’Dhɛbhowunta

’Dhɛbhowunta ’sëëdhɛ

’ö Zan ‑ya ꞊bɛɛn ’ö ꞊nɛ

¹Pë ’ö ꞊bɛɛn’ ‑sü ’ka ’sëëdhɛ ‑be ’ö ꞊nɛ ‑a ’gü ’ö tɔɔ pë ‑nu ’wo dho kë ‑dhɛkpaɔ ꞊dhia’ ‑bha ’ö ‑Zlan ‑ya ‑wun ‑lo Yesu Klito kwɛɛ kö ‑yaan ‑a ‑zɔn ö ‑bha yuökëmɛ ‑nu ‑dhë. Klito ‑ya ‑zɔn ’ö bɔa ö ‑bha yuökëmɛ Zan ’gü, ‑Zlan ‑bha bɔmɛ ‑bɔ ‑a ‑dhë ‑sü ’ka. ²Pë ‑nu ’ö Zan ‑ya yö ꞊nɛ ’ö‑ ꞊blɛɛ. ’Wun ’ö‑ ꞊blɛɛ’ ‑na zö ꞊nɛ ’ö tɔɔ ’wun ‑nu ’wo go ‑Zlan ’piö waa‑ ’wun gia‑ ’ö Yesu Klito ‑ya ‑zɔn. ³꞊Zuögludhi ‑yö kë mɛ ’ö ’sëëdhɛ ‑be ’ö ꞊nɛ ’ö ’dhoë‑ ‑a pö ‑a ‑gɔ! ꞊Zuögludhi ‑yö kë mɛ ’ö ’dhoë‑ ö ’to to ‑Zlan ’dhi ‑wo ’ö ꞊nɛ ‑a ‑bha, kö pë ‑nu ’wo ‑ya ꞊nɛ ‑yaan ꞊bhlë ‑ya ‑a ‑gɔ! Bhii ’töng ’ö ‑ya ‑sü ’ka kö pë ‑nu ’wo ꞊nɛ ‑waan kaa bhë ꞊ya yö ꞊klöö’.

꞊Wekadhe ’ö dho Yesu ‑wun ‑dhɛ ’wun gia‑ ‑mɛ ‑nu ‑dho ’kuë‑ ‑sü ’slaplɛ ’piö

^4-5Ma Zan ꞊nɛ ’ö ’sëëdhɛ ꞊nɛ ’a‑ bɔ Yesu ‑wun ‑dhɛ ’wun gia‑ ‑mɛ ‑nu ‑dho ’kuë‑ ‑sü ’slaplɛ ’ka Azi ‑sɛ ’gü ka ‑dhë: ’Ka ꞊büee. ‑Zlan ’ö ‑kë ‑dhö, ’ö ꞊tun ‑dhö, ’ö dhö nu ’dhö, ‑zuu ’slaplɛ ’wo‑ ‑bha ’gɔ ‑gbloo ’dhiö ’dhö, waa‑ Yesu Klito ’ö kwa ꞊goo‑ ‑towogüsüzë ’ka, Gbö ‑blɛɛzë, ’yö mɛ ‑blɛɛzë ’yö go ga ’gü ‑a ’ka, ’yö mɛ ꞊va ’ka ‑gludë ‑nu ’wo ’kpongtaa zö ‑an ‑ta, ‑wo ’glusë waa‑ ꞊zuöyagluu ’ö go ‑an ’piö ‑an kë ka ’ka. Yesu Klito ꞊nɛ ’ö kwa ‑dhɔ ‑ya ‑kë, ’yö kwa dha kwa ‑bha ꞊sɔɔn yaa ‑nu ‑gɔ, ‑ga kwa ‑wun ’gü ‑sü ’ka. ⁶’Ö ’kwa ‑kë ö ‑bha ‑gludëdhɛ ‑pö ’gü ‑mɛ ‑nu, slabhomɛ ‑nu ’ö ’kwa dho yuö kë ‑a Dë ‑Zlan ‑dhë ‑an ’ka. ’Tɔbhɔdhe waa‑ ’piigbeedhɛ ‑wo kë Yesu Klito ‑bha ’ka ꞊toëpö ’ka! (Amɛn!)

⁷‑Ka ‑dhɛ ‑ga, ‑yö nu ‑na dha kpö ‑nu ‑ta; mɛ ‑nu ’saadhö ’yan ‑dhö ‑da ‑a ’gü; mɛ ‑nu gia‑ ’wo‑ zlɔa ’dü ’ka bhë ‑an ’yan ‑dhö dɔ ‑a ‑bha ’pö. ’Sɛgümɛ ‑nu ’saadhö ‑wo ‑dho ’gbo ‑nu bɔ wo ‑de ꞊maa’ ‑sü ’ka ‑a ‑wun ’gü. Pë ’ö ‑de dho kë yö ‑mü. Amɛn.

⁸Kwa Dëmɛ ‑Zlan ’piigbeezë, ’ö ‑kë ‑dhö, ’ö ꞊tun ‑dhö, ’ö dho nu bhë ꞊nɛ ’ö ’wun ꞊blɛɛ ’ö‑ pö: «Ma ꞊nɛ ’a ’wun ’plɛ züdɔdhɛ waa‑ ‑a ’dhiötodhɛ ’ka.»

Zan ‑bha ’yanpiöpë ’ö ‑gban Klito ‑bha ‑a ‑sü

⁹N tɔɔ Zan; a ka dheglu ’ka, ’ö ’kwa Yesu ’gü do; ma ꞊nɛ ’ö ’klobhɔdhe ’ö ‑gban ‑Zlan ‑bha ‑gludëdhɛ ‑wun ‑bha, ’a ka ’piö do ‑a wo ‑sü ’gü, ‑dɔ ‑a ‑gɔ ‑sü ’ka ꞊zuösaadhɛ ’gü bhë. ’Yiziëndhɛ ’wo‑ ‑dhɛ Patemɔsö ’a ‑ya ‑a ‑bha ꞊nɛ, ‑Zlan ‑wo waa‑ ’wun gia‑ ’ö ‑kë ꞊bɛɛn’ ‑sü ’ka ’ö Yesu ‑ya yö ‑dhɛgbɛadhɛ ’gü bhë ‑an ꞊blɛɛ’‑ ’a‑ wo bhë ꞊nɛ ’ö ’wo n kun ‑a ‑wun ’gü ’wo nu n ’ka zö ꞊nɛ. ¹⁰Dëmɛ ‑bha yi ’ka a ‑kë mü ’ö ‑Zuu ’slööslö ‑yö pa n ’ka, ’ö ’a ‑wo do ma n ꞊zlöö ꞊zian’. ’Ö ‑wo bhë ’ö ‑kë ’gbee‑ ’ka ꞊nɛ ꞊dhɛ ’wo ’truu ‑piö ‑a ‑bha ’kpa ‑a ’dhö. ¹¹‑Wo bhë ‑ya pö: «Pë ‑nu ’ü ’dhoë‑ yö ꞊nɛ ‑a ꞊bɛɛn’ ’sëëdhɛ ‑be do ’gü, kö ’sëëdhɛ ‑be bhë ’ü‑ bɔ Yesu ‑wun ‑dhɛ ’wun gia‑ ‑mɛ ‑nu ‑dho ’kuë‑ ‑sü ’ö Efɛzö, ’ö Simiinë, ’ö Pɛɛgamë, ’ö Tiatii, ’ö Saadö, ’ö Filadɛɛfi waa‑ ‑a mɛ ’ö Laodise ‑an ‑dhë. ‑An ‑dho ’kuë‑ ‑sü ‑yö ’slaplɛ.»

¹²’A ꞊dhië n ‑zü, ’a ‑dhɛ ‑ga n ꞊zlöö kö mɛ ’ö ’wun ꞊blɛɛ’ ‑na n ‑dhë bhë ’aan‑ yö. ’Ö ’a ꞊labang ‑dɔatapë ’slaplɛ ’ö ’sënng ’ka ‑a yö. ¹³Kö pë do ’ö bhɔ mɛ ’bhee‑ ‑bha ‑yö dɔ ‑sü ’ka ‑an ziën. Gblang do ꞊gbiin ’ö nu ’ö yö ‑a ‑gɛn kpöödhö ‑yö ‑kë ‑a ‑bha; ’sënng ‑du kwi ‑yö ziö ‑sü ’ka ‑a ‑kënng ’gü. ¹⁴‑A ‑bha wun ‑nu ‑wo kë ’puu ꞊nɛ ’bhla kaa‑ ’puu ’dhö ꞊nɛ ’yɔɔ ’dhö, ’ö‑ ’yan ‑nu ‑wo bhü ꞊nɛ ’siö ’dhö. ¹⁵‑A ‑gɛn ‑nu ‑wo ‑bhü ꞊nɛ zën ’wo‑ bho ’ö ’wo‑ ‑kë ’drëëndrën ‑a ’dhö; ’ö‑ ’we ‑wo ‑zuö ‑kë ꞊va ‑kɔ ‑yö ‑kë ꞊nɛ ’yi ‑zuö ‑drinng ’dhö. ¹⁶’Susongga ’slaplɛ ‑wo ‑kë ‑a ꞊kwɛɛ‑ ’gü ‑kɔ ’gü ’ö ‑dhaa ’dhiözë ’ö‑ ’dhiö ’dho zian ꞊plɛ ’ka ’ö go ‑a dhiö. ‑A wöödhɛ ‑yö ‑bhü ꞊nɛ ‑kɔ ’ö lan‑ ’dho ’bhü ‑na ‑a ’ka, kö ꞊ya dɔ ’dhëë ziën bhë ‑a ’dhö. ¹⁷꞊Dhɛ ’ö n ’yan ‑yö ‑da ‑a ’gü, ’a ‑püö ‑a ꞊gɛɛndhö ꞊nɛ mɛ ꞊ya ga ‑a ’dhö. ’Yö ö ꞊kwɛɛ‑ ’gü ‑kɔ sü ’yö‑ ‑da n gban ‑ta ‑a pö ‑sü ’ka ꞊nɛɛ: «Kö ꞊kun ’ö ’suö ‑yö ü ‑kë! Ma ’a tɔɔ mɛ ‑blɛɛzë; ma ’a tɔɔ mɛ ‑kaanta. ¹⁸Ma ’a tɔɔ mɛ ’ö ’bhee‑; a ‑ga, ’kɛɛ ꞊dɛɛ ꞊nɛ ‑a ’gü bhë, a ’bhee‑ ꞊toëpö ’ka zlöö. ‑Kɔ ‑mɔ ’wuën‑ ‑sü ‑yö n ‑gɔ ga waa‑ ꞊glööbɔɔdhɛ ‑an ‑ta. ¹⁹Pë ‑nu ’wo kë ‑na ꞊nɛ waa‑ pë ‑nu ’wo dho kë ‑an ’piö ’ü ‑an yö ‑na ꞊nɛ, ‑bhö ‑a ‑ya ’sëëdhɛ ’gü! ²⁰‑Dhɛ ‑ga ’zü, ’susongga ’slaplɛ ’ü‑ ‑ga ‑na n ꞊kwɛɛ‑ ’gü ꞊zian’ ꞊nɛ waa‑ ’sënng ꞊labang ‑dɔatapë ’slaplɛ ‑wun ꞊nɛ ‑an ‑gɛn ’ö ‑bin ‑sü ’ka ’wo ꞊nɛ: ’Susongga ’slaplɛ ’ö ’wo ꞊nɛ ’wo tɔɔ ‑Zlan ‑bha yuökëmɛ ’slaplɛ ’wo ’dhiö ‑sü Yesu ‑wun ‑dhɛ ’wun gia‑ ‑mɛ ‑nu ‑dho ’kuë‑ ‑sü kpö ’slaplɛ ’wo bhë ‑an ’ka ‑mɛ ’ka bhë ‑an ‑bha. ’Ö ꞊labang ‑dɔatapë ’slaplɛ ’wo ꞊nɛ ’wo Yesu ‑wun ‑dhɛ ’wun gia‑ ‑mɛ ‑nu ‑dho ’kuë‑ ‑sü kpö ’slaplɛ bhë ‑an ’ka.»

’Sëëdhɛ ’ö dho Yesu ‑wun ‑dhɛ ’wun gia‑ ‑mɛ ‑nu ‑dho ’kuë‑ ‑sü ’ö Efɛzö ‑a ’piö

¹꞊Dhɛ ’ö pë ‑nu ’wo bhë ꞊yaa‑ ‑gɛn ‑nu pö n ‑dhë ’dhö, ’yö‑ pö ’zü: «‑Bhö ’sëëdhɛ bɔ Yesu ‑wun ‑dhɛ ’wun gia‑ ‑mɛ ‑nu ‑dho ’kuë‑ ‑sü ’ö Efɛzö bhë ‑a ‑dhë ’ü‑ pö ‑a ‑dhë ꞊nɛɛ: Mɛ ’ö ’susongga ’slaplɛ ’dhoë‑ ꞊kwɛɛ‑ ’gü ꞊zian’, ’ö ’ta ’sü ‑sü ’gü ꞊labang ‑dɔatapë ’slaplɛ ’wo ’sënng ’ka ‑an ziën bhë ‑ya ‑pö: ²Pë ‑nu ’ü‑ kë ‑na ’töüdhö bhë a‑ ‑dɔ. A ꞊sëëbhodhe waa‑ ꞊zuösaadhɛ ’wo ü ’gü bhë ‑a ‑yö. A‑ ꞊dɔa’ ꞊nɛ kaa‑ ’gluyaamɛ ‑nu ka këwun ‑nu ’waa do; mɛ ‑nu ’wo wo ‑de ‑dhɛ ‑na Yesu ‑bha bɔmɛ ‑nu ’kɛɛ ’waa‑ ’ka bhë, ü ‑an ’piö ‑ga, ’ö ’ü‑ yö ꞊nɛ ꞊suamɛ ‑mü ‑an ’ka. ³꞊Zuö’ kë ‑saa ‑sü ‑yö ü ‑gɔ; ü ’yënng ‑yö ‑bhɔ n ‑wun ’gü ’ö ꞊faan’ yaa ’go ü ’gü. ⁴’Kɛɛ pë ’ö n ‑zuë ü buëndhö ’ö ꞊nɛ: N ‑dhɔ ’yaa ü ‑bha gbɔ ꞊nɛ ‑kɔ ’ü‑ zü dɔa bhë ‑a ’dhö. ⁵Ü ‑zo ‑yö ‑büö ‑dhɔ ’ö ‑kë ü ’gü ’dhiö ꞊zian’ n buëndhö ’ö ’bha ü ꞊kwaa’‑ ‑a ‑zü bhë ‑a ‑wun ’ka! Dɔ ’ö ’kwa‑ wo ꞊dɛɛ ꞊nɛ, ‑bhö ü kë ‑kɔ ‑ga ’dhɛ! ’Go ü bha ꞊sɔɔn yaa ‑nu ’gü, ’ü ꞊dhië’‑ ‑Zlan ’piö, ’ü ’wun ‑nu kë ꞊nɛ ‑kɔ ’ü‑ ꞊kaa’ ’dhiö ‑blɛɛzë ’ka bhë ‑a ’dhö. ’Ö ꞊ya kë ꞊nɛ ü ’ka ’go ü ‑bha ꞊sɔɔn yaa ‑nu ’gü, a ‑dho nu ü ‑gɔ ’a ü bha ꞊labang ‑dɔatapë bho piën‑. ⁶‑Yö ’dhö, ’kɛɛ ’wun mɛ ’ö n ‑zo ’kun ‑wun ’ka ü buëndhö ’ö tɔɔ: Pë ’ö Nikolaitö ‑nu ’dho ‑a kë ‑na bhë ü‑ ‑san ‑zë ꞊nɛ n ’dhö ’pö.

⁷Kö mɛ ’ö‑ ’wun ma ‑to ’dhö ‑dhö, pë ‑Zuu ’slööslö ’dhoë‑ ꞊blɛɛ’ ‑na Yesu ‑wun ‑dhɛ ’wun gia‑ ‑mɛ ‑nu ‑dho ’kuë‑ ‑sü ‑dhë ꞊nɛ ‑ya ma.

Mɛ ‑nu ’wo ’dhoë‑ to ‑a ’gbee‑ ’ka, a ‑dho ‑këdhösü ‑lü bhɛ ’ö ‑Zlan ‑bha ’tɛɛpadhɛ ‑bha ‑a nu ‑an ‑dhë, ’wo‑ ‑bhö.»

’Sëëdhɛ ’ö dho Yesu ‑wun ‑dhɛ ’wun gia‑ ‑mɛ ‑nu ‑dho ’kuë‑ ‑sü ’ö Simiinë ‑a ’piö

⁸’Yö‑ pö: «‑Bhö ’sëëdhɛ bɔ ’dhiö ‑sü ‑Zlan ‑bha mɛ ‑nu ’ka ‑mɛ ’ö Yesu ‑wun ‑dhɛ ’wun gia‑ ‑mɛ ‑nu ‑dho ’kuë‑ ‑sü ’ö Simiinë ‑a ’gü bhë ‑a ‑dhë ꞊nɛɛ: Mɛ ’ö ga, ’ö ꞊ya ’go ga ’gü ’ö ’wun ’plɛ züdɔdhɛ waa‑ ’wun ’plɛ ’dhiötodhɛ ’ka bhë, ‑ya ‑pö: ⁹A ü ‑bha ’yënngbhɔdhe ‑dɔ; ’a ü bha ’fɛɛdhɛ ‑dɔ. A‑ ‑pö ’dhö ’kɛɛ giagia ’ka ü ꞊bhɔɔzë! ’Wun ’ö mɛ ‑nu ’wo wo ‑de ‑dhɛ Zuifö ‑nu ’ö ’waa Zuifö ’ka ’wo‑ ꞊blɛɛ’ ‑na ü ‑gɔ bhë a‑ ‑dɔ. Dü ‑bha mɛ ‑nu ‑mü. ¹⁰Kö ꞊kun ’ü ‑suö ü ’yënng ’ö ’dhoë‑ bhɔ bhë ‑a ‑wun ’gü! Ü ’to ’to: ’Ö tɔɔ ka ‑dho ‑da ’güdandhe ’gü, dü ‑bha ka kpö ’gü ‑mɛ ‑nu ’bhaa ‑nu ‑da ‑kanso ’gü ‑sü ’ka; ka ’klo‑ ‑dho bhɔ ‑dhɛkpaɔyi ’gɔɔ‑ do ’piö. ’Kɛɛ ‑bhö ’to ‑klu ‑sü ’ka ‑Zlan ‑bha ‑yö ’dho ‑yö yöë ü ‑bha ga ‑yi ‑bha; a ‑dho ü gbaa kë ‑a ’gü ‑sü ’gɔ ꞊gblaa’ ’ö dho ‑a ‑zɔn ꞊nɛ ü ‑to ‑a ’gbee‑ ’ka bhë ‑a ’ka.

¹¹Kö mɛ ’ö‑ ’wun ma ‑to ’dhö ‑dhö, pë ’ö ‑Zuu ’slööslö ’dho ‑a ꞊blɛɛ’ ‑na Yesu ‑wun ‑dhɛ ’wun gia‑ ‑mɛ ‑nu ‑dho ’kuë‑ ‑sü ‑dhë ꞊nɛ ‑ya ma. Mɛ ‑nu ’wo ’dhoë‑ to ‑a ’gbee‑ ’ka bhë, ga kë ꞊plɛ ‑naa yaa ’dho nu ‑an ‑ta.»

’Sëëdhɛ ’ö dho Yesu ‑wun ‑dhɛ ’wun gia‑ ‑mɛ ‑nu ‑dho ’kuë‑ ‑sü ’ö Pɛɛgamë ‑a ’piö

¹²’Yö‑ pö ’zü: «‑Bhö ’sëëdhɛ bɔ ’dhiö ‑sü ‑Zlan ‑bha mɛ ‑nu ’ka ‑mɛ ’ö Yesu ‑wun ‑dhɛ ’wun gia‑ ‑mɛ ‑nu ‑dho ’kuë‑ ‑sü ’ö Pɛɛgamë ‑a ’gü bhë, ‑a ‑dhë ꞊nɛɛ: Mɛ ’ö ‑dhaa ’dhiözë ’ö‑ ’dhiö ’dho zian ꞊plɛ ’ka ’yö‑ kwɛɛ bhë ‑ya ‑pö: ¹³A ü këdhɛ ‑dɔ; yö kun tɔɔ ‑dhɛ ’ö dü ‑bha ’gɔ ‑gbloo ’dhoë‑ ‑bha ‑a! ’Kɛɛ ü ’ka ü bo ‑zo ‑yö n ‑ma ‑sü ’ka; bhii ü ‑to ‑klu ‑sü ’ka n ‑ma ‑së ’ka, ’töng gia‑ ‑de ’ö n ꞊goo‑ ’ö ’yaa ’kan n ‑ma ’wo‑ ‑dhɛ Antipasö bhë ’wo‑ zaa plöö, ‑dhɛ ’ö dü ’dhoë‑ ‑bha bhë ‑a ‑bha. ¹⁴’Kɛɛ ‑a ‑kë ’dhö ‑sü ’ka ’wun do ‑yö n ‑zuë ka buëndhö: Mɛ ‑nu ‑wo ü ꞊plöö ’ö ’wo ‑klu ‑sü ’ka Balaamö ‑bha mɛ ꞊daan’ ‑wo ‑bha. Bhii Balaamö ‑yö ‑gleng ‑nu ‑da Balakö ꞊zuö’ ’piö kö ‑ya këdhɛ ꞊mɛɛ’‑ ‑yaan Izlaɛlö ‑mɛ ‑nu ‑da ꞊sɔɔn yaa ’gü wü ’wo wo ‑bha gbapë ‑nu gba ‑na ’ka bhë ‑a ‑bhö ‑sü ’ka; ’go mü ’wo wo ‑de nu ꞊sɔɔn kë ‑sü ‑dhë. ¹⁵‑Kɔ do bhë ꞊nɛ ’ö mɛ ’bhaa ‑nu ’dhoë‑ ’ka ü ꞊plöö ’ma ’ö ’wo ’to ‑sü ’ka Nikolaitö ‑nu ’wo ‑kë gbapë ’vlanvlan gbamɛ ‑nu ’ka bhë ‑an këpë ‑nu ’piö. ¹⁶꞊Dhɛ ’ö ’pö, ‑bhö ’go ü bha ꞊sɔɔn yaa ‑nu ’gü! ’Yaa ’pö a ‑dho nu ü ‑gɔ yi ’bhaa ’ka, ’a ’ko ‑zë mɛ ‑nu ’wo ’dhö bhë ‑an ’ka (n ‑wo ’ö ‑kë) ‑dhaa ’ö ’go ‑na n ’dhii ‑a ’ka bhë ‑a ’ka.

¹⁷Mɛ ’ö‑ ’wun ma ‑to ’dhö ‑dhö, ’wun ’ö ‑Zuu ’slööslö ’dhoë‑ ꞊blɛɛ’ ‑na ‑Zlan ‑bha mɛ ‑nu ‑dhë bhë ‑ya ma!

Mɛ ‑nu ’wo ’dhoë‑ to ‑a ’gbee‑ ’ka, a ‑dho ’manë ’ö ‑bin ‑sü ’ka bhë ‑a nu ‑an ‑dhë, ’go mü ’a dho ‑guö kpö ’puu, ’ö mɛ ’ö ‑dhö ’ö‑ ’tɔ ’dho ‑ya ‑sü ’ka ‑a ‑ta ‑a nu ‑a ‑dhë. ’Tɔ ‑dëü gbɛ ’ö mɛ gbɛ yaa‑ dɔ, ‑a ’ke yaa kë mɛ ’a‑ nu ‑a ‑dhë bhë ‑a ’ka ’ö dho kë ‑ya ‑sü ’ka ‑guö kpö bhë ‑a ‑ta yö ‑mü.»

’Sëëdhɛ ’ö dho Yesu ‑wun ‑dhɛ ’wun gia‑ ‑mɛ ‑nu ‑dho ’kuë‑ ‑sü ’ö Tiatii ‑a ’piö

¹⁸’Yö‑ pö ’zü: «‑Bhö ’sëëdhɛ bɔ ’dhiö ‑sü ‑Zlan ‑bha mɛ ‑nu ’ka ‑mɛ ’ö Yesu ‑wun ‑dhɛ ’wun gia‑ ‑mɛ ‑nu ‑dho ’kuë‑ ‑sü ’ö Tiatii bhë ‑a ’piö ꞊woë’ ꞊nɛɛ: ‑Zlan Gbö ’ö‑ ’yan ’dho ’bhü ‑na ꞊nɛ ’siö ’dhö, ’ö‑ ‑gɛn ‑nu ’dho ’bhü ‑na ꞊nɛ zën ’wo‑ bho ’wo‑ ‑kë ’drëëndrën ‑a ’dhö bhë ‑ya ‑pö: ¹⁹A ü këyuö ‑nu ‑dɔ; ü ‑bha ‑Zlan waa‑ mɛ ‑nu ‑an ‑dhɔ kë ‑sü ‑nu, ü ‑bha ‑zo yö ‑sü ‑nu, ü ‑bha ‑to ‑klu ‑sü ’ka ‑Zlan ‑bha ‑sü ‑nu, ü ‑bha ‑kë ꞊naazë ‑sü waa‑ ü ‑bha yuö ‑kaanta ꞊plëëzë ’ö ‑ziö ‑an ‑blɛɛzë ‑ta bhë a ‑an ’plɛ ‑dɔ. ²⁰’Kɛɛ pë ’ö n ‑zuë ü buëndhö ’ö tɔɔ: Dhebɔ ’wo‑ ‑dhɛ Zezabɛlö ’ö‑ pö ö ‑de ‑dhë ö ‑Zlan ‑wodhiölodhe ’ka bhë ‑a ’to ’ü‑ wo ka ziën bhë yaa kë n ‑dhë ‑së. ‑Yö ma yuökëmɛ ‑nu ‑daan ꞊sɔɔn kë ‑sü ’ka. ‑Ya ‑pö ‑an ‑dhë ’zü wü ’wo gbapë ‑nu gba ‑na ‑a ’ka bhë, ‑wa ‑bhö. ²¹A ’töng ‑nu ‑a ‑dhë kö ‑yaan ’kan ꞊sɔɔn yaa kë ‑sü ‑bha, ’ö yaa ’pa ö ‑deë kö ‑yaan ö ꞊kwaa’‑ ö ‑bha ꞊sɔɔn kë ‑sü ‑zü bhë. ²²꞊Dhɛ ’ö ’dhö, a ‑dho ‑a kë ’ö yö ’dhö waa‑ mɛ ‑nu ’wo ꞊sɔɔn bhë ’wo‑ ’gü ’wo dho sia‑ ’yua ’ka, ‑a ’ke waa wo bo wo wɔ ‑kɔ yaa ‑nu ’wo bhë ‑an ’ka. ²³A ‑dho ‑a ‑bha ’në ‑nu zë, ‑yö kë ’dhö kö Yesu ‑wun ‑dhɛ ’wun gia‑ ‑mɛ ‑nu ‑dho ’kuë‑ ‑sü ‑nu ’saadhö ‑wa dɔa ꞊nɛ a mɛ ’ö mɛ ‑nu ‑bha ‑zo ‑ta ‑a ’gü ‑wun waa‑ ‑an ꞊dhɔɔbhaapë ‑nu dɔ ‑a ’ka. ’Kɛɛ kë‑ wo ’dhö bhë ‑yö kë ka ’yaan ꞊nɛ mɛ ’ö ‑dhö ka ziën, ‑kɔ ’ö ’dhoë‑ pë ‑nu kaa bhë ꞊nɛ ’a dho ‑a ꞊saan’ bhoë.

²⁴‑Zlan ‑bha mɛ ‑nu, mɛ ’ka to Tiatii ꞊ya kë ka ‑bha ’ka, kaa ’to ‑an ‑bha mɛ ꞊daan’ ‑wo ’ö bhë ‑a ’piö, ’ö pë ’ö mɛ ‑nu ‑wa ‑dhɛ Satan ‑bha ‑gleng ‑wun ‑nu ’piö ꞊gbiinzë ’wo ‑bin ‑sü ’ka ’ö kaa‑ ꞊daan’‑ bhë, a‑ ‑pö ka ‑dhë, n ’ka ’dho ‑wo ‑zuöatadhe ’waa gbɛ kë gbɔ. ²⁵’Kɛɛ pë mɛ ‑nu ’ö ’wo ka ‑gɔ ka ‑bha ‑zo yö ‑sü ’gü bhë, ‑kaa ‑an ’kun ’gbee‑ ‑yö ’dho ‑yö yöë n nu ‑yi ‑bha. ^26-27Mɛ ’ö ’dhoë‑ to ‑a ’gbee‑ ’ka, ’go mü ’zü ’ö ’dhoë‑ ö ‑zo kë ma yuö kë ‑kɔ ‑nu ’wo ꞊nɛ ‑an ’piö, a ‑dho ‑wogbiindhɛ nu ‑a ‑dhë ’sɛgɔgümɛ ‑nu ‑ta. ‑Yö ‑dho ’dhiö sü ‑an ’ka ‑piö ’gblɔɔngblɔn do ’ka; ’go mü ’yö dho ‑an ꞊wüü’‑ ꞊nɛ ‑kɔ ’wo gbɔ ’sɛ kpö ꞊wüü’‑ ‑na ‑a ’ka bhë ‑a ’dhö ꞊nɛ ‑kɔ ’ö ‑kɔ ‑mɔ ’wuën‑ ‑sü ’ö go n Dë ’piö ’ö‑ ’ka n ‑gɔ bhë ‑a ’dhö. ²⁸A ‑dho ‑dhiadhiö ’susongga nu ‑a ‑dhë.

