2 RAJA’

2 RAJA’

¹ Om kapatai no i Ahab i raja’ dot Israil, om saap no do pomorintaan dot Israil o pomogunan do Muab. ² Insan tadau om karatu’ no i Ahasia, i raja’ dot Israil do mantad hiri’d liligaon di hiri’d tingkat dit id sawat kopio di walai do raja’ do hilo’d Samaria, gisom do nadalaan iyau’d nosuhat. Om ponuhu’ no iyau’d tulun do minongoi ponguhot di Baal-Sibub, i tingolig do tulun dot Ikron di hilo’d Pilistin ondung olingasan po iyau ko’ amu’. ³ Nga’ suhuo’ nogi’ di moloikat do TUHAN i Ilia, i Nabi diri, i mantad hilo’d Tisbi, do mongoi solowot di susuhuon di Raja’ Ahasia do mongoi popoboros do poingkaa, ’’Aiso’ no kopio o Kinorohingan dot Israil tu’ gisom do mongoi kou ponguhot di Baal-Sibub, i tingolig do tulun dot Ikron? ⁴ Posunudon no di raja’ do poingkaa o boros do TUHAN, ’A’ ko no olingasan, apatai ko no,’ kanto,’’ ka di moloikat. Om tonudo’ no di Ilia i pinonuhuan do TUHAN. ⁵ Om poguliai ngai’ noddi di susuhuon diri dot id di Raja’ Ahasia. Om uhoto’ no iyolo’ di raja’, ’’Nokuro tu’ pinogulian dokoyu?’’ ka. ⁶ Om boros ka diyolo’ do suminimbar, ’’Haro o songulun o kusai do minongoi solowot dahai om suhuo’ no iyahai dau do gumuli’ do mongoi popoilo do Tuan Raja’ do poingkaa o boros do TUHAN dot id diya’, ’Aiso’ no tuu o Kinorohingan dot Israil, tu’ gisom do mongoi kou ponguhot do Baal-Sibub, i tingolig do tulun dot Ikron? A’ ko no olingasan, apatai ko no!’ ka,’’ ka diyolo’. ⁷ ’’Okuro-kuro i tulun diri?’’ ka di raja’ do minonguhot. ⁸ Om boros ka diyolo’ do suminimbar, ’’Kirasuk iyau dot anaru om kitagkos do kulit do nintorusan,’’ ka. ’’O, i Ilia ino!’’ ka di raja’ do pinopoboros dot opuhod. ⁹ Om ponuhu’ noddi i raja’ do songulun o soudor do miniwoyo’ do limo nohopod o tulun do mongoi panangkap di Ilia. Om pamanau noddi i soudor diri, om kabantalai no dau i Ilia do poirikau do hiri’d timpak di nulu-nulu. Om boro-boros no i soudor, ’’Oi susuhuon do Kinorohingan, suhuon ko di raja’ do rumuhuk,’’ ka. ¹⁰ Om boros ka di Ilia, ’’Ondung susuhuon kopio oku do Kinorohingan om lumintuhun po daa o tapui do mantad hilo’d tawan do monorob diya’ om ilo tulun nu!’’ ka dau. Om diiri i’ om diiri om sondot noddi o tapui do minonorob di soudor om i limo nohopod o tulun dau. ¹¹ Om ponuhu’ po i raja’ do songulun kawagu o soudor do miwoyo’ do limo kawagu nohopod o tulun. Om pamanau no iyolo’ do tuminakad do minongoi boro-boros di Ilia, ’’Oi susuhuon do Kinorohingan, suhuon ko di raja’ do rumuhuk do dinondo!’’ ka diyolo’. ¹² Om boros ka kawagu di Ilia, ’’Ondung susuhuon kopio oku do Kinorohingan om lumintuhun po daa o tapui do mantad hilo’d sawat do monorob diya’ om ilo limo nohopod o tulun nu!’’ ka dau. Om diiri i’ om diiri, om sondot no o tapui do Kinorohingan do minonorob di soudor om i limo nohopod o tulun dau. ¹³ Om insan po kawagu do minonuhu’ i raja’ do songulun o soudor do miniwoyo’ do limo nohopod o tulun. Om takad no i soudor do hiri’d timpak di nulu-nulu om korikot no iyolo’ do hiri’d di Ilia, om otud no iyolo’ dot id toguang di Ilia om boro-boros nod, ’’Ompunai no iyahai, oi susuhuon do Kinorohingan! Om kosianai no doho’ om iti tulun ku; kada’ iyahai patayo’! ¹⁴ Duwo no o soudor do mogitonggoi-tonggoi di tulun diyolo’ do napatai do nosorob di tapui do mantad hilo’d tawan; nga’ pokionuon ku no daa dot osianan ko doho’,’’ ka dau. ¹⁵ Om maso iddi do minoro-boros o moloikat do TUHAN dot id di Ilia do poingkaa, ’’Kada’ kooris! Tanud nopo dau do rumuhuk diti nulu-nulu!’’ ka. Om pamanau noddi i Ilia do tuminanud di soudor do minongoi do hiri’d raja’. ¹⁶ Om boros ka di Ilia dot id raja’, ’’Minoro-boros o TUHAN do poingkaa, ’Minongoi ko ponguhot di Baal-Sibub, i tingolig do tulun dot Ikron — do miagal pod aiso’ o Kinorohingan dot Israil dot uhoton. Om a’ ko no olingasan, apatai ko no!’ ka,’’ ka dau. ¹⁷ Om kapatai noddi i Ahasia do miagal di nokoboros do TUHAN di pinolombus di Ilia. I Ahasia nopoddi om aiso’ i’ o tanak dau’d kusai, om i Yoram diri, i tadi’ dau o suminowoli dau do suminiliu’d raja’. Iri nopo om nosiliu do tontok di koduwo’d toun do pomorintaan di Raja’ Yihoram, i tanak di Yosapat, i raja’ do Yohuda. ¹⁸ Om koinsanai di nongowonsoi di Raja’ Ahasia do suwai nga’ nongkotulis ngai’ i’ do hiri’d Buuk do Monusui do Pasal Ngai’ di Raja’ dot Israil.

¹ Om korikot noddi o maso do TUHAN do popoinsawat di Ilia do hilo’d surga do powoyoon di ribut di monomporiu-riu. Om maso nopoddi nga’ manau-panau i Ilia om i Ilisa do mantad hilo’d Gilgal, ² om maha’ di hiri no iyolo’d tanga’d ralan om boro-boros no i Ilia di Ilisa, ’’Undorong pod hiti, tu’ suhuon oku’d TUHAN do mongoi’d hilo’d Baitol,’’ ka. Nga’ boros ka di Ilisa do suminimbar, ’’Sumumpa’ oku no dot id suang do ngaran do TUHAN di poimpasi om id diya’ dot a’ oku tumongkiad diya’,’’ ka dau. Om piwoyo’ noddi iyolo’ do minamanau do kuminaa do hilo’d Baitol. ³ Om ongoi no solowot di Ilisa ot iso’ o sinompuruan do nabi di poundorong do hilo’ om ponguhot no iyolo’ dau, ’’Nokoilo ko no do tadau nopod baino’ om ongoyon do TUHAN i tuan nu om tumongkiad nondo diya’?’’ ka. ’’Oo, nokoilo oku no,’’ ka di Ilisa do suminimbar. ’’Ula’ pori, a’ no minog do pimbarasan toko’ iri,’’ ka dau. ⁴ Om boro-boros po kawagu i Ilia di Ilisa, ’’Undorong pod hiti, tu’ suhuon oku’d TUHAN do mongoi’d hilo’d Yorikou,’’ ka dau. Nga’ boros ka di Ilisa, ’’Sumumpa’ oku no dot id suang do ngaran do TUHAN di poimpasi om id diya’ dot a’ oku tumongkiad diya’,’’ ka. Om piwoyo’ noddi iyolo’ do minongoi do hilo’d Yorikou. ⁵ Om ngoyo’ po kawagu solowoto’ i Ilisa dot iso’ o sinompuruan do nabi di poundorong do hilo’d Yorikou do mikuwo’d minonguhot dau, ’’Nokoilo ko no do tadau nopod baino’ om ongoyon do TUHAN i tuan nu om tumongkiad nondo diya’?’’ ka. ’’Oo, nokoilo oku i’,’’ ka di Ilisa do suminimbar. ’’Nga’ ula’ pori, kada’ toko’ no pimbarasai iri,’’ ka dau. ⁶ Om boro-boros po kawagu i Ilia di Ilisa, ’’Undorong pod hiti, tu’ suhuon oku’d TUHAN do mongoi’d hilo’d Bawang do Yordan,’’ ka dau. Nga’ boros ka di Ilisa, ’’Sumumpa’ oku no dot id suang do ngaran do TUHAN di poimpasi om id diya’ dot a’ oku i’ tumongkiad diya’,’’ ka dau. Om pamanau noddi iyolo’ ⁷ do minongoi do hilo’d Bawang do Yordan, om limo nohopod o nabi do minoyo’ diyolo’. Om undorong noddi i Ilia om i Ilisa do hiri’d tisan di bawang diri, om songingkakat diri i limo nohopod o nabi do hiri’d sodu-odu’ diyolo’. ⁸ Om iduwo’ no di Ilia i rasuk dau dit id soibau om lopio’ no dau om pobobogo’ nogiddi dau do hiri’d waig di bawang. Om kopigirang nopo i waig di bawang, om pamanau noddi i Ilia om i Ilisa do hiri’d nanad di nopigirangan di waig. ⁹ Om korikot noddi iyolo’ do hiri’d soborong om uhoto’ no di Ilia i Ilisa, ’’Nunu o korohian nu do wonsoyon ku dot id diya’ dot a’ oku po oongoi’d TUHAN do tumongkiad diya’?’’ ka dau. Om boros ka di Ilisa, ’’Potungkusai doho’ ino sinundu nu om milo oku indo do sumowoli diya’,’’ ka dau. ¹⁰ ’’Atuuk koi, apagon no moti’ kopio ino,’’ ka di Ilia do suminimbar. ’’Nga’ ondung kokito ko doho’ do tontok dit ongoyon oku’d TUHAN, om aanu nu no i pokionuon nu. Nga’ a’ ko nopo kokito doho’, om a’ nu no aanu i pokionuon nu,’’ ka dau. ¹¹ Om miboro-boros diri iyolo’ di manau-panau iyolo’. Om sigog id korikot o korita’ di haro o tapui do ginayat do kuda’ di kitapui do minongoi popitongkiad diyolo’, om poinsawato’ noddi i Ilia do hilo’d surga do nokowoyo’ di ribut di monomporiu-riu. ¹² Om poingontong i’ i Ilisa di Ilia do mininsawat om polohowo’ noddi di Ilisa o poingkaa, ’’Ilia, i tapa’ ku! I tapa’ ku! I gunsiou dot Israil dit okoris kopio! A’ ko noddi hino!’’ ka. Om a’ noddi di Ilisa nokito i Ilia. Om tumongob tomod diri i Ilisa om kiniso’ no dau i rasuk dau dit id soibau om kopiduwo nopo. ¹³ Om ngoyo’ noddi di Ilisa i rasuk di Ilia dit id soibau di naratu’ om poguliai no dau om ongoi no iyau ingkakat do hiri’d tisan di Bawang do Yordan. ¹⁴ Om pobobogo’ no di Ilisa i rasuk di Ilia’ddi do hiri’d waig di bawang om boro-boros nod, ’’Hinonggo no i TUHAN, i Kinorohingan di Ilia?’’ ka. Om kobobog poddi dau i waig diri, om kopigirang nopo i waig, om pamanau noddi iyau do minongoi’d hiri’d soborong. ¹⁵ Om kokito no di limo nohopod o nabi di mantad hilo’d Yorikou i Ilisa, om boros ka diyolo’, ’’Iri nopo sinundu di Ilia nga’ nakawaliu no do hiri’d di Ilisa!’’ ka. Om ongoi noddi iyolo’ solowot di Ilisa om otud no iyolo’ dot id toguang dau. ¹⁶ Om boros ka diyolo’, ’’Iyahai nopodti om limo nohopod o tulun dit ongokoris ngai’. Kaino ngoyo’ toko’ ihumo’ i Ilia, i tuan nu. A’ i’ oila-ilaan do tinanggayan nopo iyau do Rusod do TUHAN do hilo’d nuluhon ko’ hilo’d rantai, om poiliho’ no doti’ddi do hilo’,’’ ka. ’’A’ i’ minog!’’ kad i Ilisa do suminimbar. ¹⁷ Nga’ sumonsog i’ iyolo’ om kookunai iddi di Ilisa. Om ngoyo’ noddi di limo nohopod o nabi ihumo’ i Ilia do tolu o tadau do koloido’, nga’ a’ i’ diyolo’ nokito i Ilia. ¹⁸ Om poguliai noddi diyolo’ dot id di Ilisa. Om poingandad iyau do hilo’d Yorikou. Om boros ka di Ilisa dot id diyolo’, ’’A’ ku toi nokoboros no dokoyu dot a’ minog do ngoyon ihumo’!’’ ka dau. ¹⁹ Om haro’ddi o piro-piro o tulun do mantad hilo’d Yorikou do minongoi solowot di Ilisa, om boros ka diyolo’, ’’Okito nu i’, oi aman, dot osonong i’ daa iti bandar nga’ ilo’ nopo waig do hiti om a’ osonong, gowoi poddi om ogumu’ o tongoondu’ do monontian dot ongoiduan,’’ ka. ²⁰ Om boros ka di Ilisa, ’’Ongoi kou do mangkuk di wagu po om suangan nod silaon,’’ ka. Om pootodo’ noddi diyolo’ dot id di Ilisa i pinokianu dau’ddi. ²¹ Om ongoi noddi i Ilisa do hiri’d tudan di waig om potuntugo’ no dau i silaon diri do hiri’d waig, om boros ka dau, ’’Poingkaa no o boros do TUHAN, ’Lidangan ku’ti waig diti om a’ nondo kapatai om a’ koidu’ di ragang di ponontianon,’ ka,’’ ka dau. ²² Om mantad poddi om osonong noddi i waig do miagal di nokoboros di Ilisa. ²³ Mantad no do hilo’d Yorikou om pakayaai no di Ilisa do hilo’d Baitol. Om maha’ di hiri no iyau id tanga’d ralan om haro o piro-piro o tangaanak do mogiwoyo-woyo’ do suminoliwan do mantad hiri’d bandar do momohingi-hingi dau. ’’Lagas, lagas, poggidu’ no do mantad hiti!’’ ka diyolo’ do minggiak. ²⁴ Om koili no i Ilisa do minontong diyolo’ om papalai no dau iyolo’ dot id suang do ngaran do TUHAN. Om diiri i’ om diiri om rikot no o duwo tinan do bohuang do tondu’ do mantad hiri’d gouton do minongoi panabpo dot apat nohopod om duwo o tangaanak dot id pialatan di tangaanak diri, gisom do nopogitobilang-bilang poo tinan diyolo’. ²⁵ Om lombus noddi i Ilisa do kuminaa do hilo’d Nuluhon do Karmol, om poguliai noddi dau do hilo’d Samaria.

¹ Tontok di kohopod om walu’ do toun di Raja’ Yosapat do momorinta’ do Yohuda, om kosiliu no i Yoram, i tanak di Ahab do raja’ dot Israil. Om hopod om duwo toun do koloido’ dau do momorinta’ do Samaria. ² Om iyau nga’ nokowonsoi id dusa dot id toguang do TUHAN, nga’ a’ no koiyo di kararaat di Ahab om i Isibil, i molohing dau. Om piningraag ngai’ dau i tingolig di winonsoi di tapa’ dau di tukuon do sumambayang dot id Baal. ³ Nga’ miagal i’ iyau di Yorobiam, i tanak di Nobat, i nokopomorinta’ dit id gulu ko’ iyau, tu’ minamayayat do tulun dot Israil do momonsoi’d dusa. Om a’ no iyau ruminologo. ⁴ I Misa nopo, i raja’ do Muab, om haro o baanan do dumba’. Om pointikid-tikid do toun om manahak iyau do 100,000 o tanak do dumba’ do maan dau do sukai do patahakon di raja’ dot Israil, om papatahak do hulu do 100,000 di dumba’ do tontoluhan. ⁵ Nga’ di nopoddi napatai i Raja’ Ahab, om saap noddi i Misa do pomorintaan dot Israil. ⁶ Om tongkiadai nopoddi di Yoram o Samaria, om ongoi no ponimung di soudor dot ongkirapo-rapo. ⁷ Om poporikot no iyau do boros dot id di Yosapat, i raja’ do Yohuda do poingkaa, ’’Sumaap i raja’ do Muab doho’; tu’ midu’ daa iyau do mantad id pomorintaan ku, om orohian ko i’ daa do sumokodung doho’ do mongoi sangod dau?’’ ka. ’’Orohian oku i’,’’ ka di Raja’ Yosapat do suminimbar. ’’Om tumanud oku i’, om i tulun ku, om i soudor ku di kikuda’ nga’ tumanud i’. ⁸ Hinonggo nondo o wayaan toko’ do mongoi sangod?’’ ka dau. ’’Sumusui toko’ di ralan di kawaya’ do hilo’d tana’ do kowotuan dot Idom,’’ ka di Yoram do suminimbar. ⁹ Om pamanau noddi i Raja’ Yoram do mogiwoyo-woyo’ di raja’ do Yohuda om i raja’ dot Idom. Om maha’ di koturu’ noddi do tadau diyolo’ do manau-panau, om kooyiai no iyolo’ do waig, om oinsanan nopo i tulun di minongigit di konunu-nunuan om i tayam-tayam diyolo’ di ginandaran di konunu-nunuan diyolo’ dot a’ ngai’ nongkoinum. ¹⁰ Om boros kaddi di Raja’ Yoram, ’’Obungou toko’ nodti. Tu’ iyati’ nopod tolu diti om nakatahak nod TUHAN dot id raja’ do Muab!’’ ka dau. ¹¹ Om ponguhot noddi i Raja’ Yosapat, ’’Haro i’ tuu o nabi do hiti’dti di milo do momialatan dati’ do monguhot do TUHAN?’’ ka dau. Om boros ka dit iso’ di pagawai do soudor di Raja’ Yoram, ’’Hiti i’ i Ilisa, i tanak di Sapat. Iyau no i mongunguhup di Ilia di gulu po,’’ ka dau. ¹² Om boros ka di Raja’ Yosapat, ’’Moro-boros i’ moti’ kopio o TUHAN dot id dau,’’ ka. Om ongoi noddi i tolu o raja’ddi solowot di Ilisa. ¹³ Om boros ka di Ilisa dot id raja’ dot Israil, ’’A’ oku i’ monulung diya’! Ongoi nopo do hilo’d nabi di tuuhoton di molohing nu,’’ ka dau. Nga’ boros ka di Yoram do suminimbar, ’’A, a’ oku i’! Tu’ nakatahak no iyahai do TUHAN dot id raja’ do Muab,’’ ka dau. ¹⁴ Om boros ka di Ilisa, ’’Id suang nod ngaran do TUHAN di poimpasi, i pogobi-obian ku, dot otopot do poboroson ku dot okon nopo daa ko’ momusou oku di Raja’ Yosapat, om a’ oku no monongkoilo diya’. ¹⁵ Ngoyo’ oku paatadai do songulun di mongongombit do kecapi,’’ ka dau. Om daamot po di tulun diri do mongombit di kecapi, om porintao’ no i Ilisa do Rusod do TUHAN. ¹⁶ Om pimboros no iyau, ’’Poingkaa o boros do TUHAN, ’Momonsoi no do liang do hiti’d kinarasakan do bawang. ¹⁷ Tu’ mulong piya dot a’ rumasam ko’ aiso’ o ribut nga’ lumabai nopondo o waig do hiti’d kinarasakan do bawang. Om haro indo o waig do kabagal do tinumon dokoyu om ilo tayam-tayam di ginandaran di konunu-nunuan dokoyu,’ ka,’’ ka dau. ¹⁸ Om boro-boros po kawagu i Ilisa, ’’Nga’ iti nopo om okooro’ dot id TUHAN. Om onuan kou po dau do kamanangan do sumangod do tulun do Muab. ¹⁹ Om araag ngai’ dokoyu i bandar diyolo’ dit ongkitolig om it ongosonong om atagad ngai’ dokoyu i kouwaan diyolo’, om osompon ngai’ dokoyu i tudan do waig. Om asasadan ngai’ dokoyu do watu i koumaan diyolo’ dit ongoruak gisom dot angaraag nondo iri,’’ ka dau. ²⁰ Kosuabon noddi kawagu, do tontok di papatahak do porsombahan di dongkosuabon, om luyung no o waig do mantad hilo’d Idom do minomonu’ di kinarasakan do bawang diri. ²¹ Om soira’ di norongou di tulun do Muab do nokorikot i tolu o raja’ diri do mongoi panangod diyolo’, om koinsanai nopoddi i tulun — dot i molohing no om it ongomulok po — di milo po do mongigit di rapo-rapo do sinuhu’ ngai’ dau do minongoi do hiri’d piwolitan do pomogunan. ²² Om tontok di kosuabon kawagu, di nokotungag iyolo’ om kotitihai nod tadau i waig gisom do miagal poddi do raha’ o kokitanan di waig. ²³ Om pomogiak no iyolo’, ’’Hodi raha’! Iri no soudor do tolu o sinompuruan do pisangod diri o minogiumang, gisom do minogipapatai’ddi iyolo’. Kainou mongoi panakau do hilo’d kokiiman diyolo’!’’ ka. ²⁴ Nga’ soira’ di nokorikot i tulun do Muab do hiri’d pinomukiiman diri, om songodo’ no iyolo’ di tulun dot Israil. Om gusao’ nopo iyolo’ di tulun dot Israil do gisom do nangapatai iyolo’. ²⁵ Om raago’ ngai’ no diyolo’ i bandar do tulun do Muab. Om koinsanai di tumo dit ongoruak nga’ pininsasadan ngai’ diyolo’ do watu, gisom do nongoolitan do watu i tumo. Om sinonsong ngai’ nogi’ di tulun dot Israil i tudan do waig om pinintagadan ngai’ diyolo’ i kouwaan di tulun do Muab. Om iri po i bandar do Kir-Harisit, i bandar dot agayo do Muab o noolu’. Nga’ alaid noddi om noturungku’ i’ i bandar diri om pinindumpahan diyolo’ do watu. ²⁶ Om soira’ di nopurimanan di raja’ do Muab dot aala’ iyolo’ om pangangat noddi i raja’ do Muab do turu’ nahatus di soudor dit ongoilo do mongigit do gayang, om umbal no daa iyolo’ do tumalib di soudor di raja’ dot Idom, nga’ a’ i’ iyolo’ nakatalib. ²⁷ Om gayato’ no dau i tanak dau’d kusai di sumowoli daa dau do raja’, om patahako’ no dau do hiri’d timpak di tolig di bandar do numaan dau do porsombahan di sumbolion do podsubak di tingolig do Muab. Om kooris noddi i tulun dot Israil om iduwai no diyolo’ i bandar diri, om uli’ no do hilo’d pomogunan diyolo’.

