1 PITRUS

1 PITRUS

¹ - ² Oi tobpinai-tobpinai, i tulun do nopili’ do Kinorohingan, i nokotompias dot id pointongkop do watas do Pontus, om Galatia, om Kapadokia, om Asia om Bitinia. Mogondos oku no, iyoho’ i Pitrus, i rasul di Yesus Kristus, dot onuan kou do Kinorohingan do barakat om kosimbayanan do ginawo dit a’ ogina-gina’ kagayo. Nopili’ kou do siniliu’d tulun di songonuon do Kinorohingan do miontok di natantu’ mantad do wonsoyon do Kinorohingan, i Tapa’. Om nosiliu kou no di Rusod do Kinorohingan do tulun dit olidang, i pinotobilang do maan do dong Kinorohingan do tulun, om mumboyo’ kou i’ di Yesus Kristus om olidangan kou di raha’ dau. ³ Kainou no mongunsikou do Kinorohingan, i Tapa’ do Tuhan toko’, i Yesus Kristus! Nosianan tomod iyau dati’, om iri no o kinapanahakan dau dati’ do koposion di wagu, tu’ pinasi i’ kawagu dau i Yesus Kristus do mantad id kapatayon. Om iri no o manahak dati’ do soro-sorohon di pointantu’ kopio. ⁴ Mogondos toko’ do kaanu di barakat di pinosodia’ do Kinorohingan do patahakon di tulun di songonuon dau, iri no i barakat di pinoopi’ dau do hilo’d surga, it a’ rumaag, om a’ apasa’ om a’ tumalup. ⁵ Aanu ngai’ no dokoyu iri, tu’ otumbayaan kou i’ do Kinorohingan. Om gompion kou di kuasa’ do Kinorohingan om kaanu kou i’ di koposion di nokosodia’ no do pointalangon do kopupuson diti pomogunan. ⁶ Iyo nopoddi, om kongotood kou no, do mulong piya do tumongob kou do daamot tu’ oontok kou i’ do piro-piro o pogumbalan di mogisuayan. ⁷ Kogunaan nopoddi nga’ popointalang kopio ondung iso-iso’ kopio o ginawo dokoyu dot otumbayaan do Tuhan ko’ amu’. Iri piya i tamas di rumaag nga’ sompipion i’ do tapui. Om kotumbayaan nopo dokoyu om agayo po o guna’ ko’ mantad do tamas. Om kaa pogiddi dot apatut i’ dot umbalan om kointalang i’ o kogiroto’. Om arayou kou indo om pusohon om poinggoyoon do tontok di tadau do korikatan kawagu di Yesus Kristus. ⁸ Osianan kou i’ dau do mulong piya dot a’ kou nokokito mantad dau di gulu. Om otumbayaan kou i’ dau do mulong piya dot a’ kou kokito dau do dinondo. Om iri no o kataadan dokoyu, om haro o kataadan dokoyu dit agayo kopio om it a’ no milo’d susuyon. ⁹ Tu’ norikot no i pokiririkatan kopio di kotumbayaan dokoyu, iri no i koposion do rusod dokoyu. ¹⁰ Iti no i koposion di sinorisid kopio om i nihum kopio di nabi, o komoyon, om pinosunud mantad diyolo’ o pasal di barakat di pinatahak do Kinorohingan dot id dokoyu. ¹¹ Om sinorisid diyolo’ ondung poingkuro om soira’ iri dot osiliu, i komoyon di Rusod do Kristus, it id suang do ginawo diyolo’. Om tontok nopoddi nga’ pinoboros mantad di Rusod diri dot id diyolo’ o pasal di koinggoritan dit a’ milo dot a’ di Kristus opurimanan om pasal di kagayaan dau do katalib iri. ¹² Om sinunudan do Kinorohingan i nabi diri dot iri nopo i wonsoyon diyolo’ om okon i’ ko’ maan do koinsanangan diyolo’ suwai ko’ maan do koinsanangan dokoyu; iri