²⁹Kö mɛ ’ö‑ ’wun ma ‑to ’dhö ‑dhö, ’wun ’ö ‑Zuu ’slööslö ’dhoë‑ ꞊blɛɛ’ ‑na Yesu ‑wun ‑dhɛ ’wun gia‑ ‑mɛ ‑nu ‑dho ’kuë‑ ‑sü ‑dhë bhë ‑ya ma.»

’Sëëdhɛ ’ö dho Yesu ‑wun ‑dhɛ ’wun gia‑ ‑mɛ ‑nu ‑dho ’kuë‑ ‑sü ’ö Saadö ‑a ’piö

¹’Yö‑ pö n ‑dhë: «‑Bhö ’sëëdhɛ bɔ ’dhiö ‑sü ‑Zlan ‑bha mɛ ‑nu ’ka ‑mɛ ’ö Yesu ‑wun ‑dhɛ ’wun gia‑ ‑mɛ ‑nu ‑dho ’kuë‑ ‑sü ’ö Saadö bhë ‑a ‑dhë ꞊nɛɛ: Pë ’ö mɛ ’ö ‑Zlan ‑bha ‑Zuu ’slaplɛ waa‑ ’susongga ’slaplɛ ’dho ‑a ‑gɔ ’ö‑ ꞊blɛɛ ’yö ꞊nɛ: Pë ‑nu ’ü‑ kë ‑na ’saadhö bhë a‑ ‑dɔ. A‑ ꞊dɔa’ ꞊nɛ mɛ ‑nu ‑wo ü ga ꞊nɛ mɛ ’ö ’bhee‑ ‑a ’dhö, ’kɛɛ kö ü ga ‑sü ’ka. ²‑Bhö ‑büö, ’ü ‑dɔ gɛnngdhö ‑sü nu mɛ ‑nu ’wo ꞊tun ü ‑gɔ, ’ö ꞊wa kë ’tëëtë bhë ‑an ‑dhë kö ꞊kun ’wo dho ga. Bhii ’ma‑ yö ꞊nɛ ü bha yuö ‑nu ’ü‑ kë ‑na bhë ‑a gbɛ ’yaa ‑yö ’ko ’dhiö ‑sü ’ka n ma ‑Zlan wö ’dhiö. ³Ü ‑zo ‑yö ‑büö mɛ ꞊daan’ ‑wo ’ü‑ ma bhë ‑a ‑wun ’ka! ’Go mü ü ‑zo ‑yö ‑büö ’zü ‑an ma ‑kɔ ’ü ‑an maa bhë ‑a ’ka. ‑Bhö ’wun ma mɛ ꞊daan’ ‑wo bhë ‑a ‑ta, ’ü ’kan ü bha ꞊sɔɔn yaa ‑nu bhë ‑an ‑bha. ‑A ’ke ü ’ka ‑büö ’gbɛɛdhö, a ‑dho nu ü tii ’ka ꞊nɛ ꞊kwaanmɛ ‑yö nu. ⁴’Kɛɛ kë‑ wo ’dhö bhë, ü ‑bha mɛ ’bhaa ‑nu ’wo Saadö ‑dhɛ gia‑ ‑bha, waa wo ‑bha sɔ ‑nu kë ‑dhiizë. ‑Wo ‑dho kë n ’piö sɔ ’puu ‑kë wo ‑bha ‑sü ’ka. Bhii ’ö tɔɔ ‑yö ‑an ‑ma ‑kun kö ‑wo kë ’dhö. ⁵Mɛ ‑nu ’wo ’dhoë‑ to ‑a ’gbee‑ ’ka, ‑kɔ bhë ꞊nɛ ’wo dho sɔ ’puu bhë ‑a ꞊daa’ wo ‑bha ’pö, n ’ka ’dho ‑an ’tɔ bho ‑kë ‑a ’gü ‑sü ’sëëdhɛ ‑be ’gü; a ‑dho ‑a pö n Dë waa‑ ö ‑bha bɔmɛ ‑nu ’dhiö ꞊nɛ ‑wo n ‑ma ’ka.

⁶Kö mɛ ’ö‑ ’wun ma ’to ’dhö ‑dhö, pë ’ö ‑Zuu ’slööslö ’dhoë‑ ꞊blɛɛ’ ‑na Yesu ‑wun ‑dhɛ ’wun gia‑ ‑mɛ ‑nu ‑dho ’kuë‑ ‑sü ‑dhë ꞊nɛ ‑ya ma!»

’Sëëdhɛ ’ö dho Yesu ‑wun ‑dhɛ ’wun gia‑ ‑mɛ ‑nu ‑dho ’kuë‑ ‑sü ’ö Filadɛɛfi ‑a ’piö

⁷’Yö‑ pö n ‑dhë ’zü ꞊nɛɛ: «‑Bhö ’sëëdhɛ bɔ ’dhiö ‑sü ‑Zlan ‑bha mɛ ‑nu ’ka ‑mɛ ’ö Yesu ‑wun ‑dhɛ ’wun gia‑ ‑mɛ ‑nu ‑dho ’kuë‑ ‑sü ’ö Filadɛɛfi ‑a ‑dhë ꞊nɛɛ: Mɛ ’ö ’slööslö ’ö ’wun giagia ’ka, mɛ ’ö ‑gludë Davidö ‑bha ꞊lakele ’dhoë‑ ‑gɔ, ’ö ꞊ya ’kwɛɛ ta, ’ö‑ ’po ‑mɛ gbɛ ’yaa ’dhö, ’ö ꞊ya ’kwɛɛ ’po ’ö‑ ta ‑mɛ gbɛ ’yaa ’dhö bhë ‑ya ‑pö: ⁸Pë ‑nu ’ü‑ kë ‑na ’töüdhö bhë a‑ ‑dɔ. A‑ ꞊dɔa’ ꞊nɛ ꞊faan’ ’ö ü ‑gɔ bhë, ‑yö ’tee; ’kɛɛ kë‑ wo ’dhö bhë, ü ’wun ‑ma n ‑wo ‑ta, ’ü to ‑klu ‑sü ’ka n ‑ma; ’ma ’kwɛɛ do ’po ü ‑gɔ; mɛ gbɛ ’ka ’dho ‑mɔa ‑bha kö ‑ya ’dhi ta ü ‑gɔ. ⁹Dü ‑bha ‑kpakuëmɛ ‑nu, ꞊suamɛ ‑nu ’wo wo ‑de kë ‑na Zuifö ’ka, ’kɛɛ kö ’waa Zuifö ’ka bhë, pë ’a dho ‑a kë ‑an ’ka ’ö tɔɔ: A ‑dho ‑an ’gbee‑ ‑ta bho ’wo nu ’wo ‑lo wo kpɔn ’gü ü ’dhiö ü ꞊bhlë ‑ya ‑sü ’ka. Bhii kö ꞊waa‑ dɔ ꞊nɛ ü ‑dhɔ ‑yö n ‑kë. ¹⁰꞊Dhɛ ’ö ‑kë ꞊nɛ ü ü ‑zo ‑kë n ‑wo ‑nu ’a‑ nu bhë ‑an ’piö, ꞊zuö’ ‑kë ‑saa ‑sü ’ka bhë, kö ma ‑de ’pö, a ‑dho n ‑zo kë ü ’piö ’yena ’yö ’dhoë‑ nu ’kpongtaa kö ’kpongtaamɛ ‑nu ‑waan bɔ ’güdandhe ’gü bhë ‑a ’töng ’yö dho kaa bhë ‑a ’ka. ¹¹A nu ‑na; pë ‑nu ’wo ü ‑gɔ bhë, ‑bhö ü ‑zo kë ‑an ’piö ‑yö kë ’dhö kö ꞊kun mɛ ’kpaan gbɛ dho ‑to ‑a ’gbee‑ ’ka ’gɔ ꞊gblaa’ ’ö ‑ya ü ‑bha ’ka bhë ‑a kun ü ‑gɔ! ¹²Mɛ ’ö ’dhoë‑ to ‑a ’gbee‑ ’ka, a ‑dhoë kë n ‑ma ‑Zlan ‑bha ’kɔ ‑gban ’lü ’ö yaa ’dho yö plaan gbɔ ‑a ’ka; a ‑dho n ‑ma ‑Zlan ’tɔ waa‑ n ‑ma ‑Zlan ‑bha pödhɛ ’tɔ ‑ya ‑a ‑bha. Pödhɛ bhë ’ö tɔɔ Zeluzalɛmë ‑dhɛ ‑dëü ’yö dho go dhang‑ ’gü, n ‑ma ‑Zlan ’piö. ’Tɔ ‑dëü ’ö n ‑ma zlöö ꞊nɛ a ‑dho ‑a ‑ya ‑a ‑bha ’pö.

¹³Kö mɛ ’ö‑ ’wun ma ‑to ’dhö ‑dhö, ’wun ’ö ‑Zuu ’slööslö ’dhoë‑ ꞊blɛɛ’ ‑na Yesu ‑wun ‑dhɛ ’wun gia‑ ‑mɛ ‑nu ‑dho ’kuë‑ ‑sü ‑dhë ꞊nɛ ‑ya ma!»

’Sëëdhɛ ’ö dho Yesu ‑wun ‑dhɛ ’wun gia‑ ‑mɛ ‑nu ‑dho ’kuë‑ ‑sü ’ö Laodise ‑a ’piö

¹⁴’Yö‑ pö: «‑Bhö ’sëëdhɛ bɔ ’dhiö ‑sü ‑Zlan ‑bha mɛ ‑nu ’ka ‑mɛ ’ö Yesu ‑wun ‑dhɛ ’wun gia‑ ‑mɛ ‑nu ‑dho ’kuë‑ ‑sü ’ö Laodise ‑a ‑dhë ꞊nɛɛ: Mɛ ’wo‑ ‑dhɛ Amɛn, ’yö ꞊goo‑ ‑to ‑wo ’gü ‑sü ‑zë ’ka, ’yö ’wungiamɛ ’ka, yö ’ö pë ’ö ‑Zlan ‑ya ‑da ’töüdhö ’yö‑ ‑bɔa ‑ta ’ka, ‑ya ‑pö: ¹⁵Pë ‑nu ’ü‑ ‑kë ’töüdhö bhë a‑ ‑dɔ. A‑ ꞊dɔa’ ꞊nɛ ’bhaa ‑saa ’iin ’bhaa ’siözë. ‑Yö ‑dho kë n ‑dhë ‑së ‑be kö pë ꞊plɛ ’wo bhë ’ü‑ do ’sü ’ü kaa ’gbönggböng. ¹⁶’Kɛɛ ’ö ‑kë ꞊nɛ ü ’zɔzɔ, ’ö ’bhaa ‑saa ’iin ’bhaa ’siö‑ bhë kö a ‑dho ‑pe ü ’ka ꞊nɛ ‑kɔ ’ö ’yi ’zɔzɔ ’dhö ‑pë ‑da ‑na ‑a ’ka mɛ ’ka bhë ‑a ’dhö. ¹⁷’Ö tɔɔ ü‑ ‑pö ü ꞊bhɔɔzë, ’go mü ü ‑bha ’wun ‑nu ‑wo ’dho ‑na ’dhiö, ’iin pë gbɛ ‑wun ’yaa ü kë. ’Kɛɛ ü ’yenazë, ’ö ’bhaa‑ ꞊tɛi’ dɔ. Ü ’fɛɛzë, ’ü ü ’kpaan ’ka ’ö ü ’yënng ’dho tii. ¹⁸꞊Dhɛ ‑kë ’dhö, ’a ü ꞊kpaɔ ‑na kö ’ü ’sënng ’ö ꞊ya kë ’slööslö ’siö ’ka bhë ’ü‑ ’dhɔ n ‑gɔ kö ’üën‑ kë ꞊bhɔɔzë giagiawo. ‑Bhö sɔ ’puu ‑nu ’dhɔ ’pö ’ü‑ kë ü ‑bha kö ‑yaan ü ‑bha ‑to ’kpaan ‑sü lë‑ ‑nu ‑ta ‑bin. ’Ü ‑yö ’yënng pë ’yi ’dhɔ ’ü‑ yö ü ’yënng kö ’üën‑ ‑dhɛ yö. ¹⁹Mɛ ‑nu ’ö ‑an ‑dhɔ ‑yö n ‑kë bhë a ‑an ‑kun ’gbee‑ ’a ‑an ꞊dɔɔ. ‑Bhö pë ‑nu kë, ‑kë ꞊naazë ‑sü ’ka, ’ü ’kan ü ‑bha ꞊sɔɔn yaa ‑nu ‑bha! ²⁰‑Bhö ‑dhɛ ‑ga, a dɔ ‑sü ’ka ’kɔdhi ‑bha, ’a ’kwɛɛ ‑ta ‑ma ‑na; ꞊ya kë ꞊nɛ mɛ ꞊ya n ‑wo ma ꞊ya ’kwɛɛ ’po n ‑gɔ, a ‑dho ‑da ‑a ‑gɔ kɔɔ, ’a pë ‑bhö ‑a ’piö, ’ö yö ‑de ’pö ’ö pë ‑bhö n ’piö. ²¹Mɛ ‑nu ’wo ’dhoë‑ to ‑a ’gbee‑ ’ka, a ‑dho we ‑a ‑bha ‑an ‑gɔ ’ö ’wo ‑ya n ’sian ’piö n ‑ma ’gɔ ‑gbloo ’gü ꞊nɛ ‑kɔ ma ‑de ’pö ’a toë ’gbee‑ ’ka, ’ö ’a ‑ya ‑sü ’ka ‑a ’ka n Dë ’sian ’piö, ‑a ‑bha ’gɔ ‑gbloo ’gü bhë ‑a ’dhö.

²²Kö mɛ ’ö‑ ’wun ma ‑to ’dhö ‑dhö, pë ö ‑Zuu ’slööslö ’dhoë‑ ꞊blɛɛ’ ‑na Yesu ‑wun ‑dhɛ ’wun gia‑ ‑mɛ ‑nu ‑dho ’kuë‑ ‑sü ‑dhë ꞊nɛ, ‑ya ma!»

Mɛ ’ö ‑ya ‑sü ’ka ’gɔ ‑gbloo ’gü bhë ‑a gba ‑kɔ ’ö dhang‑ ’gü

¹꞊Dhɛ ’ö ꞊ya ’go mü a ’yanpiöpë do ’bhaa ‑yö. ’A ’kwɛɛ do yö, kö ‑yö ’po ‑sü ’ka dhang‑ ’gü; ’ö ‑wo do ’a‑ ma ’dhiö ’ö‑ ‑drinng ‑yö ‑kë ꞊nɛ ’truu ‑wo ’dhö bhë, ’a‑ ma ’zü ’ö‑ pö n ‑dhë: «‑Bhö ‑da ’ü nu zö kö pë ‑nu ’wo dho kë ’dhiö ꞊zian’ ’aan‑ ‑zɔn ü ‑dhë!» ²’Ö to mü ’ö ‑Zuu ’slööslö ‑yö pa n ’ka. ’Ö ꞊dhɛ ’a‑ ‑ga kö ’gɔ ‑gbloo do ‑yö dɔ ‑sü ’ka dhang‑ ’gü mü. Mɛ do ‑yö ‑kë ‑ya ‑sü ’ka ’gɔ ‑gbloo bhë ‑a ’gü; ³’ö‑ wöödhɛ ’bhü ‑yö ‑kë ꞊nɛ ‑guö ‑wungbeezë ꞊suu’‑ ’wo‑ ‑dhɛ ’zasüpë ’ö‑ bun ’yan dho ‑gblɛibizë ’iin ‑guö ‑wungbeezë ꞊suu’‑ do ’wo‑ ‑dhɛ ’saaduanö ’ö‑ bun dho nuɛazë ‑an ’dhö. Dha ‑bhüö ’ö‑ ’yan ’dho ’bhü ‑sü ’ka ꞊nɛ ‑guö ‑wungbeezë ꞊suu’‑ gbɛ ’wo‑ ‑dhɛ emelodö ’ö‑ bun ‑yö ‑kë ‑gblɛibizë bhë ‑a ’dhö, ‑yö ‑nië ‑a ‑bha ’gɔ ‑gbloo ‑zü. ⁴’Piö ‑bhɔ ꞊taa’ ‑sü ‑zë ’ka ‑a ‑zü ’to, ’gɔ ‑gbloo ’gɔɔ‑ ꞊plɛ ö ga ‑yiisië ’bhaa gbɛ ‑wo ‑kë mü. ’Ö mɛ ziizii ’gɔɔ‑ ꞊plɛ ö ga ‑yiisië ’ö sɔ ’puu ’dhö ‑an ‑bha, ’go mü ’ö ’sënng ꞊gblaa’ ’dho ‑ya ‑sü ’ka ‑an ‑gɔ ‑bha ‑wo ‑kë ‑ya ‑sü ’ka ‑an ’gü. ⁵’Ö pë ‑nu ’wo ‑kë ꞊nɛ dha ‑bha ’yan bɔ ‑sü ’dhö ‑wo bɔ ’gɔ ‑gbloo ꞊vaazë ’gü ’ma ꞊zian’ ’wo ‑ziö ‑blaandhö, ’ö pë ‑nu ’wo ‑kë ꞊nɛ dha ‑bha ’we ‑sü ’dhö ’wo bɔ ‑dhɛ do bhë ‑a ’gü ꞊zian’ ’wo ‑we. ’Ö ‑zuö ‑nu ‑wo bɔ ’ma ꞊zian’ ’pö ’wo ‑we. ’Gbia ‑be ’slaplɛ ‑wo ‑kë ’kun ꞊dhia ’gɔ ‑gbloo bhë ‑a ’dhiö mü. ’Gbia ‑be ’slaplɛ ’wo bhë ’wo tɔɔ ‑Zlan ‑bha ‑Zuu ’slaplɛ. ⁶’Gɔ ‑gbloo ’dhiö mü, pë ’ö ‑kë ꞊nɛ pë ’wo‑ ’vɛdhɛ kë ‑na ‑a ’ka ‑a ’dhö bhë, ‑a ’yipuë ‑yö ‑kë mü, bhii mɛ ’yan‑ ‑bɔ ‑a ’gü ꞊nɛ ’yi ’slööslö ’dhö.

’Gɔ ‑gbloo ziën waa‑ ‑a ’sian ’piö ‑dhɛ ‑nu ‑bha, pë ’bhee‑ ‑yiisië ’ö ‑an ’yan ‑nu ’dho ‑mɔ ‑sü ’ka ‑an buën‑ ‑an ’dhiö ꞊zian’ waa‑ ‑an ꞊zlöö ꞊zian’ ‑wo ‑kë mü. ⁷Pë ’bhee‑ ‑nu ’wo bhë ‑a ‑blɛɛzë ‑yö ‑bhɔ ꞊laa’ ‑bha; ‑a ꞊plɛ ‑naa ‑yö bhɔ ‑du ’në ‑bha; a‑ kë ‑yaaga ‑naa wöödhɛ ‑yö bhɔ mɛ ’bhee‑ ‑lü wöödhɛ ‑bha, ’ö‑ kë ‑yiisië ‑yö bhɔ ’gblübhaa ’ö ‑lö ꞊dhia ‑a ‑bha. ⁸Pë ’bhee‑ ‑nu ‑yiisië ’wo bhë, ‑a mɛ ’ö ‑dhö ‑a gban ‑yö ’slado; ’ö ‑an ’yan ‑nu ’dhö ‑lo ‑sü ’ka ‑an gban ‑ta dhuö ‑dhɛ ‑nu waa‑ ‑an gban ꞊löö ‑dhɛ ‑nu ‑bha. ’Ö ’waa wo bo ‑a pö ‑sü ’ka ‑dhɛ ’po ‑sü waa‑ ’bin ’më ‑sü ‑an ’gü ꞊nɛɛ: «’Slööslö, ’slööslö, ’slööslö ’yö tɔɔ Dëmɛ ‑Zlan ’piigbeezë ’yö ‑kë ‑dhö, ’yö ‑dhö, ’yö nu ‑na.» ⁹’Ö ꞊ya kë pë ’bhee‑ ‑nu ‑yiisië ’wo bhë ‑wo ’tan ‑nu bho ‑na kö mɛ ’ö ‑ya ‑sü ’ka ’gɔ ‑gbloo ’gü, ’yö ‑dhö ꞊toëpö ’ka bhë ‑waan ’tɔ kë ꞊va, ‑waan ‑a ꞊bhlë ‑ya, ’go mü ‑waan zuö pö, ¹⁰’Ö mɛ ziizii ’gɔɔ‑ ꞊plɛ ö ga ‑yiisië ’wo bhë ’wo ‑lo wo kpɔn ’gü, mɛ ’ö ‑ya ‑sü ’ka ’gɔ ‑gbloo ’gü ’ö ‑dhö ꞊toëpö ’ka bhë ‑a wö ’dhiö ’ö ’wo‑ gba. ’Wo dho wo ‑bha ’gɔ ꞊gblaa’ ’ka ’wo‑ ‑lo ’gɔ ‑gbloo ’dhiö ‑a pö ‑sü ’ka ꞊nɛɛ: ¹¹«Yi Dëmɛ, yi ‑bha ‑Zlan, ‑yö ü ‑ma ‑kun kö ’tɔbhɔdhe, ꞊bhlëyadhe waa‑ ’piigbeedhɛ ‑wo kë ü ‑bha ’ka; bhii bhi ꞊nɛ ’ü pë ’plɛ ‑da, ’ö ‑dhi ü ‑dhë ’ü ‑këdhösü nu ‑an ‑dhë.»

’Sëëdhɛ ‑be ’dhipomɛ

¹A ’sëëdhɛ ‑be ’ö ‑kë ꞊nɛ pë ‑dho ’kou ‑sü ‑zë ’dhö ‑a ‑yö mɛ ’ö ‑kë ‑ya ‑sü ’ka ’gɔ ‑gbloo ’gü bhë ‑a ꞊kwɛɛ‑ ’gü ‑kɔ ’gü mü. Pë ‑yö ‑kë ‑ya ‑sü ’ka ‑a ’gü ‑dhɛ waa‑ ‑a ’pian ꞊zian’ ‑dhɛ ‑bha, ’yö ’sëëdhɛ ‑be ’dhi ta ‑sü ‑zë ’ö ꞊duakëpë ’slaplɛ ’dhö ‑a ‑ta (’ö mɛ do dho ‑a ’dhi po) ‑a ’ka. ²’A ‑Zlan ‑bha bɔmɛ do ’piigbeezë ’yö ’wun ꞊blɛɛ’ ‑na ’gbee‑ ’ka ‑a yö kö ‑ya pö ‑na: «Dö ’yö‑ ‑ma kun kö ‑yö ꞊duakëpë ‑nu ’wo ꞊nɛ ‑an ꞊wüü’‑ kö ‑yaan ’sëëdhɛ ‑be ’ö ꞊nɛ ‑a ’dhi ’po e?» ³’Kɛɛ ‑a ‑mɛ gbɛ ’yaa ‑dhö, dhang‑ ’gü, ’kpongtaadhɛ, ’iin ’sɛ ꞊löö kö ‑yaan ’sëëdhɛ ‑be bhë ‑a ’dhi ’po ‑yaan ꞊kpɔɔ’‑ ‑a ’gü. ⁴A ’gbo ‑bɔ ꞊va ’ka ’ö tɔɔ mɛ gbɛ yaa kë ‑dhö kö ‑yaan ’sëëdhɛ ‑be bhë ‑a ’dhi ’po ‑yaan ‑dhɛ ‑ga ‑a ’gü. ⁵꞊Dhɛ ꞊ya kë ’dhö, ’ö mɛ ziizii ‑nu ’wo bhë ’ö‑ mɛ do ‑ya pö n ‑dhë: «Kö ꞊kun ’ü ’gbo bɔ! ‑Bhö ‑dhɛ ‑ga: ꞊Laa’ ’ö Zuda ‑gɔ ’gunng ’gü, ’ö ‑gludë Davidö ꞊suutamɛ ’ka, yö ꞊nɛ ’ö ’to ‑a ’gbee‑ ’ka. Yö ꞊nɛ ’ö ‑mɔa kö ‑yö ꞊duakëpë ’slaplɛ bhë ‑an ꞊wüü’‑ kö ‑yaan ’sëëdhɛ ‑be ’ö ꞊nɛ ‑a ’dhi ’po.»

⁶꞊Dhɛ ’ö go mü, ’a ’bhlanë ‑gbɔng do yö kö ‑yö ‑dɔ ‑gɛn ‑ta ‑sü ’ka ’gɔ ‑gbloo ’dhiö pë ’bhee‑ ‑nu ‑yiisië waa‑ mɛ ziizii ‑nu ’wo bhë ‑an ziën. ’Bhlanë bhë ‑yö ‑bhɔ pë ’wo‑ zë ‑a ‑bha. ‑A ‑sö ‑nu ‑wo ’slaplɛ, ’ö‑ ’yan ‑nu ’dhö ’slaplɛ; wo ꞊nɛ ’wo tɔɔ ‑Zlan ‑bha ‑Zuu (’slööslö) ’slaplɛ ’ö ‑an bɔ ’sɛ ‑dhɛ ’saadhö ‑a ’gü sia‑ bhë. ⁷’Yö ’bhlanë bhë ’yö ‑yɔɔn ’sëëdhɛ ‑be bhë ‑a ‑bha, ’yö‑ sü mɛ ’yö ‑ya ‑sü ’ka ’gɔ ‑gbloo ’gü bhë ‑a ꞊kwɛɛ‑ ’gü ‑kɔ ’gü. ⁸꞊Dhɛ ’ö ‑ya ’sëëdhɛ ‑be ’ö bhë ‑a ’sü, ’ö pë ’bhee‑ ‑nu ‑yiisië waa‑ mɛ ziizii ‑nu ’gɔɔ‑ ꞊plɛ ö ga ‑yiisië ’wo bhë ’ö ‑an ’plɛ ‑wo ‑lo wo kpɔn ’gü ’bhlanë bhë ‑a ’dhiö. Mɛ ’ö ‑dhö kɔng do, waa‑ ’sënng ‑kɔɔ ‑nu ’ö pë ’tëë ‑sëëzë ’ö ‑ya kë ’wo‑ ‑güö ’ö‑ pa ‑wo kë ‑an ‑gɔ. Pë ’tëë ‑sëëzë ’ö bhë ’ö tɔɔ ꞊bhɛa’ ‑wo ’ö ‑Zlan ‑bha mɛ ‑nu ‑dho ’kuë‑ ‑sü ‑wa wo. ⁹’Wo ’tan ‑dëü bho ꞊woë’ ꞊nɛ: «‑Yö ü ‑ma ‑kun kö ’üën‑ ’sëëdhɛ ‑be ’ö ꞊nɛ ‑a ’sü, ’üën‑ ꞊duakëpë ‑nu ’wo bhë ‑an ’wü. Bhii ‑wo ü ‑zë, ’ö ’ü bɔ ‑a ‑ta ’ü mɛ ‑nu ’wo go ’gunng ’saadhö, ‑wo ꞊suu’‑ ’saadhö, ’sɛ ’saadhö waa‑ ö ’gü ‑mɛ ‑nu ‑an ‑gɔ ‑ta dhɔ kö ‑waan kë ‑Zlan ‑bha ’ka. ¹⁰’Bha ‑an kë ’sɛgɔ do ’gü ‑mɛ ‑nu ’wo slabhomɛ ’ka ‑an ’ka ‑waan yuö kë kwa ‑bha ‑Zlan ‑dhë; ‑wo ‑dho ‑gludëdhɛ kë ’kpongtaa.»