¹ Insan tadau om rikot no dot id di Ilisa o songulun o tondu’ di nopuadan, i sawo daa do nabi, om boro-boros nod, ’’Aman, napatai no i sawo ku! Om oilaan nu i’ dot iyau nopo om otorodok i’ dot id Kinorohingan. Nga’ haro o tutang dau dot id iso’ o tulun. Om baino’ noddi om nokorikot no i tulun diri do mongoi panganu di duwo tanak ku do silihon dau do turipon do maan do pambayar di tutang di sawo ku,’’ ka dau. ² Boros ka di Ilisa, ’’Poingkuro oku po do monulung diya’ oi inan? Nunu po o haro dot id suang do walai nu?’’ ka dau. Boros ka di tondu’ do suminimbar, ’’Aiso’ no o nunu-nunu, suwai ko’ iri po tumau do saitun do sangkakanan po dot okooro’,’’ ka dau. ³ Boros ka di Ilisa, ’’Ongoi pokiolos do piro-piro nopo o kakanan dit aiso’ o suang do hilo’d songkoduwo nu. ⁴ Om sumuang nogindo do miwoyo’ di tangaanak nu do hiri’d walai dokoyu om tabanan no i wawayaan. Om dolinan ngai’ nogindo di tumau do mantad id kakanan dit okooro’ i kakanan diri om posuwai-suwayon no i nongoponu’,’’ ka dau. ⁵ Om uli’ noddi i tondu’ddi do hiri’d walai dau. Om kosuang poddi iyau om i tangaanak dau do hiri’d walai om tabanai no dau i wawayaan. Om dolinai ngai’ no dau di tumau do saitun do mantad id kakanan dit okooro’ i kakanan di pinatahak di tangaanak dau dot id dau, ⁶ om kongoponu’ ngai’ nopo i kakanan diri. Om pokianu po kawagu iyau dot iso’ o kakanan. ’’Naayi’ no,’’ ka di tiso’ di tanak dau do suminimbar. Om a’ noddi lumuyung i tumau. ⁷ Om poguliai no kawagu di tondu’ dot id di Ilisa, om boro-boros noddi i Ilisa di tondu’ddi, ’’Padagangon no i tumau’ddi do maan nu do pambayar do koinsanai di tutang nu, om iri nopondo it oolu-olu’ om kabagal po do maan dokoyu di tangaanak nu do kaakan-akanan,’’ ka dau. ⁸ Insan tadau om ongoi no i Ilisa do hilo’d Sunim. Hilo’ nopod Sunim nga’ haro o songulun o tondu’ do kaya’. Om lohowo’ noddi di tondu’ i Ilisa do makan. Mantad nopoddi om pointikid-tikid do mongoi i Ilisa do hilo’d Sunim om mongoi kasai’ nopo iyau akan do hiri’d walai di tondu’ddi. ⁹ Om boro-boros noddi i tondu’ di sawo dau, ’’Otumbayaan kopio oku dot iri nopo i tulun dit asaru’ do koumbaya’d hiti, om susuhuon i’ kopio do Kinorohingan. ¹⁰ Osonong do wansayan toko’ iyau dot iso’ o bilik dot okooro’ do hilo’d tingkat dit id sawat diti walai toko’ om sodiaan toko’ do toodopon om mija’ om tirikohonon, om lampung o hiri’d bilik, om haro i’ o tiyonon dau do pointikid-tikid do mongoi iyau do hiti’d dati’,’’ ka dau. ¹¹ Insan o tadau, om ongoi no kawagu i Ilisa do hilo’d Sunim. Om suang no iyau do hiri’d bilik dau do mongoi potingkod-tingkod do huyan. ¹² Om suhuo’ no dau i Gohasi, i susuhuon dau, do mongoi pomolohou di tondu’ddi. Om korikot poddi i tondu’ddi, ¹³ om boro-boros no i Ilisa di Gohasi, ’’Uhoto’ daa iyau ondung poingkuro oku po do sumomuli’ diti hingos dau do mogobi-obi’ dato. Orohian doti’ iyau do mongoi oku solowot di raja’ ko’ i boyoon do soudor do poboros do nunu i korohian dau,’’ ka dau. Om boros ka di tondu’ do suminimbar, ’’Poingiyon oku i’ dot id pogialatan do koobpinayan ku om haro ngai’ ku i’,’’ ka dau. ¹⁴ Om uhoto’ no di Ilisa i Gohasi, ’’Iyo nopoddi, om nunu pondo o milo ku’d wonsoyon dot id dau?’’ ka dau. Om boros ka di Gohasi do suminimbar, ’’Aiso’ o tanak dau om molohing no i sawo dau,’’ ka. ¹⁵ Om boros kaddi kawagu di Ilisa, ’’Lohowo’ po i tondu’ddi,’’ ka. Om rikot no i tondu’ om ingkakat no iyau do hiri’d dotimbabaan di wawayaan. ¹⁶ Om boro-boros no i Ilisa di tondu’ddi, ’’Dongiyo’dti nopod toun do tabantalan om kokibit ko no do tanak do kusai,’’ ka. Boros ka di tondu’, ’’Kada’ pongudut, oi aman, tu’ iya’ nopo om susuhuon id Kinorohingan,’’ ka. ¹⁷ Nga’ otopot kopio iddi i pinoboros di Ilisa, tu’ tontok di dongiyo- iyo’ddi di toun kawagu, om kosusu no i tondu’ddi do tanak do kusai. ¹⁸ Tontok dit agayo noddi i tanak, om insan o kosuabon di dongmongomot, om ongoi no i tanak suhut di tapa’ dau di maso do mongomot do gandum do hiri’d dumo do mogiwoyo-woyo’ di tulun do suwai. ¹⁹ Om sigog id pomogiak i tanak do minoro-boros di tapa’ dau, ’’Adu! Oruol o tulu ku!’’ ka. ’’Pootodo’ ilo tanak do hilo’d tina’ dau,’’ ka di tapa’ dau do minonuhu’ do songulun di susuhuon dau. ²⁰ Om pootodo’ noddi di susuhuon dau i tanak diri do hiri’d tina’ di tanak, om kibito’ no di tina’ di tanak, i tanak. Om tontok di sosodopon do tadau’ddi om kapatai no i tanak diri. ²¹ Om ngoyo’ no di tina’ di tanak i rata’ di tanak om ngoyo’ no dau posuango’ di bilik di Ilisa di hiri’d sawat, om poliiyo’ no dau do hiri’d sakai di toodopon di Ilisa. Om soliwan no iyau om tabanai no dau i wawayaan, ²² om ngoyo’ no dau lohowo’ i sawo dau. Om boros ka dau, ’’Ponuhu’ dot ongoiso’ dino susuhuon do mamagayat do songinan o kaladai do pootodon do hiti. Tu’ arau-arau oku do mongoi solowot di Ilisa, i Nabi. Om oruhai oku i’ do koguli’,’’ ka dau. ²³ Boros ka di sawo dau, ’’Nokuro tu’ baino’ nod mongoi ko, tu’ baino’ nopo om okon i’ ko’ tadau do Sabat, om okon ko’ Tadau dot Agayo do Tulan do Wagu,’’ ka dau. ’’A’ i’ kokukuro,’’ ka dau do suminimbar. ²⁴ Om kapakalai poddi i kaladai, om boro-boros no iyau di susuhuon dau, ’’Pikoton no iti kaladai om osiau i’ do manangkus; kada’ pogonoyo’ o papamanau dot a’ oku po monuhu’ do popogonoi,’’ ka dau. ²⁵ Om pamanau no i tondu’ddi do minongoi do hilo’d Nuluhon do Karmol do hilo’d kinoiyonon di Ilisa. Om osodu’ po i tondu’ddi om kokito no di Ilisa. Om boro-boros no i Ilisa di Gohasi, ’’Antangai pogi’ ilo tondu’ do mantad hilo’d Sunim do mongoi’d hiti! ²⁶ Ongoyo’ kopio iyau rubao’ om uhoton no iyau ondung poingkuro-kuro i sawo om i tanak dau,’’ ka dau. Om poboroso’ no di tondu’ dot id di Gohasi dot osonong ngai’ i’ iyolo’. ²⁷ Nga’ soira’ di nokorikot iyau dot id toguang di Ilisa, om otud no iyau om gapus no di gakod di Ilisa. Om poundolihon daa di Gohasi i tondu’ddi nga’ boros ka di Ilisa, ’’Pologoso’ nopo! Tu’ kokitanan nopo dau om tumongob kopio. Nga’ aiso’ i’ o nunu-nunu do pinosunud do TUHAN dot id doho’!’’ ka dau. ²⁸ Om boro-boros no i tondu’, ’’Aman, a’ oku i’ nokopokianu diya’ do tanak. Om nokoboros oku no dot id diya’ dot a’ ko mongiman-iman doho’!’’ ka dau. ²⁹ Om koili no i Ilisa di Gohasi om boro-boros nod, ’’Ongoyo’ kopio i sukud ku! Om tumilombus nopo do mongoi’d hilo’d walai dilo tondu’. Kada’ no undorong do sumuwau dot isai nopo o tulun dot orubaan nu do hilo’d ralan. Om ondung haro o tulun do sumuwau diya’ om kada’ no iya’ ponokisuwau. Om korikot ko nopondo om pasakayon no ino sukud ku do hiri’d tinan di tanak,’’ ka dau. ³⁰ Om boros ka di tondu’, ’’Ilisa! Sumumpa’ oku dot id suang do ngaran do TUHAN di poimpasi, om id diya’ nogi’ dot a’ oku i’ tumongkiad diya’!’’ ka dau. Om piwoyo’ noddi i Ilisa om i tondu’ddi do mongoi’d hiri’d walai di tondu’. ³¹ Nga’ nokopogulu no i Gohasi diyolo’ do minongoi pasakai di sukud di Ilisa do hiri’d tinan di tanak, nga’ aiso’ i’ o tuni ko’ tanda’ do suwai dot oposian i tanak. Om ongoi noddi solowot i Gohasi di Ilisa om boro-boros nod, ’’A’ po nokotungag i tanak,’’ ka. ³² Soira’ di nokorikot i Ilisa om suang no iyau do hiri’d bilik om kokito no dau i rata’ di tanak diri do poingiliu do hiri’d sakai di toodopon. ³³ Om tabanai no di Ilisa i wawayaan di bilik diri om sambayang no iyau dot id TUHAN. ³⁴ Om loubai noddi dau i tanak, om potungubo’ no dau di kabang di tanak o kabang dau om potopiso’ dau o mato dau dot id mato di tanak om polokopo’ dau o palad dau do hiri’d palad di tanak, om daamot di poinloub iyau di tanak om timpuun nod luminasu’ i tinan di tanak. ³⁵ Om tungag noddi i Ilisa om mikorobibi’ iyau do mimpanau do hiri’d suang di bilik, om loubai po kawagu dau i tinan di tanak. Om alaid noddi om koontiho’ no i tanak dot inturu’ om ungkalat no iyau. ³⁶ Om suhuo’ noddi di Ilisa i Gohasi do mongoi pomolohou di tina’ di tanak. Om kosuang poddi i tina’ di tanak do hiri’d bilik om boro-boros nogi’ i Ilisa dot id dau, ’’Diya iti tanak nu,’’ ka dau. ³⁷ Om otud noddi i tina’ di tanak dot id toguang di Ilisa om igitai nogiddi dau i tanak do suminoliwan. ³⁸ Tontok dot insan o tadau di maso do mononglous o hiri’d pointongkop di pomogunan. Om maso nogiddi do minuli’ i Ilisa do hilo’d Gilgal. Om maso diri dau do monuduk dot iso’ o sinompuruan do nabi, om suhuo’ no dau i susuhuon dau do mogonsok do takanon diyolo’ do hiri’d balanga’ dot agayo. ³⁹ Om ongoi no i songulun diyolo’ pokirarapaon do hiri’d dumo, om kokito no dau o tua’ do koiyo-iyo do tua’ do tawadak om panganu no iyau di tua’ddi dot ogumu’, om kuyutai no dau do minuli’. Om oribo’ no dau i tua’ddi om posuango’ no do hiri’d balanga’. Nga’ a’ i’ dau otutunan om nunu kopio o songua’ddi. ⁴⁰ Om koonsok noddi iri om potikido’ no dau dot id nabi. Nga’ maha’ di noumbalan nogi’ diyolo’ do mangakan iri om boro-boros no iyolo’ di Ilisa, ’’Kawanit i’ moti’ iti!’’ ka. Om a’ noddi diyolo’ nakan iri. ⁴¹ Om ponuhu’ no i Ilisa do manganu do tapung dot okuuri’ om posuango’ no dau do hiri’d balanga’. Om boro-boros no iyau, ’’Potikido’ kawagu dokoyu ilo’,’’ ka. Om a’ noddi kawanit i nonsok diri. ⁴² Om koimbagu no, om korikot no songulun o kusai do mantad hilo’d Baal-Salisa di minongigit do duwo nohopod o roti do winonsoi mantad id barli di gulu omoto’ do toun diri, om haro nogi’ o gandum di wagu po omoto’ do patahakon dau di Ilisa. Om suhuo’ no di Ilisa i susuhuon dau do potikid diri dot id nabi. ⁴³ Nga’ boros ka di susuhuon dau, ’’A’ i’ koumbagal iti do maan do hatus o tulun,’’ ka. Om boros ka di Ilisa do suminimbar, ’’Potikido’ nopo om kaakan i’ iyolo’. Tu’ nokoboros nod TUHAN do kaakan nopo iyolo’ om haro po ot oolu’,’’ ka dau. ⁴⁴ Om potikido’ noddi di susuhuon i taakanon diri dot id diyolo’. Om akan ngai’ noddi iyolo’. Om kaakan ngai’ noddi iyolo’ nga’ haro po o noolu’ do miagal di nokoboros mantad do TUHAN.

¹ I Naaman nopoddi nga’ boyoon do soudor dit ongkirapo-rapo do hilo’d Siria. Om iyau nopo nga’ kosianan om koupusan kopio di raja’ do Siria. Tu’ iyau no o pinakai do TUHAN do pinapamanang di soudor do Siria. Nga’ i Naaman nopo, i soudor do gunsiou diri om kitoruol do kusta. ² Insan o tadau, di minongoi i tulun do Siria panangod do tulun dot Israil om haro o songulun o tondu’ dot Israil dit okoro’ po do tinangkap diyolo’, om tanggayai no diyolo’ iyau. Om kosiliu noddi i tondu’ddi do susuhuon di sawo di Naaman. ³ Insan o tadau om boro-boros no i susuhuon diri dot id sawo di tuan dau do poingkaa, ’’Mongoi nopo daa solowot ilo tuan di nabi do hilo’d Samaria, om atantu’ no do lingasan i’ iyau di nabi diri,’’ ka dau. ⁴ Om korongou noddi i Naaman di boros diri, om ongoi no iyau do hiri’d raja’ om susuyo’ no dau i pinoboros di tondu’ dit okoro’ poddi. ⁵ Om boros ka di raja’, ’’Ongoi nopo do hilo’d raja’ dot Israil. Om monulis oku i’ do surat do patahakon dau,’’ ka dau. Om pamanau noddi i Naaman om pongigit no iyau do tolu nohopod noribu o tusin do pirok, om onom noribu o tusin do tamas om hopod o pasang di pakayan dit ongosonong. ⁶ Suang nopo di surat di nigitan dau’ddi nga’ poingkaa, ’’Id suang diti surat diti om popointutun oku diya’ di Naaman, i boyoon do soudor ku, om pokionuon ku iya’ do momolingos do toruol dau,’’ ka. ⁷ Soira’ di nabasa’ di raja’ dot Israil i surat diri, om hurako’ nopo dau i pakayan dau tu’ aiso’ no o pokukurayan dau, om boros ka dau, ’’Araatan oku no kopio, nokuro i raja’ do Siria tu’ monuhu’ doho’ do momolingos do tulun diti? Dot okon oku i’ ko’ Kinorohingan di kisinundu do mamasi ko’ mamatai do tulun! Mogihum no kopio i raja’ do Siria diti do ralan do paantakan do monokisongkiwal doho’,’’ ka dau. ⁸ Om korongou noddi di Ilisa o hal diri, om poporikot no iyau do boros dot id raja’ddi do poingkaa, ’’Nokuro tu’ agangau ko? Suhuo’ ino tulun do mongoi’d hiti’d doho’ om koilo i’ iyau do haro o nabi do hiti’d Israil,’’ ka dau. ⁹ Om pamanau noddi i Naaman do suminakai do korita’-kuda’ dau do gayaton di kuda’ dau. Om korikot noddi iyau do hiri’d walai di Ilisa, om undorong no iyau do hiri’d dotimbabaan di wawayaan di walai. ¹⁰ Om ponuhu’ no i Ilisa di susuhuon dau do minongoi popoboros dot id di Naaman do poingkaa, ’’Tuan, ongoi podsu’ dot inturu’ do hilo’d Bawang do Yordan, om olingasan ko i’,’’ ka dau. ¹¹ Om korongou poddi di Naaman iri, om pamanau no iyau do mikuwo’d otogod tomod. Om boro-boros nod, ’’Andasan ku nopo daa om mongoi iyau solowot doho’, om sumambayang nondo iyau dot id TUHAN, i Kinorohingan dau, om pasahawon nondo daa dau i longon dau do hiti’d toruol ku do momolingos. ¹² Okon toi ko’ i nopo Bawang dot Albana om Bawang do Parpar di hilo’d Damsik om osonong i’ ko’ mantad di bawang do hinonggo nopo do hiti’d Israil! Om milo oku i’ do mongoi podsu’ do hilo’ om olingasan oku i’!’’ ka dau. ¹³ Nga’ ongoi no insomok i susuhuon dau om boro-boros nod, ’’Tuan, ondung suhuon ko daa di nabi do momonsoi dit apagon do momonsoi om atantu’ nod wonsoyon nu i’. Om nokuro nogindo tu’ a’ tonudon i ponuhuan do mongoi no podsu’ om olingasan ko i’!’’ ka dau. ¹⁴ Om ongoi noddi i Naaman do hiri’d Bawang do Yordan, om tolop no iyau dot inturu’ do hiri’d bawang diri do miagal di pinonuhuan di Ilisa. Om kolingasai noddi i Naaman; om osonong noddi o tinan dau do miagal di tanakwagu po iyau. ¹⁵ Om poguliai noddi di Naaman om i tulun di minananud dau dot id di Ilisa, om boro-boros no dot, ’’Baino’ nopoddi om noilaan ku no kopio dot iso’ noo o Kinorohingan do pointongkop diti pomogunan, iri no i Kinorohingan di tukuon do tulun dot Israil; om iyo nopoddi om romito’ no iti popuhawangon ku diya’ oi Tuan,’’ ka dau. ¹⁶ Om boros ka di Ilisa do suminimbar, ’’Id suang do ngaran do TUHAN di poimpasi i pogobi-obian ku om sumumpa’ oku no dot a’ oku i’ rumamit do nunu nopo o popuhawangon nu,’’ ka dau. Om posonsogon i’ di Naaman do papatahak di Ilisa i popuhawangon dau, nga’ mada’ i’ i Ilisa. ¹⁷ Om boro-boros noddi i Naaman, ’’Ondung mada’ kopio ko do rumamit di popuhawangon ku, om pologoso’ oku no do manganu diti tana’ dot igitan ku do muli’ do songkuro nopo ot ooyit dilo sapasang o bagal. Tu’ mimpuun nod baino’ do papatahak oku do porsombahan dot id TUHAN om a’ oku nondo papatahak do porsombahan dot id ponokokinorohingan do suwai. ¹⁸ Om mogondos oku nod TUHAN do mangampun doho’ do tontok do momoyo’ oku di raja’ ku do mongoi sambayang do hilo’d walai do tingolig do Rimon, i ponokokinorohingan do Siria,’’ ka dau. ¹⁹ Om boros ka di Ilisa, ’’Pamanau nopo om sumonong-sonong,’’ ka. A’ po alaid do mantad di kinapamanahan di Naaman, ²⁰ om pomusorou no i Gohasi, i susuhuon di Ilisa do poingkaa, ’’Nokuro tu’ poulio’ tomod nopo di tuan i tulun diri dot a’ minokibayar? Apatut i’ daa do rinamit dau i pinopuhawang di tulun do Siria diri! Id suang nod ngaran do TUHAN di poimpasi, do ngoyon ku i’ iyau gusao’ do mokianu do nunu nopo i haro dot id dau!’’ ka dau. ²¹ Om ngoyo’ noddi di Gohasi gusao’ i Naaman. Om soira’ di nokito di Naaman do haro o tulun do gumusa’ dau, om lintuhun no iyau do mantad hiri’d korita’- kuda’ dau om ponguhot nod, ’’Nunu’ri?’’ ka dau. ²² Om boros ka di Gohasi do suminimbar, ’’Mokiampun oku, oi Tuan. Tu’ sinuhu’ oku do minongoi pomisunud do Tuan, do haro o duwo o nabi di koririkot di tiinu’ do mantad hilo’d konulu-nuluan dot Ipraim, om suhuo’ oku noddi di tuan ku do mongoi pokianu diya’ do tolu noribu o tusin do pirok om duwo pasang do kain dit osonong do patahakon di duwo o nabi diri,’’ ka dau. ²³ ’’Iyo nogiddi,’’ kad i Naaman do suminimbar, om sansagai noddi dau i Gohasi do mongigit dit onom noribu o tusin do pirok om lopoto’ no di Naaman i tusin diri om posuango’ no di duwo o kantung, om anu iyau di duwo o pasang do pakayan dit osonong kopio. Om poigitai ngai’ no di Naaman iri di duwo o susuhuon dau di pinopogulu dau di Gohasi. ²⁴ Om soira’ di nokorikot iyolo’ do hilo’d nulu-nulu di kinoiyonon di Ilisa, om onuo’ no di Gohasi i tusin om i pakayan diri om ngoyo’ no poopio’ do hiri’d walai, om suhuo’ no dau do muli’ i susuhuon di Naaman. ²⁵ Om soira’ di suminuang iyau kawagu do hiri’d walai, om uhoto’ no iyau di Ilisa, ’’Hinonggo tadon nu?’’ ka dau. ’’A’ oku i’ nokotongkiad, oi Tuan,’’ ka dau do suminimbar. ²⁶ Nga’ boros kad i Ilisa, ’’Hilo’ oku i’ moti’ddi dot id suang do rusod do tontok di luminintuhun i Naaman do mantad hiri’d korita’-kuda’ dau do minongoi solowot diya’. Dinondo nopo om okon i’ ko’ maso do rumamit do tusin om momoli do kabun do saitun, om kabun dot anggur, om dumba’ om sapi’ om turipon! ²⁷ Iyo nopoddi tu’ ruminamit ko di pinomuhawang diri, om aramit nu pondo i toruol di Naaman. Om iri sinakagon nu nga’ oontok ngai’ nopondo do toruol do miagal diri do gisom dot alaid,’’ ka dau. Om kosoliwan poddi i Gohasi do mantad hiri, om koontok no iyau do toruol diri. Om sigog iddi do minumang purak i kulit dau, tu’ noontok noddi iyau do toruol do kusta.

¹ Insan tadau om boro-boros no i nabi di tudukan di Ilisa dot id di Ilisa, ’’Ogiol-giol kopio’ddi iti tiyon-iyonon toko’! ² Om pologoso’ daa iyahai do mongoi panagad do kayu do hilo’d toning di Bawang do Yordan, om momonsoi nogindo iyahai do tiyonon dahai’d hilo’,’’ ka. ’’Oo, osonong,’’ ka di Ilisa do suminimbar. ³ Om sansagai iddi do songulun dot id pialatan diyolo’ i Ilisa do tumanud diyolo’. Om kotumboyo’ iddi i Ilisa. ⁴ Om pogitanud-tanud no iyolo’ do minamanau. Om soira’ddi nokorikot iyolo’ do hiri’d tisan di Bawang do Yordan, om timpuun no iyolo’ do managad do kayu. ⁵ Om maso daa do songulun diyolo’ do managad om sigog i’ do kotongos i kapak dau om karatu’ no do hiri’d waig. ’’Kukuroyon ku ma lo’?’’ ka dau dot id di Ilisa. ’’Tu’ nolos-olos ku i’ daa ilo kapak!’’ ka dau. ⁶ Om boros ka di Ilisa, ’’Hinonggo o kinorotuon diri?’’ ka dau. Om potuduko’ no di tulun i kinorotuon di kapak. Om langod noddi i Ilisa do kayu om pataamo’ no dau do hiri’d waig. Om hampung noddi i kapak. ⁷ ’’Ngoyo’ ilo’,’’ ka di Ilisa. Om poroloyo’ no di tulun o longon dau do minongoi panganu di kapak. ⁸ Insan o maso om ongoi no o Siria sangod dot Israil. Om koponokirunding poddi i raja’ do Siria di piro-piro o boyoon do soudor dau om tontuo’ nogi’ dau o kinoiyonon do pomukiiman diyolo’. ⁹ Nga’ posunudai no di Ilisa i raja’ dot Israil do popoinsan dau dot a’ mongoi dot id kinoiyonon diri tu’ hiri no i tulun do Siria. ¹⁰ Om i tulun di songingiyon do hiri nga’ sinunudan nogi’ di raja’ dot Israil do mumbangan-bangan kopio. Om asaru’ i’ i Ilisa do pinopoinsan di raja’. ¹¹ Om araatan noddi kopio i raja’ do Siria, om lohowo’ ngai’ no dau i boyoon do soudor dau om uhoto’ no dau iyolo’, ’’Isai ot id pialatan dokoyu do muhup do raja’ dot Israil. Isai? Posunudo’ dokoyu!’’ ka dau. ¹² Om boros ka do songulun dot id pialatan diyolo’, ’’Aiso’ i’, oi Tuan Raja’. I Nabi Ilisa i’ o poposunud di boros nu dot id raja’ dot Israil, dot iri piya i boros do Tuan Raja’ di poboroson do hilo’d bilik do toodopon do Tuan Raja’,’’ ka dau. ¹³ Om boros ka di raja’, ’’Ihumon no iyau, om tangkapon ku i’ iyau,’’ ka dau. Om kosunudai no i raja’ do Siria do hilo’d Dotan i Ilisa. ¹⁴ Om ponuhu’ noddi iyau do soudor dot ogumu’ do kuminaa’d hilo’ dot ongkikuda’ om ongkikorita’-kuda’ do don sumasangod. Om korikot ngai’ no i soudor do hiri’d bandar di totuong. Om turungkuo’ no diyolo’ i bandar diri. ¹⁵ Kosuabon noddi om tungag no i susuhuon di Ilisa, om soliwan no do mantad hiri’d walai, om kokito dau i soudor do tulun do Siria dot ongkikuda’ om ongkikorita’-kuda’ do don sumasangod do posorili’ di bandar diri do monurungku’ddi. Om poguliai no dau do hiri’d di Ilisa om boro-boros nod, ’’Obungou toko’ no, oi Tuan! Poingkukuro toko’ podti?’’ ka dau. ¹⁶ ’’Kada’ kooris,’’ ka di Ilisa do suminimbar. ’’Iri nopo i momogompi’ dati’ om ogumu’ po ko’ iyolo’,’’ ka dau. ¹⁷ Om sambayang noddi i Ilisa, ’’Oi TUHAN, poungkalato’ no o mato dilo susuhuon ku om kokito i’ iyau!’’ ka dau. Om pohubayaai nod TUHAN i sambayang di Ilisa om kokito no di susuhuon dau di minintong iyau, do notongkop nopo i nulu-nulu do kuda’ om korita’-kuda’ di kitapui do posorili’ di Ilisa. ¹⁸ Om soira’ di mongoi daa sangod i tulun do Siria, om sambayang no i Ilisa, ’’Oi TUHAN, boloho’ ngai’ no o mato do tulun diti!’’ ka dau. Om pohubayaai nod TUHAN i sambayang di Ilisa, om kongobolou ngai’ nopo i tulun diri. ¹⁹ Om boros kaddi di Ilisa dot id diyolo’, ’’Napalid kou! Okon i’ ko’ iti i bandar dit ihumon dokoyu. Tanud kou doho’, om pootodon ku i’ iyokoyu dot id tulun dit ihumon dokoyu,’’ ka dau. Om angatai noddi dau iyolo’ do mongoi’d hilo’d Samaria. ²⁰ Om korikot poddi iyolo’ do hiri’d bandar diri, om sambayang no i Ilisa, ’’Poungkalato’ no o mato diyolo’, oi TUHAN. Pologoso’ no iyolo’ do kokito,’’ ka dau. Om pohubayaai nod TUHAN i sambayang di Ilisa, om poungkalato’ no dau o mato di tulun diri. Om kopurimanai noddi diyolo’ do hilo’ no iyolo’d Samaria. ²¹ Om soira’ di nokito di raja’ dot Israil i soudor do Siria, om uhoto’ no dau i Ilisa, ’’Patayon ku tuu iti tulun diti, oi Ilisa?’’ ka dau. ²² ’’Amu’,’’ ka di Ilisa do suminimbar. ’’Tu’ iri ngai’ piya i soudor di natangkap om natanggayan nu do mantad id pisangadan nga’ a’ nu i’ pinatai; om patayon nu nogindo daa iyolo’. Paakanon nogi’ om poinumon iyolo’, om pologoson nopo iyolo’ do muli’ dot id raja’ diyolo’,’’ ka dau. ²³ Om papaharo noddi i raja’ dot Israil do poginakanan dot agayo do maan diyolo’. Kangaakan poddi om kongoinum iyolo’ om suhuo’ nogiddi iyolo’ di raja’ dot Israil do muli’ dot id raja’ do Siria, i raja’ diyolo’. Om mantad poddi om tingkod no i tulun do Siria do manangod di pomogunan dot Israil. ²⁴ A’ po songkuro o koloidon do mantad diri om angatai no di Binhadad, i raja’ do Siria, o koinsanai di soudor dau do minongoi panangod dot Israil. Om turungkuo’ no diyolo’ o bandar do Samaria. ²⁵ Om nokootuson nopoddi nga’ minononglous o hiri’d bandar, gisom dot iso’ nopo o tulu do kaladai om walu’ nohopod o tusin do pirok do gatang, om duwo no auns do taii’ do punai om limo tusin do pirok do gatang. ²⁶ Insan o maso, di manau-panau i raja’ dot Israil do hiri’d timpak do tolig di bandar, om pomolohou no dau o songulun o tondu’, ’’Tulungo’ oku, oi Tuan Raja’!’’ ka. ²⁷ Om boros ka di raja’ do suminimbar, ’’Ondung a’ ko’d TUHAN tulungon, om poingkuro oku po daa iyoho’ do monulung diya’? Aiso’ i’ o gandum om aiso’ o waig dot anggur ku! ²⁸ Nga’ nunu toi’ o kosusaan nu?’’ ka dau. Om boros ka di tondu’, ’’Di nopo di guulu, om minangangat iti tambalut ku do mangakan di doho’d tanak om kanon nogindo i dau’d tanak di tadau kawagu. ²⁹ Om onsoko’ noddi dahai i doho’d tanak, om akano’ noddi dahai. Om kosuabon noddi om sunudai ku no iyau do mogonsok di dau’d tanak, nga’ polisoko’ nogi’ dau i tanak dau!’’ ka dau. ³⁰ Om soira’ di norongou di raja’ o hal diri, om hurako’ nopo dau o pakayan dau tu’ tumongob no kopio iyau. Om kokito ngai’ i’ i tulun di poingiyon dot id somok di tolig di bandar do kipinakai iyau do pakayan do mogihad do tanda’ do tumongob iyau. ³¹ Om boros ka di raja’ dot opuhod, ’’Patayon oku nopod TUHAN dot a’ ku no apatai i Ilisa do baino’,’’ ka dau. ³² Om ponuhu’ noddi i raja’ do tulun do mogulu dau do mongoi’d hiri’d walai di Ilisa. Tontok nopoddi om hiri i Ilisa id walai do mogirumo-rumo di piro-piro o boyoon. Om tontok dit a’ po nokorikot i sinuhu’ di raja’ do mongoi’d hiri om boros ka di Ilisa dot id boyoon di hiri, ’’Antaan-taan no dokoyu! Tu’ monuhu’ moti’ i gampamatai do tulun do mongoi pamatai doho’! Soira’ nopo do korikot i tulun di sinuhu’ dau do hiti, om ontiilan no ilo totobon, om kada’ dokoyu iyau posolokoyo’. Om muhut-suhut i’ dau i raja’,’’ ka dau. ³³ Om a’ po di Ilisa nopupusan o boros dau om korikot no i raja’ do hiri, om boros ka dau, ’’TUHAN i’ o pinoporikot do kosusaan diti dot id dati’! Om nunu poddi o kapagandasan toko’ dot itulung do mantad id dau?’’ ka dau.

