Titö

Pɔlö ‑bha ’sëëdhɛ ’ö‑ bɔ

Titö

‑dhë bhë ’ö ꞊nɛ

Pɔlö ‑bha ‑büö ‑da Titö ‑dhë ‑sü

¹Ma Pɔlö ’a ‑Zlan ‑bha yuökëmɛ waa‑ Yesu Klito ‑bha bɔmɛ ’ka, ’a ’sëëdhɛ ꞊nɛ ’a‑ bɔ ü ‑dhë. ‑Zlan ‑yö n ‑bɔ kö mɛ ‑nu ’ö ‑an sü ö ‑bha ’ka bhë, ’aan‑ ‑zo ‑yö ö ‑bha ‑sü ‑wun ꞊blɛɛ’‑ ‑an ‑dhë, kö ‑waan wo ‑zo yö ‑a ‑bha. ’Yö n bɔ ’pö kö ’aan‑ ‑an ꞊daan’‑, ’wun giagia ’ö‑ ‑gɛn go ‑a ’piö, ’ö dho wɔ ‑kɔ ’ö ’kwa dho wɔ ‑a ’ka kö ‑yaan ‑Zlan ‑zo ’kun ‑a ‑zɔn kwa ‑dhë. ²A‑ ‑kë ’dhö kö mɛ ‑nu ‑wo ꞊toëpö ‑këdhösü ‑wun ‑dhɛ ’wun gia‑. Bhii ‑Zlan ’ö ’yaa ꞊sua kë bhë, ꞊toëpö ‑këdhösü bhë, ‑ya ’tɔ ‑go kwa ‑dhë kö ‑yaan ꞊tun ’kpongtaadhɛ kë ‑na. ³‑Zlan ’ö kwa Dhamɛ ’ka bhë, ꞊toëpö ‑këdhösü ‑wuntaɔsë bhë, ‑ya ‑wun ‑lo n kwɛɛ kö ’aan‑ ‑a ꞊blɛɛ’‑ mɛ ‑nu ‑dhë. Bhii yi ’ö ’kwa‑ ’ka ꞊dɛɛ ꞊nɛ ’ö tɔɔ yi ’ö‑ kpɔ ’ö‑ ‑kë kö ’kwaan‑ ‑a dɔ.

⁴[Titö bhi ’ö ’ü ‑kë ꞊nɛ n gbö ’dhö, ’ö tɔɔ ma ’a ‑Zlan ‑wo ꞊blɛɛ ü ‑dhë kö ’üën‑ ꞊tun ‑a ‑wun ‑dhɛ ‑na ’wun gia‑, ’go mü ’zü ’ö ko ‑bha ‑zo ‑yö ‑Zlan ‑bha ‑sü ’dhö do bhë,] a‑ ‑dhɛ ‑na ‑Zlan ’ö kwa Dë ’ka waa‑ Yesu Klito ’ö kwa Dhamɛ ’ka ‑an ‑gɔ kö ‑wo ’dhuë‑ ’kpɔ ü ‑bha, kö ‑wo ü gbaa wo ‑bha ꞊zuöyagluu ’ka.

