1 SOMUIL

¹ Di nopo di gulu po, om haro o songulun o kusai do mantad id payat dot Ipraim, do poingiyon do hilo’d bandar do Rama, i hilo’d watas do konulu-nuluan dot Ipraim. Ngaran nopo di kusai om i Ilkana. I Ilkana nopoddi om tanak di Yoruham, om manangaki di Ilihu. Iyau nopo om poinghompit di sompiiyon di Tohu, i sompiiyon do mantad id pinuruan do sompiiyon di Sup. ² I Ilkana nopoddi nga’ duwo o sawo, i Hana om i Ponina. I Ponina nopo om kitanak i’, nga’ i Hana noo om aiso’ o tanak. ³ Pointikid-tikid do toun om tumongkiad kasai’ nopo i Ilkana do hilo’d Rama do mongoi sambayang do hilo’d Silo, om mongoi papatahak do porsombahan di sumbolion dot id TUHAN, it Agayo Kuasa’. Imam nopo do mogobi-obi’d TUHAN do hilo’d Silo om i Hopni om i Pinihas, i tangaanak di Ili. ⁴ Pointikid-tikid do mongoi i Ilkana patahak do porsombahan di sumbolion, om onuan kasai’ nopo dau do bahagi’ di daging di sinumbali’ i Ponina, om tikidan ngai’ nogi’ dau di daging do sinumbali’ i tangaanak dau. ⁵ Nga’ mulong piya do kosianan kopio daa dau i Hana, nga’ sambahagi’ noo o patahakon dau tu’ i Hana nopo om a’ i’ do TUHAN nonuan do tanak. ⁶ Om asaru’ nopoddi i Ponina i tapid di Hana diri, do pokoruol do ginawo om monori-tori’ di Hana, tu’ i Hana nopo om a’ i’ do TUHAN nonuan do tanak. ⁷ Om iyo kasai’ nopoddi do monikid toun. Pointikid-tikid do mongoi iyolo’ do hiri’d Walai’d TUHAN om pokoruol kasai’ nopo i Ponina do ginawo di Hana, gisom do mihad nopoddi i Hana, om a’ makan. ⁸ Om uhoton kasai’ nopondo di Ilkana i Hana, i sawo dau’ddi do poingkaa, ’’Hana, nokuro tu’ mihad ko? Nokuro tu’ a’ ko makan? Nokuro tu’ tumongob ko nopo? Okon toi ko’ oupus ko no doho’ ko’ mantad do hopod o tanak do kusai?’’ ka dau. ⁹ - ¹⁰ Insan tadau, di nakaakan no iyolo’ do hiri’d walai’d TUHAN do hilo’d Silo, om ingkakat no i Hana. Om tontok nopoddi nga’ poirikau i Ili, it Imam diri, do hiri’d tirikohonon dau dit id toning di wawayaan. Om maso nopoddi nga’ tumongob tomod i Hana, om sumambayang iyau dot id TUHAN do mikuwo’d mihad-ihad tomod. ¹¹ Om poboroso’ noddi di Hana o batos dau do poingkaa, ’’Oi TUHAN, it Agayo Kuasa’, ontong no doho’, i susuhuon nu. Antangai no iti koinggoritan ku. Soroho’ oku no, om kada’ oku kopio lihuwai. Ondung onuan oku daa diya’ dot iso’ o tanak do kusai om mamatos oku no do papatahak dau dot id diya’ do solinaid dau’d poimpasi. Om tobuk piya dau nga’ a’ ku i’ pampadan,’’ ka dau. ¹² Om alaid tomod i Hana do sumambayang dot id TUHAN, om poinsonsod diri i Ili do munung di Hana. ¹³ Nga’ id suang nod ginawo di Hana o sumambayang, om munung no dau o mopi-kopi, om a’ i’ orongou o boros dau. Om ondos daa’ddi di Ili do naawuk i Hana. ¹⁴ Om boros kad i Ili dot id di Hana, ’’Kada’ pagawuk do hiti! Kada’ nondo ongoi kawagu ponginum do waig dot anggur!’’ ka dau. ¹⁵ Nga’ boros ka di Hana do suminimbar, ’’A’ oku i’ aawuk, oi Tuan. A’ oku i’ minoginum do tinumon do kaawuk. Nga’ tumongob tomod oku’dti, om maso ku do sumambayang do popoboros ngai’ do kosusaan ku dot id TUHAN. ¹⁶ Kada’ oku tondoso’ do tondu’ dit a’ osonong. Tu’ iyo oku pogidti do sumambayang nga’ tumongob tomod oku,’’ ka dau. ¹⁷ Om boros kaddi di Ili, ’’Ondung iyo’ddi, om kumosonong-sonong no! Maha’ daa om pohubayaan do Kinorohingan dot Israil i pinokianu nu,’’ ka dau. ¹⁸ Om boros kaddi di Hana, ’’Maha’ daa om kohubayaan oku diya’, oi Tuan,’’ ka dau. Om poguliai noddi dau, om ongoi no akan, om a’ noddi iyau tumongob. ¹⁹ Kosuabon noddi om suab no i Ilkana om i sompiiyon dau do tuminungag. Om kasambayang poddi iyolo’ dot id TUHAN om uli’ no iyolo’ do hilo’d Rama. Om ongoi no i Ilkana dudun di Hana, i sawo dau’ddi, om simbaro’ nod TUHAN i sambayang di Hana. ²⁰ Om ponontian no i Hana om kosusu no iyau’d tanak do kusai. Om pungaranai no dau dot i Somuil tu’ boros ka dau, ’’Pinokianu ku iyau do mantad id TUHAN,’’ ka. ²¹ Om korikot noddi kawagu i maso do kaangayan di Ilkana om i sompiiyon dau do hilo’d Silo, do mongoi papatahak do porsombahan di sumbolion, i patahakon dot id TUHAN do monikid toun. Om suwai no ko’ iri om nakapamatos no i Ilkana do papatahak do porsombahan di pinotobilang. ²² Nga’ tontok nopoddi om a’ i’ i Hana minoyo’. Tu’ boros ka di Hana dot id sawo dau, ’’Kotingkod pod sumusu i Somuil om pootodon ku nogindo iyau do hilo’d Walai’d TUHAN, om hilo’ nondo iyau’d poingiyon do solinaid dau do poimpasi,’’ ka dau. ²³ Om boros ka di Ilkana do suminimbar, ’’Oo, poingkuro nopo ot osonong dot osorou nu om wonsoyon nopo. Hiti ko nopod walai do gisom pod kotingkod do sumusu ilo tanak to. Om maha’ daa om pohubayaan do TUHAN i pinabatos nu,’’ ka dau. Om pitamangai noddi di Hana i tanak do hiri’d walai do gisom do nokotingkod i tanak do sumusu. ²⁴ Om kotingkod poddi do sumusu i Somuil om pootodo’ noddi iyau di Hana do hilo’d Walai’d TUHAN di hilo’d Silo do mulong piya dot okoro’ po daa i Somuil. Om minigit po i Hana dot iso’ o sapi’ do tontoluhan, di tolu nogi’ o toun do tumur, om minigit iyau do gandum do hopod o kilogram, om sangkantung do kulit o waig dot anggur. ²⁵ Om kosumbali’ poddi diyolo’ i sapi’ om pootodo’ nogiddi diyolo’ i Somuil dot id di Ili. ²⁶ Om boros kaddi di Hana dot id di Ili, ’’Haro daa o poboroson ku diya’, oi Tuan. Osorou oku i’ diya’? Iyoho’ no i tondu’ di nokito nu do poingkakat do hiti do sumambayang dot id TUHAN di gulu poddi. ²⁷ Iti no i tanak do pinokianu ku dot id TUHAN, om nosimbar kopio i’ do TUHAN i pinokianu ku. ²⁸ Om iri no o kapatahakan ku diti tanak dot id TUHAN, do sumiliu’d don TUHAN do songonuon do solinaid dau do poimpasi,’’ ka dau. Om ongoi nogiddi iyolo’ sambayang dot id TUHAN.

¹ Om sambayang no i Hana do poingkaa, ’’Pinonu’ do TUHAN do kataadan o ginawo ku, popotood do ginawo ku i winonsoi dau, irak-irakan ku i pisangod ku, ooropod oku no kopio tu’ nuhupan oku i’ do Kinorohingan. ² Aiso’ no o miagal do TUHAN kolidang, om aiso’ no o koiyo dau, aiso’ no o pogintirungan do koiyo do Kinorohingan toko’. ³ Tingkod kou do mimboros do minggayo-gayo, pupusai ino boros nu do mokirayou-rayou, tu’ TUHAN nopo om Kinorohingan i’ di koilo, om butusan i’ dau o koinsanai’d wonsoyon do tulun. ⁴ Notipu’ no i pana’ do soudor do gunsiou, nga’ kumoris no i tulun dit oluhoi. ⁵ Iri nopo tulun di nangayahan di gulu po, om gumadsi’ noddi do mogihum do kaakan-akanan, nga’ iri no tulun di louson di gulu po om a’ noddi louson. Iri nopo sawo dit a’ maganak om kianak noddi do turu’, nga’ iri no tina’ dit ogumu’ o tanak om notongkiadan noddi. ⁶ TUHAN no i mamatai om i mamasi, pokoyoon dau o tulun do hilo’d kinoiyonon di tulun do napatai, om posoliwanon no kawagu dau iyolo’ do mantad hilo’. ⁷ Haro i’ o tulun do porutumon dau, om haro nogi’ i pakayaon dau. Haro i’ o tulun do poinsiribaon dau, om haro nogi’ i poinsawaton dau. ⁸ Kakaton dau i tulun do mosikin do mantad id pupuk, poiduwon dau i tulun do kikokurangan do mantad id koinggoritan. Poomboluton dau iyolo’ di tangaanak do raja’, om onuan dau iyolo’ do karaja’ dit asawat. TUHAN no o sanganu do pinoimpahan diti tana’, om hiri no o pinawansayan dau diti pomogunan. ⁹ Intirungan dau o tulun dau dit ongotorodok, nga’ atagak i’ dot id totuong i tulun dot araat. A’ i’ milo’d manahak do kamanangan o kinoris do tulun. ¹⁰ Angapatai nondo o pisangod do TUHAN, ongorod nopondo iyau do sumaap diyolo’ do mantad hilo’d tawan. Butusan nondod TUHAN o pointongkop diti pomogunan, onuan nondo dau do kuasa’ i raja’ di nopili’ dau, pamanangon nondo dau i raja’ di nopili’ dau,’’ ka dau. ¹¹ Om uli’ noddi i Ilkana om i sompiiyon dau do hilo’d walai dau do hilo’d Rama, nga’ i Somuil nopo, i tanak dau’ddi, om minundorong no do hilo’d Silo do momonsoi do karaja’d TUHAN do moyo-woyo’ di Ili it Imam, i monuduk dau. ¹² Iri nopo tangaanak di Ili do tongokusai nga’ angaraat kopio. Om a’ iyolo’ mamadul do TUHAN. ¹³ Om a’ iyolo’ tumanud dit oturan do momonsoi do karaja’ di don imam, dot id tulun dot Israil. Tu’ soira’ nopod haro o tulun do papatahak do porsombahan di sumbolion, om rumikot no i susuhuon dit imam do kiinigit do totodok do tolu sarapang. Om tontok dit onsokon nogi’ i daging, ¹⁴ om mongoi no iyau pintodsok do hiri’d kuali’ di pagansakan di daging, om nunu nopo it otodok dau om onuon no dau do maan do don imam. Om iyo ngai’ nopoddi o wonsoyon diyolo’ dot id koinsanai’d tulun dot Israil di mongoi patahak do porsombahan di sumbolion do hilo’d Silo. ¹⁵ Om kawagu po kanogi’ nga’ koumbal i’ do tontok dit a’ po kotobilang i lunok di sinumbali’ do maan sorobo’, om moro-boros no i susuhuon dit imam dot id tulun di papatahak di porsombahan di sumbolion do poingkaa, ’’Onuwai oku daa dino daging dit a’ po nalasu’, do maan dit imam do luguon. Tu’ mada’ no iyau di daging di nalasu’,’’ ka. ¹⁶ Ondung sumimbar daa i tulun dot, ’’Osonong nogid tonudon to it oturan, om sorobon po lo lunok, om koino-ino ko nogi’ do manganu do nunu nopo o korohian nu,’’ ka, om moro-boros no i susuhuon dit imam dot, ’’Amu’, onuwai oku nod dinondo. Tu’ a’ nopo moti’, om ahawan ku nopo iya’!’’ ka. ¹⁷ Iri nopo dusa di duwo o tanak di Ili diri nga’ awagat no kopio dot id pagantangan do TUHAN tu’ a’ iyolo’ minamadul di porsombahan di sumbolion do patahakon dot id TUHAN. ¹⁸ Om daamot nopoddi nga’ maso no di Somuil, i tanak di Hana diri, do momonsoi’d karaja’ do TUHAN. Om kirasuk iyau do kain linan do miagal di papakayon dot imam do tontok do sumambayang. ¹⁹ Pointikid-tikid do toun om wansayan kasai’ nopo di tina’ di Somuil i Somuil do rasuk dit okooro’. Om ngoyon nondo dau pootodo’ dot id di Somuil i rasuk diri do tontok di moyo’ iyau di sawo dau do mongoi papatahak di porsombahan di sumbolion do patahakon do monikid toun. ²⁰ Om barakatan nondo di Ili i Ilkana om i sawo di Ilkana, om boros kando dau dot id di Ilkana, ’’Maha’ daa om onuan ko kawagu’d TUHAN do tangaanak do mantad id sawo nu’dti do poningolon di tanak di pinatahak nu dot id TUHAN,’’ ka. Om muli’ nondo iyolo’ do hilo’d Rama. ²¹ Om binarakatan i’ kopio do TUHAN i Hana gisom do kianak po kawagu iyau do tolu o kusai om duwo o tondu’. Om mayo-gayo nopoddi i Somuil, om maso i’ kasai’ dau do momonsoi do karaja’d TUHAN. ²² Om molohing noddi kopio i Ili. Om mongou-rongou kasai’ nopo iyau do kowoyo-woyoon di tangaanak dau dot id tulun dot Israil. Om oilaan i’ di Ili do mongoi iyolo’ dudun di tongoondu’ di pakaraja’ do hiri’d wawayaan di Kiim do TUHAN. ²³ Om boros kaddi di Ili dot id tangaanak dau, ’’Nokuro tu’ momonsoi kou do miagal diri? Momisunud ngai’ nopo o tulun doho’ di kowoyo-woyoon dokoyu dot araat. ²⁴ Kada’ kou no ubas-ubas do miagal diri, oi tangaanak ku! Tu’ araat no kopio i popimboroson do tulun di songonuon do TUHAN do pasal dokoyu! ²⁵ Ondung kopomonsoi’d dusa o tulun dot id sompi’ ko’ tulun, om milo i’ o Kinorohingan do mogobi’ dau. Nga’ ondung kopomonsoi’d dusa o tulun dot id TUHAN om isai poo o milo do monulung dau?’’ ka dau. Nga’ a’ i’ iyolo’ minamadul di boros di Ili, i tapa’ diyolo’ddi, tu’ natantu’ mantad nod TUHAN do patayon dau iyolo’. ²⁶ Nga’ i Somuil nopo, i tanak diri, om mayo-gayo nopoddi, om kasanangan iyau’d TUHAN om kasanangan do koinsanai’d tulun. ²⁷ Insan tadau, om rikot no o nabi do boros do TUHAN dot id di Ili do pinopoboros do boros do TUHAN dot id dau, do poingkaa, ’’Di nopo maso pod i Harun, i taki-aki nu’ddi om i sompiiyon dau do turipon di raja’ do Masir, om intalang oku no dot id di Harun. ²⁸ Om id pogialatan nopo do toinsanan di payat dot Israil om sompiiyon no di Harun o pinili’ ku do sumiliu’d imam di mogobi-obi’ doho’, do maganu-anu do hiri’d pananaraban do porsombahan, om modtutud do kominyan, om manampakai dit ipod do tontok do moro-boros doho’. Om nonuan ku iyolo’ do kuasa’ do manganu do sombahagian do mantad id porsombahan di sorobon do hiri’d pananaraban do porsombahan. ²⁹ Nga’ nokuro tu’ tamaha’ ko do kokito di porsombahan di sumbolion om i porsombahan di patahakon di tulun ku dot id doho’? Nokuro tu’ pusohon nu nogi’ kopio i tangaanak nu mantad ko’ iyoho’? Nokuro tu pinologos nu iyolo’ do polombon do tinan diyolo’ dot i bohogian dit osonong kopio do mantad id porsombahan di tulun ku dot id doho’ o maan do pomolombon? ³⁰ Iyoho’ no i TUHAN, i Kinorohingan dot Israil, o minamatos dot id diyolo’ di gulu po do sompiiyon nu no om pinuruan do sompiiyon nu o sumiliu’d imam do momonsoi’d karaja’ ku do gisom dot alaid. Nga’ baino’ nopoddi om a’ ku no wonsoyon o miagal diri! Tu’ iri nopo momusou doho’ om pusohon ku i’, nga’ iri no i mongintingayam doho’ om intingayamon ku no. ³¹ Pokinongou no, tu’ rumikot moti’ndo o maso do patayon ku o koinsanai di tangaanakwagu dot id suang do sompiiyon nu om id suang do pinuruan do sompiiyon nu, gisom dot aiso’ no o kolohing do tongokusai dot id suang do sompiiyon nu. ³² Tumongob ko nondo om osolon di tulun dot Israil do suwai tu’ kokito ko do koinsanai di barakat do patahakon ku diyolo’; nga’ id suang nopod sompiiyon nu iya’ om aiso’ i’ ot anaru-naru o tumur. ³³ Nga’ posion ku indo o songulun do mantad id sinakagon nu, om iyau nondo o sumiliu’d imam di mogobi-obi’ doho’. Nga’ obolou i’ mando o mato dau om kakaus o ginawo dau. Nga’ apatai ngai’ no i sinakagon nu’d suwai. ³⁴ Soira’ pod opiandad dot apatai i duwo tanak nu, i Hopni om i Pinihas, om opurimanan nu nogindo dot abayaan kopio i pinoboros ku’ddi. ³⁵ Om momili’ oku nondo dot imam dit otorodok dot id doho’, om i momonsoi do koinsanai di ponuhuan ku. Om onuan ku iyau do sinakagon di momonsoi kasai’ do karaja’ di dong imam dot id toguang di piro-piro o raja’ do pilion ku. ³⁶ Om isai nopondo o sinakagon nu di poimpasi, om mongoi pondo solowot dit imam diri do mokianu’d tusin om taakanon, om momilugu-lugut do mokibanar do muhup dit imam do suwai do maganu-anu. Tu’ miagal poddi o koonu-onuan diyolo’d kaakan-akanan,’’ ka dau.

¹ Tontok nopoddi om maso po di Somuil, i tanak poddi, do momonsoi do karaja’d TUHAN do tumanud dit ituduk di Ili. Om maso nopoddi nga’ ingkuri’ no do haro o boros do TUHAN om i pointalangon do mantad id TUHAN. ² Insan tuong, om koodop i Ili do hiri’d bilik dau, om oruhai nod obolou o mato dau tu’ molohing no kopio. ³ Om i Somuil no om koodop do hiri’d Kiim dot Olidang. Om maha’ dit a’ po numawau, di poingapui po i lampung, ⁴ om lohowo’ nod TUHAN i Somuil dot, ’’Somuil! Somuil!’’ ka. Om simbar no i Somuil, ’’Hoi, nunu’ri oi Aki,’’ ka dau. ⁵ Om panangkus no iyau do minongoi’d hiri’d di Ili. Om boro-boros nod, ’’Linohou oku diya’, oi Aki? Hati oku no,’’ ka dau. Nga’ boros ka di Ili, ’’Amu’, a’ oku i’ minomolohou diya’. Ongoi odop,’’ ka dau. Om ongoi no kawagu i Somuil odop. ⁶ - ⁷ Om lohowo’ po kawagu’d TUHAN i Somuil. Nga’ a’ i’ di Somuil oilaan do TUHAN o minomolohou dau, tu’ a’ po o TUHAN insan koboro-boros dau. Om tungag po kawagu iyau om ongoi nod hiri’d di Ili, om boro-boros nod, ’’Linohou oku diya’, oi Aki? Hati oku no,’’ ka dau. Nga’ boros kad i Ili, ’’Amu’, a’ oku i’ minomolohou diya’, oi ondu’. Ongoi kawagu odop,’’ ka dau. ⁸ Om lohowo’ po kawagu’d TUHAN i Somuil do kointolu. Om tungag no i Somuil om ongoi nod hiri’d di Ili. Om boro-boros nod, ’’Linohou oku diya’, oi Aki? Hati oku no,’’ ka dau. Om koilaai nogiddi di Ili do TUHAN i’ o minomolohou di tanak. ⁹ Om iri noddi o kinapamarasan dau dot id di Somuil dot, ’’Ongoi kawagu odop. Om ondung lohowon ko kawagu om sumimbar nod, ’Boro-boros nopo, oi TUHAN. Tu’ mokinongou i’ iti susuhuon nu,’ kanto,’’ ka dau. Om ongoi no kawagu i Somuil odop. ¹⁰ Om rikot no o TUHAN, om ongoi no ingkakat do hiri’d kinoiyonon diri, om pomolohou no kawagu, ’’Somuil! Somuil!’’ ka. Om boros kad i Somuil do suminimbar, ’’Boro-boros nopo, oi TUHAN. Tu’ mokinongou i’ iti susuhuon nu,’’ ka. ¹¹ Om boros kaddi do TUHAN dot id dau, ’’Haro o wonsoyon ku di koronob kopio dot id tulun dot Israil do koimbagu, gisom dot oborulong ngai’ nopo o tulun di korongou. ¹² Om tontok noddi do porikoton ngai’ ku dot id di Ili i kosusaan di nokoboros ku do rumikot dot id sompiiyon dau, do mantad do koimpuunon om gisom do kopupuson. ¹³ Nosunudan ku no iyau do hukuman ku i sompiiyon dau do gisom dot alaid tu’ minongindaraat i’ doho’ i tangaanak dau. Om oilaan i’ di Ili i wonsoyon diyolo’ nga’ a’ i’ dau iyolo’ noduhan. ¹⁴ Om iri no o nokosumpaan ku dot id sompiiyon di Ili dot aiso’ no o porsombahan di sumbolion ko’ porsombahan do nunu nopo do koidu’ diti dusa dot awagat kopio,’’ ka dau. ¹⁵ Om odop no kawagu i Somuil do hiri’d toodopon dau do gisom do kosuabon. Om tungag no iyau di kosuabon om ngoyo’ ngai’ no dau iwangai i wawayaan di Walai’d TUHAN. Om ooris daa’ddi iyau do momisunud di Ili di nokointalang dot id dau, ¹⁶ nga’ lohowo’ no iyau di Ili, ’’Oi Somuil, i tanak ku,’’ ka. ’’Nunu, oi Aki?’’ kad Somuil. ¹⁷ Om uhoto’ no iyau di Ili, ’’Nunu kad boros do TUHAN dot id diya’? Kada’ nod haro lisok-lisokon do posunud doho’, posunudon ngai’ nopo. Tu’ hukuman ko moti’d TUHAN dot a’ nu no posunudon ngai’ doho’ i pinoboros dau,’’ ka di Ili. ¹⁸ Om susuyo’ ngai’ nopoddi di Somuil iri dot id di Ili. Iso’ po nga’ aiso’ no o linisok-lisok dau. Om boros kaddi di Ili, ’’Iyau no o TUHAN, om wonsoyon nopo dau it osonong dot osorou dau,’’ ka dau. ¹⁹ Om mayo-gayo nopoddi i Somuil. Om woyoon kasai’ nopo iyau do TUHAN om binayaan ngai’ dau i pinoboros di Somuil. ²⁰ Om koilo ngai’ nopoddi o tulun do pointongkop dot Israil do nabi kopio do TUHAN i Somuil. ²¹ Om minintalang po kawagu o TUHAN do hilo’d Silo, i kinoiyonon dit intalang i’ iyau dot id di Somuil dit insan i’, om minoro-boros iyau dau. Om soira’ nopod moro-boros i Somuil, om mokinongou ngai’ nopo i tulun dot Israil.

¹ Tontok nopoddi om timungo’ ngai’ no di tulun do Pilistin i soudor diyolo’ do mongoi panangod do tulun dot Israil. Om iri no o kinapamanahan di soudor dot Israil do mongoi sangod; om pomukiim no iyolo’ do hilo’d somok dot Ibin Haisor, om iri no soudor do Pilistin om minomukiim do hilo’d Apik. ² Om songodo’ no di soudor do Pilistin i soudor dot Israil, om maha’ di notingkod i pinisangadan dit adalaan kopio om naala’ddi i soudor dot Israil. Om haro i’ doti’ ot apat noribu o soudor dot Israil do napatai do hiri’d pinisangadan diyolo’. ³ Om soira’ddi nokoguli’ do hiri’d kokiiman i soudor dit a’ napatai, om boros ka di boyoon do tulun dot Israil, ’’Nokuro tu’ pinologos toko’d TUHAN do naala’ di tulun do Pilistin do baino’? Ngoyo’ toko’ nogi’ igitai’d hiti i Kaban do Tumpongo’d TUHAN di hilo’d Silo, om woyoon toko’ indo do TUHAN om poiduwon toko’ dau do mantad id pisangod toko’,’’ ka diyolo’. ⁴ Om ponuhu’ noddi iyolo’d piro-piro o tulun do minongoi’d hilo’d Silo do mongongoi di Kaban do Tumpongo’d TUHAN, iyau it Agayo o Kuasa’, i poirikau do hiri’d sakai di moloikat di roitan do kerub. Om tonudo’ noddi di Hopni om i Pinihas i tangaanak di Ili diri, i Kaban do Tumpongo. ⁵ Om soira’ddi nokorikot i Kaban do Tumpongo do hiri’d kokiiman om insan-insan nopo do minamangkis i tulun dot Israil dot opuhod kopio do gisom do nokogogor i tana’. ⁶ Om soira’ddi norongou di tulun do Pilistin i pinongkisan di tulun dot Israil diri, om boros ka diyolo’, ’’Nokuro tu’ sampangkis-pangkis ilo tulun dot Ibrani?’’ ka. Nga’ soira’ddi noilaan diyolo’ do nokorikot i Kaban do Tumpongo’d TUHAN do hiri’d kokiiman dot Ibrani, ⁷ om kongooris noddi iyolo’. Boros ka no diyolo’, ’’Haro moti’ o kinorohingan do nokorikot do hilo’d kokiiman diyolo’! Obungou toko’ nodti! A’ toko’ po insan koumbal do miagal diti. ⁸ Obungou toko’ no! Isai po daa o milo’d mamasi dati’ do mantad id kinorohingan dit ongokoris diri? Okon toi ko’ iri nogi’ i kinorohingan diri o minamatai di tulun do Masir do hilo’d tana’ do kowotuan di gulu po? ⁹ Nga’ pokorison no o ginawo, oi tulun do Pilistin! Sumangod kou no do miagal do kusai. Tu’ ondung amu’ nga’ osiliu toko’ no do turipon dilo tulun dot Ibrani, do miagal di nosiliu iyolo’d turipon toko’ di gulu. Nga’ sumangod kou no do miagal do kusai!’’ ka. ¹⁰ Om ponotos noddi do suminangod i soudor do Pilistin om kaala’ no diyolo’ i soudor dot Israil. Om sompori-pori nopoddi i soudor dot Israil do minuli’ do hiri’d kiim diyolo’. Om nadalaan no kopio iyolo’ do naala’, tu’ tolu nopo nohopod noribu o soudor dot Israil do napatai. ¹¹ Om iri i Kaban do Tumpongo do Kinorohingan nga’ natanggayan no di pisangod. Om iri nogi’ i duwo o tanak di Ili, iyo Hopni om i Pinihas, nga’ napatai nogi’. ¹² Om panangkus nod minongoi do hilo’d Silo o songulun do mantad hiri’d pinisangadan. Iyau nopo nga’ mantad id payat do Binyamin. Om tadau iddi do nokorikot iyau do hilo’d Silo. Om pinghurako’ no dau o rasuk dau om arabai no dau’d tana’ o tulu dau do popointalang do tumongob iyau. ¹³ Om i Ili nopo nga’ poirikau do hiri’d tirikohonon dau do hiri’d tisan do ralan, om aiso’ i’ o komi dau tu’ mondom-hondom po iyau di Kaban do Tumpongo’d TUHAN. Om potongkopo’ noddi di tulun diri do hiri’d bandar o habar do naala’ ot Israil. Om oinsanan nopoddi i tulun do hiri do minihad tu’ ongooris no kopio iyolo’. ¹⁴ Om korongou no di Ili i tihad. Om ponguhot noddi iyau, ’’Nunu kopio ilo kagangahan dilo’?’’ ka. Om osiau nopo i tulun diri do minongoi solowot di Ili do mongoi posunud di habar dot araat. ¹⁵ Tontok nopoddi nga’ siam no nohopod om walu’ o tumur di Ili om mato dau nga’ oruhai no dot a’ kokito. ¹⁶ Om boros ka di tulun diri dot id di Ili, ’’Minogidu’ oku do mantad hilo’d pisangadan baino’, om koririkot ku’dti,’’ ka dau. Om uhoto’ noddi di Ili iyau, ’’Poingkuro no habar, oi ondu’?’’ ka dau. ¹⁷ Om boros ka di tulun di pinoporomut di habar do suminimbar, ’’Minogidu’ i tulun dot Israil do mantad id tulun do Pilistin; om ogumu’ tomod o napatai! Om i duwo o tanak nu’ddi, i Hopni om i Pinihas nga’ napatai nogi’. Om iri Kaban do Tumpongo’d Kinorohingan nga’ natanggayan nod pisangod!’’ ka dau. ¹⁸ Om soira’ddi noroitan di tulun i Kaban do Tumpongo, om koliad no i Ili do mantad hiri’d timpohon dau do hiri’d toning di wawayaan dot agayo. Om kotipu’ no o liou dau di noliad iyau, tu’ molohing no iyau om olombon po. Om diri noddi do napatai i Ili. Om i Ili no i nosiliu’d boyoon di tulun dot Israil do solinaid dot apat nohopod o toun. ¹⁹ Iri nopo monongiwan di Ili do tondu’, i sawo di Pinihas, om borosusuon no. Om soira’ddi nokorongou iyau do naahau i Kaban do Tumpongo’d Kinorohingan, om napatai i tiwanon om i sawo dau, om sigog nopoddi do korualai iyau’d tian, om a’ no alaid om kosusu no iyau. ²⁰ Om tontok dit oruhai no iyau dot apatai om boros ka di tongoondu’ di migagu dau, ’’Kada’ kooris! Tu’ kusai o tanak nu,’’ ka. Nga’ a’ no dau pinusou i boros diyolo’ om a’ iyau suminimbar. ²¹ Om pungaranai no dau i tanak diri dot i Ikabod, tu’ boros ka dau om, ’’Nokotongkiad nod mantad id Israil o kagayaan do Kinorohingan,’’ ka. Minomoros pogi’ iyau do miagal diri nga’ naahau no i Kaban do Tumpongo om napatai i tiwanon dau’d kusai om i sawo dau. ²² Om boros ka kawagu dau, ’’Nokotongkiad nod mantad id Israil i kagayaan do Kinorohingan tu’ natanggayan nod pisangod i Kaban do Tumpongo’d Kinorohingan,’’ ka dau.

