2 TIMOTIUS

2 TIMOTIUS

¹ - ² Oi Timotius, i tanak ku di kosianan ku! Tulison ku, iyoho’ i Paulus, iti surat diti do patahakon ku diya’, om mogondos oku dot onuan ko’d Kinorohingan i Tapa’ toko’ i Yesus Kristus do barakat, om kosianan om kosimbayanan do ginawo. Mantad i’ do korohian do Kinorohingan do siniliu oku do rasul di Kristus Yesus om sinuhu’ do mongoi popinsusui di koposion di pinabatos do Kinorohingan. Om aanu toko’ i’ i koposion diri tu’ nokoiso’ toko’ no dot id Kristus Yesus. ³ Mongunsikou oku do Kinorohingan, i pogobi-obian ku do mikuwo’d osonong o kopurimanan do ginawo, do miagal di winonsoi di taki-aki ku di gulu po. Om mongunsikou kasai’ oku nopo dot id Kinorohingan do pointikid-tikid dot osorou ku iya’ dot id suang do sambayang ku, do dangadau om dongotuong. ⁴ Osorou ku i’ i katangaban nu. Om iri noddi o korohian kopio ku daa do kosolowot diya’ om otood oku indo kopio. ⁵ Osorou ku i’ i kotumbayaan nu dit ogirot kopio dot id Kristus, do miagal di kotumbayaan di Lois i todu’ nu, om i Yuniki, i tina’ nu. Om monongkuyaan oku i’ kopio dot iya’ nga’ iyo iddi o kotumbayaan. ⁶ Om iri no o kapasarahan ku diya’ do tumilombus do mamakai di nipuhawang di nakatahak do Kinorohingan dot id diya’ do tontok di sinukabayan ku iya’. ⁷ Tu’ iri nopo Rusod do Kinorohingan di pinatahak dot id dati’, om okon i’ ko’ Rusod di popooris dati’. Suwai ko’ iri nopo Rusod do Kinorohingan diri om popokoris dati’, om momonu’ dati’ do kosianan om gisom do milo toko’d momusus do korohian toko’ di don tinan. ⁸ Iyo nopoddi, om kada’ kotingayamai do popinsusui do pasal di Tuhan toko’, om kada’ kotingayamai doho’, i nokogiil do Kristus o nokogiilan. Suwai ko’ hompit nogi’ iya’ dot oinggorit dot i Habar dot Osonong diri o koinggoritan, dot i kokorisan do mantad id Kinorohingan o popokoris diya’ do humompit diri. ⁹ Pinasi toko’d Kinorohingan om linohou toko’ do sumiliu’d tulun di songonuon dau. Om kinapamansayan nopo dau do miagal diri om okon i’ ko’ i winonsoi toko’ o pinoimpahan, suwai ko’ i natantu’ mantad dau do wonsoyon dau om i kosianan dau o pinoimpahan. Ninsianan toko’ i’ dau dot i Kristus Yesus o nosianan dit a’ po nowonsoi iti pomogunan. ¹⁰ Om baino’ noddi, om nokointalang nod Kinorohingan o kosianan dau dot id dati’ tu’ nokorikot no i Raja’ do Gampamasi dati’, iri no i Kristus Yesus. Om naala’ no di Yesus i kuasa’ do kapatayon om minongigit iyau di koposion di poingompus do pinawaya’ di Habar dot Osonong diri. ¹¹ Om kinopomilian nopod Kinorohingan doho’ do sumiliu’d rasul om gomponuduk, nga’ popinsusui di Habar dot Osonong. ¹² Om iri no o kokuwaan dot oinggorit oku, dot iri ngai’ o koinggorit doho’, nga’ ogirot kasai’ i’ o ginawo ku, tu’ oilaan ku i’ kopio ondung isai i kinotumbayaan ku. Oilaan ku i’ kopio dot iri nopo i pinaharapan dau doho’, om milo i’ dau do gompion do gisom dot orikot o Tadau do Kopupuson diti Pomogunan. ¹³ Tonudon no kopio i ponudukan dit otopot di pinotuduk ku diya’. Om gumirot no kopio dot id kotumbayaan om kosianan, i nosiliu do dati’d songonuon tu’ nokoiso’ toko’ no dot id Kristus Yesus. ¹⁴ Gompion no kopio kosonong-sonong o koinsanai di kiguna’ kopio di pinaharapan diya’, do mikuwo’d uhupan di Rusod do Kinorohingan, it id suang toko’. ¹⁵ Oilaan nu i’ do nokotongkiad ngai’ no doho’ i tulun do mantad id pomogunan dot Asia, om nokohompit nogi’ i Pigolus om i Hirmoginis. ¹⁶ Nga’ iri nopo sompiiyon di Onisiporus om a’ no impiro-piro do pinopotood do ginawo ku. Om maha’ daa om orohian o Tuhan do pointalang do kosianan dau dot id diyolo’. Mulong piya do poinggiil oku, nga’ a’ i’ i Onisiporus otingayaman diti koiyon-iyono’ ku. ¹⁷ Tu’ korikot nopo iyau do hilo’d Rum, om tilombus nopo iyau do minogihum doho’ do gisom do nokosolowot iyau doho’. ¹⁸ Om oilaan nu i’ dot asaru’ tomod iyau do monulung doho’ di hilo’ oku’d Iposus. Om maha’ daa do pointalangan iyau’d Tuhan do kosianan do tontok di tadau do butusan do Tuhan o koinsanai’d tulun.

