1 KORINTUS

¹ - ³ Oi tobpinai-tobpinai, i sidang do Kinorohingan di hiti’d Korintus! Nolohou kou nod Kinorohingan do sumiliu’d tulun dau tu’ nasanganu kou no di Kristus Yesus, do mihompit do koinsanai’d tulun do honggo nopo di tumuku’ do Tuhan toko’, i Yesus Kristus, iri no i Tuhan diyolo’ om i Tuhan toko’ iyati’. Mogondos no kopio iyahai — iyoho’ i Paulus om i Sostinis, i tobpinai toko’, dot onuan kou’d Kinorohingan i Tapa’ toko’, om i Tuhan Yesus Kristus, do barakat om kosimbayanan do ginawo. Om tulison ku’ti surat tu’ tulun oku nod sinuhu’ di Kristus Yesus, i pinili’ do Kinorohingan do tumanud do korohian dau. ⁴ Mongunsikou kasai’ oku nopod Kinorohingan dot iyokoyu o kopongunsikahan ku, tu’ nakaramit kou nod nipuhawang do Kinorohingan dot i Kristus Yesus o pinapatahak. ⁵ Om osima’ kou no do nunu nopo tu’ nasanganu kou nod Kristus. Aralom tomod o toilaan dokoyu do pasal do nunu nopo, om oilo kou do popotuduk di toilaan diri. ⁶ Om iri no o popointalang do nokogirot no kopio i habar do pasal di Kristus dot id suang do ginawo dokoyu, ⁷ gisom dot a’ kou no okurangan dot ongoiso’ piya o barakat, do daamot dokoyu do magandad do korikatan do Tuhan toko’, i Yesus Kristus, om dit okito iyau do koinsanai’d tulun. ⁸ I Kristus no o mamajamin dokoyu do gisom do kopupuson; om aiso’ indo o kapasalaan dokoyu do rumikot iyau kawagu. ⁹ Milo i’ kopio do ponongkuyaanan o Kinorohingan. Om iyau no o Kinorohingan di minomolohou dokoyu do miso’ di Tanak dau, i Yesus Kristus, i Tuhan toko’! ¹⁰ Oi tobpinai-tobpinai! Pokionuon ku no kopio dot id suang do ngaran di Tuhan toko’, i Yesus Kristus, do mogiulud kou om iso-iso’ o pakat; om aiso’ i’ ot a’ kopogiuludan dot id pogialatan dokoyu. Mogiuulud kou no, om koiso-isoon no o ginawo om korohian. ¹¹ Tu’ haro o piro-piro tulun do mantad id sompiiyon di Kloi do minomisunud doho’ do mogisosongkiwal kou. ¹² Komoyon ku nopo nga’ haro ot id pogialatan dokoyu do momoros dot, ’’Tumanud oku di Paulus,’’ ka, om haro o momoros dot, ’’Tumanud oku di Apolos,’’ ka, om haro o momoros dot, ’’Tumanud oku di Pitrus,’’ ka, om haro o tulun do suwai do momoros dot, ’’Tumanud oku di Kristus,’’ ka. ¹³ Pinogipori-pori toi i Kristus? A’ i’ i Paulus napatai do pinasalib do suminowoli dokoyu! Om a’ kou binotisan do sumiliu’d tumatanud di Paulus. ¹⁴ Pounsikou po kopio tu’ a’ oku minamatis dot ongoiso’ piya o tulun dot id pogialatan dokoyu, suwai ko’ i Krispus om i Gayus. ¹⁵ Kada’ nogi’ kopio do haro o tongoiso’d tulun do momoros do binotisan ku iyau do sumiliu’d tumatanud ku. ¹⁶ (Nga’ iyoho’ i’ o minamatis di Stipanus om i sompiiyon dau. Nga’ suwai nopo ko’ iyolo’ do gisom dot osorou ku, om aiso’ no tulun do suwai do nobotisan ku.) ¹⁷ Okon i’ ko’ mongoi pamatis do tulun o pinonuhuan do Kristus doho’, suwai ko’ mongoi poposusui di Habar dot Osonong do mantad id Kinorohingan; om a’ oku i’ mimboros do mamakai do toilaan do don tulun do popinsusui’ddi, om a’ i’ oidu’ o komoyon di kuasa’ do mantad id kinapatayon do Kristus do hiri’d salib. ¹⁸ Tu’ id tulun nopo di kumaa dot id kapatayon, om aiso’ i’ o katapatan di habar do pasal do kinapatayon di Kristus do hiri’d salib. Nga’ id dati’ nopo, i pinasi do Kinorohingan, om iri nopo habar diri om ralan id Kinorohingan do popointalang do kuasa’ dau. ¹⁹ Tu’ nokoboros no o Kinorohingan dot id suang do Buuk do Kinorohingan do poingkaa, ’’Raagon ku nondo i toilaan do tulun dit ongoilo, om tonuson ku it ongosuhutan do tulun di nongkopinsingilo,’’ ka. ²⁰ Nunu’ddi o guna’ di tulun dit ongoilo’ddi? Om nunu o guna’ di guru do Tourat? Om nunu o guna’ di tulun dit angatarom o pomusarahan do hiti’d pomogunan? Nokointalang nod Kinorohingan do toilaan nopo di dom pomogunan om aiso’ tomod i’ o komoyon! ²¹ Tu’ poingkuro piya o koiloo’ do tulun, nga’ a’ i’ iyau milo do mintutun do Kinorohingan dot i koiloo’ dau o pakayon do mintutun. Nga’ mantad i’ do koiloo’ do Kinorohingan do norohian iyau do mamasi’d tulun di monongkuyaan dau do korongou di habar di popinsusuyon dahai, i roitan do tulun dot aiso’ o katapatan. ²² Iri nopo tulun do Yohudi om mokianu do koimayaan do maan do kointalangan kopio, om iri no tulun do Yunani om popoinggayo do toilaan di dom pomogunan. ²³ Nga’ iyati’ no om popinsusui noo di Kristus di napatai do hiri’d salib. Om iri nopo habar diri nga’ paparaat do ginawo do tulun do Yohudi, om sorohon di tulun dot okon ko’ Yohudi do habar dit aiso’ o katapatan, om sorohon do tulun dit okon ko’ bansa’d Yohudi do dongkababasug i’ di habar diri. ²⁴ Nga’ id tulun nopo di nolohou’d Kinorohingan — do tulun do Yohudi ko’ it okon ko’ Yohudi — om iri nopo habar diri nga’ ralan id Kinorohingan do pointalang do kuasa’ om koiloo’ dau. ²⁵ Tu’ iri nopo i roitan daa’d tulun do kababasug do Kinorohingan, om oilo i’ ko’ mantad di koiloo’ do tulun; om iri daa i roitan do tulun do koluhayan do Kinorohingan nga’ okoris i’ ko’ mantad di kinoris do tulun. ²⁶ Oi tobpinai-tobpinai! Umbalai pogi’ dokoyu’d momusorou o kowoyo-woyoo’ dokoyu di lohowo’ kou id Kinorohingan. Okuuri’ kopio ot id pogialatan dokoyu dit oilo, ko’ kikuasa’, ko’ kipangkat dot asawat dot id pagantangan do tulun. ²⁷ Tu’ tinomod id Kinorohingan do minomili’ i roitan do tulun do hiti’d pomogunan do basug do pongintingayam di tulun dit ongoilo. Om tinomod do Kinorohingan do minomili’ i roitan do tulun do hiti’d pomogunan dot oluhoi, do pongintingayam di tulun dit ongokoris. ²⁸ Pinili’ pogid Kinorohingan i sorohon do tulun do hiti’d pomogunan dot aiso’ o ngaran-ngaran, om a’ pusohon, om a’ pokonunu-nunuon, nga’ maan do Kinorohingan do pamaraag di sorohon do tulun do hiti’d pomogunan dot agayo o komoyon. ²⁹ Om aiso’ nondo o tiso’ piya’d tulun do milo’d minggayo-gayo dot id toguang do Kinorohingan. ³⁰ Kinorohingan no o minomonsoi do miagal diri gisom do nokoiso’ kou dot id Kristus Yesus. Om Kristus no o minanahak dati’ do toilaan. Om iyau o pinopoulud kawagu dati’ dot id Kinorohingan, om siniliu toko’ dau do tulun di dong Kinorohingan do songonuon, om iyau o pinopoidu’ dati’. ³¹ Om abayaan i’ i nokotulis dot id suang do Buuk do Kinorohingan do poingkaa, ’’Tulun nopo dit orohian do minggayo-gayo, om mositi’ no do minggayo-gayo dot i winonsoi’d Tuhan o kopinggaya-gayaan,’’ ka.

¹ Oi tobpinai-tobpinai! Di nopo di rikot oku i’ do hino’d dokoyu do minongoi poporongou dokoyu do pasal di natantu’ mantad do Kinorohingan do wonsoyon dau, it a’ po noilaan do tulun do hiti’d pomogunan, om a’ oku i’ minamakai do toilaan di dom pomogunan ko’ minimboros po do boros dit angaralom. ² Tu’ nokopomusorou mantad oku no do solinaid ku nopo do poinsugku’ dokoyu, om a’ oku i’ popoboros do nunu nopo, do suwai ko’ pasal di Yesus Kristus; om okon-okon po om i kinapatayon dau do hiri’d salib. ³ Di nopo di poinsugku’ oku po dokoyu om oluhoi oku no om gagaran oku pod ooris. ⁴ Om iri nopo habar di pinosunud ku dokoyu om a’ ku i’ pinolombus do minamakai do boros di kagayat do ginawo do tumanud do toilaan do don tulun. Kowoyo-woyoo’ ku nopod pinopolombus diri om minamakai oku’d ralan di popointalang do kikuasa’ o Rusod do Kinorohingan. ⁵ Om iyo pogi’ddi o winonsoi ku nga’ mada’ oku i’ dot i toilaan do tulun o poimpahan di kotumbayaan dokoyu dot id Kristus, suwai ko’ poimpohon di kuasa’d Kinorohingan. ⁶ Nga’ mulong piya dot iyo’ddi, nga’ id pogialatan nopo di tulun do nongkotuo o koposi-posion do don rusod, om moro-boros kopio oku i’ do pasal do toilaan. Nga’ iti nopo toilaan om okon i’ ko’ toilaan do dom pomogunan ko’ toilaan po do pomorinta’ do hiti’d pomogunan do dinondo tu’ tumagak i’ i kuasa’ dau do momorinta’. ⁷ Iti nopo toilaan diti om a’ i’ oilaan do tulun do hiti’d pomogunan, nga’ nokosodia’ mantad nod Kinorohingan iti dit a’ po nowonsoi iti pomogunan do maan do koinsanangan toko’. ⁸ Aiso’ i’ o songulun piya di pomorinta’ do hiti’d pomogunan do dinondo do koilo do pasal di toilaan diri. Tu’ ondung nokoilo daa iyolo’ om atantu’ no dot a’ i’ daa diyolo’ pinasalib i Tuhan di kikagayaan diri. ⁹ Nga’ iri nopo om miagal no kopio di nokotulis dot id suang do Buuk do Kinorohingan do poingkaa, ’’Iri no it a’ insan do tulun kokito om a’ insan korongou, om it a’ insan koimbulai dot id suang do pomusarahan do tulun, o pinosodia’ mantad do Kinorohingan do patahakon di tulun dit osianan dau,’’ ka. ¹⁰ Nga’ nokointalang noddid Kinorohingan iri dot id dati’, dot i Rusod dau o pinopointalang. Iri nopo Rusod do Kinorohingan om kosorisid i’ do koinsanai’d nunu nopo, dot iri piya i nangatantu’ mantad do Kinorohingan do wonsoyon dau di poillisok kopio. ¹¹ Tu’ okon toi ko’ iri i rusod do tulun o koilo dit id suang do ginawo’d tulun? Om Kinorohingan nga’ iyo iddi. Koilo nopo dit id suang do ginawo’d Kinorohingan om iri no i Rusod do Kinorohingan! ¹² Om a’ toko’ i’ nonuan do rusod di dom pomogunan, suwai ko’ i Rusod di mantad id Kinorohingan, om koilo toko’ i’ do koinsanai di pinopuhawang do Kinorohingan dot id dati’. ¹³ Om kaa pogi’ do tontok nopod popotuduk iyahai do pasal do Kinorohingan dot id tulun di haro o Rusod do Kinorohingan, om a’ i’ dahai potudukon do tumanud do toilaan do tulun, suwai ko’ tumanud di ponudukan do Rusod do Kinorohingan. ¹⁴ Iri nopo tulun dit aiso’ o Rusod do Kinorohingan, om a’ i’ kaanu di pointalangon di Rusod diri. Tu’ tulun nopo do miagal diri om a’ i’ kosuhut do komoyon diri, tu’ iyo nod kababasug dot osorou dau. Tu’ iri nopo om oilaan nopo o komoyon om i don rusod do toilaan o pongilo. ¹⁵ Iri nopo tulun di haro o Rusod do Kinorohingan om milo i’ do mongilo do komoyon do koinsanai’d nunu nopo, nga’ aiso’ i’ o tiso’ pod tulun do haro o kosorupayan do mongilo do dau’d kowoyo-woyoo’. ¹⁶ Do miagal di nokotulis dot id suang do Buuk do Kinorohingan do poingkaa, ’’Isai toi o koilo do pomusarahan do Tuhan? Om isai o milo do monosihat dau?’’ ka. Iyati’ no i nakaanu do pomusorou di miagal do dong Kristus!

