1 TOSOLUNIKA

¹ Oi tobpinai-tobpinai i sidang do hilo’d Tosolunika, i nosiliu do tulun di songonuon do Kinorohingan Tapa’ om i Tuhan Yesus Kristus: Mogondos oku iyoho’ i Paulus om i Silas om i Timotius dot onuan kou’d Kinorohingan do barakat om kosimbayanan do ginawo. ² - ³ Om mongunsikou kasai’ nopo iyahai dot id Kinorohingan do koinsanai dokoyu o kounsikahan dahai. Pointikid-tikid do sumambayang iyahai dot id Kinorohingan i Tapa’ toko’, om osorou kasai’ i’ dahai iyokoyu. Om sumambayang kasai’ i’ iyahai do bagi’ dokoyu. Om osorou i’ dahai i winonsoi dokoyu do popointalang dot otumbayaan kou di Kristus, om i kosianan dokoyu dot id tulun do suwai, gisom do minongobi-obi’ kou diyolo’, om i kogiroto’ do pogogondos dokoyu dot id Tuhan toko’ i Yesus Kristus. ⁴ Oilaan no dahai, oi tobpinai-tobpinai dot osianan o Kinorohingan dokoyu om nopili’ kou no dau do sumiliu kopio do dau’d songonuon. ⁵ Tu’ poposusui iyahai diti Habar dot Osonong dot id dokoyu om okon i’ ko’ boros no toomod, suwai ko’ poposusui iyahai do mikuwo’d kuasa’ om mikuwo di Rusod do Kinorohingan. Om otumbayaan kopio iyahai di katapatan di Habar dot Osonong diri. Om koilo kou i’ di kowoyo-woyoo’ do koposi-posion dahai do maan do koinsanangan dokoyu do tontok di poinsugku’ iyahai dokoyu. ⁶ Om minomit kou di kowoyo-woyoo’ dahai om i kowoyo-woyoo’ do Tuhan. Mulong piya dot oinggorit tomod kou, nga’ otood i’ o ginawo dokoyu do ruminamit di habar di pinosusui dahai dokoyu. Tu’ iri nopo i kataadan diri om pinatahak i’ di Rusod do Kinorohingan. ⁷ Om iyokoyu noddi o nosiliu do poiyaan do koinsanai do tulun do Kristian di hilo’d Makidunia om i hilo’d Akaya. ⁸ Tu’ iyokoyu no o tadon di habar do pasal do Tuhan do tuminongkop do hilo’d Makidunia om hilo’d Akaya, om okon i’ ko’ iri noo; suwai ko’ i habar do pasal do kotumbayaan dokoyu dot id Kinorohingan nga’ nokotongkop nogi’ do hinonggo-honggo nopo, gisom dot a’ no iyahai minog do popimboros do nunu-nunu. ⁹ Oinsanan nopo i tulun diri do popimboros do pasal do kowoyo-woyoo’ dokoyu do minamaramit dahai, di nokorikot i’ iyahai do hiti’d dokoyu di gulu po. Om popimboros nogi’ iyolo’ ondung poingkuro kou do tuminongkiad di tingolig. Om ruminikot kou’ddi dot id Kinorohingan dit iso’ noo, i poimpasi, om sumambayang kou’ddi dot id dau. ¹⁰ Om pinopimboros nogi’ diyolo’ o pasal do kowoyo-woyoo’ dokoyu do mogondos do korikatan di Tanak do Kinorohingan do mantad hilo’d surga, iri no i Yesus i pinasi kawagu do Kinorohingan do mantad id kapatayon. Om i Yesus no o pinopoidu’ dati’ do mantad id katagadan do Kinorohingan di rumikot do sumonu’.

