Kasi Lalk Ye̱so un
Yohana
Ge̱nine
U’Gabte
Taka̱llaka̱n ge̱nsa̱n kasi lalk Ye̱so ka̱ha̱n, i k’comta̱v Ye̱so, Yohana a̱n ge̱nin ka̱. U ge̱nk rihica̱n u he̱nine. U ge̱nk ka̱ a̱n copun E̱fisu a̱n we̱e̱sa̱n 90-96 a̱n po̱ta̱m Ye̱so. Yohana zek az u ge̱nk ka̱ bat neta̱n ta bat d’ba̱t az i Ye̱so a̱n rein ka d’gwa̱a̱ma̱, a Waav Na’Sil na̱. A kum ta̱m po̱tu d’kal baan bata̱m d’ba̱t baa ru (beboda̱n 20:31). U kwesaka az i Ye̱so a̱n rein Gomd Na’Sil da̱n uva̱in a̱n copun yanda̱ha̱n ho̱d nocurimu rema̱n u san d’gwa̱a̱ma̱. Ye̱so lak de̱ha̱nzo. I a̱n unwa ta̱m a̱n Sila baltin c’rihi kwe̱. I unwa a̱n reina̱n po̱to̱so̱m rihica̱n rein a̱nmin copun yanda̱ha̱n kwe̱. Yohana hwenna̱ska Ye̱so a̱n: d’za̱n, c’be̱re̱e̱di, m’ho̱o̱, d’hutu, kac’go̱te, ceun anab, m’ga̱u, c’to̱no̱, a rihic hyan na (Beboca̱n 13–17). U ge̱nk ta̱m da̱n rihica̱ c’he̱t ca̱n Ye̱so emka̱lline. U hya̱a̱lka̱ ta̱m rihica̱n an ge̱nin taka̱llac hyan ca̱n kasi lalk Ye̱so botaine.
Taka̱llak Maatiyu ge̱nk az soota̱m Ye̱so kan gwa̱a̱ma̱d neta̱n kwe̱, a̱n rein damran rihi. Taka̱llac Markus na Luka la, ca̱ kwesaka az Ye̱so i coka̱v Na’Sil ta̱m nocurimu. Taka̱llak Yohana kwesaka la az Ye̱so i A’Sil un emin c’nocurimu. Na zeka i Yoh 3:16 a̱n ruta̱in kasi lalk a̱ncass. Ka̱ ba̱tkska̱ rina̱n rein gabs Ka̱risti, in rein, “Sila to̱nk an copun yanda̱hna.”
1Gomd bala̱mk noco
1A̱n d’takbo, ai na balta copun yanda̱hna, Gomd laka. Gomd ne lak ta̱m baa Na’Sila̱. Gomd ne ta̱ma̱, i A’Sila̱. 2Gomd ne lak a̱n d’takbo d’kut a A’Sil na̱. 3I a̱n Gomd ne a̱n Sila baltin c’rihi kwe̱. A za a̱n Gomda̱n da, rihi za in Sila balin da. 4I baad da̱ a̱n po̱tu rwa̱ini. I po̱tun lo ta̱m a̱n rein za̱nd netna. 5Za̱nda̱n lo za̱na̱ska̱ i’cumunkunnu. Cumunkunni ta hweks la a̱n rims da̱ da.
6Noc lak ta̱m un Sila comaine, dind ru i Yohana. 7U haka u ve̱ce̱te̱ neta̱n ga̱uma̱n za̱nd ne. I bat neta̱n kwe̱ ta hong ba̱sa̱d ru, a bat d’ba̱t baa Na’Sila̱. 8Za unwa a̱n hid ru a̱n rein za̱nd ne da. Na coma-coma o u vatt ga̱uma̱n za̱nd ne c’taa. 9Za̱nda̱ m’ga̱u da̱n-da̱n za̱na̱sa̱ kooye̱ nocwa, lan na̱m’han a̱nmin copun yanda̱hna.
10Gomd ne lak de̱ha̱n a̱nmin copun yanda̱hna. Go̱t ge̱ i a̱n da̱nda a̱n Sila baltin copun yanda̱hna, an copun yanda̱ha̱n ta nap la o da. 11U haka baa neta̱n ru. A ta kab la o da. 12Geda̱n an kabin la o kwe̱, a bat ta̱m d’ba̱t a̱n dind ru, u ne̱e̱k na̱m’we̱s a vaak akna Na’Sila̱. 13Za aknanan na matin ho̱da̱n macu c’nocurimu da. Alla a̱n to̱nu a̱ra̱m na neta da. I Silan vaaksain na̱ aka̱n na̱.
14Gomd bala̱mk noco, u sootk baa cinna. Na he̱nk ta̱m gwink ru. Goon gwinka̱n i kan rwa̱in baa Na’Sil c’taa un tu ci ka̱. U el ta̱m a m’ga̱u nu, a pusuu Na’Sil a̱n hwe̱di.
15Yohana vatk da̱n unwa. U ba̱sk ta̱m u zeka, “I unwa ha̱n a̱m tanain daava̱n m zetin az, noc tu han a̱n dimd ri. U pa̱tk me, rem u baak a̱m hwe̱di.”
16I rema̱n pusuu ru u rork a̱n na kabtin ho̱sa̱m Na’Sil cinna kwe̱, na̱m’sak-na̱m’sako. 17I Mosa a̱n Sila nesain s’giira. Pusuu Na’Sil a m’ga̱un la, i baa Ye̱so a̱n sa̱ rwa̱ini. 18Noc za un takina̱n he̱n A’Sil da. I Waav na̱ c’taa, un rein ta̱m A’Sila̱, un rein ta̱m a̱n de̱b Ceto, i unwa a̱n kwesain na ho̱da̱na̱n Cetok retine.
Yohana za Ka̱risti da
(Mat 3:1-12; Mar 1:1-8; Luk 3:1-18)
19Go̱t ha̱n rina̱n Yohana se̱sin daava̱n hwenga̱nc Yahude̱n comtain go̱mna d’ka̱b a Na’Sil a goov Le̱vin rwa̱nma̱n le̱in Urisalima az a ipk o, “I vo we̱?”
20Yohana se̱sk la, u ta hyaa da. U vatk a̱ncass, “Za mi a̱n rein Ka̱risti da.”
21A ipkt bo̱ o, “I vo kaa we̱? I vo Iliya?”
U se̱sk na̱, “Za mi Iliya da.”
“I vo k’barav Na’Sil unle?”
U se̱sk na̱, “Aabo.”
22A ipkk o, “He̱, i vo kaa we̱? I bat ca̱n kum rina̱n ca̱n ve̱ce̱ an comain co. I vo we̱?” 23Yohana se̱sk na̱ ho̱da̱na̱n k’barav Na’Sil Isaaya vattin ho̱d uhna,
“I mi nocuna̱n reina̱n d’ba̱s a̱n k’kad na̱m’ze,
una̱sa̱ na Kanubu k’le̱v rococo.”1:23 Go̱t ta̱m: Isa 40:3.
24Ahyan an Farisin comain 25ipkt bo̱ o, “I rema̱n ye̱ kaa v retina̱n emam na baptisma? Awaz za vo Ka̱risti unl da. A̱v za Iliya da. A̱v za ta̱m k’barav Na’Sil unl da?”
26Yohana se̱sk ta̱m na̱, “Mi a̱m el ta̱’m ema na baptisma na̱m’ho̱o̱. Noc el la baa no un a̱n ta napin da. 27I unwa a̱n tu han a̱n dimd ri. U pa̱tk la me. A̱m ta ma̱a̱na̱ a̱m but rabsa̱n kaatc ru da.”
28Na emk rihica̱ ha̱n kwe̱ a̱n le̱in Betani, kabva̱n rwa̱nma̱ d’hwen a̱n ge̱nka̱n Jodan. Va̱na̱n u laina̱n emam neta̱n baptisma.
Ye̱so Waa’Kyo̱o̱ma̱v Na’Sila̱
29Na̱m’zanta, Yohana he̱nke̱ Ye̱so tu noka-noka baa ru. U zeta bo̱ na̱, “Go̱t bo̱ na Waa’Kyo̱o̱ma̱v Na’Sila̱! Un nan hwaa ho̱da̱n ka̱ca̱v c’to̱ve. Un tu to̱v an copun yanda̱ha̱n lanma̱n ko̱tc na̱. 30I unwa ha̱n a̱m tanain daava̱n m zetin az, ‘Noc tu han a̱n dimd ri. U pa̱tk me, rema̱n u baak a̱m hwe̱di.’ 31A̱m ta tak la m napk o da. I rema̱n na kwesata an Isra’ila unwa a̱m hatain a̱n emma̱n baptisma na̱m’ho̱o̱.”
32Yohana vatk rina̱n u he̱nine, “A̱m he̱nk Hora̱md Na’Sil na̱m’ciza̱ lanm na’con ho̱d gora̱b pusu, u hek a̱n un. 33A̱m ta lak la m napk az i unwa a̱n rein ka d’gwa̱a̱m da. Kan comain m az a̱m ema na baptisma na̱m’ho̱o̱, i unwa a̱n zein me, nocuna̱n v he̱nin Hora̱md Na’Sil cizka̱ a̱n un, i unwa bo̱ a̱n tu em baptisma a̱n Hora̱mda̱n zattin ri d’reb da.” 34Yohana zeka, “A̱m he̱nk a̱n is ri. A̱m vatk la rina̱n m he̱nine. A̱m ve̱ce̱ke̱ no, i unwa a̱n rein Waav Na’Sila̱.”
An la̱a̱s baa Ye̱so a m’e̱te̱
35Na̱m’zanta ta̱ma̱, Yohana lak a’es a an la̱a̱sa̱n baa run i’ila̱. 36Au he̱ntoin Ye̱so tu to̱o̱-to̱o̱, u zeka, “Go̱t bo̱ na Waa’Kyo̱o̱ma̱v Na’Sila̱.”
37An an la̱a̱s baa ru nanlo i’il hongtin rina̱n Yohana zeine, a gabt bo̱ Ye̱so. 38An Ye̱so be̱le̱te̱in dim u he̱nk na̱ ta gaba-gaba o, u ipkt bo̱ na̱, “Iye̱ a̱n reina̱n hobo?”
A ipkt bo̱ ta̱m o, “Kan la̱a̱sa̱m na, ipe̱ v reina̱n d’sooco?”
39Ye̱so zeta bo̱ na̱, “Noka na a̱n he̱nte.” A havk la a he̱nk baan sooca̱d ru. A be̱se̱ke̱ hweda̱n lo baa ru rema̱n daav lak le̱v s’ko̱m s’naas na’rima̱.
40Da̱nv i’il inlo an hongin Yohana a̱n s’lalk a gab ta̱m Ye̱so, i Andarawus ha̱n Simo̱n Bitrus. 41Rina̱n Andarawus emin na̱m’e̱te̱, u hobka ha̱nu Simo̱n. U zeka o, “C he̱nke̱ Ka d’Gwa̱a̱ma̱!” (Un nan po̱g, “Ka̱risti.”) 42U sata bo̱ o baa Ye̱so.
Daava̱n Ye̱so he̱ntin o, u zeka, “I vo Simo̱n waav Yohana. Nan po̱g a̱v Ke̱fas. Rina̱n nan ze Ke̱fas, i Bitrus. Rina̱n nan ze Bitrus, i u’taare.”
Ye̱so po̱gk Filip na Nataniya
43Na̱m’zanta ta̱ma̱, Ye̱so saak havma̱n Galili. U he̱nt bo̱ Filip. U zeta bo̱ o, “Gaba me.”
44Filip la i noc va̱n Be̱tsaida, le̱i Andarawus na Bitrus. 45Filip he̱nt bo̱ Nataniya. U zeta bo̱ o, “C he̱nke̱ nocuna̱n Mosa ge̱nin da̱n unwa a̱nmi s’giira. Un baranc Na’Sil tanain ta̱m a̱n ge̱ns na̱. Dind ru, i Ye̱so kan Nazarat, waav Isuhu.”
46Nataniya ipkt bo̱ o, “Ti ema bo̱ rihi kasi rwa̱n a̱n le̱in Nazarat?”
Filip zeta bo̱ o, “Noka v he̱ne̱ d’hi.”
47An Ye̱so he̱nte̱in Nataniya tu can-can baa ru, u zeka, “Go̱t bo̱ na kan Isra’ila u m’ga̱u, un zain tu get c’ko̱l da.”
48Nataniya ipkt bo̱ o, “I’Le̱e̱le̱ v naptin me?”
Ye̱so se̱st bo̱ o, “Be̱e̱zo. Daava̱n a̱v latin a̱n beboda̱n ceun remba, ai Filip po̱gt vo, a̱m he̱nko vo.”
49Nataniya se̱st bo̱ o, “Kan la̱a̱sa̱m na lalks Na’Sila̱, i vo a̱n rein Waav Na’Sila̱. I vo ta̱m a̱n rein go̱m va̱n Isra’ila.”
50Ye̱so sudt bo̱ a̱n ipk o, “Rema̱n a̱m zek az a̱m he̱nko v a̱n beboda̱n ceun remba c’taa a̱v batin d’ba̱t baa ri? To̱. Ta̱’v he̱n rihica̱n pa̱tin o̱p ca̱hna.”
51Ye̱so zeka ta̱ma̱, “Lag na a̱m ve̱ce̱te̱ no m’ga̱u. Taha̱n a̱n hwici, ta̱n he̱n cona a̱ba̱ska̱, comta̱nc Na’Sil el nu’el ta ciza̱ a̱n Waav Noco.”
2C’Ga̱i a̱n le̱in Kana
1A̱n hweda̱ v’ta̱ccu, na gagk c’ga̱i a̱n le̱in Kana un copun Galili. In Ye̱so lak ta̱m a̱n a̱n’a. 2Na bank ta̱m Ye̱so a an la̱a̱s baa run ga̱ic ne. 3Daava̱n ho̱o̱ma̱n yaanin ceun anab taatin na̱, in Ye̱so zeka o, “Ho̱o̱ma̱n yaanin ceun anab taak na̱.”
4Ye̱so se̱st bo̱ inu, “I rema̱n ye̱ v ve̱ce̱te̱in me? Ho̱ra̱v ri ta hwesa can da.”
5Inu zeta bo̱ a d’wanko, “Kooye̱ u zein no az a̱n ema, em na e.”
6Na kink so̱nca̱ c’taar c’cihin a̱n a̱n’a. I goon ca̱n saptca̱n gabs Yahude̱ne̱. Ca̱n rein ca̱n o̱m cidca̱ m’ho̱o̱ d’kwe̱ze̱ alla d’kwe̱z a̱n oopa.
7Ye̱so zeta bo̱ na̱, “Hiis na c’so̱n na̱m’ho̱o̱.” A hiisk la ca̱ cwebe na̱m’ho̱o̱. 8U zeta bo̱ ta̱m na̱, “Ib na a̱n se̱ve̱ go̱m va̱ d’karga.” A ibk la a se̱ve̱ke̱ o.
9Daava̱n go̱m va̱ d’karga le̱ktin ho̱o̱ma̱n na vaaksain ho̱o̱ma̱n yaanin ceun anab, u ta nap va̱na̱n na kumma̱in ma̱ da. A d’wank la, a napka. Go̱m va̱ d’karga po̱gto̱ bo̱ ga̱a̱gi, 10u zeka o, “Koowe̱ el tu baa ruta̱ ho̱o̱ma̱n yaanin ceun anab ma̱n pa̱tina̱n d’ke̱m na̱m’e̱te̱. Daava̱n hamca̱n so̱o̱tin a cigka̱, tu ruta̱ kaa ma̱n ta cain ma̱m’e̱t a̱n d’ke̱m da. Vo la v kinka̱ m kasi, a̱v rutka̱ kaa ma̱ a̱nta̱ma̱.”
11I he̱tca̱ m’e̱t ha̱n ca̱n Ye̱so emine. U emk ca̱ a̱nmin le̱in Kana un copun Galili. U kwesata gwink ru. An la̱a̱s baa ru batk ta̱m d’ba̱t baa ru.
12An o̱p da̱ha̱n to̱o̱tine, Ye̱so havk Kafarnahum a inu nu a ha̱nun d’kut a an la̱a̱s baa ru nu. A la̱vka̱ c’hwe c’hona a̱n a̱n’a.2:12 Go̱t ta̱m: Mat 4:13.
Ye̱so vogk a s’yo̱p a̱n buuk Na’Sila̱
(Mat 21:12-13; Mar 11:15-17; Luk 19:45-46)
13An he̱tda̱n Paska da̱ Yahude̱n bo̱ptina̱n can, Ye̱so elk a̱n le̱in Urisalima.2:13 Go̱t ta̱m: U’Rwa̱ 12:1-27.14U gitka̱ an babeda̱n naamna, a kyo̱o̱ma̱n no̱, a gorba̱n na, a an se̱sa̱n kind ni, a̱n gwen un buuk Na’Sila̱. 15U gaat bo̱ k’lak a̱n s’hwen. U vogk na̱ kwe̱ a rwa̱a̱ a̱n buuk Na’Sila̱, kyo̱o̱ma̱n a naama̱nna. U aska̱lk kindi. U ha̱dga̱lska̱ ta̱m zegac an se̱sa̱n kindi. 16U haagska ta̱m an babeda̱n gora̱bna. U zeka, “Rut na na̱ na’isa̱. An vaaksa la buuk Cet me, buuka̱ s’yo̱p da.” 17An la̱a̱s baa ru bakasta bo̱ i el a’ge̱n a̱n taka̱llaka̱n lalks Na’Sila̱, “To̱nca̱n buuk rov ca̱n ryaa me.”2:17 Go̱t ta̱m: Zab 69:9.
18Rema̱n taanlo, hwenga̱nc Yahude̱n ipkt bo̱ o, “Iye̱ a̱n ta̱’v ema i kwesata az Sila ne̱e̱k a̱v we̱sma̱n emma̱n rihica̱ v emine?”
19Ye̱so se̱sk na̱, “He̱e̱k na buuk Na’Sil ka̱ha̱n kwe̱, ta̱’m vaak a̱m maa ka̱ a̱n c’hwe c’ta̱a̱cu.”2:19 Go̱t ta̱m: Mat 26:61; 27:40; Mar 14:58; 15:29.
20Hwenga̱nc Yahude̱n sudt bo̱ a̱n ipk o, “Na rigk s’we̱e̱ kwe̱zc c’il a̱n s’cihin na taast maama̱n buuk Na’Sil ka̱hna. Vo bo̱ kaa ta̱’v maa ka̱ a̱n c’hwe c’ta̱a̱ci?”
21Buuk Na’Sil ka̱n Ye̱so tanain la, i we̱du ru. 22Daava̱n Ye̱so utin u po̱tko̱, an la̱a̱s baa ru bakasta bo̱ az u ve̱ce̱ke̱ na̱ taanlo. A kabt bo̱ ge̱nsa̱n lalks Na’Sil a rina̱n Ye̱so vatin kwe̱ d’ba̱t d’da̱n.
Ye̱so napk ba̱ta̱d noco
23An Ye̱so latin a̱n le̱in Urisalima baan he̱tda̱n Paska, neta̱n hwe̱di he̱nk he̱tca̱n cu emka̱lline. A batk d’ba̱t a̱n dind Ye̱so. 24Ye̱so ta be̱sse̱ la na̱ d’ba̱t da, rema̱n u napk de̱bc na̱ kwe̱. 25Za noc a̱n tu ve̱ce̱ Ye̱so ho̱da̱n neta̱n da, rema̱n u baask u napk ba̱ta̱d noc kwe̱.
3Niko̱dimo̱ haka baa Ye̱so
1Noc lak de̱ha̱n un nan po̱g Niko̱dimo̱. I k’Farisi, da̱nv an ka̱nk go̱mgo̱ma̱n Yahude̱ne̱. 2U haka baa Ye̱so a̱n gyopo. U zeka o, “Kan la̱a̱sa̱m na lalks Na’Sila̱. C napk i vo kan la̱a̱sa̱m na un rwa̱in baa Na’Sila̱. Noc za un tu la̱a̱ a̱n em goon he̱tca̱n ca̱ v rein nu’emka̱l a za Sila el d’kut a unwan da.”
3Ye̱so se̱sk o, “Lag a̱m ve̱ce̱te̱ va̱ m’ga̱u. A za na sudk a̱n mat noc da, a tu uv a̱n go̱mc Na’Sil da cakk.”
4Niko̱dimo̱ ipkt bo̱ o, “I ho̱da̱npe̱ a̱n nan sudt a̱n mat nocuna̱n baasin u setka? Tu la̱a̱ a̱n vaak ta̱m a̱n ba̱ta̱d inu na sudt a̱n mata o?”
5Ye̱so se̱st bo̱ o, “Lag a̱m ve̱ce̱te̱ va̱ m’ga̱u. A za a na sudk macu noc macu m’ho̱o̱ a Hora̱md Na’Sil a̱n da, a tu uv a̱n go̱mc Na’Sil da cakk. 6Rina̱n noc matin i noco. Rina̱n Hora̱md Na’Sil matin la, i d’hormo. 7Av sip la a’nwa̱a̱ rema̱n a̱m zeka vo, ‘Ke̱ng na sud a̱n mat noc da.’ 8E̱nm el ma̱n hul ga̱luna̱n m to̱ntine. Ta̱’v hong ma̱ pipipi na̱m’to̱o̱. A ta̱’v nap kaa va̱na̱n m rwa̱in alla va̱na̱n ma hav da. I ho̱da̱n lo bo̱ ta̱m a̱n kooye̱ nocwa a̱n Hora̱md Na’Sil matine.”
9Niko̱dimo̱ ipkt bo̱ Ye̱so, “I ho̱da̱npe̱ a̱n rihica̱ ha̱n ca̱n emata?”
10Ye̱so se̱sk o, “I vo damra kan la̱a̱sa̱m an Isra’ila, a̱v ta ke̱e̱se̱ kaa rihica̱ ha̱n da? 11Lag a̱m ve̱ce̱te̱ va̱ m’ga̱u. C vatk rina̱n c napine. C vatk ta̱m rina̱n c he̱nine. A̱n ta kab la lalk co da. 12Awaz a̱m ve̱ce̱ke̱ no rihica̱n copun yanda̱ha̱n a̱n ta kab da, i’le̱e̱le̱ kaa a̱n ta̱n bat d’ba̱t am ve̱ce̱ no rihic na’cona? 13Noc za un takina̱n el a’con da, a za Waav Noc c’taa, un rwa̱in lanm na’con da.
14“Ho̱da̱na̱n Mosa ze̱ltin oba̱l zutk a̱n zo̱n a̱nmi k’kade, i ho̱da̱n lo bo̱ ta̱m a̱n nan ze̱lt Waav Noco.3:14 Go̱t ta̱m: D’Og 21:9.15I bat koowe̱ a̱n batin d’ba̱t baa ru, tu po̱t d’kala.
16“Ai retin Sila to̱nk copun yanda̱ha̱n hwe̱di d’kala, a neska Waav na̱ un v’da̱n c’taa, bat koowe̱ a̱n batin d’ba̱t baa ru, a tu wa̱a̱ da, tu po̱t ta̱m d’kala. 17Sila ta coma Waav na̱ rema̱n u hett an copun yanda̱ha̱n baan gedma̱n lalk da. I bat an copun yanda̱ha̱n ta kum d’gwa̱a̱ma̱ rem ru. 18Koowe̱ a̱n batin d’ba̱t baa Waav Na’Sila̱, a nan het o baan gedma̱n lalk da. Koowe̱ la a̱n ta batin d’ba̱t baa ru da, na baask na hetk o baan lalko. I rema̱n u ta bat d’ba̱t baan dind Waav Na’Sil un v’da̱n c’taa da.
19“Go̱t ha̱n rina̱n ti het na̱. Za̱nd uvka̱ a̱nmin copun yanda̱hna. Neta̱n pa̱tk la a̱n to̱na̱m i’cumunkun a lag d’za̱n, rema̱n yomks na̱ i sa̱ naake. 20Koowe̱ a̱n rein tu em rihic naake, a tu to̱n d’za̱n da cakk. A tu han ta̱m baan da̱nda da, rema̱n a na a̱da̱sa̱ la rihic naak c ru da. 21Koowe̱ la a̱n reina̱n emma̱n m’ga̱u, tu han baan za̱nd Na’Sila̱. Rema̱n na he̱nt a̱ncass az u el a̱n gabma̱n rina̱n Sila zeine.”
Yohana vatk iwe̱ a̱n rein Ye̱so
22Daava̱n rihica̱ ha̱n to̱o̱tine, Ye̱so a an la̱a̱s baa run havk a̱n hergun copun Judiya. U sootk a̱n a̱n’a, u emaka ta̱m neta̱n baptisma. 23Yohana lak ta̱m a̱n emam na baptisma a̱n le̱in Ainon in rein d’viivi a Salim ne. Rema̱n ho̱o̱m lak hwe̱di a̱n a̱n’a, neta̱n lak ta̱m na̱m’he̱e̱le̱ na emata na̱ baptisma. 24(A̱n daava̱n lo, a̱n na hwesa gag Yohana a̱n buu s’ko̱m da.)3:24 Go̱t ta̱m: Mat 14:3; Mar 6:17; Luk 3:19-20.
25An la̱a̱s baa Yohana gudgt bo̱ s’lan a Yahude̱k hyan da̱n tanin saptca̱n gabs Yahude̱ne̱. 26A hata bo̱ baa Yohana, a zeka o, “Kan la̱a̱sa̱m na lalks Na’Sila̱, bakasa a̱rmuna̱n lain baa rov a̱n rigta̱n ge̱nka̱n Jodan, u’na̱n v tanain da̱ ru. Go̱t bo̱ u el a̱n emma̱n baptisma, neta̱n hwe̱di el ta̱m nu’hav baa ru.”
