1 YOHANIS
11 Tonsi nopo kopio do surat diti om pasal di Boros di manahak do koposion, iri no i Boros di hino mantad do mantad di timpuun i’. Norongou no dahai iri, om nokito dahai do mato kopio dahai o nokokito. Om nosonsod kopio dahai iri, om noigitan kopio do palad dahai. 2 Tontok di pinointalang i koposion diri, om nokito i’ kopio dahai iri. Om iri noddi o koponusuyan dahai do pasal diri. Posusuyon dahai dot id dokoyu o pasal di koposion dit otopot kopio om i poingompus, i poinsugku’ mantad do Tapa’ om i nokointalang no dot id dahai. 3 Tu’ nunu nopo i nokito om i norongou dahai, om iri no o posusuyon dahai dot id dokoyu, om kopuriman kou i’ iyokoyu do kosonongo’ di koposion di koiso’ dot id Tapa’ om id Tanak dau, i Yesus Kristus. 4 Kinoponulisan nopo dahai’dti om popotood kopio do ginawo toko’. 5 Iti no o habar di norongou dahai do mantad id Tanak dau, i posusuyon dahai dot id dokoyu: Kinorohingan nopo om tanawau, om aiso’ no kopio o totuong dot id suang dau. 6 Ondung momoros toko’ do koposion toko’ nopo om nokoiso’ no dot id dau, om otuong indo o kowoyo-woyoon toko’, om mongudut toko’ noddi dot id boros toko’ om id wonsoyon toko’. 7 Nga’ ondung poimpasi toko’ dot id suang do tanawau do miagal do Kinorohingan tu’ id suang do tanawau, om mogiuulud toko’ no om ogirot o piuludan toko’, om iri no i raha’ di Yesus, i Tanak dau, o momolihung dati’ do mantad id koinsanai do dusa toko’! 8 Ondung momoros toko’ dot aiso’ o dusa toko’, om monipu’ toko’ no do tinan toko’; om a’ i’ hino o Kinorohingan dot id suang do ginawo toko’. 9 Nga’ ondung okunon toko’ dot id Kinorohingan o koinsanai di dusa toko’, om sulungon i’ dau i batos dau om wonsoyon dau it otulid. Om ompunan i’ dau o koinsanai di dusa toko’ om lihungan toko’ dau do mantad id koinsanai di nowonsoi toko’ di kasala’. 10 Nga’ ondung momoros toko’ dot aiso’ o dusa toko’, om roitan toko’ no do goudut o Kinorohingan om a’ toko’ pinoopi’ dot id suang do ginawo toko’ i boros do Kinorohingan.
21 Oi tangaanak ku! Koponulisan ku nopodti dot id dokoyu om mogodu dokoyu do momonsoi’d dusa. Nga’ ondung haro i nokowonsoi’d dusa, om haro i’ o mogobi’ dati’, iri no i Yesus Kristus, it otulid diri; om moro-boros indo iyau dot id Tapa’ do mogobi’ dati’. 2 Om i Yesus Kristus no o popomilo do koinsanai di dusa toko’ dot oompunan. Om okon i’ ko’ iri noo i dati’d dusa ot oompunan, suwai ko’ iri nogi’ i dusa do koinsanai’d tulun. 3 Ondung mumboyo’ toko’ do koinsanai di ponuhuan do Kinorohingan, om iri no o popointalang do kotutun toko’ do Kinorohingan. 4 Tulun nopo di momoros do, ’’Kotutun oku do Kinorohingan,’’ ka, om a’ i’ iyau mumboyo’ ngai’ di ponuhuan do Kinorohingan, om oudut i’ i tulun diri, om a’ i’ hino o Kinorohingan dot id suang do ginawo dau. 5 Nga’ tulun nopo di mumboyo’ di boros do Kinorohingan, om aayi-ayi’ no kopio o ginawo di tulun diri dot osianan do Kinorohingan, om iri no o popointalang do nokoiso’ toko’ no dot id Kinorohingan. 6 Isai nopo o tulun do momoros do nokoiso’ iyau dot id Kinorohingan, om mositi’ no do momit iyau do kowoyo-woyoon do Kristus. 