1 SUSUI

1 SUSUI

¹ I Adam nopo om tapa’ di Sit, om i Sit no om tapa’ di Inos, om i Inos no om tapa’ di Kinan, ² om i Kinan no om tapa’ di Mahalaliil, om i Mahalaliil no om tapa’ di Yarid, ³ om i Yarid no om tapa’ di Hinok, om i Hinok no om tapa’ di Motusala, om i Motusala no om tapa’ di Lamik, ⁴ om i Lamik no om tapa’ di Nuu. Kianak i Nuu do tolu o kusai: i Sim, i Ham, om i Yapit. ⁵ Tangaanak nopo di Yapit do tongokusai om i Gomor, i Magog, i Madai, i Yawan, i Tubal, i Misik, om i Tiras. Om iyolo’ no i taki-aki do bansa’ di pinungaranan do ngaran diyolo’. ⁶ Sinakagon nopo di Gomor om i tulun di poingiyon do hilo’d Askinas, om hilo’d Ripat, om hilo’d Togarma. ⁷ Sinakagon nopo di Yawan om i tulun do poingiyon do hilo’d Ilisa, om hilo’d Sepanyol, om hilo’d Siprus, om hilo’d Rodis. ⁸ Tangaanak nopo di Ham do tongokusai om i Kus, i Masir, i Libia, om i Kanaan. Om iyolo’ no o taki-aki di bansa’ di pinungaranan do ngaran diyolo’. ⁹ Sinakagon nopo di Kus om i tulun do poingiyon do hilo’d Siba, om hilo’d Hawila, om hilo’d Sabta, om hilo’d Raima, om hilo’d Sabtika. Sinakagon nopo di Raima om i tulun di poingiyon do hilo’d Shiba om hilo’d Didan. ¹⁰ (Kianak i Kus do kusai dot i Nimrod o ngaran. Om i Nimrod no it id gulu kopio do nosiliu do sumasangod dit abantug kopio do hiti’d pomogunan.) ¹¹ Sinakagon nopo di Masir om i tulun di poingiyon do hilo’d Lidia, om hilo’d Anamim, om hilo’d Lihabim, om hilo’d Naptuhim, ¹² om hilo’d Patrusim, om hilo’d Kasluhim, om hilo’d Krita. (Om iyolo’ no o sinolusukan di tulun do Pilistin.) ¹³ Tangaanak nopo di Kanaan do tongokusai om i Sidon, it id dotuo, om i Hit. Om iyolo’ no i taki-aki di bansa’ di pinungaranan do ngaran diyolo’. ¹⁴ Om i Kanaan nogi’ i taki-aki di tulun do Yobusi, om Amori, om Girgasi, ¹⁵ om Howi, om Arki, om Sini, ¹⁶ om Arwadi, om Simari, om Hamati. ¹⁷ Tangaanak nopo di Sim do tongokusai om i Ilam, i Asur, i Arpaksad, i Lud, i Aram, i Us, i Hul, i Gitir, om i Misik. Om iyolo’ no o taki-aki di bansa’ do pinungaranan do ngaran diyolo’. ¹⁸ I Arpaksad nopo om tapa’ di Sila, om i Sila no om tapa’ di Ibir. ¹⁹ I Ibir nopo om kianak do duwo o kusai; iri nopo i tanak dau dit id dotuo om pinungaranan dot i Pilig tu’ maso nopoddi om nokopogitongkiad-kiad no o tulun do hiti’d pomogunan. Om iri no koduwo om pinungaranan dot i Yoktan. ²⁰ Sinakagon nopo di Yoktan om i tulun di poingiyon do hilo’d Almodad, om hilo’d Silip, om hilo’d Hasarmawit, om hilo’d Yira, ²¹ om hilo’d Hadoram, om hilo’d Usal, om hilo’d Dikla, ²² om hilo’d Ibal, om hilo’d Abimail, om hilo’d Shiba, ²³ om hilo’d Opir, om hilo’d Hawila, om hilo’d Yobab. ²⁴ - ²⁷ Poingkaa no o dopitar do ngaran do sinakagon di Sim do poimpuunon dot id dau om korikot dot id di Abraham: I Sim, i Arpaksad, i Sila, i Ibir, i Pilig, i Rohu, i Sorug, i Nahor, i Tira, i Abram (i rinoitan diri dot i Abraham.) ²⁸ I Abraham nopo om kianak do duwo o kusai: i Isak om i Ismail. ²⁹ - ³¹ Iri nopo tangaanak di Ismail om: i Nibayot, i tanak dau dot id dotuo, i Kidar, i Adbiil, i Mibsam, i Misma, i Duma, i Masa, i Hadad, i Tima, i Yotur, i Napis, om i Kidma. Om iyolo’ no o nosiliu do taki-aki do hopod om duwo o payat. ³² Haro o tondu’ do panakasawo di Abraham dot i Kotura o ngaran. Om onom o tanak diyolo’ do kusai: i Simran, i Yoksan, i Midan, i Midian, i Isbak, om i Sua. I Yoksan nopo om kianak do duwo o kusai: i Shiba om i Didan. ³³ Om limo o tanak di Midian do kusai: i Ipa, i Ipir, i Hanok, i Abida, om i Ildaa. ³⁴ I Isak nopo, i tanak di Abraham, om kianak do duwo o kusai: i Isau om i Yakub. ³⁵ Tangaanak nopo di Isau do kusai om i Ilipas, i Rohuil, i Yius, i Yailam, om i Kora. ³⁶ Om i Ilipas no o nosiliu do taki-aki do payat diti: Timan, Omar, Sipi, Gaitam, Kinas, Timna, om Amalik. ³⁷ Om i Rohuil o nosiliu do taki-aki do payat do Nahat, Sira, Syama, om Misa. ³⁸ - ⁴² Iri nopo tulun mantad do hilo’d pomogunan dot Idom om i sinakagon do tangaanak di Soir: i Lotan, i Syobal, i Sibion, i Ana, i Dision, i Isir, om i Disian. I Lotan nopo om taki-aki do sinompuruan do tulun do Hori om Homam. (Om haro o tobpinai di Lotan do tondu’ dot i Timna o ngaran.) I Syobal nopo om taki-aki do sinompuruan do tulun dot Alyan, Manahat, Ibal, Sipi, om Onam. I Sibion nopo om kianak do duwo o kusai: i Aya om i Ana; i Ana nopo om tapa’ di Dision. Om i Dision no o taki-aki do sinompuruan do tulun do Hamran, Isban, Yitran, om Kiran. I Isir nopo om taki-aki do sinompuruan do tulun do Bilhan, Saawan, om Yaakan. Om i Dision nopo om taki-aki do sinompuruan do tulun dot Us om Aran. ⁴³ - ⁵⁰ Iti ngai’ nopo raja’ diti om minogisuhu-suhut do minomorinta’ dot Idom dit aiso’ po o raja’ dot Israil: I Bila, i tanak di Bior, i mantad hilo’d Dinhaba I Yobab, i tanak di Sira, i mantad hilo’d Bosra I Husam, i mantad id watas do Timan I Hadad, i tanak di Bidad, i mantad hilo’d Awit, (iyau no i minangala’ do tulun do Midian dot id iso’ o pinisangadan do hilo’d watas do Muab.) I Samla, i mantad hilo’d Masrika I Saul, i mantad hilo’d Rihobot, it id tisan do bawang I Baal-Hanan, i tanak di Akbor I Hadad, i mantad hilo’d Pahu (sawo nopo dau om i Mihitabiil, i tanak di Matrid, i manangaki di Misahab). ⁵¹ Iri nopo tulun dot Idom om nopogibahagi-hagi’ do piro-piro payat. Iri no i payat do Timna, Alya, Yitit, ⁵² Oholibama, Ila, Pinon, ⁵³ Kinas, Timan, Mibsar, ⁵⁴ Magdiol, om Iram.

¹ I Yakub nopo om kianak do hopod om duwo o tongokusai: I Rubin, i Simion, i Liwi, i Yohuda, i Isakar, i Sibulon, ² i Dan, i Yusup, i Binyamin, i Naptali, i Gad, om i Asor. ³ I Yohuda nopo om kianak do limo o tongokusai. Tanak nopo dau di Batsua, i sawo dau, i tondu’ do Kanaan diri, om tolu o kusai: i Or, i Onan, om i Sila. I Or nopo, i tanak dau dit id dotuo nga’ ruminaat tomod o kowoyo-woyoon gisom do pinatai’ddi iyau’d TUHAN. ⁴ Om duwo po kawagu o tanak do kusai di Yohuda do pinaganak di Tamar, i sawo dau, i monongiwan daa dau: i Piris om i Sira. ⁵ I Piris nopo om kianak do duwo o kusai: i Hisron om i Hamul. ⁶ Om i Sira no, i tadi’ dau, om kianak do limo o kusai: i Simri, i Itan, i Himan, i Kalkol, om i Dara. ⁷ I Akar nopo, i tanak di Karmi, om sinakagon i’ di Sira, nga’ pinoporikot iyau do kosusaan dot id tulun dot Israil tu’ pinopoopi’ iyau di dapu’ di nanu do mantad id pisangadan di pinotobilang do patahakon dot id Kinorohingan. ⁸ I Itan nopo om iso’ noo o tanak do kusai; do ngaran nopo om i Asaria. ⁹ I Hisron nopo om kianak do tolu o kusai: i Yiramiil, i Ram, om i Kalib. ¹⁰ Iti ngai’ no o dopitar do sinakagon do mantad id di Ram om gisom do korikot dot id di Isai: i Ram, i Aminadab, i Nahason (iyau no o songulun dit abantug dot id payat do Yohuda), ¹¹ i Salmon, i Buas, ¹² i Obid, om i Isai. ¹³ I Isai nopo om kianak do turu’ o kusai. Om oirus nopo o tumur diyolo’ do tumanud do ngaran diyolo’dti: I Iliab, i Abinadab, i Simia, ¹⁴ i Nitaniil, i Radai, ¹⁵ i Osim, om i Daud. ¹⁶ Om haro po o duwo tanak di Isai do tondu’: i Soruya om i Abigail. I Soruya nopoddi, i tanak di Isai do tondu’ om kianak do tolu o kusai: i Abisai, i Yoab, om i Asail. ¹⁷ Om iri no tanak di Isai do tondu’ di tiso’, i roitan dot i Abigail, om kinawin di Yitir, i sinakagon di Ismail. Om kianak diri iyolo’ dot iso’ o kusai dot i Amasa o ngaran. ¹⁸ I Kalib noo, i tanak di Hisron, om minangawin di Asuba. Om kianak iyolo’ dot iso’ o tondu’ dot i Yiriot o ngaran. I Yiriot nopo om kianak do tolu o kusai: i Yisir, i Sobab, om i Ardon. ¹⁹ Om di nopoddi napatai i Asuba, om panansawo po kawagu i Kalib di Iprata. Om kianak po iyolo’ dot iso’ o kusai dot i Hur o ngaran. ²⁰ Om tanak nopo di Hur om i Uri, om iri no i manangaki dau om i Bisaliil. ²¹ Tontok dit onom no nohopod o toun di Hisron, om kowino’ no dau i tanak do tondu’ di Makir, i tobpinai di Giliad do tondu’. Om kianak iyolo’ dot iso’ o kusai dot i Sogub o ngaran. ²² Om i Sogub no om kianak dot iso’ o kusai dot i Yair o ngaran. Om minomorinta’ i Yair do duwo nohopod om tolu o bandar do hilo’d watas do Giliad. ²³ Nga’ naala’ di pomorinta’ do Gosur om pomorinta’ dot Aram ot onom nohopod o bandar do hilo’, do kosuang no i kokompungan do Yair om Kinat om kohompit ngai’ i kawalayan do hiri’d posorili’. Sinakagon nopo di Makir, i tapa’ di Giliad, om i tulun di poingiyon dot id watas diri. ²⁴ Om di nopoddi napatai i Hisron, om kowino’ no di Kalib, i tanak di Hisron, i Iprata, i sawo daa di tapa’ dau. Om kianak iyolo’ dot iso’ o kusai dot i Asur o ngaran. Om i Asur no o minomonsoi do bandar do Tokua. ²⁵ I Yiramiil nopo, i tanak di Hisron dot id gulu, om kianak do limo o kusai: i Ram it id dotuo, i Buna, i Orin, i Osim, om i Ahia. ²⁶ - ²⁷ I Ram nopo om kianak do tolu o kusai: i Maas, i Yamin, om i Ikir. Om haro po kawagu o sawo di Yiramiil dot i Atara o ngaran. Om kianak iyolo’ dot iso’ o kusai dot i Onam o ngaran. ²⁸ I Onam nopo om kianak do duwo o kusai: i Samai om i Yada. Om i Samai nopo om kianak do duwo o kusai: i Nadab om i Abisur. ²⁹ Om kowino’ no di Abisur ot iso’ o tondu’ dot i Abihail o ngaran. Om paganak no iyolo’ do duwo o kusai: i Aban om i Molid. ³⁰ I Nadab no, i tobpinai di Abisur, om kianak do duwo o kusai: i Silid om i Apaim; nga’ i Silid nopo om aiso’ i’ o tanak do kusai do gisom do kinapatayo’ dau. ³¹ I Apaim no om tapa’ di Yisoi, om i Yisoi no om tapa’ di Sisan, om i Sisan no om tapa’ di Alai. ³² I Yada no, i tobpinai di Samai, om kianak do duwo o kusai: i Yitir om i Yonatan. Nga’ i Yitir nopo om aiso’ i’ o tanak do kusai do gisom do kinapatayo’ dau. ³³ I Yonatan no om kianak do duwo o kusai: i Pilit om i Sasa. Om iri ngai’ no o sinakagon di Yiramiil. ³⁴ I Sisan nopo om aiso’ i’ o tanak do kusai; tongoondu’ ngai’ nopo o tanak dau. Nga’ haro o turipon dau do tulun do Masir dot i Yarha o ngaran. ³⁵ Om pokowinai no dau o tiso’ di tanak dau’d tondu’ di turipon dau’ddi. Om kianak diri iyolo’ dot iso’ o kusai dot i Atai o ngaran. ³⁶ Iti no o dopitar do ngaran do sinakagon do mantad id di Atai om gisom do korikot dot id di Ilisama: i Atai, i Natan, i Sabad, ³⁷ i Iplal, i Obid, ³⁸ i Yohu, i Asaria, ³⁹ i Hilis, i Ilasa, ⁴⁰ i Sismai, i Salum, ⁴¹ i Yikamia, om i Ilisama. ⁴² Iri nopo tanak di Kalib dot id dotuo, om i Misa o ngaran. I Kalib nopoddi om tobpinai di Yiramiil. I Misa nopo om tapa’ di Sip. Om i Sip no om tapa’ di Marisa. Om i Marisa no om tapa’ di Hibron. ⁴³ I Hibron nopo om kianak dot apat o kusai: i Kora, i Tapua, i Rikim, om i Sima. ⁴⁴ I Sima nopo om tapa’ di Raham, om taki di Yorkiam. I Rikam nopo, i tobpinai di Sima, om tapa’ di Samai. ⁴⁵ I Samai nopo om tapa’ di Maon, om i Maon no om tapa’ di Bait-Sur. ⁴⁶ Om haro po o tondu’ do panakasawo di Kalib dot i Ipa o ngaran. Om tolu o tanak do kusai diyo’ Ipa di Kalib: i Haran, i Mosa, om i Gasis. Om i Haran nga’ kianak i’ dot iso’ o kusai dot i Gasis o ngaran. ⁴⁷ (Om haro o kusai dot i Yodai o ngaran do kianak dot onom o kusai: i Rigim, i Yotam, i Gisan, i Pilit, i Ipa, om i Saap.) ⁴⁸ Om haro po kawagu o tondu’ do panakasawo di Kalib dot i Maaka o ngaran. Om kianak iyolo’ do duwo o kusai: i Sibir om i Tirhana. ⁴⁹ Om paganak po kawagu i Maaka do duwo o kusai: i Saap, om i Siwa. I Saap nopo om minomonsoi do bandar do Madmana, om i Siwa, no om minomonsoi do bandar do Makbina om Gibia. Om haro po o tanak di Kalib do tondu’ dot i Aksa o ngaran. ⁵⁰ Iti po kawagu o sinakagon di Kalib: I Hur nopo om tanak di Kalib do kotuahan, do tanak diyolo’ di Iprata, i sawo dau. Om i Syobal, i tanak di Hur do kusai, o minomonsoi di bandar do Kiriat Yiarim. ⁵¹ Om i Salma no, i tanak di Kalib do koduwo, om minomonsoi do bandar do Baitlahim, om i Harip no, i tanak di Kalib do kotolu, om minomonsoi do bandar do Bait-Gador. ⁵² I Syobal nopo, i minomonsoi do bandar do Kiriat-Yiarim, om taki-aki di tulun do Haroi, om i wookon do tulun do hilo’d Monuhot, ⁵³ om iti piro-piro o sinompuruan do tulun di poingiyon do hilo’d Kiriat Yiarim: i sinompuruan do tulun do Yitri, Puti, Sumati, om Misrai. (Iyolo’ no o sinolusukan di tulun do poingiyon do hilo’d bandar do Sora om hilo’d bandar dot Istaol.) ⁵⁴ I Salma nopo, i minomonsoi do bandar do Baitlahim, om taki-aki di tulun do hilo’d Nitopa, om i hilo’d Atarot-Bait-Yoab, om i tulun do Sori, it iso’ di duwo sinompuruan do tulun do poingiyon do hilo’d Manati. ⁵⁵ (Iti ngai’ no i sinompuruan do tulun di poingiyon do hilo’d bandar do Yabis. Om iyolo’ no it ongoilo do monulis om manalin do surat di kiguna’ kopio: i tulun do Tirati, om Simati, om Sukati. Om iyolo’ no i tulun do Kini, i minangawin do tulun do Rikab.)

¹ - ³ Iti ngai’ no o ngaran do tangaanak di Daud do kusai do poingirus do tumur diyolo’. Om pinogkosusu iyolo’ di maso di Daud do hilo’d Hibron. I Amnon, tina’ nopo dau om i Ahinuam, i mantad hilo’d Yisriil I Daniol, tina’ nopo dau om i Abigail, i mantad hilo’d Karmol I Absalom, tina’ nopo dau om i Maaka, i tanak di Talmai, i raja’ do Gosur I Adonia, tina’ nopo dau om i Hagit I Sipasa, tina’ nopo dau om i Abital I Yitriam, tina’ nopo dau om i Igla. ⁴ Om hilo’ ngai’ nopod Hibron o kinosusuon dit onom o tanak diri; i hilo’d niyon di Daud do momorinta’ do solinaid do turu’ o toun om satanga’. Om hilo’ nod Yorusalim om tolu nohopod om tolu o toun di Daud do minomorinta’, tu’ iyau no o raja’ do hilo’. ⁵ Tontok di hilo’ iyau om ogumu’ po o tanak dau’d kusai. Om i Batsiba nopo, i tanak di Amiol, i sawo di Daud diri, om kianak dot apat o kusai: i Simia, i Sobab, i Natan, om i Suliman. ⁶ Om siam po kawagu o tanak di Daud do kusai: i Yibhar, i Ilisua, i Ilpilit, ⁷ i Noga, i Nipig, i Yapia, ⁸ i Ilisama, i Ilyada, om i Ilipilit. ⁹ Om suwai no ko’ mantad diri om haro po o tangaanak di Daud do pinogkosusu di tongoondu’ di panakasawo dau. Om haro nogi’ o tanak dau’d tondu’ dot i Tamar o ngaran. ¹⁰ - ¹⁴ Iti no o dopitar do ngaran do sinakagon di Raja’ Suliman do korikot dot id di Yosia: i Suliman, i Rihabiam, i Abia, i Asa, i Yosapat, i Yihoram, i Ahasia, i Yoas, i Amasia, i Usia, i Yotam, i Ahas, i Hiskia, i Manasi, i Amon, i Yosia. ¹⁵ I Yosia nopo om kianak dot apat o kusai: i Yohanan, i Yoyakim, i Sodokia, om i Yoahas. ¹⁶ I Yoyakim nopo om kianak do duwo o kusai: i Yoyakin om i Sodokia. ¹⁷ Iti ngai’ no i sinakagon di Raja’ Yoyakin di natanggayan do tulun do Babil. I Yoyakin nopo om kianak do turu’ o kusai: i Sialtiol, ¹⁸ i Malkiram, i Podaya, i Sinasar, i Yikamia, i Hosama, om i Nidabia. ¹⁹ I Podaya nopo om kianak do duwo o kusai: i Sorubabil om i Simoi. I Sorubabil nopo om kianak do duwo o kusai: i Mosulam om i Hanania; om iso’ o tanak dau’d tondu’ dot i Silomit o ngaran. ²⁰ Om haro po kawagu o limo o tanak dau do kusai: i Hasuba, i Ohil, i Birikia, i Hasaya, om i Yusab-Hisid. ²¹ Om i Hanania nopo om kianak do duwo o kusai: i Pilasa om i Yosaya. I Yosaya nopo om tapa’ di Ripaya, om i Ripaya no om tapa’ di Arnan, om i Arnan no om tapa’ di Abaya, om i Abaya no om tapa’ di Sikania. ²² I Sikania nopo om kianak dot iso’ o kusai dot i Somaya o ngaran. Om i Somaya no om kianak do limo o kusai: i Hatus, i Yigal, i Baria, i Niaria, om i Sapat. ²³ I Niaria nopo om kianak do tolu o kusai: i Ilyoinai, i Hiskia, om i Asrikam. ²⁴ I Ilyoinai nopo om kianak do turu’ o kusai: i Hodawia, i Iliasib, i Polaya, i Akub, i Yohanan, i Dolaya, om i Anani.