27Yohana se̱st bo̱ na̱, “Noc au kum rihi da, a za a na neska o inya lanm na’con da. 28Nwaa a̱n hid no ta̱n vata az a̱m zeka, ‘Za mi a̱n rein Ka̱risti da. I Silan comain me a̱m baa o m’can.’3:28 Go̱t ta̱m: Yoh 1:20.29I ga̱a̱gi a̱n ciin wanta robgo. Barav ga̱a̱gi la, tu val u hong goda̱v ga̱a̱gi. Tu em ta̱m c’za̱ngkta̱ hwe̱di au hong goda̱v ru. I za̱ngkta̱ca̱ m retin bo̱. Ca̱ cek ta̱m gedo. 30I ke̱ng neta̱n pa̱t a̱n gaba̱m ru, mi la an gaba̱m ri haba.
31“Koowe̱ a̱n rwa̱in a’cona, u so̱dk koowe̱. Koowe̱ la a̱n rwa̱in a̱n copun yanda̱hna, i kan copun yanda̱hna. Tu vat ta̱m rihica̱n copun yanda̱hna. Koowe̱ la a̱n rwa̱in a’cona, u pa̱tk koowe̱. 32U vatk ta̱m rihica̱n u he̱ne̱in a ca̱n u hongain ne. Noc za la un kabin rina̱n u vatin da. 33Koowe̱ la a̱n kabin rina̱n u vatine, u kabk az A’Sil i ka m’ga̱u.
34“Kan Sila comain el tu vat lalks Na’Sila̱, ai retin Sila neska o we̱sma̱n Hora̱md na̱ kwe̱. 35Cetok el a̱n to̱nc Waa. U nesk ta̱m o c’rihi kwe̱. 36Koowe̱ a̱n batin d’ba̱t baa Waav Na’Sila̱, tu po̱t d’kala. Koowe̱ la a̱n ha̱lin Waav Na’Sila̱, a tu po̱t da. Hwinsa̱d Na’Sil el ta̱m male baa ru.”
4Ye̱so iga̱msk neta k’Samariya
1Farisin hongk az Ye̱so pa̱tk Yohana a̱n kumma̱n an la̱a̱s a au reina̱n emam baptisma na. 2Za la Ye̱so a̱n hid ru a̱n reina̱n emma̱n baptisma da, i an la̱a̱s baa ru. 3An Ye̱so hongtin taanlo, u lagk copun Judiya. U sak k’le̱v u sudt a̱n vaak Galili. 4I ke̱ng la u gedanna a̱nmin copun Samariya.
5U ceta bo̱ i’le̱e̱ a̱n copun Samariya in nan po̱g Sukar. I el d’viivi a ke̱nge̱ka̱n Yakubu nesin waav ru Isuhu.4:5 Go̱t ta̱m: D’Tak 33:19; Jo̱s 24:32.6Dwa̱a̱d Yakubu el ta̱m a̱n a̱n’a. Ye̱so la, ai retin u pooka le̱be̱ na’ha̱gcu, u sootk a̱n paata̱n dwa̱a̱d ne. A̱n daava̱n lo hwed bo̱pk a̱n gag a’te̱ke̱.
7An neta k’Samariya cetain a̱n dwa̱a̱ u ibt m’ho̱o̱, Ye̱so zeka o, “Ne̱e̱ m m’ho̱o̱ a̱m so̱o̱.” 8(A̱n daava̱n lo an la̱a̱s baa Ye̱so lak a uvk ni’le̱e̱ a waata c’ryaako.)
9Neta k’Samariya se̱st bo̱ o, “Ye̱? I vo k’Yahude̱, mi la k’Samariya. I rema̱n ye̱ a̱n ta̱’v kont a̱m m’ho̱o̱?” (U vat-vat taanlo rema̱n i za ti bagenne Yahude̱n a an Samariyan da.4:9: Go̱t ta̱m: Ne̱h 4:1-2.)
10Ye̱so se̱st bo̱ o, “Neta, av nap be̱ ho̱sa̱m Na’Sila̱, a kan reina̱n zem rov no, ‘Ne̱e̱ m m’ho̱o̱ a̱m so̱o̱.’ Lak be̱ a̱v konk o m’ho̱o̱. Unwa la tu ne̱e̱ v ho̱o̱ma̱n ta̱m po̱to̱so̱ na.”
11Neta zeta bo̱ o, “Kanubu, a̱v zatta rina̱n ta̱’v ibta̱ m’ho̱o̱ da. Dwa̱a̱da̱ ha̱n pimk la ta̱ma̱. Ipe̱ kaa a̱n va kuma̱ ho̱o̱ma̱n ta̱m po̱to̱so̱ na? 12A̱v pa̱t-pa̱t bo̱ kaa ceta co Yakubu, un be̱in co dwa̱a̱da̱ hne? Unwa a̱n hid ru, i a̱n a̱n’a u so̱in a aka̱n ru nu, a bugca̱n rinnanutusa̱n run kwe̱.”
13Ye̱so se̱sk la neta, “Koowe̱ a̱n so̱in ho̱o̱ma̱ ha̱n, so̱o̱ti i ti sud a̱n ot o. 14Koowe̱ la a̱n tu so̱o̱ ho̱o̱ma̱n ta̱’m ne̱e̱ o, so̱o̱tii a ti sud a̱n ot o da cakk. Ho̱o̱ma̱n ta̱’m ne̱e̱ la o, ta̱m soot a̱nmi baa ru na̱m’o̱no̱. Ho̱da̱n dwa̱a̱da̱n zain da̱n hwaa da cakk, ma̱n po̱to̱so̱ o ta̱m d’kala.”
15Neta zeta bo̱ o, “Kanubu, ne̱e̱ m ho̱o̱m ne ho̱da̱na̱n so̱o̱tii zatina̱n ota̱m ri ta̱m da. Bat ta̱m ta̱’m hwera havma̱n d’wa̱a̱.”
16Ye̱so zeta bo̱ o, “Nok a̱v po̱go̱ wa̱rvu, a̱n noka tahna.”
17Neta se̱st bo̱ o, “A̱m zatta a̱ra̱m da.”
Ye̱so zeta bo̱ o, “A̱v vatk m’ga̱u av zetin az a̱v zatta a̱ra̱m da. 18Rema̱n a̱ra̱m ni’tan gaak vo. Uv rein baa ru a̱nta̱ma̱, za wa̱ra̱v da.” 19Neta zeta bo̱ o, “Kanubu, i kwesaka m az i vo k’barav Na’Sila̱. 20Ceta con emaka A’Sil c’hwiipsa̱ a̱n conan se̱mka̱ hna. Nwaa la Yahude̱n, a̱n zeka az in le̱in Urisalima c’taa a̱n neta̱n ta ema A’Sil c’hwiipsa̱.”
21Ye̱so se̱st bo̱ o, “Neta, kab lalk ri. Daav lan, daava̱n neta̱n ta emata K’Ceto c’hwiipsa̱ koope̱, za a̱n se̱mka̱ ha̱n alla a̱nmin le̱in Urisalima c’taa da. 22Nwaa an Samariya la, a̱n el emam rina̱n a̱n ta napin da c’hwiipsa̱. Cwan la Yahude̱ne̱, c napk rina̱n c reina̱n emam c’hwiipsa̱. Rema̱n ka d’gwa̱a̱ma̱, i k’Yahude̱. 23Daav lan, ta̱m a̱v ceka, daava̱n an hwiipsa̱ca̱ m’ga̱u ta emata A’Sil K’Ceto c’hwiipsa̱ a̱nmi d’hora̱m a m’ga̱u nu. I goon an hwiipsa̱ca̱ ha̱n a̱n Cetok reina̱n hobo. 24A’Sil i d’hormo, an ta ema la na̱ c’hwiipsa̱ kwe̱, i ke̱ng a ema na̱ c’hwiipsa̱ a̱n d’hormo a m’ga̱u nu.”
25Neta zeta bo̱ o, “A̱m napk az Ka d’gwa̱a̱ma̱ (un nan po̱g Ka̱risti) lan na̱m’han. Daava̱n u cetaine, tu ve̱ce̱ na c’rihi kwe̱.”
26Ye̱so se̱st bo̱ neta, “Miuna̱n rein ha̱n a̱n iga̱msa̱m rovo, i mi a̱n rein unwa.”
An la̱a̱s baa Ye̱so vaakka
27A el taanlo, go̱to̱ an la̱a̱s baa Ye̱so vaakka lanm ni’le̱e̱. Aa cetain baa ru, a sipk a’nwa̱a̱ rem a gitka̱ o a̱n s’lalk a netaune. Puti a tan na, noc ta ipk la o, “Iye̱ v reina̱n hob baa netaun lo?” Alla “I rema̱n ye̱ a̱v retina̱n s’lalk a unwan da?”
28Netaune lagt bo̱ rika̱n d’wa̱a̱ u doogk a̱nmi ni’le̱e̱. U zeka netna, 29“Noka na a̱n he̱nt nocuna̱n ve̱ce̱in m rihica̱n m takina̱n em kwe̱. Ai bo̱ kaa i unwa a̱n rein Ka̱risti?” 30Rema̱n taanlo, a ni’le̱e̱ rwiila̱lta̱ bo̱ a nok baa Ye̱so.
31A̱n daava̱ ha̱n kwe̱, an la̱a̱s baa Ye̱so lak a̱n kons ru, “Kan la̱a̱sa̱m na lalks Na’Sila̱, baa ryaaka.”
32Ye̱so zeta bo̱ la na̱, “A̱m ci ryaakca̱n ta̱’m ryaa ca̱n a̱n ta napin da.”
33Rema̱n taanlo, an la̱a̱s baa ru ipkt bo̱ hyannana̱, “Noc hyan sava-sava o c’ryaake?”
34Ye̱so zeta bo̱ na̱, “Ryaakc ri, i a̱m em to̱nu kan comain me, a̱m taas ta̱m yomka ru. 35A̱n za ho ta̱n ze, ‘I kusk s’pe̱e̱t s’naas daava̱n ke̱m ceta da?’ Mi la a̱m zeka no, bon na is a̱n kekksa c’bel a d’ke̱mne̱nne̱. C enka, c cek ta̱m ke̱mo. 36A̱nta̱ma̱ hna, kan ke̱m tu kab copa̱nc ru. Tu kargsa rina̱n u ke̱min rema̱n po̱tu d’kala. Bat ka d’goo a kan ke̱ma̱n ta em c’za̱ngkta̱ d’kutu. 37A s’lalk zeka, ‘Uhyan gwaa, uhyan ke̱me.’ 38A̱m comk no a̱n ke̱m va̱na̱n a̱n ta go̱vin da. I neta̱n hyan a̱n emin m’coko. Nwaa la a̱n ryaak coka̱m na̱.”
Netnan Samariya batk d’ba̱ta̱
39Neta̱n hwe̱di an Samariya, an rein a̱n le̱in lo, a batk d’ba̱t baa Ye̱so. I rema̱n neta zeka, “U ve̱ce̱ke̱ m rihica̱ m takina̱n em kwe̱.” 40Rema̱n taanlo, daava̱n netnan Samariya cetain baa Ye̱so, a konk o u soot baa na̱. U sootk la baa na̱ c’hwe c’ila̱.
41Neta̱n hwe̱di, aa hongtin lalks Ye̱so, a batk d’ba̱t baa ru. 42A zeta bo̱ neta, “A̱nta̱ma̱, c batk d’ba̱t baa Ye̱so. Za rema̱n rina̱n v vatin c’taa a̱c kabtin da. I rema̱n cwan ta̱m c hwengka hid co. Ca̱ napk ta̱m az ke̱ng, i unwa a̱n rein kan gwa̱a̱ma̱d an copun yanda̱hna.”
Gaag waav kan yomka go̱mo̱
43An na la̱vtin c’ila̱, Ye̱so lagk copun Samariya u vaak a̱n copun Galili. 44Ye̱so vatk a̱n hid ru, az k’barav Na’Sil zatta k’gwin a̱n copu ru da.4:44 Go̱t ta̱m: Mat 13:57; Mar 6:4; Luk 4:24.45Au cetain Galili, netnan Galili gwaak o c’kom c’ila̱. A em-em taanl rem a lak a̱n le̱in Urisalima baan he̱tda̱n Paska. A he̱nke̱ ta̱m he̱tca̱n ca̱n Ye̱so emka̱lline.4:45: Go̱t ta̱m: Yoh 2:23.
46Ye̱so sudk a̱n hav le̱in Kana a̱n copun Galili, va̱na̱n u vaaksain m’ho̱o̱, ho̱o̱ma̱n yaanin ceun anab. Damra kan yomka go̱m lak a̱n a̱n’a kan waa’a̱rma̱v ru laina̱n gaag a̱n le̱in Kafarnahum.4:46 Go̱t ta̱m: Yoh 2:1-11.47Au hongtin az Ye̱so ceka Galili lanma̱n copun Yahude̱, u havk baa ru. U konk o az u han u taas waav ru gaago, ai retin waa el a̱n hob na’wa̱a̱.
48Ye̱so zeta bo̱ o, “Nwaa a za an he̱nk c’he̱t a rihica̱ sipa̱m na’nwa̱a̱n da, a ta̱n tak a̱n bat d’ba̱t da.” 49Damra kan yomka go̱mun lo zet bo̱ o, “Kanubu, gag c’de̱be̱, noka a̱nta̱ma̱. Waav ri el a̱n hob na’wa̱a̱.”
50Ye̱so zet bo̱ o, “To̱o̱ a̱n c’rovo. Gaag uha̱n a tu hwaa waav rov da.”
A̱ra̱m kabk la lalksa̱n Ye̱so ve̱ce̱in o. U sakk k’le̱v u to̱o̱ko̱. 51Au latin a̱n k’le̱ve̱, coka̱n ru gwaantka o. A ve̱ce̱ke̱ o az gaag batk waav ru.
52U ipkt bo̱ na̱ ho̱rva̱n gaag taatin waa. A se̱st bo̱ o, “I de̱e̱de̱ daava̱n hwed se̱ttin a’te̱k ca̱nmi, a̱n gaag taatin o kwe̱.” 53Cetok bakasta bo̱ az i a̱n ho̱rva̱n lo honhon a̱n Ye̱so zetin o, “Gag uha̱n a tu hwaa waav rov da.” A̱rmune a an buu run kwe̱, a batk d’ba̱t baa Ye̱so.
54I he̱tca̱ v’illa̱ ha̱n ca̱n Ye̱so emin au lagtain copun Judiya u havk Galili.
5Ye̱so taask a̱ra̱m m’le̱me̱
1An rihica̱ ha̱n to̱o̱tine, na bank he̱ta̱d Yahude̱ne̱. Ye̱so elt bo̱ a̱n le̱in Urisalima baan he̱ta̱d ne. 2A̱n le̱in Urisalima, dwa̱a̱k lak d’viivi a hutda̱n nan po̱g huta̱d kyo̱o̱mno̱. Nan po̱g ka̱ a̱n remd Yahude̱ne̱, Ba̱tzaata. K ci s’varanda s’tan s be̱mke. 3I a̱nmin varandasa̱n lo a̱n damran bugda̱n netna s’malse, pomna, a le̱ma̱n rein ta litla̱lla̱.5:3 Ge̱nke̱-ge̱nke̱ ca̱ m’e̱t zatta za̱tva̱n 4 a be̱se̱da̱n za̱tva̱n 3 da. A el na̱m’val na na̱ma̱nsa̱ ho̱o̱ma̱ k’dwa̱a̱. 4Rema̱n na̱v’daa-na̱v’daa, k’Comta̱v Na’Sil el tu ciza̱ a̱nmi m’ho̱o̱ u na̱ma̱nsa̱ ma̱. Koowe̱ kaa a̱n bain a̱n hyoo na̱m’ho̱o̱ a na na̱ma̱nsa̱ ma̱, kooye̱ gaagwa a̱n ciin o, ti taa o kwe̱.
5A̱ra̱m lak a̱n a̱n’a a’la̱t a̱n gaag s’we̱e̱ d’kwe̱z a̱n oopa a̱n s’ya̱a̱ru. 6An Ye̱so he̱ntin o a’la̱ta̱, u napk la az u gosk hwe̱di a̱n gaagune. I ipkt bo̱ a̱rmune, “A̱v to̱nk na taas a̱v gaage?”
7Kan gaag se̱sk o, “Kanubu, a̱m zatta kan tu hyoto m a̱n k’dwa̱a̱ daava̱n na na̱ma̱nsta̱in m’ho̱o̱ da. Am hya̱a̱k ai ta̱’m hyoo, noc hyan el tu baa m a̱n hyoo.”
8Ye̱so zeta bo̱ o, “Unu v o̱m kakdak rov a̱v to̱o̱.” 9V’Daa v’da̱nka̱ la, gaag taak o. U o̱mk kakdak ru u to̱o̱ko̱.
Hweda̱n lo la, i hweda̱n hwerad Yahude̱ne̱. 10Hwenga̱nc Yahude̱n zeta bo̱ a̱rmuna̱n na taasin gaago, “Te̱nte̱ i hweda̱ d’hwera. Giira ta ne̱e̱ va̱ d’ke̱e̱ a̱v to̱o̱s kakdak rov da.”5:10 Go̱t ta̱m: Ne̱h 13:19; Je̱r 17:21.
11U se̱st bo̱ na̱, “I kan taasin m gaag a̱n zein me, ‘Unu v o̱m kakdak rov a̱v to̱o̱.’ ”
12A ipkt bo̱ o, “Iwe̱ a̱n zein vo, unu v o̱m kakdak rov a̱v to̱o̱?”
13Kan na taasin gaag ta nap la nocun da. Rema̱n Ye̱so yangske o a̱nmin bugda̱n netna.
14Ai ho̱kstoine, Ye̱so gwaantka o a̱n gwen un buuk Na’Sila̱. U zeta bo̱ o, “Go̱to̱, na taask a̱v gaago. Av sud la ta̱m d’ko̱t da. A za taanl da, rina̱n pa̱tin o̱p inzo, ti kum vo.” 15A̱ra̱m to̱o̱t bo̱ u havk u ve̱ce̱ hwenga̱nc Yahude̱n az i Ye̱so a̱n taasin o gaago. 16Rema̱n taanlo, hwenga̱nc Yahude̱n takaz ryeesam Ye̱so d’kob rem u emk rihica̱ ha̱n a̱n hweda̱ d’hwera.
17Ye̱so zet bo̱ na̱, “Cet me el na’yomk kooye̱ daava. Iye̱ ba̱ri kaa a̱n ti hol me?” 18Rema̱n taanlo, hwenga̱nc Yahude̱n ryaak hwic a̱n hoba̱n hweed Ye̱so. Az za giiran hweda̱ d’hwera c’taa u getin da, u zeka ta̱m az i unwa Waav Na’Sila̱. U vaakska hid ru honhon a A’Sil na̱.
Cetok ne̱e̱k Waa m’we̱se̱
19“Lag na a̱m ve̱ce̱te̱ no m’ga̱u. Waa a tu la̱a̱ a̱n em rihi a̱n hid ru da, a za rina̱n u he̱nin K’Ceto nu’em da. Rema̱n rihica̱n Cetok rein nu’emo, i ca̱nca ta̱m c’taa a̱n Waa tu ema. 20Ai retin Cetok el a̱n to̱na̱m Waaro hwe̱di d’kala, u kwesaka o rihica̱n u rein nu’em a̱n hid ru kwe̱. Tu kwesa ta̱m o ho̱da̱na̱n tu emt damran he̱tca̱n pa̱tin ta̱ca̱, bat ta̱n sip a’nwa̱a̱.
21“Ho̱da̱na̱n Cetok retin ka̱n una̱sa̱ an wa̱ini, u po̱to̱so̱ ta̱m na̱, i ho̱da̱n lo bo̱ a̱n Waa tu po̱to̱sto̱ koowe̱ u to̱nine. 22Cetok a ka̱n geda noc lalk da. U nesk Waav ru we̱sma̱n gedma̱n lalk kwe̱. 23I bat neta̱n kwe̱ ta ne̱e̱ Waa k’gwin ho̱da̱na̱n ta ne̱e̱t K’Ceto. Koowe̱ a̱n ta ne̱in Waa k’gwin da, u ta ne̱e̱ Cetoka̱n comain o k’gwin da.
24“Lag na a̱m ve̱ce̱te̱ no m’ga̱u. Koowe̱ a̱n hongin lalks ri, u bat ta̱m d’ba̱t baa kan comain me, u baask u po̱tk d’kala. A nan het o baan gedma̱n lalk da. U kobk ta̱m a’wa̱a̱. 25Lag na a̱m ve̱ce̱te̱ no m’ga̱u. Hwed lan, ta̱m a̱d ceka. Hweda̱n an wa̱in ta hongt goda̱v Waav Na’Sila̱. An hongin va̱ ta̱ma̱, ta po̱to̱. 26Ho̱da̱na̱n Cetok citin we̱sa̱m nu’po̱to̱so̱, i ho̱da̱n lo bo̱ ta̱m u ne̱e̱tin Waa we̱sa̱m nu’po̱to̱so̱. 27U ne̱e̱k ta̱m o m’we̱s u gedt lalko, rema̱n i unwa a̱n rein Waav Noco.
28“An sip la a’nwa̱a̱ rema̱n ri ha̱n da. Rema̱n daav lan, daava̱n an rein a̱nmi c’sag kwe̱ ta hongt goda̱v ru, 29a rwa̱n ta̱ma̱. An emin c’rihi c’kasi, ta po̱t d’kala. An emin la c’rihi c’naake, ta unu na gedata na̱ lalka̱n wa̱a̱’a d’kala.5:29 Go̱t ta̱m: Dan 12:2.30A ta̱’m la̱a̱ a̱n em rihi a̱n hid ri da. Ho̱da̱na̱n Sila zetin me, i ho̱da̱n lo bo̱ a̱n ta̱’m gedt lalko. Gedma̱n lalk ri ta̱ma̱, i honhono. Rema̱n za to̱nu ri a̱m reina̱n hob da. I to̱nu ri la a̱m em to̱nu kan comain me.”
Kwesama̱n Ye̱so lan baa Na’Sil
31“Awaz be̱ az i mi a̱n vatin da̱n mi, vatu ri a tu soot m’ga̱u da. 32I noc hyan la a̱n vatin da̱n mi. A̱m napk la az rina̱n u vatine, i m’ga̱u.
33“A̱n comk neta̱n baa Yohana kan emam na baptisma. U vatk la m’ga̱u.5:33 Go̱t ta̱m: Yoh 1:19-27; 3:27-30.34Za a̱m la a̱n valma̱n vatu neta̱n i kwesata az i mi we̱ da. A̱m vat-vat rihica̱ ha̱n a̱m bakasta no rina̱n Yohana kan emam na baptisma vatin da̱n mi, bat ta̱n kum d’gwa̱a̱ma̱. 35Yohana lak de̱ha̱n ho̱d d’za̱n da̱n lain nu’za̱na̱sa̱ baa no. A̱n baak la kab da̱ na̱v’daa ca̱nmi. A̱n emk ta̱m c’za̱ngkta̱ rema̱n za̱nd ru.
36“A̱m ci la rina̱n ti kwesa, in so̱din rina̱n Yohana vatine. Rihica̱ m rein nu’emo, i rihica̱n Cet me comain me az a̱m ema. I ca̱nca a̱n ca̱n kwesa az i Ceto kan comain me. 37K’Ceto a̱n hid ru, un comain ta̱m me, u vatk da̱n mi. Nwaa la a̱n ta tak a̱n hong goda̱v ru na̱v’daa da. A̱n ta tak la ta̱m a̱n he̱n hyo̱o̱m ru da.5:37 Go̱t ta̱m: Mat 3:17; Mar 1:11; Luk 3:22.
38“A̱n ta kin la lalk ru a̱n de̱bc no da, rema̱n a̱n ta bat d’ba̱t baa nocuna̱n u comain da. 39A̱n el ta̱n be̱tk ge̱nsa̱n lalks Na’Sil a d’ke̱mne̱nne̱. Rema̱n i a̱n sa̱nsa a̱n de̱ltin c’de̱b az ta̱n kum po̱tu d’kala. I sa̱nsa la a̱n vatin da̱n mi. 40Puti a tan na, a̱n ha̱lk la a̱n noka baa ri a̱n po̱tte.
41“A̱m za a̱n hob ai neta̱nrima bo̱m a̱m da. 42A̱m napk la no. A̱n zatta to̱nc Na’Sil a̱n de̱bc no da cakk. 43A̱m haka a̱n we̱sa̱m Cet me, a̱n ta kab la m da. A uhyan han be̱ a̱n we̱sma̱n hid ru, lak be̱ a̱n kabk o. 44I’Le̱e̱le̱ a̱n ta̱n bat d’ba̱t a̱n kab rina̱n m ve̱ce̱in no, awaz a̱n el a̱n hob c’bo̱m baa hyannano, a̱n ta hob la c’bo̱m baa Na’Sil c’taa da?
45“An keka̱b la az i mi a̱n ta̱’m uvt lalks no baa K’Ceto da. Mosa u’na̱n saktin u’con baa ru, i unwa a̱n tu sav lalks no. 46An kab be̱ lalks Mosa, ta̱n bat be̱ d’ba̱t baa ri, rema̱n Mosa ge̱nk da̱n mi. 47An ta kabtin la rina̱n Mosa ge̱nin da, i’le̱e̱le̱ a̱n ta̱n kabt lalks ri?”