¹ Oi Timotius, i tanak ku! Kumoris no dot i kosianan do nakatahak dot id dati’ o kokoris, tu’ nokoiso’ toko’ no dot id Kristus Yesus. ² Iri nopo ponudukan ku di norongou nu di gulu po dot id toguang do tulun dot ogumu’, om potudukon no dot id tulun di milo’d ponongkuyaanan om i milo do monuduk do tulun do suwai. ³ Iya’ nga’ mositi’ i’ do tumonggoi dot oinggorit do miagal do soudor do Kristus dit otorodok. ⁴ Iri nopo soudor di maso do kumaraja’, om a’ i’ minggangau do momonsoi di dau’d karaja’, tu’ orohian i’ iyau do poposonong do ginawo di boyoon dau. ⁵ Om iri tulun di mamain nga’ a’ i’ kamanang dot id nunu nopo o pomoinan ondung a’ no iyau tumanud di toturan. ⁶ Iri no gompongumo di noudipon do minorobuat ot apatut dot id gulu panganu do tua’ di tanom dau. ⁷ Sorohon no om ilaan no o komoyon di pinoboros ku’ddi, tu’ onuan ko indod Tuhan do toilaan do mongilo do komoyon do koinsanai’ddi. ⁸ Soroho’ noti: Iri nopo Habar dot Osonong di popinsusuyon ku’ddi om habar do pasal di Yesus Kristus, i sinakagon di Daud; iyau no i Kristus i napasi kawagu do mantad id kapatayon. ⁹ Koinggori-goritan ku nopo om iri i popinsusui oku di Habar dot Osonong; om gisom dot akagasan oku do rantai do miagal do tulun dit araat. Nga’ boros nopod Kinorohingan om a’ i’ milo do kagasan. ¹⁰ Iri no o kalanu-lanut do ginawo ku do tumanggung do koinsanai’ddi do maan do koinsanangan do koinsanai’d tulun di nongopili’ do Kinorohingan, om kaanu i’ iyolo’ do koposion di patahakon di Kristus Yesus dot id diyolo’, do mitonggoi do kagayaan dit aiso’ o kopupuson. ¹¹ Otopot no kopio iti boros do poingkaa, ’’Ondung nokotonggoi toko’ dau do napatai, om kotonggoi toko’ no dau dot apasi. ¹² Ondung alanut o ginawo toko’, om kopomorinta’ toko’ i’ do kowoyo’ dau. Ondung mogolim toko’ do kotutun toko’ dau, om iyau nga’ mogolim nondo do kotutun iyau dati’. ¹³ Ondung a’ toko’ otorodok, om otorodok i’ kasai’ iyau, tu’ a’ i’ iyau milo do sumansala’ di dau mantad do kowoyo-woyoo’,’’ ka. ¹⁴ Posorohon ngai’ no o tulun do koinsanai’dti. Om nosihatan no iyolo’ dot id toguang do Kinorohingan, dot a’ mogisongkiwal do boros nod pomungaran o kopogisosongkiwalan. Aiso’ i’ o guna’ddi, tu’ momorulong nod tulun di korongou. ¹⁵ Tumotos no kopio do minsimparu’ do kumaraja’ om okunon ko i’ do Kinorohingan do tulun dit osorupai kopio do momonsoi di karaja’ dau. Minsimparu’ no om a’ ko’ i’ otingayaman dino karaja’ nu, om koontok o ponunuduk nu di ponudukan dit otopot do mantad id Kinorohingan. ¹⁶ Insodu’ no do mantad id boboroson dit aiso’ o suang om i mongindaraat do Kinorohingan. Boboroson nopo do miagal diri om popoinsodu’ nogi’ kopio’d tulun dot id Kinorohingan. ¹⁷ Ponudukan nopod tulun do miagal diri om iyo pod gandas dit a’ lumingos. Om id pogialatan nopo di piro-piro o gomponuduk diri om i