¹ Iti no o wookon do sinakagon di Yohuda: i Piris, i Hisron, i Karmi, i Hur, om i Syobal. ² I Syobal nopo om tapa’ di Riaya, om i Riaya no om tapa’ di Yahat, om i Yahat no om tapa’ di Ahumai om i Lahad; om iyolo’ no o taki-aki di tulun do poingiyon do hilo’d bandar do Sora. ³ - ⁴ I Hur no o tanak do totuo diyo’ Iprata di Kalib. Om iri no i sinakagon di Hur o minomonsoi do bandar do Baitlahim. Om kianak i Hur do tolu o kusai: i Itam, i Ponuil, om i Isir. Om i Itam no om kianak do tolu o kusai: i Yisriil, i Isma, om i Idbas; om iso’ o tanak dau do tondu’ dot i Hasililponi o ngaran. I Ponuil no o minomonsoi do bandar do Gidor, om i Isir o minomonsoi do bandar do Husa. ⁵ I Asur nopo om duwo o sawo: i Hila om i Naara. Om i Asur no o minomonsoi do bandar do Tokua. ⁶ Om apat o tanak do kusai diyo’ Asur di Naara: i Ahusam, i Hipir, i Timini, om i Ahastari. ⁷ Nga’ tolu no o tanak do kusai diyo’ Asur di Hila: i Sirit, i Yisohar, om i Itnan. ⁸ I Kos nopo om tapa’ di Anub om i Hasobiba. Om i Kos no o taki-aki di sinakagon di Aharhil, i tanak di Harum. ⁹ Om haro o songulun do roitan dot i Yabis. Om iyau no i pusohon kopio dot id sompiiyon dau. I Yabis pogi’ o pinomungaran di tina’ di Yabis dau nga’ noinggorit tomod i tina’ di Yabis do minogkosusu dau. ¹⁰ Om sambayang no i Yabis dot id Kinorohingan dot Israil do poingkaa, ’’Oi Kinorohingan, barakatai oku no om onuwai oku no do tana’ dit agayo. Woyoo’ oku no om poinsoduwo’ oku no do mantad id nunu nopo o kosusaan di monginggorit doho’,’’ ka. Om sinimbar id Kinorohingan i sambayang dau. ¹¹ I Kalub nopo, i tobpinai di Suha, om kianak dot iso’ o kusai, dot i Mohir o ngaran. Om i Mohir nopo om tapa’ di Iston. ¹² I Iston nopo om kianak do tolu o kusai: i Bait-Rapa, i Pasia om i Tohina. Om i Tohina no i minomonsoi do bandar do Nahas. Om sinakagon nopo do tulun diti om minomogun do hilo’d bandar do Rika. ¹³ I Kinas nopo om kianak do duwo o kusai: i Otniol om i Soraya. Om i Otniol nga’ kianak nogi’ do duwo o kusai: i Hatat om i Mionatai. ¹⁴ I Mionatai nopo om tapa’ di Opra. I Soraya no om tapa’ di Yoab, i minomonsoi di roitan do Rantai do Tukang. Tu’ tukang ngai’ nopo i tulun do poingiyon do hiri’d rantai’ddi. ¹⁵ I Kalib nopo, i tanak di Yopuni om kianak do tolu o kusai: i Iru, i Ila, om i Naam. Om tanak nopo di Ila om i Kinas. ¹⁶ I Yihaliliil nopo om kianak dot apat o kusai: i Sip, i Sipa, i Tiria, om i Asariil. ¹⁷ - ¹⁸ I Isra nopo om kianak dot apat o kusai: i Yitir, i Mirid, i Ipir om i Yalon. Om kowino’ nod i Mirid i Bisa, i tanak do tondu’ di raja’ do Masir. Om kianak diri iyolo’ dot iso’ o tondu’ dot i Miriam o ngaran, om duwo o tanak diyolo’ do kusai: i Samai om i Yisba. Om i Yisba no i minomonsoi di bandar dot Istimoa. Om minangawin nogi’ kawagu i Mirid dot iso’ o tondu’ do mantad id payat do Yohuda. Om kianak iyolo’ do tolu o kusai: i Irid, i minomonsoi do bandar do Gidor, om i Hibir, i minomonsoi do bandar do Soko, om i Yokutiol, i minomonsoi do bandar do Sanua. ¹⁹ Om kowino’ no di Hodia i tobpinai di Naham do tondu’. Om sinakagon nopo diyolo’ nga’ i sinompuruan do tulun do Garmi, i poingiyon do hilo’d bandar do Kohila, om i sinompuruan do tulun do Maaka, i poingiyon do hilo’d bandar do Istimoa. ²⁰ I Simon nopo om kianak dot apat o kusai: i Amnon, i Rina, i Binhanan, om i Tilon. I Yisoi nopo om kianak do duwo o kusai: i Sohit om i Binsohit. ²¹ I Sila nopo om tanak di Yohuda do kusai. Om iti ngai’ no o sinakagon di Sila: i Or, i minomonsoi do bandar do Lika; om i Lada, i minomonsoi di bandar do Marisa; om i sinompuruan do tulun di mangangawol do kain linan, i songingiyon do hilo’d bandar do Bait-Asbia; ²² om Yokim, om i tulun do poingiyon do hilo’d bandar do Kosiba; om i Yoas om i Sarap, i kuminawin do tongoondu’ do Muab, om i minundorong diri do hilo’d Baitlahim. (Iti nopo dopitar do ngaran diti om sinalin do mantad id buuk di gulu po kopio.) ²³ Om iyolo’ no i momorun do kuron om luping do don raja’, om poingiyon iyolo’ do hilo’d bandar do Nitaim om hilo’d Godora. ²⁴ I Simion nopo om kianak do limo o kusai: i Nomuil, i Yamin, i Yarib, i Sira, om i Saul. ²⁵ I Saul nopo om tanak di Salum; om tanak no di Salum om i Mibsam om tanak no di Mibsam om i Misma. ²⁶ Tanak nopo di Misma, om i Hamuil om tanak no di Hamuil, om i Sakur, om tanak no di Sakur om i Simoi. ²⁷ I Simoi nopo om kianak do hopod om onom o tongokusai, om onom o tongoondu’, nga’ a’ i’ ogumu’ o tanak di piro-piro o tobpinai dau. Om a’ iddi koirad do sinakagon di Yohuda o sinakagon di Simion. ²⁸ Pinomogunan nopo di sinakagon di Simion do gisom di pomorintaan di Raja’ Daud, om id kabandaran diti: bandar do Borsiba, Molada, Hasar-Sual, ²⁹ Bilha, Isim, Tolad, ³⁰ Botuil, Horma, Siklag, ³¹ Bait-Markabot, Hasar-Susim, Bait-Biri, om Saaraim. ³² Om minomogun nogi’ iyolo’ dot id limo o bandar do suwai: bandar dot Itam, Ain, Rimon, Tokin, Asan, ³³ om id kawalayan di posorili’ do koiyonon diri om gisom do korikot do ponong id salatan do ponong id kotonobon do mantad id bandar do Baal. Om iti no i notulis do pasal do sinakagon di Simion om i kinoiyonon diyolo’. ³⁴ - ³⁸ Iti ngai’ no i boyoon do sinompuruan do tulun dot id suang do payat di Simion: i Misobab, i Yamlik, i Yosa i tanak di Amasia, i Yoil, i Yohu, (i tanak di Yosibia, i Yosibia no om tanak di Soraya, i manangaki di Asiol), i Ilyoinai, i Yaakoba, i Yisohaya, i Asaya, i Adiol, i Yosimiol, i Bonaya, i Sisa, i tanak di Sipoi, (i Sipoi nopo om suminolusuk di Alon, om i Yodaya, i Simri, om i Somaya.) Om a’ nopo tumingkod do guminumu’ o sompiiyon diyolo’, ³⁹ om tongkop noddi iyolo’ do ponong id kotonobon do gisom do hilo’d somok do bandar do Gidor. Om pomogompian nopo diyolo’ do tayam-tayam diyolo’ om id sampaping ponong id koulayon do mantad id rantai’ddi, i hiri’d kinoiyonon di bandar diyolo’. ⁴⁰ Om kokito no iyolo’ do sakot di torombung kopio dot id rantai dit agayo’ddi. Om osimbayan tomod o kinoiyon-iyono’ do hiri om aiso’ o koligagaanan. Om tulun mantad nopo di poingiyon do hiri om i tulun do Ham. ⁴¹ Om tontok dit i Raja’ Hiskia o momorinta’ do hilo’d Yohuda, om ongoi no i sinakagon di Simion do hilo’d Gidor om ngoyo’ ngai’ no diyolo’ raago’ i kiim om i sulap di tulun do hiri. Om uyungo’ no diyolo’ i tulun mantad do hiri om tungoliho’ no diyolo’d miyon i pomogunan diri tu’ agayo tomod i butur do hiri do paakan-akanan di tayam-tayam diyolo’. ⁴² Om limo po kawagu nahatus o tulun do mantad id payat do Simion do minongoi do hilo’d Idom, i ponong id koulayon. Minomoyo’ nopo diyolo’ om i tangaanak di Yisoi do kusai: i Polasa, i Niaria, i Ripaya, om i Usiol. ⁴³ Om patayo’ no diyolo’ i tulun dot Amalik, di noolu-olu’ do hiri. Om mantad poddi om hiri no iyolo’ do momogun-mogun do gisom do baino’.

¹ Iti no o sinakagon di Rubin, i tanak di Yakub dot id dotuo. (Om a’ i Rubin nakaanu di tungkusan do gontok do tanak dit id dotuo, tu’ minongoi i’ iyau dudun di panakasawo di tapa’ dau. Om i Yusup diri o noonuan di tungkusan diri. ² Nga’ sinakagon nopo dit okoris kopio dot id pogialatan do sinakagon di Yakub om i payat di Yohuda, om iri no payat diri o tadon do piro-piro o raja’ dot Israil.) ³ I Rubin nopo, i tanak di Yakub dot id dotuo om kianak dot apat o kusai: i Hinok, i Palu, i Hisron, om i Karmi. ⁴ - ⁶ Iti no i sinakagon di Yoil, do mogisolusuk-lusuk: i Simaya, i Gog, i Simoi, i Mika, i Riaya, i Baal, om i Biira. Om i Biira nopo, i boyoon do payat do Rubin, om tinangkap di Tiglat-Pilisir i raja’ dot Asur om tinanggayan diri dau iyau dot id pomogunan do pisangod. ⁷ Om tumanud nopo do dopitar do ngaran do sinakagon om iti ngai’ no i piro-piro o boyoon do pinuruan do sompiiyon dit id suang do payat do Rubin: i Yoyol, i Sakaria, ⁸ i Bila i tanak di Asas, i manangaki di Sima, i mantad id pinuruan do sompiiyon di Yoil. Om pinomogunan nopo do pinuruan do sompiiyon diti om hilo’d Aroir, om i watas do mimpuun do hilo’d Aroir om poingkaa do ponong id utara do korikot do hilo’d Nibo om hilo’d Baal Mion. ⁹ Ogumu’ kopio o tayam-tayam diyolo’ do hilo’d watas do Giliad. Om gowoi poddi om iyono’ no diyolo’ o watas do poingrikot do hilo’d tana’ do kowotuan, gisom do korikot do hilo’d Bawang dot Iprat do ponong id koulayon. ¹⁰ Tontok di pomorintaan di Raja’ Saul, om ngoyo’ no di payat di Rubin songodo’ i pomogunan do Hagri, om patayo’ ngai’ no diyolo’ o tulun do hiri di maso do misangod. Om solodo’ noddi diyolo’ i pomogunan do Giliad. ¹¹ Iri nopo sinakagon di Gad om minomogun do ponong hiri’d utara do watas do payat do Rubin, i hilo’d Basan om gisom do hilo’d Salka, i ponong id koulayon. ¹² Boyoon nopo do pinuruan do sompiiyon dit abantug kopio om i Yoil, om koduwo no dot abantug om i Sapam. Om iri no boyoon do pinuruan do sompiiyon do suwai do hilo’d Basan om i Yainai om i Sapat. ¹³ Om iri no tulun do suwai do payat di Gad om poinsuang diti turu’ o pinuruan do sompiiyon diti: pinuruan do sompiiyon di Mikail, di Mosulam, di Syoba, di Yorai, di Yakan, di Sia, om di Ibir. ¹⁴ Iyolo’ ngai’ nopodti om sinakagon di Abihail i tanak di Huri. Om suminolusuk iyolo’ di: Abihail, i Huri, i Yaroa, i Giliad, i Mikail, i Yosisai, i Yado, om i Bus. ¹⁵ I Ahi no i tanak di Abdiol, i manangaki di Guni, o boyoon di piro-piro o pinuruan do sompiiyon diri. ¹⁶ Pinomogunan nopo diyolo’ om hiri’d watas do Basan om Giliad, do hiri’d kabandaran dot id watas diri om pointongkop di kobuturan do hilo’d kinoiyonon do roitan do Saron. ¹⁷ Iti nopo dopitar do ngaran diti om tinulis do tontok di pomorintaan di Yotam, i raja’ do Yohuda, om i Yirobiam i raja’ dot Israil. ¹⁸ Mantad nopo id payat do Rubin, om Gad, om Manasi di ponong id koulayon, om apat nohopod om apat noribu om turu’ nahatus om onom nohopod o soudor di nokopinsingilo do mamakai do kolid, om gayang, om pana’. ¹⁹ Om sinangod diyolo’ i payat do Yotur, om Napis, om Nodab; iti nopo tolu o payat diti om id suang ngai’ do bansa’ do Hagri. ²⁰ Om kaala’ iddi di piro-piro o soudor diri i tulun diri tu’ minogondos iyolo’d Kinorohingan om suminambayang do mokiuhup dau, om sinimbar iddi do Kinorohingan i sambayang diyolo’ om pinamanang dau iyolo’ do suminangod do tulun do Hagri om i suminokodung daa di tulun do Hagri. ²¹ Om naanu nopo diyolo’ do mantad id pisangod om limo nohopod noribu ot unta, om duwo nahatus om limo nohopod noribu o dumba’, om duwo noribu o kaladai, om hatus noribu o tulun do tinangkap do mantad id pisangadan. ²² Om ogumu’ddi o pisangod do napatai diyolo’ tu’ korohian id Kinorohingan i pinisangadan diri. Om hiri kasai’ nod watas diri o pinomogun-mogunan diyolo’ do gisom do norikot i maso do nangatanggayan do pisangod i tulun dot Israil. ²³ Pinomogun-mogunan nopo di payat do Manasi di ponong id koulayon om hiri’d watas do Basan gisom do ponong hilo’d Baal Hormon, Sonir om Nuluhon do Hormon i ponong id utara. Om oruuhai iyolo’ do guminumu’. ²⁴ Om iti ngai’ no i boyoon do pinuruan do sompiiyon diyolo’: i Hipir, i Yisoi, i Iliol, i Asriol, i Yoromia, i Hodawia om i Yadiol. Om iyolo’ ngai’ no i soudor do gunsiou om ongokoris. ²⁵ Nga’ a’ i’ tuminorodok i tulun dot Israil dot id Kinorohingan di tukuon di taki-aki diyolo’. Tuminongkiad iyolo’ do Kinorohingan om tuminuku’ diri dot id tingolig di piro-piro o bansa’d tulun di nuyung do Kinorohingan do mantad id pomogunan do Kanaan. ²⁶ Om gowoi poddi om bininsuhu’ddi do Kinorohingan i Pul, i raja’ dot Asur (it abantug do roitan dot i Tiglat-Pilisir) do minongoi panangod do pomogunan diyolo’. Om notimporon no do natanggayan do pisangod i payat do Rubin, om Gad om Manasi di ponong id koulayon om pinoiyon diri iyolo’ do hilo’d Hala, om hilo’d Habor, om hilo’d Hara, om hilo’d kinoiyonon dit id somok do Bawang do Gosan. Om hilo’ noddi iyolo’ do minomogun-mogun do gisom do baino’.

¹ I Liwi nopo om kianak do tolu o kusai: i Girson, i Kohat, om i Morari. ² I Kohat nopo om kianak dot apat o kusai: i Amram, i Yisar, i Hibron, om i Usiol. ³ I Amram nopo om kianak do duwo o kusai: i Harun om i Musa, om kianak iyau dot iso’ o tondu’ dot i Miriam o ngaran. I Harun nopo om kianak dot apat o kusai: i Nadab, i Abihu, i Iliasar om i Itamar. ⁴ Sinakagon nopo di Iliasar do mogisolusuk-lusuk om: i Pinihas, i Abisua, ⁵ i Buki, i Usi, ⁶ i Sorahia, i Mirayot, ⁷ i Amaria, i Ahitub, ⁸ i Sadok, i Ahimaas, ⁹ i Asaria, i Yohanan, ¹⁰ i Asaria (iyau no i minaganu-anu do hiri’d Walai’d Sasambayangan dot Agayo di winonsoi di Raja’ Suliman do hilo’d Yorusalim), ¹¹ i Amaria, i Ahitub, ¹² i Sadok, i Salum, ¹³ i Hilkia, i Asaria, ¹⁴ i Soraya, om i Yosadak. ¹⁵ Om i Yosadak nga’ nokotonggoi nogi’ do tinanggayan di Raja’ Nobukadnisar do miwoyo’ di tulun do Yohuda om i tulun do poingiyon do hilo’d Yorusalim, tu’ iyo noddi o korohian do TUHAN. ¹⁶ I Liwi nopo om kianak do tolu o kusai: i Girson, i Kohat, om i Morari. ¹⁷ Om iyolo’ nga’ ongkiangaanak nogi’ do tongokusai. I Girson nopo om tapa’ di Libni om i Simoi. ¹⁸ I Kohat no om tapa’ di Amram, i Yisar, i Hibron, om i Usiol; ¹⁹ om i Morari no om tapa’ di Mali om i Musi. ²⁰ Iti ngai’ no o sinakagon di Girson do mogisolusuk-lusuk: i Libni, i Yahat, i Sima, ²¹ i Yoa, i Ido, i Sira, om i Yiatirai. ²² Iti ngai’ no o sinakagon di Kohat do mogisolusuk-lusuk: i Aminadab, i Kora, i Asir, ²³ i Ilkana, i Ibiasap, i Asir, ²⁴ i Tahat, i Uriol, i Usia, om i Saul. ²⁵ I Ilkana nopo om kianak do duwo o kusai: i Amasai om i Ahimot. ²⁶ Om sinakagon nopo di Ahimot do mogisolusuk-lusuk om: i Ilkana, i Sopai, i Nahat, ²⁷ i Iliab, i Yiroham, om i Ilkana. ²⁸ I Somuil nopo om kianak do duwo o kusai: i Yoil ot id dotuo om i Abia it id domulok. ²⁹ Iti no o sinakagon di Morari do mogisolusuk-lusuk: i Mali, i Libni, i Simoi, i Usa, ³⁰ i Simia, i Hagia, om i Asaya. ³¹ Iti ngai’ no i tulun di nonuan di Raja’ Daud do karaja’ do pouuni do tuunion do hiri’d Walai’d Sasambayangan dot Agayo do hilo’d Yorusalim, do mantad poddi nakawaliu do hiri i Kaban do Tumpongo. ³² Om tontok dit a’ po di Raja’ Suliman nowonsoi i Walai’d Sasambayangan dot Agayo om mogisowoli-woli nopo iyolo’ do maganu-anu do hiri’d Kiim do TUHAN. ³³ Om iti no o dopitar do ngaran do tulun di mogisolusuk-lusuk di nonuan do karaja’: Mantad nopo dot id pinuruan do sompiiyon di Kohat om: i Himan, i tanak di Yoil, i momoyo’ di tinimungan do modsisinding do koiso’. Om iti no i sinolusukan di Himan do pinoguli’ dot id di Yakub: i Himan, i Yoil, i Somuil, ³⁴ i Ilkana, i Yiroham, i Iliol, i Toa, ³⁵ i Sup, i Ilkana, i Mahat, i Amasai, ³⁶ i Ilkana, i Yoil, i Asaria, i Sipania, ³⁷ i Tahat, i Asir, i Ibiasap, i Kora, ³⁸ i Yisar, i Kohat, i Liwi, om i Yakub. ³⁹ I Asap nopo om momoyo’ di tinimungan do modsisinding do koduwo. Om iti no o sinolusukan di Asap do pinoguli’ dot id di Liwi: i Asap, i Borokia, i Simia, ⁴⁰ i Mikail, i Baasiya, i Malkia, ⁴¹ i Itai, i Sira, i Adaya, ⁴² i Itan, i Sima, i Simoi, ⁴³ i Yahat, i Girson, om i Liwi. ⁴⁴ I Itan no, i mantad id pinuruan do sompiiyon di Morari o momoyo’ di tinimungan do modsisinding do kotolu. Om iti no i sinolusukan di Itan do pinoguli’ dot id di Liwi: i Itan, i Kisi, i Abdi, i Maluk, ⁴⁵ i Hasabia, i Amasia, i Hilkia, ⁴⁶ i Amsi, i Bani, i Simir, ⁴⁷ i Mali, i Musi, i Morari, om i Liwi. ⁴⁸ Om iri no sinakagon di Liwi do suwai om nonuan do karaja’ do suwai do hiri’d Walai’d Sasambayangan dot Agayo. ⁴⁹ I Harun nopo om i sinakagon dau om modtututud do kominyan om papatahak di porsombahan do sorobon do hiri’d pananaraban do porsombahan. Iyolo’ no i mongilo-ilo do koinsanai’d wonsoyon do tontok do sumambayang do hiri’d kinoiyonon dit Olidang Kopio om papatahak do porsombahan do pangampun do dusa do tulun dot Israil. Om wonsoyo’ ngai’ nopo diyolo’ iti do tumanud di pinonuhuan di Musa, i susuhuon do Kinorohingan. ⁵⁰ Iti no o dopitar do ngaran do sinakagon di Harun: i Iliasar, i Pinihas, i Abisua, ⁵¹ i Buki, i Usi, i Soraya, ⁵² i Mirayot, i Amaria, i Ahitub, ⁵³ i Sadok om i Ahimaas. ⁵⁴ Kinoiyonon nopo di pinatahak dot id sompiiyon di Kohat, i sinakagon di Harun om i bahagi’ di koiso’ do mantad id watas do pinatahak dot id tulun do Liwi. ⁵⁵ Kosuang nopod watas diti om bandar do Hibron, it id watas do Yohuda om i kobuturan do hiri’d posorili’. ⁵⁶ Nga’ iri nopo koumaan om i kokompungan do hiri’d posorili’ di bandar diri om pinatahak i’ dot id di Kalib, i tanak di Yopuni. ⁵⁷ - ⁵⁹ Iti ngai’ no o bandar do pinatahak dot id sinakagon di Harun: Hibron, i bandar do pogintirungan diri, om Yatir, om i kabandaran do Libna, Istimoa, Hilon, om Dobir, Asan, om Bait-Simis om mitonggoi di kobuturan do hilo’. ⁶⁰ Om hilo’ nod watas do Binyamin om iti ngai’ no o bandar do pinatahak dot id diyolo’ do mitonggoi di kobuturan do hiri: Giba, Alimit, om Anatot. Oinsanan nopo om hopod om tolu o bandar do tiyonon do koinsanai di sompiiyon diyolo’. ⁶¹ Om hiri nod watas do Manasi do ponong id kotonobon om hopod o bandar do pinatahak dot id pinuruan do sompiiyon di Kohat do pinotikid di sompiiyon dit a’ po nobohogian do tana’. Om nundi’ iti do pinatahak dot id diyolo’. ⁶² Om iri no i piro-piro o sompiiyon dit id suang do pinuruan do sompiiyon di Girson, om pinotikid di sompiiyon o hopod om tolu o bandar dot ongokooro’ do hiri’d watas dot Isakar, Asor, Naptali, om Manasi ponong id koulayon do hilo’d Basan. ⁶³ Om iri nogi’ i hopod om duwo o bandar do hilo’d watas do Rubin, Gad, om Sibulon nga’ pinatahak i’ dot id pinuruan do sompiiyon di Morari, om pinotikid di piro-piro o sompiiyon dot id pinuruan diri. ⁶⁴ Om iyo noddi o pinamahagi’ di tulun dot Israil di bandar do tiyonon di tulun do Liwi, do mitonggoi di kobuturan do hiri’d posorili’ di bandar. ⁶⁵ (Om iri nogi’ i kabandaran do hiri’d watas do Yohuda, om Simion, om Binyamin di nangarait di tiinu’ nga’ nundi’ i’ do pinapatahak.) ⁶⁶ Om haro nogi’ o piro-piro o sompiiyon do mantad id pinuruan do sompiiyon di Kohat do nonuan do bandar om kobuturan do hilo’d watas dot Ipraim: ⁶⁷ i bandar do Sikim, i bandar do pogintirungan dot id watas do konulu-nuluan dot Ipraim, om Gisir, ⁶⁸ Yokmiam, Bait-Horon, ⁶⁹ Ayalon, om Gat-Rimon. ⁷⁰ Om hilo’ nod watas do Manasi di ponong id kotonobon om pinatahak dot id diyolo’ i bandar dot Anor om Biliam do mitonggoi di kobuturan do hiri’d posorili’. ⁷¹ Om iri no sompiiyon dit id suang do pinuruan do sompiiyon di Girson om nonuan do piro-piro o bandar diti do mitonggoi do kobuturan do hiri’d posorili’: Hilo’ nopod watas do Manasi di ponong id koulayon om: Golan, i hilo’d Basan, om Astarot. ⁷² Hilo’d watas dot Isakar: Kidis, Dabirat, ⁷³ Ramot, om Anim. ⁷⁴ Hilo’d watas dot Asor: Masal, Abdon, ⁷⁵ Hukok om Rihob. ⁷⁶ Hilo’d watas do Naptali: Kidis, i hilo’d Galilia, om Hamon, om Kiriataim. ⁷⁷ Om iri no sinakagon di Morari dit a’ po nakaanu do tana’, om nonuan do piro-piro bandar diti do mitonggoi di kobuturan do hiri’d posorili’: Hilo’d watas do Sibulon: Rimono om Tabor. ⁷⁸ Hilo’d watas do Rubin, i ponong id koulayon do mantad id Bawang do Yordan i hilo’d somok do Yorikou: Bisir, i tana’ dot apatau dot id konulu-nuluan, om Yahas, ⁷⁹ Kidimot om Mipaat. ⁸⁰ Hilo’d watas do Gad: Ramot, i hilo’d Giliad, om Mahanaim, ⁸¹ Hisbon, om Yaisir.

