dot id tingolig, om a’ koino-ino do mangakan do raha’, om i nintorusan di napatai do linawaan. Om a’ iyolo’ koino-ino do magampahu’,’’ ka diyolo’. ²⁶ Sinuabon noddi om ongoi no i Paulus om it apat o tulun diri pomolidang do tinan diyolo’ do tumanud dit oturan. Om suang noddi iyolo’ do hiri’d Walai’d Sasambayangan dot Agayo do minongoi poposunud ondung piro o tadau do koloido’ di kopomolidangan do tinan diyolo’ om i kapatahakan diyolo’ do porsombahan di sumbolion do bagi’d pointikid-tikid diyolo’. ²⁷ Om tontok di motingkaayi’ no i turu’ o tadau’ddi, om haro’ddi o piro-piro o tulun do Yohudi do mantad hilo’d Asia do nokokito di Paulus do hiri’d Walai’d Sasambayangan dot Agayo. Om bayayato’ noddi diyolo’ i tulun dot ogumu’ om ongoyo’ no diyolo’ pususo’ i Paulus, ²⁸ om mikuwo’d popinggarang do poingkaa, ’’Oi tulun dot Israil, uhupai iyahai! Tu’ iti no i tulun di mimpanau nopo do mongoi ponuduk ngai’ do tulun di ponudukan do sumaap do tulun dot Israil, om sumaap di Tourat di Musa om iti Walai’d Sasambayangan dot Agayo. Om minangangat po iyau dilo tulun dot okon ko’ Yohudi do suminuang diti Walai’d Sasambayangan dot Agayo do minonosomu’ diti kinoiyonon dot olidang!’’ ka. ²⁹ (Kinapamarasan nopo diyolo’ do miagal diri om nokokito iyolo’ do manud-tanud di Paulus do suminuang do hiri’d bandar diri i Tropimus i tulun dot Iposus; om andasan nopo diyolo’ om nangatan di Paulus iyau do suminuang do hiri’d Walai’d Sasambayangan dot Agayo.) ³⁰ Om angagangau ngai’ nopoddi i tulun do pointongkop di bandar diri, om santangkus-tangkus ngai’ nopoddi i tulun do minongoi gurumung. Om tangkapo’ noddi diyolo’ i Paulus, om gayato’ no diyolo’ iyau do pinosoliwan do mantad hiri’d Walai’d Sasambayangan dot Agayo, om tontok iddi do tinabanan i wawayaan di Walai’d Sasambayangan dot Agayo. ³¹ Om daamot po di tulun di mamagangau’ddi do tumotos daa do mamatai di Paulus, om haro’ddi o tulun do minongoi pomisunud di boyoon do soudor do Rum di kagangahan do hiri’d bandar do Yorusalim. ³² Om arau-arau nopoddi i boyoon do soudor do minangangat do piro-piro pagawai do soudor om piro-piro soudor, om osiau nopo iyolo’ do minongoi rapou di tulun dot ogumu’ dit angagangau’ddi. Om kokito poddi di tulun dot ogumu’ i boyoon do soudor om i piro-piro soudor do suwai, om tingkadai nogi’ diyolo’ do mimbobog i Paulus. ³³ Om ongoyo’ noddi di boyoon do soudor tangkapo’ i Paulus, om ponuhu’ noddi iyau’d tulun do mongogos di Paulus. Om pinguhot nogiddi i boyoon do soudor di tulun dit ogumu’ ondung isai i Paulus om nunu o winonsoi dau. ³⁴ Om mogisuwai-suwai nopo o tisimbar di tulun dot ogumu’ddi. Om a’ iddi di boyoon oilaan ondung poingkuro kopio i nosiliu tu’ angagangau tomod nopo o hiri. Om ponuhu’ noddi iyau’d tulun do papakaa di Paulus do hiri’d kuta’ di pogintirungan. ³⁵ Om korikot poddi iyolo’ do hiri’d tukad di kuta’ddi om antayango’ no di piro-piro soudor i Paulus, tu’ pokiuumangan no kopio diyolo’ iyau. ³⁶ Om santanud-tanud nopo i tulun dot ogumu’ do hiri’d dohuri di piro-piro o soudor do sanggarang-garang do poingkaa, ’’Patayo’ no iyau!’’ ka. ³⁷ Om tontok di posuangon no daa di soudor i Paulus do hiri’d kuta’, om boro-boros no i Paulus di boyoon do soudor do poingkaa, ’’Koino-ino oku i’ do moro-boros diya’ dot ongoruhai oi tuan ?’’ ka dau. Om boros ka di boyoon do soudor do minonguhot dau, ’’Koilo ko i’ do boros do Yunani? ³⁸ Iyo nopondo, om okon ko i’ ko’ i tulun do Masir di minamagangau di gulu poddi, om pangangat noddi dot apat noribu o tulun dit ongkirapo-rapo do kuminaa do hilo’d tana’ do kowotuan ?’’ ka dau. ³⁹ Om boros ka di Paulus do suminimbar, ’’Iyoho’ nopo om tulun id Yohudi, om hilo’d bandar do Tarsus o kinosusuon ku, i bandar dot agayo do hilo’d Kilikia. Pabanaro’ oku daa diya’ do moro-boros dot id tulun dot ogumu’ dilo’,’’ ka dau. ⁴⁰ Om pabanaro’ noddi di boyoon do soudor iyau do moro-boros. Om ingkakat noddi i Paulus do hiri’d tukad di kuta’, om pobilido’ no dau o longon dau do popotingkod di tulun do minghiyo. Om tingkod ngai’ nopo iyolo’. Om boro-boros noddi i Paulus diyolo’ dot id suang do boros dot Ibrani do poingkaa,

¹ ’’Oi molohing-lohingon, om i tobpinai-tobpinai. Popoboros oku dot id dokoyu dot a’ oku i’ apatut do hukuman. Om pokinongoho’ no dokoyu!’’ ka dau. ² Om tontok di nokorongou iyolo’ di Paulus do moro-boros dot id suang do boros dot Ibrani, om a’ noddi iyolo’ ohiyo. Om boro-boros noddi kawagu i Paulus do poingkaa, ³ ’’Tulun oku i’ do Yohudi, om hilo’d Tarsus it id pomogunan do Kilikia o kinosusuon ku. Nga’ hiti’ddi id Yorusalim o kinogoyoon ku, om notudukan oku kopio di Gamaliol, i boyoon do gomponuduk, do tumanud kopio di Tourat di taki-aki toko’, om aparu’ oku do momonsoi di ponuhuan do Kinorohingan do miagal dokoyu. ⁴ Om nokoponginggorit oku nogi’ di tulun di tumanud di ponudukan di wagu’ddi gisom do haro o nangapatai diyolo’. Om tangkapon ngai’ ku nopo o tongokusai om tongoondu’ do pogiilon ku. ⁵ Om i Boyoon dot Agayo dot Imam om koinsanai di Gompomutus do Don Tugama’ nga’ nokoilo id otopot iti pinoboros ku. Tu’ iyolo’ nogi’ i minanahak doho’ do surat kuasa’ do kopoilaan dot id tulun do Yohudi di hilo’d Damsik. Om kikabanaran oku noddi do manangkap do tulun di nongotumbayaan di ponudukan diri, om milo oku’d mongoit diyolo’ do hiti’d Yorusalim do maan hukumai,’’ ka dau. ⁶ Om boro-boros no kawagu i Paulus do poingkaa, ’’Tontok di manau-panau oku do pakayaan do hilo’d Damsik, dit oruhai oku no daa do korikot do hilo’ di pitangaadau no, om sigog id titiu o tulinau di kosorong kopio do mantad hilo’d tawan do hiri’d posorili’ doho’. ⁷ Om karatu’ oku nopo do hiri’d tana’, om korongou ku no do haro o minoro-boros doho’ do poingkaa, ’Oi Saulus, Saulus! Nokuro tu’ monginggorit ko doho’?’ ka. ⁸ Om ponguhot oku noddi, ’Isai ko oi tuan ?’ kangku. Om simbar no i minoro-boros diri do poingkaa, ’Iyoho’ no i Yesus i tulun do Nasarit it inggoriton nu’ddi!’ ka. ⁹ Om i piro-piro tulun di manud-tanud doho’ nga’ nokokito nogi’ di tulinau’ddi, nga’ a’ i’ iyolo’ nokorongou di minoro-boros doho’. ¹⁰ Om boro-boros oku noddi kawagu do minonguhot do poingkaa, ’Oi Tuhan nunu nondo ot apatut ku’d wonsoyon?’ kangku. Om boros kad Tuhan do suminimbar, ’Ingkakat no om mongoi i’ do hilo’d Damsik. Om sunudan ko indo do hilo’ do koinsanai di korohian do Kinorohingan dot apatut nu’d wonsoyon,’ ka dau. ¹¹ Om kobolou oku nopo do notitihan di tulinau di kosorong kopio’ddi. Om ahako’ oku noddi di piro-piro tambalut ku do ruminikot do hilo’d Damsik. ¹² Om hilo’ nopod Damsik om haro o songulun dot i Ananias o ngaran. Om iyau nopo om tulun dit otorodok do tumanud di Tourat toko’ om sumambayang kopio dot id Kinorohingan. Om pusohon kopio iyau do koinsanai’d tulun do Yohudi di poingiyon do hilo’d Damsik. ¹³ Om rikot noddi iyau do minongoi ontong doho’, om ingkakat no iyau do hiri’d toning ku om boro-boros nod poingkaa, ’Oi tobpinai ku Saulus, kokito ko no kawagu,’ ka dau. Om diiri i’ om diiri do huminangog oku, om kokito ku noddi iyau. ¹⁴ Om boro-boros noddi iyau doho’ do poingkaa, ’Nopili’ ko nod Kinorohingan di taki-aki toko’, om koilo ko indo do korohian dau, om kokito ko di Yesus, i susuhuon do Kinorohingan di minomonsoi’d korohian dau, om nokorongou ko’d boros di Yesus dot iyau kopio o minoro-boros diya’. ¹⁵ Om iya’ no o popinsusui dot id koinsanai’d tulun do poporongou diyolo’ di nokito nu om i norongou nu. ¹⁶ Ingkakat no do dinondo. Kada’ no andad dot alaid, om mokibatis i’. Om sambayang no dot id Tuhan om koidu’ ko i’ do mantad id koinsanai di dusa nu,’ ka di Ananias,’’ ka di Paulus. ¹⁷ Om boros ka kawagu di Paulus, ’’Om kouli’ oku poddi kawagu do hiti’d Yorusalim, om ongoi oku noddi sambayang do hilo’d Walai’d Sasambayangan dot Agayo. Om diri nod noporinta’ oku di Rusod do Kinorohingan. ¹⁸ Om kokito ku noddi o Tuhan; om boro-boros no iyau doho’ do poingkaa, ’Lomusai no do tumongkiad do mantad hiti’d Yorusalim tu’ a’ i’ ongotumbayaan o tulun do hiti do ponudukan nu do pasal doho’,’ ka dau. ¹⁹ Om boros kangku do suminimbar, ’Oi Tuhan, nongkoilo no kopio iyolo’ do nokosuang oku dot id piro-piro walai’d sasambayangan do mongoi panangkap diyolo’, om mimbobog oku di tulun di nongotumbayaan diya’. ²⁰ Om di pinatai i Stipanus i popinsusui do pasal diya’, nga’ hino oku nogi’ iyoho’ do tontok diri, om kosokodung oku nogi’ di kinapamatayan di Stipanus diri. Om iyoho’ nogi’ o tuminamong di pakayan di tulun di minamatai dau,’ kangku. ²¹ Nga’ boro-boros nogi’ kawagu o Tuhan doho’ do poingkaa, ’Mongoi nopo, tu’ suhuon ku iya’ do mongoi do hilo’d kinoiyonon dit id sodu’, hilo’d pogialatan do tulun dit okon ko’ Yohudi,’ kad Tuhan,’’ ka di Paulus. ²² Om hiri no o gisom di boros di Paulus do pinokinongou di tulun dot ogumu’, om timpuun noddi kawagu iyolo’ do minggarang dot opuhod kopio do poingkaa, ’’Patayon nopo o tulun do miagal dilo’! a’ no iyau apatut do poimpasi!’’ ka no diyolo’. ²³ Om sanggarang-garang iyolo’, om santantag-tantag do pakayan diyolo’, om sontias-tias do pupuk. ²⁴ Om ponuhu’ noddi i boyoon do soudor do Rum do tulun do mangangat di Paulus do sumuwang do hiri’d kuta’ diri, om ouhot i’ kopio iyau mikuwo’d pillapasan do mongilo kopio ondung nokuro tu’ sampalak-palak kopio i tulun do Yohudi dot iyau o komoyon. ²⁵ Om kagasai noddi i Paulus do maan daa loposo’. Om boro-boros no i Paulus di soudor di poingkakat do hiri’d toning dau do poingkaa, ’’Koino-ino i’ tuu do loposon o rayat do Rum dot a’ po obutusan kopio?’’ ka dau. ²⁶ Om korongou noddi i soudor di boros di Paulus do miagal diri, om ongoi no iyau solowot di boyoon do soudor, om boro-boros no iyau dau do poingkaa, ’’Kukuroyon nu nondo iyau’ddi, do rayat i’ iyau do Rum?’’ ka dau. ²⁷ Om ongoi noddi i boyoon do soudor do hiri’d di Paulus, om boro-boros no do minonguhot dau do poingkaa, ’’Sunudai oku daa, ondung otopot kopio ko do rayat ko’d Rum?’’ ka dau. Om boros kad Paulus do suminimbar, ’’Otopot, rayat oku nogi’ kopio’d Rum,’’ ka dau. ²⁸ Boros ka di boyoon do soudor, ’’Iyoho’ nopo om amahal i’ o pinambayar ku do suminiliu’d rayat do Rum,’’ ka dau. Om boros kad Paulus do suminimbar, ’’Nga’ iyoho’ nopo om rayat mantad nod Rum tu’ rayat id Rum i molohing ku,’’ ka dau. ²⁹ Om olomus nopoddi i soudor di mongimuhot daa di Paulus do mininsodu’, om i boyoon do soudor nga’ moddosi diri do nokoilo do rayat do Rum i Paulus, tu’ nakagasan no dau iyau. ³⁰ Om sinuabon noddi, om lohowo’ no di boyoon do soudor i piro-piro o boyoon dot imam om i Gompomutus do Don Tugama’ do tumimung tu’ pokiilaan kopio dau ondung nunu o kapasalaan di tulun do Yohudi di Paulus. Om iduwo’ noddi i kogos di Paulus om ngoyo’ no iyau potimbabao’ diyolo’ ngai’.

¹ Om sonsodo’ no di Paulus i piro-piro tulun do gompomutus diri, om boro-boros no iyau diyolo’ do poingkaa, ’’Oi tobpinai-tobpinai ku, a’ i’ kasala’ o kopurimanan do ginawo ku do kowoyo-woyoo’ do koposion ku dot id toguang do Kinorohingan do gisom piya’d baino’,’’ ka dau. ² Nga’ ponuhu’ noddi i Ananias i Boyoon dot Agayo dot Imam, di tulun di poingkakat do hiri’d toning di Paulus do manapap do kabang di Paulus di minomoros i Paulus do miagal diri. ³ Om boro-boros noddi i Paulus di Boyoon dot Agayo dot imam, ’’Iya’ nga’ atantu’ nod tapapon id Kinorohingan, iya’ i minsorupai-rupai no toomod dot olidang. Om poirikau ko daa’d hiti do momutus doho’ do tumanud di Tourat, om inda’ ka do tuminolibamban ko i’ iya’ di Tourat diri tu’ minonuhu’ ko id tulun do minanapap doho’!’’ ka dau. ⁴ Om boros ka di piro-piro tulun dit id toning di Paulus dot id di Paulus, ’’Mongindaraat ko i’ pama di Boyoon dot Agayo dot Imam do Kinorohingan!’’ ka diyolo’. ⁵ Om boros kad Paulus do suminimbar, ’’O, om a’ oku i’ koilo oi tobpinai- tobpinai dot iyau i Boyoon dot Agayo dot Imam. Otopot i’ do haro o nokotulis dot id suang do Buuk do Kinorohingan do poingkaa, ’Kada’ pongindaraat di boyoon do bansa’ nu!’ ka,’’ ka di Paulus. ⁶ Om kokito noddi di Paulus do tulun do Saduki o wookon di gompomutus, om tulun do Parisi o wookon, om boro-boros noddi iyau diyolo’, ’’Oi tobpinai- tobpinai ku, iyoho’ nopo om tulun oku i’ do Parisi, om komolohingan ku nga’ tulun id Parisi. Om iri no it otumbayaan oku dot apasi kawagu i tulun do napatai o kopomisaraan doho’d hiti,’’ ka dau. ⁷ Om koboros poddi di Paulus o miagal diri, om timpuun noddi o pisongkiwalan dot id pialatan di tulun do Parisi om i tulun do Saduki, om kopibahagi’ noddi i piro-piro tulun di momumutus diri. ⁸ (Tu’ tulun nopod Saduki om a’ otumbayaan dot apasi kawagu o tulun di napatai, om a’ iyolo’ monongkuyaan do haro o moloikat om haro o rusod. Nga’ tulun nopod Parisi om otumbayaan i’ do haro ngai’ iri.) ⁹ Om inggayo noddi kopio i pisongkiwalan diri. Om haro’ddi o piro-piro tulun do Parisi di nosiliu do guru do Tourat do miningkakat om suminongkiwal kopio. Boros ka diyolo’, ’’Dahai nopod osorou om aiso’ i’ o tongokooro’ piya do kasalaan diti tulun diti. Tu’ haro nogi’ doti’ o rusod ko’ moloikat do minoro-boros dau!’’ ka diyolo’. ¹⁰ Nga’ mininggayo iddi kopio i pisongkiwalan diri, om suhuon’ noddi di boyoon do soudor i piro-piro soudor do suwai do mongoi popotongkiad di Paulus do mantad id pogialatan di tulun diri, om pokoyoon do hiri’d kuta’. Tu’ moddosi i boyoon do soudor do pogiuuhapan diyolo’d mamatai i Paulus. ¹¹ Om totuong noddi, om ingkakat no o Tuhan Yesus do hiri’d toning di Paulus, om boro-boros no dau do poingkaa, ’’Pogiroto’ no o ginawo nu! Tu’ mositi’ nod poposusui ko do pasal doho’ do hilo’d Rum do miagal di pinosusui nu do hiti’d Yorusalim,’’ ka dau. ¹² Om kosuabon noddi om pogiupakat no i tulun do Yohudi do mamatai di Paulus. Om sumpa’ no iyolo’ dot a’ makan om a’ minum dot a’ po diyolo’ apatai i Paulus. ¹³ Om lobi i’ dot apat nohopod o tulun di minogiupakat diri. ¹⁴ Om ongoi noddi iyolo’ solowot di piro-piro boyoon dot imam om i piro-piro boyoon do tulun do Yohudi. Om boro-boros no iyolo’ diyolo’ do poingkaa, ’’Nokosumpa’ ngai’ no iyahai dot a’ mangakan om a’ monginum do nunu nopo dot a’ po dahai apatai i Paulus. ¹⁵ Iyo nopoddi om mogipapakat kou no di Gompomutus do Don Tugama’ o monulis do surat do patahakon di boyoon do soudor do Rum do monuhu’ dau do papaatod di Paulus dot id dokoyu do miagal-agal dot orohian kawagu kou do monorisid kopio di hal dau. Om awangan nondo dahai do mamatai i Paulus dot a’ po iyau korikot do hiti,’’ ka diyolo’. ¹⁶ Om korongou noddi di tanak di tobpinai di Paulus do tondu’ i pakat diri. Om ongoi no iyau do hiri’d kuta’ do minongoi posunud di Paulus di pakat diri. ¹⁷ Om lohowo’ noddi di Paulus o songulun di pagawai do soudor om boro-boros no iyau dau, ’’Pootodo’ doho’ iti tanak diti do mongoi solowot di boyoon do soudor tu’ haro o poboroson dilo’ dau,’’ ka dau. ¹⁸ Om pootodo’ noddi di pagawai do soudor i tanak diri do hiri’d boyoon di soudor. Om boro-boros no i pagawai do soudor diri dot id boyoon do soudor, ’’Linohou oku di Paulus, i pointahan diri, do mongoi pomoyo’ diti tanak diti do mongoi solowot diya’, tu’ haro o poboroson dau dot id diya’,’’ ka dau. ¹⁹ Om ahako’ no di boyoon do soudor i tanak diri om angatai no dau dot iyolo-yolo’ do hiri’d sodu-odu’, om uhoto’ no dau iyau do poingkaa, ’’Nunu o poboroson nu doho’?’’ ka dau. ²⁰ Om boros ka di tanak do suminimbar, ’’Nokopogiupakat no i tulun do Yohudi do monuhu’ diya’ oi tuan do papaatod di Paulus do suab do ngoyon potimbabao’ kawagu di Gompomutus do Don Tugama’ do miagal-agal dot orohian kawagu iyolo’ do mongimuhot kopio dau. ²¹ Nga’ kada’ no kopio pohubayaai i pokionuon diyolo’ddi oi tuan, tu’ haro moti’ o poingawang do hilo’d ralan do lobi dot apat nohopod o tulun do nokosumpa’ no dot a’ po iyolo’ makan om a’ minum dot a’ po diyolo’ apatai i Paulus. Om posodia’ no moti’ iyolo’ddi, om magandad po iyolo’ dot isimbar nu,’’ ka di tanak diri. ²² Om boro-boros noddi i boyoon do soudor diri do poingkaa, ’’Kada’ pomisunud dot isai nopo do nokosunud nu iti dot id doho’,’’ ka dau. Om suhuon’ noddi dau i tanak diri do muli’. ²³ Om pomolohou noddi i boyoon do soudor do duwo o pagawai do soudor, om boro-boros no iyau dot id diyolo’ do poingkaa, ’’Posodiawon no o duwo nahatus o soudor om turu’ nohopod o soudor di sumakai’d kuda’ om duwo nahatus o soudor di migit do tandus om mongoi i’ do hilo’d Kaisaria do jam kosiam do totuong diti. ²⁴ Om posodia’ nogi’ do kuda’ do sakayon di Paulus, om woyoon no iyau kosonong-sonong do gisom do korikot do hilo’d di Gobunor Piliks,’’ ka dau. ²⁵ Om ponulis noddi i boyoon do soudor diri do surat do poingkaa o pinoboros, ²⁶ ’’Oi tuan Gobunor Piliks, poporikot oku do tabi’ dot id diya’, iyoho’ i Klaudius Lisias. ²⁷ Iti nopo tulun diti om tinangkap di tulun do Yohudi, om patayon no daa diyolo’ iyau. Om korongou ku noddi do rayat i’ iyau do Rum om pogiwoyo-woyo’ noddi iyahai di soudor do suwai do minongoi popoidu’ dau. ²⁸ Om woyoo’ ku noddi iyau do mongoi potimbaba’ di Gompomutus do Don Tugama’, tu’ mokiilo kopio oku ondung nunu o kinapasalaan diyolo’ dau. ²⁹ Om koilaai noddi kopio dot i pasal dit oturan do tugama’ diyolo’ o kinapasalaan diyolo’ dau. Om aiso’ iddi o kasalaan dau di nokointalang kopio do kopomohukuman dau do kapatayon ko’ kopogiilan dau. ³⁰ Om haro’ddi o minomisunud doho’ di pakat do tulun do Yohudi dot araat dot id dau. Om potilombusai ku nopoddi do monuhu’d tulun do papaatod dau dot id diya’ oi tuan Gobunor. Om suhuon’ ku noddi i tulun di papasala’ dau do mongoi timbaba’ diya’ do mongoi popoboros di pokisalasayan diyolo’, oi tuan,’’ ka. ³¹ Om wonsoyo’ noddi di piro-piro soudor i pinonuhuan diri. Om ngoyo’ no diyolo’ i Paulus om woyoo’ noddi diyolo’ iyau do kuminaa do hilo’d Antipatris do totuong iddi. ³² Om sinuabon noddi om suhuon’ no di piro-piro soudor i soudor di songinsakai’d kuda’ do minomoyo’ di Paulus. Om poguliai noddi di soudor di minamanau do gakod do hiri’d kuta’ do pogintirungan. ³³ Om korikot poddi i piro-piro soudor di songinsakai’d kuda’ diri do hilo’d Kaisaria, om ngoyo’ no diyolo’ patahako’ i surat diri dot id gobunor. Om ngoyo’ nogiddi diyolo’ pootodo’ i Paulus dot id dau. ³⁴ Om kabasa’ poddi di gobunor i surat diri, om uhoto’ no dau i Paulus ondung hinonggo kopio o pomogunan do tadon dau. Om koilaai noddi di gobunor do mantad i Paulus do hilo’d Kilikia. ³⁵ Om boro-boros no iyau do poingkaa, ’’Osonong ino! Sorisidon ku indo kopio o hal nu do korikot do hiti i tulun di papasala’ diya’,’’ ka dau. Om ponuhu’ noddi iyau do manahan di Paulus do hiri’d walai di Raja’ Horudis.