7 Oi tobpinai-tobpinai di kosianan ku! Iti nopo tulison ku’dti om okon i’ ko’ ponuhuan do wagu. Iti nopo om ponuhuan i’ di laid, i nokosunud no dot id dokoyu do mantad poddi kotumbayaai kou i’ di Kristus; iri no i habar do mantad id Kinorohingan, i norongou dokoyu dit id gulu ko’ iri. 8 Mulong piya do miagal diri, nga’ iti nopo ponuhuan diti tulison ku om wagu i’; tu’ iri nopo i katapatan diti, om okito i’ dot id kowoyo-woyoon di Kristus om okito nogi’ dot id kowoyo-woyoon dokoyu. Tu’ manus-tanus no o totuong om tumitiu no i tanawau dit otopot. 9 Tulun nopo di momoros dot id suang iyau di tanawau, nga’ araatan indo iyau di tobpinai dau, om id suang kasai’ pod totuong i tulun diri do gisom piya do dinondo. 10 Tulun nopo dit osianan do tobpinai dau, om poimpasi no iyau’ddi dot id suang do tanawau, gisom dot aiso’ no dot id suang do kowoyo-woyoon dau i kobungou do tulun do suwai dot aratu’ dot id dusa. 11 Nga’ tulun nopo dit araatan do tobpinai dau, om id suang po iyau do totuong. Manau-panau po iyau dot id suang do totuong, om a’ i’ iyau koilo ondung hinonggo o pakayaan dau, tu’ iri no i totuong diri o kobungou dau dot a’ kokito. 12 Monulis oku pogi’ dot id dokoyu, oi tangaanak ku, nga’ noompunan no i dusa dokoyu dot i Kristus o kinopongompunan. 13 Monulis oku pogi’ dot id dokoyu, oi komolohingan do kusai, nga’ nokotutun kou no dau, i hino mantad do mantad di timpuun i’. Monulis oku pogi’ dot id dokoyu oi tangaanakwagu nga’ naala’ no dokoyu i Yaraat. 14 Monulis oku pogi’ dot id dokoyu, oi tangaanak, nga’ nokotutun kou no do Kinorohingan i Tapa’. Monulis oku pogi’ dot id dokoyu oi komolohingan do kusai nga’ nokotutun kou no di Boros di hino mantad do mantad di timpuun i’. Monulis oku pogi’ dot id dokoyu, oi tangaanakwagu nga’ ongokoris kou i’, om id suang no do ginawo dokoyu i boros do Kinorohingan, om naala’ dokoyu i Yaraat. 15 Kada’ kou kosianai diti pomogunan, ko’ nunu nopo it id suang diti pomogunan. Ondung osianan kou diti pomogunan om a’ kou no osianan do Tapa’. 16 Koinsanai dit id suang do pomogunan diti — i korohian do kowoyo-woyoon do tulun di kidusa, it okito do tulun om korohian nondo om i kopinggaya-gayaan do tulun — koinsanai’ddi om okon i’ ko’ mantad id Tapa’, suwai ko’ mantad i’ do hiti’d pomogunan. 17 Iti nopo pomogunan om koinsanai di hiti’d pomogunan, i korohian do tulun, om maso no do tumanus. Nga’ tulun nopo di tumanud do korohian do Kinorohingan, om poimpasi kasai’ i’ do gisom do poingompus. 18 Oi tangaanak ku, oruhai no do kopupuson diti pomogunan! Nosunudan mantad kou no do rumikot nondo i Pisangod do Kristus; om dinondo’dti nga’ ogumu’ no o tulun do nokointalang do sumaap do Kristus. Om iri no o koilaan dot oruhai no o kopupuson do pomogunan. 19 Iri nopo i pisangod do Kristus diri om iri no i tulun di tuminongkiad do mantad id dati’, tu’ otopot nopo kopio om okon i’ ko’ id suang iyolo’ di sinompuruan do tulun toko’. Ondung id suang daa iyolo’ do sinompuruan do tulun toko’, om atantu’ no do poinsugku’ kasai’ i’ daa iyolo’ dati’. Nga’ tuminongkiad i’ iyolo’ dati’, om oilaan no kopio dot aiso’ i’ o tongosongulun piya do mantad id pogialatan diyolo’ dot otopot kopio do poinsuang do sinompuruan toko’. 