1 TIMOTIUS

1 TIMOTIUS

¹ - ² Oi Timotius, i tanak kopio ku dot id suang do Tuhan! Iti nopo surat diti om mantad id doho’, i Paulus, i nosiliu do rasul di Kristus Yesus, do tuminanud di pinonuhuan do Kinorohingan, i Gampamasi dati’, om tuminanud di pinonuhuan di Kristus Yesus, i pagandasan toko’. Pokionuon ku no dot onuan ko’d Kinorohingan Tapa’ om i Kristus Yesus, i Tuhan toko’, do barakat, om kosianan, om kosimbayanan do ginawo. ³ Orohian oku do mundorong ko nopo do hilo’d Iposus do miagal di pinoboros ku diya’ do tontok di minongoi oku do hilo’d Makidunia. Tu’ haro o piro-piro tulun di popintuduk do ponudukan dit a’ otopot do hilo’d Iposus. Om mositi’ no do tingkodon nu iyolo’ do popintuduk diri. ⁴ Om sunudan no iyolo’ do magada’ di totongonon om i susui-susui do pasal do sinolusukan dit a’ opupus-pupusan. Iri ngai’ nopoddi om popoimbulai nod pogitatagadan, om a’ i’ popoburu’ di natantu’ mantad do Kinorohingan do wonsoyon dau. Tu’ osuhutan nopo i natantu’ mantad do Kinorohingan do wonsoyon dau’ddi om otumbayaan toko’ dau. ⁵ Koponosihatan ku nopodti nga’ orohian oku do kaanu o tulun do ginawo dit olidang, om kopurimanan do ginawo dit osonong, om kotumbayaan dot ogirot dot id Tuhan, om milo indo iyolo’ do mogiinsian-sian do sompi’ ko’ iyolo’ ngai’. ⁶ Haro no o piro-piro tulun dit a’ iyo’ddi o kowoyo-woyoon, om napalid iyolo’ dot id pogisosongkiwalan dit aiso’ o kotutuk-tutukon. ⁷ Om orohian daa iyolo’ do sumiliu’d guru do Tourat, nga’ a’ i’ iyolo’ kosuhut di boros di popimboroson diyolo’, om a’ kosuhut di pokotopoton kopio diyolo’. ⁸ Oilaan toko’ i’ dot osonong i Tourat, ondung koontok o panananud diri. ⁹ Om mositi’ no do sorohon dot iri nopo toturan om okon i’ ko’ i tulun dot osonong o kinapamansayan, suwai ko’ i tulun di tumolibamban do toturan, om i tulun dot araat, om i tulun dit a’ otumbayaan do Kinorohingan, om i tulun di momonsoi’d dusa, om i tulun dot aiso’ o tugama’; om i tulun di dom pomogunan o kowoyo-woyoon, om i tulun di mamatai do tina’ om tapa’ dau, om koinsanai’d tulun di gampamatai, ¹⁰ om i tulun di magampahu’, om i magampahu’ dot oiyo ko’ kusai, om i mononggoi’d tulun dot araat o kapananggayan, om i goudut; om i mingudut do tontok do sumiliu’d sasi’; om isai nopo i mingwonsoi dit a’ miontok do ponudukan dit otopot. ¹¹ Om iri nopo i ponudukan dot otopot diri om id suang di Habar dot Osonong, i mantad id Kinorohingan di kikagayaan om it apatut do royohon. ¹² Mongunsikou oku no di Kristus Yesus, i Tuhan toko’. Iyau no i minanahak doho’ do kokorisan do momonsoi’d karaja’ dau, om pinosorupai oku dau do momonsoi do karaja’dti, ¹³ do mulong piya do minongindaraat om minonginggorit oku, om minomohingi-hingi oku dau di gulu po. Nga’ ninsianan oku id Kinorohingan, tu’ tontok nopoddi om a’ oku po nokotutun om a’ oku notumbayaan di Yesus Kristus, om a’ oku iddi kosuhut di pingwonsoyon ku. ¹⁴ Nga’ tinuntugan oku i’ di Tuhan do kosianan dau dit agayo