2 SUSUI

2 SUSUI

¹ Om nosiliu noddi i Suliman, i tanak di Raja’ Daud, do raja’ dit ogirot o pomorintaan do hilo’d Israil. Om binarakatan iyau do TUHAN, i Kinorohingan dau, om pinokoris kopio iyau do TUHAN. ² Om oinsanan nopo i boyoon do soribu o soudor om boyoon do hatus o soudor, om oinsanan i pagawai do pomorinta’, om oinsanan i boyoon do sompiiyon, om oinsanan i rayat dot Israil do sinuhu’ di Raja’ Suliman ³ do mongoi woyo’ dau do hilo’d tiyonon do sumambayang di hilo’d Gibion. Om ongoi ngai’ nopoddi iyolo’ do hilo’ tu’ hilo’ no i Kiim do TUHAN di winonsoi di Musa, i susuhuon do TUHAN, di hilo’ pod tana’ do kowotuan. ⁴ (Nga’ iri nopo i Kaban do Tumpongo’d TUHAN om hilo’ nod Yorusalim, do poinsuang di kiim do winonsoi di Raja’ Daud, do tontok di pinawaliu dau i Kaban do mantad hilo’d Kiriat Yiarim.) ⁵ Om i pananaraban do porsombahan, i tambaga’ do winonsoi, i winonsoi di Bisaliil i tanak di Uri, i manangaki di Hur, nga’ hilo’ id Gibion, do hiri’d dotimbabaan di Kiim do TUHAN. Om hilo’ no i Raja’ Suliman om koinsanai di rayat do suminambayang dot id TUHAN. ⁶ Om hiri nod pananaraban do porsombahan di tambaga’ do winonsoi, it id dotimbabaan di Kiim, o pinanaraban di raja’ do soribu o tinan do tayam-tayam do maan do porsombahan di sorobon dot id TUHAN. ⁷ Om totuong iddi do minintalang o Kinorohingan dot id di Suliman, om boro-boros nod, ’’Nunu o korohian nu do patahakon ku diya’?’’ ka. ⁸ Om boros ka di Suliman, ’’TUHAN, nokointalang nu no dot osianan kopio ko di Daud, i tapa’ ku, om baino’ noddi om nosiliu oku no diya’ do raja’ do suminowoli dau. ⁹ Om maha’ daa om bayaanon nu i batos nu dot id tapa’ ku do dinondo, oi TUHAN, i Kinorohingan ku. Nopili’ oku no diya’ do sumiliu’d raja’ do bansa’ dit agayo, it a’ no ointob-intob o kogumuo’. ¹⁰ Om iri no o kopokionuan ku diya’ do toilaan om pomusarahan dot atarom do momorinta’ diyolo’. Tu’ ondung amu’, om poingkuro oku po daa do momorinta’ diti tulun nu dot irad diti kogumu’?’’ ka dau. ¹¹ Om boros kad Kinorohingan dot id di Suliman, ’’Osonong tomod i pinokianu nu. A’ ko i’ minokianu do kakayaan ko’ dapu’ ko’ kobontugan ko’ kapatayon di pisangod nu, ko’ tumur po dot anaru, suwai ko’ minokianu ko do toilaan om pomusarahan dit atarom do momorinta’ diti tulun ku, di pinaharapan ku diya’. ¹² Om iri no o kapanahakan ku diya’ do toilaan om pomusarahan dot atarom. Om suwai no ko’ iri, om posimbayanon tiya’ po, om pakayaon ku iya’, om pobontugon ku ko’ mantad di piro-piro raja’ dit ongosonong di maso di nakatalib, om id dabantalan,’’ ka dau. ¹³ Om tongkiad noddi i Suliman di tiyonon do sumambayang do hilo’d Gibion, i pinoiyanan di Kiim do TUHAN, om poguliai no dau do hilo’d Yorusalim. Om hilo’ no iyau do momorinta’ dot Israil. ¹⁴ Om pongonuwai no dau i soudor dau do soribu om apat nahatus o korita’- kuda’ di don sumasangod, om hopod om duwo noribu o tinan do kuda’ di don sumasangod. Songintanga’ nopoddi nga’ pinoiliu dau do hilo’d Yorusalim, om iri no suwai om pinakaa dau dot id bandar do suwai. ¹⁵ Tontok nopo di pomorintaan di Suliman, om pirok nopo nga’ miagal no do konunu-nunuan di koubasanan kasai’, tu’ miagal pod watu; om kayu sedar do Libanon nga’ ogumu’ no kopio tu’ miagal pod kayu ara di koubasanan o kogumuo’. ¹⁶ Om iri ngai’ no i wakil di raja’ o momoli do kuda’ do mantad hilo’d Musri om hilo’d Kilikia, ¹⁷ om korita’-kuda’ do don sumasangod do mantad hilo’d Masir, om padagangon no kawagu diyolo’ dot id piro-piro o raja’ do Hit om raja’ do Siria. Om gatang nopo do padagang diyolo’ nga’ hatus om limo nohopod o tusin do pirok dot iso’ o kuda’, om onom nahatus o tusin do pirok dot iso’ o korita’-kuda’ do don sumasangod.

¹ Om natantu’ no di Raja’ Suliman do momonsoi iyau do Walai’d Sasambayangan dot Agayo do don TUHAN, om momonsoi do walai’d raja’ dot iyonon dau. ² Om ponuhu’ no i Suliman do turu’ nohopod noribu o tulun do mongoi pomirangkat di pakakas do pawaalon, om walu’ nohopod noribu o tulun do mamabak do watu do hilo’d konuluhanan, om tolu noribu om onom nahatus o mandur do miontong do karaja’ddi. ³ Om porikoto’ no di Suliman o boros diti dot id di Hiram, i raja’ do Tirus do poingkaa, ’’Osonong do midagang-dagang to do miagal di winonsoi di Daud, i tapa’ ku. Pinapadagang ko do kayu sedar do Libanon dot id dau do pamaal di walai dau do don raja’. ⁴ Om baino’ no om orohian oku do mamaal di Walai’d Sasambayangan dot Agayo do don TUHAN, i Kinorohingan ku. Om hiri nondod walai’ddi o tiyonon ku om tiyonon di rayat ku do sumambayang om modtutud do kominyan om it ongosonong o kosingudan. Om posodia’ kasai’ nopondo iyahai do roti do maan do porsombahan dot id TUHAN. Om patahak nondo iyahai do porsombahan di sorobon do pointikid-tikid do kosuabon om sosodopon, om pointikid do tadau’d Sabat, om tadau dot agayo do Tulan do Wagu, om tontok di piro-piro o tadau di natantu’ mantad do TUHAN, i Kinorohingan dahai, do kopomusahan dahai dau. Nokoponuhu’ no iyau do tulun dot Israil do momonsoi do miagal diri do gisom dot alaid. ⁵ Om mositi’ nod suwai-suwai ko’ i walai di koubasanan i Walai’d Sasambayangan dot Agayo do wonsoyon ku tu’ Kinorohingan nopo dahai om agayo i’ ko’ mantad do nunu nopo o ponokokinorohingan do suwai. ⁶ Nga’ otopot nopo kopio om iso’ pod tulun nga’ aiso’ i’ o milo do momonsoi do walai’d Kinorohingan, tu’ oinsanan piya ilo tawan nga’ a’ i’ kabagal do tiyonon dau. Om iri nopondo i Walai’d Sasambayangan dot Agayo di wonsoyon ku om milo no kopio do podtutudan do kominyan dot id Kinorohingan. ⁷ Om iri no o kopokionuan ku diya’ do paatod dot id dahai do tulun dit oilo kopio do manantan do tamas, om pirok, om tambaga’ om basi’, om it oilo do mangawol do kain dit otomou, om it otomou daragang-ragang om it aragang, om it oilo do monipong. Om muhup nondo iyau di piro-piro o tukang di mantad hilo’d Yohuda om hilo’d Yorusalim, i nongopili’ mantad di Daud, i tapa’ ku. ⁸ Om oilaan ku nogi’ dot ongoilo kopio do managad do kayu i tulun di mananagad do kayu do hino’d pomogunan nu. Om paatadan oku no daa diya’ do piro-piro o bansa’ do kayu sedar om kayu cendana do mantad hilo’d Libanon. Om suhuon ku indo i tulun dahai do muhup di tulun nu, ⁹ do posodia’ do kayu dot ogumu’. Tu’ mositi’ no dot agayo om olumis i Walai’d Sasambayangan dot Agayo di maan dahai waalo’. ¹⁰ Om paatadan i’ dahai do taakanon i tulun nu do duwo noribu tan do gandum, om duwo noribu tan do barli, om apat nahatus noribu lito do waig dot anggur, om apat nahatus noribu lito do tumau do saitun,’’ ka. ¹¹ Om simbaro’ no di Raja’ Hiram i surat di Raja’ Suliman, do poingkaa, ’’Siniliu ko do TUHAN do raja’, tu’ osianan i’ o TUHAN do bansa’ nu. ¹² Royohon no o TUHAN, i Kinorohingan dot Israil, i minomonsoi do tawan om pomogunan! Nonuan dau i Daud do tanak do kusai di kipomusarahan dot atarom om i kitoilaan, i momonsoi do walai’d TUHAN om walai do dong raja’ dot iyonon dau. ¹³ Paandadon ku nodti do paatod o songulun o tukang dit oilo om atarom o pomusarahan, i roitan dot i Huram. ¹⁴ Tina’ nopo dau om mantad id payat do Dan, om tapa’ no dau om tulun do Tirus. Iyau nopo om oilo kopio do momonsoi do nunu nopo i tamas, om pirok, om basi’, om watu om kayu do wonsoyon. Om milo nogi’ iyau do mangawol do kain dot otomou, om it otomou daragang-ragang, om it aragang, om iri nogi’ i kain linan. Om milo ngai’ nopo iyau do mongikir do poiyoon do nunu nopo i poiyaan. Om suhuon nopo iyau do kumaraja’ do poinsugku’ di tukang nu iya’ om i tulun di nakakaraja’ dot id tapa’ nu. ¹⁵ Om poingandad no iyahai do korikatan di gandum, om barli, om anggur, om i tumau do saitun di pinabatos nu’ddi. ¹⁶ Om mongoi indo iyahai panagad do kayu sedar do hilo’d konuluhanan do Libanon do songkuro nopo o kogumuo’ do pokionuon nu. Om kagasan nogindo dahai do poiyoon di gakit, om porulunon dahai do hilo’d rahat do gisom do hilo’d Yopi. Om hilo’ nopondo om oongoi no dokoyu kasaan do pokoyoon do hilo’d Yorusalim,’’ ka. ¹⁷ Om papaharo no i Raja’ Suliman do pongintaban do koinsanai di tulun do bansa’d suwai di poingiyon do hilo’d Israil, do miagal di winonsoi di Raja’ Daud, i tapa’ dau. Om koilaai no do 153,600 o tulun do bansa’d suwai. ¹⁸ Om 70,000 o tulun do mantad id pogialatan diyolo’ do sinuhu’ do mongoi panaan di maan do waalon, om 80,000 o mamabak do watu do hilo’d konuluhanan, om 3,600 o mandur do miontong do karaja’ddi.

¹ Om natantu’ mantad no di Daud, i tapa’ di Suliman, do waalan nopo di Walai’d Sasambayangan dot Agayo om hilo’d Yorusalim; do hiri’d Nuluhon do Moria, i tiyonon do momogomos do gandum, it i Arauna daa, i tulun do Yobus, o sanganu di gulu po. ² Om tinimpuunan nopo di Raja’ Suliman do momonsoi i Walai’d Sasambayangan dot Agayo’ddi nga’ di tulan do koduwo di kaapat do toun dau do momorinta’. ³ Konoruo’ nopo di walai nga’ duwo nohopod om turu’ o mito om kalaabo’ no om siam o mito. ⁴ Konoruo’ nopo di langga’ dit id gulu kobontol om miirad do kalaabo’ di walai, tu’ siam o mito. Om kasawato’ no om limo nohopod om apat o mito. Om hiri nopod ponong id suang di langga’ddi nga’ nurogupan do tamas di nosompipi’. ⁵ Hiri nopod langga’ dit agayo di walai’ddi nga’ linimput do papan do kayu sedar do Libanon om nurogupan do tamas dit osonong, om kinikiran do pinoiyo-iyo do guas do kurma om rantai. ⁶ Om linumis po di raja’ i walai’ddi do watu dit olumis om it agayo gatang dit ongosonong kopio om tamas di nanu do mantad hilo’d pomogunan do Parwaim. ⁷ Om iri nogi’ i tamas diri o pinonguragup dau di limput di Walai’d Sasambayangan dot Agayo’ddi, om i boruti di pinadakatan di limput, om i pinadakatan di totobon, om iri ngai’ i totobon di wawayaan. Om kinikiran ngai’ nopo di pinoiyo-iyo do moloikat di roitan do kerub o hiri’d limput. ⁸ Konoruo’ nopo di bilik di hiri’d gogok kopio, i roitan do Bilik dit Olidang Kopio, om siam o mito, om kalaabo’ no om siam o mito, dot irad do kalaabo’ di Walai’d Sasambayangan dot Agayo. Kogumuo’ nopo do tamas do pinonguragup di limput di Bilik dot Olidang Kopio’ddi om duwo nohopod o tan, ⁹ om limo nahatus om turu’ nohopod o gram do tamas do winonsoi do lantak. Iri nopo limput do koinsanai’d di bilik di hiri’d tingkat dot id sawat om nurogupan do tamas. ¹⁰ - ¹³ Om minonuhu’ nogi’ i raja’ di piro-piro tukang do momonsoi do duwo i poiyo-iyoon do moloikat di roitan do kerub, do tambaga’ o wonsoyon; om urogupan nogindo do tamas om pitoningon do poiliu, do potimbaba’ di wawayaan do hiri’d Bilik dit Olidang Kopio. Om wansayan goduwo nopo do talad di poungkalad do 2.2 mito do konoruo’, om kopitopis i’ i tompok do tiso’ di talad di winonsoi’ddi do hiri’d tanga’ di bilik, om iri no tompok di talad do koduwo om poirikot do hiri’d limput do ponong id gibang om ponong id wanan. Konoruo’ nopo di talad diri om siam o mito; miirad nopo do kalaabo’ di bilik. ¹⁴ Om iri nopo Bilik dit Olidang Kopio’ddi om winansayan do tirai do kain linan om kain dit otomou, om kain dit otomou daragang-ragang om kain dit aragang. Om rinindaan i tirai’ddi do pinoiyo-iyo do moloikat di roitan do kerub. ¹⁵ Om pomonsoi no i raja’ do duwo o torigi do sopihopod om limo om satanga’ o mito do kasawato’, om poudongo’ no dau do hiri’d gulu kobontol di Walai’d Sasambayangan dot Agayo. Om winansayan goduwo nopo i torigi’ddi do pinongulu do 2.2 mito o kasawato’. ¹⁶ Om linumis po i pinongulu di torigi’ddi di tambaga’ do winonsoi do pinoiyo-iyo do rantai di rinambo-rambot om hatus o pinoiyo-iyo do tua’ do delima. ¹⁷ Pinoudangan nopo di torigi dot agayo’ddi om hiri’d miampaping di wawayaan do sumuang di Walai’d Sasambayangan dot Agayo; om iri nopo i torigi do ponong id salatan om pinungaranan do Yakin, om iri no torigi di ponong id utara om pinungaranan do Buas.

¹ Om ponuhu’ no i Raja’ Suliman do momonsoi dot iso’ o pananaraban do porsombahan do tambaga’ o wonsoyon, do konoruon nopo om siam o mito, om kalaabon nga’ siam i’ o mito. Om kasawato’ no om apat om satanga’ o mito. ² Om minomonsoi nogi’ iyau do tangki’ do tambaga’, dot ourug o pinomonsoi. Korolomo’ nopo di tangki’ om 2.2 mito, om sukatan no do padarapas di kabang om 4.4 mito, om kogoyoo’ no do pointutuk om 13.2 o mito. ³ Pointutuk nopo do ponong id soliwan do tisan di kabang di tangki’ om kinikiran do pinoiyo-iyo do sapi’ do duwo o rulud, do pinasagalai di tangki’. ⁴ Iri nopo tangki’ddi nga’ pinasakai do likud do hopod om duwo o sapi’ di tambaga’ do winonsoi — tolu o sapi’ do potoguang ponong id utara, om tolu o potoguang ponong id salatan, om tolu o potoguang ponong id kotonobon, om tolu o potoguang ponong id koulayon. ⁵ Kakapalo’ nopo di tangki’ om 75 o milimito. Om iri nopo tisan do kabang di tangki’ nga’ koiyo-iyo di tisan do kabang do sangkir tu’ posuringa’ do koiyo-iyo di tusak do bunga bakung di noungkalad no. Korumpos nopo di tangki’ om haro i’ doti’ o 60,000 o lito. ⁶ Om minomonsoi po i Raja’ Suliman do hopod o mimpun dot angagayo. Limo o poilihon do hiri’d ponong id salatan di Walai’d Sasambayangan dot Agayo om limo o poilihon do hiri’d ponong id utara. Iri ngai’ nopo mimpun dit angagayo’ddi nga’ pongougan di popot do tayam-tayam di sorobon do maan do porsombahan di sumbolion. Om iri no waig di hiri’d tangki’ dit agayo’ddi om maan dit imam do pomougan. ⁷ - ⁸ Om minomonsoi po iyau do hopod o potimpakan do lampung do tamas o winonsoi; om pinoiyo di poiyaan di natantu’ mantad, om minomonsoi iyau do hopod o mija’. Pinoiyanan nopo di hopod o potimpakan do lampung om i hopod o mija’ diri nga’ hiri’d bilik dot agayo di Walai’d Sasambayangan dot Agayo; limo o potimpakan do lampung om limo o mija’ do ponong id gibang, om sopilimo o pinoiliu do hiri’d ponong id wanan. Om minomonsoi po iyau do hatus o mangkuk do tamas do winonsoi. ⁹ Om minomonsoi po i Raja’ Suliman dot iso’ o natad do ponong id suang do maan do don imam, om iso’ kawagu o natad do ponong id soliwan. Om iri nopo totobon di wawayaan dit id piolitan di duwo o natad diri om nurogupan do tambaga’. ¹⁰ Iri nopo tangki’ om pinoiliu do hiri’d linsuk di ponong id salatan om potimbaba’ ponong id koulayon do hiri’d Walai’d Sasambayangan dot Agayo. ¹¹ - ¹⁶ Om minomonsoi po i Huram, i boyoon di tukang, do kuali’, sikup, om mangkuk dot ogumu’. Om kopongo ngai’ no dau do minomonsoi o koinsanai di pakakas do hirion id Walai’d Sasambayangan dot Agayo, do miagal di nakabatos dau dot id di Raja’ Suliman. Iri ngai’ nopo pakakas diri om: Duwo o torigi dot agayo Duwo o pongulu do torigi do pinoulu di duwo o torigi’ddi I winonsoi do pinoiyo-iyo do rantai do rinambo-rambot do hiri’d duwo o pinongulu di torigi Apat nahatus o pinoiyo-iyo do tua’ do delima do tambaga’ do winonsoi, i pinorulud do duwo o rulud do sopihatus dot iso’ o rulud; om pinotutuk di winonsoi do pinoiyo-iyo do rantai do rinambo-rambot di hiri’d duwo o pongulu di torigi. Hopod o korita’-kuda’ Hopod o mimpun dot angagayo Iso’ o tangki’ Hopod om duwo o sapi’ di tambaga’ do winonsoi do pasakayan di tangki’ Piro-piro o kuali’, om sikup om totodok. Om tambaga’ nopo di pinomonsoi di Huram do koinsanai di pakakas diri om tambaga’ di kinisasan do gisom dot okolong. Om winonsoi ngai’ dau iri do maan do koburu-buruon do hiri’d Walai’d Sasambayangan dot Agayo, do miontok di pinonuhuan di Raja’ Suliman. ¹⁷ Om sinuhu’ iyolo’ di Raja’ do momonsoi’ddi do hilo’d podsusupuan dit id piolitan do Sukot om Sirida, it id Rantai do Yordan. ¹⁸ Om ogumu’ no kopio i pakakas diri gisom dot iso’ pod tulun nga’ aiso’ no o koilo ondung piro o kilogram do tambaga’ do naayi’ do pinomonsoi’ddi. ¹⁹ - ²² Om minonuhu’ po i Raja’ Suliman do momonsoi do piro-piro pakakas do suwai do tamas dit osompipi’ o wonsoyon, do koburu-buruon do hiri’d Walai’d Sasambayangan dot Agayo. Iri ngai’ nopo pakakas diri om: Pananaraban do Porsombahan Piro-piro o mija’ do poiyanan di roti do maan do porsombahan dot id Kinorohingan Koinsanai di potimpakan do lampung om i lampung do tamas dit osompipi’ do winonsoi; i tutudan do hiri’d dotimbabaan di Bilik dit Olidang Kopio, do miontok di natantu’ mantad I pinomolumis di pinoiyo-iyo do tusak do bunga Piro-piro lampung Piro-piro o pananggip do popou Pomisok do lampung Piro-piro o mangkuk Piro-piro o piring do poiyanan do kominyan Piro-piro o talam do poiyanan do popou Koinsanai di totobon do wawayaan di koiwang ponong id soliwan di Walai’d Sasambayangan dot Agayo om i totobon di Bilik dit Olidang Kopio nga’ nurogupan ngai’ nopod tamas.

¹ Om kopongo poddi di Raja’ Suliman do momonsoi i Walai’d Sasambayangan dot Agayo, om poopio’ no dau do hiri’d piro-piro bilik do poopian o koinsanai di pirok, om tamas, om i konunu-nunuan do suwai di pinatahak di Daud dot id TUHAN. ² Om lohowo’ ngai’ noddi di Raja’ Suliman o koinsanai di boyoon do payat om pinuruan do sompiiyon dot Israil do rumikot do hilo’d Yorusalim do mongoi di Kaban do Tumpongo’d TUHAN do mantad hilo’d Sion, i Bandar di Daud, om posuangon do hiri’d Walai’d Sasambayangan dot Agayo. ³ Om rikot ngai’ nopo iyolo’ do tontok di Tadau’d Agayo do Kinuhub-Kuhub. ⁴ Om kongotimung ngai’ poddi i boyoon om saano’ no di tulun do Liwi i Kaban do Tumpongo, ⁵ om igitai no diyolo’ do hiri’d Walai’d Sasambayangan dot Agayo. Om iri nogi’ i Kiim do TUHAN om i pakakas do hiri nga’ pinawaliu ngai’ no dit imam om i tulun do Liwi do pinosuang do hiri’d Walai’d Sasambayangan dot Agayo. ⁶ Om timung nogiddi i Raja’ Suliman om koinsanai di tulun dot Israil do hiri’d dotimbabaan di Kaban do Tumpongo om papatahak no iyolo’ do porsombahan dot id TUHAN, do pinatahak nopo om dumba’ om sapi’ dot ogumu’ kopio, gisom dot a’ no ointob-intob. ⁷ Om posuango’ ngai’ nogiddi dit imam i Kaban do Tumpongo do hiri’d Walai’d Sasambayangan dot Agayo, om poiliho’ no diyolo’ do hiri’d sahau di winonsoi do pinoiyo-iyo do moloikat do roitan do kerub, do hiri’d Bilik dit Olidang Kopio. ⁸ Iri nopo talad di winonsoi di pinoiyo-iyo do moloikat do roitan do kerub nga’ poungkalad do poinsompon di Kaban om i kayu do pinangantayang di Kaban. ⁹ Iri nopo kayu di pinangantayang nga’ anaru kopio, gisom dot iri no tulun di poingkakat do hiri’d hapak kopio di Bilik dit Olidang Kopio o kokito di tompok di kayu di pinangantayang diri. (Hilo’ kasai’ po i kayu do pinangantayang diri do gisom do baino’.) ¹⁰ Poinsuang nopo di Kaban do Tumpongo om aiso’ i’ o suwai ko’ i duwo o kaping do watu. Iri nopo duwo o kaping do watu’ddi om pinosuang di Musa do hiri’d Kaban di hilo’ pod Nuluhon do Sinai; do tontok di minomonsoi i’ o TUHAN do tumpongo dot id bansa’ dot Israil, di kososoliwan diyolo’ do mantad hilo’d Masir. ¹¹ - ¹⁴ Nokosodia’ ngai’ no it imam do hiri, i mantad id piro-piro o sinompuruan, do momonsoi di wonsoyon do don tugama’. Om oinsanan nopo i modsisinding om i popouni do tuunion do mantad id payat di Liwi — i Asap, i Himan om i Yodutun om koinsanai dit id suang do pinuruan do sompiiyon diyolo’, do kipinakai do pakayan do kain linan. Iri nopo i tulun do Liwi om miningkakat do ponong id koulayon do mantad id pananaraban do porsombahan om ongkiinigit do simbal om kecapi. Om poinsugku’ nogi’ diyolo’ o hatus om duwo nohopod ot imam di popouni do torumpit. Iri nopo sinding di modsisinding diri om ompoton do torumpit om simbal om tuunion do suwai. Om iti no i boroson do sinding diyolo’ dot id TUHAN, ’’Royohon no o TUHAN, tu’ iyau nopo om osonong. Mompus-ompus kasai’ i’ o kosianan dau,’’ ka. Tontok di suminoliwan it imam do mantad hiri’d Walai’d Sasambayangan dot Agayo, om sigog i’ do koponu’ i walai’ddi do tulinau do tanda’ do nakarapou o TUHAN, gisom dot a’ no iyolo’ milo do potilombus do momonsoi di natantu’ mantad do wonsoyon do tontok do sumambayang.

¹ Om sambayang noddi i Raja’ Suliman do poingkaa, ’’Oi TUHAN, uhang nu nogi’ do miyon dot id pituongon do haun. ² Nga’ baino’ noddi, om nawansayan ku no iya’ do walai do miagal do walai’d raja’, do maan nu dot iyonon do gisom dot alaid,’’ ka dau. ³ Om kasambayang poddi i raja’, om toguang no iyau dot id toinsanan do rayat di songingkakat do hiri, om pokionuwai no dau iyolo’ do barakat do mantad id Kinorohingan. ⁴ - ⁶ Boros ka dau, ’’Di nopo di gulu po, om minamatos o TUHAN dot id di Daud, i tapa’ ku do poingkaa, ’Mantad di posoliwano’ ku i’ o tulun ku do mantad hilo’d Masir, om gisom do baino’, om aiso’ i’ o tiso’ pod bandar do hiti’d pomogunan dot Israil do pinili’ ku do poingkakatan do Walai’d Sasambayangan do maan ku, om aiso’ o songulun piya do pinili’ ku do sumiliu do boyoon dot Israil, i bansa’ do songonuon ku. Nga’ baino’ noddi, om pilion ku o Yorusalim dot iyonon do sumambayang dot id doho’. Om iya’ no, oi Daud, o pilion ku do momorinta’ di tulun ku,’ ka. Royohon no o TUHAN, i Kinorohingan dot Israil, i minamayaan do batos diri!’’ ka dau. ⁷ Om boros ka kawagu di Suliman, ’’Nokopomusorou no i Daud, i tapa’ ku, do momonsoi do Walai’d Sasambayangan dot Agayo do maan do don TUHAN, i Kinorohingan dot Israil. ⁸ Nga’ boros kad TUHAN dot id dau, ’Osonong i’ daa kopio ino tosorou nu. ⁹ Nga’ okon i’ ko’ iya’ o popoingkakat di Walai’d Sasambayangan dot Agayo, suwai ko’ i tanak nu,’ ka dau. ¹⁰ Om baino’ noddi om nabayaan nod TUHAN i batos dau. Om nosiliu oku nod raja’ dot Israil do suminowoli di tapa’ ku. Om nowonsoi ku no i Walai’d Sasambayangan dot Agayo do maan do TUHAN, i Kinorohingan dot Israil. ¹¹ Om nokosuang ku no do hiri’d Walai’d Sasambayangan dot Agayo i Kaban do Tumpongo, i sinuangan di watu do tumpongo’d TUHAN dot id tulun dot Israil,’’ ka dau. ¹² - ¹³ Om minomonsoi po i Suliman do mimbar do tambaga’ o winonsoi do hiri’d tanga’ di natad di Walai’d Sasambayangan dot Agayo. Konoruo’ nopo di mimbar om 2.2 o mito, om kalaabo’ nga’ irad iddi tu’ 2.2 o mito, om kasawato’ no om 1.3 o mito. Om ongoi no i Suliman ingkakat do hiri’d mimbar diri dot id dotoguangan do koinsanai di rayat di nakarapou’d hiri, om timbaba’ no iyau di pananaraban do porsombahan. Om kokito ngai’ i’ dau i tulun do hiri. Om otud nogiddi iyau, om poinsawato’ goduwo no dau o longon dau, om sambayang noddi. ¹⁴ Boros ka dau, ’’Oi TUHAN, i Kinorohingan dot Israil! Aiso’ no o Kinorohingan do koiyo diya’ do hilo’d tawan om hiti’d pomogunan! Binayaan nu i’ i batos nu om pinointalang nu o kosianan nu dot id tulun nu dit otorodok dot id diya’ om it obingumboyo’ do mikuwo’d aayi-ayi’ o ginawo. ¹⁵ Om binayaan nu i batos nu dot id di Daud, i tapa’ ku; nowonsoi ngai’ nu noddi do tadau’d baino’ o pointikid-tikid di boros di pinoboros nu. ¹⁶ - ¹⁷ Om nakabatos ko nogi’ dot id tapa’ ku dot ondung iso-iso’ kopio o ginawo di sinakagon dau do tumanud di Tourat nu do miagal di winonsoi dau, om haro kasai’ nopondo o songulun do mantad id sinakagon dau dot osiliu do raja’ dot Israil. Om baino’ nodti, oi TUHAN, i Kinorohingan dot Israil, om pokionuon ku do bayaanon nu po o koinsanai di pinabatos nu dot id di Daud, i tapa’ ku, i susuhuon nu’ddi. ¹⁸ Nga’ milo ko i’ tuu kopio, oi Kinorohingan, do miyon do hiti’d pomogunan dot id pogialatan do tulun? Tu’ oinsanan piya ilo tawan nga’ a’ nu i’ kabagal dot iyonon, om okuro-kuro nogindo iti Walai’d Sasambayangan dot Agayo di winonsoi ku! ¹⁹ Oi TUHAN, i Kinorohingan ku, iyoho’ no o susuhuon nu! Om pokinongoho’ no daa doho’ iti sambayang ku, oi TUHAN, i Kinorohingan ku, om patahako’ no iti pokionuon ku. ²⁰ - ²¹ Om intirungan no do pointikid-tikid do tadau om totuong iti Walai’d Sasambayangan dot Agayo di pinili’ nu do diya’. Om maha’ daa om korongou ko doho’ do hino’d kinoiyonon nu do hino’d surga, om mangampun doho’ om mangampun di tulun nu do tontok do sumambayang iyahai dot id diya’ do potimbaba’ diti walai. ²² Om soira’ nopo do haro o tulun do tondoson do nokowonsoi’d sala’ dot id tulun do suwai, om angatan nondo do hiti’d pananaraban do porsombahan di hiti’d Walai’d Sasambayangan dot Agayo, do sumumpa’ dot a’ iyau nokowonsoi’d sala’, ²³ om pokinongohon nori do hino’d surga, om butusan no i susuhuon nu’ddi, oi TUHAN. Hukuman no i kisala’ om poiduwon no it aiso’ o sala’. ²⁴ Om soira’ nopo dot aala’ do pisangod o bansa’ dot Israil, iti tulun do songonuon nu, tu’ obungou di dusa diyolo’, om rumikot nondo iyolo’ dot id diya’ do mokitulung, om mongoi do hiti’d Walai’d Sasambayangan dot Agayo, om sumambayang do mikuwo’d osiriba’ o ginawo do mokiampun diya’, ²⁵ om pokinongohon no iyolo’ do hino’d surga. Om maha’ daa om ompunan nu o dusa diti tulun nu om pogulion nu kawagu iyolo’ do hiti’d pomogunan di nakatahak nu dot id komolohingan diyolo’. ²⁶ Soira’ nopo dot a’ ko poporikot do rasam tu’ nokowonsoi i’ do dusa dot id diya’ o tulun nu, om ondung kumorologo iyolo’ di dusa diyolo’ om tumimbaba’ diti Walai’d Sasambayangan dot Agayo, om sumambayang do mikuwo’d osiriba’ o ginawo dot id diya’, ²⁷ om pokinongohon no iyolo’ do hino’d surga, oi TUHAN. Om ompunan no o dusa di susuhuon nu, i tulun dot Israil. Tudukan no iyolo’ do momonsoi dit otopot. Om owonsoi pondo o miagal diri, om porikatan nod rasam o hiti’d pomogunan nu, i pomogunan di pinatahak nu dot id tulun nu do sumiliu’d songonuon diyolo’ do gisom dot alaid. ²⁸ Soira’ nopo do mononglous ko’ orikatan do toruol di mogkoroliu o hiti’d pomogunan diti, ko’ angaraag i totonomon dot oontok do tongus dit alasu’ ko’ akanon do katat, om soira’ nopod songodon do pisangod i tulun nu, ko’ oontok do toruol, ²⁹ om pokinongohon no o sambayang diyolo’. Om ondung haro o songulun di tulun dot Israil, i tulun do songonuon nu do tumongob, om sumambayang nondo dot id diya’ do mikuwo’d popoinsawat do longon dau do pointuduk diti Walai’d Sasambayangan dot Agayo, ³⁰ om pokinongohon no o sambayang diyolo’ do hino’d tiyonon nu do hino’d surga, om ompunan no om uhupan iyolo’. Tu’ iya’ noo o koilo dot id suang do ginawo’d tulun. Iyo nopoddi, om wonsoyon no dot id pointikid-tikid do tulun it apatut do wonsoyon dot id diyolo’, ³¹ om oronok indo om mihuboyo-boyo’ o tulun nu dot id diya’ do solinaid diyolo’ do poingiyon do hiti’d pomogunan di pinatahak nu dot id taki-aki dahai. ³² Om soira’ nopod haro o tulun do bansa’d suwai do mantad id pomogunan di hilo’d sodu’ do korongou do kobontugo’ om kokoriso’ nu, om korongou do posodia’ kasai’ ko do monguhup, om rumikot nondo iyau dot id Walai’d Sasambayangan dot Agayo diti do mongoi sambayang dot id diya’, ³³ om maha’ daa om pokinongohon nu o sambayang dau do hino’d tiyonon nu do hino’d surga, om patahakon nu i pokionuon dau. Om iyo nondo do tulun dot Israil, i tulun do songonuon nu, o koinsanai do bansa’d tulun do hiti’d pomogunan tu’ kotutun diya’ om mumboyo’ do boros nu, om kongoilo dot iti no walai di winonsoi ku o tiyonon do sumambayang dot id diya’. ³⁴ Om soira’ nopod suhuon nu i tulun nu do mongoi sangod do pisangod, om hinonggo nopondo iyolo’ do tumimbaba’ diti bandar di nopili’ nu om sumambayang do potimbaba’ diti walai di winonsoi ku do maan nu, ³⁵ om maha’ daa om pokinongohon nu o sambayang diyolo’ do hino’d surga, om maha’ daa om onuan nu iyolo’ do kamanangan. ³⁶ Om soira’ nopo do kowonsoi do dusa dot id diya’ iti tulun nu — otopot nopo kopio om aiso’ i’ o tulun dot aiso’ o dusa — om pologoson tomod nu nopondo iyolo’ dot alaon do pisangod om atanggayan do pisangod do kumaa dot id pomogunan dit osodu’ ko’ osomok, tu’ atatagadan ko no kopio, ³⁷ - ³⁸ om ondung otopot-topot kopio om aayi-ayi’ kopio o ginawo diyolo’ do tumongkiad di dusa diyolo’ do daamot diyolo’ do poingiyon dot id pomogunan diri, om sumambayang nondo dot id diya’ do potimbaba’ do pomogunan diti, i pinatahak nu dot id taki-aki dahai, om potimbaba’ diti bandar do nopili’ nu om iti Walai’d Sasambayangan dot Agayo di winonsoi ku do maan nu, ³⁹ om pokinongohon no daa o sambayang diyolo’ do hino’d tiyonon nu do hino’d surga, om kosianai no diyolo’; om maha’ daa om ompunan nu o koinsanai di dusa do tulun nu. ⁴⁰ Om antangai no iyahai do dinondo, oi Kinorohingan ku, om pokinongohon ngai’ no i sambayang dahai dot id diya’ do mantad id kinoiyonon diti. ⁴¹ Ingkakat nod dinondo, oi TUHAN i Kinorohingan! Om suang no diti Walai’d Sasambayangan dot Agayo do miwoyo’ di Kaban do Tumpongo, i tanda’ do kuasa’ nu, om miyon nod hiti do gisom dot alaid. Barakatan no o koinsanai do karaja’ dit imam di mogobi-obi’ diya’, om maha’ daa om ongotood ngai’ i tulun nu tu’ osonong ko i’ dot id diyolo’. ⁴² Oi TUHAN, i Kinorohingan, simbaro’ no iti sambayang do raja’ di nopili’ nu. Sorohon no i kosianan nu dot id di Daud, i susuhuon nu,’’ ka dau.