6Ye̱so ryaakska bugda̱n netna
(Mat 14:13-21; Mar 6:30-44; Luk 9:10-17)
1An rihica̱ ha̱n to̱o̱tine, Ye̱so pask Saama̱n Galili, ma̱n nan po̱g saama̱n Taibe̱riyas. 2Damran bugda̱n neta̱n gabka ta̱m o, rema̱n a he̱nk he̱tca̱n u emka̱llin a̱n taasa̱m neta̱n s’malse. 3Ye̱so elt bo̱ a̱n se̱m u soot a̱n a̱n’a a an la̱a̱s baa ru nu. 4A̱n daava̱n lo, he̱tda̱n Paska a̱d Yahude̱n bo̱pk la m’can. 5An Ye̱so bontoin isa̱, u he̱nke̱ damran bugda̱n neta̱n ta noka-noka baa ru. U ipkt bo̱ Filip, “Ipe̱ a̱n nan wan c’ryaak rem o̱p naha̱n ryaate?” 6U vat-vat la taanlo u maakt Filip, rem u baask u napk rina̱n tu ema.
7Filip se̱st bo̱ o, “Copa̱nc noc ca̱n yomka c’hwen s’za̱ngu s’ila̱, a ti ma̱a̱na̱ na waata c’ryaak ho̱da̱na̱n koowe̱ tu kumt ca̱nm da.”
8Da̱nv an la̱a̱s baa ru un nan po̱g Andarawus ha̱n Simo̱n zeta bo̱ o, 9“Waa el bo̱ taha̱n un ciin be̱re̱e̱dica̱n bale6:9 Bale i rihi ho̱da̱n alkama. Na el nan zo̱o̱ c’be̱re̱e̱di a̱n hyunma̱n inya. c’tan a m’ryaa ge̱nna̱n m’ila̱. A ti ma̱a̱na̱ la hwera̱n netna ha̱n da.”
10Ye̱so zeta bo̱ an la̱a̱s baa ru, “Ze na neta̱n a sweeta̱lla.” Gwe̱e̱c lak ta̱m hwe̱di a̱n baad ne, neta̱n sweeta̱lt bo̱. I a̱rma̱n ho̱d s’kwe̱re̱ s’tan a̱n lain a̱n a̱n’a. 11Ye̱so o̱mt bo̱ be̱re̱e̱dic ne. Au ematain A’Sil c’bo̱mo̱, u de̱lk na we̱nkke̱ netnanan rein a’sweta̱l be̱re̱e̱dic ne. U emk ta̱m taanl a̱n ge̱nne̱. Bugda̱n neta̱n ryaak a cigk ho̱d a to̱ntine. 12An bugda̱n neta̱n ryaaktin a cigka̱, Ye̱so zeka an la̱a̱s baa ru, “Kargsa na yatrananan neta̱n ka̱ltine. An lag la rihi naa da.” 13Rema̱n taanl a kargska yatrananan a ka̱ltin baan be̱re̱e̱dica̱n bale c’tan ca̱nlo ca ryaine. A hiisk c’gyo̱b oopa a̱n c’ila̱.
14An netnan lo he̱ntin he̱tca̱n Ye̱so emine, a zeka, “Ke̱ng, i unwa k’barav Na’Sil un na lain na̱m’val u han a̱n copun yanda̱hna.” 15Ye̱so napuz a̱ndaabe az a to̱nk a han a o̱m o na̱m’we̱s a kaat o c’go̱mo̱. U vaakt bo̱ u el a̱n se̱m u soot unwa v’da̱n.
Ye̱so emk a’ha̱gc na̱m’saa
16An rima tudtini, an la̱a̱s baa Ye̱so cizka̱ a ceka bilka̱ m’saa. 17A uvk ta̱m a̱n bumbka̱ m’ho̱o̱ ta hav-hav ga̱la̱n le̱in Kafarnahum na̱m’saa. Gyop ribguzo. Ye̱so ta hwesa la a can baa na̱ da. 18Saam gudga̱z a̱n c’gaag rema̱n damran e̱nca̱n ca̱n gudga̱in na̱m’we̱se̱. 19Daava̱n a noktin a̱n bumbka̱ m’ho̱o̱ nakma̱ s’me̱l s’naase, a he̱nke̱ Ye̱so na’ha̱gc a̱n cona m’ho̱o̱ tu can-can ga̱la̱n bumbuk na̱. Gelk ryaat bo̱ na̱ hwe̱di. 20U zeta bo̱ na̱, “I mi. An hong la v’gel da.” 21An la̱a̱s baa Ye̱so lak be̱ a to̱nk az u uva̱ baa na̱ a̱nmi bumbka̱ m’ho̱o̱, bumbuk ka̱n cauz la kaa bilka̱n va̱na̱n ta hava.
Neta̱n hobk Ye̱so
22Na̱m’zanta, netnanan kusa̱in rigta̱ m’saa he̱nk az bumbka̱ m’ho̱o̱ k hyan ta lak a̱n a̱n’a da. I bumbka̱ m’ho̱o̱ ka̱n an la̱a̱s baa Ye̱so uvtin c’taa, ta̱m Ye̱so ta uv a̱n bumbka̱ m’ho̱o̱ k ne da, i an la̱a̱s baa ru c’taa an to̱ine. 23(Bumbc hyan haka la lanma̱n le̱in Tabe̱riya, c ceka d’viivi va̱na̱n Kanubu Ye̱so ryaaksain bugda̱n neta̱n au ematain A’Sil c’bo̱mo̱.) 24Daava̱n neta̱n he̱ntin az Ye̱so a an la̱a̱s baa run za a̱n a̱n’a da, a uvk a̱n c’bumbu a havk a̱n le̱in Kafarnahum a̱n hob Ye̱so.
25Aa he̱ntin o a̱n bilka̱ m’saa a̱n kabv hyan, a zeka o, “Kan la̱a̱sa̱m na lalks Na’Sila̱, iye̱ daava kaa a̱v cetain tahna?”
26Ye̱so se̱sk na̱, “Lag na a̱m ve̱ce̱te̱ no m’ga̱u. Nwaa a̱n la a̱n hob ri, za rema̱n he̱tca̱n ca̱n he̱nin da, i rema̱n a̱n ryaak c’be̱re̱e̱di a̱n cigka̱. 27An em la m’cok rema̱n ryaakca̱n ca̱n za̱m da. Em na m’cok rema̱n ryaakca̱n ca̱n cet no a̱n po̱tu d’kala. Ryaakca̱n Waav Noc tu ne̱e̱ no. Rema̱n i unwa a̱n A’Sil K’Ceto de̱le̱in c’nape az i unwa a dagine.”
28A̱n daava̱n lo, a ipkk Ye̱so, “Iye̱ a̱n ge̱be̱se̱in az c ema rem c la̱a̱t a̱n em yomka Na’Sila̱?”
29Ye̱so se̱st bo̱ na̱, “Yomka Na’Sila̱, i a̱n bat d’ba̱t baa kan Sila comaine.”
30A zeta bo̱ o, “Iye̱ a̱n ta̱’v kwesa co, bat ca̱n he̱n c batt d’ba̱t baa rovo? Iye̱ a̱n ta̱’v ema? 31Ceta cinna an de̱ha̱n ryaak ryaakca̱n nan po̱g manna daav a latin a̱nmi k’kade. Ho̱da̱na̱n i retin a’ge̱n a̱n lalks Na’Sila̱, ‘U ne̱e̱k na̱ c’ryaak lanm na’con a ryaate.’ ”
32Ye̱so zeta bo̱ na̱, “Lag na a̱m ve̱ce̱te̱ no m’ga̱u. Za Mosa a̱n ne̱in no be̱e̱re̱dida̱n rwa̱in lanm na’con da. I Cet me a̱n tu ne̱e̱ no be̱re̱e̱dida̱ m’ga̱u lanm na’cona. 33Rema̱n be̱re̱e̱dida̱n Sila ta ne̱e̱, i kan ciza̱in lanm na’con u ne̱e̱t an copun yanda̱ha̱n u’po̱to.”
34A zeta bo̱ o, “Kanubu, mal a̱n ne̱e̱m co be̱re̱e̱dida̱ hna.”
35Ye̱so zeta bo̱ na̱, “I mi a̱n rein be̱e̱re̱dida̱n da̱n po̱to̱so̱ na. Koowe̱ a̱n hain baa ri, a tu hong ta̱m k’mer da. Koowe̱ ta̱m a̱n batin d’ba̱t baa ri, so̱o̱ti a ti ot o ta̱m da cakk. 36A̱m baask la a̱m zeka no, nwaa a̱n he̱nk me, a̱n ta bat la d’ba̱t baa ri da. 37Koowe̱ a̱n Cetok nesin me, tu han baa ri. Koowe̱ ta̱m a̱n hain baa ri, a ta̱’m vog o da cakk. 38Rema̱n a̱m ta ciza̱-ciza̱ lanm na’con a̱m emt to̱nu ri da. I bat ta̱m em to̱nu kan comain me.
39“Go̱t rina̱n kan comain m to̱nin az a̱m ema. Az au nesin m kwe̱, am yangs la v’da̱n baa na̱ da. A̱m po̱to̱so̱ ta̱m na̱ kwe̱ buka a̱n hwed d’be̱se̱. 40Go̱t rina̱n Cet me to̱nine. U to̱nk az koowe̱ a̱n he̱nin Waa, u bat ta̱m d’ba̱t baa ru, u kum po̱tu d’kala. Ta̱’m po̱to̱so̱ ta̱m o buka a̱n hwed d’be̱se̱.”
41Yahude̱n emata bo̱ o s’remreme rem u zeka, “I mi a̱n rein be̱e̱re̱dida̱n ciza̱in lanm na’cona.” 42A ipkt bo̱, “Za Ye̱so ha̱n ho, waav Isuhu, uc napin ceto a inun ta̱m da? I’le̱e̱le̱ kaa a̱n tu zeta, ‘A̱m cizka̱ lanm na’cona’?”
43Ye̱so se̱sk ta̱m na̱, “Lag na s’remrem a̱n nwaana̱n nwaa na. 44Noc za un tu han baa ri a za Cetoka̱n comain m agka o da. Mi la ta̱’m po̱to̱so̱ o buka a̱n hweda̱ d’be̱se̱. 45Ho̱da̱na̱n i retin a’ge̱n a̱nmin ge̱ns baranc Na’Sila̱, ‘Sila ta la̱a̱sa̱ koowe̱.’6:45 Go̱t ta̱m: Isa 54:13. Koowe̱ la a̱n hongin K’Ceto, u em ta̱m la̱a̱s baa ru, tu han baa ri. 46Noc ta tak a̱n he̱n A’Sil K’Ceto da, a za kan rwa̱in baa Na’Sil K’Ceto da. I unwa c’taa a̱n he̱nin K’Ceto.
47“Lag na a̱m ve̱ce̱te̱ no m’ga̱u. Koowe̱ a̱n batin d’ba̱t baa ri, u kumk po̱tu d’kala. 48I mi a̱n rein be̱e̱re̱dida̱n da̱n po̱to̱so̱ na. 49Ceta non ryaak ryaakca̱n nan po̱g manna a̱nmi k’kade. Puti a tan na, a uk kwe̱. 50Go̱t na be̱e̱re̱dida̱n ciza̱in lanm na’cona, koowe̱ a̱n ryain da̱, au wa̱a̱ da. 51I mi be̱e̱re̱dida̱n da̱n po̱to̱so̱ na, da̱n ciza̱in lanm na’cona. Koowe̱ a̱n ryain be̱re̱e̱dida̱ hna, tu po̱t d’kala. Be̱re̱e̱dida̱ ha̱n la, i we̱du ri, un ta̱’m nes rem an copun yanda̱ha̱n po̱tte.”
52Yahude̱n emt bo̱ s’lan na̱m’we̱s a̱n a̱n’na̱n a̱n’na̱. A zeka, “I’Le̱e̱le̱ a̱n a̱rm uha̱n tu ne̱e̱t na na̱min we̱du ru na ta̱a̱ti?”
53Ye̱so se̱st bo̱ na̱, “Lag na a̱m ve̱ce̱te̱ no m’ga̱u. A za an ta̱a̱k we̱du Waav Noco, a̱n so̱o̱ ta̱m hiba̱m ru da, a̱n zatta u’po̱t da. 54Koowe̱ la a̱n ta̱in na̱min we̱du ri, u so̱o̱ ta̱m hiba̱m ri, u ci po̱tu d’kala. Ta̱’m po̱to̱so̱ ta̱m o buka a̱n hweda̱ d’be̱se̱. 55I we̱du ri a̱n rein ryaakca̱ m’ga̱u. I hiba̱m ri ta̱m a̱n rein ri nu’so̱u i m’ga̱u. 56Koowe̱ a̱n ta̱in na̱min we̱du ri, u so̱o̱ ta̱m hiba̱m ri, tu boro a̱nmi baa ri, mi ta̱m a̱nmi baa ru.
57“Ho̱da̱na̱n Cetoka̱n zain ka̱n wa̱a̱ da comtain me, a̱m po̱tk ta̱m rem K’Ceto. I ho̱da̱n lo bo̱ a̱n koowe̱ a̱n ta̱in na̱min we̱du ri, tu po̱t ta̱m rem ri. 58I mi a̱n rein be̱e̱re̱dida̱n ciza̱in lanm na’cona. A̱d za ho̱da̱n manna un ceta non ryain a uk la kwe̱ da. Koowe̱ a̱n ryain be̱re̱e̱dida̱ hna, tu po̱t d’kala.”
59U vatk rihica̱ ha̱n kwe̱ a̱nmin ka̱bda̱n kargad Yahude̱ne̱, au retina̱n la̱a̱sa̱m neta̱n a̱n le̱in Kafarnahum.
Lalksa̱n po̱tu d’kala
60Daava̱n an la̱a̱s baa Ye̱so hwe̱di hongtin rihica̱ hna, a zeka, “Lalk uha̱n bo̱, i lalk a m’nii ni. Iwe̱ a̱n tu kab o?”
61Ye̱so napk az an la̱a̱s baa ru el a̱n s’remreme. U ipkt bo̱ na̱, “Riiha̱n naas-naas no c’de̱be̱? 62I’le̱e̱le̱ bo̱ kaa a̱n ta̱n emte, an he̱n Waav Noc na̱m’vaak a’con va̱na̱n u lain de̱hne? 63I Hora̱md Na’Sil a̱n rein da̱n po̱to̱so̱. Nocurimu zatta we̱sma̱n rihi da. Lalksa̱ m ve̱ce̱in no, i sa̱nsa a̱n rein Hora̱md Na’Sila̱. I sa̱nsa ta̱m a̱n sa̱n po̱to̱so̱. 64Ahyan el la baa no an ta batin d’ba̱t baa ri da.”
Ye̱so vat-vat taanl rema̱n u baask u napk an ta batin d’ba̱t baa ru da, u baask ta̱m u napk kan tu bab o. 65U zeta bo̱, “I rema̱n taanl a̱m zetin no az noc za un tu noka baa ri a za Cet me ne̱e̱k o d’ke̱e̱ da.”
66Lanma̱n daava̱n lo, an la̱a̱s baa ru hwe̱di vaakk dima̱, a ta gab ta̱m o da. 67Ye̱so ipkt bo̱ oopa ni’il nanlo, “Nwaa ta̱ma̱, an ya to̱o̱ la bano?”
68Simo̱n Bitrus ipkt bo̱ o, “Kanubu, i baa we̱ a̱n ca̱n hava? I vo a̱n ciin lalksa̱n po̱tu d’kala. 69C batk la d’ba̱t c kabka, ta̱ma̱ c napk az i vo a̱n rein kan zattin ri d’reb da, u Na’Sila̱.”6:69 Go̱t ta̱m: Mat 16:16; Mar 8:29; Luk 9:20.
70Ye̱so se̱st bo̱ na̱, “Za mi ho a̱n dagin no oopa ni’ila̱, go̱t la da̱nv no i A̱krimu da?” 71I Yahuda Iskariyo̱ti waav Simo̱n la u ciini. Rema̱n i unwa a̱n tu bab o. Go̱t la i da̱nv oopa ni’il anlo.
7Ye̱so havk a̱n le̱in Urisalima
1An rihica̱n lo to̱o̱tin kwe̱, Ye̱so paak copca̱n Galili. U kwaagk copun Judiya, rema̱n hwenga̱nc Yahude̱n lak a̱n hoba̱n hweed ru. 2An he̱tda̱n Yahude̱n retin ta soot a̱nmi m’saace bo̱ptina̱n can,7:2 Go̱t ta̱m: Ggdk 23:34.3ha̱nun zeta bo̱ o, “Unu v hav copun Judiya. I bat an gaba̱m rov ta he̱n yomkca̱ v rein nu’emka̱llo. 4Noc za un tu em c’rihi m’ze̱se̱, u el la a̱n hob az koowe̱ nap o da. Ai retin a̱v el a̱n emma̱n goon damra rihica̱ hna, kwesa hid rov baa an copun yanda̱hna.” 5A vat-vat taanl rema̱n ha̱nun ta̱ma̱, a ta bat d’ba̱t baa Ye̱so da.
6Ye̱so se̱sk ta̱m na̱, “Daav ri ta hwesa em da. Nwaa la kooye̱ daava, i honhon baa no. 7An copun yanda̱ha̱n zatta rina̱n ti de̱l a ha̱lt no da. Mi la a ha̱lk me, rema̱n a̱m vatk rihic naak ca rein ta ema. 8Nok na bano baa d’he̱te̱. Mi a̱m ta hwesa unu nu’hav da, rema̱n daav ri ta hwesa em da.” 9Au ve̱ce̱te̱in na̱ lalksa̱ hna, u sootk a̱n c ru a̱nmin Galili.
Ye̱so havk baan he̱tda̱ m’saace
10An ha̱nun to̱o̱tin la, Ye̱so elk baan he̱ta̱d ne. U ta nok la nan he̱nt o da, i m’ze̱se̱. 11Yahude̱n takaz hob ru baan he̱ta̱d ne. A zeka, “Pe̱ u reine?”
12Neta̱n emk s’remrem hwe̱di rem Ye̱so. Ahyan zeka, “I unwa noc u kasi.”
Ahyan zeka la, “I kan palka̱m netna.” 13Puti a tan na, noc ta tana o baa neta̱n da rema̱n gelk hwenga̱nc Yahude̱ne̱.
14An na gedanstain d’karga, Ye̱so uvk a̱n gwen un buuk Na’Sil u takaz la̱a̱sa̱m na. 15Hwenga̱nc Yahude̱n sipk a’nwa̱a̱. A zeka, “I ho̱da̱npe̱ a̱n a̱rm uha̱n kumtin goon napsa̱ ha̱n go̱t u ta hav la a̱n la̱a̱s da?”
16Ye̱so se̱st bo̱ na̱, “La̱a̱suna̱n m reina̱n la̱a̱sa̱m na, za u ri da, iu kan comain me. 17Koowe̱ a̱n dagin u em to̱nu Na’Sila̱, tu nap da̱n la̱a̱s uhna, awaz iu Na’Sila̱ alla a̱m la a̱n lalksa̱n hid ri. 18Koowe̱ a̱n reina̱n la̱a̱sa̱m neta̱n napsa̱n hid ru c’taa, u la a̱n hwebam hid ru k’gwin. Koowe̱ la a̱n tu hweba kan comain o k’gwin, i unwa a̱n rein ka m’ga̱u, za ka c’ko̱l da. 19I Mosa a̱n nesain no s’giira. Go̱t la da̱nv no za un reina̱n gabma̱n giirasa̱n lo da. I rema̱n ye̱ a̱n retina̱n hoba̱n hweed ri?”
20Neta̱n se̱st bo̱ o, “A̱v ci rinnas’ce. Iwe̱ a̱n reina̱n hoba̱n hweed rovo?”
21Ye̱so se̱st bo̱ na̱, “A̱m emk c’he̱t a’da̱n c’taa. Nwaa kwe̱ a̱n sipk a’nwa̱a̱. 22Mosa zek az a̱n ema yaa’a̱rma̱n s’geda, (za la baa Mosa i rwa̱in da, i baa cetonc no). Rema̱n taanl a̱n el ta̱n ema yaa’a̱ra̱m s’ged a̱n hweda̱ d’hwera.7:22 Go̱t ta̱m: D’Tak 17:10; Ggdk 12:3.23Awaz nan ema waa’a̱ra̱m s’ged a̱n hweda̱ d’hwera, rema̱n a na pas la giira Mosa da. I rema̱n ye̱ a̱n ta̱n hwinsti mi az a̱m taask noc gaag a̱n hweda̱ d’hwera?7:23 Go̱t ta̱m: Yoh 5:9.24An ged la lalk a̱n rina̱n is he̱nin c’taa da. Gab na m’ga̱u a̱n gedt lalko.”
Ye̱so a̱n rein Ka̱risti
25Neta̱n hyan baa na̱ an le̱in Urisalima zet bo̱, “Za a̱rm uha̱n ho a reina̱n hob a hot da? 26Go̱t la u el a̱n s’lalk koowe̱ tu hongte, a ta ze la o ta̱da̱ gab da. Go̱mgo̱ma̱n nap-nap bo̱ kaa az ke̱ng, i unwa a̱n rein Ka̱risti? 27Go̱t la na napk va̱na̱n a̱rm uha̱n rwa̱ini. Daava̱n Ka̱risti tu hata la, noc za un tu nap va̱na̱n tu rwa̱n da.”
28An Ye̱so latina̱n la̱a̱sa̱m na a̱n buuk Na’Sila̱, u ze̱lk v’god u zeka na̱, “A̱n napk me. A̱n napk ta̱m va̱na̱n m rwa̱ini. A̱m ta han la rema̱n hid ri da. Kan comain ta̱m me, i ka m’ga̱u. Nwaa la a̱n ta nap o da. 29Mi la a̱m napk o, rema̱n a̱m lan baa ru, i unwa ta̱m a̱n comain me.”
30A takaz bo̱ hoba̱n sipa̱m ru. A̱n na kum la nocuna̱n tapin a’kom u do̱vk o da, rema̱n daav ru ta hwesa can da. 31Neta̱n hwe̱di baa d’bug batk d’ba̱t baa ru. A zeka, “Daava̱n Ka̱risti tu hata, tu em he̱tca̱n pa̱tin goon ca̱n a̱rm uha̱n emka̱llin kwe̱?”
Na comk na sipa̱ Ye̱so
32An ba̱tksa̱m na s’giira hongt bo̱ az neta̱n el a̱n zwe̱me̱m hyannana̱ rihica̱ hna. Rema̱n taanlo na̱nna a c’hwengnan ka̱bd Na’Sil a̱n comt bo̱ bebna s’rega̱d a hav a sipa̱ Ye̱so. 33Ye̱so zet bo̱ na̱, “V’Daa ca̱nmi a̱n kusin a̱m el baa no, a̱m vaakt kaa baa kan comain me. 34Ta̱n jaa rik ut a̱n hob ri, a ta̱n he̱n la m da. Va̱na̱n m rein ta̱ma̱, a ta̱n la̱a̱ m’han a̱n a̱n’a da.”
35Hwenga̱nc Yahude̱n emt bo̱ s’lan a̱n’na̱n a̱n’na̱. A zeka, “Ipe̱ a̱n wa hav a̱n na zatina̱n he̱na̱m ru da? A wa caa-caa baa Yahude̱ nanan ba̱rgin baa an zain Yahude̱n da bat tu la̱a̱sa̱ an zain Yahude̱n da? 36Iye̱ goon lalkwa ha̱n u vatine, ‘Ta̱n jaa rik ut a̱n hob ri, a ta̱n he̱n la m da. Va̱na̱n m rein ta̱ma̱, a ta̱n la̱a̱ a̱n han a̱n a̱n’a da’?”
Ge̱nca̱n ho̱o̱m nu’po̱to
37A̱n hweda̱ d’be̱se̱, damran hwed d’he̱t kwe̱, Ye̱so esk u ba̱ska̱. U zeka, “Koowe̱ a̱n so̱o̱ti ciini, u noka u so̱o̱ m’ho̱o̱. 38Koowe̱ a̱n batin d’ba̱t baa ri, ho̱da̱na̱n ge̱nsa̱n lalks Na’Sil vattine, lanma̱n ba̱ta̱d ru a̱n ge̱nca̱n ho̱o̱m nu’po̱t ma̱n ge̱e̱n.”7:38 Go̱t ta̱m: Izi 47:1; Zak 14:8.39(Ye̱so tana-tana la Hora̱md Na’Sil da̱n an batin d’ba̱t baa ru ta kaba. Rema̱n a̱n daava̱n lo, Sila ta hwesa nesa Horma̱d na̱ da, ai retin a ta hwesa ne̱e̱ Ye̱so k’gwin da.)
Hid neta̱n wankske
40Neta̱n hwe̱di an hongin lalksa̱ ha̱n, a zeka, “Ke̱ng, o̱p uha̱n a̱n rein k’barav Na’Sil u’na̱n na lain na̱m’vala.”
41Ahyan zeka ta̱ma̱, “I Ka̱risti hna.”
Ahyan zeka la, “Ka̱risti tu rwa̱n a̱nmin copun Galili? 42Ge̱nsa̱n lalks Na’Sil ta ze ho az Ka̱risti tu rwa̱n baan goov Dauda a̱n le̱in Batalami, va̱na̱n Dauda rwa̱in da?” 43Hid neta̱n wankske rema̱n lalks Ye̱so. 44Ahyan baa na̱ to̱nk be̱ a sip o. A̱n na kum la kan tapin a’kom u do̱vk o da.