¹ Soira’ddi naahau di tulun do Pilistin i Kaban do Tumpongo’d Kinorohingan, om igitai no diyolo’ iri do mantad hilo’d Ibin Haisor do kuminaa do hilo’d bandar dot Asdod, i bandar diyolo’. ² Om posuango’ no diyolo’ i Kaban diri do hiri’d walai di Dagon, i tingolig diyolo’. Om poiliho’ no diyolo’ iri do hiri’d toning di tingolig diyolo’. ³ Nga’ kosuabon noddi om kokito no di tulun do hiri’d bandar dot Asdod do pointungub do hiri’d tana’ i Dagon, i tingolig diyolo’, dot id toguang di Kaban do Tumpongo’d TUHAN. Om tungago’ no diyolo’ i tingolig om potondulio’ no do hiri’d pinoiyanan mantad. ⁴ Nga’ kosuabon noddi kawagu om kokito no diyolo’ i Dagon, i tingolig diri, do naratu’ kawagu do hiri’d toguang di Kaban do Tumpongo. Nga’ tontok nopoddi om nopungol i tulu om i duwo longon di tingolig om hiri’d doulakan kopio di wawayaan o kinoilihon. Om iri po tinan di tingolig o noolu’. ⁵ (Iri no ot a’ dit imam di mogobi-obi’ do Dagon om koinsanai di tulun do sumuang di walai di Dagon koina-inaan do mulok do hiri’d doulakan kopio di wawayaan di walai’d Dagon do gisom do baino’; laangan kasai’ nopo diyolo’ o hiri.) ⁶ Om awagat tomod diri o pinomohukum do TUHAN di tulun do hiri’d Asdod om i tulun do hiri’d posorili’. Pinomohukum nopo dau diyolo’ nga’ gandas dot id tinan diyolo’. ⁷ Soira’ di nokito diyolo’ do miagal diri o nosiliu, om boros ka diyolo’, ’’Hinukuman toko’ di Kinorohingan dot Israil, om i Dagon, i tingolig toko’ nga’ hinukuman nogi’ dau. A’ toko’ no milo’d poloidon do hiti i Kaban do Tumpongo,’’ ka. ⁸ Om suhuo’ no diyolo’ o piro-piro tulun do minongoi pomolohou di limo o raja’ do Pilistin. Om lohowo’ ngai’ no diyolo’ i raja’, ’’Kukuroyon toko’ no ma ilo Kaban do Tumpongo’d Kinorohingan do tulun dot Israil,’’ ka. Om boros ka di raja’ do suminimbar, ’’Pokoyoon do hilo’d bandar do Gat,’’ ka diyolo’. Om powoliho’ no diyolo’ i Kaban do Tumpongo’d Kinorohingan dot Israil do hilo’d Gat, i bandar do Pilistin do suwai. ⁹ Nga’ maha’ di nokorikot i Kaban do hilo’ om hukumai nod TUHAN i bandar diri, gisom dot agangau poddi ngai’ i tulun do hiri. Tu’ hinukuman do TUHAN do gandas i tulun dot id bandar diri, dot i tongomulok po om iri nogi’ i molohing no. ¹⁰ Om iri no o kinapaatadan diyolo’ di Kaban do Tumpongo’ddi do hilo’d Ikron, it iso’ kawagu o bandar do Pilistin. Nga’ tontok di nokorikot i Kaban diri do hilo’ om pinggiak ngai’ no i tulun do hilo’ dot, ’’Nigitan diyolo’d hiti ilo Kaban do Tumpongo’d Kinorohingan do tulun dot Israil do maan do pamatai dati’!’’ ka diyolo’. ¹¹ Om lohowo’ noddi diyolo’ do tumimung o koinsanai di raja’ do tulun do Pilistin, om boro-boros no iyolo’d, ’’Pogulion nogi’ ilo Kaban do Tumpongo’d Kinorohingan do tulun dot Israil do hilo’d tadon mantad dilo’ om a’ i’ kapamatai dati’ om iti sompiiyon toko’,’’ ka. Om agangau ngai’ poddi i tulun do hiri’d bandar diri tu’ awagat no kopio o pinomohukum do Kinorohingan dot id diyolo’. ¹² Om iri piya tulun dit a’ napatai nga’ nongorolihan no di gandas. Om millohou poddi iyolo’ do mokitulung di ponokokinorohingan diyolo’.

¹ Om tontok di turu’ noddi o tulan di Kaban do Tumpongo’d TUHAN do hiri’d pomogunan do tulun do Pilistin, ² om pomolohou no i tulun do Pilistin dit imam om i bobolian. Om uhot no iyolo’, ’’Kukuroyon toko’ no ma i Kaban do Tumpongo’d TUHAN diri? Ondung pogulion toko’ iri do hilo’d tadon mantad diri, om nunu no ma o potonggoyon toko’?’’ ka. ³ Om boros ka diyolo’ do suminimbar, ’’Ondung pogulion dokoyu i Kaban do Tumpongo’d Kinorohingan do tulun dot Israil, om a’ no milo dot a’ kou potonggoi do maan do popuhawangon do ponogit di dusa dokoyu. Tu’ iyo noddi o ralan do momolingos dokoyu, om oilaan nogindo dokoyu ondung nokuro tu’ a’ kou’d Kinorohingan dot Israil tingkad-tingkadan do momohukum,’’ ka. ⁴ Om uhot po kawagu i tulun do Pilistin, ’’Nunu o potonggoyon dahai?’’ ka. Om boros ka dit imam do suminimbar, ’’Potonggoyon no dokoyu o limo bulugu’ do tamas di koiyo-iyo’d gandas o pomomonsoi, om limo o tinan do tikus, do tamas do winonsoi, do pongikid do toinsanan di raja’ do Pilistin. Tu’ iri no i gandas om i tikus o nokoinggorit dokoyu om i limo o raja’ do Pilistin. ⁵ Momonsoi kou nod koiyo-iyo do gandas om tikus do tamas o wonsoyon, tu’ iri no i mamaraag diti pomogunan dokoyu do maso’dti. Om opusou indo dokoyu o Kinorohingan do tulun dot Israil. Om maha’ daa om a’ nondo iyau momohukum dokoyu, om a’ momohukum di tingolig, om tana’ dokoyu. ⁶ Nokuro tu’ pokodohon dokoyu o ginawo do miagal di raja’ om i tulun do Masir di gulu po? Kada’ dokoyu lihuwai i pinonguntotogod do Kinorohingan diyolo’, gisom do minonosol iyolo’, om pinologos iddi diyolo’ i tulun dot Israil do tuminongkiad do mantad hilo’d Masir. ⁷ Iyo nopoddi, om posodia’ kou no do guyudan di wagu po om manu do duwo o tinan do sapi’ di susuan pod tanak om it a’ po insan pagayato’ do guyudan. Om pagayatan no di duwo o sapi’ i guyudan diri nga’ iri nopo tangaanak di sapi’ om pogulion no do hiri’d kandang. ⁸ Om ngoyon nondo i Kaban do Tumpongo’d TUHAN, om pasakayon no di guyudan. Om posuangon no dot id kaban i tamas do potonggoyon dokoyu, om poilihon nogindo do hiri’d toning di Kaban do Tumpongo’d TUHAN, tu’ iri no o popuhawangon dokoyu dot id dau do maan do ponogit di dusa dokoyu. Om pologoson nopo i guyudan diri do gayaton do honggo nopo o pakayaan. ⁹ Nga’ antaan no dokoyu ondung honggo o pakayaan di guyudan. Ondung pakayaan di guyudan do ponong hilo’d bandar do Bait-Simis, i hilo’d pomogunan dau, om iri no kopio Kinorohingan do tulun dot Israil o pinoporikot di kinoinggoritan toko’ dit awagat kopio. Nga’ ondung amu’, om okon i’ ko’ iyau o pinoporikot, suwai ko’ kinoontok-ontoko’ no toomod,’’ ka diyolo’. ¹⁰ Om wonsoyo’ noddi diyolo’ o miagal diri. Ongoi no iyolo’ panganu do duwo o tinan do sapi’ di posusu pod tanak, om pagayato’ no diyolo’ di guyudan i sapi’ddi. Nga’ pinoundorong i’ diyolo’ i tangaanak di sapi’ do hiri’d kandang. ¹¹ Om pasakayo’ no diyolo’ i Kaban do Tumpongo do hiri’d guyudan om potoningo’ diyolo’ i kaban do pinosuangan di winonsoi do kaagal-agal do tikus om gandas do tamas do winonsoi. ¹² Om pamanau no i sapi’ di pinamagayat di guyudan do kumaa’d hilo’d Bait-Simis, om tilombus nopod mamanau om a’ i’ suminala’ di ralan. Om mua-ngua’ nopo i sapi’ do maso’d manau-panau. Om susuhut no i limo o raja’d Pilistin di sapi’ddi do gisom do nokorikot do hilo’d piwolitan do Bait-Simis. ¹³ Om tontok nopoddi nga’ maso di tulun di hiri’d bandar do Bait-Simis do mongomot do gandum do hiri’d rantai. Nga’ soira’ di huminangog iyolo’, om sigog id kokito diyolo’ i Kaban do Tumpongo. Om ongotood tomod diri iyolo’ do nokokito’ddi! ¹⁴ Om undorong no i guyudan dot id somok do tontolob dot agayo do hiri’d tumo di Yosua, i tulun do poingiyon do hilo’d Bait-Simis. Om longodo’ no di tulun i papan di pinowonsoi di guyudan om sumbolio’ diyolo’ i duwo o sapi’ do numaan do porsombahan di sorobon dot id TUHAN. ¹⁵ Om polintuhuno’ no di tulun do Liwi i Kaban do Tumpongo’d TUHAN om i kaban di kisuang do tamas, om poiliho’ no diyolo’ do hiri’d sakai di tontolob. Om papatahak nogiddi i tulun do Bait-Simis do porsombahan di sorobon om porsombahan do sumbolion dot id TUHAN. ¹⁶ Om soira’ di nokito di limo o raja’d Pilistin i winonsoi diyolo’ddi om poguliai no diyolo’ do hilo’d Ikron do tontok do tadau’ddi. ¹⁷ Pinopokirim i tulun do Pilistin dot id TUHAN do limo o bulugu’ do tamas di koiyo-iyo’d gandas do maan do popuhawangon do ponogit di dusa diyolo’; om soroisaan nopo i bandar diyolo’: i bandar dot Asdod, Gasa, Askilon, Gat om Ikron. ¹⁸ Om pinopokirim nogi’ iyolo’d koiyo-iyo’d tikus do tamas o winonsoi. Om soroisaan nopo i limo o bandar di porintaon di limo o raja’ do Pilistin, do kohompit ngai’ i bandar dit ongkitolig om iri nogi’ i kokompungan dit aiso’ o tolig. Om hilo’ kasai’ po do gisom do baino’ i tontolob dot agayo’ddi, i hiri’d tumo di Yosua, i tulun do Bait-Simis, i tontolob do pinoilihan diyolo’ di Kaban do Tumpongo’d TUHAN. Om iri no i sumiliu’d kointalangan kopio do haro o nosiliu do miagal diri. ¹⁹ Om patayo’ nod TUHAN o turu’ nohopod o tulun do Bait-Simis tu’ minongoi i’ iyolo’ ontong do hiri’d suang di Kaban do Tumpongo’d TUHAN. Om pogihad ngai’ noddi i tulun do hiri’d bandar diri tu’ pinorikatan iyolo’d TUHAN do hukuman dot awagat kopio. ²⁰ Om boros kaddi di tulun do hilo’d Bait-Simis, ’’Isai po o kasaap do tumimbaba’d TUHAN, i Kinorohingan dot Olidang Kopio? Id disai poo o paatadan toko’ di Kaban om koinsodu’ i’ iri dati’?’’ ka diyolo’. ²¹ Om ponuhu’ no iyolo’d piro-piro o tulun do mongoi pomisunud di tulun do hilo’d Kiriat Yiarim, do poingkaa, ’’Nokoguli’ no di tulun do Pilistin i Kaban do Tumpongo’d TUHAN. Om rikot kou no do mongoi di Kaban diri, do hinoon id dokoyu,’’ ka diyolo’.

¹ Om ngoyo’ noddi di tulun do hilo’d Kiriat Yiarim i Kaban do Tumpongo’d TUHAN diri om posuango’ no do hiri’d walai di Abinadab. Walai nopo di Abinadab om hiri’d timpak do nulu-nulu. Om pilio’ no diyolo’ i Iliasar, i tanak di Abinadab do podtomongon di Kaban do Tumpongo. ² Om alaid i’ i Kaban do Tumpongo’d TUHAN do poundorong do hilo’d Kiriat Yiarim; tu’ haro i’ doti’ o duwo nohopod o toun do koloido’ddi do poundorong do hilo’. Om maso nopoddi nga’ oinsanan nopo o tulun dot Israil do lumohou’d TUHAN do mokitulung dau. ³ Om boro-boros noddi i Somuil dot id toinsanan di tulun dot Israil, ’’Ondung aayi-ayi’ o ginawo dokoyu’d gumuli’ dot id TUHAN, om taamon ngai’ no dokoyu i ponokokinorohingan do suwai om i tininganak dot Astorit. Om oyi-oyion no dokoyu do papatahak dot id TUHAN o koposi-posion dokoyu, om id dau noo o sambayangan, om poiduwon kou indo dau do mantad id pomorintaan do tulun do Pilistin,’’ ka dau. ⁴ Om pataamo’ ngai’ noddi di tulun dot Israil i tingolig do Baal om i tininganak dot Astorit, om id TUHAN poddi o sambayangan diyolo’. ⁵ Om boros kaddi di Somuil, ’’Timungon ngai’ no i tulun dot Israil do hilo’d Mispa om sumambayang oku nogindo dot id TUHAN do bagi dokoyu,’’ ka. ⁶ Om timung ngai’ no iyolo’ do hilo’d Mispa. Om ongoi no iyolo’ timbauk do waig om potuntugo’ nod hiri do maan do porsombahan dot id TUHAN, om puasa no iyolo’ do nosongodou do tadau’ddi. Boros ka diyolo’, ’’Nokowonsoi no iyahai’d dusa dot id TUHAN,’’ ka. (Om hilo’ nod Mispa i Somuil do tuminimpuun do minanalasai di pigulatan di tulun dot Israil.) ⁷ Om soira’ di nokorongou i tulun do Pilistin do tuminimung i tulun dot Israil do hilo’d Mispa, om pamanau no i limo o raja’ do Pilistin do miwoyo’ di soudor diyolo’ do mongoi panangod di tulun dot Israil. Om ongooris tomod diri i tulun dot Israil do nokorongou’ddi. ⁸ Om boros ka diyolo’ dot id di Somuil, ’’Kada’ no kopio tingkod do sumambayang dot id TUHAN, i Kinorohingan toko’, om koidu’ toko’ i’ do mantad id tulun do Pilistin,’’ ka. ⁹ Om ponumbali’ noddi i Somuil do songinan o tanak do dumba’ om songkoyuo’ nopo do minonorob do maan do porsombahan dot id TUHAN. Om sambayang nogiddi iyau om otulung i’ do TUHAN i tulun dot Israil. Om sinimbar iddi do TUHAN i sambayang dau. ¹⁰ Om tontok di maso pod i Somuil do papatahak di porsombahan di sorobon, om insomok no i tulun do Pilistin do mongoi panangod diyolo’. Nga’ maso iddi do nokongorod o TUHAN do hilo’d tawan do hiri’d sawa-sawat diyolo’ gisom dot oborulong nopoddi i tulun do Pilistin om a’ no oila-ilaan o kotongkus-tongkuso’ diyolo’ do mogidu’. ¹¹ Om soliwan no i soudor dot Israil do mantad hilo’d Mispa om gusao’ no diyolo’ i tulun do Pilistin do gisom dot osomok nod hilo’d Bait-Kar. Om pinimpatai nogi’ diyolo’ i tulun do Pilistin do hiri’d tanga’d ralan. ¹² Om panganu noddi i Somuil dot iso’ o watu om poudongo’ nod hiri’d piolitan do Mispa om Son. Boros ka dau, ’’Nuhupan toko’ id TUHAN do solinaid toko’ do manau-panau,’’ ka dau. Om pungaranai no dau i watu’ddi do ’’Watu do Minonguhup’’. ¹³ Om iyo noddi o nakaala-ala’ di tulun do Pilistin, om a’ no iyolo’d TUHAN pinologos do sumuang di pomogunan do tulun dot Israil. Om solinaid nopo di Somuil do poimpasi, om a’ no insan kamanang i tulun do Pilistin do sumangod di tulun dot Israil. ¹⁴ Om koinsanai di bandar dit id pialatan dot Ikron om Gat, i naanu daa di tulun do Pilistin, nga’ nokoguli’ ngai’ nopoddi dot id tulun dot Israil. Om naanu kawagu dot Israil o koinsanai di tana’ mantad diyolo’. Om miulud noddi i tulun dot Israil om i tulun mantad do hilo’d Kanaan. ¹⁵ Om solinaid nopo di Somuil do poimpasi om pomorinta’ kasai’ no iyau do tulun dot Israil. ¹⁶ Pointikid-tikid do toun om mamanau kasai’ nopo iyau’d tumutuk do Baitol, om hilo’d Gilgal, om hilo’d Mispa do mongoi panalasai di pigulatan dot id bandar diri. ¹⁷ Om muli’ kasai’ nopo iyau do hilo’d Rama. Om hilo’ nga’ manalasai i’ iyau di tulun dot Israil. Om minomonsoi nogi’ iyau dot iso’ o pananaraban do porsombahan dot id TUHAN do hilo’d Rama.

¹ Tontok di molohing no i Somuil, om siliho’ no dau i tangaanak dau’d kusai do gompomutus do hilo’d Israil. ² Iri nopo kotuahan do tanak dau om i Yoil o ngaran, om iri no koduwo om i Abia. Gompomutus goduwo nopo iyolo’ do hilo’d Borsiba. ³ Nga’ a’ i’ iyolo’ tuminanud di kowoyo-woyoon dot osonong di tapa’ diyolo’. Tu’ mongingusin no o sorohon diyolo’. Om rumamit iyolo’d tusin di ponisip do tulun dot id diyolo’, om a’ otulid o pomumutus diyolo’. ⁴ Om iri noddi o nokotimungan do koinsanai di boyoon do tulun dot Israil, om ongoi ngai’ no iyolo’ solowot di Somuil do hilo’d Rama. ⁵ Om boros ka diyolo’ dot id dau, ’’Antangai pogi’ nga’ molohing ko noddi, om ilo tangaanak nu nga’ a’ i’ tumanud do kowoyo-woyoon nu. Om osonong nogi’ do pomilian nu iyahai’d raja’, om haro i’ o dahai’d raja’ do miagal dilo bansa’d suwai,’’ ka. ⁶ Nga’ a’ i’ i Somuil ohubayaan di pinokianu diyolo’ddi. Om sambayang noddi iyau dot id TUHAN. ⁷ Om boros kaddi do TUHAN dot id dau, ’’Pohubayaan ngai’ nopo i pinokianu diyolo’. Tu’ okon i’ ko’ iya’ ot iyadaan diyolo’, suwai ko’ iyoho’. A’ noddi iyolo’ orohian dot iyoho’ o raja’ diyolo’. ⁸ Mantad poddi pinosoliwan ku i’ iyolo’ do mantad hilo’d Masir om tuminongkiad no iyolo’ doho’, om tuminuku’ nogiddi dot id ponokokinorohingan do suwai. Om iti nopo wonsoyon diyolo’ dot id diya’ do baino’dti om miagal noddi o wonsoyon kasai’ diyolo’ dot id doho’. ⁹ Iyo nopoddi om pohubayaan nopo i pinokianu diyolo’ nga’ poinsanon mantad po iyolo’ om poiloon kopio ondung poingkukuro o wonsoyon di raja’ dot id diyolo’ do sumonu’,’’ ka dau. ¹⁰ Om posunudo’ ngai’ nod i Somuil i nokoboros do TUHAN diri dot id tulun di mokianu’d raja’. ¹¹ Om boros kad Somuil, ’’Iti no ngai’ o wonsoyon di raja’ dot id dokoyu. Sansagan nondo dau i tangaanak dokoyu’d kusai do sumiliu’d soudor. Haro o silihon dau’d pongigiton di korita’-kuda’ dau, om haro o silihon do soudor di songinsakai’d kuda’, om haro o silihon do soudor di mamanau’d gakod. ¹² Om haro o silihon dau’d boyoon do sinompuruan do soribu o soudor, om haro nogi’ o boyoon do limo nohopod o soudor. Om i tangaanak dokoyu’d kusai nga’ sansagan indo di raja’ do mamaradu do tumo dau, om mongomot, om momonsoi’d rapo-rapo do sumangod, om pakakas do korita’-kuda’ dau. ¹³ Iri no tangaanak dokoyu’d tongoondu’ om onuon dau do popomonsoyon do tumau dit osonong o kosingudan, om mogogonsok, om momomonsoi’d roti dau. ¹⁴ Om onuon dau i tumo dokoyu dit ongoluhub, om i kabun dot anggur dokoyu, om i kabun do saitun dokoyu dit ongosonong kopio do maan patahako’ di pagawai dau. ¹⁵ Om ontokon nondo do sukai i tumo om kabun dot anggur dokoyu, dot i sompihopod do tua’ di gandum om anggur dokoyu o maan do sukai. Om patahakon nogindo di raja’ iri di boyoon do soudor dau om i pagawai dau. ¹⁶ Om onuon ngai’ dau i susuhuon dokoyu, om i tayam-tayam om i kaladai dokoyu dit ongosonong kopio, om suhuon ngai’ nogindo dau iri do kumaraja’ dot id dau. ¹⁷ Om onuon dau o sompihopod do mantad id koinsanai di dumba’ om i kambing dokoyu. Om iyokoyu’ndo nga’ osiliu do turipon dau. ¹⁸ Om tontok nopondoddi om sontogod-togod kou nondo di raja’ do pinili’ dokoyu. Nga’ a’ nod TUHAN pokinongohon i boros dokoyu do tumogod,’’ ka dau. ¹⁹ Nga’ a’ no mokinongou di boros di Somuil i tulun dot Israil. Boros ka diyolo’, ’’Poingkuro piya nga’ manu kasai’ no iyahai’d raja’, ²⁰ om koiyo i’ iyahai dilo bansa’d suwai. Tu’ iri’ndo raja’ dahai o momorinta’ dahai om momoyo’ dahai do mongoi sangod,’’ ka. ²¹ Om pokinongoho’ ngai’ nopod Somuil i boros diyolo’ddi om posunudo’ noddi dau dot id TUHAN. ²² Om boros kad TUHAN do suminimbar, ’’Wonsoyo’ nopo o miagal di pinokianu diyolo’. Pomilian nopo iyolo’d raja’,’’ ka dau. Om suhuo’ noddi di Somuil i tulun dot Israil do muli’ do hiri’d walai diyolo’.

¹ Haro o songulun do kaya’ om it abantug do mantad id payat do Binyamin. Ngaran nopo dau om i Kis. Iyau nopo om tanak di Abiol om manangaki di Siror. Om iyau nopo nga’ id suang do sompiiyon di Bikurat, i sompiiyon do mantad id pinuruan do sompiiyon di Apia. ² I Kis nopodti nga’ kianak do kusai. Om ngaran nopo di tanak dau om i Saul, i tanakwagu dot oligkang om okoris. I Saul nopoddi om aranggou om oligkang ko’ mantad do koinsanai di tulun dot Israil do suwai. Tu’ iri nopo tulun dot Israil do suwai om gisom ngai’ no dau id lihawa. ³ Insan tadau om katagakai no i Kis do piro-piro tinan do kaladai. Om boros kaddi dau dot id di Saul, ’’Ongoi pangangat dot ongoiso’ di susuhuon do moyo’ diya’ om ongoyon i’ dokoyu ihumo’ i kaladai,’’ ka. ⁴ Om homboo’ no diyolo’ o hilo’d watas do konulu-nuluan dot Ipraim om hilo’d tana’ do Salisa, nga’ a’ i’ diyolo’ nokito i kaladai’ddi. Om tilombus poddi iyolo’ do hilo’d Sahalim, nga’ a’ i’ hino’d hilo’ i kaladai. Om ongoi po iyolo’ do hilo’d watas do Binyamin, nga’ a’ i’ diyolo’ nokito i kaladai’ddi. ⁵ Om soira’ di nokorikot iyolo’ do hilo’d tana’ do Sup, om boro-boros no i Saul dot id susuhuon dau, ’’Kaino muli’, tu’ iyato moti’ndo o hondom-hondomon di tapa’ ku, om okon no ko’ i kaladai,’’ ka dau. ⁶ Om boros ka di susuhuon dau do suminimbar, ’’Kada’ po! Tu’ haro o susuhuon do Kinorohingan do hiti’d bandar diti di suahon kopio’d tulun, tu’ nunu nopo i poboroson dau om angabayaan no kopio. Kaino po mongoi solowot dau. Tu’ milo i’ doti’ iyau do momisunud dato ondung honggo i kaladai’ddi,’’ ka dau. ⁷ Om boros kad Saul, ’’Ondung mongoi to do hilo’d dau, om nunu nondo patahak-tahakon to dau? Tu’ naayi’ no i kokoriu di nigitan to. Om aiso’ no nunu-nunu do milo to do patahakon di susuhuon do Kinorohingan diri,’’ ka. ⁸ Om boros ka di susuhuon dau, ’’Haro i’ o doho’d iso’ poo tusin do pirok. Om patahakon ku i’ dau i tusin diri om momisunud indo iyau dato ondung hinonggo i kaladai’ddi,’’ ka dau. ⁹ - ¹¹ Om boros kad Saul, ’’Ba, osonong. Kaino mongoi’d hilo’!’’ ka. Om ongoi no iyolo’d hiri’d bandar di nokoiyonon di susuhuon do Kinorohingan diri. Om tontok di tumakad nogi’ iyolo’ di nulu-nulu do kumaa’d hiri’d bandar, om kosolowot nogi’ iyolo’ do piro-piro tongoondu’ di mongoi sago’ do hiri’d torobong. Om uhoto’ no diyolo’ i tongoondu’, ’’Hiti bo i mogogontong diri?’’ ka diyolo’. (Tontok nopoddi nga’ roitan do mogogontong o nabi. Om soira’ nopo do haro o tulun dot orohian do muhot do nunu nopo dot id Kinorohingan, om momoros no iyolo’ dot, ’’Kaino mongoi’d hilo’d mogogontong,’’ ka.) ¹² - ¹³ Om boros ka di tongoondu’ do suminimbar, ’’Hiti i’. Id gulu-gulu no iyau ko’ iyokoyu. Ondung osiau kou om okosupan po doti’ dokoyu iyau. Osolowot i’ dokoyu iyau do hilo’d bandar. Tu’ nokorikot pogi’ iyau baino’ nga’ papatahak do porsombahan di sumbolion, i tulun do hiti’d bandar do hiri’d pananaraban do porsombahan do hilo’d timpak do nulu-nulu. Om a’ po milo’d makan i tulun do nongolohou dot a’ po iyau korikot tu’ mositi’ no do barakatan po dau’d gulu i porsombahan diri,’’ ka. ¹⁴ Om ongoi noddi do hiri’d bandar i Saul om i susuhuon dau. Om tontok di sumuang nogi’ daa iyolo’ di bandar om kokito no diyolo’ i Somuil do pakayaan pong id diyolo’, do mongoi’d hiri’d tiyonon do sumambayang. ¹⁵ Tontok nopoddi konihabon po, om nosunudan nod TUHAN i Somuil do poingkaa, ¹⁶ ’’Suab nopondo, do dongiyo’dti, om monuhu’ oku nondo do songulun do mantad id payat do Binyamin do mongoi solowot diya’. Om pilion no iyau do sumiliu’d raja’ do tulun dot Israil, i tulun do songonuon ku; do tuntugan do tumau o ralan do momili’. Om iyau no o popoidu’ diyolo’ do mantad id tulun do Pilistin. Tu’ nokito ku no o koinggoritan do tulun ku, om norongou ku o tihad diyolo’ do mokitulung,’’ ka. ¹⁷ Om soira’ di nokito’d Somuil i Saul om boro-boros no o TUHAN dot id di Somuil, ’’Iti no i tulun di komoyon ku diya’ddi. Iyau no o momorinta’ do tulun ku,’’ ka dau. ¹⁸ Om tontok nopoddi nga’ rumapou no i Saul di Somuil do hiri’d somok di wawayaan dot agayo di bandar. Om boros kad Saul, ’’Sunudai oku daa ondung hinonggo walai di mogogontong oi Aman,’’ ka. ¹⁹ Om boros kad i Somuil do suminimbar, ’’Iyoho’ nogi’ i mogogontong diri. Pogulu-gulu doho’d mamanau do mongoi’d hilo’d tiyonon do sumambayang, tu’ tumorungak goduwo kou doho’d makan do baino’. Suab pondo om simbaron ku nogi’ ngai’ i tuhoton nu, om muli’ kou nogindo. ²⁰ Om iri nopo i kaladai di natagak di tolu no tadau’d nakatalib diri om nokito no. Kada’ kou no katangkabo. Om kawagu po nga’ iri nopo it agayo kopio o gatang do hiti’d pointongkop dot Israil om patahakon nondo dot id diya’ om id sompiiyon do tapa’ nu,’’ ka dau. ²¹ Om boros ka di Saul do suminimbar, ’’Iyoho’ nopodti om mantad id payat do Binyamin, i payat dit okuuri’ kopio do hiti’d Israil. Om sompiiyon ku no it aiso’ kopio o ngaran-ngaran dot id suang do payat diri. Om nokuro’ddi tu’ miagal diri o boros nu dot id doho’?’’ ka dau. ²² Om angatai nod i Somuil i Saul om i susuhuon di Saul do suminuang dot iso’ o bilik dit agayo, om onuwai no dau iyolo’d tirikohonon dit osonong kopio dot id dotoguangan do haro i’ doti’ o tolu nohopod o tulun di linohou do mongoi akan. ²³ Om boros kad i Somuil dot id tulun di mogogonsok, ’’Ngoyo’ posurungo’ i tikanas di pinonuhuan ku diya’d poopi’ di tiinu’ddi,’’ ka. ²⁴ Om ngoyo’ no di mogogonsok i tonsi’d poo di pinili-pili’ noo, om posurungo’ no dot id di Saul. Om boros kad Somuil, ’’Iti no i pinoopi’ ku do buntuk diya’, om aakan nu i’ do potorungak diti tulun do nalap ku. Akan no,’’ ka dau. Om akan no i Saul, om tontok nod tadau’ddi do tuminorungak i Saul di Somuil do minakan. ²⁵ Om kaakan poddi iyolo’, om poruhukai no diyolo’ do mantad hiri’d niyon do sumambayang om ongoi no iyolo’ do hiri’d bandar. Om onuwai no i Saul do tiyonon do modop do hiri’d sakai’d taap di walai, ²⁶ om odop noddi i Saul do hiri. Om soira’ di minnanawau no om ngoyo’ nod i Somuil lohowo’ i Saul do hiri’d sakai di taap. Boros ka dau, ’’Tungag, om ngoyon ku i’ iya’ pootodo’,’’ ka. Om tungag no i Saul om piwoyo’ no iyolo’d i Somuil do minamanau. ²⁷ Om soira’ di nokorikot iyolo’ do hiri’d tisan di bandar om boro-boros no i Somuil di Saul, ’’Suhuo’ ilo susuhuon nu do mogulu-gulu dato do mamanau,’’ ka dau. Om pogulu-gulu nod mamanau i susuhuon di Saul. Om boro-boros po kawagu i Somuil dot id di Saul, ’’Undorong pod hiti dot oruhai. Tu’ haro o boros do Kinorohingan do polombuson ku dot id diya’,’’ ka dau.

