Wlɔmë

’Sëëdhɛ ’ö Pɔlö ‑ya bɔ

‑Zlan ‑bha mɛ ‑nu ’wo

Wlɔmë

plöö ‑an ‑dhë bhë ’ö ꞊nɛ

¹’Sëëdhɛ ö ꞊nɛ, ma Pɔlö, ’a Yesu Klito ‑bha yuökëmɛ ’ka, ma ’ö ‑Zlan ‑yö n sü ’ö n ‑ya kö ’aan‑ kë ‑a ‑bha bɔmɛ ’ka ‑a ‑bha ’wuntaɔsë bhë ‑a ‑wun ꞊blɛɛ’ ‑sü ’ka bhë ꞊nɛ ’a‑ bɔ ka ‑dhë.

²’Wuntaɔsë ’ö bhë ‑Zlan ‑ya ‑wun ‑blɛɛ ’kpa, ꞊bɔa’ ö ’dhiwopömɛ ‑nu ’gü ‑sü ’ka; ’ö ’dhö ꞊bɛɛn’ ‑sü ’ka ‑a ‑bha ’sëëdhɛ ’slööslö ’gü. ³’Wuntaɔsë ’ö bhë ‑yö ‑gban ‑a Gbö ’ö kwa Dëmɛ Yesu Klito ’ka, yö ’ö‑ ‑bha mɛ ‑dhɛ ’gü ꞊zian’ ’ö bhɔ ‑gludë Davidö ꞊suu’‑ ’gü bhë ‑a ‑bha. ⁴Yö bhë ꞊nɛ ’wun ‑nu ’wo ‑gban ‑Zlan ‑bha ‑an ’gbloo ’piö ’ö ‑Zuu ’slööslö ‑bha ‑a ‑bho ga ’gü ‑sü ’ö ‑kë ’piigbeedhɛ ’ka bhë ’ö‑ ‑zɔn ꞊nɛ ‑yö ‑Zlan Gbö ’ka bhë. ⁵Yö ’ö bhë ꞊nɛ ’ö ‑Zlan ‑yö bɔ ‑a ’gü, ’glusë ‑kë n ’ka ‑sü ’ka ‑a ‑bha bɔmɛ Klito ’tɔ bhɔ ‑sü ‑wun ’gü kö ’aan‑ pö ’sɛ ’saadhö ’gü ‑mɛ ‑nu ‑dhë, ‑wo ’wuntaɔsë bhë ‑a ‑wun ‑dhɛ ’wun gia‑ ’iin kö ‑wo ’wun ma ‑Zlan ‑ta. ⁶Mɛ ‑nu ’ö ‑Zlan ‑yö ‑an ꞊dhɔɔ ‑kë kö ‑waan kë Klito ‑bha ’ka bhë, mɛ ‑nu ’ka Wlɔmë ka ‑an kpö ’gü ’pö.

⁷Mɛ ‑nu ’ö ’ka Wlɔmë ’ö ka ‑dhɔ ‑yö ‑Zlan ‑kë ’ö‑ ‑wun ’gü ’ö ka ꞊dhɔɔ ‑kë kö ’kaan‑ ka ‑bha ‑tosiadhe kë ‑a ‑bha ’ka bhë, ka ꞊nɛ ’ö ’sëëdhɛ ꞊nɛ ’a‑ bɔ ka ‑dhë. Kö kwa Dë ‑Zlan waa‑ kwa Dëmɛ Yesu Klito ‑wo ’glusë kë ka ’ka, ‑wo ka gbaa ꞊zuöyagluu ’ka.

Pɔlö ‑ya ’piö kö ’ö ’dho ‑bhɔdhia kë Wlɔmë ‑mɛ ‑nu ‑gɔ

⁸Pë ‑blɛɛzë ’a dhoë‑ kë ’ö tɔɔ ma ‑Zlan zuö ’a dhö ‑a pö ꞊bɔa’ Yesu Klito ‑ta ‑sü ’ka ’ö tɔɔ ka ’plɛ ka ‑bha ‑zo ‑yö ‑Zlan ‑bha ‑sü ’ö bhë, ‑dhɛ ’saadhö ’gü ’kpongtaa zö, mɛ ‑nu ‑wa ‑wun ꞊blɛɛ’ ‑sü ’gü. ^9-10‑Zlan ’a‑ ‑bha yuö kë ‑na n ꞊zuö’ ’plɛ ’ka, ’wuntaɔsë ’ö ‑gban ‑a Gbö ‑bha ‑a ‑blɛɛ mɛ ‑nu ‑dhë ‑sü ’ka bhë, yö gia‑ ‑ya ꞊tɛi’ ‑dɔ ꞊nɛ a ꞊bhɛa’ ‑na, n ‑zo ‑yö ‑büö ka ‑wun ’ka ‑kplawo. ‑A ‑dhɛ ꞊ya ꞊glɔɔ ’ö ’ma‑ ‑ya n ꞊zuö’ ’piö kö ’aan‑ nu ka ’piö. A‑ ‑dhɛ ‑na ‑Zlan ‑gɔ kö ꞊ya kë ꞊nɛ ꞊ya kë ‑a ‑zo ’kun ‑wun ’ka, kö ’aan‑ nu ‑bhɔdhia kë ka ‑gɔ ꞊dhia. ¹¹’Ö tɔɔ ‑nu ka ’piö ‑sü ‑dhɔ ꞊ya n ’kun, ‑yö kë ’dhö kö ‑Zuu ’slööslö ‑bha gbaɔ bhë ’kaan‑ ka ‑bha yö; ‑yö ‑dho ka ꞊faan’ ‑më ‑zo ‑yö ‑Zlan ‑bha ‑sü ‑bha. ¹²’Kɛɛ kë‑ wo ’dhö bhë, n nu ‑sü ’ö ka ziën ’ma bhë, ‑a ‑gɛn ‑blɛɛzë ’ö tɔɔ kö ’pian ꞊plɛ ’ö ’kwa‑ ‑bha bhë, mɛ ’ö ‑dhö ‑a ꞊faan’ ‑yö ’më ‑zo ‑yö ‑Zlan ‑bha ‑sü ‑bha.

¹³N dhegluzë ‑nu, a‑ ’piö kö ‑yö kë ka ’yaan ꞊nɛ, ꞊ya kë a‑ ‑ya n ꞊zuö’ ’piö kö ’aan‑ nu ka ’piö ’ma; ’kɛɛ ’wun bhë ‑a ’kundhɛ n ’ka‑ yö ꞊kun bhë yö ‑mü. N ‑nu ’ma ‑sü ‑gɛn ꞊ga tɔɔ kö ’aan‑ Yesu ‑wun ꞊blɛɛ’‑ kö mɛ ‑nu ‑waan ’we ‑a ‑wun ‑bha ’pö ꞊nɛ ‑kɔ ’ö‑ ’ka ’sɛ mɛ ‑nu ’wo to ‑an ’gü bhë ‑a ’dhö. ¹⁴Bhii ‑yö n ‑ma kö ’a‑ ’wun ꞊blɛɛ’ ’sɛgümɛ ‑nu ’saadhö, ‑an mɛ ‑nu ’ö kwa ‑nu kwa wɔ ‑kɔ ’dhö do waa‑ mɛ ‑nu ’ö ‑an ‑bha ’dhö ‑de ‑ta oo, mɛ ‑nu ’wo pë dɔ waa‑ mɛ ‑nu ’ö ’waa pë dɔ, ’wo bhë ’saadhö ‑an ‑dhë. ¹⁵‑Ya ’ö ’ma‑ wo ‑nu ka ꞊plöö Wlɔmë ’ma ‑sü ꞊wuën’ kö ’aan‑ ’wuntaɔsë ꞊blɛɛ’‑ ka ‑dhë bhë, ‑a ‑gɛn ꞊ga bhë.

’Piigbeedhɛ ’ö ’wun ‑taɔ ’piö ‑pë ’ka

¹⁶’Wuntaɔsë ’ö bhë lë‑ ’yaa n kë ‑a ꞊blɛɛ’‑ sü ‑wun ’gü; bhii a‑ ꞊tɛi’ ‑dɔ ꞊nɛ ’piigbeedhɛ ’ö ‑Zlan ‑yö bɔ ‑a ‑ta ’ö mɛ ‑nu dha yö ‑mü; mɛ ’saadhö ’ö ’dhoë‑ ö ‑zo yö ‑a ‑bha ‑yö ‑dho dha. Kë‑ wo ’dhö bhë, ‑Zlan ‑ya ‑kë ’dhö kö ‑yaan Zuifö ‑nu dha ‑blɛɛzë ’ka, kö ꞊ya ’go mü, mɛ ‑nu ’waa Zuifö ’ka kö ‑waan dha ’pö. ¹⁷’Ö bhii ‑ka ‑dhɛ ‑ga bhë ’sa, mɛ ‑bha ‑kë kpengdhö ‑sü ’ö ‑Zlan wö ’dhiö bhë, ’wuntaɔsë bhë ꞊nɛ ’ö zian ‑zɔn kwa ‑dhë ꞊nɛ ‑yö mɛ ‑kë kpengdhö mɛ ‑nu ‑bha ‑zo yö ‑sü do ’kpaan ‑wun ’gü. ‑A ‑de pë ’ö ꞊bɛɛn’ ‑sü ’ka ‑Zlan ‑bha ’sëëdhɛ ’gü ‑a ꞊wuën’ ‑ya ‑pö: Mɛ ’ö‑ ‑bha ‑kë kpengdhö ‑sü ’ö ‑Zlan ’dhiö ’ö ‑kë bɔa ‑a ‑bha ‑zo ‑yö ‑Zlan ‑bha ‑sü ‑ta, ‑këdhösü ’ö ’yaa yën (’ö ‑dhö ꞊toëpö ’ka bhë), ‑yö ‑dho kë ‑a ‑gɔ.

Mɛ ‑nu ‑bha za yaa ’sü ‑kɔ ’ö ‑Zlan wö ’dhiö

¹⁸Ka gia‑, ‑Zlan ’ka‑ ‑ga ‑na bhë, ꞊ya ‑ya dhang‑ ’gü, ‑dhɛ ’ö mɛ ‑nu ’dhoë‑ ‑bha, ’ö ‑an këwun ‑nu yaya waa‑ ‑an ‑bha ꞊sɔɔn yaa ‑nu ‑wun ’gü, ’ö ’wun ’ö ’wun gia‑ ’ka ’ö ’yaa ö këdhɛ yö bhë, ‑dhɛ bhë ‑Zlan ‑bha ‑naadhe ’yaa ’kan ‑a ‑bha; ¹⁹’ö ꞊ya kë ’ö mɛ ‑nu bhë ’ö ‑an ’klo bhɔ; ’ö tɔɔ ’wun ‑nu ’wo ‑gban ‑Zlan ‑bha, ’ö mɛ dho ‑mɔa kö ‑ya dɔ, ꞊waa‑ dɔ ’saadhö; bhii ‑Zlan gia‑ ꞊nɛ ’ö‑ ‑zɔn ‑an ‑dhë. ²⁰’Kɛɛ kë‑ wo ’dhö poo bhë, ‑Zlan ’ö bhë ‑yö ’wun gia‑ ’ka ꞊nɛ mɛ gbɛ ’yaa‑ yö. ’Kɛɛ yö ꞊ga ’sa ’ö yö ’ö bhë, ’ö ’go ’töng ’ö ’kpongtaadhɛ ꞊kaa’ ‑a ‑bha ’ö yö ꞊dɛɛ ‑bha, ‑a ‑bha ’gügbeedhɛ ’ö ‑dhö ꞊toëpö ’ka waa‑ ‑a ‑bha ‑kë ‑Zlan ’ka ‑sü ’ö bhë, mɛ ’bhee‑ ‑nu kwa‑ ‑yö ‑a ‑kɔ këpë ‑nu ‑bha. ꞊Ɛɛ, ꞊ya kë ’pö kö ‑ziö mɛ ‑ta ‑sü gbɛ ’yaa ‑dhɛ bhë ‑a ‑bha gbɔ. ²¹Wo ’ö ’wo bhë ‑wo ‑Zlan ‑dɔ; ’kɛɛ ’waa‑ ꞊bhlë ‑ya ’iin ’waa‑ zuö pö pë ‑nu ’ö‑ ‑kë bhë ‑a ‑wun ’gü; ’kɛɛ ‑an ‑zo ‑ta ‑a ’gü ‑wun ‑nu ꞊nɛ ’wo ‑kë yaya; ’ö ‑an ‑bha ’waa ’wun dɔ bhë ‑a ‑wun ’gü ꞊wa wo ‑de ‑da ‑dhɛtiidhɛ ’gü. ²²‑Wo wo ‑de ‑sü ’wundɔmɛ ‑nu ’ka ’kɛɛ kö ’waa pë gbɛ dɔ. ²³’Ö tɔɔ ‑wo wo ‑ta ‑yö ‑Zlan ’tɔbhɔsüzë ’ö ‑dhö ꞊toëpö ’ka bhë ‑a ‑dhɔ kë ‑sü ‑bha ’ö ’wo dho ꞊zian’ mɛ ’bhee‑ ’ö ‑kë gapë ’ka bhë, yö ’dhö, ‑ma ‑nu ’dhö, ꞊sootawü ‑nu waa‑ wü ‑nu ’ö ’wo ‑kë ꞊nɛ ꞊mɛɛ ‑nu ’iin ’yuö‑ ‑nu ‑an ’dhö bhë ‑an gba ‑dhiadhö.

²⁴‑A ‑kë ’dhö ‑sü ’ka, ‑Zlan ꞊ya ö ‑kɔ bho ‑an ’gü; ꞊wa ’to wo ‑de ‑ta wo ‑de ‑dhi ‑a ‑dhë ‑wun kë ‑sü ’ka. Wɔ ‑kɔ yaa ꞊nɛ ’wo‑ kë ‑na wo ’kuë zlöö. ²⁵‑A ‑kë ’dhö ‑sü ’ka, pë ’wo‑ kë ‑na zlöö ’ö tɔɔ ꞊sua ‑wun ‑nu ‑yö ’wun ’ö ’wun gia‑ ’ka ‑a pin ꞊taa ‑sü. Pë ‑nu ’wo ‑Zlan ‑kɔ këpë ‑nu ’ka bhë ꞊nɛ ’wo ‑an gba ‑na zlöö; ’wo wo ‑ta yö pë ’kpɛkpɛ ‑da ‑mɛ gia‑ ’ö ’dhuë‑ ’dhoë‑ ’tɔ ‑ta ꞊toëpö ’ka bhë ‑a ‑bha, ꞊ii‑. ‑Zlan bhë ꞊nɛ ’ö ’dhuë‑ ’dhoë‑ ’tɔ ‑ta giagia ’ka. ²⁶’Yö ‑Zlan ꞊ya ö ‑kɔ bho ‑an ’gü, ꞊wa ’to wo ’sloo ’ka wo këpë ‑nu lëzë bhë ‑an ’gü. ’Ö bhii pë ’wo‑ kë ‑na zlöö ’ö tɔɔ dhoo ‑nu ’wo bhë wɔ ꞊nɛ ’wo‑ wo ‑na wo ’ko ’piö. ²⁷‑A gɔɔn‑ ‑nu gia‑ ‑de ’pö pë mɛ ’ö ‑kë ’kpongtaa wɔ ’ka ’ö ‑kë dhe ꞊mɛɛ’ ‑sü ’ka bhë, ꞊wa wo ‑ta ‑yö ‑a ‑bha; pë ’wo‑ kë ‑na zlöö ’ö tɔɔ wɔ ’wo‑ wo ‑na wo ’ko ’piö ’kɛɛ kö ‑yö lëzë. Kë ‑kɔ ’ö ꞊kaa’ ’ö ’klobhɔdhe ’ö ‑an ꞊tian’ ’wo‑ yö ‑na bhë ’ö bhë.

²⁸꞊Dhɛ ‑kë ꞊nɛ ‑Zlan dɔ ‑sü ‑wun yaa ‑an ‑kaan wo bhë, ’ö ‑Zlan ‑yö ö ‑kɔ bho ‑an ’gü, ’wo to wo ‑de ’sloo ’ka wo ‑bha ’wundɔdhe ’ö‑ ‑yö ‑a ‑bha ‑pë gbɛ ’yaa ’dhö bhë ‑a ’gü ’ö pë ’ö ’yaa këpë ’ka ’ö ’wo‑ kë ‑na zlöö bhë. ²⁹‑A ‑wun ’gü ꞊nɛ ’ö ’wun yaa ꞊suu’‑ ’kpɛkpɛ ‑dhɔ ‑yö ‑an ‑kë bhë. ‑An ’glu ‑yö ya; ‑an ‑bha ꞊naɔ ‑wun ‑yö ’gbee‑ ’ö ‑ziö ‑a ’ka pë ’plɛ ‑ta. ’Wun yaa ‑kë wo ’bhamɛ ‑nu ’ka ‑sü ꞊nɛ ’wo‑ ’piö; ‑kë ꞊gluɛngzë ‑sü, mɛ zë ‑sü, ’dhinaa kë ‑sü, ’kpënng‑ ‑kë mɛ ‑gɔ ‑sü ’wo mɛ ‑püö bhë. ³⁰Mɛ ‑nu ‑wun yaa ‑pɛn ‑sü ꞊nɛ ’ö ‑an ’gü. ꞊Wa kë zlöö ‑Zlan yaagümɛ ’ka; ‑an ’dhi ‑wo ꞊ya kë ya; ‑wo wo ‑de ‑sü ꞊va. ꞊Wa ꞊yaannu ꞊nëdhö kö pë ’wo dhoë‑ kë ‑waan pë yaa kë mɛ ‑nu ’ka, kö ‑wa yö ‑na ’ko ’dhiö. Wo ’wo bhë ’waa wo ‑mɛ ‑nu ꞊bhlë ‑ya. ³¹‑An ꞊zuö’ ’yaa ’dhö ’iin ’waa ’to wo ‑wo ’gü mɛ ‑nu ‑dhë: ‑Kɔ do ’wo‑ ’ka ’dhiö wo ‑de ‑dhë bhë ꞊nɛ ’waa mɛ ’yena yöë ’pö. ³²‑Zlan ‑bha za ’ö dhoë‑ kan bhë, ‑yö ‑an ’yaan ’ka ‑wun ’ka ’ö bhii ‑wa ꞊tɛi’ dɔ ꞊nɛ mɛ ‑nu ’wo ‑tosiadhe ꞊suu’‑ bhë ’wo‑ kë ‑na bhë, ‑an ’dhiötodhɛ ’ö tɔɔ ga. ’Kɛɛ ’kö ‑kë ꞊nɛ ‑yö ’dhö, ‑wo wo ’to ‑dɔ ’gbee‑ ’wo ’dho ‑na ‑a ’ka ’dhiö bhë. Mɛ ‑nu ‑de ’wo ’wun ꞊suu’‑ bhë ’wo‑ kë ‑na bhë, ‑an ꞊faan’ ꞊nɛ ’wo‑ më.

’Wun ’ö ‑gban ‑Zlan ‑bha mɛ ‑bha za ’kan ‑sü ‑bha

¹Dö ‑mü ü ’ka ’ü za dɔ mɛ ‑nu ‑bha ‑ɛ? ‑Yö kë ü ’yaan ꞊nɛ ‑ziö ü ‑ta ‑sü ’ka dho kë, ’ö tɔɔ bhi ’ü za dɔ ‑na mɛ ‑nu ’wo to ‑an ‑bha bhë, pë do ’wo‑ kë ‑na bhë ꞊nɛ ’ü‑ ‑kë ’pö; ꞊ya kë ’dhö kö za ’ü‑ ‑lo ü ‑de tuö bhë. ²Kwa‑ ꞊tɛi’ ‑dɔ ꞊nɛ mɛ ‑nu ’ö wɔ ‑kɔ ꞊suu’‑ bhë ’wo‑ wo ‑na bhë, ‑Zlan ‑yö ‑dho ‑an ‑bha za kan ‑an këwun ‑nu ꞊tian’ ’wun gia‑ ’gbloo ’piö. ³‑Yö ü ‑zo ’piö ꞊nɛ bhi ’ü za dɔ ‑na mɛ ‑nu ’ö wɔ ‑kɔ ꞊suu’‑ bhë ’wo‑ wo ‑na ‑an ‑bha, ’kɛɛ kö bhi ‑de ’pö ü‑ ’gü bhë, ‑Zlan ‑bha ’klobhɔdhe bhë ‑yö ‑dho san ü ’ka a, ⁴’iin kë‑ wo bhë ‑Zlan ‑bha ’glusë ꞊va bhë, ‑a ‑bha ꞊zuösaadhɛ waa‑ ‑a ‑bha ꞊zuö’ ‑kun sia‑ ‑sü ’wo bhë, ü ‑kaan ’pö yaa‑ wo bhë ee? ꞊Ao’, ‑yö kë ü ’yaan ’püë‑ wo ꞊nɛ ‑a ‑bha ’glusë bhë ‑a ‑wun ’gü ꞊nɛ ’ö yaa ü ’klo bhɔ ꞊kun bhë. ’Kɛɛ kë‑ wo ’dhö bhë, yi ꞊nɛ ’ö‑ ’to ‑na ü ‑gɔ kö ’üën‑ ü ꞊zuö’ ꞊dhië’‑ ‑a ’piö bhë. ⁵꞊Ɛɛ, ’ö ꞊ya kë ꞊nɛ ‑kɔ bhë ‑a ’dhö, kö ‑yö kë ü ’yaan ’püë‑ wo ꞊nɛ ü ꞊gɔü’ ‑bha ‑kë ’gbee‑ ‑sü waa‑ ü ‑bha ‑kë ꞊sɔɔn yaa ’gü ‑sü ’ö ’bhaa ’we ‑a ‑bha kö ’ü ü ꞊zuö’ ꞊dhië’ bhë ‑a ‑wun ’gü, ü ’klobhɔdhe ‑nu dɔ ‑na ’kuë‑ ü ‑de ‑gɔ kö yi ’ö ‑Zlan dho ö ‑bha ‑naazuëdhe yö ‑a ’ka plaan ö ‑bha za kpengdhö ’kan ‑yi ’ka bhë ‑waan nuë ü ‑ta bhë. ⁶Yi bhë ‑a ’ka, mɛ ’ö ‑dhö, ‑a ꞊saan’ ‑dho bho ‑a yuö kë ‑kɔ ’ö yuö ꞊kaa’ ’kpongtaa zö ‑a ‑bha. ⁷Yi bhë ‑a ’ka, mɛ ‑nu ’wo wo ‑de dɔ ’wun ’ö kpengdhö ‑a kë ‑sü ‑bha, ’ö ’wo ‑kë ’tɔbhɔdhe, ꞊bhlëyadhe waa‑ ‑këdhösü ’ö ’yaa yën bhë ‑a kë ‑mɛ ’ka bhë ‑yö ‑dho ‑këdhösü gia‑ ’ö ’yaa yën bhë ‑a nu ‑an ‑dhë. ⁸’Kɛɛ mɛ ‑nu ’ö ’wo dɔ ’yënng ‑a ‑gɔ, ’ö ’wun ’ö ’yaa ’wun gia‑ ’ka ’wo ’wun ma ‑a ‑ta, ’ö pë ’ö ya, ’wo wo ‑de nu ‑a ‑dhë ’ö yö ‑an ‑dhë ’dhiö bhë, ‑yö ‑dho ö ‑bha ‑naazuëdhe ‑zɔn ‑an ‑dhë ’ö ’wun bho ‑an ’kwi. ⁹Mɛ ’saadhö ’ö ’wo ’wun yaa kë ‑na bhë, ’klobhɔdhe ‑dho nu ‑an ‑ta, ’ö ’suö ꞊va ‑yö ‑da ‑an ’gü. ‑Yö ‑dho kë ’dhö Zuifö ‑nu ’ka ꞊kun, ’ö ꞊ya ’go mü ’ö mɛ ’waa Zuifö ’ka ’wo yö mü ’sabla. ¹⁰’Kɛɛ mɛ ’saadhö ’ö ‑an këwun ‑nu ’dhö ‑së bhë ‑Zlan ‑dho ’tɔbhɔdhe, ꞊bhlëyadhe waa‑ ꞊zuöyagluu nu ‑an ‑dhë. ‑Yö ‑dho kë ’dhö Zuifö ‑nu ‑dhë ’dhiö ‑yaan ꞊tun ‑a kë ‑na mɛ ’waa Zuifö ’ka ‑an ‑dhë ’pö, ¹¹’ö tɔɔ ‑Zlan ’yaa mɛ gbɛ ‑zë ’gü dhe kë.

¹²Mɛ ’saadhö ’wo ꞊sɔɔn yaa kë ‑na kö tɔng ’ö ‑Zlan ‑ya nu Moizö ‑dhë kö ‑yaan dɔ bhë, ‑an ’gü ‑dho ꞊siö’ ’kɛɛ yaa ’dhö sü Moizö ‑bha tɔng ‑bha; mɛ ’kö Moizö ‑bha tɔng dɔ ’ö ꞊sɔɔn yaa kë bhë, ‑a ‑bha za ‑dho kan ꞊nɛ ‑kɔ ’ö‑ ’ka Moizö ‑bha tɔng ’gü bhë ‑a ’dhö. ¹³Bhii yaa kë ꞊nɛ mɛ ’ö ’wo wo ’to to tɔng ‑wo ‑bha ’kpaan ’ka ’wo kpengdhö ‑Zlan wö ’dhiö ‑a ’dhö, ’kɛɛ mɛ ’wo‑ ma, ’ö ’wo‑ ’kun ö ’kun ‑kɔ ’ka ꞊nɛ ’wo kpengdhö. ¹⁴꞊Ya kë ꞊nɛ mɛ ’waa Zuifö ’ka ꞊wa pë ’ö tɔng ‑ya pö ‑a ’sü wo ‑de ’gü ꞊waa‑ kë, kö ꞊wa kë wo ‑de ‑dhë tɔng ’ka, ’kö ‑kë ꞊nɛ ’waa ‑Zlan ‑bha tɔng ’ö‑ nu Zuifö ‑nu ‑dhë bhë ‑a dɔ. ¹⁵‑A ‑kë ’dhö ‑sü ’ka kö ꞊waa‑ ‑zɔn ꞊nɛ wɔ ‑kɔ gia‑ ’ö ꞊waa‑ wo ’ö ‑yö ’ko ’dhiö ‑sü ’ka tɔng ‑dhë bhë ‑yö ‑ya ‑sü ’ka ‑an ꞊zuö’ ’gü; ’ö bhii ‑wo ’ö ’we ‑na ‑an ꞊zuö’ ’gü bhë waa‑ ‑an ‑zo ‑ta ’gü ‑wun ‑nu ’ö ꞊ya kë ’wo ‑dhio ‑nu dɔ ‑na ‑an ‑ta bhë ꞊nɛ, ’ö ’wo‑ ꞊blɛɛ ‑an ‑dhë. ¹⁶Yi ’ö ‑Zlan dho mɛ ‑nu ‑bha za kan ‑a ’ka ꞊bɔa’ Yesu Klito ’gü ‑sü ’ka, pë ‑nu ’ö ’wo ‑bin ‑sü ’ka mɛ ’bhee‑ ‑nu ‑bha ‑tosiadhe ’gü ‑a ‑bha, ꞊nɛ ‑kɔ ’ö ’wuntaɔsë ’a‑ ꞊blɛɛ’ ‑na ꞊nɛ ’ö‑ ꞊blɛɛ ‑a ’ka ‑a ’dhö bhë, pë ‑nu ’wo dho kë ’wo bhë.

’Wun ’ö ‑gban Zuifö ‑nu waa‑ Moizö ‑bha tɔng ‑an ‑bha

¹⁷Bhi ’ü‑ pö ‑na ü ‑de ‑dhë ü Zuifö ’ka, ’ü ü zü ‑gban ‑na tɔng ‑ta, ’ü ü ‑de ’sü ‑na ꞊va ü ‑bha ‑kë ‑Zlan ‑bha mɛ ’ka ‑sü ‑wun ’gü, ¹⁸bhi ’ü‑ ‑zo ’kun ‑wun dɔ, ’ö ü ꞊daan tɔng ’ka bhë ‑a ‑wun ’gü ’ü ‑mɔa kö pë ’ö ‑së ’ü‑ dɔ ’wun ‑nu ’gü, ¹⁹‑yö ü ‑zo ’piö ꞊nɛ ’bha kë ’dhiö ‑sü ’yënngtiimɛ ‑nu ’ka ‑mɛ ’ka a? ’Bha kë ꞊nɛ ’siö ’bhü ‑sü ’dhö ‑dhɛtiidhɛ ’gü mɛ ‑nu ‑dhë ‑a? ²⁰꞊Dhɛ ‑kë ꞊nɛ ‑Zlan ‑bha tɔng ’ö ’wundɔdhe waa‑ ’wun gia‑ ’wo‑ ’gü bhë ‑wo ka ‑daan ‑a ’ka ’ö ’ka‑ dɔ bhë, ‑yö ka ‑zo ’piö ꞊nɛ ꞊ya kë ’dhö kö ka ‑kɔ ‑yö ‑mɔa ’ka pë ‑zɔn mɛ ‑nu ’waa pë gbɛ dɔ ‑an ‑dhë ’iin ’wun ‑nu ’wo ‑gban ‑Zlan ‑bha, ’ka ’në ’sɛɛn‑ ‑nu ꞊daan ‑a ’ka ‑oo? ²¹꞊Ɛɛ, ’ö ‑më ‑kë ’ö bhi ’ü mɛ ‑nu ꞊daan bhë ’ö ’bhaa ü ‑de ꞊daan’‑ ’sa? ꞊Ya kë ’dhö bhi ’ü‑ pö ‑na kö ꞊kun ’ö mɛ ‑yö ꞊kwaan bhë, ‑më ‑kë ’ü‑ wo ꞊ee? ²²’Ö bhi ’ü‑ pö ‑na kö ꞊kun ’ö mɛ ‑yö ‑da ö ’bha ‑bha dhe ’piö ’iin ’ö dhebɔ ‑yö ö ’bha dhe ꞊gɔn ꞊mɛɛ’‑, ‑a kë ’ü‑ wo ‑na ꞊nɛ ‑a ‑gɛn tɔɔ ‑më ‑ɛ? Ü‑ ‑pö ’sa ü gbaapë gba ‑sü ‑san ‑zë, ’yö ‑më ’ü‑ ꞊mɛɛ’ ‑na ‑kplawo ‑an gbadhɛ ‑nu ’gü ꞊nɛ ꞊ɛ? Ü ‑kwaan mü ‑kɔklë ꞊ɛ? ²³Ü ü ‑de ‑sü ꞊va tɔng ‑bha ‑kë ü ‑gɔ ‑sü ‑wun ’gü ’kɛɛ kö tɔng gia‑ bhë ü‑ ‑dɔ ’gü ‑Zlan ꞊bhlë ‑siö ‑sü ’ka. ²⁴Yö ꞊ga ’ö‑ ‑wun ’gü ‑Zlan ‑bha ’sëëdhɛ ꞊bɛɛn’ ‑yan ’bhaa ‑ya ‑pö: Mɛ ’ka Zuifö ’ka, ka ꞊nɛ ’ka‑ ‑kë ’ö ’sɛgümɛ ‑nu ’wo to ’ö ’wo ’wun yaa ꞊blɛɛ’ ‑na ‑Zlan ‑gɔ bhë.

