Eblö

’Sëëdhɛ ’ö dho ‑Zlan ‑bha mɛ ‑nu ’wo

Eblö

’ka ‑an ’piö ’ö ꞊nɛ

¹Kë‑ wo ’kpa bhë ‑Zlan ‑yö ’wun ‑blɛɛ kwa ’bhɛma ‑nu ‑dhë ꞊plëëzë ’ka ꞊bɔa’ ö ‑wodhiölomɛ ‑nu ‑ta ‑sü ’ka; ’yö kë‑ wo ’dhö bhë ’sa, ‑yö ꞊blɛɛ ’dhö ‑kɔ ꞊suu’‑ ’saadhö ‑ta. ²Yö ꞊ga ’ö yi ‑kaanta ’kwa ‑an ’gü ꞊nɛ ’ö ꞊ya bɔ ö Gbö ’gü ’ö ꞊ya ’wun ꞊blɛɛ’‑ kwa ‑dhë ’zü bhë. ‑A Gbö ’ö ’dhö bhë ꞊nɛ ’ö bɔ ‑a ’gü ’ö pë ’plɛ ‑da, ’ö‑ sü ’ö‑ ‑ya pë ’plɛ Dëmɛ ’ka. ³Yö ꞊nɛ ’ö ‑Zlan ‑bha ’tɔbhɔdhe ’bhü ’dhö ‑a ’gü. Yö ꞊nɛ ’ö ‑Zlan ‑bhɔa giagia ’ka, ’ö‑ ‑kɔ ’dhö pë ’plɛ ‑gɔ ‑a ‑wo ’piigbeezë bhë ‑a ’ka. Yö bhë ꞊nɛ, ꞊dhɛ ’ö ꞊ya yën mɛ ’bhee‑ ‑nu ‑bha ’wun yaa ‑nu ‑bho ‑an ‑bha ‑sü ‑bha, ’ö ‑ya ‑sü ’ka ‑Zlan ’ö ‑ya ‑sü ’ka ‑kɔ ‑mɔ ’wuën‑ ‑sü ’saadhö ‑ta bhë ‑a ‑kɔ ‑së ’gü dhang‑ ’gü.

