1 RAJA’

1 RAJA’

¹ Om molohing noddi kopio i Raja’ Daud. Om mulong po do kumutan iyau do kumut dit angakapal nga’ osogitan kasai’ i’ iyau. ² Om boros kaddi di pagawai dau, ’’Oi Tuan Raja’, osonong nogi’ do mogihum iyahai dot iso’ o sumandak do sumugku’ diya’ om momogompi’ diya’. Om modop indo iyau do hino’d toning nu om alasu’ i’ ot opurimanan do Tuan Raja’,’’ ka diyolo’. ³ - ⁴ Om tongkopo’ noddi o pomogunan dot Israil do mogihum do sumandak dit olumis. Om kokito noddi diyolo’ o sumandak dit olumis kopio do hilo’d Sunim dot i Abisag o ngaran. Om pootodo’ no diyolo’ i sumandak diri do hiri’d raja’. Om iyau noddi o madtamong om momogompi’ di raja’. Nga’ a’ i’ i raja’ minomonsoi do miagal di wonsoyon do tulun di misasawo dot id sumandak diri. ⁵ - ⁶ Om i Adonia noddi o tanak di Daud dit id dotuo tu’ napatai no i Absalom. Tina’ nopo di Adonia om i Hagit. Om i Adonia nopodti nga’ oligkang kopio koulun. Om a’ i’ iyau di tapa’ dau insan togodo’ do kowonsoi piya iyau do sala’. Om orohian no kopio i Adonia do sumiliu’d raja’ om posodia’ noddi iyau do korita’-kuda’ di don sumasangod, om soudor di kikuda’, om limo nohopod o tulun di moyo-woyo’ kasai’ dau. ⁷ Om ongoi noddi iyau boro-boros di Yoab om i Abiatar it Imam. (Ngaran nopo do tina’ di Yoab om i Soruya.) Om kaakun goduwo nopo iyo Yoab di Abiatar do sumokodung di korohian di Adonia. ⁸ Nga’ i Sadok nopo it imam, om i Bonaya i tanak di Yoyada, om i Natan i Nabi, om i Simoi, om i Roi, om i madtatamong kasai’ di Raja’ Daud om a’ i’ suminokodung di Adonia. ⁹ Insan tadau om papatahak no i Adonia do porsombahan di sumbolion do hilo’d kinoiyonon di roitan do Tontolob do Tulanut, it id toning di tudan do waig do roitan dot Inrogil. Porsombahan nopo do pinatahak di Adonia om dumba’, om sapi’ do tontoluhan om sapi’ dit ongokoro’ po dit ongolomu’. Nalap ngai’ di Adonia i tangaanak di Raja’ Daud do suwai om i pagawai di raja’ di mantad hilo’d Yohuda do mongoi rapou di poginakanan do kapatahakan do porsombahan do sinumbali’ddi. ¹⁰ Nga’ a’ i’ di Adonia nalap i Suliman i tadi’ dau, om i Natan i Nabi, om i Bonaya om i madtatamong kasai’ di Raja’ Daud. ¹¹ Om ongoi noddi i Natan solowot di Batsiba, i tina’ di Suliman. Om boro-boros no do poingkaa, ’’Nokorongou ko no do minimpori-pori i Adonia, i tanak di Hagit do suminiliu’d raja’? Om inda’ ka dot i Raja’ Daud nopo om a’ i’ nokoilo do pasal diri. ¹² Ondung orohian ko dot apasi i Suliman om apasi ko iya’, om osonong nogi’ do ¹³ lomusan nu do mongoi solowot di Raja’ Daud. Om poboroson no dot id dau o poingkaa, ’Okon toi ko’ nokosumpa’ ko no dot id doho’ dot i Suliman, i tanak ku’d kusai o sumiliu do raja’ do sumowoli diya’? Nokuro tu’ baino’ nopoddi om i Adonia i’ o suminiliu do raja’?’ kanto,’’ ka dau. ¹⁴ Om boros ka kawagu di Natan, ’’Maso nu nopondo do moro-boros di Raja’ Daud om sumuang oku nondo iyoho’ do mongoi popogirot di boros nu,’’ ka dau. ¹⁵ Om ongoi noddi i Batsiba solowot di raja’ do hiri’d bilik dau. Om tontok nopoddi nga’ molohing no kopio i raja’, om momogompi’ nopo dau nga’ i Abisag, i sumandak do mantad hilo’d Sunim. ¹⁶ Om kotuku’ poddi i Batsiba dot id toguang di raja’ do suminuwau dau, om uhoto’ no iyau di raja’, ’’Haro o pokionuon nu?’’ ka dau. ¹⁷ Om boros ka di Batsiba do suminimbar, ’’Oi Tuan Raja’, suminumpa’ ko dot id doho’ dot id suang do ngaran do TUHAN, i Kinorohingan nu dot i Suliman, i tanak ku’d kusai o sumiliu do raja’ do sumowoli diya’. ¹⁸ Nga’ nosiliu no i Adonia do raja’ om a’ ko i’ nokoilo do pasal diri. ¹⁹ Nakapatahak no i Adonia do porsombahan do dumba’ dot ogumu’, om sapi’ do tontoluhan om tangaanak do sapi’ dit ongolomu’. Om nangaalap no dau dot id poginakanan diri i tangaanak do Raja’ om i Abiatar it Imam, om i Yoab i boyoon do soudor do Raja’. Nga’ a’ i’ dau nalap i Suliman. ²⁰ Oi Tuan Raja’, songingandad ngai’ no o tulun dot Israil do boros do mantad id Raja’ ondung isai kopio o sumowoli diya’ do sumiliu’d raja’. ²¹ Ondung a’ nu poboroson, om atantu’ no dot apatai ko pondo, om iyoon oku pondo om i tanak ku do tulun dit araat,’’ ka dau. ²² Om tontok di maso po di Batsiba do moro-boros, om korikot no i Natan do hiri’d walai di raja’. ²³ Om sunudai no i raja’ do nokorikot i Natan, om suang noddi i Natan, om ongoi no iyau otud do hiri’d toguang di raja’. ²⁴ Om boros ka di Natan, ’’Oi Tuan Raja’, nokoboros nu toi dot i Adonia o sumowoli diya’ do sumiliu’d raja’? ²⁵ Tu’ baino’ no do pinapatahak iyau do dumba’ dot ogumu’, om sapi’ do tontoluhan om tangaanak do sapi’ dit ongolomu’ do maan do porsombahan. Om nalap ngai’ nopo dau i tangaanak di Raja’, om i Yoab i boyoon do soudor do Raja’ om i Abiatar it Imam nga’ nalap nogi’ dau. Om wagu po iyolo’ kotimpuun do mangakan-ngakan do potorungak di Abiatar om mimboros dot opuhod dot, ’Otogui po i Raja’ Adonia!’ ka no. ²⁶ Nga’ a’ oku i’ iyoho’ nalap di Adonia. Om i Sadok it Imam, om i Bonaya, om i Suliman nga’ a’ i’ dau nalap. ²⁷ Tuan Raja’ toi o minonuhu’ do momonsoi do miagal diri, om a’ i’ o Tuan Raja’ pinopoilo di pagawai nu ondung isai kopio o sumowoli do Tuan Raja’,’’ ka dau. ²⁸ Om boros ka di Raja’ Daud, ’’Lohowo’ i Batsiba,’’ ka. Om rikot no i Batsiba do minongoi timbaba’ di raja’. ²⁹ - ³⁰ Om boros kaddi di raja’ dot id dau, ’’Otopot nopo kopio om nakabatos ku no diya’ dot id suang do ngaran do TUHAN, i Kinorohingan dot Israil, dot i Suliman, i tanak nu’d kusai o sumowoli doho’ do sumiliu’d raja’. Om baino’ no do mamatos oku dot id diya’ dot id suang do ngaran do TUHAN di poimpasi, i pinopoidu’ doho’ do mantad id koinsanai do kosusaan ku, om tadau nod baino’ do bayaanon ku i batos ku dot id diya’ddi,’’ ka dau. ³¹ Om otud noddi i Batsiba mikuwo’d minomoros do, ’’Poimpasi po o Raja’ do gisom dot alaid!’’ ka. ³² Om ponuhu’ noddi i Raja’ do momolohou di Sadok, om i Natan om i Bonaya. Om korikot poddi iyolo’ om, ³³ boro-boros no i raja’ dot id diyolo’, ’’Ngoyo’ ngai’ dokoyu lohowo’ i pagawai ku om moyo’ kou no diyolo’ do mongoi pasakai di Suliman, i tanak ku, di kaladai ku om pootodon no iyau do hilo’d tudan do waig di hilo’d Gihon. ³⁴ Om hilo’ no iyau do silihon diyo Sadok di Natan do raja’ dot Israil. Om pounion nogindo dokoyu o torumpit om poboroson dot opuhod o poingkaa, ’Otogui po i Raja’ Suliman,’ ka. ³⁵ Om woyoon nogindo iyau do gumuli’ do hiti do mongoi irikau di tirikohonon ku di don raja’, tu’ iyau no o pilion ku do raja’ do sumowoli doho’ do momorinta’ dot Israil om Yohuda,’’ ka dau. ³⁶ Om boros ka di Bonaya, ’’Owonsoi i’ o miagal diri, oi Tuan Raja’. Maha’ daa om pogiroton do TUHAN, i Kinorohingan nu, i boros nu’ddi. ³⁷ Om poingkuro nopo o TUHAN do minomoyo’ diya’, om iyo no iyau’ddi do momoyo’ di Suliman. Om maha’ daa om pomogoton do TUHAN o pomorintaan di Suliman do mantad ko’ i pomorintaan nu,’’ ka dau. ³⁸ Om pasakayo’ noddi di Sadok, om i Natan, om i Bonaya, om i madtatamong di raja’, i Suliman dot id kaladai di raja’. Om woyoo’ no diyolo’ iyau do kuminaa do hilo’d tudan do waig di hilo’d Gihon. ³⁹ Om ngoyo’ noddi di Sadok i pinoiyanan di tumau do saitun di nigitan dau do mantad hiri’d Kiim do TUHAN. Om potuntugo’ noddi dau dot id di Suliman do tanda’ do momili’ dau. Om pounio’ noddi i torumpit om oinsanan nopo i tulun do hiri do minomoros dot opuhod do poingkaa, ’’Otogui po i Raja’ Suliman,’’ ka. ⁴⁰ Om woyo’ ngai’ nopo iyolo’ do guminuli’, do mikuwo’d sampangkis-pangkis om popinguni do suling, gisom do miagal po dot oguyu’ o tana’ do gama’ do kohiyoo’. ⁴¹ Om kotitingkod di Adonia om i tulun do nalap dau do mangakan-ngakan, do tontok di norongou diyolo’ it ohiyo’ddi. Tontok di norongou di Yoab i tuni do torumpit, om ponguhot no iyau. ’’Nokuro kopio’lo’ tu’ ohiyo kopio o hilo’d bandar?’’ ka dau. ⁴² Om a’ po di Yoab nopupusan o boros dau om korikot no i Yonatan, i tanak di Abiatar it Imam. Om boros ka di Adonia, ’’Suang, atantu’ no do poromut ko do habar dot osonong tu’ osonong ko i’ koulun,’’ ka dau. ⁴³ ’’Mokiampun oku no, tu’ a’ i’ miagal diri,’’ ka di Yonatan do suminimbar. ’’Nopili’ no di Raja’ Daud i Suliman do sumiliu’d raja’. ⁴⁴ Nosuhu’ no i Sadok, om i Natan om i Bonaya om i madtatamong kasai’ di raja’ do momoyo’ di Suliman; om nakasakai no diyolo’ iyau di kaladai di raja’. ⁴⁵ Om nopili’ no diyo Sadok di Natan iyau di hilo’d tudan do waig do Gihon. Om suang noddi iyolo’ di bandar mikuwo’d sampangkis-pangkis dot atataadan. Ohiyo po tomod i tulun do hilo’d bandar. Om iri no it ohiyo di norongou dokoyu di tiinu’ddi. ⁴⁶ Nosiliu noddi i Suliman do raja’. ⁴⁷ Om iri ngai’ piya pagawai do pomorinta’ nga’ nongkoongoi no kosolowot di Raja’ Daud. Boros ka diyolo’, ’Maha’ daa om pobontugon do Kinorohingan nu i Suliman, do mantad ko’ i kobontugo’ nu; om maha’ daa om poimogot o pomorintaan di Suliman ko’ i pomorintaan nu,’ ka no. Om otud noddi i Raja’ Daud do tuminuku’ dot id Kinorohingan do hiri’d toodopon dau, ⁴⁸ mikuwo’d suminambayang do poingkaa, ’Royohon no o TUHAN, i Kinorohingan di tukuon do tulun dot Israil. Tu’ tadau nod baino’ do nopili’ nu o songulun di sinakagon ku do sumiliu’d raja’ do sumowoli doho’. Om pinologos oku po diya’ do poimpasi gisom do nokokito oku dau!’ ka dau,’’ ka di Yonatan. ⁴⁹ Om ongooris tomod diri i tulun di nalap di Adonia. Om ingkakat ngai’ nopo iyolo’ om pamanau no; om sompori-pori nopoddi iyolo’ do minamanau do minuli’. ⁵⁰ Om moddosi tomod diri i Adonia di Suliman gisom do minongoi iyau kabai di sinangau-sangau di pananaraban do porsombahan do hiri’d Kiim do TUHAN. ⁵¹ Om haro’ddi o tulun do minongoi pomisunud di Raja’ Suliman do moddosi tomod i Adonia dau gisom do minongoi iyau kabai di sinangau-sangau di pananaraban do porsombahan. Om minomoros iyau do, ’’Pokionuon ku do sumumpa’ po i Raja’ Suliman dot id doho’, dot a’ oku dau patayon,’’ ka. ⁵² Om boros kad i Suliman, ’’Ondung osonong o kowoyo-woyoon dau om a’ i’ kopio iyau ohukuman, nga’ ondung araat o wonsoyon dau om atantu’ no dot apatai iyau,’’ ka dau. ⁵³ Om ponuhu’ noddi i Raja’ Suliman do tulun do mongoi polintuhun di Adonia do mantad hiri’d pananaraban do porsombahan. Om ongoi noddi i Adonia solowot di raja’ mikuwo’d minotud do hiri’d toguang dau. Om boros kaddi di raja’, ’’Koino-ino ko nod muli’!’’ ka.

¹ Tontok dit oruhai no do matai i Daud om lohowo’ no dau i Suliman, i tanak dau. Om sunudai no dau iyau di pobilinon dau dit id tohuri no kopio. Boros kad Daud, ² ’’Norikot noddi o kopupuson do topud-opud ku. Nga’ pogiroton no o ginawo nu om kumosiou no. ³ Wonsoyon no o ponuhuan do TUHAN, i Kinorohingan nu dot id diya’. Om umboyoon ngai’ no it oturan om ponuhuan dau di songintulis do hiri’d Tourat di Musa, om koundar ko i’ do honggo nopo o ngoyon nu om nunu nopo o wonsoyon nu. ⁴ Mumboyo’ ko nopod TUHAN, om bayaanon indo dau i batos dau do sinakagon ku o momorinta’ dot Israil, ondung tumorodok no iyolo’ do mumboyo’ ngai’ di ponuhuan dau do mikuwo’d aayi-ayi’ o ginawo om pomusarahan diyolo’. ⁵ Iso’ po kawagu! Atantu’ no dot osorou nu i’ i winonsoi di Yoab dot id doho’ tu’ pinatai dau i duwo o boyoon do soudor dot Israil, i Abnor i tanak di Nor, om i Amasa i tanak di Yitir. Pinatai dau iyolo’ do tontok dit a’ misangod do ponuli’ dau diyolo’ di minamatai iyolo’ do tontok do mogisasangod. Iyau i’ o minamatai di tulun dit aiso’ o sala’, nga’ iyoho’ iddi o noulian do monongkoilo di winonsoi dau, om gisom do noinggorit oku. ⁶ Om oilaan nu i’ it apatut nu’d wonsoyon, oi tanak ku: kada’ no kopio iyau pologoso’ dot osonong o kapatai-patayo’. ⁷ Nga’ kumosonong no dot id tangaanak di Barsilai di tongokusai, i mantad hilo’d Giliad. Om tulungon no iyolo’ tu’ osonong i’ iyolo’ dot id doho’ do tontok di minogidu’ oku do mantad id di Absalom, i tobpinai nu. ⁸ I Simoi no i tanak di Gira, i mantad hilo’d bandar do Bahurim it id watas do Binyamin, om hati po o pobilinon ku diya’. Tontok di pakayaan ku do hilo’d Mahanaim, om minomolupu’ tomod i Simoi doho’. Nga’ tontok di nosolowot ku iyau do hilo’d Bawang do Yordan, om sumpa’ oku no dot id dau dot id suang do ngaran do TUHAN, dot a’ ku iyau patayon. ⁹ Nga’ iti no o pobilinon ku diya’: kada’ iyau pologoso’ do koidu’ do mantad id hukuman. Oilaan ku id koilo ko do momusorou; om ihumon no kopio o ralan do momohukum dau do kapatayon,’’ ka dau. ¹⁰ Om kapatai noddi i Daud om lobongo’ no iyau do hilo’d Bandar di Daud. ¹¹ Nosiliu iyau do raja’ dot Israil do solinaid dot apat nohopod o toun: turu’ o toun dau do poundorong do hilo’d Hibron om tolu nohopod om tolu o toun dau do hilo’d Yorusalim. ¹² Om kosiliu noddi i Suliman do raja’ do suminowoli di Daud, i tapa’ dau. Om ogirot tomod diri i pomorintaan di Raja’ Suliman. ¹³ Insan tadau om ongoi no i Adonia do hiri’d di Batsiba. Om uhoto’ no di Batsiba i Adonia, ’’Osonong i’ o kaangai-angayan nu’d hiti?’’ ka dau. ’’Osonong i’ ’’ ka dau do suminimbar. ¹⁴ Om boros ka dau kawagu, ’’Haro daa o pokionuon ku diya’, oi inan,’’ ka. ’’Nunu?’’ ka di Batsiba do minonguhot. ¹⁵ Boros ka di Adonia do suminimbar, ’’Oilaan nu i’ dot iyoho’ daa it apatut do sumiliu’d raja’, om soro-sorohon ngai’ no daa di tulun dot Israil o miagal diri. Nga’ iri iddi tadi’ ku o nosiliu’d raja’; tu’ iyo noddi o kinorohian do TUHAN. ¹⁶ Nga’ iso’ po daa o pokionuon ku; om maha’ daa om potumboyoon oku diya’,’’ ka dau. ¹⁷ ’’Nunu daa o pokionuon nu?’’ ka di Batsiba do minonguhot. Om boros ka di Adonia, ’’Ngoyon daa doho’ pokionuo’ di Raja’ Suliman om pabanaron oku i’ dau do mangawin di Abisag, i sumandak do mantad hilo’d Sunim diri; oilaan ku i’ do patahakon id Suliman o pokionuon nu,’’ ka dau. ¹⁸ ’’Oo, mongoi oku i’ boro-boros di raja’ do poporomut di boros nu,’’ ka dau. ¹⁹ Om ongoi noddi i Batsiba solowot di raja’ do mongoi poporomut di boros di Adonia. Om ingkakat no i raja’ do suminuwau di tina’ dau om tuku’ no do minomusou dau, om ongoi nogi’ irikau kawagu do hiri’d tirikohonon di don raja’. Om ponuhu’ nogi’ iyau do tulun do pinoposodia’ do tirikohonon do hiri’d dawananan dau do poirikahanan di tina’ dau. ²⁰ Om boro-boros noddi i Batsiba. ’’Haro daa ot okooro’ do pokionuon ku diya’; om maha’ daa om patahakon nu,’’ ka dau. ’’Nunu’ri, oi ina’? Patahakon ku i’,’’ ka dau. ²¹ Om boros ka di Batsiba, ’’Pabanaron no daa i Adonia, i tobpinai nu do mangawin di Abisag,’’ ka dau. ²² ’’Nokuro tu’ iri o pokionuon nu doho’, oi ina’? Miagal nopo do pokionuon i Abisag om patahakon ku dau iti tirikohonon ku do momorinta’. Okon toi ko’ id dotuo iyau ko’ iyoho’. Om kawagu po nga’ sumokodung dau i Abiatar it Imam om i Yoab!’’ ka dau. ²³ Om koboros po di Suliman o miagal diri om sumpa’ no iyau dot id suang do ngaran do TUHAN. Boros ka dau, ’’Patayon oku nopod Kinorohingan ondung a’ ku no hukuman do kapatayon i Adonia dot i pinokianu dau do miagal diri o kapamatayan. ²⁴ Nokogirot nod TUHAN o koiyonon ku do momorinta’ do hiti’d tirikohonon di Daud i tapa’ ku. Om nabayaan nod TUHAN i batos dau, tu’ nakatahak no dau iti pomorintaan dot id doho’ om id sinakagon ku. Om sumumpa’ oku no dot id suang do ngaran do TUHAN i poimpasi, do tadau nod baino’ do matai i Adonia!’’ ka dau. ²⁵ Om suhuo’ noddi di Raja’ Suliman i Bonaya, om ngoyo’ no dau patayo’ i Adonia. ²⁶ Om boros kaddi di Raja’ Suliman dot id di Abiatar it Imam, ’’Ongoi no do hilo’d Anatot, i kampung nu. Otopot nopo kopio om patayon ko i’ daa, nga’ a’ ku i’ iya’ patayon do baino’, tu’ tontok di moyo-woyo’ ko po di tapa’ ku om tuminonggoi ko i’ dau dot id koinsanai di koinggoritan dau. Om iya’ nogi’ i minomogompi’ di Kaban do Tumpongo’d TUHAN,’’ ka dau. ²⁷ Om potingkodo’ noddi di Suliman i Abiatar di karaja’ dau dot imam. Om iri no i winonsoi di Suliman o minamayaan di nokoboros do TUHAN di hilo’ pod Silo do pasal di Ili it Imam om i sinakagon dau. ²⁸ Om korongou ngai’ no di Yoab i nongosiliu’ddi. Om moddosi tomod diri iyau tu’ suminokodung i’ iyau di Adonia, mulong po dot a’ i’ daa iyau suminokodung di Absalom di gulu po. Om poggidu’ no iyau do kuminaa do hiri’d Kiim do TUHAN om ongoi no iyau kabai di sinangau-sangau di pananaraban do porsombahan. ²⁹ Om kosunud noddi i habar dot id di Raja’ Suliman, do nokoongoi no i Yoab do hiri’d Kiim do TUHAN om hiri no iyau’d pananaraban do porsombahan. Om ponuhu’ no i Raja’ Suliman do tulun do mongoi poromut do boros dot id di Yoab, do monguhot dau ondung nokuro tu’ minongoi iyau do hiri’d pananaraban do porsombahan. Om simbar no i Yoab do minogidu’ iyau om ruminikot iyau dot id Tuhan, tu’ moddosi iyau di Suliman. Om suhuo’ noddi di Raja’ Suliman i Bonaya do mongoi pamatai di Yoab. ³⁰ Om ongoi noddi i Bonaya do hiri’d Kiim do TUHAN om boro-boros no di Yoab, ’’Suhuon ko di raja’ do sumoliwan do mantad hino!’’ ka dau. ’’A, hiti oku nod matai,’’ ka dau. Om guli’ no i Bonaya do minongoi posunud diri dot id raja’. ³¹ Om soira’ di norongou di raja’ o miagal diri om pomoros no iyau do, ’’Ngoyo’ nopo wonsoyo’ o miagal di nokoboros dau. Patayon nopo iyau om lobongon no, om a’ oku i’ om a’ ngai’ i sinakagon do tapa’ ku kokuro-kuro di pinamatayan di Yoab do tulun dit aiso’ o sala’. ³² Om hukuman nondo iyau do TUHAN tu’ minamatai i’ iyau, om a’ i’ nokoilo-ilo i tapa’ ku. Pinatai di Yoab o duwo tulun dit aiso’ o sala’, i Abnor i boyoon do soudor dot Israil om i Amasa i boyoon do soudor do Yohuda, om osonong nogi’ daa iyolo’ ko’ i Yoab, nga’ pinatai i’ di Yoab iyolo’. ³³ Om i Yoab nondo om i sinakagon dau o mamabo di hukuman do kinapatayan di duwo o boyoon do soudor diri, do gisom dot alaid. Nga’ oinsanan nopondo o sinakagon di tapa’ ku dit osiliu do raja’ dot abarakatan kasai’d TUHAN — om koundar kasai’ iyolo’,’’ ka di Raja’ Suliman. ³⁴ Om ongoi noddi i Bonaya do hiri’d Kiim do TUHAN, om patayo’ no dau i Yoab do hiri. Om lobongo’ noddi i Yoab do hiri’d walai dau di hiri’d soliwan di bandar. ³⁵ Om siliho’ noddi di raja’ i Bonaya do boyoon di soudor dot ongkirapo-rapo do suminowoli di Yoab, om i Sadok diri o siniliu dot imam do suminowoli di Abiatar. ³⁶ Om lohowo’ noddi di raja’ i Simoi om boro-boros no dau, ’’Momonsoi nod walai nu do hiti’d Yorusalim. Om mundorong nod hiri om kada’ no soliwan diti bandar. ³⁷ Nga’ ondung sumoliwan ko om katalib ko no di luyu’ do Bawang do Kidron, om patayon ko no; om iya’ no o nakasala’,’’ ka dau. ³⁸ ’’Oo, oi Tuan Raja’. Tonudon ku i’ o boros nu, oi Raja’,’’ ka dau. Om hilo-hilo’ noddid Yorusalim i Simoi do poundorong ³⁹ do solinaid do tolu o toun. Nga’ poggidu’ noddi o duwo di turipon di Simoi do hilo’d Gat, do minongoi do hilo’d di Raja’ Akis, i tanak di Maaka. Om soira’ di noilaan di Simoi o hal diri, ⁴⁰ om pakalai no dau i kaladai dau om ongoi no do hilo’d di Raja’ Akis, i hilo’d Gat do mongoi pogihum di turipon dau. Om kosolowot noddi dau iyolo’, om angatai no dau iyolo’ do minuli’. ⁴¹ Nga’ soira’ di norongou di Suliman i nowonsoi di Simoi, ⁴² om ponuhu’ no iyau do mongoi pomolohou dau, om boro-boros no do poingkaa, ’’Nosuhu’ ku no iya’ do mamatos dot id suang do ngaran do TUHAN dot a’ ko tumongkiad do Yorusalim. Om nokoinsan mantad ku no iya’ do soira’ nopo do sumoliwan ko do mantad id Yorusalim, om matai ko no. Om iya’ nga’ nakapamatos nogi’ om nakaakun do tumanud di boros ku, ko i? ⁴³ Nga’ nokuro’ddi tu’ a’ nu nigitan i batos nu om tinolibambanan nu i boros ku? ⁴⁴ Oilaan ngai’ nu i’ i kararaat nu dot id tapa’ ku. Om gowoi poddi om hukuman ko’d TUHAN, ⁴⁵ nga’ iyoho’ nopo om barakatan i’ om pomorintaan do tapa’ ku nga’ kogirot i’ do gisom dot alaid,’’ ka dau. ⁴⁶ Om koboros po dau o miagal diri om suhuo’ no di raja’ i Bonaya, om ngoyo’ no di Bonaya patayo’ i Simoi. Om i Suliman noddi o kikuasa’ dot id koinsanai di nunu nopo do hiri’d pomorintaan dau.