²⁵’Wun mɛ ’ö ‑gban ‑kë Zuifö ’ka ‑sü ‑bha bhë, ‑kwa ‑dhɛ ‑ga ‑a ’gü ’dhɛ! ꞊Ya kë ꞊nɛ ’bha tɔng ’kun ö ’kun ‑kɔ ’ka, kö ü ‑bha ‑dho ’bɔng ‑sü ꞊bhlë ‑yö ‑dhö; ’kɛɛ ꞊ya kë ꞊nɛ ü ‑bha ꞊ya kë tɔng ‑dɔ ’gü ‑sü ’ka, kö ü ‑bha ‑kë ‑kwɛa ’ka ‑sü ‑yö ꞊nɛ ꞊druɛn ’dhö. ²⁶’Kɛɛ kë‑ wo ’dhö bhë, mɛ ’ö yaa ’go ’bɔng ’kɛɛ ’ö tɔng ‑wo ‑nu kun ö ’kun ‑kɔ ’ka, ‑Zlan ‑dho ‑a ‑ga ꞊nɛ mɛ ’ö ꞊ya ’go ’bɔng ‑a ’dhö. ²⁷‑A ‑ga ’ü‑ wo bhë, mɛ ’ö ꞊druɛn ’ka ’ö ’wun ma tɔng ‑ta bhë, bhi ’ü ‑kwɛa ’ka, ’ö tɔng ’dhö ü ‑gɔ ’ö ’kɛɛ ’bhaa‑ ’kun ö ’kun ‑kɔ ’ka bhë, yaa ’dhö za ‑lo ü tuö ꞊a? ²⁸’Ö tɔɔ ‑kë Zuifö gia‑ ’ka ‑sü ’ka‑ ‑ga ‑na bhë yaa kë ꞊nɛ pë ’wo‑ pö ꞊wa mɛ ‑ga ’wo‑ pö ‑yö Zuifö ’ka yö kun, ’iin yaa yö mɛ ‑bha ‑kë ‑kwɛa ’ka ‑sü ’ö mɛ bun ’gü ’kpaan ’ka bhë ‑a ‑bha. ²⁹Mɛ ’ö Zuifö gia‑ ’ka ’ö tɔɔ mɛ ’ö‑ ’ka ö ꞊zuö’ ’gü, ’ö‑ ‑bha ‑kë ‑kwɛa ’ka ‑sü bhë, ’ö‑ ꞊zuö’ ’piö ꞊zian’, ‑Zuu ’slööslö ‑bha yuö kë mɛ ꞊zuö’ ’piö ‑sü ꞊kwaa’; ‑kë Zuifö gia‑ ’ka ‑sü yaa yö tɔng ’ö dɔ ’ö ‑ya ‑sü ’ka ‑a ‑bha. Mɛ ’ö Zuifö gia‑ ’ka bhë, ‑a ‑bha ꞊bhlë ’yaa ’go mɛ ‑nu ’gü, ’kɛɛ ‑yö ‑go ‑Zlan ’piö.

¹‑Yö ’dhö ’püë‑ wo ꞊nɛ ‑kɔ ’kwa‑ pöë bhë ‑a ’dhö, ’kɛɛ ‑kwa ‑dhɛ ‑ga ‑a ’gü ‑së ’ka ’dhɛ! ‑Më ’ö tɔɔ ‑kë Zuifö ’ka ‑sü ꞊truën ꞊ɛn? ‑Dho ’bɔng ‑sü ’ö bhë ‑a ꞊bhlë ‑yö ‑kë ‑më ’ka ɛ? ²‑A ‑ga ’ka‑ wo ‑na bhë ‑a ꞊bhlë ꞊yö ꞊va ‑kɔ ꞊suu’‑ ’saadhö ‑ta. ‑Kwaa ’piö ‑ga ‑së ’ka ’dhɛ! Pë ’tɔ ’go ‑wo ‑nu bhë, Zuifö ‑nu ꞊nɛ ’ö ‑Zlan ‑ya ‑lo ‑an kwɛɛ. ³꞊Ɛɛ, ’ö ꞊ya kë ’dhö kö Zuifö ’bhaa ‑nu ’ö ‑zo ‑yö ‑Zlan ‑bha ‑sü yaa kë ‑an ‑gɔ bhë, kwa ‑dho ‑a pö ꞊dhë ’pö ee? ‑A ‑wun ’gü ’pö ‑Zlan ’ka ’dho to ö ‑wo ’gü pë ‑nu ’ö ’tɔ go bhë ‑a ’gü bhë ꞊ee? ⁴‑Yö kë ka ’yaan ꞊nɛ ‑Zlan ’yaa pë ‑nu kë ’dhö. ‑Yö ‑Zlan ‑bha kö ‑yö pë ‑nu kë ’wun gia‑ ’gbloo ’piö ’kö ‑kë ꞊nɛ mɛ ’plɛ ‑wo ꞊sua ‑zian ‑ta ’dhee. ‑A ‑wun ’gü, ‑yö ꞊bɛɛn’ ‑sü ’ka (‑Zlan ‑bha ’sëëdhɛ ’gü) ꞊nɛɛ: Ü pö ‑pë ‑nu ’wo bhë ‑wo gia‑ ’ka. ’Wun ꞊ya ‑da kaa‑ mɛ ka ziën, ü ‑bha ꞊nɛ ’ö to ‑a ‑bha.

⁵’Ö ‑ya kë ’dhö ’sa kö kwa ‑dho ‑a pö ꞊dhë ’pö bhë? Kö kwa këpë yaa ‑nu ’wo bhë ‑wa ‑zɔn ꞊nɛ ‑Zlan ‑yö kpengdhö e? Kwa ’klo ’ö ‑Zlan ’dhoë‑ bhɔ ‑na kö ’kwa pë yaa kë bhë ’pö‑ ‑wun ’gü ’ö ’yaa kpengdhö bhë ee? ꞊Dhɛɛ’ ’ö bhë ’a‑ ‑kpɔ ’dhö ’ö tɔɔ mɛ ’bhee‑ ‑nu ‑zo ’ta ‑kɔ ꞊nɛ ’ö bhë. ⁶’Yaa yö ’dhö! Bhii ‑Zlan ka‑ ‑ga ‑na bhë, ꞊ya kë ꞊nɛ ’yaa kpengdhö ‑be, kö ‑a ‑bha ’kpongtaadhɛ ‑bha za ’kan ‑sü ‑yö ‑yö ’më ’sa?

⁷‑Ka ‑dhɛ ‑ga ’dhɛ! ’Ö ꞊ya kë ꞊nɛ ’ma ꞊sua kë, ’ö ‑Zlan ꞊ya n ’klo bhɔ ‑a ‑wun ’gü, kö ‑Zlan ‑bha ‑kë kpengdhö ‑sü yaa yö ‑dhɛgbɛadhɛ ’gü a. ‑A ’tɔ bhɔ ‑gɛn kun bhë ꞊a? ꞊Ɛɛ, ’ö ꞊ya kë ’dhö, kö za ‑bha n ’kun ‑sü n ‑ma ‑kë ‑pë yaa kë ‑mɛ ’ka ‑sü ‑yö ‑go ’më ’sa? ⁸꞊Ya kë ’dhö kö ‑më ‑kë ’kwaa‑ pö ꞊klöödhö: «‑Kwa ’wun yaa kë kö ‑yaan ’gla ’wun ‑së ’gü.» ‑A ‑de mɛ ’bhaa ‑nu ‑wo ma Pɔlö ‑mɛ n ‑wun yaa ꞊blɛɛ’ ‑na ꞊nɛ ’wun ꞊suu’‑ bhë ꞊ya ’go n ’dhii. ’Kɛɛ kë‑ wo ’dhö bhë mɛ ‑nu bhë, za ‑dho ‑an kun ’ö ‑an ’klo ‑yö bhɔ; pë ’ö‑ ‑de dho kë ‑yö ‑mü bhii ‑yö ‑an ‑ma ‑kun!

Mɛ gbɛ ’yaa kpengdhö ‑Zlan wö ’dhiö

⁹‑Ka dɔ! Ka‑ ‑pö ꞊dhë! Ka‑ ‑pö mɛ ’kwa Zuifö ’ka, kwa ’gianzë mɛ ‑nu ’wo to ‑an ‑bha ‑ee? ‑Abi’ bhoo‑! ‑A mɛ ’kö bhë ’ma ‑dhɛ ta ’po ‑a ‑ta ’saadhö ꞊nɛ Zuifö waa‑ mɛ ‑nu ’wo to kwa ’saadhö kwa ꞊sɔɔn yaa ‑kɔ ꞊löö. ¹⁰‑Yö ꞊bɛɛn’ ‑sü ’ka ‑Zlan ‑bha ’sëëdhɛ ’gü ꞊nɛɛ: Mɛ kpengdhö ’yaa ’dhö; mɛ do ‑de yaa ‑mɔa ‑yö ö ‑gɔ ‑zɔn ‑dhɛ bhë ‑a ’gü. ¹¹Mɛ ’ö dho kë ’wunmamɛ ’ka ’yaa ’dhö. Mɛ gbɛ ’yaa ‑Zlan ꞊mɛɛ’ ꞊dhia. ¹²Mɛ ’plɛ ꞊wa ’go ‑Zlan ‑bha zian ‑ta, ꞊wa ’dho wo ’kuëdhö ‑Zlan ’ka ꞊gbiin. ’Wunsëkëmɛ ’yaa ’dhö. ‑A mɛ do ‑de ’yaa ’dhö. ¹³꞊Wa wo ꞊za ga ’dhi ’po ꞊nëdhö, ‑an ’dhi ‑wo ‑taɔ ꞊ya kë ꞊nɛ pë ’busü ’tëë ’dhö blɔɔn‑ ꞊taa; ‑an nɛga ꞊ya dɔ kö ‑yaan mɛ ‑nu ‑püö; ‑an ‑wo ‑nu ꞊wa kë ’dhiö‑ ꞊nɛ ꞊mɛɛ ’yi ’dhö. ¹⁴‑An ’dhi ‑wo ꞊ya kë ’dhangga ‑ya mɛ ‑bha ‑wo yaa ’ka. ¹⁵‑An ‑kɔ ’dhee ꞊ya kë ’siö mɛ zë ‑sü ’gü. ¹⁶‑Dhɛ ’saadhö ꞊wa bɔ ‑a ‑bha, pë ’güsiödhe waa‑ ꞊zuökaankuëdhe ꞊nɛ ’wo‑ to mü. ¹⁷Zian ’ö ‑kë ꞊zuöyagluu ‑zian ’ka bhë waa‑ dɔ do. ¹⁸‑An ‑bha ‑tosiadhe ’gü, ’suö do ’yaa ‑an ꞊zuö’ ’piö ‑Zlan buëndhö.

¹⁹‑Yö kë kwa ’yaan ꞊nɛɛ: Mɛ ’ö ’yi Zuifö ’ka, ’ö ’yi tɔng ꞊löö bhë, ‑wo ‑nu ’wo bhë ‑wo yi ‑bha ’ka ’pö, ‑yö kë ’dhö kö ‑de ‑gɔ ‑wun ‑za ’kan ‑sü ‑yaan ’kun ‑këdhösü ’ka ’iin ‑an ’dhi ‑yaan yö ’kuë‑. Mɛ ’plɛ ‑wo dɔ ‑sü ’ka ‑Zlan ‑bha zakanyi ‑gɔ. ²⁰’Ö tɔɔ mɛ gbɛ ’ka ’dho kë kpengdhö ‑Zlan wö ’dhiö ‑a ‑bha tɔng ’kun ‑sü ‑wun ’gü. ’Ö bhii tɔng ’ö ’ka‑ ‑ga ‑na bhë, ‑a këyuö ’ö tɔɔ pë ’ö ’wun yaa ’ka bhë ‑a ‑zɔn mɛ ‑dhë ‑sü ꞊nɛ ’wun yaa ’ö ꞊nɛ.

’Wun ’ö ‑gban ‑Zlan ‑bha mɛ ‑kë kpengdhö ‑kɔ ‑bha

²¹’Kɛɛ dɔ ’ö ’kwa‑ wo ꞊dɛɛ ꞊nɛ bhë, ‑Zlan ‑bha mɛ ‑kë kpengdhö ö wö ’dhiö ‑kɔ ’ö‑ wo kwa ’ka bhë, ꞊yaa‑ ‑zɔn kwa ‑dhë. ’Kɛɛ kë‑ wo ’dhö bhë, ’wun bhë tɔng ‑kɔ yaa kë ‑a ’gü. Pë ’ö ‑kë ‑ya ‑sü ’ka tɔng ’sëëdhɛ ’gü ’ö ‑Zlan ‑wodhiölomɛ ‑wo ’wun ’ö ‑gban ‑a ‑bha ‑a ꞊blɛɛ yö ‑mü. ²²’Yö ’wo‑ pö ꞊nɛ ‑Zlan ‑yö mɛ ‑kë kpengdhö (ö wö ’dhiö); ’kɛɛ ‑yö ‑sü ‑an ‑bha ‑zo ‑yö Yesu Klito ‑bha ‑sü ‑bha. Pë ’ö dhö bhë ’yaa mɛzëgüdhe kë ‑a ’gü; ’kɛɛ mɛ ’saadhö ’ö ’wo Yesu Klito ‑wun ‑dhɛ ’wun gia‑ ‑yö ‑an ‑bha ’ka. ²³’Ö tɔɔ mɛ ’plɛ ‑wo ꞊sɔɔnyaamɛ ’ka; ’ö ‑kë ‑Zlan ‑bha ’tɔbhɔdhɛ ’gü ‑sü ’ö bhë ’ö ’yaa mɛ gbɛ ꞊tian’ ‑be. ²⁴’Kɛɛ ‑Zlan ’ö bhë ‑a ’glu ’ö ‑kë ‑së ꞊duö bhë yö ꞊ga ’ö ꞊ya mɛ ‑nu kë kpengdhö ’kpaan ‑bɔa Yesu Klito ’gü ‑sü ’ka bhë, ’ö bhii yö ꞊nɛ ’ö mɛ ‑nu bho ꞊sɔɔn yaa ‑gɔ ’gan ’gü. ^25-26Kë‑ wo ’dhö bhë, ‑Zlan ‑yö Klito ‑nu sla‑ bhoë ‑pë ’ka ’dhö ‑yö kë ’dhö kö ‑a ‑bha ga ‑sü ’gü, ‑ziö mɛ ‑nu ‑bha ꞊sɔɔn yaa ‑ta dhe ’ö dho kë mɛ ‑nu ’wo ‑we ‑a ‑wun ‑bha ‑an ‑bha ’ka bhë, ‑yaan bɔ ‑a ’gü. ‑Zlan ‑ya ‑kë ’dhö kö ‑a ‑bha ‑kë kpengdhö ‑sü bhë, ‑yaan ‑a ‑zɔn ’ö tɔɔ kë‑ wo ’kpa bhë ‑a ꞊zuö’ ‑yö ‑kë ‑saa ’ö ö ‑zo bho mɛ ‑nu ‑bha këwun yaa ‑nu ‑dhë; ’kɛɛ dɔ ’kwa‑ wo ꞊nɛ, ‑a ‑bha mɛ ‑kë kpengdhö ö wö ’dhiö ‑kɔ bhë, ꞊yaa‑ ‑zɔn kwa ‑dhë; ’ö tɔɔ ‑ya ’piö kö ‑a ‑bha ‑kë kpengdhö ‑sü bhë ‑yö ’to pin ꞊taa ’iin kö mɛ ‑nu ’ö ’wo ’dhoë‑ Yesu ‑bha ga ’ö‑ wo ‑an ‑wun ’gü bhë ‑a ‑dhɛ ’wun gia‑, kö ‑yaan ‑an kë kpengdhö ’pö.

²⁷꞊Ɛɛ, ’ö ꞊dhɛ pë ‑nu ’wo bhë ꞊wa kë ꞊nɛ ‑kɔ bhë ‑a ’dhö bhë, kö mɛ ‑yö ‑dho dɔ ’më gbɔ kö ‑yaan ö ‑de ’sü ꞊va ꞊ɛɛ? ‑A këdhɛ do ’yaa ’dhö. Yaa kë ꞊nɛ ‑yö ‑sü ‑an ‑bha ‑gɔ ’wo‑ dho tɔng ‑dhë sia‑ bhë ‑a ‑bha ’kɛɛ Yesu Klito ‑wun ‑dhɛ ’wo ‑wo ’wun gia‑ bhë yö ‑mü. ²⁸’Ö tɔɔ kwa ‑bha ’ka, mɛ ‑bha ‑kë kpengdhö ‑sü ’ö ‑Zlan wö ’dhiö yaa yö pë ’ö tɔng dɔ ‑wo ’ka ‑a ’kun ‑sü ‑bha; yö ‑sü ‑zo yö ‑sü ‑bha. ²⁹’Iin kö kë ’püë‑ wo bhë, ‑Zlan bhë kë‑ wo Zuifö ‑nu dosɛn ‑bha ‑Zlan ’ka bhë ee? ’Yaa ’sɛgümɛ ‑nu ’wo to ‑an ‑bha ‑Zlan ’ka ’pö aa? ‑Abi’ ii, ‑an ’saadhö ‑an ‑bha ‑Zlan ‑mü. ³⁰’Ö tɔɔ ‑Zlan ‑yö dosɛn. Mɛ ‑nu ’wo Zuifö ’ka ‑yö ‑dho ‑an kë kpengdhö ‑an ‑bha ‑zo yö ‑sü ‑wun ’gü; ’yö dho mɛ ‑nu ’waa Zuifö ’ka ‑an yö ö wö ’dhiö kpengdhö ‑zo yö ‑sü do ’ö bhë ‑a ‑wun ’gü ’pö. ³¹‑Ka dɔ, ’wun do ‑yö mü. Yaa kë ꞊nɛ kö ꞊ya kë ’dhö kö kwa ‑bha ‑zo yö ‑sü ‑wun ’gü ’kwa tɔng ꞊bhlë bho ‑a ‑bha yö kun. Pë ’kwa‑ ‑kë ꞊zian’ ’ö tɔɔ ‑a ꞊bhlë giagia ꞊nɛ ’kwa‑ ‑ya ‑a ‑bha.

’Wun ꞊zuan’ ’ö sü Ablaamö ‑bha ‑kë kpengdhö ‑kɔ ’ö ꞊kaa’ ‑Zlan wö ’dhiö ‑a ‑bha

^1-2Mɛa‑, ’wun mɛ ’ö ‑kë mɛ ‑bha ‑kë kpengdhö ‑sü ’ka bhë, kwa ’ö ’kwa Zuifö ’ka bhë, ‑kwa kwa ’bhɛma Ablaamö ’piö ꞊gaa’ ’bhlewo ’dhɛ! ‑A ꞊bhlë ’ö ’wun bhë ‑a ’gü ’ö tɔɔ ‑më ‑ɛ? (Mɛdhɛvadhɛ ‑wa ‑pö mɛ ‑bha ‑kë kpengdhö ‑sü ‑yö ‑sü mɛ këwun ‑nu ‑bha). ’Yö ꞊dhɛ ’ö ’kwa‑ ‑ga Ablaamö ’piö bhë, ꞊ya kë ꞊nɛ ‑yö ‑kë ‑a ‑gɔ ’dhö ‑bezë kö yö ’ka ’dho ö ‑de sü ꞊va ‑be ‑a! ꞊Ɛɛ, ’kɛɛ ’wun bhë ’yaa pë gbɛ ’ka kö ‑yaan dho kë ‑de ‑sü ꞊va ‑wun ’ka ‑Zlan wö ’dhiö! ³‑Yö ꞊bɛɛn’ ‑sü ’ka ‑Zlan ‑bha ’sëëdhɛ ’gü ꞊nɛ: Ablaamö ‑yö ö ‑zo yö ‑Zlan ‑bha, ’ö‑ ‑wun ’gü ’ö ‑Zlan ꞊ya yö kpengdhö ö wö ’dhiö. ⁴Kë‑ wo bhë mɛ ’ö yuö ‑kë, ‑a ꞊saan’ ꞊nɛ ’wo‑ bho. Yaa kë ꞊nɛ gbaɔ ’wo‑ ‑kë ‑a ‑dhë ’kpaan ’ka ‑a ’ka; ’kɛɛ pë ’ö‑ ꞊dua’ ’ka yö ‑mü. ⁵Mɛ ’ö yaa ö ‑zo yö ö këwun ‑nu ‑bha ꞊nɛ ‑kë kpengdhö ‑kɔ ꞊nɛ ’ö bhë, ’ö ꞊ya ö ‑zo yö ‑Zlan ’ö ꞊sɔɔnyaamɛ ’piö ‑ga bhë ‑a ‑bha, ‑a ‑bha ‑zo yö ‑sü ’ö bhë ‑a ‑wun ’gü, ‑Zlan ‑ya ‑yö kpengdhö ö wö ’dhiö. ⁶‑Kɔ bhë ꞊nɛ ’ö Davidö ‑yö ’wun ꞊gbaan’ mɛ ‑bha ’wunsë ‑bha ’ö‑ pö ‑Zlan ‑ya yö kpengdhö ’kɛɛ ’yaa ö ‑zo ’to mɛ këwun ‑nu ’piö ꞊woë’ ꞊nɛɛ: ⁷꞊Zuögludhi ‑yö mɛ ‑nu ’ö ‑Zlan ꞊ya ziö ‑an ‑bha ’wun yaa ‑nu ‑ta ’ö ꞊ya ö ‑zo bho ‑an ’piö bhë ‑an ‑gɔ! ⁸꞊Zuögludhi ‑yö mɛ ’ö Dëmɛ ’yaa‑ ‑bha ꞊sɔɔn yaa ‑wun ’kun ö ꞊zuö’ ’piö ‑a ‑gɔ!

⁹Kë‑ wo poo ꞊nɛ ’wunsë ’ö bhë, Zuifö ‑nu ’ö ꞊wa ’go ’bɔng bhë wo ’sloo ’ö ‑gban ‑an ‑bha ‑a? ’Iin kë‑ wo bhë ꞊nɛ mɛ ‑nu ’ö ’wo to bhë ’yaa ‑an ‑bha ’ka ’pö a? Ka gia‑, ‑ka ‑dhɛ ‑ga ’wun bhë ‑a ’gü ‑së ’ka ’dhɛ! Kwa kun ’kwa ’goë‑ pö ꞊dhia ’piöklöözë ꞊nɛɛ: ‑Zlan ‑yö Ablaamö ‑kë kpengdhö ö wö ’dhiö ‑a ‑bha ‑zo yö ‑sü ‑wun ’gü ꞊nɛ ꞊a? ¹⁰꞊Ɛɛ, ’ö ꞊dhɛ ‑kë ’dhö, ’wun bhë ‑yö ‑kë ’töng ‑mlë ’ka ɛɛ? ‑Yö ‑kë kö Ablaamö ꞊ya ’dho ’bɔng ’iin kö yaa kaa ꞊kun ee? ’Kɛɛ ‑yö ’to ka ’yaan ꞊nɛ ꞊dhɛ ’ö kë ‑na ’dhö kö yaa ’dho ’bɔng ꞊kun. ¹¹Pë ’ö ‑kë ‑dho ’bɔng ‑sü ’ka bhë, ‑yö ‑yö zlöö Ablaamö ‑bha ꞊nɛ ꞊duakëpë ’dhö ꞊nɛ mɛ bhë ‑Zlan ꞊yaa‑ kë kpengdhö ö wö ’dhiö ‑a ‑bha ‑zo yö ‑sü ‑wun ’gü; ‑kɔ ’ö ꞊kaa’ zlöö ’ö Ablaamö ‑yö to zlöö mɛ ‑nu ’ö ’wo wo ‑zo yö ‑Zlan ‑bha bhë ‑an dë ’ka ’ö bhë; ‑yö ’dhö ’kö ‑kë ꞊nɛ waa ’dho ’bɔng ’dhee, ‑wo ‑Zlan wö ’dhiö kpengdhö. ¹²‑Yö mɛ ‑nu ’ö ꞊wa ’go ’bɔng ’pö ‑an dë ’ka. ’Ma‑ ’pö mɛ ’ö ꞊wa ’go ’bɔng kö a‑ ‑pö mɛ ‑nu ’ö ꞊dhɛ ’wo go ’bɔng ’ö ‑an ’dhiö yaa ’to bhë ’kɛɛ ’wo to kwa dë Ablaamö pin ’piö, ’wun ’ö ‑gban ‑zo yö ‑sü ‑bha ‑a ’ka kö yaa kë ‑kwɛa ’ka ꞊kun bhë.

’Wun ’ö ‑gban Ablaamö ‑bha ‑zo ‑yö ‑Zlan ‑bha ‑sü ‑bha

¹³‑Zlan ‑yö pë ’tɔ ’go ‑wo ‑nu Ablaamö waa‑ ö ꞊suu’‑ ‑ta ‑nu ‑an ‑dhë ꞊nɛ ’kpongtaamɛ ‑nu ’saadhö ‑wo ‑dho kë ‑an ‑bha ’ka. ’Kɛɛ kë‑ wo ’dhö bhë yaa kë ꞊nɛ, ꞊dhɛ ’ö pë ’ö tɔng ‑ya pö ’ö Ablaamö ‑ya ‑kë, ’ö pë ’tɔ ’go ‑wo bhë ’ö ‑kë ‑a ‑dhë. ’Kɛɛ ‑Zlan ‑ya ‑kë ‑a ‑dhë ’dhö ’ö tɔɔ ‑yö ‑kë kpengdhö ‑Zlan wö ’dhiö ö ‑bha ‑zo yö ‑sü ‑wun ’gü. ¹⁴Kë‑ wo bhë ꞊ya kë ꞊nɛ mɛ ‑nu ’ö ’wo tɔng kun ꞊nɛ ’ö wo ’sloo ’ö ‑to mɛ ‑gɔ ‑pë bhë ’ö dho kë ‑an ‑bha ’ka ‑be, kö ‑zo yö ‑sü ‑wun ‑yö ’kpaan, ’iin kö pë ’ö ‑Zlan ‑yö ’wun ‑gban ‑a ‑bha ’ö‑ ‑wo ‑bhö ‑wo ’ka bhë, ‑a ꞊bhlë ’yaa ’dhö. ¹⁵’Ö tɔɔ tɔng ’ö‑ ’ka‑ ‑ga ‑na bhë, ‑a ’piö ‑pë ’ö tɔɔ ‑Zlan ‑bha ‑naazuëdhe; ’kɛɛ ‑dhɛ ’ö tɔng ’yaa‑ ‑bha kö tɔng ‑lö ’gü dhe ’yaa‑ ‑bha kö ‑waan ’dhoë‑ pö ’ka yö ‑Zlan ‑naa ‑bha. ꞊Ya kë ’dhö kö ’wun ’ö ‑gban ‑kë kpengdhö ‑sü ’ö ‑Zlan wö ’dhiö ‑a ‑bha bhë tɔng ‑ya ‑dhɛ kun bhë.