So̱dka̱n ta bat d’ba̱t da
45An bebna s’rega̱d vaaktain baa an ba̱tksa̱m na s’giira a c’hwengnan ka̱ba̱d Na’Sila̱, a ipkt bo̱ na̱, “I rema̱n ye̱ a̱n ta sipta̱in o da?”
46Bebna s’rega̱d se̱st bo̱ na̱, “Noc ta tak a̱n em s’lalk ho̱d a̱rm uha̱n da.”
47An ba̱tksa̱m na s’giira hulka̱lt bo̱ na̱, “U palk-palk no la bano? 48A̱n he̱nk na kumk noc baa go̱mgo̱ma̱n alla Farisin, un batin d’ba̱t baa ru? 49Netna ha̱n la an gabin o, i an ta napin s’giira da. Na emaka ta̱m na̱ s’nwa̱a̱.”
50Niko̱dimo̱ u’na̱n havin baa Ye̱so a̱n gyop lak a̱n a̱n’a. I da̱nv hwenga̱nc na̱ la. U ipkt bo̱ na̱,7:50 Go̱t ta̱m: Yoh 3:1-2.51“A̱m ze dan, giiras cinna ne̱e̱k ho na d’ke̱e̱ na geda noc lalk a̱n na baa hong o na napt ta̱m rina̱n u emin da?”
52A se̱st bo̱ o, “I vo la ba̱ra̱v kan Galili? Go̱t lalks Na’Sil a̱v he̱nte. K’Barav Na’Sil a tu rwa̱n lanma̱n Galili da.”
537:53 Ge̱nke̱-ge̱nke̱c Yohana c’hyan hwe̱di ca̱n de̱hne zatta za̱tsa̱n 7:53–8:11.Koowe̱ to̱uz u gya̱a̱ ba̱na̱.
8Na sipka̱ neta a̱n d’o̱mo̱
1Ye̱so elk a̱n Se̱mka̱n Cesa̱n O̱lif. 2Na̱m’zan-na̱m’zana, u vaakka ta̱m a̱n gwen un buuk Na’Sila̱. Bugda̱n neta̱n hata bo̱ kwe̱ baa ru. U sootk ta̱m u la̱a̱ska̱ na̱. 3Farisin a an la̱a̱sa̱m na s’giiran na nokta̱vka o netauna̱n na sipa̱in a̱n d’o̱mo̱. Aa esastain o a̱n te̱kan bugda̱n netna, 4a zeka o, “Kan la̱a̱sa̱m na lalks Na’Sila̱, go̱t neta uhna. Na sipka̱ o kakte a̱n d’o̱mo̱. 5Giiras Mosa zek la az na bonga̱l goon na̱nna a̱n c’taar na hwaa. Vo iye̱ v zeine?” 6A vat-vat la taanl rem a maakt o, bat ta kum rina̱n ta sipt o. Ye̱so kugt bo̱ nu’cop u emk s’ge̱n na̱v’gyu.
7Aa ryaatin hwic a̱n ipka̱m ru, u unutu bo̱ a’es-esa. U zeka na̱, “Un zattin d’ko̱t da baa no, lag u taka bona̱m ru a̱n d’taare.” 8U vaakk ta̱m u kugk u emk s’ge̱n nu’copo. 9An hongin o kwe̱, takama̱n manka̱n na̱, a to̱o̱k v’da̱n-v’da̱n. A lagk kaa Ye̱so un v’da̱n a netan a’esa. 10An Ye̱so unutuin a’esa, u ipkk neta, “Neta, pe̱ha̱n an uvta̱in lalks rovo? A̱n na kum kan bonin v da?”
11Neta se̱st bo̱, “Kanubu, a̱n na kum da.”
Ye̱so zeta bo̱ o, “Mi la, a ta̱’m geda v lalk da. To̱o̱, av sud la ta̱m d’ko̱t da.”
Ye̱so i d’za̱n
12Ye̱so sudt bo̱ ta̱m a̱n ve̱ce̱ neta̱n lalko. U zeka, “I mi a̱n rein za̱nda̱n copun yanda̱hna. Koowe̱ a̱n gabin me, au tak a̱n nok ni’cumunkun da, tu kum la za̱nda̱n ta̱d po̱to̱so̱ na.”8:12 Go̱t ta̱m: Mat 5:14; Yoh 9:5.
13Farisin zeta bo̱ o, “A̱v el a̱n vatma̱n rina̱n v emin a̱n hid rovo. Rina̱n v vatin la, za m’ga̱u da.”8:13 Go̱t ta̱m: Yoh 5:31.
14Ye̱so se̱st bo̱ na̱, “Ai to̱n a̱m vat rina̱n m emin a̱n hid ri. Puti a tan na, rina̱n m vatin la i m’ga̱u. A̱m napk va̱na̱n m rwa̱ini a va̱na̱n ma hav na. Nwaa la a̱n ta nap va̱na̱n m rwa̱in alla va̱na̱n ma hav da. 15A̱n el ta̱n ged lalk ho̱da̱n gedu neta̱nrima. Mi la a ta̱’m geda noc lalk da. 16Awaz la ai ta̱’m ged lalko, gedma̱n lalk ri tu soot u m’ga̱u. Rema̱n za mi v’da̱n a̱n rein da, i cwan c Cet me u’na̱n comain me. 17I el la a’ge̱n a̱nmin giiras no, az rina̱n net ni’il esin a vatka, ti soot m’ga̱u. 18Mi, a̱m vatk rina̱n m emin a̱n hid ri. Cetoka̱n comain me vatk ta̱m taanlo.”
19A ipkt bo̱ o, “I pe̱ha̱n cet a̱v une reine?”
Ye̱so se̱st bo̱ na̱, “A̱n ta nap a̱m daat ta̱m Cet me da. An nap be̱ me, ta̱n nap be̱ ta̱m Cet me.”
20Ye̱so vat-vat lalksa̱ ha̱n daava̱n u latina̱n la̱a̱sa̱m na a̱n gwen un buuk Na’Sila̱. U el koma̱n kwaateka̱n kinma̱n kind a̱n buuk Na’Sila̱. A̱n na kum la nocuna̱n do̱vin o da, rema̱n daav ru ta hwesa em da.
A ta̱n hav va̱na̱n ma hav da
21Ye̱so ryaak hwic ta̱m u sudk a̱n ze na̱, “Ta̱’m to̱o̱. Ta̱n jaa rik ut a̱n hob ri, a̱n wa̱a̱ ta̱m a ko̱tc no-no. Va̱na̱n ma hav la, a ta̱n la̱a̱ a̱n hav a̱n a̱n’a da.”
22Go̱mgo̱ma̱n Yahude̱n zeta bo̱, “A wa hwaa hid ru?” A ze-ze taanl rem u zeka, “Va̱na̱n ma hava, a ta̱n la̱a̱ a̱n han a̱n a̱n’a da?”
23Ye̱so sudk a̱n ze na̱, “Nwaa i nu’cop a̱n rwa̱ini. Mi la i lanm na’cona. I nwaa an copun yanda̱hna. Mi a̱m za kan copun yanda̱ha̱n da. 24I rema̱n taanl a̱m zetin no az ta̱n wa̱a̱ a ko̱tc no-no, a za a̱n batk d’ba̱t a̱n kabk az i mi a̱n rein unwa um zein no da. Ke̱ng ta̱n wa̱a̱ a ko̱tc no-no.”
25A ipkt bo̱ o, “I vo we̱?”
Ye̱so se̱st bo̱ na̱, “Unwa ge̱ um zein no hyanma̱ m’e̱te̱. 26A̱m ci c’rihi hwe̱di ca̱n ta̱’m vata, ca̱n-ca̱n het no baan lalko. Un comain ta̱m me, i ka m’ga̱u. A̱m ve̱ce̱ke̱ ta̱m an copun yanda̱ha̱n rihica̱n a̱m hongain baa ru.”
27A ta ke̱e̱se̱ az u tanva-tanva na̱ K’Ceto da. 28Ye̱so zet bo̱ ta̱m na̱, “Daava̱n ta̱n ze̱lt Waav Noco, i daava̱n lo kaa a̱n ta̱n napt az i mi a̱n rein unwa. Ta̱n nap ta̱m az a ta̱’m em rihi a̱n we̱sma̱n hid ri da. Ho̱da̱na̱n Cetok la̱a̱sta̱in me, i taanl a̱m retin nu’emo. 29Unwa ta̱m un comain me, u el d’kut a mi ni. U ta lag a̱m mi v’da̱n da, rema̱n a̱m el ta̱m em rina̱n ti pusa̱sa̱ o c’de̱b male.”
30Au latina̱n vatma̱n lalksa̱ hna, neta̱n hwe̱di batk d’ba̱t baa ru.
Ga̱uman ta̱’m rut no
31Ye̱so sudk ta̱m zem Yahude̱ nanan batin d’ba̱t baa ru. U zeka, “An ryaa hwic a̱n gabma̱n lalks ri, i nwaa bo̱ a̱n rein an la̱a̱s baa ri a m’ga̱u. 32Ta̱n nap m’ga̱u, ga̱uma̱n lo ta̱ma̱, ta̱m rut no m’coko.”
33A se̱st bo̱ o, “I cwan goov Ibrahi, ca tak emam noc m’cok da. I’Le̱e̱le̱ a̱n ta̱’v zeta az nan rut co m’coko?”8:33 Go̱t ta̱m: Mat 3:9; Luk 3:8.
34Ye̱so se̱sk la na̱, “Lag na a̱m ve̱ce̱te̱ no m’ga̱u. Koowe̱ a̱n reina̱n c’ko̱to, i coka̱v c’ko̱to. 35Cok au boro nu’bu d’kal da. Waav nu’bu la tu boro d’kala. 36Rema̱n taanlo, awaz Waa rutk no m’coko, a̱n kobk bo̱ kaa m’cok na̱m’ga̱u. 37A̱m napk az i nwaa goov Ibrahi, a̱n el la a̱n hoba̱n hweed ri rema̱n a̱n ha̱lk a̱n kab la̱a̱s ri. 38A̱m vatk rina̱n m he̱ne̱in baa Cet me. Nwaa la a̱n el a̱n emma̱n rina̱n he̱nin baa ceta no.”
39A se̱st bo̱ o, “I Ibrahi a̱n rein ceta co.”
Ye̱so zeta bo̱ la na̱, “Awaz be̱ i nwaa aka̱n Ibrahi na̱m’ga̱u, ta̱n em be̱ rihica̱n Ibrahi emine. 40Go̱t la a̱n el a̱n hoba̱n hweed ri, miuna̱n ve̱ce̱in no ga̱uma̱n m hongain baa Na’Sila̱. Ibrahi ta em taanl da. 41I yomka ceta no a̱n rein nu’emo.”
A sudt bo̱ a̱n ze o, “Za o̱mdan na matin co da. Ca̱ ci A’Sil ceta co uda̱n c’taa.”
42Ye̱so zeta bo̱ na̱, “Awabe̱ az i Silan rein Ceta no, ta̱n to̱n be̱ me. Rema̱n i lanma̱n baa Na’Sil a̱m rwa̱in a̱m nokta taha̱n baa no. A̱m ta han-han la rema̱n hid ri da, i Silan comain me. 43Iye̱ a̱n de̱lin kaa a̱n ta ke̱e̱ste̱ lalks ri da? I rema̱n a ta̱n la̱a̱ a̱n kab lalks ri da. 44I nwaa aka̱n ceta no A̱krimu. Rina̱n ceta no rein la tu to̱no̱, i inya a̱n rein ta̱n ema. I unwa kan hweed neta̱n takada̱ m’e̱t zo. U ta bo̱p m’ga̱u da, rema̱n ga̱um za baa ru da cakk. Au get ta̱m c’ko̱lo̱, i ho̱d ru bo̱. Rema̱n i unwa ka c’ko̱lo̱, cetoka̱n ca̱nca ta̱ma̱.
45“A̱m ve̱ce̱ke̱ no m’ga̱u. A̱n ta kab la lalk ri da. 46Iwe̱ baa no a̱n tu ke̱e̱ u ze az a̱m ko̱tko̱? Ai retin la az i ga̱uma m reina̱n ve̱ce̱m no, i rema̱n ye̱ a̱n ta kabtin lalks ri da? 47Koowe̱ a̱n rein u Na’Sila̱, tu hong lalks Na’Sila̱. A ta̱n hong sa̱ da, rema̱n a̱n za a Na’Sil da.”
Ye̱so na Ibrahi
48Yahude̱n ryaat bo̱ hwic a zeka o, “Ca vat honhon ac zetin az i vo kan Samariya, az a̱v ci ta̱m rinnas’ce da?”
49Ye̱so se̱st bo̱ na̱, “A̱m zatta rinnas’ce da. A̱m el ta̱’m ne̱e̱ Cet me k’gwin. Nwaa la a̱n gink me. 50Za hwebam hid ri k’gwin a̱m retin da. I Silan ta ne̱e̱ m k’gwin. Na̱nna a̱n rein ta ged lalk u m’ga̱u. 51Lag na a̱m ve̱ce̱te̱ no m’ga̱u. Koowe̱ a̱n gabin lalks ri, au wa̱a̱ da cakk.”
52Yahude̱n zeta bo̱ o ta̱ma̱, “A̱nta̱ma̱ bo̱ kaa a̱c napin az a̱v ci rinnas’ce. Ibrahi uk ho̱d baranc Na’Sil ahyan. Vo la a̱v zeka, az koowe̱ a̱n gabin lalks rovo, az au wa̱a̱ da cakk. 53A̱v pa̱t-pa̱t bo̱ kaa ceta co Ibrahi a baranc Na’Sil nanan wa̱in kwe̱? Iwe̱ a̱v vaaksain hid rov zo?”
54Ye̱so se̱st bo̱ na̱, “Awaz i mi a̱n ta̱’m ne̱e̱ hid ri k’gwin, gwink ri i ka̱n ka̱ka̱la̱. I Cet me a̱n ne̱in m k’gwin. I unwa la a̱n zein az i Sila no. 55Go̱t la a̱n ta nap o da. Mi la m napk o. Am ze be̱ az a̱m ta nap o da, go̱t la a̱m napk o, a̱m el ta̱m a̱n gabma̱n lalks ru, ta̱’m vaak ka c’ko̱l ho̱d no. 56Ibrahi emk c’za̱ngkta̱ au naptin az tu he̱n hweda̱n hanm ri. U he̱nk la da̱. U emk ta̱m c’za̱ngkta̱ hwe̱di.”
57Yahude̱n sudt bo̱ ta̱m a̱n ipk o, “A̱v ta hwesa caa s’we̱e̱ kwe̱zc c’il a̱n oopa nu’mac da. Ipe̱ kaa v lain a̱v napt Ibrahi?”
58Ye̱so se̱st bo̱ na̱, “Lag na a̱m ve̱ce̱te̱ no m’ga̱u. Az na matt Ibrahi, a̱m ello.”
59A o̱mt bo̱ c’taar az a bonga̱lt be̱ o. Ye̱so ge̱e̱ste̱ bo̱ u rwa̱a̱ u lag na̱ a̱n gwen un buuk Na’Sila̱.
9Ye̱so a̱pa̱ska̱ is poma
1An Ye̱so latin tu to̱o̱-to̱o̱, u he̱nk nocuna̱n na matin poma. 2An la̱a̱s baa ru ipkt bo̱ o, “Kan la̱a̱sa̱m na, iwe̱ a̱n ko̱tin na matta a̱rm uha̱n poma? I unwa alla i an matin o?”
3Ye̱so se̱st bo̱ na̱, “Za a̱ra̱m alla an matin o a̱n ko̱tin da. I rema̱n na kwesata we̱sa̱m Na’Sil baa ru. 4I ke̱ng na gadese i’hwen na em yomka kan comain me. Gyop lan, daava̱n noc zatina̱n la̱a̱ a̱n em a’yomk da. 5Daava̱n m retina̱n copun yanda̱hna, i mi a̱n rein za̱nda̱n copun yanda̱hna.”9:5 Go̱t ta̱m: Mat 5:14; Yoh 8:12.
6An Ye̱so vattin taanlo, u pisk c’te̱i nu’copo. U we̱ga̱lk c’hwin a̱n te̱ic ne, u swikiki pom a̱n isa̱. 7U zeta bo̱ o, “Nok a̱v sapt a̱n dwa̱a̱ka̱n Silo̱m.” (Rina̱n rein Silo̱m, iu comkai.) A̱rmune havk u saptka. U gyuiz la nu’he̱no.
8A̱n daava̱n lo, an e̱s ru a an lain ta he̱n o a̱n kona, a zeka, “Za ho a̱rm uha̱n a̱n lain tu soot a̱n kon da?”
9Ahyan zeka, “I unwa ge̱!”
Ahyan zeka ta̱ma̱, “I kan hyo̱o̱m ru.”
A̱ra̱m se̱sk la na̱, “I mi ge̱.”
10Rema̱n taanl neta̱n ipkk o, “I’le̱e̱le̱ a̱n na a̱ba̱sta̱in is rovo?”
11U se̱sk ta̱m na̱, “I nocuna̱n nan po̱g Ye̱so a̱n we̱glin c’hwin u swikiki m a̱n isa̱. U be̱se̱ u ze az a̱m hav a̱n dwa̱a̱ka̱n Silo̱m a̱m sapta. A̱m havk la m saptka. A̱m he̱nk la.”
12A ipkt bo̱ ta̱m o, “Pe̱ha̱n o?”
U se̱st bo̱ na̱, “A̱m ta nap bo̱ da.”
Farisin ipkk kan lain poma
13A savt bo̱ a̱rmuna̱n lain de̱ha̱n pom baa Farisini. 14I a̱n hweda̱ d’hwera la a̱n Ye̱so we̱glin c’hwin u a̱ba̱sta̱ is poma. 15An ba̱tksa̱m na s’giira sudk ta̱m ipka̱m ru ho̱da̱na̱n na taastin o m’poma. U zeka na̱, “U swiki-swiki m c’hwin a̱n isa̱. A̱m saptka. A̱m el la nu’he̱no.”
16Farisin hyan zeta bo̱, “A̱ra̱m uha̱n za u Na’Sil da. Rema̱n u ta gab giiraun hweda̱ d’hwera da.”
Ahyan ipkt bo̱ ta̱ma̱, “I’le̱e̱le̱ a̱n noc ka c’ko̱t tu emt goon he̱tca̱ hna?” Hid na̱ wankske.
17A sudk a̱n ipk ta̱m pomune, “Iye̱ a̱n va ze da̱n noc uhna, ai retin u a̱ba̱ska̱ is rovo?”
U se̱sk na̱, “I unwa k’barav Na’Sila̱.”
18Hwenga̱nc Yahude̱n ta se̱s la az u lak de̱ha̱n poma, a̱nta̱ma̱ la, u el nu’he̱n da, a za aa po̱gto̱in an matin o da. 19A ipkt bo̱ an matin o, “I waav no hne? I unwa ha̱n a̱n zein az a̱n matk u pomke? I’le̱e̱le̱ kaa i taktain u lat nu’he̱n a̱nta̱ma̱?”
20An matin o zeta bo̱, “C napk az i unwa waav co. C napk ta̱m az i pom a̱n na matin o. 21Ho̱da̱na̱n i taktain u he̱nt a̱nta̱ma̱, ca nap bo̱ da. Ca nap la ta̱m un a̱ba̱sa̱in is ru da. U za waark da, ipk na o. Tu ve̱ce̱ no.” 22An matin o vat-vat taanl rema̱n gelva̱n hwenga̱nc Yahude̱ne̱. Yahude̱n baask a se̱e̱pske̱ az nocuna̱n vatin a̱n nwa̱a̱’a ru, az i Ye̱so a̱n rein Ka̱risti, nan vog o d’kal a̱n ka̱bda̱n kargad Yahude̱ne̱. 23I rina̱n de̱lin bo̱ an matin o zeta, “U za waark da, ipk na o.”
24A ryaak hwic a sudk ta̱m a̱n po̱go̱ a̱rmuna̱n lain poma. A zeka o, “Gel A’Sil a̱v vat m’ga̱u. Rema̱n c napk az a̱rm uha̱n un taasin va̱ m’poma, i ka c’ko̱to.”
25U se̱st bo̱ na̱, “Az i unwa ka c’ko̱te alla za ka c’ko̱t da, a̱m ta nap bo̱ da. Rihi i’da̱nka̱ a̱m napine. A̱m lak de̱ha̱n poma, a̱nta̱ma̱ a̱m el nu’he̱no.”
26A sudk ta̱m a̱n ipk o, “Iye̱ u emain vo? I’le̱e̱le̱ u a̱ba̱sta̱in is rovo?”
27U ipkk na̱, “A̱m baask a̱m ve̱ce̱ke̱ no, a̱n ta kab la da. I rema̱n ye̱ a̱n to̱ntin az a̱n sud a̱n honga? A̱n to̱n-to̱n a̱n vaak an la̱a̱s baa ru?”
28A hulka̱lt bo̱ o, “I vo bo̱ a̱n rein kan la̱a̱s baa ru. Cwan bo̱ i an la̱a̱s baa Mosa. 29C napk az Sila iga̱msk Mosa. A̱rm uha̱n la, ca nap va̱na̱n u rwa̱in da.”
30A̱ra̱m se̱st bo̱ na̱, “Go̱t ha̱n bo̱ kaa rin sipa̱m na’nwa̱a̱. Az a̱n ta nap va̱na̱n u rwa̱in da. Go̱t la u a̱ba̱ska̱ is ri. 31Na napk la kwe̱ az Sila za ta hong a c’ko̱t da. I kan tu hong gela̱v Na’Sila̱, u em ta̱m to̱nu na̱, a̱n Sila ta honga. 32Lanma̱n takboda̱n copun yanda̱hna, a̱n na tak a̱n hong az noc a̱ba̱ska̱ is nocuna̱n na matin pom da. 33Awaz a̱rm uha̱n za be̱ u Na’Sil da, au la̱a̱ be̱ a̱n em rihica̱ ha̱n da.”
34A se̱st bo̱ ta̱m o, “Vouna̱n na matin na guba̱sa̱ ta̱m a̱nmi c’ko̱to, vo a̱n ta̱’v la̱a̱sa̱ co?” A vogk o d’kal a̱n ka̱bda̱n kargad na̱.
Pomma̱ d’hormo
35Ye̱so hongt bo̱ az na vogk a̱rmun d’kal a̱n ka̱bda̱n kargad na̱. Au he̱ntin o, u ipkk o, “A̱v batk d’ba̱t baa Waav Noce?”
36A̱rmun ipkt bo̱ ta̱m Ye̱so, “Kanubu, i unwa we̱? Ve̱ce̱ me, bat ta̱’m bat d’ba̱t baa ru.”
37Ye̱so se̱sk ta̱m o, “A̱v baask a̱v he̱nk o. I unwa ta̱m a̱n reina̱n iga̱msa̱m rovo.”
38U zeta bo̱, “Kanubu, a̱m batk bo̱ kaa d’ba̱ta̱.” U emaz Ye̱so c’hwiipsa̱.
39Ye̱so zeta bo̱, “I rema̱n gedma̱n lalk a̱m hatain a̱nmin copun yanda̱hna. Bat an zain ta he̱n da, a he̱ne̱. An ta he̱n la, na vaaksa na̱ pomna.”
40Farisin hyan an lain baa ru hongk lalksa̱ hna. A ipkt bo̱ o, “C la bo̱ kaa pomne?”
41Ye̱so se̱st bo̱ na̱, “An kab be̱ az i nwaa pomna, a̱n zatta be̱ d’ko̱t da. A̱nta̱ma̱ la, a̱n zek az a̱n el ta̱n he̱ne̱. Rema̱n taanlo, ko̱tc no eska.”
10C’Hwennsa a̱n kac’go̱te
1“Lag na a̱m ve̱ce̱te̱ no m’ga̱u. Kan ta gabin d’hut u uvt a̱n kurk kyo̱o̱ma̱n da, u gaba kaa ga̱l hyan, o̱pun lo, i hivi ta̱m i ka c’rumu. 2Kan tu gaba la d’hut u uvta̱, unwa a̱n rein kan go̱teca̱n kyo̱o̱mno̱. 3I unwa a̱n ka s’rega̱d tu a̱ba̱sa̱ d’hutu. Kyo̱o̱ma̱n napk ta̱m goda̱v ru. Tu po̱g kyo̱o̱ma̱n ru a̱n dinc na̱. U gaa ta̱m hwic ta gabo, u rut na̱. 4Au rut kyo̱o̱ma̱n ru, tu gaa hwici. Kyo̱o̱ma̱n ta gabo o, rema̱n a napk goda̱v ru. 5A ta tak a̱n gab k’hamc da. Ta som o, rema̱n a ta nap goda̱v ru da.” 6Ye̱so emaka na̱ hwennsaca̱ hna. A ta ke̱e̱se̱ la rihica̱n cu ve̱ce̱in na̱ da.
Ye̱so i kac’go̱te u kasi
7Ye̱so sudk ta̱m a̱n ze na̱, “Lag na m ve̱ce̱te̱ no m’ga̱u. I mi a̱n rein huta̱d kyo̱o̱mno̱. 8An bain m u’noka kwe̱, i hivni, a c’rum ta̱ma̱. Kyo̱o̱ma̱n ta hong la na̱ da. 9I mi a̱n rein d’hutu. Koowe̱ a̱n tu gab hutda̱ ha̱n u uvti, nan gwa̱a̱ o. Tu uvu, u rwa̱a̱ pa̱ra̱ra̱, u kum ta̱m c’ta̱a̱gu. 10Hiv la tu han rem d’hivi, d’hwee, a u’naasa̱n ta̱ma̱. Mi la m haka rema̱n a̱n po̱tte, a̱n po̱t ta̱m d’kala.