’Wun ’ö ‑gban Yesu Klito ‑bha ‑kë ꞊va ‑Zlan ‑bha bɔmɛ ‑nu ‑ta ‑sü ‑bha

⁴Yesu ‑bha ‑kë ꞊bhlëzë ‑sü ’ö ꞊zië’ ‑Zlan ‑bha bɔmɛ ‑nu ‑ta ‑sü ‑bha bhë, ‑ya ‑kë ’ö ‑Zlan ‑yö ’tɔ ’ö ꞊va ’ö ‑ziö ‑an ‑bha ‑ta ’ö‑ nu ‑a ‑dhë. ⁵Ka gia‑ ‑ka ‑dhɛ ‑ga bhë ’sa! Kë‑ wo bhë, ‑Zlan yaa‑ pö do ö ‑bha bɔmɛ ‑nu ’wo bhë ‑a mɛ do ‑dhë do ꞊nɛɛ: Bhi ꞊nɛ ’ü n Gbö ’ka, ’kan ꞊dɛɛ ‑bha, ’ma kë ü Dë ’ka. Ka‑ ‑yö bhë ꞊a? Yaa ö ‑bha bɔmɛ ‑nu ’wo bhë ‑a mɛ do ‑wun ꞊blɛɛ’‑ do ꞊woë’ ꞊nɛɛ: Ma ꞊nɛ ’a tɔɔ ‑a Dë, ’ö yö ‑de ’pö yö ꞊nɛ ’ö tɔɔ n Gbö. ⁶’Kɛɛ pë ’ö ‑kë ꞊zian’ ’ö tɔɔ, ‑dhɛ ’ö ‑Zlan ’dhoë‑ ö Gbö do ’ö‑ ‑bha ’në ‑blɛɛzë ’ka bhë ‑a bɔ ’kpongtaa, ‑ya ‑pö: ’Go ‑Zlan ‑bha bɔmɛ ’plɛ ‑wo yö wo kpɔn ’gü ‑a ’dhiö ‑a gba ‑sü ’ka. ⁷Pë mɛ ’ö ꞊bɛɛn’ ‑sü ’ka ꞊zian’ ‑a ‑bha bɔmɛ ‑nu ‑wun ’gü ’ö tɔɔ: ‑A ‑bha bɔmɛ ‑nu ’wo‑ ‑bha yuökëmɛ ‑nu ’ka bhë, ꞊ya kë, ‑yö ‑an kë ’tëë ‑saa ’ka, ’ö‑ ’bhaa ‑nu ꞊ya kë, ’ö‑ ‑an ‑kë ’siö ꞊nɛ ’ka ’pö. ⁸’Kɛɛ ꞊dhɛ ’ö yö ö Gbö ‑bha ’yö‑ pö: Ü ‑bha ꞊bhɔɔ’ ’gɔ ‑gbloo bhë ‑yö ‑gban ꞊toëpö ’ka, ‑Zlan; ü ‑bha ‑ya ü ‑bha ‑gludëdhɛ ‑pö bhë ‑a ’dhiö ‑sü bhë, ü‑ ‑kɔɔn ‑a ‑kɔɔn ‑kɔ kpengdhö ’ka. ⁹Pë ’ö kpengdhö ꞊nɛ ’ö‑ ‑dhɔ ‑yö ü ‑kë; ’ö ’wun yaa ‑dhɔ ’yaa ü kë. Pë ’ö ‑kë ’ö ‑Zlan, ’ö ü ‑bha ‑Zlan ‑yö ü sü ’ö ꞊zuögludhi nu ü ‑dhë ü ‑ya ‑sü ’ka ‑dhɛ ꞊bhlëzë ‑dhɛ ‑bha ’ö bhë. ‑Dhɛ ’ö ‑ya ‑a ‑bha bhë, ‑yö ꞊bhlëzë ’ö ꞊zië’ ‑a ‑dhɛ mɛ ’ö ü ’bha ‑nu ‑ya ‑a ‑bha bhë ‑a ‑ta. ¹⁰’Yö‑ pö ’zü: Bhi ꞊nɛ, n Dëmɛ, ’ö ’töng züdɔyi ’ka, ’ü ’kpongtaadhɛ ‑kë; ’ö ’ü dhang‑ ‑pë ‑kë ü ‑kɔ ’ka. ¹¹Pë ‑nu ’wo bhë ‑an ’gü ‑dhö ꞊siö ’töüdhö; ’kɛɛ bhi ‑zë ü ‑dhö to ’dhö. Pë ‑nu ’wo bhë ‑wo ‑dho kë zii ꞊nɛ sɔ ‑nu ’dhö; ¹²ü ‑dho ‑an kpö kë ꞊nɛ mɛ ‑sɔ kpö ‑kë, ’ö‑ mɛ ’ö ꞊ya kë zii ’ü‑ bho mü ’ü‑ ‑dëü yö ‑a piën‑ ꞊nɛ mɛ ‑sɔ ‑kë wo ‑bha. ’Kɛɛ bhi ‑zë, ‑kɔ do ’ü‑ ’ka bhë ꞊nɛ ’ü dhö toë ’pö; ü ’ka ’dho kë zii ’gbɛɛdhö. ¹³‑A ‑ga ’ka‑ wo bhë ‑Zlan ‑bha bɔmɛ ‑nu ’wo bhë ‑a dözë ’ö ‑Zlan ꞊yaa‑ pö ‑a ‑dhë do: ‑Ya n ‑kɔ ‑së ’gü, ‑yö ’dho ‑yö yöë yi ’a dho ü yaagümɛ ‑nu kaa ü ‑bha ‑taa ‑an ‑ta ‑pë ’ka ‑a ‑bha ‑ɛ? ¹⁴꞊Ya kë ’dhö kö bɔmɛ ‑nu ’wo bhë, ‑wo ‑zuu ‑nu ꞊suu’‑ ‑sëëzë ’ka ’ö ꞊ya kë ’wo yuö ‑nu ‑kë ‑Zlan ‑dhë; ’ö ‑Zlan ‑yö ‑an bɔ kö mɛ ‑nu ’ö dhasü dho kë ‑an ‑gɔ bhë, ‑waan nu ‑an ‑dhë.