¹⁶꞊Ya kë ’dhö kö pë ’ö ‑Zlan ‑ya ’tɔ go bhë, ‑yö ‑kë ’dhö ‑zo yö ‑sü ‑wun ’gü, ‑yö kë ’dhö kö ‑yaan kë gbaɔ ’kpaan ’ö ‑kë ‑a ’ka ’iin kö ‑a ꞊bhlë ‑yaan kë ‑dhö, mɛ ‑nu ’saadhö ’wo go Ablaamö ꞊suu’‑ ‑ta ’gü ‑an ‑dhë; ’yö kë‑ wo ’dhö bhë ’ö bhii ’yaa mɛ ‑nu ’ö ’wo tɔng kun bhë wo ’sloo ‑an ‑bha ’ka. ’Kɛɛ ‑yö mɛ ’saadhö ’wo ’wun ‑dhɛ ’wun gia‑ ꞊nɛ Ablaamö ’dhö bhë, ‑an ‑bha ’ka ’pö. Ablaamö bhë ꞊nɛ ’ö tɔɔ kwa ’saadhö kwa dë ¹⁷꞊nɛ ‑kɔ ’ö pë ’ö ꞊bɛɛn’ ‑sü ’ka ‑Zlan ‑bha ’sëëdhɛ ’gü ’ö‑ pöë ‑a ’dhö ꞊nɛɛ: (‑Zlan ‑ya ‑pö: Ablaamö,) ’ma ü kë ’sɛgɔ ꞊va dë ’ka. ‑Zlan ’ö yö bhë ’ö ‑kɔ ‑mɔ ’wuën‑ ‑sü ’dhoë‑ ‑gɔ kö ‑yaan ‑këdhösü nu mɛ ‑nu ’ö ꞊wa ga ‑an ‑dhë ’iin kö pë ’ö ’yaa ‑dhö ‑yaan ‑da bhë, ‑a wö ’dhiö Ablaamö ‑yö kwa dë ’ka. ‑A ‑de, ‑Zlan bhë, Ablaamö ‑yö ö ‑zo ‑yö ‑a ‑bha. ¹⁸‑Zlan ‑ya ‑pö Ablaamö ‑dhë: Ü ꞊suu’‑ ‑ta ‑nu ‑dho kë ꞊va ꞊nɛ ‑kɔ ꞊nɛ ‑a ’dhö. ’Yö ꞊dhɛ ‑kë ’dhö ’yö Ablaamö ‑yö ‑kë ’sɛgɔ ꞊va dë ’ka ’ö tɔɔ Ablaamö bhë, ‑yö ö ‑zo ‑yö ‑Zlan ‑bha, ’ö ö ‑zo to pë ’ö ‑Zlan ‑ya ’tɔ go ‑a ‑dhë bhë ‑a ‑gɔ ’kɛɛ kö ‑dhɛ bhë ‑a ‑bha, (’wun gia‑ ’ka, ‑zo ‑yö ‑a ‑bha ‑dhɛ pë ’tee ‑de yaa kë mü). ¹⁹꞊Dhɛ ’ö ’wun ‑nu bhë ’wo kë ‑na ’dhö kö Ablaamö ‑kwɛ ꞊ya kë ꞊nɛ ꞊këng’ do ’dhö; ’kɛɛ kë‑ wo ’dhö bhë, ‑a ꞊zuö’ yaa ’to zlöö ‑a ‑bha ‑kë zii ꞊duö ‑sü ’iin Saala ‑bha ö ’ka ’dho ’në kpɔ gbɔ bhë ‑a ‑wun ’gü. ²⁰Pë ‑nu bhë ‑wo ‑kë ’dhö gia‑ ’ka ’kɛɛ ‑a ‑bha ‑zo ‑yö ‑Zlan ‑bha ‑sü ‑kɔ yaa yö züë‑, ’iin ‑a ꞊zuö’ yaa ’zëzë ’kun pë ’ö ‑Zlan ‑ya ’tɔ go ‑a ‑dhë bhë ‑a ‑wun ‑bha. Pë ’ö ‑kë ꞊zian’ ’ö tɔɔ ‑a ‑bha ‑zo ‑yö ‑Zlan ‑bha ‑sü bhë ‑a ꞊faan’ ꞊nɛ ’ö më ’ö ‑Zlan ’tɔ ‑kë ꞊va. ²¹‑Yö ‑kë ‑a ’yaan ꞊nɛ pë ’ö ‑Zlan ‑ya ’tɔ go bhë, ‑a ‑kɔ ‑mɔ ’wuën‑ ‑sü ’plɛ ‑ya ‑gɔ kö ‑yaan kë. ²²Kë ‑kɔ ’ö ꞊kaa’ ’ö Ablaamö ‑bha ‑zo ‑yö ‑Zlan ‑bha ‑sü ‑wun ’gü ’ö ’sëëdhɛ ꞊bɛɛn’ ‑yan ‑ya pöë: ‑Yö ‑kë kpengdhö ‑Zlan wo ’dhiö bhë ’ö bhë. ²³’Kɛɛ ‑wo kpö ’ö ‑kë «‑yö ‑kë kpengdhö ‑Zlan wö ’dhiö» ’ka bhë, waa ‑ya, yö do ‑a ‑bha ‑ya ’ka. ²⁴Mɛ ‑nu ’ö ‑Zlan dho kwa yö kpengdhö ’pö ö wö ’dhiö bhë, ‑wo kpö bhë ‑yö kwa ‑bha ’ka, kwa ’ö ‑Zlan ’ö kwa Dëmɛ Yesu bho ga ’gü bhë ’ö kwa‑ ‑wun ‑dhɛ ’wun gia‑ bhë. ²⁵Yesu ’ö bhë, ga ’ö‑ wo bhë, ‑yö ‑ga kwa ‑bha ꞊sɔɔn yaa ‑nu ‑wun ’gü. ’Kɛɛ ꞊dhɛ ‑kë ’dhö ‑yö ‑go ga ’gü kö ’kwaan‑ kë kpengdhö ‑Zlan wö ’dhiö.

꞊Dhɛ ’ö ’kwa ‑kë kpengdhö bhë, dhidhe ’ö kwaa‑ ‑Zlan ‑nu kwa ziën bhë, ’wun ’ö ‑gban ‑a ‑bha

¹‑A ‑kë ’dhö ‑sü ’ka, ꞊dhɛ ‑kë ꞊nɛ kwa ‑zo ‑yö Klito ‑bha ‑sü ‑mü bhë, yö ꞊ga ’ö ’kwa kë kpengdhö ‑Zlan wö ’dhiö bhë. ‑A ‑wun ’gü ꞊nɛ ’ö dɔ ’kwa‑ wo ꞊nɛ ’ö ’kwa ꞊zuöyagluu ’gü ‑a wöödhö kwa ‑bha ‑klu kwa Dëmɛ Yesu Klito ‑bha ‑sü ’gü bhë. ²Yesu ꞊nɛ ’kwa bɔ ‑a ‑ta ’ö ’kwa ‑da ‑Zlan ‑bha ’glusë ’gü, ’ö ’kwa ‑yaa ’gü bhë. ’Kɛɛ kë‑ wo ’dhö bhë ‑yö ‑sü kwa ‑bha ‑zo ‑yö ‑a ‑bha ‑sü ‑bha. ’Yö pë ’ö kwa ꞊zuögludhi ‑gɛn ’ka bhë ’sa ’yö ‑kë ‑Zlan ‑bha ’tɔbhɔdhe ’ö ’dhiö ’ö kwa ‑zo ’dhö ‑a ‑dhë ꞊nɛ kwa ‑dho kë ‑a ’gü bhë ‑a ’ka. ³’Ö‑ ‑de ’kö ‑kë ꞊nɛ kwa ’klobhɔdhe ’gü ’dhe, ‑a ꞊zuögludhi ‑yö kwa ‑gɔ; bhii ’klobhɔdhe ‑nu ’wo bhë ‑an ’piö ‑pë ‑nu ’wo ’wun ‑së ‑nu ’ka ‑wo ‑dhö; ’ö tɔɔ wo ꞊nɛ ’kwa bɔ ‑an ’gü ’ö ꞊zuösaadhɛ waa‑ ‑dɔ diindhö ‑sü ’wo ‑kë kwa ‑gɔ. ⁴Yö ꞊ga ’ö ꞊zuösaadhɛ ’ö bhë ’pö, ’ö‑ ‑kë ’ö ’kwa dɔ gɛnngdhö ’güdandhe ‑nu ’gü ’ö kwa ‑bha ’yan ‑to ‑a ‑gɔ ‑pë bhë ’ö dɔ ’pö gɛnngdhö. ⁵Kwa ‑bha ’yan ‑to ‑a ‑gɔ ‑pë ‑de ’pö ’ö ’yaa kwa ‑kɔ yö züë ’ö tɔɔ ꞊dhɛ ‑kë ’dhö, ‑Zlan ‑bha ‑a ‑dhɔ ‑kë kwa ’ka ‑sü bhë, ꞊yaa‑ ‑ya kwa ꞊zuö’ ’gü; ’yö‑ ‑kë ’dhö ‑Zuu ’slööslö ’ö‑ nu kwa ‑dhë bhë ‑a ꞊kwaa’.

⁶Kë‑ wo ’dhö bhë ’ö tɔɔ ꞊dhɛ ’ö ꞊tun ‑be kö ꞊faan’ gbɛ ’yaa kwa ‑gɔ bhë, yi ’ö ‑Zlan ‑ya ‑ya bhë, ꞊dhɛ ’ö ‑lo, Klito ‑yö ‑ga mɛ ’ö kwa ꞊sɔɔn ’dhö ya bhë kwa ꞊wuën’. ⁷‑Yö ’dhö ’püë‑ wo; ’kɛɛ ’kwa ‑dhɛ ‑ga ’wun bhë ‑a ’gü ‑së ’ka, ‑yö ‑dho kë ’gbee‑ kö mɛ ‑yö ö ‑de nu kö ‑yö ga mɛ ’ö kpengdhö ‑a ꞊wuën’; ’iin kö mɛ ’ö‑ këwun ’dhö ‑së, mɛ ‑yö ö ‑de nu ‑a ꞊wuën’ ’pö. ⁸’Kɛɛ kwa ’ö ’kwa bhë, ‑Zlan ‑ya ‑zɔn kwa ‑dhë ꞊nɛ ö kwa ‑dhɔ ‑kë giagiawo, ’ö tɔɔ kwa ‑kë ꞊sɔɔnyaamɛ ’ka, ’ö Klito ‑yö ga kwa ꞊wuën’. ⁹’Yö‑ ‑bha ga ‑sü bhë ꞊nɛ kwa bɔ ‑a ‑ta ’ö ’kwa ‑kë kpengdhö ‑Zlan wö ’dhiö; ꞊ya kë ’dhö kö mɛ ꞊suu’‑ ’ö bhë yaa ’dho kwa dha ‑Zlan ‑bha ‑naazuëdhe ‑gɔ ‑a? ¹⁰Kwa ‑kë ‑be ‑Zlan yaagümɛ ’ka; ’kɛɛ ꞊dɛɛ ꞊nɛ ꞊yaa‑ kë ’kwa bɔ ‑a Gbö ‑ta, ꞊ya kwa dhi ö ’ka. ꞊Dhɛ ’ö ꞊ya ’we ‑a ‑bha kwa ‑nu ’kwa dhi ’kuë‑ bhë, ‑më ’pö dho dɔ kwa ‑gɔ zian‑ kö ’kwaan‑ ’kun dhasü ’ka ꞊bɔa’ ‑a Gbö ‑bha ‑tosiadhe ‑ta ‑sü ’ka ɛ? ¹¹Pë ’bhaa ’ö mü ’zü ’ö tɔɔ kwa ꞊zuögludhi ‑sü ‑mü kwa ‑bha ‑Zlan ’piö ꞊bɔa’ kwa Dëmɛ Yesu Klito ’ö ꞊ya kwa dhi (kwa Dë) ‑Zlan ’ka bhë ‑a ‑ta ‑sü ’ka.

‑Dankuëdhe ’ö Adan waa‑ Klito ‑an ziën

¹²Kë‑ wo ’kpa bhë, ꞊sɔɔn yaa ‑yö ‑da ’kpongtaa mɛ do ꞊kwaa’‑. Mɛ ’ö bhë ’ö tɔɔ Adan. ’Yö ꞊sɔɔn yaa ’ö ’dhö bhë ’pö, ’ö nu ga ’ka ’kpongtaa. ‑Kɔ ’ö ꞊kaa’ ꞊zlöö ’ö mɛ ’plɛ ’dho ga ‑na ’ö bhë ’ö bhii mɛ ’plɛ ‑wo ꞊sɔɔn yaa kë. ¹³‑A kë ꞊yië’ kö ‑Zlan ‑yaan tɔng ‑nu nu Moizö ‑dhë, kö ꞊sɔɔn yaa ꞊ya ‑da ’kpongtaa ’saadhö; ’kɛɛ ꞊dhɛ ’ö ‑kë ꞊nɛ tɔng yaa kë ‑dhö ’töng bhë ‑a ’ka, ‑yö ö ‑zo ‑bho ꞊sɔɔn yaa ’ö ‑kë ‑a ’töng bhë ‑a ’ka bhë ‑a ‑dhë. ¹⁴’Kɛɛ kö kë‑ wo ’dhö bhë ’sa, ’go Adan ‑bha ’töng ‑bha ’ö yöë Moizö ‑bha ’töng ‑bha, ga ‑yö ‑kë yuö ’piö; ’ö‑ ‑de ’ö mɛ ‑nu ’ö ‑an ‑bha ꞊sɔɔn yaa yaa kë ꞊nɛ Adan ’ö ‑Zlan ‑wo ‑lö ’gü ‑a ‑bha ’dhö bhë, ’yö ‑kë ‑an ’sü ꞊dhia.

Adan ’ö bhë, mɛ ’ö dho nu ’ö Klito ’ka bhë, ‑yö ‑kë ‑a ’bin ’ka. ¹⁵‑Yö ’dhö ’püë‑ wo ’kɛɛ Adan ’ö bhë, ‑a ‑bha ꞊sɔɔn yaa ’ö bhë kwaa ‑mɔa ’kwa‑ ‑zɔn gbaɔ ’ö ‑kë kwa ‑dhë bhë ‑a ’ka, ‑a ‑bha ‑kë ‑ziögɔüsüzë ‑wun ’gü. ’Ö tɔɔ ’kö ‑kë ꞊nɛ mɛ ’plɛ ‑wo ga ‑sü ’ka mɛ do bhë ‑a ‑bha ꞊sɔɔn yaa ‑wun ’gü, ‑Zlan ‑bha ’glusë ’ö‑ ‑kë kwa ’ka bhë, ꞊yö ꞊va ‑ziögɔüsüzë; yö do bhë ’zü ’ö‑ ‑bha gbaɔ ’ö‑ ‑kë (’kpaan ’ka) mɛ ’plɛ ‑dhë ꞊bɔa’ Yesu Klito dosɛn ’kpaan ’gü ‑sü ’ka bhë, ’ö ꞊bhlëzë. ¹⁶Pë ’bhaa ’ö mü ’zü ’ö tɔɔ ‑Zlan ‑bha gbaɔ ’ö‑ kë bhë, ‑a këyuö ꞊yö gbɛ. ’Yaa ꞊nɛ mɛ do ‑bha ꞊sɔɔn yaa ’ö ‑kë bhë ‑a ’piö ‑pë ’dhö; ’ö tɔɔ za ’ö mɛ do ‑bha ꞊sɔɔn yaa ’ö‑ ‑kë bhë ’ö‑ ’piö ‑pë ’ka bhë ’ö tɔɔ mɛ ’kun ‑sü ’ö mɛ ‑da ’klobhɔdhe ’gü, ’kɛɛ kö ‑Zlan ‑bha gbaɔ ’ö‑ ‑kë ’kpaan ’ka kö ꞊sɔɔn yaa ꞊plëëzë ꞊ya kë bhë, ‑a ’piö ‑pë ’ö ’dhö mü ’pö bhë ’ö tɔɔ ‑ziö ꞊sɔɔn yaa ‑ta dhe ’ö mɛ ‑kë kpengdhö. ¹⁷‑Yö ’wun gia‑ ’ka, ga ’ö bhë ‑yö ‑da ’dhö mɛ do ꞊kwaa’, mɛ do ’ö ’dhö bhë ‑a ‑wun ’gü. ’Kɛɛ kwa ‑bɔ Yesu Klito dosɛn ’kpaan ‑ta ’ö ’kwa pë yö ꞊va. ’Ö tɔɔ mɛ ’saadhö ’ö ‑Zlan ‑bha ’glusë ꞊gbaɔnsü ’ö‑ kë ‑na mɛ ‑nu ’ka ’ö ’wo ‑da ‑na ‑a ’gü ’iin ’ö‑ ‑bha pë ‑nu ‑kë kpengdhö ‑sü ’gü ’ö ’wo bɔ ‑na ‑a ’ka bhë, ‑këdhösü ‑yö ‑dho kë ‑an ‑gɔ ’ö ’wo ‑gludëdhɛ kë Klito ‑wun ’gü.

¹⁸‑A ‑kë ’dhö ‑sü ’ka, ‑kɔ do ’ö mɛ ’plɛ ‑wo bɔa Adan mɛ do bhë ‑a ‑bha këwun yaa ‑ta ’ö za ‑yö ꞊loë’ ‑an tuö bhë ’ö mɛ ’plɛ ‑wo goë ’gan ’gü ꞊bɔa’ Yesu Klito mɛ do bhë ‑a këwun ‑ta, ’ö ‑këdhösü ‑yö ꞊kaa’ ‑an ‑gɔ. ¹⁹‑Kɔ do ’ö mɛ do ‑bha ‑Zlan ‑wo ‑lö ’gü ‑sü ‑yö mɛ ꞊plëëzë ꞊kaa’ ꞊sɔɔnyaamɛ ’ka bhë, ’ö mɛ do ‑bha ’wun ‑ma ‑Zlan ‑ta ‑sü ‑yö mɛ ꞊plëëzë ꞊kaa’ kpengdhö ‑Zlan wö ’dhiö.

²⁰Tɔng ’ö bhë, ‑yö ‑da ’wun bhë ‑a ’gü ’dhö ‑yö kë ’dhö kö ꞊sɔɔn yaa ‑yaan yöë ‑dhɛgbɛadhɛ ’gü. ’Yö ꞊dhɛ ’ö ‑kë ꞊nɛ ‑kɔ bhë ‑a ’dhö ’ö ꞊sɔɔn yaa ‑yö ‑da ‑dhɛgbɛadhɛ ’gü; ’ö ‑dhɛ bhë, ’ö ‑Zlan ‑bha ’glusë ‑yö ‑wo ‑a ‑bha ’ö ‑ziö ‑a ’ka ꞊sɔɔn yaa këyuö ‑ta. ²¹꞊Dhɛ ’ö ‑kë ’dhö, ‑kɔ do ’ö ꞊sɔɔn yaa ‑yö yuö ꞊kaa’ ga ꞊kwaa’ bhë, ’ö ‑Zlan ‑bha ’glusë bhë ’ö ö ‑bha kë ‑na ‑a ’ka ‑Zlan ‑bha ’wun ‑nu ‑kë kpengdhö ‑sü ’gü, ’ö‑ ’tɔ ’dhö bhɔ ‑na kö ‑yaan kwa ‑da ‑këdhösü ’ö ’yaa yën ‑a ’gü ꞊bɔa’ kwa Dëmɛ Yesu Klito ‑ta ‑sü ’ka bhë.

꞊Dhɛ ’ö ’wun ’ö ‑gban ꞊sɔɔn yaa ‑bha ’ö ’kwa ga ‑sü ’ka ‑a ‑gɔ bhë, ‑këdhösü ‑yö kwa ‑gɔ Klito ’gü

¹’Wun ‑nu ’wo bhë ꞊wa kë ꞊nɛ ‑kɔ bhë ‑a ’dhö, kö kwa dɔ ‑kɔ ‑yö ‑dho kë ꞊dhë mü? ’Dho ’pö ’kwa dhoë‑ wo kwa ‑bha ‑tosiadhe ’ka kwa ’dhiö ꞊sɔɔn yaa ’gü ‑yö kë ’dhö kö ‑Zlan ‑bha ’glusë ꞊gbaɔnsü bhë ‑yaan ‑wo ‑dhɛ bhë ‑a ‑bha ’pö bhë ee? ²‑Abi’ bhoo‑! ’Kwa ga kwa ‑bha ꞊sɔɔn yaa kë ‑sü ‑gɔ ’saadhö. ’Ö ꞊ya kë ’dhö kwa ‑to ꞊sɔɔn yaa ’gü ‑gɛn ’ö mü ’ö tɔɔ ‑më ‑ɛ? ³‑Yö kë ka ’yaan ꞊nɛ mɛ ‑nu ’saadhö ’ö ’wo kwa bɔ yiö kö ’kwaan‑ ’to ‑klu ‑sü ’ka Klito ‑bha bhë, kwa ‑nu kwa ‑klu ‑sü ’ka ’kuë‑ ’dhö ’ö ’kwa bɔa ga ’gü ꞊nɛ bhë. ⁴꞊Ya kë ’dhö, kö kwa ‑bha ‑bɔ yiö ‑sü ’gü, kwa ‑nu ꞊nɛ ’ö ’kwa ga ’kuë ’ö ’wo kwa ‑bin bhë, ‑yö kë ’dhö kö ‑kɔ do ’ö Klito ‑yö goë ga ’gü kwa Dë (‑Zlan) ‑bha ’piigbeedhɛ ’gblüünzë ꞊kwaa’ bhë ’ö kwa ‑de ’pö ’kwa dho ‑wo ‑a ’ka ’pö kö ’kwaan‑ kaa ‑tosiadhe ‑dëü kë ‑sü ’gü.

⁵’Ö bhii ‑kɔ do ’ö kwa ‑nu ’kwa ꞊kaa’ ‑a ’gü do ga do ’ö‑ wo bhë ‑a ’gü bhë ’ö ’kwa dho kaa ‑a ’gü do ‑a ’ka ‑go ga ’gü ‑sü do ’ö‑ wo bhë ‑a ’ka ’pö. ⁶’Wun do ‑yö mü ’ö ‑kɔnëga ‑glüü ‑a ‑ta ‑sü ’dhö ‑së; ’ö tɔɔ kwa ‑bha ‑tosiadhe ’ö ’kwa ‑kë ‑a ’gü ’dhiö ‑be bhë, waa‑ Klito ꞊waa‑ ‑an dɔ ‑gaatalü ‑bha, ꞊wa ga ‑yö kë ’dhö kö kwa mɛdhɛ ꞊sɔɔn yaazë bhë ‑a ’gü ‑yaan ꞊siö’ kö ’kwaan‑ ’go ꞊sɔɔn yaa ‑gɔ ’gan ’gü. ⁷’Ö tɔɔ mɛ ’ö wo ‑nu ꞊wa ga wo ’kuë‑ kö mɛ bhë ꞊ya ’go ꞊sɔɔn yaa ‑gɔ ’gan ’gü ꞊nɛ bhë. ⁸’Ö ꞊ya kë ꞊nɛ (giagia ’ka) kwaa‑ Klito ‑nu ꞊nɛ ’kwa ga kwa ’kuë, kö ‑yö kë kwa ’yaan ꞊nɛ kwa ‑nu kwa ‑dho kë ‑këdhösü ’gü kwa ’kuë. ⁹’Ö bhii Klito ’ö ’kwa‑ ‑ga ‑na bhë, ꞊dhɛ ’ö ꞊ya ’go ga ’gü, yaa ’dhö ga gbɔ ’gbɛɛdhö, ’ö tɔɔ ga ‑kɔ gbɛ ’yaa ‑mɔ ‑a ‑bha gbɔ. ¹⁰Ga ’ö‑ wo bhë ’ö tɔɔ ga dosɛn ’ö‑ wo ꞊sɔɔn yaa ‑wun ’gü. ’Kɛɛ ‑këdhösü mɛ ’ö‑ kë ‑na zlöö bhë, ‑ya ‑kë ‑Zlan ‑bha kë ’ka. ¹¹‑Kɔ do bhë ꞊nɛ ’ö ’ka dho ka ‑de süë ’pö ꞊nɛ ka ga ‑sü ’ka ꞊sɔɔn yaa ‑nu ‑gɔ; ’kɛɛ ka ’bhee‑ ‑Zlan ‑bha ’ka ka ‑bha ‑kpa Yesu Klito ‑bha ‑sü ’gü.

¹²꞊Ya kë ’dhö kö ꞊sɔɔn yaa ꞊dua’ ’yaa ‑mü kö ‑yö ‑ya ka ‑ta kö ‑yaan kë kö bun ’ö‑ ’gü dho ꞊siö’ ’ö ka ‑gɔ bhë, ’kaan‑ ’to ‑a ‑zo ’kun ‑wun ‑nu ’piö. ¹³꞊Ya kë ’dhö kö ka dɔ ’toutou ‑nu ’wo ka ‑bha bhë, ꞊kun ‑kë ’ka ‑an to ’wo ‑kë ꞊sɔɔn yaa ꞊kaa’ ‑pë ’ka. ’Kɛɛ ‑ka ka ‑de nu ꞊zian’ ka ’böü ’ka ‑Zlan ‑dhë bhii ’ka ’go ga ’gü, kö ’kaan‑ kë ’wun ‑nu kpengdhö ꞊kaa’ ‑pë ‑nu ’ka. ¹⁴꞊Sɔɔn yaa ꞊dua’ ’yaa ‑mü kö ‑yö ‑ya ka ‑ta bhii ’kaa tɔng ꞊löö; ka ‑Zlan ‑bha ’glusë ꞊löö ꞊zian’.

’Wun ’ö ‑gban ‑kë kpengdhö ‑sü waa‑ ‑kë ꞊sɔɔn yaa ’gü ‑sü ‑an ‑bha ꞊nuadhɛ ‑wun ‑bha

¹⁵‑Ka dɔ! ’Wun ‑yö ’wun bhë ‑a ’gü, yaa kë ꞊nɛ ꞊dhɛ ’kwaa tɔng ꞊löö gbɔ ’ö ’kwa ‑Zlan ‑bha ’glusë ’gü zlöö bhë kö pë ’ö ’kwa dho ꞊sɔɔn yaa kë (‑a pö ‑sü ’ka ꞊nɛ ’kwa ꞊sɔɔn yaa kë, ‑Zlan ’ka ’dho to mü ‑yaan kwa ’klo ‑bhɔ ꞊nɛ ‑kɔ ’ö ’dhiö ‑a ’dhö) yö kun. ¹⁶‑Yö kë ka ’yaan ꞊nɛ ziö ’kwa‑ wo ‑na bhë, ꞊ya kë ꞊nɛ ’kwa kwa ‑de nu mɛ ‑dhë ꞊nɛ ꞊nua ’dhö kö ’kwaan‑ ’wun ma ‑a ‑ta kö ’kwa ‑da ‑a ‑gɔ ꞊nuadhɛ giagia ’gü ‑a këpë ‑nu ’gü ꞊nɛ bhë. ‑Yö ꞊sɔɔn yaa ’ö‑ ’dhiö‑ to ga ‑bha oo, ‑Zlan ‑zo ’kun ‑wun kë ‑sü ’wo dho mɛ ’ka zian kpengdhö ‑ta oo, kö ’kwa ‑da ‑a ’gü ꞊nɛ bhë. ¹⁷’Kɛɛ ‑Zlan ’tɔ ‑yö kë ꞊va ’ö bhii ꞊dhɛ ’ö ka ’ö ’ka ‑kë ꞊sɔɔn yaa ‑bha ꞊nuadhɛ ’gü ‑be bhë ’ö ’ka ka bo ꞊sɔɔn yaa kë ‑sü ’ka, ’ka ka ‑de nu ’wun ’ö ’ka‑ ma bhë ‑to ‑a ꞊zuan’ ’piö ‑sü ‑dhë ’ö ’ka‑ kun kpinngdhö. ¹⁸’Ka ’go ꞊sɔɔn yaa ‑gɔ ’gan ’gü, ’ka ‑da ‑Zlan ‑zo ’kun ‑wun ‑gɔ ꞊nuadhɛ ’gü. ¹⁹Mɛa‑, ‑ka ziö n ‑ta. ꞊Nuadhɛ ‑wun ’ö bhë, n ’dhi ‑yö ‑zuö ‑a ‑bha ‑yö kë ’dhö kö ‑yö ꞊sɔɔn yaa ’piö oo, ‑yö ‑Zlan ‑zo ’kun ‑wun ’piö oo, kö ’wun ’ö ‑gban ‑a ‑bha, ’a‑ ꞊blɛɛ’ ‑na ꞊nɛ kö ‑a ‑gɛn ma ‑sü ‑yö kë ka ‑gɔ ‑së ’ka. Kë‑ wo ’dhö ꞊zian’ ‑be bhë, ka ka ‑de ‑nu pë ’ö ‑dhiizë ‑a kë ‑sü ‑dhë ka ꞊zuö’ ’plɛ ’ka, ’yö ’ka ‑kë ‑tosiadhe yaa yaa kë ‑sü ’gü ꞊nɛ mɛ‑ ‑kë ꞊nuadhɛ ’gü; kö ‑kɔ do bhë ‑a ’ka, zlöö ꞊nɛ ‑ka ꞊daa’ ka ꞊zuö’ ’plɛ ’ka ‑Zlan ‑zo ’kun ‑wun ’gü ꞊nɛ pë ’wo‑ pö ‑a ‑bha ’kpa ’ka ‑da zian kpengdhö ‑bha ꞊nuadhɛ ’gü kö ‑tosiadhe ’ö ‑ya ‑sü ’ka ‑de ‑ta ‑Zlan ‑bha ’ka bhë, ’kaan‑ ‑a wo ꞊e.