11“I mi kac’go̱te u kasi. Kac’go̱te u kasi el tu cod hid ru rema̱n kyo̱o̱ma̱n ru. 12Kac’go̱te la rem na copt o, un kyo̱o̱ma̱n zain a ru da, au he̱ne̱ o̱mva̱ d’kad zo̱lko̱, tu lag kyo̱o̱ma̱n u soma. O̱mva̱ d’kad tu sip kyo̱o̱mno̱, u va̱nksa̱ ta̱m na̱. 13Kan yomkan kind tu som rema̱n na la nan cop o, u ta wass ta̱m a kyo̱o̱mnan lon da.
14“I mi a̱n rein kac’go̱te u kasi. A̱m napk kyo̱o̱ma̱n ri, kyo̱o̱ma̱n ri napk la me. 15Ho̱da̱na̱n Cetok naptin me, i ho̱da̱n lo bo̱ a̱m naptin K’Ceto. Ta̱’m cod ta̱m hid ri rema̱n kyo̱o̱mno̱.10:15 Go̱t ta̱m: Mat 11:27; Luk 10:22.16A̱m ci ta̱m kyo̱o̱ma̱n hyan an zain baan bugda̱ ha̱n da. I ke̱ng a̱m karga̱vsa na̱, a ge̱ne̱ m u’con. A soot d’bug d’da̱nka̱, kac’go̱te ta̱m uda̱n.
17“I rina̱n Cet me retin bo̱ tu to̱n me. Rema̱n ta̱’m cod hid ri, a̱m vaak a̱m po̱t ta̱ma̱. 18Noc za un tu hweks hweed ri da, a za am to̱nk da. A̱m ci m’we̱s a̱m lag na hwaa me. A̱m ci ta̱m m’we̱s a̱m vaak a̱m po̱to̱. I rina̱n Cet me zein ha̱n az a̱m ema.”
19Au vattin taanlo, hid Yahude̱n wankske. 20Ahyan hwe̱di baa na̱ zeka, “U ci rinnas’ce, naam vosk ta̱m o. I rema̱n ye̱ a̱n retina̱n ge̱ne̱m ru u’con?”
21Ahyan zeka la, “Za lalks kan rinnas’ce ha̱n bo̱ da. Rinnas’ce ta taas noc m’pome?”
Yahude̱n ta bat d’ba̱t da
22Daava̱n he̱tda̱n bakasama̱n kwa̱a̱gca̱n buuk Na’Sil a̱n le̱in Urisalima ceka. I daava̱n yo̱o̱yo̱n ta̱ma̱. 23An Ye̱so latin na’ha̱gc a̱nmin buuk Na’Sil a̱n kabva̱n nan po̱g, varanda So̱lmo̱n, 24Yahude̱n haka a rigk o. A ipkk o, “I nama kaa a̱n ta̱’v hwerasa co s’lana? Awaz i vo a̱n rein Ka̱risti, ve̱ce̱ co a̱ncass.”
25Ye̱so se̱st bo̱ na̱, “A̱m baask a̱m ve̱ce̱ke̱ no, a̱n ta kab la da. Yomkca̱n m rein nu’emka̱l a̱n dind Cet me, ca̱n kwesa az i me we̱. 26Nwaa la a̱n ta bat d’ba̱t baa ri da, rema̱n a̱n za kyo̱o̱ma̱n ri da. 27Kyo̱o̱ma̱n ri napk goda̱v ri. A̱m napk na̱. A el ta̱m ta gab me. 28Ta̱’m po̱to̱so̱ na̱ d’kala, a ta wa̱a̱ da cakk. Noc za la un tu rum na̱ a̱n komc ri da. 29Cet me u’na̱n nesin m na̱nna, u pa̱tk kooye̱. Noc za ta̱m un tu hweks a̱n rum na̱ a̱n komc Cet me da. 30Mi a K’Ceto no, i rihi i’da̱nka̱.”
31Yahude̱n o̱mto̱ bo̱ c’taar az ta bonga̱l o. 32Ye̱so ipkt bo̱ na̱, “A̱m emk damra c’he̱t hwe̱di lanma̱n baa Cet me ta̱n he̱nte. I rema̱n ye̱ he̱tca a̱n ya bonga̱lt me?”
33Yahude̱n se̱st bo̱ o, “Za rema̱n he̱tca̱ ha̱n a̱n ca bonga̱lt a̱v da. I rema̱n a̱v ela̱vsko A’Sila̱. Go̱t i vo noco, a̱v vaakska la hid rov A’Sila̱.”
34Ye̱so se̱st bo̱ na̱, “I za ho a’ge̱n a̱nmi s’giira, az Sila zeka, ‘I nwaa Sila rekan da’?10:34 Go̱t ta̱m: Zab 82:6.35Awaz Sila po̱gk au emain lalksa̱ ha̱n, Sila rekanne, na napk la az a nan vodasa lalks Na’Sil da. 36I’Le̱e̱le̱ bo̱ kaa a̱n ta̱n zet az nocuna̱n Sila dagin a ka̱a̱sa̱, a coma ta̱m o a̱nmin copun yanda̱ha̱n, az u el a̱n ela̱vsoc Na’Sila̱? Rema̱n u zek az, ‘I mi Waav Na’Sila̱?’ 37Awaz za yomka Cet me a̱m rein nu’em da, an kab la lalk ri da. 38Waz la az i na̱nna, awaz a̱n ta bat d’ba̱t baa ri da, bat na d’ba̱t rema̱n he̱tc ne. I bat ta̱n napa, a̱n bat ta̱m d’ba̱t az Cetok el a̱nmi baa ri, mi ta̱m a̱nmi baa ru.”
39Rema̱n taanlo a to̱nk be̱ ta̱m a sip o. U to̱o̱t bo̱ u lagk na̱.
40Ye̱so to̱o̱k ta̱m u havk rigta̱n ge̱nka̱n Jodan. U cek va̱na̱n Yohana takain emam na baptisma, u sootk a̱n a̱n’a.10:40 Go̱t ta̱m: Yoh 1:28.41Neta̱n haka baa ru hwe̱di. A zeka ta̱ma̱, “Yohana ta em c’he̱t da. Go̱t la rina̱n Yohana zein kwe̱ in tanin noc uha̱n, i m’ga̱u.” 42Neta̱n hwe̱di an lain a̱n a̱n’a, a batk d’ba̱t baa ru.
11Wa̱a̱’a Lazaru
1Noc lak un nan po̱g Lazaru un la̱tin gaago. I noc va̱n hergun Betani, le̱i Me̱e̱ri na ha̱nu Matta. 2(I Me̱e̱ri unlo, un bo̱ntso̱in Ye̱so nevma̱ d’ha̱ngu, u pink o ta̱m s’naa a̱n his ru. I ha̱nu Lazaru a̱n lain a’la̱t a̱n gaago.)11:2 Go̱t ta̱m: Yoh 12:3.3Ha̱nun yaa’yantan cwemata bo̱ Ye̱so. A zeka, “Kanubu, go̱t bo̱ barav rovo, ka v rein ta̱’v to̱no̱, u el a̱n gaago.”
4Daava̱n Ye̱so hongtin tan, u zeka, “Gaag uha̱n au caa na’wa̱a̱ da. I rema̱n na ne̱e̱t A’Sil k’gwin. Bat ta̱m Waav Na’Sil tu kum k’gwin.”
5Ye̱so el tu to̱n Matta a̱n ha̱nu Me̱e̱ri a Lazaru nu. 6Au hongtin az Lazaru el a̱n gaago, u suduz a̱n la̱va̱ c’hwe c’il baa nu laine. 7An hweca̱n lo to̱o̱tine, u zeka an la̱a̱s baa ru, “Na vaak na copun Judiya.”
8An la̱a̱s baa ru zeta bo̱ o, “Kan la̱a̱sa̱m na lalks Na’Sila̱, i hweca̱ ha̱n a̱n Yahude̱n lain ya bonga̱l vo. Ta̱’v vaak ta̱m a̱n a̱n’a?”
9Ye̱so se̱sk na̱, “I’Hwen, za ho s’ho̱r oopa a̱n s’il da? A noc em a’ha̱gc ni’hwen, au pa̱gisi da, rema̱n tu he̱n za̱nda̱n copun yanda̱hna. 10A noc em la a’ha̱gc a̱n gyopo, tu pa̱gisi. Rema̱n u za a̱n he̱na̱m d’za̱n da.”
11Au vattin rihica̱ hna, u zeka na̱, “Barav cinna Lazaru el na̱m’la̱va̱. Ta̱’m hav la, bat ta̱’m pa̱dksa̱ o.”
12An la̱a̱s baa ru sudt bo̱ a̱n ze, “Kanubu, awaz i la̱vma u retine, ti taa o.”
13Ye̱so tana-tana la wa̱a̱’a Lazaru. A̱n’a la, a lak na̱m’ze az i magda̱ m’la̱va̱.
14Ye̱so ve̱ce̱te̱ bo̱ na̱ a̱ncass, “Lazaru uku. 15A̱m emk la c’za̱ngkta̱ rem no am ta latin a̱n a̱n’a da, bat ta̱n bat d’ba̱ta̱. Puti a tan na, na hav na baa ru.”
16Toma, un nan po̱g ta̱m waa’rusu, zeuz hyaaron an la̱a̱s baa Ye̱so, “C nok na. A to̱n na wa̱a̱ d’kut a unwa na.”
Ye̱so a̱n rein u’po̱to
17Daava̱n Ye̱so cetaine, u gatka Lazaru baask u la̱vk c’naas nu’sago. 18Betani ta caa nakma̱n s’me̱l s’il lanma̱n le̱in Urisalima da. 19Rema̱n taanlo Yahude̱n hwe̱di haka baa Matta na Me̱e̱ri a ko̱nlsto̱ na̱ rema̱n wa̱a̱’a ha̱na na̱.
20An Matta hongtin az Ye̱so bo̱pk a̱n can, u ruk u gwaanta o. Me̱e̱ri la, u sootk nu’bu. 21Matta zeta bo̱ Ye̱so, “Kanubu, av wa be̱ tahna, lak be̱ ha̱n mi ta wa̱a̱ da. 22A̱m napk la v’daa ge̱, kooye̱ v konin A’Sila̱, Sila ta ne̱e̱ v inya.”
23Ye̱so zeta bo̱ o, “Ha̱n a̱v tu po̱to̱.”
24Matta se̱st bo̱ o, “A̱m napk az Sila ta po̱to̱so̱ o buka, a̱n hweda̱ d’be̱se̱.”
25Ye̱so zeta bo̱ o, “I mi a̱n ta̱’m po̱to̱so̱ an wa̱ini. I mi ta̱m a̱n rein u’po̱to. Koowe̱ a̱n batin d’ba̱t baa ri, au wa̱a̱, tu po̱to̱. 26Koowe̱ ta̱m a̱n reina̱n s’hobo, un batin d’ba̱t baa ri, au wa̱a̱ wa̱a̱’a d’kal da cakk. A̱v batk d’ba̱t baa ri?”
27Matta se̱st bo̱ o, “Ha̱! Kanubu. A̱m batk d’ba̱t az i vo a̱n rein Ka̱risti, Waav Na’Sil u’na̱n ge̱be̱se̱in u han a̱nmin copun yanda̱hna.”
Ye̱so o̱nko̱
28An Matta vattin taanlo, u havk u po̱gko̱ ha̱nu Me̱e̱ri m’ze̱se̱. U zeka o, “Kanubu ceka. U to̱nk u he̱n vo.” 29An Me̱e̱ri hongtin tan, u unuku a̱ndaabe u nok baa Ye̱so. 30A̱n daava̱n lo, Ye̱so ta hwesa uva̱ ni’le̱e̱ da. U lak v’daa va̱na̱n Matta gita̱in o. 31Yahude̱n an lain a̱nmi nu’bu a̱n ko̱nlso̱m Me̱e̱ri, aa he̱ntin u unuku a̱ndaabe u ruku, a gabk o. A lak na̱m’ze az wa hav baa nu’sag u o̱nte.
32Me̱e̱ri cet bo̱ va̱na̱n Ye̱so reine. Au he̱ntin Ye̱so, u hek a̱n naas ru. U zeka o, “Kanubu, av la be̱ tahna, ha̱n mi a tu wa̱a̱ be̱ da.”
33An Ye̱so he̱ntin o a̱n s’o̱n, a Yahude̱n an gabain ta̱m o a̱n s’o̱n, u sikka̱. De̱bc naak ta̱m o hwe̱di. 34U ipkt bo̱ na̱, “Ipe̱ a̱n na sagin o?”
A se̱sk la o, “Kanubu, noka v he̱nte.”
35Ye̱so o̱nt bo̱. 36Yahude̱n zeta bo̱, “Go̱t na ho̱da̱na̱n u retina̱n to̱nc ru.”
37Ahyan zeta bo̱, “U taask a̱ra̱m m’poma. A tu taas be̱ ta̱m a̱rm uha̱n gaag u hol o a̱n wa̱a̱ da?”
Ye̱so po̱to̱sko̱ Lazaru
38Ye̱so cek baa nu’sag c’de̱b c’naake. Sagune, i a̱n pa̱kk k’taare. Na zo̱pk o ta̱m nu’taare. 39Ye̱so zeta bo̱ na̱, “He̱lkse̱ na u’taare.”
Matta, ha̱n kan wa̱in zeka la o, “Kanubu, u za̱mk a̱nta̱ma̱. Rema̱n u la̱vk c’naas na’wa̱a̱.”
40Ye̱so ipkt bo̱ la o, “A̱m ta ve̱ce̱ ha̱n vo, az av bat d’ba̱t baa ri, ta̱’v he̱n gwink Na’Sil da?”
41A he̱lkste̱ bo̱ u’taar baa nu’sago. Ye̱so wa̱lkt bo̱ a’cona. U zeka, “Cet me, a̱m bo̱mk vo av baastin a̱v hongk me. 42A̱m napk ta̱m az a̱v el ta̱’v hong a̱m kooye̱ daava. I rema̱n netna ha̱n la an rein a’es a̱m vattin tan. I bat ta bat d’ba̱t az i vo a̱n comain me.” 43Au taastin s’lalk taanlo, u ze̱lk v’god na̱m’we̱se̱, “Lazaru! Rwa̱n ha.” 44Kan lain u uk ruka̱ u alka̱lk kwe̱ a̱n kuska̱n zila̱m d’wa̱a̱. Na bitiski ta̱m cu’a ru a̱n d’kusu. Ye̱so zeta bo̱ na̱, “Buta̱msa̱ na o bat tu to̱o̱.”
Yahude̱n hobk a hwaa Ye̱so
(Mat 26:1-5; Mar 14:1-2; Luk 22:1-2)
45Rema̱n taanlo Yahude̱n hwe̱di an hain baa Me̱e̱ri, an he̱nin ta̱m rihica̱n Ye̱so emine, a batk d’ba̱t baa ru. 46Ahyan to̱o̱k la a havk baa Farisin a ve̱ce̱ke̱ na̱ da̱n rihica̱n Ye̱so emka̱llin ne. 47C’Hwengnan ka̱bd Na’Sil a Farisin po̱gt bo̱ merad ka̱nk an gedma̱n lalk a zeka, “Iye̱ a̱n nan ema? Rema̱n a̱rm uha̱n el a̱n emma̱ c’he̱t hwe̱di. 48A na lag o u ryaak hwic ho̱d uhna, neta̱n kwe̱ ta bat d’ba̱t baa ru. An Roma ta han ta̱m a rum na buuk Na’Sil a u’cop no.”
49Da̱nv na̱ un nan po̱g Kayafa, ai retin i unwa a̱n rein d’hweng va̱n ka̱bd Na’Sil a̱n we̱une, u zeka na̱, “A̱n ta nap rihi da cakk. 50I pitiki na na ze az noc v’da̱nka̱ uk rem cinna, a̱n na ze az netnan copu cinna u’biri, a uku.”
51Kayafa ta vat-vat la taanl a̱n we̱sma̱n hid ru da. Ai retin i unwa a̱n rein d’hweng va̱n ka̱bd Na’Sil a̱n we̱une, u vatk com Na’Sil az Ye̱so tu wa̱a̱ rem netnan copun Judiya. 52Za la rem netnan copun Judiya c’taa da, i bat ta̱m tu karga̱vsa akna Na’Sil an na ba̱rgsa̱in koope̱ d’baa d’da̱n. 53Lanma̱n hweda̱n lo, hwenga̱nc Yahude̱n se̱e̱pske̱ ho̱da̱na̱n ta hot Ye̱so. 54Rema̱n taanlo, Ye̱so ta em ta̱m a’ha̱gc baa Yahude̱n koowe̱ tu he̱nt o da. U havk a̱n copuna̱n rein d’viivi a copu k’mam na, a̱n le̱ina̱n nan po̱g Ifraima. U sootk a̱n a̱n’a a an la̱a̱s baa ru nu.
55An he̱tda̱n Paska a̱d Yahude̱n bo̱ptina̱n can, neta̱n hwe̱di lagka herge a havk a̱n le̱in Urisalima a valt canma̱n hweda̱n he̱tda̱n Paska, bat ta walg hid na̱. 56A takta bo̱ hob Ye̱so. A emk ta̱m s’lan a̱n a̱n’na̱n a̱n’na̱ aa retin a’es a̱n gwen un buuk Na’Sila̱. A zeka “Tu han ba̱ru baa d’he̱te̱ alla au han da?” 57A̱n daava̱n lo, c’hwengnan ka̱bd Na’Sil a Farisin ni, a baask a ba̱sk az koowe̱ a̱n napin va̱na̱n Ye̱so reine, u kwesa na̱ bat ta sip o.
12Na bo̱ntsko̱ Ye̱so m’nev
1An he̱tda̱n Paska kustin c’hwe c’cihin, Ye̱so havk le̱in Betani va̱na̱n Lazaru, un Ye̱so po̱to̱so̱in rein a̱n d’sooco. 2Na emaka Ye̱so ryaakca̱n gyop a̱n a̱n’a. I Matta ta̱m a̱n wankine. Lazaru lak ta̱m baa an sootina̱n c’ryaak a Ye̱so no. 3A̱n daava̱n lo, Me̱e̱ri o̱mko̱ battaka̱n neva̱m d’ha̱ng ma̱n ceun nard, ma̱n kind hwe̱di. U bo̱ntsko̱ Ye̱so ma̱nma a̱n s’naa. U vaak u pink naas ru a̱n his ru. Buu ga̱ma̱nka̱ kwe̱ a̱n kosa̱n d’ha̱ngu.12:3 Go̱t ta̱m: Luk 7:37-38.
4Da̱nv an la̱a̱s baa Ye̱so, un nan po̱g Yahuda Iskariyo̱ti, waav Simo̱n, un tu bab Ye̱so, ta hong d’ke̱m da. U zeta bo̱, 5“Iye̱ a̱n na babtin neva̱m d’ha̱ng ma̱ha̱n ko̱m pusin s’za̱ngu s’ta̱a̱c na we̱nke̱ kobneta̱nn da?” 6U vat-vat la taanlo za rema̱n u wassk a kobneta̱n da. I rema̱n i unwa hivi. I unwa ta̱m kan kinbuda̱n kindi, u el ta̱m tu kas tu hwaa.
7Ye̱so zeta bo̱, “Lag na o a̱n c ru. Lag na o. U kin-kin neva̱m d’ha̱ng ma̱ha̱n rema̱n walgca̱n hweda̱n nan sagt me. 8Kobneta̱n el baa no kooye̱ daava. Mi la a ta̱’m mal baa no da.”
Kwe̱e̱ma̱n hweed Lazaru
9Yahude̱n hwe̱di kumt bo̱ s’nap az Ye̱so el a̱n le̱in Betani. A hata bo̱, za rem ru c’taa da, i rema̱n ta̱m a he̱nt Lazaru kan u po̱to̱so̱ine. 10C’Hwengnan ka̱bd Na’Sil buut bo̱ s’lan az a hwaa Lazaru ta̱ma̱. 11A zek az i rem ru a̱n Yahude̱n hwe̱di rutin bugd na̱. A havt kaa a bat d’ba̱t baa Ye̱so.
Ye̱so uvk ni’le̱e̱ ho̱d go̱mo̱
(Mat 21:1-11; Mar 11:1-11; Luk 19:28-40)
12Na̱m’zanta, neta̱n hwe̱di an hain baan he̱tda̱n Paska hongk az Ye̱so tu uva̱ le̱in Urisalima. 13A o̱mko̱ za̱tsa̱n cesa̱n hyan a havk ta̱m a gwaanta o. A ze̱lk s’god a zeka,
“C’Bo̱m baa Na’Sila̱!
Sila emaka un lain na̱m’han
a̱n dind Na’Sila̱!
Sila emaka go̱m va̱ Isra’ila!12:13 Go̱t ta̱m: Zab 118:25,26.
14An Ye̱so kumtin d’waa janka, u sakk a̱n da̱nda. I ho̱da̱na̱n i retin a’ge̱ne̱,
15‘An hong la v’gel da
nwaa an Zaayo̱n,12:15 Go̱t ta̱m: Zak 9:9.
go̱t bo̱ go̱m va̱ no na̱m’han
a sak a̱n d’waa janka.’ ”
16Daava̱n rihica̱ ha̱n emtine, an la̱a̱s baa Ye̱so ta ke̱e̱se̱ ca̱ da. I daava̱n Ye̱so kumtin k’gwin an Sila po̱to̱sto̱in o, i baktain na̱ az na ge̱nk rihica̱ ha̱n ca̱n tanin o. Na emaka ta̱m o ca̱nca kwe̱.
17Netnanan lain baa ru daava̱n u po̱to̱sto̱in Lazaru, u po̱gto̱ o u rwa̱n lanm nu’sago, a ryaak hwic a̱n ba̱rgsa̱ma̱n lalks ne. 18Neta̱n hwe̱di an hongin u emk he̱tca̱ hna, a haka baa Ye̱so. 19An ba̱tksa̱m na s’giira zeta bo̱ hyannana̱, “Rihica̱ ha̱n za bo̱ a̱n sava̱m na d’baa da. Go̱t ho̱da̱na̱n an copun yanda̱ha̱n gabtin o kwe̱.”
An zain Yahude̱n da hobk Ye̱so
20A̱n daava̱n lo, ahyan an zain Yahude̱n da lak baa an hain a emt c’hwiipsa̱ baan he̱ta̱d ne. 21A haka baa Filip kan Be̱tsaida a̱n copun Galili. A konk o, “Kanubu, c to̱nk he̱na̱m Ye̱so.”
22Filip havt bo̱ u ve̱ce̱ Andarawus. Andarawus na Filip havt bo̱ ta̱m a ve̱ce̱ Ye̱so. 23Ye̱so se̱st bo̱ na̱, “Ho̱ra̱v ceka va̱n nan ne̱e̱t Waav Noc k’gwin. 24Lag na a̱m ve̱ce̱te̱ no m’ga̱u. A za yaanva̱n hii hek nu’cop a̱v wa̱a̱ da, ta̱’v mal va̱nva v’da̱n. Av wa̱a̱ la, ta̱’v mat yaan hwe̱di. 25Koowe̱ a̱n to̱nin po̱tu ru, tu rob o. Koowe̱ la a̱n ha̱lin po̱tu ru a̱nmin copun yanda̱hna, tu kin o caama̱n po̱tu d’kala.12:25 Go̱t ta̱m: Mat 10:39; 16:25; Mar 8:35; Luk 9:24; 17:33.26Koowe̱ a̱n tu ema m m’coko, i ke̱ng u gaba me. Va̱na̱n m rein ta̱ma̱, i a̱n a̱n’a a̱n coka̱n ri ta soota. Koowe̱ ta̱m a̱n reina̱n ema m ri m’coko, Cet me tu ne̱e̱ o k’gwin.”
Ye̱so tanka wa̱a̱’a ru
27“Horma̱d el a̱n buga̱m ri a̱nta̱ma̱. Iye̱ la a̱n ma ze? Ma ze-ze, ‘Cet me, gwa̱a̱ m baan ho̱rva̱n kobda̱n lavain me?’ A̱’a̱. I rema̱n ryaaka̱n kobda̱ ha̱n a̱m cetain ho̱rva̱ hna. 28Cet me, ne̱e̱ dind rov k’gwin.”
A̱n daava̱n lo, na hongk s’lalk lanm na’cona. Na zeka, “A̱m baask a̱m ne̱e̱k da̱ k’gwin. Ta̱’m sud ta̱m a̱n ne̱e̱ da̱ k’gwin.”
29Netnanan lain a’es a̱n a̱n’a an hongin godva̱ ne, a zeka, i v’te̱no. Ahyan zeka, i k’comta̱v Na’Sil a̱n iga̱msin o.
30Ye̱so zeka na̱, “Lalksa̱ ha̱n ta rwa̱n rem ri da, i rem no. 31A̱nta̱ma̱ a̱n na gedvain an copun yanda̱ha̱n lalko. I a̱nta̱ma̱ a̱n nan vog kan go̱mca̱n copun yanda̱ha̱n u rwa̱a̱ na’isa̱. 32Mi la, a na ze̱l a̱m lanm nu’copo, ta̱’m karga̱vsa neta̱n kwe̱ baa ri.” 33U vatk taanl u kwesata goon wa̱a̱’anan tu wa̱a̱.
34Bugda̱n neta̱n se̱st bo̱ o, “C hongk lanma̱n giira az Ka̱risti tu mal d’kala. I’le̱e̱le̱ kaa a̱n va zeta, ‘Ke̱ng na ze̱l Waav Noco?’ Iwe̱ a̱n rein Waav Nocune zo?”12:34 Go̱t ta̱m: Zab 110:4; Isa 9:7; Izi 37:25; Dan 7:14.
35Ye̱so zeka na̱, “I v’daa ca̱nmi a̱n za̱nd rein baa no. Em na a’ha̱gc daava̱n citin d’za̱n, a cumunkunni han la i biti no da. Rema̱n koowe̱ a̱n rein na’ha̱gc ni’cumunkunnu, a tu nap va̱na̱n tu hav da. 36Bat na d’ba̱t baa d’za̱n daava̱n a̱d retin baa no, bat ta̱n soot akna d’za̱n.” Daava̱n Ye̱so vattin rihica̱ hna, u to̱o̱k u havk u hokk na̱.
Yahude̱n ta bat d’ba̱t da
37Go̱t ge̱ u emk c’he̱t hwe̱di a̱n hwic na̱, v’daa ge̱, Yahude̱n ta bat d’ba̱t baa Ye̱so da. 38I em-em taanl bat nan esasa rina̱n Isaaya k’barav Na’Sil vatine. U zeka:
“A’Sila̱, iwe̱ a̱n kabin rina̱n c vatine?
I baa we̱ ta̱m a̱n Sila kwesain we̱sa̱m na̱?”12:38 Go̱t ta̱m: Isa 53:1.
39Rema̱n taanl a ta la̱a̱ a̱n bat d’ba̱t baa Na’Sil da. Rema̱n Isaaya sudk ta̱m a̱n ze:
40“U pomsk na̱.12:40 Go̱t ta̱m: Isa 6:10.
U celaska ta̱m de̱bc na̱
rema̱n aa he̱n la a̱n is na̱n da.
Alla ta̱m a ke̱e̱se̱ a̱nmin de̱bc na̱,
a panka baa ri bat ta̱’m taas na̱ gaag na̱ da.”
41Isaaya vat-vat rihica̱ ha̱n rem u he̱nk gwink Ye̱so, u tanka ta̱m o.
42Puti a tan na, neta̱n hwe̱di d’kut a damra-damran go̱mgo̱mno̱, a batk d’ba̱t baa Ye̱so. Rema̱n gela̱v Farisin la, a ta vat az a batk d’ba̱t baa Ye̱so da. A el na̱v’gel az Farisin ta vog na̱ d’kal a̱n ka̱bda̱n kargad Yahude̱ne̱. 43A pa̱tk nu’to̱n az neta̱n bo̱m na̱, a̱n Sila bo̱m na̱.
44Ye̱so ze̱lt bo̱ v’god u zeka na̱, “Koowe̱ a̱n be̱sse̱in m d’ba̱ta̱, za mi u be̱sse̱in d’ba̱t c’taa da. I ta̱m a kan comain me ne. 45Koowe̱ a̱n he̱nin me, u he̱nk kan comain me. 46A̱m uvka̱ ho̱d d’za̱n a̱nmin copun yanda̱ha̱n bat koowe̱ a̱n batin d’ba̱t baa ri, a tu soot a̱nmi ni’cumunkun da.
47“Koowe̱ a̱n hongin lalks ri, u ha̱l a̱n kaba, a ta̱’m geda o lalk da. Rema̱n a̱m ta han a̱m gedata an copun yanda̱ha̱n lalk da, i rema̱n a̱m gwa̱a̱t na̱. 48Koowe̱ a̱n ha̱lin me, u ha̱l ta̱m a̱n kab lalks ri, u ci un tu geda o lalko. Lalksa̱ m vatine, i sa̱nsa ge̱ a̱n sa̱n geda o lalk buka, a̱n hweda̱ d’be̱se̱. 49Rema̱n za a̱n we̱sma̱n hid ri a̱m vattin lalksa̱ ha̱n da. Cetoka̱n comain me, i unwa a̱n tu ve̱ce̱ m rina̱n ta̱’m vata a ho̱da̱na̱n ta̱’m vatt e ne. 50A̱m napk la az giira ru tu de̱l noc kum po̱tu d’kala. Rema̱n taanlo, kooye̱ a̱m vatine, i rina̱n Cetok zein az a̱m vata.”
13Ye̱so saptk an la̱a̱s baa ru
1Ai kustin d’hwe d’da̱n i cet he̱tda̱n Paska a̱d Yahude̱ne̱, Ye̱so napk az ho̱ra̱v ru ceka va̱n tu lagt copun yanda̱ha̱n u vaak baa K’Ceto. U to̱nk aa ru an rein a̱nmin copun yanda̱hna. U to̱nk na̱ ta̱m caam d’be̱se̱.
2Aa latina̱n ryaakca̱n gyopo, A̱krimu baask u de̱le̱ke̱ Yahuda Iskariyo̱ti, waav Simo̱n, keka̱bsa̱n az u bab Ye̱so. 3Ye̱so napk az Cetok nesk o we̱sa̱m c’rihi kwe̱. U napk ta̱m az i baa Na’Sil u rwa̱ini, tu vaak ta̱m baa Na’Sila̱. 4U unutu bo̱ baa c’ryaako, u ho̱l kusi ru. U o̱mk ta̱m kusda̱n pinka̱m m’ho̱o̱ u gagk a̱n ba̱ya ru. 5Au taastine, u ke̱dk m’ho̱o̱ ni’hono. U takaz sapta̱m an la̱a̱s baa ru s’naa, tu pinkuz sa̱ a̱n kusda̱n pinka̱m m’ho̱o̱ da̱n u gagine. 6Au cetain baa Simo̱n Bitrus, Bitrus zeka o, “Kanubu, i vo ta̱m a̱n ta̱’v sapt a̱m s’naa?”
7Ye̱so se̱st bo̱ o, “A ta̱’v ke̱e̱se̱ rina̱n m rein nu’em a̱nta̱ma̱ da. Ta̱’v ke̱e̱se̱ e a̱n hwici.”
8Bitrus zeta bo̱ o, “A ta̱’v sapt a̱m s’naa da cakk.”
Ye̱so se̱st bo̱ o, “Am ta sapt a̱v da, a̱v zatta u’yob baa ri da.”
9Simo̱n Bitrus zeta bo̱ o, “Kanubu, za naas ri c’taa da, sapt a̱m c’koma, a̱v guz a̱m ta̱m d’hi.”
10Ye̱so zeka la o, “Koowe̱ a̱n baasin u zolka, i naasan nan sapt o c’taa, rema̱n u zatta c’lima̱l da. A̱n zatta la c’lima̱l da. Za la i nwaa kwe̱ a̱n zattain c’lima̱l da.” 11Rema̱n u baask u napk un tu bab o. I rina̱n de̱lin bo̱ u zeta, “Za nwaa kwe̱ a̱n zattain c’lima̱l da.”
12Au taastin sapta̱m na̱ s’naa, u vaakk u to̱pk kusi ru. U vaakk ta̱m u sootk baan sooca̱d ru. U zeka na̱, “A̱n pamaska bo̱ kaa rina̱n m emain no? 13A̱n el ta̱n po̱g a̱m ‘Kan la̱a̱sa̱m na’ a ‘Kanubu nu.’ A̱n vatk la honhono, rema̱n i taanl a̱m retine. 14Awaz kaa mi un rein kan buu no, a kan la̱a̱sa̱m no-no, a̱m saptk no s’naa, nwaa la bano, i ge̱be̱ske̱ a̱n sapt hyannanon s’naa. 15A̱m kwesa-kwesa no bat ta̱n ema hyannanon ho̱da̱na̱n m ematain no. 16Lag na a̱m ve̱ce̱te̱ no m’ga̱u. Cok za un tu so̱d kan buu ru alla k’comt un so̱din kan comin o da.13:16 Go̱t ta̱m: Mat 10:24; Luk 6:40; Yoh 15:20.17Awaz a̱n napk rihica̱ ha̱n, a̱n em ta̱m ca̱, ta̱n kum u’pusu.
18“Za nwaa la kwe̱ a̱m ciin da. A̱m napk am dagine. I rema̱n na esasta rina̱n ge̱nsa̱n lalks Na’Sil vatine, ‘Kan reina̱n c’ryaak d’kut a mi ni, u kwesaka m c’ha̱la̱.’13:18 Go̱t ta̱m: Zab 41:9.
19“A̱m taktak ve̱ce̱m no rihica̱ ha̱n a̱nta̱ma̱. Bat daava̱n ca̱n emte, ta̱n bat d’ba̱t az i mi a̱n rein Ka̱risti. 20Lag na a̱m ve̱ce̱te̱ no m’ga̱u. Koowe̱ a̱n kabin ka m comaine, i mi u kabine. Koowe̱ ta̱m a̱n kabin me, u kabk un comain me.”13:20 Go̱t ta̱m: Mat 10:40; Mar 9:37; Luk 9:48; 10:16.
Ye̱so vatk az nan bab o
(Mat 26:20-25; Mar 14:17-21; Luk 22:21-23)
21Daava̱n Ye̱so vattin taanlo, de̱bc naak o. U zeta bo̱, “Lag na a̱m ve̱ce̱te̱ no m’ga̱u. Da̱nv no tu bab me.”
22An la̱a̱s baa ru go̱tente bo̱, a el a̱n lansa̱n az iwe̱ u ciini. 23Da̱nv an la̱a̱s baa Ye̱so lak a’te̱nt a̱n gamt ru. I unwa ta̱m a̱n Ye̱so rein tu to̱n hwe̱di. 24Simo̱n Bitrus wegata bo̱ o az u ipk Ye̱so az iwe̱ u ciini.
25Kan lain a’te̱nt a̱n gamt Ye̱so ipkt bo̱ o, “Kanubu, iwe̱?”
26Ye̱so se̱st bo̱, “I kan ta̱’m nes d’hwii am hwa̱n s’to̱o̱.” Au hwa̱a̱tin la s’to̱o̱, u nesk Yahuda Iskariyo̱ti, waav Simo̱n. 27An Yahuda taastin k’ryaa, A̱krimu uvk a̱n de̱bc ru. Ye̱so zeta bo̱ o, “Rina̱n ta̱’v ema, em ha e a̱ndaabe.” 28A̱n na kum la noc baa k’ryaa un napin rina̱n de̱lin Ye̱so emata Yahuda s’lalk taanl da. 29Ai retin i Yahuda a̱n rein tu kin baida̱n kindi, ahyan baa na̱ lak na̱m’ze az Ye̱so ze-ze o ai u wan rihica̱n nan to̱n baa d’he̱te̱ alla u ne̱e̱ kobneta̱n rihi.
30Yahuda la, au yoostoin hwiid ne, u ruk a̱ndaabe. Gyop baask la u ribgka̱.
Ye̱so kaak giira poune
31Daava̱n Yahuda rutine, Ye̱so zeka, “I a̱nta̱ma̱ a̱n na guba̱sa̱in gwink Waav Noco. Sila kumk ta̱m k’gwin rem ru. 32Awaz Sila kumk k’gwin rem Waa, Sila ta ne̱e̱ Waa k’gwin a̱n hid na̱. I a̱ndaabe ta̱m a̱n ta ne̱e̱ o k’gwin.
33“Aka̱n ri, i v’daa ca̱nmi a̱n kusin a̱m el baa no. Ta̱n hob me. Ho̱da̱na̱n m baastin a̱m ve̱ce̱ke̱ Yahude̱ne̱, i ho̱da̱n lo bo̱ a̱n ta̱’m ve̱ce̱te̱ no a̱nta̱ma̱. Va̱na̱n ma hava, a ta̱n la̱a̱ a̱n han a̱n a̱n’a da.13:33 Go̱t ta̱m: Yoh 7:34.
34“I giira poune a̱m ke̱in no. To̱n na hyannano. Ho̱da̱na̱n m to̱ntin no, nwaa ta̱ma̱, to̱n na hyannano. 35I baan emma̱n taanl a̱n neta̱n kwe̱ ta napt az i nwaa an la̱a̱s baa ri, awaz a̱n to̱nk hyannano.”
Bitrus tu hyaa naps Ye̱so
36Simo̱n Bitrus ipkt bo̱ o, “Kanubu, ipe̱ a̱n va hava?”
Ye̱so se̱sk la o, “Va̱na̱n ma hava, a ta̱’v la̱a̱ v gaba m a̱nta̱ma̱ da. I a̱n d’hwen a̱n va gaba me.” 37Bitrus zeta bo̱ o, “Kanubu, i rema̱n ye̱ m zatina̱n gaba̱m rov a̱nta̱ma̱ da? Ta̱’m nes hid ri rem rovo.”
38Ye̱so ipkk la o, “Ta̱’v la̱a̱ a̱n wa̱a̱ rem ri? Lag a̱m ve̱ce̱te̱ va̱ m’ga̱u. Az ka̱c kant te̱nte̱, ta̱’v hyaa naps ri a’ta̱a̱cu.”
14Ye̱so le̱vka̱n caam K’Ceto
1Ye̱so zek an la̱a̱s baa ru, “A de̱bc naa la no da. Bat na d’ba̱t baa Na’Sila̱, a̱n bat ta̱m d’ba̱t baa ri. 2A̱n buu Cet me, kurc el hwe̱di. Awaz be̱ za taanl da, lawabe̱ m ve̱ce̱ke̱ no. Ta̱’m hav a̱m me̱mge̱ no d’baa. 3Am hav a̱m me̱mgske̱ no d’baa, ta̱’m vaaka a̱m o̱m no. I bat va̱na̱n m reine, nwaa ta̱m ta̱n soot a̱n a̱n’a. 4A̱n napk la va̱na̱n ma hava, a̱n napk ta̱m k’le̱ve̱.”
5Toma zeta bo̱ o, “Kanubu, ca nap va̱na̱n va hav da. I’Le̱e̱le̱ kaa a̱n ca̱n napt k’le̱ve̱?”
6Ye̱so zeta bo̱ o, “I mi a̱n rein k’le̱ve̱. I mi a̱n rein m’ga̱u. I mi ta̱m a̱n rein u’po̱to. Noc za un tu hav baa K’Ceto da a za u gabka m da. 7Awaz be̱ a̱n napk me, lawabe̱ a̱n napk Cet me. Lanma̱n daava̱ ha̱n la, a̱n napk o, a̱n he̱nk ta̱m o.”
8Filip zeta bo̱ o, “Kanubu, kwesa co K’Ceto. Av em taanlo, ti hyoo co.”
9Ye̱so zeta bo̱ o, “A̱m gosk baa no. V’Daa ge̱ a̱v ta nap a̱m da, Filip? Koowe̱ a̱n he̱nin me, u he̱nk K’Ceto. I rema̱n ye̱ kaa a̱v zetain, ‘Kwesa co K’Ceto?’ 10Filip, a̱v ta bat d’ba̱t az a̱m el a̱nmi K’Ceto, Cetok el ta̱m a̱nmi baa ri da? Lalksa̱ ha̱n sa̱ m reina̱n ve̱ce̱m no, za a̱n we̱sa̱m ri a̱m retina̱n vatma̱n sa̱nsa da. Cetoka̱n rein a’soot a̱nmi baa ri a̱n reina̱n emma̱n yomka ne. 11Kab na lalk ri am zetin az a̱m el a̱nmi K’Ceto, Cetok el la ta̱m a̱nmi baa ri. Alla ta̱m a̱n kab rema̱n yomkca̱ c’he̱t ca̱ m emka̱lline.
12“Lag na a̱m ve̱ce̱te̱ no m’ga̱u. Koowe̱ a̱n batin d’ba̱t baa ri, tu em rina̱n m emine. Tu em ta̱m rina̱n so̱din o̱p ca̱hna, rema̱n ta̱’m vaak baa K’Ceto. 13Kooye̱ ta̱m a̱n ta̱n kon a̱n dind ri, ta̱’m ne̱e̱ no inya. I bat Cetok ka̱n kab k’gwin rem Waa. 14Kooye̱ a̱n konin a̱n dind ri, ta̱’m ne̱e̱ no.
Hora̱mda̱n zattin ri d’reb da
15“Awaz a̱n el a̱n to̱nc ri, ta̱n gab giiras ri. 16Mi ta̱m ta̱’m kon K’Ceto u comtva no Ka D’Se̱e̱te̱ uhyan, un tu boro baa no d’kala. 17I Hora̱mda̱n zattin ri d’reb da, da̱ m’ga̱u. An copun yanda̱ha̱n a ta kab da̱ da. I rema̱n a ta he̱n da̱ alla a nap ta̱m da̱ da. Nwaa la a̱n napk da̱, rema̱n da̱ el a’soot baa no. Da̱n boro ta̱m a̱nmi baa no. 18A ta̱’m lag no na̱m’kwib da, ta̱’m vaaka baa no.
19“I v’daa ca̱nmi a̱n kusin an copun yanda̱ha̱n lagt he̱na̱m ri. Nwaa la ta̱n he̱n me. Rema̱n a̱m el u po̱tke, nwaa ta̱m ta̱n po̱to̱. 20A̱n hweda̱n lo, ta̱n nap az cwan c Cet me, i rihi i’da̱n. Cinna ta̱m kwe̱, i rihi i’da̱n. 21Koowe̱ a̱n kabin giiras ri, u gab ta̱m sa̱, i unwa a̱n reina̱n to̱nc ri. Koowe̱ ta̱m a̱n to̱nin me, Cet me tu to̱n la o. Mi ta̱m ta̱’m to̱n o, a̱m kwesa o ta̱m hid ri.”
22Yahuda, (za bo̱ Yahuda Iskariyo̱ti da) zeuzo, “Kanubu, i’le̱e̱le̱ a̱n ta̱’v kwesata hid rov baa co, za baa an copun yanda̱ha̱n da?”
23Ye̱so se̱sk o, “Awaz noc el a̱n to̱nc ri, tu gab la̱a̱s ri. Cet me tu to̱n ta̱m o. Ca̱n han baa ru c soot ta̱m d’kut a unwa na. 24Koowe̱ a̱n zain tu to̱n a̱m da, au kab lalks ri da. La̱a̱suna̱n a̱n hongin ta̱ma̱, za u ri da, iu Cetoka̱n comain me.
25“A̱m ve̱ce̱-ve̱ce̱ no rihica̱ ha̱n ai retin a̱m el v’daa baa no. 26Ka D’Se̱e̱te̱ la, un rein Hora̱mda̱n zattin ri d’reb da, un Cetok ka̱n coma a̱n dind ri, tu la̱a̱sa̱ no c’rihi kwe̱. U bakasa ta̱m no rihica̱n a̱m ve̱ce̱in no kwe̱.
27“A̱m be̱sske̱ no u’yo̱ro. I yo̱ru ri a̱m ne̱in no. Za ho̱da̱n an copun yanda̱ha̱n ta ne̱e̱t a̱m ne̱e̱tin no da. A de̱bc naa la no da. An hong la ta̱m v’gel da.
28“A̱n hongk ho̱da̱na̱n m zetin no, ta̱’m to̱o̱. Ta̱’m vaaka la ta̱m baa no. Awaz a̱n el a̱n to̱nc ri, ta̱n em c’za̱ngkta̱ rem a̱m zek az ta̱’m hav baa K’Ceto. Rema̱n Cet me so̱dk me. 29A̱m ve̱ce̱ke̱ no rihica̱ ha̱n a̱nta̱ma̱ ca hwesa can da. I bat daava̱n ca̱n ceta, ta̱n bat d’ba̱ta̱. 30A ta̱’m sud ta̱m s’lalk a nwaan hwe̱di da, rema̱n go̱m va̱n copun yanda̱ha̱n lan na̱m’han. Au hweks la ema̱m m ri rihi da. 31Ta̱’m em la rina̱n Cetok zein az a̱m ema. I bat an copun yanda̱ha̱n ta nap az a̱m el a̱n to̱nc K’Ceto, ta̱ma̱ rina̱n Cetok zein az a̱m ema, i ho̱da̱n lo bo̱ a̱m retin nu’emo.
“Unu na na lag baada̱ hna.”
15Ye̱so ceun anab u m’ga̱u
1Ye̱so zeka ta̱m an la̱a̱s baa ru, “I mi a̱n rein ceun anab u m’ga̱u. Cet me a̱n rein kac’go̱te. 2Kooye̱ za̱tva a̱n rein a’dap a̱nmi va̱n zain ta̱’v mat yaan da, tu gedanna va̱. Kooye̱ za̱tva va̱n rein va̱n mata, tu se̱pa̱l va̱ bat ta̱’v pisa̱ a̱v sud u’mato. 3A̱nta̱ma̱, nwaa na kobsk no rema̱n lalksa̱n a̱m ve̱ce̱in no. 4Soot na a’dap a̱nmi, mi ta̱m a’dap a̱n nwaa. Ho̱da̱na̱n za̱ta̱v zatin va̱n mat yaan a̱n hid va̱ da, a za a̱v el a’dap a̱n ceun anab da, i ho̱da̱n lo bo̱ ta̱ma̱, nwaa a ta̱n la̱a̱ a̱n mat da, a za an el a’dap a̱nmi da.
5“I mi a̱n rein ceun anab. I nwaa a̱n rein s’za̱ta̱. Koowe̱ a̱n rein a’dap a̱nmi, mi ta̱m a’dap a̱n un, tu mat yaan hwe̱di. A ta̱n la̱a̱ a̱n em rihi a za a min da. 6Awaz noc ta soot a̱nmi baa ri da, u el ho̱da̱n za̱tva̱n na gedannain va̱ ho̱o̱, na bono a̱nmin hwela v tok kwe̱. 7An soot a̱nmi baa ri, lalks ri ta̱m a̱nmi baa no, rina̱n a̱n to̱nin kwe̱ an kon A’Sila̱, ta ema no inya. 8I taanl a̱n Cet me tu kumt k’gwin, an mat yaan hwe̱di. I taanl in ti kwesata az i nwaa an la̱a̱s baa ri.
9“Ho̱da̱na̱n Cetok to̱ntin me, i ho̱da̱n lo bo̱ a̱m to̱ntin no. Ryaa na hwic a̱n emma̱n rihica̱n ca̱n de̱l a̱m to̱nt no. 10An gab giiras ri, ta̱’m to̱n no, ho̱da̱na̱n m gabtin giiras Cet me, a el la a̱n to̱nc ri. 11A̱m ve̱ce̱ke̱ no rihica̱ ha̱n bat goon za̱ngkta̱ca̱ m ciini, ca̱n soot a̱nmi baa no, za̱ngkta̱c no em ta̱m hwe̱di. 12Go̱t ha̱n giira ri. To̱n na hyannanon ho̱da̱na̱n m to̱ntin no.
13“To̱nc za ca̱n hatin o̱p ca̱ha̱n da. Noc cod hid ru rema̱n baran ru. 14I nwaa baran ri, an em rina̱n m zein no kwe̱. 15A ta̱’m po̱g ta̱m no coka̱n da, rema̱n cok au nap rina̱n kan buu ru rein nu’em da. A̱m po̱gk la no baran ri, rema̱n rihica̱n m hongain kwe̱ baa Cet me, a̱m ve̱ce̱ke̱ no ca̱nca kwe̱. 16Za nwaa a̱n dagin m da. I mi a̱n dagin no. A̱m de̱lk ta̱m no a̱n hav a̱n mat yaan hwe̱di, yaan no mal ta̱ma̱. Kooye̱ kaa a̱n ta̱n kon K’Ceto a̱n dind ri, tu ne̱e̱ no inya. 17Go̱t ha̱n giirauna̱n m ke̱in no: to̱n na hyannano.
Neta̱n ta ha̱l no
18“Awaz an copun yanda̱ha̱n ha̱lk no, nap na az i mi a takain a̱n ha̱l a ha̱lt kaa no. 19An la be̱ an copun yanda̱hna, an copun yanda̱ha̱n ta to̱n be̱ no ho̱d a na̱. Ai retin la a̱n za an copun yanda̱ha̱n da, i mi a̱n dagin no baa an copun yanda̱hna, i rina̱n de̱lin bo̱ an copun yanda̱ha̱n ha̱lt no. 20Bakasa na rina̱n m ve̱ce̱in no az, ‘Cok au so̱d kan buu ru da.’ Awaz a ta̱a̱ska̱ m ka̱ngu, ta ta̱a̱sa̱ la no ka̱ngu. Awaz a kabk lalks ri, ta kab la sa̱ no.15:20 Go̱t ta̱m: Mat 10:24; Luk 6:40; Yoh 13:16.21Ta ema no goon rihica̱ ha̱n kwe̱ rema̱n dind ri. Rema̱n a ta nap un comain m da.
22“Awaz a̱m ta han be̱ a̱m ve̱ce̱ke̱ na̱ da, lawabe̱ a zatta d’ko̱t da. A̱nta̱ma̱ la, a zatta rina̱n ta ze da̱n ko̱tc na̱ da. 23Koowe̱ a̱n ha̱lin me, u ha̱lk ta̱m Cet me. 24Awaz a̱m ta em be̱ rihica̱ c’he̱t ca̱n noc hyan ta takina̱n em a he̱nk da, lawabe̱ a ta ko̱t da. A̱nta̱ma̱ la, a he̱nk ca̱, a ha̱lk ta̱m me, a ha̱lisi Cet me. 25Na em-em rihica̱ ha̱n rema̱n na esasta rina̱n na ge̱nin a̱nmin giira na̱. Sa̱ zeka, ‘A ha̱lk me. A̱m ta em la na̱ rihi da.’15:25 Go̱t ta̱m: Zab 35:19; 69:4.
26“Daava̱n Ka D’Se̱e̱te̱ tu ceta la, un ta̱’m comtva no lanma̱n baa K’Ceto, Hora̱mda̱ m’ga̱u da̱n ta̱d rwa̱n baa K’Ceto, tu vat da̱n mi. 27Nwaa ta̱ma̱, ta̱n vat da̱n mi rema̱n a̱n el d’kutu a mi ni, lanma̱ d’takbo.