Titö ‑bha yuö ’ö‑ ‑kë ‑Zlan ‑dhë Klɛtö ‑sɛ ’gü

⁵A ü ‑to n ꞊zlöö Klɛtö ‑sɛ ’gü kö yuö ’ö n ’ka‑ ’dhiö ’to gbɔ, ’töng ‑bha ‑to ’tee ‑sü ‑dhë bhë, ’üën‑ ‑a kë. ‑Bhö mɛ ziizii ‑nu ‑ya ‑Zlan ‑bha mɛ ‑nu ‑dho ’kuë‑ ‑sü ‑gɔ ‑ta do do ’ka pödhɛ ‑nu ’gü! Ü ’dhoë‑ mɛ ziizii ‑nu ‑ya ꞊dhia, ü ‑zo ‑yö ‑büö ’wun ’ö ’a‑ ꞊blɛɛ ü ‑dhë ’dhiö ’ö ‑gban ‑an ‑bha ‑a ’ka. ⁶A‑ ‑pö mɛ ’ü dho ‑a sü ‑yö kë mɛ ’ö mɛ gbɛ yaa ’dho ‑mɔa ‑bha kö ‑ya ‑bha ‑tɔmɔdhɛ yaa kë ‑a ’ka. ‑Yö kë gɔɔn‑ ’ö‑ bɔɔ ’dhö do ‑a ’ka. ‑Yö kë ’zü mɛ ’ö‑ ‑bha ’në ‑nu ‑wo ‑kë Yesu ‑wun ‑dhɛ ’wun gia‑ ‑mɛ ‑nu ’ka ‑a ’ka. Kö ꞊kun ’ö mɛ gbɛ ‑ya ‑bha ’në ‑nu ‑bha ‑tɔmɔdhɛ ‑kë ‑a pö ‑sü ’ka ꞊nɛ ‑a ‑bha ’në ‑nu ꞊sɔɔn ‑yö ya, ’iin ’waa ’wun ma wo ‑mɛ ‑nu ‑ta. ⁷Bhii ’ö tɔɔ ’dhiö ‑sü mɛ ’ka ‑mɛ ’ö dho ‑Zlan ‑bha yuö kë ‑a ‑bha mɛ ‑nu ‑dho ’kuë‑ ‑sü ziën, ‑yö ‑dho kë mɛ ’ö mɛ gbɛ ’ka ’dho ’wun yaa yö ‑a ‑bha ‑a ’ka. Yö ’ka ’dho kë ‑desüvamɛ, ‑naazuëdhekëmɛ, yɔmümɛ, ’wunpɛnmɛ, ’iin mɛ ’ö ꞊naɔ ꞊mɛɛ ꞊flüü kë ‑sü ’ka ‑a ’ka. ⁸’Kɛɛ ‑yö kë mɛ ’ö ‑nia ‑nu kun ‑së, mɛ ’ö pë ‑së ‑dhɔ ‑ya ‑kë, mɛ ’ö‑ ꞊zuö’ ’dhö ‑saa, mɛ ’ö kpengdhö, mɛ ’ö ‑Zlan ꞊bhlë ‑ya ’iin mɛ ’ö ö ‑de ꞊kɔɔn ‑a ’ka. ⁹‑Yö kë ’wuntaɔsë kpengdhö ’ö go ‑Zlan ’piö ’ö ’yi ka ꞊daan ‑a ’ka bhë, ‑zo ‑yö ‑a ‑bha ‑mɛ ’ka. ꞊Ya kë ’dhö ‑yö ‑dho mɛ ꞊faan’ më ö ‑bha mɛ ꞊daan’ ‑wo ’ö ’wun giagia ’ka bhë ‑a ’ka, ’ö dho ‑a ‑zɔn ’zü ꞊nɛ mɛ ‑nu ’wo mɛ ꞊daan ꞊sua ‑wun ‑nu ’ka bhë, wo ‑de ‑püö ’wo‑ wo.

