Kasi Lalk Ye̱so un
Maatiyu
Ge̱nine
U’Gabte
I Maatiyu k’comta̱v Ye̱so, a̱n ge̱ne̱in Yahude̱n taka̱llaka̱ ha̱n a̱n hwennama̱n we̱e̱sa̱n 40-50 a̱n wa̱a̱’a Ye̱so. I unwa kan kabma̱n tala, nan po̱g ta̱m o Le̱vi. Maatiyu ve̱ce̱ke̱ Yahude̱n az Ye̱so ta ha̱l alla u ze na bat giiras Mosa da. La̱a̱ss Ye̱so la, i rihi i pooya̱ baan kims Yahude̱ne̱. Na vatk da̱n sa̱nsa de̱ha̱nzo a̱nmin lagk gigk utu. Sa̱ tanka go̱mc Na’Sil c’pooca̱n ca̱n Ye̱so hain u ba̱tksa̱. Sa̱ kwesaka az za cunksi a̱n Ye̱so noktain a̱n copun yanda̱ha̱n da, az i walgc Na’Sil lanma̱n takboda̱ v’daa de̱ha̱nzo. Maatiyu tanka coms Na’Sil lanma̱n lagk gigk utu, rema̱n u kwesata Yahude̱n az i Ye̱so a̱n rein ka d’gwa̱a̱m un Sila gigin lalk az ta comta. Rema̱n u gwa̱a̱t Yahude̱n a an zain Yahude̱n da (beboda̱n 1:21) an rein a̱n copca̱n copun yanda̱ha̱n kwe̱ (beboda̱n 4:13-16). Ye̱so tu soot go̱m va̱ a s’gab a an copca̱n copun yanda̱ha̱nna̱n kwe̱ (beboda̱n 28:19). U buka ta̱m kaa go̱mca̱ d’kal-d’kala, za goon go̱mc Dauda go̱m da.
Ye̱so comk a s’gab a hav a bisi neta̱n kwe̱ da̱n go̱mca̱ ha̱n ca̱n laine. Az a vaaksa an copca̱n copun yanda̱ha̱n kwe̱ an gabs ru.
1Bapca̱d Ye̱so Ka̱risti
1Go̱t bapca̱d Ye̱so Ka̱risti, waav Dauda, Dauda waav Ibrahi.
2I Ibrahi a̱n matin Isaaku,
Isaaku mat Yakubu.
Yakubu matk la ba̱ru Juda a ha̱nun nu.
3Juda matk Ferez na Zaraba ga̱l Tamara,
Ferez mat la Masruna.
Masruna matk la ba̱ru Arama,
4Arama mat Aminadaba.
Aminadaba matk Nahashuna,
Nahashuna mat la ba̱ru Salhuna.
5Salhuna matk Bu’aza ga̱l Rahab,
Bu’aza mat Obida ga̱l Ruut.
Obida matk Je̱si,
6Je̱si la u matk Dauda go̱mo̱.
Dauda go̱m matk So̱lmo̱n ga̱l un lain netav Uriya.
7So̱lmo̱n matk Ra̱hobom,
Ra̱hobom mat la ba̱ru Abija.
Abija matk Asa,
8Asa mat Yahushafatu.
Yahushafatu matk Yaruma,
Yaruma mat Uzaya.
9Uzaya matk Yutama,
Yutama mat Ahaza.
Ahaza matk Hizikaya,
10Hizikaya dang u mat Manasa.
Manasa matk Amuna,
Amuna mat ta̱m Yushiya.
11Yushiya matk Yakunya a ha̱nun nu daava̱n na savtin netnan Isra’ila na̱m’cok a̱n copun Babilo̱n.1:11 Go̱t ta̱m: 2Go̱m 24:14-15; 2Ggo̱ 36:10; Je̱r 27:20.
12Daava̱n na savtin na̱ na̱m’cok Babilo̱n,
Yakunya matk Sha’altiye̱l,
Sha’altiye̱l mat Zarubabila.
13Zarubabila matk Abihuda,
Abihuda mat Aliyakima.
Aliyakima matk Azura,
14Azura mat Sadiku.
Sadiku matk Ahima,
Ahima mat la Aliyuda.
15Aliyuda matk Ali’azara,
Ali’azara mat Maatan.
Maatan matk Yakubu,
16Yakubu mat la ba̱ru Isuhu wa̱r Me̱e̱ri, Me̱e̱ri u’na̱n matin Ye̱so, un nan po̱g Ka̱risti.
17Goosa̱n na ogmin kwe̱ lanm Ibrahi na ceta daav Dauda go̱mo̱, i s’goo oopa a̱n s’naase. Lanm Dauda go̱m ta̱m na ceta daava̱n na savtin netnan Isra’ila na̱m’cok Babilo̱n, i s’goo oopa a̱n s’naase. Lanma̱n sava̱m na̱ na̱m’cok Babilo̱n na ceta daav Ka̱risti, i s’goo oopa a̱n s’naase.
Macu Ye̱so Ka̱risti
18Go̱t ha̱n na ho̱da̱na̱n macu Ye̱so Ka̱risti soottine. Daava̱n Isuhu maaktin Me̱e̱ri in Ye̱so, a̱n na hwesa la giit Me̱e̱ri c’ga̱i da, na he̱n-he̱n o a d’uba̱n lanma̱n Hora̱mda̱n zattin ri d’reb da.1:18 Go̱t ta̱m: Luk 1:27.19Isuhu un maakin la o, ai retin i kan gela̱v Na’Sila̱, u ta to̱n u ne̱e̱ Me̱e̱ri m’e̱n a̱n hwic neta̱n da. U se̱e̱pste̱ bo̱ a̱n de̱bc ru az tu kuz o m’ze̱se̱. 20Au latina̱n keka̱bsa̱n rihica̱ hna, k’comta̱v Na’Sil nokka baa ru a̱n beena. U zeka o, “Vo Isuhu waav Dauda, av hong la gelva̱n gaam Me̱e̱ri u soot netav rov da. Rema̱n ba̱tda̱n u ciini, i lanma̱n Hora̱mda̱n zattin ri d’reb da. 21Tu mat waa’a̱rma̱, ta̱’v cet ta̱m o d’din Ye̱so, rema̱n i unwa a̱n tu to̱v neta̱n ru lanma̱n ko̱tc na̱.”1:21 Go̱t ta̱m: Luk 1:31.
22Na em-em rihica̱ ha̱n kwe̱ rema̱n na esasta rina̱n Sila vatin a̱n nwa̱a̱’a k’barav na̱. U zeka, 23“Go̱to̱, waa’wanta un a̱ra̱m ta takina̱n la̱v a unwan da, tu em d’ubu u mat waa’a̱rma̱. Nan cet o d’din Imanuwe̱l.” Rina̱n nan ze Imanuwe̱l i, “A’Sil d’kut a cinna na.”1:23 Go̱t ta̱m: Isa 7:14.
24An Isuhu pa̱dktin la, u emk rina̱n k’comta̱v Na’Sil zein az u ema, u gaak Me̱e̱ri. 25U ta la̱v la a unwan da u matt hwa̱tka̱v ru, waa’a̱rma̱. U cetuz la o d’din Ye̱so.1:25 Go̱t ta̱m: Luk 2:21.
2Hamca̱n hwiipska̱ Ye̱so
1Me̱e̱ri matk Ye̱so a̱nmin le̱in Batalami a̱n copun Judiya a̱n hweca̱n go̱mc He̱ro̱d. An na mattin o, an napsa̱n keba̱n ruka̱ rwa̱nma̱ d’hwen a haka a̱n le̱in Urisalima. 2A ipkk a zeka, “Pe̱ha̱n na kan na matin go̱m va̱ Yahude̱ne̱? C he̱nke̱ keba̱v ru ga̱la̱n rwa̱nma̱ d’hwen. C nokka c emata o c’hwiipsa̱.”
3An He̱ro̱d go̱m hongtin rihica̱ hna, horma̱d bugk o hwe̱di d’kala. Taanl ta̱m an le̱in Urisaliman kwe̱. 4Au kargstain c’hwengnan ka̱bd Na’Sil a an la̱a̱sa̱m na s’giiran kwe̱ d’baa d’da̱n, u ipkk na̱ va̱na̱n nan mat Ka̱risti une.
5A zeta bo̱ He̱ro̱d, “I a̱n le̱in Batalami a̱n copun Judiya. I taanl a̱n k’barav Na’Sil ge̱ntine. U zeka,
6“ ‘Vo le̱in Batalami
a̱n copun Judiya,2:6 Go̱t ta̱m: Mik 5:2.
a̱v za bo̱ a̱n dim baa
go̱mgo̱mnan Juda da.
Rema̱n i baa rov a̱n
damran kac’go̱m tu rwa̱n
un tu em go̱tec
neta̱n ri an Isra’ila.’ ”
7He̱ro̱d la, au po̱gto̱in an napsa̱n kebnan lo m’ze̱se̱, u ipkk na̱ a d’ke̱mne̱n daav a he̱ntin kebune. 8U comt bo̱ na̱ a hav Batalami. U zeka na̱, “Nok na a̱n hobg waa’gyozune a d’ke̱mne̱nne̱. An he̱ne̱ o, vaaka na a̱n ve̱ce̱ me, bat mi ta̱ma̱ ta̱’m hav a̱m ema o c’hwiipsa̱.”
9Aa hongtin rina̱n go̱m zeine, a to̱o̱k a̱n c’na̱. Go̱to̱ kebuna̱n a bain a̱n he̱ne̱ ga̱la̱n rwa̱nma̱ d’hwen nokk a̱n hwic na̱. U cek u esk a̱n conan buuna̱n waa’gyozune retine. 10Aa he̱ntin kebune, a emk c’za̱ngkta̱ hwe̱di d’kala. 11Aa uvtin a̱nmin buune, a he̱nk waa’gyoz a Me̱e̱ri inu nu. A het bo̱ a̱n c’rwin a ema o c’hwiipsa̱. A a̱ba̱sta̱ bo̱ baic na̱. A emaka o ho̱sma̱n zo̱n a hoodasa̱ d’ha̱nga̱n sa̱n kind hwe̱di s’goo s’il sa̱n nan po̱g farankinse̱ns a ma̱a̱r ni2:11 Farankinse̱ns a ma̱a̱r ni: Farankinse̱ns i lo̱nma̱n ce ma̱n kind hwe̱di, am ci kos d’ha̱ng hwe̱di. Ma̱a̱r i lo̱nma̱n ce ho̱d k’boba. Yahude̱n el ta swiki d’wa̱a̱ ma̱mma. I rihi a kinda̱n hwe̱di..
12Ai retin Sila kaagk na̱ a̱n been az aa vaak la baa He̱ro̱d da, a gabk le̱vk hyan a vaakt a̱n copu na̱.
An matin Ye̱so somtk o
13An an napsa̱n keba̱n to̱o̱tine, Sila comka k’comta̱v na̱ baa Isuhu a̱n beena. U zeka o, “Unu v o̱m waa’gyoz a inu nu a̱n som a̱n caa copun Masar. Soota na a̱n a̱n’a a̱n val daava̱n m cwema̱vtoin no. Rema̱n He̱ro̱d tu hob waa’gyozune, u hote.”
14An Isuhu pa̱dktine, u o̱mk waa’gyoz a inun a̱n gyopo, a sakk k’le̱v a cek Masar. 15A sootka a̱n a̱n’a caama̱n daava̱n He̱ro̱d utine. I taanl a̱n na esastain rina̱n Sila vatin a̱n nwa̱a̱’a k’barav na̱. A zeka, “Lanma̱n copun Masar a̱m po̱go̱in waav ri.”2:15 Go̱t ta̱m: Hos 11:1.
16He̱ro̱d la, au he̱ntin az an napsa̱n kebnan lo palkk o, u hwinsk hwe̱di d’kala. U de̱lt bo̱ na hweela̱l yaa’a̱ra̱mnan le̱in Batalami a le̱e̱ma̱n s’e̱ssa̱n kwe̱, an ta to̱in s’we̱e̱ s’il nu’mac da. I ho̱da̱na̱n u hwenna̱stain daava̱n na mattin waaune baa an napsa̱n kebnan lo.
17I taanl a̱n rina̱n Je̱rmaya k’barav Na’Sil vatin estine. U zeka:
18“Na hongko s’kan a̱n le̱in Rama.
S’O̱n a naam c’de̱ba̱n hwe̱di.2:18 Go̱t ta̱m: Je̱r 31:15.
I Re̱ce̱l a̱n reina̱n de̱lka̱m s’kan
rema̱n aka̱n ru.
A nan hweks a̱n resasa o da,
rema̱n aka̱n uk o.”
U’Vaaka lanma̱n Masar
19An He̱ro̱d utine, k’comta̱v Na’Sil haka baa Isuhu a̱n been a̱n copun Masar. 20U zeka o, “Unu v o̱m waa a inun a̱n vaak a̱n copun Isra’ila. Rema̱n an laina̱n hoba̱n hweed ru, a uku.” 21Isuhu unutu bo̱ u o̱mk waa a inun a vaakk a̱n copun Isra’ila.
22An Isuhu hongtin la az i Arkilaus waav He̱ro̱d a̱n gaadin go̱mca̱n copun Judiya, u hongk gela̱v nu’hav a̱n a̱n’a. An Sila ematain la o s’lalk a̱n beena, u kwaagk u uvk a̱n kabsa̱n copun Galili. 23U havk u sootk a̱n le̱in Nazarat. Taanl a̱n na esastain vatu baranc Na’Sila̱. A zeka, “Nan po̱g o kan Nazarat.”2:23 Go̱t ta̱m: Mar 1:24; Luk 2:39; Yoh 1:45.
3Yohana ba̱sk kasi lalko
(Mar 1:1-8; Luk 3:1-18; Yoh 1:19-28)
1A̱n hweca̱n lo, Yohana kan emam na baptisma ruka̱ u el a̱n d’ba̱s a̱n kabva̱ k’mam a̱n copun Judiya. 2U zeka, “But na c’hwin a̱n lag c’ko̱to, rema̱n go̱mc Na’Sil ceka d’viivi.”3:2 Go̱t ta̱m: Mat 4:17; Mar 1:15.3I unwa ha̱n a̱n Isaaya k’barav Na’Sil tanaine. U zeka,3:3 Go̱t ta̱m: Isa 40:3.
“Noc el a̱n d’ba̱s
a̱nmi copu k’mam na̱m’ze,
‘Mamgsa na Kanubu k’le̱ve̱,
una̱sa̱ na o s’le̱v rococo.’ ”
4Yohana kan emam na baptisma lak tu to̱p kusca̱n na cain a̱n ke̱nc rakumni, tu gag ta̱m rabva̱ k’we̱d na’ba̱i. Rina̱n u lain tu ryaa, i emna a c’swen ne. 5Netnan le̱in Urisalima a an Judiya na, a an e̱ssa̱n rigin ge̱nka̱n Jodan kwe̱, a ruka̱ a haka baa ru. 6A vatk ko̱tc na̱. U emaka ta̱m na̱ baptisma a̱n Ge̱nka̱n Jodan.
7Yohana zeka bugda̱n Farisin a Sadusin nanan nokain u emata na̱ baptisma, “Nwaananan rein ho̱d yaa’bo̱mno̱. Iwe̱ a̱n ve̱ce̱in no az a̱n som hwinsa̱d Na’Sil da̱n laine?3:7 Go̱t ta̱m: Mat 12:34; 23:33.8Em na rihica̱n ca̱n kwesa az a̱n bita̱lk c’hwin a̱n lagk ko̱tc no. 9An keka̱b la a̱n de̱bc no ta̱n ze, ‘Na ci Ibrahi ceta cinna da.’ A̱m el a̱n ve̱ce̱m no, Sila ci we̱sma̱n vaaksama̱n taarca̱ ha̱n aka̱n Ibrahi.3:9 Go̱t ta̱m: Yoh 8:33.
10“A̱nta̱ma̱ gyuri el a’dod a̱n beboda̱n ce. Kooye̱ cewa a̱n ta matin yaanc kasi da, nan ged o na bono a̱nmin hwelana.3:10 Go̱t ta̱m: Mat 7:19.11Mi a̱m emaka no baptisma na̱m’ho̱o̱ i kwesata az a̱n lagk c’ko̱to. Un lain a̱n dimd ri la, u so̱dk a̱m hwe̱di d’kala. A̱m ta ma̱a̱na̱ a̱m to̱p kaatu ru da. I unwa a̱n tu ema no baptisma a̱n Hora̱mda̱n zattin ri d’reb da a hwelan na. 12Zaagca̱v el ta̱m a̱n komc ru. Tu jaag balu ru kwe̱ u kargsa hii u de̱l a̱n d’be̱e̱. U toks kaa c’cwembe a̱n hwelananan zain ta rimsi da cakk.”
Yohana emaka Ye̱so baptisma
13A̱n daava̱n lo, Ye̱so lagka Galili u haka ge̱nka̱n Jodan baa Yohana rema̱n Yohana emata o baptisma. 14Yohana lak wa ha̱la̱. U zet bo̱ Ye̱so, “I vo be̱ a̱n va ema m baptisma, a̱v noka ta̱m baa ri az a̱m ema ve?” 15Ye̱so se̱st bo̱ o, “Lag i soot taanl a̱nta̱ma̱ hna. Rema̱n i ge̱be̱ske̱ na esasa rina̱n Sila zeine.” Yohana se̱st bo̱ kaa u ema Ye̱so baptisma.
16An Yohana ematain Ye̱so baptisma u rwa̱a̱gka̱ na̱m’ho̱o̱, a̱ndaabe, cona a̱ba̱ska̱. U he̱ne̱-he̱ne̱ Hora̱md Na’Sil na̱m’ciza̱ ho̱d gora̱b pusu. Da̱ haka da̱ hek a̱n Ye̱so. 17Na hong-hong lanm na’con na zeka, “O̱p uha̱n i Waav ri. A̱m el a̱n to̱na̱m ru hwe̱di d’kala. A̱m el ta̱m a̱n he̱nma̱n ke̱md ru hwe̱di.”3:17 Go̱t ta̱m: D’Tak 22:2; Zab 2:7; Isa 42:1; Mat 12:18; 17:5; Mar 1:11; Luk 9:35.
4A̱krimu ke̱ta̱mske̱ Ye̱so
1A̱n daava̱n lo, Hora̱md Na’Sil gabtk Ye̱so u uvk a̱n k’kad bat A̱krimu tu maak o.4:1 Go̱t ta̱m: Ibr 2:18; 4:15.2Au emtin i’so̱o̱ti, i’hwen a gyop no, c’hwen kwe̱zc c’ila̱, merk la̱a̱k o hwe̱di. 3A̱krimu ceta bo̱ baa Ye̱so, u zeka o, “Awaz i vo Waav Na’Sila̱, bala̱msa taarca̱ ha̱n d’gaa.” 4Ye̱so se̱sk la o, “I el a’ge̱n a̱nmin lalks Na’Sila̱, ‘Nocurimu au po̱t a̱n ryaaka̱ d’gaa c’taa da. Tu po̱t rema̱n kooye̱ gomda da̱n rwa̱in baa Na’Sila̱.’ ”
5A̱krimu o̱mt bo̱ ta̱m Ye̱so u savk o a̱n le̱in Urisalima, le̱ina̱n zattin ri d’reb da. U eltk o a’con zo, va̱na̱n buuk Na’Sil pa̱tin na̱m’ho̱p kwe̱. 6U zeta bo̱ o, “Awaz i vo Waav Na’Sila̱, hapo nu’copo. Rema̱n i el a’ge̱n a̱nmin lalks Na’Sila̱.4:6 Go̱t ta̱m: Zab 91:11-12. Sa̱ zeka,
“ ‘Ta de̱l comta̱nc na̱
a gwaav a̱n komc na̱
rema̱n av tak la a̱n cakese
nau rov a̱n d’taar da.’ ”
7Ye̱so se̱st bo̱ ta̱m o, “I el ta̱m a’ge̱n a̱nmin lalks Na’Sila̱, av taks la Sila rov da.”
8A̱krimu sudk ta̱m a̱n o̱m Ye̱so u eltk o a̱n se̱mka̱n ho̱ppin hwe̱di. U kwesaka o go̱mca̱n copun yanda̱ha̱n a gwinka̱n ca̱ncan kwe̱. 9A̱krimu sudk ta̱m a̱n ze Ye̱so, “Rihica̱ ha̱n kwe̱, ta̱’m nes a̱v ca̱nca awaz ta̱’v hyaa a̱n c’rwin a̱v ema m c’hwiipsa̱.” 10Ye̱so se̱sk ta̱m o, “A̱krimu, to̱o̱ v lag m a̱n c’ri! I el a’ge̱n a̱nmin lalks Na’Sila̱, ‘Sila rov a̱n ta̱’v ema c’hwiipsa̱. I na̱nna ta̱m c’taa a̱n ta̱’v ema m’coko.’ ”
11A̱krimu lagt bo̱ Ye̱so. Comta̱nc Na’Sil haka a se̱e̱tke̱ Ye̱so.
Ye̱so takka yomka ru
12An Ye̱so hongtin az na gagk Yohana a̱n buu s’ko̱mo̱, u vaakka a̱n copun Galili.4:12 Go̱t ta̱m: Mat 14:3; Mar 6:17; Luk 3:19-20.13Au lagtain le̱in Nazarat, u haka u sootk a̱nmin Kafarnahum, le̱ina̱n rein a̱n paata̱n Saama̱n Galili. Kafarnahum i ho̱deka̱n copca̱n Ze̱bulo̱m a Naftali ni.4:13 Go̱t ta̱m: Yoh 2:12.14I em-em taanl bat nan esasa rina̱n Sila vatin a̱n nwa̱a̱’a Isaaya k’barav na̱. 15A zeka,
“Copca̱n Ze̱bulo̱m a Naftali ni,4:15 Go̱t ta̱m: Isa 9:1-2.
ca̱n rein a̱n le̱vka̱
m’saa pasma̱n ge̱nka̱n Jodan,
a̱nz a̱n copun Galili,
va̱na̱n an zain
Yahude̱n da reine.
16Netnanan lain
ni’cumunkunnu,
go̱t a he̱nk damra d’za̱n.
An lain a’soot a̱n copca̱n
hora̱mca̱d na’wa̱a̱,
za̱nd za̱na̱ska̱ baa na̱.”
17Lanma̱n daava̱n lo, Ye̱so takaz a̱n ba̱s tu ze, “Bita̱l na c’hwin a̱n lag c’ko̱to, rema̱n go̱mc Na’Sil ceka d’viivi.”4:17 Go̱t ta̱m: Mat 3:2.
Ye̱so po̱gk an suva̱n ge̱nne̱
18An Ye̱so latin tu to̱o̱-to̱o̱ a̱n bilka̱n Saama̱n Galili, u he̱nk Simo̱n un nan po̱g Bitrus a Andarawus ha̱nu nu. A lak a̱n asa̱m nu’raaga a̱nmi m’saa, rema̱n na̱nna i an suva̱n ge̱nne̱. 19Ye̱so zeta bo̱ na̱, “Gaba na me. Ta̱’m la̱a̱sa̱ no ho̱da̱n ta̱n hobta neta̱n a kum d’gwa̱a̱ma̱.” 20A̱ndaabe, a batk u’raaga, a gabk o.
21An Ye̱so noktin ta̱m a̱n hwici, u he̱nk Yakub waav Za̱ba̱di a Yohana ha̱nun a̱nmi bumbka̱ m’ho̱o̱ a Za̱ba̱di ceta na̱-na̱. A lak a̱n mamga̱m nu’raaga. U po̱gk ta̱m na̱. 22A̱ndaabe ta̱ma̱, a lagk bumbka̱ m’ho̱o̱ a ceta na̱n a gabk o.
Ye̱so taask neta̱n s’malse
23Ye̱so paak copun Galili kwe̱ a̱n la̱a̱sa̱m neta̱n a̱nmin ka̱bca̱n kargac Yahude̱ne̱, tu ba̱suz kasi lalkun go̱mc Na’Sila̱. U taask ta̱m neta̱n s’mals a kooye̱ goon gaagwan na.4:23 Go̱t ta̱m: Mat 9:35; Mar 1:39.24Ye̱so emk din a̱nmin copun Siriya u’biri. Neta̱n noktta bo̱ a s’mals s’goo-s’goo a a m’so̱n no̱. A noktka ta̱m an rinnas’ce, an naam vosin a le̱ma̱n ne̱. U taask ta̱m na̱ gaag kwe̱. 25Damran bugca̱n neta̱n gabt bo̱ o lanma̱n Galili a copuna̱n ciin damran m’le̱e̱n oopa (Dikafolis) na a le̱in Urisalima na a Judiya na, a an rigtun ge̱nka̱n Jodan ta̱ma̱.
5Ye̱so la̱a̱ska̱ netna
1An Ye̱so he̱ntin damran bugda̱n neta̱n lak na̱m’karga, u elk a̱n k’se̱me̱. Au soottine, an la̱a̱s baa ru nokka baa ru. 2U la̱a̱ska̱ na̱ u zeka:
3Sila emaka an napin
az i na̱nna kobneta̱n a̱n d’hormo,
go̱mc na’con ic na̱.
4Sila emaka an nau c’de̱be̱,5:4 Go̱t ta̱m: Isa 61:2.
Sila ta la̱ta̱sa̱ na̱ c’de̱be̱.
5Sila emaka an rein tuptupu,5:5 Go̱t ta̱m: Zab 37:11.
Sila ta ne̱e̱ na̱ copun yanda̱hna.
6Sila emaka an savin
c’de̱b a̱n ema̱n rina̱n
Sila ta to̱no̱,5:6 Go̱t ta̱m: Isa 55:1-2.
Sila ta ne̱e̱ na̱ rina̱n
a reina̱n hobo.
7Sila emaka a m’za̱i,
Sila ta hong la za̱im na̱.
8Sila emaka an de̱bc kasi,5:8 Go̱t ta̱m: Zab 24:3-4.
ta he̱n A’Sila̱.
9Sila emaka a d’se̱e̱pse̱,
nan po̱g na̱ aka̱n Na’Sila̱.
10Sila emaka an nan
ryeesa d’kob rema̱n a
el a̱n gela̱v Na’Sila̱,5:10 Go̱t ta̱m: 1Bit 3:14.
go̱mc na’con ic na̱.
11Sila emaka no, daava̱n neta̱n ta rebga̱lt no, a ryeesa ta̱m no d’koba, a e̱le̱ ta̱m no kooye̱ goon katca rem ri. 12Em na c’za̱ngkta̱ a damran pusuu c’de̱b ne̱, rema̱n copa̱nc no a̱nz a’con rork d’kala. I ho̱da̱n lo bo̱ ta̱m a ryeestain baranc Na’Sil an bain no d’koba.
I’Gum a d’za̱n na̱
13“I nwaa a̱n rein gumin copun yanda̱hna. A gumi rob la ryaam e, i ho̱da̱npe̱ a̱n nan mamgt e? I ta kustu ta̱m rihi kasi in nan em a̱n inya da, a za na ask e neta̱n le̱vga̱l da.
14“I nwaa a̱n rein za̱nda̱n copun yanda̱hna, le̱ina̱n rein a̱n conan se̱me̱, a ti ze̱se̱ da.5:14 Go̱t ta̱m: Yoh 8:12; 9:5.15Na za nan dapasa d’ta̱si na kubg da̱ ni’dor da. I na sakasa da̱ a̱n d’sakc rema̱n da̱ za̱na̱sta̱ u’bu kwe̱.5:15 Go̱t ta̱m: Mar 4:21; Luk 8:16; 11:33.16Rema̱n taanlo, lag na za̱nd no za̱na̱sa̱ baa netna, bat ta he̱n yomka no a kasi a ne̱e̱ A’Sil Ceta no un rein a̱nmi na’con k’gwin.5:16 Go̱t ta̱m: 1Bit 2:12.
Ye̱so esaska giiras Mosa
17“An ze la az a̱m han-han a̱m hot panva̱n giiras Mosa a ge̱ns baranc Na’Sil a̱n da. A̱m ta han rema̱n a̱m hot sa̱ da. I a̱m esasta sa̱. 18Lag na a̱m ve̱ce̱te̱ no m’ga̱u. A za a’con a copun yanda̱ha̱nna̱n taak da, gomd za alla v’pana, va̱n ta̱’v tak a̱n yang baa s’giira da. Nan esasa sa̱ kwe̱.5:18 Go̱t ta̱m: Luk 16:17.19Koowe̱ bo̱ kaa a̱n tu get giirav kalk kwe̱, u la̱a̱sa̱ ta̱m neta̱n taanlo, nan po̱g o u kalk kwe̱ a̱nmin go̱mc na’cona. Koowe̱ la a̱n tu gaba, u la̱a̱sa̱ ta̱m ahyan gabma̱n sa̱nsa, i unwa a̱n nan po̱g damra a̱nmin go̱mc na’cona. 20Go̱to̱, a̱m el a̱n ve̱ce̱m no, a za a̱n pa̱tk Farisin a an la̱a̱sa̱m na s’giiran a̱n gela̱v Na’Sil da, rihi za in ti de̱l a̱n uv a̱n go̱mc na’con da.
Ye̱so holk na d’hwinsu
21“A̱n hongk na zek an de̱hne, ‘Av hwaa la noc da, koowe̱ a̱n hwain noco, nan geda o lalko.’5:21 Go̱t ta̱m: U’Rwa̱ 20:13.22Mi la a̱m zeka no, koowe̱ a̱n hwinsiin hyaaro, nan geda o lalko. Koowe̱ ta̱m a̱n rebin hyaaro, nan sav o baa ka̱nk an gedma̱n lalko.5:22 Ka̱nk an gedma̱n lalko a̱n Yahude̱n rein ta po̱g Sanhe̱drin. Koowe̱ ta̱m a̱n tu ve̱v hyaaro u ze o, i vo kipi, nan de̱l o a̱nmin wa̱a̱ka̱n hwela. 23Rema̱n taanlo, av san m’ho̱s baan sakada̱n se̱ke̱m Na’Sil sako, av bakasaz az hyaara̱v ci v a̱n c’de̱be̱, 24baa lag ho̱sa̱m rov baa d’saka. A̱v hav a̱n se̱e̱pa̱vse̱ a hyaara̱v no. Daava̱n lo kaa a̱v vaaka a̱v sak ho̱sa̱m rovo.
25“Se̱e̱pse̱ na a̱ndaabe a kan ke̱in vo az a̱v emk o rihi daava̱n a̱n retin nu’hav baa s’lalko. Rema̱n kan ke̱in v lalk tu la̱a̱ a̱n badasa v a̱n komc kan gedma̱n lalko. Kan gedma̱n lalk ta̱ma̱, tu badasa v a̱n komc yassandana. Yassandan la, ta o̱m vo a de̱l a̱nmin buu s’ko̱mo̱. 26Lag na a̱m ve̱ce̱te̱ no m’ga̱u. A ta̱’v kum le̱vk nu’rwa̱n da, a za a̱v copk mo̱gda̱n lo kwe̱ da.
Ye̱so holk na d’o̱mo̱
27“A̱n hongk ta̱m na zeka, ‘An em la d’o̱m da.’5:27 Go̱t ta̱m: U’Rwa̱ 20:14.28Mi la a̱m zeka no, koowe̱ a̱n kekksain neta, u sav c’de̱b baa ru, u baask u emk d’o̱m a unwan a̱nmin de̱bc ru. 29Awaz isa̱d rov ta̱d de̱l a̱v ko̱to̱, ho̱l da̱ v duku. I u’kum baa rov a̱v rob yobun we̱du rovo, a̱nda na bono v a we̱du rova̱n u’biri a̱nmin wa̱a̱ka̱n hwela.5:29 Go̱t ta̱m: Mat 18:9; Mar 9:47.
30“Awaz ta̱m koma rov ta de̱l a̱v ko̱to̱, gedanna na̱ v duku. I u’kum baa rov a̱v rob yobun we̱du rovo, a̱nda na bono v a we̱du rova̱n u’biri a̱nmin wa̱a̱ka̱n hwela.5:30 Go̱t ta̱m: Mat 18:8; Mar 9:43.
Ye̱so holk na kuza̱m c’ga̱i
(Mat 19:9; Mar 10:11-12; Luk 16:18)
31“Na zeka az, ‘Koowe̱ a̱n to̱nin u kuz netav ru, az u ge̱ne̱ o vaaka̱n kwizid c’ga̱i.’5:31 Go̱t ta̱m: Mat 19:7; Mar 10:4.32Mi la a̱m zeka no, koowe̱ a̱n kuzin netav ru, a za rem d’o̱m da, u de̱lk o a̱n d’o̱mo̱. Koowe̱ ta̱m a̱n gain netauna̱n na kuzine, u el a̱n d’o̱mo̱.5:32 Go̱t ta̱m: Mat 19:9; Mar 10:11-12; Luk 16:18; 1Kor 7:10-11.