20 Nga’ iyokoyu nopo om nakaramit no di Rusod do Kinorohingan di pinatahak di Yesus Kristus om iri noddi o nokotutun-tutun dokoyu di ponudukan dit otopot. 21 Koponulisan ku nopodti dot id dokoyu om okon i’ ko’ it a’ kou nokotutun di ponudukan dit otopot, suwai ko’ i nokotutun kou’ddi o kinoponulisan ku, om koilo kou nogi’ dot aiso’ no o tudut dot id suang di ponudukan dit otopot diri. 22 Iri nopo i goudut om iri no i tulun di momoros dot i Yesus nopo om okon i’ ko’ i Raja’ di Gampamasi di pinabatos do Kinorohingan. Iri nopo tulun diri om Pisangod i’ do Kristus; tu’ a’ i’ iyau otumbayaan di Tapa’ om a’ otumbayaan di Tanak. 23 Tulun nopo dit a’ otumbayaan di Tanak, om komoyon nopoddi nga’ a’ no iyau rumamit di Tapa’. Om tulun nopo dit otumbayaan di Tanak, om komoyon nopoddi nga’ rumamit no iyau di Tapa’. 24 Iyo nopoddi, om mositi’ no do poiyonon kopio dokoyu dot id ginawo dokoyu i habar di norongou dokoyu do mantad di kotumbayaai kou i’. Ondung podulon kopio dokoyu i habar diri, om poingiso’ kasai’ kou no dot id Tanak om id Tapa’. 25 Om iti no o pinabatos di Kristus dot id dati’: i koposion dit otopot kopio om i poingompus. 26 Om tulison ku dot id dokoyu o pasal di tulun di maso do tumotos do monipu’ dokoyu. 27 Nga’ pasal nopo dokoyu, om nakatahak no di Kristus i Rusod dau dot id dokoyu. Om solinaid nopo di Rusod dau dot id suang dokoyu, om a’ no minog do haro o tulun do suwai do monuduk dokoyu. Tu’ iri no i Rusod do Kristus o monuduk dokoyu do koinsanai do nunu nopo; om nunu nopo i potudukon dau om ongotopot ngai’ no, om okon i’ ko’ tudut. Iyo nopoddi, om mositi’ no do mumboyo’ kasai’ kou di potudukon di Rusod diri, om poingiso’ kasai’ kou dot id Kristus. 28 Iyo nopoddi, oi tangaanak ku, om mositi’ no do poingiso’ kasai’ kou dot id Kristus, om katama’ toko’ i’ do sumolowot dau do korikot iyau, om a’ toko’ lumisok dot ointingayaman. 29 Nokoilo kou no do Kristus nopo om tumanud i’ do korohian do Kinorohingan. Iyo nopoddi, om apatut no do koilo kou do pointikid-tikid do tulun do tumanud di korohian do Kinorohingan om tangaanak nod Kinorohingan.
31 Antangai toko’ pogi’ o kogoyoo’ do kosianan do Kinorohingan dati’, gisom do nakun toko’ dau do tangaanak dau. Om otopot i’ kopio do tangaanak toko’ do Kinorohingan. Iri no ot a’ kotutun-tutun dati’ diti pomogunan dit araat, tu’ a’ i’ iti pomogunan kotutun do Kinorohingan. 2 Oi tobpinai-tobpinai di kosianan ku! Tangaanak toko’ noddi do Kinorohingan do baino’, nga’ iri nopo i koinan-inano’ toko’ do koimbagu om a’ po nokointalang kopio. Nga’ oilaan toko’ i’ do korikot nopo o Kristus, om koiyo toko’ nondo dau, tu’ okito toko’ nondo i koinan-inano’ kopio dau. 3 Koinsanai’d tulun di haro o soro-sorohon do miagal diti dot id Kristus, om mositi’ no do mumbangan-bangan kopio om olidang i’ kopio iyau, om olihungan do mantad id dusa do miagal do Kristus tu’ olidang. 4 Tulun nopo di momonsoi’d dusa, om tumolibamban no iyau dit oturan do Kinorohingan; tu’ komoyon nopod dusa om i tumolibamban dit oturan do Kinorohingan. 