¹⁰‑Bhö ‑a kë ’slë ’ka ꞊nɛ ‑kɔ ’a‑ pöë bhë ‑a ’dhö! ’Ö tɔɔ Yesu ‑wun ‑dhɛ ’wun gia‑ ‑mɛ ‑nu ziën, mɛdhɛvadhɛ ‑wo ‑dhö, ’ö ’waa mɛ gbɛ ꞊bhlë ‑ya, ’ö ’wun ’ö‑ ‑gɛn ’yaa ’dhö ’wo‑ ꞊blɛɛ, ’ö ’wo mɛ ‑nu ꞊daan ꞊suapë ‑nu ’ka. Mɛ ‑nu ’ö ’wo ’dhö bhë ‑an ꞊plëëzë ‑wo ‑kë Zuifö ’ka ‑be kö ‑waan ꞊tun Yesu ‑wun ‑dhɛ ‑na ’wun gia‑. ¹¹Mɛ ‑nu ’wo bhë, ‑bhö dɔ ‑an ‑bha mɛ ꞊daan’ ‑wo bhë ‑a ‑gɔ ’yënng, ’ö tɔɔ ‑wo ’gügludhe ‑da ‑na ‑a ’ka kɔɔmɛ ‑nu ziën do do ’ka. ‑Wa ‑kë ’dhö mɛ ‑nu ‑waan ’wëüga nu ‑an ‑dhë. ’Wun ꞊suu’‑ ’ö ꞊nɛ, yaa ‑dhɛ ‑ma ’kun! ¹²‑A ‑de ‑an ‑de ‑gɔ ’wundɔmɛ do ’ö ‑kë Klɛtö mi ’ka ꞊nɛ ‑an ’dhö ’pö ’ö ‑kë ‑ya ‑sü ’ka Klɛtö ‑sɛ gia‑ bhë ‑a ’gü, ‑yö ’wun ‑blɛɛ ’ö‑ pö: «Klɛtö ‑mɛ ‑nu ‑bha ’wun ’ö tɔɔ ꞊sua ‑wun ꞊blɛɛ’ ‑sü ‑kplawo. ‑Wo pë yaa ‑kë, mɛ ‑nu ’wo to ‑an ’ka ꞊nɛ ‑kɔ ’ö wü ’dhiö‑ ’dho pë yaa kë ‑na ‑a ’ka wü ’në ’sɛɛn‑ ‑nu ’wo to ‑an ’ka bhë ‑a ’dhö. ‑An ‑kɔ ‑mɔa ‑bha ‑pë gbɛ ’yaa ’dhö. ‑An ‑zo ‑ta ‑a ’gü ‑wun dosɛn ’ö tɔɔ pë ‑bhö ‑sü.»

¹³Pë ’ö Klɛtö mi bhë ’ö‑ ꞊blɛɛ bhë ’wun gia‑ ‑mü. ‑A ‑wun ’gü ’ü dho ‑a pö Yesu ‑wun ‑dhɛ ’wun gia‑ ‑mɛ ‑nu ‑dhë ’gbee‑ ’ka ꞊nɛ kö ꞊kun ’ö ’wo wo ’to to ꞊sua ‑wun ’ö ’wo mɛ ꞊daan’ ‑na ‑a ’ka bhë ‑a ‑bha; ’kɛɛ ‑wo wo ‑zo yö ’wun giagia ’ö go ‑Zlan ’piö bhë ‑a ‑bha. ¹⁴‑Yö kë ’dhö kö ꞊kun ’ö ’wo dho wo ’to to ꞊kwɛzü ‑nu ’ö Zuifö ‑nu ’dho ‑an ꞊blɛɛ’ ‑na bhë ‑an ‑bha kö ‑waan ‑an ‑dhɛ ’wun gia‑. ’Go mü ’zü kö ꞊kun ’wo dho ’wun ma mɛ ’bhee‑ ‑nu ’ö ’waa ’we ‑a ‑bha kö ‑wo ‑Zlan ‑bha mɛ ꞊daan’ ‑wo kpengdhö kun bhë ‑an ‑bha tɔng ‑nu ‑ta; ¹⁵’Ö bhii mɛ ’ö kpengdhö, pë ’plɛ ‑yö ’slööslö ‑a ‑bha ’ka. ’Kɛɛ mɛ ’ö ’yaa kpengdhö ’ö ’yaa ’wun ma ‑Zlan ‑ta, ‑yö Yesu ‑wun ‑dhɛ ’wun gia‑ ‑mɛ ‑nu ‑bha ‑gɔ ’ö ’waa ‑a ’dho sia‑ Zuifö ‑nu ‑bha tɔng ‑dhë bhë waa‑ pë ’plɛ ’wo to ‑an yö ya. ‑An ‑bha ‑zo ‑ta ‑a ’gü ‑wun ‑yö ya, ’ö ’wun yaa kë ‑sü ‑dhɔ ‑yö ‑an ‑kë. ¹⁶(Mɛ ‑daan ꞊sua ‑wun ‑nu ’ka ‑mɛ ‑nu ’wo bhë, ‑bhö ‑an ꞊gbaannu,) ’ö tɔɔ ’zü ꞊nɛɛ ‑wa ‑pö wo ‑Zlan ‑dɔ, ’kɛɛ kö ‑an këwun ‑nu ‑wa ‑zɔn ꞊nɛ ’waa ‑Zlan dɔ. Bhii ’ö tɔɔ ’waa ’wun ma ‑Zlan ‑ta; pë ’ö ‑Zlan ‑ya ‑san zë ’wo‑ ‑kë; ‑an ‑kɔ ’yaa ‑mɔ ‑a ‑bha kö ‑wo ’wun ‑së kë.