Ye̱so holk na s’conko
33“A̱n hongk ta̱m na zek an de̱hne, ‘An conk la a̱n c’ko̱l da. Ema A’Sil rina̱n v emtin d’kobo baa na̱.’5:33 Go̱t ta̱m: Ggdk 19:12; D’Og 30:2.34Mi la a̱m zeka no, an conk la da cakk. Za na’con da, rema̱n i dotaka̱n go̱mc Na’Sila̱.5:34 Go̱t ta̱m: Yak 5:12; Isa 66:1; Mat 23:22.35Za ta̱m a̱n copun yanda̱ha̱nna̱n da. Rema̱n i dotaka̱n sakasama̱n naas na̱. Za ta̱m a̱n le̱in Urisaliman da. Rema̱n i le̱i Na’Sila̱.5:35 Go̱t ta̱m: Isa 66:1; Zab 48:2.36Av conk la ta̱m a̱n hid rov da. Rema̱n a ta̱’v la̱a̱ a̱n pusa̱sa̱ alla a̱v rims v’hi da. 37Lag lalks no soot, ‘Ha̱.’ Awaz i rina̱n ta̱n zeta, ‘Ha̱.’ I soot ta̱m, ‘A̱’a̱.’ Awaz i rina̱n ta̱n zeta, ‘A̱a̱.’ Rina̱n to̱in taanl kwe̱, i lan baa A̱krimu.
Ye̱so holk na k’so̱to̱so̱
38“A̱n hongk ta̱m na zeka, ‘Kan he̱e̱kin na d’isa̱, na he̱e̱k la da̱ ru. Kan ho̱lin na v’nina̱, na ho̱l la v ru.’5:38 Go̱t ta̱m: U’Rwa̱ 21:24; Ggdk 24:20.39Mi la a̱m zeka no, a noc ema no v’dumu, an so̱to̱so̱ la da. Koowe̱ a̱n gonannain v a̱n yamun koma s’to̱o̱, panksa o yamu hyan. 40A noc sav a̱v baa c’go̱m u kabt la̱a̱pa̱k rovo, lag u o̱mese kusi rovo. 41Koowe̱ ta̱m a̱n tu de̱l a̱v na̱m’we̱s a̱v nweka o com v’me̱e̱l v’da̱n, nweka o s’ila̱.
42“A noc kon a̱v rihi, ne̱e̱ o. Kan to̱nin ta̱m d’mo̱g baa rovo, av hol la o da.
To̱n na an ha̱lin no
43“A̱n hongk ta̱m na zeka, ‘To̱n kan e̱s rov a̱v ha̱l kan ha̱lin vo.’5:43 Go̱t ta̱m: Ggdk 19:18.44Mi la a̱m zeka no, ‘To̱n na an ha̱lin no, a̱n cepka an reina̱n ryeesam no d’koba.5:44 Pe̱ge̱ na an ta ema no nwa̱a̱s s naak emu Na’Sila̱, ema na an ha̱lin no c’rihi c’kasi. Maatiyu zatta lalksa̱ ha̱n a̱n ge̱nke̱-ge̱nke̱ca̱n lalks Na’Sil ca̱n panksaca̱n de̱ha̱n da.45I taanl a̱n ta̱n soot ho̱d Na’Sil Ceta no un rein a̱nmi na’cona.’ Rema̱n a el ta de̱l hwed rwa̱n baa neta̱n naake a baa a kasi ni. A heesa ta̱m me̱nk baa an emma̱n rihic kasi a baa an emma̱n rihic naak ne. 46Rema̱n taanlo, awaz i an ta to̱n no c’taa a̱n ta̱n to̱no̱, iye̱ a̱n ta̱n kumu? An kabma̱n tal ta̱ma̱, a za ta em taanl da? 47Awaz ta̱m i an bano c’taa a̱n ta̱n po̱o̱so̱, iye̱ a̱n emin a̱n pa̱tt ahyan? An zain Yahude̱n da, a za ta em taanl da? 48Soot na an zattin ri d’reb da ho̱da̱na̱n ceta no un rein a̱nmi na’con zattin ri d’reb da.5:48 Go̱t ta̱m: Ggdk 19:2.
6La̱a̱s u m’ho̱so̱
1“An ema la kobneta̱n m’ho̱so̱ alla a̱n cepka, a̱n em ta̱m i’so̱o̱ti rema̱n neta̱n he̱nt no da. An em taanlo, a̱n zatta c’copa̱n baa Na’Sil Ceta no un rein a̱nmi na’con da.6:1 Go̱t ta̱m: Mat 23:5.
2“Rema̱n taanlo, an ze ne̱e̱m kobneta̱n rihi, an ba̱s la ho̱da̱na̱n oba̱lna d’kika̱ retin ta em a̱nmin ka̱bca̱n kargad Yahude̱n a s’le̱va̱n rema̱n neta̱n bo̱mt na̱ da. Lag na a̱m ve̱ce̱te̱ no m’ga̱u. A baask a kabk copa̱nc na̱. 3An ze la ne̱e̱m kobneta̱n rihi, an lag la koman kanta nap rina̱n koma s’to̱o̱ rein nu’em da. 4Lag na ho̱sa̱m no soot m’ze̱se̱. A’Sil Ceta no an rein ta he̱n rihica̱ m’ze̱s kwe̱, ta cop no.
La̱a̱s u s’cepko
5“An hwesa ta̱m s’cepko, an em la ho̱da̱na̱n oba̱lna d’kika̱ retin ta em da. A el ta to̱n a’es a̱nmi ka̱bca̱n kargad Yahude̱n a e̱s s’le̱va̱n a cepkt bat neta̱n ta he̱n na̱. Lag a̱m ve̱ce̱te̱ no m’ga̱u. A baask a kabk copa̱nc na̱.6:5 Go̱t ta̱m: Luk 18:10-14.6Nwaa la, an hwesa s’cepko, uv na a̱nmi k’kuru. Gweda na bira̱vna’isa̱n a̱n cepk baa ceta no un rein m’ze̱se̱. Ceta no ta̱m un rein tu he̱n rihica̱ m’ze̱se̱, tu cop no.
7“An ze ta̱m s’cepko, an em la ta̱n rera ho̱da̱na̱n an zain Yahude̱n retin ta em da. A el na̱m’ze az Sila ta hong na̱ rema̱n rerama̱n cepks na̱. 8An em la ho̱d na̱ da. Ai retin az a̱n konte, A’Sil Ceta no napk rina̱n ta̱n to̱n kwe̱. 9Go̱t na ho̱da̱na̱n ta̱n cepkte,
“ ‘Ceta co un rein a̱nmi na’cona,
na ne̱e̱ dind rov k’gwin,
10go̱mc rov han.
Na em to̱nu rov
a̱nmin copun yanda̱ha̱n
ho̱da̱na̱n na retin
nu’em a̱nmi na’cona.
11Ne̱e̱ co te̱nte̱
ryaakca̱n guba̱m d’hwen.
12Kwisi co ko̱tc co,
ho̱da̱na̱n c retin ca̱n
kwisi an rein ta ko̱t baa co.
13Av sav la co baa
c’ke̱ta̱mse̱ da,
a̱v gwa̱a̱ ta̱m co baa
ka v’dumu.
I vo a̱n ciin c’go̱m a
m’we̱s ne̱, a k’gwin ni,
d’kal-d’kala.’
14“An kwisi neta̱n ko̱tc na̱, A’Sil Ceta no an rein a̱nmi na’con ta kwisi la no ko̱tc no.6:14 Go̱t ta̱m: Mar 11:25-26.15An ta kwisi la neta̱n ko̱tc na̱ da, Ceta no un rein a̱nmi na’con a tu kwisi la no ko̱tc no da.
Ho̱da̱na̱n nan emt i’so̱o̱ti
16“An hwesa i’so̱o̱ti, an ho̱d la s’cuu ho̱da̱na̱n an budma̱n hwelana c’waal retin ta em da. A el ta ho̱d cuus na̱ bat ta kwesa neta̱n az a el ni’so̱o̱ti. Lag a̱m ve̱ce̱te̱ no m’ga̱u. A baask a kabk copa̱nc na̱. 17Nwaa la an hwesa i’so̱o̱ti, sapt na cuus no a̱n suk m’neve, 18rema̱n a neta̱n nap la az a̱n el ni’so̱o̱ti da. I A’Sil Ceta no an rein m’ze̱s a̱n napin az a̱n el ni’so̱o̱ti. A’Sil Ceta no ta̱m an rein ta he̱n rihica̱ m’ze̱se̱, ta cop no.
Em na d’Kinbu a’cona
19“An kargsa la hid no u’kum a̱n copun yanda̱ha̱n va̱na̱n te̱kte̱ka̱n a zo̱nn ta ok alla hiva̱n he̱e̱k a hiv da.6:19 Go̱t ta̱m: Yak 5:2-3.20Em na bano kinbud no a̱nz a’con va̱na̱n te̱kte̱ka̱n a zo̱nn zain nu’ok da. Va̱na̱n hiva̱n zain ta̱m na̱m’he̱e̱k a uv a hiv da. 21Rema̱n va̱na̱n kumu no reine, i a̱n a̱n’an ta̱n sav c’de̱be̱.
Za̱nd nu’we̱de̱
22“Ta̱sid nu’we̱de̱, i isa̱. Awaz is rov el m’ho̱o̱kno̱, we̱du rov u’biri ci d’za̱n. 23Awaz la is rov za m’ho̱o̱ka̱n da, we̱du rov u’biri el ni’cumunkunnu. Awaz ta̱m az za̱nda̱n rein baa rov i i’cumunkunnu, cumunkunin lo rork d’kala.
Emam Na’Sil m’coko
24“Noc za un tu tak a̱n ema an buu ru i’il m’cok da. Tu ha̱l uda̱nka̱, u to̱n uhyan alla u ne̱e̱ uda̱n k’gwin, u gin uda̱nka̱. I ho̱da̱n lo bo̱ ta̱ma̱, a ti ema a̱n ema A’Sil m’cok a̱n ema ta̱m kind da.
Av o̱so̱so̱ la hid rov da
25“Rema̱n taanlo, a̱m zeka no, an naas la c’de̱b a̱n nocurimuc no rema̱n rina̱n ta̱n ryaa alla rina̱n ta̱n so̱o̱ a rina̱n ta̱n to̱pa̱n da. Po̱tu ta pa̱t ho c’ryaak da? We̱du ta pa̱t ta̱m m’kus da? 26Keksa na nemna! A za ta gwaa da a za la ta ke̱m alla ta̱m a kargsa a de̱l a̱n c’be̱e̱ da. Go̱t la A’Sil Ceta no an rein a̱nmi na’con el ta ryaaksa na̱. A̱n ta pa̱t na̱ a̱n k’gwin da? 27Iwe̱ baa no un rema̱n naama̱n de̱bc ru, a̱n tu swidi hid ru c’hwen a̱n c’nocurimu?
28“I rema̱n ye̱ ta̱m a̱n ta̱n soot a̱n naam c’de̱b rema̱n kusa̱m nu’to̱po? Keksa na c’pa̱ru ho̱da̱na̱n c retin ca̱n gubu, ca̱ za ca̱n em a’yomk alla ta̱m c em a’caa da. 29Lag a̱m ve̱ce̱te̱ no m’ga̱u. So̱lmo̱n a gwink run kwe̱, a̱n na walg o i’kasi ho̱d k’pa̱r da.6:29 Go̱t ta̱m: 1Go̱m 10:4-7; 2Ggo̱ 9:3-6.30Nwaa an kalkma̱n bata̱m d’ba̱t baa Na’Sila̱, awaz kaa Sila ta walg c’gwe̱e̱, ca̱n rein te̱nte̱, buk taaha̱n na dwaak ca̱ a̱n hwela, a ta pa̱t a̱n walga̱m no da?
31“Rema̱n taanlo, an naas la de̱bc no na̱m’ze, ‘Iye̱ a̱n ca̱n ryaa?’ Alla ‘Iye̱ a̱n ca̱n so̱o̱?’ Alla ta̱m ‘I ho̱da̱npe̱ a̱n ca̱n kumt rina̱n ca̱n to̱po̱?’ 32I goon rihica̱ ha̱n a̱n an zain Yahude̱n da reina̱n hobo. Go̱t la A’Sil Ceta no, an rein a̱nmi na’cona, a napk az ta̱n to̱n ca̱ kwe̱.
33“Hob na bano go̱mc Na’Sil na̱m’e̱te̱, a̱n em ta̱m to̱nu na̱, rihica̱ ha̱n kwe̱ nan ne̱e̱se no ca̱nca ta̱ma̱. 34An naas la c’de̱b rema̱n buk da. Buk tu noka a o̱so̱mo̱d ru nu. Rihic naak ca̱n rein te̱nte̱, ca̱ ma̱a̱nka̱ hweda̱n te̱nte̱.
7An geda la ahyan lalk da
1“Av geda la noc lalk da, bat vo la a nan geda la v da. 2Ho̱da̱na̱n v gedatain ahyan lalko, i ho̱da̱n lo bo̱ a̱n Sila ta gedata la v lalko. A̱n honin na̱ v me̱e̱kte̱in ahyan, i a̱n inya a̱n nan me̱e̱kte̱ la vo.7:2 Go̱t ta̱m: Mar 4:24.3I rema̱n ye̱ a̱n ta̱’v he̱nt v’gwe̱e̱ a̱n isa̱d hyaarvo, a̱v ha̱l kaa a̱n he̱n kungka̱n rein a̱n isa̱d rovo? 4I’le̱e̱le̱ a̱n ta̱’v zeta hyaarvo, ‘Lag a̱m ho̱l va̱ v’gwe̱e̱ a̱n d’isa̱.’ Go̱t la kunguk el a̱n isa̱d rovo? 5Vo oba̱l va̱ d’kika̱, baa ho̱l kungka̱n rein a̱n isa̱d rovo. Daava̱n lo kaa ta̱’v he̱n a d’ke̱mne̱nne̱ a̱v ho̱lt v’gwe̱e̱ a̱n isa̱d hyaarvo.
6“An ne̱e̱ la o̱ma̱n rina̱n ciin k’gwin da, ta panka a e̱pe̱l no. An ne̱e̱ la ta̱m ale̱de̱n rina̱n rein i kasin ho̱da̱n taar yal-yal in kind hwe̱di da. Rema̱n ta le̱vga̱l e.
Kon na, hob na, kult na
7“Kon na, nan ne̱e̱ no. Hob na, ta̱n kumu. Kult na, nan a̱ba̱sa̱ no. 8Koowe̱ a̱n konine, nan ne̱e̱ o. Kan hobin ta̱m kwe̱, tu kumu. Koowe̱ ta̱m a̱n kultini, nan a̱ba̱sa̱ o.
9“Iwe̱ baa no, un waav ru tu kon o d’kaka, u ne̱e̱ o d’taare? 10Alla au kon o ge̱ne̱, u ne̱e̱ o obla? 11Awaz nwaa an rein a v’dumu, a̱n napk ho̱da̱na̱n ta̱n emata aka̱n no ho̱sa̱m kasi, i daat bo̱ kaa A’Sil Ceta no an rein a’cone? Ta ne̱e̱ an konin na̱ ho̱sa̱m kasi. 12Rina̱n to̱nin neta̱n ema no kwe̱, ema na na̱ ho̱da̱n lo. I taanl a̱n rein geda̱n giiras Na’Sil a la̱a̱ss baranc Na’Sil na̱.7:12 Go̱t ta̱m: Luk 6:31.
Huta̱d mo̱dke
13“Uv na a̱n huta̱d mo̱dke. Hutda̱n sava̱m neta̱n baa na’wa̱a̱, i yagte a̱d reine. I neta̱n la hwe̱di a̱n dagin le̱vk ne. 14Huta̱d mo̱dk la, ta̱d cet neta̱n nu’po̱to. I neta̱n i’hona la a̱n he̱nin le̱vk ne.
A na nap ce a̱n yaanc ru
15“La̱a̱ na a’ha̱gc a baranc Na’Sil a c’ko̱l no̱. An ta han baa no ho̱d kyo̱o̱mno̱, go̱t la a̱nmin de̱bc na̱, i a c’gaag ho̱d o̱mna d’kade. 16Ta̱n nap na̱ a̱n rina̱n a rein ta ema. Hila̱ la tu mat yaanina̱n nan ryaa alla la̱nda̱ mat a̱n boma? 17I ho̱da̱n lo bo̱ ta̱ma̱, ce kasi tu mat yaan kasi. Ce naak mat la yaan naake. 18Ce kasi a tu tak a̱n mat yaan naak alla ce naak tak a̱n mat yaan kasi da. 19Kooye̱ cewa a̱n ta matin yaan kasi da, nan ged o na bono a̱nmin hwela.7:19 Go̱t ta̱m: Luk 3:9.20I ho̱da̱n lo bo̱ a̱n ta̱n napt baranc Na’Sil a c’ko̱l a̱n rina̱n a rein ta ema.7:20 Go̱t ta̱m: Mat 12:33.
A̱m ta tak a̱n nap no da
21“Za koowe̱ a̱n tu po̱g a̱m, ‘Kanubu, Kanubu,’ a̱n tu uv a̱n go̱mc na’con da. I kan tu em to̱nu Cet me un rein a̱nmi na’con a̱n tu uvu. 22A̱n hweda̱n gedma̱n lalko, neta̱n hwe̱di ta po̱g me. Ta ze, ‘Kanubu, Kanubu, ca̱ vatk com Na’Sil a̱n we̱sma̱n dind rovo. Ca̱ vega̱lk ta̱m rinnas’ce a̱n dind rovo. A̱n dind rov ta̱m a̱c emka̱ltin rihica̱ c’he̱te̱.’ 23I a̱n daava̱n lo a̱n ta̱’m ze na̱ a̱ncass, ‘A̱m ta tak a̱n nap no da. Unu na baa ri, nwaa an emin rihic naake!’7:23 Go̱t ta̱m: Zab 6:8.
Net ni’il an emin a’maa
24“Rema̱n taanlo, koowe̱ a̱n hongin lalks ri sa̱ha̱n ta̱m u gab sa̱, ta̱’m hwenna̱sa o a̱n noc ka s’ver un main buu ru nu’taare. 25A me̱nk kasa, weru duva̱, e̱nc gudga̱ c viga̱msi buune, a tu hyaa la da. Rema̱n na maak o nu’taare.
26“Koowe̱ ta̱m a̱n hongin lalks ri, u ha̱l a̱n gab sa̱, nan hwenna̱sa o a̱n kipi, un main buu ru a̱n k’mama. 27A me̱nk kasa, weru duva̱, e̱nc gudga̱ ta̱m c viga̱msi buune, tu hyaa furupp.”
We̱sma̱n go̱mc Ye̱so
28Daava̱n Ye̱so taastin lalksa̱ hna, neta̱n robk rina̱n ta ze in tanin la̱a̱s ru.7:28 Go̱t ta̱m: Mar 1:22; Luk 4:32.29Rema̱n u la̱a̱ska̱ na̱ la̱a̱s ho̱d ka̱n ciin c’go̱mo̱, za ho̱d an la̱a̱sa̱m na s’giira da.
8Ye̱so taask a̱ra̱m c’daka
1An Ye̱so cizgta̱in a̱n se̱me̱, damran bugca̱n neta̱n gabka o. 2Go̱to̱ kan gaag c’dak haka u emaka o c’hwiipsa̱. U zeka o, “Kanubu, awaz a̱v to̱nko̱, ta̱’v la̱a̱ v taas a̱m gaago8:2 taas a̱m gaago: Koowe̱ a̱n ciin c’dak a̱n copun Isra’ila, u ci c’ko̱pto̱ ta̱m au uva̱ baa neta̱n da..” 3Ye̱so tapta bo̱ koma ru u do̱v o. U zeka, “A̱m to̱nko̱, dakc taa vo.” A̱ndaabe la, dakc taak o. 4Ye̱so zeta bo̱ o, “To̱o̱ a̱n c’rovo. Av ve̱ce̱ la noc da. Hav baa go̱m va̱ d’ka̱b u Na’Sil a̱v em ta̱m m’ho̱s ho̱da̱n Mosa zetin no. Bat ti soot rina̱n ti kwesa az dakc taak vo.”8:4 Go̱t ta̱m: Ggdk 14:1-32.
Ye̱so taask cok gaago
5An Ye̱so uvta̱in a̱n le̱in Kafarnahum, so̱dka̱v koola̱n haka baa ru u konk o d’se̱e̱te̱. 6U zeka o, “Kanubu, coka̱v ri el a’la̱t nu’bu u’we̱d u talke. U el ta̱m a̱n ryaaka̱ d’kob hwe̱di.”
7Ye̱so zeta bo̱ o, “Ta̱’m hau a̱m taas o gaag ru.” 8So̱dka̱v koola̱n se̱st bo̱ o, “Kanubu, a̱m ta ma̱a̱na̱ v uva̱ a̱n buu ri da. Ze ba̱ra̱v d’gom c’taa, gaag tu taa coka̱v ri. 9A̱m ci so̱dka̱n ri. Mi ta̱m i so̱dka̱v ahyan. Am ze noc uha̱n, ‘To̱o̱!’ Tu to̱o̱ la. Am ze ta̱m uhyan, ‘Noka ha.’ Tu noka la. Coka̱v ri ta̱ma̱, am ze, ‘Em taahna.’ Tu em la e.”
10An Ye̱so hongtin taanlo, u sipk a’nwa̱a̱. U zek an la̱a̱s baa ru, “Lag a̱m ve̱ce̱te̱ no m’ga̱u. A̱m ta hwesa he̱n noc a̱nmin copun Isra’ila a goon bata̱m d’ba̱ta̱n hwe̱di baa Na’Sil ho̱d uha̱n da. 11A̱m el ta̱m a̱n ve̱ce̱m no. Neta̱n hwe̱di ta han lanma̱n rwa̱nma̱ d’hwen a hyooma̱ d’hwen ne. A soot ta̱m baan zegak c’ryaak a Ibrahi ni a Isaaku nu a Yakubun a̱nmin go̱mc Na’Sila̱.8:11 Go̱t ta̱m: Luk 13:29.12Na̱nna akna c’go̱m la, nan bono na̱ a̱nmi k’cumunkunu. Va̱na̱n ta o̱n s’o̱n a ta̱uda̱n nin na̱.”8:12 Go̱t ta̱m: Mat 22:13; 25:30; Luk 13:28.
13Ye̱so zeta bo̱ so̱dka̱v koolno, “To̱o̱ a̱n c’rovo. Nan ema v ho̱da̱n batma̱n ba̱ta̱d rovo.” Gaag taak la cokune a̱n ho̱rva̱n lo.
Ye̱so taask neta̱n s’malse
14An Ye̱so cetain buu Bitrus, u gitka̱ in netav Bitrus a’la̱t mals ci o. 15Ye̱so do̱vt bo̱ koma ru, mals batuz la o. U unuku ta̱m u liktki na̱.
16An rima tudtine, na savaka o neta̱n hwe̱di an rinnas’ce sipine. U vogk rinnas’ce nane a̱n lalk ru. U taask ta̱m an gaag kwe̱ malss na̱. 17I em-em taanl rema̱n na esasta rina̱n Isaaya k’barav Na’Sil vatine. U zeka, “U o̱mk so̱na̱m cinna. U taask ta̱m na s’mals kwe̱.”8:17 Go̱t ta̱m: Isa 53:4.
An zein az ta gab Ye̱so
18An Ye̱so he̱ntin damran bugda̱n neta̱n rigk o, u zek an gaba̱m ru az a pas a caa bilk hyan ka̱n ge̱nka̱n Galili. 19Kan la̱a̱sa̱m na s’giira uhyan nokka ta̱ma̱. U zeka o, “Kanubu, ta̱’m gab a̱v koope̱ a̱n ta̱’v hava.” 20Ye̱so zeta bo̱ o, “O̱mna d’kad ci s’wa̱a̱. Nema̱n ci ta̱m c’ta̱ndi. Mi Waav Noc la, a̱m zatta baada̱ d’la̱cu da.”
21Kan la̱a̱s baa ru uhyan zeka ta̱m o, “Kanubu, lag a̱m baa gya̱a̱ m saga cet me.” 22Ye̱so zeta bo̱ o, “Gaba ha me. Lag an wa̱in a sag wa̱a̱c na̱.”
Ye̱so esaska c’e̱n
23An Ye̱so uvtin a̱n bumbka̱ m’ho̱o̱ u past rigt hyan, an la̱a̱s baa ru gabka o. 24Cunksi, go̱to̱ damra c’e̱n gudgka̱ na̱m’saa. I de̱lk hwensa̱ m’ho̱o̱ bitiki bumbka̱ m’ho̱o̱. Ye̱so la, u el na̱m’la̱v piss. 25An la̱a̱s baa ru hata bo̱ a pa̱dksa̱ o. A zeka o, “Kanubu, gwa̱a̱ co, ca̱n hav nu’ya̱u.”
26Ye̱so zeta bo̱ na̱, “Nwaa an kalkma̱n bata̱m d’ba̱t baa Na’Sila̱! I rema̱n ye̱ a̱n gelk ryaatin no?” U unutu bo̱ u haagsa c’e̱n a m’saa na. Rihic resuz la te̱kk a̱ndaabe.
27An la̱a̱s baa ru sipt bo̱ a’nwa̱a̱. A zeka, “Iye̱ goon nocwa ha̱n un c’e̱n a m’saan ta gab lalk ru?”
Ye̱so vogk neta̱n rinnas’ce
28Ye̱so pask rigtun bilk hyan. U uvka̱ ta̱m a̱n copu netnan Garasin. U gwaantaz net ni’il an rinnas’ce sipini. A lan ta rwa̱n-rwa̱n baa c’sago. A rork c’gaago, ta hol ta̱m neta̱n to̱o̱ma̱n le̱vk ne. 29A̱n daava̱n lo, a zek na̱m’we̱se̱, “Iye̱ v to̱nin a cwan na, vo Waav Na’Sila̱? A̱v han-han taha̱n a̱v ryeesta co d’kob baa daav va caa?”
30A̱n daava̱n lo, bugda̱n ale̱de̱n lak a̱n c’ta̱a̱g a̱n hwic na̱ ca̱nmi. 31Rinnas’cen kont bo̱ o, “Av vog co, lag co c uv a̱n bugda̱n ale̱de̱nan zo.”
32U zeta bo̱ na̱, “Nok na.” Aa ruta̱in la, a duvk a̱n ale̱de̱nane. Ale̱de̱n somk a̱n s’kwe̱e̱v a virkka̱ lanm k’se̱m a yiik na̱m’saa a uk kwe̱.
33An go̱tec na̱ swema̱rk koowe̱ a̱n le̱vk ru a uvk ni’le̱e̱. A vatk ta̱m rina̱n emin kwe̱ a rina̱n kumin an rinnas’ce lain a sipka̱. 34Neta̱n ruka̱ i’le̱e̱ i’biri a haka a gitka̱ Ye̱so. Aa he̱ntin o, a konk o az u rwa̱a̱ u lag copu na̱.
9Ye̱so taask a̱ra̱m m’le̱me̱
1Ye̱so uvk ta̱m a̱n bumbka̱ m’ho̱o̱ u pask u cek le̱i ru. 2Neta̱n o̱mto̱ bo̱ a̱ra̱m le̱m a’la̱ta̱sa̱ a̱n k’zega a savaka o. An Ye̱so he̱ntin batma̱n ba̱ta̱d na̱ baa Na’Sila̱, u zeka le̱me̱, “Waare, em pusuu c’de̱be̱, na kwisiki v ko̱tc rovo.”
3Na kumt bo̱ ahyan baa an la̱a̱sa̱m na s’giira an zein a̱n de̱bc na̱, “A̱rm uha̱n el a̱n elovsa̱m Na’Sila̱.”
4Ye̱so la, ai retin u napk keka̱bs na̱ kwe̱, u zeka na̱, “I rema̱n ye̱ a̱n retina̱n keka̱bs s naak a̱n de̱bc no? 5Iye̱ a̱n pa̱tini? I a̱m ze, ‘Na kwisiki v ko̱tc rove?’ Alla i a̱m ze, ‘Unu v em a’ha̱gci?’ 6Rema̱n a̱n napt la az, mi Waav Noco, a̱m ci m’we̱s a̱n copun yanda̱ha̱n a̱m kwisi na c’ko̱to,” u zeka le̱me̱, “Unu! O̱m zegak rov a̱v gya̱a̱.”
7Le̱m unuku la u gyiika̱. 8An bugca̱n neta̱n he̱ntin rina̱n emine, a sipk a’nwa̱a̱. A ne̱e̱k ta̱m Sila nan ne̱in neta̱n goon we̱sma̱ ha̱n k’gwin.
Ye̱so po̱gk Maatiyu
9An Ye̱so una̱vta̱in a̱n a̱n’a, u he̱nk nocuna̱n nan po̱g Maatiyu a’soot baan kabma̱n tala. U zeka o, “Gaba me.”
Maatiyu unuku la u gabk o.
10An Ye̱so soottin a̱n c’ryaak a̱n buu Maatiyu, an kabma̱n tal hwe̱di a a c’ko̱ta̱n haka a sootk a ryaakt a unwan d’kut a an la̱a̱s baa ru nu.9:10 Go̱t ta̱m: Luk 15:1-2.11An Farisin he̱ntin na̱, a zeka an la̱a̱s baa ru, “I rema̱n ye̱ a̱n kan buu no retina̱n c’ryaak a an kabma̱n tal a a c’ko̱t no?” 12An Ye̱so hongtin tan, u zeka na̱, “An rein m’ho̱o̱kno̱, a ta hob ka s’banc da. I an gaag a̱n rein ta hob ka s’banco. 13Nok na a̱n keka̱b rina̱n lalks Na’Sil sa̱ha̱n rein nu’vato. Sa̱ zeka, ‘I za̱ima m to̱nin az a̱n ci, za sak no da.’ A̱m ta han a̱m po̱gt an gela̱v Na’Sil da, i a c’ko̱t a bita̱l c’hwin, a lag c’ko̱to.”9:13 Go̱t ta̱m: Mat 12:7; Hos 6:6.
Lalk ni’so̱o̱ti
14An la̱a̱s baa Yohana kan emam na baptisma haka baa Ye̱so. A zeka o, “I rema̱n ye̱, a̱n cwan a Farisin retin ca̱n em i’so̱o̱ti, go̱t la an la̱a̱s baa rov za ta em da?”
15Ye̱so zeta bo̱ na̱, “Ti ema an havin a̱n he̱ta̱d c’ga̱i em naam c’de̱b daava̱n ga̱a̱gi retin baa na̱? Hwed lan la, daava̱n nan o̱mt ga̱a̱gi baa na̱. I a̱n daava̱n lo a̱n ta emt i’so̱o̱ti.
16“Noc za un tu zo̱p kusi ut a̱n ke̱pse̱d pooda̱n da. Au em taanlo, ke̱pse̱da̱n na zo̱ptin i’kus ta̱d sud a̱n sa̱ta̱nvna̱ i’kusu. 17Na za nan de̱l ho̱o̱ma̱n yaanin cen anab m’pooma̱n a̱nmin kwa̱a̱ca̱n we̱dc9:17 Yahude̱n el ta em kwa̱a̱c c’we̱d ta de̱lt ho̱o̱ma̱n yaanin ceun anab. Ai retin ho̱o̱m po̱o̱ma̱n el ta̱m unu, a ta de̱l ma̱ a̱n kwa̱a̱c ut da, rema̱n aa de̱l ma̱ kwa̱a̱c ca̱n he̱e̱ke̱. c ut da. A na em taanlo, ca̱n purt ho̱o̱ma̱n yaanin ceun anab aska, na rob ta̱m kwa̱a̱c ne. I a̱n kwa̱a̱ca̱n we̱dc c’pooca̱n a̱n nan de̱lt ho̱o̱ma̱n yaanin ceun anab m’poomne. I taanl a̱n kwa̱a̱c zatin nu’purt na rob ca̱ d’kut a ho̱o̱ma̱n yaanin ceun anab a̱n da.”