kopio. Om nonuan oku dau do ginawo di milo dot otumbayaan dau om osianan do koinsanai’d tulun. Om pinatahak i’ dot id dati’ ngai’ i komiloo’ diri, iyati’ i nokoiso’ no dot id Kristus Yesus. ¹⁵ Otopot i’ kopio o boros diti — om ka pogi’ dot apatut do romiton om ponongkuyaanan kopio —, ’’Ruminikot i Kristus Yesus do hiti’d pomogunan do mongoi pamasi di tulun di kidusa,’’ ka. Om iyoho’ no i tulun di kidusa dit araat no kopio. ¹⁶ Nga’ iri nogi’ o kinoponginsianan do Kinorohingan doho’, om milo i’ do Kristus Yesus do pointalangon kopio i kolonuto’ do ginawo dau dot id doho’, iyoho’ i tulun dit agayo kopio o dusa. Om iti no ot osiliu dot iso’ o poiyaan dot id koinsanai’d tulun dit otumbayaan dau do koimbagu om i kaanu do koposion dit otopot kopio om i poingompus. ¹⁷ Om apatut no do suahon om royohon kasai’ o Kinorohingan, i Raja’ do gisom do poingompus, tu’ iyau nopo om aiso’ i’ o kopupuson, om a’ okito om iso-iso’! Amin. ¹⁸ Oi Timotius, i tanak ku! Patahakon ku nopo dot id diya’ iti karaja’ diti, do tumanud di boros do Kinorohingan di pinolombus di piro-piro nabi dot id suang do sidang do pasal diya’. Om iri no i boros diri o sumiliu’d rapo-rapo nu do tontok do sumaap ko dot id suang di pisaapan dit osonong. ¹⁹ Igitan no kopio i kotumbayaan nu dit otopot do mikuwo’d osonong o kopurimanan do ginawo. Haro i’ o tulun dit a’ mamadul do kopurimanan do ginawo diyolo’, om gowoi poddi om naraag o kotumbayaan diyolo’. ²⁰ Id pogialatan nopo diyolo’ om i Himonius om i Aliksandor. Iti nopo duwo o tulun diti om nohukuman ku no, do pinomohukum ku nopo om pinatahak ku iyolo’ dot id Rogon, om minsingilo indo iyolo’ do tumingkod do mongindaraat do Kinorohingan.

¹ Id gulu nopo kopio, om pokionuon ku kopio do sumambayang kou do bagi’d tulun do suwai, om sumambayang kou do mokianu kopio do mikuwo’d mongunsikou dot id Kinorohingan, do koinsanai’d tulun o sambayangan; ² om sambayangan ngai’ i raja’ om koinsanai’d tulun di momorinta’. Om pokionuon no dokoyu dot osimbayan toko’ do momogun-mogun om momusou toko’ do Kinorohingan om osonong o kowoyo-woyoon toko’. ³ Iri no it osonong om i kohubayaan do Kinorohingan, i Gampamasi dati’. ⁴ Korohian nopo dau om apasi ngai’ o tulun om kongoilo iyolo’ dit otopot. ⁵ Tu’ iso’ noo o Kinorohingan, om iso-iso’ i momialatan do Kinorohingan om tulun, iri no i Kristus Yesus. ⁶ Iyau no i pinapatahak do tinan dau do popoidu’ do koinsanai’d tulun do mantad id toinsanan do dusa diyolo’. Om iri no o kointalangan kopio do pinointalang do Kinorohingan dot orohian iyau do mamasi do koinsanai’d tulun do tontok di maso di natantu’ mantad. ⁷ Om iri no o kinoponuhuan dau doho’ do kumaa do hilo’d tulun dit okon ko’ Yohudi do mongoi poposusui di habar do pasal do kotumbayaan dit otopot. Iti nopo poboroson ku’dti om otopot i’, om a’ oku i’ mongudut. ⁸ Om pokionuon ku no do sumambayang o tongokusai do hinonggo nopo do mikuwo’d olidang o ginawo, om a’ tumogod om a’ mogisosongkiwal. ⁹ Om tongoondu’ nga’ pokosuhat-suhatanon nopo o pomolumis do tinan om mamakai do pakayan dit osonong om it apatut. Om a’ i’ posuwayon kopio o ponunudai do tobuk do gisom dot a’ osonong dot okito, om a’ manampakai do tamas ko’ mutiara’ do maan do pongillumis, om a’ manampakai do pakayan dit adalaan kopio kamahal. ¹⁰ Suwai ko’, osonong nogi’ do lumison o tinan dot i wowonsoyon dot osonong o pongillumis, do miagal dit apatut do wonsoyon do tondu’ dit otorodok do sumambayang dot id Kinorohingan. ¹¹ Tongoondu’ nopo om mositi’ no do mihuboyo-boyo’ do tontok di minsingilo om a’ apatut do minghiyo. ¹² Om a’ oku i’ pabanar do tongoondu’ do monuduk ko’ momohuruan po do tongokusai; iyolo’ nopo om mositi’ no dot a’ nopo mimboros. ¹³ Tu’ iri nopo gulu wonsoyo’ om i Adam i’, om wonsoyo’ nogiddi i Hawa. ¹⁴ Om okon i’ ko’ i Adam o notipu’, suwai ko’ i tondu’, om gowoi poddi om nokotolibamban iyau di pinonuhuan do Kinorohingan. ¹⁵ Nga’ iyo piya’ddi, nga’ apasi indo o tongoondu’ dot i mogkosusu o kapasi-pasi, ondung osiriba’ no o ginawo dau do monongkuyaan kasai’ do Kristus, om osianan kasai’ do tulun do suwai om patahakon dau dot id Kinorohingan o koposi-posion dau.

¹ Otopot i’ kopio iti boros do poingkaa, ’’Iri nopo tulun dit orohian do sumiliu’d boyoon do sidang, om orohian no do karaja’ dit osonong kopio,’’ ka. ² Iri nopo tulun di sumiliu’d boyoon do sidang om mositi’ no do tulun dit aiso’ o kabara-barasan, om iso’ noo o sawo, om kopusus do korohian do tinan dau, om milo’d momusorou, om osinondot o kowoyo-woyoon; om orohian do papasalakoi do tulun dot id walai dau, om milo’d monuduk do tulun; ³ om okon i’ ko’ i tulun di magagauk, ko’ iri po i monokisongkiwal nopo, suwai ko’ mositi’ no do tulun iyau dit alamaya’ o kowoyo-woyoo’ om orohian do monokiulud, om a’ i’ iyau koino-ino dot adalaan do rumohian do tusin. ⁴ Om mositi’ no do milo iyau do mongulud kosonong-sonong di sompiiyon dau, om monuduk do tangaanak dau do mumboyo’ om momusou dau. ⁵ Tu’ ondung a’ o tulun milo do mongulud do dau’d sompiiyon, om poingkuro daa’ndo iyau do milo do mongulud do sidang do Kinorohingan? ⁶ Tulun nopo di silihon do boyoon do sidang om a’ i’ koino-ino do tulun di wagu po kosiliu’d Kristian, tu’ minggayo-gayo dotindo iyau, om apapalan nondo do miagal di Rogon di gulu po. ⁷ Om mositi’ no do tulun iyau di pusohon do tulun dit id soliwan piya do sidang; tu’ ondung amu’, nga’ indaraaton indo iyau’d tulun, om gisom do kosulung iyau do lawa’d Rogon. ⁸ Om iri tulun do silihon do palayan dot id sidang nga’ mositi’ nogi’ do tulun dit osonong om it otulid o ginawo; om a’ adalaan do rumohian do tusin om a’ orohian do mindala’ do monginum do waig dot anggur. ⁹ Om mositi’ no do gumirot kopio iyolo’ do mikuwo’d osonong o kopurimanan do ginawo dot id ponudukan di ponongkuyaanan do dong Kristian di nokointalang do Kinorohingan. ¹⁰ Mositi’ no do toinuon po mantad iyolo’, om kointalang pondo dot aiso’ o