Zakö

’Sëëdhɛ ’ö

Zakö

‑ya bɔ ‑Zlan ‑bha mɛ ‑nu

’wo ‑pɛn ‑sü ’ka ‑an ‑dhë bhë ’ö ꞊nɛ

¹’Sëëdhɛ ꞊nɛ, ma Zakö ’a ‑Zlan waa‑ kwa Dëmɛ Yesu Klito ‑an ‑bha yuökëmɛ ’ka, ’a‑ ꞊bɛɛn. ’Ma ’we ‑Zlan ‑bha mɛ ‑nu, ’ka ‑pɛn ‑sü ’ka ’kpongtaadhɛ ’saadhö ‑bha, ka ’plɛ ka ’ka.

’Wun ’ö ‑gban ‑zo ‑yö ‑Zlan ‑bha ‑sü waa‑ ’kpaakpadhɛ ‑an ‑bha

²N dhegluzë ‑nu, ’wun ’gbee‑ ꞊suu’‑ ’saadhö ’wo nu ‑na ka ‑ta bhë, ‑wo kë ka ‑gɔ ꞊zuögludhi ‑wun ’ka; ³bhii ka gia‑ ’ka‑ ꞊tɛi’ dɔ ꞊nɛ ꞊ya kë ꞊nɛ ’wun ’gbee‑ ‑nu ’wo nu ‑na ka ‑ta bhë, ’ka bɔ ‑an ’gü ‑to ‑a ’gbee‑ ’ka ‑sü ’ka, ꞊zuösaadhɛ ‑yö ‑dhö kë ka ‑gɔ, ka ‑bha ‑zo ‑yö ‑Zlan ‑bha ‑sü bhë ‑a ’gü. ⁴꞊Zuösaadhɛ ’ö ka ‑gɔ bhë, ‑ka ka ’gü dɔ ’gbee‑ kö ‑yö ’dho ’dhiö, ‑yö kë ’dhö kö ka ‑bha ‑kë Yesu Klito ‑bha mɛ ’ka ‑sü bhë ‑yö kë ’wun ’ö‑ ’gü ’dhö ’puu ’ö ’wun ’yaa‑ ‑bha ‑a ’ka ’iin ’ö pë gbɛ ‑wun ’yaa ka ‑bha ‑a ’ka. ⁵’Ö ꞊ya kë ꞊nɛ mɛ ꞊ya kë ka ziën, ’ö ’kpaakpadhɛ ’yaa‑ ‑gɔ, kö ‑ya ‑dhɛ ‑Zlan ‑gɔ. ’Kpaakpadhɛ ’ö bhë ‑Zlan ‑yö ‑dhoë nu ‑a ‑dhë; bhii ‑yö pë ‑nu mɛ ’plɛ ‑dhë ꞊zuö’ ’puu ’ka, ’ö ’yaa ’wun gbɛ ꞊blɛɛ’‑ ‑an ’ka. ⁶‑Ka pë ‑gba ‑dhɛ! ’Kɛɛ kö ꞊kun ’ö‑ ‑kë ꞊zuötozlöödhe ’ka ꞊nɛ pë ’a‑ ‑dhɛ ꞊nɛ ‑Zlan ‑yö ‑dho ‑a kë ꞊nɛ ‑kɔ ’a‑ ꞊dhɛa’ bhë ‑a ’dhö ’gbödhö poo ꞊a; yö ꞊ga tɔɔ mɛ ’ö ‑zo ‑yö ‑Zlan ‑bha ‑sü ’yaa‑ ‑gɔ bhë, ‑yö ꞊nɛ ‑kɔ ’ö ’yoo kpö ‑nu ’dhoë‑ ’ka ’ö ꞊wa ꞊luu’‑ ꞊nëdhö ’ö ’tëë ’dhö ’dho ‑na ‑a ’ka ꞊kwaa‑ ’gü, ꞊kwɛɛ‑ ’gü bhë ‑a ’dhö. ⁷Mɛ ꞊suu’‑ ’ö ’dhö bhë, ‑yö kë ‑a ’yaan ꞊nɛ yö ’ka ’dho pë gbɛ yö kwa Dëmɛ kwɛɛ. ⁸’Ö tɔɔ mɛ ꞊suu’‑ ’ö bhë, ꞊ya ’wun ‑nu ‑ya ö ꞊zuö’ ’piö ‑yaan kë, ‑a ’töng ꞊ya ‑lo, ’ö‑ ‑kɔ ’yi ‑yö ga; ’iin ’ö ꞊ya kë ’ö‑ ꞊zuö’ ‑yö to zlöö ‑a këpë ‑nu ’saadhö ’gü.

’Wun ’ö ‑gban ‑kë ’fɛɛzë ‑sü waa‑ ‑kë ꞊bhɔɔzë ‑sü ‑an ‑bha

⁹N dhegluzë ‑nu, ꞊yö ‑së kö mɛ ’ö ’fɛɛzë ka ziën, ‑a ꞊zuö’ ’glu ‑yö dhi (’ö bhii ‑a ‑bha ‑kpa Klito ‑bha ‑sü ’gü) ‑Zlan ꞊yaa‑ kë ꞊bhlëzë, ¹⁰’iin kö mɛ ’ö ꞊bhɔɔzë ’pö, ‑a ꞊zuö’ ’glu ‑yö dhi ‑a ‑gɔ ’ö ‑Zlan ‑ya ꞊yɔɔ bhë ‑a ‑wun ’gü; ’ö tɔɔ ꞊bhɔɔmɛ ’ka‑ ‑ga ‑na bhë, ‑yö ‑kë ꞊nɛ ꞊blëë’ ’bin ’dhö; ¹¹꞊waa‑ pö: «꞊Ee’‑, ‑dhɛ ꞊ya ’po bhoo‑, ‑an ’bin ꞊ga ꞊nɛ; ‑a kë yië lan‑ ‑yaan ’bhü ‑a ‑bha do, ꞊plɛ, kö ꞊ya ga bhë ‑a ’dhö; kö ꞊blëë’ ’ö ꞊ya ga bhë ‑a ’bin ‑bha ‑sëdhɛ ’yaa ’dhö gbɔ.» ‑Kɔ do bhë ꞊nɛ ’ö ꞊bhɔɔmɛ dho ‑lo ‑a ’ka kö ‑a ‑bha ’wun ‑nu ꞊wa yö ‑së.

’Wun ’ö ‑gban ‑bɔ ’wun ’gbee‑ ’gü ‑sü waa‑ ’güdandhe ‑an ‑bha

¹²꞊Zuögludhi ‑yö kë mɛ ’ö bɔ ’wun ’gbee‑ ’gü, ’ö‑ ‑gɔ yaa ’to ‑a ’gü bhë ‑a ‑gɔ, bhii ꞊toëpö ‑këdhösü ’gɔ ꞊gblaa’ ’ö ‑Zlan ‑ya ‑ya mɛ ’ö‑ ‑dhɔ ‑yö ‑an ‑kë ’ö ꞊wa bɔ ’wun ’gbee‑ ’gü ꞊wa ’to ‑a ’gbee‑ ’ka ‑an ‑gɔ bhë, ‑yö ‑dho ö ‑bha yö. ¹³꞊Ya kë ꞊nɛ ’güdandhe ꞊ya nu mɛ ’ö ‑dhö ‑a ‑ta, kö ꞊kun ’ö‑ pö: «‑Zlan ꞊nɛ ’ö n ’gü dan bhë», ’ö tɔɔ ’wun yaa gbɛ ’yaa ‑mɔ ‑Zlan ’gü dan ‑sü ‑bha; yö ‑de ’pö ’yaa mɛ ’gü ‑dan. ¹⁴’Kɛɛ ꞊ya kë ꞊nɛ ’güdandhe ꞊ya nu mɛ ‑ta, kö ‑a ꞊zuö’ ’piö ‑wun ‑nu yaa ’ö ’yaa ö ꞊kwaa’‑ ‑an ‑zü bhë ꞊nɛ, ’wo ’wun ‑nu kë ‑na ‑a ’ka bhë. ¹⁵꞊Ya ’go mü zlöö, ’ö ’wun yaa ’wo‑ ‑ya ’ti ‑kë wo ꞊zuö’ ’piö bhë, ’ö‑ ’piö ‑wun ‑yö ‑kë ꞊sɔɔn yaa ’ka; ꞊sɔɔn yaa ‑de ’pö ꞊ya kë zlöö, ꞊ya ’dho ’dhiö, ’ö ‑kë mɛ bhë ‑a ‑bɔ ‑a ‑ta ‑pë ’ka ’ö ga.