no it ongorongou dokoyu dot atarang tomod do posusuyon di piro-piro o gomponusui di Habar dot Osonong diri do pasal di Yesus Kristus. Om pinolombus diyolo’ iri dot id dokoyu do mikuwo’d kuasa’ do Rusod do Kinorohingan, i pinolintuhun dau do mantad hilo’d surga. Om iri piya moloikat nga’ orohian i’ do koilo di habar di posusuyon diyolo’ddi. ¹³ Iyo nopoddi, om sumodia’ kou no kopio. Antaan-taan no dokoyu om soro-sorohon no kopio i barakat di patahakon dot id dokoyu do korikot kawagu i Yesus Kristus. ¹⁴ Mumboyo’ kou nod Kinorohingan, om kada’ kou nondo tanud di kowoyo-woyoon do koposi-posion dokoyu di gulu po, dit a’ kou po nokotutun do Kinorohingan. ¹⁵ Suwai ko’ kumolidang kou no do nunu nopo i wonsoyon dokoyu, do miagal do Kinorohingan di minomolohou dokoyu tu’ olidang. ¹⁶ Nokotulis no dot id suang do Buuk do Kinorohingan o poingkaa, ’’Kumolidang kou no, tu’ olidang oku i’,’’ ka. ¹⁷ Roitan dokoyu do Tapa’ o Kinorohingan do tontok do sumambayang kou dot id dau. Om iyau no i Kinorohingan di momutus do tulun do miontok di nowonsoi do pointikid-tikid do tulun, om a’ i’ iyau momogibang-gibang do momutus. Iyo nopoddi, om solinaid nopo dokoyu do hiti’d pomogunan, om poinggoyoon no dokoyu o Kinorohingan dot id suang do koposi-posion dokoyu. ¹⁸ Om koilo kou i’ di pinabayar do pinopoidu’ dokoyu do mantad id koposi-posion dit aiso’ o guna’, i notungkusan dokoyu do mantad id taki-aki dokoyu. Om iri nopo pinambayar diri om okon i’ ko’ i milo’d rumaag do miagal do pirok ko’ tamas, ¹⁹ suwai ko’ it agayo o gatang; iri no i tinan di Kristus, i nosiliu do dumba’ dit aiso’ o bohiton om aiso’ o kabara-barasan do pinatahak dot id Kinorohingan do numaan do porsombahan di sinumbali’. ²⁰ Om nopili’ nod Kinorohingan i Kristus do tontok dit a’ po nowonsoi iti pomogunan. Om tontok no di miririkot o kopupuson do pomogunan, do ruminikot iyau do hiti’d pomogunan, om apasi kou indo. ²¹ Om id dau no o nokotumbayaan dokoyu do Kinorohingan, i minamasi kawagu dau do mantad id kapatayon om i pinopoinggayo dau. Om Kinorohingan no o kotumbayaan dokoyu om Kinorohingan o pagandasan dokoyu. ²² Om iri no i panananud dokoyu di ponudukan do mantad id Kinorohingan o kinopomolidangan dokoyu do tinan dokoyu om osianan kou do tulun dit iso-iso’ o kinotumbayaan, do mikuwo’d iso-iso’ kopio o ginawo. ²³ Tu’ id suang no di boros do Kinorohingan di poimpasi om i poingompus diri, do siniliu kou do tulun di wagu, it okon i’ ko’ pinogkosusu do tulun, suwai ko’ mantad id Tapa’ di hino kasai’ do gisom do poingompus. ²⁴ Om nokotulis no dot id suang do Buuk do Kinorohingan o poingkaa, ’’Oinsanan nopo o tulun do miagal do sakot, om i kagayaan dau nga’ iyo no di tusak do sakot. Oriou no i sakot, om tumatak i tusak, ²⁵ nga’ iri nopo boros do Tuhan om hino kasai’ i’ do gisom do poingompus,’’ ka. Iri nopo boros diri om iri no i Habar dot Osonong di pinosusui dot id dokoyu.

