2 SOMUIL

2 SOMUIL

¹ Tontok di napatai no i Saul, om koguli’ nogi’ i Daud do mantad id pinisangadan di minangala’ iyau di tulun dot Amalik. Om undorong noddi iyau do hilo’d Siklag do solinaid do duwo o tadau. ² Tadau noddi kawagu om korikot no o tiso’ o tanakwagu do mantad id kokiiman di Saul. Om hinurak dau o pakayan dau om naraban dau do pupuk o tulu dau do popointalang do tumongob iyau. Om ongoi no iyau solowot di Daud om otud no do hiri’d toguang dau. ³ Om uhoto’ no iyau di Daud, ’’Honggo o tadon nu?’’ ka dau. Om boros ka di tanakwagu do suminimbar, ’’Minogidu’ oku do mantad hilo’d kokiiman do tulun dot Israil,’’ ka dau. ⁴ Om boros ka di Daud, ’’Sunudai oku daa ondung poingkuro kopio o nosiliu,’’ ka dau. Om boros ka di tanakwagu do suminimbar, ’’Minogidu’ ngai’ i soudor toko’ do mantad id pinisangadan. Om okon nopo ko’ ogumu’ o soudor do napatai nga’ iyo Saul di Yonatan, i tanak dau nga’ napatai nogi’,’’ ka dau. ⁵ Om boros kad i Daud do minonguhot dau, ’’Poingkuro ko do nokoilo do napatai i Saul om i Yonatan?’’ ka. ⁶ Om boros ka di tanakwagu do suminimbar, ’’Tontok nopoddi, om koontok no kopio do hilo’ oku’d Nuluhon do Gilbua om kokito ku noddi i Saul do tumobok di tandus dau. Om kawagu po kanogi’ nga’ gusa-gusaon no iyau di korita’-kuda’ om i soudor do pisangod di songinsakai’d kuda’ do mongoi ponutuk dau. ⁷ Om koili no i Saul om kokito oku no dau, om lohowo’ oku no dau, ’Nunu’ri, oi Tuan ku,’ kangku do suminimbar. ⁸ Om ponguhot no iyau doho’ ondung isai oku. Om posunudo’ ku no do tulun oku dot Amalik. ⁹ Om boros kaddi dau dot id doho’, ’Kaino do hiiti, maai oku diya’ patayo’! Tu’ nadalaan oku nod nosuhat om a’ no alaid om apatai oku no,’ ka. ¹⁰ Om insomok oku noddi dau om maai ku no iyau patayo’. Tu’ oilaan ku no dot ahaba’ po iyau om apatai no. Om iduwo’ ku noddi i tupi’ dau do dong raja’ om i golong do poinsulung do longon dau, om igitai ku no do hiti’d diya’, oi Tuan,’’ ka dau. ¹¹ Om korongou poddi di Daud iri, om hurako’ no dau i pakayan dau tu’ tumongob no kopio iyau. Om miagal ngai’ nopoddi o winonsoi di tulun dau. ¹² Tumongob tomod diri iyolo’ om pogihad noddi iyolo’ do gisom do nosongodou, om a’ iyolo’ minakan om a’ mininum do maan do kopomuhandaman di Saul, om i Yonatan, om koinsanai di tulun dot Israil, i tulun do songonuon do TUHAN, tu’ ogumu’ tomod o nangapatai do hiri’d pinisangadan. ¹³ Om uhoto’ noddi di Daud i tanakwagu di pinoporomut di habar diri, ’’Honggo o tadon nu?’’ ka dau. Om boros ka di tanakwagu do suminimbar, ’’Iyoho’ nopo om tulun dot Amalik nga’ poingiyon oku do hiti’d pomogunan nu, oi Tuan,’’ ka dau. ¹⁴ Om boros ka di Daud, ’’Nokuro tu’ kasaap kopio ko do mamatai di raja’ do nopili’d TUHAN?’’ ka dau. ¹⁵ Om ponuhu’ no i Daud do songulun di soudor dau do mamatai di tanakwagu’ddi. Om bobogo’ no di soudor i tanakwagu om patayo’ no dau. ¹⁶ Om boros ka di Daud dot id tulun dot Amalik diri, ’’Iya’ i’ o pinaparatu’ do hukuman do kapatayon dot id tinan nu tu’ minangakun ko i’ dot iya’ o minamatai di raja’ do nopili’d TUHAN,’’ ka dau. ¹⁷ Om pogihadai no di Daud i Saul om i Yonatan, i tanak di Saul do mikuwo’d minodsinding diti sinding do mogihad. ¹⁸ Om minonuhu’ nogi’ iyau do popotuduk diti sinding do mogihad dot id koinsanai do tulun do payat do Yohuda. (Nokotulis i’ iti sinding diti dot id Buuk do Yasar. ) ¹⁹ ’’Nangapatai no i boyoon toko’ do hilo’d konulu-nuluan dot Israil! Nangapatai no i gunsiou toko’! Naraag ngai’ no i kaandasan do tulun dot ogumu’. ²⁰ Kada’ posusuyo’ iti habar diti do hilo’d Gat om kada’ posunudo’ iti do hilo’d karalan-ralanan dot Askilon. Kada’ potoodo’ i tongoondu’ do Pilistin; kada’ posonongo’ o ginawo di tangaanak do tondu’ di tulun do kapir. ²¹ Kada’ po daa kasandatai do rasam ko’ bolobou o hilo’d konulu-nuluan do Gilbua; aiso’ kasai’ po daa o sumuni do hiri’d koumaan do hilo’! Tu’ hilo’ no o nokoilihon di kolid do gunsiou toko’ dot id suang do kointingayaman, a’ noddi opulangan do tumau i kolid di Saul. ²² Kipaliu i pana’ di Yonatan, om aiso’ ot olu-oluon di gayang di Saul, do monibas di soudor dot ongokoris, om mamatai di pisangod. ²³ Kosianan om koupusan kopio i Saul om i Yonatan, misugku’ i’ di poimpasi po, om misugku’ i’ do minatai; okoris po iyolo’ ko’ singa, om osiau ko’ kondiu. ²⁴ Oi tongoondu’ dot Israil, pogihadai no dokoyu i Saul! Rinosukan kou dau do pakayan dit angaragang om agayo gatang, linumis kou dau do tamas om watu dit olumis, it agayo o gatang. ²⁵ Nangapatai no i soudor do gunsiou, napatai iyolo’ dot id pinisangadan. Napatai i Yonatan do hilo’d konulu-nuluan. ²⁶ Tumongob oku do kosorou diya’, oi Yonatan, i tobpinai ku; osonong tomod ko dot id doho’! Agayo tomod o kosianan nu doho’, agayo po ko’ kosianan do tondu’. ²⁷ Nangapatai no o gunsiou toko’! Notongkiadan no om aiso’ noddi o kootuk-otukon di rapo-rapo diyolo’!’’ ka.

¹ Om uhot noddi i Daud do TUHAN, ’’Mongoi oku tuu undorong dot id ongoiso’ di bandar do hilo’d Yohuda?’’ ka dau. ’’Oo,’’ kad TUHAN do suminimbar. ’’Bandar do honggo’ddi?’’ ka kawagu di Daud do minuhot. ’’I bandar do Hibron,’’ kad TUHAN. ² Om ongoi noddi i Daud do hilo’d Hibron om powoyoo’ goduwo no dau i sawo dau: i Ahinuam, i mantad hilo’d Yisriil, om i Abigail, i sawo daa di Nabal, i tulun do Karmol. ³ Om nangatan nogi’ dau o koinsanai di tulun dau, om iri ngai’ i sompiiyon diyolo’ om undorong no iyolo’ do hiri’d kabandaran di posorili’ do Hibron. ⁴ Om ongoi noddi i tulun do Yohuda do hilo’d Hibron, om siliho’ no diyolo’ i Daud do raja’ do Yohuda. Soira’ddi do nokorongou i Daud do nolobong no di tulun do Yabis di hilo’d Giliad i Saul, ⁵ om ponuhu’ no iyau do piro-piro o tulun do minongoi’d hilo’ om popoboros do poingkaa, ’’Maha’ daa om barakatan kou do TUHAN tu’ pinopointalang kou i’ do kotorodoko’ dokoyu dot id raja’ dokoyu dot i minomolobong kou dau o pinopointalang. ⁶ Om maha’ daa om pointalangon do TUHAN o kotorodoko’ om kosianan dau dot id dokoyu. Om iyoho’ nga’ osonong indo o wonsoyon dot id dokoyu tu’ i winonsoi dokoyu’ddi o kapamansayan ku’d osonong. ⁷ Sumiliu kou no do tulun dit okoris om osiou! Napatai no i Saul, i raja’ dokoyu, om nopili’ oku no di tulun do Yohuda do sumiliu do raja’ diyolo’,’’ ka. ⁸ I Abnor nopo, i tanak di Nor, om minogidu’ do miniwoyo’ di Isbosit, i tanak di Saul, do hilo’d Mahanaim, it id soborong do Yordan. I Abnor nopoddi nga’ boyoon do soudor di Saul. ⁹ Om hilo’ no do siniliu di Abnor i Isbosit do raja’ do watas do Giliad, om Asur om Yisriil, om Ipraim, om Binyamin, om pointongkop dot Israil. ¹⁰ Apat no nohopod o toun do tumur di Isbosit di nosiliu iyau do raja’ dot Israil, om duwo o toun do koloido’ dau do minomorinta’. Nga’ iri nopo payat do Yohuda om otorodok kasai’ i’ dot id di Daud. ¹¹ Om turu’ o toun om satanga’ di Daud do momorinta’ do watas do Yohuda do hilo’d Hibron. ¹² Om pamanau no i Abnor om piro-piro o pagawai di Isbosit do mantad hilo’d Mahanaim om pakayaai no diyolo’ do hilo’d bandar do Gibion. ¹³ Om ngoyo’ no di Yoab, (tina’ nopo dau nga’ i Soruya), om i pagawai di Daud do suwai solowoto’ iyolo’ do hiri’d somok di kulam do hilo’d Gibion. Om minitimbaba’ iyolo’ do minirikau do hiri’d tisan di kulam; tu’ hiri’d soborong ponong hiti o nirikau di Abnor om i tongoulun dau, om id soborong ponong hilo’ o nirikau di Yoab om i tongoulun dau. ¹⁴ Om boros ka di Abnor dot id di Yoab, ’’Suhuo’ to ilo tulun to do misaap do miala-ala’!’’ ka dau. ’’Ba,’’ ka di Yoab do suminimbar. ¹⁵ Om pamanau noddi o hopod om duwo o tulun do mantad id payat do Binyamin do ponokowakil di Isbosit, om pamanau o hopod om duwo tulun do mantad id pogialatan di tulun di Daud. ¹⁶ Om sompori-pori nopoddi iyolo’ do mamabut do tobuk di ponokisaap dau om sopitobok-tobok do gayang do hiri’d tobik di tiso’, gisom do koinsanai nopoddi do napatai i duwo nohopod om apat o tulun. Om iri no o kinopomungaranan di kinoiyonon do hilo’d Gibion diri do ’’Tumo do Gayang’’. ¹⁷ Om kinootuson nopoddi nga’ pinisangadan dit adalaan kopio. Om kaala’ no di soudor di Daud i Abnor om i soudor dot Israil. ¹⁸ Om hiri ngai’ nopo i tolu o tanak di Soruya, i Yoab, i Abisai, om i Asail. I Asail nopo nga’ iyo pod tambang o kosiaho’ do manangkus, ¹⁹ om a’ noddi dau tingkadan do momogusa’ i Abnor. ²⁰ Om koili no i Abnor om ponguhot no iyau, ’’Iya’ ino, oi Asail?’’ ka dau. ’’Oo,’’ ka di Asail do suminimbar. ²¹ Om boros kad i Abnor, ’’Kada’ oku iyoho’ gusao’. Ngoyo’ nogi’ gusao’ ot ongoiso’ dilo soudor do suwai, om onuon nopo i rapo-rapo dau,’’ ka dau. Nga’ gusaon kasai’ i’ iyau di Asail. ²² Om boro-boros po kawagu i Abnor di Asail, ’’Kada’ oku no gusao’! Kada’ oku sansagai do mamatai diya’! Tu’ poingkuro oku nondo do tumimbaba’ di Yoab, i tobpinai nu?’’ ka dau. ²³ Nga’ gusaon kasai’ i’ di Asail iyau. Om potokono’ noddi di Abnor i tandus dau do ponong id tohuri om koonong nopo o tian di Asail gisom do nokolopuson i tandus do hiri’d likud dau. Om kahaba’ nopoddi i Asail do hiri’d tana’ om kapatai no. Om undorong ngai’ nopoddi i tulun do hiri’d kinoilihon dau, di nokorikot iyolo’d hiri. ²⁴ Nga’ maso i’ di Yoab om i Abisai do momogusa’ di Abnor. Om tontok di notonob no o tadau om korikot no iyolo’ do hilo’d nulu-nulu dot Ama, i ponong id koulayon do mantad id Gia, it id ralan do kumaa do hilo’d tana’ do kowotuan do Gibion. ²⁵ Om ongoi po kawagu i tulun do Binyamin uhup di Abnor, om tamong no iyolo’ do hiri’d timpak dot iso’ o nulu-nulu. ²⁶ Om hiri no o tadon di Abnor do pinopolohou dot id di Yoab do poingkaa, ’’Misangod toko’ nopo tuu’dti do gisom dot alaid? A’ nu toi oilaan do karaaton noo o kootuson diti pisangadan? Okon toi ko’ iyahai nga’ bansa’ i’ dokoyu? Songkuro po o koloido’ om oduhan nu nogi’ ilo tulun nu do momogusa’ dahai?’’ ka dau. ²⁷ Om boros ka di Yoab do suminimbar, ’’Sumumpa’ oku no dot id suang do ngaran do Kinorohingan di poimpasi, dot ondung a’ ko daa minomoros do miagal diri om atantu’ no do gusaon kasai’ kou i’ dilo tulun ku do gisom do kosuabon do suab,’’ ka dau. ²⁸ Om pounio’ noddi di Yoab i torumpit dau do monuhu’ di tulun dau do tumingkod do momogusa’ di soudor dot Israil. Om kotingkod noddi i pisangadan. ²⁹ Om ponuabai nopo i Abnor om koinsanai di tulun dau do minamanau do minaya’ di Rantai do Yordan. Om soborong nogiddi iyolo’ di Bawang do Yordan, om nosongodou po iyolo’ do minamanau di tadau kawagu om korikot nogi’ do hilo’d Mahanaim. ³⁰ Om soira’ di nokotingkod i Yoab do momogusa’ di soudor dot Israil om timungo’ ngai’ no dau i tulun dau. Om koilaai nogiddi dau dot a’ hino o hopod om siam o tulun do suwai ko’ i Asail. ³¹ Tolu nahatus om onom nohopod o tulun di Abnor do mantad id payat do Binyamin do pinatai di tulun di Daud. ³² Om ngoyo’ noddi di Yoab om i tulun dau i rata’ di Asail om lobongo’ no do hilo’d kalabangan do sompiiyon dau di hilo’d Baitlahim. Om ponuabai nopoddi iyolo’ do minamanau om korikot nogi’ iyolo’ do hilo’d Hibron di kosuabon.

¹ Om haro kasai’ po o pisangadan di soudor di sumokodung di sompiiyon di Saul om i soudor di sumokodung di Daud. Om muhang-ruhang nopoddi o kokoriso’ di Daud, nga’ muhoi-luhoi noddi i pisangod dau. ² Iti no ngai’ it onom o tanak di Daud do nosusu do hilo’d Hibron, do nirus do mantad id kotuahan om gisom dot id komulakan: i Amnon, tina’ nopo dau om i Ahinuam, i mantad hilo’d Yisriil; ³ i Kiliab, tina’ nopo dau om i Abigail, i sawo daa di Nabal, i tulun do Karmol; i Absalom, tina’ nopo dau om i Maaka, i tanak di Talmai, i raja’ do Gosur; ⁴ i Adonia, tina’ nopo dau om i Hagit; i Sipasa, tina’ nopo dau om i Abital; ⁵ i Yitram, tina’ nopo dau om i Igla. Hilo’ ngai’ nopod Hibron o kinosusuon do tangaanak diti. ⁶ Om daamot nopo di misaap i soudor di Daud om i soudor dit ongotorodok dot id sompiiyon di Saul, om tumotos nopoddi i Abnor do papabantug do ngaran dau dot id pogialatan di tumatanud di Saul. ⁷ Insan tadau om tondoso’ no di Isbosit, i tanak di Saul, i Abnor do minongoi dudun di Rispa, it iso’ di panakasawo di Saul. I Rispa nopo om tanak di Aya do tondu’. ⁸ Om kotogod tomod noddi i Abnor tu’ tinondos i’ iyau do miagal diri. Om boros ka dau, ’’Ondos nu daa om monompuraraat oku di Saul? Ondos nu daa om sumokodung oku do Yohuda? Mantad po di gulu po om otorodok oku i’ dot id di Saul, i tapa’ nu, om id tobpinai dau, om id tambalut dau. Om nuhupan ku iya’ gisom dot a’ ko i’ naala’ di Daud, om pasalaon oku poddi diya’ do pasal nod tondu’! ⁹ - ¹⁰ Osonong nogi’ do monguhup oku di Daud, om kawagu po nga’ nakabatos mantad nod TUHAN do patahakon dau iti pomorintaan di Saul om i sinakagon dau dot id di Daud, om silihon nondo i Daud do raja’ do pointongkop dot Israil om Yohuda. Om hukuman oku nopod Kinorohingan dot a’ oku no tumotos do mamayaan di nakabatos do Kinorohingan dot id di Daud diri!’’ ka dau. ¹¹ Om moddosi tomod diri i Isbosit di Abnor, gisom dot a’ no iyau nokosimbar dot ongoiso’ piya o boros. ¹² Om ponuhu’ no i Abnor do susuhuon dau do mongoi do hilo’d di Daud, i hilo’d Hibron do tontok diri, do mikuwo’d popoboros do poingkaa, ’’Isai po o momorinta’ do pomogunan diti? Momonsoi nod batos dot id doho’ om uhupan ku indo iya’ do posokodung ngai’ diya’ di tulun dot Israil,’’ ka. ¹³ Om boros kad Daud do suminimbar, ’’Ba, osonong! Poromuton noti boros diti dot id di Abnor: Momonsoi oku id pibatasan dot id diya’, nga’ haro ot iso’ o pokionuon ku do wonsoyon nu: Mositi’ nod powoyoon nu i Mikal, i tanak di Saul do tondu’ddi, do mongoi ko solowot doho’,’’ ka. ¹⁴ Om minonuhu’ po i Daud do piro-piro susuhuon dot id di Isbosit, do popoboros do poingkaa, ’’Pogulio’ no doho’ i Mikal, i sawo ku. Tu’ noboli ku no iyau do hatus o kulit di sisinsibon do monunat do tulun do Pilistin,’’ ka. ¹⁵ Om suhuo’ noddi di Isbosit i tulun di sinuhu’ di Daud do mongongoi di Mikal do mantad id di Paltiol, i tanak di Lais, i sawo daa di Mikal. ¹⁶ Nga’ ongoi i’ tanud di Mikal i Paltiol, do mikuwo’d mihad-ihad tomod do hiri’d ralan do gisom do nokorikot do hilo’d bandar do Bahurim. Om boros kaddi di Abnor dot id di Paltiol, ’’Ula’ no, uli’ nogi’!’’ ka dau. Om uli’ nogiddi i Paltiol. ¹⁷ Om ongoi noddi i Abnor ponokirunding di boyoon do tulun dot Israil, om boros ka dau dot id diyolo’, ’’Alaid kou no dot orohian dot i Daud o raja’ dokoyu. ¹⁸ Om iti no o maso dokoyu’d osonong. Sorohon no dokoyu do nakabatos mantad nod TUHAN dot id di Daud o poingkaa, ’I Daud o pakayon ku do mamasi do tulun dot Israil, i tulun ku, do mantad id tulun do Pilistin om mantad id pisangod diyolo’d suwai!’ ka. ¹⁹ Om ruminunding nogi’ i Abnor di payat do Binyamin, om ongoi nogiddi iyau do hilo’d Hibron do minongoi pomisunud di Daud di nopogiokun-okunan di tulun dot Israil om i payat do Binyamin,’’ ka. ²⁰ Tontok di minongoi i Abnor solowot di Daud do hilo’d Hibron do miwoyo’ di duwo nohopod o tulun dau, om papaharo no i Daud do poginakanan do maan diyolo’. ²¹ Om boros kaddi di Abnor dot id di Daud, ’’Mamanau oku nodti do mongoi ponuhu’ do koinsanai di tulun dot Israil do sumokodung diya’. Om romiton ko indo diyolo’ do sumiliu’d raja’ diyolo’, om oporinta’ nu indo o pointongkop diti pomogunan do miontok di korohian do ginawo nu,’’ ka dau. Om jomino’ no di Daud dot aiso’ o koligagaanan di Abnor, om pologoso’ nogiddi dau i Abnor do minamanau. ²² A’ po alaid do mantad diri om koguli’ no i Yoab om i tulun di Daud do mantad id pinisangadan, om ogumu’ tomod o dapu’ do naahau diyolo’ do mantad id pisangod. ²³ Om kosunudai noddi i Yoab do minongoi solowot di Raja’ Daud i Abnor om nokouli’ noddi do mikuwo’d jinamin dot aiso’ o koligagaanan dau. ²⁴ Om ongoi noddi i Yoab solowot di raja’, om boro-boros nod, ’’Nokuro tu’ iyo’ddi o winonsoi nu? Ruminikot i Abnor dot id diya’, om nokuro’ddi tu’ pologoso’ nu nopo iyau do minamanau? ²⁵ Kinaangayan nopo dau do hiti nga’ minongoi no pagakal, om minongoi pongilo-ilo ngai’ di wonsoyon nu om i kowoyo-woyoo’ nu. A’ ko i’ koilo dot iiyo’ddi?’’ ka dau. ²⁶ Om kotongkiad poddi i Yoab di Daud om ponuhu’ no iyau do tulun do mongoi pomolohou di Abnor. Om kokosupai no diyolo’ i Abnor do hilo’d somok di torobong do Sira, om pogulio’ no diyolo’ iyau. Nga’ a’ i’ nokoilo i Daud do pasal diri. ²⁷ Om korikot poddi i Abnor do hilo’d Hibron, om angatai no iyau di Yoab do hiri’d toning di wawayaan dot agayo, do miagal-agal do posunud dit a’ koino-ino do korongou o tulun do suwai. Nga’ hiri nogiddi do tinobok di Yoab o tian di Abnor do gisom do napatai iyau. Om miagal noddi o kinapatai-patayo’ di Abnor, tu’ minamatai i’ iyau di Asail, i tadi’ di Yoab. ²⁸ Soira’ddi nokorongou i Daud do pasal diri om boros ka dau, ’’Oilaan id TUHAN dot okon i’ ko’ iyoho’ om okon ko’ iti rayat ku o nakasala’ dot id suang di kinapatayon di Abnor. ²⁹ I Yoab nopo om i sompiiyon dau o hukuman! Haro po daa kasai’ o sinakagon di Yoab di kitoruol di haro kasai’ o raha’ do sumoliwan, ko’ i kitoruol do kulit dit araat kopio, ko’ tongokusai di don tongoondu’ do kowoyo-woyoo’, ko’ it apatai dot id pisangadan, ko’ it aiso’ o takanon!’’ ka dau. ³⁰ Om iyo noddi i Yoab di Abisai, i tadi’ dau’ddi, do suminuli’ di Abnor tu’ minamatai i’ i Abnor di Asail, i tadi’ diyolo’ di hilo’d pinisangadan do hilo’d Gibion. ³¹ Om suhuo’ noddi di Daud i Yoab om koinsanai di tulun dau do momohurak do pakayan diyolo’, om manampakai di pakayan do mogihad, tu’ sinuhu’ iyolo’ do mogihad di Abnor. Om tontok di linobong i Abnor om i Daud o minamanau do hiri’d tohuri-huri di lungun. ³² Pinamalabangan nopo di Abnor om hilo’d Hibron, om miningihad tomod diri i raja’ om koinsanai di rayat dau do hiri’d lobong di Abnor. ³³ Om pogihadai noddi di Daud i Abnor, boros ka dau, ³⁴ ’’Nokuro tu’ minatai i Abnor do miagal do tulun di basug? A’ i’ nakagasan o longon dau, om gakod dau nga’ a’ i’ nakagasan do rantai. Minatai iyau do pinatai do tulun dit araat om orongit!’’ ka. Om pogihadai po kawagu di tulun dot ogumu’ i Abnor. ³⁵ Om nosongodou nopo do lugu-lugutan di tulun i Daud do makan nga’ sumpa’ nogi’ iyau do poingkaa, ’’Patayon oku nopod Kinorohingan do makan oku no dot a’ po otonob ilo tadau!’’ ka dau. ³⁶ Om osonong tomod diri o ginawo di rayat do nokorongou’ddi. Tu’ nunu nopo o wonsoyon di Raja’ Daud nga’ poposonong ngai’ nopod ginawo diyolo’. ³⁷ Om tontok nod tadau’ddi do nokoilo i rayat di Daud om koinsanai di tulun dot Israil dot a’ i’ nokohompit-hompit i Daud do minamatai di Abnor. ³⁸ Boros ka di raja’ dot id pagawai ngai’ dau, ’’A’ toi dokoyu oilaan do minatai baino’ o songulun o boyoon dot agayo do hiti’d Israil? ³⁹ Mulong po dot iyoho’ daa i raja’ do nopili’d Kinorohingan nga’ oluhoi no ot opurimanan ku do tadau’d baino’. Adalaan no kopio korongit i tangaanak di Soruya. A’ oku no kosoibau diyolo’. Hukuman po daa do TUHAN i tulun dot araat diri do miontok di winonsoi diyolo’!’’ ka dau.