¹ Om boros ka di Ilisa do suminimbar, ’’Pokinongoho’ no iti boros do TUHAN! Suab nopondo, do dongiyo’dti, om koboli no tulun do 3 kilogram do gandum dit osonong no kopio, ko’ 6 kilogram do barli do horogo nopo om iso’ no tusin do pirok,’’ ka dau. ² Nga’ boros ka di madtatamong kasai’ di raja’ dot id di Ilisa, ’’A’ no kopio milo dot osiliu ot iyo’ddi! Sokiro piya daa do porikoton do TUHAN o rasam do dinondo, nga’ a’ no kopio milo dot owonsoi o miagal diri,’’ ka dau. Om boros ka di Ilisa do suminimbar, ’’Kokito ko indo dot osiliu o miagal diri. Nga’ a’ ko no ma kotudu’ di taakanon diri,’’ ka dau. ³ Tontok nopo do tadau’ddi om haro ot apat o tulun do kitoruol o kulit dit araat kopio do hiri’d soliwan di wawayaan do bandar do Samaria. Om pogiboro-boros no iyolo’, ’’Nunu noo ot aanu-anu toko’ do mundorong do hiti do mandad do gisom dot apatai? ⁴ Ondung sumuang toko’ dilo bandar om apatai toko’ id olikapan om mundorong toko’d hiti nga’ matai toko’ i’. Osonong nogi’ do mongoi toko’d hilo’d kokiiman do tulun do Siria. Patayon toko’ no diyolo’. Nga’ nunu koilo-ilo, a’ toko’ i’ doti’ diyolo’ kuroi-kuroyon,’’ ka diyolo’. ⁵ Om maha’ di sumodop no o tadau, om ongoi no iyolo’ do hiri’d kokiiman di tulun do Siria. Nga’ aiso’ i’ o nokito diyolo’ dot ongoiso’ piya o tulun do hiri. ⁶ Tu’ pinorongou do TUHAN i tulun do Siria do tuni do miagal-agal do haro o soudor dot ogumu’ dit ongkikuda’ om ongkikorita’-kuda’ do montol-bontol do mongoi panangod diyolo’. Om andasan daa’ddi diyolo’ om ginodsian di raja’ dot Israil o raja’ do tulun do Hit om raja’ do tulun do Masir do mogiwoyo-woyo’ di soudor diyolo’ do mongoi panangod diyolo’. ⁷ Gowoi poddi om sosodopon iddi do minogidu’ iyolo’ do minokipapasi. Om iduwai ngai’ nopo diyolo’ i kiim, om i kuda’, om kaladai diyolo’ do hiri’d kokiiman. ⁸ Om soira’ di nokorikot it apat o tulun di kitoruol o kulit diri do hiri’d tisan di kokiiman, om suango’ no diyolo’ o tiso’ di kiim. Om akan noddi iyolo’ om inum om mininganu iyolo’ do nunu nopo i hiri. Om minanganu nogi’ iyolo’ do tamas om pirok om pakayan di nokito diyolo’. Om polisoko’ noddi diyolo’ i nangaanu diyolo’ddi. Om suang po kawagu iyolo’ di kiim do suwai. Om pinganu po kawagu iyolo’ di konunu-nunuan, om niyo i’ diyolo’ dit id gulu. ⁹ Om pogiboro-boros noddi iyolo’, ’’A’ i’ osonong iti wonsoyon toko’! Iti nopo om habar dot osonong! Om apatut do ngoyon toko’ posunudo’ iti! Ondung andadon toko’ do gisom do suab, om pointantu’ no do hukuman toko’. Kainou, ngoyo’ toko’ posunudo’ iti dot id piro-piro o boyoon do soudor do pomorinta’,’’ ka diyolo’. ¹⁰ Om tongkiadai noddi diyolo’ i kokiiman do tulun do Siria om uli’ no do hilo’d Samaria. Om pamagarang no iyolo’ do momolohou di madtatamong do wawayaan di bandar. Boros ka diyolo’, ’’Nokoongoi no iyahai do hilo’d kokiiman do tulun do Siria, om aiso’ no o songulun do nokito om norongou dahai do hilo’. Songinlukug ngai’ po i kuda’ om kaladai, om tongkiadai tomod nopo diyolo’ i kokiiman,’’ ka diyolo’. ¹¹ Om popinsunudo’ noddi di piro-piro o madtatamong o habar diri gisom do nokorikot dot id raja’. ¹² Om tontok nopoddi om otuong po daa nga’ tungag nopo i raja’, om boros ka dau dot id koinsanai di boyoon do soudor dau, ’’Pokinongou kou pogi’! Om posuhuton ku i’ iyokoyu ondung nunu o kosondoton dilo winonsoi di tulun do Siria! Tu’ oilaan toko’ i’ diyolo’ do louson, om iduwai noddi diyolo’ i kokiiman diyolo’ om ongoi no lisok do hilo’d gouton. Tu’ osorou nopo diyolo’ nga’ sumoliwan toko’ nondo do mongoi pogihum do taakanon, om ngoyon toko’ nopondo diyolo’ songodo’ om osolod nondo diyolo’ iti bandar toko’,’’ ka dau. ¹³ Om boros ka do songulun di pagawai di raja’, ’’Poingkuro piya nga’ angapatai i’ o tulun dot id bandar diti do miagal ngai’ di tulun di nangapatai no. Osonong nogi’ do monuhu’ toko’ do piro-piro o tulun do mongoi pogontong di nosiliu’d hilo’ om sakayon nopo ilo kuda’ do limo po o tinan do noolu-olu’, om oilaan toko’ indo ondung nunu kopio i nosiliu’ddi,’’ ka dau. ¹⁴ Om pomili’ no iyolo’ do piro-piro o tulun, om suhuo’ no di raja’ do sumakai do duwo o korita’-kuda’ di don sumasangod. Sinuhu’ iyolo’ do mongilo-ilo ondung nunu kopio o nosiliu dot id soudor do Siria. ¹⁵ Om pamanau no iyolo’ do gisom do nokorikot do hilo’d Bawang do Yordan. Om poingompus nopo di ralan dot okito diyolo’ do moninggarayat o pakayan om i koburu-buruon do nakangataam di tulun do Siria do tontok di poggidu’ iyolo’. Om poguliai no di tulun diri om ngoyo’ no diyolo’ posunudo’ di raja’. ¹⁶ Om soliwan ngai’ noddi di bandar i tulun do Samaria do mongoi pinganu di konunu-nunuan di hiri’d kokiiman do tulun do Siria. Om poingkukuro nopo i nokoboros do TUHAN om nangabayaan ngai’ no tu’ tolu nopo o kilogram do gandum dit osonong no kopio, ko’ onom o kilogram do barli om songusin poo o pirok do gatang. ¹⁷ Nga’ koontok no kopio do maso’ddi dot i madtatamong kasai’ di raja’ o nosuhu’ do madtamong di wawayaan di bandar diri. Om kapatai no iyau’d hiri do nopingulakan di tulun dot ogumu’. Om piontok nopo di nokoboros di Ilisa do tontok di solowot i’ i raja’ dau. ¹⁸ Om nokoboros no di Ilisa do dongiyo nopoddi di tadau kawagu, om tolu nopo o kilogram do gandum dit osonong ko’ onom o kilogram do barli om dagangon nondo do hilo’d Samaria do sousin poo o pirok do gatang. ¹⁹ Om tontok noddi do minoro-boros i madtatamong kasai’ di raja’ do poingkaa, ’’A’ no kopio milo dot osiliu ot iyo’ddi. Sokiro piya daa do sigog id porikoton do TUHAN o rasam do dinondo; nga’ a’ no kopio milo dot owonsoi o miagal diri,’’ ka dau. Om boros ka di Ilisa, ’’Kokito ko indo kopio dot osiliu iti, nga’ a’ ko noddi ma kotudu’ di taakanon,’’ ka dau. ²⁰ Iri noddi o nosiliu dot id tulun diri, tu’ napatai do nopingulakan di tulun dot ogumu’ do hiri’d wawayaan di bandar diri.

¹ Insan o maso om porikatai nod TUHAN do mononglous o hilo’d pomogunan dot Israil do solinaid do turu’ o toun. Om sinunudan mantad di Ilisa i tondu’ do Sunim, i noumbalan dau do minamasi kawagu i tanak do kusai di tondu’ddi di napatai daa. Om suhuo’ no di Ilisa i tondu’ddi do mongoi iyon dot id pomogunan do suwai do sumangkat nopo di sompiiyon dau. ² Om tinanud i’ di tondu’ i nituduk di Ilisa, om ongoi noddi iyau do miwoyo’ di sompiiyon dau do hilo’d pomogunan do Pilistin do minongoi iyon do hilo’. ³ Katalib poddi i turu’ o toun diri, om poguliai no dau kawagu do hilo’d pomogunan dot Israil. Om ongoi no iyau solowot di raja’ do miwoyo’ di tanak dau tu’ pokigulian kawagu dau i walai om i tana’ dau. ⁴ Tontok nopoddi nga’ sinuhu’ di raja’ i Gohasi, i susuhuon di Ilisa, do monusui di kongoimayaan di nongowonsoi di Ilisa. ⁵ Om maso di Gohasi do monusui do kowoyo-woyoo’ di Ilisa do minamasi di tanak di napatai, nga’ poboroso’ no di tondu’ do mantad hilo’d Sunim i pokionuon dau dot id raja’. Om boros ka di Gohasi dot id raja’, ’’Tuan Raja’, iti no i tondu’ddi, om hoodi i tanak di pinasi kawagu di Ilisa,’’ ka dau. ⁶ Om ponguhot noddi i raja’ om suhuo’ no dau i tondu’ do monusui do pasal di tanak. Om lohowo’ noddi di raja’ o songulun di pagawai dau om suhuo’ no dau do popoguli’ kawagu do koinsanai di dapu’ di tondu’, om kohompit no i gatang do tua-ua’ di tanom-tanom do hiri’d dumo di tondu’ do solinaid di turu’ o toun di tondu’ dot id pomogunan do suwai. ⁷ Insan o maso om ongoi no i Ilisa do hilo’d Damsik. Tontok nopoddi nga’ sumakit i Raja’ Binhadad. Om soira’ddi di nosunudan i raja’ do hino i Ilisa do hiri’d Damsik, ⁸ om boros ka dau dot id di Hasail, i songulun di pagawai dau, ’’Igit dot ipuhawang do patahakon di nabi, om suhuon indo iyau do monguhot do TUHAN ondung olingasan oku po tuu diti ko’ amu’,’’ ka dau. ⁹ Om igit no i Hasail do mogisuwai-suayan nopo o bansa’ do konunu-nunuan dit ongosonong kopio do mantad hilo’d Damsik, om pagandaro’ no dau dot apat nohopod o tinan dot unta. Om ongoi nogiddi iyau solowot di Ilisa. Om soira’ di nokorikot i Hasail do hiri’d di Ilisa, om boro-boros no iyau, ’’Sinuhu’ oku di Raja’ Binhadad, i susuhuon nu, do monguhot diya’ ondung olingasan po tuu iyau ko’ amu’,’’ ka dau. ¹⁰ Om boros ka di Ilisa do suminimbar, ’’Nokointalang nod TUHAN dot id doho’ do matai no iyau. Nga’ poboroson no dot id dau dot olingasan i’ iyau,’’ ka dau. ¹¹ Om sonsodo’ noddi di Ilisa i Hasail gisom do suwai-suwai’ddi ot opurimanan di Hasail. Om sigog iddi dot ihad i Ilisa. ¹² Om ponguhot no i Hasail dau, ’’Nokuro tu’ mihad ko, oi Tuan,’’ ka dau. Om boros ka di Ilisa, ’’Mihad oku pogi’ nga’ oilaan ku no o karaaton do wonsoyon nu dot id tulun dot Israil. Tutudan nu nondo i kabandaran diyolo’ di kitolig, om patayon nu o tangaanak diyolo’ dit ongomulok po om it ongoligkang om kotolon nu i tangaanak di ragang po, om ulayakon nu o tian di tongoondu’ do monontian,’’ ka dau. ¹³ Om boros ka di Hasail, ’’Isai kopio oku daa’dti? Hinonggo kopio daa o ngayan ku do kuasa’ do miagal kopio’ddi?’’ ka dau. Nga’ boros ka di Ilisa, ’’Nosunudan oku nod TUHAN dot osiliu ko nondo do raja’ do pomogunan do Siria,’’ ka dau. ¹⁴ Om pouliai noddi di Hasail dot id di Raja’ Binhadad. Om uhoto’ no di Binhadad iyau, ’’Nunu kad i Ilisa?’’ ka dau. Om boros ka di Hasail, ’’Sinunudan oku dau dot olingasan ko i’,’’ ka dau. ¹⁵ Nga’ tadau poddi kawagu om anu no i Hasail do kumut, om yoposo’ no dau do waig om pokuluputo’ nogiddi dau dot id rabas di Raja’ Binhadad do gisom do napatai i raja’ do nopusakan. Om kosiliu noddi i Hasail do raja’ do Siria do suminowoli di Binhadad. ¹⁶ Tontok di kolimo nod toun di Raja’ Yoram, i tanak di Ahab do momorinta’ dot Israil, om kosiliu no i Yihoram, i tanak di Yosapat do raja’ do Yohuda. ¹⁷ Tontok nopoddi om tolu no nohopod om duwo o toun dau do momorinta’ do hilo’d Yorusalim. ¹⁸ Om kowino’ no dau i tanak di Ahab. Om pomonsoi noddi iyau do dusa dot id TUHAN do miagal di wonsoyon di sompiiyon di Ahab, tu’ minusui ngai’ di winonsoi di piro-piro o raja’ dot Israil dit angaraat. ¹⁹ Nga’ a’ i’ do TUHAN rinaag o pomogunan do Yohuda, tu’ nakabatos mantad no o TUHAN dot id di Daud, i susuhuon dau, do sinakagon nopo dau om osiliu kasai’ do raja’ om momorinta’ kasai’ nopondo do gisom dot alaid. ²⁰ Tontok nopo di pomorintaan di Yihoram, om suminaap o pomogunan dot Idom do pomorintaan do Yohuda, om mimpori-pori diri ot Idom do momorinta’. ²¹ Om pamanau noddi i Raja’ Yihoram do miwoyo’ do toinsanan di korita’- kuda’ dau do kuminaa do hilo’d bandar do Sair. Om turungkuo’ no iyolo’ di soudor dot Idom do hilo’. Nga’ nokoidu’ i’ iyau om koinsanai di boyoon do soudor dau do tuminalib di borisan di soudor do pisangod di dongotuong. Om iri no i soudor diyolo’ om pogitongkiad-kiad nopo om sorompori-pori do minuli’. ²² Mantad poddi om okon noddi ko’ id suang do pomorintaan do Yohuda o pomogunan dot Idom. Om maso nogiddi do suminaap o Libna do pomorintaan do Yohuda. ²³ Om koinsanai di nongowonsoi di Raja’ Yihoram om nongkotulis ngai’ i’ dot id suang do Buuk di Monusui do pasal do Raja’ do Yohuda. ²⁴ Om kapatai noddi i Raja’ Yihoram om lobongo’ no do hiri’d kalabangan do raja’ do hiri’d Bandar di Daud. Om kosiliu noddi do raja’ i Ahasia, i tanak dau do suminowoli dau. ²⁵ Tontok di kohopod om duwo do toun di Yoram, i tanak di Ahab do momorinta’ do pomogunan dot Israil, om kosiliu nod raja’ do Yohuda i Ahasia, i tanak di Yihoram. ²⁶ Tontok nopoddi om duwo no nohopod om duwo o toun di Ahasia, om sontoun no o koloido’ dau do momorinta’ do hilo’d Yorusalim. Tina’ nopo dau om i Atalia, i tanak di Raja’ Ahab, om manangaki iyau di Omri, i raja’ dot Israil. ²⁷ Om koobpinai diri i Ahasia do sompiiyon di Raja’ Ahab tu’ nakakawin no iyau dot id sompiiyon diri. Om iyau nga’ minomonsoi id dusa dot id TUHAN do miagal di winonsoi di sompiiyon di Ahab. ²⁸ Om miniuhup i Raja’ Ahasia om i Raja’ Yoram, i raja’ dot Israil, do suminangod di Hasail, i raja’ do pomogunan do Siria. Pinisangadan nopo diyolo’ om hilo’d Ramot, i hilo’d watas do Giliad. Om nosuhat diri i Raja’ Yoram do hiri’d pinisangadan diri. ²⁹ Om uli’ noddi i Yoram do hilo’d bandar do Yisriil do minongoi pokiubat di nongosuhat. Om ongoi no i Raja’ Ahasia kakap di Yoram do hilo’.

¹ Tontok nopoddi om lohowo’ no di Nabi Ilisa, o songulun di nabi dit omulok po, om boros ka dau, ’’Sodia’ no, om mongoi i’ do hilo’d Ramot, i hilo’d Giliad. Om igitan no iti kakanan dot okooro’ di kisuang do tumau do saitun. ² Om korikot ko nopondod hilo’, om ihumon no i Yohu i tanak di Yosapat, i manangaki di Nimsi. Om angatan nondo iyau do sumuang do bilik do duwo-duwo kou. ³ Om tuntugan nondo diti tumau do saitun o tulu dau, om poboroson nondo o poingkaa, ’Pinopoilo o TUHAN do silihon ko dau do raja’ do tulun dot Israil,’ kanto. Om owonsoi nu pondo iri om siahan no do tumongkiad do kinoiyonon diri,’’ ka di Ilisa. ⁴ Om pamanau noddi i nabi dit omulok poddi do minongoi do hilo’d Ramot. ⁵ Om tontok di nokorikot iyau’d hilo’, om kokunamaai no dau do maso ngai’ di boyoon do soudor om i Yohu do mogirumo-rumo. Om boros ka di nabi, ’’Oi Tuan, haro o habar do poboroson ku diya’,’’ ka dau. Om ponguhot no i Yohu, ’’Isai o posunudan nu do habar dino?’’ ka. ’’Iya’, oi Tuan,’’ ka di nabi diri. ⁶ Om pitanud noddi iyolo’ do suminuang do hiri’d walai, om tuntugai no di nabi o tulu di Yohu di tumau do saitun, om boro-boros nod poingkaa, ’’Boros kad TUHAN, i Kinorohingan dot Israil, ’Silihon ku iya’ do raja’ do tulun ku, i bansa’ dot Israil. ⁷ Patayon ngai’ no i sompiiyon do tuan nu, i Raja’ Ahab. Om ohukuman ku indo i Isibil tu’ minamatai ngai’ di nabi ku om i susuhuon ku di suwai. ⁸ Patayon ngai’ nopo o koinsanai dit id sompiiyon om i sinakagon di Ahab; tu’ patayon ngai’ ku no o koinsanai do kokusayan dit id suang do sompiiyon dau dit ongomulok po, om i molohing no. ⁹ Om wonsoyon ku nondo dot id sompiiyon di Ahab, o miagal di winonsoi ku dot id sompiiyon di Yirobiam om id sompiiyon di Baisa, i duwo o raja’ dot Israil. ¹⁰ I Isibil nopo om a’ i’ olobong, tu’ akanon nondo do tasu o rata’ dau do hilo’d watas do Yisriil,’ ka,’’ ka dau. Om koboros poddi di nabi dit omulok poddi o miagal diri, om soliwan no iyau do mantad hiri’d walai om panangkus no do minuli’. ¹¹ Om guli’ no i Yohu do hiri’d tambalut dau do suwai, om uhoto’ no diyolo’ iyau, ’’Nunu ka do habar? Minogkuro diya’ i mulau’ddi?’’ ka diyolo’. ’’A’ kou toi koilo?’’ ka di Yohu do suminimbar. ¹² ’’Amu’, a’ i’ iyahai koilo!’’ ka diyolo’. ’’Sunudai daa iyahai!’’ ka kawagu diyolo’. Om boros ka di Yohu, ’’Sinunudan oku dau do boros do TUHAN, do silihon oku’d TUHAN do raja’ dot Israil!’’ ka dau. ¹³ Om diiri i’ om diiri, om pawalado’ ngai’ no di tambalut di Yohu i rasuk diyolo’ dit id soibau do hiri’d tukad di kawayaon di Yohu. Om pounio’ no diyolo’ i torumpit om pagarango’ no diyolo’ o poingkaa, ’’I Yohu no o raja’ toko’!’’ ka. ¹⁴ - ¹⁵ Om pongupakat noddi i Yohu do sumaap di Raja’ Yoram. Tontok nopoddi om hilo’ po i Yoram id Yisriil do minongoi pokiubat di nongosuhat di hilo’d pisangadan do hilo’d Ramot, di suminangod iyau di Hasail, i raja’ do Siria. Om boros ka di Yohu dot id boyoon do soudor, i tambalut dau’ddi, ’’Ondung kaakun kou do sumiliu oku do raja’, om kada’ no pologoso’ do haro o tongosongulun piya do kosoliwan do mantad hilo’d Ramot do mongoi popoinsan di tulun do hilo’d Yisriil,’’ ka. ¹⁶ Om sakai noddi iyau di korita’-kuda’ dau di don sumasangod om pakayaai no do hilo’d Yisriil. Tontok nopoddi om minongoi kakap i Ahasia, i raja’ do Yohuda, di raja’ Yoram tu’ a’ po nolingos i nosuhat dau. ¹⁷ Om kokito’ddi di madtatamong di walai dot akawas i Yohu do mogiwoyo-woyo’ di tulun dau do miririkot no. Om polohowo’ no dau o boros do poingkaa, ’’Haro ot iso’ o sinompuruan do tulun do mogitanud-tanud do kumaa’d hiti,’’ ka dau. Om boros ka di Yoram, ’’Suhuo’ o songulun di soudor do kikuda’ do mongoi pongilo ondung tambalut tuu iyolo’ ko’ pisangod po,’’ ka dau. ¹⁸ Om ongoi noddi i tulun di sinuhu’ddi solowot di Yohu, om boros ka dau, ’’Mokiilo i raja’ ondung mambalut o korikatan nu’d hiti,’’ ka dau. Om boros ka di Yohu, ’’Nunu ma o diya’d koilo-ilo! Sugku’ nogi’ doho’,’’ ka dau. Om posunudo’ no di madtatamong do walai dot akawas dot id di Raja’ Yoram do nokorikot no i tulun di sinuhu’ddi do hiri’d sinompuruan do tulun diri, nga’ a’ noddi iyau gumuli’. ¹⁹ Om suhuo’ po kawagu dau o songulun do minongoi solowot di Yohu. Om i pinonguhatan dau, om i di Yohu do pinonimbar nga’ iyo iddi gulu tu’, ’’Nunu ma o diya’d koilo-ilo. Sugku’ nogi’ doho’!’’ ka. ²⁰ Om posunudo’ po kawagu di madtatamong di walai dot akawas do nokorikot no do hiri’d sinompuruan do tulun i sinuhu’ddi, nga’ a’ noddi iyau guminuli’. Om boros kaddi dau, ’’Atantu’ no dot i Yohu o boyoon dilo tulun, tu’ poinsakai iyau di korita’-kuda’ dau di don sumasangod om iyo po iyau do tulun di mulau,’’ ka dau. ²¹ Om boros kaddi di Raja’ Yoram, ’’Posodiawo’ i korita’-kuda’ ku!’’ ka dau. Kosodia’ poddi, om pamanau no i Yoram om i Raja’ Ahasia do sopipori-pori do suminakai di korita’-kuda’ diyolo’. Om koruba’ no iyolo’ di Yohu do hiri’d tumo daa di Nabot di gulu po. ²² Om uhoto’ noddi di Yoram i Yohu, ’’Mambalut i’ o kinorikatan nu’d hiti?’’ ka dau. Om boros ka di Yohu, ’’Poingkuro’ddi do mongoi ambalut do solinaid pod haro o bobolian do hiti om i sumambayang dot id tingolig di tinimpuunan di Isibil, i tina’ nu?’’ ka dau. ²³ ’’Takal moti’ iti, oi Ahasia!’’ ka di Yoram dot id di Ahasia. Om pogulio’ no dau i korita’-kuda’ dau, om poggidu’ no do mantad hiri. ²⁴ Nga’ kodongo’ no di Yohu i pana’ dau, om papanao’ no dau dot id di Yoram gisom do nokototos iyau do minamalanat di pawakasan do pana’ dau. Om ilihai nogiddi dau, om pionong nopo o likud di Raja’ Yoram, om gisom do nokorikot do hiri’d tundu-undu’ dau. Om kahaba’ noddi iyau om kapatai no do hiri’d suang di korita’-kuda’ dau. ²⁵ Om boros kaddi di Yohu dot id di Bidkar, i madtatamong kasai’ dau, ’’Osorou nu po do tontok di poinsakai kito di kuda’ om muhut-suhut to di Raja’ Ahab, i tapa’ di Raja’ Yoram do minoro-boros o TUHAN dot id di Ahab do poingkaa, ²⁶ ’Oilaan ku i’ i minamatai di Nabot om i tangaanak dau di konihab. Om mamatos oku no do baino’ do hukuman ku’ndo iya’ do hiti’d kabun diti,’ ka,’’ ka dau. Om boros kaddi kawagu di Yohu dot id tulun di madtatamong kasai’ dau, ’’Ngoyo’ pataamo’ ilo rata’ di Yoram do hilo’d kabun di Nabot om abayaan i’ i hukuman do Kinorohingan dot id dau,’’ ka dau. ²⁷ Om montong-ontong i’ i Ahasia do koinsanai di nongowonsoi’ddi. Om poggidu’ noddi iyau do poinsakai di korita’-kuda’ dau do kuminaa ponong hilo’d bandar do Bait-Hagan. Om gusao’ no di Yohu i Ahasia, om garangai no dau i tulun dau, ’’Ilo’ nga’ patayon i’!’’ ka dau. Om panao’ no diyolo’ i Ahasia om kosuhat no iyau do hiri’d ralan di kumaa do hilo’d Gur, it id somok do bandar do Yibliam. Nga’ nokopoggidu’ kasai’ po iyau do gisom do nokorikot do hilo’d Mogido, om kapatai noddi iyau’d hilo’. ²⁸ Om ngoyo’ no di pagawai di Ahasia i rata’ di Ahasia do pinoguli’ do hilo’d Yorusalim, do mitonggoi di korita’-kuda’ dau. Om lobongo’ no i Ahasia do hiri’d kalabangan do raja’ do hilo’d Bandar di Daud. ²⁹ Nosiliu i Ahasia do raja’ do Yohuda do tontok di kohopod om iso’ do toun di Raja’ Yoram, i tanak di Ahab, do raja’ dot Israil. ³⁰ Om korikot noddi i Yohu do hilo’d Yisriil. Om tontok di nongorongou ngai’ di Isibil i nongowonsoi’ddi, om pamadak no iyau om ponudai no, om liga’ nogiddi do hiri’d liligaon di walai do raja’ do luminuung do hiri’d siriba’. ³¹ Om tontok di suminuang i Yohu do hiri’d wawayaan dot agayo, om pomogiak no i Isibil, ’’Oi Simri! I gampamatai! Nunu ngoyon nu’d hiti?’’ ka dau. ³² Om tingaha’ no i Yohu do hiri’d liligaon, om boro-boros nod, ’’Isai no o sumokodung doho’?’’ ka. Om haro’ddi o duwo ko’ tolu po o pagawai do luminuung do mantad hiri’d liligaon. ³³ Om boros ka di Yohu dot id diyolo’, ’’Pataamo’ dokoyu i tondu’ do hiti’d siriba’!’’ ka dau. Om pataamo’ no diyolo’ i tondu’ddi do hiri’d siriba’, gisom do koromos nopo o raha’ dau do hiri’d tolig om hiri’d kuda’. Om poulakai nogiddi di Yohu di korita’-kuda’ dau i rata’ di Isibil. ³⁴ Om suang noddi i Yohu do hiri’d walai do raja’, om boro-boros nod, ’’Ngoyo’ dokoyu lobongo’ i rata’ di tondu’ di nousung diri, tu’ iyau nopo om tanak i’ do raja’,’’ ka. ³⁵ Nga’ tontok di nongoi daa di piro-piro o tulun i rata’ di Isibil, om nabantalan nopo diyolo’ om iri po i korulung do tulu, om i tulang do gakod om longon dau. ³⁶ Om soira’ di pinoboros diyolo’ iri dot id di Yohu, om boros ka di Yohu, ’’Iti no o minamayaan di nokoboros do TUHAN do pinolombus di Ilia, i susuhuon dau do poingkaa, ’Akanon nondo do tasu o rata’ di Isibil do hilo’d watas do Yisriil. ³⁷ Om iri nopondo toolu-olu’ di rata’ dau om songurias poo do miagal do taii’ do nintorusan, gisom dot a’ nod tulun otutunan,’ ka,’’ ka dau.