¹ Otopot nopo kopio, om a’ oku i’ milo do moro-boros dokoyu do miagal do moro-boros di tulun di haro o Rusod do Kinorohingan. Suwai ko’ pomomoros ku nopo dokoyu om miagal di pomomoros ku di tulun di maso pod tumanud do korohian do dom pomogunan; om miagal do pomomoros dot id tulun di tanak po dot id suang do kotumbayaan dau do Kristus. ² Di nopo di gulu po om iri no taakanon do tangaanak po o milo ku’d paakanan dokoyu, om okon i’ ko’ i taakanon do tulun dit angagayo no, tu’ a’ kou po kotolon do mangakan diri. Nga’ gisom piya’d dinondo nga’ a’ kasai’ kou po kotolon diri, ³ tu’ maso po dokoyu’d tumanud di kowoyo-woyoon dokoyu di don tulun. Tu’ ondung mogiosol-osol kou om mogisosongkiwal, om okon toi ko’ iri no o popointalang do maso po dokoyu do tumanud di kowoyo-woyoon do don tulun, do miagal di tulun dit a’ kotutun do Kinorohingan? ⁴ Ondung haro o moro-boros dot, ’’Tumanud iyahai di Paulus,’’ ka, om iri no suwai om momoros dot, ’’Tumanud oku di Apolos,’’ ka, om okon toi ko’ iri no o popointalang do miagal pod kowoyo-woyoon do tulun do hiti’d pomogunan o kowoyo-woyoon dokoyu? ⁵ Isai kopio toi i Apolos diri? Om isai i Paulus? Iyahai nopo om susuhuon no toomod do Kinorohingan, i minonuduk dokoyu do monongkuyaan di Kristus. Iyahai nopo om momonsoi noddi karaja’ di pinonuhuan do Tuhan dahai. ⁶ Iyoho’ o patanom, om i Apolos o moniram, nga’ Kinorohingan i’ o poposuni di tinanom diri. ⁷ Iyo nopoddi om Kinorohingan o poinggoyoon tu’ iyau i’ i poposuni. Iri nopo i mananom om i moniram om a’ i’ poinggoyoon; ⁸ tu’ iyolo’ nopo om miagal nopo om aiso’ i’ o pisuayan. Om sopipori-pori indo do rumamit dot isomuli’ do tumanud di karaja’ dau. ⁹ Iyahai nopo om tulun di pakaraja’ dot id Kinorohingan; om iyokoyu no om miagal do tumo do Kinorohingan. Om iyo kou’d walai do Kinorohingan. ¹⁰ Om iyoho’ no o miagal di tukang do momonsoi’d walai do pinopowonsoi di poimpahan di walai, do mikuwo di toilaan do pinatahak do Kinorohingan dot id doho’, om tulun nondod suwai o mamaal do walai do hiri’d timpak di poimpahan diri. Om pointikid-tikid do tulun nga’ mositi’ no do momusorou kopio ondung poingkuro iyau do maal do hiri’d sakai di poimpahan di waalan diri. ¹¹ Tu’ nokoiliu nod Kinorohingan i Yesus Kristus do miagal do poimpahan di walai’ddi, om iyau noo o poimpahan; aiso’ no o poimpahan do suwai. ¹² Haro i’ o mamaal do walai do hiri’d sakai di poimpahan diri do tamas o pakayon, om haro o mamakai’d pirok, om haro o mamakai’d watu dit agayo o gatang, om haro o mamakai’d kayu, om sakot di nokoring ko’ rahami po. ¹³ Om okito indo o karaja’ do pointikid-tikid do tulun dot orikot i maso do korikatan kawagu di Kristus. Tu’ tontok nopondo do tadau’ddi om tapui nondo o popointalang do karaja’ do pointikid-tikid do tulun. Om tapui o pogumbal om panantu’ do kosonongo’ di karaja’ddi. ¹⁴ Ondung a’ osorob do tapui i walai di winonsoi’d tulun do hiri’d sakai di poimpahan diri, om kaanu nod isomuli’ i tulun diri. ¹⁵ Nga’ ondung osorob i winonsoi di tulun, om orugi’ no iyau; apasi indo iyau, nga’ iyo po di tulun di nokosoliwan do mantad id tapui. ¹⁶ A’ kou toi koilo do Walai kou’d Kinorohingan? Om poingiyon i Rusod do Kinorohingan dot id suang dokoyu? ¹⁷ Ondung haro o tulun di mamaraag do Walai’d Kinorohingan, om Kinorohingan nga’ mamaraag no do tulun diri. Tu’ Walai nopod Kinorohingan om dong Kinorohingan no kopio, om iyokoyu no i walai’ddi. ¹⁸ Kada’ kou kotipu’ dit osorou do ginawo dokoyu. Ondung haro o tulun dot id pogialatan dokoyu di kopuriman dot oilo iyau dot id pagantangan do tulun do hiti’d pomogunan, om mositi’ no do sumiliu pod basug i tulun diri, om osiliu i’ iyau do tulun dit otopot-topot kopio dot oilo. ¹⁹ Tu’ iri nopo roitan do tulun do hiti’d pomogunan dot oilo, om basug i’ dot id pagantangan do Kinorohingan. Do nokotulis no dot id suang do Buuk do Kinorohingan o poingkaa, ’’Lawaan do Kinorohingan di toilaan diyolo’ i tulun dit ongoilo,’’ ka. ²⁰ Om haro po o nokotulis do poingkaa, ’’Oilaan id Tuhan do pomusarahan nopod tulun dit ongoilo om aiso’ i’ o guna’,’’ ka. ²¹ Iyo nopoddi om kada’ nod haro o tongosongulun piya do popoinggayo’d tulun, tu’ nakatahak ngai’ nori dot id dokoyu: ²² I Paulus, om i Apolos, om i Pitrus, om iti pomogunan diti, om koposion om kapatayon, om iti maso’d dinondo om i maso’d abantalan, nga’ iyokoyu ngai’ no o sanganu. ²³ Om iyokoyu nga’ nasanganu nod Kristus, om nasanganu’d Kinorohingan o Kristus.

¹ Sorohon nopo dokoyu iyahai do susuhuon do Kristus di kitonggungan do popinsusui di natantu’ mantad do Kinorohingan do wonsoyon dau, it a’ po noilaan do tulun do hiti’d pomogunan. ² Koiso’ nopo kopio dot apatut do wonsoyon do susuhuon do miagal diri om tumorodok dot id tuan dau. ³ Id doho’ nopo, om a’ i’ monguro no ondung poingkuro o pomusarahan dokoyu ko’ isai nopo tulun — do pasal doho’. Om iri piya sorohon ku iyoho’ do pasal do tinan ku nga’ a’ i’ sumiliu tomod no do kawagatan. ⁴ A’ oku i’ kasala’ dot id suang do nunu nopo do tumanud do kopurimanan ku, nga’ okon i’ ko’ iri o sumiliu’d kointalangan dot aiso’ o sala’ ku. Tuhan no o manantu’ kopio ondung kisala’ oku ko’ aiso’. ⁵ Iyo nopoddi, om ondung a’ po orikot i maso do natantu’ mantad, om kada’ kou po kolomus do manantu’ ondung kisala’ ko’ aiso’ o sala’ dot isai nopo o tulun. Andadon nopo do gisom do korikatan do Tuhan do koimbagu. Iyau indo i popointalang do koinsanai di lisok-lisokon daa, i songillisok dot id dotuong. Om iyau no i popoimbulai do koinsanai do korohian di poingopi’ dot id suang do ginawo’d tulun. Om tontok pondoddi, om aanu nogi’ do pointikid-tikid do tulun i pamarayou dit apatut dau’d aanu do mantad id Kinorohingan. ⁶ Oi tobpinai-tobpinai! Nokoontok ngai’ ku nori dot id di Apolos om id doho’, do maan do koinsanangan dokoyu. Do koiyo’ddian nopoddi nga’ iri nondo winonsoi dahai o koilaan dokoyu do minsingilo do komoyon di boros do poingkaa, ’’Tonudon no dokoyu i toturan di songintulis mantad,’’ ka. Om aiso’ indo tiso’ dokoyu do popoinggayo-gayo dot iso’ o tulun, om popoinsiriba-riba’ di suwai. ⁷ Isai toi o pinopoinggayo dokoyu do mantad ko’ tulun do suwai? Okon toi ko’ Kinorohingan i’ o koonuan dokoyu do koinsanai’d nunu nopo? Om nokuro’ddi tu’ minggayo-gayo kou, dot iyo pod a’ pinatahak do Kinorohingan dot id dokoyu i haro dot id dokoyu? ⁸ Aiso’ no bo o pokionuon dokoyu! Kaya’ kou no! Nosiliu kou nod raja’! Nga’ iyahai nopo om a’ i’. Om songkuro daa o kosonongo’ do nosiliu kopio kou daa’d raja’, om kopomorinta’ i’ iyahai do kotonggoi dokoyu. ⁹ Tu’ tumanud nopo dot osorou ku iyoho’, om iyahai nopo i rasul om siniliu’d Kinorohingan do tiintangan do tulun om moloikat. Om iyo po iyahai’d tulun dit aiso’ o ngaran-ngaran do pinorotuan do hukuman do kapatayon dot id toguang do tulun dot ogumu’ om irak-irakan do tulun do hiti’d pomogunan. ¹⁰ Iyahai nopo om pokobosugon tu’ tumanud i’ iyahai di Kristus, om iyokoyu no om tulun do Kristian dit ongoilo! Iyahai nopo om oluhoi i’, nga’ iyokoyu no om okoris! Iyahai nopo om pasalaon, om iyokoyu no om pingroyohon! ¹¹ Gisom piya’d dinondo nga’ louson i’ iyahai om tuuhan; om iti po poimpakai dahai o pakayan dahai; inggoriton iyahai’d tulun; om aiso’ o tiyonon dahai’d mundorong; ¹² om ohuyan tomod iyahai do kumaraja’ do mogihum do kaakan-akanan. Om tontok nopo do papalan iyahai, om barakat nogi’ o posulion dahai; om inggoriton nopo iyahai, om alanut i’ o ginawo dahai; ¹³ pakaraaton nopo iyahai’d tulun, om boros i’ dit osonong o posimbaron dahai. Iyo po iyahai’d rinomos toomod do hiti’d pomogunan; om gisom piya’d dinondo nga’ roitan kasai’ i’ iyahai do rinomos di sosomu’ do hiti’d pomogunan. ¹⁴ Koponulisan ku nopodti dot id dokoyu om okon i’ ko’ mongintingayam dokoyu, nga’ monosihat kopio oku dokoyu do miagal do tangaanak kopio ku iyokoyu. ¹⁵ Tu’ iyoho’ no o nosiliu do tapa’ dokoyu, do mulong piya’d hopod noribu o guru dokoyu, tu’ nosiliu kou nod Kristian. Id suang nopod koposi-posion dokoyu di nokoiso’ kou dot id Kristus, om iyoho’ no o nosiliu’d tapa’ dokoyu, tu’ iyoho’ i’ o minongoi pomisunud dokoyu di Habar dot Osonong do pasal di Kristus. ¹⁶ Om iri no o koponuhuan kopio ku dokoyu do momit di winonsoi ku. ¹⁷ Om nosuhu’ ku no i Timotius do mongoi’d hino’d dokoyu. Iyau nopo om iyo pod tanak kopio ku di kosianan ku, tu’ tumatanud i’ iyau do Kristus. Iyau nopo om milo i’ kopio do ponongkuyaanan. Om posorohon kou indo dau di kowoyo-woyoo’ ku di notumbayaan oku’d Kristus, iri no i kowoyo-woyoo’ di potudukon ku dot id pointikid-tikid do sidang do hinonggo nopo. ¹⁸ Haro o piro-piro tulun dot id pogialatan dokoyu do minggayo-gayo, tu’ ondos daa diyolo’ om a’ oku no mongoi kawagu’d hino. ¹⁹ Nga’ ondung korohian do Tuhan, om koongoi oku po do hino’d dokoyu dot a’ no alaid do mantad do baino’. Om diri pondo om iyoho’ nga’ kokito indo ondung nunu noo i milo’d wonsoyon di tulun di minggayo-gayo’ddi; om okon i’ ko’ iri no i boros diyolo’ ot orongou. ²⁰ Tu’ iri nopo Pomorintaan do Kinorohingan om okon i’ ko’ kogumuo’ nod boros, suwai ko’ kuasa. ²¹ Iyo nopoddi om pilion nopo ondung nunu o korohian dokoyu! Orohian kou tuu do rumikot oku do mongoi ponuduk dokoyu do mikuwo’d monogod ko’ rumikot oku po do mongoi ponuduk do mikuwo’d alamaya’ om osianan?

¹ Nokorongou oku nod haro ot id pogialatan dokoyu do minomonsoi dit araat kopio, tu’ kosumbang no kopio. Tu’ haro ot id pogialatan dokoyu do minagampahu’ di monohonok dau’d tondu’. Iri piya tulun dot a’ kotutun do Tuhan nga’ a’ i’ momonsoi do miagal diri! ² Nga’ mulong piya dot iyo’ddi nga’ asawat kasai’ po o ginawo dokoyu. Om apatut nopo daa kopio om tumongob kou, om posoliwanon dokoyu do mantad id sidang dokoyu i tulun di minomonsoi’d miagal diri. ³ - ⁴ Tinan ku nopo om osodu’ i’ dokoyu, nga’ ginawo ku nopo om poingamung i’ dokoyu. Om iti nopondo wonsoyon ku om miagal nopo di wonsoyon ku di poingamung oku dokoyu. Om poboroson ku no dot id suang do ngaran do Tuhan Yesus Kristus, do tulun nopo di minomonsoi’d miagal kopio’ddi kososomu’, om mositi’ nod hukuman! Tumimung kou nopo, om sorohon oku nopo dokoyu’d poingamung oku dokoyu, om id suang nod kuasa’d Tuhan toko’ i Yesus, ⁵ do mositi’ nod patahakon dokoyu o tulun diri dot id Rogon om apatai i’ o tinan dau, nga’ apasi indo o rusod dau dot orikot o korikatan kawagu’d Tuhan. ⁶ A’ kou i’ apatut do minggayo-gayo. Om nokoilo kou no doti’d boros do komolohingan do poingkaa, ’’Sasad piya dit okuuri’ nga’ kakambang i’ di tapung di wonsoyon do roti!’’ ka. ⁷ Pataamon po i sasad do laid, iri no i sasad do dusa, om osiliu kou i’ do miagal di roti di wagu po kowonsoi, tu’ a’ naralatan do sasad do dusa di laid; om oilaan ku i’ dot iyo kou’ddi. Tu’ nokosodia’ no i poginakanan toko’ do dong Paska, tu’ nakatahak nod numaan do porsombahan di sinumbali’, i Kristus, i nosiliu do miagal do dumba’ do Paska toko’. ⁸ Iyo nopoddi, om ramayo’ toko’ no i poginakanan toko’ddi do mikuwo’d mangakan do roti dit a’ naralatan do pangambang, iri no i roti di tanda’ do kolidangan om tanda’ do koinsanai di kohubayaan do Kinorohingan. Kada’ toko’ ramayo’ i poginakanan toko’ di don Paska dot i roti di naralatan do sasad do laid ot akanon, iri no i sasad do dusa om karaaton. ⁹ Id suang nopo di surat ku dit id gulu om sinunudan ku iyokoyu dot a’ monokiambalut do tulun di magampahu’. ¹⁰ Komoyon ku nopoddi om okon i’ ko’ i tulun di magampahu’ ko’ i tamaha’, ko’ i magakal ko’ i tumuku’ dot id tingolig, dit a’ kotutun do Kinorohingan. Okon i’! Okon i’ ko’ iyolo’ o komoyon ku; tu’ ondung minsodu’ kou do mantad id diyolo’, om atantu’ no dot apatut nod sumoliwan kopio kou do mantad hiti’d pomogunan. ¹¹ Komoyon ku nopo nga’ a’ monokiambalut di tulun di momoros do tulun iyau’d Kristian, om magampahu’ indo, ko’ tamaha’, ko’ tumuku’ dot id tingolig, ko’ orohian do mongindaraat do tulun do suwai, ko’ magagauk, ko’ mananakau. Om tumorungak piya’d makan do tulun do miagal diri nga’ a’ i’ koino-ino! ¹² - ¹³ Otopot nopo kopio om okon i’ ko’ doho’d tonggungan do momutus do tulun dit okon ko’ Kristian. Kinorohingan noo o momutus diyolo’. Nga’ iri nopo i tulun dot id suang do sidang dokoyu, om okon toi ko’ iyokoyu ot apatut do momutus diyolo’? Tu’ nokotulis no dot id suang do Buuk do Kinorohingan o poingkaa, ’’Uyungon no i tulun dot araat dot id pogialatan dokoyu,’’ ka.