¹ I Isakar nopo om kianak dot apat o kusai: i Tola, i Pua, i Yasub, om i Simron. ² I Tola nopo om kianak dot onom o kusai: i Usi, i Ripaya, i Yoriol, i Yamai, i Yibsam, om i Somuil. Om iyolo’ ngai’ no o boyoon do sompiiyon di pinuruan do sompiiyon di Tola om soudor nogi’ iyolo’ dit angabantug do gunsiou. Tontok di pomorintaan di Daud om kogumuo’ nopo do sinakagon diyolo’ om 22,600 o tulun. ³ I Usi no om kianak dot iso’ o kusai dot i Yisraya o ngaran. I Yisraya no om it apat o tanak dau’d kusai o boyoon di pinuruan do sompiiyon. Ngaran nopo dit apat o tanak di Yisraya diri om i Mikail, i Obaya, i Yoil, om i Yisia. ⁴ Ogumu’ tomod o sawo om tangaanak diyolo’ gisom do milo i’ iyolo’ do potobilang do tolu nohopod om onom noribu o tongokusai do sumiliu’d soudor. ⁵ Om tumanud nopo di dopitar do ngaran di tinulis do pomorinta’ om oinsanan nopo i sinakagon di Isakar om 87,000 o tongokusai di milo do sumiliu’d soudor. ⁶ I Binyamin nopo om kianak do tolu o kusai: i Bila, i Bikir, om i Yidiaol. ⁷ I Bila no om kianak do limo o kusai: i Isbon, i Usi, i Usiol, i Yirimot, om i Iri. Iyolo’ no i boyoon do sompiiyon dot id suang do pinuruan do sompiiyon diyolo’ dot abantug do soudor do gunsiou. Id suang nopo do sinakagon diyolo’ om haro i’ o 22,034 o tongokusai di milo do sumiliu’d soudor. ⁸ I Bikir nopo om kianak do siam o kusai: i Somira, i Yoas, i Iliasor, i Ilyoinai, i Omri, i Yirimot, i Abia, i Anatot, om i Alimit. ⁹ Tumanud nopo di dopitar do ngaran di tinulis do pomorinta’ om oinsanan nopo i sompiiyon dit id suang do sinakagon diyolo’ om haro i’ o 20,200 o tongokusai di milo do sumiliu’d soudor. ¹⁰ I Yidiaol nopo om kianak dot iso’ o kusai dot i Bilhan o ngaran. Om i Bilhan no om kianak do turu’ o kusai: i Yousi, i Binyamin, i Ihud, i Kinaana, i Sitan, i Tarsis, om i Ahisahar. ¹¹ Om iyolo’ no i boyoon do sompiiyon dot id suang do pinuruan do sompiiyon diyolo’ dit angabantug do soudor di gunsiou. Kogumuo’ nopo do tongokusai diyolo’ di milo do sumiliu’d soudor om 17,200 o tulun. ¹² I Supim nopo di Hupim om sinakagon di Ir. I Husim no om sinakagon di Dan. ¹³ I Naptali nopo om kianak dot apat o kusai: i Yasiol, i Guni, i Yisir, om i Salum. Iyolo’ nopo om sinakagon di Bilha. ¹⁴ Om kianak iyo’ Manasi di tondu’ dot Aram di panakasawo dau, do duwo o kusai: i Asriol om i Makir. I Makir nopo om tapa’ di Giliad. ¹⁵ Om pogihumai no di Makir do sawo i Hupim om i Supim. Ngaran nopo di sawo di Makir om i Maaka. Om ngaran nopo di tanak di Makir do koduwo om i Silapihad. Tongoondu’ ngai’ nopo o tangaanak di Silapihad, om aiso’ i’ o tongokusai. ¹⁶ Om paganak no i Maaka, i sawo di Makir, do duwo o kusai. Om pungaranai no i duwo o tanak diri dot i Piris om i Siris. I Piris no om kianak do duwo o kusai: i Ulam om i Rikim. ¹⁷ I Ulam no om kianak dot iso’ o kusai dot i Bidan o ngaran. Om sinakagon ngai’ nopo iyolo’ di Giliad, i tanak di Makir, i manangaki di Manasi. ¹⁸ I Molikit no, i tobpinai di Giliad do tondu’ om kianak do tolu o kusai; i Isihod, i Abiosor, om i Mahla. ¹⁹ I Somida no om kianak dot apat o kusai: i Ahian, i Sikim, i Liki, om i Aniam. ²⁰ I Ipraim nopo om kianak do tolu o kusai: i Sutila, i Isir om i Ilad. Iti ngai’ no o sinakagon di Ipraim do minogisolusuk-lusuk: i Sutila, i Birid, i Tahat, i Ilada, i Tahat, ²¹ i Sabad om i Sutila. Om haro po o duwo o tanak di Ipraim do kusai: i Isir om i Ilad. Nga’ pinatai iyolo’ tu’ minongoi iyolo’ panakau di tayam-tayam do tulun di poingiyon mantad do hilo’d bandar do Gat. ²² Om mogihad nopoddi i tapa’ diyolo’ do piro-piro o tadau do koloido’, om ninsasamadan po iyau di piro-piro o tobpinai dau. ²³ Om ongoi noddi kawagu i Ipraim dudun di sawo dau om ponontian no i sawo dau, om kosusu no do tanak do kusai. Om pungaranai no diyolo’ i tanak diri dot i Boria tu’ haro i’ o kosusaan do nokoontok di sompiiyon diyolo’. ²⁴ I Ipraim nopo om kianak dot iso’ o tondu’ dot i Siira o ngaran. Om i Siira no o minomonsoi di bandar do Bait-Horon do ponong id sokid om i Bait-Horon do ponong id siba’, om i bandar dot Usa om Siira. ²⁵ Om kianak po i Ipraim dot iso’ o kusai dot i Ripa o ngaran. Om iti no o sinakagon di Ripa: i Risip, i Tila, i Tahan, ²⁶ i Ladan, i Amihud, i Ilisama, ²⁷ i Nun, om i Yosua. ²⁸ Om iri nopo watas do naanu diyolo’ om i noiyon diyolo’ om kosuang no o Baitol, om i kokompungan do hiri’d posorili’ om poingkaa po do hilo’d Naaran, i ponong id koulayon, om hilo’d Gisir, i ponong id kotonobon. Om kohompit nogi’ o bandar do Sikim om Aya, om i kokompungan do hiri’d posorili’. ²⁹ Om iri no sinakagon di Manasi o minomohuruan do mongilo-ilo do Bait-Sian, Taanak, Mogido, Dor om i kokompungan do hiri’d posorili’. Om iri ngai’ no i kinoiyonon do pinomogun-mogunan di sinakagon di Yusup, i tanak di Yakub. ³⁰ Iti ngai’ no o sinakagon di Asor. Kianak i Asor dot apat o kusai: i Yimna, i Yiswa, i Yiswi, om i Biria, om iso’ o tanak do tondu’ dot i Sira o ngaran. ³¹ I Biria nopo om kianak do duwo o kusai: I Hibir om i Malkiol. Om i Malkiol no o minomonsoi do bandar do Birsait. ³² I Hibir no om kianak do tolu o kusai: i Yaplit, i Somir, i Hotam, om iso’ o tondu’ dot i Sua o ngaran. ³³ Om i Yaplit nga’ kianak i’ do tolu o kusai: i Pasak, i Bimhab om i Aswat. ³⁴ Om i Simir, i tobpinai dau do kusai nga’ kianak i’ dot apat o kusai: i Ahi, i Roga, i Yohuba om i Aram. ³⁵ I Hotam no, i tobpinai di Yaplit do kusai om kianak dot apat o kusai: i Sopa, i Imna, i Silis om i Amal. ³⁶ Sinakagon nopo di Sopa om i Sua, i Harnipir, i Syual, i Bori, i Imra, ³⁷ i Bisir, i Hod, i Sama, i Silsa, i Yitran om i Biira. ³⁸ Sinakagon nopo di Yitir om i Yopuni, i Pispa om i Ara. ³⁹ Om sinakagon no di Ula om i Ara, i Haniol om i Risia. ⁴⁰ Iri ngai’ no o sinakagon di Asor. Om iyolo’ no i boyoon do sompiiyon om soudor dit angabantug do gunsiou om boyoon dit angabantug o ngaran. Iri nopo sinakagon di Asor om haro i’ o 26,000 o tongokusai di milo do sumiliu’d soudor.

¹ I Binyamin nopo om kianak do limo o kusai. Om iti no o ngaran diyolo’ do poingirus do tumur diyolo’: i Bila, i Asibil, i Ara, ² i Noha om i Rapa. ³ Sinakagon nopo di Bila om i Adar, i Gira, i Abihud, ⁴ i Abisua, i Naaman, i Ahoa, ⁵ i Gira, i Sopupan om i Horam. ⁶ - ⁷ Sinakagon nopo di Ihud om i Naaman, i Ahia om i Gira. Iyolo’ ngai’ no i boyoon do sompiiyon di poingiyon daa do hilo’d Giba di gulu po. Nga’ nouyung iddi iyolo’ om ongoi no iyolo’ undorong do hilo’d Manahat. Minomoyo’ nopo diyolo’ om i Gira, i tapa’ di Usa om i Ahihud. ⁸ - ⁹ Om adaai no di Saharaim o duwo di sawo dau, i Husim om i Baara. Om panansawo poddi kawagu iyau di hilo’ iyau’d watas do Muab. Om kinawin nopo dau nga’ i Hodis. Om paganak no iyolo’ do turu’ o kusai: i Yobab, i Sibia, i Misa, i Malkam, ¹⁰ i Yius, i Sokia om i Mirma. Om nosiliu ngai’ nopo do boyoon do sompiiyon i tangaanak dau’ddi. ¹¹ Om kianak po iyo’ Saharaim di Husim, i sawo dau’ddi, do duwo o kusai: i Ahitub om i Ilpaal. ¹² Om i Ilpaal nopo om kianak do tolu o kusai: i Ibir, i Misam om i Simid. Om i Simid no o minomonsoi di bandar dot Ono om Lod om i kokompungan do hiri’d posorili’. ¹³ I Biria no om i Sima o boyoon do sompiiyon di poingiyon do hilo’d bandar dot Ayalon. Om nuyung diyolo’ i tulun di poingiyon do hilo’d Gat. ¹⁴ - ¹⁶ Sinakagon nopo di Biria om i Ahio, i Sasak, i Yirimot, i Sobaya, i Arad, i Idir, i Mikail, i Yispa om i Yoha. ¹⁷ Sinakagon nopo di Ilpaal om i Sobaya, i Mosulam, Hiski, Hibor, ¹⁸ i Yismorai, i Yislia om i Yobab. ¹⁹ Sinakagon nopo di Simoi om i Yakim, i Sikri, i Sabdi, ²⁰ i Ilyoinai, i Silotai, i Iliol, ²¹ i Adaya, i Boraya om i Simrat. ²² Sinakagon no di Sasak om i Yispan, i Ibir, i Iliol, ²³ i Abdon, i Sikri, i Hanan, ²⁴ i Hanania, i Ilam, i Antotia, ²⁵ i Yipdiya om i Ponuil. ²⁶ Sinakagon nopo di Yiroham om i Samsorai, i Soharia, i Atalia, ²⁷ i Yaarisia, i Ilia om i Sikri. ²⁸ Om iyolo’ no i taki-aki di tulun di nosiliu’d boyoon do sompiiyon, om nokotulis dot id pinotulisan do ngaran di suminolusuk diyolo’. Om hilo’ nod Yorusalim do poingiyon i suminolusuk diyolo’. ²⁹ I Yoyol no o minomonsoi do bandar do Gibion om undorong noddi iyau do hilo’. Sawo nopo dau om i Maaka, ³⁰ om tanak no dau do kusai dit id dotuo om i Abdon. Tangaanak nopo dau’d kusai do suwai om i Sur, i Kis, i Baal, i Nor, i Nadab, ³¹ i Gidor, i Ahio, i Sakaria, ³² om i Miklot, i tapa’ di Simia. Om niyon nopo di sinakagon diyolo’ do suwai om hilo’d Yorusalim, do poinsugku’ di piro-piro o sompiiyon do suwai di mantad id pinuruan do sompiiyon diyolo’. ³³ I Nor nopo om tapa’ di Kis, om i Kis no om tapa’ di Raja’ Saul. I Saul nopo om kianak dot apat o kusai: i Yonatan, i Malkisua, i Abinadab om i Isbaal. ³⁴ I Yonatan nopo om tapa’ di Moribaal, om i Moribaal no om tapa’ di Mika. ³⁵ I Mika nopo om kianak dot apat o kusai: i Piton, i Milik, i Taria om i Ahas. ³⁶ I Ahas nopo om tapa’ di Yoada. Om i Yoada no om kianak do tolu o kusai: i Alimit, i Asmawit om i Simri. I Simri nopo om tapa’ di Mosa, ³⁷ om i Mosa no om tapa’ di Bina, om i Bina no om tapa’ di Rapa, om i Rapa no om tapa’ di Ilasa, om i Ilasa no om tapa’ di Asil. ³⁸ I Asil no om kianak dot onom o kusai: i Asrikam, i Bokru, i Ismail, i Siaria, i Obaya om i Hanan. ³⁹ I Isik no, i tobpinai di Asil do kusai, om kianak do tolu o kusai: i Ulam it id dotuo, i Yius, om i Ilipilit. ⁴⁰ Iri nopo tangaanak di Ulam om soudor ngai’ nopo dit ongosiou om mamamana’ dit ongotiru’. Om kianak i Ulam do tongokusai do 150 o tulun do kogumuo’. Om iyolo’ ngai’ no o sinakagon di Binyamin.

¹ Iri nopo tulun dot Israil om pinodopitar o ngaran do tumanud di ngaran do sompiiyon diyolo’, om pinotulis do hiri’d suang do Buuk do Raja’ Ngai’ dot Israil . Iri nopo tulun do Yohuda, om tinanggayan do hilo’d Babil, tu’ iri no o pomohukum di dusa diyolo’. ² Iri nopo tulun dit id gulu kopio guli’ do hilo’d tana’ diyolo’ do hiri’d kabandaran om i tulun dot Israil di tulun tomood, om i piro-piro ot imam, om i tulun do Liwi, om i maganu-anu do hiri’d Walai’d Sasambayangan dot Agayo. ³ Iri nopo payat do Yohuda, om Binyamin om Ipraim, om Manasi, om miniyon do hilo’d Yorusalim. ⁴ - ⁶ Oinsanan nopo om 690 o sompiiyon do mantad id payat do Yohuda do miniyon do hilo’d Yorusalim. Om kohompit nogi’ i sinakagon di tolu o tanak di Yohuda di roitan dot i Piris, i Sila om i Sira. Boyoon nopo di sinakagon di Piris, om i Utai, i tanak di Amihud, i manangaki di Omri. Om taki-aki nopo di Utai do suwai, om i Imri om i Bani. Boyoon nopo di sinakagon di Sila, om i Asaya. Om iyau no o nosiliu do boyoon do sompiiyon dau. Boyoon nopo di sinakagon di Sira, om i Yuil. ⁷ - ⁹ Om iti ngai’ no i tulun do mantad id payat do Binyamin do minomogun-mogun do hilo’d Yorusalim: I Salu, i tanak di Mosulam, i manangaki di Hodawia, om manangaki di Hasinua, i tapa’ di Hodawia. I Yibnia, i tanak di Yiroham I Ila i tanak di Usi, i manangaki di Mikri I Mosulam, i tanak di Sopasa, i manangaki di Rohuil, om manangaki di Yibnia, i tapa’ di Rohuil. Oinsanan nopo om 956 o sompiiyon do mantad id payat diri. Iri nopo ngaran di nangarait diri om boyoon ngai’ nopo do sompiiyon. ¹⁰ - ¹² Iti ngai’ no it imam do poingiyon do hilo’d Yorusalim: I Yoyada, i Yoyarib, i Yakin. I Asaria i tanak di Hilkia, (i Asaria nopo om boyoon do pagawai do hiri’d Walai’d Sasambayangan dot Agayo.) Komolohingan nopo dau om i Mosulam, i Sadok, i Mirayot om i Ahitub. I Adaya i tanak di Yiroham; komolohingan nopo dau om i Pasur om i Malkia. I Masai, i tanak di Adiol; komolohingan nopo dau om i Yasira, i Mosulam, i Mosilimit om i Imor. ¹³ Iri ngai’ nopo it imam di nosiliu’d boyoon do sompiiyon om 1,760 o tulun. Om iyolo’ no it ongoilo kopio do kumaraja’ do hiri’d Walai’d Sasambayangan dot Agayo. ¹⁴ - ¹⁶ Iti ngai’ no o tulun do Liwi do poingiyon do hilo’d Yorusalim: I Somaya i tanak di Hasub; komolohingan nopo dau om i Asrikam om i Hasabia i mantad id payat do Morari. I Bakbakar, i Hiris om i Galal. I Matania i tanak di Mika, komolohingan nopo dau om i Sikri om i Asap. I Obaya, i tanak di Somaya; komolohingan nopo dau om i Galal om i Yodutun. I Birikia i tanak di Asa, i manangaki di Ilkana, i poingiyon do hilo’d watas do bandar do Nitopa. ¹⁷ Iti ngai’ no i madtatamong di Walai’d Sasambayangan dot Agayo di poingiyon do hilo’d Yorusalim: i Salum, i Akub, i Talmon om i Ahiman, om i piro-piro o koobpinayan diyolo’. I Salum no o boyoon diyolo’. ¹⁸ Om iri no piro-piro o tulun do mantad id pinuruan do sompiiyon diyolo’ o nonuan do karaja’ do madtamong di wawayaan do roitan do Wawayaan dot Agayo do Raja’ di ponong hiri’d koulayon, do gisom do dinondo. Di nopo di gulu po om karaja’ nopo diyolo’ om madtamong do hiri’d piro-piro o wawayaan di kumaa dot id kokiiman do tulun do Liwi. ¹⁹ I Salum no, i tanak di Kori, i manangaki di Ibiasap, om i piro-piro o tulun do suwai do mantad id pinuruan do sompiiyon di Kora o nonuan do karaja’ do madtamong di wawayaan di Kiim do TUHAN, do miagal di komolohingan diyolo’ di gulu po tu’ minaganu-anu do hiri’d kiim do TUHAN. ²⁰ I Pinihas, i tanak di Iliasar nga’ nokoumbal id nosiliu do boyoon diyolo’ di gulu po. Maha’ daa om woyoon kasai’ iyau’d TUHAN! ²¹ I Sakaria nogi’, i tanak di Mosilimia nga’ nokoumbal id madtamong di wawayaan do Kiim do TUHAN. ²² Oinsanan nopo om 212 o tulun di nopili’ do madtatamong di wawayaan dot agayo. Om tinulis o ngaran diyolo’ do tumanud do ngaran di kampung do nokoiyonon diyolo’. Om iyo’ Raja’ Daud no di Nabi Somuil o minanahak di taki-aki diyolo’ do karaja’ do miagal diri. ²³ Om pinotilombus i’ diyolo’ om i sinakagon diyolo’ i karaja’ddi do madtamong do wawayaan di Walai’d Sasambayangan dot Agayo. ²⁴ Om haro ngai’ nopo o wawayaan do ponong id utara, om salatan, om koulayon om kotonobon. Om otikid nopo do boyoon do tulun do madtamong i piro-piro o wawayaan diri. ²⁵ Om uhupan i’ i piro-piro o madtatamong diri di koobpinayan diyolo’ di songingiyon dot id kawalayan do hilo’. Om mogisowoli-woli nopo iyolo’ do mongoi ponguhup diyolo’ do soroturu-turu’ o tadau dot insan. ²⁶ Iri nopo it apat o tulun do boyoon di madtatamong diri om mantad id tulun do Liwi. Om iyolo’ no i mongilo-ilo kopio di karaja’ddi. Om iyolo’ nogi’ i mongilo-ilo di piro-piro o bilik do hiri’d Walai’d Sasambayangan dot Agayo om koinsanai di konunu-nunuan di songingopi’ do hiri. ²⁷ Om iyonon nopo diyolo’ om hiri’d toning di Walai’d Sasambayangan dot Agayo tu’ iyolo’ no it apatut do madtamong om mongingiwang di wawayaan do monikid kosuabon. ²⁸ Iri no tulun do Liwi do suwai om mongilo-ilo ngai’ di pakakas do pakayon do sumambayang. Om piintaban diyolo’ i pakakas diri do pointikid-tikid do posoliwanon om pogulion kawagu. ²⁹ Om iri no suwai om mongilo-ilo di pakakas di pakayon do sumambayang, om i tapung, om waig dot anggur, om tumau do saitun, om kominyan, om koinsanai di rampa. ³⁰ Nga’ iri nopo popogirolo-rolot di rampa om iri i’ i piro-piro ot imam. ³¹ Om i Matitia, i tulun do Liwi diri, i tanak di Salum dot id dotuo, i mantad id pinuruan do sompiiyon di Kora, o momomonsoi do roti di patahakon do maan do porsombahan. ³² Om iri no tulun do mantad id pinuruan do sompiiyon di Kohat om poposodia’ do roti di posusurungon do hiri’d Walai’d Sasambayangan dot Agayo do pointikid do tadau’d Sabat. ³³ Om haro nogi’ o piro-piro di tulun do Liwi do modsisinding do hiri’d Walai’d Sasambayangan dot Agayo. Om iri ngai’ nopo i boyoon di piro-piro o sompiiyon diri om miniyon do hiri’d walai di pinatambing di Walai’d Sasambayangan dot Agayo. Om a’ no iyolo’ nonuan do buruon do suwai tu’ dangadau om dongotuong nga’ lohowon kasai’ i’ iyolo’ do momonsoi di diyolo’d wonsoyon. ³⁴ Om iri ngai’ nopo i tulun di nangarait diri om boyoon ngai’ nopo di sompiiyon do Liwi do tumanud di komolohingan diyolo’. Om iyolo’ no i poingiyon do hilo’d Yorusalim. ³⁵ Om wonsoyo’ no di Yoyol i bandar do Gibion om iyon noddi iyau’d hiri. Om ngaran nopo di sawo dau om i Maaka. ³⁶ Ngaran noddi tanak dau dot id dotuo om i Abdon, om iri no tangaanak dau’d kusai di suwai om i Sur, i Kis, i Baal, i Nor, i Nadab, ³⁷ i Gidor, i Ahio, i Sakaria om i Miklot, ³⁸ i tapa’ di Simia. Iri nopo sinakagon diyolo’ om miniyon do hilo’d Yorusalim, do poinsugku’ di piro-piro o sompiiyon do suwai do mantad id pinuruan do sompiiyon diyolo’. ³⁹ I Nor nopo om tapa’ di Kis, om i Kis no om tapa’ di Saul. I Saul no om kianak dot apat o kusai: i Yonatan, i Malkisua, i Abinadab om i Isbaal. ⁴⁰ I Yonatan nopo om tapa’ di Moribaal, om i Moribaal no om tapa’ di Mika. ⁴¹ I Mika nopo om kianak dot apat o kusai: i Piton, i Milik, i Taria om i Ahas. ⁴² I Ahas nopo om tapa’ di Yaira, om i Yaira no om kianak do tolu o kusai: i Alimit, i Asmawit om i Simri. I Simri nopo om tapa’ di Mosa, ⁴³ om i Mosa no om tapa’ di Bina, om i Bina no om tapa’ di Ripaya, om i Ripaya no om tapa’ di Ilasa, om i Ilasa no om tapa’ di Asil. ⁴⁴ I Asil nopo om kianak dot onom o kusai: i Asrikam, i Bokru, i Ismail, i Siaria, i Obaya om i Hanan.

¹ Om pisangod no i tulun do Pilistin om i tulun dot Israil do hilo’d Nuluhon do Gilbua. Om ogumu’ diri o tulun dot Israil do napatai’d hiri. Om iri nopo noolu-olu’, do kohompit no i Saul om i tangaanak dau, om minogidu’ diri. ² Nga’ nokosupan i’ iyolo’ di tulun do Pilistin om napatai iddi o tolu di tanak di Saul: i Yonatan, i Abinadab om i Malkisua. ³ Om nokototos no kopio o pisangadan do posorili’ di Saul gisom do nadalaan iyau do nosuhat do pinana’ di pisangod. ⁴ Om boros kaddi dau dot id tanakwagu di mongingigit di rapo-rapo dau, ’’Kodongo’ ino gayang nu om tobokon oku i’, om a’ oku i’ oirak-irakan diti tulun do Pilistin tu’ kapir,’’ ka. Nga’ a’ i’ katama’ i tanakwagu’ddi do momonsoi do miagal diri. Om gowoi poddi om kodongo’ nopo di Saul i gayang dau om haba’ no do tuminobok di gayang. ⁵ Om soira’ddi nokito di tanakwagu do napatai i Saul, om iyau’ddi nga’ haba’ nopo do tuminobok di gayang dau. ⁶ Om iyo noddi o kinapatai-patayo’ di Saul om i tolu o tangaanak dau’d kusai. Om diri noddi do nopupusan i pomorintaan dau. ⁷ Om soira’ di nokorongou i tulun dot Israil di poingiyon do hilo’d Rantai do Yisriil do minogidu’ ngai’ i soudor diyolo’, om napatai i Saul om i tolu o tangaanak dau’d kusai, om iduwai nopo diyolo’ i kabandaran diyolo’ om poggidu’ no. Om gowoi poddi om rikot no i tulun do Pilistin do minongoi iyon do hiri’d kabandaran diri. ⁸ Om tadau po kawagu di natalib i pisangadan, om ngoyo’ noddi di tulun do Pilistin pingiduwai do pakayan i rata’ di tulun dot Israil. Om kabantalai no diyolo’ i rata’ di Saul om i rata’ di tolu o tanak dau’d kusai do hilo’d Nuluhon do Gilbua. ⁹ Om puloso’ no diyolo’ o tulu di Saul om onuo’ ngai’ i rapo-rapo dau. Om ponuhu’ no iyolo’d tulun do mongigit di tulu om i pakayan di Saul do don sumasangod do tumongkop di pomogunan do tulun do Pilistin om poporikot do habar dot osonong dot id piro-piro di tingolig diyolo’ om id tulun dot ogumu’. ¹⁰ Om poiliho’ no diyolo’ i rapo-rapo di Saul dot id iso’ di walai di tingolig diyolo’ om iri no tulu di Saul om pinogiis do hiri’d walai di Dagon, i ponokokinorohingan diyolo’. ¹¹ Om soira’ di nokorongou i tulun do Yabis, i hilo’d Giliad, di winonsoi di tulun do Pilistin dot id di Saul, ¹² om pamanau ngai’ no i gunsiou diyolo’ do minongoi di rata’ di Saul om i rata’ di tangaanak di Saul. Om igitai no diyolo’ iri do hilo’d Yabis. Om lobongo’ ngai’ no diyolo’ i rata’ddi do hilo’, dot id sahau do kayu dit agayo. Om a’ diri iyolo’ minakan om a’ mininum do solinaid do turu’ o tadau. ¹³ Napatai pogi’ i Saul nga’ a’ iyau tuminorodok dot id TUHAN. Om a’ iyau minumboyo’ di pinonuhuan do TUHAN; tu’ minumbal nogi’ daa iyau do minokituduk di rusod do tulun di napatai, ¹⁴ om a’ nogi’ minokituduk do TUHAN. Om gowoi poddi om pinatai iyau’d TUHAN om pinatahak i pomorintaan dau dot id di Daud, i tanak di Isai.