Ye̱so po̱to̱sko̱ kan wa̱ini
18An Ye̱so latina̱n vatma̱n rihica̱ hna, go̱to̱ k’go̱mgo̱m haka u hek a̱n c’rwin a̱n hwic ru. U zeka o, “Waa’wantava̱n buu ri uk a̱nta̱ma̱ hna. Puti a tan na, noka v dweda o a’koma bat tu po̱to̱.”
19Ye̱so unuku la u gabk o. An la̱a̱s baa ru gabka ta̱m na̱.
20Aa latin ta nok-noka, go̱to̱ neta kan he̱nin u’cin s’we̱e̱ oopa a̱n s’il i ta ged da. U nokka a̱n dima̱, u do̱vk nwa̱a̱da̱n kusi Ye̱so. 21U zek a̱n c’de̱be̱, “Am kum a̱n do̱v kusi ru c’taa, gaag tu taa me.”
22Ye̱so pankta bo̱. Au he̱ntin netaune, u zeka o, “Waare, la̱ta̱sa̱ de̱bc rovo. Batma̱n ba̱ta̱d rov baa ri taask a̱v gaago.” Na taask neta gaag lanma̱n ho̱rva̱n lo.
23An Ye̱so uvta̱in a̱nmin buu k’go̱mgo̱mune, u he̱nk an hinca̱n wa̱a̱ a neta̱n hyan a̱n yakkav s’kan. 24U zeta bo̱ na̱, “Rwa̱a̱ na kwe̱. Waa’wanta ta wa̱a̱ da. I la̱vma u retine.” A ke̱ka̱lt bo̱ o a ceesa. 25An na vogtin neta̱n a ruk na’isa̱, Ye̱so uvk a̱nmi u sipk koma waa’wantaune. Waa’wanta unutu bo̱. 26Lalksa̱n lo ba̱rga̱k u’cop u’biri.
Ye̱so taask a̱ra̱m ni’il m’poma
27An Ye̱so lagtin baad ne, pom ni’il gabka o a̱n s’kan. A zeka, “Vo Waav Dauda, hong za̱im co.”
28An Ye̱so uvtin a̱nmi nu’bu, pomnan lo haka baa ru. Ye̱so zeta bo̱ na̱, “A̱n batk d’ba̱t az ta̱’m la̱a̱ a̱n em ri hne?”
A se̱sk la o, “Ha̱, Kanubu.”
29Ye̱so do̱vt bo̱ is na̱. U zeka, “Rema̱n batma̱n ba̱ta̱d no, i taak no.” 30Is na̱ a̱pa̱ska̱ la a̱ndaabe, a he̱nke̱. Ye̱so saak ta̱m na̱ d’rin u zeka, “An ve̱ce̱ la noc ri ha̱n da.”
31A̱n’a la, aa to̱o̱tine, a ba̱sk dind Ye̱so koope̱ a̱nmin copun lo.
Ye̱so taask a̱ra̱m m’kyurmu
32An Ye̱so a an la̱a̱sa̱n baa run latin ta̱m ta rwa̱n-rwa̱n nu’bu, neta̱n hyan savaka o kan rinnas’ce sipin a holk o s’igmu. 33Au vogtin rinnas’ce nane, nocune, u iga̱mka̱. Bugca̱n neta̱n sipk a’nwa̱a̱. A zeka, “A̱n na tak a̱n he̱n goon taaha̱n a̱nmin copun Isra’ila da.” 34Farisin zeta bo̱, “I a̱n we̱sa̱m A̱krimu, go̱m va̱ rinnas’ce, u retina̱n voga̱m rinnas’ce.”9:34 Go̱t ta̱m: Mat 12:24; Mar 3:22; Luk 11:15.
Ye̱so kan za̱im netna
35Ye̱so paak damra m’le̱e̱ a m’esma̱n a̱n la̱a̱sa̱m neta̱n a̱n ka̱bca̱n kargad Yahude̱ne̱, tu bisi na̱ kasi lalkun go̱mc Na’Sila̱. U taask ta̱m s’mals a kooye̱ goon gaagwan baa netna. 36Au he̱ntin bugca̱n netna, u hongk za̱im na̱ hwe̱di d’kal rem a cuulku. A zatta ta̱m kan se̱e̱te̱m na̱ da. A ba̱rgk ta̱m ho̱d kyo̱o̱mnanan zattin ka c’go̱te da. 37U zet bo̱ an la̱a̱s baa ru, “Ke̱m rork d’kal-d’kala, go̱t la a na’yomk za hwe̱di da.9:37 Go̱t ta̱m: Luk 10:2.38Kon na Kanubu bat tu cuka̱ an ke̱m a̱n belu ru.”
10Ye̱so dagk an la̱a̱s baa ru
1Ye̱so po̱gto̱ bo̱ an la̱a̱s baa ru oopa ni’ila̱. U ne̱e̱k na̱ we̱sma̱n vega̱lma̱n rinnas’ce, a taas ta̱m kooye̱ goon malswa a kooye̱ goon gaagwa na. 2Go̱t dinc an la̱a̱s nane oopa ni’ila̱: Kam’e̱t i Simo̱n (kan nan po̱g Bitrus) a ha̱nun Andarawus, Yakub waav Za̱ba̱di a̱n ha̱nu Yohana. 3Go̱t Filip a Batalomi ni, Toma a Maatiyu kan kabma̱n tal na, Yakub waav Halfa a Tadiyo̱s ne. 4Go̱t ta̱m Simo̱n kan hyubud nu’cop a Yahuda Iskariyo̱tin, un babin Ye̱so a̱n d’be̱se̱.
Ye̱so comk an la̱a̱s baa ru
5Ye̱so comk an la̱a̱s baa ru oopa ni’ila̱. U zeka na̱, “An hav la baa an zain Yahude̱n da, an uv la ta̱m a̱n le̱e̱m an Samariya da. 6Hav na bano baa netnan Isra’ila, an rein ho̱d kyo̱o̱mna s’yango. 7An la ta̱n nok-noka, ba̱s na ta̱n ze, ‘Go̱mc Na’Sil ceka d’viivi.’10:7 Go̱t ta̱m: Luk 10:4-12.8Taas na an gaag, gaag na̱. Taas na a c’dak dakc na̱. Po̱to̱so̱ na an wa̱ine. Vega̱l na rinnas’ce. I m’ho̱s a̱n kabine, ne̱e̱ na ta̱m na̱ m’ho̱so̱.
9“An o̱m la zo̱n alla ko̱m gyo̱zin alla ko̱m pusin a̱n baic no da. 10An o̱m la baika̱ m’baala alla m’kus a̱m ila̱ alla c’kaat a d’kyura̱n da. I ge̱be̱ske̱ kanayomk kab copa̱nc ru.10:10 Go̱t ta̱m: 1Kor 9:14; 1Tim 5:18.
11“Kooye̱ le̱e̱ya alla hergewa a̱n uvtine, hob na kan rein tu to̱n cila̱sa̱m netna u cila̱sa̱ no caama̱n daava̱n ta̱n lagt le̱in lo. 12An ze uva̱m nu’bu, po̱o̱so̱ na na̱. 13Aa marssa no, lag na pusuu no soot baa na̱. Awaz la a ta marssa no da, lag na pusuu no vaaka baa no.
14“Koowe̱ ta̱m a̱n ta marssain no alla ta̱m u hong lalk no da, an ze lagma̱n buun lo alla le̱in lo, pezg na budgda̱n naas no.10:14 Go̱t ta̱m: YCCo 13:51.15Lag a̱m ve̱ce̱te̱ no m’ga̱u. Ti piti netnan So̱do̱m na Gomora a̱n hweda̱n gedma̱n lalko, a̱nda le̱in lo.10:15 Netnan So̱do̱m a Gomoran, Sila hok na̱ rema̱n ko̱tc na̱.10:15 Go̱t ta̱m: Mat 11:24; Luk 10:3; D’Tak 19:24-28.
Ryaaka̱n kobda̱n laine
16“A̱m el a̱n coma̱m no ho̱d kyo̱o̱ma̱n baa o̱mna d’kade. Rema̱n taanlo, soot na a s’vera̱n ho̱d oba̱lna, tupp ta̱m ho̱d gora̱bna. 17Soot na a c’walg no. Rema̱n neta̱n ta sav no baa ka̱nk an gedma̱n lalko, a swepa̱l ta̱m no a̱n s’lak a̱nmin ka̱bca̱n kargad Yahude̱ne̱.10:17 Go̱t ta̱m: Mar 13:9-11; Luk 12:11-12; 21:12-15.18Rem ri, ta sav no a̱n hwic an go̱mc nu’cop a baa go̱mgo̱mno̱. Ta̱n kum kaa ke̱e̱da̱n ve̱ce̱m na̱ lalks ri, na̱nna d’kut a an zain Yahude̱n da.
19“Daava̱n ta sipt no a uvt baan lalko, an keka̱b la rina̱n ta̱n vat alla ta̱m ho̱da̱na̱n ta̱n vatt e da. Sila ta la̱a̱sa̱ no a̱n ho̱rva̱n lo, rina̱n ta̱n vata. 20Rema̱n za nwaa a̱n ta̱n iga̱m da. I Hora̱md Na’Sil Ceta no a̱n reina̱n s’lalk a̱nmi baa no.
21“Noc tu badasa ha̱nu na hote. Taanl ta̱m a̱n cetok ka̱n emata waa. Aka̱n ta̱m ta gudgva̱ matka̱n na̱, a de̱l ta̱m na hwaa na̱.10:21 Go̱t ta̱m: Mar 13:12; Luk 21:16.22Neta̱n kwe̱ ta ha̱l no rema̱n dind ri. Kan gagin la c’de̱b caam d’be̱se̱, nan gwa̱a̱ o.10:22 Go̱t ta̱m: Mat 24:9; 13; Mar 13:13; Luk 21:17.23Aa ryeesa no d’kob a̱n le̱i hna, som na a̱n caa le̱i hyan. Lag na a̱m ve̱ce̱te̱ no m’ga̱u. A ta̱n taas paama̱n le̱e̱ma̱n Isra’ila kwe̱ da a̱n mi, Waav Noc ta̱’m hata.
24“Kan na rein nu’la̱a̱sa̱, a tu tak a̱n hat kan reina̱n la̱a̱sa̱m ru da. Cok ta̱m au tak a̱n so̱d kan buu ru da.10:24 Go̱t ta̱m: Luk 6:40; Yoh 13:16; 15:20.25Ti hyoo kan kabma̱n la̱a̱si, awaz u cek kan la̱a̱sa̱m ru. Cok soot ta̱m ho̱d kan buu ru. Awaz a po̱gk kanubu A̱krimu, go̱mv rinnas’ce,10:25 A̱krimu, go̱mv rinnas’ce: Un nan po̱g “Ba’alzabul”. iye̱ a̱n ta po̱g netnan buu ru?10:25 Go̱t ta̱m: Mat 9:34; 12:24; Mar 3:22; Luk 11:15.
Un nan gela
26“Rema̱n taanlo, an hong la gela̱v na̱ da. Rihi za in na bitiin in na zain nu’ba̱tksa̱ da. Rihi za ta̱m a’ze̱s in na zain nu’a̱da̱sa̱ da.10:26 Go̱t ta̱m: Mar 4:22; Luk 8:17.27Rina̱n m ve̱ce̱in no m’ze̱se̱, vat na e a̱ncass. Rina̱n na zwe̱me̱in no ta̱ma̱, ba̱s na e koowe̱ honga. 28An hong la gela̱v an ta hwaa noco, a ta hweks la a̱n hwaa hora̱md ru da. Hong na bano gela̱v Na’Sil an ta hweks hwaam noco, a be̱se̱ a bono hora̱md ru a̱nmin wa̱a̱ka̱n hwela.
29“Za v’anini v’da̱n a̱n na rein nan bab kara̱m ni’il da? Da̱nv na̱ la au tak a̱n hyaa nu’cop a za a to̱nka̱d Na’Sil Ceta non da? 30Hisa̱n hid no kwe̱, i sa̱ oga̱mke. 31Rema̱n taanlo, an hong la v’gel da, a̱n hatk kara̱mna̱n a̱n k’gwin hwe̱di baa Na’Sila̱.
Hyaama̱n naps Ye̱so
32“Koowe̱ a̱n tu ve̱ce̱ neta̱n az u el a̱n gaba̱m ri, mi la ta̱’m ve̱ce̱ Cet me un rein a̱nmi na’cona, az nocun lo i kan gaba̱m ri. 33Koowe̱ la a̱n tu hyaa naps ri a̱n hwic netna, ta̱’m hyaa la ba̱ri naps ru a̱n hwic Cet me un rein a̱nmi na’cona.10:33 Go̱t ta̱m: 2Tim 2:12.
Ye̱so saka d’wankse baa netna
34“An keka̱b la az a̱m han-han a̱m la̱ta̱sta̱ de̱bc an copun yanda̱ha̱n da. A̱m ta han rema̱n a̱m la̱ta̱sta̱ na̱ c’de̱b da, i vanka m sain ne. 35A̱m haka, ‘A̱m damasa noc a ceto no, waa’wanta a inu nu, waa’neta ta̱m a in wa̱ru nu. 36An ha̱lc noc ta soot an buu ru.’10:36 Go̱t ta̱m: Mik 7:6.
37“Koowe̱ a̱n pa̱tina̱n to̱na̱m ceto alla inu, i hat ho̱da̱na̱n u to̱ntin me, u ta ma̱a̱na̱ gaba̱m ri da. Kan to̱nin ta̱m aka̱n ru i hat ho̱da̱na̱n u to̱ntin me, u ta ma̱a̱na̱ gaba̱m ri da. 38Koowe̱ a̱n ta walgin ryaaka̱ d’kob ho̱d kan to̱o̱sin kanka̱n nan hot o, u gaba m da, u ta ma̱a̱na̱ gaba̱m ri da. 39Koowe̱ a̱n hobin po̱tu ru, tu rob o. Koowe̱ la a̱n robin po̱tu ru rem ri, tu kum o.10:39 Go̱t ta̱m: Mat 16:24; Mar 8:34; Luk 9:23.
C’Cop no
(Mar 9:41)
40“Koowe̱ a̱n kabin no, i mi u kabine. Kan kabin ta̱m me, i kan comain me u kabine.10:40 Go̱t ta̱m: Mar 9:37; Luk 9:48; 10:16; Yoh 13:20.41Koowe̱ a̱n kabin k’barav Na’Sil rema̱n u el k’barav Na’Sila̱, tu kab copa̱nc k’barav Na’Sila̱. Koowe̱ ta̱m a̱n kabin kan gela̱v Na’Sil rema̱n u el kan gela̱v Na’Sila̱, tu kab copa̱nc kan gela̱v Na’Sila̱. 42Koowe̱ ta̱m a̱n tu ne̱e̱ da̱nv aka̱n rekan aha̱n koklin ho̱o̱m tudk a so̱o̱t rema̱n a el an la̱a̱s baa ri, lag na a̱m ve̱ce̱te̱ no m’ga̱u, a tu rob copa̱nc ru da.”
11Yohana comk neta̱n baa Ye̱so
1An Ye̱so taastin emam an la̱a̱s baa ru oopa ni’il la̱a̱si, u unuku u havk a̱n d’ba̱s a la̱a̱sa̱n a̱n le̱e̱ma̱n rein d’viivi a va̱na̱n a lain ne.
2An Yohana kan emam na baptisma un lain a’gag a̱nmin buu s’ko̱m hongtin da̱n rihica̱n Ye̱so rein nu’emka̱llo, u comk an la̱a̱s baa ru i’ila̱. 3U zek az a ipka̱ o, “I vo a̱n rein ka d’gwa̱a̱m u’na̱n ge̱be̱se̱in u han alla c la̱gs uhyan?”
4Ye̱so se̱st bo̱ na̱, “Vaak na a̱n ve̱ce̱ Yohana rihica̱n a̱n hongin a ca̱n he̱nin ne. 5Ve̱ce̱ na o poma̱n he̱nke̱. Le̱ma̱n el na’ha̱gcu. Na taask a c’dak c’daka. Kyurma̱n hongka. Na po̱to̱sko̱ an wa̱ini. Kobneta̱n el ta̱m a̱n hongma̱n ba̱sda̱n kasi lalko.11:5 Go̱t ta̱m: Isa 35:5-6; 61:1.6Sila emaka kan ta vaakin dim rem ri da.”
7An an la̱a̱s baa Yohana to̱o̱tine, Ye̱so takaz ve̱ce̱m bugca̱n neta̱n da̱n Yohana. U zeka, “Iye̱ a̱n havin a̱n k’kad a̱n he̱ne̱? Gwe̱e̱ca̱n e̱nm rein nu’vigma̱lsi? 8Iye̱ kaa a̱n rwa̱in a̱n he̱ne̱? Noc kan kusma̱n kindi? Go̱t la an rein ta to̱p kusma̱n kind el a̱n buuc go̱mgo̱mno̱. 9Iye̱ kaa a̱n rwa̱in a̱n he̱ne̱? K’Barav Na’Sili? Lag a̱m ve̱ce̱te̱ no. To̱o̱ka̱n k’barav Na’Sila̱. 10I unwa ha̱n a̱n na ge̱nin da̱n unwa a̱nmin lalks Na’Sila̱. Sa̱ zeka, ‘Go̱t bo̱ ta̱’m como k’comta̱v ri a̱n hwic rovo, un tu me̱mge̱ v k’le̱v a̱n hwic rovo.’11:10 Go̱t ta̱m: Mal 3:1.
11“Mi ge̱ a̱n ve̱ce̱in no m’ga̱u. A̱n na tak a̱n mat nocuna̱n so̱din Yohana kan Baptisma da. Puti a tan na, kan rein la u kalk kwe̱ a̱nmin go̱mc Na’Sila̱, u so̱dk Yohana. 12Lanma̱n hweca̱n Yohana kan Baptisma taktain d’ba̱s na ceta daava̱ hna, i a̱n c’ma̱d a ta̱ga̱n a̱n go̱mc Na’Sil retina̱n ryaaka̱n hwici. Netna m’we̱s el la a̱n hob a rum ca̱ na̱m’we̱se̱.11:12 Go̱t ta̱m: Luk 16:16.13Rema̱n baranc Na’Sil kwe̱ a s’giira na, a ba̱sk rina̱n ti han i soot a̱n hwic na ceta daav Yohana. 14Awaz la a̱n kabk rina̱n a vatine, i Yohana a̱n rein Iliya un na zein az tu han.11:14 Go̱t ta̱m: Mal 4:5; Mat 17:10-13; Mar 9:11-13.15Koowe̱ a̱n ciin conc nu’hongo, lag u honga.
16“I a̱n ye̱ a̱n ta̱’m hwenna̱sta netnan a̱nta̱ma̱? A el ho̱d aknanan sootin baa c’hwaal a̱n po̱ga̱m hyannana̱. 17A zeka na̱, ‘C hwiliki no s’kwa̱a̱, a̱n ta hev da. C takka sepun wa̱a̱, a̱n ta o̱n da.’ 18Yohana kan emam na baptisma haka, u za tu ryaa da, u za tu so̱o̱ da. A zeka, ‘U ci rinnas’ce.’ 19Mi Waav Noco, a̱m haka ta̱’m ryaak ta̱’m so̱o̱. A zeka, ‘Go̱t na kan hamo, so̱o̱ge, ta̱m kwe̱sa̱v an kabma̱n tal a a c’ko̱t no.’ Go̱t la nan nap vers Na’Sil baan yomka sa̱.”
Le̱e̱ma̱n ta kabin Ye̱so da
20Ye̱so takta bo̱ dami netnan le̱e̱ma̱n u pa̱ttin a̱n emka̱lla̱m rihica̱ c’he̱t a̱nmin ma̱mma, rema̱n a ta bita̱l c’hwin a pankka a lagk ko̱tc na̱ da. 21“I naak no an Korazin. I naak no an Be̱tsaida. Awaz damran yomkca̱n na emin baa no az na emk be̱ ca̱ a̱nmin le̱e̱ma̱n Taya a Sido̱n ne, lawabe̱ a sa̱ta̱mk kusa̱m na̱ a bita̱lk c’hwin, a pankka a lagk ko̱tc na̱ de̱ha̱nzo. 22Lag na a̱m ve̱ce̱te̱ no m’ga̱u. Nan pa̱t a̱n hongma̱n za̱im netnan Taya a Sido̱n a̱n hweda̱n gedma̱n lalk a̱nda nwaa.
23“Nwaa netnan Kafarnahum. A̱n la nu’he̱n az nan ne̱e̱ no k’gwin a̱nz a’cone? A̱’a̱, Sila ta ha̱dgsa̱ no a̱n kobo a̱n wa̱a̱ka̱n hwela. Awaz be̱ az damran yomkca̱n na emin baa no, az na emk be̱ ca̱ a̱nmin le̱in So̱do̱m, lawabe̱ an So̱do̱m el te̱nte̱. 24A̱m el la a̱n ve̱ce̱m no. Nan pa̱t a̱n hongma̱n za̱im an le̱in So̱do̱m a̱n hweda̱n gedma̱n lalk a̱nda nwaa.”11:24 Go̱t ta̱m: D’Tak 19:24-28.
Noka na baa ri a̱n hwera
25A̱n daava̱n lo Ye̱so emk s’lalko. U zeka, “A̱m bo̱mk vo, vo K’Ceto, kan go̱mc na’con a copun yanda̱ha̱n ne. Rema̱n a̱v ze̱sk rihica̱ ha̱n baa a s’ver a a m’la̱a̱ na̱, a̱v kwesaka kaa yaa’aka̱n ca̱nca. 26I ho̱da̱n lo bo̱ i emtin va̱ d’ke̱me̱, K’Ceto, rema̱n i taanl a̱v to̱ntine.
27“Cet me badaska m c’rihi kwe̱. Noc za un napin Waa da a za K’Ceto da. Noc za ta̱m un napin K’Ceto da a za Waa da, a netnanan Waa to̱nin u kwesa na̱ K’Ceto da.11:27 Go̱t ta̱m: Yoh 3:35; 1:18; 10:15.
28“Noka na baa ri nwaa an to̱o̱sc otine, mi la ta̱’m hwerasa no. 29Ema na m m’cok a̱n la̱a̱s baa ri, ho̱da̱na̱n na retin nan se̱ke̱ naamna nu’go̱v k’kan a gaba. Rema̱n i tupp a̱m reine. A̱m zatta ta̱m lo̱ga̱m d’hi da, ta̱n kum ta̱m d’hwera a̱n de̱bc no.11:29 Go̱t ta̱m: Je̱r 6:16.30Cokma̱n ta̱n ema m zatta d’o̱so̱mo̱ da, to̱o̱sa̱d ri zatta ta̱m m’nii da.”
12Ye̱so i go̱m va̱n kwe̱
1A̱n daava̱n lo ta̱ma̱, Ye̱so baalk u gedanka a̱nmi nu’bel a̱n hweda̱n hwerad Yahude̱ne̱. An merk la̱a̱tin an la̱a̱s baa ru, a takaz pe̱ndma̱n ko̱lgo̱sa̱n gwange ta ta̱a̱.12:1 Go̱t ta̱m: Ggdk 23:25.2An Farisin he̱ntin na̱, a zeka o, “Go̱to̱, an la̱a̱s baa rov el a̱n emma̱n rina̱n giira ta ne̱in na d’ke̱e̱ na em a̱n hweda̱n hwerad Yahude̱n da.”
3Ye̱so zeta bo̱ na̱, “A̱n ta po̱g ho ge̱nsa̱n rina̱n Dauda emin an merk la̱a̱tin o d’kut a an lain a unwan da?12:3 Go̱t ta̱m: 1Sam 21:1-6.4U uvk a̱n buuk Na’Sila̱, baada̱n emam Na’Sil c’hwiipsa̱. U o̱mk kakda̱n na se̱ke̱in A’Sil u ryaak d’kut a an lain a unwa na. Giira ta se̱s la a ryaa da̱ da, a za go̱mna d’ka̱b a Na’Sil c’taa da.12:4 Go̱t ta̱m: Ggdk 24:9.5A̱n ta po̱g ho ta̱m ge̱nsa̱n giiras Mosa az go̱mna d’ka̱b a Na’Sil el ta em a’yomk a̱nmin buuk Na’Sil a̱n hweda̱n hwerad Yahude̱ne̱, ta̱ma̱ a ta ko̱t da-da?12:5 Go̱t ta̱m: D’Og 28:9-10.
6“Mi a̱m zeka no, kan so̱din buuk Na’Sil el tahna. 7Awabe̱ a̱n napk rina̱n lalks Na’Sil sa̱ha̱n zeine. Sa̱ zeka, ‘I za̱ima m to̱nin az a̱n ci, za rina̱n ta̱n se̱ke̱ A’Sil da.’ A ta̱n geda be̱ an zattin c’ko̱t da lalko.12:7 Go̱t ta̱m: Mat 9:13; Hos 6:6.8Rema̱n mi, Waav Noco, i go̱m kwe̱ a hweda̱n hwerad Yahude̱n ne̱.”
A̱ra̱m kan koma talke
9An Ye̱so lagtin baada̱n lo, u uvk a̱n ka̱bda̱n kargad Yahude̱ne̱. 10Noc lak ta̱m a̱n a̱n’a kan koma taline. Ai retin a to̱nk a sip Ye̱so az u getk giiras Mosa, a ipkt bo̱ o. A zeka, “Giiras zek az na taas noc gaag a̱n hweda̱n hwerad Yahude̱ne̱?”
11Ye̱so zeta bo̱ na̱, “Iwe̱ baa no, un tu ci kyo̱o̱mo̱, kyo̱o̱mun lo kobo kaa a̱nmi k’dwa̱a̱ a̱n hweda̱ d’hwera, un zain a̱n sipa̱ o u rwa̱a̱gta̱ o da?12:11 Go̱t ta̱m: Luk 14:5.12Noc ta pa̱t ha̱n kyo̱o̱m a̱n k’gwin hwe̱di d’kal da? Rema̱n taanlo, giira zek az na em rihic kasi a̱n hweda̱ d’hwera.” 13U zeta bo̱ a̱rmune, “Na̱ka̱nsa̱ koma rovo.”
A̱ra̱m na̱ka̱nsta̱ bo̱ la a’koma. A vaakk la honhon ho̱da̱n koma hyan. 14Farisin rut bo̱ a hav a se̱e̱pste̱ ho̱da̱na̱n ta hot Ye̱so.
Cokuna̱n Sila dagine
15An Ye̱so naptin az a el a̱n c’walg a hot o, u lagk baad ne. Damran bugca̱n neta̱n gabk ta̱m o, u taask ta̱m na̱ s’mals kwe̱. 16U saak na̱ d’rin az aa ve̱ce̱ la neta̱n da̱n unwa da. 17I taanl a̱n rina̱n Isaaya k’barav Na’Sil vatin de̱ha̱nzo ti este. 18U zeka,
“Go̱t na coka̱v ri um dagine.
A̱m el a̱n to̱nc ru hwe̱di.
A̱m el ta̱m a̱n he̱nma̱n ke̱md ru.
Ta̱’m ne̱e̱ o we̱sma̱n
Hora̱md ri.
Tu ema c’cop
ba̱sda̱ d’gwa̱a̱ma̱.
19A tu em s’lan a noca̱n
alla u to̱o̱ a̱n d’gudg da.
Noc au tak a̱n honga
goda̱v ru a̱n s’le̱v da.
20A tu taa an kalin
m’we̱s a̱n c’gaag da.
Tu hong ta̱m za̱im an
zattin ka d’se̱e̱te̱ da,
u de̱lt neta̱n nap
gwa̱a̱ma̱da̱ m saine.
21I baa ru ta̱m a̱n neta̱n
ta sav c’de̱b kwe̱.”12:21 Go̱t ta̱m: Isa 42:1-4.
Az we̱sa̱m Ye̱so lan baa A̱krimu
22Neta̱n hyan nokta̱vka Ye̱so a̱rmuna̱n rinnas’ce sipin a pomsk ta̱m a kyura̱msk o. Ye̱so rutk la o rinnas’ce, u vaakk nu’he̱n a u’hong no. 23Neta̱n kwe̱ a sipk a’nwa̱a̱. A zeka, “Za ho Waav Dauda ha̱n da?”
24An Farisin hongtin taanlo, a zeka, “I a̱n we̱sa̱m A̱krimu, go̱m va̱ rinnas’ce, a̱n a̱rm uha̱n retina̱n rwita̱lma̱n rinnas’ce.”12:24 Go̱t ta̱m: Mat 9:34; 10:25.
25Ai retin Ye̱so napk keka̱bs na̱, u zeta bo̱ na̱, “Kooye̱ go̱mca ca̱n wanksein ta̱m c ha̱llinni, ca̱n hyaa. Kooye̱ le̱e̱ya alla buuwa a̱n wanksein ta̱m a ha̱llinni, a tu es da. 26Awaz A̱krimu vogk A̱krimu, u wankse ta̱m u el a̱n ha̱lca̱n hid ru, i’le̱e̱le̱ bo̱ kaa a̱n go̱mc ru ca̱n este? 27Awaz i a̱n we̱sa̱m A̱krimu a̱m vogtin rinnas’ce, i a̱n ye̱ we̱sma a̱n neta̱n no retin ta vog na̱? Rema̱n taanlo, i neta̱n no a̱n ta geda no lalko. 28Awaz la i a̱n we̱sma̱n Hora̱md Na’Sil a̱m retina̱n vogma̱n rinnas’ce, to̱, go̱mc Na’Sil ceka bo̱ baa no.
29“I ho̱da̱npe̱ a̱n noc tu uvt a̱n buu ka m’we̱s u waag rina̱n u ciini, a za au hatk o na̱m’we̱se̱, u baa gag o da? Au gag o, i daava̱n lo kaa a̱n tu waagt rina̱n u ciini.
30“Kan zain baa ri da, u el a̱n ha̱lc ri. Kan ta kargsain a min ta̱m da, u la nu’ba̱rgsa̱ m’naka.12:30 Go̱t ta̱m: Mar 9:40.31Lag na a̱m ve̱ce̱te̱ no. Kooye̱ goon ko̱tda a ela̱vsoc Na’Sil a̱n ca̱n noc tu ema, nan kwisi o.12:31 ela̱vsoc Na’Sil: Alla rihic naak ca̱n ta tana A’Sil a̱n ca̱nca. Koowe̱ la a̱n ela̱vsoin Hora̱mda̱n zattin ri d’reb da, a nan kwisi o da pakk. 32Koowe̱ ta̱m a̱n vatin d’gom a̱n ha̱lc ri, mi, Waav Noco, nan kwisi o. Koowe̱ la a̱n tu vat d’gom a̱n ha̱lca̱n Hora̱mda̱n zattin ri d’reb da, a nan kwisi o taha̱n a̱nmin copun yanda̱ha̱n alla a̱n yanda̱nda̱n lain na̱m’han da.12:32 Go̱t ta̱m: Luk 12:10.
Ce a yaanc ru nu
33“Ce kasi tu mat yaan kasi. Ce naak ta̱m tu mat yaan naake. Nan nap kooye̱ cewa a̱n yaan ru.12:33 Go̱t ta̱m: Mat 7:20; Luk 6:44.34Nwaananan rein ho̱da̱n yaa’bo̱mno̱, a v’dumu, i’le̱e̱le̱ a̱n ta̱n vatt rihic kasi? I geda̱n rina̱n a̱n puin a̱n c’de̱b kwe̱ a̱n nwa̱a̱k ka̱n vata.12:34 Go̱t ta̱m: Mat 3:7; 23:33; 15:18; Luk 3:7; 6:45.35Noc u kasi, i lanma̱n rihic kasi cu gigin a̱nmi c’de̱b a̱n tu vatt rihic kasi. Noc u naak la i lanma̱n rihic naak cu gigin a̱n c’de̱b a̱n tu vatt rihic naake.
36“A̱m zeka no, kooye̱ gomda̱n ka̱ka̱l da da̱n neta̱n vatine, ta vat da̱ a̱n hweda̱ d’be̱se̱. 37Rema̱n i nwa̱a̱’a rov a̱n ta rut vo, i nwa̱a̱’a rov ta̱m a̱n ta gag vo.”
Neta̱n hobk rihica̱n sipa̱m na’nwa̱a̱
38Ahyan an la̱a̱sa̱m na s’giira a Farisin zet bo̱ o, “Kanubu, c to̱nk a̱v em ri c’he̱t c he̱nte.”12:38 Go̱t ta̱m: Mat 16:1; Mar 8:11; Luk 11:16.