5 Koilo kou i’ do kinorikatan nopod Kristus om mongoi pananus do koinsanai do dusa’d tulun, om aiso’ i’ o dau’d dusa. 6 Koinsanai di tulun di nokoiso’ dot id Kristus om a’ no iyau tumilombus do momonsoi’d dusa. Tu’ tulun nopo di tumilombus nopo do momonsoi’d dusa, om a’ i’ insan kokito do Kristus om a’ kotutun dau. 7 Oi tangaanak ku, kada’ dokoyu pologoso’ ot isai nopo o tulun do mamalid dokoyu. Tulun nopo di momonsoi do korohian do Kinorohingan om tanak nod Kinorohingan, do miagal do Kristus tu’ Tanak do Kinorohingan. 8 Nga’ tulun nopo dit a’ tumingkod do momonsoi’d dusa om tangaanak nod Rogon, tu’ Rogon nopo om kidusa mantad, do mantad di timpuun i’. Om iri no o kinorikatan di Tanak do Kinorohingan tu’ mongoi pamaraag di karaja’ do Rogon. 9 Tulun nopo di nosiliu do Tanak do Kinorohingan, om a’ no tumilombus do momonsoi’d dusa, tu’ haro no dot id dau i kowoyo-woyoon do Kinorohingan. Om a’ noddi iyau milo do tumilombus do momonsoi’d dusa tu’ Kinorohingan no o Tapa’ dau. 10 Iti no o pisuayan do tangaanak do Kinorohingan om i tangaanak do Rogon: Isai nopo it a’ momonsoi do korohian do Kinorohingan ko’ it a’ osianan do tobpinai dau, om okon no ko’ tanak do Kinorohingan. 11 Mantad po di timpuun i’ om nokosunud no dot id dokoyu o habar diti: Mositi’ no do mogiinsian-sian toko’. 12 Kada’ toko’ no omit di Kain, i nosiliu do tanak do Rogon om minamatai di tobpinai dau. Nokuro tu’ minamatai i Kain di tobpinai dau’ddi? Kinapamatayan nopo dau di tobpinai dau nga’ kasala’ i winonsoi dau. Nga’ iri nopo i winonsoi di tobpinai dau om koontok i’. 13 Iyo nopoddi, oi tobpinai-tobpinai ku, om kada’ kou no kosuayai do karaatan kou piya do tulun do hiti’d pomogunan. 14 Noilaan toko’ i’ do nokosoliwan toko’ no do mantad id kapatayon, om nakakaa toko’ no dot id koposion. Noilaan toko’ i’ iri, tu’ osianan toko’ no di tobpinai toko’. Tulun nopo dit a’ osianan om komoyon nopoddi nga’ porintaon kasai’ po iyau do kapatayon. 15 Tulun nopo dit araatan do tobpinai dau om gampamatai i’, om koilo kou no do tulun nopo di gampamatai om aiso’ no o koposion dit otopot kopio om i poingompus. 16 Om iyo nodti o koila-ilaan toko’ do kowoyo-woyoo’ do mogiinsian-sian. Nakatahak nod Kristus o koposion dau do minatai do suminowoli dati’. Iyo nopoddi, om mositi’ no do patahakon toko’ o dati’ do koposion gisom do matai do bagi’d tobpinai toko’! 17 Ondung haro o tulun dit aiso’ no o kokurangan do kokito di tobpinai dau di haro o kokurangan, om a’ indo iyau monulung di tobpinai dau’ddi, om poingkuro nondo iyau’ddi do milo do momoros dot osianan iyau do Kinorohingan? 18 Oi tangaanak ku! Kada’ toko’ pomoros dot osianan dot id kabang noo ko’ boros no toomod dot osianan. Mositi’ no dot otopot kopio dot osianan toko’, om i kointalang kopio dot id wonsoyon toko’. 19 Iyo noddi o koila-ilaan toko’ do nokohompit toko’ do tangaanak do Kinorohingan dit otopot, om osimbayan o ginawo toko’ dot id toguang do Kinorohingan. 20 Koilo toko’ i’ dot ondung pasalaon toko’ do ginawo toko’, om toilaan nopo do Kinorohingan om agayo po ko’ i toilaan do ginawo toko’, om oilaan toko’ dot iyau nopo om koilo i’ do koinsanai’d nunu nopo. 21 Iyo nopoddi, oi tobpinai-tobpinai di kosianan ku, om ondung a’ toko’ pasalaon do ginawo toko’, om katama’ toko’ no do tumimbaba’ do Kinorohingan. 