¹ Nokuro tu’ haro ot id pogialatan dokoyu do kasaap kopio do mongoi dot id gompomutus dit a’ kotutun do Kinorohingan, do mamadawa di tulun dit iso-iso’ o kinotumbayaan, do tontok do haro o pigulatan dot id tulun diri? Nokuro tu’ a’ nogi’ iyau monuhu’ di dong Kinorohingan do tulun do manalasai do hal diri? ² A’ kou toi koilo dot iri indo i dong Kinorohingan do tulun o momutus diti tulun do hiti’d pomogunan? Om ondung iyokoyu o momutus diti tulun do hiti’d pomogunan, om nokuro tu’ a’ kou milo’d manalasai do hal dit angagaan? ³ A’ kou toi koilo dot iyati’ indo o momutus do moloikat? Om songkuro nogindo kopio iti pasal nod koposi-posion do monikid tadau! ⁴ Om ondung haro o hal do miagal diri, om ngoyon nogindo dokoyu pokisalasayai do tulun dit aiso’ kopio o ngaran-ngaran dot id sidang? ⁵ Pointingayam no kopio! Atantu’ nod haro i’ o tongoiso’d tulun dot id pogialatan dokoyu di milo’d manalasai do pogisosongkiwalan dot id pogialatan di tulun dot oiyo ko’ Kristian! ⁶ Nga’ mongoi nogi’ i tulun do Kristian solowot dit okon ko’ Kristian do mokisalasai di hal dau dot id tulun dit oiyo ko’ Kristian! ⁷ Om okuro-kuro nogindod mongoi pokisalasai’d tulun dit okon ko’ Kristian; tu’ iri nopo haro o pogisosongkiwalan dot id pogialatan dokoyu nga’ iso’ no o kinaalaan dokoyu. Okon toi ko’ osonong nogi’ dot iyokoyu o pasalaon dot a’ piya otopot o kapasalaan? Om okon toi ko’ osonong nogi’ dot iyokoyu o rugion? ⁸ Nga’ iyokoyu nogi’ o papasala’d tulun do suwai dot a’ otopot o kapasalaan. Om iyokoyu o momorugi’ do tulun do suwai. Om wonsoyon i’ dokoyu o miagal diri dot id tulun piya dit oiyo do notumbayaan! ⁹ A’ kou toi koilo dot iri nopo tulun dit a’ tumanud do korohian do Kinorohingan om a’ no kasanganu di Pomorintaan do Kinorohingan? Kada’ kou kapalid! Tu’ tulun nopo di magampahu’, om i tulun do tumuku’ dot id tingolig, om i lumapau, om i magampahu’ dot oiyo ko’ kusai, ¹⁰ om i manakau, om i tamaha’, om i magauk, om i mongindaraat do tulun do suwai, om i monipu’d tulun do suwai — om a’ ngai’ nopo kasanganu do Pomorintaan do Kinorohingan. ¹¹ Om haro i’ o piro-piro dot id pogialatan dokoyu dot iyo’ddi o kowoyo-woyoon di gulu po. Nga’ baino’ nopoddi om nokoidu’ kou no do mantad id dusa. Om nosiliu kou nod dong Kinorohingan do tulun. Nokoulud kou no kawagu dot id Kinorohingan, tu’ minonongkuyaan kou i’ do Tuhan Yesus Kristus do mikuwo di kuasa’ di Rusod do mantad id Kinorohingan toko’. ¹² Haro i’ o tulun do momoros do koino-ino’d momonsoi’d nunu nopo o pointikid-tikid do tulun. Nga’ id doho’ nopo om a’ i’ oinsanan iri’d kiguna’. Om mulong piya do koino-ino oku’d momonsoi do nunu nopo, nga’ a’ ku i’ pologoson o tinan ku dot oporinta’ do nunu nopo. ¹³ Om haro o tulun do momoros do taakanon nopo om maan nod tian, om tian nga’ maan nod poiyanan do taakanon. Nga’ tonuson goduwo indod Kinorohingan iri. Om a’ i’ koino-ino do popogompohuon o tinan, suwai ko’ maan do pomonsoi’d karaja’ di don Tuhan. Om gompion indod Tuhan i tinan diri. ¹⁴ Napasi nod Kinorohingan o Tuhan Yesus do mantad id kapatayon, om iyo nogiddi o Kinorohingan do mamasi dati’ dot i kuasa’ dau o pamasi. ¹⁵ Oilaan i’ dokoyu, oi tobpinai-tobpinai, do pakakas do tinan do Kristus o tinan dokoyu. Om koino-ino oku toi do moniliu’d ongoiso’ di pakakas do tinan do Kristus do pakakas do tinan do sundal? Atantu’ nod amu’! ¹⁶ Om a’ kou po toi koilo do tulun nopo di mongoi dudun do sundal, om kopiiso’ no di sundal diri? Tu’ nokotulis no dot id suang do Buuk do Kinorohingan o poingkaa, ’’Osiliu nondo iyolo’ goduwo dot iso-iso’,’’ ka. ¹⁷ Nga’ tulun nopo di popoiso’ do tinan dau dot id Tuhan, om kopiiso’ no i Rusod do Tuhan om i rusod do tulun diri. ¹⁸ Insodu’ kou no do mantad id tampahu’. Tu’ iri ngai’ nopo dusa’d suwai di wonsoyon do tulun, om id soliwan i’ do tinan di tulun diri. Nga’ tulun nopo di magampahu’, om momonsoi nod dusa dot id tinan dau. ¹⁹ Om mositi’ nod koilo kou do tinan nopo dokoyu om tiyonon di Rusod do Kinorohingan. Om poingiyon dot id suang dokoyu i Rusod diri. Om Kinorohingan no o pinapatahak di Rusod diri dot id dokoyu. Okon no ko’ iyokoyu o sanganu’d tinan dokoyu, suwai ko’ Kinorohingan o sanganu. ²⁰ Noboli kou nod Kinorohingan om nabayaran ngai’ no dau iri. Iyo nopoddi, om pakayon no dokoyu o tinan dokoyu do popoinggayo’d Kinorohingan.

¹ Dinondo no, om moro-boros oku do pasal di noroitan dokoyu do hiri’d surat dokoyu. Ondung a’ kumawin o songulun o kusai, om osonong i’. ² Nga’ osonong nogi’ do haro ngai’ o sawo do pointikid-tikid do kusai om pointikid-tikid do tondu’, om a’ i’ abayayat do magampahu’. ³ Mositi’ nod wonsoyon di kusai it apatut dau’d wonsoyon dot id sawo dau, om i tondu’ nga’ apatut i’ do momonsoi dit apatut do wonsoyon dau dot id sawo dau; do sopipori-pori nopo do momonsoi dit apatut do wonsoyon dot id diyolo’ goduwo. ⁴ Aiso’ i’ o kuasa’ di tondu’ dot id tinan dau, tu’ i nopo kikuasa’ dot id tinan dau om i sawo dau. Om iyo nogiddi tu’ i kusai nga’ aiso’ i’ o kuasa’ dot id tinan dau; tu’ i nopo kikuasa’ om i sawo dau. ⁵ Kada’ kou sopikada-kada’ do midudun do miagal dit apatut do wonsoyon do misasawo. Nga’ koino-ino indo dot a’ midudun dot ongoruhai, do kotumboyo’ no goduwo. Om milo indo goduwo do sumambayang dot aiso’ o kagangau. Nga’ owonsoi pondo o miagal diri, om midudun indo kawagu do miagal dit apatut do wonsoyon di misasawo. Tu’ ondung a’ iyo’ddi, om katanud kou i’ dotindo di pamayayat do rusod dot araat, tu’ a’ kou i’ okoris do momusus do korohian do tinan dokoyu. ⁶ Om poboroson ku o miagal diti nga’ okon i’ ko’ oturan kopio, suwai ko’ nosihat noo. ⁷ Otopot nopo kopio om orohian oku nogi’ daa do miyo ngai’ doho’ o tulun. Nga’ pointikid-tikid do tulun om nakaanu ngai’ do nipuhawang di mogisuwai-suwai do mantad id Kinorohingan. Iso’ nopo o kowoyoon do nipuhawang dot aanu dot iso’ o tulun, om suwai no o nipuhawang dot aanu do tulun do suwai. ⁸ Poingkaa o nosihat ku dot id tulun dit a’ po nakakawin, om id tongoondu’ di nopuadan: Osonong nogi’ do mingiso-iso’ kasai’ nopo iyolo’ dot iyo doho’. ⁹ Nga’ ondung a’ ko kopusus do korohian do tinan nu, om osonong nogi’ do kumawin ko. Tu’ osonong nogi’ do kumawin ko, ko’ mantad dot oporinta’ ko di korohian do tinan nu dit a’ opusus. ¹⁰ Om poingkaa o ponuhuan ku dot id tulun di nakakawin: (Otopot nopo kopio om okon i’ ko’ iyoho’ o monuhu’, suwai ko’ Tuhan i’.) Tondu’ nopo di nakakawin om kada’ no kopio ponokiada’ di sawo dau. ¹¹ Nga’ ondung nakaada’ iyau, om mositi’ no dot a’ nopo iyau manansawo kawagu, do suwai indo ko’ gumuli’ kawagu iyau di sawo dau mantad. Om iri kusai nga’ a’ i’ koino-ino do magada’ di sawo dau. ¹² Om id tulun nod suwai, om poingkaa o nosihat ku: — iti nopo om doho’d nosihat, om okon i’ ko’ mantad id Tuhan — ondung haro o kusai di nosiliu’d Kristian do kisawo dit a’ otumbayaan do Kristus, om orohian i’ i tondu’ do poinsawo kasai’ dau, om a’ i’ koino-ino i kusai’ddi do magada’ di sawo dau. ¹³ Om ondung haro o tondu’ di nosiliu’d Kristian do kisawo dit a’ otumbayaan do Kristus, om orohian indo i kusai do poinsawo kasai’ dau, om a’ i’ koino-ino i tondu’ddi do magada’ di sawo dau. ¹⁴ Tu’ iri kusai dit a’ otumbayaan nga’ posorupayon indo do sumiliu’d dong Kinorohingan do tulun tu’ nakakawin i’ iyau do tulun di nasanganu do Kinorohingan. Om iyo nogiddi i tondu’ dit a’ otumbayaan tu’ posorupayon i’ do sumiliu’d dong Kinorohingan do tulun tu’ nakawin no iyau do kusai di nasanganu do Kinorohingan. Tu’ ondung a’ iyo’ddi, om antantu’ no dot iyo pondod tangaanak do tulun dit a’ kotutun do Kinorohingan i tangaanak diyolo’, om kohompit i’ daa do dong Kinorohingan do tulun i tangaanak diyolo’ddi. ¹⁵ Nga’ ondung mada’ i kusai dit a’ otumbayaan di tondu’ di sawo dau’ddi, ko’ mada’ i tondu’ di sawo dau di nosiliu nod Kristian, om a’ piya minog dot oduhan i mada’. Tu’ id suang nopod hal diti om aiso’ no o koontobon di kusai ko’ i tondu’ di Kristian diri do mobpili’, tu’ korohian id Kinorohingan dot oulud ot id suang do koposi-posion dokoyu. ¹⁶ Tu’ iya’, oi tondu’ di kisawo — i notumbayaan nod Tuhan — poingkuro ko do koilo kopio dot a’ ko milo do mamasi di sawo nu? Om iyo ko nogiddi iya’, oi kusai di Kristian di kisawo, poingkuro ko do koilo kopio dot a’ ko milo do mamasi di sawo nu? ¹⁷ Apatut i’ do sompori-pori nopo o tulun do mongulud do koposi-posion dau do tumanud di ponudukan do Tuhan, om miagal di natantu’ mantad do Kinorohingan do bagi’ dau do tontok di lohowo’ i’ iyau’d Kinorohingan do monongkuyaan dau. Iri no ot oturan do potudukon ku dot id pointikid-tikid do sidang. ¹⁸ Miagal ko’, iso’ o tulun di nosunatan mantad no di lohowo’ iyau’d Kinorohingan. Tulun nopo do miagal diri om a’ no minog do tumotos do mananus di sinunatan diri. Om iyo nogiddi, tu’ ondung haro o tulun dit a’ nosunatan di lohowo’ i’ iyau’d Kinorohingan om a’ no minog do mokisunat. ¹⁹ Tu’ tumanud piya dot oturan do sunat ko’ amu’, nga’ miagal nopo dot aiso’ goduwo o komoyon. Nga’ agayo nopo kopio om tumanud di ponuhuan do Kinorohingan. ²⁰ Apatut i’ do sompori-pori nopo o tulun do tumilombus dot id kowoyo-woyoo’ do koposi-posion dau do miagal di lohowo’ i’ iyau’d Kinorohingan. ²¹ Ondung turipon ko do tontok di lohowo’ ko i’, om a’ piya minog do minsusa’ do momusorou do pasal diri. Nga’ ondung polobuson ko do koimbagu, om lumabus no. ²² Tu’ turipon nopo di notumbayaan do Tuhan, om osiliu nod tulun di songonuon do Tuhan di nakalabus. Om i tulun di poillabus di notumbayaan do Tuhan, nga’ susuhuon nod Kristus. ²³ Noboli ko nod Tuhan om nabayaran ngai’ no dau i gatang nu. Iyo nopoddi om kada’ no patahako’ o tinan nu do sumiliu’d turipon do tulun. ²⁴ Iyo nopoddi, oi tobpinai-tobpinai, om poingkuro nopo o koiyon-iyono’ dokoyu di lohowo’ kou i’, om tumilombus kou nopo do miagal diri do poingulud kasai’ do Kinorohingan. ²⁵ Baino’ no om moro-boros oku do pasal do tulun dit a’ po nakakawin. Om pasal nopodti om aiso’ i’ o boros do naanu ku do mantad id Tuhan. Nga’ poboroson ku nopo o ponosihat ku, tu’ tulun oku i’ dit apatut do ponongkuyaanan, tu’ nosianan i’ o Tuhan doho’. ²⁶ Osorou ku dot osonong nogi’ do tumilombus nopo o tulun dot id koiyon- iyono’ dau do miagal di koiyon-iyono’ dau do dinondo, tu’ ogumu’ noddi kopio o kosusaan di korolosi kopio do baino’. ²⁷ Ondung haro o kusai di kisawo om kada’ no ponokiada’ di sawo dau. Nga’ ondung a’ ko po nakakawin om a’ piya minog do kumawin. ²⁸ Nga’ ondung nakakawin ko, om okon i’ ko’ dusa iri. Om iyo nogiddi, tu’ ondung haro o sumandak do kumawin, om okon i’ ko’ dusa iri. Nga’ ogumu-gumu’ nondo o kosusaan do timbabaon di nakakawin. Om orohian oku dot a’ kou kotimbaba’ do kosusaan do miagal diri. ²⁹ Poingkaa o komoyon ku, oi tobpinai-tobpinai: A’ no alaid o maso toko’. Om mantad pondod baino’, om pointikid-tikid do kusai di kisawo, om mositi’ nod sorohon nopo dot aiso’ o sawo dau; ³⁰ om iri tulun di mihad, nga’ sorohon nopo dot a’ iyau tumongob; om iri tulun di koirak, nga’ sorohon nopo dot a’ iyau otood; om iri tulun di haro o binoli, nga’ sorohon nopo dot aiso’ o nunu-nunu dau; ³¹ om iri tulun di mongindapu’ do hiti’d pomogunan, nga’ sorohon nopo dot a’ iyau agangau di tindopuon dau. Tu’ a’ no alaid om tumanus no iti pomogunan, do miagal do kowoyo-woyoo’ do dinondo! ³² Orohian oku do koidu’ kou do mantad id kosusaan. Om iri nopondo tulun dit aiso’ o sawo om iri po i karaja’ do don Tuhan o sorohon dau, tu’ orohian i’ iyau do kohubayaan do Tuhan. ³³ Nga’ iri nopo kusai di kisawo om ogumu’ i’ ot osorou dau di dom pomogunan, tu’ orohian i’ iyau do poposonong do ginawo di sawo dau; ³⁴ om gowoi pondo om opogiduwo-duwo o pomusarahan dau. Iri nopo tondu’ dit aiso’ o sawo, ko’ i sumandak poo, om ogumu’ i’ o sorohon do pasal do don Tuhan, tu’ orohian i’ iyau dot asanganu kopio’d Kinorohingan o ginawo om koinsanai’d koposi-posion dau. Nga’ tondu’ nopo di kisawo, om iri po i dom pomogunan o sorohon dau, tu’ orohian iyau do poposonong do ginawo di sawo dau. ³⁵ Koponulisan ku nopodti om maan do koinsanangan dokoyu, om okon i’ ko’ mogodu di mogisuayan nopo o pogoduhan. Korohian ku nopo kopio om momonsoi kou dit otopot om it apatut, om kotumpu i’ dot id Tuhan o pomusarahan dokoyu. ³⁶ Ondung haro o tulun di kopuriman dot a’ dau nowonsoi it apatut dau’d wonsoyon dot id tunang dau, om ondung a’ dau opusus o korohian do tinan dau, om opurimanan dau dot apatut dau’d kowinon i sumandak diri, om wonsoyon nopo dau it osonong dot opurimanan dau. A’ i’ iyau kowonsoi’d dusa do mikawin piya iyolo’. ³⁷ Nga’ ondung haro o tulun do nokopomusorou no kopio dot a’ mangawin di tunang dau om a’ dau sansag-sansagan do momonsoi o miagal diri, om osonong i’ i wonsoyon dau’ddi, dot ogirot po o ginawo dau do momonsoi’d miagal diri. ³⁸ Otopot nopo kopio om i tulun di kumawin, nga’ osonong i’, om i tulun dit a’ kumawin, nga’ okon-okon o kosonongo’. ³⁹ Tondu’ nopo di nakakawin om akagasan no di sawo dau do solinaid po di sawo dau do poimpasi. Ondung apatai i sawo dau, om aiso’ no o kaantob di tondu’ do mokikawin kawagu di tulun di korohian dau; do dong Kristian poo di kopikowinan. ⁴⁰ Nga’ koundar nogi’ ma daa iyau dot a’ kumawin kawagu. Iyo noddi ot osorou ku iyoho’, nga’ opurimanan ku i’ do mantad id kuasa’ do Rusod do Kinorohingan i pinoboros ku’ddi.