¹¹’A ko ’zü ’a ‑dhɛ ‑ga; ’a ‑Zlan ‑bha bɔmɛ ‑nu ’ö ’wo ‑kë ꞊nɛ mɛ ‑vuu ꞊plëëzë ‑gwaa ‑vuu ꞊plëëzë ’dhö ‑an yö kö ‑wo mü. A ‑an ‑yö kö ‑wo ꞊nië’ ‑sü ’ka ’gɔ ‑gbloo, pë ’bhee‑ ‑nu waa‑ mɛ ziizii ‑nu ’wo bhë ‑an ‑zü ’to. ¹²‑Wo ‑kë ’tan ‑nu bho ꞊dhia ’wo‑ pö ‑wo ’gbee‑ ’ka ꞊nɛɛ: «’Bhlanë ’wo‑ zë bhë ‑ya ‑ma ‑kun kö ‑yaan ’piigbeedhɛ ’dhö, ꞊bhɔɔpë ‑nu, ‑kë ’kpaakpasü ‑nu waa‑ ’gügbeedhɛ ‑nu, ꞊bhlëyasü ‑nu, ’tɔbhɔdhe ‑nu waa‑ ’tɔblüsü ‑nu ‑waan kë ‑a ‑bha ’ka.»

¹³’Go mü ’zü a pë ‑nu ’ö ‑Zlan ‑yö ‑an ‑da, ’wo dhang‑ ’gü, ’wo ’kpongtaa, ’wo ’sɛ ꞊löö, ’wo ’yoo ꞊bhaa, pë ‑nu ’saadhö ’ö ‑Zlan ‑yö ‑an ‑da ’wo ‑dhɛ ’saadhö ‑a ’gü, ‑an ‑wo ‑ma kö ‑wo ’tan bho ‑na ꞊woë’ ꞊nɛɛ: «Mɛ ’ö ‑ya ‑sü ’ka ’gɔ ‑gbloo ’gü waa‑ ’bhlanë, ’tɔsaablüdhe, ꞊bhlëyadhe, ’tɔbhɔdhe waa‑ ’piigbeedhɛ ‑wo kë ‑an ‑bha ’ka ꞊toëpö ’ka.»

¹⁴’Ö pë ’bhee‑ ‑yiisië ’wo bhë ’wo‑ pö: «Amɛn.» ’Ö mɛ ziizii ‑nu ’wo bhë ’wo ‑lo wo kpɔn ’gü, (’yö ’bhlanë waa‑ mɛ ’ö ‑kë ‑ya ‑sü ’ka ’gɔ ‑gbloo ’gü bhë,) ’wo ‑an gba.

꞊Duakëpë ‑nu

¹’Go mü ’zü ’a ’bhlanë bhë ’a‑ yö kö ꞊duakëpë ’slaplɛ bhë ꞊yaa‑ do ’wü; ’ö pë ’bhee‑ ‑nu ‑yiisië ’wo bhë ’a‑ do ‑wo ma kö ‑ya pö ‑na ‑wo ’gbee‑ ’ka ꞊nɛ dha ‑bha ’gbla ‑wo ’dhö ꞊nɛɛ: «‑Bhö nu!» ²꞊Dhɛ ’a‑ ‑ga bhë ’a ꞊soo ’puu do yö. Mɛ ’ö ‑kë ‑a ꞊taa bhë ’sɔɔn do ‑yö ‑kë ‑a ‑gɔ; ’ö ’wo ’gɔ ꞊gblaa’ do nu ‑a ‑dhë. Yö ’ö ‑to ‑a ’gbee‑ ’ka ‑mɛ ’ka bhë, ’yö dho ‑yaan ’to ‑a ’gbee‑ ’ka ’zü.

³’Ö ’bhlanë ‑yö ꞊duakëpë kë ꞊plɛ ‑naa wü; ’a pë ’bhee‑ ‑nu ’wo bhë ‑a kë ꞊plɛ ‑naa ‑wo ma kö ‑ya pö ‑na: «‑Bhö nu!» ⁴꞊Dhɛ ꞊ya kë ’pö ’ö ꞊soo do ’ö‑ bun ’dhö nuɛazë bhë ’yö ‑wo, ’ö mɛ ’ö ‑kë ‑a ꞊taa bhë, ’ö ‑kɔ ‑mɔ ’wuën‑ ‑sü ‑yö nu ‑a ‑dhë kö ‑yaan ‑glu ‑da ’kpongtaa, ‑yö kë ’dhö mɛ ‑nu ‑waan wo ’ko ‑nu zë. ’Wo ‑dhaa do ꞊va nu ‑a ‑dhë.

⁵’Ö ’bhlanë ‑yö ꞊duakëpë kë ‑yaaga ‑naa wü; ’ö ’a pë ’bhee‑ ‑nu bhë ‑a kë ‑yaaga ‑naa ‑wo ma kö ‑ya pö ‑na: «‑Bhö nu!» ’Ö ꞊dhɛ ’a‑ ‑ga, ’a ꞊soo tii do yö. Mɛ ’ö ‑kë ‑a ꞊taa bhë ’kilong kpö do ‑yö ‑kë ‑a kwɛɛ. ⁶’Ö ’a ’we ‑wo do ’yö go pë ’bhee‑ ‑nu ‑yiisië ’wo bhë ‑an ziën ‑a ma ꞊nɛɛ: «꞊Bluu’‑ waa‑ ’klën ‑an ‑bi ‑wun ‑dho kë ’gbee‑. ꞊Bluu’‑ ‑bi ’kilong do ꞊sɔnng’ ‑yö ‑dho kë ‑gɛn dɔ do ꞊saan’ ’ka; kö ’klën ‑bi ’kilong ‑yaaga ꞊sɔnng’ ‑yö kë ‑gɛn dɔ do ꞊saan’ ’ka ’pö. ’Kɛɛ kö ꞊kun ’ka pa ’yɔn waa‑ ‑drɔɔn ‑an ’ka!»

⁷꞊Dhɛ ’ö ’bhlanë ‑yö ꞊duakëpë ‑yiisië ‑naa wü, ’ö pë ’bhee‑ ‑nu bhë ‑a ‑yiisië ‑naa ‑de ’pö ’a‑ ‑wo ma ꞊nɛɛ: «‑Bhö nu!» ⁸꞊Dhɛ ’a‑ ‑ga bhë ’a ꞊soo bun ’yuënyuënzë do yö. Mɛ ’ö ‑kë ‑a ꞊taa bhë ‑a ’tɔ tɔɔ ga, ’ö ꞊glööbɔɔ ‑yö ziö ‑a ’piö. ’Wo ’kpongtaamɛ ‑nu ’gbu ‑bha ’gbu nu ‑a ‑dhë kö ‑yaan pë yaa kë ‑an ’ka ‑dhaa, din ‑nu, ’yua ‑nu waa‑ wü ’dhiözë ’gügbeezë ‑nu ‑an ꞊kwaa’.

⁹’Ö ’bhlanë ‑yö ꞊duakëpë ’sɔɔdhu ‑naa wü. ’Ö mɛ ‑nu ’wo ‑an zë wo ‑bha ‑Zlan ‑wo ‑dhɛ ’wun gia‑ ‑sü waa‑ ‑a ‑wo ꞊blɛɛ’ ‑sü ‑wun ’gü bhë, ’a ‑an nii yö ‑Zlan ‑bha sla‑ ‑bho ‑a ‑ta ‑pë ꞊löö. ¹⁰‑Wo ‑kë ’gbla ‑sü ’gü ꞊woë’ ꞊nɛɛ: «Yi Dëmɛ, bhi ’ü ’slööslö, ’ü ‑dhö ’wun giagia ’ka, ü ‑dho ’kpongtaamɛ ‑nu ‑bha za kan, ’go mü kö ’üën‑ mɛ ‑nu ’wo ’wun ‑wɔ yi ‑ta, ’yi to ‑a ꞊kwaa’ ꞊nɛ ‑an ’klo‑ bhɔ ‑më yië ꞊ɛ?» ¹¹’Ö mɛ ’ö ‑dhö ’wo gblang ’puu do nu ‑a ‑dhë, ’go mü ’wo‑ pö ‑an ‑dhë ‑wo wo ꞊fuë ꞊kun ’töng ’ö bhë ‑a ’ka, ‑yö ’dho ‑yö yöë ‑an dhegluzë ‑nu waa‑ ‑an ’bhamɛ ‑nu ’wo yuö do bhë ‑a ’gü ’wo dho ‑an zë ꞊nɛ ‑kɔ ’wo ‑an zaa ‑a ’dhö bhë ‑an ‑dho ’kuë‑ ‑sü ’dhiö ‑mɔ ’kuë ꞊yië’.

¹²꞊Dhɛ ’a‑ ‑ga kö ’bhlanë ‑yö ꞊duakëpë kë ’slado ‑naa ’wü ‑na. ’Ö ’sɛzluundhe ’gbee‑ ‑yö ‑kë, ’ö lan‑ ‑yö ‑kë tii ꞊nɛ sɔ tii ga ꞊vaazë do ’dhö. ’Ö ’su ‑de ’pö ’yö ‑kë nuɛazë ꞊nɛ fɛi ’dhö. ¹³’Ö ’susongga ‑nu ‑wo go dhang‑ ‑bha ’wo ‑püö ’sɛ ‑ta ꞊nɛ ‑kɔ ’ö figö bhɛ ’ö ꞊tun ‑kpo ’ö ’tëë ’gbee‑ ꞊ya ‑ma ‑a ‑bha ’yö ꞊zaan ’zan ‑na ’ö ‑püö ‑na ‑a ’ka bhë ‑a ’dhö. ¹⁴’Ö dhang‑ ‑yö ꞊yɔɔn ö ꞊bhaa ꞊nɛ ‑kɔ ’wo ’sëëdhɛ ‑be kë ‑na ‑a ’ka (꞊nɛ ‑kɔ ’wo ꞊sɛɛ’ ‑be kë ‑na ‑a ’ka bhë) ‑a ’dhö. ’Ö ‑tɔn ‑nu ’saadhö waa‑ ’sɛ ‑tɔn ‑nu ’wo ’yi ziën ‑an ’plɛ ‑wo go wo pin ꞊taa. ¹⁵‑Gludë ‑nu ’wo ’kpongtaa ‑nu, ’dhiö ‑sü mɛ ’ka ‑mɛ ‑nu, ’dhasi ꞊kɔɔnmɛ ‑nu, ꞊bhɔɔmɛ ‑nu, ’piigbeedhɛ ‑nu, mɛ ‑nu ’wo to ‑nu, mɛ ‑nu ’wo ’gan ’gü ’iin ’waa ’gan ’gü ‑nu, ‑wo ‑dho ‑bin ꞊duudhɛ ‑nu waa‑ ‑guö ‑tɔn ’gü ‑dhɛ ‑nu ‑an ‑bha. ¹⁶’Ö ’wo‑ pö ‑guö kpö ‑nu ’iin ‑tɔn ‑nu ‑dhë: «‑Ka ‑lo yi ‑ta mɛ ’ö ‑ya ‑sü ’ka ’gɔ ‑gbloo ’gü bhë waa‑ ’bhlanë ‑an ‑bha ‑naazuëdhe ‑gɔ. ¹⁷Bhii ‑an ‑bha ’wun ‑naa ‑an ‑zuë ‑yi ’ö yi ꞊va ’ka bhë ꞊ya ‑lo; dö ’yö dho dha ‑an ‑gɔ ‑ɛ?»

Izlaɛlö ’sɛgɔ ‑gbaan 144.000

¹꞊Dhɛ ꞊ya kë ’dhö, a ‑Zlan ‑bha bɔmɛ ‑nu ‑yiisië ‑yö ’sɛ ’pian ‑yiisië ‑bha. ’Yö ’tëë ‑nu ‑yiisië ’wo ‑piö ‑na ’kpongtaa bhë, ’wo ‑an kun ‑yö kë ’dhö kö ꞊kun ’ö ’tëë dho ‑ma ’sɛ ‑ta ‑dhɛ, ’yoo ꞊bhaa ‑dhɛ, ’lü tuö ‑dhɛ ‑nu ’iin ‑dhɛ ’saadhö ‑a gbɛ ’gü. ²’A ‑Zlan ‑bha bɔmɛ do yö kö ‑yö ‑da ‑na dhang‑ ’gü lan‑ ’go ꞊zian’ kö ‑Zlan ’bhee‑ ‑bha ꞊duakëpë ‑ya ‑gɔ. ’Ö ‑gbla ‑wo ’gbee‑ ’ka ‑Zlan ‑bha bɔmɛ ‑nu ‑yiisië ’ö ‑kɔ ‑mɔ ’wuën‑ ‑sü ’dhö ‑an ‑gɔ bhë ‑an ‑dhë kö ‑waan ’wun yaa kë ’sɛ waa‑ ’yoo ‑an ’ka bhë ‑an ‑dhë ꞊nɛ: ³«Kö ꞊kun ’ka ’wun yaa ‑kë ’sɛ ’dhö, ’yoo ’dhö ’iin ’lü ‑nu ‑an gbɛ ’ka, ‑yö ’dho ‑yö yöë yi ‑bha kwa ‑bha ‑Zlan ‑bha yuökëmɛ ‑nu ‑bha ꞊dua’ kë ‑sü ‑bha!» ⁴’Ö ’wo mɛ ‑nu ’ö ‑Zlan ‑bha ꞊duakëpë ’dho ‑ya ‑sü ’ka ‑an ‑kpong ’gü bhë ’wo ‑an ‑dho ’kuë‑ ‑sü ’tɔ pö n ‑dhë: ‑An ‑dho ’kuë‑ ‑sü ‑yö ‑kë ‑vuu ꞊këng’ do waa‑ mɛ ‑lü ‑vuu ’gɔɔ‑ ‑yiisië ö ga ‑yiisië (144.000) ’wo go Izlaɛlö ’gunng ’saadhö ‑a ’gü. ⁵Mɛ ‑lü ‑vuu ’gɔɔ‑ do ö ga ꞊plɛ ’wo go Zuda ‑gɔ ’gunng ’gü ’ö ꞊duakëpë ‑yö ‑ya ‑an ‑bha; Lubɛn ‑bha ‑vuu ’gɔɔ‑ do ö ga ꞊plɛ, Gadö ‑bha ‑vuu ’gɔɔ‑ do ö ga ꞊plɛ, ⁶Asɛɛ ‑bha ‑vuu ’gɔɔ‑ do ö ga ꞊plɛ, Nefötali ‑bha ‑vuu ’gɔɔ‑ do ö ga ꞊plɛ, Manase ‑bha ‑vuu ’gɔɔ‑ do ö ga ꞊plɛ, ⁷Simeɔn ‑bha ‑vuu ’gɔɔ‑ do ö ga ꞊plɛ, Levi ‑bha ‑vuu ’gɔɔ‑ do ö ga ꞊plɛ, Isakaa ‑bha ‑vuu ’gɔɔ‑ do ö ga ꞊plɛ, ⁸Zabilɔn ‑bha ‑vuu ’gɔɔ‑ do ö ga ꞊plɛ, Zozɛfu ‑bha ‑vuu ’gɔɔ‑ do ö ga ꞊plɛ, ’ö Bɛnzamɛ ‑bha ‑yö kë ‑vuu ’gɔɔ‑ do ö ga ꞊plɛ.

Mɛ gbung ꞊va

⁹꞊Dhɛ ’ö ꞊ya kë ’dhö, a ‑dhɛ ‑ga ’zü ’a mɛ gbung ꞊va yö: ’Ö mɛ gbɛ yaa kë ‑dhö kö mɛ ‑nu ’wo ‑kë wo ’ko ꞊bhaa mü ‑yaan ‑an ꞊dhong’‑. ‑Wo ‑kë mɛ ‑nu ’wo go ’sɛ ’saadhö, ’gunng ’saadhö, ’sɛgümɛ ‑nu ’saadhö waa‑ wo ꞊suu’‑ ‑ta ’saadhö ‑a pö ‑mɛ ‑nu ’ka. ‑Wo ‑kë dɔ ‑sü ’ka ’gɔ ‑gbloo waa‑ ’bhlanë ‑an ’dhiö; gblang ’puu ‑yö ‑kë ‑an ‑bha, ’ö ꞊glaa‑ ‑paa ‑nu ‑wo ‑kë ‑an kwɛɛ. ¹⁰‑Wo ‑kë ’gbla ‑sü ’gü ’gbee‑ ꞊woë’ ꞊nɛ: «Kwa ‑bha dha ‑sü ‑yö ‑go kwa ‑bha ‑Zlan ’yö ‑ya ‑sü ’ka ’gɔ ‑gbloo ’gü waa‑ ’bhlanë ‑an kwɛɛ!» ¹¹‑Zlan ‑bha bɔmɛ ‑nu ’saadhö ‑wo ‑kë ’gɔ ‑gbloo bhë, mɛ ziizii ‑nu waa‑ pë ’bhee‑ ‑nu ‑yiisië ’wo bhë ‑an ‑zü ’to ’wo ‑lo ’gɔ ‑gbloo ’dhiö mü ‑gɔ ‑gblü ’sɛi ‑sü ’ka ’ö ’wo ‑Zlan gba ¹²‑a pö ‑sü ’ka ꞊nɛɛ: «Amɛn! ’Tɔsaablüdhe, ’tɔbhɔdhe, ’kpaakpadhɛ, ꞊sɛɛbhodhe, mɛsüvasü, ’piigbeedhɛ waa‑ ’gügbeedhɛ ‑wo kwa ‑bha ‑Zlan ‑bha ’ka ꞊toëpö ’ka! Amɛn.»

¹³’Ö mɛ ziizii ‑nu ’wo bhë ’ö‑ mɛ do ‑yö n ꞊dhɛɛ’ kpɔ ꞊nɛɛ: «Dö ‑nu ’ö gblang ’puu ‑nu ’dho ‑an ‑bha ꞊nɛɛ, ’go mü ‑wo ‑go më ꞊ɛ?» ¹⁴’A‑ ‑daa ‑kë ‑a ‑gɔ ꞊nɛɛ: «Ma ‑zë ’maa‑ dɔ ‑ɔ, n Dëmɛ; bhi ꞊nɛ ’ü dho ‑mɔa ‑bha kö ’üën‑ dɔ.» ꞊Dhɛ ꞊ya kë ’dhö, ’yö‑ pö n ‑dhë: Mɛ ‑nu ’wo bɔ ’klobhɔdhe ꞊va kwɛɛ wo ‑mü. ‑Wo wo ‑bha gblang ‑zlu ‑a ‑kë ’slööslö ‑sü ’ka ’bhlanë fɛi ’ka. ¹⁵Pë ’ö ‑kë ’ö ’wo dɔ ‑Zlan ‑bha ’gɔ ‑gbloo ’dhiö, yuö ‑kë ‑Zlan ‑dhë ‑sü ’ka gbeng waa‑ lënng ‑a ‑gɔ kɔɔ ’ö bhë, ’ö mɛ ’ö ‑ya ‑sü ’ka ’gɔ ‑gbloo ’gü ’ö dho ö ‑zo kë ‑an ’piö. ¹⁶Din ‑nu, ’yi mü ‑dhɔ ‑nu, ‑an gbɛ ’ka ’dho ‑an kë gbɔ; ’iin lan‑ ‑nu, ’siö ’gbee‑ ‑bha ‑dɔ mɛ ‑ta ‑sü ‑nu gbɛ ’ka ’dho ‑an kë gbɔ. ¹⁷Bhii ’bhlanë ’yö ’gɔ ‑gbloo ziën bhë ‑yö ‑dho kë ‑an ‑maakëmɛ ’ka, ’yö dho ‑an ’ka ‑kë ‑a ’gü ‑yi ’tɔɔ‑ ꞊bhaa. ’Go mü ‑Zlan ‑dho ‑an ’yënng ’plɛ ꞊dhuë’‑.

꞊Duakëpë ’slaplɛ ‑naa

¹꞊Dhɛ ’ö ’bhlanë ‑yö ꞊duakëpë kë ’slaplɛ ‑naa wü, ‑dhɛ ‑yö ga diindhö dhang‑ ’gü ’yö ‑mɔ ’lɛlɛ ’gbu ‑bha. ²’Ö ’a ‑Zlan ‑bha bɔmɛ ‑nu ’slaplɛ yö, kö ‑wo dɔ ‑sü ’ka ‑Zlan ’dhiö; ’wo ’truu ’slaplɛ nu ‑an ‑dhë.

³’ö ‑Zlan ‑bha bɔmɛ do ‑yö nu ’yö dɔ ‑Zlan ‑bha slabhodhɛ ’sɔɔ. ’Güö ‑pë ’tëë ‑sëëzë ‑yö ‑a ’gü ‑pë ö ’sënng ’ka bhë ‑yö ‑kë ‑a kwɛɛ, ’ö ’wo ’güö ‑pë ’tëë ‑sëëzë bhë ’wo‑ nu ‑a ‑dhë ꞊va kö ‑yaan kpa ‑Zlan ‑bha ’sɛgɔgümɛ ‑nu ’slööslö ‑bha ꞊bhɛa’ ‑wo ‑bha ‑yaan sla‑ bhoë slabhodhɛ ’ö ’sënng ’ka, ’gɔ ‑gbloo ’dhiö bhë ‑a ‑ta. ⁴Pë ’tëë ‑sëëzë bhë, ‑a ’güö ‑sü ’ka, ‑a ’siɔn waa‑ ‑Zlan ‑bha mɛ ‑nu ’ö ‑an sü ö ‑bha ’ka ‑an ‑bha ꞊bhɛa’ ‑wo ‑wo ‑luu ’kuë ‑Zlan ‑bha bɔmɛ bhë ‑a kwɛɛ ‑Zlan wö ’dhiö mü. ⁵꞊Dhɛ ꞊ya kë ’dhö, ’ö ‑Zlan ‑bha bɔmɛ ‑yö pë ’tëë ‑sëëzë ‑yö ‑a ’gü ‑pë ’ö bhë, ’yö‑ pa ’siö ’ö slabhodhɛ ‑bha mü bhë ‑a ’ka; ’yö‑ ‑zuö sia‑. ’Ö dha ‑nu ‑wo ‑we; ’we ‑wo ‑nu, pë ‑bha ’yan bɔ ‑sü ‑nu waa‑ ’sɛ ‑bha ꞊zluun ‑sü ‑nu ‑wo ‑kë.

⁶’Ö ‑Zlan ‑bha bɔmɛ ’slaplɛ ’ö ’truu ’slaplɛ ’dho ‑an kwɛɛ bhë ’wo yö wo ꞊baa’ ‑sü ‑bha kö ‑waan ’truu ‑piö.

⁷’Ö ‑Zlan ‑bha bɔmɛ ‑blɛɛzë ‑yö ’truu ‑piö. ’Ö mëngga ‑nu waa‑ ’siö ’ö fɛi ‑yö ꞊kaan ‑a ’ka, ‑wo ‑lo ’kpongtaa. ’Ö siadhɛ ’bhaa ‑nu, ’lü ’bhaa ‑nu ’wo ‑güö ‑dhɛ ‑nu ’gü, ‑dhɛ ‑nu ’gü ’kpongtaa ’wo dho ‑mɔ ‑a ’fa bho ’gü ‑yaaga ’pian do ‑bha. ’Ö ꞊blëë’ ‑nu ’wo ‑güö ’töüdhö.

⁸’Ö ‑Zlan ‑bha bɔmɛ kë ꞊plɛ ‑naa ‑yö ö ‑bha ’truu ‑piö. ’Ö pë ’ö ‑kë ꞊nɛ ‑tɔn ꞊suu’‑ do ꞊va ’ö ’siö ’dhö ‑a ‑bha, ’yö ‑zuö ’yoo ꞊bhaa, ’ö ’yoo ’pian do ’ö ‑mɔ ‑a ’fa bho ’gü ‑yaaga ‑bha ‑yö ‑gla fɛi ’gü. ⁹’Ö ’të ‑pë ’saadhö ’wo ’yoo ’pian ’ö bhë ‑a ꞊bhaa, ’ö ’wo ga; ’ö ’yi ‑ta ‑gɔ ‑nu ’wo ‑dhɛ bhë ‑a ’gü ’wo ‑siö.

¹⁰’Ö ‑Zlan ‑bha bɔmɛ kë ‑yaaga ‑naa ‑yö ’truu ‑piö. ’Ö ’susongga do ꞊va ’ö ‑kë ’güö ꞊dhia ꞊nɛ ’gbia ‑dɔɔ ’dhö ‑yö ‑go dhang‑ ’gü ’yö ‑püö ’yiga ꞊vava ‑nu waa‑ ’yigɔbhɔdhɛ ‑nu ’wo ’kpongtaa ‑an ꞊bhaa ‑dhɛ ‑nu ’gü, ’ö ‑an ‑dho ’kuë‑ ‑sü ‑yö ‑mɔ ‑an ’fa bho ’gü ‑yaaga ’pian do ‑bha ‑dhɛ ‑nu ‑bha. ¹¹’Susongga ’ö bhë ‑a ’tɔ tɔɔ «Pë ’güüzë». ’Ö‑ ‑wun ’gü, ’ö ’yi ‑dhɛ ’pian ‑nu ’wo ’dhö bhë ’wo ‑kë ’güüzë; ’kpongtaamɛ ‑nu ‑dhɛ ꞊va ‑dhɛ ‑wa mü; ’yö ’wo ga.

¹²’Ö ‑Zlan ‑bha bɔmɛ kë ‑yiisië ‑naa ‑yö ’truu ‑piö. ’Ö lan‑ ‑bha ’bhü ‑sü ‑yö ‑kan ’pian ’fa bho ’gü ‑yaaga ‑bha; pë do bhë ’ö ꞊kaa’ ’su waa‑ ’susongga ‑nu ‑an ‑gɔ ’pö. ’Ö ‑dhɛpuudhɛ yaa kë ‑dhö ‑dhɛ ’po yi ’gü ‑glu ’gü dhe ‑yaaga kpö do ’ka, ’ö ’töng mɛ ’ö bhë ’ö to ‑dhɛtiidhɛ ’ö trö ’sënsëndhö ‑a ’gü. ‑Kɔ do bhë ’ö ꞊kaa’ gbeng ‑bha ’ka; ’ö gbeng ’gü ‑glu ’gü dhe ‑yaaga ’ka ’ö ’susongga ‑nu waa bhüë.

¹³’Yö ꞊dhɛ ’a‑ ‑ga ’zü, ’a ’gblübhaa do yö kö ‑yö ꞊nië’ ‑na dhuö ꞊gbiin. ‑Yö ‑kë ‑a pö ꞊dhia ꞊woë’ ’gbee‑ ’ka ꞊nɛ: «‑Më ’yena ‑wun oo, ‑më ’yena ‑wun oo, ‑më ’yena ‑wun ’ö dho kë mɛ ‑nu ’wo ’kpongtaa ‑an ’ka, yi ’ö ‑Zlan ‑bha bɔmɛ ‑nu ‑yaaga ’wo to ꞊nɛ ’wo dho ’truu ‑piö ‑a ’ka ‑a ’ka ’dhö ‑oo!»

¹’Ö ‑Zlan ‑bha bɔmɛ kë ’sɔɔdhu ‑naa ‑yö ’truu ‑piö. ’Ö ’susongga do ‑yö go dhang‑ ’gü, ’yö ‑püö sia‑; ’a‑ yö; ’wo ‑glu ’kpa ’dhi ꞊va ‑yö ‑a ’dhiö ‑pë ꞊lakele nu ‑a ‑dhë. ²’Ö ’susongga ’ö bhë ’ö ‑glu ’kpa ’dhi ꞊va bhë ‑a ’dhi ‑po, ’ö ’siɔn ꞊va ’ö ‑kë ꞊nɛ ’siɔn ’ö ’go ‑na ꞊bluu’‑ ‑kë ‑a ’gü ‑kɔ ’gü bhë ‑a ’dhö ’ö ꞊luu ’ö lan‑ waa‑ plaan ’puu ’piö ‑dhɛ ‑wo ‑trö ’siɔn ’yö go ‑glu ’kpa ’dhi ꞊va ’dhi ’gü bhë ‑a ꞊kwaa’. ³’Ö ’peedhekpaa ‑nu ‑wo go ’siɔn ’ö bhë ‑a ’gü ’wo ‑pɛn ’kpongtaa sia‑ ‑dhɛ ‑nu ‑bha; ’ö ‑kɔ ‑mɔ ’wuën‑ ‑sü ‑yö nu ‑an ‑dhë kö ‑waan mɛ ‑nu ’kun ꞊nɛ gian ‑nu ’dhö. ⁴’Wo‑ pö ‑an ‑dhë kö ꞊kun ’wo ’wun yaa gbɛ ‑kë ꞊blëë’ ‑nu, ’lü ‑nu waa‑ tapë ‑nu ‑an gbɛ ’ka; ’kɛɛ mɛ ‑nu ’ö ‑Zlan ‑bha ꞊duakëpë ’yaa ‑an ‑kpong ‑bha ꞊nɛ ’wo dho ’wun yaa kë ‑an ’ka. ⁵‑Kɔ ‑mɔ ’wuën‑ ‑sü yaa nu ’peedhekpaa ‑nu ‑dhë kö ‑waan mɛ ‑nu zë, ’kɛɛ kö ‑waan mɛ ‑nu ’yënng bhɔ ꞊zian’ ’su ’sɔɔdhu ’piö. ’Yënngbhɔdhe ’ö ’dhoë‑ nu ‑an ‑ta bhë, ‑yö ‑dho kë ꞊nɛ gian ‑bha mɛ ’kun ‑sü ’dhö. ⁶’Su ’sɔɔdhu ’töng ’ö bhë ‑a ’ka, mɛ ‑nu ‑wo ‑dho ga ꞊mɛɛ’‑, ’kɛɛ wo ’ka ’dho ‑a wo; ‑wo ‑dho ‑a ‑dhɔ kaa kö ’wo ga, ’kɛɛ ga ‑yö ‑dho ꞊duëë ‑an ‑dhë.