¹ Haro o turu’ nohopod o tulun do manangaki di Raja’ Ahab do poingiyon do hilo’d bandar do Samaria. Om ponulis noddi i Yohu do surat do pinotikid ngai’ di boyoon di hiri’d bandar do Samaria, om i tulun dit ongkipangkat, om i tulun di mongilo-ilo di sinakagon di Ahab. Poingkaa o suang di surat diri, ² ’’Iyokoyu ngai’ no i monongkoilo do koinsanai di sinakagon di Raja’ Ahab, om haro ngai’ nogi’ o korita’-kuda’, om rapo-rapo dokoyu do sumangod om haro o bandar dokoyu dit ongkitolig. Om aramit nopondo dokoyu iti surat, ³ om pilion no dokoyu o songulun di sinakagon di Raja’ Ahab dit osonong kopio, om silihon no dokoyu do raja’ dokoyu, om tumotos kou no do mongintirung dau,’’ ka. ⁴ Om soira’ di noilaan diyolo’ o suang di surat, om kongooris noddi kopio iyolo’. Boros ka diyolo’, ’’Nunu’ddi o kasaap-saap toko’ di Yohu, tu’ antangai pogi’ nga’ i Raja’ Yoram piya om i Raja’ Ahasia nga’ a’ i’ nakasaap dau,’’ ka. ⁵ Om oinsanan nopoddi i boyoon di hiri’d bandar diri om it ongkipangkat di tulun do hiri, om i mongilo-ilo di walai do raja’, om i tulun di mongilo-ilo di sinakagon di Raja’ Ahab, do pinoporomut do boros diti dot id di Yohu. Boros ka diyolo’, ’’Minsiriba’ ngai’ nopo iyahai dot id diya’ om posodia’ ngai’ i’ iyahai do tumanud do nunu nopo o tisuhu’ nu. Nga’ a’ i’ iyahai momili’ dot isai nopo do silihon do raja’! Wonsoyo’ nopo it osonong dot osorou nu,’’ ka. ⁶ Om ponulis po kawagu i Yohu do surat dot id diyolo’ do poingkaa, ’’Ondung sumokodung kou doho’, om posodia’ do tumanud dot isuhu’ ku, om patayon ngai’ no dokoyu i manangaki di Ahab om igitan no dokoyu o tulu diyolo’ do hiti’d doho’ do dongiyo’dtid suab do hilo’d Yisriil,’’ ka. Iri nopo i turu’ nohopod o manangaki di Raja’ Ahab diri om poinsugku’ di tulun dit ongkipangkat do hiri’d bandar do Samaria. Om iyolo’ no o minonuduk ngai’ di manangaki di Raja’ Ahab diri. ⁷ Om soira’ di naramit diyolo’ i surat di Yohu, om patayo’ no di tulun dit ongkipangkat di hiri’d bandar do Samaria o koinsanai di turu’ nohopod o manangaki di Raja’ Ahab. Om puloso’ no diyolo’ o tulu do koinsanai di manangaki di Ahab om posuango’ no dot id balatak, om pootodo’ nogiddi dot id di Yohu do hilo’d Yisriil. ⁸ Om kosunudai poddi i Yohu do nakaatod ngai’ no i tulu di manangaki di Raja’ Ahab, om suhuo’ noddi dau iyolo’ do poulud di tulu do pogitimpak-timpakon do duwo o kotumpukon do hiri’d wawayaan di bandar om pologoson nopondo do hiri do gisom do kosuabon kawagu. ⁹ Kosuabai poddi om ongoi no i Yohu do hiri’d wawayaan dot agayo, om boros ka dau dot id koinsanai di tulun di nokotimung do hiri, ’’Iyoho’ no i minogupakat do suminaap di Raja’ Yoram om iyoho’ i minamatai dau; om a’ kou i’ iyokoyu kohompit do kasalaan diri. Nga’ oilaan i’ dokoyu i minamatai ngai’ do tulun diti. ¹⁰ Nokointalang noddi kopio do baino’ dot abayaan kopio o koinsanai di nokoboros do TUHAN do pasal di sinakagon di Ahab. Nabayaan nod TUHAN i pinoboros dau do pinolombus di Ilia, i susuhuon dau,’’ ka dau. ¹¹ Om patayo’ ngai’ poddi di Yohu i koworisan di Raja’ Ahab do suwai, i songingiyon do hilo’d Yisriil, om koinsanai di pagawai om i koombolutan di Raja’ Ahab, om i piro-piro ot imam di mogobi-obi’ di Raja’ Ahab; iso’ po nga’ aiso’ no o pinologos dau do poimpasi. ¹² Om tongkiad no i Yohu do mantad hilo’d Yisriil om pakayaai no dau do hilo’d Samaria. Om hilo’ noddid tanga’d ralan, dot id iso’ o kinoiyonon do roitan do ’’Kampung do Madtatamong do Dumba’ ’’, ¹³ om kosolowot dau o piro-piro o tulun di koworisan di Ahasia, i raja’ do Yohuda. Om uhoto’ no di Yohu iyolo’, ’’Isai kou’ndo?’’ ka dau. Om boros ka diyolo’, ’’Iyahai nopodti om koworisan di Ahasia. Mongoi iyahai’d hilo’d Yisriil do mongoi pogolimbuha’ do koinsanai di sompiiyon do raja’, om i monongodu’ di Raja’ Isibil,’’ ka. ¹⁴ Om boros ka di Yohu dot id tulun dau, ’’Tangkapo’ dokoyu iyolo’!’’ ka dau. Om tangkapo’ ngai’ noddi diyolo’ i tulun diri, om patayo’ no do hiri’d toning dot iso’ o torobong di narasakan no. Koinsanai nopo di pinatai om apat nohopod om duwo o tulun. Om iso’ po nga’ aiso’ no o pinologos dau do poimpasi. ¹⁵ Om lombus po kawagu i Yohu do minamanau. Om kosolowot diri iyau di Yonadab, i tanak di Rikab, di hiri’d tanga’d ralan. Om suwau no i Yohu dau, om boros ka dau, ’’A’ toi miagal i’ o dato dot osorou? Orohian ko i’ daa do sumokodung doho’?’’ ka dau. ’’Oo, orohian oku i’,’’ ka di Yonadab do suminimbar. Om boros kaddi di Yohu, ’’Ondung iyo’ddi, om kaino mitabi’,’’ ka. Om pitabi’ noddi iyolo’ om pasakayo’ no di Yohu i Yonadab di korita’-kuda’ dau. ¹⁶ Om boros ka di Yohu dot id di Yonadab, ’’Tanud pogi’, om kokito ko i’ do kotorodoko’ ku dot id TUHAN,’’ ka dau. Om pitanud noddi iyolo’ do kuminaa do hilo’d Samaria do poinsakai di korita’-kuda’ diyolo’. ¹⁷ Om korikot poddi iyolo’ do hilo’, om patayo’ noddi di Yohu o koinsanai di wari-waris di Raja’ Ahab. Aiso’ no o songulun piya do pinasi dau. Om kowonsoi ngai’ nopo iri do miontok di boros do TUHAN do pinolombus di Ilia. ¹⁸ Om suhuo’ no di Yohu o koinsanai di tulun do Samaria do tumimung, om boros ka dau, ’’I Raja’ Ahab nopo om a’ i’ kosongkuro no o podsusubak do tingolig do Baal; nga’ iyoho’ nopo om a’ ku no paalang-alangon. ¹⁹ Om timungon ngai’ no o koinsanai di nabi di mogobi-obi’ di tingolig do Baal, om koinsanai di tulun do tumuku’ dot id tingolig diri om koinsanai dit imam do mogobi-obi’ di tingolig diri. Kada’ nod haro o songulun po dot a’ rumikot. Tu’ papatahak oku dot ogumu’ o porsombahan dot id Baal. Om isai-isai’ndo ot a’ tuminong om hukuman no do kapatayon,’’ ka dau. Nga’ iti no o pagakal di Yohu om apatai indo o koinsanai di tulun di tumuku’ dot id Baal. ²⁰ Om boros kaddi di Yohu, ’’Papatantu’ no dot iso’ o tadau’d agayo do kopodsubakan do Baal,’’ ka. Om wonsoyo’ no di tulun o miagal diri, ²¹ om i Yohu nga’ popinsunud nogi’ do habar diri do pointongkop do pomogunan dot Israil. Om tontok nopo di norikot i tadau’ddi om rikot ngai’ nopo i modsusubak do Baal, om aiso’ no ot iso’ dot a’ ruminikot. Om suang ngai’ nopo iyolo’ do hiri’d walai do podsubakan do Baal do gisom do nososok tomod. ²² Om suhuo’ no di Yohu it imam di migompi’ di pakayan do modsubak do papatahak ngai’ di pakayan diri dot id koinsanai’d tulun di mongoi podsubak do Baal. Om wonsoyo’ noddi diyolo’ o miagal diri, ²³ om suang noddi i Yohu om i Yonadab, i tanak di Rikab, do hiri’d walai di tingolig do Baal. Om boros kaddi dau dot id toinsanan di tulun do hiri, ’’Antangan no kopio dokoyu ondung osompipi’ i tulun di modsubak do Baal i nokongorikot do hiti, kada’ nod haro o songulun pod sumambayang dot id TUHAN do hiti,’’ ka dau. ²⁴ Om patahak noddi i Yohu om i Yonadab do podsubak diyolo’ do Baal. Nga’ nokosodia’ mantad no di Yohu i walu’ nohopod o tulun di madtatamong om i gunsiou do hiri’d soliwan di walai do tingolig, om nosunudan mantad no dau iyolo’ do poingkaa, ’’Patayon ngai’ no dokoyu i tulun; isai nopo i popologos dot ongoiso’ diyolo’ do mogidu’, om hukuman nod kapatayon!’’ ka. ²⁵ Om kopongo poddi i Yohu om i Yonadab do pinapatahak do porsombahan, om soliwan no i Yohu om boro-boros no iyau do koinsanai di madtatamong om i gunsiou, ’’Suang kou no om patayon ngai’ no dokoyu iyolo’! Kada’ no dokoyu pologoso’ do haro o tongosongulun piya do kopoggidu’!’’ ka dau. Om suang ngai’ noddi iyolo’ do songingkodong no o gayang, om pimpatayai ngai’ no diyolo’ i tulun, om gayato’ ngai’ no diyolo’ i rata’ do suminoliwan. Om suang nogiddi iyolo’ do hiri’d koiyonon dit id gogok kopio di walai do tingolig, ²⁶ do pinoposoliwan di patung do tingolig do Baal, om tutudai noddi diyolo’ iri. ²⁷ Om habao’ ngai’ nopo diyolo’ i tingolig do Baal om i walai di tingolig. Om siliho’ no diyolo’ i walai di tingolig diri do totoiyan do gisom do baino’. ²⁸ Om iyo noddi o kinowoyo-woyoo’ di Yohu do minomunso do tulun di tumuku’ dot id Baal do hilo’d Israil. ²⁹ Nga’ minusui iddi i Yohu di dusa di Yirobiam, i minamayayat do tulun dot Israil do minomonsoi’d dusa, tu’ tuminuku’ i’ iyau di sapi’ do tamas di winonsoi dau do hilo’d Baitol om hilo’d Dan. ³⁰ Om boros kaddi do TUHAN dot id di Yohu, ’’Nowonsoi nu no dot id sinakagon di Raja’ Ahab o koinsanai di pinonuhuan ku diya’. Om iri no o kapamatasan ku dot id diya’ do sinakagon nu nopo om ongosiliu nondo do raja’ dot Israil do gisom di koingapat do manangaki diya’,’’ ka. ³¹ Nga’ a’ i’ i Yohu minumboyo’ dit oturan do TUHAN, i Kinorohingan dot Israil, dot iso-iso’ kopio o ginawo. Nga’ minomit nogi’ iyau di Yirobiam, tu’ minamayayat do tulun dot Israil do minomonsoi’d dusa. ³² Om maso noddi do tinimpuunan do TUHAN do mongingkoro’ o watas do pomogunan dot Israil. Nosolod no di Hasail, i raja’ do pomogunan do Siria, o koinsanai di watas dot Israil ³³ di ponong id koulayon do mantad id Bawang do Yordan om gisom do hiri’d bandar dot Aroir, i ponong id salatan, it id somok di Bawang dot Arnon, om kohompit nogi’ i watas do Giliad om Basan, i kinoiyonon di watas do Gad, Rubin, om Manasi ponong id koulayon. ³⁴ Koinsanai di nongowonsoi di Yohu, do kohompit ngai’ i kosioho’ dau, om nongkotulis ngai’ i’ dot id suang do Buuk di Monusui do pasal do Koinsanai di Raja’ dot Israil. ³⁵ - ³⁶ Om duwo nohopod om walu’ o toun do koloido’ di Yohu do momorinta’ dot Israil do hilo’d Samaria. Om kapatai no iyau om lobongo’ no do hilo’d Samaria. Om kosiliu no do raja’ i Yihoahas, i tanak dau, do suminowoli dau.

¹ Korongou noddi di Atalia, i tina’ di Ahasia, do napatai i Raja’ Ahasia, i tanak dau, om ponuhu’ no iyau do mamatai ngai’ dit id sompiiyon di Ahasia. ² I Yoas poo, i tanak di Ahasia, o napasi. Tontok nopo dit oruhai no daa iyau do patayon do mogitonggoi-tonggoi di tangaanak do kusai di raja’ om tanggayai no iyau di Yosiba. I Yosiba nopo om tanak do tondu’ di Raja’ Yihoram, om tobpinai i’ iyau di Ahasia, nga’ misuwai po o tina’ diyolo’. Tinanggayan di Yosiba i Yoas do miwoyo’ di mitatamong di Yoas dot id iso’ o bilik do toodopon do hiri’d Walai’d Sasambayangan dot Agayo. Om lisoko’ no dau iyolo’d hiri, tu’ mada’ dot okito di Atalia. Om a’ iddi i Yoas napatai. ³ Onom diri o toun do koloido’ di Yosiba do momogompi’ di tanak diri do hiri’d Walai’d Sasambayangan dot Agayo di maso di Raja’ Atalia do momorinta’. ⁴ Nga’ tontok di koturu’d toun, om lohowo’ ngai’ no di Yoyada it Imam, i boyoon do soudor, i madtatamong kasai’ di raja’ do tondu’, om i migompi’ di walai’d raja’ do mongoi solowot dau do hiri’d Walai’d Sasambayangan dot Agayo. Om kongorikot ngai’ poddi iyolo’, om suhuo’ no di Yoyada iyolo’ do sumumpa’ do tumanud dot isuhu’ dau. Om pokitono’ nogiddi di Yoyada iyolo’, di Yoas i tanak di Ahasia, ⁵ om boro-boros no iyau do poingkaa, ’’Soira’ nopo do kumaraja’ kou do tadau’d Sabat, om sompitolu nopondo dokoyu, om tumamong di walai do raja’, ⁶ om sompitolu no kawagu om tumamong di wawayaan di roitan do Wawayaan do Sur, om sompitolu nondo kawagu om tumamong do hiri’d dotolikudan di tulun di madtatamong do hilo’d wawayaan dot agayo. ⁷ Iri nopo i duwo o sinompuruan do soudor dit a’ kumaraja’ do tadau’d Sabat, om tumamong nondo do hilo’d Walai’d Sasambayangan dot Agayo do mongintirung di Raja’ Yoas. ⁸ Intirungan no kopio dokoyu i Raja’ Yoas do mikuwo’d songingkodong o gayang dokoyu, om pitonud-tonudan no dokoyu iyau do hinonggo nopo ot ongoyon dau. Isai nopo i minsomok-somok dokoyu om patayon nopo,’’ ka dau. ⁹ Om minumboyo’ ngai’ i’ i boyoon do soudor di boros di Yoyada, om minangangat nogi’ iyolo’ di soudor diyolo’ dit a’ kumaraja’ do tadau’d Sabat om i soudor di kumaraja’ do tadau’d Sabat do minongoi solowot di Yoyada. ¹⁰ Om tikidai ngai’ noddi di Yoyada i boyoon do soudor diri do piro-piro tandus, om kolid, i di Raja’ Daud daa di songingopi’ do hiri’d suang di Walai’d Sasambayangan dot Agayo. ¹¹ Om sinuhu’ di Yoyada o piro-piro tulun do tumamong do hiri’d posorili’ di hiri’d ponong id wawayaan di Walai’d Sasambayangan dot Agayo, om songingkodong no diyolo’ o gayang tu’ mongintirung iyolo’ di raja’. ¹² Om angatai noddi di Yoyada i Yoas do sumoliwan, om potupio’ no dau i tupi’ do raja’ dot id tulu di Yoas, om onuwai no dau iyau do buuk dot oturan. Om siliho’ noddi i Yoas do raja’ om popimboroso’ nori dot id rayat. Om panapap noddid palad i rayat do mikuwo’d minomoros dot opuhod do poingkaa, ’’Otogui po o raja’!’’ ka. ¹³ Om korongou’ddi di Raja’ Atalia i gara’ di madtatamong om gara’ di tulun dot ogumu’. Om osiau nopo iyau do minongoi’d hiri’d Walai’d Sasambayangan dot Agayo, i kinotimungon di tulun dot ogumu’. ¹⁴ Om kokito no di Atalia i raja’ do wagu do poingkakat do hiri’d toning di torigi dot id dotimbabaan di wawayaan di Walai’d Sasambayangan dot Agayo tu’ tumanud do tadat do tontok do momili’ do raja’. Om nosorilian i Yoas do boyoon do soudor om i popouni do torumpit. Om oinsanan nopo i rayat do sampangkis-pangkis dot atataadan om popinguni do torumpit. Om hurako’ nopo di Atalia o pakayan dau dot atatagadan om pamagarang nod, ’’Takal dot araat! Takal dot araat!’’ ka. ¹⁵ Om mada’ i’ i Nabi Yoyada do patayon i Raja’ Atalia do hiri’d toning di Walai’d Sasambayangan dot Agayo. Om boros kaddi dau dot id koinsanai di boyoon do soudor, ’’Gayato’ dokoyu iyau do hilo’d soliwan do pawayaon dilo duwo o borisan do madtatamong. Om patayon ngai’ nopo ot isai nopo i mumbal daa do mamasi dau,’’ ka dau. ¹⁶ Om tangkapo’ no diyolo’ i Atalia, om gayato’ no do kuminaa do hiri’d walai do raja’. Om patayo’ nogiddi diyolo’ iyau do hiri, do hiri’d dotimbabaan di wawayaan dot agayo di roitan do Wawayaan do Kuda’. ¹⁷ Om suhuo’ no di Yoyada it Imam diri, i Raja’ Yoas om i rayat do mamatos dot id TUHAN do sumiliu iyolo’ do tulun di don TUHAN; om sinuhu’ nogi’ dau i raja’ do mamatos dot id rayat. ¹⁸ Om soruango’ noddi di tulun dot ogumu’ i walai do tingolig do Baal, om raago’ no diyolo’ i walai; om minumuk diyolo’ i pananaraban do porsombahan, om i tingolig. Om patayo’ no diyolo’ i Matan, it imam do mogobi-obi’ do Baal do hiri’d dotimbabaan di pananaraban do porsombahan. Om suhuo’ no di Yoyada i piro-piro madtatamong do madtamong di Walai’d Sasambayangan dot Agayo. ¹⁹ Om tonudo’ no di Yoyada it Imam diri, om i piro-piro o boyoon do soudor, om i madtatamong di raja’, om i madtatamong do hiri’d walai’d raja’, i Yoas do mantad hiri’d Walai’d Sasambayangan dot Agayo om gisom do nokorikot do hiri’d walai do raja’; om ohuyud nopo i tulun dot ogumu’ do manud-tanud do hiri’d tohuri-huri diyolo’. Om suang noddi i Raja’ Yoas di walai do raja’, do minaya’ di wawayaan di roitan do Wawayaan do Madtatamong, om irikau no do hiri’d tirikohonon do raja’. ²⁰ Om oinsanan nopoddi i rayat dot ongotood. Om osimbayan diri o hiri’d bandar diyolo’ di napatai i Atalia do hiri’d walai di raja’. ²¹ Om turu’ nogi’ o toun di Yoas di nosiliu iyau do raja’ do Yohuda.

¹ Tontok di koturu’ nod toun di Raja’ Yohu do momorinta’ dot Israil, om kosiliu no i Yoas do raja’ do Yohuda. Om apat nohopod o toun do koloido’ di Raja’ Yoas do momorinta’ do hilo’d Yorusalim. Tina’ nopo dau om i Sibia, i tulun do mantad id bandar do Borsiba. ² Om solinaid nopo di Yoas do poimpasi om momonsoi kasai’ i’ iyau do korohian do TUHAN, tu’ notudukan i’ iyau di Yoyada it Imam diri. ³ Nga’ iyo piya’ddi nga’ a’ i’ dau rinaag i tiyonon do modsubak do tingolig. Om maso poddi di rayat do papatahak do porsombahan om modtutud iyolo’ do kominyan do hiri. ⁴ Insan tadau, om lohowo’ no di Raja’ Yoas i piro-piro ot imam, om suhuo’ no dau iyolo’ do poopi’ di tusin dit aramit diyolo’ do mantad id porsombahan do hiri’d Walai’d Sasambayangan dot Agayo, i tusin di pambayar do kapatahakan do porsombahan om i tusin di patahakon do tumanud do kagaanan do ginawo. ⁵ Pointikid-tikid dit imam om mongilo-ilo ngai’ nopo di tusin dit angaramit diyolo’ do mantad id tulun di pogobi-obian diyolo’. Om iri no tusin diri o pakayon do pomonsoi di nangaraag-raag do hiri’d Walai’d Sasambayangan dot Agayo. ⁶ Nga’ gisom piya di koduwo no nohopod om tolu do toun di Raja’ Yoas do momorinta’ nga’ a’ po dit imam nowonsoi i nangaraag-raag di hiri’d Walai’d Sasambayangan dot Agayo. ⁷ Gowoi poddi om lohowo’ no di Yoas i Yoyada it Imam diri, om it imam do suwai, om uhoto’ no dau iyolo’, ’’Nokuro tu’ a’ po dokoyu nosonong i Walai’d Sasambayangan dot Agayo? Mantad pondo do baino’, om a’ kou no koino-ino do poopi’ di tusin dit aramit dokoyu. Patahakon ngai’ nopondo dokoyu iri do maan do pononong di Walai’d Sasambayangan dot Agayo,’’ ka dau. ⁸ Om kotumboyo’ ngai’ nopoddi it imam dot a’ monimung do tusin do mantad id rayat, om a’ mononong di Walai’d Sasambayangan dot Agayo. ⁹ Om panganu noddi i Yoyada dot iso’ o pati’, om luangai no dau o hiri’d sompon, om poiliho’ no do hiri’d toning di pananaraban do porsombahan do ponong id wanan di wawayaan di wayaan do sumuang di Walai’d Sasambayangan dot Agayo. Om popisuang-suangon nopo dit imam di pointamong do hiri’d wawayaan di Walai’d Sasambayangan dot Agayo i tusin dit aramit diyolo’ do mantad id tulun dot ogumu’ do hiri’d pati’ddi. ¹⁰ Soira’ dit ogumu’ o tusin do hiri’d pati’ om ngoyon no di gomponulis do raja’, om i Boyoon dot Agayo dot Imam intobo’ i tusin diri, om lopoton nogindo diyolo’. ¹¹ Om otulis pondo diyolo’ o kogumuon di tusin om patahakon nogindo diyolo’ di piro-piro o mandur di momohuruan di karaja’ do mononong di Walai’d Sasambayangan dot Agayo. Om iri nondo i mandur diri o mamagadsi’ di tukang kayu, om i tukang do mamaal di walai, ¹² om i tukang watu, om i mamabak do watu. Om iyolo’ nogi’ o momoli do kayu, om watu, om mongilo-ilo di tusin do posoliwanon do maan do pononong di Walai’d Sasambayangan dot Agayo. ¹³ Nga’ a’ i’ pinakai i tusin diri do pomonsoi do sangkir do pirok, ko’ mimpun, ko’ torumpit, ko’ pakakas po do lampung, ko’ nunu nopo o pakakas do suwai di tamas ko’ pirok do wonsoyon. ¹⁴ Iri nopo tusin diri om pogodsion ngai’ nopo di tukang, om pomoli do pakakas di pakayon. ¹⁵ Iri ngai’ nopo i mandur diri nga’ ongotulid kopio o ginawo. Om a’ iddi minog do haro o kopoilaan ondung poingkuro o kinapamakayan di tusin. ¹⁶ Nga’ iri nopo tusin dit aramit di maan do porsombahan do poningolon om i porsombahan do pangampun do dusa, om a’ i’ posuangon do hiri’d pati’ddi. Tu’ tusin nopoddi om iri no it imam o kaanu. ¹⁷ Tontok nopoddi om sinangod om sinolod di Hasail, i raja’ do Siria diri, o bandar do Gat. Om ngoyon po daa dau songodo’ o Yorusalim. ¹⁸ Om paatadai no di Yoas i Raja’ Hasail dot ipuhawang. Iri nopo pinopuhawang diri nga’ nanu do mantad id koinsanai do porsombahan di nakatahak dot id TUHAN, do mantad po dit i Yosapat, om i Yoram, om i Ahasia, o raja’ di momorinta’ dit id gulu ko’ i Yoas. Om minanu nogi’ do mantad id porsombahan di Yoas, om koinsanai di tamas di hiri’d poiiyanan do hiri’d Walai’d Sasambayangan dot Agayo, om i hiri’d walai do raja’. Om a’ noddi nabayaan i Hasail do minongoi panangod do Yorusalim. ¹⁹ - ²¹ Om pogipapakat ngai’ noddi i pagawai do pomorinta’ do Yohuda do sumaap di Raja’ Yoas. Om haro’ddi o duwo o tulun dot id pialatan diyolo’, do ngaran nopo diyolo’ om i Yosakar, i tanak di Simiat, om i Yosabad, i tanak di Somir, do minongoi pamatai di Yoas do hiri’d walai dau dit id timpak do tana’ di pinotimbun, i hiri’d ponong id koulayon do mantad id Yorusalim, it id ralan do kumaa do hilo’d bandar do Sila. Om lobongo’ noddi i Raja’ Yoas do hiri’d kalabangan do raja’ do hiri’d Bandar di Daud. Om kosiliu noddi do raja’ i Amasia, i tanak di Yoas, do suminowoli dau. Koinsanai di nongowonsoi di Raja’ Yoas om nongkotulis ngai’ i’ dot id suang do Buuk di Monusui do Pasal Ngai’ di Raja’ do Yohuda.