¹ Dinondo no, om pasal di taakanon di nokosubak dot id tingolig o poboroson ku. Otopot i’ kopio i poboroson do tulun do poingkaa, ’’Ongoilo ngai’ toko’ no,’’ ka. Nga’ iri no i toilaan o papasawat do ginawo’d tulun, nga’ kosianan nopo om kogirot i’ do ginawo. ² Iri nopo tulun di momusorou dot ogumu’ no o nongoilaan dau, om otopot nopo kopio om a’ po iyau nokoilo dit apatut dot ilaan dau. ³ Nga’ tulun nopo dit otopot kopio dot osianan do Kinorohingan, om otutunan i’ iyau’d Kinorohingan. ⁴ Iri no tuhoton do pasal do taakanon di nokosubak dot id tingolig, om oilaan toko’ i’ dot iri no i tingolig o maan do ponongkuiyo-iyo dit aiso’ i’ daa kopio. Om oilaan toko’ dot iso’ noo o Kinorohingan; om aiso’ no o suwai. ⁵ Otopot nogi’ dot ogumu’ i roitan do ponokokinorohingan om tuhan; dot i hilo’d tawan om i hiti’d pomogunan. ⁶ Nga’ id dati’ nopo, om iso’ noo o Kinorohingan. Iyau no i Tapa’, i minomonsoi do koinsanai’d nunu nopo. Om poimpasi toko’ do bagi’ dau. Om Tuhan nga’ iso’ noo, iri no i Yesus Kristus. Om iyau no o pinawayaan do minomonsoi do koinsanai’d nunu nopo, om iyau no o manahak dati’ do koposion. ⁷ Mulong piya dot iyo’ddi nga’ okon i’ ko’ koinsanai’d tulun do koilo do pasal diri. Haro i’ o tulun dit oubas do tumuku’ dot id tingolig di gulu po. Om gowoi poddi om gisom piya’d dinondo nga’ osorou i’ diyolo’ dot iri nopo i taakanon di nokosubak dot id tingolig om taakanon nod tingolig. Om mangakan nopondo iyolo’ do taakanon diri, om kowonsoi nod dusa dot osorou diyolo’; tu’ a’ po ogirot no o kopurimanan do ginawo diyolo’. ⁸ Otopot nopo kopio om taakanon nopo toomod om a’ i’ popogirot do piuludan toko’ dot id Kinorohingan. Tu’ ondung mangakan toko’ do taakanon diri, om aiso’ i’ ot aanu-anu toko’. Om a’ toko’ mangakan di taakanon diri nga’ aiso’ i’ o korugian toko’. ⁹ Nga antaan-taan! Kada’ indo do gisom do kowonsoi’d dusa o tulun do suwai — tu’ a’ po ogirot no o ponongkuyaanan diyolo’ — dot aiso’ piya kopio o koontobon nu iya’ do momonsoi’d nunu nopo. ¹⁰ Poingkaa o komoyon ku: Sokiro nopo do poirikau ko’d makan do hilo’d walai’d tingolig, iya’ it ogirot no o kopurimanan do ginawo, om haro nondo o tulun do kokito diya’d makan do hiri. Om ondung a’ ogirot o kopurimanan do ginawo di tulun diri, om okon toi ko’ iri nondo o kabayayat dau do mangakan do taakanon di nokosubak dot id tingolig? ¹¹ Om gowoi pondo om i ponongkuyaanan nu iya’ o mamalid do ponongkuyaanan di tulun dit a’ po ogirot. Om inda’ ka do minatai i’ o Kristus do suminowoli do tulun diri. ¹² Om ondung kowonsoi kou’d sala’ do miagal diri dot id tulun di sompi’ ko’ tulun do Kristian — tu’ mamaraag kou di kopurimanan do ginawo diyolo’ dit oluhoi om kowonsoi kou nod dusa dot id Kristus. ¹³ Om kaa pogi’ddi, dot ondung taakanon o kobungou di tobpinai ku do momonsoi’d dusa, om a’ oku nogindo kopio mangakan di taakanon diri. Tu’ nunu o koilo-ilo dot iri nopo wonsoyon ku o kobungou di tobpinai ku do momonsoi’d dusa.

¹ Okon oku toi ko’ tulun di poillabus om okon i’ ko’ turipon? Okon oku toi ko’ rasul? A’ oku toi insan kokito di Yesus, i Tuhan toko’? Okon kou toi ko’ tua’ di karaja’ ku do don Tuhan? ² Om mulong piya dot a’ o tulun do suwai monongkuyaan do tulun oku di sinuhu’, nga’ monongkuyaan kou po daa iyokoyu! Tu’ ino no koposi-posion dokoyu do dong Kristian o kointalangan kopio do tulun oku di sinuhu’. ³ Ondung pasalaon oku’d tulun, om posimbaron ku indo o poingkaa: ⁴ A’ oku toi apatut i’ dot onuan do taakanon om tinumon do gontok diti karaja’ ku? ⁵ A’ oku toi koino-ino i’ do powoyo’ do sawo di Kristian do tontok do mimpanau oku, do miagal di winonsoi di piro-piro o tobpinai di Tuhan Yesus om i rasul di suwai, om kohompit nogi’ i Pitrus? ⁶ Ko’ i Barnabas no tuu om iyoho’ o suhuon do mimpori-pori do mogihum do kaakan-akanan? ⁷ Aiso’ i’ o soudor di mimpori-pori do mogihum do kaakan-akanan dau dot id suang di posukan do soudor di mongoi sangod! Aiso’ i’ o gompongumo do mananom dot anggur do hiri’d kabun dau om a’ indo iyau mangakan do tua’ dit anggur do hiri’d kabun dau’ddi! Aiso’ i’ o gompomogompi’d dumba’ do momogompi’d dumba’, om a’ indo monginum di susu di dumba’ dau’ddi. ⁸ Okon i’ ko’ mantad no di koubasanan do momonsoi’d pointikid do tadau o kapabarasan ku’dti, suwai ko’ id suang do Tourat nga’ haro i’ o boros do pasal diri. ⁹ Nokotulis no o poingkaa dot id suang do Tourat di Musa, ’’Iri nopo sapi’ di mongulok di gandum do popotobilang di tua’ do gandum do mantad hiri’d rawo, om a’ i’ apatut do kakangan o kabang,’’ ka. Iri toi i sapi’ o pusohon kopio’d Kinorohingan? ¹⁰ Ko’ iyati’ po o komoyon diri? Atantu’ no do kinoponulisan nopoddi om iyati’ i’ o komoyon. Tu’ iri nopo tulun di mongumo om i tulun di morobuat di gandum dau, om kumaraja’ pogi’ nga’ haro i’ o soro-sorohon dau do kaanu do tintanga’ do tua’ di karaja’ dau. ¹¹ Nakapatanom no iyahai do linsou di don rusod dot id suang do koposi-posion dokoyu. Om ondung mongomot iyahai do barakat do konunu-nunuan do mantad id dokoyu, om ogumu’ kopio toi iri do pokionuon dahai do mantad id dokoyu? ¹² Ondung apatut o tulun do suwai do morou-sorou do kaanu’ddi do mantad id dokoyu, om okon toi ko’ iyahai nogi’ daa ot apatut kopio do kaanu, ko’ mantad dot iyolo’? Nga’ a’ ku i’ pakayon i kosorupayan ku do kaanu’ddi, suwai ko’ uhang ku nogi’ do pimpori-porianan ku do mananggung o koinsanai’d nunu nopo ko’ mantad do moningkau do hal di sumiliu’d koontobon do popinsusui di Habar dot Osonong do pasal do Kristus. ¹³ Atantu’ no do koilo kou i’ dot iri nopo tulun di maganu-anu do hiri’d Walai’d Sasambayangan dot Agayo om kaanu nod takanon diyolo’ do mantad hiri’d Walai’d Sasambayangan dot Agayo. Om iri tulun di maganu-anu do hiri’d tiyonon do papatahak do porsombahan di sorobon, nga’ kaanu i’ do bahagi di porsombahan di patahakon diri. ¹⁴ Om iyo nogiddi o Tuhan do pinapatantu’ dot iri nopo tulun di popinsusui di Habar dot Osonong diri nga’ apatut i’ do kaanu do kaakan-akanan dau do mantad id karaja’ dau di popinsusui. ¹⁵ Nga’ a’ oku po insan pamakai di kosorupayan diri. Om koponulisan ku’dti surat diti nga’ okon i’ ko’ monuhu’ oku do wonsoyon o miagal diri dot id doho’ do baino’. Osonong nogi’ dot apatai oku ko’ mantad dot atagakan oku di kaandasan kopio ku. ¹⁶ Tu’ ondung pasal no do popinsusui di Habar dot Osonong do mantad id Kinorohingan o komoyon diri, om aiso’ i’ o paantakan ku dot oondos, tu’ sinuhu’ oku id Kinorohingan do momonsoi’ddi. Obungou oku no, ondung a’ oku no popinsusui di Habar dot Osonong diri! ¹⁷ Ondung wonsoyon ku i karaja’ddi do tumanud do doho’d korohian om milo oku no daa do mogondos do kaanu’d gadsi’. Nga’ popinsusui oku pogi’ di Habar dot Osonong diri nga’ iri no o tonggungan ku. Om sinuhu’ oku i’ do Kinorohingan do momonsoi’d karaja’ddi. ¹⁸ Iyo nopoddi, om nunu noo o gadsi’ dot aanu ku? Iti no o gadsi’ ku: iri no tu’ milo oku do popinsusui di Habar dot Osonong diri, mikuwo’d a’ papawagat do tonggungan dot ongoiso’ piya’d tulun do mamalansa’ doho’, tu’ a’ ku i’ pokionuon it apatut daa dot aanu do tulun di popinsusui do Habar dot Osonong. ¹⁹ Iyoho’ nopo om okon i’ ko’ turipon dot isai nopo o tulun; poillabus oku i’. Mulong piya dot iyo’ddi nga’ nosiliu ku no o tinan ku do turipon do koinsanai’d tulun. Om winonsoi ku pogi’ o miagal diri nga’ mokimamaha’ oku dot ogumu’ o tulun dot aangatan ku do tumanud do Kristus. ²⁰ Id pogialatan oku nopod tulun do Yohudi, om moyo’ oku no di kowoyo-woyoo’ do tulun do Yohudi om milo oku i’ do mangangat di tulun do Yohudi do tumanud do Kristus. Om id pogialatan oku no di tulun di tumanud kopio di Tourat di Musa, om mingiyo-iyo oku no do tulun di maso po dot akagasan di Tourat diri, do mulong piya dot a’ oku no daa akagasan di Tourat. Om wonsoyon ku pogi’ o miagal diri nga’ wayaan ku do mangangat diyolo’ do sumiliu’d tumatanud do Kristus. ²¹ Om id pogialatan oku no di tulun dot okon ko’ Yohudi om tumanud oku no di kowoyo-woyoo’ diyolo’ it okon ko’ tulun do Yohudi, it id soliwan di Tourat. Om wonsoyon ku pogi’ o miagal diri nga’ wayaan ku do mangangat diyolo’ do sumiliu’d tumatanud do Kristus. Nga’ okon indo ko’ gisom dot a’ oku tumanud di ponuhuan do Kinorohingan; tu’ porintaon oku i’ di ponuhuan do Kristus. ²² Om id pogialatan oku nod tulun dit a’ ogirot o ponongkuyaanan, om mingiyo-iyo oku no diyolo’ tu’ a’ ogirot o ponongkuyaanan, om milo oku i’ do mangangat diyolo’ do sumiliu’d tumatanud do Kristus. Om iyo oku noddi do momit do koinsanai’d tulun, om poingkuro nopo o kowoyo-woyoo’ nga’ wonsoyon ku nopo, dot iri po o ralan do mamasi do wookon diyolo’. ²³ Om wonsoyon ngai’ ku nopo iri dot i Habar dot Osonong do mantad id Kinorohingan o kapamansayan ku, om kohompit oku i’ iyoho’ dot abarakatan. ²⁴ Om atantu’ no do koilo ko i’ dot id suang nopo do pilumbaan do manangkus, om manangkus ngai’ i’ i tulun di monokilumbo, nga’ iso’ no o tulun di kaanu do hodia’. Iyo nopoddi om monotos nod manangkus om kaanu ko i’ do hodia’. ²⁵ Pointikid-tikid do tulun di maso’d torining, om koporinta’ i’ do tinan dau dot id suang do nunu nopo. Om wonsoyon pogi’ dau o miagal diri nga’ orohian iyau dot akaraan di karo do bunga do tanda’ do kamanangan, i bunga dit oruuhai om oriou no. Nga’ iyati’ nopo om porintaon toko’ pogi’ o tinan toko’ dot id suang do nunu nopo nga’ orohian toko’ dot akaraan di karo do bunga dit a’ rumiou. ²⁶ Om iri no o koponongkusan ku do mikuwo’d haro kopio o pokiririkatan. Do miagal dit id pilawanan do mitumbuk, tu’ a’ ku i’ songkotumbuk-tumbuk dot a’ oila-ilaan. ²⁷ Om pologoson ku nopo o tinan ku dot opintumbukan om opimbobog do gisom do milo ku’d porintaon o tinan ku. Om wonsoyon ku pogi’ o miagal diri, nga’ mada’ oku do kapangangat oku nod tulun do suwai do sumuang di pilumbaan, om a’ oku iddi iyoho’ kosuang.