⁷’Peedhekpaa ‑nu ’wo bhë ‑wo ‑bhɔ ꞊soo ‑nu ’ö ꞊wa ‑mɔ ‑glu gɔn ‑sü ‑bha ‑an ‑bha. Pë ’ö ‑kë ꞊nɛ ’sënng ’gɔ ꞊gblaa’ ‑nu ’dhö ‑wo ‑kë ‑an tuö; ‑an wöödhɛ ‑yö ‑bhɔ mɛ ’bhee‑ wöödhɛ ‑bha. ⁸‑An ‑bha wun ‑nu ‑wo ‑kë ꞊nɛ dhoo ‑nu ‑bha wun ’dhö, ’ö ‑an ’sɔn ‑nu ‑wo ‑kë ꞊nɛ ꞊laa’ ’sɔn ’dhö. ⁹‑An ‑kënngtadhɛ ‑yö ‑kë ꞊nɛ ‑gluë ’dhaa‑ ‑piö ‑ta ‑dhɛ ’dhö; ‑an gban ‑drinng ‑yö ‑kë ꞊nɛ ‑yaagüpë ‑nu ’wo‑ ‑klu ‑na ꞊soo ‑nu ‑bha, ’ö ꞊soo ‑nu ’dho ‑an ’gan ‑na ’wo ’dho ‑na ‑glu ’piö bhë ‑an ziö ‑drinng ’dhö. ¹⁰‑An weng ‑yö ‑dhö ꞊nɛ ‑kɔ ’ö gian ‑nu ‑bha ’dhö ‑a ’ka bhë ‑a ’dhö, ’ö ’wo mɛ kun ‑a ’ka. ‑An weng ‑nu ’wo bhë ꞊nɛ ’wo pë yaa ꞊kaa’ mɛ ‑nu ’ka ’su ’sɔɔdhu ’piö. ¹¹’Ö ‑an ‑gɔ ’dhiö, ‑gludë do ’ö ‑kë bɔmɛ ’ö go ‑glu ’kpa ’dhi ꞊va ’gü ‑a ’ka, ‑yö yö ‑an ‑dhë ’dhiö. ‑A ’tɔ tɔɔ Eblö ‑wo ’gü Abadɔn, ’ö Glɛkö ‑nu ‑wa ‑dhɛ Apoliɔn, (‑a ‑gɛn ’ö tɔɔ «Pëgüsiömɛ»).

¹²’Yena ‑wun ‑blɛɛzë ꞊ya ziö, ꞊ya ’go mü ’yena ‑wun ꞊plɛ ’bhaa ‑wo ‑dho nu.

¹³’Ö ‑Zlan ‑bha bɔmɛ kë ’slado ‑naa ‑yö ’truu ‑piö. ’A ’we ‑wo do ma; ‑yö ‑go slabhodhɛ ’ö ’sënng ’dhö ’më ‑sü ’ka ‑a ‑bha ’ö ‑Zlan ’dhiö ‑dhɛ ‑bha bhë ‑a ’sian ‑nu ’piö. ¹⁴’We ‑wo ’ö ’dhö bhë, ‑ya ‑pö ‑Zlan ‑bha bɔmɛ kë ’slado ‑naa ’ö ’truu ‑yö ‑kë ‑a kwɛɛ bhë ‑a ‑dhë: «‑Bhö bɔmɛ ‑nu ‑yiisië ’wo ꞊yɔɔ’ ’gü ’yiga ꞊va ’wo‑ ‑dhɛ öflatö bhë ‑a ’sɔɔ bhë ‑an bho ꞊yɔɔ’ ’gü.» ¹⁵’Wo dho ’ö bɔmɛ ‑nu ‑yiisië ’wo bhë ’wo ‑an bho ꞊yɔɔ’ ’gü. ‑Wo ‑kë ꞊baa’ ‑sü ’ka ’gbönggböng ‑kwɛ ’ö ’dhö bhë, ’su ’ö ’dhö bhë, yi ’ö bhë ‑a ’ka, ’töng gia‑ bhë ‑a ’ka ‑yö kë ’dhö kö mɛ ‑nu ’wo ’kpongtaa zö, ‑waan ‑a ’gügludhe ‑yaaga kpö ‑ta do zë. ¹⁶’Ö ’dhasi waa‑ ꞊soo ‑nu ‑dho ’kuë‑ ‑sü bhë ’wo‑ ‑zɔn n ‑dhë. ‑An ‑dho ’kuë‑ ‑sü tɔɔ ‑vuu ’gü ‑vuu ꞊këng’ ꞊plɛ. ¹⁷’Yanpiöpë bhë ‑a ’gü, ‑kɔ ’a ꞊soo ‑nu waa‑ wo ‑yaataamɛ ‑nu ‑an yöë bhë ’ö ꞊nɛ: ‑Glu gɔn ‑piö ’bhɛi ’në nuɛazë ’ö ‑kë ꞊nɛ ’siö ’dhö, ’yö ’budhazë ꞊nɛ ‑guö ‑wungbeezë ’wo‑ ‑dhɛ safii ‑a bun ’dhö, ’ö zënzënzë ꞊nɛ pë ’tëë yaazë ’ö ‑kë blɔɔn ’ka ’wo‑ ‑dhɛ blɔɔn bhë ‑a ’yan ’dhö ‑yö ‑kë ‑an ‑bha. ꞊Soo ‑nu ‑gɔ ‑yö ‑kë ꞊nɛ ꞊laa’ ‑nu ‑gɔ ’dhö. ’Ö ’siö ‑nu, ’siö ’tëë ‑nu, pë ’piɔnpiɔn ’ö ‑kë ꞊nɛ blɔɔn ’tëë yaazë ’dhö ‑wo go ‑an dhiö. ¹⁸’Ö mɛ ‑nu ’wo ’kpongtaa bhë ’ö ‑an ’gü ‑glu ’gü dhe ‑yaaga ’pian do ‑wo ga pë ‑yaaga ’wo ‑kë ’siö ’dhö, ’siö ’tëë waa‑ blɔɔn ’tëë yaazë ’ö ’wo ’go ‑na ꞊soo ‑nu bhë ‑an dhiö bhë ‑an ꞊kwaa’. ¹⁹Bhii ꞊soo ‑nu ‑bha ‑kɔ ‑mɔ ’wuën‑ ‑sü ‑yö ‑go ‑an dhiö ‑dhɛ, waa‑ ‑an weng ‑an ’gü. ‑An weng ‑nu ‑wo ‑bhɔ ꞊mɛɛ ‑bha, ’ö ‑an ‑gɔ ’dhö ‑an ’dhiö; ‑an weng ‑nu ‑gɔ bhë ꞊nɛ ’ö ’wo ’wun yaa ꞊kaa’ mɛ ‑nu ’ka.

²⁰Mɛ ’bhee‑ ‑nu mɛ ’wo to, mɛ ‑nu mɛ ’ö waa ga pë ‑nu ’wo ꞊nɛ ‑an ꞊kwaa’ bhë, waa ’dho go wo ‑de këpë yaa ‑nu ‑zü. Waa ’dho wo ꞊kwaa’ ‑zuu yaa ‑nu gba ‑sü waa‑ ’sënng gbapë nu, ’wëü‑ gbapë ‑nu, zën gbapë ‑nu, ‑guö gbapë waa‑ ’lü gbapë ‑nu, ’ö waa ’dho ‑mɔ ‑a ‑bha kö ‑waan ‑dhɛ yö ‑waan ’wun ma ’iin ‑waan ’ta ’sü bhë ‑an gba ‑sü ‑zü. ²¹Mɛ ‑nu ’wo bhë waa ’dho go ’zü wo ‑bha mɛ zë ‑sü ‑nu, ’gina kë ‑sü ‑nu, ꞊sɔɔn kë ‑sü ‑nu ’iin ‑an ‑bha ꞊kwaan ‑sü ‑nu ‑an ‑zü.

‑Zlan ‑bha bɔmɛ waa‑ ’sëëdhɛ ‑be ’tee do

¹꞊Dhɛ ꞊ya kë ’dhö, a ‑Zlan ‑bha bɔmɛ do ’piigbeezë ‑yö, kö ‑yö ’go ‑na dhang‑ ’gü. Dha kpö ‑yö ‑kë ‑a ‑bha, ’ö dhabhüö do ’dho ‑nië ‑a ‑gɔ ‑zü ‑sü ’ka. ‑A wöödhɛ ‑yö ‑kë ꞊nɛ lan‑ ’dhö; ’ö‑ ‑gɛn ‑nu ‑wo ‑kë ꞊nɛ ’siö ꞊gban ’lü ’dhö. ²’Yö ’sëëdhɛ ‑be ’tee do ’ö‑ ’dhi ’dho ’po ‑sü ’ka, ’yö ‑kë ‑a kwɛɛ. ’Yö ö ꞊kwɛɛ‑ ’gü ‑gɛn yö ’yoo ‑ta; ’yö ö ꞊kwaa‑ ’gü ‑gɛn yö ’sɛ ‑ta. ³’Yö ‑gbla ’gbee‑ ’ka ꞊nɛ ꞊laa’ ‑bha pë ꞊bhöü‑ ꞊mɛɛ’ ‑wo ’dhö. ꞊Dhɛ ꞊ya yën ’we ‑sü ‑bha, ’ö dha ’slaplɛ ‑wo ‑we ꞊nɛ mɛ ‑we ꞊dhɔɔ ‑wo ‑bha ’gbee‑ ’ka. ⁴꞊Dhɛ ’ö ꞊wa yën ’we ‑sü ‑bha, ’a dho ’a ‑ya pë ‑ya ‑sü ‑bha. ’Kɛɛ a ‑wo do ’bhaa ‑ma dhang‑ ’gü, ’yö‑ pö n ‑dhë: «‑Bhö pë ’ö dha ’we ‑wo ’slaplɛ ‑wa pö bhë, ‑a ‑ta ‑bin; kö ꞊kun ’ü‑ ꞊bɛɛn!»

⁵꞊Dhɛ ꞊ya kë ’dhö, ’ö ‑Zlan ‑bha bɔmɛ ’a‑ yö kö ꞊ya ꞊luu’‑ ’yoo waa‑ ’sɛ ‑an ‑ta bhë, ’yö ö ꞊kwɛɛ‑ ’gü ‑kɔ ꞊luu dhang‑ ’gü ꞊zian’. ⁶’Ö ö ‑wo ‑bhö ‑Zlan ’ö ‑dhö ꞊toëpö ’ka, ’ö dhang‑ waa‑ pë ‑nu ’wo‑ ’gü ’töüdhö, ’sɛ waa‑ pë ‑nu ’wo ‑an ‑ta ’töüdhö, ’yoo waa‑ ö ꞊bhaapë ‑nu ’töüdhö ‑an ‑kë bhë ‑a ’tɔ ’ka. ’Ö ‑Zlan ‑bha bɔmɛ bhë ’yö‑ pö: «’Töng gbɛ yaa ’dho kë ‑dhö kö ‑waan dɔ ‑a ‑gɔ. ⁷’Kɛɛ yi ’ö ‑Zlan ‑bha bɔmɛ kë ’slaplɛ ‑naa ’dhoë‑ ’truu ‑piö ‑a ’ka bhë ꞊nɛ ’ö ‑Zlan dho ö bha ’slë ’yö ‑bin ‑sü ’ka ‑a ’dhiö ‑mɔ ‑a ’ka ’kuë ꞊nɛ ‑kɔ ’ö‑ ꞊blɛɛ ‑a ’ka ö bha yuökëmɛ ‑nu ’wo‑ ’dhiwopömɛ ‑nu ’ka ‑an ‑dhë bhë ‑a ’dhö.»

⁸’Yö ‑wo ’a‑ ma ’ö go dhang‑ ’gü bhë, ’ö ’wun ꞊blɛɛ n ‑dhë ’zü ‑dëüwo ꞊nɛɛ: «‑Bhö ’dho ’ü ’sëëdhɛ ‑be ’teete ’ö‑ ’dhi ’dho ’po ‑sü ’ka, ’ö ‑Zlan ‑bha bɔmɛ mɛ ’ö dɔ ‑sü ’ka ’yoo waa‑ ’sɛ ‑an ‑ta ‑a ‑gɔ bhë, ’ü‑ ’sü ‑a ‑gɔ!» ⁹’A dho ‑Zlan ‑bha bɔmɛ bhë ‑a ’piö ’a‑ pö ‑a ‑dhë ‑yö n gbaa ’sëëdhɛ ‑be ’teete bhë ‑a ’ka; ’yö‑ pö n ‑dhë: «‑Bhöë ’sü, ’ü‑ ‑bhö! ‑Yö ‑dho kë ’slëënslën ü dhiö ꞊nɛ ’zɔ ’yɔn ’dhö, ’kɛɛ ’bha yën ‑a ꞊yɔɔ’ ‑sü ‑bha, ‑yö ‑dho kë ’güüzë ü ’guu.» ¹⁰’Ö ’sëëdhɛ ‑be ’teete bhë, ’a‑ sü ‑a kwɛɛ, ’a‑ ‑bhö. ‑Yö ‑kë n dhiö ꞊zian’ ’slëënslën ꞊nɛ ’zɔ ’yɔn ’dhö; ’kɛɛ ꞊dhɛ ’ma yën ‑a ꞊yɔɔ’ ‑sü ‑bha, ‑yö ‑kë ’güüzë n ’guu.

¹¹꞊Dhɛ ‑kë ’pö ’wo‑ pö n ‑dhë: «Ü ‑dho ko ’zü ’ö ‑Zlan ‑yö pë bho ‑bin ‑blü ü ‑dhë, ’ö ‑gban ’sɛgɔ ‑nu waa‑ ö ’gü ‑mɛ ‑nu, ‑wo ꞊suu’‑ ’oo ꞊suu’‑ waa‑ ‑gludë ‑nu ‑an ‑bha ’ü‑ ꞊blɛɛ ’zü.»

’Wun ’ö ‑gban ꞊goo‑ ꞊plɛ ‑nu ‑bha

¹꞊Dhɛ ꞊ya kë ’pö, ’wo ‑dhɛ ‑nu ‑dan ‑a ’ka ’lü ’në do nu n ‑dhë ’ö ’wo‑ pö n ‑dhë: «‑Bhö ꞊luu’‑, kö ‑Zlan ‑bha ’kɔ waa‑ ‑a ‑bha slabhodhɛ bhë, ’ü ‑an dan ‑a ’ka; mɛ ‑nu ’wo ‑Zlan gba ‑na ‑a ‑gɔ kɔɔ bhë ‑an ꞊dhong’‑! ²’Kɛɛ ‑bhö ü ꞊kwaa’ ‑Zlan ‑bha ’kɔ ’kwɛandhɛ plaandhɛ ‑zü; kö ꞊kun ’ü‑ dan, bhii ‑yö nu ‑sü ’ka mɛ ’waa ‑Zlan ‑bha mɛ ‑nu ’ka ‑an ‑dhë, kö pödhɛ ’slööslö ’ö Zeluzalɛmë ’ka bhë ‑waan ‑a ꞊siö’‑ ’su ’gɔɔ‑ ‑yiisië ö ga ꞊plɛ ‑bha. ³A ‑dho ma ꞊goo‑ ꞊plɛ ’ö ga ‑ta ‑sɔ ’dhö ‑an ‑bha ‑an bɔ kö ‑waan ‑Zlan ’dhi ‑wo ꞊blɛɛ’‑, ‑dhɛkpaɔyi ‑vuu do ö ‑ta ꞊plɛ waa‑ ‑dhɛkpaɔyi ’gɔɔ‑ ’slado (1.260) ‑an ’ka.»

⁴꞊Goo‑ ꞊plɛ ’wo bhë ’wo tɔɔ olivie ‑lü ꞊plɛ waa‑ ꞊labang ꞊plɛ ’wo dɔ ‑sü ’ka kwa Dëmɛ ‑Zlan ’ö ’kpongtaa kë ‑mɛ ’ka ‑a ’dhö. ⁵Mɛ ꞊yaa‑ pö ’yö ’wun yaa kë ‑an ’ka, ’siö ‑yö ‑go ‑an dhiö ’ö ‑an yaagümɛ ’gü ꞊siö; ‑kɔ bhë ꞊nɛ ’ö mɛ ‑nu ’wo ’dhoë‑ ’wun yaa kë ‑an ’ka ’wo dho gaa. ⁶‑Kɔ ‑mɔ ’wuën‑ ‑sü ‑yö ‑an ‑gɔ kö ‑waan dhang‑ ’dhi ta, ‑yö kë ’dhö kö ꞊kun ’ö dha dho ban ’töng ’wo dho ‑Zlan ’dhi ‑wo ꞊blɛɛ ‑a ’ka bhë ‑a ’ka; ‑kɔ ‑mɔ ’wuën‑ ‑sü ‑yö ‑an ‑gɔ kö ‑waan ’yi ‑nu ’gla fɛi ’gü. ‑Kɔ ‑mɔ ’wuën‑ ‑sü ‑yö ‑an ‑gɔ ’pö kö ‑wo ’wun ’gbee‑ ‑nu wɔ ’kpongtaadhɛ ‑ta ‑kɔ ꞊suu’‑ ’oo ꞊suu’‑ ‑ta ꞊nɛ ‑kɔ ’ö ‑dhi ‑a ’ka ‑an ‑dhë ‑a ’dhö.

⁷Yi ’wo ’dhoë‑ yën wo ‑bha ’wun ꞊blɛɛ’ ‑sü ‑bha, wü ’ö go ‑glu ’kpa ’dhi ꞊va ’gü bhë ‑yö ‑dho nu ‑an ‑gɔ. ’Yö to ‑a ’gbee‑ ’ka ‑an ‑ta; ’yö ‑an zë. ⁸‑An ꞊glöö ‑dho to ‑kpinngga ’piö pödhɛ ꞊va ’ö ’wo ‑an Dëmɛ dɔa ‑gaatalü ‑bha bhë ‑a ’gü. Pödhɛ ’ö bhë ꞊nɛ ’wo‑ ‑ga zlöö ꞊nɛ Sodɔmë ’iin ꞊nɛ Ezitö ‑sɛ ‑an ’dhö. ⁹Mɛ ‑nu ’wo ’sɛgɔ ’saadhö ’gü, ’wo ’gunng ’saadhö ’gü, ’wo ‑wo ꞊suu’‑ ’oo ꞊suu’‑ pö waa‑ ’sɛgümɛ ‑nu ’saadhö ‑wo ‑dho ‑an ꞊glöö ‑ga ‑dhɛkpaɔyi ‑yaaga waa‑ ö ’gbu ’ka ’ö waa ’dho ’we ‑a ‑bha kö ‑wo ‑an ꞊glöö ‑bin. ¹⁰’Sɛgümɛ ‑nu ꞊zuö’ ’glu dho dhi mɛ ꞊plɛ ’wo bhë ‑an ‑bha ga ‑sü ‑wun ’gü. ‑Wo ‑dho ꞊zuögludhi kë, ’wo gbaɔ ‑nu bɔ wo ’ko ‑nu ‑dhë, bhii ’ö tɔɔ ‑Zlan ’dhiwopömɛ ꞊plɛ ’wo bhë kö ꞊wa ’sɛgümɛ ‑nu dɔ ‑gbɔudhö. ¹¹’Kɛɛ ꞊dhɛ ‑dhɛkpaɔyi ‑yaaga waa‑ ö ’gbu ’ö bhë ꞊ya ziö, ’ö ‑këdhösü ’tëë ’yö go ‑Zlan ’piö ’yö ‑da ‑an ’gü, ’ö ’wo ꞊luu ’wo dɔ wo ‑gɛn ‑ta. ’Ö ’suö ꞊va ‑yö ‑da mɛ ‑nu ’wo wo ’yan dɔ ‑an ‑bha ‑an ’gü. ¹²’Ö ‑Zlan ’dhiwopömɛ ꞊plɛ ’wo bhë ’wo ‑wo do ’gbee‑ ’yö go dhang‑ ’gü ‑a ma ꞊nɛɛ: «‑Ka ‑da zö!» ’Wo ‑da dhang‑ ’gü, dha kpö ’ka kö ‑an yaagümɛ ‑nu ‑wo ‑an ‑ga ‑sü ’gü. ¹³‑A ’töng gia‑ bhë ‑a ’ka ’sɛzluundhe ’gbee‑ ‑yö ‑kë; ’ö pödhɛ bhë ‑a ’gü ‑kan ’kou kpö kë ’gɔɔ‑ do ‑naa bhë ’ö‑ ’plɛ ‑yö ‑lo. ’Ö mɛ ‑lü ‑vuu ’slaplɛ ‑wo ga ’sɛ ‑bha ꞊zluun ‑sü do bhë ‑a ꞊kwaa’. Mɛ ‑nu ’wo to, ’suö ‑yö ‑da ‑an ’gü; ’wo yö ‑Zlan ’yö dhang‑ ’gü ‑a ’tɔ ‑kë ꞊va ‑sü ‑bha.

¹⁴’Yena ‑wun kë ꞊plɛ ‑naa ꞊ya ziö; (’kɛɛ ‑ka ka ‑zo kë ka ‑de ’piö!) ‑A kë ‑yaaga ‑naa ‑dho nu.

’Truu kë ’slaplɛ ‑naa

¹⁵꞊Dhɛ ꞊ya kë ’dhö, ’ö ‑Zlan ‑bha bɔmɛ kë ’slaplɛ ‑naa ‑yö ’truu ‑piö; ’ö ‑wo ‑nu ‑wo ‑we ’gbee‑ ’ka dhang‑ ’gü ’wo‑ pö: «‑Gludëdhɛ kë ‑sü ’ö ’kpongtaa zö ꞊nɛ ꞊ya ’to kwa Dëmɛ waa‑ Klito ‑an ‑bha ’ka zlöö. ‑Yö ‑dho ’kpongtaadhɛ ꞊kɔɔn ꞊toëpö ’ka!» ¹⁶’Yö mɛ ziizii ’gɔɔ‑ ꞊plɛ ö ga ‑yiisië ’wo ‑kë ꞊yaannu ꞊süë’ wo ‑bha ’gɔ ‑gbloo ’gü ‑Zlan wö ’dhiö bhë ’wo ‑gblü ’sɛi, ’ö ’wo ‑Zlan gba ¹⁷꞊woë’ ꞊nɛɛ: «Yi Dëmɛ ‑Zlan ’piigbeezë, bhi ’ü ‑kë ‑dhö, ’ü ꞊tun ‑dhö, yi ü zuö ‑pö ü ‑bha ‑kë ꞊va ‑sü ’ü‑ wo ’piigbeedhɛ ’ka, ’ü ü ‑bha ‑gludëdhɛ ‑kë bhë ‑a ‑wun ’gü. ¹⁸‑Dɔ ’yënng ‑sü ‑yö ’sɛgümɛ ‑nu ‑pa; ’kɛɛ ‑a yi ꞊ya ‑lo kö ü ‑bha ‑naazuëdhe bhë ‑a ’piö ‑pë ‑yaan kë kö gamɛ ‑nu ‑bha za ‑yaan ’kan. ‑A yi ꞊ya ‑lo kö ’üën‑ ü bha yuökëmɛ ‑nu ’wo ü ’dhi ‑wo ꞊blɛɛ waa‑ mɛ ‑nu ’töüdhö ’wo ü ‑bha ’ka ’wo ‑suö ü ‑dhë ‑yö mɛ ꞊va ’ka ’iin ‑yö mɛ ’tee ’ka ’üën‑ mɛ ’ö ‑dhö ‑a ꞊saan’ bho. Mɛ ‑nu ’wo ’kpongtaadhɛ ’gü ꞊siö bhë, ‑a yi ꞊ya ‑lo kö ’üën‑ ‑an ’gü ꞊siö’‑ ’pö.»

¹⁹꞊Dhɛ ꞊ya kë ’pö ’ö ‑Zlan ‑bha ’kɔ ’ö dhang‑ ’gü bhë, ’ö‑ ’dhi ‑yö ‑po. ’Ö mɛ ‑nu ‑wo ‑Zlan ‑bha tɔng ꞊gbëü yö ‑a ‑gɔ kɔɔ mü. ’Yö dha ‑bha ’yan bɔ ‑sü ‑nu, pë ‑drinng ‑nu, dha ‑bha ’gbla ‑wo ‑nu, ’sɛ ‑bha ꞊zluun ‑sü waa‑ mëngga ’gbee‑ ‑bha ‑lo ‑sü ‑wo ‑kë.

Dhebɔ ’ö ’gina ‑yö ‑ziö ‑a ’piö

¹’Ö ꞊duakëpë do ꞊va ‑yö ‑wo dhang‑ ’gü: Dhebɔ do ’ö lan‑ ‑da ö ‑bha ꞊nɛ sɔ ’dhö ’ö ’su ’dho ‑a ‑gɛn ꞊löö, ’go mü ’ö ’gɔ ꞊gblaa’ ’ö ’susongga ’gɔɔ‑ do ö ga ꞊plɛ ’dho ‑a ‑bha ’yö ‑kë ‑a tuö. ²‑Yö ‑kë dhe ’guzë ’ö koyigadhe ꞊yaa‑ ’kun ‑a ’ka; ‑yö ‑kë ꞊gblaa ’gbla ꞊dhia koyigadhe ’yënngbhɔdhe ꞊kwaa’.

³’Ö pë do ’bhaa ‑yö ‑wo dhang‑ ’gü ’zü: ‑Yö ‑kë ’gina do ‑ziizë bun nuɛazë ’ö‑ ‑gɔ ‑nu ’dho ’slaplɛ ‑a ’ka. ‑A ‑sö ‑nu ‑wo ‑kë ’gɔɔ‑ do. ’Ö ’gɔ ꞊gblaa’ ’dhö ‑ya ‑sü ’ka ‑a ‑gɔ ’ö ‑dhö do do ’ka ‑a ‑bha. ⁴‑A weng bhë ꞊nɛ ’ö ’susongga ‑nu ’wo dhang‑ ‑bha, ‑an ’gügludhe ‑yaaga ‑kɔ ’pian do bho ‑a ’ka dhang‑ ’gü ’ö‑ ꞊zuë’ sia‑. ’Yö dɔ dhebɔ ’ö koyiga ꞊yaa‑ ’kun bhë ‑a ’dhiö, kö ꞊ya kë ꞊nɛ ꞊ya ’bë bho ’yaan‑ ‑a ‑bha ’në ꞊yɔɔ’‑. ⁵’Ö dhebɔ ’ö bhë ’yö ’në gɔɔn‑ do kpɔ. Yö ꞊nɛ ’yö dho ’dhiö ‑sü ’sɛgümɛ ‑nu ’plɛ ’ka ‑piö ’gblɔɔngblɔn do ’ka. ’Kɛɛ ’në bhë ‑wa ‑sü ’wo dho ‑a ’ka ‑Zlan ’piö ‑a ‑bha ’gɔ ‑gbloo ’sɔɔ. ⁶Dhebɔ ’ö bhë ‑yö ꞊duë, ’ö dho ’yënng ꞊taa, ‑dhɛ ’ö ‑Zlan ‑ya ‑yadhɛ do ‑kë ‑a ‑bha kö ‑waan ‑bhöpë nu ‑a ‑dhë ‑dhɛkpaɔyi ‑vuu do ö ‑ta ꞊plɛ waa‑ ‑dhɛkpaɔyi ’gɔɔ‑ ’slado ‑an ‑bha bhë ‑a ‑bha.

⁷꞊Dhɛ ꞊ya kë ’dhö, ’ö ’ko do ‑yö ꞊luu dhang‑ ’gü. Misɛlö ’ö ‑Zlan ‑bha bɔmɛ ‑nu ‑gɔmɛ do ’ka bhë ’dhö ‑Zlan ‑bha bɔmɛ ‑nu mɛ ’wo‑ ‑kɔ ꞊löö, waa‑ ’gina ’dhö, ö ‑bha bɔmɛ ‑nu ’dhö, ’wo ’ko ‑ya ’kuë. ⁸’Kɛɛ ‑wo ‑to ‑a ’gbee‑ ’ka ’gina ‑ta ’ö ‑yadhɛ yaa kë ‑dhö yö ’dhö waa‑ ö ‑bha bɔmɛ ‑nu ’dhö ‑an ‑gɔ kö ‑waan ’to dhang‑ ’gü gbɔ. ⁹’Gina ‑ziizë ’ö bhë, ’wo‑ ‑zuö plaan. Yö ꞊nɛ ’ö tɔɔ ꞊mɛɛ zii, ’ö ’wo‑ ‑dhɛ zlöö dü ’iin Satan ’yö ’kpongtaamɛ ‑nu ’plɛ ‑püö ‑na ꞊nɛ. ’Ö yö ’dhö waa‑ ö ‑bha bɔmɛ ‑nu ’dhö, ’wo ‑an ‑zuö ’kpongtaa.