39Ye̱so se̱st bo̱ ta̱m na̱, “I netna v’dum a d’o̱ma̱n an rein ta hob na kwesa na̱ rihica̱n sipa̱m na’nwa̱a̱. A nan kwesa la na̱ rihi a za goon rihica̱n kumin Joona k’barav Na’Sil da.12:39 Go̱t ta̱m: Mat 16:4; Mar 8:12.40Ho̱da̱na̱n Joona emtin c’hwe c’ta̱a̱cu, i’hwen a gyop no a̱nmin ba̱ta̱d ge̱ne̱, i ho̱da̱n lo bo̱ ta̱m a̱n mi Waav Noc ta̱’m emt c’hwe c’ta̱a̱cu, i’hwen a gyop no, a̱nmi nu’copo.12:40 Go̱t ta̱m: Joo 1:17.
41“Netnan Niniva ta unu baan gedma̱n lalk a̱n hweda̱ d’be̱se̱ a netnan ta̱ma̱ na̱, a het na̱. Rema̱n netnan Niniva bita̱lk c’hwin a lagk ko̱tc na̱ an Joona ematain na̱ d’ba̱sa̱. Go̱t la a̱nta̱ma̱ kan so̱din Joona el tahna.12:41 Go̱t ta̱m: Joo 3:5.42Go̱m va̱n Sheba neta, tu unu baan gedma̱n lalk a̱n hweda̱ d’be̱se̱ a netnan ta̱ma̱ na̱, u het la na̱. Rema̱n u una̱vka̱ lanma̱n copun be̱se̱da̱n yanda̱ha̱n zo rema̱n u hongt la̱a̱s u s’ver baa So̱lmo̱n. Go̱t la a̱nta̱ma̱ kan so̱din So̱lmo̱n el tahna.
Vaakam rinnas’ce
43“A rinnas’ce rwa̱a̱ baa noco, ta baa hav a pan baaca̱n ho̱o̱m zain da a̱n hoba̱n baada̱ d’hwera. Aa ta kum la d’baa da, 44ta ze, ‘Na vaak na a̱n buuna̱n na lagaine.’ Aa vaaka a gatka o ka̱ka̱la̱, u waagk ta̱m na mamgska kwe̱, 45ta vaak a bana hyannana̱ i’tan’il an hatin na̱ na̱v’dumu, a uv a soot a̱n a̱n’a. Be̱se̱d nocun lo la, da̱n hat d’takbo nu’nau. Ke̱ng, i ho̱da̱n lo bo̱ a̱n ti emt netnan ta̱ma̱ a v’dumu.”
Inu a ha̱n Ye̱son no
46An Ye̱so latina̱n ve̱ce̱m bugda̱n neta̱n lalko, go̱to̱ inu a ha̱nun haka a eska na’is a el a̱n hob a iga̱ms o. 47Noc v’da̱nka̱ zeta bo̱ o, “Go̱t bo̱ in vu a ha̱n va̱n a’es na’is a̱n hob a iga̱ms vo.”
48Ye̱so ipkt bo̱ o, “Iwe̱ a̱n rein in mi? I we̱nne̱n ta̱m an rein ha̱n min ni?” 49Ye̱so wegata bo̱ an la̱a̱s baa ru. U zeka na̱, “Go̱t ha̱n na in mi a ha̱n min ni. 50Koowe̱ a̱n tu em to̱nu Cet me un rein a̱nmi na’cona, i unwa a̱n rein ha̱n mi waa’a̱rma̱ a ha̱n mi waa’wanta na a in min ta̱ma̱.”
13C’Hwennsa a̱n ka d’goo
1A̱n hweda̱n lo ta̱ma̱, Ye̱so lagk u’bu u havk u sootk a̱n bilka̱ m’saa. 2Damran bugca̱n neta̱n kargaz baa ru a rigk o hatt. I de̱lk u uvk a̱n bumbka̱ m’ho̱o̱ u sootka, bugca̱n neta̱n el kaa a̱n k’bila̱. 3U ve̱ce̱te̱ bo̱ na̱ c’rihi hwe̱di a̱n c’hwennsa. U zeka na̱, “Kanugo̱v ruk a̱n d’goo. 4Au retina̱n d’goo, goo hyan hek a̱n e̱s k’le̱ve̱. A̱ndaabe nema̱n haka a kek e a to̱ra̱mko̱. 5Goo hyan hek na̱m’taar va̱na̱n hwinc ta ma̱a̱na̱in da. I potka a̱ndaabe rema̱n copu ta pim da.
6“An hwed ruta̱ini, hwei radk e. Ai retin i zatta s’ga̱a̱r da, i le̱e̱k a̱ndaabe, i uku. 7Goo hyan hek baa c’hila̱. Hila̱c potka la c ho̱deske e. 8Goo hyan hek a̱n copu kasi. I potka i matka yaana. I hyan v’za̱ngu. I hyan kwe̱zc c’ta̱a̱cu. I hyan ta̱m d’kwe̱z a̱n oopa.
9“Koowe̱ a̱n ciin c’con, lag u honga.”
Rina̱n kabain c’hwennsa
10An la̱a̱s baa Ye̱so hata bo̱ a zeka o, “I rema̱n ye̱ v retina̱n emam neta̱n s’lalk a̱n c’hwennsa?”
11U se̱st bo̱ na̱, “I rema̱n na kwesaka no rihica̱ m’ze̱s ca̱n go̱mc Na’Sila̱. Na̱nna la, a̱n na kwesa na̱ da. 12Koowe̱ a̱n ciini, i unwa a̱n nan swidi bat kumu ru tu sud a̱n rora. Koowe̱ la a̱n zattain rihi da, nan kab rina̱n u ciin baa ru. 13I rema̱n taanl a̱m retina̱n emam na̱ s’lalk a̱n c’hwennsa.
“ ‘Go̱t ge̱ is na̱ el vatte,
a za la ta he̱n da.
Conc na̱ el gane,
a za la nu’hong da,
a ta ke̱e̱se̱ ta̱m rihi da.’
14“Rina̱n Isaaya k’barav Na’Sil vatin esk bo̱ kaa baa na̱. U zeka,
“ ‘Rem nu’hongo, ta honga,
a ta ke̱e̱se̱ la da.
Rem nu’he̱no ta he̱ne̱,
a ta pamasa la rihi da.
15Rema̱n de̱bc na̱ celka.
Conc na̱ damtk ta̱m baa nu’hongo.
A ruptk is na̱
rema̱n v’daa aa he̱n la a̱n is na̱ da.
Aa hong la ta̱m a̱n conc na̱ da,
bat ta ke̱e̱se̱ a̱nmin de̱bc na̱
a lag ko̱tc na̱,
bat ta̱’m taas na̱ gaag na̱ da.’
16“Sila emaka la is no rema̱n i el ti he̱ne̱. Sila emaka ta̱m conc no, rema̱n c el ca̱n honga. 17Lag a̱m ve̱ce̱te̱ no m’ga̱u. Baranc Na’Sil a an gela̱v Na’Sil a̱n hwe̱di, a to̱nk be̱ a he̱n rihica̱n a̱n rein nu’he̱no. A ta he̱n la ca̱ da. A to̱nk be̱ a hong ta̱m rihica̱n a̱n rein nu’hongo. A ta hong la ca̱ da.
Ba̱tksa̱ca̱ c’hwennsa
18“Gan na kaa c’con a̱n hongt ba̱tksa̱ca̱n hwennsaca̱n ka d’goo. 19Daava̱n noc tu hongt lalksa̱n go̱mc Na’Sil wa ke̱e̱se̱ sa̱ da, a̱ndaabe a̱n A̱krimu tu ko̱s rina̱n na gwain a̱n de̱bc ru. I unwa a̱n rein goina̱n hyain a̱n e̱s k’le̱ve̱.
20“Goina̱n hyain na̱m’taare, i inya a̱n rein ho̱d kan tu hong lalks Na’Sila̱, u kab ta̱m sa̱ a̱ndaabe a̱n c’za̱ngkta̱. 21Ai retin la u el ho̱da̱n goina̱n ta tanin s’ga̱a̱r da, tu gag c’de̱b v’daa ca̱nmi. Daava̱n c’ke̱ta̱mse̱ alla ryaaka̱ d’kob da̱n nokta rema̱n lalks Na’Sila̱, ai geza, tu vaak dima̱.
22“Goina̱n hyain a̱n c’hila̱, i el ho̱d netnanan ta hong lalks Na’Sila̱, to̱nca̱n copun yanda̱ha̱n a palkac nu’kuma̱n han c mo̱dkse na̱, c hol na̱ matma̱n yaana.
23“Goina̱n hyain a̱n copu kasi, i inya a̱n rein ho̱d kan tu hong lalks Na’Sila̱. U hong ta̱m u ke̱e̱se̱ sa̱. U mat ta̱m yaana. I hyan v’za̱ngu. I hyan kwe̱zc c’ta̱a̱cu. I hyan ta̱m d’kwe̱z a̱n oopa.”
C’Hwennsa a̱n kwan
24Ye̱so emaka ta̱m na̱ hwennsac hyan. U zeka, “Nan hwenna̱sa go̱mc Na’Sil a̱n nocuna̱n gwain goon hii kasi a̱n belu ru. 25An neta̱n retin na̱m’la̱va̱, kan ha̱lc ru haka u gweeka o kwan u to̱uz a̱n c ru. 26An hii buttin i takka de̱lma̱n yaana, na he̱n-he̱n kwan a̱nmin. 27An rein ta ema kanubu a’yomk hata bo̱ baa ru. A zeka o, ‘Kanubu, za ho goo kasi v gwain a̱n belu rov da? I’Le̱e̱le̱ kaa i taktain na kumt kwan a̱nmin?’
28“U zeta bo̱ na̱, ‘I ka c’ha̱l a̱n emin yomka hna.’ A na’yomk ipkt bo̱ o, ‘Ta̱’v se̱s na hav na ke̱m kwan na kargsa?’ 29U zeta bo̱ na̱, A̱’a̱. Rema̱n an han la baan ke̱mma̱n kwan a̱n ke̱mese a hiin da. 30Lag na e i gubisi i caa daava̱n ke̱me. Ta̱’m ze an ke̱me a baa kargsa kwan na̱m’e̱te̱, a gag ca̱ c’gag-c’gag rem na dwaate. A kargsa kaa hii a̱n d’be̱se̱ a de̱l a̱n be̱e̱d ri.”
C’Hwennsa a̱n yaanin mo̱stad
31Ye̱so ryaak hwic u emaka na̱ hwennsac hyan. U zeka, “Go̱mc na’con el ho̱da̱n goova̱n yaanin bobaka̱n mo̱stad va̱n noc gwain a̱n belu ru. 32Yaanin mo̱stad pa̱tk kooye̱ goon yaanin cewa a̱n s’kala. A he̱n la i potka i gubku, ti so̱d kooye̱ goon bobaka a̱n c’gubu. I bala̱m ta̱m ce nema̱n ta hyaa a̱n za̱ts ru a em c’ta̱ndi.”
C’Hwennsa a̱n yist
33Ye̱so emaka ta̱m na̱ hwennsac hyan. U zeka “Go̱mc na’con el ho̱da̱n yist un neta o̱min u we̱e̱k a̱n hyumma̱n u maakin m’hon a̱m ta̱a̱cu. Yist sa̱ma̱nka̱ la na̱m’hyun kwe̱ a̱m hwa̱a̱ka̱.”
Rina̱n de̱lin Ye̱so emt c’hwennsa
34Ye̱so ve̱ce̱ke̱ bugca̱n neta̱n rihica̱ ha̱n kwe̱ a̱n c’hwennsa. U ta ema na̱ s’lalk da a za a̱n c’hwennsa da. 35I taanl a̱n na esastain rina̱n k’barav Na’Sil vatine. U zeka:
“Ta̱’m em s’lalk a̱n c’hwennsa,
ta̱’m vat rihica̱n na ze̱sin lanma̱n kaakda̱n copun yanda̱hna.”13:35 Go̱t ta̱m: Zab 78:2.
Ba̱tksa̱m hwennsaca̱n kwan
36Ye̱so lagt bo̱ bugca̱n netna, u to̱o̱k u uvk a̱nmi nu’bu. An la̱a̱s baa ru hata bo̱ baa ru. A zeka o, “Ba̱tksa̱ co hwennsaca̱n kwan nu’bela.”
37U se̱st bo̱ na̱, “Kan gwain goo kasi, i mi Waav Noco. 38U’Bel la ba̱ru, i copun yanda̱hna. Goo kasi, i aknan go̱mc Na’Sila̱. Kwan la ba̱ya̱, i aka̱n A̱krimu. 39Kac’ha̱l u’na̱n gwain kwan, i A̱krimu. Daava̱n ke̱me, i be̱se̱da̱n copun yanda̱hna. An ke̱m la, i comta̱nc Na’Sila̱.
40“Ho̱da̱na̱n na retin nan kargsa kwan na toks a̱n hwela, i ho̱da̱n lo bo̱ a̱n ti soott a̱n be̱se̱da̱n copun yanda̱hna. 41Mi Waav Noco, ta̱’m coma comta̱nc Na’Sila̱, ta ho̱l netnanan rein ta de̱l ahyan a̱n d’ko̱to a an rein ta em rihic naaka̱n baan go̱mc Na’Sila̱. 42Ta bono na̱ a̱n wa̱a̱ka̱n hwela, va̱na̱n ta kanng s’kan a ta̱uda̱n nin na̱. 43I a̱n daava̱n lo a̱n an gela̱v Na’Sil ta emt d’za̱n ho̱d ni’hwen a̱nmin go̱mc Na’Sil Ceta na̱. Un ciin conc nu’hongo, lag u honga.”
C’Hwennsa c’ta̱a̱cu
44“Go̱mc na’con el ta̱m ho̱da̱n kumuna̱n na sagin a̱nmi k’ke̱nge̱. A noc purusu o, tu vaak u biti a̱n c’za̱ngkta̱. U hav u bab rina̱n u ciin kwe̱ u waa ke̱nge̱k ne.
45“Go̱mc na’con el ta̱m ho̱d ka s’yo̱p un rein a̱n hoba̱n taarin kindi. 46Au kumtin taarin kind hwe̱di, u havk u babk rina̱n u ciin kwe̱ u waak e.
47“Go̱mc na’con el ta̱m ho̱d nu’raaga, un na asin a̱nmi k’ge̱n k gaga ge̱na̱n s’goo-s’goo. 48A ka̱ hitine, an suv rwa̱a̱gtka̱ ka̱ a̱n k’bila̱. A sootk a de̱ga̱lk a kargska ge̱na̱n kasi a̱nmi c’hono, a dukuku ta̱m a naake. 49I ho̱da̱n lo bo̱ a̱n ti soott a̱n be̱se̱da̱n copun yanda̱hna. Comta̱nc Na’Sil ta noka a wankse a v’dum baa an gela̱v Na’Sila̱. 50Ta bono a naak a̱nmin wa̱a̱ka̱n hwela, a̱nl a̱n ta kanng s’kan a ta̱uda̱n nin na̱.”
Kinbud ut a d’pooda̱n ne
51Ye̱so ipkt bo̱ na̱, “A̱n ke̱e̱ske̱ rihica̱ ha̱n kwe̱?” A zeta bo̱ o, “Ha̱, Kanubu.”
52Ye̱so zet bo̱ ta̱m na̱, “Rema̱n taanlo, kooye̱ kan la̱a̱sa̱m na s’giirawa un kabin la̱a̱sun go̱mc na’cona, u el ho̱d kanubu un rein tu ruta̱ rihic pooca̱n a c’uta̱n baan kinbud ru.”
Na ha̱lk Ye̱so a̱n le̱in Nazarat
53An Ye̱so taastin vatma̱n hwennsaca̱ hna, u lagk baada̱n lo. 54Au uvta̱in a̱n copu ru, u la̱a̱ska̱ na̱ a̱nmin ka̱bda̱n kargad Yahude̱ne̱. Aa hongtin o, a sipk a’nwa̱a̱. A ipkka̱, “Ipe̱ a̱n a̱rm uha̱n kuma̱in goon versa̱ ha̱n a we̱sma̱n emma̱n damran he̱tca̱ ha̱n ne? 55Za ho waav se̱bgun lo da? Za Me̱e̱ri a̱n rein inu da? Ha̱nun ta̱m za Yakub, Isuhu, Simo̱n a Yahudan da? 56Ha̱nun yaa’yantan ta̱ma̱, za baa cinna a rein kwe̱ da? Ipe̱ kaa a̱n a̱rm uha̱n kuma̱in rihica̱ ha̱n kwe̱?” 57A ha̱lk o. Ye̱so zeka la na̱, “K’Barav Na’Sil a tu rob k’gwin a za a̱n le̱i ru a buu run da.”13:57 Go̱t ta̱m: Yoh 4:44.58Rema̱n taanlo, u ta em rihica̱ c’he̱t hwe̱di a̱n a̱n’a da rema̱n a ta be̱sse̱ o d’ba̱t da.
14Wa̱a̱’a Yohana
1He̱ro̱d Antipas, go̱m va̱n copun Galili hongk ho̱da̱n Ye̱so rutin dina̱. 2U zeta bo̱ an yomka ru, “I Yohana kan emam na baptisma ha̱n a̱n po̱tine. I rina̱n de̱lin bo̱ u citi we̱sma̱n emma̱n damran rihica̱ c’he̱te̱.”
3He̱ro̱d sipk Yohana u gagk a̱n buu s’ko̱m rem Hiridiya netav ha̱nu Filip. 4U em-em taanl rem Yohana pook a̱n ve̱ce̱ o, “Giira ta se̱s az a̱v gaa Hiridiya da.” 5He̱ro̱d to̱nk be̱ u hwaa Yohana. U el la a̱n gela̱v netna, rema̱n neta̱n kabk az Yohana i k’barav Na’Sila̱.
6An hweda̱n na mattin He̱ro̱d rigta̱ini, waav Hiridiya waa’wanta hyoko a̱n s’hev a̱n hwic He̱ro̱d a hamca̱n ru nu. I emt bo̱ He̱ro̱d d’ke̱m hwe̱di d’kala. 7U conkt bo̱ az tu ne̱e̱ waa’wantaune kooye̱ u konin o.
8Inu zeta bo̱ waa’wantaune az u ze, “Ne̱e̱ m hid Yohana kan emam na baptisma a̱nmi ni’hono.”
9Rin lo vaakk i gagk He̱ro̱d go̱m d’hi hwe̱di. Puti a tan na, ai retin u baask u vatka, u conkk ta̱m a̱n hwic hamca̱n ru, u zek az na em rina̱n waa’wanta konine. 10U comk na havk na gedka hid Yohana a̱nmin buu s’ko̱mo̱. 11Na noktka hid ne ni’hon na nesk waa’wantaune. Unwa ta̱ma̱, u kabk u nwektka inu. 12An la̱a̱s baa Yohana hata bo̱ a o̱mk birgud ru a havk a sagka. A havk kaa a ve̱ce̱ke̱ Ye̱so.
Ye̱so ryaakska bugda̱n netna
(Mar 6:30-44; Luk 9:10-17; Yoh 6:1-14)
13An Ye̱so hongtin rina̱n kumin Yohana kan emam na baptisma, u lagk baada̱n lo. U ge̱e̱ske̱ u havk u uvk a̱n bumbka̱ m’ho̱o̱ a an la̱a̱s baa run u havk baada̱n neta̱n zain da. An neta̱n hongtin az Ye̱so uvk a̱n bumbka̱ m’ho̱o̱ u to̱o̱ko̱, a gabk o a̱n s’naa lanma̱n le̱e̱m na̱. 14An Ye̱so ruta̱in u he̱nk damran bugda̱n netna, u hongk za̱im na̱ hwe̱di d’kala. U taask an gaag baa na̱ s’malse.
15An rima tudtine, an la̱a̱s baa ru zeka o, “Va̱na̱n na rein hna, le̱i za d’viivi da, go̱t ta̱m hwed taaka. Pya̱a̱ksa̱ bugda̱n neta̱n a to̱o̱ bat ta uv a̱n le̱e̱ma̱n rein d’viivi a weva hid na̱ c’ryaako.”
16Ye̱so zeta bo̱ na̱, “I ta ge̱be̱se̱ a to̱o̱ da. Ne̱e̱ na na̱ rina̱n ta ryaa.”
17A zeta bo̱ o, “C’Be̱re̱e̱di c’tan a̱n ge̱n ni’il c’taa a̱n na ciin tahna.”
18Ye̱so zeta bo̱ na̱, “Noktva na m ca̱n.” 19U zet bo̱ bugda̱n neta̱n az a sweeta̱l a̱n c’gwe̱e̱. U o̱mt bo̱ be̱re̱e̱dica̱n lo c’tan a ge̱nnan lo i’ila̱. Au wa̱lktin a’con u bo̱mk A’Sila̱, u bosa̱mk ca̱ u nesk an la̱a̱s baa ru a we̱nka̱lle̱ netna. 20Bugda̱n neta̱n ryaakk a cigka̱. An la̱a̱s baa Ye̱so kargsta bo̱ yatrananan ka̱ltin a hiisk c’gyo̱b oopa a̱n c’ila̱. 21Netnanan ryain ryaakc ne cek a̱rma̱n s’kwe̱re̱ s’tan. A̱n na oga̱mse netan a aka̱n na̱n da.
Ye̱so emk a’ha̱gc na̱m’ho̱o̱
22Aa taastine, Ye̱so de̱lk an la̱a̱s baa ru uvk a̱n bumbka̱ m’ho̱o̱ a pas rigt a caa bilk hyan. Unwa la u baak a eso u pya̱a̱ksa̱ netna. 23Au pya̱a̱ksta̱in bugda̱n neta̱n a to̱o̱ko̱, u elk a̱n k’se̱m unwa v’da̱n u cepkte. U maaske un v’da̱n caama̱n gyopo. 24A̱n daava̱n lo, bumbka̱ m’ho̱o̱ ka̱n an la̱a̱s baa ru uvtin nakko a bilka̱ m’saa na. Hwensa̱ m’ho̱o̱ el a̱n ze̱rkma̱n ka̱n, e̱nc el ta̱m a̱n vaakta̱m na̱ dima̱.
25Nu’Pun, Ye̱so gabk ga̱l na̱ na’ha̱gc a̱n cona m’saa. 26An an la̱a̱s baa ru he̱nte̱in o na’ha̱gc a̱n cona m’saa, a hongk v’gel hwe̱di d’kala. A zeka, “I a̱ku.” A de̱lka̱lk s’kan rem v’gela.
27A̱ndaabe, Ye̱so zeka na̱, “Em na c’a̱rma̱. An hong la v’gel da, i mi.”
28Bitrus se̱st bo̱ o, “Kanubu, awaz i vo, ze az a̱m noko baa rov a̱n cona m’ho̱o̱.”
29Ye̱so zeta bo̱ o, “Noka ha.” An Bitrus cizta̱in a̱n bumbka̱ m’ho̱o̱, u emk a’ha̱gc a̱n cona m’ho̱o̱ tu caa-caa baa Ye̱so. 30Au he̱ntin e̱nc gudgka̱ na̱m’we̱se̱, gela̱v ryaak o. U takaz u’ya̱u na̱m’ho̱o̱. U de̱lt bo̱ kan u zeka, “Kanubu, gwa̱a̱ mi.”
31A̱ndaabe, Ye̱so tapt bo̱ koma ru u sipk o. U zeka ta̱m o, “Vo kan kalkma̱n bata̱m d’ba̱ta̱. I rema̱n ye̱ v ta batin d’ba̱t baa ri kwe̱ da?”
32Aa saktin a̱n bumbka̱ m’ho̱o̱, e̱nc resk te̱kk. 33An la̱a̱s baa Ye̱so nanan lain a̱nmi bumbka̱ m’ho̱o̱ emata bo̱ o c’hwiipsa̱. A zeka o, “M’Ga̱u, i vo Waav Na’Sila̱.”
Ye̱so taask neta̱n s’malse
34Aa pastin m’saa, a ceka copun Janasare̱t. 35Daava̱n an baada̱n lo naptin az i Ye̱so, a cwemaka an copca̱n rigt kwe̱. A nokta̱vka ta̱m o a s’mals kwe̱. 36A konk o az u lag a s’mals a do̱v nwa̱a̱da̱n kusi ru c’taa. Geda̱n an kumin la kwe̱ a do̱vk kusi ru, malss taak na̱.
15La̱a̱s netnan de̱hne
1A̱n daava̱n lo, Farisin a an la̱a̱sa̱m na s’giiran haka baa Ye̱so lanma̱n le̱in Urisalima. A ipkk o, 2“I rema̱n ye̱ a̱n an la̱a̱s baa rov zatina̱n gabma̱n rihica̱n na gaadin baa hwenga̱nc cinna da? Rema̱n a za ta sapt c’kom a ryaakt ho̱da̱na̱n giiras zetin na da.”
3Ye̱so ipkk la na̱, “I rema̱n ye̱ la bano a̱n retina̱n getma̱n giiras Na’Sil baan gabma̱n rihica̱n a̱n gaadin baa an de̱hne? 4Sila zeka, ‘Ne̱e̱ cet a̱v na in va̱n k’gwin. Koowe̱ ta̱m a̱n rebin ceto alla inu, na hwaa o.’15:4 Go̱t ta̱m: U’Rwa̱ 20:12; 21:17; Ggdk 20:9.5Nwaa la a̱n zek az a noc ze ceto alla inu, rina̱n ta̱’m ne̱e̱ be̱ vo, ‘I inya a̱n ta̱’m emata A’Sil sako, Korban.’ 6Za rem u ‘Ne̱e̱t ceto alla inu k’gwin’ a̱n inya da. A̱n emma̱n taanlo, a̱n hok lalks Na’Sil rema̱n a̱n gabt rihica̱n a̱n gaadin baa an de̱hne. 7Nwaa an budma̱n hwelana c’waala. Kims no esaska rina̱n Isaaya k’barav Na’Sil he̱ne̱in de̱ha̱n in tanin no. U zeka,
8“ ‘Netna ha̱n el ta ne̱e̱ m k’gwin a̱n k’nwa̱a̱ c’taa.
De̱bc na̱ el la m’nak a mi ni.
9I ka̱ka̱l a reina̱n emam ri c’hwiipsa̱,
go̱t la a el a̱n la̱a̱sa̱m na la̱a̱m neta̱n
az i ma̱mma a̱n rein giiras Na’Sila̱.’ ”
Rina̱n ti ko̱psso̱ noco
10Ye̱so po̱gt bo̱ bugda̱n netna. U zeka ta̱m na̱, “Hong na, a̱n ke̱e̱se̱ ta̱ma̱. 11Za rina̱n noc ryain a̱n ti ko̱psso̱ o da. Rina̱n ti rwa̱n a̱n nwa̱a̱’a noco, i inya a̱n ti ko̱psso̱ o.”
12An la̱a̱s baa ru hata bo̱ baa ru. A zeka o, “A̱v napk ba̱ru az de̱bc Farisin naak aa hongtin lalksa̱n le?”
13Ye̱so se̱sk la na̱, “Kooye̱ cewa a̱n Cet me un rein a̱nmi na’con ta gwain da, nan vuga̱nna̱ o. 14Lag na na̱ a̱n c’na̱! I na̱nna pomna. A el la a̱n nakma̱n hyannana̱n pomna. A pom nak la hyan poma, na̱nna kwe̱ ta kobo a̱n k’wa̱a̱.”
15Bitrus zeta bo̱ o, “Ba̱tksa̱ co hwennsaca̱ hna.”
16Ye̱so ipkt bo̱ na̱, “Nwaa ta̱m v’daa a̱n ta ke̱e̱se̱ da? 17V’Daa a̱n ta ke̱e̱se̱ az rina̱n uvin na’nwa̱a̱, i ba̱tdan ti uvt da? A̱n d’be̱se̱ na ruta̱ e baan dung da? 18Rihica̱n rein ca̱n rwa̱n la lanm na’nwa̱a̱, i lanm c’de̱be̱. I ca̱nca a̱n rein ca̱n ko̱psso̱ noco. 19I lanm c’de̱b a̱n keka̱bs naak rein sa̱n rwa̱n: Hweed netna, d’o̱mo̱, d’hivi, ke̱mc neta̱n a̱n c’ko̱l a c’ela̱vso no. 20I rihica̱ ha̱n ca̱n rein ca̱n ko̱psso̱ noco. K’Ryaa la noc ta sapt c’kom da, a ti ko̱psso̱ noc da.”
Neta kan Kana batk d’ba̱ta̱
21Ye̱so lagt bo̱ baada̱n lo u caa copca̱n Taya a Sido̱n ne. 22Go̱to̱ ta̱m neta kan Kana lanma̱n copca̱n lo haka u ke̱nngke̱ o. U zeka, “Hong za̱im ri, Kanubu, Waav Dauda. Rinnas’ce el a̱n pita̱lsa̱m waav ri waa’wanta.”
23Ye̱so ta se̱s la o da. An la̱a̱s baa ru hata bo̱ a kon o. A zeka, “Vog neta uha̱n u to̱o̱. U el a̱n s’kan tu gaba na.”
24Ye̱so se̱sk la na̱, “I baa netnan Isra’ila an rein ho̱d kyo̱o̱mna s’yang a̱n na comain me.”
25Neta hodgta bo̱ u hyaa a̱n c’rwin a̱n hwic Ye̱so. U zeka o, “Kanubu, se̱e̱te̱ me.”
26Ye̱so zeta bo̱ o, “I ta hwenna na o̱m ryaakc aka̱n na ne̱e̱ o̱ma̱n da.”
27Neta zeta bo̱, “I m’ga̱u, Kanubu. Puti a tan na, o̱ma̱n el ta ryaa yatrananan ta koba baan ryaakc kanubu.”
28Ye̱so se̱st bo̱ neta, “Vo neta, batma̱n ba̱ta̱d rov baa ri lo̱gko̱. Lag i soot baa rov ho̱da̱na̱n v to̱ntine.” Waa’wanta v ru kumk m’ho̱o̱ka̱n lanma̱n ho̱rva̱n lo.
Ye̱so taask neta̱n s’malse
29Lanma̱n a̱nlu, Ye̱so to̱o̱k u gabk paata̱n Saama̱n Galili. U havk u elk a̱n k’se̱m u sootka. 30Damran bugca̱n neta̱n nokka baa ru. A nokta̱vka ta̱m o le̱mne̱, pomna, a c’kyuntu, kyurumnu a an mals sa̱ hyann ta̱m hwe̱di. A la̱ta̱lska̱ na̱ kwe̱ baan naas ru. U taask la na̱ s’mals kwe̱. 31Neta̱n sipk a’nwa̱a̱ aa he̱ntin kyurumnu a̱n s’lalko. A c’kyuntu vaakk a gyu nu. Le̱ma̱n el na’ha̱gcu. Poma̱n el ta̱m nu’he̱no. A bo̱mk Silan Isra’ila.
Ye̱so ryaakska d’bugu
32A̱n daava̱n lo, Ye̱so po̱gko̱ an la̱a̱s baa ru a noka baa ru. U zeka na̱, “Bugda̱n netna ha̱n emk a̱m m’za̱i. A el baa ri te̱nte̱ c’hwe c’ta̱a̱cu. A ta kum la rina̱n a ryain da. A̱m ta to̱n a̱m lag na̱ a to̱o̱ a̱n mer da, tade̱e̱da a hyaa a̱n le̱ve̱.”
33An la̱a̱s baa ru ipkt bo̱ o, “Ipe̱ a̱n nan kuma̱ c’ryaak a̱nmin kadka̱ ha̱n na cigst damran bugda̱n netna ha̱n kwe̱?”
34Ye̱so ipkt bo̱ na̱, “I c’be̱re̱e̱di c’nai a̱n ciini?”
A se̱sk o, “I c’be̱re̱e̱di c’tan’il am yaa-ge̱nna̱n m’hona.”
35Ye̱so zeta bo̱ bugda̱n neta̱n az a soot nu’copo. 36U o̱mt bo̱ be̱re̱e̱dica̱n lo c’tan’il a ge̱nnan lo ne. U emaka A’Sil c’bo̱mo̱. U bosa̱mk ca̱ u nesk an la̱a̱s baa ru a we̱nke̱ netna. 37Na̱nna kwe̱ a ryaakk a cigka̱. An la̱a̱s baa ru kargsta bo̱ yatrananan ka̱ltin a hiis c’gyo̱b c’tan’ila̱. 38An ryaakin i neta̱n s’kwe̱re̱ s’naase. A̱n na oga̱mse la netan a aka̱n na̱n da.
39Ye̱so zet bo̱ bugda̱n neta̱n az a gya̱a̱. U uvuz kaa a̱n bumbka̱ m’ho̱o̱ u caa copca̱n Magadan.