’Wun ’ö ‑gban dhasü ’gblüünzë bhë ‑a ‑bha

¹‑A ‑wun ’gü ꞊nɛ ’ö ’wun giagia (’ö ‑gban Yesu Klito ‑bha) ’ö ’kwa‑ ma bhë, ’ö ’kwa dho to ‑klu ‑sü ’ka ‑a ‑bha gɛnngdhö, ‑yö kë ’dhö kö ꞊kun ’ö ’kwa dho dho ‑an ’ka ꞊gbiin kö ’kwaan‑ ‑da ꞊dhɔng ‑zian ‑ta; ²Ö tɔɔ tɔng dɔ ‑wo ’ö ‑Zlan ‑bha bɔmɛ ‑nu ‑wo nuë yi bhë ‑a ’ka (Moizö ꞊dhia kö ‑ya dɔ Izlaɛlö ‑mɛ ‑nu ‑dhë) bhë, ‑a ’gü ‑wun ‑yö ‑kë; ’ö tɔɔ mɛ ’ö yaa‑ ‑ya ’ti kë ’iin ’ö yaa ’wun ma ‑a ‑ta, ‑a ’klo ‑yö ‑bhɔ. ³꞊Ɛɛ, ’ö ꞊ya kë ’dhö, ’klobhɔdhe ’ö bhë kwa ‑dho dha ‑a ‑gɔ ‑kɔklë ’kɛɛ kö dhasü ꞊va ’ö bhë ’kwa‑ ‑wun ’sü ‑kɔ ꞊taa ꞊ɛɛ? ’Kɛɛ kö ka gia‑ ‑yö ka ’yaan ꞊nɛ ’wun ’ö ‑gban ‑a ‑bha bhë, kwa Dëmɛ gia‑ ‑de ‑ya ‑blɛɛ ‑blɛɛzë ’ka. Ö mɛ ‑nu ’wo‑ ma ’wo‑ ‑bha ‑kë ꞊bhlëzë ‑sü ‑zɔn kwa ‑dhë. ⁴’Kɛɛ kë‑ wo ’dhö bhë, kö ‑Zlan ‑yö ’wun bhë ‑a ‑bha ‑kë ’wun gia‑ ’ka ‑sü ’gü ‑pë kë ‑na ꞊duakëpë ‑nu, ‑dhidhaapë ‑nu waa‑ ’wun ’gblüünzë ꞊plëëzë kë ‑sü ’ka. Yö do bhë ’zü ’ö ‑Zuu ’slööslö ‑bha gbaɔ ‑nu ‑glu mɛ ‑nu ’wo‑ ‑wun ‑dhɛ ’wun gia‑ ‑an ’ka ꞊nɛ ‑kɔ ’ö ‑dhi ‑a ’ka ‑a ‑dhë ‑a ’dhö. ⁵’Kɛɛ kë‑ wo ’dhö bhë, ‑yö kë ka ’yaan ꞊nɛ ‑dhɛkpaɔ ꞊dhia’ ’yi‑ ‑wun ꞊blɛɛ’ ‑na bhë, ‑Zlan yaa ö ‑bha bɔmɛ ‑nu ‑ya ‑a ‑gɔ ’dhiö ‑mɛ ’ka; (Yesu Klito ꞊nɛ ’ö ‑yadhɛ bhë ‑a ‑bha). ⁶Pë ’ö ꞊bɛɛn’ ‑sü ’ka ꞊zian’ ’wun bhë ‑a ‑wun ’gü ‑Zlan ‑bha ’sëëdhɛ ’gü ‑ya ‑pö: ’Aa, (n Dë ‑Zlan), mɛbheedhe ‑yö ‑kë ‑më ’ka ’yö ü ‑zo ‑yö ‑büö ‑a ’ka ɛ? ’Iin mɛbheedhe ’kpaan ‑yö ‑kë ‑më ’ka ’yö ü ‑ya ‑a ‑wun ꞊zɔnng’ ‑ta ‑ɛ? ⁷’Bha‑ ‑gɔ ꞊yɔɔ’ ’töng ’dɛdɛ ’ka ü ‑bha bɔmɛ ‑nu ꞊löö; ’bha ’tɔbhɔdhe waa‑ ꞊bhlëyadhe nu ‑a ‑dhë ‑gludëdhɛ ‑kwaa. ⁸’Bha pë ’plɛsɛn ‑lo ‑a ‑kɔ ꞊löö. ꞊Waa‑ pö ‑Zlan ꞊ya pë ’plɛ ‑lo ‑a ‑kɔ ꞊löö, kö pë ’plɛ giagia ꞊nɛ ’wo ‑we ‑a ’ka; pë do ’yaa ’dhö kö ‑yaan ’kun ‑kë ‑a ‑kɔ ꞊löö ‑sü ’ka. ꞊Ɛɛ, ’kɛɛ kë‑ wo ’dhö bhë ’sa, dɔ ’ö ’kwa‑ wo ꞊nɛ pë ’plɛ ‑bha ‑kë ‑a ‑kɔ ꞊löö ‑sü ’ö bhë yaa kë ‑dhö ꞊kun kwa ’yaan ’ka. ⁹’Kɛɛ pë do ’ö kwa ’yaan ’ö tɔɔ ’töng ’ö Yesu ‑yö ꞊kaa’ ’kpongtaa zö bhë ‑Zlan ‑ya ‑kë ’tee ’ö dho ‑dewo ’ö‑ ‑kë ö ‑bha bɔmɛ ‑nu ꞊löö, ’ö‑ ’yënng ‑yö bhɔ, ’ö ga. ‑Zlan ‑ya ‑kë ’dhö ö ‑bha ’glusë ’gü kö ‑yaan ga mɛ ’plɛ ‑wun ’gü. Dɔ ’ö ’kwa‑ wo zlöö ’ö ’kwa‑ ‑ga ‑na ꞊bhlëzë ’ka ’ö‑ ’tɔ ’dhö bhɔ ‑na bhë, ‑dhɛ ’ö bɔ ‑a ‑bha bhë ’ö bhë. ¹⁰Bhii ’wun ‑mɔ ’kuë ‑sü ‑zë ’ö mü ’ö tɔɔ ‑Zlan ’ö pë ’plɛsɛn ‑kë ’ö pë ’plɛ ’dhö ‑a kwɛɛ bhë, ‑yö Yesu ‑kë mɛ ’ö dho bɔ ’klobhɔdhe ’gü ‑a ’ka mɛ ’plɛsɛn ‑wun ’gü; ’ö ꞊dhɛ ꞊ya ’go mü ’dhö, ’yö‑ ‑kë mɛ ’ö ’wun ꞊zaa’ ‑sü ’yaa‑ ‑bha, ’ö dhasü nu mɛ ’plɛ ‑dhë, kö mɛ ꞊plëëzë ‑waan kë ‑a ‑bha ’tɔbhɔdhe ’gü bhë ‑a ’ka.