¹ - ⁴ Iri nopo sinakagon di Saul do suwai om i Mopibosit, i tanak di Yonatan. Nga’ nokimpaan iyau di limo nogi’ o toun do tumur dau do tontok di napatai i Saul om i Yonatan. Tu’ tontok di nokorongou i mitamong di Mopibosit do habar do kinapatayon diyolo’ do mantad hilo’d Bandar do Yisriil, om poggidu’ no iyau do poingkibit i tanak. Nga’ arau-arau tomod iyau om gowoi poddi om karatu’, om kokimpaai noddi. Om soira’ddi nokorongou i Isbosit, i tanak di Saul diri, do napatai i Abnor do hilo’d Hibron, om moddosi tomod diri iyau. Om ongooris ngai’ i tulun dot Israil. I Isbosit nopoddi om haro o duwo pagawai dau di siniliu do boyoon do tulun di mongoi sangod. Iyolo’ nopoddi nga’ i Rikab om i Baana. Iyolo’ nopo om tangaanak di Rimon, i mantad hilo’d Biirot, it id suang do payat do Binyamin. (Biirot nopo om id suang i’ do watas do Binyamin. Iri nopo tulun mantad do hiri nga’ minogidu’ do kuminaa do hilo’d Gitaim, om hilo-hilo’ noddi iyolo’ do poingiyon.) ⁵ Om ongoi no i Rikab om i Baana do hiri’d walai di Isbosit. Om pitangaadau no do nokorikot iyolo’d hiri, om maso no di Isbosit do koodop do dangadau. ⁶ Om sumubu po nga’ nokoodop no i tondu’ di madtatamong di walai tu’ nalamayan do monompipi’ di gandum. Om salakoi nopoddi i Rikab om i Baana. ⁷ Kosuang poddi iyolo’ do hiri’d walai om tilombus nopo iyolo’ do hiri’d bilik di Isbosit. I Isbosit nopo do maso’ddi nga’ nokoolong tomod do koodop, om toboko’ no diyolo’ iyau do gisom do napatai. Om maai noddi diyolo iduwo’ o tulu di Isbosit om igitai no diyolo’ do minamanau. Om kosuabai nopo iyolo’ do minamanau do duminarapas di Rantai do Yordan. ⁸ Om ngoyo’ noddi diyolo’ patahako’ i tulu di Isbosit dot id di Daud do hilo’d Hibron. Om boros ka diyolo’, ’’Iti no o tulu di Isbosit, i tanak di Saul, i pisangod nu di tumotos daa do mamatai diya’. Tadau nod baino’ do sinulian do TUHAN i winonsoi di Saul om i sinakagon dau dot id diya’,’’ ka diyolo’. ⁹ Nga’ boros ka di Daud do suminimbar, ’’Sumumpa’ oku no dot id TUHAN di poimpasi, i minamasi doho’ do mantad id koinsanai do koligagaanan, dot iyau o koilo dot otopot iti poboroson ku. ¹⁰ Tu’ iri nopo tulun di minongoi poporongou doho’ do habar do napatai i Saul di hilo’d Siklag, om minomusorou daa dot iri nopo habar di napatai i Saul diri nga’ habar dot osonong. Nga’ tinangkap ku nogiddi iyau om hinukuman ku do kapatayon! ¹¹ Om okon-okon pondo kawagat o pomohukum ku dot id tulun dit araat, tu’ minamatai do tulun dit aiso’ o sala’, i maso id koodop do hiri’d walai dau! Dinondo no do sulian ku ino kararaat dokoyu. Tonuson ku no iyokoyu do mantad hiti’d pomogunan!’’ ka dau. ¹² Om ponuhu’ no i Daud di soudor dau do minamatai di Rikab om i Baana. Om di nopoddi napatai, om potodo’ no diyolo’ o longon om gakod di duwo o tulun diri, om pogiiso’ nogiddi do hiri’d toning di kulam do hilo’d Hibron. Nga’ iri nopo tulu di Isbosit om nongoi i’ diyolo’ lobongo’ do hiri’d lobong di Abnor do hilo’d Hibron.

¹ Om ongoi ngai’ noddi i boyoon do payat dot Israil solowot di Daud do hilo’d Hibron. Om boros ka diyolo’ dot id dau, ’’Iyahai nga’ koworisan nu i’! ² Di nopo di gulu po, dit i Saul po o raja’ dahai, om iya’ i’ o minomoyo’ do tulun dot Israil do mongoi sangod. Om kawagu po nga’ nakabatos nod TUHAN dot id diya’ dot iya’ no o woyoon do tulun dau om iya’ o sumiliu do raja’ diyolo’,’’ ka diyolo’. ³ Om ongoi ngai’ nopoddi i boyoon dot Israil solowot di Daud do hilo’d Hibron. Om pomonsoi no i Daud do batos dot id diyolo’ om siliho’ no diyolo’ i Daud do raja’ dot Israil. ⁴ Tontok nopo di nosiliu i Daud do raja’ om tolu no nohopod o toun do tumur dau. Om koloido’ nopo dau do momorinta’ om apat nohopod o toun. ⁵ Turu’ o toun om onom o tulan dau do momorinta’ do hilo’d Hibron om tolu nohopod om tolu toun dau do momorinta’ do koinsanai dot Israil om Yohuda do hilo’d Yorusalim. ⁶ Insan tadau om pamanau no i Daud om i tulun dau do minongoi panangod do Yorusalim. Om ondos daa di tulun do Yobus i tulun mantad do hiri, om a’ kaala’ i Daud do bandar do Yorusalim. Om boros ka diyolo’ dot id dau, ’’A’ ko i’ kosuang do hiti. Tu’ ilo’ piya tulun do bolou om kimpo’ nga’ katalob i’ diya’,’’ ka diyolo’. ⁷ (Nga’ naanu kopio id Daud o Sion, i kuta’ daa diyolo’. Om pungaranai noddi do, ’’Bandar di Daud’’ o kinoiyonon diri.) ⁸ Tontok di tadau’ddi om boro-boros no i Daud dot id tulun dau, ’’Haro i’ o tulun do hiti dit araatan do tulun do Yobus, do miagal doho’ tu’ araatan diyolo’, om sipamatai diyolo’? Haro nopo om mongoi kou no waya’ di liang do waig om ngoyon i’ songodo’ i tulun do bolou om kimpo’, i karaatan ku’ddi,’’ ka dau. (Iri noddi o kinabara-barasan diyolo’ do poingkaa, ’’Iri nopo tulun do bolou om kimpo’ om a’ no koino-ino do sumuang do Walai do TUHAN,’’ ka.) ⁹ Kaanu poddi di Daud i kuta’ do Sion om iyon no iyau do hiri, om pungaranai no dau iri do, ’’Bandar di Daud’’. Om wonsoyo’ no dau i bandar do posorili’ di kuta’ddi, do pinoimpuun do hiri’d ponong id koulayon do mantad id nulu-nulu di tinimbunan do tana’. ¹⁰ Om maid-laid nga’ muhang-ruhang o kokoriso’ di Daud tu’ woyoon i’ iyau’d TUHAN, i Kinorohingan dit Agayo Kuasa’. ¹¹ Om porikot no i Hiram, i raja’ do pomogunan do Tirus, dot id di Daud do tulun di mongilo-ilo do pogidagang-dagangan. Om nonuan nogi’ dau i Daud do kayu sedar do Libanon, om piro-piro o tukang kayu om tukang watu do momonsoi do walai do raja’. ¹² Om koilaai nogiddi kopio di Daud do natantu’ mantad no iyau’d TUHAN do sumiliu do raja’ dot Israil om pinosimbayan do TUHAN o pomorintaan dau do maan do koinsanangan di tulun do songonuon do TUHAN. ¹³ Di nopo di nokoundaliu i Daud do mantad hilo’d Hibron, di hilo’ iyau id Yorusalim om minanansawo po iyau do piro-piro o tongoondu’, om minanganu do tongoondu’ do numaan dau do panakasawo. Om ogumu’ poddi o tanak dau do tongokusai om tongoondu’. ¹⁴ Iti ngai’ no i tangaanak dau do tongokusai di nosusu do hilo’d Yorusalim: i Samua, i Sobab, i Natan, i Suliman, ¹⁵ i Yibhar, i Ilisua, i Nipig, i Yapia, ¹⁶ i Ilisama, i Ilyada, om i Ilipilit. ¹⁷ Soira’ di nokoilo i tulun do Pilistin do nopili’ do raja’ dot Israil i Daud, om pamanau no daa i piro-piro o soudor diyolo’ do mongoi daa panangkap di Daud. Nga’ nokorongou i’ i Daud do pasal diri, om ongoi no iyau dot id iso’ o kinoiyonon di kitolig o posorili’. ¹⁸ Om korikot no i tulun do Pilistin do hilo’d Rantai do Ropaim, om kaanu no diyolo’ o kinoiyonon diri. ¹⁹ Om uhot no i Daud do TUHAN, ’’Ngoyon ku tuu songodo’ i tulun do Pilistin diri? Onuan oku i’ tuu diya’ do kamanangan?’’ ka dau. Boros kad TUHAN, ’’Ngoyon nopo songodo’. Tu’ onuan ku i’ iya’ do kamanangan!’’ ka. ²⁰ Om ongoi noddi i Daud do hilo’d Baal Porasim om hilo’ no do naala’ dau i soudor do Pilistin. Om boros kaddi dau, ’’Naraag nod TUHAN i pogintirungan di pisangod ku, do miagal pod luyud do minonigowo do minomorudsu’ ngai’ddi,’’ ka dau. Om iri noddi o kinopomungaranan do kinoiyonon diri do Baal Porasim. ²¹ Om poggidu’ no i soudor do Pilistin om tongkiadai nopoddi diyolo’ i tingolig diyolo’ do hiri, tu’ narau-arau tomod iyolo’, om puhuo’ no di Daud om i tulun dau i tingolig diri. ²² A’ i’ alaid do mantad diri om rikot no kawagu i tulun do Pilistin do minongoi iyon do hiri’d Rantai do Ropaim. ²³ Om uhot po kawagu i Daud do TUHAN. Om boros kad TUHAN do suminimbar, ’’Kada’ iyolo’ songodo’ do mantad hiti. Nga’ sorili’ nogi’ om songodon i’ iyolo’ do mantad ponong id tohuri do hilo’d toning dilo koguasan do kayu di roitan do murbei. ²⁴ Om orongou nu nopo o miagal-agal do tulun do mamanau do hiri’d tuntu di kayu, om mamanau no do mongoi sangod, tu’ mogulu oku i’ diya’ do mongoi pangala’ di soudor do Pilistin,’’ ka dau. ²⁵ Om wonsoyo’ no di Daud o miagal di pinonuhuan do TUHAN dot id dau. Om kaala’ no dau i tulun do Pilistin do mantad po do hilo’d Giba om gisom do hilo’d Gisir.

¹ Om timungo’ noddi di Daud o koinsanai di soudor dot Israil di gunsiou, om kogumuon nopo nga’ tolu nohopod noribu o tulun. ² Om pamanau no i Daud do momoyo’ diyolo’ do kuminaa do hilo’d Baala Yohuda, do mongoi poundaliu di Kaban do Tumpongo, i roitan do ngaran do TUHAN it Agayo o Kuasa, i poirikau do hiri’d sakai di miagal do moloikat di roitan do kerub. ³ Om ngoyo’ no diyolo’ i Kaban do Tumpongo do mantad id walai di Abinadab di hiri’d timpak do nulu-nulu. Om pasakayo’ no diyolo’ i Kaban do Tumpongo’ddi dot id guyudan di wagu po. Om iyo Usa di Ahio, i tangaanak di Abinadab o minomoyo’ di guyudan, ⁴ om i Ahio no om hiri id gulu-gulu. ⁵ I Daud no om koinsanai di tulun dot Israil om tumotos do mintari’ om minsinding do pomusou do TUHAN do hiri’d gulu-gulu di Kaban diri. Om popouni nogi’ iyolo’ do kecapi, om gandang, om rebana, om lunsing om tamburin. ⁶ Tontok di nokorikot iyolo’ do hiri’d pamagamasan do gandum do hilo’d Nakon, om kasadu i sapi’ di mamagayat di guyudan diri, om poroloyo’ no di Usa o longon dau do minongoi daa pomusus di Kaban do Tumpongo. ⁷ Om tontok iddi do notogod di Usa o TUHAN, i Kinorohingan. Om patayo’ nod Kinorohingan i Usa do hiri’d kinoiyonon diri tu’ a’ kopio i’ iyau opuro-puro. Om kapatai no i Usa do hiri’d toning di Kaban do Tumpongo. ⁸ Om roitai noddi i kinoiyonon diri do Piris-Usa Iri kasai’ no o ngaran do kinoiyonon diri do gisom do baino’. Om kotogod no i Daud tu’ awagat kopio o pinomohukum do TUHAN di Usa. ⁹ Nga’ ooris i’ i Daud do TUHAN. Om boros ka dau, ’’Poingkuro oku poddi do mongigit dilo Kaban do Tumpongo?’’ ka dau. ¹⁰ Om a’ iddi di Daud pinakaa i Kaban diri do hilo’d Yorusalim, suwai ko’ ngoyo’ nopoddi dau poopio’ do hiri’d walai di Obid Idom, i tulun mantad do bandar do Gat. ¹¹ Tolu o tulan do koloido’ di Kaban do Tumpongo do poundorong do hiri’d walai di Obid Idom. Om binarakatan diri do TUHAN i Obid Idom om i sompiiyon dau. ¹² Om ngoyo’ noddi i Daud sunudai do poingkaa, ’’Binarakatan do TUHAN i sompiiyon di Obid Idom om koinsanai di songonuon dau, dot i Kaban do Tumpongo o kinapamarakatan,’’ ka. Om ngoyo’ noddi di Daud i Kaban diri do mantad hiri’d walai di Obid Idom. Om igitai no dau do hilo’d Yorusalim do mikuwo do pinapaharo do karamayan. ¹³ Tontok dit ingonom nogi’ kalaang i tulun di suminaan di Kaban do Tumpongo, om suhuo’ no di Daud iyolo’ do mundorong. Om papatahak noddi iyau dot id TUHAN do porsombahan di sumbolion, do pinatahak nopo om songinan o sapi’ do tontoluhan om songinan o tanak do sapi’ dit olomu’ kopio. ¹⁴ Om pintari’ no i Daud do mikuwo dot aayi-ayi’ no o kinoris dau do pomusou dau do TUHAN. Tontok nopoddi nga’ kigonob-gonob po iyau do kain linan dit oniiba’ di poinsiwot do hiri’d tawak dau. ¹⁵ Om iyo noddi i Daud om koinsanai di tulun dot Israil do pinopoundaliu di Kaban do Tumpongo do pinakaa do hilo’d Yorusalim, mikuwo’d sampangkis-pangkis dot atataadan om popinguni do torumpit do minomoyo’ddi. ¹⁶ Om tontok di posuangon noddi do hiri’d bandar i Kaban om liga’ no do hiri’d liligaon i Mikal, i tanak di Saul do tondu’. Om kokito no dau i Raja’ Daud do mimbul-simbul om mari-tari’ do momusou do TUHAN. Om araatan diri i Mikal do kokito di Daud. ¹⁷ Om posuango’ noddi i Kaban do Tumpongo do hiri’d kiim di pinowonsoi di Daud do maan do poiyanan di Kaban diri, om poiliho’ no do hiri’d poiiyanan. Om papatahak noddi i Daud dot id TUHAN do porsombahan di sorobon om porsombahan do piombolutan. ¹⁸ Om kopongo ngai’ poddi iri, om barakatai ngai’ no dau i tulun dot Israil dot id suang do ngaran do TUHAN dit Agayo Kuasa’, ¹⁹ om tikidai nogiddi dau iyolo’ do taakanon. Om onuwai noddi dau do sombulugu’ o roti, om sonsinsib o tonsi di kinoring om piro-piro o roti dot anggur do kinoring o winonsoi, o pointikid-tikid di tulun dot Israil do hiri, do pinotikid di tongokusai om tongoondu’. Om uli’ ngai’ nogiddi iyolo’ do hiri’d walai diyolo’. ²⁰ Tontok di minuli’ i Daud do hiri’d walai dau do minongoi suwau di sompiiyon dau, om soliwan no i Mikal do minongoi solowot dau. Om boro-boros nod, ’’Pinopoinggayo no kopio’d ngaran i raja’ dot Israil baino! Tu’ luminabas iyau do miagal di tulun do basug dot id toguang di tongoondu’ di susuhuon di piro-piro o pagawai dau!’’ ka dau. ²¹ Nga’ boros ka di Daud do suminimbar di Mikal, ’’Minanari’ oku do pomusou ku do TUHAN, i minomili’ doho’ do suminiliu do boyoon di tulun dot Israil, i tulun dau, om i minagada’ di tapa’ nu om i sompiiyon dau. A’ oku i’ tumingkod do manari’ do pomusou ku’d TUHAN, ²² om uhang ku id ointingayam oku piya ko’ mantad di tiinu’. Poinsiriba-ribaon tomod oku doti’ daa diya’ nga’ suahon oku i’ di tongoondu’ di komoyon nu’ddi!’’ ka dau. ²³ Om aiso’ i’ o tanak di Mikal, i tanak di Saul diri, do gisom do kinapatayo’ dau.

¹ Om nintirungan i’ do TUHAN i Daud do mantad id koinsanai di pisangod dau, om gisom do milo’ddi iyau do mundorong do hiri’d walai dau. ² Om boros kaddi di Raja’ Daud dot id di Natan i Nabi diri, ’’Antangai pogi’ nga’ iyoho’ nopo om poingiyon no dot id walai di kayu sedar do Libanon do winonsoi nga’ iri nopo Kaban do Tumpongo do Kinorohingan om id kiim noo o pinoopian,’’ ka dau. ³ Om boros ka di Natan dot id di Daud, ’’Nunu nopo it osorou nu om wonsoyon nopo, tu’ woyoon ko id TUHAN, oi Tuan Raja’,’’ ka dau. ⁴ Nga’ boro-boros no o TUHAN dot id di Natan do totuong diri do poingkaa, ⁵ ’’Pamanau no om ngoyon i’ sunudai i Daud, i susuhuon ku do boros do poingkaa, ’Okon i’ ko’ iya’ o momonsoi do walai do maan ku dot iyonon. ⁶ A’ oku i’ nokoiyon dot id suang do walai do mantad di pinosoliwan ku i’ i tulun dot Israil do mantad hilo’d Masir om gisom do baino’. Suwai ko’ mombo-hombo kasai’ oku i’ om poingiyon kasai’ oku dot id kiim. ⁷ Solinaid ku nopo do minghombo do moyo-woyo’ do koinsanai di tulun dot Israil, om nokoumbal oku toi do minomoros dot id ongoiso’ piya di boyoon do tulun dot Israil, i pinili’ ku’ddi dot, nokuro tu’ a’ oku wansayan do walai di kayu sedar do Libanon o wonsoyon?’ ka. ⁸ Iyo nopoddi om poboroson no o miagal diti dot id di Daud, i susuhuon ku oi Natan, ’Poingkaa no o boros do TUHAN it Agayo o Kuasa’. Iyoho’ no i minongongoi diya’ do mantad id karaja’ nu do madtatamong do dumba’ do hilo’d kobuturan; om siniliu ku’ddi iya’ do raja’ do tulun dot Israil, i tulun do songonuon ku. ⁹ Honggo nopo o nongoi nu nga’ winoyo’ ku i’ iya’. Om nala’ ku diya’ o koinsanai di pisangod nu do tontok di suminangod ko. Om pobontugon ku’ndo o ngaran nu do miagal di piro-piro o boyoon dot angabantug kopio do hiti’d pomogunan. ¹⁰ - ¹¹ Om kawagu po nga’ nokosodia’ ku no o tiyonon dot Israil, i tulun do songonuon ku, om nosuhu’ ku no iyolo’ do momogun-mogun do hilo’, om osimbayan indo iyolo’ om a’ nondo iyolo’ oinggorit kawagu. Mantad poddi nokorikot i’ iyolo’ do hiti’d pomogunan diti di gulu po, om tontok di minomili’ oku do piro-piro o boyoon diyolo’, om songod-songodon no iyolo’ do tulun dit ongorohian do pokoruol, nga’ a’ nondo osiliu o miagal diri. Om mamatos oku dot osimbayan ko nondo do mantad id toinsanan do pisangod, om onuan ku po iya’ do sinakagon. ¹² - ¹³ Apatai ko nopondo, om olobong ko do poinsugku’ di taki-aki nu, om silihon ku’ndo do raja’ ot iso’ di tanak nu’d kusai. Om iyau nondo o popoingkakat do walai ku, om pogiroton ku’ndo o pomorintaan dau do gisom dot alaid. ¹⁴ Om osiliu oku’ndo do tapa’ dau om osiliu iyau do tanak ku. Soira’ nopo do kowonsoi iyau do sala’ om bobogon ku indo iyau do monuduk do miagal do songulun o tapa’ di momobog do monuduk di tanak dau. ¹⁵ Nga’ a’ oku i’ tumingkod dot osianan dau do miagal di tuminingkod oku do nosianan di Saul. Iyo pogiddi o winonsoi ku dot id di Saul nga’ iya’ no o silihon ku do raja’. ¹⁶ Haro kasai’ nopondo o sinakagon nu, om potilombuson ku i’ o pomorintaan nu do gisom dot alaid. Om a’ indo opupusan o pomorintaan nu do gisom dot alaid,’ ka,’’ ka dau. ¹⁷ Om posunudo’ ngai’ nopo di Natan dot id di Daud o koinsanai di pinointalang do Kinorohingan dot id dau. ¹⁸ Om suang noddi i Raja’ Daud do hiri’d Kiim do TUHAN. Om irikau no iyau om sambayang no do poingkaa, ’’Oi TUHAN it Asawat Kopio, a’ oku i’ om i sompiiyon ku osorupai do rumamit do koinsanai di barakat do patahakon nu. ¹⁹ Om agayo po ko’ iri o winonsoi nu, oi TUHAN, it Asawat Kopio; tu’ pinopoboros ko po do batos do pasal do sinakagon ku dot id dosunsudan. Om pinokito oku po diya’ddi do mulong po do tulun toomod oku, oi TUHAN it Asawat Kopio! ²⁰ Nunu poo o milo ku do poboroson dot id diya’? Tu’ noilaan nu no o kowoyo-woyoo’ ku, i susuhuon nu. ²¹ Winonsoi ngai’ nu iti dot id doho’ do tumanud di batos nu om korohian nu, om pinokito oku po diya’, iyoho’ i susuhuon nu do koinsanai di hal dot angagayo’ddi. ²² Agayo ko no kopio, oi TUHAN, i Kinorohingan! Aiso’ no o koiyo diya’, om mantad po di gulu po om nokoilo no iyahai dot iya’ noo o Kinorohingan. ²³ Om aiso’ no o bansa’ do hiti’d pomogunan do koiyo dot Israil. Tu’ Israil no o bansa’ di pinoidu’ nu do mantad id ponguripanan om siniliu nu’ddi iyolo’ do tulun di songonuon nu. Nokotongkop no o ngaran nu dot osonong do hiti’d pomogunan tu’ i winonsoi nu dot id diyolo’ dit angagayo om i kongoimayaan. Nuyung ngai’ nu i bansa’d suwai do miwoyo’ di tingolig diyolo’ do tontok di ruminikot i’ i tulun nu do mongoi sangod. ²⁴ Nosiliu nu no do tulun di songonuon nu o bansa’ dot Israil do gisom dot alaid, om iya’ oi TUHAN nga’ nosiliu do Kinorohingan diyolo’. ²⁵ Om baino’ nodti, oi TUHAN i Kinorohingan, om pogiroto’ no o batos di pinoboros nu do pasal doho’ om i sinakagon ku do gisom dot alaid, om wonsoyo’ no i nakabatos nu do wonsoyon nu. ²⁶ Om abantug i’ o ngaran nu. Om mompus-ompus indo o tulun do momoros do, ’TUHAN it Agayo Kuasa’ o Kinorohingan dot Israil,’ ka. Om potilombuson nu indo kasai’ o sinakagon ku do sumiliu do raja’ do momorinta’ do bansa’ diti. ²⁷ Oi TUHAN, it Agayo Kuasa’, i Kinorohingan dot Israil! Kasaap oku pogi’ do sumambayang do miagal diti dot id diya’ nga’ nokointalang nu no ngai’ iti dot id doho’, i susuhuon nu, om nokopomisunud ko nogi’ doho’ do gompion nu o sinakagon ku om a’ indo opupusan. ²⁸ Oi TUHAN, it Asawat Kopio, iya’ noo o Kinorohingan; bayaanon ngai’ nu i’ o batos nu, om pinabatos nu dot id doho’ i batos dit osonong kopio. ²⁹ Om pokionuon ku no daa do barakatan kasai’ nu o sinakagon ku om kopuriman kasai’ i’ iyolo’ do kosianan nu do gisom dot alaid. Nakabatos nu nori, oi TUHAN it Asawat Kopio, om barakatan kasai’ nu indo o sinakagon ku do gisom dot alaid,’’ ka dau.