Yesu ‑wun ‑dhɛ ’wun gia‑ ‑mɛ ‑nu wɔ ‑kɔ

¹Bhi ‑zë, ‑bhö mɛ ‑nu ꞊daan’‑ mɛ ꞊daan’ ‑wo giagia ’ö go ‑Zlan ’piö bhë ‑a ’ka!

²‑Bhö ‑a pö gɔɔn‑ ꞊klöö ‑nu ‑dhë kö ꞊kun ’wo ‑kë ’wun ‑nu ‑ziö ꞊gɔü’ ‑mɛ ‑nu ’ka! ‑Wo kë mɛ ’ö mɛ ‑nu dho ‑an ꞊bhlë ‑ya ‑an ’ka! ‑Wo kë mɛ ‑nu ’ö ’wo ’wun dɔ ‑an ’ka, ‑an këwun ‑nu waa‑ ‑an ‑bha ‑zo ‑ta ‑a ’gü ‑wun ‑nu ’ka! ‑Wo kë mɛ ‑nu ’ö ’wo wo ‑zo yö giagiawo ‑Zlan ‑bha ‑an ’ka! ‑Zlan waa‑ mɛ ‑nu ‑dhɔ ‑yö ‑an kë kpinngdhö! ‑Wo kë ꞊zuö’ ‑saa ‑mɛ ‑nu ’ka, (mɛ ‑nu ’ö ’wo pë yaa kë ‑na ‑an ’ka bhë ‑an buëndhö)!

³‑A pö dhe ꞊klöö ‑nu ‑de ’pö ‑an ‑dhë ꞊nɛ ‑an ‑bha ‑tosiadhe ‑yö kë ꞊nɛ dhoo ‑nu ’ö ’wo Yesu ‑wun ‑dhɛ ’wun gia‑ ‑an ‑bha ’dhö, bhii ’waa mɛ ‑nu ’tɔ ’gü ꞊siö’‑, ’wun yaa ‑blɛɛ ‑an ‑gɔ ‑sü ’ka! Kö ꞊kun ’wo ‑kë yɔmüdhe ’ka! ‑Wo yö mɛ ‑nu ‑dhë ’dhiö ꞊zian’ ’wun ‑së kë ‑sü ’gü! ⁴‑A ‑kë ’dhö ‑sü ’ka, ‑wo ‑dho ‑a ‑zɔn ‑dadhëü dhoo ‑nu ‑dhë ꞊nɛ ‑wo wo ꞊gɔn ‑nu waa‑ woë‑ ’në ‑nu ‑dhɔ kë. ⁵‑Wo ‑dho wo ‑bha ’wundɔdhe ‑zɔn ‑an ‑dhë, ‑an këwun ‑nu waa‑ ‑an ‑bha ‑zo ‑ta ‑a ’gü ‑wun ‑nu ’ka. ’Go mü ’zü ‑wa pö ‑an ‑dhë ꞊nɛ kö ꞊kun ’ö ’wo wo ‑zo ta wo ’bhamɛ ‑nu ‑bha gɔɔn‑ ꞊mɛɛ’ ‑sü ’iin ꞊mlaabɔ ꞊mɛɛ’ ‑sü ‑wun ’gü. ‑Wo wo ‑bha kɔɔ ‑yuö ‑nu ‑wun ’kun ’gbee‑! ‑Wo wo ‑gɔ ’dho sia‑ wo ꞊gɔn ‑nu ‑dhë! ‑Dadhëü dhoo ‑nu ’wo bhë, ‑wo wo ‑de ’kun kö ꞊kun ’ö mɛ gbɛ dho ‑a pö ‑Zlan ‑wo ’yaa kpengdhö.