¹¹’Ö tɔɔ mɛ ’ö mɛ ‑nu ‑bha ꞊sɔɔn yaa ‑nu bho ‑an ‑bha waa‑ mɛ gia‑ ’wo bhë, ‑an ‑go ‑a ’gü ‑mɛ ‑yö do kwa Dë ’ka. Pë ‑de ’ö ‑kë ’ö lë‑ ’yaa Yesu kë ‑an ‑dhɛ ö dheglu ‑sü ’ö bhë. ¹²’Ö tɔɔ ‑ya ‑pö: (N Dë ‑Zlan), a ‑dho ü ‑wun ꞊blɛɛ’‑ n dhegluzë ‑nu ‑dhë. A ‑dho ’tan bho ü ’tɔ ’piö ü ‑bha mɛ ‑nu ‑dho ’kuë‑ ‑sü ziën. ¹³’Yö‑ pö ’zü: A ‑dho n ‑zo yö ‑Zlan ‑bha. ’Yö ‑dhɛ ’bhaa ’gü ’zü, ’yö‑ pö: Ma ꞊ga ’ö yië‑ ’në ‑nu ’ö ‑Zlan ‑ya nu n ‑dhë ’yi ‑ya ꞊nɛ.

¹⁴꞊Dhɛ ’ö ‑kë ꞊nɛ mɛ ‑nu ’ö Yesu ‑yö ‑an ‑dhɛ ‑Zlan ‑bha ’në ‑nu bhë, ‑wo ‑kë mɛbheedhe ’ka bhë, ’ö ö ‑de ‑kë mɛbheedhe ’ka ꞊nɛ ‑an ’dhö, ‑yö kë ’dhö kö ‑yaan bɔ ga ‑sü ‑ta kö mɛ ’ö ga ‑bha ’piigbeedhɛ ’dhoë‑ ‑gɔ bhë ‑yaan ’gü ꞊siö’‑. Mɛ bhë tɔɔ dü; ¹⁵’iin kö mɛ ‑nu ’wo ‑kë wo ‑bha ‑tosiadhe ’gü ꞊nɛ mɛ‑ ‑kë ꞊nuadhɛ ’gü ‑an ‑bha ‑suö ga ‑dhë ‑sü ‑wun ’gü bhë ‑yaan kë ‑an dha ‑kɔ ’ka ’pö. ¹⁶’Ö tɔɔ yaa kë ꞊nɛ mɛ ’wo ‑Zlan ‑bha bɔmɛ ‑nu ’ka bhë ꞊nɛ ’yö nu ‑an ‑dhë; ’kɛɛ pë ’a‑ dɔ ’ö tɔɔ ‑yö ‑nu ꞊zian’ mɛ ’wo Ablaamö ꞊suu’‑ ‑ta ‑nu ’ka bhë ‑an ‑bha nu ’ka. ¹⁷Kë ‑dewo ’dhö bhë poo, ‑ya ‑bha kö ‑yö bhɔ ö dhegluzë ‑nu ‑bha pë ’plɛ ’ka kö ‑yaan kë slabhomɛ ꞊va ’ö mɛ ’yena yö ’iin ’ö ‑to ‑wo ’gü ‑sü zë ’ka ‑a ’ka, ö ‑bha yuö ‑kë ‑Zlan ‑dhë ‑sü ’gü, kö ‑yaan ziö mɛ ‑nu ‑bha ꞊sɔɔn yaa ‑nu ‑ta; ¹⁸bhii ’ö tɔɔ ‑yö ‑bɔ ’güdandhe ’gü ’ö‑ ’klo ‑yö bhɔ ’pö; ꞊ya kë ’dhö kö ‑yö ‑mɔ ‑a ‑bha kö ‑yö nu mɛ ‑nu ’ö ’güdandhe ’dhö nu ‑na ‑an ‑ta bhë ‑an ‑dhë.