¹ Om alaid-laid noddi do mantad diri, om ongoi no kawagu i Daud sangod do tulun do Pilistin. Om naala’ i’ dau iyolo’ om nosolod dau i tana’ diyolo’. ² Om naala’ nogi’ di Daud i tulun do Muab. Om suhuo’ no dau iyolo’ do lumii do hiri’d tana’. Om patayo’ noddi dau o duwo tulun do mantad id pointikid-tikid do tolu o tulun. Om kosiliu noddi i tulun do Muab do turipon di Daud om mambayar diri iyolo’ do sukai dot id dau. ³ Om naala’ nogi’ di Daud i raja’ do momorinta’ do pomogunan do Soba, i roitan dot i Hadadisir, i tanak di Rihob; pomogunan nopoddi nga’ id somok do Damsik. Tontok nopoddi nga’ hiri nod tanga’d ralan i Hadadisir do mongoi daa pomorinta’ kawagu di watas do ponong id sarayo di Bawang dot Iprat. ⁴ Om katangkap no di Daud o 1,700 o soudor di Hadadisir di poinsakai do kuda’, om 20,000 o soudor di mamanau’d gakod. Om panganu no i Daud do kuda’ do kabagal do pamagayat do hatus o korita’-kuda’ om iri nopoddi i suwai om tinipuan ngai’ dau o gakod. ⁵ Soira’ di ruminikot i soudor do tulun do Siria do mantad hilo’d Damsik do mongoi daa uhup di Raja’ Hadadisir, om ngoyo’ no iyolo’ di Daud songodo’, om kaala’ iddi iyolo’. Om 22,000 o tulun do napatai. ⁶ Om pomukiim noddi i Daud do pinoundarangan dau di soudor dau do hiri’d watas di tulun do Siria, om id siriba’ noddi iyolo’ do pomorintaan di Daud, om mambayar iyolo’ do sukai dot id dau. Om hinonggo-honggo nopo i Daud do monokisangod, nga’ onuan kasai’ nopo iyau’d TUHAN do kamanangan. ⁷ Om onuo’ no di Daud i kolid di tamas do winonsoi, i songingigit daa di piro-piro o pagawai di Hadadisir, om igitai no dau do hilo’d Yorusalim. ⁸ Om suwai no ko’ iri, om ogumu’ po tomod o tambaga’ do nanu di Daud do mantad hilo’d Bota om hilo’d Borutai, i kabandaran do porintaon daa di Hadadisir di gulu po. ⁹ Om korongou noddi i Raja’ Tou, i mantad hilo’d Hamat, do naala’ ngai’ di Daud i soudor di Hadadisir. ¹⁰ Om suhuo’ noddi dau i Yoram, i tanak dau, do mongoi poporikot do tabi’ dot id di Raja’ Daud, om pokoundar dau tu’ nakamanang i’ iyau do suminangod di Hadadisir, tu’ alaid no i Tou do monokisangod di Hadadisir. Om igit no i Yoram do pomuhawang do tamas, om pirok, om tambaga’ do winonsoi do patahakon dau di Daud. ¹¹ - ¹² Om patahako’ no di Daud i pinomuhawang diri dot id TUHAN do pakayon do tontok do sumambayang, om iri nogi’ i pirok om tamas di naanu dau do mantad id piro-piro bansa’ do tulun di naala’ dau — i tulun dot Idom, Muab, Amon, Pilistin, om Amalik — om iri nogi’ wookon di nangaanu dau do mantad id di Hadadisir. ¹³ Om koruhangai poddi o kababantug di Daud di napatai dau o hopod om walu’ noribu o tulun dot Idom do hilo’d rantai di roitan do Rantai do Silaon. ¹⁴ Om pomukiim no i Daud do pinoundarangan dau do soudor dau dot id pointongkop do pomogunan dot Idom, om id siriba’ noddi do pomorintaan dau i tulun dot Idom. Om onuan kasai’ nopoddi do TUHAN do kamanangan i Daud do honggo nopo iyau do sumangod. ¹⁵ Om i Daud noddi o momorinta’ do pointongkop dot Israil. Om antaan-taan kasai’ dau, om otulid indo om osonong ot owonsoi dot id rayat dau. ¹⁶ - ¹⁷ Iti no ngai’ i pagawai dot angasawat o pangkat do pinili’ di Daud: Boyoon do soudor: I Yoab, i tanak di Soruya; Gomponulis do hiri’d walai’d raja’: I Yosapat, i tanak di Ahilud; Imam: I Sadok, i tanak di Ahitub, om i Ahimilik, i tanak di Abiatar. Gomponulis do pomorinta’: i Soraya. ¹⁸ Boyoon di madtatamong do raja’: I Bonaya, i tanak di Yoyada; Imam do hiri’d walai’d raja’: I tangaanak di Daud do tongokusai.

¹ Insan tadau om ponguhot no i Daud, ’’Haro po o tulun do noolu’ dot id suang do sompiiyon di Saul? Ondung haro daa om orohian oku do popointalang do kosianan ku dot id dau do bagi’ di Yonatan,’’ ka. ² Iri nopo sompiiyon di Saul nga’ haro o susuhuon dot i Siba o ngaran. Om sinunudan diri iyau do mongoi solowot di Daud. ’’I Siba ko?’’ ka di Daud do minuhot. ’’Oo, oi Tuan Raja’,’’ ka dau. ³ Om uhoto’ no di raja’ iyau, ’’Haro po o tulun do noolu’ dot id suang do sompiiyon di Saul? Tu’ orohian oku do popointalang do kosianan ku dot id dau do miagal di nakabatos ku dot id Kinorohingan,’’ ka dau. Om boros kad i Siba do suminimbar, ’’Iso’ poo o tanak di Yonatan do kusai, nga’ kimpo’ iyau,’’ ka dau. ⁴ ’’Hinonggo iyau?’’ ka di raja’ do minuhot. ’’Hilo’d walai di Makir, i tanak di Amiol, do hilo’d Lodibar,’’ kad i Siba do suminimbar. ⁵ Om ponuhu’ noddi i Daud do tulun do mongongoi di tanak di Yonatan. ⁶ Ngaran nopo di tanak di Yonatan diri nga’ i Mopibosit. Om soira’ddi nokorikot iyau om otud no iyau dot id toguang di Daud do suminuwau dau. Om boros kad i Daud, ’’Mopibosit!’’ ka. Om boros ka di Mopibosit, ’’Hati oku no, oi Tuan Raja’,’’ ka. ⁷ Om boros kad i Daud dot id dau, ’’Kada’ kooris, tu’ osonong oku i’ dot id diya’ tu’ osorou ku i’ i Yonatan, i tapa’ nu. Pogulion ku i’ diya’ o koinsanai di tana’ di taki nu, i Saul. Om milang kasai’ ko doho’ do makan do hiti’d walai ku,’’ ka dau. ⁸ Om otud po kawagu i Mopibosit, om boro-boros no iyau, ’’Iyoho’ nopodti om miagal pod tasu do napatai! Nga’ nokuro tu’ podulon oku po kopio diya’, oi Tuan?’’ ka dau. ⁹ Om lohowo’ noddi di raja’ i Siba, i susuhuon di Saul, om boro-boros no do, ’’Patahakon ngai’ ku nopo di Mopibosit, i manangaki di tuan nu, o koinsanai di dapu’ di Saul om i sompiiyon dau. ¹⁰ Umoon no dokoyu di tangaanak nu om i susuhuon nu i tana’ddi do bagi’ di sompiiyon di Saul, i tuan nu, om patahakon no i hasil di tana’ dot id manangaki di tuan nu do maan diyolo’d kanon. Nga’ i Mopibosit nopo om hilo’ kasai’ id walai ku ot akanan,’’ ka dau. (Kogumuon nopo di tangaanak di Siba do tongokusai om hopod om limo om susuhuon no dau om duwo nohopod o tulun.) ¹¹ Om boros kad i Siba do suminimbar, ’’Wonsoyon ngai’ ku i’ ino ponuhuan nu, oi Raja’,’’ ka dau. Om hiri kasai’ noddid walai di raja’ i Mopibosit do makan do miagal poddi tanak kopio di Raja’ Daud. ¹² I Mopibosit nopoddi nga’ kianak do kusai dot i Mika o ngaran. Om oinsanan nopoddi i sompiiyon di Siba do nosiliu do susuhuon di Mopibosit. ¹³ Om hilo’ noddid Yorusalim do poingiyon i Mopibosit, i kimpo’ goduwo o gakod diri, om hiri kasai’d walai di raja’ ot akanan dau.

¹ Om alaid-laid noddi om kapatai no i Nahas, i raja’ dot Amon, om i Hanun diri, i tanak dau’d kusai, o nosiliu do raja’. ² Om boros kaddi di Daud, ’’Orohian oku i’ do mambalut di Hanun, i tanak di Nahas, tu’ minambalut i’ doho’ i tapa’ dau,’’ ka. Om ponuhu’ noddi i Daud do piro-piro tulun do mongoi poporikot do boros dot id diyolo’ dot i Daud nga’ tumonggoi i’ di Hanun do tumongob. ³ Nga’ tontok di nokorikot i susuhuon di Daud do hiri’d pomogunan dot Amon, om boros ka ngai’ di boyoon do tulun dot Amon dot id di Hanun, ’’Ondos nu daa om mongoi posunud do tumonggoi iyolo’ do tumongob o kinoporikatan di Daud diti tulun dau do hiti. A’ i’ moti’! Suwai ko’ sinuhu’ pogi’ dau iyolo’ do mongoi’d hiti nga’ mongoi pogontong om mongoi ponoluku’ diti bandar om aala’ toko’ indo diyolo’!’’ ka. ⁴ Om tangkapo’ ngai’ noddi di Hanun i susuhuon di Daud. Om bugaro’ no o sampaping di ganggut diyolo’ om pompodo’ i pakayan diyolo’ do gisom pod hiri’d puun do poo, om suhuo’ nogiddi diyolo’ i susuhuon diri do mamanau. ⁵ Nga’ ointingayaman diri iyolo’ do muli’ do hiri’d pomogunan diyolo’. Om soira’ddi nosunudan i Daud do pasal diri om ponuhu’ no iyau do tulun do mongoi solowot di susuhuon di nintingayam diri do mongoi poromut do boros di Daud do poingkaa, ’’Undorong kou nopo do hilo’d Yorikou do gisom pod kanaru kawagu ino ganggut dokoyu,’’ ka. ⁶ Om kopurimanai nogiddi di tulun dot Amon do nosiliu’ddi diyolo’ do pisangod i Daud. Om pamagadsi’ no iyolo’ do duwo nohopod noribu o soudor do Siria, i poingiyon do hilo’d Bait-Rihob om hilo’d Soba, om hopod po om duwo noribu o soudor do mantad hilo’d Tob, om mantad nod hilo’d Maaka om soribu o soudor do miniwoyo’ di raja’ diyolo’. ⁷ Om soira’ddi nokorongou i Daud diri om suhuo’ no dau i Yoab om koinsanai di soudor dau do mongoi sangod di pisangod. ⁸ Om pamanau no i tulun dot Amon do mongoi sangod om talob no do hiri’d wawayaan do sumuang do hiri’d bandar do Raba, i bandar diyolo’ dit agayo. Iri no suwai, i tulun do Siria om i tulun do mantad hilo’d Tob om Maaka, om tuminamong do hiri’d talun dit id soliwan di bandar. ⁹ Om kokito no di Yoab do notutukan iyolo’ do soudor di pisangod; om pilio’ noddi dau i soudor dot Israil dit ongosiou kopio do tumimbaba’ di tulun do Siria. ¹⁰ Om iri no soudor do suwai om i Abisai, i tobpinai dau, o minomoyo’. Om pinotimbaba’ dau iyolo’ di soudor dot Amon. ¹¹ Om boros ka di Yoab dot id di Abisai, ’’Ondung okito nu dot aala’ oku di tulun do Siria, om ngoyon oku no uhupai; om ondung a’ ko kasaap di soudor dot Amon, om ngoyon ku i’ iya’ uhupai. ¹² Kumosiou no! Tumotos toko’ no do sumangod do bagi’ do bansa’ toko’ om bagi’ di bandar do Kinorohingan toko’. Om maha’ daa om wonsoyon do TUHAN i korohian dau,’’ ka. ¹³ Om pamanau no i Yoab om i soudor dau do mongoi sangod om poggidu’ no i tulun do Siria. ¹⁴ Om soira’ di nokito di tulun dot Amon i tulun do Siria do minogidu’ om poggidu’ no iyolo’ do mantad id di Abisai, om suang no iyolo’ do hiri’d bandar diyolo’. Om kasangod poddi di Yoab i tulun dot Amon om poguliai nogiddi dau do hilo’d Yorusalim. ¹⁵ Om kopurimanai noddi di tulun do Siria do naala’ iyolo’ di tulun dot Israil. Om lohowo’ ngai’ noddi diyolo’ i soudor diyolo’ do tumimung kawagu. ¹⁶ Om ponuhu’ no i Raja’ Hadadisir do momolohou di tulun do Siria, i mantad ponong id koulayon do mantad di Bawang dot Iprat. Om rikot no iyolo’ do hilo’d Hilam, om i Sobak o boyoon diyolo’, i boyoon do soudor di Raja’ Hadadisir do mantad hilo’d Soba. ¹⁷ Om soira’ di nokorongou i Daud do pasal diri, om timungo’ ngai’ no dau i soudor dot Israil om soborong no iyolo’ di Bawang do Yordan do pakayaan do hilo’d Hilam do mongoi sangod. Om hilo’ no o pinotimungan di tulun do Siria di soudor om ongoi nogiddi iyolo’ sangod di soudor di Daud. ¹⁸ Nga’ naala’ i’ di soudor dot Israil i soudor do Siria. Napatai nopo di Daud om i soudor dau nga’ 700 o mongingigit do korita’-kuda’ di don sumasangod, om 40,000 i songinsakai do kuda’. Om suwai no ko’ iri, om norualan po tomod diyolo’ i Sobak, i boyoon di soudor do pisangod om kapatai noddi iyau do hiri’d kinoiyonon do minisangod. ¹⁹ Om soira’ di nopurimanan di raja’ dit id siriba’ di Raja’ Hadadisir do naala’ iyolo’ dot Israil, om ponokiulud noddi iyolo’ dot Israil om insiriba’ no iyolo’ dot id diyolo’. Om mantad poddi om ooris no i tulun do Siria do mongoi uhup di tulun dot Amon.

¹ Koubasanan no do raja’ do mongoi sangod do tontok di momuroun kawagu o kayu. Om tontok di maso do kopomurounan do kayu do toun diri, om suhuo’ no di Daud i Yoab om koinsanai di soudor dau do mongoi sangod; om kaala’ no diyolo’ i tulun dot Amon om turungkuo’ no diyolo’ i bandar do Raba. Nga’ i Daud nopo om minundorong i’ do hilo’d Yorusalim. ² Insan tadau, di sumodop no, om tungag no i Daud di noposik iyau om ongoi no do hiri’d sakai di taap do walai dau dit arantai. Om tontok di mimpanau iyau do hiri om kokito no iyau dot iso’ o tondu’ do modsu’. Om iri nopo tondu’ddi nga’ olumis kopio. ³ Om ponuhu’ noddi iyau do tulun do mongoi ponguhot ondung isai i tondu’ddi. Om kosunudai no iyau dot i Batsiba i tondu’ddi, i tanak di Iliam, om sawo nopo dau nga’ i Uria, i tulun do Hit. ⁴ Om ponuhu’ no i Daud do tulun do mongoi pangangat di tondu’ do hiri’d walai dau, om korikot poddi i tondu’ do hiri, om duduno’ no di Daud i tondu’ddi. (Iri nopo tondu’ddi nga’ wagu po kopongo do momolidang do tinan dau do tumanud dot oturan do tugama’ tu’ wagu po kotingkod o pomulanan dau.) Om uli’ noddi i tondu’ do hiri’d walai dau. ⁵ Om alaid-laid noddi om ponontian no i tondu’ddi om ponuhu’ no iyau do tulun do mongoi pomisunud di Daud do monontian iyau. ⁶ Om ponuhu’ noddi i Daud do tulun do mongoi pomisunud di Yoab do poingkaa, ’’Suhuon no i Uria, i tulun do Hit diri, do mongoi do hiti’d doho’,’’ ka. Om suhuo’ no di Yoab i Uria do mongoi solowot di Daud. ⁷ Om soira’ di nokorikot i Uria do hiri’d di Daud, om uhoto’ no di Daud i Uria ondung osonong-sonong i Yoab om koinsanai di soudor, om ondung poingkuro- kuro no i pisangadan. ⁸ Om boros kaddi di Daud dot id di Uria, ’’Uli’ no do hilo’d walai nu om koundorong-dorong ko i’,’’ ka. Om tongkiad no i Uria di walai di raja’. Om paatadai noddi di Daud dot ipuhawang o hiri’d walai di Uria. ⁹ Nga’ a’ i’ minuli’ i Uria; suwai ko’ minodop nogi’ iyau do hiri’d toning di wawayaan do walai di raja’, do poinsugku’ di madtatamong do raja’. ¹⁰ Soira’ di nosunudan i Daud dot a’ minuli’ i Uria, om uhoto’ no dau iyau, ’’Koguguli’ nu om alaid ko no do potongkiad. Nga nokuro’ddi tu’ a’ ko minuli’ do hilo’d walai nu?’’ ka dau. ¹¹ Om boros ka di Uria do suminimbar, ’’Iri nopo soudor dot Israil om Yohuda om maso i’ do sumangod, om i Kaban do Tumpongo do TUHAN nga’ moyo-woyo’ i’ diyolo’; om hilo’d kobuturan o pinomukiiman di Yoab, i boyoon dahai, om i soudor dau. Om nokuro tu’ muli’ oku i’ daa’ndo iyoho’ do hilo’d walai ku, do mongoi akan om mongoi inum, om mongoi dudun di sawo ku? Sumumpa’ oku no kopio dot a’ momonsoi do miagal diri!’’ ka dau. ¹² Om boros kaddi di Daud, ’’Om undorong katuu do hiti do baino’, om suab pondo om pologoson ku nogi’ iya’ do mamanau,’’ ka. Om undorong no i Uria do hilo’d Yorusalim do tadau’ddi. Om tadau noddi kawagu, ¹³ om lohowo’ no iyau di Daud do tuminorungak dau do makan, om owuko’ no di Daud i Uria. Nga’ a’ i’ minuli’ i Uria do hiri’d walai dau do totuong diri, suwai ko’ odop nopo iyau do minamalapik-lapik di kumut dau do hiri’d bilik di madtatamong do walai di raja’. ¹⁴ Tadau noddi kawagu om ponulis no i Daud do patahakon dau di Yoab. Om poigitai no dau iri di Uria. ¹⁵ Tinulis nopo dau nga’ poingkaa, ’’Pohirion nod borisan dit id gulu kopio i Uria, i hiri’d adalaan kopio do mogisasangod, om sumunsuri kou nogindo om apatai i’ i Uria,’’ ka. ¹⁶ Om daamot diyo Yoab do monurungku’ di bandar om suhuo’ no dau i Uria do mongoi do hiri’d kinoiyonon dit oilaan dau dot ongokoris i pisangod do madtamong. ¹⁷ Om soira’ di suminoliwan di bandar i soudor di pisangod do minongoi sangod di soudor di Yoab, om kapatai noddi o piro-piro di soudor di Daud om i Uria nga’ nokotonggoi nogi’ do napatai. ¹⁸ Om porikatai noddi di Yoab i Daud do habar do kinowoyo-woyoo’ di pinisangadan. ¹⁹ Om bilinai no di Yoab i tulun di minongoi poromut di habar do poingkaa, ’’Kosunud ngai’ nu nopondo di raja’ o kinowoyo-woyoo’ di pinisangadan, ²⁰ om tumogod dotindo iyau om muhot nondo diya’ do poingkaa, ’Nokuro tu’ mininsomok kopio kou di bandar do suminangod diyolo’? A’ toi dokoyu oilaan do mamana’ o pisangod do mantad hiri’d tolig do bandar diyolo’? ²¹ A’ toi dokoyu osorou i kinapatai-patayo’ di Abimilik, i tanak di Gidion diri do hilo’d Tibis? Tu’ numaan no iyau do tondu’ poliidai di watu do ponutuan do mantad hiri’d tolig di bandar, om iri no o nakapatai dau. Nokuro poddi tu’ mininsomok kopio kou di tolig?’ ka dotindo dau. Om ondung uhoton ko di raja’ do miagal diri om sunudan no iyau do poingkaa, ’I Uria, i soudor nu’ddi nga’ napatai nogi’!’ kanto,’’ ka dau. ²² Om ongoi no i susuhuon diri solowot di Daud om posunudo’ ngai’ no dau i pinonuhuan di Yoab do poposunud. ²³ Boros ka di tulun do minongoi poromut di habar dot id di Daud, ’’Okoris i’ ko’ iyahai i pisangod, om soliwan noddi iyolo’ do mantad hiri’d bandar do minongoi panangod dahai do hiri’d talun; nga’ nouyung i’ kawagu dahai iyolo’ do hiri’d wawayaan di bandar. ²⁴ Om pamana’ noddi iyolo’ dahai do mantad hiri’d timpak di tolig do bandar diyolo’, om nangapatai’ddi o piro-piro o soudor do Tuan Raja’, om i Uria, i soudor nu’ddi nga’ napatai nogi’,’’ ka dau. ²⁵ Om sunudai no di Daud i susuhuon diri, boros ka dau, ’’Pogiroton no o ginawo di Yoab, om sunudan no iyau dot a’ minog do tumongob tu’ a’ i’ oilaan ondung isai ot apatai dot id pisangadan. Sunudan no iyau do tumotos kopio do sumaap om osolod i’ i bandar,’’ ka. ²⁶ Om soira’ di nokoilo i Batsiba do napatai i sawo dau, om pogihadai no dau iyau. ²⁷ Om katalib poddi i maso do kopogihadan om lohowo’ no di Daud i tondu’ddi do hiri’d walai dau. Om kosiliu noddi iyau do sawo di Daud. Om alaid-laid noddi om kosusu no iyau do tanak do kusai. Nga’ a’ i’ o TUHAN orohian di winonsoi di Daud.

¹ Om suhuo’ noddi do TUHAN i Nabi Natan do mongoi solowot di Daud. Om ongoi no i Natan do hiri, om boros ka dau, ’’Haro o duwo tulun do poingiyon dot id iso’ o bandar; iso’ nopo diyolo’ om kaya’, nga’ iri no tiso’ om mosikin. ² Iri nopo tulun do kaya’ nga’ ogumu’ o dumba’ dau, ³ nga’ iso’ no o tanak do dumba’ di tulun do mosikin, om binoli-boli i’ dau iri. Om gompio’ no dau i tanak do dumba’ do gisom do nakagayo do hiri’d walai dau do poinsugku’ di tangaanak dau. Iri nopo tanak do dumba’ dau’ddi nga’ poingilang dau do makan, om minum do hiri’d sangkir dau, om poingkibit dau do modop; do miagal po di tanak dau’d tondu’. ⁴ Insan tadau om rikot no o sompogunan dot id walai di tulun do kaya’. Om a’ diri siponumbali’ i tulun do kaya’ di dau’d dumba’ ko’ sapi’ do maan do paakan di sompogunan diri. Om ngoyo’ noddi dau i tanak do dumba’ di tulun do mosikin om onsoko’ no do maan do paakan di sompogunan diri,’’ ka dau. ⁵ - ⁶ Om otogod diri i Daud di tulun do kaya’ om boros ka dau, ’’Sumumpa’ oku no dot id TUHAN di poimpasi do mositi’ no do hukuman do kapatayon i tulun do minomonsoi do miagal kopio’ddi! Tu’ orongit no kopio iyau! Om mositi’ no do tingalanan dau i tanak do dumba’ddi dot ingapat kogumu’ ko’ mantad di naanu dau,’’ ka dau. ⁷ Om boros kaddi di Natan dot id di Daud, ’’Iya’ nogi’ moti’ i tulun diri oi Tuan Raja’. Om poingkaa o boros do TUHAN, i Kinorohingan dot Israil, ’Siniliu ku iya’ do raja’ dot Israil om pinasi ku iya’ do mantad id di Saul. ⁸ Tinahak ku diya’ i pomorintaan di Saul om iri ngai’ nogi’ i sawo dau; om siniliu ku iya’ do raja’ dot Israil om Yohuda. Om ondung a’ daa kabagal iri nga’ ruhangan ku po daa. ⁹ Nga’ nokuro’ddi tu’ a’ nu pinadul o boros ku? Nokuro tu’ minomonsoi ko dit araat? Pinokipatayan nu i Uria dot id pisangadan; pinologos nu i tulun dot Amon do minamatai dau, om ngoyo’ nu poddi i sawo dau! ¹⁰ Gowoi pondo om id suang nopo do sinakagon nu, om haro kasai’ nopondo ot apatai do patayon tu’ a’ ko i’ minumboyo’ doho’, tu’ nongoi nu kowino’ i sawo di Uria. ¹¹ Sumumpa’ oku no do porikatan ku nondo iya’ do kosusaan, nga’ mantad i’ dot id sompiiyon nu o poporikot di kosusaan diri dot id diya’. Ngoyon ngai’ ku nopondo i sawo nu do montong-ontong ko, om patahakon ku dot id tulun do suwai; om dumudun nondo iyau diyolo’ do hiri’d dokito kopio do dangadau. ¹² Poillisok-lisok ko i’ daa do minomonsoi do dusa nga’ pologoson ku’ndo dot osiliu i pinoboros ku’ddi dot id dokito kopio, om ongkokito ngai’ o tulun dot Israil!’ ka dau,’’ kad i Natan. ¹³ Om boros kaddi di Daud dot id di Natan, ’’Nokowonsoi oku nod dusa dot id TUHAN,’’ ka. Om boros ka di Natan do suminimbar, ’’Ompunan ko id TUHAN, oi Tuan Raja’, om a’ ko i’ apatai. ¹⁴ Nga’ nokopongindaraat kopio ko’d TUHAN, tu’ i winonsoi nu do miagal diri o pinongindaraat nu, om matai no i tanak nu di wagu po kosusu,’’ ka dau. ¹⁵ Om uli’ noddi i Natan do hiri’d walai dau. Om porikatai nod TUHAN do toruol i tanak di Daud, i pinogkosusu di Batsiba, i sawo daa di Uria, gisom do nadalaan tomod diri do sumakit. ¹⁶ Om sambayang noddi i Daud dot id TUHAN do mokilingos daa di tanak. Om a’ no iyau mangakan do nunu nopo. Pointikid-tikid do totuong om mongoi kasai’ nopo iyau do hiri’d bilik dau, om lumii do hiri’d siliu do gisom dot osuaban. ¹⁷ Om ongoi no solowot di Daud i pagawai dau do hiri’d walai dau om lugu-lugutai no daa diyolo’ iyau do tumungag, nga’ a’ i’ iyau tumungag om a’ minongoi torungak diyolo’d makan. ¹⁸ Om sominggu’ noddi do mantad diri om kapatai no i tanak. Om ongooris diri i susuhuon di Daud do mongoi pomisunud di Daud do napatai i tanak. Boros ka diyolo’, ’’Di nopo poimpasi po i tanak om a’ i’ i raja’ sumimbar dati’ do tontok di moro-boros toko’ dau. Om okuro-kuro nogi’ tuu’ndo do baino’ tu’ napatai i tanak dau? Tu’ nunu koilo-ilo do pokoruol dotindo iyau do tinan dau!’’ ka diyolo’. ¹⁹ Soira’ di nokito di Daud do mogikonos-konos i susuhuon dau, om koilaai no dau do napatai no i tanak. Om uhoto’ noddi dau iyolo’, ’’Napatai’ddi i tanak?’’ ka. ’’Oo,’’ ka diyolo’ do suminimbar. ²⁰ Om tungag noddi i Daud do mantad hiri’d siliu om ongoi no podsu’, om ponudai, om poningolon iyau do pakayan. Om ongoi noddi iyau sambayang do hiri’d walai’d TUHAN. Om soira’ di nokoguli’ iyau do hiri’d walai dau, om pokianu no iyau do taakanon om akan no iyau. ²¹ Om boros ka di pagawai dot id di Daud, ’’A’ no kopio iyahai kosuhut do miagal diti. Tu’ tontok di poimpasi po i tanak om nihadan nu i’ iyau om a’ ko minakan, nga’ maha’ nogiddi do napatai i tanak om tumungag ko om makan!’’ ka. ²² Om boros kad i Daud do suminimbar, ’’A’ oku i’ minakan om minihad oku di poimpasi po i tanak. Tu’ osorou ku nopo nga’ osianan i’ doti’ o TUHAN doho’ om a’ indo pologoson i tanak do matai. ²³ Nga’ baino’ nopoddi tu’ napatai no i tanak, om nokuro tu’ minog oku po kasai’ do puasa? Milo oku po daa do mamasi kawagu di tanak? Insan tadau om iyoho’ nga’ koongoi indo do hiri’d kinoiyonon dau, nga’ a’ no iyau milo do gumuli’ dot id doho’,’’ ka dau. ²⁴ Om insasamadai noddi di Daud i Batsiba, i sawo dau. Om ongoi no iyau dudun dau do minodop. Om paganak no i Batsiba dot iso’ tanak do kusai. Om pungaranai nod i Daud i tanak diri dot i Suliman. Om kosianan i’ do TUHAN i tanak diri. ²⁵ Om suhuo’ noddi do TUHAN i Nabi Natan do mongoi pomungaran di tanak diri dot i Yodiya, tu’ kosianan id TUHAN i tanak diri. ²⁶ Om tontok nopoddi nga’ maso di Yoab do sumaap do Raba, i bandar dot agayo do pomogunan dot Amon. Om oruhai no daa dau dot osolod i bandar diri. ²⁷ Om ponuhu’ noddi i Yoab do tulun do mongoi pomisunud di Daud do poingkaa, ’’Nasangod ku no o Raba, om nosolod ku no i tudan do waig diyolo’. ²⁸ Ngoyo’ no timungo’ i soudor toko’ di noolu-olu’ om iya’ indo o boyoon do mongoi kopio panganu di bandar. Om aiso’ indo o tulun do momoros dot iyoho’ o nokosolod di bandar,’’ ka. ²⁹ Om timungo’ ngai’ no di Daud i soudor dau om ongoi no do hilo’d Raba. Om songodo’ no di Daud i tulun di poingiyon do hiri’d bandar diri om kosolod noddi dau i bandar. ³⁰ Om onuo’ no dau i tupi’ di raja’ diyolo’, om tupio’ no dau. Om kawagato’ nopo di tupi’ nga’ haro i’ doti’ o tolu nohopod om limo kilogram om dinakatan iri do watu dit agayo gatang dit ongolumis kopio. Om ogumu’ po o konunu-nunuan do naanu dau do mantad id bandar diri. ³¹ Om tanggayai ngai’ no dau i tulun di hiri’d bandar om sansagai no dau iyolo’ do kumaraja’ do mamagaragadi’, om manangkul om mangapak; om pinakaraja’ nogi’ dau iyolo’ do hiri’d pamansayan do bata’ di watu o wonsoyon. Om iyo nogiddi o winonsoi dau dot id kabandaran dot Amon di suwai. Om guli’ nogiddi i Daud om koinsanai di soudor dau do hilo’d Yorusalim.

¹ I Absalom nopo, i tanak di Daud do kusai, om kitobpinai do tondu’ dot olumis kopio. Ngaran nopo dau om i Tamar. Om muhang diri i Amnon di Tamar, i tanak di Daud di sawo dau do suwai. ² Om haro daa’ddi ot osorou di Amnon do wonsoyon dau dot id di Tamar. Nga’ a’ i’ milo tu’ a’ po nodudun do kusai i Tamar, om a’ po iyau koino-ino do mongoi rolot do tongokusai. Om osorou kasai’ nopoddi di Amnon iri gisom do suminakit iyau. ³ Nga’ i Amnon nopoddi, om kitambalut dit oilo kopio do momusorou, dot i Yonadab o ngaran, i tanak di Simia, i tobpinai di Daud. ⁴ Om boros ka di Yonadab dot id di Amnon, ’’Oi tanak do raja’, nokuro tu’ miagal kopio ko’ndo do tumongob do pointikid do tadau? Nokuro kopio?’’ ka dau. Om boros ka di Amnon do suminimbar, ’’Muhang oku daa di Tamar, i tadi’ di Absalom do tondu’, i tobpinai ku’ddi,’’ ka dau. ⁵ Om boros kaddi di Yonadab dot id dau, ’’Ongoi lii do hilo’d toodopon nu, om minsaki-sakit i’. Om soira’ nopondo do mongoi ontong diya’ i tapa’ nu, om sunudan no iyau do poingkaa, ’Apa’, pologoson daa i Tamar, i tadi’ ku do mongoi paakan doho’. Om montong-ontong oku nopo dau do mogonsok di taakanon do hiti, om makan oku indo,’ kanto,’’ ka dau. ⁶ Om ongoi no i Amnon lii do hiri’d toodopon, om pinsaki-sakit no iyau. Om soira’ di ruminikot i Raja’ Daud do mongoi ontong dau, om boro-boros no i Amnon di raja’, ’’Apa’, pologoson daa doho’ i Tamar, i tadi’ ku, do mongoi pomonsoi do roti’d hiti tu’ okito ku iyau. Om makan oku indo,’’ ka dau. ⁷ Om ponuhu’ no i Daud do tulun do mongoi pomisunud di Tamar do hiri’d walai dau do poingkaa, ’’Ongoi do hilo’d walai di Amnon, i tobpinai nu, om pagansakan no iyau do takanon,’’ ka dau. ⁸ Om ongoi noddi i Tamar do hiri’d walai di Amnon, i tobpinai dau. Om poinglii i Amnon do norikatan dau. Om anu no iyau do tapung dot okooro’ di nakambang no om onsoko’ no dau do linugu do mogonsok do hiri’d dokito di Amnon. ⁹ Om ngoyo’ noddi dau i roti do mantad hiri’d pinagansakan, om posurungo’ no dau dot id di Amnon. Nga’ a’ i’ i Amnon minangakan diri. Om boros ka di Amnon, ’’Soliwan ngai’ kou do mantad hiti,’’ ka. Om soliwan ngai’ noddi i tulun. ¹⁰ Om boros kaddi di Amnon dot id di Tamar, ’’Igitai ino taakanon do hiti’d toodopon ku, om suhuon oku i’ diya’,’’ ka dau. Om wonsoyo’ nod i Tamar o miagal diri. ¹¹ Nga’ soira’ di potunuyon nogi’ di Tamar i roti dot id di Amnon, om pususo’ no iyau di Amnon, mikuwo’d minomoros do poingkaa, ’’Dudun doho’ do modop,’’ ka. ¹² Nga’ boros ka di tondu’, ’’A, a’ oku i’. Kada’ oku sansagai do momonsoi do miagal kopio’dti karaat! Tu’ a’ i’ kopio momonsoi’d miagal diti o tulun do hiti’d Israil. ¹³ Tu’ ondung owonsoi o miagal diri, om honggo pondo pakayaan ku? Om iya’ndo nga’ ointingayam no do hiti’d Israil. Nga’ osonong nogi’ do mongoi ko boro-boros di raja’, tu’ osorou ku do kaakun i’ iyau do silihon oku diya’d sawo nu,’’ ka dau. ¹⁴ Nga’ a’ i’ i Amnon minokinongou di boros dau. Om kosoho’ no di Amnon i Tamar, tu’ okoris i’ iyau ko’ i Tamar. ¹⁵ Om kotogod tomod noddi i Amnon di Tamar. Om agayo poddi ko’ i muhang o kototogod di Amnon. Om boros kaddi di Amnon dot id tadi’ dau’ddi, ’’Soliwan!’’ ka. ¹⁶ Om boros kad i Tamar do suminimbar, ’’Kada’ pongiyondo! Kada’ oku uyungo’ do sumoliwan. Tu’ monguyung nopo moti’ om araat po ko’ mantad di winonsoi nu dot id doho’ di tiinu’,’’ ka dau. Nga’ a’ i’ mokinongou dau i Amnon. ¹⁷ Om lohowo’ noddi dau i susuhuon dau di manud-tanud kasai’ dau, om sunudai nod, ’’Posoliwano’ iti tondu’, om ontiilan no ilo totobon,’’ ka. ¹⁸ Om wonsoyo’ no di susuhuon i pinonuhuan diri. I Tamar nopo daa’ddi nga’ kirasuk dit anaru o longon. Tu’ miagal noddi o pakayan do tangaanak do raja’ di tongoondu’ dit a’ po nokodudun do kusai do tontok do maso’ddi. ¹⁹ Om arabai no di Tamar do pupuk o tulu dau om hurako’ no dau i rasuk dau dot anaru di poimpakai dau, om sompono’ no dau do palad o rabas dau, om pamanau nogiddi do mikuwo’d mompud-lompud do mihad. ²⁰ Om uhoto’ noddi iyau di Absalom, ’’Kinasou ko di Amnon di tiinu’ koii? Ula’ no, oi adi’. Tu’ tobpinai nu i’ i Amnon, om a’ i’ minog do pinsarahan tomod ino. Om kada’ sunudai o wokon,’’ ka dau. Om undorong noddi i Tamar do hiri’d walai di Absalom. Om oingou tomod diri iyau om tumongob. ²¹ Om soira’ di nokorongou i Raja’ Daud do hal diri om kotogod no tomod iyau. ²² Om sisuli’ tomod diri i Absalom di Amnon om a’ noddi iyau siboro-boros di Amnon tu’ minangasou i’ i Amnon di Tamar, i tobpinai dau. ²³ Duwo noddi toun do mantad diri om lohowo’ ngai’ no di Absalom i tangaanak do kusai di raja’ do hilo’d Baal Hasor, it id somok do bandar dot Ipraim, tu’ pinapaharo iyau do poginakanan do kopomoguntingan do hulu do dumba’ dau’d hilo’. ²⁴ Om ongoi no iyau solowot di Raja’ Daud, om boros ka dau, ’’Apa’, papaharo oku do poginakanan do kopomoguntingan do hulu di dumba’ ku. Om mongoi kou no daa di pagawai nu rapou di poginakanan diri,’’ ka dau. ²⁵ Nga’ boros ka di raja’, ’’A’ piya minog, oi ondu’. Tu’ mongoi ngai’ nopo iyahai, om osusa’ kopio ko’ndo,’’ ka dau. Om osonsog i’ daa i Absalom nga’ a’ no i raja’ mongoi. Om barakatai poddi dau i Absalom. ²⁶ Om boros kaddi di Absalom, ’’Iyo nopoddi, om pologoso’ po katuu doho’ i Amnon, i tobpinai ku, do mongoi ruhang dahai,’’ ka dau. Om boros ka di raja’ do suminimbar, ’’A’ i’ minog do mongoi iyau,’’ ka. ²⁷ Nga’ soira’ dit osonsog kopio i Absalom om pologoso’ noddi di raja’ i Amnon om koinsanai di tangaanak dau’d suwai do mongoi tanud di Absalom. [Om posurungo’ noddi di Absalom o taakanon dit ogumu’ om it angawasiu kopio.] ²⁸ Om sunudai ngai’ no di Absalom i susuhuon dau do poingkaa, ’’Antangan no kopio dokoyu! Tu’ soira’ nopondo dot aawuk i Amnon dot adalaan do monginum di waig dot anggur, om tontok di monuhu’ oku, om ngoyon no dokoyu iyau patayo’. Kada’ kou kooris. Tu’ iyoho’ i’ o monongkoilo do hal diti. Kumosiou kou no om kada’ kou pikoduwo o ginawo!’’ ka dau. ²⁹ Om wonsoyo’ no di susuhuon di Absalom i pinonuhuan di Absalom diri om patayo’ no diyolo’ i Amnon. Om kokito poddi di tangaanak di Raja’ Daud iri, om ongoi ngai’ no iyolo’ sakai di bagal diyolo’ om poggidu’ no. ³⁰ Om tontok di hilo’ po iyolo’d tanga’d ralan di poulian no diyolo’ om korikot no o habar dot id di Daud do poingkaa, ’’Napatai ngai’ no di Absalom i tangaanak do Raja’, aiso’ no tiso’ do noolu’!’’ ka. ³¹ Om ingkakat no i raja’, om hurako’ no dau i pakayan dau, om lii no do hiri’d siliu. Om iri’ddi i susuhuon dau nga’ minomohurak ngai’ nogi’ do pakayan dau. ³² Nga’ boros ka di Yonadab, i tanak di Simia, i tobpinai di Daud, ’’Kada’ nogi’ kopio pomusorou do napatai ngai’ i tangaanak do Tuan Raja’. I Amnon noo o pinatai, tu’ oilaan mantad i’ dot iri mantad no ot osorou di Absalom do mantad di kinasou i’ di Amnon i Tamar, i tadi’ dau’ddi. ³³ Om kada’ kopio ponongkuyaai di habar do napatai ngai’ i tangaanak do Tuan Raja’, tu’ iso’ no i Amnon o napatai,’’ ka dau. ³⁴ Om poggidu’ no i Absalom. Om kokito di soudor do madtatamong do walai’d raja’ o tulun dot ogumu’ do mogiwoyo-woyo’ do ponong hiri’d Horonaim do rumuhuk di nulu-nulu. ³⁵ Om boros kaddi di Yonadab dot id di Daud, ’’Antangai pogi’, nga’ halo’ no i tangaanak do Raja’. Miontok nopo di nokoboros ku,’’ ka dau. ³⁶ Om koboros poddi dau ot iyo’ddi, om korikot no i tangaanak di raja’. Om songlompud-lompud nopoddi iyolo’ do mihad, om iri raja’ om i pagawai dau nga’ miningihad tomod nogi’. ³⁷ - ³⁸ I Absalom nopoddi nga’ nokopoggidu’ no, om minongoi’ddi iyau do hilo’d walai di Talmai, i tanak di Amihur, i raja’ do pomogunan do Gosur. Om hilo- hilo’ noddi iyau do solinaid do tolu o toun. Om alaid i’ i Daud do minogihad di Amnon, ³⁹ nga’ nopoddi nakatanus-tanus o ginawo dau do tumongob, om langadon noddi iyau di Absalom.