¹ Oi tobpinai-tobpinai! Koilo kou i’ dot okon i’ ko’ maan toomod dahai i kinaangayan dahai do hino’d dokoyu. ² Oilaan i’ dokoyu do tontok dit a’ po iyahai nokorikot do hino’d dokoyu do hino’d Tosolunika, om noinggorit no iyahai om noindaraat di hilo’ po iyahai’d Pilipi. Nga’ mulong piya dot ogumu’ o tulun do sumaap dahai, nga’ nonuan i’ iyahai’d Kinorohingan do kosioho’ do poposusui dot id dokoyu di Habar dot Osonong di mantad id Kinorohingan. ³ Tu’ okon i’ ko’ momorulong dokoyu i pinangangatan dahai, om okon ko’ haro o tosorou dahai dit a’ osonong ko’ monipu’ po iyahai. ⁴ A’ i’ kopio! Okon i’ ko’ momoros iyahai do poposonong no do ginawo’d tulun, suwai ko’ poposonong iyahai do ginawo’d Kinorohingan, i mongilo kopio do ginawo dahai. Tu’ iyahai nopo om pinosorupai do Kinorohingan do popinsusui diti Habar dot Osonong. ⁵ Oilaan i’ dokoyu dot a’ i’ iyahai nokoumbal do popimboros di pomolumbok nod ginawo ko’ pinopimboros po di boros di pangalit no di katamahao’ dahai. Om Kinorohingan no o sasi’ diti. ⁶ A’ i’ iyahai tuminotos do mokimoroyo-royohon do tulun — dot iyokoyu tuu o mamarayou ko’ tulun pod suwai. ⁷ Otopot nopo kopio om milo i’ daa iyahai do mokianu dokoyu do nunu nopo, tu’ rasul i’ iyahai di Kristus. Nga’ alamaya’ i’ o kowoyo-woyoo’ dahai tontok di poinsugku’ iyahai dokoyu, do miagal do tina’ do momogompi’ di tangaanak dau. ⁸ Om okon nopo ko’ kosodia’ no iyahai do papatahak dot id dokoyu di Habar dot Osonong do mantad id Kinorohingan, suwai ko’ koposion piya dahai nga’ patahakon i’ dahai dokoyu tu’ osisianan iyahai dokoyu. ⁹ Atantu’ no dot osorou i’ dokoyu i huyan dahai do tuminotos tomod do kuminaraja’. Om a’ nopo iyahai otingkod do kuminaraja’ do tadau om totuong, om a’ i’ iyahai nokoponusa’ dot ongoiso’ piya o tulun dot id pogialatan dokoyu do tontok di pinoposusui iyahai dot id dokoyu di Habar dot Osonong do mantad id Kinorohingan. ¹⁰ Kowoyo-woyoon nopo dahai om olidang i’ om otopot, om aiso’ o kasalaan dahai dot id dokoyu, i nongotumbayaan do Kristus. Om iyokoyu no om Kinorohingan o sasi’ dahai. ¹¹ Oilaan i’ dokoyu do kowoyo-woyoo’ nopo dahai dot id dokoyu om miagal no do kowoyo-woyoo’ do tapa’ dot id tangaanak dau. ¹² Om minonosihat iyahai dokoyu om minongodsuur iyahai dokoyu om minonuhu’ kopio iyahai dokoyu do momit do kowoyo-woyoo’ do miagal diri om kohubayaan kou indo do Kinorohingan. Tu’ nolohou kou nod Kinorohingan do kaanu’d bahagi’ do hiri’d Pomorintaan dau om i kagayaan dau. ¹³ Om haro po o suwai do mominsuhu’ dahai do mongunsikou dot id Kinorohingan. Iri nopo i kounsikahan dahai’ddi om i minokinongou kou om ruminamit kou di habar diri do tontok di nokosusui dahai iri dot id dokoyu, om rinamit dokoyu i habar diri do miagal do habar do mantad kopio id Kinorohingan om okon i’ ko’ habar do mantad id tulun. Om iyau no i maso do pakaraja’ dot id suang do ginawo dokoyu, i nongotumbayaan do Kristus. ¹⁴ Iri nopo i nongoumbalan dokoyu’ddi oi tobpinai-tobpinai, om