Himonius om i Pilotus. ¹⁸ Nokotongkiad no iyolo’ do mantad id ponudukan dit otopot, om minomorulong iyolo’d kotumbayaan do piro-piro o tulun. Momoros iyolo’ do nakatalib no i maso dot apasi kawagu do mantad id kapatayon. ¹⁹ Nga’ a’ i’ milo do guyuon i pinoimpahan dit ogirot do winonsoi’d Kinorohingan. Om notulisan no i pinoimpahan diri do poingkaa, ’’Otutunan i’ do Tuhan i tulun di dau’d songonuon,’’ ka, om, ’’Iri nopo tulun di nasanganu dau, om mositi’ no do tumingkod do momonsoi di kasala’,’’ ka. ²⁰ Id suang nopod walai dit agayo om mogisuayan o piring om tompurung. Haro i’ o pirok ko’ tamas do winonsoi, nga’ haro i’ i kayu ko’ tana’ do winonsoi. Haro i’ i pakayon do tontok no di tadau’d agayo om haro i pakayon do maan di koubasanan no toomod. ²¹ Iri nopo tulun di momolidang do tinan dau do mantad id koinsanai dit angaraat, om iyau no o susuhuon do momonsoi dit osonong kopio. Om asanganu kopio iyau di tuan om kiguna’ iyau dot id tuan dau. Om iyau o suhuon do momonsoi do pointikid-tikid do karaja’ dit osonong. ²² Insodu’ no do mantad id korohian do tulun dit ongomulok po. Tumotos no do tumanud di korohian do Kinorohingan dot id suang do koposi-posion nu, om tumorodok do tumanud di ponudukan dau, om osianan do koinsanai’d tulun, om haro kasai’ o kosimbayanan do ginawo. Poiyoon noddi o kowoyo-woyoo’ nu dot id sugku’ di tulun di lumohou do mokitulung do Tuhan do mikuwo’d otulid o ginawo. ²³ Kada’ ponokiwoyo’ do pogisimbar-simbaran do tulun di basug, it aiso’ i’ o toila-ilaan. Oilaan nu i’ dot iri nopo om popoimbulai no do pogisosongkiwalan. ²⁴ Iri nopo tulun di momonsoi do karaja’ di don Tuhan om a’ i’ apatut do monokitogod; suwai ko’ mositi’ no dot osonong o kowoyo-woyoo’ dau dot id koinsanai’d tulun, om osonong om alanut o ginawo do monuduk do koinsanai’d tulun. ²⁵ Mositi’ no dot alamaya’ iyau do monuduk do tulun dit obinsaap; om maha’ daa’ndo om onuan do Kinorohingan do maso i tulun diri do kumorologo do mantad id koinsanai di dusa diyolo’ om kotutun indo iyolo’ di ponudukan dot otopot. ²⁶ Om iri no o ralan diyolo’ do kopuriman kawagu’, om koidu’ do mantad id lawa’ do Rogon, i minongogos daa diyolo’ om minononsog diyolo’ do tumanud di korohian dau.

¹ Soro-sorohon noti: Motingkopupuson nopodti pomogunan om ogumu’ nondo o kosusaan. ² Om dau pondod tinan o sorohon do tulun, om adalaan do rumohian do tusin, om minsawat o ginawo om minggayo-gayo. Orohian nondo iyolo’ do mongindaraat do tulun, om sumaap do molohing, om araatan di kowoyo-woyoo’ di don rusod. ³ A’ iyolo’ mogiinsian-sian, om a’ mangampun, om orohian do mongindaraat do ngaran do tulun do suwai, om pokoruol do mononsog, om orongit, om a’ orohian dit osonong. ⁴ Orohian iyolo’ do popohudsu, om mimilo-milo, om a’ paparalom do pomusorou. Orohian nogi’ iyolo’ do karamayan do dom