22 Om nunu nopo i pokionuon toko’ dot id dau, om aanu toko’ no iri, tu’ minumboyo’ toko’ i’ do koinsanai di ponuhuan dau om minomonsoi toko’ di kohubayaan dau. 23 Iti no o ponuhuan dau dati’. Mositi’ no dot otumbayaan toko’ di Tanak dau, iri no i Yesus Kristus, om mositi’ no do mogiinsian-sian toko’ do miagal di pinonuhuan do Kristus dot id dati’. 24 Koinsanai’d tulun di mumboyo’ do ponuhuan do Kinorohingan om poingiso’ no dot id Kinorohingan, om Kinorohingan nga’ poingiso’ no diyolo’. Om oilaan toko’ no do poingiso’ o Kinorohingan dati’ tu’ nakatahak no dau dati’ i Rusod dau.
41 Oi tobpinai-tobpinai di kosianan ku! Kada’ kou ponongkuyaai do koinsanai di tulun di mangakun do haro o Rusod do Kinorohingan dot id suang dau, nga’ toinuon po dokoyu iyolo’d gulu do mongilo ondung otopot do mantad kopio dot id Kinorohingan i rusod dit id suang diyolo’ ko’ amu’. Tu’ ogumu’ no o nabi di goudut do mimpanau do hinonggo-honggo nopo. 2 Om poingkaa o ralan do koilaan dokoyu ondung otopot kopio iri do Rusod do Kinorohingan ko’ okon: Tulun nopo di mangakun do ruminikot i Yesus do hiti’d pomogunan do miniyo’d tulun, om hino no dot id suang do tulun diri i Rusod do mantad id Kinorohingan. 3 Nga’ iri nopo tulun dit a’ mangakun do miagal diri o nosiliu dot id di Yesus, om a’ no hino i Rusod do Kinorohingan dot id suang dau. Iri nopo rusod dit id suang di tulun diri om mantad i’ dot id Pisangod do Kristus. Nokorongou kou no do rumikot nondo i rusod diri, om dinondo nopodti om hiti no iyau id pomogunan. 4 Nga’ iyokoyu nopo oi tangaanak ku, om nasanganu no do Kinorohingan. Nangaala’ no dokoyu i piro-piro nabi di goudut diri, tu’ iri nopo i Rusod dit id suang dokoyu om agayo i’ o kuasa’ ko’ mantad di rusod dit id suang di tulun di nasanganu diti pomogunan diti. 5 Iri nopo i piro-piro nabi di goudut diri om pasal nopo do kowoyo-woyoon do dom pomogunan o popimboroson diyolo’, om mokinongou i’ iti pomogunan di boros diyolo’ tu’ nasanganu no iyolo’ diti pomogunan. 6 Nga’ iyati’ nopo om tangaanak toko’ no do Kinorohingan; om iri no i tulun di nokotutun do Kinorohingan o mokinongou do boros toko’. Tulun nopo dit a’ nasanganu do Kinorohingan, om a’ i’ mokinongou di boros toko’. Om iyo nodti o ralan toko’ do mongilo do pisuayan di Rusod do popotuduk do ponudukan dit otopot, om i rusod di mamalid. 7 Oi tobpinai-tobpinai di kosianan ku! Kainou no mogiinsian-sian tu’ kosianan nopo om mantad i’ dot id Kinorohingan. Tulun nopo dit osianan om tanak no iyau do Kinorohingan om kotutun iyau do Kinorohingan. 8 Tulun nopo dit a’ osianan, om a’ no iyau kotutun do Kinorohingan; tu’ Kinorohingan nopo om obinsianan i’. 9 Pinointalang do Kinorohingan dot osianan iyau dati’ tu’ sinuhu’ dau i Tanak dau dit iso-iso’ do luminintuhun do hiti’d pomogunan, om kaanu toko’ i’ do koposion do patahakon di Tanak dau dot id dati’. 10 Iti no o komoyon do kosianan: Okon i’ ko’ iyati’ o nosianan do Kinorohingan, nga’ Kinorohingan o nosianan dati’. Om sinuhu’ dau i Tanak dau do luminintuhun om kaanu toko’ i’ do koompunan do koinsanai di dusa toko’ dot i Tanak dau o popomilo’ddi dot oompunan. 