¹ Oi tobpinai-tobpinai! Apatut no dot osorou dokoyu i nosiliu dot id taki- aki toko’ di maso diyolo’ do manud-tanud di Musa. Nointirungan ngai’ i’ iyolo’ di haun, om osonong iddi iyolo’ do suminoborong di Rahat dot Aragang. ² Om nobotisan ngai’ iyolo’ di haun om nobotisan di rahat diri do sumiliu’d tumatanud di Musa. ³ Om minangakan ngai’ iyolo’ di taakanon do don rusod dit iso’ i’ o bansa’. ⁴ Om minonginum iyolo’ do mantad hiri’d pampang do don rusod di moyo-woyo’ diyolo’; om iri nopo pampang diri nga’ Kristus nogi’. ⁵ Nga’ iyo piya’ddi, nga’ kogumuan no diyolo’ dot a’ id Kinorohingan kinohubayaan, om gowoi poddi do songirromos poo o rata’ diyolo’ do hilo’d tana’ do kowotuan. ⁶ Iri ngai’ no o sumiliu’d popoinsan dati’, om poposorou dati’ dot a’ rumohian dit angaraat do miagal di winonsoi diyolo’. ⁷ Om popoinsan dati’ dot a’ tumuku’ dot id tingolig do miagal di winonsoi do wookon diyolo’. Do nokotulis no dot id suang do Buuk do Kinorohingan o poingkaa, ’’Om timpuun no i bansa’ddi do mangakan-ngakan om monginum-nginum, om mintari’ do tumuku’ dot id tingolig,’’ ka. ⁸ A’ toko’ i’ koino-ino do magampahu’ do miagal di winonsoi do wookon diyolo’. Om kapatai nopo o duwo nohopod om tolu noribu o tulun dot id pogialatan diyolo’ dot insan no tadau, tu’ minomonsoi i’ iyolo’ do miagal diri. ⁹ A’ toko’ i’ koino-ino do mogumbal do Tuhan do miagal di winonsoi do wookon diyolo’ di gulu po, gisom do napatai iyolo’ do tininduk do tulanut di kipaliu. ¹⁰ Om a’ toko’ koino-ino do somboro-boros dot araatan; do miagal di winonsoi do wookon diyolo’ di gulu po. Om gowoi poddi do pinatai iyolo’ di Moloikat di Mamamatai. ¹¹ Om nongosiliu ngai’ pogi’ o miagal diri dot id diyolo’ nga’ maan do popoinsan do tulun do suwai. Om nongkotulis ngai’ pogi’ iri nga’ popoinsan dati’. Tu’ iyati’ nopodti om poimpasi do tontok dit oruhai nod karaagon do pomogunan. ¹² Iri nopo tulun di momusorou dot ogirot iyau, om mositi’ no do minsan- insan; om a’ i’ iyau aratu’. ¹³ Pointikid-tikid di pogumbalan do koontok diya’ om iri i’ i koubasanan do koontok do tulun. Nga’ otorodok i’ o Kinorohingan dot id batos dau. Om a’ ko i’ dau pologoson dot opogumbalan dit a’ nu ooyit. Om tontok nopo dot oontok ko’d pogumbalan, om onuan ko indo dau’d ralan do gumirot om ogirot ko i’. ¹⁴ Iyo nopoddi, oi tobpinai-tobpinai di kosianan ku, om karaatai toko’ no kopio do tumuku’ dot id tingolig. ¹⁵ Om moro-boros oku dot id dokoyu do miagal do moro-boros oku dot id tulun dit oilo. Om timbangon no kopio dokoyu iti boros ku. ¹⁶ Tontok nopo di monginum toko’ do waig dot anggur do mikuwo’d mongunsikou dot id Kinorohingan, om okon toi ko’ iri no o popointalang do nokoiso’ toko’ dot id Kristus dot id suang do kinapatayon dau? Om tontok di pogikobing-kobingon toko’ i roti do maan toko’ pogiandadai do mangakan, om okon toi ko’ iri no o popointalang do nokoiso’ toko’ dot id tinan do Kristus? ¹⁷ Tu’ iri nopo roti om iso’ noo, om mangakan ngai’ toko’ nopo di roti dit iso’ noddi, om iri no o popointalang dot ogumu’ toko’ piya nga’ iso’ no o tinan toko’. ¹⁸ Sorohon pogi’ i tulun do Yohudi. Iri nopo i tulun di mangakan di nakatahak do hiri’d poiyanan di porsombahan do sorobon, om nokoiso’ no i tulun di kinoiyonon diri. ¹⁹ Nunu tuu o komoyon ku do miagal diri? Iri nopo i tingolig om i taakanon di pinosubak dot id tingolig om aiso’ i’ kopio o komoyon. ²⁰ Do nunu nopo i nakatahak do hiri’d poiyanan do podsubak do tingolig om a’ i’ pinatahak dot id Kinorohingan, suwai ko’ id rusod dot angaraat. Om mada’ oku i’ do koiso’ kou do rusod dot araat. ²¹ A’ kou i’ koino-ino do monginum do mantad hiri’d sangkir di kisuang do waig dot anggur do don Tuhan, om monginum indo do mantad hiri’d sangkir di kisuang do waig dot anggur do don rusod dot araat. Om a’ kou koino-ino do makan do hiri’d mija’ do don Tuhan, om makan indo do hiri’d mija’ do don rusod dot araat. ²² Orohian toko’ toi do popoosol do Tuhan? Okoris toko’ toi ko’ Tuhan? ²³ Boros kad tulun om, ’’Koino-ino toko’ i’ do momonsoi do nunu nopo i korohian toko’,’’ ka. Otopot nogi’! Nga’ a’ i’ haro ngai’ no o guna’ di korohian toko’. ’’Koino-ino toko’ i’ do momonsoi do nunu nopo i korohian toko’ ’’ — nga’ a’ i’ kotulung ngai’ iri dot id suang do koposi-posion toko’. ²⁴ Kada’ nod haro o tongoiso’ pod tulun do tumotos do mogihum di dau nod koinsanangan. Suwai ko’ apatut nogi’ do tumotos do mogihum do koinsanangan do tulun do suwai. ²⁵ Koino-ino kou i’ do mangakan do nunu nopo i padagangon do hilo’d pasar do daging. Om a’ piya minog do sorisidon do minguhot do tintod do momoli, om a’ i’ otingkau o kopurimanan do ginawo dokoyu. ²⁶ Tu’ haro i’ o nokotulis dot id suang do Buuk do Kinorohingan do poingkaa, ’’Iti nopo pomogunan om koinsanai dit id suang do pomogunan om Tuhan i’ o sanganu,’’ ka. ²⁷ Ondung alapon kou’d makan, do tulun dit okon ko’ Kristian om kaakun kou do mongoi, om kanon ngai’ nopo i posurungon dau dokoyu. Om a’ piya minog dot uhoton ondung honggo o tadon di taakanon diri, om a’ i’ otingkau o kopurimanan do ginawo dokoyu. ²⁸ Nga’ ondung haro o tulun do momisunud dokoyu dot, ’’Nokosubak no moti’ dot id tingolig iti taakanon diti,’’ ka, om kada’ kou no pangakan di taakanon, tu’ apatut i’ do podulon i tulun diri om i kopurimanan do ginawo. ²⁹ Komoyon ku nopo om okon i’ ko’ i kopurimanan do ginawo dokoyu, nga’ i kopurimanan do ginawo di tulun diri. Haro doti’ o monguhot do poingkaa, ’’Nokuro tu’ aantaban oku do kopurimanan do ginawo’d tulun do suwai? ³⁰ Ondung mangakan oku’d taakanon do mikuwo’d mongunsikou dot id Kinorohingan, om nokuro tu’ pasalaon oku pod tulun do mangakan do taakanon diri, om nounsikou ku no dot id Kinorohingan?’’ ka. ³¹ Nunu nopo o wonsoyon nu do makan ko tuu ko’ minum nga’ wonsoyon ngai’ nori do popoinggayo’d Kinorohingan. ³² Wonsoyon kasai’ no dokoyu o miagal diri om a’ kou i’ kobungou’d tulun do suwai do momonsoi’d dusa; dot iri tuu tulun do Yohudi ko’ iri po tulun dot okon ko’ Yohudi, ko’ iri po sidang do Kinorohingan. ³³ Momit kou no do doho’d kowoyo-woyoon. Tu’ tumotos kasai’ oku i’ do poposonong do ginawo’d koinsanai’d tulun dot id suang do koinsanai’d nunu nopo, om a’ ku no sorohon o doho’d koinsanangan. Tu’ korohian ku nopo kopio om angapasi ngai’ daa iyolo’.

¹ Omit kou no do kowoyo-woyoon ku, do miagal doho’ tu’ momit do kowoyo-woyoon do Kristus. ² Mamarayou oku no dokoyu tu’ osorou kasai’ oku i’ dokoyu om tumanud kou di ponudukan di pinotuduk ku dokoyu. ³ Nga’ orohian oku po do kongoilo kou dot iso’ kawagu o ponudukan. Iri no tu’ boyoon nopo do pointikid-tikid do kusai om Kristus; om boyoon nod tondu’ om i sawo dau, om boyoon nod Kristus om Kinorohingan. ⁴ Ondung haro o kusai do mononsunduk do tontok do sumambayang ko’ tontok do poposusui di habar do mantad id Kinorohingan, dot id toguang do tulun dot ogumu’, om mongintingayam no iyau do Kristus. ⁵ Om ondung haro o tondu’ dit a’ mononsunduk do tontok do sumambayang ko’ tontok do poposusui di habar do mantad id Kinorohingan dot id toguang do tulun dot ogumu’, om mongintingayam no i tondu’ddi di sawo dau, i nosiliu do boyoon dau. Om iyo nopoddi om miagal pod nobugaran o tulu di tondu’ddi. ⁶ Tu’ ondung a’ o tondu’ mononsunduk om osonong nogi’ do pampadan o tobuk dau. Nga’ ondung bugaran o tulu do tondu’ ko’ pampadan o tobuk dau, om kointingayam i’ dau iri. Om osonong nogi’ do mononsunduk iyau. ⁷ Tongokusai nopo om a’ i’ minog do mononsunduk, tu’ iyau no o popointalang do kowoyo-woyoo’ om kagayaan do Kinorohingan. Tongoondu’ noo om popointalang do kagayaan do tongokusai, ⁸ tu’ kusai nopo om a’ i’ winonsoi do mantad id tondu’, suwai ko’ tondu’ o winonsoi do mantad id kusai. ⁹ Om kinapamansayan do kusai nga’ okon i’ ko’ maan do koinsanangan do tondu’, suwai ko’ tondu’ o winonsoi do maan do koinsanangan do kusai. ¹⁰ Iyo nopoddi, om mositi’ no do mononsunduk o tongoondu’ om asanangan i’ i moloikat, tu’ iri no o koilaan do minsiriba’ iyau di sawo dau. ¹¹ Mulong piya dot iyo’ddi, nga’ id suang nopod koposi-posion toko’ do pointikid do tadau, dot iyati’ tu’ tulun do Kristian, om a’ i’ poimpori-pori i tondu’ do posuwai-suwai di kusai, om i kusai nga’ a’ i’ poimpori-pori do posuwai-suwai di tondu’. ¹² Tu’ mulong piya do winonsoi do mantad id kusai o tondu’ di timpuun i’, nga’ id tohuri noddi om tongoondu’ i’ o mogkosusu do tongokusai; om Kinorohingan i’ o tadon do koinsanai’d nunu nopo. ¹³ Umbalai pogi’ kopio dokoyu do momusorou iti: Osorupai toi o tondu’ do sumambayang dot id Kinorohingan dot id toguang do tulun dot ogumu’, dot a’ mononsunduk? ¹⁴ Om notudukan kou no do mantad id koubasanan do tulun dot ogumu’ dot anaru nopo o tobuk do kusai, om a’ i’ osonong no. ¹⁵ Nga’ tongoondu’ nopo, om tobuk no o pinatahak dot id dau do maan do ponokop do tulu dau om sumiliu’d kaandasan dau o tobuk dit anaru. ¹⁶ Ondung haro o sumurilog do pasal diti, om iso’ noo o milo ku’d poboroson tu’ iyati’ nopo om i piro-piro o sidang do Kinorohingan di suwai, om iso’ noo o koubasanan toko’ dot id suang do sidang; om aiso’ no o suwai ko’ iri. ¹⁷ Iti no poboroson ku’d baino’, om a’ oku no mamarayou dokoyu. Tu’ okon nogi’ ko’ osonong o kootuson di pitimungan dokoyu, suwai ko’ araat nogi’. ¹⁸ Id gulu nopo kopio do norongou ku om haro o piro-piro sinompuruan do tulun dot a’ mogiuulud dot id suang do pitimungan. Om osorou ku dot otopot i’ o wookon di norongou ku’ddi. ¹⁹ Om a’ i’ milo dot aiso’ kopio o pogisosongkiwalan dokoyu, tu’ iri nogindo o pointalang kopio ondung isai ngai’ i tulun do Kristian dit otopot. ²⁰ Nga’ tontok nopo di tumimung kou om okon i’ ko’ porjomuan do don Tuhan i wonsoyon dokoyu. ²¹ Tu’ tontok nopod makan kou, om sompori-pori kou nopo do mongoi di taakanon dokoyu om mogiaahau kou. Om gisom do haro nondo ot aiso’ i’ ot aakan- akan, om inda’ ka di suwai tu’ nangaawuk poo. ²² Nokuro tu’ miagal kopio kou’ddi? Aiso’ toi o walai dokoyu? Milo kou i’ do makan om minum do hiri’d walai dokoyu! Ko’ orohian kou nod mongindaraat di sidang do Kinorohingan om mongintingayam di tulun do mosikin? Nunu poo o poboroson ku dokoyu’dti? Royohon ku po tuu iyokoyu? Amu’! A’ oku no kopio mamarayou dokoyu. ²³ Tu’ iri nopo pinotuduk ku dokoyu om iri i pinotuduk do Tuhan dot id doho’: do tontok nopo di totuong di padagangon no i Yesus, i Tuhan toko’, om anu no iyau’d roti, ²⁴ om kopongunsikou poddi iyau’d Kinorohingan di roti’ddi, om pogikobing-kobingo’ no dau i roti, om boro-boros no iyau’d poingkaa, ’’Iti no poiyaan do tinan ku di patahakon do sumowoli dokoyu. Wonsoyon no dokoyu o miagal diti do kopomusarahan doho’,’’ ka dau. ²⁵ Om iyo iddi di nakaakan tu’ anu no iyau do sansangkir o waig dot anggur om boro-boros nod poingkaa, ’’Iti no waig dot anggur o tumpongo do Kinorohingan di wagu, om pogiroton do raha’ ku. Om pointikid-tikid do monginum kou’dti, om wonsoyon no o miagal diti do kopomusarahan doho’,’’ ka dau. ²⁶ Tu’ pointikid-tikid do mangakan kou di roti om monginum kou di waig dot anggur diri, om poposusui kou no di kinapatayan do Tuhan, do gisom do korikot iyau. ²⁷ Iyo nopoddi, om iri nopo tulun di mangakan di roti di don Tuhan om monginum di waig dot anggur di don Tuhan, dot a’ apatut o kowoyo-woyoo’ do mangakan om monginum diri, om kowonsoi no i tulun diri do dusa dot id toguang do Tuhan, i pinapatahak do tinan dau om raha’ dau. ²⁸ Iyo nopoddi, om mositi’ no do sorisidon po kopio do pointikid-tikid do tulun o ginawo dau, om koino-ino nogindo iyau do mangakan di roti om monginum di waig dot anggur. ²⁹ Tu’ ondung haro o tulun di mangakan nopo di roti om monginum di waig dot anggur om a’ indo momusou no do tinan do Tuhan o komoyon di porjomuan diri, om poporikot no do hukuman do Kinorohingan dot id tinan dau o kapangakanan om koponginuman dau’ddi. ³⁰ Om iri no o kokuwaan dot ogumu’ ot id pogialatan dokoyu do sumakit om oluhoi, om ogumu’ o napatai. ³¹ Nga’ ondung poguluonon toko’ do monorisid kopio o ginawo toko’, om a’ toko’ i’ ohukuman do Kinorohingan. ³² Nga’ ondung hukuman toko’ do Kinorohingan, om bobogon toko’ no dau, om a’ toko’ i’ kotonggoi diti pomogunan do hukuman. ³³ Iyo nopoddi, oi tobpinai-tobpinai ku, om ondung tumimung kou do mangakan di porjomuan do don Tuhan diri, om mogiandad-andad kou no do mangakan. ³⁴ Ondung haro o louson, om makan mantad nogi’ do hiri pod walai dau. Om ondung podulon dokoyu iti, om a’ indo poporikot do hukuman do mantad id Kinorohingan dot id tinan dokoyu i pitimungan dokoyu’d sumambayang. Om iri no tuhoton do suwai ko’ iti, om simbaron ku indo do korikot oku’d hino.