¹ Om ponokiambalut noddi i Suliman di raja’ do Masir. Ralan nopo dau do minonokiambalut nga’ kinawin dau i tanak do tondu’ do raja’ddi. Om angatai no dau i tondu’ do minongoi iyon do hiri’d Bandar di Daud do daamot po do mamaal di walai’d raja’ om i Walai’d Sasambayangan dot Agayo, om i tolig di pointutuk do Yorusalim. ² Aiso’ po o Walai’d Sasambayangan dot Agayo do don TUHAN, om maso poddi di tulun do papatahak do porsombahan di sumbolion dot id piro-piro o pananaraban do porsombahan. ³ Osianan i’ i Suliman do TUHAN om mumboyo’ iyau di pinotuduk di tapa’ dau. Nga’ iyau nga’ maso po do monumbali’ om papatahak di tayam-tayam dot id piro-piro o pananaraban do porsombahan. ⁴ Pananaraban nopo do porsombahan dit abantug kopio nga’ i hilo’d Gibion. Om asaru’ i’ i Suliman do mongoi papatahak do porsombahan do sumbolion do hilo’. Insan tadau, om ongoi no kawagu iyau do hilo’ do miagal di koubasanan. ⁵ Om totuong noddi om intalang no o TUHAN dot id dau dot id suang do nipi dau, om minonguhot do poingkaa, ’’Nunu o korohian nu do patahakon ku diya’?’’ ka dau. ⁶ Om boros ka di Suliman do suminimbar, ’’Oi TUHAN, nokointalang nu no dot osianan kopio ko di Daud, i tapa’ ku, i susuhuon nu’ddi. Tu’ iyau nopo om osonong om otulid o ginawo om otorodok dot id diya’. Om pinointalangan nu iyau do kosianan nu dot id dau. Om atalang no kopio iri tu’ nonuan nu iyau do tanak do kusai i momorinta’ noddi do baino’ do suminowoli dau. ⁷ Oi TUHAN, i Kinorohingan ku, iya’ no i minomili’ doho’ do sumiliu do raja’ do suminowoli di tapa’ ku, mulong po dot omulok oku po, om a’ oku koilo do kowoyo-woyoon do momorinta’. ⁸ Om id tanga-tanga’ oku do bansa’ di nopili’ nu do sumiliu do tulun nu. Iyolo’ nopo om bansa’ dit asapou kopio, tu’ a’ no ointob-intob o kogumuo’. ⁹ Iyo nopoddi, oi TUHAN, om onuwai oku no do toilaan do momorinta’ do tulun nu’dti do mikuwo’d otulid o pomorinta’ om koilo oku id mongintutun dit osonong om it araat. Tu’ ondung amu’, nga’ poingkuro oku po do momorinta’ diti tulun nu do miagal diti kogumu’?’’ ka dau. ¹⁰ Om orohian tomod diri o TUHAN di pinokianu di Suliman do miagal diri. ¹¹ Om boro-boros noddi o TUHAN dot id dau, ’’Iyo nopoddi tu’ minokianu ko do toilaan do momorinta’ dot otulid o pomomorinta’, om okon ko’ tumur dot anaru ko’ kakayaan do maan nu’d diya’, ko’ kapatayon po di pisangod nu o pinokianu nu, ¹² om simbaron ku i’ i pinokianu nu. Om silihon ku nondo iya’ do tulun dit opintar kopio om kitoilaan kopio ko’ mantad do koinsanai’d tulun di nokoumbal do poimpasi om i tulun di sumusuhut do miyon do hiti’d pomogunan diti. ¹³ Om iri piya it a’ nu pinokianu nga’ patahakon ku i’ diya’: solinaid nu nopo do poimpasi om kaya’ ko nondo om suahon kopio ko ko’ mantad do koinsanai’d raja’ do hinonggo-honggo nopo. ¹⁴ Om ondung iyo ko di Daud i tapa’ nu’ddi, tu’ minumboyo’ om tuminanud dit oturan ku, om onuan ku indo iya’ do tumur dot anaru,’’ ka. ¹⁵ Om koposik poddi i Suliman, om koilaai no dau do minoro-boros o Kinorohingan dot id dau dot id suang do nipi. Om ongoi noddi iyau do hilo’d Yorusalim om ingkakat no do hiri’d dotimbabaan di Kaban do Tumpongo’d TUHAN om papatahak no iyau do porsombahan di sorobon om porsombahan di piombolutan. Om papaharo nogiddi iyau do poginakanan do pagalapan do koinsanai di pagawai dau. ¹⁶ Insan tadau om ongoi no solowot di Raja’ Suliman o duwo o tondu’ do sundal. ¹⁷ - ¹⁸ Om boros ka di tiso’ diyolo’, ’’Oi Tuan Raja’, iyahai nopodti om iso- iso’ o walai, om aiso’ i’ o tulun do suwai do poinsugku’ dahai, om kosusu oku no dot iso’ o tanak do kusai di guulu. Om duwo no tadau do mantad diri om kosusu no iti tondu’ diti; om kusai i’ o tanak dau. ¹⁹ Insan totuong, tontok di maso dahai do koodop om koonsitai nodti tondu’ i tanak dau, om kapatai no i tanak; nga’ a’ i’ daa dau tinomod. ²⁰ Om pitangatuong noddi di maso ku iyoho’ do koodop om koposik no iti tondu’dti om ngoyo’ no dau i tanak ku do hiri’d poirumak ku. Om ngoyo’ no dau hirio’d toodopon dau i tanak ku. Om iri no tanak di napatai om nongoi dau hirio’d toodopon ku. ²¹ Om kosuabon noddi, di noposik oku om poposusu oku daa’ddi di tanak ku, om kokito ku no do napatai no i tanak. Nga’ kosonsod ku noddi kopio om okon i’ ko’ i doho’ di tanak diri,’’ ka. ²² Nga’ boros ka di tondu’ di tiso’, ’’Goudut! Iri nopo tanak di poimpasi’ddi om doho’ i’, om iri no napatai o diya’,’’ ka. Om boros ka di tondu’ di koiso’ do suminimbar, ’’Okon! Iri nopo tanak di napatai om diya’ i’, om i poimpasi o doho’!’’ ka dau. Om iyo noddi iyolo’ do minisongkiwal do hiri’d toguang di raja’. ²³ Om boros kaddi di Raja’ Suliman, ’’Sopiakun-akun kou nopo dot i poimpasi o tanak dokoyu, om okon ko’ i napatai,’’ ka dau. ²⁴ Om koboros po i raja’ do miagal diri om ponuhu’ no iyau do tulun do minongoi’d gayang. ²⁵ Om boros kaddi kawagu di raja’, ’’Pipapason nogi’ i tanak di poimpasi’ddi om onuan i’ ilo tongoondu’ do sopisampapasan,’’ ka dau. ²⁶ Om korongou noddi di tondu’, i tina’ kopio di tanak i boros do miagal diri, om boro-boros no iyau, ’’Oi Tuan Raja’, kada’ nogi’ kopio patayo’ i tanak diri. Patahakon nopo iri dot id dilo’,’’ ka. Minomoros iyau do miagal diri tu’ osianan no kopio iyau di tanak dau. Nga’ boros kaddi di tondu’ di tiso’, ’’A, pipapason nopo. Baya’ nopo dot aiso’ o kaanu dahai’ddi,’’ ka. ²⁷ Om boros kaddi di Suliman, ’’A’ piya patayon i tanak. Patahakon dilo tondu’ di koiso’ i tanak — ilo’ no o tina’ kopio dau,’’ ka. ²⁸ Om soira’ di norongou di tulun dot Israil i pinomutus di Suliman do hal diri om oinsanan nopo iyolo’ dot oimayaan mikuwo’d opusou kopio di Suliman. Tu’ atalang no kopio do nonuan iyau’d Kinorohingan do toilaan do manalasai do hal dot otulid o pomumutus.

³² Haro i’ o tolu noribu o boros dit angaralom o komoyon, om lobi id soribu’ o sinding do tinulis dau. ¹ Om nosiliu noddi i Suliman do raja’ do pointongkop dot Israil. ² - ³³ Milo i’ iyau do mimboros do pasal do kokoyuan om i tanom-tanom — mantad di kayu sedar do hilo’d Libanon om iri piya i rongilut do hisop di songinsuni do hiri’d tolig di watu do winonsoi — om mimboros nogi’ iyau do pasal do nintorusan di sontulud-tulud om i sangkamang-kamang om sada’. ⁶ Om iti ngai’ no i pagawai dit angasawat o pangkat do pinili’ di Suliman: Imam: i Sadok; i Asaria i tanak di Sadok; om i Abiatar Gomponulis do hiri’d walai’d raja’: i Ilihorip om i Ahia, i tangaanak di Sisia Gomponulis do pomorinta’: i Yosapat, i tanak di Ahilud Boyoon do Soudor: i Bonaya i tanak di Yoyada Boyoon do koinsanai di gobunor do watas: i Asaria i tanak di Natan Ponosihat do Raja’: i Sabud it Imam, i tanak di Natan Boyoon do koinsanai di susuhuon do hiri’d walai di raja’: i Ahisar Boyoon do tulun di sinansagan do kumaraja’: i Adoniram i tanak di Abda ⁷ Minomili’ i Suliman do hopod om duwo o gobunor do pointongkop do pomogunan dot Israil. Karaja’ nopo diyolo’ om monimung do kaakan-akanan do mantad hiri’d watas diyolo’ do patahakon di raja’ om koinsanai di poingiyon do hiri’d walai di raja’. Om mogisowoli-woli nopo i piro-piro o gobunor dot onuan do karaja’ddi do solinaid do sombulan do pointikid-tikid do toun. ⁸ - ³⁴ Oinsanan nopo o raja’ do pointongkop do pomogunan do nokorongou do kapandayo’ di Suliman gisom do minonuhu’ iyolo’ do tulun do mongoi pokinongou dau. ¹⁹ Om iri nopo hopod om duwo o gobunor diri nga’ haro i’ o boyoon. Iti ngai’ no o ngaran di gobunor om i ngaran do watas diyolo’: I Bonhur: watas do konulu-nuluan dot Ipraim I Bin-Dikir: bandar do Makas, Saalbim, Bait-Simis, Ilon, om Bait-Hanan I Bin-Hisid: bandar dot Arubot, Soko, om koinsanai di watas do Hipir I Bin-Abinadab, i sawo di Tapat, i tanak di Suliman do tondu’: koinsanai do watas do Dor I Baana i tanak di Ahilud: bandar do Taanak, Mogido, om koinsanai di kinoiyonon dot id somok do Bait-Sian, om id toning do bandar do Sartan i ponong id salatan do bandar do Yisriil gisom do hilo’d bandar do Abil-Mihola, om Yokmiam I Bin-Gibir: bandar do Ramot di hilo’d Giliad, om kawalayan do hilo’d Giliad, i nasanganu di sompiiyon di Yair, i sinakagon di Manasi, om i watas dot Argob do hilo’d Basan, i kibandar dot angagayo dot onom nohopod o kogumuo’, om ongkitolig om ongkisalampad do tambaga’ i wawayaan dot agayo I Ahinadab i tanak di Ido: watas do Mahanaim I Ahimaas, i sawo di Basmat, i tanak di Suliman do tondu’: watas do Naptali I Baana i tanak di Husai: watas dot Asir, om bandar dot Alot I Yosapat i tanak di Parua: watas dot Isakar I Simoi i tanak di Ila: watas do Binyamin I Gibir i tanak di Uri: watas do Giliad, i porintaon di Sihon i raja’ dot Amori om i Og i raja’ do Basan di gulu po. ²⁰ Kogumuo’ nopod tulun do Yohuda om Israil nga’ miagal po di pasir do hilo’d tisan do rahat. Osimbayan tomod o koposi-posion diyolo’ om osima’ do takanon om tinumon. ²¹ Oinsanan nopo i bansa’d tulun do mantad pod hiri’d Bawang dot Iprat om korikot do hilo’d Pilistin om i piwolitan do Masir dot id suang ngai’ do pomorintaan di Suliman. Id suang ngai’ nopo do pomorintaan di Suliman om mambayar kasai’ id sukai i piro-piro o bansa’ddi do solinaid di Suliman do poimpasi. ²² Kaakan-akanan nopo dot onuon di Suliman do monikid tadau nga’ limo noribu lito do tapung do torigu dit angatandai, om hopod noribu lito do tapung do torigu dit angasalau, ²³ om hopod o tinan do sapi’ di poingkandang, om duwo nohopod o sapi’ di songidu-idu’, om hatus o tinan do dumba’. Om suwai no ko’ iri om mokianu po iyau do tambang, om paus, om tambang do tontoluhan, om tombolog. ²⁴ Koinsanai di tana’ do ponong id kotonobon do mantad id Bawang dot Iprat, do mantad hilo’d Tipsa, i hilo’d Iprat om gisom do ponong hilo’d kotonobon, i hilo’d bandar do Gasa, nga’ id suang ngai’ i’ do pomorintaan di Suliman. Oinsanan nopo i raja’ di ponong id kotonobon do mantad id Iprat dot id suang do pomorintaan dau, om oinsanan i pomogunan do hiri’d posorili’ do mulud dau. ²⁵ Solinaid di poimpasi i Suliman om ongosimbayan ngai’ nopo i tulun do pointongkop do Yohuda om Israil, aiso’ no o koligagaanan diyolo’, om haro ngai’ nopo o kabun dot anggur om kabun dot ara do pointikid-tikid do sompiiyon. ²⁶ Kisoudor i Suliman dit ongkikuda’ do hopod om duwo noribu, om apat nohopod noribu o kogumuon do kandang do kuda’ do pakandangan do kuda’ di pamagayat do korita’-kuda’ dau. ²⁷ Om mogisowoli-woli nopo i gobunor, do sorombulan-bulan do papatahak do kaakan-akanan di Raja’ Suliman om koinsanai di tulun di makan do hiri’d walai di raja’, gisom do haro ngai’ nopo diyolo’. ²⁸ Om patahak ngai’ nopo i gobunor di diyolo’ dot apatut do patahakon, do barli om sakot do paakan do koinsanai di kuda’ di Suliman, i kuda’ di sakayon om i kuda’ di pamagayat do korita’. Om popiotodon i taakanon di tayam-tayam do hiri’d kandang do kuda’ do songkuro nopo i pokionuon. ²⁹ Nonuan do Kinorohingan i Suliman do kopintaran, om toilaan dit aralom kopio ko’ i toilaan do tulun do suwai, om pomusorou dit atarom kopio. ³⁰ Hilo’ nopod pomogunan do ponong id koulayon om hilo’d pomogunan do Masir om aiso’ no o koiyo dau kapandai. ³¹ Iyau no ot apandai kopio ko’ mantad do koinsanai’d tulun! Apandai po ko’ i Itan i tulun dot Israhi, om apandai ko’ i Himan om i Kalkol om i Darda, i tangaanak di Mahol. Abantug tomod o ngaran di Suliman do honggo nopo om pointongkop di pomogunan di hiri’d posorili’ di pomorintaan dau.

¹ I Hiram nopo, i raja’ do Tirus, om tambalut i’ di Raja’ Daud. Om soira’ddi nokorongou i Hiram dot i Suliman o nosiliu do raja’ do suminowoli di Daud, i tapa’ dau, om ponuhu’ no iyau do tulun do minongoi do hiri’d di Suliman. ² Om porikatai noddi di Suliman i Hiram do boros do poingkaa, ³ ’’Oi Raja’ Hiram. Atantu’ no do koilo ko i’ dot i Daud nopo, i tapa’ ku, om mongoi nopo sangod do sumaap di pisangod dot id pomogunan di posorili’ dau. Om iri noddi ot a’ di tapa’ ku kinomilaan do minomonsoi di walai dot iyonon do sumambayang dot id TUHAN, i Kinorohingan dau, do solinaid dit a’ po iyau’d TUHAN noonuan do kamanangan do sumangod do koinsanai di pisangod dau. ⁴ Nga’ baino’ nopoddi om noonuan noddi do TUHAN, i Kinorohingan ku, do kosimbayanan o pointongkop diti pomorintaan ku. Om aiso’ no o sumangod doho’ om aiso’ o ligogon do ngoyon songodo’ do pisangod. ⁵ Nakabatos no o TUHAN dot id di Daud, i tapa’ ku do poingkaa, ’Iri nopondo tanak nu do silihon ku’d raja’ do sumowoli diya’ om mamaal nondo do walai dot iyonon do sumambayang dot id doho’,’ ka. Iyo nopoddi, oi Raja’ Hiram, om nokopomusorou oku no kopio dot iyoho’ no, i Suliman, o mamaal di Walai’d Sasambayangan diri. ⁶ Om oilaan nu i’ dot aiso’ i’ o tulun ku dit ongoilo do managad do kayu do miagal di tulun nu tu’ ongoilo. Iyo nopoddi, om pokionuon ku daa do monuhu’ ko di tulun nu do mongoi panagad do kayu sedar do hilo’d Libanon do patahakon doho’. Om suhuon ku indo i tulun ku do mongoi uhup diyolo’, om piro nopo o gadsi’ do pokionuon nu do pamagadsi’ di tulun nu nga’ bayaran ku i’,’’ ka dau. ⁷ Om asanangan tomod diri i Hiram do nokorongou do habar diri. Boros ka dau, ’’Royohon no TUHAN do baino’ tu’ nonuan dau i Daud do tanak dit opintar kopio do suminiliu do raja’ do bansa’ dit agayo’ddi,’’ ka dau. ⁸ Om pobilino’ noddi di Hiram iti tisimbar dau di Suliman do poingkaa, ’’Nokoromut no dot id doho’ i boros nu’ddi om i pokionuon nu, om ookunan ku i’ iri. Om posodiawon ku indo i kayu sedar do Libanon om i kayu sedar di koubasanan do tumanud di pinokianu nu. ⁹ Om poruhukon indo di tulun ku i kayu’ddi do mantad hilo’d Libanon om pokoyoon do hilo’d rahat. Om hilo’ nopondo om kagasan nondo diyolo’ i kayu do wonsoyon do miagal do gakit om milo id rulunon do sumusui di tisan do rahat do kumaa do hiri’d kinoiyonon di tontuon nu. Om korikot pondo iri do hiri om uriason nogindo i kayu om patahakon nogindo di tulun nu. Om iri nondo i tulun nu o monongkoilo’ddi. Om pokionuon ku no iyoho’, om poposodia’ ko do kaakan- akanan di tulun ku’ddi,’’ ka dau. ¹⁰ Om onuwai noddi di Hiram i Suliman do koinsanai di kayu sedar do Libanon om kayu sedar di koubasanan do tumanud di kogumuo’ di pinokianu dau. ¹¹ Om paakan ngai’ no di tulun di Hiram diri, om patahak kasai’ nopo i Suliman dot id di Hiram do duwo juta kilogram do gandum om apat nahatus noribu o lito do tumau’d saitun dit aiso’ o rolot do pointikid do toun. ¹² Om binayaan id TUHAN i batos dau tu’ nonuan i’ dau do toilaan i Suliman. Om i Hiram nopo di Suliman diri nga’ miulud tomod om minomonsoi iyolo’ do taru’. ¹³ Om sinuhu’ di Raja’ Suliman o 30,000 o tongokusai do mantad id pointongkop dot Israil do momonsoi di karaja’ di posonsogon, ¹⁴ om pinili’ dau i Adoniram do boyoon diyolo’. Om binahagi’ di Suliman iyolo’ do tolu o bohogian, do sorohopod-hopod noribu tulun dot iso’ o bohogian. Om mogisowoli-woli nopo i tolu bohogian diri do mundorong do sombulan o koloido’ do hilo’d Libanon om duwo nondo tulan do hiri’d walai diyolo’. ¹⁵ Om minonuhu’ nogi’ i Suliman do 80,000 o tulun do mamabak di watu di hiri’d nuluhon om 70,000 o tulun do mongoi pamabo di watu, ¹⁶ om 3,300 o tulun do pinili’ dau do sumiliu’d mandur do mongilo-ilo do karaja’ddi. ¹⁷ Om sinuhu’ iyolo’ di Raja’ Suliman do manganu di watu dot angagayo om it ongosonong do maan do poimpahan di Walai’d Sasambayangan dot Agayo. ¹⁸ Om iyo noddi i tulun do kuminaraja’ dot id di Suliman, om i tulun di Hiram om i tulun do mantad hilo’d bandar do Gibal do pinoposodia’ di watu om kayu do pamaal di Walai’d Sasambayangan dot Agayo.

¹ Tontok di tulan do Sib, i tulan do koduwo, di kaapat do toun di Suliman do momorinta’, om dit apat no nahatus om walu’ nohopod o toun do mantad di kinosoliwanan di tulun dot Israil do mantad hilo’d Masir, om timpuun no i Suliman do minamaal di Walai’d Sasambayangan dot Agayo. ² Om kogoyoo’ nopo di ponong hiri’d suang om: 27 o mito do konoruo’, om 9 o mito do kalaabo’, om 13.5 o mito do kasawato’. ³ Iri nopo kakilima’ di Walai’d Sasambayangan dot Agayo’ddi om 4.5 o mito do konoruo’ om kalaabo’ no om 9 o mito dot irad do kalaabo’ di walai. ⁴ Om ongkililigaon i limput di walai; do poingkoro’ o pinomolobu di liligaon do ponong id soliwan om poinggayo o pinomolobu do ponong id suang. ⁵ Om hiri nod topis di limput di hiri’d tolikud om hiri’d bombong do ponong id soliwan om winansayan po kawagu do bilik do tolu o tingkat. Om oiyo nopo o kasawato’ddi do 2.2 o mito. ⁶ Kalaabo’ nopo di bilik dit id tingkat do koiso’ om 2.2 o mito, om iri no it id tingkat do koduwo om 2.7 o mito, om iri no it id tingkat do kotolu om 3.1 o mito. Iri nopo limput dit id tingkat dot id siriba’ om akapal po ko’ i limput dit id sawa-sawat, do gisom do milo do powonsoyon i palampag di bilik di pinatambing dot a’ piya poluangon di limput di Walai’d Sasambayangan dot Agayo. ⁷ Iri nopo watu di pinakai do pamaal di walai om nosodia’ mantad no do hiri’d pinongonuan di watu. Om solinaid di wonsoi-wonsoyon i walai om aiso’ no ot orongou dot ohiyo do monukul, ko’ mangapak ko’ i mamakai do papakas do basi’. ⁸ Iri nopo wawayaan do sumuang do hiri’d kobilik-bilikan di pinatambing di hiri’d tingkat dot id siriba’ kopio, om i hiri’d ponong id salatan di Walai’d Sasambayangan dot Agayo, om haro o tukad do wayaan do mongoi do hiri’d tingkat do koduwo om hiri’d tingkat do kotolu. ⁹ Om kolimpupuson noddi om pinowonsoi i siling do papan do pinodokot di kayu sedar do Libanon. Om iyo noddi i Suliman do minomongo di Walai’d Sasambayangan dot Agayo. ¹⁰ Om nopongo nogi’ do minomonsoi i bilik di pinatambing, i tolu o tingkat diri; i pinooput di limput di ponong id soliwan di walai do pinopiromut nopo om i kayu sedar do Libanon. ¹¹ Om boro-boros noddi o TUHAN dot id di Suliman, ¹² ’’Ondung umboyoon nu o koinsanai dit oturan om ponuhuan ku, om wonsoyon ku indo dot id diya’ i nakabatos ku dot id di Daud, i tapa’ nu. ¹³ Mundorong oku nondo do hiti’d walai diti wonsoyon nu om hiti kasai’ oku id pogialatan diti tulun dot Israil, i tulun do songonuon ku. Om a’ ku i’ iyolo’ tongkiadan,’’ ka dau. ¹⁴ Om iyo noddi i Suliman do minomongo di Walai’d Sasambayangan dot Agayo: ¹⁵ Iri nopo limput do ponong id suang om linopisan ngai’ nopo do kayu sedar do Libanon, do mantad pod hiri’d siliu om gisom do korikot do hiri’d siling. Nga’ iri nopo siliu om iri i kayu sedar di koubasanan o winonsoi. ¹⁶ Hiri nopod suang di walai om sinapad do kayu sedar o hiri’d ponong id gogok kopio; do poinsondot do hiri’d siliu i sapad om poirikot do hiri’d siling. Om iri nopo bilik diri nga’ rinoitan do Bilik dit Olidang Kopio. Konoruo’ nopoddi om 9 o mito. ¹⁷ Om iri no bilik dit awayaan do mongoi’d hiri’d Bilik dit Olidang Kopio om 18 o mito do konoruo’. ¹⁸ Om iri nopo limput di ponong id suang di walai’ddi om linopisan ngai’ nopo do kayu sedar do Libanon, om gisom dot a’ noddi okito i watu di pinomolimput. Om kinikiran po i lapis diri do pinoiyo-iyo do tua’ do tawadak om tusak do bunga. ¹⁹ Iri nopo Bilik dit Olidang Kopio’ddi, it id gogok kopio di Walai’d Sasambayangan dot Agayo om maan do poiyanan di Kaban do Tumpongo’d TUHAN. ²⁰ - ²² Konoruo’ nopo om kalaabo’ om kasawato’ di bilik diri om 9 ngai’ nopo o mito. Om iri nopo pananaraban do porsombahan om kayu sedar do Libanon do winonsoi. Om iri nopo wawayaan di suangon do mongoi’d hiri’d bilik dit id gogok kopio’ddi om pinolotingan do rantai do tamas. Om oinsanan nopo i ponong id suang di Walai’d Sasambayangan dot Agayo’ddi do nurogupan do tamas; om iri nogi’ i Bilik dot Olidang Kopio om i pananaraban do porsombahan nga’ nurogupan i’ do tamas. ²³ Om pinoiyanan nogi’ do duwo i pinoiyo-iyo do moloikat di roitan do kerub o hiri’d Bilik dit Olidang Kopio’ddi. Iri nopo kerub diri nga’ kayu saitun do winonsoi. Om miagal nopo o kasawato’ di winonsoi’ddi dot 4.4 o mito, ²⁴ - ²⁶ om kogoyoo’, om pinomonsoi nga’ miagal nopo. Duwo goduwo nopo o talad di winonsoi’ddi, do 2.2 o mito do konoruo’ dot iso’ o talad. Om konoruo’ nopo do mantad id tompok di talad di koiso’ om korikot do hiri’d tompok do talad di koduwo om 4.4 o mito. ²⁷ Om iri nopo duwo o winonsoi’ddi nga’ pinitalad do hiri’d suang di Bilik dit Olidang Kopio, om iri nopo talad do sampaping di duwo o winonsoi’ddi om kotopis di limput, om iri no talad do tiso’ om kopitopis do hiri’d tanga’ di bilik. ²⁸ Om nurogupan goduwo nopo do tamas i duwo o winonsoi di koiyo-iyo do moloikat di roitan do kerub diri. ²⁹ Om tongkopo’ nopo do minongikir i limput di ponong id suang di Walai’d Sasambayangan dot Agayo. Iri nopo pinokikir om pinoiyo-iyo do moloikat di roitan do kerub om pinoiyo-iyo do guas do kurma om tusak do bunga do maan do pongillumis. ³⁰ Om iri piya siliu nga’ nurogupan i’ do tamas. ³¹ Om iri nopo wawayaan do sumuang do hiri’d Bilik dot Olidang Kopio om pinadakatan do duwo o totobon di kayu saitun do winonsoi. Iri nopo pinongisan di wawayaan di ponong id sawat om pinalahis o pinomonsoi do hiri’d tanga- tanga’. ³² Om kinikiran goduwo nopo i totobon do pinoiyo-iyo do moloikat di roitan do kerub, om guas do kurma om tusak do bunga. Om nurogupan ngai’ nopo do tamas i totobon di wawayaan om i winonsoi di pinoiyo-iyo do moloikat di roitan do kerub, om i pinokikir do koiyo-iyo do guas do kurma. ³³ Hiri nod wawayaan do sumuang do hiri’d bilik dit id gulu kabantalai, i bilik dit agayo’ddi, om nisanan do boruti do kayu saitun dit apasagi’. ³⁴ Om winansayan i wawayaan do duwo o totobon do kayu sedar di koubasanan o winonsoi, om milo goduwo nopo do polopion i totobon diri. ³⁵ Om kinikiran goduwo nopo i totobon diri do pinoiyo-iyo do moloikat di roitan do kerub, om guas do kurma om tusak do bunga do maan do pongillumis. Om nurogupan ngai’ nopo iri do tamas. ³⁶ Hiri nopod dotimbabaan di Walai’d Sasambayangan dot Agayo’ddi om winansayan do natad. Om iri nopo natad diri om nolig o posorili’. Kowoyo- woyoo’ nopo do pinomonsoi di tolig diri om tolu nopo lapis do watu om salapis no o boruti do kayu sedar do Libanon do polopison. ³⁷ Iri nopo pinoimpahan di walai’ddi om pinowonsoi do tontok di tulan do Sib, i tulan do koduwo, di kaapat do toun di Suliman do momorinta’. ³⁸ Om tontok di tulan do Bul, i tulan do kawalu’ di kohopod om iso’ do toun di Suliman do momorinta’, om kopongo noddi i Walai’d Sasambayangan dot Agayo, do miagal di pomomonsoi di natantu’ mantad. Koloido’ nopo di Suliman do minomonsoi’ddi om turu’ o toun.