¹ Om ngoyo’ noddi di Somuil i kakanan di kisuang do tumau’d saitun, om potuntugo’ nod hiri’d tulu di Saul. Om tungubai no dau i Saul om boro-boros nod, ’’Pinili’ ko’d TUHAN do sumiliu’d raja’ do tulun dau, i bansa’d Israil. Om iya’ no o momorinta’ di tulun dau om mongintirung diyolo’ do mantad id koinsanai’d pisangod diyolo’. Om iti no o tanda’ dot id diya’ do pinili’ kopio ko’d TUHAN do sumiliu’d raja’ do tulun dau: ² Kotongkiad ko nopondo doho’ do baino’, om kosolowot ko nondo do duwo o kusai do hilo’d somok di lobong di Rahil, i hilo’d Silsa, it id watas do Binyamin. Om sunudan ko’ndo diyolo’ do nokito no i kaladai di nongoi nu daa ihumo’ddi om katangkabaan nopoddi di tapa’ nu nga’ okon no ko’ i kaladai, suwai ko’ iya’. Tu’ minguhot poddi iyau’d poingkaa, ’Kukuroyon ku no ma i tanak ku’ddi?’ ka. ³ Om mantad nondod hilo’ om tumilombus nopod mamanau do gisom do korikot ko di guas do kayu, i tiiyonon do sumambayang do hilo’d Tabor. Om hilo’ nod ngoyon ko solowoto’ do tolu o tongokusai do pakayaan do hilo’d Baitol do mongoi papatahak do porsombahan di sumbolion dot id Kinorohingan. Om iso’ nopo diyolo’ nga’ kiginayat do tolu o tinan do tanak do kambing; om iso’ diyolo’ o kiinigit do tolu liob do roti, om iso’ kawagu o kiinigit do kantung do kulit do kisuang do waig dot anggur. ⁴ Om sumuwau nondo iyolo’ diya’ om onuan ko nondo do duwo liob do roti, om romiton no i roti’ddi. ⁵ Om katalib pondo’ri om mositi’ nod mongoi ko do hilo’d Gibia, i nulu-nulu do Kinorohingan diri, om i pinomukiiman di tulun do Pilistin. Om kosolowot ko’ndod piro-piro nabi do mogiwoyo-woyo’, do hiri’d nulu-nulu di haro o pananaraban do porsombahan. Om popouni iyolo’d gambus, om rebana, om suling om kecapi do mikuwo’d sampangkis-pangkis om santari-tari’. ⁶ Om sigog indo do porintaon ko do Rusod do TUHAN om moyo’ ko nondo diyolo’ do mintari’ om mimpangkis, om oonuan ko nondo do kowoyo-woyoon do wagu, gisom do suwai nondo ko’ i gulu o kowoyo-woyoon nu. ⁷ Osiliu ngai’ nopondo o miagal diri om wonsoyon nopo it osonong dot osorou nu, tu’ woyoon ko i’ do Kinorohingan. ⁸ Om mogulu no doho’ do mongoi’d hilo’d Gilgal. Om solowoton ku indo iya’d hilo’, di mongoi oku papatahak do porsombahan di sorobon om porsombahan di piombolutan. Mandad nopod hilo’ do solinaid do turu’ o tadau, do gisom do korikot oku do mongoi pomisunud diya’ dit apatut nu’d wonsoyon,’’ ka dau. ⁹ Om soira’ di nokotolikud nogi’ i Saul do tumongkiad di Somuil, om onuwai nod Kinorohingan i Saul do kowoyo-woyoon do wagu. Om koinsanai di pinosunud di Somuil dot id dau nga’ nongosiliu ngai’ nopo do tadau’ddi. ¹⁰ Om soira’ di nokorikot i Saul om i susuhuon dau do hilo’d Gibia om ngoyo’ no iyolo’ solowoto’ do piro-piro o nabi di mogiwoyo-woyo’. Om sigog id porintao’ i Saul do Rusod do Kinorohingan, om tanud no iyau di piro-piro o nabi do mintari’ om mimpangkis. ¹¹ Om oinsanan nopoddi i tulun di kotutun mantad di Saul dot osuayan do nokokito dau do miagal diri o kowoyo-woyoon. Om mogiuhot-uhot poddi iyolo’, ’’Nunu’ddi kopio o nosiliu dot id tanak di Kis dilo’? Do nosiliu i’ i Saul iyau’d nabi,’’ ka no diyolo’. ¹² Om ponguhot noddi o songulun di poingiyon do hiri, ’’Poingkuro ngai’ no ilo nabi di suwai? Isai tuu o diyolo’d tapa’ dot osorou dokoyu?’’ ka dau. Iri noddi o kinointonodon di boboroson do poingkaa, ’’Do nosiliu i’ i Saul iyau’d nabi?’’ ka. ¹³ Om kotingkod poddi i Saul do mintari’ om mimpangkis om ongoi no iyau’d hiri’d pananaraban do porsombahan do hiri’d timpak do nulu-nulu. ¹⁴ Om kokito no di tamanon di Saul i Saul om i susuhuon di Saul, om ponguhot nod, ’’Honggo tadon dokoyu?’’ ka. Om boros kad Saul, ’’Minongoi iyahai pogihum do kaladai di natagak, nga’ di nopoddi dit a’ dahai nokito iri, om ongoi no iyahai solowot di Somuil,’’ ka dau. ¹⁵ ’’Nunu kad Somuil?’’ ka di tamanon dau’d minuhot. ¹⁶ Om boros kad Saul do suminimbar, ’’Sinunudan iyahai dau do nokito no kaka i kaladai,’’ ka. Nga’ a’ i’ di Saul sinunudan i tamanon dau di boros di Somuil dot osiliu iyau’d raja’. ¹⁷ Om lohowo’ nod Somuil i tulun dot Israil do tumimung do hilo’d Mispa, ¹⁸ om boros ka dau dot id diyolo’, ’’Poingkaa no o boros do TUHAN, i Kinorohingan dot Israil, ’Pinosoliwan ku iyokoyu do mantad hilo’d Masir om pinoidu’ ku iyokoyu do mantad id pomorintaan do tulun do Masir om mantad id pomorintaan do piro-piro o bansa’d suwai di minonginggorit dokoyu. ¹⁹ Iyoho’ no i pinopoidu’ dokoyu do mantad id koinsanai di koinggoritan om kosusaan. Nga’ baino’ noddi om iyada’ oku i’ dokoyu, i Kinorohingan dokoyu, tu’ minokipili’ kou i’ doho’ do songulun do sumiliu’d raja’ dokoyu. Om ondung iyo’ddi, om tumimung kou no dot id toguang ku, i TUHAN dokoyu, do sumompipi’ do tumanud do payat om pinuruan do sompiiyon dokoyu,’ ka,’’ ka dau. ²⁰ Om suhuo’ nod Somuil o pointikid-tikid di payat do mongoi’d hiri’d gulu om pilio’ nod TUHAN o payat do Binyamin. ²¹ Om suhuo’ nod i Somuil i sompiiyon dot id suang do payat do Binyamin do mongoi’d hiri’d gulu om kopili’ no i sompiiyon di Matri. Om soira’ di minongoi’d hiri’d gulu o pointikid-tikid do kusai dit id suang do sompiiyon di Matri, om kopili’ no i Saul, i tanak di Kis. Om ihumo’ noddi diyolo’ i Saul nga’ a’ i’ iyau hino’d hiri. ²² Om uhot noddi do TUHAN i tulun, ’’Oi TUHAN, minongoi i’ tuu’d hiti i tulun diri?’’ ka. Om boros kad TUHAN do suminimbar, ’’Minongoi i Saul lisok do hilo’d tolikud dilo konunu-nunuan,’’ ka. ²³ Om panangkus nopoddi iyolo’ do minongoi poundaliu di Saul do mantad hiri, om angatai nod hiri’d pogialatan di tulun dot ogumu’. Om kokito no diyolo’ dot i Saul nopo nga’ aranggou no ko’ mantad do tulun do suwai; tu’ iri nopo tulun do suwai om gisom ngai’ no dau dot id lihawa di poingkakat iyau. ²⁴ Om boros kaddi di Somuil dot id tulun dot Israil, ’’Iti no i tulun do nopili’d TUHAN. Aiso’ i’ o songulun dot id pogialatan dati’ do koiyo dau,’’ ka dau. Om pagarango’ no di tulun dot Israil o poingkaa, ’’Otogui po iti raja’!’’ ka. ²⁵ Om poboroso’ nogiddi di Somuil dot id koinsanai di tulun o kuasa’ om tonggungan do raja’. Om potuliso’ ngai’ no dau iri dot id iso’ o buuk. Om poopio’ no dau i buuk diri dot id kinoiyonon dit olidang. Om suhuo’ ngai’ nogiddi dau i tulun do minuli’ dot id walai diyolo’. ²⁶ Om i Saul nga’ minuli’ nogi’ do hilo’d walai dau do hilo’d Gibia. Om minoyo’ dau o piro-piro tulun di gunsiou om i bininsuhu’d Kinorohingan do moyo’ di Saul. ²⁷ Nga’ haro i’ o piro-piro tulun dot angaraat di minimboros do poingkaa, ’’Haro kopio tuu o guna’ do tulun diti dot id dati’?’’ ka. Om hingi-hingion diri diyolo’ i Saul om a’ minanahak do nipuhawang dot id dau. Nga’ a’ i’ miningkoilo-ilo i Saul.

¹ Oruhai pod mantad diri, om angatai nod i Nahas i raja’ dot Amon diri, i soudor dau do minongoi ponurungku’ di bandar do Yabis, it id suang do watas do Giliad. Om boros ka daa di tulun do hilo’d Yabis dot id di Nahas, ’’Mitaru’ toko’ nogi’ om mokiporinta’ i’ iyahai diya’,’’ ka. ² Om boros ka di Nahas, ’’Monokitaru’ oku i’ dokoyu nga’ wonsoyon ku po o miagal diti: maan ku po irulo’ o pointikid-tikid do mato dokoyu’d wanan om ointingayam i’ o koinsanai’d tulun dot Israil,’’ ka dau. ³ Om boros ka di piro-piro o boyoon do hiri’d bandar do Yabis, ’’Onuwai po iyahai’d maso do turu’ o tadau do popoilo diti habar dot id pointongkop do pomogunan dot Israil. Ondung aiso’ o mongoi dahai ponulung, om tumahak no iyahai dot id diya’,’’ ka diyolo’. ⁴ Om korikot no i piro-piro o susuhuon diri do hilo’d Gibia, i kinoiyonon di Saul. Om tontok di pinoboros diyolo’ i habar diri om timpuun nod minihad i tulun do hiri tu’ aiso’ no o pokukurayan diyolo’. ⁵ Maso nopoddi nga’ koguguli’ di Saul do mantad id dumo do kiginayat di sapi’ dau. Om ponguhot no iyau, ’’Nokuro ti? Nokuro tu’ mihad ngai’ o tulun?’’ ka dau. Om posunudo’ no diyolo’ dot id dau i habar do pinosunud di tulun do mantad hilo’d Yabis. ⁶ Om soira’ddi nokorongou i Saul diri, om porintao’ no iyau di Rusod do Kinorohingan, om kotogod no tomod iyau. ⁷ Om ongoi no iyau do duwo o tinan do sapi’ om pimpopoto’ no dau. Om ponuhu’ no iyau’d tulun do minongigit di popot di sapi’ddi do potongkopon di pomogunan dot Israil, do mikuwo’d popoboros do boros do poingkaa, ’’Isai nopo it a’ tumanud di Saul om i Somuil do mongoi sangod, om popoton no do miagal diti sapi’ diyolo’!’’ ka. Om ongooris diri i tulun dot Israil do haro doti’ndo o wonsoyon do TUHAN. Om rikot ngai’ nopoddi iyolo’, om aiso’ no o minolu’. ⁸ Om timungo’ nod Saul iyolo’ do hilo’d Bisik om intobo’ dau iyolo’: 300,000 o tulun do mantad hilo’d Israil, om 30,000 o tulun do mantad hilo’d Yohuda. ⁹ Om boros kaddi diyolo’ dot id tulun di mantad hilo’d Yabis diri, ’’Sunudan no i tulun dokoyu dot a’ po orikot o tangaadau’d suab om otulung no iyolo’,’’ ka. Om soira’ddi nokorongou i tulun do Yabis diri om ongotood tomod diri iyolo’. ¹⁰ Om boros ka diyolo’ dot id di Nahas, ’’Suab nopondo om mangakun no iyahai’d aala’, om wonsoyon nopo i korohian nu do wonsoyon dot id dahai!’’ ka. ¹¹ Om kosuabon poddi om bohogio’ nod Saul i tulun dau do tolu o bohogian. Om tontok di numawau nogi’, om ongoi no iyolo’ do hiri’d kokiiman di tulun dot Amon do minongoi panangod diyolo’. Om a’ poddi norikot o tangaadau om nangapatai nod Saul i pisangod. Om iri nopoddi i tulun dot Amon dit a’ nangapatai om kopogitongkiad-kiad nopo, om aiso’ no o soroduwo-duwo tulun do miwoyo-woyo’ do manangkus. ¹² Om boros kaddi di tulun dot Israil dot id di Somuil, ’’Honggo no i tulun di kasaap kopio dot a’ poposorupai di Saul do sumiliu’d raja’? Patahako’ daa iyolo’ dot id dahai, om maan i’ dahai iyolo’ patayo’,’’ ka diyolo’. ¹³ Nga’ boros kad i Saul, ’’Iso’ pod tulun nga’ a’ i’ koino-ino’d patayon do tadau’d baino’, tu’ tadau nod baino’ do pinasi’d TUHAN ot Israil,’’ ka. ¹⁴ Om boros kaddi di Somuil dot id diyolo’, ’’Kainou mongoi ngai’ do hilo’d Gilgal, om maan toko’ indo kawagu pogiroto’ dot i Saul o nosiliu’d raja’ toko’,’’ ka dau. ¹⁵ Om ongoi ngai’ no iyolo’ do hilo’d Gilgal om hilo’ no, do hiri’d tiiyonon do sumambayang diri, do pinogirot kawagu diyolo’ dot i Saul o raja’ diyolo’. Om papatahak no iyolo’ do porsombahan do piombolutan. Om ramayo’ no di Saul om koinsanai’d tulun dot Israil i winonsoi do tontok diri.

¹ Om boro-boros noddi i Somuil dot id tulun dot Israil, ’’Nowonsoi ngai’ ku no i pinokianu dokoyu. Om nopomilian ku no iyokoyu’d raja’. ² Om mantad do baino’, om iyau no o sumiliu’d boyoon dokoyu, tu’ iyoho’ nopo om molohing no om nokopurak no o tobuk ku. Laid oku noddi kopio do nosiliu’d boyoon dokoyu, do mantad po dit omulok oku po om gisom do baino’. Tu’ nangkagayo no o tangaanak ku. ³ Om baino’ nopodti om poingkakat oku dot id toguang dokoyu! Om ondung nakasala’ oku dot id suang do nunu nopo, om tondoso’ oku nopod dinondo dot id toguang do TUHAN om id toguang diti raja’ di nopili’ dau. Nokoumbal oku toi do minanakau do sapi’ ko’ kaladai do tulun do suwai? Nokoumbal oku toi do minagakal ko’ minonginggorit pod isai nopo o tulun? Nokoumbal oku toi do ruminamit do tusin di ponisip? Poboroson nopo, om koguli’ ku i’ o nunu nopo i naanu ku,’’ ka dau. ⁴ Om boros ka di tulun dot Israil, ’’Amu’, a’ ko i’ insan pagakal om a’ ko insan ponginggorit dahai. Om a’ ko insan panakau do nunu nopo do mantad id tulun do suwai,’’ ka diyolo’. ⁵ Om boros kaddi di Somuil, ’’TUHAN no om ilo raja’ di nopili’ dau o sumiliu’d sasi’ do tadau’d baino’, dot aiso’ o sala’ ku dot ongokooro’ piya,’’ ka dau. Om boros ka diyolo’ do suminimbar, ’’Iyo noddi, TUHAN no o sumiliu’d sasi’ toko’,’’ ka. ⁶ Om boros ka kawagu di Somuil, ’’TUHAN i’ o minomili’ di Musa om i Harun. Om iyau no o pinoposoliwan di taki-aki dokoyu do mantad hilo’d Masir. ⁷ Om dinondo nodti, om kada’ kou po pamanau. Tu’ pasalaon ku iyokoyu dot id toguang do TUHAN. Sorohon no dokoyu i kosianan do TUHAN di pinointalang dau dot id dokoyu om id taki-aki dokoyu. ⁸ Tontok di minongoi i Yakub om i sompiiyon dau do hilo’d Masir, om di nopo di ninggorit iyolo’ di tulun do Masir, om pomolohou nod TUHAN i taki-aki dokoyu do mokitulung dau. Om suhuo’ nod TUHAN i Musa om i Harun do momoyo’ diyolo’ do sumoliwan do mantad hilo’d Masir do mongoi pomogun-mogun do hiti’d pomogunan diti. ⁹ Nga’ linihuan iddi diyolo’ o TUHAN, i Kinorohingan diyolo’. Om pologoso’ noddi do TUHAN i tulun do Pilistin, om i raja’ do Muab, om i Sisora, i boyoon do soudor di hilo’d Hasor, do minongoi panangod di taki-aki dokoyu do gisom do naala’ iyolo’. ¹⁰ Om sambayang noddi iyolo’ dot id TUHAN do minangakun di dusa diyolo’. Boros ka diyolo’, ’Nokowonsoi no iyahai’d dusa dot id diya’, oi TUHAN, tu’ tuminongkiad iyahai diya’ om tuminuku’ nogiddi iyahai di tingolig do Baal om Astorit. Nga’ poiduwo’ no iyahai do mantad id pisangod dahai, oi TUHAN, om sumambayang indo iyahai dot id diya’!’ ka. ¹¹ Om pilio’ noddi do TUHAN i Gidion, om i Barak nogiddi, om i Yipta no, om id tohuri noddi om iyoho’ o pinili’ dau. Nokopoidu’ ngai’ iyahai dokoyu do mantad id pisangod dokoyu, gisom dot osimbayan kou’ddi do momogun-mogun. ¹² Nga’ soira’ddi noilaan dokoyu do mongoi panangod dokoyu i Nahas, i raja’ do tulun dot Amon diri, om iyadaai no dokoyu o TUHAN do sumiliu’d raja’ dokoyu. Tu’ boros ka dokoyu dot id doho’, ’Orohian iyahai do porintaon do raja’,’ ka dokoyu. ¹³ Om baino’ nodti om haro no o raja’ do nopili’ dokoyu. Pinokianu dokoyu iyau, om patahako’ noddi do TUHAN iyau dot id dokoyu. ¹⁴ Solinaid nopo dokoyu do momusou’d TUHAN, i Kinorohingan dokoyu, om sumambayang dot id dau, om mokinongou do boros dau, om mumboyo’ do ponuhuan dau, om solinaid nopo dokoyu om ilo raja’ dokoyu do tumanud dau om osimbayan kou no. ¹⁵ Nga’ ondung a’ kou momusou’d boros do TUHAN, om a’ mumboyo’d ponuhuan dau, om atantu’ nod saapon kou dau, om saapon dau i raja’ dokoyu. ¹⁶ Om dinondo nodti om kada’ kou po pamanau! Mintong kou po kopio di wonsoyon do TUHAN do koimayaan kopio. ¹⁷ Dongmagadau’d dinondo koii? Nga’ sumambayang oku indo dot id TUHAN om poporikot indo iyau do tinggoron om rasam do ponimbar di sambayang ku. Om osiliu nopondo o miagal diri om kopuriman kou nogindo do nokowonsoi kou’d dusa dit agayo kopio dot id TUHAN tu’ minokianu kou i’ do raja’,’’ ka dau. ¹⁸ Om sambayang noddi i Somuil, om tadau iddi do pinoporikot o TUHAN do tinggoron om rasam. Om oinsanan nopoddi i tulun dot Israil dot ooris do TUHAN om ooris di Somuil. ¹⁹ Om boros kaddi diyolo’ dot id di Somuil, ’’Tulungo’ no iyahai, oi Tuan, sambayang nod id TUHAN, i Kinorohingan nu, do bagi’ dahai, om a’ i’ iyahai apatai. Opurimanan noddi dahai do suwai nopo ko’ i dusa dahai, om nokowonsoi po kawagu iyahai’d dusa tu’ minokianu i’ iyahai’d raja’,’’ ka. ²⁰ Om boros kaddi di Somuil, ’’Kada’ kou kooris! Tu’ mulong piya do nokopomonsoi kou’d karaaton diri, nga’ kada’ kou i’ tongkiad do TUHAN. Suwai ko’ sumambayang kou no kasai’ dot id dau do mikuwo’d aayi-ayi’ o ginawo dokoyu. ²¹ Kada’ kou tanud di piro-piro o ponokokinorohingan, tu’ a’ i’ iyolo’ milo’d monulung ko’ mamasi po dokoyu, tu’ a’ i’ iyolo’ poimpasi. ²² Nakabatos no kopio o TUHAN do mikuwo’d sumpa’ dot a’ iyau tumongkiad dokoyu. Tu’ natantu’ no dau dot iyokoyu o silihon dau do tulun di songonuon dau. ²³ Om iyoho’ noo om mada’ oku no kopio do kowonsoi’d dusa dot id TUHAN dot i tumingkod do sumambayang do bagi’ dokoyu o kowonsoi-wonsoi ku’d dusa. Om monuduk kasai’ oku i’ dokoyu do pasal dit ongosonong om it apatut dokoyu’d wonsoyon. ²⁴ Umboyo’ kou nod TUHAN om wonsoyon no dokoyu i korohian dau do mikuwo’d otorodok om iso-iso’ kopio o ginawo. Soroho’ no dokoyu i kongoimayaan do winonsoi dau do bagi’ dokoyu. ²⁵ Nga’ ondung tumilombus kou’d momonsoi’d dusa om apatai kou no om ilo raja’ dokoyu nga’ kotonggoi nod apatai,’’ ka dau.

¹ Insan tadau, do tontok di nosiliu nod raja’ i Saul, ² om pomili’ no iyau do tolu noribu tulun. Om poundorongo’ no dau dot id sugku’ dau do hilo’d Mikmas, i hilo’d konulu-nuluan do Baitol, o duwo noribu di tulun. Om suhuo’ no dau o soribu di tulun do tumanud di Yonatan, i tanak dau, do kumaa do hilo’d Gibia, it id watas do payat do Binyamin. Om iri no tulun do suwai ko’ iri om sinuhu’ dau do muli’. ³ Om kaala’ nod Yonatan i sonsinompuruan do soudor do Pilistin do hilo’d Giba; om kongorongou no i bansa’d Pilistin do pasal diri. Om ponuhu’ no i Saul do piro-piro o tulun do mongoi popouni’d torumpit do pointongkop di pomogunan, do pomolohou di tulun dot Ibrani do mongoi sangod. ⁴ Om sinunudan ngai’ nogi’ i tulun dot Israil do napatai nod Saul i boyoon do soudor do Pilistin om araatan diri diyolo’ i tulun do Pilistin. Om iri no o kinotonudan di tulun dot Israil di lolohou do mongoi tanud di Saul do hilo’d Gilgal. ⁵ Om daamot nopoddi nga’ nokotimung no i tulun do Pilistin do mongoi sangod di tulun dot Israil. Tolu nohopod noribu o korita’-kuda’, om onom noribu o soudor di kikuda’, om miagal po di pasir do hilo’d tisan do rahat o kogumuo’ di soudor diyolo’. Om pomukiim no iyolo’ do hilo’d Mikmas, i ponong id koulayon do Bait-Awon. ⁶ Om hilo’ no o tadon diyolo’ do minanangod di tulun dot Israil, gisom dot aiso’ no o pokukurayan di tulun dot Israil. Om haro’ddi o piro-piro di tulun dot Israil do minongoi lisok do hiri’d luang do pampang, om hiri’d luang do nuluhon, om hiri’d pogialat-alatan do tontolob, om hiri’d luang do tana’ om hiri’d torobong. ⁷ Iri no wookon om suminoborong di Bawang do Yordan om pinakayaan do hilo’d watas do Gad om Giliad. I Saul nopo nga’ hilo’ kasai’ pod Gilgal, om pananggagaran ngai’ poddi i tulun do manud-tanud dau dot opopoddosian. ⁸ Turu’ no tadau’d i Saul do magandad do korikatan di Somuil, do hilo’d Gilgal, tu’ iyo noddi o pinonuhuan di Somuil, nga’ gisom piya do maso’ddi nga’ a’ po hino i Somuil. Om tumimpuun noddi i tulun do tumongkiad di Saul. ⁹ Om boros kaddi dau dot id diyolo’, ’’Hiitio’ doho’ i porsombahan do sorobon om i porsombahan do piombolutan,’’ ka dau. ¹⁰ Om maha’ dit oruhai no dau’d opupusan o kapatahakan di porsombahan diri om korikot nogi’ i Somuil. Om ongoi no i Saul ruba’ dau mikuwo’d suminuwau. ¹¹ Nga’ uhoto’ no di Somuil iyau, ’’Nunu o winonsoi nu?’’ ka dau. Om boros kad Saul do suminimbar, ’’Pogiiduan oku nodti tulun, om iya’ po nga’ a’ koriko-rikot do miagal di nakabatos nu. Kawagu po nga’ nokotimung no i tulun do Pilistin do hilo’d Mikmas. ¹² Osorou ku nopo nga’ ngoyon oku doti’ndo di soudor do Pilistin songodo’ do hiti’d Gilgal om a’ oku po nokopokianu do kosianan do mantad id TUHAN. Om patahako’ ku nopoddi i porsombahan,’’ ka dau. ¹³ Nga’ boros kad i Somuil dot id di Saul, ’’Iri nopo winonsoi nu’ddi om dongkababasug tomod i’. Tu’ a’ ko tuminanud do tisuhu’ do TUHAN, i Kinorohingan nu. Ondung tuminanud ko daa, om atantu’ no do pologoson ko i’ daa’d TUHAN om i sinakagon nu do momorinta’ dot Israil do gisom dot alaid. ¹⁴ Nga’ iyo nopondo tu’ a’ ko tuminanud om a’ no tumilombus o pomorintaan nu. Om mogihum indo o TUHAN do tulun di korohian dau do silihon do raja’ do tulun dau,’’ ka dau. ¹⁵ Om tongkiad no i Somuil do mantad hilo’d Gilgal om pakayaai no dau do hilo’d Gibia, it id watas do Binyamin. Om daamot nopoddi om nintob di Saul i soudor dau om haro po ot onom nahatus o tulun. ¹⁶ Om pomukiim no i Saul om i Yonatan, i tanak dau, om i piro-piro o soudor diyolo’ do hilo’d Giba, it id watas do Binyamin. Om iri no tulun do Pilistin om minomukiim do hilo’d Mikmas. ¹⁷ Tontok nopoddi nga’ minamanau do mantad hiri’d kokiiman o tolu bohogian do tulun do Pilistin do mongoi panangod, iri nopo bohogian do koiso’ om pinakayaan ponong id Opra, it id watas do Sual, ¹⁸ om iri no bohogian do koduwo om pinakayaan do hilo’d Bait-Horon. Om iri no bohogian di tiso’ om kuminaa do hilo’d wolit di poingimpa’ do Rantai do Siboyim om i tana’ do kowotuan. ¹⁹ Tontok nopoddi nga’ aiso’ i’ o modsusupu’ do basi’ do hilo’d Israil tu’ mada’ i tulun do Pilistin do momonsoi i tulun dot Ibrani do gayang om tandus. ²⁰ Om a’ no milo’d a’ mongoi i tulun dot Israil do hiri’d tulun do Pilistin do mongoi pokiasa’ do radu, om sangkul, om kapak om gogorib diyolo’. ²¹ Pamagadsi’ nopo do mangasa’ do kapak om momonsoi di kakang do sapi’, om sopisousin, om pamagadsi’ nod mangasa’ do radu om sangkul, om sopiduwo o tusin. ²² Gowoi poddi om iyo Saul nod i Yonatan, i tanak dau’ddi, o kigayang om kitandus di maso do mogisasangod do hilo’d Mikmas, om iso’ po di tulun dot Israil do suwai nga’ aiso’ i’ o kigayang ko’ kitandus. ²³ Om suhuo’ no di tulun do Pilistin o sombohogian di soudor diyolo’ do madtalob di ralan do hiri’d pitas do nuluhon do hilo’d Mikmas.

¹ Insan tadau, om boro-boros no i Yonatan dot id tanakwagu di mongingigit di rapo-rapo dau, ’’Kaino mongoi’d hilo’d kiim do tulun do Pilistin,’’ ka. Nga’ a’ i’ di Yonatan sinunudan i Saul, i tapa’ dau. ² Maso nopoddi om poundorong i Saul do hiri’d dolungungan do guas do delima do hilo’d Migron, it id somok no do Gibia. Om haro i’ doti’ ot onom nahatus o tulun do moyo-woyo’ di Saul do maso’ddi. ³ (Iri nopo it imam di kiinigit dit ipod do maso’ddi om i Ahia, i tanak di Ahitub; i Ahitub nopo om tobpinai di Ikabod. I Ikabod no om tanak di Pinihas, om i Pinihas no om tanak di Ili, it Imam do mogobi-obi’ do TUHAN do hili’d Silo). Om iri ngai’ nogi’ i tulun do hiri nga’ a’ i’ nokoilo do nakapamanau i Yonatan. ⁴ Iri nopo ralan do hilo’d Mikmas diri, i hiri’d pitas do nuluhon, i kawayaon kopio di Yonatan do mongoi’d hiri’d kiim do Pilistin, om nopiompopingan do pampang dit atarom. Iri nopo tiso’ di pampang om roitan do Bosis om iri no tiso’ om roitan do Sini. ⁵ Iri nopo pampang di ponong id utara om potimbaba’ do Mikmas, om iri no ponong id salatan om potimbaba’ do Giba. ⁶ Boros kad Yonatan dot id tanakwagu’ddi, ’’Kaino mongoi’d hilo’d kiim dilo tulun do Pilistin, ilo tulun do kapir. Tu’ uhupan to i’ doti’ do TUHAN; tu’ milo i’ o TUHAN do manahak do kamanangan dot id tulun dit ogumu’ om id tulun dit okuri’,’’ ka dau. ⁷ Om boros ka di tanakwagu do suminimbar, ’’Nunu nopo o wonsoyon nu om tumanud oku no,’’ ka dau. ⁸ Om boros ka di Yonatan, ’’Osonong no. Sumampaping to nopo om okito to i’ di tulun do Pilistin. ⁹ Ondung suhuon to diyolo’d mandad do gisom do korikatan diyolo’, om mandad to nopo, om a’ to no sumampaping. ¹⁰ Nga’ ondung suhuon to diyolo’ do mongoi’d hilo’d diyolo’, om mongoi to nopo; tu’ iri no o koilaan to dot onuan to’d TUHAN do kamanangan do sumaap diyolo’,’’ ka dau. ¹¹ Om pokilogos nopo iyolo’ goduwo dot okito di tulun do Pilistin. Om boros kaddi di tulun do Pilistin, ’’Intong pogi’! Nga’ haro moti’ o tulun dot Ibrani do suminoliwan do mantad hilo’d luang di linisok diyolo’!’’ ka. ¹² Om polohowo’ noddi diyolo’ o boros dot id di Yonatan om id tanakwagu’ddi, ’’Takad kou’d hiti! Tu’ haro o pokitanan dahai dokoyu!’’ ka. Om boros kaddi di Yonatan dot id tanakwagu’ddi, ’’Tanud doho’. Tu’ noonuan nod TUHAN do kamanangan o tulun do Israil do sumangod do tulun do Pilistin,’’ ka dau. ¹³ Om ponungkamang no i Yonatan do tuminakad, om i tanakwagu nga’ muhut- suhut i’ dau. Om honggo nopo o kobulaton di Yonatan om hiri no iyau do momobog di tulun do Pilistin om hiri no dot ohunduk iyolo’, om muhut-suhut dau i tanakwagu do mimpatai di tulun do Pilistin diri. ¹⁴ Om id suang nopod pinisangadan dit insan i’ om haro i’ doti’ o duwo nohopod o tulun do napatai di Yonatan om i tanakwagu’ddi dot id kinoiyonon di sompiapat do hiktar o kogoyoo’. ¹⁵ Om pananggagaran poddi dot opopoddosian i tulun do Pilistin do hiri’d kokiiman om i hiri’d talun do nokorongou di habar diri. Om ongooris ngai’ poddi i tulun do Pilistin om i soudor di madtamong, om i piro-piro sinompuruan do mananakau; om iri piya tana’ nga’ guminuyu’, om ongoborulong ngai’ poddi iyolo’. ¹⁶ Om kokito’ddi di tulun di Saul i tulun do Pilistin dot a’ no oila-ilaan o kotongkus-tongkuso’ tu’ ongoborulong poo, do tontok di pointamong iyolo’ do hilo’d Gibia, it id watas do Binyamin. ¹⁷ Om boros kad Saul dot id tulun dau, ’’Intobo’ ilo soudor toko’ om ilaan no ondung isai ot a’ hino’d hiti,’’ ka dau. Om soira’ di nointob diyolo’, nga’ koilaai no dot a’ hino i Yonatan om i tanakwagu di mongingigit di rapo-rapo dau. ¹⁸ Om boro-boros no i Saul dot id di Ahia, it Imam, ’’Igitai it ipod do hiti,’’ ka dau. (Tadau nopoddi nga’ nigitan di Ahia it ipod dot id toguang di tulun dot Israil.) ¹⁹ Om maso pod i Saul do moro-boros dit imam nga’ muhang-ruhang nopo o kagangaho’ do hiri’d kokiiman di tulun do Pilistin. Om boros kaddi di Saul dot id imam diri, ’’Aiso’ no o maso toko’ do muhot do TUHAN,’’ ka dau. ²⁰ Om pamanau noddi i Saul om i piro-piro o soudor dau do minongoi’d hiri’d pogisasangadan. Om kokito no diyolo’ dot angagangau nopo i tulun do Pilistin tu’ mogisasaap nopo iyolo’ om mogipapatai dot iyolo’ i’ om iyolo’. ²¹ Om iri nopoddi i tulun dot Ibrani di poingiyon do hiri’d watas di tulun do Pilistin, om i minongoi daa sugku’ di soudor do Pilistin nga’ tuminongkiad diri diyolo’ om minongoi nogiddi sokodung di Saul om i Yonatan. ²² Om iri nogi’ i tulun do suwai, i minongoi daa lisok do hiri’d konulu-nuluan dot Ipraim nga’ minongoi iddi uhup do suminangod di tulun do Pilistin, di nokorongou iyolo’ do minogidu’ i tulun do Pilistin. ²³ Om sangod nopo iyolo’ do minompus di ralan, om gisom do nakatalib iyolo’ do hilo’d Bait-Awon. Om tadau noddi do pinasi do TUHAN ot Israil. ²⁴ Tontok nopod tadau’ddi nga’ louson no om ongolomok poo i tulun dot Israil tu’ nokopomopol no i Saul do poingkaa, ’’Isai nopo o tulun do mangakan do nunu nopo do tadau’d baino’ dot a’ oku po kosuli’ di pisangod ku om ousung no,’’ ka. Om gowoi poddi om iso’ pod tulun nga’ aiso’ no o minangakan do nunu- nunu do nosongodou do tadau’ddi. ²⁵ Om korikot no iyolo’ dot id iso’ o puru’ om kokito no iyolo’ ngai’ do paha’ dot ogumu’ tomod. ²⁶ Nga’ aiso’ i’ tiso’ diyolo’d minangakan tu’ ooris iyolo’d oontok di popol di Saul. ²⁷ Nga’ i Yonatan nopo, om a’ i’ nokorongou di popol di tapa’ dau, i koorisan ngai’ di tulun. Om poroloyo’ no dau i sukud do poingigit dau om ongoi no iyau tiuk di paha’ dot okooro’ do mantad hiri’d pinuwalai om kano’ no dau. Om okoris nopoddi o nopurimanan dau. ²⁸ Nga’ boros kad songulun di soudor, ’’Ongolomok no daa ngai’ iyahai’d ololousanan nga’ minongoris i tapa’ nu tu’ minomopol iyau do poingkaa, ’Isai nopo o tulun do mangakan do nunu nopo do tadau’d baino’ om ousung no,’ ka,’’ ka dau. ²⁹ Om boros kad Yonatan do suminimbar, ’’Adalaan noddi kopio o winonsoi di tapa’ ku dot id tulun toko’ do miagal diri! Antangai pogi’ nga’ okoris-koris no moti’ o topurimanan ku iyoho’ tu’ minangakan oku i’ di paha’. ³⁰ Okon toi ko’ osonong nogi’ daa’d nakan di tulun i taakanon di naahau do mantad id pisangod? Tu’ ondung minangakan, nga’ atantu’ no dot ogumu-gumu’ i’ daa o tulun do Pilistin dot apatai toko’,’’ ka dau. ³¹ Om naala’ iddi di tulun dot Israil i tulun do Pilistin do mantad pod hilo’d Mikmas om gisom do korikot do hilo’d Ayalon do tontok do tadau’ddi. Nga’ louson noddi kopio iyolo’, ³² om gowoi poddi om pogiahawo’ nopo diyolo’ i nangaanu diyolo’ do mantad id pisangod. Om onuo’ no diyolo’ i sapi’ om i dumba’, om sumbolio’ nod hiri. Om kano’ noddi diyolo’ i daging dit a’ po nakalawas ngai’ o raha’. ³³ Om kosunudai noddi i Saul do pasal diri, ’’Intong pogi’, nga’ momonsoi moti’d dusa o tulun toko’ dot id TUHAN tu’ mangakan iyolo’d daging di kiraha’,’’ ka. Om boros kad Saul do minamagarang, ’’Magakal kou! Poliid kou’d watu dit agayo do hiti!’’ ka dau. ³⁴ Om boros ka kawagu dau dot id tulun di minomisunud diri, ’’Ongoi kou do hilo’d tulun diri om suhuon no iyolo’d mongigit di sapi’ om dumba’ diyolo’ do hiti. Om osumbali’ i’ diyolo’ iri dot id sakai diti watu om aakan i’ do hiti. Nga’ kada’ po do momonsoi’d dusa dot id TUHAN tu’ mangakan do daging di kiraha’,’’ ka dau. Om igitai no di tulun i tayam-tayam di naanu diyolo’ do mantad id pisangod do kuminaa’d hiri do totuong iddi. Om sumbolio’ noddi diyolo’ do hiri. ³⁵ Om pomonsoi no i Saul dot iso’ o pananaraban do porsombahan dot id TUHAN. Om iri no o pananaraban do porsombahan di winonsoi di Saul dit id gulu i’ kopio. ³⁶ Om boros kad Saul dot id tulun dau, ’’Ngoyo’ toko’ gusao’ i tulun do Pilistin do dongotuong do baino’, om asangod toko’ i’ iyolo’ om panakahan toko’ nogindo do gisom dot anawau, om patayon ngai’ toko’ nopondo iyolo’,’’ ka dau. Om boros ka di tulun do suminimbar, ’’Wonsoyo’ nopo it osonong dot osorou nu,’’ ka diyolo’. Nga’ boros ka dit imam diyolo’, ’’Osonong do muhot toko’ pod Kinorohingan,’’ ka dau. ³⁷ Om uhot no i Saul do Kinorohingan, ’’Mongoi oku tuu sangod di tulun do Pilistin? Pamanangon oku i’ tuu diya’?’’ ka dau. Nga’ a’ i’ suminimbar o Kinorohingan do tadau’ddi. ³⁸ Om boros kaddi di Saul dot id piro-piro o boyoon di tulun, ’’Kainou’d hiti om ilaan toko’ i’ ondung nunu i dusa do nowonsoi’d tadau baino’! ³⁹ Mamatos oku no dot id TUHAN di poimpasi, i minanahak do kamanangan dot id tulun dot Israil, dot iri nopo tulun di nakasala’ om hukuman nod kapatayon, do mulong piya dot i Yonatan, i tanak ku,’’ ka dau. Nga’ aiso’ i’ o songulun piya do nakatama’ do suminimbar. ⁴⁰ Om boros kaddi di Saul dot id toinsanan di tulun dot Israil, ’’Ingkakat kou iyokoyu do ponong hilo’, om mingkakat iyahai di Yonatan do ponong hiti,’’ ka dau. Om boros ka di tulun do suminimbar, ’’Wonsoyo’ nopo it osonong dot osorou nu,’’ ka. ⁴¹ Om sambayang no i Saul dot id TUHAN, i Kinorohingan dot Israil, ’’Nokuro tu’ a’ ko sumimbar doho’d baino’, oi TUHAN, i Kinorohingan dot Israil? Simbaro’ oku no do pawayaon diti watu dot olidang. Ondung iyoho’ ko’ i Yonatan o nakasala’, om simbaro’ no di watu dot Urim, nga’ ondung Israil, i tulun nu o nakasala’, om simbaro’ no do watu’d Tumim,’’ ka dau. Om iri nopoddi nisimbar do TUHAN om iyo Yonatan di Saul o notuduk, om nokointalang noddi dot a’ nakasala’ i rayat. ⁴² Om boros kad Saul, ’’Baino’ nodti om pointalango’ no ondung i Yonatan ko’ iyoho’ o nakasala’,’’ ka dau. Om i Yonatan no o nokointalang do nakasala’. ⁴³ Om uhoto’ noddi di Saul i Yonatan, ’’Nunu o winonsoi nu?’’ ka dau. Om boros ka di Yonatan do suminimbar, ’’Nakapangakan oku’d paha’ dot okooro’ do tiniuk ku di sukud ku. Nga’ posodia’ oku id patayon,’’ ka dau. ⁴⁴ Om boros kad i Saul, ’’Hukuman oku nopod Kinorohingan dot a’ ku no iya’ hukuman do kapatayon, oi Yonatan!’’ ka dau. ⁴⁵ Nga’ boros ka di tulun dot ogumu’ dot id di Saul, ’’Nokuro tu’ patayon nogi’ i Yonatan, tu’ okon toi ko’ iyau o nakaanu’d kinamanangan dit agayo do hiti’d Israil? Amu’, a’ i’ iyahai kaakun! Mamatos iyahai dot id TUHAN, i poimpasi, dot iso’ pod tobuk di Yonatan nga’ a’ i’ koino-ino dot ouul. Tu’ iri i’ i nuhupan iyau’d TUHAN, o nakamanang-manang dau baino’,’’ ka diyolo’. Om napasi iddi di tulun dot ogumu’ i Yonatan do mantad id hukuman do kapatayon. ⁴⁶ Om tingkod no i Saul do momogusa’ di tulun do Pilistin. Om uli’ noddi i tulun do Pilistin do hiri’d pomogunan diyolo’. ⁴⁷ Tontok di nosiliu i Saul do raja’ dot Israil, om ngoyo’ ngai’ nopo dau songodo’ i pisangod do tulun dot Israil do hinongo-honggo nopo iyolo’. Iri tulun do Muab, om Amon, om Idom; om i piro-piro o raja’ do Soba, om i tulun do Pilistin. Om kamanang kasai’ nopo iyau dot id pisangadan. ⁴⁸ Osiou tomod iyau do suminangod gisom dot i tulun dot Amalik nga’ naala’ i’ dau. Om nokoidu’ddi dau o tulun dot Israil do mantad id pisangod di mongoi panakau do konunu-nunuan diyolo’. ⁴⁹ Tangaanak nopod i Saul do tongokusai om i Yonatan, i Yiswi, om i Malkisua. Iri no tanak dau’d tondu’ dot id gulu om i Mirab, om iri no koduwo om i Mikal. ⁵⁰ Sawo nod i Saul om i Ahinuam, i tanak di Ahimaas; om iri no boyoon do soudor dau om i Abnor, i pinsan dau; i Abnor nopo om tanak di Nor; i tamanon di Saul. ⁵¹ I Kis nopo, i tapa’ di Saul, om i Nor, i tapa’ di Abnor, om tangaanak di Abiol. ⁵² Solinaid nopo di Saul do poimpasi om a’ no milo’d a’ iyau tumotos do sumaap di tulun do Pilistin. Om iri no o kokuwaan do soira’ nopod kosolowot iyau’d tulun dit okoris om osiou om silihon no dau do soudor dau.

¹ Insan tadau, om boro-boros no i Somuil di Saul, ’’TUHAN no i minonuhu’ doho’ do momili’ diya’ do sumiliu’d raja’ do tulun dau, i bansa’d Israil. Iyo nopoddi, om pokinongoho’ no iti boros do TUHAN, it Agayo Kuasa’. ² Hukuman no dau o tulun dot Amalik tu’ suminaap i’ di tulun dot Israil i taki-aki diyolo’ do tontok di kososoliwan di tulun dot Israil do mantad hilo’d Masir. ³ Iyo nopoddi om ngoyo’ no songodo’ i tulun dot Amalik om raagon ngai’ nopo i diyolo’d songonuon. Kada’ nod haro o poolu-oluon; patayon ngai’ no i tongokusai, om tongoondu’, om tangaanak om i tangaanak di ragang po om i sapi’, om i dumba’, om it unta om i kaladai,’’ ka. ⁴ Om timungo’ ngai’ nod i Saul i soudor dau om intobo’ no dau do hilo’d Tilaim. Om oinsanan nopo nga’ 200,000 o soudor do mantad hilo’d Israil om 10,000 o soudor do mantad hilo’d Yohuda. ⁵ Om ongoi no i Saul om i soudor dau do hilo’d bandar do tulun dot Amalik om awang no iyolo’ do hiri’d kinarasakan do bawang. ⁶ Om porikot no i Saul do boros do poinsan di tulun do Kini, it iso’ bansa’d tulun, i taki-aki nopo diyolo’ om osonong dot id tulun dot Israil, di kososoliwan di tulun dot Israil do mantad hilo’d Masir di gulu po. Poingkaa o boros di Saul, ’’Poggidu’ kou no om tumongkiad nod mantad id tulun dot Amalik om a’ kou i’ kotonggoi’d apatai,’’ ka dau. Om tongkiad no i tulun do Kini do mantad hiri. ⁷ Om ngoyo’ noddi di Saul songodo’ i tulun dot Amalik, om kaala’ no dau iyolo’. Om monokisaap nopo iyau do mantad pod hilo’d Hawila om gisom do nokorikot do hilo’d Sur, i ponong id koulayon do mantad hilo’d Masir. ⁸ Om tangkapo’ no dau i Agag, i raja’ do tulun dot Amalik, om patayo’ ngai’ no dau i tulun dot Amalik do suwai. ⁹ Nga’ pinologos i’ di Saul om i soudor dau do poimpasi i Agag. Om a’ i’ diyolo’ pinatai i dumba’ om i sapi’ dit ongosonong, om i tangaanak do sapi’ om kambing dit ongolomu’ om nunu nopo it agayo o gatang. Iri no tayam-tayam dit angara-raat om it aiso’ o guna’ o pinatai diyolo’. ¹⁰ Om boro-boros no o TUHAN dot id di Somuil, ¹¹ ’’Monosol oku i’ do siniliu ku’d raja’ i Saul. Tu’ nokotongkiad no iyau doho’ om a’ noddi mumboyo’ dot isuhu’ ku,’’ ka dau. Om kotogod no i Somuil. Om lugu-lugutai no dau o TUHAN do gisom do nosuaban. ¹² Osuab poddi di kosuabon kawagu om ngoyo’ no dau ihumo’ i Saul do mongoi daa solowot dau. Om kosunudai no iyau do minongoi i Saul do hilo’d Karmol do minongoi popoingkakat do watu do maan do kopomusarahan do ngaran dau, om lombus po i Saul do hilo’d Gilgal. ¹³ Om ngoyo’ nod Somuil solowoto’ i Saul. Om boros kad Saul dot id dau, ’’Maha’ daa om barakatan ko’d TUHAN, oi Somuil! Nowonsoi ku no i pinonuhuan do TUHAN,’’ ka dau. ¹⁴ Nga’ boros kad Somuil do minuhot dau, ’’Ondung otopot do miagal dino, om nokuro tu’ korongou oku’d tunga’ do sapi’ om tuni do dumba’?’’ ka. ¹⁵ Om boros kad Saul do suminimbar, ’’Ilo’ nopo om nanu di tulun ku do mantad id tulun dot Amalik. Nanu diyolo’ i dumba’ om sapi’ dot ongosonong kopio do maan do porsombahan di sorobon dot id TUHAN, i Kinorohingan nu. Nga’ iri nopo suwai om pinatai ngai’ no,’’ ka dau. ¹⁶ Nga’ boros kad Somuil, ’’Tingkod pod moro-boros. Pokinongoho’ poti boros do TUHAN di pinoboros dau dot id doho’ kosodop,’’ ka dau. ’’Poboroso’,’’ kad Saul. ¹⁷ Om boros kad Somuil, ’’Mulong pod aiso’ i’ daa o ngaran-ngaran nu dot opurimanan nu, nga’ nosiliu ko i’ do boyoon do koinsanai’d payat dot Israil. Pinili’ ko i’ do TUHAN do suminiliu’d raja’ do tulun dot Israil, ¹⁸ om sinuhu’ ko dau do mamatai ngai’ di tulun dot Amalik dit angaraat diri. Om sinuhu’ ko dau do sumaap diyolo’ do gisom dot apatai ngai’ nu iyolo’. ¹⁹ Nga’ nokuro tu’ a’ ko minumboyo’ di nisuhu’d TUHAN? Nokuro tu’ minanganu ngai’ kou nopo di dapu’ diyolo’ om gowoi poddi om nokowonsoi kou di karaatan do TUHAN?’’ ka dau. ²⁰ Nga’ boros kad Saul do suminimbar, ’’Nga’ a’ oku toi minumboyo’d boros do TUHAN? Tuminanud oku i’ di nisuhu’ dau. Natanggayan ku i’ do minuli’ i Raja’ Agag, om napatai ngai’ ku i’ i tulun dot Amalik di suwai. ²¹ Nga’ a’ i’ di tulun ku pinatai i dumba’ om i sapi’ dit ongosonong kopio di nangaanu do mantad id pisangod. Suwai ko’ nigitan ngai’ i’ diyolo’ iri do hiti’d Gilgal do maan do porsombahan di sumbolion dot id TUHAN, i Kinorohingan nu!’’ ka dau. ²² Nga’ boros kad Somuil, ’’Honggo ma i korohian kopio’d TUHAN: i mumboyo’ ko’ i porsombahan om i porsombahan do sumbolion? Osonong nogi’ do mumboyo’ ko’d TUHAN ko’ mantad do papatahak ko’d porsombahan di sumbolion, om osonong nogi’ i mumboyo’ ko’ i lunok do dumba’. ²³ Tu’ sumaap nopod TUHAN om miagal poddi momurinait karaat; om it asawat o ginawo nga’ iyo poddi tumuku’ do tingolig karaat. Iyo nopoddi tu’ niada’ nu i boros do TUHAN om TUHAN nga’ mada’ no dot iya’ o raja’,’’ ka dau. ²⁴ Om pagaku noddi i Saul dot id di Somuil do nokorongou’d miagal diri, boros ka dau, ’’Otopot nod nokowonsoi oku’d dusa. Tu’ tuminolibamban oku di pinonuhuan do TUHAN om a’ oku minamadul di boros nu. Minodosi oku di tulun ku, om gowoi poddi om tonudo’ ku nopo i pinokianu diyolo’. ²⁵ Nga’ baino’ nopo, om mokiampun oku no di dusa ku, om ompunai oku no, om tonudo’ oku no do gumuli’ do hilo’d Gilgal, om kasambayang oku i’ dot id TUHAN,’’ ka dau. ²⁶ Nga’ boros kad Somuil, ’’A’ oku no gumuli’ do tumanud diya’. Tu’ niada’ nu i’ i boros do TUHAN, om TUHAN nga’ mada’ no diya’ do sumiliu’d raja’ dot Israil,’’ ka dau. ²⁷ Om tolikud noddi i Somuil do tumongkiad do kinoiyonon diri, nga’ toidai nod Saul i rasuk di Somuil do gisom do nohurak. ²⁸ Om boros kaddi di Somuil dot id di Saul, ’’Tadau nod baino’ do hurakon do TUHAN o pomorintaan dot Israil do mantad id diya’ om patahakon nondo dau dot id tulun do suwai dit osonong mantad ko’ iya’. ²⁹ Kinorohingan nopod Israil di kikagayaan om a’ i’ mongudut om a’ posimban dot osorou dau, tu’ iyau nopo om okon i’ ko’ tulun,’’ ka dau. ³⁰ Om boros kad Saul, ’’Nokowonsoi oku nod dusa. Nga’ pointalango’ po daa o kosuahan nu doho’ do hiti’d toguang diti boyoon do tulun ku om id toinsanan diti tulun dot Israil. Tanud no doho’ do muli do hilo’d Gilgal om kasambayang oku i’ dot id TUHAN, i Kinorohingan nu,’’ ka dau. ³¹ Om tanud no i Somuil di Saul do minuli’ do hilo’d Gilgal, om sambayang no i Saul dot id TUHAN. ³² Om boros kaddi di Somuil, ’’Ngoyo’ i Raja’ Agag hitio’d doho’,’’ ka. Om rikot no i Raja’ Agag dot id dau, mikuwo’d osonong-sonong no daa o ginawo dau tu’ kosorou daa iyau dot, ’Nakatalib noddi o kapatayon!’ ka. ³³ Nga’ boros kad Somuil, ’’Poingkuro nopo i gayang nu do minanagak do tanak do piro-piro o molohing do tondu’ om iyo noddi i tina’ nu iya’ dot atagakan do tanak dau,’’ ka dau. Om pintotoko’ noddi di Somuil i Agag dot id dotimbabaan di pananaraban do porsombahan do hilo’d Gilgal. ³⁴ Om uli’ noddi i Somuil do hilo’d Rama, om i Saul nga’ minuli’ nogi’ do hilo’d walai dau do hilo’d Gibia. ³⁵ Om mantad poddi, do solinaid di Somuil do poimpasi, om a’ no iyau insan ongoi solowot di raja’. Nga’ tumongob diri i Somuil tu’ monosol i’ o TUHAN do minomili’ di Saul do raja’ dot Israil.