Klito ’ö ‑Zlan Gbö ’ka bhë ‑a ‑dɔdhɛ ꞊yö ꞊va ’ö ꞊zië’ Moizö ‑ta

¹’Wun ’ö ‑gban Yesu ‑bha ’a ’go ‑na ‑a ꞊blɛɛ’ ꞊dhia bhë ‑an ‑bha ‑kë ’dhö ‑sü ‑wun ’gü, n dhegluzë ‑nu ’ö ’ka Yesu ‑wun ‑dhɛ ’wun gia‑ ‑mɛ ‑nu ’ka, ka ’ö ’ka ’we ‑Zlan ‑bha ꞊dhɔɔ ‑wo ‑bha bhë, Yesu ’ö‑ bɔ kwa ‑bha slabhomɛ ꞊va ’ka, ’kwa kwa ‑zo yö ‑a ‑bha ’ö ’kwa‑ ‑wun ꞊blɛɛ’ ‑na bhë, ‑ka ka ’yan kë ‑a ‑bha! ²Yö ꞊ga ’ö kë‑ wo ’dhö ’pö bhë ’sa, yuö ’ö ‑Zlan ‑ya ‑wun tën ‑a ‑bha bhë yaa ‑kɔ ‑a ’ka ’iin yaa ’kun ‑a ’ka ꞊nɛ ‑kɔ do ’ö Moizö ‑yö ö ‑bha yuö ‑nu ꞊kaa’ ‑Zlan ‑bha mɛ ‑nu ziën bhë ‑a ’dhö bhë. ³‑Kɔ do ’ö ’kɔdɔmɛ ’dhoë‑ ’ka ꞊va ’ö ꞊zië’ ’kɔ ’ö‑ dɔ ‑a ‑ta bhë ꞊nɛ ’ö Yesu ’dhoë‑ ’ka ꞊bhlëzë ’ö ꞊zië’ Moizö ’ö ‑Zlan ‑bha ’kɔ ’ö‑ dɔ bhë ’ö‑ ’gü ‑mɛ do ’ka bhë ‑a ‑ta. ⁴‑A pö ’a‑ wo ’dhö bhë ’ö tɔɔ ’kɔ ’ö ‑dhö, kö mɛ ꞊nɛ ’ö‑ dɔ; kö kë‑ wo ’dhö bhë ’sa, ‑Zlan ꞊nɛ ’ö pë ’plɛ ‑da. ⁵Moizö ‑bha ’ka ‑yö ‑to ö ‑wo ’gü ‑Zlan ‑gɔ kɔɔ ‑dhɛ ’saadhö ’gü; ‑yö ‑kë yuökëmɛ ’ö ꞊ya kë ’ö ‑Zlan ‑yö ‑bɔ ‑a ’gü ’ö ’wun ‑nu ’ö dhoë‑ kë ’ö‑ ꞊blɛɛ ö ‑bha mɛ ‑nu ‑dhë ‑a ’ka. ⁶’Kɛɛ Klito ‑bha ’to ’ö‑ wo ö ‑wo ’gü bhë, ‑ya ‑wo ’dhö ‑a ‑bha ‑kë ‑Zlan Gbö ’ö ‑ya ‑sü ’ka ö Dë ‑bha ’kɔ ꞊kɔɔnmɛ ’ka bhë ‑a ‑wun ’gü; ’yö kwa ꞊nɛ ’kwa tɔɔ ’kɔ ’ö ’dhö bhë. ‑Yö ‑dho kë kwa ‑bha ‑kë ’gɔugɔ ‑gɛn ’ka, ’kɛɛ kö ꞊ya kë ꞊nɛ ’kwa ’to ‑gban ‑sü ’ka gɛnngdhö ’iin ’kwa kwa ‑zo yö pë ’ö kwa ’yan ’dhö ‑a ‑gɔ bhë ‑a ‑bha ’dhö.

’Tɛɛpadhɛ ’ö ‑ya ‑sü ’ka ‑Zlan ‑bha mɛ ‑nu ‑gɔ

⁷(꞊Dhɛ ’ö ‑kë ꞊nɛ Klito ‑yö ꞊va Moizö ‑ta bhë kö ‑kɔ do ’ö ’ka ’wun maa Moizö ‑ta bhë), ꞊ya kë ꞊nɛ ’ka ‑Zlan ‑wo ma ꞊dɛɛ, ꞊nɛ ‑kɔ ’ö ‑Zuu ’slööslö ‑ya pöë bhë ‑a ’dhö, ⁸kö ꞊kun ’ö ka ’too ‑yö ‑kë ’gbee‑ ꞊nɛ ‑kɔ ’ö ka ’bhɛma ‑nu ‑wo dɔ ‑a ’ka n ‑gɔ ’yënng ’kpa ’ö ’wo n ’gü dan ‑a ’ka ’yënng ꞊taa bhë ‑a ’dhö. ⁹’Ö tɔɔ yi bhë ‑a ’ka, ka ’bhɛma ‑nu ‑wo ‑kë n ’gü dan ꞊dhia n ꞊woo’ ꞊mɛɛ’ ‑sü ’ka; ’kɛɛ kö kë‑ wo ’dhö bhë, ‑an ’yan ‑yö ‑kë pë ‑nu ’a‑ ‑kë ’töüdhö bhë ‑a ‑bha, ’ö ’yi ꞊kaa’ ’dhö ‑kwɛ ’gɔɔ‑ ‑yiisië ’piö. ¹⁰Pë ’ö ‑kë ’ö ’ma ‑da ‑naadhe ’gü mɛ ‑nu ’wo ’dhö bhë ‑an ‑bha ’ö bhë. ’Ö ’a‑ pö: ‑An ꞊zuöga ‑yö ꞊tun ‑an ‑da zian yaa ‑ta ‑an ‑zo ’ta ‑kɔ ‑nu ’gü. Ma tɔng ‑nu ’a‑ dɔ ‑na ‑këdhösü ‑wun ’gbloo ’piö bhë waa‑ dɔ ꞊kun ’gbɛɛdhö. ¹¹’Yö ꞊dhɛ ‑kë ’dhö a ‑da ‑naadhe ’gü, ’ö ’a n ‑wo ‑bhö ꞊woë’ ꞊nɛ: ’Tɛɛpadhe ’ö n ’piö bhë, wo ’ka ’dho ‑da ‑a ‑dhɛ ‑bha ’gbɛɛdhö.