¹ Iyo nopoddi, om iyadaai no dokoyu o koinsanai dit angaraat, om kada’ kou nondo pongudut, om kada’ kou pinsorupai-rupai. Kada’ kou osol, om kada’ kou pongindaraat do tulun do suwai. ² Mositi’ no do miyo kou do tanak di wagu po kosusu, tu’ tuuhan kasai’ di susu do don rusod dit aiso’ o rolot. Om iri no o ralan dokoyu do sumuni om apasi kou indo. ³ Haro i’ o nokotulis dot id suang do Buuk do Kinorohingan do poingkaa, ’’Nokopuriman kou no kopio iyokoyu do kosonongo’d Tuhan,’’ ka. ⁴ Iyo nopoddi, om rikot kou no dot id Tuhan. Iyau no o miagal do watu di poimpasi, i watu di pinataam do tulun tu’ sorohon daa diyolo’ dot aiso’ o guna’; nga’ iri nogiddi i pinili’ do Kinorohingan do watu dit agayo o guna’. ⁵ Iyokoyu no o miagal do watu dit ogumu’ di songimpasi. Iyo nopoddi, om mositi’ no dot orohian kou do pakayon do pomonsoi di walai’d Kinorohingan di don rusod. Om iyo noddi o ralan dokoyu dot osiliu’d imam di dong Kinorohingan no kopio do koposi-posion, om i papatahak dot id Kinorohingan do porsombahan di sinumbali’ di don rusod, i kohubayaan do Kinorohingan, tu’ i Yesus Kristus o popomilo dokoyu do papatahak diri. ⁶ Tu’ nokotulis i’ dot id suang do Buuk do Kinorohingan o poingkaa, ’’Nopili’ ku no o tiso’ o watu dit agayo o gatang, i pinoiliu ku do hilo’d Sion do maan do watu di pomogirot kopio; om iri nopondo tulun dit otumbayaan dau om a’ no oiman-iman,’’ ka. ⁷ Iri nopo watu’ddi om agayo i’ kopio o guna’ dot id dokoyu it otumbayaan. Nga’ id tulun nopondo dit a’ otumbayaan, om abayaan no kopio it ayat dot id suang do Buuk do Kinorohingan do poingkaa, ’’Iri nopo watu dit a’ pinakai di piro-piro tukang mamamaal diri, om nosiliu nogiddi kopio do watu dit agayo o guna’,’’ ka. ⁸ Om haro po o poingkaa, ’’Iri no i watu di kosoduwon do tulun, i watu di kotohubon diyolo’,’’ ka. Om kasadu pogi’ iyolo’ nga’ a’ i’ iyolo’ otumbayaan di boros do Kinorohingan. Om iyo noddi o natantu’ do Kinorohingan dot osiliu dot id diyolo’. ⁹ Nga’ iyokoyu nopo om bansa’ i’ di nopili’, om imam di mogobi-obi’ do raja’, om bansa’ dit olidang, i nokotobilang do maan do dong Kinorohingan, iyokoyu i tulun do songonuon do Kinorohingan. Pinili’ kou do Kinorohingan om linohou kou dau do suminoliwan do mantad id totuong, om sumuang indo dot id suang do tanawau dau dit anawau kopio, om kopinsusui indo dokoyu o pasal di nongowonsoi dau di koimayaan kopio. ¹⁰ Tontok nopo di gulu po, om okon kou i’ ko’ tulun di songonuon do Kinorohingan, nga’ baino’ noddi om tulun kou no di songonuon do Kinorohingan. Di nopo di gulu po om a’ kou i’ kosianan do Kinorohingan, nga’ baino’ noddi om nakaramit kou no di kosianan dau. ¹¹ Oi tobpinai-tobpinai di kosianan ku! Iyokoyu nopo om sompogunan i’ om mombo-hombo do hiti’d pomogunan. Om iri noddi o kopogoduhan kopio ku dokoyu do tumanud di korohian dokoyu di don