nongoumbalan no di piro-piro o sidang do Kinorohingan di hilo’d Yudia, i sidang di nasanganu do Kristus Yesus. Nokoumbal kou no do noinggorit di tulun do mantad id bansa’ dokoyu, do miagal di noumbalan di sidang do Kinorohingan di hilo’d Yudia tu’ noinggorit do tulun do Yohudi. ¹⁵ Iyolo’ no i tulun di minamatai di Tuhan Yesus om i piro-piro nabi, om i minonginggorit dahai. Iyolo’ nopo om sumaap do koinsanai’d tulun, om a’ no kopio iyolo’ kohubayaan do Kinorohingan. ¹⁶ Om mogodu nogi’ daa iyolo’ dahai do poposusui dot id tulun dit okon ko’ Yohudi di habar di kapasi di bansa’ddi. Om iyo noddi i tulun do Yohudi dot a’ otingkod-tingkod do minomoruhang di dusa diyolo’ do gisom do nopongo o kogumuo’ddi, om norotuan noddi iyolo’ do kototogod do Kinorohingan do baino’. ¹⁷ Nga’ tontok di nokotongkiad iyahai do daamot, do mantad id dokoyu oi tobpinai-tobpinai — om tinan no dahai o nokotongkiad — nga’ ginawo nopo dahai om a’ i’ nokotongkiad tu’ langadon kopio iyahai dokoyu om tumotos iyahai do mokioongoi solowot kawagu dokoyu! ¹⁸ Om kosorou i’ iyahai do mongoi ompuya’ dokoyu; om nokoumbal oku no daa iyoho’ do mongoi do hino’d dokoyu dot insan ko’ induwo’ddi nga’ naantaban oku i’ do Rogon. ¹⁹ Iyokoyu no o harapon dahai om i kataadan dahai. Tu’ ondung orikot o maso do korikatan do Tuhan Yesus om kotimbaba’ ngai’ toko’ dau, om iyokoyu no ot osiliu do kaandasan dahai. ²⁰ Atantu’ no dot iyokoyu no ot osiliu do kaandasan om kataadan dahai.

¹ Om alaid noddi om kopurimanai no dahai dot a’ no dahai opusus o ginawo dahai do langadon dokoyu. Om kosorou noddi dahai dot osonong nogi’ dot iyahai-yahai piya o poundorong do hiti’d Atina, ² om suhuon nogindo dahai i Timotius do mongoi do hino’d dokoyu. Iyau nopo om susuhuon do Kinorohingan om koruhang dahai do popinsusui do Habar dot Osonong do pasal do Kristus. Koponuhuan nopo dahai di Timotius do mongoi do hino’d dokoyu om mongoi popokoris dokoyu om mongoi pongodsuur dokoyu do gumirot kopio o kotumbayaan dot id Kristus. ³ Om aiso’ indo o tongoiso’ piya dokoyu do koluhoi dot iti koinggoritan toko’ o koluhoi. Iyokoyu nga’ koilo i’ do koinsanai di koinggoritan diri om id suang i’ do korohian do Kinorohingan dot osiliu dot id dati’. ⁴ Nokoboros mantad no dahai di poinsugku’ po iyahai dokoyu dot oinggorit toko’ nondo, om iyokoyu nga’ koilo i’ do nangabayaan no iri. ⁵ Om orohian kopio oku do koilo do kinosuruton do kogiroto’ do kotumbayaan dokoyu dot id Kristus, om iri noddi o kinoponuhuan ku di Timotius do mongoi do hino’d dokoyu. Om ooris oku dot aratu’ kou dot id pamayayat do Rogon, om gisom dot aiso’ nondo o kotutuk-tutukon di huyan dahai. ⁶ Nga’ nokoguli’ noddi i Timotius om nokosunud dau dahai o habar dit osonong kopio do pasal do kotumbayaan dokoyu dot id Kristus, om pasal do mogiinsian-sian kou. Om nokosunud nogi’ dau dahai dot osonong kasai’ o ginawo dokoyu do kosorou dahai, om mokisosolowot kou no daa dahai do miagal dahai tu’ sisolowot no dokoyu. ⁷ Om mulong poddi dot id suang iyahai do mogisuayan o kosusaan om koinggoritan, oi tobpinai-tobpinai nga’ oinsasamadan i’ iyahai do nokorongou di habar dokoyu. Iri no i kotumbayaan dokoyu dot id Kristus o nokoinsasamod do ginawo dahai, ⁸ gisom dot opurimanan noddi dahai do nokogirot kopio o ginawo dahai do nokorongou dot ogirot kasai’ kou do poingiso’ dot id Tuhan. ⁹ Agayo no kopio o kounsikahan dahai dot id toguang do Kinorohingan, dot i kataadan di nopurimanan dahai dot iyokoyu o kataadan, o kounsikahan dahai. ¹⁰ Sumambayang kasai’ nopo iyahai do mikuwo’d aayi-ayi’ o ginawo do tadau om totuong do mokianu dau, om kosolowot indo iyahai dokoyu, om oruhangan indo dahai o nunu nopo it apatut dot aanu dokoyu dot id suang do kotumbayaan dokoyu dot id Kristus. ¹¹ Maha’ daa om iwangan do Kinorohingan Tapa’ toko’, om Tuhan toko’ i Yesus, o ralan dahai do mongoi solowot dokoyu! ¹² Om pokionuon ku no do poinggoyoon do Tuhan o kosianan dokoyu dot id pogialatan dokoyu, om oruhangan indo o kosianan dokoyu dot id koinsanai’d tulun om gisom do muhang-ruhang o kosianan dokoyu do miagal do kosianan dahai dot id dokoyu. ¹³ Om pogiroton indo do Tuhan o ginawo dokoyu, om olidang kou i’ om aiso’ o kasalaan dokoyu dot id toguang do Kinorohingan i Tapa’ toko’, do tontok do korikatan di Yesus i Tuhan toko’, do miwoyo’ do koinsanai di tulun di songonuon dau.

¹ Om id tohuri nondo oi tobpinai-tobpinai, om poboroson dahai do noonuan no dahai iyokoyu dit omitanan dit osonong do pasal do kowoyo-woyoon do koposi-posion dokoyu di kohubayaan do Kinorohingan. Om otopot i’ dot iyo’ddi o kowoyo-woyoon dokoyu. Nga’ pokionuon po kopio dahai dokoyu do dinondo, dot id suang do kuasa’d Tuhan Yesus, om suhuon kopio dahai iyokoyu do momoruhang do koporuo’ dokoyu do momonsoi do miagal diri. ² Tu’ nokoilo kou no di ponudukan di pinotuduk dahai dokoyu do mikuwo’d kuasa’ do Tuhan Yesus. ³ Korohian nopod Kinorohingan om patahakon kopio dokoyu dot id dau o koposi-posion dokoyu om lumidang kou om minsodu’ do koinsanai di wowonsoyon di kagait do tampahu’. ⁴ Om apatut do koilo o pointikid-tikid do kusai do kowoyo-woyoon dau dot id sawo dau, do tumanud di kohubayaan do Kinorohingan om kohubayaan do tulun. ⁵ Om kada’ pomonsoi do nunu nopo do tumanud do korohian do don tinan dot id sawo nu, do miagal di wonsoyon di tulun dit a’ kotutun do Kinorohingan. ⁶ Om kada’ nod haro o tongosongulun piya do momonsoi’d sala’ do miagal diri dot id tobpinai dau ko’ monipu’ po dau. Nokoinsan no kopio dahai iyokoyu do hukuman nondo do Tuhan o tulun do momonsoi do kasalaan do miagal diri. ⁷ Kinapamalahawan nopod Kinorohingan dati’ om okon i’ ko’ momonsoi di kagait do tampahu’ suwai ko’ momonsoi di kohubayaan dau. ⁸ Tulun nopo dit a’ rumamit diti ponudukan diti, om okon i’ ko’ tulun ot a’ dau romiton suwai ko’ Kinorohingan i’ ot a’ dau romiton, i papatahak do Rusod dau dit olidang dot id dokoyu. ⁹ Om a’ no dahai minog do tulison dot id