Filipö

’Sëëdhɛ ’ö Pɔlö ‑ya bɔ

Yesu ‑wun ‑dhɛ ’wun gia‑ ‑mɛ ‑nu ’wo

Filipö

plöö ‑an ‑dhë bhë ’ö ꞊nɛ

¹Ma Pɔlö, ’ö yië‑ Timote ’yi ‑kë Yesu Klito ‑bha yuökëmɛ ’ka bhë, ’ö ’sëëdhɛ ꞊nɛ ’yi‑ bɔ ‑Zlan ‑bha mɛ ‑nu ’saadhö ’ka Filipö plöö, ’ka ‑klu ‑sü ’ka Yesu Klito ‑bha bhë ka ‑dhë. Yi‑ ‑bɔ ’pö mɛ ’ka ‑kë ‑Zlan ‑bha yuökëmɛ ꞊va ‑nu ’ka waa‑ ‑zo ‑kë ‑Zlan ‑bha ’kɔ ’piö ‑mɛ ‑nu ’ka ka ‑dhë. ²‑Zlan ’ö kwa Dë ’ka, waa‑ kwa ꞊kɔɔnmɛ Yesu Klito, ‑wo ’glusë kë ka ’ka, ‑wo ꞊zuöyagluu nu ka ‑dhë!

Pɔlö ‑bha ꞊bhɛa’‑ ’ö‑ wo ‑Zlan ‑bha mɛ ‑nu ’wo Filipö plöö ‑an ‑wun ’gü bhë ’ö ꞊nɛ

^3-5’Ma n ‑zo ’ta, ‑nu mɛ ‑dhë ‑kɔ ꞊suu’‑ ’ö ’kaa‑ wo n ‑dhë ‑Zlan ‑wo ꞊blɛɛ’ ‑sü ’gü ’ö goë ‑a zü dɔ ‑sü ‑bha ’ö yöë ꞊dɛɛ ‑bha bhë ‑a ‑wun ’gü, a ‑Zlan zuö ‑pö. ꞊Ya kë a ꞊bhɛa’ ‑na ka ’saadhö ka ‑wun ’gü, a‑ ‑wo ꞊zuögludhi ’ka. ⁶A‑ ꞊dɔa’ gia‑ ’ka ꞊nɛ, ‑Zlan ’ö yuö ‑së zü dɔ ka ꞊zuö’ ’gü bhë, ‑yö ‑dho dhoë ’dhiö ‑kplawo, ‑yaan ‑a ’dhiö ’to Yesu Klito ‑bha ‑yɛ ’zü ‑yi ’ka.

⁷꞊Yö ‑së ’ka kö ‑zotadhe ꞊suu’‑ ’ö bhë ‑yö kë n ‑gɔ, ka ’saadhö ka buëndhö. Bhii ka ‑dhɔ ‑yö n ‑kë ꞊duö. ’Ö tɔɔ ’glusë ’ö ‑Zlan ‑ya ‑kë n ’ka bhë, ꞊yaa‑ kë mɛ ’plɛ kwa ’ka. ꞊Dhɛ ’ö waa n ‑da ‑kanso ’gü ꞊kun, a ‑Zlan ‑wo ‑ta ‑za ‑dɔ kö ’aan‑ ‑zɔn mɛ ‑nu ‑dhë ꞊nɛ ‑Zlan ‑wo ‑yö ’wun gia‑ ’ka. ‑A ‑bha ’glusë bhë, ‑ya ‑kë kwa ’ka ‑kplawo, ’ö dho ’ö yöë ma ‑kë ‑kanso ’gü ‑sü ’ö ꞊nɛ ‑a ‑bha. ⁸‑Dhɔ ’ö go Yesu Klito ’piö ‑a ‑wun ’gü, ka ’plɛ, ka ‑wun ‑yö n ‑gɔ ’gbee‑ ꞊duö. ‑Zlan ‑ya ꞊dɔa’ ꞊nɛ ’ma‑ pö ’dhö kö ’wun gia‑ ꞊nɛ ’a‑ ꞊blɛɛ.

⁹Ma ꞊bhɛa’ ‑wo ’ö ‑Zlan ‑dhë ka ‑wun ’gü ’yö ꞊nɛ: A‑ ‑dhɛ ‑a ‑gɔ kö ‑Zlan ‑dhɔ waa‑ mɛ ’bhee‑ ‑nu ‑dhɔ ’ö ka ’gü bhë ‑yö ꞊kpɛa’‑, ‑yö ’dho ’dhiö ‑kplawo, ’wun ‑nu ’wo kpengdhö ‑an dɔ ‑sü, waa‑ ‑an ‑gɛn ‑ma kpinngdhö ‑sü ’ka. ¹⁰‑Yö kë ’dhö kö ’kaan‑ ’wun ‑së waa‑ ’wun yaa ‑an dɔ kö ’kaan‑ ‑a ‑së ‑zë kë. ‑Yö kë ’dhö kö ꞊kun ’ö mɛ gbɛ dho ’wun yaa yö ka ‑bha, Klito ‑bha nu ‑yi ’ka. ¹¹꞊Ya kë ’pö, ’wun kpengdhö kë ‑sü ’ö go Yesu Klito ’piö ‑yö ‑dho kë ka ‑bha ‑tosiadhe ’gü; kö ka këwun ‑nu ’wo bhë, mɛ ‑nu ꞊wa ‑kpën ‑a ‑bha, ‑waan ‑Zlan ’tɔ kë ꞊va. ’Go mü ’zü ‑waan ’dhuë‑ ’kpɔ ‑a ’tɔ ‑bha.

Yesu ’ö tɔɔ ‑kë ‑a ’gü ‑sü

¹²N dhegluzë ‑nu, a‑ ’piö kö ’ka‑ dɔa ꞊nɛ, ’wun ’gbee‑ ‑nu ’wo ‑kë n ’ka bhë yaa ‑Zlan ‑wo ꞊gbaannu ’kɛɛ ‑a kë ’ö‑ wo ’ö dho ’dhiö ꞊zian’. ¹³‑Kɔ bhë ‑a ’ka, ’ö ’yan ‑to ‑gludë ‑bha ’kɔ ‑bha ‑mɛ ‑nu ’wo zö waa‑ mɛ ‑dhɛ ‑nu ’wo to ’pö ’wo‑ ꞊tɛi’ dɔa ꞊nɛ yuö ’a‑ kë ‑na Klito ‑dhë bhë ‑a ‑wun ꞊nɛ ’wo n ‑da ‑a ‑dhë ‑kanso ’gü bhë. ¹⁴N ‑ma ‑kë ‑kanso ’gü ‑sü bhë, ‑ya ‑kë ’ö dhegluzë ‑nu ꞊plëëzë ’ö ’wo ‑klu ‑sü ’ka kwa Dëmɛ ‑bha ’ö ‑an ‑zo ‑yö ‑gban; ’ö ’wo ‑Zlan ‑wo ꞊blɛɛ ꞊faan’ ’ka mɛ ‑nu ‑dhë.