tulun, it a’ kasai’ nopo kopisokodung do ginawo dokoyu. ¹² Om mositi’ no do posonongon kopio dokoyu o kowoyo-woyoon dokoyu dot id rolot do tulun dit a’ kotutun do Tuhan, gisom do tondoson kou piya daa’ndo diyolo’ do tulun dit araat nga’ a’ i’ milo dot a’ diyolo’ okunon dot osonong i wonsoyon dokoyu, om mamarayou indo iyolo’d Kinorohingan do tontok di tadau do korikatan dau. ¹³ Mositi’ no do minsiriba’ kou dot id pointikid-tikid do tulun di momorinta’, do Tuhan o koinsiribaan: dot id Kaisar tuu, i nosiliu’d pomorinta’ dit agayo, ¹⁴ ko’ id gobunor po di nopili’ di Kaisar do momohukum di tulun di momonsoi’d araat om momusou di tulun di momonsoi’d osonong. ¹⁵ Tu’ korohian id Kinorohingan dot i wowonsoyon dokoyu dit osonong o ponompon dokoyu’d kabang do tulun di mimboros do dongkababasug. ¹⁶ Mositi’ no dot iyo di tulun dit okon ko’ turipon o kowoyo-woyoon do koposi-posion dokoyu, nga’ kada’ dokoyu pakayo’ i kosimbayanan dokoyu’ddi do maan do ponompon do karaaton, suwai ko’ mositi’ no dot iyo do dongsusuhuon do Kinorohingan o kowoyo-woyoon dokoyu. ¹⁷ Pusohon no o koinsanai’d tulun, om kosianai no di tulun di sompi’ ko’ tulun do Kristian. Koronok kou no do Kinorohingan, om pusohon no dokoyu i Kaisar. ¹⁸ Oi tobpinai-tobpinai di nosiliu do susuhuon, insiriba’ kou no di tuan dokoyu do mikuwo’d momusou kopio diyolo’; om okon nopo ko’ id tuan dit osonong koulun om it alamaya’ nga’ id tuan nogi’ dit orongit. ¹⁹ Om barakatan kou indo do Kinorohingan, ondung koilo kou no do korohian do Kinorohingan, om alanut o ginawo dot a’ piya otulid o wonsoyon dot id dokoyu. ²⁰ Tu’ nunu toi kopio o koimayaan dot alanut piya o ginawo dokoyu do mamabo’d hukuman dit apatut dokoyu’d boboon dot i kisala’ kou o kinopomohukuman? Nga’ ondung alanut o ginawo dokoyu do mamabo’d koinggoritan di koontok dokoyu dot it otopot o winonsoi do koponginggoritan, om barakatan kou i’ do Kinorohingan. ²¹ Om iri no o kinapamalahawan do Kinorohingan dokoyu. Tu’ noinggorit no i Kristus dot iyokoyu o kinoinggoritan, om iri no i winonsoi dau ot apatut dokoyu’d omitanan, om tumanud kou i’ di winonsoi dau. ²² A’ i’ iyau insan pomonsoi’d dusa, om aiso’ o tiso’ pod tulun do nokorongou dau do minongudut. ²³ Tontok di pinimpapalan iyau, om a’ i’ iyau suminuli’ do minomopol. Om tontok di ninggorit iyau nga’ a’ i’ iyau minimboros do sumuli’; suwai ko’ tahak nopo iyau do Kinorohingan, i Gompomutus dit otulid. ²⁴ I Kristus no o minamabo do koinsanai’d dusa toko’ do hiri’d kayu salib, om koidu’ toko’ i’ do mantad id pomorintaan do dusa, om miontok indo di korohian do Kinorohingan o kowoyo-woyoon toko’. Om iri no i suhat di Kristus o kolingos dokoyu. ²⁵ Tontok nopo di gulu po om iyo kou poddi dumba’ di napalid, nga’ baino’ noddi om nokoguli’ kou no do tumanud di Madtatamong om i Gompomogompi’ do ginawo dokoyu.