16Napma̱n va̱n we̱sa̱m Ye̱so rwa̱ini
1Farisin a Sadusin haka a̱n hob az Ye̱so ema na̱ rina̱n ti kwesa az i lanm na’con u kuma̱in we̱sa̱m ru. 2Ye̱so se̱sk la na̱, “A rima tud a̱n he̱nk u’ko̱ko̱, a̱n el ta̱n ze, ‘Zanma̱n buk ta̱m em tass.’ 3Na̱m’zan ta̱ma̱, an he̱n cona dwaak u’ko̱k alla a rimk cipp, ta̱n ze, ‘Hweda̱n te̱nte̱ bo̱ a da̱n em tass da.’ A̱n el ta̱n nap rina̱n ti em a̱n go̱tma̱n hyo̱o̱m na’cona. A̱n ta la̱a̱ kaa a̱n ke̱e̱se̱ rihica̱n daava̱ ha̱n da? 4I netna v’dum a d’o̱ma̱n an rein ta hob az na kwesa na̱ rihica̱n sipa̱m na’nwa̱a̱. A nan kwesa la na̱ rihi da a za goon rina̱n kumin Joona k’barav Na’Sil da.” Ye̱so lagk na̱ u to̱o̱k a̱n c ru.
Yist Farisin a Sadusin ni
5An an la̱a̱s baa ru pastin rigt m’saa, a bakasaz az hwec kaaka na̱ o̱mo̱m c’be̱re̱e̱di. 6Ye̱so zeka la na̱, “Gab na sasa rema̱n yist Farisin a Sadusin ni.”
7A emt bo̱ s’lan a̱n a̱n’na̱n a̱n’na̱. A zeka, “Tade̱e̱da i rema̱n ca o̱mo̱ na c’be̱re̱e̱di da.”
8Ye̱so napk la keka̱bs na̱. U ipkt bo̱ na̱, “Nwaa an kalkma̱n bata̱m d’ba̱ta̱. I rema̱n ye̱ a̱n retin a̱n lansa̱n az a̱n zatta c’be̱re̱e̱di da? 9V’Daa ge̱ a̱n ta ke̱e̱se̱ da? A̱n ta bakasa c’be̱re̱e̱di c’tan ca̱n na ryaakstain neta̱n s’kwe̱re̱ s’tan da? I yatran c’gyo̱b c’nai a̱n na ka̱ltine? 10Alla c’be̱re̱e̱di c’tan’il ca̱nlo ta̱m ca̱n na ryaakstain neta̱n s’kwe̱re̱ s’naase, i yatran c’gyo̱b c’nai a̱n na ka̱ltine? 11I’le̱e̱le̱ kaa a̱n ta ke̱e̱ste̱in az za be̱re̱e̱dica m tanain da? A̱m la a̱n zem no az a̱n gab sasa rema̱n yist Farisin a Sadusin ni.”
12I daava̱n lo kaa a ke̱e̱ste̱in az za yist u c’be̱re̱e̱di u zein az a gab sasa a unwan da. I la̱a̱ss Farisin a Sadusin ni.
Bitrus vatk kan rein Ye̱so
13An Ye̱so cetain a̱n copun Kaisariya Filibi, u ipkk an la̱a̱s baa ru. U zeka, “Iwe̱ a̱n neta̱n rein ta po̱g me, mi, Waav noco?”
14A se̱st bo̱ o, “Ahyan zeka az i vo Yohana kan emam na baptisma. Ahyan ze az i vo Iliya. Ahyan ze ta̱m az i vo Je̱rmaya alla da̱nv baranc Na’Sila̱.”16:14 Go̱t ta̱m: Mat 14:1-2; Mar 6:14-15; Luk 9:7-8.
15U sudt bo̱ a̱n ipk na̱, “Nwaa la bano, iwe̱ a̱n rein ta̱n po̱g me?”
16Simo̱n Bitrus se̱st bo̱ o, “I vo a̱n rein Ka̱risti, Waav Sila nan rein kooye̱ daava.”16:16 Go̱t ta̱m: Yoh 6:68-69.
17Ye̱so se̱st bo̱ o, “Sila emaka vo, Simo̱n waav Joona. Za nocurimu a̱n kwesain v ri ha̱n da. I Cet me un rein a̱nmi na’cona. 18A̱m zeka ta̱m vo, i vo Bitrus. (Rina̱n nan po̱g Bitrus a̱n remda̱n C’Girik, i K’Taare.) Ta̱’m de̱l a̱v bo̱p an batin d’ba̱t a gabk a̱m ho̱da̱na̱n nan kaakt a’maa a̱n k’taare. Wa̱a̱’a a ta pa̱t we̱sa̱m na̱ da. 19Ta̱’m nes a̱v risa̱n gwedasama̱n hutda̱n go̱mc na’cona. Kooye̱ v esasain a̱n copun yanda̱hna, Sila ta esasa e a’cona. Kooye̱ ta̱m a̱v butin a̱n copun yanda̱hna, Sila ta but e a’cona.”16:19 Go̱t ta̱m: Mat 18:18; Yoh 20:23.
20Ye̱so saat bo̱ an la̱a̱s baa ru d’rin az aa ve̱ce̱ la noc az i unwa a̱n rein Ka̱risti da.
Ye̱so tu ryaa d’kob u wa̱a̱
21Lanma̱n daava̱n lo, Ye̱so takaz ve̱ce̱m an la̱a̱s baa ru. U zeka, “Ke̱ng ta̱’m hav a̱n le̱in Urisalima. Ta̱’m ryaa d’kob s’goo-s’goo a̱n komc hwenga̱nc Yahude̱n a c’hwengnan ka̱bd Na’Sil na̱ a an la̱a̱sa̱m na s’giira na. Ta hwaa me. A̱n hweda̱ v’ta̱ccu la, ta̱’m po̱to̱.”
22Bitrus po̱gt bo̱ o v’kabo. U zeka, “Sila bita̱! Kanubu, rihica̱ ha̱n a ca̱n tak a̱n kum v da.”
23Ye̱so pankka la, u zeka Bitrus, “Unu baa ri, A̱krimu! I vo ri d’hyaa baa ri. A̱v za a̱n keka̱bsa̱n rihic Na’Sil a za rihica̱ c’nocurimu da.”
24Ye̱so zet bo̱ an la̱a̱s baa ru, “Koowe̱ a̱n to̱nin u gaba me, ke̱ng u ha̱l to̱nun de̱bc ru. U walg ryaaka̱ d’kob ho̱da̱n kan na twe̱e̱se̱in kanka̱n nan hot o, u gaba me. 25Rema̱n kowe̱ a̱n hyain naps ri a̱n gelva̱n nan hwaa o, tu wa̱a̱. Koowe̱ la a̱n nan hwaa rem ri, i unwa a̱n tu po̱to̱. 26Iye̱ ke̱mda a̱n noc tu honga, au kum rihica̱n copun yanda̱ha̱n kwe̱, u wa̱a̱ kaa d’kala? Alla iye̱ a̱n noc tu nes u to̱vt hid ru? 27Mi Waav Noco, ta̱’m han a̱n gwink K’Ceto d’kut a comta̱nc na̱-na̱. A̱n daava̱n lo a̱n ta̱’m cop koowe̱ geda̱n yomka ru. 28Lag na a̱m ve̱ce̱te̱ no m’ga̱u. Ahyan el taha̱n a’esa an zain na’wa̱a̱ da a za a he̱nk hanm ri a gwinka̱n go̱mc rin da, mi Waav Noco.”
17Vodma̱n hyo̱o̱m Ye̱so
1An na la̱vtin c’cihin, Ye̱so o̱mk Bitrus na Yakub, a̱n Yohana ha̱n Yakub. U savk na̱ a̱n cona k’se̱m k’ziska̱, a̱n’a c’taa. 2Na vodasta bo̱ hyo̱o̱m Ye̱so a̱n hwic na̱. Cu’a ru emk d’za̱n ho̱d ni’hwen. Kusa̱m ru pusa̱nka̱ ta̱m padpad ho̱d c’kempra. 3A el taanlo, go̱to Mosa na Iliyan coso a el a̱n s’lalk a Ye̱so no. 4Bitrus zeta bo̱ Ye̱so, “Kanubu, i emk d’ke̱m hwe̱di an na retin tahna. Awaz a̱v se̱ske̱, lag a̱m em m’saace m’ta̱a̱cu. I’Da̱n rem rovo. I’Da̱n rem Mosa. I’Da̱n ta̱m rem Iliya.”
5Bitrus ta cim s’lalk da, go̱to̱ k’wec ka̱ d’za̱n hwe̱di k nokka k bitiki na̱. A hong-hong ta̱m v’god a̱nmi k’wece. Va̱ zeka, “Go̱t ha̱n na Waav ri. Ta̱’m to̱n o hwe̱di d’kala. A̱m el ta̱m a̱n he̱nma̱n ke̱md ru hwe̱di. Ge̱ne̱ na o u’con.”
6An an la̱a̱s baa ru i’ta̱a̱c inlo hongtin rina̱n na zeine, gela̱v ryaak na̱ hwe̱di d’kala. A hek nu’copo. 7Ye̱so hata bo̱ u do̱v na̱. U zeka, “Unu na. An hong la v’gel da.” 8Aa una̱sta̱in cuus na̱, a ta he̱n ta̱m noc hyan da. I Ye̱so c’taa a he̱nine.
9Aa latin ta ciza̱-ciza̱ a̱n se̱me̱, Ye̱so saak na̱ d’rina̱. U zeka, “An ve̱ce̱ la noc rina̱n he̱ne̱in da. A za hweda̱n Sila po̱to̱sto̱in me, mi Waav Noc da.”
10An la̱a̱s baa ru ipkt bo̱ o, “I rema̱n ye̱ a̱n an la̱a̱sa̱m na s’giira zetin az ke̱ng Iliyan tu baa han na̱m’e̱te̱?”
11Ye̱so se̱st bo̱ na̱, “M’Ga̱u, i Iliya ge̱ a̱n tu han na̱m’e̱t u mamgsta c’rihi kwe̱. 12Mi la a̱m zeka no az Iliya baask u haka. A ta nap la o da. A emaka ta̱m o ho̱da̱na̱n a to̱ntin kwe̱. I ho̱da̱n lo bo̱ ta̱m a̱n mi Waav Noco, ta̱’m ryaat d’kob a̱n komc na̱.”
13An Ye̱so tantain Iliya, an la̱a̱s baa ru ke̱e̱ste̱ bo̱ az i Yohana kan emam na baptisma u tanaine.
Ye̱so rutk waa’a̱ra̱m rinnas’ce
14An Ye̱so a an la̱a̱s baa run cizgta̱in lanma̱n se̱me̱, u ceka baan bugda̱n netna. A̱ra̱m haka baa Ye̱so u kugtk a̱n hwic ru. U konk o, 15“Kanubu, hong za̱im waav ri. Gaag v’lalala ci o. U el a̱n ryaaka̱ d’koba. Daav hyan u el tu kobo a̱nmin hwela, daav hyan ta̱ma̱, a̱nmi m’ho̱o̱. 16A̱m saka o baa an la̱a̱s baa rovo, a ta hweks la a̱n taas o gaag da.”
17Ye̱so zeta bo̱, “Nwaa netnan ta̱ma̱ a v’dumu, an ta batin d’ba̱t baa ri da. Go̱t na gosa̱m ri baa no. Go̱t ta̱m ho̱da̱na̱n m gagtin c’de̱b a nwaa na. Nokta na waaune.” 18Ye̱so haagsta bo̱ rinnas’ce. A ruk a lagk waa. Gaag tauz la waa a̱n ho̱rva̱n lo.
19Aa latin a̱n’a c’taa, an la̱a̱s baa Ye̱so ipkt bo̱ o, “Iye̱ bo̱ kaa a̱n holin co voga̱m rinnas’ce nane?”
20Ye̱so se̱sk na̱, “I rema̱n kalkma̱n batma̱n ba̱ta̱d no baa Na’Sila̱. Lag a̱m ve̱ce̱te̱ no m’ga̱u. Awaz a̱n batk d’ba̱t i cek lo̱gma̱n yaanva̱n bobaka̱n mo̱stad,17:20 Yaanva̱n mo̱stad el ho̱da̱n yaanva̱n po̱o̱co̱. ta̱n ze se̱mka̱ hna, ‘Hodgo v caa taanzo.’ Ka̱n hodgo la. Rihi za in zain nu’ema baa no da.17:20 Go̱t ta̱m: Mat 21:21; Mar 11:23; 1Kor 13:2. [21Goon o̱p naha̱n la, a ta rwa̱a̱ da a za a̱n s’cepk a i’so̱o̱tin da.”17:21 A̱nmin ge̱nke̱-ge̱nke̱ c hyan, za̱tva̱n 21 za da.]
Ye̱so zek ta̱m az tu wa̱a̱
22Daava̱n an la̱a̱s baa ru kargtain a̱nmin le̱in Galili, Ye̱so zeka na̱, “Nan be̱be̱ neta̱n mi, Waav Noco. 23Ta hwaa o. A̱n hweda̱ v’ta̱ccu la, Sila ta po̱to̱so̱ o.”
De̱bc naat bo̱ an la̱a̱s baa ru hwe̱di d’kala.
Ye̱so copk tala
24Aa cetain Kafarnahum, an kabma̱n talun go̱tma̱n buuk Na’Sil haka baa Bitrus. A ipkk o, “Kan la̱a̱sa̱m no za tu cop tal da?”17:24 Go̱t ta̱m: U’Rwa̱ 30:13; 38:26.25Bitrus zeta bo̱ na̱, “U el tu copa.”
An Bitrus uvta̱in nu’bu, Ye̱so baast bo̱ o. U ipkk o, “I baa we̱ a̱n go̱mgo̱mnan copun yanda̱ha̱n rein ta kab tala? I baa a nu’cope alla i baa hamcne? Iye̱ v he̱nine, Simo̱n?”
26Bitrus se̱st bo̱ o, “I baa hamcne.” Ye̱so zeta bo̱ o, “Awaz i taanlo, na batk a nu’cop baan tala. 27Puti a tan na, rema̱n a na naas la na̱ c’de̱b da, caa m’saa a̱v bato v’kwe̱mbe̱. Ge̱nuna̱n a̱v sipin na̱m’e̱te̱, a̱ba̱sa̱ nwa̱a̱’a ru, ta̱’v gita̱ ko̱min kindi a̱nmin. O̱mo̱ e a̱v hav a̱v cwepa cin tala.”
18Iwe̱ a̱n rein u so̱dk kwe̱
1A̱n daava̱n lo ta̱ma̱, an la̱a̱s baa Ye̱so haka a ipkk o. A zeka, “Iwe̱ a̱n rein u so̱dk kwe̱ a̱nmin go̱mc na’cona?”
2Ye̱so po̱gto̱ bo̱ waa u reko u noka baa ru. U esasta bo̱ o a̱n te̱ka na̱. 3U zeta bo̱ na̱, “Lag a̱m ve̱ce̱te̱ no m’ga̱u. A za a̱n vaakk ho̱d aka̱n rekan da, a ta̱n uv a̱n go̱mc na’con da. 4Koowe̱ a̱n kalasain hid ru ho̱d waa’rekun uhna, i unwa a̱n rein u so̱dk kwe̱ a̱nmin go̱mc na’cona. 5Koowe̱ ta̱m a̱n tu kab goon waa’rekun uha̱n a̱n dind ri, i mi u kabine.
Ven kan tu san c’ke̱ta̱mse̱
6“Koowe̱ ta̱m a̱n tu de̱l da̱nv aka̱n rekan aha̱n an batin d’ba̱t baa ri a ko̱to̱, ti piti be̱ o na ge̱ge̱ o d’naa a̱n to̱r na bono o a̱nmin m’saa.
7“Badu kask netnan copun yanda̱ha̱n an rein ta de̱l ahyan a̱n c’ko̱to. Ke̱ng rihica̱ c’ko̱t ca̱n han, badu kask la un noktain ca̱. 8Awaz koma rov alla nau rov tu de̱l a̱v ko̱to̱, gedanna o a̱v duku. I pitiki va̱ v po̱t u talke alla a d’kyuntu nu, a̱nda a̱v ci c’kom c’il alla s’naa s’ila̱, na bono v a̱n hwelana d’kal-d’kala. 9Awaz ta̱m isa̱d rov ta̱d de̱l a̱v ko̱to̱, ho̱l da̱ v duku. I pitiki va̱ v po̱t a d’isa̱n d’da̱nka̱, a̱nda a̱v ci is i’il na bono v a̱n wa̱a̱ka̱n hwela.
Kyo̱o̱muna̱n yangine
10“An gin la da̱nv aka̱n rekan aha̱n da. Lag a̱m ve̱ce̱te̱ no. Comta̱nc Na’Sil a na̱ a̱nmi na’con el baa Cet me a̱nmi na’con kooye̱ daava. [11Rema̱n mi Waav Noc a̱m haka rema̱n a̱m gwa̱a̱t rina̱n yangine.]18:11 A̱nmin ge̱nke̱-ge̱nke̱ c hyan, za̱tva̱n 11 za da.
12“Go̱t na a̱n he̱nte. A noc ci kyo̱o̱ma̱n v’za̱ngu, da̱nv yang o. A tu lag o̱pnan lo kwe̱zc c’naas a̱n oopa ni’doore, u el a̱n c’se̱m u hobta un yangin da? 13Au he̱ne̱ la o, lag na a̱m ve̱ce̱te̱ no m’ga̱u. Tu em c’za̱ngkta̱ rema̱n kyo̱o̱mun lo, i pa̱t za̱ngkta̱ca̱n tu ema kwe̱zc c’naas a̱n oopa ni’door an ta yangin da. 14I ho̱da̱n lo bo̱ ta̱ma̱, za to̱nu ceta no un rein a̱nmi na’con az da̱nv a rekan aha̱n yang da.
Hyaara̱v kan ko̱tin baa rovo
15“Awaz hyaara̱v ko̱tk baa rovo, hav a̱v ve̱ce̱ o habsa̱d ru, nwaa i’il c’taa. Au hong vo, a̱v puttka̱ bo̱ o a̱n k’le̱ve̱.18:15 Go̱t ta̱m: Luk 17:3.16Au ta hong la v da, o̱m noc v’da̱nka̱ alla i’il a̱n hav baa ru. Rema̱n ‘A̱n nwa̱a̱’a net ni’il alla i’ta̱a̱cu, kooye̱ lalkwa tu esa.’18:16 Go̱t ta̱m: Rsgi 17:6; 19:15.17Au ha̱l ta̱m a̱n hong no, hav a̱v ve̱ce̱ buga̱d a s’gaba. Au ha̱l ta̱m a̱n hong buga̱d a s’gaba, kin na bo̱ o ho̱d un ta napin A’Sil da alla ho̱d kan kabma̱n tala.
We̱sma̱n a s’gab ciini
18“Lag a̱m ve̱ce̱te̱ no m’ga̱u. Kooye̱ a̱n esasain a̱n copun yanda̱hna, Sila ta esasa la e a’cona. Kooye̱ ta̱m a̱n ta esasain a̱n copun yanda̱ha̱n da, Sila a ta esasa la e a’con da.18:18 Go̱t ta̱m: Mat 16:19; Yoh 20:23.
19“A̱m el ta̱m a̱n ve̱ce̱m no. Awaz net ni’il baa no ta swe̱e̱ hid na̱ a̱n kooye̱ a konin a̱nmin copun yanda̱hna, Cet me un rein a̱nmi na’con tu ne̱e̱ na̱ inya. 20Rema̱n va̱na̱n net ni’il alla i’ta̱a̱c kargain d’baa d’da̱n a̱n dind ri, a̱m el a̱n a̱n’a baad na̱.”
La̱a̱s un emma̱ d’kwisi
21Bitrus nokka baa Ye̱so, u ipkk o, “Kanubu, i s’lam a’nai a̱n hyaare tu ko̱t baa ri a̱m kwisi o? S’Lam a tan’ili?”
22Ye̱so se̱st bo̱ o, “A̱m ta ze v s’lam a tan’il da. I s’lam kwe̱zc c’ta̱a̱c a̱n oopa s’lam a tan’ila̱.”18:22 Go̱t ta̱m: D’Tak 4:24.23I rema̱n taanl a̱n na hwenna̱stain go̱mc na’con a go̱m hyan na, un ipkin coka̱n ru rina̱n tu gab na̱. 24Au taktain a̱n gaba, na savaka o kan u rein na̱m’gab mo̱gda̱n ko̱min kind s’kwe̱re̱ oopa. 25Ai retin cokune zatta rina̱n tu copt o da, kan buu ru de̱lk az na bab o a netav ru nu, a aka̱n ru nu, a rina̱n u ciin ta̱m kwe̱, na copt mo̱ga̱d ru. 26“Cokun lo het bo̱ nu’cop u konk o, ‘Kanubu, gag c’de̱b a mi ni, ta̱’m cop a̱v kwe̱.’ 27Kan buu cokun lo hongt bo̱ za̱im ru. U batk o, u kwisiki ta̱m o mo̱gc ru kwe̱.
28“I cokun lo ge̱ a̱n rwa̱in u git hyaaro cok un ryain mo̱gda̱n ko̱min kind oopa baa ru. U sipt bo̱ o u mo̱d o ha̱ru. U zeta bo̱ o, ‘Cop a̱m mo̱gda̱ m rein a̱n gaba̱m rovo.’ 29Hyaaro cok het bo̱ nu’cop a̱n naas ru. U konk ta̱m o u zeka, ‘Gag c’de̱be̱, kwisi me, ta̱’m cop a̱v kwe̱.’ 30U ha̱lk la a̱n hong kons ru. U havk u de̱lk na gagk o a̱n buu s’ko̱m u copt mo̱gda̱n lo kwe̱.
31“Daava̱n hyann coka̱n he̱ntin rina̱n emine, de̱bc naak na̱ hwe̱di d’kala. A havk ta̱m a ve̱ce̱ke̱ kan buu na̱ rina̱n cokun lo emin kwe̱. 32An kan buu ru po̱gto̱in o, u zeka o, ‘Vo cok kan de̱bc naake. A̱m kwisiki v mo̱gc rov kwe̱ rema̱n a̱v konk me. 33Vo la ba̱rvu, i ta ge̱be̱se̱ be̱ v hong za̱im hyaara̱v cok ho̱da̱na̱n m hongtin za̱im rov da?’ 34Kanubu hwinst bo̱ hwe̱di d’kala. U badasta bo̱ o a̱n komc an ryeesam neta̱n d’kob u copt mo̱gda̱n nan gab o kwe̱.
35“I ho̱da̱n lo bo̱ ta̱m a̱n Cet me un rein a̱nmin a’con tu emata no, awaz a̱n ta kwisi hyannanon ko̱tc na̱ d’ba̱t d’da̱n da.”
19Ye̱so holk kuza̱m c’ga̱i
1An Ye̱so taastin vatma̱n lalksa̱ hna, u lagk copun Galili u cek copun Judiya un rein a̱n rigta̱n ge̱nka̱n Jodan. 2Damran bugca̱n neta̱n gabka ta̱m o. U taask ta̱m na̱ s’mals kwe̱ a̱n a̱n’a.
3Farisin hata bo̱ baa ru rema̱n a maakt o. A ipkt bo̱ o, “Giira se̱sk az noc kuz netav ru, a̱n kooye̱ u emin o?”
4Ye̱so ipkt bo̱ na̱, “A̱n ta po̱g ho ge̱nsa̱ s’giira, az Sila nan emin na̱ a̱n d’takbo, a emk na̱ a̱ra̱m na neta da?19:4 Go̱t ta̱m: D’Tak 1:27; 5:2.5Sila zeka ta̱ma̱, ‘I rema̱n taanl a̱n a̱ra̱m tu lagt ceto a inu nu, u de̱pe̱ netav ru. Na̱nna i’il ta soot u’we̱d uda̱nka̱.19:5 Go̱t ta̱m: D’Tak 2:24.’ 6Rema̱n taanlo, a za ta̱m net ni’il da. I noc v’da̱n. Rina̱n Sila gagin d’baa d’da̱n, a noc but la da.”
7A ipkt bo̱ o, “I rema̱n ye̱ kaa a̱n Mosa kaatin giira az na ge̱n vaaka̱n kuza̱m c’ga̱i, na bat ta̱m neta u to̱o̱?19:7 Go̱t ta̱m: Rsgi 24:1-4; Mat 5:31.”
8U se̱st bo̱ ta̱m na̱, “I rema̱n honga̱mzac no a̱n Mosa lagtin no a̱n kuz netan no. A̱n d’takbo la, za taanl i retin da. 9A̱m el ta̱m a̱n ve̱ce̱m no. Koowe̱ a̱n kuzin netav ru, a za rem d’o̱m da, u gan ta̱m uhyan, u el a̱n d’o̱mo̱. Koowe̱ ta̱m a̱n gain netauna̱n na kuzini, u el a̱n d’o̱mo̱.”
10An la̱a̱s baa ru zeta bo̱ o, “Awaz i taanl a̱n sooca̱d a̱ra̱m na netav ru retine, i pa̱tk a̱n d’ke̱m a noc gaa la da.”
11Ye̱so zeta bo̱ na̱, “Za neta̱n kwe̱ a̱n ta kab lalksa̱ ha̱n da, a za an Sila se̱e̱te̱in da. 12Rema̱n ahyan zatta c’a̱ra̱m da. I taanl la a̱n Sila emtain na̱. Ahyan la, i netnan hwain na̱ c’a̱rma̱. Ahyan la, a ha̱l-ha̱l c’ga̱i rema̱n go̱mc na’cona. Koowe̱ a̱n tu la̱a̱ a̱n kab lalksa̱ hna, lag u kaba.”
Ye̱so de̱le̱ke̱ aka̱n u’pusu
13Neta̱n hyan savaka Ye̱so aka̱n rekanne rem u dwedata na̱ c’koma, u pe̱ge̱ ta̱m na̱ u’pusu. An la̱a̱s baa ru haagsta bo̱ na̱ az a to̱o̱. 14Ye̱so zeta bo̱ na̱, “Lag na aka̱n rekan a noka baa ri. An hol la na̱ da. Rema̱n go̱mc na’con ic goon na̱nna.”
15Ye̱so dwedata bo̱ na̱ c’kom a̱n daava̱n lo. U laguz kaa baad ne.
Waa’beb kanukumu
16Na el taanl go̱to̱ waa’beb nokka baa Ye̱so. U ipkk o, “Kan la̱a̱sa̱m na lalks Na’Sila̱, iye̱ a̱n ma em i kasi a̱m po̱tt d’kala?”
17Ye̱so ipkk la o, “I rema̱n ye̱ a̱n va ipkt a̱m da̱n rihi kasi? Noc kasi za da, a za A’Sil c’taa da. Awaz a̱v to̱nk a̱v po̱t d’kala, gab rina̱n giiras Na’Sil zeine.”
18Waa’beb ipkt bo̱ o, “Iye̱ giirasa?”
Ye̱so se̱st bo̱ o, “Av hwaa la noc da. Av em la d’o̱m da. Av em la d’hiv da. Av ke̱m la noc a̱n c’ko̱l da. 19Ne̱e̱ cet a̱v a in va̱n k’gwin. A̱v to̱n kan e̱s rov ho̱da̱na̱n ta̱’v to̱nt hid rovo.”19:19 Go̱t ta̱m: U’Rwa̱ 20:12; Ggdk 19:18.
20Waa’bebun lo se̱st bo̱ Ye̱so, “Rihica̱ ha̱n kwe̱, a̱m gabk ca̱ lanma̱n paad ri i ceta te̱nte̱. Iye̱ ta̱m a̱n kusin me? Iye̱ kaa a̱m robine?”
21Ye̱so zeka ta̱m o, “Awaz a̱v to̱nk a̱v soot noc kan zattin ri d’reb da, nok a̱v bab rina̱n v ciin kwe̱, a̱v we̱nke̱ kobneta̱n kindi. Ta̱’v kum kaa u’kum a’cona. A̱n daava̱n lo, noka kaa v gaba me.”
22An waa’bebune hongtin lalksa̱ hna, u to̱o̱k c’de̱b c’naake, rema̱n u ci kumu u rorke.
23Ye̱so zeta bo̱ an la̱a̱s baa ru, “Lag na m ve̱ce̱te̱ no m’ga̱u. I c’ma̱d bo̱ a ta̱ga̱n kanukum uvt a̱n go̱mc Na’Sila̱. 24A̱m zek ta̱m no, i pa̱tk a̱n k’le̱v az rakum uv a̱n wa̱a̱va̱ v’tamswa, a̱nda kanukum uv a̱n go̱mc Na’Sila̱.”
25An an la̱a̱s baa ru hongtin tan, a robk ho̱da̱n m’emte. I cek a ipkk o, “Iwe̱ bo̱ kaa a̱n tu kum d’gwa̱a̱ma̱?” 26Ye̱so go̱tk na̱ u zeka, “Baa netna, a ti ema da. Baa Na’Sil la, kooye̱ ti ema.”
27Bitrus ipkt bo̱ o, “Go̱to̱, c lagka c’rihi kwe̱ c gabk vo. Iye̱ bo̱ kaa a̱n ca̱n kumu?” 28Ye̱so se̱st bo̱ na̱, “Lag na m ve̱ce̱te̱ no m’ga̱u. Nwaananan gabain me, a̱n hweca̱n nan vodasta c’rihi kwe̱, daava̱n Waav Noc tu soott a̱n dotaka̱n go̱mc ru ka̱ k’gwin, nwaa ta̱m ta̱n soot a̱n dotaca̱ c’go̱m oopa a̱n c’ila̱. Ta̱n geda ta̱m goos an Isra’ila oopa a̱n s’il lalko.19:28 Go̱t ta̱m: Mat 25:31; Luk 22:30.
29“Koowe̱ ta̱m a̱n lagain c’buu alla ha̱nun yaa’a̱ra̱mna̱ alla ha̱nun yaa’yantana alla k’ceto alla k’inu alla akna alla ta̱m c’ke̱nge̱ rem ri, tu kab c’copa̱n s’lam v’za̱ngu. Sila ta ne̱e̱ ta̱m o po̱tu d’kala. 30An rein na̱m’he̱n az i na̱nna a̱n nan hwenga na̱m’e̱te̱, ta vaak an na zain nan hwenga da. An rein la ta̱m na̱m’he̱n az a nan hwenga na̱ da, ta vaak an nan hwenga a̱n d’be̱se̱.”19:30 Go̱t ta̱m: Mat 20:16; Luk 13:30.
20Hwennsac a̱n a na’yomko
1“Go̱mc na’con el ho̱d kanubel un rwa̱in nu’pun u o̱mt a na’yomk u sav a̱n belu ru. 2U se̱e̱pske̱ a a na’yomka̱n az tu cop koowe̱ v’dinariyo̱ v’da̱n rema̱n yomka d’hwe d’da̱n. U cukuz na̱ nu’bela. 3U ruk ta̱m ho̱d s’ko̱m s’door na̱m’zana. U he̱n-he̱n ta̱m neta̱n hyan a’es baa s’yo̱p a za a̱n emma̱n rihi da. 4U zeka ta̱m na̱, ‘Nwaa ta̱m rya̱a̱ na a̱n belu ri. Ta̱’m cop no rina̱n hwennain kwe̱.’
5“A sakk ta̱m k’le̱v a ryiika̱. U ruk ta̱m u o̱mk ahyan d’hwen na’te̱ke̱. Ahyan s’ko̱m s’ta̱a̱c ni’hwen. 6S’Ko̱m s’tan na’rim ta̱ma̱, u sudk a̱n rwa̱a̱ ta̱m u gitka̱ neta̱n hyan a’es a za a̱n emma̱n rihi da. U ipkt bo̱ ta̱m na̱, ‘I rema̱n ye̱ a̱n retina̱n naasa̱m d’hwen ka̱ka̱la̱?’ 7A se̱st bo̱ o, ‘I rema̱n noc ta o̱m co na’yomk da.’ U zeta bo̱ ta̱m na̱, ‘Nwaa ta̱m rya̱a̱ na a̱n belu ri.’
8“An hwed hyotoine, kanubu zeka kan go̱tec nu’bela, ‘Po̱go̱ ha a na’yomk a̱v cop na̱. Taka baa an na o̱min a̱n d’be̱se̱, a̱v ceta a m’e̱te̱.’20:8 Go̱t ta̱m: Ggdk 19:13.