¹ Tontok di koduwo no nohopod om tolu do toun do pomorintaan di Yoas, i tanak di Ahasia, do hilo’d Yohuda, om kosiliu no i Yihoahas, i tanak di Yohu, do raja’ dot Israil. Om hopod om turu’ o toun di Yoahas do momorinta’ do hilo’d Samaria. ² Om i Yihoahas nga’ miagal i’ di Raja’ Yirobiam, i minomorinta’ dit id gulu ko’ iyau tu’ minomonsoi’d dusa dot id toguang do TUHAN, om minamayayat do tulun dot Israil do minomonsoi’d dusa. A’ i’ iyau insan koumbal do rumologo do mantad id karaaton dau’ddi. ³ Om iri noddi o kinatagadan do TUHAN dot Israil, om pinologos diri do TUHAN i Raja’ Hasail, i raja’ do Siria, om i Binhadad, i tanak dau, do managalai-galai do mangala’ dot Israil dot id pisangadan. ⁴ Om sambayang noddi i Yihoahas dot id TUHAN, om korongou i’ do TUHAN i sambayang dau, tu’ okito id TUHAN o korongito’ di raja’ do Siria do mongulok-ulok di tulun dot Israil. ⁵ Om onuwai iddi do TUHAN o tulun dot Israil do songulun o boyoon di pinopoidu’ diyolo’ do mantad id pongulok-ulok do tulun do Siria. Om osimbayan noddi iyolo’ do miagal di gulu po. ⁶ Nga’ iyo piya’ddi nga’ a’ i’ i tulun dot Israil tuminingkod do momonsoi’d dusa di tinimpuunan di Raja’ Yirobiam. Om pinologos i’ diyolo’ i patung do tingolig dot Asira do hilo’d Samaria. ⁷ Om aiso’ noddi o soudor di Yihoahas, suwai ko’ iri po limo nohopod o soudor dit ongkikuda’, om hopod o korita’-kuda’, om hopod noribu o soudor. Tu’ nangapatai ngai’ no di raja’ do Siria i soudor di Raja’ Yihoahas. ⁸ Om koinsanai di nongowonsoi di Raja’ Yihoahas do suwai om i kosioho’ dau nga’ nongkotulis ngai’ i’ dot id suang do Buuk di Monusui do Pasal Ngai’ di Raja’ dot Israil. ⁹ Om kapatai noddi i Raja’ Yihoahas om lobongo’ no do hilo’d Samaria. Om kosiliu no do raja’ i Yihoas, i tanak dau, do suminowoli dau. ¹⁰ Tontok di kotolu nohopod om turu’ do toun do pomorintaan di Yoas do hilo’d Yohuda, om kosiliu no do raja’ dot Israil i Yihoas, i tanak di Yihoahas. Om hopod diri om onom o toun dau do momorinta’ do hilo’d Samaria. ¹¹ Iyau nga’ minomonsoi nogi’ do dusa dot id TUHAN tu’ minusui di karaato’ di Raja’ Yirobiam do minamayayat do tulun dot Israil do minomonsoi’d dusa. ¹² Koinsanai di nongowonsoi di Raja’ Yihoas om i kosioho’ dau do suminangod di Amasia, i raja’ do Yohuda, nga’ nongkotulis ngai’ i’ dot id suang do Buuk di Monusui do Pasal Ngai’ di Raja’ dot Israil. ¹³ Om kapatai noddi i Raja’ Yihoas om lobongo’ no do hiri’d kalabangan do raja’ do hilo’d Samaria. Om kosiliu no do raja’ i Yirobiam di koduwo, i tanak dau, do suminowoli dau. ¹⁴ Insan o maso om kadalaai no do suminakit i Nabi Ilisa, om ongoi no i Raja’ Yihoas kakap dau. Om soira’ di nokito di Raja’ Yihoas dot oruhai nod matai i Ilisa, om ihad no iyau do mikuwo’d minoro-boros dot, ’’Apa’, Apa’, iya’ no it okoris kopio do minongintirung dot Israil!’’ ka dau. ¹⁵ Om boros ka di Ilisa dot id raja’, ’’Ngoyo’ ilo powakasan do pana’, om manu no do pana’,’’ ka dau. Om ngoyo’ no di Raja’ Yihoas iri, ¹⁶ om suhuo’ no iyau di Ilisa do sumodia’ do mamana’. Om sodia’ noddi i Raja’ Yihoas do mamana’, nga’ pakamao’ no di Ilisa o palad dau do hiri’d palad di Yoas. ¹⁷ Om ukabai no di Raja’ Yihoas i liligaon di potimbaba’ ponong id pomogunan do Siria do tuminanud di pinonuhuan di Ilisa. Om boros ka di Ilisa, ’’Papanao’ ino pana’ nu!’’ ka. Om papanao’ no di raja’, om boros ka di Ilisa, ’’Iya’ no o pana’ do TUHAN. Ino no o pana’ do pangala’ do TUHAN do Siria. Sumangod ko nondo do tulun do Siria do hilo’d Apik om aala’ nu indo iyolo’,’’ ka dau. ¹⁸ Om suhuo’ no di Ilisa i Raja’ Yoas do manganu di pana’ di noolu’, om popimbobogon indo do hiri’d tana’. Om popimbobogo’ no di raja’ iri do hiri’d tana’ dot intolu, om tingkod noddi iyau. ¹⁹ Om kotogod noddi i Ilisa. Boros ka dau dot id raja’, ’’Nokuro i’ tu’ a’ nu pinopimbobog dot ongoilimo toi ko’ ongoingonom po, om aala’ nu i’ daa’ndo kopio i tulun do Siria? Nga’ iyo nopoddi om intolu ko no do kamanang do sumangod di tulun do Siria,’’ ka dau. ²⁰ A’ no alaid do mantad diri om kapatai no i Ilisa, om lobongo’ noddi. Koubasanan nopo do tontok diri nga’ monikid toun nopo do haro o piro-piro o sinompuruan do tulun do Muab di mananakau do mongoi panangod di pomogunan dot Israil. ²¹ Om haro’ddi dot insan o tadau, do maso di tulun dot Israil do momolobong do tulun do napatai, om sigog id kokito diyolo’ o sonsinompuruan do tulun do Muab do rumikot, om poddosi-dosi nopo iyolo’ nga’ pataamo’ nopo diyolo’ i rata’ di tulun do hiri’d suang di lobong di Ilisa, om poggidu’ no iyolo’. Nga’ kotopis nopoddi i rata’ddi di tulang di Ilisa, nga’ koposiai no kawagu om ingkakat noddi. ²² Solinaid nopo do pomorintaan di Raja’ Yihoahas, om songodon kasai’ nopo di Hasail, i raja’ do Siria, o tulun dot Israil. ²³ Nga’ a’ id TUHAN insan kolihuwai o tulun dau. Osianan i’ iyau diyolo’ om osonong iyau dot id diyolo’. Om a’ i’ dau pinologos dot opunso kopio iyolo’ suwai ko’ tinulung i’ dau iyolo’ tu’ osorou i’ dau i tumpongo dau dot id di Abraham om id di Isak om id di Yakub. ²⁴ Om kapatai noddi i Hasail, i raja’ do pomogunan do Siria, om kosiliu no do raja’ i Binhadad, i tanak dau. ²⁵ Tontok dit i Yihoas o raja’ dot Israil, om kaala’ no dau i Binhadad dot intolu. Om kaanu no kawagu dau i bandar di nongosolod di Raja’ Binhadad di maso po do pomorintaan di Raja’ Yihoahas, i tapa’ di Yihoas.

¹ Tontok di koduwo nod toun do pomorintaan di Raja’ Yihoas, i tanak di Raja’ Yihoahas do hilo’d Israil, om kosiliu no i Amasia, i tanak di Yoas do raja’ do Yohuda. ² Tontok nopoddi om duwo no nohopod om limo o toun do tumur dau, om duwo nohopod om siam o toun dau do momorinta’ do hilo’d Yorusalim. Tina’ nopo dau om i Yoadan, i mantad hilo’d Yorusalim. ³ Om minomonsoi i’ i Amasia di korohian do TUHAN. Nga’ a’ i’ ma iyau nokoiyo di Daud, i taki-aki dau, suwai ko’ minusui no iyau di tapa’ dau, ⁴ tu’ a’ i’ dau rinaag i tiyonon do tulun do modsubak do tingolig, om gowoi poddi om patahak kasai’ po i rayat do porsombahan om modtutud do kominyan do hiri. ⁵ Om soira’ di nokogirot o kinosilihan di Amasia do raja’, om ponuhu’ noddi iyau’d tulun do mongoi pamatai ngai’ di pagawai di minamatai di tapa’ dau. ⁶ Nga’ a’ i’ dau pinatai i tangaanak di pagawai’ddi, tu’ boros nopod TUHAN dot id suang di Tourat di Musa om poingkaa, ’’Kada’ hukumai do kapatayon o molohing dot i kasalaan do tanak dau o kopomohukuman. Om kada’ hukumai do kapatayon o tangaanak dot i kasalaan do tapa’ diyolo’ o kopomohukuman. Iri no i tulun di minomonsoi di kasala’ o hukuman do kapatayon,’’ ka. ⁷ Haro ot insan dot id pinisangadan do minamatai i Raja’ Amasia do hopod noribu o soudor dot Idom do hilo’d rantai di roitan do Rantai do Silaon, om nosolod nogi’ dau o bandar do Sila, om pungaranai noddi dau o bandar diri do Yoktiil. Om Yoktiil kasai’ po o ngaran do bandar diri do gisom do baino’. ⁸ Om ponuhu’ noddi i Raja’ Amasia do piro-piro o tulun dau do minongoi popoilo di Yihoas, i raja’ dot Israil, do mangangat iyau di Yoas do misangod. ⁹ Nga’ ponuhu’ no i Raja’ Yihoas do tulun do mongoi posunud dot isimbar dau do poingkaa, ’’Insan o maso om poromut no do boros i korugian do hilo’d konulu-nuluan do Libanon dot id kokoyuan dot aras do poingkaa, ’Pokowinai di tanak ku i tanak nu’d tondu’, oi guas dot aras,’ ka. Nga’ talib no o songinan di nintorusan do hiri om pingulakai no i korugian diri. ¹⁰ Minggayo-gayo ko daa’ddi, oi Amasia, tu’ naala’ nu i’ i tulun dot Idom. Nga’ osonong nogi’ do poulaon nu i kinamanangan nu’ddi om mundorong nopo do hino’d walai nu. Nokuro tu’ mogihum ko po do kosusaan nu di poporikot nod koinggoritan dot id diya’ om id rayat nu?’’ ka. ¹¹ Nga’ a’ i’ di Amasia pinusou i boros di Yihoas. Om pamanau i’ i Raja’ Yihoas om i tulun ngai’ dau do minongoi sangod di Raja’ Amasia do hilo’d Bait-Simis, i hilo’d Yohuda. ¹² Om kaala’ ngai’ iddi i soudor di Amasia om koinsanai nopo iyolo’ do minogidu’, om sompori-pori do minuli’ dot id walai diyolo’. ¹³ Om tangkapo’ no di Yihoas i Amasia. Om soruango’ no dau o Yorusalim om raago’ no dau i tolig di bandar do konoruo’ nopo om haro i’ doti’ o duwo nahatus o mito; do mantad pod hiri’d Wawayaan dot Agayo di roitan dot Ipraim om gisom do hiri’d wawayaan di roitan do Wawayaan do Linsuk. ¹⁴ Om tanggayai ngai’ nopo di Raja’ Yihoas i tamas om i pirok di nokito dau om koinsanai di konunu-nunuan dit id suang di Walai’d Sasambayangan dot Agayo om koinsanai di dapu’ do hiri’d walai do raja’, do guminuli’ do hilo’d Samaria. Om tinanggayan nogi’ dau o piro-piro tulun di kipangkat do hilo’d Samaria. ¹⁵ Koinsanai di nongowonsoi di Raja’ Yihoas, do kohompit ngai’ i kosioho’ dau dot id pisangadan diyolo’ di Amasia, i raja’ do Yohuda, nga’ nongkotulis ngai’ i’ dot id suang do Buuk di Monusui do Pasal Ngai’ di Raja’ dot Israil. ¹⁶ Om kapatai noddi i Raja’ Yihoas om lobongo’ no do hiri’d kalabangan do raja’ di hilo’d Samaria. Om kosiliu no do raja’ i Yirobiam di koduwo, i tanak di Yoas, do suminowoli dau. ¹⁷ Om hopod po om limo o toun di Amasia do poimpasi do mantad di napatai i Yihoas, i raja’ dot Israil. ¹⁸ - ²¹ Nga’ pogipapakat noddi i tulun do hilo’d Yorusalim do mamatai di Amasia. Gowoi poddi om poggidu’ no iyau do kuminaa do hilo’d bandar do Lakis. Nga’ gusao’ i’ iyau di pisangod dau, om patayo’ no diyolo’ iyau di hilo’. Om pasakayo’ no diyolo’ do kuda’ i rata’ dau, do pinakaa do hilo’d Yorusalim, om lobongo’ no do hiri’d kalabangan do raja’ do hilo’d Bandar di Daud. Om siliho’ no di tulun do Yohuda do raja’ i Usia, i tanak di Amasia do kusai, di hopod nogi’ om onom o toun dau. Om iri nopo suwai do nongowonsoi di Raja’ Amasia om nongkotulis ngai’ i’ do hiri’d suang do Buuk di Monusui do Pasal Ngai’ di Raja’ do Yohuda. ²² Om di nopoddi napatai i Amasia, i tapa’ di Usia, om ngoyo’ no di Usia solodo’ kawagu o bandar dot Ilat, om wonsoyo’ no dau kawagu. ²³ Tontok di kohopod no om limo do toun do pomorintaan di Raja’ Amasia, i tanak di Yihoas do hilo’d Yohuda, om kosiliu no do raja’ dot Israil i Yirobiam di koduwo. Om apat nohopod om iso’ o toun dau do momorinta’ do hilo’d Samaria. ²⁴ Om minomonsoi i’ iyau do dusa dot id toguang do TUHAN tu’ minusui iyau di karaaton di Raja’ Yirobiam di koiso’, i minamayayat do tulun dot Israil do momonsoi’d dusa. ²⁵ Om i Raja’ Yirobiam di koduwo o minonolod kawagu do koinsanai di watas mantad dot Israil do mantad hiri’d ralan do kumaa do hilo’d Hamat, it id utara, om gisom do hilo’d Rahat do Napatai di hilo’d salatan. Om kopiontok nopori di batos do TUHAN, i Kinorohingan dot Israil, i pinolombus di Nabi Yunus, i tanak di Amitai, i susuhuon dau do mantad hilo’d Gat-Hipir. ²⁶ Om kokito nod TUHAN o koinggoritan do tulun dot Israil dit a’ ogina-gina’ om aiso’ no o songulun piya do monguhup diyolo’. ²⁷ Om a’ i’ o TUHAN orohian do momunso kopio dot Israil do gisom dot alaid. Om tulungo’ iddi dau iyolo’ dot i Yirobiam di koduwo o pinawayaan dau di ponulung dau. ²⁸ Om koinsanai di nongowonsoi di Raja’ Yirobiam di koduwo, do kohompit ngai’ i kosioho’ dau dot id pisangadan, om i kinowoyo-woyoo’ dau do minanganu kawagu do Damsik om Hamat do patahakon do tulun dot Israil, nga’ nongkotulis ngai’ i’ dot id suang do Buuk di Monusui do Pasal Ngai’ di Raja’ dot Israil. ²⁹ Om kapatai noddi i Yirobiam di koduwo om lobongo’ no do hiri’d kalabangan do raja’. Om kosiliu nod raja’ i Sakaria, i tanak dau, do suminowoli dau.

¹ Tontok di koduwo no nohopod om turu’ do toun do pomorintaan di Yirobiam di koduwo do hilo’d Israil, om kosiliu no i Usia, i tanak di Amasia, do raja’ do Yohuda. ² Tontok nopoddi om hopod no om onom o toun dau. Om limo nohopod om duwo o toun dau do minomorinta’ do hilo’d Yorusalim.Ngaran nopo do tina’ dau om i Yikolia, i mantad hilo’d Yorusalim. ³ Om i Usia nga’ minusui i’ di tapa’ dau tu’ minomonsoi di korohian do TUHAN. ⁴ Nga’ a’ i’ dau rinaag i tiyonon do tumuku’ dot id tingolig om gowoi poddi om kakal po di rayat do papatahak do porsombahan om modtutud do kominyan do hiri. ⁵ Om porikatai nod TUHAN iyau do toruol do kusta. Om a’ nopo lumingos i toruol diri gisom do pinosuwai-suwai iyau dot id iso’ o walai om pinotingkod di karaja’ dau do gisom do nikapatai dau. Om i Yotam diri, i tanak dau, o wakil dau do momorinta’ di rayat. ⁶ Om koinsanai di nongowonsoi di Usia om nongkotulis ngai’ i’ do hiri’d suang do Buuk di Monusui do Pasal Ngai’ di Raja’ do Yohuda. ⁷ Om kapatai noddi i Usia om lobongo’ no do hiri’d kalabangan do raja’ do hilo’d Bandar di Daud. Om kosiliu nod raja’ i Yotam, i tanak dau’d kusai, do suminowoli dau. ⁸ Tontok di kotolu no nohopod om walu’ do toun do pomorintaan di Raja’ Usia do hilo’d Yohuda, om kosiliu no i Sakaria, i tanak di Yirobiam di koduwo, do raja’ dot Israil. Om minomorinta’ iyau do hilo’d Samaria do solinaid dot onom o tulan. ⁹ Om iyau nga’ miagal i’ ngai’ di raja’ dit id gulu ko’ iyau tu’ minomonsoi i’ iyau’d dusa dot id TUHAN. Om minusui iyau do kararaat di Raja’ Yirobiam di koiso’, tu’ minamayayat do tulun dot Israil do minomonsoi’d dusa. ¹⁰ Om pongupakat no i Salum, i tanak di Yabis, do sumaap di Raja’ Sakaria. Om patayo’ no dau i Sakaria do hilo’d Yibliam, om sowoli no iyau do suminiliu’d raja’. ¹¹ - ¹² Om kabayaai no i pinabatos do TUHAN dot id di Raja’ Yohu do korikot no di sinakagon dau di koingapat ot osiliu do raja’ dot Israil. Om iri nopo nongowonsoi di Raja’ Sakaria do suwai om nongkotulis ngai’ i’ do hiri’d suang do Buuk di Monusui do Pasal Ngai’ di Raja’ dot Israil. ¹³ Tontok di kotolu no nohopod om siam do toun do pomorintaan di Raja’ Usia do hilo’d Yohuda om kosiliu no i Salum, i tanak di Yabis, do raja’ dot Israil. Om sombulan no o koloido’ dau do momorinta’ do hilo’d Samaria, ¹⁴ tu’ minongoi i Monahim, i tanak di Gadi, do hilo’d Samaria di mantad iyau do hilo’d Tirsa. Om patayo’ noddi dau i Salum, om sowoli no iyau do suminiliu’d raja’. ¹⁵ - ¹⁶ Tontok di hiri’d tindalanon i Monahim do mantad hilo’d Tirsa, om nakawaya’ iyau do hilo’d bandar do Tapua, om suminuang daa iyau do hiri’d bandar diri nga’ a’ i’ iyau di tulun do hiri niwangan. Gowoi poddi om raago’ no dau i bandar diri gisom do naraag no kopio, om pinatai ngai’ dau i tulun do hiri, om iri nogi’ i hiri’d kinoiyonon dit id posorili’. Om nulayak nogi’ dau o tian do tongoondu’ di monontian.Koinsanai di nongowonsoi di Raja’ Salum, do kohompit ngai’ i pakat dau, om nongkotulis ngai’ i’ do hiri’d suang do Buuk di Monusui do Pasal Ngai’ di Raja’ dot Israil. ¹⁷ Tontok di kotolu nohopod om siam do toun do pomorintaan di Raja’ Usia do hilo’d Yohuda, om kosiliu no i Monahim, i tanak di Gadi, do raja’ dot Israil. Om hopod o toun do koloido’ dau do momorinta’ do hilo’d Samaria. ¹⁸ Om solinaid nopo dau do poimpasi om momonsoi kasai’ nopo iyau’d dusa dot id TUHAN, tu’ minusui iyau di karaato’ di Raja’ Yirobiam di koiso’, i minamayayat do tulun dot Israil do minomonsoi’d dusa. ¹⁹ Om soira’ di minongoi panangod dot Israil, i Pul, i raja’ dot Asur, om onuwai no iyau di Raja’ Monahim do 34,000 o kilogram do pirok, tu’ mokimamaha’ iyau dot uhupan do popogirot do pomorintaan dau do hilo’d Israil. ²⁰ Nokoonuan nopo di Monahim do tusin diri, om mantad id tulun dot Israil di kaya’. Sinansagan dau iyolo’ do papatahak do sorolimaan nohopod do tusin do pirok. Kaanu poddi di Pul i tusin diri om uli’ no iyau do hilo’d pomogunan dau. ²¹ Koinsanai di nongowonsoi di Raja’ Monahim om nongkotulis ngai’ i’ do hiri’d suang do Buuk di Monusui do Pasal Ngai’ di Raja’ dot Israil. ²² Om kapatai noddi i Monahim om lobongo’ no, om kosiliu nod raja’ i Pikaya, i tanak dau’d kusai, do suminowoli dau. ²³ Tontok di kolimo no nohopod do toun do pomorintaan di Raja’ Usia do hilo’d Yohuda, om kosiliu no i Pikaya, i tanak di Monahim, do raja’ dot Israil. Om duwo o toun dau do momorinta’ do hilo’d Samaria. ²⁴ Om minomonsoi iyau do dusa dot id TUHAN tu’ minusui iyau do karaato’ di Raja’ Yirobiam di koiso’, tu’ minamayayat do tulun dot Israil do minomonsoi’d dusa. ²⁵ Om pongupakat no do limo nohopod o tulun do mantad hilo’d Giliad o tiso’ di boyoon do soudor dau, di roitan dot i Pika, i tanak di Rimalia. Om patayo’ noddi diyolo’ i Pikaya dot id suang dot iso’ o kuta’ do hiri’d walai’d raja’ do hilo’d Samaria. Om kosiliu noddi i Pika do raja’ do suminowoli di Pikaya. ²⁶ Koinsanai di nongowonsoi di Raja’ Pikaya, om nongkotulis ngai’ i’ do hiri’d suang do Buuk di Monusui do Pasal Ngai’ di Raja’ dot Israil. ²⁷ Tontok di kolimo no nohopod om duwo do toun do pomorintaan di Raja’ Usia do hilo’d Yohuda, om kosiliu nod raja’ i Pika, i tanak di Rimalia do hilo’d Israil. Om duwo nohopod o toun dau do momorinta’ do hilo’d Samaria. ²⁸ Om minomonsoi iyau do dusa dot id TUHAN, tu’ minusui iyau di Raja’ Yirobiam di koiso’ do minamayayat do tulun dot Israil do minomonsoi’d dusa. ²⁹ Tontok di maso do pomorintaan di Raja’ Pika, om nosolod di Tiglat-Pilisir, i raja’ dot Asur, o bandar dot Iyon, om Abil-Bait-Maaka, Yanua, Kidis, Hasor om watas do Giliad, Galilia, om Naptali. Om tinanggayan nogi’ dau do hilo’d Asur o koinsanai di tulun do mantad id pomogunan di nangaala’ dau. ³⁰ Tontok di koduwo nohopod do toun do pomorintaan di Raja’ Yotam i tanak di Usia, do hilo’d Yohuda, om pongupakat no i Hosia, i tanak di Ila do sumaap di Raja’ Pika. Om patayo’ noddi di Hosia i Raja’ Pika om sowoli no iyau do suminiliu’d raja’. ³¹ Koinsanai di nongowonsoi di Raja’ Pika om nongkotulis ngai’ i’ do hiri’d suang do Buuk di Monusui do Pasal Ngai’ di Raja’ dot Israil. ³² Tontok di koduwo do toun do pomorintaan di Raja’ Pika, i tanak di Rimalia do hilo’d Israil, om kosiliu nod raja’ do hilo’d Yohuda i Yotam, i tanak di Usia. ³³ Tontok nopoddi om duwo no nohopod om limo o toun do tumur dau, om hopod om onom o toun do koloido’ dau do momorinta’ do hilo’d Yorusalim. Tina’ nopo dau om i Yorusa, i tanak di Sadok. ³⁴ Om minusui i’ i Yotam do kowoyo-woyoon di Usia, i tapa’ dau, tu’ minomonsoi i’ iyau di kohubayaan do TUHAN. ³⁵ Nga’ a’ i’ dau rinaag i tiyonon do modsubak dot id tingolig om gowoi poddi om papatahak kasai’ po i tulun do porsombahan om modtutud do kominyan do hiri. I Raja’ Yotam no o minomonsoi di wawayaan di roitan do Wawayaan dot Utara do hiri’d Walai’d Sasambayangan dot Agayo. ³⁶ - ³⁷ Tontok no di pomorintaan di Raja’ Yotam, do tuminimpuun o TUHAN do minonuhu’ di Rosin, i raja’ do pomogunan do Siria om i Pika, i raja’ dot Israil do mongoi panangod do Yohuda. Koinsanai di nongowonsoi di Raja’ Yotam, om nongkotulis ngai’ i’ do hiri’d suang do Buuk di Monusui do Pasal Ngai’ di Raja’ do Yohuda. ³⁸ Kapatai noddi i Yotam om lobongo’ no do hiri’d kalabangan do raja’ do hilo’d Bandar di Daud. Om kosiliu nod raja’ i Ahas, i tanak dau do suminowoli dau.

¹ Tontok di kohopod om turu’ do toun do pomorintaan di Raja’ Pika i tanak di Rimalia, do hilo’d Israil, om kosiliu no i Ahas, i tanak di Yotam do raja’ do Yohuda. ² Tontok nopoddi om duwo no nohopod o toun do tumur dau. Om hopod om onom o toun dau do momorinta’ do hilo’d Yorusalim. Nga’ a’ i’ iyau minusui di kowoyo-woyoon dot osonong di Raja’ Daud, i taki-aki dau. Nga’ pomonsoi nogi’ iyau dit a’ kohubayaan do TUHAN, i Kinorohingan dau. ³ Minusui nogi’ iyau di kowoyo-woyoon di piro-piro o raja’ dot Israil, gisom do pinatahak dau i tanak dau’d kusai do numaan do porsombahan di sumbolion do patahakon dot id tingolig do tumanud di koubasanan dit araat di tulun di nuyung do TUHAN do mantad id pomogunan do Kanaan di suang i’ o tulun dot Israil do pomogunan diri. ⁴ Om pinapatahak nogi’ i Ahas do porsombahan di sumbolion om minodtutud iyau do kominyan do hiri’d tiyonon do tumuku’ do tingolig do hiri’d timpak do konulu-nuluan om hiri’d sahau do kayu dit ongokohob o tuntu. ⁵ Om tontok nogiddi do sinangod om tinurungku’ di Risin, i raja’ do Siria om i Pika i raja’ dot Israil o Yorusalim. Nga’ a’ i’ iyolo’ nakaala’ di Raja’ Ahas. ⁶ Om tontok nogiddi do naanu kawagu di raja’ dot Idom i bandar dot Ilat. Om nuyung dau i tulun do Yohuda di songingiyon do hiri. Om iyono’ no di tulun dot Idom o bandar diri. Om hilo’ kasai’ no iyolo’ do gisom do baino’. ⁷ Om ponuhu’ no i Ahas do piro-piro o tulun dau do minongoi poromut do boros dot id di Tiglat-Pilisir, i raja’ dot Asur do poingkaa, ’’Iyoho’ nopodti om susuhuon nu dit otorodok. Om rikot no do mongoi poidu’ doho’ do mantad id raja’ do Siria om Israil, i maso do manangod doho’,’’ ka. ⁸ Om ngoyo’ no di Raja’ Ahas i tamas om i pirok do mantad hiri’d Walai’d Sasambayangan dot Agayo om i dapu’ do hiri’d walai di raja’, om popuhawango’ no dau di raja’ dot Asur. ⁹ Om pohubayaai noddi di Tiglat-Pilisir i pinokianu di Ahas, om ngoyo’ noddi dau songodo’ do gisom do nosolod dau i bandar do Damsik. Om pinatai dau i Raja’ Risin, om tinanggayan ngai’ dau i tulun do hiri do kuminaa do hilo’d Kir. ¹⁰ Tontok di minongoi i Raja’ Ahas do hilo’d Damsik, do mongoi solowot di Raja’ Tiglat-Pilisir, om kokito no dau o pananaraban do porsombahan dot id bandar diri. Om pokirimo’ noddi dau dot id di Uria it Imam diri, i hilo’d Yorusalim, o poiyaan di pananaraban do porsombahan diri, do mikuwo’d sukatan di koontok kopio. ¹¹ Om pomonsoi noddi i Uria dot iso’ o pananaraban do porsombahan do pinoiyo kopio di poiyaan om sukatan di naanu dau. Om kopongo no dau iri dit a’ po nokoguli’ i Raja’ Ahas. ¹² Om soira’ di nokoguli’ i Ahas do mantad hilo’d Damsik, om kokito no dau i pananaraban do porsombahan do nopongo no. ¹³ Om papatahak noddi iyau do porsombahan di sumbolion do tayam-tayam o pinatahak do hiri’d pananaraban do porsombahan om pinapatahak nogi’ iyau do porsombahan do gandum, om pinopotuntug iyau do porsombahan do waig dot anggur om pinopotuntug iyau do raha’ do mantad id porsombahan do piuludan. ¹⁴ Om kokito noddi di Ahas dot iri nopo i pananaraban do porsombahan di tambaga’ do winonsoi, i pinotobilang do maan do don TUHAN, do hiri’d piolitan di pananaraban do porsombahan di wagu om i Walai’d Sasambayangan dot Agayo, om poundoliho’ noddi di Ahas i pananaraban do porsombahan di tambaga’ do winonsoi, i hiri daa id dotimbabaan di Walai’d Sasambayangan dot Agayo, do pinowolihan nopo om hiri’d ponong id utara di pananaraban do porsombahan di wagu. ¹⁵ Om sunudai noddi di Raja’ Ahas i Uria it Imam diri, ’’Pakayon noti doho’ do pananaraban do porsombahan dot agayo, do panaraban do porsombahan do dong kosuabon om porsombahan do dong sosodopon, koinsanai di porsombahan di pinatahak di raja’ om i rayat. Om potuntugon nod hilo’ i porsombahan do waig dot anggur di mantad id rayat. Om potuntugon no do hiti’d pananaraban do porsombahan i raha’ do koinsanai di tayam-tayam di patahakon do maan do porsombahan. Nga’ ilo’ nopo pananaraban do porsombahan di tambaga’ do winonsoi om iyoho’ no o mamakai,’’ ka dau. ¹⁶ Om tonudo’ ngai’ nopo di Uria i pinonuhuan di raja’. ¹⁷ Om raago’ ngai’ noddi di Ahas i korita’ di tambaga’ do winonsoi, i papakayon do hiri’d Walai’d Sasambayangan dot Agayo. Om poundoliho’ ngai’ no dau i kakanan di songinsuang do hiri’d korita’ do tambaga’ddi. Om nanu nogi’ dau i mimpun do tambaga’, i pointimpak di hopod om duwo o sapi’ di tambaga’ do winonsoi, om poimpoho’ no dau iri do hiri’d watu. ¹⁸ Om orohian i Ahas do poposonong do ginawo di raja’ dot Asur, gisom do rinaag dau i poiiyanan do tirikohonon do raja’ do hiri’d Walai’d Sasambayangan dot Agayo. Om tinabanan nogi’ dau i wawayaan, di wawayaan kasai’ do raja’. ¹⁹ Koinsanai di nongowonsoi di Raja’ Ahas om nongkotulis ngai’ i’ do hiri’d suang do Buuk di Monusui do Pasal Ngai’ di Raja’ do Yohuda. ²⁰ Om kapatai noddi i Ahas om lobongo’ no do hiri’d kalabangan do raja’ di hilo’d Bandar di Daud. Om kosiliu nod raja’ i Hiskia, i tanak dau, do suminowoli dau.