dokoyu ondung poingkuro kou dot osianan di tulun dit iso-iso’ o kinotumbayaan, tu’ notudukan kou nod Kinorohingan do mogiinsian-sian. ¹⁰ Om nowonsoi nogi’ dokoyu o miagal diri dot id koinsanai di tulun dit iso-iso’ o kinotumbayaan do pointongkop do Makidunia. Nga’ pokionuon po kopio dahai, oi tobpinai-tobpinai, dot oruhangan o kosonongo’ do kowoyo-woyoon dokoyu. ¹¹ Om tumotos kou no dot a’ minggangau, om a’ mongoi hompit do hal do tulun do suwai. Mositi’ no do kumaraja’ kou do mogihum do kaakan-akanan dokoyu do miagal di pinonuhuan dahai dokoyu di gulu po. ¹² Om ondung momonsoi kou do miagal diri, om a’ kou nondo minog do sumondiu dot id isai nopo o tulun om iri piya’ndo i tulun dit a’ otumbayaan do Kristus, nga’ momusou i’ dokoyu. ¹³ Oi tobpinai-tobpinai, orohian iyahai do koilo kopio kou do pasal di tulun di nangapatai; om a’ kou i’ tumongob do miagal di tulun do suwai dit aiso’ o pagandasan. ¹⁴ Otumbayaan toko’ i’ do napatai i Yesus om napasi kawagu iyau. Om iri no o kotumbaya-bayaan toko’ do posion kawagu’d Kinorohingan o koinsanai di tulun di nangapatai di notumbayaan di Yesus, om kosugku’ indo iyolo’ di Yesus. ¹⁵ Iti no o ponudukan do Tuhan do potudukon dahai dokoyu do pasal diri. Tontok nopod korikatan do Tuhan Yesus, om iyati’ nopo i songimpasi om a’ toko’ i’ kopogulu di tulun di nangapatai no. ¹⁶ Om moro-boros nogindo i moloikat dit agayo kopio dot opuhod om pounion i torumpit do Kinorohingan do maan do popoilo. Om lumintuhun nogindo i Tuhan Yesus do mantad hilo’d surga, om poguluonon nondo do mamasi i tulun do Kristian di nangapatai no. ¹⁷ Om poinsawaton toko’ nogindo iyati’ i songimpasi do miwoyo’ diyolo’ do hilo’d haun, do mongoi solowot do Tuhan do hilo’d tawan. Om poinsugku’ toko’ nondod Tuhan do gisom do poingompus. ¹⁸ Iyo nopoddi, om pogiodsuur-suur kou no dot iti boros diti o pongodsuur.

¹ Oi tobpinai-tobpinai, a’ no iyahai minog do monulis dot id dokoyu do popoilo ondung soira’ kopio dot angabayaan iti komoyon dahai’dti. ² Tu’ iyokoyu nga’ koilo no kopio do Tadau nopo do korikatan do Tuhan om miagal di manakau di rumikot do dongotuong. ³ Soira’ nopod moro-boros o tulun dot, ’’Ongosimbayan ngai’ i’ om aiso’ o koligagaanan,’’ ka, nga’ tontok nogiddi do sigog indo dot oontok iyolo’ do kosusaan dot agayo, om aiso’ no o tiso’ piya do tulun do kopoggidu’. Tu’ sigog i’ dot ongosiliu ngai’ iri, om a’ i’ daa insan-insanon do miagal di toruol di rumikot dot id tondu’ dit a’ no alaid dot osusu. ⁴ Nga’ iyokoyu nopo om okon i’ ko’ poimpasi dot id suang dot otuong gisom dot otigawaan kou di tadau’ddi, do miagal do korikatan do manakau. ⁵ Iyokoyu ngai’ nopo, oi tobpinai-tobpinai, om poimpasi i’ dot id suang do tanawau om poinghompit kou no dot id tanawau dit anawau kopio, om poinghompit toko’ no do poimpasi dot id suang do tanawau, om okon toko’ no ko’ id suang do totuong dit odondom. ⁶ Iyo nopoddi, om a’ toko’ no milo do modop nopo do miagal do tulun do suwai. Suwai ko’ mositi’ no do mumbangan-bangan toko’, om sumodia’ kopio. ⁷ Tu’ dongotuong nopo om modop o tulun, om dongotuong do magauk o tulun. ⁸ Nga’ iyati’ nopo om nokohompit no dot id tanawau dit anawau kopio. Iyo nopoddi, om mositi’ no do sumodia’ kopio toko’. Om mositi’ no dot otumbayaan kasai’ toko’ do Tuhan om osianan do tulun do suwai do mikuwo’d mogondos kopio do posion toko’ do Kinorohingan. Om iri no o rapo-rapo do mongintirung dati’ do tontok di sumaap toko’ do totuong. ⁹ Tu’ okon i’ ko’ hukuman o kinopomilian do Kinorohingan dati’, suwai ko’ posion dot i Tuhan toko’ i Yesus Kristus o pamasi. ¹⁰ Napatai no iyau dot iyati’ o kinapatayan om rumikot nopondo iyau kawagu — do poimpasi toko’ po tuu ko’ poimpatai po — om kosugku’ toko’ no dau. ¹¹ Iyo nopoddi, om pogiodsuur-suur kou no, om pogitulung-tulung kou no do miagal di wonsoyon dokoyu do dinondo. ¹² Oi tobpinai-tobpinai, pokionuon no kopio dahai do podulon dokoyu i tulun di kumaraja’ dot id pogialatan dokoyu; iyolo’ i nongopili’ do Tuhan do momoyo’ dokoyu om monosihat dokoyu. ¹³ Om podulon no kopio dokoyu iyolo’ do mikuwo’d osianan diyolo’ dot i winonsoi diyolo’ o kopomodulan. Om mogiuulud kasai’ kou no. ¹⁴ Om pokionuon nogi’ dahai, oi tobpinai-tobpinai, do poinsanon om nosihatan dokoyu i tulun dit akaul, om pogiroton no o ginawo di tulun di moddosi, om tulungon i tulun dit apatut do tulungon, om polonuton no o ginawo dot id koinsanai’d tulun. ¹⁵ Antaan-taan no kopio om aiso’ i’ o tulun do sumuli’ do karaaton dot it araat o ponuli’. Om tumotos no do momonsoi kasai’ dot osonong, dot id sompi’ ko’ iyokoyu ngai’ om id koinsanai’d tulun. ¹⁶ Kongotood kou no kasai’, ¹⁷ om sumambayang kasai’ kou no. ¹⁸ Om mongunsikou kasai’ kou no, do poingkuro nopo o koiyon-iyono’ dokoyu, tu’ iri no o korohian do Kinorohingan do wonsoyon dokoyu, i tulun di nokoiso’ dot id Kristus Yesus. ¹⁹ Om kada’ dokoyu antabai o Rusod do Kinorohingan. ²⁰ Om kada’ dokoyu pagaan-gaano’ i boros di mantad id Rusod do Kinorohingan. ²¹ Om toinuon ngai’ no dokoyu o nunu nopo, om tonudon no kopio dokoyu it osonong. ²² Om tongkiad kou no do mantad id koinsanai dit angaraat. ²³ Om Kinorohingan no o manahak dati’ do kosimbayanan do ginawo. Om posiliu kopio dokoyu do tulun di pointahak kopio dot id Kinorohingan o koposi-posion. Om ogompi’ kou i’ kopio do Kinorohingan, tu’ rusod om ginawo om tinan dokoyu nga’ ogompi’ i’ dau do gisom dot aiso’ o bohiton do gisom do korikatan kawagu do Tuhan toko’, i Yesus Kristus. ²⁴ Kinorohingan nopo i minomolohou dokoyu, om otorodok i’ do momonsoi do koinsanai’ddi. ²⁵ Om sambayangan no iyahai dokoyu, oi tobpinai-tobpinai. ²⁶ Mogitatabi’ ngai’ kou no do mikuwo’d osuwau do miagal do tulun do Kristian di mogiobpinai. ²⁷ Om pokionuon ku no kopio dokoyu dot id suang do kuasa’d Tuhan, do basaon dokoyu iti surat diti dot id koinsanai’d tulun dit iso-iso’ o kinotumbayaan. ²⁸ Om pokionuon ku no i Tuhan toko’ i Yesus Kristus, do mamarakat dokoyu.