¹ Om minomonsoi nogi’ i Suliman do walai dau. Koloido’ nopo dau do minomonsoi’ddi om hopod om tolu o toun. ² - ³ Id suang nopo di walai dau’ddi om winansayan dau do langga’ di rinoitan do ’’Langga’ do Puru’ do Libanon’’. Kogoyo-goyoo’ nopo di langga’ diri om: 44 o mito do konoruo’, om 22 o mito do kalaabo’, om 13.5 o mito do kasawato’. Om haro o tolu rulud do torigi do kayu sedar do Libanon do hiri’d langga’ddi; sonrulud nopo nga’ hopod om limo o torigi om hiri nopod sawat om pinadakatan do kasau do kayu sedar do Libanon. Om i siling do pinonirung di kasau nga’ kayu sedar i’ do Libanon. ⁴ - ⁵ Hiri nopod limput do ponong id gibang om ponong id wanan di bilik diri om kililigaon: tolu o liligaon do hiri’d limput do hiri’d sampaping om tolu kawagu o liligaon do hiri’d limput do tiso’ do poingontok di tolu o liligaon do hiri’d sampaping. Iri nopo pinongisan di wawayaan om i liligaon diri om boruti dit apasagi’. ⁶ Om minomonsoi i Suliman do langga’ do roitan do ’’Langga’ do Torigi’’. Konoruo’ nopo do langga’ddi om 22 o mito, om kalaabo’ no om 13.5 o mito. Id dotimbabaan nopo di langga’ diri om haro o kakilima’ di kitaap om kitorigi. ⁷ Iri no langga’ do suwai om roitan do ’’Langga’ do Tirikohonon’’ om roitan nogi’ do ’’Langga’ do Pomisaraan’’. Iti nopo langga’dti om linopisan ngai’ nopo do kayu sedar do Libanon do mantad pod hiri’d siliu om gisom do korikot do hiri’d kasau. Om hiri nod langga’ddi o tiyonon di Suliman do momisara’. ⁸ Om i tiyon-iyonon di Suliman nga’ iyo nogi’ di langga’ di suwai o pinomonsoi. Om pinawansayan nopoddi om hiri’d dotolikudan di Langga’ do Pomisaraan. Om winansayan pod i Suliman do walai i sawo dau, i tanak di raja’ do Masir, do miagal iddi o pinomonsoi. ⁹ Oinsanan nopo i walai do kohompit i natad dit agayo, do watu dit ongosonong o winonsoi, do mantad pod hiri’d pinoimpahan om gisom do korikot do hiri’d kapanaapan. Om iri nopo watu’ddi om sinodia’ mantad do hiri pod pinongonuan di watu om binabak do tumanud di sukatan; om kinikisan do garagadi’ o miampaping di watu do ponong id suang om ponong id soliwan. ¹⁰ Iri nopo pinoimpahan di walai’ddi om watu dot angagayo di nosodia’ mantad no do hiri pod pinongonuan di watu. Iri nopo watu’ddi om haro tolu om satanga’ o mito do konoruo’ om haro ot apat o mito do konoruo’. ¹¹ Om id sakai nopoddi om pinotimpakan po do watu’d suwai di binabak do tumanud di sukatan. Om lopisai nogiddi do kayu sedar do Libanon. ¹² Iri nopo winonsoi do tolig di natad di walai di raja’ om i natad di ponong id suang di Walai’d Sasambayangan dot Agayo om i kakilima’ do hiri, om watu do tolu o lapis om lopisai nogiddi do sallapis o kayu sedar do Libanon. ¹³ Om ponuhu’ noddi i Raja’ Suliman do tulun do minongoi pomolohou do songulun o kusai, i roitan dot i Huram, do mantad hilo’d bandar do Tirus. Iri nopo tulun diri nga’ oilo kopio do mongikir do tambaga’. ¹⁴ Iri nogi’ i tapa’ dau, i mantad hilo’d Tirus, nga’ mongingikir nogi’ do tambaga’ di poimpasi po iyau. Iri nopo tina’ dau nga’ mantad id payat do Naptali. I Huram nopodti om tukang no kopio dot id suang do karaja’ddi om noubas no tomod do mongikir do tambaga’. Om suhuo’ no iyau di Raja’ Suliman do sumiliu’d boyoon do koinsanai di wonsoyon di haro o tambaga’; om kookunai i’ di Huram iri. ¹⁵ - ²⁰ Om pomonsoi no i Huram do duwo o torigi do tambaga’, do kakawaso’ nopo di torigi’ddi om walu’ o mito, om kogoyoo’ no om 5.3 o mito. Om minomonsoi po iyau do duwo o tulu do pinoulu di duwo o torigi do tambaga’ddi do miirad nopo o kakawaso’ do 2.2 o mito. Hiri nopod dompok ponong id sawat di pinongulu diri om winansayan dau di koiyo-iyo do tusak do bunga bakung do 1.8 o mito do kakawaso’. Om hiri nopod siriba-riba’ di koiyo-iyo do tusak do bunga bakung, i hiri’d kinoimpohon diri, om winansayan dau do pinoiyo-iyo di rantai do rinambo-rambot om winansayan do duwo o rulud di pinoiyo-iyo do tua’ do delima. Om sopiduwo nopo nahatus i winonsoi do pinoiyo-iyo do tua’ do delima do hiri’d duwo o tulu do torigi’ddi. Om oinsanan nopo i pinongillumis diri do tambaga’ do winonsoi. ²¹ - ²² Iri nopo pinongulu di torigi’ddi di pinoiyo-iyo do tusak do bunga bakung om pinotimpak dau di duwo o torigi. Om poudongo’ noddi di Huram i duwo o torigi do tambaga’ddi do hiri’d dotimbabaan di wawayaan di Walai’d Sasambayangan dot Agayo. Iri nopo torigi di ponong hiri’d salatan om pinungaranan dau do Yakin, om iri no torigi di ponong id utara om pinungaranan dau do Buas. Om kopongo noddi i karaja’ddi. ²³ Om pomonsoi po i Huram do tangki’ do tambaga’ dit ourug. Korolomo’ nopoddi om 2.2 o mito, om sukatan no do padarapas di kabang om 4.4 o mito, om kogoyoo’ no do pointutuk om 13.2 o mito. ²⁴ Om pointutuk nopo di tangki’ do ponong id soliwan om kinikiran do duwo o rulud di pinoiyo-iyo do tua’ do tawadak, do pinasandad mantad do mongikir di wonsoyo’ i’ i tangki’ do tambaga’. ²⁵ Om pinoimpahan nopo di tangki’ om hiri’d likud do hopod om duwo o sapi’ do tambaga’ do winonsoi do potoguang ponong id soliwan. Om sorotolu-tolu nopo i sapi’ddi do potoguang dot id iso’ o kohunungon. ²⁶ Kakapalo’ nopo di tangki’ om turu’ nohopod om limo o milimito. Iri nopo kabang di tangki’ om miagal di kabang do sangkir, om posuringa’ do miagal di tusak do bunga bakung di noungkalad no. Orumpos nopo di tangki’ om apat nohopod noribu lito do waig. ²⁷ Om minomonsoi nogi’ i Huram do hopod o korita’-kuda’ do tambaga’ do winonsoi; do 1.8 mito do konoruo’, om 1.8 mito do kalaabo’, om 1.3 mito o kasawato’. ²⁸ Iri nopo korita’-kuda’ddi om papan dit abasagi’ o winonsoi do pinodokot dot id boruti di nowonsoi no do maan do padakatan. ²⁹ Iri nopo papan diri om kinikiran do pinoiyo-iyo do singa, om sapi’, om pinoiyo-iyo do moloikat di roitan do kerub; om hiri nod boruti di pinadakatan di papan, do hiri’d sawat om hiri’d siriba’ di kinikiran di pinoiyo-iyo do singa om sapi’, om pinadakatan di winonsoi do pinoiyo-iyo do tusak do bunga di sinulu. ³⁰ Om iri nopo piro-piro korita’-kuda’ om saraapatan do ruda’ do tambaga’ do winonsoi, om i pinawansayan di ruda’ nga’ tambaga’ i’. Hiri nopod apat o linsuk di korita’-kuda’ om winansayan do ponukod di tambaga’ do winonsoi, do ponukod di poiyanan do luping, om i ponukod nga’ pinadakatan i’ di winonsoi do pinoiyo-iyo do tusak do bunga di sinulu do maan do pongillumis. ³¹ Hiri nopod sakai di ponukod diri om haro o winonsoi do poingurug do porusadan do luping. Iri nopo ponukod diri om 44 sontimito do posoibau di papan di korita’-kuda’ om 22 sontimito do poirusod di korita’-kuda’. Om kinikiran o pointutuk di porusadan diri. ³² Kasawato’ nopo di ruda’ om onom nohopod om onom o sontimito. Iri nopo ruda’ddi om pinowonsoi do hiri’d siriba-riba’ di papan di pinodokot. Iri nopo pinawansayan di ruda’ om pasagalai i’ di korita’-kuda’. ³³ Iri nopo ruda’ di korita’-kuda’ddi om miagal nopo do ruda’ di korita’- kuda’ do don sumasangod; iri pinawansayan di ruda’, om i riim, om i sipuk om i buulbiring nga’ tambaga’ ngai’ i’ do winonsoi. ³⁴ Om hiri nopod siriba’ dit apat o linsuk do pointikid-tikid di korita’- kuda’ om haro ot apat o ponukod di pasagalai di korita’-kuda’ o pinomonsoi. ³⁵ Om pointutuk nopo di ponong id sawat di korita’-kuda’ om nisanan do duwo nohopod om duwo sontimito o kalaabo’. Iri nopo pinonukod diri om i papan di pinodokot di korita’-kuda’ om pasagalai i’ di korita’-kuda’. ³⁶ Iri nopo pinonukod om i papan di pinodokot om kinikiran ngai’ nopo do pinoiyo-iyo do moloikat di roitan do kerub, om pinoiyo-iyo do singa om guas do kurma, do hinonggo nopo i haro o pokikiran. Om notutuk ngai’ nopo iti di winonsoi do pinoiyo-iyo do tusak do bunga di sinulu. ³⁷ Om iyo noddi o pinomonsoi dau di korita’-kuda’, tu’ oiyo nopo o pinomonsoi om oiyo o kogoyo-goyoo’. ³⁸ Om minomonsoi nogi’ i Huram do hopod o luping dot angagayo do soroisaan nopo i korita’-kuda’ddi. Om oiyo nopo kogoyoo’ do sukatan do padarapas di kabang di luping do 1.8 o mito, om walu’ nahatus o lito do waig do korumpos. ³⁹ Om poiliho’ no di Huram o limo di korita’-kuda’ddi do ponong id salatan di Walai’d Sasambayangan dot Agayo, om limo o ponong id utara. Om iri no tangki’ do tambaga’ om pinoiliu do hiri’d linsuk ponong id salatan do ponong id koulayon. ⁴⁰ - ⁴⁵ Om minomonsoi nogi’ i Huram do piro-piro o kuali’, om pononduk, om mangkuk. Om kopongo ngai’ noddi dau i karaja’ dau dot id di Raja’ Suliman do hirion id Walai’d Sasambayangan dot Agayo. Iti ngai’ no i winonsoi dau: Duwo o torigi dit agayo Duwo o tulu do pongulu di duwo o torigi I koiyo-iyo do rantai di rinambo-rambot do hiri’d tulu di pinoulu di torigi Apat nahatus o koiyo-iyo do tua’ do delima do tambaga’ do winonsoi do pinorulud do duwo o rulud, do sarahatus-hatus o koiyo-iyo do tua’ do delima do pinodokot do pointutuk di koiyo-iyo do rantai di rinambo-rambot do hiri’d duwo o tulu di pinoulu di torigi Hopod o korita’-kuda’ Hopod o luping dot agayo Tangki’ do tambaga’ Hopod om duwo sapi’ do tontoluhan di tambaga’ do winonsoi do poimpahan di tangki’ Piro-piro o kuali’, om pononduk om mangkuk Koinsanai di pakakas do tambaga’ di hirion id Walai’d Sasambayangan dot Agayo’ddi om kinisasan ngai’ nopo di Huram do gisom dot ongokolong o kokitanan do tumanud di pinonuhuan di Raja’ Suliman. ⁴⁶ Om pinonuhuan nopo di raja’ dot iyonon do momonsoi di pakakas diri om hiri’d podsusupuan dit id piolitan do Sukot om Saritan, i hilo’d Rantai do Yordan. ⁴⁷ Om a’ i’ di Suliman insan kotimbang i pakakas do tambaga’ddi tu’ adalaan no kopio kogumu’. Om gowoi poddi om a’ no noilaan o winagat diri. ⁴⁸ - ⁵⁰ Om minonuhu’ nogi’ i Suliman do momonsoi di pakakas do tamas o wonsoyon do hirion id Walai’d Sasambayangan dot Agayo. Om iti no ngai’ iri: Pananaraban do porsombahan Mija’ do poiyanan do roti di patahakon dot id Kinorohingan Hopod o potimpakan do lampung dit id dotimbabaan di Bilik dit Olidang Kopio, do limo o mija’ do ponong id salatan om limo o ponong id utara Bunga Lampung Sanggip Sangkir I Pomimisok do lampung Mangkuk Piring do poiyanan do kominyan Talam do poiyanan do popou Tontolingo di totobon di Bilik dot Olidang Kopio om i totobon di ponong id soliwan di Walai’d Sasambayangan dot Agayo. ⁵¹ Om kopongo ngai’ poddi di Raja’ Suliman i karaja’ do hiri’d Walai’d Sasambayangan dot Agayo om poopio’ nogi’ dau do hiri’d Bilik di poopian do konunu-nunuan di Walai’d Sasambayangan dot Agayo i pirok, om tamas, om i konunu-nunuan do suwai di pinatahak di Daud, i tapa’ dau, dot id TUHAN.

¹ Om lohowo’ ngai’ noddi di Raja’ Suliman i boyoon do payat om pinuruan do sompiiyon dot Israil do mongoi solowot dau do hilo’d Yorusalim, om oongoi indo diyolo’ i Kaban do Tumpongo’d TUHAN do mantad hilo’d Sion, i Bandar di Daud, om pokoyoon nondo do hiri’d Walai’d Sasambayangan dot Agayo. ² Om timung ngai’ nopo iyolo’ do tontok di Tadau’d Agayo do Kinuhub-Kuhub, do koontok di tulan dot Itanim. ³ Om kotimung ngai’ poddi i boyoon om kakato’ nogiddi di piro-piro ot imam i Kaban do Tumpongo ⁴ om saano’ no do pinakaa do hiri’d Walai’d Sasambayangan dot Agayo. Om pinawaliu nogi’ di tulun do Liwi i Kiim do TUHAN om koinsanai di pakakas do hiri, do pinosuang do hiri’d Walai’d Sasambayangan dot Agayo. ⁵ Om timung noddi i Raja’ Suliman om koinsanai di tulun dot Israil do hiri’d dotimbabaan di Kaban do Tumpongo om papatahak no iyolo’ do dumba’ om sapi’ dot ogumu’ kopio gisom dot a’ no ointob-intob o kogumuo’. ⁶ Om posuango’ nogiddi di piro-piro ot imam i Kaban do Tumpongo do hiri’d Walai’d Sasambayangan dot Agayo om poiliho’ no do hiri’d Bilik dit Olidang Kopio do hiri’d sahau di winonsoi di koiyo-iyo do moloikat di roitan do kerub. ⁷ Om notirung diri di talad di winonsoi di koiyo-iyo do moloikat do roitan do kerub i Kaban diri om i kayu di pinangantayang, tu’ poungkalad i talad di winonsoi’ddi. ⁸ Iri nopo kayu di pinangantayang diri om anaru kopio gisom dot iri no i tulun do poingkakat dot id hapak kopio di Bilik dot Olidang Kopio o kokito di tompok di kayu do pinangantayang. (Hilo’ kasai’ po i kayu do pinangantayang diri do gisom do baino’.) ⁹ Om suang nopo di Kaban do Tumpongo om aiso’ i’ o suwai ko’ i duwo o kaping do watu di pinosuang di Musa do hiri di hilo’ pod Nuluhon do Sinai, do tontok di minomonsoi o TUHAN do tumpongo dot id tulun dot Israil di hilo’ iyolo’d tindalanon do mantad id Masir. ¹⁰ Om maha’ di sumoliwan nogi’ i piro-piro ot imam do mantad hiri’d Walai’d Sasambayangan dot Agayo om sigog id koponu’ do haun i Walai’d Sasambayangan dot Agayo ¹¹ di mogulinau tomod om kosorong kopio, tu’ iri no o kagayaan do TUHAN. Om a’ noddi i piro-piro ot imam diri kosuang kawagu do mongoi paganu-anu di buruon diyolo’. ¹² Om sambayang noddi i Suliman, ’’Iya’ i’, oi TUHAN, i pinopoiyon dilo tadau do hilo’d tawan, nga’ pinokouhang nu i’ do miyon do hilo’d pituongon do haun. ¹³ Nokopomonsoi oku noddi do Walai’d Sasambayangan dot Agayo, dit olumis kopio do tiyonon nu do gisom dot alaid,’’ ka. ¹⁴ Om daamot di tulun do songingkakat do hiri, om toguang no i Raja’ Suliman do tuminimbaba’ diyolo’, om pokionuwai no dau iyolo’d Kinorohingan do barakat. ¹⁵ Boros ka dau, ’’Royohon no o TUHAN, i Kinorohingan dot Israil! Tu’ nabayaan no dau i batos dau dot id di Daud, i tapa’ ku, do poingkaa, ¹⁶ ’Mantad po di pinosoliwan ku i’ o tulun ku do mantad hilo’d Masir, om aiso’ i’ o bandar do hiti’d pomogunan dot Israil do pinili’ ku do pamansayan do Walai’d Sasambayangan dot Agayo dot iyonon do sumambayang dot id doho’. Nga’ pinili’ ku i’ iya’, oi Daud, do momorinta’ do tulun ku,’ ka,’’ ka dau. ¹⁷ Om boros ka kawagu di Suliman, ’’Nokopomusorou no daa i Daud, i tapa’ ku do momonsoi do Walai’d Sasambayangan dot Agayo dot iyonon do sumambayang dot id TUHAN, i Kinorohingan dot Israil. ¹⁸ Nga’ boros kad TUHAN dot id dau, ’Osonong nogi’ kopio o korohian nu’ddi do momonsoi do Walai’d Sasambayangan dot Agayo do tiyonon ku, ¹⁹ nga’ okon i’ ko’ iya’ o momonsoi di walai’ddi, suwai ko’ i tanak nu,’ ka dau. ²⁰ Om nabayaan noddi do TUHAN i batos dau. Nosiliu oku noddi do raja’ dot Israil do suminowoli di tapa’ ku, om nowonsoi ku no i Walai’d Sasambayangan dot Agayo, i tiyonon do sumambayang dot id TUHAN, i Kinorohingan dot Israil. ²¹ Om haro nogi’ o tiyonon do nokosodia’ ku do hiri’d Walai’d Sasambayangan dot Agayo do poiyanan di Kaban do Tumpongo, i pinosuangan di duwo kaping do watu, i pinotulisan di Tumpongo’d TUHAN dot id taki-aki toko’ do tontok di pinosoliwan dau iyolo’ do mantad hilo’d Masir,’’ ka dau. ²² Om ongoi noddi i Suliman ingkakat do hiri’d dotimbabaan di pananaraban do porsombahan dot antang-antangan do koinsanai di tulun dot Israil. Om poinsawato’ goduwo no dau o longon dau, ²³ om sambayang no do poingkaa, ’’Oi TUHAN, i Kinorohingan dot Israil! Aiso’ no o Kinorohingan do koiyo diya’ do hilo’d sawat ko’ hiti pod pomogunan! Binayaan nu i’ i tumpongo nu dot id tulun nu om pointalangan nu iyolo’ di kosianan nu do tontok dit iso-iso’ kopio o ginawo diyolo’ do mumboyo’ diya’. ²⁴ Binayaan nu i’ i batos nu dot id di Daud, i tapa’ ku; om baino’ nopoddi, om nowonsoi ngai’ nu no o koinsanai di nokoboros nu. ²⁵ Om baino’ nodti, oi TUHAN, i Kinorohingan dot Israil, om pokionuon ku do bayaanon ngai’ nu i batos nu di koduwo dot id tapa’ ku. ²⁶ Iyo nopoddi, oi TUHAN, i Kinorohingan dot Israil, om wonsoyo’ ngai’ no o koinsanai di nakabatos nu di tapa’ ku, i Daud, i susuhuon nu’ddi. ²⁷ Nga’ milo ko i’ tuu do mundorong do hiti’d pomogunan? Tu’ oinsanan piya ilo tawan nga’ a’ nu i’ kabagal! Om okuro-kuro nogindo ilo Walai’d Sasambayangan dot Agayo di winonsoi ku! ²⁸ Nga’ pokinongoho’ no daa o sambayang ku, oi TUHAN, i Kinorohingan ku. Om patahako’ no iti pokionuon ku do tadau’d baino’. ²⁹ Intirungai no iti Walai’d Sasambayangan dot Agayo do tadau om totuong, i pinili’ nu dot iyonon nu do tontok di sumambayang oku om i tulun nu do potimbaba’ diti walai’dti. ³⁰ Om pokinongohon no o sambayang ku om sambayang dilo tulun nu do soira’ nopo do sumambayang iyolo’ do potimbaba’ diti walai. Om maha’ daa om pokinongohon nu iyahai om ompunan nu iyahai do mantad hino’d kinoiyonon nu do hino’d surga. ³¹ Om soira’ nopo do haro o tulun do tondoson do nokowonsoi do sala’ dot id tulun do suwai, om it angatan do hiti’d dotimbabaan do pananaraban do porsombahan nu do hiti’d Walai’d Sasambayangan dot Agayo diti, do mongoi sumpa’ dot aiso’ o sala’ dau, ³² om pokinongohon no i tulun diri, oi TUHAN, do mantad hino’d surga, om butusan no i susuhuon nu. Om hukuman no i tulun di kisala’ om poiduwon no i tulun dit aiso’ o sala’. ³³ Om soira’ nopo dot aala’ o tulun dot Israil do pisangod diyolo’, tu’ obungou di dusa diyolo’, om mokitulung nopondo iyolo’ diya’ om rumikot do hiti’d Walai’d Sasambayangan dot Agayo diti do mongoi sambayang dot id diya’ do mikuwo’d osiriba’ o ginawo do mokiampun diya’, ³⁴ om maha’ daa om pokinongohon nu’ri do hino’d surga. Om ompunan no o dusa di tulun nu, om pogulion no iyolo’ kawagu do hilo’d pomogunan di nakatahak nu di taki-aki diyolo’. ³⁵ Om soira’ nopo dot a’ nu parasamon tu’ i nokopomonsoi’d dusa dot id diya’ i tulun nu ot a’ nu kaparasaman, om kumorologo nopondo iyolo’ di dusa diyolo’ om tumimbaba’ diti Walai’d Sasambayangan dot Agayo om sumambayang do mikuwo’d osiriba’ o ginawo, ³⁶ om pokinongohon nori do hino’d surga. Ompunan no o dusa di tulun dot Israil om i dusa di raja’ diyolo’. Tudukan no iyolo’ do momonsoi dit otopot. Om parasamon nogindo o hiti’d pomogunan nu’dti, oi TUHAN, i pomogunan do pinatahak nu dot id tulun nu do sumiliu do diyolo’d songonuon do gisom dot alaid. ³⁷ Om soira’ nopo do mononglous ko’ madsakit, ko’ angaraag o tanom-tanom dot oontok di tongus dot alasu’, ko’ akanon do godu, ko’ di songodon do pisangod o tulun nu, ko’ oontok do toruo-ruol, ³⁸ om pokinongohon no o sambayang diyolo’. Om ondung haro ot id pogiolitan do tulun dot Israil di tumongob om sumambayang nondo dot id diya’ do mikuwo’d poinsawat do longon do potimbaba’ diti Walai’d Sasambayangan dot Agayo diti ³⁹ om pokinongohon no o pokionuon diyolo’ do mantad hino’d tiyonon nu do hino’d surga. Om ompunan no iyolo’ om uhupan no iyolo’. Tu’ iya’ no o koilo dit id suang do ginawo’d tulun. Om wonsoyo’ no dot id pointikid-tikid do tulun it apatut do wonsoyon dot id diyolo’, ⁴⁰ om oronok i’ om otorodok i tulun nu do mumboyo’ diya’ do solinaid diyolo’ do poundorong do hiti’d pomogunan di nakatahak nu di taki-aki dahai. ⁴¹ - ⁴² Om soira’ nopo do haro o bansa’d suwai di hilo’d sodu’ do korongou do kagayaan nu om koimayaan di nowonsoi nu, om rumikot nondo do hiti’d pomogunan diti do mongoi tuku’ dot id diya’ om sumambayang do potimbaba’ diti Walai’d Sasambayangan dot Agayo ⁴³ om pokinongohon no iyau do mantad hino’d tiyonon nu do hino’d surga om patahakon no i pokionuon dau. Om oinsanan indo o tulun do hiti’d pomogunan do kotutun diya’ om otorodok do mumboyo’ diya’ do miagal do tulun nu, i bansa’ dot Israil. Om koilo indo iyolo’ dot iti nopo walai di winonsoi ku om tiyonon do sumambayang dot id diya’. ⁴⁴ Om soira’ nopo do suhuon nu o tulun nu do mongoi sangod do pisangod diyolo’, om hinonggo nopondo iyolo’, nga’ tumimbaba’ i’ iyolo’ diti bandar do nopili’ nu om sumambayang do potimbaba’ diti walai do winonsoi ku do tiyonon nu, ⁴⁵ om pokinongohon no o sambayang diyolo’ do hino’d surga om onuan no iyolo’ do kamanangan. ⁴⁶ Om soira’ nopo do momonsoi’d dusa o tulun nu, gisom do songulun po nga’ aiso’ no ot aiso’ o dusa, om pologoson nu nondo iyolo’ dot aala’ do pisangod tu’ adalaan ko no kopio’d otogod, om atanggayan nondo iyolo’ do pisangod do kumaa id pomogunan do suwai, di hilo’d sodu’ ko’ it id somok, ⁴⁷ om pokinongohon no o sambayang diyolo’. Ondung rumologo iyolo’ om sumambayang iyolo’ dot id diya’, om magaku iyolo’ di dusa om i kararaat diyolo’ do potimbaba’ do pomogunan diti om pokinongohon no i sambayang diyolo’, oi TUHAN. ⁴⁸ Ondung iso-iso’ kopio o ginawo diyolo’ do rumologo do daamot diyolo’ do hiri’d pomogunan diri om sumambayang dot id diya’ do potimbaba’ diti pomogunan di pinatahak nu di taki-aki dahai, om potimbaba’ diti bandar di nopili’ nu, om potimbaba’ diti walai do tiyonon do sumambayang di winonsoi ku diya’, ⁴⁹ om pokinongohon no o sambayang diyolo’, do mantad hino’d tiyonon nu do hino’d surga, om kosianai no diyolo’. ⁵⁰ Ompunai ngai’ no o dusa om karaaton diyolo’ dot id diya’, om pologoso’ no dot osonong i pisangod diyolo’ dot id diyolo’. ⁵¹ Iyolo’ nopo om tulun di songonuon nu, i pinosoliwan nu do mantad id pomogunan do Masir, i kinoiyonon do miagal do tapui do naraka. ⁵² Oi TUHAN, i Kinorohingan, piantangan no kasai’ o tulun dot Israil, i tulun nu, om i raja’ diyolo’. Om korohiai no do mokinongou do sambayang diyolo’ do pointikid-tikid do lumohou iyolo’ do mokitulung diya’. ⁵³ Iya’ no o minomili’ diyolo’ dot id pogialatan do koinsanai do bansa’ do silihon do diya’d tulun, do miagal di nokoboros nu dot id di Musa, i susuhuon nu, do tontok di pinosoliwan nu i’ iyolo’ do mantad hilo’d Masir,’’ ka dau. ⁵⁴ Om iyo noddi i Suliman do suminambayang do mikuwo’d minotud dot id dotimbabaan di pananaraban do porsombahan, om poinsawat o longon dau. Om ingkakat noddi iyau, ⁵⁵ om boro-boros no dot opuhod do mokianu’d Kinorohingan do barakat do patahakon do toinsanan di tulun di pointimung do hiri. Boros ka dau, ⁵⁶ ’’Royohon no o TUHAN i minanahak do tulun dau do kosimbayanan do miagal di nakabatos mantad dau do pinolombus di Musa, i susuhuon dau. Tu’ oinsanan nopo i batos diri dot osonong om nangabayaan ngai’ dau. ⁵⁷ Om maha’ daa om woyoon toko’ do TUHAN, i Kinorohingan toko’, do miagal di minomoyo’ iyau di taki-aki toko’, maha’ daa om a’ toko’ dau tongkiadan. ⁵⁸ Om maha’ daa om silihon toko’ dau do tulun dit ongotorodok dot id dau, om i momonsoi kasai’ di korohian dau, om tumanud do koinsanai dit oturan om ponuhuan di pinoboros dau di taki-aki toko’. ⁵⁹ Om maha’ daa om osorou do TUHAN, i Kinorohingan toko’, o koinsanai di sambayang om i pinokianu ku dot id dau. Om maha’ daa om barakatan kasai’ dau o tulun dot Israil om i raja’ diyolo’ do miontok di pokionuon diyolo’ do monikid tadau. ⁶⁰ Om koilo indo o koinsanai di bansa’ do hiti’d pomogunan do TUHAN noo o Kinorohingan, om aiso’ no o suwai. ⁶¹ Om tumorodok kou no dot id TUHAN, i Kinorohingan toko’, iyokoyu i tulun di songonuon do TUHAN, om tumanud do koinsanai dit oturan om ponuhuan dau do miagal diti wonsoyon dokoyu do baino’,’’ ka dau. ⁶² Om patahak noddi i Suliman om koinsanai di tulun do pointimung do hiri do porsombahan di sinumbali’ dot id TUHAN. ⁶³ Pinapatahak i Suliman do 22,000 o tinan do sapi’ om 120,000 o tinan do dumba’ do maan do porsombahan do piombolutan. Om iyo noddi i raja’ om koinsanai di rayat do pinapatahak di Walai’d Sasambayangan dot id Kinorohingan. ⁶⁴ Om tontok nogi’ do tadau’ddi do sinambayangan dau i kakilima’, i hiri’d gulu kobontol di Walai’d Sasambayangan dot Agayo’ddi. Om hiri no iyau id kakilima’ do pinapatahak do porsombahan do sorobon, om porsombahan do gandum, om lunok do tayam-tayam do maan do porsombahan do piombolutan. Hiri ngai’ nopo o pinatahakan dau’ddi tu’ okoro’ i’ kopio i pananaraban do porsombahan di tambaga’ do winonsoi, do poiyanan do koinsanai di porsombahan diri. ⁶⁵ Om hiri nogi’d Walai do Sasambayangan dot Agayo’ddi i Suliman om koinsanai di tulun dot Israil do pinapaharo do Tadau dot Agayo do Kinuhub-Kuhub, do solinaid do turu’ o tadau. Om ogumu’ no kopio o tulun do ruminikot; mantad pod hilo’d Ralan do Hamat di ponong id utara, om gisom do hilo’d piwolitan do Masir di hilo’d salatan. ⁶⁶ Om kawalu’ poddi do tadau, om suhuo’ ngai’ nogi’ di Suliman i tulun do muli’. Om ongotood tomod diri iyolo’ do minuli’, om minamarayou iyolo’ di raja’ do koinsanai di barakat di pinatahak do TUHAN dot id di Daud, i susuhuon dau om id koinsanai di tulun dau, i bansa’ dot Israil o kinapamarayahan.