¹ Om kasambayang poddi i Raja’ Suliman, om rikot no o tapui do mantad hilo’d tawan do minonorob do koinsanai di porsombahan di sinumbali’ di pinatahak dot id TUHAN. Om koponu’ noddi di tulinau do tanda’ do nakarapou o TUHAN, i Walai’d Sasambayangan dot Agayo, ² gisom dot a’ no kosuang it imam do hiri’d suang. ³ Om soira’ di nokito di tulun dot Israil o tapui do ruminikot do mantad hilo’d tawan om noponu’ di tulinau do tanda’ do nakarapou o TUHAN, i Walai’d Sasambayangan dot Agayo, om otud nopo iyolo’ do hiri’d siliu do tuminuku’ om mikuwo’d minamarayou iyolo’ do Kinorohingan, tu’ Kinorohingan nopo om osonong om mompus-ompus o kosianan dau. ⁴ Om papatahak noddi i Raja’ Suliman om koinsanai di tulun do pointimung do hiri, do porsombahan di sumbolion dot id TUHAN. ⁵ Om papatahak no i Suliman do 22,000 o tinan do sapi’ om 120,000 o tinan do dumba’ do numaan do porsombahan do piuludan. Om iyo noddi i raja’ om koinsanai di rayat do pinapatahak di Walai’d Sasambayangan dot Agayo dot id Kinorohingan. ⁶ Om songingkakat ngai’ it imam do hiri’d ningkokoton diyolo’ do mitimbaba’ di tulun do Liwi di mamarayou’d TUHAN do mikuwo’d popinguni di tuunion di winonsoi di Raja’ Daud, om modsinding di sinding do ’’Mompus-Ompus O Kosianan Dau,’’ ka, do tumanud di pinonuhuan di Daud. Om iri ngai’ no imam om popinguni do torumpit om songingkakat i tulun dot ogumu’. ⁷ Om potobilango’ noddi di Suliman do maan do don TUHAN i hiri’d tanga’ di natad, it otimbabaan di Walai’d Sasambayangan dot Agayo, om papatahak nogiddi iyau do porsombahan di sorobon om porsombahan do gandum om lunok, i nanu do mantad id porsombahan do piuludan. Iyo pogiddi o winonsoi di Suliman nga’ a’ no orumpos di pananaraban do porsombahan di tambaga’ do winonsoi, dot oinsanan i porsombahan. ⁸ Om hiri nod Walai’d Sasambayangan dot Agayo do minamaramai i Suliman om koinsanai di tulun dot Israil do Tadau dot Agayo do Kinuhub-Kuhub do solinaid do turu’ o tadau. Om ogumu’ no kopio o tulun do nokotimung tu’ nongkorikot nopo om mantad pod hilo’d Ralan do Hamat di ponong id utara om gisom do hilo’d piwolitan do Masir di ponong id salatan. ⁹ Turu’ o tadau diyolo’ do pointimung do pinapatahak di pananaraban do porsombahan dot id TUHAN, om turu’ po kawagu o tadau diyolo’ do minamaramai di Tadau dot Agayo do Kinuhub-Kuhub. Om tontok di tadau do kolimpupuson no, om papaharo po iyolo’ do karamayan do pongolimpupus. ¹⁰ Om tadau poddi kawagu, di koduwo nohopod om tolu tadau do tulan do koturu’, om suhuo’ ngai’ no di Suliman i tulun do minuli’. Om ongotood ngai’ nopo iyolo’ tu’ osonong ngai’ i’ o winonsoi’d TUHAN dot id tulun dot Israil, i tulun do songonuon dau, om id di Daud om id di Suliman. ¹¹ Om kopongo poddi di Suliman do momonsoi i Walai’d Sasambayangan dot Agayo om i walai do don raja’ do miontok di natantu’ mantad do wonsoyon, ¹² om intalang no kawagu o TUHAN dot id di Suliman di dongotuong, om boro-boros nod poingkaa, ’’Norongou ku no i sambayang nu, om romiton ku i’ iti walai di winonsoi nu do maan do tiyonon do sumambayang dot id doho’ do gisom dot alaid. ¹³ Om soira’ nopo dot a’ oku poporikot do rasam ko’ poporikot oku do katat do mangayi’ do tanom-tanom ko’ poporikot oku do toruol di mogkoroliu dot id tulun ku, ¹⁴ om ondung minsiriba’ iyolo’, om sumambayang dot id doho’ om kumorologo di dusa diyolo’, mikuwo’d tumongkiad di kowoyo-woyoon diyolo’ dot araat, om pokinongohon ku indo do hilo’d surga o sambayang diyolo’; om ompunan ku i’ o dusa diyolo’ om posimbayanon kawagu ku o pomogunan diyolo’. ¹⁵ Om piantangan ku indo iti Walai’d Sasambayangan dot Agayo om posodia’ kasai’ oku do mokinongou do koinsanai do sambayang diyolo’ di poboroson diyolo’ do hiti’d kinoiyonon diti. ¹⁶ Wonsoyon ngai’ ku pogi’ o miagal diri nga’ nopili’ ku no o kinoiyonon diti om nokotobilang ku no do maan dot iyonon do sumambayang dot id doho’ do gisom dot alaid. Om piantangan ku indo om piintirungan ku do gisom dot alaid. ¹⁷ Ondung iyo ko iya’ di Daud, i tapa’ nu, tu’ otorodok do tumanud dit oturan ku om momonsoi do toinsanan di ponuhuan ku diya’, ¹⁸ om bayaanon ku indo i batos ku dot id di Daud, i tapa’ nu, do haro kasai’ nopondo o songulun di sinakagon dau dot osiliu do raja’ dot Israil. ¹⁹ Nga’ ondung sumaap ko om i rayat nu nga’ sumaap dit oturan ku om i ponuhuan ku, om tumuku’ kou nogindo dot id tingolig, ²⁰ om posoliwanon ku nondo iyokoyu do mantad id pomogunan di pinatahak ku dokoyu. Om tongkiadan ku pondo iti walai di natantu’ ku do tiyonon do sumambayang dot id doho’, om hinonggo-honggo nopondo nga’ hingi-hingion po om irak-irakan do tulun o tulun dot Israil. ²¹ Om iti nondo Walai’d Sasambayangan dot Agayo, i suahon kopio daa do dinondo, nga’ popotigowo pondo do tulun di katalib do hiti. Om muhot nondo iyolo’ do poingkaa, ’Nokuro tu’ iyo kopio’dti o winonsoi’d TUHAN dot id pomogunan diti om id Walai’d Sasambayangan dot Agayo’dti?’ ka. ²² Om poingkaa nondo o ponimbar do tulun, ’Nokobungou nopo nga’ tuminongkiad iyolo’d TUHAN, i Kinorohingan diyolo’, i minomoyo’ di taki-aki diyolo’ do suminoliwan do mantad hilo’d Masir. Tu’ tuminuku’ nogi’ om minamatos iyolo’ do tumorodok dot id tingolig. Om iri no o nokoporikatan do TUHAN do kosusaan diti dot id diyolo’,’ ka nondo diyolo’,’’ ka dau.

¹ Koloido’ nopo di Suliman do minomonsoi di Walai’d Sasambayangan dot Agayo om i walai dau do don raja’ om duwo nohopod o toun. ² Om winonsoi nogi’ dau kawagu i piro-piro bandar di pinatahak di Raja’ Hiram dot id dau, om minonuhu’ iyau do tulun dot Israil do mongoi iyon do hiri. ³ Om kosolod po dau i watas do Hamat om Soba, ⁴ om ninggiratan dau i bandar do Palmira, i hilo’d kinoiyonon do poiyanan do kaakan-akanan di hilo’d Hamat. ⁵ Om winonsoi nogi’ dau kawagu o bandar do Bait-Horon dit id sokid om Bait-Horon dit id siba’, om nosiliu’ddi do bandar di kitolig o posorili’ di bandar diri, om kisalampad o totobon do wawayaan dot agayo. ⁶ Om winonsoi nogi’ dau kawagu o bandar do Baalat, om koinsanai di bandar do poiyanan do kaakan-akanan, om i piro-piro bandar do pinoiyanan di korita’- kuda’ om i kuda’ dau. Om nowonsoi ngai’ nopo dau i natantu’ mantad dau do wonsoyon do hilo’d Yorusalim, om hilo’d Libanon om pointongkop di watas do porintaon dau. ⁷ - ⁸ Om oinsanan nopo i tulun do sinakagon di bansa’ do Kanaan, it a’ di tulun dot Israil pinatai di solodo’ i’ diyolo’ o pomogunan diri, do sinuhu’ di Suliman do kumaraja’ do miagal do turipon. Iri nopo tulun diri nga’ bansa’ do Hit, Amori, Poris, Howi om Yobus. Om gisom piya do baino’ nga’ turipon kasai’ po i sinakagon diyolo’. ⁹ Iri nopo tulun dot Israil om a’ i’ sinuhu’ do kumaraja’ do miagal do turipon, suwai ko’ siniliu iyolo’ do soudor, om boyoon do soudor, om boyoon dit ongkikorita’-kuda’ do don sumasangod, om soudor di songinsakai’d kuda’. ¹⁰ Duwo nahatus om limo nohopod o pagawai do sinuhu’ do monongkoilo di tulun di kumaraja’ do miagal do turipon do hiri’d piro-piro o waalon. ¹¹ Om powoliho’ no di Suliman i sawo dau, i tanak do raja’ do Masir, do mantad id Bandar di Daud om pinakaa do hiri’d walai di winonsoi dau do tiyonon di sawo dau. Tu’ boros ka di Suliman, ’’A’ i’ koino-ino do miyon i sawo ku do hiti’d walai di Daud do don raja’, i raja’ dot Israil, tu’ koinsanai di kinoiyonon di noumbalan do pinoilihan di Kaban do Tumpongo om olidang no,’’ ka dau. ¹² Om papatahak no i Suliman dot id TUHAN do porsombahan di sumbolion do hiri’d sakai di pananaraban do porsombahan di winonsoi dau, dot id dotimbabaan di Walai’d Sasambayangan dot Agayo. ¹³ Om pinapatahak iyau do porsombahan di sorobon do pointikid do tadau dot agayo do tumanud di Tourat di Musa: tontok do tadau’d Sabat, Tadau dot Agayo do Tulan do Wagu om tontok di tolu o tadau dot agayo do pointikid-tikid do toun — iri no i Tadau’d Agayo do Roti dit A’ Kipangambang, Tadau dot Agayo do Dongmongomot, om Tadau dot Agayo do Kinuhub-Kuhub. ¹⁴ Om natur nogi’ di Suliman o karaja’ dit imam do pointikid do tadau, om karaja’ di tulun do Liwi di monguhup dit imam do modsinding do pamarayou om momonsoi di karaja’ diyolo’, do tumanud di pinangatur di Daud, i tapa’ dau. Om iri nogi’ i madtatamong di Walai’d Sasambayangan dot Agayo nga’ binahagi’ i’ dau do piro-piro o sinompuruan do madtamong do pointikid-tikid di wawayaan, do tumanud di nituduk di Daud, i susuhuon do Kinorohingan. ¹⁵ Om tinanud ngai’ nopo, om aiso’ i’ o tinolib-toliban di pinotuduk di Daud dot id imam om id tulun do Liwi do pasal di piro-piro bilik di poopian do konunu-nunuan om pasal di piro-piro o hal do suwai. ¹⁶ Om kopongo noddi i waalon di natantu’ mantad di Suliman do wonsoyon. Om osonong ngai’ nopo o pinomonsoi’ddi, do mantad poddi pinoiliu i’ i watu do pinoimpahan om gisom do nopongo i Walai’d Sasambayangan dot Agayo. ¹⁷ Om ongoi noddi i Suliman do hilo’d Ision-Gibir om hilo’d Ilat, i duwo o bandar do podompiran do kapal do rahat do hiri’d tisan di Suok dot Akaba, do hilo’d pomogunan dot Idom. ¹⁸ Om nonuan nogi’ iyau di Raja’ Hiram do piro-piro kapal do rahat do pinitanud di piro-piro pagawai dau om i piro-piro tulun di popotunud do kapal do rahat di nongoubas no. Om pogitanud-tanud nopo iyolo’ di tulun di Suliman do kuminaa do hilo’d pomogunan dot Opir do mongoi panganu do lobi ko’ hopod om limo noribu o kilogram do tamas, om pootodo’ noddi diyolo’ iri dot id di Suliman.

¹ Iri nopo Raja’d Tondu’ do pomogunan do Siba nga’ nokorongou do kobontugo’ di Suliman. Om ongoi noddi iyau do hilo’d Yorusalim do mongoi pogumbal di Suliman do piro-piro o tuhoton dit angaralom. Om ogumu’ nogi’ o tulun do pinowoyo’ dau om ogumu’ ot unta di ginandaran do rampa, om watu dot olumis dit angagayo o gatang, om tamas dot ogumu’ kopio. Om kosolowot poddi i Raja’d Tondu’ diri di Suliman, om poboroso’ ngai’ no dau o tuhoton dit osorou-sorou dau dot uhoton. ² Om kosimbar ngai’ nopod i Suliman i nuhot dau’ddi, om iso’ po nga’ aiso’ i’ ot adalaan karalom dot id di Suliman. ³ Om koilaai no di Raja’d Tondu’ dot opintar kopio i Suliman om nokokito iyau di walai’d raja’ dit olumis kopio do winonsoi di Suliman. ⁴ Om nokokito nogi’ iyau di kowoyo-woyoon di pagawai do kumaraja’ do hiri’d walai’d raja’, om i pakayan diyolo’ dit ongoiyo om i bilik dit iyonon diyolo’; om nokokito nogi’ iyau di taakanon di pinosurung, om i pakayan di tulun di modsusurung do tontok do moginakan; om nokokito nogi’ iyau di piro-piro porsombahan di sumbolion di patahakon di Suliman do hiri’d Walai’d Sasambayangan dot Agayo. Om oimayaan tomod diri om olumisan tomod i Raja’d Tondu’ do Siba do nokokito ngai’ddi. ⁵ Om boros kaddi dau dot id di Suliman, ’’Ongotopot i’ kopio i norongou ku do pasal do kopintaro’ nu di hilo’ oku pod pomogunan ku! ⁶ Nga’ korikot oku poddi do minongoi kopio ontong ngai’ddi, om ponongkuyaai oku nogi’ kopio. Om a’ i’ kointanga-tanga’ diti nokito ku i nongorongou ku. Opintar ko po om kaya’ ko ko’ i nokosunud do tulun dot id doho’ do pasal do kopintaro’ om kakayao’ nu. ⁷ Olumaag no kopio o koinsanai di pagawai dit id toning kasai’ diya’ tu’ kopirongou di ponudukan nu dit angaralom! ⁸ Royohon no o TUHAN, i Kinorohingan nu! Om nokointalang no dau dot asanangan iyau diya’ tu’ siniliu ko i’ dau do raja’ dot Israil. A’ i’ iyau otingkod dot osianan do tulun dot Israil; om iri no o nokopomilian dau diya’ do sumiliu do raja’ diyolo’, om kogirot nu i’ ot oturan om it otulid,’’ ka dau. ⁹ Om patahako’ noddi di Raja’d Tondu’ do Siba dot id di Suliman i popuhawangon dau di nigitan dau — lobi i’ dot apat noribu kilogram o tamas om ogumu’ o watu dot olumis dit angagayo o gatang om ogumu’ o rampa. Om a’ no i Suliman nokoumbal kawagu do nakaramit do rampa dot iyo’ddi pinatahak di Raja’d Tondu’ do Siba tu’ osonong no kopio. ¹⁰ (Om iri nogi’ i tulun di Raja’ Hiram om i tulun di Raja’ Suliman di pinapaatod do tamas do mantad hilo’d Opir do patahakon di Suliman nga’ minigit pod watu dit ongolumis, om it agayo o gatang, om minigit do kayu cendana. ¹¹ Om iri no i kayu’ddi o winonsoi di Suliman do tukad di Walai’d Sasambayangan dot Agayo om tukad di walai dau do don raja’. Om iri nogi’ o winonsoi do kecapi om gambus do maan di tulun do pouuni do tuunion. Om a’ po nokoumbal do haro ot iyo’ddi do hilo’d pomogunan do Yohuda.) ¹² Om patahako’ ngai’ nopo di Suliman dot id Raja’d Tondu’ do Siba o nunu nopo i pinokianu dau, do suwai mantad ko’ i popuhawangon kasai’ di Suliman. Om uli’ noddi i Raja’d Tondu’ diri do hilo’d pomogunan dau do mogitanud-tanud di tulun di minomoyo’ dau. ¹³ Monikid toun nopo om osomok nod duwo nohopod om tolu noribu o kilogram do tamas dot aramit di Suliman, ¹⁴ om a’ po kohompit i sukai do mantad id piro-piro o tulun di mongingindapu’ om i tulun di dumagang-dagang, om mantad id piro-piro raja’ dot Arab om koinsanai di gobunor dot Israil. ¹⁵ Om pomonsoi no i Suliman do duwo nahatus o kolid dit angagayo do nurogupan ngai’ nopod tamas di tinantan do haro i’ doti’ o turu’ o kilogram do pinonguragup dot iso’ o kolid. ¹⁶ Om minomonsoi po iyau do tolu nahatus o kolid dit ongokoro-koro’, om nurogupan do tamas di tinantan do haro i’ doti’ o tolu o kilogram do pinonguragup dot iso’ o kolid. Om posuango’ ngai’ nopo dau i kolid diri do hiri’d langga’ di pinungaranan do Langga’ do Puru’ do Libanon. ¹⁷ Om minomonsoi po i Raja’ dot iso’ o tirikohonon do don raja’ dit agayo om linopisan do lamai om nurogupan do tamas di nosompipi’. ¹⁸ Iri nopo tirikohonon diri nga’ winansayan do tukad dot onom o taang. Om haro o poulakan do lapap di nurogupan do tamas do pasagalai di tirikohonon. Om haro o kakabayon di tirikohonon. Om hiri nopod miampaping di kakabayon om haro o winonsoi do pinoiyo-iyo’d singa. ¹⁹ Om hiri’d misingompok do pointikid-tikid di taang do tukad nga’ haro ngai’ nopo i winonsoi do pinoiyo-iyo’d singa, om oinsanan nopo i winonsoi’ddi om hopod om duwo o tinan. Om a’ po nokoumbal do haro o tirikohonon do raja’ dot iyo’ddi do hinonggo-honggo nopo o pomorintaan. ²⁰ Koinsanai di ponginuman di Suliman om tamas ngai’ nopod winonsoi om iri ngai’ i pakakas do hiri’d langga’ di roitan do Langga’ do Puru’ do Libanon nga’ tamas i’ di nosompipi’ do winonsoi. Om tontok nopo di poimpasi po i Suliman om aiso’ i’ o gatang do pirok. ²¹ Om ogumu’ po o kapal do rahat di Suliman dit angagayo do moyo-woyo’ di piro-piro kapal do rahat di Raja’ Hiram do hilo’d rahat dot agayo. Om insan kasai’ dot id suang do tolu o toun do gumuli’ i kapal do rahat diri do mongoi paatod do tamas, pirok, lamai, kara’ om tubou. ²² I Raja’ Suliman nopo nga’ kaya’ om opintar ko’ mantad do raja’ do hinonggo nopo do hiti’d pomogunan. ²³ Om oinsanan nopo o tulun dot orohian do mongoi pokinongou do ponudukan dau dit angaralom di pinatahak do Kinorohingan dot id dau. ²⁴ Om pointikid-tikid do tulun di rumikot nga’ manahak kasai’ nopod nipuhawang dot id dau. Papatahak iyolo’ do konunu-nunuan di pirok om tamas do winonsoi, om papatahak do pakayan, rapo-rapo, rampa, kuda’ om bagal. Om iyo kasai’ nopoddi do pointikid do toun. ²⁵ Om haro po ot apat noribu o kandang do poiyanan di Raja’ Suliman do kuda’ om korita’-kuda’ dau. Om kogumuo’ nopod kuda’ dau do don sumasangod om hopod om duwo noribu o tinan. Om iri nopo wookon diri om pinoiliu dau do hilo’d Yorusalim, om iri no suwai om pinoiyon dot id piro-piro o bandar do suwai. ²⁶ Om iyau no o kikuasa’ dot id sawat do toinsanan di raja’ do hiri’d watas do mantad pod hilo’d Bawang dot Iprat om gisom do korikot di pomogunan do Pilistin om i piwolitan do Masir. ²⁷ Tontok nopo di pomorintaan di Suliman, om pirok nopo do hilo’d Yorusalim om miagal nod konunu-nunuan di koubasanan, tu’ miagal pod watu; om kayu sedar do Libanon nga’ a’ no aayi-ayi’, tu’ miagal po di kayu ara. ²⁸ Om momoli nogi’ i Suliman do kuda’ do mantad hilo’d Musri om mantad id piro-piro o pomogunan do suwai. ²⁹ Iri nopo susuyon do suwai do pasal di Suliman, do mantad di timpuun i’ om gisom di kinopupuson, om nongkotulis no do hiri’d suang do Buuk do Susui di tinulis di Natan i Nabi, om id suang di Buuk do Boros do Pasal dit id Dabantalan di tinulis di Ahia, i tulun do Silo, om id suang do Buuk do Pinointalang di tinulis di Ido i Nabi, i pinotulisan di susui do pasal di pinomorintaan di Yirobiam, i raja’ dot Israil. ³⁰ Apat nohopod o toun do koloido’ di Suliman do momorinta’ do pointongkop do hilo’d Yorusalim. ³¹ Om kapatai noddi iyau om lobongo’ nod hilo’d Bandar di Daud. Om kosiliu nod raja’ i Rihabiam, i tanak dau do suminowoli dau.

¹ Om ongoi no i Rihabiam do hilo’d Sikim tu’ nokotimung nod hilo’ o koinsanai di rayat dot Israil do ponong id utara, do posiliu dau do raja’. ² Om soira’ di nokorongou do hal diri i Yirobiam, i tanak di Nibat, i minongoi do hilo’d Masir tu’ minogidu’ iyau do mantad id di Raja’ Suliman, om poguliai no dau do hilo’d Israil. ³ Om lohowo’ no di rayat do ponong id utara i Yirobiam, om pogitatanud no iyolo’ do minongoi solowot di Rihabiam. Boros ka diyolo’, ⁴ ’’Awagat no kopio o pinotonggungan di Suliman, i tapa’ nu, dot id dahai. Ondung pagaan-gaanon nu daa i tonggungan dahai om i koinggoritan dahai, om minsiriba’ i’ iyahai dot id diya’,’’ ka diyolo’. ⁵ Om boros ka di Rihabiam do suminimbar, ’’Momusorou oku po, om tolu po o tadau do mantad baino’ om gumuli’ kou nogi’ kawagu do hiti,’’ ka dau. Om uli’ ngai’ noddi i tulun diri. ⁶ Om pokinosihat no i Rihabiam di kongomolohingan no di nosiliu do ponosihat di Suliman, i tapa’ dau. Boros ka dau, ’’Poingkuro ma o ponimbar ku di tulun diri? Poingkuro o nosihat dokoyu?’’ ka dau. ⁷ Om boros ka diyolo’, ’’Ondung osonong o wonsoyon nu dot id tulun diri om poposonong ko do ginawo diyolo’ tu’ osonong i’ o ponimbar nu, om otorodok no iyolo’ dot id diya’ do gisom dot alaid,’’ ka. ⁸ Nga’ a’ i’ di Rihabiam pinadul i nosihat di kongomolohingan diri. Suwai ko’ ongoi nogi’ iyau dot id tulun dit ongomulok po, i rampam nogi’ dau, i nongosiliu do ponosihat dau. ⁹ Boros ka dau, ’’Poingkuro ma o ponimbar ku di tulun di mokinggaan do tonggungan diyolo’? Poingkuro o nosihat dokoyu doho’?’’ ka di Rihabiam do minuhot diyolo’. ¹⁰ Om boros ka diyolo’, ’’Poboroson no o poingkaa dot id diyolo’, ’Oluhoi oku piya nga’ okoris-koris oku i’ ko’ i tapa’ ku. ¹¹ Awagat no daa i pinotonggungan di tapa’ ku dot id dokoyu nga’ awaga-wagat po o doho’d potonggungan dokoyu. Tuwai noo o pinomikot dau dokoyu, nga’ i pipikot do kuda’ o doho’d pomikot dokoyu!’ kanto,’’ ka diyolo’. ¹² Tolu poddi o tadau do mantad diri om guli’ no kawagu i Yirobiam om koinsanai di tulun diri do minongoi solowot di Raja’ Rihabiam, do tumanud di pinonuhuan dau. ¹³ Om suminansala’ i’ iyau di nosihat di kongomolohingan tu’ apantog nopo iyau do minoro-boros di rayat, ¹⁴ tu’ tuminanud nogi’ iyau di pinonosihat di tulun dit ongomulok po. Boros ka dau, ’’Awagat no daa i pinotonggungan di tapa’ ku dot id dokoyu, nga’ awagat po ko’ iri o doho’d potonggungan dokoyu. Tuwai noo o dau do pinomikot dokoyu, nga’ doho’ nopod pomikot dokoyu om pipikot do kuda’!’’ ka dau. ¹⁵ Om a’ i’ dau pinadul i pinokianu di rayat. Nga’ iri no o korohian do TUHAN, i Kinorohingan, tu’ mositi’ nod osiliu i nokoboros mantad di Ahia i Nabi, i mantad hilo’d Silo do pasal di Yirobiam, i tanak di Nibat. ¹⁶ Om soira’ddi nokito di rayat dot a’ i’ mokinongou i raja’, om pagarango’ noddi diyolo’ o poingkaa, ’’Nunu kopio o kapadul-padul toko’ di Daud om i sinakagon dau? Aiso’ i’ o nunu-nunu do winonsoi diyolo’ dot osonong dot id dati’. Kainou muli’, oi tulun dot Israil! Pologoson nopo i Rihabiam do mongilo-ilo do dau’d tinan!’’ ka diyolo’. Om suminaap diri i rayat dot Israil, ¹⁷ om i Rihabiam nopoddi nga’ raja’ poo do watas do Yohuda. ¹⁸ Om suhuo’ no di Raja’ Rihabiam i Adoniram, i mandur di turipon di songingkaraja’, do monginsasamod di rayat. Nga’ dumpaho’ nogi’ diyolo’ iyau do watu do gisom do napatai iyau. Om kokito poddi di Rihabiam iri, om osiau nopo iyau do suminakai di korita’-kuda’ dau om poggidu’ no do kuminaa do hilo’d Yorusalim. ¹⁹ Om mantad poddi om sumaap no kasai’ di raja’ do sinakagon di Daud i rayat do pomorintaan do ponong id utara dot Israil.

¹ Soira’ di nokorikot i Raja’ Rihabiam do hilo’d Yorusalim, om ponimung no iyau do 180,000 o soudor dau dit ongosiou do mantad id payat do Binyamin om Yohuda do mongoi panangod di tulun dot Israil om koguli’ i’ o pomorintaan dau dot id payat di ponong id utara dot Israil. ² Nga’ suhuo’ nod TUHAN i Nabi Somaya ³ do mongoi polombus do boros diti dot id di Rihabiam om id toinsanan di payat do Yohuda om Binyamin, ⁴ ’’Kada’ kou ponokisangod di tulun dot Israil, i tongotobpinai dokoyu. Uli’ ngai’ kou nogi’. Tu’ iti nopo nosiliu om korohian ku i’,’’ ka. Om umboyo’ ngai’ no iyolo’ di boros do TUHAN om a’ iddi iyolo’ nabayaan do minongoi sangod di Yirobiam. ⁵ Om undorong no i Rihabiam do hilo’d Yorusalim om ponuhu’ no iyau’d tulun do momonsoi’d tolig do pongolig do posorili’ di kabandaran dit id watas do Yohuda om Binyamin. Iri nopo bandar diri om: ⁶ bandar do Baitlahim, Itam, Tokua, ⁷ Bait-Sur, Soko, Adulam, ⁸ Gat, Marisa, Sip, ⁹ Adoraim, Lakis, Asika, ¹⁰ Sora, Ayalon om Hibron. ¹¹ Om pinogirot nogi’ dau i kabandaran di kitolig diri om tinikidan dau dot iso’ o boyoon do soudor o pointikid-tikid di bandar, om nonuan ngai’ dau i bandar do kaakan-akanan, om tumau’d saitun, om waig dot anggur, ¹² om kolid, om tandus. Om id suang kasai’ iddi do pomorintaan dau o watas do Yohuda om Binyamin. ¹³ Om ongoi ngai’ nopod hiri’d di Rihabiam it imam om i tulun do Liwi do mantad id toinsanan di watas dot Israil. ¹⁴ Tongkiadai ngai’ nopo di tulun do Liwi i kobuturan do paakan-akanan do tayam-tayam om i tana’ diyolo’, om undaliu no iyolo’ do hilo’d Yohuda om hilo’d Yorusalim, tu’ a’ iyolo’ di Yirobiam pinabanar do kumaraja’ di karaja’ dot imam di mogobi-obi’d TUHAN, om i suminowoli di Yirobiam do raja’ dot Israil nga’ a’ i’ pinapabanar diyolo’. ¹⁵ Minomili’ nogiddi i Yirobiam dot imam do maganu-anu do hiri’d tiyonon do modsubak do tingolig om modsubak do rusod-rusod, om i patung di pinoiyo-iyo do sapi’ di winonsoi dau. ¹⁶ Om iri nopo i tulun do mantad id toinsanan di payat dot Israil dit otopot-topot kopio dot orohian do sumambayang dot id TUHAN, i Kinorohingan dot Israil, om minongoi i’ do hilo’d Yorusalim, do tuminanud di tulun do Liwi, om kapatahak i’ iyolo’ do porsombahan di sumbolion dot id TUHAN, i Kinorohingan di tinuku’ di taki-aki diyolo’. ¹⁷ Om iri noddi o kogiro-girot di pomorintaan do Yohuda. Om tolu o toun diyolo’ do suminokodung kopio do pomorintaan di Rihabiam, i tanak di Suliman, om koiyon-iyono’ nopo diyolo’ om iyo po dit i Raja’ Daud po om i Raja’ Suliman o momorinta’. ¹⁸ Kinawin nopo di Rihabiam om i Mahalat; tapa’ nopo di Mahalat om i Yorimot, i tanak di Daud, om tina’ no dau om i Abihail, i tanak di Iliab, i manangaki di Isai. ¹⁹ Kianak iyo Rihabiam di Mahalat do tolu o kusai: i Yous, i Somaria om i Saham. ²⁰ Om kowino’ po di Rihabiam i Maaka i tanak di Absalom. Om apat o tanak diyolo’d kusai: i Abia, i Atai, i Sisa om i Silomit. ²¹ Kogumuo’ nopod sawo di Rihabiam om hopod om walu’, om kogumuon nod tondu’ di panakasawo dau om onom nohopod. Tangaanak nopo di Rihabiam do kusai om duwo nohopod om walu’, om onom nohopod o tangaanak dau’d tondu’. Id pogialatan nopo di sawo om tongoondu’ di panakasawo dau om i Maaka no o kosianan kopio dau. ²² Om i Abia noddi, i tanak diyolo’ di Maaka o kasanangan kopio dau dot id pogialatan do koinsanai di tangaanak dau, om i Abia no o pinili’ dau do similiu’d raja’ do sumowoli dau. ²³ Om oilo tomod i Rihabiam do minanahak do karaja’ dot id tangaanak dau’d kusai, om pinoiyon dau iyolo’ dot id kabandaran dit ongkitolig do pointongkop do watas do Yohuda om Binyamin. Om nonuan nogi’ dau iyolo’ do taakanon do gisom dot a’ aayi-ayi’, om nonuan dau iyolo’d sawo dot ogumu’.

¹ Om kogirot poddi o pomorintaan di Raja’ Rihabiam, om a’ di dau om a’ do koinsanai di rayat dau pinadul i Tourat do TUHAN, ² om a’ noddi iyolo’ tuminorodok dot id TUHAN. Om hukumai noddi iyolo’d TUHAN. Om tontok di kolimo do toun do pomorintaan di Rihabiam, om ngoyo’ no di Sisak i raja’ do Masir, songodo’ o Yorusalim, ³ do miwoyo’ do soribu om duwo nahatus o korita’-kuda’ di don sumasangod, om onom nohopod ribu o soudor di kikuda’, om soudor dit a’ no ointob-intob o kogumuo’, do poinghompit ngai’ i soudor do Libia, Suki om Etiopia. ⁴ Om sinolod dau i kabandaran di kitolig o posorili’ do hilo’d Yohuda om potilombusai po dau o hilo’d Yorusalim. ⁵ Om tontok nopoddi nga’ nokotimung nod hilo’d Yorusalim i Raja’ Rihabiam om koinsanai di boyoon do tulun do Yohuda do mogidu’ daa do mantad id di Sisak. Nga’ rikot no dot id diyolo’ i Somaya i Nabi, om boro-boros nod, ’’Poingkaa o boros do TUHAN, ’Tuminongkiad kou doho’, om iyoho’ nga’ tumongkiad no dokoyu do baino’, om oporinta’ kou indo di Sisak,’ ka,’’ ka dau. ⁶ Om pagakun noddi i raja’ om koinsanai di boyoon do nokowonsoi iyolo’d dusa. Boros ka diyolo’, ’’Otulid i’ i wonsoyon do TUHAN diri,’’ ka. ⁷ Om soira’ di nokito do TUHAN do mininsiriba’ iyolo’, om boro-boros po kawagu iyau dot id di Somaya do poingkaa, ’’A’ ku i’ iyolo’ patayon tu’ minagakun i’ iyolo’ di dusa diyolo’. A’ no alaid om poiduwon ku no iyolo’; om a’ indo araag o Yorusalim. Nga’ iyo piya’ddi nga’ i Sisak ⁸ kasai’ i’ o momorinta’ diyolo’, om koilo indo iyolo’ do pisuayan do momonsoi do ponuhuan ku om momonsoi do ponuhuan do pomorinta’ do hiti’d pomogunan,’’ ka. ⁹ Om rikot noddi i Raja’ Sisak do minongoi panangod do bandar do Yorusalim om nongoi ngai’ dau i konunu-nunuan dit angagayo o gatang di hiri’d Walai’d Sasambayangan dot Agayo om i hiri’d walai’d raja’; do kohompit ngai’ no i kolid do tamas di winonsoi di Raja’ Suliman. ¹⁰ Om pomonsoi noddi i Rihabiam do kolid do tambaga’ o winonsoi do pinoningolon di nangaanu di pisangod, om patamangai no dau di boyoon do soudor di madtatamong di wawayaan dot agayo di walai’d raja’. ¹¹ Om pointikid-tikid do mongoi i raja’ do hiri’d Walai’d Sasambayangan dot Agayo, om ngoyon no di madtatamong i kolid diri om pogulion nogindo kawagu do hiri’d bilik di madtatamong. ¹² Om kotingkod noddi i kototogod do TUHAN dot id di Rihabiam tu’ mininsiriba’ i’ iyau dot id TUHAN, om a’ iddi iyau’d TUHAN pinatai. Om osonong noddi kawagu o koiyon-iyono’ do hilo’d Yohuda. ¹³ Niyon nopo di Rihabiam do momorinta’ nga’ hilo’d Yorusalim om mayo-gayo nopoddi o kuasa’ dau do momorinta’. Tumur nopo dau di nosiliu iyau’d raja’ om apat nohopod om iso’ o toun, om hopod om turu’ o toun dau do momorinta’ do hilo’d Yorusalim, i bandar di nopili’d TUHAN do tiyonon do sumambayang dot id dau, dot id pogialatan di kabandaran do hilo’d watas dot Israil. Tina’ nopo di Rihabiam om i Naama, i mantad hilo’d pomogunan dot Amon. ¹⁴ Om araat o winonsoi di Rihabiam tu’ a’ i’ iyau tuminotos do momonsoi do korohian do TUHAN. ¹⁵ Susuyon nopod pasal di Rihabiam do mantad di timpuun i’ om gisom do kinopupuson, om i sinolusukan dau, nga’ nokotulis ngai’ i’ dot id suang di Buuk do Susui di tinulis di Somaya i Nabi, om id suang di Buuk do Susui di tinulis di Ido i Nabi. Om misangod kasai’ nopo iyo’ Rihabiam di Yirobiam. ¹⁶ Om kapatai noddi i Rihabiam om lobongo’ no iyau do hiri’d kalabangan do raja’ di hilo’d Bandar di Daud. Om kosiliu nod raja’ i Abia, i tanak dau, do suminowoli dau.

¹ Tontok di kohopod om walu’ do toun do pomorintaan di Raja’ Yirobiam do hilo’d Israil, om kosiliu no i Abia do raja’ do Yohuda, ² om tolu o toun do koloido’ di Abia do momorinta’ do hilo’d Yorusalim. Tina’ nopo dau om i Mikaya, i tanak di Uriol, i mantad hilo’d bandar do Gibia. Om haro’ddi o pisangadan diyo Abia di Yirobiam; ³ om pomolohou no i Abia dot 400,000 o soudor om pomolohou i Yirobiam do 800,000 o soudor. ⁴ Om pitimbaba’ no i duwo o tinimungan do soudor diri do hilo’d watas do konulu-nuluan dot Ipraim. Om takad no i Abia do hiri’d Nuluhon do Somaraim om pomoros no iyau dot opuhod dot id di Yirobiam om id tulun dot Israil do poingkaa, ’’Pokinongou kou! ⁵ Koilo kou i’ do nokopomonsoi no o TUHAN, i Kinorohingan dot Israil, do batos dot id di Daud om id sinakagon dau dot iyau no om i sinakagon dau o momorinta’ dot Israil do gisom dot alaid. Om a’ no milo dot a’ bayaanon i batos diri. ⁶ Nga’ iyo piya’ddi nga’ suminaap i’ i Yirobiam i tanak di Nibat, di Suliman i raja’ dau. ⁷ Minonimung iyau dot iso’ o sinompuruan do tulun dot araat om sinansagan dau iyolo’ do posonsog do korohian diyolo’ dot id di Rihabiam, i tanak di Suliman. Nga’ tontok nopoddi om omulok po kopio i Rihabiam, om a’ po ogumu’ o nopinsingilaan dau do kowoyo-woyoo’ do sumaap. ⁸ Om baino’ noddi om momusorou kou’ddi do kasaap kou di kuasa’ do pinatahak do TUHAN dot id sinakagon di Daud, tu’ ogumu’ o soudor dokoyu om kisapi’ kou di tamas do winonsoi, i siniliu di Yirobiam do ponokokinorohingan dokoyu. ⁹ A’ toi dokoyu nouyung ngai’ no it imam di mogobi-obi’d TUHAN, it imam di suminolusuk di Harun om i tulun do Liwi? Om pinosowoli nopoddi dokoyu nga’ isai nopo o tulun dit orohian do sumiliu’d imam, do mongigit po iyau do songinan o sapi’ ko’ turu’ o tinan do dumba’, om silihon no dokoyu dot imam do modsubak di ponokokinorohingan dokoyu; it okon i’ ko’ Kinorohingan kopio. Tu’ iyo noddi o kowoyo-woyoo’ di piro-piro o tulun di bansa’d suwai do momili’ dot imam di tuuhoton diyolo’. Nga’ iyahai nopo om a’ i’ minomonsoi do miagal diri. ¹⁰ Sumambayang kasai’ i’ iyahai dot id TUHAN, i Kinorohingan dahai om a’ i’ iyahai tuminongkiad dau. Iri nopo imam dahai om iri kasai’ i’ i sinakagon di Harun, om iri kasai’ i tulun do Liwi o monguhup diyolo’. ¹¹ Pointikid-tikid do kosuabon om sosodopon om modtutud kasai’ nopo iyolo’ do kominyan om papatahak dot id TUHAN do porsombahan di sorobon, om posurung do roti do maan do porsombahan do hiri’d mija’. Om monikid tuong iyolo’ do modtutud di lampung di hiri’d potitimpakan do lampung di tamas do winonsoi. Mumboyo’ kasai’ i’ iyahai di ponuhuan do TUHAN. Nga’ iyokoyu nopo om nokotongkiad no dau. ¹² Boyoon nopo dahai om Kinorohingan i’ om hiti i’ it imam di mogobi-obi’ dau. Om nokosodia’ no iyolo’ do popouni do torumpit do tanda’ do sumangod iyahai dokoyu. Oi tulun dot Israil, kada’ kou saap do TUHAN, i Kinorohingan do taki-aki dokoyu! Tu’ poingkuro piya nga’ a’ kou i’ kamanang!’’ ka dau. ¹³ Om daamot nopoddi nga’ suhuo’ no di Yirobiam o songintanga’ di soudor dau do mongoi talob di soudor do Yohuda do ponong id tohuri, om iri no songintanga’ om minawang do hiri’d doburuan diyolo’. ¹⁴ Om soira’ di nokito di soudor do Yohuda do notutukan iyolo’ do pisangod, om pinggiak no iyolo’ do mokiuhup do TUHAN. Om pounio’ no di piro-piro imam i torumpit, ¹⁵ om pamangkis ngai’ no i soudor do Yohuda do pangkis do sumangod om pamanau no iyolo’ do minongoi sangod, do winoyo’ di Abia. Om alao’ nod Kinorohingan i Yirobiam om i soudor dot Israil ¹⁶ gisom do minogidu’ iyolo’. Om pinamanang do Kinorohingan i tulun do Yohuda do suminangod diyolo’. ¹⁷ Om agayo no kopio o kinaalaan di tulun dot Israil do nala’ di Abia om i soudor dau; tu’ limo nopo nahatus noribu o soudor dit ongosiou do napatai. ¹⁸ Om nakamanang iddi i tulun do Yohuda tu’ suminondiu i’ iyolo’ do TUHAN, i Kinorohingan di taki-aki diyolo’. ¹⁹ Om soira’ di ginusa’ di Abia i soudor di Yirobiam, om sinolod nogi’ dau o piro-piro o bandar om kawalayan di hiri’d posorili’. Iri nopo kabandaran diri om Baitol, Yosana, om Ipron. ²⁰ Om solinaid nopo di pomorintaan di Abia, om a’ no nokoguli’ kawagu dot id di Yirobiam i kuasa’ dau do momorinta’ do hiri, om alaid noddi om patayo’ no iyau’d TUHAN. ²¹ Nga’ i Abia no om muhang-ruhang nopo o kuasa’ do momorinta’. Kogumuon nopod sawo dau om hopod om apat o tulun, om tangaanak no dau do tongokusai om duwo nohopod om duwo o tulun, om tangaanak no dau do tongoondu’ om hopod om onom o tulun. ²² Om iri nopo susuyon do suwai do pasal di Abia, om koinsanai di pinoboros om i winonsoi dau om nokotulis ngai’ no dot id suang di Buuk do Susui di tinulis di Ido, i Nabi.

¹ Om kapatai poddi i Raja’ Abia om di nolobong iyau do hiri’d kalabangan do raja’ do hiri’d Bandar di Daud, om kosiliu no do raja’ i Asa, i tanak dau, do suminowoli dau. Om osimbayan diri o hiri’d pomogunan dot Israil do solinaid do hopod o toun, di maso do pomorintaan di Asa. ² Om pinoposonong i’ i Asa do ginawo’d TUHAN, i Kinorohingan dau, tu’ minomonsoi i’ iyau dit otulid om it osonong. ³ Om nidu’ ngai’ dau i pananaraban do porsombahan di dong bansa’d suwai, om nidu’ nogi’ dau i tiyonon do modsubak do tingolig. Om minumuk dau i torigi do watu di don tingolig om hinaba’ ngai’ dau i torigi di tingolig dot Asira. ⁴ Om suhuo’ no dau i rayat do Yohuda do momonsoi do korohian do TUHAN, i Kinorohingan di taki-aki diyolo’, om mumboyo’ di ponudukan om ponuhuan do TUHAN. ⁵ Nidu’ ngai’ nopo dau i tiyonon do tumuku’ dot id tingolig om tiyonon do modtutud do kominyan di hilo’d kabandaran do Yohuda. Om osimbayan noddi o pomorintaan diri di maso dau do momorinta’, ⁶ gisom do milo iddi iyau do momonsoi di tolig do pongolig do posorili’ di kabandaran do hilo’d Yohuda. Om aiso’ noddi o pisangadan do solinaid do piro-piro o toun tu’ nonuan i’ iyau’d TUHAN do kosimbayanan. ⁷ Boros ka di Asa dot id rayat do Yohuda, ’’Osonong dot inggiratan toko’ i kabandaran do ponginggirot nopo om wansayan do tolig o posorili’, om wansayan do walai’d angakawas do pogimpaan, om wansayan do wawayaan dit angagayo dit ongkisalampad o totobon. Naanu toko’ pogi’ o pomogunan diti nga’ otorodok toko’ i’ do tuminanud di korohian do TUHAN, i Kinorohingan toko’. Om ginompi’ toko’ dau om pinosimbayan dau o pointongkop diti pomogunan toko’,’’ ka dau. Om timpuun noddi iyolo’ do minomonsoi’ddi om kopongo no diyolo’. ⁸ Kogumuon nopo di soudor di Raja’ Asa om 300,000 o tulun do Yohuda dit ongkikolid om ongkitandus, om 280,000 o tulun do Binyamin dit ongkikolid om ongkipana’; om oinsanan nopo iyolo’ do soudor dit ongosiou om nongkopinsingilo do sumangod. ⁹ Insan o maso om rikot no o songulun do bansa’d Etiopia di roitan dot i Sira do minongoi panangod do Yohuda do miniwoyo’ do sojuta o soudor om tolu nahatus o korita’-kuda’ do don sumasangod. Om pamanau po iyolo’ do gisom do nokorikot do hilo’d Marisa. ¹⁰ Om soliwan no i Asa do minongoi timbaba’ di Sira, om sopipori-pori nopoddi iyolo’ do pinopotimung di soudor diyolo’ do hiri’d Rantai do Sipata, it id somok do Marisa. ¹¹ Om sambayang noddi i Asa dot id TUHAN, i Kinorohingan dau do poingkaa, ’’Oi TUHAN, iya’ noo i milo do monguhup dit oluhoi do tumimbaba’ dit okoris. Uhupai no iyahai do dinondo, oi TUHAN i Kinorohingan dahai! Iya’ noo o sondihon dahai om id suang nod ngaran nu do sumoliwan iyahai do mongoi sangod diti soudor dot ogumu’ kopio’dti. Oi TUHAN, iya’ no o Kinorohingan dahai. Kada’ pologoso’ dot aala’ ko dot isai nopo o tulun,’’ ka dau. ¹² Om songodo’ no di Asa om i soudor do Yohuda i soudor do Etiopia. Om naala’ i’ do TUHAN i soudor dot Etiopia gisom do minogidu’ iyolo’. ¹³ Om gusao’ po iyolo’ di Asa om i soudor dau do gisom do nokorikot do hilo’d Gorar. Om ogumu’ tomod diri o napatai di soudor dot Etiopia gisom dot aiso’ no o pokukurayan diyolo’ tu’ naala’ no kopio iyolo’d TUHAN om i soudor do Yohuda. Om ogumu’ nogi’ i konunu-nunuan diyolo’ do nangaanu di suminangod diyolo’. ¹⁴ Om raago’ noddi di soudor do Yohuda i kabandaran di hilo’d watas do posorili’ do Gorar, tu’ pinooris do TUHAN i tulun do songingiyon do hiri. Om pingonuo’ nopo di soudor do Yohuda i konunu-nunuan do hiri’d bandar om ogumu’ tomod diri o naanu diyolo’! ¹⁵ Om nongoi po diyolo’ songodo’ i kokiiman di gompomogompi’ do tayam-tayam, om ogumu’ tomod o dumba’ om unta do naanu diyolo’. Om guli’ nogiddi iyolo’ do hilo’d Yorusalim.

¹ Om porintao’ nod Rusod do Kinorohingan i Asaria i Nabi, i tanak di Odid, ² gisom do minongoi iyau solowot di Raja’ Asa, om boro-boros nod poingkaa, ’’Oi Raja’ Asa, om koinsanai di tulun do poingiyon do hiti’d Yohuda om hilo’d Binyamin! Pokinongou kou no! Osomok i’ o TUHAN dot id dokoyu ondung osomok kou no dot id dau. Ondung mokituduk kou’d TUHAN, om monuduk i’ iyau. Nga’ ondung a’ kou mamadul dau, om iyau nga’ a’ no mamadul dokoyu. ³ Laid noddi kopio o tulun dot Israil dot a’ sumambayang dot id Kinorohingan dit otopot kopio, om aiso’ o ponudukan dot aanu diyolo’ do mantad id imam, om a’ iyolo’ tumanud dit oturan. ⁴ Nga’ id suang nopo iyolo’d kosusaan, om rumikot i’ iyolo’ dot id TUHAN, i Kinorohingan dot Israil. Om minokituduk i’ iyolo’ dau, om tinudukan iddi dau iyolo’. ⁵ Tontok nopoddi nga’ a’ nopo osimbayan o tulun do mimpanau, tu’ haro ngai’ nopo o kosusaan om kagangahan dot id pointikid-tikid do pomogunan. ⁶ Mogiinggori-gorit nopo i piro-piro o bansa’d tulun, om mogiinggori-gorit i kabandaran, tu’ pinorikatan iyolo’d Kinorohingan do kosusaan om kagangahan dit awagat kopio. ⁷ Nga’ iyokoyu nopo om mositi’ nod polonuton o ginawo om kumosiou kou. Om koundar i’ o nunu nopo o wonsoyon dokoyu,’’ ka dau. ⁸ Om soira’ di norongou di Asa i boros di Asaria, i tanak di Odid diri, om okoris nopoddi o topurimanan dau. Om iduwo’ ngai’ no dau i tingolig do hilo’d pomogunan do Yohuda om Binyamin, om i hiri’d kabandaran di naala’ dau dit id watas do konulu-nuluan dot Ipraim. Om wonsoyo’ no kawagu dau i pananaraban do porsombahan di don TUHAN, i hiri’d natad di Walai’d Sasambayangan dot Agayo. ⁹ Om ogumu’ nogi’ o tulun dot Ipraim om Manasi, om Simion do minongoi sugku’ di Asa, om miniyon diri do hiri’d watas di porintaon dau, tu’ okito diyolo’ dot uhupan iyau’d TUHAN. Om suhuo’ ngai’ no di Asa i tulun diri om i rayat do Yohuda om Binyamin ¹⁰ do tumimung do hilo’d Yorusalim. Om timung no iyolo’ di tulan do kotolu do tontok di kohopod om limo do toun do pomorintaan di Asa. ¹¹ Om tadau noddi do pinapatahak iyolo’ do porsombahan dot id TUHAN do turu’ nahatus o tinan do sapi’ om turu’ noribu o tinan do dumba’, do mantad di nangaanu diyolo’ dot id pisangadan, om i nigitan diyolo’ do minuli’. ¹² Om pamatos no iyolo’ dot id TUHAN do sumambayang iyolo’ dot id TUHAN, i Kinorohingan di taki-aki diyolo’, do mikuwo’d aayi-ayi’ o ginawo om pomusarahan diyolo’. ¹³ Om isai nopo, molohing tuu ko’ omulok, kusai tuu ko’ tondu’, dot a’ sumambayang dot id TUHAN, om pointantu’ nod hukuman do kapatayon. ¹⁴ Om pamatos no iyolo’ dot id TUHAN do mikuwo’d suminumpa’ dot opuhod o boros dot igitan kasai’ diyolo’ i batos diri. Om pimpangkis noddi iyolo’ do mikuwo’d pinopinguni do torumpit. ¹⁵ Om oinsanan nopoddi i rayat do Yohuda dot ongotood tu’ nokopomonsoi no iyolo’ do batos do mikuwo’d iso-iso’ kopio o ginawo. Om asanangan iyolo’ do sumambayang dot id TUHAN, om TUHAN nga’ orohian i’ do rumamit diyolo’. Om nonuan do TUHAN do kosimbayanan o hiri’d watas diyolo’. ¹⁶ Om iduwo’ noddi di Raja’ Asa o pangkat di Maaka i todu’ dau, do Tina’ do Raja’ tu’ minomonsoi i’ i Maaka do tingolig dit araat kopio — i tingolig dot Asira, i tingolig do kororombung. Om mumuko’ nopo dau i tingolig diri om tutudai nogiddi dau do hilo’d Rantai do Kidron. ¹⁷ Mulong piya dot a’ di Asa naraag ngai’ i tiyonon do modsubak do tingolig dot id pomogunan diri, nga’ otorodok kasai’ no ma iyau dot id TUHAN do solinaid dau do poimpasi. ¹⁸ Om poopio’ noddi di Asa do hiri’d Walai’d Sasambayangan dot Agayo o koinsanai di tamas om pirok om i konunu-nunuan do suwai di naanu diyolo’ om i naanu di tapa’ dau do mantad id pisangadan. ¹⁹ Om aiso’ no o pisangadan dot id pomogunan diri do gisom di kotolu nohopod om limo do toun di Asa do momorinta’.

¹ Tontok di kotolu nohopod om onom do toun di Raja’ Asa do momorinta’ do hilo’d Yohuda, om ngoyo’ no di Baisa, i raja’ dot Israil songodo’ o Yohuda. Om pogiroto’ no dau o bandar do Rama do mangantob di ralan do sumuang om sumoliwan do Yohuda. ² Om ngoyo’ noddi di Raja’ Asa i tamas om i pirok do mantad hiri’d Walai’d Sasambayangan dot Agayo om i hiri’d walai’d raja’, om pootodo’ no dau dot id di Binhadad, i raja’ do Siria do hilo’d Damsik. Om pinoporikot nogi’ iyau do boros do poingkaa, ³ ’’Kaino miambalut do miagal di winonsoi di molohing to. Om pinaatadan ku nogi’ iya’ do tamas om pirok do maan ku do popuhawangon diya’, om suhuon ku iya’ do momutut di piombolutan dokoyu di Baisa, i raja’ dot Israil, om poinsoduwon indo dau i soudor dau do mantad id watas ku,’’ ka. ⁴ Om kookunai i’ di Binhadad i pinoboros diri, om suhuo’ no dau i piro-piro boyoon do soudor dau do mogiwoyo-woyo’ di soudor diyolo’ do mongoi panangod di kabandaran dot Israil. Om kaala’ no diyolo’ o bandar dot Iyon, Dan, Abil-Bait-Maaka om koinsanai di kabandaran do poopian do kaakan-akanan di hilo’d Naptali. ⁵ Om soira’ di nokorongou i Raja’ Baisa do hal diri, om tingkod no iyau do popogirot do Rama om tongkiadai no dau. ⁶ Om suhuo’ no di Raja’ Asa o koinsanai di tulun do mantad id Yohuda do mongoi panaan di watu om kayu di pinonginggirot daa di Baisa do Rama. Om iri no o pinakai di Asa do pinopogirot do bandar do Giba om Mispa. ⁷ Om tontok noddi do ruminikot i Hanani i Nabi, dot id di Raja’ Asa om boro-boros nod poingkaa, ’’A’ ko noddi kapangala’ do soudor do Israil tu’ suminondiu ko i’ di raja’ do Siria, om a’ nogi’ suminondiu do TUHAN, i Kinorohingan nu. ⁸ Okon toi ko’ Etiopia om Libia nga’ kisoudor i’ dot ogumu’ dit ongkirapo-rapo om ogumu’ o korita’-kuda’ om soudor dit ongkikuda’? Nga’ iyo piya’ddi nga’ nonuan ko id TUHAN do kamanangan do suminangod diyolo’, tu’ suminondiu ko i’ dau. ⁹ TUHAN i’ o miontong do pointongkop diti pomogunan om pinointalang dau o kokoriso’ dau dot id tulun dit otorodok dot id dau. Dangkababasug no kopio do winonsoi nu baino’, om gowoi pondo om baino’ no o timpuunon nu dot aala’ dot id pisangadan,’’ ka dau. ¹⁰ Om notogod tomod diri i Asa do nokorongou di boros di Nabi Hanani, om posuango’ noddi dau i nabi diri dot id giil. Om tontok nogiddi do ninggorit di Asa o piro-piro tulun dot id pogialatan di rayat dau. ¹¹ Iri nopo i nongosiliu do maso do pomorintaan di Asa, do mantad di timpuun i’ om gisom do kinopupuson, om nongotulis ngai’ no do hiri’d suang di Buuk do Susui do Pasal Ngai’ di Raja’ do Yohuda om Israil. ¹² Om tontok di kotolu no nohopod om siam do toun dau do momorinta’, om koontok goduwo nod toruol dit araat o gakod di Asa. Nga’ iyo piya’ddi nga’ a’ i’ iyau minokitulung do TUHAN, suwai ko’ minokitulung nogi’ iyau do bobolian. ¹³ Duwo poddi o toun do mantad diri om kapatai no iyau. ¹⁴ Om kopuro’ nod rampa om it ongosonong o kosingudan i rata’ dau, om lobongo’ no do hiri’d kalabangan do raja’ di hilo’d Bandar di Daud. Om podtutud no i rayat do rinubpu’ do gisom dot agayo tomod o binandak do pinomusou diyolo’ di Asa.

¹ Om kosiliu noddi i Yosapat do raja’ do Yohuda do suminowoli di Asa, i tapa’ dau. Om pogiroto’ no dau o koiyon-iyono’ dau tu’ sumodia’ iyau do sumangod dot Israil. ² Om poiyanai no dau do soudor o pointikid-tikid di bandar do kitolig do hilo’d Yohuda, om hiri’d kinoiyonon dit id soliwan do bandar do hilo’d Yohuda, om hiri’d kabandaran di nosolod di tapa’ dau dit id watas dot Ipraim. ³ Om barakatai nod TUHAN i Yosapat tu’ tuminanud i’ iyau do kowoyo-woyoon di tapa’ dau, dot a’ tuminuku’ dot id Baal, ⁴ tu’ suminambayang i’ iyau dot id Kinorohingan. Om minumboyo’ iyau do ponuhuan do Kinorohingan, om a’ i’ iyo di kowoyo-woyoon di piro-piro raja’ dot Israil o kowoyo-woyoon dau. ⁵ Om pinogirot do TUHAN o pomorintaan di Raja’ Yosapat do hilo’d Yohuda. Om oinsanan nopo i rayat do papatahak dot ipuhawang dot id dau, om kaya’ tomod diri iyau om pusohon kopio. ⁶ Om aayi-ayi’ o ginawo dau do mumboyo’ do ponuhuan do TUHAN om rinaag ngai’ dau o koinsanai di tiyonon do modsubak do tingolig om i tininganak do tingolig dot Asira do hilo’d Yohuda. ⁷ Om tontok di kotolu nod toun do pomorintaan dau, om ponuhu’ no iyau do piro-piro di pagawai dot angasawat o pangkat do mongoi potuduk dit oturan do TUHAN do hilo’d kabandaran do Yohuda. Iri nopo i tulun do sinuhu’ddi nga’: i Binhail, i Obaya, i Sakaria, i Nitaniil om i Mika. ⁸ Om kinoruhang po iyolo’ do siam o tulun do Liwi om duwo o nabi. Iri nopo tulun do Liwi diri nga’ i Somaya, i Nitania, i Sobaya, i Asail, i Somiramot, i Yonatan, i Adonia, i Tobia om i Tobadonia. Iri no duwo ot imam om i Ilisama om i Yoram. ⁹ Om piigit-igit nopo diyolo’ i Buuk do Tourat do TUHAN do mintikid do toinsanan di bandar do Yohuda do mongoi ponuduk di rayat do hilo’. ¹⁰ Om pooriso’ nod TUHAN o koinsanai di raja’ dit id sorili’ do Yohuda do mongoi sangod di Raja’ Yosapat. ¹¹ Om ogumu’ o pirok om i nipuhawang do suwai do naramit dau do mantad id tulun do Pilistin. Om mantad no di tulun dot Arab om nakaramit iyau do 7,700 o tinan do dumba’ om 7,700 o tinan do kambing. ¹² Om maid-laid diri nga’ mayo-gayo o kuasa’ di Yosapat. Om pointongkop nopod Yohuda o winansayan dau do kuta’ do padtamangan om piro-piro bandar do poopian do kaakan-akanan. ¹³ Om ogumu’ o kaakan-akanan do tinimung dau dot id kabandaran diri. Om hilo’ nopod Yorusalim om pinoiyanan dau do piro-piro boyoon do soudor dit ongosiou, ¹⁴ do sompori-pori do haro o sinompuruan, do tumanud di pinuruan do sompiiyon diyolo’. I Adna nopo om boyoon di soudor do mantad id pinuruan do sompiiyon do payat do Yohuda. Om iyau no o boyoon do 300,000 o soudor. ¹⁵ Iri no tulun do koduwo om i Yohanan; om iyau no o boyoon do 280,000 o soudor. ¹⁶ Om iri no tulun do kotolu om i Amasia, i tanak di Sikri; om iyau no o boyoon do 200,000 o soudor. (I Amasia nopo om agaan nopo o ginawo dau do norohian do momonsoi’d karaja’ do don TUHAN om a’ i’ iyau sinuhu’ do tulun do suwai.) ¹⁷ Om iri nopo boyoon di sinompuruan do piro-piro o pinuruan do sompiiyon do Binyamin, om i Iliada i soudor do nabantug o kosioho’. Om iyau no o boyoon do 200,000 o soudor dit ongkipana’ ngai’ om ongkikolid. ¹⁸ Iri no wakil dau do boyoon dot id suang do sinompuruan diti, om i Yosabad; om iyau no o boyoon do 180,000 o soudor di haro ngai’ o rapo-rapo di don soudor. ¹⁹ Om iyolo’ no i pakaraja’ do hilo’d Yorusalim. Om suwai no ko’ iri, om poiyono’ po di raja’ o piro-piro o soudor do suwai do hiri’d piro-piro kuta’ do padtamangan dit id watas do Yohuda.

¹ Om tontok di nakakaya’ om di nakabantug i Yosapat, i raja’ do Yohuda, om pokowino’ no dau o tiso’ dit id suang do sompiiyon dau dot id iso’ o tulun dit id suang do sompiiyon di Ahab, i raja’ dot Israil. ² Piro-piro noddi o toun do mantad diri om ongoi no i Yosapat pogolimbuha’ di Ahab do hilo’d bandar do Samaria. Om papaharo no i Ahab do poginakanan om ponuhu’ no iyau do monumbali’ dot ogumu’ o dumba’ om sapi’ do ponuwau di Yosapat om i tulun di tuminanud dau. Om tontok noddi do nangatan dau i Yosapat do mongoi panangod di bandar do Ramot, i hilo’d Giliad. ³ Om boros ka dau do minuhot, ’’Orohian ko i’ do tumanud doho’ do mongoi panangod do Ramot?’’ ka. Om boros ka di Yosapat do suminimbar, ’’Oo, mongoi to nopo. Om sumugku’ indo do soudor nu i soudor ku. ⁴ Nga’ osonong do muhot kito pod TUHAN,’’ ka dau. ⁵ Om timungo’ no di Ahab ot apat nahatus o nabi om uhoto’ no dau iyolo’ do poingkaa, ’’Mongoi oku tuu panangod do Ramot ko’ amu’?’’ ka. ’’Mongoi!’’ ka diyolo’ do suminimbar. ’’Onuan ko id Kinorohingan do kamanangan,’’ ka kawagu diyolo’. ⁶ Nga’ ponguhot po kawagu i Yosapat, ’’Haro po o nabi do suwai ko’ iyolo’ di milo do momiolitan dato om i milo do monguhot ondung poingkuro o korohian do TUHAN?’’ ka dau. ⁷ Om boros ka di Ahab, ’’Iso’ poo, i Mika i tanak di Yimla. Nga’ araatan oku dau tu’ a’ nopo iyau insan do posunud dit osonong dot id doho’; iri kasai’ nopo it a’ osonong o posunudon dau,’’ ka dau. ’’A, kada’ pomoros dot iyondo!’’ ka di Yosapat. ⁸ Om lohowo’ no di Ahab o songulun di pagawai do hiri’d walai di raja’ om suhuo’ no dau do marau-arau do mongoi pangangat di Mika. ⁹ Tontok nopoddi om kipinakai iyo Ahab di Yosapat do pakayan di don raja’, om poirikau do hiri’d tirikohonon do don raja’ do hiri’d kinoiyonon do pamagamasan do gandum dit id dotimbabaan di wawayaan dot agayo do bandar do Samaria. Om rikot ngai’ nopo do hiri’d dotoguangan diyolo’ i nabi do minongoi polombus do boros do pasal dit id dosunsudan. ¹⁰ Om haro o songulun dot id pogialatan di piro-piro o nabi diri, i roitan dot i Sodokia, i tanak di Kinaana, do minomonsoi do sinangau-sangau do basi’ do winonsoi, om boro-boros noddi iyau dot id di Ahab, ’’Poingkaa o boros do TUHAN, ’Iti no sinangau-sangau o panangod nu do Siria om pangala’ nu diyolo’,’ ka,’’ ka dau. ¹¹ Om kosokodung ngai’ nopo i nabi di suwai, om boros ka diyolo’, ’’Ngoyon nopo songodo’ o Ramot, tu’ kamanang ko i’. Onuan ko id TUHAN do kamanangan,’’ ka. ¹² Om daamot nopoddi om boros ka di tulun do sinuhu’ do minongoi pangangat di Mika, dot id di Mika, ’’Oinsanan nopo i nabi do pinopoboros do kamanang i raja’. Om maha’ daa om osonong o diya’ kadauu do poboroson do miagal di diyolo’d pinoboros,’’ ka dau. ¹³ Nga’ boros ka di Mika, ’’Sumumpa’ oku no dot id suang do ngaran do TUHAN di poimpasi dot iri no i pinoboros do Kinorohingan dot id doho’ o poboroson ku!’’ ka dau. ¹⁴ Om karapou poddi i Mika di Raja’ Ahab, om ponguhot no i raja’, ’’Mongoi i’ tuu iyahai di Raja’ Yosapat panangod do Ramot ko’ amu’?’’ ka dau. ’’Ongoi kou nopo!’’ ka di Mika. ’’Atantu’ nod kamanang ko i’. Tu’ onuan ko id TUHAN do kamanangan,’’ ka dau. ¹⁵ Om boros ka di Ahab, ’’Ondung moro-boros ko doho’ dot id suang do ngaran do TUHAN, om poboroson no it otopot. Impiro tiya’ no sunudai dot iyo’ddi?’’ ka dau. ¹⁶ Om boros kad i Mika, ’’Okito ku o soudor dot Israil do nopogitongkiad-kiad do hilo’d konuluhanan. Miagal po iyolo’ do dumba’ dit aiso’ o gompomogompi’, om poingkaa o boros do TUHAN do pasal diyolo’, ’Iti nopo tulun diti om aiso’ o boyoon; om pologoson nopo iyolo’ dot osimbayan do muli’,’ ka,’’ ka dau. ¹⁷ Om boros kaddi di Ahab dot id di Yosapat, ’’Piontok nopo di boros ku, koii? A’ nopo iyau insan poboros dit osonong dot id doho’! Iri kasai’ nopo it araat o poboroson dau,’’ ka dau. ¹⁸ Om boros ka kawagu di Mika, ’’Pokinongoho’ no iti poboroson do TUHAN do dinondo! Okito ku o TUHAN do poirikau dot id tirikohonon dau do momorinta’ do hilo’d surga, om oinsanan nopo i moloikat dau do songingkakat do hiri’d toning dau. ¹⁹ Om ponguhot no o TUHAN do poingkaa, ’Isai o mongoi pominsuhu’ di Ahab om mongoi i’ iyau sangod om apatai indo do hilo’d Ramot, i hilo’d Giliad?’ ka. Om mogisuwai-suwai nopo o pinosimbar di moloikat. ²⁰ Alaid noddi om rikot no ot iso’ o rusod. Om insomok no iyau do TUHAN om boro-boros nod, ’Iyoho’ o mongoi pominsuhu’ dau,’ ka. ’Poingkuro ko do mominsuhu’?’ kad TUHAN do minuhot. ²¹ Om boros ka di rusod, ’Mamanau oku nondo om ngoyon ku i’ binsuhuo’ do mongudut o koinsanai di nabi, di tuuhoton di Ahab,’ ka. Om boros kad TUHAN, ’Ba, wonsoyon nopo o miagal diri, om obinsuhu’ nu indo kopio iyau,’ ka,’’ ka dau. ²² Om boros ka kawagu di Mika, ’’Nosiliu no kopio iri! Pinoudut do TUHAN i piro-piro o nabi di tuuhoton nu dot id diya’ tu natantu’ mantad nod TUHAN i piro-piro o nabi di tuuhoton nu’ddi do mongudut diya’ tu’ natantu’ mantad nod TUHAN do paratu’ diti kosusaan dot id diya’!’’ ka dau. ²³ Om pamanau no i Nabi Sodokia do minongoi’d hiri’d gulu om insomok no iyau di Mika om tapapo’ no dau o rabas di Mika, om boro-boros nod, ’’Soira’ kopio’ddi tongkiad i Rusod do TUHAN do mantad id doho’ om minongoi nogiddi boro-boros diya’?’’ ka dau. ²⁴ Om boros ka di Mika, ’’Okito nu indo o katapatan diti do mongoi ko lisok!’’ ka. ²⁵ Boros ka di Raja’ Ahab, ’’Tangkapo’ dokoyu ilo’! Om pootodon i’ do hilo’d di Amon, i gobunor diti bandar, om hilo’d di Yoas, i tanak do raja’. ²⁶ Suhuon no iyolo’ do pogiil dau, om kada’ no iyau onuwai’d suwai ko’ roti noo om waig do gisom do koguli’ oku do mikuwo’d osonong-sonong,’’ ka dau. ²⁷ Om boros ka di Mika, ’’Ondung osonong-sonong ko do koguli’, om okon no ko’ TUHAN o somboros di pinolombus ku’ddi. Om iyokoyu ngai’ no i hino’d hiti o sumiliu’d sasi’,’’ ka dau. ²⁸ Om pamanau noddi i Ahab i raja’ dot Israil, om i Yosapat i raja’ do Yohuda, do minongoi panangod do bandar do Ramot i hilo’d Giliad. ²⁹ Om boros ka di Ahab dot id di Yosapat, ’’A’ oku i’ iyoho’ manampakai do pakayan do raja’ do mongoi sangod, nga’ iya’ nopo om manampakai no di pakayan do don raja’,’’ ka dau. Om kada’ noddi panampakai do pakayan do don raja’ i raja’ dot Israil do tontok di minongoi iyolo’ sangod. ³⁰ Om tontok nopod maso’ddi nga’ nosunudan no di raja’ do Siria i boyoon do soudor dau dit ongkikorita’-kuda’ dot a’ manangod dot isai nopo do suwai ko’ i raja’ dot Israil. ³¹ Gowoi poddi om tontok di nokito diyolo’ i Raja’ Yosapat, om andasan ngai’ nopo daa diyolo’ om iyau i raja’ dot Israil. Om songodo’ no daa diyolo’ iyau. Nga’ pomolohou no i Yosapat do TUHAN, om uhupai no iyau’d TUHAN, i Kinorohingan. Om pasalao’ nod TUHAN i kawayaon di mongoi panangod. ³² Om koilaai nogiddi di piro-piro boyoon do soudor do Siria dit ongkikorita’-kuda’ dot okon i’ ko’ i tulun diri i raja’ dot Israil, om tingkod noddi iyolo’ do manangod dau. ³³ Nga’ kaantak-antakai no kopio do minamana’ o tiso’ di soudor do Siria om kolopuson no di rasuk di Ahab do dong soudor, do hiri no kopio’d piniromutan o noontok. ’’Noontok oku!’’ ka di Ahab do minamagarang dot id tulun di potunud di korita’-kuda’ dau. ’’Poguliai om posoliwanon oku i’ do mantad id pisangadan diti!’’ ka dau. ³⁴ Om daamot nopo di soudor do mogisasangod, om poingkakat kasai’ po i Raja’ Ahab do poinsondiu di korita’-kuda’ dau do potimbaba’ di soudor do Siria. Om kapatai noddi iyau di notonob o tadau.

¹ Om soira’ di nokoguli’ i Yosapat, i raja’ do Yohuda do hiri’d walai dau do hilo’d Yorusalim, dot osonong-sonong i’ iyau, ² om rikot no o songulun o nabi di roitan dot i Yohu i tanak di Hanani, do minongoi solowot di raja’. Om boros ka di nabi diri dot id dau, ’’Apatut i’ toi do monguhup ko’d tulun dot araat om sumokodung do tulun dit araatan do TUHAN! Iri no i winonsoi nu o kotogod-togod do TUHAN diya’. ³ Nga’ iyo piya’ddi nga’ haro i’ o kosonongo’ nu. Tu’ nidu’ ngai’ nu i tininganak do tingolig dot Asira, i tukuon di rayat om tuminotos ko do tumanud do korohian do Kinorohingan,’’ ka dau. ⁴ I Raja’ Yosapat nopo om poingiyon do hilo’d Yorusalim. Nga’ asaru’ i’ iyau do mongoi pinsolowot di rayat do pointongkop do pomogunan do mangangat diyolo’ do gumuli’ dot id TUHAN, i Kinorohingan do taki-aki diyolo’. ⁵ Om pointikid-tikid do bandar di kitolig do hilo’d Yohuda om pinomilian ngai’ nopo dau do gompomutus, ⁶ om sinunudan dau do poingkaa, ’’Popunongon no kopio dokoyu o pomumutus, tu’ a’ kou i’ momutus dot id suang do ngaran do tulun. Suwai ko’ id suang do ngaran do TUHAN. Om piantangan kasai’ kou i’ dau do tontok di momutus kou do hal. ⁷ Rumonok kou nod TUHAN, om antaan-taan no kopio dokoyu do tontok do momonsoi kou do nunu nopo, tu’ TUHAN nopo, i Kinorohingan toko’, om araatan i’ do tulun dit a’ otulid o kowoyo-woyoon, om i manampaping do wokon, om i rumamit do ponisip,’’ ka dau. ⁸ Om hilo’d Yorusalim nga’ minomili’ i’ i Yosapat do piro-piro o gompomutus dot id pialatan di tulun do Liwi, om it imam, om i boyoon do rayat. Om iyolo’ no ot apatut do momutus do hal di sumaap do Tourat do TUHAN om piro-piro o hal do suwai. ⁹ Om iti no o pinoboros di Yosapat dot id piro-piro o gompomutus diri, ’’Wonsoyon no dokoyu iti karaja’ dokoyu do mikuwo’d rumonok do TUHAN. Om tonudon ngai’ no i ponuhuan dau do nunu nopo o wonsoyon dokoyu. ¹⁰ Om soira’ nopo do korikot i tambalut dokoyu di mantad id bandar do suwai di minamatai’d tulun ko’ tuminolibamban do Tourat, ko’ tuminolibamban do boros do TUHAN, om tudukan no dokoyu iyolo’ do kowoyo-woyoon do tontok do bisara’. Om a’ indo iyolo’ kowonsoi do sala’ dot id TUHAN, om a’ indo o TUHAN otogod dokoyu om a’ otogod diyolo’. Wonsoyon no dokoyu o ponuhuan diti, om a’ kou i’ kowonsoi’d sala’. ¹¹ Om i Amaria, i Boyoon dot Agayo dot Imam ot onuan ku do kuasa’ dit id sawat kopio do momutus do nunu nopo o hal di kagait dot Oturan do TUHAN. Om i Sobaya, i tanak di Ismail, i gobunor do Yohuda, ot onuan ku do kuasa’ dit id sawat kopio do momutus do koinsanai’d hal do suwai. Om iri nogi’ i tulun do Liwi nga’ kitonggungan i’ do mongilo-ilo kopio dot owonsoi i nobutus dot id bisara’. Tonudon ngai’ no iti pinotuduk, om pogiroton no kopio o ginawo do momonsoi’dti. Om maha’ daa om woyoon do TUHAN i tulun dit otulid o wonsoyon!’’ ka dau.

¹ Om piro-piro noddi o koloido’ do mantad diri om ngoyo’ no di soudor do Muab om soudor dot Amon songodo’ o Yohuda, om minoyo’ nogi’ i soudor do Mounim, i soudor do sokodung diyolo’. ² Om korikot noddi o tulun do minongoi poromut do habar diti dot id di Raja’ Yosapat, ’’Nokorikot no i soudor dot ogumu’ do mantad hilo’d Idom, i hilo’d soborong do Rahat do Napatai! Mongoi iyolo’ panangod om nosolod no diyolo’ o Hasason Tamar,’’ ka. (I roitan dot In-Godi). ³ Om kooris noddi i Yosapat om sambayang no iyau do minokituduk do TUHAN. Om ponuhu’ no iyau do koinsanai di rayat do puasa. ⁴ Om rikot ngai’ nopo do hilo’d Yorusalim o tulun do mantad id pointikid-tikid do bandar do hilo’d Yohuda, do mongoi pokitulung do TUHAN. ⁵ Om iyolo’ ngai’ no di tulun do songingiyon do hilo’d Yorusalim o tuminimung do hiri’d natad do wagu di Walai’d Sasambayangan dot Agayo. Om ingkakat no i Raja’ Yosapat do tuminimbaba’ diyolo’. ⁶ Om sambayang no iyau dot opuhod o boros do poingkaa, ’’Oi TUHAN, i Kinorohingan do taki-aki dahai! Iya’ no o Kinorohingan do hino’d surga om iya’ o momorinta’ dot id sawat do koinsanai’d bansa’d tulun do hiti’d pomogunan. Kikuasa’ ko om okoris ko; iso’ pod tulun nga’ aiso’ i’ o kasaap diya’. ⁷ Iya’ no o Kinorohingan dahai. Tontok di ruminikot i’ i tulun nu, i bansa’ dot Israil, do hiti’d pomogunan diti, om nuyung nu i’ i tulun mantad di poingiyon do hiti do maso’ddi. Om patahako’ nu noddi iti pomogunan dot id sinakagon di Abraham, i tambalut nu, do sumiliu do diyolo’d songonuon do gisom dot alaid. ⁸ Om nokoiyon noddi iyolo’ do hiti om nokopomonsoi do Walai’d Sasambayangan dot Agayo do pomusou diya’. Om oilaan i’ diyolo’ ⁹ dot ondung ohukuman iyolo’ dot i dusa diyolo’ o kopomohukuman, om orikot nondo iyolo’d pisangadan, ko’ oontok do toruol di mogkoroliu, ko’ mononglous, om milo i’ iyolo’ do rumikot do mongoi ingkakat do hiti’d dotimbabaan diti Walai’d Sasambayangan dot Agayo. Om id suang nopo iyolo’ do kosusaan om milo i’ iyolo’ do sumambayang dot id diya’, om pokinongohon nu indo iyolo’ om uhupan nu iyolo’! ¹⁰ Om dinondo nopodti nga’ songodon iyahai do tulun dot Amon om Muab, om Idom. Tontok di nokorikot i’ i taki-aki dahai do mantad hilo’d Masir, om a’ nu i’ iyolo’ pinotumboyo’ do sumuang di pomogunan diri dot a’ po iyolo’ suminusui di ralan di posorili’ om a’ iddi nangapatai i tulun dot Amon, om Muab, om Idom. ¹¹ Om baino’ noddi om iyo’dti o wonsoyon di piro-piro o bansa’ddi dot id dahai. Om nuyung iyahai diyolo’ do mantad id pomogunan di pinatahak nu dot id dahai. ¹² Iya’ no o Kinorohingan dahai! Hukumai no iyolo’, tu’ aiso’ no o pokukurayan dahai do tumimbaba’ di soudor dot ogumu’ di mongoi panangod dahai. A’ no iyahai koilo ondung nunu ot apatut do wonsoyon dahai, om iri no o kinorikatan dahai dot id diya’ do mongoi pokitulung,’’ ka dau. ¹³ Om daamot nopoddi nga’ songingkakat ngai’ i tongokusai do Yohuda do mogiwoyo-woyo’ do sawo om tangaanak diyolo’ do hiri’d Walai’d Sasambayangan dot Agayo. ¹⁴ Id pogialatan nopo di tulun dot ogumu’ddi om haro o songulun o tulun do Liwi di roitan dot i Yahasiol. Iyau nopo om tanak di Sakaria, i mantad id pinuruan do sompiiyon di Asap do suminolusuk di Bonaya, i Yoyol, om i Matania. Om tontok noddi do pinorinta’ do Rusod do TUHAN i Yahasiol, ¹⁵ om boros kaddi dau, ’’Oi Tuan Raja’, om iyokoyu i tobpinai ngai’ ku. Boros kad TUHAN om a’ kou i’ apatut do momoros dot aiso’ o pokukurayan ko’ moddosi po do tumimbaba’ di soudor dot ogumu’. Tu’ iri nopo mongoi sangod om okon i’ ko’ iyokoyu suwai ko’ Kinorohingan. ¹⁶ Suab nopondo, di tumakad iyolo’ do maya’ di ralan do kawaya’ do hilo’d Sis, om ngoyon no dokoyu iyolo’ songodo’. Om kotimbaba’ kou nondo diyolo’ do hiri’d tompok di rantai dit id gulu kobontol di tana’ do kowotuan, i hilo’d somok do Yoruil. ¹⁷ A’ kou i’ minog do monokisaap dot id pisangadan diti. Mingkakat kou nopo do hilo’d tiyonon dokoyu do kumaraja’, om mandad kou nopod hilo’. Om kokito kou indo dot onuan kou’d TUHAN do kamanangan. Oi tulun di poingiyon do hiti’d Yohuda om hiti’d Yorusalim, kada’ kou katangkabo om kada’ kou kooris. Ongoi kou nopo sangod, tu’ uhupan kou id TUHAN!’’ ka dau. ¹⁸ Om otud noddi i Raja’ Yosapat. Om woyo’ ngai’ nopo i rayat dau do minotud do tuminuku’ dot id TUHAN. ¹⁹ Om ingkakat noddi i tulun do Liwi di mantad id pinuruan do sompiiyon di Kohat om i Kora do minodsinding do mamarayou’d TUHAN i Kinorohingan dot Israil. ²⁰ Kosuabon noddi kawagu, dit osuab po, om soliwan no i rayat om ongoi no do hiri’d tana’ do kowotuan dit id somok do Tokua. Om soira’ di minamanau iyolo’, om nosihatai no iyolo’ di Yosapat do poingkaa, ’’Oi rayat do Yohuda om Yorusalim! Ponongkuyaai kou nod TUHAN, i Kinorohingan dokoyu, om ogirot i’ o ginawo dokoyu. Romiton no dokoyu o nosihat do mantad id piro-piro o nabi di tuuhoton dokoyu, om koundar kou i’!’’ ka dau. ²¹ Om koponokirunding poddi i raja’ di rayat dau, om suhuo’ no dau i modsisinding do mamakai do pakayan dit oiyo nopo, i koubasanan diyolo’ do mamakai do tontok do haro o wonsoyon di don tugama’. Om mositi’ nod mulud do poimbaris do hiri’d gulu di soudor om modsinding do poingkaa, ’’Royohon no o TUHAN! Mompus-ompus kasai’ i’ o kosianan dau!’’ ka. ²² Om soira’ di tumimpuun do modsinding i modsisinding, om gangaho’ nod TUHAN o hiri’d pogialatan di soudor do pisangod di maso do mongoi panangod. ²³ Om songodo’ no di soudor dot Amon om Muab i soudor dot Idom do gisom do naayi’ do napatai. Om poguliai nogiddi diyolo’ om pogisasangod no dot iyolo’ i’ om iyolo’. ²⁴ Om soira’ di nokorikot do hiri’d walai’d akawas do padtamangan i soudor do Yohuda, i hiri’d tana’ do kowotuan om impao’ no diyolo’ i kinoiyonon di pisangod, om kokito no diyolo’ do songinromos no do hiri’d tana’ i rata’ di pisangod. Om iso’ po di soudor do pisangod nga’ aiso’ no o poimpasi. ²⁵ Om ngoyo’ no di Yosapat om i soudor dau pingonuo’ i konunu-nunuan di pisangod. Om ogumu’ tomod o tayam-tayam, om rapo-rapo, om pakayan, om konunu-nunuan do suwai dit angagayo o gatang do nabantalan diyolo’. Om kotimung poddi diyolo’ i konunu-nunuan diri do solinaid do tolu o tadau, om ogumu’ po o konunu-nunuan do suwai, gisom dot a’ noddi milo dot a’ tongkiadan. ²⁶ Om kaapat poddi do tadau om timung no iyolo’ do hiri’d Rantai do Boraka om pamarayou no iyolo’d TUHAN tu’ i nongowonsoi dau dot id diyolo’ o kapamarayahan. Om iri no o kinopomungaranan do rantai’ddi do Rantai do ’’Boraka’’. ²⁷ Om woyoo’ noddi di Yosapat o koinsanai di soudor do muli’ do hilo’d Yorusalim do mikuwo’d ongotood tomod iyolo’ tu’ naala’ nod TUHAN i pisangod diyolo’. ²⁸ Om soira’ di nokorikot iyolo’ do hiri’d bandar, om baris no iyolo’ do kuminaa do hiri’d Walai’d Sasambayangan dot Agayo dot ompot-ompoton do kecapi om torumpit. ²⁹ Om ongooris ngai’ nopoddi i pomogunan do suwai di nokorongou iyolo’ do karalan-ralano’d TUHAN do minangala’ di pisangod dot Israil. ³⁰ Om iri no o nokosimbayan-bayan di Yosapat do momorinta’, om nonuan iyau’d TUHAN do kosimbayanan do pointongkop di pomogunan. ³¹ Nosiliu nopo i Yosapat do raja’ do Yohuda om di tolu no nohopod om limo o toun do tumur dau, om duwo nohopod om limo o toun dau do momorinta’ do hilo’d Yorusalim. Tina’ nopo dau om i Asuba, i tanak di Silhi. ³² Om i Yosapat nga’ iyo i’ di Asa, i tapa’ dau, tu’ osonong i’ o winonsoi dau dot id toguang do TUHAN. ³³ Nga’ iri nopo piro-piro o tiyonon do modsubak do tingolig om a’ i’ dau rinaag. Om a’ po aayi-ayi’ no o ginawo di rayat do sumambayang dot id Kinorohingan di taki-aki diyolo’. ³⁴ Nga’ iri nopo susuyon do suwai do pasal di Yosapat, do mantad di timpuun i’ om gisom do kinopupuson do pomorintaan dau, om nongkotulis no do hiri’d Susuyon do Pasal di Yohu i Tanak di Hanani, i nokotulis do hiri’d suang do Buuk do Susui do Pasal Ngai’ di Raja’ dot Israil. ³⁵ Insan o maso om popiogot nod piombolutan i Yosapat, i raja’ do Yohuda om i Ahasia, i raja’ dot Israil, i raja’ di mingwonsoi dot angaraat. ³⁶ Om hilo’ no iyolo’d Ision-Gibir, i pododompiran do kapal do rahat, do minomonsoi do piro-piro kapal do rahat do mongoi’d hilo’d Tarsis. ³⁷ Nga’ ngoyo’ no di Iliosor i Nabi, i tanak di Dodawa, i mantad hilo’d bandar do Marisa poinsano’ i Yosapat, boros ka dau, ’’Raagon nondod TUHAN i nongowonsoi nu tu’ minonokiambalut ko i’ di Ahasia,’’ ka. Om karaag ngai’ nopoddi i kapal do rahat di winonsoi di Yosapat gisom dot a’ noddi milo do mamanau.

¹ Om kapatai noddi i Yosapat om lobongo’ no do hiri’d kalabangan do raja’ do hilo’d Bandar di Daud. Om i Yihoram, i tanak dau’d kusai o nosiliu’d raja’ do suminowoli dau. ² I Yihoram nopo, i tanak di Yosapat do kusai, i raja’ do Yohuda, om kiobpinai dot onom o kusai: i Asaria, i Yohiol, i Sakaria, i Asariahu, i Mikail om i Sopasa. ³ Om ogumu’ tomod o tamas om pirok, om konunu-nunuan do suwai dit angagayo o gatang do naanu diyolo’ do mantad id tapa’ diyolo’, om tinikidan iyolo’ do bandar di kitolig o posorili’ do hilo’d Yohuda. Om i Yihoram no o tinantu’ di Yosapat do sumiliu’d raja’ tu’ iyau no o tanak dau’d kusai dit id dotuo. ⁴ Om soira’ dit opurimanan di Yihoram dot ogirot o pomorintaan dau om ponuhu’ no iyau do mamatai do koinsanai di tobpinai dau, om piro-piro nogi’ o pagawai dit angasawat o pangkat. ⁵ Nosiliu nopo i Yihoram do raja’ om di tolu no nohopod om duwo o toun do tumur dau, om minomorinta’ iyau do hilo’d Yorusalim do solinai’d do walu’ o toun. ⁶ Om minomit iyau do kowoyo-woyoon di Raja’ Ahab om i raja’ dot Israil do suwai, tu’ kinawin dau o tiso’ di tanak do tondu’ di Ahab. Om minomonsoi iyau do dusa dot id TUHAN, ⁷ nga’ a’ id TUHAN pinatai i raja’ do mantad id sinakagon di Daud tu’ nakabatos no iyau do momorinta’ kasai’ o sinakagon di Daud. ⁸ Maso nopo di pomorintaan di Yihoram, om suminaap ot Idom om minidu’ do mantad id pomorintaan do Yohuda, om mimpori-pori noddi iyolo’ do momorinta’. ⁹ Om soliwan noddi i Yihoram om iri ngai’ i boyoon do soudor dau do mogiwoyo-woyo’ di korita’-kuda’ dau do don sumasangod do mongoi sangod dot Idom. Om turungkuo’ no daa iyau di soudor dot Idom, nga’ nakatalib i’ iyolo’ di soudor do pisangod di songinsorili’ diyolo’, di dongotuong. ¹⁰ Om mantad poddi om a’ noddi ot Idom mokiporinta’ do Yohuda. Om tontok iddi do suminaap om minidu’ do mantad id pomorintaan do Yohuda o bandar do Libna. Om nongosiliu pogi’ o miagal diri nga’ tuminongkiad i’ i Yihoram do mantad id TUHAN, i Kinorohingan di tukuon di taki-aki dau. ¹¹ Om minomonsoi po iyau do tiyonon do modsubak do tingolig do hilo’d konulu-nuluan do Yohuda, om gowoi poddi om nokowonsoi’d dusa dot id TUHAN i rayat do Yohuda om Yorusalim. ¹² Om pokirim noddi i Ilia i Nabi, do surat dot id di Yihoram. Om poingkaa o pinotulis do hiri’d surat, ’’TUHAN no, i Kinorohingan di tinuku’ di Daud, o momohukum diya’ tu’ a’ ko i’ tuminanud di kowoyo-woyoon di tapa’ om taki nu. ¹³ Tu’ minomit ko nogi’ do kowoyo-woyoon di piro-piro raja’ dot Israil, om minamayayat ko do rayat do Yohuda om Yorusalim dot a’ tumorodok dot id Kinorohingan. Iri nopo i winonsoi nu nga’ miagal di winonsoi di Raja’ Ahab om i piro-piro raja’ do suminowoli dau. Om pinatai nu po i tobpinai nu, om ongosonong nogi’ daa iyolo’ ko’ iya’. ¹⁴ Porotuan nondod TUHAN do hukuman dot awagat kopio iti rayat nu, om tangaanak om sawo nu, om angaraag ngai’ nopondo o dapu’ nu. ¹⁵ Om iya’ndo nga’ oinggorit do toruol dot id tinaii’ nu, om maid-laid nga’ mayo-gayo nopondo i toruol diri!’’ ka. ¹⁶ Tontok nopoddi nga’ haro o piro-piro tulun do Pilistin om tulun dot Arab do poingiyon do hiri’d somok di kokiiman do tulun dot Etiopia di hiri’d watas do ponong id tisan do rahat. Om binsuhuo’ nod TUHAN i tulun diri do mongoi panangod di Yihoram. ¹⁷ Om ngoyo’ no diyolo’ songodo’ o Yohuda, om ngoyo’ pingonuo’ i konunu-nunuan do hiri’d walai’d raja’, om tanggayai ngai’ nogiddi diyolo’ i tangaanak om sawo di Yihoram. Noolu’ nopo om i Ahasia poo, i tanak di Yihoram do kusai dit id domulok. ¹⁸ Om katalib poddi iri, om hukumai nod TUHAN i Yihoram do toruol dot id tinaii’ dit a’ milo’d lingoson. ¹⁹ Om osomok nod duwo o toun do murut-surut nopo o koruolo’ di toruol, gisom do nadalaan noddi kopio iyau do sumakit, om kapatai noddi iyau. Om a’ i’ minodtutud do kayu di rinubpu’ i rayat dau do maan do pomusou dau do miagal di winonsoi diyolo’ dot id taki-aki dau. ²⁰ Iso’ pod tulun nga’ aiso’ i’ o monosol do napatai iyau. Om hilo’ id Bandar di Daud o pinamalabangan dau nga’ okon no ma ko’ hiri’d kalabangan do raja’. Tontok nopo di nosiliu i’ do raja’ i Yihoram om tolu nogi’ nohopod om duwo o toun dau, om walu’ o toun dau do minomorinta’ do hilo’d Yorusalim.

¹ Tontok di minongoi sangod it iso’ o sinompuruan do tulun dot Arab, om koinsanai nopo i tangaanak di Yihoram do kusai do napatai, om i Ahasia poddi, i tanak dau dit id domulok o noolu’. Om siliho’ noddi di tulun do hilo’d Yorusalim do raja’ i Ahasia, do suminowoli di tapa’ dau. ² - ³ Om kosiliu no i Ahasia do raja’ di duwo nohopod om duwo o toun do tumur dau. Om sontoun iyau do momorinta’ do hilo’d Yorusalim. Om i Ahasia nga’ iyo i’ di sompiiyon di Raja’ Ahab, tu’ suhuon iyau di Atalia, i tina’ dau do momonsoi dit araat. I Atalia nopo nga’ tanak do tondu’ di Raja’ Ahab, om manangaki di Omri, i raja’ dot Israil. ⁴ Om i Ahasia nga’ minomonsoi i’ do dusa dot id TUHAN do miagal di sompiiyon di Ahab, tu’ iyolo’ no i minonosihat dau di napatai i tapa’ dau. Om iri no i tulun di monosihat dau o minomungou dau. ⁵ Om iri i nosihat diyolo’ o nokosokodung-kodungan dau di Yoram, i raja’ dot Israil do sumangod di Hasail, i raja’ do Siria. Om pisangod no iyolo’ do hilo’d Ramot, it id watas do Giliad. Om nosuhat diri i Yoram dot id pinisangadan diri. ⁶ Om guli’ noddi iyau do hilo’d Yisriil do minongoi pokiubat, om ongoi no i Ahasia do hilo’ do minongoi kakap di Yoram. ⁷ Om natantu’ mantad nod Kinorohingan dot apatai i Ahasia do tontok do mongoi iyau kakap di Yoram. Tontok nopoddi nga’ sinaap i Yoram dot iso’ o kusai di roitan dot i Yohu, i tanak di Nimsi. I Yohu no o nopili’d TUHAN do mamatai ngai’ di sinakagon di Raja’ Ahab. Om i Ahasia, i minongoi kakap di Yoram nga’ nokohompit nogi’ dot id pisaapan diri. ⁸ Om patayo’ ngai’ po di Yohu i piro-piro o boyoon do Yohuda om i kamanakon di Ahasia di minoyo’ do minongoi kakap di Yoram. Winonsoi di Yohu iti do tontok di pinorikot dau o hukuman do TUHAN dot id sompiiyon diri. ⁹ I Ahasia nopo om nokopoggidu’ i’ do hilo’d Samaria. Om ihumo’ noddi iyau om kokito no do hiri’d kinoiyonon di linisok dau. Om ngoyo’ no iyau pootodo’ do hiri’d di Yohu om patayo’ noddi. Nga’ linobong i’ diyo Yohu om i tulun dau i Ahasia tu’ pomusou diyolo’ di Raja’ Yosapat, i taki dau di minonotos do momonsoi do korohian do TUHAN do mikuwo’d aayi-ayi’ kopio o ginawo dau. Om aiso’ no o tulun dit id suang do sompiiyon di Ahasia do milo do sumiliu’d raja’ do sumowoli dau. ¹⁰ Om soira’ di nokoilo i Atalia do napatai i Raja’ Ahasia, i tanak dau, om ponuhu’ no iyau do mamatai ngai’ di sinakagon do raja’ do hilo’d Yohuda. ¹¹ I Ahasia nopo om kitobpinai do tondu’ di roitan dot i Yosiba, om i nakawin do songulun ot imam di roitan dot i Yoyada. Om pomolisok-lisok no i Yosiba do minongoi do tiso’ di tanak di Ahasia do kusai, i roitan dot i Yoas, do mantad id pogialatan di tangaanak do raja’ do patayon di Atalia. Om polisoko’ no i tanak diri do miwoyo’ di mitamong dau dot id iso’ di bilik do hiri’d Walai’d Sasambayangan dot Agayo. Om iyo noddi i Yosiba do minamasi di tanak diri om a’ iddi di Atalia napatai. ¹² Onom o toun di Yoas do poillisok do hiri’d Walai’d Sasambayangan dot Agayo di solinaid di Atalia do momorinta’; tu’ i Atalia no o nosiliu do raja’d tondu’.

¹ Tontok di koturu’ do toun, om wonsoyo’ noddi di Yoyada it Imam, it osorou dau dot apatut do wonsoyon. Om pongupakat no iyau do limo o boyoon do soudor, i Asaria i tanak di Yiroham, i Ismail i tanak di Yohanan, i Asaria i tanak di Obid, i Maasiya i tanak di Adaya, om i Ilisapat i tanak di Sikri. ² Om ongoi no iyolo’ dot id pointikid-tikid di bandar do hilo’d Yohuda, om timungo’ no diyolo’ i tulun do Liwi om koinsanai di boyoon do pinuruan do sompiiyon, om angatai no do hilo’d Yorusalim. ³ Om timung no iyolo’ do hiri’d Walai’d Sasambayangan dot Agayo, om pamatos no iyolo’ dot id di Yoas, i tanak do raja’ddi. Om boros ka di Yoyada dot id diyolo’, ’’Iti no i tanak do kusai di daudti’ Raja’ Ahasia! Om mositi’ no dot osiliu iyau do raja’ do dinondo, tu’ nakabatos no o TUHAN dot iri kasai’ i sinakagon di Raja’ Daud o momorinta’. ⁴ Om iti no ot apatut do wonsoyon toko’: kopongo pondo do maganu-anu it imam om i tulun do Liwi do tontok do tadau’d Sabat, om a’ no minog do muli’ iyolo’. Sompitolu nopo diyolo’ om mositi’ no do tumamong do hiri’d piro-piro wawayaan di Walai’d Sasambayangan dot Agayo, ⁵ om sompitolu kawagu o hilo’d walai’d raja’, om iri no suwai om hilo’d wawayaan di roitan do Wawayaan dot Agayo do Pinoimpahan. Om mositi’ nod tumimung ngai’ o rayat do hiri’d natad di Walai’d Sasambayangan dot Agayo. ⁶ Om a’ i’ koino-ino do haro o songulun po do sumuang di Walai’d Sasambayangan dot Agayo do suwai ko’ it imam om i tulun do Liwi di maso do maganu-anu. Iyolo’ nopo om koino-ino i’ do sumuang tu’ nokotobilang no iyolo’ do momonsoi’d karaja’ do don TUHAN. Iri nopo tulun do suwai om mositi’ nod mumboyo’ dot Oturan do TUHAN, om hiti’d soliwan ot undorongon. ⁷ Om mositi’ nod mingkakat i tulun do Liwi do posorili’ di raja’ do mikuwo’d songingkodong o gayang, om madtamong di raja’ do honggo nopo o ngoyon dau. Om isai nopo i mumbal daa do sumuang di Walai’d Sasambayangan dot Agayo om mositi’ nod patayon,’’ ka dau. ⁸ Om wonsoyo’ no di tulun do Liwi om i rayat do Yohuda i pinonuhuan di Yoyada. Iri tulun di nongkopongo nod maganu-anu do tontok di tadau’d Sabat nga’ a’ poddi pinouli’. Om milo iddi di piro-piro boyoon do soudor do suhuon i tulun di nongkopongo no do maganu-anu om i nokorikot nogi’ do mongoi paganu-anu. ⁹ Om tikidai no di Yoyada do tandus om kolid i piro-piro boyoon do soudor, dot i di Daud di gulu po do pinoopi’ do hiri’d Walai’d Sasambayangan dot Agayo. ¹⁰ Om sinuhu’ nogi’ di Yoyada o piro-piro o tulun di songingkodong no o gayang do madtamong do ponong hiri’d gulu kobontol di Walai’d Sasambayangan dot Agayo do mongintirung di raja’. ¹¹ Om kowonsoi ngai’ poddi iri, om posoliwano’ nogi’ di Yoyada i Yoas, om tupiai no dau i Yoas do tupi’ do raja’, om onuwai dau do Buuk dot Oturan do Kinorohingan. Om iyo noddi i Yoas do siniliu do raja’. Om tuntugai noddi di Yoyada om i tangaanak dau i Yoas di tumau do potuntugon do tontok do momili’ do raja’. Om oinsanan nopo i tulun do minomoros dot opuhod do poingkaa, ’’Otogui po daa o raja’!’’ ka. ¹² Om korongou di Atalia i rayat do sampangkis-pangkis do sumuwau do raja’. Om osiau nopo iyau do minongoi do hiri’d Walai’d Sasambayangan dot Agayo, i nokotimungon di tulun dot ogumu’. ¹³ Om kokito no dau i raja’ do wagu’ddi do poingkakat do hiri’d wawayaan do sumuang di Walai’d Sasambayangan dot Agayo, i kinoiyonon do pinili’ iyau do silihon do raja’. Om nosorili’ nopo iyau do boyoon do soudor om i tulun do popouni do torumpit. Om oinsanan nopo i rayat do sampangkis-pangkis dot atataadan om i torumpit nga’ popingunion. Om i piro-piro o popouni do tuunion di hiri’d Walai’d Sasambayangan dot Agayo nga’ popinguni di tuunion diyolo’ do pamaramai do kinopomilian di raja’ddi. Om hurako’ nopo di Atalia o pakayan dau dot atatagadan om pinggarang no, ’’Takal dot araat! Takal dot araat!’’ ka. ¹⁴ Om a’ i’ di Yoyada uhang do patayon i Atalia do hiri’d somok di Walai’d Sasambayangan dot Agayo. Om boros kaddi dau dot id piro-piro boyoon do soudor, ’’Posoliwano’ iyau do potolibon dilo madtatamong do songimbaris om patayon ngai’ nopo i mumbal daa do mongoi poidu’ dau,’’ ka dau. ¹⁵ Om tangkapo’ no diyolo’ iyau, om pokoyoo’ no do hiri’d walai’d raja’. Om patayo’ noddi iyau do hiri’d wawayaan dot agayo di roitan do Wawayaan do Kuda’. ¹⁶ Om angatai no di Yoyada it Imam, i Raja’ Yoas om i rayat do mamatos do sumiliu iyolo’d tulun do songonuon do TUHAN. ¹⁷ Om oinsanan nopo iyolo’ do minongoi pamaraag di walai’d tingolig do Baal; om mumuko’ nopo diyolo’ i pananaraban do porsombahan om i tingolig do Baal. Om i Matan, it Imam do modsubak do Baal nga’ pinatai nogi’ dot id dotimbabaan di piro-piro pananaraban do porsombahan diri. ¹⁸ Om suhuo’ noddi di Yoyada i piro-piro imam om i tulun do Liwi do mongilo-ilo di buruon do hiri’d Walai’d Sasambayangan dot Agayo do miagal di natantu’ mantad di Raja’ Daud. Om mositi’ no do papatahak iyolo’ do porsombahan di sorobon dot id TUHAN do tumanud di Tourat di Musa om mongilo-ilo di sinding do sindingon om i piro-piro o karamayan do tontok do tadau’d agayo. ¹⁹ Om minonuhu’ po i Yoyada do tulun do madtamong do hiri’d piro-piro o wawayaan di Walai’d Sasambayangan dot Agayo, om a’ i’ kosuang o tulun dit a’ olidang. ²⁰ Om tanud ngai’ nopo di Yoyada i boyoon do soudor, om i piro-piro boyoon do tulun, om i piro-piro pagawai do pomorinta’, om koinsanai di rayat, do minomoyo’ di Raja’ Yoas do mantad hiri’d Walai’d Sasambayangan dot Agayo om gisom do nokorikot do hiri’d walai’d raja’. Om suang no iyolo’ do minaya’ di wawayaan dot agayo om irikau noddi i raja’ do hiri’d tirikohonon do raja’. ²¹ Om oinsanan nopoddi i tulun do hiri’d bandar dot ongotood tomod, om hiri’d bandar nga’ osimbayan tu’ napatai noddi i Atalia.

¹ Turu’ nogi’ o toun do tumur di Yoas do tontok di nosiliu iyau do raja’ do Yohuda, om minomorinta’ iyau do hilo’d Yorusalim do solinaid dot apat nohopod o toun. Ngaran nopod tina’ dau om i Sibia, i mantad hilo’d bandar do Borsiba. ² Solinaid nopo di poimpasi i Yoyada it Imam, om kasanangan ngai’ id TUHAN o wonsoyon di Yoas. ³ Om pomili’ no i Yoyada do duwo o tondu’ do maan di Yoas do sawo, om iyolo’ no o nokoonuan di Yoas do tangaanak do kusai om tondu’. ⁴ Om alaid-laid poddi iyau do momorinta’, om pomusorou noddi iyau do mononong di Walai’d Sasambayangan dot Agayo. ⁵ Om suhuo’ no dau o piro-piro imam om i tulun do Liwi do mongoi ponimung do tusin do mantad id toinsanan di rayat di hilo’d kabandaran do Yohuda, do pointikid-tikid do toun, do pononong di Walai’d Sasambayangan dot Agayo. Om sinuhu’ dau iyolo’ do tuminimpuun dot oruhai do momonsoi do karaja’ddi, nga’ monorimo-rimo nogi’ i tulun do Liwi. ⁶ Om lohowo’ noddi dau i Yoyada it Imam, i boyoon dit imam do suwai, om boro-boros nod, ’’A’ toi nokoponuhu’ i Musa, i susuhuon do TUHAN, diti rayat do mambayar do sukai do maan do kosukup-sukupan do hiri’d Kiim do TUHAN? Om baino’ noddi, om nokuro tu’ a’ nu suhuon kopio ilo tulun do Liwi do monimung do sukai do mantad id rayat do Yohuda om Yorusalim?’’ ka dau. ⁷ (Iri nopo Walai’d Sasambayangan dot Agayo om rinaag di tulun di tuminanud di Atalia, i tondu’ dot araat diri, om ogumu’ nogi’ i konunu-nunuan di pinotobilang do maan do dong Kinorohingan do nongoi diyolo’ do numaan pakayo’ do tumuku’ dot id Baal.) ⁸ Om suhuo’ noddi di raja’ i tulun do Liwi do momonsoi dot iso’ o pati’ do poiyanan do tusin, om poilihon indo do hiri’d toning di wawayaan dot agayo di Walai’d Sasambayangan dot Agayo. ⁹ Om poboroso’ noddi dot id tulun dot ogumu’ do hilo’d Yorusalim om hilo’d Yohuda do mositi’ nod mambayar ngai’ o tulun do sukai dot id TUHAN, do miagal di pinonuhuan di Musa. ¹⁰ Om osonong ngai’ nopo o ginawo di rayat om i boyoon diyolo’ do nokorongou di pinoboros diri. Om pogiwoyo-woyo’ nopo iyolo’ do minongoi posuang do tusin do maan diyolo’d sukai do hiri’d pati’ di poiyanan do tusin. ¹¹ Om pointikid-tikid do ngoyon di tulun do Liwi pootodo’ i pati’ dot id pagawai do raja’ di monongkoilo’ddi, om oponu’ kasai’ nopod tusin i pati’. Om bubuson nondo i tusin do poingontong i gomponulis do pomorinta’ om i wakil di Boyoon dot Agayo dot Imam. Om aiso’ pondo o suang di pati’, om pogulion nogindo i pati’ddi do hiri’d poiyanan kasai’. Om iyo kasai’ nopoddi o wonsoyon diyolo’ do pointikid-tikid do tadau om ogumu’ tomod diri o tusin dot otimung. ¹² Om patahakon nondo di raja’ om i Yoyada i tusin diri dot id mandur, om iyolo’ no o mamagadsi’ di tukang watu, om i tukang kayu, om i tukang do manantan do tambaga’ om i suwai-suwai ko’ iri. ¹³ Om tumotos ngai’ nopo iyolo’ do mononong di Walai’d Sasambayangan dot Agayo gisom do nokogirot om nosonong do miagal di timpuun i’. ¹⁴ Om kopongo poddi i karaja’ddi, om iri nopo tamas om pirok dit a’ naayi’ om pinatahak dot id raja’ om id di Yoyada. Om iri no i tamas om i pirok diri o winonsoi’d mangkuk om i pakakas do suwai do maan do hiri’d Walai’d Sasambayangan dot Agayo. Solinaid nopo di Yoyada it Imam diri do poimpasi, om oulud tomod i’ o papatahak do porsombahan di sumbolion do hiri’d Walai’d Sasambayangan dot Agayo. ¹⁵ Otogui tomod i’ i Yoyada tu’ di nopo di minatai iyau om hatus no om tolu nohopod o toun do tumur dau. ¹⁶ Om linobong iyau do hiri’d kalabangan do raja’ do hiri’d Bandar di Daud, tu’ pomusou di winonsoi dau dit osonong dot id Kinorohingan, om id Walai’d Sasambayangan dot Agayo om id tulun dot Israil. ¹⁷ Om di nopo di napatai i Yoyada om abayayat diri i Yoas di piro-piro boyoon do Yohuda gisom dot a’ noddi iyau momusou di ponudukan di Yoyada. ¹⁸ Om a’ noddi i rayat sumambayang do hiri’d Walai’d Sasambayangan dot Agayo, i Kinorohingan di taki-aki diyolo’, tu’ modsubak nogiddi iyolo’ do tingolig om i piro-piro tininganak do tingolig dot Asira. Om iri no i dusa diyolo’ o nokotogod-togod do TUHAN dot id tulun do Yohuda om id tulun do Yorusalim. ¹⁹ Om ponuhu’ no o TUHAN do piro-piro ot imam do mongoi pomisunud diyolo’, om gumuli’ i’ daa’ndo iyolo’ dot id TUHAN, nga’ a’ i’ i rayat mokinongou. ²⁰ Om porintao’ noddi do Rusod do Kinorohingan i Sakaria, i tanak di Yoyada it Imam diri. Om ongoi no i Sakaria toguang di tulun dot ogumu’, om boro-boros no dot opuhod do poingkaa, ’’Poingkaa o boros do TUHAN, i Kinorohingan, ’Nokuro tu’ a’ kou tumanud di ponuhuan ku om nokuro tu’ momungou kou do tinan dokoyu? A’ kou mamadul doho’, om iyoho’ nga’ a’ no mamadul dokoyu!’ ka,’’ ka dau. ²¹ - ²² Nga’ pogiupakat no i rayat do sumaap di Sakaria, om i Raja’ Yoas nga’ suminokodung i’ di pakat diri. Om a’ no di Yoas osorou i kosonongo’ om kotorodoko’ di Yoyada, i tapa’ di Sakaria. Om dumpaho’ noddi do watu i Sakaria do gisom do napatai iyau do hiri’d natad di Walai’d Sasambayangan dot Agayo, tu’ minonuhu’ i’ i raja’ do momonsoi’d miagal diri. Om tontok dit oruhai nod oiduan do ginawo i Sakaria, om pomoros no iyau dot opuhod do poingkaa, ’’Maha’ daa om okito do TUHAN i winonsoi nu om sulian ko dau!’’ ka dau. ²³ Om tontok i’ do toun diri, di maso do lumahanggang o roun do kayu, do nongoi di soudor do Siria songodo’ o Yohuda om Yorusalim. Om patayo’ ngai’ nopo diyolo’ i boyoon do tulun om ogumu’ o konunu-nunuan do tinanggayan diyolo’ do hilo’d Damsik. ²⁴ Okuri’ i’ daa i soudor do Siria, nga’ pinologos i’ iyolo’d TUHAN do mangala’ di soudor do Yohuda dit ogumu’ ko’ iyolo’, tu’ a’ i’ di tulun do Yohuda pinadul o TUHAN, i Kinorohingan di taki-aki diyolo’. Om iri no o pinomohukum do TUHAN di Raja’ Yoas. ²⁵ Om nadalaan tomod diri do nosuhat i Raja’ Yoas. Om kapamanau poddi i soudor do pisangod, om pipakat no o duwo di pagawai di Yoas. Om ngoyo’ no diyolo’ patayo’ i Yoas do hiri’d toodopon dau do ponuli’ di pinamatayan dau di tanak di Yoyada it Imam diri. Om lobongo’ no i Raja’ Yoas do hiri’d Bandar di Daud, nga’ okon i’ ko’ hiri’d kalabangan do raja’. ²⁶ (Iri nopo tulun di minipakat do sumaap dau’ddi om i Sabad i tanak di Simiat, om i Yosabad i tanak di Simrit. I Simiat nopo om tondu’ do bansa’d Amon, om i Simrit no om tondu’ do bansa’d Muab.) ²⁷ Id suang nopo di Buuk do Poposuhut do Komoyon di Buuk do Raja’ om haro i’ i susuyon do pasal di tangaanak di Yoas, om i boros do pinoboros mantad do pasal dit id dosunsudan dau, om i karalan-ralano’ dau do minononong di Walai’d Sasambayangan dot Agayo do pinotulis do hiri’d Buuk di Poposuhut do Komoyon di Buuk do Raja’. Om i Amasia diri, i tanak di Raja’ Yoas o nosiliu do raja’ do suminowoli di Raja’ Yoas.

¹ Nosiliu nopo i Amasia do raja’ nga’ di duwo no nohopod om limo o toun do tumur dau, om duwo nohopod om siam o toun do koloido’ dau do momorinta’ do hilo’d Yorusalim. Tina’ nopo dau om i Yoadan, i mantad hilo’d Yorusalim. ² I Amasia nga’ minomonsoi i’ di korohian do TUHAN nga’ a’ i’ ma aayi-ayi’ kopio o ginawo dau. ³ Om kogirot poddi o pomorintaan dau om hukumai no dau do kapatayon i piro-piro pagawai di minamatai di tapa’ dau. ⁴ Nga’ a’ i’ dau pinatai i tangaanak di piro-piro pagawai’ddi tu’ tuminanud i’ iyau di boros do TUHAN dit id suang di Tourat di Musa do poingkaa, ’’Kada’ hukumai do kapatayon o molohing dot i karaaton do winonsoi di tangaanak dau o kopomohukuman, om kada’ hukumai do kapatayon o tangaanak dot i karaaton do winonsoi di molohing diyolo’ o kopomohukuman. Iri no i tulun di nokowonsoi’d araat o koino-ino do hukuman do kapatayon,’’ ka. ⁵ Om timungo’ ngai’ no di Raja’ Amasia i tulun do mantad id payat do Yohuda om Binyamin, om suhuo’ no dau iyolo’ do mingkakat do tumanud di pinuruan do sompiiyon diyolo’, do momoyo’ nopo om i boyoon do soribu o soudor om i boyoon do hatus o soudor. Om pilio’ nogiddi dau i tulun di duwo no nohopod o toun om it otuo ko’ iri, i milo do monokisangod om milo do mamakai do tandus om kolid. Kogumuo’ nopo di nopili’ om 300,000 o tulun. ⁶ Om suwai no ko’ iri om pamagadsi’ po iyau do 100,000 o soudor do mantad hilo’d Israil do pinamagadsi’ nopo om haro i’ doti’ o 3,400 o kilogram do pirok. ⁷ Nga’ rikot no o songulun o nabi dot id raja’ om boro-boros nod poingkaa, ’’Kada’ onuo’ ilo soudor dot Israil, tu’ a’ i’ iyolo’d TUHAN uhupan. ⁸ Nga’ ondung onuon nu iyolo’ om songkuro-kuro piya o kokoriso’ om kosioho’ do soudor nu, nga’ pologoson i’ do Kinorohingan dot aala’ ko do pisangod. Tu’ Kinorohingan noo o kikuasa’ do manahak do kamanangan ko’ kaalaan,’’ ka dau. ⁹ Om boros ka di Amasia do minonguhot, ’’Poingkuro nondo ngai’ i pirok di nakatahak ku diyolo’?’’ ka. Om boros ka di nabi, ’’Milo i’ o TUHAN do poguli’ dot id diya’ dot lobi ko’ iri!’’ ka. ¹⁰ Om posoliwano’ noddi di Amasia i soudor di ginodsian daa dau’ddi om suhuo’ no dau do muli’. Om uli’ noddi iyolo’, nga’ ongotogod tomod maddi iyolo’. ¹¹ Om pasangalo’ nopo di Amasia o ginawo dau om woyoo’ no dau i soudor dau do minongoi’d hilo’d Rantai do Silaon. Om hilo’ no iyolo’ do suminangod om napatai diyolo’ o hopod noribu o soudor dot Idom. ¹² Om hopod po noribu o soudor do suwai do natanggayan diyolo’. Om tanggayai ngai’ no i soudor diri do hiri’d timpak di pampang do hilo’d bandar do Sila om popintaamo’ no do hiri’d siba’ do gisom do napatai. ¹³ Om daamot nopoddi om ngoyo’ no di soudor dot Israil, i pinouli’ di Amasia songodo’ i kabandaran do Yohuda dit id pialatan do Samaria om Bait-Horon. Om patayo’ no diyolo’ o tolu noribu o tulun om ogumu’ po o konunu-nunuan do pininganu diyolo’. ¹⁴ Om kaala’ poddi di Amasia i soudor dot Idom om uli’ no iyau do mikuwo’d minongigit di piro-piro tininganak do tingolig dot Idom. Om poiyono’ no dau iri do hilo’d Yohuda. Om podtutud noddi iyau do kominyan dot id tininganak diri om tuminuku’ iyau dot id tingolig diri. ¹⁵ Om pinopotogod tomod do TUHAN i winonsoi dau’ddi. Om ponuhu’ noddi o TUHAN do songulun o nabi do minongoi solowot di Amasia. Om boros ka di nabi, ’’Nokuro tu’ tumuku’ ko dot id tingolig do bansa’d suwai, it a’ i’ nakapasi do tulun dau do mantad id kuasa’ nu?’’ ka dau. ¹⁶ Om boros ka di Amasia, ’’Kada’ kohiyo. A’ ko nopo mumboyo’ om patayon no moti’ dahai iya’! A’ i’ iyahai nokopomili’ diya’ do sumiliu do ponosihat do raja’!’’ ka dau. Om kada’ noddi pimboros i nabi diri, nga’ pomoros po iyau do poingkaa, ’’Baino’ nopoddi om oilaan ku no kopio do patayon ko do Kinorohingan tu’ ino wonsoyon nu o kapamatayan, om it a’ ko minamadul do nosihat ku,’’ ka dau. ¹⁷ Om pogiupakat no i Amasia i raja’ do Yohuda, om i piro-piro o ponosihat dau do sumaap dot Israil. Om ponuhu’ no iyau do tulun do minongoi solowot di Yihoas, i raja’ dot Israil, i tanak di Yihoahas, i manangaki di Yohu, do mangangat dau do misangod. ¹⁸ Nga’ poromuto’ nod tulun dot id di Raja’ Yihoas o ponimbar do poingkaa, ’’Insan o maso om pokirim no i korugian do hilo’d konuluhanan do Libanon do boros diti dot id kokoyuan dot aras, ’Oi guas dot aras, patahako’ daa i tanak nu’d tondu’ dot id tanak ku do maan dau’d sawo,’ ka. Nga’ talib nod hiri o songinan o nintorusan om pingulakai no i korugian. ¹⁹ Naala’ nu no o tulun dot Idom, oi Amasia, om minggayo-gayo ko daa’ddi. Nga’ osonong nogi’ do dumuwalai ko nopo. Nunu kopio o kahantalan nu do mogihum do kosusaan di momungou no diya’ om ino rayat nu?’’ ka. ²⁰ Nga’ a’ i’ di Amasia pinadul i boros di Yoas. Om id suang nod korohian do Kinorohingan dot aala’ i Amasia tu’ tuminuku’ i’ iyau di tininganak do tingolig dot Idom. ²¹ Om ongoi noddi i Yihoas, i raja’ dot Israil sangod di Amasia, i raja’ do Yohuda. Om pisangod no iyolo’ do hilo’d Bait-Simis, i hilo’d Yohuda. ²² Om kaala’ no i soudor do Yohuda om poggidu’ ngai’ no iyolo’ do minuli’ do hiri’d walai diyolo’. ²³ Om tangkapo’ no di Yihoas i raja’ dot Israil, i Amasia, om pootodo’ no do hilo’d Yorusalim. Om habao’ no di Yihoas i tolig di bandar diri do haro i’ doti’ o duwo nahatus o mito do konoruo’ do mantad hiri’d wawayaan di roitan do Wawayaan dot Agayo dot Ipraim om gisom do hiri’d wawayaan di roitan do Wawayaan dot Agayo do Linsuk. ²⁴ Om tanggayai ngai’ no dau do hilo’d Samaria i tamas, om pirok, om i piro-piro pakakas do suwai, di pitamangan di sinakagon di Obid Idom do hiri’d Walai’d Sasambayangan dot Agayo, om i nogi’ i piro-piro pakakas do walai di pitamangan di Obid Idom, om i dapu’ do walai do raja’ nga’ tinanggayan ngai’ nopo di Yihoas do hilo’d Samaria. Om minononggoi nogi’ iyau do piro-piro o tulun di maan dau pokibayarai do tontok di pokigulian iyolo’ di koobpinayan diyolo’. ²⁵ Om kapatai poddi i Yihoas i raja’ dot Israil, om hopod po om limo o toun di Amasia, i raja’ do Yohuda do poimpasi. ²⁶ - ²⁸ Om mantad poddi tuminongkiad do TUHAN i Amasia, om mogipapakat no i tulun do sumaap dau do hilo’d Yorusalim. Om poggidu’ no daa iyau do hilo’d bandar do Lakis, nga’ ginusa’ i’ iyau di pisangod dau om patayo’ noddi iyau do hilo’. Om pasakayo’ nod kuda’ i rata’ dau do pinakaa do hilo’d Yorusalim, om lobongo’ no do hiri’d kalabangan do raja’ do hilo’d Bandar di Daud. Om iri nopo susuyon do suwai do pasal di Amasia do mantad di timpuun i’ om gisom do kinopupuson do pomorintaan dau om nongotulis ngai’ i’ do hiri’d suang do Buuk di Monusui do Pasal Ngai’ di Raja’ do Yohuda om Israil.

¹ - ³ Om di nopoddi napatai i Amasia, om oinsanan nopo i rayat do Yohuda do minomili’ di Usia, i tanak di Amasia do kusai, do silihon do raja’. Tontok nopoddi om hopod nogi’ om onom o toun do tumur dau. Tina’ nopo dau om i Yikolia, i tondu’ do mantad hilo’d Yorusalim. Om koloido’ nopo di Usia do momorinta’ do hilo’d Yorusalim om limo nohopod om duwo o toun. Om iyau no i minonolod om i minomonsoi kawagu do bandar dot Ilot. ⁴ Om i Usia nga’ iyo i’ di tapa’ dau, tu’ minomonsoi i’ di korohian do TUHAN. ⁵ Om i Sakaria no o ponosihat dau do pasal do kowoyo-woyoo’ do don rusod. Om solinaid nopo di Sakaria do poimpasi, om otorodok i’ i Usia do sumambayang dot id TUHAN gisom do nabarakatan iyau’d TUHAN. ⁶ Om ongoi no i Usia sangod di tulun do Pilistin, om habao’ no dau i tolig do bandar do Gat, Yobni, om Asdod. Om pomonsoi no iyau do piro-piro o bandar di kitolig do hilo’d somok dot Asdod om id kinoiyonon do suwai do hilo’d Pilistin. ⁷ Om nuhupan i’ iyau’d Kinorohingan do mangala’ di tulun do Pilistin, om i tulun dot Arab di poingiyon do hilo’d Gurbaal, om i nogi’ i tulun do Mounim. ⁸ Om iri tulun dot Amon nga’ mambayar i’ do sukai dot id di Usia. Om mayo-gayo diri o kuasa’ dau gisom do nokorikot do hilo’d Masir o kobontugo’ do ngaran dau. ⁹ Om wansayai no di Usia do walai’d akawas do pogigimpaan o hiri’d wawayaan di roitan do Wawayaan dot Agayo do Linsuk om hiri’d wawayaan di roitan do Wawayaan dot Agayo do Rantai om hiri’d kokilongon di tolig. ¹⁰ Om minomonsoi po iyau do piro-piro o walai dot angakawas do maan do pogimpaan do hiri’d kobuturan, om minongukad iyau do torobong dot ogumu’ tu’ ogumu’ i’ kopio o tayam-tayam dau do hiri’d tana’ dot apatau di hiri’d guas do konulu-nuluan om hiri’d rantai di ponong id kotonobon. Om suhuo’ no dau i rayat dau do mananom dot anggur do hiri’d konulu-nuluan, om momutanom-tanom do hiri’d tana’ dit oruak, tu’ orohian iyau do momutanom-tanom. ¹¹ I Usia nopo om kisoudor dot ogumu’ di posodia’ kasai’ do mongoi sangod. Om mongoi sangod i soudor dau do tumanud di sinompuruan diyolo’, om i Yoyol om i Maasiya, i piro-piro o gomponulis do raja’, o mitulis do kogumuon diyolo’. Om boyoon nopo di gomponulis om i Hanania, it iso’ di pagawai di raja’. ¹² - ¹³ Oinsanan nopo i soudor dot ongkirapo-rapo om 307,500 o tulun di milo nod mongoi sangod do bagi’ di raja’. Om 2,600 o boyoon do momoyo’ diyolo’. ¹⁴ Om nonuan di Usia i soudor dau do kolid, om tandus, om tupi’ do tambaga’, om rasuk do basi’, om pawakasan do pana’ om pana’, om watu do pomodumpau. ¹⁵ Om minomonsoi i tulun di momomonsoi do rapo-rapo do don sumasangod, i songingiyon do hilo’d Yorusalim do pakakas do papapana’ di pana’ om watu dot angagayo do mantad hiri’d walai dit angakawas di pogigimpaan om mantad hiri’d linsuk di tolig do bandar. Om abantug tomod i Usia do hinonggo nopo, om agayo o kuasa’ dau tu’ nuhupan i’ iyau’d Kinorohingan. ¹⁶ Om tontok di nokogirot i Raja’ Usia, om mininsawat diri o ginawo dau, om iri no o nokoinsiriba-riba’ do pangkat dau. Tuminolibamban iyau di boros do TUHAN, i Kinorohingan dau tu’ suminuang i’ iyau di Walai’d Sasambayangan dot Agayo do minongoi podtutud do kominyan do hiri’d podtutudan do kominyan. ¹⁷ Nga’ suhuto’ no iyau di Asaria do miwoyo’ do walu’ nohopod ot imam do suwai, it ongokoris om ongosiou ¹⁸ do papasala’ di winonsoi dau. Boros ka diyolo’, ’’Tuan Raja’! A’ ko i’ koino-ino do modtutud do kominyan dot id TUHAN. Iti nopo om buruon dit imam di suminolusuk di Harun, tu’ iyolo’ no o nokotobilang do momonsoi do karaja’dti. Tongkiad nogi’ kopio’dti kinoiyonon dot olidang! Suminaap ko’d TUHAN, i Kinorohingan, om a’ ko noddi kaanu do barakat dau,’’ ka diyolo’. ¹⁹ Tontok nopoddi om poingkakat no i Usia do hiri’d toning di podtutudan do kominyan di hiri’d Walai’d Sasambayangan dot Agayo, do kiinigit di podtutud do kominyan. Om kotogod no iyau dit imam, nga’ sigog i’ dot imbulai o toruol do kusta do hiri’d turos dau. ²⁰ Om kotigowo tomod diri i Asaria om it imam do suwai do nokokito dau, om sansagai no diyolo’ iyau do tumongkiad do mantad hiri’d Walai’d Sasambayangan dot Agayo. Om osiau nopo iyau do suminoliwan tu’ nohukuman no iyau’d TUHAN. ²¹ Om posuwai-suwayo’ noddi i Raja’ Usia dot id iso’ o walai tu’ kitoruol i’ iyau do miagal diri. Om hiri-hiri noddi iyau do gisom do kinapatayo’ dau. Om a’ noddi iyau koino-ino do sumuang di Walai’d Sasambayangan dot Agayo. Om i Yotam noddi, i tanak dau do kusai o momonsoi ngai’ di karaja’ dau do dong pomorinta’. ²² Om iri nopo susuyon do suwai do pasal di pomorintaan di Raja’ Usia, om nongotulis no di Yosaya i Nabi, i tanak di Amos. ²³ Om di nopoddi napatai i Usia, om linobong iyau do hiri’d somok di kalabangan do raja’ nga’ okon i’ ko’ hiri kopio’d kalabangan diri tu’ kitoruol i’ o kulit dau dit araat kopio. Om i Yotam noddi, i tanak dau’d kusai, o nosiliu’d raja’ do suminowoli dau.

¹ Om kosiliu no i Yotam do raja’ di duwo nohopod om limo o toun do tumur dau, om hopod om onom o toun dau do momorinta’ do hilo’d Yorusalim. Tina’ nopo dau om i Yorusa, i tanak di Sadok. ² Om iyau nga’ minomonsoi i’ di korohian do TUHAN, do miagal di winonsoi di tapa’ dau. Nga’ iyau nopo om a’ i’ minongoi podtutud do kominyan do hiri’d Walai’d Sasambayangan dot Agayo, do miagal di winonsoi di tapa’ dau. Nga’ iyo piya’ddi, nga’ maso po di rayat do momonsoi’d dusa. ³ Om wonsoyo’ no di Yotam i wawayaan do roitan do Wawayaan dot Agayo dot Utara, i hiri’d Walai’d Sasambayangan dot Agayo om inggiratai no dau o tolig do hiri’d kinoiyonon di roitan dot Opil di hilo’d Yorusalim. ⁴ Om pomonsoi no iyau do piro-piro o bandar do hilo’d konulu-nuluan do Yohuda om minomonsoi po iyau do kuta’ di padtamangan om piro-piro walai dot angakawas do pogigimpaan do hiri’d gouton. ⁵ Om songodo’ no dau do gisom do naala’ i raja’ dot Amon om i soudor dau, om sansagai no dau i tulun dot Amon do mambayar do sukai dot id dau. Om monikid toun nopo do solinaid do tolu o toun do mogisuhut-suhut do mambayar iyolo’ do 3,400 o kilogram do pirok, om 1,000 o tan do gandum om 1,000 o tan do barli. Om a’ no milo dot a’ diyolo’ wonsoyon o miagal diri. ⁶ Om mayo-gayo diri o kuasa’ di Yotam tu’ otorodok i’ om obintanud iyau do TUHAN, i Kinorohingan dau. ⁷ Om i suwai-suwai do nongosiliu do daamot di Yotam do momorinta’, om i piro-piro pisangadan om i nongobutus dau, nga’ nongkotulis no do hiri’d suang do Buuk do Monusui do Pasal do Raja’ dot Israil om Yohuda. ⁸ Om duwo no nohopod om limo o toun do tumur di Yotam do tontok di nosiliu iyau do raja’. Om koloido’ nopo dau do momorinta’ do hilo’d Yorusalim om hopod om onom o toun. ⁹ Om kapatai no iyau om lobongo’ no do hiri’d Bandar di Daud, om i Ahas diri, i tanak dau’d kusai o nosiliu do raja’ do suminowoli dau.

¹ Om kosiliu no i Ahas do raja’ di duwo nogi’ nohopod o toun do tumur dau, om koloido’ nopo dau do momorinta’ do hilo’d Yorusalim om hopod om onom o toun. Nga’ a’ i’ iyau tuminanud di kowoyo-woyoon dot osonong di Raja’ Daud, suwai ko’ minomonsoi nogi’ iyau dit okon ko’ korohian do TUHAN. ² Kowoyo-woyoon nopo dau om miagal di kowoyo-woyoon di piro-piro raja’ dot Israil, om i kowoyo-woyoon do tulun di momonsoi do tingolig do Baal do tambaga’ o wonsoyon, ³ om modtutud iyau do kominyan do hiri’d Rantai do Hinom. Om iri piya tanak dau’d kusai nga’ pinatahak i’ dau do numaan do porsombahan di sumbolion dot id tingolig, do tumanud di koubasanan dot araat do tulun di nuyung do TUHAN do mantad id pomogunan do Kanaan, do tontok di suminuang i’ i tulun dot Israil do pomogunan diri. ⁴ Om pinapatahak i Ahas do porsombahan di sumbolion om minodtutud do kominyan do hiri’d tiyonon do modsubak do tingolig do hiri’d konulu-nuluan om hiri’d sahau do kayu dit ongokohob o tuntu. ⁵ - ⁶ Om pologoso’ nod TUHAN, i Kinorohingan, do naala’ di raja’ do Siria i Raja’ Ahas; om minononggoi nogi’ i raja’ do Siria dot ogumu’ o tulun do Yohuda do pinakaa do hilo’d Damsik, tu’ minomonsoi id dusa i Raja’ Ahas. Om pinologos po iyau’d TUHAN do naala’ di Raja’ Pika, i tanak di Rimalia, i mantad hilo’d Israil. Om insan no o tadau di Raja’ Pika do minamatai do 120,000 o soudor do Yohuda dit ongosiou. Om pologoso’ nopod TUHAN i Kinorohingan di taki-aki diyolo’ dot ongosiliu ngai’ o miagal diri tu’ a’ i’ mamadul do TUHAN i rayat do Yohuda. ⁷ Om patayo’ no di songulun o soudor dot Israil di roitan dot i Sikri, i Maasiya i tanak di Ahas do kusai. Om pinatai nogi’ dau i Asrikam, i mongilo-ilo di walai’d raja’ om i Ilkana, i pagawai do raja’ dit asawat kopio o pangkat. ⁸ Om mulong po dot oiyo i’ daa do bansa’ dot Israil o tulun do Yohuda, nga’ minononggoi i’ i soudor dot Israil do 200,000 o tongoondu’ om tangaanak do tulun do Yohuda, om tanggayai no diyolo’ do hilo’d Samaria do mitonggoi do konunu-nunuan dot ogumu’ kopio. ⁹ Haro o songulun o nabi do TUHAN do roitan dot i Odid do poingiyon do hilo’d bandar do Samaria. Tontok di muli’ no i soudor dot Israil do mogiwoyo-woyo’ di tinanggayan diyolo’ do mantad hilo’d Yohuda, om ngoyo’ no iyolo’ di Odid solowoto’ do tontok di sumuang no iyolo’ di bandar. Boros ka dau, ’’Naala’ no dokoyu o tulun do Yohuda tu’ otogod i’ diyolo’ o TUHAN i Kinorohingan di taki-aki dokoyu. Nga’ norongou id TUHAN i kororongit dokoyu do minamatai di soudor do Yohuda. ¹⁰ Om baino’ noddi, om silihon daa dokoyu do turipon o tulun do Yorusalim om Yohuda! A’ i’ dokoyu oilaan dot iyokoyu nga’ momonsoi id dusa dot id TUHAN i Kinorohingan dokoyu? ¹¹ Pokinongou kou pogi’! Iti nopo tulun do tinangkap dokoyu’dti om tobpinai i’ dokoyu. Om suhuo’ nogi’ kopio dokoyu iyolo’d muli’. Tu’ a’ nopo moti’ om otogod moti’ndo o TUHAN om hukuman kou nondo dau,’’ ka dau. ¹² Om haro’ddi ot apat o tulun do woyo-woyoon do hilo’d Israil; i Asaria i tanak di Yohanan, i Borokia i tanak di Mosilimot, i Yohiskia i tanak di Salum, om i Amasa i tanak di Hadlai, dot a’ suminokodung di winonsoi di soudor di minuli’ddi. ¹³ Boros ka diyolo’, ’’Kada’ dokoyu angatai do hiti ino tulun do tinanggayan dokoyu! Nokowonsoi toko’ nod dusa dot id TUHAN, om ula’ no do hukuman i dusa toko’. Om baino’ no, om momonsoi kou po do miagal diti do pomoruhang di kasalaan toko’,’’ ka diyolo’. ¹⁴ Om patahako’ no di soudor i tulun di tinangkap diyolo’ddi om i konunu-nunuan di naanu diyolo’, dot id rayat om id piro-piro o boyoon diyolo’. ¹⁵ Om ingkakat noddi it apat o tulun do woyo-woyoon diri do mongilo-ilo di tulun di nangatangkap. Om bohogio’ no diyolo’ i pakayan om i konunu-nunuan di nangaanu’ddi dot id tulun di nangatangkap. Om binahagi’ nogi’ diyolo’ i kasut, om i taakanon om i tinumon. Om ubatai no diyolo’d tumau do saitun i suhat di tulun di nangatangkap. Om iri no it adalaan koluhoi, it a’ no kapanau om pinasakai diyolo’d kaladai. Om oinsanan nopoddi i tulun di nangatangkap do pinaatod do hilo’d Yorikou, i bandar do koguasan do kurma, om kouli’ i’ iyolo’ do hilo’d kampung diyolo’ do hilo’d Yohuda. Om uli’ nogiddi i tulun dot Israil do hilo’d Samaria. ¹⁶ - ¹⁷ Om timpuun po kawagu o tulun dot Idom do manangod do Yohuda om mintangkap do tulun dot ogumu’. Om pokitulung noddi i Raja’ Ahas di Tiglat-Pilisir, i raja’ dot Asur, do mongoi ponguhup diyolo’. ¹⁸ Om tontok nogiddi do manangod i tulun do Pilistin di kabandaran do hiri’d guas do nuluhon di ponong id kotonobon, om i hiri’d watas di ponong id salatan do Yohuda. Om nosolod nogi’ diyolo’ o bandar do Bait-Simis, om Ayalon, om Gidirot, om i bandar do Soko, om Timna, om Gimso, om i kawalayan di posorili’ di tolu o bandar diri. Om undorong noddi iyolo’d hilo’. ¹⁹ Om porikatai nod TUHAN do kosusaan om kagangahan o hilo’d Yohuda tu’ a’ i’ di Ahas, i raja’ do Yohuda, pinadul it apatut dot aanu di rayat, om suminaap iyau’d TUHAN. ²⁰ Om okon i’ ko’ monguhup di Ahas o kinorikatan di raja’ dot Asur, suwai ko’ minongoi nogi’ ponusa’ dau. ²¹ Om onuwai noddi di Ahas i raja’ dot Asur do tamas di mantad id Walai’d Sasambayangan dot Agayo, om i mantad id walai’d raja’, om i mantad id walai di piro-piro boyoon do rayat. Nga’ iri piya nga’ aiso’ i’ o kinootuk-otukon. ²² Nga’ iyo piya kopio’ddi o kosusao’ nga’ muhang-ruhang nogi’ o dusa do wonsoyon di Ahas dot id TUHAN. ²³ Minomungou iyau do tinan dau om i rayat dau tu’ pinapatahak i’ iyau do porsombahan di sinumbali’ dot id tingolig do tulun do Siria di minangala’ dau. Minomusorou daa iyau do poingkaa, ’’Nuhupan i’ di tingolig do Siria i raja’ do Siria, om ondung papatahak oku do porsombahan di sumbolion dot id tingolig diyolo’ om uhupan oku i’ dotindo iyoho’,’’ ka. ²⁴ Om ngoyo’ ngai’ noddi dau i pakakas di hiri’d Walai’d Sasambayangan dot Agayo om pingraago’ no dau. Om tabanai no dau i Walai’d Sasambayangan dot Agayo, om pomonsoi no iyau do piro-piro o pananaraban do porsombahan do pointongkop do Yorusalim. ²⁵ Hiri nopod pointikid-tikid do bandar om kawalayan do hilo’d Yohuda om winansayan ngai’ nopo dau do tiyonon do modsubak do tingolig om monorob do porsombahan di sinumbali’ dot id tingolig do bansa’d suwai. Om iri no o pinopotogod kopio’d TUHAN i Kinorohingan di taki-aki dau, dot id dau. ²⁶ Om iri nopo susuyon do suwai do pasal di pomorintaan dau om koinsanai di winonsoi dau om nongkotulis no do hiri’d suang do Buuk di Monusui do Pasal Ngai’ di Raja’ do Yohuda om Israil. ²⁷ Om kapatai noddi i Ahas, om lobongo’ no do hiri’d kalabangan do hilo’d Yorusalim, nga’ okon i’ ko’ hiri’d kalabangan do raja’. Om kosiliu nod raja’ i Hiskia, i tanak dau’d kusai do suminowoli dau.

¹ Om kosiliu no i Hiskia do raja’ do Yohuda di duwo nohopod om limo o toun do tumur dau. Om duwo nohopod om siam o toun do koloido’ dau do momorinta’ do hilo’d Yorusalim. Tina’ nopo dau om i Abia i tanak di Sakaria. ² I Hiskia nopo om minomonsoi i’ do korohian do TUHAN do tuminanud di kowoyo-woyoon di Raja’ Daud, i taki-aki dau. ³ Tontok di tulan do koiso’ di toun do nosiliu i Hiskia do raja’, om ukabai no di Hiskia i wawayaan di Walai’d Sasambayangan dot Agayo om ponuhu’ no iyau’d tulun do mononong diri. ⁴ Om suhuo’ no dau it imam om i tulun do Liwi do tumimung do hiri’d natad di Walai’d Sasambayangan dot Agayo, i hiri’d ponong id koulayon, ⁵ om boro-boros no iyau diyolo’d hiri. Boros ka dau, ’’Iyokoyu nopo i tulun do Liwi, om apatut nod potobilang do tinan dokoyu do mogobi-obi’d TUHAN om lidangan i’ iti Walai’d TUHAN, i Kinorohingan di taki-aki dokoyu. Om mositi’ nod iduwon ngai’ i kososomu’ diti walai. ⁶ A’ tuminorodok dot id TUHAN i Kinorohingan toko’, i komolohingan toko’, tu’ minomonsoi nogi’ iyolo’ dit okon ko’ korohian dau. A’ i’ diyolo’ pinadul iyau om a’ ginompi’ i tiyonon dau. ⁷ Tinabanan diyolo’ i wawayaan di Walai’d Sasambayangan dot Agayo om pinisok diyolo’ i lampung do hiri. Om aiso’ no o modtutud do kominyan om aiso’ o papatahak do porsombahan di sorobon do hiri’d Walai’d Sasambayangan dot Agayo. ⁸ Om hukumai noddi do TUHAN o tulun do Yohuda om i tulun do Yorusalim tu’ atatagadan no kopio iyau. Om koilo ngai’ kou i’ do pinopotigowo om minongoris do koinsanai’d tulun i winonsoi’d TUHAN. ⁹ Nangaala’ i komolohingan toko’ dot id pisangadan, om nangatanggayan do pisangod i tangaanak om sawo toko’. ¹⁰ Om mamatos oku no do momonsoi’d tumpongo dot id TUHAN, i Kinorohingan dot Israil do dinondo, om a’ indo iyau otogod dot id dati’. ¹¹ Oi tangaanak ku, kada’ no dokoyu popiloid-loido’, tu’ iyokoyu no i nopili’d TUHAN do modtutud do kominyan dot id dau, om momoyo’ diti tulun dau do sumambayang dot id dau,’’ ka dau. ¹² - ¹⁴ Iri nopo tulun do Liwi di nakarapou do tontok diri om: Mantad id pinuruan do sompiiyon di Kohat: i Mahat i tanak di Amasai, om i Yoil i tanak di Asaria Mantad id pinuruan do sompiiyon di Morari: i Kis i tanak di Abdi, om i Asaria i tanak di Yihaliliil Mantad id pinuruan do sompiiyon di Girson: i Yoa i tanak di Sima, om i Idon i tanak di Yoa Mantad id pinuruan do sompiiyon di Ilisapan: i Simri om i Yoyol Mantad id pinuruan do sompiiyon di Asap: i Sakaria om i Matania Mantad id pinuruan do sompiiyon di Himan: i Yohiol om i Simoi Mantad id pinuruan do sompiiyon di Yodutun: i Somaya om i Usiol ¹⁵ - ¹⁶ Om timungo’ ngai’ noddi diyolo’ i tulun do Liwi di suwai, om lidangai ngai’ no diyolo’ o tinan diyolo’. Om suang nogiddi it imam do hiri’d Walai’d Sasambayangan dot Agayo om timpuun nod momolidang do kinoiyonon diri do tumanud di Tourat do TUHAN, om i pinonuhuan di raja’. Posoliwano’ ngai’ nopo diyolo’ i sosomu’ om hirio’ no diyolo’d natad di Walai’d Sasambayangan dot Agayo. Om igitai nogiddi di tulun do Liwi do hiri’d Rantai do Kidron, it id soliwan di bandar. ¹⁷ Om tinimpuunan nopo i karaja’ddi nga’ di tadau’d koiso’ do tulan do koiso’. Om tadau poddi do kawalu’ om kopongo no diyolo’ do mamalangga’ o pointongkop di natad om gisom do ponong hiri’d bilik di gulu kopio kobontol di hiri’d Walai’d Sasambayangan dot Agayo. Om walu’ po kawagu o tadau diyolo’ do minamalangga’ do pointongkop di walai’ddi om kopongo nopo diyolo’ do mamalangga’ om di kohopod om onom do tadau do tulan diri. ¹⁸ Om posunudo’ noddi di tulun do Liwi dot id di Raja’ Hiskia o poingkaa, ’’Notongkop no dahai do momolidang i Walai’d Sasambayangan dot Agayo, do kohompit ngai’ i pananaraban do porsombahan di sorobon, om i mija’ do poiyanan di roti do patahakon dot id TUHAN, om iri ngai’ i pakakas do hiri. ¹⁹ Om nongoongoi kawagu dahai i pakakas di nidu’ di Raja’ Ahas do tontok dit a’ iyau mamadul do TUHAN dit iyau po o momorinta’. Om nokotobilang ngai’ no dahai i pakakas diri do maan do don TUHAN, om hilo’ ngai’ no id dotimbabaan di pananaraban do porsombahan iri do dinondo,’’ ka diyolo’. ²⁰ Om a’ no i Raja’ Hiskia minonorimo-rimo tu’ olomus nopo iyau do minonimung di woyo-woyoon do tulun, om pogiwoyo-woyo’ no iyolo’ do minongoi do hiri’d Walai’d Sasambayangan dot Agayo. ²¹ Om pinatahak nopo do porsombahan do pangampun do dusa di sompiiyon di raja’ om i rayat do Yohuda, om maan do pomolidang di Walai’d Sasambayangan dot Agayo, om turu’ o tinan do sapi’ do tontoluhan, om turu’ o dumba’, om turu’ o tanak do dumba’, om turu’ o kambing. Om suhuo nogiddi di raja’ i piro-piro imam di suminolusuk di Harun do papatahak di tayam-tayam diri do hiri’d sakai di pananaraban do porsombahan do maan do porsombahan di sorobon. ²² Id gulu nopo kopio om nongoi dit imam sumbolio’ i piro-piro o sapi’ddi om poiyaso’ no diyolo’ i raha’ do hiri’d pananaraban do porsombahan. Om niyo i’ diyolo’ddi i turu’ o tinan do dumba’ om i turu’ o tinan do tanak do dumba’. ²³ Om id tohuri noddi om ngoyo’ no diyolo’ i kambing om igitai nod hiri’d raja’ om id rayat di maso do sumambayang do hiri. Om pakabayo’ ngai’ nopo diyolo’ o longon diyolo’ do hiri’d kambing diri. ²⁴ Om sumbolio’ nogiddi i kambing diri om potuntugo’ no i raha’ do hiri’d pananaraban do porsombahan do maan do porsombahan do pangampun do dusa do koinsanai di rayat. Om winonsoi pogi’ diyolo’ o miagal diri nga’ nokoponuhu’ no i raja’ do papatahak do porsombahan di sorobon om porsombahan do pangampun do dusa do koinsanai di rayat dot Israil. ²⁵ Om ponuhu’ no i raja’ di tulun do Liwi do mongoi’d hiri’d Walai’d Sasambayangan dot Agayo do popouni do kecapi om gambus, do tumanud di pinonuhuan di pinoboros do TUHAN dot id di Daud do pinolombus di Gad, i nabi di tuuhoton dau, om i Natan i Nabi. ²⁶ Om sagalai i’ di pinakai di Daud i tuunion diri. Om iri piro-piro imam dit ongkitorumpit nga’ sinuhu’ nogi’ do minongoi’d hiri. ²⁷ Om panahak no i Hiskia do tanda’ do kotimpuunan di kapatahakan do porsombahan di sorobon. Om daamot nopo do papatahak di porsombahan di sumbolion, om modsinding i tulun dot ogumu’ do sinding do pamarayou’d TUHAN, om iri no i popouni do tuunion om popinguni do torumpit om i tuunion do suwai. ²⁸ - ²⁹ Om otud no i Raja’ Hiskia om koinsanai di tulun do hiri do tuminuku’ dot id TUHAN om iri no modsisinding om modsinding nopo om i popouni do tuunion nga’ popinguni nopo do tuunion do gisom do nongosorob ngai’ i porsombahan di sinumbali’ddi. ³⁰ Om suhuo’ no di raja’ om i woyo-woyoon do tulun i tulun do Liwi do modsinding dot id TUHAN di sinding di tinulis di Daud om i Asap, i nabi. Om ongooropod ngai’ nopo i tulun do modsinding om mikuwo’d minotud do tumuku’ dot id Kinorohingan. ³¹ Om boro-boros noddi i Hiskia do poingkaa, ’’Nongolidangan kou noddi do baino’, om mositi’ nod papatahak kou dot id TUHAN do porsombahan di sumbolion, do maan dokoyu do porsombahan do kounsikahan,’’ ka dau. Om tonudo’ no diyolo’ i boros di Hiskia, om agaan nopo o ginawo diyolo’ do pinapaatod do tayam-tayam do maan do porsombahan. ³² Minigit iyolo’ do turu’ nohopod o sapi’ do tontoluhan om hatus o dumba’, om duwo nahatus o tanak do dumba’ om patahako’ nogiddi dot id TUHAN do numaan do porsombahan di sorobon. ³³ Om pinapatahak po iyolo’ dot onom nahatus o sapi’ do tontoluhan om tolu noribu o dumba’ do maan do pogiilangan do mangakan do koinsanai di tulun di nakarapou’d hiri. ³⁴ Iri nopo imam di nokopomolidang do tinan nga’ okuri’ kopio om a’ di iyolo’ kaayi’ do mongidu’ ngai’ do kulit di tayam-tayam. Om nuhupan diri iyolo’ di tulun do Liwi, tu’ otorodok nogi’ kopio i tulun do Liwi ko’ it imam do tumanud dit oturan do momolidang. Om minonguhup kasai’ po iyolo’ dit imam do gisom do kabagal do maganu-anu it imam di nokopomolidang do tinan. ³⁵ Om suwai nopo ko’ i porsombahan di sorobon, om pinapatahak po it imam do lunok di nanu do mantad id porsombahan do kounsikahan di nakan di rayat. Om pinapatahak po iyolo’ do waig dot anggur di pinotungu do poingandad di porsombahan di sorobon. Om iyo noddi o pinonimpuun kawagu do sambayang do hiri’d Walai’d Sasambayangan dot Agayo. ³⁶ Om osonong tomod diri o ginawo di Raja’ Hiskia om i rayat dau tu’ nuhupan i’ iyolo’d Kinorohingan do momonsoi ngai’ddi, om a’ i’ iyolo’ alaid do minomonsoi’ddi.

¹ - ⁵ Om a’ poddi di rayat naramai o Tadau’d Agayo do Paska do maso di kapamaramayan kasai’ do tontok do tulan do koiso’, tu’ okuri’ kopio ot imam do nokopomolidang do tinan, om a’ po ogumu’ o tulun do nokotimung do hilo’d Yorusalim. Om iso-iso’ nopoddi o pakat di Raja’ Hiskia om koinsanai di pagawai dau om i tulun do hilo’d Yorusalim do mamaramai di Paska do tontok do tulan do koduwo, om orohian ngai’ nopo iyolo’ di pakat diri. Om popokirim noddi i raja’ do surat dot id koinsanai’d tulun, do pointongkop dot Israil om Yohuda, om hilo’d Ipraim om hilo’d Manasi nga’ kiniriman i’ diyolo’d surat. Om linohou ngai’ i tulun dot Israil do mongoi do hiri’d Walai’d Sasambayangan dot Agayo do hilo’d Yorusalim, do mongoi pamaramai do Paska do maan do pomusou’d TUHAN, do miagal di natantu’ mantad do hiri’d Tourat di Musa. ⁶ Om suhuo’ no di raja’ om i pagawai dau o piro-piro tulun do tumongkop do Yohuda om Israil do papaatod do surat di tinulisan do poingkaa, ’’Oi rayat dot Israil! Nokoidu’ kou no do mantad id pomorintaan do tulun dot Asur. Om guli’ kou no do dinondo dot id TUHAN, i Kinorohingan di tinuku’ di Abraham, om i Isak, om i Yakub, om gumuli’ i’ iyau kawagu dot id dokoyu. ⁷ Kada’ kou omit di komolohingan dokoyu om i tulun dot Israil do suwai dit a’ otorodok dot id TUHAN, i Kinorohingan diyolo’. Om nokokito kou no do kawagato’ do pinomohukum dau diyolo’. ⁸ Kada’ kou kokodou o ginawo do miagal diyolo’, suwai ko’ umboyo’ kou nod TUHAN. Rikot kou nod hilo’d Yorusalim; do hilo’d Walai’d Sasambayangan dot Agayo, i nokotobilang do TUHAN i Kinorohingan dokoyu do maan do dau do gisom dot alaid. Kainou no sumambayang dot id dau om otingkod i’ o kototogod dau dot id dokoyu. ⁹ Ondung mamadul kou’d TUHAN, om osianan indo i pisangod di minononggoi di koobpinayan dokoyu, om pogulion indo diyolo’ kawagu i tulun di tinangkap diyolo’ddi. TUHAN nopo, i Kinorohingan dokoyu, om Kinorohingan i’ dit osonong om obinsianan; om podulon kou indo dau do mamadul kou no iyokoyu dau,’’ ka. ¹⁰ Soira’ di minamanau i tulun di sinuhu’ddi do mantad id kabandaran dit id watas do payat dot Ipraim om Manasi om gisom do hilo’d utara om nokorikot do hilo’d watas do payat do Sibulon, om nirak-irakan nogi’ om hiningi-hingi iyolo’. ¹¹ Nga’ haro i’ o piro-piro o tulun do mantad id payat dot Asor, om Manasi om Sibulon dit orohian do mongoi do hilo’d Yorusalim. ¹² Om hilo’d Yohuda nga’ kuminaraja’ i’ o Kinorohingan om piniiso-iso’ dau o ginawo di rayat do tumanud kopio di korohian do Kinorohingan om tumanud di ponuhuan do raja’ om i pagawai do raja’. ¹³ Tontok di tulan do koduwo om ogumu’ tomod diri o tulun do tuminimung do hilo’d Yorusalim do mongoi pamaramai di Tadau’d Agayo do Roti dit A’ Kipangambang. ¹⁴ Om ngoyo’ ngai’ no diyolo’ i pananaraban do porsombahan di hilo’d Yorusalim di maan do pananaraban do porsombahan di sumbolion om podtutudan do kominyan dot id tingolig om pataamo’ no diyolo’ do hiri’d Rantai do Kidron. ¹⁵ Om sumbolio’ no diyolo’ i piro-piro dumba’ do tontok di kohopod om apat do tulan diri, do maan do porsombahan di sumbolion do don Paska. Om nointingayam tomod diri it imam om i tulun do Liwi di maso pod sosomu’. Om lidangai noddi diyolo’ o tinan diyolo’, om milo indo iyolo’ do papatahak do porsombahan di sorobon do hiri’d Walai’d Sasambayangan dot Agayo. ¹⁶ Om sompori-pori nopo iyolo’ do minongoi do hiri’d diyolo’ do tiiyonon do hiri’d Walai’d Sasambayangan dot Agayo do tumanud di natantu’ mantad di nokotulis do hiri’d Tourat di Musa. Om patahako’ no di tulun do Liwi i raha’ di porsombahan do sinumbali’ddi dot id imam, om potunguho’ noddi dit imam i raha’ do hiri’d pananaraban do porsombahan. ¹⁷ Om ogumu’ po ot id pogialatan di tulun do nakarapou’d hiri dot a’ nokopomolidang do tinan, om a’ poddi iyolo’ koino-ino do monumbali’ do dumba’ do maan do porsombahan di sumbolion do don Paska. Om iri noddi i tulun do Liwi o minogobi’ diyolo’ do momonsoi’ddi om pinapatahak diri dot id TUHAN. ¹⁸ Om suwai no ko’ iri, om id pogialatan nopo di tulun dot Ipraim, Manasi, Isakar, om Sibulon, om ogumu’ po i ruminikot om a’ i’ nokopomolidang do tinan. Om a’ noddi katanud no dit oturan mantad o pamaramai diyolo’ do Paska. Om sambayangai noddi iyolo’ di Raja’ Hiskia. Poingkaa o sambayang dau, ¹⁹ ’’Oi TUHAN, i Kinorohingan, i tinuku’ do taki-aki dahai. Maha’ daa om ompunan nu i tulun di maso do sumambayang dot id diya’ do mikuwo’d aayi-ayi’ kopio o ginawo, dot a’ piya nolidangan o tinan diyolo’; tu’ iya’ nopo om osonong i’,’’ ka dau. ²⁰ Om norongou id TUHAN i sambayang di Hiskia. Om ompunai iddi do TUHAN i tulun diri, om a’ i’ dau iyolo’ hinukuman. ²¹ Turu’ o tadau do koloido’ di tulun do pointimung do hilo’d Yorusalim do mamaramai di Tadau’d Agayo do Roti dit A’ Kipangambang. Om ongotood tomod iyolo’. Monikid tadau nopo i tulun do Liwi om it imam do mamarayou’d TUHAN do mikuwo’d aayi-ayi’ kopio o ginawo. ²² Om oilo tomod i tulun do Liwi do momoyo’ di tulun do sumambayang dot id TUHAN, gisom do narayou iyolo’ di Hiskia. Om katalib poddi o turu’ o tadau do papatahak do porsombahan di sinumbali’ do pongunsikou’d TUHAN, i Kinorohingan di taki-aki diyolo’, ²³ om oinsanan nopo iyolo’d minomoros do popotilombus di karamayan diri do turu’ kawagu o tadau. Om ramayo’ poddi kawagu diyolo’ iri do mikuwo’d ongotood o ginawo. ²⁴ Om papatahak no i Raja’ Hiskia do soribu o tinan do sapi’ do tontoluhan om turu’ noribu o tinan do dumba’. Om papatahak no i piro-piro pagawai di Hiskia do soribu o tinan do sapi’ do tontoluhan om hopod noribu o tinan do dumba’. Om pinatahak ngai’ nopo i tayam-tayam diri dot id rayat do maan do sumbolion om maan dot akanon. Om ogumu’ tomod diri ot imam do minomolidang do tinan. ²⁵ Om ongotood ngai’ nopo i rayat do Yohuda, om it imam, om i tulun do Liwi, om i tulun do mantad hiri’d utara, om i tulun do bansa’d suwai di nokoiyon do hilo’d Israil om hilo’d Yohuda. ²⁶ Om aramai tomod o hilo’d bandar do Yorusalim tu’ mantad poddi pomorintaan di Raja’ Suliman, i tanak di Daud do kusai, om a’ po nokoumbal do nosiliu o miagal diri. ²⁷ Om pinokionuan dit imam om i tulun do Liwi do barakat do mantad id TUHAN i rayat, om norongou iddi do Kinorohingan do hiri’d tiyonon dau do hilo’d surga i sambayang diyolo’, om rinamit dau i pinokianu diyolo’.

¹ Om kopongo poddi i karamayan, om oinsanan nopo i rayat do tuminikid di bandar do hilo’d Yohuda, om pingraago’ no diyolo’ i torigi do watu do don tingolig, om pininghaba’ i tininganak di pinoingkakat do pinatahak dot id Tingolig dot Asira, om piningraag i pananaraban do porsombahan om i tiiyonon do modsubak do tingolig. Om iyo iddi o winonsoi diyolo’ dot id kinoiyonon do suwai do hilo’d Yohuda, om hiri’d watas do Binyamin, om Ipraim, om Manasi. Om uli’ nogiddi ngai’ iyolo’ do hiri’d kinoiyonon diyolo’. ² Om tontuo’ no kawagu di Raja’ Hiskia o karaja’ dit imam om i tulun do Liwi. Om iti ngai’ no i karaja’ diyolo’ddi: papatahak do porsombahan di sorobon om porsombahan do piuludan, om moyo’ do sumambayang do hiri’d Walai’d Sasambayangan dot Agayo, om mamarayou om mongunsikou do TUHAN dot id piro-piro o kinoiyonon do hiri’d suang di Walai’d Sasambayangan dot Agayo. ³ Om pinapatahak po i raja’ do tayam-tayam do maan do porsombahan di sorobon do monikid kosuabon om monikid sosodopon, om maan do porsombahan di sumbolion do patahakon do tontok do tadau’d Sabat, om tontok di Tadau dot Agayo do Tulan do Wagu, om tontok do karamayan do suwai di natantu’ dot id suang do Tourat do TUHAN. ⁴ Om suwai no ko’ iri om suhuo’ po di raja’ i tulun do hilo’d Yorusalim do mongigit do porsombahan di natantu’ mantad do patahakon dot id imam om id tulun do Liwi, om oponu’ indo diyolo’ o maso diyolo’ do maganu-anu do hiri’d Walai’d Sasambayangan dot Agayo, do tumanud di nokotulis do hiri’d Tourat do TUHAN. ⁵ Om posunudo’ no i ponuhuan diri dot id tulun dot ogumu’, om paatod noddi i tulun dot Israil do maan do popuhawangon do mantad id tua’ dit id gulu di tanom-tanom diyolo’, do patahakon dit imam: luong, anggur, tumau do saitun, paha’ om i tua’ do totonomon do suwai. Om pinatahak no diyolo’ di tulun do Liwi om sompihopod do nunu nopo i haro dot id diyolo’. ⁶ Oinsanan nopo i tulun di poingiyon do hilo’d Yohuda do pinapaatod do sompihopod di baanan do sapi’ om dumba’ diyolo’, om ogumu’ po o pinopuhawang do suwai, om patahako’ ngai’ nogiddi diyolo’ iri dot id TUHAN, i Kinorohingan diyolo’. ⁷ Tuminimpuun nopo do pinaatod i popuhawangon om di tulan do kotolu, om mikot-rikot kasai’ nopo do gisom di tulan do koturu’. ⁸ Om royoho’ noddi di Raja’ Hiskia om i pagawai dau o TUHAN, om rinayou diyolo’ i tulun dot Israil do tontok di nokokito iyolo’ di pinopuhawang dot irad diri kogumu’. ⁹ Om soira’ di minoro-boros i raja’ dot id imam om id tulun do Liwi do pasal di pinopuhawang diri, ¹⁰ om boro-boros no i Asaria, i Boyoon dot Agayo dot Imam, i suminolusuk di Sadok, do poingkaa, ’’Mantad poddi popingatod o rayat do nipuhawang diyolo’ do hilo’d Walai’d Sasambayangan dot Agayo, om a’ no iyahai ooyian do taakanon; tu’ a’ nogi’ dahai aayi-ayi’ iri. Om aramit pogi’ dahai ot irad diri nga’ binarakatan id TUHAN o tulun dau,’’ ka diyolo’. ¹¹ Om pomonsoi no iyolo’ do bilik do poopian do hiri’d posorili’ di Walai’d Sasambayangan dot Agayo, tu’ iyo noddi o pinonuhuan di raja’, ¹² om poopio’ ngai’ no diyolo’ i pinopuhawang diri om i porsombahan di sompihopod do hiri’d piro-piro bilik di poopian. Om i Konania, i tulun do Liwi, o sinuhu’ do mongilo-ilo ngai’ddi om i Simoi, i tadi’ dau o sinuhu’ do monguhup dau. ¹³ Om hopod po o tulun do Liwi do suwai do sinuhu’ do maganu-anu do moyo’ diyolo’: i Yohiol, i Asasia, i Nahat, i Asail, i Yorimot, i Yosabad, i Iliol, i Yismakia, i Mahat om i Bonaya. Om winonsoi ngai’ nopo iri do tumanud di pinonuhuan di Raja’ Hiskia om i Asaria, i Boyoon dot Agayo dot Imam. ¹⁴ I Kori noo, i tanak di Yimna, i tulun do Liwi di nosiliu do boyoon di madtatamong do hiri’d wawayaan di roitan do Wawayaan dot Agayo do Koulayon, i hiri’d Walai’d Sasambayangan dot Agayo, om nonuan do karaja’ do rumamit om mamahagi’ di popuhawangon di patahakon dot id TUHAN. ¹⁵ Om hiri nod kabandaran do suwai di nokoiyonon dot imam, om uhupan i Kori diti piro-piro o tulun do Liwi: i Idon, i Minyamin, i Yosua, i Somaya, i Amaria, om i Sakania. Om oirad nopo o pamahagi’ di taakanon dot id tulun do payat do Liwi do tumanud di buruon diyolo’, ¹⁶ om okon i’ ko’ tumanud do pinuruan do sompiiyon. Om oinsanan nopo i tongokusai di kiumur do tolu nohopod o toun om it otuo ko’ iri, om i kiburuon kasai’ do hiri’d Walai’d Sasambayangan dot Agayo do pointikid do tadau, do tumanud di sinompuruan diyolo’ do kaanu di diyolo’d bahagi’. ¹⁷ Iri ngai’ nopo it imam om tinulis o ngaran do tumanud di pinuruan do sompiiyon diyolo’ om iri no tulun do Liwi di kiumur do duwo nohopod o toun ko’ it otuo ko’ iri om tinulis o ngaran do tumanud di buruon om i sinompuruan diyolo’. ¹⁸ Om tulison ngai’ nopo o ngaran diyolo’ om i ngaran do tangaanak om sawo diyolo’, om i tiyon-iyon diyolo’d suwai, tu’ mositi’ nod posodia’ kasai’ iyolo’ do pointikid do maso do momonsoi di karaja’ diyolo’ di don TUHAN, di natantu’ mantad. ¹⁹ Id pogialatan nopo dit imam di songingiyon do hiri’d kabandaran di tinantu’ mantad dot iyonon di sinakagon di Harun, ko’ i hiri’d kobuturan di posorili’ do kabandaran diri, om haro o piro-piro o tulun do pinili’ do mamahagi’ di taakanon dot id toinsanan di tongokusai dit id suang do sompiiyon dot imam, om id pointikid-tikid do tulun di nokotulis o ngaran dot id suang do payat do Liwi. ²⁰ Om otulid ngai’ nopo o wonsoyon di Raja’ Hiskia dot id pointongkop do Yohuda, om poposonong iyau do ginawo’d TUHAN, i Kinorohingan dau. ²¹ Om koundar i’ iyau, tu’ koinsanai di wonsoyon dau do bagi’ di Walai’d Sasambayangan dot Agayo ko’ i wonsoyon dau do tumanud di Tourat do TUHAN, om wonsoyon i’ dau do mikuwo’d aayi-ayi’ kopio o ginawo dau, tu’ osianan i’ iyau’d TUHAN, i Kinorohingan dau.

¹ Om kowonsoi poddi di Raja’ Hiskia i popointalang do kotorodoko’ dau dot id TUHAN, om ngoyo’ no di Sanhorib i raja’ dot Asur, songodo’ o Yohuda. Nongoi dau turungkuo’ o kabandaran dit ongkitolig o posorili’ om sinuhu’ dau i soudor dau do monolod di kabandaran diri. ² Om soira’ di noilaan di Hiskia do haro o ginawo di Sanhorib do manangod do Yorusalim, ³ - ⁴ om pogiokun-okunai no di raja’ om i piro-piro pagawai dau do monompon dit ongkiwaig do hiri’d soliwan di bandar om aiso’ indo o waig di tulun dot Asur do tontok do koinsomok iyolo’ do Yorusalim. Om ogumu’ tomod o tulun do sinuhu’ di piro-piro pagawai di Hiskia diri do mongoi ponompon ngai’ di tudan do waig di lumuyung do ponong id soliwan di bandar. ⁵ Om inggiratai noddi di raja’ i bandar, om sonongo’ no dau i tolig di posorili’ di bandar, om pomonsoi po iyau do walai dot angakawas do maan do pogimpaan do hiri’d sakai di tolig, om pomonsoi po kawagu iyau do tolig do ponong id soliwan. Om suwai no ko’ iri om sinonong po dau i tolig di winonsoi do hiri’d timpak di tana’ do pinotimbun do hiri’d ponong id koulayon do mantad id bohogian di laid di bandar do Yorusalim. Om minonuhu’ nogi’ iyau do momonsoi do tandus om kolid dot ogumu’. ⁶ Om minomili’ nogi’ iyau do piro-piro boyoon do soudor do momoyo’ do koinsanai di tongokusai do hiri’d bandar, om monuhu’ diyolo’ do tumimung do hiri’d dalangga’ dit id dotimbabaan di wawayaan dot agayo di bandar. Om boros kaddi dau, ⁷ ’’Pogiroton no om pokoiso-isoon no o ginawo dokoyu; kada’ kou kooris di raja’ dot Asur ko’ iri po i soudor dau. Okoris toko’ i’ iyati’ ko’ iyau. ⁸ Iyau nopo om don tulun noo do kokorisan, nga’ iyati’ nopo om haro i’ o TUHAN, i Kinorohingan toko’ do monguhup om sumangod do mogobi’ dati’,’’ ka dau. Om korongou poddi di rayat i boros di raja’ do miagal diri, om a’ noddi iyolo’ ooris. ⁹ Om alaid-laid noddi, di hilo’ pod Lakis i Sanhorib om i soudor dau, om ponuhu’ no iyau’d tulun do minongoi solowot di Hiskia om i rayat do Yohuda do hilo’d Yorusalim, do popoboros do boros do poingkaa, ¹⁰ ’’Muhot oku, iyoho’ i Sanhorib, i raja’ dot Asur, ondung nunu po kopio o kasaap-saap dokoyu do mundorong do hilo’d Yorusalim tu’ noturungku’ no. ¹¹ Nokoboros daa i Hiskia do poiduwon kou i’ do TUHAN, i Kinorohingan dokoyu do mantad id kuasa’ dahai, koii? Nga’ kada’ kou ponongkuyaai, tu’ magakal no iyau toomod dokoyu. Pologoson kou i’ moti’ndo dau do louson om tuuhan. ¹² Iyau no i minamaraag di piro-piro o tiiyonon do sumambayang om i piro-piro pananaraban do porsombahan di don TUHAN, om suhuo’ noddi dau i tulun do Yohuda om i tulun do Yorusalim do sumambayang om modtutud do kominyan dot id iso’ noo o pananaraban do porsombahan. ¹³ A’ kou toi koilo di winonsoi ku om i winonsoi di komolohingan ku dot id piro-piro o bansa’d tulun do suwai? A’ po nokoumbal do haro o tingolig do bansa’d suwai do nokopoidu’ do tulun dau do mantad id kuasa’ do raja’ dot Asur! ¹⁴ Isai noo diyolo’ o nokoumbal do momonsoi do miagal diri? Om poingkuro po daa do milo do poidu’ dokoyu i dokoyu’d tingolig? ¹⁵ Kada’ dokoyu pologoso’ i raja’ dokoyu do magakal om mongudut dokoyu! Kada’ kou ponongkuyaai dau! Tu’ a’ i’ nokoumbal do haro o tingolig do tulun do hinonggo-honggo nopo do minilo do pinopoidu’ di tulun dau do mantad id kuasa’ do raja’ dot Asur. Om atantu’ no dot i tingolig dokoyu nga’ a’ i’ milo do poidu’ dokoyu!’’ ka. ¹⁶ Om ogumu’ po o boros do pinimboros di susuhuon dot Asur do pongindaraat do TUHAN, i Kinorohingan om pinongindaraat di Hiskia, i susuhuon do TUHAN diri. ¹⁷ Iri nogi’ i Raja’ dot Asur nga’ minonulis id surat do sumaap do TUHAN, i Kinorohingan do tukuon di tulun dot Israil. Poingkaa o suang di surat diri, ’’Iri nopo tingolig di Hiskia om miagal no di tingolig di piro-piro o bansa’d suwai tu’ a’ i’ milo do poidu’ di tulun dau do mantad id kuasa’ ku,’’ ka. ¹⁸ Om pagarango’ ngai’ nopo di susuhuon dot Asur iri dot id suang do boros dot Ibrani do pomorolosi om popoluhoi do ginawo di tulun do Yorusalim di hiri’d timpak di tolig di bandar. Om iyo no daa’ddi o pangala’ di tulun dot Asur di bandar diri. ¹⁹ Om pimboroson diyolo’ dot iri nopo Kinorohingan di tukuon do hilo’d Yorusalim om iyo noddi tingolig do bansa’d suwai, i tininganak di winonsoi’d tulun. ²⁰ Om sambayang noddi i Raja’ Hiskia om i Yosaya i Nabi, i tanak di Amos. Om pinglohou no iyolo’ do mokiuhup do Kinorohingan. ²¹ Om ponuhu’ noddi o TUHAN dot iso’ o moloikat do minongoi pamatai di soudor om i piro-piro boyoon do soudor do tulun dot Asur. Om guli’ noddi i raja’ dot Asur do hilo’d pomogunan dau do mikuwo’d nointingayam tomod. Insan o tadau, di maso dau do hiri’d walai di tingolig dau, om haro’ddi o piro-piro di tangaanak dau do minongoi pamatai dau, do gayang o pinamatai. ²² Om iyo noddi o ralan do TUHAN do pinopoidu’ di Raja’ Hiskia om i tulun do hilo’d Yorusalim do mantad id kuasa’ di Sanhorib, i raja’ dot Asur, om mantad id pisangod diyolo’ do suwai. Om nonuan iyolo’d TUHAN do piuludan dot id piro-piro o pomogunan do suwai. ²³ Om ogumu’ o tulun do minongoi do hilo’d Yorusalim dot ongkiinigit do porsombahan do patahakon dot id TUHAN om popuhawangon dot id di Hiskia. Om mantad poddi om suahon no i Hiskia do koinsanai’d bansa’ do tulun. ²⁴ Om tontok noddi do suminakit i Raja’ Hiskia dot adalaan kopio gisom dot oruhai no iyau dot apatai. Om sambayang no iyau, om patahak noddi o TUHAN do tanda’ dot id dau dot olingasan iyau. ²⁵ Nga’ a’ i’ iyau minongunsikou di kolingasan do pinatahak do TUHAN dot id dau, tu’ mininggayo-gayo nogi’ iyau. Om iri noddi o kinatagadan do TUHAN di tulun do Yohuda om Yorusalim. ²⁶ Nga’ alaid noddi om insiriba’ iddi i Hiskia om i tulun do Yorusalim, om a’ iddi nakaratu’ i pomohukum do solinaid po di Hiskia do poimpasi. ²⁷ Om nakakaya’ tomod diri i Raja’ Hiskia, om pusohon do koinsanai’d tulun. Om minomonsoi iyau do piro-piro o bilik do poopian di dapu’ dau: tamas, pirok, watu dit olumis dit angagayo o gatang, rampa, kolid om i konunu-nunuan do suwai dit angagayo o gatang. ²⁸ Om haro po o piro-piro o walai dau do poiyanan do tua’ do tanom-tanom dau: gandum, anggur, om tumau do saitun; om kikandang po iyau do poiyanan di sapi’ om dumba’ dau ²⁹ dit ogumu’ kopio. Om suwai no ko’ iri om minomonsoi po iyau do bandar dot ogumu’. Om ogumu’ tomod o kakayaan do pinatahak do Kinorohingan dot id dau. ³⁰ I Raja’ Hiskia no i minomokok di tudan do waig do Gihon, om i pinopoluyung di waig do pinawaya’ di parit do hiri’d saalom do tana’ do poluyungon do hiri’d suang di bandar do Yorusalim. Om koundar ngai’ nopo i winonsoi di Hiskia. ³¹ Om tontok di nokorikot i tulun do sinuhu’ do mantad hilo’d Babil do minongoi ponguhot do pasal di kinolingasan di Hiskia di koimayaan kopio, om pologoso’ nopod TUHAN i Hiskia do momonsoi do tumanud di korohian di Hiskia do pongilo kopio’d TUHAN do ginawo dau. ³² Om iri nopo susuyon do suwai do pasal di Raja’ Hiskia, om pasal di kosianan dau’d TUHAN, om nongkotulis no do hiri’d suang do Buuk do Pinotulisan di Pinointalang do Kinorohingan dot id di Yosaya i Nabi, i Tanak di Amos, om id suang di Buuk do Susui do Pasal Ngai’ di Raja’ do Yohuda om Israil. ³³ Om kapatai noddi i Hiskia, om lobongo’ no iyau do hiri’d tana’ di poinsawa-sawat do hiri’d kalabangan do raja’. Om oinsanan nopo i rayat do Yohuda om Yorusalim do pinopointalang do pomusou diyolo’ dau dit a’ ogina-gina’ do tontok di minatai iyau. Om kosiliu noddi do raja’ i Manasi i tanak dau, do suminowoli dau.

¹ Hopod nogi’ om duwo o toun do tumur di Manasi di nosiliu iyau do raja’ do Yohuda, om koloido’ nopo dau do momorinta’ do hilo’d Yorusalim om limo nohopod om limo o toun. ² Om minomonsoi i Manasi do dusa dot id TUHAN, tu’ tuminanud iyau di kongoubasanan dot araat di piro-piro o bansa’d tulun di nuyung do TUHAN do mantad hilo’d Kanaan do tontok di suang i’ o tulun dot Israil do pomogunan diri. ³ Om wonsoyo’ no dau kawagu i tiyonon do modsubak do tingolig di rinaag di Hiskia, i tapa’ dau. Om winonsoi nogi’ dau kawagu i piro-piro pananaraban do porsombahan di pakayon do modsubak do Baal, om minomonsoi iyau do piro-piro tininganak do Tingolig dot Asira, om tuminuku’ iyau dot id rombituon. ⁴ Om nokoboros nod TUHAN, do Yorusalim no o tiyonon do sumambayang dot id dau do gisom dot alaid, nga’ hiri nogid Walai’d Sasambayangan dot Agayo o pinamansayan di Manasi do piro-piro pananaraban do porsombahan dot id tingolig. ⁵ Om winansayan goduwo nopo dau do pananaraban do porsombahan dot id rombituon o hiri’d natad di Walai’d Sasambayangan dot Agayo. ⁶ Om pinatahak dau i tangaanak dau do maan do porsombahan di sorobon do hiri’d Rantai do Hinom. Om mininsingilo iyau di toilaan do bobolian om i mogogontong, om toilaan do dong rogon, om mokituduk di rusod-rusod. Om agayo no kopio o dusa dau dot id TUHAN gisom do tuminogod diri o TUHAN. ⁷ Om pinoiyanan dau do tininganak do tingolig o hiri’d suang di Walai’d Sasambayangan dot Agayo, om iri nogi’ daa i Walai’d Sasambayangan dot Agayo o komoyon do Kinorohingan do tontok di minoro-boros iyau dot id di Daud om id di Suliman i tanak di Daud do poingkaa, ’’Nopili’ ku no o Yorusalim dot id pogialatan di hopod om duwo o watas di payat do bansa’d Israil. Om natantu’ ku no do mositi’ nod sumambayang dot id doho’ i tulun ku do hiri’d walai ku dot id bandar diri do gisom dot alaid. ⁸ Ondung tonudon ngai’ di tulun dot Israil i ponuhuan ku om tonudon i Tourat di pinatahak di Musa, i susuhuon ku dot id diyolo’ om a’ ku no iyolo’ pologoson dot ouyung do mantad id pomogunan di pinatahak ku dot id taki-aki diyolo’,’’ ka. ⁹ Om i Manasi no o minamayayat di rayat do Yohuda do momonsoi’d dusa dit araat po ko’ i dusa di winonsoi di piro-piro o bansa’d Kanaan di nuyung do TUHAN do tontok di suang i’ i tulun di songonuon do TUHAN do pomogunan diri. ¹⁰ Om togodo’ no daa’d TUHAN i Manasi om i rayat dau nga’ a’ i’ iyolo’ minokinongou. ¹¹ Om gowoi poddi om porikoto’ nod TUHAN i piro-piro boyoon do soudor dot Asur do minongoi ponolod do Yohuda. Om koito’ no i Manasi do kakait do minanangkap dau, om kagasai no iyau om tanggayai noddi iyau do hilo’d Babil. ¹² Om insiriba’ nogiddi iyau dot id TUHAN i Kinorohingan dau, di maso dau dot oinggorit, om sambayang no iyau do mokiuhup do TUHAN. ¹³ Om simbaro’ id Kinorohingan i sambayang di Manasi. Om pogulio’ no iyau’d Kinorohingan do hilo’d Yorusalim do momorinta’ kawagu’d hilo’. Om iri noddi i nosiliu do miagal diri o pinopogirot do kotumbayaan di Manasi, do TUHAN noo o Kinorohingan. ¹⁴ Om poinsawato’ no di Manasi i tolig di ponong id soliwan di Bandar di Daud, i tolig di ponong id koulayon. Om nimpuun nopo dau do momonsoi om id iso’ o kinoiyonon di hiri’d rantai, it id toning do tudan do waig do Gihon om potilombus dot id utara do gisom do hiri’d wawayaan di roitan do Wawayaan dot Agayo do Sada’ om i hiri’d kinoiyonon di roitan dot Opil dot id bandar diri. Om pinoiyanan ngai’ nopo dau do songulun o boyoon do soudor ot id pointikid-tikid do bandar di kitolig do hilo’d Yohuda. ¹⁵ Om nidu’ ngai’ dau i tininganak do tingolig do bansa’d suwai om iri nogi’ i tingolig di pinoiliu dau do hiri’d Walai’d Sasambayangan dot Agayo. Om nidu’ ngai’ nogi’ dau i piro-piro pananaraban do porsombahan di don tingolig di hiri’d nulu-nulu di winaalan do Walai’d Sasambayangan dot Agayo, om id kinoiyonon do suwai do hilo’d Yorusalim. Om insanai nopo dau iri do pinoposoliwan di bandar om pataamo’ ngai’ noddi. ¹⁶ Om sonongo’ noddi dau i pananaraban do porsombahan, i hiri’d tiyonon do tumuku’ dot id TUHAN. Om hiri noddi iyau do pinapatahak do porsombahan do piuludan om porsombahan do kounsikahan. Om suhuo’ ngai’ no dau i tulun do Yohuda do tumuku’ dot id TUHAN, i Kinorohingan dot Israil. ¹⁷ Om maso po di rayat do papatahak do porsombahan di sumbolion dot id piro-piro o kinoiyonon do suwai di tiyonon do sumambayang, nga’ iri nopo i porsombahan diri om TUHAN i’ ot onuan. ¹⁸ Om iri nopo susuyon do suwai do pasal di Manasi, om i sambayang dau dot id Kinorohingan, om i boros do Kinorohingan dot id dau do pinolombus di piro-piro nabi dot id suang do ngaran do TUHAN, i Kinorohingan dot Israil, om nokotulis ngai’ no do hiri’d suang do Buuk di Monusui do Pasal Ngai’ di Raja’ dot Israil. ¹⁹ Om nokotulis po do hiri’d suang di Buuk di Monusui do Pasal di Nabi i sambayang di Manasi om i nisimbar do Kinorohingan di sambayang diri, om i dusa di nowonsoi dau dit a’ po iyau nokorologo, om i kinoiyonon do modsubak do tingolig om i tininganak do Tingolig dot Asira di winonsoi dau, om i piro-piro tingolig di tinuku’ dau. ²⁰ Om kapatai no i Manasi, om lobongo’ no do hiri’d walai’d raja’. Om kosiliu nod raja’ i Amon, i tanak dau’d kusai, do suminowoli dau. ²¹ Duwo nogi’ nohopod om duwo o toun do tumur di Amon di nosiliu iyau’d raja’ do Yohuda. Om koloido’ nopo dau do momorinta’ do hilo’d Yorusalim om duwo no o toun. ²² Om iyau nga’ minomonsoi id dusa dot id TUHAN do miagal di tapa’ dau, om tuminuku’ iyau dot id tingolig di tinuku’ di tapa’ dau. ²³ Nga’ i Amon nopo om a’ i’ iyo di tapa’ dau tu’ a’ i’ iyau mininsiriba’ om a’ guminuli’ dot id TUHAN; agayo-gayo po dau’d dusa ko’ i tapa’ dau. ²⁴ Om pogipapakat no i piro-piro pagawai di Raja’ Amon do sumaap di Amon om ngoyo’ no diyolo’ iyau patayo’ do hiri’d walai’d raja’. ²⁵ Nga’ napatai i’ di rayat do Yohuda i tulun di minamatai di Raja’ Amon, om siliho’ no diyolo’ do raja’ i Yosia, i tanak di Amon.

¹ Om walu’ nogi’ o toun do tumur di Yosia di nosiliu iyau do raja’ do Yohuda, om tolu nohopod om iso’ o toun do koloido’ dau do momorinta’ do hilo’d Yorusalim. ² Om korohian id TUHAN i winonsoi dau; tu’ tuminanud i’ iyau di kowoyo-woyoon di Raja’ Daud, i taki-aki dau, om naayi’ dau do tumanud o koinsanai dit oturan do Kinorohingan. ³ Om di nopoddi walu’ no toun di Yosia do nosiliu’d raja’, dit omulok po kopio iyau, om timpuun no iyau do sumambayang dot id Kinorohingan, i tinuku’ di Raja’ Daud, i taki-aki dau. Om apat no toun do mantad diri om timpuun no iyau do mingraag di tiyonon do modsubak do tingolig, om i tininganak di Tingolig dot Asira, om i piro-piro tingolig do suwai. ⁴ Om mumuko’ nopo kopio di tulun di Yosia i tininganak om i tingolig diri om potiaso’ nogiddi i kinomumukan do hiri’d lobong di tulun di pinapatahak do porsombahan di sinumbali’ dot id tingolig diri. Om habao’ ngai’ nopo diyolo’ i piro-piro pananaraban do porsombahan dot id Baal om i piro-piro podtutudan do kominyan do hilo’. ⁵ Om tutudai noddi di Yosia do hiri’d sakai di pananaraban do porsombahan diri i tulang dit imam di minogobi-obi di tingolig diri. Om iyo noddi o ralan dau do minomolidang kawagu do Yohuda om Yorusalim dot id pagantangan do tugama’. ⁶ Om iyo iddi o winonsoi dau do hiri’d kabandaran om i hiri’d piro-piro o kinoiyonon di nangaraag do hilo’d watas do Manasi, om Ipraim, om Simion, om gisom do korikot do hilo’d Naptali, i ponong id utara. ⁷ Om oinsanan nopo i pananaraban do porsombahan om i tininganak dot Asira do pointongkop do hiri’d Pomorintaan dot Utara do rinaag ngai’ di Yosia, om mumuko’ ngai’ nopo dau i tininganak om i podtutudan do kominyan. Om uli’ nogiddi i Yosia do hilo’d Yorusalim. ⁸ Tontok di kohopod no om walu’ do toun do pomorintaan di Yosia, di notingkod dau i modsubak do tingolig do hiri’d Walai’d Sasambayangan dot Agayo om id pointongkop di pomogunan, om ponuhu’ no iyau do tolu o tulun do mongoi pononong di Walai’d TUHAN, i Kinorohingan. Iri nopo tolu o tulun diri nga’ i Sapan, i tanak di Asalia, i Maasiya i gobunor do Yorusalim, om i Yoa i tanak di Yoahas, i pagawai dot asawat o pangkat. ⁹ Om patahako’ no di tulun do Liwi dot id di Hilkia, i Boyoon dot Agayo dot Imam, i tusin di notimung diyolo’. Iri nopo tulun do Liwi diri nga’ i madtatamong di wawayaan do Walai’d Sasambayangan dot Agayo. Iri nopo tusin diri nga’ mantad id tulun dot Ipraim om Manasi, om mantad id rayat do suwai, i mantad id pomorintaan dot id utara, om mantad id rayat do hilo’d Yohuda, om mantad hilo’d Binyamin om hilo’d Yorusalim. ¹⁰ Om patahako’ noddi di Hilkia i tusin diri dot id tolu o tulun di nonuan do karaja’ do mongilo-ilo di karaja’ do mononong di Walai’d Sasambayangan dot Agayo. Om patahako’ no diyolo’ i tusin diri dot ¹¹ id piro-piro tukang kayu om i tukang mamaal do pomoli do watu om kayu do maan do pononong di piro-piro o walai di pinologos di raja’ do Yohuda do poingraag. ¹² Iri nopo tulun di mononong di nangaraag diri nga’ tulun dit ongotulid kopio o ginawo. Om boyoon nopo diyolo’ nga’ apat o tulun do Liwi: i Yahat om i Obaya, i mantad id pinuruan do sompiiyon do Morari, om i Sakaria om i Mosulam i mantad id pinuruan do sompiiyon di Kohat. Om iri no i tulun do Liwi, it ongoilo ngai’ do popouni do tuunion, ¹³ om nonuan do karaja’ do mongilo-ilo di momirangkat ngai’ di pakakas, om boyoon di tulun di pakaraja’ do momonsoi di mogisuayan o karaja’; om i mongilo-ilo do kowoyo-woyoon di karaja’ om madtamong di wawayaan. ¹⁴ Om tontok di pinosoliwan i tusin do mantad hiri’d pinoopian, om kokito no di Hilkia i Buuk do Tourat do TUHAN, i Tourat di pinatahak do Kinorohingan dot id di Musa. ¹⁵ Om boros ka di Hilkia dot id di Sapan, ’’Nokito ku i Buuk do Tourat do TUHAN do hilo’d Walai’d Sasambayangan dot Agayo,’’ ka dau. Om patahako’ no dau i buuk diri dot id di Sapan, ¹⁶ om romito’ no di Sapan i buuk om ongoi no solowot di raja’ om boro-boros nod, ’’Nowonsoi ngai’ no dahai i pinonuhuan nu. ¹⁷ Noongoi no dahai i tusin di pinoopi’ do hilo’d Walai’d Sasambayangan dot Agayo, om nakatahak no dahai dot id tulun di songingkaraja’ om id mandur diyolo’,’’ ka dau. ¹⁸ Om boros ka kawagu dau, ’’Pinatahak di Hilkia iti buuk diti dot id doho’,’’ ka. Om basao’ noddi di Sapan i buuk diri do pinarangahan di raja’. ¹⁹ Om korongou poddi di raja’ i suang di buuk diri, om hurako’ no dau o pakayan dau dot atatangaban. ²⁰ Om suhuo’ noddi di raja’ i Hilkia om i Ahikam i tanak di Sapan, om i Abdon i tanak di Mika, om i Sapan i gomponulis do pomorinta’, om i Asaya i madtatamong kasai’ di raja’. Boros ka dau, ²¹ ’’Ngoyo’ dokoyu doho’ uhoto’ o TUHAN do bagi’ doho’ om bagi’ di tulun di nongoolu’ do hilo’d Israil om hiti’d Yohuda do pasal do suang diti buuk. Otogod o TUHAN dati’ tu’ a’ i’ i taki-aki toko’ tuminanud di pinonuhuan di songintulis do hiti’d buuk diti,’’ ka dau. ²² Om ongoi no i tulun diri uhot do songulun o tondu’ di roitan dot i Hulda. Iyau nopo om nabi di poingiyon dot id kawalayan do wagu di hilo’d Yorusalim. Ngaran nopod sawo dau om i Salum i tanak di Tikwa, i manangaki di Harhas. Om i Salum no o mongilo-ilo di pakayan do tontok do sumambayang do hiri’d Walai’d Sasambayangan dot Agayo. Om korongou poddi di Hulda i pinoboros diyolo’, ²³ om suhuo’ no dau iyolo’ do gumuli’ dot id raja’ do popolombus do ²⁴ boros do poingkaa, ’’Poingkaa o boros do TUHAN, hukuman ku nondo o Yorusalim om koinsanai di tulun do poingiyon do hilo’ dot iti popol di songintulis do hiti’d buuk di binasa’ dot id raja’ o pomohukum. ²⁵ Nokotongkiad no iyolo’ doho’ om pinapatahak iyolo’ do porsombahan di sinumbali’ dot id tingolig. Koinsanai di winonsoi diyolo’ om pinopotogod ngai’ nopo doho’. Otogod oku no kopio do Yorusalim, om a’ no milo dot atanus o kototogod ku. ²⁶ Nga’ poingkaa o bilin ku dot id di Raja’ Yosia, iyoho’ i TUHAN, i Kinorohingan dot Israil: Nokorongou ko no di pointulis dot id suang do buuk diri, ²⁷ om minonosol ko iddi om mininsiriba’ ko dot id toguang ku. Minihad ko om hinurak nu o pakayan nu do tanda’ do tumongob ko do tontok di nokorongou ko di boros ku do momohukum do Yorusalim om i tulun do poingiyon do hilo’. Nga’ norongou ku no i sambayang nu. ²⁸ Om a’ ku indo porotuon dot id Yorusalim i hukuman do solinaid nu pod poimpasi. Om osonong indo o kapatai-patayo’ nu,’’ ka. Om poguliai no di tulun di sinuhu’ di raja’ dot id raja’ om posunudo’ no diyolo’ i pinobilin diri. ²⁹ Om lohowo’ ngai’ noddi di Raja’ Yosia i piro-piro boyoon do Yohuda om Yorusalim. ³⁰ - ³¹ Om tanud noddi iyau diyolo’ do minongoi do hiri’d Walai’d Sasambayangan dot Agayo, om minoyo’ nogi’ i piro-piro imam, om i piro-piro nabi, om koinsanai di rayat, dot i mosikin om i nogi’ i kaya’. Om hiri nod toguang diyolo’, dot id toning di torigi di pinotobilang do maan do don raja’, o pinambasaan di raja’ do toinsanan do suang di buuk do tumpongo dot opuhod o pambasa’ dau, i buuk di nokito do hiri’d Walai’d Sasambayangan dot Agayo. Om pamatos noddi i raja’ dot id TUHAN do tumorodok dot id dau, om aayi-ayi’ o ginawo om aayi-ayi’ o pomusorou do tumanud di ponuhuan om it oturan dau, om tumanud di ponuhuan do tumpongo’d TUHAN dot id tulun dau, i pointulis dot id buuk diri. ³² Om oinsanan nopo i tulun do Binyamin om i tulun do suwai di hilo’d Yorusalim do sinuhu’ dau do mamatos do tumorodok dot id pinibatasan diri. Om iri no o kinotonudan di tulun do Yorusalim dit Oturan dot id suang di pinibatasan dot id pialatan diyolo’ om id Kinorohingan di taki-aki diyolo’. ³³ Om i tingolig di kososomu’, dit id piro-piro o kinoiyonon dot id suang di watas dot Israil, nga’ rinaag ngai’ nogi’ di Raja’ Yosia. Om suhuo’ no dau i rayat dau do sumambayang dot id TUHAN, i Kinorohingan di taki-aki diyolo’. Om solinaid nopo di Yosia do poimpasi om otorodok kasai’ i’ i rayat dot id TUHAN.

¹ Om ramayo’ noddi di Yosia o Paska do hilo’d Yorusalim do pomusou dau do TUHAN. Om iri nopo tayam-tayam do maan do tontok do karamayan diri nga’ sinumbali’ do tontok di tadau do kohopod om apat di tulan do koiso’. ² Om bohogio’ no di Yosia dot id koinsanai dit imam i karaja’ dit apatut do wonsoyon diyolo’ do hiri’d Walai’d Sasambayangan dot Agayo, om sinuhu’ dau iyolo’ do sonong-sonongon kopio o pomonsoi do karaja’ddi. ³ Om sinuhu’ nogi’ di Yosia i tulun do Liwi di nokotobilang do momonsoi do karaja’d TUHAN, om i nosiliu do monunuduk dot Israil. Boros ka dau, ’’Ngoyo’ dokoyu poopio’ i Kaban do Tumpongo’d TUHAN dit olidang diri do hilo’d Walai’d Sasambayangan dot Agayo, i winonsoi di Raja’ Suliman, i tanak di Daud do kusai. A’ no dokoyu minog do popingwolihon iri. Pogobi-obian no dokoyu o TUHAN, i Kinorohingan dokoyu, om i tulun dot Israil, i tulun do songonuon do TUHAN. ⁴ Ongoi kou no do hilo’d Walai’d Sasambayangan dot Agayo, i tiyonon do tinantu’ dot iyonon di pinuruan do sompiiyon dokoyu, om sumodia’ kou no do momonsoi’d karaja’ di natantu’ mantad di Raja’ Daud om i Raja’ Suliman i tanak dau’d kusai, do wonsoyon dokoyu. ⁵ Om uludon no kopio dokoyu o pamahagi’ di karaja’ om haro indo kasai’ ot id pogialatan dokoyu do milo’d monguhup do pointikid-tikid di sinompuruan do tulun dot Israil. ⁶ Om mositi’ nod sumbolion dokoyu i dumba’ om kambing do maan do tontok do Tadau’d Agayo do Paska. Om iri no o kopomolidangan dokoyu do tinan dokoyu do tumanud dot oturan do tugama’, om posodia’ kou di porsombahan do sumbolion om owonsoi i’ di tulun dit oiyo ko’ bansa’ dokoyu i pinonuhuan do TUHAN di pinolombus di Musa,’’ ka dau. ⁷ Om panahak no i Raja’ Yosia do tayam-tayam dau do maan di tulun di nakarapou di karamayan do Paska. Tinahak nopo dau om tolu nohopod noribu o tinan do dumba’, om tanak do dumba’, om kambing dit ongokoro’ po, om tolu noribu o tinan do sapi’ do tontoluhan. ⁸ Om i piro-piro pagawai di Yosia nga’ minanahak nogi’ do maan di piro-piro imam, om maan di tulun do Liwi om koinsanai di rayat. Om iri nopo tolu o pagawai di nonuan do karaja’ do mongilo-ilo di Walai’d Sasambayangan dot Agayo, i Hilkia i Boyoon dot Agayo dot Imam, om i Sakaria, om i Yohiol, om minanahak ngai’ nopo dit imam do duwo noribu om onom nahatus o tinan do tanak do dumba’ om kambing dit ongokoro’ po om tolu nahatus o tinan do sapi’ di tontoluhan do maan do porsombahan do tontok do karamayan diri. ⁹ Om iri piro-piro boyoon do tulun do Liwi: i Konania, i Somaya om i Nitaniil i tobpinai dau, i Hasabia, i Yoyol, om i Yosabad, nga’ minanahak i’ di tulun do Liwi do limo noribu o tinan do tanak do dumba’ om kambing dit ongokoro’ po om limo nahatus o tinan do sapi’ di tontoluhan do maan do porsombahan do tontok di karamayan diri. ¹⁰ Om kopongo ngai’ poddi iri do maan di karamayan do Paska, om sompori-pori nopo it imam om i tulun do Liwi do minongoi do hiri’d tiiyonon diyolo’ do kumaraja’ do miagal di pinonuhuan di raja’. ¹¹ Om sumbolio’ noddi diyolo’ i tayam-tayam do maan do tontok di Tadau’d Agayo do Paska; i tulun do Liwi o minongidu’ di kulit di tayam-tayam om it imam o pinopowowos di raha’ do hiri’d sakai di pananaraban do porsombahan. ¹² Om kaanu ngai’ nopod soronginanan o tayam-tayam di maan do porsombahan do sorobon o pointikid-tikid di pinuruan do sompiiyon di nakarapou’d hiri. Om milo iddi iyolo’ do papatahak do porsombahan di sumbolion do tumanud dit oturan di nokotulis do hiri’d Tourat di Musa. ¹³ Om luguo’ noddi di tulun do Liwi i porsombahan di sinumbali’ di don Paska, do tumanud dit oturan, om linasu’ diyolo’ dot id poriuk, om id kuali’, om id balanga’, i porsombahan di pinotobilang. Om araa-raho’ nogiddi diyolo’ do pinopotikid i tonsi dot id tulun dot ogumu’. ¹⁴ Om kowonsoi po ngai’ iri, om posodiawo’ nogi’ di tulun do Liwi i daging di diyolo’d gontok om i gontok dit imam di sinakagon di Harun. Tu’ maganu-anu nopo it imam do papatahak di tayam-tayam do maan do porsombahan di sorobon, om mininsorob iyolo’ di lunok di nanu do mantad id porsombahan di sinumbali’ do gisom do notuangan. ¹⁵ Om i piro-piro tulun di popouni do tuunion do mantad id pinuruan do sompiiyon di Asap, it id suang do payat do Liwi nga’ hiri id tiiyonon diyolo’ do maganu-anu, i hiri’d natantu’ mantad di Raja’ Daud do tiyonon diyolo’. Iti ngai’ no o ngaran diyolo’: i Asap, i Himan, om i Yodutun, it imam di pakaraja’ dot id raja’. Iri nopo madtatamong do wawayaan dit angagayo om a’ i’ minog do tumongkiad di karaja’ diyolo’ tu’ milo i’ iyolo’ do mamaramai do Paska do hiri’d tiyonon diyolo’ do kumaraja’ tu’ uhupan i’ iyolo’ di tulun do Liwi di suwai. ¹⁶ Om tontok no do tadau’ddi do winonsoi diyolo’ o koinsanai di pinonuhuan di Raja’ Yosia do momonsoi do pamaramai di Paska, do kohompit ngai’ no i piro-piro porsombahan do hiri’d pananaraban do porsombahan. ¹⁷ Om oinsanan nopo i rayat dot Israil di nakarapou’d hiri do minamaramai do Paska om turu’ o tadau do koloido’ diyolo’ do minamaramai di Tadau’d Agayo do Roti dit A’ Kipangambang. ¹⁸ Om a’ po nokoumbal dot iyo’ddi o pinamaramai do Paska do mantad di hino po i Nabi Somuil. Iso’ po di raja’ dit id gulu nga’ aiso’ i’ o nokoumbal do minamaramai do Paska do miagal di pinamaramai ¹⁹ do tontok di kohopod om walu’ do toun di Yosia do momorinta’, do rinamai di Raja’ Yosia om it imam, om i tulun do Liwi, om i tulun do Yohuda om tulun dot Israil, om i tulun do poingiyon do hilo’d Yorusalim. ²⁰ Om kowonsoi ngai’ po di Raja’ Yosia iri do maan do hiri’d Walai’d Sasambayangan dot Agayo, om woyoo’ no di Niko i raja’ do Masir, i soudor dau do mongoi sangod do hilo’d Karkomis, it id toning do Bawang dot Iprat. Om tuminotos i’ daa i Yosia do minangantob dau, ²¹ nga’ porikot no i Niko do boros diti dot id di Yosia, ’’Iti nopo pisangadan om a’ i’ kokuro-kuro diya’, oi raja’ do Yohuda! Okon i’ ko’ mongoi saap diya’ o kinorikatan ku, nga’ mongoi saap di pisangod ku, om Kinorohingan i’ o minonuhu’ doho’ do momonsoi’dti dot oruhai. Uhupan oku i’ do Kinorohingan, om kada’ nogi’ iyau antabai, tu’ patayon ko moti’ndo dau,’’ ka. ²² Nga’ suminonsog i’ i Yosia do minongoi sangod. A’ i’ iyau minumboyo’ di pinoboros do Kinorohingan do pinolombus di Raja’ Niko. Om pingunali-nali no iyau do tulun dit okon ko’ raja’ om ongoi no do hiri’d pisangadan di hiri’d rantai do hilo’d Mogido. ²³ Om hiri noddid pisangadan diri do noonong do pana’ i Raja’ Yosia. Om suhuo’ noddi dau o piro-piro di susuhuon dau do posoliwan dau do mantad id pisangadan diri, tu’ nadalaan no kopio iyau do nosuhat. ²⁴ Om kakato’ no diyolo’ iyau do mantad hiri’d korita’-kuda’ dau om powoliho’ no diyolo’ iyau dot id korita’-kuda’ do suwai di hino’d hiri, om pokoyoo’ nogiddi diyolo’ do hilo’d Yorusalim. Om hilo’ no o kinapatayon dau om lobongo’ no iyau do hiri’d kalabangan do raja’. Om oinsanan nopo i rayat do Yohuda om Yorusalim do minogihad di kinapatayon dau. ²⁵ Om ponulis no i Nabi Yoromia, dot iso’ o sinding do pogihad di Raja’ Yosia. Om gisom piya do dinondo nga’ sindingon kasai’ po i sinding diri do hilo’d Israil, do sindingon di modsisinding do tongokusai om tongoondu’ do kopomuhandaman di kinopogihadan do kinapatayon di Yosia. Om iri nopo sinding nga’ pinotulis do hiri’d buuk di pinotulisan ngai’ di sinding do pogihad. ²⁶ Om iri nopo susuyon do suwai do pasal di Yosia, do pasal di kosianan dau do TUHAN, om i kotorodoko’ dau do tumanud di Tourat do TUHAN, ²⁷ om i susuyon do pasal do kowoyo-woyoo’ do koposi-posion dau do mantad di timpuun i’ om gisom do kinopupuson, nga’ nongkotulis ngai’ no do hiri’d suang do Buuk di Monusui do Pasal Ngai’ di Raja’ dot Israil om Yohuda.

¹ Om pilio’ no di rayat do Yohuda i Yoahas, i tanak di Yosia do kusai, om siliho’ no diyolo’ iyau do raja’ do Yorusalim do suminowoli di tapa’ dau. ² Om duwo no nohopod om tolu o toun do tumur di Yoahas di nosiliu iyau do raja’ do Yohuda, om koloido’ nopo dau do momorinta’ do hilo’d Yorusalim om tolu o tulan. ³ - ⁴ Om tangkapo’ no di Niko i raja’ do Masir, i Yoahas, om tanggayai no do hilo’d Masir. Om suhuo’ noddi dau o Yohuda do mambayar do 3,400 o kilogram do pirok om 34 o kilogram do tamas do tanda’ do minsiriba’ iyolo’ dot id dau. Om siliho’ nogiddi dau do raja’ i Ilyakim i tobpinai di Yoahas, om powoliho’ no dau o ngaran di Ilyakim dot i Yoyakim. Om tanggayai noddi dau i Yoahas do hilo’d Masir. ⁵ Duwo no nohopod om limo o toun do tumur di Yoyakim di nosiliu iyau do raja’ do Yohuda. Om hopod om iso’ o toun dau do momorinta’ do hilo’d Yorusalim. Om minomonsoi iyau’d dusa dot id TUHAN, i Kinorohingan dau. ⁶ Tontok di nongoi di Nobukadnisar i raja’ do Babil, solodo’ o Yohuda, om tangkapo’ no dau i Yoyakim, om kinagasan diri i Yoyakim do tinanggayan do hilo’d Babil. ⁷ Om haro’ddi o piro-piro di konunu-nunuan dit agayo o gatang di hiri’d Walai’d Sasambayangan dot Agayo do tinanggayan di Nobukadnisar om hirio’ no dau id walai di don raja’ do hilo’d Babil. ⁸ Om iri nopo susuyon do suwai do pasal di Yoyakim, do kohompit ngai’ i winonsoi dau di sosomu’ om i karaato’ dau, om nokotulis ngai’ no do hiri’d suang do Buuk di Monusui do Pasal Ngai’ di Raja’ dot Israil om Yohuda. Om i Yoyakin diri, i tanak dau’d kusai o nosiliu do raja’ do suminowoli dau. ⁹ Hopod nogi’ om walu’ o toun do tumur di Yoyakin di nosiliu iyau do raja’d Yohuda. Om koloido’ nopo dau do momorinta’ do hilo’d Yorusalim om tolu o tulan om hopod o tadau. Om iyau nga’ minomonsoi id dusa dot id TUHAN. ¹⁰ Tontok di maso do momuroun kawagu o kayu om tangkapo’ no om tanggayai di Raja’ Nobukadnisar i Yoyakin do hilo’d Babil. Om i konunu-nunuan dit angagayo gatang do hiri’d Walai’d Sasambayangan dot Agayo nga’ tinanggayan nogi’ dau. Om siliho’ noddi di Nobukadnisar i Sodokia, i tamanon di Yoyakin, do raja’ do Yohuda om Yorusalim. ¹¹ Duwo no nohopod om iso’ o toun do tumur di Sodokia di nosiliu iyau’d raja’ do Yohuda. Om hopod om iso’ o toun dau do momorinta’ do hilo’d Yorusalim. ¹² Om iyau nga’ minomonsoi id dusa dot id TUHAN. Om a’ iyau mininsiriba’ om a’ minumboyo’ di Yoromia, i pinopolombus do boros do TUHAN. ¹³ Om sansagai no di Raja’ Nobukadnisar i Sodokia do sumumpa’ dot id suang do ngaran do Kinorohingan do tumorodok iyau dot id dau. Nga’ alaid noddi om suminaap i’ i Sodokia di Nobukadnisar. Om a’ i’ i Sodokia rumologo di dusa dau. Om suminurilog iyau do TUHAN, i Kinorohingan dot Israil, om a’ orohian do gumuli’ dot id dau. ¹⁴ Om suwai no ko’ iri, om iri Walai’d Sasambayangan dot Agayo, i pinotobilang do TUHAN do maan do dau nga’ sinosomu’ i’ di piro-piro boyoon do Yohuda, om it imam, om i rayat, tu’ iyolo’ nga’ minodsubak i’ do tingolig om minomit di kowoyo-woyoon di tulun do bansa’d suwai di kidusa di hiri’d posorili’ diyolo’. ¹⁵ Om asaru’ no o TUHAN, i Kinorohingan di taki-aki diyolo’ do monuhu’ do susuhuon dau do mongoi poposorou di tulun dau, tu’ olisiu i’ iyau diyolo’ om olisiu iyau di Walai dau. ¹⁶ Nga’ nuntotogod nogi’ diyolo’ i susuhuon do Kinorohingan, om nirak-irakan ngai’ i nabi dau, om a’ pinadul i boros dau. Om alaid noddi om kotogod no kopio o TUHAN diyolo’ gisom dot aiso’ no o ralan diyolo’ do midu’ do mantad id kototogod do TUHAN. ¹⁷ Om binsuhuo’ nod TUHAN i raja’ do Babil do mongoi panangod diyolo’. Om pimpatayo’ no di raja’ i tulun do Yohuda dit ongomulok po, om iri nogi’ i tulun di hiri’d suang di Walai’d Sasambayangan dot Agayo. Om iso’ pod tulun nga’ aiso’ no o ninsianan dau, do molohing tuu ko’ omulok, om kusai tuu ko’ tondu’ ko’ iri po i kitoruol ko’ it aiso’ o toruol. Patahako’ ngai’ nopo iyolo’d Kinorohingan dot id raja’ do Babil. ¹⁸ Om iri ngai’ i pakakas do Walai’d Sasambayangan dot Agayo, om i konunu-nunuan dit angagayo o gatang, om i dapu’ di raja’ om i dapu’ di pagawai dau, nga’ nanu ngai’ nopo di raja’ do Babil om igitai no dau do hilo’d Babil. ¹⁹ Om habao’ no dau i tolig do bandar do Yorusalim, om tutudai no i bandar, om nokotonggoi ngai’ diri i Walai’d Sasambayangan dot Agayo om koinsanai di walai’d raja’ do mogitonggoi-tonggoi di konunu-nunuan dit angagayo o gatang di hiri’d kawalayan do raja’. ²⁰ Om iri nopo i rayat dit a’ nangapatai om tinanggayan do hilo’d Babil. Om hilo’ no iyolo’ do nosiliu’d turipon dau om nosiliu do turipon di sinakagon dau do gisom do norikot i maso do pomorintaan do raja’ do Porsia. ²¹ Om iyo noddi do nongosiliu i pinoboros do TUHAN di pinolombus di Yoromia, do poillogos tomod nopondo i pomogunan do solinaid do turu’ nohopod o toun do maan do poningolon di piro-piro o toun do Sabat dit a’ pinadul di gulu po. ²² Tontok di sontoun nogi’ i Koris i raja’ do Porsia do momorinta’, om wonsoyo’ nod TUHAN i pinoboros dau do pinolombus di Nabi Yoromia. Om binsuhuo’ nod TUHAN i Koris do popoboros do boros diti di binasa’ dot id pointongkop do pomorintaan dau. Poingkaa i pinoboros dau, ²³ ’’Poingkaa no o boros di Koris, i raja’ do Porsia! TUHAN no, i Kinorohingan do momorinta’ do surga, o pinoposiliu doho’d raja’ do pointongkop diti pomogunan, om sinuhu’ oku dau do momonsoi di walai dau do hilo’d Yorusalim, i hilo’d watas do Yohuda. Om mositi’ nod gumuli’ ngai’ kou’d hilo’, iyokoyu ngai’ i tulun do songonuon do Kinorohingan! Om maha’ daa om woyoon kou’d TUHAN, i Kinorohingan dokoyu,’’ ka.