9“Daava̱n an na o̱min na’yomk s’ko̱m s’tan na’rim cetaine, na copk koowe̱ rina̱n hwennain na cop o a̱n gubca̱ d’hwen. 10An a m’e̱t cetain la, a de̱lk c’de̱b az nan so̱do̱so̱ copa̱nc na̱. An na coptin na̱ v’dinariyo̱, 11a kabk a emk s’remrem ta tana kanubela. 12A zeka, ‘O̱p naha̱n an hain a̱n d’be̱se̱, a emk yomka v’ho̱r v’da̱n c’taa. Puti a tan na, a̱v copk na̱ honhon a cwannanan hotin na’yomk go̱t ta̱m sangam ni’hwen.’
13“Kanubel se̱sk la da̱nv na̱, ‘Barav ri, a̱m ta hitksa̱ v da. Na se̱e̱pske̱ a̱n rina̱n hwennain copca̱n gubca̱ d’hwen. I inya la m copin vo. A̱v ta se̱s ha̱n a̱m cop a̱v v’dinariyo̱ da? 14Kab copa̱nc rov a̱v to̱o̱. I mi a̱n to̱nin a̱m cop a d’be̱se̱ ho̱da̱na̱n m coptin vo. 15A̱m zatta-zatta d’ke̱e̱ a̱m em rina̱n m to̱nin a̱n kind ri da? A̱v hwins-hwins bo̱ kaa a min rema̱n a̱m ci m’ho̱se?’
16“An rein na̱m’he̱n az i na̱nna a̱n nan hwenga na̱m’e̱te̱, ta vaak an na zain nan hwenga da. An rein la ta̱m na̱m’he̱n az a nan hwenga na̱ da, ta vaak an nan hwenga a̱n d’be̱se̱.”20:16 Go̱t ta̱m: Mat 19:30; Mar 10:31; Luk 13:30.
Nan edg Ye̱so a̱n k’kan
17An Ye̱so latina̱n havma̱n le̱in Urisalima, u kwaatk an la̱a̱s baa ru oopa ni’il a̱n paat k’le̱ve̱. U zeka na̱, 18“Go̱to̱, c el bo̱ na a̱n havma̱n le̱in Urisalima. Va̱na̱n nan be̱be̱ c’hwengnan ka̱bd Na’Sil a an la̱a̱sa̱m na s’giiran mi Waav Noco. Ta geda m lalk na hwaa me. 19Ta badasa ta̱m m a̱n komc an zain Yahude̱n da. Ta gin me. A swepa̱l me. A edg m a̱n k’kan. A be̱se̱ a hwaa me. A̱n hweda̱ v’ta̱ccu la, ta̱’m po̱to̱.”
Inuk kwenaka aka̱n ru
20An ho̱ra̱v hwaine, in aka̱n Za̱ba̱di haka baa Ye̱so d’kut a aka̱n ru nu. U hek a̱n c’rwin a̱n emam Ye̱so c’hwiipsa̱ a̱n konsa̱n rihi baa ru.
21Ye̱so ipkt bo̱ o, “Iye̱ v to̱nine?”
Neta se̱sk la o, “Se̱s az aka̱n ri naha̱n i’il soot baa rovo. Uda̱n a̱n kabva̱n koma s’to̱o̱. Uhyan a̱n koman kanta rov baan go̱mc rovo.”
22Ye̱so se̱st bo̱ o, “A̱n ta nap rina̱n a̱n reina̱n s’kon da. Ta̱n la̱a̱ a̱n ryaa goon kobda̱n ta̱’m ryaa?”
A se̱sk la o, “Ca̱n la̱a̱.”
23Ye̱so zeta bo̱ na̱, “Ta̱n la̱a̱ ge̱ a̱n ryaa goon kobda̱n ta̱’m ryaa. Da̱n soocda̱n kabva̱n koma s’to̱o̱ alla kanta ri la, za mi a̱n ta̱’m ne̱e̱ da. I Cet me a̱n tu ne̱e̱ au dagine.”
24An an la̱a̱s baa Ye̱so oopananan kusa̱in hongtin rina̱n emine, il inlo ko̱o̱k na̱ s’le̱b hwe̱di d’kala. 25Ye̱so po̱gt bo̱ na̱ a noka baa ru. U zeta bo̱ na̱, “A̱n napk az an go̱mc an zain Yahude̱n da, a el ta kwesa we̱sa̱m c’go̱m baa neta̱n na̱. Damran na̱ ta̱ma̱, na za nan pas rina̱n a zein da.
26“Nwaa la, za taanl a̱n ti soott baa no da. Koowe̱ a̱n to̱nin c’damra baa no, lag u soot kan tu ema no m’coko. 27Koowe̱ ta̱m a̱n to̱nin u soot u so̱dk kwe̱ baa no, lag u soot coka̱v no. 28I ho̱da̱n lo bo̱ a̱n mi, Waav Noco, a̱m noktaine, za rema̱n na emata m m’cok da. I rema̱n a̱m emata neta̱n m’coko, a̱m cod ta̱m hid ri na hwaa rema̱n to̱vec neta̱n hwe̱di.”
Ye̱so taask a̱ra̱m ni’il m’poma
29An Ye̱so a an la̱a̱s baa run latina̱n lagma̱n le̱in Je̱riko, damran bugda̱n neta̱n gabk o. 30Pom ni’il lak la a’soot a̱n e̱s k’le̱ve̱. Aa hongtin az i Ye̱so a̱n rein tu to̱o̱-to̱o̱, a ze̱lk s’god a zeka, “Kanubu, Waav Dauda, hong za̱im co!”
31Bugda̱n neta̱n haagsta bo̱ na̱ az a res te̱kk. A sudk la a̱n ze̱l s’god a zeka, “Kanubu, Waav Dauda, hong za̱im co.”
32Ye̱so est bo̱ sa̱a̱d. U po̱gt bo̱ na̱. U ipkk na̱, “Iye̱ a̱n to̱nin a̱m ema no?”
33A se̱st bo̱ o, “Kanubu, c to̱nk u’he̱no.”
34Ye̱so hongt bo̱ za̱im na̱. U do̱vk ta̱m is na̱. A̱ndaabe, a he̱nke̱, a gabk ta̱m o.
21Ye̱so uvk Urisalima ho̱d go̱mo̱
(Mar 11:1-11; Luk 19:28-40; Yoh 12:12-19)
1An Ye̱so a an la̱a̱s baa run cetin d’viivi a le̱in Urisalima na, a ceka a̱n le̱in Betafeji in rein a̱n Se̱mka̱n Cesa̱n O̱lif. Ye̱so comt bo̱ an la̱a̱s baa ru i’ila̱. 2U zeka na̱, “Nok na a̱n le̱ina̱n rein a̱n hwic cinna. An caa, ta̱n git jank a’gag a waa’jank na. Buta̱ na na̱ a̱n noktva me. 3A noc ze no ta̱da̱ gaba, ze na o az kanubu to̱nk a’yomk a̱n na̱nna. A̱ndaabe, tu lag no a̱n noktva m na̱nna.”
4Na emk rihica̱ ha̱n kwe̱ rema̱n na esasta vatu k’barav Na’Sila̱. U zeka:
5“Ve̱ce̱ na netnan Zaayo̱n,21:5 Go̱t ta̱m: Zak 9:9.
‘Go̱t bo̱ go̱mv no
tu noko-noko baa no.
Za a̱n lo̱ga̱m d’hi da,
u el ta̱m a’sak a̱n janka.
I a̱n d’waa jank la u retin a’saka.’ ”
6An la̱a̱s baa Ye̱so havk a emk ho̱da̱na̱n Ye̱so zetin na̱. 7A noktka jank a waa’jank na. A se̱ke̱te̱ bo̱ na̱ kusa̱m na̱, Ye̱so sakt bo̱ a̱n d’waa janka. 8Damran bugca̱n neta̱n heeska kusa̱m na̱ a̱n k’le̱ve̱. Ahyan sa̱ta̱mka̱ c’vaa a se̱e̱pske̱ ca̱ a̱n k’le̱ve̱. 9Bugca̱n neta̱n an rein a̱n hwici a an gabain dim na̱, a ze̱lk s’god a zeka, “Bo̱m na A’Sila̱! Bo̱m na Waav Dauda! Sila emaka un rein na̱m’han a̱n dind Na’Sila̱. C’Bo̱m baa Na’Sil an rein a̱n cona d’be̱se̱ zo.”21:9 Go̱t ta̱m: Zab 118:25-26.
10Au uvta̱in a̱nmin le̱in Urisalima, i’le̱e̱ i’biri bo̱lk a̱n c’za̱ngkta̱. Neta̱n el ta̱m a̱n s’ipku, “Iwe̱ ha̱n zo?”
11Bugda̱n netnanan lain a̱n gaba̱m Ye̱so se̱sk la na̱, “I Ye̱so k’barav Na’Sil kan Nazarat, le̱ina̱n reina̱n copun Galili.”
Ye̱so vogk a s’yo̱po
(Mar 11:15-19; Luk 19:45-48; Yoh 2:13-22)
12Ye̱so uvk a̱n gwen un buuk Na’Sila̱. U ve̱ga̱lt bo̱ koowe̱ a̱n tu baba a un tu waa na. U ha̱dga̱lska̱ ta̱m zegac an se̱sa̱n kind a dotac an babeda̱n gorba̱n na. 13U zeka na̱, “I el a’ge̱n a̱nmin lalks Na’Sila̱, ‘Nan po̱g buu ri buu s’cepko. Go̱t la a̱n vaakska o baada̱n pagc hivni.’ ”21:13 Go̱t ta̱m: Isa 56:7; Je̱r 7:11.
14Poma̱n a le̱ma̱n haka baa ru a̱n gwen un buuk Na’Sila̱. U taask ta̱m na̱ malss na̱ kwe̱. 15C’Hwengnan ka̱bd Na’Sil a an la̱a̱sa̱m na s’giiran he̱nk rihica̱ c’he̱t cu emka̱lline. A hongk ta̱m ho̱da̱na̱n aka̱n retina̱n s’ub a̱nmin buuk Na’Sil na̱m’ze, “Bo̱m na Waav Dauda.” I ta em na̱ d’ke̱m da d’kala. 16A zeta bo̱ o, “A̱v el a̱n hongma̱n rina̱n akna ha̱n rein nu’vate?”
Ye̱so zeta bo̱ na̱, ha̱, a̱m hongka. A̱n ta tak a̱n po̱g ho ge̱nsa̱n lalks Na’Sil sa̱n zeine, “A̱v de̱lk yaa’aka̱n a yaa’gyoza̱n a bo̱mk dind rov da?”
17Ye̱so to̱o̱t bo̱ u lag na̱. U ruk ta̱m u lagk le̱ine. U cek a̱n le̱in Betani, u cilk a̱n a̱n’a.
Ye̱so emaka remba s’nwa̱a̱
18Ai zantain ta̱ma̱, an Ye̱so latin tu vaaka-vaaka a̱nmi ni’le̱e̱, merk la̱a̱k o. 19Au he̱ntin ceun remba a̱n k’le̱ve̱, u ceka baan ceune. U ta gita̱ la c’yaan a̱n unwa a za c’vaa c’taa da. U zeta bo̱ ceune, “A ta̱’v sud ta̱m a̱n mat da d’kala.” A̱ndaabe ceun remba ho̱o̱k kau.
20An an la̱a̱s baa ru he̱ntin tan, a sipk a’nwa̱a̱. A zeka, “I’Le̱e̱le̱ a̱n ceun remba ho̱o̱tin a̱ndaabe?” 21Ye̱so se̱st bo̱ na̱, “Lag na a̱m ve̱ce̱te̱ no m’ga̱u. Awaz a̱n batk d’ba̱t baa ri, a̱n ta em ta̱m s’lan da, za rina̱n na emin ceun remba c’taa a̱n ta̱n la̱a̱ a̱n em da. Ta̱n la̱a̱ a̱n ze se̱mka̱ hna, ‘Vuga̱nna̱ v kobo a̱nmi m’saa.’ Ti em la tan. 22An bat d’ba̱t kwe̱ baa Na’Sila̱, kooye̱ a̱n ta̱n kon a̱n s’cepko, ta̱n kumu.”
Va̱na̱n we̱sa̱m Ye̱so rwa̱ini
23Ye̱so uvka̱ a̱n gwen un buuk Na’Sila̱. Au latina̱n la̱a̱sa̱m netna, hwenga̱nc Yahude̱n a an ka̱bd Na’Sil a̱n haka. A ipkk o, “I a̱n ye̱ we̱sma̱n go̱mca v retina̱n emma̱n rihica̱ hna? Iwe̱ ta̱m a̱n ne̱in v we̱sma̱ ne?”
24Ye̱so se̱sk ta̱m na̱, “Mi ta̱ma̱, ta̱’m ipk no ipk uda̱nka̱. An se̱s me, ta̱’m ve̱ce̱ no la ba̱ri we̱sma̱n go̱mca̱n a̱m retina̱n emka̱lla̱ma̱n rihica̱ hna. 25Ipe̱ a̱n Yohana kuma̱in we̱sma̱n emam neta̱n Baptisma? I baa Na’Sili alla i baa netna?”
A buut bo̱ s’lan a̱n a̱n’na̱n a̱n’na̱, “A na ze, ‘A̱m lan baa Na’Sila̱.’ Tu ze cinna, ‘I rema̱n ye̱ a̱n ta kabtin lalk ru da?’ 26A na ze la, ‘A̱m lan baa netna.’ C el a̱n gela̱v netna. Rema̱n neta̱n kwe̱ a kabk az Yohana i k’barav Na’Sila̱.” 27A se̱st bo̱ Ye̱so, “Ca nap bo̱ da.”
U zeta bo̱ la na̱, “Mi la a ta̱’m ve̱ce̱ no da̱n we̱sma̱n go̱mca̱n a̱m retina̱n emma̱n rihica̱ ha̱n da.
C’Hwennsa a̱n yaa’a̱ra̱m ni’ila̱
28“Go̱t na a̱n he̱nte. Noc ciki yaa’a̱ra̱m ni’ila̱. U haka baa u m’e̱t u zeka o, ‘Waare, rya̱a̱ nu’bel te̱nte̱.’ 29Waa se̱st bo̱ o, ‘A̱m za bo̱ a̱n rya̱a̱m nu’bel da.’ Ai ho̱kstoine, waaune, u gabk s’duk u vaakk u ryiika̱. 30U haka ta̱m baa waa u v’illa̱, u zeka o ta̱m taanlo. U v’illa̱ se̱sk la o, Kanubu, ‘To̱, ta̱’m rya̱a̱.’ U ta rya̱a̱ la da. 31Iwe̱ baan i’il inlo a̱n emin to̱nu ceta na̱?”
A zeka o, “U m’e̱te̱.” Ye̱so zeta bo̱ na̱, “Lag na m ve̱ce̱te̱ no m’ga̱u. An kabma̱n tal a netan zamsne21:31 I kaarwana. ta baa no uvma̱n go̱mc Na’Sila̱. 32Rema̱n Yohana haka u kwesaka no le̱vka̱ m’ga̱u, a̱n ta kab la lalk ru da. An kabma̱n tal la a netan zamsne, a kabk lalk ru. Nwaa la an he̱ntin taanlo, a̱n ta lag ko̱tc no a̱n kab lalk ru da.
C’Hwennsa a̱n an le̱kin belu s’ce
33“Hong na hwennsac hyan. Kanubu lak de̱ha̱n un gwain belu s’ce. U rigk o a̱n gagne a̱n kooye̱ kabva kwe̱. U baak wa̱a̱ka̱n mo̱dma̱n yaan a̱nmi. U maa ta̱m sakad s’regdo. U le̱gse̱z kaa an le̱k belune u to̱o̱k u baalk m’naka.21:33 Go̱t ta̱m: Isa 5:1-2.34An daava̱n kaama̱n yaan bo̱ptina̱n can, u comk coka̱n ru baa an le̱k a kabva o yobu ru baan rina̱n ces matine. 35An le̱k sipk la coka̱n ru, a buuk uda̱nka̱, a hwaa uhyan, a bonga̱l ta̱m uhyan.
36“Kanubel sudt bo̱ ta̱m a̱n com coka̱n hyan an pa̱tin a m’e̱te̱. An le̱k emaka ta̱m na̱ taanlo. 37A̱n d’be̱se̱ la, u comt bo̱ waav ru baa na̱. U zeka, ‘Ta hwenga kaa waav ri.’ 38Daava̱n an le̱k he̱ntin waaune, a zeka, ‘A̱nha̱a̱n, i unwa ha̱n a̱n tu buka gaad u’bela. C hwaa na o bat belu tu soot u co.’ 39A sipt bo̱ la o, a rutk o lanm nu’bel a hoka.
40“Daava̱n kanubel tu vaakta, iye̱ a̱n tu em an le̱k nu’bel nanlo?”
41A se̱st bo̱ o, “Tu hwaa an le̱knan lo a v’dumu. U nes ta̱m ahyan le̱kun belu ru, an ta nes o yobu ru honhon daava̱n in.”
42Ye̱so zeta bo̱ na̱, “A̱n ta tak ho a̱n po̱gk ge̱nsa̱n lalks Na’Sil sa̱n zeine,21:42 Go̱t ta̱m: Zab 118:22-23.
“ ‘Taarda̱n maaga̱n ha̱line,
i da̱nda a̱n sootin
damran taara̱d d’kaak da?
I emu Na’Sil hna,
i rin sipa̱m na’nwa̱a̱
ta̱m baa cinna.’
43“I rema̱n taanl a̱m retina̱n ve̱ce̱m no. Nan o̱m go̱mc Na’Sil baa no na nes netnanan ta em rina̱n go̱mc Na’Sil to̱nine. 44Koowe̱ a̱n hyain a̱n taarda̱ ha̱n tu gecma̱lse c’gyundu-c’gyundu. Koowe̱ la a̱d kobvaine, da̱n nam o u vaak ho̱da̱n m’hyun.”
45An go̱mna ni’le̱e̱ a c’hwengnan ka̱bd Na’Sil a Farisin hongtin hwennsaca̱ hna, a napuz az i na̱nna u ciini. 46Aa to̱ntin be̱ a sip o, a hongk gela̱v netna. Rema̱n neta̱n kabk az Ye̱so i k’barav Na’Sila̱.
22C’Hwennsa a̱n he̱tda̱ c’ga̱i
1Ye̱so emaka ta̱m na̱ s’lalk a̱n c’hwennsa. U zeka, 2“Go̱mc na’con el ho̱da̱n go̱muna̱n be̱ne̱in waav ru waa’a̱ra̱m he̱ta̱d c’ga̱i. 3U comt bo̱ coka̱n ru a ve̱ce̱ netnanan na banain c’ga̱i az a noka. A ha̱lk la u’noka. 4U sudk ta̱m a̱n com coka̱n hyan. U zeka, ‘Ve̱ce̱ na an na banain az a̱m walgk c’ryaako. A̱m hok naama̱n nooke, na walgk ta̱m c’rihi kwe̱. Ze na na̱ a noka ha baan he̱ta̱d c’ga̱i.’
5“An na banain ta wass la o da, a to̱o̱k a̱n c’na̱. U’Da̱n ryiik nu’bela. Uhyan nokk baa s’yo̱po. 6An kusin la, a sipk coka̱n ru a buuk na̱ s’bii, a be̱se̱ a hwaa. 7Go̱m hwinst bo̱ hwe̱di d’kala. U comt bo̱ bugda̱n koola̱n a hav a hweela̱l an hwain netnan lo, a dwaa ta̱m le̱i na̱.
8“U zeka ta̱m coka̱n ru, ‘Na taask walgca̱n he̱ta̱d c’ga̱i. Go̱t la an na banain ta hwenna be̱ na banka na̱ da. 9Nok na a̱n c’ha̱ta̱nka̱nna̱. An he̱ne̱in kwe̱, bana na na̱ a han baan he̱ta̱d c’ga̱i.’ 10Coka̱n ruk la a cek c’ha̱ta̱nka̱n a po̱gko̱ geda̱n netnanan a he̱ne̱in kwe̱, a naake a a kasin ni. Baad c’ga̱i hik cwebe a̱n hamcne.
11“An go̱m uvta̱in u po̱o̱sto̱ hamcne, u he̱nko nocuna̱n ta to̱po̱in kusi c’ga̱i da. 12U ipkt bo̱ o, ‘Barav ri, i rema̱n ye̱ v uvta̱in taha̱n a̱v ta to̱po̱ kusi c’ga̱i da?’ A̱ra̱m ta kum rina̱n tu se̱s da. 13Go̱m zeta bo̱ coka̱n ru, ‘Gag na o s’naa a c’kom na, a̱n rut o a̱n bono na’is baa ni’cumunkunnu. Va̱na̱n ta kanng a ta̱uda̱n nin na̱.’22:13 Go̱t ta̱m: Mat 8:12; 25:30; Luk 13:28.
14“Rema̱n i neta̱n hwe̱di a̱n na banaine. I i’hona la a̱n na dagine.”
Lalkun copma̱n tala
15Farisin havt bo̱ a se̱e̱pa̱vse̱ ho̱da̱na̱n ta sipt Ye̱so baan rina̱n tu vata. 16A comt bo̱ an la̱a̱s baa na̱ d’kut a neta̱n He̱ro̱d baa Ye̱so. A ipkk o, “Kan la̱a̱sa̱m na lalks Na’Sila̱, c napk az i vo ka m’ga̱u. A̱v el ta̱m a̱n gabta̱m na a̱n le̱vk Na’Sil na̱m’ga̱u. A̱v za ta̱m a̱n gela̱v neta̱nn da rema̱n a̱v za ta̱’v ka̱a̱ka̱nsi na̱ da. 17A̱n he̱nu rovo, i honhon na cop Kaisar22:17 Kaisar i go̱m va̱n copun Roma. tale alla a na cop la da?”
18Ye̱so napk la keka̱bs naak s na̱ kwe̱. U ipkt bo̱ na̱, “Nwaa an budma̱n hwelana c’waala. I rema̱n ye̱ a̱n retina̱n kwe̱e̱m ri? 19Kwesa na m kindin na retin nan cop tala.”
A nokta̱vta bo̱ o kindin ko̱mo̱. 20U ipkt bo̱ na̱, “I hyo̱o̱m we̱ a dind we̱ a̱n na ge̱nin a̱n inya?”
21A se̱sk o, “I Kaisar.” Ye̱so zeta bo̱ na̱, “Rema̱n taanlo, nes na Kaisar rina̱n rein i Kaisar. A̱n nes ta̱m A’Sil rina̱n rein i Na’Sila̱.”
22Aa hongtin taanlo, a sipk a’nwa̱a̱. A to̱uz a̱n c’na̱ a lagk o.
Lalkun po̱to̱so̱m netna
23A̱n hweda̱n lo ta̱ma̱, Sadusin an ta se̱sin az a na wa̱a̱ nan po̱t da, a haka baa Ye̱so a ipkk o. 24A zeka o, “Kan la̱a̱sa̱m na, Mosa zeka, ‘A noc wa̱a̱ u ta mat da, ha̱nu so̱t netav ru bat tu kwimi o goo.’22:24 Go̱t ta̱m: Rsgi 25:5-6.25A̱rma̱n lak i’tan’il nu’ha̱nu baa co. Hwa̱tk baa na̱ kwe̱ gaak neta, u wa̱a̱ a ta mat da. Ha̱nu so̱tt bo̱ netaune. 26Taanl ta̱m i kumtin u v’illa̱ a u v’ta̱ccu nu, na cet u v’tan’ila̱. 27A̱n d’be̱se̱ kwe̱, neta uk la ba̱ru. 28Rema̱n taanlo, daava̱n Sila ta po̱to̱sto̱ an wa̱ini, iwe̱ a̱n rein kan neta baa na̱ i’tan’ila̱? Rema̱n na̱nna kwe̱, koowe̱ gaak o.”
29Ye̱so se̱st bo̱ na̱, “A̱n el a̱n d’habse. Rema̱n a̱n ta nap rina̱n na vatin a̱nmin ge̱nsa̱n lalks Na’Sil alla ta̱m we̱sa̱m Na’Sil da. 30Daava̱n Sila ta po̱to̱sto̱ an wa̱ini, a ta gaa da, a nan gaa ta̱m na̱ da. Ta soot ho̱d comta̱nc Na’Sil an rein a̱nmi na’cona. 31Lalkun po̱to̱so̱m an wa̱in la, a̱n ta po̱g ho ge̱nsa̱n rina̱n Sila ve̱ce̱in no da? Sila zeka no, 32‘I mi Sila Ibrahi, Isaaku a Yakubu nu.’ Sila za Sila neta̱n uk da. I Sila a po̱tke.”22:32 Go̱t ta̱m: U’Rwa̱ 3:6.
33An bugda̱n neta̱n hongtin tan, a sipk a’nwa̱a̱ rema̱n la̱a̱s ru.
Giira u so̱dk kwe̱
34An Farisin hongtin az Sadusin ta la̱a̱ se̱sa̱m Ye̱so da, a meraka d’baa d’da̱n. 35Da̱nv na̱ un rein la̱a̱gva̱n giira ipkt bo̱ Ye̱so u maakt o. U zeka, 36“Kan La̱a̱sa̱m na, iye̱ giirawa a̱n rein u so̱dk kwe̱?”
37Ye̱so se̱st bo̱ o, “To̱n Sila rov a de̱bc rova̱n kwe̱, a hora̱md rov no, a keka̱bs rova̱n ta̱m kwe̱. 38I o̱p da̱ha̱n a̱n rein giira u m’e̱te̱, u so̱dk ta̱m kwe̱. 39U v’illa̱ el ta̱m ho̱d u m’e̱te̱. To̱n kan e̱s rov ho̱da̱n hid rovo.22:39 Go̱t ta̱m: Ggdk 19:18.40I a̱nmin giirasa̱ ha̱n s’il a̱n giiras hyan a la̱a̱ss baranc Na’Sil a̱n rwa̱in kwe̱.”
Iwe̱ a̱n rein Ka̱risti
41An Farisin kargtain d’baa d’da̱n, Ye̱so ipkk na̱, 42“A̱n he̱nu no, iwe̱ a̱n rein Ka̱risti? I unwa waav we̱?”
A se̱sk la o, “Waav Dauda.”
43Ye̱so ipkk ta̱m na̱, “I’le̱e̱le̱ kaa a̱n Dauda po̱gtin o, ‘Kan Go̱mca̱n Kooye̱,’ au emtin s’lalk a̱n we̱sma̱n Hora̱md Na’Sila̱? Rema̱n u zeka,
44“ ‘Sila zeka Kan buu ri,22:44 Go̱t ta̱m: Zab 110:1.
soot a̱n kabva̱n koma s’to̱o̱ a ri,
i cet daava̱n ta̱’m de̱lt a̱v pa̱t
we̱sa̱m an ha̱lc rovo.’ ”
45Awaz Dauda po̱gk o, Kanubu, i’le̱e̱le̱ kaa ta̱m u retin waav Dauda? 46A̱n na kum ta̱m nocuna̱n kumin rina̱n tu se̱s o da. Lanma̱n hweda̱n lo, a̱n na kum ta̱m un sudin ipka̱m ru rihi da.
23Kaag da̱n la̱a̱ss Farisin
(Mar 12:38-39; Luk 11:43-46; 20:45-46)
1Ye̱so ryaak hwic u emaka bugda̱n neta̱n d’kut a an la̱a̱s baa run s’lalko. U zeka, 2“An la̱a̱sa̱m na s’giira a Farisin kabk bo̱o̱d Mosa. 3Rema̱n taanlo, i ke̱ng a̱n em rina̱n a zein no a̱n em kwe̱. An gabese la na̱ a̱n em rina̱n a rein nu’em da. Rema̱n a la ta vat na’nwa̱a̱, a za la ta em da. 4A el ta gaga, a twe̱e̱se̱ neta̱n to̱o̱sca̱ m’nii. Na̱nna la, a ta do̱v ca̱ a̱n juuv na̱ da.
5“Rihica̱n ta emka̱l ta̱m kwe̱, a la ta em ca̱ rema̱n neta̱n he̱nt na̱. Ta lo̱go̱so̱ da̱pa̱ca̱n ciin ge̱nsa̱n lalks Na’Sil ca rein ta ge̱ga̱l a̱n cumkuc na̱ a c’kom na. A lo̱go̱so̱ ta̱m ke̱pse̱ca̱n kusma̱n ciin ge̱nsa̱n lalks Na’Sil ca rein ta zil a̱n be̱se̱da̱n kusa̱m na̱ bazabaza. 6Ta to̱n ta̱m sakac so̱dk baa d’he̱te̱, a baaca̱ d’sooc c so̱dka̱n a̱nmin ka̱bca̱n kargad Yahude̱ne̱. 7A el ta to̱n ta̱m c’po̱o̱sso̱ a̱n baaca̱ s’yo̱po. Ta to̱n ta̱m nan po̱g na̱, ‘Kan la̱a̱sa̱m na.’
8“An se̱s la na po̱g no, ‘Kan la̱a̱sa̱m na’ da. Rema̱n i uda̱nka̱ a̱n rein no kan la̱a̱sa̱m na. Nwaa la kwe̱, i ha̱nuwa a̱n retine. 9An po̱g la noc ‘K’Ceto’ a̱nmin copun yanda̱ha̱n da. I A’Sil c’taa a̱n rein no k’ceto. Kan rein a̱nmi na’cona. 10An se̱s la na po̱g no ‘Kanubu’ da. I Ka̱risti c’taa a̱n rein no Kanubu. 11Kan rein u so̱dk kwe̱ baa no, tu soot coka̱v no.23:11 Go̱t ta̱m: Mat 20:26-27; Mar 9:35; 10:43-44; Luk 22:26.12Koowe̱ ta̱m a̱n tu guba̱sa̱ hid ru, nan kalasa o. Koowe̱ la a̱n kalasain hid ru, nan guba̱sa̱ o.23:12 Go̱t ta̱m: Luk 14:11; 18:14.
Litim neta̱n gwe̱e̱v nu’copo
(Mar 12:40; Luk 11:39-42; 20:47)
13“I naak no, an la̱a̱sa̱m na s’giira a Farisin ni, an litim neta̱n gwe̱e̱v nu’copo! A̱n holk neta̱n uvma̱n go̱mc Na’Sila̱. Nwaa a̱n ta uv da, a̱n ta lag ta̱m an to̱nin u’uvu, a uvt da. [14I naak no, an la̱a̱sa̱m na s’giira a Farisin ni, oba̱lna d’kika̱! A̱n el ta̱n rum bomsa̱n c’buu, a̱n yangs ta̱m s’naa baan zisa̱sa̱m s’cepko. Rema̱n taanlo, nan het no damra d’hyaa baan gedma̱n lalko.]23:14 A̱nmin ge̱nke̱-ge̱nke̱ c hyan, za̱tva̱n 14 za da.
15“I naak no, an la̱a̱sa̱m na s’giira a Farisin ni, an litim na gwe̱e̱v nu’copo! A̱n el ta̱n paa c’cop a m’saa na a̱n kumta̱ nocuna̱n tu panka u gab la̱a̱s no. An taas la̱a̱sa̱m ru, tu pa̱t no a̱n ryaaka̱ d’kob a̱n wa̱a̱ka̱n hwela s’lam a’ila̱.
16“I naak no pomnan yangsa̱m netna. A̱n zeka, ‘Koowe̱ a̱n conkin a̱n buuk Na’Sila̱, az za rihi da. Koowe̱ la kaa a̱n tu conk a̱n zo̱n in rein a̱nmin buuk Na’Sila̱, az u gagk hid ru.’ 17Nwaa kipni, poma̱n ta̱ma̱! Iye̱ a̱n so̱din a̱n k’gwin? I zo̱n alla buuk Na’Sil ka̱n-ka̱n vaaksa zo̱n rina̱n zattin ri d’reb da? 18A̱n zek ta̱m az koowe̱ a̱n tu conk a̱n sakada̱n sako, az za rihi da. Az koowe̱ la a̱n conkin a̱n ho̱sma̱n rein a’sakasa a̱n ka̱n, u ko̱tko̱.
19“Nwaa pomna. Iye̱ a̱n so̱dine, ho̱sma̱n nan se̱ke̱ A’Sil alla sakada̱n da̱n vaaksa m’ho̱s rina̱n zattin ri d’reb da? 20Rema̱n taanlo, koowe̱ a̱n tu conk a̱n sakada̱n emam Na’Sil sako, u conkk a̱n da̱nda a rina̱n rein a̱n conan da̱ndan kwe̱. 21Koowe̱ ta̱m a̱n conkin a̱n buuk Na’Sila̱, u conkk a̱n ka̱nka a un rein a’soot a̱nmin ka̱nka na. 22Koowe̱ ta̱m a̱n tu conk a a’con na, u conkk a̱n dotaka̱n go̱mc Na’Sil a un rein a’soot a̱n ka̱nka na.23:22 Go̱t ta̱m: Isa 66:1; Mat 5:34.