¹ Tontok di kohopod om duwo do toun do pomorintaan di Raja’ Ahas do hilo’d Yohuda, om kosiliu no i Hosia, i tanak di Ila do raja’ dot Israil. Om siam o toun dau do momorinta’ do hilo’d Samaria. ² Om iyau nga’ minomonsoi id dusa dot id TUHAN, nga’ a’ indo koiyo kopio do dusa di piro-piro o raja’ dot Israil dit id gulu ko’ iyau. ³ Om nongoi iyau songodo’ di Salmanisir, i raja’ dot Asur. Om gowoi poddi om nokosuang iyau do pomorintaan di raja’ Salmanisir, i raja’ dot Asur. Om mambayar kasai’ddi i Raja’ Hosia do sukai dot id dau, do pointikid-tikid do toun. ⁴ Nga’ insan o maso om ponuhu’ no i Hosia di susuhuon dau do minongoi solowot di So, i raja’ do Masir tu’ mokiuhup daa iyau di So. Om tingkod noddi i Raja’ Hosia do mambayar do sukai di monikid toun dot id pomogunan dot Asur. Nga’ soira’ di noilaan di Salmanisir o takal dot araat diri, om ngoyo’ no dau tangkapo’ i Hosia om pogiilo’ no dau. ⁵ Om ngoyo’ noddi di Salmanisir i raja’ dot Asur, songodo’ ot Israil om tinurungku’ dau o Samaria. Om tontok di kotolu nod toun dau do monurungku’ do Samaria, ⁶ i kosiam nod toun do pomorintaan di Raja’ Hosia, om kosolod no di Salmanisir o Samaria. Om tanggayai no dau i tulun dot Israil do pinakaa do hilo’d Asur. Pinoiyanan nopo di Raja’ dot Asur do wookon diyolo’ om hilo’d bandar do Hala, om iri no wookon diyolo’ om pinoiyon dau do hilo’d toning do Bawang do Habor, it id watas do Gosan, om iri no wookon om pinoiyon dot id kabandaran do hilo’d pomogunan do Madai. ⁷ Naala’ pogi’ o Samaria nga’ minomonsoi do dusa o tulun dot Israil dot id TUHAN, i Kinorohingan diyolo’ di pinopoidu’ diyolo’ do mantad id raja’ do Masir, om i pinoposoliwan diyolo’ do mantad id pomogunan do Masir. Tuminuku’ iyolo’ dot id tingolig, ⁸ om tuminanud do koubasanan do bansa’ di nuyung do TUHAN, di rikot i’ o bansa’ dot Israil do minanangod di piro-piro o bansa’ddi. Om tuminanud iyolo’ di kaadat-adato’ di tinantu’ di piro-piro o raja’ dot Israil do tonudon. ⁹ Om momonsoi nogi’ iyolo’ di pogoduhan do TUHAN, i Kinorohingan diyolo’. Minomonsoi iyolo’ do tiyonon do tumuku’ do tingolig dot id pointikid-tikid di bandar diyolo’, do hiri’d kampung dit ongokooro’ om hiri’d bandar dit angagayo. ¹⁰ Id timpak nopo do pointikid-tikid do nulu-nulu om id sahau di guas do kayu dit ongokohob o tuntu, om noudangan no diyolo’ do torigi do watu di don tingolig om tininganak di tingolig dot Asira. ¹¹ - ¹² Om minodtutud nogi’ iyolo’ do kominyan dot id timpak do pointikid-tikid di pananaraban do porsombahan do don tingolig, do tuminanud di kongoubasanan di piro-piro o bansa’ di nuyung do TUHAN do mantad id pomogunan do Kanaan. Tuminuku’ nogi’ iyolo’ do tingolig, do mulong piya do noduhan daa iyolo’d TUHAN. Om nokopotogod diri do TUHAN i wonsoyon diyolo’ dit araat. ¹³ Om ponuhu’ no o TUHAN di susuhuon om i nabi dau, do mongoi pomisunud di tulun dot Israil om Yohuda do boros do TUHAN do poingkaa, ’’Tingkod kou no do momonsoi dot araat, om tonudon ngai’ no ot isuhu’ om i Tourat ku di nakatahak ku dot id taki-aki dokoyu, om i nakatahak ku dokoyu do pinolombus di piro-piro o nabi, om i susuhuon ku’ddi,’’ ka. ¹⁴ Nga’ a’ i’ minokinongou ot Israil om Yohuda; pinokodou i’ diyolo’ o ginawo diyolo’ do miagal di taki-aki diyolo’ dit a’ otumbayaan do TUHAN, i Kinorohingan diyolo’. ¹⁵ Minada’ i’ i tulun dot Israil om i tulun do Yohuda do tumanud dit isuhu’ do TUHAN, om a’ iyolo’ tuminorodok dot id tumpongo do TUHAN dot id taki-aki diyolo’. Om a’ iyolo’ minamadul di boros do TUHAN do mogodu diyolo’, tu’ tuminuku’ nogi’ iyolo’ dot id tingolig dit aiso’ o kootuk-otukon, gisom dot iyolo’ddi nga’ aiso’ no o kootuk-otukon. Tuminanud nogi’ iyolo’ do kowoyo-woyoon di piro-piro o bansa’ di hiri’d posorili’ diyolo’ do noduhan piya daa iyolo’d TUHAN do tumanud diri. ¹⁶ Om tinolibambanan ngai’ diyolo’ o koinsanai dit oturan do TUHAN, i Kinorohingan diyolo’, om minomonsoi iyolo’ do duwo o patung do sapi’ do tambaga’ do winonsoi, do maan do tukuon. Minomonsoi nogi’ iyolo’ dot iso’ o patung di tingolig dot Asira, om tumuku’ iyolo’ dot id rombituon, om sumambayang iyolo’ dot id tingolig do Baal. ¹⁷ Pinopintahak nogi’ diyolo’ o tangaanak diyolo’ do maan do porsombahan di sorobon dot id piro-piro o tingolig. Om mamakai iyolo’ do toilaan do dong rogon, om mokituduk iyolo’ di bobolian, di lumohou do rusod-rusod. Om tumotos tomod nogi’ iyolo’ do mingwonsoi dit a’ korohian do TUHAN gisom do notogod tomod o TUHAN diyolo’. ¹⁸ Om a’ noddi o TUHAN mamadul diyolo’ om pataamo’ nod TUHAN iyolo’ do mantad id tana’ di pinatahak do TUHAN dot id diyolo’. Noolu’ nopoddi om iri po pomorintaan do hiri’d Yohuda. ¹⁹ Nga’ iri piya i tulun do Yohuda nga’ a’ i’ otorodok do tumanud dot oturan do TUHAN, i Kinorohingan diyolo’. Minusui nogi’ iyolo’ di wowonsoyon di nosiliu do koubasanan do tulun dot Israil. ²⁰ Om iyadaai ngai’ nopod TUHAN o koinsanai di tulun dot Israil. Om hinukuman dau iyolo’ om pinatahak dau iyolo’ dot id pisangod diyolo’ dit ongorongit, gisom dot a’ no iyau mamadul diyolo’. Uyungo’ nopo dau iyolo’ do mantad id tana’ di pinatahak dau dot id diyolo’. ²¹ Tontok di nokotongkiad do TUHAN ot Israil do mantad id Yohuda, om pilio’ no di tulun dot Israil i Yirobiam, i tanak di Nibat, do sumiliu’d raja’ diyolo’. Om bayayato’ no di Yirobiam iyolo’ do tumongkiad do TUHAN om gisom diri do miningwonsoi iyolo’ do dusa dit angagayo kopio. ²² Om minusui iyolo’ di kowoyo-woyoon di Yirobiam om minomonsoi do koinsanai’d dusa di winonsoi dau. ²³ Id tohuri noddi om a’ nod TUHAN podulon iyolo’, tu’ uyungo’ nopo dau iyolo’ do mantad id tana’ di pinatahak dau dot id diyolo’. Om kopiontok nopo iri di pinolombus di piro-piro o nabi, om i piro-piro o susuhuon dau’ddi. Om iyo noddi o tulun dot Israil do nakataam do hilo’d pomogunan dot Asur, i nokoiyonon diyolo’ do gisom do baino’. ²⁴ Om ponuhu’ no i raja’ dot Asur di tulun do mantad id bandar do Babil, Kuta, Awa, Hamat om mantad id Siparwaim do mongoi iyon do hilo’d Samaria, do sumowoli di tulun dot Israil, i nangatanggayan dot id pomogunan do pisangod. Iri ngai’ no i tulun do suminowoli do miyon do hiri’d piro-piro o bandar diri. ²⁵ Tontok di wagu po iyolo’d poingiyon do hilo’, om a’ i’ iyolo’ momusou do TUHAN. Om iri no o kinoponuhuan do TUHAN do singa do rumikot do minongoi pamatai do wookon diyolo’. ²⁶ Om kosunudai noddi i raja’ dot Asur, dot iri nopo tulun di nokongorikot do hilo’d kabandaran do Samaria, nga’ a’ koilo dot oturan do tingolig do pomogunan diri; gowoi poddi om suhuo’ no di tingolig do hiri o singa do mongoi pamatai diyolo’. ²⁷ Om boros kaddi di raja’ dot Asur, ’’Suhuo’ dokoyu do muli’ o songulun dit imam di natanggayan toko’, om poundorongon nopod hilo’ do poponudukon ngai’ di tulun dot oturan do tingolig do pomogunan diri,’’ ka. ²⁸ Om uli’ noddi o songulun dit imam dot Israil, i natanggayan daa do hilo’d Asur do mantad hilo’d Samaria. Om undorong no iyau do hilo’d Baitol. Om hilo’ no iyau do minonuduk ngai’ di tulun do ralan do sumambayang dot id TUHAN. ²⁹ Nga’ iri nopo i tulun di songingiyon do hilo’d Samaria om mingwonsoi kasai’ do tingolig diyolo’, om popingiyono’ no diyolo’ iri do hiri’d walai di poningoligan di nongowonsoi mantad di tulun dot Israil. Om sorompori-pori nopo do momonsoi do diyolo’d tingolig i piro-piro o sinompuruan do tulun do hiri’d bandar di niyon diyolo’. ³⁰ Iri nopo tulun do Babil om minomonsoi di patung do tingolig do Sukot Binot, om iri no tulun do Kuta om minomonsoi do patung do tingolig do Norgal; om iri no tulun do Hamat om minomonsoi do patung do tingolig dot Asima, ³¹ om iri no tulun dot Awa om minomonsoi do patung do tingolig do Nibhas om Tartak; om iri no tulun do Siparwaim om pinapatahak do tangaanak diyolo’ do maan do porsombahan do sorobon dot id tingolig dot Adramilik om Anamilik. ³² Iri ngai’ nopo tulun diri, om tumuku’ dot id piro-piro tingolig diri, om tumuku’ dot id TUHAN. Om minomili’ iyolo’ do piro-piro o tulun do sumiliu dot imam do papatahak di porsombahan di sumbolion do hiri’d walai do tingolig. ³³ Om iyo noddi iyolo’, tu’ tumuku’ dot id TUHAN, om tumuku’ dot id tingolig diyolo’, do tumanud di kaadat-adato’ do hiri’d pomogunan di tadon diyolo’. ³⁴ Om gisom piya’d baino’ nga’ maso po diyolo’ do tumanud di tadat diyolo’. A’ i’ iyolo’ sumambayang dot id TUHAN om a’ tumanud dot oturan om i ponuhuan di nakatahak do TUHAN dot id sinakagon di Yakub, i pinungaranan dau dot Israil. ³⁵ Nokopongumpongo no o TUHAN dot id tulun dot Israil do poingkaa, ’’Kada’ kou tuku’ dot id tingolig; kada’ kou otud do tumuku’ dot id toguang diyolo’, ko’ modsubak po diyolo’ ko’ papatahak po do porsombahan di sumbolion dot id diyolo’. ³⁶ Pusohon oku no dokoyu, iyoho’ i TUHAN di pinopoidu’ dokoyu do mantad id pomogunan do Masir, dot i kuasa’ ku dit agayo o pinopoidu’ ku dokoyu; tuku’ kou no dot id doho’, om papatahak kou no do porsombahan di sumbolion dot id doho’. ³⁷ Tumorodok kou no kasai’ do tumanud dit oturan ku om i ponuhuan di tinulis ku do pinatahak ku dokoyu. Kada’ kou tuku’ dot id tingolig, ³⁸ om kada’ dokoyu lihuwai i tumpongo di winonsoi ku dot id dokoyu. ³⁹ Mumboyo’ kou no doho’ i TUHAN, i Kinorohingan dokoyu, om poiduwon ku indo iyokoyu do mantad id piro-piro o pisangod dokoyu,’’ ka. ⁴⁰ Nga’ a’ i’ mokinongou i tulun di poingiyon do hilo’d Samaria; tumanud kasai’ i’ iyolo’ di tadat mantad diyolo’. ⁴¹ Om iyo no iyolo’ddi, tu’ tumuku’ dot id TUHAN om tumuku’ dot id tingolig diyolo’. Om gisom piya’d baino’ nga’ iyo kasai’ iddi o wonsoyon di sinakagon diyolo’.

¹ Tontok di kotolu nod toun do pomorintaan di Raja’ Hosia, i tanak di Ila, do hilo’d Israil, om kosiliu no i Hiskia, i tanak di Ahas do raja’ do Yohuda. ² Tontok nopoddi om duwo no nohopod om limo o toun dau, om duwo nohopod om siam o toun dau do momorinta’ do hilo’d Yorusalim. Tina’ nopo dau om i Abi, i tanak di Sakaria. ³ Koinsanai di winonsoi di Hiskia nga’ kongohubayaan i’ do TUHAN, tu’ tuminanud i’ iyau do kowoyo-woyoon di Raja’ Daud, i taki-aki dau. ⁴ Koinsanai di tiyonon do tumuku’ dot id tingolig om rinaag ngai’ nopo dau om hinaba’ ngai’ dau i torigi do watu di don tingolig, om rinaag dau i patung do tingolig dot Asira. Om minumuk nogi’ di Hiskia i tulanut do tambaga’ di winonsoi di Musa di gulu po, i rinoitan do Nohustan. Tu’ gisom piya do maso’ddi nga’ modtutud kasai’ i’ i tulun dot Israil do kominyan do pomusou di tulanut do tambaga’ddi. ⁵ I Hiskia nopo om otumbayaan kopio do TUHAN, i Kinorohingan do tulun dot Israil. Om id pogialatan ngai’ nopo di raja’ do Yohuda, di nokopogulu ko’ i suminusuhut dau do momorinta’ om aiso’ no o nokoiyo di Raja’ Hiskia. ⁶ I Hiskia nopoddi nga’ otorodok kopio dot id TUHAN, om a’ i’ iyau nokoumbal do sumaap dau. Om tonudon ngai’ i’ di Hiskia o koinsanai di ponuhuan do TUHAN di nakatahak dau dot id di Musa. ⁷ Om iri no o nokoponguhupan kasai’ do TUHAN dau, om nunu nopo o wonsoyon dau nga’ koundar kasai’ nopo. Om suminoliwan iyau do mantad id pomorintaan do Raja’ Asur om mada’ iyau do porintaon di raja’ dot Asur. ⁸ Om nangaala’ nogi’ dau i tulun do Pilistin, om sinolod dau i pomogunan diyolo’ dot i kokompungan dit ongokooro’, om i bandar dit agayo kopio, om kohompit nogi’ o Gasa om i kinoiyonon do hiri’d posorili’ do nosolod dau. ⁹ Tontok di kaapat nod toun do pomorintaan di Raja’ Hiskia, i koturu’ nod toun do pomorintaan di Raja’ Hosia, i tanak di Ila, do hilo’d Israil, om rikot no i Salmanisir, i raja’ dot Asur, do minongoi panangod do tulun dot Israil om turungkuo’ no dau o Samaria. ¹⁰ Tolu poddi o toun do turungkuon i bandar do Samaria, om kaala’ nogi’ i bandar diri; nosiliu iri di koonom do toun do pomorintaan di Hiskia, om kosiam do toun do pomorintaan di Hosia. ¹¹ Om tanggayai no di raja’ dot Asur o tulun dot Israil di nangatangkap dau do kuminaa do hilo’d pomogunan dot Asur; om iri nopoddi wookon diyolo’ om pinakaa do hilo’d bandar do Hala, om iri no suwai om pinakaa do hilo’d somok di Bawang do Habor, it id watas do Gosan, om iri no wookon diyolo’ om pinakaa do hilo’d kabandaran dit id pomogunan do Madai. ¹² Nakaalala’ nopo do Samaria om i kowoyo-woyoon do tulun dot Israil dit a’ otorodok dot id TUHAN, i Kinorohingan diyolo’. A’ diyolo’ tinanud i tumpongo do TUHAN dot id diyolo’, om tinolibambanan ngai’ diyolo’ i ponuhuan di pinatahak di Musa, i susuhuon do TUHAN. A’ iyolo’ minokinongou om a’ tuminanud diri. ¹³ Tontok di kohopod om apat do toun do pomorintaan di Raja’ Hiskia, om rikot no i Sanhorib, i raja’ dot Asur, do mongoi panangod do kabandaran do Yohuda dit ongkitolig o posorili’ do gisom do naala’ ngai’ dau iri. ¹⁴ Om poromut no i Hiskia do habar dot id di Sanhorib, i raja’ dot Asur di hilo’d Lakis. Boros ka dau, ’’Mangakun oku no do nakasala’, om pokionuon ku no do tumingkod ko do manangod dahai, tu’ patahakon ku i’ o nunu nopo o pokionuon nu,’’ ka. Om suhuo’ no di raja’ dot Asur i Raja’ Hiskia do paatod do hiri’d dau do hopod noribu o kilogram do pirok, om soribu o kilogram do tamas. ¹⁵ Gowoi poddi om koinsanai nopo i pirok di hiri’d Walai’d Sasambayangan dot Agayo om i hiri’d poopian do hiri’d walai’d raja’ do pinokirim di Hiskia dot id di Sanhorib. ¹⁶ Iri piya i tamas di pinodokot do pointikid-tikid di wawayaan di Walai’d Sasambayangan dot Agayo, i pinodokot daa di Hiskia, nga’ ngoyo’ ngai’ nopo dau om pokirimo’ no dot id di Sanhorib. ¹⁷ Nga’ papaatod nogiddi i raja’ dot Asur do soudor dot ogumu’ do mantad hilo’d Lakis, i winoyo’ do tolu o boyoon do soudor dit asawat o pangkat do mongoi panangod do Yorusalim. Iri ngai’ nopo soudor diri om winoyo’ do tolu o boyoon dit asawat o pangkat; iso’ o boyoon do soudor, iso’ i monininggarung do tinumon do raja’, om iso’ o boyoon di madtatamong do raja’. Korikot poddi iyolo’ do hilo’d Yorusalim om solodo’ no diyolo’ i ralan do hiri’d kinoiyonon di roitan do Tumo do Mangangawol, it id toning di liang di poluyungan do waig do mantad hiri’d kulam di hiri’d sokid. ¹⁸ Om ponuhu’ noddi iyolo’d tulun do mongoi pomolohou di Raja’ Hiskia. Om ongoi no solowot diyolo’ o tolu pagawai di Hiskia: i Ilyakim, i tanak di Hilkia, i mongilo-ilo do hiri’d walai’d raja’; i Sibna, i gomponulis do pomorinta’, om i Yoa, i tanak di Asap, i popoopi’ do tusin do pomorinta’. ¹⁹ Om boros ka di tiso’ di boyoon do soudor dot Asur dot id diyolo’, ’’Poboroson no o boros do Raja’ dot Asur dot id di Hiskia do poingkaa, ’Nokuro tu’ osorou nu dot okoris ko? ²⁰ Osorou nu daa do boros nopo nga’ kaala’ no do toilaan om kokorisan do soudor? Isai daa ot osorou nu do milo’d monguhup diya’ tu’ sumaap ko dot Asur? ²¹ Sumondiu ko daa do Masir do monguhup diya’. Nga’ iri nopo om miagal do songulun di mononsukud do sumbiling, tu’ otipu’ nori om kotodok no dot id palad dau. Iyo noddi o kowoyo-woyoon do raja’ do Masir dot id tulun di sumondiu dau,’ ka,’’ ka. ²² Om boros ka kawagu di boyoon do soudor dot Asur, ’’Ko’ momoros kou daa do mogondos kou do TUHAN, i Kinorohingan dokoyu? Nga’ okon toi ko’ i Hiskia i’ o minomohuyas di pananaraban do porsombahan dot id TUHAN om i tiyonon di tumuku’ dot id TUHAN, do tontok di minonuhu’ iyau do tulun di songingiyon do hilo’d Yohuda om hilo’d Yorusalim do tumuku’ dot id dotimbabaan di pananaraban do porsombahan di hilo’d Yorusalim? ²³ Monokitupa’ oku dokoyu dot id suang do ngaran do raja’ dot Asur, dot onuan kou piya daa do duwo noribu o kuda’ nga’ aiso’ no o tulun dokoyu do sumakai do koinsanai’ddi! ²⁴ A’ kou no kotori’ do sumaap di soudor dahai dit oluhoi piya kopio. Nga’ mogondos kou po daa do tulun do Masir do papaatod dokoyu do korita’-kuda’ om soudor dot ongkikuda’. ²⁵ Osorou daa dokoyu do songodon tomod ku nopo om raagon ku o pomogunan diti dot a’ oku’d TUHAN uhupan? TUHAN i’ o minonuhu’ dahai do mongoi panangod om mongoi pamaraag do pomogunan diti,’’ ka dau. ²⁶ Om boros kaddi di Ilyakim, om i Sibna, om i Yoa dot id boyoon do soudor diri, ’’Tuan, boro-boros dahai do boros dot Aram, tu’ kosuhut i’ iyahai. Kada’ pimboros do boros dot Ibrani, tu’ kongorongou ngai’ nondo ilo tulun do hilo’d timpak do tolig do bandar,’’ ka diyolo’. ²⁷ Nga’ boros ka di boyoon do soudor diri, ’’Osorou nu daa do sinuhu’ oku di Raja’ Asur do popoilo’ddi dot id dokoyu noo om id raja’? Amu’, parangahan ku nogi’ iti do koinsanai’d tulun di songirikau do hilo’d timpak do tolig do bandar, dot iyolo’ nga’ kapangakan indo do taii’ om koponginum do sobu diyolo’ do miagal dokoyu,’’ ka dau. ²⁸ Om ingkakat noddi i boyoon do soudor do mikuwo’d minoro-boros dot opuhod kopio do boros dot Ibrani do poingkaa, ’’Pokinongoho’ no iti boros do raja’ do pomogunan dot Asur dot id dokoyu do poingkaa: ²⁹ ’Kada’ kou kaakalai di Hiskia; tu’ a’ i’ iyau milo do mamasi dokoyu. ³⁰ Kada’ kou kotumbayaai di pomilugut di Hiskia dokoyu do mogondos do TUHAN. Kada’ dokoyu soroho’ do poiduwon kou’d TUHAN ko’ antaban po dau o soudor dot Asur do mongoi ponolod do bandar dokoyu. ³¹ Kada’ kou pokinongou di Hiskia. Suhuon ku iyokoyu, iyoho’ i raja’ dot Asur, o monuhu’ dokoyu do sumoliwan do mantad id bandar dokoyu om tumahak kou nogindo dot id doho’. Om kaakan kou indo do tua’ dot anggur do mantad id guas dot anggur dokoyu, om kaakan kou do tua’ dot ara do mantad id guas dot ara dokoyu; om koinum kou do waig do mantad id torobong dokoyu, ³² gisom dot orikot o maso do poundolihon kou dot id pomogunan di miagal-agal do pomogunan dokoyu. Hilo’ nopo om haro i’ o kabun dot anggur di kitua’ dot aanu dokoyu, om haro o tumo di kitanom do gandum, i gandum dit aanu dokoyu o tua’, om i maan dokoyu topungo’ do maan do kaakan-akanan dokoyu. Om ogumu’ nogi’ o guas do saitun om tumau do saitun om paha’. Ondung tumanud kou diti ponuhuan ku, om osonong-sonong kou i’, om a’ kou indo apatai. Kada’ kou pokinongou do boros di Hiskia. Magakal no iyau dokoyu om momusorou kou no daa’ndo do poiduwon kou’d TUHAN. ³³ Haro toi o tingolig do bansa’d suwai do nokointirung do pomogunan diyolo’ do mantad id raja’ do pomogunan dot Asur? ³⁴ Hinonggo ngai’ no i tingolig do pomogunan do Hamat om Arpad do baino’? Om hinonggo ngai’ no i tingolig do Siparwaim, om Hina om Iwa? Haro toi o ruminikot do minongoi popoidu’ do Samaria? ³⁵ Haro toi o tingolig do nokoumbal do pinopoidu’ do pomogunan dau do mantad id pomorintaan ku? Om kada’ kou no pomusorou do milo o TUHAN do poidu’ do Yorusalim,’ ka,’’ ka dau. ³⁶ Om oinsanan nopo i tulun di porintaon di Raja’ Hiskia do hilo’d Yorusalim dot a’ minungkomi tu’ noduhan iyolo’ di Raja’ Hiskia do moro-boros. ³⁷ Om hurako’ nopo di Ilyakim, om i Sibna, om i Yoa o pakayan diyolo’ tu’ tumongob no kopio iyolo’. Om uli’ noddi iyolo’ do minongoi posunud do koinsanai di pinoboros di boyoon do soudor dot Asur diri, dot id di Raja’ Hiskia.

¹ Korongou nopoddi di Raja’ Hiskia i sinusui di tolu o tulun diri, om hurako’ no dau o pakayan dau tu’ tumongob no kopio iyau. Om pamakai noddi iyau do pakayan do mogihad om pakayaai no dau do hiri’d Walai’d Sasambayangan dot Agayo. ² Om suhuo’ no dau i Ilyakim, i mongilo-ilo do hiri’d walai’d raja’, om i Sibna, i gomponulis do pomorinta’, om i piro-piro ot imam di komolohingan no do minongoi solowot di Yosaya i Nabi, i tanak di Amos. Om iyolo’ nga’ minamakai nogi’ do pakayan do mogihad. ³ Om iti no o boros do pinonuhuan di Hiskia diyolo’ do popoboros dot id di Yosaya, ’’Tadau nopod baino’ om tadau do katangaban; hinukuman toko’ om nintingayam toko’. Miagal-agal toko’ do tondu’ di norikot no o maso do kopogkosusuan nga’ oluhoi no o tinan dau. ⁴ Sinuhu’ di raja’ dot Asur i boyoon do soudor dau dit angasawat kopio o pangkat do mongindaraat do Kinorohingan di poimpasi. Nunu koilo-ilo nga’ norongou nopod TUHAN, i Kinorohingan nu i pinongindaraat diri om hukuman nondo dau i tulun di minomoros do miagal diri. Iyo nopoddi om sumambayang no dot id Kinorohingan do bagi’ di tulun toko’ di maso do poimpasi,’’ ka. ⁵ Soira’ddi nokoromut dot id di Yosaya o boros di mantad id di Raja’ Hiskia diri, ⁶ om simbaro’ no di Yosaya do poingkaa, ’’Boros kad TUHAN om a’ ko piya minog dot ooris do tulun dot Asur, i mimboros dot a’ o TUHAN milo do popoidu’ dati’. ⁷ Tu’ porongohon indo do TUHAN i raja’ dot Asur do habar gisom do gumuli’ nondo iyau do hilo’d pomogunan dau. Om patayon nondo iyau do korikot iyau’d hilo’,’’ ka. ⁸ Om korongou noddi i boyoon do soudor dot Asur, do nakapamanau no i raja’ do mantad hilo’d Lakis om maso no do sumangod do hilo’d Libna, it iso’ o bandar dot id somok. Om ongoi no i boyoon do soudor diri do hiri do minongoi solowot di raja’. ⁹ Om tontok iddi do nokorongou i tulun dot Asur do rumikot no i soudor do mantad id Masir, do woyoon di Tirhaka, i raja’ dot Etiopia, do mongoi panangod diyolo’. Om korongou nopoddi di raja’ dot Asur o habar diri, om ponulis no iyau kawagu do surat do pinakaa dot id di Hiskia, i raja’ do Yohuda. ¹⁰ Poingkaa o boros di tinulis dau, ’’Sinunudan ko daa’d TUHAN, i pagandasan nu’ddi dot a’ ko i’ aala’ do raja’ dot Asur. Nga’ kada’ nogi’ kotumbayaai’ddi. ¹¹ Nokorongou ko no di nongowonsoi di piro-piro o raja’ do pomogunan dot Asur dot id pomogunan do hinonggo nopo di ngoyon diyolo’ songodo’. Om koidu’ kopio ko daa’ddi iya’, dot osorou nu? ¹² Tontok di rinaag di taki-aki ku o bandar do Gosan, Haran, om Risip, om di pinatai ngai’ dau i tulun dot Idon di songingiyon do hilo’d Tilasar, om aiso’ i’ o tiso’ di tingolig diyolo’ do milo do pinopoidu’ diyolo’. ¹³ Hinonggo ngai’ no i raja’ do Hamat om Arpad, om Siparwaim, om Hana, om Iwa, do baino’?’’ ka. ¹⁴ Om basao’ no di Raja’ Hiskia i surat diri di naramit dau do pinaatod di piro-piro o susuhuon di raja’ dot Asur. Om pakayaai noddi dau do hiri’d Walai’d Sasambayangan dot Agayo. Om ungkalado’ no dau i surat diri dot id toguang do TUHAN, ¹⁵ mikuwo’d suminambayang do poingkaa, ’’Oi TUHAN, i Kinorohingan dot Israil, i poirikau do hiri’d sakai di moloikat di roitan do kerub. Iya’ noo o Kinorohingan di momorinta’ do koinsanai do pomorintaan dot id suang do pomogunan diti. Iya’ no i minomonsoi do tawan om tana’. ¹⁶ Nga’ baino’ nodti om antangai no ondung nunu iti nosiliu dot id dahai. Pokinongoho’ no o koinsanai di pongindaraat di Sanhorib diya’, i Kinorohingan do poimpasi! ¹⁷ Koilo ngai’ i’ iyahai oi TUHAN, dot ogumu’ no o bansa’ om pomogunan do nangaala’ om nangaraag di raja’ dot Asur. ¹⁸ Om tinutudan ngai’ nogi’ i tingolig diyolo’ tu’ aiso’ i’ o kuasa’ di tingolig diri. Iri nopo om patung no toomod do winonsoi do tulun, do kayu om watu do winonsoi. ¹⁹ Oi TUHAN, i Kinorohingan dahai, poiduwo’ no iyahai do mantad id tulun dot Asur, om oilaan indo do koinsanai’d bansa’ do hiti’d pomogunan dot iya’ noo o Kinorohingan, oi TUHAN,’’ ka dau. ²⁰ Om porikot noddi i Yosaya do boros dot id di Raja’ Hiskia, dot isimbar nopod TUHAN di sambayang dau ²¹ om poingkaa, ’’Hingi-hingion ko om irak-irakan ko’d tulun do Yorusalim, oi Sanhorib. ²² Isai toi it indaraaton nu dot osorou nu? Iyoho’ i’, i Kinorohingan dot Israil, i Kinorohingan dot olidang, it indaraaton nu’ddi. Minggayo-gayo kopio ko daa dot id toguang ku. ²³ Pinapaatod ko do susuhuon nu do popoinggayo-gayo do ngaran nu dot iri no i korita’-kuda’ nu o nakaanu-anu nu do nuluhon dit angasawat kopio do hilo’d Libanon. Om minggayo-gayo ko do nangatagad nu o koinsanai di guas dot aras dit angakawas om it ongolumis om salagan ngai’ nu nopo i puru’ di himbaan. ²⁴ Om minggayo-gayo ko nogi’ do nokopongukad ko do torobong om nokoponginum ko’d waig dot id piro-piro o pomogunan do suwai. Om piningulakan di soudor nu i Bawang do Nil do gisom do narasak. ²⁵ A’ ko po nokoilo dot iyoho’ i’ o minomusorou ngai’ddi do mantad di gulu po? Om wonsoyon ku’ddi iri do baino’. Iyoho’ i’ o minanahak diya’ do kuasa’ do momohuyas do piro-piro o bandar di kitolig o posorili’ do gisom do nosiliu’ddi do pogun. ²⁶ Om gisom dot iri nopo tulun di poingiyon do hilo’ om aiso’ no o pokukurayan. Moddosi ngai’ nopo iyolo’. Nosiliu po iyolo’ do miagal do sakot do hilo’d kobuturan om miagal di sakot do sumuni dot id taap do walai tu’ awayaan nopo di tongus dot alasu’ do mantad id koulayon, om rumiou nopo ²⁷ Nga’ oilaan ngai’ ku i’ o nunu nopo do pasal diya’. Oilaan ku i’ o wonsoyon nu om oilaan ku o pakayaan nu. Om oilaan ku dot otogod kopio ko doho’. ²⁸ Nongorongou ngai’ ku no i pokikirayou nu. Baino’ nondo om godingan ku o todung nu, om kakangan ku o kabang nu, om gayaton tiya’ nondo do gumuli’ do hilo’d ralan di tadon nu,’’ ka. ²⁹ Om poromuto’ no di Yosaya di Raja’ Hiskia o boros do poingkaa, ’’Iti no o tanda’ do koilaan nu dit osiliu dot id dabantalan. Toun nopod baino’ om toun do tabantalan, om iri pondo i turisang di gandum o takanon dokoyu. Nga’ katalib nopondo iri om milo kou no do mananom do gandum om anggur, om aanu dokoyu o tua’ddi. ³⁰ Iri nopondo i tulun do Yohuda dit oolu-olu’ om osimbayan nondo do miagal di tanom dit aralom o gamut om i mongua’. ³¹ Hilo’ nopod Yorusalim om hilo’d Nulu-Nulu do Sion om haro i’ o tulun dot apasi, tu’ natantu’ mantad nod TUHAN dot osiliu o miagal diri. ³² Poingkaa o boros do TUHAN do pasal di raja’ dot Asur, ’A’ i’ iyau kosuang do bandar diri, om iso’ po di pana’ dau nga’ a’ i’ kapana’ do hilo’. Om iso’ po di soudor dau di kikolid nga’ a’ i’ koinsomok do bandar diri, om a’ i’ iyolo’ kopotimung do tana’ do maan do ponokotolig do ponurungku’ di bandar. ³³ Muli’ nopondo o raja’ dot Asur do sumusui di ralan di winayaan dau di rikot i’ iyau, om a’ i’ iyau kosuang do bandar diri. Iyoho’ no, i TUHAN o minomoros diti. ³⁴ Obian ku indo om intirungan ku o bandar do Yorusalim tu’ osorou ku i’ o doho’ do kosuahan om i tumpongo ku dot id di Daud, i susuhuon ku,’ ka,’’ ka dau. ³⁵ Om totuong iddi om rikot no o Moloikat do TUHAN do hiri’d kokiiman do tulun dot Asur om patayo’ no dau o 185,000 o soudor, om kosuabon noddi om songingiliu poo i rata’ diyolo’! ³⁶ Om poggidu’ noddi i Sanhorib, i raja’ dot Asur, do mantad hiri om pouliai no dau do hilo’d Niniwi. ³⁷ Insan diri o tadau, di maso dau do sumambayang do hiri’d walai di tingolig do Nisro, om rikot no i Adramilik om i Sarisir, i tangaanak dau’d kusai do minongoi pamatai dau do gayang o pinamatai. Om poggidu’ nogiddi iyolo’, om ongoi no do hilo’d pomogunan dot Ararat. Om kosiliu noddi do raja’ i Isarhadon, i tanak di Sanhorib do suwai.

¹ Om tontok no do maso’ddi do suminakit i Raja’ Hiskia dot adalaan kopio gisom dot oruhai no daa iyau dot apatai. Om rikot noddi i Yosaya, i tanak di Amos, do minongoi solowot dau om boro-boros nod, ’’Minomilin o TUHAN do monuhu’ diya’ do momongo do koinsanai’d karaja’ nu tu’ a’ ko no olingasan. A’ no alaid om apatai ko no,’’ ka dau. ² Om togiging no i Raja’ Hiskia do tuminimbaba’ ponong id limput, om sambayang no iyau do poingkaa, ³ ’’Oi TUHAN, soroho’ no o kotorodoko’ ku dot id diya’ do mikuwo dot iso- iso’ kopio o ginawo ku, om tuminotos oku do tumanud do korohian nu,’’ ka dau. Om pingihad noddi iyau. ⁴ Om tongkiadai no di Yosaya i Raja’ Hiskia, nga’ a’ po i Yosaya nakatalib di natad di hiri’d tanga’ di walai’d raja’, ⁵ om suhuo’ no iyau’d TUHAN do gumuli’ kawagu dot id di Hiskia, i raja’ di tulun di songonuon do TUHAN, do mikuwo’d popoboros do poingkaa, ’’Iyoho’ no i TUHAN, i Kinorohingan do tukuon di Daud, i taki-aki nu. Norongou ku no o sambayang nu, om nokito ku o romou nu. Om lingasan ku i’ iya’; om koongoi ko no do hilo’d Walai’d Sasambayangan dot Agayo do suabdiino. ⁶ Oputan ku’ndo o tumur nu do hopod om limo o toun do koloido’. Om poiduwon ku iya’ om iti bandar do Yorusalim do mantad id raja’ dot Asur. Om intirungan ku indo o bandar diti tu’ osorou ku i’ o kosuahan ku om i tumpongo ku dot id di Daud, i susuhuon ku,’’ ka. ⁷ Om ponuhu’ noddi i Yosaya do tulun do popogihil do tua’ dot ara di hinotok do hiri’d kupos di Raja’ Hiskia, om olingasan i’ iyau. ⁸ Om ponguhot noddi i Hiskia, ’’Nunu o koilaan ku dot olingasan oku’d TUHAN, om koongoi oku do hilo’d Walai’d Sasambayangan dot Agayo do kotolu’d tadau?’’ ka dau. ⁹ Om boros ka di Yosaya, ’’Onuan ko id TUHAN dot iso’ o tanda’ do koilaan nu’d bayaanon do TUHAN o batos dau. Om poboroso’ daa ondung honggo o korohian nu: sumindur do hopod o garis o sangai di longon do jam do tadau, i winonsoi di Raja’ Ahas ko’ gumuli’ do hopod o garis?’’ ka dau. ¹⁰ Om boros ka di Hiskia, ’’Osonong id posindur ilo sangai do gisom do hopod o garis. Nga’ pogulio’ daa do hopod o garis,’’ ka. ¹¹ Om sambayang noddi i Yosaya dot id TUHAN, om pogulio’ nod TUHAN i sangai do hopod o garis do hiri’d jam do tadau. ¹² Om tontok noddi do nokorongou i raja’ do Babil, i Mirodak Baladan i tanak di Baladan, do kolilingasai di Raja’ Hiskia do sumakit. Om ponuhu’ noddi iyau’d tulun do mongoi paatod do surat om ipuhawang dot id di Hiskia. ¹³ Om osonong tomod o pinonuwau di Hiskia do tulun di sinuhu’ddi, om angatai noddi dau iyolo’ do minongoi ontong do koinsanai do kakayaan dau, i tamas om pirok, i rampa om tumau dit owongi’, om koinsanai di rapo-rapo di soudor dau. Iso’ po nga’ aiso’ no ot a’ dau pinokitanan diyolo’ do hiri’d walai’d raja’, om pointongkop di pomorintaan dau. ¹⁴ Om rikot noddi i Yosaya do minongoi’d hiri’d di Hiskia, om ponguhot nod, ’’Hinonggo ngai’ o tadon do tulun diri, om nunu ka diyolo’?’’ ka. Om boros ka di Hiskia, ’’Iyolo’ nopo om mantad hilo’d Babil, i pomogunan di hilo’d sodu’,’’ ka dau. ¹⁵ ’’Nunu ngai’ o nongokito diyolo’ do hiti’d walai’d raja’?’’ ka kawagu di Yosaya do minuhot. ’’Nongokito ngai’ no diyolo’. Aiso’ no ot a’ ku pinokitanan diyolo’ do hiti’d suang diti poopian do hiti’d walai ku,’’ ka di Hiskia do suminimbar. ¹⁶ Om boros kaddi di Yosaya dot id di Raja’ Hiskia, ’’Boros kad TUHAN ¹⁷ om orikot nondo o maso do nunu nopo i kakayaan dot id suang diti walai nu, i nongotimung di taki-aki nu di gulu po om gisom do baino’, om rangkaton ngai’ nopondo do kumaa do hilo’d Babil. Om aiso’ nondo ot oolu’. ¹⁸ Om haro nondo o sinakagon nu do tanggayan om silihon do pagawai do hiri’d walai’d raja’ do mogobi-obi’ di raja’ do Babil,’’ ka. ¹⁹ Om boros ka di Hiskia do suminimbar, ’’Osonong no kopio ino boros do TUHAN di pinoboros nu doho’,’’ ka. Minomoros pogi’ iyau do miagal diri nga’ osorou nopo di Hiskia om maso nopo dau do poimpasi om osimbayan i’ om aiso’ o kagangahan do pomorintaan dau. ²⁰ Koinsanai di nongowonsoi di Raja’ Hiskia, om i kosioho’ dau, om i karalan-ralano’ dau do minomonsoi di kulam om i poluyungan do waig do poirikot do hiri’d bandar om nongkotulis ngai’ no do hiri’d Buuk di Monusui do Pasal Ngai’ di Raja’ do Yohuda. ²¹ Kapatai poddi i Hiskia, om kosiliu nod raja’ i tanak dau do suminowoli dau.

¹ Hopod nogi’ om duwo o toun di Manasi di nosiliu iyau’d raja’ do Yohuda. Om minomorinta’ iyau do hilo’d Yorusalim do solinaid do limo nohopod om limo o toun. Ngaran nopo do tina’ dau nga’ i Hopsiba. ² Om minomonsoi i Manasi do dusa dot id TUHAN, tu’ minusui iyau di kowoyo-woyoon dot araat di piro-piro o bansa’d tulun di nuyung do TUHAN do sumoliwan do mantad id Kanaan di suang i’ o tulun dot Israil do pomogunan diri. ³ Om pinoingkakat kawagu dau i tiiyonon do tumuku’ dot id tingolig, i rinaag daa di Hiskia, i tapa’ dau, di gulu po. Om minomonsoi iyau do piro-piro o pananaraban do porsombahan dot id tingolig do Baal. Om minomonsoi iyau do piro-piro o patung do tingolig dot Asira, do miagal di winonsoi di Raja’ Ahab, i raja’ dot Israil di gulu po. Om tuminuku’ nogi’ i Manasi dot id rombituon. ⁴ Nokoboros nod TUHAN dot i Walai’d Sasambayangan dot Agayo o tiyonon do sumambayang dot id dau nga’ hiri nogi’ o winansayan di Manasi do pananaraban do porsombahan do don tingolig. ⁵ Om winansayan goduwo nopo dau do pananaraban do porsombahan di pakayon do tontok do sumambayang dot id rombituon o hiri’d duwo o natad di Walai’d Sasambayangan dot Agayo. ⁶ Om pinatahak nogi’ dau i tanak dau do maan do porsombahan di sorobon dot id tingolig. Om minomonsoi nogi’ iyau di wowonsoyon do bobolian, om i mogogontong, om i kitoilaan do dong rogon, om minokituduk iyau do rusod-rusod. Om agayo no kopio o dusa dau dot id TUHAN gisom do nokotogod tomod o TUHAN. ⁷ Om pinosuang nogi’ dau i tanda’ do tingolig dot Asira do hiri’d Walai’d Sasambayangan dot Agayo. Om iri nogi’ daa o kinoiyonon di komoyon do TUHAN di pinoboros dau dot id di Daud om id di Suliman, i tanak di Daud do poingkaa, ’’Hiti nod Walai ku do hiti’d Yorusalim o nopili’ ku dot id pialatan di hopod om duwo o watas do payat dot Israil dot iyonon do tulun ku do sumambayang dot id doho’. ⁸ Ondung otorodok o tulun dot Israil do tumanud do koinsanai dit isuhu’ ku om mumboyo’ do koinsanai di Tourat di nakatahak di Musa, i susuhuon ku dot id diyolo’, om a’ ku no iyolo’ pologoson dot ouyung do mantad id pomogunan di nakatahak ku dot id taki-aki diyolo’,’’ ka. ⁹ Nga’ a’ i’ otorodok dot id TUHAN i tulun do Yohuda tu’ naangatan nogiddi iyolo’ di Manasi do momonsoi’d dusa dit araat po ko’ mantad di dusa di nowonsoi di piro-piro o bansa’d tulun di nuyung do TUHAN do tontok di suang i’ o tulun di songonuon do TUHAN do pomogunan diri di gulu po. ¹⁰ Om polombuso’ noddi di piro-piro o nabi, iyolo’ i susuhuon do TUHAN, o boros do TUHAN do poingkaa, ¹¹ ’’Araat no kopio i Raja’ Manasi, araat po ko’ mantad di winonsoi do tulun do Kanaan, i winonsoi dau. Om iri no i tingolig dau o minamayayat di tulun do Yohuda do minomonsoi’d dusa. ¹² Gowoi pondo om porikatan ku’ndo iyoho’, i TUHAN i Kinorohingan di tukuon do tulun dot Israil, do kosusaan dot agayo o Yorusalim om Yohuda, gisom dot aranaban ngai’ nopondo o tulun do korongou’ddi. ¹³ Hukuman ku nondo o Yorusalim do miagal di pinomohukum ku do Samaria om i Ahab, i raja’ dot Israil, om koinsanai di sinakagon dau. Imuhawon ku nopondo o Yorusalim, do miagal po do piring di linihungan o miampaping do gisom dot opulang kopio. ¹⁴ Om pologoson ku nopondo i tulun di poundorong do hilo’ dot inggoriton di pisangod diyolo’, gisom dot aala’ iyolo’ om angaanu ngai’ di pisangod i hiri’d pomogunan diyolo’. ¹⁵ Wonsoyon ku’ti dot id tulun ku tu’ minomonsoi i’ iyolo’d dusa dot id doho’ gisom do notingkau o kototogod ku do mantad poddi soliwan i’ i taki-aki diyolo’ do mantad hilo’d Masir om gisom do baino’,’’ ka. ¹⁶ Om ogumu’ tomod o tulun dit aiso’ o sala’ do pinatai di Manasi gisom do lumuyung po o raha’ do pointongkop do hilo’d Yorusalim. Iri no o dusa di winonsoi dau do suwai mantad ko’ i dusa dau di minamayayat do tulun do Yohuda do minomonsoi’d dusa dot id TUHAN, iri no tu’ tuminuku’ dot id tingolig. ¹⁷ Koinsanai di nongowonsoi di Raja’ Manasi, do kohompit ngai’ no i dusa di nongowonsoi dau, nga’ nongkotulis ngai’ no do hiri’d Buuk di Monusui do Pasal Ngai’ di Raja’ do Yohuda. ¹⁸ Om kapatai noddi i Manasi, om lobongo’ no do hiri’d kabun do walai’d raja’, i kabun di Usa. Om i Amon diri i tanak dau, o nosiliu’d raja’ do suminowoli dau. ¹⁹ Duwo nogi’ nohopod om duwo o toun di Amon di nosiliu iyau’d raja’ do Yohuda. Om minomorinta’ iyau do hilo’d Yorusalim do duwo o toun do koloido’. Ngaran nopo do tina’ dau nga’ i Misulimit, i tanak di Harus, i mantad id bandar do Yotba. ²⁰ I Amon nga’ miagal nogi’ di tapa’ dau tu’ minomonsoi i’ do dusa dot id TUHAN. ²¹ Iyau nga’ minusui i’ di winonsoi di tapa’ dau, om tuminuku’ iyau di piro-piro o tingolig di tinuku’ di tapa’ dau. ²² Tuminongkiad iyau do TUHAN, i Kinorohingan di tinuku’ di taki-aki dau. Om a’ iyau otorodok do tuminanud dit isuhu’d TUHAN. ²³ Om pogipapakat ngai’ noddi i pagawai di Raja’ Amon do sumaap dau om patayo’ no diyolo’ iyau do hiri’d walai di raja’. ²⁴ Nga’ napatai i’ di tulun do Yohuda i minamatai di Raja’ Amon, do hiri’d walai di raja’. Om siliho’ no diyolo’ do raja’ i Yosia, i tanak di Raja’ Amon. ²⁵ Koinsanai di nongowonsoi di Amon nga’ nongkotulis ngai’ i’ do hiri’d Buuk di Monusui do Pasal Ngai’ di Raja’ do Yohuda. ²⁶ Om lobongo’ noddi i Amon do hiri’d kalabangan do hiri’d kabun di Usa. Om i Yosia diri i tanak dau, o nosiliu’d raja’ do suminowoli dau.

¹ Walu’ nogi’ o toun di Yosia do tontok di nosiliu iyau’d raja’ do Yohuda. Om minomorinta’ iyau do Yorusalim do solinaid do tolu nohopod o toun. Ngaran nopo do tina’ dau nga’ i Yodida, i tanak di Adaya, i mantad id bandar do Boskat. ² I Yosia nopoddi nga’ minomonsoi i’ do kohubayaan do TUHAN, om tuminanud iyau do kowoyo-woyoon di Raja’ Daud, i taki dau, om otorodok iyau do tuminanud do koinsanai dit oturan do Kinorohingan. ³ Tontok di kohopod no om walu’ do toun do pomorintaan di Raja’ Yosia, om ponuhu’ no iyau di gomponulis do pomorinta’ do mongoi’d hiri’d Walai’d Sasambayangan dot Agayo. Ngaran nopo di gomponulis diri nga’ i Sapan, i tanak di Asalia, i manangaki di Mosulam. Boros ka di Raja’ Yosia, ⁴ ’’Ongoi solowot di Hilkia, i Boyoon dot Agayo dot Imam, om pokionuon i’ o kopoilaan do kogumuon do tusin do notimung di piro-piro ot imam di maganu-anu do hiri’d wawayaan do Walai’d Sasambayangan dot Agayo. ⁵ Om suhuon no iyau do papatahak di tusin diri dot id piro-piro o mandur di mongilo-ilo di karaja’ do mononong di Walai’d Sasambayangan dot Agayo. ⁶ Om iyolo’ indo o mamagadsi’ di tukang kayu, om i tukang mamaal, om i tukang watu dot i tusin diri o pamagadsi’. Om iyolo’ o momoli do kayu om watu dit apatut do bolion. ⁷ Iri ngai’ nopo tulun di mongilo-ilo do pakarajaan diri, om otulid i’ kopio o ginawo, om a’ i’ minog do pokionuon o kopoilaan do kinapamakayan di tusin do mantad id diyolo’,’’ ka. ⁸ Om posunudo’ no di Sapan i boros di Raja’ Yosia, dot id di Hilkia. Om sunudai no di Hilkia i Sapan do nokobontol iyau do buuk do Tourat do TUHAN do hiri’d Walai’d Sasambayangan dot Agayo. Om patahako’ no di Hilkia dot id di Sapan i buuk diri, om basao’ noddi dau. ⁹ Om ngoyo’ noddi di Sapan poboroso’ dot id raja’, do naanu no dau i tusin do hiri’d Walai’d Sasambayangan dot Agayo om nakatahak no dau di piro-piro o mandur do maan do pononong di Walai’d Sasambayangan dot Agayo. ¹⁰ Om boros ka kawagu di Sapan, ’’Intangai pogi’ iti buuk di pinatahak di Hilkia doho’,’’ ka dau. Om basao’ no dau iri do hiri’d toguang di raja’. ¹¹ Om korongou nopoddi di raja’ o boros di pointulis do hiri’d buuk diri, nga’ hurako’ nopo dau o pakayan dau tu’ tumongob no kopio iyau. ¹² Om boro-boros noddi i raja’ dot id di Hilkia, i Boyoon dot Agayo dot Imam diri, om i Ahikam i tanak di Sapan, om id di Akbor i tanak di Mika, om i Sapan i gomponulis do pomorinta’, om id di Asaya, i pagawai di raja’ do poingkaa, ¹³ ’’Ongoyo’ dokoyu doho’ uhoto’ o TUHAN do bagi’ doho’ om bagi’ do toinsanan diti rayat do pasal do ponudukan do buuk diti. Otogod no o TUHAN dati’ tu’ a’ i’ di taki-aki toko’ tinanud i ponuhuan di songintulis dot id buuk diti,’’ ka dau. ¹⁴ Om ongoi ngai’ no i tulun diri pokituduk do songulun o tondu’ di roitan dot i Hulda. Iyau nopo nga’ nabi, i poingiyon do hiri’d kawalayan do wagu do hilo’d Yorusalim. Sawo nopo dau nga’ i Salum, i tanak di Tikwa, i manangaki di Harhas; om iyau no o momogompi’ di pakayan do sumambayang do hiri’d Walai’d Sasambayangan dot Agayo. Om korongou poddi i Hulda di pinoboros diyolo’ddi, ¹⁵ om suhuo’ no dau iyolo’ do gumuli’ do popoboros dot id raja’ ¹⁶ do poingkaa, ’’Poingkaa o boros do TUHAN, ’Hukuman ku no o Yorusalim do mitonggoi do koinsanai di songingiyon do hilo’ do miontok di nokotulis dot id suang do buuk di wagu po di raja’ kabasa’. ¹⁷ Tu’ tuminongkiad iyolo’ doho’, om pinapatahak iyolo’ do porsombahan dot id piro-piro o tingolig. Om minoningkau no kopio do kototogod ku i winonsoi diyolo’. Om otogod oku no kopio do Yorusalim. Om a’ no milo do tingkodon o kototogod ku. ¹⁸ Nga’ poingkaa o boros ku dot id Raja’ Yosia, iyoho’, i TUHAN i Kinorohingan dot Israil, nokorongou ko no di songintulis dot id suang do buuk diri. ¹⁹ Om minonosol ko iddi om mininsiriba’ ko dot id toguang ku do nakabasa’ddi. Om hinurak nu o pakayan nu do mikuwo’d minihad ko dot atatangaban do soira’ di norongou nu do hukuman ku o Yorusalim om i tulun di poingiyon do hilo’. Hukuman nondo o Yorusalim dot adalaan kopio, om koronob kopio dot okito, gisom do ngaran nondo do Yorusalim o roiton do pomopol. Nga’ norongou ku iddi o sambayang nu. ²⁰ Om a’ ku indo porotuon i hukuman dot id Yorusalim do solinaid nu po do poimpasi. Om pologoson ku i’ iya’ dot osonong o kapatai-patayo’,’ ka,’’ ka dau. Om uli’ ngai’ noddi i tulun di sinuhu’ddi do minongoi popoboros diri dot id di Raja’ Yosia.