pomogunan ko’ mantad do mumboyo’d Kinorohingan. ⁵ Mulong piya daa dot otorodok iyolo’ do tumanud di ponuhuan do tugama’ dit id soibau noo, nga’ iyada’ indo diyolo’ i komoyon kopio di tugama’. Insodu’ no do mantad id tulun do miagal diri. ⁶ Haro i’ ot id pogialatan diyolo’ di mongoi pinsalakoi do walai, om mongoi pamagayat do ginawo do tongoondu’ dit ongoluhoi, om it ogumu’ kopio o dusa om i noporinta’ do mogisuayan o korohian do don tinan. ⁷ A’ nopo otingkod do mokituduk o tongoondu’ do miagal diri, nga’ a’ i’ iyolo’ insan do kosuhut kopio do ponudukan dit otopot do mantad id Kinorohingan. ⁸ Om poingkuro nopo i Yanis om i Yambris do suminaap di Musa di gulu po, om iyo noddi i tulun diri do sumaap di ponudukan do mantad id Kinorohingan. Naraag no o pomusarahan diyolo’, om natanus o kotumbayaan diyolo’. ⁹ Nga’ aiso’ indo o nunu-nunu dot aanu diyolo’ tu’ oilaan ngai’ indo do tulun i kababasug diyolo’, do miagal di nosiliu dot id di Yanis om id di Yambris. ¹⁰ Nga’ iya’ nopo om tuminanud i’ di ponudukan ku, om i kowoyo-woyoon ku, om i guna’ ku do poimpasi. Om iya’ no kopio o nokokito ondung poingkukuro oku do notumbayaan di Yesus Kristus do mikuwo’d iso-iso’ o ginawo ku om osianan oku do koinsanai’d tulun; om oilaan nu i’ o kolonuto’ om kogiroto’ do ginawo ku. ¹¹ Nokokito ko i’ doho’ do noinggorit om norualan tomod. Oilaan ngai’ nu i’ i nosiliu dot id doho’ di hilo’ oku’d Antiokia, om di hilo’ oku’d Ikonium om di hilo’ oku’d Listra; om oilaan ngai’ nu i’ i kinoinggoritan ku! Nga’ pinoidu’ oku id Tuhan do mantad id koinsanai’ddi. ¹² Atantu’ no do koinsanai’d tulun dit orohian do momonsoi di wowonsoyon do tulun do Kristian, om it orohian do miso’ kopio di Kristus Yesus om oinggorit no, ¹³ om iri no tulun dit araat om i monipu’ om oruhangan nogindo o kararaat. Monipu’ daa iyolo’d tulun do suwai nga’ iyolo’ piya’ndo nga’ otipu’ i’. ¹⁴ Nga’ iya’ nopo, oi Timotius, om igitan no kopio i ponudukan dit otopot, i nokotuduk dot id diya’ om i ponongkuyaanan kopio nu; tu’ oilaan nu i’ ondung isai ngai’ i minonuduk diya’. ¹⁵ Om apatut i’ do sorohon nu do mantad po dit okoro’ ko po om nokoilo ko no do pasal do Buuk do Kinorohingan. Om iri nopo Buuk do Kinorohingan diri om milo i’ do monuduk diya’ do ralan do kaanu’d koposion, dot it otumbayaan di Kristus Yesus o kaanu-anu. ¹⁶ Koinsanai di nokotulis dot id suang do Buuk do Kinorohingan om pinotuduk i’ do Kinorohingan om kiguna’ do popotuduk dit ongotopot, om popopuriman om popoontok di nakasala’, om monuduk do tulun do tumanud do korohian do Kinorohingan dot id suang do koposi-posion dau. ¹⁷ Om iri no Buuk do Kinorohingan o milo do monuduk kopio do tulun di momonsoi’d karaja’ do Kinorohingan, do gisom dot aiso’ o kabara-barasan do tulun diri do momonsoi’d nunu nopo o kowoyoon do karaja’ dit osonong.