¹²Kö n dhegluzë ‑nu, ‑kaa kë ‑së kö ꞊kun ’ö mɛ ‑yö ‑kë ka ziën ’ö ‑kë ꞊zuöyaamɛ ’ka ’iin ’ö‑ ’tou ‑yö ‑kë ’gbee‑; ’ö mɛ bhë ’yö ‑kan ‑Zlan ’ö ’bhee‑ ‑a ‑bha. ¹³’Kɛɛ ‑ka ka ’ko ‑nu ꞊faan’ ’më ’töng ’saadhö ’ka ‑dhɛkpaɔyi ’saadhö ’ö ‑po ‑a ’ka ’dhö ‑kplawo kö ꞊kun ’ö mɛ gbɛ dhö to ꞊sɔɔn yaa din ’piö ’ö ꞊sɔɔn yaa ‑yö ‑ziö ‑a ‑gɔ ’ö to ‑a ’gü ’ö‑ ꞊zuö’ ‑yö ‑kë ’glɔɔglɔ. ¹⁴’Ö tɔɔ kwa ‑dhö to Klito ’ö bhë ‑a ’piö ’kɛɛ kö ꞊ya kë ꞊nɛ kwa ‑bha ‑zo ‑yö ‑a ‑bha ‑sü ’ö bhë ꞊ya ’to ‑gban ‑sü ’ka kpinngdhö ꞊nɛ ‑kɔ ’ö ꞊kaa’ ‑a züdɔyi ’ka bhë ‑a ’dhö. ¹⁵Pë ’ö ꞊bɛɛn’ ‑sü ’ka ‑Zlan ‑bha ’sëëdhɛ ’gü ‑ya ‑pö: ꞊Ya kë ꞊nɛ ’ka ‑Zlan ‑wo ma ꞊dɛɛ, kö ꞊kun ’ö ka ’tou ‑yö ‑kë ’gbee‑ ꞊nɛ ‑kɔ ’ö ꞊kaa’ yi ’ö ’ka dɔ ‑a ’ka ‑Zlan ‑gɔ ’yënng bhë ‑a ’dhö. ¹⁶’Ö bhii ka gia‑ ‑ka ‑dhɛ ‑ga bhë ’dhɛ! Dö ’kpaan ’ö dɔ ‑Zlan ‑gɔ ’yënng kö ꞊ya ’go ‑a ‑wo ma ꞊dhia ‑a ’ke yaa kë mɛ ‑nu ’ö Moizö ‑yö yö ‑an ‑dhë ’dhiö ’ö ’wo go Ezitö ‑sɛ ’gü bhë ‑an ’ka ɛ? ¹⁷Dö ‑nu ’ö ‑Zlan ‑yö ‑naadhe ‑kë ‑an ‑bha ‑kwɛ ’gɔɔ‑ ‑yiisië ’piö e? ’Wo tɔɔ mɛ ‑nu ’ö ’wo ꞊sɔɔn yaa ‑kë ’ö ’wo ga ’yënng ꞊taa bhë. ¹⁸‑Zlan ‑yö ö ‑wo ‑bhö ꞊woë’ ꞊nɛ: Wo ’ka ’dho ‑da ma ’tɛɛpadhɛ ‑bha ’gbɛɛdhö n ’piö. ꞊Dhɛ ’ka‑ ‑ga ‑a ’gü bhë, dö ‑nu ’pö ‑Zlan ‑yö ‑an ‑bha ’wun ꞊blɛɛ bhë ꞊ɛ? ’Wo tɔɔ mɛ ‑nu ’wo dɔ ‑a ‑gɔ ’yënng. ¹⁹Pë ’ö‑ ‑de ‑kë yö ‑mü, bhii waa ’dho ‑dhɛ bhë ‑a ‑bha gbɔ, ’wun bhë ‑a ‑dhɛ waa‑ wo ’wun gia‑ bhë ‑a ‑wun ’gü.