¹⁶‑Ka ka ‑de kë ’slë ’ka, n dhegluzë ‑nu; ¹⁷’Ö tɔɔ ‑nu mɛ ‑dhë ‑pë ’saadhö ’ka, ’ö ‑së kö ‑yö ‑go dhang‑ ’gü. Kwa Dë ‑Zlan ’ö‑ ‑bha ‑kë ‑dhɛpuudhɛ ’ka, ’ö ’yaa ’go pin ꞊taa, ’ö ‑dhɛtiidhɛ ’gü ‑wun gbɛ ’yaa‑ ’gü bhë ꞊nɛ ’ö pë ‑nu bhë ’ö‑ ‑nu kwa ‑dhë. ¹⁸Kë‑ wo bhë, ‑Zlan ‑yö ö ‑wo ’ö ’wun gia‑ ’ka bhë ‑a ‑da kwa ’gü, ‑këdhösü ‑dëü ‑nu kwa ‑dhë ‑sü ’ka ö ‑de ‑zo ’kun ‑wun ’ka kö ’kwaan‑ kë ‑a ‑kɔ këpë ‑nu ’wo bhë ’saadhö, mɛ ‑nu ’ö ’kwa ꞊nɛ ‑an ‑blɛɛzë ’dhö ‑an ’ka.

’Wun ’ö ‑gban ’to ’to ‑sü waa‑ ’wun kë ‑sü ‑an ‑bha

¹⁹N dhegluzë ‑nu, ‑yö kë ka ’yaan ꞊nɛ mɛ ’ö ‑dhö ‑yö ö ’to ’to ‑së ’ka, ‑yö ‑yö ’wun ’gü ‑kɔ dɔ; kö ꞊kun ’ö ’wun ‑yö naa‑ ‑zuë ’siösiö, ²⁰bhii mɛ ’ö ‑naazuëdhe kë ‑na bhë, pë ’ö kpengdhö ‑Zlan wö ’dhiö ’yaa‑ kë. ²¹‑A ‑wun ’gü ꞊nɛ ’ö ’ka dho kan pë ’ö mɛ ‑kë ‑dhuuzë waa‑ këwun yaa ꞊suu’‑ ’saadhö ’wo bhë ‑an ‑bha. ’Go mü ’zü, ‑Zlan ‑wo ’ö‑ ‑ya ka ꞊zuö’ ‑bha bhë, ‑kaa ’kun ‑de ‑dho sia‑ ‑sü ’ka, bhii yö ꞊nɛ ’ö dho ka dha.

²²Kö ꞊kun ’ka ka ‑de ‑püö, ’to ‑to ‑Zlan ‑wo ‑bha ‑sü ’sloo ’ka, ’kɛɛ ‑wo ’ö bhë ‑kaa ’gü ‑pë ‑nu kë ꞊zian’. ²³Bhii mɛ ’ö ö ’to to ‑Zlan ‑wo ‑bha ’ö yaa‑ ’gü ‑pë kë, ‑yö ‑kë ꞊nɛ mɛ ’ö ö ‑de ‑ga ‑dhɛgayan ’gü, ’yö ö ‑de yö ꞊nɛ ‑kɔ ’ö‑ ’ka ‑a ’dhö bhë ‑a ’dhö. ²⁴Yö ꞊ga, ꞊dhɛ ꞊ya ö ‑de ‑ga ’dhö, ’ö ‑dhɛgayan bhë ꞊yaa‑ ꞊waannu kö ‑a ‑zlö ꞊ya trö ‑kɔ ’ö ꞊kaa’ bhë ‑a ‑bha. ²⁵Tɔng ‑nu ’wo go ‑Zlan ’piö bhë ꞊nɛ ’wo ‑potaasü nu kwa ‑dhë. Mɛ ’ö ꞊ya ‑klu ‑a ‑bha ‑zo yö ‑sü ’ka, ’ö ’yaa ö ’to to ‑a ‑bha ’kpaan ’ka, kö ‑a ‑zlö ‑yaan ’dho trö ‑a ‑bha, ’ö‑ kun ö ’kun ‑kɔ ’ka, ‑Zlan ‑dho ’dhuë‑ kpɔ ‑a këpë ‑nu ‑bha.

²⁶꞊Ya kë ꞊nɛ mɛ ꞊ya ö ‑de ‑ga ‑Zlan ‑bha tɔng ’kun ‑mɛ ’ka, ’kɛɛ kö ‑a ’dhi ‑wo ‑yö ya, kö ö ‑de ‑püö ’ö‑ wo; kö ‑kë ‑Zlan ‑bha ’në ’ka ‑sü pin ’yaa‑ ‑bha. ²⁷Pë ’ö ‑Zlan ’ö kwa Dë ’ka bhë ’ö‑ ‑dhë ‑së ‑a ‑bha tɔng ‑wun ‑kun ’gbee‑ ‑sü ’gü ’ö tɔɔ: ‑Zo ‑kë ‑tenë ‑nu waa‑ ꞊gɛandhoo ‑nu ’wo ꞊wa ‑bhö ‑sü ’gü bhë ‑an ’piö ‑sü ’ka waa‑ ‑de ‑dhɛ ’kan ‑sü ’kpongtaadhɛ ‑bha mɛ ‑kë ‑dhuuzë ‑pë ’saadhö ‑an ‑gɔ ‑sü.

Kö ꞊kun ’kwa mɛ gbɛ zë ’gü

¹N dhegluzë ‑nu, ka ’ö ’ka ka ‑zo yö Yesu Klito ’ö kwa Dëmɛ ’tɔbhɔsüzë ’ka ‑a ‑bha bhë, kö ꞊kun ’ö mɛ gbɛ ‑zë ’gü kë ‑sü ‑yö ‑kë ka ’gü. ²‑Kwa kwa ’yan kë ’wun bhë ‑a ’piö ’kwee‑! ‑Kwa mɛ ꞊plɛ dan ’kuë ka ‑bha ‑bhɔkuëkɔ ’gü. ‑A mɛ do bhë ꞊bhɔɔmɛ ‑mü ’ö ’sënng ‑vaaga do ’dhoë‑ ‑kwaa; ’ö sɔ ‑së ꞊duö ’dhoë‑ ‑bha; ’ö‑ mɛ kë ꞊plɛ ‑naa bhë, ’fɛɛmɛ ‑mü ’ö sɔ ’blësü yaa ’dhoë‑ ‑bha, ’wo nu mü. ³’Ö ꞊ya kë ꞊nɛ mɛ ’ö sɔ ‑së ’dhoë‑ ‑bha bhë, ’ka‑ ’yi ’kan, ’ka‑ pö ‑a ‑dhë: «‑Bhö nu ’ü ꞊yaannu ‑yadhɛ ꞊bhlëzë ꞊nɛ ‑a ‑bha!» ’Ö ’ka‑ pö ’fɛɛmɛ ‑zë ‑dhë: «Bhi ‑zë, ‑bhö dɔ ü ‑gɛan!» ’iin: «‑Bhö ꞊yaannu sia‑ n ꞊gɛɛndhö zö!» ⁴kö ’ka mɛzëgüdhe kë ꞊nɛ bhë, kö ka ‑bha ’wun ‑yö ’ko ’dhiö ‑kɔ ꞊ya ’sü ꞊zuö’ ’piö ‑wun yaa ‑bha ꞊nɛ bhë.