¹ Om oinsanan nopoddi i tulun dot Israil do minongoi solowot di Daud do hilo’d Hibron. Om boros ka diyolo’ dot id dau, ’’Iyahai nopodti om tobpinai nu i’. ² Di nopo di gulu po, dit i Saul po o raja’ toko’, om iya’ i’ o minomoyo’ do tulun dot Israil do minongoi sangod. Om nakabatos no o TUHAN, i Kinorohingan nu dot iya’ nondo o momoyo’ do tulun dau om osiliu do raja’ diyolo’,’’ ka. ³ Om rikot ngai’ nopoddi i boyoon do tulun dot Israil dot id di Raja’ Daud do hilo’d Hibron. Om pomonsoi noddi i Daud do tumpongo dot id diyolo’ dot id suang do ngaran do TUHAN. Om pilio’ no diyolo’ i Daud do sumiliu’d raja’ dot Israil do miagal di nakabatos mantad do TUHAN do pinolombus di Somuil. ⁴ Om ngoyo’ noddi di Raja’ Daud om koinsanai di soudor dot Israil songodo’ i bandar do Yorusalim. Om tontok nopoddi om Yobus po o ngaran do bandar diri. Om iri po i tulun do Yobus, i tulun mantad do pomogunan diri o poingiyon do hilo’. ⁵ Om sunudai no di tulun do Yobus i Daud do poingkuro piya nga’ a’ i’ iyau kosuang di bandar. Nga’ nosolod iddi di Daud i kuta’ diyolo’ di roitan do Sion. Om iyon no iyau’d hiri. Om pinungaranan diri i kuta’ddi do ’’Bandar di Daud’’. ⁶ Om boros kaddi di Daud, ’’Isai nopo o tulun dit id gulu kopio do kapamatai do tulun do Yobus om iyau no o boyoon do koinsanai do soudor,’’ ka. Om i Yoab diri, o minomohuruan di pinisangadan; om kosiliu no iyau’d boyoon do koinsanai di soudor. Tina’ nopo di Yoab om i Soruya. ⁷ Rinoitan pogi’ do ’’Bandar di Daud’’ i kuta’ddi nga’ minongoi i’ i Daud iyon do hiri’d kuta’ddi. ⁸ Om wonsoyo’ no dau kawagu i bandar do pointutuk di kuta’ddi. Nimpuun nopo dau do minomonsoi om hiri’d kinoiyonon di tinimbunan do tana’ di hiri’d ponong id koulayon do mantad id nulu-nulu. Om tuntunai no di Yoab do minomonsoi iri do gisom do nopongo. ⁹ Om muhang-ruhang nopoddi o kokoriso’ di Daud, tu’ moyo-woyo’ i’ dau o TUHAN, it Agayo Kuasa’. ¹⁰ Iti ngai’ no o ngaran do soudor di Daud dit angabantug. Om minogisokodung iyolo’ di tulun dot Israil do pinoposiliu di Daud do raja’, do miagal di nakabatos mantad do TUHAN. Om pinogirot nogi’ diyolo’ i pomorintaan dau. ¹¹ Iri nopo soudor di koiso’ om i Yasobam, i mantad id pinuruan do sompiiyon di Hakmoni, om iyau no i boyoon di ’’Tolu o Soudor’’. Iri no tandus o nigitan dau do suminangod om nakapatai i’ iyau do tolu nahatus o tulun dot id iso’ noo o pinisangadan. ¹² Koduwo nopo di ’’Tolu o Soudor’’ dot abantug diri om i Iliasar, i tanak di Dodo, i mantad id pinuruan do sompiiyon di Ahohi. ¹³ Minuhup iyau di Daud do suminangod di tulun do Pilistin di hilo’d pisangadan do Pas Damim. Om tontok di tuminimpuun i tulun dot Israil do mogidu’ om hiri iyau’d tumo di tinanaman do barli. ¹⁴ Nga’ undorong nopo iyau om i tulun dau do hiri’d tanga’ di tumo’ddi om sangod no iyolo’ di tulun do Pilistin. Om nonuan iddi iyau do TUHAN do kinamanangan dot agayo. ¹⁵ Insan tadau om ongoi no o tolu di tolu nohopod o soudor di Daud dit angabantug dot id iso’ o pampang di niyon di Daud, it id toning di luang do nulu-nulu dot Adulam. Om maso nopoddi om nokopomukiim no i soudor do Pilistin do hiri’d Rantai do Ropaim. ¹⁶ Om tontok nopoddi om hiri i Daud id nulu-nulu di kikuta’ do padtamangan. Om noiyon no do piro-piro o soudor do Pilistin i bandar do Baitlahim. ¹⁷ Om linangadon diri i Daud di kampung dau, om boros ka dau, ’’Orohian oku no daa do haro o songulun do mongoi doho’ poinum di waig di torobong dit id toning do wawayaan dot agayo do Baitlahim,’’ ka. ¹⁸ Om pogihum noddi do ralan i tolu o soudor dot angabantug diri do minaya’ di pinomukiiman di tulun do Pilistin. Om ongoi no iyolo’ timbauk di waig do mantad id torobong diri om igitai no diyolo’ dot id di Daud. Nga’ a’ i’ di Daud ninum i waig; suwai ko’ potuntugo’ nogi’ dau do maan do porsombahan dot id TUHAN, ¹⁹ mikuwo do minomoros dot, ’’A’ oku i’ kopio monginum do waig diti! Tu’ ondung monginum oku’dti om miagal pod monginum oku do raha’ diti tulun dit a’ no minomusorou’d tinan diyolo’,’’ ka dau. ²⁰ Boyoon nopo di ’’Tolu Nohopod o Soudor’’ dit abantug om i Abisai, i tobpinai di Yoab. Suminangod iyau do tolu nahatus o tulun om napatai ngai’ i’ dau iyolo’ dot iri no tandus dau o pinamatai. Om nabantug diri iyau dot id pogialatan di ’’Tolu Nohopod o Soudor’’. ²¹ Om iyau no it abantug kopio dot id pogialatan di ’’Tolu Nohopod o Soudor’’ om nosiliu diri iyau do boyoon diyolo’, nga’ a’ i’ iyau nokoiyo do kobontugo’ di ’’Tolu o Soudor’’. ²² I Bonaya nopo, i tanak di Yoyada, i mantad hilo’d Kabsiil om soudor dit abantug om osiou kopio. Om nokoumbal nogi’ iyau do minamatai do duwo o gunsiou do bansa’ do Muab. Om nokoumbal nogi’ iyau do tuminuhun dot id luang di dong manangais om minamatai iyau dot iso’ o singa do hiri. ²³ Om minamatai nogi’ iyau do tulun do Masir dit aranggou kopio. Om koronggoho’ nopo di tulun diri om asawat i’ ko’ duwo o mito, om kitandus dot agayo kopio. Om saapo’ no di Bonaya i tulun diri dot iri no i bobobog dau o pinongumang dau, om ngoyo’ no dau ahawo’ i tandus do poingigit di tulun do Masir diri, om iri no tandus di tulun diri o pinamatai dau di tulun diri. ²⁴ Om iri no o kosioho’ di Bonaya, it iso’ do mantad id pogialatan di ’’Tolu Nohopod o Soudor’’. ²⁵ Om iyau no ot abantug kopio dot id pogialatan di ’’Tolu Nohopod o Soudor’’, nga’ a’ i’ iyau koiyo do kobontugo’ di ’’Tolu o Soudor’’. Om siliho’ no iyau di Daud do boyoon di soudor do madtatamong dau. ²⁶ - ⁴⁷ Iti ngai’ no i soudor do suwai dit angabantug: I Asail, i tobpinai di Yoab I Ilhanan, i tanak di Dodo, i mantad hilo’d Baitlahim I Syamot, i tulun do Harod I Hilis, i tulun do Pilit I Ira, i tanak di Ikis, i tulun do Tokua I Abiosor, i tulun dot Anatot I Sibkai, i tulun do Husa I Ilai, i tulun do Ahohi I Maharai, i tulun do Nitopa I Hilid, i tanak di Baana, i tulun do Nitopa I Itai, i tanak di Ribai, i tulun do Gibia, it id watas do Binyamin I Bonaya, i tulun do Piraton I Hurai, i mantad hilo’d rantai do Gaas I Abiol, i tulun dot Araba I Asmawit, i tulun do Bahurim I Ilyahba, i tulun do Saalbon I Hasim, i tulun do Gison I Yonatan, i tanak di Sagi, i tulun do Harari I Ahiam, i tanak di Sakar, i tulun do Harari I Ilipal, i tanak di Ur I Hipir, i tulun do Mikirati I Ahia, i tulun do Piloni I Hisro, i tulun do Karmol I Naarai, i tanak di Isbai I Yoil, i tobpinai di Natan I Mibhar, i tanak di Hagri I Silik, i tulun dot Amon I Naharai, i mongingigit do rapo-rapo di Yoab, i tulun do Biirot I Ira om i Garob, i tulun do Yitri I Uria, i tulun do Hit I Sabad, i tanak di Ahlai I Adina, i tanak di Sisa (songulun it abantug dot id payat di Rubin, om kisoudor do tolu nohopod o tulun) I Hanan, i tanak di Maaka I Yosapat, i tulun do Mitni I Usia, i tulun dot Astarot I Sama om i Yoyol, i tangaanak di Hotam, i tulun dot Aroir I Yodiail om i Yoha, i tangaanak di Simri, i tulun do Tis I Iliol, i tulun do Mahawim I Yoribai om i Yosawia, i tangaanak di Ilnaam I Yitma, i tulun do Muab I Iliol, i Obid om i Yaasiol, i tulun do Misobaya.

¹ Tontok di minogidu’ i Daud do mantad id di Raja’ Saul, om minongoi’ddi iyau iyon do hilo’d Siklag. Tontok di hilo’ iyau om ogumu’ o soudor di noubas nod sumangod om i milo kopio do ponongkuyaanan do minongoi sugku’ dau, ² do mantad id payat do Binyamin om payat nogiddi o tadon di Saul. Om oinsanan nopo i soudor diri dot ongotiru’ do mamana’ om ongotiru’ do monulogong — do longon do wanan om longon do gibang. ³ - ³⁷ Tontok di hilo’ i Daud id Hibron, om ogumu’ o soudor di nongkopinsingilo do sumangod do minongoi sugku’ di soudor dau. Om iyolo’ no i minonguhup dau do suminiliu do raja’ do suminowoli di Saul, do miagal di nakabatos do TUHAN. Om poingkaa o kogumuo’ diyolo’: Mantad id Yohuda: 6,800 o tulun, dot ongkirapo-rapo, om ongkikolid om ongkitandus; Mantad id Simion: 7,100 o tulun di nongkopinsingilo do sumangod; Mantad id Liwi: 4,600 o tulun; I Yoyada om i piro-piro o tulun di tuminanud dau, i sinakagon di Harun: 3,700 o tulun; I Sadok, i gunsiou dit omulok po om i koobpinayan dau: 22 o tulun dit angabantug; Mantad id Binyamin (i payat di tadon di Saul): 3,000 o tulun (nga’ kogumuan i’ di payat di Binyamin dot otorodok kasai’ dot id di Saul); Mantad id Ipraim: 20,800 o tulun. Om abantug ngai’ nopo iyolo’ dot id pinuruan do sompiiyon diyolo’; Mantad id Manasi ponong id kotonobon: 18,000 o tulun di nongopili’ do mongoi poposiliu di Daud do raja’; Mantad id Isakar: 200 o boyoon om miwoyo’ di tumatanud diyolo’ (koilo ngai’ i’ iti boyoon dit apatut do wonsoyon do tulun dot Israil om i maso dot osonong do momonsoi’ddi); Mantad id Sibulon: 50,000 o tulun dit otorodok om i milo do ponongkuyaanan, om i nongkosodia’ no do mongoi sangod, om i milo do mamakai do nunu nopo o rapo-rapo do sumangod; Mantad id Naptali: 1,000 o boyoon om miwoyo’ do 37,000 o soudor dit ongkikolid om ongkitandus; Mantad id Dan: 28,600 o tulun di nongkopinsingilo do sumangod; Mantad id Asor: 40,000 o tulun di nongkosodia’ no do sumangod; Mantad id piro-piro o payat di ponong id koulayon do mantad id bawang do Yordan — iri no i payat do Rubin, Gad om Manasi ponong id koulayon: 120,000 o tulun dit ongoilo do mamakai do nunu nopo o rapo-rapo do sumangod. ³⁸ Om oinsanan nopoddi i soudor di nongkosodia’ no do sumangod do minongoi do hilo’d Hibron. Om korohian nopo diyolo’ do wonsoyon om poposiliu di Daud do raja’ do pointongkop dot Israil. Om iso-iso’ nopo o ginawo do tulun dot Israil di suwai dot orohian do momonsoi do miagal diri. ⁷ Boyoon nopo diyolo’ om i Ahiosor om i Yoas, i tangaanak di Simaa do tongokusai, i mantad hilo’d Gibia. Iti ngai’ no o ngaran do soudor diri: I Yosiol om i Pilit, i tangaanak di Asmawit do tongokusai I Biraka om i Yohu, i tulun dot Anatot I Yismaya, i tulun do Gibion, i gunsiou om iso’ di boyoon di sinompuruan do ’’Tolu Nohopod o Soudor’’. I Yoromia, i Yohasiol, i Yohanan om i Yosabad, i tulun do Gidira I Ilusai, i Yirimot, i Bialia, i Somaria, i Sopasa i tulun do Harupi I Ilkana, i Yisia, i Asariil, i Yoisir om i Yasobam i mantad id pinuruan do sompiiyon di Kora I Yoila, om i Sibaya i tangaanak do kusai di Yiroham, i tulun do Gidor. ⁸ Iti ngai’ no o ngaran di soudor dit angabantug om i nongoubas do sumangod do mantad id payat do Gad di suminugku’ di Daud di hiri iyau id kuta’ di hilo’d tana’ do kowotuan. Om ongoilo tomod iyolo’ do mamakai do kolid om tandus, om orongit do miagal po di singa, om osiau do miagal do tambang. ⁹ - ³⁹ Om minundorong iyolo’ do hiri’d sugku’ di Daud do solinaid do tolu o tadau. Om minangakan iyolo’ di taakanon om minonginum di tinumon di pinosodia’ di tulun dot Israil. ¹³ Om iti ngai’ no o ngaran diyolo’ do poingirus di kasawato’ do pangkat diyolo’: I Isir, i Obaya, i Iliab, i Mismana, i Yoromia, i Atai, i Oliol, i Yohanan, i Ilsabad, i Yoromia om i Makbanai. ¹⁴ Haro o piro-piro tulun dot id pogialatan di payat di Gad do boyoon do soudor dit angasawat o pangkat: om boyoon nogi’ iyolo’ do soudor do soribu o tulun. Om iri no suwai om boyoon do soudor di koubasanan, om boyoon iyolo’ do soudor do hatus o tulun. ¹⁵ Om tontok di tulan do koiso’ do toun diri, om mulong pod lumuyud dot agayo i Bawang do Yordan, nga’ sinoborong i’ diyolo’, om nouyung i’ diyolo’ i tulun di songingiyon do ponong hiri’d koulayon om i ponong hiri’d kotonobon do mantad di bawang diri. ¹⁶ Insan tadau om rikot no o sonsinompuruan o tulun do mantad id payat do Binyamin om Yohuda do hiri’d kuta’ do padtamangan di niyon di Daud. ¹⁷ Om ngoyo’ no di Daud solowoto’ iyolo’ om boro-boros no dot, ’’Ondung mambalut om monulung doho’ o kinorikatan dokoyu om kainou no, sumugku’ doho’d hiti. Osonong i’ o ginawo dahai do poinsugku’ dokoyu. Nga’ ondung magakal kou doho’ om papatahak kou doho’ dot id pisangod ku, mulong piya dot a’ oku nokoumbal do pinopokoruol dokoyu, om oilaan i’ di Kinorohingan di tukuon di taki-aki toko’,’’ ka dau. ¹⁸ Om tontok iddi do pinorinta’ do Rusod do Kinorohingan o tiso’ diyolo’, i roitan dot i Amasai. Om i Amasai no o nosiliu do boyoon di sinompuruan do ’’Tolu Nohopod o Soudor’’. Om poboroso’ no dau o poingkaa, ’’Oi Daud, i tanak di Isai, tumanud i’ iyahai diya’! Iya’ no o kaanu do kamanangan do miwoyo’ di tulun di muhup diya’! Muhup i’ dati’ o Kinorohingan,’’ ka dau. Om romito’ noddi di Daud iyolo’ om siliho’ no dau iyolo’ do boyoon di soudor dau. ¹⁹ Om haro o piro-piro soudor do mantad id payat di Manasi do minongoi sugku’ di soudor di Daud, do tontok di minamanau i Daud do minoyo’ di tulun do Pilistin do mongoi sangod di Raja’ Saul. Nga’ a’ iddi nokouhup i Daud di tulun do Pilistin, tu’ ooris ngai’ i’ i raja’ diyolo’ dot aakalan iyolo’ dau tu’ mongoi dotindo iyau sugku’ di Saul, i tuan dau di gulu po om kohudsu nondo iyolo’. Om gowoi poddi om suhuo’ no diyolo’ iyau do gumuli’ do hilo’d Siklag. ²⁰ Iti ngai’ no o ngaran di soudor do mantad id payat do Manasi di minoyo’ di Daud do tontok di minuli’ iyau kawagu do hilo’d Siklag: I Adna, i Yosabad, i Yodiail, i Mikail, i Yosabad, i Ilihu om i Silotai. Om oinsanan nopo iyolo’ do boyoon do soribu o soudor di hilo’ po iyolo’d Manasi. ²¹ Om siliu no iyolo’ do boyoon do soudor di Daud do minuhup di Daud, tu’ gunsiou ngai’ i’ iyolo’ dit ongokoris kopio. Om nosiliu’ddi iyolo’ do boyoon do soudor dot Israil di koimbagu. ²² Om osomok nod monikid tadau do haro o tulun do wagu do mongoi sugku’ di soudor di Daud, gisom dot ogumu’ tomod diri o soudor dau. ²³ - ⁴⁰ Om mantad piya do hilo’d Isakar, om Sibulon, om Naptali, i piro-piro o payat do ponong id utara, nga’ ruminikot ngai’ i’ i tulun dot ongkiginayat ngai’ nopo do kaladai, om unta, om bagal, om sapi’ do ginandaran do tapung, om tua’ dot ara om tua’ dot anggur di kinoring om waig dot anggur om tumau do saitun. Om guminayat nogi’ iyolo’ do sapi’ om dumba’ do maan do sumbolion om maan do tikanas. Om iri ngai’ no o pointalang dot ongotood ngai’ o tulun do pointongkop di pomogunan dot Israil.

¹ Om ponokirunding no i Daud do toinsanan di boyoon do soudor dau, i boyoon do soudor di soribu o tulun, om i boyoon do soudor do hatus o tulun. ² Om katalib poddi iri om posunudo’ no dau dot id toinsanan o tulun dot Israil o boros do poingkaa, ’’Ondung kaakun kou, om ondung korohian do TUHAN, i Kinorohingan toko’ iti, om suhuo’ ngai’ toko’ no o bansa’ toko’ om it imam om i tulun do Liwi do hilo’d kabandaran diyolo’ do tumimung do mongoi sugku’ dati’ do hiti. ³ Om ngoyon toko’ nogindo i Kaban do Tumpongo do Kinorohingan dit a’ napadul do solinaid di pomorintaan di Raja’ Saul,’’ ka. ⁴ Om kaakun ngai’ nopo i tulun do hiri di pinoboros di Daud. ⁵ Om timungo’ ngai’ noddi di Daud i tulun dot Israil do mantad id pointongkop do pomogunan diri do mantad po do hilo’d piwolitan do pomogunan do Masir do ponong id salatan om gisom do hilo’d Ralan do kumaa do hilo’d Hamat do ponong id utara, do mongoi pawaliu di Kaban do Tumpongo do mantad hilo’d Kiriat Yiarim om pokoyoon do hilo’d Yorusalim. ⁶ Om ongoi no i Daud om koinsanai di tulun dot Israil do hilo’d bandar do Baala, iri no i bandar do roitan do Kiriat Yiarim, it id watas do Yohuda, do mongoi di Kaban do Tumpongo do Kinorohingan. Iri nopo Kaban diri om koilaan do TUHAN o poirikau do hiri’d sakai di moloikat do roitan do kerub. ⁷ Tontok di nokorikot iyolo’ do hilo’d bandar do Baala, om posoliwano’ no diyolo’ i Kaban do Tumpongo’ddi do mantad id walai di Abinadab om pasakayo’ no di guyudan di wagu po. Om popotunud nopo di sapi’ di mamagayat di guyudan diri om i Usa om i Ahio. ⁸ Om i Daud no om koinsanai di tulun dot Israil om minogulu-gulu di Kaban om mintari’ do popoinggayo do Kinorohingan. Om modsinding nogi’ iyolo’ dot ompoton do kecapi, gambus, gandang, rebana om torumpit. ⁹ Om soira’ di nokorikot iyolo’ do hiri’d pamagamasan do gandum di Kidon, om kasadu i sapi’ di mamagayat di guyudan. Om gowoi poddi om poroloyo’ no di Usa o longon dau do minongoi pomusus di Kaban do Tumpongo. ¹⁰ Om diiri i’ om diiri do notogod o TUHAN di Usa om pinatai’ddi do TUHAN i Usa tu’ minongoi i’ iyau kama’ di Kaban diri. Om kapatai no i Usa do pinatai’d Kinorohingan. ¹¹ Om mantad poddi om roitan no do ’’Piris Usa’’ o kinoiyonon diri. Om tuminogod diri i Daud tu’ hinukuman i’ do TUHAN i Usa dot iyo kopio’ddi kawagat. ¹² Om ooris diri i Daud do Kinorohingan. Om boros ka dau, ’’Poingkuro poddi o ralan ku do mongoi di Kaban do Tumpongo’ddi?’’ ka. ¹³ Om a’ iddi iyau nabayaan do minongigit di Kaban diri do hilo’d Yorusalim. Om poiliho’ nopoddi dau do hiri’d walai do songulun di roitan dot i Obid Idom. Iyau nopo om tulun do mantad id bandar do Gat. ¹⁴ Om hiri-hiri noddi i Kaban diri do solinaid do tolu o tulan. Om binarakatan diri do TUHAN i sompiiyon di Obid Idom om koinsanai di dau’d songonuon.