¹⁰’Go mü ’a ’we ‑wo do ’gbee‑ ’ö go dhang‑ ’gü ꞊zian’ ‑a ma ’ö‑ pö: «Dha ‑sü, ’piigbeedhɛ waa‑ ‑gludëdhɛ kë ‑sü ’ö kwa ‑bha ‑Zlan ‑bha ’ka waa‑ ‑wogbiindhɛ ’ö‑ ‑bha Klito ‑bha ’ka ꞊wa yö ‑dhɛpuudhɛ ’gü. Bhii mɛ ’ö za ‑lo ‑na kwa dhegluzë ‑nu tuö ‑Zlan wö ’dhiö gbeng waa‑ lënng bhë, ꞊waa‑ kë, ꞊waa‑ ꞊zong’ ꞊ya ’go dhang‑ ’gü. ¹¹Dɔ ’ö ’bhlanë fɛi ‑ya wo ‑an ‑gban ‑gɔ waa‑ ’wun gia‑ ’ö bhë ‑a ꞊blɛɛ’‑ ’wo‑ wo bhë ꞊nɛ ’ö kwa dhegluzë ‑nu ‑wo bɔ ‑a ‑ta ’wo to ‑a ’gbee‑ ’ka bhë. ‑Wo wo ‑kwaa wo ‑de ‑wun ‑zü ’ö ’wo ‑an zë ‑a ‑wun ’gü. ¹²‑Dhɛ ‑kë ’dhö, dhang‑ ’gü ‑dhɛ ‑nu, ‑ka ꞊zuögludhi kë, mɛ ‑nu ‑de ’pö ’ka dhang‑ ‑nu bhë ‑an ’gü, ‑ka ꞊zuögludhi kë! ’Kɛɛ ‑më ’yena ‑wun ’ö dho kë ’kpongtaadhɛ waa‑ ’yooga ‑an ‑bha ’ka ꞊nɛ ‑oo! Bhii ’ö tɔɔ dü ’yö ꞊yɔɔ ka ’piö bhë, ‑yö pa ‑sü ’ka ‑naazuëdhe ’ka ka buëndhö ’ö tɔɔ ‑ya ꞊dua’ ꞊nɛ ’töng ’yö‑ ‑gɔ bhë ꞊ya ’to ’tee.»

¹³꞊Dhɛ ’ö ’gina ꞊yaa‑ dɔa ꞊nɛ ’ya ‑zuö ’kpongtaa ’ö yö ‑ziö dhebɔ ’ö ’nëgɔɔnzë kpɔ bhë ‑a ’piö ‑sü ’gü. ¹⁴’Yö pë ’yö ‑kë ꞊nɛ ’gblübhaa gban ꞊plɛ ’dhö ’wo‑ nu dhebɔ bhë ‑a ‑dhë kö ‑yaan ‑lö ‑yaan ’dho ö ‑yadhɛ ‑bha ’yënng ꞊taa ‑bin ‑sü ’ka ꞊mɛɛ ‑bha ‑glu ‑da ‑a ‑ta ‑sü ‑gɔ; ‑dhɛ bhë ꞊nɛ ’wo dho ‑bhöpë nu ‑a ‑dhë ‑a ‑bha, ‑kwɛ ‑yaaga waa‑ ö ’gbu ’piö. ¹⁵’Yö ꞊mɛɛ ‑yö ö ’dhi ‑po ’ö ’yi ’ö ‑ziö ꞊nɛ ’yiga ’dhö ‑yö ‑ziö dhebɔ ’ö bhë ‑a ’piö, ‑yö kë ’dhö kö ’yi ‑zuö ꞊va ‑yö ziö ‑a ’ka. ¹⁶’Kɛɛ ’sɛ ‑yö ‑nu dhebɔ bhë ‑a ‑dhë. Bhii ’sɛ ‑yö ö ’dhi ‑po ’ö ’yi ’ö go ’gina dhiö bhë, ’ö‑ ꞊yɔɔ. ¹⁷’Ö‑ ‑wun ‑yö ‑na ’gina bhë ‑a ‑zuë dhebɔ bhë ‑a buëndhö. ’Yö dho ’ö ’ko ‑ya dhebɔ bhë ‑a ꞊suu’‑ ‑ta ‑nu, mɛ ‑nu ’töüdhö ’wo ‑Zlan ‑bha tɔng ꞊bhlë ‑ya, mɛ ‑nu ’ö ’wo dɔ ‑sü ’ka Yesu ‑wun ‑dhɛ ’wun gia‑ ‑sü ’gü ‑an ‑bha. ¹⁸’Ö ’gina ‑yö dho ’ö dɔ ’yoo ’kpong ’dhiö.

’Wun ’ö ‑gban wü ꞊plɛ ‑bha

¹’Go mü ’a wü do yö kö ‑yö ’go ‑na ’yoo ꞊bhaa. ‑A ‑sö ‑yö ‑kë ’gɔɔ‑ do, ’ö‑ ‑gɔ ‑nu ’dhö ’slaplɛ; ’ö ’gɔ ꞊gblaa’ ’dho ‑a ‑sö ’ö ‑dhö do do ’ka ‑a ‑bha. ’Ö ’tɔ do ’ö ’si ‑bho ‑Zlan ‑gɔ ‑tɔ ’ka ’yö ‑ya ‑sü ’ka ‑a ‑gɔ ‑nu ‑bha. ²Wü ’ö bhë ‑yö ‑bhɔ ’gɔɔ‑ ‑bha. ‑A ‑gɛn ‑nu ‑wo ‑kë ꞊nɛ ‑tɔn ‑bha gbɛn‑ ‑nu ‑gɛn ’dhö, ’ö‑ dhiö ‑dhɛ ‑yö ‑kë ꞊nɛ ꞊laa’ dhiö ‑dhɛ ’dhö. ’Yö ’gina do ’ö ꞊sia bhë ’yö ö ‑bha ’piigbeedhɛ ’dhö, ö ‑bha ’gɔ ‑gbloo waa‑ ö ‑bha ‑kɔ ‑mɔ ’wuën‑ ‑sü ꞊va bhë ’ö‑ nu ‑a ‑dhë. ³’Kpa do ꞊va ’gblüünzë ‑yö ‑kë wü bhë ‑a ‑gɔ ‑nu do ‑bha. Mɛ ’ö ’yan ꞊ya ‑da ‑a ‑ta kö ꞊ya kë ‑a ’yaan ꞊nɛ bhüö ’ö‑ ’kpa ’dhö bhë, pë ’ö wü ’ö bhë ’ö dho to ꞊a ꞊kwaa’ ‑bezë yö ‑mü. ’Kɛɛ wü bhë bhüö ’ö dho kë ‑a ga ‑gɛn ’ka ‑be bhë, ‑yö ‑dha ‑a ‑gɔ. ’Ö ’kpongtaamɛ ‑nu ’saadhö ’wo ‑da ꞊zuögludhi ’gü, ’wo ‑ziö wü ’ö bhë ‑a ’piö. ⁴’Ö mɛ ‑nu ’saadhö ’wo yö ’gina ’ö bhë ‑a gba ‑sü ‑bha, bhii ’ö tɔɔ ‑yö ö ‑bha ‑kɔ ‑mɔ ’wuën‑ ‑sü ‑nu wü ’ö bhë ‑a ‑dhë. ’Ö ’wo yö wü ’ö bhë ‑a gba ‑sü ‑bha ’pö ‑a pö ‑sü ’ka ꞊nɛɛ: «Dö ’yö dho kë ꞊nɛ wü ’ö ꞊nɛ ‑a ’dhö e? Dö ’ö dho ‑mɔ ‑a ‑bha kö ‑yaan ’ko zë ‑a ’ka ɛ?»

⁵’Ö wü bhë ’wo zian nu ‑a ‑dhë, ’yö ‑de ‑sü ꞊va ‑wun ‑nu ꞊blɛɛ, ’ö ’si ‑nu bho ‑Zlan ‑gɔ; ’ö ‑kɔ ‑mɔ ’wuën‑ ‑sü yö kö pë ‑nu ’wo ꞊nɛ ‑yaan ‑an kë ’su ’gɔɔ‑ ‑yiisië ö ga ꞊plɛ ’piö. ⁶’Ö yö ’si ‑bho ‑Zlan ‑gɔ ‑sü ’gü, ‑a ’tɔ ‑gɔ ’gü zë ‑sü ’ka, ’wun ‑nu ‑dɔ yö ’dhö, ‑dhɛ ’ö‑ ‑bha waa‑ mɛ ‑nu ’wo dhang‑ ’gü ’töüdhö ‑an ‑bha ‑sü ’ka. ⁷’Ö zian ‑yö nu ‑a ‑dhë, kö ‑yaan ‑glu gɔn ‑Zlan ‑bha mɛ ‑nu ’slööslö ’ka ‑yaan ’to ‑a ’gbee‑ ’ka ‑an ‑ta; ’yö ‑kɔ ‑mɔ ’wuën‑ ‑sü yö ’gunng ’saadhö, ’sɛgümɛ ‑nu ’saadhö waa‑ ‑wo ꞊suu’‑ ’saadhö ‑a pö ‑mɛ ‑nu ‑ta. ⁸’Kpongtaamɛ ‑nu ’saadhö ‑wo ‑dho ‑a gba; ’kɛɛ mɛ ‑nu ’wo dho ‑a gba ’wo tɔɔ mɛ ‑nu ’ö ’kpongtaadhɛ züdɔyi ’ka, ’ö ‑an ’tɔ yaa ‑ya ‑sü ’ka ’bhlanë ’wo‑ zë bhë ‑a ‑bha ꞊toëpö ‑këdhösü ’sëëdhɛ ‑be bhë ‑a ’gü bhë.

⁹‑Ka ka ’to ’to ‑së ’ka! Mɛ ’ö‑ ’wun ma ‑to ’dhö ‑dhö, ‑yö ’wun ’ö ꞊nɛ ‑a ma. ¹⁰Mɛ ‑nu ’wo ‑Zlan ‑bha ’sɛgɔgümɛ ‑nu ’ka bhë, ‑a mɛ ‑nu ’wo dho kë ‑kanso ’kɔɔmɛ ’ka, ‑wo ‑dho dho ‑an ’ka ‑kanso ’kɔɔdhö. ’Ö‑ mɛ ‑nu ’wo dho kë ’pö ‑zë ‑dhaa ’ka ‑mɛ ’ka, ’wo dho ‑an zë ‑dhaa ’ka. ‑A ‑wun ’gü, ‑yö ‑Zlan ‑bha mɛ ’slööslö ‑bha kö ‑wo bɔ ’wun ’gbee‑ ’gü, ꞊zuö’ ‑kë ‑saa ‑sü waa‑ ‑zo yö ‑sü ‑an ’ka.

¹¹’Go mü ’zü, ’ö wü ’waa gbɛ ’ö‑ ‑sö ‑yö ‑kë ꞊nɛ ’bhlanë ‑nu ‑sö ’dhö, ’ö‑ ’we ‑wo ‑yö ‑kë ‑ziizë ꞊nɛ ’gina ‑wo ’dhö bhë, ’a‑ yö kö ‑yö ’go ‑na ’sɛidhö, ¹²’Ö wü ‑blɛɛzë ‑bha ‑kɔ ‑mɔ ’wuën‑ ‑sü ’gü ‑pë ‑nu ‑kë ‑a wö ’dhiö mü. ’Ö ’sɛ waa‑ ö ’gü ‑mɛ ‑nu ’gbee‑ ‑ta bho ‑yö kë ’dhö kö wü ‑blɛɛzë ’ö‑ ‑bha bhüö ’ö dho to ‑a ꞊kwaa’ ‑be ’ö bo bhë, ‑waan ‑a gba. ¹³Wü kë ꞊plɛ ‑naa ’ö bhë, ‑yö ‑dhidhaapë ꞊vava ‑nu ‑kë; ‑a do ’bhaa tɔɔ ‑ya ‑kë ’ö ’siö ‑yö go dhang‑ ’gü ’yö ꞊yɔɔ ’kpongtaamɛ ’plɛ wö ’dhiö. ¹⁴’Ö ’kpongtaamɛ ‑nu ’plɛ ‑püö, ‑kɔ ‑mɔ ’wuën‑ ‑sü ’ö ‑dhidhaapë ‑nu kë ‑na ‑a ’ka bhë ‑a ꞊kwaa’ wü ‑blɛɛzë bhë ‑a wö ’dhiö. Bhii pë ‑nu bhë ꞊nɛ ’wo‑ ‑wo ‑kë ’gbiin‑ ’kpongtaamɛ ‑nu wö ’dhiö, ’ö bɔ ‑a ‑ta ’ö‑ pö ‑an ‑dhë, wü ’ö yaa ga gbɔ ‑gi ’ö‑ wo ‑a ꞊kwaa’ bhë, ‑wa ’bin ꞊va do dɔ. ¹⁵Wü kë ꞊plɛ ‑naa ’ö bhë ‑yö zian ‑yö kö ‑yaan ‑këdhösü nii ‑da wü ‑blɛɛzë ’bin bhë ‑a ’gü, ‑yö kë ’dhö kö pë ’bin ’ö bhë ‑yö ’we ’iin kö mɛ ‑nu ’saadhö ’ö waa ’dho we ‑a ‑bha kö ‑waan ‑a gba, ‑yö ‑an zë. ¹⁶Wü ’ö bhë ‑yö ‑dhö mɛ ‑nu ’saadhö, ‑yö ’në ’tee ’ka ’iin ‑yö mɛ ꞊va ’ka, ‑yö ꞊bhɔɔmɛ ’ka ’iin ‑yö ’fɛɛmɛ ’ka, ‑yö ’gan ’ka ’iin ’yaa ’gan ’ka, ‑an ’plɛ ’gbee‑ ‑ta ‑bho kö mɛ ’ö ‑dhö ‑wo ꞊duakëpë do kë ‑a kwɛɛ ’gü ‑kɔ ‑bha ’iin ‑a ‑kpong ’gü. ¹⁷Mɛ gbɛ yaa kë ‑dhö kö ‑yaan pë ’dhɔ ’iin pë ’dhɔɔ dɔ, kö ꞊duakëpë ’ö bhë yaa kë ‑a ‑bha. ꞊Duakëpë ’ö bhë ’ö tɔɔ: Wü ’ö bhë ‑a ’tɔ ’iin ’nimlo ’ö nu ‑sü ’ka ’ö waa‑ wü ’ö bhë ’ö ‑an ’tɔ dhö dho ’ko ’piö.

¹⁸‑Dhɛ ’ö ꞊nɛ ’ö tɔɔ ’kpaakpadhɛ ‑zɔn ‑dhɛ. Mɛ ’ö ’wun ‑bho ’kou dɔ, ’nimlo ’ö ꞊nɛ ‑ya ‑dho ’kuë‑ ‑sü ꞊dhong’‑ bhii ’nimlo ’ö bhë waa‑ gɔɔn‑ do ’tɔ ‑wo ‑dho ’ko ’piö. ‑A ‑dho ’kuë‑ ‑sü ’ö tɔɔ ꞊këng’ ’slado ‑kɔ ’slado ö ga ’slado (666).

’Bhlanë waa‑ mɛ ‑nu ’ö ‑an ‑dhɔ

¹꞊Dhɛ ꞊ya kë ’pö ’a ‑dhɛ ‑ga; ’a ’bhlanë yö kö ‑yö dɔ ‑sü ’ka Siɔn ‑tɔn tuö. Mɛ ‑lü ‑vuu ꞊këng’ do ö ‑kɔ ‑yiisië waa‑ mɛ ‑lü ‑vuu ‑yiisië (144.000) ‑wo kë ‑a ’piö mü. ‑A ’tɔ waa‑ ‑a Dë ’tɔ ‑wo ‑kë ‑ya ‑sü ’ka ‑an ‑kpong ’gü. ²’Ö ‑wo do ‑yö go dhang‑ ’gü ’ö ‑we ꞊nɛ ’yi ꞊va ‑zuö ’iin dha ’we ‑drinng ’dhö, ’a‑ ma. ’We ‑wo ’a‑ ma bhë ‑yö ‑bhɔ kɔngzëmɛ ‑nu ‑bha kɔng ‑wo ‑bha. ³Mɛ ‑lü ‑vuu ꞊plëëzë ’wo bhë ‑wo ‑kë dɔ ‑sü ’ka ’gɔ ‑gbloo bhë ’dhö, pë ’bhee‑ ‑yiisië waa‑ mɛ ziizii ‑nu ’wo bhë ‑an wö ’dhiö ’ö ’wo yö ’tan ‑dëü bho ‑sü ’gü. Mɛ gbɛ yaa kë ‑dhö kö ‑yaan ’tan ‑dëü bhë ‑a ꞊daan’‑ ‑yaan ‑a bho ‑a ’ke yaa kë mɛ ‑lü ‑vuu ꞊këng’ do ö ‑kɔ ‑yiisië waa‑ mɛ ‑lü ‑vuu ‑yiisië ’ö Yesu ‑yö ‑an ‑gɔ ‑ta ‑bɔ ꞊sɔɔn yaa ‑gɔ ’kpongtaa bhë ‑an ’ka. ⁴Mɛ ’wo bhë waa wo ‑de kë ‑dhuuzë dhoo ‑nu ’piö, ‑wo wo ‑zo ‑kë wo ‑de ’piö ’wo to ’slööslö. ‑Dhɛ ’saadhö ’ö ’bhlanë bhë ’ö dho ‑a ‑bha, ‑wo ‑ziö ‑a ’piö. ‑Wo ‑an ‑dhɔ mɛ ‑nu ziën kö ‑waan kë mɛ ‑nu ’wo dho dho ‑an ’ka ‑Zlan waa‑ ’bhlanë ‑an ’dhiö ‑a ’ka. ⁵Waa‑ ma ‑an ’dhii do kö ‑wo ꞊sua ‑wun ꞊blɛɛ’ ‑na; ’wun yaa gbɛ ’yaa ‑an ‑bha.

’Wun ’ö ‑gban ‑Zlan ‑bha bɔmɛ ‑nu ‑yaaga ‑bha

⁶’Go mü ’a ‑Zlan ‑bha bɔmɛ do ’waa gbɛ yö kö ‑yö ziö ‑sü ’gü plaan ’puu ’piö dhuö ꞊gbiin. ꞊Toëpö ‑këdhösü ‑wuntaɔsë ‑yö ‑kë ‑a ‑gɔ kö ‑yaan nuë mɛ ‑nu ’wo ’kpongtaa ’ö ’wo ’sɛ ’saadhö ’gü ‑mɛ ‑nu ’ka, ’gunng ’saadhö ’gü ‑mɛ ‑nu ’ka, ‑wo ꞊suu’‑ ’saadhö pö ‑mɛ ‑nu waa‑ ’sɛgɔ ’saadhö ’gü ‑mɛ ‑nu ‑an ‑dhë. ⁷‑Yö ‑kë ‑a pö ‑dhiadhö ‑wo ’gbee‑ ’ka ꞊nɛɛ: «‑Ka ’suö ‑Zlan ‑dhë, ’ka‑ ’tɔ bhɔ! Bhii ’töng ’yö dho mɛ ‑nu ‑bha za kaan bhë ꞊ya ‑lo. Yö ’ö dhang‑, ’sɛ, ’yoo waa‑ ’yigɔ ‑an ’plɛ ‑kë bhë, ‑kaa gba!»

⁸꞊Dhɛ go mü, ’ö ‑Zlan ‑bha bɔmɛ kë ꞊plɛ ‑naa ‑yö nu ‑a pö ‑sü ’ka ꞊nɛɛ: «Babilɔnë ‑pö ꞊va bhë ꞊ya ꞊siö’‑, ‑ka ‑dhɛ ‑ga, ꞊ya ꞊siö’‑! ꞊Ya ꞊sɔɔn kë ‑sü ‑pɛn ’sɛ ’saadhö ’gü ꞊nɛ ‑kɔ ’ö ’wo ‑drɔɔn ’yi nu ‑na ‑a ’ka mɛ ’plɛ ‑dhë ꞊waa‑ mü ’ö ‑an kë ‑na bhë ‑a ’dhö!»

⁹’Ö ‑Zlan ‑bha bɔmɛ kë ‑yaaga ‑naa ‑yö ‑wo kö ‑a mɛ ꞊plɛ ’wo ’dhiö bhë ꞊wa ziö. ‑Yö ‑kë ‑a pö ‑sü ’gü ‑wo ’gbee‑ ’ka ꞊nɛɛ: «Mɛ ’ö ’dhoë‑ wü bhë ‑a gba ‑yaan ‑a ’bin gba, ’go mü ‑waan ꞊duakëpë ‑ya ‑a ‑kpong ’iin ‑a ‑kɔ ‑bha, ¹⁰yö ‑de ’pö, ‑Zlan ‑bha ‑naadhe ‑dhö nu ‑a ‑ta. ‑Zlan ‑bha ‑naazuëdhe bhë ‑yö ‑kë ꞊nɛ ‑drɔɔn ’yi ’ö ’yaa ‑kaan ’kuë ‑sü ’ka ’ö yö gia‑ ’ö‑ ‑lo ö ‑bha ‑naazuëpë ’ka, yö ‑mü. Mɛ ’oo mɛ ’yö ’dhoë‑ ‑a kë ꞊nɛ ‑kɔ bhë ‑a ’dhö, ‑wo ‑dho ‑a ‑zuö blɔɔn ’tëë yaazë bhë ‑a ’siö ’gü, ’go mü ’ö‑ ’yënng dho bhɔ ‑Zlan ‑bha bɔmɛ ‑nu ’slööslö waa‑ ’bhlanë ‑an wö ’dhiö. ¹¹’Siö ’tëë ’yö dho ‑an ’yënng bhɔ bhë, ‑yö ‑dho kë ‑dhö ꞊toëpö ꞊toëpö ’ka. Mɛ ‑nu ’wo ’dhoë‑ wü bhë waa‑ ‑a ’bin ‑an gba, ’iin ’ö‑ ‑bha ꞊duakëpë ’dhoë‑ kë ‑an ‑bha, ’tɛɛpadhe yaa ’dho kë ‑an ‑gɔ lënng ‑nu waa‑ gbeng ‑nu ‑an ’ka.»

¹²꞊Dhɛ ’ö ꞊nɛ ’ö tɔɔ ‑Zlan ‑bha mɛ ‑nu ’slööslö ’wo ’dhoë‑ ‑a ‑bha tɔng kun ’go mü ‑waan wo ‑zo yö Yesu ‑bha, ‑an ‑bɔ ’wun ’gbee‑ ’gü ‑dhɛ ’ö dho kë ꞊zuösaadhɛ ’ka.

¹³’Go mü ’ö ‑wo do ‑yö bɔ dhang‑ ’gü ’ö‑ pö n ‑dhë: «’Sëëdhɛ ’sü ’ü pë ꞊bɛɛn’‑ ‑a ’gü ꞊nɛɛ: ’Go ꞊dɛɛ ‑bha, ꞊zuögludhi ‑yö kë mɛ ‑nu ’wo ’dhoë‑ to ‑klu ‑sü ’ka Dëmɛ ‑bha ‑yaan yöë ‑an ‑bha ga ‑sü ‑bha ‑an ‑gɔ!» ’Ö ‑Zuu ’slööslö ‑ya ‑pö: «‑Yö ’wun gia‑ ’ka, ‑wo ‑dho wo ’tɛɛ pa wo ‑bha yuö ’gbee‑ kë ‑sü ‑gɔ bhii ‑an ‑bha ’wun ‑së kë ‑sü ꞊saan’ ‑dho bho ’ma.»

’Sɛ ‑ta dhuö ‑pë ’kan ‑sü

¹⁴꞊Dhɛ ’a‑ ga ’zü, ’ö ’a dha kpö ’puu do yö; ’ö pë ’ö ‑kë ꞊nɛ mɛ ‑lü ’dhö ’a‑ yö kö ‑yö ‑ya ‑sü ’ka ‑a ‑ta. ’Sënng ’gɔ ꞊gblaa’ do ‑yö ‑kë ‑a ‑gɔ ‑bha, ’ö ’gbuë‑ ’kan ‑dhaa do ’dhiözë ’dho ‑a kwɛɛ. ¹⁵’Yö ‑Zlan ‑bha bɔmɛ do ’bhaa ‑yö go ‑Zlan ‑gba ‑a ’gü ‑kɔ ’gü ’yö yö plaan, ’yö yö ’wun ꞊blɛɛ’ ‑sü ‑bha ‑wo ’gbee‑ ’ka mɛ ’yö ‑kë ‑ya ‑sü ’ka dha kpö ‑ta bhë ‑a ‑dhë ’ö‑ pö: «‑Bhö ü ‑bha ‑dhaa ’në ’sü, ’ö mɛ ‑nu ’wo ’kpongtaa, ’ü ‑an ’dho ’kuë‑ ꞊nɛ ꞊dhɛ ’wo ‑mlü ‑kan bhii ‑mlü ꞊ya ga. ‑A ’kan ‑yi ꞊ya ‑lo.» ¹⁶꞊Dhɛ ꞊ya kë ’pö ’ö mɛ ’ö ‑kë ‑ya ‑sü ’ka dha kpö ‑ta bhë ’yö nu ö ‑bha ‑dhaa ’në ’ka, ‑yö yö yuö kë ‑sü ‑bha ꞊nɛ mɛ ‑mlü ‑kan, ’ö‑ ’plɛ ‑kan.

¹⁷’Ö ‑Zlan ‑bha bɔmɛ ’bhaa ’ö yö ‑de ’pö ö ‑dhaa ’në do ’dhiözë ’dho ‑a kwɛɛ ‑yö go ‑Zlan ‑gba ‑a ’gü ‑kɔ ’ö dhang‑ ’gü bhë ‑a ’gü ’yö yö plaan.

¹⁸’Ö ‑Zlan ‑bha bɔmɛ do ’waa gbɛ ’ö ‑kɔ ‑mɔ ’wuën‑ ‑sü ’dhoë‑ ‑gɔ ’siö ‑ta bhë, ‑yö go slabhodhɛ ‑bha ꞊zian’, ’yö nu ’yö‑ pö ‑wo ’gbee‑ ’ka mɛ ’ö ‑dhaa ’dhiözë ’dhoë‑ ‑gɔ bhë ‑a ‑dhë ꞊nɛɛ: «‑Bhö ü ‑bha ‑dhaa ’sü ’ü lɛzɛn ‑nu ’wo ’sɛ ‑ta ’ü ‑an ‑kpa ’kan ‑a ’ka, bhii ‑an ‑kpa ‑nu ꞊wa ma.» ¹⁹’Ö ‑Zlan ‑bha bɔmɛ bhë ’yö ö ‑bha ‑dhaa bɔ ’sɛ ‑ta lɛzɛn ‑lü ‑nu tuö ‑an ‑kpa ’kan ‑sü ’ka, ’yö ‑an ‑zuö lɛzɛn ‑kpa ’yi ‑bho ‑a ’gü ‑pë ’gü. ‑Drɔɔn ’yi ‑bho ‑a ’gü ‑pë ’ö bhë ’ö tɔɔ ‑Zlan ‑bha ‑naazuëdhe ꞊va. ²⁰‑Wo lɛzɛn ‑kpa ‑nu bhë ‑an ꞊wüü ‑an ’yi ‑bho ‑a ’gü ‑pë ’gü pö‑ ꞊taa ‑bha, ’ö fɛi ‑glu ‑yö ziö ’yö dho ’kilong ꞊këng’ ‑yaaga ‑naa ꞊taa ’ö‑ ‑glu ꞊duan’ ‑yö ‑mɔ ’mɛtrë do waa‑ ö ’gbu ‑bha.

‑Zlan ‑bha bɔmɛ ‑nu ’slaplɛ ‑bha ‑nu ‑Zlan ‑bha ‑naazuëdhe ‑kɔɔ ‑nu ’ka ‑sü

¹’Yö ꞊dhɛ ’a‑ ‑ga ’zü, ’ö pë do ’bhaa ’ö ’wun ’gblüünzë ꞊va ’ka, ’a‑ yö dhang‑ ’gü. ‑Zlan ‑bha bɔmɛ ‑nu ’slaplɛ ꞊nɛ ’a ‑an yö kö ‑wɔ mɛ ‑ta ‑wun ’slaplɛ ‑wo ‑an kwɛɛ. ‑Wɔ mɛ ‑ta ‑wun ’slaplɛ ’wo bhë ’wo tɔɔ ‑an ‑kaanta ‑nu ’ö ‑Zlan dho ö bha ‑naazuëdhe ’dhiö ‑mɔ ‑a ’ka ’kuë.

²’A ko ’zü ’a pë ’ö ‑kë ꞊nɛ ’yipuë ’dhö ’a‑ yö. ’Kɛɛ ’yi giagia ’yaa ‑mü. ‑Yö ‑kë ꞊nɛ pë ’wo ’vɛdhɛ kë ‑na ‑a ’ka ’ö mɛ ’yan ’dho bɔ ‑na ‑a ’gü bhë ‑a ’dhö. ’Yö pë ’ö ‑kë ꞊nɛ ’siö ’dhö ’a‑ yö kö ‑yö ‑ya ‑sü ’ka ‑a ’gü. ’Go mü ’zü ’a mɛ ‑nu ’wo to ‑a ’gbee‑ ’ka wü bhë ’dhö, ‑a ’bin ’dhö, waa‑ mɛ ’ö‑ ’tɔ ’dho ’nimlo ’ka bhë ‑an ‑ta bhë, ‑an yö kö ‑wo dɔ ‑sü ’ka pë ’bhlöngbhlöng bhë ‑a ’dhiö, kö ‑Zlan ꞊ya kɔng ‑nu nu ‑an ‑dhë. ³‑Wo ‑kë Moizö ’ö ‑kë ‑Zlan ‑bha yuökëmɛ ’ka bhë ‑a ‑bha ’tan ’ö‑ bho ‑Zlan ’tɔ bhɔ ‑sü ’ka waa‑ ’tan ’ö bho ’bhlanë ’tɔ bhɔ ‑sü ’ka bhë ‑an bho ꞊dhia, ‑a pö ‑sü ’ka ꞊nɛɛ: «Yi Dëmɛ, ‑Zlan ’piigbeezë, ü këyuö ‑nu ꞊wo ꞊va, ’ö ’wo ’gblüünzë; ’sɛ ’saadhö ‑bha ‑gludë, ü ‑bha ’slë ‑nu ꞊wo kpengdhö ’ö ’wo ’wun gia‑ ’ka. ⁴Dö ’ö yaa ’dho suö ü ‑dhë ‑ɛ, yi Dëmɛ? Dö ’ö yaa ’dho we ‑a ‑bha kö ‑yaan ü ’tɔ bhɔ ꞊ɛ? Bhii bhi do ꞊nɛ ’ü ’slööslö. ’Sɛtamɛ ‑nu ’saadhö ‑wo ‑dho nu ’wo ‑gblü ü ’dhiö ü gba ‑sü ’ka, bhii ü këwun ‑nu ’wo kpengdhö bhë ꞊wa yö ‑dhɛgbɛadhɛ ’gü.»

⁵꞊Dhɛ ’ö pë ‑nu ’wo bhë ꞊wa ziö, ‑Zlan ‑gba ‑a ’gü ‑kɔ ’ö dhang‑ ’gü bhë, ’a‑ yö kö ‑a ’dhi ꞊ya ’po ‑dhɛ ’slööslö ‑dhɛ ꞊duö ’ö ‑Zlan ’dhö ‑ya ‑sü ’ka ‑a ’gü bhë ‑a ‑zü. ⁶‑Zlan ‑bha bɔmɛ ‑nu ’slaplɛ ’ö ‑wɔ mɛ ‑ta ‑wun ’slaplɛ ’dhö ‑an ‑gɔ bhë, ‑wo ‑go ‑Zlan ‑gba ‑a ’gü ‑kɔ ’gü, ’wo yö plaan; ‑wo ‑kë ’dhu ‑sü ’ka sɔ ’puu ’ö ’bhü ‑sü ’ka ‑a ’ka; ’ö ’sënng ‑du kwi ’dho ziö ‑sü ’ka ‑an ‑kënng ’gü. ⁷’Ö pë ’bhee‑ ‑nu ‑yiisië ’wo bhë ’ö‑ mɛ do ‑yö ’sënng ‑kɔɔ ’slaplɛ ’ö ’wo pa ‑sü ’ka ‑Zlan ’ö ’bhee‑ ꞊toëpö ’ka bhë ‑a ‑bha ‑naazuëdhe ’gü ‑pë ’ka bhë ‑a nu ‑Zlan ‑bha bɔmɛ ‑nu ’slaplɛ ’wo bhë ‑an ‑dhë. ⁸‑Zlan ‑gba ‑a ’gü ‑kɔ bhë ‑yö ‑pa ’siɔn ’ka ‑Zlan ‑bha ’tɔbhɔdhe waa‑ ‑a ‑bha ’piigbeedhɛ ‑an ꞊kwaa’. ’Ö mɛ gbɛ yaa kë ‑dhö ‑yaan ‑da ‑Zlan ‑gba ‑a ’gü ‑kɔ ’ö bhë ‑a ’gü kö ‑yö ’dho ‑yö yöë ‑wɔ mɛ ‑ta ‑wun ’slaplɛ ’ö ‑Zlan ‑bha bɔmɛ ‑nu ‑wo ‑nu ‑a ’ka bhë ‑a ‑wun ’plɛ ‑yö ’ko ’dhiö ‑yi ‑bha.

’Wun ’ö ‑Zlan ‑bha ‑naazuëdhe ‑kɔɔ ‑nu ’slaplɛ ’gü

¹’Go mü ’zü, ’ö ‑wo do ’gbee‑ ’ö go ‑Zlan ‑gba ‑a ’gü ‑kɔ ’gü ꞊zian’ ’a‑ ma; ’ö‑ pö ‑Zlan ‑bha bɔmɛ ‑nu ’slaplɛ ’wo bhë ‑an ‑dhë: «‑Ka ’dho ’ka ‑Zlan ‑bha ‑naazuëdhe ‑kɔɔ pa ‑sü ’slaplɛ bhë ‑a ’daawo ’kpongtaa!»

²’Ö ‑Zlan ‑bha bɔmɛ ‑blɛɛzë ‑yö dho ’yö ö bha ‑kɔɔ pa ‑sü ’daawo ’kpongtaa. ’Ö mɛ ’yënng bhɔ bhüö ꞊yua’ ‑yö ‑lo mɛ ‑nu ’ö wü ’ö bhë ’ö‑ ꞊dua’ ’dho ‑an ‑bha, ’go mü ’wo‑ ’bin gba bhë ‑an ‑bha.

³’Ö ‑Zlan ‑bha bɔmɛ ꞊plɛ ‑naa ‑yö ö ‑bha ‑kɔɔ pa ‑sü ’daawo ’yoo ꞊bhaa. ’Ö ’yi ‑yö ‑kë ꞊nɛ mɛ ꞊ya ga ‑a fɛi ’dhö, ’ö pë ‑nu ’wo ’bhee‑ ’yoo ꞊bhaa, ’ö ‑an ’plɛ ‑wo ga.

⁴’Ö ‑Zlan ‑bha bɔmɛ kë ‑yaaga ‑naa ‑yö ö ‑bha ‑kɔɔ pa ‑sü ’daawo ’yiga ‑nu waa‑ ’yigɔ bhɔ ‑dhɛ ‑nu ‑an ꞊bhaa ‑dhɛ ‑nu ‑bha; ’ö ’yi ‑nu ‑wo ‑gla fɛi ’gü. ⁵’Ö ‑Zlan ‑bha bɔmɛ ’ö ‑wo ‑kɔ ‑mɔ ’wuën‑ ‑sü ’dho ‑a ‑gɔ ’yi ‑nu ‑ta bhë ’a‑ ‑wo ma ꞊nɛɛ: «Bhi ’ü ’slööslö, bhi ’ü ‑dhö, ’ü ‑kë ‑dhö, ü kpengdhö ü ‑bha za ’kan ‑kɔ ‑nu ’gü. ⁶Bhii mɛ ‑nu ’wo ü ‑bha mɛ ‑nu ’slööslö waa‑ ü ’dhiwopömɛ ‑nu fɛi ‑lo bhë, ü fɛi ’yi nu ‑an ‑dhë ’wo‑ mü; ‑yö ‑dhi ‑an ‑bha.» ⁷’Go mü ’zü, ’ö ‑wo do ’bhaa ‑yö go ‑Zlan ‑bha slabhodhɛ ‑bha ’a‑ ma ꞊nɛɛ: «꞊Ii‑, ’wun gia‑ ‑mü, yi Dëmɛ ‑Zlan ’piigbeezë, ü bha za ’kan ‑kɔ ‑nu ’plɛ ꞊wo ‑së ’ö ’wo kpengdhö giagia ’ka!»

⁸’Ö ‑Zlan ‑bha bɔmɛ kë ‑yiisië ‑naa ‑yö ö bha ‑kɔɔ pa ‑sü ’daawo lan‑ ‑ta ’ö ’wo zian nu ‑a ‑dhë kö ‑yaan mɛ ‑nu ’güö ’siö ’ka. ⁹’Ö mɛ ’bhee‑ ‑nu ‑wo yö ’güö ‑sü ’gü ’siö ‑bha dɔdhe ’gbee‑ ꞊kwaa’; ’wo yö ’si ‑bho ‑Zlan ’ö ‑kɔ ‑mɔ ’wuën‑ ‑sü ’dhoë‑ ‑gɔ ‑wɔ mɛ ‑ta ‑wun ꞊suu’‑ ’ö bhë ‑a ‑ta bhë, ‑a ’tɔ ‑gɔ ‑sü ’gü; waa ’go ꞊zian’ wo ‑bha ’wun yaa ’gü kö ‑waan ‑a ’tɔ bhɔ.

¹⁰’Ö ‑Zlan ‑bha bɔmɛ kë ’sɔɔdhu ‑naa ‑yö ö ‑bha ‑kɔɔ pa ‑sü ’daawo wü ’ö bhë ‑a ‑bha ’gɔ ‑gbloo ’gü, ’ö ‑dhɛ ’saadhö ’ö‑ ‑bha ‑gludëdhɛkëdhɛ ’dhoë‑ ‑bha ’yö ‑da ‑dhɛtiidhɛ ’gü, ’ö mɛ ‑nu ‑wo yö wo nɛ‑ ‑bhö ‑sü ’gü ’yënngbhɔdhe ꞊kwaa’. ¹¹’Wo yö ’si bho ‑sü ’gü ‑Zlan ’ö dhang‑ ’gü ‑a ‑gɔ, wo ‑bha ’yënngbhɔdhe waa‑ wo ‑bha bhüö ‑nu ‑wun ’gü; waa ’go wo ‑bha ’wun yaa ‑nu ’gü.

¹²’Ö ‑Zlan ‑bha bɔmɛ kë ’slado ‑naa ‑yö ö ‑bha ‑kɔɔ pa ‑sü ’daawo ’yiga ꞊va ’wo‑ ‑dhɛ öflatö bhë ‑a ꞊bhaa. ’Ö ’yiga ꞊va bhë ’ö ꞊bhöü kö ‑yaan zian nu ‑gludë ’ö go lan‑ bhɔ ꞊zian’ bhë ‑a ‑dhë. ¹³’Go mü ’a ‑zuu yaa ‑yaaga ’wo bhɔ ’drɔɔ ‑bha ‑an yö: ‑A do ‑yö ‑go ’gina dhiö, ’ö‑ do ’bhaa ‑yö go wü dhiö, ’ö‑ ‑kaanta ‑yö go ‑Zlan ‑wodhiölomɛ ꞊suazë dhiö. ¹⁴Wo ꞊nɛ ’wo tɔɔ dü ‑bha ‑zuu yaa ‑nu ’wo ‑dhidhaapë ‑nu ‑kë. ‑Zuu ‑yaaga ’wo bhë ꞊nɛ ’wo dho ‑gludë ‑nu ’piö ’kpongtaadhɛ ’saadhö ‑bha, kö ‑waan ‑an ’kpɔ ’kuë‑ kö ‑glu ’ö dho kë ‑Zlan ’piigbeezë ‑bha yi ꞊va ’ka bhë ‑waan gɔn.

¹⁵‑Ka ka ’to ’to, a nu ‑na ꞊nɛ ꞊kwaanmɛ ‑yö nu. ’Gludhi ‑yö kë mɛ ’ö ’dhoë‑ ‑ya ö ’yaan ‑yaan ö ‑bha sɔ ‑nu ’kun ‑së ‑a ‑gɔ, ‑yö kë ’dhö kö ꞊kun ’yö dho to ö ’kpaan ’ka ’ö mɛ ‑nu dho ‑a lë‑ ‑dhɛ yö.

¹⁶‑Zuu ‑nu bhë ‑wo ‑gludë ‑nu ‑kpɔ ’kuë‑ ‑dhɛ do ’wo‑ ‑dhɛ Eblö ‑nu ‑wo ’gü Aamagedɔn ‑a ‑bha.

¹⁷’Ö ‑Zlan ‑bha bɔmɛ kë ’slaplɛ ‑naa ‑yö ö ‑bha ‑kɔɔ pa ‑sü ‑pɛn ’dhung‑ ‑ta. ’Ö ‑wo do ’gbee‑ ‑yö ‑we ‑Zlan ‑gba ‑a ’gü ‑kɔ ’gü; ‑yö ‑go ’gɔ ‑gbloo ’gü ’yö‑ pö: «꞊Ya yën!» ¹⁸’Ö pë ‑bha ’yanbɔdhe ‑nu, pë ‑drinng ‑nu, dha ’we ‑wo ‑nu waa‑ ’sɛ ‑bha ꞊zluun ‑sü ’gbee‑ ‑wo ‑kë. ’Ö sü mɛ ’bhee‑ ‑da ‑sü ‑bha ’kpongtaa ’sɛ yaa ꞊zluun ꞊suu’‑ wo ’dhö do; ‑a mɛ ’ö ꞊nɛ ‑yö ‑kë ’gbee‑ ꞊duö! ¹⁹’Ö ’kwipö (’wo‑ ‑dhɛ Babilɔnë) bhë ’yö ‑kan ’gü ‑yaaga, ’ö pödhɛ ‑nu ’wo ’sɛgüdhɛ ’saadhö ‑nu ‑bha ’ö ‑an ‑bha ’kɔ ‑nu ‑wo ‑lo. ‑Zlan ‑zo ‑yö ‑bhüö Babilɔnë ‑dhɛ ꞊va ’ka kö ‑yaan ö bha ‑naazuëdhe ꞊va ‑drɔɔn ‑kɔɔ nu ‑a ‑dhë ‑yaan ‑a mü. ²⁰’Ö ’yi songdhɛ ‑nu ‑wo ꞊dhɔng, ’ö ‑tɔn ‑nu ‑wo ꞊dhɔng mɛ ‑gɔ. ²¹Mëngga ꞊vava ’ö‑ do dho ‑mɔ ’kilong ’gɔɔ‑ ‑yiisië ‑bha bhë ’wo go dhang‑ ’gü ’wo ‑lo mɛ ‑nu ‑ta. ’Ö mɛ ‑nu ‑wo yö ’si ‑bho ‑Zlan ‑gɔ ‑sü ’gü mëngga ‑nu ’wo ‑lo ‑an ‑ta ’wun ‑wɔ mɛ ‑ta dhe ’ka bhë ‑a ‑wun ’gü. Bhii ’ö tɔɔ ‑yö ‑kë ’gbee‑ ‑ziizë ’ka.

¹꞊Dhɛ ꞊ya kë ’pö ’ö ‑Zlan ‑bha bɔmɛ ‑nu ’slaplɛ ’ö ‑kɔɔ pa ‑sü ’slaplɛ ‑yö ‑kë ‑an ‑gɔ bhë, ’ö‑ mɛ do ‑yö nu ’ö‑ pö n ‑dhë: «‑Bhö nu kö ‑kɔ ’a dho ꞊sɔɔnkëdhe ꞊va ’ö pö‑ ꞊va ’ö dɔ ‑sü ’ka ’yiga ꞊plëëzë ’sɔɔ ‑a ’klo‑ bhɔ ‑a ’ka bhë ’aan‑ ‑zɔn ü ‑dhë. ²’Kpongtaa ‑gludë ‑nu ꞊wa wo ‑de kë ‑dhuuzë ‑a ’piö, ’go mü ’ö ’kpongtaamɛ ‑nu ꞊waa‑ ‑bha ꞊sɔɔn kë ‑sü ‑drɔɔn mü, ‑a ’yi ꞊ya ziö ‑an ‑gɔ.»

³’Ö ‑Zlan ‑bha bɔmɛ ‑yö dho n ’ka ’yënng ꞊taa ‑Zuu ’slööslö ꞊kwaa’. ‑Dhɛ bhë ꞊nɛ ’a dhebɔ do yö ‑a ‑bha kö ‑yö ‑ya ‑sü ’ka wü nuɛazë ’ö ’si ‑bho ‑Zlan ‑gɔ ‑tɔ ‑nu ’dho ‑lo ‑sü ’ka ‑a ‑bha ‑a ꞊taa. Wü ’ö ’dhö bhë ‑a ‑gɔ ‑nu ‑wo ’slaplɛ ’ö‑ ‑sö ‑nu ’dho ’gɔɔ‑ do. ⁴Dhebɔ ’ö bhë, sɔ bun nuɛazë ‑yö ‑kë ‑a ‑bha; ’ö‑ ’bhaa ‑nu ‑wo ‑kë ’sënng ’ka, ’ö‑ ’bhaa ‑nu ‑wo ‑kë ‑guö ’yan bho ‑sü ‑zë ‑nu ’ka, ‑zlɔɔ ‑nu ‑wo ‑kë ‑a ‑bha. ’Sënng ‑kɔɔ do ’ö ‑kë pa ‑sü ’ka pë ꞊lɔɔzë ‑nu, pë ‑dhuuzë ‑nu ’wo‑ ‑bha ꞊sɔɔn kë ‑sü ’piö ‑pë ‑nu ’ka ‑yö ‑kë ‑a kwɛɛ. ⁵’Ö ’tɔ do ’ö‑ ‑gɛn ’dho ‑bin ‑sü ’ka ’yö ‑kë ‑ya ‑sü ’ka ‑a ‑kpong ’gü ꞊nɛɛ: Babilɔnë, ’kwipö ꞊va, ꞊sɔɔnkëdhe ‑nu waa‑ pë ꞊lɔɔzë ‑nu ’wo ’kpongtaa ‑an dhe. ⁶Dhebɔ ’ö mɛ ’slööslö ‑nu waa‑ Yesu ‑bha ꞊goo‑ ‑nu fɛi mü bhë, a‑ ‑yö kö fɛi bhë ‑ya kë ‑na ꞊nɛ ‑kɔ ’ö yɔ ’yi ’dhö mɛ kë ‑na ‑a ’ka bhë ‑a ’dhö.

’Ö ’tetundhe ꞊va ‑yö ‑da n ’gü n ’yan ‑bha ‑dɔ ‑a ‑bha ‑sü ’ka. ⁷’Ö ‑Zlan ‑bha bɔmɛ ‑ya pö n ‑dhë: «‑Më ’yö ‑kë ’ö ü ’te ‑yö tun ꞊ii? Dhebɔ bhë waa‑ wü ’ö‑ ‑gɔ ’dho ’slaplɛ, ’ö‑ ‑sö ‑nu ’dho ’gɔɔ‑ do, ’ö ‑ya ‑sü ’ka ‑a ꞊taa bhë, a ‑dho ‑a ‑gɛn ’ö ‑bin ‑sü ’ka bhë ‑a pö ü ‑dhë. ⁸Wü ’ö bhë ‑yö ‑kë ’bhee‑ ’dhiö ‑be ’kɛɛ ’yaa ’dhö gbɔ, ‑yö ‑dho go ‑glu ’kpa ’dhi ꞊va ’gü kö ‑yaan ’dho ö ’gü ꞊siö’ ‑zian ’ka. Mɛ ‑nu ’wo ’kpongtaa ’ö ‑an ’tɔ yaa ‑ya ‑këdhösü ’sëëdhɛ ‑be ’gü ’kpongtaadhɛ züdɔyi ’ka bhë, ‑an ’te ‑yö ‑dho tun ‑a ‑bha ‑go ‑glu ’kpa ’dhi ꞊va ’gü ‑sü ’ka ‑an ’yaan ’ka. Bhii ‑yö ‑kë ‑dhö, ’yaa ‑dhö gbɔ; ’kɛɛ ‑yö ‑dho ‑wo ’zü.

⁹‑Dhɛ ’ö ꞊nɛ ’ö tɔɔ ’wundɔdhe waa‑ ’kpaakpadhɛ ‑an ‑zɔn ‑dhɛ. ‑A ‑gɔ ‑nu ’slaplɛ bhë ’wo tɔɔ ’sɛ ‑tɔn ’slaplɛ ’ö dhebɔ ’ö bhë ’ö ‑ya ‑sü ’ka ‑an ‑ta; ‑wo ‑gludë ’slaplɛ ’ka ’pö. ¹⁰‑An mɛ ’sɔɔdhu ꞊wa ’go ‑an ziën; ’waa ‑dhö gbɔ, ‑a mɛ do ’tɔ ‑yö bhɔ ‑sü ’gü. ‑A mɛ kë ’slaplɛ ‑naa yaa nu ꞊kun; ꞊ya kë ꞊nɛ ꞊ya nu, ’töng kpö ’bhle ꞊nɛ ’ö dhoë‑ kë zö. ¹¹Wü ’ö ’dhiö ‑bezë ’ö ‑kë ’bhee‑ ’ö ’yaa‑ ’ka gbɔ bhë, yö gia‑ ’ö tɔɔ ‑gludë kë ’slɛaga ‑naa, yö ꞊nɛ ’ö tɔɔ ‑gludë ’slaplɛ ’wo bhë ‑a mɛ do ’ö ꞊ya ö ‑bha ‑gludëdhɛ kë ’saadhö, ’yö ’dho ‑na ö ‑bha ’gü ꞊siö’ ‑zian ’ka bhë.

¹²‑A ‑sö ‑nu ’gɔɔ‑ do ’ü ‑an yö bhë ’wo tɔɔ ‑gludë ‑nu ’gɔɔ‑ do ’ö waa ’tɔbhɔdhe kë ꞊kun ’kɛɛ ‑wo ‑dho ‑kɔ ‑mɔ ’wuën‑ ‑sü yö wo ‑bha ‑gludëdhɛkëdhɛ ‑bha kö waa‑ wü bhë ‑an ’tɔ ‑yaan bhɔ ’lɛlɛ do ’piö. ¹³꞊Dhɛ ’wo‑ ‑bha ’gɔɔ‑ do, ‑an ‑zo ‑ta ‑a ’gü ‑wun ‑yö do, ’ö ’wo wo ‑bha ’piigbeedhɛ waa‑ ‑kɔ ‑mɔ ’wuën‑ ‑sü ‑lo wü bhë ‑a kwɛɛ. ¹⁴‑Wo ‑dho ’ko ‑ya ’bhlanë ‑bha, ’kɛɛ ’bhlanë ‑yö ‑dho to ‑a ’gbee‑ ’ka ‑an ‑ta; bhii ’ö tɔɔ ‑yö dëmɛ ‑nu ‑bha Dëmɛ waa‑ ‑gludë ‑nu ‑bha ‑gludë ’ka. Yö ’dhö waa‑ ö bha mɛ ‑nu, mɛ ’ö ‑an ꞊dhɔɔ ‑kë, ’ö ‑an sü ’wo ‑to ‑a ’piö ‑mɛ ‑nu ’ka ‑wo dho to ‑a ’gbee‑ ’ka.»

¹⁵’Ö ‑Zlan ‑bha bɔmɛ ‑ya pö n ‑dhë ’zü ꞊nɛɛ: «’Yi ‑nu ’ü ‑an yö, ’ö ꞊sɔɔnkëdhe ‑yö ‑kë ‑a ‑ta bhë ’wo tɔɔ ’sɛgümɛ ‑nu, mɛ gbung ‑nu, ’sɛgɔgümɛ ‑nu, ‑wo ꞊suu’‑ ’oo ꞊suu’‑ pö ‑mɛ ‑nu. ¹⁶‑Sö ’gɔɔ‑ do ’ü ‑an yö bhë waa‑ wü ‑wo ‑dho ꞊sɔɔnkëdhe ’ö bhë ‑a ‑san zë; ‑wo ‑dho ‑a ‑bha pë ‑nu ’wo‑ ‑gɔ ‑a ’plɛ kun ‑a ‑gɔ ’ö ’yö to ö bun ’kpaan ’ka. ‑Wo ‑dho ‑a ꞊nëng ‑bhö ’ö ’wo‑ ’gü ꞊siö ’siö ’ka. ¹⁷Bhii ‑Zlan ‑de ꞊nɛ ’ö ö ‑de ‑dhi ‑a ‑dhë ‑wun ‑da ‑an ꞊zuö’ ’gü ’wo‑ ‑kë, ’ö ’wo dho wo ’kuë‑, ’wo wo ‑bha ‑kɔ ‑mɔ ’wuën‑ ‑sü nu wü bhë ‑a ‑dhë, ‑yaan ’dho ‑yaan yöë ‑Zlan ‑wo ‑nu ’dhiö ‑mɔ ’kuë ‑yi ‑bha.

¹⁸‑A ‑de, dhebɔ ’ü‑ yö bhë ’ö tɔɔ pödhɛ ꞊va ’ö ‑gɔ ‑dhɛ kë ‑na ‑gludë ‑nu ‑ta ’kpongtaa.»

Babilɔnë ’gü ꞊siö’ ‑kɔ

¹꞊Dhɛ ’ö ꞊ya kë ’pö, ’a ‑Zlan ‑bha bɔmɛ do ’bhaa ’ö ‑kɔ ‑mɔ ’wuën‑ ‑sü ꞊va ’dho ‑a ‑gɔ ’a‑ yö kö ‑yö ’go ‑na dhang‑ ’gü kö ‑a ’bhü ꞊ya sa ’kpongtaadhɛ ’saadhö ‑bha. ²’Yö ‑gbla ‑wo ’gbee‑ ’ka ꞊nɛɛ: «Babilɔnë ‑pö ꞊va bhë ‑a ’gü ꞊ya ꞊siö’‑! ‑Ka ‑dhɛ ‑ga, ‑a ’gü ꞊ya ꞊siö’‑! ‑A ‑yadhɛ ꞊ya kë zlöö ‑zuu yaa ‑nu këdhɛ ’ka. ꞊Ya kë zlöö ‑ma ꞊suu’‑ yaazë ‑nu ’ö ’waa ’slööslö ‑an ’saadhö ‑an këdhɛ ’ka. ³Bhii ’ö tɔɔ ’sɛgümɛ ‑nu ’saadhö ꞊wa ‑drɔɔn ’ö‑ ‑bha ꞊sɔɔn ’gblüünzë kë ‑sü ’ka bhë ‑a mü; ’ö ’kpongtaa ‑gludë ‑nu ꞊wa wo ‑de ꞊nëng ‑a ‑bha, ‑kë ‑dhuuzë ‑sü ’ka, ‑a ’piö. ’Ö ’dhɔɔdɔmɛ ‑nu ’wo ’kpongtaa ꞊wa kë ꞊bhɔɔzë, ‑a ‑bha pë ꞊sɔnng’ ꞊vavazë ‑nu ’gü.»

⁴’Go mü ’zü, ’ö ‑wo do ’bhaa ‑yö go dhang‑ ’gü ’a‑ ma, ’yö‑ pö: «‑Ka ’go pödhɛ bhë ‑a ’gü, ma ’sɛgümɛ ‑nu! ‑Yö kë ’dhö kö ꞊kun ’ka dho ‑da ‑a ‑bha ꞊sɔɔn yaa ‑nu ’gü ’iin kö ꞊kun ’ö ’klobhɔdhe ‑nu ’ö dho ‑ma ‑a ’ka bhë ’ö dho nu ka ‑ta ’pö. ⁵Bhii ‑a ‑bha ꞊sɔɔn yaa ‑nu ‑lo ’ko ‑ta ‑sü ‑ta ꞊ya ’dho ꞊ya ‑lo dhang‑ ’gü; ‑Zlan ‑zlö yaa trö ‑a këyuö yaa ‑nu ’ka. ⁶‑Kaa ’yënng bhɔ ꞊nɛ ‑kɔ ’ö ka ’yënng bhɔa bhë ‑a ’dhö. Pë ’ö ‑kë kaa bhë, ‑kaa ’pë bho ‑a ‑gɔ ‑gwaa ꞊plɛzë. ‑Kaa ‑bha yɔ ‑kɔɔ pa ‑yö kë ’gbee‑ ‑gwaa ꞊plɛzë ‑yö ziëë ‑a mɛ ’ö‑ ‑yuö ‑kë ka ‑dhë bhë ‑a ‑ta! ⁷‑Ka ’klobhɔdhe waa‑ ’yënngbhɔdhe wɔ ‑a ‑ta ꞊nɛ ‑kɔ do ’ö‑ ꞊kaa’ ’tɔbhɔdhe waa‑ ꞊naɔpë ‑nu ’gü bhë ‑a ’dhö. ‑Ya ‑pö ö ‑de ’gü ꞊nɛɛ: ‹A ‑ya zö ꞊nɛ ‑gludhe ’dhö. ’Maa ꞊gɛandhe ’ka, ’ö n ’ka ’dho pë ’wo‑ ‑dhɛ ga ‑a dɔ ’gbɛɛdhö.› ⁸‑A ‑wun ’gü ’wun ‑nu ’wo ’dhoë‑ nu ‑a ‑ta bhë ‑wo ‑dho ‑ya ‑a ‑bha ‑dhɛkpaɔyi do ’kpaan ’ka; ’ö tɔɔ ga ’dhö, ga ‑gbo ‑nu waa‑ din ‑nu. ‑A ’gü ‑dho ꞊siö’‑ ’siö ꞊kwaa’. Bhii kwa Dëmɛ ‑Zlan ’yö‑ ‑bha za kan bhë ‑a ’pii ‑yö ’gbee‑.