⁵N dhegluzë ‑nu, ‑yö kë ka ’yaan ꞊nɛ ’fɛɛmɛ ‑nu ’ka ‑an ‑ga ‑na ’kpongtaa zö bhë, ‑yö ‑an ‑ya ’dhö kö ’wun ‑nu ’wo ‑gban ‑zo ‑yö Yesu Klito ‑bha ‑sü ‑bha bhë, ‑waan kë mɛ ‑nu ’wo‑ kuënnu ‑kɔ dɔ ‑an ’ka, ’go mü ’zü kö ‑gludëdhɛ kë ‑sü ’ö‑ ’tɔ go ‑an ‑dhë ꞊nɛ mɛ ‑nu ’wo‑ ‑dhɔ ꞊kaa’, ‑yö ‑dho ‑a nu ‑an ‑dhë bhë kö ‑waan ‑a yö. ⁶’Yö ka ’ö ’ka bhë, ’ka ‑an ‑san zë ꞊a? Ka gia‑, ‑dhɛ ’ka‑ ‑ga bhë, dö ‑nu ’kpaan ’ö ꞊ya kë ’wo ka ’gbee‑ ‑ta bho, ’wo dho ka ’ka zakanmɛ ‑nu ’dhiö ’ö yaa kë ꞊bhɔɔmɛ ‑nu ’wo bhë ‑an ’ka ɛɛ? ⁷Wo do ’wo bhë ꞊nɛ ’ö ’tɔ ‑sëënë ’ö Yesu Klito ‑tɔ ’ka, ’ö ‑Zlan ‑ya nu kwa ‑dhë bhë ’ö ꞊ya kë ’wo‑ zë ’dhii.

⁸Kë‑ wo bhë, ꞊ya kë ꞊nɛ tɔng ’ö dɔ ‑sü ’ka ‑Zlan ‑bha ‑gludëdhɛ ‑pö ‑bha ’ka, ’ö ‑ya ‑sü ’ka ‑a ‑bha ’sëëdhɛ ’gü ꞊nɛ: ‑Bhö ü ‑ya ’yɔɔ ‑dhɔ kë ꞊nɛ ‑kɔ ’ö ü ‑de ‑dhɔ ‑yö ü ꞊kaa’ bhë ‑a ’dhö bhë, ’ka‑ ’kun ö ’kun ‑kɔ ’ka kö ka‑ ‑kë ‑së. ⁹’Kɛɛ ꞊ya kë ꞊nɛ mɛzëgüdhe ꞊nɛ ’ka‑ kë ‑sü ’gü, kö ꞊sɔɔn yaa ꞊nɛ ’ö ’ka‑ kë ‑na bhë; ’ö kö tɔng ‑yö ‑dho ka kun, bhii kö ’ka‑ ‑lö ’gü. ¹⁰’Ö tɔɔ mɛ ’oo mɛ ’ö ꞊ya tɔng ‑nu ’wo bhë ‑an do ‑lö ’gü kö ꞊ya ‑an ’plɛ ‑lö ’gü ꞊nɛ bhë. ¹¹Kë‑ wo ’dhö bhë ’ö tɔɔ mɛ gia‑ ’ö‑ pö: «Kö ꞊kun ’ü ‑da dhe ’piö ’iin kö ꞊kun ’ü mɛ gbɛ ‑bha dhe ’too bho ‑a ‑ta» bhë, yö do bhë ꞊nɛ ’ö‑ pö ’zü: «Kö ꞊kun ’ü mɛ zë». ꞊Ya kë ’dhö, ’kö ‑kë ꞊nɛ ’bhaa ‑da ü ’bha ‑bha dhe ’piö ’iin ’bhaa ü ’bha dhe ‑bha gɔɔn‑ ’too bho ‑a ‑ta, ’kɛɛ kö tɔng ’ö ‑gban «kö ꞊kun ’ü mɛ zë» ‑bha bhë, ’bha‑ ‑lö ’gü, kö tɔng ‑to ’dhö ‑sü ꞊ya ü ’kun ꞊nɛ bhë. ¹²꞊Ya kë ’dhö, ka ’wun ‑nu ꞊blɛɛ’ ‑na ’iin ka pë ‑nu kë ‑na, kö ꞊kun ’ö ka ‑zlö ‑yö ‑trö ꞊nɛ tɔng ’ö ‑potaasü nu mɛ ‑nu ‑dhë bhë ‑a ‑bha za ’ö dho kan bhë ‑yö ꞊tun ka ‑gɔ zian‑; ¹³bhii za ’ö dho kan bhë, mɛ ’yena yö ‑sü ’ka ’dho kë ‑a ’gü mɛ ’ö yaa mɛ ’yena yö ‑a ‑bha ’ka. ’Kɛɛ ꞊ya kë ꞊nɛ ’ka mɛ ‑nu ’yena yö, kö ꞊kun ’ö ’suö ‑yö ka kë ‑Zlan ‑bha zakanyi ‑dhë, ’ö bhii ‑Zlan ‑yö ‑dho ka ’yena yö ’pö.

’Wun ’ö ‑gban ‑zo ‑yö ‑Zlan ‑bha ‑sü waa‑ ’wun kë ‑sü ‑an ‑bha

¹⁴N dhegluzë ‑nu, ꞊ya kë ꞊nɛ mɛ ꞊yaa‑ pö: «‑Zo ‑yö ‑Zlan ‑bha ‑sü ‑yö n ‑gɔ», ’kɛɛ kö ’waa‑ yö ‑a këwun ‑nu ‑bha kö ‑a ‑bha ‑zo ‑yö ‑Zlan ‑bha ‑sü bhë ‑a ‑yö ‑a ‑bha ‑pë ‑dho kë ‑më ’ka ɛɛ? Yö ’pö dhoë‑ dha ꞊ee? ¹⁵’Wun ꞊zuan’ do ꞊ga ꞊nɛ: ’Ka dho ka dheglumɛ ꞊plöö yi do ’ka, ’ö ka gia‑ ka ’yan ꞊ya ‑da ‑a ’gü ꞊nɛ ‑kpatasɔ ‑nu ’waa ‑an ‑gɔ ’iin ‑bhöpë ‑nu ’wo dho wɔ ‑a ‑ta yaa bɔ ‑an ’dhi, ¹⁶ka gia‑, ‑dhɛ ’ka‑ ‑ga bhë ꞊yö ‑së kö ’ka ‑an ’to ’nɛnɛ waa‑ din bhë ‑an ’gü ’ka ka ‑wo ‑da ‑an ‑dhë ꞊nɛ: «N ‑kɔ ‑yö ka ’piö mü», ’iin: «‑Ka yiö ‑së bho» ꞊a? ¹⁷‑Kɔ do bhë ’ö‑ ’ka ‑zo ‑yö ‑Zlan ‑bha ‑sü ’piö ’pö. ‑A ‑yö ‑a ‑bha ‑pë gbɛ ’ka ’dho kë ‑dhö; kö ‑yö ga ‑sü ’ka, bhii ‑a këpë gbɛ ’yaa ’dhö.