¹ Om alaid-laid noddi, om boros kad TUHAN dot id di Somuil, ’’Songkuro nopondo koloido’ nu’ndo do tumongob dot i Saul o katangaban? A’ ku toi iyau nadaan no do sumiliu’d raja’ do tulun dot Israil? Nga’ ongoi nogid hilo’d Baitlahim do dinondo, om migit no do tumau’d saitun, om mongoi i’ dot id tiso’ o tulun di roitan dot i Isai tu’ nopili’ ku no o tiso’ di tangaanak dau do sumiliu’d raja’,’’ ka. ² Nga’ boros kad Somuil, ’’Poingkuro oku’d momonsoi’d miagal diri? Tu’ ondung korongou i Saul diti nga’ atantu’ no do ngoyon oku dau patayo’,’’ ka. Om boros kad TUHAN, ’’Migit no do songinan o sapi’ dit okoro’ po om poboroson nondo dot id tulun dot ogumu’ do mongoi ko pogi’d hilo’ nga’ mongoi ko papatahak dot id TUHAN do porsombahan di sumbolion. ³ Om alapon no i Isai dot id kapatahakan di porsombahan di sumbolion diri. Om sunudan tiya’ indo ondung nunu it apatut nu’d wonsoyon. Pilion no do silihon do raja’, i tulun do potudukon ku diya’,’’ ka. ⁴ Om wonsoyo’ nod Somuil i pinonuhuan do TUHAN dot id dau. Ongoi no iyau’d hilo’d Baitlahim om kotigowo ngai’ nopo i boyoon di tulun do hiri’d bandar diri do minongoi solowot dau. Om ponguhot no iyolo’, ’’Osonong-sonong i’ o kaangai-angayan nu’d hiti?’’ ka diyolo’. ⁵ Om boros kad Somuil do suminimbar, ’’Oo, osonong i’. Nokorikot oku’d mongoi papatahak dot id TUHAN do porsombahan di sumbolion. Om lidangan no dokoyu o tinan dokoyu om katanud kou i’ dot id kapatahakan di porsombahan do sumbolion diri,’’ ka dau. Om sinuhu’ i’ dau i Isai om i tangaanak di Isai do momolidang do tinan diyolo’, om nalap dau iyolo’ do hiri’d kapatahakan di porsombahan diri. ⁶ Om soira’ddi nokotimung iyolo’ om kokito nod i Somuil i tanak di Isai dot i Iliab o ngaran. Om poingkaa daa ot osorou dau, ’’Iti nopo tulun di poingkakat dot id toguang do TUHAN diti nga’ atantu’ nod i pilion do TUHAN,’’ ka. ⁷ Nga’ boros kad TUHAN dot id di Somuil, ’’Kada’ ontong dilo rinanggou om ilo linigkang dau. Okon i’ ko’ ilo’ o korohian ku tu’ a’ i’ iyo’d don tulun o pogogontong ku. Tu’ antangan nopod tulun om iri no i korupa-rupao’ dot id soliwan, nga’ antangan ku nopo iyoho’ om i ginawo,’’ ka dau. ⁸ Om lohowo’ no di Isai i tanak dau dot i Abinadab o ngaran, do mongoi timbaba’ di Somuil. Nga’ boros kad Somuil, ’’Ilo’ nga’ a’ i’ do TUHAN pilion,’’ ka dau. ⁹ Om suhuo’ no di Isai i Sama do mongoi timbaba’, nga’ boros kad Somuil, ’’Ilo’ nogi’ nga’ a’ i’ do TUHAN pilion,’’ ka dau. ¹⁰ Om iyo ngai’ nopoddi o kinowoyo-woyoo’ di Isai do minonuhu’ di turu’ o tanak dau do minongoi timbaba’ di Somuil. Nga’ boros kad Somuil dot id di Isai, ’’Aiso’ i’ o nopili’d TUHAN dot id pogialatan diyolo’,’’ ka dau. ¹¹ Om uhoto’ nod i Somuil i Isai, ’’Haro po o suwai do tangaanak nu’d kusai?’’ ka dau. Om boros kad i Isai, ’’Haro po i komulakan, nga’ maso dau do momogompi’d dumba’,’’ ka dau. Om boros kad Somuil, ’’Ngoyo’ iyau sunudai do mongoi’d hiti. Tu’ a’ toko’ po papatahak do porsombahan di sumbolion dot a’ po iyau korikot,’’ ka dau. ¹² Om ponuhu’ noddi i Isai do tulun do mongoi pomolohou di tanak dau. Iri nopo tanak dau’ddi nga’ tanakwagu dit oligkang om osihat, om olumis o mato dau. Om boro-boros noddi o TUHAN dot id di Somuil, ’’Iti no. Pilio’ iyau!’’ ka. ¹³ Om olomus nopo i Somuil do minongoi di tumau’d saitun, om tuntugai no dau i Daud do tanda’ do pilion dau iyau, dot id toguang di tobpinai di Daud do suwai. Om maso iddi do pinorinta’ do Rusod do TUHAN i Daud. Om mantad pod tadau’ddi om moyo-woyo’ kasai’ no dau o Rusod do TUHAN. Om uli’ noddi i Somuil do hilo’d Rama. ¹⁴ Om tongkiad noddi di Saul i Rusod do TUHAN. Om inggoriton diri iyau’d rusod dot araat di sinuhu’d TUHAN do mongoi ponginggorit dau. ¹⁵ Om boros kaddi di piro-piro o susuhuon di Saul, dot id di Saul, ’’Oilaan i’ dahai dot inggoriton ko’d rusod dot araat di sinuhu’d TUHAN do mongoi ponginggorit diya’. ¹⁶ Nga’ ondung kaakun ko, om posodia’ i’ iyahai do mogihum do tulun di milo do mongombit do kecapi. Om soira’ nopondo dot inggoriton ko di rusod dot araat, om kombiton nondo di tulun i kecapi dau, om olingasan ko indo,’’ ka diyolo’. ¹⁷ Om boros kaddi di Saul, ’’Pogihuman oku nod tulun dit oilo do pouni do tuunion, om angatan nod hiti’d doho’,’’ ka dau. ¹⁸ Om boros ka di tiso’ di susuhuon dau, ’’Haro o tanak di Isai, i tulun do Baitlahim diri, dot oilo do popouni do tuunion. Om kawagu po nga’ oligkang iyau koulun, om osiou, om soudor dit osonong, om oilo do mimboros. Om woyoon po iyau’d TUHAN,’’ ka dau. ¹⁹ Om ponuhu’ no i Saul do tulun do minongoi’d hiri’d di Isai do mongoi poboros do poingkaa, ’’Suhuon no i tanak nu, i Daud, i gompomogompi’ di dumba’ nu do mongoi solowot doho’,’’ ka. ²⁰ Om suhuo’ no di Isai i Daud do mongoi solowot di Saul, mikuwo’d pinoigitan do songinan o tanak do kambing, om songinan o kaladai di ginandaran do roti om kantung do kulit di noponu’d waig dot anggur. ²¹ Om iyo noddi i Daud do minongoi’d hiri’d di Saul om kosiliu no iyau do susuhuon di Saul. Om orohian tomod diri i Saul di Daud, gisom do pinili’ dau iyau do mongingigit do rapo-rapo dau’d sumangod. ²² Om posunudai nod Saul i Isai do poingkaa, ’’Orohian kopio oku’d Daud. Pologoson nopo iyau do mundorong do hiti do sumiliu’d susuhuon ku,’’ ka. ²³ Om mantad poddi om pounion kasai’ nopo di Daud i kecapi dau do soira-ira’ nopod rikoton i Saul di rusod dot araat di sinuhu’d TUHAN. Om mogidu’ nondo i rusod dot araat om osonong-sonong nondo i Saul.

¹ Insan o maso, om timungo’ no di tulun do Pilistin i soudor diyolo’ do hilo’d Soko. Pinotimungan nopo diyolo’ om hilo’d Soko, it iso’ o bandar do hilo’d watas do Yohuda. Om pomukiim no iyolo’ do hilo’d piolitan do Soko om Asika, it id somok dot Ipis Damim. ² Om i Saul om i tulun dot Israil nga’ tuminimung nogi’, om pomukiim no iyolo’ do hilo’d Rantai dot Ila, om sodia’ no iyolo’ do mongoi sangod di tulun do Pilistin. ³ Iri nopo tulun do Pilistin om songingkakat dot id timpak dot iso’ o nulu- nulu om iri no tulun dot Israil om id timpak dot iso’ o nulu-nulu’d suwai. Piolitan nopo diyolo’ om iso’ po o kubong. ⁴ Om haro’ddi o kusai do roitan dot i Guliat, i mantad id bandar do Gat, do suminoliwan do mantad hiri’d kokiiman do tulun do Pilistin do minongoi pimboros do sumaap di tulun dot Israil. Koronggoho’ nopo dau om haro i’ doti’ o tolu o mito. ⁵ Om kirasuk iyau do tambaga’ di dong sumasangod do kawagato’ nopo om haro i’ doti’ o limo nohopod om turu’ o kilogram, om kitupi’ iyau do tambaga’. ⁶ I gakod dau nga’ kilapis do tambaga’, om poinsaan po dau o tandus do tambaga’. ⁷ Iri nopo randagan do tandus dau om irad i’ di salampad do pangawalan, om iri no dila’ di tandus dau om haro i’ doti’ o turu’ o kilogram do kawagato’. Om haro o soudor do hiri’d gulu-gulu dau do kiinigit di kolid dau. ⁸ Om ingkakat no i Guliat om pinggarangai no dau i soudor dot Israil, ’’Nunu maan dokoyu’d hino, tu’ poimbaris do mongoi sangod? Okon toi ko’ tulun oku’d Pilistin, oi dokoyu i turipon di Saul? Pomili’ kou pogi’ dot iso’ o tulun dot id pogialatan dokoyu di gunsiou do mongoi saap doho’. ⁹ Ondung kamanang iyau, om kapatai no doho’, om sumiliu no iyahai’d turipon dokoyu. Nga’ ondung kamanang oku, om apatai ku no iyau, om osiliu kou nod turipon dahai. ¹⁰ Umbalan ku no kopio iyokoyu’d baino’, oi soudor dot Israil. Pomili’ kou pogi’ dot iso’ o tulun do mongoi saap doho’!’’ ka dau. ¹¹ Om soira’ di nokorongou i Saul om i tulun dau di boros do miagal diri om aiso’ no o pokukurayan diyolo’ tu’ moddosi ngai’ poo. ¹² I Daud nopo om tanak di Isai, i tulun dot Iprata, do mantad hilo’d Baitlahim, it id watas do Yohuda. I Isai nopoddi nga’ kianak do walu’ o kusai, om tontok nopoddi nosiliu i Saul do raja’ om molohing no kopio i Isai. ¹³ Minongoi ngai’ nopo tanud di Saul do sumangod i tolu tangaanak dau’d angagayo. Ngaran nopo dit id dotuo om i Iliab, om iri no koduwo om i Abinadab, om iri no kotolu om i Sama. ¹⁴ I Daud nopo om tanak dau do komulakan. Om tontok di moyo-woyo’ nod Saul do sumangod i tolu tobpinai dau dot id dotuo, ¹⁵ om misomonu-monu’ do tongkiadan di Daud i Saul, tu’ muli’ iyau do hilo’d Baitlahim do mongoi padtamong di baanan do dumba’ di tapa’ dau. ¹⁶ Om monikid kosuabon nopo om monikid sosodopon do minsomok i Guliat di tulun dot Israil om mimboros do sumaap diyolo’ do solinaid dot apat nohopod o tadau. ¹⁷ Insan tadau, om boro-boros no i Isai dot id di Daud, ’’Ongoi anu dot ongohopod o kilogram di gandum do ginowi om hopod o liob do roti, om ngoyon no pootodo’ dot id tobpinai nu do hilo’d kokiiman do soudor. ¹⁸ Om igitai iti hopod o bulugu’ do montiga’ do patahakon di boyoon do soudor. Uhoton no kopio ondung poingkuro-kuro no i tobpinai nu om migit nod maan ku’d pogintutunan do nokosolowot kopio ko diyolo’ om ongosonong-sonong iyolo’. ¹⁹ I Raja’ Saul nopo om i tobpinai nu, om koinsanai di tulun dot Israil om hilo’d Rantai dot Ila do sumangod di tulun do Pilistin,’’ ka dau. ²⁰ Om osuab poddi di kosuabon kawagu, om tungag no i Daud om ponuhu’ no iyau do tulun do suwai do mongoi padtamong di dumba’. Om igitai ngai’ no dau i taakanon om pamanau no do tumanud di pinonuhuan di tapa’ dau. Om korikot no iyau do hiri’d kokiiman do tontok di mamanau no i tulun dot Israil do mongoi sangod om mikuwo’d sampangkis-pangkis do pangkis do sumangod. ²¹ Om mitimbaba’ nopo i soudor dot Israil om i soudor do Pilistin do posodia’ nod misangod. ²² Om poiliho’ nopoddi di Daud i taakanon di nigitan dau dot id tulun di madtatamong di taakanon do soudor om tangkus nod minongoi’d hiri’d tiyonon do misangod. Om ongoi no iyau solowot di tobpinai dau om ponguhot no ondung poingkuro-kuro no iyolo’. ²³ Nga’ maso dau do moro-boros diyolo’ om pamanau no i Guliat do minongoi’d hiri’d gulu do minimboros do sumaap dot Israil do miagal di pimboroson kasai’ dau. Om i Daud nga’ nokorongou nogi’ di pinoboros dau’ddi. ²⁴ Om kokito poddi di tulun dot Israil i Guliat om panangkus no iyolo’ do minogidu’ tu’ moddosi no kopio iyolo’. ²⁵ ’’Antangai pogi’ iyau!’’ ka diyolo’ do mogiboro-boros. ’’Om pokinongoho’ pogi’ ilo boros dau do sumaap. Nakabatos no i Saul, i raja’ toko’ do manahak dot isomuli’ dit agayo dot id tulun di kapatai di Guliat. Om pokowinan po di raja’ i tanak dau’d tondu’ dot id tulun diri, om sompiiyon dau nga’ a’ no minog do mambayar do sukai,’’ ka diyolo’. ²⁶ Om uhoto’ no di Daud i soudor di hiri’d toning dau, ’’Nunu ot isomuli’ di tulun di kapatai dilo tulun do Pilistin, om i kopoidu’ do tulun dot Israil do mantad id kointingayaman diti? Nga’ isai kopio toi ilo tulun do Pilistin do kapir dilo’, tu’ kasaap kopio’d mimboros do sumaap do soudor do Kinorohingan di poimpasi?’’ ka dau. ²⁷ Om sunudai no diyolo’ iyau dit isomuli’ do patahakon dot id tulun di kapatai di Guliat. ²⁸ Om korongou nod i Iliab, i tobpinai di Daud dot id dotuo, i boros di Daud dot id soudor diri, om kotogod no iyau di Daud. Boros ka dau, ’’Nunu maan nu’d hiti? Isai no o sinuhu’ nu’d madtamong di dumba’ nu do hilo’d tana’ do kowotuan? Oilaan ku i’ ino kowoyo-woyoon nu’d minggunsiou-siou; mongoi ko no ontong do mogisasangod do hiti koii?’’ ka dau. ²⁹ Om boros kad Daud do suminimbar, ’’Nunu o sala’ ku? Minuhot oku no toomod diri!’’ ka dau. ³⁰ Om ongoi noddi iyau solowot di soudor do suwai om iri kasai’ nopo o tuhoton dau, om pointikid-tikid do muhot iyau nga’ iyo kasai’ nopoddi ot isimbar. ³¹ Nga’ haro o piro-piro tulun do nokorongou di boros di Daud. Om poboroso’ no diyolo’ iri dot id di Saul. Om lohowo’ noddi di Saul i Daud do mongoi solowot dau. ³² Om boros kad Daud dot id di Saul, ’’Oi Tuan Raja’, a’ toko’ i’ minog do moddosi di tulun do Pilistin diri! Tu’ ngoyon ku i’ iyau saapo’,’’ ka dau. ³³ ’’Kada’!’’ kad i Saul do suminimbar. ’’Poingkuro ko’d sumaap dau? Tu’ iya’ nopo om omulok po, nga’ iyau nopo om noubas nod sumangod do mantad po dit okoro’ po iyau,’’ ka dau. ³⁴ Nga’ boros kad Daud dot id di Saul, ’’Iyoho’ nopo om oubas i’ do madtamong di dumba’ do tapa’ ku. Om soira’ nopod rumikot o singa ko’ bohuang do mongoi daa panabpo di dumba’ om ³⁵ gusaon ku nopo om patayon ku no om apasi indo i dumba’. Om ondung takaman oku di singa ko’ i bohuang, om maan ku nopo kotolo’ o liou om bobogon ku no do gisom dot apatai. ³⁶ Nakapamatai oku nod singa om bohuang, om iti tulun do Pilistin do kapir diti nga’ oiyo iddi, tu’ kasaap kopio i’ do mimboros do sumaap diti soudor do Kinorohingan di poimpasi. ³⁷ Pinoidu’ oku id TUHAN do mantad id singa om bohuang om poiduwon oku i’ dau do mantad id tulun do Pilistin diti,’’ ka dau. Om boros kaddi di Saul, ’’Ongoi no, om maha’ daa om woyoon ko’d TUHAN,’’ ka. ³⁸ Om patahako’ nod Saul di Daud i pakayan do don sumasangod om i rasuk do basi’ om pakayo’ noddi di Daud iri. Om potupiyai nogiddi di Saul di Daud i tupi’ do tambaga’. ³⁹ Om pokogoso’ no di Daud i gayang di Saul do hiri’d rasuk do basi’, om umbal noddi iyau do mamanau. Nga’ a’ no iyau milo’d mamanau tu’ a’ i’ iyau noubas do manampakai’d pakayan do don sumasangod. ’’A’ oku i’ milo’d manampakai’dti,’’ ka dau. Om iduwo’ ngai’ nopoddi dau i pakayan do don sumasangod. ⁴⁰ Om igitai no dau i sukud do dong madtatamong do dumba’, om anu iyau’d limo o watu dit ongolunau do mantad hiri’d bawang, om posuango’ no dau do hiri’d kantung dau. Om poingigit dau o tullogong, om ongoi nogiddi iyau timbaba’ di Guliat. ⁴¹ Om pamanau noddi i tulun do Pilistin do mongoi insomok di Daud, om hiri’d gulu-gulu dau i mongingigit di kolid dau. ⁴² Nga’ soira’ di nokito kopio di Guliat i Daud, om koirak poddi tomod i Guliat do monguntotori’ dau tu’ omulok po i Daud om oligkang kinoulunan. ⁴³ Om boros kad i Guliat dot id di Daud, ’’Nunu maan nu’ndo sukud? Tasu oku daa dot osorou nu?’’ ka dau. Om pimpapalai no dau i Daud dot id suang do ngaran di ponokokinorohingan dau. ⁴⁴ Om boros ka kawagu dau, ’’Kaino pogi’d hiiti. Om paakanan ku i’ o rata’ nu di tombolog om i nintorusan,’’ ka dau. ⁴⁵ Om boros kad Daud, ’’Iya’ nopo om rumikot do sumaap doho’ do mikuwo’d gayang, om tandus, om totokon. Nga’ iyoho’ nopo om rumikot do sumaap diya’ do mikuwo’d ngaran do TUHAN it Agayo Kuasa’, i Kinorohingan do soudor dot Israil, it indaraaton nu’ddi. ⁴⁶ Tadau nod baino’ do patahakon ko’d TUHAN dot id doho’. Tu’ aala’ ku i’ iya’ om oidu’ ku o tulu nu. Om paakanan ku’d tombolog om nintorusan o rata’ nu om i rata do soudor do Pilistin. Om koilo indo o pointongkop do pomogunan do haro o Kinorohingan do tukuon dahai, i tulun dot Israil, ⁴⁷ om kokito ngai’ indo o koinsanai’d tulun do hiti dot a’ i’ minog do haro o gayang ko’ tandus do TUHAN do mamasi do tulun dau. Iyau no i kamanang dot id suang do pisangadan diti, om patahakon kou i’ dau dot id suang do longon dahai,’’ ka dau. ⁴⁸ Om soira’ di mininsomok kawagu i Guliat di Daud, om osiau nopoddi i Daud do minanangkus do kuminaa ponong id borisan di soudor do Pilistin do mongoi saap dau. ⁴⁹ Om kokog no i Daud di kantung dau om anu nod iso’ o watu, om polositiko’ no dau dot id di Guliat. Om koonong nopo di watu o turos di Guliat om gisom do nakatanom di korulung do tulu dau. Om kahaba’ nopoddi i Guliat om kotungub no do hiri’d tana’. ⁵⁰ - ⁵¹ Om panangkus no i Daud do minongoi’d hiri’d kinoilihon di Guliat om ingkakat no iyau do hiri’d toning dau. Om kodongo’ no dau i gayang di Guliat do mantad hiri’d tangkap om iduwo’ no dau o tulu di Guliat, om kapatai noddi i Guliat. Om miagal noddi i Daud do minangala’ om minamatai di Guliat, tu’ aiso’ i’ o gayang dau, suwai ko’ tullogong noo om iso’ o watu do pinamatai dau! Soira’ di nokito di tulun do Pilistin do napatai no i gunsiou diyolo’ om panangkus no iyolo’d minogidu’. ⁵² Om pamangkis no i soudor dot Israil om i soudor do Yohuda om gusao’ no diyolo’ i soudor do Pilistin do mantad hilo’d Saaraim om gisom do nokorikot do hilo’d Gat om hilo’d wawayaan dot agayo dot Ikron. Iri nopoddi tulun do Pilistin di nongosuhat nga’ songingiliu pod hiri’d ralan! ⁵³ Om soira’ di guminuli’ i soudor dot Israil do minongoi pomogusa’ di soudor do Pilistin, om ngoyo’ no diyolo’ pingonuo’ it id suang do kiim di soudor do Pilistin. ⁵⁴ Om ngoyo’ nod Daud i tulu di Guliat om igitai nod hilo’d Yorusalim, nga’ iri nopo rapo-rapo di Guliat om pinoopi’ i’ dau do hiri’d kiim dau. ⁵⁵ Soira’ddi nokito di Saul i Daud do mongoi saap di Guliat, om uhoto’ no dau i Abnor, i boyoon do soudor dau, ’’Abnor, isai o sanganak dilo tanakwagu dilo’?’’ ka dau. ’’Oi Tuan Raja’, a’ oku i’ koilo,’’ kad Abnor do suminimbar. ⁵⁶ Om boros kad Saul do minonuhu’, ’’Ongoi poguho-guhot ondung isai sanganak dilo’,’’ ka. ⁵⁷ Om soira’ddi guminuli’ i Daud do hiri’d kokiiman, di napatai dau i Guliat, om angatai no iyau di Abnor do minongoi solowot di Saul. Om poingigit po di Daud i tulu di Guliat. ⁵⁸ Om uhoto’ no di Saul iyau, ’’Isai o sanganak diya’, oi anakwagu?’’ ka. Om boros kad Daud do suminimbar, ’’Iyoho’ nopo om tanak di Isai, i mantad hilo’d Baitlahim,’’ ka dau.

¹ - ² Om kopongo po i Saul do monokiboro-boros di Daud, om oduhai no dau i Daud do minuli’ do hiri’d walai di tapa’ dau. Om korongou nod i Yonatan, i tanak di Saul, i pinibara-barasan diyolo’ddi. Om i Yonatan diri nga’ osianan nogi’ kopio di Daud do miagal pod osianan do dau’d tinan. ³ Om sumpa’ noddi i Yonatan do mambalut kasai’ di Daud do gisom dot alaid, tu’ osianan kopio i’ iyau di Daud. ⁴ Om iduwo’ no dau i rasuk di poinrasuk dau om patahako’ no dau di Daud, om iri nogi’ i pakayan dau do don sumasangod, om i gayang, om i pana’, om i tagkos dau nga’ pinatahak i’ dau. ⁵ Om owonsoi kasai’ nopod Daud kosonong-sonong o koinsanai di ponuhuan di Saul dau do momonsoi. Om siliho’ noddi iyau di Saul do boyoon di soudor dau. Om asanangan ngai’ nopod i Daud i soudor om i susuhuon di Saul. ⁶ Tontok di minuli’ i Daud, di napatai dau i Guliat, i tulun do Pilistin diri, om tontok di baris no i soudor do suwai do sumuang di bandar, om ongoi ngai’ no solowot di Saul i tongoondu’ do mantad id pointikid-tikid do bandar dot Israil. Om minsinding po iyolo’ dot atataadan, om mintari’ om popinguni do rebana om kecapi. ⁷ Om ongotood tomod diri iyolo’ om modsinding do poingkaa, ’’Boribu-ribu o pisangod do napatai di Saul, nga’ hinapadan noribu o napatai di Daud,’’ ka. ⁸ Om kotogod tomod noddi i Saul tu’ a’ iyau norohian do nokorongou’ddi. Boros ka dau, ’’Hinapadan noribu o poboroson diyolo’d napatai di Daud, nga’ doho’ nopo om boribu-ribu noo. A’ no alaid om silihon no diyolo’d raja’ i Daud!’’ ka dau. ⁹ Om mantad poddi om mosol no om monoinu’ i Saul di Daud. ¹⁰ Tadau noddi kawagu, om sigog id rikoto’ i Saul di rusod dot araat di sinuhu’d Kinorohingan. Om miagal poddi iyau’d tulun do mulau-ulau do muhod do hiri’d walai dau. Maso nopoddi nga’ mongombit i Daud di kecapi do miagal di koubasanan dau om i Saul no om kiinigit do tandus. ¹¹ Om poingkaa’ddi ot osorou di Saul, ’’Maan ku lo’ palantako’ do hilo’d limput,’’ ka. Om potokono’ no dau dot induwo i tandus dot id di Daud, nga’ noilag goduwo id Daud iri. ¹² Om ooris diri i Saul di Daud tu’ woyoon i’ iyau’d TUHAN, nga’ i Saul nopo om notongkiadan nod TUHAN. ¹³ Om iri noddi o kinopoinsoduan di Saul di Daud do mantad id dau, om siliho’ no dau i Daud do boyoon do soribu o soudor. Om i Daud no o minogulu di soudor dau dot id pointikid-tikid do pisangadan. ¹⁴ Om koundar kasai’ nopo o wonsoyon di Daud tu’ woyoon i’ iyau’d TUHAN. ¹⁵ Om soira’ di nokito’d Saul do koundar kasai’ i Daud, om okon nogiddi dot ooris kopio iyau di Daud. ¹⁶ Nga’ osianan ngai’ nopod i Daud i tulun dot Israil om Yohuda tu’ iyau no o boyoon dit ogumu’ kopio o nowonsoi dot osonong. ¹⁷ Om boros kaddi di Saul dot id di Daud, ’’Diya i Mirab, i tanak ku’d tondu’ dit id dotuo. Om pokowinan ku no diya’ ilo’ do kopointalang ko nod kosioho’ nu do sumangod dot id suang do pisangadan do don TUHAN,’’ ka dau. (Tu’ osorou nopo daa di Saul nga’ iyo nodti o ralan dot apatai i Daud di tulun do Pilistin om okon indo ko’ iyau kopio o kapamatai.) ¹⁸ Om boros kad Daud do suminimbar, ’’Isai oku’dti om nunu kopio o sompiiyon ku do hiti’d Israil tu’ silihon oku do monongiwan do Raja’?’’ ka dau. ¹⁹ Nga’ soira’ di norikot i maso do kapatahakan di Mirab dot id di Daud, om pokowinai nogiddi i Mirab di Adriol, i tulun do mantad hilo’d bandar do Mihola. ²⁰ Nga’ minuhang iddi di Daud i tanak di Saul do tondu’ di tiso’, i roitan dot i Mikal. Om asanangan nopo i Saul do nokoilo’ddi. ²¹ Osorou nopo dau nga’, ’’Patahakon ku nopo di Daud i Mikal om silihon ku indo iyau do lawa’ dot id di Daud, om apatai indo iyau di tulun do Pilistin,’’ ka. Om koinduwo noddi di Saul do momoros dot id di Daud do poingkaa, ’’Monongiwan ko no doho’,’’ ka. ²² Om suhuo’ nod Saul i pagawai dau do momolisok-lisok do mongoi pomisunud di Daud dot orohian iyau di Daud om posunudon dot oinsanan nopo i pagawai dau dot osianan di Daud. Om posunud nogi’ do tontok noddi o maso dot osonong do kowinon di Daud i tanak dau’d tondu’. ²³ Om posunudo’ no diyolo’ iri dot id di Daud. Nga’ boros kad i Daud do suminimbar, ’’Ondos daa dokoyu om osoonong do sumiliu’d monongiwan do raja’? Iyoho’ nopo om tulun i’ do mosikin om aiso’ o ngaran-ngaran,’’ ka dau. ²⁴ Om sunudai no di pagawai i Saul di pinoboros di Daud. ²⁵ Om suhuo’ no kawagu iyolo’ di Saul do momisunud di Daud do poingkaa, ’’Pokionuon nopo di raja’ do pongopung di tondu’ om hatus o kulit di sisinsibon do monunat do mantad id tulun do Pilistin om osulian i’ i pisangod dau,’’ ka. (Iti no o ralan dit osorou di Saul dot apatai i Daud di tulun do Pilistin.) ²⁶ Soira’ di nokosunud di pagawai i boros diri dot id di Daud om pangakun no i Daud do sumiliu’d monongiwan di raja’. Om tontok dit a’ po norikot o tadau do pikowinan, ²⁷ om ongoi no i Daud om i tulun dau pamatai do duwo nahatus o tulun do Pilistin do hiri’d watas do Pilistin. Om igitai no dau dot id di Saul i kulit do sisinsibon do tontok do monunat dot irad di pinokianu dau. Om pokowinai noddi di Saul di Daud i Mikal. ²⁸ Om koilaai noddi kopio di Saul do moyo-woyo’ o TUHAN di Daud om osianan kopio di Daud i Mikal, i tanak dau’d tondu’. ²⁹ Om okon nogiddi dot ooris kopio i Saul di Daud. Om araatan kasai’ nopoddi i Saul di Daud do solinaid dau do poimpasi. ³⁰ Om pointikid-tikid do mongoi saap diyolo’ i soudor do Pilistin om poillobi-lobi no kasai’ o kamanangan di Daud dot id pisangadan ko’ i soudor di Saul do suwai. Om iri noddi o pinapabantug kopio di Daud.