¹ Rumikot indo kawagu o Kristus Yesus do hiti’d pomogunan do mongoi pomutus do tulun di poimpasi om i poimpatai; om rumikot nondo iyau do mongoi pomorinta’ do miagal do Raja’. Om iri no o koponuhuan kopio ku diya’ dot id toguang do Kinorohingan om Kristus Yesus do: ² Popinsusui ko di habar do mantad id Kinorohingan, om a’ tumingkod do popinsusui om korongou i’ o tulun, dot orohian tuu daa iyolo’ ko’ amu’ po. Poiloon no kopio o tulun, om pointalangon no i kasala’, om odsuuron no iyolo’. Om polonuton no o ginawo nu do monuduk do tulun. ³ Tu’ rumikot i’ moti’ndo o maso dot a’ o tulun orohian do rumamit do ponudukan dit otopot. Tu’ tonudon nogindo diyolo’ o diyolo’d korohian, om monimung iyolo’ dot ogumu’ o gomponuduk om otudukan i’ iyolo’ di korohian diyolo’d mokinongou. ⁴ Sonsongon nopondo diyolo’ o tolingo dot id nunu nopo it ongotopot, nga’ mokinongou tomod nogindo iyolo’ di tangon-tangon toomod. ⁵ Mulong piya dot iyo’ddi, nga’ mositi’ no do porintaon nu o tinan nu dot id suang do nunu nopo o kowoyo-woyoo’. Polonuton nopo o ginawo dot oinggorit piya, om wonsoyon no o karaja’ nu do popinsusui di Habar dot Osonong, om wonsoyon no kopio kosonong-sonong it apatut nu’d wonsoyon tu’ susuhuon ko nod Kinorohingan. ⁶ Nga’ iyoho’ no om norikot noddi o maso ku do matai do miagal ko’ porsombahan di sumbolion do patahakon dot id Kinorohingan. Om a’ no alaid om tumongkiad oku no do mantad id pomogunan diti. ⁷ Nakatanud oku no dot id ponongkusan om tuminotos oku do minanangkus; om nokorikot oku noddi di garis do kolimpupuson. Om otorodok kasai’ oku i’ dot id Kristus do gisom do kopupuson. ⁸ Om poingandad noddi i hodia’ do kinamanangan ku. Om Tadau nopondod Kopupuson diti Pomogunan, om patahakon indo dot id doho’ i hodia’ diri, do Tuhan, i Gompomutus dit otulid o papatahak, tu’ nokoulud oku no dot id Kinorohingan. Om okon nopo ko’ iyoho’ noo o kaanu di hodia’ddi, suwai ko’ koinsanai nogid tulun di langadon kopio do magandad do korikatan do Tuhan. ⁹ Rumikot no kopio do hiti’d doho’ dot oruhai, ¹⁰ tu’ notongkiadan oku no di Dimas, tu’ nosianan nogi’ iyau diti pomogunan. Nokoongoi no iyau do hilo’d Tosolunika. Om i Kriskis no om minongoi do hilo’d Galatia, om i Titus no om minongoi do hilo’d Dalmatia. ¹¹ I Lukas poo o moyo-woyo’ doho’. Angatan no i Markus om powoyoon no iyau, tu’ milo i’ iyau do monguhup doho’ do momonsoi diti karaja’ ku. ¹² Nosuhu’ ku no i Tikikus do mongoi’d hilo’d Iposus. ¹³ Om mongoi ko nopondod hiti, om igitan no i rasuk di posoibahon do mamakai, i nokoiliu ku do hilo’d Truas, do hiri’d walai di Karpus. Om igitan ngai’ no i buuk ku, om okon-okon po om i buuk di kulit do winonsoi. ¹⁴ Araat tomod o winonsoi di Aliksandor, i tukang basi’ diri, dot id doho’. Om sulian indo iyau do Tuhan do miontok di winonsoi dau. ¹⁵ Iya’ piya nga’ antaan-taan no kopio do kosolowot ko dau, tu’ sumaap tomod iyau di popinsusuyon toko’. ¹⁶ Tontok di koinsan ku i’ do suminimbar dot id bisara’, om aiso’ i’ o songulun piya do koruhang ku; koinsanai nopo iyolo’ do tuminongkiad doho’. Om maha’ daa om a’ iyolo’d Kinorohingan pasalaon dot iyo piya’ddi o winonsoi diyolo’! ¹⁷ Nga’ kinoruhang oku id Tuhan. Minanahak i’ iyau do kokorisan gisom do milo oku do popinsusui do koinsanai di Habar dot Osonong diri, om orongou i’ iri do koinsanai’d tulun dit okon ko’ Yohudi. Om nokoidu’ oku iddi do mantad id koligagaanan do kapatayon. ¹⁸ Atantu’ no do poiduwon oku id Tuhan do mantad id pointikid-tikid di wonsoyon dot araat dot id doho’. Om pokoyoon oku indo dau do hiri’d suang di Pomorintaan dau do hilo’d surga. Om iyau no ot apatut do poinggoyoon do gisom dot alaid! Amin. ¹⁹ Tumabi’ oku di Priskila om i Akuila, om i sompiiyon di Onisiporus. ²⁰ I Irastus nopo om hilo’d Korintus, om i Tropimus no om pinoundorong ku do hilo’d Milotus tu’ maso po dau do sumakit. ²¹ Mongoi no kopio’d hiti dot a’ po orikot i maso dot osogit. Tumabi’ dokoyu, i Ibulus, om i Pudis, om i Linus, om i Klaudia; om porikot nogi’ do tabi’ o koinsanai di tobpinai’d suwai dit iso-iso’ o kinotumbayaan. ²² Pokionuon ku no o Tuhan do momoyo’ diya’. Tuhan no o mamarakat dokoyu, oi tobpinai-tobpinai!