¹ Om limo noddi o tadau do mantad diri, om ongoi no do hilo’d Kaisaria i Ananias i Boyoon dot Agayo dot Imam om i piro-piro boyoon do tulun do Yohudi om songulun o luyar dot i Tortulus o ngaran. Om ongoi no iyolo’ timbaba’ di Gobunor Piliks om poboroso’ no diyolo’ i kapasalaan diyolo’ di Paulus. ² Om kolohou poddi i Tortulus do mongoi do hiri’d gulu om boro-boros no iyau do papasala’ di Paulus, ’’Oi tuan Gobunor! Osimbayan nopo o pomogunan dahai do porintaon nu. Om i koiloo’ do tuan do momorinta’ o nokoinsonong do bansa’ dahai. ³ Om kasanangan ngai’ nopo dahai iri, om mongunsikou kasai’ iyahai diya’, om a’ kopio dahai pagaan-gaanon iri. ⁴ Nga’ pokionuon ku po daa dot ongoruhai do mokinongou o tuan diti poboroson dahai dot oniba’. ⁵ Tu’ iti nopo tulun diti om noilaan dahai do mamagangau om sumiliu’d koligagaanan. Tu’ iyau no o minonimpuun do pogisasaapan do tulun do Yohudi do pointongkop diti pomogunan. Om iyau no o boyoon di pati’ do tulun do Nasarit. ⁶ Om minumbal daa iyau do minonosomu’ di Walai’d Sasambayangan dot Agayo, nga’ natangkap iddi dahai iyau. [Om osorou daa dahai do momisara’ dau do tumanud di Tourat dahai. ⁷ Nga’ ngoyo’ nogi’ di Lisias i boyoon do soudor ahawo’ i Paulus do mantad id dahai. ⁸ Om minonuhu’ iyau diti tulun di pinapasala’ di Paulus do mongoi timbaba’ diya’ oi tuan .] Ondung sorisidon do mongilo iti tulun diti oi tuan, om orongou nu indo o poboroson dau dot otopot ngai’ i pinoboros dahai dot id diya’ do pasal dau,’’ ka. ⁹ Om papasala’ ngai’ nopo di Paulus i tulun do Yohudi di hino’d hiri, om popotopot ngai’ di pinoboros di Tortulus. ¹⁰ Om bourai noddi di gobunor i Paulus do popoilo dau do koino-ino i’ iyau do moro-boros. Om boro-boros noddi i Paulus do poingkaa, ’’Nokoilo oku no do piro-piro no o toun do koloidon do tuan do nosiliu do gompomutus do hiti’d pomogunan diti. Om iri noddi o korohian ku’d popoboros dot id toguang do tuan dot a’ oku i’ apatut do hukuman. ¹¹ Om oilaan id tuan do hopod no om duwo o tadau do gisom dit ongoi oku sambayang do hilo’d Yorusalim. ¹² Om a’ i’ nokoumbal o tulun do Yohudi do nokokito doho’ do monokisongkiwal do tongosongulun piya ko’ mangangat pod tulun do tumimung do hilo’d Walai’d Sasambayangan dot Agayo ko’ hilo’ pod sasambayangan do suwai ko’ hilo’ pod bandar do mogihum do kopogisosongkiwalan. ¹³ Om a’ iddi iyolo’ milo do popointalang kopio do katapatan di pononondos diyolo’ doho’ dot id toguang nu oi tuan . ¹⁴ Om okunon ku no dot id toguang do tuan do sumambayang oku i’ dot id Kinorohingan di taki-aki dahai do tumanud di ponudukan di Yesus, i komoyon diyolo’ do kasala’. Nga’ otumbayaan kasai’ oku i’ ma do koinsanai di nongkotulis dot id suang di Tourat di Musa om id suang di piro-piro buuk do Nabi. ¹⁵ Om iyoho’ nga’ iyo i’ diyolo’ tu’ otumbayaan do posion kawagu’d Kinorohingan o koinsanai di tulun di napatai — dot i tulun dit ongosonong om i tulun dit angaraat! ¹⁶ Om iri no o kapanatasan ku kopio, om osonong i’ o kopurimanan do ginawo ku dot id toguang do Kinorohingan om id toguang dot oiyo ko’ tulun. ¹⁷ Om piro-piro poddi o toun ku dot a’ nokoongoi do hilo’d Yorusalim, om poguliai ku nogiddi kawagu do hilo’ do minongoi papaatod do tusin do ponulung di bansa’ ku, om mongoi papatahak do porsombahan di sumbolion dot id Kinorohingan. ¹⁸ Om tontok no di maso ku do momonsoi’ddi do nokito oku diyolo’ do hiri’d Walai’d Sasambayangan dot Agayo di nokopongo oku do momolidang do tinan ku do tumanud dit oturan do tugama’. Nga’ a’ i’ ogumu’ o tulun do hiri do maso’ddi, om aiso’ i’ o kagangahan do hiri. ¹⁹ suwai ko’ haro no o piro-piro tulun do Yohudi di mantad hilo’d Asia do poingamung doho’d hiri. Om ondung haro daa o kapasalaan diyolo’ doho’ om iyolo’ nogi’ daa ot apatut do mongoi timbaba’ do tuan do papasala’ doho’. ²⁰ Ko’ pologoson po iti tulun diti do popoboros di noilaan diyolo’ do karaaton ku do tontok di pinotimbaba’ oku di Gompomutus do Don Tugama’. ²¹ suwai ko’ iti no o boros di pinoboros ku dot id toguang di gompomutus. Boros kangku: Kapamadawahan nopo diyolo’ doho’ do baino’ om i monongkuyaan oku do posion kawagu i tulun di napatai,’’ kangku. ²² Om boro-boros noddi i Piliks do poingkaa, ’’Butusan ku nopo o hal diti om korikot i Lisias i boyoon do soudor,’’ ka dau. Tu’ i Piliks nga’ ogumu’ i’ o toilaan do ponudukan do pasal di Yesus. ²³ Om suhuon’ noddi di Piliks i piro-piro pagawai do soudor di moyo-woyo’ di Paulus do madtamong kasai’ di Paulus. Nga’ a’ i’ diyolo’ oduhan i tongotambalut di Paulus do mongoi papatahak dot id di Paulus di pokionuon dau. ²⁴ Om katalib poddi o piro-piro tadau do mantad diri, om rikot no i Piliks do mitanud di Drusila i sawo dau, i tulun do Yohudi. Om ponuhu’ noddi i Piliks do tulun do mongongoi kawagu di Paulus, om pokinongou nogiddi i Piliks do minonusui i Paulus do pasal do kotumbayaan dot id Kristus Yesus. ²⁵ Nga’ tontok di minomoros i Paulus do pasal dit otulid, om momusus do korohian do tinan om pasal do hukuman dot orikot o kopupuson diti pomogunan, om ooris diri i Piliks. Om boro-boros noddi iyau do poingkaa, ’’Koino-ino nod mamanau ko’ndo. Haro nopo o maso om lohowon tiya’ i’ kawagu,’’ ka dau. ²⁶ Om tayon-tayon no daa di Piliks dot onuan iyau di Paulus do tusin do ponisip dau. Om iri noddi o kosoruan dau do monuhu’d tulun do mongoi pangangat di Paulus do monokiboro-boros dau. ²⁷ Nga’ katalib poddi o duwo o toun do mantad diri om kosowoliai noddi i Piliks di Porkius Pistus do gobunor, om pologoso’ nopoddi di Piliks i Paulus do poinggiil tu’ poposonong iyau do ginawo di tulun do Yohudi.

¹ Om tolu noddi o tadau do gisom di kinorikatan di Pistus do hiri’d watas diri, om pamanau no iyau do mantad hilo’d Kaisaria do kuminaa do hilo’d Yorusalim. ² Om hilo’ nod pinorikot di piro-piro boyoon dot imam om i piro-piro boyoon do Yohudi dot id dau i pamadawa diyolo’ di Paulus. Om a’ nopo iyolo’ tumingkod do momolugu-lugut di Pistus, ³ om sumokodung indo iyau diyolo’, om monuhu’ nondo iyau do popoongoi di Paulus do hilo’d Yorusalim, tu’ nokopogiupakat no iyolo’ do mamatai di Paulus do hiri’d tanga’d ralan. ⁴ Nga’ boros kad Pistus do suminimbar, ’’I Paulus nopo om pointahan no do hilo’d Kaisaria. Om iyoho’ nga’ oruhai nod gumuli’ do hilo’. ⁵ Iyo nopoddi, om pologoson nopo i piro-piro boyoon dokoyu do tumanud doho’ do mongoi’d hilo’d Kaisaria om mongoi pamadawa dau ondung nokowonsoi kopio iyau’d sala’,’’ ka dau. ⁶ Om walu’ po doti’ ko’ hopod o tadau di Pistus do poundorong do hilo’d Yorusalim do mantad diri, om poguliai nogiddi dau do hilo’d Kaisaria. Om sinuabon noddi, om ongoi no iyau do hiri’d tiiyonon do momutus. Om ponuhu’ no iyau’d tulun do mongoi potimbaba’ diyolo’ di Paulus. ⁷ Om korikot noddi i Paulus, om tutukai nopo iyau di tulun do Yohudi di mantad hilo’d Yorusalim. Om timpuun no iyolo’d mimboros do monondos di Paulus do minomonsoi dit angaraat kopio. Nga’ a’ i’ iyolo’ milo kopio’d popointalang dot otopot i pononondos diyolo’ddi. ⁸ Nga’ boro-boros noddi i Paulus do pointalang dot aiso’ i’ o sala’ dau. Boros ka dau, ’’A’ oku i’ nokowonsoi’d ongoiso’ piya di kotolibamban di Tourat di Musa om a’ oku nakasala’ dot id Walai’d Sasambayangan dot Agayo, om a’ oku nokopomoros dot araat do sumaap di Kaisar do Rum,’’ ka dau. ⁹ Om monginsonong-sonong diri i Pistus do ginawo di tulun do Yohudi, om uhoto’ noddi dau i Paulus, ’’Kaakun ko i’ do mongoi do hilo’d Yorusalim, om bisaraon ku indod hilo’ ondung otopot kopio i pinonondos diyolo’ diya’?’’ ka dau. ¹⁰ Nga’ boros ka di Paulus do suminimbar, ’’Pokionuon ku no kopio dot i Kaisar o momisara’ diti hal ku. Om hilo’ no ot apatut do kopomutusan doho’. Tu’ oilaan id tuan dot a’ oku i’ nakasala’ dot id tulun do Yohudi. ¹¹ Ondung tuminolibamban oku dit oturan om nokowonsoi oku’d sala’ dit apatut do kopomohukuman doho’d kapatayon, om uhang ku i’ do patayon oku. Nga’ ondung aiso’ o katapatan di pononondos diyolo’ doho’, om aiso’ i’ o tongosongulun piya do milo’d papatahak doho’ dot id diyolo’. Tu’ pokionuon ku po dot i Kaisar o momisara’ doho’,’’ ka dau. ¹² Om koponokiboro-boros poddi i Pistus di piro-piro ponosihat dau, om boros kaddi dau do suminimbar, ’’Mokibisara’ ko nopo di Kaisar, om mongoi ko no timbaba’ di Kaisar,’’ ka dau. ¹³ Om a’ no alaid do mantad diri om korikot no i Raja’ Agripa om i Borniki do hilo’d Kaisaria do mongoi suwau di Pistus. ¹⁴ Om undorong noddi iyolo’ do hilo’d Kaisaria do piro-piro tadau, om posunudo’ noddi di Pistus i hal di Paulus dot id di Raja’ Agripa. Boros ka di Pistus, ’’Haro o songulun do pointahan do hiti do tinahan di Piliks. ¹⁵ Di nopo di hilo’ oku’d Yorusalim, om porikoto’ no di piro-piro boyoon dot imam om i piro-piro boyoon do tulun do Yohudi dot id doho’ i pamadawa diyolo’ do tulun diri. Om sinuhu’ oku daa diyolo’ do momohukum di tulun diri. ¹⁶ Nga’ simbaro’ ku nopo iyolo’ do tulun nopod Rum om a’ i’ oubas do momohukum di tulun di dawahon dot a’ po kopitimbaba’ i tulun di dawahon om i tulun di mamadawa dau. Om pologoson nogi’ i tulun di dawahon do sumimbar di mamadawa dau. ¹⁷ Om kotimung poddi iyolo’d hiti om a’ oku no minandad dot alaid, tu’ sinuabon poo om ongoi oku nod hiri’d tiiyonon do momutus om ponuhu’ oku noddi do mongoi potimbaba’ doho’ di tulun diri. ¹⁸ Om tontok di songingkakat i tulun di mamadawa dau, om aiso’ iddi o pinoboros kopio diyolo’ do kasalaan di tulun diri do miagal di nosorou ku’d poboroson diyolo’. ¹⁹ suwai ko’ iri no i mogisuwai-suwai o tosorou diyolo’ do pasal do tugama’ diyolo’, om pasal do songulun i roitan dot i Yesus. Iri nopo tulun diri om napatai no, nga’ posonsogon i’ di Paulus do poimpasi i tulun diri. ²⁰ Om a’ oku noddi koilo ondung poingkuro oku’d mongilo kopio ondung honggo’ddi ot otopot kopio do pasal diri, om uhoto’ ku noddi i Paulus ondung kaakun iyau do mongoi do hilo’d Yorusalim om bisaraon indo do hilo’. ²¹ Nga’ pangapil nogiddi i Paulus, om pokionuo’ no dau do pogiilon kasai’ nopo iyau do gisom do butusan iyau di Kaisar. Om ponuhu’ oku noddi do popogiil dau do gisom do haro o maso ku’d papaatod dau do hilo’d di Kaisar,’’ ka dau. ²² Om boro-boros noddi i Agripa di Pistus, ’’Iyoho’ nga’ sirongou i’ do poboroson dino tulun,’’ ka dau. Om boros kad Pistus do suminimbar, ’’Korongou ko i’ bo dau’d suab, oi tuan,’’ ka dau. ²³ Om sinuabon noddi om ongoi no i Raja’ Agripa om i Borniki do hiri’d bandar diri, om ogumu’ tomod o winonsoi di tulun do hiri do ponuwau diyolo’, om minoyo’ nogi’ di Raja’ Agripa om i Borniki i piro-piro boyoon do soudor om i tulun dit ongkipangkat do suminuang do hiri’d pomumutusan. Om ponuhu’ noddi i Pistus do tulun do minongoi paatod di Paulus do hiri. ²⁴ Om boro-boros noddi i Pistus, ’’Oi Raja’ Agripa om koinsanai’dti tulun do songintimung. Iti no i tulun di dinawa dot oinsanan o tulun do Yohudi di hilo’d Yorusalim om i hiti. Om sanggarang-garang iyolo’ do momoros dot a’ apatut do poimpasi iti tulun diti. ²⁵ Nga’ aiso’ i’ o noilaan ku dot ongoiso’ piya do nowonsoi dau di kasala’ do paantakan do momohukum dau do kapatayon. Nga’ iyau i’ o minokianu dot i Kaisar o momutus dau. Om pohubayaai ku nopoddi do pootodon iyau do hilo’d di Kaisar. ²⁶ Nga’ aiso’ poo o milo ku’d potulison dot id suang do surat ku do patahakon di Kaisar do pasal do tulun diti. Om iti noddi o kopotimbabaan ku dau dot id dokoyu ngai’ om okon-okon po om id di Raja’ Agripa. Om haro indo o potulison ku dot id surat ku, do katalib o pomisaraan diti. ²⁷ Tu’ osorou ku nopo om a’ i’ apatut do monuhu’d paatod do hilo’d di Kaisar do tulun di tinahan dot a’ poboroson o kasalaan dau,’’ ka di Pistus.

¹ Om boro-boros noddi i Agripa di Paulus, ’’Pabanaron ko id popoboros do diya’d poboroson,’’ ka dau. Om pobilido’ noddi di Paulus o longon dau om boro-boros no iyau do poingkaa, ² ’’Oi Raja’ Agripa! Osorou ku dot ountung oku no tu’ milo oku i’ do popoboros di doho’d poboroson dot id toguang do Raja’, do ponimbar ngai’ ku di pamadawa do tulun do Yohudi doho’. ³ Om kawagu nogi’ nga’ koilo i’ kopio o Raja’ do kaadat-adato’ om kosusaan do tulun do Yohudi. Om iri no o kopokionuan ku’d Raja’ do kaandad daa do mokinongou diti poboroson ku. ⁴ Ongkoilo ngai’ i’ o tulun do Yohudi do kowoyo-woyoon ku do mantad dit okoro’ oku po. Om koilo i’ iyolo’ do hilo’d Yorusalim o kinogoyoon ku do poinrolot di bansa’ ku do mantad dit okoro’ oku po. ⁵ Om alaid no iyolo’ do koilo doho’. Om ondung orohian daa iyolo’ do poposusui, om milo i’ iyolo’ do monusui do mantad po di gulu po om tulun oku nod Parisi om otorodok oku do tumanud dot oturan do tugama’ dahai dot iri ngai’ piya it angawagat kopio. ⁶ Om kopoingkakatan nopoddi doho’d hiti do baino’ om bisaraon dot it otumbayaan oku di batos do Kinorohingan di pinabatos dau dot id taki-aki dahai o kopomisaraan. ⁷ Om iri nogi’ i batos diri o soro-sorohon di hopod om duwo o payat dot Israil, om gisom diri do sumambayang iyolo’ dot id Kinorohingan do tadau om totuong. Om iri no it otumbayaan oku di batos diri o kapasalaan do tulun do Yohudi doho’, oi tuan Raja’. ⁸ Oi tobpinai-tobpinai, i tulun do Yohudi, nokuro tu’ a’ kou otumbayaan do posion kawagu’d Kinorohingan i tulun do napatai? ⁹ Iyoho’ nga’ nokopomusorou oku i’ di gulu po do mositi’ nod magayi-ayi’ oku do momonsoi’d nunu nopo do sumaap di Yesus, i mantad hilo’d Nasarit diri. ¹⁰ Om iyo noddi i winonsoi ku do hilo’d Yorusalim. Om ogumu’ o tulun dit otorodok dot id Kinorohingan do pinogiil ku di nakaanu oku do surat kuasa’ do mantad id piro-piro boyoon dot imam. Om iyoho’ nga’ nakaakun nogi’ do hukuman iyolo’d kapatayon. ¹¹ Om asaru’ oku nod monginggorit diyolo’ dot id piro-piro walai’d sasambayangan, do mononsog diyolo’ do magada’ di kinotumbayaan diyolo’. Om otogod oku no kopio diyolo’ gisom do pigusa-gusa’ ku nopo iyolo’ do mongoi ponginggorit do hilo’ piya’d kabandaran do suwai,’’ ka di Paulus. ¹² Om boros ka kawagu di Paulus, ’’Om iri nogi’ o kinaangayan ku do hilo’d Damsik, om kinopongigitan ku di surat kuasa’ do mantad id piro-piro boyoon dot imam. ¹³ Nga’ tontok di hilo’ oku’d tanga’d ralan, di pitangaadau no, om kokito oku nod tulinau do mantad hilo’d tawan dot anawau po ko’ ilo tadau do nokotitiu do hiri’d posorili’ doho’ om id posorili’ di tulun di manud-tanud doho’, oi tuan Raja’. ¹⁴ Om karatu’ ngai’ nopo iyahai do hiri’d tana’. Om korongou ku noddi do haro o moro-boros doho’ dot id suang do boros dot Ibrani do poingkaa, ’Oi Saulus, Saulus! Nokuro tu’ a’ ko tumingkod do monginggorit doho’? Orualan ko no motindo dot a’ ko no tumingkod do sumaap di ponuhuan di tuan nu,’ ka. ¹⁵ Om boro-boros oku nod poingkaa, ’Isai ko, oi tuan ?’ kangku. Om boros kad Tuhan do suminimbar, ’Iyoho’ no i Yesus it inggoriton nu. ¹⁶ Tungag no om mingkakat i’! Tu’ kinointalangan ku nopo dot id diya’dti om silihon ku iya’ do susuhuon ku. Om mositi’ nod posusuyon nu dot id tulun do suwai iti nokito nu baino’ do pasal doho’ om i pointalangon ku dot id diya’ do koimbagu. ¹⁷ Om poiduwon ku indo iya’ do mantad id tulun dot Israil om mantad id tulun dit okon ko’ Yohudi. Om suhuon tiya’ nondo do kumaa dot id diyolo’, ¹⁸ do mongoi popoungkalat do mato diyolo’, om koidu’ i’ iyolo’ do mantad id totuong om kosuang dot id tanawau, om koidu’ iyolo’ do mantad id porintaon do rogon, om Kinorohingan nondo o momorinta’ diyolo’. Om ongoompunan indo o dusa diyolo’ dot i kotumbayaan diyolo’ dot id doho’ o kaampun, om osiliu indo iyolo’d tulun di songonuon do Kinorohingan do poinsugku’ di tulun di nongopili’ do Kinorohingan,’ ka dau, ’’ ka di Paulus. ¹⁹ Om boros ka kawagu di Paulus, ’’Om ka pogiddi do tuminotos oku nod tuminanud di pinointalang do Kinorohingan dot id doho’ddi, oi Raja’ Agripa. ²⁰ Om posondoto’ ku nopoddi kopio do pinopotuduk dot id tulun do mositi’ nod rumologo iyolo’ di dusa diyolo’ om papatahak do tinan diyolo’ dot id Kinorohingan, om pointalangon nogindo diyolo’ o kowoyo-woyoon dot osonong do koilaan do nokorologo kopio iyolo’ di dusa diyolo’. Om hilo’ nod Damsik o nimpuun ku do potuduk do miagal diri, om hilo’ nogiddi’d Yorusalim om pointongkop do Yudia om id pogialatan do tulun dit okon ko’ Yohudi. ²¹ Om iri noddi o kinapanangkapan di tulun do Yohudi doho’ di hiri oku’d Walai’d Sasambayangan dot Agayo. Om pokipapatayan oku’ddi diyolo’. ²² Nga’ intirungan oku id Kinorohingan do gisom do baino’, om hiti oku poddi do poingkakat do poposusui di karaja’ ku dot id koinsanai’d tulun — dot i tulun dit ongkingaran-ngaran om i tulun dit aiso’ o ngaran-ngaran. Iti nopo poboroson ku’dti om iri no i nokoboros mantad di piro-piro nabi om i Musa; ²³ dot inggoriton nondo i Raja’ do Gampamasi di pinabatos do Kinorohingan om iyau no ot id gulu kopio posio’ do mantad id kapatayon; om milo indo iyau do popinsusui dot id tulun do Yohudi om id tulun dit okon ko’ Yohudi, do milo iyolo’d posion, om iri no o miagal do tanawau dot id diyolo’,’’ ka dau. ²⁴ Om maso pod Paulus do popoboros diri om pamagarang no i Pistus do minoro-boros do poingkaa, ’’Mulau ko indo oi Paulus! Ino i kogumuon do toilaan nu o nokoulau diya’!’’ ka dau. ²⁵ Nga’ boros kad Paulus do suminimbar, ’’A’ oku i’ mulau, oi tuan, suwai ko’ popoboros oku i’ do boros dit otopot om i mantad id pomusarahan di kopunong. ²⁶ Iya’ piya oi Raja’ Agripa nga’ koilo i’ do koinsanai’d hal diri. Om iti no o katama-tama’ ku do moro-boros kopio dot id toguang do tuan Raja’. Oilaan ku i’ kopio dot aiso’ o tongoiso’ piya do hal diri dot a’ do tuan Raja’ oilaan, tu’ koinsanai’ddi om okon i’ ko’ id kinoiyonon di poillisok do nosiliu. ²⁷ Otumbayaan ko i’ di pinoboros di piro-piro nabi, oi Raja’ Agripa? Osorou ku dot otumbayaan ko i’!’’ ka di Paulus. ²⁸ Om boro-boros no i Agripa di Paulus, ’’Ondos nu nopo daa om oruhai ko do posiliu doho’d tulun do Kristian?’’ ka dau. ²⁹ Om boros kad Paulus do suminimbar, ’’Mulong piya dot oruhai ko’ alaid o maso nga’ pokionuon ku i’ dot id Kinorohingan dot iya’ om koinsanai diti tulun do nokorongou doho’ do moro-boros do dinondo do koiyo ngai’ doho’ — nga’ a’ po daa’ndo akagasan do miagal diti,’’ ka dau. ³⁰ Om ingkakat noddi i raja’, om i gobunor om i Borniki om koinsanai di tulun do suwai. ³¹ Om kosoliwan poddi iyolo’, om pogiboro-boros no iyolo’, ’’Aiso’ i’ o tongoiso’ piya’d nowonsoi diti tulun diti do kopomohukuman dau do kapatayon ko’ kopogiilan po dau,’’ ka diyolo’. ³² Om boro-boros noddi i Agripa di Pistus do poingkaa, ’’Kosoliwan no bo daa iti tulun diti dot a’ daa iyau minangapil do mongoi pokibutus di Kaisar,’’ ka dau.

¹ Om katantu’ poddi do pokoyoon iyahai do hilo’d Italia, om patahako’ noddi diyolo’ i Paulus om i tulun do suwai di songinggiil dot id di Yulius, i boyoon do posukan do soudor di Kaisar. ² Om sakai noddi iyahai di kapal do rahat, i mantad hilo’d Adramitium, om woyo’ noddi iyahai di kapal diri, i nokosodia’ nod mamanau do mongoi dot id piro-piro podompiran do kapal do rahat dot id pomogunan dot Asia. Om i Aristarkus, i tulun do Makidunia, i mantad hilo’d Tosolunika nga’ suminakai nogi’ di kapal di sinakai dahai. ³ Om sinuabon noddi om korikot no iyahai do hilo’d Sidon. Om osonong tomod i Yulius dot id di Paulus, om pologoso’ noddi dau i Paulus do minongoi solowot di kongoombolutan di Paulus om oonuan i’ diyolo’ iyau di pokionuon dau. ⁴ Om pamanau noddi iyahai do mantad hiri do poinsakai di kapal do rahat. Om asasakan diri dahai i tongus, om susui noddi iyahai do tisan di pulou Siprus, tu’ a’ adalaan nod kasasak di tongus o hiri. ⁵ Om waya’ noddi iyahai do hiri’d rahat dit id hapak do Kilikia om Pampilia. Om korikot noddi iyahai do hilo’d Mira, i hilo’d pomogunan do Likia. ⁶ Om hilo’ no o kinokitanan di pagawai do soudor do kapal do mantad hilo’d Aliksandria do pakayaan do hilo’d Italia. Om suhuon’ noddi iyahai dau do mongoi sakai di kapal diri. ⁷ Om haro iddi o piro-piro tadau dot ogonoi no kopio i kapal do mamanau. Om alaid noddi om korikot iddi iyahai do hilo’d bandar do Knidus dot osusa’ piya kopio i pinamanahan dahai. Om a’ noddi iyahai milo do maya’ di ralan mantad tu’ opuhod kasai’ po i tongus. Om waya’ noddi iyahai do ponong id salatan di pulou do Krita, i kawaya’ do hilo’d Tanjung Salmoni, om a’ i’ oontok kopio di tongus. ⁸ Om osusa’ tomod iyahai do suminusui do hiri’d tisan di pulou’ddi. Om alaid noddi om korikot iddi iyahai do hiri’d iso’ o kinoiyonon di roitan do Podompiran dit Olumis, it osomok nod hilo’d bandar do Lasia. ⁹ Om tontok nopoddi om nakatalib no o Tadau dot Agayo di Kopongompunan do Dusa di ramayon do tulun do Yohudi. Om alaid kopio iyahai, gisom do norikot noddi i maso di haro o koligagaanan do mamanau. Om boro-boros noddi i Paulus do minonosihat diyolo’, ¹⁰ ’’Oi tobpinai-tobpinai, osorou ku dot agayo kopio moti’ o koligagaanan do lumombus toko’ nod mamanau. Tu’ ondung lumombus toko’dti, om okon nopo ko’ iti no suang diti kapal om iti kapal ot araag, nga’ iyati’ piya nga’ apatai i’!’’ ka dau. ¹¹ Nga’ a’ i’ monongkuyaan i pagawai do soudor di boros di Paulus, tu’ monongkuyaan nogi’ iyau di boros di papamanau di kapal om i boyoon di kapal. ¹² Om kawagu po nga’ a’ osonong o kapal do poindampir do hiri’d podompiran diri do tontok do maso’d osogit. Om iri no o kinokuwaan do kogumuan no di tulun di songingkaraja’ do hiri’d kapal dot orohian do lumombus do mamanau om kotongkiad i’ di podompiran diri, tu’ mokiririkot iyolo’ do hilo’d Piniks, om hilo’ indo o tundorongon diyolo’ do solinaid di maso dot osogit. Piniks nopo om pododompiran do kapal do rahat do hilo’d Krita di potimbaba’ do ponong id salatan do ponong id kotonobon om potimbaba’ do ponong id utara do ponong id kotonobon. ¹³ Om tontok nopoddi om a’ i’ opuhod no i ribut do mantad id salatan. Om osorou nopo di songingkaraja’ do hiri’d kapal nga’ milo no iyolo’d lumombus kawagu do mamanau. Om gayato’ noddi diyolo’ i basi’ di pinomolimbagat di kapal, om pamanau nod suminusui di tisan di pulou do Krita. ¹⁴ Nga’ a’ po alaid do mantad diri, om rikot no o tongus dot opuhod kopio — i tongus do roitan do Tongus dot Utara do ponong id Koulayon — do mantad hiri’d pulou, ¹⁵ om koontok noddi i kapal di sinakai dahai. Om a’ noddi kasasak di tongus i kapal om pologoso’ nopoddi dahai i kapal do rumulun do kowoyo’ di tongus. ¹⁶ Om a’ daa’ddi iyahai noontok kopio di tongus di nakawaya’ iyahai do ponong id salatan di pulou Kauda dit okooro’. Om hilo’ no dot osusa’ tomod iyahai do minanganu di parau’ di kapal dahai. ¹⁷ Om kasakai poddi i parau’ di kapal, om koruto’ nod tali i parau’ do pomogirot di kapal. Om poinsiribao’ no i layar di kapal tu’ ooris do kosorod do hiri’d togis dit aralom di hilo’d Sirtis, om pologoso’ nopoddi i kapal do kowoyo’ di tongus. ¹⁸ Om a’ nopoddi tumingkod i tongus dot opuhod om popintaamo’ noddi do hiri’d rahat i suang di kapal di sinuabon. ¹⁹ Om tadau noddi kawagu om popintaamo’ no di songingkaraja’ do hiri’d kapal do hiri’d rahat i piro-piro pakakas di kapal. ²⁰ Om otuong nopoddi o kokitanan diti pomogunan do piro-piro tadau, tu’ a’ nopo okito o tulinau do tadau, om a’ okito o rombituon, om a’ tumingkod o tongus dot opuhod do koontok di kapal di sinakai dahai. Om a’ noddi dahai osorou dot apasi po iyahai. ²¹ Om haro noddi o piro-piro tadau dot a’ makan i tulun do hiri. Om ongoi noddi i Paulus ingkakat dot id pogialatan diyolo’, om boro-boros no iyau do poingkaa, ’’Ondung tuminanud kou daa di boros ku’ddi oi tobpinai-tobpinai, om a’ daa luminombus do minamanau do mantad hilo’d Krita, om a’ i’ daa araag iti kapal om a’ haro ot orubat. ²² Nga’ baino’ piya nga’ suhuon ku i’ iyokoyu do popogirot do ginawo. Tu’ aiso’ i’ ot apatai dot ongoiso’ piya o tulun dot id pogialatan dokoyu, oi tobpinai-tobpinai; suwai ko’ iti no kapal ot araag. ²³ Tu’ di nopo kosodop om ruminikot dot id doho’ i moloikat di mantad id Kinorohingan di tukuon ku om i sanganu doho’. ²⁴ Om minoro-boros i moloikat diri dot id doho’ do poingkaa, ’Oi Paulus, kada’ kooris! Tu’ kotimbaba’ kasai’ ko i’ di Kaisar. Om angapasi ngai’ i’ ilo tulun di poinsugku’ diya’ do hiti’d kapal tu’ osianan i’ o Kinorohingan diya’,’ ka. ²⁵ Iyo nopoddi, oi tobpinai-tobpinai, om pogiroto’ no dokoyu o ginawo dokoyu! Tu’ otumbayaan oku id Kinorohingan dot owonsoi ngai’ indo o miagal di pinoboros dau dot id doho’. ²⁶ Nga’ koimpit toko’ nondo dot id tisan dot iso’ o pulou,’’ ka dau. ²⁷ Om korikot noddi i totuong do kohopod om apat do mimboriud nopo iyahai dot orulun do hiri’d Rahat do Tanga’. Om maha’ di pitangatuong no matuu’ddi om kopurimanai no di tulun di songingkaraja’ do hiri’d kapal do miririkot dot id katanaan i kapal. ²⁸ Om porongulu noddi iyolo’d tali do hiri’d rahat do pinakagasan do watu do ponipong diyolo’ ondung songkuro po o korolomo’ di rahat. Om koilaai noddi diyolo’ dot oruhai nod apat nohopod o mito do korolomo’ di rahat. Om a’ po alaid do mantad diri, om tipongo’ no diyolo’ kawagu, om oruhai nod tolu nohopod o mito do korolomo’ di rahat do hiri. ²⁹ Om polintuhuno’ noddi diyolo’ ot apat di basi’ do pomolimbagat di kapal do mantad ponong id tohuri, tu’ ooris iyolo’ do kosorod do watu i kapal. Om orohian nopo daa’ddi iyahai dot oruhai’d osuab. ³⁰ Nga’ lumisok-lisok i’ daa i tulun di songingkaraja’ do hiri’d kapal do mogidu’ do mantad hiri’d kapal. Om pouluho’ no diyolo’ i parau’ do pinopolintuhun do hiri’d rahat, do miagal-agal do popoulu di basi’ di pomolimbagat di kapal di ponong id gulu. ³¹ Nga’ boro-boros noddi i Paulus di pagawai do soudor om i piro-piro soudor do suwai, ’’Ondung mogidu’ do mantad hiti’d kapal ilo tulun dilo songingkaraja’ do hiti’d kapal, om angapatai ngai’ kou no, oi tobpinai- tobpinai,’’ ka dau. ³² Om rantaso’ noddi di piro-piro soudor i tali di pinongogos di parau’ddi om korulun no i parau’. ³³ Om pangangat noddi i Paulus diyolo’ do makan di motingkosuab no. Om boro-boros no i Paulus diyolo’, ’’Hopod noddi om apat o tadau dot a’ kou minakan do magandad kou dot otingkod iti kosusaan. ³⁴ Nga’ mangangat oku dokoyu’d makan dot ongokooro’, om okoris kou i’ kawagu. Tu’ angapasi ngai’ kou indo om a’ kou i’ okurai-kurayan,’’ ka dau. ³⁵ Om koboros poddi di Paulus o miagal diri, om anu no iyau di roti om sambayang no iyau do minongunsikou’d Tuhan dot id toguang diyolo’. Om potikido’ no dau i roti om akan noddi iyolo’. ³⁶ Om ongosonong-sonong nogiddi o topurimanan diyolo’ om torungak ngai’ nogiddi iyolo’ do minakan. ³⁷ Kogumuon’ nopo di tulun do hiri’d kapal diri om duwo nahatus om turu’ nohopod om onom o tulun. ³⁸ Om kangaakan poddi ngai’ iyolo’ do gisom do nongoiyahan, om popintaamo’ nogiddi diyolo’ do hiri’d rahat i gandum di poinsuang di kapal do monginggaan-gaan di kapal. ³⁹ Om anawau poddi, om kokito no di tulun di songingkaraja’ do hiri’d kapal o katanaan, nga’ a’ diyolo’ oilaan ondung nunu o ngaran di kinoiyonon diri. Om kokito no diyolo’ o suwok om i tisan di suwok, om osorou’ddi diyolo’ do podompiron i kapal do hiri do milo noo. ⁴⁰ Om rantaso’ ngai’ nopo diyolo’ i tali di pinongogos di pinomolimbagat, om pologoso’ nopoddi i pinomolimbagat do nolonsod do hiri’d rahat. Om iyado’ diyolo’ i tali di pinongogos di komudi’, om ungkalado’ no diyolo’ i layar di ponong id gulu di kapal om kowoyo’ i’ di ribut i kapal do koimpit do ponong id tisan. ⁴¹ Nga’ kosorod nogi’ i kapal do hiri’d pasir. Om kasangat noddi i ponong id gulu om a’ nopoddi koinsud, om iri no i ponong id tohuri om karaag nopo do noontok di tumbak dit opuhod tomod. ⁴² Om pokipapatayan daa’ddi di piro-piro soudor i tulun di mantad id giil, tu’ moddosi iyolo’ do kumaau ngai’ i tulun diri om kotindal nopondo om mogidu’ nondo iyolo’. ⁴³ Nga’ oduhai noddi di pagawai di soudor i piro-piro soudor do momonsoi do miagal diri, tu’ orohian iyau dot apasi i Paulus. Om suhuon’ ngai’ noddi dau i tulun di koilo’d kumaau do mogulu’d kumaau do mongoi do hiri’d tisan. ⁴⁴ Om iri wokon nga’ sumusuhut nogindo do kumabai do papan ko’ i kinaraagan di kapal. Om iyo noddi o winonsoi dahai do gisom dot ongosonong ngai’ iyahai do nokorikot do hiri’d tindal.

¹ Om kotindal ngai’ poddi iyahai, om koilaai nogiddi dahai do Malta o ngaran di pulou’ddi. ² Iri nopo tulun do hiri om ongosuwau i’ kopio dahai, om tulungo’ no iyahai diyolo’. Om podsiduwai no iyahai diyolo’, tu’ tumimpuun nod rumasam om osogit diri kopio. ³ Om ongoi noddi i Paulus ponimung do kayu, om poudungo’ no dau i kayu’ddi do hiri’d tapui. Om daamot pod Paulus do mogudung om urilai no o tiso’ o tulanut do nouhub di tapui, om tinduko’ no o longon di Paulus. ⁴ Om di nopoddi nokito di tulun do hiri’d pulou’ddi do pointaid i tulanut do hiri’d longon di Paulus, om pogiboro-boros no iyolo’, ’’Tulun no kopio iyau do gampamatai, tu’ mulong piya do nokoidu’ no iyau do mantad id koligagaanan do hilo’d rahat nga’ a’ i’ di ponokokinorohingan di roitan dot Otulid pologoson do poimpasi iyau,’’ ka diyolo’. ⁵ Nga’ tantago’ noddi di Paulus i tulanut diri do hiri’d tapui om aiso’ i’ o toruol dot opurimanan dau. ⁶ Nga’ ondos nopo daa diyolo’ om lumonit nondo i longon di Paulus ko’ sigog nopo om humunduk no iyau do matai. Om alaid noddi iyolo’d poingandad nga’ aiso’ iddi o nunu-nunu do nosiliu dot id di Paulus. Om kosuwai noddi o tosorou diyolo’, om pomoros no iyolo’ dot i Paulus nopo om ponokokinorohingan i’. ⁷ Hiri nopod somok do kinoiyonon diri om haro o tana’ dot i Publius o sanganu, i boyoon do pagawai do hiri’d pulou’ddi. Om osonong kopio o ginawo dau do pinapasalakoi dahai om tolu diri o tadau do koloido’ dahai do poundorong do hiri’d dau. ⁸ Tontok nopoddi om sumakit i tapa’ dau do sogiton om oruak o nakan. Om ongoi noddi i Paulus ontong di tapa’ di Publius di sumakit diri, om sambayang no iyau om sukabayai no dau iyau. Om kolingasai noddi iyau. ⁹ Om kosiliu poddi o miagal diri om rikot noddi dot id di Paulus o koinsanai di tulun di sumakit do hiri’d pulou’ddi. Om kolingasai ngai’ nopoddi iyolo’. ¹⁰ Om ogumu’ddi o pinatahak-tahak diyolo’ dahai, om pootodo’ noddi diyolo’ do hiri’d kapal di minamanau iyahai o koinsanai di gunaon dahai dot id tindalanon. ¹¹ Om tolu poddi o tulan do koloido’ dahai do poundorong do hiri’d pulou’ddi, om pamanau nogiddi iyahai do mantad hiri do suminakai’d kapal do rahat di mantad hilo’d Aliksandria, i poindampir do hiri’d pulou’ddi do solinaid di maso dot osogit. Ngaran nopoddi kapal diri om, ’’Ponokokinorohingan di Miapid, i Kastur om i Poluks.’’ ¹² Om dampir no iyahai do hiri’d bandar do Sirakusa om tolu o tadau dahai do poundorong do hiri. ¹³ Om mantad nod hilo’ om pamanau no iyahau kawagu do suminusui di tisan do rahat do gisom do nokorikot iyahai do hilo’d bandar do Rigium. Om rikot po o tongus do mantad id salatan di sinuabon, om duwo poddi o tadau dahai’d manau-panau, om korikot no iyahai do hilo’d bandar do Putiyoli. ¹⁴ Om hilo’ nod nokosolowot iyahai do piro-piro tulun di notumbayaan di Yesus. Om angatai noddi iyahai diyolo’ do minundorong do hilo’ do solinaid do sominggu’. Om lombus nogiddi iyahai do kuminaa do hilo’d Rum. ¹⁵ Om korongou noddi i tulun do Rum di notumbayaan di Yesus do habar dahai, om ongoi noddi iyolo’ do hiri’d pasar di roitan do Pasar dot Apius om hiri’d walai di roitan do Tolu o Walai’d Sisiwaan do minongoi ruba’ dahai. Om pongunsikou noddi i Paulus do Kinorohingan do mikuwo’d nokogirot o ginawo dau di nokosolowot iyau diyolo’. ¹⁶ Om tontok di nokorikot iyahai do hilo’d Rum, om pologoso’ noddi i Paulus dot iso-iso’, nga’ tinamangan i’ iyau do songulun o soudor. ¹⁷ Om tolu noddi o tadau do mantad diri, om pomolohou no i Paulus di piro-piro boyoon do tulun do Yohudi di poundorong do hilo’. Om kotimung poddi iyolo’, om boro-boros no i Paulus, ’’Oi tobpinai-tobpinai! Tinangkap oku do hilo’d Yorusalim om pinatahak oku dot id tulun do Rum do mulong piya dot aiso’ o nowonsoi ku di kasala’ dot id bansa’ toko’ om a’ oku tuminolibamban di tadat di koubasanan di notungkusan toko’ do mantad id taki-aki toko’. ¹⁸ Om kosorisid poddi kopio diyolo’ i hal ku om aiso’ iddi o tiso’ po do noilaan diyolo’ do kasalaan ku dit apatut do kopomohukuman doho’ do kapatayon, om poiduwo oku i’ daa’ddi diyolo’. ¹⁹ Nga’ a’ ngai’ nopo mangakun i tulun do Yohudi, om kasansagai oku noddi do mangapil do mokibisara’ di Kaisar do Rum, dot a’ oku piya papasala’ do bansa’ ku. ²⁰ Om iri no o kinapamalahawan ku dokoyu, om koponokiboro-boros oku i’ dokoyu, tu’ iri no i Gampamasi dit andad-andadon do bansa’ dot Israil o kinapangagasan doho’d rantai,’’ ka dau. ²¹ Om boros kaddi diyolo’, ’’Aiso’ i’ o surat do naramit dahai do mantad hilo’d Yudia do pasal diya’. Om aiso’ nogi’ o tongosongulun piya do mantad hilo’d Yudia do nokorikot do hiti do minonusui do pasal diya’ ko’ popoboros do kasalaan nu. ²² Nga’ orohian nogi’ iyahai do mokinongou do pasal do kinotumbayaan nu, tu’ nokorongou ngai’ no iyahai do pasalaon do tulun i ponudukan di tinanud nu,’’ ka diyolo’. ²³ Om tontuo’ noddi diyolo’ om i Paulus ot insan o tadau do kopogititimungan diyolo’. Om rikot noddi o tulun dot ogumu’ do hiri’d niyonon di Paulus do tontok diri. Om posusuyo’ noddi di Paulus dot id diyolo’ o habar do pasal do Pomorintaan do Kinorohingan. Om umbal noddi i Paulus do monotos do mangangat diyolo’ dot otumbayaan di Yesus dot it ayat di nongkotulis dot id suang di Tourat di Musa om id suang di piro-piro buuk do Nabi o pinoimpahan dau do mangangat diyolo’. Om kasadapai nopo i Paulus do minonusui’ddi. ²⁴ Om haro’ddi o piro-piro diyolo’ do notumbayaan di boros dau, nga iri nopo tulun do suwai om a’ i’ notumbayaan. ²⁵ Om mogisuwai-suwai nopoddi o tosorou diyolo’. Om tongkiad noddi iyolo’ do mantad hiri do nokoboros di Paulus dot id diyolo’ o poingkaa, ’’Otopot no i nokoboros do Rusod do Kinorohingan di pinolombus di Nabi Yosaya, dot id taki-aki dokoyu do poingkaa, ²⁶ Boros kad Kinorohingan, ’Ongoi no do hilo’d bansa’dti om poboroson no iti: Mokinongou kou i’ daa kopio, nga’ a’ kou i’ kosuhut; om poingontong kou i’ nga’ a’ kou i’ koilo ondung nunu kopio it osiliu. ²⁷ Tu’ iti nopo bansa’dti om nokokodou no o ginawo, om tolingo nga’ nobosuk om mato nga’ pinoungkodom. Iyo noddi o nosiliu, om a’ indo kokito o mato diyolo’. om a’ korongou o tolingo diyolo’, om a’ kosuhut o pomusarahan diyolo’, om a’ indo iyolo’ gumuli’ dot id doho’, om a’ ku iyolo’ olingasan,’ ka,’’ ka di Paulus. ²⁸ Om pomoros poddi kawagu i Paulus do poingkaa, ’’Ilaai no dokoyu, oi tobpinai-tobpinai, dot iri nopo habar do pasal do koposion do mantad id Kinorohingan om nokosusui no dot id tulun dit okon ko’ Yohudi. Om tumanud indo iyolo’ddi!’’ ka dau. ²⁹ [Om koboros poddi di Paulus iri, om tongkiad no i tulun do Yohudi do mantad hiri’d kinoiyonon diri om pogisosongkiwal no iyolo’.] ³⁰ Om duwo diri o toun di Paulus do poundorong do hiri’d walai di siniwaan dau do hilo’d Rum. Om posolokoyon ngai’ nopo dau i tulun di mongoi pogkorumo dau. ³¹ Om poboroson nopo dau dot id diyolo’ o pasal do Pomorintaan do Kinorohingan, om pasal di Tuhan Yesus Kristus. Om a’ i’ iyau ooris do poposusui’ddi. Om osimbayan nopo i Paulus do momonsoi’d miagal diri om aiso’ i’ o kaantob dau.