¹ Om ponuhu’ no i Hiram i raja’ do pomogunan do Tirus, do wakil do mongingindapu’ do mongoi do hiri’d di Daud. Om onuwai no dau i Daud do kayu sedar do Libanon om piro-piro o tukang watu om tukang kayu do momonsoi di walai’d raja’. ² Om kopurimanai nogiddi kopio di Daud do TUHAN o pinopogirot do kinosilihan dau do raja’ dot Israil om popoburu’ di pomorintaan dau do koinsanangan di tulun di songonuon do TUHAN. ³ Om panansawo po kawagu i Daud do piro-piro o tongoondu’ di hilo’ iyau’d Yorusalim, om noruhangan poddi o tangaanak dau do kusai om tondu’. ⁴ Iti ngai’ no o ngaran di tangaanak dau do tongokusai di nosusu do hilo’d Yorusalim: i Syamua, i Sobab, i Natan, i Suliman, ⁵ i Yibhar, i Ilisua, i Ilpilit, ⁶ i Noga, i Nipig, i Yapia, ⁷ i Ilisama, i Biilyada om i Ilipilit. ⁸ Om soira’ di nokoilo i tulun do Pilistin do nosiliu noddi i Daud do raja’ do pointongkop dot Israil, om pamanau ngai’ no i soudor diyolo’ do mongoi daa panangkap di Daud. Om pamanau noddi i Daud iyau do mongoi solowot diyolo’. ⁹ Om korikot no i soudor do Pilistin do hilo’d Rantai do Ropaim om timpuun no do manangod di tulun di hiri’d rantai’ddi. ¹⁰ Om uhot no i Daud do Kinorohingan. Boros ka dau, ’’Oi TUHAN, ngoyon ku tuu songodo’ i tulun do Pilistin? Onuan oku i’ tuu diya’ do kamanangan,’’ ka. Om boros kad TUHAN do suminimbar, ’’Ngoyon nopo songodo’! Onuan ku i’ iya’ do kamanangan!’’ ka. ¹¹ Om ngoyo’ noddi di Daud songodo’ i tulun do Pilistin do hilo’d Baal- Pirasim om naala’ i’ dau iyolo’. Om boros ka dau, ’’Pinakai oku id Kinorohingan do tuminolibamban di soudor do pisangod do miagal di luyud do rumudsu’,’’ ka. Om rinoitan diri do Baal-Pirasim o kinoiyonon diri. ¹² Om soira’ di minogidu’ i tulun do Pilistin om koiliu ngai’ no diyolo’ i tingolig diyolo’, tu’ narau-arau kopio iyolo’ do minogidu’. Om ponuhu’ noddi i Daud do modtutud ngai’ di tingolig diri. ¹³ Om a’ po alaid om guli’ no kawagu i tulun do Pilistin do hiri’d rantai’ddi om timpuun no do sumangod. ¹⁴ Om uhot po kawagu i Daud do Kinorohingan. Om boros kad Kinorohingan do suminimbar, ’’Kada’ iyolo’ ngoyo’ songodo’ do mantad hiti. Nga’ sorili’ nogi’ om sumodia’ id manangod diyolo’ do mantad hilo’d sampaping; do hilo’d toning do koguasan do kertau. ¹⁵ Om orongou nu po o tuni do miagal do pamamanau do soudor do hiri’d tuntu di kokoyuan, om sumangod nogi’, tu’ mogulu oku indo diya’ do mamanau do mongoi pangala’ di soudor do Pilistin,’’ ka dau. ¹⁶ Om wonsoyo’ no di Daud o miagal di pinonuhuan do Kinorohingan. Om nouyung iddi dau i tulun do Pilistin do mantad hilo’d Gibion om gisom do nokorikot do hilo’d Gisir. ¹⁷ Om abantug tomod diri o ngaran di Daud do hinonggo-honggo nopo. Om oinsanan nopo o bansa’ dot ooris di Daud tu’ pinooris id TUHAN iyolo’.

¹ Om pomonsoi no i Daud do piro-piro o walai dau do hilo’d Bandar di Daud. Om pinoposodia’ nogi’ iyau do poiyanan di Kaban do Tumpongo do Kinorohingan om winansayan dau do kiim i Kaban diri. ² Om boros ka dau, ’’Tulun nod Liwi ot apatut do sumaan di Kaban do Tumpongo’ddi tu’ iyolo’ no i nopili’d TUHAN do sumaan diri om momonsoi’d karaja’ dau do gisom dot alaid,’’ ka. ³ Om timungo’ ngai’ noddi di Daud i tulun dot Israil do hilo’d Yorusalim do mongoi pawaliu di Kaban do Tumpongo do hiri’d poiyanan di nosodia’ dau. ⁴ Om lohowo’ ngai’ no dau i sinakagon di Harun om i tulun do Liwi. ⁵ Om rikot no i Uriol, i tulun do Liwi do mantad id pinuruan do sompiiyon di Kohat, i boyoon do hatus om duwo nohopod o tulun do mantad id pinuruan do sompiiyon dau. ⁶ Om i Asaya, i mantad id pinuruan do sompiiyon di Morari, i boyoon do duwo nahatus om duwo nohopod o tulun; ⁷ om i Yoil, i mantad id pinuruan do sompiiyon di Girson, i boyoon do hatus om tolu nohopod o tulun; ⁸ om i Somaya, i tulun do mantad id pinuruan do sompiiyon di Ilsapan, i boyoon do duwo nahatus o tulun; ⁹ om i Iliol, i tulun do mantad id pinuruan do sompiiyon di Hibron, i boyoon do walu’ nohopod o tulun; ¹⁰ om i Aminadab, i tulun do mantad id pinuruan do sompiiyon di Usiol, i boyoon do hatus om hopod om duwo o tulun. ¹¹ Om lohowo’ noddi di Daud i Sadok it Imam om i Abiatar it Imam, om onom o tulun do Liwi: i Uriol, i Asaya, i Yoil, i Somaya, i Iliol om i Aminadab. ¹² Om boros ka dau dot id diyolo’, ’’Iyokoyu no o boyoon do piro-piro o pinuruan do sompiiyon dit id suang do payat do Liwi. Om lidangan no dokoyu o tinan dokoyu om i tulun do Liwi do suwai, om milo kou indo do mongoi papawaliu di Kaban do Tumpongo’d TUHAN, i Kinorohingan dot Israil, dot id kinoiyonon di nokosodia’ ku do poiyanan diri. ¹³ A’ kou giya hino di ngoyo’ i’ powoliho’ i Kaban diri, gowoi poddi om hinukuman toko’ do TUHAN, i Kinorohingan toko’, tu’ a’ i’ kopunong di korohian dau o ralan toko’ do suminambayang dot id dau,’’ ka dau. ¹⁴ Om lidangai noddi dit imam om i tulun do Liwi o tinan diyolo’ om milo’ i’ iyolo’ do pawaliu di Kaban do Tumpongo’d TUHAN, i Kinorohingan dot Israil. ¹⁵ Om saano’ noddi diyolo’ i Kaban do nantayang di kayu do pagantayang do miagal di pinonuhuan do TUHAN do pinolombus di Musa. ¹⁶ Om suhuo’ ngai’ noddi di Daud i boyoon do tulun do Liwi do monuhu’ do piro-piro o tulun do Liwi do modsinding om popouni do tuunion di popotood do ginawo, om popouni do kecapi om simbal. ¹⁷ - ²¹ Om mantad nopo di pinuruan do sompiiyon di modsisinding om iti ngai’ no o pinili’ diyolo’ do popouni di simbal om tambaga’: i Himan, i tanak di Yoil om i koobpinayan dau; i Asap, i tanak di Borokia; i Itan i tanak di Kusaya, i mantad id pinuruan do sompiiyon di Morari. Om minomili’ po kawagu iyolo’ do piro-piro o tulun do Liwi do monguhup diyolo’ om mongombit di kecapi dit otolis: Pinili’ nopo om i Sakaria, i Yaasiol, i Somiramot, i Yohiol, i Uni, i Iliab, i Maasiya om i Bonaya. Om mongombit no di kecapi dit olombou, om pinili’ nopo diyolo’ nga’ i Matisa, i Ilipili, i Mikniya, i Asasia om duwo o tulun di madtatamong do Walai’d Sasambayangan dot Agayo, i Obid Idom om i Yoyol. ²² I Kinaya nopo om oilo kopio do popouni do tuunion, om iyau noddi o pinili’ do sumiliu’d boyoon di tinimungan do payat do Liwi di popouni do tuunion. ²³ - ²⁴ Om pinili’ nopo do madtamong di Kaban do Tumpongo’d TUHAN om i Borokia, i Ilkana, i Obid Idom om i Yohia. Om nopili’ nopo do pouni di torumpit do hiri’d gulu-gulu di Kaban do Tumpongo om iti piro-piro ot imam diti: i Sibania, i Yosapat, i Nitaniil, i Amasai, i Sakaria, i Bonaya om i Iliosor. ²⁵ Om ongoi noddi i Raja’ Daud, om i piro-piro o boyoon dot Israil, om i boyoon do soudor, do hiri’d walai di Obid Idom do mongoi panganu di Kaban do Tumpongo. Om pinapaharo nogi’ iyolo’ do karamayan dit agayo. ²⁶ Om minonumbali’ iyolo’ do turu’ o tinan do sapi’ do tontoluhan om turu’ o tinan do dumba’ do maan do porsombahan dot id Kinorohingan, do mokitulung do Kinorohingan do monguhup di tulun do Liwi di sumaan di Kaban do Tumpongo. ²⁷ Om i Daud nopo om kipinakai do rasuk do linan dit aalus. Om iyo nogiddi o pakayan di piro-piro o tulun di popouni do tuunion, om i Kinia, i boyoon diri, om i tulun do Liwi di suminaan di Kaban do Tumpongo. Om kipinakai po i Daud dot ipod. ²⁸ Om iyo noddi i tulun dot Israil do minananud di Kaban do Tumpongo gisom do nokorikot do hilo’d Yorusalim, do mikuwo’d sampangkis-pangkis dot atataadan om popinguni do torumpit, om toburi’, om simbal om kecapi. ²⁹ Om tontok di posuangon i Kaban diri do hiri’d bandar, om kokito no di Mikal, do mantad hiri’d liligaon, do mintari’ tomod om minsimbul i Raja’ Daud dot atataadan. Om araatan tomod diri i Mikal di Daud. I Mikal nopoddi nga’ tanak di Saul do tondu’.

¹ Om igitai no diyolo’ i Kaban do Tumpongo’ddi do hiri’d kiim di nokosodia’ di Daud. Om poiliho’ no diyolo’ i Kaban diri do hiri’d suang di kiim. Om papatahak noddi iyolo’ do porsombahan do sorobon om porsombahan do piombolutan dot id Kinorohingan. ² Om kopongo po i Daud do pinapatahak di porsombahan diri, om barakatai no dau i tulun dot Israil dot id suang do ngaran do TUHAN, ³ om tikidai no dau iyolo’ do taakanon. Om nonuan ngai’ nopo dau o pointikid-tikid do kusai om tondu’ do hilo’d Israil do roti, om sompigis o sinalau, om roti di tua’ dot anggur di kinoring do winonsoi. ⁴ Om pilio’ no di Daud o piro-piro o tulun do Liwi do momoyo’ do tulun do sumambayang dot id TUHAN, i Kinorohingan dot Israil, dot id toguang di Kaban do Tumpongo’ddi. Om modsinding diri iyolo’ do mamarayou’d TUHAN. ⁵ Om i Asap o pinili’ do sumiliu’d boyoon om i Sakaria o wakil dau. Om mongombit nopo do kecapi om i Yoyol, i Somiramot, i Yohiol, i Matisa, i Iliab, i Bonaya, i Obid Idom om i Yoyol. I Asap nopo om pouni do simbal, ⁶ om iri no duwo imam do suwai, i Bonaya om i Yahasiol om popouni kasai’ do torumpit do hiri’d gulu-gulu di Kaban do Tumpongo. ⁷ Om diri no do koinsan i’ kopio di Daud do pinapatahak do karaja’ do modsisinding do mamarayou’d TUHAN dot id di Asap om id piro-piro o tulun do Liwi do suwai. ⁸ Pongunsikou nod TUHAN, popinsunudo’ no o kogoyoo’ dau; Sunudan ngai’ no o bansa’d tulun di nongowonsoi dau dit ongosonong. ⁹ Podsinding no do pamarayou’d TUHAN; popinsunudo’ no i nongowonsoi dau di kongoimayaan kopio. ¹⁰ Kotood toko’ no tu’ nasanganu toko’ no dau; Kumooropod ngai’ no o tulun di tumuku’ dot id dau! ¹¹ Rikot no dot id TUHAN do mokianu do kokorisan, om kada’ tingkod do sumambayang dot id dau. ¹² - ¹³ Iyokoyu i sinakagon di Yakub, i susuhuon do Kinorohingan, i sinakagon dot Israil, i tulun di pinili’ dau. Soroho’ no i kongoimayaan di winonsoi do Kinorohingan, om tonudon no i ponuhuan dau. ¹⁴ TUHAN no o Kinorohingan toko’; om kotongkop diti pomogunan o kuasa’ dau. ¹⁵ Kada’ kopio lihuwai i tumpongo do Kinorohingan, i winonsoi dau om pinogirot do gisom do poingompus; ¹⁶ i tumpongo do winonsoi dau dot id di Abraham, i batos do pinabatos dau dot id di Isak. ¹⁷ Pinogirot do TUHAN i tumpongo dot id di Yakub, i tumpongo di poingompus dot id Israil. ¹⁸ ’’Patahakon ku i’ diya’ i pomogunan do Kanaan,’’ ka dau, ’’Om iri no o tungkusan nu,’’ ka dau. ¹⁹ Di nopo di gulu po om okuuri’ o tulun di dong Kinorohingan om sompogunan iyolo’ do hilo’d pomogunan do Kanaan. ²⁰ Minghombo nopo iyolo’ do mantad id iso’ o kinoiyonon om kumaa dot id kinoiyonon do suwai, mantad id iso’ o bansa’d tulun om kumaa dot id bansa’d tulun do suwai. ²¹ Nga’ mada’ i’ o Kinorohingan do haro o monginggorit diyolo’; pinoinsan ngai’ dau i raja’, tu’ mongintirung i’ iyau di tulun dau; ²² Kada’ pokorualai i tulun di nongopili’ ku; kada’ kuroi-kuroyo’ i nabi ku,’’ ka dau. ²³ Podsinding no dot id TUHAN, oi koinsanai do pomogunan! Popinsusuyo’ no do pointikid do tadau i habar dot osonong do napasi iyahai dau. ²⁴ Popinsusuyo’ no i kagayaan dau dot id koinsanai’d bansa’d tulun, om i winonsoi dau do kongoimayaan kopio dot id toinsanan o tulun. ²⁵ TUHAN nopo om agayo i’ om apatut no do royohon kopio; apatut no do pusohon kopio iyau ko’ mantad di ponokokinorohingan do suwai. ²⁶ Iri nopo ponokokinorohingan do suwai om tininganak no toomod, nga’ TUHAN nopo om minomonsoi i’ do tawan om pomogunan om koinsanai’d nunu nopo. ²⁷ Nosorilian iyau do kagayaan om kogoyoo’ dau do miagal di dong raja’, noponu’ do sinundu om kaarapadan i Walai’d Sasambayangan dot Agayo. ²⁸ Royohon no o TUHAN, oi koinsanai dokoyu i tulun do hiti’d pomogunan. Royohon no i kagayaan om i kokoriso’ dau. ²⁹ Royohon no i ngaran do TUHAN di kikagayaan; migit nod porsombahan om rumikot no do hiri’d Walai’d Sasambayangan dot Agayo. Oiyo-iyon no o ginawo nu do tontok do sumambayang dot id dau. ³⁰ Gagarai kou no dot id toguang do TUHAN, oi koinsanai do pomogunan! Nokogirot no o pinopoiyon diti pomogunan om a’ no milo do powolihon. ³¹ Kooropod no, oi pomogunan om tawan! Sunudai ngai’ no o bansa’d tulun do TUHAN noo o raja’. ³² Ngorod no, oi rahat, om koinsanai di kipinuhobo do hino’d rahat; kooropod no, oi koumaan, om koinsanai di poinsuni’d hino! ³³ Mimpangkis pondo dot atataadan i kokoyuan do hilo’d gouton dot id toguang do TUHAN, do tontok do rumikot iyau do mongoi pomorinta’ diti pomogunan. ³⁴ Pongunsikou nod TUHAN, tu’ osonong i’ iyau; om mompus-ompus o kosianan dau. ³⁵ Poboroson no dot id dau o poingkaa, ’’Posio’ no iyahai, oi Kinorohingan, i Gampamasi dahai; timungo’ no iyahai kawagu; poiduwo’ no iyahai do mantad id koinsanai’d bansa’d tulun di suwai, om ounsikou indo iyahai om mamarayou iyahai do ngaran nu dit olidang,’’ ka. ³⁶ Royohon no o TUHAN, i Kinorohingan dot Israil. Royohon no iyau do baino’ om gisom dot alaid! Om kosinding poddi di Asap om i tulun do Liwi i sinding diri om oinsanan nopoddi i tulun do minomoros dot, ’’Amin,’’ ka, om royoho’ no diyolo’ o TUHAN. ³⁷ Om suhuo’ no di Raja’ Daud i Asap om i tulun do Liwi do suwai, di koruhang di Asap do nosiliu do mongilo-ilo kasai’ do nunu nopo i kagait do sumambayang do hiri’d kiim di pinoiyanan di Kaban do Tumpongo’d TUHAN. Om apatut nod wonsoyon diyolo’ i karaja’ diyolo’ddi do hiri do pointikid-tikid do tadau. ³⁸ Om monguhup nopo diyolo’ om i Obid Idom, i tanak di Yodutun, om onom nohopod om walu’ o tulun do suwai do mantad id pinuruan do sompiiyon dau. Om madtatamong nopo di wawayaan om i Obid Idom om i Hosa. ³⁹ Om i Sadok no, it Imam diri om it imam do suwai, om mongilo-ilo di kowoyo-woyoo’ do sumambayang dot id TUHAN do hiri’d tiyonon do sumambayang do hilo’d Gibion. ⁴⁰ Pointikid-tikid do kosuabon om sosodopon om mositi’ no do papatahak iyolo’ do porsombahan do sorobon do hiri’d pananaraban do porsombahan do miontok di nokotulis do hiri’d Tourat di pinatahak do TUHAN dot id tulun dot Israil. ⁴¹ Om monguhup nopo di Sadok it Imam diri, om i piro-piro imam do suwai, om i Himan om i Yodutun om i tulun do suwai di pinili’ do sumiliu’d modsisinding dot id TUHAN do pasal di kosianan dau di mompus-ompus. ⁴² Om i Himan nogi’ om i Yodutun o nopili’ do mongilo-ilo di torumpit om i simbal om i tuunion do suwai do pounion do tontok do sindingon i sinding do pamarayou. Om iri no i tulun do mantad id pinuruan do sompiiyon di Yodutun o sinuhu’ do madtamong di wawayaan. ⁴³ Om uli’ ngai’ noddi i tulun. Om i Daud nga’ minuli’ nogi’ do minongoi solowot di sompiiyon dau.

¹ Tontok nopoddi om poingiyon no i Raja’ Daud do hiri’d walai dau di don raja’. Insan tadau, om lohowo’ no dau i Nabi Natan. Om boros ka dau, ’’Antangai pogi’, nga’ poingiyon oku no iyoho’ do hiti’d walai di kayu sedar do Libanon do winonsoi nga’ iri nopo Kaban do Tumpongo’d TUHAN om hilo’ kasai’ id kiim!’’ ka. ² Om boros ka di Natan, ’’Wonsoyo’ nopo it osorou nu tu’ uhupan ko id Kinorohingan,’’ ka. ³ Nga’ totuong iddi do minoro-boros o Kinorohingan dot id di Natan. ⁴ Boros ka dau, ’’Ngoyo’ sunudai i Daud, i susuhuon ku do poingkaa, ’Okon i’ ko’ iya’ o momonsoi do walai dot iyonon ku, ⁵ tu’ mantad poddi posoliwano’ ku i’ i tulun dot Israil do mantad hilo’d Masir om gisom do baino’ om a’ oku i’ insan koiyon dot id walai; poingiyon kasai’ oku i’ dot id kiim do mombo-hombo. ⁶ Om solinaid ku do mombo-hombo do moyo-woyo’ di tulun dot Israil om a’ oku i’ insan ponguhot di piro-piro o boyoon di pinili’ ku ondung nokuro tu’ a’ iyolo’ minomonsoi do walai do kayu sedar do Libanon o wonsoyon do tiyonon ku,’ kanto. ⁷ Iyo nopoddi, oi Natan, om sunudan no i Daud, i susuhuon ku, dot iyoho’ no, i TUHAN it Agayo Kuasa’ o momoros dot id dau do poingkaa, ’Nongoi ku iya’ do mantad id karaja’ nu do momogompi’d dumba’ do hilo’d talun om siniliu ku iya’ do raja’ do tulun dot Israil, i tulun ku. ⁸ Om honggo nopo nongoi nu nga’ winoyo’ ku i’ iya’, om nala’ ku o koinsanai di pisangod nu do tontok di minongoi ko sangod. Om silihon ku’ndo iya’ do miagal di piro-piro o boyoon dit angagayo tu’ angabantug do hiti’d pomogunan. ⁹ - ¹⁰ Om nopili’ ku no ot iso’ o kinoiyonon do patahakon ku dot Israil, i tulun ku do pomogun-mogunan om nokoiyon ku no iyolo’ do hilo’, i kinoiyonon dit aiso’ o koinggorit. Om mantad poddi kosuang iyolo’ do pomogunan diti om di pinomilian ku iyolo’ do boyoon om songod-songodon no iyolo’ do tulun dit ongorongit, nga’ a’ nondo osiliu kawagu o miagal diri. Mamatos oku no do mangala’ do koinsanai do pisangod nu om manahak diya’ do sinakagon. ¹¹ Apatai ko nopondo om olobong ko dot id sugku’ di komolohingan nu, om silihon ku’ndo do raja’ o tiso’ di tangaanak nu’d kusai, om pogiroton ku o pomorintaan dau. ¹² Om iyau nondo i momonsoi do walai dot iyonon ku, om pogiroton ku indo o pomorintaan dau do gisom dot alaid. ¹³ Om iyoho’ nondo o tapa’ dau om iyau o tanak ku. Om a’ oku indo tumingkod do sumokodung dau do miagal di winonsoi ku dot id di Saul. Om noidu’ ku no i Saul do raja’ om osiliu ko indo iya’ do raja’. ¹⁴ Om silihon ku’ndo i tanak nu do mongilo-ilo di walai ku om i pomorintaan ku do gisom dot alaid. Om a’ otingkod do momorinta’ o sinakagon dau do gisom do mogisolusuk-lusuk,’ kanto,’’ ka dau. ¹⁵ Om posunudo’ ngai’ nopo di Natan dot id di Daud o koinsanai di pinosunud do Kinorohingan dot id dau. ¹⁶ Om ongoi noddi i Raja’ Daud do hiri’d Kiim do TUHAN, om irikau no iyau, om sambayang nod poingkaa, ’’A’ oku i’ om i sompiiyon ku osorupai do kaanu di barakat di pinatahak nu dot id doho’, oi TUHAN, i Kinorohingan. ¹⁷ Nga’ ogumu’ po ko’ iri o wonsoyon nu dot id doho’ do baino’; tu’ nakabatos ko no do pasal di sinakagon ku dot id dosunsudan. Om paagalon oku po diya’ di tulun dit asawat o pangkat, oi TUHAN i Kinorohingan. ¹⁸ Nunu po o milo ku’d poboroson dot id diya’! Tu’ talib id koilo ko doho’, nga’ pusohon oku i’ diya’, i susuhuon nu. ¹⁹ Diya’ id korohian om iya’ o nokosorou mantad do momonsoi do miagal diti dot id doho’ om popointalang dot id doho’ do kobontugo’ ku do koimbagu. ²⁰ Oi TUHAN, aiso’ no o koiyo diya’; om nokoilo mantad no iyahai dot iya’ no o Kinorohingan. ²¹ Om aiso’ i’ o bansa’d suwai do miagal do bansa’ dot Israil do hiti’d pomogunan tu’ pinoidu’ nu do mantad id ponguripanan om siniliu nu do tulun di songonuon nu. Om iri nopo winonsoi nu dot angagayo om i kongoimayaan kopio dot id diyolo’ om pinopotongkop do kobontugo’ do ngaran nu do hiti’d pomogunan. Pinosoliwan nu i tulun nu do mantad hilo’d Masir om nuyung nu i bansa’d suwai di mangantob daa di tulun nu do tontok di ruminikot i tulun nu. ²² Om siniliu nu o bansa’ dot Israil do tulun nu do gisom dot alaid om iya’ no, oi TUHAN, i nosiliu do Kinorohingan diyolo’. ²³ Om baino’ nopodti, oi TUHAN i Kinorohingan, om bayaanon no kasai’ i batos nu do pasal doho’ om i sinakagon ku, om wonsoyon no i pinoboros nu do wonsoyon nu. ²⁴ Om abantug nondo o ngaran nu, om mompus-ompus nopondo o tulun do momoros do poingkaa, ’Iri no TUHAN dit Agayo Kuasa’ o Kinorohingan dot Israil,’ ka. Om iya’ no o poposiliu kasai’ do sinakagon ku do raja’ do bansa’ diti do gisom dot alaid. ²⁵ Katama’ oku id sumambayang do miagal diti, oi Kinorohingan ku, tu’ nokointalang ngai’ nu no iti dot id doho’, i susuhuon nu, om nosunudan oku no diya’ do silihon nu do raja’ i sinakagon ku. ²⁶ Iya’ noo oi TUHAN, o Kinorohingan, om pinoboros nu o batos dit osonong kopio’dti dot id doho’. ²⁷ Om pokionuon ku do barakatan nu i sinakagon ku om kopuriman kasai’ i’ iyolo’ do kosianan nu. Iya’ no, oi TUHAN, i minamarakat di tulun nu om abarakatan nondo iyolo’ do gisom dot alaid,’’ ka dau.