23“I naak no, an la̱a̱sa̱m na s’giira a Farisin ni! An budma̱n hwelana c’waala! A̱n el ta̱n rut yobu Na’Sil baa s’gyo̱o̱rco. A̱n batka la kaa rihica̱n pa̱tin kwe̱ na̱m’nii a̱nmi s’giira: Gedma̱n lalk honhono, m’za̱i, emma̱ c’rihi d’ba̱t d’da̱n. I rihica̱ ha̱n i ge̱be̱se̱in be̱ a̱n emka. Za la az i a̱n lag emma̱n o̱p ca̱nz da.23:23 Go̱t ta̱m: Ggdk 27:30.24Nwaa pomnan yangsa̱m netna. Nwaananan ta̱n naka i’buga̱buga̱ a̱n ri nu’so̱u a̱n to̱l kaa rakumi.
25“I naak no, an la̱a̱sa̱m na s’giira a Farisin ni, oba̱lna d’kika̱! A̱n el ta̱n guz dimda̱ m’koka̱l a m’se̱nd ne̱. A̱nmi la, a̱n pask c’rumu a c’zo̱rmo̱’is na̱. 26Vo k’Farisi poma! Baa ha guz rina̱n rein a̱nmi ni’koka̱l a i’se̱nd ne̱, bat isan ma̱mma ta̱m soot a d’hare ne.
27“I naak no, an la̱a̱sa̱m na s’giira a Farisin ni! An budma̱n hwelana c’waala! A̱n el ho̱da̱n sagca̱n na pusa̱sa̱ine. Ca̱n nan he̱n a d’haren na’isa̱, go̱t la c el cwebe a te̱lc neta̱n uk ni, a kooye̱ goon za̱mma na.23:27 Go̱t ta̱m: YCCo 23:3.28I ho̱da̱n lo bo̱ a̱n retin ta̱n kwesa hid no baa neta̱n ho̱da̱n an gela̱v Na’Sila̱. Go̱t la a̱nmin de̱bc no, a̱n pask litim neta̱n gwe̱e̱v nu’copo, a v’dum nu.
29“I naak no, an la̱a̱sa̱m na s’giira a Farisin ni! Oba̱lna d’kika̱! A̱n maak sagc baranc Na’Sila̱, a̱n po̱rrsko̱ ta̱m sagc netnan gela̱v Na’Sila̱. 30A̱n el ta̱m ta̱n ze, ‘Ac la be̱ a̱n hwec ceta co, a ca̱n gabese be̱ na̱ a̱n hweec baranc Na’Sil da.’ 31An vattin taanlo, a̱n hetk hid no az i nwaa aka̱n an hweelin baranc Na’Sila̱. 32Be̱se̱ na kaa rina̱n ceta non takaine.
33“Nwaananan rein ho̱d yaa’bo̱mno̱! I’le̱e̱le̱ a̱n ta̱n kobt uvma̱n wa̱a̱ka̱n hwela?23:33 Go̱t ta̱m: Mat 3:7; 12:34; Luk 3:7.34I rina̱n de̱lin bo̱ a̱m comta̱vto no baranc Na’Sila̱, a a s’ver ne, a an la̱a̱sa̱m na s’giira na. Ta̱n edg ahyan a̱n c’kan a̱n hwaa ahyan baa na̱. Ta̱n swepa̱l ta̱m ahyan a̱nmin ka̱bca̱n kargac Yahude̱ne̱. Ta̱n paa ta̱m m’le̱e̱-m’le̱e̱ a̱n bizid na̱, a̱n ryeesam na̱ d’koba. 35I ho̱da̱n lo bo̱ a̱n kobda̱n Sila ta ne̱e̱ netnanan hwain an gela̱v Na’Sil a̱nmin copun yanda̱hna, takama̱n hiba̱m Habila, i ceta hiba̱m Zakariya waav Barakiya, ta̱d soot a̱n hid no. Zakariya u’na̱n ceta non hwain a̱n te̱kan buuk Na’Sil a sakada̱ m’ho̱s no̱. 36Lag na a̱m ve̱ce̱te̱ no m’ga̱u. Rihica̱ ha̱n kwe̱ ca̱n kum netnan daava̱ hna.
Ye̱so to̱nk le̱in Urisalima
37“E̱’e̱, netnan le̱in Urisalima! Le̱in Urisalima! Nwaananan rein ta̱n hwaa baranc Na’Sila̱. A̱n bonga̱l ta̱m an Sila comain baa no. I s’lam a’nai a̱m to̱nin be̱ a̱m kargsa no d’baa d’da̱n, ho̱da̱na̱n ka̱c tu karga̱vsta aka̱n ru a̱n kapc ru? A̱n ta se̱s la m da. 38Go̱t bo̱ na le̱gske̱ v buu rov a’banbana.23:38 Go̱t ta̱m: Je̱r 22:5.39A̱m el a̱n ve̱ce̱m no, a ta̱n he̱n a̱m ta̱m da, a za i cek daava̱n ta̱n zeta, ‘Sila emaka un tu han a̱n dind Na’Sil da.’23:39 Go̱t ta̱m: Zab 118:26.”
24Nan he̱e̱k buuk Na’Sila̱
1Ye̱so ruka̱ a̱n buuk Na’Sil tu to̱o̱-to̱o̱. An la̱a̱s baa ru hodgta bo̱ a zek az u kekksa me̱le̱me̱le̱ca̱n buuk ne. 2Ye̱so ipkt bo̱ na̱, “A̱n el a̱n he̱nma̱n rihica̱ ha̱n kwe̱? Lag a̱m ve̱ce̱te̱ no m’ga̱u. A nan lag d’taar a̱n cona d hyan taha̱n da̱n na zain nu’kobta nu’cop da.”
Naam c’de̱b a ryaaka̱ d’kob na
3An Ye̱so latin a’soot a̱n Se̱mka̱n Cesa̱n O̱lif, an la̱a̱s baa ru haka baa ru a̱n’a c’taa. A ipkk o, “Ve̱ce̱ co, i nama a̱n rihica̱ ha̱n ca̱n ema? Iye̱ ta̱m a̱n ti kwesa az hanm rov a be̱se̱da̱n copun yanda̱ha̱n bo̱pk a̱n can?”
4Ye̱so se̱sk na̱, “Gab na sasa. A noc palk la no da. 5Neta̱n hwe̱di ta han a̱n dind ri, a ze no, ‘I mi Ka̱risti.’ Ta yangs ta̱m neta̱n hwe̱di. 6Ta̱n hong da̱ d’gaag a lamsa̱ d’gaag no. An hong la v’gel da. I ke̱ng na em rihica̱ ha̱n kwe̱. Be̱se̱d ta hwesa can la da.
7“Copu tu gudgva̱ copu hyan. Go̱mc ca̱n gudgva̱ c’go̱mo̱. Nan em mer a viga̱msis nu’cop a̱n c’cop s’goo-s’goo. 8Rihica̱ ha̱n la kwe̱, i takboda̱n ryaaka̱ d’koba.
9“Ta badasa ta̱m no na ryeesta no d’koba, na hwaa ta̱m no. Netnan copun yanda̱ha̱n kwe̱ ta ha̱l ta̱m no rema̱n dind ri.24:9 Go̱t ta̱m: Mat 10:22.10A̱n daava̱n lo, neta̱n hwe̱di ta lag s’gaba, ta ha̱l hyannana̱ a be̱ba̱l ta̱m na̱. 11Baranc Na’Sil a c’ko̱l hwe̱di ta noka ta̱m a palka̱l neta̱n hwe̱di. 12Rema̱n rihic naak ca̱n rora, to̱nc neta̱n hwe̱di ca̱n haba. 13Kan tu gag la c’de̱b caam d’be̱se̱, i unwa a̱n nan gwa̱a̱.24:13 Go̱t ta̱m: Mat 10:22.14Nan em ta̱m ba̱sda̱n kasi lalksa̱n go̱mc Na’Sil a̱nmin copun yanda̱ha̱n kwe̱. I bat koowe̱ a̱nmin copca̱n copun yanda̱ha̱n kwe̱ tu honga, u kaba alla u ha̱la̱. I daava̱n lo kaa a̱n be̱se̱d da̱n ceta.
Rihica̱ m’e̱n a̱n buuk Na’Sila̱
15“A̱n hweda̱n ta̱n he̱nt ‘Rihica̱ m’e̱n ca̱n-ca̱n ko̱psso̱ buuk Na’Sil a’es a̱n baad swaadne,’ ca̱n k’barav Na’Sil Daniya tanaine, lag kan po̱ga̱m s’ge̱n ke̱e̱se̱.24:15 Go̱t ta̱m: Dan 9:27; 11:31; 12:11.16Lag an rein a’soot a̱nmin copun Judiya a̱n daava̱n lo, a som a caa c’se̱me̱. 17Un rein ta̱m a̱n dwenkcei nu’bu, au ciza̱ la u uvt nu’buu u o̱mto̱ rihi da. 18Koowe̱ ta̱m a̱n rein nu’bela, au vaaka la nu’buu u o̱mto̱ kusa̱m ru da.
19“I naak netana c’ubu a an yaa’gyoza̱n a̱n hweca̱n lo. 20Cepk na az a kwe̱e̱vs no soot la a̱n daava̱n yo̱o̱yo̱n alla ta̱m a̱n hweda̱n hwerad Yahude̱n da. 21Rema̱n daava̱n lo, neta̱n ta ryaa damrav d’koba. Goon kobda̱n a̱n na takina̱n ryaa da lanma̱n takboda̱n copun yanda̱ha̱n canma̱n daava̱ hna. A nan tak ta̱m a̱n ryaa goon kobda̱n lo da d’kal-d’kala. 22A za an Sila habkstein hweca̱n lo da, noc au po̱t be̱ da. Rema̱n an Sila dagin la, a habkske hwec ne.
23“A̱n daava̱n lo, a noc ze no, ‘Go̱t ha̱n Ka̱risti.’ Alla ‘Go̱tuz o a̱nzu.’ An kab la da. 24Rema̱n Ka̱ristin a c’ko̱l a baranc Na’Sil a c’ko̱lo̱, ta rwa̱n a em damran rihica̱n sipa̱m na’nwa̱a̱. I bat awaz ti ema be̱, a yangs netna a an Sila dagin ne. 25A̱m baask a̱m ve̱ce̱ke̱ no rihica̱ ha̱n ai c ceta.
26“Rema̱n taanlo aa ze no, ‘Go̱to̱, u el a̱n kondo.’ An hav la da. Alla, ‘Go̱to̱, u hokk a̱n k’kuru.’ An kab la da. 27Rema̱n ho̱da̱na̱n yabka̱v va̱n yabkte, za̱nda̱n va̱n gedanna lanma̱n rwa̱nma̱ d’hwen caama̱n hyooma̱ d’hwen, i ho̱da̱n lo bo̱ a̱n hanm ri ma̱n sootte, mi Waav Noco.
28“I ho̱da̱n lo ta̱ma̱, va̱na̱n wa̱a̱d rihi rein kwe̱, i a̱n a̱n’a a̱n sakran ta karga.”24:28 Go̱t ta̱m: Luk 17:37.
Vaakam Ye̱so
29“A ryaaka̱n kobda̱n lo to̱o̱, a̱ndaabe,
“ ‘hwei ti vaak i’cumunkunnu.
Pe̱e̱ti za a̱n ruta̱ ta̱m yand e da.
Keba̱n ta kwebra̱lla lanm na’cona.
Sila ta viga̱msi ta̱m
rihica̱n ciin m’we̱s a̱nz a’cona.’
30“I a̱n daava̱n lo kaa a̱n ta̱n he̱nt saada̱n hanm ri, mi Waav Noc a̱n c’wece. Netnan copca̱n copun yanda̱ha̱n kwe̱ ta kannga̱lla. Ta he̱n Waav Noc na̱m’han a̱nmin c’wec a’cona, a damra c’go̱m a k’gwin ni. 31Sila ta coma comta̱nc na̱ a hul kaaru s’o̱n hwe̱di. A karga̱vsa ta̱m an Sila dagin lanm s’kab s’naas sa̱n copun yanda̱hna a lanma̱ d’takbo a be̱se̱d a’con na.
La̱a̱s a̱n ceun remba
32“La̱a̱s na rihi baan ceun remba. Daava̱n u taktain u’pisa̱, a̱n napk az siisiu bo̱pk a̱n can. 33I ho̱da̱n lo bo̱ ta̱ma̱, daava̱n ta̱n he̱nt rihica̱ ha̱n nu’emo, nap na az daava̱n vaakam ri bo̱pk a̱n can. A̱m el a̱n bira̱vna’isna̱. 34Lag a̱m ve̱ce̱te̱ no m’ga̱u. Netnan daava̱ ha̱n a ta taa da a za rihica̱ ha̱n emk kwe̱ da. 35A’Con a copun yanda̱ha̱nna̱n ca̱n to̱o̱ kwe̱. Lalks ri la, a sa̱n taa da cakk, sa̱n es kwe̱.
Noc ta nap d’hwen da
36“Noc za un napin d’hwen alla v’daa da. Za comta̱nc Na’Sil nanan rein a’con alla ta̱m Waav Na’Sil da. I K’Ceto c’taa a̱n napine. 37Ho̱da̱na̱n i emtin a̱n hwec Nuhu, i ho̱da̱n lo bo̱ ta̱m a̱n hanm ri, mi Waav Noc ma̱n sootte.24:37 Go̱t ta̱m: D’Tak 6:5-8.38A̱n hweca̱n lo, ai na emt u’were, neta̱n lak ta ryaak ta so̱o̱. Ta gaa ta giit ta̱m na c’ga̱i, i ceta hweda̱n Nuhu uvtin a̱nmi bumbka̱ m’ho̱o̱.
39“A ta nap la rina̱n ti em da, weru duvka̱ u to̱o̱tk na̱ kwe̱. I ho̱da̱n lo bo̱ a̱n ti emt daava̱n hanm ri, mi Waav Noco.24:39 Go̱t ta̱m: D’Tak 7:6-24.40A̱n daava̱n lo, net ni’il ta wa nu’bela, nan o̱m uda̱n na lag uda̱nka̱. 41Neta ni’il ta wa a̱n d’naa, nan o̱m uda̱n na lag uda̱nka̱.
42“Soot na a c’walg no, rema̱n a̱n ta nap hweda̱n kan buu no tu doogta da. 43Ke̱e̱se̱ na ri hna: Awaz be̱ kanubu napk daava̱n hiv tu hata, tu em be̱ s’regdo. Au lag be̱ hiv uv a̱n buu ru da. 44Soot na a c’walg no, rema̱n Waav Noc tu vaaka a̱n ho̱rva̱n a̱n ta de̱ltin c’de̱b da.
Coka̱v d’kau alla u naake
45“I pe̱ha̱n coka̱v d’kau a s’ver ne? Un kan buu ru le̱gse̱in go̱teca̱n coknan buu ru, u we̱nkte̱ na̱ c’ryaak a daav ema? 46Sila emaka cokun lo a kan buu ru vaaka u gitka̱ o a̱n emma̱n rina̱n na de̱lin o u ema. 47Lag a̱m ve̱ce̱te̱ no m’ga̱u. Tu kaa o kan go̱teca̱n kumu ru kwe̱. 48Awaz la cokun lo i ka v’dumu, u ze a̱n de̱bc ru, ‘Kan buu ri emka dekk nu’vaaka.’ 49U takaz ba̱a̱ka̱d hyann cokno, u hav ta̱m a̱n k’ryaa tu so̱o̱ a so̱o̱ga̱n ne. 50Kan buu cokun lo tu vaaka a̱n hweda̱nda̱n u ta de̱ltin c’de̱b da, a̱n ho̱rva̱n u ta napin ta̱m da. 51Tu ne̱e̱ o d’koba, u ven o d’kut a an budma̱n hwelana c’waal na. Ta kanng s’kan a ta̱uda̱n nin na̱.”
25Yaa’yantan oopa
1“Nan hwenna̱sa go̱mc na’con a̱n yaa’yantan oopa an o̱min ta̱sim na̱ a ruk a gwaanta ga̱a̱gi.25:1 Go̱t ta̱m: Luk 12:35.2I’Tan i kipni. I’Tan la i a s’vere. 3An rein kipni, a o̱mko̱ ta̱sim na̱, a ta bo̱po̱ la neva̱m hyan da. 4A s’ver la, a o̱mko̱ ta̱sim na̱, a bo̱pko̱ ta̱m m’nev a̱n s’kwa̱a̱. 5An ga̱a̱gi emtain dekk nu’can, la̱va̱m ko̱sk na̱ kwe̱.
6“A̱n te̱kan gyop la, na ba̱ska̱, ‘Go̱to̱ bo̱ na ga̱a̱gi. Rwa̱n na a̱n gwaanta o!’ 7A̱n daava̱n lo, yaa’yantan pa̱dkk kwe̱ a uvk a̱n mamgsama̱n ta̱sim na̱. 8A m’kip zeta bo̱ a s’vere, ‘Ne̱e̱ na co m’nev ca̱nmi rema̱n ta̱sim co el a̱n hob nu’rimu.’
9“A s’ver se̱st bo̱, ‘A ti ema taanl da. Tade̱e̱da ta̱ma̱ ha̱n a ma̱n ma̱a̱na̱ cinna kwe̱ da. Ti pa̱t a̱n hav baa a d’babe a̱n weva d’hi.’ 10Aa havtin nu’wan, ga̱a̱gi canzo. An rein a’walgke, a uvuz a ga̱a̱gin baan he̱ta̱d c’ga̱i. Na gwedata bo̱ d’hutu.
11“An ho̱ra̱v hwaine, yaa’yantanan lo vaakka. A takaz u’zeu, ‘Kanubu, kanubu, gwedasa co.’ 12Ga̱a̱gi se̱sk la na̱, ‘Lag a̱m ve̱ce̱te̱ no m’ga̱u. A̱m ta nap no da.’
13“Soot na bo̱ kaa a c’walg no. Rema̱n a̱n ta nap d’hwen alla v’ho̱r da.”
C’Hwennsa a̱n cok ni’ta̱a̱cu
14“Go̱mc na’con el ta̱m ho̱da̱n nocuna̱n unuin na̱m’baala. U po̱go̱ kaa coka̱n ru u nes na̱ go̱teca̱n kumu ru. 15U nesk koowe̱ geda̱n we̱sa̱m ru. U nesk uda̱nka̱ ko̱min zo̱n s’kwe̱re̱ s’tan. U nesk ta̱m uhyan s’kwe̱re̱ s’ila̱. Uhyan v’kwe̱re̱ v’da̱n. U sakuz kaa k’le̱v u baala.
16“Kan u nesin ko̱min zo̱n s’kwe̱re̱ s’tan havk a̱ndaabe u emk s’yo̱p a̱n zo̱n ine. U so̱o̱ko̱ ta̱m ko̱min zo̱n hyan s’kwe̱re̱ s’tan. 17I ho̱da̱n lo bo̱ ta̱m a̱n un na nesin i’il so̱o̱to̱in s’kwe̱re̱ s’ila̱. 18Kan na nesin la v’da̱nka̱, u havk u o̱lk d’wa̱a̱ u budk ko̱min zo̱n kan buu ru.
19“Ai gostin hwe̱di, kan buu coknan lo vaakka. U po̱gko̱ ta̱m na̱ a ve̱ce̱te̱ o so̱uca̱n ca kuma̱in baan yo̱ps ne. 20Kan na nesin s’kwe̱re̱ s’tan, u so̱o̱ko̱ s’kwe̱re̱ s’tan sa̱ hyan. U zeka, ‘Kanubu, a̱v nesk a̱m s’kwe̱re̱ s’tan, go̱to̱, a̱m so̱o̱ko̱ kwe̱re̱s s’tan sa̱ hyan.’ 21Kanubu zeta bo̱ o, ‘Ho̱o̱ c’kala, coka̱v d’kau kan emin ta̱m a’yomk d’ba̱t d’da̱n. A̱v emk a’yomk d’ba̱t d’da̱n a̱n rihi ca̱nmi. Ta̱’m nes a̱v go̱teca̱ c’rihi hwe̱di. Uva̱ ba̱ra̱v a̱v em c’za̱ngkta̱ a kan buu rov no.’
22“Kan na nesin ko̱m s’kwe̱re̱ s’ila̱, u haka. U zeka ta̱ma̱, ‘Kanubu, a̱v nesk a̱m ko̱m s’kwe̱re̱ s’ila̱. Go̱to̱, a̱m so̱o̱ko̱ ils hyan.’ 23Kanubu zeta bo̱ o, ‘Ho̱o̱ c’kala, coka̱v d’kau kan emin a’yomk d’ba̱t d’da̱n. A̱v emk a’yomk d’ba̱t d’da̱n a̱n rihi ca̱nmi. Ta̱’m nes a̱v go̱teca̱ c’rihi hwe̱di. Uva̱ ba̱ra̱v a̱v em c’za̱ngkta̱ a kan buu rov no.’
24“An ho̱ra̱v hwaine, kan na nesin ko̱m v’kwe̱re̱ v’da̱n haka. U zeka o, ‘Kanubu, a̱m napk a̱v za ta̱’v twe̱ke̱ da. A̱v el ta̱’v ke̱m va̱na̱n v ta gwain da. A̱v kargsa ta̱m va̱na̱n v ta asin da. 25Gela̱v ryaat bo̱ me. A̱m havt bo̱ a̱m ze̱s ko̱m rov nu’copo. Go̱to̱, kab ha rihic rovo.’
26“Kan buu ru se̱st bo̱ o, ‘Vo cok ka v’dumu, kan to̱nc nu’we̱de̱. Av napk az a̱m el ta̱’m ke̱m va̱na̱n m ta gwain da, a̱m kargsa ta̱m va̱na̱n m ta asin da. 27I ta ge̱be̱se̱ be̱ v kini m ko̱m ri baa an se̱sa̱n kind da? Bat am vaakka, a̱m kab ko̱m ri a c’so̱un da? 28Kab na ko̱min lo a̱n komc ru a̱n nes kan ciin ko̱m oopa. 29Koowe̱ a̱n ciini, nan swidi o bat rihic ca̱n ror o. Kan zattin la da, rina̱n u ciin ca̱nmi, nan kab e baa ru.25:29 Go̱t ta̱m: Mat 13:12; Mar 4:25; Luk 8:18.30Rut na cok va̱n ka̱ka̱l na’is baa ni’cumunkunnu. Va̱na̱n nan kanng s’kan a ta̱uda̱n nin na̱.’25:30 Go̱t ta̱m: Mat 8:12; 22:13; Luk 13:28.
Gedma̱n lalkun hweda̱ d’be̱se̱
31“A̱n hweda̱n Waav Noc tu vaakta a̱nmin gwink ru d’kut a comta̱nc Na’Sil a̱n kwe̱, tu soot a̱n dotaka̱n go̱mc ru ka̱n damra k’gwin.25:31 Go̱t ta̱m: Mat 16:27; 19:28.32Netnan copca̱n copun yanda̱ha̱n kwe̱ ta karga a̱n hwic ru. Tu wankse ta̱m na̱ ho̱da̱na̱n kac’go̱te retin tu wankse kyo̱o̱ma̱n baa gwe̱lne̱. 33Tu kargsa kyo̱o̱ma̱n a̱n koma s’to̱o̱ a ru, gwe̱la̱n ta̱m a̱n koman kanta a ru.
34“A̱n daava̱n lo, go̱m tu ze an rein a̱n kabva̱n koma s’to̱o̱ a ru, ‘Noka na, nwaananan Cet me emaine. Kab na go̱mca̱n na we̱lgve̱in no lanma̱n kaakda̱n copun yanda̱hna. 35Rema̱n a̱m lak a̱n mero, a̱n ne̱e̱k a̱m c’ryaako. A̱m lak ni’so̱o̱ti a̱n ne̱e̱k a̱m ho̱o̱m nu’so̱u. Am latin a̱n d’hamce, a̱n cila̱ska̱ me. 36Am latin murmuru, a̱n ziliki m m’kusu. Am latina̱n gaago, a̱n emk go̱tec ri. Am latin ta̱m a’gag a̱nmin buu s’ko̱mo̱, a̱n haka a̱n po̱o̱sko̱ me.’
37“I a̱n daava̱n lo a̱n an gela̱v Na’Sil ta ipkt o, ‘Kan Go̱mca̱n Kooye̱, i nama c he̱nin v a̱n mer c ryaaksta vo alla ta̱m ni’so̱o̱ti, c ne̱e̱t a̱v ho̱o̱m nu’so̱u? 38I nama ta̱m a̱v lain a̱n d’hamce, c cila̱sta̱ vo alla murmuru, c ziliti va̱ m’kusu? 39I nama c he̱nin v a̱n gaago alla a’gag a̱n buu s’ko̱mo̱, c hata c po̱o̱sto̱ vo?’ 40Go̱m tu se̱s ta̱m u ze na̱, ‘Lag na a̱m ve̱ce̱te̱ no m’ga̱u. Awaz a̱n emaka da̱nv a kalk kwe̱ baa hyaare nahna, i mi a̱n emaine.’
41“Tu dang ta̱m u ze an rein a̱n kabva̱n koman kanta, ‘Unu na baa ri, nwaananan na emain s’nwa̱a̱. Uv na a̱nmin hwelana d’kal-d’kala. Baada̱n na we̱lge̱in A̱krimu a comta̱nc ru nu. 42Rema̱n a̱m emk mero, a̱n ta ne̱e̱ m c’ryaak da. So̱o̱ti i ciki me, a̱n ta ne̱e̱ m ho̱o̱m nu’so̱u da. 43A̱m emk ta̱m d’hamce, a̱n ta cila̱sa̱ m da. A̱m lak murmuru, a̱n ta zili m m’kus da. A̱m la̱tk gaago, a̱m lak ta̱m a’gag a̱nmin buu s’ko̱mo̱, a̱n ta han a̱n po̱o̱sko̱ m da.’
44“Na̱nna ta̱m ta ipk o, ‘Kan Go̱mca̱n Kooye̱, i nama c he̱nin v a̱n mero alla so̱o̱ti i otk vo alla a̱v lak a̱n d’hamce alla murmuru alla a̱n gaago alla a’gaga, a̱c ta ematain va̱ d’se̱e̱te̱ da?’
45“Go̱m tu dang u se̱s na̱, ‘Lag a̱m ve̱ce̱te̱ no m’ga̱u. Awaz a̱n ta ema da̱nv a kalk kwe̱ baa o̱p naha̱n da, i mi a̱n ta emain da.’ 46O̱p naha̱n ta uv a̱n ryaaka̱n kobda̱ d’kal-d’kala. An gela̱v Na’Sil la, ta uv a po̱t d’kal-d’kala.”25:46 Go̱t ta̱m: Dan 12:2.
26M’Kwe̱e̱ na sipt Ye̱so
(Mar 14:1-2; Luk 22:1-2; Yoh 11:45-53)
1An Ye̱so taastin lalksa̱ ha̱n kwe̱, u zek an la̱a̱s baa ru, 2“A̱n napk az i c’hwe c’il ca̱n kusin hweda̱n he̱tda̱n Paska ceta. Nan bab me, mi Waav Noco, rema̱n na edgt m a̱n k’kan.”26:2 Go̱t ta̱m: U’Rwa̱ 12:1-27.
3An ho̱ra̱v hwaine, c’hwengnan ka̱bd Na’Sil a hwenga̱nc Yahude̱ne̱, a kargka a̱n ka̱bd Kayafa go̱m va̱ d’ka̱b u Na’Sil u so̱dke. 4A se̱e̱pske̱ az a deba a sip Ye̱so a hwaa o. 5A zeta bo̱, “A ti ema a̱n hweda̱ d’he̱t da, rema̱n neta̱n ta una̱sa̱ d’gudgu.”
Neta bo̱ntsko̱ Ye̱so m’neve
6An Ye̱so latin a̱nmin le̱in Betani, a̱nmin buu Simo̱n kan gaag c’daka, 7neta haka a neva̱m d’ha̱ng ma̱n kind hwe̱di a̱n battada̱n alabasta.26:7 I k’taar ka̱n na rein nan se̱b c’rihi s’goo-s’goo. U bo̱ntsko̱ Ye̱so ma̱nma a̱n d’hi au latin a’soot baa c’ryaako.26:7 Go̱t ta̱m: Luk 7:37-38.8Daava̱n an la̱a̱s baa ru he̱ntin taanlo, a hwinsk hwe̱di. A zeka, “Iye̱ a̱n kabain damran naasda̱ hna? 9Nan bab be̱ nevma̱ ha̱n kind hwe̱di na we̱nke̱ kobnetna.”
10Ye̱so napk la keka̱bs na̱. U ipkt bo̱ na̱, “I rema̱n ye̱ a̱n retina̱n o̱so̱so̱m neta? U emaka m rihi i kasi d’kala. 11A̱n ci kobneta̱n baa no kooye̱ daava. Mi la a ta̱’m mal baa no da.26:11 Go̱t ta̱m: Ggdk 15:11.12Nevma̱ ha̱n ma̱n neta uha̱n bo̱ntso̱in me, u em-em taanl rema̱n walgca̱n saga̱m ri. 13Lag na a̱m ve̱ce̱te̱ no m’ga̱u. Koope̱ a̱n na emin ba̱sda̱n kasi lalksa̱ ha̱n a̱nmin copun yanda̱hna, nan tana rina̱n neta uha̱n emin a̱n bakasac ru.”
Yahuda se̱sk u bab Ye̱so
14An ho̱ra̱v hwaine, da̱nv an la̱a̱s baa Ye̱so oopa ni’il inlo, un nan po̱g Yahuda Iskariyo̱ti, u havk baa c’hwengnan ka̱bd Na’Sila̱. 15U ipkk na̱, “I i’nai a̱n ta̱n cop me, am badasta no Ye̱so a̱n komc no?” A gigt bo̱ lalk az ta cop o ko̱m pusin d’kwe̱z a̱n oopa.26:15 Go̱t ta̱m: Zak 11:12.16Lanma̱n daava̱n lo, u takaz hoba̱n ho̱da̱na̱n tu badasta na̱ Ye̱so.
Ye̱so ryaak ryaakca̱n Paska
(Mar 14:12-21; Luk 22:7-13; Yoh 13:21-30)
17A̱n hweda̱ m’e̱t da̱n he̱tda̱n be̱re̱e̱dica̱n zattin yist da, an la̱a̱s baa Ye̱so nokka. A ipkk Ye̱so, “Ipe̱ v to̱nin c we̱lge̱ v rema̱n a̱v ryaat ryaakca̱n he̱tda̱n Paska?”
18U se̱sk na̱, “An uv ni’le̱e̱ ta̱n he̱n noco. Ze na o, ‘Kan buu co zeka, daav ri bo̱pk a̱n can. Ta̱’m ryaa ryaakca̱n he̱tda̱n Paska a an la̱a̱s baa rin a̱n buu rovo.’ ”
19An la̱a̱s baa Ye̱so nanlo emk ho̱da̱na̱n u zetin na̱. A walgk ryaakca̱n he̱tda̱n Paska a̱n a̱n’a.
20An rima tudtine, Ye̱so sootk baa c’ryaak a an la̱a̱s baa run oopa ni’ila̱. 21Aa latina̱n k’ryaa, u zeka na̱, “Lag na a̱m ve̱ce̱te̱ no m’ga̱u. Da̱nv no tu bab me.”
22De̱bc naat bo̱ na̱ hwe̱di d’kala. A takaz ipka̱m ru v’da̱n-v’da̱n, “Kanubu, i mi?”
23Ye̱so se̱st bo̱ na̱, “Kan ca̱n hwa̱a̱ i’se̱nd i’da̱n, i unwa ge̱ a̱n tu bab me.26:23 Go̱t ta̱m: Zab 41:9.24Nan hwaa la me, mi Waav Noco, ho̱da̱na̱n i retin a’ge̱n a̱nmin lalks Na’Sila̱. I naak la nocun lo un tu bab Waav Noco. Ti piti be̱ o az a̱n na mat o da.”
25An ho̱ra̱v hwaine, Yahuda un babin Ye̱so ipkt bo̱ o, “Ka̱n la̱a̱sa̱m na, i mi?”
Ye̱so se̱sk la o, “A̱v vatk honhono.”