¹‑A ‑kë ’dhö ‑sü ’gü, ꞊dhɛ ‑kë ꞊nɛ pë ’ö ‑Zlan ‑ya ’tɔ go kwa ‑dhë ’ö ‑gban ‑ya ‑de ’flëë ’gü ‑dhɛ ’ö‑ ’piö ‑a ‑bha bhë, ‑a ’töng yaa ziö ꞊kun bhë, ‑kwa kwa ‑zo kë kwa ‑de ’piö, ꞊kun ‑kë ’ö mɛ ‑yö ‑kë ‑dhö kwa ziën ’ö ‑kë ‑tozlöömɛ ’ka. ²’Ö tɔɔ ’wuntaɔsë ’ö bhë, ’kwa‑ ‑wun ma ꞊nɛ ‑kɔ ’ö ꞊kaa’ mɛ ‑nu ’wo ‑kë ’yënng ꞊taa ‑an ‑gɔ bhë ‑a ’dhö; ’kɛɛ kë‑ wo ’dhö bhë ‑a ‑yö ‑a ‑bha ‑pë gbɛ yaa kë ‑dhö ‑an ‑bha ’ka, ’ö tɔɔ ’wun bhë ‑dhɛ ’wo‑ ma, ‑zo ‑yö ‑a ‑bha ‑sü yaa kë ‑an ‑gɔ kö ‑waan ’dho wo ꞊zuö’ ’dhi po ‑a ‑gɔ. ³‑Zlan ‑ya ‑pö: A ‑da ‑naadhe ’gü; ’yö ‑dhɛ ‑kë ’dhö ’a n ‑wo ‑bhö ꞊nɛ wo ’ka ’dho ‑da ’gbɛɛdhö ’tɛɛpadhɛ ’ö n ’piö bhë ‑a ‑bha. ’Tɛɛpadhɛ ’ö ‑Zlan ‑yö ’wun ‑gban ‑a ‑bha ’ö‑ ꞊blɛɛ bhë, kwa ’ö ’kwa‑ ‑wun ‑dhɛ ’wun gia‑ bhë, kwa ‑dho ‑da ‑a ’gü; ’kɛɛ kë‑ wo ’dhö bhë, ’wun bhë ‑ya ꞊blɛɛ ’dhö kö ꞊ya yën ö ‑bha yuö ‑nu ‑bha ’kpongtaadhɛ züdɔyi ’ka. ⁴‑A pö ’a‑ wo ’dhö bhë ’ö tɔɔ ‑Zlan ‑bha ’sëëdhɛ ꞊bɛɛn’ ‑yan ’bhaa ‑yö ’wun ‑gban ‑dhɛkpaɔyi kë ’slaplɛ ‑naa ‑bha, ’ö‑ pö: ꞊Dhɛ ꞊ya kë ’dhö, ’yö ‑Zlan ‑yö ö ’tɛɛ pa ‑a ‑dhɛkpaɔyi ’slaplɛ ‑naa ’ka, kö ꞊ya yën yuö ‑nu bhë ‑an ’plɛ kë ‑sü ‑bha. ⁵Pë do bhë ’ö ‑Zlan ‑yö ’wun ‑gban ‑a ‑bha ’zü ’ö‑ pö: Wo ’ka ’dhö ‑da ’tɛɛpadhɛ ’ö n ’piö bhë ‑a ‑bha. ⁶Mɛ ‑nu ’wo ‑kë mɛ ‑blɛɛzë ‑nu ’ka ’ö ’wuntaɔsë bhë ’wo‑ ma bhë, waa ‑da ’tɛɛpadhɛ bhë ‑a ‑bha ’ö tɔɔ waa‑ ‑wun ‑dhɛ ’wun gia‑; ’kɛɛ kë‑ wo ’dhö bhë, dɔ ’kwa‑ wo ꞊dɛɛ ꞊nɛ mɛ‑ ‑mɔ ‑a ‑bha ‑yö ‑da mü. ⁷Pë ’ö ‑kë ’ö ‑Zlan ‑yö ꞊dɛɛ ‑yi ‑dëü ’bhaa ‑kë ’ö bhë. ’Yö ‑dhɛ ’ö ’töng ꞊plëëzë ꞊ya ziö, ’yö ‑bɔ Davidö ‑ta ’dhiö ꞊zian’, ’ö‑ ’wun ꞊blɛɛ ꞊nɛ ‑kɔ ’ö ’sëëdhɛ ’ö ꞊nɛ ’ö‑ ꞊bɛɛn’ ‑yan ’bhaa ‑ya pöë bhë ‑a ’dhö ꞊nɛ: ꞊Ya kë ꞊nɛ ’ka ‑Zlan ‑wo ma ꞊dɛɛ, kö ꞊kun ’ö ka ’too ‑yö ‑kë ’gbee‑!

⁸’Wun bhë ‑yö ‑kë ’dhö ’püë‑ wo ’kɛɛ Zozue (’ö yö Izlaɛlö ‑mɛ ‑nu ‑dhë ’dhiö Moizö pin ꞊taa bhë) ꞊ya kë ꞊nɛ ‑ya ‑kë ’ö ’tɛɛ pa ‑sü bhë ’ö ‑kë ‑an ‑gɔ ‑bezë, kö ‑Zlan ’ka ’dho ’wun ‑gban yi gbɛ ’bhaa ‑bha ‑yaan ꞊blɛɛ’‑ ’zü. ⁹‑A ‑kë ’dhö ‑sü ’gü, ’tɛɛpasü ’ö ‑kë ꞊nɛ ‑Zlan ‑bha ö ’tɛɛ pa ’ö‑ wo ‑dhɛkpaɔyi ’slaplɛ ‑naa ’ka ‑a ’dhö bhë, ‑yö mɛ ‑nu ’ö ’wo ‑Zlan ‑bha mɛ ‑nu ’ka ‑an ‑bha ’ka. ¹⁰’Ö tɔɔ mɛ ’ö ‑da ’tɛɛpadhɛ ’ö ‑Zlan ’piö bhë ‑a ‑bha kö yuö ’ö‑ ‑kë bhë ’ö‑ ’gü ’tɛɛ pa ꞊nɛ ‑kɔ do ’ö ‑Zlan ‑ya ꞊kaa’ ö ‑bha ’ka bhë ‑a ’dhö bhë. ¹¹꞊Ya kë ’dhö, kö ‑kwa kwa ’gü dɔ ’gbee‑ kö ’tɛɛpadhɛ ’ö bhë ’kwa ‑da ‑a ’gü; kö ꞊kun ’ö mɛ gbɛ ‑yö ‑kë kwa ziën ’ö ö ‑de ‑püö ꞊gɔügbeedhɛ ’gü ꞊nɛ ‑kɔ ’ö mɛ ‑nu ’wo ‑kë ’yënng ꞊taa ’kpa ’wo‑ ꞊kaa’ ’ö waa ‑da ’tɛɛpadhɛ bhë ‑a ’gü gbɔ bhë ‑an ’dhö.