¹ Om kongopongo poddi di Suliman do mamaal i Walai’d Sasambayangan dot Agayo om i walai dau di don raja’ om koinsanai di nosorou mantad dau do wonsoyon, ² om intalang no kawagu o TUHAN dot id di Suliman do miagal di nosiliu di hilo’d Gibion. ³ Om boros kad TUHAN dot id di Suliman, ’’Norongou ku no i sambayang nu. Om korohian ku i’ ilo walai di winonsoi nu do tiyonon do sumambayang dot id doho’ do gisom dot alaid. Piantangan ku indo om piintirungan ku o kinoiyonon diti. ⁴ Ondung sumambayang ko dot id doho’ do mikuwo’d otulid om iso-iso’ kopio o ginawo do miagal di Daud, i tapa’ nu om tumanud ko dit oturan ku om i ponuhuan ku diya’, ⁵ om bayaanon ngai’ ku indo i nakabatos ku dot id di Daud, i tapa’ nu, do haro kasai’ nopondo o sinakagon dau dot osiliu’d raja’ do momorinta’ dot Israil. ⁶ Nga’ ondung tolikudan oku dokoyu, om i sinakagon nu nga’ tumolikud doho’, om a’ kou mumboyo’ dit oturan ku om i ponuhuan ku, om tumuku’ kou nogindo dot id ponokokinorohingan do suwai, ⁷ om uyungon ku nondo o tulun dot Israil do mantad hiti’d pomogunan di nakatahak ku diyolo’. Om tongkiadan ku iti walai di tinantu’ ku do tiyonon do sumambayang dot id doho’. Om intingayamon nondo om irak-irakan o tulun dot Israil do hinonggo nopo iyolo’. ⁸ Om pogun pondo iti Walai’d Sasambayangan dot Agayo gisom dot isai nopo o tulun do katalib do hiti nga’ kotigowo ngai’ nopo om osuayan. Om muhot nondo iyolo’ do poingkaa, ’Nokuro tu’ iyo’dti o winonsoi do TUHAN dot id pomogunan diti om id Walai’d Sasambayangan diti?’ kando diyolo’. ⁹ Om haro nondo o tulun do sumimbar do poingkaa, ’Kinokuwaan nopoddi om tuminongkiad giya iyolo’d TUHAN, i Kinorohingan diyolo’, i minomoyo’ di taki- aki diyolo’ do suminoliwan do mantad hilo’d Masir. Om tuminuku’ iyolo’ dot id ponokokinorohingan do suwai, gowoi poddi om pinorikot do TUHAN iti kosusaan dot id diyolo’’ kando diyolo’,’’ kad Kinorohingan. ¹⁰ Om koloido’ nopo di Suliman do minomongo di Walai’d Sasambayangan dot Agayo om i walai do raja’ nga’ duwo nohopod o toun. ¹¹ Om nonuan di Hiram i raja’ do Tirus, i Suliman do kayu sedar do Libanon om kayu sedar di koubasanan, om tamas do pinomonsoi ngai’ di walai. Om kopongo ngai’ poddi iri, om onuwai noddi di Suliman i Hiram do duwo nohopod o bandar do hilo’d watas do Galilia. ¹² Om ngoyo’ no daa di Hiram antangai iri nga’ a iddi iyau orohian di pinatahak diri. ¹³ Om boros ka dau dot id di Suliman, ’’Oi tobpinai ku, iyo pama’dti o bandar do patahakon nu doho’?’’ ka. Om gisom do baino’ nga’ pungaranan kasai’ po o watas diri do Kabul. ¹⁴ Koinsanai nopo do tamas do nakatahak di Hiram dot id di Suliman nga’ lobi id apat noribu o kilogram do kawagato’. ¹⁵ Sinansagan ngai’ di Raja’ Suliman i tulun do minomonsoi di Walai’d Sasambayangan dot Agayo om i walai do raja’, om i tolig di bandar om minonimbun do tana’ do ponong hiri’d salatan di bandar. Om iyo iddi o ralan dau do pinopoingkakat do bandar do Hasor, Mogido om Gisir. ¹⁶ (Bandar nopo do Gisir om i nongoi di raja’ do Masir songodo’ di gulu po gisom do naala’ dau iri, om patayo’ ngai’ nopo dau i tulun do hiri om tinutudan dau i bandar. Om popuhawango’ noddi dau i bandar diri di tanak dau’d tondu’ do tontok di minikawin iyolo’ di Suliman. ¹⁷ Om wonsoyo’ no kawagu di Suliman i bandar diri.) Om minononsog i’ i Suliman do tulun do minomonsoi kawagu do Bait-Horon di ponong id sawa’, ¹⁸ om Baalat, om Tamar, i hilo’d tana’ do kowotuan do Yohuda, ¹⁹ om i piro-piro o bandar do poiyanan do kaakan-akanan dau, om i piro-piro o bandar do poopian dau do kuda’ om korita’-kuda’ do don sumasangod di dong raja’, om koinsanai di ponuhuan dau’d momonsoi do hilo’d Yorusalim, om hilo’d Libanon, om hinonggo nopo do hiri’d pomorintaan dau do miagal di nosorou mantad dau do wonsoyon dau. ²⁰ - ²¹ Iri nopo i sinansagan dau do kumaraja’ nga’ i tulun do Kanaan dit a’ di tulun dot Israil pinatai dit ongoyo’ i’ diyolo’ iyono’ o pomogunan diri. Iyolo’ nopo nga’ tulun dot Amori, Hit, Poris, Howi om Yobus, i notilombus do nosiliu do turipon o sinakagon diyolo’ do gisom do baino’. ²² Ongosongulun piya di tulun dot Israil nga’ aiso’ i’ o siniliu di Suliman do turipon. Iyolo’ nopo nga’ siniliu dau do soudor, om pagawai, om boyoon do soudor, om popongigiton di korita’-kuda’, om soudor dit ongkikuda’. ²³ Om limo nahatus om limo nohopod o tulun do sinuhu’ dau do miontong di turipon di sansagan do kumaraja’ do momonsoi ngai’ di walai do wonsoyon di Suliman. ²⁴ Iri nopo tana’ di ponong id koulayon do mantad hiri’d bandar nga’ tinimbunan di Suliman di nokoundaliu i sawo dau, i tanak di raja’ do Masir do mantad hilo’d Bandar di Daud do minongoi do hiri’d walai do raja’ di winonsoi di Suliman dot iyonon dau. ²⁵ Om intolu do sontoun do papatahak i Suliman do porsombahan di sorobon om porsombahan do piombolutan do hiri’d pananaraban do porsombahan di winonsoi dau do maan do don TUHAN. Om modtutud nogi’ iyau do kominyan do maan do don TUHAN. Iyo noddi i Suliman do minomongo di Walai’d Sasambayangan dot Agayo. ²⁶ Om pomonsoi no i Suliman do kapal do rahat do maan di soudor dau do hilo’d rahat, i hilo’d Ision-Gibir, i hilo’d somok dot Ilat, it id tisan do Suok dot Akaba, it id watas dot Idom. ²⁷ Om minonuhu’ nogi’ i Hiram do piro-piro o tulun dau dit ongoilo do papamanau do kapal do rahat do moyo’ di tulun di Suliman do papamanau di kapal do rahat. ²⁸ Om pakayaai no diyolo’ do hilo’d Opir, om hilo’ no o nangayan diyolo’ do hopod om apat noribu o kilogram do kawagato’ do tamas do pinatahak diyolo’ di Suliman.

¹ Hilo’ nopod Siba om tondu’ o raja’ diyolo’. Om nokorongou no i raja’ddi do kobontugo’ di Suliman. Om pakayaai no dau do hilo’d Yorusalim do mongoi pogumbal di Suliman do piro-piro o tuhoton dit angaralom. ² Om pinapatanud nogi’ iyau do tulun dot ogumu’, om unta di ginandaran do rampa om watu dot olumis dit agayo o gatang, om tamas dit ogumu’ kopio. Om kosolowot poddi iyau di Suliman om uhoto’ no dau iyau do koinsanai di tuhoton dit osorou-sorou dau. ³ Om nosimbar ngai’ nopo di Suliman i tuhoton diri, om aiso’ i’ o tiso’ dot adalaan karalom dot id di Suliman. ⁴ Om koilo nogiddi kopio i raja’ do tondu’ do Siba do toilaan di Suliman. Om nokito nogi’ ngai’ dau it id suang di walai di Suliman, ⁵ om kowoyo-woyoo’ di pagawai do kumaraja’ do hiri’d walai do raja’, om kowoyo-woyoo’ di susuhuon do modsurung, om i pakayan diyolo’ dot oiyo nopo, om i taakanon do posurungon diyolo’, om iri ngai’ i bilik dit iyonon diyolo’. Om nokokito nogi’ iyau di porsombahan di sumbolion di patahakon di Suliman do hiri’d Walai’d Sasambayangan dot Agayo. Om oimayaan tomod diri om olumisan tomod i raja’ do Siba do nokokito ngai’ddi. ⁶ Om boros ka dau dot id di Suliman, ’’Otopot no kopio i norongou ku do hilo’d pomogunan ku do pasal diya’ om pasal do toilaan nu, oi Tuan! ⁷ Nga’ korikot oku poddi do minongoi kopio intong, om kotumbayaai oku nogi’ kopio. Om iri no i norongou ku om a’ po kopintanga’ diti nokito ku. Ogumu’ po ko’ i norongou ku o kakayao’ nu om opintar ko ko’ i norongou ku, oi Tuan. ⁸ Nongkoundar no kopio o koinsanai di sawo nu! Om ongolumaag no ngai’ i pagawai nu dit id doros nu tu’ korongou kasai’ di ponudukan nu dit angaralom! ⁹ Royohon no o TUHAN, i Kinorohingan nu. Pinointalang dau dot asanangan iyau diya’ tu’ siniliu ko i’ dau do raja’ dot Israil. Tu’ mompus-ompus i’ o kosianan dau dot id tulun dot Israil, om iri no o kinopomilian dau diya’ do raja’ diyolo’ om milo ko i’ do popogirot dot oturan om it otulid,’’ ka dau. ¹⁰ Om patahako’ no di raja’ do tondu’ do mantad hilo’d Siba dot id di Suliman o koinsanai di pomuhawang do nigitan dau do mantad hilo’d pomogunan dau. Iri nopo nga’ apat noribu kilogram do tamas, om ogumu’ po o rampa om watu dit olumis dit agayo o gatang. Iri nopo i rampa di pinatahak di raja’d Siba diri nga’ ogumu’ no kopio ko’ i naanu di Suliman di maso do nakatalib, om a’ noddi iyau nokoumbal do nakaanu do rampa do miagal diri kogumu’ do mantad diri. ¹¹ (Om iri ngai’ i kapal do rahat di Hiram nga’ pinapaatod nogi’ do tamas do mantad hilo’d Opir do patahakon di Suliman, om minigit po iyolo’ do kayu cendana. ¹² Om iri nopo kayu’ddi nga’ numaan di Suliman do tolig di kakilima’ di Walai’d Sasambayangan dot Agayo om i kakilima’ di walai’d raja’, om winonsoi nogi’ do tuunion, do kecapi om gambus, do maan di popouni do tuunion. Iri nopo nga’ kayu cendana dit osonong no kopio di noumbalan do pinaatod do hilo’d Israil. Mantad poddi om a’ no nokoumbal o tulun do nokokito do kayu do miagal diri kosonong.) ¹³ Om iri no i raja’ do tondu’ do Siba diri, om nonuan di Suliman do koinsanai di pinokianu dau, do suwai mantad ko’ i koubasanan dau do popuhawang. Om uli’ noddi i raja’ do tondu’ddi do hilo’d pomogunan do Siba do mogiwoyo-woyo’ di tulun dau di tuminanud dau. ¹⁴ - ¹⁵ Om suwai nopo ko’ i sukai di bayaran di mongingindapu’ om i kountungan do mantad id pongindopuan, om i bayaran di piro-piro o raja’ dot Arab om i gobunor do koinsanai di watas dot Israil, om kaanu po i Raja’ Suliman dot osomok no do duwo nohopod om tolu noribu kilogram do tamas do pointikid-tikid do toun. ¹⁶ Minomonsoi nogi’ i Suliman do duwo nahatus o kolid dit agayo, i nurogupan ngai’ do tamas do haro i’ doti’ o turu’ o kilogram do tamas do pinonguragup dot iso’ di kolid. ¹⁷ Om minomonsoi po iyau do tolu nahatus o kolid dit ongokooro’ do nurogupan do tamas, do haro i’ doti’ o duwo kilogram do tamas do pinonguragup do tiso’ di kolid. Om poopio’ ngai’ no dau i kolid diri do hiri’d langga’ do roitan do Langga’ do Puru’ do Libanon. ¹⁸ Om minomonsoi nogi’ iyau dot iso’ o tirikohonon dot agayo di don raja’. Om iri nopo nga’ nurogupan do lamai om tamas dit osonong kopio. ¹⁹ - ²⁰ Iri nopo tirikohonon di don raja’ddi om winansayan dot onom o taang do tukad. Om misingompok nopo do pointikid-tikid di taang do ponong id wanan om ponong id gibang om winansayan do patung do pinoiyo-iyo do singa, do hopod om duwo do toinsanan. Om hiri nopod ponong id tolikud di tirikohonon diri om pinadakatan di pinoiyo-iyo do tulu’d sapi’! Om hiri nod kakabayon di tirikohonon diri om dinakatan di pinoiyo-iyo’d singa. Om a’ po nokoumbal do haro o tirikohonon do raja’ do miagal diri do hinonggo-honggo nopo o pomorintaan. ²¹ Om iri nopo sangkir di ponginuman di Suliman nga’ tamas ngai’ nopo do winonsoi, om koinsanai do nunu nopo do hiri’d langga’ di roitan do Langga’ do Puru’ do Libanon nga’ tamas nogi’ di nosompipi’ o winonsoi. Om aiso’ i’ o winonsoi do mantad id pirok, tu’ aiso’ i’ o gatang do pirok do tontok poddi. ²² Om ogumu’ o kapal do rahat di Suliman dit agayo do mogiwoyo-woyo’ di kapal do rahat di Hiram. Om muli’ i piro-piro o kapal do rahat diri do pointikid-tikid do toun do papaatod do tamas, pirok, lamai om kara’ dit angagayo om kara’ dit ongokoro’. ²³ Om i Raja’ Suliman no o kaya’ kopio om it opintar kopio dot id pogialatan do koinsanai’d raja’. ²⁴ Om pointongkop nopod pomogunan o tulun dot orohian do mongoi pokinongou di ponudukan di Suliman dit angaralom kopio, i pinatahak do Kinorohingan dot id dau. ²⁵ Om pointikid-tikid do tulun di mongoi solowot di Suliman nga’ papatahak ngai’ nopo dot id dau dot ipuhawang do pirok, tamas, pakayan, rapo-rapo do sumangod, rampa, kuda’ om bagal. Om iyo kasai’ nopoddi do pointikid do toun. ²⁶ Om minanganu nogi’ i Suliman do soudor do soribu om apat nahatus i kikorita’ do don sumasangod, om hopod om duwo noribu o kuda’ di sakayon do mongoi sangod. Songintanga’ nopoddi nga’ pinoundorong do hilo’d Yorusalim, om iri no wookon om pinopintikid di bandar do suwai. ²⁷ Tontok di pomorintaan di Suliman om gatang nopod pirok om miagal nod gatang do watu do hilo’d Yorusalim. Om kayu sedar do Libanon nga’ miagal pod kayu ara o kogumuo’. ²⁸ Om iri ngai’ no i wakil di raja’ o momoli do kuda’ do mantad hilo’d Masir om hilo’d Kilikia, ²⁹ om momoli do korita’-kuda’ do mantad hilo’d Masir. Om padagangon nondo diyolo’ iri dot id raja’ do Hit om id raja’ do Siria. Om gatang nopo do songinan o kuda’ nga’ hatus om limo nohopod o tusin do pirok, om gatang no dot iso’ o korita’-kuda’ di don sumasangod om onom nahatus o tusin do pirok.

¹ Om minuhang po i Suliman dot ogumu’ o tongoondu’ do bansa’d suwai. Suwai nopo ko’ i tanak do tondu’ do raja’d Masir, om minangawin po iyau do tondu’ do bansa’d Hit, Muab, Amon, Idom om Sidon. ² Kinawin i’ dau iyolo’ do mulong piya dot oduhan daa’d TUHAN o tulun dot Israil do mangawin do bansa’ddi, tu’ iri nondo o mamayayat diyolo’ do tumanud do ponokokinorohingan do suwai. ³ Minangawin i Suliman do turu’ nahatus o tanak do raja’ om tolu nahatus o tondu’ di siniliu dau do panakasawo dau. Om iri ngai’ no sawo di Suliman diri o minamayayat dau do tuminongkiad do Kinorohingan. ⁴ Om tontok di molohing i Suliman om naangatan iddi diyolo’ iyau do tumuku’ dot id ponokokinorohingan do suwai. Om a’ noddi iyau otorodok dot id TUHAN, i Kinorohingan dau, do miagal di Daud, i tapa’ dau. ⁵ Tumuku’ diri i Suliman dot id Astorit, i tingolig do tulun do Sidon, om tumuku’ dot id Molok, i tingolig di kososomu’ kopio di tukuon do tulun dot Amon. ⁶ Om iyo noddi i Suliman do minomonsoi’d dusa dot id toguang do TUHAN. I Daud nopo, i tapa’ di Suliman om iso-iso’ i’ o ginawo do tuminanud do TUHAN, nga’ i Suliman nopo om a’ i’ iyo’ddi. ⁷ Hiri’d timpak do nulu-nulu di ponong id koulayon do mantad id Yorusalim o pinamansayan dau do tiyonon do tumuku’ dot id Kamos, i tingolig do tulun do Muab, om id Molok i tingolig do tulun dot Amon — i duwo tingolig di kososomu’ kopio. ⁸ Om minomonsoi nogi’ i Suliman do tiyonon do koinsanai di sawo dau di bansa’d suwai do modtutud do kominyan om papatahak do porsombahan dot id piro-piro tingolig di tukuon diyolo’. ⁹ - ¹⁰ Mulong piya dot induwo o TUHAN, i Kinorohingan dot Israil, do minintalang dot id di Suliman do minogodu dau do tumuku’ dot id tingolig, nga’ a’ i’ di Suliman numboyo’ i boros do TUHAN diri, tu’ tuminongkiad nogiddi iyau do TUHAN. Om kotogod noddi o TUHAN di Suliman. ¹¹ Boros kad TUHAN, ’’Iyo nopondo tu’ tuminomod ko do tuminolibamban di batos nu dot id doho’, om a’ ko tuminanud di boros ku, om ahawon ku nondo iti pomorintaan nu do mantad id diya’ om patahakon ku dot id songulun di pagawai nu. ¹² Nga’ a’ ku i’ wonsoyon iti do maso nu po do poimpasi tu’ osorou ku i’ i Daud, i tapa’ nu. Iri pondo tanak nu o momorinta’ om wonsoyon ku nogi’ iti. ¹³ Nga’ a’ ku i’ ahawon ngai’ iti pomorintaan do mantad id dau; pooluon ku i’ ot iso’ o payat dot id tanak nu tu’ osorou ku i’ i Daud om Yorusalim, i bandar do nopili’ ku do sumiliu do bandar di songonuon ku,’’ ka dau. ¹⁴ Om binsuhuo’ nod TUHAN i Hadad, i mantad id sompiiyon do raja’ dot Idom do sumaap di Suliman. ¹⁵ - ¹⁶ Tontok di gulu po, di naala’ di Daud ot Idom om minongoi i Yoab, i boyoon do soudor di Daud do hilo’ do mongoi pomolobong di soudor do nangapatai. Om poundorong i Yoab do hilo’d Idom do mogiwoyo-woyo’ di soudor dau do solinaid dot onom o tulan. Om maso nopoddi om pinimpatayan diyolo’ o koinsanai di kokusayan do hilo’d Idom. ¹⁷ Nga’ nokopoggidu’ i’ i Hadad om piro-piro o tulun dot Idom, i susuhuon di tapa’ dau do hilo’d Masir. Tontok nopoddi om tanak po i Hadad. ¹⁸ Om poggidu’ no iyolo’ do mantad hilo’d Midian om pakayaai no do hilo’d Paran. Hilo’ nopod Paran om haro o piro-piro o tulun do suminompuru diyolo’, om pakayaai no diyolo’ do hilo’d Masir do minongoi solowot di raja’ do Masir. Om onuwai no di raja’ do Masir i Hadad do sompila’ o tana’ om iso’ o walai, om nonuan nogi’ iyau do taakanon. ¹⁹ Om kosiliu no i Hadad do tambalut kopio di raja’, om patahako’ noddi di raja’ i longuon dau, i tadi’ di Tapinis, i raja’ do tondu’ddi, do sumiliu’d sawo di Hadad. ²⁰ Om paganak no i sawo di Hadad dot iso’ o tanak do kusai. Om pungaranai no i tanak diri dot i Gonubat. Om i Raja’ Tapinis i’ o pinapagayo di Gonubat do hiri’d walai di raja’ do miagal di tangaanak do kusai di raja’. ²¹ Om korongou poddi di Hadad do napatai no i Daud, om i Yoab i boyoon do soudor dau nga’ napatai no, om boro-boros no iyau dot id raja’, ’’Pologoso’ oku daa do muli’ do hilo’d pomogunan ku,’’ ka dau. ²² ’’Nokuro?’’ ka di raja’ do minonguhot. ’’A’ ko osukup do hiti tu’ gumuli’ ko do hilo’d pomogunan nu?’’ ka dau. ’’Osukup i’, nga’ pologoso’ oku nopo daa do muli’,’’ ka di Hadad do suminimbar. Om uli’ noddi iyau do hilo’d pomogunan dau. ²³ Om pologoso’ po kawagu’d Kinorohingan i Rison, i tanak di Ilada, do sumaap di Suliman. I Rison nopo nga’ i turipon do minogidu’ do mantad id tuan dau, i Hadadisir, i raja’ do Soba. ²⁴ Om nosiliu diri iyau do boyoon dot iso’ o sinompuruan do tulun dit angaraat. (Nosiliu iti di naala’ di Daud i Hadadisir, om pinatai ngai’ dau i tambalut di Hadadisir do mantad hilo’d Siria.) Om ongoi no i Rison om koinsanai di tulun dau do hilo’d Damsik om iyon no iyolo’d hilo’. Om siliho’ no iyau di tulun dau do raja’ do Siria. ²⁵ Iri nogi’ i Raja’ do Siria diri nga’ nosiliu i’ do pisangod dot Israil do miagal di Hadad, do solinaid di Suliman do poimpasi, om mamagangau iyau do pomogunan diri. ²⁶ Haro po kawagu o songulun do suminaap di Suliman om iyau nopo nga’ pagawai i’ di Suliman, do ngaran nopo om i Yirobiam. Iyau nopo om tanak di Nibat, i mantad hilo’d Sirida, i hilo’d Ipraim. Tina’ nopo dau om i Sorua, i nopuadan no. ²⁷ Poingkaa o kinowoyo-woyoo’ di Yirobiam do suminaap di Suliman. Tontok di maso di Suliman do monimbun di tana’ do ponong id koulayon do mantad hilo’d Yorusalim, om di maso do mononong di tolig di bandar, ²⁸ om i Yirobiam nga’ pakaraja nogid hiri. Om soira’ di nokito di Suliman dot okoris om aparu’ iyau, om suhuo’ no dau i Yirobiam do sumiliu do boyoon do koinsanai di tulun di sinuhu’ do kumaraja’ do hilo’d watas do payat do Manasi om Ipraim. ²⁹ Om insan diri o tadau, di manau-panau i Yirobiam do sumoliwan do mantad hilo’d Yorusalim om ngoyo’ no iyau solowoto’ di Ahia i Nabi, i mantad hilo’d Silo, do hiri’d tanga’d ralan do hiri’d talun. Om duwo-duwo iyolo’d hiri. ³⁰ Om iduwo’ no di Ahia i rasuk dau di siningkoyo’ di wagu po, om pogikinis-kiniso’ no dau do hopod om duwo o nokokinisan. ³¹ Om boros kaddi dau dot id di Yirobiam, ’’Onuo’ iya’ o hopod o kinis. Tu’ poingkaa o boros do TUHAN, i Kinorohingan dot Israil, dot id diya’, ’Ahawon ku iti pomorintaan do mantad id di Suliman om patahakon ku diya’ o hopod o payat. ³² Nga’ id di Suliman kasai’ i’ ot iso’ o payat tu’ osorou ku i’ i Daud, i susuhuon ku, om osorou ku o Yorusalim, i bandar di nopili’ ku do sumiliu do doho’d bandar, dot id pointongkop do pomogunan dot Israil. ³³ Wonsoyon ku pogi’ o miagal diti nga’ tuminongkiad i’ i Suliman doho’ om tuminuku’ diri iyau dot id tingolig: id Astorit, i tingolig do tulun do Sidon; om id Kamos, i tingolig do tulun do Muab; om id Molok, i tingolig do tulun dot Amon. Minomonsoi’d dusa i Suliman, om suminongkiwal iyau di pinonuhuan ku. I Daud nopo, i tapa’ dau om tuminanud i’ dit oturan om i pinonuhuan ku, nga’ i Suliman nopo om a’ i’. ³⁴ Nga’ a’ ku i’ onuon ngai’ iti pomorintaan do mantad id dau. Pologoson ku i’ iyau do momorinta’ do solinaid dau do poimpasi. Om wonsoyon ku pogi’ o miagal diri nga’ osorou ku i’ i Daud, i susuhuon ku di nopili’ ku, om it otorodok do tuminanud dit oturan om i pinonuhuan ku. ³⁵ Ahawon ku nondo iti pomorintaan do mantad id di Suliman, om patahakon ku o hopod o payat dot id diya’. ³⁶ Nga’ pologoson ku i’ o tanak di Suliman do momorinta’ dot iso’ o payat, om haro indo kasai’ o songulun di sinakagon di Daud, i susuhuon ku’ddi, do momorinta’ do Yorusalim, i bandar di nopili’ ku do tiyonon do sumambayang dot id doho’. ³⁷ Om iya’ no, oi Yirobiam, o silihon ku do raja’ dot Israil. Om pologoson tiya’ do momorinta’ do koinsanai do watas di korohian nu. ³⁸ Ondung otorodok ko dot id doho’ om tumanud ko dit oturan ku, om poposonong ko do ginawo ku, tu’ wonsoyon ngai’ nu i ponuhuan ku diya’ do miagal di Daud, i susuhuon ku, om woyoon ku indo kasai’ iya’ do gisom dot alaid. Om silihon ku’ndo o sinakagon nu do raja’ dot Israil do sumowoli diya’, do miagal di nowonsoi ku dot id di Daud. ³⁹ Om hukuman ku’ndo i sinakagon di Daud, tu’ minomonsoi id dusa i Suliman, nga’ okon indo ko’ gisom do poingompus do hukuman ku,’ ka,’’ ka dau. ⁴⁰ Om umbalai no daa di Suliman do mamatai i Yirobiam di nokorongou iyau do habar diri, nga’ poggidu’ no i Yirobiam do hilo’d di Sisak, i raja’ do Masir; om poingiyon noddi iyau’d hilo’ do gisom do napatai i Suliman. ⁴¹ Koinsanai di nowonsoi di Suliman di suwai, om i toilaan dau om nokotulis ngai’ no do hiri’d suang do Buuk di Monusui do Kinowoyo-woyoo’ do Koposi-posion di Suliman. ⁴² Om hilo’d Yorusalim o niyonon dau di nosiliu iyau’d raja’ do momorinta’ do pointongkop dot Israil do solinaid dot apat nohopod o toun. ⁴³ Kapatai noddi iyau om lobongo’ no do hilo’d Bandar di Daud. Om i Rihabiam diri, i tanak dau, o suminowoli dau do suminiliu’d raja’.