¹ Om soira’ di noilaan di Yoab do langadon i Raja’ Daud di Absalom, ² om ponuhu’ no iyau do tulun do mongoi do hilo’d Tokua do mongoi pangangat do songulun o tondu’ dit opintar kopio do mantad hilo’. Om boros kaddi dau dot id tondu’ddi, ’’Minsorupai-rupai no do mogihad om manampakai no di pakayan do mogihad. Kada’ pongumau do tumau dit osonong o kosingudan. Om mingiyo-iyo no do tondu’ di laid no do mogihad do tulun di napatai di kosianan kopio dau. ³ Om mongoi nondo solowot di raja’, om poboroson no iti poboroson ku,’’ ka dau. Om sunudai noddi di Yoab i tondu’ do boros dit apatut dau’d poboroson. ⁴ Om ongoi no i tondu’ solowot di raja’, om otud no iyau do tuminuku’, om boros ka dau, ’’Oi Tuan Raja’, tulungo’ oku no!’’ ka. ⁵ Om ponguhot no i raja’ dau, ’’Nokuro?’’ ka dau. Om boros ka di tondu’ do suminimbar, ’’Iyoho’ nopodti om napatayan do sawo, om mosikin oku po. ⁶ Haro o duwo tanak ku’d kusai, oi Tuan, om insan tadau om piumang no iyolo’ do hiri’d dumo. Om patayo’ noddi di tiso’ i tiso’ dau tu’ aiso’ i’ o tulun do pinopitongkiad diyolo’. ⁷ Om baino’ noddi om oinsanan nopo i koobpinayan ku do sumaap doho’. Boros ka diyolo’, ’Patahako’ daa dahai i tulun do minamatai di tobpinai dau om maan i’ dahai iyau patayo’,’ ka. Ondung owonsoi diyolo’ o miagal diri, om iso’ oku pondo, om aiso’ no o tanak ku. Maan no kopio diyolo’ raago’ it iso’ poo do kosondi-sondihon ku, om a’ no poolu’ do tongosongulun piya o tanak do bagi’ di sawo ku do potilombus do sinakagon dau,’’ ka dau. ⁸ Om boros kaddi di raja’ dot id tondu’ddi, ’’Uli’ no do hilo’d walai nu, om salasayon ku i’ diya’ iti hal diti,’’ ka dau. ⁹ Om boros ka di tondu’, ’’Oi Tuan Raja’, nunu nopo o wonsoyon nu, om tonggungon ku i’ om tonggungon di sompiiyon ku i kasalaan diri; nga’ Raja’ nopo om i sompiiyon do Raja’ om aiso’ i’ o sala’,’’ ka dau. ¹⁰ Om boros ka di raja’, ’’Ondung haro kawagu o tulun do mimboros do monompurolosi diya’, om pootodon nopo do hiti’d doho’ i tulun diri om a’ nondo iri mamagangau diya’,’’ ka dau. ¹¹ Om boros ka di tondu’, ’’Oi Tuan Raja’, sambayang no dot id TUHAN, i Kinorohingan nu, om a’ i’ i tulun di momolokop di kinapatayan di tanak ku’ddi momonsoi do karaaton di lobi kagayo do mamatai di tanak ku di tiso’,’’ ka dau. Om boros ka di Raja’ Daud, ’’Sumumpa’ oku no dot id suang do ngaran do TUHAN di poimpasi, dot a’ i’ okuro-kuro i tanak nu’ddi,’’ ka. ¹² Om boros kaddi di tondu’, ’’Oi Tuan Raja’, pologoso’ oku po daa kawagu do moro-boros dot oniba’,’’ ka. Om boros ka di raja’, ’’Boro-boros nopo,’’ ka. ¹³ Om boros ka di tondu’, ’’Nokuro tu’ miagal diri o kasalaan do wonsoyon nu dot id tulun do songonuon do Kinorohingan? A’ nu pologoson do gumuli’ i tanak nu di minogidu’ddi, om gowoi poddi om iya’ i kasala’ do miagal di nokoboros nu di tiinu’ddi. ¹⁴ Matai ngai’ toko’ nodti tu’ miagal toko’ po di waig di nokotuntug do hilo’d tana’, tu’ a’ no milo do timungon kawagu. Om Kinorohingan nga’ a’ no mamasi kawagu do tulun di napatai. Om osonong nogi’ do mogihum ko’d ralan do popouli’ kawagu di tulun di pinotongkiad diri. ¹⁵ Nokorikatan ku nopo do mongoi boro-boros diya’dti oi Tuan Raja’, nga’ tompurolosion oku do tulun. Om pomusorou oku noddi dot osonong nogi’ do mongoi oku nopo boro-boros diya’ om mogondos nopo do pohubayaan nu i pokionuon ku. ¹⁶ Om minomusorou oku do mokinongou ko i’ doho’ om popoidu’ doho’ do mantad id tulun di mumbal daa do mamatai doho’ om mamatai di tanak ku. Tu’ osorou daa diyolo’ do potongkiad dahai do mantad id tana’ di pinatahak do Kinorohingan dot id tulun dau. ¹⁷ Om oilaan ku nogi’ do mongintirung doho’ i batos do Tuan, tu’ Raja’ nopo om miagal po do moloikat do Kinorohingan, tu’ milo do mongintutun dit osonong om it araat. Om TUHAN no i Kinorohingan nu, o moyo-woyo’ do Tuan Raja’,’’ ka dau. ¹⁸ Om boros ka di raja’ do suminimbar, ’’Haro o tuhoton ku diya’, om poboroson no dot id doho’ it otopot,’’ ka. ’’Uhoto’ oku nopo do nunu nopo,’’ ka di tondu’ do suminimbar. ¹⁹ Om ponguhot noddi i raja’, ’’I Yoab o minonuhu’ diya’?’’ ka dau. Om boros ka di tondu’, ’’Sumumpa’ oku no dot id suang do ngaran do Raja’, do sumimbar oku i’ dino tuhoton nu. Otopot nogi’ kopio dot i Yoab o minomisunud doho’ ondung nunu ot apatut ku’d wonsoyon om it apatut ku’d poboroson. ²⁰ Nga’ winonsoi pogi’ dau o miagal diri nga’ panalasai kosonong-sonong do hal diri. Nga’ Raja’ nopo om oilo i’ do miagal do moloikat do Kinorohingan tu’ koilo i’ do koinsanai dit osiliu,’’ ka dau. ²¹ Om lohowo’ noddi di raja’ i Yoab, om boro-boros no dot id dau, ’’Wonsoyon ku i’ i pinokianu nu. Ngoyo’ no angatai i Absalom, om pootodon no do hiti,’’ ka. ²² Om otud no i Yoab dot id toguang di Daud. Om boro-boros no dot id dau, ’’Kinorohingan no o mamarakat diya’, oi Tuan Raja’. Oilaan ku noddi kopio do baino’ dot asanangan o Tuan doho’, tu’ winonsoi nu i’ i pinokianu ku,’’ ka dau. ²³ Om pamanau noddi i Yoab do minongoi do hilo’d Gosur om angatai no dau i Absalom do gumuli’ do hilo’d Yorusalim. ²⁴ Nga’ mada’ i’ i raja’ do mundorong i Absalom do hiri’d walai di raja’. Boros ka di raja’, ’’A’ oku i’ siontong dau,’’ ka. Om tilombus nopoddi i Absalom do minuli’ do hiri’d walai dau om a’ no minongoi solowot di raja’. ²⁵ I Absalom no o narayou o koligkango’ do pointongkop dot Israil om aiso’ no o tulun do suwai dit oligkang ko’ iyau. Mantad nopo dot id lapap dau om gisom dot id tulu dau om aiso’ i o poinraraat. ²⁶ Om tobuk dau nga’ akapal tomod, om monikid toun nopoddi do pampadan dau i tobuk dau tu’ adalaan no kopio kanaru om awagat dot opurimanan dau. Iri nopo tobuk dit opompod dau nga’ lobi i’ do duwo kilogram o kawagato’ do tumanud di poninimbang do don raja’. ²⁷ I Absalom nopoddi nga’ kianak do tolu o kusai om iso’ o tondu’, dit olumis kopio, dot i Tamar o ngaran. ²⁸ Om duwo noddi o toun di Absalom do poingiyon do hilo’d Yorusalim om a’ po iyau nokosolowot di raja’. ²⁹ Insan tadau, om lohowo’ no dau i Yoab, do suhuon daa dau do mongoi solowot di raja’, nga’ a’ i’ i Yoab ruminikot. Om lohowo’ po kawagu di Absalom i Yoab do koinduwo nga’ a’ i’ iyau ruminikot. ³⁰ Om boros kaddi di Absalom dot id susuhuon dau, ’’Antangai pogi’ nga’ poinrani’ i’ di tumo ku di kitanom do barli o tumo di Yoab. Ngoyo’ dokoyu tutudai i tumo dau’ddi,’’ ka dau. Om ngoyo’ no diyolo’ tutudai i tumo’ddi. ³¹ Om ongoi no i Yoab do hiri’d walai di Absalom om ponguhot no, ’’Nokuro tu’ tinutudan di susuhuon nu i tumo ku?’’ ka. ³² Om boros ka di Absalom do suminimbar, ’’A’ ko i’ giya’ddi ruminikot di lohowo’ ku i’ iya’. Suhuon ku daa iya’ddi do mongoi solowot di raja’ do poporomut diti tuhoton ku do poingkaa, ’Nunu guna’ ku do tuminongkiad do hilo’d Gosur om minongoi do hiti? Osonong nogi’ daa’ddi do poundorong kasai’ oku do hilo’,’ ka. Nga’ pogihum no daa kopio do ralan, om kosolowot oku i’ di raja’. Om ondung kisala’ kasai’ oku po, om posodia’ oku id hukuman do kapatayon,’’ ka dau. ³³ Om ongoi noddi i Yoab solowot di Raja’ Daud om sunudai no dau di pokionuon di Absalom. Om lohowo’ noddi di Raja’ Daud i Absalom, om rikot no iyau om otud no do hiri’d toguang di raja’. Om tungubai no iyau di raja’.

¹ Om katalib poddi iri, om posodia’ no i Absalom dot iso’ o korita’-kuda’ om piro-piro o kuda’, om limo nohopod o tulun do moyo’ dau. ² Om pointikid-tikid do tadau dit osuab po om mongoi no i Absalom ingkakat do hiri’d tisan di ralan, i hiri’d toning di wawayaan dot agayo di walai di raja’. Om pointikid-tikid do tulun di sumuang do mongoi solowot di raja’ do mongoi pokibutus do hal om lohowon no di Absalom om uhoton dau do poingkaa, ’’Mantad ko dot id payat disai?’’ ka. Om ondung sumimbar i tulun dot, ’Mantad oku id payat diti ko’ payat dilo’,’ ka, ³ om barasan nondo di Absalom iyau do poingkaa, ’’Tumanud nopo dot oturan om otopot ino hal nu, nga’ araat kopio tu’ aiso’ i’ o wakil do raja’ do mokinongou dino hal nu,’’ ka dau. ⁴ Om boros ka kawagu di Absalom, ’’Umbalai pogi’ daa dot iyoho’ o gompomutus! Tu’ isai nopo daa’ndo o haro o hal ko’ uhoton om mongoi nopo daa’ndo solowot doho’ om otulid indo o pomutus ku,’’ ka dau. ⁵ Om soira’ nopo do haro o tulun do minsomok di Absalom do motud dot id dau om poroloyon nopo dau o longon dau om ngoyon no igitai i tulun om tunguban no dau. ⁶ Om miagal kasai’ nopodti o wonsoyon di Absalom dot id pointikid-tikid do tulun dot Israil di mongoi pokibutus di raja’. Om iyo noddi o kowoyo-woyoo’ di Absalom do minomolumbok do ginawo di tulun dot Israil. ⁷ Om katalib diri ot apat o toun om boro-boros no i Absalom di Raja’ Daud, boros ka dau, ’’Apa’, pologoso’ oku no daa do mongoi do hilo’d Hibron do mongoi pamayaan di batos ku dot id TUHAN. ⁸ Tu’ di nopo di hilo’ oku pod Gosur, i hilo’d Siria, om nakapamatos oku no dot id TUHAN dot ondung pogulion oku daa dau do hiti’d Yorusalim, om mongoi oku’ndo sambayang dot id dau do hilo’d Hibron,’’ ka dau. ⁹ Boros ka di raja’, ’’Ongoi nopo om sumonong-sonong,’’ ka. Om pamanau noddi i Absalom om ongoi no do hilo’d Hibron. ¹⁰ Nga’ nokoponuhu’ mantad no ma iyau do tulun do mongoi pomisunud dot oinsanan o payat dot Israil do poingkaa, ’’Korongou kou nopo do tuni di torumpit om pogiakon no dot, ’Nosiliu no do raja’ i Absalom do hilo’d Hibron,’ kanto dokoyu,’’ ka dau. ¹¹ Om haro o duwo nahatus o tulun do mantad hilo’d Yorusalim do tuminanud di Absalom do minongoi do hilo’d Hibron, nga’ aiso’ i’ o noila-ilaan diyolo’ do pasal do pakat diri om aiso’ i’ daa o kooris-orisan diyolo’ do tuminanud dau. ¹² Om soira’ di maso di Absalom do papatahak do porsombahan di sumbolion om ponuhu’ no iyau do tulun do mongoi pangangat di Ahitopol, i tulun do Gilo, it iso’ di ponosihat di Daud. Om muhang-ruhang nopoddi o kogiroto’ di pakat dau do sumaap di raja’ om mumu-gumu’ o tulun do sumokodung di Absalom. ¹³ Om rikot noddi o tulun do minongoi pomisunud di Daud do poingkaa, ’’Sumokodung ngai’ no di Absalom o tulun dot Israil,’’ ka. ¹⁴ Om boros kaddi di Daud dot id koinsanai di pagawai dau di poinsugku’ dau do hilo’d Yorusalim, ’’Kainou pamanau kopio toko’. Om kopoggidu’ toko’ i’ do mantad id di Absalom. Tu’ a’ no moti’ alaid om korikot no iyau. Siahai toko’ no om a’ toko’ i’ okosupan, om a’ toko’ indo aala’ om a’ angapatai iti tulun do hiti’d bandar!’’ ka dau. ¹⁵ Om boros ka ngai’ di pagawai di raja’ do suminimbar, ’’Posodia’ ngai’ i’ iyahai do momonsoi do nunu nopo o poboroson do Tuan,’’ ka. ¹⁶ Om pamanau noddi i raja’ do miwoyo’ do koinsanai di sompiiyon dau om i pagawai dau. Nga’ pinoundorong i’ dau o hopod di tongoondu’ di panakasawo dau do tumamong di walai di raja’. ¹⁷ Om soira’ di tumongkiad no i raja’ om koinsanai di tulun dau di bandar diri om undorong no iyolo’ do hiri’d somok di walai di kolimpupuson no. ¹⁸ Om pamanau no do tuminalib di raja’ o koinsanai di soudor di madtatamong dau, om iri no i pagawai dau om songingkakat do hiri’d toning di raja’. Om oinsanan it onom nahatus o soudor do tuminanud dau do mantad hilo’d Gat do poimbaris dot id dotimbabaan dau. ¹⁹ Om boros kaddi di raja’ dot id di Itai, i tulun do Gat, i boyoon dit onom nahatus o soudor diri, ’’Nokuro tu’ moyo’ ko dahai? Poguliai no om mundorong nopo do sumugku’ di raja’ do wagu. Tu’ iya’ nopo om sompogunan id hiti tu’ tuminongkiad ko i’ do pomogunan nu. ²⁰ Wagu ko pod hiti om nokuro daa’ndo tu’ maan ku no iya’ popinghomboo’ do tumanud doho’? Tu’ iyoho’ piya nga’ a’ i’ koilo ondung hinonggo o pakayaan ku. Poguliai nogi’ om angatan ngai’ i’ ilo tambalut nu dit iso-iso’ o bansa’. Om maha’ daa om osianan o TUHAN diya’ om otorodok dot id diya’,’’ ka di raja’. ²¹ Nga’ boros ka di Itai do suminimbar, ’’Oi Tuan Raja’, sumumpa’ oku no dot id suang do ngaran do TUHAN di poimpasi om id suang do ngaran do Raja’ do moyo’ oku i’ kasai’ diya’ do honggo nopo o tongoyon nu mulong po do haro o koligagaanan do kapatayon,’’ ka dau. ²² Om boros kaddi di Daud dot id di Itai, ’’Osonong no. Kainou mamanau,’’ ka. Om pamanau noddi i Itai do miwoyo’ do koinsanai di soudor dau om i sompiiyon diyolo’. ²³ Om lompud no do minihad o koinsanai di tulun do hiri do tontok di tuminalib i Daud om i tulun do minoyo’ dau do tuminongkiad di bandar diri. Om soborong noddi i raja’ di luyu’ do Kidron om susuhut no ngai’ i tulun dau. Om pakayaai ngai’ noddi diyolo’ do hilo’d tana’ do kowotuan. ²⁴ Om i Sadok it Imam diri om i Abiatar it Imam nga’ hiri nogi’. Om koinsanai di tulun do Liwi di kisinaan di Kaban do Tumpongo do TUHAN nga’ hino ngai’ nogid hiri. Om poiliho’ no diyolo’ i Kaban do Tumpongo, om a’ po diyolo’ sinaan kawagu dot a’ po nokosoliwan ngai’ i tulun do mantad hiri’d bandar diri. ²⁵ Om boros kaddi di raja’ dot id di Sadok, ’’Ongoyo’ kawagu ilo Kaban do Tumpongo om pogulion do hilo’d bandar. Ondung osianan o TUHAN doho’ om pologoson oku i’ dau do koguli’ om kokito kawagu dilo Kaban do Tumpongo om i pinoiyanan dilo’. ²⁶ Nga’ ondung a’ o TUHAN asanangan doho’, om poingkuro nopondo o korohian dau dot id doho’,’’ ka dau. ²⁷ Om boros ka kawagu di raja’ dot id di Sadok, ’’Angatan nogi’ i Ahimaas, i tanak nu, om i Yonatan, i tanak di Abiatar, om gumuli’ kou no do hilo’d bandar do mikuwo’d osimbayan o ginawo. ²⁸ Om mandad oku indo do hilo’d somok di sosoborongon di bawang do hilo’d tana’ do kowotuan do gisom do kaanu oku’d habar do mantad id dokoyu,’’ ka dau. ²⁹ Om pogulio’ noddi diyo’ Sadok di Abiatar i Kaban do Tumpongo do hilo’d Yorusalim om undorong no iyolo’d hilo’. ³⁰ Om iduwo’ noddi di Daud i kasut dau. Om patakadai no dau om koinsanai di tulun di minoyo’ dau, do hiri’d Nulu-Nulu do Saitun, do mikuwo’d songihad-ihad om kinuluputan o tulu do popointalang do tumongob iyolo’. ³¹ Om soira’ di nosunudan i Daud do minongoi sokodung i Ahitopol di pakat di Absalom do sumaap, om sambayang noddi iyau do poingkaa, ’’Oi TUHAN, pologoso’ no dot a’ atanud i nosihat di Ahitopol,’’ ka. ³² Om soira’ di nokosigampot i Daud do hiri’d timpak di nulu-nulu, i tiiyonon do tulun do sumambayang dot id TUHAN, om ngoyo’ no iyau solowoto’ di Husai, i tambalut dau dit otorodok kopio, i tulun dot Arki. Om rasuk nopo di Husai nga’ nopinghurak po om tulu dau nga’ kipupuk. ³³ Om boros kad i Daud dot id dau, ’’Ondung moyo’ ko doho’ om a’ ko i’ koponguhup doho’. ³⁴ Nga’ kouhup ko nogi’ doho’ do gumuli’ ko do hilo’d bandar om ngoyon sunudai i Absalom do sumiliu ko do susuhuon dau dit otorodok do miagal di kotorodoko’ nu di suminiliu do susuhuon di tapa’ dau. Om tumotos nondo dot a’ sumokodung do nunu nopo o nosihat di poboroson di Ahitopol. ³⁵ Om iyo Sadok di Abiatar, i duwo ot imam diri nga’ hilo’ nogi’, om sunudan no iyolo’ do nunu nopo ot orongou nu dot id suang do walai di raja’. ³⁶ Hilo’ nogid poinsugku’ diyolo’, i Ahimaas om i Yonatan, i tangaanak diyolo’ddi. Om suhuon no i tangaanak diyolo’ddi do mongoi do hiti’d doho’ do mongoi posunud do nunu nopo it orongou nu,’’ ka dau. ³⁷ Om poguliai noddi di Husai, i tambalut di Daud diri, do hilo’d Yorusalim. Om korikot noddi iyau do hilo’d Yorusalim, om i Absalom nga’ koririkot do hiri.

¹ Om soira’ dit osomok po o nakapamanahon di Daud do mantad hiri’d timpak di nulu-nulu, om sigog id solowoto’ iyau di Siba, i susuhuon di Mopibosit do kiginayat do duwo o kaladai do ginandaran do duwo nahatus o liob do roti, om hatus o puru do tua’ dot anggur di nokoring, om hatus o puru do tua’ dot ara di kouupu’, om sangkantung do kulit o waig dot anggur. ² Om ponguhot no i Raja’ Daud dau, ’’Nunu ngai’ o maan nu’dti?’’ ka. Om boros ka di Siba do suminimbar, ’’Ilo’ nopo kaladai om maan do sakayon do sompiiyon do Raja’, om ilo’ no roti om tua-ua’ om maan di susuhuon dot akanon, om ilo’ no waig dot anggur om maan dot inumon di tuuhan do hiti’d tana’ do kowotuan,’’ ka dau. ³ Om ponguhot no i raja’, ’’Hinonggo i Mopibosit, i manangaki di Saul, i tuan nu,’’ ka. Om boros kad i Siba dot id dau, ’’Hilo’d Yorusalim tu’ otumbayaan no iyau do maan di tulun dot Israil pogulio’ dot id dau i pomorintaan di taki dau, i Saul,’’ ka dau. ⁴ Om boros ka di raja’ dot id di Siba, ’’Koinsanai di songonuon di Mopibosit om asanganu ngai’ nu no,’’ ka. Om boros kad i Siba do suminimbar, ’’Wonsoyon ngai’ ku i’ i pinonuhuan do Raja’. Maha’ daa om osonong kasai’ o Raja’ dot id doho’!’’ ka dau. ⁵ Om soira’ di nokorikot i Daud do hilo’d Bahurim, om ongoi no ruba’ dau i Simoi, i tanak di Gira, i koworisan di Saul. Om mimpopol tomod iyau di Daud. ⁶ Om pindumpahai no dau do watu i Daud om i pagawai dau do mulong piya do notutukan i’ daa i Daud di tulun om i soudor di madtatamong dau. ⁷ Om pimboros no i Simoi do mimpopol dau do poingkaa, ’’Poggidu’ kopio! poggidu’ kopio! Iya’ i tulun do gampamatai om tulun dot araat! ⁸ Nahau nu i pomorintaan di Saul, om baino’ nopoddi om hukuman ko nod TUHAN tu’ ogumu’ kopio i’ o tulun dot id sompiiyon di Saul do pinatai nu. Nakatahak noddi do TUHAN iti pomorintaan dot id di Absalom i tanak nu, om aiso’ noddi o kotutuk-tutukon nu tu’ gampamatai ko i’!’’ ka dau. ⁹ Om boros ka di Abisai, i tadi’ di Yoab, i tanak di Soruya, dot id raja’, ’’Oi Raja’, nokuro tu’ pologoson nu’ti tasu do mimpopol diya’? Pologoso’ oku pogi’ do mongoi’d hilo’ om ngoyon ku i’ puloso’ ilo tulu dau,’’ ka dau. ¹⁰ Nga’ boros ka di raja’ dot id di Abisai om id di Yoab, i tobpinai di Abisai, ’’Nunu kokuro-kuro nu doho’? Pologoson nopolo’ do mimpopol doho’. Tu’ ondung TUHAN o minonuhu’ dau om isai poddi o milo do muhot ondung nokuro tu’ miagal dilo’ o wonsoyon dau?’’ ka dau. ¹¹ Om boros ka di Daud dot id di Abisai, om id koinsanai di susuhuon dau, ’’Iri piya tanak ku kopio nga’ mumbal id mamatai doho’. Om nokuro tu’ osuayan kou’d kokito do winonsoi’dti tulun do Binyamin diti? Pologoson nopo iyau do mimpopol doho’ tu’ TUHAN i’ o minonuhu’ dau. ¹² Om a’ i’ oila-ilaan nga’ okito i’ doti’ do TUHAN iti koinggoritan ku om tingalanan indo dau do barakat i popol diri,’’ ka dau. ¹³ Om tilombus po i Daud om koinsanai di tulun dau do minamanau do suminusui di ralan om i Simoi nga’ mapak-hapak i’ diyolo’ do hiri’d guas di nulu-nulu do mindumpau di Daud do watu om mintias do tana’. ¹⁴ Om korikot noddi i raja’ om koinsanai di tulun dau do hiri’d Bawang do Yordan. Om nongohuyan no tomod iyolo’. Om undorong-dorong no iyolo’ do hiri. ¹⁵ Om korikot noddi do hilo’d Yorusalim i Absalom om koinsanai di tulun dot Israil di manud-tanud dau. Om i Ahitopol nga’ moyo-woyo’ nogi’ diyolo’. ¹⁶ Om soira’ di nosolowot di Absalom i Husai, i tulun dot Arki, i tambalut di Daud dit otorodok diri om pomoros no i Husai dot opuhod, ’’Otogui po o raja’! Otogui po o raja’,’’ ka. ¹⁷ Om ponguhot no i Absalom di Husai, ’’Honggo noddi i kotorodoko’ nu dot id di Daud, i tambalut nu? Nokuro tu’ a’ ko minoyo’ dau?’’ ka dau. ¹⁸ Om boros ka di Husai do suminimbar, ’’Poingkuro oku po daa do moyo’? Tu’ sumokodung oku i’ di tulun di nopili’ do TUHAN, om i nopili’ do koinsanai’dti tulun, om i nopili’ do koinsanai’d tulun dot Israil. Iri no tulun diri o woyoon ku. ¹⁹ Om isai po daa o pogobi-obian ku ondung okon ko’ i tanak do tuan ku? Poingkuro oku nopo do minogobi-obi’ di tapa’ nu om miagal noddi o pogobi-obi’ ku diya’,’’ ka dau. ²⁰ Om boros kaddi di Absalom dot id di Ahitopol, ’’Poboroso’ no ondung nunu ot apatut do wonsoyon toko’?’’ ka dau. ²¹ Om boros ka di Ahitopol, ’’Ongoi dudun dilo tongoondu’ di panakasawo di tapa’ nu di pinoundorong dau do madtamong di walai do raja’. Om koilo ngai’ indo o tulun do hiti’d Israil do nosiliu ko di tapa’ nu do pisangod om ongoodsuur indo ilo tulun do tumanud diya’,’’ ka dau. ²² Om wansayai no diyolo’ i Absalom do kiim do hiri’d sakai di taap do walai di raja’, dit arantai. Om ongoi no iyau dudun di tongoondu’ di panakasawo di tapa’ dau. Om songingontong ngai’ nopo i tulun di wonsoyon di Absalom diri. ²³ Tontok nopo di maso’ddi om iyo po do mantad kopio id Kinorohingan o nosihat di Ahitopol, om kaa pogi’ddi dot umboyoon nopo di Daud om i Absalom o nosihat di Ahitopol.

¹ A’ po alaid do mantad diri om boro-boros no i Ahitopol dot id di Absalom, ’’Pologoso’ oku daa do momili’ do hopod om duwo noribu o tongokusai om ngoyon ku indo gusao’ i Daud do totuong do baino’. ² Ngoyon ku iyau saapo’ do tontok dit ohuyan om oluhoi iyau. Om tigowoon ku’ndo iyau gisom do moddosi om mogidu’ ngai’ nopondo i tulun dau. Om i Daud nopo o patayon ku. ³ Om tanggayan ngai’ ku nogindo i tulun dau om pootodon ku nondo dot id diya’ do miagal di tondu’ do gumuli’ dot id sawo dau. Tu’ iso’ no tulun do pokipapatayan nu koii? Nga’ iri nopondo i tulun do suwai om a’ i’ pokorua-rualan,’’ ka dau. ⁴ Om osonong i’ i nosihat diri do norongou di Absalom om koinsanai di boyoon do tulun dot Israil. ⁵ Nga’ boros ka di Absalom, ’’Lohowo’ po i Husai, om pokinongohon toko’ po o dau dot osorou,’’ ka. ⁶ Om tontok di nokorikot i Husai, om boros ka di Absalom, ’’Poingkaa o nosihat di Ahitopol; tonudon toko’ tuu iri? A’ nopo, om poboroson no o diya’ dot osorou,’’ ka dau. ⁷ Om boros ka di Husai do suminimbar, ’’Iri nopo nosihat di Ahitopol dot id dokoyu baino’ om a’ osonong. ⁸ Oilaan nu i’ dot i Daud nopo om i tulun dau, om soudor dit ongokoris om osiou; om miagal po do bohuang di natagakan do tanak korongit. Om soudor nogi’ iyau di noubas no tomod do sumangod om a’ i’ iyau insan do sumugku’ di soudor dau do dongotuong. ⁹ Dinondo piya doti’dti nga’ poillisok no iyau dot id luang do nulu-nulu ko’ id kinoiyonon po do suwai. Om soira’ nopondo do saapon di Daud i tulun nu, om haro no o tapatai, om pointikid-tikid do tulun di korongou’ddi om momoros nondo do naala’ no i tulun nu oi Absalom. ¹⁰ Om iri piya’ndo tulun dit osiou kopio, i miagal pod singa tu’ a’ moddosi nga’ moddosi indo tu’ koilo ngai’ i’ o tulun do hiti’d Israil dot iri nopo tapa’ nu om gunsiou kopio om iri nogi’ i tulun dau nga’ sumasangod dit ongokoris om gunsiou. ¹¹ Nosihat ku nopo iyoho’ om poingkaa: Timungon ngai’ no o tulun dot Israil do mantad id pointongkop diti pomogunan dot Israil do gisom do miagal po di togis do hilo’d tisan do rahat kogumu’. Om iya’ nondo o boyoon diyolo’ do mongoi sangod. ¹² Om soira’ nopondo dot okito toko’ i Daud do honggo nopo iyau, om songodon toko’ no iyau do tontok dit a’ po dau oilaan ondung nunu o nosiliu. Om aiso’ no ot olu-oluon toko’ diyolo’ do poimpasi, dot iyau tuu ko’ i po tulun dau. ¹³ Om ondung mongoi daa iyau suang do bandar om mongoi ngai’ nopo o tulun dot Israil do tali do pokogoson di bandar om gayaton toko’ nogindo iri do gisom do kosuang do kubong dit id somok. Om iso’ pod watu nga’ aiso’ no ot oolu’ do hiri’d timpak di nulu-nulu’ddi,’’ ka dau. ¹⁴ Om boros kaddi di Absalom om koinsanai di tulun dot Israil, ’’Osonong nogi’ i nosihat di Husai ko’ i di Ahitopol,’’ ka. Tu’ natantu’ mantad nod TUHAN dot a’ atanud i nosihat di Ahitopol dit osonong om porikatan i’ do TUHAN do kosusaan i Absalom. ¹⁵ Om sunudai noddi di Husai i Sadok it Imam om i Abiatar it Imam di nosihat di Ahitopol om i dau do nosihat dot id di Absalom om id boyoon do tulun dot Israil. ¹⁶ Om boros kad i Husai, ’’Lomusai no do mongoi popoilo di Daud, om a’ i’ iyau modop do hilo’d sosoborongon di bawang do hilo’d tana’ do kowotuan suwai ko’ sumoborong nogi’ kopio di Bawang do Yordan. Tu’ ondung amu’, om apatai no iyau om koinsanai di tulun dau,’’ ka dau. ¹⁷ Daamot nopoddi om poingandad no i Yonatan, i tanak di Abiatar, om i Ahimaas, i tanak di Sadok, do hiri’d somok di tudan do waig dot Inrogil, it id tisan do bandar do Yorusalim. A’ no iyolo’ kasaap do sumuang di bandar tu’ ooris nopo dot okito do tulun. Om koubasanan no do ngoyon iyolo’ sunudai dot iso’ o susuhuon do tondu’ do habar dit apatut do ngoyon posunudo’ dot id di Daud. ¹⁸ Nga’ haro iddi kopio ot iso’ o tanak do kusai do nokokito diyolo’, om ngoyo’ no dau sunudai i Absalom. Om arau-arau nopoddi iyolo’ do minongoi lisok do hiri’d walai dot iso’ tulun do hilo’d Bahurim. Haro o torobong di tulun diri do hiri’d toning di walai dau om ongoi no iyolo’ suang do hiri. ¹⁹ Om ongoi no i sawo di kusai anu do ponokop om potokopo’ no do hiri’d kabang di torobong, om sasadai nogiddi do gandum o hiri’d sakai, gisom dot a’ no okito i torobong. ²⁰ Om korikot no i pagawai di Absalom om uhoto’ no i tondu’. Boros ka diyolo’, ’’Honggo no i Yonatan om i Ahimaas?’’ ka. Om boros ka dau, ’’Nokosoborong no dilo bawang,’’ ka. Om pingihumai po daa di tongoulun iyolo’ nga’ a’ no nokito, om poguliai noddi diyolo’ do hilo’d Yorusalim. ²¹ Om kapamanau poddi iyolo’ om soliwan nogiddi i Ahimaas om i Yonatan do mantad hiri’d torobong. Om osiau nopoddi iyolo’ do minongoi pomisunud di Daud di habar diri. Boros ka diyolo’, ’’I Ahitopol nopo om minonosihat do sumaap diya’. Om pamanau nogi’ kopio do sumoborong dilo bawang,’’ ka. ²² Om soborong noddi i Daud om koinsanai di tulun dau di Bawang do Yordan, om numawau noddi di nokosoborong ngai’ iyolo’. ²³ Om soira’ di noilaan di Ahitopol dot a’ tinanud i nosihat dau om pakalai noddi dau i kaladai dau om uli’ no do hiri’d bandar dau. Om koulud ngai’ po dau o hiri’d walai dau om ongoi nogiddi iyau giis. Om linobong diri iyau do hiri’d kalabangan do sompiiyon dau. ²⁴ Om nokorikot no i Daud do hiri’d bandar do Mahanaim do tontok di sumoborong nogi’ di Bawang do Yordan i Absalom om koinsanai di tulun dot Israil do minoyo’ dau. ²⁵ (Om i Amasa o pinili’ di Absalom do sumowoli di Yoab do boyoon do soudor. I Amasa nopo om tanak di Yitora, i tulun dot Ismail. Om tina’ nopo dau om i Abigail, i tanak di Nahas do tondu’, i tobpinai di Soruya i tina’ di Yoab.) ²⁶ Om pomukiim noddi i Absalom om koinsanai di tulun dau do hilo’d tana’ do Giliad. ²⁷ Om soira’ di nokorikot i Daud do hilo’d Mahanaim om ongoi no solowot dau i Sobi, i tanak di Nahas, i mantad hilo’d bandar do Raba, i hilo’d Amon, om rikot po i Makir, i tanak di Amiol, i mantad hilo’d Lodibar, om rikot i Barsilai do mantad hilo’d Rogolim, i hilo’d Giliad. ²⁸ - ²⁹ Om minigit iyolo’ do mangkuk, om kuron, om galam, om gandum, om barli, om tapung om gandum di ginowi, om kasang dit aragang, om kasang dit oniba’ om paha’ om montiga’, om susu di kilunok, om piro-piro o tinan do dumba’. Tu’ oilaan no diyolo’ do louson om tuuhan, om ohuyan i Daud om i tulun dau tu’ minamanau do hilo’d tana’ do kowotuan.

¹ Om timungo’ ngai’ noddi di Daud i tulun dau om bohogio’ no do mogiposuk-posukan do sororibu-ribu om sarahatus-hatus o tulun om haro ngai’ o boyoon do pointikid-tikid di posukan. ² Om suhuo’ ngai’ no dau iyolo’ do sumoliwan do mongoi sangod; om pitoluo’ no dau i posukan diri, do winoyo’ di Yoab, om i Abisai, i tobpinai di Yoab, om i Itai, i mantad hilo’d Gat, om soroisaan nopo iyolo’ do posukan. Om boros ka di raja’, ’’Iyoho’ nga’ mongoi i’ woyo’ dokoyu,’’ ka. ³ Om boros ka di tongoulun, ’’Kada’ no iya’ ongoi, oi Tuan Raja’. Tu’ ondung mogidu’ iyahai, ko’ apatai po o songintanga’ dahai nga’ aiso’ i’ o nunu-nunu’ddi dot id pisangod, tu’ iya’ noo ot ihumon diyolo’. Iso’ ko nopo nga’ irad i’ do hopod noribu o tulun dahai. Om osonong nogi’ do sumodia’ ko do monulung dahai do mantad hiti’d bandar,’’ ka diyolo’. ⁴ Om boros ka di raja’ do suminimbar, ’’Nunu nopo it osonong dot osorou dokoyu, om iri no o wonsoyon ku,’’ ka dau. Om ingkakat noddi iyau do hiri’d toning di wawayaan dot agayo om pamanau ngai’ no i soudor dau do mogiposuk-posukan do sororibu-ribu om sarahatus-hatus o tulun dot iso’ o posukan. ⁵ Om sunudai no kopio dau i Yoab, om i Abisai, om i Itai do poingkaa, ’’Kada’ no kopio dokoyu doho’ pokorual-rualai i Absalom, i tanakwagu’ddi,’’ ka. Om korongou ngai’ i’ i soudor di boros di Daud diri. ⁶ Om pamanau noddi i soudor di Daud do minongoi saap di soudor dot Israil do hiri’d puru’ dot Ipraim. ⁷ Om kaala’ no di tulun di Daud i soudor dot Israil; om agayo no kopio o kinaalaan tu’ kapatai nopo o 20,000 o tulun do tadau’ddi. ⁸ Om kotongkop noddi do hiri’d watas diri i mogisasangod, nga’ ogumu’ nogiddi o napatai di hiri’d gouton ko’ mantad di napatai do hiri’d pisangadan. ⁹ Tontok di poinsakai i Absalom di bagal dau om sigog id kosolowot i Absalom do piro-piro o tulun di Daud. Om soira’ di suminusut i bagal di guas do kayu dot agayo om kasangat no di raan o tulu di Absalom. Nga’ panangkus nopo i bagal, om miis-giis poddi i Absalom. ¹⁰ Om kokito noddi di songulun o tulun di Daud i Absalom om ngoyo’ no posunudo’ di Yoab. Boros ka dau, ’’Oi Tuan, nokito ku i Absalom do miis-giis do hilo’d guas do kayu dot agayo,’’ ka dau. ¹¹ Om boros ka di Yoab, ’’Ondung nokito nu iyau, om nokuro tu’ a’ nu iyau pinatai’d diiri? Onuan ku daa iya’ddi do hopod o tusin do pirok om iso’ o tagkos,’’ ka dau. ¹² Nga’ boros ka di tulun do suminimbar, ’’Mulong piya daa dot onuan oku diya’ do soribu o tusin do pirok, nga’ a’ oku i’ mumbal do paakang do longon ku dot id tanak di raja’. Nokorongou ngai’ toko’ i’ di Raja’ do minomisunud kopio diya’, om i Abisai, om i Itai do poingkaa, ’Kada’ no kopio dokoyu doho’ pokorual-rualai i Absalom, i tanakwagu’ddi,’ ka. ¹³ Nga’ ondung pinatai ku i Absalom di tiinu’, om atantu’ no dot oilaan i’ di raja’ — tu’ orongou ngai’ i’ dau o nunu nopo — om atantu’ no dot a’ ko indo mogobi’ doho’,’’ ka dau. ¹⁴ Om boros ka di Yoab, ’’Ula’ po no boros dit aiso’ o komoyon,’’ ka dau. Om anu no iyau do tolu o tandus om potokono’ no do hiri’d kangkab di Absalom di miyau po iyau do poinggiis do hiri’d guas do kayu dit agayo. ¹⁵ Om pogiuhupai noddi di hopod o soudor di Yoab do mamatai i Absalom. ¹⁶ Om pounio’ no di Yoab i torumpit dau om tingkod noddi i soudor dau do momogusa’ di tulun dot Israil. ¹⁷ Om ngoyo’ no diyolo’ i rata’ di Absalom om pataamo’ no do hiri’d torobong di hiri’d puru’, om rubpuwai nogiddi do watu do gisom dot asawat o kinorubpuon di watu. Om poggidu’ ngai’ nopo i tulun dot Israil, om sorompori-pori nopo iyolo’ do minuli’ do hiri’d walai diyolo’. ¹⁸ Om tontok di poimpasi po i Absalom om pinopoingkakat iyau dot iso’ o torigi do watu do hiri’d Rantai do Raja’ do kopomuhandaman do ngaran dau tu’ aiso’ i’ o tanak dau do kusai di potilombus do sinakagon dau. Om pinungaranan diri dau iri do pinasangai do ngaran dau. Om gisom piya’d baino’ nga’ roitan kasai’ i’ iri do, ’’Torigi do Watu di Absalom’’. ¹⁹ Om boros kaddi di Ahimaas, i tanak di Sadok dot id di Yoab, ’’Pologoso’ oku do manangkus do mongoi pomisunud di raja’ do habar dot osonong tu’ pinoidu’ i’ iyau do TUHAN do mantad id pisangod dau,’’ ka. ²⁰ Boros ka di Yoab, ’’Kada’! Mongoi id koimbagu. Tu’ tadau nopod baino’ om a’ ko i’ koino-ino do popolombus do habar dot id raja’ tu’ minatai i tanak dau,’’ ka dau. ²¹ Om boros kaddi dau dot id turipon dau di tulun dot Etiopia, ’’Ngoyo’ sunudai i raja’ di nokito nu,’’ ka. Om otud no i turipon diri om panangkus nod minongoi. ²² Nga’ osonsog i’ i Ahimaas, ’’Poingkuro piya ot osiliu nga’ pologoso’ oku no do mongoi polombus di habar diri,’’ ka dau. Boros ka di Yoab do minonguhot, ’’Nokuro kopio tu’ sumonsog ko do mongoi, oi tanak ku? Aiso’ i’ ot isomuli’ dot aanu nu,’’ ka dau. ²³ Boros ka kawagu di Ahimaas, ’’Poingkuro piya nga’ mongoi kasai’ oku i’,’’ ka dau. ’’Om iyo nopoddi om ongoi nopo katuu,’’ kaddi di Yoab. Om panangkus no i Ahimaas do pinoruhukan do suminusui di ralan do kawaya’ di Rantai do Yordan, om a’ i’ alaid om kosoguluanai no dau i turipon, i bansa’d Etiopia diri. ²⁴ Poirikau i Daud do hiri’d langga’ dit id piolitan di wawayaan ponong id suang om wawayaan ponong id soliwan di bandar. Om ongoi no i madtatamong do hiri’d sakai di tolig om ingkakat no do hiri’d sakai di taap di wawayaan diri. Om soira’ di huminangog iyau om kokito no dau o songulun do manangkus do pakayaan do hiri. ²⁵ Om polohowo’ no di madtatamong dot id raja’ do hiri’d siriba’ do pinoposunud diri. Om boros ka di raja’, ’’Ondung iso-iso’ iyau om habar nod osonong o polombuson dau,’’ ka dau. Om maha’ dit oruhai no do korikot i tulun diri, ²⁶ om kokito po kawagu di tulun do madtatamong ot iso’ kawagu o tulun do manangkus do pakayaan i’ do hiri. Om polohowo’ po kawagu dau o poingkaa, ’’Antangai pogi’! Nga’ haro po kawagu o tulun do manangkus tomod do pakayaan do hiti!’’ ka. Om boros ka di raja’ do suminimbar, ’’Iti nga’ poporomut id habar dot osonong,’’ ka. ²⁷ Om boros ka di tulun di madtatamong, ’’Miagal-agal di pananangkus di Ahimaas ilo pananangkus dilo tulun dot id gulu. Om i Ahimaas nolo’,’’ ka dau. Om boros ka di raja’, ’’Iyau nopo om osonong i’ koulun om atantu’ no dot osonong i’ o habar do poromuton dau,’’ ka dau. ²⁸ Om polohowo’ no di Ahimaas o pinonuwau dau di raja’, om ongoi no iyau otud do tuminuku’ dot id toguang di raja’, om boros ka dau, ’’Royohon no o TUHAN i Kinorohingan do Tuan Raja’, i pinapatahak dot id Tuan Raja’ do kamanangan dot id sawat do koinsanai di tulun di sumaap daa do Raja’,’’ ka dau. ²⁹ Om ponguhot no i raja’, ’’Osonong-sonong i’ i Absalom, i tanakwagu’ddi?’’ ka dau. Om boros ka di Ahimaas do suminimbar, ’’Oi Tuan Raja’, soira’ di linohou oku di Yoab, i susuhuon do Raja’, om nokokito oku dot agangau nopo o hiri, nga’ a’ oku i’ koilo ondung nunu o nosiliu do hiri,’’ ka dau. ³⁰ Om boros ka di raja’, ’’Ongoi ingkakat do hilo’,’’ ka dau. Om ongoi noddi iyau ingkakat do hiri. ³¹ Om korikot noddi i turipon di Yoab, i tulun dot Etiopia om boro-boros no iyau di raja’, ’’Poporongou oku do habar dot osonong dot id Raja’! Baino’ nopo om nonuan ko nod TUHAN do kamanangan do suminaap do koinsanai do tulun di sumaap diya’,’’ ka dau. ³² Om ponguhot no i raja’, ’’Poimpasi po i Absalom, i tanakwagu’ddi?’’ ka dau. Om boros ka di turipon do suminimbar, ’’Pologoson nopo daa do miagal ngai’ di tanakwagu’ddi ot owonsoi dot id koinsanai di tulun di mumbal do sumaap om pokoruol do Tuan Raja’,’’ ka dau. ³³ Om korongou poddi di raja’ iri, om tuminongob tomod diri iyau. Om salakoi no iyau do hiri’d bilik di hiri’d sawat di wawayaan dot agayo om pogihad no iyau. Om moro-boros iyau do poingkaa, ’’Oi tanak ku! Tanak ku Absalom! Absalom! i tanak ku! Osonong nogi’ daa dot iyoho’ o minatai’ddi do sumowoli diya’, oi tanak ku! Absalom, i tanak ku!’’ ka.

¹ Om sinunudan diri i Yoab do mihad i Raja’ Daud do mogihad di Absalom. ² Om iri nopo kinamanangan di tadau’ddi nga’ nosiliu nogiddi do katangaban dot id toinsanan di soudor di Daud, tu’ norongou diyolo’ do mogihad i raja’ di tanak dau. ³ Om aiso’ nod komi di soudor do guminuli’ do hiri’d bandar do tadau’ddi; om miagal po iyolo’ di soudor do nointingayaman do minogidu’ do mantad id pisangadan. ⁴ Om sompono’ no di raja’ o rabas dau mikuwo’d mininglompud do minihad om mimboros dot, ’’Oi tanak ku Absalom, Absalom, i tanak ku, oi tanak ku!’’ ka. ⁵ Om suang no i Yoab do hiri’d walai di raja’ do minongoi solowot di raja’. Om boros ka dau, ’’Baino’ no do minongintingayam ko do koinsanai di tulun nu, i tulun di minamasi diya’ om koinsanai di tangaanak nu do kusai om tondu’, om i sawo nu om i tongoondu’ di panakasawo nu. ⁶ A’ ko nogi’ osianan di tulun dot osianan diya’ nga’ osianan ko nogi’ di tulun dit araatan diya’! Nokointalang nu no kopio dot aiso’ i’ o komoi-komoyon di boyoon di soudor nu, om i soudor nu dot id diya’! Oilaan ku no kopio dot asanangan ko nogi’ daa do poimpasi i Absalom om nangapatai ngai’ iyahai do tadau baino’. ⁷ Ingkakat nogi’ kopio om sumoliwan i’ do mongoi ponginsasamod do ginawo di tulun nu. Tu’ ondung a’ ko sumoliwan do mongoi solowot diyolo’ om sumumpa’ oku no dot id TUHAN dot iso’ po moti’ di tulun diri nga’ aiso’ no o mundorong do moyo’ diya’ do totuong diti; om komoyon nopodti nga’ iti no o kosusaan nu dit adalaan kopio kawagat dot opurimanan nu do solinaid nu do poimpasi,’’ ka dau. ⁸ Om ingkakat noddi i raja’ om soliwan no om irikau no do hiri’d toning di wawayaan dot agayo di bandar. Om korongou ngai’ poddi i tulun dau do hiri iyau, om ongoi ngai’ no iyolo’ solowot di raja’. Daamot nopoddi om nokopoggidu’ ngai’ no i tulun dot Israil; om sorompori-pori nopo iyolo’ do minuli’ do hiri’d walai diyolo’. ⁹ Om mogisosongkiwal poddi ngai’ i payat do tulun dot Israil do pointongkop di pomogunan. Boros ka diyolo’, ’’I Raja’ Daud i’ o pinopoidu’ dati’ do mantad id pisangod toko’, om iyau i’ o minamasi dati’ do mantad id longon do tulun do Pilistin, nga’ baino’ noddi om nokopoggidu’ no iyau do mantad id di Absalom, om nokotongkiad nodti pomogunan. ¹⁰ Pilio’ toko’ no daa i Absalom do sumiliu do raja’ toko’ nga’ napatai iddi iyau dot id pisangadan. Om nokuro’ddi tu’ mundorong tomod kou om aiso’ i’ ot ongoiso’ piya do mongoi pangangat di Raja’ Daud do gumuli’?’’ ka. ¹¹ Om iri nopo i boros di tulun dot Israil diri nga’ nokorikot no dot id di Raja’ Daud. Om suhuo’ noddi di Daud i duwo ot imam, i Sadok om i Abiatar do mongoi ponguhot ngai’ di boyoon do tulun do Yohuda do poingkaa, ’’Nokuro tu’ kotohuri kou nogi’ iyokoyu do mongoi pangangat om momoyo’ di raja’ do gumuli’ do hilo’d walai dau? ¹² Iyokoyu nopo om koobpinayan ngai’ ku i’ om id suang do sompiiyon ku; nga’ nokuro tu’ iyokoyu nogi’ o kotohuri kopio do mongoi popouli’ doho’?’’ ka. ¹³ Om sinuhu’ nogi’ di Daud iyolo’ do popoboros dot id di Amasa do poingkaa, ’’Tobpinai ku i’ iya’. Om mantad po do baino’ om iya’ndo o silihon ku do sumiliu do boyoon do koinsanai do soudor do sumowoli di Yoab. Pologoson nopo o Kinorohingan do mamatai doho’ dot a’ ku no wonsoyon o miagal diri,’’ ka. ¹⁴ Om kohubayaai ngai’ nopoddi i tulun do Yohuda di boros di Daud om ponuhu’ noddi iyolo’ do mongoi posunud do boros diti dot id raja’, ’’Guli’ no oi Tuan Raja’, do miwoyo’ do koinsanai di pagawai nu,’’ ka. ¹⁵ Om pamanau noddi i raja’ do guminuli’. Om soira’ di nokorikot iyau do hilo’d Bawang do Yordan, om i tulun do Yohuda nga’ nokorikot no do hilo’d Gilgal do mongoi pangangat om mongoi pomoyo’ di raja’ do sumoborong di bawang. ¹⁶ Om i Simoi nogi’, i tanak di Gira, i tulun do Binyamin diri, nga’ arau-arau tomod do minongoi amung di tulun do Yohuda do mongoi solowot di Raja’ Daud. ¹⁷ Om moyo-woyo’ di Simoi o soribu o tulun do mantad id payat do Binyamin. Om i Siba nogi’, i susuhuon di sompiiyon di Saul do miwoyo’ di hopod om limo o tanak dau do kusai om duwo nohopod o susuhuon dau nga’ suminoborong nogi’ di Bawang do Yordan dit a’ po nokorikot i raja’. ¹⁸ Om soborong noddi iyolo’ do hiri’d sosoborongon do mongoi posoborong di sompiiyon di raja’ om momonsoi do nunu nopo i pokionuon di raja’. Om tontok di motisoborong no i raja’ di Bawang do Yordan om ongoi no i Simoi otud dot id toguang di raja’, ¹⁹ om boro-boros nod, ’’Oi Tuan Raja’, pokionuon ku no daa kopio do lihuan nu i kasalaan di nowonsoi ku di tontok di tadau do tuminongkiad ko do Yorusalim. Kada’ no soroho’ i sala’ ku’ddi. ²⁰ Tu’ oilaan ku no kopio do nokowonsoi oku’d dusa; om antangai pogi’ nga’ iyoho’ no kopio o nokopogulu do mantad do koinsanai di payat di poundorong do hilo’d ponong id utara do minongoi rapou do Raja’ do tadau baino’,’’ ka dau. ²¹ Om korongou noddi di Abisai, i tanak di Soruya iri om boro-boros nod, ’’A’ toi apatut do patayon i Simoi tu’ minomopol di raja’ do nopili’ do TUHAN,’’ ka. ²² Nga’ boros ka di Daud dot id di Abisai om id di Yoab, i tobpinai dau dit id dotuo, ’’Kada’ kou ongoi kuro-kuro doho’! Monusa’ kou nopo doho’! Tadau nod baino’ do nosiliu kawagu oku do raja’ dot Israil, om iso’ pod tulun dot Israil nga’ aiso’ i’ o koino-ino do patayon do tadau’d baino’,’’ ka dau. ²³ Om boros ka di Daud dot id di Simoi, ’’Jominon ku i’ dot a’ ko i’ hukuman do kapatayon,’’ ka dau. ²⁴ Om i Mopibosit, i manangaki di Saul nga’ minongoi nogi’ solowot di raja’. Om a’ i’ dau nisuan o gakod dau, om a’ pinampadan o ganggut, om a’ pinupuan o pakayan dau do mantad po di tuminongkiad i’ i raja’ do hilo’d Yorusalim gisom do tadau di nokoguli’ i raja’ di nakamanang iyau. ²⁵ Om soira’ di nokorikot i Mopibosit do mantad hilo’d Yorusalim do minongoi solowot di raja’ om boro-boros no i raja’ dot id dau, ’’Nokuro tu’ a’ ko minoyo’ doho’ do tontok diri oi Mopibosit?’’ ka. ²⁶ Om boros ka di Mopibosit do suminimbar, ’’Oilaan nu i’ oi Tuan Raja’ do kimpo’ oku. Om sunudai ku no daa i susuhuon ku do mamakol di kaladai om kasakai oku i’ om katanud oku i’ daa’ndo diya’ nga’ minagakal nogi’ iyau doho’. ²⁷ Om minongudut iyau doho’ dot id Tuan Raja’; nga’ iya’ nopo om miagal id moloikat do Kinorohingan, om wonsoyo’ nopo dot id doho’ it osonong dot osorou nu. ²⁸ Koinsanai di sompiiyon do tapa’ ku nga’ osorupai ngai’ no daa do patayon do Tuan Raja’, nga’ pinologos oku i’ diya’ do makan do potorungak diya’. Om aiso’ no o kosorupayan ku do mokianu do nunu nopo do mantad id diya’, oi Tuan Raja’,’’ ka dau. ²⁹ Om boros ka di raja’ do suminimbar, ’’Ula’ pori’d boros. Natantu’ ku no do maan dokoyu di Siba pibohogio’ o koinsanai di dapu’ di Saul,’’ ka dau. ³⁰ Nga’ boros ka di Mopibosit, ’’Okuro i’ dot i Siba o kaanu ngai’ddi. Tu’ osonong no o ginawo ku dot osonong po o Tuan Raja’ do nokoguli’,’’ ka dau. ³¹ I Barsilai nogi’, i tulun do Giliad nga’ ruminuhuk i’ do mantad hilo’d Rogolim do minoyo’ di raja’ do gisom do nokosoborong di Bawang do Yordan. ³² I Barsilai nopodti nga’ molohing no kopio, tu’ walu’ no nohopod o toun dau. Nga’ kaya’ tomod iyau om iyau noddi o minanahak do taakanon di raja’ di daamot di raja’ do hilo’d Mahanaim. ³³ Om boros ka di raja’ dot id dau, ’’Kaino, tumanud doho’. Om onuan ku i’ iya’ do nunu nopo o kosukup-sukupan nu do hilo’d Yorusalim,’’ ka dau. ³⁴ Nga’ boros ka di Barsilai do suminimbar, ’’A’ oku no alaid diti do poimpasi. Om nokuro po nanu’ tu’ mongoi oku po tanud do Tuan Raja’ do hilo’d Yorusalim? ³⁵ Walu’ no nohopod o toun ku, om aiso’ no o milo do manahak doho’ do koinsanangan. Om a’ oku no kopuriman ondung okuro-kuro i taakanon om it inumon ku. Om a’ oku no korongou di sinding di modsisinding. Kagangau-gangau oku nopo do Tuan Raja’. ³⁶ Om a’ oku i’ osorupai do kaanu dot isomuli’ do raja’ dot irad diri kagayo. Kowoyo’ oku po katuu diya’ dot oruhai do hilo’d ralan dit id soborong do Bawang do Yordan. ³⁷ Nga’ pologoson oku no iyoho’ do muli’ do hilo’d walai ku, om hilo’ id somok di lobong di molohing ku o kapatayon ku. Nga’ diiya i Kimham, i tanak ku. Pologoso’ nopo iyau do tumanud do Tuan Raja’; om wonsoyon nopo dot id dau it osonong dot osorou do Tuan Raja’,’’ ka dau. ³⁸ Om boros ka di raja’ do suminimbar, ’’Powoyoon ku i’ i Kimham, om nunu nopo o korohian nu om wonsoyon ku i’ dot id dau. Om wonsoyon ku dot id diya’ o nunu nopo o pokionuon nu,’’ ka dau. ³⁹ Om soborong noddi i Daud om koinsanai di tulun dau di Bawang do Yordan. Om tungubai no di Daud i Barsilai om barakatai no dau. Om poguliai noddi di Barsilai do hiri’d walai dau. ⁴⁰ Om ongoi noddi i raja’ do hilo’d Gilgal. Om i Kimham nga’ minoyo’ nogi’ dau. Om minoyo’ nogi’ o koinsanai di tulun do Yohuda om songintanga’ do tulun dot Israil. ⁴¹ Om ongoi ngai’ no solowot di raja’ o koinsanai di tulun dot Israil om pomoros no iyolo’ do poingkaa, ’’Oi Tuan Raja’, nokuro tu’ osorou di tobpinai dahai, i tulun do Yohuda, dot iyolo’ noo o haro o kosorupayan do mongongoi diya’ om momoyo’ diya’, om sompiiyon nu, om koinsanai di tulun do sumoborong di Bawang do Yordan?’’ ka. ⁴² Om boros ka di tulun do Yohuda, ’’Atantu’ no, tu’ iyau nopo om osomok po kopio o koobpinayan dot id dahai. Nga’ nokuro tu’ otogod kou? Haro toi o naanu dahai do taakanon do pinatahak di raja’, ko’ nakaanu toi iyahai do nipuhawang?’’ ka diyolo’. ⁴³ Om boros ka di tulun dot Israil do suminimbar, ’’Kosorupayan nopo dahai do mananganu di raja’ om inghopod i’ ko’ mantad di kosorupayan dokoyu; mulong po tuu daa do tobpinai kopio dokoyu iyau. Nokuro tu’ poinsiriba-ribaon daa iyahai dokoyu? Kada’ nogi’ dokoyu kolihuwai dot iyahai i’ o nokopogulu do minomoros do mongoi popouli’ di raja’,’’ ka diyolo’. Nga’ opodos po kopio i boros di tulun do Yohuda ko’ mantad di boros di tulun dot Israil om mada’ i’ iyolo’ dot aala’.

¹ Om koontok no do haro o tulun dit araat o kowoyo-woyoon do hilo’d Gilgal do maso’ddi. Ngaran nopo dau om i Siba, i tanak di Bikri, i mantad id payat do Binyamin. Om tontok di nokorikot i minomoyo’ di Daud, om pounio’ nod Siba i torumpit om polohowo’ no o boros do poingkaa, ’’A’ toko’ i’ kokuro-kuro di Daud. Nunu o kawayaan toko’ dau, oi tulun dot Israil? Kainou, muli’ do hilo’d walai toko’!’’ ka. ² Om tongkiad ngai’ noddi di Daud i tulun dot Israil om woyo’ no iyolo’ di Siba. Nga’ iri nopo tulun do Yohuda om suminokodung kasai’ i’ di Daud om minomoyo’ dau do mantad hiri’d Bawang do Yordan om gisom do nokorikot do hilo’d Yorusalim. ³ Om soira’ di nokorikot i Daud do hiri’d walai dau di hilo’d Yorusalim om ngoyo’ no dau i hopod o tongoondu’ di panakasawo dau, i pinoundorong dau do madtamong di walai. Om poiyono’ no dau iyolo’ do hiri’d tiso’ o walai di tamangan di madtatamong. Om onuwai i’ dau iyolo’ do kosukup-sukupan nga’ a’ no ma iyau insan ongoi dudun diyolo’. Om poinsuwai-suwai noddi iyolo’ do miagal di tongoondu’ di nopuadan do gisom do kinapatayo’ diyolo’. ⁴ Om boros ka di raja’ dot id di Amasa, ’’Ngoyo’ ngai’ sunudai i tulun do Yohuda do tumimung om gumuli’ nod hiti do miwoyo’ diyolo’ do tolu tadau’d mantad baino’,’’ ka dau. ⁵ Om pamanau noddi i Amasa do minongoi pomisunud di tulun do Yohuda nga’ a’ i’ iyau guminuli’ do tontok di maso di natantu’ mantad di raja’. ⁶ Om boros kaddi di raja’ dot id di Abisai, ’’Monusa’ nogi’ moti’ kopio dati’ i Siba, i tanak di Bikri diri ko’ mantad di Absalom. Angatai nogi’ kopio iti tulun ku om ongoyon i’ dokoyu iyau gusao’, dot a’ po iyolo’ korikot do hilo’d bandar di kitolig om kopoggidu’ nondo do mantad id dati’,’’ ka dau. ⁷ Om pamanau noddi do tuminongkiad do Yorusalim i tulun di Yoab, om i soudor do madtatamong di raja’, om koinsanai di soudor do suwai, do minoyo’ di Abisai do mongoi pomogusa’ di Siba. ⁸ Om soira’ di nokorikot iyolo’ di tontolob dot agayo do hilo’d Gibion om nokopogulu no do nokorikot do hilo’ i Amasa. Om i Yoab nopo nga’ kirasuk no do dongsumasangod om kiniabil do gayang di pinokogos do tagkos dau o tangkap. Soira’ di luminaang iyau om karatu’ no i tangkap di gayang om kosomitai poddi di longon dau’d gibang. ⁹ Om boros ka di Yoab dot id di Amasa, ’’Osonong-sonong ko i’, oi tobpinai ku?’’ ka. Nga’ iri nopo longon do wanan di Yoab nga’ pointaid no di ganggut di Amasa do miagal-agal do maan dau tungubai i Amasa. ¹⁰ Nga’ a’ i’ di Amasa insan-insanon do kiinigit do gayang i tiso’d longon di Yoab. Om toboko’ no di Yoab o tian di Amasa om koulayak nopo o tinaii’ dau gisom do naratu’ do hiri’d tana’. Om diri i’ om diri do napatai iyau; om a’ no di Yoab noinduwaan do minonobok i Amasa. Om lombus po kawagu i Yoab om i tobpinai dau, i Abisai, do minongoi pomogusa’ di Siba. ¹¹ Om ingkakat no o songulun do mantad di tulun di Yoab do hiri’d toning di rata’ di Amasa om pomoros no dot opuhod do poingkaa, ’’Isai nopo it orohian di Yoab, om i sumokodung di Daud, om osonong do tumanud di Yoab!’’ ka. ¹² Om maso nopoddi nga’ poingiliu i rata’ di Amasa do notounan do raha’ do hiri’d tanga’ di ralan. Om kokito no di soudor di Yoab do koinsanai di tulun do kawaya’ om mundorong ngai’ nopod hiri do montong, om gayato’ noddi dau i rata’ do mantad hiri’d ralan om poiliho’ no do hiri’d kasakat-sakatan, om takapai no dau do kain. ¹³ Om soira’ di noidu’ i rata’ do mantad hiri’d ralan om oinsanan nopoddi i tulun do tuminanud di Yoab do mongoi pomogusa’ di Siba. ¹⁴ Om nawayaan ngai’ di Siba o koinsanai di watas do payat dot Israil di pinakayaan dau do hilo’d bandar do Abil-Bait-Maaka. Om songwoyo-woyo’ nogi’ dau o koinsanai do sinompuruan do sompiiyon di Bikri. ¹⁵ Om korongou noddi di tulun di Yoab do hiri i Siba, om ngoyo’ no diyolo’ awangai i bandar. Om timbunai no diyolo’d tana’ o posorili’ di bandar dot id soliwan di tolig di bandar om nungkudan nogi’ diyolo’ i tolig mantad di bandar do mamahaba’ddi. ¹⁶ Om haro’ddi o songulun o tondu’ dot opintar kopio do hiri’d bandar do minomolohou do mantad hiri’d tolig di bandar do poingkaa, ’’Pokinongou pogi’! Pokinongou pogi’! Sunudai i Yoab do mongoi’d hiti tu’ haro o poboroson ku dau,’’ ka dau. ¹⁷ Om ongoi noddi i Yoab, om ponguhot no i tondu’, ’’I Yoab ko?’’ ka dau. ’’Oo,’’ ka di Yoab do suminimbar. Om boros ka di tondu’, ’’Oi Tuan, pokinongoho’ no iti boros ku,’’ ka dau. ’’Ba, mokinongou oku i’,’’ ka di Yoab. ¹⁸ Om boros ka di tondu’, ’’Di nopo di gulu po, om koubasanan no do momoros dot ’Mokituduk ko nopo om mongoi no do hilo’d bandar dot Abil,’ ka, om iri no o winonsoi diyolo’. ¹⁹ Pinatantu’ mantad di tulun dot ongotorodok do hiti’d Israil dot iti nopo bandar dahai’dti nga’ bandar dit agayo om iso’ o bandar dot id pialatan di bandar dot osimbayan kopio om otorodok do hiti’d Israil. Nokuro tu’ umbalan nu daa do mamaraag iti? Orohian ko daa do mamaraag do tana’ di don TUHAN?’’ ka dau. ²⁰ Om boros ka di Yoab, ’’Amu’! Aiso’ i’ kopio o pomusarahan ku do mamaraag ko’ mananus po diti bandar dokoyu! ²¹ Okon i’ ko’ miagal diri ot osorou dahai. Nga’ haro o songulun do roitan dot i Siba, i tanak di Bikri do mantad hilo’d watas do konulu-nuluan dot Ipraim do mumbal do sumaap di Raja’ Daud. Patahako’ dahai i tulun diri om mogidu’ oku i’ do mantad hiti’d bandar,’’ ka dau. Om boros ka di tondu’, ’’Pobigodon i’ dahai i tulu dau do mantad id sampaping diti tolig,’’ ka. ²² Om suang no i tondu’ di bandar om poboroso’ no dau iri dot id toinsanan di tulun do hiri. Om ngoyo’ noddi diyolo’ iduwo’ o tulu di Siba, i tanak di Bikri, om pobigodo’ no do hiri’d di Yoab. Om pounio’ no di Yoab i torumpit do popoilo do koinsanai di tulun dau do tumongkiad di bandar diri. Om uli’ noddi iyolo’ dot id walai diyolo’. Om poguliai noddi di Yoab do hilo’d Yorusalim do minongoi solowot di raja’. ²³ Iti ngai’ no i tulun di pinili’ di Daud: Boyoon do koinsanai di soudor dot Israil: i Yoab. Boyoon di soudor do moyo-woyo’ kasai’ di Daud: i Bonaya, i tanak di Yoyada. ²⁴ Boyoon di tulun di sinuhu’ do kumaraja’: i Adoram. Poopi’ do tusin do pomorinta’: i Yosapat, i tanak di Ahilud. ²⁵ Gomponulis do pomorinta’: i Siya. Imam: i Sadok om i Abiatar. ²⁶ Imam do hiri’d walai di raja’: i Ira, i mantad hilo’d bandar do Yair.

¹ Tontok dit i Daud o momorinta’ om minononglous dot adalaan tomod do solinaid do tolu o toun. Om ongoi noddi i Daud uhot do TUHAN do pasal diri, om boros kad TUHAN, ’’Mononglous pogi’ nga’ kisala’ i Saul om i sompiiyon dau tu’ minamatai iyau di tulun do Gibion,’’ ka. ² (Iri nopo tulun do Gibion nga’ okon i’ ko’ tulun dot Israil nga’ i bansa’ dot Amori dit okuri’ no. Om mulong piya do nokosumpa’ i tulun dot Israil do mongintirung diyolo’ nga’ numbalan i’ di Saul do momunso iyolo’ tu’ osorou dau dot osiliu iri do koinsanangan di tulun dot Israil om tulun do Yohuda.) Om lohowo’ noddi di Daud i tulun do Gibion, ³ om uhoto’ no dau iyolo’, ’’Nunu o maan ku wonsoyo’ dot id dokoyu? Orohian oku do monogit di kasalaan di nowonsoi dot id dokoyu, om barakatan i’ dokoyu o tulun di songonuon do TUHAN,’’ ka. ⁴ Om boros ka diyolo’ do suminimbar, ’’A’ i’ milo do salasayon do pirok ko’ tamas i pioduhan dahai di Saul om i sompiiyon dau, nga’ a’ nogi’ iyahai orohian do mamatai dot ongosongulun piya do tulun dot Israil,’’ ka. Om boros ka di Daud do minonguhot, ’’Om nunu’ndo ot osorou dokoyu do maan ku wonsoyo’ dot id dokoyu?’’ ka dau. ⁵ Om boros ka diyolo’ dot id raja’, ’’Orohian daa i Saul, i raja’ di pinili’ do TUHAN do mamatai dahai om momunso dahai gisom dot aiso’ no o tiso’ dahai do poimpasi do hinonggo nopo o kinoiyonon do hiti’d Israil. ⁶ Iyo nopoddi om patahako’ no dot id dahai o turu’ di sinakagon dau do kusai om maan i’ dahai iyolo’ pogiiso’ dot id toguang do TUHAN do hilo’d Gibia, i bandar di Raja’ Saul,’’ ka diyolo’. Om boros ka di raja’, ’’patahakon ku i’ iyolo’,’’ ka. ⁷ Om a’ i’ di Daud pinatahak i Mopibosit, i tanak di Yonatan, tu’ nokopitaru’ no i Yonatan om i Daud. ⁸ Om ngoyo’ noddi di raja’ i Armoni om i Mopibosit, i tanak di Saul do kusai do pinaganak di Rispa: I Rispa nopo nga’ tanak di Aya do tondu’. Om nongoi nogi’ dau i limo o tanak do kusai diyo’ Mirab di Adriol. I Mirab nopo nga’ tanak di Saul do tondu’. Om i Adriol no om tanak di Barsilai, i mantad hilo’d Mihola. ⁹ Om patahako’ noddi di raja’ iyolo’ dot id tulun do Gibion. Om pogiiso’ no iyolo’ di tulun do Gibion do hiri’d nulu-nulu dot id toguang do TUHAN. Om kapatai ngai’ nopo i turu’ tulun diri. Om pinatai ngai’ iyolo’ do tontok di kooiyon no do maso do kopomurounan do kayu om tontok di tumimpuun no do mongomot do barli. ¹⁰ Om anu no i Rispa, i panakasawo di Saul do kain di pakayon do mogihad om pataap-taapo’ no dau do hiri’d sakai di tontolob, i hiri’d kinoilihon di rata’. Om hiri-hiri no iyau do mantad di tuminimpuun do mogiongomot om gisom do norikot i maso do rumasam do tontok di lumahanggang o roun do kayu. Om a’ i’ dau pinologos i tombolog do mongoi sako di rata’ do dongadau om ugadan dau i nintorusan do mongoi insomok di rata’ do dongotuong. ¹¹ Om soira’ di nosunudan i Daud di winonsoi di Rispa, ¹² om ngoyo’ no di Daud onuo’ i tulang di Saul om i tulang di Yonatan, i tanak dau, do mantad id tulun di poingiyon do hilo’d Yabis, i hilo’d Giliad. (Iyolo’ no i minanakau di tulang diri do mantad hiri’d talun-alun do hilo’d bandar do Bait-San, i pinogiisan di tulun do Pilistin di rata’ diyolo’ do tontok di naala’ i Saul do hilo’d nulu-nulu do Gilbua.) ¹³ Om nigitan dau do mantad hilo’ i tulang di Saul om i tulang di Yonatan, om tinimung nogi’ dau i tulang di turu’ o tulun di pinogiis diri. ¹⁴ Om lobongo’ noddi dau i tulang di Saul om i tulang di Yonatan, om i tulang di turu’ o tulun diri, do hiri’d lobong di Kis, i tapa’ di Saul. Kinoiyonon nopodti nga’ hilo’d Sila, i hilo’d watas do Binyamin. Om kowonsoi ngai’ poddi iri do tumanud di pinonuhuan di raja’, om simbaro’ nogi’ do Kinorohingan o sambayang diyolo’ do bagi’ di pomogunan diri. ¹⁵ Tontok di haro kawagu o pinisangadan dot id piolitan di tulun do Pilistin om i tulun dot Israil, om pamanau no i Daud do miwoyo’ do koinsanai di tulun dau do minongoi sangod di tulun do Pilistin. Nga’ tontok di misangod iyolo’ om kohuyan no tomod i Daud. ¹⁶ Om osorou nopo daa di Yisbibinob nga’ apatai no dau i Daud. I Yisbibinob nopodti nga’ sinakagon do tulun dit angagayo koulun. Om kitandus iyau do tambaga’ do haro i’ doti’ o tolu om satanga’ kilogram do kawagato’. Om kiniabil iyau do gayang di wagu po. ¹⁷ Nga’ rikot noddi i Abisai, i tanak di Soruya, do minongoi ponguhup di Daud. Om saapo’ no dau om patayo’ dau i tulun do Pilistin dit agayo koulun diri. Om suhuo’ noddi di tulun di Daud do mamatos i Daud dot a’ nondo moyo’ diyolo’ do mongoi sangod. Tu’ boros ka diyolo’, ’’Iya’ no o sondihon do tulun dot Israil, om mada’ i’ iyahai dot atagakan diya’,’’ ka. ¹⁸ Om katalib nori, om haro po o pinisangadan do sumangod di tulun do Pilistin dit angagayo koulun do hilo’d Gob. Om tontok noddi do pinatai di Sibkai, i tulun do Husa, i Sap, i tulun dot agayo koulun. ¹⁹ Om haro po kawagu o pinisangadan do sumangod di tulun do Pilistin do hilo’d Gob. Om pinatai di Ilhanan, i tanak di Yair, i tulun do Baitlahim diri, i Guliat, i tulun do Gat. Iri nopo tulu di tandus di Guliat om irad po di salampad di pangawalan. ²⁰ Om haro po kawagu o pinisangadan do hilo’d Gat. Om haro o songulun dit agayo kopio o kinoulunan do hilo’. Om sopionom o tunturu’ do palad dau, om sopionom o tunturu’ do lapap dau. Om iri nopo tulun diri nga’ orohian kopio do monokisangod. ²¹ Om momohingi-hingi diri iyau di tulun dot Israil nga’ napatai i’ iyau di Yonatan, i tanak di Simia, i tobpinai di Daud. ²² Iri nopo it apat o tulun dit angagayo koulun diri, i pinatai di Daud om i tulun dau, om sinakagon ngai’ nopo do tulun dit angagayo koulun do hilo’d Gat.

¹ Iti no o sinding di sininding di Daud dot id TUHAN do tontok di pinoidu’ iyau do TUHAN do mantad id di Saul om mantad id koinsanai di pisangod dau: ² TUHAN no o manahak doho’ do kointirungan; iyau no o kuta’ ku dit ogirot. ³ Kinorohingan no ot intirungon ku, om aiso’ no o koligagaanan ku do pointirung dau. Iyo po iyau do kolid do mongintirung doho’, mogobi’ iyau doho’ om momogompi’ doho’. Iyau no o gampamasi ku; gompion oku dau om poiduwon oku do mantad id kororongit. ⁴ Lumohou oku do TUHAN om poiduwon oku i’ dau do mantad id pisangod ku. Royohon no o TUHAN! ⁵ Notutukan oku do ruab do kapatayon; minalit doho’ o ruab do karaagon. ⁶ Pointutuk doho’ o koligagaanan do kapatayon, om nokowonsoi no di lobong i pamalawa’ dau doho’. ⁷ Luminohou oku do TUHAN dit id suang oku do kosusaan; luminohou oku do mokiuhup di Kinorohingan ku. Norongou dau o boros ku di hiri iyau id Walai dau; minokinongou iyau di tihad ku do mokiuhup. ⁸ Om gogor noddi om guyu’ iti pomogunan; guminogor om guminuyu’ o pinoimpahan do tawan, tu’ otogod no kopio o Kinorohingan! ⁹ Suminoliwan o lisun do mantad id luang do todung dau, mindak-sindak o tapui om angalasu’ tomod o popou do sumoliwan do mantad id kabang dau. ¹⁰ Pinitas dau o tawan om lintuhun noddi iyau, om oitom nopo o haun dot id siriba’ di lapap dau. ¹¹ Osiau nopo iyau do tuminulud dot id sakai di moloikat di roitan do kerub; om mininghombo iyau dot id sakai di talad do ribut. ¹² Luminopot iyau do totuong; haun dit oitom, om poimponu’ do waig o posorili’ dau. ¹³ Mikit-sikit o popou dit angalasu’ do mantad id kodumaat dit id gulu-gulu dau. ¹⁴ Om ngorod noddi o TUHAN do mantad hilo’d tawan, norongou’ddi o boros do Kinorohingan dit Agayo Kuasa’. ¹⁵ Pinapana’ dau i pana’ dau om pogiurias nopo i pisangod; kalab do kodumaat o pinopoggidu’ dau diyolo’. ¹⁶ Nokointalang o nanad do rahat, om nokoulai o pinoimpahan do pomogunan, tontok di tinogod do TUHAN o pisangod dau, om minamagarang iyolo’ dot atatagadan. ¹⁷ Hilo’d sawat o tadon do TUHAN do minongoi pomusus doho’; ginayat oku dau do mantad id waig dit aralom. ¹⁸ Pinoidu’ oku dau do mantad id pisangod ku dit ongokoris, om mantad id koinsanai’d tulun dit araatan doho’ — om adalaan no iyolo’ kokoris ko’ iyoho’. ¹⁹ Suminaap iyolo’ doho’ do tontok dit osusa’ oku, nga’ nintirungan oku i’ do TUHAN. ²⁰ Nuhupan oku i’ dau do minidu’ do mantad id koligagaanan; pinasi oku i’ dau tu’ osianan i’ iyau doho’. ²¹ Somulian oku id TUHAN tu’ koontok i’ o wonsoyon ku; barakatan oku i’ dau tu’ aiso’ i’ o kasalaan ku. ²² Noumboyo’ ku i’ i Tourat do TUHAN; a’ oku i’ tuminolikud do mantad id Kinorohingan ku. ²³ Natanud ngai’ ku i’ it oturan dau; om a’ oku i’ tuminolibamban di ponuhuan dau. ²⁴ Oilaan i’ dau dot aiso’ o dusa ku, om mininsodu’ oku do mantad id wowonsoyon dit araat. ²⁵ Om somulian oku i’ dau tu’ oilaan i’ dau do koontok o wonsoyon ku, om oilaan dau dot aiso’ o sala’ ku. ²⁶ Oi TUHAN, otorodok ko i’ dot id tulun dit otorodok dot id diya’, om osonong kopio ko dot id tulun dit aiso’ o kasalaan. ²⁷ Olidang ko i’ dot id tulun dit olidang, nga’ pisangod nu i’ i tulun dit araat. ²⁸ Uhupan id TUHAN o tulun di minsiriba’, nga’ poinsiribaon i’ dau i tulun dit asawat o ginawo. ²⁹ Oi TUHAN, iya’ no o tanawau ku, om tonuson nu o totuong ku. ³⁰ Onuan oku diya’ do kokorisan do sumaap do pisangod ku, om onuan oku diya’ do kuasa’ do mangala’ di pongintirungan diyolo’. ³¹ Kinorohingan nopo om osonong ngai’ i’ o wonsoyon, om boros dau nga’ milo i’ do ponongkuyaanan! TUHAN nopo om miagal do kolid dot id toinsanan di mogihum do kointirungan dot id dau. ³² TUHAN noo o Kinorohingan; Kinorohingan no o mongintirung dati’. ³³ Kinorohingan no o pogintirungan ku dit ogirot; poposimbayan iyau do tindalanon ku. ³⁴ Silihon oku dau do miagal di tambang tu’ kotunud o pongulok-ulok; om gompion oku dau do hilo’d konuluhanan. ³⁵ Tudukan oku dau do karalan-ralano’ do sumangod, om milo oku i’ do manganat di poundaan do pana’ dit opuhod kopio. ³⁶ Oi TUHAN, manahak ko doho’ do kointirungan, om mamasi ko doho’; nuhupan oku diya’ gisom do nosiliu oku’ddi do tulun dit abantug. ³⁷ A’ oku i’ diya’ pinologos dot atanggayan do pisangod, om a’ oku insan kaala’. ³⁸ Ginusa’ ku i pisangod ku om naala’ ku i’ iyolo’; a’ oku i’ tumingkod dot a’ ku po iyolo’ apatai. ³⁹ Binobog ku iyolo’ gisom dot a’ no iyolo’ kotungag; om poingiliu po iyolo’ do naala’ dot id toguang ku. ⁴⁰ Nonuan oku diya’ do kokorisan do sumangod, om kamanangan do sumangod di pisangod ku. ⁴¹ Pinopoggidu’ nu i pisangod ku do mantad id doho’; om patayon ku i tulun dit araatan doho’. ⁴² Mininglohou iyolo’ do mokitulung, nga’ aiso’ i’ o minonulung diyolo’; luminohou iyolo’ do TUHAN nga’ a’ i’ iyau suminimbar. ⁴³ Binobog ku iyolo’ do gisom do miagal po iyolo’ di pupuk; piningulakan ku iyolo’ do miagal po di burutak do hilo’d ralan. ⁴⁴ Pinoidu’ oku diya’ do mantad id tulun ku dit obinsaap, om pinotilombus oku diya’ do momorinta’ do piro-piro o bansa’. Iri piya tulun dit a’ ku notutunan mantad nga’ nosiliu noddi do rayat ku. ⁴⁵ Tumuku’ dot id doho’ o tulun di bansa’d suwai, om mumboyo’ iyolo’ do tontok do korongou do boros ku. ⁴⁶ Atagakan iyolo’ do kinoris om pananggagaran nopo do sumoliwan do mantad id kuta’ diyolo’. ⁴⁷ Poimpasi o TUHAN! Royohon no i mogobi’ doho’! Popinsusuyo’ no o kogoyoo’ do Kinorohingan dit okoris, iyau i minamasi doho’! ⁴⁸ Nonuan oku dau do kamanangan do suminangod do pisangod ku; om pinoinsiriba’ ngai’ dau doho’ i bansa’d tulun, ⁴⁹ om pinoidu’ oku do mantad id tulun di sumaap doho’. Oi TUHAN, nonuan oku diya’ do kamanangan do suminaap do pisangod ku, om intirungan oku diya’ do mantad id tulun dit ongorongit. ⁵⁰ Om royohon ku’ddi iya’ dot id pogiolitan do koinsanai’d bansa’, modsinding oku do mamarayou diya’. ⁵¹ Manahak o Kinorohingan do kamanangan dot agayo dot id raja’ dau; om popointalang iyau do kosianan dit aiso’ o kotingkadan dot id tulun di nopili’ dau; dot id di Daud om id sinakagon dau do gisom dot alaid.

¹ I Daud nopo, i tanak di Isai, om pinili’ do sumiliu do raja’ om pinabantug iyau do Kinorohingan di Yakub. Om iyau no i minintulis do sinding do sindingon dot Israil. Iti no ngai’ o boros di Daud dit id tohuri no: ² Moro-boros o Rusod do TUHAN do pawayaon doho’; id tompok nod dila’ ku o boros dau. ³ Nokoboros no o Kinorohingan di Yakub; boros ka di pogintirungan dot Israil dot id doho’, ’’Iri nopo raja’ dit otulid o pomomorinta’, i momorinta’ do mikuwo’d mumboyo’ do Kinorohingan, ⁴ om miagal di tadau do mulinau do tontok di kosuabon po dit aiso’ po o haun, i tadau do popotomou di sakot di dongkotingkadan do rasam,’’ ka dau. ⁵ Om miagal noddi o Kinorohingan do mamarakat do sinakagon ku; tu’ nokopomonsoi no iyau do tumpongo dit aiso’ o kopupuson dot id doho’, pinitoruan dit a’ milo do pakaisoon, batos dit a’ milo do simbanan. Iri noo o pokionuon kopio ku; iri no i kamanangan ku, om atantu’ no do bayaanon do TUHAN iri. ⁶ Nga’ tulun nopo dit a’ mumboyo’ do Kinorohingan om miagal noddi rugi do pataamon. A’ no oigitan do palad toomod do tulun; ⁷ mositi’ no do mamakai ko do pakakas do basi’ ko’ tandus; om tutudan nondo do gisom dot ouu. ⁸ Iti ngai’ no o ngaran do soudor di Daud dit angabantug: Koiso’ nopo nga’ i Isbaal, i mantad hilo’d Hakmoni, i boyoon di ’’Tolu o Soudor’’. Nokoumbal i’ iyau do suminaap do walu’ nahatus o tulun dot id iso’ o pinisangadan, om kapatai ngai’ nopo dau iyolo’ dot iri no tandus dau o pinamatai. ⁹ Iri no koduwo dot id pialatan di Tolu o Soudor diri om i Iliasar, i tanak di Dodo, i mantad id sinakagon di Ahohi. Minoyo’ iyau di Daud do tontok di minongoi iyau sangod di tulun do Pilistin di nokotimung no do mongoi sangod. Om tontok di minsodu’ no daa i tulun dot Israil, ¹⁰ om sangod i’ iyau di tulun do Pilistin do gisom i’ do nadalaan kohuyan o longon dau, om a’ noddi kalangkab o palad dau do mantad id gayang dau. Om tadau noddi do nonuan do TUHAN iyolo’ do kamanangan dit agayo. Om poguliai ngai’ no di soudor di mininsodu’ daa’ddi do hiri’d kinoiyonon di Iliasar do suminangod. Om pingiduwo’ no diyolo’ i pakayan do don sumasangod di songimpakai di soudor do nangapatai. ¹¹ Iri no kotolu dot id piolitan di Tolu o Soudor diri om i Sama, i tanak di Agi, i mantad hilo’d Harari. Nokoumbal i’ do tontok di tinimung i tulun do Pilistin do hilo’d Lihi, dot id iso’ o tumo di tinanaman do kasang dot aragang. Om poggidu’ no i soudor dot Israil do mantad id tulun do Pilistin. ¹² Nga’ i Sama nopo om suminangod po, om pinimpatai dau do gisom do naala’ i tulun do Pilistin, om a’ iddi nosolod i tumo. Om iyo noddi o TUHAN do minanahak do kamanangan dot agayo do tontok do tadau’ddi. ¹³ Tontok dit oruhai no do tumimpuun do mongomot om rikot no o tolu tulun do mantad di ’’Tolu Nohopod o Soudor’’ do minongoi solowot di Daud do hilo’d luang do Nulu-Nulu dot Adulam. Om tontok nopoddi nga’ poundorong no do hilo’d Rantai do Ropaim ot iso’ o sinompuruan do tulun do Pilistin. ¹⁴ Tontok nopoddi nga’ hiri i Daud id kuta’ dit id nulu-nulu, om nosuang no do piro-piro o tulun do Pilistin o hilo’d Baitlahim. ¹⁵ Om langadon noddi i Daud di kampung dau, om boros ka dau, ’’Haro daa giya o tulun do mongoi poinum doho’ di waig do torobong do hilo’d Baitlahim, i hiri’d toning di wawayaan dot agayo!’’ ka dau. ¹⁶ Om salagai nopoddi di Tolu o Soudor dit angabantug diri i kokiiman do tulun do Pilistin. Om ongoi no iyolo’ timbauk di waig do mantad hiri’d torobong om igitai no do guminuli’ do hiri’d di Daud. Nga’ a’ i’ di Daud ninum iri, suwai ko’ pinotuntug nogi’ dau do maan do porsombahan dot id TUHAN. ¹⁷ Boros ka dau, ’’Oi TUHAN, poingkuro piya nga’ a’ ku i’ inumon iti waig! Tu’ ondung inumon ku iti nga’ miagal nod monginum do raha’ do tongokusai dit a’ no minomusorou do tinan diyolo’ do minongoi’dti,’’ ka dau. Om a’ iddi i Daud minonginum di waig diri. Om iri ngai’ no o winonsoi di Tolu o Soudor dit angabantug diri. ¹⁸ I Abisai no, i tadi’ di Yoab (tina’ nopo diyolo’ nga’ i Soruya) o boyoon di ’’Tolu Nohopod o Soudor dit Angabantug’’. Nokoumbal i’ iyau do suminaap do tolu nahatus o tulun dot iri no tandus dau o pinanangod, om kapatai ngai’ nopo dau iyolo’. Om iyau noddi ot abantug kopio dot id piolitan di, ’’Tolu Nohopod o Soudor’’. ¹⁹ Om iyau no ot abantug kopio dot id pogialatan di ’’Tolu Nohopod o Soudor’’, om iyau no o nosiliu do boyoon diyolo’. Nga’ a’ i’ ma iyau koiyo do kobontugo’ di ’’Tolu o Soudor’’. ²⁰ I Bonaya, i tanak di Yoyada, nga’ soudor nogi’ dit abantug. Iyau nopo om mantad hilo’d Kabsiil, om osiou kopio iyau. Nakapamatai i’ iyau do duwo soudor do gunsiou do mantad hilo’d Muab. Om nokoumbal nogi’ iyau do suminuang do luang do hiri’d tana’ do tontok di monongais om pamatai noddi iyau do songinan o singa do hiri. ²¹ Om nakapamatai nogi’ iyau do songulun o tulun do Masir dit agayo o tinan om aranggou, om i kiinigit do tandus. Om bobobog no o pinomobog di Bonaya di tulun diri. Om ahawo’ noddi di Bonaya i tandus di poingigit di tulun do Masir, om patayo’ no dau i tulun diri dot i tandus di tulun o pinamatai dau. ²² Om iri no o winonsoi di Bonaya dit osiou kopio; iyau nopoddi om mantad id pogialatan di ’’Tolu Nohopod’’. ²³ I Bonaya no it abantug dot id pogialatan di ’’Tolu Nohopod o Soudor’’, nga’ a’ i’ iyau koiyo di ’’Tolu o Soudor’’. Om siliho’ noddi iyau di Daud do boyoon di soudor di madtatamong di Daud. ²⁴ - ³⁹ Iri nopo i soudor do suwai dot id suang di ’’Tolu Nohopod o Soudor’’ nga’ i: Asail, i tadi’ di Yoab; i Ilhanan, i tanak di Dodo, i mantad hilo’d Baitlahim; i Sama, om i Ilika, i tulun do Harod; i Hilis, i tulun do Palti; i Ira, i tanak di Ikis, i tulun do Tokua; i Abiosor, i tulun dot Anatot; i Mobunai, i tulun do Husa; i Salmon, i tulun dot Ahohi; i Maharai, i tulun do Nitopa; i Hilib, i tanak di Baana, i tulun do Nitopa; i Itai i tanak di Ribai, i mantad do hilo’d Gibia, om mantad id payat do Binyamin; i Bonaya, i tulun do Piraton; i Hidai, i mantad do hilo’d Rantai do Gaas; i Abialbon, i tulun dot Araba; i Asmawit, i tulun do Bahurim; i Iliaba, i tulun do Saalbon; i tangaanak di Yasin; i Yonatan; i Sama, i tulun do Harari; i Ahiam, i tanak di Sarar, i tulun do Harari; i Ilipilit, i tanak di Ahasbai, i tulun do Maaka; i Iliam, i tanak di Ahitopol, i tulun do Gilo; i Hisrai, i tulun do Karmol; i Pairai, i tulun dot Arbi; i Yigal, i tanak di Natan, i mantad do hilo’d Soba; i Bani, i tulun do Gad; i Silik, i tulun dot Amon; i Naharai, i tulun do Biirot, i mongingigit do rapo-rapo di Yoab, i Ira, om i Garob, i tulun do Yitri; i Uria, i tulun do Hit. Oinsanan nopo nga’ tolu nohopod om turu’ o soudor dit angabantug.

¹ Om kotogod po kawagu o TUHAN do tulun dot Israil, om suhuo’ no dau i Daud do poporikot do kosusaan dot id diyolo’. Boros ka do TUHAN dot id dau, ’’Papaharo no do pongintaban do tulun do hilo’d Israil om hilo’d Yohuda,’’ ka. ² Om boro-boros no i Daud di Yoab, i boyoon do soudor dau, ’’Ngoyon no dokoyu di pagawai ku solowoto’ o koinsanai do payat dot Israil do pointongkop diti pomogunan, om intobon ngai’ no i tulun. Orohian oku do koilo do ginumu’ diyolo’,’’ ka dau. ³ Nga’ boros ka di Yoab do suminimbar di raja’, ’’Oi Tuan Raja’, maha’ daa om poinggumuon pod TUHAN i Kinorohingan nu dot inhatus kogumu’ ko’ mantad do ginumu’ diyolo’ do dinondo ilo tulun dot Israil. Om maha’ daa om kokito ko po do wonsoyon dau o miagal diri. Nga’ nokuro tu’ orohian o Tuan Raja’ do papaharo do pongintaban do tulun?’’ ka dau. ⁴ Nga’ a’ i’ di raja’ sinimbanan i pinonuhuan dau. Om a’ noddi milo dot a’ tinanud di Yoab om i pagawai do suwai i pinonuhuan di raja’ddi. Om pamanau no i Yoab om i koinsanai di pagawai do minongoi pongintob di tulun dot Israil. ⁵ Om soborong no iyolo’ di Bawang do Yordan, om pomukiim no iyolo’ do hilo’d ponong id salatan dot Aroir, i bandar dit id tanga-tanga’ di rantai, it id watas do Gad. Om pakayaai no diyolo’ do ponong id utara, do kuminaa do hilo’d Yaisir, ⁶ om lombus no iyolo’ do hilo’d Giliad, om hilo’d Kadis, it id watas do tulun do Hit. Om korikot noddi iyolo’ do hilo’d Dan, om mantad no do hilo’d Dan om pahamadai no diyolo’ do ponong id kotonobon do kuminaa do hilo’d Sidon. ⁷ Om korikot noddi iyolo’ do hiri’d kinoiyonon di kikuta’, i hilo’d Tirus. Om pakayaai no diyolo’ dot id koinsanai do bandar do tulun do Howi om tulun do Kanaan; om id tohuri noddi kopio om kuminaa iyolo’ do hilo’d Borsiba, i ponong id salatan do Yohuda. ⁸ Om katalib poddi o siam o tulan om duwo nohopod o tadau, om poguliai nogi’ diyolo’ do hilo’d Yorusalim tu’ notongkop ngai’ no diyolo’ i pomogunan. ⁹ Om posunudo’ no diyolo’ dot id raja’ i pinongintaban diyolo’ di rayat. Kogumuon nopo do tongokusai di milo do sumuang do soudor do hilo’d Israil om, 800,000 o tulun, om 500,000 o tulun do hilo’d Yohuda. ¹⁰ Nga’ maha’ di nopongo no o kinopongintaban di rayat om kopuriman diri i Daud do nakasala’ iyau, om boros ka dau dot id TUHAN, ’’Nokowonsoi oku nod dusa! Om ompunai oku no oi TUHAN, tu’ dongkababasug i’ di winonsoi ku,’’ ka. ¹¹ - ¹² Om boro-boros no o TUHAN dot id di Nabi Gad, i popiromut di boros do TUHAN dot id di Daud, ’’Pamanau no, om poboroson no dot id di Daud dot onuan ku iyau do tolu o pinsimpilian. Om honggo nopo o pilion dau om iri no o wonsoyon ku,’’ ka. Om tadau noddi kawagu, di noposik i Daud, ¹³ om ongoi no i Gad do hiri’d di Daud om posunudo’ no dau i pinoboros do TUHAN, om boros ka dau, ’’Hinonggo’ddi o pilion do Tuan Raja’? Tolu toun do mononglous o hiti’d pomogunan nu, ko’ tolu tulan do gusa-gusaon ko do pisangod nu, ko’ tolu tadau do madsakit o hiti’d pomogunan nu? Soroho’ noti om timbangon no kopio, om sunudan oku nogindo di posunudon ku dot id TUHAN,’’ ka dau. ¹⁴ Om boros ka di Daud do suminimbar, ’’A’ oku nopodti milo do momusorou! Nga’ pologoson nopo do hukuman toko’ do TUHAN, tu’ obinsianan i’ iyau. Nga’ mada’ oku i’ do hukuman do tulun,’’ ka dau. ¹⁵ Om porikatai noddi do TUHAN i tulun dot Israil do toruol do tuminimpuun do kosuabon diri gisom do norikot i maso di natantu’ mantad. Om kapatai no o turu’ nohopod noribu o tongokusai do pointongkop di pomogunan. ¹⁶ Om soira’ di potiraagon no daa di moloikat do TUHAN o Yorusalim, om posimbano’ nod TUHAN o pomusarahan dau do momohukum di tulun, om boro-boros noddi iyau dot id moloikat di mimpatai diyolo’ do poingkaa, ’’Tingkod! Ula’ no’’ ka. Om tontok nopoddi nga’ hiri i moloikat id toning di pamagamasan do gandum di Arauna, i tulun do Yobus diri. ¹⁷ Om kokito no di Daud i moloikat di mimpatai di tulun, om boros kaddi dau dot id TUHAN, ’’Iyoho’ no i kidusa, om iyoho’ i minomonsoi do kasalaan diti. Nunu o kasalaan do nowonsoi diti rayat? Hukuman oku nopo iyoho’ om i sompiiyon ku,’’ ka dau. ¹⁸ Om tadau iddi do ruminikot i Gad dot id di Daud, om boro-boros nod, ’’Pamanau no om mongoi i’ pomonsoi do pananaraban do porsombahan dot id TUHAN do hilo’d pamagamasan do gandum di Arauna, i tulun do Yobus diri,’’ ka dau. ¹⁹ Om umboyoo’ nod i Daud i pinonuhuan do TUHAN om pamanau no do tuminanud di pinosunud di Gad dot id dau. ²⁰ I Arauna nopoddi nga’ poingimpa’, om kokito no dau i raja’ om i pagawai dau do tumakad do mongoi do hiri’d dau. Om otud no i Arauna dot id toguang di Raja’ Daud, ²¹ om ponguhot no i Arauna, ’’Nokuro tu’ ruminikot do hiti o Tuan Raja’?’’ ka. Om boros ka di Daud do suminimbar, ’’Mongoi oku pomoli diti tiyonon nu do momogomos do gandum do maan do pawansayan do pananaraban do porsombahan dot id TUHAN, om otingkod indo iti toruol do nokoontok di rayat,’’ ka dau. ²² Om boros ka di Arauna, ’’Onuo’ nopoti, oi Tuan Raja’, om patahakon nopo do maan do porsombahan o nunu nopo it osonong dot okito nu, hati ngai’ i’ iti sapi’ do maan do porsombahan di sorobon. Om hati iti poku’ om papan di pamagamasan do maan do pogudung,’’ ka. ²³ Om patahako’ ngai’ nopoddi di Arauna iri dot id raja’. Om boro-boros po kawagu i Arauna, ’’Om maha’ daa om romiton do TUHAN i Kinorohingan nu, iti porsombahan nu oi Tuan Raja’,’’ ka. ²⁴ Nga’ boros ka di raja’ do suminimbar, ’’Bayaran ku i’. Tu’ mada’ oku id papatahak do porsombahan dot id TUHAN i Kinorohingan ku, dot a’ kapambayar do gatang. Bolion ngai’ ku i’ iti dot id diya’,’’ ka dau. Om bolio’ nod Daud i kinoiyonon do pamagamasan do gandum om iri ngai’ i sapi’, do gatang nopod toinsanan om limo nohopod o tusin do pirok. ²⁵ Om powonsoyo’ no dau do hiri i pananaraban do porsombahan dot id TUHAN, om papatahak no iyau do porsombahan di sorobon om porsombahan do piombolutan. Om simbaro’ no do TUHAN i sambayang di Daud, om kotingkod noddi i toruol do nokoontok di tulun dot Israil.