¹⁸’Kɛɛ kë‑ wo ’dhö bhë, mɛ ꞊plɛ ꞊wa kë ‑dhö ’ö‑ mɛ do ꞊yaa‑ pö ‑zo ‑yö ‑Zlan ‑bha ‑sü ‑yö ö ‑gɔ, ’ö‑ mɛ kë ꞊plɛ ‑naa ꞊yaa‑ pö ’pö ö ’wun ‑së ‑kë mɛ ‑nu ‑dhë, a dhoë‑ pö ‑an ‑dhë: ‑Zo ‑yö ‑Zlan ‑bha ‑sü ’ö bhë, dɔ ‑kɔ ’ö dɔa kö ‑a ’piö ‑pë ‑nu ’wo ‑kë këwun ‑së ‑nu ’ka ’waa ’dhö bhë, ‑a ‑zɔn ‑dhɛ gbɛ ’yaa ‑dhö; ’ö tɔɔ ‑zo ‑yö ‑Zlan ‑bha ‑sü waa‑ ö këwun ‑nu ꞊nɛ ’ö ’wo dho wo ’ko ’piö. ¹⁹‑Yö ü ‑zo ’piö ꞊nɛ bhi do ꞊nɛ ’ü (kwa Dë) ‑Zlan ‑bha ‑kë do ‑sü ‑wun ‑dhɛ ’wun gia‑, ’ö ’ü dɔ ü ‑bha ‑zo ‑yö ‑Zlan ‑bha ‑sü ’sloo ’ka bhë ꞊a? ‑Zuu yaa ‑nu ‑de ’pö, ‑a mɛ ’kö bhë ‑wa ꞊tɛi’ ‑dɔ, ’ö ’wo ꞊zluun ‑a ’dhiö ’suö ‑dhë. ²⁰Bhi ’bhaa ’wun dɔ ’ü ꞊nɛ, ü ’to ’to ’a ’wun ꞊zuan’ do ‑zɔn ü ‑dhë ’dhɛ, bhii ‑zo ‑yö ‑Zlan ‑bha ‑sü ’ü‑ ‑ga ‑na bhë, ‑a ‑yö ‑a ‑bha ‑pë gbɛ ’yaa ’dhö kö waa‑ ‑ta ‑kpa wo këwun ‑nu ’ka. ²¹Ablaamö kwa ’bhɛma ’ö bhë, ‑më ’ö‑ ‑kë ’ö ‑Zlan ‑ya dɔ ‑a ‑bha kpengdhö ꞊e? ‑Yö ‑sü ‑a këwun ‑nu ‑bha, ’ö tɔɔ yi do ’ka (‑a ‑bha ‑zo ‑yö ‑Zlan ‑bha ‑sü ‑wun ’gü), ‑yö ö gbö Izaakö gbaɔ ‑kë ‑Zlan ‑dhë slapë ’ka, ‑dhɛ ’ö dho ö ‑bha sla‑ bho ‑a ‑bha bhë ‑a ‑bha. ²²’Bha‑ yö ꞊a? ‑Kɔ ’ö‑ ‑bha ‑zo ‑yö ‑Zlan ‑bha ‑sü waa‑ ‑a këpë ’wo dhoë wo ’ko ’piö bhë ‑a ‑ga bhë ’dhɛ! ‑Kɔ bhë ꞊nɛ ’ö‑ ‑bha ‑zo ‑yö ‑Zlan ‑bha ‑sü ‑yö ꞊kaa’ ’dhiö ‑mɔ ’kuë ‑sü ’ka bhë; ’kɛɛ kë‑ wo ’dhö bhë ‑yö ‑sü ‑a këpë ‑nu ’wo ‑kë ‑a ’piö ‑pë ‑nu ’ka bhë ‑an ‑bha. ²³‑Yö ꞊bɛɛn’ ‑sü ’ka ‑Zlan ‑bha ’sëëdhɛ ’gü ꞊nɛ: Ablaamö ‑yö ö ‑zo ‑yö ‑Zlan ‑bha, ’ö ‑Zlan ‑ya yö mɛ kpengdhö ’ka, ‑a ‑bha ‑zo ‑yö ‑Zlan ‑bha ‑sü ‑wun ’gü. ‑Kɔ bhë ꞊nɛ ’ö ꞊kaa’ ’ö pë ’ö ꞊bɛɛn’ ‑sü ’ka ’ö‑ ’dhiö ‑yö ‑mɔ ‑a ’ka ’kuë. Pë ’ö ‑kë ’ö ‑Zlan ‑ya ‑dhɛ zlöö ö ’bha ’ö bhë. ²⁴Ka‑ ‑yö ꞊a; ꞊ya kë ’dhö kö mɛ ‑bha ‑kë kpengdhö ‑sü ’ö ‑Zlan wö ’dhiö bhë ‑yö ‑sü ‑a këpë ‑nu ‑bha; yaa ’sü ‑a ‑bha ‑zo ‑yö ‑Zlan ‑bha ‑sü ’sloo ‑bha.

²⁵Pë do bhë ’ö ꞊kaa’ Laabö, ꞊sɔɔnkëdhe ‑bha ’ka. Kë‑ wo bhë, ‑a ‑bha ‑kë kpengdhö ‑Zlan wö ’dhiö ‑sü bhë, ‑yö ‑sü ‑a këpë ‑nu ‑bha; ’ö tɔɔ ‑glunaɔkëmɛ ‑nu ’wo ‑kë Zuifö ’ka (’ö Zozue ‑yö ‑an bɔ ‑waan ’dho Zeliko ‑pö waa‑ ö ‑zütodhɛ ‑nu ’piö, ‑ga ‑binblü ꞊dhia) bhë, ‑yö ‑an ‑nia ‑kun ’ö nu ‑an ‑dhë ’ö ’wo dho wo ꞊plöö, zian gbɛ ’sü ‑sü ’ka kö ꞊wa yën. ²⁶(’Wun ‑nu ’wo bhë, a‑ ‑blɛɛ ’dhö ka ‑zo ‑büö ‑wun ’ka,) bhii ‑kɔ do ’ö bun ’dhoë‑ ’ka pë ’kpaan ’ka kö ’të ‑sü ’yaa‑ ‑gɔ bhë ’ö ‑zo ‑yö ‑Zlan ‑bha ‑sü ’dhoë‑ ’ka, kö ‑a ’piö ‑pë ‑nu ’wo ‑kë këpë ‑nu ’ka bhë, waa kë ‑dhö.