¹ Om iyo kou nogiddi iyokoyu, i tongoondu’ di kisawo, tu’ mositi’ no do minsiriba’ dot id sawo. Om ondung haro ot id pogialatan di sawo dokoyu dot a’ otumbayaan di habar do mantad id Kinorohingan, om milo indo i kowoyo-woyoon dokoyu do mamagayat diyolo’ dot otumbayaan. Om a’ kou i’ minog do popoboros do nunu-nunu dot id diyolo’, ² tu’ okito indo diyolo’ i kowoyo-woyoon dokoyu dit olidang om it otorodok dot id kinotumbayaan dokoyu. ³ Kada’ dokoyu pologoso’ dot id soliwan noo o kolulumis dokoyu, do miagal do momolumis do tobuk ko’ manampakai di poingillumis do tinan, ko’ manampakai do pakayan dit angagayo o gatang. ⁴ Suwai ko’ pologoso’ no do mantad id ginawo o tadon di kolumiso’ dit a’ tumanus, iri no i kowoyo-woyoon dit alamaya’ om it osinondot, it agayo kopio o gatang dot id pagantangan do Kinorohingan. ⁵ Om iyo noddi o kowoyo-woyoon di tongoondu’ dit otorodok dot id tugama’ om i mogondos do Kinorohingan, do momolumis do tinan diyolo’ di gulu po, tu’ mininsiriba’ iyolo’ dot id sawo diyolo’. ⁶ Om i Sara nga’ iyo iddi. Minihuboyo-boyo’ i’ iyau di Abraham om rinoitan dau i Abraham do tuan dau. Om iyokoyu do dinondo nga’ osiliu no do tangaanak di Sara, ondung momonsoi kou no dit ongosonong om a’ kou ooris do nunu nopo. ⁷ Om iyokoyu nogi’, i tongokusai dit ongkisawo nga’ mositi’ no do kosuhut kopio kou do kowoyo-woyoon di sawo dokoyu dot id pisompiiyanan dokoyu, om osorou kasai’ dot iyolo’ nopo om a’ i’ koiyo dokoyu kokoris. Suahon no dokoyu iyolo’ tu’ iyolo’ nga’ iyo i’ dokoyu, do karamit di nipuhawang do koposion dit otopot kopio do mantad id Kinorohingan. Wonsoyon no dokoyu o miagal diti, om aiso’ i’ o kaantob do sambayang dokoyu. ⁸ Tonsi nopo do toinsanan diti om: mositi’ no dot iso-iso’ o ginawo dokoyu om iso-iso’ o pomusarahan. Mositi’ no do mogiinsian-sian kou do miagal do tulun di mogiobpinai. Om mogikosonong-sonong kou no om mogiinsiriba-riba’ do ginawo. ⁹ Kada’ dokoyu suliai do karaaton it araat, om kada’ suliai do popol o popol; suwai ko’ ponuli’ nopo om pokionuan o tulun diri do barakat do mantad id Kinorohingan. Tu’ kinapamalahawan nopo do Kinorohingan dokoyu om papaanu dokoyu do barakat di mantad id dau. ¹⁰ Nokotulis no dot id suang do Buuk do Kinorohingan o poingkaa, ’’Iri nopo tulun dit orohian do kopuriman do kosonongo’ do koposion om orohian do kopuriman do piro-piro o tadau dit osimbayan, om mositi’ no do porintaon dau o kabang dau om a’ i’ kopimboros dit araat om a’ kopoboros dit a’ otopot. ¹¹ Mositi’ no do minsodu’ iyau dit araat om momonsoi dit osonong; om mositi’ no do tumotos kopio iyau do monokiulud. ¹² Tu’ podulon kasai’ id Tuhan i tulun di tumanud do korohian dau, om mokinongou kasai’ o Tuhan do sambayang diyolo’; nga’ saapon id Tuhan i tulun di momonsoi’d araat,’’ ka. ¹³ Isai po toi ot orohian do momonsoi’d araat dot id dokoyu, ondung it osonong o korohian dokoyu’d momonsoi? ¹⁴ Nga’ mulong piya dot oinggorit kou dot i momonsoi’d osonong o koponginggoritan nga’ ountung kou i’! Kada’ kou kooris dot isai nopo, om kada’ kou katangkabo. ¹⁵ Nga’ id suang nopod ginawo dokoyu, om patahakon no dot id Kristus o karayahan dit apatut do patahakon dot id dau tu’ Tuhan. Om mositi’ no do posodia’ kasai’ kou do sumimbar do pointikid-tikid do tulun di muhot do pasal di soro-sorohon