¹ Om ongoi no i Rihabiam do hilo’d Sikim, tu’ nokotimung ngai’ no i tulun dot Israil di mantad ponong id utara do poposiliu dau do raja’. ² I Yirobiam nopo nga’ hilo’ pod Masir tu’ minogidu’ iyau do mantad id di Raja’ Suliman. Om korongou poddi dau o habar do pasal di Rihabiam om poguliai no dau do mantad hilo’d Masir. ³ Om lohowo’ no di tulun do ponong id utara i Yirobiam om pogitatanud no iyolo’ do minongoi solowot di Rihabiam, om boro-boros no iyolo’ dot id di Rihabiam do poingkaa, ⁴ ’’Oi Tuan Raja’! I Suliman nopo, i tapa’ nu om pinopokoruol dahai. Pinawagat kopio dau o tonggungan dahai. Om baino’ nopo, om ondung inggaanan nu o tonggungan dahai om sonong-sonongon nu iyahai om minsiriba’ i’ iyahai diya’,’’ ka diyolo’. ⁵ Om boros kad Rihabiam, ’’Gumuli’ kou nod hiti do tolu o tadau do mantad baino’, om sunudan ku nogindo iyokoyu dot isimbar ku,’’ ka dau. Om pamanau no ngai’ iyolo’. ⁶ Om ongoi no i Rihabiam ponokiboro-boros di komolohingan di gomponosihat di Suliman, i tapa’ dau’ddi, boros ka dau, ’’Nunu kangku’ndo do sumimbar diyolo’? Poingkuro o nosihat dokoyu?’’ ka dau. ⁷ Om boros ka di komolohingan, ’’Ondung orohian kopio ko do popoinsonong do rayat, om pohubayaan nopo o pokionuon diyolo’, om minsiriba’ indo kasai’ iyolo’ dot id diya’,’’ ka diyolo’. ⁸ Nga’ a’ i’ di Rihabiam pinadul i nosihat di komolohingan. Tu’ minongoi nogi’ iyau ponguhot di tulun dit ongomulok po, i rampam-rampam dau, om i nosiliu do gomponosihat dau. ⁹ ’’Nunu o nosihat dokoyu doho’? Nunu tuu o poboroson ku di tulun di mokiinggaan di tonggungan diyolo’?’’ ka dau do minonguhot. ¹⁰ Om boros ka diyolo’, ’’Poboroson no diyolo’ o poingkaa, ’Oluhoi oku piya daa nga’ okoris oku i’ ko’ i tapa’ ku! ¹¹ Awagat no daa o pinotonggungan di tapa’ ku dot id dokoyu; nga’ awaga-wagat o doho’ do potonggungan dokoyu. Tuwai noo o pinomikot dau dokoyu, nga’ doho’ nopod pomikot dokoyu om i pipikot do kuda’ di kirugi,’ kanto,’’ ka diyolo’. ¹² Om katalib poddi o tolu o tadau, om rikot no i Yirobiam om koinsanai di tulun do minongoi solowot di Raja’ Rihabiam do miagal di pinonuhuan di raja’. ¹³ Nga’ a’ i’ di Rihabiam pinadul i boros di komolohingan. Om apantog tomod o boros dau do minoro-boros di rayat, ¹⁴ tu’ tuminanud iyau di nosihat di tulun dit ongomulok po. Boros ka dau, ’’Awagat no daa o tonggungan di pinotonggungan di tapa’ ku dokoyu, nga’ pawagaton ku pondo ko’ iri o tonggungan dokoyu. Om tuwai noo o pinomikot dau dokoyu, nga’ doho’ nopod pomikot om pipikot do kuda’ di kirugi,’’ ka dau. ¹⁵ Om a’ i’ di raja’ pinadul i pinokianu di rayat. Nga’ iri no o korohian do TUHAN, om abayaan i’ i pinoboros mantad di Ahia, i Nabi, i mantad hilo’d Silo, do pasal di Yirobiam i tanak di Nibat. ¹⁶ Om kopurimanai poddi di rayat dot a’ di raja’ pokinongohon i pokionuon diyolo’, om pagarango’ no diyolo’ o poingkaa, ’’Kada’ toko’ podulo’ i Daud om i sinakagon dau! A’ i’ iyolo’ nokoumbal do minomonsoi do nunu-nunu it osonong dot id dati’. Kainou, tulun dot Israil, muli’! Pologoson nopo i Rihabiam do mongilo-ilo do tinan dau!’’ ka diyolo’. Om saap no i tulun dot Israil di Rihabiam. ¹⁷ Om pologoso’ no diyolo’ i Rihabiam do momorinta’ do tulun di hiri pod watas do Yohuda. ¹⁸ Om suhuo’ no di Rihabiam i Adoniram, i boyoon do tulun di sinansagan do kumaraja’ do mongoi ponginsasamod di rayat. Nga’ dumpaho’ nogiddi diyolo’ iyau’d watu do gisom do napatai iyau. Om kokito poddi di Rihabiam iri om kaarau-arau no iyau do suminakai di korita’-kuda’ dau om ongoi no do hilo’d Yorusalim. ¹⁹ Om mantad poddi om sumaap kasai’ no i tulun dot Israil di poingiyon do ponong id utara di sinakagon di Daud. ²⁰ Om korongou poddi di tulun dot Israil do nokouli’ i Yirobiam do mantad hilo’d Masir, om lohowo’ no diyolo’ iyau do mongoi rapou dot id iso’ o pitimungan do rayat, om siliho’ no diyolo’ iyau do raja’ dot Israil. Om iri po i payat do Yohuda ot otorodok kasai’ dot id sinakagon di Daud. ²¹ Om korikot poddi i Rihabiam do hilo’d Yorusalim, om timungo’ no dau o 180,000 o soudor dau dit ongosiou do mantad id payat do Yohuda om Binyamin. Tu’ osorou nopo daa dau nga’ mongoi sangod do popoguli’ kawagu di kuasa’ dau do momorinta’ di piro-piro payat dot Israil di ponong id utara. ²² Nga’ suhuo’ nod Kinorohingan i Somaya i Nabi, do mongoi poboros do boros dau ²³ dot id di Rihabiam om id payat do Yohuda om Binyamin do poingkaa, ²⁴ ’’Kada’ ongoi sangod do tulun dot Israil tu’ iyolo’ nga’ tobpinai nu i’! Uli’ ngai’ kou nogi’. Tu’ iti nopo nosiliu baino’ om korohian ku i’,’’ ka dau. Om umboyo’ ngai’ no iyolo’ di boros do TUHAN om uli’ no iyolo’ do hiri’d walai diyolo’. ²⁵ Om kosiliu poddi i Yirobiam do raja’ dot Israil, om inggiratai no dau i bandar do Sikim, i hiri’d watas do konulu-nuluan dot Ipraim, om iyon no iyau’d hiri do daamot. Om undaliu no iyau om ngoyo’ no dau inggiratai i bandar do Ponuil. ²⁶ - ²⁷ Om pomusorou no i Yirobiam do poingkaa, ’’Ondung mongoi ilo rayat ku do hilo’d Yorusalim do mongoi papatahak do porsombahan do hilo’d Walai’d Sasambayangan dot Agayo, do miagal dilo wonsoyon diyolo’d dinondo, om orohian indo iyolo’ kawagu di Rihabiam, i raja’ do tulun do Yohuda, om patayon oku nondo diyolo’,’’ ka. ²⁸ Om kopingguliai poddi dau do momusorou iri, om pomonsoi no iyau do duwo o patung di pinoiyo-iyo’d sapi’ do tamas do winonsoi, om boro-boros no iyau di rayat dau, ’’Oi tulun dot Israil! Alaid kou no do miongoi sambayang do hilo’d Yorusalim. Nga’ baino’ nopo, oi tulun dot Israil, om diya iti patung di minomoyo’ dokoyu do suminoliwan do mantad hilo’d Masir,’’ ka dau. ²⁹ Om poiliho’ no dau o tiso’ di patung di pinoiyo-iyo do sapi’ddi do hilo’d Baitol om iri no tiso’ om hilo’d Dan o pinoiyanan. ³⁰ Om kowonsoi noddi i rayat do dusa tu’ minongoi i’ iyolo’ do hilo’d Baitol om hilo’d Dan do mongoi sambayang do hilo’. ³¹ Om minomonsoi po i Yirobiam do tiyonon do sumambayang do hiri’d timpak do konulu-nuluan om pomili’ no iyau do piro-piro ot imam do mantad id sompiiyon dit okon ko’ mantad id payat do Liwi. ³² Om pinotimpuun nogi’ di Yirobiam ot iso’ o tadau’d agayo do tugama’, i koontok do kohopod om limo do tulan do kawalu’, do miagal di tadau dot agayo do hilo’d Yohuda. Om papatahak iyau do porsombahan do hiri’d pananaraban do porsombahan dot id sapi’ di tamas do winonsoi, do hilo’d Baitol. Om poiyono’ no dau i piro-piro ot imam diri do hilo’d Baitol do maganu-anu do hiri’d tiyonon do sumambayang di winonsoi dau. ³³ Om tontok di kohopod om limo do tulan do kawalu’, i tadau di tinantu’ dau, om ongoi no iyau do hilo’d Baitol do mongoi papatahak do porsombahan do hiri’d pananaraban do porsombahan do mamaramai di tadau dot agayo do tugama’ di tinantu’ dau’ddi do ramayon di tulun dot Israil.

¹ Tontok nopoddi om haro o songulun o nabi do mantad hilo’d Yohuda do sinuhu’d TUHAN do mongoi do hilo’d Baitol. Om di nopo nokorikot iyau’d hilo’ om poingkakat no i Yirobiam do hiri’d dotimbabaan di pananaraban do porsombahan do papatahak do porsombahan di sinumbali’. ² Om suhuo’ nod TUHAN i nabi diri do moro-boros do papasala’ di pananaraban do porsombahan. Boros ka dau, ’’Oi pananaraban do porsombahan! Poingkaa o boros do TUHAN, ’Haro nondo o songulun o tanak di pungaranan dot i Yosia dot osusu dot id sompiiyon di Daud. Om id timpak nu no o pamatayan ngai’ dau dit imam di maganu-anu do hiti’d pananaraban do porsombahan dot id tingolig om i papatahak do porsombahan di sumbolion do hiti’d sakai nu. Om hiti nod sakai nu o podtutudan dau di tulang diyolo’,’ ka,’’ ka dau. ³ Om boros ka kawagu di nabi diri, ’’Ohuyas nondo iti pananaraban do porsombahan, om ilo tauu do hilo’d sakai nu nga’ kotuntug nondo. Om koilo ko nogindo kopio do sinuhu’ oku’d TUHAN,’’ ka dau. ⁴ Om korongou poddi di Yirobiam i boros do miagal diri, om boro-boros no iyau dot opuhod do mikuwo’d tinuduk dau i nabi diri, ’’Tangkapo’ dokoyu ilo’!’’ ka. Nga’ diiri i’ do kuminodou i longon di Yirobiam gisom dot a’ no milo do pokodongon kawagu. ⁵ Om sigog id kopilapak i pananaraban do porsombahan om i tauu nga’ kotuntug nopo do hiri’d tana’ do miagal di nokoboros mantad di nabi do tuminanud di pinonuhuan do TUHAN. ⁶ Om boro-boros no i Yirobiam di nabi diri, ’’Tulungo’ oku no, sambayang no dot id TUHAN, i Kinorohingan nu. Pokilingasai no dau doho’ iti longon ku!’’ ka dau. Om sambayang no i nabi diri, om kolingos no i longon di raja’. ⁷ Om boro-boros no i raja’ di nabi diri, ’’Kaino mongoi akan do hilo’d walai ku. Om onuan tiya’ i’ dot isomuli’ di nowonsoi nu,’’ ka dau. ⁸ Om boros ka di nabi diri do suminimbar, ’’Mulong piya do patahakon nu doho’ o songintanga’ diti kakayaan nu nga’ a’ oku i’ tumanud diya’, ko’ mongoi po akan om mongoi inum do potorungak diya’. ⁹ Tu’ nosunudan oku nod TUHAN dot a’ makan om a’ minum, om a’ muli’ do sumusui di ralan di winayaan ku do minongoi’d hiti,’’ ka dau. ¹⁰ Om a’ noddi i nabi diri minaya’ di ralan di winayaan dau di ruminikot i’ iyau tu’ minaya’ddi iyau do ralan do suwai. ¹¹ Tontok nopo do maso’ddi om haro o songulun o nabi di molohing no do poingiyon do hilo’d Baitol. Om rikot no i tangaanak dau do minongoi pomisunud dau di winonsoi di nabi do mantad hilo’d Yohuda, do hilo’d Baitol do tadau’ddi, om i pinoboros di nabi diri dot id di Raja’ Yirobiam. ¹² Om boros ka di nabi di molohing no do minonguhot diyolo’, ’’Honggo ralan do nayaan dau di minuli’ iyau?’’ ka. Om potuduko’ no diyolo’ i ralan, ¹³ om suhuo’ no dau iyolo’ do popowonsoi di pakol di kaladai dau. Om pakalai no diyolo’. Om sakai noddi iyau, om pamanau no ¹⁴ do suminusui di ralan diri do gumusa’ di nabi do mantad hilo’d Yohuda. Om kabantalai no dau iyau do poirikau do hiri’d sahau di guas do kayu dot agayo. Om boros ka di nabi di molohing no do minonguhot, ’’Iya’ nogi’ i nabi do mantad hilo’d Yohuda?’’ ka. ’’Oo, iyoho’ nogi’,’’ ka dau. ¹⁵ Om boros ka di nabi di molohing no, ’’Kaino, tanud doho’d muli’ om tumorungak i’ doho’d makan,’’ ka. ¹⁶ Nga’ boros ka di nabi do mantad hilo’d Yohuda, ’’A, a’ oku no milo do moyo’ diya’ do muli’ ko’ sumalakoi po di walai nu. Om a’ oku i’ tumorungak diya’ do makan ko’ minum po do nunu nopod hiti, ¹⁷ tu’ nobilinan oku nod TUHAN dot a’ makan om a’ minum, om a’ gumuli’ do sumusui di ralan di winayaan ku di pinaangayan ku id hiti,’’ ka dau. ¹⁸ Nga’ boros ka di nabi di molohing noddi, i mantad hilo’d Baitol, do minongudut dau, ’’Iyoho’ nga’ nabi nogi’ do miagal diya’. Om sinuhu’d TUHAN o moloikat do mongoi pomisunud doho’ do mongoi pangangat diya’ om papaakan diya’ do hilo’d walai ku,’’ ka dau. ¹⁹ Om tanud noddi dau i nabi di mantad hilo’d Yohuda om torungak no dau do minakan. ²⁰ Om tontok di makan iyolo’, om boro-boros no o TUHAN dot id nabi di molohing no, ²¹ gisom do sinunudan diri dau i nabi di mantad hilo’d Yohuda do poingkaa, ’’Boros kad TUHAN om a’ ko minumboyo’ dau; om a’ nu winonsoi i pinonuhuan dau diya’. ²² Tu’ guminuli’ ko nogi’ om minongoi ko akan do hiri’d pogoduhan dau do mongoi akan, om iri no o kapamatayan diya’, om tinan nu nga’ a’ no olobong do hiri’d kalabangan di sompiiyon nu,’’ ka dau. ²³ Om kaakan poddi iyolo’, om pakalai noddi di nabi di molohing no i kaladai di nabi di mantad hilo’d Yohuda. ²⁴ Om pamanau no i nabi di mantad hilo’d Yohuda. Om maha’ di hiri no iyau id tanga’d ralan om bontolo’ no iyau do singa om patayo’ no iyau di singa’ddi. Om poingiliu’ddi i tinan dau do hiri’d ralan, om poingkakat i kaladai om i singa do hiri’d toning di rata’. ²⁵ Om haro’ddi o piro-piro tulun do nakatalib om nokobontol di rata’ do hiri’d ralan, om poingkakat i singa do hiri’d toning di rata’. Om potilombusai no diyolo’d minongoi do hilo’d Baitol om posunudo’ no diyolo’ i nokito diyolo’. ²⁶ Om soira’ di nokorongou i nabi di molohing no do pasal diri, om boros kaddi dau, ’’Iri no i nabi dit a’ minumboyo’ do boros do TUHAN! Om gowoi poddi om pinorikot do TUHAN o singa do minongoi panabpo om minamatai dau, do miagal di nokoboros mantad do TUHAN,’’ ka dau. ²⁷ Om boros kaddi dau dot id tangaanak dau, ’’Pakalai doho’ i kaladai,’’ ka. Om pakalai no diyolo’, ²⁸ om pamanau no iyau. Om kabantalai no dau i rata’ di nabi di mantad hilo’d Yohuda’ddi do poingiliu do hiri’d ralan. Om poingkakat kasai’ i’ do hiri’d toning di rata’ i singa om i kaladai. A’ i’ di singa nakan i rata’ om a’ pinatai i kaladai. ²⁹ Om ngoyo’ noddi di nabi di molohing no i rata’ddi om pasakayo’ no dau di kaladai. Om pogulio’ no dau do hilo’d Baitol om pogihadai no dau om lobongo’ noddi dau do hilo’. ³⁰ Om lobongo’ no dau iri do hiri’d kalabangan di sompiiyon dau om pogihadai no dau, om i tangaanak dau nga’ minogihad nogi’, mikuwo’d mimboros dot, ’’Adai giya’dti tobpinai ku, i tobpinai ku!’’ ka no. ³¹ Om kolobong poddi i rata’ om boros ka di nabi di molohing no dot id tangaanak dau, ’’Apatai oku nopondo om lobongon oku no dot id lobong diti om potoningon nodti tinan dau o tinan ku. ³² Iri nopo boros di pinolombus dau om tumanud i’ do pinonuhuan do TUHAN do papasala’ di pananaraban do porsombahan do hilo’d Baitol, om koinsanai di tiyonon do sumambayang do hilo’d kabandaran do Samaria, om abayaan i’ kopio iri,’’ ka dau. ³³ Om a’ po i Yirobiam, i raja’ dot Israil, tuminingkod do mantad id kowoyo-woyoon dau dot araat. Tu’ maso po dau do momili’ dot imam do maganu-anu do hiri’d pananaraban do porsombahan do mantad id disai nopod sompiiyon — a’ no dau tutunon. Silihon ngai’ nopo dau dot imam ot isai nopo o tulun dit orohian do sumiliu’d imam. ³⁴ Om iti no kopio o dusa dau di pinoporikot do kosusaan dot id sinakagon dau gisom do nopunso’ddi iyolo’.

¹ Om tontok noddi do suminakit i Abia, i tanak di Raja’ Yirobiam do kusai. ² Om boros ka di Yirobiam dot id sawo dau, ’’Ongoi do hilo’d Silo, nga’ mingunali-nali no do tulun toomod, om aiso’ i’ o kotutun diya’. Om mongoi id hilo’d tiyonon di Ahia i Nabi, i pinopoboros di gulu po dot osiliu oku do raja’ dot Israil. ³ Om onuan no iyau do hopod o tinan do roti, om piro-piro o liob do roti om paha’ do sangkakanan dot okooro’. Uhoton no iyau ondung poingkukuro o kosunsudon di tanak to, om sunudan ko indo dau,’’ ka dau. ⁴ Om ongoi no i sawo di Yirobiam do hiri’d walai di Ahia do hilo’d Silo. Om a’ no kokito i Ahia tu’ molohing no kopio iyau. ⁵ Nga’ nosunudan no iyau’d TUHAN do rumikot i sawo di Yirobiam do mongoi ponguhot dau do pasal di tanak diyolo’ di sumakit. Om nosunudan nod TUHAN i Ahia do boros dot apatut do polombuson dau. Om soira’ di nokorikot i sawo di Yirobiam, om pingunali-nali no daa iyau do tulun do suwai. ⁶ Nga’ soira’ di norongou nogi’ di Ahia i sawo di Yirobiam do hiri’d wawayaan, om boro-boros no i Ahia, ’’Salakoi. Oilaan ku i’ do sawo ko di Yirobiam. Nokuro tu’ mingunali-nali ko do tulun do suwai? Araat tomod o habar do posunudon ku diya’. ⁷ Ngoyo’ nogi’ sunudai i Yirobiam diti boros do TUHAN, i Kinorohingan dot Israil, dot id dau. Boros kad TUHAN, ’Pinili’ ku iya’ do pomorinta’ dot Israil, i tulun ku. ⁸ Nahau ku i pomorintaan do mantad id sinakagon di Daud om pinatahak ku daa’ddi diya’. Nga’ a’ ko i’ miagal di Daud, i susuhuon ku, tu’ otorodok dot id doho’, om minumboyo’ di pinonuhuan ku, om iri no i korohian ku o winonsoi dau. ⁹ Agayo-gayo po i diya’d dusa ko’ i dusa di pomorinta’ dit id gulu ko’ iya’. Niadaan oku diya’ om tiningkau nu o kototogod ku tu’ minomonsoi ko do tingolig om patung do tambaga’ do tukuon nu. ¹⁰ Om iti no o koporikatan ku do kosusaan dot id sinakagon nu om patayon ngai’ ku i sinakagon nu do tongokusai, dot it ongomulok po om i komolohingan no. Punsoon ku nopo kopio o sompiiyon nu; oimuhau tomod nopondo iyolo’ do miagal pod taii’. ¹¹ Iri nopo it id suang do sompiiyon nu dit apatai dot id suang do bandar om ngoyon nondod tasu kano’, om iri no it apatai do hilo’d soliwan do bandar om akanon do tombolog. Sorohon no, dot iyoho’ i’, i TUHAN, o minomoros diti!’ ka,’’ ka dau. ¹² Om tuntunai po di Ahia i boros dau dot id sawo di Yirobiam, boros ka dau, ’’Uli’ no. Om kosuang ko poddi bandar om apatai no i tanak nu. ¹³ Om oinsanan nopondo i tulun dot Israil do mogihad dau om ngoyon nondo diyolo’ lobongo’ iyau. Om iyau pondo it id suang do sompiiyon di Yirobiam dot osonong o pomolobong. Tu’ iyau poo o kasanangan do TUHAN, i Kinorohingan dot Israil. ¹⁴ Haro nondo o raja’ do silihon do TUHAN do pomorinta’ dot Israil, om i momupus do pomorintaan di Yirobiam. ¹⁵ Hukuman nondod TUHAN ot Israil, om milayuk-layuk pondo ot Israil do miagal di sakot do hiri’d bawang. Om utuson nondo dau iyolo’ do mantad hiti’d tana’ dit osonong di pinatahak dau di taki-aki diyolo’. Om potompiason nondo dau iyolo’ do hilo’d soborong di Bawang dot Iprat, tu’ minomonsoi i’ iyolo’ do tingolig dot Asira, i ponokokinorohingan diyolo’, om notingkau’ddi o kototogod do TUHAN. ¹⁶ Om tongkiadan nondod TUHAN ot Israil tu’ minomonsoi i’ iyolo’d dusa,’’ ka dau. ¹⁷ Om poguliai noddi di sawo di Yirobiam do hilo’d Tirsa. Om maha’ di sumalakoi nogi’ iyau di walai dau om kapatai no i tanak dau. ¹⁸ Om pogihadai noddi di tulun dot Israil i tanak diri om ngoyo’ no diyolo’ lobongo’ do miagal di nokoboros mantad do TUHAN do pinolombus di Ahia i Nabi, i susuhuon do TUHAN. ¹⁹ Koinsanai di nongowonsoi di Raja’ Yirobiam, om i pisangadan do noongoi dau om i karalan-ralano’ dau do momorinta’ nga’ nongkotulis ngai’ no do hiri’d suang do Buuk di Monusui do Pasal Ngai’ di Raja’ dot Israil. ²⁰ Duwo nohopod om duwo toun di Yirobiam do nosiliu do raja’ di momorinta’. Om kapatai noddi iyau om lobongo’ no. Om i Nadab diri, i tanak dau, o suminiliu do raja’ do suminowoli dau. ²¹ I Rihabiam nopo, i tanak di Suliman diri, om apat no nohopod om iso’ o toun dau di nosiliu iyau do raja’ do Yohuda. Om hopod om turu’ o toun dau do minomorinta’ do hilo’d Yorusalim, i bandar do pinili’ do TUHAN dot id pialatan do koinsanai’d watas dot Israil, do tiyonon do sumambayang dot id dau. Tina’ nopo di Rihabiam om i Naama, i tulun dot Amon. ²² Om pomonsoi nod dusa i tulun do Yohuda dot id toguang do TUHAN. Om ogumu-gumu’ po i diyolo’ do nowonsoi do minoningkau di kototogod do TUHAN ko’ i nowonsoi di taki-aki diyolo’. ²³ Minomonsoi iyolo’ do piro-piro tiyonon do tumuku’ dot id tingolig om pinopoingkakat iyolo’ do torigi do watu om tanda’ do tingolig dot Asira do maan do tukuon do hiri’d konulu-nuluan om hiri’d sahau do kayu dit angagayo. ²⁴ Nga’ araat nopo kopio, om i piro-piro o tongokusai om tongoondu’ do suminiliu’d sundal do hiri’d tiyonon do tumuku’ dot id tingolig. Om omitanai ngai’ nopo di tulun do Yohuda i kowoyo-woyoon di tulun di nuyung do TUHAN do mantad id pomogunan diri, di ruminikot i’ i tulun dot Israil do hiri; i kowoyo-woyoon di kointingayam tomod. ²⁵ Tontok di kolimo do toun di Raja’ Rihabiam do momorinta’ om ngoyo’ no di Sisak, i raja’ do Masir, songodo’ o Yorusalim. ²⁶ Om onuo’ ngai’ nopo dau i dapu’ do hiri’d Walai’d Sasambayangan dot Agayo om i hiri’d walai’d raja’, om nokotonggoi ngai’ nogi’ i kolid do tamas di winonsoi di Suliman. ²⁷ Om pomonsoi noddi i Raja’ Rihabiam do kolid, do tambaga’ o winonsoi do pinoningolon diri. Om paharapai no dau di piro-piro pagawai do madtatamong di wawayaan do walai’d raja’ i kolid diri. ²⁸ Om pointikid-tikid do mongoi i raja’ do hiri’d Walai’d Sasambayangan dot Agayo, om igitan no di madtatamong i kolid diri, om pogulion nondo kawagu do hiri’d tiiyonon di madtatamong. ²⁹ Om koinsanai di nongowonsoi di Raja’ Rihabiam, om nongkotulis ngai’ no do hiri’d suang do Buuk di Monusui do Pasal Ngai’ di Raja’ do Yohuda. ³⁰ Om solinaid nopo do pomorintaan di Rihabiam om misaap kasai’ nopo i Rihabiam di Yirobiam. ³¹ Om kapatai noddi i Rihabiam om lobongo’ no do hiri’d kalabangan do raja’ do hiri’d Bandar di Daud. Om suminiliu nopod raja’ do suminowoli dau om i Abia, i tanak dau’d kusai.