²⁰꞊Dhɛ ’ö ’ka ꞊tun ꞊sɔɔn yaa ‑gɔ ꞊nuadhɛ ’gü, pë ‑nu ’wo ‑kë ‑Zlan ‑zo ’kun ‑wun ’ka, ‑an ‑bha ’wun yaa kë ka ‑bha. ²¹Kë ‑de ’ka‑ wo ꞊sɔɔn yaa ’ö‑ lë‑ ‑nu ’dhö ka kë ‑na zlöö ꞊nɛ ‑a ’gü bhë, ‑a ꞊tɛi’ ’pö kaa‑ ‑dɔ ꞊nɛ ‑a ꞊truën ’ö tɔɔ ga bhë ee? ²²’Kɛɛ dɔ ’kwa‑ wo ꞊nɛ, ’ka ’go ‑a ‑gɔ ’gan ’gü, ’ka ‑da ‑Zlan ‑bha yuö ’gü. Pë ’ö‑ ’piö ‑pë ’ka ka ꞊truën ’gbloo ’piö ꞊zian’ ’ö tɔɔ ‑dhɛ bhë ꞊nɛ ’ö ’ka dho ‑tosiadhe ö ‑de ‑ta ‑Zlan ‑bha ’ka ‑a wo ‑a ‑bha kö yi ‑kaanta ‑nu ’ka, kö ‑këdhösü ’ö ‑dhö ꞊toëpö ’ka bhë ‑yaan kë ka ‑gɔ. ²³’Ö bhii pë ’ö ꞊sɔɔn yaa ’piö ‑pë ’ka ö tɔɔ ga. ’Kɛɛ kë‑ wo ’dhö bhë pë mɛ ’ö ‑Zlan ‑ya ‑kë kwa ‑dhë gbaɔ ’ka ’ö ’yaa ‑ya ‑sü ’ka ‑a ‑yɛ ’zü ‑gɔ bhë ’ö tɔɔ ꞊toëpö ‑këdhösü ’ö ’kwa ‑mɔa ’kwa‑ yö kwa ‑bha ‑kpa kwa Dëmɛ Yesu Klito ‑bha ‑sü ’gü ‑sü ’ka bhë.

¹’Wun ꞊zuan’ mɛ ’ö n ’dhi ’dhoë‑ ‑zuö bhë ‑yö ‑dho kë ꞊nɛ ’ka‑ ma do; ’ö bhii ’wun ’ö ‑gban tɔng ‑bha bhë, ‑a ‑bha ‑kɔ ‑mɔ mɛ ‑bha ‑sü ’ö bhë, ‑yö kwa ’gü kö kwa ꞊tun ’bhee‑ ’kpongtaa zö bhë ka‑ ‑dɔ. ²‑A ꞊tɛi’ ‑yö ‑kë ꞊nɛ dhe waa‑ ö ꞊gɔn, ’wun ’ö ‑gban ‑an ‑bha ‑a ’dhö; dhe ’ö bhë, waa‑ ö ꞊gɔn ‑an ‑bha ‑kë ’ko ’piö ‑sü ’ö tɔng ’gü bhë, ‑yö ’gbee‑ ’kɛɛ kö mɛ ꞊plɛ ’wo bhë ‑wo ꞊tun ’bhee‑. ’Kɛɛ ꞊ya kë ꞊nɛ mɛ ꞊plɛ ’wo bhë ‑a mɛ do ꞊ya ga, kö tɔng ’ö ‑an ‑kë dhe waa‑ ꞊gɔn ‑an ’ka bhë, ꞊ya ‑potaasü nu ‑a mɛ ’ö to bhë ‑a ‑dhë. Kwa ‑mɔa ’kwa‑ pö, ꞊ya kë ꞊nɛ ‑a mɛ ꞊plɛ ’wo bhë, ‑a gɔɔn‑ ‑zë ꞊nɛ ’ö ga kö ‑potaasü ꞊ya kë dhebɔ bhë ‑a ‑gɔ. ³’Kɛɛ kë‑ wo ’dhö, mɛ ꞊plɛ ’wo bhë ‑an ’yan ꞊ya ’to ‑a ’gü, ‑a mɛ do ꞊ya ö ‑kɔ ‑da mɛ ’bhaa gbɛ ’gü kö mɛ bhë, ꞊ya ꞊sɔɔn kë ’gbönggböng. ꞊Ya kë dhebɔ ’ka, ‑yö ‑dho ‑mɔ ‑a ‑bha kö ‑yö kë mɛ ’waa gbɛ ‑bha dhebɔ ’ka kö ‑yaan ’kun ‑kë ꞊sɔɔnkëdhe ’ka ‑sü ’ka kö ‑a ꞊gɔn ‑blɛɛzë ’yaa‑ ’gü gbɔ. ⁴N dhegluzë ‑nu, pë do bhë ’ö‑ ’ka; gwaan mɛ ’ö ’ka ‑kë ‑a ’gü ‑be bhë, ꞊dhɛ ’ö ka ‑bha ‑kpa Klito ‑bha ‑sü ’gü ’ö ’ka ga bhë, kaa‑ tɔng ‑nu, ’kaa ka ’kuë‑ gbɔ; ‑potaasü ꞊ya kë ka ‑gɔ kö ’kaan‑ kë mɛ ’waa gbɛ ‑bha ’ka. ꞊Dhɛ ’ö ’ka ga ’dhö bhë, mɛ ’ö go ga ’gü bhë ꞊nɛ ’ö ’ka‑ ‑bha ’ka zlöö, kö këwun ‑së ‑nu ’wo ‑dhö, ’kaan‑ ‑an kë ‑Zlan ‑dhë. ⁵’Ö tɔɔ ꞊dhɛ ’ö ’kwa ꞊tun kwa mɛbheedhe ‑wɔ wo ꞊dhia pë ‑nu kë ‑sü ’gü pë ‑nu ’ö tɔng ‑yö ‑an ‑dhio dɔ bhë ‑an ’gü bhë, ’dho ꞊nɛ ’kwa ‑kë ‑a wo ꞊dhia ga ‑zian ‑ta bhë. ⁶’Kɛɛ dɔ ’kwa‑ wo ꞊nɛ kwa ‑potaasü ‑mü tɔng buëndhö; ’ö tɔɔ pë ’ö ’kwa ‑kë ‑a ‑gɔ ’gan ’gü bhë, kwa ‑ga ‑a ‑gɔ. ꞊Ya kë ’dhö zlöö kö kwa ‑mɔa ’kwa yuö ‑kë ‑Zlan ‑dhë ‑kɔ ꞊suu’‑ ‑dëü ‑ta, ‑Zuu ’slööslö ‑bha ‑yö kwa ‑dhë ’dhiö ‑sü ’ka. Yaa ’dhö kë zlöö wɔ ‑kɔ zii ‑bha, tɔng ’ö ꞊ya ‑sü ’ka bhë ‑a ꞊kwaa’.

’Wun ’ö ‑gban tɔng waa‑ ꞊sɔɔn yaa ‑an ‑bha

⁷‑Yö ’dhö ’wun gia‑ ’ka; ’kwa ’wun ‑gban tɔng ‑bha ꞊va ’kwa‑ ꞊blɛɛ. Kö ꞊ya kë ’dhö, kö tɔng bhë kë ’pö‑ wo ꞊sɔɔn yaa ’ka bhë ꞊ee? ‑Abi’! ’Kɛɛ tɔng bhë ‑a këpë ’ö tɔɔ ꞊sɔɔn yaa ‑zɔn ’ö‑ wo n ‑dhë. ’Ö tɔɔ ꞊ya kë ꞊nɛ tɔng yaa ‑ya pë ‑dhɔ ’ka ‑sü ‑wun ꞊blɛɛ’ ‑be kö n ’ka ’dhoë‑ dɔ ‑dewo poo kö ’aan‑ ‑ya ‑a ꞊wuën’, ’ö tɔɔ tɔng ‑ya pö: Kö ꞊kun ’ü ‑ya pë ꞊wuën’. ⁸꞊Sɔɔn yaa yö ‑bɔ ’wun ‑ta ’ö ‑ya pë ‑dhɔ ’ka ‑sü ’saadhö ’ö tɔng ‑ya ‑wun ꞊blɛɛ ‑a ‑ya n ꞊zuö’ ‑bha; ’ö bhii tɔng ’yaa ’dhö kö ꞊sɔɔn ‑wun ’ka ’dho ꞊luu’‑. ⁹Kë‑ wo ’kpa bhë, n ‑ma ’ka, a ‑kë ‑tosiadhe kë ꞊dhia kö tɔng yaa ‑da ꞊kun. ’Yö ꞊dhɛ ’ö tɔng ‑yö nu zlöö ’ö ꞊sɔɔn yaa ‑yö yö ’sɛi, ¹⁰’ö ’a ‑kë gamɛ ’ka zlöö; ’ö bhii tɔng ’ö ‑da kö ‑yaan kë mɛ ‑bɔ ‑a ‑ta ‑pë ’ka ‑yaan dha bhë, ꞊ya kë n ‑gɔ zlöö n ‑ma ga ‑sü ‑bɔ ‑a ‑ta ’ka; ¹¹’yö ꞊sɔɔn yaa ‑yö bɔ ’wun ’gü ’yö n ’bɔn ‑kan tɔng ’gü; ’yö bɔ tɔng do bhë ‑a ‑ta ’yö n ‑kë gamɛ ’ka.

¹²’Yaa ’dhö, tɔng bhë yö ‑de ‑yö kpengdhö, ’ö‑ dɔ ‑wo ’dhö kpengdhö; ꞊yö ‑së. ¹³’Kɛɛ kë‑ wo ’dhö bhë, yaa kë ꞊nɛ kö pë ‑së ’ö bhë yö ’pö ꞊nɛ ’ö ‑kë n ‑gɔ n ‑bɔ ‑a ‑ta ‑pë ’ka ’a ga bhë. ꞊Sɔɔn yaa ꞊nɛ ’ö ’wun ‑kë n ’ka bhë. Pë ’ö ‑së bhë ꞊nɛ ’ö ꞊sɔɔn yaa ‑yö bɔ ‑a ‑ta ’ö n pɔn bhë. Ka gia‑, ka‑ ‑yö bhë ꞊aa! ‑Kɔ ’ö ꞊kaa’ zlöö ’ö ꞊sɔɔn yaa ‑bha ‑bɔ tɔng ‑ta ‑sü ‑wun ’gü ’ö‑ ‑bha yaadhɛ ya yöë ‑a ’ka ’sɛi bhë yö ꞊ga bhë.

’Wun ’ö ‑gban mɛ ‑bha ‑kë tɔng ꞊löö ‑sü ‑bha

¹⁴‑Yö ’wun gia‑ ’ka ’ö ’kwa‑ dɔa ꞊nɛ tɔng ‑yö ‑go ‑Zlan ’piö; ’kɛɛ ma ’pö mɛ ’bhee‑ ‑mü n ’ka, ’ö ’a ’tëëtë. Ma bhë ꞊nɛ ’ö n ’dhɔɔ ‑yö dɔ ꞊sɔɔn yaa ‑gɔ. ¹⁵’Ö tɔɔ pë ‑nu ’a ‑an kë ‑na bhë ’maa‑ dɔ n ‑de ‑gɔ. ’Yö ’go mü ’zü, pë ’a‑ ’piö, ’yö ’maa‑ kë ’sa; ’yö pë ’ö‑ ‑dhɔ ’yaa n ‑ma ’gbönggböng bhë ’ö ‑kë n këpë ’ka ꞊zian’. ¹⁶’Ö ꞊ya kë ꞊nɛ pë ’a‑ kë ‑na bhë, ’yaa n ‑dhë ‑së, kö n ‑wo ‑ya ’gü do ꞊nɛ tɔng ꞊yö ‑së. ¹⁷꞊Ya kë ’dhö zlöö kö ma kun ’ö ’a pë ‑nu kë ‑na bhë; ’kɛɛ ꞊sɔɔn yaa ’ö n ’gü bhë yö ‑mü; ¹⁸’Ö bhii ’ma‑ ꞊tɛi’ dɔ ’saadhö ꞊nɛ pë ’ö ’wun ‑së ’ka, ’yaa n mɛbheedhɛ bun ’gü, ’ö tɔɔ ’kö ‑kë ꞊nɛ a ‑ya pë ‑së kë ‑sü ꞊wuën’ ’dhe, ‑a kë ‑sü ‑faan ’yaa kë n ‑gɔ. ¹⁹Pë ’ö ’wun ‑së ’ka bhë, a‑ ’piö ’dhö; ’kɛɛ ’maa ‑mɔ ‑a ‑bha ’sa; ’yö pë ’ö ’wun yaa ’ka ’ö ’maa‑ ’piö bhë, ’a‑ ‑kë ꞊zian’. ²⁰’Kɛɛ kë‑ wo ’dhö bhë, ‑dhɛ ‑ga ‑dhɛ pë ’bhle ‑yö ‑mü: ꞊Ya kë ꞊nɛ pë ’ö ’maa‑ ’piö ꞊nɛ ’a‑ ‑kë, kö ma kun ’a‑ ‑kë gbɔ. Mɛ ’ö‑ ‑kë ’ö tɔɔ ꞊sɔɔn yaa ’ö n ’gü bhë.

²¹’Ma ‑dhɛ ‑ga ’wun bhë ‑a ’piö ‑së ’ka, ’wun do ’bhaa ‑yö mü; ’ö tɔɔ ꞊ya kë ꞊nɛ ’ma‑ ‑ya n ꞊zuö’ ’piö kö ’a ’wun ‑së kë, ’maa ‑mɔa ‑bha, ’ö bhii ’wun yaa ‑yö n ’sɔɔ ‑kplawo. ²²’Kɛɛ kë‑ wo ’dhö bhë, ‑Zlan ‑bha tɔng ’ö bhë ‑a ’yi‑ ‑kan n ’dhi giagia ’ka, ²³’kɛɛ tɔng do ’bhaa gbɛ ‑yö n bun ’gü ꞊zian’; ’yö ‑gɔn gɔn ‑na tɔng ’ö ’a‑ ma ‑na ’wun ‑bho ’kou ‑dɔ ‑sü ’ka bhë ‑a ’ka. Yö ꞊nɛ ’ö n kë ‑na ’gan ’ka ꞊sɔɔn yaa ‑bha tɔng ’ö n bun ’gü bhë ‑a ‑dhë bhë. ²⁴‑Më ’a dɔa ’yenazë ’ka ꞊nɛ! Dö dho n bho bun ’ö n ꞊wië ’wië ‑na ga ’gü ꞊nɛ ‑a ‑gɔ ‑oo? ²⁵Kwa Dëmɛ Yesu Klito ’tɔ ’gü, ‑Zlan ’tɔ ‑yö kë ꞊va ‑a ‑bha ’glusë ‑wun ’gü ’ö bhii ꞊ya n bho ’gan bhë ‑a ’gü.

’Wun ‑nu ’kwa ’goë‑ ꞊blɛɛ’ ꞊dhia ’saadhö bhë, ’wun mɛ ’ö ’kwa dho to ‑a ‑ta ’ö tɔɔ n ꞊zuöga ’plɛ ’ka, a ‑ya ‑sü ’ka ‑Zlan ‑bha tɔng ‑wun ’ka, ’kɛɛ n mɛbheedhe ‑bun ’gü ꞊sɔɔn yaa ‑bha tɔng ‑yö ’wun kë ‑na n ’ka.

¹꞊Ya kë ’dhö zlöö, kö mɛ ’ö waa‑ Yesu Klito ’wo ‑nëng ’kuë‑ ’gü, kö ‑a ‑bha ’klobhɔdhe ’yaa ‑dhö gbɔ (‑Zlan ’piö). ²Bhii ‑Zuu ’slööslö ’ö ‑këdhösü nu mɛ ‑nu ‑dhë ꞊bɔa’ Yesu Klito ’gü ‑sü ’ka bhë, ‑a ‑bha tɔng ꞊ya n ’po ꞊taa’ ꞊sɔɔn yaa ‑bha tɔng waa‑ ga ‑an ‑gɔ. ³Pë ’ö kwa ‑bha ’wun ‑ma tɔng ‑ta ‑sü ‑kɔ yaa ‑mɔ ‑a ‑bha, mɛ ’bhee‑ ꞊gɔü’ ‑bha ‑kë ’gbee‑ ‑sü ‑wun ’gü bhë, ‑Zlan ‑ya ‑kë; ’ö bhii ꞊sɔɔn yaa ’ö bhë, ‑a ’klo ꞊ya ‑bhɔ mɛbheedhɛ ‑bun ’gü. ‑A ‑kë ’dhö ‑sü ’ka, ‑yö ö ‑de Gbö ‑bɔ kö ‑yaan ꞊sɔɔn yaa ‑nu bho mɛ ‑nu ‑bha; ’kɛɛ kë‑ wo ’dhö bhë, ‑yö ‑nu bun ’ö bhɔ kwa bun ’ö ꞊sɔɔn yaa ꞊ya ziö ‑a ’gü ꞊nɛ ‑a ’ka. ⁴’Wun ’ö ’dhö bhë, ‑yö ‑kë ’dhö kö tɔng ‑bha ‑kë kpengdhö ‑sü ’dhiö ‑yaan ‑mɔ ’kuë mɛ ’ö ’kwa ’ta ’sü ‑na ‑Zuu ’slööslö ’gü ’ö ’kwaa ’ta ’sü kwa ‑de ꞊dhɔɔbhaapë ‑nu ’gü bhë kwa ’ka. ⁵’Ö tɔɔ mɛ ’ö wo ’ta ’sü ‑na wo ‑de ꞊dhɔɔbhaa ’ka, pë ‑nu ’wo bhë ꞊nɛ ’wo dɔ ‑a ‑wun ꞊zɔnng’ ‑ta, kö mɛ ‑nu ’wo ’ta sü ‑Zuu ’slööslö ‑zo ’kun ‑wun ’ka bhë, ‑wo dɔ ‑na ꞊zian’ pë ‑nu ’wo ‑Zuu ’slööslö ‑ya ‑zɔn ‑an ‑wun ꞊zɔnng’ ‑ta. ⁶(’Kɛɛ ‑yö kë ka ’yaan ꞊nɛ) pë ’ö ‑zo ‑to pë ’piö ‑sü ’ö ‑de ꞊dhɔɔbhaapë ‑nu ’ka bhë ‑a ’piö ‑pë ’ka, ’ö tɔɔ ga; ’kɛɛ pë ’wo to ‑a ’piö ‑Zuu ’slööslö ’gü bhë, ‑a ’piö ‑pë ’ö mü ’ö tɔɔ ꞊toëpö ‑këdhösü waa‑ ꞊zuöyagluu. ⁷‑To pë ’piö ‑sü ’ö mɛ ’bhee‑ ꞊dhɔɔbhaa ’gü bhë ‑yö ‑Zlan yaagümɛ ’ka; ’ö tɔɔ mɛ ‑nu ’wo‑ kë ‑na ’dhö bhë ’waa ‑Zlan ‑bha tɔng kun ’ö bhii ‑an ‑kɔ ’yaa ‑mɔa. ⁸’Yö‑ ‑kë ’dhö ‑sü ‑wun ’gü, mɛ ‑nu ’ö ’wo ‑de ꞊dhɔɔbhaapë ‑nu ‑gɔ ꞊nuadhɛ ’gü bhë ’ö ‑an ‑wun ’yi ’yaa ’kan ‑Zlan ‑dhë.

⁹Ka ‑bha ’ka, ’kaa ka ‑bha ‑tosiadhe kë mɛ ’bhee‑ ꞊dhɔɔbhaa ’ka, ’kɛɛ ka‑ ‑kë ‑Zuu ’slööslö ‑zo ’kun ‑wun ’ka ꞊zian’ ’ö bhii ‑yö ‑ya ‑sü ’ka ka ’gü. ‑Zuu ’ö go (‑Zlan waa‑) Klito ‑an ’piö bhë, mɛ ’ö ’yaa ‑ya ‑sü ’ka ‑a ’gü, kö mɛ bhë ’yaa Klito ‑bha ’ka. ¹⁰’Ö ꞊ya kë ꞊nɛ Klito ‑yö ka ’gü, ‑yö ’wun gia‑ ’ka ꞊nɛ ka bun ‑yö ga ‑sü ’ka ꞊sɔɔn yaa ‑gɔ, ’kɛɛ ‑këdhösü ‑yö ka ‑gɔ ‑Zlan ‑bha ka kë ’ö‑ wo kpengdhö ö wö ’dhiö bhë ‑a ‑wun ’gü. ¹¹’Ö ꞊ya kë ꞊nɛ ‑Zlan ’ö Yesu Klito bho ga ’gü bhë, ‑Zuu ’ö go ‑a ’piö ‑yö ‑ya ‑sü ’ka ka ’gü, kö yö ’ö Klito bho ga ’gü bhë ‑yö ‑dho ‑këdhösü nu ka bun ’ö dho ga bhë ‑a ‑dhë ‑Zuu ’ö go ‑a ’piö ’ö ‑ya ‑sü ’ka ka ’gü bhë ‑a ꞊kwaa’.

¹²꞊Ya kë ꞊nɛ ’wun bhë ’kwa‑ ’piö ‑ga ‑së ’ka, n dhegluzë ‑nu, kö pë ’ö ‑kë ꞊nɛ ’pë ’dhö ‑yö kwa ‑bha; ’kɛɛ yaa kë ꞊nɛ kwa mɛbheedhɛ bun ’ö ꞊ya kë ’ö‑ kë ‑na ’ö ’kwa ‑tosiadhe kë ‑na ‑a ꞊dhɔɔbhaa ’ka bhë ꞊nɛ ’ö‑ ‑bha ’pë ’dhö kwa ‑bha. ¹³꞊Ya kë ꞊nɛ ka ka ‑bha ‑tosiadhe ‑kë ka ‑de ꞊dhɔɔbhaa ’ka, kö ka ‑dho ga; ’ö ꞊ya kë ꞊nɛ ‑Zuu (’ö go ‑Zlan ’piö bhë ‑a) ‑bha ‑kë ka ’gü ‑sü ‑wun ’gü, ‑de ꞊dhɔɔbhaapë ‑nu ꞊wa kë ka ‑dhë gapë ‑nu ’ka, kö ka ‑dho ‑këdhösü yö. ¹⁴’Ö tɔɔ mɛ ’saadhö ’ö ‑Zuu ’ö go ‑Zlan ’piö ’ö ’dhiö sü ‑an ’ka, kö ‑wo ‑Zlan gbö ‑nu ’ka. ¹⁵’Go mü ’zü, ‑Zuu (’ö go ‑Zlan ’piö) ’ö ’ka‑ yö bhë, ’yaa ‑Zuu ’ö dho ka ꞊nuadhɛ ‑kë wo ‑a ’ka, kö ‑a ‑wun ’gü ’kaan‑ dɔ ka ‑de ‑wun ꞊zɔnng’ ‑ta; ’kɛɛ ‑Zuu ’ö bhë ’ö tɔɔ ‑Zuu ’ö ka ‑kë ‑Zlan gbö ‑nu giagia ’ka. Yö ꞊nɛ ’ö‑ ‑kë ’ö ’kwa ‑mɔa kö (’wun ꞊ya yö kwa ‑bha) ’kwaan‑ pö ‑Zlan ‑dhë: «N Dë!» ¹⁶‑Zuu ’ö bhë ꞊nɛ (’ö ꞊ya kë kwa ’gü) ’ö kwa ‑zo ‑büö ꞊nɛ kwa ‑Zlan ‑bha ’në ‑nu ’ka. ¹⁷’Ö ꞊ya kë ꞊nɛ ‑kɔ bhë ‑a ’dhö, kö ’kwaan‑ kë ‑Zlan ‑bha ’në ‑nu ’ka kö pë ’ö ꞊bhɔɔpë ‑nu ’ka ’ö ꞊ya kë ’ö Dë ‑ya to ö ‑bha ’në ‑nu ‑gɔ bhë kwa ꞊nɛ ’ö dhoë‑ nu kwa ‑dhë ’sa. ’Yö kë‑ wo ’dhö bhë, kwaa‑ Klito ‑nu ꞊nɛ ’ö dho to kwa ‑gɔ ’kɛɛ kö kwa ‑nu ’kwa ꞊wa ‑bhö kwa ’ko ꞊yië’ kö kwa ’tɔ ‑yaan bhɔ ’ko ꞊yië’.

’Tɔbhɔdhe ’ö ’dhiö ’ö dho nu

¹⁸Pë do ’a‑ dɔ ’ö tɔɔ ’yena ’kwa‑ kë ‑na ’töng ’ö ꞊nɛ ‑a ’gü bhë, ‑dankuëpë ’yaa ‑mü ’tɔbhɔdhe (’ö ‑Zlan ’piö) ’ö ‑bin ‑sü ’ka ’kɛɛ ö ‑dhɛ ‑ta dhö po ‑a ‑ta kwa ‑dhë ’ö dho nu bhë ‑a ’ka. ¹⁹Yö do bhë ’zü, ‑Zlan ‑kɔ këpë ’saadhö dɔ ‑sü ‑mü ’siökpaatadhe ’ka ’töng ’ö ‑Zlan dho ö gbö ‑nu yö ‑a ’ka ‑dhɛgbɛadhɛ ’gü bhë ‑a ‑gɔ. ²⁰’Ö tɔɔ ’kpongtaadhɛ ’ö ’ka‑ ‑ga ‑na bhë, yaa kë ꞊nɛ ‑püö ’ö‑ wo ziö ‑pë ‑nu ’ö ‑an ’dhiötodhɛ dho kë ga ’ka ‑a ’gü bhë, ‑yö ‑go yö ‑de ‑a ’gü yö ꞊kun, ’kɛɛ ‑yö ‑sü ‑Zlan ’ö‑ ‑da ‑a ’gü bhë ‑a ‑bha. ²¹‑Yö ‑kë ’dhö ’püë‑ wo ’kɛɛ pë do ’ö ’yan ‑to ‑a ‑gɔ ‑pë ’ka zlöö ’ö tɔɔ: Yi do ‑yö nu ‑na, ’ö ‑Zlan dho ö ‑kɔ këpë ‑nu ’saadhö bho ’güsiödhe ‑gɔ ꞊nuadhɛ ’gü kö ‑potaasü ‑yaan kë ‑an ‑gɔ ’pö kö ‑waan kë ‑Zlan ‑bha ’në ‑nu ’piö ‑an ‑bha ’tɔbhɔdhe ’gü. ²²’Kɛɛ kö kwa gia‑ dɔ ’kwa‑ wo ꞊nɛ kwa‑ ꞊tɛi’ ‑dɔ ꞊nɛ ‑a ‑kɔ këpë ‑nu ’saadhö ’wo bhë ‑wo wo ‑wo ’kpɔ ‑na, ‑wo dɔ ‑na wo ‑de ‑wun ꞊zɔnng’ ‑ta ‑yaan ’dho ‑yaan yöë yi ’ö ‑potaasü dho kaa ‑an ‑gɔ ꞊nɛ dhe ’ö ’dhoë‑ ’bë bho ‑a ’dhö. ²³‑Kɔ do bhë ꞊nɛ ’ö‑ ’ka. Mɛ ’ö ‑Zuu ’ö go ‑Zlan ’piö ’ö kwa ‑gɔ ꞊nɛ ‑Zlan ‑bha gbaɔ ‑blɛɛzë ’dhö bhë, kwa ’plɛ kwa kwa ‑wo ’kpɔ ‑na, yi ’ö ‑Zlan dho kwa ‑bha ‑kë ‑a ‑bha ’në ‑nu ’ka ‑sü ‑wun yö ‑a ’ka ’ko ’dhiö, waa‑ kwa bun dha ‑yi bhë ‑a ‑lo ‑yi ‑wun ’ka. ²⁴Bhii dhasü ’ö kwa ‑gɔ bhë ‑yö pë ’ö kwa ’yaan ꞊nɛ ‑yö ‑dho kë ’ö kwa ’yan ’dhoë‑ ‑gɔ ‑a ’ka. ’Kɛɛ kö ’wun ’ö mü ’pö ’ö tɔɔ pë ’ö mɛ ’yan ’dhoë‑ ‑gɔ ’ö yaa kë ꞊kun bhë kö pë ’ö mɛ ’yan ’dhiö ’yaa ‑mü ’ö bhii pë ’ö kwa ’yan ’dhiö, kwa ‑dho dɔ ‑a ‑gɔ ‑kɔklë ꞊ɛɛ? ²⁵’Kɛɛ ꞊ya kë ꞊nɛ ’kwa kwa ’yan ’to pë ’ö ’yaa kwa ’yan ’dhiö ‑a ‑gɔ zian‑, yö ꞊nɛ ’ö ꞊ya kë ’ö ’kwa dɔ ‑a ‑gɔ kwa ꞊zuöga ’plɛ ’ka.

²⁶‑Kɔ do ’ö mɛ ‑nu ’ö ’kwa ‑Zlan ‑bha ’ka ’ö pë ’ö ’yan ‑to ‑a ‑gɔ ‑pë ’ka bhë ’ö‑ kë ‑na ’ö kwa bɔ ‑na ’wun ’gbee‑ ‑nu ’gü bhë, ’ö‑ ’ka ’pö; ‑Zuu ’ö go ‑Zlan ’piö bhë ‑yö ‑nu kö ‑yaan nu mɛ ‑nu ’ö ’kwa ’tëëtë bhë kwa ‑dhë. ’Ö tɔɔ ꞊dhɛ ’kwaa ꞊bhɛa’ ‑dhɛ dɔ ꞊bhɛa’ ‑kɔ gia‑ ’ka bhë, ‑Zuu ’ö bhë ꞊ya kë ’ö pë ’ö ’waa ‑mɔa ‑wa ’gü ꞊bhɛa’‑ wo ‑Zlan ‑dhë bhë, yö ꞊nɛ ’ö ‑kë ‑zo ‑lo ‑wo ‑nu ’ka ‑Zlan ‑dhë kwa ‑bha ’ka. ²⁷‑Zlan ’ö ‑dhɛ yö mɛ ‑nu ꞊zuö’ ’piö bhë, ’ö ‑Zuu ’slööslö ‑bha ‑zotadhe waa‑ pë ’ö dho ‑a ‑dhɛ ‑a ‑gɔ ’yö‑ dɔ; bhii ‑Zuu ‑yö ‑bhɛa mɛ ’wo ‑Zlan ‑bha ’ka ‑an ‑wun ’gü ꞊nɛ ‑kɔ ’ö‑ ’ka ‑Zlan ‑dhë ‑së ‑a ’dhö.