Mɛ nɛga ‑yö ‑kë ꞊nɛ ’siö ’dhö

¹N dhegluzë ‑nu, ‑kë mɛ ꞊daan’ ‑mɛ ’ka ‑sü ’ö ’ka ‑yaa ꞊wuën’ ꞊plëëzë ’ka bhë, kö ꞊kun ’ö ’ka ‑kë ꞊plëëzë ‑a ’gü, bhii ‑a ‑ga ’ka‑ wo ‑na bhë mɛ ’yi‑ ’gü bhë, za ’ö dho kan bhë, yi ‑bha ‑dho kë ’gbee‑ ’ö ‑ziö ‑a ’ka mɛ ‑nu ’ö ’waa‑ ’gü bhë ‑an ‑bha ‑ta. ²Kwa ’plɛsɛn, kwa ‑püö ’wun ‑nu ’gü ‑kɔ ꞊plëëzë ‑ta ’kɛɛ kë‑ wo ’dhö bhë mɛ ’ö ’yaa ‑püö ’gbɛɛdhö ö ꞊blɛɛ’ ‑wun ‑nu ’gü, kö yö ꞊nɛ ’ö tɔɔ mɛ ’ö‑ ‑bha ’ta ‑kɔ ’dho ‑mɔ ‑sü ’ka ’kuë. Mɛ ’ö ’dhö bhë ‑a ‑kɔ ‑yö ‑mɔa kö ‑yö ö ‑de ꞊kɔɔn. ³‑Kwa ‑dhɛ ‑ga ‑a ’gü ‑së ’ka; ’ö ꞊ya kë ꞊nɛ ’kwa ’klang ‑nu yö ꞊soo ‑nu dhiö kö pë ’kwa‑ ꞊mɛɛ kun tɔɔ kö ‑waan ’wun ma kwa ‑ta ‑a? ‑Kɔ bhë ꞊nɛ ꞊ya kaa zlöö, ’ö kwa ‑kɔ ‑ya ‑mɔ ꞊soo ‑nu ’wo ’dhö bhë ‑an ‑bha. ⁴’Iin ’zü ‑ka ’yitagɔ ꞊vava ‑nu ‑ga ’dhɛ! ’Kö ‑kë ꞊nɛ ‑wo ꞊va ’dhee, ’ö ꞊ya kë ’ö ’tëë ‑nu ‑wo dho ‑an ’ka ‑dhɛ ’saadhö ’gü, pë ’kö ꞊ya kë ’ö‑ ‑blümɛ ꞊yaa‑ ’pa ö ‑de ‑dhë, ’ö zian ‑zɔn ‑a ‑dhë bhë ‑yö ’teete ’kpaan ’ka. ⁵‑Kɔ do bhë ’ö mɛ nɛga ’dhoë‑ ’ka ’pö mɛ bun ‑bha. ‑Yö ’teete ’ka ’dhö mɛ ‑dhɛ mɛ ‑nu ’wo to ‑an ‑bha, ’kɛɛ ‑a ꞊blɛɛ’ ‑wun ‑nu ‑wo ‑ziö ‑a ‑de ‑ta. Ka gia‑, ‑ka ‑dhɛ ‑ga bhë ’dhɛ; ‑kɔ do ’ö ’siö pë ’tee ‑de ‑yö ꞊mɔa’ ’ö blii ‑to ’dhö ‑sü ꞊kaa’ siën‑ ꞊bhaa ‑dhɛ ’ka bhë ꞊nɛ ⁶’Ö nɛga ’dhoë‑ ’ka ’pö. ’Wun yaa ’kpɛkpɛ ‑yö nɛga ’ö kwa ‑gɔ bhë ‑a ’gü. ‑Yö kwa dɔ do ’ka ’dhö ’kɛɛ ‑a ‑kɔ ‑yö ‑mɔa ‑yö ’wun yaa ‑pɛn kwa bun ’gü ‑dhɛ ’plɛsɛn ‑bha. ꞊Ya kë ’ö ’siö ’ö ’go ‑na ꞊glöötiaandhö bhë ’ö‑ ‑da kwa ‑bha ‑tosiadhe ’plɛ ’gü. ⁷Mɛ ‑kɔ ‑yö ‑mɔa kö wü ꞊suu’‑ ’oo ꞊suu’‑ ’ö ’blü ‑ya ‑to, ‑yö ’wun ma ‑a ‑ta; ‑yö ‑ma ‑nu ’piö oo, ‑yö ’wun ‑nu ’wo ꞊gblëë wo ’gu ‑ta ‑an ’piö oo, ‑yö ’yuö‑ ‑nu ’piö oo, ‑a mɛ ’ö dho kun ‑a ’ka ’yaa ’dhö. ⁸’Kɛɛ pë mɛ ’ö ’wo‑ ‑dhɛ mɛ nɛga bhë, mɛ yaa kë ‑dhö do ꞊kun kö ‑yaan ‑a pö: «N ‑kɔ ꞊ya ‑mɔ ‑a ‑bha». ‑Yö ’wun yaa ‑go ‑a ’gü ‑pë ’ka ’dhö; yö do bhë ’zü, pë ’ö mɛ ‑ya kuënnu ‑kɔ dɔ ’yaa ‑mü, ‑yö pa ‑sü ’ka mɛ zë ‑pë ’ka. ⁹Yö ꞊nɛ ꞊ya kë ’kwa‑ sü ’ö ’kwa kwa Dëmɛ, kwa Dë zuö pö ‑a ’ka; ’yö yö do bhë ’zü ꞊nɛ ’ö ꞊ya kë ’kwa‑ sü ’pö ’ö ’kwa ’dhangga ꞊yaa’ mɛ ‑nu ’ö ‑Zlan ‑yö ‑an ‑da ö ‑bhɔa ’ka bhë ‑an ‑bha. ¹⁰Ka gia‑ ka‑ ‑yö bhë ꞊a! ’Dhi do bhë, ꞊sɛɛ‑ pö ‑wo waa‑ ’dhangga ‑ya mɛ ’ka ‑wo ‑wo go ‑a ’gü ꞊dhɛɛ? N dhegluzë ‑nu, kö ꞊kun ’ö ’kwa‑ ‑kë ’dhö. ¹¹(꞊Dhɛ ’ö ’ka bhɔ ꞊nɛ,) ’ka‑ yö do ꞊nɛ ’yi ’güüzë waa‑ ’yi din ‑sëëzë ꞊wa bhɔ do ’yi ’tɔɔ‑ ‑gɔ do ꞊bhaa ꞊a? ¹²’Iin ’zü olivö bhɛ ꞊ya ‑ya do figö ‑lü tuö ’iin figö bhɛ ꞊ya ‑ya do lɛzɛn ‑kpa ’lü ’wo ‑drɔɔn kë ‑na ‑a ’ka bhë ‑a ‑lü tuö, ’ka‑ yö a? N dhegluzë ‑nu, ’ö bhii ‑kɔ do bhë ꞊nɛ ’ö kweezö ‑yi bhë ꞊waa‑ ’tɔ ’yaa kë mɛ ‑gɔ ’yi din ‑sëëzë ’ka.