¹²‑Zlan ‑wo ’ö ’ka‑ ‑ga ‑na bhë ‑yö ’bhee‑, ’ö ’wun ’plɛ ‑bɔa ‑ta ’ka. ‑A ‑bha ‑kë ’dhiözë ‑sü ‑de ’ö bhë, ‑yö ‑ziö ‑dhaa ’ö‑ ’dhiö ’dhö zian ꞊plɛ ’ka ‑a ‑ta. ‑A ‑bha ‑kë ’dhö ‑sü ‑wun ’gü, ‑yö ‑mɔa ’ö dho ‑dewo mɛbheedhe ’gü, ‑dhɛ ’ö mɛ nii waa‑ mɛ ‑zuu ’ö ‑an ‑naa ’ka bhë ‑a ‑bha. ‑Kɔ do bhë ’ö ‑mɔa ’pö ’ö ‑da mɛ bun ’gü kö ‑dhɛ ’ö mɛ ga ‑nu ‑yö ’ko tuö ‑dhɛ waa‑ mɛ ’yɔn ‑an ‑naa ’ka bhë, ‑yö ‑da ‑a ‑bha mü. Pë ’ö ꞊ya kë ’ö mɛ ‑ya ‑yö ’ko ’dhiö ‑kë ö ꞊zuö’ ’piö ꞊nɛ pë ꞊nɛ a‑ ’piö kö ’a‑ kë ’iin mɛ ‑zo ‑ta ‑a ’gü ‑wun ‑nu bhë, ‑yö ‑dhɛ ‑yö ‑an ’plɛ ’gü ’ö ‑an ’piö ‑ga; ’ö ꞊ya kë ’ö yö ‑an ‑bha. ¹³Pë ’bhle ’ö dho kë ‑bin ‑sü ’ka ‑Zlan ‑gɔ ’yaa ’dhö. Pë ’kö ‑Zlan ‑da ‑pë ’ka, ‑yö plaan ’ö ’dhɛ ’dhö ‑go ‑a ‑ta ‑sü ’ka, ‑a ’yan ’dhiö; ‑Zlan ’ö bhë ꞊nɛ ’ö ’kwa dho pë ’plɛ ‑gɛn bho ‑a ‑dhë.

Yesu Klito ‑bha ‑kë ꞊va ‑sü ’ö ‑ziö ‑a ’ka slabhomɛ ‑gɔmɛ ’wo ‑kë ‑dhikuëdhe zii ’gü ‑an ‑ta ‑sü

¹⁴‑A ‑kë ’dhö ‑sü ’gü, ꞊dhɛ ’ö ‑kë ꞊nɛ Yesu ’ö ‑Zlan Gbö ’ka, ’ö kwa ‑bha slabhomɛ ꞊va ’ka ’ö ꞊ya bɔ ’wun ’plɛ ’gü ꞊ya ‑da ‑Zlan wö ’dhiö bhë, yö ’ö ‑zo ‑yö ‑a ‑bha ‑sü ’ö ’kwa‑ ‑wun ꞊blɛɛ’ ‑na ’ö kwa ‑gɔ bhë, ‑kwa kwa ’gü dɔ ’gbee‑ kö ’kwa ’to ‑klu ‑sü ’ka ‑a ‑bha. ¹⁵Slabhomɛ ’ö kwa ‑gɔ bhë ’yaa slabhomɛ ’ö‑ ‑kɔ ‑yö kun kwa ’yena yö ‑sü ’ka ‑yaan ’kun ‑nu kwa ‑dhë ‑sü ’ka ‑a ’ka kwa ‑bha ‑kë ’tëëtë ‑sü ’gü; yö ’ö bhë, ‑a ’gü ‑yö ‑dan ’ö bɔ ’wun ’gbee‑ ’gü ꞊nɛ ‑kɔ ’ö ꞊kaa’ kwa ‑gɔ ‑a ’dhö; ’kɛɛ kë‑ wo ’dhö bhë, yaa ‑püö ꞊sɔɔn yaa ’gü. ¹⁶꞊Dhɛ ’ö ‑kë ꞊nɛ kwa ‑bha slabhomɛ ꞊va ‑yö ‑dhö Yesu ’ka bhë kö ‑kwa bɔ ‑a ‑ta, ’kwa ꞊yɔɔn ‑zo ‑gban ‑sü ’ka ‑Zlan ‑bha ’tɔbhɔdhɛ këdhɛ ’ö ꞊tun ꞊ya ‑sü ’ka ‑a ