2 TOSOLUNIKA

¹ Oi tobpinai-tobpinai, i sidang do hilo’d Tosolunika, i nosiliu do tulun do songonuon do Kinorohingan, i Tapa’ toko’ om songonuon di Tuhan Yesus Kristus. Mogondos iyahai, iyoho’ i Paulus om i Silas om i Timotius, ² dot onuan kou do Kinorohingan Tapa’ om Tuhan Yesus Kristus do barakat om kosimbayanan do ginawo. ³ Oi tobpinai-tobpinai, apatut no do mongunsikou kasai’ iyahai dot id Kinorohingan dot iyokoyu o kopongunsikahan. Om atantu’ nod apatut i’ do miagal diri o wonsoyon dahai tu’ murut-surut i’ o kotumbayaan dokoyu dot id Kristus, om muhang-ruhang o kosianan dokoyu dot id tulun do suwai. ⁴ Om iri no o koposusuyan dahai do pasal dokoyu dot id pointikid-tikid do sidang do Kinorohingan dit oongoi dahai koolimbuha’. Om oondos tomod iyahai do popinsusui do kogiroto’ do kotumbayaan dokoyu dot id Kristus dot id suang kou piya do koinggoritan om koudipanan. ⁵ Om iti noddi o popointalang dot otulid o pomumutus do Kinorohingan; tu’ noinggorit kou no dot i Pomorintaan do Kinorohingan o kinoinggoritan dokoyu. Om iri noddi o kinoposorupayan dokoyu do sumuang di Pomorintaan diri, ⁶ om wonsoyon indo do Kinorohingan it otulid. Om sulian dau do koinggoritan i tulun di minonginggorit dokoyu. ⁷ Om iyokoyu it oinggorit do baino’ — om iyahai nogi’ — nga’ onuan indo do Kinorohingan do kosimbayanan do tontok di tadau’d kolintuhunan do Tuhan Yesus do mantad hilo’d surga do miwoyo’ di moloikat dau dit ongokoris, ⁸ om mitonggoi do tapui di molob-ngolob. Om rumikot iyau do mongoi pomohukum di tulun dit a’ mamadul do Kinorohingan, om it a’ tumanud di Habar dot Osonong do pasal do Tuhan toko’ i Yesus, dot id suang do koposi-posion diyolo’. ⁹ Om hukuman nogindo i tulun diri do koinggoritan dit aiso’ o kopupuson, om potongkiadon do mantad id Tuhan om mantad id kuasa’ dau dit agayo kopio; ¹⁰ do tontok di tadau di rumikot iyau do poinggoyoon do tulun di songonuon dau om pusohon do koinsanai di tulun di nongotumbayaan. Om iyokoyu nga’ hino indo do poingamung di tulun di songonuon do Kinorohingan diri, tu’ notumbayaan kou i’ di habar di pinosusui dahai dot id dokoyu. ¹¹ Om iri noddi ot a’ dahai kotingkadan do sumambayang do bagi’ dokoyu. Om sumambayang iyahai om posorupayon kou indo do Kinorohingan do momonsoi di korohian dau dot id suang do koposi-posion dokoyu, tu’ iri no o kinapamalahawan do Kinorohingan dokoyu. Om Kinorohingan no o mamayaan di korohian dokoyu do momonsoi dit osonong do mikuwo’d kuasa’ dau, om iyau o momongo do koinsanai do karaja’ di wonsoyon dokoyu, tu’ notumbayaan kou i’ di Kristus. ¹² Om iyo noddi do koinggayo dokoyu i Yesus i Tuhan toko’, om iyokoyu nga’ poinggoyoon indo di Yesus tu’ osonong i’ o Kinorohingan toko’ om i Tuhan Yesus Kristus.