²⁸‑Yö kë ka ’yaan ꞊nɛ mɛ ‑nu ’ö ‑Zlan ‑dhɔ ‑yö ‑an ‑kë ’ö ‑an ꞊dhɔɔ ‑kë ‑a ‑bha ’wun ‑yö ’ko ’dhiö ‑kɔ ’gbloo ’piö bhë, ’wun ’saadhö ’ö nu ‑na ‑an ‑ta, ‑yö ‑kë ‑an ‑bha ’wun ‑së ’ka (’ö ‑Zlan ‑ya kë ‑an ‑dhë). ²⁹’Ö tɔɔ mɛ ‑nu ’ö ‑Zlan ‑yö ‑an sü ’dhiö bhë, ‑ya ‑kë ’dhö kö ‑waan bhɔ ö Gbö ‑bha; ‑yö kë ’dhö ‑a Gbö ’ö bhë ‑yaan kë Dë do ’gü dhegluzë ‑nu ꞊plëëzë ’wo bhë ’saadhö, ‑an ꞊dhoo ’ka. ³⁰Mɛ ‑nu ’ö ‑Zlan ‑yö ’wun ’ö ꞊nɛ ‑a yö ’ko ’dhiö ‑an ‑bha ’ka bhë, ‑yö ‑an ꞊dhɔɔ ‑kë; mɛ ‑nu ’ö ‑an ꞊dhɔɔ ‑kë ’dhö bhë, ‑yö ‑an ‑kë kpengdhö ö wö ’dhiö; ’yö mɛ ‑nu ’ö ‑an ‑kë kpengdhö ’dhö bhë, ’yö ‑an ‑da ö ‑bha ’tɔbhɔdhe ’gü.

‑Dhɔ ’ö ‑Zlan ‑ya ‑kë kwa ’ka bhë ‑a ‑bha ‑kë ꞊va ‑kɔ

³¹’Wun mɛ ’ö kwa ’dhi dho ‑zuö ‑a ‑bha zlöö ꞊ga tɔɔ: ꞊Dhɛ ’ö ‑Zlan ’dhö kwa ‑bha ’ka ꞊nɛ, kö mɛ gbɛ yaa ’dho dɔ kwa ‑gɔ. ³²Yö ’ö yaa ö ‑de Gbö kuënnu ö ꞊bhaa, ’ö‑ nu mɛ ’plɛ ‑wun ’gü bhë, ‑a ga ’ka‑ wo bhë ‑më ’kpaan ’pö dho dɔ ‑a ‑gɔ kö ‑yaan ’kun pë ’plɛ ‑nu kwa ‑dhë ‑sü ’ka ɛɛ? ³³Dö ’kpaan ’ö dho ‑mɔ ‑a ‑bha kö ‑yö za ‑lo mɛ ‑nu ’ö ‑Zlan ‑yö ‑an ‑ya ö ‑bha ’ka bhë ‑an tuö ee, ’ö bhii yö do ꞊nɛ ’ö ‑mɔ ‑a ‑bha ‑ya pö mɛ ꞊nɛ ‑yö kpengdhö, (‑a mɛ ꞊nɛ ’wun ‑ya ‑bha). ³⁴꞊Ya kë ’dhö kö mɛ gbɛ ’yaa ‑mɔa kö ‑yö za ‑lo ‑an tuö ‑yaan kë ‑an ’gü ꞊siö’ ‑gɛn ’ka ’ö bhii Yesu Klito ꞊nɛ ’ö ga; ’kɛɛ ꞊dhɛ ’ö ga, ‑yö ‑go ga ’gü. ꞊Dhɛ ‑kë ’dhö ꞊ya ’dho dhang‑ ’gü ö Dë ‑Zlan ’piö; ‑yö ‑ya ‑sü ’ka ‑a ꞊kwɛɛ‑ ’gü; ‑dhɛ bhë ‑yö ꞊bhɛa’ ‑na ‑a ‑bha kwa ‑wun ’gü. ³⁵(꞊Ya kë ’dhö kö) mɛ gbɛ ’ka ’dho ‑mɔ ‑a ‑bha kö ‑yö kwa ’kan ‑dhɔ ’ö Klito ‑ya ‑kë kwa ’ka bhë ‑a ‑bha; ‑yö ‑kë ꞊saan ‑sü ‑wun ’ka oo, ‑yö ‑kë ꞊zuökaankuëdhe ’ka oo, ’iin ‑yö ‑kë ’wun ‑wɔ mɛ ‑ta sü ’ka oo, ‑yö ‑kë din ’ka oo, ‑yö ‑kë ’fɛɛdhɛ ’ka oo, ‑yö ‑kë ’wun ’gbee‑ ’ka oo, ’iin ‑yö ‑kë ga ’ka oo, ‑an gbɛ ‑kɔ ’ka ’dho ‑mɔa. ³⁶‑A ‑wun ’gü, ‑yö ꞊bɛɛn’ ‑sü ’ka ‑Zlan ‑bha ’sëëdhɛ ’gü ꞊nɛ: Ü ‑wun ꞊ga, ‑dhɛ ’po ‑sü ’gü, ’yi bɔ ‑na ga ‑glu ’dhiö, yö ꞊ga ’wo yi kë ‑na ꞊nɛ mɛ dho ’bhla ‑tuë ’ka wü zë ‑dhɛ ’gü bhë. ³⁷’Kɛɛ ‑Zlan ’ö kwa ‑dhɔ ‑kë bhë, kwa kwa zü ‑gban ‑a ’gü ’ö ’kwa to ‑a ’gbee‑ ’ka ’fɛfɛdhö bhë. ³⁸Bhii a‑ ꞊tɛi’ ‑dɔ ’gbönggböng ꞊nɛ pë gbɛ ’ka ’dho ‑mɔa kö ‑dhɔ ’ö‑ ‑kë kwa ’ka bhë ‑yaan kwa ’kan ‑a ‑bha. ‑Yö ‑kë ga ’ka oo, ‑yö ‑kë ‑tosiadhe (‑së ’ö ’kpongtaa zö ‑a) ’ka oo, ‑yö ‑kë ‑Zlan ‑bha bɔmɛ ‑nu ’ka oo, ‑yö ‑kë ’gügbeedhɛ ‑nu ’wo dhang‑ ’gü ‑nu ‑an ’ka oo, ‑yö ‑kë pë ’ö kë ‑na ꞊dɛɛ ’iin pë mɛ dho kë ꞊dhia’ ’piö ‑an ’ka oo, ³⁹‑yö mɛkɔɔnmɛ ‑nu ’wo ’kpongtaa zö ‑an ’ka oo, ‑yö ‑kë pë ‑nu ’wo dhang‑ ‑nu ’gü ’iin pë ‑nu ’wo kwa ꞊löö zö ‑an ’ka ’iin ‑yö ‑kë këpë ‑nu ’ö ‑Zlan ‑yö ‑an ‑da ‑an ’ka, ‑an gbɛ ‑kɔ ’ka ’dho ‑mɔa ’gbɛɛdhö kö ‑dhɔ ’ö ‑Zlan ‑ya ‑kë kwa ’ka kwa Dëmɛ Yesu Klito ’gü bhë, ‑wo kwa ’kan ‑a ‑bha.

¹’Wun ’a ’dhoë‑ ꞊blɛɛ’‑ ꞊nɛ ’wun gia‑ ‑mü, ’ö bhii ’ma kë Klito ‑bha ’ka; n ’ka ’dho ꞊sua kë, ‑wo ’ö ’we ‑na n ꞊zuö’ ’piö ‑Zuu ’slööslö ꞊kwaa’ bhë ‑yö n ‑zo ‑gban ‑a ‑bha ꞊nɛ ’wun gia‑ ‑mü. ²’Ö tɔɔ n ꞊zuö’ ‑yö ‑kaan ’kuë ‑sü ’ka ’ö ’wun (’ö ‑gban n dheglu Zuifö ‑nu ‑bha bhë) ’ö n ꞊zuö’ ’dhö ꞊wa ‑bhö ‑sü ’gü ‑kplawo. ³’Kö ‑kë ꞊nɛ ‑wa ‑pö ‑dewo ‑Zlan ‑dho ’dhangga ‑ya n ’ka kö ’a ’kan Klito ‑bha n dhegluzë ‑nu, n ‑sɛgümɛ ‑nu ‑wun ’gü, a ‑dho we ‑a ‑bha, ‑an ‑bha dha ‑sü ‑wun ’gü. ⁴Wo ’ö ’wo Izlaɛlö ‑mɛ ‑nu ’ka, ’ö ‑Zlan ‑yö ‑an ‑kë ö ‑bha ’në ‑nu ’ka, ’ö ‑an ‑ya ö ‑bha ’tɔbhɔdhe ’gü, ’ö wo ‑nu ’plɛ ’wo ‑kë ‑dhi ’kuë do ’gü, ’ö tɔng dɔ ‑an ‑dhë, ’ö ö ‑wo pö ‑sü waa‑ ö gba ‑sü ‑ya ‑an ’gü, ’ö pë ’tɔ go ‑an ‑dhë bhë ꞊nɛ ’a ‑we ‑an ’ka. ⁵’Wo tɔɔ kwa dë ziizii ‑nu ’kpɔ ’në ‑nu ’ö waa‑ Klito ’ö mɛbheedhɛ ’gü ꞊zian’, ’ö wo ‑nu ’ö ‑an ‑bha ’sɛ ’dhö do ’kɛɛ kö yö Klito ’ö bhë ‑yö pë ’plɛ ‑gɔ ’dhiö ’sa; yö bhë ꞊nɛ ’ö tɔɔ ‑Zlan. Kö ‑a ’tɔ ‑yö kë ꞊va ꞊toëpö ’ka. Amɛn.

⁶Kë‑ wo ’dhö bhë yaa kë ꞊nɛ a‑ ‑pö kö ‑Zlan ‑bha pë ’tɔ go ‑wo bhë ‑a ‑wun ꞊ya ’to ’kpaan. Ka gia‑, ka‑ ‑yö bhë, yaa kë ꞊nɛ mɛ ‑nu ’wo go Izlaɛlö ’gü ‑an ’plɛ ꞊nɛ ’ö ‑Zlan ‑yö ‑an ‑ga Izlaɛlö ’në ‑nu giagia ’ka. ⁷’Iin Ablaamö ꞊suu’‑ ‑ta ‑nu ’wo bhë ‑an ’plɛ ’waa ‑a ‑bha ’në ‑nu giagia ’ka bhii ‑Zlan ‑ya ‑pö Ablaamö ‑dhë: Mɛ ‑nu ’wo Izaakö ‑bha ’në ‑nu ’ka ꞊nɛ ’wo tɔɔ ü ‑bha ‑nu giagia. ⁸Yaa kë ꞊nɛ mɛ ‑nu ’wo bhɔ mɛ ’bhee‑ ꞊dhɔɔbhaa ‑wun ’ka ’wo tɔɔ ‑Zlan ‑bha ‑nu, ’kɛɛ ’në ‑nu ’wo bhɔ ‑Zlan ‑bha pë ’tɔ go ‑wo ’ka bhë ’wo Izlaɛlö ’gü ’në ‑nu ’ka, ’ö ’wo tɔɔ ‑Zlan ‑bha ’në ‑nu giagia. ⁹Pë ’tɔ ’go ‑wo bhë yö ꞊ga ꞊nɛɛ: ’Töng ’kwa‑ ’gü ꞊nɛ, (’kwa dɔ ‑a ’gü ꞊kwɛa,) ‑a kë ꞊yië’ kö ’aan‑ nu, Saala dho ’në gɔɔn‑ do kpɔ.

¹⁰’Go mü ’zü ‑kɔ do bhë ’ö Lebeka ‑bha ꞊kaa’ ’dhö ’yö ‑flɛan do ’wo ‑kë gɔɔn‑ ’ka, ’ö ‑an kpɔa kwa ’bhɛma Izaakö ‑gɔ. ^11-12’Yö kë‑ wo ’dhö bhë, ‑Zlan ‑yö ’dhoë‑ mɛ sü, ‑a ‑bha ’wun ‑yö ’ko ’dhiö ‑kɔ ‑yö ‑dhö; ‑yö ‑sü ‑a ‑bha ꞊dhɔɔ kë ‑wo ‑bha; yaa ’sü ‑an këwun ‑nu ‑bha kö ’në ‑nu ’wo dho bhɔ bhë waa bhɔ kun, kö ‑waan ’dhoë‑ pö ‑a mɛ ꞊nɛ ‑a këwun ‑yö ya ’iin ꞊yö ‑së; ’yö ‑Zlan ‑ya pö Lebeka ‑dhë: Ü ‑bha ’në ‑nu ’wo bhë, ‑a ꞊vazë ‑yö ‑dho yuö kë ‑a ’teezë ‑dhë. ’Kɛɛ kë‑ wo ’dhö bhë, ‑Zlan ‑ya pö ’dhö kö ‑yaan ‑zɔn ꞊nɛ pë ’ö ꞊yaa‑ yö ’ko ’dhiö ’saadhö ö ꞊zuö’ ’piö yö ‑mü; ’ö‑ ‑de ‑kë ’gbɛɛdhö. ¹³‑A ‑wun ’gü, ‑yö ꞊bɛɛn’ ‑sü ’ka ‑Zlan ‑bha ’sëëdhɛ ’gü ꞊nɛ: Zakɔbö ’a‑ sü; ’a Ezau to.

¹⁴Kö kë‑ wo ’dhö bhë kwa dhoë‑ pö ‑Zlan ’yaa kpengdhö ꞊a? ‑Abi’ bhoo‑! ¹⁵Bhii ‑ya pö Moizö ‑dhë: Mɛ ’a‑ ’piö ’a‑ ’yena ‑yö wo ꞊nɛ ’a‑ ’yena ‑yö wo. ¹⁶꞊Ya kë ’dhö kö ’wun bhë yaa yö mɛ ’bhee‑ ꞊dhɔɔbhaapë ‑bha ’iin mɛ kë ‑kɔ ‑nu ‑bha, ’kɛɛ ‑yö ‑sü ‑Zlan do ’ö mɛ ’yena yö bhë ‑a ‑bha. ¹⁷‑Zlan ‑bha ’sëëdhɛ ’gü, ‑yö ꞊bɛɛn’ ‑sü ’ka mü ꞊nɛ ‑Zlan ‑ya ‑pö ‑gludë ’ö ‑kë Ezitö ‑sɛgɔ ’dhiö bhë ‑a ‑dhë ꞊nɛ: Pë ’a ü ‑ya ‑a ‑dhë ‑gludë ’ka bhë ’ö tɔɔ kö ’a ma ’piigbeedhɛ ‑zɔn mɛ ‑nu ‑dhë ü ’gü kö ’aan‑ kë ‑waan n dɔ ’kpongtaadhɛ ’saadhö ’gü. ¹⁸’Wun bhë ‑a kë ‑kɔ ꞊ga bhë; kö ‑yö ’to kwa ’yaan ꞊nɛ mɛ ’ö ‑Zlan ’dhoë‑ ’piö ’ö ’yena yö ꞊nɛ ’ö‑ ’yena yö, ’ö mɛ ’ö‑ ’piö ’ö‑ ꞊gɔü’ kë ’gbee‑, ’ö‑ ꞊gɔü’ ‑kë ’gbee‑.

’Wun ’ö ‑gban ‑Zlan ‑bha ‑naazuëdhe waa‑ ‑a ‑bha mɛ ’yënng yö ‑kɔ ‑bha

¹⁹‑Yö ’dhö ’kɛɛ ꞊dhɛɛ’ ‑dhö kë mɛ ‑nu ‑gɔ kö ‑waan ’kpɔ n ‑gɔ ꞊woë’ ꞊nɛ: «Kö ꞊ya kë ’dhö ‑dhɛ ‑mlë ’ö ‑Zlan ‑yö yö ‑a ‑bha zlöö ’ö mɛ ’bhee‑ ‑bha ꞊sɔɔn ‑kë yaa ‑sü ‑yö ‑kë ‑a ‑dhë ya ꞊ɛɛ? Bhii pë mɛ ’ö ꞊yaa‑ ‑ya ö ꞊zuö’ ’piö kö ‑yaan kë, ‑a kuënnumɛ gbɛ ’yaa ’dhö.» ²⁰’Oo, mɛ ’bhee‑, ‑më ‑mü ü ’ka kö ’üën‑ dɔ ‑Zlan ‑wo ‑gɔ ‑ɛ? (꞊Dhɛ ’ka bhɔ ꞊nɛ) ’ka‑ ma do ꞊nɛ ’sɛ gbɔ ꞊ya ö këmɛ ꞊dhɛɛ’ ’kpɔ do ꞊nɛ ‑më ‑kë ’ü n kë ꞊nëdhö ꞊a? ²¹Pë ’ö ‑dhi gbɔdɔmɛ ‑dhë ꞊nɛ ’ö‑ ‑kë gbɔ ’sɛ kpö ’ka; ’ö tɔɔ ‑a ’bhaa ‑nu ꞊ya kë, gbɔ ’në ‑nu ’ö ‑an ꞊bhlë ’dhö ‑dhö ꞊nɛ ’ö ‑an ‑kë, ’ö‑ ’bhaa ‑nu ꞊ya kë ’pö ’ö‑ mɛ ‑nu ’wo yuö ’saadhö ꞊kaa’ ’ö ‑an ‑kë, ’kɛɛ kö ‑an kë ‑sɛ ‑yö do ’sa.

²²‑Kɔ do bhë ꞊nɛ ’ö‑ ’ka ‑a ‑zo ’kun ‑wun ’gü, ꞊ya kë ’dhö kö ‑më ’ö ka ‑gɔ kö ’kaan‑ pö ‑Zlan ‑bha ‑ɛ? ’Ö bhii ’pian do ’piö, ‑yö ö ‑bha ‑naadhe waa‑ ö ‑bha ’piigbeedhɛ ‑zɔn mɛ ‑nu ‑dhë; ‑a ‑wun ’gü, ‑a ꞊zuö’ ‑kë ‑saa giagiawo, ’ö mɛ ‑nu ’ö‑ ‑bha ’klobhɔdhe ‑yö ‑an ‑ma kun kö ‑an ’gü ‑yaan ꞊siö’‑ bhë ’yö ö ‑zo ‑kë ‑an ’piö; ²³’Ö ꞊dhɛ ꞊ya dhi ‑a ‑dhë ’pö ’ö ö ‑bha ’tɔbhɔdhe bhë ‑a ’piö ‑pë ‑nu ‑zɔn mɛ ‑nu ’ö kwa ’yena ‑ya ‑kë bhë kwa ‑dhë. ’Ö bhii pë ’ö ꞊yaa‑ ‑pë kë ’ö ‑ya ‑sü ’ka kwa ‑bha ’ka kö ’kwaan‑ ‑da ‑a ’gü yö ‑mü. ²⁴’Ö tɔɔ mɛ ‑nu ’ö ‑an ꞊dhɔɔ ‑kë kö ’kwaan‑ kë ‑a ‑bha ’ka bhë ’wo tɔɔ mɛ ‑nu ’wo go Zuifö ‑nu ziën waa‑ mɛ ‑nu ’waa Zuifö ’ka ’ö ’waa ‑Zlan dɔ ‑an ziën, ’ö kwa dho ’kuë‑. ²⁵’Yö ꞊bɛɛn’ ‑sü ’ka ‑a ’ka ’dhö ’sëëdhɛ ‑be mɛ ’ö Ose ‑ya ‑ya bhë ‑a ’gü ꞊nɛ: Mɛ ‑nu ’ö ’waa ma ’sɛgɔgümɛ ‑nu ’ka, a ‑dho ‑an ‑dhɛ ma ’sɛgɔgümɛ ‑nu, ’ö ’sɛ mɛ ’ö ’yaa n ‑zo ’kun ‑sɛ ’ka ‑be, ’a‑ ‑dhɛ n ‑dhɔ ꞊kaa’ ‑sɛ. ²⁶’Ö ‑dhɛ ’wo‑ pö ‑a ‑bha ‑an ‑dhë: ’Kaa n ‑ma ’ka, ’wo dho ‑a pö ‑an ‑dhë ’zü ‑dhɛ do bhë ‑a ‑bha ꞊nɛ wo ꞊nɛ ’wo tɔɔ ‑Zlan ’ö ’bhee‑ ‑a gbö ‑nu. ²⁷Ezai ‑de ’pö ‑yö ’wun ‑blɛɛ Izlaɛlö ‑mɛ ‑nu buëndhö ꞊woë’ ꞊nɛ: ’Kö ‑kë ꞊nɛ Izlaɛlö ’sɛgɔgümɛ ‑nu ‑wo ‑kë ꞊va ’ö ’wo dho ‑an ‑zɔn ‑dewo ’yënng ’ö ꞊wee ‑yi ’kpong ’dhiö bhë ‑a ga ‑nu ‑dho ’kuë‑ ‑sü ’ka ’dhee, ‑an mɛ ‑nu ’wo dho dha ‑an songdhö bhë, ‑an kpö ‑yö ’tee ’kpaan; ²⁸bhii Dëmɛ ‑dho ö ‑de ‑wo kë ö ’plɛ ’ka ’zodhö ’kpongtaa zö. ²⁹’Ö tɔɔ Ezai ‑yö ’wun ‑blɛɛ ’dhiö ꞊zian’ ’ö‑ pö: ’Ö ꞊ya kë Dëmɛ ’piigbeezë yaa kwa ꞊suu’‑ ‑ta ‑nu ’bhaa ’to ‑bezë kö kwa ‑dho kë ꞊nɛ Sodɔmë ’dhö ’iin kö kwa ‑dho bhɔ Gomɔɔ ‑dhɛ ‑bha ‑bezë.

’Wuntaɔsë ’ö Izlaɛlö ‑mɛ ‑wa ma

³⁰Pë mɛ ’ö to zlöö ’kwa dho ‑mɔa pö ‑sü ‑bha ’ö tɔɔ: Mɛ ’ö ’waa Zuifö ’ka ’ö waa kë ‑a ꞊mɛɛ’ ꞊dhia ‑be ’ta ’sü ‑kɔ kpengdhö ’ka bhë, ꞊wa kë kpengdhö ‑Zlan wö ’dhiö ‑an ‑bha ‑zo ‑yö ‑a ‑bha ‑sü ‑wun ’gü; ³¹’kɛɛ kö Izlaɛlö ‑mɛ ‑nu ’ö tɔng ’ö dho ‑an kë kpengdhö ‑Zlan wö ’dhiö ’wo ‑kë ‑a ꞊mɛɛ’ ꞊dhia bhë, wo ’dhö, tɔng ’dhö, ‑an ’kun ‑pë gbɛ yaa kë ‑dhö gbɔ. ³²Kë‑ wo ’dhö bhë, ’ö tɔɔ waa kë ‑a ꞊mɛɛ’ ꞊dhia, kö wo ’yi ‑yö ’kan ‑Zlan ‑dhë wo ‑bha ‑zo ‑yö ‑a ‑bha ‑sü ‑wun ’gü. Pë ’ö ‑kë ‑an ‑zo ’piö ‑bezë ’ö tɔɔ wo këpë ‑nu. Kë‑ wo ’dhö bhë, pë ’wo yö ‑a ‑bha bhë ’ö tɔɔ ‑guö kpö ’ö mɛ ‑gɛn ’dhö ‑zuö ‑na ‑a ‑bha, ’wo ‑püö ‑na bhë. ³³‑A ‑de, ‑guö kpö ’ö bhë, ’wun ‑yö ‑gban ‑a ‑bha ‑Zlan ‑bha ’sëëdhɛ ’gü ꞊nɛ: ‑Ka ‑dhɛ ‑ga! ‑Guö kpö ’ö mɛ ‑gɛn ꞊ya ‑zuö ‑a ‑bha ’wo ‑püö ‑na bhë, a‑ do ‑ya ‑na Siɔn ‑pö ’gü; ‑guö kpö ’ö bhë ‑a mɛ ‑püö ‑dhɛ ’yaa ꞊gbiin; ’kɛɛ mɛ ’ö ꞊ya ö ‑zo yö ‑a ‑bha, yö ’ka ’dho to ö ‑kɔ ’kpaan ’ka.

¹N dhegluzë ‑nu, pë ’ö n ‑dhë ‑së giagia, ’a‑ ‑dhɛ ‑na ‑Zlan ‑gɔ Zuifö ‑nu ‑bha ’ka ’ö tɔɔ kö ‑wo dha. ²Ma gia‑, ‑a mɛ ’kö bhë a ‑mɔa ’a‑ pö; ’ö tɔɔ ‑wo ’siözë ‑Zlan ‑bha ’wun ‑nu ’gü. Kë‑ wo ’ö ‑an ‑bha ‑kë ’siözë ‑sü ’ö bhë ’ö ’wundɔdhe ’ö ‑gban ‑Zlan ‑bha bhë, ’yaa ‑mɔ ’kuë ‑sü ‑zë ’ka ‑an ‑gɔ bhë yö ‑mü. ³‑Zlan ‑bha mɛ ‑kë kpengdhö ‑kɔ bhë waa‑ dɔ; ’wo wo ‑de ‑gɔ ’slë ꞊mɛɛ kö ‑waan wo ‑de kë kpengdhö yö ꞊ga ’ö ’wo dhoë zlöö ’ö ‑Zlan ‑bha mɛ ‑kë kpengdhö ‑kɔ gia‑ (’ö bɔ Klito ‑ta) bhë ’ö ꞊wa wo ‑ta yö ‑a ‑bha bhë. ⁴’Ö tɔɔ Klito ’ö tɔɔ Moizö ‑bha tɔng ‑gɔ, mɛ ‑nu ’ö ’wo wo ‑zo yö ‑Zlan ‑bha ‑an ‑bha ‑kë kpengdhö ‑sü ’gü.

Dhasü ‑yö mɛ ’oo mɛ ’ö kwa Dëmɛ ‑wun ‑dhɛ ’wun gia‑ ‑a ‑bha ’ka

⁵‑A ‑wun ’gü, ’wun ’ö ‑gban ‑kë kpengdhö ‑sü ’ö bɔ tɔng ‑ta ‑a ‑bha bhë, Moizö ‑yö ’wun ‑gban ‑a ‑bha ’ö‑ ꞊bɛɛn ‑Zlan ‑bha ’sëëdhɛ ’gü ꞊nɛ: Mɛ ’ö ’dhoë‑ tɔng ‑nu ’wo ꞊nɛ ‑an kun ‑an ’kun ‑kɔ ’ka, ‑yö ‑dho ‑këdhösü yö. ⁶’Kɛɛ ‑kë kpengdhö ‑sü ’ö ‑gban ‑zo ‑yö ‑Zlan ‑bha ‑sü ‑bha bhë ‑a ‑zian do ’bhaa ꞊ga ꞊nɛ: ’Waa‑ pö wo ‑de ꞊zuö’ ’piö ꞊nɛ: Dö ’pö dho ‑da dhang‑ ’gü kö ‑yaan ꞊yɔɔ’ Klito ’ka ɛ? ⁷’Iin ’waa‑ pö ’pö: Dö ‑dho ‑mɔa kö ‑yö ’dho gamɛ ‑nu ꞊plöö kö ‑yö nu Klito ’ka ’kpongtaa ꞊ɛɛ ? ⁸’Ö ꞊ya kë ’dhö kö ‑wa ‑pö ꞊dhë ’sa? ‑Wa ‑pö: ‑Zlan ‑wo ‑yö ü ’sɔɔ, ‑yö ü dhiö, ‑yö ü ꞊zuö’ ’gü, bhii ‑wo ’ö go ‑zo yö ‑sü ’gü bhë ꞊nɛ ’yi‑ ꞊blɛɛ’ ‑na bhë. ⁹꞊Ya kë ꞊nɛ ’bha‑ bho ü ’dhii, ꞊ya ‑da mɛ ‑nu ’toodhö ꞊nɛ ’ü‑ pö Yesu ꞊nɛ ’ö tɔɔ kwa Dëmɛ ’iin ’ö ’bha‑ ‑wun ‑dhɛ ’wun gia‑ ꞊nɛ ‑Zlan ‑ya ‑bho ga ’gü, ü ‑dho dha. ¹⁰Bhii ꞊wa ’wun ‑dhɛ ’wun gia‑ wo ꞊zuö’ ’gü ’ö ’wo ‑kë kpengdhö; ꞊wa wo ’dhi bho ’wun ‑ta ꞊nɛ ‑wo Yesu ‑wun ‑dhɛ ’wun gia‑ ’ö ’wo dha ‑sü yö ꞊nɛ ‑kɔ ’ö ꞊bɛɛn’ ‑sü ’ka ‑a ’ka ‑Zlan ‑bha ’sëëdhɛ ’gü ‑a ’dhö ꞊nɛ: ¹¹Mɛ ’ö ꞊ya ö ‑zo yö ‑a ‑bha, ’yaa ’to ‑kɔ ’kpaan ’ka. ¹²꞊Ya kë ’dhö zlöö, kö ‑naa gbɛ ’yaa mɛ ’ö Zuifö ’ka waa‑ mɛ ’ö ’yaa Zuifö ’ka ‑an ziën gbɔ; ’ö bhii kö ‑an Dëmɛ ꞊ya kë do; yö ’ö bhë ꞊nɛ ’ö ö ‑bha ꞊bhɔɔpë ‑nu nu mɛ ‑nu ’wo‑ ꞊mɛɛ’ ‑na ‑an ‑dhë, ¹³꞊nɛ ‑kɔ ’ö ꞊bɛɛn’ ‑sü ’ka ‑a ’ka ‑Zlan ‑bha ’sëëdhɛ ’gü bhë ‑a ’dhö ꞊nɛ: Bhii mɛ ’oo mɛ ’ö ’dhoë‑ Dëmɛ ꞊dhɔɔ kë, (‑yö ‑dho nu ‑a ‑wo ‑bha,) ’ö‑ dha.

¹⁴’Yö ꞊dhɛ ’kwa‑ ‑ga ‑së ’ka bhë, ‑wo ‑dho ‑a ꞊dhɔɔ kë ‑kɔklë kö waa‑ ‑wun ‑dhɛ ’wun gia‑ ‑ɛ? ’Wun ’ö ‑gban ‑a ‑bha, mɛ ’ö waa‑ ꞊blɛɛ’ ‑wo ma do, ‑wo ‑dho ‑a ‑wun ‑dhɛ ’wun gia‑ ‑kɔklë ꞊ɛ? ‑Wo ‑dho ‑a ‑wo ma ‑kɔklë kö ‑a ‑wo pö ‑mɛ ‑nu ’waa ’dhö ee? ¹⁵’Iin ‑Zlan ‑wo ꞊blɛɛ’ ‑mɛ ‑nu ‑wo ‑dho kë ‑dhö ‑kɔklë kö waa ‑an bɔ ꞊ɛɛ? ‑A ‑de ‑yö ꞊bɛɛn’ ‑sü ’ka ‑Zlan ‑bha ’sëëdhɛ ’gü ꞊nɛ: Mɛ ’ö ’wo ꞊zuöyagluu ‑wun ꞊blɛɛ’ ‑na ’ö ’wo ’wuntaɔsë ꞊blɛɛ’ ‑na ꞊nɛ, ‑an ‑da plöö ‑sü ‑kpɛ ꞊ga ꞊nɛ! ¹⁶’Kɛɛ kë‑ wo ’dhö ’pö bhë yaa kë ꞊nɛ ‑dhɛ ’wo‑ ma bhë, mɛ ’plɛ ‑wo wo ‑gɔ ‑dho ‑a ‑dhë sia‑. Ezai ‑ya ‑to ’dhiö ’ö ’wun ‑gban ‑a ‑bha ’ö‑ pö: Ü ‑wo ‑nu ’yi‑ ꞊blɛɛ bhë, dö ‑nu ’pö ’wo‑ ‑wun ‑dhɛ ’wun gia‑ ‑ɛɛ, n Dëmɛ? ¹⁷Bhii kë‑ wo bhë ‑zo yö ‑sü ‑yö ‑go ’wun ’ö mɛ ‑ya ma ‑a ’gü, ’ö ’wun ’ö mɛ ‑ya ma yö ‑de ’pö ’ö go Klito ‑wo ’gü.

¹⁸꞊Ya kë ’dhö kö ꞊dhɛɛ’ ’ö dho kë n ‑gɔ mü ’ö tɔɔ: Kö kë‑ wo ’dhö bhë, ’wun bhë ‑a ma ’pö waa‑ wo bhë ee? ’Kɛɛ ꞊ii‑; ‑wa ‑wun ‑ma ’ö bhii ‑Zlan ‑bha ’sëëdhɛ ꞊bɛɛn’ ‑yan ‑ya ‑pö: ‑An ‑wo ‑yö ‑da ’kpongtaamɛ ‑nu ’saadhö ’toodhö, ’ö ‑an ꞊blɛɛ’ ‑wun ‑nu ‑wo ‑lo ’sɛgɔgüdhɛ ‑nu ’wo ’ma ꞊gbiin ‑an ’gü ‑dhɛ ‑nu ‑bha, ’kpongtaa ‑an ‑ta. ¹⁹A ꞊tun ꞊dhɛɛ’ kpɔ ꞊nɛ: Kö kë‑ wo bhë ꞊nɛ ’wun bhë ‑a ma ’pö Izlaɛlö ‑mɛ ‑nu waa‑ wo bhë ee? ’Kɛɛ ’sëëdhɛ ꞊bɛɛn’ ‑yan ’gü Moizö ‑ya ‑yɛ ’zü ‑kë ’ö‑ pö ‑Zlan ‑ya ‑pö: A ‑dhoë kë ’ö ’ka ‑kë ꞊druɛizë ’sɛgɔ mɛ ’ö ’yaa ’sɛgɔ gia‑ ’ka ‑a ’ka ’ö ’a bɔ ’sɛgɔ ’ö ’yaa ’wun dɔ ‑a ’gü ’a ’wun ‑së ‑kë ‑an ‑dhë ’ö yö ka ‑naa ‑bha. ²⁰꞊Dhɛɛ’ do ’ö bhë Ezai ‑ya ‑daa ’dhiözë ‑kë ’pö ’ö‑ pö ’sëëdhɛ ꞊bɛɛn’ ‑yan ’gü ꞊nɛ: ‑Zlan ‑ya ‑pö: Mɛ ‑nu ’ö waa kë n ꞊mɛɛ’ ꞊dhia bhë, ‑wo n ‑yö; ’ö ’a n ‑de ‑zɔn mɛ ‑nu ’ö waa pë gbɛ ‑dhɛ n ‑gɔ bhë ‑an ‑dhë. ²¹’Yö ꞊dhɛ ’ö yö Izlaɛlö ‑wun ‑bha ’ö‑ pö: ‑Zlan ‑ya ‑pö: ’Töng ’saadhö ’ka, a n ‑kɔ ‑po ’sɛ do ’gü ‑mɛ ‑nu ‑gɔ; ’kɛɛ ‑an ꞊gɔü’ ‑bha ‑kë ’gbee‑ ‑sü ’gü, ‑wo ‑dho wo ꞊taa ’ka ꞊zian’.

‑Zlan yaa ö ‑kɔ bho Izlaɛlö ’gü

¹’Wun bhë ꞊ya kë ’dhö, kö ‑Zlan ‑kɔ ’pö‑ bho ö ‑bha ’sɛgɔ ’gü bhë ꞊ee? ’Kɛɛ ’ma ‑dhɛ ‑ga ‑a ’gü, ‑abi’! Ma gia‑ ’a ꞊nɛ, Izlaɛlö mi ‑mü n ’ka; ’ö ’a Ablaamö ꞊suu’‑ ‑ta ‑në ’ka. A ‑go Bɛnzamɛ ‑gɔ ’gunng ’gü. ²’Sɛgɔ ’ö ‑Zlan ꞊yaa‑ pö ’saadhö ’dhiö ꞊zian’ ꞊nɛ ö ‑bha ‑mü bhë, yaa ’dho ö ‑kɔ bho ‑a ’gü. ‑Ka dɔ ’dhɛ! ’Sëëdhɛ ꞊bɛɛn’ ‑yan ‑dhɛ ’bhaa ’gü, ‑Zlan ‑wodhiölomɛ Eli ‑yö ‑kë Izlaɛlö ‑mɛ ‑nu ‑ta ‑zɔn ꞊dhia ‑Zlan ‑dhë. ³’Yö‑ pö: N Dëmɛ, ꞊wa ü ‑wodhiölomɛ ‑nu zë, ꞊wa ü ‑bha slabhodhɛ ‑nu ’güö. ’Yö ’ma ’to do ’kpaan, ’kɛɛ ‑wa ꞊mɛɛ’ ‑na kö ‑waan n zë ’pö. ⁴’Yö ‑Zlan ‑ya ‑daa ‑kë ‑a ‑gɔ ’ö‑ pö: ’Ma mɛ ‑lü ‑vuu ’slaplɛ ’bhaa ‑ya ‑de ‑ta n ‑ma ’ka ’kpa ’pë‑; mɛ ’wo bhë waa ‑lo wo kpɔn ’gü ‑zlan ’wo‑ ‑dhɛ Baalö bhë ‑a ’dhiö. ⁵‑Kɔ do bhë ‑a ’ka, dɔ ‑de ’kwa‑ wo ꞊dɛɛ ꞊nɛ, mɛ ’bhaa ‑nu ‑wo ‑dhö ’ö ‑Zlan ‑bha ’glusë ’gü ’ö ꞊ya ‑an ’sü ꞊ya ‑an ‑ya ‑de ‑ta. ⁶‑An ‑ya ’ö‑ wo ‑de ‑ta bhë, ‑yö ‑go ‑a ’gü ‑a ‑bha ’glu ‑kë ‑së ‑sü ‑wun ’gü; yaa ’sü ‑an këwun ‑nu ‑bha. ’Ö bhii ’yaa ’dhö ‑bezë kö ‑Zlan ‑bha ’glusë bhë ’wun ‑ya ’gü.

⁷Kö kwa ‑dhoë pö ꞊dhë ’pö bhë? Kö kë ’püë‑ wo ꞊nɛ, pë ’ö Izlaɛlö ‑mɛ ‑nu ‑wo ‑kë ‑a ꞊mɛɛ’ ꞊dhia bhë, ‑a yö ’pö waa‑ wo bhë ee, ’iin ꞊dhë? Kë‑ wo bhë, mɛ ‑nu ’ö ‑Zlan ‑yö ‑an sü ’ö ‑an ‑ya ‑de ‑ta ö ‑bha ’ka bhë ꞊nɛ wo ’sloo ’wo‑ yö. Mɛ ‑nu ’wo to ’saadhö, ‑an ‑kɔ ’yaa ‑mɔ ‑a ma ‑sü ‑bha ⁸꞊nɛ ‑kɔ ’ö ꞊bɛɛn’ ‑sü ’ka ‑a ’ka ‑Zlan ‑bha ’sëëdhɛ ’gü bhë ‑a ’dhö ꞊nɛ: ‑Zlan ꞊ya ‑an ‑zo ‑ta ‑a ’gü ‑wun ‑nu ’plɛ yö yaan; bhii ꞊wa pë ‑nu ‑ga, ’waa ‑dhɛ yö ‑a ’gü ’iin ꞊wa ’wun ‑nu ma, ’yaa ’to ‑an ’toodhö; ’ö‑ ’ka ’dhö dɔ ’kwa‑ wo ꞊dɛɛ ꞊nɛ ‑a ’gü. ⁹’Yö Davidö ‑ya pö ’pö: ‑An ‑de ‑bha ’wlaan‑ këdhɛ ‑nu ‑wo ‑kë ‑an ’kundhɛ ’ka, ‑yö ‑kë ‑an ‑gɔ ’sɔ ’ka ‑wo ‑püö ‑a ’gü; ‑an ’klo ‑yö bhɔ; ¹⁰‑an ’yënng ‑yö trö kö ꞊kun ’ö ’wo ‑dhɛ yö. ‑Bhö ‑a kë kö ‑wo ’to ‑kplawo ꞊nɛ mɛ‑ ‑kë ꞊nuadhɛ ’gü.

¹¹’Yö ꞊ya kë ’dhö kö Zuifö ‑nu ’wo bhë ‑an ‑gɛn ꞊ya ‑zuö ’wun ‑nu ’gü, ꞊wa ‑püö, kö ‑püö ’plɛ ’wo‑ wo bhë ꞊ee? ‑Yö n ’gü ꞊nɛ ‑abi’! ’Kɛɛ kë‑ wo ’dhö bhë, ‑an ‑bha këwun yaa bhë ‑a ‑wun ’gü yö ꞊ga ’ö ’sɛgɔ mɛ ‑nu ’ö ’wo to ’ö ꞊wa dhasü yö bhë. ‑Yö kë ’dhö kö Zuifö ‑nu ‑waan kë ꞊druɛizë bhë. ¹²’Ö ꞊ya kë ꞊nɛ Zuifö ‑nu ‑bha ‑kun ‑a ’ka ‑sü ꞊ya kë ’sɛgümɛ ‑nu ’wo to ‑an ‑bɔ ‑a ‑ta ‑pë ’ka kö ‑waan ’wun ‑së yö, ka gia‑ ‑ka ‑dhɛ ‑ga mü ’dhɛ! ‑Yö ‑dho kë ꞊dhë mü kö wo ’wo bhë, ‑wo kë dhamɛ ’ka, ’ö tɔɔ ‑a ’piö ‑pë ’ö dho kë bhë ‑yö ‑dho kë ‑së ’gblüünzë.

Dhasü ’ö mɛ ‑nu ’ö ’waa Zuifö ’ka ’ö ‑an ‑bha ’ka

¹³Mɛ ’kaa Zuifö ’ka, ‑ka ka ’to ’to! ’Ma ꞊dhië’ ka ’piö. N ‑ma ‑kë Yesu Klito ‑bha bɔmɛ ’ka ‑sü ’ö mɛ ’kaa Zuifö ’ka ’a‑ ’ka ka ziën bhë, ‑yö n ꞊zuö’ ’glu ‑dhi. ¹⁴‑Yö n ꞊zuö’ ’piö ꞊nɛ ‑a ‑kë ’dhö ‑sü ’ka, ‑yö ‑dho yɛ n ‑sɛgümɛ ‑nu ’bhaa ‑nu ‑bha kö ‑waan kë ꞊druɛizë. ꞊Ya kë ’dhö, ‑wo ‑dho wo ꞊zuö’ ꞊dhië’‑, ’ö‑ mɛ ’bhaa ‑nu ‑wo dha. ¹⁵’Ö tɔɔ ꞊dhɛ ’ö ’wo ‑kan ‑Zlan ‑bha ’ö ö ‑kɔ bho ‑an ’gü ’töng kpö ’bhle ‑bha, ꞊nɛ ’ö ’kpongtaamɛ ’wo to, ’wo ‑dhi ‑Zlan ’ka. Pë ’ö‑ kë ‑kɔ ’dhö bhë, ka gia‑ ’ka ‑dhɛ ‑ga ‑a ’gü, yi ’ö ‑Zlan dho ö ‑kɔ kpɔa ‑an ‑gɔ bhë, ‑a ꞊tɛi’ ka ’dho kë ꞊nɛ gamɛ ‑nu ‑bha ‑go ga ’gü ‑sü ’dhö aa?

¹⁶’Wun ꞊zuan’ do ꞊ga ꞊nɛ: ꞊Ya kë ꞊nɛ ꞊bluu’‑ ’wo dho ‑a nu ‑Zlan ‑dhë, ꞊waa‑ ’klu ’sü ‑a ‑ta ꞊waa‑ nu ‑a ‑dhë, kö ‑a ‑to ’dhö ‑sü ‑bha ‑kë ‑a ‑bha ’ka ‑sü bhë yaa kë mɛ ’plɛ ’yaan aa! ’Iin ꞊wa ’lü yun ’sü ꞊waa‑ ‑zɔn ‑Zlan ‑dhë, kö ‑më ’ö to zlöö kö ’lü ’ö bhë ‑a ‑kɔ ‑nu ‑waan ’kun ‑kë ‑Zlan ‑bha ’ka ꞊süë’ ɛɛ! ¹⁷Izlaɛlö ‑mɛ ‑nu ’ö ’ka ‑an ‑ga ‑na bhë, ‑wo ꞊nɛ olivie ‑lü ’wo‑ ta ’ö‑ ‑kɔ ‑nu bhë ’ö ꞊wa ‑an ’kan ‑a ’dhö; ’yö bhi ’ö ’bhaa Zuifö ’ka, ’ü ꞊nɛ ’blü olivie ‑lü ‑kɔ ’ö ’wo‑ sü ’ö ’wo‑ yö ‑a pin ꞊taa ‑a ’dhö (꞊nɛ ‑kɔ ’ö pë ta ‑kɔ ‑zɔn ‑mɛ ‑nu ’dhoë‑ kë ‑na ‑a ’ka ’manglo ‑lü ‑nu ’ka bhë ‑a ’dhö). ’Yö ꞊dhɛ ’wo ü ‑ya mü bhë, pë ‑nu ’ö olivie ‑lü bhë ’wo‑ ’gü bhë, ꞊wa kë ü ‑bha ’ka zlöö. ¹⁸‑A ‑wun ’gü ü ꞊dua’ ’yaa ‑mü kö olivie ‑lü ’ö bhë ‑a ‑kɔ ‑nu ’wo ‑an ’kan bhë ü ‑an bho yunng. ’Ö bhii (‑a ‑kɔ ‑nu ’wo ‑an ‑kan bhë) waa kë ‑dhö kö ‑waan ‑an ’kan ’üën‑ ‑ya ‑an pin ꞊taa, ü ‑dhoë kë ꞊dhë ‑bezë ’ö ’ü ü ‑de ’sü ‑na ꞊va ꞊nɛɛ. ’Kɛɛ ‑yö kë ü ’yaan ꞊nɛ ’lü bhë ‑a yun ‑nu ꞊nɛ ’wo ü bun ’ü ꞊yaa’ bhë; bhi kun ’ü‑ yun ‑nu bun.

¹⁹Ü ‑dho ‑mɔa ’ü‑ pö: «‑Wa ‑kɔ ‑nu ‑kan kö ’aan‑ ‑ya ‑an pin ꞊taa.» ²⁰‑Yö ’wun gia‑ ’ka. ‑Dhɛ ’ö ‑kë ‑an ‑bha ‑yadhɛ ’ka ‑bezë bhë, ’go ’wo‑ wo ‑a ‑bha bhë ’ö tɔɔ Yesu Klito ‑wun ‑dhɛ ’wun gia‑ ‑sü yaa kë ‑an ‑gɔ. Ü ‑ya mü ‑kɔ ꞊ga ’ö bhë, bhii bhi ‑zë ü ‑we Yesu Klito ‑wun ‑bha. ’Kɛɛ ‑bhö ü ‑de ’kun ‑de ‑sü ꞊va ‑gɔ. ‑A kë ‑së. ²¹’Ö tɔɔ Zuifö ’ö ‑an pin gia‑ ’dhö ‑mü bhë, ꞊dhɛ ’wo ‑an bho ‑na mü bhë kö ‑yö kë ü ’yaan ꞊nɛ ’bhaa pë gbɛ ’ka mü. ²²Bhi gia‑, ‑bhö ‑dhɛ ‑ga bhë ’sa. ‑Zlan ’ö bhë ‑a ‑bha ’glu ‑kë ‑së ‑kɔ waa‑ ‑a ‑bha ‑kë kpengdhö ‑kɔ ꞊ga ’ö bhë. ‑Yö ’dhiö‑, mɛ ‑nu ’ö ’waa‑ ꞊bhlë ‑ya ‑an ’ka ’kɛɛ bhi ‑zë ‑yö ’lëëlë ü ’ka. Kö ‑dhɛ ’ü‑ ‑bha ‑a ‑bha ’glusë ’gü bhë, ü ‑zo kë ü ‑de ’piö ’yaa ’pö ü ‑dho go mü ꞊nɛ ’lü ‑kɔ ’wo‑ ‑kan ‑a ’dhö. ²³’Ö ꞊ya kë ꞊nɛ Zuifö ‑nu ꞊wa ’go wo ‑bha ꞊gɔü’ ’gbee‑ ’gü, ‑wo ‑dho ‑an ‑ya ‑an ‑yadhɛ ’wo ‑kë ‑a ‑bha ’dhiö bhë ‑a ‑bha. ’Ö tɔɔ ‑Zlan ‑kɔ ‑mɔa kö ‑yö ‑an ‑ya wo ‑yadhɛ ‑blɛɛzë bhë ‑a ‑bha ꞊nɛ ’lü ‑kɔ ’dhö ’zü. ²⁴’Wun ‑nu bhë ‑a mɛ ’ö ‑dhö, ‑kwaa ’piö ‑ga ‑së ’ka. Bhi ’ö ’bhaa Zuifö ’ka bhë, ü ‑kë ꞊nɛ ’blü olivie ‑lü ‑de ‑kɔ gia‑ ’dhö. ’Yö ’wo ü ‑kan ’wo ü ‑ya olivie ‑lü ’wo‑ ta wo ‑de ꞊kwaa’ bhë ‑a ‑bha ‑a ’dhö, ’kɛɛ kö ü ‑bha ‑kë ’kpongtaa ‑sü ’ka, ü ‑bha ‑ya ‑dhɛ gia‑ ’yaa kë ’dhö. ’Ö Zuifö ‑nu ’dhö olivie ‑lü ’wo‑ ta bhë ‑a ‑de ‑kɔ ‑nu ’ka. ꞊Ya kë ’dhö kö ‑an ‑yö ‑an pin ꞊taa ‑sü ’yaa ’gbee‑.

Dhasü ‑kaanta ’ö dho kë Izlaɛlö ‑mɛ ‑nu ‑bha ’ka

²⁵Dhegluzë ‑nu, ’wun do ’a‑ ’piö kö ’a ‑dhɛ ’po ‑a ‑ta ka ‑dhë, ‑yö kë ’dhö kö ꞊kun ’ö ’ka dho ka ‑de sü ꞊va ’ö tɔɔ: Izlaɛlö ‑mɛ ‑nu ‑kɔ ’pian do ’to ‑ya ta; ’waa ‑mɔa kö ’wun ’ö ’wun gia‑ ’ka ‑wa ma. ’Kɛɛ ‑yö kë ka ’yaan ꞊nɛ ‑a ’piö ’ka ’dho kë ꞊gbiin gbɔ, ‑yaan ’dho ‑yaan yöë mɛ ‑nu ’waa Zuifö ’ka ’ö ’wo dho kë dhamɛ ’ka, ‑an ’dhiö ‑mɔ ’kuë ‑yi ‑bha. ²⁶Izlaɛlö ‑mɛ ‑nu ‑todhösü dha ‑kɔ ’wo dho dhaa ’ö ꞊bɛɛn’ ‑sü ’ka ‑Zlan ‑bha ’sëëdhɛ ’gü ’ö tɔɔ: ‑Zlan ‑ya ‑pö: Mɛdhamɛ ‑dho go Siɔn ’gü, ’yö dho ’wun yaa ꞊suu’‑ ’saadhö bho Zakɔbö ꞊suu’‑ ‑ta ‑nu ‑bha. ²⁷’Ö ꞊ya kë ꞊nɛ ’ma ‑an ‑bha ꞊sɔɔn yaa bho ‑an ‑bha kö ‑dhi ’kuë‑ ’ö dho kë yi ‑nu yi ziën bhë, kö ꞊ya yö ’sɛi ꞊nɛ bhë.

²⁸‑Kwa ‑dhɛ ‑ga ’dhɛ! ꞊Dhɛ ’ö Zuifö ‑nu ‑wo ‑kɔ ’wuntaɔsë (’ö ‑gban Yesu Klito ‑bha ‑a) ’ka bhë, yö kun ’ö ’wo ‑kë zlöö ‑Zlan yaagümɛ ’ka bhë ꞊a! ’Kɛɛ kë‑ wo ’dhö bhë ’wun bhë ‑yö ‑kë zlöö ka ‑bha ’wun ‑së ’ka. ’Kɛɛ ꞊ya kë ‑a mɛ ’ö ‑gban mɛ ‑nu ’ö ‑Zlan ‑yö ‑an ‑ya ‑de ‑ta ‑a ‑wun ’ka, wo ꞊nɛ ’ö ‑Zlan ‑ya ‑dhɔ ‑kë ‑an ’bhɛma ‑nu ’ka. ²⁹’Ö tɔɔ mɛ ’ö ‑Zlan ꞊ya ö ‑kɔ ’yɛ ‑a ‑bha, ’ö ꞊yaa‑ ꞊dhɔɔ kë kö ‑yaan kë ‑a ‑bha ’ka, ’ö ꞊ya pë ’tɔ ’go ‑a ‑dhë, ’iin ꞊ya pë ‑nu nu ‑a ‑dhë, ’yaa ö ‑wo bho ‑a ‑gɔ ’zü pin ꞊taa. ³⁰Kë‑ wo ’kpa bhë, ka ‑Zlan ‑wo ‑lö ’gü; ’kɛɛ zlöö ꞊nɛ ’ka ‑da ‑Zlan ‑bha mɛ ’yena ’gü ’ö bhii Zuifö ‑nu (’wo kë ‑a ’gü bhë) ‑wa ‑wo ‑lö ’gü. ³¹’Yö ꞊dhɛ ’wo ‑Zlan ‑wo ‑lö ’gü ’dhö ꞊nɛ ’ö ’ka ‑da ‑Zlan ‑bha mɛ ’yena yö ‑sü ’gü; ’kɛɛ ‑yö kë ’dhö kö wo ‑de ’pö ‑an ’yena ‑yö wo ‑sü bhë ‑waan ‑a dɔ. ³²’Wun ‑nu bhë ‑wo ‑kë ’dhö bhii ‑Zlan ‑yö ‑we ‑a ‑bha kö mɛ ’plɛ ‑wo kë ‑a ꞊bhlë ‑siö ‑mɛ ’ka ‑yö kë ’dhö kö ‑yaan ‑a ‑zɔn mɛ ’plɛ ‑dhë ꞊nɛ ’ö mɛ ‑nu ’yena ‑yö.

³³‑Zlan ‑bha ꞊bhɔɔpë ‑nu bhë, ‑wo ’gblüünzë ꞊dhɛɛ! ‑A ꞊ga ’ka‑ wo ‑na bhë, ‑a ‑bha ’kpaakpadhɛ waa‑ ‑bha ’wundɔdhe bhë ‑an ’piö ꞊yö ꞊gbiin ’dhɛ! Dö dho ‑mɔa kö ‑yaan pö pë mɛ ꞊nɛ ‑Zlan ‑ya ‑kë ꞊nëdhö ꞊e? Dö ’ö dho ‑mɔa kö ‑Zlan ‑bha ’wun ‑nu ’ö‑ yö ‑na ’ko ’dhiö bhë ‑yö ‑dhɛ yö ‑an ’gü ii? ³⁴‑A ‑wun ’gü, ‑yö ꞊bɛɛn’ ‑sü ’ka ‑Zlan ‑bha ’sëëdhɛ ’gü ꞊nɛ: Dö ’ö ‑Zlan ꞊zuö’ ’piö ‑wun dɔ ꞊ɛɛ? Dö dho ‑mɔa kö ‑yö kë ‑Zlan ‑zlakpaɔmɛ ’ka ɛɛ? ³⁵Dö ’ö ꞊ya dɔ ’dhiö do ꞊ya pë ‑nu nu ‑Zlan ‑dhë kö ‑a ‑yɛ ’zü ‑wun ‑yaan kë ‑a ‑bha ‑ɛɛ? ³⁶’Ö bhii pë ’plɛ ‑yö ‑go ‑a kwɛɛ; yö ꞊nɛ ’ö pë ’plɛ ‑da, ’ö pë ’plɛ ’dhoë‑ ‑bha ’ka; kö ‑Zlan ’tɔ ‑yö bhɔ ꞊toëpö ’ka! Amɛn.

‑Tosiadhe ‑dëü ’wo‑ ‑kë ‑Zlan ‑bha ’ka

¹N dhegluzë ‑nu, ꞊dhɛ ‑kë ꞊nɛ ‑Zlan ‑bha mɛ ’yena yö ‑sü bhë ’ka ‑da ‑a ’gü bhë, a‑ ‑dhɛ ka ‑gɔ kö ’ka ka ‑de ‑ya ‑de ‑ta ‑Zlan ‑bha ’ka ka ‑bha ‑tosiadhe kë ‑sü ’ka ‑a ‑zo ’kun ‑wun ’ka. Sla‑ ’ö ’ka dho ‑a bho zlöö bhë ’ö bhë. ‑A ‑kë ’dhö ‑sü ꞊nɛ ’ö tɔɔ ‑a ‑dhɔ kë ‑sü giagia ’ö ’ka dhoë‑ wo. ²Kö ꞊kun ’ö ’ka ka ‑de to ’kpongtaapë ‑nu ’wo zö ‑an ’piö; ’kɛɛ ‑ka ka ꞊kwaa’‑ ka ‑de ‑zü ‑Zlan kwɛɛ kö ‑yaan ka ꞊dhië’ ‑kwaa ka ‑bha ’wundɔdhe ’gü ꞊zian’ ö ’plɛ ’ka. ‑Kɔ bhë ꞊nɛ ’ö ꞊ya kaa ’ö ’ka dho ‑Zlan ‑zo ’kun ‑wun dɔa, ’ö bhii ka ‑dho pë ’ö ‑së ’ö‑ ‑wun ‑ya ‑zo kun ’ö ’wun ꞊zaa’ ‑sü ’yaa‑ ‑bha ‑a dɔ.

³Mɛa‑, ‑ka ka ’to kë n ‑ma, n ‑ma ‑kë ka ꞊daan’ ‑mɛ ’ka ‑sü ’ka ‑Zlan ‑bha ’glusë ’gü; a‑ ‑pö ka ’saadhö ka ‑dhë: Kö ꞊kun ’ö ‑zotadhe ‑nu ‑wo ‑kë ka ’gü ꞊nɛ ka ’gianzë ’wun ’bhaa ’gü; ’kɛɛ ’ka ’wun ‑nu dan ’kuë ka ꞊zuö’ ’gü, ‑yö kë ‑zo yö ‑sü ’ö ‑Zlan ‑ya nu ka ‑dhë bhë ‑a ‑naa ’gü. ⁴‑Ka ‑dhɛ ‑ga ’dhɛ! Kwa mɛdhɛ bun ’gü, kwa dɔ ‑nu ‑wo kwa ‑bha ꞊va; ’ö‑ mɛ ’ö ‑dhö, ’ö‑ këyuö ’dhö ‑dhö ‑de ‑ta. ⁵‑Kɔ do bhë ’ö‑ ’ka kwa ’ka; kwa ꞊plëëzë; ’kɛɛ kwa ‑dho ’kuë‑ ‑sü ‑yö do kwa ‑bha ‑kpa Yesu Klito ‑bha ‑sü ’gü, ’ö ’kwa‑ ’ka ’dhö ꞊nɛ bun do dɔ ꞊plëëzë ‑nu ’dhö. ⁶Mɛ ’ö ’kwa bhë ’saadhö, mɛ ’ö ‑dhö, gbaɔ ’ö ‑Zlan ‑ya ‑kë ‑a ‑dhë ’kpaan ’ka, ‑yö ‑dhö, ’ö ’kwa dho yuö kaa. ’Ö ꞊ya kë ꞊nɛ ‑Zlan ‑ya gbaɔ kë ü ‑dhë kö ’üën‑ ‑Zlan ‑wo ’dhiö ‑lo, kö ‑bhöë kë ꞊nɛ ‑kɔ ’ö ü ‑bha ‑zo ‑yö ‑Zlan ‑bha ‑sü ’dhoë‑ ’ka bhë ‑a ’dhö. ⁷Mɛ ’ö ‑Zlan ꞊ya gbaɔ kë ‑a ‑dhë kö ‑yaan pë ‑nu kë mɛ ‑nu ‑dhë, kö ‑ya kë. Mɛ ’ö dho mɛ ꞊daan’‑, kö ‑ya kë. ⁸Mɛ ’ö ‑Zlan ꞊ya gbaɔ kë ‑a ‑dhë kö ‑yaan mɛ ‑nu ’wo to ‑an ꞊faan’ ’më, kö ‑a ꞊dua’ ‑mü ‑ya kë. Kö mɛ ’ö‑ ‑bha ‑kë pë ‑nu ‑nu mɛ ‑nu ‑dhë ‑sü ’ka, ‑ya kë ’kpaan ’ka ö ꞊zuöga ’plɛ ’ka; kö mɛ ’ö‑ ‑bha ‑kë ’dhiö ‑sü mɛ ’ka ‑sü ’ka ‑ya ‑kë ’slë ’ka. Kö mɛ ’ö‑ ‑bha ‑kë ‑nu ’yenamɛ ‑nu ‑dhë ‑sü ’ka, ‑yö ö ‑bha kë ꞊zuögludhi ’ka.