kabara-barasan diyolo’, om milo nogindo iyolo’ do silihon do palayan dot id sidang. ¹¹ Om sawo diyolo’ nga’ mositi’ no do tulun dit osonong, om okon i’ ko’ it orohian do mimboros do kowoyo-woyoo’ do tulun do suwai. Om mositi’ no do koporinta’ iyolo’ do ginawo diyolo’, om otulid o wonsoyon dot id suang do nunu nopo. ¹² Om tulun nopo di palayan dot id sidang om mositi’ no dot iso’ noo o sawo. Om mositi’ no do milo iyau do mongulud kosonong-sonong di tangaanak om i sompiiyon dau. ¹³ Iri nopo tulun dit osonong o pomomonsoi di karaja’ diyolo’ dot id sidang, om pusohon indo om muhang-ruhang o kasangango’ do popinsusui di kotumbayaan dau dot id Kristus. ¹⁴ Mogondos oku nopo do koongoi oku do hino’d diya’ dot oruhai. Nga’ iyo piya’ddi, nga’ tulison kasai’ ku po iti surat dot id diya’, ¹⁵ tu’ alaid oku nopod koongoi, om koilo mantad ko po do kowoyo-woyoo’ do koposi-posion toko’ dot id suang do sompiiyon do Kinorohingan, iri no i sidang do Kinorohingan di poimpasi. Om iti no sidang o miagal do torigi do papapanggor om i momogompi’ kopio di ponudukan dot otopot do mantad id Kinorohingan. ¹⁶ Aiso’ no o songulun piya do milo’d mogolim do kogoyoo’ do tonsi do ponudukan diti tugama’ toko’ do poingkaa: Minintalang iyau dot id koinsanai’d tulun, om pinokotopot iyau di Rusod do Kinorohingan, om nokito iyau do moloikat. Pinopinsusui dot id koinsanai’d bansa’ o habar do pasal dau, om kinotumbayaan iyau do tulun do pointongkop do hiti’d pomogunan, om pinoinsawat iyau do hilo’d surga.

¹ Om oingod no kopio i pinoboros di Rusod do Kinorohingan, do koimbagu nopondo om haro nondo o piro-piro tulun do magada’ di kinotumbayaan diyolo’, om mogolim iyolo’ do Kristus. Om mumboyo’ nogindo iyolo’ di rusod di mamalid om tumanud do ponudukan di rusod dot araat, ² i popinsusuyon do tulun di goudut om i minsorupai-rupai no toomod. Om a’ no kotutun dit araat ko’ it osonong o kopurimanan do ginawo do tulun do miagal diri. ³ Monuduk iyolo’d tulun dot a’ koino-ino do kumawin om a’ koino-ino do mangakan do piro-piro o taakanon di natantu’ mantad. Nga’ kinapamansayan nopod Kinorohingan do taakanon om maan nogid kanon di tulun di notumbayaan do Kristus om i nokoilo kopio di ponudukan dot otopot do mantad id Kinorohingan, do kopongunsikou iyolo’d Kinorohingan diri. ⁴ Koinsanai di winonsoi do Kinorohingan om ongosonong ngai’ i’ om aiso’ i’ o tiso’ po do pokososomuon ondung rinamit no do mikuwo’d ounsikou dot id Kinorohingan. ⁵ Tu’ iri no i barakat do mantad id Kinorohingan om i sambayang o pokolidang di taakanon diri. ⁶ Ondung potudukon ngai’ nu’ri dot id tulun dit oiyo dot iso-iso’ o kinotumbayaan, om osiliu ko no do susuhuon do Kristus Yesus dit osonong. Om ponuon kasai’ no o ginawo nu do boros do Kinorohingan di kotumbayaan toko’, om ponuon do koinsanai di ponudukan dit otopot, i tinanud nu do solinaid diti. ⁷ Insodu’ no do mantad id koinsanai di totongonon dit a’ momusou’d Kinorohingan, tu’ aiso’ i’ o