’Kpaakpadhɛ ’ö go ‑Zlan ’piö

¹³(’Ö ꞊ya ’go mü ’zü, n dhegluzë ‑nu, a ‑dho ‑a pö ka ‑dhë ’zü ꞊nɛɛ:) Kö mɛ ꞊ya kë ka ziën ’ö ’kpaakpa, ’ö ’wun ‑nu ‑yö ’ko ’dhiö ‑kɔ dɔ, kö ‑a ’ta ‑sü ‑kɔ ‑nu, ‑a ‑bha ’wun kë ‑kɔ ‑nu ‑wo kë ‑së; ’iin kö ‑yö ö ‑de sü ’tee ꞊nɛ mɛ ’ö ’kpaakpa ‑a ’dhö. ¹⁴’Ö ꞊ya kë ꞊nɛ ꞊zuögüdhɛ yaa ’ö ꞊ya kë ’ö nu ꞊gluɛng’ waa‑ pë ‑ta ꞊kɔɔ’ ‑sü ‑an ’ka bhë ‑yö ka ‑gɔ, kö ꞊kun ’ka ka ‑de sü ꞊va ꞊nɛ ka ’kpaakpa, ’ka ’wun gia‑ to, ’ö ’ka ꞊sua ‑kë. ¹⁵꞊Ya kë ’dhö kö ’kpaakpadhɛ ꞊suu’‑ mɛ bhë, yaa ’go ‑Zlan ’piö, ’kɛɛ ‑yö ’kpongtaadhɛ waa‑ ö ’gü ‑mɛ ‑nu ‑an wɔ ‑kɔ ‑bha ’ka, kö ‑yö ‑go dü ’gü. ¹⁶’Ö bhii ‑dhɛ ’oo ‑dhɛ kö ꞊gluɛng’ waa‑ pë ‑ta ꞊kɔɔ’ dhe ’wo‑ ‑bha, kö ‑dhɛ bhë pë ‑kaankuëdhe waa‑ pë yaa ꞊suu’‑ ’saadhö ‑wa ‑bha ’pö. ¹⁷’Kɛɛ ’kpaakpadhɛ mɛ ’ö go ‑Zlan ’piö bhë ‑yö ‑kë ’puu; ‑yö ꞊nɛ ’ö ꞊zuöyagluu ’dhö, ‑kë ’lëëlë ‑sü waa‑ ’kowogümadhe ’wo go ‑a ’gü. ‑A ’glu ꞊yö ‑së, ’ö‑ këwun ‑nu ’dhö ‑së; ’yaa pë ‑nu kë mɛ ‑nu ‑zë ’gü dhe ‑bha ’iin ’yaa pë ‑nu kë dɔ ’a‑ kë ꞊nëdhö ‑an ’yaan‑ kun ‑sü ’ka ‑sü ‑bha. ¹⁸Mɛ ‑nu ’ö ‑an ‑bha pë ‑nu kë ‑sü ’gü, ’wo kë ‑na ꞊zuöyagluu ‑gɛn ’ka mɛ ‑nu ’wo ‑an ‑zü ’to ‑an ‑dhë bhë, pë ’ö kë ‑na ‑an ꞊truën ’ka ’ö tɔɔ ‑tosiadhe ’ö kpengdhö.

‑Ka ’kan dü ‑bha, ’ka ziö ‑Zlan ’piö

¹(N dhegluzë ‑nu,) ‑dɔn ‑nu waa‑ ’dhinaa ‑nu ’wo ka ziën ’ö ’waa yën bhë, ‑wo ‑go ka ꞊zuö’ ’piö ‑wun yaa ‑nu ’wo wo ’ko ꞊gaan ’gan ‑na bhë ‑an ’gü. ²’Ö ꞊ya kë ꞊nɛ pë ‑dhɔ ‑yö ka kë ‑na, ’ö pë bhë ’kaa ‑mɔa ’ka‑ yö, kö ’ka bhɔ mɛ zë ‑sü ‑bha. ‑Kɔ do bhë ’ö‑ ’ka, kö ’ka kë ’dhinaakëmɛ ’ka. Kë‑ wo ’dhö ’ö pë bhë ’kaa‑ yö bhë, ’ö tɔɔ ’kaa‑ ‑dhɛ ‑Zlan ‑gɔ. ³‑A ‑de ‑a ‑ga ’ka‑ wo bhë, ’kö ‑kë ꞊nɛ ka‑ ‑dhɛ ‑Zlan ‑gɔ ’dhee, ’kaa‑ yö, bhii ka ꞊zuö’ ’piö ‑wun ‑yö ya, ’ö tɔɔ pë ’ö ’ka‑ ‑dhɛ ‑na bhë, pë ’ö ’ka dho ka ‑de ꞊dhɔɔbhaapë kaa yö ‑mü. ⁴Mɛ ‑nu ’kaa ‑to zian do ’piö ꞊nɛ, ’kaa‑ ꞊tɛi’ dɔ ꞊nɛ ’ka ‑klu ’kpongtaapë ‑nu ‑bha kö ’ka kë ‑Zlan yaagümɛ ‑nu ’ka a? ⁵‑Yö ꞊bɛɛn’ ‑sü ’ka ‑Zlan ‑bha ’sëëdhɛ ’gü ꞊nɛ: ‑Zuu ’ö ‑Zlan ‑ya ‑da kwa ’gü bhë, ‑yö ꞊druɛi kë ‑na; ‑ya ’piö kö ’kwa kë ‑Zlan do ’sloo ‑bha ’ka. ‑Yö kë ka ’yaan ꞊nɛ ‑wo ’ö bhë yaa ‑ya ’sëëdhɛ ’gü ’dhö ’kpaan ’ka, ‑ya ’sëëdhɛ ’gü ‑dhɔ ‑bha. ⁶’Kɛɛ kë‑ wo ’dhö bhë, ‑Zlan wö ‑yö ꞊sië’ ‑sü ’ka ‑kplawo kwa ’piö ꞊nɛ ‑kɔ ’ö ꞊bɛɛn’ ‑sü ’ka ‑a ’ka ‑Zlan ‑bha ’sëëdhɛ ’gü bhë ‑a ’dhö ꞊nɛɛ: ‑Zlan ‑yö ‑dɔ ‑desüvamɛ ‑gɔ ’yënng, ’kɛɛ ‑yö ’glusë ‑kë ‑de ‑sü ’tee ‑mɛ ‑nu ’ka. ⁷꞊Dhɛ ’ö ‑kë ’dhö, ‑ka ka ‑gɔ ’dho ‑Zlan ‑dhë sia‑, ’ka dɔ dü ‑gɔ ’yënng; ꞊ya kë ’dhö, ‑yö ‑dho ꞊duë ka ‑dhë ’ö dho ꞊gbiin. ⁸‑Ka ꞊yɔɔn ‑Zlan ‑bha kö yö ‑de ’pö ‑yaan ꞊yɔɔn ka ‑bha. ‑Ka ka ‑kɔ bho ’wun yaa kë ‑sü ’gü; mɛ ‑nu ’kaa ’to zian do ’piö ’ka ꞊nɛ, ka ꞊zuö’ ‑yö kë ’puu. ⁹‑Ka kë ’yenazë, ‑ka ka ‑de dɔ pë yaa kë mɛ ’ka ‑mɛ ’ka, ’ka ’gbo ‑nu bɔ. Pë ’ö ‑kë ka ‑gɔ ꞊zuögludhi ‑wun ’ka ’ö ’ka‑ ’yee ‑nu to bhë, ‑wo kë ka ‑gɔ ’gbo ‑gɛn ’ka. ¹⁰‑Ka ka ‑de ’dho sia‑ kwa Dëmɛ wö ’dhiö; ‑yö ‑dhö ka ꞊luu’‑.

Kö ꞊kun ’ka za dɔ ka dheglu ‑nu ‑bha

¹¹N dhegluzë ‑nu, kö ꞊kun ’ka ka ’ko ‑nu ‑wun yaa ꞊blɛɛ; bhii mɛ ’ö ꞊ya ö dheglu ‑wun yaa ꞊blɛɛ’‑, ’iin ꞊ya za dɔ ‑a ‑bha, kö ‑Zlan ‑bha tɔng (’ö‑ pö ‑kwa kwa ’ko ‑nu ‑dhɔ kë bhë) ꞊yaa‑ ‑wun yaa ꞊blɛɛ’ ꞊nɛ bhë; kö ꞊ya za ‑ya ‑a ‑bha ꞊nɛ bhë. ’Kɛɛ kö kwa‑ ꞊tɛi’ ‑dɔ ꞊nɛ mɛ ’ö ꞊ya za ‑ya tɔng ‑bha, kö tɔng bhë, ‑a ’kun ‑mɛ ’yaa ‑mü bhë. ¹²‑Zlan dosɛn ’kpaan ’yö tɔɔ tɔng ‑nu mɛ ‑dhë ‑mɛ; yö ꞊nɛ ’ö mɛ ‑bha za ‑kan; yö do gia‑ bhë ꞊nɛ ’ö za ꞊ya ‑ya mɛ ‑bha, ’ö ‑mɔa ’ö mɛ dha ’iin ’ö mɛ ’gü ꞊siö’‑. ꞊Ya kë ’dhö kö dö ‑mü ü ’ka ’ü za dɔ ü ‑ya ’yɔɔ ‑bha ‑ɛ?