⁶’Go mü ’zü ’ü‑ pö ‑dadhëü gɔɔn‑ ‑nu ‑dhë ’pö ꞊nɛ ‑wo kë mɛ ’ö ’wo ’wun dɔ, ‑an këwun ‑nu waa‑ ‑an ‑bha ‑zo ‑ta ‑a ’gü ‑wun ‑nu ’ka ‑an ’ka! ⁷꞊Dhɛ ‑kë ꞊nɛ bhi ‑de ’pö ü ‑kë ‑dadhëü ’ka bhë, ‑bhö pë ’ö kpengdhö ‑a kë kö ü ’bhamɛ ‑nu ’wo to ‑waan wo wɔ ‑kɔ ’sü ü ‑bha. ꞊Ya kë ꞊nɛ ’bha kë mɛ ꞊daan’ ꞊dhia, ‑bhö ‑an ꞊daan’ ’wun gia‑ ’sloo ’ka! ’Go mü ’zü, ‑bhö ‑a ’slë ꞊mɛɛ’‑ kö mɛ ‑nu ‑waan ü ꞊bhlë ‑ya! ⁸Ü ꞊blɛɛ’‑ ‑wun ‑nu ‑wo mɛ ‑nu ‑zo ’kun! ꞊Ya kë ’dhö, lë‑ ‑dho kpɔ kwa yaagümɛ ‑nu ‑ta, bhii ’ö tɔɔ waa ’dho ‑mɔ ‑a ‑bha kö ‑waan ’wun yaa ꞊blɛɛ’‑ kwa ‑gɔ.

⁹‑A pö yuö ‑kë mɛ ’piö ‑mɛ ‑nu ‑dhë ‑wo ’wun ma wo ꞊kɔɔnmɛ ‑nu ‑ta ‑kplawo! Pë ’ö ‑an ꞊kɔɔnmɛ ‑nu ‑zo kun ꞊nɛ ’wo dho ‑a kë! Kö ꞊kun ’wo ’yan ꞊ziö’ ‑kë wo ꞊kɔɔnmɛ ‑nu ’ka! ¹⁰Kö ꞊kun ’wo wo ꞊kɔɔnmɛ ‑nu ‑bha pë ꞊kwaan! ’Kɛɛ ‑wo kë ’kpaakpa kö ‑waan wo ‑zo ’tën ‑an ‑dhë kö ‑an këwun ‑nu bhë mɛ ‑nu ꞊wa yö kö ‑wo ’wun ‑së ꞊blɛɛ’‑ mɛ ꞊daan’ ‑wo ’ö ‑gban kwa Dhamɛ ‑Zlan ‑bha bhë ‑a ‑bha.