dokoyu dot aanu dokoyu. ¹⁶ Nga’ wonsoyon no dokoyu iri do mikuwo’d alamaya’ o kowoyo-woyoon om osuwau. Om mositi’ no dot osonong o kopurimanan do ginawo dokoyu, tu’ ondung indaraaton kou dot it osonong o kowoyo-woyoon dokoyu, om i tumatanud kou di Kristus o kopongindaraatan, om ointingayaman indo i tulun di mongindaraat diri. ¹⁷ Om osonong nogi’ dot oinggorit dot i momonsoi’d osonong o koponginggoritan — ondung iyo’ddi o korohian do Kinorohingan — ko’ mantad dot oinggorit dot i nokowonsoi’d araat o koponginggoritan. ¹⁸ Tu’ Kristus piya nga’ insan noo kapatai, om diri noo do napatai do gisom do poingompus, dot i dusa’d tulun o nakapatayan — iyau nopo om aiso’ i’ o sala’, nga’ minatai iyau do suminowoli do tulun di kisala’. Om winonsoi pogi’ do Kristus o miagal diri nga’ poporikot kawagu iyau dokoyu dot id Kinorohingan. Om pinatai o tinan dau, nga’ pinasi i’ kawagu dot id suang do kowoyo-woyoo’ di don rusod. ¹⁹ Om id suang nod kowoyo-woyoo’ dau di don rusod do minongoi iyau popinsusui di habar do mantad id Kinorohingan dot id rusod di nokogiil: ²⁰ iri no i rusod do tulun dit a’ minumboyo’ do Kinorohingan do tontok di poimpasi po i Nuu. Tontok nopoddi om alanut i’ o ginawo do Kinorohingan do minandad do solinai’d di Nuu do minomonsoi di kapal dau. Om iri no i tulun di hiri’d kapal — do walu’ no o tulun — o napasi do mantad id sakob dot agayo’ddi. ²¹ Om iri nopo i nosiliu’ddi om poiyaan di botisan, i mamasi dokoyu do dinondo. Iti nopo botisan diti om okon i’ ko’ i wonsoyon di natantu’ mantad do pomolihung do tinan do mantad id koinsanai di sosomu’, suwai ko’ ponokobatos nu i’ dot id Kinorohingan do mikuwo’d kopurimanan do ginawo dit osonong. Om kapasi pogi’ dokoyu i botisan nga’ napasi no kawagu i Yesus Kristus do mantad id kapatayon, ²² om nokoinsawat iyau do hilo’d surga. Om baino’ nopoddi om kikuasa’ no iyau do poinsugku’ do Kinorohingan om momorinta’ iyau do koinsanai’d moloikat, om koinsanai’d pomorinta’ om koinsanai dit ongkikuasa’.

¹ Iyokoyu nga’ apatut nogi’ do popokoris do tinan dot i pomusorou do miagal di dong Kristus o popokoris, tu’ noinggorit no o tinan do Kristus. Iri nopo tulun dit oinggorit o tinan, om a’ no kowonsoi’d dusa. ² Iyo nopoddi, om mantad pondod baino’, om mositi’ no do tumanud kou do korohian do Kinorohingan dot id suang do koposi-posion dokoyu do hiti’d pomogunan, om a’ nondo tumanud di korohian do tulun. ³ Tontok nopo di gulu po, om alaid kou no kopio do miningwonsoi do miagal di korohian di tulun dit a’ kotutun do Tuhan. A’ i’ kopio osonong o kowoyo-woyoon dokoyu di gulu po. Tu’ tuminanud kou do korohian do tinan dokoyu, om minagauk kou, om adalaan kou do rumamai dit a’ osonong o karamayan, om moginum kou, om tumuku’ kou dot id tingolig di kososomu’ tomod o kowoyo-woyoo’ do tumuku’. ⁴ Om baino’ nopoddi om osuayan diri i tulun dit a’ kotutun do Tuhan do kokito dokoyu dot a’ kou moyo’ di kowoyo-woyoon diyolo’ dit a’ nopo otingkod- tingkod do mingwonsoi’d dusa. Om iri no o kopongindaraatan diyolo’ dokoyu. ⁵ Nga’ tumimbaba’ indo iyolo’ do Kinorohingan do koimbagu, do poposusui do koinsanai di nongowonsoi diyolo’ dot id toguang do Kinorohingan, i nokosodia’ no do momutus do tulun di poimpasi om i nangapatai no. ⁶ Om iri no o nokoposusuyan di Habar dot Osonong dot id