¹ Om iti po nipuhawang do Rusod do mantad id Kinorohingan o patarangon ku, tu’ orohian oku do koilo kopio kou dit otopot, oi tobpinai-tobpinai ku. ² Soroho’ no dokoyu do nopo dit a’ kou po nokotutun do Tuhan, om nabayayat tomod kou do tumanud di tingolig dit a’ poimpasi. ³ Om mositi’ nod koilo kou do tulun nopo di pitudukan do Rusod do Kinorohingan om a’ i’ milo do moro-boros dot, ’’Ousung po i Yesus!’’ ka. Om iyo nogiddi tu’ a’ i’ o tulun milo do momoros dot, ’’I Yesus no o Tuhan!’’ ka, ondung a’ i tulun diri pitudukan di Rusod do Kinorohingan. ⁴ Haro i’ o piro-piro kowoyoon do nipuhawang do mantad id Rusod do Kinorohingan, nga’ iso-iso’ i’ o Rusod do manahak ngai’ddi. ⁵ Om haro piro-piro o kowoyoon do karaja’ di don Tuhan. Nga’ iso-iso’ i’ o Tuhan di pogobi-obian! ⁶ Haro i’ o piro-piro kowoyoon do toilaan do momonsoi’d karaja’ di don Tuhan, nga’ iri nopo manahak do toilaan dot id pointikid-tikid do tulun di momonsoi di karaja’ do nakatahak dot id dau’ddi om iso-iso’ i’ o Kinorohingan. ⁷ Kointalang i’ i karaja’ di Rusod do Kinorohingan dot id pointikid-tikid do tulun do koinsanangan ngai’ toko’. ⁸ Haro i’ o tulun do puhawangan di Rusod do toilaan do mimboros do kikuasa’ kopio. Om haro o puhawangan di Rusod diri do toilaan do popotuduk do pasal do Kinorohingan. ⁹ Om iri i’ i Rusod diri o momuhawang do tulun do suwai do kotumbayaan dot id Kristus dit ogirot ko’ i koubasanan; om tulun nod suwai om puhawangan di Rusod do kuasa’ do momolingos do toruol. ¹⁰ Om haro o tulun do puhawangan do kuasa’ do momonsoi’d koimayaan om iri no tulun do suwai om puhawangan do toilaan do poposunud di natantu’ mantad do Kinorohingan do wonsoyon dau. Om tulun nod suwai om puhawangan di Rusod do toilaan do mongintutun di nipuhawang do mantad id Rusod do Kinorohingan om it okon ko’ mantad id dau. Om haro o puhawangan do toilaan do mimboros do mogisuayan o bansa’d boros di koimayaan kopio, om haro o puhawangan do toilaan do poposuhut do komoyon di boros do bansa’d suwai’ddi. ¹¹ Iri nopoddi om mantad ngai’ i’ dot iso’ noo o Rusod; om mogisuayan o nipuhawang do patahakon dot id pointikid-tikid do tulun, do tumanud do korohian di Rusod diri. ¹² Kristus nopo om miagal do tinan do tulun; iso’ noo o tinan, nga’ ogumu’ i’ o pakakas. Om mulong piya dot ogumu’ i pakakas diri, nga’ iso-iso’ i’ o tinan. ¹³ Om iyati’ nga’ iyo iddi, dot iri tulun do Yohudi om it okon ko’ Yohudi, om turipon tuu ko’ iri po it okon ko’ turipon; tu’ nongobotisan ngai’ toko’ no dot id suang dit iso’ noo o Rusod, om opogiiso’ toko’ i’ dot id tinan do Kristus. Om noonuan ngai’ toko’ no di Rusod diri. ¹⁴ Tu’ tinan piya nga’ okon i’ ko’ iso’ noo o pakakas, suwai ko’ ogumu’ i’ o pakakas. ¹⁵ Ondung momoros i gakod dot, ’’Okon oku i’ ko’ longon, om a’ oku i’ kohompit di tinan,’’ ka, om okon i’ ko’ a’ no kopio kohompit di tinan i gakod diri. ¹⁶ Om ondung moro-boros i tolingo dot, ’’Okon oku i’ ko’ mato, om a’ oku i’ kohompit di tinan,’’ ka, om okon i’ ko’ a’ no kopio kohompit di tinan i tolingo’ddi. ¹⁷ Ondung osiliu ngai’ do mato i tinan, om poingkuro daa’ndo i tinan do korongou? Om ondung osiliu ngai’ i tinan do tolingo, om poingkuro no daa’ndo do kosingud i tinan? ¹⁸ Oilaan toko’ i’ do Kinorohingan o pinopoiyon do pointikid-tikid di pakakas do tinan dot id tinan. Om pinoiyon ngai’ iri do hiri’d apatut do poiyanan diri do tumanud di korohian do Kinorohingan. ¹⁹ Ondung oinsanan iri dot osiliu’d iso’ noo o pakakas om honggo po daa’ndo o roitan do tinan? ²⁰ Iyo nopoddi, om atantu’ no dot ogumu’ i’ o pakakas do tinan nga’ iso- iso’ indo i tinan. ²¹ Om a’ no milo o mato do moro-boros dot id longon dot, ’’Mada’ oku i’ diya’!’’ ka, ko’ moro-boros po i tulu dot id gakod dot, ’’Mada’ oku i’ diya’!’’ ka. ²² Nga’ kiguna’ toko’ i’ kopio di pakakas do tinan di sorohon piya daa dot oluhoi; ²³ om iri nopo pakakas do tinan toko’ di sorohon toko’ daa dot a’ agayo no guna’, om iri nogi’ i pusohon kopio toko’. Om iri pakakas do tinan dit a’ olumis no o kokitanan, nga’ iri nogi’ kopio i podulon toko’. ²⁴ Iri nopo pakakas do tinan toko’ dit osonong mantad o kokitanan om a’ toko’ nogi’ minog nod gompion. Om noulud nod Kinorohingan iti tinan toko’ gisom dot iri nogi’ i pakakas do tinan dit a’ haro no o guna’ o pusohon kopio toko’. ²⁵ Om iyo noddi o ralan dot a’ opogipori-pori i tinan; tu’ mogipadul-padul i pakakas di tinan. ²⁶ Ondung oinggorit o tiso’ di pakakas do tinan, om oinggorit ngai’ no i pakakas do suwai; ondung royohon o tiso’ di pakakas do tinan, om otood ngai’ no i pakakas do suwai di hiri’d tinan diri. ²⁷ Iyokoyu ngai’ no i tinan do Kristus, om pointikid-tikid dokoyu nga’ pakakas ngai’ no di tinan diri. ²⁸ Om iyo nogiddi dot id suang piya’d sidang, tu’ natantu’ mantad nod Kinorohingan o kogoyo-goyoo’ do karaja’d tulun do hiri’d sidang: koiso’ nopo om i rasul, om koduwo no om i nabi, om kotolu no om i gomponuduk, om iri nogi’ i momonsoi do kongoimayaan, om iri nogi’ i noonuan do nipuhawang do momolingos do toruol, om i monulung do tulun do suwai, om i momoyo’ do tulun, om i mimboros do mogisuayan o bansa’d boros di koimayaan. ²⁹ Okon i’ ko’ koinsanai diyolo’ do nosiliu’d rasul, ko’ nabi, ko’ gomponuduk. Om a’ i’ haro ngai’ o kuasa’ do momonsoi’d koimayaan, ³⁰ ko’ momolingos do toruol, ko’ mimboros do mogisuayan o bansa’d boros di koimayaan, ko’ poposuhut do boros di koimayaan diri. ³¹ Iyo nopoddi, om tumotos kou nogi’ kopio do mokiaanu di nipuhawang dit agayo kopio o guna’. Nga’ poingkaa o ralan dit osonong kopio.

¹ Mulong piya do milo oku’d mimboros do mogisuayan o bansa’d boros do tulun om boros do moloikat, nga’ ondung a’ oku osianan, om iri nopo boros ku’ddi om kohiyo-hiyo no toomod, om aiso’ i’ o komoyon. ² Mulong piya dot oilo oku do popolombus di habar do mantad id Kinorohingan, om kosuhut ngai’ oku dit angaralom, om kongoilo ngai’ oku do nunu nopo, om otumbayaan kopio oku’d Kinorohingan, gisom do milo oku do popoundaliu do nuluhon, nga’ ondung a’ oku osianan, om aiso’ i’ o guna-guna’ ku! ³ Mulong piya dot insanan ku nopod popuhawang dot id tulun do mosikin o nunu nopo i haro dot id doho’, om patahakon ku o tinan ku do maan sorobo’, nga’ ondung a’ oku osianan, om aiso’ ngai’ i’ o guna-guna’ddi. ⁴ Tulun nopo dit osianan om alanut i’ o ginawo om osonong koulun. A’ i’ iyau mosol, om a’ mingudut, om a’ minggayo-gayo. ⁵ A’ i’ iyau mokirayou-rayou, om a’ ohurolo, om a’ mononsog do tulun do suwai do tumanud do dau’d korohian, om a’ obingkaus om a’ obinsuli’. ⁶ Tulun nopo dit osianan om a’ i’ orohian dit araat, tu’ korohian nopo dau om iri no it osonong. ⁷ Alanut i’ o ginawo dau do tumimbaba’ do nunu nopo, om monongkuyaan iyau; om amu’ tumingkod do mogondos, om alanut o ginawo. ⁸ Kosianan nopo om aiso’ i’ o kopupuson. Dinondo nopodti om haro i’ o tulun dit oilo do popolombus di habar do mantad id Kinorohingan, nga’ tumingkod indo iyau do popolombus di habar diri. Dinondo nopodti om haro i’ ot oilo do mimboros do mogisuayan o bansa’d boros di koimayaan, nga’ koimbagu nopondo om kotingkod i’ iyau do mimboros do boros diri. Dinondo nopodti om haro i’ o tulun dit ogumu’ o toilaan, nga’ koimbagu nopondo om olihuan indo i noilaan diyolo’ddi. ⁹ Tu’ iri nopo toilaan toko’ om i komiloo’ toko’ do popinsusui di habar do mantad id Kinorohingan, om haro kasai’ po o bohiton, tu’ a’ toko’ po oilaan ngai’. ¹⁰ Nga’ orikot indo o maso do koimbagu do patahakon ngai’ do Kinorohingan iri, gisom dot aiso’ nondo o bohiton, tu’ oilaan ngai’ toko’ no, om oidu’ nondo i haro o bohiton. ¹¹ Tontok nopo di tanak oku po, om don tangaanak no do koboro-boroso’ ku, om don tangaanak do pomurimon-rimon ku, om don tangaanak do kowoyo-woyoo’ ku do momusorou. Dinondo nopoddi tu’ agayo oku, om notingkadan ku no i kowoyo-woyoo’ ku di don tangaanak. ¹² Iti nopo tokito toko’ do dinondo’dti om iyo no do sangai-sangai dit a’ i’ okito no kopio dot id pogotulan. Nga’ koimbagu nopondo om kotimbaba’ toko’ nopo kopio om atalang indo o tokito toko’. A’ ku po oilaan ngai’ do dinondo poo, nga’ koimbagu nopondo om ongoilaan ngai’ ku indo do miagal do Kinorohingan tu’ koilo do koinsanai’d kowoyo-woyoon ku. ¹³ Nga’ daamot nopodti om haro o tolu o kowoyoon dit apatut do wonsoyon kasai’ toko’: otumbayaan, mogondos om mogiinsian-sian. Nga’ iri nopo it agayo kopio dot id pogialatan di tolu’ddi, om it osianan do tulun do suwai.