161“A̱m ve̱ce̱-ve̱ce̱ no rihica̱ ha̱n rema̱n an vaak la dim a̱n s’gab da. 2Ta vog no d’kal a̱n ka̱bda̱n kargad Yahude̱ne̱. Daav lan ta̱ma̱, daava̱n koowe̱ a̱n hwain no, tu he̱n az u la a̱n yomka Na’Sila̱. 3Ta ema no rihica̱ ha̱n kwe̱ rema̱n a ta nap K’Ceto alla mi da. 4A̱m ve̱ce̱ke̱ la no rihica̱ ha̱n rema̱n a daav ema, ta̱n bakasa az a̱m ve̱ce̱ke̱ no da̱n ca̱nca. A̱m ta ve̱ce̱ no rihica̱ ha̱n na̱m’e̱t da, rema̱n a̱m lak baa no.
Yomka Hora̱md Na’Sila̱
5“A̱nta̱ma̱ la, ta̱’m hav a̱m vaak baa un comain me. A̱n na kum la da̱nv no un ipkin me, ‘Ipe̱ a̱n va hav da?’ 6De̱bc naak la no hwe̱di d’kal rema̱n a̱m ve̱ce̱ke̱ no rihica̱ hna. 7Puti a tan na, a̱m ve̱ce̱ke̱ no m’ga̱u. I rihi kasi baa no a̱m to̱o̱. A za a̱m to̱o̱k da, Ka D’Se̱e̱te̱ au han baa no da. Am to̱o̱ la, ta̱’m coma o baa no. 8Daava̱n tu ceta, tu kwesa an copun yanda̱ha̱n rina̱n rein c’ko̱to, rina̱n rein gela̱v Na’Sila̱ a ho̱da̱na̱n Sila ta gedata neta̱n lalk no.
9“Rina̱n tanin c’ko̱to, a ko̱tko̱ rema̱n a ta bat d’ba̱t baa ri da. 10Da̱n gela̱v Na’Sil la, i rema̱n ta̱’m vaak baa K’Ceto, va̱na̱n a̱n zain a̱n he̱na̱m ri ta̱m da. 11Da̱n tanin gedma̱n lalk Na’Sila̱ ta̱ma̱, i rema̱n a̱m baask a̱m gedaka go̱m va̱n copun yanda̱ha̱n lalko.
12“A̱m ci la c’rihi hwe̱di ca̱n ta̱’m ve̱ce̱ be̱ no. A ta̱n la̱a̱ la a̱n kab ca̱ a̱nta̱ma̱ da. 13Puti a tan na, daava̱n Hora̱mda̱ m’ga̱u da̱n hata, ta̱d gabt no a̱n le̱vka̱ m’ga̱u. A da̱n tana hid da̱ da. Rina̱n a̱d hongain kwe̱, i inya a̱n da̱n vata. Da̱n kwesa ta̱m no rihica̱n laine. 14Da̱n ne̱e̱ m k’gwin, rema̱n da̱n o̱mo̱ baan rina̱n rein i ri, a̱d ve̱ce̱ no. 15Rihica̱n Cet me ciin kwe̱, ic ri. I rina̱n de̱lin bo̱ a̱m zeta, Hora̱mda̱n zattin ri d’reb da, da̱n o̱mo̱ rina̱n rein i ri, a̱d ve̱ce̱ no.
16“Ai okso ca̱nmi, a ta̱n he̱n a̱m ta̱m da. Ai okso la ta̱m ca̱nmi, ta̱n he̱n me.”
Naam c’de̱b ca̱n vaak c’za̱ngkta̱
17An la̱a̱s baa ru ahyan zeuz a̱n a̱n’na̱n a̱n’na̱, “Iye̱ u rein nu’vato? ‘Ai okso ca̱nmi, a ta̱n he̱n a̱m da. Ai okso la ta̱m ca̱nmi, ta̱n he̱n me.’ U zeka ta̱ma̱, ‘I rema̱n ta̱’m hav baa K’Ceto.’ ”
18A ryaak hwic a̱n s’ipku, “Iye̱ u rein bo̱ kaa na̱m’vata? U zeka, ‘Ai okso ca̱nmi?’ Ca nap bo̱ rina̱n u rein na̱m’vat da.”
19Ye̱so napuz az a to̱nk a ipk o. U zeta bo̱ na̱, “A̱n la nu’ipkinni rema̱n a̱n ke̱e̱ste̱ rina̱n m vatine? Am zetin, ‘Ai okso ca̱nmi, a ta̱n he̱n a̱m ta̱m da. Ai okso la ta̱m ca̱nmi, ta̱n he̱n me?’ 20Lag na a̱m ve̱ce̱te̱ no m’ga̱u. Ta̱n kannga, de̱bc naa ta̱m no. An copun yanda̱ha̱n la, ta em c’za̱ngkta̱. De̱bca̱n naa no. A̱n d’hwen la, Sila ta vaaksa naama̱n de̱bc no c’za̱ngkta̱. 21Daava̱n neta retina̱n samk nu’maco, de̱bc ca̱n naa o hwe̱di, rema̱n daav nu’mac ceka. Au mat la, a̱ndaabe a̱n hwec ca̱n kaa o so̱na̱m nu’mac rema̱n za̱ngkta̱ca̱n u matk waa a̱nmin copun yanda̱hna.
22“I taanl a̱n ti soott baa no. A̱nta̱ma̱ a̱n rein daava̱n naama̱n de̱bc no. Ta̱’m sud la he̱na̱m no. Ta̱n em kaa pusuu c’de̱be̱. Noc za ta̱m un tu tak a̱n hol no pusuu c’de̱b da cakk. 23A̱n hweda̱n lo, a ta̱n kon a̱m ta̱m rihi da. Lag na a̱m ve̱ce̱te̱ no m’ga̱u. Kooye̱ a̱n ta̱n kon K’Ceto a̱n dind ri, tu ne̱e̱ no inya. 24V’Daa, a̱n ta hwesa kon rihi a̱n dind ri da. Kon na, nan ne̱e̱ no, bat ta̱n em pusuu c’de̱b hwe̱di.
25“A̱m vetaska ve̱ce̱m na̱ s’lalk a̱n c’hwennsa. Daav lan la va̱n a ta̱’m em s’lalk taanl da. Daava̱n lo, ta̱’m ve̱ce̱ no da̱ K’Ceto a̱ncass. 26A̱n hweda̱n lo, ta̱n kon a̱n dind ri. A̱m ta ze ta̱’m kwena no ta̱m K’Ceto da. 27K’Ceto a̱n hid ru, u el a̱n to̱nc no, rema̱n a̱n to̱nk me. A̱n batk ta̱m d’ba̱t a̱n kabk az a̱m ruka̱ baa Na’Sila̱. 28A̱m ruka̱ baa K’Ceto, a̱m uvka̱ a̱n copun yanda̱hna. A̱nta̱ma̱ la, ta̱’m lag copun yanda̱ha̱n a̱m vaak baa K’Ceto.”
29An la̱a̱s baa ru zeta bo̱ o, “A̱nha̱a̱n. A̱nta̱ma̱ bo̱ kaa a̱v rutva̱in co s’lalk a̱ncass, za ta̱m a̱n c’hwennsa da. 30A̱nta̱ma̱ bo̱ kaa ca̱ kabk a̱v napk c’rihi kwe̱. Za az a̱v val noc ipk a̱v rihi da. Taanl de̱lk ca̱ kabk az a̱v ruka̱ baa Na’Sila̱.”
31Ye̱so se̱st bo̱ na̱, “A̱n batk bo̱ kaa d’ba̱t a̱n kabk a̱nta̱ma̱? 32Ho̱ra̱v lan la, a̱v ceka ta̱ma̱, daava̱n nan ba̱rgsta̱ no. Koowe̱ gya̱a̱ ba̱na̱, a̱n lag a̱m mi v’da̱n. A̱m za la mi v’da̱n da. Cetok el d’kutu a mi ni.
33“A̱m ve̱ce̱ke̱ no rihica̱ ha̱n bat de̱bc ca̱n la̱t no baa ri. A̱nmin copun yanda̱ha̱n ta̱n ta̱a̱ ka̱ngu. Em na la c’za̱ngkta̱ ai retin a̱m ryaak copca̱n copun yanda̱ha̱n d’gaago.”
17Ye̱so cepkka hid ru
1An Ye̱so taastin vatma̱n lalksa̱ hna, u wa̱lkk a’con u zeka, “K’Ceto, daav ceka. Ne̱e̱ waav rov k’gwin, bat tu ne̱e̱ la v k’gwin. 2I rema̱n a̱v nesk o go̱mca̱n neta̱n kwe̱, az u po̱to̱so̱ av nesin o d’kala. 3Go̱t ha̱n po̱tu d’kala. Az a nap vo, Sila m’ga̱u c’taa a Ye̱so Ka̱risti u’na̱n v comaine. 4A̱m guba̱ska̱ gwink rov a̱nmin copun yanda̱ha̱n am taastin yomka na v nesain ma̱ m ema. 5A̱nta̱ma̱, K’Ceto, guba̱sa̱ gwink ri a̱n hwic rovo. A̱n goon gwinka̱n a̱m ciin baa rov az na emt copun yanda̱hna.
Ye̱so cepkka an la̱a̱s baa ru
6“A̱m de̱lk netnan copun yanda̱ha̱n av nesin me, a napk vo. I na̱nna neta̱n rov de̱ha̱nzo. A̱v nesk a̱m na̱nna, a gabk ta̱m lalks rovo. 7A̱nta̱ma̱ a napk az rihica̱n ca̱ v nesin m kwe̱, ca̱ lan baa rovo. 8A̱m ve̱ce̱ke̱ na̱ rihica̱n ca̱ v zein a̱m ve̱ce̱ na̱. A kabk la ca̱. A napk ta̱m ke̱ng az i baa rov a̱m rwa̱ine. A batk ta̱m d’ba̱t a kabk az i vo a̱n comain me.
9“A̱m el a̱n cepkam na̱. Za an copun yanda̱ha̱n a̱m cepkain da. I av nesin m a̱m cepkain ne, rema̱n i na̱nna aa rovo. 10Rihic ri kwe̱, ic rovo. C rov ta̱m kwe̱, ic ri. A̱m kabk ta̱m k’gwin rema̱n ca̱nca. 11A ta̱’m ryaa hwic a̱n d’sooc a̱nmin copun yanda̱ha̱n da. Na̱nna la, a el v’daa a̱nmin copun yanda̱hna. Mi la ta̱’m vaako baa rovo. Cetoka̱n zattin ri d’reb da, rega̱d na̱ a̱n we̱sma̱n dind rovo, dinda̱ v nesin me. Bat na̱nna ta̱ma̱, ta soot rihi i’da̱nka̱, ho̱da̱na̱n c retine. 12Am latin baa na̱, a̱m rega̱dk na̱ a̱n dinda̱ v nesin me. Da̱nv na̱ ta yang da a za un na baasin na vatin az tu wa̱a̱ da. I bat nan esasa rina̱n ge̱nsa̱n lalks Na’Sil vatine.
13“A̱nta̱ma̱ ta̱’m vaako baa rovo. A̱m el la a̱n vatma̱n rihica̱ ha̱n ai retin a̱m el v’daa a̱nmin copun yanda̱hna. I bat ta kum a̱n de̱bc na̱, goon pusuu c’de̱b ca̱ m ciin hwe̱di d’kala. 14A̱m ve̱ce̱ke̱ na̱ lalks rovo. I de̱lk an copun yanda̱ha̱n ha̱lk na̱. I rema̱n a za an copun yanda̱ha̱n da, ho̱da̱na̱n m zattin kan copun yanda̱ha̱n da. 15A̱m ta la a̱n s’kon az a̱v rut na̱ a̱nmin copun yanda̱ha̱n da. I bat ta̱’v gwa̱a̱ na̱ baa ka v’dumu.
16“A za an copun yanda̱ha̱n da. Ho̱da̱na̱n m zatin kan copun yanda̱ha̱n da. 17Ho̱l na̱ rihica̱ d’reb a̱n ga̱um rovo. I lalks rov a̱n rein m’ga̱u. 18Ho̱da̱na̱n v comtain me a̱nmin copun yanda̱hna, i ho̱da̱n lo bo̱ ta̱m a̱m comtin na̱ a̱nmin copun yanda̱hna. 19Rem na̱, a̱m nesk hid ri baan yomka rovo. Bat na̱nna ta̱m ta nes hid na̱, a kum u’ke̱be̱ baa rovo.
Ye̱so cepkka a s’gab kwe̱
20“Za la an la̱a̱s baa ri c’taa a̱m cepkain da. I ta̱m a an ta bat d’ba̱ta̱n baa ri rema̱n ba̱sa̱d na̱. 21Bat na̱nna kwe̱ ta soot rihi i’da̱nka̱, ho̱da̱na̱n vo K’Ceto retina̱n mi baa ri, mi ta̱m a̱nmi baa rovo. Lag ta̱m a soot taanl a̱nmin baa cin. I bat an copun yanda̱ha̱n ta kab i vo a̱n comain me. 22A̱m nesk na̱ gwinka̱ v nesin me, bat ta soot rihi i’da̱n ho̱da̱na̱n c retin rihi i’da̱n. 23Mi a̱nmi baa na̱, vo a̱nmi baa ri. A soot kwe̱ rihi i’da̱n. Bat an copun yanda̱ha̱n ta nap az i vo a̱n comain me, az a̱v to̱nk ta̱m na̱ ho̱da̱na̱n v to̱ntin me.
24“Cet me, a̱m to̱nk az av nesin me a soot va̱na̱n m reine. A he̱n ta̱m gwink ri ka̱ v nesin me. Rema̱n a̱v to̱nk a̱m az na emt kaakda̱n copun yanda̱hna.
25“K’Ceto ka̱ m’ga̱u, an copun yanda̱ha̱n ta nap a̱v da. Mi la a̱m gosk a̱n naps rovo. An la̱a̱s naha̱n baa ri gosk ta̱m nu’nap az i vo a̱n comain me. 26A̱m de̱lk a napk vo. A ta̱m cim la da. Bat goon to̱nca̱n ca̱ v to̱nin me, ca̱ mal baa na̱, mi ta̱m a̱m soot baa na̱.”
18Yahuda babk Ye̱so
(Mat 26:47-56; Mar 14:43-50; Luk 22:47-53)
1Daava̱n Ye̱so taastin s’cepko, u ruk a an la̱a̱s baa run a pask wa̱a̱da̱n nan po̱g Kidro̱n. A daatka va̱na̱n belun cesa̱n o̱lif reine. U uvk ta̱m a̱n a̱n’a a an la̱a̱s baa ru nu. 2Yahuda un babin o napk baad ne, rema̱n Ye̱so vetaska tu hav a̱n a̱n’a a an la̱a̱s baa ru nu. 3Go̱to̱ Yahuda gaaka bugda̱n koola̱n hwici, a bebnan rega̱dsa̱n buuk Na’Sil a̱n lanma̱n baa c’hwengnan ka̱bd Na’Sil a Farisin ni. A nokka a̱n belune, a c’ta̱sin a gwenca̱n hwelan na, a rihica̱n dumi d’gaaga̱n a’bo̱po̱. 4Ai retin Ye̱so baask u napk rihica̱n ca̱n kum o kwe̱, u rwa̱a̱gka̱. U ipkk na̱, “Iwe̱ a̱n reina̱n hobo?”
5A se̱sk o, “I Ye̱so kan Nazarat.”
Ye̱so zeta bo̱ na̱, “I mi.”
Yahuda kan babin la o, u el a’es baa na̱. 6Au zetin na̱, “I mi,” a vaakk c’dim c’dimca̱n a hek nu’copo. 7Ye̱so sudk ta̱m a̱n ipk na̱, “Iwe̱ a̱n reina̱n hobo?”
A se̱sk ta̱m o, “Ye̱so kan Nazarat.”
8Ye̱so se̱sk ta̱ma̱, “A̱m baask a̱m ve̱ce̱ke̱ no az i mi. Awaz i mi a̱n reina̱n hobo, lag na o̱p naha̱n a to̱o̱ a̱n c’na̱.” 9I bat nan esasa lalksa̱ ha̱n su vatine, “Av nesin m kwe̱, a̱n na kum un yangin da.”18:9 Go̱t ta̱m: Yoh 6:39.
10Simo̱n Bitrus ciki k’vana. U pe̱ndte̱ bo̱ ka̱ u se̱pe̱nne̱ coka̱v go̱m va̱ d’ka̱b u Na’Sil u so̱dk coun koma s’to̱o̱. Dind cokune, i Malkus.
11Ye̱so zeta bo̱ Bitrus, “Vaakt vank rov a̱n k’fyakno. Va nap az i ke̱ng a̱m ryaa kobda̱n Cetok zein az a̱m ryaa da?”
Na savk Ye̱so baa Anas
12Bugda̱n koola̱n a so̱dka̱v na̱n, a bebnan rega̱dsa̱n buuk Na’Sil a̱n sipt bo̱ kaa Ye̱so a gaga. 13A savk o na̱m’e̱t baa Anas mo̱o̱r Kayafa un rein go̱m va̱ d’ka̱b u Na’Sil u so̱dk a̱n we̱une. 14I Kayafa a̱n ne̱in hyann hwenga̱nc Yahude̱n s’lalk az i ge̱be̱ske̱ noc v’da̱n wa̱a̱ rema̱n netna.18:14 Go̱t ta̱m: Yoh 11:49-50.
Bitrus hyaak naps Ye̱so
(Mat 26:69-70; Mar 14:66-68; Luk 22:55-57)
15Simo̱n Bitrus a kan la̱a̱s baa Ye̱son uhyan gabka Ye̱so a̱n dima̱. Rema̱n kan la̱a̱s baa Ye̱so une, u napk go̱m va̱ d’ka̱b u Na’Sil u so̱dke, u uvk a Ye̱son a̱nmin gwen un buu go̱mune. 16Bitrus ta kum la a̱n uva̱ da. U eska a̱n d’hutu. Kan la̱a̱sun lo un go̱m va̱ d’ka̱b u Na’Sil u so̱dk napin ruta̱ bo̱ na’is u konk waa’wanta kan regda̱m d’hut az u lag Bitrus u uva̱ a̱nmi. U uvtt bo̱ Bitrus a̱nmin. 17Waa’wanta kan regda̱m d’hut ipkt bo̱ Bitrus, “Za vo ho ta̱m kan la̱a̱s baa a̱rmun lo da?” U se̱sk u zeka, “A̱’a̱.”
18Tuduk laka. Coka̱n go̱m va̱ ka̱bd u Na’Sil u so̱dk a bebnan rega̱dsa̱n buuk Na’Sil a̱n dapasta bo̱ hwela, a esk a el nu’hobto. Bitrus esk ta̱m baa na̱ u el la ba̱ru a̱n hobtma̱n hwela.
Ye̱so baa Go̱m va̱ d’ka̱ba̱
(Mat 26:59-66; Mar 14:55-64; Luk 22:66-71)
19Go̱m va̱ d’ka̱b u Na’Sil u so̱dk ipkt bo̱ Ye̱so da̱n an la̱a̱s baa ru a la̱a̱s ru nu. 20Ye̱so se̱st bo̱ o, “A̱m emaka an copun yanda̱ha̱n s’lalk a̱ncass. A̱m emk la̱a̱s a̱nmin ka̱bca̱n kargad Yahude̱ne̱ a buuk Na’Sil a̱n va̱na̱n Yahude̱n rein ta karga. A̱m ta vat rihi m’ze̱s da. 21I rema̱n ye̱ a̱n ta̱’v ipkt mi? Ipk an hongin me. A napk rina̱n m vatin kwe̱.”
22An Ye̱so taastin s’lalk taanlo, da̱nv kan rega̱dsa̱n buuk Na’Sil un lain a’es gonanka o. U zeka, “I ho̱da̱n bo̱ a̱n ta̱’v se̱st go̱m va̱ d’ka̱b u Na’Sil u so̱dk lalke?”
23Ye̱so se̱st bo̱ o, “Awaz a̱m vatk rihi naake, vat e. Awaz la m vatk m’ga̱u, i rema̱n ye̱ v gonantain me?” 24Anas la, i a’gag u cukin Ye̱so baa Kayafa, go̱m va̱ d’ka̱b u Na’Sil u so̱dke.
Bitrus hyaak naps Ye̱so
25An Simo̱n Bitrus latin a’es a̱n hobtma̱n hwela, a ipkk o, “Za vo ta̱m da̱nv an la̱a̱s baa ru da?” U hyaak u zeka, “A̱m za da̱nv na̱ da.”
26Da̱nv coka̱n go̱m va̱ d’ka̱b u Na’Sil u so̱dke, ha̱n kan Bitrus se̱pe̱nne̱in u’con ipkk o, “Za vo ho a̱m he̱ne̱in baa Ye̱so a̱n belun cesa̱n o̱lif da?”
27Bitrus sudk ta̱m a̱n hyaa naps Ye̱so. A̱n daava̱n lo ka̱c kanuz a̱ndaabe.
Na savk Ye̱so baa Bilatu
(Mat 27:1-2,11-14; Mar 15:1-5; Luk 23:1-5)
28Yahude̱n to̱o̱tk Ye̱so lanma̱n baa Kayafa a cetk o buu gwamna va̱n Roma. I nu’pun la. A ha̱lt bo̱ a̱n uv a̱nmin d’ka̱b rema̱n aa ko̱pso̱ la hid na̱ da. I bat ta la̱a̱ a̱n ryaa ryaakca̱n he̱tda̱n Paska. 29Rema̱n taanl Bilatu ruta̱ bo̱ baa na̱ u ipkk na̱, “Iye̱ lalksa sa̱n uvta̱in sa̱ a̱rm uhna?”
30A se̱sk ta̱m o, “Au ta pas be̱ giira da, a ca̱n san be̱ o baa rov da.”
31Bilatu zeta bo̱ na̱, “Nokt na o a̱n geda o lalk ho̱da̱na̱n giira no kaatine.”
Yahude̱n zeta bo̱ o, “Giira co ta ne̱e̱ co d’ke̱e̱ ca̱ hwaa noc da.” 32I sootk taanlo bat nan esasa rina̱n Ye̱so vatin u kwesata goon wa̱a̱’anan tu wa̱a̱.
33Bilatu vaakk u uvk a̱nmin ka̱bda̱n gedma̱n lalko. U po̱gko̱ Ye̱so u ipkk o, “I vo a̱n rein go̱m va̱ Yahude̱ ne?”
34Ye̱so ipkt bo̱ la o, “I vo a̱n hid rov a̱n he̱nin taanle alla i ahyan a̱n ve̱ce̱in v da̱n mi?”
35Bilatu se̱st bo̱ o, “A̱m la k’Yahude̱? I an copu rov a c’hwengnan ka̱bd Na’Sil a̱n badasain v a̱n komc ri. Iye̱ v emine?”
36Ye̱so se̱sk o, “Go̱mc ri za ca̱n copun yanda̱ha̱n da. Awaz be̱ i ca̱n copun yanda̱hna, an gaba̱m ri ta dwimi be̱ me a holt Yahude̱n sipa̱m ri. Go̱mc ri la, za taha̱n a̱c rwa̱in da.”
37Bilatu ipkt bo̱ o, “I vo bo̱ kaa go̱me?”
Ye̱so se̱sk o, “A̱v vatk honhono. I mi go̱mo̱. I rem c’go̱m a̱n na mattin me. A̱m uvka̱ ta̱m a̱nmin copun yanda̱ha̱n rema̱n a̱m vatt lalksa̱ m’ga̱u. Koowe̱ la a̱n rein ka m’ga̱u, tu kint u’con baa ri.”
38Bilatu ipkt bo̱ o, “Iye̱ a̱n rein m’ga̱u?”
Na gedk lalk na hwaa Ye̱so
(Mat 27:15-31; Mar 15:6-20; Luk 23:13-25)
Au vattin taanlo, Bilatu ruk ta̱m na’is baa Yahude̱ne̱. U zeka na̱, “A̱m ta he̱n bo̱ va̱na̱n a̱rm uha̱n pasin giira da. 39A̱m vetaska ta̱’m butva̱ no noc v’da̱nka̱ daava̱n he̱tda̱n Paska. Ta̱n se̱s bo̱ kaa a̱m be̱tve̱ no go̱m va̱ Yahude̱ ne?”
40A kara̱msk la o kwe̱. A zeka, “Be̱tve̱ co Barabbas. Za a̱rm uha̱n da.” Barabbas la, i damrav an ela̱vsoin c’go̱mo̱.
19Ryaaka̱n kobd Ye̱so
1A̱n daava̱n lo, Bilatu de̱lk na swepa̱lk Ye̱so. 2Koola̱n alk c’hila̱ ho̱d d’zemna, a twe̱pe̱ke̱ o a̱n d’hi. A twe̱pe̱ke̱ o ta̱m kusi c’go̱m i gyo̱z-gyo̱z no. 3A he̱e̱lke̱ baa ru s’lam hwe̱di ta ze, “Na po̱o̱so̱ vo, go̱m va̱ Yahude̱ne̱.” A dima̱lk o.
4Bilatu sudk ta̱m a̱n rwa̱n na’isa̱. U zeka Yahude̱ne̱, “Go̱to̱, a̱m rutka̱ o baa no bat ta̱n nap az a̱m ta he̱n va̱na̱n u pasin giira da.” 5Ye̱so ruta̱ bo̱ a c’hila̱n a’to̱p d’hi ho̱d d’zemna, a kusi c’go̱m i gyo̱z-gyo̱z no a’to̱po̱. Bilatu zeta bo̱ na̱, “Go̱t bo̱ na nocune.”