¹ Tontok di kohopod om walu’ do toun di Raja’ Yirobiam do momorinta’ dot Israil, om kosiliu no i Abia do raja’ do Yohuda. ² Om tolu o toun dau do minomorinta’ do hilo’d Yorusalim. Tina’ nopo dau om i Maaka, i tanak di Absalom do tondu’. ³ Om iyau nga’ minomonsoi id dusa do miagal di winonsoi di tapa’ dau. A’ i’ iyau tuminorodok kopio dot id TUHAN, i Kinorohingan dau, do miagal di kotorodoko’ di Daud, i taki-aki dau. ⁴ Nga’ nonuan iddi do TUHAN, i Kinorohingan di tukuon di Daud, i Abia dot iso’ o tanak do kusai, do sumowoli dau do momorinta’ do hilo’d Yorusalim om mongintirung do Yorusalim, tu’ osorou i’ do TUHAN i Daud. ⁵ Winonsoi’d TUHAN o miagal diri tu’ nowonsoi ngai’ i’ di Daud i korohian do TUHAN om a’ iyau nokoumbal do suminaap di pinonuhuan do TUHAN, suwai nondo ko’ i winonsoi dau dot id di Uria, i tulun do Hit diri. ⁶ Om solinaid nopo di Abia do momorinta’ om haro kasai’ nopo o pisangadan dot id piolitan diyolo’ di Yirobiam. ⁷ Om koinsanai di nongowonsoi di Abia do suwai nga’ nongkotulis ngai’ i’ do hiri’d suang do Buuk di Monusui do Pasal Ngai’ di Raja’ do Yohuda. ⁸ Om kapatai noddi i Abia om lobongo’ no do hiri’d Bandar di Daud. Om suminowoli nopoddi dau do raja’ om i Asa, i tanak dau’d kusai. ⁹ Tontok di koduwo nohopod do toun di Yirobiam do raja’ dot Israil, om kosiliu no i Asa do raja’ do Yohuda. ¹⁰ Om apat nohopod om iso’ o toun dau do momorinta’ do hilo’d Yorusalim. Todu’ nopo dau om i Maaka, i tanak di Absalom do tondu’. ¹¹ Om i Asa nopo om minomonsoi i’ do korohian do TUHAN, do miagal di winonsoi di Daud, i taki-aki dau. ¹² Om uyungo’ ngai’ nopo dau do mantad id pomogunan diri i tongokusai om i tongoondu’ do sundal di maganu-anu do hiri’d tiiyonon do tumuku’ dot id tingolig, om nidu’ ngai’ dau i tingolig di piningwonsoi di piro-piro o raja’ dit id gulu ko’ iyau. ¹³ Om i Maaka, i toduon daa dau, nga’ nidu’ i’ dau o pangkat do miagal do ponokotina’ di raja’, tu’ minomonsoi i’ iyau do tingolig dit araat kopio, iri no i tingolig dot Asira, i tingolig do kororombung. Om habao’ no di Asa i tingolig diri om ngoyo’ no dau tutudai do hiri’d Rantai do Kidron. ¹⁴ Mulong po dot a’ di Asa naraag ngai’ i tiiyonon do tumuku’ dot id tingolig nga’ otorodok kasai’ i’ iyau dot id TUHAN do solinaid dau do poimpasi. ¹⁵ Om poopio’ ngai’ nopo dau do hiri’d Walai’d Sasambayangan dot Agayo i konunu-nunuan do pinatahak di tapa’ dau dot id TUHAN, om iri nogi’ i dau do konunu-nunuan, i tamas om pirok do winonsoi di pinatahak dau dot id TUHAN. ¹⁶ Om solinaid nopo di Asa i raja’ do Yohuda, om i Baisa i raja’ dot Israil do momorinta’ om misangod kasai’ nopo iyolo’. ¹⁷ Om ngoyo’ no di Baisa songodo’ o Yohuda om timpuun nod pinopogirot kopio di bandar do Rama om atalaban i’ dau o koinsanai di modtinalib do mantad hilo’d Yohuda om i mongoi do hilo’d Yohuda. ¹⁸ Om ngoyo’ ngai’ noddi di Raja’ Asa i pirok om i tamas di noolu-olu’ do hiri’d Walai’d Sasambayangan dot Agayo om i hiri’d walai di raja’. Om suhuo’ no dau o piro-piro di pagawai dau do minongoi paatod diri do hilo’d Damsik, do patahakon di Binhadad i raja’ do Siria, i tanak di Tabrimon, i manangaki di Hision. Om pinatanggayan nogi’ dau do boros do poingkaa, ¹⁹ ’’Kaino misokodung do miagal di tapa’ to tu’ minisokodung. Iti nopo pirok om tamas om itahak ku i’ toomod diya’. Pututon no kopio o piombolutan dokoyu di Baisa, i raja’ dot Israil, om poggiduon i’ dau i soudor dau do mantad id watas ku,’’ ka. ²⁰ Om kookunai noddi di Raja’ Binhadad i pinoboros di Asa. Om suhuo’ no dau i boyoon do soudor dau do miwoyo’ di soudor diyolo’ do mongoi panangod di bandar dot Israil. Om naala’ iddi diyolo’ o bandar dot Iyon, Dan, Abil-Bait-Maaka om koinsanai do Kinirot om pointongkop do watas do Naptali. ²¹ Om soira’ di norongou di Raja’ Baisa i nosiliu do miagal diri, om tingkod no iyau do popogirot do Rama om uli’ no iyau do hilo’d Tirsa. ²² Om ponuhu’ noddi i Raja’ Asa do toinsanan di tulun do pointongkop do Yohuda, do mongoi ngai’ nopo uhup do papawaliu di watu om kayu do mantad hilo’d Rama; i pinakai daa di Baisa do pomogirot di bandar. Om pakayo’ ngai’ noddi di Asa iri do pinomogirot di bandar do Mispa om Giba, i hiri’d watas do Binyamin. ²³ Om koinsanai di winonsoi di Raja’ Asa do suwai, i kosioho’ dau, om i kabandaran do ninggiratan dau, nga’ nokotulis ngai’ i’ do hiri’d suang do Buuk di Monusui do Pasal Ngai’ di Raja’ do Yohuda. Nga’ di nopoddi molohing i Asa om noontok goduwo nopod toruol o gakod dau. ²⁴ Om kapatai noddi i Asa om lobongo’ no iyau do hiri’d kalabangan do raja’ do hiri’d Bandar di Daud. Om i Yosapat diri, i tanak dau, o suminowoli dau do raja’. ²⁵ Tontok di koduwo do toun do pomorintaan di Asa, i raja’ do Yohuda, om kosiliu nod raja’ dot Israil i Nadab, i tanak di Yirobiam. Om duwo o toun dau do minomorinta’. ²⁶ Nga’ iyo i’ iyau di tapa’ dau tu’ minomonsoi i’ do dusa dot id TUHAN, om minamayayat di tulun dot Israil do momonsoi’d dusa. ²⁷ Om pongupakat no i Baisa i tanak di Ahia, i mantad id payat di Isakar do sumaap di Nadab. Om ngoyo’ no dau patayo’ i Nadab di maso di Nadab om i soudor dau do monurungku’ di bandar do Gibiton, i hilo’d watas do Pilistin. ²⁸ Nosiliu o miagal diri di kotolu do toun di Raja’ Asa do momorinta’ do Yohuda. Om i Baisa noddi o nokosowoli di Nadab do raja’ dot Israil. ²⁹ Om tilombusai nopo dau do minimpatai ngai’ i tulun dot id sompiiyon di Yirobiam. Om piontok nopo iri di boros do TUHAN di pinolombus di Nabi Ahia, i susuhuon dau do mantad hilo’d Silo; kapatai ngai’ nopo i sompiiyon di Yirobiam, om iso’ pod tulun nga’ aiso’ no o noolu’. ³⁰ Nosiliu pogi’ o miagal diri nga’ pinopotogod i Yirobiam do TUHAN, i Kinorohingan dot Israil, tu’ miningwonsoi iyau do dusa om minamayayat iyau do tulun dot Israil do momonsoi’d dusa. ³¹ Koinsanai di nongowonsoi di Nadab do suwai nga’ nongkotulis ngai’ i’ do hiri’d suang do Buuk di Monusui do Pasal Ngai’ di Raja’ dot Israil. ³² Om solinaid nopo di Raja’ Baisa do momorinta’ dot Israil, om haro kasai’ nopo o pisangadan diyolo’ di Asa, i raja’ do Yohuda. ³³ Tontok di kotolu’d toun di Raja’ Asa do momorinta’ do Yohuda, om kosiliu no i Baisa i tanak di Ahia, do raja’ do pointongkop dot Israil. Om koloido’ nopo dau do momorinta’ do hilo’d Tirsa om duwo nohopod om apat o toun. ³⁴ Om iyau nga’ miagal i’ di Raja’ Yirobiam di gulu po tu’ minomonsoi id dusa dot id TUHAN om minamayayat di tulun dot Israil do minomonsoi’d dusa.

¹ Om boro-boros noddi o TUHAN dot id di Yohu i Nabi, i tanak di Hanani. Boros ka dau, ’’Poboroson no o miagal diti dot id di Baisa, ² ’Di nopo di gulu po om aiso’ i’ tomod o ngaran-ngaran nu, nga’ pinili’ ku i’ iya’ do sumiliu do boyoon dot Israil, i tulun ku. Nga’ baino’ noddi om momonsoi ko i’ do dusa do miagal di Yirobiam tu’ minamayayat di tulun ku do momonsoi’d dusa, om gisom diri do nokotogod oku. ³ Om gowoi pondo om patayon ku iya’ om i sompiiyon nu do gisom dot opunso kou, do miagal di winonsoi ku dot id di Yirobiam. ⁴ Iri nopondo i tiyon-iyon nu dot apatai do hiri’d bandar om ngoyon nondod tasu akano’, om iri no it apatai do hiri’d soliwan do bandar om akanon di tombolog do mangangakan do rata’,’ kanto,’’ ka dau. ⁵ - ⁷ Om iri nopo boros do TUHAN dot id di Baisa om id sompiiyon dau’ddi om pinolombus di Yohu, i nabi, tu’ nokowonsoi nod dusa i Baisa dot id TUHAN. Okon nopo ko’ i karaato’ di piningwonsoi di Baisa o nokotogod do TUHAN, nga’ nosubuanan nogi’ di minimpatai iyau do koinsanai di tulun dit id suang do sompiiyon di Yirobiam. Koinsanai di nongowonsoi di Baisa di suwai, om i kosioho’ dau, nga’ nokotulis ngai’ do hiri’d suang do Buuk di Monusui do Pasal Ngai’ di Raja’ dot Israil. Om kapatai noddi i Baisa om lobongo’ no do hilo’d Tirsa. Om i Ila noddi, i tanak dau do kusai, o suminowoli dau do suminiliu do raja’. ⁸ Tontok di koduwo nohopod om onom do toun di Raja’ Asa do momorinta’ do Yohuda, om kosiliu nod raja’ dot Israil i Ila, i tanak di Baisa. Om duwo toun dau do minomorinta’ do hilo’d Tirsa. ⁹ Om ponokipakat no i Simri do sumaap di Ila. Iyau nopo nga’ gunsiou, om boyoon do soudor di kikorita’-kuda’. Insan tadau di hilo’d Tirsa, om poginum no i Ila do hiri’d walai di Arsa, i mongilo-ilo do hiri’d walai di raja’, om naawuk tomod diri i Ila. ¹⁰ Om salakoi noddi i Simri om patayo’ no dau i Ila om siliu no iyau do raja’ do suminowoli di Ila. Nosiliu iti di koduwo nohopod om turu’ o toun di Raja’ Asa do momorinta’ do Yohuda. ¹¹ Om kosiliu poddi i Simri do raja’ om ngoyo’ ngai’ no dau patayo’ i tiyon-iyon di Baisa, om iri ngai’ piya i tobpinai om i tambalut di sompiiyon di Baisa nga’ aiso’ no o nokopoggidu’. ¹² Om kapatai ngai’ nopoddi it id suang do sompiiyon di Baisa do miagal di nokoboros do TUHAN do pinolombus di Nabi Yohu, dot id di Baisa. ¹³ Iyo Baisa nopo di Ila, i tanak dau om tumuku’ dot id tingolig om minamayayat di tulun dot Israil do momonsoi’d dusa. Om gowoi poddi om pinopotogod iyolo’d TUHAN, i Kinorohingan do tukuon do tulun dot Israil. ¹⁴ Iri nopo susuyon do suwai do pasal di Ila om nongkotulis no do hiri’d suang do Buuk di Monusui do Pasal Ngai’ di Raja’ dot Israil. ¹⁵ Tontok di koduwo nohopod om turu’ do toun di Raja’ Asa do momorinta’ do Yohuda, om kosiliu no i Simri do raja’ dot Israil. Om hilo’ddi iyau id Tirsa do momorinta’ do solinaid do turu’ no tadau. Tontok nopoddi nga’ maso di soudor dot Israil do monurungku’ do Gibiton, i bandar do tulun do Pilistin. ¹⁶ Om soira’ddi norongou diyolo’ do mongupakat i Simri do sumaap di raja’ om pinatai dau i raja’, om hiri nod kinoiyonon diri dot oinsanan nopo iyolo’ do minomili’ di Omri, i boyoon do soudor diyolo’, do siniliu do raja’ dot Israil. ¹⁷ Om tongkiadai noddi diyo Omri om i soudor dau o Gibiton, om ngoyo’ no diyolo’ turungkuo’ o Tirsa. ¹⁸ Om tontok di nokito di Simri do nosolod no i bandar diri, om suang noddi iyau do hiri’d walai do raja’ om tutudai no dau om rundun no iyau di walai, om kapatai noddi iyau. ¹⁹ Nosiliu pogi’ o miagal diri nga’ nokowonsoi id dusa i Simri dot id TUHAN, do miagal di Raja’ Yirobiam, om iyau nga’ minamayayat nogi’ di tulun dot Israil do momonsoi’d dusa. ²⁰ Om iri nopo susuyon do suwai do pasal di Simri, om kohompit ngai’ i pakat dot araat di winonsoi dau, om nokotulis ngai’ i’ do hiri’d suang do Buuk di Monusui do Pasal Ngai’ di Raja’ dot Israil. ²¹ Om a’ di oulud i tulun dot Israil tu’ haro ot orohian dot i Tibni, i tanak di Ginat o silihon do raja’, om haro ot orohian dot i Omri o raja’. ²² Nga’ kinootuson nopoddi om i sumokodung di Omri o nakamanang, om napatai’ddi i Tibni, om i Omri noddi o nosiliu’d raja’. ²³ Nosiliu iti do tontok di kotolu nohopod om iso’ do toun di Raja’ Asa do momorinta’ do Yohuda. Koloido’ nopo di Omri do momorinta’ dot Israil om hopod om duwo toun. Om onom o toun dau do minomorinta’ do Tirsa do mantad di timpuun i’ iyau do momorinta’. ²⁴ Nga’ alaid noddi om pomoli no iyau dot iso’ o nuluhon dot onom noribu o tusin do pirok do gatang, do mantad id songulun di roitan dot i Somor. Om pomonsoi no i Omri do bandar do hiri’d sakai di nuluhon diri, om pungaranai no dau do Samaria, do pinasangai-sangai di ngaran di Somor, i sanganu mantad di nuluhon. ²⁵ Nga’ agayo-gayo po o dusa do nowonsoi di Omri ko’ i piro-piro o raja’ di nokopomorinta’ dit id gulu ko’ iyau. ²⁶ I Omri nga’ miagal nopo di Yirobiam tu’ minomonsoi’d dusa om minamayayat di tulun dot Israil do momonsoi’d dusa om tumuku’ dot id tingolig. Om gowoi poddi om kotogod no o TUHAN, i Kinorohingan di tukuon do tulun dot Israil. ²⁷ Iri nopo susuyon do suwai do pasal di Omri om koinsanai di nongowonsoi dau nga’ nokotulis ngai’ i’ do hiri’d suang do Buuk di Monusui do Pasal Ngai’ di Raja’ dot Israil. ²⁸ Om di nopoddi napatai om nolobong i Omri do hilo’d Samaria, om i Ahab diri, i tanak dau, o nosiliu do raja’ do suminowoli dau. ²⁹ Tontok di toun do kotolu nohopod om walu’ di Raja’ Asa do momorinta’ do hilo’d Yohuda, om kosiliu no i Ahab, i tanak di Omri do raja’ dot Israil. Om duwo nohopod om duwo toun dau do momorinta’ do hilo’d Samaria. ³⁰ Om agayo-gayo po o dusa do nowonsoi dau dot id TUHAN ko’ i piro-piro o raja’ dit id gulu ko’ iyau. ³¹ A’ po dau koula’ dot iyo-iyo poddi dusa di winonsoi di Raja’ Yirobiam o dusa do winonsoi dau tu’ kinawin po dau i Isibil, i tanak di Raja’ Itbaal, i mantad hilo’d Sidon, om tuminuku’ iyau dot id Baal. ³² Minomonsoi iyau do walai’d iyonon do tumuku’ dot id Baal, i ponokokinorohingan do hilo’d Samaria. Om minomonsoi iyau do pananaraban do porsombahan dot id tingolig diri do hiri’d suang di walai’d tingolig. ³³ Om minomonsoi po iyau do patung dot Asira, i ponokokinorohingan diri. Agayo po kopio o dusa di winonsoi di Ahab ko’ i nowonsoi do koinsanai di raja’ dot Israil di minomorinta’ dot id gulu ko’ iyau. Om gowoi poddi om pinopotogod iyau do TUHAN, i Kinorohingan di tukuon do tulun dot Israil. ³⁴ Tontok di maso di Ahab do momorinta’ om nongoi di Hiol, i tulun do Baitol, wonsoyo’ kawagu i bandar do Yorikou. Nga’ kapatayai nopo i Hiol do duwo o tanak dau do miagal di nokoboros mantad do TUHAN do pinolombus di Yosua, i tanak di Nun. Tu’ napatai i Abiram, it id dotuo do tontok di pinopowonsoi i Hiol di pinoimpahan di bandar, om napatai i Sogub, i tanak dau dot id domulok do tontok di pinowonsoi di Hiol i totobon di wawayaan dot agayo di bandar diri.

¹ Insan tadau om ongoi no solowot di Raja’ Ahab o songulun o nabi di roitan dot i Ilia. Iyau nopo om mantad do hilo’d Tisbi, i hilo’d Giliad. Om boros ka dau, ’’Id suang do ngaran do TUHAN, i Kinorohingan do poimpasi, i tukuon do tulun dot Israil, om i pogobi-obian ku, om momisunud oku diya’, oi Tuan, dot id suang nopodti duwo ko’ tolu toun dot id dabantalan om aiso’ nondo o bolobou om aiso’ o rasam dot ongotigas piya dot a’ ku po poboroson do haro o rasam,’’ ka dau. ² Om boro-boros noddi o TUHAN dot id di Ilia, ³ ’’Tongkiad no do kinoiyonon diti, om pakayaan no do ponong hilo’d koulayon, i hilo’d soborong do Bawang do Yordan. Om lumisok nod hilo’ do hiri’d toning di luyu’ do Bawang do Kirit. ⁴ Om koinum ko indo do hiri’d luyu’ om kaakan ko do taakanon di pootodon do tombolog di roitan do bangkahak, i tombolog do suhuon ku’d paatod,’’ ka dau. ⁵ Om tonudo’ no di Ilia i pinonuhuan do TUHAN diri om ongoi no iyau do hiri’d luyu’ do Bawang do Kirit om undorong no iyau’d hiri. ⁶ Inuman nopo dau om hiri’d luyu’, om kaakan iyau do roti om daging di pootodon di tombolog do roitan do bangkahak, do monikid kosuabon om monikid sosodopon. ⁷ Alaid noddi do mantad diri om karasak no i luyu’ tu’ a’ i’ nakarasam. ⁸ Om boro-boros noddi o TUHAN dot id di Ilia. ⁹ Boros ka dau, ’’Baino’ nopodti om mongoi no do hilo’d bandar do Sarpat, i hilo’d somok do Sidon, om mundorong nod hilo’. Nosuhu’ ku no o songulun o tondu’ do nopuadan do paakan diya’ do hilo’,’’ ka dau. ¹⁰ Om ongoi noddi i Ilia do hilo’d Sarpat. Om soira’ di nokorikot iyau do hiri’d wawayaan di bandar om kokito no dau o songulun o tondu’ do monimung do siduwon. Om boros kaddi di Ilia dot id tondu’ddi, ’’Inan, ngoyo’ oku daa onuwai do waig dot ongokooro’,’’ ka dau. ¹¹ Tontok di manau-panau no i tondu’ do mongoi anu di waig, om pomolohou po kawagu i Ilia, ’’Igitan oku no daa diya’ do roti dot ongokooro’,’’ ka dau. ¹² Om boros ka di tondu’ do suminimbar, ’’Id suang do ngaran do TUHAN di poimpasi, i Kinorohingan di tukuon nu, om sumumpa’ oku no dot aiso’ no kopio o roti ku. Songonggom po kopio o tapung do torigu do hiri’d mangkuk om okoro’ no o tumau do saitun do hiri’d kakanan dot okooro’. Om maso ku nogi’ daa do monimung do siduwon do pogonsok dit okuri’ noddi, do maan dahai di tanak ku dot akanon. Iri poo o takanon dahai, om aayi’ pori om mandad pondo iyahai do matai,’’ ka dau. ¹³ Nga’ boros ka di Ilia dot id dau, ’’Kada’ katangkabo, oi inan. Wonsoyon po doho’d ongoiso’ o roti dit okooro’ i tapung om i tumau’ddi, om igitan nondo do hiti. Om mogonsok nogindo kawagu do maan do dokoyu di tanak nu. ¹⁴ Tu’ nokoboros nod TUHAN, i Kinorohingan do tukuon do tulun dot Israil do kisuang kasai’ nopondod tapung i mangkuk, om i kakanan nga’ kisuang kasai’ id tumau do gisom do porikatan kawagu’d TUHAN do rasam iti pomogunan,’’ ka dau. ¹⁵ Om pamanau noddi i tondu’ do minongoi pomonsoi do miagal di nokoboros di Ilia dot id dau. Om haro kasai’ nopo o kabagal do takano’ diyolo’d tolu do solinaid do piro-piro o tadau. ¹⁶ Om iri nopo mangkuk diri nga’ kisuang kasai’ nopod tapung om i kakanan nga’ kisuang kasai’ nopod tumau do miagal di nokoboros do TUHAN do pinolombus di Ilia. ¹⁷ Om piro-piro noddi o koloido’ do mantad diri, om sakit no i tanak di tondu’ di nopuadan. Om maid-laid nga’ murut-surut i toruol dau gisom do napatai iyau. ¹⁸ Om boros kaddi di tondu’ dot id di Ilia, ’’Oi susuhuon do Kinorohingan, nokuro tu’ minongoi ko’d hiti, om gowoi poddi om nosorou kawagu’d Kinorohingan i dusa ku om napatai nogiddi iti tanak ku?’’ ka dau. ¹⁹ Om boros ka di Ilia do suminimbar, ’’Patahako’ daa doho’ i tanak,’’ ka dau. Om ngoyo’ noddi di Ilia kibito’ i tanak do kusai di tondu’ddi, i poingkibit di tondu’, om igitai no di Ilia do hiri’d sawat, do hiri’d bilik di niyon di Ilia. Om poliiyo’ no di Ilia do hiri’d toodopon, ²⁰ om sambayang no iyau dot opuhod do poingkaa, ’’Oi TUHAN, i Kinorohingan ku, nokuro tu’ pinorikot nu o kosusaan diti dot id tondu’ di nopuadan diti? Osonong tomod i’ iyau dot id doho’ om nokuro tu’ pinatai nu nogiddi i tanak dau!’’ ka di Ilia. ²¹ Om loubai nogiddi di Ilia dot intolu i tinan di tanak, mikuwo’d suminambayang do poingkaa, ’’Oi TUHAN, i Kinorohingan ku, posio’ no iti tanak diti,’’ ka dau. ²² Om pinokinongou id TUHAN i sambayang di Ilia; om koposiai no i tanak om osonong noddi. ²³ Om ngoyo’ noddi di Ilia patahako’ i tanak diri do hiri’d tina’ di tanak om boro-boros nod, ’’Inan! Antangai pogi’ nga’ napasi no kawagu iti tanak nu!’’ ka dau. ²⁴ Om boros ka di tondu’ di nopuadan do suminimbar, ’’Oilaan ku nogiddi kopio do susuhuon ko do Kinorohingan om pawayaan kopio ko’d TUHAN do boros dau!’’ ka dau.