⁹‑Gludë ‑nu ’wo ’kpongtaa ’ö wo ‑nu ’wo ꞊sɔɔn ‑kë ’iin ’ö ’wo wo ‑de nu ꞊naɔpë ‑nu ‑bha ‑kë mɛ ‑gɔ ‑sü ‑dhë bhë, yi ’wo ’dhoë‑ pödhɛ bhë ‑a ’güö ‑sü ’siɔn ꞊luu’‑ ‑sü yöë bhë ‑a ’ka, ‑wo ‑dho ’gbo bɔ wo ‑de ꞊maa ’ma ‑sü ’ka ‑a ‑wun ’gü. ¹⁰‑Wo ‑dho dɔ ‑a ’ka ꞊gbiin ’suö ’ka, ’yënngbhɔdhe ’ö ’dhoë‑ nu pödhɛ bhë ‑a ’gü ‑mɛ ‑nu ‑ta bhë ‑a ‑wun ’gü, ’ö ’wo‑ pö: ‹‑Më ’yena ‑wun ꞊nɛ ‑oo! ’Yena ‑wun ‑mlë ’ö ꞊nɛɛ! O, Babilɔnë, pödhɛ ꞊va ’piigbeezë! ’Lɛlɛ do ’kpaan ’gü ‑wun ’yö ü ’klo bhɔ ꞊nɛ ꞊a!›

¹¹’Dhɔɔdɔmɛ ‑nu ’wo ’kpongtaa ‑wo ’gbo bɔ ‑na wo ‑de ꞊maa ’ma ‑sü ’ka ‑a ‑wun ’gü ’pö, bhii ’ö tɔɔ mɛ ’yaa pë gbɛ ’dhɔ ‑an ‑gɔ gbɔ. ¹²Pë ‑nu ꞊ya kë ’wo‑ dhɔ bhë ’wo tɔɔ: ’Sënng, ’wëü‑, ‑güö ꞊suu’‑ ‑wungbeezë ‑nu, ‑zlɔɔ ‑nu, sɔ ‑sɛɛbɔ ‑nu, sɔ ꞊suu’‑ bun nuɛazë ‑nu, ’lü ꞊suu’‑ ‑wungbeezë ‑nu, pë ‑nu ’wo‑ yan biö ’sɔn ’ka, ‑a mɛ ‑nu ’wo ’yan ‑sü ’ka ’lü ꞊suu’‑ do ’bhaa ꞊sɔnng’ ’gbeezë ’ka, ‑a mɛ ‑nu ’wo‑ yan zën ’ka, ‑a mɛ ‑nu ’wo‑ yan ‑piö ’ka ’iin ‑tɔn ’piö ‑guö ꞊suu’‑ do ’wo‑ ‑dhɛ ’maablë, ¹³pë din ‑kë ‑së ‑pë ‑nu ’wo‑ ‑dhɛ kanɛlö waa‑ ‑a ’bhaa ‑nu; pë ’yi ’tëë ‑sëëzë ‑nu ’wo‑ ‑dhɛ ’miilö waa‑ ‑a ’bhaa ‑nu, ’güö ‑pë ’tëë ‑sëëzë ‑nu, ‑drɔɔn ’yi ‑nu, ’yɔn ‑nu, ’blee‑ ga waa‑ ’blee‑ ‑bi ‑nu, ‑du ‑nu, ’bhla ‑nu, ꞊soo ‑nu waa‑ ‑yaa ’gü ‑pë, ‑wo ‑dho ‑dewo ’wo mɛ ’bhee‑ ‑nu ’dhɔɔ dɔ ꞊nɛ ꞊nua ‑nu ’dhö. ¹⁴’Ö ’dhɔɔdɔmɛ ‑nu ’wo bhë ’wo‑ pö pödhɛ bhë ‑a ‑dhë: ‹Ü ‑bha ꞊naɔpë ’ü‑ ’piö ‑be kö ’ü ü ’yan dɔ ‑a ‑bha bhë ‑an ’plɛ ’gü ꞊ya ꞊siö’‑; ü ‑bha ꞊bhɔɔpë ‑nu waa‑ ü ‑bha pë ꞊sɔnng’ ’gbeezë ‑nu ’gü ꞊ya ꞊siö’‑! Ü ’ka ’dho ‑an yö gbɔ ’gbɛɛdhö!› ¹⁵’Dhɔɔdɔmɛ ‑nu ’wo ‑kë ꞊bhɔɔzë ’dhɔɔ dɔ ‑sü ’ka pödhɛ bhë ‑a ’gü, ‑wo ‑dho dɔ ‑a ’ka ꞊gbiin ’ö ’yena ‑wun ’ö ’dhoë‑ kë pö‑ bhë ‑a ’gü ‑mɛ ‑nu ’ka bhë, ’ö‑ ’suö ‑yö ‑da ‑an ’gü. ‑Wo ‑dho ’gbo ‑nu bɔ wo ‑de ꞊maa ’ma ‑sü ’ka ¹⁶‑a pö ‑sü ’ka ꞊nɛɛ: ‹’Öö, ‑më ’yena ‑wun ’ö ꞊nɛ ‑oo; ’yena ‑wun ‑mlë ’ö ‑kë pödhɛ ꞊va ꞊nɛ ‑a ’ka ꞊nɛ ‑oo! ’Ö ’dhu ’ö‑ wo sɔ ’biɔnbiɔn ’puu waa‑ ‑a nuɛazë ’ka, ’ö ’sënng ꞊baa’ ‑pë ‑nu, ‑guö ’yanbhɔsüzë ‑nu, ‑zlɔɔ ‑nu ‑wo ‑kë ‑a ‑bha, ¹⁷’Ö ’lɛlɛ do ’kpaan ’gü, ’ö ꞊bhɔɔpë ‑nu ’wo‑ ‑gɔ ’saadhö bhë, ’ö‑ ’plɛ ’gü ꞊ya ꞊siö ꞊nɛ ꞊a!›

’Dhiö ‑sü ’yitagɔ ’dhasi ‑nu ’ka ‑mɛ waa‑ ö bha ‑dho ’tagümɛ ‑nu, ’yitagɔblümɛ ‑nu waa‑ ’yitagɔgümɛ ‑nu ’wo to ’töüdhö ‑wo ‑dɔ ꞊gbiin, ¹⁸’wo ’kɔ ‑nu ’güö ‑sü ’siɔn ‑ga; ’wo yö ꞊gblaa ’gbla ‑sü ’gü ꞊nɛɛ: ‹Pödhɛ ’ö‑ ꞊suu’‑ dho kë ꞊nɛ pödhɛ ꞊va ’ö ꞊nɛ ‑a ’dhö yaa kë ‑dhö do!› ¹⁹’Wo ‑büö ‑bi ‑nu ‑lo wo ‑gɔ ‑ta, ’wo ’gbo ‑nu bɔ wo ‑de ‑maa ’ma ‑sü ’ka ꞊woë’ ꞊nɛɛ: ‹’Yena ‑wun ‑mü ꞊dhɛ ꞊ɛ! Pödhɛ ꞊va ’ö ꞊nɛ ’ö‑ ‑bha ꞊bhɔɔpë ‑nu bhë ’ö mɛ ‑nu ’wo ’yoo ‑ta ’yitagɔgümɛ ‑nu ’ka ’wo ꞊kaa’ ꞊bhɔɔzë bhë ’yena ‑wun ꞊ya kaa ꞊dhɛ ꞊ɛ! Bhii ’lɛlɛ do ’kpaan ’gü ‑wun ꞊yaa‑ ’plɛ ’gü ꞊siö’‑! ²⁰Dhang‑ ’gü ‑dhɛ, ‑bhö ꞊zuögludhi kë, bhii ‑a ’gü ꞊ya ꞊siö’‑; mɛ ‑nu ’ö ‑Zlan ‑yö ka sü ö ‑bha ’ka, ka ’dhö, ‑Zlan ’dhiwopömɛ ‑nu ’dhö, waa‑ Yesu ‑bha bɔ ‑mɛ ‑nu, ‑ka ꞊zuögludhi kë, bhii ‑Zlan ꞊ya ‑a ‑bha za ’kan, ‑a ‑bha ’wun yaa ’ö‑ ‑kë ka ’ka bhë ‑a ‑wun ’gü. Za ꞊yaa‑ ’kun, ‑a ’klo ꞊ya bhɔ.› »

²¹꞊Dhɛ ꞊ya kë ’dhö, ’ö ‑Zlan ‑bha bɔmɛ do ’gü ’gbeezë ‑yö ‑guö kpö do ’ö‑ ‑ta ‑yö ‑kë ꞊nɛ ’blee‑ ga ‑wüü ‑a ’ka ‑guö kpö do ꞊va ’dhö ‑a sü ’ö‑ ‑zuö ’yoo ꞊bhaa ‑a pö ‑sü ’ka ꞊nɛɛ: «‑Kɔ do gia‑ ’ö ꞊nɛ ’ö Babilɔnë ‑pö ꞊va dho ꞊zong’‑ ‑a ’ka kö ‑a ’gü ‑yaan ꞊siö’‑. ’Ö mɛ gbɛ ’ka ’dho ö ’yan dɔ ‑a ‑bha gbɔ ’gbɛɛdhö. ²²Mɛ gbɛ ’ka ’dho ’tan bho ‑wo ‑nu, kɔng zë ‑wo ‑nu, ‑bhɔng ‑piö ‑wo ‑nu waa‑ ’truu ‑piö ‑wo ‑nu ‑an gbɛ ma ü ꞊plöö gbɔ. Waa ’dho ꞊daan’ ‑yuö ꞊suu’‑ ’oo ꞊suu’‑ kë ‑mɛ gbɛ yö ü ꞊plöö gbɔ. Waa ’dho ’blee‑ ga zɔn ‑drinng ma ü ꞊plöö gbɔ. ²³꞊Labang yaa ’dho yö ü ꞊plöö gbɔ. Waa ’dho dhe ’sü ‑sü ’iin ‑dho gwaan ‑sü ‑drinng ma ü ꞊plöö gbɔ. Ü ‑bha ’dhɔɔdɔmɛ ‑nu ‑wo ‑kë mɛ ’piigbeezë ‑nu ’ka ’kpongtaa, bhii ü ’sɛgümɛ ‑nu ’plɛ ‑püö ü ‑bha ’gina ‑nu kë ‑sü ’ka.

²⁴Babilɔnë ‑dhɛ ’klo ‑yö ‑bhɔ, ’ö tɔɔ ‑dhɛ bhë ꞊nɛ ’ö ’wo ‑Zlan ‑wodhiölomɛ ‑nu waa‑ mɛ ’slööslö ‑nu zë ‑a ‑bha. Mɛ ‑nu ’saadhö ’wo ‑an zë ’kpongtaa, ‑wo ‑an ‑yö mü.»

¹꞊Dhɛ ꞊ya kë ’dhö, ’ö pë ’ö ‑kë ꞊nɛ mɛ gbung ꞊va ’we ‑wo ’dhö ’a‑ ‑ma dhang‑ ’gü, ’ö‑ pö ꞊nɛɛ: «‑Kwa ꞊toëpö ‑Zlan ’tɔ bhɔ! Dhasü, ’tɔbhɔdhe waa‑ ’piigbeedhɛ ‑wo kwa ‑bha ‑Zlan ‑bha ’ka! ²Bhii ‑a ‑bha za ’kan ‑kɔ ‑yö ’wun gia‑ ’ka ’ö ’yö kpengdhö! ’Ö tɔɔ ꞊ya ‑lo ꞊sɔɔnkëdhe ꞊va bhë ‑a tuö. Za ꞊yaa‑ ’kun, yö ’ö ’kpongtaamɛ ’plɛ ‑gɔ ’gü ꞊siö ö ‑bha ꞊sɔɔn kë ‑sü ’ka bhë, ‑Zlan ꞊ya ’klobhɔdhe ‑da ‑a ‑ta. ‑A ’klo ‑bhɔ ‑gɛn ’bhaa ’ö tɔɔ ‑Zlan ‑bha yuökëmɛ ‑nu zë ’ö‑ wo bhë.» ³’Ö ’we ‑wo ’ö ‑kë ꞊nɛ mɛ gbung ‑wo ’dhö bhë ’ö ‑we ’zü ꞊nɛɛ: «‑Kwa ꞊toëpö ‑Zlan ’tɔ bhɔ, bhii pödhɛ ꞊va bhë ‑a ’güö ‑sü ’siɔn ‑yö ‑dho ꞊luu’ ꞊toëpö ’ka!» ⁴’Ö mɛ ziizii ‑nu ’gɔɔ‑ ꞊plɛ ö ga ‑yiisië waa‑ pë ’bhee‑ ‑nu ‑yiisië ’wo bhë ’wo ‑lo wo kpɔn ’gü ‑Zlan ’ö ‑ya ‑sü ’ka ’gɔ ‑gbloo ’gü bhë ‑a ’dhiö ’ö ’wo‑ gba ꞊woë’ ꞊nɛɛ: «Amɛn! ꞊Dhɛ ‑kë ’dhö kö ‑kwa ‑Zlan ’tɔ kë ꞊va!»

’Bhlanë ‑bha dhe ’sü ’wlaan‑

⁵’Yö ‑wo do ‑yö go ’gɔ ‑gbloo ’gü ꞊zian’ ’yö‑ pö: «‑Ka kwa Dë ‑Zlan ’tɔ bhɔ, ka ’saadhö ’ö ’ka‑ ‑bha yuökëmɛ ’ka waa‑ mɛ ‑nu ’ka ‑suö ‑a ‑dhë, ka mɛ ꞊va ’ka ’iin ka ’në ’tee ’ka!» ⁶’Go mü ’ö ’we ‑wo do ’ö bhɔ mɛ gbung ꞊va ’we ‑wo ‑bha ꞊nɛ ’yiga ꞊va ‑nu ‑zuö ‑drinng ’dhö, ’iin ’gbee‑ ’ka ꞊nɛ dha ’we ‑wo ’dhö ’a‑ ma ꞊nɛɛ: «Kwa ‑bha ꞊toëpö ‑Zlan ’tɔ ‑yö kë ꞊va! Bhii kwa Dëmɛ ’ö kwa ‑bha ‑Zlan ’piigbeezë ’ka bhë ‑a ’tɔ ‑yö mɛ ꞊kɔɔn ‑na ‑gludëdhɛ ’gü! ⁷‑Kwa ꞊zuögludhi kë ’sönggö ‑sönggö, ’kwa‑ ’tɔ kë ꞊va. Bhii ’bhlanë ‑bha dhe ’sü ’wlaan‑ yi ꞊ya ‑lo. ‑A ‑bha dhebɔ ꞊ya ö ‑de ꞊baa’‑. ⁸‑Wogbiindhɛ ‑yö ‑nu ‑a ‑dhë, kö ‑yö ö ’dhu sɔ ’piɔnpiɔn, ’bhü ‑sü ’go mü ’ö ’puu ‑a ’ka. Sɔ ’piɔnpiɔn bhë ‑ya ‑zɔn këwun ‑nu kpengdhö ’ö ‑Zlan ‑bha ’sɛgɔgümɛ ‑nu ’dho ‑a kë ‑na bhë ‑a ’ka.» ⁹꞊Dhɛ ꞊ya kë ’pö, ’ö ‑Zlan ‑bha bɔmɛ ‑ya pö n ‑dhë: «‑Bhö ’sëëdhɛ ’sü, ’ü pë ‑ya ꞊woë’ ꞊nɛɛ: ꞊Zuögludhi ‑yö mɛ ‑nu ’wo ‑an ꞊dhɔɔ ‑kë ’bhlanë ‑bha dhe ’sü ’wlaan‑ ‑ta bhë ‑an ‑gɔ.» ’Ö ko ’zü ’ö‑ pö ꞊nɛɛ: «‑Wo bhë, ‑Zlan ‑wo giagia ’ö go ‑a ’dhii yö ‑mü.» ¹⁰’Yö ’a ‑lo n kpɔn ’gü ‑a ꞊gɛɛndhö kö ’aan‑ gba, ’yö‑ pö n ‑dhë: «Dɔ! Kö ꞊kun ’ü‑ ‑kë ’dhö! Yuökëmɛ ‑mü n ’ka ’pö ꞊nɛ ü ’dhö, ü dheglu ’në gɔɔn‑ ‑nu ’ö pë ‑nu ’ö Yesu ‑ya ‑kë bhë ’ö ‑kë ‑an ’yaan ’ö ’wo‑ ‑wun ꞊blɛɛ’‑ ‑mɛ ’ka bhë ka ’dhö. ‑Bhö ‑Zlan gba ꞊zian’!» Bhii pë ’ö ‑kë ‑bin ‑sü ’ka ’ö Yesu ‑ya yö ‑dhɛgbɛadhɛ ’gü bhë ’ö tɔɔ ‑Zuu ’slööslö ’ö ’wun ‑nu dɔ ‑na mɛ ‑nu ’dhii ’ö ’wo ‑Zlan ’dhi ‑wo pö ‑na ‑a ’ka bhë.

‑Ya ꞊soo ’puu ꞊taa ‑mɛ ‑bha ‑to ‑a ’gbee‑ ’ka ‑sü

¹¹꞊Dhɛ ꞊ya kë ’dhö, a dhang‑ ‑yö kö ‑a ’dhi ꞊ya ’po, ’ö ꞊soo ’puu do ‑yö ‑wo. Mɛ ’ö ‑kë ‑ya ‑sü ’ka ‑a ꞊taa bhë ‑a ’tɔ tɔɔ «‑Towotamɛ»; ’ö‑ ’bhaa ‑yö ‑kë ’zü «’Wungiagia» ’ka; ꞊ya za ’kan, ‑ya ‑kan ‑a ’kan ‑kɔ ’ka kpengdhö; ’iin ꞊ya ’ko zë mɛ ’ka, kö ‑ya ‑zë ’wun gia‑ ‑wun ’gü. ¹²‑A ’yan ‑yö ‑kë ’bhü ‑dhiadhö ꞊nɛ ’siö ’dhö. ’Ö ’gɔ ꞊gblaa’ ꞊plëëzë ’dhoë‑ ‑gɔ ‑bha. ’Tɔ do ’ö mɛ gbɛ ’yaa‑ dɔ ‑a ’ke yaa kë yö gia‑ ‑a ’ka ‑yö ‑kë ‑ya ‑sü ’ka ‑a ‑bha. ¹³Gblang ’ö fɛi ‑ya kun ’töüdhö bhë, (yö ꞊nɛ ’ö‑ ‑zɔn zö ꞊nɛ ‑ya ꞊soo ꞊taa ‑mɛ ’ö bhë ꞊ya ’toë‑ ’gbee‑ ’ka ö yaagümɛ ‑nu ‑ta) ‑yö ‑kë ‑a ‑bha. Mɛ bhë ‑a ’tɔ tɔɔ ‑Zlan ‑wo. ¹⁴‑Glu gbung ’wo dhang‑ ’gü ‑wo ‑kë ‑a ’piö; sɔ ’piɔnpiɔn ’puu ’slööslö ‑yö ‑kë ‑an ‑bha ’ö ’wo ‑kë ‑ya ‑sü ’ka ꞊soo ’puu ‑nu ꞊taa. ¹⁵’Ö ‑dhaa ’dhiözë do ’yö dho ’sɛgümɛ ‑nu ’klo bhɔ ‑a ’ka ’yö go ‑a ’dhii. ‑Yö ‑dho ’dhiö sü ‑an ’ka ‑piö ’gblɔɔngblɔn do ’ka; ’yö dho lɛzɛn ‑kpa ‑nu ꞊wüü’‑ lɛzɛn ‑kpa ’yi ‑bho ‑a ’gü ‑pë ’ö ‑Zlan ’piigbeezë ‑bha ‑naazuëdhe ’gblüünzë bhë ‑a ’gü ‑pë ’ka bhë ‑a ’gü. ¹⁶Pë do ’ö ‑kë ‑a ’tɔ ’ka ‑yö ‑kë ‑ya ‑sü ’ka ‑a ‑bha gblang waa‑ ‑a ‑gɛn ‑an ‑bha ꞊nɛɛ: «‑Gludë ‑nu ‑bha ‑Gludë waa‑ dëmɛ ‑nu ‑bha Dëmɛ».

¹⁷’Go mü ’zü ’a ‑Zlan ‑bha bɔmɛ do ’bhaa yö kö ‑yö ‑dɔ ‑sü ’ka lan‑ ’gü. ’Yö ‑gbla ‑wo do ’gbee‑ ’ka ‑ma ‑nu ’wo ‑kë ziö ꞊dhia ‑an ‑dhë ꞊nɛɛ: «‑Ka nu ’ka ’dho ka ’kuëdhö ‑Zlan ‑bha ‑bhöpë ꞊va ’ö ꞊nɛ ‑a ‑ta! ¹⁸‑Ka nu, ’ka ‑gludë ‑nu, ’dhasi ‑nu ‑gɔmɛ ‑nu, ’gü ’gbee‑ ‑mɛ ‑nu, ꞊soo ‑nu waa‑ ö ‑ya ‑a ꞊taa ‑mɛ ‑nu, mɛ ‑nu ’töüdhö ’wo ’gan ’gü ’iin ’waa ’gan ’gü ‑nu, mɛ ꞊vava ‑nu ’iin ’në ’sɛɛn‑ ‑nu ‑an ‑bhö!»

¹⁹’Go mü ’a wü ’dhö, ’kpongtaa ‑gludë ‑nu waa‑ wo ‑bha ‑glu gbung ‑nu yö kö ꞊wa ’dho wo ’ko ꞊bhaa ‑waan ‑glu ‑ya mɛ ’ö ꞊soo ꞊taa bhë waa‑ ö ‑bha ‑glu gbung ‑nu ‑an ‑bha. ²⁰’Kɛɛ mɛ ’ö ‑kë ꞊soo ꞊taa bhë waa‑ ö ‑bha mɛ ‑nu ‑wo ‑to ‑a ’gbee‑ ’ka ‑an ‑ta ’ö wü ’ö bhë ’wo‑ kun ’gan ’ka. Yö ’dhö waa‑ ‑Zlan ‑wodhiölomɛ ꞊suazë ’yö ‑dhidhaapë ‑nu ‑kë wü bhë ‑a ’yan ’dhiö bhë ’wo ‑an kun. ‑Dhidhaapë ‑nu bhë ꞊nɛ ’ö bɔ ‑a ‑ta ’ö mɛ ‑nu ‑püö; ’ö ’wo wü bhë ‑a ‑bha ꞊duakëpë ‑ya ‑an ‑bha; ’ö wü bhë ’ö mɛ ‑nu ‑wa ’bin gba. Wü bhë waa‑ ‑Zlan ‑wodhiölomɛ ꞊suazë bhë ‑wo ‑to ’bhee‑ ’ka ’wo ‑an ‑zuö ’siö kpö ‑ta ‑dhɛ ’ö blɔɔn ’tëë yaazë ’dho ’güö ‑na ‑a ‑bha bhë ‑a ’gü. ²¹’Kɛɛ mɛ ‑nu ’wo to ‑wo ‑ga ‑dhaa ’ö ’go ‑na mɛ ’ö ‑ya ꞊soo ꞊taa bhë ‑a dhiö bhë ‑a ꞊kwaa’; ’ö ‑ma ‑nu ’saadhö ‑wo ‑an ꞊glöö ‑kë wo ‑bha ‑bhöpë ’ka.

¹’Go mü ’zü a ‑Zlan ‑bha bɔmɛ do ‑yö kö ‑yö ’go ‑na dhang‑ ’gü ‑yö ꞊yɔɔ’ ‑na; ‑glu ’kpa ’dhi ꞊va bhë, ‑a ‑yö ‑a ’dhiö ‑pë ꞊lakele waa‑ ꞊yɔɔ’ ‑bhüö ꞊va do ‑wo ‑kë ‑a kwɛɛ. ²’Yö nu ’yö ’gina ’ö ꞊mɛɛ zii ’ka bhë, ’ö‑ kun. ’Gina bhë ꞊nɛ ’ö tɔɔ dü ’wo‑ ‑dhɛ Satan. ’Yö‑ ‑lö ꞊yɔɔ’ ’ka ‑kwɛ ‑vuu do ’piö. ³’Ö ‑Zlan ‑bha bɔmɛ ‑ya ‑zuö ‑glu ’kpa ’dhi ꞊va ’gü, ’yö‑ ’dhi ta, ’ö ö ‑bha ‑wogbiindhɛ ꞊duakëpë to ‑a ‑bha, ‑yö kë ’dhö kö ꞊kun ’ö dho ’sɛgümɛ ‑nu bho zian ‑ta gbɔ ‑yö ’dho ‑yö yöë ‑kwɛ ‑vuu do bhë ‑a ‑lo ‑yi ‑bha. ‑Kwɛ ‑vuu do bhë ꞊ya ‑lo, ‑wo ‑dho wo ꞊kwaa’‑ ‑a ‑zü ’töng pë ’tee ‑bha.

⁴’Go mü ’a ’gɔ ‑gbloo ‑nu yö: Mɛ ‑nu ’wo ‑kë ‑ya ‑sü ’ka ‑a ’gü bhë ‑wo ‑kɔ ‑mɔ ’wuën‑ ‑sü yö kö ‑waan mɛ ‑nu ‑bha za ’kan. Mɛ ‑nu ’wo to ‑piö ꞊kwaa’ Yesu ‑wun ꞊blɛɛ’ ‑sü waa‑ ‑Zlan ‑wo ‑an ‑wun ’gü, ’ö wü ’ö bhë waa‑ ‑a ’bin ’ö waa ‑an gba, ’ö waa ꞊duakëpë gbɛ ‑ya ‑an ‑kpong ’gü ’iin ‑an ‑kɔ ‑nu ‑bha bhë, a ‑an nii ‑yö mü ’pö, ’ö ‑kë ‑a ’gü ‑sü ‑yö nu ‑an ‑dhë, ’ö waa‑ Klito ‑nu ’ö ’wo ‑gludëdhɛ ‑kë ‑kwɛ ‑vuu do bhë ‑a ’piö. ⁵‑Go ga ’gü ‑sü ‑blɛɛzë ꞊nɛ bhë. Gamɛ ‑nu mɛ ’wo to waa ’dho go ga ’gü ’ö dho ’ö yöë ‑kwɛ ‑vuu do bhë ‑a ziö ‑sü ‑bha. ⁶꞊Zuögludhi waa‑ ’dhoë‑ ‑yö ’to mɛ ‑nu ’wo ’dhoë‑ go ga ’gü ‑blɛɛzë ’ka bhë ‑an ‑ta! Ga kë ꞊plɛ ‑naa ‑kɔ ’ka ’dho ‑mɔ ‑an ‑bha gbɔ ’gbɛɛdhö. ‑Wo ‑dho kë ‑Zlan waa‑ Klito ‑an ‑bha slabhomɛ ‑nu ’ka. ‑Wo ‑dho ‑gludëdhɛ kë Klito ’piö ‑kwɛ ‑vuu do bhë ‑a ‑bha.

‑To ‑a ’gbee‑ ’ka Satan ‑ta ‑sü

⁷‑Kwɛ ‑vuu do ’ö bhë ꞊ya ziö, Satan ‑yö ‑dho go ‑kanso ’gü. ⁸‑Yö ‑dho dho ’ö ’sɛgɔgümɛ ‑nu ’wo ‑lo ‑sü ’ka ’sɛ ‑to ’dhö ‑sü ‑ta, ’yö ‑an ‑püö; ’wo tɔɔ Gɔgö waa‑ Magɔgö. ‑Yö ‑dho ‑an ‑dhɛ ’ko ꞊bhaa kö ‑waan ‑glu gɔn; ‑an ‑dho ’kuë‑ ‑sü ‑wo ‑dho kë ꞊va ꞊nɛ ’yënng ‑nu ’dhö ’yoo ’kpong ’dhiö. ⁹‑Wo ꞊yɔɔn ‑na ’sɛ ’pian ’saadhö ‑ta; ‑wo ꞊nië’ ‑na ‑Zlan ‑bha mɛ ‑nu waa‑ ‑a ‑bha pödhɛ ’ö‑ ‑dhɔ ‑ya ‑kë bhë ‑an ‑zü. ’Kɛɛ ’siö ‑yö ‑dho go dhang‑ ’gü, ’yö ‑an ’gü ‑siö. ¹⁰Dü ’yö ‑kë ‑an ‑püö ꞊dhia ‑be bhë, ‑yö ‑dho ‑zuö ’siö ’yipuë waa‑ blɔɔn ’tëë yaazë ‑an ’gü; ‑dhɛ bhë ꞊nɛ ’ö wü waa‑ ‑Zlan ‑wodhiölomɛ ꞊suazë bhë ’ö ꞊wa ‑an ‑zuö ‑a ‑bha ’dhiö ’saadhö. ‑An ’klo ‑dho bhɔ lënng waa‑ gbeng ‑nu ’plɛ ’ka ꞊toëpö ’ka.

Za ‑kaanta dɔ ‑sü

¹¹’Go mü ’ö ’gɔ ‑gbloo ’puu ꞊va waa‑ mɛ ’ö ‑kë ‑ya ‑sü ’ka ‑a ’gü bhë ’a ‑an yö. ’Sɛ waa‑ dhang‑ ‑wo ‑ziö ’wo go ‑a ’dhiö, ’ö mɛ gbɛ yaa ‑an yö gbɔ. ¹²꞊Dhɛ ꞊ya kë ’pö, ’a gamɛ ‑nu, mɛ ꞊vava ‑nu, mɛ ’sɛɛn‑ ‑nu ‑an yö kö ‑wo dɔ ‑sü ’ka ’gɔ ‑gbloo ’dhiö. ’Ö mɛ do ‑yö ’sëëdhɛ ‑be ‑nu ’dhi ‑po. ’Sëëdhɛ ‑be do ’bhaa ‑yö ‑kë mü ’ö ’wo‑ ’dhi po ’pö. Yö ꞊nɛ ’ö tɔɔ ‑kë ‑a ’gü ‑sü ’sëëdhɛ ‑be. ’Ö gamɛ ‑nu ‑bha za ‑yö ‑kan pë ‑nu ’wo‑ ‑kë, ’ö ‑ya ‑sü ’ka ’sëëdhɛ ‑be ‑nu bhë ‑an ’gü bhë ‑a ‑wun ’gü. ¹³’Ö ’yoo ‑yö nu ö ‑bha mɛ ‑nu ’wo to ‑a ꞊bhaa ‑an ’ka za dɔ ‑dhɛ ꞊bhaa mü. ’Ö ga waa‑ ꞊glööbɔɔdhɛ ’wo nu wo ‑bha gamɛ ‑nu ’ka mü ’pö. ’Ö ‑an ‑bha za ‑yö ‑kan pë ‑nu ’wo‑ kë ‑a ‑wun ’gü. ¹⁴꞊Dhɛ ’ö ‑an ‑bha za ꞊ya ’kan, ’wo ga ‑de gia‑ waa‑ ꞊glööbɔɔdhɛ ‑an ‑zuö ’siö ’yipuë ’gü. ’Siö ’yipuë ’gü ‑dhɛ bhë ’ö tɔɔ ga ‑kë ꞊plɛ ‑naa. ¹⁵Mɛ ’oo mɛ ’ö‑ ’tɔ yaa kë ‑ya ‑sü ’ka ‑kë ‑a ’gü ‑sü ’sëëdhɛ ‑be bhë ‑a ’gü, ‑a ‑zuö ’wo‑ wo ’siö ’yipuë bhë ‑a ’gü.

Dhang‑ ‑dëü waa‑ ’sɛ ‑dëü

¹’Go mü ’a dhang‑ ’gü ‑dhɛ ‑dëü waa‑ ’sɛ ‑dëü ‑an yö; kö dhang‑ zii waa‑ ’sɛ zii ’waa ‑dhö gbɔ, kö ’yoo gbɛ ’yaa ‑dhö gbɔ. ²’Ö pödhɛ ’slööslö ’ö Zeluzalɛmë ‑dhɛ ‑dëü ’ka bhë, ’a‑ yö kö ‑yö ’go ‑na ‑Zlan ’piö dhang‑ ’gü ‑yö ꞊yɔɔ’ ‑na kö ꞊ya kë ꞊nɛ pë ’wo‑ pö dhebɔ ’ö ꞊ya ö ’dhu ꞊nɛ ‑dhɛ ’wo pö ‑a ‑bha, ‑a ‑bha ‑dho gwaan ‑yi ‑mü ꞊dɛɛ ‑a ’dhö ‑a ’dhö. ³A ’we ‑wo do ’ö ‑kë ’gbee‑ ’ö go ’gɔ ‑gbloo ’gü ꞊zian’ ’a‑ ma ’yö‑ pö: «Dɔ ’kwa‑ wo zlöö ꞊nɛ bhë, ‑Zlan ‑dho kë mɛ ’bhee‑ ‑nu ’piö, ꞊ya nu mɛ ’bhee‑ ‑nu ziën. ‑Zlan ‑yö ‑dho kë ‑an ’piö, ’wo ‑kë ‑a ‑bha ’sɛgɔgümɛ ‑nu ’ka, ’ö yö gia‑ ’ö ‑kë ‑an ‑bha ‑Zlan ’ka. ⁴‑Yö ‑dho ‑an ’yënng ꞊dhuë’‑. ’Ö ga ‑sü ‑nu, ‑wokpɔdhe ‑nu ’iin ’yënngbhɔdhe ‑nu ‑an gbɛ yaa ’dho kë ‑dhö gbɔ, bhii pë ziizii ‑nu ’wo bhë ꞊wa ziö.»

⁵’Ö mɛ ’ö ‑kë ‑ya ‑sü ’ka ’gɔ ‑gbloo ’gü bhë, ’ö‑ pö: «Dɔ ’kwa‑ wo zlöö ꞊nɛ bhë, ’ma pë ’plɛ kë ‑dëü.» ’Go mü ’yö‑ pö n ‑dhë: «’Wun mɛ ’ö bhë ‑a ‑ya; bhii n ‑wo ‑nu ’wo bhë ‑wo ’wun gia‑ ’ka, ’ö ‑zo ‑yö ‑an ‑bha ‑sü ‑yö ‑an ‑ma kun.» ⁶’Yö‑ pö ’zü: «꞊Ya yën, ma ꞊nɛ ’a tɔɔ Alüfa waa‑ Omɛga; ’a pë ‑blɛɛzë waa‑ pë ’dhiötodhɛ ‑an ’ka. Mɛ ’ö ’yi mü ‑dhɔ ꞊yaa‑ ’kun, a ‑dho ‑a gbaa ‑kë ‑a ’gü ‑yi ’ka ’kpaan. ⁷Mɛ ‑nu ’wo ’dhoë‑ to ‑a ’gbee‑ ’ka, pë ‑nu ’wo dho kë gbaɔ ’ka ’aan‑ kë ‑an ‑dhë ’wo bhë, ’go mü a ‑dho kë ‑an ‑bha ‑Zlan ’ka ‑waan kë n gbö ‑nu ’ka. ⁸꞊Ya ’to mɛ ‑nu ’ö ‑an ‑gɔ ‑ga ’yaa ‑an ’dhiö ‑nu, mɛ ’waa ‑Zlan ‑wo ꞊bhlë ‑ya, mɛ ꞊lɔɔzë ‑nu, mɛzëmɛ ‑nu, ꞊sɔɔnkëmɛ ‑nu, mɛ ‑nu ’wo wo ‑zo ’to ‑na bhë këpë ‑nu ’piö ‑nu, mɛ ‑nu ’wo gbapë ‑nu gba ‑na waa‑ ꞊suamɛ ‑nu ’töüdhö, ‑an ‑bha këdhɛ ‑yö ‑dho kë ’yi ’siö‑ ’puëë ’ö ’siö ’gü ‑dhɛ waa‑ blɔɔn ’tëë yaa ’gü ‑dhɛ ’ö ga kë ꞊plɛ ‑naa ’ka bhë ‑a ’gü.»

Zeluzalɛmë ‑dhɛ ‑dëü

⁹‑Zlan ‑bha bɔmɛ ‑nu ’slaplɛ ’ö ‑Zlan ‑bha ‑wɔ mɛ ‑ta ‑wun ‑kɔɔ ’slaplɛ ’dho ‑an kwɛɛ bhë, ‑a mɛ do ‑yö ‑nu ’yö‑ pö n ‑dhë: «‑Bhö nu ’a ’bhlanë ‑bha ’sü dhe ‑zɔn ü ‑dhë!» ¹⁰’Ö ‑Zlan ‑bha bɔmɛ ‑yö dho n ’ka ‑tɔn do ꞊gbiin tuö ‑Zuu ’slööslö ꞊kwaa’. ’Yö Zeluzalɛmë ‑pö ’slööslö ’yö ‑kë go ꞊dhia dhang‑ ’gü ‑Zlan ’piö bhë ’yö‑ ‑zɔn n ‑dhë. ¹¹‑Yö ‑kë ’bhü ꞊dhia ‑Zlan ‑bha ’tɔbhɔdhe ’ka. Pödhɛ bhë ‑a ’bhü ‑kɔ ‑yö ‑kë ꞊nɛ ‑guö ’yanbhɔsüzë ꞊sɔnng’ ’gbeezë ꞊suu’‑ do ’wo‑ ‑dhɛ ’zasüpë ’kɛɛ ’ö‑ bun ’dhö ’bhlöngbhlöng ‑a ’dhö. ¹²’Ö pë ’ö ‑kë ꞊nɛ böü‑ ’kplong ꞊va ꞊gbiin ’dhö ’ö ꞊nië ‑a ‑zü. ’Ö‑ ’dhi ‑nu ’dho ’gɔɔ‑ do ö ga ꞊plɛ, ’ö ‑Zlan ‑bha bɔmɛ ’gɔɔ‑ do ö ga ꞊plɛ ‑wo wo ‑zo ‑kë ’kɔdhi ‑nu ’wo bhë ‑an ’piö. ’Ö‑ ’dhiö kpong ‑nu ’gɔɔ‑ do ga ꞊plɛ ’wo bhë ’ö Izlaɛlö ’gunng ‑gɔ ’gɔɔ‑ do ga ꞊plɛ ’tɔ ’dho ‑ya ‑sü ’ka ‑an ‑bha ’dhö do do ’ka. ¹³’Kɔdhi ‑yaaga ’ö‑ ’pian ’ö ‑dhö ö ‑a ‑ta. ‑A ‑yaaga ‑wo lan‑ ’go ꞊zian’; ‑a ‑yaaga ‑wo kwa ’pian do ‑gɔ dhuö ꞊zian’, ‑a ‑yaaga ‑wo kwa ’pian do ‑gɔ goo ꞊zian’; ’ö‑ ‑yaaga ’dho lan‑ ‑püö ꞊zian’. ¹⁴Pödhɛ ’kplong bhë, ‑wa ‑gban ‑guö kpö ’gɔɔ‑ do ga ꞊plɛ ‑ta. ’Ö ‑guö ’gɔɔ‑ do ga ꞊plɛ ’wo bhë ’ö ’bhlanë ‑bha bɔmɛ ‑nu ’gɔɔ‑ do ga ꞊plɛ ’tɔ ’dho ‑ya ‑sü ’ka ‑an ‑ta.

¹⁵‑Zlan ‑bha bɔmɛ ’ö ‑kë ’wun ‑blɛɛ n ‑dhë ꞊dhia bhë, ’sënng ’lü ’në ’yö ‑kë pëdanpë ’ka ‑yö ‑kë ‑a kwɛɛ, kö ‑yaan pödhɛ bhë ’dhö, ö ’kɔdhi ‑nu waa‑ ö ’kplong ‑nu daan. ¹⁶Pödhɛ bhë ‑a ’pian ‑yiisië ’wo bhë, ‑wo ‑mɔ wo ’kuë ’kpodhö. ꞊Dhɛ ’ö ‑Zlan ‑bha bɔmɛ ‑ya do dan ö ‑bha ’lü ’në bhë ‑a ’ka, ‑a ’kilong ‑yö ‑kë ‑vuu ꞊plɛ ö ‑ta ꞊plɛ. Pë do bhë ’ö‑ ’ka pödhɛ bhë ‑a ‑bha ’kɔ ‑nu ’pian ’plɛ ’piö. ¹⁷’Yö ‑Zlan ‑bha bɔmɛ ‑yö ’kplong bhë ‑a ‑ta dan. ’Ö‑ ‑ta ꞊duan’ ‑yö ‑kë ’mɛtrë ’gɔɔ‑ ’slaplɛ ga ꞊plɛ. ¹⁸’Kplong ’ö bhë ‑wa ‑dɔ ‑guö ꞊suu’‑ ꞊sɔnng’ ’gbeezë do ’wo‑ ‑dhɛ ’zasüpë bhë ‑a ’ka. Pödhɛ gia‑ ‑de ’gü ‑dhɛ ‑yö ‑kë ’sënng ’bhlöngbhlöng ’ka ꞊nɛ ’vɛdhɛ ’dhö. ¹⁹‑Guö ‑nu ’wo ‑kë ’kplong bhë ‑a ‑gban ‑a ‑ta ‑pë ’ka bhë, ‑guö ‑sɛɛbɔ ‑nu ‑wun ꞊suu’‑ ’gbeezë ‑nu ‑wo ‑kë dɔ ‑sü ’ka ‑a ‑bha. ‑A ‑gɛn ꞊luu’‑ ‑guö ‑blɛɛzë ‑yö ‑kë ‑guö ’wo‑ ‑dhɛ ’zasüpë (’ö ‑gblɛibizë) bhë ‑a ’ka; ‑a kë ꞊plɛ ‑naa ‑yö ‑kë safii, (’ö‑ bun ’dho ’budhazë) ‑a ’ka. ‑A kë ‑yaaga ‑naa tɔɔ agatö, ’ö‑ ’yan ’dho ꞊plëëzë. ‑A kë ‑yiisië ‑naa tɔɔ emelodö. (‑Yö ‑kë ‑gblɛibizë.) ²⁰‑A kë ’sɔɔdhu ‑naa tɔɔ onikusö ’ö‑ ’yan ’dho ꞊plëëzë; ‑a kë ’slado ‑naa (’ö‑ bun ‑yö kë nuɛazë) tɔɔ ’saaduanö. ‑A kë ’slaplɛ ‑naa tɔɔ klizolitö ’ö‑ bun ‑yö ‑kë ꞊nɛ zën ’dhö; ‑a ’slɛaga ‑naa tɔɔ belilö (’ö‑ ’bhaa ‑nu bun ‑yö bhɔ ’budha ‑bha ’iin ‑gblɛibi ‑bha). ‑A ’sɛisië ‑naa tɔɔ topazë (’ö‑ bun ‑yö ‑kë ꞊nɛ ’siö ’dhö). ‑A ’gɔɔ‑ do ‑na tɔɔ klizoplazë (’ö‑ bun ‑yö ‑kë ’puu ‑gblɛibizë). ‑A ’gɔɔ‑ do ga do ‑naa tɔɔ tuukwaazë (‑yö ‑kë ’budhazë); ‑a ’gɔɔ‑ do ga ꞊plɛ ‑naa (bun ‑yö nuɛazë ꞊nɛ dha ‑bhüö ‑dhɛ nuɛazë ’dhö) ’wo‑ ‑dhɛ ametisö. ²¹’Kwɛɛ ’dhi ’gɔɔ‑ do ga ꞊plɛ ’wo bhë ’wo tɔɔ ‑zlɔɔga ‑nu ’gɔɔ‑ do ga ꞊plɛ. Kpong ‑nu ’wo ’dhö bhë ‑a do ‑yö ‑kë ‑zlɔɔga ‑nu ’wo bhë ‑a do ’ka; ‑kpinngga ’ö plöö mü ‑a ‑ta dhuö ‑dhɛ ‑yö kë ’sënng ’puu ’ka; ’yö ‑kë ’bhlöngbhlöng ꞊nɛ ’vɛdhɛ ’dhö.

²²N ’ka ‑Zlan ‑gba ‑a ’gü ‑kɔ gbɛ yö pödhɛ bhë ‑a ’gü, bhii kwa Dëmɛ ‑Zlan ’piigbeezë waa‑ ’bhlanë ‑wo ‑dhɛ bhë ‑a ‑bha. ²³Pödhɛ ‑bha ‑wun ’yaa lan‑ ’iin ’su ‑an ‑bha kö ‑waan ’bhü ‑a ‑ta, bhii ‑Zlan ‑bha ’tɔbhɔdhe ‑yö ‑bhü ‑a ‑ta, ’ö ’bhlanë ’dho ‑a ‑bha ꞊labang ’ka. ²⁴’Sɛgümɛ ‑nu ‑wo ‑dho ’ta sü ‑a ‑bha ‑dhɛpuudhɛ ’gü, ’ö ’kpongtaa ‑gludë ‑nu ‑wo nu wo ‑bha ꞊bhɔɔpë ‑nu ’ka. ²⁵Pödhɛ ’kɔdhi ‑nu ‑wo ‑dho to ’po ‑sü ’ka. ‑An ’dhi ’ka ’dho ta, bhii ’bin ’më ‑sü yaa ’dho kë mü. ²⁶’Kpongtaamɛ ‑nu ‑wo ‑dho nu wo ‑bha ꞊bhɔɔpë waa‑ ꞊bhlëyadhe ‑an ’ka mü. ²⁷’Kɛɛ pë ‑dhuuzë gbɛ ’ka ’dhö ‑da pödhɛ bhë ‑a ’gü, ’iin mɛ ’ö‑ këpë ‑nu ‑wo ‑kë pë ꞊lɔɔzë waa‑ ꞊sua ‑wun ꞊blɛɛ’ ‑sü ‑an ’ka, wo ’ka ’dho ‑da mü ’pö. Mɛ ‑nu ’wo dho ‑da mü, ’wo tɔɔ mɛ ‑nu ’ö ‑an ’tɔ ’dho ‑ya ‑sü ’ka ’bhlanë ‑bha ’sëëdhɛ ‑be ’ö ‑kë ‑a ’gü ‑sü ’sëëdhɛ ‑be ’ka bhë ‑a ’gü.

¹‑Kë ‑a ’gü ’yiga ’ö ’bhlöngbhlöng ꞊nɛ pë ’wo ’vɛdhɛ kë ‑na ‑a ’ka ꞊nɛ ‑a ’dhö bhë, ‑Zlan ‑bha bɔmɛ ‑ya ‑zɔn n ‑dhë. ‑Yö ‑kë ’go ꞊dhia ‑Zlan waa‑ ’bhlanë ‑an ‑bha ’gɔ ‑gbloo ’gü. ²’Yiga bhë ‑yö ‑kë ziö ꞊dhia ‑kpinngga ’ö pö‑ ziën bhë ‑a ’piö. ‑Kë ‑a ’gü ‑lü ‑nu ‑wo ‑kë dɔ ‑sü ’ka ‑a ’kpong ’dhiö mü. ‑An bhɛ ‑nu ‑wo ‑ya ‑gwaa ’gɔɔ‑ do ga ꞊plɛzë ‑kwɛ do ’gü. ’Su ’saadhö ’ka, ‑an bhɛ ‑nu ‑wo ‑kë. ‑A ’dhɛ ‑nu ’wo bhë ꞊nɛ ’wo ’sɛgümɛ ‑nu ‑dhɛ bo. ³‑Zlan ’ka ’dho ’dhangga ‑ya pë gbɛ ‑bha gbɔ.

‑Zlan waa‑ ’bhlanë ‑an ‑bha ’gɔ ‑gbloo ‑wo ‑dho kë pödhɛ bhë ‑a ‑bha, ’ö ‑Zlan ‑bha yuökëmɛ ‑nu ’wo dho ‑a gba. ⁴‑Wo ‑dho wo ’yan dɔ ‑a ‑bha; ’ö ‑a ’tɔ dhö kë ‑ya ‑sü ’ka ‑an ‑kpong ’gü. ⁵’Bin ‑bha ’më ‑sü gbɛ ’ka ’dho kë mü, ’ö ‑an ‑bha ‑wun gbɛ ’ka ’dho kë ꞊labang ‑bha ‑dhɛpuudhɛ ‑bha ’iin lan‑ ‑bha ‑dhɛpuudhɛ ‑bha, bhii ’ö tɔɔ kwa Dëmɛ ‑Zlan ‑yö ‑dho ö ‑bha ‑dhɛpuudhɛ bhü ‑an ‑ta, ’ö ’wo dho ‑gludëdhɛ kë ꞊toëpö ’ka.

Yesu ‑bha nu ‑sü

⁶’Go mü ’ö ‑Zlan ‑bha bɔmɛ ‑ya pö n ‑dhë: «’Wun ‑nu ’wo bhë ‑wo ’wun gia‑ ’ka ’ö ‑an ‑dhɛ ’wun gia‑ ‑sü ‑ya ‑ma kun. Dëmɛ ‑Zlan ’ö ꞊ya kë ’ö ö ‑bha ‑Zuu ‑ya ö ‑wodhiölomɛ ‑nu ’gü ꞊nɛ ‑yö ö ‑bha bɔmɛ ‑bɔ kö pë ‑nu ’wo nu ‑na bhë, ‑yaan ‑a ‑zɔn ö ‑bha yuökëmɛ ‑nu ‑dhë.»

⁷Yesu ‑ya ‑pö: «‑Bhö ü ’to ’to! A nu ‑na; ꞊zuögludhi ‑yö mɛ ’ö ‑Zlan ’dhi ‑wo ’ö go ’sëëdhɛ ꞊nɛ ‑a ’gü ‑a ꞊bhlë ‑ya bhë ‑a ‑gɔ.»

⁸Ma Zan ‑mɛ, ‑wo ‑nu ’wo ꞊nɛ ’a ‑an ‑ma, ’ö pë ‑nu ’wo ꞊nɛ ’a ‑an yö. ꞊Dhɛ ’ma yën ‑a ‑bha, ’a ‑lo n kpɔn ’gü ‑Zlan ‑bha bɔmɛ ’ö pë ‑nu ’wo ꞊nɛ ’ö‑ ‑zɔn n ‑dhë bhë ‑a ꞊gɛɛndhö kö ’aan‑ gba. ⁹’Yö‑ pö n ‑dhë: «Kö ꞊kun ’ü‑ ‑kë ’dhö! A ‑Zlan ‑bha yuökëmɛ ’ka ꞊nɛ ü ’dhö, ü dheglu ‑nu ’wo ‑Zlan ‑wodhiölomɛ ’ka ‑nu waa‑ mɛ ‑nu ’wo ‑wo ’ö ’sëëdhɛ ‑be ’ö ꞊nɛ ‑a ’gü ’wo‑ ꞊bhlë ‑ya ‑nu, ka ’dhö. ‑Bhö ‑Zlan gba ꞊zian’!» ¹⁰’Go mü ’yö‑ pö n ‑dhë: «Kö ꞊kun ’ö ‑Zlan ’dhi ‑wo ’ö ‑ya ‑sü ’ka ’sëëdhɛ ‑be ꞊nɛ ‑a ’gü bhë ’ü‑ ‑bin, bhii ’töng ’yö ‑ya pë ‑nu ’wo ꞊nɛ ‑an ‑bha kë ‑yi ’ka bhë ꞊ya yö ꞊klöö’. ¹¹Mɛ ’ö‑ këwun ’dho ya, ‑yö ’wun yaa kë ‑yö dhoë ’dhiö; mɛ ’ö ö ‑de kun ya, ‑yö ‑de ‑kun yaa kë ‑yö dhoë ö ’dhiö; mɛ ’ö‑ këwun ’dho ‑së ‑yö ’wun ‑së kë, ‑yö dhoë ’dhiö, mɛ ’ö ’slööslö ‑yö ’dho ‑kë ’slööslö ‑sü ’ka ’dhiö.»

¹²Yesu ‑ya ‑pö: «‑Bhö ü ’to to! A nu ‑na! A ‑dho nu ma mɛ ‑nu ꞊saan’ ’ka; ’a dho ‑a dan mɛ ’ö ‑dhö ‑a këpë ‑nu ꞊tian’ ’a‑ nu ‑a ‑dhë. ¹³Ma ꞊nɛ ’a tɔɔ Alüfa waa‑ Omɛga; a pë ’plɛ züdɔdhɛ waa‑ ‑a ’dhiötodhɛ ‑an ’ka.»

¹⁴꞊Zuögludhi ‑yö kë mɛ ‑nu ’wo wo ‑bha gblang ‑zlu, ’ö ‑an ꞊dua’ ’dho ‑mü kö ‑waan ‑da pödhɛ bhë ‑a ’kɔdhi gia‑ ‑bha ‑waan ‑kë ‑a ’gü ‑sü ‑lü bhɛ ’ö bhë ‑a ‑bhö ‑an ‑gɔ. ¹⁵’Kɛɛ pö‑ ꞊taa ‑bha ‑dhɛ bhë ’ö tɔɔ mɛ ꞊lɔɔzë ‑nu, mɛ ‑nu ’wo to ’gina kë ‑sü ‑nu ’piö ‑nu, ꞊sɔɔnkëmɛ ‑nu, mɛzëmɛ ‑nu, ‑gbapë gbamɛ ‑nu waa‑ mɛ ‑nu ’wo ꞊sua ‑kë wo ‑wo waa‑ wo kë ‑kɔ ‑nu ’ka ‑nu ‑an ’plɛ ‑an ’to ‑dhɛ.

¹⁶«Ma Yesu ‑mɛ, ’a ma bɔmɛ ‑bɔ ka ‑dhë kö ‑yaan pë ‑nu ’wo ꞊nɛ ‑an ꞊blɛɛ’‑ n ‑wun ‑dhɛ ’wun gia‑ ‑mɛ ‑nu ‑dho ’kuë‑ ‑sü ‑nu ‑dhë. A Davidö ꞊suu’‑ ‑ta ’gü ‑mɛ ’ka; a ’susongga ’yö bhü ‑dhiadhiö ‑a ’ka.»

¹⁷‑Zuu ’slööslö waa‑ ’sü dhe ‑wa ‑pö: «‑Bhö nu!» ’Ö mɛ ’ö ꞊ya ‑an ‑wo ma, ‑ya pö ’pö: «‑Bhö nu!» Mɛ ’ö ’yi mü ‑dhɔ ꞊yaa‑ ’kun ‑yö nu; mɛ ’ö ‑kë ‑a ’gü ‑yi ’piö ‑yö ‑dho nu ‑a ‑dhë ’kpaan.

’Wun ‑gɔ dɔ ‑dhɛ

¹⁸Ma Zan ‑mɛ, a‑ ‑pö ka ‑dhë ‑yö sia‑ ‑sü ’ka mɛ ‑nu ’töüdhö ’ö ‑Zlan ’dhi ‑wo ’ö ’sëëdhɛ ‑be ’ö ꞊nɛ ‑a ’gü ’ka‑ ma ka ‑dhë ꞊nɛɛ: Mɛ ’ö ’dhoë‑ ’wun ’bhaa ‑zuö ’sëëdhɛ ‑be ’ö ꞊nɛ ‑a ‑ta, ‑Zlan ‑yö ‑dho ’klobhɔdhe ’ö‑ ‑wun ’dho ‑ya ‑sü ’ka ’sëëdhɛ ‑be ’ö ꞊nɛ ‑a ’gü bhë ‑a ’bhaa ‑da ‑a ‑bha ’klobhɔdhe ‑ta. ¹⁹’Ö mɛ ꞊ya ’wun ’bhaa bho ‑Zlan ’dhi ‑wo ’ö ‑ya ‑sü ’ka ’sëëdhɛ ‑be ’ö ꞊nɛ ‑a ’gü bhë ‑a ‑ta ’pö, ‑Zlan ‑yö ‑dho ‑a ‑bha ‑kë ‑a ’gü ‑lü bhɛ sü, ’yö‑ bho pödhɛ ’slööslö ’ö‑ ‑wun ‑yö ꞊blɛɛ ‑a ‑bha ’sëëdhɛ ’ö ꞊nɛ ‑a ’gü bhë ‑a ’gü.

²⁰Mɛ ’ö pë ‑nu ’wo ‑ya zö ꞊nɛ ’ö ‑gban ‑a ‑bha bhë ‑ya pö: «꞊Ii‑, a nu ‑na!»

‑Yö kë ꞊nɛ ‑kɔ bhë ‑a ’dhö! ‑Bhö nu Dëmɛ Yesu!

²¹Kwa Dëmɛ Yesu ‑yö ’glusë kë ka ’saadhö ka ’ka! Amɛn!