¹ Om pasal no di korikatan do Tuhan toko’ i Yesus Kristus, om i pasal do koponimungan do Tuhan dati’ do posugkuon dau om iti no o posunudon kopio ku dokoyu. ² Kada’ kou koruhai kopio dot oborulong ko’ tumangkabo do haro piya o habar do norikot no o tadau do korikatan kawagu do Tuhan Yesus. Tu’ iri nopo doti’ om pinoboros mantad do tulun di nakaanu do toilaan do pasal diri ko’ mantad po dot id ponudukan, ko’ haro doti’ o mimboros do nokoumbal iyahai do minonulis do miagal diri dot id iso’ di surat dahai. ³ Nga’ poingkuro piya nga’ kada’ kou no pokitipu’ do tulun. Tu’ a’ po orikot o Tadau’ddi dot a’ po ongosiliu ngai’ o miagal diti: Ogumu’ nondo o tulun do magada’ di kinotumbayaan, om sumaap do Kristus; om mintalang nondo i Tulun dot Araat, i natantu’ mantad do posuangon dot id naraka. ⁴ Om sumaap nondo iyau om minggayo-gayo dot id pogialatan do koinsanai di tukuon do tulun, ko’ i ponokokinorohingan di sorohon do tulun do Kinorohingan kopio. Om miyon nondo iyau do hiri’d Walai’d Sasambayangan dot Agayo, om popimboros dot iyau no i Kinorohingan kopio. ⁵ Sorohon no dokoyu do koinsanai’ddi om nokoboros ku no mantad dot id dokoyu di poinsugku’ oku po dokoyu. ⁶ Om oilaan i’ dokoyu i mangantob diri dot osiliu do dinondo. Nga’ mintalang nondo i Tulun dit Araat diri dot orikot i maso di natantu’ mantad do Kinorohingan. ⁷ Tu’ iri nopo i kuasa’ di momonsoi di karaaton diri om nokotimpuun nod kumaraja’ nga’ poillisok-lisok, nga’ pusus-pususon po. Ondung oidu’ i kopusus diri, ⁸ om okito nogindo kopio i Tulun dit Araat. Om soira’ nopondo do korikot o Tuhan Yesus om patayon nondo dau di pinuhobo di mantad id kabang dau i Tulun dit Araat diri, om patayon dau iyau di tulinau, i tanda’ do poirapou iyau. ⁹ Rumikot nondo i Tulun dot Araat diri do mitonggoi di kuasa’ dot agayo do mantad id Rogon. Om mingwonsoi nondo iyau do mogisuayan o koimayaan om i kosuayan kopio di poimponu’ do poninipu’. ¹⁰ Om mamakai nondo iyau di toilaan dot araat do pamalid di tulun di kumaa dot id kapatayon. Patayon nondo iyolo’ tu’ mada’ i’ iyolo’ om a’ iyolo’ orohian di habar dit otopot do mantad id Kinorohingan, i milo daa do mamasi diyolo’. ¹¹ Om iri noddi o kinoporikatan do Kinorohingan dot id diyolo’ di kuasa’ di mamalid, gisom do monongkuyaan nogiddi iyolo’ dit a’ otopot. ¹² Kootuson nopoddi om hukuman ngai’ nondo i tulun dit orohian do momonsoi’d dusa om it a’ otumbayaan dit otopot. ¹³ Oi tobpinai-tobpinai di kosianan do Tuhan! Apatut i’ do mongunsikou kasai’ iyahai dot id Kinorohingan dot iyokoyu o kopongunsikahan, tu’ mantad po di timpuun i’ om nopili’ mantad kou no do Kinorohingan do maan dau posio’. Om kinosili-silihan nopo do miagal diri om iri i winonsoi di Rusod do Kinorohingan dot id dokoyu do poposiliu dokoyu do tulun dit olidang om i songonuon do Kinorohingan; om iri kotumbayaan dokoyu di habar dot otopot do mantad id Kinorohingan. ¹⁴ Om iri no o kinapamalahawan do Kinorohingan dokoyu dot i Habar dot Osonong di pinosusui dahai dot id dokoyu o pinawayaan dau do minomolohou. Linohou kou pogi’ do Kinorohingan nga’ orohian iyau do kaanu kou iyokoyu di kagayaan di Tuhan toko’ i Yesus Kristus. ¹⁵ Iyo nopoddi, oi tobpinai-tobpinai, om gumirot kou no kopio om kada’ dokoyu ilihai i ponudukan di nongkotuduk dahai dokoyu, i ponudukan dit iyahai kopio o pinopoboros dot id dokoyu, ko’ iri po i ponudukan di tinulis dahai. ¹⁶ - ¹⁷ Om pokionuon ku no do Tuhan toko’ i Yesus Kristus om Kinorohingan, i Tapa’ toko’, do monginsasamod om popokoris do ginawo dokoyu, om milo kou i’ do momonsoi om popinsusui dit osonong. Tu’ osianan i’ o Kinorohingan dati’, om iri i’ i kosonongo’ dau o papalanut kasai’ do ginawo toko’, om mogondos toko’ indo dit ongosonong.