tulun piya di nangapatai. Om kinoposusuyan nopo nga’ mulong piya do norotuan no iyolo’ do hukuman di koubasan do porotuon dot id tulun nga’ apasi indo o rusod diyolo’ do miagal do Kinorohingan tu’ poimpasi. Iri nopo tulun diri om apatut i’ do hukuman tu’ i winonsoi diyolo’ o kinopomohukuman do solinaid po diyolo’ do poimpasi do hiti’d pomogunan diti, nga’ orohian i’ o Kinorohingan do manahak diyolo’ do maso do rumamit di koposion di poingompus. ⁷ Oruhai noddi dot orikot o kopupuson do koinsanai’d nunu nopo. Iyo nopoddi, om mositi’ no do porintaon dokoyu o tinan dokoyu om mumbangan-bangan, om milo kou i’ do sumambayang. ⁸ Om agayo nopo kopio do wonsoyon dokoyu nga’ mositi’ no do mogiinsian-sian kou om kosodia’ kou do mogiampun-ampun. ⁹ Mogisalakoi-lakoi kou no dot id walai dokoyu do mikuwo’d a’ mimboros dot araatan. ¹⁰ Nakaanu ngai’ kou no do nipuhawang di mogisuayan do mantad id Kinorohingan. Iyo nopoddi, om sumiliu nopod tulun dit osonong o pongilo-ilo di nipuhawang do mantad id Kinorohingan diri, om mositi’ no do pakayon dokoyu i nipuhawang diri do maan do koinsanangan do koinsanai’d tulun. ¹¹ Iri nopo tulun di popolombus do boros, om mositi’ no do popolombus di boros di mantad id Kinorohingan; om iri tulun di mogobi-obi’ do tulun do suwai nga’ mositi’ no do mogobi-obi’ do mikuwo’d kokorisan do mantad id Kinorohingan. Om koinggayo indo o Kinorohingan dot i Yesus Kristus o popoinggayo, dot id suang do nunu nopo o wonsoyon. Iyau no i kikuasa’ om it apatut do poinggoyoon do gisom do poingompus. Amin. ¹² Oi tobpinai-tobpinai di kosianan ku! Oinggorit tomod kou do dinondo poo tu’ maso i’ dokoyu do toinuon. Nga’ kada’ kou kosuayai do sorohon piya dokoyu do haro i suwai kopio ko’ mantad di koubasanan do koontok dokoyu. ¹³ Suwai ko’ kotood kou nogi’ tu’ kotonggoi kou i’ do Kristus dot oinggorit. Om pointalangon nopondo i kagayaan do Kristus do koimbagu, om otood kou indo iyokoyu. ¹⁴ Ountung kou i’ dot indaraaton kou piya dot i tumatanud kou do Kristus o kopongindaraatan. Tu’ komoyon nopoddi nga’ id suang dokoyu i Rusod di kikagayaan, iri no i Rusod do Kinorohingan. ¹⁵ Kada’ nogi’ kopio’d haro o tongoiso’ dokoyu dot oinggorit do koponginggoritan nopo om i minamatai do tulun, ko’ minanakau, ko’ i kararaat, ko’ i minongoi iyau hompit do hal do tulun do suwai, o koponginggoritan. ¹⁶ Nga’ ondung oinggorit kou dot i tulun kou’d Kristian o koponginggoritan om kada’ kou kointingayamai do hal diri. Nga’ mongunsikou nogi’ dot id Kinorohingan, tu’ poposusui kou i’ do ngaran do Kristus. ¹⁷ Norikot noddi i maso do kopomutusan do Kinorohingan diti pomogunan. Om iri no i tulun do songonuon do Kinorohingan o poguluonon do momutus. Om ondung iyati’ o poguluonon do Kinorohingan do momutus, om okuro-kuro nogindo ot osiliu dot id tulun dit a’ otumbayaan di Habar dot Osonong do mantad id Kinorohingan diri? ¹⁸ Nokotulis no dot id suang do Buuk do Kinorohingan o poingkaa, ’’Ondung apagon no do mamasi i tulun dit ongosonong, om okuro-kuro nogindo i tulun dit a’ kotutun do Tuhan!’’ ka. ¹⁹ Iyo nopoddi, om ondung haro o tulun dit oinggorit tu’ korohian i’ do Kinorohingan dot osiliu o miagal diri, om mositi’ no dot osonong o kowoyo-woyoon diyolo’, om tumahak kopio dot id Minomonsoi diyolo’, i mamayaan kasai’ di batos dau.