6An c’hwengnan ka̱bd Na’Sil a bebnan rega̱dsa̱n buuk Na’Sil a̱n he̱ntin o, a ze̱lk s’god a zeka, “Kul na o a̱n k’kan. Kul na o a̱n k’kan.”
Bilatu zeta bo̱ na̱, “Nokt na o a̱n kul a̱n k’kan a̱n hid no. Mi bo̱ a̱m ta he̱n va̱na̱n u pasin giira da.”
7C’Hwenga̱n Yahude̱ nanlo se̱st bo̱ o, “Na ci giira. Awaz nan gab o, i ge̱be̱ske̱ na hwaa o. Rema̱n u vaakska hid ru Waav Na’Sila̱.”
8Daava̱n Bilatu hongtin lalksa̱n lo, gela̱v sudk a̱n ryaa o. 9U sudk a̱n uv ta̱m a̱nmin ka̱bda̱n gedma̱n lalk u ipkk Ye̱so, “I vo kan pe̱?”
Ye̱so ta se̱s la o da. 10Bilatu ipkt bo̱ o, “A ta̱’v se̱s a̱m da? A̱v ta nap az a̱m ci m’we̱s a̱m kul v a̱n k’kan, a̱m ci ta̱m m’we̱s a̱m bat a̱v da?”
11Ye̱so se̱sk la, “A̱v zatta be̱ m’we̱s baa ri a za an na nesain v ma̱nma lanm na’con da. Rema̱n taanlo, i un badasain m a̱n komc rov a̱n ciin ko̱ta̱d so̱dke.”
12Lanma̱n daava̱n lo, Bilatu hobk u bat Ye̱so. Yahude̱n ryaak la hwic a̱n ze̱la̱m s’god na̱m’ze, “Av bat a̱rm uhna, za vo barav Kaisar da. Koowe̱ a̱n kain hid ru go̱mo̱, u la a̱n ha̱lc Kaisar.”
13An Bilatu hongtin lalksa̱n lo, u rutka̱ Ye̱so. U havk ta̱m u sootk a̱n sakada̱n gedma̱n lalk da̱n nan po̱g a̱n remd Yahude̱ne̱, Gabbata. 14Hweda̱n lo, i hweda̱n walgca̱n he̱tda̱n Paska, ga̱l d’hwen na’te̱ke̱. Bilatu zeta bo̱ Yahude̱ne̱, “Go̱t bo̱ na go̱m va̱ no.”
15A ze̱lk la s’god a zeka, “To̱o̱t na o. To̱o̱t na o. Kul na o a̱n kank.”
Bilatu zeta bo̱ na̱, “A̱m kul go̱m va̱ no a̱n k’kan?”
C’Hwengnan ka̱bd Na’Sil se̱st bo̱, “Na zatta go̱m a za Kaisar da.”
16U cwiksti bo̱ na̱ Ye̱so a̱n komc na̱ az a kul o a̱n k’kan.
Na kulk Ye̱so a̱n k’kan
(Mat 27:32-44; Mar 15:21-32; Luk 23:26-43)
Koola̱n o̱mt bo̱ Ye̱so a to̱o̱tk o. 17Ye̱so ruka̱ a kank run a’to̱o̱se. U cek baada̱n nan po̱g ko̱ga̱d d’hi, da̱n nan po̱g a̱n remd Yahude̱ ne, Golgota. 18I a̱n a̱n’a a kulin Ye̱so a̱n k’kan a neta̱n hyann i’ila̱. Uda̱nka̱ a̱n kabva̱n kanta. Uhyan a̱n kabva̱n koma s’to̱o̱. Ye̱so el kaa na’te̱ke̱. 19Bilatu ge̱nk lalk u sakaska a̱n k’kan ho̱d uhna, YE̱SO KAN NAZARAT, GO̱MV YAHUDE̱NE̱.
20Yahude̱n hwe̱di pe̱ga̱lk lalkune, rema̱n va̱na̱n na kulin Ye̱so a̱n k’kan, ta nak a i’le̱e̱n da. Na ge̱nk ta̱m sa̱ a̱n remd Yahude̱ne̱, remd an Roma da̱n nan po̱g Laatin a̱n remd an Giris da̱n nan po̱g c’Girik. 21C’Hwengnan ka̱bd Na’Sil a Yahude̱n zeta bo̱ Bilatu, “Av ge̱n la, ‘Go̱m va̱ Yahude̱n’ da. Ge̱n az, ‘U zeka, I mi go̱m va̱ Yahude̱ne̱.’ ”
22Bilatu se̱st bo̱, “Rina̱n m baasin a̱m ge̱nke̱, a̱m ge̱nke̱.”
23Daava̱n koola̱n taastin kula̱m Ye̱so a̱n k’kan, a o̱mk kusa̱m ru a wankk ma̱ c’kusu c’naase. Kooye̱ bebwa o̱mk d’kusu d’da̱nka̱. I kusk kaa kusi c’go̱m in zattain d’nwa̱a̱ da. Na caa-caa e lanm d’takbo caam d’rwa̱a̱sa̱. 24Rema̱n taanlo, a buuk s’lan a̱n a̱n’na̱n a̱n’na̱. A zeka. “A na sa̱ta̱m la kusi ha̱n da. Na taa na d’gapa rem na napt un tu o̱m e.” Na emk taanlo rem na esasta ge̱nsa̱n lalks Na’Sila̱. Sa̱ zeka,
“A wankk kusa̱m ri. Kusi c’go̱m i ri ta̱ma̱, a taak d’gapa rema̱n inya.”19:24 Go̱t ta̱m: Zab 22:19.
I rema̱n taanl a̱n koola̱n emtin rihica̱ ha̱n kwe̱.
25A̱n daava̱n lo, in Ye̱so lak a’es d’viivi baa k’kan, a̱n’a a ha̱n inu waa’wanta na, Me̱e̱ri netav (Kilyo̱ba), a Me̱e̱ri (kan Magdala) na. 26An Ye̱so he̱ntin inu a kan la̱a̱s baa ru un u rein tu to̱n a’esa, u zeka inu, “Go̱t bo̱ waav rovo.”
27U zek ta̱m kan la̱a̱sune, “Go̱t bo̱ in vu.” Lanma̱n ho̱rva̱n lo, kan la̱a̱sune o̱mk in Ye̱so u giitk o a̱n buu ru.
Wa̱a̱’a Ye̱so
(Mat 27:45-56; Mar 15:33-41; Luk 23:44-49)
28Ye̱so napk az u taask yomka ru kwe̱. Rema̱n la na esasta ge̱nsa̱n lalks Na’Sila̱, u zeka, “So̱o̱tii ci me.”
29So̱nk lak a̱n a̱n’a a ho̱o̱m ni’zaga̱n19:29 I viniga a̱n na panksain ho̱o̱m ni’zage. cwebe. A ne̱bt bo̱ d’soso a̱n ho̱o̱m ni’zag ma̱ ne. A ze̱lk da̱ a̱n dapaka̱n cen izo̱p a cetaka Ye̱so na’nwa̱a̱. 30An Ye̱so le̱ktin ho̱o̱m ne, u zeka, “I taaka.”
U kidiski u uku.
Na do̱o̱k Ye̱so v’kabo
31I hweda̱n ca̱bgu, ai zana ta̱ma̱, i damran hweda̱n hwerad Yahude̱ne̱. A ta to̱n la wa̱a̱c soot a’kul a̱n c’kan a̱n hweda̱ d’hwera da̱n da. C’Hwenga̱n Yahude̱n kont bo̱ Bilatu az na geca̱m naas an na edgin a̱n c’kan, na citta̱ na̱. 32Koola̱n hata bo̱ a geca̱m naas u m’e̱te̱, a sa̱ uhyan un na edgin d’kut a Ye̱so no. 33Aa cetain la baa Ye̱so, a he̱n-he̱n u baask u uku. A ta geca̱m naas ru da.
34Da̱nv koola̱n do̱o̱t bo̱ kabv ru a̱n k’taka. A̱ndaabe ho̱o̱m ruka̱ a m’hib na̱. 35I kan he̱nin a̱n vatin ri hna. Rina̱n u vatin ta̱ma̱, i m’ga̱u. U napk rina̱n u vatin i m’ga̱u. U vatk e bat nwaa ta̱m ta̱n bat d’ba̱t a̱n kaba. 36Na emk rihica̱ ha̱n kwe̱ rema̱n na esasta ge̱nsa̱n lalks Na’Sila̱. Sa̱ zeka, “A nan get te̱la̱v ru da.”19:36 Go̱t ta̱m: U’Rwa̱ 12:46; D’Og 9:12; Zab 34:21.37Ge̱nsa̱n lalks Na’Sil sa̱ hyan zeka ta̱ma̱, “Ta kekksa o, kan a do̱ine.”19:37 Go̱t ta̱m: Zak 12:10; YYoh 1:7.
Na sagk Ye̱so
(Mat 27:57-61; Mar 15:42-47; Luk 23:50-56)
38Ai o̱kstoine, Isuhu kan Aramatiya, kan la̱a̱s baa Ye̱so m’ze̱s rema̱n gela̱v Yahude̱ne̱, u havk u konk Bilatu wa̱a̱d Ye̱so. An Bilatu nestin o, u havk u o̱mk wa̱a̱d ne. 39Niko̱dimo̱ haka ta̱m u noktka nevma̱n ma̱a̱r ma̱n na we̱e̱kin a alo̱s ne, ma̱n niima̱ s’laaba v’za̱ngu. I unwa a̱n hain de̱ha̱n baa Ye̱so a̱n gyopo.19:39 Go̱t ta̱m: Yoh 3:1-2.40A o̱mt bo̱ wa̱a̱d Ye̱so a swikiki da̱ nevma̱n ma̱a̱r, a alka̱l ta̱m da̱ a̱n kusk puska̱n ho̱da̱na̱n Yahude̱n vetastain c’sago. 41A̱n baada̱n a kullin Ye̱so a̱n k’kan, belu s’ce laka. A̱nmin belune, sagu se̱bk a̱n k’taar u poune lak un a na takina̱n sag noc da. 42Sagu ne lak ta̱m d’viivi. Ai retin i hweda̱n ca̱bg un he̱tda̱n Paska, a sagt bo̱ Ye̱so a̱n a̱n’a.
20Ye̱so po̱tko̱
(Mat 28:1-8; Mar 16:1-8; Luk 24:1-12)
1Nu’pun hweda̱n lahadi, Me̱e̱ri kan Magdala havk baa nu’sago. U gad-gad na he̱ge̱ske̱ u’taare. 2U somuz a̱n kwe̱e̱v u hav baa Simo̱n Bitrus na kan la̱a̱s hyan, un Ye̱so rein tu to̱no̱. U zeka na̱, “Na o̱mk wa̱a̱d Kanubu baa nu’sago. Ca nap ta̱m va̱na̱n a savin da̱ da.”
3Bitrus na kan la̱a̱s hyan unlo baa Ye̱so, rut bo̱ a nok baa nu’sago. 4Aa somtin a̱n s’kwe̱e̱ve̱, kan la̱a̱s hyan unlo baak Bitrus a̱n caa baa nu’sago. 5Au kugtin u ve̱vko, u he̱nko kusc pusca̱n a’heesa. U ta uv la a̱nmin da. 6An Simo̱n Bitrus cetaine, u pe̱tko a̱nmi nu’sago. U he̱nk kusc pusca̱n a’heesa. 7A kusda̱n na e̱le̱in Ye̱so a̱n d’hi, na putk da̱ na kink na̱ v’kabo. Da̱ za baan kusc pusca̱n da. 8Kan la̱a̱s baa Ye̱so unlo, un cain na̱m’e̱t baa nu’sago, u uvk la ba̱ru a̱nmi. U he̱ne̱ke̱ ta̱m d’hi. U batk la d’ba̱t u kabka. 9I rema̱n ai na ceta daava̱n lo, a ta nap ge̱nsa̱n lalks Na’Sil sa̱n zein az i ke̱ng Ye̱so vaak u po̱t da. 10An la̱a̱s baa Ye̱so nanlo i’il to̱o̱t bo̱ a gya̱a̱.
Me̱e̱ri Magdala he̱nk Ye̱so
11Me̱e̱ri esk la a̱n paat nu’sag u el a̱n s’o̱n. Au latina̱n s’o̱n, u kugk u ve̱vko u’sago. 12U he̱nt bo̱ comta̱nc Na’Sil na̱i il a’soot a m’kusa̱n m’pusma̱ a’to̱po̱. Uda̱nka̱ ga̱l d’hi. Uda̱n ga̱l s’naa a̱n hwennama̱n va̱na̱n wa̱a̱d Ye̱so lain a’la̱ta̱sa̱. 13A ipkt bo̱ o, “Neta, i o̱nsa̱n ye̱ v retine?”
U se̱st bo̱ na̱, “I rem na o̱mk wa̱a̱d kan buu ri. A̱m ta nap la va̱na̱n a savin da̱ da.”
14An Me̱e̱ri taastin a̱n vat taanl u panka, u he̱noz Ye̱so a’esa. U ta nap la az i Ye̱so da. 15Ye̱so ipkt bo̱ o, “Neta, i rema̱n ye̱ v retina̱n s’o̱n? Iwe̱ v reina̱n hobo?”
Me̱e̱ri el az i kanubel a̱n ciin o. U se̱st bo̱ o, “Kanubu, awaz i vo a̱n o̱min da̱, ve̱ce̱ m va̱na̱n v savin da̱, bat ta̱m hav a̱m o̱m da̱.”
16Ye̱so zeta bo̱ o, “Me̱e̱ri.”
U pankta bo̱, u zeka o a̱n C’Yahude̱, “Rabboni.” Rina̱n nan ze Rabboni, i Kan la̱a̱sa̱m na.
17Ye̱so zeta bo̱ o, “Av do̱v la m da, rema̱n a̱m ta hwesa el baa Cet me da. Nok ba̱ra̱v baa ha̱n mi ni, a̱v ze na̱ az ta̱’m el baa Cet me un rein ta̱m Ceta no. Baa Sila ri, un rein ta̱m Sila no.”
18Me̱e̱ri kan Magdala havk la u ve̱ce̱ke̱ an la̱a̱s baa Ye̱so. U zeka, “A̱m he̱nke̱ Kanubu.” U ve̱ce̱ke̱ ta̱m na̱ az i unwa a̱n ve̱ce̱in o rihica̱ hna.
An la̱a̱s baa Ye̱so he̱nk o
(Mat 28:16-20; Mar 16:14-18; Luk 24:36-49)
19A̱n riman hweda̱n lahadi da̱n lo ta̱ma̱, an la̱a̱s baa Ye̱so meraka d’baa d’da̱n. A gweda̱lka c’hut kwe̱, rema̱n gelva̱n hwenga̱nc Yahude̱ne̱. A el taanl go̱t Ye̱so a̱n te̱ka na̱. U zeta bo̱ na̱, “Po̱o̱s no tahna.” 20Au vattin taanlo, u kwesaka na̱ komc ru a kabv ru nu. An la̱a̱s baa Ye̱so emk c’za̱ngkta̱ hwe̱di aa he̱ntin Kanubu.
21Ye̱so sudk ta̱m a̱n ze na̱, “Po̱o̱s no tahna. Ho̱da̱na̱n Cet me comtain me, i ho̱da̱n lo bo̱ a̱m comtin no.” 22Au taastin a̱n vat taanlo, u hwiliki na̱ s’hobo. U zeka ta̱m na̱, “Kab na Hora̱mda̱n zattin ri d’reb da. 23Koowe̱ a̱n kwisiin c’ko̱to, Sila ta kwisi o. Koowe̱ ta̱m a̱n ta kwisiin ko̱tc ru da, Sila a ta kwisi o da.”20:23 Go̱t ta̱m: Mat 16:19; 18:18.
Ye̱so na Toma
24Toma, da̱nv oopa ni’il inlo, (un nan po̱g waa’rusu) u ta lak baa na̱ daava̱n Ye̱so hatain da. 25Rema̱n taanlo, hyaaron an la̱a̱s baa Ye̱so zeta bo̱ o, “C he̱nk Kanubu.”
U zeka la na̱, “A za a̱m he̱nk va̱na̱n na do̱in o a̱n s’mo̱klo̱ a̱n komc ru, a̱m de̱l ta̱m juuv ri a̱n wa̱a̱sa̱n mo̱ka̱ls baline, a̱m so̱v ta̱m koma ri a̱n kabv ru va̱na̱n na do̱in o da, a ta̱’m bat d’ba̱t da.”
26An na la̱vtin c’ya̱a̱ru, an la̱a̱s baa Ye̱so kargka d’baa d’da̱n a̱nmi nu’bu. Toma lak kaa baa na̱. A̱n daava̱n lo, bira̱vna’isa̱ns lak kwe̱ sa̱ gwedakai. Ye̱so uvka̱ coso, u esk a̱n te̱ka na̱ ho̱da̱n hweda̱n lo. U zeka, “Po̱o̱s no tahna.” 27U zeta bo̱ Toma, “Noka ha taha̱n a̱v go̱t koma ri. Tapa ta̱m koma rov taha̱n a̱v do̱v kabv ri. Av soot la s’lan-s’lan da. Bat d’ba̱t baa ri.”
28Toma se̱st bo̱ o, “Kan buu ri, a Sila ri ni.”
29Ye̱so zeta bo̱ o, “Toma, i rema̱n a̱v he̱nk a̱m a̱v battin d’ba̱t baa ri! Sila emaka an ta he̱nin m da, puti a tan na, a batk d’ba̱t baa ri.”
Rina̱n de̱lin na ge̱nt k’taka̱lla
30Ye̱so emka̱lk c’he̱t hwe̱di a̱n hwic an la̱a̱s baa ru, ca̱n a na ge̱nin a̱nmin taka̱llaka̱ ha̱n da. 31O̱p ca̱ha̱n la, na ge̱n-ge̱n ca̱ bat ta̱n bat d’ba̱t az i Ye̱so a̱n rein Ka̱risti, Waav Na’Sila̱. An bat d’ba̱t baa ru, ta̱n po̱t rema̱n dind ru.
21Net ni’tan’il he̱nk Ye̱so
1An rihica̱ ha̱n to̱o̱tine, Ye̱so sudk ta̱m a̱n kwesa an la̱a̱s baa ru u’we̱d a̱n bilka̱n Saama̱n Galili. Go̱t ho̱da̱na̱n u kwesatain na̱ u’we̱de̱. 2An la̱a̱s baa ru naha̱n lak d’baa d’da̱n: Simo̱n Bitrus, Toma (un nan po̱g waa’rusu), Nataniya kan Kana un copun Galili, a aka̱n Za̱ba̱di ni d’kut a an la̱a̱s baa Ye̱so ahyan i’ila̱. 3Simo̱n Bitrus zeta bo̱ na̱, “Ta̱’m hav a̱n suva̱n ge̱nne̱.”21:3 Go̱t ta̱m: Luk 5:5.
A zeta bo̱ o, “Ca̱n gab vo.” A rut bo̱ a̱ndaabe a havk a uvk a̱n bumbka̱ m’ho̱o̱. A̱n gyopun lo la, a ta sip rihi da. 4Na̱m’zan-na̱m’zana, Ye̱so havk u esk a̱n bilka̱ m’saa. An la̱a̱s baa ru ta nap la az i unwa da. 5Ye̱so zeta bo̱ na̱, “Kwe̱sa̱mne̱, a̱n gagka ge̱nne̱?”
A se̱sk o, “A̱’a̱.”
6U zeta bo̱ na̱, “As na u’raaga a̱n kabva̱n koma s’to̱o̱ va̱ bumbka̱ m’ho̱o̱. Ta̱n sipa̱ ge̱nne̱.” Aa astin la, a ta hweks a̱n fumta̱ o da rema̱n a gagka ge̱na̱n a rorke.21:6 Go̱t ta̱m: Luk 5:6.
7He̱nma̱n taanlo, kan la̱a̱sun lo un Ye̱so rein tu to̱n hwe̱di, zeta bo̱ Bitrus, “I Kanubu.” Daava̱n Simo̱n Bitrus hongtin az i Kanubu, u to̱puz kusi ru, (rema̱n u lak murmuru). U hyouz a̱nmi m’saa. 8An la̱a̱s baa ru ahyan gabka a̱nmin bumbud esdne, (rema̱n a ta lak a nak a k’bila̱n da). I ho̱da̱n naka̱m s’naa s’za̱ngu s’ta̱a̱cu. A el a̱n fumta̱m nu’raaga, u hik cwebe a̱n ge̱nne̱. 9Daav a cetain k’bila̱, a he̱nk ka̱ngca̱n hwela a̱n a̱n’a, na el a̱n zo̱o̱ma̱n ge̱nne̱ a c’be̱re̱e̱di ni. 10Ye̱so zeta bo̱ na̱, “Gasa na ge̱nnanan sipa̱in a̱nta̱ma̱.”
11Simo̱n Bitrus uvt bo̱ a̱n bumbka̱ m’ho̱o̱ u fumtka̱ u’raaga u hik cwebe a̱n damran ge̱nna̱n v’za̱ngu a̱n kwe̱zc il a̱n oopa ni’ta̱a̱cu, u cetka a̱n k’bila̱. I ge̱nn a rork d’kala, raagau ta ka̱sa̱m la da. 12Ye̱so zeta bo̱ na̱, “Noka na a̱n ba̱ksi.” A̱n na kum la v’da̱n baa an la̱a̱s baa ru un hweksin ipka̱m ru, “I vo we̱ da?” A napk kwe̱ az i Kanubu. 13Ye̱so nokta bo̱ u o̱m d’be̱re̱e̱di u we̱nkke̱ na̱. U emk ta̱m taanl a̱n ge̱nne̱.
14I v’ta̱ccu ha̱n a̱n Ye̱so kwesatain an la̱a̱s baa ru u’we̱d au po̱ttine.
Ye̱so na Bitrus
15Aa taastin d’ba̱ksi, Ye̱so ipkk Simo̱n Bitrus, “Simo̱n waav Yohana, a̱v pa̱tk hyaara̱v na̱n to̱nc ri?”
Bitrus se̱st bo̱ o, “Ha̱, Kanubu, a̱v napk az a̱m el ta̱’m to̱n vo.”
Ye̱so zeta bo̱ o, “Ryaaksa kyo̱o̱ma̱n ri.” 16U sudk a̱n ipk ta̱m o na̱v’illa̱, “Simo̱n, waav Yohana, ta̱’v to̱n me?”
Bitrus se̱sk ta̱m o, “Ha̱, Kanubu, a̱v napk a̱m el ta̱’m to̱n vo.”
Ye̱so zeka ta̱m o, “Ryaaksa kyo̱o̱ma̱n ri.” 17U sudk a̱n ipk ta̱m o na̱v’ta̱ccu, “Simo̱n, waav Yohana, ta̱’v to̱n me?”
De̱bc naat bo̱ Bitrus hwe̱di d’kal rema̱n Ye̱so ipkk o na̱v’ta̱ccu, “A̱v el a̱n to̱na̱m ri?” U zeta bo̱ o, “Kanubu, a̱v napk kooye̱. A̱v napk az am el a̱n to̱na̱m rovo.”
Ye̱so zet bo̱ kaa o, “Ryaaksa kyo̱o̱ma̱n ri. 18Lag a̱m ve̱ce̱te̱ va̱ m’ga̱u. Daava̱n a̱v retin a̱n d’paa, ta̱’v walg hid rovo, a̱v nok ta̱m va̱na̱n v to̱nin kwe̱. Daava̱n a̱v se̱ttin la, ta̱’v ze̱l koma rov noc hyan walg vo, u nokt a̱v ta̱m va̱na̱n a̱v ta to̱nin da.” 19Ye̱so vatk taanl u kwesata goon wa̱a̱’anan Bitrus tu wa̱a̱ u guba̱sta̱ gwink Na’Sila̱. Au taastin vatma̱n taanlo, u zeka Bitrus, “Gaba me.”
Kan la̱a̱s un Ye̱so rein tu to̱no̱
20An Bitrus be̱le̱te̱in dima̱, u he̱nke̱ kan la̱a̱sun lo un Ye̱so rein tu to̱n hwe̱di a̱n gabam na̱. I unwa ta̱m a̱n te̱ntin a̱n gamt Ye̱so baa c’ryaak u ipk o, “Kanubu, iwe̱ a̱n tu bab vo?”21:20 Go̱t ta̱m: Yoh 13:23.21An Bitrus he̱ntoin o, u zeka Ye̱so, “Kanubu, i’le̱e̱le̱ bo̱ kaa da̱n a̱rm uhna?”
22Ye̱so se̱st bo̱ o, “Am to̱n u soot u caa vaakam ri, i pe̱ha̱n ho̱o̱m rovo? Gaba ba̱ra̱v me.”
23Lalksa̱ ha̱n ba̱rgt bo̱ baa an gabs ru, az kan la̱a̱sune, au wa̱a̱ da. Go̱t la Ye̱so ta ze-ze o az a tu wa̱a̱ da-da. I, “Am to̱n u soot u caa vaakam ri, i pe̱ha̱n ho̱o̱m rovo?”
24I kan la̱a̱sune a̱n reina̱n vatma̱n rihica̱ hna. U ge̱nk ta̱m ca̱. Na napk la az lalks ru i m’ga̱u.
Ye̱so emka̱lk rihic hyan
25Ye̱so emka̱lk ta̱m rihic hyan hwe̱di ca̱n, awaz be̱ na ge̱nk ca̱ kwe̱ d’da̱n-d’da̱n, a̱n he̱nu ri, copun yanda̱ha̱n u’biri, a tu ma̱a̱na̱ kabma̱n taka̱llaca̱n nan ge̱n be̱ da.