Ye̱so ryaak ryaakca̱ d’be̱se̱
26Aa latina̱n k’ryaa, Ye̱so o̱mk d’be̱re̱e̱di u emaka A’Sil c’bo̱mo̱. U bosa̱mk da̱ u ze̱le̱ke̱ an la̱a̱s baa ru. U zeka na̱, “Kab na a̱n ryaa, i we̱du ri hna.”
27U o̱mk ta̱m koklin ho̱o̱ma̱n yaanin ceun anab, u emaka ta̱m A’Sil c’bo̱mo̱. Au nestin na̱, u zeka na̱, “Koowe̱ so̱o̱. 28I hiba̱m ri ha̱n ma̱n Lalk Gigk Poune. I ma̱nma a̱n nan ask rem neta̱n kwe̱, bat Sila ta kwisi na̱ c’ko̱to.26:28 Go̱t ta̱m: U’Rwa̱ 24:8; Je̱r 31:31-34.29A̱m sudk ta̱m a̱n ze no, lanma̱n ta̱ma̱, a ta̱’m sud a̱n so̱o̱ ta̱m ho̱o̱ma̱n yaanin ceun anab da. A za na cek hweda̱n ta̱’m so̱o̱t ma̱ m’pooma̱n a nwaan a̱nmin go̱mc Cet me da.”
30Aa septin u’sepa, a ruk a elk a̱n Se̱mka̱n Cesa̱n O̱lif.
Bitrus tu hyaa naps Ye̱so
(Mar 14:27-31; Luk 22:31-34; Yoh 13:36-38)
31Ye̱so zet bo̱ na̱, “Nwaa kwe̱ ta̱n som a̱n lag a̱m a̱n gyopun te̱nte̱, rema̱n rina̱n ti kum me. A̱m vat-vat taanl ho̱da̱na̱n i retin a’ge̱n a̱nmin lalks Na’Sila̱. Sa̱ zeka, ‘Ta̱’m te̱me̱nne̱ kac’go̱te, bugda̱n kyo̱o̱ma̱n ba̱rga̱.’26:31 Go̱t ta̱m: Zak 13:7.32Daava̱n ta̱’m po̱tt la, ta̱’m baa no caama̱n Galili.”26:32 Go̱t ta̱m: Mat 28:16.
33Bitrus se̱st bo̱ o, “A to̱n neta̱n som kwe̱ rema̱n rina̱n ti kum vo, mi a ta̱’m tak a̱n som da.”
34Ye̱so zeta bo̱ o, “Lag a̱m ve̱ce̱te̱ va̱ m’ga̱u. A̱nmin gyopun te̱nte̱, ka̱c au uvt u kant da a̱n ta̱’v hyaa naps ri s’lam a’ta̱a̱cu.”
35Bitrus zeta bo̱ o, “Ai caa na hwaa m d’kut a vo no, a ta̱’m hyaa naps rov da pakk.”
I ho̱da̱n lo bo̱ ta̱m a̱n an la̱a̱s baa ru vattin kwe̱.
Ye̱so cepkka
36Ye̱so a an la̱a̱s baa run dangt bo̱ a caa baada̱n nan po̱g Ge̱tse̱me̱ni. U zeta bo̱ na̱, “Soot na tahna, mi ta̱’m caa a̱nz a̱m cepkta.” 37U o̱mt bo̱ Bitrus a aka̱n Za̱ba̱din i’ila̱. U takaz naam c’de̱b a s’kekba̱n hwe̱di. 38U zeta bo̱ na̱, “De̱bc naak a̱m hwe̱di d’kal zai ma wa̱a̱. Soot na a c’walg no, a̱n val a̱m tahna.”
39U nokt bo̱ a̱n hwic ca̱nmi, u kugtk u kidiski u cepkka. U zeka, “Cet me, awaz ti ema be̱, lag kobda̱ ha̱n kwaa me. Puti a tan na, za ho̱da̱na̱n m to̱ntin a̱n nan emt da, i ho̱da̱na̱n v to̱ntine.”
40Au vaaktain baa an la̱a̱s baa ru, u gitka̱ a la̱vka̱. U zeta bo̱ Bitrus, “Iye̱ kaa a̱n ta hwekstin a̱n soot m’hwengce v’ho̱r v’da̱nka̱ da? 41Soot na a c’walg no, a̱n cepka. Bat ta̱n gag c’de̱b daav c’ke̱ta̱mse̱. De̱bc el a̱n to̱na̱m nu’emo, we̱du kalk la kaa m’we̱se̱.”
42Ye̱so sudk a̱n nok, nok u v’illa̱. U cepkka ta̱m u zeka, “Cet me, awaz a ti ema kobda̱ ha̱n kwaa m da, az a za ge̱ a̱m ryaak da̱ da, lag na em rina̱n v to̱nine.” 43U sudk a̱n vaak u gitka̱ na̱ na̱m’la̱va̱, ai retin la̱va̱m baask a̱m otk na̱ hwe̱di d’kala.
44U lagk ta̱m na̱ u vaakk hav u v’ta̱ccu, u cepkka. U cepkka ta̱m ho̱da̱na̱n u baatin a cepka. 45U vaakta bo̱ ta̱m baa an la̱a̱s baa ru. U ipkk na̱, “V’Daa ge̱, hweradan retin na̱m’la̱vi? To̱, ho̱rva̱n nan be̱be̱te̱ a c’ko̱t mi, Waav Noc, ceka bo̱. 46Unu na c nok na. Go̱to̱ bo̱ na kan tu bab me.”
Na sipk Ye̱so
(Mar 14:43-50; Luk 22:47-53; Yoh 18:3-12)
47Au latina̱n s’lalko, go̱to̱ Yahuda, da̱nv an la̱a̱s baa ru oopa ni’il inlo ceka. U nokka a damran bugda̱n neta̱n a c’van na, a c’kyur nu. I c’hwengnan ka̱bd Na’Sil a hwenga̱nc Yahude̱n a̱n comain na̱. 48Kan babin Ye̱so la, u baask u zeka na̱, “Koowe̱ m hamtaine, i unwa bo̱, sip na o ke̱kk.”
49A̱ndaabe Yahuda ceka baa Ye̱so u zeka o, “Po̱o̱sko̱ vo, kan la̱a̱sa̱m na.” U hamtta bo̱ Ye̱so.
50Ye̱so zeta bo̱ o, “Barav ri, em rina̱n sain vo.”
Neta̱n hodgta bo̱ a sipt Ye̱so a savt o baan gedma̱n lalko. 51Na el taanlo, da̱nv an rein baa Ye̱so pe̱ndke̱ vank ru u se̱pe̱nke̱ coka̱v go̱m va̱ d’ka̱b u Na’Sil u so̱dk u’con. 52Ye̱so zeta bo̱ o, “Vaakt vank rov a̱n fyakno. An ta dum a̱n k’vana, i vankan ka̱n hwaa na̱. 53A̱v la bo̱ kaa nu’he̱n az am kon Cet me a̱nta̱ma̱ hna, a tu comtva m bugca̱n comta̱nc na̱ a̱ndaabe a gwa̱a̱m da? 54Am em la taanlo, i’le̱e̱le̱ a̱n nan esasta lalks Na’Sil sa̱n zein az i ho̱d uha̱n a̱n rihic ca̱n emte?”
55A̱n ho̱rva̱n lo, Ye̱so zeka bugda̱n netna, “A̱n rwa̱n-rwa̱n bo̱ kaa taaha̱n a c’van na a c’kyura̱n a̱n sipt a̱m ho̱d an hain a sipt hivi? A̱m sootk la kooye̱ hweda a nwaan a̱n gwen un buuk Na’Sil a̱n la̱a̱sa̱m na, a̱n ta sip la m da.26:55 Go̱t ta̱m: Luk 19:47; 21:37.56Rihica̱ ha̱n emk la kwe̱ bat nan esasa lalks Na’Sil sa̱n baranc Na’Sil vatine.”
An la̱a̱s baa ru swema̱rk kwe̱ a lagk o.
Ye̱so baa an gedma̱n lalko
(Mar 14:53-65; Luk 22:54-55; Yoh 18:13-14)
57An sipin Ye̱so savt bo̱ o baa Kayafa go̱m va̱ d’ka̱b u Na’Sil u so̱dke, va̱na̱n an la̱a̱sa̱m na s’giira a hwenga̱nc Yahude̱ne̱ baasin a kargka. 58Bitrus gabk la na̱ s’yuu-s’yuu caama̱n gwen un ka̱bda̱ c’go̱m da̱ go̱m va̱ d’ka̱b u Na’Sil u so̱dke. U uvk a̱nmin gwen u sootk baa a na’yomk bat tu he̱n ho̱da̱na̱n rihic ca̱n be̱se̱te̱.
59A̱n daava̱ ha̱n kwe̱, c’hwengnan ka̱bd Na’Sila̱, a hwenga̱nc Yahude̱ne̱,26:59 Hwenga̱nc Yahude̱n a̱n na rein nan po̱g Sanhe̱drin. a ka̱nk an gedma̱n lalka̱n kwe̱, a hobk an ta ke̱m Ye̱so a̱n c’ko̱l bat ta kum ke̱e̱da̱n hweed ru. 60A ta kum la rihi da. Go̱t ge̱ a kumka̱ neta̱n hwe̱di an ke̱min o a̱n c’ko̱lo̱. A̱n d’be̱se̱, net ni’il rwa̱a̱gka̱. 61A zeka, “A̱rm uha̱n zek az tu la̱a̱ a̱n he̱e̱k buuk Na’Sil u vaak u maa ka̱ a̱n c’hwe c’ta̱a̱cu.”26:61 Go̱t ta̱m: Yoh 2:19.
62Go̱m va̱ d’ka̱b u Na’Sil u so̱dk unutu bo̱ u ipkk Ye̱so. U zeka o, “Av se̱s rihi da? A̱v zatta rina̱n ta̱’v se̱s a̱n rihica̱ ha̱n ca rein nu’zeu az a̱v vatk da?” 63Ye̱so ta se̱s la rihi da. Go̱m va̱ d’ka̱b u Na’Sil u so̱dk sudk a̱n ipk o. U zeka, “A̱m gelska v Sila nan rein kooye̱ daava. Ve̱ce̱ co, i vo a̱n rein Ka̱risti Waav Na’Sili?”
64Ye̱so se̱st bo̱ o, “A̱v vatk honhono. Lag ta̱m a̱m ve̱ce̱te̱ no. A̱n d’hwen, ta̱n he̱n me, mi Waav Noc a’soot a̱n kabva̱n koma s’to̱o̱ a Sila m’we̱s kwe̱. Ta̱n he̱n ta̱m me ta̱’m ciza̱-ciza̱ lanm na’con a̱n c’wece.”26:64 Go̱t ta̱m: Dan 7:13.
65Go̱m va̱ d’ka̱b u Na’Sil u so̱dk sa̱ta̱nta̱ bo̱ kusa̱m ru rema̱n naam c’de̱be̱. U zeka, “U ela̱vsko A’Sila̱. Iye̱ ta̱m a̱n nan hobt neta̱n hyan an ta vat rina̱n u emine? Go̱to̱, a̱nta̱ma̱ nwaa kwe̱ a̱n hongk ho̱da̱na̱n u ela̱vstoin A’Sil. 66Iye̱ a̱n he̱nine?”
A se̱sk kwe̱ a zeka “U cek na hwaa o?” 67A ryaak hwic a pisski o c’te̱i na’cuu. A dima̱lk o. Ahyan gonma̱lk ta̱m o.26:67 Go̱t ta̱m: Isa 50:6.68A zeka, “Vat rihica̱n kumin vo awaz i vo Ka̱risti. Iwe̱ a̱n vosin vo?”
Bitrus hyaak naps Ye̱so
(Mar 14:66-72; Luk 22:56-62; Yoh 18:15-18)
69A̱n daava̱ ha̱n kwe̱ Bitrus el a’soot a̱n gwen un ka̱bd go̱m va̱ d’ka̱b u Na’Sil u so̱dke. Cok waa’wanta hata bo̱ u zeka o, “Vo ta̱ma̱, a̱v lak baa Ye̱so kan Galili.”
70Bitrus hyaak la a̱n hwic na̱ kwe̱. U zeka, “A̱m ta nap rina̱n v rein nu’vat da.” 71Au rutin ta̱m a̱n bira̱vna’isa̱n a̱n d’puge̱, cok waa’wanta hyan he̱nk ta̱m o. U zet bo̱ an rein a̱n a̱n’a, “O̱p uha̱n lak baa Ye̱so kan Nazarat.”
72Bitrus hyaak ta̱m u conkk u zeka, “A̱m ta nap a̱rmun lo da.”
73Ai okstoin ta̱ma̱, ahyan an lain a’es haka. A zeka Bitrus, “M’Ga̱u, i vo ta̱m da̱nv na̱, rema̱n lalks rov kwesaka.”
74Bitrus takaz s’conk u zeka, “Sila ema m i naak awaz a̱m tak a̱n nap noc uhna.”
A̱ndaabe, ka̱c kanuzo. 75Bitrus bakasta bo̱ lalksa̱n Ye̱so ve̱ce̱in o, “Ka̱c au uvt u kant da, a̱n ta̱’v hyaa naps ri s’lam a’ta̱a̱cu.” U rut bo̱ na’is a̱n s’kan a̱n naam c’de̱b hwe̱di d’kala.
27Na savk Ye̱so baa Bilatu
(Mar 15:1; Luk 23:1-2; Yoh 18:28-32)
1Na̱m’zan-na̱m’zana, c’hwengnan ka̱bd Na’Sil kwe̱ a hwenga̱nc Yahude̱n ne̱, a buuk s’lan a se̱e̱pske̱ ai na hwaa Ye̱so. 2Aa gagtin Ye̱so, a savk o baa Bilatu gwamna va̱n copun Roma.
Wa̱a̱’a Yahuda Iskariyo̱ti
3An Yahuda un babin Ye̱so he̱ntin na gedk lalk az na hwaa Ye̱so, i ta em o d’ke̱m da cakk. U vaaka̱vta bo̱ c’hwengnan ka̱bd Na’Sil a hwenga̱nc Yahude̱n ko̱min kind pusin d’kwe̱z a̱n oopa iu kabin au babtin Ye̱so. 4U zeka na̱, “A̱m ko̱tk am babtin kan ta emin rihi i naak da.”
A zeta bo̱ o, “Te̱ha̱n ho̱o̱m co? Hav bo̱ kaa v ema.”
5Yahuda ast bo̱ ko̱m pusinni a̱nmin buuk Na’Sil u to̱o̱k u havk u gageske.
6C’Hwengnan ka̱bd Na’Sil ka̱pst bo̱ ko̱min kind pusin ine. A zeka, “Giira ta se̱s az na dubinsi kind iha̱n baa d’kinbu da, rema̱n i kindi m’hiba̱.” 7A se̱e̱pste̱ bo̱ az a waa d’baa baa kan maam c’dor rema̱n sagc hamcne. 8I rina̱n de̱lin bo̱ nan po̱gt baada̱n lo ke̱nge̱ka̱ m’hib i ceta te̱nte̱. 9I ho̱da̱n lo bo̱ a̱n rina̱n Je̱rmaya k’barav Na’Sil vatin estine. U zeka “A o̱mt bo̱ ko̱min kind pusinni d’kwe̱z a̱n oopa, kindina̱n an Isra’ila waatin o. 10A nesk ta̱m e rema̱n ke̱nge̱k kan maam c’doro, ho̱da̱na̱n Sila zetin me.”27:10 Go̱t ta̱m: Zak 11:12-13.
Bilatu ipkk Ye̱so s’ipku
(Mar 15:2-5; Luk 23:3-5; Yoh 18:33-38)
11A̱n daava̱n lo, na esaska Ye̱so a̱n hwic Bilatu, gwamna. U ipkt bo̱ Ye̱so, “I vo a̱n rein go̱m va̱ Yahude̱ne̱?”
Ye̱so se̱sk la o, “Ha̱, i ho̱da̱na̱n v vattine.” 12Daava̱n c’hwengnan ka̱bd Na’Sil a hwenga̱nc Yahude̱n ke̱mtin Ye̱so az u emk rihic naake, u ta se̱s na̱ rihi da.
13Bilatu ipkt bo̱ o, “A̱v ta hong rihic naak ca̱n na zein az a̱v emk da?”
14U ta se̱s la d’gom baan lalksa̱n na ke̱mtin o da. I de̱lk gwamna sipk a’nwa̱a̱.
Na gedk lalk na hwaa Ye̱so
(Mar 15:6-15; Luk 23:13-25; Yoh 18:39; 19:16)
15A̱n daava̱n goon he̱tda̱n Paska da̱hna, gwamna vetaska tu be̱tve̱ neta̱n noc v’da̱nka̱ baa an na gagine. Koowe̱ a dagine. 16A̱n daava̱n lo, noc lak a’gag kan rwa̱in din a̱n emma̱n rihic naak un nan po̱g Barabbas. 17An neta̱n kargtain a̱n buu Bilatu, u ipkt bo̱ na̱, “Iwe̱ a̱n to̱nin a̱m butva̱ no? Barabbas alla Ye̱so un nan po̱g Ka̱risti?” 18U napk az i rem d’hyub a satain Ye̱so baa ru.
19Au soottin ta̱m a̱n dotaka̱n gedma̱n lalko, netav ru comka az na ze o, “Rut bo̱ hid rov baan lalk nocun lo kan gela̱v Na’Sila̱. Rema̱n a̱m ryaak d’kob a̱n been hwe̱di a̱n gyop rem ru.”
20C’Hwengnan ka̱bd Na’Sil a hwenga̱nc Yahude̱n baask a so̱vk bugda̱n neta̱n az a kon na be̱tve̱ na̱ Barabbas, na hwaa kaa Ye̱so. 21Gwamna ipkt bo̱ ta̱m na̱, “Iwe̱ baan ili ha̱n a̱n to̱nin a̱m be̱tve̱ no?”
A se̱sk la kwe̱, “Barabbas!”
22Bilatu ipkk ta̱m na̱, “Iye̱ bo̱ kaa a̱n ta̱’m em a Ye̱so un nan po̱g Ka̱risti ni?”
A se̱sk o ta̱m kwe̱, “Lag na edg o a̱n k’kan!”
23Gwamna ipkt bo̱ na̱, “I rema̱n ye̱? Iye̱ u emin i naake?” A sudk la a̱n ze̱l s’godo, “Lag na edg o a̱n k’kan.”
24An Bilatu he̱ntin az u za a̱n hweksa̱m na̱ da, go̱t ta̱m ta hav a̱n una̱sa̱m d’gudgu, u o̱mko̱ m’ho̱o̱ u saptk komc ru a̱n hwica̱d d’bugu. U zeka, “Komc ri swarap baan hiba̱m noc uha̱n ka m’ga̱u. Hav na bo̱ kaa a̱n ema.” 25Neta̱n se̱st bo̱ na̱nna kwe̱. A zeka, “Hiba̱m ru soot a̱n hid co a aka̱n co no.”
26U be̱ta̱vte̱ bo̱ na̱ Barabbas. Au de̱ltin na swepa̱lk Ye̱so a̱n s’lako, u be̱te̱ke̱ na̱ unwa. A havk la a edgk o a̱n k’kan.
Koola̱n hyaakk Ye̱so
27Koola̱n gwamna o̱mt bo̱ Ye̱so a savk a̱n ka̱bd gwamna. A karga̱vska ta̱m bugda̱n koola̱n kwe̱ a nokka a rigk o hatt. 28A ho̱lk o m’kusu, a twe̱pe̱ kaa o kusi gyo̱z-gyo̱za̱n ho̱da̱n kusi c’go̱mo̱. 29A alk c’hila̱ ho̱d d’zemna, a twe̱pe̱ke̱ o a̱n d’hi. A nesk o cev c’go̱m u bo̱p a̱n koma s’to̱o̱. A kugtk a̱n hwic ru, a hyaakk o. A zeka, “Po̱o̱sko̱ vo, go̱m va̱ Yahude̱ ne.” 30A pisski o c’te̱i. A o̱mk ta̱m ceva̱n lo a baazga̱lk o d’hi. 31Aa taastin hyaaka̱m ru, a ho̱lk o kusi c’go̱mo̱, a vaakk a twe̱pe̱ke̱ o kusa̱m ru. A to̱o̱tuz kaa o a havt a edg o a̱n k’kan.
Na edgk Ye̱so a̱n k’kan
(Mar 15:21-32; Luk 23:26-43; Yoh 19:17-27)
32Daav a ruta̱ine, a gwaantka noc va̱n Serane un nan Po̱g Simo̱n. A de̱lk o na̱m’we̱s u to̱o̱s kank Ye̱so. 33A ceka Golgota, va̱na̱n nan ze baada̱n ko̱go̱c c’hi. 34A ne̱e̱k Ye̱so ho̱o̱ma̱n yaanin ceun anab ma̱n na ha̱bgsin a ri d’gaaga̱n in nan po̱g ga̱a̱l. Au le̱ktin ma̱, u ha̱lk a̱n so̱o̱.
35Aa edgtin Ye̱so a̱n k’kan, a taak d’gapa a wankt kusa̱m ru.27:35 A̱nmin ge̱nke̱-ge̱nke̱ c hyan na ge̱nk za̱tva̱n 35 ho̱d uhna: A wankk kusa̱m ri, rema̱n kusi ri ta̱ma̱, a taak d’gapa.27:35 Go̱t ta̱m: Zab 22:18.36A sootk a̱n a̱n’a a̱n regda̱m ru. 37A sakaska ta̱m a̱n hid ru ge̱nsa̱n rina̱n de̱lin a gedata o lalko, GO̱T HA̱N NA YE̱SO, GO̱MVA̱ YAHUDE̱NE̱.38Na edgk ta̱m hiv ni’il a unwa na. Uda̱nka̱ a̱n kabva̱n koma s’to̱o̱. Uhyan a̱n koman kanta.
39An to̱in a̱n a̱n’a kwe̱, a rakske c’hi a rebga̱lk ta̱m o. 40A zeka, “Vo kan tu he̱e̱k buuk Na’Sil u vaak u maa ka̱ a̱n c’hwe c’ta̱a̱cu, gwa̱a̱ kaa hid rovo. Ciza̱ ha a̱n k’kan awaz i vo Waav Na’Sila̱.”
41I ho̱da̱n lo bo̱ ta̱m a̱n c’hwengnan ka̱bd Na’Sila̱, a an la̱a̱sa̱m na s’giira na, a hwenga̱nc Yahude̱n hyaaktin o. A zeka, 42“U gwa̱a̱k ahyan, u ta la̱a̱ kaa a̱n gwa̱a̱ hid ru da. Awaz i unwa a̱n rein go̱m va̱n Isra’ila, lag u ciza̱ a̱n k’kan a̱nta̱ma̱ bat ca̱n bat d’ba̱t baa ru. 43U batk d’ba̱t baa Na’Sila̱, lag kaa Sila gwa̱a̱ o a̱nta̱ma̱ awaz a el a̱n to̱nc ru. Rema̱n u zeka, ‘I mi Waav Na’Sila̱.’ ” 44Hivnan lo ta̱m an na edgin a unwa na, a ve̱ca̱lke̱ o lalksa̱n ka̱ka̱la̱.
Wa̱a̱’a Ye̱so
(Mar 15:33-41; Luk 23:44-49; Yoh 19:28-30)
45Cumunkunni bitiki u’cop u’biri lanma̱ d’hwen na’te̱ke̱, caam s’ko̱m s’ta̱a̱c s ni’hwen. 46Ga̱l s’ko̱m s’ta̱a̱c s ni’hwen, Ye̱so ze̱lk v’god u kanka. U zeka, “Eli, Eli, lamasabattani.” U la na̱m’ze, “Sila ri, Sila ri, i rema̱n ye̱ v ha̱ltin me?”27:46 Go̱t ta̱m: Zab 22:1.47An ahyan an lain a’es a̱n a̱n’a hongtin o, a zeka, “A̱rm uha̱n el a̱n po̱gs Iliya.” 48A̱ndaabe da̱nv na̱ somk u havk u o̱mko̱ d’soso. U ne̱bk da̱ a̱n ho̱o̱m ni’zage. U cobk a̱n k’dapa, u ze̱le̱ke̱ Ye̱so az u so̱o̱.
49Ahyan zeka, “Lag na o a̱n c ru. Lag na he̱nt awaz Iliya tu han u gwa̱a̱t o.”
50Ye̱so la, au sudtin a̱n ze̱l v’god u kanka, u batk hora̱md ru, u wa̱uzo.
51A̱n daava̱n lo, kuska̱n te̱ge̱in baada̱n zattin ri d’reb da a̱nmin buuk Na’Sila̱, ka̱ sa̱ta̱nvka̱ lanm na’cona, i ceka nu’copo. Copu vigma̱lski, ta̱m taarc he̱e̱ka̱lke̱. 52Sagc a̱ba̱lska̱. Sila po̱to̱sko̱ wa̱a̱c neta̱n an gela̱v Na’Sil an wiiline. 53A rwiila̱lka̱ ta̱m a̱n sagc na̱ daava̱n Sila po̱to̱sto̱in Ye̱so. A uvk a̱nmin le̱in Urisalima, neta̱n hwe̱di he̱na̱lk na̱.
54An so̱dka̱v koola̱n a neta̱n run an reina̱n regda̱m Ye̱so he̱ntin viga̱msis nu’cop a rihica̱n emka̱llin ne, na̱n kwe̱ a hongk v’gel hwe̱di. A zeka, “M’Ga̱u, o̱p uha̱n, i Waav Na’Sila̱.”
55Netan hwe̱di ta̱m an gabain Ye̱so lanma̱n Galili rem a se̱e̱tte̱ o, a eska m’nak a̱n s’hyongo. 56Me̱e̱ri kan Magdala, a Me̱e̱ri in Yakub nu, a Isuhu nu, a in aka̱n Za̱ba̱di ni, a lak kwe̱ baa na̱.
Na sagk Ye̱so
(Mar 15:42-47; Luk 23:50-56; Yoh 19:38-42)
57An rima tudtine, noc kanukumu, kan Aramatiya, un nan po̱g Isuhu, un rein ta̱m kan la̱a̱s baa Ye̱so, u haka. 58U uvk ta̱m baa Bilatu u konk o wa̱a̱d Ye̱so. Bilatu de̱lt bo̱ la na nes o wa̱a̱d ne. 59An Isuhu o̱mtin d’wa̱a̱, u alka̱lk da̱ a̱n kusk puska̱n padpada. 60U havk u sagk wa̱a̱d ne a̱n sagu ru u poowa̱, un na se̱bin nu’taare. U birga̱vska̱ u’taar u zo̱pk huta̱d nu’sago, u to̱uz kaana. 61Me̱e̱ri kan Magdala a Me̱e̱ri hyan lak a’soot ta go̱tto sagune.
An regda̱m nu’sago
62Na̱m’zanta, hweda̱n hwerad Yahude̱ne̱, c’hwengnan ka̱bd Na’Sil a an la̱a̱sa̱m na s’giiran meraka a haka baa Bilatu. 63A zeka o, “Kanubu, c bakaska az daava̱n ka c’palka unlo latin u po̱tke, u zeka az tu po̱t a̱n hweda̱ v’ta̱ccu. 64Rema̱n taanlo, de̱l na rega̱d sagu ru caama̱n hweda̱ v’ta̱ccu. A za taanl da, an la̱a̱s baa ru ta la̱a̱ a̱n han a̱n gyop a hiv wa̱a̱d ru, a to̱o̱ kaa a̱n zem neta̱n az u po̱tko̱. Ti soot kaa az habsda̱ d’be̱se̱, da̱n so̱d habseda̱ m’e̱t nu’nau.”
65Bilatu zeta bo̱ na̱, “A̱n ci a s’regdo. Nok na a̱n ho̱dkso̱ s’regdo bat de̱bc no ca̱n la̱ta̱.”
66A ruk la a ho̱dksko̱ s’rega̱d baa nu’sago. A de̱lk ta̱m c’nape a̱n taarka̱n na zo̱ptin u’sago, a de̱lk ta̱m a s’regdo.
28Ye̱so po̱tko̱
(Mar 16:1-10; Luk 24:1-12; Yoh 20:1-10)
1Na̱m’zan-na̱m’zan a̱n hweda̱n lahadi, Me̱e̱ri neta kan Magdala, a kamanta̱d ru nu, a haka a go̱tt u’sago. 2A̱ndaabe copu viga̱mski, rema̱n k’comta̱v Na’Sil cizka̱ lanm a’cona. U havk ta̱m baa nu’sag u birgska̱ u’taar lanma̱ d’hutu, u sootk ta̱m a̱n unwa. 3U el ho̱d v’yabko, kusa̱m ru el ta̱m padpada. 4Rema̱n gela̱v ru, a s’rega̱d hek s’zapa, a ho̱o̱ske ta̱m kau ho̱d an wa̱ini.
5K’Comta̱v Na’Sil zeta bo̱ netana ne, “An hong la v’gel da. A̱m napk az a̱n la a̱n hob Ye̱so u’na̱n na edgin a̱n k’kan. 6U za taha̱n da. U unuku ho̱da̱na̱n u baastin u vatka. Noka na a̱n he̱nt va̱na̱n u lain a’la̱ta̱sa̱. 7Nok na a̱ndaabe a̱n ve̱ce̱ an la̱a̱s baa ru, ‘Sila po̱to̱sko̱ o. U baak ta̱m no nokma̱n Galili. Ta̱n he̱n o a̱n a̱n’a.’ I rina̱n m nokain bo̱ a̱m ve̱ce̱ no.”
8Netana ne to̱o̱k a̱ndaabe a lagk u’sago, go̱t v’gela, go̱t ta̱m damra c’za̱ngkta̱. A somk a havk a ve̱ce̱ke̱ an la̱a̱s baa ru.
9Ye̱so gwaantka netanane cunksi. U zeka na̱, “Po̱o̱sko̱ no.” A haka a sipk naas ru, a emaka ta̱m o c’hwiipsa̱.
10Ye̱so zeta bo̱ na̱, “An hong la v’gel da. Nok na a̱n ve̱ce̱ ha̱n min a hav Galili. I a̱n a̱n’a a̱n ta he̱n me.”
Ka s’rega̱d vatk az Ye̱so po̱tko̱
11An netanan lo latin ta to̱o̱-to̱o̱, ahyan baa a s’rega̱d uvk ni’le̱e̱ a ve̱ce̱ke̱ c’hwengnan ka̱bd Na’Sil rihica̱n emin kwe̱. 12An c’hwengnan ka̱bd Na’Sil a hwenga̱nc Yahude̱n meratain a buuk ta̱m s’lana, a se̱e̱pste̱ bo̱ a ne̱e̱k koola̱n kind hwe̱di. 13A zeka na̱, “Ze na, ‘An la̱a̱s baa ru haka a̱n gyop a hivk wa̱a̱d ru ac latin na̱m’la̱va̱.’ 14A lalksa̱ ha̱n uv a̱n conc gwamna, ca̱n kum le̱vka̱n ca̱n la̱ta̱sta̱ o c’de̱b c rutt no.”
15Koola̱n kabt bo̱ kind a emk ta̱m ho̱da̱na̱n na zetin na̱. Lalksa̱ ha̱n ba̱rgk ta̱m baa Yahude̱n kwe̱. V’Daa, a el ta vat sa̱.
Ye̱so ceka an la̱a̱s baa ru coso
(Mar 16:14-18; Luk 24:36-49; Yoh 20:19-23; YCCo 1:6-8)
16An la̱a̱s baa Ye̱so oopa na̱v’da̱n nanlo to̱o̱t bo̱ a hav Galili. A cek ta̱m se̱mka̱n Ye̱so zein az a caa.28:16 Go̱t ta̱m: Mat 26:32; Mar 14:28.17Daav a he̱ntin o, a emaka o c’hwiipsa̱. Ahyan baa na̱ la, a el s’lan-s’lana. 18Ye̱so ceta bo̱ baa na̱. U zeka, “Na nesk a̱m c’go̱m a we̱sma̱n kooye̱n in rein a̱nmi a’con a copun yanda̱ha̱n ne.
19“Rema̱n taanlo, nok na a̱n ve̱ce̱ netnan copca̱n copun yanda̱ha̱n kwe̱ az a gab me. A̱n ema ta̱m na̱ baptisma a̱n dinda̱ K’Ceto, a da̱ Waa na, a a̱n Hora̱mda̱n zattin ri d’reba̱n da. 20La̱a̱sa̱ na ta̱m na̱ a gab rihica̱n a̱m zein no kwe̱. Ke̱ng a̱m el d’kutu a nwaan kooye̱ daava, caama̱n be̱se̱da̱n copun yanda̱hna.”