¹ Pokionuon ku no kopio i piro-piro boyoon do sidang dokoyu do mokinongou do boros ku. Om iyoho’ nga’ boyoon nogi’ do sidang. Om nokokito kopio oku di kinoinggoritan di Kristus, om kohompit oku indo dot id kagayaan dau di pointalangon do koimbagu. Om pokionuon ku no kopio dokoyu ² do gompion dokoyu i dumba’ di nakatahak do Kinorohingan dot id dokoyu. Om gompion no dokoyu iyolo’ do mikuwo’d osonong o ginawo do miagal di korohian do Kinorohingan, om okon i’ ko’ awagat o ginawo do momogompi’. Om kada’ kou pomonsoi di karaja’ dokoyu do mokimaanu-anu no do kountungan suwai ko’ wonsoyon no dokoyu i karaja’ dokoyu do mikuwo’d iso-iso’ kopio o ginawo dot orohian do kumaraja’. ³ Kada’ kou iyo do pomorinta’ di tumanud do dau’d korohian do momorinta’ di tulun do pinaharapan dokoyu, suwai ko’ siliu kou no dot omitanan diyolo’ dit osonong. ⁴ Om korikot nopondo i Boyoon do Gompomogompi’ diri, om kaanu kou nondo di tupi’ do don raja’ dit olumis kopio, om it a’ tumalup o kolumiso’. ⁵ Om iyo kou nogiddi iyokoyu, i tongomulok po. Insiriba’ kou no dot id tulun dit ongotuo. Om mositi’ no do minsiriba’ ngai’ o ginawo dokoyu om mogitulung-tulung do mikuwo’d osiriba’ o ginawo. Tu’ nokotulis no dot id suang do Buuk do Kinorohingan o poingkaa, ’’Saapon i’ do Kinorohingan i tulun dit asawat o ginawo, nga’ insianan i’ dau i tulun dit osiriba’ o ginawo,’’ ka. ⁶ Iyo nopoddi, om insiriba’ kou no dot id longon do Kinorohingan di kikuasa’, om poinggoyoon kou indo dau dot orikot i maso do kopoinggayaan. ⁷ Patahako’ ngai’ no dokoyu dot id Kinorohingan o koinsanai’d katangkabaan dokoyu tu’ mamadul i’ iyau dokoyu. ⁸ Mumbangan-bangan kou no om sumodia’ kasai’! Tu’ Rogon no o pisangod dokoyu. Om iyo po iyau di singa do mimpanau do hilo’ om hiti do marom-garom do mogihum do kanon dau. ⁹ Saapon no dokoyu iyau do mikuwo’d ogirot o kotumbayaan, tu’ oilaan i’ dokoyu dot i tulun do Kristian do suwai do pointongkop diti pomogunan nga’ oinggorit i’ do miagal dokoyu. ¹⁰ Nga’ oinggorit kou pondo dot ongoruhai, om silihon kou nondo do Kinorohingan do tulun dit aiso’ o kabara-barasan. Om pogiroton kou indo dau om pokorison kou om poponggoron kou. Tu’ iyau no o Kinorohingan dit obinsianan kopio, i minomolohou dokoyu do tumonggoi dau do momuriman do kosonongo’ di kagayaan dau di poingompus do Kristus o popopurimon. ¹¹ Iyau no i kikuasa’ do gisom do poingompus! Amin. ¹² Iti nopo surat ku dot oniiba’ diti om tulison ku dot id dokoyu do nuhupan oku di Silas do minonulis. I Silas no o ponokotobpinai kopio ku do Kristian dit otorodok. Orohian oku do mongodsuur dokoyu om popoilo kopio dokoyu dot iti nopo tulison ku’dti om boros i’ dit otopot do pasal do kosianan do Kinorohingan. Om igitan no kopio dokoyu i kosianan diri. ¹³ Om i tobpinai dokoyu dit id sidang do hilo’d Babilon, i nopili’ do Kinorohingan, nga’ poporikot i’ do tabi’ dot id dokoyu; om i Markus, i tanak ku di kosianan kopio ku, nga’ poporikot nogi’ do tabi’ dot id dokoyu. ¹⁴ Pogitatabi’ kou no do mikuwo’d poimponu’ do kosianan do miagal do tulun do Kristian di mogiobpinai. Pokionuon ku no o Tuhan do manahak ngai’ dokoyu do kosimbayanan do ginawo, iyokoyu i nosiliu do tulun di songonuon do Kristus.