^15-17꞊Ii‑, ‑yö ’dhö! Mɛ ’bhaa ‑nu ‑wo Klito ‑wun ‑blɛɛ ꞊gluɛng’ ’ka n buëndhö, ‑yö kë ’dhö kö ‑wo mɛ ‑nu dɔ ‑gbɔudhö. Bhii ’waa Klito ‑wun ꞊blɛɛ’‑ ꞊zuö’ ’puu ’ka; ‑wa ‑kë pë ‑ta ꞊kɔɔ’ ‑sü ’ka ꞊zian’. N ‑ma ‑kë ‑kanso ’gü ‑sü bhë ‑yö ‑kë ‑an ‑zo ’piö ꞊nɛ ’wa‑ kë ’dhö kö ’wa ma ’klobhɔdhe ꞊taɔ’ kë. Mɛ ’bhaa ‑nu ‑wo wo ‑bha Klito ‑wun ‑blɛɛ wo ꞊zuö’ ’puu ’ka. Bhii ‑a ‑gɛn ’ö tɔɔ ‑wo n ‑dhɔ ‑kë ’ö ’wo‑ ꞊tɛi’ dɔ ꞊nɛ ‑Zlan ꞊ya yuö ’ö ‑kë ö ‑wo ‑ta ‑ko zë ‑sü ’ka bhë ꞊yaa‑ nu n ‑dhë.

¹⁸’Kɛɛ pë ‑nu ’wo ’dhö bhë ’waa n ’gü pë gbɛ ’ka. ’Kö ‑kë ꞊nɛ ‑wa ‑kë wo ꞊zuö’ ’puu ‑bha oo waa‑ kë ‑a ‑bha oo, n ’gludhi ‑sü ‑mü; ’ö ma ꞊zuögludhi bhë ’ö dho dho ’dhiö ‑kplawo, ’ö tɔɔ Klito ‑wun ‑yö ꞊blɛɛ’ ‑sü ’gü ‑kplawo. ¹⁹Bhii a‑ ꞊tɛi’ dɔ ꞊nɛ, ’wun ‑nu ’wo bhë ‑an ’dhiötodhɛ ‑yö ‑dho kë ‑së n ‑ma ’ka, ka ‑bha ‑bhɛa n ‑wun ’gü ‑sü waa‑ Yesu Klito ‑bha ‑Zuu ‑bha ‑dɔ n ‑gban ‑gɔ ‑sü ‑wun ’gü. ²⁰Bhii a‑ ‑dɔ gia‑ ’ka ꞊nɛ, n ꞊dua’ ’yaa ‑mü kö ’aan‑ kë ꞊nɛ mɛ ’ö lë‑ dho ’kpɔ ‑a ‑ta ‑a ’dhö. Pë ’ö dho kë zlöö ‑kplawo ’ö tɔɔ: ‑Zo ‑gban ‑sü ’yö dho kë n ‑gɔ kö ’aan‑ Klito ‑bha ‑kë ꞊va ‑sü ’tɔ bhɔ n ꞊zuö’ ’plɛ ’ka ma ga ‑sü ’iin ma ‑këdhösü ‑an ’gü. ²¹Bhii n ‑ma ’ka, ‑këdhösü ’ö tɔɔ Klito, ga ‑sü ’ö tɔɔ n ꞊truën.

²²꞊Ya kë ꞊nɛ ’ma ’to ꞊kun ’sia‑ zö, a ‑dho yuö ‑së kë; ’ö ꞊ya kë ’zü ꞊nɛ ’ma ga, a ‑dho n ꞊truën yö ‑Zlan ’piö. ’Wun ꞊plɛ ’wo bhë ‑wo n ’gan ‑na zian ꞊plɛ ’ka, ²³’ma dɔ ‑a ’gü ‑gbɔudhö. ’Kɛɛ ’ma ‑dhɛ ‑ga ‑a ’gü ’sengdhö, ‑yö ‑dho kë ‑së kö ’aan‑ ’go ’kpongtaa kö ’aan‑ kë ‑a ’gü Klito ’piö. ²⁴’Kɛɛ ka ‑wun ’gü ꞊yö ‑së ꞊duö kö ’a ‑tosiadhe kë ka ’piö ’a dho ‑a ’ka ’dhiö.

²⁵꞊Dhɛ ’ö ‑kë ꞊nɛ a‑ ꞊dua’ ’dhö gia‑ wo, ’ö ’go mü ’a‑ ꞊tɛi’ dɔ ꞊nɛ a ‑dho dho ma ‑tosiadhe kë ‑sü ’ka ’dhiö, a ‑dho kë ka ’saadhö ka ’piö kö ’aan‑ nu ka ‑dhë, kö ka ‑bha ‑zo ‑yö ‑Zlan ‑bha ‑sü ‑yaan kë ꞊va kö ka ‑bha ’gludhi ‑yaan ’dho ’dhiö.

²⁶꞊Ya kë ꞊nɛ ’ma kë ‑dëüwo ’zü ka ’piö, ka ‑dho kë ’gɔugɔ ’zü ꞊duö n ‑wun ’gü Yesu Klito ’gü.

²⁷’Wun ‑nu ’wo ’dhö ’töüdhö bhë, ‑a ‑dhɛ ’ö ’gianzë ’ö tɔɔ kö ka ꞊sɔɔn ‑yö kë ‑së ꞊nɛ ‑kɔ ’ö Klito ‑bha ’wuntaɔsë ‑ya ꞊blɛɛ ‑a ’ka bhë ‑a ’dhö. ꞊Ya kë ’dhö, ’kö ‑kë ꞊nɛ a ‑nu ka ’piö oo, n ’ka nu oo, a‑ ’piö kö ’a‑ ma ꞊nɛ ka dɔ ‑sü ’ka kpinngdhö, ’ö ka ‑bha ‑zotadhe ’dhö do, ’ö ka ꞊zuö’ ꞊ya kë do ‑zotëndhe ’ö ‑Zlan ‑ya nu ’ö bɔ ‑a ’ka ’wuntaɔsë ‑ta ‑a ’gü. ꞊Ya kë ’dhö kö ’kaan‑ ‑a ‑ta ‑ko zë ’wuntaɔsë yaagümɛ ‑nu ’ka.

²⁸Kö ꞊kun ’ka ‑suö mɛ ‑nu ’wo ka yaagümɛ ‑nu ’ka ‑Zlan ‑wo ‑wun ’gü bhë ‑an ‑dhë pë gbɛ ‑wun ’gü ’gbɛɛdhö! Bhii ꞊ya kë ’dhö, ‑yö ‑dho kë ‑an ‑bha ꞊duakëpë ’ka, yö ꞊nɛ ’yö dho ‑a ‑zɔn ‑an ‑dhë ꞊nɛ ‑Zlan ‑dho ‑an ’gü ꞊siö’‑, ’iin kö ‑waan ‑a ꞊dua’ ’zü ꞊nɛ, ka ‑dho dha. ’Wun ‑nu ’wo bhë ‑wo ‑go ‑Zlan ’piö. ²⁹Bhii ‑Zlan ꞊ya ’glusë kë ka ’ka; ’ka Klito ‑wun ‑dhɛ ’wun gia‑. ’Ö ’glusë do ’ö bhë ’ö‑ ‑kë ’zü ’ö ka ’klo ‑yö bhɔ Klito ’tɔ ‑wun ’gü. ³⁰Zlöö ꞊nɛ bhë ’ka nu n ‑dhë kö ’kwaan‑ ‑glu gɔn ‑Zlan yaagümɛ ‑nu ’ka. ‑Glu do ’ö ’ka n yö kö a‑ gɔn ‑na ’dhiö ‑be, ’ö ’ka‑ dɔa ꞊nɛ a ’dho ‑na ‑a ’ka ’dhiö ‑kplawo bhë, yö ‑mü.

Klito ‑bha ö ‑de ꞊yɔɔn sia‑ ‑sü waa‑ ‑a ‑gɔ ‑bha ꞊luu’ ‑sü

¹’Go ka ‑bha ‑klu Klito ‑bha ‑yi ‑bha ’ö yöë ꞊dɛɛ ‑bha, Klito ‑yö ka ꞊faan’ ‑më, ’ö‑ ‑bha ‑dhɔ bhë ’ö ka ’yënng ꞊dhuë’. ’Go mü ’zü ’ö ’ka ‑klu ‑sü ’ka ‑Zlan ‑bha ‑Zuu ’slööslö ‑bha. ’Ö ’ka‑ ‑dhɔ ‑kë ka ’kuë ’ö ’ka ka ’ko ‑nu ’yena ‑yö wo.

²꞊Dhɛ ‑kë ’dhö, a‑ ‑dhɛ ka ‑gɔ, kö ’ka n ꞊zuö’ ’glu dhi ö ’plɛ ’ka, ka ‑wo ‑kë do ‑sü, ka ‑bha ‑dhɔ ‑kë ’kuë ‑sü, ka ‑bha ꞊zuö’ ‑kë do ‑sü waa‑ ka ‑bha ‑zotadhe ‑kë do ‑sü ‑an ’plɛ ’ka. ³Kö ꞊kun ’ka pë gbɛ ‑kë pë ‑ta ꞊kɔɔ’ ‑sü waa‑ ‑de ‑sü ꞊va ‑sü ‑an ’ka! ‑Ka ka ‑de ’sü ’tee ka ’ko ‑nu ‑dhë! Mɛ ’ö ‑dhö ‑yö mɛ ’wo to ‑yö ‑an ’sü ’gianzë ö ‑de ‑bha! ⁴Kö ꞊kun ’ö mɛ gbɛ ‑yö ö ‑de ’sloo ö ꞊truën ꞊mɛɛ, ’kɛɛ ‑ka ka ‑zo ’ta ’pö, mɛ ‑nu ’wo to ‑an ‑wun ’gü!

⁵Ka ‑bha ’wun kë ‑kɔ ‑nu ’ö do do ’ka ka ’ko ’piö, ‑yö bhɔ Yesu Klito ‑bha ’wun kë ‑kɔ ‑bha, ’ö tɔɔ: ⁶Kö ‑yaan ꞊tun nu ‑sü ‑bha ’kpongtaa, ‑kɔ do ’ö ‑Zlan ’dhoë‑ ’ka bhë ꞊nɛ ’ö‑ ’ka ’pö. ’Kɛɛ yaa‑ ꞊mɛɛ’ kö waa‑ ‑Zlan ’wo ‑mɔ wo ’kuë. ⁷Pë ’ö‑ ‑kë ꞊zian’ ’ö tɔɔ: ‑Yö ö ‑kwaa ö ‑bha pë ‑nu ’plɛ ‑wun ‑zü, ’ö ö ‑de ‑kë ꞊nua ’ka. ’Go mü ’zü ’ö ö ‑de ‑kë ꞊nɛ mɛ ’bhee‑ ’dhö. ‑A ‑bha ‑kë mɛ ’bhee‑ ’ka ‑sü bhë, ⁸‑yö ‑we ‑a ‑bha ’ö ö ‑de ꞊yɔɔn sia‑, ’ö ‑kë ’wun ‑ma ‑Zlan ‑ta ‑mɛ ’ka ö këwun ’saadhö ’gü, ’ö ‑we ‑a ‑bha kö mɛ ‑nu ‑waan zë. Ga ’ö‑ wo ’dhö bhë yaa kë ga ’kpaan ’ka ’kɛɛ ‑yö ‑kë ‑ga ‑gaatalü ‑bha ‑sü ’ö ga lëzë ’ka bhë ‑a ’ka. ⁹Pë ’ö ‑kë ’ö ‑Zlan ‑ya bho ga ’gü ’ö‑ ꞊luu dhang‑ ’gü, ’ö‑ ‑ya ’gɔ ‑gbloo ’gü ’ö‑ gbaa ’tɔ ’ö ’gianzë ’ö ꞊zië’ ’tɔ ’plɛ ‑ta ‑a ’ka bhë ’ö bhë. ¹⁰꞊Ya kë ’dhö kö ’të ‑pë ’saadhö ’wo dhang‑ ‑nu ’gü, ’wo ’sɛ ‑ta, ’wo ’sɛ ꞊löö, kö ‑wo wo ‑gɔ ꞊yɔɔ’‑ Yesu ’dhiö ‑a ꞊bhlë ’kpɔ ‑sü ’ka, ¹¹kö ‑an ’plɛ ‑waan pö ‑a Dë ‑Zlan ’tɔ bhɔ ‑sü ’ka, ‑dhɛ ’saadhö ‑a ’gü ꞊nɛ: Yi ꞊kɔɔnmɛ ’ö tɔɔ Yesu Klito.

‑Ka kë ’kpongtaamɛ ‑nu ‑bha ‑dhɛpuudhɛ ’ka

¹²N dhegluzë ‑nu, ꞊dhɛ ‑kë ꞊nɛ ka ’wun ‑ma ‑Zlan ‑ta ‑kplawo bhë, kö ka ‑bha dhasü bhë, ‑kaa ’gü ‑yuö kë ‑süë ‑Zlan ‑dhë ‑sü ’ka ꞊nɛ pë ’wo‑ pö ‑a ‑bha a ka ’piö ma ‑a ’dhö; ‑a ‑de ‑yö ziö mü ’kö ‑kë ꞊nɛ ’maa ’ma ’dhee.

¹³Bhii ‑Zlan ‑yö yuö ‑kë ‑kplawo ka ꞊zuö’ ’gü. Yuö ’ö ’dhö bhë ’ö tɔɔ ‑a ‑dhi ‑a ‑dhë ‑wun ‑nu kë ‑sü bhë ‑a ‑dhɔ ‑da ka ’gü ‑sü waa‑ ꞊faan’ nu ka ‑dhë ‑sü kö ka ‑kɔ ‑yaan ‑mɔ ’wun ‑nu ’wo ’dhö bhë ‑an kë ‑sü ‑bha.

¹⁴Kö ꞊kun ’ka ’wun gbɛ ‑kë ‑wokpɔdhe waa‑ ꞊zuötozlöödhe ‑an ’ka! ¹⁵‑Yö kë ’dhö, ’kaan‑ kë ‑Zlan ‑bha ’në ‑nu ’wo kpengdhö ’ö ’wun ꞊zaa’ ‑sü gbɛ ’yaa ‑an ‑bha, ’ö ꞊sɔɔn yaa gbɛ ’yaa ‑an ꞊zuö’ ’piö ‑an ’ka. ‑Tosiadhe ‑së ’ö ’dhö bhë, ka ‑dho ‑a kë mɛ ‑nu ’wo ’kpongtaa ꞊dɛɛ ‑yi ꞊nɛ ‑a ’gü ’ö ’waa kpengdhö ’ö ’wo këpëyaamɛ ‑nu ’ka ‑an ziën. ‑Kɔ do bhë ‑a ’ka ’ö ’ka dho ‑dhɛ po këpëyaamɛ ‑nu ’wo bhë ‑an ziën ꞊nɛ ’gbia ‑nu ‑bha ‑dhɛ ’po ‑sü ’ö ‑dhɛtiidhɛ ’gü ‑a ’dhö, ¹⁶‑wo ’ö ꞊toëpö ‑kë ‑a ’gü ‑sü nu mɛ ‑nu ‑dhë bhë ‑a ‑zɔn ‑an ‑dhë ‑sü ’ka. ’Ö ꞊ya kë ꞊nɛ, ’ka‑ kë ’dhö, a ‑dho ‑mɔ ‑a ‑bha kö ’aan‑ kë ’gɔugɔ ka ‑wun ’gü Klito ‑bha nu ‑yi ’ka. Bhii kö ꞊yaa‑ ‑zɔn n ‑dhë ꞊nɛ n ‑ma yuö ‑nu waa‑ ꞊saan’ ‑nu ’a‑ wo ka ’piö bhë waa ’to ’kpaan.

¹⁷Ka ‑bha ‑zo ‑yö ‑Zlan ‑bha ‑sü ꞊tɛi’ ‑yö kë ꞊nɛ sla‑ ‑bho ‑Zlan ‑dhë ‑sü ’dhö. ’Ö ‑de ’ö ‑kë ꞊nɛ a ‑to ‑kanso ’gü ’ö ’wo n zë, ’yaa n ’gü pë gbɛ ’ka. N ‑ma ga ‑sü ’ö bhë ‑yö ‑dho kë ka ‑bha sla‑ ’yoo ‑bho sia‑ ‑pë ’ka. ’Ö ꞊ya kë ꞊nɛ, ‑kɔ ’ö ’a‑ ꞊blɛɛ ‑a ’ka bhë ꞊ya kë ‑a ’ka ’dhö, n ꞊zuö’ ’glu ‑dho dhi ‑a ‑wun ’gü. ’Ö kwa ’plɛ ’kwa dho n ‑ma ꞊zuögludhi bhë ‑a kë kwa ’ko ꞊bhaa. ¹⁸‑Kɔ do bhë ‑a ’ka ’pö, ka ꞊zuö’ ’glu ‑yö dhi kö ’kaan‑ kpa n ‑ma ’kwaan‑ ‑a kë kwa ’ko ꞊bhaa.

Pɔlö ‑bha naɔ ‑wun ’ö ‑gban Timote waa‑ Epafloditö ‑an ‑bha, ‑a ꞊blɛɛ’ ‑sü

¹⁹’Ö ꞊ya kë ꞊nɛ kwa Dëmɛ Yesu ꞊ya ’we ‑a ‑bha, a ‑dho Timote bɔ ka ’piö, dɔ ’ö ’kwa‑ wo ꞊nɛ ‑a ’gü, kö ‑a ‑bha ‑yɛ ’zü ‑sü ’ka, n ꞊faan’ ‑yaan ’më, ’wuntaɔsë ’ö dho goë ka ’piö bhë ‑a ‑wun ’gü. ²⁰Yö dosɛn ’kpaan ꞊nɛ ’ö ꞊ya kë ’ö nu n ‑dhë, yuö ’a‑ kë ‑na kwa Dëmɛ Yesu ‑dhë bhë ‑a ’gü. ’Go mü ’zü ’ö ‑ya ka ‑wun ꞊zɔnng’ ‑ta giagiawo. ²¹Mɛ ‑nu ’ö ’wo to ’waa wo ‑zo ’ta pë ‑nu ’ö ’wo dho Yesu Klito ’gbloo ’piö ‑an ‑wun ’gü, ’kɛɛ ‑an ‑de ‑bha pë ‑nu dosɛn ꞊nɛ ’ö ’wo wo ‑zo ‑ta ‑an ‑wun ’gü. ²²Timote ‑bha ‑kë kpengdhö ‑sü ’ö ö ‑de ‑zɔn ‑a ’ka bhë, ka gia‑ ‑de, ’ka‑ ꞊tɛi’ dɔ. Bhii ‑yö ‑nu n ‑dhë, yuö ’ö ‑kë ’wuntaɔsë ꞊blɛɛ’ ‑sü ’ka mɛ ‑nu ‑dhë bhë ‑a ’gü ꞊nɛ ‑kɔ ’ö ’në waa‑ ö dë ’wo yuö kë ‑na ‑a ’ka wo ’kuë‑ bhë ‑a ’dhö. ²³꞊Ya kë ꞊nɛ pë ’ö dho kë n ’ka ‑kanso ’gü zö, ’ma ‑dhɛ yö ‑a ’gü, a ‑dho to mü ’a‑ bɔ ka ‑dhë. ²⁴‑Yö n ’gü ꞊nɛ kwa Dëmɛ dho ‑a kë kö ’aan‑ nu ‑wo ꞊dhia ka ’piö, dɔ ’kwa‑ wo ꞊nɛ ‑a ’gü.

²⁵Kwa dheglu Epafloditö ’ö ’ka‑ bɔ n ’piö ’ö nu n ‑dhë ‑Zlan ‑bha yuö waa‑ ‑a ‑bha ‑glu gɔn ‑sü ’gü, ’ö pë ’ö n ‑ma ‑wun ‑yö yö ‑a ‑bha, ’ka‑ dɔ ‑a ‑gɔ ’ö nuë n ꞊dhia bhë, a‑ ‑yö ‑së kö ’aan‑ ‑a bɔ ka ’piö ’zü. ²⁶‑A ma ’ö‑ wo ꞊nɛ, ka ‑da ’yena ’gü ö ‑bha ’yua ‑wun ’gü bhë, ‑a ꞊zuö’ ‑yö ‑to zlöö; ‑a ’siö ‑de ‑yö kpa ‑na ‑a ‑ta kö ‑yaan nu ka ’saadhö ka ’piö kö ‑yaan ka ꞊zuö’ wɔ sia‑. ²⁷’Yua ‑ya ‑kë ’dhö! ’Ö ꞊töng ga ‑sü ’ka ꞊klöö’. ’Kɛɛ ‑Zlan ‑ya ’yena ‑yö, ’ö‑ dha ’yua bhë ‑a ‑gɔ. Ma ‑de ’pö, ‑Zlan ‑yö n ’yena ‑yö ‑a ‑bha ’yua bhë ‑a ’gü. Bhii ’ö tɔɔ ꞊ya kë ꞊nɛ, ‑yö ‑kë ‑a ‑bha ‑dhɛkpaɔyi ’dhiötoyi ’ka ‑be, ‑a ’wun bhë ‑yö ‑dho n ‑ma ’yena ꞊taɔ’ kë. ’Kɛɛ ‑Zlan yaa ’we ‑a ‑bha kö ’wun ’ö ’dhö ‑yaan kë n ’ka. ²⁸’Wun ‑nu ’wo ’dhö ’töüdhö bhë ‑a ‑wun ’gü, ’siö ‑yö kpa ‑na n ‑ta kö ’aan‑ ‑a bɔ ka ‑dhë kö ’ka ka ’yan dɔ ‑a ‑bha, kö ka ꞊zuö’ ’glu ’yaan‑ dhi ‑dëüwo ’zü, kö ma ‑de ’pö n ꞊zuö’ ‑yö ꞊waannu. ²⁹꞊Dhɛ ‑kë ’dhö bhë, ꞊ya nu ka ’piö ’ma, ‑kaa ‑nia ’kun ꞊zuögludhi ’ka ꞊nɛ ‑kɔ ’ö ’ka dho ka dheglu mɛ ‑nu ’wo kwa Dëmɛ ’gü ‑an ‑nia kuën bhë ‑a ’dhö. Mɛ ‑nu ’ö ’wo ‑kë ꞊nɛ Epafloditö ’dhö bhë, ‑ka ‑an ꞊bhlë ‑ya ꞊va ’ka! ³⁰Bhii ‑yö ‑yö ga ‑sü ’ka ꞊klöö’ Klito ‑bha yuö ‑wun ’gü. ’Ö tɔɔ pë ’ö ka ‑kɔ yaa ‑mɔ ‑a ‑bha kö ’ka‑ kë n ‑dhë bhë, yö ‑zë ’pö, ‑ya ‑kë.

’Wun ’ö ‑gban ‑kë kpengdhö ‑kɔ giagia ’ö ‑dhö ‑Zlan wö ’dhiö ‑a ꞊blɛɛ’‑ ’ö Pɔlö ‑ya wo

¹N dhegluzë ‑nu, ka ꞊zuö’ ’glu ‑yö dhi kwa Dëmɛ ’gü! ’Yaa n ‑gɔ ’gügasüzë kö ’wun ‑nu ’ö ’a ‑an ꞊blɛɛ ka ‑dhë ’dhiö ‑be bhë, ’aan‑ bɔ ‑a ’gü ’zü ’sëëdhɛ ’gü, bhii a‑ ꞊dɔa’ ꞊nɛ ‑yö ‑dho ka ‑zo ‑büö kö ‑yö ka ‑ya ’yaan, kö ꞊kun ’ö ’ka dho to mɛ ‑nu ‑püö ‑mɛ ‑nu ‑wo ’piö kö ’kaan‑ ‑püö. ²‑Zlan ‑bha yuö ‑kë yaa ‑mɛ ‑nu ’ö ’wo mɛ ‑nu ‑püö ‑na bhë, ‑ka ka ‑de kë ‑an ‑gɔ ’slë ’ka! Bhii ‑yö ‑kë ‑an ‑zo ’piö ꞊nɛ, ‑go ’bɔng ‑sü ꞊nɛ ’ö dho ‑an kë ‑Zlan ‑bha ’në ‑nu ’ka. ³’Kɛɛ kwa ꞊nɛ ’ö ’kwa tɔɔ ‑Zlan ‑bha ’në kpinngdhö, ’waa ‑mü? Bhii kwa ‑Zlan ‑gba ‑a ‑bha ‑Zuu ‑bha ’piigbeedhɛ ꞊kwaa’. ’Go mü ’zü ’ö ’kwa Yesu Klito ’tɔ ‑kë ꞊va, pë ‑nu ’ö‑ ‑kë kwa ‑dhë bhë ‑a ‑wun ’gü; ’ö ’kwaa kwa ‑zo yö mɛ ’bhee‑ wɔ ‑kɔ ‑dhë.

⁴’Ö ꞊ya kë ‑be ꞊nɛ, ‑zo ‑yö mɛ ’bhee‑ wɔ ‑kɔ ‑bha ‑sü bhë ‑yö ‑mɔ ‑a ‑bha kö ‑yaan mɛ ’bhee‑ kë ‑Zlan ‑bha ’në ’ka ‑be, kö ma ꞊nɛ ’ö n ‑ma kun ‑be. ⁵Bhii ’ö tɔɔ ꞊dhɛ ’a bhɔ, ‑a ‑dhɛkpaɔyi ‑yö ‑kë ’slɛaga, ’ö ’a dho ’bɔn ꞊nɛ ‑kɔ ’ö kwa ‑bha tɔng ’dhö ‑a ’ka bhë ‑a ’dhö. Izlaɛlö ’në giagia ‑mü n ’ka, ’ö ’a go Bɛnzamɛ ‑gɔ ’gunng ’gü. Eblö ’në giagia ‑mü n ’ka. ‑A ‑dhɛ ’ö ‑gban Zuifö ‑nu wɔ ‑kɔ ‑bha ’ö ‑kë kwa ‑bha tɔng ’ö ‑Zlan ‑ya nu Moizö ‑dhë ‑a ’kun ‑sü ’ka bhë, a‑ ’gü ’gbee‑ ’pö, ’ö tɔɔ Falizi ‑mɛ ‑nu, ’ö ’wo ‑kë tɔng ’ö ’dhö bhë ‑a ’kun ‑sü ’gü kpinngdhö bhë, ‑a mɛ do ’ka. ⁶Tɔng ’ö ’dhö bhë, a‑ ‑kun ꞊faan’ ’ka, ’ö ’a dhoë ’dhö, ’a Yesu Klito ‑wun ‑dhɛ ’wun gia‑ ‑mɛ ‑nu ’klo bhɔ. ’Go mü ’zü, ‑a ‑dhɛ ’ö ‑gban ‑tosiadhe ‑kë kpengdhö ‑sü ’ö tɔng ’gü ꞊zian’, mɛ gbɛ ’yaa ‑mɔ ‑a ‑bha kö ‑yö za dɔ n ‑ma. ⁷Pë ‑nu ’wo bhë, a ‑an ‑ga ‑be ꞊nɛ pë ’ö‑ ꞊truën dho ‑kë ‑dhö ‑a ’dhö, ’kɛɛ Klito ‑wun ’gü, ’ma ‑an ‑ga zlöö, ‑wo ‑kë n ’gü ꞊nɛ pë ’flëë ’ö‑ ‑yö ‑a ‑bha ‑pë gbɛ ’yaa ’dhö ‑a ’dhö. ⁸Pë ‑nu ’ö ’wo ’dhö bhë, wo ‑de ’sloo ’waa ‑mü ’ö ’wo ‑kë n ‑dhë pë ’flëë ’ka; ’kɛɛ pë ‑nu ’saadhö ’ö ’wo n ‑gɔ a ‑an ‑ga ꞊nɛ ‑kɔ do bhë ‑a ’dhö, ’ö tɔɔ n Dëmɛ Yesu Klito dɔ ‑sü ‑yö ’gianzë ’ö ꞊zië’ pë ’saadhö ’wo to bhë ‑an ‑ta. Yesu Klito ’ö bhë ‑a ‑wun ’gü, ’yö ’a ‑we ‑a ‑bha ’a n ‑kɔ bho pë ’saadhö ‑wun ’gü, ’ö ’a ‑an ‑ga ꞊nɛ ’dunngtaapë ’dhö, ‑yö kë ’dhö kö Yesu Klito ‑yaan kë n ꞊truën ’ka. ⁹A‑ ’piö kö ’aan‑ ‑klu Yesu Klito ‑bha kpinngdhö. ’Maa n ‑zo ’ta gbɔ ꞊nɛ n ‑ma ’wun ‑ma Zuifö ‑nu ‑bha tɔng ‑ta ‑sü ꞊nɛ ’ö‑ ‑kë ’a ‑kë kpengdhö, ’kɛɛ ‑zo ‑yö Klito ‑bha ‑sü ꞊nɛ ’ö‑ ‑kë ’ö ’a ‑kë kpengdhö ‑Zlan wö ’dhiö. ‑Kë kpengdhö ‑sü ’ö bhë ‑yö ‑go ‑Zlan ’piö ’ö ꞊ya kë ’ö‑ nu Klito ‑wun ‑dhɛ ’wun gia‑ ‑mɛ ‑dhë.

¹⁰Pë dosɛn ’kpaan ’ö ’a‑ ’piö ’ö tɔɔ kö ’aan‑ Klito dɔ. ’Go mü ’zü kö ’aan‑ ‑Zlan ‑bha ’piigbeedhɛ ’ö‑ bho ga ’gü bhë kö ’a‑ dɔ ’pö. A‑ ’piö kö ’aan‑ ‑da ‑a ‑bha ꞊sëëbhodhe ’gü kö ’a kë ꞊nɛ ‑a ’dhö, ‑a ‑bha ga ‑sü ’gü. ¹¹꞊Ya kë ’dhö, kö ꞊ya kë ꞊nɛ ’ma ga, ’aan‑ go ga ’gü bun ꞊suu’‑ ’ö ‑kë Klito ‑gɔ ’ö goë ga ’gü bhë ‑a ’ka.

‑Bla ’sü ‑sü ’ö ’wo dhoë ’ö ’wo ꞊loë’ ‑a ’dhiötodhɛ ‑bha

¹²N ’ka‑ pö ꞊nɛ ‑bla ’a‑ ’sü ‑na bhë ’ma ‑lo ‑a ’dhiötodhɛ ‑bha, ’iin ’ma kë kpengdhö ’saadhö; ’kɛɛ a‑ ‑pö ꞊zian’ ꞊nɛɛ, a ’dho ‑na ’dhiö ‑bla ’sü ‑sü ’ka ‑kplawo; ’a n ’gü dɔ ‑na ’gbee‑ kö ’aan‑ n ꞊saan’ yö, bhii Yesu Klito ꞊ya n ’sü ö ‑bha ’ka ’saadhö.

¹³N dhegluzë ‑nu, a‑ ‑pö ka ‑dhë ’zü ‑dëüwo ꞊nɛ, ’yaa n ma ‑zotadhe ’gü ꞊nɛ ’ma n ꞊saan’ yö ’saadhö ’kɛɛ pë ’a‑ kë ‑na ’ö tɔɔ: Pë ‑nu ’saadhö ’wo n ꞊zlöö bhë, a n ‑zo bho ‑na ‑an ’piö, ’ö ’a n ’gü dɔ ‑na ’gbee‑ kö ‑a ‑dhɛ ’ö n ’dhiö bhë ’aan‑ yö ‑a ‑bha. ¹⁴‑Kɔ ’ö ’a ‑bla ’sü ‑na ‑a ’ka kö ’aan‑ ‑lo ‑a ’dhiötodhɛ ‑bha kö ꞊saan’ ’ö ꞊toëpö ‑këdhösü ’ka dhang‑ ’gü, ’ö ‑Zlan ‑yö bɔa Yesu Klito ’gü ’ö kwa ꞊dhɔɔ kë ‑na ‑a ’ka bhë kö ’aan‑ n ‑ma yö bhë ’ö bhë.

¹⁵Mɛ ‑nu ’ö ’kwa ‑kian ‑Zlan ‑wo ’gü bhë, ꞊yö ‑së kö ‑zotadhe ꞊suu’‑ ’a‑ ꞊blɛɛ ka ‑dhë bhë ‑yö kë kwa ‑gɔ. ’Ö ꞊ya kë ꞊nɛ mɛ ’bhaa ‑nu ‑wo ka ziën ’ö ‑zotadhe ’ö bhë ’yaa ‑an ‑gɔ, ‑Zlan ‑dho ‑a ‑bho ’kou kë ‑an ‑dhë ’papadhö. ¹⁶‑A mɛ ’ö ’gianzë ’ö tɔɔ zian ’ö ’kwa‑ sü ’dhiö ’ö ’kwa ꞊tun ‑a ‑ta ꞊nɛ kö ’kwa ’ta ’sü ‑a ‑ta ‑kplawo, ’kwa dhoë ’dhiö.

¹⁷N dhegluzë ‑nu, ‑ka ’wun kë ‑kɔ ’sü n ‑ma, ’ka‑ ’sü ’pö n ‑ma ‑to n ’piö ‑mɛ ‑nu ‑bha! ’Ka mɛ ‑nu ’ö ’wo wo ‑bha ‑tosiadhe kë ‑na ꞊nɛ ‑kɔ ’ö ’yi‑ ‑zɔn ‑a ’ka ‑an ‑dhë ‑a ’dhö, ‑ka ‑an ‑ga kö ’ka ka ‑bha kë ’dhö ’pö! ¹⁸’Wun mɛ ’ö nu ‑na ꞊nɛ ꞊ya kë a‑ ‑blɛɛ ka ‑dhë ‑kplawo. A bɔ ‑na ‑a ’piö ’zü ‑dëüwo ’a‑ ꞊blɛɛ’ ‑na ka ‑dhë ’gbo ’ka ꞊nɛ: Mɛ ꞊plëëzë ‑nu ‑wo ka ’piö, ’ö ‑an ‑bha ‑tosiadhe kë ‑kɔ ‑yö ‑kë ꞊nɛ mɛ ‑nu ’ö ’wo Klito ‑bha ‑ga ‑gaatalü ‑bha ‑wun bhë ’wo‑ yaagümɛ ‑nu ’ka ‑an ’dhö. ¹⁹Mɛ ‑nu ’wo ’dhö bhë, ‑an ‑bhöpë ‑yö ‑an ‑gɔ ꞊nɛ ‑an ‑bha ‑zlan ’dhö. ’Ö pë ‑nu ’ö‑ lë‑ dho ‑an kë ‑be bhë, ’ö ’wo wo ‑de sü ‑a ’gü ꞊va ꞊zian’. ’Wun ‑nu ꞊ya kë ’ö ’wo wo ‑zo ‑ta ‑a ’gü ’ö tɔɔ ’kpongtaa ‑wun dosɛn. ‑A mɛ ‑nu ’ö ’wo ’dhö bhë, ‑an ’dhiö ‑dho to ‑an ’gü ꞊siö’ ‑sü ‑ta. ²⁰Mɛ ‑nu ’ö ’kwaa kwa ‑bha ‑tosiadhe kë ꞊nɛ ‑an ’dhö bhë, kwa ꞊nɛ ’ö ’kwa tɔɔ dhang‑ ‑nu ’gü ’në ‑nu, ’ö ’kwa ‑ya ‑sü ’ka kwa Dhamɛ ’ö kwa Dëmɛ Yesu Klito ’ka bhë ‑a ‑bha ‑go dhang‑ ’gü ‑yi ‑gɔ. ²¹Yi ’ö dho nuë ’kpongtaa zö, ‑yö ‑dho ö bha ’piigbeedhɛ ’ö ‑mɔ ‑a ‑bha kö ‑yaan pë ’saadhö ’gblü ‑a ’dhiö bhë ‑a sü kö ‑yaan kwa ’kpongtaa ‑bun ’yenazë ’ö ꞊nɛ ‑a ’gla ‑a ’ka kö ‑yaan ‑a kë ꞊nɛ ö bun ’bhü ‑sü ’ö bhë ‑a ’dhö.

Pɔlö ‑bha Filipö ‑mɛ ‑nu ꞊kpaɔ ’ö‑ wo

¹N dheglu ‑nu, ‑kɔ ’a‑ ꞊blɛɛ ‑a ’ka bhë, ’ka dho dɔ ‑a ’ka gɛnngdhö ka ‑bha ‑zo ‑yö ‑Zlan ‑bha ‑sü ’gü, ‑klu kwa Dëmɛ ‑bha ‑sü ’ka. ꞊Dhɛ ’ö ꞊ya kë ’dhö, a‑ ’piö ’sönggö ‑sönggö kö ’aan‑ n ’yan dɔ ka ’ö ’ka n ꞊zuö’ ’glu dhi ‑na ꞊duö ’ö ’ka n ‑ma yuö ꞊truën ’ka bhë ka ‑bha.

²Evodi kaa‑ Sɛntisö, a ‑bhɛa ka ‑dhë ’sönggö ‑sönggö kö ka ꞊zuö’ ‑yaan kë do ꞊nɛ ’ta ‑sü kwa Dëmɛ ’piö ‑mɛ ‑nu ꞊zuö’ ’dhö.

³Bhi ‑de ’pö, n ’bhamɛ ’ö yuö do ’a‑ kë ‑na ꞊nɛ ’ü‑ kë ‑na ’pö ‑së ’ka bhë, a‑ ‑dhɛ ü ‑gɔ kö dhoo ‑nu ꞊plɛ ’wo bhë ’ü ’dho ‑an ‑dhë kö ‑waan ’wun ma wo ’ko ‑ta. Bhii dhoo ‑nu ꞊plɛ ’wo bhë oo, Klema oo, ’iin n ‑ma yuökëyɔɔ ‑nu ’töüdhö ’ö ‑Zlan ꞊ya ‑an ’tɔ ‑ya ꞊toëpö ‑këdhösü ’sëëdhɛ ‑be ’gü bhë, ‑wo ‑nu n ‑dhë ’ö ’yi ’wuntaɔsë ‑ta ‑ko zë, ’wuntaɔsë bhë ‑a ꞊blɛɛ’ ‑sü ’ka mɛ ‑nu ’saadhö ‑dhë kö ‑yaan ’dho ’dhiö.

⁴Ka ꞊zuö’ ’glu ‑yö dhi ‑kplawo kwa Dëmɛ ’gü! A‑ ‑pö ka ‑dhë ’zü ꞊nɛɛ: Ka ꞊zuö’ ’glu ‑yö dhi! ⁵‑Ka kë ’lëëlë mɛ ’saadhö buëndhö, bhii kwa Dëmɛ nu ‑yi ’yaa ꞊gbiin gbɔ! ⁶Kö ꞊kun ’ka ‑ya pë gbɛ ꞊zɔnng’ ‑ta, ’kɛɛ pë ’töüdhö ’ö ka ‑bha ‑wun ‑yö yö ‑a ‑bha yi ’oo yi ’ka, ‑kaa ‑dhɛ ‑Zlan ‑gɔ ‑bhɛa ‑a ‑dhë ‑sü ꞊zuö’ ’plɛ ’ka waa‑ ‑a zuö pö ‑sü ’ka!

⁷꞊Ya kë ’dhö, ‑Zlan ‑bha ꞊zuöyagluu ’ö ꞊va ’ö ꞊zië’ mɛ ’bhee‑ ‑bha ’wundɔdhe ’saadhö ‑ta bhë, ‑yö ‑dho ‑a kë kö ka ꞊zuö’ waa‑ ka ‑bha ‑zotadhe ‑yaan ’to Yesu Klito ‑bha zian ‑ta.

⁸N dhegluzë ‑nu, pë ’a dho ‑a pö ka ‑dhë ’zü ’ö tɔɔ: Ka ‑bha ‑zotadhe ‑yö ’dho pë ’ö ’wun gia‑ ’ka, pë ’ö ꞊bhlë ’kpɔ ‑pë ’ka, pë ’ö kpengdhö, pë ’ö ’puu, pë ’ö ‑dhɔ ꞊kaa’ ‑pë ’ka, pë ’ö ’gianzë, pë ’ö ‑së, pë ’ö‑ ’tɔ bhɔ ‑sü ’dhö ‑së ‑an ’piö ꞊zian’. ⁹Pë ‑nu ’ö ’ka ‑an ꞊daan ’ö ’ka ‑an yö n ’piö, pë ‑nu ’ö ’ka ‑an ma n ’dhii waa‑ pë ‑nu ’ö ’ka n yö ‑an kë ꞊dhia bhë, pë ‑nu ’wo bhë ’saadhö, ‑ka ‑an kë! ꞊Ya kë ’dhö ‑Zlan ’ö ꞊zuöyagluu nu kwa ‑dhë bhë ‑yö ‑dho kë ka ’piö.

Pɔlö ‑bha Filipö ‑mɛ ‑nu zuö pö ‑sü gbaɔ ’wo‑ ‑kë ‑a ‑dhë bhë ‑a ‑wun ’gü

¹⁰N ꞊zuö’ ’glu ‑yö ‑dhi ꞊duö kwa Dëmɛ ’gü, bhii ’ö tɔɔ ’töng ꞊plëëzë ’ö ‑ziö bhë, ka ‑yɛ ’zü ‑dëüwo, ’ka ka ‑bha ‑dhɔ ‑zɔn n ‑dhë, ‑nu n ‑dhë ‑sü ’ka. ’Kö ‑kë ꞊nɛ ‑a ‑dhɛ ‑yö ꞊glɔɔ kaa nu n ‑dhë ’siö‑, a‑ ꞊tɛi’ dɔ ꞊nɛ kaa ka bo ‑ya n ‑wun ꞊zɔnng’ ‑ta ‑sü ’ka, ’kɛɛ ‑a kë ‑kɔ ’slë yaa kë ‑dhö ka ‑gɔ bhë yö ‑mü. ¹¹’Wun ’a‑ ꞊blɛɛ bhë, yaa kë ꞊nɛ n ‑ma ‑wun ’ö yö pë ’bhaa ‑bha, bhii ‑tosiadhe kë ‑sü ’ö ꞊zuögludhi ’ka, pë ’ö mɛ ‑gɔ ’iin ’yaa mɛ ‑gɔ ‑a ‑wun ’gü bhë, ’ma‑ ꞊daan’‑. ¹²‑Tosiadhe kë ‑sü ’ö ’fɛɛ ’gü waa‑ ‑a kë ‑sü ’ö ꞊bhɔɔ’ ’gü, a ‑an ’plɛ këdhɛ ‑dɔ. ’Ö ‑kë ꞊nɛ ‑bhöpë ‑yö n ‑gɔ ’iin ’yaa n ‑gɔ, ’iin ’zü pë ’dhö n ‑gɔ ꞊va ’ö ‑lö n ‑zü oo, ’iin ‑yö n ‑gɔ ’tee ’ö yaa ‑mɔ n ‑ma oo, ’ma‑ ’plɛ kë ‑kɔ ꞊daan’‑; ’ö n ’glu ‑yö ‑dhi ‑a ’plɛ ‑wun ’gü, ‑dhɛ ’saadhö ’gü ’töng ’plɛ ’ka. ¹³Pë ‑nu ’wo ’dhö ’töüdhö bhë, n ‑kɔ ‑yö ‑mɔ ‑an ’plɛ kë ‑sü ‑bha ’gügbeedhɛ ’ö Klito ’dhö ‑a nu ‑na n ‑dhë bhë ‑a ꞊kwaa’.

¹⁴꞊Ii‑, a‑ ꞊blɛɛ ’dhö ’kɛɛ nu ’ka‑ wo n ‑dhë n ‑ma ’wun ’gbee‑ ’gü bhë, ka‑ ‑kë ‑së. ¹⁵Filipö ‑mɛ ‑nu, ka gia‑ ‑de ka‑ ꞊tɛi’ dɔ ꞊nɛ ’töng ’a go ‑a ’ka ka ‑gɔ Maseduanë ‑sɛ ’gü kö ’ma ‑Zlan ‑wo ꞊blɛɛ’ ‑sü zü dɔ, Yesu ‑wun ‑dhɛ ’wun gia‑ ‑mɛ ‑nu ‑dho ’kuë‑ ‑sü ‑nu ’ö ’wo ‑dhö ’töüdhö bhë, ka do ’kpaan ꞊nɛ ’ö ꞊ya kë ’ka pë ‑nu bɔ n ‑dhë. ¹⁶Kö ’a ꞊tun Tesalɔnikö, pë ‑nu ’ö n ‑ma ‑wun ‑yö yö ‑a ‑bha, ka ‑an ‑bɔ n ‑dhë ‑gwaa ꞊plëëzë ’ka ’dhö. ¹⁷’Kɛɛ, kö ꞊kun ’ö ‑kë ka ‑zo ’piö ꞊nɛ pë ’ö ’a‑ ’piö ’ö tɔɔ kö ’kaan‑ gbaɔ kë n ‑dhë ‑kplawo. ’Kɛɛ ’a‑ ’piö ꞊zian’ kö pë ‑nu ’ö ’ka‑ kë ‑na n ‑dhë ‑kplawo bhë, ‑an ꞊truën ‑nu ‑waan kë ‑dhö ka ‑bha ’ka, ’iin kö ‑yö ‑da ’kuë‑ dhö, kö ‑yö kë ꞊va ‑Zlan ’piö. ¹⁸Pë ‑nu ’töüdhö ’ö ’ka‑ dɔ Epafloditö ‑gɔ ’ö nuë n ꞊dhia bhë, ‑a ’plɛ ‑yö ‑lo n ‑ta. ‑Yö ‑mɔ n ‑ma ’ö‑ ’bhaa ‑yö to. ’Ö dɔ ’ö ’kwa‑ wo zlöö ꞊nɛ ‑a ’gü, pë ‑nu ’ö n ‑ma ‑wun ‑yö yö ‑a ‑bha ’dhiö ‑be bhë, ’ö‑ ’plɛ ꞊ya kë n ‑gɔ zlöö ꞊va ’ka. Ka ‑bha gbaɔ ’ö ’ka‑ ‑kë n ‑dhë bhë, ‑yö ’wun ‑së ’ö‑ ‑wun ’yi ‑yö ‑kan ‑Zlan ’dhi, ’ö ‑we ‑a ‑wun ‑bha ‑a ’ka; ¹⁹(n ‑kɔ ’yaa ‑mɔ ‑a ‑bha kö ’a‑ ‑yɛ ’zü kë ka ‑dhë; ’kɛɛ) pë ’töüdhö ’ö ka ‑bha ‑wun ‑yö yö ‑a ‑bha, n ma ‑Zlan ‑bha ‑kë ꞊bhɔɔzë ‑sü ꞊duö bhë ‑a ‑wun ’gü, ‑yö ‑dho bɔ Yesu Klito ’gü ’ö‑ nu ka ‑dhë.

²⁰Kwa Dë ‑Zlan ’ö bhë ‑a ’tɔ ‑yö kë ꞊va ‑kplawo ‑yö dhoë ’dhiö. Amɛn.

꞊Wekadhe

^21-22‑Zlan ‑bha mɛ ‑nu ’töüdhö, ’ö ’ka ‑klu ‑sü ’ka Yesu Klito ‑bha ’ö ’ka Filipö plöö, ’ma ’we kaa! Ka dhegluzë ‑nu ’wo kwa Dëmɛ ’gü ’ö yi ‑nu ’yi yi ’ko ’piö ’nö waa‑ ‑Zlan ‑bha mɛ ‑nu ’wo to ’saadhö ’wo ’nö, ꞊wa ’we kaa! ‑Zlan ‑bha mɛ ‑nu mɛ ’ö ’wo ‑gludë Sezaa ‑gɔ kɔɔ, ꞊wa ’we kaa ꞊duö. ²³Kwa Dëmɛ Yesu Klito ‑bha ’dhuë‑ ‑yö ’to ka ’saadhö ka ’piö!