guna’ddi. Nga’ mintingubas nogi’ do sumambayang. ⁸ Sasais nopod tinan om a’ i’ kosongkuro no o guna’, nga’ sasais nopo di don rusod om kiguna’ ngai’ i’, tu’ iri nopo om kibatos do manahak do koposion do dinondo om koposion do koimbagu. ⁹ Om otopot i’ kopio iri om apatut do romiton om ponongkuyaan kopio. ¹⁰ Om iri no o kopinghuyanan om katatasan toko’ do kumaraja’, tu’ mogondos toko’ i’ kopio do Kinorohingan di poimpasi; om iyau no o Gampamasi do koinsanai’d tulun, om okon-okon po om i tulun dit otumbayaan. ¹¹ Potudukon ngai’ nori, om suhuon ngai’ no o tulun do tumanud diri. ¹² Kada’ pologoso’ do haro o tongoiso’ pod tulun do popoinsiriba-riba’ diya’ dot ino tomulok ko po o kopoinsiriba-ribaan. Nga’ sumiliu no do poiyaan dit osonong, dot omitanan di tulun di nongotumbayaan, dot id suang do koboro-boroso’ nu om kowoyo-woyoon nu, om id suang do kosianan nu do koinsanai’d tulun om id suang do kotumbayaan nu dot id di Yesus Kristus, om id suang do koposi-posion nu dit olidang. ¹³ Om daamot nopo dot a’ oku po korikot, om mositi’ no do pakayon nu o maso om koporuo’ nu do mambasa’d Buuk do Kinorohingan do parangahan do koinsanai’d tulun, om mongodsuur om monuduk diyolo’. ¹⁴ Kada’ popioling-olingo’ do mamakai i nipuhawang do mantad id Rusod do Kinorohingan, i nakatahak dot id diya’ do tontok di sinukabayan ko di piro-piro o boyoon do sidang, om di pinolombus di piro-piro o nabi i bilin do Kinorohingan do pasal diya’. ¹⁵ Koiso-isoon no kopio o ginawo do momonsoi ngai’ddi om okito ngai’ indo’d tulun o kouruton nu. ¹⁶ Antaan-taan no o kowoyo-woyoon nu om ponudukan nu. Om tumorodok no kopio do momonsoi ngai’ddi, om apasi nu indo o diya’d tinan om apasi i tulun di korongou diya’.

¹ Kada’ togodo’ i tulun dit otuo ko’ iya’, suwai ko’ angatan nogi’ iyau do mokinongou’d boros nu dot iyo ko’ tapa’ nu iyau. Om iyoon nod tobpinai nu i kusai dit ongomulok po, ² om iyoon nopo do tina’ i tongoondu’ di molohing no. Om i tongoondu’ dit ongomulok po nga’ iyoon nopo do tobpinai nu’d tondu’, do mikuwo’d osonong om olidang o kowoyo-woyoon nu dot id diyolo’. ³ Pusohon no i tongoondu’ do nopuadan dit obulun-bulun kopio. ⁴ Nga’ ondung haro o tangaanak ko’ i monongodu’ do tondu’ di nopuadan diri, om iyolo’ no it apatut kopio do poguluonon do popopuriman dot apatut iyolo’ do momogompi’ dit id suang do sompiiyon diyolo’, om iyolo’ it apatut do monomuli’ do kosianan di molohing om i todu’ diyolo’ddi. Tu’ iri no o korohian do Kinorohingan. ⁵ Iri nopo tondu’ do nopuadan dit otopot kopio dot obulun-bulun, om it aiso’ kopio o tulun do suwai do momogompi’ dau, om i mogondos pod Kinorohingan, om monongodou nopo om mogkosuaban iyau do sumambayang dot id Kinorohingan do mokitulung dau. ⁶ Nga’ iri nopo tondu’ do nopuadan dit orohian nod minsimbayan, om napatai no do mulong piya daa do poimpasi iyau. ⁷ Om polombuson no dot id diyolo’ iti ponudukan diti, om aiso’ indo o bohiton do koposi-posion diyolo’. ⁸ Nga’ ondung haro o tulun dit a’ momogompi’ di tobpinai dau, om okon-okon po om i dau’d sompiiyon, om mogolim no o tulun diri di kotumbayaan dau; om araat po iyau ko’ i tulun dit a’ notumbayaan. ⁹ Iri no i tongoondu’ do nopuadan di miagal diti o kowoyo-woyoo’ o koino-ino do potulison o ngaran do hiri’d potutulisan do ngaran do tongoondu’ di nopuadan: it a’ osiriba’ ko’ onom nohopod o toun, om it insan noo kakawin di gulu po, ¹⁰ om it abantug do mingwonsoi dit osonong, do miagal ko’: osonong o pinomogompi’ dau di tangaanak dau do gisom do nakagayo iyolo’, om papasalakoi iyau do sompogunan do hiri’d walai dau, om mogobi-obi’ iyau di tulun dot oiyo dot iso-iso’ o kinotumbayaan, om monulung iyau di tulun dot osusa’, om iso- iso’ kopio o ginawo dau do momonsoi do koinsanai’d nunu nopo it osonong. ¹¹ Kada’ potuliso’ o ngaran di tongoondu’ do nopuadan dit ongomulok po. Tu’ ondung a’ diyolo’ opusus o korohian do tinan diyolo’, om mokikawin indo iyolo’ kawagu, om tumongkiad nondo iyolo’ do Kristus. ¹² Om kasala’ nondo iyolo’ tu’ a’ i’ diyolo’ sulungon i batos diyolo’ dot id Kristus di timpuun i’. ¹³ Om kawagu po nga’ magayi’ no iyolo’d maso do mongoi pinsongkoduwo dot id dombokon. Om iri no it araat ko’ iri, om i mintingubas iyolo’ do mongindaraat do ngaran do tulun do suwai om orohian do mongoi hompit do hal do tulun do suwai om mimboros dit a’ apatut do pimboroson. ¹⁴ Om iri no o kabarasan ku dot orohian oku nogi’ do kakawin kawagu i tongoondu’ do nopuadan dit ongomulok po, om kianak indo iyolo’ om kopomogompi’ iyolo’ di sompiiyon diyolo’, om aiso’ indo o paantakan di piro-piro o pisangod toko’ do mongindaraat do ngaran toko’. ¹⁵ Tu’ haro i’ o piro-piro tongoondu’ di nopuadan do napalid tu’ tuminanud iyolo’ di rusod dot araat. ¹⁶ Nga’ ondung haro o tondu’ di Kristian, do haro o tondu’ di nopuadan dot id sompiiyon dau, om mositi’ no do tulungon dau i tondu’ di nopuadan diri; om a’ i’ apatut do pologoson dot i sidang o momogompi’ dau. Om koponulung indo i sidang di tongoondu’ do nopuadan dit aiso’ kopio o tobpinai. ¹⁷ Iri nopo boyoon do sidang dit osonong o pomomonsoi di karaja’ dau, om apatut i’ dot onuan do gadsi’ dot induwo kogumu’ ko’ i natantu’ mantad, om okon-okon pondo om i tulun dit aparu’ do monusui do boros do Tuhan om aparu’ do monuduk. ¹⁸ Tu’ nokotulis no dot id suang do Buuk do Kinorohingan o poingkaa, ’’Iri nopo sapi’ di maso do mongulok do gandum do manantag di linsou di gandum do hiri’d rawo, om a’ i’ apatut do kakangan,’’ ka. Om haro po o poingkaa, ’’Iri nopo tulun di kumaraja’, om apatut i’ do kaanu di gadsi’ dau,’’ ka. ¹⁹ Kada’ ponongkuyaai do pononondos di papasala’ do boyoon do sidang, ondung a’ no haro o duwo tulun ko’ lobi ko’ iri do sasi’ do popotopot diri. ²⁰ Iri nopo tulun di kowonsoi’d dusa, om mositi’ no do pointalangon i dusa dau om nosihatan dot id toguang do koinsanai’d tulun do hiri’d sidang, om ooris indo i wokon. ²¹ Om pokionuon ku no kopio, dot id toguang do Kinorohingan, om id toguang do Kristus Yesus, om id toguang di moloikat di nongopili’, do tonudon kopio nu o koinsanai’dti ponudukan, om a’ popoinggayo-gayo di diya’d osorou dot id isai nopo o tulun, om a’ momogibang-gibang. ²² Kada’ kolomus kopio do monukabai dot isai nopo o tulun do popogirot do nosiliu iyau do tulun di momonsoi’d karaja’ di don Tuhan. Om ondung kowonsoi’d dusa o tulun do suwai om kada’ ongoi hompit diri. Om antaan-taan no o kowoyo-woyoon nu om olidang i’ kasai’. ²³ Kada’ nondo sompipio’ kopio o waig dot inumon nu; suwai ko’ monginum no dot ongokooro’ do waig dot anggur, om osonong i’ ot id suang do tian nu; om i maki-sakit ko nopo o koponginuman diri. ²⁴ Dusa nopod wookon do tulun, om oilaan no do tontok piya dit a’ po obutusan. Nga’ dusa nod tulun do suwai om oilaan nopo om alaid. ²⁵ Om iyo nogiddi tu’ i winonsoi dot ongosonong nga’ okito i’ kopio. Om iri piya it a’ daa okito no, nga’ a’ i’ poillisok kasai’.

¹ Iri nopo tulun do Kristian di nosiliu’d turipon, om mositi’ no do momusorou dot apatut i’ do suahon diyolo’ i tuan diyolo’, om a’ i’ o tulun milo do mongindaraat do ngaran do Kinorohingan ko’ mongindaraat po di ponudukan toko’. ² Om iri turipon di Kristian o tuan nga’ a’ i’ koino-ino do papagaan-gaan di boros di tuan dau dot i Kristian goduwo iyolo’ o kapagaan-gaanan. Suwai ko’ apatut nogi’ do ruhangan diyolo’ o kosonongo’ diyolo’ do mogobi-obi’ di tuan diyolo’, tu’ iso-iso’ i’ o kinotumbayaan diyolo’ di tuan diyolo’, om kosianan ngai’ iyolo’. Mositi’ no do potudukon ngai’ nu’ti om ponosihaton nu. ³ Om isai nopo i popotuduk do ponudukan do suwai ko’ iti om it a’ kosokodung di ponudukan dit otopot do mantad id Tuhan toko’, i Yesus Kristus, om i ponudukan do tugama’ toko’, ⁴ om tulun nori di minggayo-gayo no toomod om aiso’ o toila-ilaan! Om a’ i’ kopio osonong o kasanangan dau tu’ orohian nopo iyau do monokisimbar-simbar om monokisongkiwal do pasal di boros do pomungaran do piro-piro o hal, gisom do moningkau do ginawo do mosol, om popoimbulai dot a’ kopogiuludan, om mogiindara-raat, om minsorou do karaaton do wokon, ⁵ om popoimbulai do kopogitatagadan dit a’ opupus-pupusan. Om pomusorou nopod tulun do miagal diri om naraag no om aiso’ no o katapatan. Tu’ sorohon daa diyolo’ do tugama’ nopo om wayaan no do kumaya’. ⁶ Otopot nogi’ kopio do manahak do kountungan dit agayo o tugama’, ondung oumbagalan no o tulun di haro dot id dau. ⁷ Tu’ aiso’ i’ o nunu-nunu do nigitan toko’ do hiti’d pomogunan, om aiso’ nogi’ o nunu-nunu do milo toko’ dot igitan do sumoliwan! ⁸ Iyo nopoddi, om ondung haro po o taakanon om pakayan, om kabagal nori. ⁹ Nga’ iri nopo tulun dit orohian do kumaya’, om abayayat i’ om oburunsut di mogisuayan o korohian di dongkababasug om i karaag. Om iri no i korohian do miagal diri o mamaraag om mamatai do tulun. ¹⁰ Tu’ iri no i korohiano’ do tusin o tadon do mogisuayan o karaaton. Haro i’ o wookon do tulun dot adalaan kopio do rumohian do tusin gisom dot a’ nondo tumanud di ponudukan do dong Kristus, om oontok nondo iyolo’ dot ogumu’ o koinggoritan di popotongob do ginawo diyolo’. ¹¹ Nga’ iya’ nopo om tulun i’ di nasanganu nod Kinorohingan. Iyo nopoddi, om mositi’ no do minsodu’ ko do mantad id koinsanai’ddi. Om tumotos no do sumiliu’d tulun dit otopot dot id pagantangan do Kinorohingan, i sumambayang dot id Kinorohingan, om it otumbayaan do Kristus, om osianan do koinsanai’d tulun, om alanut o ginawo dot id suang do koinggoritan, om alamaya’ o kowoyo-woyoo’. ¹² Tumotos no kopio do tumanud di kowoyo-woyoon do dong Kristian om kaanu ko i’ di hodia’, iri no i koposion dit otopot kopio om i poingompus. Tu’ iri no o kinapamalahawan do Kinorohingan diya’ do tontok di nakun nu dot id toguang do tulun dot ogumu’ dot otumbayaan ko di Kristus. ¹³ Om dinondo nodti, dot id toguang do Kinorohingan, i manahak do pinuhobo dot id koinsanai’d nunu nopo, om id toguang di Kristus Yesus, i pinopoboros dit otopot dot id di Pontius Pilatus, om suhuon ku iya’ do ¹⁴ tumanud ngai’ di ponuhuan diri do mikuwo’d olidang om aiso’ o kabara-barasan do kowoyo-woyoo’ do gisom dot orikot i tadau do gumuli’ kawagu i Tuhan toko’, i Yesus Kristus. ¹⁵ Om tontuon indod Kinorohingan i maso do korikatan di Kristus do tumanud di maso di natantu’ mantad dau. Om iyau noo o Pomorinta’; om abantug iyau, om Raja’ do koinsanai’d raja’; om Tuhan do koinsanai’d tuan. ¹⁶ Iyau noo it a’ aala’ do kuasa’ do kapatayon; om poimpasi iyau dot id suang di tanawau dit a’ milo’d insamakan dot isai nopo. Aiso’ i’ o tiso’ pod tulun do nokoumbal do nokokito dau, ko’ milo po do montong dau. Om iyau no ot onuan do pangkat om kuasa’ do gisom dot alaid! Amin. ¹⁷ Om nosihatan no i tulun do kaya’ do hiti’d pomogunan dot a’ minggayo-gayo om a’ sumondiu di konunu-nunuan di milo’d tumanus — do miagal ko’ i kakayaan. Apatut nogi’ do sumondiu iyolo’ dot id Kinorohingan, i papatahak do koinsanai’d nunu nopo dot id dati’ do mikuwo’d a’ aayi-ayi’, om kopuriman toko’ i’ do kosonongo’ddi. ¹⁸ Om nosihatan no iyolo’ do popointalang dit osonong, om kumaparu’ do momonsoi dit ongosonong, om kumopuhawang, om orohian do manahak do nunu nopo dot id tulun do suwai. ¹⁹ Om iyo noddi o ralan diyolo’ do monimung do dapu’ di sumiliu’d poimpahan dit ogirot kopio do maan do koimbagu. Om iri nondo o kaanu-anu diyolo’ do koposion dit aiso’ o kopupuson, iri no i koposion dit otopot kopio. ²⁰ Om gompion no kopio i pinaharapan diya’, oi Timotius! Om minsodu’ no di pogibara-barasan dit aiso’ o guna’, om i pogisimbar-simbaran do pasal di komoyon do ’’Toilaan’’ do sorohon do wookon do tulun di noborulong. ²¹ Tu’ haro i’ o piro-piro tulun di momoros do haro dot id diyolo’ i toilaan diri, gisom do tumongkiad iyolo’ do mantad id piro-piro o ponudukan do dong Kristian di kotumbayaan diyolo’ di gulu po. Pokionuon ku no do barakatan kou’d Tuhan, oi tobpinai-tobpinai.