11 Oi tobpinai-tobpinai di kosianan ku, ondung miagal kopio’ddi o kosianan do Kinorohingan dati’, om iyati’ nga’ mositi’ no do mogiinsian-sian. 12 Aiso’ i’ o tongosongulun piya do nokoumbal do nokokito do Kinorohingan nga’ ondung mogiinsian-sian toko’, om poingiso’ no o Kinorohingan dot id dati’ om poimpongo nondo gisom dot aiso’ no ot okurang di kosianan dau dot id suang toko’. 13 Nakatahak nod Kinorohingan i Rusod dau dot id dati’, om iri noddi o koilo-ilo toko’ do poingiso’ toko’ do Kinorohingan, om Kinorohingan nga’ poingiso’ no dot id dati’. 14 Nokokito no iyahai di Tanak do Kinorohingan, om popinsusuyon diri dahai dot iyau nopo om sinuhu’ di Tapa’ do sumiliu’d Raja’ do Gampamasi do pomogunan diti. 15 Isai nopo o mangakun dot i Yesus nopo om Tanak do Kinorohingan, om poingiso’ no o Kinorohingan dot id tulun diri, om i tulun diri nga’ poingiso’ no dot id Kinorohingan. 16 Nokoilo toko’ no om notumbayaan toko’ di kosianan do Kinorohingan dati’. Kinorohingan nopo om obinsianan i’. Tulun nopo di noporinta’ do kosianan o kowoyo-woyoon, om poingiso’ no i tulun diri dot id Kinorohingan, om Kinorohingan nga’ poingiso’ no dot id dau. 17 Kinapamangaan nopo di kosianan diri do gisom dot aiso’ no ot okurang dot id suang toko’ om papatama’ dati’ do tontok di Tadau’d Kopomutusan. Katama’ toko’ pogi’ndo nga’ nokoiyo no do kowoyo-woyoon do Kristus o kowoyo-woyoon toko’ do hiti’d pomogunan. 18 Tulun nopo di nokopuriman do kosonongo’ do kosianan do Kinorohingan om a’ no kopuriman dot ooris; tu’ iri no i kosianan dit aiso’ ot okurang diri o mananus do koinsanai di kopurimanan dot ooris. Iyo nopoddi om kointalang no dot a’ po nokopuriman ngai’ o tulun do kosonongo’ di kosianan do Kinorohingan ondung ooris no i tulun diri do tumimbaba’ di Tadau’d Kopomutusan. 19 Iyati’ nga’ osianan toko’ no, tu’ id gulu i’ o Kinorohingan kosianai dati’. 20 Ondung haro o tulun do moro-boros dot, ’’Osianan oku do Kinorohingan,’’ ka, nga’ a’ indo iyau osianan di tobpinai dau, om goudut no i tulun diri. Tu’ tulun nopo dit a’ osianan do tobpinai dau dit okito dau, om a’ no iyau milo dot osianan do Kinorohingan dit a’ dau okito. 21 Iyo nopoddi, om iti no o ponuhuan di Kristus dot id dati’: Isai nopo ot osianan do Kinorohingan om mositi’ no dot osianan di tobpinai dau.
51 Tulun nopo dit otumbayaan dot i Yesus no i Raja’ do Gampamasi di pinabatos do Kinorohingan, om tanak nod Kinorohingan o tulun diri. Tulun nopo dit osianan do tapa’, om osianan no iyau di tanak. 2 Om iti no o koilaan toko’ dot osianan toko’ di tangaanak do Kinorohingan tu’ osianan toko’ do Kinorohingan om mumboyo’ toko’ do koinsanai di ponuhuan dau. 3 Tu’ komoyon nopod osianan toko’ do Kinorohingan om mumboyo’ toko’ do koinsanai di ponuhuan dau. Om koinsanai di ponuhuan dau nga’ a’ i’ awagat dot id dati’, 4 tu’ pointikid-tikid do tanak do Kinorohingan om haro no o kokorisan do mangala’ diti pomogunan dit araat. Om pangala’ toko’ nopo diti pomogunan om i kotumbayaan toko’. 5 Isai toi i kaala’ diti pomogunan? Iri no i tulun dit otumbayaan dot i Yesus nopo om Tanak do Kinorohingan. 