¹¹Yesu ‑wun ‑dhɛ ’wun gia‑ ‑mɛ ‑nu ‑bha ‑tosiadhe kë ‑kɔ ‑yö kë ’dhö, bhii ‑Zlan ‑ya ‑zɔn mɛ ’plɛ ‑dhë ꞊nɛ ‑yö ‑dho ö ‑bha ’glusë kë ‑an ’ka, ‑potaasü ‑nu ‑an ‑dhë ‑sü ’ka, kö ‑waan dha ‑sü yö ‑bɔ ö ‑ta ‑sü ’ka. ¹²’Glusë ’ö bhë ‑a ‑wun ’gü, ‑Zlan ‑yö kwa ‑daan kö ’kwa kwa ꞊kwaa’‑ kwa wɔ ‑kɔ yaa ‑zü, ’ö kwa ꞊daan ’pö kö ’kwa kwa ꞊kwaa’‑ ’kpongtaapë ’ö ’yaa‑ ‑dhë ‑së, ‑a ‑dhɔ kë ‑sü ‑zü. ’Kɛɛ kwa ‑bha ‑tosiadhe ’gü ’kpongtaa zö kwa ‑dho kwa ‑de ꞊kɔɔn. ’Go mü ’zü kwa ‑dho ‑Zlan ꞊bhlë ‑ya pë ’ö kpengdhö ‑a kë ‑sü ’ka. ¹³‑Kɔ do ’ö bhë ‑a ’ka ’pö ‑Zlan ‑yö kwa ‑daan, ‑dɔ pë ‑së ’ö ’dhiö ’ö ’kwa‑ ꞊tɛi’ dɔa ꞊nɛ ‑yö ‑dho nu bhë ‑a ‑gɔ, ‑tosiadhe ‑kë ‑sü ’ka ꞊kun. Pë ‑së ’ö ’kwa dɔ ‑na ‑a ‑gɔ bhë ’ö tɔɔ kwa ‑bha ‑Zlan ꞊va ’ö ‑kë kwa Dhamɛ Yesu Klito ’ka bhë, ‑yö ‑dho nu ö ‑bha ’tɔbhɔdhe ’ka. ¹⁴Yesu ‑yö ö ‑de ‑nu mɛ ’bhee‑ ‑nu kwa ‑wun ’gü, ‑yö kë ’dhö kö ’kwaan‑ ’go pë yaa ‑bha ’piigbeedhɛ kwɛɛ kö ’kwaan‑ kë ’slööslö yö do ’sloo ‑a ‑bha ’ka, ’go mü ’zü kö ’kwaan‑ kwa ‑de nu ’fɛfɛdhö pë ‑së kë ‑sü ‑dhë.

¹⁵‑Bhö mɛ ‑nu ꞊daan’‑ ’wun ‑nu ’wo bhë ‑an ’ka! ‑Bhö ‑gban mɛ ‑nu ‑bha ‑an kë ‑sü ’ka! ‑Bhö ’we mɛ ‑nu ’ö ’waa ’we ‑a ‑bha kö ‑wa kë bhë ‑an ’piö. Pë ‑nu ’wo bhë, ‑bhö ‑an kë ‑wogbiindhɛ ’ka! Kö ꞊kun ‑kë ’ö mɛ gbɛ ‑ya pö ‑san ’ka ü ‑dhë ꞊nɛ ’bhaa mɛ ’ö dho mɛ ꞊daan’ ’wun ‑nu ꞊suu’‑ ’wo bhë ‑an ’ka!