¹ Alaid-laid noddi do mantad diri, om di kotolu do toun do magadau, om boro-boros no o TUHAN dot id di Ilia. Boros ka dau, ’’Ongoi solowot di Raja’ Ahab om porikoton ku indo o rasam,’’ ka. ² Om pamanau no i Ilia. Tontok nopoddi om nakadala’ no kopio o pagagadau do hilo’d Samaria. ³ Om lohowo’ noddi di Ahab i Obadia, i mongilo-ilo di walai do raja’. (I Obadia nopo om tulun dit otorodok kopio do sumambayang dot id TUHAN, ⁴ om ngoyo’ no di Obadia o hatus di nabi om polisoko’ no dau dot id luang do nuluhon. Om binahagi’ dau iyolo’ do duwo o bohogian do sopilimo nohopod o tulun. Om piatadan dau iyolo’ do taakanon om waig.) ⁵ Om boros ka di Ahab dot id di Obadia, ’’Kaino tumongkop diti pomogunan do mongoi pogontong do tudan do waig om bawang; tu’ a’ i’ oila-ilaan do kobontol to nopo do sakot do paakan di kuda’ om i bagal toko’, om a’ indo minog do haro o patayon dot ongoiso’ piya di tayam-tayam toko’,’’ ka dau. ⁶ Om kopibahagi’ po diyolo’ i watas do ngoyon diyolo’ antangai, om pamanau nogiddi iyolo’. Pinakayaan di Ahab dot id iso’ o kinoiyonon om i Obadia no om pinakayaan dot id kinoiyonon do suwai. ⁷ Om maha’ di hiri nod tanga’d ralan i Obadia, om kosolowot no dau i Ilia. Om kotutunai no dau i Ilia, om otud no i Obadia do suminuwau dau. Om ponguhot no i Obadia, ’’I Ilia kopio ko toi, oi Aman?’’ ka dau. ⁸ ’’Oo, i Ilia oku nogi’,’’ ka di Ilia do suminimbar. ’’Ngoyo’ nogi’ kopio sunudai i raja’, i tuan nu’ddi do hiti oku,’’ ka dau. ⁹ Om boros ka di Obadia, ’’Nunu kopio’ddi o sala’ ku tu’ posuangon oku diya’ dot id koligagaanan do patayon di Ahab? ¹⁰ Id suang do ngaran do TUHAN di poimpasi, i Kinorohingan nu, om sumumpa’ oku do nokoponuhu’ no i raja’ do mogihum diya’ dot id pointikid-tikid do kinoiyonon do pointongkop diti pomogunan. Om ondung momoros i boyoon dot iso’ o kinoiyonon dot a’ ko hino do hiri, om pinokianu di Ahab do sumumpa’ i boyoon do kinoiyonon diri dot a’ ko nosolowo-lowot do hiri. ¹¹ Om baino’ noddi om suhuon oku nogi’ diya’ do mongoi pomisunud dau do hiti ko? ¹² Om kapamanau oku nopo dotindo do mantad hiti om atantu’ no do ngoyon ko angatai di Rusod do TUHAN do kumaa dot id kinoiyonon dit a’ ku oilaan! Om ondung sunudan ku i Ahab do hiti ko, om a’ ko indo dau osolowot om atantu’ no do patayon oku dau, do mulong piya dot otorodok kopio oku do sumambayang dot id TUHAN do mantad dit okoro’ oku po. ¹³ A’ ko po toi nokorongou di pinopolisok oku do hatus o nabi do TUHAN do hilo’d luang do nuluhon di maso di Isibil do minimpatai do nabi do TUHAN? Binahagi’ ku iyolo’ do sopilimo nohopod o tulun dot id iso’ o luang, om piatadan ku iyolo’ do takanon om tinumon? ¹⁴ Om poingkuro ko’ddi do monuhu’ doho’ do mongoi pomisunud di raja’ do hiti ko? Atantu’ no do patayon oku dau!’’ ka dau. ¹⁵ Om boros ka di Ilia, ’’Mamatos oku dot id suang do ngaran do TUHAN dit Agayo Kuasa’, i pogobi-obian ku, do mongoi oku no kopio solowot di raja’ do tadau’d baino’,’’ ka dau. ¹⁶ Om ngoyo’ no di Obadia sunudai i raja’, om pamanau no i Ahab do minongoi solowot di Ilia. ¹⁷ Soira’ di nokito nogi’ di Ahab i Ilia om pomoros no i Ahab dot opuhod do poingkaa, ’’No, nga’ hiti ko i’, i mamagangau do hiti’d Israil!’’ ka. ¹⁸ Nga’ boros ka di Ilia, ’’Okon i’ ko’ iyoho’ i mamagangau, nga’ iya’ om i sompiiyon nu. Tu’ suminurilog ko di pinonuhuan do TUHAN, om tuminuku’ ko di piro-piro o tingolig do Baal. ¹⁹ Nga’ baino’ nopo, om suhuon ngai’ no i tulun dot Israil do mongoi solowot doho’ do hilo’d Nuluhon do Karmol. Om suhuon nogi’ it apat nahatus om limo nohopod o nabi di modsubak do Baal om it apat nahatus o nabi di modsubak dot Asira, i godsian di Isibil, i sawo do raja’ddi!’’ ka dau. ²⁰ Om suhuo’ ngai’ no di Ahab o koinsanai di tulun om i piro-piro o nabi di modsubak do Baal do mongoi do hilo’d Nuluhon do Karmol. ²¹ Om insomok noddi i Ilia di tulun dot ogumu’ om boro-boros no iyau, ’’Songkuro nopo koloido’ dokoyu dot orohian do mikoduwo o ginawo? Ondung Kinorohingan kopio o TUHAN, om tumuku’ kou no dot id TUHAN; nga’ ondung Baal o Kinorohingan, om tumuku’ kou nopo dot id Baal!’’ ka dau. Om aiso’ id komi di tulun di songintimung do hiri. ²² Om boros kaddi di Ilia, ’’Id pogialatan nopo di nabi do TUHAN om iyoho’ poo o noolu’, om apat indo nahatus om limo nohopod o nabi do modsubak do Baal do hiti. ²³ Nga’ pootodo’ pogi’ do hiti o duwo tinan do sapi’ do tontoluhan, om suhuon i’ ilo piro-piro nabi di modsubak do Baal do manganu di songinan om sumbolion i’. Om popoton nogindo om pasakayon di siduwon, nga’ kada’ kopio pagapui do hiri. Om iri tiso’ di sapi’ nga’ iyoon ku i’ iyoho’ddi. ²⁴ Om pologoson nopo i piro-piro nabi di modsubak do Baal diri do sumambayang dot id kinorohingan diyolo’, om iyoho’ nga’ sumambayang indo dot id TUHAN. Om isai nopo i sumimbar do mikuwo’d polintuhun do tapui om iri no o Kinorohingan kopio,’’ ka dau. Om oinsanan nopo i tulun do suminimbar dot opuhod do poingkaa, ’’Kaakun i’ iyahai!’’ ka. ²⁵ Om boros kaddi di Ilia dot id piro-piro o nabi di modsubak do Baal, ’’Iyokoyu no o gulu do momili’ do sapi’ om poposodia’ddi tu’ ogumu’ kou i’ iyokoyu. Om sumambayang kou no dot id kinorohingan dokoyu, nga’ kada’ no kopio dokoyu opuyai i kayu,’’ ka dau. ²⁶ Om pilio’ noddi diyolo’ o songinan di sapi’ om posodiawo’ no diyolo’. Om sambayang nogiddi iyolo’ dot id Baal do gisom do norikot o pitangaadau, do mikuwo’d minggarang. ’’Simbaro’ iyahai, oi Baal!’’ ka no diyolo’. Om mingiyo nopoddi iyolo’ do mikuwo’d mintari’ do minsorili’ di pananaraban do porsombahan di winonsoi diyolo’. Nga’ aiso’ i’ o nunu-nunu dot isimbar. ²⁷ Om sosodopon noddi om timpuun no i Ilia do momohingi-hingi diyolo’. Boros ka dau, ’’Sambayang-bayang kou po dot opuuhod! A’ i’ oila-ilaan do nokotongkiad nopo iyau! Ko’ maso po dau do koodop, om mositi’ no do posikan dokoyu iyau!’’ ka no di Ilia. ²⁸ Om sambayang po kawagu dot opuuhod i piro-piro nabi diri. Om pingsuhatan po diyolo’d pisau om pais o tinan diyolo’, do miagal di koubasan diyolo’d momonsoi, om gisom do songluyung-luyung po o raha’. ²⁹ Om mingiyo nopoddi iyolo’ do gisom dot aadau no, do miagal pod tulun di noulau-ulau; nga’ aiso’ i’ o sumimbar, om aiso’ o minamadul. ³⁰ Om boros kaddi di Ilia dot id tulun dit ogumu’, ’’Insomok-somok kou,’’ ka dau. Om timung ngai’ no iyolo’ do hiri’d posorili’ dau. Om timpuun no i Ilia do mononong di pananaraban do porsombahan dot id TUHAN, di nahaba’ no. ³¹ Om anu no iyau do hopod om duwo o watu. Iso’ nopo o watu nga’ ponokowakil do tiso’ di hopod om duwo o sinakagon di tangaanak di Yakub, i pinungaranan do TUHAN dot i Israil. ³² Om iri no ngai’ i watu’ddi o pinononong kawagu di Ilia di pananaraban do porsombahan, i tiyonon do sumambayang dot id TUHAN. Om pinoritan dau dot agayo o posorili’ di pananaraban do porsombahan, do korumpos i’ o hopod om apat o lito do waig. ³³ Om pouludo’ no dau i siduwon do hiri’d sakai di pananaraban do porsombahan. Om popoto’ noddi dau i sapi’ di tiso’ om pasakayo’ no i popot diri do hiri’d siduwon. Om boros kaddi dau, ’’Ngoyo’ dokoyu suangai do waig ot apat o luping do gisom dot oponu’, om potuntugon i’ i waig do hilo’d porsombahan do sorobon om hilo’d siduwon,’’ ka dau. Om kowonsoi poddi diyolo’ o miagal diri, ³⁴ om boro-boros po kawagu iyau, ’’Tuntug-tuntugan po dokoyu,’’ ka dau. Om ngoyo’ no diyolo’ tuntugai. ’’Tuntug-tuntugai po dot ongoinsan,’’ ka kawagu di Ilia, om ngoyo’ no diyolo’ kawagu tuntugai. ³⁵ Om lumuyung nopoddi i waig do posorili’ di pananaraban do porsombahan do gisom do noponu’ do waig i parit. ³⁶ Om korikot poddi i maso do kapatahakan do porsombahan do sorobon di dongsosodopon, om insomok no i Nabi Ilia, di pananaraban do porsombahan, om sambayang no iyau. Boros ka dau, ’’Oi TUHAN, i Kinorohingan di tukuon di Abraham, om i Isak, om i Yakub. Pointalango’ nod baino’ dot iya’ o Kinorohingan dot Israil, om iyoho’ o susuhuon nu; om pointalangon do pinonuhuan ngai’ nu doho’ iti winonsoi ku. ³⁷ Simbaro’ oku no, oi TUHAN! Simbaro’ oku no om koilo i’ iti tulun dot ogumu’ dot iya’ no o Kinorohingan, oi TUHAN, om iya’ o popoguli’ kawagu diyolo’ dot id diya’,’’ ka dau. ³⁸ Om polintuhun noddi o TUHAN do tapui do mantad hilo’d tawan do minonorob do koinsanai di porsombahan om i siduwon, om koinsanai di watu om i tana’, om minonuu di waig di hiri’d parit. ³⁹ Om kokito poddi di tulun dot ogumu’ iri om tungub nopo iyolo’ do hiri’d tana’ do mikuwo’d minomoros do poingkaa, ’’TUHAN no o Kinorohingan; TUHAN no kopio o Kinorohingan!’’ ka diyolo’. ⁴⁰ Om boros kaddi di Ilia, ’’Ngoyo’ dokoyu tangkapo’ ngai’ ilo nabi di modsubak do Baal; kada’ nod haro o tongoiso’ piya do kopoggidu’!’’ ka dau. Om olomus nopoddi i tulun do minongoi panangkap do koinsanai di nabi di modsubak do Baal. Om pokoyoo’ ngai’ no di Ilia iyolo’ do hilo’d Bawang do Kison, om hilo’ noddi o pinamatayan ngai’ dau diyolo’. ⁴¹ Om boro-boros noddi i Ilia dot id di Raja’ Ahab, ’’Ongoi nogi’ akan do dinondo, oi Tuan Raja’, tu’ oruhai nod rumasam; orongou no o kahas do rasam,’’ ka dau. ⁴² Om ongoi no i Ahab akan, om i Ilia no om tuminakad di Nuluhon do Karmol. Om hilo’ no iyau do pointungub do hiri’d tana’, om tulu nopo dau om id piolitan do totud dau. ⁴³ Om boros ka dau dot id susuhuon dau, ’’Takad daa do hilo’d timpak om antangan i’ o ponong hilo’d rahat,’’ ka dau. Om takad no i susuhuon dau om guli’ no kawagu om boros ka dau, ’’Aiso’ i’ o nunu-nunu do nokito ku,’’ ka. Inturu’ di Ilia suhuo’ i susuhuon dau do tuminakad do minongoi pogontong. ⁴⁴ Om di nopo di kointuru’ di susuhuon diri do guminuli’, om boros ka dau, ’’Haro nokito ku’d haun dot irad nod palad do mantad ponong hilo’d rahat,’’ ka. Om boros ka di Ilia dot id susuhuon dau’ddi, ’’Ongoi kopio do hilo’d di Raja’ Ahab, om suhuon i’ iyau do sumakai di korita’-kuda’ dau om kouli’ i’ iyau dot a’ po aandon do rasam,’’ ka dau. ⁴⁵ Om a’ po alaid om luhung no i tadau, om minumang puhod o tongus om ruminasam dot asapou. Om sakai no i Ahab di korita’-kuda’ dau om uli’ no do hilo’d Yisriil. ⁴⁶ Om tontok iddi do nakaanu i Ilia do kokorisan do mantad id TUHAN. Om lopio’ no dau i rasuk dau dot anaru om poogkoso’ no dau. Om panangkus no iyau do suminogulu di Ahab do gisom do nokorikot do hiri’d wawayaan do bandar do Yisriil.

¹ Om susuyo’ ngai’ no di Ahab i winonsoi di Ilia dot id di Isibil, i sawo dau. Om sinusui nogi’ dau do pinatai ngai’ di Ilia i nabi di modsubak do Baal. ² Om porikoto’ nod i Isibil o boros dot id di Ilia do poingkaa, ’’Hukuman oku nopo om patayon oku nopo di tingolig ku ondung a’ ku no owonsoi dot id diya’ o miagal di winonsoi nu dot id nabi diri do dongiyo’dtid suab,’’ ka dau. ³ Om kooris tomod noddi i Ilia gisom do minogidu’ iyau do moddosi’d patayon. Om pitanud no iyolo’ di susuhuon dau do minongoi do hilo’d Borsiba, i hilo’d watas do Yohuda. Om tongkiadai no di Ilia i susuhuon dau’d hilo’. ⁴ Nga’ i Ilia nopo om pamanau nopod gakod do nosongodou do ruminikot do hiri’d tana’ do kowotuan. Om undorong no iyau dot id sahau di kayu dit okohob o tuntu. Om irikau no iyau do hiri om uhang po daa’ddi dau do matai. Boros ka di Ilia dot id TUHAN, ’’A’ oku noddi kogoos, oi TUHAN. Ngoyo’ nopo o ginawo ku, osonong nogi’ dot apatai oku,’’ ka dau. ⁵ Om lii noddi iyau do hiri’d sahau di kayu om koodop no iyau. Om rikot no ot iso’ o moloikat do minongoi kama’ dau do mikuwo’d minoro-boros do poingkaa, ’’Ilia, tungag, om makan i’!’’ ka. ⁶ Om pikorowo-rowo no i Ilia om kokito no dau o sonliob o roti do hiri’d toning do tulu dau om haro o kakanan dot okooro’ do kisuang do waig. Om akan noddi iyau om inum, om lii no iyau kawagu. ⁷ Om rikot po kawagu i moloikat do TUHAN do koinduwo no do minongoi kama’ dau. Om boro-boros nod, ’’Ilia, tungag, om makan i’, om kogoos ko i’ do mamanau dot osodu’,’’ ka. ⁸ Om tungag no i Ilia, om akan noddi om inum iyau, gisom dot okoris iyau. Om nokogoos iddi iyau do minamanau do solinaid dot apat nohopod o tadau do kuminaa do hilo’d Sinai, i nuluhon do tiyonon do TUHAN. ⁹ Om odop noddi iyau do hiri’d suang dot iso’ o luang do nuluhon. Om boro-boros noddi o TUHAN dot id dau, ’’Ilia, nunu maan nu’d hiti?’’ ka. ¹⁰ Om boros kaddi di Ilia do suminimbar, ’’Oi TUHAN, i Kinorohingan dot Agayo Kuasa’. Iyoho’ nopo om iya’ noo o pinogobi-obian ku. Nga’ iri nopo tulun dot Israil om tuminolibamban i’ di batos diyolo’ dot id diya’. Tu’ hinuyas diyolo’ i pananaraban do porsombahan dot id diya’ om pinatai diyolo’ i piro-piro nabi nu. Om iyoho’ poo o noolu’, om baino’ noddi om pokipapatayan oku po daa diyolo’!’’ ka dau. ¹¹ Om boros kad TUHAN dot id dau, ’’Soliwan do mantad hino’d luang, om mingkakat i’ do tumimbaba’ doho’ do hilo’d timpak diti nuluhon,’’ ka dau. Om talib noddi o TUHAN do hiri om porikoto’ no dau o tongus dit opuhod kopio, gisom do nongopitas o nulu-nulu om nangagaang o nuluhon di kapampangan, nga’ a’ i’ o TUHAN minintalang dot id tongus diri. Om kotingkod poddi i tongus, om guyu’ no o tana’, nga’ a’ i’ o TUHAN minintalang do tontok di guminuyu’ o tana’. ¹² Om rikot nogiddi o tapui nga’ a’ i’ hino o TUHAN do hiri. Om katalib poddi iri om korongou no dau o kohus do ribut dit opiiyan. ¹³ Om korongou poddi di Ilia i kohus di ribut dot opiiyan diri, om sompono’ no dau do rasuk dau o rabas dau, om soliwan no iyau om ingkakat no do hiri’d kabang di luang. Om haro’ddi o boros do minoro-boros dau do poingkaa, ’’Ilia, nunu maan nu’d hiti?’’ ka. ¹⁴ Om boros ka di Ilia do suminimbar, ’’Oi TUHAN, i Kinorohingan dot Agayo Kuasa’. Iyoho’ nopo, om iya’ noo o pogobi-obian. Nga’ iri nopo tulun dot Israil om tuminolibamban i’ di batos diyolo’ dot id diya’. Tu’ hinuyas diyolo’ i pananaraban do porsombahan dot id diya’ om pinatai diyolo’ i piro-piro nabi nu. Iyoho’ poo o noolu’, om baino’ noddi om pokipapatayan oku po daa diyolo’!’’ ka dau. ¹⁵ Om boros kad TUHAN, ’’Guli’ nogi’ do hilo’d tana’ do kowotuan, i hilo’d somok do Damsik, om tuntugan nod tumau o tulu di Hasail, do tanda’ do silihon do raja’ do Siria. ¹⁶ Om iyoon nogiddi i Yohu, i tanak di Nimsi, om osiliu i’ iyau do raja’ dot Israil, om i Ilisa i tanak di Sapat, i mantad hilo’d Abil Mihola om osiliu i’ iyau do nabi do sumowoli diya’. ¹⁷ Isai nopo it a’ di Hasail apatai, om apatai indo di Yohu. Om iri no i kopoggidu’ do mantad id di Yohu om apatai indo di Ilisa. ¹⁸ Nga’ posion ku i’ o turu’ noribu tulun dot Israil, iri no i tulun dit otorodok kasai’ dot id doho’ om it a’ insan tuku’ dot id tingolig do Baal om a’ insan ongoi tungub di tingolig,’’ ka. ¹⁹ Om pamanau no i Ilia om kabantalai no dau i Ilisa do maso do mamaradu do hiri’d tumo dau om hopod om duwo o pasang do sapi’ do maso do pamaradu. I Ilisa nopo om i sapi’ dit id tohuri no o pamaradu dau. Om soira’ di tuminalib i Ilia di Ilisa, om iduwo’ no di Ilia i rasuk dau dit anaru om pasapayo’ no do hiri’d lihawa di Ilisa. ²⁰ Om tongkiadai nopoddi di Ilisa i sapi’ dau om panangkus no do guminusa’ di Ilia. Om kokosupai poddi dau, om boro-boros no i Ilisa, ’’Pabanaro’ oku po daa do mongoi intod di molohing ku om tumanud oku nogindo diya’,’’ ka dau. Om boros ka di Ilisa, ’’Ongoi nopo. A’ ku i’ iya’ sansagan do moyo’,’’ ka dau. ²¹ Om guli’ noddi i Ilisa do hiri’d tumo dau om sumbolio’ no dau i sapi’ dau. Om iri nopo tinggayan di radu om numaan dau do pogudung do pinogonsok di daging di sapi’. Om bohogio’ nogiddi dau i daging dot id tulun di pakaraja’ do hiri, om akano’ no diyolo’. Om ongoi noddi i Ilisa tanud di Ilia do suminiliu do mongunguhup dau.

¹ Insan tadau om timungo’ ngai’ no di Binhadad, i raja’ do Siria, i soudor dau, om ngoyo’ no dau turungkuo’ o bandar do Samaria do miwoyo’ do tolu nohopod om duwo o raja’ do suwai di kikuda’ om kikorita’-kuda’ di don sumasangod. Om songodo’ no diyolo’ i bandar diri. ² Om ponuhu’ no iyau do tulun do mongoi solowot di Ahab, i raja’ dot Israil, do hiri’d bandar diri, do mikuwo’d poboros do poingkaa, ³ ’’Pokionuon di Raja’ Binhadad do maan nu patahako’ dot id dau i tamas, om pirok om iri ngai’ i sawo om tangaanak nu dit ongokoris,’’ ka. ⁴ Om boros ka di Ahab, ’’Sunudan no i Tuan Raja’ do kaakun oku i’ di pokionuon dau. Onuon oku nopo dau om koinsanai di doho’d songonuon,’’ ka dau. ⁵ Om guli’ no kawagu i piro-piro susuhuon di Binhadad diri dot id di Ahab do pinopoboros di pokionuon di Binhadad di suwai ko’ iri. Poingkaa i boros di piro-piro susuhuon diri, ’’Di nopo di guulu om pinokianu di raja’ dahai do maan nu patahako’ dau i tamas, om pirok om iri ngai’ i sawo om tangaanak nu. ⁶ Nga’ baino’ noo, om porikoton dau i gunsiou dau do mongoi ponoruang di walai nu om i kawalayan di pagawai nu, do mongoi panganu do nunu nopo i kigatang dot okito diyolo’. Rumikot no iyolo’d hiti do dongiyo’dtid suab,’’ ka diyolo’. ⁷ Om lohowo’ ngai’ noddi di Raja’ Ahab i boyoon dot Israil om boro-boros no iyau diyolo’, ’’Iyokoyu nga’ kokito i’ dot orohian daa iti tulun diti do momungou dati’. Tu’ pokionuon dau do patahakon ngai’ ku i sawo om i tangaanak ku, om i tamas om pirok ku. Om nookunan ku nori,’’ ka dau. ⁸ Om boros kaddi di piro-piro o boyoon dot Israil, ’’Kada’ podulo’ i tulun diri, oi Raja’! Kada’ pokiala’,’’ ka diyolo’. ⁹ Om boros kaddi di Ahab do suminimbar di susuhuon di Binhadad, ’’Sunudan no i Tuan Raja’ Binhadad dot ookunan ku i’ daa i pinokianu dau di koiso’ i’, nga’ iri nopo koduwo om a’ ku no ookunan,’’ ka dau. Om pamanau noddi i piro-piro susuhuon diri. Om ongoi po kawagu iyolo’ solowot di Ahab, om boro-boros nod poingkaa, ¹⁰ ’’Porikot nondo i raja’ dahai do soudor dot ogumu’ kopio do mongoi pamaraag diti bandar nu, om iri nopondo tauu di kinaraagan do bandar nu om oonggom-onggom i’ diyolo’. Nokosumpa’ no iyau dot id tingolig dau do momohukum dau, ko’ mamatai dau dot a’ no dau owonsoi o miagal diri!’’ ka diyolo’. ¹¹ Om boros ka di Raja’ Ahab do suminimbar, ’’Poboroson no o miagal diti dot id di Raja’ Binhadad: Iri nopo gunsiou dot otopot om oondos nopo om kopongo do sumangod, okon i’ ko’ dit a’ po kasangod,’’ ka dau. ¹² Iri nopo pinonimbar di Ahab diri nga’ pinoboros dot id di Binhadad di maso dau do poinsugku’ di piro-piro o raja’ do suwai di sokodung dau, do monginum-nginum do hiri’d kokiiman diyolo’. Om korongou poddi di Binhadad iri, om suhuo’ no dau i tulun dau do mongoi panangod di bandar do Samaria. Om pamanau noddi iyolo’. ¹³ Om daamot nopoddi, om haro o songulun o nabi do minongoi boro-boros di Raja’ Ahab. Boros ka dau, ’’Minomoros o TUHAN dot id diya’ do poingkaa, ’Kada’ poddosi di soudor dot ogumu’ddi! Onuan ku i’ iya’ do kamanangan do sumangod diyolo’ do tadau’d baino’, om oilaan nu indo dot iyoho’ no o TUHAN!’ ka,’’ ka dau. ¹⁴ ’’Isai tuu o mogulu do mongoi sangod?’’ ka di Ahab do minuhot. Om boros ka di nabi diri, ’’I soudor dit ongomulok po, i woyoon di piro-piro boyoon do watas. Iyo noddi o boros do TUHAN,’’ ka dau. ’’Om isai o momoyo’ do mongoi sangod?’’ ka kawagu di raja’ do minuhot. ’’Iya’, oi Raja’,’’ ka di nabi. ¹⁵ Om timungo’ ngai’ noddi di raja’ i soudor dit ongomulok po, i woyoon di piro-piro boyoon do watas, om intobo’ no dau iyolo’. Oinsanan nopo nga’ duwo nahatus om tolu nohopod om duwo o soudor. Om niyo i’ dau’ddi i soudor dot Israil dit ongkirapo-rapo. Oinsanan nopo om turu’ noribu o tulun. ¹⁶ Om tuminimpuun iyolo’ do minongoi sangod di dangadau no, di maso di Binhadad om i tolu nohopod om duwo raja’ do sokodung dau do moginum-ginum do gisom do nangaawuk do hiri’d kokiiman diyolo’. ¹⁷ Iri nopo minogulu om i soudor dit ongomulok po. Om ngoyo’ noddi di tulun di sinuhu’ di Binhadad do mongoi ponoluku’ di pisangod, sunudai i Binhadad do haro o sinompuruan do soudor do kumaa ponong id diyolo’ do mantad ponong hilo’d Samaria. ¹⁸ Om ponuhu’ no i Binhadad do mongoi panangkap di soudor diri. Boros ka dau, ’’Miahon nopod manangkap. A’ no podulon do mongoi tuu daa iyolo’ sangod ko’ mongoi po ponokiulud,’’ ka. ¹⁹ Om timpuun no i soudor dit ongomulok poddi do suminangod, om sinusuhut iyolo’ di soudor dot Israil dit ongkirapo-rapo. ²⁰ Om sompori-pori nopo iyolo’ do minamatai di pisangod dot abantalan diyolo’ gisom diri do minogidu’ i tulun do Siria do gusa-gusaon di tulun dot Israil. Nga’ i Binhadad nopo om a’ i’ nokosupan tu’ suminakai iyau do kuda’ do minogidu’ do miwoyo’ do piro-piro di soudor dau dit ongkikuda’. ²¹ Om i Raja’ Ahab nga’ minongoi nogi’ sangod. Om piningraag dau i korita’- kuda’ di don sumasangod om pinimpatai dau i kuda’. Om agayo no kopio o kinaalaan di tulun do Siria do tadau’ddi. ²² Om ongoi no kawagu i nabi solowot di Ahab om boro-boros no, ’’Baino’ nodti, oi Tuan, om osonong nogi’ do muli’ ko om pokorison no ginawo nu om momusorou no kopio. Tu’ rumikot po moti’ kawagu i raja’ do Siria do mongoi panangod dot orikot i maso do momiroun kawagu o kayu,’’ ka dau. ²³ Om boro-boros no i soudor di Raja’ Binhadad dot id di Binhadad, ’’Iri nopo kinorohingan di tukuon do tulun dot Israil om ongokoris kopio do hilo’d konuluhanan om iri no kinaala-laan toko’ do nala’ di bansa’ dot Israil. Nga’ atantu’ no dot aala’ toko’ i’ iyolo’ do hilo’d rantai. ²⁴ Om osonong nogi’ do sowolian nu di boyoon do soudor i tolu nohopod om duwo o raja’ddi. ²⁵ Om woyoon nu nogindo o posukan do soudor dot irad di soudor nu di naala’ di gulu, om miwoyo’ do kuda’ om korita’-kuda’ do don sumasangod do miagal di gulu kogumu’. Om ngoyon toko’ nondo songodo’ i tulun dot Israil do hilo’d rantai, om atantu’ no do kamanang toko’ i’ do baino’,’’ ka diyolo’. Om kookunai nod i Raja’ Binhadad iri, om tonudo’ no dau i nosihat di soudor dau. ²⁶ Om korikot poddi i maso do momiroun kawagu o kayu om woyoo’ no dau i soudor dau do minongoi do hilo’d bandar dot Apik do mongoi panangod di tulun dot Israil. ²⁷ Om i tulun dot Israil nga’ minonimung nogi’ do soudor diyolo’ om pamanau no do minongoi sangod. Om minipiduwo i soudor diyolo’ om pomukiim no iyolo’ do hiri’d hapak di tulun do Siria. Pataladon nopo di soudor do Siria dit agayo tomod o kinotongkopon do minomonu’ di watas diri, om iyo nod duwo baanan do dumba’ i soudor dot Israil. ²⁸ Om rikot no o songulun o nabi dot id di Ahab om boro-boros no, ’’Poingkaa o boros do TUHAN, ’Iyo nopoddi tu’ osorou daa di tulun do Siria do hilo’ nod konuluhanan do kikuasa’ oku, om a’ no kikuasa’ do hiti’d rantai, om onuan ku i’ iya’ do kamanangan dot iyo piya kopio’ddi o kogumuo’ do soudor diyolo’. Om koilo ko indo om i tulun nu do TUHAN oku,’ ka,’’ ka dau. ²⁹ Om turu’ o tadau di soudor do Siria om i soudor dot Israil do poundorong do hiri’d pinomukiiman diyolo’. Om tadau poddi di koturu’ om timpuun nogi’ iyolo’ do minisangod. Om id suang nopo do pinisangadan diri nga’ napatai di tulun dot Israil o hatus noribu o tulun do Siria. ³⁰ Iri nopo i nokopoggidu’ om minogidu’ daa do kuminaa do hiri’d bandar dot Apik, nga’ kahaba’ noddi i tolig di bandar om kootungai no o duwo nohopod om turu’ noribu diyolo’. Om i Binhadad nga’ minogidu’ nogi’ do minongoi do hiri’d suang di bandar om lisok no dot id iso’ o bilik dit id gogok no kopio. ³¹ Om ongoi noddi o piro-piro boyoon do soudor di Binhadad solowot dau. Om boros ka diyolo’, ’’Boros kad tulun, om ongobinsianan i’ kaka o raja’ dot Israil. Om pabanaro’ daa iyahai do mongoi solowot di raja’ dot Israil do mikuwo’d manampakai do karung do tanda’ do monosol, om manangkaro do tali do tanda’ do mokiporinta’; om ulan toi’ daa om a’ ko dau patayon,’’ ka diyolo’. ³² Om panampakai noddi iyolo’ do karung om panangkaro do tali, om ongoi no solowot di Ahab, om boro-boros nod poingkaa, ’’Nosiliu nod susuhuon nu i Binhadad, oi Tuan Raja’. Om pokionuon no daa kopio dau dot a’ nu iyau patayon,’’ ka diyolo’. Om boros ka di Ahab, ’’Poimpasi po toi i tobpinai ku’ddi?’’ ka dau. ³³ Om magandad no i boyoon do soudor di Binhadad do tanda’ do sumonong i Ahab. Om koboros poddi di Ahab dot, ’’Tobpinai’’ ka, om tilombus nopo iyolo’ do minomoros dot, ’’Oo, otopot nogi’ kopio do tobpinai nu i Binhadad,’’ ka diyolo’. Om boros ka di Ahab, ’’Ngoyo’ iyau hitio’!’’ ka dau. Om korikot noddi i Binhadad, om angatai no di Ahab do sumakai di korita’-kuda’. ³⁴ Om boros ka di Binhadad dot id dau, ’’Pogulion ku i’ dot id Tuan i piro-piro bandar di nosolod di tapa’ ku do mantad id tapa’ nu. Om songkoino ko i’ do popoingkakat do tiyonon nu do mongindapu’ do hilo’d bandar do Damsik do miagal di winonsoi di tapa’ ku do hiti’d Samaria,’’ ka dau. Om boros ka di Ahab, ’’Iti no boros om batos nu o kopoiduan ku diya’,’’ ka dau. Om pomonsoi noddi i Ahab do pitoruan dot id di Binhadad, om poiduwo’ no di Ahab i Binhadad. ³⁵ Om suhuo’ nod songulun o nabi o tiso’ o nabi do suwai do mongoi pomobog dau, tu’ iyo noddi o pinonuhuan do TUHAN, nga’ mada’ i’ i tambalut dau do momonsoi do miagal diri. ³⁶ Om boros kaddi di nabi diri, ’’Kapamanau ko po do mantad hiti om ngoyon ko nod singa tabpaai tu’ a’ ko i’ mumboyo’ do boros do TUHAN,’’ ka dau. Om notopot i’ kopio tu’ kapamanau po iyau do mantad hiri om tabpaai no iyau do singa. ³⁷ Om ongoi no i nabi diri dot id tulun do suwai om boros ka dau, ’’Bobogo’ oku!’’ ka. Om bobogo’ noddi iyau di tulun do gisom do nosuhat iyau. ³⁸ Om rilitai noddi di nabi i suhat dau, do kain o pinomorilit, gisom dot a’ no iyau’d tulun otutunan. Om ongoi nogi’ iyau ingkakat do hiri’d tisan do ralan do magandad di raja’ dot Israil do tumalib. ³⁹ Om soira’ di tuminalib i raja’, om pomolohou no i nabi diri dot i raja’ o linohou, ’’Oi Tuan Raja’, tontok di monokisaap oku do hilo’d pisangadan, om ngoyo’ oku no dot iso’ o soudor paatadai dot iso’ o pisangod di natangkap. Boros ka dau, ’Gompion no kosonong-sonong iti tulun diti; ondung kopoggidu’ iyau, om iya’ no o patayon do sumowoli dau ko’ kapambayar ko do tolu noribu tusin do pirok,’ ka. ⁴⁰ Nga’ tontok dit agangau kopio oku, om poggidu’ no i tulun,’’ ka dau. Om boros ka di raja’, ’’Iya’ i’ o pinoporikot do hukuman dot id tinan nu, om iya’ no o tumanggung dino,’’ ka. ⁴¹ Om iduwo’ noddi di nabi diri i rilit di suhat dau, om kotutunai no di raja’ do tulun iyau di nabi. ⁴² Om boros ka di nabi diri dot id raja’, ’’Poingkaa o boros do TUHAN, ’Iri nogi’ i tulun di pinonuhuan ku diya’ do mamatai om pinologos nu do minogidu’. Om gowoi poddi om iya’ no o matai do sumowoli dau; om iri pondo i soudor nga’ angapatai no tu’ pinologos nu i’ i soudor dau do minogidu’,’ ka,’’ ka dau. ⁴³ Om otogod tomod diri om tumongob i raja’ do minuli’ do hilo’d Samaria.

¹ Hiri nopod toning di walai di Raja’ Ahab do hilo’d Yisriil om haro o kabun dot anggur dot i Nabot o sanganu. ² Insan tadau om boro-boros no i Ahab di Nabot, ’’Sianu oku daa’dti kabun dot anggur nu, tu’ iti nopo kabun om osomok kopio diti walai ku. Om tanaman ku daa do rarapaon. Onuan ku i’ daa iya’ do kabun dot anggur dit osonong ko’ iti do maan do poningolon diti. Ko’ ondung orohian ko om bolion ku nogi’ do tumanud di pamagatang dit apatut,’’ ka dau. ³ Om boros kaddi di Nabot, ’’Iti nopo kabun dot anggur diti om tinungkusan ku po do mantad id taki-aki ku. Sumumpa’ oku no dot id suang do ngaran do Kinorohingan dot a’ ku no kopio patahakon iti dot id diya’!’’ ka dau. ⁴ Om tumongob diri om otogod o ginawo di Ahab do nokorongou di pinoboros di Nabot dot id dau. Om kouli’ poddi i Ahab om lii no iyau do hiri’d toodopon dau do potoguang ponong hiri’d limput, om a’ nopoddi iyau makan. ⁵ Om ongoi no i Isibil, i sawo di Ahab do hiri’d dau, om uhoto’ no dau i Ahab, ’’Nokuro tu’ tumongob ko? Nokuro tu’ a’ ko makan?’’ ka dau. ⁶ Om boros ka di Ahab, ’’Gama’ no di Nabot, a’ oku asanangan dau. Tu’ bolion ku daa i kabun dau ko’ ondung orohian daa iyau om poolonon ku daa do kabun dot anggur do suwai, nga’ mada’ i’ iyau!’’ ka dau. ⁷ Om boros ka di Isibil, ’’Okon toi ko’ raja’ ko dot Israil! Tungag, om makan i’! Posimbayanon nopo o ginawo tu’ katahak ku i’ diya’ i kabun dot anggur di Nabot diri!’’ ka dau. ⁸ Om ponulis noddi i Isibil do surat, om tulisai nod ngaran di Ahab om sinaapan di saap di Ahab. Om pokirimo’ no dau i surat diri dot id boyoon om id tulun dit ongkipangkat do hilo’d Yisriil. ⁹ Suang nopo di surat diri om poingkaa, ’’Suhuon no i tulun dot ogumu’ do puasa, om lohowon no iyolo’ do tumimung; om onuan no i Nabot do tirikohonon dit osonong kopio dot id pitimungan diri. ¹⁰ Suhuon no o duwo tulun dot araat do mirikau do hiri’d toguang di Nabot do monondos do minomopol i Nabot do Kinorohingan om minomopol do raja’. Om posoliwanon nogindo iyau di bandar, om dumpahon do watu do gisom dot apatai!’’ ka. ¹¹ Om wonsoyo’ no di boyoon om i tulun dit ongkipangkat do hiri’d Yisriil i pinonuhuan di Isibil diri. ¹² Om posunudo’ no diyolo’ dot apatut do puasa ngai’ o tulun. Om lohowo’ no diyolo’ i tulun dot ogumu’ do tumimung. Om nonuan diyolo’ i Nabot do tirikohonon dit osonong kopio. ¹³ Om poirikohono’ nogiddi o duwo tulun dot araat do hiri’d toguang di Nabot. Om tondoso’ no diyolo’ i Nabot do minomopol do Kinorohingan om minomopol di raja’, dot id toguang di tulun dot ogumu’. Om gowoi poddi om posoliwano’ no i Nabot di bandar om pindumpahai nod watu do gisom do napatai iyau. ¹⁴ Om ngoyo’ noddi diyolo’ posunudo’ dot id di Isibil i karalan-ralano’ do minamatai di Nabot. ¹⁵ Om soira’ di norongou di Isibil i habar do napatai i Nabot om boro-boros no iyau di Ahab, ’’Napatai no i Nabot. Ngoyo’ nondo onuo’ i kabun dot anggur dit a’ daa dau uhang do bolion nu,’’ ka dau. ¹⁶ Om olomus nopo i Ahab do minongoi panansanganu di kabun diri. ¹⁷ Om boro-boros noddi o TUHAN dot id di Ilia, i nabi do mantad hilo’d Tisbi. ¹⁸ Boros ka, ’’Baino’ nopo om hilo’ nod kabun dot anggur di Nabot i Ahab, i raja’ do Samaria, do mongoi panansanganu di kabun diri. Ongoi nogi’ kopio’d hilo’, ¹⁹ om posunudon no dau do moro-boros oku, iyoho’ i TUHAN do poingkaa, ’Kapamatai nogi’, om manakau po! Gowoi pondo om silaan nondod tasu o raha’ nu do hiri’d pinonilaan do tasu di raha’ di Nabot,’ kanto,’’ ka dau. ²⁰ Om soira’ di nokito di Ahab i Ilia, om boro-boros no iyau, ’’Oi pisangod, suminusuhut ko i’ pama doho’?’’ ka dau. ’’Oo,’’ ka di Ilia. ’’Tu’ araat no kopio o winonsoi nu dot id toguang do TUHAN, ²¹ om poingkaa’ddi o pinoboros do TUHAN dot id doho’ do pasal diya’, ’Porikoton ku nondo o kosusaan dot id diya’. Potongkiadon tiya’ nondo, om pointikid-tikid di tongokusai dot id sompiiyon nu, dot it omulok po ko’ i molohing no, nga’ punsoon ngai’ ku nopondo. ²² Om osiliu nondo o sompiiyon nu do miagal di sompiiyon di Raja’ Yirobiam, i tanak di Nibat, om miagal di sompiiyon di Raja’ Baisa, i tanak di Ahia, tu’ minamayayat ko do tulun dot Israil do minomonsoi’d dusa om gowoi poddi om notogod oku,’ ka. ²³ Om i Isibil noo, om nokoboros nod TUHAN dot aakan nondod tasu i tinan dau do hiti’d suang do bandar do Yisriil. ²⁴ Isai nopo i tiyon-iyon nu dot apatai do hiti’d suang do bandar om aakan nod tasu, om iri no it apatai do hilo’d soliwan do bandar om aakan do tombolog di mangangakan do rata’,’’ ka dau. ²⁵ A’ po insan do haro o tulun do miagal kopio di Ahab tu’ araat no kopio o nowonsoi dot id pagantangan do TUHAN. I Isibil no, i sawo dau o nokobinsuhu’ dau do miningwonsoi do koinsanai di karaaton diri. ²⁶ Kointingayam no kopio i dusa do winonsoi di Ahab, tu’ tuminuku’ iyau do tingolig do miagal di winonsoi di tulun dot Amori, iri no i tulun di nuyung do TUHAN do mantad id pomogunan do Kanaan di suminuang i’ o tulun dot Israil do pomogunan diri. ²⁷ Om kotingkod poddi i Ilia do mimboros, om hurako’ no di Ahab o pakayan dau om panampakai nod karung do pointalang do monosol iyau. Om puasa nogiddi iyau, om modop piya nga’ kipinakai i’ iyau do karung. Om mimpanau piya nga’ tumongob kasai’ nopo o kokitanan dau. ²⁸ Om boros kad TUHAN dot id di Ilia, ²⁹ ’’A’ nu toi nokito i Ahab do minsiriba’ tomod dot id toguang ku? Om iri noddi ot a’ ku koporikatan do kosusaan do solinaid po dau do poimpasi. Nga’ maso nopondo di tanak dau do momorinta’ om porikoton ku nondo i kosusaan,’’ ka dau.

¹ Solinaid di duwo toun om lobi om aiso’ i’ o pisangadan dot id pialatan dot Israil om Siria. ² Nga’ kotolu nopoddid toun, om ongoi no i Yosapat, i raja’ do Yohuda, do hiri’d di Ahab, i raja’ dot Israil. ³ Nga’ tontok dit a’ po norikot o maso’ddi, om nokoboros mantad no di Ahab dot id pagawai dau o poingkaa, ’’Iri nopo bandar do Ramot di hilo’d Giliad om dati’ i’. Nokuro tu’ a’ toko’ ngoyon solodo’ iri do mantad id raja’ do Siria?’’ ka dau. ⁴ Om tontok di nokorikot i Yosapat, om ponguhot no i Ahab dau, ’’Tumanud ko i’ doho’ do mongoi panangod do bandar do Ramot?’’ ka dau. Om boros ka di Yosapat, ’’Ondung miwoyo’ to, om posodia’ oku i’. Om iyo nogiddi i soudor ku om i soudor ku dit ongkikuda’. ⁵ Nga’ osonong nopo kopio om uhoton toko’ po o TUHAN,’’ ka dau. ⁶ Om timungo’ noddi di Ahab o haro i’ doti’ ot apat nahatus o nabi. Om uhoto’ no dau iyolo’, ’’Mongoi oku tuu’dti panangod do Ramot ko’ amu’?’’ ka dau. ’’Mongoi nopo!’’ ka diyolo’ do suminimbar. ’’TUHAN i’ o manahak diya’ do kamanangan,’’ ka diyolo’. ⁷ Nga’ ponguhot po kawagu i Yosapat, ’’Haro po o nabi do suwai di milo do momiolitan dato do muhot do korohian do TUHAN?’’ ka dau. ⁸ Om boros ka di Ahab, ’’Iso’ poo, i Mika poo, i tanak di Yimla. Nga’ araatan oku dau tu’ a’ nopo insan do momoros dot osonong ot id dosunsudan ku; araat kasai’ nopo o poboroson dau,’’ ka dau. ’’A, kada’ pomoros dot iyondo,’’ ka di Yosapat. ⁹ Om pomolohou noddi i Ahab do songulun o pagawai do hiri’d walai do raja’ om suhuo’ no dau do mongoi pangangat di Mika. ¹⁰ Tontok nopoddi nga’ kipinakai i Yosapat om i Ahab do pakayan diyolo’ di dong raja’, om poirikau iyolo’ do hiri’d tirikohonon do dong raja’ do hiri’d pamagamasan do gandum, i hiri’d dotimbabaan di wawayaan do bandar do Samaria. Om hiri ngai’ nopod dotoguangan diyolo’ i piro-piro o nabi do posunud dit oilaan diyolo’ do pasal dit id dosunsudan. ¹¹ Om haro’ddi o songulun di nabi dot i Sodokia o ngaran, i tanak di Kinaana, do minomonsoi do sinangau-sangau, do basi’ o winonsoi. Om boro-boros no iyau di Ahab, ’’Poingkaa o pinoboros do TUHAN, ’Iti no sinangau-sangau o panangod nu do Siria, om gisom dot aala’ nu iyolo’,’ ka, ’’ ka dau. ¹² Om oinsanan nopo i nabi do suwai do nokosokodung diri. Boros ka ngai’ diyolo’, ’’Ngoyo’ nopo songodo’ o bandar do Ramot, tu’ kamanang ko i’, oi Tuan Raja’. Onuan ko id TUHAN do kamanangan,’’ ka. ¹³ Om daamot nopoddi om boro-boros no i pagawai di minongoi pomolohou di Mika, dot id di Mika do poingkaa, ’’Nongkoboros ngai’ no i nabi do suwai do kamanang i raja’. Iyo nopoddi, om osonong nogi’ do posunud ko dit a’ araat,’’ ka dau. ¹⁴ Nga’ boros ka di Mika, ’’Mamatos oku no dot id suang do ngaran do TUHAN di poimpasi do nunu nopo i pinoboros do TUHAN dot id doho’, om iri no o poboroson ku!’’ ka dau. ¹⁵ Om soira’ di nokotimbaba’ i Mika di Raja’ Ahab, om uhoto’ no iyau di raja’, ’’Mika, mongoi tuu iyahai di Raja’ Yosapat panangod do Ramot ko’ amu’?’’ ka dau. ’’Mongoi nopo!’’ kad i Mika. ’’Tu’ atantu’ no do kamanang ko i’. Onuan ko i’ do TUHAN do kamanangan,’’ ka dau. ¹⁶ Om boros ka di Ahab, ’’Ondung moro-boros ko doho’ dot id suang do ngaran do TUHAN, om poboroso’ no it otopot. Impiro ku noddi iya’ poinsano’ do pasal diti?’’ ka dau. ¹⁷ Om boros ka di Mika, ’’Okito ku o soudor dot Israil do nokopogitongkiad-kiad do hilo’d konuluhanan. Miagal po iyolo’ do dumba’ dit aiso’ o gompomogompi’. Iyo nopoddi, om poingkaa o boros do TUHAN do pasal diyolo’, ’Aiso’ i’ o boyoon do tulun diti; om pologoson nopo dot osimbayan iyolo’ do muli’,’ ka,’’ ka dau. ¹⁸ Om boros kaddi di Ahab dot id di Yosapat, ’’Koii, nga’ otopot i’ i pinoboros ku diya’! A’ nopo insan dot osonong-sonong o poboroson dau dot id doho’! Araat kasai’ nopo!’’ ka dau. ¹⁹ Om boros ka kawagu di Mika, ’’Pokinongou nodti poboroson do TUHAN do baino’! Nokito ku o TUHAN do poirikau do hiri’d tirikohonon dau do momorinta’ do hilo’d surga, om songingkakat ngai’ i moloikat dau do hiri’d toning dau. ²⁰ Om ponguhot no o TUHAN diyolo’, ’Isai dokoyu o mongoi pominsuhu’ di Ahab do mongoi sangod om apatai i’ iyau do hilo’d Ramot?’ ka. Om mogisuayan nopoddi o pinoboros di moloikat. ²¹ Nga’ haro’ddi o rusod do minongoi timbaba’ kopio do TUHAN, om boro-boros nod ’Ngoyon ku i’ iyau binsuhuo’,’ ka. ²² ’Poingkuro ko do mominsuhu’?’ kad TUHAN. Om boros ka di rusod, ’Ngoyon ku binsuhuo’ i piro-piro nabi di tuuhoton di Ahab, om poboros i’ iyolo’ dit a’ otopot,’ ka,’’ ka dau. ²³ Om boros ka di Mika do minongolimpupus, ’’Iyo noddi o nosiliu. Pinologos do TUHAN iti piro-piro nabi di tuuhoton nu do mongudut diya’. Nga’ nokoboros no dau do kosusaan ot abantalan nu!’’ ka dau. ²⁴ Om ngoyo’ no di Sodokia, i nabi diri, ropoho’ i Mika, om tapapo’ no dau o rabas di Mika. Om ponguhot no i Sodokia, ’’Songgira’ kopio toi tongkiad doho’ i Rusod do TUHAN om minongoi iddi boro-boros diya’?’’ ka dau. ²⁵ Om boros kad i Mika, ’’Oilaan nu nopo om koongoi ko kolisok dot id bilik di hiri’d gogok kopio,’’ ka dau. ²⁶ Om suhuo’ no di Raja’ Ahab o tiso’ di pagawai dau, ’’Ngoyo’ tangkapo’ i Mika! Om pootodon i’ do hilo’d di Amon, i gobunor do bandar, om hilo’d di Yoas, i tanak do raja’. ²⁷ Om sunudan no iyolo’ do pogiil dau, om onuan nopo iyau do taakanon om waig dot ongokooro’ do gisom do koguli’ oku dot aiso’ o nunu-nunu do kosusaan,’’ ka dau. ²⁸ Om boros kad Mika, ’’Osonong-sonong ko nopod koguli’, om okon i’ ko TUHAN o minomoros dot id doho’!’’ ka dau. Om boros ka kawagu dau, ’’Norongou ngai’ nod tulun i pinoboros ku’ddi!’’ ka dau. ²⁹ Om ngoyo’ no di Ahab i raja’ dot Israil, om i Yosapat i raja’ do Yohuda, songodo’ o bandar do Ramot, i hilo’d Giliad. ³⁰ Om boros ka di Ahab dot id di Yosapat, ’’Mongoi to nopo sangod om a’ oku piya iyoho’ manampakai do pakayan do raja’, nga’ iya’ nopo om manampakai no di pakayan nu do dong raja’,’’ ka dau. Om ongoi noddi i raja’ dot Israil do hiri’d pisangadan, nga’ a’ i’ iyau minanampakai do pakayan do dong raja’. ³¹ Om tontok nopoddi nga’ nokoponuhu’ no i raja’ do Siria di tolu nohopod om duwo o boyoon di soudor di kikorita’-kuda’ dot a’ mamatai do tulun do suwai tu’ iri no raja’ dot Israil o patayon. ³² Om tontok di nokito diyolo’ i Raja’ Yosapat, om ondos daa ngai’ diyolo’ om iyau no i raja’ dot Israil. Om pamanau no daa iyolo’ do mongoi saap dau. Nga’ soira’ di minomogiak i Yosapat ³³ om koilaai nogi’ diyolo’ dot okon i’ ko’ iyau i raja’ dot Israil. Om tingkod noddi iyolo’ do sumaap. ³⁴ Nga’ koontok no kopio do songulun di soudor do Siria do minamana’ i Ahab, tu’ nokoontok di pinioputan di rasuk di Ahab di don sumasangod i napana’. Om kotogu’ noddi iyau. ’’Nosuhat oku!’’ ka di Ahab dot id tulun di potunud di korita’-kuda’ dau. ’’Poguliai nogi’ om posoliwanon oku do mantad hiti’d pisangadan!’’ ka kawagu dau. ³⁵ Om daamot nopo do mogisasangod om poingkakat kasai’ po i Ahab do poinsondiu di korita’-kuda’ dau, do potimbaba’ di soudor do Siria. Om muyung-luyung i raha’ do mantad hiri’d suhat dau do gisom do notounan do raha’ o hiri’d sakai di korita’-kuda’. Om totuong poddi om kapatai no iyau. ³⁶ Om maha’ di tumonob o tadau, om oinsanan nopo i soudor dot Israil do sinuhu’d muli’ dot id bandar om id watas diyolo’, ³⁷ tu’ napatai noddi i raja’. Om uli’ noddi iyolo’ om lobongo’ no diyolo’ i rata’ di Ahab do hilo’d Samaria. ³⁸ Om tontok di linihungan i korita’-kuda’ dau do hilo’d kulam do Samaria, om maso di tongoondu’ do sundal do modsu’. Om sila-silaan do tasu i raha’ do hiri’d korita’-kuda’. Om kabayaai nopoddi kopio o miagal di nokoboros mantad do TUHAN. ³⁹ Om iri nopo susuyon do suwai do pasal di Raja’ Ahab, om pasal di walai dau di lamai do winonsoi, om pasal di piro-piro bandar di winonsoi dau, om nongkotulis ngai’ no do hiri’d suang do Buuk di Monusui do Pasal Ngai’ di Raja’ dot Israil. ⁴⁰ Om di nopoddi napatai i Ahab, om i Ahasia diri, i tanak dau, o nosiliu do raja’ do suminowoli dau. ⁴¹ Tontok di kaapat do toun di Ahab do momorinta’ dot Israil, om kosiliu no i Yosapat, i tanak di Asa do raja’ do Yohuda. ⁴² Tontok nopoddi om tolu no nohopod om limo toun dau. Om duwo nohopod om limo toun dau do momorinta’ do hilo’d Yorusalim. Tina’ nopo dau om i Asuba, i tanak di Silhi. ⁴³ Om i Yosapat nga’ iyo i’ di Asa, i tapa’ dau di minomorinta’ dit id gulu ko’ iyau, tu’ minomonsoi i’ dit osonong dot id pagantangan do TUHAN. ⁴⁴ Nga’ a’ i’ dau nangaraag i tiyonon do tumuku’ dot id tingolig, om maso poddi di tulun dau do papatahak do porsombahan di sorobon om modtutud do kominyan do hiri. ⁴⁵ Om iri nopo susuyon do suwai do pasal di Yosapat, om pasal di kosioho’ dau, om i pinisangadan dau, om nongkotulis no do hiri’d suang do Buuk di Monusui do Pasal Ngai’ di Raja’ do Yohuda. ⁴⁶ Om pinatai ngai’ dau i sundal do tongokusai om tongoondu’ di maganu-anu do hiri’d piro-piro pananaraban do porsombahan dot id tingolig, i nongoolu-olu’ di maso po di Asa, i tapa’ dau, do momorinta’. ⁴⁷ Tontok nopoddi om aiso’ o raja’ do hilo’d Idom. Om momorinta’ nopoddi do hilo’ nga’ iri po i boyoon do watas di pinili’ di raja’ do Yohuda. ⁴⁸ Om minomonsoi i Yosapat do kapal do rahat dit angagayo do pasakayan daa do tamas do mantad hilo’d Opir, nga’ a’ iddi nakabaya’ i kapal do mamanau tu’ hilo’ nogid Ision-Gibir om karaag no. ⁴⁹ Pinokianu daa di Ahasia i raja’ dot Israil, do moyo’ i tulun dau di tulun di Yosapat do sumakai di kapal, nga’ a’ i’ nakaakun i Yosapat. ⁵⁰ Om kapatai noddi i Yosapat om lobongo’ no do hiri’d kalabangan do raja’ do hilo’d Bandar di Daud. Om i Yoram diri, i tanak dau, o nosiliu do raja’ do suminowoli dau. ⁵¹ Tontok di koturu’d toun do pomorintaan di Raja’ Yosapat do hilo’d Yohuda, om kosiliu no i Ahasia i tanak di Ahab, do raja’ dot Israil do solinaid do duwo o toun. ⁵² Om minomonsoi i’ iyau’d dusa dot id TUHAN, tu’ tuminanud iyau do kowoyo-woyoon dot araat di Ahab, i tapa’ dau, om i kowoyo-woyoon di Isibil, i tina’ dau, om i kowoyo-woyoon di Raja’ Yirobiam di minamayayat do tulun dot Israil do minomonsoi’d dusa. ⁵³ Tuminuku’ iyau om minodsubak do Baal. Om iyo i’ iyau di tapa’ dau di minomorinta’ dot id gulu ko’ iyau tu’ pinopotogod do TUHAN, i Kinorohingan do tukuon do tulun dot Israil.