¹ Id tohuri nondo oi tobpinai-tobpinai, om pokionuon dahai do sumambayang kou do bagi’ dahai. Sumambayang kou no om oruhai id kotongkop i habar do mantad id Tuhan, om aramit iri kosonong-sonong do miagal di nosiliu dot id dokoyu di gulu po. ² Om sumambayang kou no om poiduwon i’ iyahai do Kinorohingan do mantad id tulun dit angaraat om it ongorongit. Tu’ a’ i’ oinsanan no o tulun do monongkuyaan di habar do mantad id Tuhan diri. ³ Nga’ otorodok i’ o Tuhan. Om pokorison kou indo dau om intirungan kou do mantad id di Yaraat. ⁴ Om monongkuyaan i’ kopio iyahai do Tuhan do pasal di wonsoyon dokoyu, do masaan i’ dokoyu do momonsoi di pinonuhuan dahai dokoyu om tumilombus kou do momonsoi’ddi. ⁵ Om pokionuon ku no o Tuhan do monuduk dokoyu; om kosuhut kou indo kopio dot osianan o Kinorohingan dokoyu om manahak dokoyu o Kristus do kolonuton do ginawo. ⁶ Oi tobpinai-tobpinai, suhuon ku iyokoyu do mikuwo’d kuasa’ do Tuhan Yesus Kristus do minsodu’ kou do mantad id koinsanai di tulun dit angakaul om it a’ tumanud di ponudukan di pinotuduk dahai diyolo’. ⁷ Tu’ koilo kou i’ do mositi’ no do momit kou dahai. ⁸ Iyahai nopo om a’ i’ akaul do tontok di poinsugku’ iyahai dokoyu. A’ i’ iyahai minangakan do taakanon do wokon dit a’ dahai binayaran. Om a’ i’ iyahai tumingkod do kumaraja’ do tadau om totuong do gisom do kototos tomod iyahai do kumaraja’, om a’ i’ iyahai koponusa’ dot isai nopo dot id pogialatan dokoyu. ⁹ Om okon i’ ko’ aiso’ o kosorupayan dahai do mokitulung dokoyu do kinapamansayan dahai do miagal diri, suwai ko’ kinapamansayan nopo dahai do miagal diri om orohian iyahai do sumiliu iyahai dot usuyan dokoyu dit osonong. ¹⁰ Tontok di poinsugku’ po iyahai dokoyu, om minanahak iyahai dot oturan do poingkaa, ’’Tulun nopo dit akaul om a’ no koino-ino do makan,’’ ka. ¹¹ Kinapamarasan nopo dahai do miagal diri nga’ nokorongou iyahai do haro o tulun dot id pogialatan dokoyu dit angakaul. Aiso’ i’ o wonsoyon diyolo’ do suwai ko’ mongoi pamagangau do karaja’ do tulun do suwai. ¹² Om id suang no do kuasa’ do Tuhan Yesus Kristus do suhuon dahai om poinsanon dahai o tulun do miagal diri do kumaraja’ kosonong-sonong om mimpori-pori do mogihum do diyolo’d kaakan-akanan. ¹³ Nga’ iyokoyu nopo om kada’ kou kapaasai do momonsoi dit ongosonong. ¹⁴ Haro i’ dotindo o tulun do koimbagu dot a’ tumanud di pinoboros dahai dot id suang do surat diti. Nga’ antaan-taan no dokoyu o tulun do miagal diri, om kada’ kou ongoi ponokiambalut dau om ointingayam i’ iyau. ¹⁵ Nga’ kada’ indo dokoyu iyau poiyoo’ do miagal do pisangod; suwai ko’ nosihatan nopo dokoyu iyau do miagal do tobpinai dokoyu. ¹⁶ Tuhan no o tadon do kosimbayanan do ginawo toko’. Om pokionuon ku no iyau do manahak kasai’ dokoyu do kosimbayanan do ginawo dot id suang do nunu nopo. Om Tuhan no o moyo-woyo’ ngai’ dokoyu, oi tobpinai-tobpinai. ¹⁷ Tabi’ do mantad id doho’, i Paulus. Iyoho’ no kopio o monulis do bohogian diti. Om iyo nodti o pananain ku do koinsanai’d surat ku. ¹⁸ Om pokionuon ku no o Tuhan toko’ i Yesus Kristus do mamarakat ngai’ dokoyu, oi tobpinai-tobpinai.