2 PITRUS

2 PITRUS

¹ Oi tobpinai-tobpinai dit otumbayaan kopio do miagal dahai! Nonuan toko’ i’ di Yesus Kristus, i Kinorohingan om i Raja’ di Gampamasi toko’ do kotumbayaan dot id dau, tu’ minomonsoi i’ iyau dit otopot. Iti nopo surat diti om mantad id di Simun Pitrus, i susuhuon om i rasul di Yesus Kristus. ² Pokionuan ku no iyokoyu do Kinorohingan do barakat om kosimbayanan do ginawo dit a’ ogina-gina’ o kogoyoo’, tu’ kotutun kou i’ do Kinorohingan om i Yesus, i Tuhan toko’. ³ Iri no i kuasa’ do Kinorohingan di dong Kinorohingan o pinakai dau do minanahak dati’ do koinsanai dit apatut do haro dot id dati’ dot id suang do koposi-posion toko’, iyati’ i tulun di kikotumbayaan. Om winonsoi dau iti do tumanud di noilaan toko’ do pasal di Yesus Kristus, i minomolohou dati’ do rumamit di kagayaan om i kosonongo’ dau. ⁴ Om iyo noddi o ralan do Kinorohingan do minomuhawang dati’ di piro-piro o barakat dit angagayo kopio om it angagayo kopio o guna’ di nakabatos dau. Om iri no i piro-piro o barakat diri o popoidu’ dokoyu do mantad id koinsanai do korohian dit araat kopio di mamaraag do pomogunan diti, om kaanu kou nondo di kowoyo-woyoon di dong Kinorohingan. ⁵ Iyo nopoddi, om tumotos kou no kopio do gumirot dot otumbayaan di Kristus, om sokodungon i kotumbayaan dokoyu’ddi do kowoyo-woyoon dokoyu dit osonong. Om suwai no ko’ i kowoyo-woyoon dokoyu dit osonong, om apatut nogi’ do sumiliu kou do tulun di kitoilaan, ⁶ om suwai no ko’ i toilaan, om apatut nogi’ do milo kou do momusus do korohian do tinan dokoyu. Om suwai no ko’ i kopusus do korohian do tinan om apatut nogi’ do minsingilo kou do papalanut do ginawo do tumimbaba’ do koinsanai’d nunu nopo. Om suwai no ko’ i papalanut do ginawo do tumimbaba’ do koinsanai’d nunu nopo, om apatut nogi’ do tumanud kou di korohian do Kinorohingan dot id suang do koposi-posion dokoyu. ⁷ Om i tumanud do korohian do Kinorohingan dot id suang do koposi-posion nga’ apatut nogi’ do ruhangan do kosianan do koinsanai’d tulun dit iso-iso’ o kinotumbayaan. Om suwai no ko’ iri, om ruhangan no i kosianan dokoyu dot id tulun dit iso-iso’ o kinotumbayaan, do kosianan dot id koinsanai’d tulun. ⁸ Om iri ngai’ no o kowoyo-woyoon dit apatut do haro dot id dokoyu. Om ondung haro dot id dokoyu o kowoyo-woyoon do miagal diri do gisom dot a’ otingkod-tingkod, om osiliu kou no do tulun dit aparu’ om haro kopio o kootuson di wonsoyon dokoyu, om kotutun kopio kou nondo di Yesus Kristus, i Tuhan toko’. ⁹ Nga’ tulun nopo dit a’ miagal diri o kowoyo-woyoon, om a’ i’ atarang no o pogogontong dau; a’ i’ iyau kokito om olihuan dau do nolihungan no i dusa dau dit id gulu. ¹⁰ Iyo nopoddi, oi tobpinai-tobpinai, om tumotos kou no kopio do popogirot di lolohou om i pinomili’ do Kinorohingan dokoyu. Om ondung wonsoyon dokoyu o miagal diri, om a’ no tumanus o kotumbayaan dokoyu. ¹¹ Iyo nopoddi, om iyo noddi o kaanu-anu dokoyu do kosorupayan kopio do sumuang di pomorintaan di mompus-ompus, i pomorintaan do Tuhan om i Raja’ do Gampamasi toko’, i Yesus Kristus. ¹² Om iri no o kosoruan ku do poposorou dokoyu do pasal diri, do mulong piya do nokoilo kou noddi om notumbayaan