⁹‑Dhɔ ’ö ’ka‑ ‑ga ‑na bhë, ‑a ꞊dua’ ‑mü kö ‑yö kë ꞊zuö’ ’puu ’ka. ‑Ka ’kan ’wun yaa ‑bha, ’ka ‑klu ꞊zian’ ’wun ‑së ‑bha. ¹⁰‑Ka ka ’ko ‑nu ‑dhɔ kë ꞊nɛ ‑kɔ ’ö dhegluzë ‑nu ’dhoë‑ kë ‑na ‑a ’ka bhë ‑a ’dhö, ’iin kö ’ka kë ’siözë ka ’ko ‑nu ꞊bhlë ‑ya ‑sü ’gü. ¹¹‑Ka pë ‑nu kë ‑zɛi ‑zɛidhö; kö ꞊kun ’ö ’ka ‑kë ’fiasü. ‑Ka yuö kë kwa Dëmɛ ‑dhë ka ꞊zuöga ’plɛ ’ka! ¹²Ka ꞊zuö’ ’glu ‑yö dhi pë ’ö ka ’yan ’dhoë‑ ‑gɔ bhë ‑a ‑wun ’gü. Ka ꞊zuö’ ‑yö kë ‑saa, ka ‑bha ‑bɔ ’wun ’gbee‑ ‑nu ’gü ‑sü ’gü. ‑Ka kë ꞊naazë ꞊bhɛa’ ‑sü ’gü! ¹³‑Ka nu ka dhegluzë ‑nu ’ö pë ‑wun ‑ya yö ‑an ‑bha ‑an ‑dhë, kö mɛ ‑nu ’wo nu ‑na ka plöö ’ma bhë, ’ka ‑an ‑nia ’kun ‑së!

¹⁴‑Kaa ‑dhɛ ‑Zlan ‑gɔ kö ‑yö ’dhuë‑ ’kpɔ mɛ ‑nu ’ö ’wo ’wun wɔ ‑na ka ‑ta bhë ‑an ‑bha; kö ꞊kun ’ö ’ka‑ pö ‑yö ’dhangga ‑ya ‑an ’ka. ¹⁵Mɛ ‑nu ’ö ’wo ‑kpɛ ’gü, ka ‑nu ka ꞊zuögludhi kë ’ko ꞊bhaa! Mɛ ‑nu ’ö ‑an ꞊zuö’ ’dhö ‑kaan ’kuë ‑sü ’ka, ‑ka ‑an ꞊zuö’ ꞊dhuë’. ¹⁶Mɛ ‑nu ’ö ka ‑nu ’ka ka ’kuëdhö bhë, ka ‑nu ‑ka dhi ka ’kuëë; kö ꞊kun ’ö ’ka ka ‑de sü ꞊va, ’kɛɛ ‑ka kpa mɛ ‑nu ’waa wo ‑de ’sü ꞊va ‑an ‑bha! Kö ꞊kun ’ö ’ka ka ‑de sü mɛ ’kpaakpa ‑nu ’ka!

¹⁷Kö ꞊kun ’ö ’ka ’wun yaa ’pë bho mɛ ‑gɔ ’wun yaa ’ka; ‑kaa këdhɛ ꞊mɛɛ’‑ ꞊zian’ kö ’kaan‑ ’wun ‑së kë mɛ ’plɛ wö ’dhiö. ¹⁸‑Ka ka ’gü dɔ ’gbee‑ kö ꞊zuöyagluu ‑bha ‑kë kaa‑ mɛ ‑nu ka ziën ‑sü bhë, ‑yö ’go ka ’gü. ¹⁹N dhegluzë ‑nu, kö ꞊kun ’ka ka ‑de ‑wun ‑ta ‑ko zë; ’kɛɛ ‑kaa ’to ‑Zlan ‑gɔ ‑a ‑bha ‑naazuëdhe ‑ya kë, ’ö tɔɔ ‑yö ꞊bɛɛn’ ‑sü ’ka ‑Zlan ‑bha ’sëëdhɛ ’gü ꞊nɛ: Kwa Dëmɛ ‑ya ‑pö: Ma ꞊nɛ ’a dho ü ‑ta ‑ko zë, ’ö pë ’wo‑ ‑kë bhë, ’a dho ‑a ’pë bho ‑an ‑gɔ. ²⁰’Yö‑ pö ’zü: ꞊Ya kë ꞊nɛ ü yaagümɛ ꞊ya ‑ya din ’ka, ‑bhö ‑bhöpë nu ‑a ‑dhë ‑ya ‑bhö; ’yi mü ‑dhɔ ꞊yaa‑ ’kun, ’yi nu ‑a ‑dhë ‑yö ‑fö bho ö ‑bha. ‑A ‑kë ’dhö ‑sü ’ka, ‑a ꞊tɛi’ ‑yö ‑kë ꞊nɛ ꞊dhɛ ü ’siö ꞊dhuu ‑da ‑a ‑bha ’kuëdhö ‑a tuö ‑a ’dhö. (’Ö bhii pë ’ö‑ ‑kë ü ’ka bhë, ‑a lë‑ ‑dhoë kë.) ²¹Kö ꞊kun ’ö ’ü ü ꞊kwaa‑ ü ‑de ‑zü ’ö ’wun yaa ‑yö sɔ ü ‑ta. Ü ‑bha ’wun ‑së kë ‑sü ’gü, ‑bhö ’to ’wun yaa ‑ta ‑a ’gbee‑ ’ka.

’Wun ‑ma ‑wogbiinmɛ ‑nu ‑ta ‑sü ’sɛ ’gü

¹Mɛ ’saadhö ꞊dua’ ‑mü kö ‑yö ö ‑gɔ ꞊yɔɔ’‑ mɛ ’ö ‑wogbiindhɛ ’dhö ‑an ‑gɔ ’sɛ ’gü ‑an ‑dhë ’ö tɔɔ ‑wogbiindhɛ mɛ ’kö ‑dhö, kö ‑Zlan ꞊nɛ ’ö‑ ‑ya. ‑An ’plɛ ‑wo ‑go ‑Zlan ’piö. ²꞊Ya kë ’dhö kö mɛ ’ö ꞊ya ꞊gɔügbeedhɛ kë ‑wogbiindhɛ ’ö ’sɛ ’gü ‑a ‑ta kö mɛ ‑nu ’ö ‑Zlan ‑yö ‑an ‑ya ’sɛ ꞊kɔɔn ‑sü ’ka bhë, ꞊ya dɔ ‑an ‑gɔ ’yënng ꞊nɛ bhë. Mɛ ’oo mɛ ’ö ’dhoë‑ dɔ mɛ ‑nu ’wo ’dhö bhë ‑an ‑gɔ ’yënng kö ꞊ya ‑Zlan ‑bha za ‑lo ö ‑de tuö ꞊nɛ bhë. ³’Ö tɔɔ ’dhiö ‑sü mɛ ’ka ‑mɛ ‑nu ’wo bhë, yaa kë ꞊nɛ ’suö ’wo dhoë‑ wo ‑an ‑dhë ’kpaan ’ka yö kun. ’Kɛɛ mɛ ’ö ’wo ’wunyaakëmɛ ’ka ꞊nɛ, ’wo dho suö mɛ ‑nu ’wo bhë ‑an ‑dhë. ’Ö ꞊ya kë ꞊nɛ ’bhaa‑ ’piö kö ’ü suö ‑wogbiindhɛ ‑nu ’wo ’sɛ ’gü ‑an ‑dhë, kö ‑bhö ’wun ‑së kë kö ü ‑wun ’yi ‑yaan ’kan ‑an ’dhi. ⁴’Ö tɔɔ mɛ ‑nu ’wo ‑ya ’dhö bhë, ‑wo ‑ya ‑Zlan ‑bha yuö ’dhiö ü ‑bha ’wun ‑së ’gbloo ’piö. ’Ö ꞊ya kë ꞊nɛ ’bha ’wun yaa kë, kö ‑bhö ’suö ‑an ‑dhë. Bhii ‑ya ’wo‑ wo ka ‑gɔ ’dhiö ’ö ’wo ’wunyaakëmɛ ‑nu ’klo bhɔ ‑na ’ö ’ka ‑an ‑ga ‑na bhë, waa ‑ya ’kpaan. ’Ö tɔɔ ‑Zlan ꞊nɛ ’ö ‑an ‑ya kö ‑a ‑bha ‑naazuëdhe ‑yaan nu mɛ ‑nu ’ö ’wo ’wun yaa kë ‑na bhë ‑an ‑ta. ⁵‑A ‑wun ’gü, ‑mɛ ’ö ‑dhö ‑a ꞊dua’ ‑mü kö ‑yö ’wun ma ‑wogbiindhɛ ‑nu ’wo ’sɛ ’gü ‑an ‑ta kö ‑Zlan ‑bha ‑naazuëdhe ‑yaan ’san ‑an ’ka ’iin kö ꞊zuöyagluu ‑yaan kë ‑an ‑gɔ.

⁶Pë ’ö‑ ‑wun ’gü ’ö ’ka ’nii‑ ꞊sɔnng’ bho ‑na ’ö bhë, ’ö tɔɔ mɛ ‑nu ’ö ’wo‑ ‑yuö ’piö bhë, ‑Zlan ‑bha yuö ꞊nɛ ’wo‑ ’gü kö ‑waan ‑a kë ‑a kë ‑kɔ ’ka. ⁷Mɛ ‑nu ’ö ‑an ‑bha ’pë ’dhö ka ‑bha, ‑kaa bho ‑an ‑dhë. Mɛ ‑nu ’ö ’ka dho ’nii‑ ꞊sɔnng’ bho ‑an ‑dhë, ‑kaa bho ‑an ‑dhë. Mɛ ‑nu ’ö ’wo ꞊bhlëyamɛ ’ka, ‑kaa ‑an ꞊bhlë ‑ya, ’iin mɛ ‑nu ’wo ‑sü ꞊va ‑mɛ ‑nu ’ka, ‑kaa ‑an ’sü ꞊va.

‑Dhɔ ‑kë ’kuë ‑sü

⁸Kö ꞊kun ’ö mɛ gbɛ ‑bha ’pë‑ ‑kë ka ‑bha ‑a ’ke yaa kë ‑dhɔ ’ö ’ka dhoë‑ kë ka ’ko ‑nu ’ka, ‑a ’pë ’ka. Mɛ ’ö ꞊yaa‑ ‑dhɔ kë mɛ ‑nu ’wo to ‑an ’ka, kö pë ’ö tɔng ‑ya pö bhë ꞊yaa‑ ꞊bhlë ‑ya. ⁹’Ö tɔɔ tɔng dɔ ‑wo ‑nu ’wo ‑kë kö ꞊kun ’ü ‑ziö mɛ gbɛ ‑bha dhe ’piö, ’iin ’ü ü ꞊gɔn to ’ü ‑ziö ü ’bha dhe ‑bha gɔɔn‑ ’piö ’ka bhë, ’ö‑ ’bhaa ‑nu ‑wo ‑kë kö ꞊kun ’ü mɛ zë, kö ꞊kun ’ü ꞊kwaan, kö ꞊kun ü ‑ya pë ’ö mɛ gbɛ ‑gɔ ‑a ‑dhɔ ’ka bhë waa‑ ‑a mɛ ‑nu ’wo to ’saadhö, ‑wo ‑mɔa ‑wo ‑an ’dho ’kou do tɔng dɔ ‑wo do ’ka, ‑wa pö: ‑Bhö ü ‑ya ’yɔɔ ‑dhɔ kë ꞊nɛ ü ‑de ’dhö.

¹⁰Mɛ ’ö ꞊yaa‑ ‑dhɔ kë mɛ ’ka, kö ’wun yaa ‑kë mɛ ’ka ‑mɛ ’yaa ‑mü. Mɛ ꞊yaa‑ ‑dhɔ kë mɛ ’ka, kö tɔng dɔ ‑wo ꞊nɛ ’ö‑ ꞊bhlë ‑ya ö ’plɛ ’ka bhë.

‑De ‑pë kë ‑sü ’ö ‑dhö Klito ‑bha nu ‑sü ‑wun ’gü

¹¹꞊Dhɛ ’ö ‑kë ꞊nɛ ’töng ’ö ’kwa dɔa ꞊nɛ, ‑yö ka ’yaan ꞊nɛ ’töng ‑kaanta ‑mü bhë, kö ‑a ’töng ꞊ya ‑lo kö mɛ ’ö ‑dhö ‑yö ’go yiö, ‑yö ‑ya ö ’yaan. ’Ö tɔɔ ’töng ’ö ’kwa dɔa ꞊nɛ ‑a ’gü, dhasü ꞊ya yö kwa ’ka ꞊klöö’. ’Yaa ꞊nɛ ‑kɔ ’ö‑ ’ka ’dhiö kö ’kwa Yesu Klito ‑wun ‑dhɛ ’wun gia‑ bhë ‑a ’dhö. ¹²Gbeng ꞊ya ’dho ꞊gbiin, ‑dhɛ ’po ‑sü ꞊ya yö ꞊klöö’. Pë ‑nu ’kwa ‑kë ‑an ’gü kö kwaa kë pë dɔ ꞊dhia ꞊kun ꞊nɛ mɛ‑ ‑kë ‑dhɛtiidhɛ ’gü bhë, ‑kwa ’kan ‑an ‑bha; ’ö ꞊dhɛ ‑kë ꞊nɛ kwa ’yan ꞊ya ’po ꞊nɛ pë ’wo‑ pö kwa ‑dhɛpuudhɛ ’gü ‑a ’dhö bhë, kö ’kwa kë ꞊nɛ mɛ‑ ‑kë ‑dhɛpuudhɛ ’gü ’ko zë ‑sü ’ka ‑Zlan ‑bha ’ko ꞊zaa’ ‑piö ‑nu ’ka. ¹³Kwa ’ta ‑sü ‑kɔ ‑yö kë kpengdhö ꞊nɛ ‑kɔ ’ö‑ ’ka ‑dhɛ ’po ‑sü ’gü ‑a ’dhö. ‑Kwa kwa ‑de ’kun pë ‑nu ‑kë ‑ziögɔüsüzë ‑gɔ; ‑kwa ’kan ‑de ‑nu yɔ ’yi ‑dhë ‑sü ‑bha; ‑kwa kwa bo pë yaa kë ‑sü ’wo dho ‑a ’ka bhë ‑a ’ka ’dhiö bhë ‑a ’ka, ‑to pë yaa ‑nu din ’piö ‑sü ‑nu ’dhinaa ‑nu, ꞊druɛi ‑nu ‑an ’ka. ¹⁴’Kɛɛ ‑këdhösü ‑dëü ’ö kwa Dëmɛ Yesu Klito ’gü bhë ‑kwaa kë kwa ‑bha ꞊nɛ sɔ ’dhö. Kö ꞊kun ’kwa kwa ꞊kwaa kwa ‑de ‑zü ’ö kwa mɛ ‑dhɛ ꞊dhɔɔbhaapë ‑nu yaya ‑wo sɔ kwa ‑ta.

Kö ꞊kun ’kwa za dɔ kwa dheglumɛ ‑bha

¹Mɛ ’ö ’tëëtë ‑zo yö ‑sü ’gü bhë, ‑ka ’we ‑a ‑wun ‑bha ka kpö ’gü ‑kpɛ ’ka! Kö ꞊kun ’ka‑ ‑wun ꞊blɛɛ ‑a ’wun yö ’ko ’dhiö ‑kɔ ‑wun ’gü ’iin ‑a këpë ‑nu ‑wun ’gü. ²’Ö tɔɔ mɛ ’bhaa ‑yö ‑dho kë ‑dhö ’ö ‑mɔa ’ö pë ’plɛ ‑bhö kö ‑a ’tian ’yaa ’dhö; ’kɛɛ kö mɛ ’ö ’tëëtë ‑zo yö ‑sü ’gü bhë, ’toodhɛ ‑nu ꞊nɛ ’wo tɔɔ ‑a ‑bhö ‑pë. ³꞊Ya kë ’dhö kö mɛ ’ö pë ’plɛ ‑bhö, ‑a ꞊dua’ ’yaa ‑mü kö mɛ ’ö ’yaa pë ’bhaa ‑nu ‑bhö bhë, ‑ya ‑wun yaa ꞊blɛɛ’‑ ’iin ‑ya bho yunng; ’iin ’zü kö mɛ ’ö ’yaa pë ’plɛ ‑bhö bhë, ‑a ꞊dua’ ’yaa ‑mü kö mɛ ’ö pë ’plɛ ‑bhö ‑mɛ ’ka bhë, ‑yö za dɔ ‑a ‑bha. ’Ö tɔɔ mɛ ’wo ’dhö bhë ’saadhö, ‑Zlan ‑yö ö ‑kɔ ‑kpɔ ‑an ‑gɔ ö ’piö. ⁴Mɛ ‑gwaa ꞊plɛ ‑zë ’wo bhë, ‑kwaa ‑an ‑zɔn yuö ‑kë mɛ ‑dhë ‑mɛ ’ka, ’kwa‑ ‑ga ’kwee‑! Ü ‑bha ‑më ‑wun ’ö ’gü, ’ü za dɔ ‑an ‑bha ‑ɛɛ? ‑Yö yuö kë oo, ‑yö ’fia ‑sü oo, ‑a ‑gɔmɛ ‑ta ‑wun ‑mü. ’Kɛɛ kë‑ wo bhë, ‑yö ‑dho yuö kë ö ‑gɔmɛ ‑dhë ’ö tɔɔ kwa Dëmɛ ‑kɔ ‑mɔa kö ‑yö nu ‑a ‑dhë.

⁵Mɛ ’bhaa ‑wa ‑pö ‑dhɛkpaɔyi ‑nu ‑wo ‑dhö ’ö ‑an ‑wun ’dhö ’gbee‑ ‑an ’bhaa ‑nu ‑bha. ’Kɛɛ kö mɛ ’waa gbɛ ‑nu ‑wo ‑dhö ’pö ’ö ’wo‑ pö ‑na ‑dhɛkpaɔyi ‑nu ’plɛ ‑wo dosɛn. Mɛ ’ö ’ka bhë ’saadhö ‑yö kë ka ’yaan ꞊nɛ ‑kɔ ’ö‑ ’ka ka ꞊zuö’ ’piö ’ö ka ꞊zuö’ ’dhö ꞊waannu ꞊süë’ ‑a ‑wun ’gü bhë, ‑kaa kaa! ⁶Mɛ ’ö ‑dhɛkpaɔyi ‑nu ’bhaa ‑wun kë ‑na ’gbee‑ ’ö ‑ziö ‑a ’ka ‑a ’bhaa ‑nu ‑ta bhë, ‑ya ‑kë ’dhö kwa Dëmɛ ꞊bhlë ‑ya ‑sü ’ka. Mɛ ’ö pë ’plɛ ‑bhö ‑mɛ ’ka bhë ’pö, ‑ya ‑kë ’dhö kwa Dëmɛ ꞊bhlë ‑ya ‑sü ’ka, ’ö bhii ‑yö ‑Zlan zuö ‑pö ö ‑bha ‑bhöpë bhë ‑a ‑wun ’gü. ’Yö mɛ ’ö ’yaa pë ’plɛ ‑bhö, yö ‑de ’pö, ‑ya ‑kë ’dhö kwa Dëmɛ ꞊bhlë ‑ya ‑sü ’ka; ꞊ya kë ’dhö, ‑yö ‑Zlan zuö ‑pö ’pö. ⁷’Ö tɔɔ ziö ’kwa‑ wo ‑na ’saadhö bhë, mɛ gbɛ ’yaa ‑tosiadhe kë ö ‑de ‑bha ’ka ’iin mɛ gbɛ ’yaa ga ö ‑de ‑bha ’ka. ꞊Ya kë ꞊nɛ kwa ‑dhö, kö kwa ‑dhö kwa Dëmɛ ‑bha ’ka; ⁸’ö ꞊ya kë ꞊nɛ ’kwa ga, kö kwa ‑ga kwa Dëmɛ ‑bha ga ’ka. ’Kö ‑kë ꞊nɛ kwa ‑tosiadhe ‑kë oo, kwa ‑ga oo, kwa ’saadhö kwa kwa Dëmɛ ‑bha ’ka. ⁹’Ö tɔɔ Klito ‑yö ‑ga, ’ö go ga ’gü kö ‑yaan kë mɛ ‑nu ’wo ’bhee‑ waa‑ mɛ ‑nu ’wo ga ’gü ‑an ‑bha Dëmɛ ’ka. ¹⁰’Kɛɛ bhi ‑zë, ü dɔ ꞊dhë ’ü za dɔ ü dheglu ‑bha ‑ɛɛ? ’Ö bhi ‑de ’pö ’dhee, ü ü dheglu ‑san ‑zë ‑kɔklë ꞊ɛ? ‑Yö kë ka ’yaan ꞊nɛ kwa ’plɛ kwa ‑dho ‑wo ‑Zlan ’dhiö kö ‑yaan kwa ‑bha za ’kan, ¹¹bhii pë ’ö ꞊bɛɛn’ ‑sü ’ka ‑Zlan ‑bha ’sëëdhɛ ’gü ‑ya ‑pö: Dëmɛ ‑ya ‑pö: A ’bhee‑, a ‑dhö. Mɛ ’oo mɛ ’ö ‑dhö, ‑yö ‑dho yö ö kpɔn ’gü n ’dhiö, ’ö mɛ ’ö ‑dhö, ’ö ma ‑Zlan n ‑ma ‑kë ’piigbeezë ‑sü bhë, ’ö dhoë‑ bho ö ’dhi ꞊nɛ ’wun gia‑ ‑mü. ¹²‑Kɔ bhë ꞊nɛ ’ö mɛ ’ö ‑dhö ’ö dho ö ‑de ‑wun ꞊blɛɛ’‑ ‑a ’ka ‑Zlan wö ’dhiö.

’Wun ’ö ‑gban ‑kɔ dɔ dhegluzë ‑nu ’wo ꞊tun zlöö ꞊kun ‑an ‑gban ‑gɔ ‑sü ‑bha

¹³꞊Ya kë ’dhö kö ‑kwa kwa bo za ‑dɔ kwa ’ko ‑nu ‑bha ‑sü ’ka. Pë ’ka dhoë‑ ‑ya ka ꞊zuö’ ’gü ꞊zian’ ’ö tɔɔ: Pë mɛ ’kö dho kë n dheglu ‑gɛn ‑zuö ‑a ‑bha ‑pë ’ka, ’iin ‑a ‑püö ‑gɛn ’ka, n ’ka ’dhoë‑ kë. ¹⁴N ‑ma ‑kë ‑klu kwa Dëmɛ Yesu ‑bha ‑sü ’ka, pë ’ö n ꞊zuö’ ‑bha ’a‑ dɔ ’kpakpadhö ’ö tɔɔ pë ’ö dho kë ‑dhö kö ‑yö kë ‑dhiizë, ’yaa ’dhö. ’Kɛɛ pë mɛ ’ö mü ’ö tɔɔ ꞊ya kë ꞊nɛ mɛ ꞊yaa‑ ‑ya ö ꞊zuö’ ’piö ꞊nɛ pë ꞊nɛ ‑yö ya, kö ꞊ya kë ya ’gbönggböng ‑a ‑bha ’ka ꞊nɛ bhë. ¹⁵꞊Ya kë ꞊nɛ ü ‑bhöpë ‑nu ‑wun ’gü, ü dheglu ꞊zuö’ ’yaa ꞊waannu ꞊süë’, kö ’ta ‑sü ‑kɔ ’ö ‑dhɔ ’gü bhë ’bhaa‑ ‑zian ta gbɔ ꞊nɛ bhë, ’yaa ‑së; bhii ü dheglu bhë, ‑a ‑wun ꞊ya kë ’gbee‑ ’ö tɔɔ Klito ‑yö ga ‑a ‑wun ’gü; kö ꞊kun ’ü‑ ‑kë ’ö ‑da ’gü ꞊siö’ ‑zian ‑ta ü ‑bhöpë ‑nu ‑wun ’gü. ¹⁶Pë ’ö ‑së ka ‑bha ’ka kö ꞊kun ’ö ’ka‑ ‑kë ’ö mɛ ‑nu ’wo to ’wo‑ ‑kë ka ‑wun yaa ꞊blɛɛ ‑a ‑ta ‑gɛn ’ka. ¹⁷’Ö tɔɔ ‑Zlan ‑bha ‑gludëdhɛ ‑wun yaa yö ‑bhöpë ‑wun ’iin müpë ‑nu ‑wun ‑bha. ‑A ‑wun ‑yö ‑sü ‑kë kpengdhö ‑sü, ꞊zuöyagluu waa‑ ꞊zuögludhi ’ö ‑Zuu ’slööslö ‑ya nu bhë ‑an ‑bha. ¹⁸Mɛ ’ö ꞊ya yuö kë Klito ‑dhë ꞊nɛ ‑kɔ bhë ‑a ’dhö, ‑a ‑wun ’yi ‑yö ‑kan ‑Zlan ’dhii, ’ö‑ ‑wun ‑yö mɛ ‑nu ‑zo kun.

¹⁹꞊Ya kë ’dhö kö pë mɛ ’ö ’kwa dhoë‑ ꞊mɛɛ’‑ ’ö tɔɔ pë ’ö kwa ‑bha ‑wun ’dhoë‑ ‑bha ’ö dho ‑mɔa kö ‑yaan ꞊zuöyagluu nu kwa ‑dhë ’iin kö ‑yö kwa ’saadhö kwa ‑zo ‑gban kwa ‑bha ‑zo yö ‑sü ’gü. ²⁰Kö ꞊kun ’ü ‑Zlan ‑bha yuö ’gü ꞊siö ’kpaan ‑bhöpë ‑wun ’gü. ‑Yö ’wun gia‑ ’ka ꞊nɛ ‑wo ‑mɔa ‑wo pë ’plɛ ‑bhö. ’Kɛɛ ‑yö ya kö ‑bhöpë ’ö ’dhö bhë, ’ka‑ ‑bhö ’kɛɛ kö ka‑ ꞊tɛi’ ‑dɔ ꞊nɛ ‑yö ‑dho ka dheglu ‑püö ꞊sɔɔn yaa ’gü. ²¹Pë ’ö ‑së ’ö tɔɔ kö ꞊kun ’ka ‑köpë ‑bhö, ’ka ‑drɔɔn ’yi mü, ’iin ’ka pë ’waa gbɛ ‑kë, kö pë ‑nu ’wo bhë, ‑wo pë ’wo ‑mɔa ‑wo ka dheglu ‑püö ‑an ’ka. ²²꞊Ya kë ꞊nɛ ’wun ’bhaa yö ü ‑bha pë mɛ ꞊nɛ ’bhaa‑ kë ’iin ‑a mɛ ꞊nɛ ’ü‑ kë bhë ‑a ‑bha, kö ‑bhöë kuënnu bhi do ü ‑bha ’ka ü ‑bha ‑Zlan wö ’dhiö. ꞊Zuögludhi ‑yö kë mɛ ’ö ꞊ya pë ‑nu yö ’ko ’dhiö ö ꞊zuö’ ’piö ‑yaan kë ’ö‑ ꞊zuö’ ’yaa ’wun ꞊blɛɛ’‑ ‑a ’ka bhë ‑a ‑gɔ. ²³’Kɛɛ mɛ ’ö‑ ꞊zuö’ ’dhö ‑to zlöö ‑sü ’ka pë mɛ ’ö dhoë‑ ‑bhö ‑a ‑wun ’gü, kö ‑yö kë ‑a ’yaan ꞊nɛ ꞊ya ‑bhöpë bhë ‑a ‑bhö, kö ‑Zlan ‑bha za ꞊ya ‑lo ‑a tuö ꞊nɛ bhë, ’ö bhii ’yaa pë ‑nu kë ꞊nɛ ‑kɔ ’ö‑ ‑bha ‑zo yö ‑sü ’dhoë‑ ’ka bhë ‑a ’dhö. Bhii pë ’oo pë ’ö yaa ’go mɛ ‑bha ‑zo yö ‑sü ’gü kö ꞊sɔɔn yaa ‑mü.