Kö ꞊kun ’ka ka ‑de sü ꞊va

¹³’Wun ’ö ‑gban ka ‑bha ’a ’dhoë‑ ꞊blɛɛ’‑ bhë; ‑ka ka ’to ’to n ‑ma. ꞊Ya kë ka‑ ‑pö: «꞊Dɛɛ ’iin ꞊dhia’, yi ‑dho dho pö‑ mɛ ꞊nɛ ‑a ’gü kö ’yiën‑ ’dhɔɔ ‑nu dɔ ‑kwɛ do ’piö; yi ‑dho ’wëü‑ yö ꞊va ’ka ’ma.» ¹⁴Ka‑ ‑pö ’dhö, ’kɛɛ pë mɛ ’ö dho kë kaa ꞊dhia’, ’kaa‑ dɔ! Ka ‑bha ‑tosiadhe ‑yö ‑kë ꞊nɛ ’dhuu pë ’tee ’ö ꞊luu ’ö yaa ꞊glɔɔ ’ö to mü ’ö ‑ziö ‑a ’dhö. ¹⁵Pë ’ka dho ‑a pö ꞊zian’ ’ö tɔɔ: «꞊Ya kë Dëmɛ ‑zo ’kun ‑wun ’ka, kö ’yiën‑ ‑tosiadhe kë ꞊dhia’, yi ‑dho pë mɛ ꞊nɛ ‑a kë.» ¹⁶’Kɛɛ ’yaa kë ’dhö ’sa, ’ö ’ka ’dhi ꞊va ’gü ‑wun ꞊blɛɛ. ‑De ‑sü ꞊va ꞊suu’‑ mɛ ’ö bhë ‑yö ya. ¹⁷꞊Ɛɛ, ꞊aoo! ’Ma ka ’paan bho ꞊va ꞊nɛ bhë. ꞊Ya kë ’dhö kö mɛ ’ö pë ’ö‑ këpë ’ka ’ö‑ ’yaan ‑wun ’ka ’ö ’yaa kë bhë, kö ö ‑de ‑kë ’plɛ ’ö‑ wo ‑na ꞊sɔɔnyaakëmɛ ’ka bhë.

’Wun ’ö ‑gban ꞊bhɔɔmɛ ‑nu ‑bha

¹Mɛ ’ka ꞊bhɔɔmɛ ’ka, ’wun bhë ‑ya yö ka ‑bha ’sabla. ‑Ka ’gbo ‑nu bɔ ka ‑wo ‑ta ’gbee‑ ’ka, ’wun ’gbee‑ ‑nu ’wo dho nu ka ‑ta bhë ‑an ‑wun ’gü. ²‑A pö ’a‑ wo ’dhö bhë ’ö tɔɔ ꞊bhɔɔpë ‑nu ’wo ka ‑gɔ bhë ‑an ’plɛ ‑wo ’bu ‑sü ’ka ’ö ka ‑bha ‑kë ‑bha ‑sɔ ‑nu ’wo bhë ’pö ’ö pë ’bhee‑ ‑nu ꞊wa ‑an ‑bhö ’saadhö. ³Kaa‑ ’sënng ‑nu waa‑ kaa‑ zën ‑nu ’wo bhë ’kaɔ ‑dho ‑an kun. ’Kaɔ ’ö bhë ꞊nɛ ’ö dhö ‑zɔn ꞊nɛ ka këwun ‑yö ya (wo ꞊nɛ ’ö ’ka dhö bɔ ‑an ‑ta kö za ‑yaan ka ’kun). Pë do ’ö ’kaɔ ‑ya ‑kë kaa‑ zën waa‑ kaa‑ ’sënng ‑nu ‑an ’ka bhë ꞊nɛ ’ö dhoë‑ kë ka ’ka ’pö ꞊nɛ pë ’wo‑ pö ‑a ‑bha ’güö ’ka‑ wo ’siö ꞊kwaa’ ‑a ’dhö, ’ö tɔɔ ’töng ‑kaanta ‑nu ꞊wa yö ꞊klöö’, ’ö ’ka ꞊tun ka ‑gɔ dɔ ’wëü‑ ꞊mɛɛ’ ‑sü ’gü ꞊nëdhö bhë. ⁴’Go mü, mɛ ‑nu ’wo yuö ‑nu kë ‑na ka ‑bha ꞊bhlöödhɛ ‑nu ‑bha bhë, kaa ‑an ꞊saan’ bho. ‑Ka ‑dhɛ ‑ga ’dhɛ! Wo ꞊ga ’ö ‑an ’we ‑zuö ’dho dɔ ‑na ’ma bhë; yö ꞊ga ’zü ’ö mɛ ‑nu ’wo ka ‑bha ꞊bhlöödhɛ ‑yuö kë ‑na bhë, ’ö ‑an ‑wo ’yena ‑zë bhë ꞊ya ‑lo kwa Dëmɛ ‑Zlan ’piigbeezë ’piö bhë. ⁵Ka ka ‑bha ‑tosiadhe ‑kë ‑dhɛ ‑së ‑dhɛ ’gü ’kpongtaa zö ’ö ’ka ka ꞊dhɔɔbhaapë ‑nu ‑kë; ’ka ‑ba ‑bhöpë ‑nu ‑së ‑gɔ ꞊nɛ pë ’wo‑ pö ‑du ’wo‑ ’dhi gba kö ‑waan zë ‑a ’dhö. ⁶Mɛ ’ö kpengdhö ’ö yaa pë gbɛ kë, ’ka‑ kun ’ö ’ka‑ zë; ’yaa ö ‑de ‑ta ꞊kɔɔ’ ’teete ‑dewo.

’Wun ‑nu ’wo ‑gban ꞊zuösaadhɛ waa‑ ꞊bhɛa’ ‑sü ‑an ‑bha

⁷N dhegluzë ‑nu (ka ’ö ’ka Yesu ‑wun ‑dhɛ ’wun gia‑ bhë), ka ꞊zuö’ ‑yö kë ‑saa, ‑yö ’dho ‑yö yöë kwa Dëmɛ nu ‑yi ‑bha. ‑Ka kë ꞊nɛ pëtamɛ ’ö ö ‑bha tapë ‑nu ‑së dhi ‑yi ’dhiö ‑gan ’ö dho ’ö yöë ‑an bho ‑yi ‑bha ‑a ’dhö; ꞊ya kë ’dhö ’ö ö ꞊zuö’ kë ‑saa ’ö dɔ ’ö dha ’yi ‑blɛɛzë ‑nu ‑wo yö sia‑, ’ö ꞊kpɔɔ ‑yö yö mü, ’ö toë ’dhö ’ö dha ’yi ‑kaanta ‑nu ‑wo ban, ‑yaan ꞊tun ö ‑kɔ ‑da ‑na ö ‑bha ꞊bhlöödhɛ ’gü. ⁸Ka ‑de ’pö, ka ꞊zuö’ ‑yö kë ‑saa, ’ka ka ’gü dɔ ’gbee‑, ’ö tɔɔ kwa Dëmɛ nu ‑yi ꞊ya yö ꞊klöö’.