¹ Tumotos kou no kopio dot osianan do tulun do suwai. Om tumotos kou no do mokiaanu di piro-piro o nipuhawang do patahakon di Rusod do Kinorohingan, om okon-okon po om i komiloo’ do popolombus di natantu’ mantad do Kinorohingan do wonsoyon dau dot id tulun. ² Iri nopo tulun di mimboros do boros di koimayaan, om a’ i’ moro-boros dot id tulun, suwai ko’ moro-boros dot id Kinorohingan. Aiso’ i’ o tulun do kosuhut di poboroson dau, tu’ iri i’ i Rusod do Kinorohingan o mominsuhu’ dau do popimboros do boros di Kinorohingan noo o kosuhut. ³ Nga’ iri nopo tulun di popolombus di habar do mantad id Kinorohingan, om tulun i’ o polombusan do maan do popogirot diyolo’, om pongodsuur do ginawo om ponginsasamod diyolo’. ⁴ Iri nopo tulun di mimboros do boros di koimayaan om popogirot no do dau’d ginawo, nga’ iri nopo tulun di popolombus do habar do mantad id Kinorohingan om mongodsuur i’ di sidang do gumirot dot id kotumbayaan diyolo’. ⁵ Osonong nogi’ kopio do milo ngai’ kou do mimboros do mogisuayan o bansa’d boros di koimayaan. Nga’ iri nopo it osonong kopio om milo kou do popinsusui di natantu’ mantad do Kinorohingan do wonsoyon dau. Tu’ iri nopo tulun di popolombus do habar do mantad id Kinorohingan om agayo i’ ko’ mantad di tulun di mimboros do mogisuayan o bansa’d boros di koimayaan; nga’ suwai indo ondung milo i tulun di mimboros do mogisuayan o bansa’d boros do koimayaan diri do poposuhut di pinoboros dau, tu’ otulung i’ o koinsanai di sidang. ⁶ Ondung rumikot oku dot id dokoyu om mimboros oku nondo do mogisuayan o bansa’d boros di koimayaan, om nunu no tuu o guna’ddi dot id dokoyu? Aiso’ i’ kopio o guna’ddi dot ongokooro’ piya! Nga’ suwai indo, ondung popolombus oku dot id dokoyu di pinointalang do Kinorohingan, ko’ popotuduk oku do pasal do Kinorohingan, ko’ popolombus oku do habar do mantad id Kinorohingan ko’ monuduk oku. ⁷ Om iri piya tuunion dit aiso’ o ginawo, do miagal di suling om kecapi, dot a’ popunongon o popouni, nga’ poingkuro daa dot oilaan do tulun o lagu’ di pounion? ⁸ Haro po kawagu o poiyaan: Ondung a’ popunongon o popouni do torumpit, om isai daa o sumodia’ do mongoi sangod? ⁹ Om iyo nogiddi o komiloo’ nu do mimboros do mogisuayan o bansa’d boros di koimayaan. Ondung oilo ko do mimboros do boros dit a’ osuhutan, om iso’ pod tulun nga’ aiso’ i’ o kosuhut di poboroson nu. Om miagal nori do moro-boros ko dot aiso’ o tulun do barasan. ¹⁰ Hiti nopod pomogunan om a’ i’ okuri-kuri’ o bansa’d boros, nga’ aiso’ i’ o tiso’ di boros diri dot aiso’ o komoyon. ¹¹ Nga’ ondung a’ oku kosuhut di boros di poboroson dot iso’ o tulun, om iri nopo tulun di mimboros diri om iyo nod sompogunan dot id doho’; om iyoho’ nga’ iyo nogiddi dot id dau. ¹² Om iyokoyu nga’ oilaan ku i’ dot orohian kopio kou do kaanu do piro-piro o nipuhawang do mantad id Rusod do Kinorohingan. Nga’ agayo nopo kopio om mositi’ no do tumotos kopio kou do mamakai di nipuhawang di kotulung do sidang do gumirot dot id kotumbayaan. ¹³ Om iri no o kokuwaan do tulun nopo di mimboros do boros di koimayaan, om mositi’ no do mokianu kopio’d Kinorohingan do toilaan do poposuhut di pinoboros dau’ddi. ¹⁴ Tu’ ondung sumambayang oku dot id suang do boros di koimayaan, om sumambayang i’ kopio o rusod ku, nga’ a’ i’ kotonggoi o pomusarahan ku do sumambayang. ¹⁵ Om nunu po daa’ndo o wonsoyon ku? Poingkaa o wonsoyon ku: Sumambayang oku dot id suang do rusod ku om sumambayang oku dot id suang do pomusarahan ku. Modsinding oku dot id suang do rusod ku, om modsinding oku dot id suang do pomusarahan ku. ¹⁶ Tu’ ondung mongunsikou ko’d Kinorohingan dot id suang nod rusod nu, om haro nondo o tulun do suwai dit a’ kosuhut di boros do koimayaan do mantad id Rusod do Kinorohingan, om a’ i’ i tulun diri milo do momoros dot, ’’Kosokodung oku,’’ ka, dot id sambayang nu do mongunsikou’ddi; tu’ a’ i’ iyau kosuhut di pinoboros nu. ¹⁷ Om mulong piya daa dot osonong tomod i sambayang nu do mongunsikou’d Tuhan, nga’ aiso’ i’ o komoyon di sambayang nu’ddi dot id tulun do suwai. ¹⁸ Mongunsikou oku nod Kinorohingan tu’ milo oku do mimboros do mogisuayan o bansa’d boros di koimayaan, dot ogumu’ po ko’ i dokoyu’d noilaan. ¹⁹ Nga’ id suang nopod pitimungan do sumambayang dot id Tuhan, om orohian oku nogi’ do popoboros dot ongolimo nopo o boros dot osuhutan pod tulun ko’ mantad do popimboros do rinibuan o boros dot id suang di boros di koimayaan. Orohian oku nogi’ kopio dot iyo’ddi om milo oku i’ do monuduk do tulun. ²⁰ Oi tobpinai-tobpinai! Kada’ dokoyu paanak-anako’ o pomusorou dokoyu. Ookuro do tangaanak kou dit ongokoro’ po dot id wowonsoyon dit araat, nga’ pomolohingon no kopio dokoyu o kowoyo-woyoo’ dokoyu’d momusorou. ²¹ Tu’ nokotulis no dot id suang do Buuk do Kinorohingan o poingkaa, ’’Boros kad Tuhan, ’Moro-boros oku nondo dot id bansa’ diti, dot i tulun di moro-boros dot id suang do boros dit a’ osuhutan o popolombus. Iri nondo tulun do bansa’d suwai o popolombus do boros ku dot id tulun di songonuon ku; nga’ iyo piya’ddi, nga’ a’ i’ iyolo’ mokinongou do boros ku,’ ka dau,’’ ka. ²² Om kaa pogi’ dot iri nopo nipuhawang do mimboros do boros do koimayaan di mogisuayan o bansa’, om pogintutunan no dot id tulun dit a’ po notumbayaan, om okon i’ ko’ pogintutunan dot id tulun di notumbayaan. Om iri no nipuhawang do poposunud di natantu’ mantad do Kinorohingan do wonsoyon dau dot id tulun, om pogintutunan dot id tulun di notumbayaan no, om okon i’ ko’ pogintutunan di tulun dit a’ notumbayaan. ²³ Iyo nopoddi, om ondung oinsanan nopo i tulun dot id pitimungan do sidang do mimboros do boros di koimayaan, om rumikot nondo o piro-piro o tulun do suwai dit a’ oubas do tumimung ko’ i tulun dit okon ko’ Kristian, om atantu’ no do pokoulahon kou diyolo’! ²⁴ Nga’ ondung oinsanan kou nopo do popolombus do habar do mantad id Kinorohingan, om rumikot nondo o songulun dit okon ko’ Kristian ko’ tulun do suwai dit a’ oubas do tumimung, om iri nopondo boros di polombuson ngai’ dokoyu’ddi om popointalang nondo do dusa di tulun diri om popopuriman dau do koinsanai di dusa dau. ²⁵ Kointalang ngai’ nopondo i poillisok dot id suang do ginawo dau, gisom do minsiriba’ o ginawo dau om tumuku’ nondo iyau dot id Kinorohingan. Om mangakun nondo iyau do hiri kopio’d pogialatan dokoyu o Kinorohingan. ²⁶ Om nunu’ddi o komoyon ngai’ddi? Ondung tumimung kou do sumambayang dot id Tuhan, om haro nondo o modsinding, om haro o monuduk, om haro o popolombus di pinointalang do Kinorohingan, om haro o mimboros do boros di koimayaan, om haro o poposuhut do komoyon di pinoboros diri. Nga’ mositi’ no do wonsoyon ngai’ iri do maan do ponuduk om koinsanangan do koinsanai’d tulun. ²⁷ Ondung haro ot orohian do mimboros do boros di koimayaan, om mositi’ no do duwo noo ko’ tolu o tulun do mogisowoli-woli do mimboros. Om mositi’ nod haro o tulun do poposuhut di pinoboros di tulun di minimboros diri. ²⁸ Ondung aiso’ o milo do poposuhut, om osonong nogi’ dot a’ nopo mimboros i tulun di mimboros do boros di koimayaan dot id suang di pitimungan. Om moro-boros nopo iyau dot id Kinorohingan dot id suang do ginawo dau. ²⁹ Ongoduwo nopo ko’ tolu o tulun do popolombus do boros do Kinorohingan, om iri nondo suwai om monimbang di boros di pinolombus diri. ³⁰ Nga’ ondung haro o habar do mantad id Kinorohingan do rumikot dot id iso’ kawagu o tulun di poirikau dot id pitimungan diri, om mositi’ no do tumingkod i tulun di maso do moro-boros. ³¹ Om iyo noddi o kowoyo-woyoo’ dokoyu ngai’, do mogisowoli-woli do popolombus do habar do mantad id Kinorohingan; om ongotudukan ngai’ i’ o tulun om kogirot dot id suang do kotumbayaan. ³² Iri nopo nipuhawang do mantad id Rusod di popolombus do habar do mantad id Kinorohingan om milo i’ di tulun di popolombus di boros diri do pususon. ³³ Kinorohingan nopo om Kinorohingan i’ dit orohian do haro o kouludan; om okon i’ iyau ko’ Kinorohingan dit orohian dot agangau. Om poingkuro nopo it osiliu dot id koinsanai’d sidang do Kinorohingan, ³⁴ om a’ no kopio koino-ino do mimboros o tongoondu’ dot id suang do pitimungan. Iyolo’ nopo om a’ i’ pabanaron do mimboros. Om a’ iyolo’ koino-ino do sumiliu’d boyoon; tu’ iyo noddi o kopiontok di ponudukan di Tourat. ³⁵ Ondung haro o pokiilaan diyolo’, om uhoton nopo diyolo’ iri dot id sawo diyolo’ om hiri iyolo’d duwalai. Kointingayam i’ kopio o tongoondu’ do mimboros dot id suang do pitimungan do sidang. ³⁶ Iyokoyu toi o tadon di boros do Kinorohingan? Ko’ iyokoyu no tuu o pinolombusan di boros diri? ³⁷ Ondung haro o tulun di kopuriman do noonuan iyau do nipuhawang do popolombus do boros di mantad id Kinorohingan ko’ noonuan iyau do nipuhawang do suwai do mantad id Rusod do Kinorohingan, om mositi’ no do kopuriman o tulun diri dot iti nopo tulison ku om ponuhuan i’ kopio’d Tuhan. ³⁸ Nga’ ondung haro o tulun dit a’ rumamit diti, om kada’ no dokoyu iyau pokinongoho’. ³⁹ Iyo nopoddi, oi tobpinai-tobpinai, om tumotos kou no do popolombus do habar di mantad id Kinorohingan, nga’ kada’ indo dokoyu oduhai i tulun dit orohian do mimboros do mogisuayan o boros di koimayaan. ⁴⁰ Nga’ mositi’ no dot osonong om oulud o kowoyo-woyoo’ do momonsoi do koinsanai’ddi.

¹ Om dinondo nodti, oi tobpinai-tobpinai ku, om orohian oku do sorohon kawagu dokoyu i Habar dot Osonong do mantad id Kinorohingan di pinosusui ku dokoyu di gulu po. Om rinamit i’ dokoyu iri, om notumbayaan kou di Kristus tu’ nokorongou kou no di Habar dot Osonong. ² Ondung tumanud kasai’ kou di pinosusui ku’ddi, om kapasi no dokoyu i Habar dot Osonong diri; ondung a’ kou no minonongkuyaan no toomod, om aiso’ iddi o nosuhut-suhutan. ³ Iri nopo i pinosusui ku dokoyu’ddi om iri no i doho’ do naanu. Iri nopo it agayo kopio, do miagal di nokotulis dot id suang do Buuk do Kinorohingan, om pinosusui ku i’ dot id dokoyu, do minatai i Kristus do minongidu’ di dusa toko’ o kinapatayan; ⁴ om nolobong iyau, nga’ napasi iddi kawagu di kotolu’d tadau. Om iri nga’ nokotulis nogi’ dot id suang do Buuk do Kinorohingan. ⁵ Om pinosunud ku nogi’ dokoyu dot i Kristus nopo, i napasi kawagu’ddi, om minintalang i’ dot id di Pitrus, om intalang nogiddi kawagu dot id hopod om duwo o tulun do suwai di sinuhu’ddi. ⁶ Om intalang nogiddi iyau dot id tumatanud dau dit ogumu’ i’ ko’ limo nahatus o tulun, dot insan-insan o maso. Om kogumuan po di tulun diri do poimpasi do dinondo; okuri’ po diyolo’ o napatai. ⁷ Om intalang po kawagu i Kristus dot id di Yakub om intalang nogiddi iyau dot id koinsanai di rasul. ⁸ Id tohuri noddi kopio, om minintalang iyau dot id doho’ — iyoho’ i miagal-agal do tanak di nosusu dot okon ko’ i maso do kosusuan do nosusu! ⁹ Iyoho’ no o rasul do Tuhan dit osiriba’ no kopio o ngaran. Om a’ oku no daa apatut do roitan do rasul, tu’ nokoponginggorit oku i’ di sidang do Kinorohingan. ¹⁰ Nga’ nokoiyo oku i’ diidti do baino’, tu’ nosianan i’ o Kinorohingan doho’. Om haro i’ kopio o kinountungan do Kinorohingan do minangampun doho’. Om iyoho’ nogiddi o poimaha’ o pangangaraja’ ko’ mantad do koinsanai di rasul. Nga’ otopot nopo kopio om okon i’ ko’ mantad id kokorisan ku’ri, suwai ko’ iri nopo om karaja’ i’ do Kinorohingan, i nosianan doho’, om i monguhup doho’ do kumaraja’. ¹¹ Om kaa pogiddi, dot isai nopo o karangahan dokoyu di Habar dot Osonong diri — dot iyoho’ tuu ko’ i tulun do suwai di sinuhu’ — nga’ a’ i’ monguro. Iri nopo it agayo kopio om i poposusui iyahai di Habar dot Osonong diri, om monongkuyaan kou iyokoyu’ddi. ¹² Ondung popinsusuyon dahai do napasi kawagu i Kristus do mantad id kapatayon, om nokuro tu’ haro ot id pogialatan dokoyu do momoros dot a’ posion kawagu i tulun do napatai? ¹³ Om ondung otopot daa dot a’ posion kawagu i tulun di napatai, om komoyon nopoddi nga’ Kristus piya nga’ a’ i’ pinasi kawagu do mantad id kapatayon. ¹⁴ Om ondung a’ daa o Kristus pinasi kawagu do mantad id kapatayon, om aiso’ no o guna’ dahai do popinsusui do nunu-nunu, om aiso’ o guna’ dokoyu do monongkuyaan, tu’ aiso’ i’ o nunu-nunu do poimpahan di kotumbayaan dokoyu. ¹⁵ Om suwai no ko’ iri, om kointalang no do mongudut iyahai do pasal do Kinorohingan, tu’ popinsusuyon dahai do pinasi kawagu’d Kinorohingan o Kristus do mantad id kapatayon, om a’ i’ iyau’d Kinorohingan pinasi kawagu dot ondung otopot no daa kopio dot a’ posion kawagu i tulun di napatai! ¹⁶ Tu’ ondung a’ posion kawagu i tulun do napatai, om Kristus nga’ a’ no pinasi kawagu do mantad id kapatayon. ¹⁷ Om ondung a’ o Kristus pinasi kawagu, om iyo nod nipi toomod i kotumbayaan dokoyu’ddi; om komoyon nopoddi nga’ id suang kasai’ kou pod kowoyo-woyoon di kidusa, om aiso’ o soro-sorohon dokoyu. ¹⁸ Om komoyon nopoddi nga’ aiso’ no o soro-sorohon di tulun do Kristian di nangapatai. ¹⁹ Om ondung daamot toko’ no do poimpasi do hiti’d pomogunan do haro o soro-sorohon toko’ dit id suang do Kristus, om iyati’ no o nokoimamang kopio dot id pogialatan do koinsanai’d tulun do hiti’d pomogunan. ²⁰ Nga’ nokointalang no kopio do napasi kawagu i Kristus do mantad id kapatayon. Om iti no o kotontuan kopio do posion kawagu i tulun do napatai. ²¹ Tu’ iso’ no o tulun do tadon do kapatayon do suminuang do hiti’d pomogunan, om iyo nogiddi tu’ iso’ no o tulun do tadon do kopomosian kawagu do tulun do mantad id kapatayon. ²² Om poingkuro nopo do nokotonggoi ngai’ di Adam o tulun do minatai tu’ nokoiso’ no iyolo’ dau, om iyo nogindoddi tu’ kotonggoi ngai’ no di Kristus do posion o koinsanai’d tulun di nokoiso’ dot id dau. ²³ Nga’ oulud indo o maso do koposian do pointikid-tikid do tulun: id gulu nopo kopio om i Kristus; om orikot pondo i maso do korikatan kawagu dau, om posion nogindo i tulun di nokohompit do tulun di songonuon do Kristus. ²⁴ Om orikot nogindo o kopupuson diti pomogunan. Om tontok nopondoddi, om alaon ngai’ nondo di Kristus o koinsanai’d pomorintaan, om koinsanai’d kuasa’ om koinsanai dit ongokoris; om patahakon nondo dau i Pomorintaan dau dot id Kinorohingan, i Tapa’ toko’. ²⁵ Om mositi’ no dot i Kristus kasai’ o momorinta’ do gisom dot paalaan ngai’ do Kinorohingan di Kristus o koinsanai di pisangod di Kristus. ²⁶ Om iri nopo pisangod di kolimpupuson no kopio dot alaon om kapatayon. ²⁷ Nokotulis no dot id suang do Buuk do Kinorohingan o poingkaa, ’’Nokoinsiriba’ ngai’ nod Kinorohingan o koinsanai’d nunu nopo dot id dau,’’ ka. Om atarang i’ do komoyon nopo do ’’koinsanai’d nunu nopo’’, om a’ i’ kohompit o Kinorohingan, i pinopoinsiriba’ do koinsanai’d nunu nopo dot id Kristus. ²⁸ Nga’ koinsiriba’ ngai’ pondo o koinsanai’d nunu nopo dot id pomorintaan do Kristus, om iyau nondo, i Tanak do Kinorohingan, nga’ minsiriba’ i’ dot id Kinorohingan, i pinopoinsiriba’ do koinsanai’ddi dot id dau. Om Kinorohingan nondo o momorinta’ do koinsanai’ddi. ²⁹ Ondung a’ posion kawagu o tulun di napatai, om nokuro’ddi tu’ haro o tulun do botisan do bagi’ di tulun di napatai? Nunu’ddi o kapamansayan diyolo’ do miagal diri? Ondung otopot daa kopio dot a’ kopio posion kawagu i tulun do napatai, om nunu poddi o kapamansayan diyolo’ do miagal diri? ³⁰ Om nunu’ddi o kotimbabaan dahai do koligagaanan do pointikid do saat? ³¹ Oi tobpinai-tobpinai! Alanut i’ o ginawo ku dot oinggorit oku piya do pointikid-tikid do tadau, om oondos oku i’ dokoyu tu’ notumbayaan ngai’ kou no di Kristus Yesus, i Tuhan toko’. ³² Ondung don tulun noddi, om nunu’ddi o taanu-anu ku do tumotos tomod dot iyo pod monokisaap do nintorusan dit ongorongit do hiti’d bandar diti, i bandar dot Iposus? Ondung a’ daa kopio posion kawagu i tulun do napatai, om osonong nogi’ do tonudon toko’ iti boros do poingkaa, ’’Kainou mangakan-ngakan om monginum-nginum om sumimbayan, tu’ matai toko’ nod suab,’’ ka. ³³ Kada’ kopio kou kaakalai! Tu’ iri no monokiambalut dit angaraat o karaag do kowoyo-woyoon dit osonong. ³⁴ Purimono’ no kopio dokoyu o kowoyo-woyoo’ dokoyu do dinondo, om kada’ kou nondo pomonsoi’d dusa. Apatut nogi’ kopio dot ointingayaman kou tu’ haro po ot a’ nokotutun do Kinorohingan dot id pogialatan dokoyu. ³⁵ Haro doti’ o muhot do poingkaa, ’’Poingkuro ma o tulun do napatai do posion kawagu? Okuro-kuro ma o tinan do patahakon dot id diyolo’ do posion kawagu iyolo’?’’ ka. ³⁶ Basug no kopio! Ondung patanom kou do linsou do hilo’d tana’, om a’ i’ i linsou sumuni dot a’ po apatai. ³⁷ Om iri nopo linsou do tonomon dokoyu’ddi — do linsou tuu do gandum ko’ linsou do totonomon do suwai — om iri no i linsou, om okon i’ ko’ i totonomon di nopongo no o sunion. ³⁸ Om Kinorohingan indo o manahak di linsou’ddi do kowoyo-woyoo’ do tumanud dit osonong dot osorou dau. Om pogisuwai-suwayon do Kinorohingan o kowoyo-woyoo’ do pointikid-tikid di linsou. ³⁹ Koinan-inano’ nopo dit ongkiginawo do dinondo om a’ i’ oiyo. Tulun nopo om iso’ no o kowoyoon do tinan, om ilo nintorusan nga’ suwai no o koinan-inano’; om tombolog no om suwai no o koinan-inano’, om i sada’ nga’ suwai no o koinan-inano’. ⁴⁰ Om iyo nogiddi i hilo’d tawan om i hiti’d pomogunan. Ilo’ nopo hilo’d tawan om suwai no o kolumiso’, om i hiti’d pomogunan nga’ suwai-suwai no. ⁴¹ Ilo’ nopo kolumiso’ do tadau om suwai no ko’ i kolumiso’ do tulan. Om ilo rombituon nga’ suwai no o kolumiso’. Om ilo’ piya rombituon nga’ mogisuwai-suwai i’ o kolumiso’. ⁴² Om iyo nogiddi i tulun di posion kawagu. Iri nopo tinan di lobongon om iri i tinan di mumang pasa’; nga’ iri nopondo tinan di posion kawagu, om tinan no dit a’ mumang pasa’. ⁴³ Tontok nopo di lobongon i’ i tinan, om masa’ no om araa-raat o kokitanan, nga’ posion nopondo kawagu om osonong indo o kokitanan di tinan om okoris. ⁴⁴ Di nopo di lobongon i’ i tinan, om tinan i’ do mantad id pomogunan i tinan diri; nga’ apasi nopondo kawagu, om iri nopondo tinan om tinan i’ di patahakon di Rusod do Kinorohingan. Haro i’ o tinan do mantad id pomogunan om haro o tinan do mantad id Kinorohingan. ⁴⁵ Haro i’ o nokotulis dot id suang do Buuk do Kinorohingan do poingkaa, ’’Iri nopo tulun di koiso’ i’, i Adam, om suminiliu do tulun di poimpasi,’’ ka, nga’ i Adam nopondo, it id tohuri om Rusod i’ di manahak do koposion. ⁴⁶ Iri nopo minogulu do ruminikot om i don tinan, om okon i’ ko’ i don rusod. Iri nopo don rusod om suminusuhut no do ruminikot. ⁴⁷ I Adam nopo di koiso’ om tana’ i’ do winonsoi, nga’ i Adam no di koduwo om mantad hilo’d surga. ⁴⁸ Iti nopo tulun do hiti’d pomogunan diti om miagal di Adam di koiso’, i tana’ do winonsoi, nga’ iri nopo tulun do surga om iyo i’ dau, i mantad hilo’d surga. ⁴⁹ Om poingkuro toko’ nopo dot iyo di Adam, do dinondo poo, om i tana’ do winonsoi, om iyo toko’ noddi dot osiliu do miagal dau i mantad hilo’d surga do koimbagu. ⁵⁰ Komoyon ku nopo, oi tobpinai-tobpinai, om iri nopo tinan di raha’ om tonsi do winonsoi om a’ i’ milo do sumuang di Pomorintaan do Kinorohingan; om iri tinan di matai nga’ a’ i’ milo do sumiliu do tinan dit a’ matai. ⁵¹ Pokinongou kou no dit a’ mantad daa pinoilaan do tulun: Okon i’ ko’ oinsanan toko’ dot apatai nga’ oinsanan toko’ indo dot osimbayan. ⁵² Om osiliu nondo o miagal diri dot oruhai kopio, dot okirapan noo, do tontok di pounion i torumpit di kolimpupuson no kopio. Tu’ orongou nopondo i torumpit diri, om posion nondo kawagu i tulun do napatai dot onuan do tinan dit a’ matai, om simbanan ngai’ toko’ nondo. ⁵³ Om sowolian nondo iti tinan toko’ diti matai do tinan dit a’ matai, om sowolian di tinan do mantad hilo’d surga iti tinan diti mantad hiti’d pomogunan. ⁵⁴ Ondung osowolian di tinan dit a’ matai i tinan di matai, om osowolian di tinan do mantad hilo’d surga i tinan di mantad hiti’d pomogunan, om tontok nondoddi dot osiliu i nokotulis dot id suang do Buuk do Kinorohingan, do poingkaa, ’’Natanus no o kapatayon; om naanu no o kamanangan!’’ ka. ⁵⁵ ’’Oi kapatayon, honggo noddi i kamanangan nu? Oi kapatayon, honggo noddi i kuasa’ nu do pokoruol?’’ ka. ⁵⁶ Kuasa’ nopod kapatayon do pokoruol om mantad i’ id dusa, om dusa no om tadon nopod kuasa’ nga’ mantad di Tourat. ⁵⁷ Nga’ pounsikou nod Kinorohingan; tu’ noonuan toko’ no dau do kamanangan dot i Yesus Kristus i Tuhan toko’ o minanahak. ⁵⁸ Iyo nopoddi, oi tobpinai-tobpinai di kongosianan ku, om kumoris kou no om gumirot kou no. Kada’ kou tingkod do momonsoi di karaja’ do don Tuhan do mikuwo’d iso-iso’ kopio o ginawo, tu’ oilaan i’ dokoyu do koinsanai di wonsoyon dokoyu di don Tuhan om okon i’ ko’ maan toomod.

¹ Om iri no tusin di maan dokoyu patahako’ do ponulung di sompi’ ko’ tulun do Kristian, om potudukon ku nopo do wonsoyon dokoyu om miagal di nokotuduk ku di sidang do hilo’d Galatia. ² Pointikid-tikid do tadau do koiso’ do pointikid do minggu’, om mositi’ no do potobilang kou’d tusin, do miontok di kogumuon do tusin dot aanu dokoyu. Om poopion nopo i tusin diri do gisom do korikot oku, om a’ indo minog do monimung do tontok diri. ³ Om korikot oku pondo, om suhuon ku nogindo i tulun di nongookunan dokoyu do mongoi’d hilo’. Om onuan ku indo iyolo’ do surat do kopoilaan, om oigitan i’ diyolo’ i tusin do mongoi’d hilo’d Yorusalim. ⁴ Om ondung osonong do mongoi oku iyoho’ woyo’ diyolo’, om tumanud oku indo diyolo’. ⁵ Mongoi oku indo ompuya’ dokoyu do kawaya’ oku’d hilo’d Makidunia, tu’ osorou ku do maya’ oku’d hilo’. ⁶ Oruhai oku doti’ do poinsugku’ dokoyu; solinaid no doti’ do maso’d osogit. Om milo kou nogindo do monulung doho’ do mamanau do lumombus dot id kinoiyonon do suwai di ngoyon ku. ⁷ Okon i’ ko’ mongoi no tomod umbaya’ o kaangayan ku’d hino’d dokoyu. Suwai ko’ ondung korohian do Tuhan, om orohian oku i’ dot alaid-laid oku do poinsugku’ dokoyu. ⁸ Nga’ daamot nopodti om mundorong oku nopo do hiti’d bandar dot Iposus, do gisom dot orikot o tadau’d Pintakosta. ⁹ Ogumu’ i’ kopio o maso do momonsoi’d karaja’ di kiguna’ do hiti, do mulong piya do haro o tulun di sumaap. ¹⁰ Korikot nopondo i Timotius om romiton no iyau kosonong-sonong om osonong i’ o kopurimanan dau dot id pogialatan dokoyu, tu’ iyau nga’ iyo i’ doho’ do momonsoi’d karaja’ di don Tuhan. ¹¹ Kada’ nogi’ do haro o tulun do poinsiriba-riba’ dau. Tulungon no dokoyu iyau di mamanau kawagu iyau do gumuli’ dot id doho’, om osonong-sonong i’ iyau, tu’ poingandad oku i’ om i piro-piro o tobpinai’d suwai do korikatan dau. ¹² I Apolos no, i tobpinai toko’, om asaru’ oku no do monuhu’ dau om i piro-piro o tobpinai’d suwai do mongoi ompuya’ dokoyu. Nga’ a’ po atantu’ no o ginawo dau ondung apatut iyau do mongoi’d dinondo poo. Nga’ ondung oiwangan o ralan dau do koimbagu, om atantu’ no do mongoi i’ iyau. ¹³ Antaan-taan no dokoyu om gumirot kou no dot id suang do koposi-posion dokoyu di dong Kristian. Kumosiou kou no om kumoris kou no. ¹⁴ Wonsoyon no dokoyu do mikuwo’d kosianan o koinsanai di wonsoyon dokoyu. ¹⁵ Atantu’ no do kotutun kou i’ di Stipanus om i sompiiyon dau; om iyolo’ no it id gulu kopio kosiliu do Kristian do hilo’d Akaya. Om iso-iso’ tomod o ginawo diyolo’ do mogobi-obi’ di dong Kinorohingan do tulun. ¹⁶ Om mongodsuur oku no kopio dokoyu do moyo’ do ponudukan do tulun do miagal diri, om i tulun do suwai di muhup diyolo’ om i sumokodung diyolo’ do kumaraja’. ¹⁷ Asanangan tomod oku do norikatan di Stipanus, om i Portunatus, om i Akaikus. Iyolo’ no o miagal dokoyu dot id doho’. ¹⁸ Iyolo’ no o pinopotood do ginawo ku, do miagal di pinopotood iyolo’ dokoyu. Apatut no kopio do pusohon o tulun do miagal diyolo’. ¹⁹ Iti piro-piro o sidang do hiti’d Asia nga’ poporikot nogi’ do tabi’ diyolo’ dot id dokoyu. Om i Akuila om i Priskila om i sidang do tumimung do hiri’d walai diyolo’ nga’ poporikot i’ do tabi’ diyolo’ di dong Kristian dit ogirot kopio dot id dokoyu. ²⁰ Oinsanan nopo i tobpinai’d hiti do poporikot do tabi’ dot id dokoyu. Mogisuwau-suwau kou no do miagal do tulun do Kristian di mogiobpinai. ²¹ Om poruhangon ku po iti tabi’ do tulison ku do tunturu’ kopio ku o popotulis: Tabi’ do mantad id doho’, i Paulus. ²² Iri nopo tulun dit a’ osianan do Tuhan, om pologoson nopo dot ousung! Maranata — Oi Tuhan dahai, rikot no! ²³ Pokionuon ku o Tuhan Yesus do mamarakat dokoyu. ²⁴ Kosianan ku iyoho’ nga’ moyo-woyo’ ngai’ i’ dokoyu, i poingiso’ dot id Kristus Yesus.