Kö ꞊kun ’kwa kwa ‑de ꞊dhɔɔbhaa ‑wun ’sloo kë

¹Mɛ ’ö ’kwa dɔ ‑sü ’ka gɛnngdhö ‑zo yö ‑sü ’gü, kwa ꞊dua’ ‑mü ’kwa nu mɛ ‑nu ’ö ’wo ’tëëtë bhë ‑an ‑dhë. Kwa ꞊dua’ ’yaa ‑mü kö ’kwa pë ‑nu kë ꞊nɛ ‑kɔ ’ö ‑dhi ‑a ’ka kwa ‑dhë ‑a ’dhö. ²‑Kwaa këdhɛ ꞊mɛɛ’‑ kö mɛ ’ö ‑dhö ‑yö dhi ö ’bha ‑dhë ‑a këwun ‑së ‑wun ’gü; ‑a ‑kë ’dhö ‑sü ‑dho ‑a ‑bha ‑zo ‑yö ‑Zlan ‑bha ‑sü ‑dhö ‑da ’dhiö. ³’Ö tɔɔ ’töng ’ö Klito ‑yö ꞊kaa’ ’kpongtaa zö bhë yaa kë ö ‑de ꞊dhɔɔbhaapë kë ꞊dhia. ’Kɛɛ pë ’ö ‑kë ꞊zian’ yö ꞊nɛ ‑kɔ ’ö ꞊bɛɛn’ ‑sü ’ka ‑a ’ka ‑Zlan ‑bha ’sëëdhɛ ’gü ꞊nɛ: Mɛ ‑nu ’wo ‑kë ’si ‑nu ‑bho ü ‑gɔ ꞊dhia bhë, ‑an ’si ‑nu bho ‑wo bhë, ‑yö ‑lo n ‑ta ’nö ‑a ’dhö. ⁴Pë ‑nu ’ö ’kwa ‑an pö ‑na ‑Zlan ‑bha ’sëëdhɛ ’gü ’dhiö ꞊zian’ bhë, ‑an ’plɛ ‑wo ‑ya ’dhö kö ‑yaan kwa ꞊daan’‑, ‑yö kë ’dhö kö kwa ‑bha ꞊zuö’ ‑kë ‑saa ‑sü ’gü, kwa ’yan ‑to ‑a ‑gɔ ‑pë ‑yaan kë ‑dhö, kö kwa ꞊faan’ ‑yaan ’më. (’Ö bhii ‑Zlan ‑bha ’sëëdhɛ bhë ꞊nɛ ’ö pë ‑nu bhë ’wo go ‑a ’gü.) ⁵Kö ‑Zlan ’ö ꞊zuösaadhɛ waa‑ ꞊faan’ ‑an nu mɛ ‑nu ‑dhë bhë, ‑ya ‑kë kö ‑kë ’kuë‑ ‑sü ’ö ’kowogümadhe ’gü ‑yö kë ka ‑gɔ ka ‑bha ’wun ꞊zuan’ ‑sü Yesu Klito ‑bha ‑sü ’ka. ⁶‑Yö kë ’dhö, kö ka ‑bha ‑dho ’kuëdhö ‑sü ’ka, kö ‑Zlan ’ö kwa Dëmɛ Yesu Klito Dë ’ka bhë, ’kaan‑ ‑a ’tɔ bhɔ; ‑yö kë ꞊nɛ mɛ do ‑wo ’dhö ‑yö ꞊luu’‑.

’Wuntaɔsë ’ö ’kpongtaamɛ ‑nu ’plɛ ‑bha ’ka

⁷꞊Ya kë ’dhö, ‑ka ka ‑kɔ ’kpɔ ka ’ko ‑nu ‑gɔ ꞊nɛ ‑kɔ ’ö Klito ‑yö ö ‑kɔ kpɔa ka ‑gɔ kö ka ‑nu ’plɛ ’kaan‑ kaa ‑Zlan ‑bha ’tɔbhɔdhe ’gü bhë ‑a ’dhö. ⁸’Ö tɔɔ Klito ’ö bhë ‑yö ö ‑de ‑kë yuö ‑kë Zuifö ‑nu ‑dhë ‑mɛ ’ka, ‑yö kë ’dhö kö ‑Zlan ‑bha pë ‑nu ’ö‑ ’tɔ go kwa ’bhɛma ‑nu ꞊va ‑dhë bhë kö ‑yaan ‑a ’dhiö ‑mɔ ’kuë ‑a kë ‑sü ’ka ’iin ‑a ‑zɔn ‑sü ’ka ꞊nɛ pë ’ö ‑Zlan ꞊yaa‑ pö bhë, ‑ya ‑de ‑kë. ⁹‑Yö ‑nu ’dhö ’pö kö mɛ ‑nu ’ö ’waa Zuifö ’ka kö ‑waan ‑Zlan ’tɔ bhɔ ’pö ‑a ‑bha ’glusë ‑wun ’gü ꞊nɛ ‑kɔ ’ö ꞊bɛɛn’ ‑sü ’ka ‑a ’ka ‑Zlan ‑bha ’sëëdhɛ ’gü bhë ‑a ’dhö ꞊nɛ: ‑A ‑wun ’gü a ‑dho ü ’tɔ bhɔ ’sɛgümɛ ‑nu ziën; ’a dho ’tan bho ü ’tɔ ’piö. ¹⁰’Yö ‑ya ‑sü ’ka ’zü ꞊nɛ: ’Sɛgümɛ ‑nu ’saadhö, ’sɛgɔ ’ö ‑Zlan ‑ya sü bhë, ka ‑nu ‑ka ꞊zuögludhi kë ka ’ko ꞊bhaa ꞊ɛɛ! ¹¹’Yö mü ’zü ꞊nɛ: Mɛ ‑nu ’ka ’sɛgɔ ’saadhö ’gü, ‑ka kwa Dëmɛ ’tɔ bhɔ. Mɛ ’plɛ ‑wa ’tɔ bhɔ; (kö ꞊kun ’ö mɛ do ‑yö to)! ¹²’Yö Ezai ‑yö bɔ ’sëëdhɛ ꞊bɛɛn’ ‑yan ‑dhɛ ’bhaa ’gü mü ’pö (’ö ’wun ‑gban Yesu ‑bha) ’ö‑ pö: Zese ꞊suu’‑ ‑ta ’në ‑yö nu ‑na; ‑yö ‑dho nu kö ‑yaan ’sɛgɔ ’saadhö ‑an ꞊kɔɔn. ‑Wo ‑dho wo ‑zo ’tën ‑a ‑bha.

¹³Kö ‑Zlan ’ö ‑zo ‑yö ‑a ‑bha ‑pë ‑ya mɛ ꞊zuö’ ’gü bhë, ‑yö ka gbaa ꞊zuögludhi waa‑ ꞊zuöyagluu ’ka (꞊va ’ka) ‑zo ‑yö ‑a ‑bha ‑sü ’ö ka ‑gɔ bhë ‑a ꞊kwaa’, ‑yö kë ’dhö kö pë ’ö ‑zo ‑yö ‑a ‑bha ‑pë ’ka bhë ’kaan‑ ka ꞊zuöga ’plɛ ’to ‑a ‑gɔ zian‑ ‑Zuu ’slööslö ‑bha ’piigbeedhɛ ꞊kwaa’.

’Sɛ ’ö ꞊nɛ ‑a bɔ ‑gɛn

¹⁴N dhegluzë ‑nu, ma ‑de gia‑ a‑ ꞊tɛi’ ‑dɔ ꞊nɛ ka ’glu ꞊yö ‑së ’ö pë ’ö ‑gban ‑Zlan ‑bha ’ö mɛ dhoë‑ dɔ, ’ö‑ ’plɛ ’dhö ka ’yaan. A‑ ꞊tɛi’ dɔ ꞊nɛ ka ‑mɔa kö ’ka ka ’ko ‑nu ’paan bho. ¹⁵’Kɛɛ kë‑ wo ’dhö bhë ’sa, ’ma ’sëëdhɛ bɔ ka ‑dhë. ’Sëëdhɛ bhë ‑a ‑dhɛ ꞊plëëzë ’gü, a ‑yɛ ’zü ’ö pë ‑nu ’ma‑ ꞊blɛɛ’‑ ka ‑dhë ’saadhö ’ö ’a bɔ ‑a ’piö ’zü ka ‑zo ‑büö ‑sü ’ka. ‑A ‑ya ’a‑ wo ’dhö bhë, ‑yö ‑kë ‑Zlan ‑bha ’glusë ’ö‑ kë n ’ka bhë ‑a ‑wun ’gü. ¹⁶’Yö n sü kö ’aan‑ kë Yesu Klito ‑bha yuökëmɛ ’ka, mɛ ‑nu ’waa Zuifö ’ka ‑an ziën bhë ‑a ‑wun ’gü. Yuö ’ö ’a‑ kë ‑na bhë, ‑yö ‑ya ‑sü ’ka ‑de ‑ta; ’ö tɔɔ kö ‑Zlan ‑bha ’wuntaɔsë bhë ’aan‑ ‑a ꞊blɛɛ’‑ mɛ ‑nu ’ö ’waa Zuifö ’ka ‑an ‑dhë kö ‑an ‑bha ‑tosiadhe ‑yaan kë ꞊nɛ slapë ’wo‑ kë ‑na gbaɔ ’ka ’ö‑ ’yi dho ’kan ‑na ‑Zlan ‑dhë ‑a ’dhö. ’Ö ‑Zuu ’slööslö ‑yö ‑an ‑kë ’slööslö ‑a ‑bha ’ka. ¹⁷꞊Ya kë ’dhö kö n ‑ma ‑kpa Yesu Klito ‑bha ‑sü ’gü, a ‑mɔa ’a ‑kë ’gɔugɔ ma yuö ’a‑ kë ‑na ‑Zlan ‑dhë bhë ‑a ‑wun ’gü. ¹⁸’Ö bhii ’ö ꞊ya kë ꞊nɛ ’a dho ’wun ꞊blɛɛ’‑, kö pë ’ö Klito ‑ya ‑kë n ‑dhë bhë, yö dosɛn ꞊nɛ ’a dhoë‑ ‑wun ꞊blɛɛ’‑ kö mɛ ‑nu ’ö ’waa Zuifö ’ka bhë ꞊waa‑ ma, ‑waan ‑Zlan ꞊bhlë ‑ya. Pë ’ö ’dhö bhë, Klito ‑ya ‑kë ö ‑wo ’ka, ’go mü ’ö‑ ‑kë këpë ‑nu ’ka, ¹⁹꞊duakëpë ‑nu ’piigbeezë ‑nu, ‑dhidhaapë ‑nu ’ka ꞊bɔa’ ‑Zuu ’slööslö ‑bha ’piigbeedhɛ ‑ta ‑sü ’ka. ‑Kɔ bhë ’ö ꞊kaa’ ’ö ’wuntaɔsë ’ö ‑gban Klito ‑bha bhë, ’a‑ ‑wun ꞊blɛɛ’ ‑na ö ’plɛ ’ka ’sɛ ‑nu ’gü ’go Zeluzalɛmë ’ö ’dho ’ö yöë Ilili ’sɛgɔ ‑bha bhë. ²⁰’Kɛɛ kë‑ wo ’dhö bhë, a‑ ‑ya n ꞊zuö’ ’piö kö ꞊dhɛ ’ö waa Klito ‑wun ma ‑a ‑bha do ꞊kun bhë ’a ’dho ‑a ‑bha ꞊zian’ kö ’a‑ ‑wun ꞊blɛɛ’‑, kö ꞊kun ’ö‑ ꞊tɛi’ ‑yö kë ꞊nɛ ꞊dhɛ ’a ’kɔ dɔ ‑a ‑bha ’kɔ ’kpan ’ö mɛ gbɛ ‑ya ‑pë ‑kë ‑a ‑ta ‑a ’dhö. ²¹’Kɛɛ kö ’aan‑ pë ‑nu kë ꞊nɛ ‑kɔ ’ö‑ ’ka ‑Zlan ‑bha ’sëëdhɛ ’gü bhë ‑a ’dhö ꞊nɛ: Mɛ ‑nu ’ö waa‑ ‑wun ꞊blɛɛ’‑ ‑an ‑dhë, ‑wo ‑dhoë yö, ’ö mɛ ’ö waa‑ ‑wun ma do, ’wo dhoë‑ ma.

’Ta ’ö Pɔlö dho dho ‑a ’gü Wlɔmë bhë, ’wun ’ö ‑gban ‑a ‑bha ’ö ꞊nɛ

²²Pë ’ö‑ ’bhaa ‑nu ꞊ya kë ’ö ’maa nu ‑a ‑dhë ka ꞊plöö ’ma bhë ’ö bhë. ²³’Kɛɛ dɔ ’kwa‑ wo ꞊nɛ, yuö ’ö ‑kë n ‑gɔ ’nö kö ’aan‑ kë bhë, ’ma yën ‑a ‑bha. ‑A ‑kwɛ ꞊ya kë ꞊plëëzë ’ö ’a‑ ’piö kö ’a nu ka plöö ’ma ‑bhɔdhia kë ꞊dhia ka ‑gɔ. ²⁴’Kɛɛ n ‑ma ’dho ‑sü ’ka Ɛsüpanyiö ‑sɛ (’ö ‑kë ’kwi ‑sɛ ’ka bhë ‑a) ’gü, a ‑dho bɔ ka ’piö ’ma; ’ö tɔɔ ‑yö n ‑zo ’piö kö n ‑ma ‑bɔ ka ’piö ’ma ‑sü ’gü, kö ’kaan‑ nu n ‑dhë kö ’aan‑ ’dho ’sɛ bhë ‑a ’gü kö ’ma ’töng kpö kë ka ’piö ’ma. ²⁵’Kɛɛ dɔ ’a‑ wo ꞊nɛ n ’dho ‑sü ‑mü Zeluzalɛmë kö ‑Zlan ‑bha mɛ ‑nu ’wo ’ma bhë, ’aan‑ ’dho ‑nu ‑an ‑dhë pë ’ka ‑an ꞊dhia. ²⁶’Ö tɔɔ Yesu Klito ‑wun ‑dhɛ ’wun gia‑ ‑mɛ ‑nu ’wo Maseduanë ‑dhɛ waa‑ Glɛkö ‑sɛ ’gü ‑dhɛ ‑an ‑bha bhë, ꞊wa ’dho wo ’kuë‑ kö ‑waan ’wëü‑ bho mɛ ‑nu ’wo ’fɛɛzë ’kɛɛ ’wo Yesu ‑wun ‑dhɛ ’wun gia‑ ‑mɛ ‑nu ’ka, ’wo Zeluzalɛmë bhë ‑an ‑dhë. ²⁷‑Wa ‑sü wo ‑de ’gü ’wo‑ ‑kë. ’Kɛɛ ’kwa ‑dhɛ ‑ga ‑a ’gü ‑së ’ka, ‑yö ‑an ꞊dua’ ’ka kö ‑wa kë ‑an ‑dhë ’dhö; ’ö tɔɔ Yesu ‑wun ‑dhɛ ’wun gia‑ ‑mɛ ‑nu ’wo Zuifö ’ka ’wo Zeluzalɛmë bhë, ’wun ’ö ‑gban ‑Zlan ‑bha bhë, ‑wa ‑kë ’ö mɛ ‑nu ’ö ’waa Zuifö ’ka ’wo‑ dɔ. ꞊Ya kë ’dhö kö mɛ ’waa Zuifö ’ka, ‑an ꞊dua’ ‑mü kö ‑wo nu ‑an ‑dhë pë ‑nu ’wo ‑kë ’wëü‑ ‑nu, sɔ ‑nu, ‑bhöpë ‑nu ’ka bhë ‑an ’ka ‑an ‑dhë. ²⁸꞊Ya kë ꞊nɛ ’ma yën ’wun ꞊nɛ ‑a ‑bha ’nö, ’ö ’ma ’dho ‑kɔ ‑da ’kuë‑ bhë ‑a ’ka ‑an ꞊dhia, kö n zian ’sü ‑sü ‑mü Ɛsüpanyiö ꞊zian’; ’kɛɛ a ‑dho bɔ ka ꞊plöö ’ma. ²⁹‑Yö n ’gü ꞊nɛ Klito ‑bha ’dhuë‑ ‑yö ‑dho kë n ‑ta ö ’plɛ ’ka, ’a nuë ’ma.

³⁰N dhegluzë ‑nu, pë ’a‑ ‑dhɛ ka ‑gɔ kwa Dëmɛ Yesu Klito ’tɔ ’ka ‑dhɔ ’ö ‑Zuu ’slööslö ’gü bhë ‑a ꞊kwaa’ ’ö tɔɔ: ‑Ka kpa n ‑ma kö ’ko bhë, ’kwa ’dhoë‑ ‑bha ‑bhɛa ‑Zlan ‑dhë ‑sü ’ka; ‑ka ꞊bhɛa’ ‑Zlan ‑dhë n ‑wun ’gü ka ꞊faan’ ’plɛ ’ka. ³¹‑Ka ꞊bhɛa’ ‑Zlan ‑dhë n ‑wun ’gü ’zü ‑yö kë ’dhö kö mɛ ‑nu ’ö ’waa Yesu ‑wun ‑dhɛ ’wun gia‑ ‑mɛ ‑nu ’ka ’wo Zude ‑sɛ ’gü bhë ’a dha ‑an ‑gɔ, ’iin kö pë ’ö ’a ’dho ‑na ‑a ’ka Zeluzalɛmë bhë, ‑a ‑së ‑yaan ‑lo ‑Zlan ‑bha mɛ ‑nu ’wo ma ‑an ‑ta. ³²‑Kɔ bhë ꞊nɛ ’ö ’a dho ‑lo ‑a ’ka ka ꞊plöö ꞊zuögludhi ꞊va ’ka, ’kɛɛ kö ꞊ya kë ‑Zlan ‑we ‑a ‑bha ‑wun ’ka, ‑yö kë ’dhö kö ’ma ‑lo ’ma ’aan‑ n ’tɛɛ ’bhle pa. ³³Kö ‑Zlan ö ꞊zuöyagluu nu mɛ ‑nu ‑dhë bhë, ‑yö kë ka ’saadhö ka ’piö! Amɛn.

꞊Wekadhe ’ö dho mɛ ‑nu ’wo Wlɔmë ‑an ’piö

¹Yi dheglu ‑mɛ dhebɔ ’ö ‑kë Febe ’ka ’ö yuö kë ‑na Yesu ‑wun ‑dhɛ ’wun gia‑ ‑mɛ ‑nu ‑dho ’kuë‑ ‑sü ’ö Sankle ‑a ’gü bhë, a‑ ‑dhɛ ka ‑gɔ kö ’ka ka ‑zo kë ‑a ’piö ‑së ’ka. ²‑Kaa ‑nia ’kun ‑së ’ka kwa Dëmɛ ’tɔ ’gü ꞊nɛ ‑kɔ ’ö ’wo‑ kë ‑na ‑a ’ka ‑Zlan ‑bha mɛ ‑nu kpö ’gü bhë ‑a ’dhö; ‑ka nu ‑a ‑dhë ’wun ’saadhö ’ö‑ ‑bha ‑wun ‑yö yö ‑a ‑bha ‑a ’gü. ‑A ‑de Febe ’ö bhë, ‑a ꞊zuö’ ꞊yö ‑së mɛ ’plɛ ’ka ’ö dho ’ö yöë n ‑ta.

³’Ma ’we n yuökëyɔɔ ‑nu Plisilö waa‑ Akilasö ’ö yi ‑nu ’plɛ ’yi Yesu Klito ‑bha yuö ’gü bhë ‑an ’ka. ⁴Wo ’wo bhë ꞊nɛ ’ö to ’tee kö ‑wo ‑an ‑zë n ‑wun ’gü ’ö ’a ‑bɔ ‑a ‑ta ’a ꞊tun ’bhee‑ ꞊nɛ; ’ö yaa kë ꞊nɛ ’wun bhë ma do ’sloo, ’ö‑ ‑wun ’gü ’a ‑an zuö pö ‑na bhë ’yaa ‑mü; ‑yö ’dhö ‑Zlan ‑bha mɛ ‑nu ‑todhösü ’wo ’kpongtaa zö ’ö ’waa Zuifö ’ka bhë, ‑an ’piö ’pö. ⁵Yesu ‑wun ‑dhɛ ’wun gia‑ ‑mɛ ‑nu ’wo ‑ya ’kuë‑ kë ‑na ‑an ‑gɔ kɔɔ bhë, ’ma ’we ‑an ’ka ’pö. N dheglu ‑wungbeezë Epanɛtö, ’ö yö ꞊nɛ ’ö ‑kë mɛ ‑blɛɛzë ’ö ‑we Yesu Klito ‑wun ‑bha Azi ‑sɛ ’gü bhë, ’ma ’we ‑a ’ka. ⁶Mali ’ö yuö kë ka ’dhiö ꞊duö bhë, ’ma ’we ‑a ’ka. ⁷N dhegluzë ‑nu Andronikusö waa‑ Zuniasö ’ö yi ‑nu ’yi ‑kanso ‑kë ’kuë bhë, ’ma ’we ‑an ’ka. ‑An ‑ga ’ka‑ wo ‑na bhë, ‑an ‑dhɔ ‑yö mɛ ‑nu ‑kë ꞊duö Yesu Klito ‑bha bɔmɛ ‑nu ’wo bhë ‑an ziën. ‑Wo ‑we Yesu Klito ‑wun ‑bha n ’dhiö.

⁸N ’bhamɛ Anpliatusö ’ö kwa Dëmɛ ’gü bhë, ’ma ’we ‑a ’ka. ⁹Yi yuökëyɔɔ Uubɛn waa‑ n dheglu ‑wungbeezë Takisö, ’wo bhë ’ma ’we ‑an ’ka. ¹⁰Apelɛsö ’ö‑ ‑bha ‑zo yö Klito ‑bha ‑kɔ bhë ’ö ’ka‑ dɔ bhë, ’ma ’we ‑a ’ka. Mɛ ‑nu ’saadhö ’wo Alitobulö ‑gɔ kɔɔ, ’ma ’we ‑an ’ka. ¹¹’Ma ’we n dheglu Elodiɔn ’ka. Mɛ ‑nu ’wo Naasisö ‑gɔ kɔɔ, ’wo ‑we kwa Dëmɛ ‑wun ‑bha, ’ma ’we ‑an ’ka. ¹²Trifɛnë waa‑ Trifɔzö ’wo kwa Dëmɛ ‑bha yuö kë ‑na bhë, ’ma ’we ‑an ’ka; ’ma ’we n dheglu ‑dhe Pɛɛsidö ’ö yuö kë giagiawo kwa Dëmɛ ‑dhë bhë ‑a ’ka. ¹³Lifisö, ’ö ꞊ya yuö kë kwa Dëmɛ ‑dhë ’ö mɛ ‑zo kun bhë, ’ma ’we ‑a ’ka. ’Ma ’we ‑a dhe ’ö n dhe ’ka ’pö bhë ‑a ’ka. ¹⁴Dhegluzë Asɛnklitö ‑nu, Flegɔn ‑nu, Ɛɛmɛsö ‑nu, Patrobasö ‑nu, Ɛɛmasö ‑nu ’ö wo ‑nu ’wo ’ma, ’ma ’we ‑an ’ka. ¹⁵’Ma ’we Filolɔgö waa‑ Zoli, Nele waa‑ ö dheglu ’nëdhezë ‑an ’ka; ’ma ’we Olɛnpasö waa‑ ‑Zlan ‑bha mɛ ‑nu ’ö wo ‑nu ’wo wo ’ko ꞊bhaa ’ma ’saadhö bhë ‑an ’ka.

¹⁶‑Ka ka ’ko ‑nu ꞊tua bho ka ’ko ’sɛnɛ bho ‑sü ’ka ꞊nɛ ‑kɔ ’ö‑ ’ka ‑së kö dhegluzë ‑nu ‑wa kaa bhë ‑a ’dhö. Klito ‑wun ‑dhɛ ’wun gia‑ ‑mɛ ‑nu ‑dho ’kuë‑ ‑sü kpökpö ‑nu ’wo ’nö ‑dhɛ ‑nu ‑bha ꞊wa ’we kaa ꞊duö.

’Paanbhodhe ‑kaanta

¹⁷N dhegluzë ‑nu, ka ‑bha za ꞊yö ‑së giagiawo; mɛ ‑nu ’ö ’wo ’gügludhe ‑da ‑na ka ziën ’iin ’ö ’wo ka bho ‑na zian ‑së ‑ta mɛ ꞊daan’ ‑wo ‑nu gbɛ ’wo ka ꞊daan’ ‑na ‑an ’ka bhë ‑a ’ka bhë, ‑ka ka ‑de dhɛ ’kan ‑an ‑gɔ! ‑Ka ’kan ‑an ‑bha ‑dewo! ¹⁸’Ö tɔɔ mɛ ꞊suu’‑ ‑nu ’wo bhë, yaa kë ꞊nɛ kwa Dëmɛ Klito ’wo‑ ‑bha yuö kë ‑na bhë ’dhɛ! ‑Yö kë ka ’yaan ꞊nɛ wo ‑de ‑bhöpë ꞊nɛ ’wo‑ ’gü ‑pë kë ‑na ’dhö bhë. ꞊Wa ꞊yaannu ꞊nëdhö, kö ‑wo ’wun tiitii ‑nu yö ‑na ’ko ’dhiö kö mɛ ‑nu ’ö ’waa ’wun dɔ bhë, ‑waan ‑an dɔ ’dudhö. ¹⁹‑Ya ’ka‑ wo ’ma bhë, ka ‑bha ‑gɔ ‑dho sia‑ ‑sü ’ö kwa Dëmɛ ‑dhë bhë, mɛ ’plɛ ‑wa ’wun ‑dɔ. ’Wun bhë, ‑yö n ꞊zuögludhi ‑wun ’ka; ’kɛɛ a‑ ’piö kö ’kpaakpadhɛ ‑yö kë ka ‑gɔ, kö pë ’ö ’wun ’ö ‑së ’ka ’ö kpengdhö, ’kaan‑ ‑a kë ꞊zian’, ’iin kö ’ka ka ‑ta yö ’wun yaa ‑bha. ²⁰’Kɛɛ ‑ka dɔ ’dhɛ! ‑Zlan ’ö ꞊ya kë ’ö ꞊zuöyagluu nu mɛ ‑dhë bhë, ‑yö ‑dho Satan pɔn ka ‑dhë kö ’kaan‑ ‑ya ‑a ‑ta. Kö kwa Dëmɛ Yesu ‑bha ’glusë ‑yö ’to ka ’piö!

²¹N yuökëyɔɔ Timote ’ö yi ‑nu ’yi ’nö ꞊ya ’we kaa ꞊duö. N dheglu ‑nu Lusiusö ’dhö, Zazɔn ’dhö waa‑ Zozipatɛɛ wo ‑de ’pö ꞊wa ’we kaa.

²²Öö ma ‑de gia‑ Tɛɛtiusö ’ö ’sëëdhɛ ꞊nɛ ’ö Pɔlö ‑ya pö n ‑dhë ’a‑ ꞊bɛɛn’ bhë, kö, ’ma ’we kaa (kwa Dëmɛ) Klito ’tɔ ’gü.

²³Mɛ ’ö n ‑nia kun ’nö ’pö ’wo‑ ‑dhɛ Gayusö bhë, ’ö ꞊ya kë ’ö Yesu ‑wun ‑dhɛ ’wun gia‑ ‑mɛ ‑nu ‑dho ’kuë‑ ‑sü ’ö ’nö, ’ö ‑ya ’kuë‑ ‑yö ‑kë ‑a ‑gɔ kɔɔ bhë ꞊ya ’we kaa. ’Wëü‑ ‑kɔ ’dhiö Elatö ’ö plöö ’nö waa‑ kwa dheglu Kwatusö ꞊wa ’we kaa ꞊duö.

²⁴[Mɛa‑, kö kwa Dëmɛ Yesu Klito ‑bha ’glusë ‑yö kë ka ’piö ‑kplawo! Amɛn.]

‑We ‑Zlan ’tɔ ’piö ‑sü

²⁵‑Kwa ‑Zlan ’tɔ bhɔ, bhii yö ꞊nɛ ’ö ‑kɔ ‑mɔ ’wuën‑ ‑sü ’dhoë‑ ‑gɔ kö ‑yö ka ꞊faan’ ’më ka ‑bha ‑zo yö ‑sü ’gü ꞊nɛ ‑kɔ ’ö‑ ’ka ’wuntaɔsë ’ö ‑gban Yesu Klito ‑bha ’a‑ ꞊blɛɛ’ ‑na ꞊nɛ ‑a ’dhö. ’Wundɔdhe ’ö ‑gban ‑Zlan ‑bha, ’wun ’ö ‑kë ‑bin ‑sü ’ka ꞊glɔɔsü ’ö ’kwa‑ yö bhë, ’ö tɔɔ Yesu Klito. ²⁶’Kɛɛ dɔ ’kwa‑ wo zlöö ꞊nɛ, ꞊ya yö kwa ‑dhë ‑dhɛpuudhɛ ’gü ’sëëdhɛ ꞊bɛɛn’ ‑yan ’ö ‑Zlan ‑wodhiölomɛ ‑nu ‑wo ’ka bhë ‑a ’gü. ‑Zlan ‑de gia‑ ꞊nɛ ’ö‑ pö ‑yö kë ’dhö kö mɛ ’saadhö ’wo ’kpongtaa ‑wa ma, kö ‑wa ‑dhɛ ’wun gia‑ kö ‑waan wo ‑gɔ ’dho ‑a ‑dhë sia‑.

²⁷‑Zlan dosɛn ’ö ’kpaakpadhɛ ’plɛ ‑yö go ‑a ’gü bhë, ’tɔbhɔdhe ‑yö kë ‑a ‑bha ’ka Yesu Klito ’gü ’töng ’saadhö ’ka! Amɛn.