¹ Om lohowo’ ngai’ noddi di Raja’ Yosia i boyoon do Yohuda om Yorusalim, ² om ongoi nogiddi iyolo’ do hiri’d Walai’d Sasambayangan dot Agayo do minogiwoyo-woyo’ di piro-piro ot imam, om i nabi om koinsanai di tulun di songingiyon do hiri’d pomogunan diri, i mosikin om i kaya’. Om basao’ nogiddi di raja’ dot opuhod o boros o koinsanai di pointulis do hiri’d buuk di nokito do hiri’d Walai’d Sasambayangan dot Agayo, i pinotulisan do koinsanai di tumpongo. Binasa’ di raja’ iri do potimbaba’ diyolo’ do hiri’d toning di torigi dot agayo. ³ Om pamatos noddi i raja’ dot id TUHAN do tumorodok dot id dau, om tumanud do koinsanai di ponuhuan om it oturan do TUHAN do mikuwo dot aayi-ayi’ o ginawo om aayi-ayi’ o pomusorou dau, om tumanud ngai’ di ponuhuan dit id suang do tumpongo’d TUHAN dot id tulun dau, i nongkotulis do hiri’d buuk diri. Om oinsanan nopo i tulun do minamatos do tumorodok do tumanud di tumpongo’ddi. ⁴ Om ponuhu’ noddi i Raja’ Yosia di Hilkia, i Boyoon dot Agayo dot Imam diri om i piro-piro o mongunguhup dot imam, om i madtatamong di wawayaan di Walai’d Sasambayangan dot Agayo do posoliwan do mantad hiri’d Walai’d Sasambayangan dot Agayo do koinsanai di konunu-nunuan di pakayon do tumuku’ dot id tingolig do Baal, om Asira, om id rombituon. Om tutudai noddi di raja’ o koinsanai di konunu-nunuan do hiri’d soliwan di bandar diri, i hiri’d somok di Rantai do Kidron, om kuyutai no dau i tauu diri do hilo’d Baitol. ⁵ Om posoliwano’ ngai’ noddi di raja’ it imam di nongopili’ di piro-piro o raja’ do Yohuda do maganu-anu do hiri’d pananaraban do porsombahan di don tingolig do hiri’d piro-piro o bandar do Yohuda, om i hiri’d posorili’ do Yorusalim om i piro-piro ot imam di papatahak do porsombahan do sumbolion dot id Baal, om id tadau, om id tulan om id pomogunan do hilo’d mawo-dawo, om id rombituon. ⁶ Om pinosoliwan nogi’ di Yosia do mantad id Walai’d Sasambayangan dot Agayo i tingolig dot Asira, om tanggayai no do sumoliwan di bandar do minongoi do hilo’d Rantai do Kidron. Om hilo’ ngai’ no o pinonutudan di tingolig diri. Om tutuo’ nogi’ i tohun diri do gisom do naawu, om popinsasado’ noddi dau i tauu diri do hiri’d kalabangan do tulun dot ogumu’. ⁷ Iri nogi’ i piro-piro o bilik do hiri’d Walai’d Sasambayangan dot Agayo di tiiyonon di sundal do tingolig, i tiyonon diyolo’ do mogiampahu’ do ralan do tumuku’ dot id tingolig nga’ rinaag nogi’. (Hiri nod bilik diri o tiiyonon do tongoondu’ do mangawol do kain do papakayon diyolo’ do tumuku’ dot id tingolig dot Asira.) ⁸ - ⁹ Om i piro-piro ot imam di hilo’d Yohuda nga’ nangatan ngai’ do mongoi’d hilo’d Yorusalim om sinosomu’ ngai’ nogi’ diyolo’ i pananaraban do porsombahan di don tingolig do pointongkop do pananaraban dit imam do porsombahan di sumbolion do pointongkop di pomogunan. Om noduhan nogi’ i piro-piro ot imam diri do maganu-anu do hiri’d Walai’d Sasambayangan dot Agayo, nga’ pinologos i’ iyolo’ do mangakan di roti dit a’ rinalatan do pangambang, i taakanon di patahakon dot id piro-piro o tambalut diyolo’. Iri nogi’ i pananaraban do porsombahan do don tingolig di roitan do Tingolig do Kambing, it id somok do wawayaan di winonsoi di Yosua, i gobunor do bandar do pomogunan diri nga’ hinias nogi’. Iri nopo i wawayaan diri nga’ ogibangan do tontok do sumuang o tulun do bandar diri do maya’ di wawayaan dot agayo. ¹⁰ Om sinosomu’ nogi’ di Yosia i Topit, i tiiyonon do tumuku’ dot id tingolig di hilo’d Rantai do Hinom. Om aiso’ noddi o tulun do milo do papatahak do tanak dau do maan do porsombahan do sorobon do patahakon dot id tingolig do Molok. ¹¹ Om koinsanai di kuda’ di pinotobilang di piro-piro o raja’ do Yohuda, i patahakon do tontok do tumuku’ dot id tadau nga’ pinataam nogi’, om i korita’- kuda’ di pakayon do tontok do tumuku’ dot id tingolig nga’ tinutudan ngai’ nogi’. (Iri ngai’ nopo i korita’-kuda’ddi nga’ hiri’d natad di Walai’d Sasambayangan dot Agayo — it id toning di wawayaan dot agayo — a’ i’ osodu’ do mantad id bilik di tiiyonon di Natan Milik, i pagawai dit asawat o pangkat.) ¹² Hinias nogi’ i pananaraban do porsombahan, i winonsoi di piro-piro o raja’ do Yohuda di hiri’d sakai di taap di bilik di Raja’ Ahas. Om i pananaraban do porsombahan di winonsoi di Raja’ Manasi, i pinoiyon do hiri’d duwo o natad di Walai’d Sasambayangan dot Agayo, nga’ rinaag nogi’ om pinataam do hilo’d Rantai do Kidron. ¹³ Om sinosomu’ nogi’ di Yosia i pananaraban do porsombahan di winonsoi di Raja’ Suliman, i hiri’d ponong id koulayon do mantad id Yorusalim, do ponong id salatan do Nulu-Nulu do Saitun i podsusubakan do tingolig di kososomu’, i roitan dot Astorit, i tingolig do tulun do Sidon, om i tingolig do Kamos, i tingolig do tulun do Muab, om i tingolig do Milkom, i tingolig do tulun dot Amon. ¹⁴ Om hinaba’ nogi’ di Yosia i torigi do watu di don tingolig om i patung do tingolig dot Asira. Om iri nopo i tana’ di pinoudangan di torigi do watu’ddi om pinoilihan di patung diri nga’ pinorubpuan di Yosia do tulang do tulun. ¹⁵ Om tinutudan nogi’ di Yosia i tingolig dot Asira om i tiiyonon do modsubak do tingolig do hilo’d Baitol nga’ rinaag nogi’, iri nopo tiyonon do modsubak diri nga’ winonsoi di Raja’ Yirobiam, i tanak di Nibat — i raja’ do minamayayat do tulun dot Israil do momonsoi’d dusa. ¹⁶ Om koili no i Yosia, nga’ kokito no dau i kalabangan do hiri’d timpak di nuluhon, om ponuhu’ no iyau’d tulun do mongoi pongukad di lobong diri om tutudan ngai’ nondo diyolo’ i tulang do hiri’d sakai di pananaraban do porsombahan do hilo’d Baitol; om babako’ ngai’ no diyolo’ i pananaraban do porsombahan diri. Om i watu nga’ minumuk ngai’ nogi’ diyolo’. Om miagal nodti i Yosia do minonosomu’ di pananaraban do porsombahan diri. Om nangabayaan ngai’ nopo i nongkoboros di nabi do TUHAN di gulu po, di tontok di poingkakat i Raja’ Yirobiam do hiri’d toning di pananaraban di porsombahan diri, di tontok do Tadau dot Agayo. Om kokito po di Yosia it iso’ o lobong. ¹⁷ Om ponguhot no i Yosia, ’’Disai’dti lobong diti?’’ ka. Om boros ka di tulun do hilo’d Baitol, ’’Ilo’ nopo om lobong di songulun o nabi do boros do TUHAN. Om nokoongoi iyau do hiti do mantad iyau do hilo’d Yohuda, om pinoboros dau i winonsoi nu dot id pananaraban do porsombahan do hiti’d Baitol,’’ ka. ¹⁸ Boros ka di raja’, ’’Kada’ no ongoyo’ kuroi-kuroyo’ ilo lobong. Pologoson nopo i tulang dau do hiti, om a’ no powolihon!’’ ka. Om iri nopo i tulang di nabi di mantad hilo’d Yohuda om a’ i’ diyolo’ kinuro-kuro; om iri nogi’ i tulang di nabi di mantad hilo’d Samaria di linobong do hiri nga’ a’ i’ kinuro-kuro. ¹⁹ Raago’ ngai’ nopo di Yosia i tiiyonon do tumuku’ do tingolig di winonsoi di piro-piro o raja’ dot Israil, dot id pointikid-tikid di bandar dot Israil, i minoningkau do kototogod do TUHAN. Poingkuro nopo o winonsoi di Raja’ Yosia di hilo’d Baitol om iyo noddi o winonsoi dau dot id pananaraban do porsombahan dot id pointongkop dot Israil. ²⁰ Pinatai ngai’ di Yosia it imam dit a’ tumuku’ dot id Kinorohingan, do hiri’d sakai di pananaraban do porsombahan o pinamatayan dau diyolo’. Om tinutudan nogi’ di Yosia i tulang do tulun do hiri’d sakai do pointikid-tikid di pananaraban do porsombahan do hilo’. Om uli’ nogiddi i Yosia do hilo’d Yorusalim. ²¹ Om ponuhu’ noddi i Raja’ Yosia di rayat dau do mamaramai di tadau dot agayo do Paska do pomusou’d TUHAN, i Kinorohingan diyolo’, do miagal di nokotulis do hiri’d buuk do tumpongo. ²² A’ po nokoumbal do naramai o tadau dot agayo do Paska do miagal diti do solinaid di raja’ dot Israil, toi’ ko’ i maso di gompomutus do momorinta’ dot Israil. ²³ Tontok nogiddi kohopod om walu’ do toun di Yosia do momorinta’ do naramai kawagu iti tadau dot agayo do Paska do hilo’d Yorusalim. ²⁴ Om uyungo’ ngai’ no di Yosia i tulun do hilo’d Yorusalim om i hilo’d Yohuda, i momolohou do rusod di nangapatai, om i mogogontong, om pinataam o koinsanai di tingolig do sompiiyon di hiri’d walai, om i patung do tingolig, om i konunu-nunuan di pakayon do tumuku’ dot id tingolig, do tumanud di songintulis do hiri’d buuk di tumpongo di nokito di Hilkia, i Boyoon dot Agayo dot imam, do hiri’d Walai’d Sasambayangan dot Agayo. ²⁵ Aiso’ po o raja’ do miagal di Raja’ Yosia tu’ otorodok kopio do sumambayang dot id TUHAN, om pointalangon dau i kotorodoko’ dau dot id kowoyo-woyoon dau om id wonsoyon dau do tumanud di Tourat di songintulis dot id suang do Tourat di Musa. Om suwai nopoddi ko’ i Yosia om aiso’ noddi o raja’ do miagal dau. ²⁶ Nga’ i nopo winonsoi di Raja’ Manasi om minoningkau do kototogod do TUHAN dot id tulun do Yohuda; gisom piya do baino’ nga’ otogod kasai’ po o TUHAN. ²⁷ Om boros kad TUHAN, ’’Poingkuro nopo i winonsoi ku dot id tulun dot Israil om miagal noddi o wonsoyon ku dot id tulun do Yohuda. Om uyungon ku iyolo’ do mantad id pomogunan di pinatahak ku daa diyolo’. Om iyadaan ku i bandar do Yorusalim, i pinili’ ku. Om i Walai’d Sasambayangan dot Agayo di tiiyonon diyolo’ do sumambayang do tumanud di nokoboros ku nga’ iyadaan ku i’,’’ ka dau. ²⁸ - ³⁰ Om kapatai noddi i Raja’ Yosia do hilo’d Mogido dot id pinisangadan do hilo’ do tontok di minongoi iyau sangod di Niko, i raja’ do Masir, i minomoyo’ di piro-piro o soudor dau do minongoi panangod di Raja’ dot Asur do hilo’d tisan do Bawang dot Iprat. Om oito’ noddi di piro-piro o pagawai di Yosia i rata’ di Yosia om pasakayo’ no diyolo’ do korita’-kuda’ do minuli’ do hilo’d Yorusalim. Om lobongo’ no diyolo’ do hilo’d kalabangan do raja’. Om pomili’ noddi i tulun do Yohuda do tulun do sumiliu’d raja’, om pilio’ no diyolo’ i Yoahas, i tanak di Yosia do kusai, do sumowoli di Yosia do raja’. Koinsanai di nongowonsoi di Raja’ Yosia om nongkotulis ngai’ i’ do hiri’d suang do Buuk di Monusui do Pasal Ngai’ di Raja’ do Yohuda. ³¹ Duwo no nohopod om tolu o toun di Yoahas do tontok di nosiliu iyau’d raja’ do Yohuda, om tolu no tulan do koloido’ dau do minomorinta’ do hilo’d Yorusalim. Tina’ nopo dau om i Hamutal, i tanak di Yoromia, i mantad id bandar do Libna. ³² I Yoahas nogi’ nga’ nokowonsoi id dusa dot id TUHAN do miagal di taki- aki dau. ³³ Om naala’ i Yoahas di Niko, i raja’ do Masir di hilo’ iyau’d Ribla, it id watas do Hamat, om sinansagan o Yohuda do mambayar do sukai dot id di Niko do 3,400 kilogram do pirok om tolu nohopod om apat o kilogram do tamas. Om iri no o kinopupuson do pomorintaan di Yoahas. ³⁴ Om siliho’ no di Raja’ Niko i Ilyakim, i tanak di Yosia do kusai, do raja’ do Yohuda. Om powoliho’ nod i Niko o ngaran dau dot i Yoyakim. Om angatai no dau i Yoahas do mongoi’d hilo’d Masir, om hilo’ no o kinapatayon di Yoahas. ³⁵ Om ponimung noddi i Yoyakim do sukai do tumanud di kahara-haraan di tulun dau do pambayar di sukai di pinokianu di raja’ do Masir. ³⁶ Duwo no nohopod om limo o toun di Yoyakim do tontok di nosiliu iyau’d raja’ do Yohuda. Om hopod om iso’ o toun do koloido’ dau do momorinta’ do hilo’d Yorusalim. Tina’ nopo dau om i Sobuda, i tanak di Pidaya, i mantad hilo’d bandar do Ruma. ³⁷ Om i Yoyakim nga’ minomonsoi id dusa dot id TUHAN do miagal di taki-aki dau.

¹ Tontok dit i Raja’ Yoyakim o momorinta’ om rikot no i Nobukadnisar, i raja’ do Babil do minongoi panangod do gisom do naala’ o Yohuda. Om tolu di o toun do koloido’ di Yoyakim dot id suang do pomorintaan di Nobukadnisar. Nga’ saapo’ noddi di Yoyakim i Nobukadnisar dit alaid. ² Om ponuhu’ noddi o TUHAN do piro-piro o soudor dit ongkirapo-rapo do mantad hilo’d Babil, om Siria, om Muab om Amon do mongoi panangod di Yoyakim om mongoi pamaraag do Yohuda, do miagal di nokoboros mantad do TUHAN do pinolombus di piro-piro o nabi, i susuhuon do TUHAN. ³ Nowonsoi pogi’ o miagal diri nga’ nokoboros mantad nod TUHAN dot uyungon dau i tulun do Yohuda do mantad id pomogunan di pinatahak do TUHAN dot id diyolo’. Koponguyungan nopo dau diyolo’ nga’ i dusa di winonsoi di Raja’ Manasi, ⁴ nga’ agayo nopo kopio do koponguyungan om i minamatai i Manasi do tulun dit aiso’ o sala’. Om a’ no o TUHAN milo’d mangampun di Manasi di nowonsoi dau do miagal diri. ⁵ - ⁷ A’ noddi insan ongoi sangod i raja’ do Masir, tu’ maso nopoddi om koinsanai di hiri’d posorili’ do Masir, do mantad pod hilo’d Bawang dot Iprat, om gisom do korikot do hiri’d piwolitan do Masir do ponong id utara, i porintaon daa di Raja’ do Masir di gulu po, om iri ngai’ noddi i raja’ do Babil o momorinta’. Om tontok nopo di napatai i Yoyakim, om iri no i tanak dau’d kusai, i roitan dot i Yoyakin o nosiliu’d raja’ do suminowoli dau. Iri nopo i susuyon do suwai do pasal di Raja’ Yoyakim om nongkotulis ngai’ no dot id suang do Buuk di Monusui do Pasal Ngai’ di Raja’ do Yohuda. ⁸ Hopod nogi’ om walu’ o toun di Yoyakin do tontok di nosiliu iyau’d raja’ do hilo’d Yohuda. Om tolu no tulan do koloido’ dau do momorinta’ do hilo’d Yorusalim. Tina’ nopo dau om i Nohusta, i tanak di Ilnatan, i mantad hilo’d Yorusalim. ⁹ I Yoyakin nga’ minomonsoi id dusa dot id TUHAN do miagal di tapa’ dau. ¹⁰ Tontok di pomorintaan di Yoyakin, om minongoi i piro-piro o soudor do Babil panangod do Yorusalim do winoyo’ di piro-piro o boyoon do soudor di Nobukadnisar, om turungkuo’ no diyolo’ i bandar diri. ¹¹ Om daamot di piro-piro o soudor diri do songintutuk do monurungku’ di bandar do Yorusalim om ongoi no i Nobukadnisar do hilo’d Yorusalim. ¹² Om pangakun nopoddi do naala’ di Nobukadnisar i Raja’ Yoyakin om i tina’ om i tangaanak dau, om i piro-piro o boyoon do soudor om i pagawai dau di hiri’d walai dau. Om katangkap noddi i Yoyakin. Iti nopo nga’ nosiliu do tontok di kawalu’ do toun do pomorintaan di Nobukadnisar. ¹³ Om raago’ ngai’ nopo di Nobukadnisar i konunu-nunuan di tamas do winonsoi, i winonsoi di Raja’ Suliman do pakayon do hiri’d Walai’d Sasambayangan dot Agayo. Om koinsanai di konunu-nunuan di hiri’d Walai’d Sasambayangan dot Agayo om i hiri’d walai do raja’ dit angagayo o gatang nga’ tinanggayan ngai’ nopo di Nobukadnisar do hilo’d Babil. Om koinsanai di nongowonsoi’ddi nga’ miontok ngai’ nopo di nokoboros mantad do TUHAN. ¹⁴ - ¹⁶ Om tangkapo’ noddi di Nobukadnisar i Raja’ Yoyakin om i piro-piro o sawo dau, om i tina’ dau om i piro-piro o pagawai do hiri’d walai dau, om tanggayai nogiddi di Nobukadnisar do hilo’d Babil. Om turu’ noribu o tulun dit angabantug, om soribu o tulun do tukang om kohompit ngai’ no it ongoilo do monupu’ do basi’ om koinsanai di tulun di milo do sumangod. Om koinsanai nopo iyolo’ do tinanggayan do hilo’d pomogunan do pisangod. Om kohompit ngai’ nogi’ i sinakagon do raja’ om i tulun dit ongkipangkat. Kogumuo’ nopo dot oinsanan nga’ haro i’ doti’ o hopod noribu o tulun. Oruhai no do noinsanan i tulun do hilo’d Yorusalim do natanggayan do hilo’d pomogunan do pisangod. Iri po i tulun do mosikin kopio o noolu’. ¹⁷ Om pilio’ no di Nobukadnisar i Matania, i tamanon di Yoyakin, do sumiliu’d raja’ do Yohuda. Om powoliho’ no di Nobukadnisar o ngaran di Matania dot i Sodokia. ¹⁸ Duwo no nohopod om iso’ o toun do tumur di Sodokia do tontok di nosiliu iyau’d raja’ do Yohuda. Om hopod om iso’ o toun do koloido’ dau do momorinta’ do Yorusalim. Tina’ nopo dau om i Hamutal, i tanak di Yoromia, i mantad id bandar do Libna. ¹⁹ Om i Raja’ Sodokia nga’ minomonsoi id dusa dot id TUHAN do miagal di Raja’ Yoyakin. ²⁰ Om otogod noddi kopio o TUHAN di tulun do hilo’d Yorusalim om i tulun do Yohuda gisom dot a’ no iyolo’d TUHAN podulon.

¹ Om idu’ noddi i Sodokia do mantad id pomorintaan di Nobukadnisar, i raja’ do Babil. Om gowoi poddi om ngoyo’ noddi di Nobukadnisar om i piro-piro o soudor dau dit ongkirapo-rapo songodo’ o Yorusalim di tadau’d kohopod do tulan do kohopod do tontok di kosiam do toun do pomorintaan di Sodokia. Om pomukiim noddi iyolo’d hiri’d soliwan di bandar do Yorusalim. Om pomonsoi no iyolo’d tolig do posorili’ di bandar diri do ponurungku’ di bandar. ² Om turungkuo’ nopo diyolo’ i bandar diri gisom do nokorikot do kohopod om iso’ do toun do pomorintaan di Sodokia. ³ Tontok di tadau’d kosiam do tulan do kaapat do toun diri, om pononglous no o hiri’d bandar diri, gisom dot aiso’ no o taakanon di tulun do hiri. ⁴ Om babako’ noddi di pisangod i tolig di bandar diri. Nga’ mulong piya do notutukan di soudor do Babil i bandar diri nga’ nokosoliwan i’ i raja’ do Yohuda om koinsanai di soudor do Yohuda do totuong diri, om ongoi no iyolo’ do hilo’d Rantai do Yordan. Tu’ suminusui iyolo’ di ralan di kawaya’ di kabun do hiri’d toning di walai do raja’, om soliwan nogiddi iyolo’ do minaya’ di wawayaan dot agayo di kopiromutan di duwo o tolig dot id kinoiyonon diri. ⁵ Nga’ gusao’ no di piro-piro o soudor do Babil i Raja’ Sodokia om tangkapo’ no diyolo’ iyau do hilo’d Rantai do Yorikou. Om iduwai nopo iyau di tulun dau. ⁶ Om tanggayai no diyolo’ i Raja’ Sodokia do hiri’d di Raja’ Nobukadnisar do hilo’d bandar do Ribla, om hukumai noddi iyau. ⁷ Om pimpatayo’ no diyolo’ i tangaanak di Sodokia dot antang-antangan di Sodokia. Om tiuko’ no diyolo’ o mato di Sodokia, om kagasai nogiddi iyau om tanggayai no do kuminaa do hilo’d Babil. ⁸ Tontok di tadau’d koturu’ do tulan di kolimo di kohopod om siam do toun do pomorintaan di Nobukadnisar, i raja’ do Babil, om rikot no do hilo’d Yorusalim o songulun do roitan dot i Nobusaradan. Iyau nopo om ponosihat om boyoon do soudor di Nobukadnisar. ⁹ Om tutudai no di Nobusaradan i Walai’d Sasambayangan dot Agayo, om i walai do raja’ om koinsanai di walai di tulun dit ongkipangkat do hilo’d Yorusalim. ¹⁰ Om babako’ no di tulun dau i tolig di bandar diri. ¹¹ Om tanggayai ngai’ noddi di Nobusaradan do hilo’d Babil i tulun, dot i tukang di nongoolu-olu’ do hilo’d Yorusalim, om i tulun di minogidu’ do minongoi sugku’ di tulun do Babil. ¹² Nga’ iri nopo wookon di tulun di mosikin kopio om pinoundorong i’ diyolo’ do hilo’d Yorusalim. Om sinuhu’ diyolo’ do morobuat do hiri’d kabun dot anggur om hiri’d koumaan. ¹³ Om iri ngai’ nopo i torigi do tambaga’ om i korita’-kuda’ di hiri’d Walai’d Sasambayangan dot Agayo om i mimpun do tambaga’ om binabak ngai’ nopo di tulun do Babil, om igitai ngai’ noddi diyolo’ i tambaga’ddi do kuminaa do hilo’d pomogunan diyolo’. ¹⁴ - ¹⁵ Om nigitan ngai’ nogi’ diyolo’ o konunu-nunuan diti: i piro-piro o pononduk, om i poiiyanan do tauu do mantad id pananaraban do porsombahan, om i pakakas di lampung, om i piro-piro o mangkuk di poiyanan do raha’ di tayam-tayam di sumbolion do maan do porsombahan, om i mangkuk di poiyanan do kominyan om i piro-piro o pakakas do tambaga’ di pakayon do sumambayang, om i pakakas do tamas om pirok om kohompit ngai’ no i mangkuk om i talam, ¹⁶ om i pakakas do tambaga’ di winonsoi di Raja’ Suliman di pakayon do hiri’d Walai’d Sasambayangan dot Agayo, iri no i duwo o torigi do tambaga’, om i piro-piro o korita’-kuda’ om i mimpun dit agayo, dit awagat kopio gisom dot a’ no milo do tinimbang. ¹⁷ Iri nopo duwo o torigi do tambaga’ddi nga’ miirad nopo do sopiwalu’ o mito do kasawato’, om haro goduwo o tambaga’ do pinongulu di torigi’ddi do 1.3 mito do kasawato’. Pointutuk nopo di tambaga’ di pinongulu di torigi’ddi nga’ winansayan do pinoiyo-iyo do rantai do rinambo-rambot om dinakatan di winonsoi do pinoiyo-iyo do tua’ do delima. ¹⁸ - ¹⁹ Suwai no ko’ iri, om tangkapo’ no di Nobusaradan i Soraya, i Boyoon dot Agayo dot Imam, om i Sipania, i mongunguhup di Boyoon dot Agayo dot Imam, om i tolu o madtatamong di wawayaan di Walai’d Sasambayangan dot Agayo, om i limo o ponosihat di raja’ di poundorong do hiri’d bandar, om i boyoon do soudor, om i wakil do boyoon do soudor di mongilo-ilo do karaja’ di soudor, om it onom nohopod o tulun do suwai dit ongkipangkat. ²⁰ Om oinsanan nopo i tulun diri do pinaatod dot id di Raja’ Nobukadnisar do hilo’d bandar do Ribla, ²¹ i hilo’d watas do Hamat. Om pimbabagai noddi iyolo’ om patayo’ no. Om iyo noddi i tulun do Yohuda do pinosoliwan do mantad id pomogunan diyolo’ do tinanggayan do pisangod do kumaa dot id pomogunan do pisangod. ²² Om pilio’ noddi di Raja’ Nobukadnisar i Godalia, i tanak di Ahikam, i manangaki di Sapan, do sumiliu’d gobunor do hilo’d Yohuda do momorinta’ di tulun di noolu-olu’ do hilo’. ²³ Om soira’ di norongou di piro-piro o boyoon do soudor om i soudor do Yohuda dit a’ nakaakun do porintaon do Babil, i pinananggayan do pisangod di tulun do hilo’, om ongoi ngai’ no iyolo’ solowot di Godalia do hilo’d Mispa. Iri nopo i boyoon do soudor diri om: i Ismail, i tanak di Nitania; i Yohanan, i tanak di Karia; i Soraya, i tanak di Tanhumit, i mantad hilo’d bandar do Nitopa; om i Yasania, i mantad hilo’d bandar do Maaka. ²⁴ Om boro-boros noddi i Godalia dot id diyolo’, ’’Kada’ kou poddosi di piro-piro o pagawai do pomorinta’ do hilo’d Babil. Mundorong kou nopod hiti’d pomogunan toko’ om minsiriba’ nopo dot id raja’ do Babil. Om jominon ku i’ dot angapasi kou i’,’’ ka dau. ²⁵ Nga’ tontok di tulan do koturu’ do toun diri om ongoi nod hilo’d Mispa i Ismail, i tanak di Nitania, i manangaki di Ilisama, i sinakagon do raja’, do miniwoyo’ do hopod o tulun. Om ngoyo’ no diyolo’ songodo’ i Godalia om patayo’ no diyolo’ iyau, om i tulun do Yohuda om i tulun do Babil di poinsugku’ di Godalia. ²⁶ Om oinsanan nopo i tulun do Yohuda, dot i kaya’ om i mosikin do mogiwoyo-woyo’ di soudor do kuminaa do hilo’d Masir tu’ moddosi iyolo’ di tulun do Babil. ²⁷ Tontok di tadau’d koduwo nohopod om turu’ do tulan di kohopod om duwo do toun di kotolu nohopod om turu’ do mantad di natanggayan i Yoyakin do hilo’d pomogunan do pisangod, om kosiliu nod raja’ do hilo’d Babil i Iwil Mirodak, om polobuso’ noddi dau i Yoyakin do mantad hiri’d giil, tu’ osianan iyau di Yoyakin. ²⁸ Om osonong i’ i Iwil Mirodak dot id di Yoyakin. Om nonuan nogi’ di Iwil Mirodak i Yoyakin do pangkat dit asawat ko’ mantad di piro-piro o raja’ di natanggayan do hilo’d Babil. ²⁹ - ³⁰ Om a’ noddi i Yoyakin manampakai di pakayan do hiri’d giil. Om hiri kasai’ noddid walai do raja’ o taakanan dau om onuan nogi’ iyau do tusin do maan do kosukup-sukupan dau.