¹ Om sunudai nod i Saul i tanak dau, i Yonatan, om koinsanai di pagawai dau do pokipapatayan dau i Daud. Nga’ i Yonatan nopo om osianan i’ kopio di Daud. ² Om iri noddi o kinopomisunudan dau di Daud, boros ka dau, ’’Pokipapatayan ko moti’ di tapa’ ku. Om antaan-taan no. Kosuabon nopod suab, om mongoi no lisok dot id iso’ o kinoiyonon dit a’ oilaan do wokon om mundorong nopod hiri. ³ Om moyo’ oku’ndo di tapa’ ku do mongoi’d hiri’d somok di kinoiyonon di linisok nu om monokiboro-boros oku’ndo dau do pasal diya’, om sunudan ku indo iya’ do kootuson di pibara-barasan dahai,’’ ka dau. ⁴ Om poboroso’ noddi di Yonatan o kosonongo’ di Daud dot id di Saul. Boros ka dau, ’’Apa’, kada’ kopio pokorualai i Daud, i susuhuon nu. Tu’ a’ i’ iyau insan pomonsoi’d kasalaan dot id diya’; tu’ osonong ngai’ i’ o koinsanai di winonsoi dau dot id diya’. ⁵ Tontok di minongoi iyau pamatai di Guliat om a’ no dau sinorou o dau’d tinan, om onuwai nod TUHAN do kamanangan dit agayo kopio o tulun dot Israil. Iya’, oi apa’, nga’ nokokito nogi’, om notood tomod ko do tontok diri. Nga’ nokuro’ddi tu’ momonsoi ko dot araat dot id tulun dit aiso’ sala’, om pokipapatayan nu i Daud do baino’ dot aiso’ o paantakan?’’ ka dau. ⁶ Om kotumbayaai iddi i Saul do nokorongou di boros di Yonatan, om sumpa’ no iyau dot id suang do ngaran do TUHAN dot a’ iyau mamatai di Daud. ⁷ Om lohowo’ noddi di Yonatan i Daud om sunudai no dau di pinibara-barasan diyolo’. Om angatai noddi dau i Daud do minongoi’d hiri’d di Saul om karaja’ no kawagu i Daud dot id di Saul do miagal di gulu. ⁸ Om ongoi po kawagu i tulun do Pilistin panangod diyolo’. Om ngoyo’ nod Daud saapo’ iyolo’, gisom do naala’ dau i tulun do Pilistin om poggidu’ ngai’ noddi i tulun do Pilistin. ⁹ Insan tadau om sigog id rikoto’ i Saul di rusod dot araat di sinuhu’d TUHAN. Tontok nopoddi nga’ poirikau i Saul do hiri’d walai dau om kiinigit iyau di tandus dau. Om i Daud nga’ hiri nogi’ do popouni di kecapi dau. ¹⁰ Om mumbal daa’ddi i Saul do papalantak di Daud do hiri’d limput. Nga’ noilag i’ di Daud, om iri nogiddi i tandus o nakalantak do hiri’d limput. Om poggidu’ no i Daud do mantad hiri. ¹¹ Om totuong iddi do minonuhu’ i Saul do piro-piro o tulun do mongoi padtamong di walai di Daud. Om sinuhu’ daa dau iyolo’ do mamatai di Daud di kosuabon. Nga’ sunudai nod i Mikal, i sawo di Daud, i Daud. Boros ka dau, ’’A’ ko nopo moti’ mogidu’ do totuong do baino’ om apatai ko nod suab,’’ ka dau. ¹² Om polintuhuno’ no di Mikal i Daud do pinawaya’ di liligaon, om poggidu’ no i Daud do mantad hiri. ¹³ Om ngoyo’ noddi di Mikal i tininganak, i tingolig do sompiiyon dau, om poliiyo’ nod hiri’d toodopon di Daud. Om nongoi dau i bantal di hulu’d kambing do winonsoi om pabantalo’ no di tulu di tininganak. Om kumutai nogiddi dau. ¹⁴ Soira’ di nokorikot i tulun do sinuhu’ di Saul do mongoi daa panangkap di Daud om sunudai noddi di Mikal iyolo’ do sumakit i Daud. ¹⁵ Nga’ suhuo’ po kawagu di Saul i tulun dau do mongoi pogontong di Daud, do mato kopio o kokito. Boros ka dau, ’’Antayangon nopo iyau do mongoi’d hiti do hiri’d toodopon dau, om apatai ku i’ iyau,’’ ka dau. ¹⁶ Om suang no i piro-piro o tulun diri do hiri’d bilik om kokito’ddi diyolo’ dot iri i’ i tininganak do tingolig i hiri’d toodopon om i bantal do hulu’d kambing do winonsoi o pinoulunanan. ¹⁷ Om uhoto’ no di Saul i Mikal, ’’Nokuro tu’ nakalan oku diya’ om pinologos nu’d mogidu’ i pisangod ku?’’ ka dau. Om boros kad Mikal do suminimbar, ’’Boros ka dau om patayon oku no dau dot a’ ku no iyau tulungon do mogidu’,’’ ka. ¹⁸ Om poggidu’ no i Daud om ongoi no do hilo’d di Somuil do hilo’d Rama. Om susuyo’ ngai’ nopod Daud dot id di Somuil o koinsanai di winonsoi di Saul dot id dau. Om pakayaai no diyo Daud di Somuil do hilo’d Nayot om undorong no iyolo’d hilo’. ¹⁹ Nga’ kosunudai i’ i Saul do hilo’d Nayot i Daud, i hilo’d somok do Rama. ²⁰ Om ponuhu’ no i Saul do piro-piro o tulun do mongoi panangkap di Daud. Nga’ tontok di nokokito i piro-piro tulun diri do piro-piro o nabi di mogiwoyo-woyo’ do mintari’ om minggiak do moyo-woyo’ di Somuil, i boyoon diyolo’, om iyolo’ nogiddi nga’ porintao’ nod Rusod do Kinorohingan, om timpuun no iyolo’ iyau do mintari’ om minggiak. ²¹ Soira’ di nokorongou i Saul do habar diri om ponuhu’ po kawagu iyau’d tulun do mongoi’d hiri, nga’ i tulun diri nga’ minintari’ i’ om mininggiak. Om ponuhu’ po i Saul do tulun, do kointolu no dau’d minonuhu’, nga’ miagal iddi o nosiliu dot id diyolo’. ²² Om ongoi noddi i Saul iyau do hilo’d Rama. Om tontok di nokorikot iyau do hiri’d torobong dot agayo do hilo’d Soku, om ponguhot no iyau ondung honggo iyo Somuil di Daud. Om kosunudai no iyau do hilo’ iyolo’d Nayot, i hilo’d somok do Rama. ²³ Om pakayaai nod i Saul do hilo’d Nayot, nga’ tontok di manau-panau po iyau om porintao’ no iyau kadauu do Rusod do Kinorohingan, gisom dot iyau nogi’ nga’ minintari’ iddi om mininggiak do gisom do nokorikot iyau do hilo’d Nayot. ²⁴ Om iduwo’ nod Saul o pakayan dau, om pintari’ noddi om pinggiak no dot id toguang di Somuil. Om kahaba’ nogiddi iyau do hiri’d tana’, om poillabas nopoddi do nosongodou om gisom do nosuaban. (Om iri no o kinoimpuunon di boboroson do poingkaa, ’’Do nosiliu id nabi i Saul iyau?’’ ka.)

¹ Om poggidu’ noddi i Daud do mantad hilo’d Nayot, i hilo’d somok do Rama, om ongoi no iyau solowot di Yonatan. Om uhoto’ no dau i Yonatan, ’’Nunu o kasalaan ku? Nunu ot araat do nowonsoi ku? Nunu o nowonsoi ku dot araat om nunu o dusa ku dot id tapa’ nu tu’ gisom do pokipapatayan oku di tapa’ nu?’’ ka dau. ² Om boros ka di Yonatan do suminimbar, ’’Kada’ pomoros dot iyo’ndo, tu’ sumumpa’ oku no dot id TUHAN dot a’ ko i’ kopio patayon. Tu’ sunudan kasai’ oku i’ di tapa’ ku do nunu nopo o wonsoyon dau, do hal tuu dit agayo ko’ okoro’ po. Om a’ i’ iyau insan do mogolim dot id doho’ do nunu nopo. Om a’ i’ otopot ino pinoboros nu,’’ ka dau. ³ Nga’ boros ka di Daud do suminimbar, ’’Noilaan no di tapa’ nu dot osianan ko doho’. Om atantu’ nod a’ iyau popoilo diya’ di maan dau wonsoyo’ddi tu’ mada’ iyau do tumongob ko. Nga’ otopot no kopio iti poboroson ku dot id suang do ngaran do TUHAN di poimpasi do sallaang po o kosoduwo’ ku do mantad id kapatayon,’’ ka dau. ⁴ Om boros kad Yonatan, ’’Wonsoyon ku i’ o nunu nopo o pokionuon nu,’’ ka dau. ⁵ Om boros kad i Daud, ’’Suab nopo om Tadau dot Agayo do mamaramai do Tulan do Wagu. Otopot nopo daa kopio om tumorungak oku daa di raja’ do makan. Nga’ ondung kaakun ko om mongoi oku lisok do hilo’d talun do gisom do sosodopon do suab diino. ⁶ Ondung monguhot i tapa’ nu ondung nokuro tu’ a’ oku nakarapou, om poboroson nopo do pinologos oku diya’ do minuli’ do hilo’d Baitlahim do mongoi papatahak do porsombahan di patahakon dot insan do sontoun do miwoyo’ do toinsanan di sompiiyon ku. ⁷ Ondung a’ iyau otogod, om aiso’ no o ligogon ku. Nga’ ondung otogod iyau om oilaan nu indo do nokopomusorou mantad no iyau do pokoruol daa doho’. ⁸ Om mokitulung oku no diya’ do wonsoyon nu’ti pokionuon ku, tu’ nokogirot to no i pinibatasan to goduwo dot id toguang do TUHAN. Ondung kisala’ oku om iya’ nogi’ o mamatai doho’! A’ no minog dot i tapa’ nu o mamatai doho’,’’ ka dau. ⁹ Om boros ka di Yonatan do suminimbar, ’’Kada’ katangkabo, tu’ ondung oilaan kopio ku do nokopomusorou i tapa’ ku do pokoruol diya’ om atantu’ nod sunudan tiya’ i’,’’ ka dau. ¹⁰ Om uhoto’ nod i Daud i Yonatan, ’’Isai nondo o momisunud doho’ dot apantog no o ponimbar di tapa’ nu diya’,’’ ka. ¹¹ Om boros kad Yonatan, ’’Kaino mongoi’d hilo’d talun,’’ ka dau. Om ongoi no goduwo iyolo’d hiri’d talun. ¹² Om boros kad Yonatan dot id di Daud, ’’TUHAN no, i Kinorohingan dot Israil o sumiliu’d sasi’ to. Tu’ dongiyo’dti nopod suab ko’ suab diino om uhoton ku nondo i tapa’ ku. Ondung osonong iyau dot id diya’ om monuhu’ oku id tulun do mongoi pomisunud diya’. ¹³ Nga’ ondung nokopomusorou iyau do pokoruol diya’ om pologoson nopo o TUHAN do mamatai doho’ ondung a’ ku no iya’ sunudan om a’ tiya’ no pologoson do mogidu’ om a’ ko i’ apatai. Maha’ daa om woyoon ko’d TUHAN do miagal di minomoyo’ iyau di tapa’ ku di gulu po. ¹⁴ Om ondung a’ oku apatai om igitan no i batos to dot id toguang do TUHAN do tumorodok ko dot id doho’. Om ondung apatai oku, ¹⁵ om pointalangon no o kotorodoko’ nu dot id sinakagon ku do gisom do poingompus. Om soira’ nopondod apatai ngai’d TUHAN o pisangod nu, ¹⁶ om poinggirot i’ kasai’ iti pibatasan to. Ondung a’ nu igitan i pinibatasan diri om hukuman ko nod TUHAN,’’ ka dau. ¹⁷ Om koinduwo nodti do minonuhu’ i Yonatan di Daud do mamatos dot osianan dau, tu’ osianan kopio i’ i Yonatan di Daud do miagal dot osianan iyau do dau’d tinan. ¹⁸ Om boro-boros po kawagu i Yonatan di Daud, ’’Suab nopo tu’ Tadau dot Agayo do Tulan do Wagu, om atantu’ nod oilaan do tulun dot a’ ko hino tu’ a’ ko i’ hino do potorungak do makan. ¹⁹ Om ondung a’ ko hino do suab diino om atantu’ nod ngoyon ko ihumo’. Iyo nopoddi, om mongoi nogi’ do hilo’d linisok nu di gulu om lumisok nod hiri’d tirung di nokotimbunon do watu. ²⁰ Om mamana’ oku nondo dot intolu do ponong hiri’d tinimbunan do watu do miagal-agal do haro o pokiaanangan ku. ²¹ Om suhuon ku nogindo i susuhuon ku do mogihum di pana’ddi. Om ondung momoros oku dot id susuhuon ku dot, ’Antangai i pana’ do hiiti’d somok, ngoyo’ no!’ ka dot id dau, om komoyon nopoddi om aiso’ i’ o koligagaanan nu om milo ko nod sumoliwan do mantad hiri. Om sumumpa’ oku dot id suang do ngaran do TUHAN di poimpasi dot aiso’ i’ o nunu-nunu’d koligagaanan nu. ²² Nga’ ondung momoros oku dot id dau dot, ’Hiino’d sodu’ i pana’,’ ka, om mogidu’ no tu’ komoyon nopoddi nga’ suhuon ko’d TUHAN do mogidu’. ²³ Nga’ iri nopo batos di nowonsoi to dot id pialatan to goduwo om TUHAN no o mongilo-ilo om oigitan kasai’ to indo iri do gisom dot alaid,’’ ka dau. ²⁴ Om ongoi no i Daud lisok do hiri’d talun. Om tontok di Tadau dot Agayo do Tulan do Wagu, om ongoi no i Saul rapou di poginakanan. ²⁵ Om irikau no i Saul do hiri’d tiirikohonon dau dit id toning di limput. Om i Abnor nopo nga’ poirikau do hiri’d toning di Saul, om i Yonatan no om poirikau do hiri’d dotoguangan di Saul. Nga’ aiso’ i’ o poirikau di tiirikohonon di Daud. ²⁶ Nga’ tadau nopoddi om aiso’ i’ o boros di Saul, tu’ poingkaa ot osorou dau, ’’Haro doti’ o nosiliu dot id di Daud di minonosomu’ dau dot id pagantangan do tugama’,’’ ka. ²⁷ Om tadau noddi kawagu, di koduwo nod tadau do mamaramai do Tulan do Wagu, om aiso’ po kasai’ o poirikau di tiirikohonon di Daud. Om uhoto’ noddi di Saul i Yonatan, ’’Nokuro tu’ a’ hino i Daud di konihab om baino’ nga’ a’ i’ hino do hiti’d poginakanan?’’ ka dau. ²⁸ Om boros kad Yonatan do suminimbar, ’’Minokibanar iyau doho’ do mongoi’d hilo’d Baitlahim. ²⁹ Tu’ poingkaa o boros dau, ’Pologoso’ oku nod mamanau, tu’ mongoi oku papatahak do porsombahan do miwoyo’ di sompiiyon ku do hilo’d Baitlahim, om sinuhu’ oku di tobpinai ku dot id dotuo do mongoi’d hilo’. Ondung kaakun ko, om pologoso’ oku nod mongoi solowot di sompiiyon ku,’ ka dau. Om iri noddi ot a’ dau nakarapahan do hiti’d poginakanan nu, oi Apa’,’’ ka dau. ³⁰ Om kotogod tomod noddi i Saul di Yonatan do nokorongou iyau’ddi, om gisom do minomoros iyau do poingkaa, ’’Iya’ no o tanak dit araat kopio! Baino’ nopoddi om oilaan ku no do mogobi’ ko di Daud. Om mongintingayam ko do tinan nu om i tina’ nu. ³¹ A’ ko toi koilo dot ondung poimpasi po i Daud om a’ ko no osiliu’d raja’ do pomogunan diti? Ngoyo’ iyau angatai’d hiti! Tu’ mositi’ nod patayon iyau!’’ ka dau. ³² Nga’ boros kad Yonatan do suminimbar, ’’Nokuro tu’ patayon iyau? Nunu o dusa dau?’’ ka. ³³ Om korongou poddi di Saul i boros di Yonatan om diri nod pinotokon di Saul i tandus dau dot id di Yonatan do pamatai daa dau. Om koilaai nogiddi kopio di Yonatan do pokipapatayan no kopio di tapa’ dau i Daud. ³⁴ Om ingkakat no i Yonatan do mantad hiri’d tirikohonon dau om soliwan no di kinoiyonon diri do mikuwo’d otogod tomod. Om a’ no iyau minangakan do nunu- nunu do tadau’ddi, i tadau do koduwo do karamayan do Tulan do Wagu, tu’ tumongob no kopio iyau do kosorou di Daud do nindaraat di Saul, i tapa’ dau. ³⁵ Kosuabon noddi kawagu om ongoi no i Yonatan do hiri’d talun do mongoi solowot di Daud, do miagal di pinibatasan mantad diyolo’. Om pangangat no iyau dot iso’ o kusai dit okoro’ po. ³⁶ Om boros ka dau dot id tanak do kusai’ddi, ’’Manangkus no om ngoyon i’ ihumo’ i pana’ do papanaon ku,’’ ka dau. Om panangkus no i tanak om papanao’ nod Yonatan i pana’ do pinosogulu di tanak diri. ³⁷ Om tontok di nokorikot i tanak do hiri’d kinorotuon di pana’ddi om garangai no di Yonatan iyau, ’’Osodu’ pod mantad hino i pana’. ³⁸ Siahai no! Kada’ andog tomod do hino!’’ ka dau. Om ngoyo’ no di tanak i pana’ om guli’ nod hiri’d tuan dau. ³⁹ Nga’ a’ i’ iyau koilo ondung nunu kopio o komoyon di boros di Yonatan diri. Iyo Yonatan nod i Daud o koilo. ⁴⁰ Om patahako’ noddi di Yonatan i pakakas dau’d mamana’ dot id tanak diri om suhuo’ no dau’d migit do gumuli’ do hiri’d bandar. ⁴¹ Om kapamanau poddi i tanak om soliwan nogiddi i Daud do mantad id dotirung di tinimbunan do watu. Om otud no iyau dot intolu. Om sopiihad-ihad nopoddi goduwo iyo Daud di Yonatan, om minigapus tomod iyolo’. Nga’ katangaban nopo di Daud om agayo po ko’ i katangaban di Yonatan. ⁴² Om boro-boros noddi i Yonatan dot id di Daud, ’’Kinorohingan i’ o momoyo’ diya’. Om TUHAN no o momogompi’ dato om i sinakagon to, om iyau o milo do mongigit di pinibatasan to dot id toguang do Kinorohingan,’’ ka. Om pamanau noddi i Daud, om poguliai no di Yonatan do hiri’d bandar.

¹ Om ongoi noddi i Daud do hilo’d di Ahimilik, it Imam do hilo’d Nob. Om soliwan no i Ahimilik do minongoi solowot dau do mikuwo’d nokotigowo tomod. Om ponguhot no iyau, ’’Nokuro tu’ iso-iso’ ko do minongoi’d hiti?’’ ka dau. ² Om boros kad Daud, ’’Sinuhu’ oku di raja’ do minongoi’d hiti. Om a’ oku i’ dau pinologos do momisunud dot isai nopo o tulun diti karaja’ ku’dti. Om suhuo’ ku noddi i tulun do mongoi solowot doho’ dot id iso’ o kinoiyonon. ³ Nunu po kaakan-akanan do haro dot id diya’? Onuwai oku daa dot ongolimo o liob do roti, ko’ nunu nopo i haro do hiti!’’ ka dau. ⁴ Om boros ka dit imam do suminimbar, ’’Aiso’ no o roti ku di roti do koubasanan, suwai ko’ iri po roti di maan do porsombahan o haro. Nga’ koino-ino ko i’ do manganu dilo’, dot a’ no i tulun nu nokodudun do tongoondu’ di tadau di nakatalib,’’ ka dau. ⁵ Om boros ka di Daud do suminimbar, ’’Atantu’ nod amu’! Olidang kasai’ i’ i tulun ku dot id pagantangan do tugama’ do mulong piya dot i koubasanan o karaja’; om okon-okon nogindod baino’ tu’ agayo kopio o komoyon diti karaja’ dahai,’’ ka dau. ⁶ Om patahako’ noddi dit imam i roti’ddi dot id di Daud tu’ iri po roti di nakatahak dot id Kinorohingan o haro dot id dau, om i nanu do mantad id pananaraban do porsombahan om tiningalanan dau’ddi do roti do wagu. ⁷ (Nga’ tontok nopod tadau’ddi om kaantakai nod hiri i Doig i mantad hilo’d Idom, i boyoon do madtatamong do dumba’ di Saul. Hiri pogi’ iyau nga’ momonsoi iyau dit apatut do wonsoyon dau do tumanud dot oturan do tugama’.) ⁸ Om uhoto’ no di Daud i Ahimilik, ’’Haro o tandus ko’ gayang di nokoopi’ nu do milo ku’d pakayon? Tu’ aarau-arau tomod oku do minamanau do sinuhu’ di raja’, gowoi poddi om a’ oku nokoigit di gayang ku ko’ nunu-nunu nopo i rapo-rapo’d suwai,’’ ka dau. ⁹ Om boros kaddi di Ahimilik do suminimbar, ’’Hati i’ i gayang di Guliat, i tulun do Pilistin di pinatai nu di hilo’d Rantai dot Ila. Hilo’d dotirung dit ipod i gayang do linopot do kain. Ondung onuon nu iri om ngoyo’ nopo. Tu’ iri po o rapo-rapo do hiti,’’ ka dau. Om boros ka di Daud, ’’Onuo’ nopo doho’ iri, tu’ aiso’ no o gayang dot osonong ko’ iri dot id pointongkop diti pomogunan,’’ ka dau. ¹⁰ Om tadau iddi do minogidu’ i Daud do mantad id di Saul. Om ongoi no iyau do hilo’d di Akis, i raja’ do bandar do Gat. ¹¹ Boros ka di pagawai di Raja’ Akis dot id di Akis, ’’Okon toi ko’ i Daud iti, i raja’ do hilo’d pomogunan dau? Okon toi ko’ iyau no i pinodsindingan di tongoondu’ do mikuwo’d santari-tari’ do modsinding do poingkaa, ’Boribu-ribu o napatai’d i Saul, nga’ hinapadan noribu o napatai’d i Daud!’ ka,’’ ka diyolo’. ¹² Om di nopoddi norongou di Daud i boros diyolo’, om agangau’ddi o ginawo dau om ooris tomod diri iyau di Akis i raja’ do Gat. ¹³ Om iri noddi o kinopingula-ulahan di Daud dot id toguang di tulun dot ogumu’. Om okon-okon poddi dit umbalan daa diyolo’d momusus iyau nga’ mingkalahit po iyau di wawayaan dot agayo di bandar gisom do mogolinuyung po o roloi dau do hiri’d ganggut dau. ¹⁴ Boros ka di Akis dot id pagawai dau, ’’A’ toi dokoyu okito ilo tulun dilo’ do mulau? Nokuro tu’ nangatan dokoyu ilo’ do hiti? ¹⁵ A’ po toi ula’ o tulun do mulau do hiti’d posorili’ dokoyu tu’ nangatan dokoyu ilo tulun do mulau do hiti’d walai ku?’’ ka dau.

¹ Om poggidu’ no i Daud do mantad hiri’d bandar do Gat om ongoi no lisok dot id iso’ o luang do nuluhon do hilo’d somok do bandar dot Adulam. Om soira’ di nokorongou ngai’ i tobpinai dau om i sompiiyon dau do hiri iyau om ongoi no iyolo’ do hiri’d dau. ² Om iri tulun dit osusa’, om i kiutang, om it otogod nga’ minongoi ngai’ sugku’ di Daud. Om haro i’ doti’ ot apat nahatus o tulun diyolo’d toinsanan, om i Daud no nosiliu’d boyoon diyolo’. ³ Om mantad do hilo’ om pakayaai nod Daud do hilo’d Mispa i tid pomogunan do Muab. Boros ka dau dot id raja’ do Muab, ’’Tulungo’ oku daa’d popoiyon diti tapa’ om tina’ ku do hino’d diya’ do gisom dot oilaan ku ondung nunu wonsoyon do Kinorohingan dot id doho’,’’ ka dau. ⁴ Om poundorongo’ nod Daud i tapa’ om i tina’ dau do hiri’d sugku’ di raja’ do Muab, om hiri-hiri no iyolo’ do solinaid di Daud do poillisok do hiri’d luang di nuluhon. ⁵ Nga’ rikot noddi i Nabi Gad, om boros ka dau dot id di Daud, ’’Kada’ undorong do hiti. Pamanau nogi’ do gumuli’ do hilo’d Yohuda,’’ ka. Om pamanau no i Daud om ongoi no do hiri’d puru’ do Kirit. ⁶ Insan tadau, om korongou no di Saul do nosolowot no i Daud om i tulun dau. Tontok nopoddi om hilo’d Gibia i Saul do poirikau do hiri’d lungung di guas do tamariska i tid timpak do nulu-nulu, om poingigit dau i tandus dau, om songingkakat ngai’ i boyoon do soudor dau do hiri’d posorili’ dau. ⁷ Om boro-boros noddi iyau di soudor dau, ’’Pokinongou kou no, oi tulun do Binyamin! Ondos daa dokoyu om manahak dokoyu’d tumo om kabun dot anggur i Daud, om poposiliu dokoyu do boyoon do soudor dau? ⁸ Iri toi daa kopogiupakatan dokoyu do sumaap doho’? Om aiso’ i dokoyu o momisunud doho’ dot iri piya tanak ku nga’ sumokodung i’ di Daud. Om aiso’ dokoyu o tumangkabo do kosorou doho’ ko’ momisunud po doho’ do maso nopodti nga’ mogihum i Daud, i susuhuon ku, do ralan do mamatai doho’, om i Yonatan i tanak ku nga’ mongodsuur i’ di Daud!’’ ka dau. ⁹ I Doig nogi’, i tulun dot Idom diri nga’ poingkakat i’ do poingamung di soudor do suwai. Om boros ka di Doig, ’’Nokito ku i’ i Daud do minongoi solowot di Ahimilik i tanak di Ahitub, do hilo’d Nob. ¹⁰ Om uhot no i Ahimilik do TUHAN ondung nunu o wonsoyon di Daud. Om onuwai noddi dau i Daud do kokoriu om patahako’ dau i gayang di Guliat, i tulun do Pilistin diri,’’ ka dau. ¹¹ Om ponuhu’ no i Saul do tulun do mongoi pomolohou di Ahimilik it imam diri, om koinsanai di sompiiyon dau di nongosiliu dot imam do hilo’d Nob. Om ongoi noddi iyolo’ solowot di Saul. ¹² Om boros kad Saul dot id di Ahimilik, ’’Pokinongou no, oi Ahimilik!’’ ’’Oo, oi Tuan Raja’,’’ ka dau’d suminimbar. ¹³ Om uhoto’ no di Saul iyau, ’’Nokuro tu’ miupakat kou di Daud do sumaap doho’? Nokuro tu’ minuhot ko’d Kinorohingan do bagi’ dau om pinatahak nu po dau i gayang, om kinokorihan nu iyau do roti? Om baino’ nopodti nga’ sumaap iyau doho’ om mogihum do ralan do mamatai doho’!’’ ka dau. ¹⁴ Om simbar ka di Ahimilik, ’’Okon toi ko’ i Daud nopo om boyoon di soudor nu dit otorodok kopio? Om monongiwan po iyau diya’, om boyoon do madtatamong nu, om suahon iyau do koinsanai’d tulun do hiri’d walai nu! ¹⁵ Otopot nogid minuhot oku’d Kinorohingan do bagi’ dau nga’ okon i’ ko’ tontok nogiddi do minomonsoi oku’d miagal diri. Nga’ a’ oku i’ koilo di pakat do sumaap diya’! Om kada’ oku nogi’ kopio tondoso’ om kada’ tondoso’ ot isai nopo o tid suang do sompiiyon ku, oi Tuan Raja’. Tu’ a’ oku i’ koilo-ilo’d hal dino!’’ ka dau. ¹⁶ Nga’ boros ka di raja’, ’’Oi Ahimilik, patayon kou no, iya’ om koinsanai di sompiiyon nu,’’ ka. ¹⁷ Om boros kad Saul dot id soudor di madtatamong dau di songingkakat do hiri’d toning dau, ’’Ngoyo’ dokoyu patayo’ ilo imam do TUHAN! Tu’ suminuang iyolo’d pakat di Daud, om a’ i’ minomisunud doho’ do minogidu’ i Daud, do mulong piya do koilo iyolo’ddi,’’ ka. Nga’ mada’ i’ i tongosoudor di madtatamong do mamatai dit imam do TUHAN. ¹⁸ Om boros ka di Saul dot id di Doig, ’’Ngoyo’ iya’ patayo’ iyolo!’’ ka. Om ngoyo’ nod Doig patayo’ ngai’ it imam. Walu’ nohopod om limo ot imam di milo ngai’ do mongigit dit ipod do pinatai dau do tadau’ddi. ¹⁹ Om ponuhu’ po i Saul do mongoi pamatai do toinsanan i poingiyon do hilo’d Nob, i bandar dot imam diri: i tongokusai, i tongoondu’, i tangaanak, om i ragang po, om i sapi’, om i kaladai, om i dumba’. ²⁰ Nga’ i Abiatar nopo i tanak di Ahimilik, om nokopoggidu’ i’. Om ongoi no iyau do hilo’d sugku’ di Daud. ²¹ Om sunudai no dau i Daud do nangapatai ngai’ nod i Saul it imam di mongobi-obi’ do TUHAN. ²² Om boros kad Daud dot id dau, ’’Soira’ di nokito ku i Doig do tadau’ddi om oilaan ku no do haro posunudon dau di Saul. Om iyoho’ no nokobungou do kinapatayon do koinsanai di tobpinai nu. ²³ Sugku’ nopo doho’, om kada’ kooris. Pokipapatayan to no daa goduwo’d Saul diti nga’ aiso’ i’ o koligagaanan nu’d poinsugku’ doho’,’’ ka dau.

¹ Insan o tadau om kosunudai no i Daud do maso nod tulun do Pilistin do manangod do bandar do Kohila, om ngoyon diyolo’ panakaho’ i gandum di wagu po koomot. ² Om uhot noddi i Daud do TUHAN, ’’Ngoyon ku tuu saapo’ i tulun do Pilistin diri?’’ ka. ’’Ngoyon,’’ kad TUHAN do suminimbar. ’’Ngoyon nopo iyolo’ saapo’ om intirungan no o bandar do Kohila,’’ ka dau. ³ Nga’ boros ka di tulun di Daud dot id dau, ’’Hiti piya’d Yohuda nga’ ongooris tomod toko’ no, om okuro-kuro nogindo do mongoi toko’d hilo’d Pilistin!’’ ka diyolo’. ⁴ Om uhot poddi kawagu i Daud do TUHAN. Om boros kad TUHAN dot id dau, ’’Kada’ katangkabo, ngoyon nopo songodo’ i bandar do Kohila, tu’ patahakon ngai’ ku i’ dot id diya’ i soudor do Pilistin,’’ ka. ⁵ Om ongoi noddi i Daud om i tulun ngai’ dau do hilo’d Kohila om songodo’ no diyolo’ i tulun do Pilistin. Om ogumu’ddi o tulun do Pilistin do napatai diyolo’ om nanu diyolo’ i tayam-tayam diyolo’. Om iyo noddi i Daud do minamasi ngai’ di tulun do hiri’d bandar diri. ⁶ Tontok di minogidu’ i Abiatar, i tanak di Ahimilik do minongoi sugku’ di Daud om di minongoi iyau woyo’ di Daud do hilo’d Kohila om nigitan i’ dau it ipod. ⁷ Om tontok di sinunudan i Saul do minongoi i Daud do hilo’d Kohila, om poingkaa ot osorou di Saul, ’’Nakatahak no kopio’d Kinorohingan iyau dot id longon ku’d baino’. Tu’ minongoi nopo i Daud do hilo’ tu’ bandar di kitolig om kitotobon om nokosuang no iyau’d lawa’,’’ ka. ⁸ Om lohowo’ noddi di Saul i soudor dau do mongoi sangod, om mongoi ponurungku’ do Kohila om oturungku’ i’ i Daud om koinsanai di tulun dau. ⁹ Om soira’ di norongou di Daud do mongoi saap dau i Saul, om boro-boros no iyau di Abiatar, it Imam diri, ’’Igitai’d hiti it ipod,’’ ka dau. ¹⁰ Om sambayang noddi i Daud, ’’Oi TUHAN, i Kinorohingan dot Israil, nokorongou oku do rumikot i Saul do mongoi pamaraag diti bandar do Kohila dot iyoho’ i susuhuon nu o kapamaraagan. ¹¹ Patahakon oku tuu do tulun do Kohila dot id di Saul? Om otopot tuu do rumikot i Saul do miagal di norongou ku? Oi TUHAN, i Kinorohingan dot Israil, simbaro’ oku no!’’ ka dau. Om boros kad TUHAN do suminimbar, ’’Rumikot no moti’ i Saul,’’ ka. ¹² Om uhot po kawagu i Daud, ’’Patahakon oku tuu om i tulun ku di tulun do Kohila dot id di Saul?’’ ka. Om boros kad TUHAN do suminimbar, ’’Patahakon kou i’ moti’,’’ ka. ¹³ Om tongkiad noddi do mantad hilo’d Kohila i Daud om koinsanai di tulun dau. Om kogumuo’ nopo diyolo’ om haro i’ doti’ ot onom nahatus o tulun, om tilombus no iyolo’ do minghombo dot id piro-piro o kinoiyonon do suwai. Om soira’ di nokorongou i Saul do nokopoggidu’ no i Daud do mantad hilo’d Kohila om kada’ noddi iyau ongoi sangod. ¹⁴ Om ongoi noddi lisok i Daud do hiri’d luang do konulu-nuluan do hilo’d tana’ do kowotuan do Sip. Om pigusa-gusa’ kasai’ i daa di Saul i Daud, nga’ a’ id TUHAN pinatahak i Daud dot id di Saul. ¹⁵ Nga’ mulong pod miagal diri, nga’ ooris kasai’ i’ i Daud, tu’ pokipapatayan kasai’ i’ di Saul iyau. Tontok di hilo’d Horis i Daud, i hilo’d tana’ do kowotuan do Sip, ¹⁶ om ongoi no i Yonatan solowot di Daud do hilo’, do mongoi popogirot do kotumbayaan di Daud dot intirungan kasai’ i iyau do Kinorohingan. ¹⁷ Boros kad Yonatan dot id di Daud, ’’Kada’ kooris. Tu’ a’ ko i’ di tapa’ ku milo do pokorualan. Oilaan no kopio dau dot iya’ no o sumiliu’d raja’ do tulun dot Israil, om iyoho’ o kaanu’d pangkat dot id siriba-riba’ diya’,’’ ka dau. ¹⁸ Om pogiroto’ no diyo Daud di Yonatan o batos do piombolutan diyolo’ dot id toguang do TUHAN. Om undorong noddi i Daud do hilo’d Horis om poguliai no di Yonatan do hiri’d walai dau. ¹⁹ Om ongoi no solowot di Saul do hilo’d Gibia o piro-piro o tulun do mantad hilo’d Sip, om boros ka diyolo’, ’’Poillisok i Daud do hilo’d watas dahai do hiri’d luang do nulu-nulu dit id somok do Horis, i hilo’d timpak do Nulu-Nulu do Hakila i ponong id salatan do tana’d kowotuan do Yohuda. ²⁰ Oilaan i’ dahai do pokitatangkapan nu iyau, oi Raja’. Om ongoi no kopio do hilo’d dahai. Om oilaan no kopio dahai dot atangkap nu iyau,’’ ka diyolo’. ²¹ Om boros kad Saul, ’’TUHAN no o mamarakat ngai’ dokoyu tu’ osonong kou i’ dot id doho’! ²² Pamanau kou no om ngoyon po kawagu dokoyu ilaai kopio! Ilaan no kopio ondung hinonggo iyau om isai o nokokito dau. Tu’ opintar kopio daa iyau dot orongou ku. ²³ Om ilaan no ondung honggo’ddi o luang do nulu-nulu do lilisokon dau om ngoyon oku no sunudai dot oruhai! Om moyo’ oku nogindo dokoyu. Ondung hilo’ po kasai’ iyau id kinoiyonon diri om ihumon ku no kopio iyau do mulong piya do tumongkop oku do Yohuda do mogihum,’’ ka dau. ²⁴ Om pogulu no di Saul i piro-piro o tulun diri do minuli’ do hilo’d Sip. Om iyo Daud nopo di piro-piro o tulun dau nga’ hilo’d tana’ do kowotuan do Maon, it id rantai dot oingou i ponong id salatan do tana’d kowotuan do Yohuda. ²⁵ Om timpuun no i Saul om i piro-piro o soudor dau do mogihum di Daud. Nga’ nongoi id tulun sunudai i Daud do pasal diyolo’, om ongoi noddi i Daud do hiri’d nuluhon di kapampangan di hilo’d tana’d kowotuan do Maon, om undorong no iyau’d hiri. Om soira’ddi do nokorongou i Saul do pasal diri om gusao’ no dau i Daud. ²⁶ I Saul nopo di soudor dau nga’ hiri’d sampaping ponong hiti di nuluhon diri, nga’ i Daud nopo om i tulun dau om hiri’d sampaping ponong hilo’. Marau-arau tomod iyolo’ do minogidu’ tu’ oruhai no daa iyolo’ dot otutukan om atangkap di Saul. ²⁷ Nga’ tontok nogiddi do nokorikot ot iso’ o susuhuon do minongoi pomisunud di Saul do poingkaa, ’’Uli’ kopio! Tu’ maso nod tulun do Pilistin do manangod do pomogunan toko!’’ ka. ²⁸ Om tingkod noddi i Saul do momogusa’ di Daud om ongoi no iyau sangod do tulun do Pilistin. Iri noddi o kinopomungaranan di nuluhon diri do Nuluhon do Pinitongkiadan. ²⁹ Om tongkiad noddi i Daud do mantad hiri om pakayaai no dau do hilo’d In-Godi om lisok nod hiri’d luang do konulu-nuluan do hilo’.

¹ Tontok di koguguli’ di Saul do minongoi sangod do tulun do Pilistin om korongou no dau do hilo’d tana’ do kowotuan di hiri’d somok dot In-Godi i Daud. ² Om olomus nopoddi i Saul do minomili’ do tolu noribu o soudor dau dit ongosiou kopio do pointongkop dot Israil om ongoi no pogihum di Daud om i tulun dau do ponong id koulayon do mantad id Nuluhon do Kapampangan di roitan do Kambing do Gouton. ³ Om korikot no i Saul do hiri’d iso’ o luang do nulu-nulu, it id somok do kandang do dumba’ do hiri’d toning do ralan. Om suang no iyau do hiri’d luang di nulu-nulu’ddi do minongoi pagawas. Nga’ koontok no kopio do hiri o linisok diyo Daud om i tulun dau, nga’ iyolo’ nopo om ponong hiri’d gogok kopio. ⁴ Boros ka diyolo’ dot id di Daud, ’’Iti no o maso nu’d osonong! Dot okon toi ko’ nokoboros nod TUHAN dot id diya’ o poingkaa, ’Patahakon ku indo diya’ o pisangod nu om wonsoyon no o nunu nopo o korohian nu dot id dau,’ ka,’’ ka dau. Om pomirulan-rulan no i Daud do minongoi do hiri’d kinoiyonon di Saul om ngoyo’ noddi dau sinsibo’ ot okooro’ di rasuk di Saul, nga’ a’ i’ di Saul noilaan iri. ⁵ Om kopurimanai noddi di Daud do nakasala’ iyau do minomonsoi do miagal diri. ⁶ Om boro-boros no i Daud dot id tulun dau, ’’Pokionuon ku no dot antaban oku’d TUHAN do momonsoi dot araat dot id raja’ ku di nopili’ do TUHAN do sumiliu’d raja’. Om a’ oku i’ koino-ino do pokoruol dau tu’ iyau no o raja’ do pinili’d TUHAN!’’ ka dau. ⁷ Om iyo noddi i Daud do minonginsasamod di tulun dau, om a’ dau iyolo’ pinologos do sumaap di Saul. Om soliwan noddi i Saul do mantad id luang do nulu-nulu’ddi, om lombus noddi iyau do minamanau. ⁸ Om i Daud nga’ suminoliwan nogi’ do mantad id luang do nulu-nulu’ddi om pomolohou no iyau do hiri’d tohuri-huri di Saul, ’’Oi Raja’!’’ ka dau. ⁹ Om koili noddi i Saul. Om otud no i Daud dot id toguang dau om boro-boros nod, ’’Nokuro tu’ mokinongou ko do boros do tulun di momoros do mumbal oku’d pokoruol diya’? ¹⁰ Antangai pogi’ nga’ di nopo di tiinu’ di hilo’d luang do nulu-nulu om nakatahak ko no daa’d TUHAN dot id doho’, om i tulun ku nga’ monuhu’ no daa doho’ do mamatai diya’, oi Tuan Raja’, nga’ a’ oku i’. Boros kangku, ’A’ oku i’ pokoruol di raja’ ku di nopili’d TUHAN’. ¹¹ Antangai pogi’ iti kain do sininsib ku do mantad id rasuk do tiwanon ku. Ondung mamatai oku daa diya’, oi Tuan Raja’, om napatai ku no daa iya’. Nga’ ngoyo’ ku nopo sinsibo’ ot okooro’ di rasuk nu. Om iti no o kointalangan dot a’ oku i’ momusorou do sumaap do Tuan Raja’, ko’ pokoruol pod Tuan Raja’. Nga’ gusaon oku i’ diya’ om pokipapatayan oku do mulong piya dot aiso’ o sala’ ku dot id toguang nu! ¹² TUHAN no o momutus dato ondung isai to o nakasala’! Om TUHAN no o monuli’ di kararaat nu dot id doho’ tu iyoho’ nopo om a’ i’ kopio pokoruol diya’. ¹³ Tu’ poingkaa o boros di komolohing-lohingan, ’Tulun nod araat o momonsoi dot araat,’ ka. Iyo nopoddi, om a’ oku i’ pokoruol do Tuan Raja’. ¹⁴ Antangai oku pogi’ i pokipapatayan do raja’ dot Israil! Antangai oku pogi’ i pigusa-gusa’ dau! Iyoho’ nopo om iyo nod songinan o tasu di napatai no! Om iyo oku nod kutu-kutu! ¹⁵ Butusan to i’ do TUHAN om tontuon dau ondung isai o kasala’. Maan i’ dau antangai kopio iti hal to. Nga’ maan oku i’ dau obiai om posion oku i’ dau do mantad id diya’!’’ ka dau. ¹⁶ Om kopongo poddi i Daud do minimboros, om boro-boros nogiddi i Saul, ’’Iya’ kopio toi iti, oi Daud, i monongiwan doho’?’’ ka dau. Om pingihad no iyau. ¹⁷ Om boros kaddi dau dot id di Daud, ’’Iya’ no ot otopot om iyoho’ no o nakasala’. ¹⁸ Tu’ iri nopo karaaton ku dot id diya’ om sinulian nu nogi’ dot osonong. Om nokointalang nu no kopio o kosonongo’ nu dot id doho’ do tadau baino’. Tu’ a’ ko i’ minamatai doho’ do mulong piya do nakatahak oku no daa’d TUHAN dot id diya’. ¹⁹ Ingkuri’ i’ kopio o tulun do popoidu’ do pisangod dau ondung natangkap dau i pisangod dau’ddi. TUHAN no o mamarakat diya’ diti kosonongo’ nu dot id doho’ di tadau baino’! ²⁰ Oilaan ku noddi kopio do baino’ dot iya’ no o sumiliu’d raja’ dot Israil, om koingkakat indo kopio o pomorintaan dot Israil dot iya’ o momorinta’. ²¹ Nga’ sumpa’ no dot id doho’ dot id suang do ngaran do TUHAN dot a’ nu patayon o sinakagon ku om a’ indo atanus o ngaran ku do mantad id sompiiyon ku,’’ ka dau. ²² Om kookunai nod i Daud iri. Om uli’ noddi i Saul do hiri’d walai dau, om i Daud no om iri ngai’ tulun dau om pinogulian do hiri’d lilisokon diyolo’.

¹ Om a’ no alaid do mantad diri om kapatai no i Somuil. Om oinsanan nopoddi o tulun dot Israil do tuminimung do minogihad dau. Om lobongo’ no diyolo’ iyau do hiri’d walai dau di hilo’d Rama. Katalib poddi iri, om ongoi no i Daud do hiri’d tana’ do kowotuan do Paran. ² - ³ Om haro o songulun do mantad id sinakagon di Kalib do hilo’, dot i Nabal o ngaran. Tadon nopo dau nga’ hilo’d Maon, nga’ kitana’ iyau do hilo’d somok do bandar do Karmol. Om iyau nopoddi nga’ tulun di kaya’ kopio om kidumba’ iyau do tolu noribu o tinan om kikambing do soribu o tinan. I Abigail nopo, i sawo dau, om olumis kopio koondu’ om oilo do mimboros. Nga’ i Nabal nopo om obintogod om araat o kowoyo-woyoon dau. Om korongou no i Daud do maso di Nabal do momogunting di hulu do dumba’ dau do hilo’d Karmol, ⁴ om tontok nopoddi nga’ hilo’d tana’ do kowotuan i Daud, ⁵ om ponuhu’ no iyau do hopod o tangaanakwagu do mongoi solowot di Nabal do hilo’d Karmol, om mongoi poporikot do tabi’ dau. ⁶ Om sinuhu’ dau iyolo’ do poboros dot id di Nabal do poingkaa, ’’Poporikot i Daud do tabi’ dot id diya’, om maha’ daa om osonong-sonong ko om i sompiiyon nu, om koinsanai di songonuon nu. ⁷ Nokorongou iyau do maso nu do momogunting do hulu’d dumba’ nu. Om orohian iyau do koilo ko do solinaid nopodti om poinsugku’ ngai’ dahai i gompomogompi’ do dumba’ nu, om a’ i’ dahai iyolo’ insan gangaho’. Om solinaid diyolo’d hilo’d Karmol om aiso’ i’ o tiso’ po di diyolo’d songonuon do napanakau. ⁸ Uhoto’ nopo iyolo’. Om atantu’ nod sunudan ko i’ diyolo’. Ruminikot iyahai do tontok diti tadau’d moginakan, om pokionuon di Daud do romiton nu iyahai kosonong-sonong. Om onuwai no iyahai, i susuhuon nu om i tambalut nu, do nunu nopo do tumanud do kagaanan do ginawo nu,’’ kad i Daud. ⁹ Om poboroso’ no di tulun di Daud i boros di Daud diri dot id di Nabal, om andad no iyolo’d hiri. ¹⁰ Nga’ boros kad Nabal do suminimbar, ’’Isai i Daud? A’ oku i’ kotutun dau! Noponu’ po bod turipon di minogidu’ do mantad id tuan diyolo’ iti pomogunan do baino’! ¹¹ A’ oku i’ moti’ kopio mongoi panganu di roti om i waig om i tayam-tayam do sinumbali’ ku di maan ku di gompomogunting do hulu di dumba’ ku, do patahakon do tulun dit a’ ku oilaan o tadon!’’ ka dau. ¹² Om guli’ no dot id di Daud i tulun di Daud, om posunudo’ no diyolo’ i boros di Nabal. ¹³ Om boros kad Daud do minonuhu’ diyolo’, ’’Obilo’ dokoyu o gayang dokoyu!’’ ka. Om wonsoyo’ no di tulun di Daud o miagal diri. Om obilo’ nod i Daud i dau’d gayang. Om angatai nogiddi dau o haro i’ doti’ ot apat nahatus o tulun do moyo’ dau om duwo nahatus o pinoundorong do madtamong di konunu-nunuan diyolo’. ¹⁴ Om daamot nopoddi, om ongoi no boro-boros o tiso’ di susuhuon di Nabal dot id di Abigail, i sawo di Nabal. Boros ka dau, ’’Nokorongou ko noddi? Minonuhu’ i Daud do piro-piro o tulun do mantad hilo’d tana’ do kowotuan do mongoi poporikot do tabi’ dot id tuan toko’. Nga’ indaraato’ nogi’ dau iyolo’. ¹⁵ Iri nopo tulun diri nga’ osonong kopio dot id dahai. A’ i’ iyolo’ insan pamagangau dahai. Om tontok di poinsugku’ iyolo’ dahai do hilo’d talun om a’ i’ iyahai napanakahan do nunu nopo. ¹⁶ Monikid tadau nopo om monikid tuong iyolo’ do mongintirung dahai di solinaid dahai do madtamong di kambing om dumba’ do hiri’d somok diyolo’. ¹⁷ Pomusorou no kopio ondung nunu ot apatut do wonsoyon nu! Tu’ poporikot moti’ iti do koligagaanan dot id tuan toko’ om id koinsanai’d sompiiyon dau. Okodou no kopio o ginawo dau, tu’ a’ no mokinongou’d boros dot isai nopo!’’ ka dau. ¹⁸ Om olomus nopo i Abigail do minonimung do duwo nahatus o liob do roti, om duwo o kantung do kulit do noponu’d waig dot anggur, om limo tinan do dumba’ di nolugu, om hopod om turu’ o kilogram do gandum do noonsok, om hatus o puru do tua’ dot anggur di kinoring, om duwo nahatus o tua’ dot ara di winonsoi’d roti, om pagandaro’ ngai’ nogiddi iri do piro-piro o tinan do kaladai. ¹⁹ Boros ka dau dot id susuhuon dau, ’’Poguulu kou do mamanau. Om sumuhut oku i’,’’ ka dau. Nga’ a’ i’ dau sinunudan i sawo dau. ²⁰ Tontok di nokorikot i Abigail do hiri’d ralan di poingkilong di hiri’d nulu-nulu om kokito no dau i Daud om i tulun di Daud do pakayaan do ponong id dau. ²¹ Om maso nopoddi nga’ momusorou no i Daud do poingkaa, ’’Aiso’ i’ tomod o komoyon di nintirungan ku i songonuon di tulun diri do hilo’d tana’ do kowotuan. Iso’ po di konunu-nunuan dau nga’ aiso’ i’ o napanakau’d tulun. Nga’ baino’ nopoddi om somulian i’ dau do karaaton i kosonongo’ ku. ²² Patayon oku nopod Kinorohingan dot a’ ku no apatai o koinsanai do kusai do hilo’d walai dau dot a’ po koulai o tadau do suab!’’ ka. ²³ Tontok di nokito di Abigail i Daud, om osiau nopo iyau do luminintuhun do mantad hiri’d kaladai dau, om otud no iyau ²⁴ do hiri’d toning do gakod di Daud. Boros ka dau, ’’Tulungo’ oku no, oi Tuan, om pokinongoho’ po iti boros ku! Pababaan nopo doho’ o kasalaan diri! ²⁵ Kada’ podulo’ i Nabal, tu’ tulun dot aiso’ o guna’! Iyau no tulun do basug tu’ okon toi ko’ basug nogi’ o komoyon di ngaran dau? A’ oku i’ nokokito di tulun di sinuhu’ nu do tontok di nokorikot iyolo’. ²⁶ Kinorohingan i’ o minogodu diya’ do sumuli’ om mamatai di pisangod nu. Om baino’dti om sumumpa’ no dot id TUHAN di poimpasi dot ohukuman do miagal di Nabal o koinsanai di pisangod nu om i tulun di momonsoi’d araat dot id diya’. ²⁷ Ompunai oku no, oi Tuan, om romito’ no iti popuhawangon ku do nigitan ku. Om patahakon noti dot id tulun nu. ²⁸ Ompunai oku no do koinsanai di kasalaan do nowonsoi ku. Silihon ko i’ do TUHAN do raja’, om poingkaa nogi’ i sinakagon nu, tu’ sumangod ko i’ do bagi’d TUHAN. Om a’ ko i’ kowonsoi’d araat do solinaid nu’d poimpasi. ²⁹ Ondung haro daa o mumbal do mongoi saap om mongoi pamatai diya’ om gompion ko i’ do TUHAN, i Kinorohingan nu, om posion ko i’ dau do miagal di pomogompi’ do tulun do dapu’ di koupusan kopio dau. Nga’ iri nopo pisangod nu om pataamon id TUHAN do miagal do watu di polositikon. ³⁰ Om soira’ nopondo dot owonsoi ngai’d TUHAN o koinsanai dit ongosonong do nakabatos dau dot id diya’, om osiliu ko dau’d raja’ dot Israil, ³¹ om osorou nu nondo dot a’ ko suminuli’ om a’ minamatai dot aiso’ o pinaantakan; om a’ ko indo monosol om a’ ko tumongob. Om soira’ nopondod abarakatan ko’d TUHAN om kada’ oku no kopio lihuwai,’’ ka dau. ³² Om boros kad Daud dot id dau, ’’Royohon no o TUHAN, i Kinorohingan dot Israil tu’ minonuhu’ diya’ do mongoi solowot doho’ do tadau’d baino’! ³³ Mongunsikou oku no dot id Kinorohingan dino komiloo’ nu’d momusorou. Tu’ iri nopo winonsoi nu baino’ nga’ nokoodu doho’ do mimpori-pori’d sumuli’. ³⁴ Nantaban oku i’ do TUHAN do pokoruol diya’. Nga’ ondung okon daa ko’ minarau-arau ko do minongoi solowot doho’ om sumumpa’ oku no dot id Kinorohingan dot Israil di poimpasi, dot apatai ngai’ no daa o tulun di Nabal dot orikot o kosuabon do suab!’’ ka dau. ³⁵ Om romito’ nod Daud i pinatahak di Abigail, mikuwo’d minomoros do poingkaa, ’’Uli’ no do hilo’d walai nu, om kada’ no katangkabo. Tu’ wonsoyon ku i’ i pinokianu nu,’’ ka dau. ³⁶ Om uli’ noddi i Abigail do hiri’d di Nabal. Maso nopoddi nga’ moginakan i Nabal do miagal pod don raja’ o pogiginakan. Om magauk tomod iyau do mikuwo’d osonong tomod ot opurimanan dau. Om aiso’ iddi o pinosunud di Abigail dot id dau do gisom do kosuabon kawagu. ³⁷ Om soira’ di notibanasan i Nabal om susuyo’ ngai’ nogiddi di Abigail i nongosiliu’ddi. Nga’ sigog id noontok i Nabal do toruol do tundu-undu’ gisom do luminomok o tinan dau om a’ noddi iyau kogura’. ³⁸ Om hopod no tadau’d mantad diri om koontok po kawagu iyau do toruol do tundu-undu’ do pinorikot do TUHAN do gisom do napatai’ddi iyau. ³⁹ Om soira’ di nokorongou i Daud do napatai no i Nabal om boros ka dau, ’’Royohon no o TUHAN! Tu’ nosulian no dau i Nabal do minonguntotori’ doho’. Nga’ noduhan oku i’ do TUHAN, iyoho’ i susuhuon dau, do momonsoi’d araat dot id di Nabal. TUHAN iddi o minomohukum di Nabal dot i karaato’ dau o kinopomohukuman,’’ ka dau. Om ponuhu’ noddi i Daud do piro-piro o tulun do minongoi ponunang di Abigail. ⁴⁰ Om korikot noddi i piro-piro o tulun di Daud do hilo’d Karmol, om posunudo’ no diyolo’ dot id di Abigail o poingkaa, ’’Sinuhu’ iyahai di Daud do mongoi diya’ paatod do hilo’d dau do sumiliu’d sawo dau,’’ ka. ⁴¹ Om otud noddi i Abigail om pomoros nod, ’’Iyoho’ no o susuhuon di Daud. Om posodia’ oku i’ do mongoug do lapap di susuhuon dau,’’ ka dau. ⁴² Om olomus nopoddi iyau do minongopi-opi’ om sakai no di kaladai dau. Om tanud no dau o limo o susuhuon dau’d tongoondu’. Om pamanau noddi iyau do tuminanud di tulun di Daud om kosiliu no iyau do sawo di Daud. ⁴³ Di nopo dit id gulu po ko’ iri, om nakawin no di Daud i Ahinuam, i mantad hilo’d Yisriil. Om kosiliu noddi i Abigail iyau do sawo dau. ⁴⁴ Om daamot nopoddi, om patahako’ nod Saul i Mikal, i tanak dau’d tondu’, i sawo daa di Daud diri dot id di Palti, i tanak di Lais, i mantad hilo’d bandar do Galim.

¹ Insan o tadau om rikot no kawagu o piro-piro o tulun do mantad hilo’d Sip do minongoi solowot di Saul do hilo’d Gibia, do minomisunud dau do poillisok i Daud do hilo’d Nuluhon do Hakila, it id tisan do tana’ do kowotuan do Yohuda. ² Om tilombus nopo i Saul do minongoi do hilo’d tana’ do kowotuan do Sip do miwoyo’ do tolu noribu o soudor dau di gunsiou do mongoi pogihum di Daud. ³ Om powonsoyo’ no diyolo’ o kiim diyolo’ do hiri’d tisan di ralan do hilo’d Nuluhon do Hakila. Tontok nopoddi nga’ hiri pod tana’ do kowotuan i Daud, ⁴ om ponuhu’ no i Daud do tulun do mongoi ponoluku’. Om koilaai no dau do hiri kopio i’ i Saul. ⁵ Om potilombusai nopo di Daud do minongoi do hilo’d pinomukiiman di Saul om kokito no dau i kiim di Saul om i Abnor, i tanak di Nor. I Abnor nopo nga’ boyoon do soudor di Saul. Om kiim nopo di Saul om hiri’d tanga-tanga’ om iri no kiim di soudor di Saul om songinsorili’ di kiim dau. ⁶ Om uhoto’ no di Daud i Ahimilik, i tulun do Hit diri, om i Abisai, i tobpinai di Yoab, (tina’ nopo diyolo’ nga’ i Soruya), boros ka dau, ’’Isai ot id pialatan dokoyu do kasaap do moyo’ doho’ do mongoi do hilo’d pinomukiiman di Saul?’’ ka dau. ’’Iyoho’,’’ ka di Abisai. ⁷ Om totuong iddi do minongoi i Daud om i Abisai suang di pinomukiiman di Saul. Om kokito no diyolo’ do koodop i Saul do hiri’d tanga-tanga’ di kokiiman om poingodsuk do hiri’d tana’ i tandus dau do hiri’d toning do tulu dau. Om i Abnor noo om i soudor dau om koodop do posorili’ di Saul. ⁸ Om boros ka di Abisai dot id di Daud, ’’Totuong nodti do patahakon do Kinorohingan o pisangod nu dot id diya’. Pologoso’ oku nod monobok dau do gisom do kohondot dilo tana’. Ilo’ i tandus dau o ponobok ku dot insan ku nopo potoboko’. Om a’ ku no iyau induaan do monobok!’’ ka dau. ⁹ Nga’ boros kad Daud, ’’Kada’ kopio iyau patayo’! Tu’ atantu’ nod hukuman do TUHAN i tulun di mamatai’d raja’ do nopili’ dau,’’ ka dau. ¹⁰ Om boros kad Daud, ’’Id suang nod ngaran do TUHAN do poimpasi, dot oilaan ku do TUHAN i’ o mamatai di Saul, do kapatai-patayo’ po tuu dau o kapatai dau ko’ maso po dau’d sumangod. ¹¹ Nga’ mada’ oku i’ do mumbal do mamatai do tulun di nopili’d TUHAN. Kaino onuo’ to nopo ilo poiyanan dau’d waig om ilo tandus dau, om sumoliwan to nondod hiti,’’ ka dau. ¹² Om ngoyo’ noddi di Daud i tandus om i poiyanan di Saul do waig, i poingiliu’d hiri’d toning do tulu dau, om tongkiad noddi iyau om i Abisai do mantad hiri. Aiso’ i’ tiso’ piya’d tulun do nokokito ko’ nokoilo po di nosiliu’ddi, om aiso’ o noposik. Koodop ngai’ nopo iyolo’ tu’ pinoolong tomod iyolo’d TUHAN. ¹³ Om pakayaai noddi di Daud do ponong hiri’d sampaping di rantai. Om ongoi no iyau’d hiri’d timpak di nulu-nulu dit osodu’ no do mantad id pinomukiiman di Saul. ¹⁴ Om garangai no dau i Abnor om i soudor di Saul, ’’Abnor! Simbaro’ oku! Korongou ko i’ doho!’’ ka dau. Om ponguhot no i Abnor, ’’Isai kopio ilo minggarang?’’ ka. ¹⁵ Om boros kad Daud do suminimbar, ’’Abnor, okon toi ko’ iya’ o tulun dit osiou kopio do pointongkop do hiti’d Israil? Nga’ nokuro tu’ a’ nu nintirungan i raja’, i tuan nu? Waagu kosuang do hino’d kokiiman o tulun do mongoi daa pamatai di tuan nu, ¹⁶ nga’ a’ nu i’ winonsoi o karaja’ nu. Sumumpa’ oku no dot id TUHAN di poimpasi, oi Abnor, dot oinsanan kou nopo dot a’ daa osorupai do posion. Tu’ a’ i’ dokoyu nintirungan i tuan dokoyu, i pinili’d TUHAN do sumiliu’d raja’. Antangai pogi! Honggo no i tandus di raja’? Om honggo no i poiyanan do waig di hiri’d toning do tulu dau’ddi?’’ ka dau. ¹⁷ Om kotutunai noddi di Saul i boros di Daud. Om ponguhot no iyau, ’’Iya’ ino, oi Daud, i tanak ku?’’ ka. ’’Oo, oi Tuan Raja’,’’ kad i Daud do suminimbar. ¹⁸ Om boros ka kawagu di Daud, ’’Nokuro tu’ maso po o Tuan Raja’ do momogusa’ diti susuhuon nu? Nunu o kasalaan do nowonsoi ku? ¹⁹ Pokinongoho’ no o boros ku. Ondung TUHAN o mominsuhu’ diya’ do sumaap doho’, om maha’ daa dot oinsasamadan do porsombahan o ginawo dau dit otogod. Nga’ ondung don tulun do wonsoyon diti, om ousung ngai’ no iyolo’! Tu’ nuyung oku diyolo’ do mantad id pomogunan di pinabatos mantad do TUHAN gisom do hiti oku’ddid pomogunan di mononsog doho’ do tumuku’ dot id ponokokinorohingan do suwai. ²⁰ Kada’ oku pologoso’ dot apatai dot id pomogunan do suwai, it osodu’ do mantad id toguang do TUHAN. Nokuro tu’ orohian o raja’ dot Israil do mamatai doho’ tu’ iyoho’ nopo om miagal nod kutu? Nokuro tu’ maan oku diya’ osuo’ do miagal pod magasu do manuk talun?’’ ka dau. ²¹ Om boros kad Saul do suminimbar, ’’Otopot nod nokowonsoi oku’d dusa. Guli’ no, oi Daud, i tanak ku! A’ oku nondo momonsoi’d araat dot id diya’. Tu’ pinologos oku i’ diya’ do poimpasi kosodop. Otopot no kopio do basug oku! Om iti wonsoyon ku nga’ araat no kopio!’’ ka dau. ²² Nga’ boros ka di Daud do suminimbar, ’’Na, diya iti tandus nu. Ponuhu’ do songulun di madtatamong nu do mongoi’dti. ²³ Osonong kasai’ i’ ot isomuli’ do TUHAN dot id tulun dit otorodok om otulid o ginawo. Nakatahak ko no daa dau dot id doho’ di tadau baino’, nga’ a’ oku i’ minomonsoi’d araat dot id diya’, oi raja’ di nopili’d TUHAN. ²⁴ Poingkuro nopod pinologos ku iya’ do poimpasi di tadau baino’, om poingkaa nogi’ o TUHAN do mongintirung doho’ om popoidu’ doho’ do mantad id koinsanai’d koligagaanan!’’ ka dau. ²⁵ Om boros kad Saul dot id di Daud, ’’Barakatan ko id TUHAN, oi tanak ku! Owonsoi ngai’ nu i’ o koinsanai di korohian nu’d momonsoi!’’ ka dau. Om tilombus no i Daud do minimpanau nga’ i Saul nopo om minuli’ no do hiri’d walai dau.

¹ Om momusorou’ddi i Daud do poingkaa, ’’Poingkuro piya nga’ rumikot i’ o tadau do ngoyon oku di Saul patayo’. Om osonong nogid mogidu’ oku’d hilo’d pomogunan do tulun do Pilistin. Om a’ nondo i Saul mogihum doho’ do hiti’d Israil, om iyoho’ nogi’ nga’ osimbayan nondo,’’ ka. ² Om pamanau noddi i Daud do miwoyo’ dit onom nahatus o tulun dau om arau-arau nopo iyolo’ do minongoi solowot di Akis, i tanak di Mua, i raja’ do bandar do Gat. ³ Om undorong noddi i Daud om koinsanai di tulun dau do hilo’d Gat, do mogiwoyo-woyo’ di sompiiyon diyolo’. Om moyo-woyo’ nogid Daud i duwo o sawo dau; i Ahinuam, i tondu’ do mantad hilo’d bandar do Yisriil, om i Abigail, i sawo daa di Nabal, i mantad hilo’d Karmol. ⁴ Om tontok di norongou di Saul do nokopoggidu’ i Daud do hilo’d bandar do Gat om tingkod noddi iyau do mogihum dau. ⁵ Om boros kad Daud dot id di Akis, ’’Ondung tambalut ku iya’, om onuwai oku no dot iso’ o bandar dot okooro’ do maan ku’d tiyonon, om a’ indo iyahai poinsugku’ diya’ do hiti’d bandar dot agayo do pomogunan nu,’’ ka. ⁶ Om patahako’ noddi di Akis dot id di Daud o bandar do Siklag. Om mantad poddi om iri ngai’ no i raja’ do Yohuda o sanganu do Siklag. ⁷ Om koloido’ nopo di Daud do poingiyon do hiri’d pomogunan do tulun do Pilistin om sontoun om apat o tulan. ⁸ Tontok nopoddi nga’ asaru’ i Daud om i tulun ngai’ dau do mongoi panangod di tulun do Gosur, om i tulun do Girsi, om i tulun dot Amalik, i poundorong do hiri’d watas diri. Om ngoyo’ noddi di Daud solodo’ i tana’ diyolo’ do gisom do korikot do hilo’d Sur, om poinsusui di ralan do kumaa do hilo’d Masir. ⁹ Om patayo’ ngai’ nopo dau i tongokusai om i tongoondu’, om tanggayai ngai’ dau i dumba’, om i sapi’, om i kaladai’, om it unta, om i pakayan diyolo’. Om guli’ noddi i Daud do minongoi popoilo di Akis. ¹⁰ Om muhot nopo i Akis dau do poingkaa, ’’Hinonggo o nongoi dokoyu songodo’ baino’?’’ ka. Om poboroson nod Daud dot id di Akis do minongoi iyau do hilo’d ponong id salatan do Yohuda, ko’ hilo’d kinoiyonon do tulun do Yiramiil, ko’ hilo’d kinoiyonon do tulun do Kini. ¹¹ Om patayo’ ngai’ nopo di Daud i tulun do hiri’d bandar di nongoi dau songodo’ om aiso’ no o songulun piya do nokoguli’ do hilo’d Gat do minongoi pomisunud di winonsoi diyolo’. Om miagal noddi o wonsoyon di Daud do solinaid dau do hilo’d pomogunan do tulun do Pilistin. ¹² Om otumbayaan tomod i Akis di Daud. Om poingkaa ot osorou dau, ’’Karaatan no kopio i Daud di bansa’ dau gisom dot a’ no milo dot a’ iyau sumiliu’d susuhuon ku do solinaid dau do poimpasi,’’ ka.

¹ Om a’ no alaid do mantad diri om timungo’ no di tulun do Pilistin o soudor diyolo’ do mongoi sangod dot Israil. Om boros ka di Akis dot id di Daud, ’’Atantu’ nod oilaan ku do muhup ko no doho’ om i tulun nu nga’ muhup no do mongoi sangod,’’ ka. ² Om boros ka di Daud do suminimbar, ’’Oo. Iyoho’ nopo om susuhuon nu. Om okito nu nogindo kopio ondung nunu noo o milo ku’d wonsoyon,’’ ka dau. Om boros kad i Akis, ’’Silihon ku no iya’d madtatamong doho’ do gisom dot alaid,’’ ka. ³ Maso nopoddi nga’ napatai no i Somuil om nopogihadan no iyau do koinsanai’d tulun dot Israil. Om linobong diyolo’ iyau do hilo’d Rama, i bandar do tadon dau. Om tontok nopoddi nga’ nouyung ngai’ nod Saul do mantad hilo’d Israil i mogogontong om i bobolian di momolohou’d rusod do tulun di napatai. ⁴ Iri nopo soudor do tulun do Pilistin om tuminimung om pinopowonsoi’d kiim do hilo’d somok do bandar do Sunim. Om i Saul nga’ minonimung i’ di tulun dot Israil om pomukiim no iyolo’ do hilo’d Nuluhon do Gilbua. ⁵ Om soira’ di nokito di Saul i soudor do Pilistin om minodosi tomod diri iyau. ⁶ Om uhot no daa iyau’d TUHAN ondung nunu ot apatut dau’d wonsoyon nga’ a’ i’ suminimbar o TUHAN dot id nipi, ko’ id Urim om Tumim, ko’ pinawaya’ pod songulun o nabi. ⁷ Om boros kaddi di Saul dot id pagawai dau, ’’Pogihumai oku’d songulun o tondu’ di milo do momolohou’d rusod do tulun do napatai, tu’ mokiilo oku dau,’’ ka dau. ’’Haro i’ o bobolian do hilo’d Indor,’’ ka diyolo’. ⁸ Om pingunali-nali noddi i Saul, om a’ nod tulun otutunan. Om otuong poddi om ongoi no iyau solowot di tondu’ddi do miwoyo’ do duwo o pagawai dau. Boros kad Saul dot id tondu’ddi, ’’Lohowo’ doho’ i rusod di tulun di roiton ku o ngaran om suhuon no do popoboros ondung nunu ot osiliu dot id dosunsudan,’’ ka dau. ⁹ Om boros ka di tondu’, ’’Atantu’ nod oilaan nu ondung nunu i winonsoi di Raja’ Saul, tu’ nuyung dau do mantad id Israil o koinsanai di mogogontong om i bobolian di momolohou’d rusod do tulun do napatai. Nokuro tu’ posuangon oku daa diya’d lawa’ do mamatai doho’?’’ ka dau. ¹⁰ Om sumpa’ no i Saul do poingkaa, ’’Sumumpa’ oku no dot id suang do ngaran do TUHAN di poimpasi dot a’ ko i’ ohukuman do wonsoyon nu piya iti,’’ ka. ¹¹ Om ponguhot no i tondu’, ’’Isai o pokilahawan nu doho’?’’ ka. ’’I Somuil,’’ kad Saul do suminimbar. ¹² Soira’ di nokito di tondu’ i Somuil om pomogiak no iyau om boro-boros no di Saul, ’’Nokuro tu’ magakal ko doho’? Tu’ i Raja’ Saul ko i’!’’ ka dau. ¹³ Nga’ boros kad Saul dot id dau, ’’Kada’ kooris! Posunudo’ nopo ino tokito nu,’’ ka. Om boros ka di tondu’, ’’Okito ku o rusod do songulun do mimbulai do mantad hilo’d tana’,’’ ka dau. ¹⁴ Om uhot po kawagu i Saul, ’’Okuro-kuro o rabas dau?’’ ka. Om boros ka di tondu’ do suminimbar, ’’Iyau nopo om songulun o kusai di molohing no. Om kirasuk iyau dot anaru,’’ ka. Om koilaai noddi di Saul dot i rusod di Somuil iri. Om otud no iyau do suminuwau di nabi diri. ¹⁵ Om boros kad Somuil dot id di Saul, ’’Nokuro tu’ mamagangau ko doho’ om momolohou doho’ do gumuli’ kawagu?’’ ka. Om boros kad Saul do suminimbar, ’’Agayo kopio o kosusaan ku. Tu’ mongoi sangod doho’ o tulun do Pilistin om Kinorohingan kanogi’ nga’ nokotongkiad no doho’. A’ nopo iyau sumimbar doho’ do pawayaon do nabi om a’ sumimbar dot id nipi. Iri noddi o kinapamalahawan ku diya’ om osunudan oku i’ diya’ ondung nunu ot apatut ku’d wonsoyon,’’ ka dau. ¹⁶ Om boros kad Somuil, ’’Nunu po o kapamalahawan nu doho’ do notongkiadan ko’d TUHAN om nosiliu iyau’d pisangod nu? ¹⁷ Nabayaan nod TUHAN i boros dau do pinawaya’ dau dot id doho’ di gulu po; naanu no dau iti pomorintaan dot Israil do mantad id diya’ om patahakon diri dau dot id di Daud. ¹⁸ A’ ko tuminanud di pinonuhuan do TUHAN. Tu’ a’ nu pinatai ngai’ i tulun dot Amalik om a’ nu rinaag ngai’ i konunu-nunuan diyolo’. Om iri noddi o kinapamansayan do TUHAN do miagal diti dot id diya’ do baino’. ¹⁹ Patahakon ko nondo dau om i tulun dot Israil dot id tulun do Pilistin. Suab nopondo om kowoyo’ ko no doho’ om i nogi’ tangaanak nu’d kusai, om patahakon pod TUHAN o soudor dot Israil dot id tulun do Pilistin,’’ ka. ²⁰ Om diiri iddi om diiri do nahaba’ i Saul do hiri’d tana’ dot iyo poddi sinisian do nopoddosian kopio do nokorongou di pinoboros di Somuil. Om kawagu po nga’ olomok tomod iyau tu’ a’ po iyau nakaakan do nunu-nunu do nosongodou om gisom di mitingkosuab no. ²¹ Om insomok no di Saul i tondu’ om koilaai no dau do moddosi i Saul, om boros ka di tondu’, ’’Oi Tuan, matai po tamu’ doho’ do minomonsoi di pinokianu nu. ²² Om baino’ nodti om wonsoyo’ no iti pokionuon ku. Makan pod ongokooro’ di taakanon di maan ku posodiawo’ om okoris ko i’ kawagu do lumombus do mamanau,’’ ka. ²³ Nga’ minada’ i’ i Saul tu’ boros ka dau om a’ i’ iyau makan. Nga’ mononsog tomod i pagawai dau. Om alaid noddi om tumboyo’ no iyau. Tungag noddi iyau do mantad hiri’d tana’ om irikau no do hiri’d toodopon. ²⁴ Om olomus nopo i tondu’ do minonumbali’ do songinan o tanak do sapi’ dit olomu’ kopio om anu iyau’d tapung. Om onsoko’ no dau iri do winonsoi’d roti dit a’ rinalatan do pangambang. ²⁵ Om posurungo’ no dau i taakanon diri dot id di Saul om id pagawai dau. Om akan noddi iyolo’. Om pamanau noddi iyolo’ do totuong iddi.

¹ Om timungo’ no di tulun do Pilistin o koinsanai di soudor diyolo’ do hilo’d Apik, om powonsoyo’ no di tulun dot Israil o diyolo’d kiim do hiri’d somok di tudan do waig do hilo’d Rantai do Yisriil. ² Om pamanau no i limo o raja’ do Pilistin do kisoudor do hatus o tulun dot iso’ o sinompuruan om soribu o tulun dot iso’ o sinompuruan. I Daud no om i tulun dau om moyo-woyo’ do hiri’d tohuri-huri di Raja’ Akis. ³ Om soira’ di nokito di boyoon do soudor do Pilistin i Daud om i tulun dau om ponguhot no iyolo’, ’’Nunu maan diti tulun dot Ibrani do hiti?’’ ka. Om boros ka di Akis do suminimbar, ’’Ilo’ nopo om i Daud, i pagawai daa di Raja’ Saul, i raja’ dot Israil. Nga’ alaid no iyau’d poinsugku’ doho’. Om mantad poddi tadau’d kinorikatan dau om gisom do baino’ om aiso’ i’ o sala’ dau do nokito ku,’’ ka dau. ⁴ Nga’ kotogod nogiddi di Akis i boyoon do soudor do Pilistin. Boros ka diyolo’ dot id dau, ’’Suhuo’ nogi’ iyau’d muli’ do hilo’d bandar di pinatahak nu dau. Nga’ kada’ nogi’ iyau pologoso’d moyo’ dati’ do mongoi sangod. Tu’ a’ i’ oila-ilaan do maso nopo doti’d sumangod om tumongkiad nondo iyau dati’ om iyati’ indo o saapon dau. Tu’ okon toi ko’ iri no daa o ralan dau do momolumbok do ginawo di tuan dau dot i kapamatai do tulun toko’ o ralan dau do momolumbok? ⁵ Okon toi ko’ i Daud iyau, i sindingon di tongoondu’ do tontok di minintari’ iyolo’ di gulu po do poingkaa, ’Boribu-ribu o pisangod do napatai di Saul, nga’ hinapadan noribu o napatai di Daud,’ ka,’’ ka diyolo’. ⁶ Om lohowo’ noddi di Akis i Daud om boro-boros no iyau, ’’Okunon ku i’ dot id toguang do Kinorohingan di poimpasi dot otorodok ko dot id doho’, om orohian oku i’ daa do moyo’ ko doho’ do hiti’d pisangadan. Tu’ mantad poddi nokorikot ko i’ do hiti’d doho’ om a’ ko i’ insan kasala’ dot id doho’. Nga’ a’ ngai’ asanangan diya’ ilo raja’d suwai. ⁷ Iyo nopoddi, om sumonong-sonong nopod muli’ om kada’ pomonsoi do nunu nopo i katagadan ngai’ dilo raja’ do Pilistin,’’ ka dau. ⁸ Om boros ka di Daud do suminimbar, ’’Nunu o kasalaan do winonsoi ku? Tu’ boros kanu om a’ oku i’ insan kasala’ dot id diya’ do mantad di korikot oku i’. Om ondung miagal diri, om nokuro tu’ a’ oku diya’ pologoson do tumanud diya’ do mongoi saap do pisangod nu?’’ ka dau. ⁹ Om boros ka di Akis, ’’Oilaan ku i’ dot otorodok ko do miagal po di moloikat do Kinorohingan, nga’ ilo raja’d suwai ot a’ kaakun do moyo’ ko dahai do mongoi sangod. ¹⁰ Iyo nopoddi, om muli’ nod suab, oi Daud, om koinsanai di tuminongkiad di Saul di minongoi do hiti’d doho’, om sumuab kou nod suab do mamanau dit a’ po koulai o tadau,’’ ka dau. ¹¹ Om pamanau noddi i Daud om i tulun dau dit osuab po di sinuabon, om uli’ nod hilo’d pomogunan do tulun do Pilistin; om iri no tulun do Pilistin om tuminilombus do minamanau do minongoi do hilo’d Yisriil.

¹ Duwo no tadau om korikot no i Daud om i tulun dau do hilo’d Siklag. Nga’ di nopo dit a’ po iyolo’ nokorikot, om noongoi no di tulun dot Amalik kasangod i ponong id salatan do Yohuda om nongoi diyolo’ songodo’ o Siklag. Tinutudan diyolo’ i bandar do Siklag, ² om tinanggayan ngai’ diyolo’ i tongoondu’. Aiso’ i’ o pinatai diyolo’ nga’ tinanggayan ngai’ no ma diyolo’ i tulun do hiri di tuminongkiad iyolo’ di bandar. ³ Tontok di nokorikot i Daud om i tulun ngai’ dau do hilo’d Siklag, om kokito no diyolo’ do notutudan no i bandar om nangatanggayan i sawo om i tangaanak diyolo’. ⁴ Om pingihad tomod noddi i Daud om i tulun dau do gisom dot aiso’ no o posunsudan diyolo’d mihad. ⁵ Om iri duwo sawo di Daud, iyo Ahinuam di Abigail nga’ natanggayan nogi’ di pisangod. ⁶ Om tumongob tomod diri i Daud, tu’ ongotogod ngai’ dau i tulun dau, tu’ nangatagakan no iyolo’ do tangaanak om sawo diyolo’. Om potidumpahon i’ daa’ddi diyolo’ i Daud do watu do pamatai dau. Nga’ pinogirot id TUHAN, i Kinorohingan di Daud, o ginawo dau. ⁷ Om boros kad Daud dot id di Abiatar, it Imam diri, i tanak di Ahimilik, ’’Onuo’d hiiti it ipod,’’ ka. Om ngoyo’ nod Abiatar iri. ⁸ Om uhot no i Daud do TUHAN, ’’Ngoyon ku tuu gusao’ i gampanakau’ddi? Okosupan ku i’ tuu iyolo’?’’ ka dau. Om boros kad TUHAN do suminimbar, ’’Ngoyo’ nopo iyolo’ gusao’. Okosupan nu i’ iyolo’ om koidu’ nu i’ i tulun di nangatanggayan diri,’’ ka. ⁹ - ¹⁰ Om pamanau noddi i Daud do miwoyo’ dit onom nahatus o tulun dau. Om soira’ di nokorikot iyolo’ do hiri’d Bawang do Bisor, om lombus no i Daud do minamanau do miwoyo’ dit apat nahatus o tulun. Nga’ iri nopo duwo nahatus o tulun om minundorong nod hiri, tu’ a’ no iyolo’ kosoborong di Bawang do Bisor tu’ angadalaan no kopio iyolo’d ohuyan. ¹¹ Om kosolowot no i tulun di moyo-woyo’ di Daud dot iso’ o tanak do kusai do bansa’ do Masir do hiri’d talun. Om ngoyo’ no diyolo’ pootodo’ iyau do hiri’d di Daud. Om tolu no tadau di tanak dot a’ nakaakan om a’ nokoinum om paakano’ noddi diyolo’ i tanak diri om poinumo’, ¹² om onuwai diyolo’ do roti di tua’ dot ara do winonsoi om duwo o puru do tua’d anggur di kinoring. Om kaakan poddi iyau om okoris nogiddi kawagu iyau, tu’ tolu no tadau dau dot a’ nakaakan om a’ nokoinum. ¹³ Om ponguhot noddi i Daud dau, ’’Isai o tuan nu? Om honggo o tadon nu?’’ ka dau. Om boros ka di tanak do suminimbar, ’’Iyoho’ nopo om tulun do Masir, om turipon oku do tulun dot Amalik. Niduan oku di tuan ku di tolu no tadau do mantad baino’ tu’ suminakit oku. ¹⁴ Nongoi dahai songodo’ i kinoiyonon di tulun do Kiriti di ponong hilo’d salatan do Yohuda om i kinoiyonon do sinompuruan do sompiiyon di Kalib, om tinutudan nogi’ dahai i bandar do Siklag do gisom do nouu,’’ ka dau. ¹⁵ Om ponguhot no i Daud, ’’Mongoi ko i’ daa potunud dahai do ralan do kumaa dot id kinoiyonon di gampanakau’ddi?’’ ka dau. Om boros ka di tanak do suminimbar, ’’Mongoi oku i’, nga’ mositi’ no do sumumpa’ ko dot id Kinorohingan dot a’ ko mamatai doho’ ko’ popoguli’ po doho’ dot id tuan ku,’’ ka. ¹⁶ Om potunudo’ no dau i Daud dot id kinoiyonon di tulun diri. Om tadau nopoddi nga’ songinsasad nopo i gampanakau do hiri’d kinoiyonon diri. Om maso diyolo’d makan om minum om rumamai dot aarapadan dot ogumu’ o dapu’ do napanakau diyolo’ do mantad id pomogunan do Pilistin om Yohuda. ¹⁷ Tadau noddi kawagu di minnanawau nogi’ om ngoyo’ no di Daud iyolo’ songodo’, om misangod nopoddi iyolo’ do gisom do notuangan. Apat po nahatus o tangaanakwagu di songinsakai’d unta o nokopoggidu’; nga’ iri nopo suwai om nangapatai ngai’ no diyolo’. ¹⁸ Om nokoidu’ ngai’ i’ di Daud o pointikid-tikid do tulun om dapu’ di tinanggayan daa di tulun dot Amalik, om iri nogi’ i duwo sawo dau. ¹⁹ Om aiso’ i o tiso’ do natagak. Naanu kawagu i’ di Daud o koinsanai di sawo om tangaanak do tongokusai om tongoondu’ om koinsanai di dapu’ di tinanggayan di tulun dot Amalik. ²⁰ Om naanu kawagu i’ di Daud o koinsanai di dumba’ om i tayam-tayam diyolo’. Om gayato’ no di tulun di Daud i tayam-tayam diri do hiri’d gulu-gulu di konunu-nunuan di nangaahau diyolo’, mikuwo’d minomoros iyolo’ do poingkaa, ’’Iti nopo om di Daud nod bahagi’!’’ ka. ²¹ Om poguliai noddi di Daud do hiri’d duwo nahatus o tulun di minundorong do hiri’d toning di Bawang do Bisor, tu’ nadalaan iyolo’ do nohuyan. Om rubao’ noddi di duwo nahatus o tulun i Daud om i tulun ngai’ dau di santanud-tanud dau. Om solowot no i Daud diyolo’ do mikuwo’d osonong tomod o podsusuwau dau. ²² Nga’ haro ot id pogialatan di tulun di Daud di tuminanud dau do minongoi sangod dot angaraat om mosol, tu’ boros ka diyolo’, ’’A’ i’ tuminanud dati’ do minongoi sangod iti tulun diti, om a’ toko’ no bohogian iyolo’dti naanu-anu toko’. Ngoyon nopo diyolo’ ilo sawo om tangaanak diyolo’ om poulian no,’’ ka. ²³ Nga’ boros kad Daud do suminimbar, ’’Oi tobpinai-tobpinai ku, kada’ toko’ kopio iyo’ddio’ i nakatahak do TUHAN dot id dati’. Tu’ ginompi’ toko’ i’ dau om nonuan toko’ dau do kamanangan do suminangod di gampanakau! ²⁴ Aiso’ i’ o tiso’ pod sumokodung dino tosorou dokoyu. Iyoon nopo o pamahagi’: i minundorong do minadtamong di konunu-nunuan do nigitan om i minongoi sangod, nga’ mositi’ no dot oirad nopo o bahagi’ dot aanu,’’ ka dau. ²⁵ Om miagal noddi o pinanalasai di Daud do hal diri. Om mantad poddi om tonudon kasai’ no ot oturan diri do hilo’d Israil do gisom do baino’. ²⁶ Soira’ di nokoguli’ i Daud do hilo’d Siklag om pootodo’ no dau o sombohogian di konunu-nunuan do naanu diyolo’ do mantad id pisangod dot id boyoon do tulun do Yohuda, i hilo’d bandar di pininghambaan di tulun dau. Om patanggayai no dau’d boros do poingkaa, ’’Romito’ no dokoyu iti konunu-nunuan do naanu dahai do mantad id pisangod do TUHAN do maan dahai’d popuhawangon dokoyu,’’ ka. ²⁷ - ³¹ Iri nopo bandar do nonuan diyolo’ddi nga’ hilo’d: Baitol, Rama i ponong id salatan do Yohuda, Yatir, Aroir, Sipmot, Istimoa, Rakal, om i ngai’ bandar do tulun do Yiramiil, om i bandar do tulun do Kini, Horma, Borasan, Atak, Hibron, om koinsanai di bandar di nopinghambaan di Daud om i tulun dau nga’ nonuan ngai’ nopo diyolo’ do nipuhawang.

¹ Daamot nopoddi, om suminangod o tulun do Pilistin do tulun dot Israil do hilo’d Nuluhon do Gilbua. Om ogumu’ tomod diri o tulun dot Israil do napatai. Om iri no noolu-olu’ diyolo’ do kohompit i Raja’ Saul om i tangaanak dau, om minogidu’ ngai’. ² Nga’ ginusa’ i’ iyolo’ di tulun do Pilistin om patayo’ no diyolo’ i tolu tanak di Saul do tongokusai; i Yonatan, i Abinadab om i Malkisua. ³ Om mitotos tomod do misangod o hiri’d posorili’ di Saul gisom dot iyau nga’ ogumu’ tomod diri o notogu’ om napana’ di pisangod, om nouruan tomod iyau do nosuhat. ⁴ Om boros ka dau dot id tanakwagu di mongingigit di rapo-rapo dau, ’’Kodongo’ ino gayang nu om patayo’ oku, om okon pondo ko’ iti tulun do Pilistin di kapir o kapamatai doho’ om kopinghingi-hingi doho’,’’ ka dau. Nga’ a’ i’ kasaap i mongingigit do rapo-rapo dau do momonsoi di pinonuhuan dau’ddi. Om kodongo’ nopoddi di Saul i gayang dau om tobok no iyau. ⁵ Om soira’ di nokito di mongingigit do rapo-rapo di Saul do napatai no i Saul om tobok no iyau kadauu om kapatai noddi do nakaandad di Saul. ⁶ Om miagal noddi o kinapatai-patayo’ di Saul, om i tolu o tanak dau do tongokusai om i mongingigit do rapo-rapo dau, om koinsanai di tulun di moyo-woyo’ kasai’ di Saul do tontok do tadau’ddi. ⁷ Om tontok di nokorongou i tulun dot Israil di hiri’d sampaping di Rantai do Yisriil om i ponong id koulayon do mantad id Bawang do Yordan do nokopoggidu’ i soudor dot Israil, om napatai i Saul om i tangaanak dau’d tongokusai, om iyolo’ nogiddi nga’ tuminongkiad di bandar diyolo’ om minogidu’. Om ngoyo’ noddi di tulun do Pilistin solodo’ i piro-piro o bandar diri. ⁸ Tadau noddi kawagu, di natalib i pinisangadan om ngoyo’ no di tulun do Pilistin pingonuo’ i konunu-nunuan di songintonggoi di soudor dot Israil di nangapatai. Om kabantalai no diyolo’ i rata’ di Saul om i tolu tanak dau do hilo’d Nuluhon do Gilbua. ⁹ Om iduwo’ no diyolo’ i tulu di Saul om oluso’ no ngai’ i rapo-rapo dau, om ponuhu’ nogiddi do tulun do popotongkop do habar dot osonong diri dot id tingolig om id koinsanai’d tulun diyolo’ om id pointongkop do pomogunan do Pilistin. ¹⁰ Om poiliho’ no diyolo’ i rapo-rapo’d Saul do hiri’d walai di tingolig dot Astorit, om palantako’ no diyolo’ do hiri’d tolig di bandar do Bait-San i rata’ di Saul. ¹¹ Om soira’ di nokorongou i tulun do hilo’d Yabis, i hilo’d Giliad, di winonsoi do tulun do Pilistin dot id di Saul, ¹² om tuongo’ nopo di gunsiou diyolo’ do minamanau do minongoi’d hilo’d Bait-San. Om polintuhuno’ no diyolo’ i rata’ di Saul om i rata’ di tangaanak dau do mantad id tolig diri om igitai no kawagu diyolo’ do hilo’d Yabis. ¹³ Om tutudai no diyolo’ i rata’ do hilo’ om lobongo’ no i tulang do hiri’d sahau di kayu do tamariska do hiri’d bandar diri. Om puasa noddi iyolo’ do solinaid do turu’ o tadau.