¹ Om a’ po alaid do mantad diri om ngoyo’ no kawagu di Raja’ Daud songodo’ i tulun do Pilistin, om kaala’ i’ dau iyolo’. Om pinoidu’ dau do mantad id pomorintaan diyolo’ i bandar do Gat om i kokompungan do hiri’d posorili’. ² Om naala’ nogi’ dau i tulun do Muab. Om mambayar diri iyolo’ do sukai dot id dau. ³ Om ngoyo’ po kawagu di Daud songodo’ i Hadadisir, i raja’ do pomogunan do Soba, it id suang do pomogunan do Siria, it id toning do watas do Hamat, tu’ minumbal daa i Hadadisir do momorinta’ kawagu di watas dot id somok di tudan do Bawang dot Iprat. ⁴ Om naahau di Daud o soribu di korita’-kuda’, om turu’ noribu o soudor do songinsakai’d kuda’, om duwo nohopod noribu o soudor di Hadadisir di mamanau’d gakod. Om pinotobilang dau o piro-piro o kuda’ do kabagal do mamagayat do hatus o korita’-kuda’ dau di don sumasangod, nga’ iri nopo i suwai om tinipuan ngai’ dau o gakod. ⁵ Om soira’ di pinoporikot daa i tulun do Siria do soudor do mantad hilo’d Damsik do mongoi ponguhup di Raja’ Hadadisir, om ngoyo’ noddi di Daud songodo’ iyolo’ om kapatai no dau o duwo nohopod om duwo noribu o tulun. ⁶ Om pomonsoi noddi i Daud do kiim dot iyonon do soudor do hiri’d watas diyolo’, om id suang diri iyolo’ do pomorintaan di Daud, om mambayar diri iyolo’ do sukai dot id dau. Om honggo nopo i Daud do sumangod nga’ pamanangon kasai’ i’ iyau’d TUHAN. ⁷ Om naahau nogi’ di Daud i kolid do tamas di nigitan di piro-piro o pagawai di Hadadisir om igitai noddi dau do hilo’d Yorusalim. ⁸ Om ogumu’ tomod nogi’ o tambaga’ do nanu dau do mantad hilo’d Tibhat om hilo’d Kun, i kabandaran do porintaon di Hadadisir di gulu po. (Om iri no i tambaga’ddi o pinakai di Suliman do winonsoi’d tangki’, om i torigi dot angagayo, om i piro-piro o pakakas do tambaga’ do hiri’d Walai’d Sasambayangan dot Agayo.) ⁹ Om korongou no di Tou, i raja’ do pomogunan do Hamat, do naala’ no di Daud o koinsanai di soudor di Hadadisir. ¹⁰ Om suhuo’ noddi dau i Yoram, i tanak dau’d kusai, do mongoi poporikot do tabi’ dau dot id di Raja’ Daud om mongoi pongunsikou dau di kinamanangan dau do suminangod di Hadadisir. Om igit no i Yoram dot ogumu’ o tamas, om pirok, om tambaga’ do popuhawangon di Daud. ¹¹ Om patahako’ noddi di Raja’ Daud iri dot id TUHAN do wonsoyon do konunu-nunuan di pakayon do tontok do sumambayang, om i pirok om i tamas nga’ niyo iddi, i nanu dau do mantad id piro-piro o bansa’d tulun di naala’ dau — i bansa’ dot Idom, Muab, Amon, Pilistin om Amalik. ¹² Om kaala’ no di Abisai, (tina’ nopo dau om i Soruya), i tulun dot Idom do hilo’d rantai di roitan do Rantai do Silaon. Om napatai di Abisai o hopod om walu’ noribu o tulun dot Idom. ¹³ Om pomonsoi no iyau do kokiiman do tiyonon do soudor do hilo’d pointongkop dot Idom. Om kosuang no do pomorintaan di Raja’ Daud i tulun dot Idom. Om honggo nopo i Daud do sumangod nga’ pamanangon kasai’ nopo iyau’d TUHAN. ¹⁴ Om iyo noddi i Daud do minomorinta’ do koinsanai dot Israil om antaan-taan kopio dau om owonsoi i’ it otulid om it osonong dot id rayat dau. ¹⁵ - ¹⁷ Iti ngai’ no i pagawai dit angasawat o pangkat do pinili’ di Daud: Boyoon do soudor: i Yoab, i tobpinai di Abisai dot id dotuo Gomponulis do hiri’d walai do raja’: i Yosapat, i tanak di Ahilud Imam: i Sadok, i tanak di Ahitub, om i Ahimilik, i tanak di Abiatar Gomponulis do Pomorinta: i Sausa Boyoon di madtatamong di raja’: i Bonaya i tanak di Yoyada. Iri no tangaanak di Daud do kusai om ongkikaraja’ do karaja’ dit angasawat, dot id porinta.

¹ Om a’ po alaid do mantad diri om kapatai no i Nahas, i raja’ do tulun dot Amon. Om kosiliu nod raja’ i Hanun, i tanak dau. ² Om boros kad i Daud, ’’Mositi’ nod pointalangon ku do mambalut oku di Hanun do miagal di winonsoi di Nahas dot id doho’,’’ ka. Om ponuhu’ no i Daud do tulun do mongoi posunud dot iyau nga’ tumonggoi i’ do tumongob. Om soira’ di nokorikot iyolo’ do hilo’d Amon om di minongoi iyolo’ rapou di Raja’ Hanun, ³ om boros ka di piro-piro o boyoon do tulun dot Amon dot id raja’ diyolo’, ’’Ondos nu daa om mongoi pomusou di tapa’ nu o kinoponuhuan di Daud diti tulun do mongoi posunud do tumonggoi iyau’d tumongob? A’ i’ moti’! Kinoponuhuan nopo moti’ dau diyolo’dti om mongoi ponoluku’ om mongoi pogontong diti pomogunan om aanu indo dau!’’ ka diyolo’. ⁴ Om tangkapo’ noddi di Hanun i tulun di sinuhu’ di Daud diri om bugaro’ no o ganggut diyolo’, om pompodo’ i rasuk diyolo’ do mantad hiri’d guas do poo, om suhuo’ nogiddi do minuli’. ⁵ Om ointingayaman tomod diri iyolo’ do gumuli’ do hiri’d pomogunan diyolo’. Om soira’ di nokorongou i Daud di winonsoi do miagal diri, om posunudai no dau iyolo’ do mundorong do hilo’d Yorikou om hilo-hilo’ nopo do gisom pod kosuni kawagu i ganggut diyolo’. ⁶ Om kopurimanai noddi di Raja’ Hanun om i tulun dot Amon do nosiliu diyolo’ do pisangod i Daud. Om pambayar noddi iyolo’ do tolu nohopod om apat noribu o kilogram do pirok do poniwa’ do korita’-kuda’ di don sumasangod om i papamanau do korita’-kuda’ do mantad hilo’d Misopotamia i ponong id sokid, om mantad hilo’d Maaka om hilo’d Soba, i hilo’d pomogunan do Siria. ⁷ Om rikot no i tolu nohopod om duwo noribu o korita’-kuda’ di don sumasangod di siniwaan diyolo’ om i soudor di raja’ do Maaka om pomukiim no do hilo’d somok do Modiba. Om soliwan ngai’ no i tulun dot Amon do mantad id toinsanan o bandar diyolo’ om sodia’ nod mongoi sangod. ⁸ Om soira’ di nokorongou i Daud di nosiliu do miagal diri om suhuo’ no dau i Yoab om koinsanai di soudor dau do mongoi sangod. ⁹ Om pamanau no do suminoliwan i tulun dot Amon om sodia’ no do sumangod do hiri’d wawayaan dot agayo do bandar do Raba, i bandar diyolo’ dot agayo. Om iri ngai’ no i raja’ di ruminikot do minongoi uhup diyolo’ om minawang do hiri’d talun. ¹⁰ Om kokito’ddi di Yoab do noturungku’ iyau di soudor do pisangod. Om pilio’ noddi dau i soudor dot Israil dit ongokoris kopio om boriso’ no do potimbaba’ di soudor do Siria. ¹¹ Om iri nopo soudor do suwai om pinowoyo’ ngai’ dau di Abisai, i tobpinai dau. Om pinotimbaba’ dau iyolo’ di soudor dot Amon. ¹² Om boros ka di Yoab dot id di Abisai, ’’Ondung okito nu dot aala’ oku di tulun do Siria, om rumikot no do mongoi uhup doho’, om ondung aala’ ko di tulun dot Amon om rumikot oku i’ do mongoi uhup diya’. ¹³ Pogiroton no o ginawo om kumosiou no! Tumotos toko’ nod sumangod do bagi’ di tulun toko’ om i kabandaran do Kinorohingan toko’. Om pologoson nopo dot owonsoi o korohian do TUHAN,’’ ka dau. ¹⁴ Om pamanau no i Yoab om i tulun dau do minongoi sangod, om poggidu’ no i soudor do Siria. ¹⁵ Om soira’ di nokito di tulun dot Amon do mogidu’ i soudor do Siria, om poggidu’ noddi iyolo’ do mantad id di Abisai om suang no di bandar. Om poguliai noddi di Yoab do hilo’d Yorusalim. ¹⁶ Om kopurimanai no di tulun do Siria do naala’ iyolo’ di tulun dot Israil. Om panganu no iyolo’ do soudor do mantad hiri’d watas do ponong id koulayon do mantad id Bawang dot Iprat, do hilo’d pomogunan do Siria, om siliho’ no diyolo’ i Sobak do boyoon di soudor; iyau no i boyoon do soudor di Hadadisir, i raja’ do Soba. ¹⁷ Om soira’ di norongou di Daud iri om timungo’ no dau i soudor dot Israil om soborong no iyolo’ di Bawang do Yordan, om boriso’ no dau iyolo’ do potimbaba’ di tulun do Siria. Om timpuun no iyolo’ do misangod, ¹⁸ om uyungo’ no di tulun dot Israil do pinopoguli’ i tulun do Siria. Om napatai nopo di Daud om i tulun dau om turu’ noribu o tulun do Siria di papamanau do korita’-kuda’ di don sumasangod om apat nohopod noribu o soudor di mamanau’d gakod. Om napatai nogi’ diyolo’ i Sobak, i boyoon di soudor do Siria. ¹⁹ Om soira’ di nopurimanan ngai’ di soudor dit id siriba’ di Hadadisir do naala’ iyolo’ dot Israil, om ponokiulud noddi iyolo’ di Daud om pokiporinta’ no iyolo’ dau. Mantad poddi om a’ noddi insan i tulun do Siria do mongoi uhup di tulun dot Amon.

¹ Om tontok di dongmomiroun o kayu, i maso do koubasanan do raja’ do mongoi sangod, om woyoo’ no di Yoab i soudor om ngoyo’ no diyolo’ solodo’ i pomogunan dot Amon; nga’ i Raja’ Daud nopo om minundorong i’ do hilo’d Yorusalim. Om turungkuo’ no diyolo’ o bandar do Raba, om songodo’ no diyolo’ iri, om raago’ noddi diyolo’. ² Om ngoyo’ noddi di Daud i tupi’ di raja’ do tulun dot Amon om tupio’ no dau. Kawagato’ nopo di tupi’ddi om haro i’ doti’ o tolu nohopod om apat o kilogram. Om haro nogi’ o watu dot olumis dit agayo gatang do poinsokot di tupi’ddi. Om ogumu’ nogi’ o konunu-nunuan do nanu diyolo’ do mantad id bandar diri. ³ Om sansagai ngai’ no dau i tulun do hilo’ do kumaraja’ do mamagaragadi’, om manangkul, om mangapak. Om niyo nogiddi dau i tulun di hiri’d kabandaran dot Amon do suwai. Om guli’ noddi i Daud om koinsanai di soudor dau do hilo’d Yorusalim. ⁴ Om alaid-laid noddi do mantad diri, om pisangod po kawagu iyolo’ di tulun do Pilistin do hilo’d Gisir. Om tontok noddi do pinatai di Sibkai, i mantad hilo’d Husa, o tulun dit agayo kopio koulun do roitan dot i Sipai. Om naala’ iddi i tulun do Pilistin. ⁵ Om haro po kawagu o pinisangadan do suminaap di tulun do Pilistin. Om tontok noddi do pinatai di Ilhanan, i tanak di Yair, i Lahmi, i tobpinai di Guliat, i mantad hilo’d Gat. Randagan nopod tandus dau om irad di salampad di pangawalan do tulun di mangangawol. ⁶ Om haro po kawagu o pinisangadan do hilo’d Gat. Om haro o tulun dot agayo kopio koulun do hilo’ dit onom goduwo o tunturu’ do lapap om palad. Iyau nopo om sinakagon do tulun dit angagayo koulun do mantad di gulu po. ⁷ Om momohingi-hingi nopo iyau di tulun dot Israil. Nga’ napatai i’ iyau di Yonatan, i tanak di Simia, i tanak do tobpinai di Daud. ⁸ Iri nopo tolu tulun di pinatai di Daud om i tulun dau om sinakagon ngai’ nopo do tulun dit angagayo koulun do mantad hilo’d bandar do Gat.

¹ Om orohian diri o rogon do mamagangau do tulun dot Israil om binsuhuo’ noddi dau i Daud do mongintob di tulun. ² Om sunudai no di Daud i Yoab om i piro-piro o pagawai dau do suwai, boros ka dau, ’’Ongoi kou tongkop dot Israil, om homboon ngai’ no dokoyu o watas dot Israil om intobon ngai’ no o tulun. Tu’ orohian oku do koilo ondung piro o kogumuo’ diyolo’,’’ ka. ³ Om boros ka di Yoab, ’’Maha’ daa om piluapon do TUHAN o kogumuo’ do tulun dot Israil dot inghatus kogumu’ ko’ mantad do kogumuo’ diyolo’ do dinondo! Susuhuon ngai’ nu i’ iyolo’, oi Tuan Raja’. Nga’ nokuro’ddi tu’ orohian ko do momonsoi do miagal diti om gisom dot oinsanan nopondo o tulun do mamabo do kootuson do kasalaan diti,’’ ka dau. ⁴ Nga’ sansagai i’ di raja’ i Yoab do mumboyo’ di ponuhuan dau. Om pamanau noddi i Yoab, om hombo no iyau do tuminongkop di pomogunan dot Israil, om aiso’ no ot a’ dau noongoi, om poguliai nogiddi dau do hilo’d Yorusalim. ⁵ Om posunudo’ no dau dot id di Raja’ Daud o ginumu’ di tulun di milo do sumangod. Kogumuo’ nopo om sojuta om hatus o tulun do hilo’d Israil om apat nahatus om turu’ nohopod noribu o tulun do hilo’d Yohuda. ⁶ Nga’ payat nopo do Liwi om Binyamin om a’ i’ di Yoab nongoi intobo’ tu’ a’ i’ iyau kosokodung di pinonuhuan di raja’. ⁷ Om Kinorohingan nga’ a’ nogi’ orohian di winonsoi di Daud, om gowoi poddi om hinukuman dau i tulun dot Israil. ⁸ Om sambayang noddi i Daud dot id Kinorohingan, ’’Agayo no kopio o dusa ku tu’ minomonsoi oku i’ do miagal diti! Ompunai oku no. Tu’ nabasug tomod oku,’’ ka dau. ⁹ Om boros kaddi do TUHAN dot id di Nabi Gad, i ponosihat di Daud, ¹⁰ ’’Ngoyo’ sunudai i Daud dot onuan ku iyau do tolu o pinsimpilian. Om honggo nopo i pilion dau om iri no o wonsoyon ku,’’ ka. ¹¹ Om ongoi no i Gad solowot di Daud om sunudai no dau di nokoboros do TUHAN. Om ponguhot noddi i Gad, ’’Honggo’dti o pilion nu, tu’ mositi’ no do pilion nu o tiso’ diti: ¹² Tolu o toun do mononglous ko’ tolu o tulan do gusa-gusaon ko do soudor do pisangod nu ko’ tolu o tadau do saapon ko’d TUHAN di gayang dau om poporikot iyau do toruol di mogkoroliu do hiti’d pomogunan nu, om monuhu’ di moloikat dau do porikot do kapatayon dot id pointongkop dot Israil? Poboroso’ no do dinondo ondung honggo’ddi o posimbaron ku’d TUHAN?’’ ka dau. ¹³ Om boros kad Daud dot id di Gad, ’’Oborulong oku nopodti! Nga’ mada’ oku id hukuman do tulun. Suwai ko’ pologoson nopo o TUHAN do momohukum doho’, tu’ obinsianan i’ iyau,’’ ka dau. ¹⁴ Om porikatai nod TUHAN do toruol do mogkoroliu i tulun dot Israil. Om turu’ diri nohopod noribu o tulun do napatai. ¹⁵ Om ponuhu’ no daa’ddi o TUHAN do moloikat do mongoi pamaraag do Yorusalim, nga’ wolihai iddi dau o tosorou dau. Om boros ka dau dot id moloikat diri, ’’Tingkod! Ula’ pori!’’ ka. Om tontok nopoddi om poingkakat no i moloikat do hiri’d toning di pamagamasan do gandum di Arauna, i tulun do Yobus. ¹⁶ Om kokito di Daud i moloikat do poingkakat do hilo’d mawo-dawo do kiinigit do gayang, om posodia’ no daa do mamaraag do Yorusalim. Om otud noddi do hiri’d tana’ i Daud om koinsanai di boyoon di tulun do kipinakai ngai’ do karung do tanda’ do monosol. ¹⁷ Om sambayang no i Daud do poingkaa, ’’Oi Kinorohingan, iyoho’ no i nakasala’. Iyoho’ no i minonuhu’ do mongintob do tulun. Nunu noddi o kasalaan diti tulun dit aiso’ no o pokukurayan diti? Oi TUHAN, i Kinorohingan ku, hukumai oku nopo om i sompiiyon ku, nga’ kada’ nogi’ kuroi-kuroyo’ iti tulun nu,’’ ka. ¹⁸ Om sunudai noddi di moloikat do TUHAN i Gad do monuhu’ di Daud do momonsoi do pananaraban do porsombahan dot id TUHAN do hiri’d pamagamasan do gandum di Arauna. ¹⁹ Om pamanau no i Daud do minumboyo’ di pinonuhuan do TUHAN do momonsoi di pinoboros di Gad dot id dau. ²⁰ Om momogomos daa di gandum i Arauna om it apat o tanak dau’d kusai do hiri’d pamagamasan. Nga’ soira’ di nokito diyolo’ i moloikat om panangkus nopo it apat o tangaanak di Arauna do minongoi lisok. ²¹ Om kokito po di Arauna i Raja’ Daud do mimbobontol do hiri, om tongkiadai nopo dau i pamagamasan om otud no do hiri’d tana’. ²² Om boros ka di Daud dot id dau, ’’Padagango’ daa dot id doho’ iti pamagamasan nu’d gandum om kopoingkakat oku id pananaraban do porsombahan do don TUHAN do hiti, om ontingkod i’ iti toruol do mogkoroliu. Patahakon ngai’ ku i’ diya’ o gatang,’’ ka dau. ²³ Boros ka di Arauna, ’’Onuo’ nopoti, oi Tuan Raja’, om wonsoyon nopo i korohian nu do momonsoi. Hati ngai’ i’ iti sapi’ do maan do porsombahan do sorobon dot id pananaraban do porsombahan, om hati iti papan do pamagamasan do maan do pogudung, om hati iti gandum do maan do porsombahan. Insanan ku nopoti do papatahak diya’, om a’ i’ minog do bolion,’’ ka dau. ²⁴ Nga’ boros ka di raja’ do suminimbar, ’’Amu’, bayaran ngai’ ku i’ i gatang. A’ oku i’ papatahak do porsombahan dot id TUHAN do nunu nopo i diya’d songonuon, om it a’ ku oboli,’’ ka dau. ²⁵ Om bayarai no di Daud i Arauna dot onom nahatus o tusin do tamas do pinomoli di pamagamasan do gandum diri. ²⁶ Om pomonsoi noddi i Daud do pananaraban do porsombahan do don TUHAN do hiri, om papatahak no iyau do porsombahan do sorobon om porsombahan do piombolutan. Om sambayang noddi iyau, om simbaro’ nod TUHAN i sambayang dau do mikuwo’d pinoporikot do tapui do mantad hilo’d surga do minonorob di porsombahan do hiri’d pananaraban do porsombahan diri. ²⁷ Om suhuo’ noddi do TUHAN i moloikat do paangkap di gayang dau, om umboyoo’ noddi di moloikat. ²⁸ Om soira’ di nokito di Daud iri om koilaai no dau do nosimbar nod TUHAN i sambayang dau, do tontok di pinapatahak iyau di porsombahan do hiri’d pananaraban do porsombahan dit id pamagamasan do gandum di Arauna. ²⁹ Om tontok nopoddi om hilo’ pod kinoiyonon do sumambayang di hilo’d Gibion i Kiim do TUHAN, i winonsoi di Musa do hilo’d tana’ do kowotuan, om iri nogi’ i pananaraban do porsombahan nga’ hilo’ po. ³⁰ Nga’ a’ i’ i Daud minongoi sambayang dot id Kinorohingan do hilo’ tu’ ooris iyau di gayang di moloikat do TUHAN.

¹ Om boros kaddi di Daud, ’’Hiti no o pamansayan di Walai’d TUHAN, i Kinorohingan. Om iti no o pananaraban do porsombahan diti o pananaraban di tulun dot Israil do porsombahan di sorobon do patahakon dot id TUHAN,’’ ka dau. ² Om suhuo’ no di Raja’ Daud do tumimung o koinsanai di tulun do bansa’d suwai i poingiyon do hiri’d pomogunan dot Israil. Om suhuo’ no dau iyolo’ do kumaraja’. Om wookon nopo diyolo’ om pinoposodia’ do watu do pomonsoi di Walai’d Sasambayangan dot Agayo. ³ Om minonimung iyau do basi’ dot ogumu’ kopio do wonsoyon do lantak om tontolingo di wawayaan dot agayo di walai’ddi. Om minonimung nogi’ iyau do tambaga’ dot ogumu’ kopio gisom dot aiso’ no o milo do monimbang do kawagato’. ⁴ Om minokianu nogi’ iyau di tulun do Tirus om tulun do Sidon dot ogumu’ o kayu sedar do Libanon. ⁵ Winonsoi pogi’ dau o miagal diri nga’ poingkaa ot osorou dau, ’’Iri nopo Walai’d Sasambayangan dot Agayo do wonsoyon di Suliman, i tanak ku, om mositi’ no dot olumis kopio om abantug do pointongkop diti pomogunan. Nga’ omulok po iyau om okuri’ po o nopinsingilaan, om mositi’ no dot iyoho’ o posodia’ ngai’ diti pakakas,’’ ka. Om ogumu’ no o nokosodia’ di Daud do pakakas dit a’ po iyau napatai. ⁶ Om lohowo’ no dau i Suliman, i tanak dau om suhuo’ no dau do momonsoi di Walai’d Sasambayangan dot Agayo do don TUHAN, i Kinorohingan di tukuon do tulun dot Israil. ⁷ Om boros ka di Daud dot id dau, ’’Ondu’, orohian oku daa do momonsoi do Walai’d Sasambayangan dot Agayo do pomusou’d TUHAN i Kinorohingan ku. ⁸ Nga’ sinunudan oku’d TUHAN dot adala’ kopio o tulun do napatai ku om asaru’ kopio oku do minongoi sangod. Gowoi poddi om mada’ o TUHAN dot iyoho’ o momonsoi di Walai’d Sasambayangan dot Agayo. ⁹ Nga’ minamatos i’ ma iyau dot id doho’ do poingkaa, ’Haro’ndo o tanak nu do momorinta’ dot id suang do kosimbayanan, tu’ tulungon ku’ndo iyau gisom dot aiso’ nondo o pisangadan. Om ngaran nopondo dau om i Suliman tu’ tontok no di pomorintaan dau dot onuan ku do kosimbayanan ot Israil om aiso’ o kagangau. ¹⁰ Om iyau no i momonsoi do Walai ku. Om osiliu nondo iyau do tanak ku, om osiliu oku do tapa’ dau. Om momorinta’ kasai’ nopondo dot Israil i sinakagon dau do gisom dot alaid,’ ka dau,’’ ka di Daud. ¹¹ Om boros ka kawagu di Daud, ’’Om maha’ daa om monguhup kasai’ diya’ o TUHAN, i Kinorohingan nu, oi ondu’. Om maha’ daa om owonsoi kopio nu i Walai’d Sasambayangan dot Agayo do miontok di pinabatos dau. ¹² Om maha’ daa om onuan ko’d TUHAN, i Kinorohingan nu do pomusarahan dot atarom om toilaan om milo ko i’ do momorinta’ dot Israil do miontok di Tourat dau. ¹³ Ondung umboyoon ngai’ nu it oturan do pinatahak do TUHAN dot id di Musa do bagi’ dot Israil, om koundar ko no. Pokoiso-isoon no om pogiroton no o ginawo om kada’ poddosi do tumimbaba’ do nunu nopo. ¹⁴ Om iri no i Walai’d Sasambayangan dot Agayo om tuminotos oku no do monimung, gisom do nokotimung oku do tolu noribu om apat nahatus o tan do tamas om lobi ko’ tolu nohopod om apat noribu o tan do pirok do maan do pomonsoi’ddi. Om suwai no ko’ mantad diri om a’ i’ ointob-intob i nokosodia’ ku do tambaga’ om basi’. Om haro no o nokosodia’ ku do kayu om watu, nga’ mongoi ko po mando panganu kawagu do pomoruhang diri. ¹⁵ Ogumu’ no o tulun nu do momonsoi do karaja’ddi. Haro no o tulun do kumaraja’ do hiti’d pamabakan do watu, om haro o tukang do suwai di milo do ¹⁶ monukang do tamas, om pirok, om tambaga’ om basi’. Om timpuunan no i karaja’ddi dot oruhai, om maha’ daa om uhupan ko’d TUHAN,’’ ka dau. ¹⁷ Om suhuo’ no di Daud o toinsanan di boyoon dot Israil do muhup di Suliman. ¹⁸ Om boros ka dau, ’’Nuhupan ko id TUHAN, i Kinorohingan nu, gisom do haro o kosimbayanan om aiso’ o kagangau. Tu’ pinologos oku dau do minangala’ do koinsanai do tulun di poingiyon mantad dot id pomogunan diti, om baino’ noddi om id siriba’ no iyolo’ do kuasa’ nu om id siriba’ do kuasa’d TUHAN. ¹⁹ Iyo nopoddi om sambayang no dot id TUHAN, i Kinorohingan nu do mikuwo’d aayi-ayi’ o ginawo nu om aayi-ayi’ o pomusorou nu. Timpuun nod mamaal di Walai’d Sasambayangan dot Agayo om kosuang nu i’ do hiri i Kaban do Tumpongo’d TUHAN om koinsanai di pakakas do suwai di pakayon do sumambayang dot id dau,’’ ka dau.

¹ Om soira’ di molohing noddi kopio i Daud om siliho’ no dau do raja’ dot Israil i Suliman, i tanak dau. ² Om timungo’ no di Raja’ Daud o koinsanai di boyoon do tulun dot Israil om koinsanai dit imam om i tulun do Liwi. ³ Om intobo’ no dau o koinsanai di tongokusai do tulun do Liwi di kiumur do tolu nohopod o toun om it otuo ko’ iri. Om kogumuo’ nopo dot oinsanan om tolu nohopod om walu’ noribu o tulun. ⁴ Om suhuo’ no di raja’ o duwo nohopod om apat noribu o tulun do mongilo-ilo di karaja’ do hiri’d Walai’d Sasambayangan dot Agayo, om onom noribu o tulun di mangangatur om momimisara’, ⁵ om apat noribu o tulun do madtatamong, om apat noribu o tulun do mamarayou’d TUHAN mikuwo’d popouni do tuunion di pinatahak di raja’. ⁶ Om bohogio’ no di Daud i tulun do Liwi do tolu o bohogian do tumanud di pinuruan do sompiiyon diyolo’: pinuruan do sompiiyon di Girson, om pinuruan do sompiiyon di Kohat om pinuruan do sompiiyon di Morari. ⁷ I Girson nopo om kianak do duwo o kusai: i Ladan om i Simoi. ⁸ I Ladan no om kianak do tolu o kusai: i Yohiol, i Sitim om i Yoil. ⁹ Om iyolo’ no i boyoon di pinuruan do sompiiyon di suminolusuk di Ladan. (I Silomit nopo, om i Hasiol om i Haran nga’ tanak di Simoi do kusai). ¹⁰ - ¹¹ I Simoi nopo om kianak dot apat o kusai: i Yahat, i Sisa, i Yius om i Boria. Iti nopo ngaran diti om pinoirus do tumur diyolo’. I Yius nopo di Boria om a’ i’ ogumu’ no o sinakagon diyolo’ om iso’ noddi o pinuruan do sompiiyon diyolo’. ¹² I Kohat nopo om kianak dot apat o kusai: i Amram, i Yisar, i Hibron om i Usiol. ¹³ I Amram nopo, i tanak dau dot id dotuo, om tapa’ di Harun om i Musa. (I Harun nopo om i sinakagon dau om tinantu’ no mantad do mongilo-ilo di pakakas do pakayon do sumambayang do gisom dot alaid, om modtutud do kominyan dot id TUHAN, om mogobi-obi’ do TUHAN, om mamarakat di tulun dot id suang do ngaran do TUHAN. ¹⁴ Nga’ iri nopo tangaanak di Musa do kusai, i Musa i susuhuon do Kinorohingan diri, om pinohompit i’ di payat do Liwi). ¹⁵ I Musa nopo om kianak do duwo o kusai: i Girsom om i Iliosor. ¹⁶ Iri nopo boyoon dot id pogialatan di tangaanak di Girsom om i Sibuil. ¹⁷ Iso’ no i Rihabia o tanak di Iliosor do kusai, nga’ i Rihabia nopo om ogumu’ i’ o tanak. ¹⁸ I Yisar noo, i tanak di Kohat do koduwo, om kianak do kusai dot i Silomit o ngaran. Om iyau no i boyoon di pinuruan do sompiiyon dau. ¹⁹ I Hibron noo, i tanak di Kohat do kotolu, om kianak dot apat o kusai: i Yoria, i Amaria, i Yahasiol om i Yikamiam. ²⁰ I Usiol noo, i tanak di Kohat do kaapat om kianak do duwo o kusai: i Mika om i Yisia. Om i Mika no o nosiliu do boyoon di pinuruan do sompiiyon dau. ²¹ I Morari nopo om kianak do duwo o kusai: i Mali om i Musi. I Mali nga’ duwo i’ o tanak do kusai: i Iliasar om i Kis. ²² Nga’ aiso’ i’ o tanak di Iliasar do kusai do gisom do kinapatayo’ dau; tongoondu’ ngai’ nopo o tanak dau. Om kowino’ no i tangaanak di Iliasar do tondu’ di pinsan diyolo’, iri no i tangaanak di Kis. ²³ I Musi nopo, i tanak di Morari do koduwo om kianak do tolu o kusai: i Mali, i Idir om i Yirimot. ²⁴ Om iri ngai’ no o sinakagon di Liwi do tumanud do pinuruan do sompiiyon om sompiiyon diyolo’, om nokotulis ngai’ nopo o ngaran diyolo’. Om haro ngai’ nopo o karaja’ di sinakagon dau di duwo nohopod o toun do tumur ko’ it otuo ko’ iri do hiri’d Walai’d Sasambayangan dot Agayo. ²⁵ Om boros ka di Daud, ’’Noonuan nod TUHAN, i Kinorohingan dot Israil, do kosimbayanan i tulun dau, om iyau nondo nga’ poingiyon kasai’ no do hiti’d Yorusalim do gisom dot alaid. ²⁶ Om a’ noddi minog do pisaan-saan di tulun do Liwi i Kiim do TUHAN om i piro-piro o pakakas do pakayon do sumambayang,’’ ka. ²⁷ Om tumanud nopo di pinonuhuan di Daud dit id tohuri no om potulison ngai’ nopo do mongoi karaja’ i tulun do Liwi dit orikot o duwo nohopod o toun do tumur, ²⁸ om nonuan iyolo’ do karaja’ diti: monguhup di piro-piro ot imam di suminolusuk di Harun do mongilo-ilo di kowoyo-woyoo’ do sumambayang do hiri’d Walai’d Sasambayangan dot Agayo, om miontong do koinsanai di natad om i bilik, om popoopi’ di konunu-nunuan di nokotobilang do maan do don TUHAN om a’ indo iri ososomu’. ²⁹ Om mongilo-ilo di roti do patahakon dot id Kinorohingan, om i tapung di maan do porsombahan dot id TUHAN, om i roti dit onipis dit a’ rinalatan do pangambang, om i porsombahan di linugu, om i tapung di rinalatan do tumau do saitun, om monimbang om magadang di porsombahan di hiri’d Walai’d Sasambayangan dot Agayo; ³⁰ om modsinding do mamarayou’d TUHAN do monikid kosuabon om monikid sosodopon, ³¹ om soira-ira’ nopo do monorob do porsombahan dot id TUHAN do tontok do tadau’d Sabat, om Tadau dot Agayo do Tulan do Wagu, om tontok di tadau dot agayo do suwai. Om sinuhu’ i tulun do Liwi do sumambayang dot id TUHAN do pointikid-tikid do maso. ³² Om iyolo’ nogi’ o sinuhu’ do mongilo-ilo om momogompi’ di Kiim do TUHAN om i Walai’d Sasambayangan dot Agayo, om monguhup di koobpinayan diyolo’, om i piro-piro ot imam di suminolusuk di Harun, do tontok do haro o sumambayang do hiri’d Walai’d Sasambayangan dot Agayo.

¹ - ³ I Harun nopo om kianak dot apat o kusai: i Nadab, i Abihu, i Iliasar om i Itamar. Iyo Nadab nopo di Abihu om nokopogulu di tapa’ diyolo’ do minatai, om aiso’ i’ o sinakagon diyolo’. Om i Iliasar po om i Itamar o nosiliu dot imam. Om bohogio’ no di Raja’ Daud i sinakagon di Harun do tumanud di karaja’ diyolo’. Om nuhupan iyau di Sadok, i sinakagon di Iliasar, om i Ahimilik, i sinakagon di Itamar do mamahagi’ diyolo’. Iti ngai’ no o sinompuruan do tulun di kinohompiton di sinakagon di Itamar. ⁴ Iri nopo sinakagon di Iliasar om binahagi’ do hopod om onom o sinompuruan, om iri no i sinakagon di Itamar om binahagi’ do walu’ o sinompuruan; niyo pogiddi nga’ poinggumu-gumu’ o tongokusai do nosiliu’d boyoon do sompiiyon di sinakagon di Iliasar. ⁵ Id pogialatan nopo di sinakagon di Iliasar om i Itamar om haro o piro-piro o pagawai do Walai’d Sasambayangan dot Agayo om boyoon do tugama’, om ralan nopoddi do minamahagi’ do karaja’ diyolo’ om numaan undio’. ⁶ Om minogisowoli-woli’ddi do minongundi’ i sinakagon di Iliasar om i sinakagon di Itamar. Om tuliso’ noddi di Somaya, i tanak di Nitaniil, o ngaran diyolo’. I Somaya nopo om tulun do Liwi om gomponulis iyau. Om suminiliu nopo do sasi’ om i raja’ om i piro-piro o pagawai dau, om i Sadok it Imam diri, om i Ahimilik, i tanak di Abiatar, om koinsanai di boyoon di sompiiyon dot imam om i piro-piro o boyoon do piro-piro o sompiiyon do tulun do Liwi. ⁷ - ¹⁸ Om iti ngai’ no i duwo nohopod om apat o sinompuruan do tulun do tumanud di kinoirus-iruso’ do minongundi’: 1. i Yoyarib, 2. i Yodaya, 3. i Harim, 4. i Siorim, 5. i Malkia, 6. i Miyamin, 7. i Hakos, 8. i Abia, 9. i Yosua, 10. i Sikania, 11. i Iliasib, 12. i Yakim, 13. i Hupa, 14. i Yisibiab, 15. i Bilga, 16. i Imor, 17. i Hisir, 18. i Hapisos, 19. i Pitaya, 20. i Yohoskiol, 21. i Yakin, 22. i Gamul, 23. i Dolaya, 24. i Maasiya. ¹⁹ Iri ngai’ no i tulun di pinotulis o ngaran do tumanud di karaja’ diyolo’. Om suang no iyolo’ di walai’d Sasambayangan dot Agayo om wonsoyo’ no diyolo’ i karaja’ diyolo’ do tontok do sumambayang di natantu’ mantad di Harun, i taki-aki diyolo’ do tumanud di pinonuhuan do TUHAN, i Kinorohingan dot Israil. ²⁰ Iti ngai’ no o boyoon di sompiiyon do sinakagon di Liwi do suwai: I Yodaya, i sinakagon di Subail, i suminolusuk di Amram; ²¹ I Yisia, i sinakagon di Rihabia; ²² I Yahat, i sinakagon di Silomit, i suminolusuk di Yisar; ²³ I Yoria, i Amaria, i Yahasiol om i Yokamiam, i tangaanak ngai’ di Hibron; do poingirus do tumur diyolo’: ²⁴ I Samir, i sinakagon di Mika, i suminolusuk di Usiol; ²⁵ I Sakaria, i sinakagon di Yisia, i suminolusuk di Usiol, i tobpinai di Mika; ²⁶ I Mali, i Musi om i Yaasia, i sinakagon di Morari. ²⁷ I Yaasia, i kianak do tolu o kusai: i Soham, i Sakur om i Hibri. ²⁸ - ²⁹ I Mali nopo om kianak do duwo o kusai: i Iliasar om i Kis. I Iliasar nopo om aiso’ i’ o tanak do kusai nga’ i Kis nopo om kianak i’ dot iso’ o kusai, dot i Yiramiil o ngaran. ³⁰ I Musi nopo om kianak do tolu o kusai: i Mali, i Idir om i Yirimot. Iti ngai’ no o sompiiyon dot id suang do payat di Liwi. ³¹ Om tuminanud iyolo’ di winonsoi di piro-piro o tobpinai diyolo’ di gulu po, iri no i piro-piro ot imam di suminolusuk di Harun. Tu’ pongilo nopo diyolo’ do karaja’ diyolo’ om undion di boyoon do pointikid-tikid do sompiiyon om it iso’ di tadi’ dau ondung nunu o diyolo’d karaja’. Om sasi’ nopo nga’ i Raja’ Daud, i Sadok, i Ahimilik, i piro-piro o boyoon do sompiiyon dot imam, om i piro-piro o boyoon do tulun do Liwi.

¹ Om pilio’ no di Raja’ Daud om i piro-piro o boyoon do tulun do Liwi o pinuruan do sompiiyon diti, do momoyo’ do tontok do sumambayang: i Asap, i Himan, om i Yodutun. Om iyolo’ ngai’ no i popinsunud do boros do Kinorohingan do mikuwo’d ompoton do kecapi om gambus om simbal. Iti no o dopitar do ngaran do tulun di nopili’ do momoyo’ do tontok do sumambayang, i woyoon do pointikid-tikid do sinompuruan diyolo’: ² It apat o tanak di Asap do kusai: i Sakur, i Yusup, i Nitania om i Asarila. Om i Asap no o boyoon diyolo’, tu’ popolombus do boros do Kinorohingan do soira’ nopo do monuhu’ i raja’. ³ It onom o tanak di Yodutun do kusai: i Godalia, i Sori, i Yosaya, i Simoi, i Hasabia om i Matisa. Om pinopolombus iyolo’ do boros do Kinorohingan do tumanud dit ituduk di tapa’ diyolo’, om mikuwo dot ompoton do kecapi, om sinding do pamarayou om pongunsikou’d TUHAN. ⁴ I hopod om apat o tanak di Himan do kusai: i Bukia, i Matania, i Usiol, i Sibuil, i Yirimot, i Hanania, i Hanani, i Iliata, i Gidalti, i Ramamti-Isir, i Yosbikasa, i Maloti, i Hotir om i Mahasiot. ⁵ I Himan nopo om nabi di raja’. Pinatahak do Kinorohingan dot id di Himan iti hopod om apat o tanak do kusai om tolu o tanak do tondu’ do miagal di nakabatos do TUHAN, tu’ suahon dau i Himan. ⁶ Popouni ngai’ nopo do simbal om kecapi om gambus i tangaanak di Himan do tumanud dit ituduk di tapa’ diyolo’, do mongompot di sambayang do hiri’d Walai’d Sasambayangan dot Agayo. Om i Asap noo, om i Yodutun, om i Himan, om pisunudan di raja’ di ponuhuan dau. ⁷ Iti nopo duwo nohopod om apat o tanak do tongokusai diyolo’dti om nongosompipi’ no i tulun dit ongoilo, om iri no tulun do Liwi di koobpinayan diyolo’ om ongoilo kopio do popouni do tuunion. Oinsanan nopo om duwo nahatus om walu’ nohopod om walu’ o tulun. ⁸ Om ralan nopo diyolo’ do minongilo ondung nunu o diyolo’d buruon, om maan diyolo’ undio’ — dot id pogialatan dit ongomulok po om i molohing no, om it ongoilo no om i minsingilo nogi’. ⁹ - ³¹ Iri nopo duwo nahatus om walu’ nohopod om walu’ o tulun diri om binahagi’ do tumanud do sompiiyon dot id duwo nohopod om apat o sinompuruan do sorohopod-hopod om duwo o tulun dot iso’ o sinompuruan, om kiboyoon nogi’ o pointikid-tikid do sinompuruan. Om iti no o ngaran diyolo’ do pinoirus do tumanud di kinoirus-iruso’ do minongundi’: 1. i Yusup, i mantad id sompiiyon di Asap; 2. i Gadalia; 3. i Sakur; 4. i Yisri; 5. i Nitania; 6. i Bukia; 7. i Yisarila; 8. i Yosaya; 9. i Matania; 10. i Simoi; 11. i Asariil; 12. i Hasabia; 13. i Subail; 14. i Matisa; 15. i Yirimot; 16. i Hanania; 17. i Yosbikasa; 18. i Hanani; 19 i Maloti; 20. i Iliata; 21. i Hotir; 22. i Gidalti; 23. i Mahasiot; 24. i Romamti-Isir.

¹ Iti no o karaja’ di tulun do Liwi di madtatamong di Walai’d Sasambayangan dot Agayo. Mantad nopo dot id sompiiyon di Kora om i Misilimia i tanak di Kori, i mantad id sompiiyon di Ibiasap. ² I Misilimia nopo om kianak do turu’ o kusai. Om iti no o ngaran diyolo’ do pinoirus di tumur diyolo’: i Sakaria, i Yidail, i Sobaya, i Yatniol, ³ i Ilam, i Yohanan om i Ilyoinai. ⁴ I Obid Idom no om pinuhawangan do Kinorohingan do walu’ o tanak do kusai. Om iti no o ngaran diyolo’ do pinoirus di tumur diyolo’: i Somaya, i Yosabad, i Yoa, i Sakar, i Nitaniil, ⁵ i Amiol, i Isakar om i Piulitai. ⁶ - ⁷ I Somaya nopo, i tanak di Obid Idom dot id dotuo om kianak dot onom o kusai: i Otni, i Ripail, i Obid, i Ilsabad, i Ilihu om i Simakia. Om iyolo’ ngai’ nopodti om tulun di pusohon tu’ kitoilaan ngai’ nopo iyolo’ dot id suang do pinuruan do sompiiyon diyolo’, om okon-okon po om i Ilihu om i Simakia. ⁸ Id suang nopo do sompiiyon di Obid Idom om haro ot onom nohopod om duwo o tulun dit oilo kopio do nonuan do karaja’ do madtatamong. ⁹ Om mantad no dot id sompiiyon di Misilimia om haro o hopod om walu’ o tulun dit oilo kopio do nonuan do karaja’ddi. ¹⁰ Om mantad no dot id pinuruan do sompiiyon di Morari om i Hosa o nopili’. I Hosa nopo om kianak dot apat o kusai: i Simri (siniliu iyau di tapa’ dau do boyoon, mulong po dot okon ko’ iyau o tanak do kotuahan), ¹¹ i Hilkia, i Tibalia om i Sakaria. Om oinsanan nopo om hopod om tolu o tulun do mantad id sompiiyon di Hosa do nosiliu do madtatamong di Walai’d Sasambayangan dot Agayo. ¹² I nopo madtatamong di Walai’d Sasambayangan dot Agayo om binahagi’ do piro-piro o sinompuruan do tumanud di sompiiyon diyolo’. Om pinakaraja’ iyolo’ do hiri’d Walai’d Sasambayangan dot Agayo do miagal di tulun do Liwi do suwai. ¹³ Om pointikid-tikid do sompiiyon, dit ogumu’ ko’ it okuri’ nga’ minongundi’ ngai’ nopo do manantu’ ondung honggo i wawayaan do tamangan diyolo’. ¹⁴ Noontok nopo di Solomia om i wawayaan do ponong id koulayon, om noontok no di Sakaria, i tanak di Solomia dit osonong kasai’ nopo o nosihat do poboroson, om i wawayaan ponong id utara. ¹⁵ Om noontok no di Obid Idom om i wawayaan do ponong hiri’d salatan, om iri no tangaanak dau om nakaanu do karaja’ do madtamong di piro-piro o bilik do poopian do konunu-nunuan. ¹⁶ Om karaja’ nopo do naanu di Supim om i Hosa om madtamong di wawayaan do ponong id kotonobon om i wawayaan do roitan do Syalikit, i hiri’d ralan do tumakad. Om mogisowoli-woli nopo iyolo’ do kumaraja’ do tumanud di maso do kumaraja’ di natantu’ mantad. ¹⁷ Iri nopo i ponong hiri’d koulayon, om soroonom-onom kasai’ nopo o tulun do madtamong, om iri no ponong hiri’d utara om apat o tulun, om iri ponong id salatan nga’ apat i’ o tulun do madtamong do monikid tadau. Om iri bilik do poiiyanan do konunu-nunuan nga’ saraapat-apat i’ o tulun do madtamong do monikid tadau: iso’ nopo bilik om tamangan do duwo o tulun. ¹⁸ Om iri no it id toning di tiirikohonon do tulun dot ogumu’ i ponong hiri’d kotonobon, om apat o tulun do madtamong di ralan dot agayo, om duwo o tulun do madtamong di tiirikohonon do tulun dot ogumu’. ¹⁹ Om iyo noddi o karaja’ di madtatamong do mantad id pinuruan do sompiiyon di Kora om i Morari. ²⁰ Om iri no tulun do Liwi do suwai om nonuan do karaja’ do mongilo-ilo di poopian di pinatahak dot id Kinorohingan om i kousinan do Walai’d Sasambayangan dot Agayo. ²¹ Om i Ladan nopo, i tiso’ di tangaanak di Girson do kusai, om taki-aki do piro-piro o pinuruan do sompiiyon, om kohompit no i sompiiyon di Yohiol, i tanak dau. ²² Om duwo po o tanak di Ladan do kusai, i Sitam om i Yoil, do mongilo-ilo di kousinan do Walai’d Sasambayangan dot Agayo om i poopian do konunu-nunuan. ²³ Om iri nogi’ i sinakagon di Amram, i Yisar, i Hibron om i Usiol nga’ nonuan nogi’ do karaja’. ²⁴ Om nosiliu nopod boyoon do mongilo-ilo do kousinan do Walai’d Sasambayangan dot Agayo om i Sibuil, i mantad id pinuruan do sompiiyon di Girsom, i tanak di Musa. ²⁵ I Sibuil nopo om tanak di Silomit do suminolusuk di Iliosor, i tobpinai di Girsom. I Iliosor nopo om tapa’ di Rihabia, om i Rihabia no om tapa’ di Yosaya, om i Yosaya no om tapa’ di Yoram, om i Yoram no om tapa’ di Sikri, om i Sikri no om tapa’ di Silomit. ²⁶ I Silomit nopo om i sompiiyon dau om mongilo-ilo di porsombahan di patahakon dot id Kinorohingan, di pinatahak di Raja’ Daud, om i piro-piro o boyoon do sompiiyon, om i piro-piro o soudor. ²⁷ Iri nopo porsombahan diri om i wookon di dapu’ di nangaanu diyolo’ dot id pisangadan, om pinatahak diri diyolo’ do maan do koburu-buruon do hiri’d Walai’d Sasambayangan dot Agayo. ²⁸ I Silomit no om i sompiiyon dau o mongilo-ilo do koinsanai di pinatahak do maan do koburu-buruon do hiri’d Walai’d Sasambayangan dot Agayo; om kohompit no i porsombahan di pinaatod di Somuil; om i Raja’ Saul, om i Abnor, i tanak di Nor; om i Yoab, i tanak di Soruya. ²⁹ Id pogialatan nopo di sinakagon di Yisar, om i Kinania no om i tangaanak dau’d kusai o nonuan do karaja’ do mangangatur om momimisara’ dot id pogialatan di tulun dot Israil. ³⁰ Id pogialatan nopo di sinakagon di Hibron, om i Hasabia no, om soribu om turu’ nahatus o koobpinayan do sompiiyon dau o nonuan do karaja’ do mongilo-ilo do pasal di don tugama’ om i dong pomorinta’ do hilo’d Israil do ponong hiri’d kotonobon do mantad id Bawang do Yordan. Om oinsanan nopo iyolo’ do tulun dit ongoilo. ³¹ I Yoria nopo om boyoon di sinakagon di Hibron. Tontok di kaapat nohopod do toun do pomorintaan di Daud, om nokoumbal do minongilo kopio do sinolusukan di sinakagon di Hibron, om koilaai noddi dot iri nopo piro-piro o soudor do gunsiou do mantad id sinakagon diri om poingiyon do hilo’d Yasor, it id watas do Giliad. ³² Om pomili’ noddi i Raja’ Daud do duwo noribu om turu’ nahatus o boyoon do sompiiyon dit ongosiou do mantad id koworisan do sompiiyon di Yoria om suhuo’ no dau iyolo’ do mongilo-ilo do pasal di don tugama’ om dong pomorinta’ do hilo’d Israil, i ponong id koulayon do mantad id Bawang do Yordan, iri no it id watas do Rubin, om Gad om Manasi di ponong id koulayon.

³² I Yonatan nopo, i tamanon di Raja’ Daud, om ponosihat dit oilo kopio om tulun dit ogumu’ o toilaan. Om iyau no om i Yohiol, i tanak di Hakmoni, o nonuan do karaja’ do monuduk di tangaanak di raja’ do tongokusai. ¹ Iti no o dopitar do ngaran di piro-piro o boyoon do sompiiyon, om i boyoon do pinuruan do sompiiyon dot Israil om i piro-piro o pagawai diyolo’ do mangatur di karaja’ do pomorintaan dot Israil. Pointikid-tikid do tulan do pointikid do toun, om iso’ no o sinompuruan do tulun do duwo nohopod om apat noribu o tulun do kogumuo’ do kumaraja’, do woyoon dot iso’ o boyoon do tontok do tulan diri. ² - ³³ Om i Ahitopol nga’ ponosihat nogi’ di raja’, om i Husai noo, i tulun dot Arki om tambalut kopio di raja’. ³⁴ Om soira’ di napatai i Ahitopol, om i Abiatar diri, om i Yoyada, i tanak di Bonaya o nosiliu do ponosihat. Om i Yoab no om boyoon di soudor do don raja’. ¹⁵ Om iti ngai’ no o ngaran di boyoon do kumaraja’ do pointikid do tulan: Tulan do koiso’: i Yasobam i tanak di Sabdiol (iyau nopo om mantad id pinuruan do sompiiyon di Piris, i sombohogian do payat do Yohuda). Tulan do koduwo: i Dodai, i sinakagon di Ahohi (wakil nopo dau om i Miklot). Tulan do kotolu: i Bonaya i tanak di Yoyada it Imam, i boyoon di ’’Sinompuruan do Tolu Nohopod o Soudor’’ (om suminowoli nopo dau do boyoon di sinompuruan diri om i Amisabad, i tanak dau). Tulan do kaapat: i Asail, i tobpinai di Yoab (i Sobaya, i tanak dau o suminowoli dau). Tulan do kolimo: i Samhut, i sinakagon di Yisra. Tulan do koonom: i Ira, i tanak di Ikos, i mantad hilo’d bandar do Tokua. Tulan do koturu’: i Hilis, i sinakagon di Ipraim, i mantad hilo’d bandar do Piloni. Tulan do kawalu’: i Sibkai, i mantad hilo’d bandar do Husa (iyau nopo om mantad id pinuruan do sompiiyon di Sira, i sombohogian do payat do Yohuda). Tulan do kosiam: i Abiosor, i mantad hilo’d bandar dot Anatot, it id watas do Binyamin. Tulan do kohopod: i Maharai, i sinakagon di Sira, i mantad hilo’d bandar do Nitopa. Tulan do kohopod om iso’: i Bonaya, i mantad hilo’d bandar do Piraton, it id watas do payat dot Ipraim. Tulan do kohopod om duwo: i Hildai, i sinakagon di Otniol, i mantad hilo’d bandar do Nitopa. ¹⁶ - ²² Iti ngai’ no o dopitar do ngaran do boyoon do payat do bansa’ dot Israil. Payat, Boyoon: Rubin, i Iliosor, i tanak di Sikri; Simion, i Sopasa, i tanak di Maaka; Liwi, i Hasabia, i tanak di Komuil; Harun, i Sadok; Yohuda, i Ilihu, i tobpinai di Raja’ Daud; Isakar, i Omri, i tanak di Mikail; Sibulon, i Yismaya, i tanak di Obaya; Naptali, i Yirimot, i tanak di Asriol; Ipraim, i Hosia, i tanak di Asasia; Manasi, i Yoil, i tanak di Podaya; Ponong id kotonobon Manasi, i Yido, i tanak di Sakaria; Ponong id koulayon Binyamin, i Yaasiol, i tanak di Abnor; Dan, i Asariil, i tanak di Yiroham. ²³ Om a’ i’ di Raja’ Daud nintob i tulun dit id siriba’ ko’ duwo nohopod o toun do tumur tu’ nakabatos no o TUHAN do silihon dau o tulun dot Israil do miagal do rombituon do hilo’d tawan kogumu’. ²⁴ Om nokotimpuun no daa i Yoab, (tina’ nopo dau om i Soruya) do mongintob do tulun do tontok diri, nga’ a’ i’ dau nopongo do mongintob. Tu’ hinukuman do Kinorohingan o tulun dot Israil dot i pinongintaban diri o kinopomohukuman. Om a’ noddi nokotulis do hiri’d suang do buuk di Raja’ Daud o kogumuon diyolo’. ²⁵ - ³¹ Om iti ngai’ no o dopitar do ngaran do tulun di mongilo-ilo di dapu’ di raja’: Bilik do poopian do hiri’d walai do raja’: i Asmawit, i tanak di Adiol Bilik di poopian di hiri’d soliwan di walai do raja’: i Yonatan, i tanak di Usia Mororobuat do hiri’d dumo: i Isri, i tanak di Kolub Kabun dot anggur: i Simoi, i mantad hilo’d bandar do Rama Poopian dot anggur: i Sabdi, i mantad hilo’d bandar do Sipmi Kabun do saitun om kabun dot ara (di hiri’d guas do konuluhanan di ponong id kotonobon): i Baal Hanan, i mantad hilo’d bandar do Gidiri Poiiyanan do tumau do saitun: i Yoas Baanan do sapi’ do hilo’d Rantai do Saron: i Sitrai, i mantad hilo’d bandar do Saron Baanan do sapi’ do hilo’d tana’ dot apatau: i Sapat, i tanak di Adlai Unta: i Obil, i sinakagon di Ismail Kaladai: i Yodiya, i mantad hilo’d bandar do Mironot Dumba’ om kambing: i Yasis, i tulun do Hagri.

¹ Om suhuo’ ngai’ no di Raja’ Daud i boyoon dot Israil do tumimung do hilo’d Yorusalim. Om timung noddi do hilo’d Yorusalim o koinsanai di boyoon do payat, om i boyoon di mangatur di karaja’ do dong pomorinta’, i boyoon di pinuruan do sompiiyon, om i mongilo-ilo di dapu’ om i tayam-tayam di raja’, om i mongilo-ilo di tangaanak di raja’ — om oinsanan i pagawai di hiri’d walai di raja’ om i soudor dit ongkipangkat, om koinsanai di tulun dit ongkipangkat. ² Om ingkakat no i Daud do hiri’d toguang diyolo’ om boro-boros nod poingkaa, ’’Pokinongou kou no doho’, oi tobpinai-tobpinai ku dit iso-iso’ o bansa’. Alaid oku no daa do sipomonsoi do walai’d poiyanan di Kaban do Tumpongo dit a’ minog do popingwolihon, i poulakan do TUHAN, i Kinorohingan toko’, do gakod dau. Om nokoposodia’ oku no do maan do pamaal di Walai’d Sasambayangan dot Agayo do tiyonon do sumambayang dot id dau, ³ nga’ noduhan oku i’ dau do momonsoi’ddi tu’ ogumu’ kopio o raha’ do tulun do nakalawas ku, tu’ soudor oku i’. ⁴ Pinili’ oku’d TUHAN, i Kinorohingan di tukuon dot Israil, om pinili’ dau o sinakagon ku do momorinta’ dot Israil do gisom dot alaid. Om pinili’ dau i sinakagon do Yohuda do posodia’ do boyoon, om mantad nod payat do Yohuda om pinili’ dau i sompiiyon do tapa’ ku. Om id pogialatan no do sompiiyon di tapa’ ku, om norohian iyau do minomili’ doho’ om pinoposiliu doho’ do raja’ do pointongkop dot Israil. ⁵ Om nonuan oku dau dot ogumu’ o tanak do kusai, om id pogialatan no diyolo’ om pinili’ dau i Suliman do momorinta’ dot Israil, i pomorintaan do don TUHAN. ⁶ Om boros kad TUHAN dot id doho’, ’I Suliman no, i tanak nu, o momonsoi di Walai’d Sasambayangan dot Agayo do maan do doho’. Nopili’ ku no iyau do sumiliu do tanak ku, om iyoho’ o sumiliu do tapa’ dau. ⁷ Om pologoson ku’ndo do mompus-ompus kasai’ i pomorintaan dau ondung tumilombus no iyau do mumboyo’ do koinsanai dit oturan om ponuhuan ku, do miagal di wonsoyon dau do dinondo,’ ka,’’ ka dau. ⁸ Om boros ka kawagu di Daud, ’’Oi koinsanai’d rayat ku, hiti nod toguang do Kinorohingan toko’ om hiti’d toguang do toinsanan o tulun dot Israil, i tulun do don TUHAN, do suhuon kopio ku iyokoyu, do mumboyo’ kopio do koinsanai di pinonuhuan do TUHAN, i Kinorohingan toko’, om kotilombus kou i’ do kasanganu’dti pomogunan dot osonong om kotungkus i’ dokoyu iti dot id sinakagon di sumusuhut dokoyu do gisom dot alaid,’’ ka dau. ⁹ Om id di Suliman no, om poingkaa o pinoboros di Daud, ’’Oi tanak ku, suhuon kopio ku iya’ do mintutun do Kinorohingan di tukuon di tapa’ nu om momonsoi’d karaja’ dau do mikuwo’d osombulu’ kopio o ginawo om agaan o ginawo. Tu’ oilaan ngai’ i’ dau o pomusarahan om korohian toko’. Om ondung rumikot ko dot id dau, om romiton ko i’ dau; nga’ ondung tumongkiad ko dau om tongkiadan ko nondo dau do gisom dot alaid. ¹⁰ Om mositi’ no dot opurimanan nu do nopili’ ko nod TUHAN do momonsoi’dti Walai’d Sasambayangan dot Agayo do maan do dau. Om wonsoyo’ noti do dinondo — om wonsoyon no do mikuwo’d ginawo dit iso-iso’ kopio,’’ ka. ¹¹ Om patahako’ noddi di Daud di Suliman i palan om koinsanai di palan di Walai’d Sasambayangan dot Agayo, om i palan di bilik di poopian do konunu-nunuan. Om palan do koinsanai di bilik do suwai, om palan di kinoiyonon dot Olidang Kopio, it iyonon do mangampun do dusa. ¹² Om pinatahak nogi’ dau o koinsanai di palan di nongosorou dau do poiyaan do koinsanai di natad di ponong id suang om i bilik do songinsorili’ di natad, om i palan di bilik do poiyanan di konunu-nunuan di Walai’d Sasambayangan dot Agayo, om i bilik di poiyanan di patahakon dot id TUHAN. ¹³ Om pinatahak nogi’ di Daud di Suliman i notulis mantad do karalan-ralano’ do mamahagi’ di piro-piro ot imam om i tulun do Liwi dot id piro-piro o sinompuruan, om kowoyo-woyoo’ do momonsoi di karaja’ do hiri’d Walai’d Sasambayangan dot Agayo, om kowoyo-woyoo’ do momogompi’ do koinsanai di konunu-nunuan di Walai’d Sasambayangan dot Agayo. ¹⁴ Om pinotuduk nogi’ dau ondung songkuro o ginumu’ do pirok om tamas do pakayon do pomonsoi di piro-piro o pakakas, ¹⁵ do pomonsoi do pointikid-tikid di lampung om i potimpakan do lampung, ¹⁶ om pomonsoi di mija’ do pirok, om pomonsoi di mija’ do tamas di pasakayan di roti do patahakon dot id Kinorohingan. ¹⁷ Om pinotuduk nogi’ dau ondung songkuro o ginumu’ do tamas di nosompipi’ do maan do pomonsoi di totodok, om mangkuk, om kakanan, om songkuro o kogumuo’ do pirok om tamas do pomonsoi di piring, ¹⁸ om songkuro o kogumuo’ do tamas do nosompipi’ do pomonsoi di podtutudan do kominyan om wonsoyon do korita’-kuda’ do pasakayan di winonsoi di pinoiyo- iyo do moloikat di roitan do kerub di poungkalad o talad dot id sawa-sawat di Kaban do Tumpongo’d TUHAN. ¹⁹ Om boros kad i Raja’ Daud, ’’Poinsuang ngai’ iti di palan di tinulis do miontok di pinonuhuan do TUHAN doho’ do momonsoi,’’ ka. ²⁰ Om boros kad i Raja’ Daud dot id di Suliman, i tanak dau, ’’Pokoiso-isoo’ no, om pogiroto’ no o ginawo nu. Timpuunan no i karaja’ om kada’ poddosi do tumimbaba’ do nunu nopo. Om muhup indo diya’ o TUHAN, i Kinorohingan di tukuon ku. Om a’ ko i’ dau tongkiadan do gisom dot opongo ngai’ nu i karaja’ do momonsoi di Walai’d Sasambayangan dot Agayo. ²¹ Nongoonuan ngai’ nod karaja’ do hiri’d Walai’d Sasambayangan dot Agayo it imam om i tulun do Liwi. Om ongorohian ngai’ i’ do muhup diya’ o piro-piro tukang di mogisuayan o toilaan. Om koinsanai di rayat om i boyoon diyolo’ nga’ posodia’ ngai’ i’ do momonsoi do nunu nopo o ponuhuan nu,’’ ka dau.

¹ Om poboroso’ no di Daud dot id koinsanai di tulun di pointimung do hiri o poingkaa, ’’I Suliman no, i tanak ku o nopili’ do Kinorohingan dot id pogialatan di tangaanak ku’d kusai, nga’ omulok po iyau om okuri’ po o nopinsingilaan dau. Om iti nopo karaja’ dot apatut do wonsoyon om agayo om awagat, tu’ iti nopo om okon i’ ko’ tiyonon do tulun do miagal di walai’d raja’, nga’ iti nopo Walai’d Sasambayangan dot Agayo om don TUHAN i’, i Kinorohingan. ² Om nokototos oku no do poposodia’ do pakakas diti Walai’d Sasambayangan dot Agayo — do tamas, om pirok, om tambaga’, om basi’, om kayu, om watu dit ongolumis, om watu dot angamahal o gatang, om watu di mogisuayan o warna’ do maan do pomolumis, om ogumu’ o watu di linunau. ³ Om pinapatahak oku do pirok om tamas do mantad id konunu-nunuan ku, tu’ osianan oku no kopio di Walai’d Kinorohingan, i tiyonon do sumambayang. ⁴ Ogumu’ i’ ko’ hatus o tan do tamas di nosompipi’ do nakatahak ku om osomok nod duwo nahatus om apat nohopod o tan do pirok do nosompipi’ do pomolumis di limput di Walai’d Sasambayangan dot Agayo, ⁵ om maan do wonsoyon dit apatut do wonsoyon di piro-piro o tukang. Om isai po ot orohian do manahak do popuhawangon dot id TUHAN?’’ ka dau. ⁶ Om kongorohiai noddi do popuhawang i piro-piro o boyoon di pinuruan do sompiiyon, om i boyoon do payat, om i boyoon do soudor, om i mongilo-ilo di dapu’ di don raja’ ⁷ do koinsanai diti do pomonsoi di Walai’d Sasambayangan dot Agayo: lobi ko’ hatus om turu’ nohopod o tan do tamas, om lobi ko’ tolu nahatus om apat nohopod o tan do pirok, om lobi ko’ onom nahatus om duwo nohopod o tan do tambaga’, om lobi ko’ tolu noribu om apat nahatus o tan do basi’. ⁸ Om iri tulun dit ongkiwatu dot agayo o gatang nga’ pinapatahak nogi’ do posuangon di kousinan di dong Walai’d Sasambayangan dot Agayo, om mongilo-ilo nopoddi om i Yohiol, i tulun do Liwi, i mantad id pinuruan do sompiiyon di Girson. ⁹ Om agaan tomod nopo o ginawo di tulun do pinapatahak dot id TUHAN, om ongotood ngai’ iyolo’ tu’ ogumu’ tomod o nakatahak diyolo’, om i Raja’ Daud nga’ otood tomod nogi’. ¹⁰ Om royoho’ no di Raja’ Daud o TUHAN dot id toguang di tulun dot ogumu’. Om boros ka dau, ’’Oi TUHAN, i Kinorohingan di tukuon di Yakub, i taki-aki dahai, iya’ no o royohon do gisom do poingompus! ¹¹ Agayo ko no kopio, om kikuasa’, om kikagayaan, om koimayaan kopio, om abantug. Diya’ ngai’ i’ dot oinsanan di hilo’d tawan om hiti’d pomogunan, om iya’ no o raja’ dit agayo, i pomorinta’ dot id sawat do koinsanai do nunu nopo. ¹² Mantad ngai’ i’ dot id diya’ o kakayaan om kohoroo’; om porintaon nu o koinsanai do nunu nopo do mikuwo’d kokoriso’ om kuasa’ nu; om milo ko i’ do papabantug om popokoris dot isai nopo o tulun. ¹³ Om mongunsikou diri iyahai diya’ oi Kinorohingan dahai, om mamarayou iyahai do ngaran nu di kikagayaan. ¹⁴ Nga’ a’ oku i’ om i rayat ku milo do manahak diya’ do nunu-nunu, tu’ koinsanai’ddi om nipuhawang nu i’, om pinopoguli’ no iyahai di diya’ mantad. ¹⁵ Om oilaan nu i’ oi TUHAN do koposi-posion nopo dahai om miagal no di tulun di tindapou om miagal di sompogunan, do miagal di komolohingan dahai di gulu po. Tumur nopo dahai om miagal no do sangai di tumalib, om a’ i’ iyahai milo do mogidu’ do mantad id kapatayon. ¹⁶ Oi TUHAN, i Kinorohingan dahai, tinimung ngai’ dahai iti konunu-nunuan dot agayo o gatang do maan do pomonsoi do walai nu do pomusou dahai di ngaran nu dit olidang, nga’ iya’ ngai’ i’ o tadon diti om iya’ ngai’ o sanganu. ¹⁷ Oilaan ku i’ dot umbalan ngai’ nu o ginawo do pointikid-tikid do tulun om orohian ko i’ do tulun dit otulid o ginawo. Om pinatahak ngai’ ku diya’ iti do mikuwo dot otulid om iso-iso’ om agaan o ginawo ku, om nokito ku nogi’ o kooropodo’ di tulun nu do nokotimung do hiti do pinapatahak do nipuhawang dot id diya’. ¹⁸ Oi TUHAN, i Kinorohingan di tinuku’ di komolohingan dahai, i Abraham, om i Isak, om i Yakub, piantangan no i tulun nu om osianan kasai’ i’ iyolo’ diya’, om tulungon no iyolo’ om otorodok kasai’ i’ iyolo’ dot id diya’ do gisom dot alaid. ¹⁹ Om onuwai no i Suliman, i tanak ku do korohian dit osombulu’ kopio do mumboyo’ do koinsanai di ponuhuan nu om korohian do mamaal di Walai’d Sasambayangan dot Agayo di pinosodiaan ku do koinsanai’dti,’’ ka dau. ²⁰ Om kasambayang poddi i Daud do miagal diri om suhuo’ ngai’ noddi di Daud i tulun do mamarayou’d TUHAN. Boros ka dau, ’’Royoho’ no o TUHAN, i Kinorohingan dokoyu!’’ ka. Om oinsanan nopo i tulun do minamarayou’d TUHAN, i Kinorohingan di tinuku’ di komolohingan diyolo’, om otud no iyolo’ do suminuwau’d TUHAN om suminuwau di raja’. ²¹ Om tadau po kawagu om ponumbali’ no iyolo’ do tayam-tayam do minaan do porsombahan di sumbolion do pinatahak dot id TUHAN, om potikido’ nogiddi di tulun do maan diyolo’d kanon. Om suwai no ko’ mantad diri, om pinapatahak po iyolo’ do soribu o sapi’ do tontoluhan, om soribu o dumba’ do tontoluhan, om soribu o tanak do dumba’, do minaan songkoyuo’ do monorob do hiri’d pananaraban do porsombahan. Om pinapatahak nogi’ iyolo’ do porsombahan dot anggur. ²² Om ongotood tomod diri iyolo’ do tontok do tadau’ddi do maso diyolo’ do mangakan om monginum dot id toguang do TUHAN. Om koinduwaai po diyolo’ do popoboros do raja’ i Suliman. Om pinogirot diyolo’ o kinosilihan di Suliman do raja’ diyolo’ dot id suang do ngaran do TUHAN, om pinogirot nogi’ diyolo’ o kinosilihan di Sadok dot imam. ²³ Om i Suliman noddi o nokosowoli di Daud, i tapa’ dau do raja’ do miagal di natantu’ mantad do TUHAN. Om iyau nopo om raja’ di nokoundar kopio, om oinsanan nopo i bansa’ dot Israil do minumboyo’ dau. ²⁴ Om oinsanan nopo i pagawai do pomorinta’ om i soudor, om i tangaanak di Daud do suwai do minamatos do mumboyo’ di Suliman tu’ raja’. ²⁵ Om pinoronok om pinopusou do TUHAN di Suliman o koinsanai do bansa’ diri om siniliu dau iyau do raja’ dit abantug ko’ mantad do raja’ do suwai di nokoumbal do momorinta’ dot Israil. ²⁶ Pinorinta’ di Daud, i tanak di Isai o pointongkop dot Israil ²⁷ do solinaid dot apat nohopod o toun. Turu’ o toun dau do minomorinta’ do hilo’d Hibron om tolu nohopod om tolu o toun dau do momorinta’ do hilo’d Yorusalim. ²⁸ Om kapatai nopo iyau om di molohing kopio iyau, om kaya’ kopio iyau om suahon do tulun. Om i Suliman diri, i tanak dau’d kusai o nosiliu’d raja’ do nokosowoli dau. ²⁹ Om susuyon nopo do pasal di Raja’ Daud do mantad di timpuun i’ om gisom do kopupuson om nongkotulis ngai’ i’ do hiri’d suang do buuk di tinulis di tolu o nabi, i Somuil, om i Natan, om i Gad. ³⁰ Om iri nopo pinotulis diri om monusui do karalan-ralano’ dau do minomorinta’, om kokoriso’ dau, om koinsanai di nongosiliu dot id dau, om id Israil, om id pomorintaan di raja’ di hiri’d posorili’.