kopio kou di ponudukan do mantad id Kinorohingan di naramit dokoyu’ddi. ¹³ Solinaid ku nopo do poimpasi, om opurimanan ku i’ do kitonggungan oku do poposorou dokoyu do pasal diri. ¹⁴ Tu’ oilaan ku no dot a’ no alaid om tumongkiad oku no do mantad id pomogunan diti, tu’ nosunudan oku no kopio di Tuhan toko’ i Yesus Kristus, do pasal diri. ¹⁵ Om tumotos oku no kopio do poposorou kasai’ dokoyu’ddi, tu’ apatai oku piya’ndo nga’ osorou kasai’ i’ dokoyu iri. ¹⁶ Tontok di minonusui iyahai dokoyu di kogoyoo’ do kagayaan do Tuhan toko’ i Yesus Kristus do tontok di kinorikatan dau, om a’ i’ miagal di totongonon no toomod do tulun i sinusui dahai. Tu’ iri nopo kagayaan do Kristus diri om nokito no kopio dahai do dahai kopio’d mato o nokokito. ¹⁷ Hino i’ iyahai’d hiri do tontok di pinusou om pinoinggayo iyau di Kinorohingan Tapa’. Tontok nopoddi om norongou o boros do mantad id dau it Agayo Kopio o Kagayaan, do minoro-boros do poingkaa, ’’Iti no i Tanak ku di kosianan ku. Om iyau no o kohubayaan do ginawo ku!’’ ka. ¹⁸ Iyahai no kopio o nokorongou di boros diri do mantad hilo’d surga do tontok di minoyo’ iyahai dau do hiri’d timpak di nuluhon dit olidang diri. ¹⁹ Om iri noddi o kotumbayaan kopio dahai di boros do Kinorohingan di pinosusui di piro-piro o nabi. Om osonong no kopio do pusohon kopio dokoyu i boros diri, tu’ iri nopo boros diri om miagal di lampung di tumitiu dot id kinoiyonon dit otuong do gisom dot orikot o kosuabon, om iyo di rombituon di roitan do soguanggo’ do mogulinau dot id suang do ginawo dokoyu. ²⁰ Sorohon no kopio dokoyu iti: Iri nopo boros do Kinorohingan di pinolombus di piro-piro o nabi om a’ i’ milo dot ilaan o komoyon do tumanud do toilaan do tulun. ²¹ Tu’ a’ i’ insan polombuso’ o boros do Kinorohingan do tumanud toomod do korohian do tulun. Nga’ iri i Rusod do Kinorohingan o momorinta’ do tulun do popolombus di boros do mantad id Kinorohingan.

¹ Tontok nopo di gulu po om haro i’ o piro-piro tulun di suminiliu’d nabi di goudut dot id pogialatan di tulun di songonuon do Kinorohingan. Om iyo nogindoddi ot id pogialatan dokoyu tu’ haro nondo o tulun do sumiliu do gomponuduk di goudut. Om popotuduk nondo iyolo’ do piro-piro o ponudukan dit a’ otopot, i karaag do tulun. Om olimon nondo diyolo’ i Pomorinta’ di pinopoidu’ diyolo’. Om iyo noddi do poporikot iyolo’ do kapatayon dot id tinan diyolo’, om a’ no alaid om rumikot no iri dot id diyolo’. ² Mulong piya dot iyo’ddi, nga’ ogumu’ indo o tulun do tumanud do kowoyo-woyoon di piro-piro o gomponuduk do goudut diri, i noporinta’ do korohian do tinan diyolo’. Om iri no i wonsoyon diyolo’ o kobungou dot ogumu’ o tulun do mongindaraat di Ralan dot Otopot do rumikot dot id Kinorohingan. ³ Om iri no i katamahao’ diyolo’ o kopopinsusuyan di gomponuduk di goudut do piro-piro o susuyon di pininsarahan i’ tomod diyolo’, do mokimaanu-anu do kountungan do mantad id dokoyu. Nga’ alaid no kosodia’ i gompomutus do paparatu’ do hukuman dot id diyolo’, om poingandad no diyolo’ i kapatayon di natantu’ mantad no do porikoton dot id diyolo’. ⁴ Iri piya i moloikat di momonsoi’d dusa nga’ a’ i’ do Kinorohingan pologoson do koidu’ do mantad id hukuman, suwai ko’ pataamon nopo dau iyolo’ dot id suang do naraka. Om posuangon iyolo’ dot id luang dit otuong, om hiri kasai’ nondo iyolo’ do gisom dot orikot i Tadau’d Kopomutusan. ⁵ Om iyo noddi o nosiliu dot id pomogunan di gulu po; a’ i’ do Kinorohingan pinologos do nokoidu’ iri do mantad id hukuman. Om pinorikatan do Kinorohingan do sakob dot agayo i pomogunan di tulun dit angaraat do maso’ddi. Om i Nuu no om i turu’ o tulun do suwai o napasi, tu’ pinopopinsusui i’ i Nuu di kowoyo-woyoon di kohubayaan do Kinorohingan. ⁶ Om iyo nogiddi o nosiliu dot id bandar do Sodom om Gomura: Raago’ nopo kopio do Kinorohingan i kabandaran diri do tapui o pinamaraag, om osiliu i’ iri do poiyaan dit osiliu dot id tulun dit angaraat do koimbagu. ⁷ Nga’ i Lut nopo om napasi i’ do Kinorohingan om noinggorit tomod iyau di kowoyo-woyoon do tulun dot araat dit araat no kopio. ⁸ Om hiri nod pogialatan do tulun do miagal diri i Lut, i tulun dot osonong diri do poingiyon nga’ oinggorit tomod i’ o ginawo dau, tu’ monikid tadau nopo iyau do kokito om korongou di wowonsoyon diyolo’ dit araat. ⁹ Om milo i’ o Tuhan do popoidu’ di tulun di tumanud do korohian dau do tontok dot oontok iyolo’ do pogumbalan. Om milo o Tuhan do popoolu’ di tulun dit angaraat do maan inggorito’ do tontok di Tadau’d Kopomutusan. ¹⁰ Om okon-okon po om i tulun di tumanud do korohian do tinan diyolo’ di kososomu’ om mongindaraat do kuasa’ do Kinorohingan. Om angkatama’ no kopio om angasawat o ginawo di piro-piro gomponuduk do goudut diri, gisom dot a’ no iyolo’ ooris-oris piya do mongindaraat dit ongkikagayaan di songingiyon do hilo’ piya’d surga! ¹¹ Om iri piya i moloikat dit okoris om kikuasa’ ko’ mantad di piro-piro o gomponuduk di goudut diri nga’ a’ i’ monondos do papasala’ dit ongkikagayaan diri do boros di koindaraat o poboroson do ponondos dot id toguang do Tuhan. ¹² Nga’ iri nopo i piro-piro o gomponuduk diri om a’ no kopio ogina-gina’ o karaato’. Iyo po iyolo’ di nintorusan di maan no gomito’ om maan patayo’ o kinopogkosusuan. A’ i’ iyolo’ momusorou, tu’ wonsoyon nopo diyolo’ o nunu nopo do tumanud di kopurimanan diyolo’, gisom do songkiwalon nopo diyolo’ it a’ diyolo’ osuhutan, dot i boros do koindaraat tomod o ponongkiwal. Iyo nopoddi, om apatai nondo iyolo’ do miagal di nintorusan dit orongit. ¹³ Om oinggorit nondo iyolo’ tu’ iri no o tisomuli’ di minonginggorit iyolo’ do tulun do suwai. Kasanangan nopo diyolo’ nga’ mingwonsoi do nunu nopo di dangadau do ponguru di korohian do tinan diyolo’. Ondung kotoning iyolo’ dokoyu do mirikau dot id poginakanan, om kososomu’ tomod o kowoyo-woyoon diyolo’ tu’ aawuk po iyolo’ do korohian do tinan diyolo’. ¹⁴ A’ nopo iyolo’ apaasan do momonsoi’d dusa, om korohian nopo diyolo’ nga’ montong no do tondu’d sundal. Om bayayaton diyolo’ i tulun di wagu po kotumbayaai, om it a’ po ogirot o kotumbayaan. Om noubas po tomod do tumamaha’ o ginawo diyolo’. Iyolo’ no i tulun di nousung! ¹⁵ Om apalid no iyolo’ tu’ a’ i’ iyolo’ orohian do sumusui di ralan dot otulid. Suminusui nogi’ iyolo’ di ralan di winayaan di Biliam i tanak di Bior di gulu po. Tu’ i Biliam nopoddi nga’ orohian tomod do kaanu’d tusin do mantad id wowonsoyon dau dit araat. ¹⁶ Nga’ awagat tomod iddi o boros do pinopoinsan dau dot i kararaat dau o kinopoinsanan, do tontok di minoro-boros i kaladai dau do miagal do tulun do moro-boros. Om sansagai noddi i nabi diri do tumingkod do momonsoi di wowonsoyon dau di dongkouulau’ddi. ¹⁷ Iri nopo piro-piro o gomponuduk do goudut diri om iyo po di tudan do waig di narasak om iyo di pituongon dot otilib di tongus dot opuhod. Nokosodia’ nod Kinorohingan o tiso’ o kinoiyonon dit otuong tomod do poiyanan diyolo’. ¹⁸ Mimboros iyolo’ do minggayo-gayo om mimboros do boros dit aiso’ o suang; om iri korohian do don tinan di kososomu’ kopio o pomurunsut diyolo’ di tulun di wagu po kotongkiad do mantad id pogialatan do tulun di nangapalid. ¹⁹ Papabatos i piro-piro o gomponuduk do goudut diri do kosimbayanan dot id tulun diri, om inda’ ka dot iyolo’ piya nga’ turipon i’ di kongoubasanan di karaag do tulun. Tu’ ondung aala’ o tulun do nunu nopo, om osiliu no iyau do turipon di nakaala’ dau’ddi. ²⁰ Iri nopo tulun di kotutun do Tuhan om nokotutun di Gampamasi dati’, i Yesus Kristus, om nokoidu’ no do mantad id koinsanai’d kuasa’ do pomogunan di kososomu’d tulun. Nga’ ondung akagasan kawagu iyau do gisom dot aala’ iyau di kuasa’ddi, om araat pondo ko’ i gulu o kowoyo-woyoon di tulun diri. ²¹ Osonong nogi’ dot a’ daa insan koilo di ralan dot otopot do mantad id Kinorohingan o tulun do miagal diri, ko’ mantad do nokoilo no, nga’ alaid nondo om a’ i’ tumanud ngai’ di ponuhuan di pinatahak do Kinorohingan dot id diyolo’. ²² Iri no i wonsoyon diyolo’ o popointalang dot otopot iti boros do poingkaa, ’’Gulion i’ di tasu do mongoi pangakan i tilob dau,’’ ka, om ’’I wogok di nopodsu’ no nga’ gumuli’ i’ kawagu do mongoi pillobu do burutak,’’ ka.

¹ Oi tobpinai-tobpinai di kosianan ku! Iti no surat ku di koduwo dot id dokoyu. Om id suang nopo diti duwo o surat ku’dti, om tuminotos oku no kopio do popoimbulai do pomusarahan dokoyu dit olidang. ² Om monuhu’ oku daa kopio dokoyu do momusorou di boros do pinoboros di piro-piro nabi do boros do Kinorohingan di gulu po, om i ponuhuan do Tuhan, i Raja’ do Gampamasi, i pinolombus dot id dokoyu di piro-piro rasul. ³ Id gulu nopo kopio, om mositi’ no do koilo kou do tontok nopondo do ponong id kopupuson do pomogunan, om mimbulai nondo o tulun di noporinta’ po do korohian diyolo’ di don tinan o koposi-posion. Om hingi-hingion kou nondo diyolo’, ⁴ tu’ mimboros nondo iyolo’ do poingkaa, ’’Minamatos kaka o Tuhan do rumikot! Om hinonggo noddi iyau’d baino’? Nangapatai no i taki-aki toko’ nga’ aiso’ i’ o nokosimban do nunu-nunu do mantad poddi wonsoyo’ i’ iti pomogunan!’’ ka no diyolo’. ⁵ Tumomod i’ iyolo’ dot a’ monongkuyaan do winonsoi’d Kinorohingan o tawan om pomogunan om winonsoi dot i boros dau o pinomonsoi di gulu po. Iti nopo pomogunan om winonsoi dau do mantad id waig, om waig o pinomonsoi; ⁶ om waig i’ — iri no i waig do sakob dit agayo — o pinamaraag do pomogunan di gulu po. ⁷ Nga’ iti nopo tawan om pomogunan di hino do dinondo om gompion i’ di boros do Kinorohingan diri do maan raago’ do tapui do koimbagu. Nga’ maso pod tawan om pomogunan do gompion do dinondo poo, do gisom dot orikot i tadau do kopomohukuman om kapamatayan di tulun dot angaraat. ⁸ Nga’ kada’ no kopio dokoyu lihuwai iti tiso’ o hal, oi tobpinai-tobpinai ku: dot id pagantangan nopod Tuhan, om aiso’ i’ o pisuayan do sangadau om soribu o toun — miagal nopo iri dot id dau. ⁹ A’ i’ o Tuhan alaid do papatahak di nakabatos dau, do mulong piya do haro daa o kosorou dot alaid o Tuhan do papatahak. Nga’ alanut nogi’ moti’ o ginawo dau’ddi dot id dokoyu tu’ mada’ i’ iyau do haro o tongoiso’ pod tulun dot apatai. Orohian i’ iyau do korologo ngai’ o tulun do mantad id koinsanai’d dusa diyolo’. ¹⁰ Nga’ rumikot indo i Tadau do Korikatan do Tuhan do miagal do korikatan do tulun di manakau. Tontok nopondo do Tadau’ddi, om tumanus nondo o tawan do mikuwo’d opuhod o ngorod, om ongosorob ngai’ nondo i hilo’d tawan, om tumanus nondo o pomogunan om koinsanai dit id suang do pomogunan. ¹¹ Iyo nopoddi o kowoyo-woyoo’ do mamaraag ngai’ddi, om poingkuro nondo o kowoyo-woyoon dokoyu dit apatut? Mositi’ no dot olidang o kowoyo-woyoon dokoyu om pointahak kopio dot id Kinorohingan, ¹² do solinaid do magandad kou om lumangad kou do korikatan di Tadau do Kinorohingan. Tontok nopondo do tadau’ddi, om aayi’ nopondo o tawan dot osorob, om iri i hilo’d tawan nga’ angalanak ngai’ nopo tu’ alasu’ no kopio. ¹³ Nga’ iyati’ nopo om magandad i’ di pinabatos do Kinorohingan, iri no i tawan di wagu om i pomogunan do wagu, i kinoiyonon dit otulid o wonsoyon. ¹⁴ Iyo nopoddi, oi tobpinai-tobpinai di kosianan ku, om daamot nopo dokoyu do magandad do tadau’ddi, om tumotos kou no kopio do popolidang do kowoyo-woyoon dokoyu om aiso’ i’ o kabara-barasan dot id toguang do Kinorohingan. Om gompion no dokoyu i piuludan dot osonong dot id Kinorohingan. ¹⁵ Om sorohon no dokoyu dot iri nopo i kolonuto’ do ginawo’d Tuhan toko’, om maso i’ dit osonong do pinatahak do Tuhan dot id dokoyu, om apasi kou i’. Om i Paulus i tobpinai toko’ di kosianan toko’, nga’ nokoponulis i’ do miagal diri dot id dokoyu. Om tinulis dau iri do mikuwo’d toilaan do pinatahak do Kinorohingan dot id dau. ¹⁶ Monulis kasai’ nopo i Paulus do pasal diri dot id suang do pointikid-tikid di surat dau. Om otopot i’ do haro o piro-piro hal dit apagon do mongilo do komoyon dot id suang di surat dau’ddi. Om iri no i bohogian diri o somputulon do tulun dit aiso’ o toila-ilaan om it a’ ogirot o kotumbayaan. Om a’ i’ kosuayan o hal diri, tu’ iri piya i bohogian do suwai dot id suang do Buuk do Kinorohingan nga’ somputulon i’ diyolo’. Om iri nopo wonsoyon diyolo’ddi, om mamaraag no diyolo’. ¹⁷ Nga’ iyokoyu nopo, oi tobpinai-tobpinai di kosianan ku, om nokoilo no do pasal diri. Iyo nopoddi, om antaan-taan no dokoyu, om a’ kou i’ atanggayan do hiri’d kinopolidon di tulun dot angaraat, gisom dot aratu’ kou nondo do mantad id kinoiyonon dokoyu dit aiso’ o koligagaanan. ¹⁸ Mositi’ no do muhang-ruhang o topurimanan dokoyu di kosonongo’ do kosianan di Tuhan Yesus Kristus, i Raja’ do Gampamasi toko’, om muhang-ruhang o toilaan dokoyu do pasal dau. Royohon no iyau do dinondo om gisom do poingompus! Amin.