6 I Yesus Kristus no i ruminikot do hiti’d pomogunan do mitonggoi do waig di pinamatis dau om mitonggoi do raha’ di napatai iyau. Tu’ okon i’ ko’ ruminikot iyau do mitonggoi nod waig, suwai ko’ mitonggoi do waig om raha’. Om iri no i Rusod do Kinorohingan o papasasi’ dot otopot iri, tu’ iri nopo i Rusod diri om a’ i’ nokoumbal do mongudut. 7 Haro o tolu sasi’: 8 Rusod do Kinorohingan, waig om raha’ — oiyo nopo o pososion diti tolu o sasi’ diti. 9 Otumbayaan toko’ i’ di pososion do tulun; nga’ iri nopo i pososion do Kinorohingan om ogirot po ko’ iri. Om iri no i pinasasi’ do Kinorohingan do pasal di Tanak dau. 10 Iyo nopoddi, om tulun nopo di notumbayaan di Tanak do Kinorohingan, om naramit no dau dot id suang do ginawo dau i pinasasi’ diri; nga’ tulun nopo dit a’ otumbayaan do Kinorohingan om momusorou no iyau do goudut o Kinorohingan tu’ a’ i’ iyau otumbayaan di pinoboros do Kinorohingan do pasal di Tanak dau. 11 Iti no i pinasasi’ diri: Nakatahak nod Kinorohingan dot id dati’ i koposion dit otopot kopio om i poingompus, om iri no i Tanak dau o tadon di koposion diri, 12 om tulun nopo di nakaramit di Tanak do Kinorohingan om nakaanu no di koposion; om tulun no dit a’ nakaramit di Tanak do Kinorohingan om a’ no nakaanu di koposion diri. 13 Kinoponulisan ku nopodti dot id dokoyu, i notumbayaan di Tanak do Kinorohingan om popoilo dokoyu do nakaanu kou no di koposion dit otopot kopio om i poingompus. 14 Om katama’ toko’ no do tumimbaba’ do Kinorohingan tu’ otumbayaan toko’ no kopio do simbaron do Kinorohingan i sambayang toko’ ondung miontok nori di korohian dau. 15 Tu’ oilaan toko’ i’ do mokinongou i’ iyau dati’ do tontok do mokianu toko’ dau, om oilaan toko’ nogi’ do patahakon i’ dau dot id dati’ i pinokianu toko’ dot id dau. 16 Ondung kokito toko’ dot ongoiso’ o tulun di sompi’ ko’ Kristian do momonsoi’d dusa dit a’ momungou di tulun diri dot atagakan do koposion dit otopot kopio om i poingompus, om mositi’ no do sumambayang kou dot id Kinorohingan; om patahakon id Kinorohingan i koposion diri dot id tulun diri. Iti nopo om pasal no di tulun di kidusa dit a’ momungou diyolo’ dot atagakan di koposion diri. Nga’ haro i’ o dusa di momungou do tulun dot atagakan do koposion. Nga’ pasal nopoddi om a’ ku i’ iyokoyu suhuon do sumambayang dot id Kinorohingan. 17 Koinsanai di wowonsoyon di kasala’, om dusa no nga’ haro i’ o dusa dit a’ momungou do tulun dot atagakan do koposion dit otopot kopio om i poingompus. 18 Koilo toko’ i’ do koinsanai’d tulun di nosiliu do tanak do Kinorohingan, om a’ no tumilombus do momonsoi’d dusa, tu’ iri no i tanak do Kinorohingan o mongintirung dau, om a’ noddi milo i Yaraat do momonsoi do nunu nopo dot id dau. 19 Koilo toko’ no do nasanganu toko’ nod Kinorohingan do mulong piya dot id suang ngai’ do pomorintaan di Yaraat o pointongkop diti pomogunan. 20 Nokoilo toko’ no do nokorikot no i Tanak do Kinorohingan om noonuan toko’ no dau do toilaan, om kotutun toko’ i’ do Kinorohingan dit otopot. Nokoiso’ toko’ no dot id Kinorohingan dit otopot om nokoiso’ toko’ dot id tanak dau i Yesus Kristus. Iyau no o Kinorohingan dit otopot, om iyau o koposion dit otopot kopio om i poingompus. 21 Oi tangaanak ku; insodu’ kou no do mantad id tingolig!