Yesu ‑wun ‑dhɛ ’wun gia‑ ‑mɛ ‑nu wɔ ‑kɔ

¹‑Bhö ‑a pö Yesu ‑wun ‑dhɛ ’wun gia‑ ‑mɛ ‑nu ‑dhë ’zü, ‑wo wo ‑gɔ ’dho ’sɛgɔ ’dhiö ‑mɛ ‑nu ‑dhë sia‑; ‑wo ’wun ma ‑an ‑ta. ‑Wo ’we ‑a ‑bha kö ‑wo kë ’wun ‑së kë ‑mɛ ’ka! ²Kö ꞊kun ’wo ’wun yaa ꞊blɛɛ mɛ gbɛ ‑gɔ! Kö ꞊kun ’wo ‑kë ’dhinaa kë ‑mɛ ’ka! ‑An ꞊zuö’ ‑yö kë ‑së mɛ ’plɛ buëndhö! ’Go mü ’zü ‑wo mɛ ’plɛ ꞊bhlë ‑ya ‑kplawo! ³’Ö tɔɔ kwa ‑de ’pö kwa ‑kë ꞊nɛ ‑an ’dhö ’pö. Kwaa pë gbɛ dɔ ‑Zlan ‑bha, ’ö ’wun ma ‑a ‑ta ‑sü yaa kë kwa ‑gɔ; kwa ꞊sua ‑wun ‑dhɛ ’wun gia‑, ’ö kwa ‑dhɔkëpë ‑nu ‑wo ‑kë yaya. Kwa ‑kë ‑klu ‑sü ’ka pë yaa ꞊suu’‑ ’kpɛkpɛ ‑nu ‑bha, ’ö mɛ gbɛ ‑bha pë ‑dhɔ ‑yö kwa ‑kë; ’ö ’kwa ‑kë ‑ya ‑sü ’ka kwa ’ko ‑san ’ka. ⁴’Kɛɛ ꞊dhɛ ’ö‑ yi ꞊ya ‑lo, ’ö ‑Zlan ’ö kwa Dhamɛ ’ka bhë ’ö‑ ‑zɔn mɛ ’saadhö ‑dhë ꞊nɛ ö ’glu ꞊yö ‑së kwa ’ka, ’ö kwa ‑dhɔ ‑kë; ⁵’ö kwa dha. Yaa kë ꞊nɛ ‑yö kwa ‑dha, kwa këwun ‑së ‑bha, ’kɛɛ ‑yö kwa ‑dha kwa ’yena ‑bha, kwa ‑bha ꞊sɔɔn yaa ‑bho kwa ‑bha ‑sü ’ka, ’ö tɔɔ ‑Zuu ’slööslö ‑ya ‑kë kö ’kwa bhɔ ‑dëüwo kö ’kwa ‑tosiadhe ‑dëü kë. ⁶‑Zuu ’slööslö ’ö bhë ‑Zlan ‑ya ‑nu kwa ‑dhë ‑ziö ‑a ‑naa ‑ta ‑sü ’ka, ꞊bɔa’ Yesu Klito ’ö ‑kë kwa Dhamɛ ’ka bhë ‑a ’gü ‑sü ’ka. ⁷‑Ya ‑kë ’dhö kö ‑a ‑bha ’glusëdhɛ ’ö bhë ‑a ‑wun ’gü, ’kwaan‑ kë kpengdhö ö wö ’dhiö kö ‑tosiadhe ‑dëü ’ö ’kwa kwa ‑zo yö ‑a ‑bha bhë ‑yaan ‑a nu kwa ‑dhë.

⁸’Wun ‑nu ’a ‑an ꞊blɛɛ bhë ’wun gia‑ ‑mü; wo ꞊nɛ ’ü dho mɛ ‑nu ꞊daan’ ‑an ’ka kpinngdhö. ‑Bhö ‑a kë ’dhö kö ‑Zlan ‑wun ‑dhɛ ’wun gia‑ ‑mɛ ‑nu ‑waan wo ꞊faan’ ’sü ꞊va kö ‑waan ’wun ‑së kaa ‑kplawo. ’Wun ’ö bhë ‑a kë ‑sü ꞊yö ‑së; ‑yö ‑dho pë ‑së kë ‑an ‑gɔ. ⁹Kö ꞊kun ’ü zaɔdhe ‑kë ’wun ’ö‑ ꞊truën ’yaa ‑dhö ‑a ‑wun ’gü, ’iin ’ü to mɛ ’bhɛma ‑nu wɔ ‑kɔ ‑bhüö ’piö! ’Go mü ’zü ’ü zaɔdhe ‑kë ’wun ’ö ‑gban Zuifö ‑nu yi ‑bha tɔng ‑nu ‑gɛn ‑bha bhë ‑a ’ka! Kö ꞊kun ’ü to ’wun ‑nu ’wo bhë ‑an ’piö, ’ö tɔɔ ‑an ꞊truën gbɛ ’yaa ’dhö. ¹⁰’Ö ꞊ya kë ꞊nɛ ’gügludhe ‑da Yesu ‑wun ‑dhɛ ’wun gia‑ ‑mɛ ‑nu ziën ‑mɛ ꞊ya kë ka ziën, ‑bhö ‑a pö ‑a ‑dhë, ‑yö ö bo ‑a kë ‑sü ’ka! ꞊Ya kë ꞊nɛ ’yaa ’we ‑na ‑a ‑bha kö ‑yaan ö bo ‑a ’ka, ’yɛ ü ’zü ’ü‑ pö ‑a ‑dhë ’dhö! ꞊Ya kë ꞊nɛ ’yaa ’we ‑na ‑a ‑bha ‑kplawo kö ‑yaan ö boë, ‑bhö ‑a bho Yesu ‑wun ‑dhɛ ’wun gia‑ ‑mɛ ‑nu ziën! ¹¹‑Bhö ‑a kë ’dhö, bhii ü‑ ꞊dɔa’ ꞊nɛ mɛ ꞊suu’‑ ’ö ’dhö bhë ’yaa ö ‑de nu ’wun kpengdhö kë ‑sü ‑dhë. ‑A ‑bha ’wun yaa ‑ya ‑zɔn ꞊nɛ ‑yö zian yaa ‑ta.

‑Wo ‑kaanta ‑nu

¹²Atemasö waa‑ Tisikö ’wo bhë, a ‑dho ‑an mɛ do bɔ ü ‑dhë. Mɛ ’ö ’dhoë‑ nu bhë, ꞊ya ‑lo, ‑bhö ’to mü ’ü ü ’gü dɔ ’gbee‑ kö ’ü nu n ’piö Nikapoli plöö; ’ö tɔɔ a‑ ’piö kö ’a ’dho ’aan‑ ’nɛnɛ ’töng kë ’ma. ¹³꞊Ya kë ꞊nɛ ’zü Zenasö ’ö tɔngdɔmɛ ’ka bhë waa‑ Apolɔsö ꞊wa ‑mɔ ‑a ’gü kö ‑wo ’dho ’dhiö wo ‑bha ’ta ’sü ‑sü ’ka, ‑bhö pë ’plɛ kë kö pë ’ö ‑an ‑bha ‑wun dho yö ‑a ‑bha, ’ü‑ këdhɛ ꞊mɛɛ’‑ kö ‑waan ‑a yö. ¹⁴Yaa kë ꞊nɛ bhi do ’ü dho ‑a kë ’dhö, ’kɛɛ Yesu ‑wun ‑dhɛ ’wun gia‑ ‑mɛ ‑nu ’töüdhö ‑wo ‑dho gbaɔ kë ‑sü ꞊daan’‑ kö ‑dhɛ ’ö‑ ‑dhɛ ’dho ‑a ‑bha ‑waan nu mɛ ‑nu ‑dhë ‑a ‑dhɛ ‑bha, kö ‑an ‑bha ‑tosiadhe ‑yaan pë ‑së kë mɛ ‑nu ‑gɔ.

¹⁵Yesu ‑wun ‑dhɛ ’wun gia‑ ‑mɛ ‑nu ’wo n ’piö ’nö ꞊wa ’we ü ’ka. ’Yië ’we Yesu ‑wun ‑dhɛ ’wun gia‑ ‑mɛ ‑nu ’wo ü ’piö ’ma ’ö yi ‑dhɔ ‑yö ‑an ‑kë kwa ‑bha ‑klu Yesu ‑bha ‑sü ‑wun ’gü ‑an ’ka!

‑Zlan ‑yö ’glusë kë ka ’ka!