⁹N dhegluzë ‑nu, kö ꞊kun ’ka ka ‑wo kpɔ ka ’ko ‑nu ‑gɔ ‑yö kë ’dhö kö ꞊kun ’ö ‑Zlan dho za ‑lo ka tuö. ‑A ‑de za bhë ‑a ’kanmɛ ꞊ya yö ꞊klöö’. ¹⁰N dhegluzë ‑nu, ‑Zlan ‑wodhiölomɛ ‑nu ’wo ‑kë ’dhiö ꞊zian’ ’wun ꞊blɛɛ’‑ ꞊dhia kwa Dëmɛ ’tɔ ’gü bhë, ‑ka ‑an ‑ga ’dhɛ! ‑An ‑bha ꞊zuö’ ‑kë ‑saa ‑sü ‑wun ’gü wo ‑bha ’klobhɔdhe ‑nu ’gü, ‑ka ‑an ’sü ka ‑bha ’wun ꞊zuan’ ’ka. ¹¹Kwa ‑an ‑ya ’ti ‑kë ꞊nɛ mɛ ‑nu ’ö ‑Zlan ‑yö ’dhuë‑ kpɔ ‑an ‑bha ‑an ’dhö, ’ö tɔɔ ‑wo ’yena ‑kë, ’kɛɛ ‑wo ‑to ‑klu ‑sü ’ka ‑Zlan ‑bha. ’Wun ’ö ‑gban Zɔbö ‑bha ꞊zuösaadhɛ ‑bha ka‑ ‑ma; ’go mü ’zü, ’wun ‑së ’ö kwa Dëmɛ ‑ya ‑kë ‑a ‑dhë ‑a ‑bha ’yena ’dhiötoyi ’ka bhë, ka‑ ‑taa ‑ma ’pö; ’ö bhii kwa Dëmɛ ’ö ’ka‑ ‑ga ‑na bhë ‑a ‑bha mɛ ’yena yö ‑sü waa‑ ‑a ‑bha ’glusë ‑wo ꞊va giagiawo.

¹²N dhegluzë ‑nu, ‑ka ka ’to ’to n ‑ma: Kö ꞊kun ’ka ka ‑wobhödhe kë (‑a ‑zɔn ‑sü ’ka ꞊nɛ pë ’ka‑ ‑wo ‑bhö bhë ’wun gia‑ ‑mü), ’ö ’ka‑ wo ‑Zlan ’ö dhang‑ ’gü ‑a ’tɔ ’ka, ’sɛ ‑tɔ ’ka, ’iin ‑kɔ ꞊suu’‑ ’saadhö ‑ta. ’Kɛɛ ’ka ’wun ꞊blɛɛ’‑, ’ö ꞊dhɛɛ’ ꞊ya kë ‑a ’piö ꞊waa‑ ’kpɔ ka ‑gɔ, ’ö‑ ‑daa dho kë ‑dhö, ꞊ya kë ꞊ii‑ ’ka, ‑kaa ꞊ii‑ pö; ’ö ꞊ya kë ‑abi’ ’ka, ‑kaa ‑abi’ pö, ‑yö ’to ’dhö, ‑yö kë ’dhö kö ꞊kun ‑Zlan ‑bha za ’ö dhö kan mɛ ’plɛ ‑bha bhë, ’ö dho ka kun.

¹³꞊Ya kë ꞊nɛ mɛ ꞊ya kë ka ziën ’ö ꞊ya kë ꞊wa ‑bhö ‑sü ’gü, kö ‑yö ‑bhɛa ‑Zlan ‑dhë; ’iin ’zü ’ö ꞊zuögludhi ’gü kö ‑yö ’tan ‑nu bho ‑Zlan ’tɔ ’piö. ¹⁴꞊Ya kë ꞊nɛ mɛ ’bhaa ꞊ya kë ka ziën ’zü ’ö ’yaa ’po ‑sü ’ka ꞊taa’, kö mɛ ’wo mɛ ziizii ‑nu ’ka ‑Zlan ‑gɔ kɔɔ bhë, ‑yö ‑an ꞊dhɔɔ kë kö ‑waan ‑a ’dhiö ꞊bhɛa’ wo ‑Zlan ‑dhë, ’yɔn ‑yö ‑a tuö ‑sü ’ka kwa Dëmɛ ’tɔ ’gü. ¹⁵’Yö ꞊bhɛawodhe ’ö ‑kë kwa Dëmɛ ‑dhë bhë, ꞊ya kë ‑zo yö ‑sü ’ka, mɛ bhë kwa Dëmɛ ‑yö ‑dho ‑potaasü nu ‑a ‑dhë, ’ö ꞊ya kë ꞊nɛ ’wun ‑ya ‑bha ‑tosiadhe ’gü, ’ö dho ziö ‑a ‑ta. ¹⁶‑Ka ka ‑bha ꞊sɔɔn yaa ‑wun ‑nu ꞊blɛɛ’‑ ka ’ko ‑nu ‑dhë; (’ö ꞊ya kë ’dhö ’ka ꞊bhɛa’ ka ’ko ‑nu ‑wun ’gü,) ’ö ‑Zlan ‑yö ka ‑dhɛ bo; ’ö tɔɔ mɛ ’ö kpengdhö ‑Zlan wö ’dhiö bhë, ꞊ya ‑bhɛa ‑Zlan ‑dhë ö ꞊zuö’ ’plɛ ’ka, ‑a ’gü ‑pë ‑yö ‑kë ’gbönggböng. ¹⁷‑Ka ‑dhɛ ‑ga ’dhɛ! ’Wun ꞊zuan’ do ꞊ga ꞊nɛ. (‑Zlan ‑wodhiölomɛ do ‑yö ‑kë ‑dhö ’kpa, ’wo‑ ‑dhɛ Eli.) Eli bhë kë‑ wo ’kpa, ‑yö ‑bhɛa ‑Zlan ‑dhë ö ꞊zuö’ ’plɛ ’ka kö ꞊kun ’ö dha dho ban; ’ö‑ ‑de ‑yö ‑kë ꞊nɛ ‑kɔ ’ö ‑dhɛ ‑a ’ka bhë ‑a ’dhö; dha yaa ban ’dhö ‑kwɛ ‑yaaga waa‑ ö ’gbu ‑an ’piö; ’kɛɛ kö kë‑ wo ’dhö bhë ’sa, Eli ‑yö ‑kë mɛ ’bhee‑ ’ka ꞊nɛ kwa ’dhö ’pö. ¹⁸’Yö ꞊dhɛ ’ö go mü, ’yö ꞊bhɛa ’zü, ’ö dha ‑yö ban ’ö tapë ‑nu ‑wo ‑dhi ’kpongtaa.

¹⁹N dhegluzë ‑nu, ꞊ya kë ꞊nɛ mɛ ꞊ya kë ka ziën ’ö ꞊ya ’go ’wun gia‑ ‑zian ‑ta, kö ‑kaa ’slë ꞊mɛɛ’‑ ’kaan‑ ‑da zian kpengdhö ‑ta; ²⁰bhii a‑ ‑pö ka ‑dhë, mɛ ’oo mɛ ’ö ’dhoë‑ mɛ ’ö ꞊ya ‑püö ꞊sɔɔn yaa ’gü ‑a bho zian ’ö‑ ’dhiötodhɛ ‑yö ‑kë ga ’ka bhë ‑a ‑ta, kö ꞊yaa‑ kë mɛ bhë ꞊ya ‑da ‑Zlan ‑bha zian ‑ta; ‑Zlan ‑yö ‑dho ziö mɛ bhë ‑a ‑bha ꞊sɔɔn yaa ‑nu ‑ta.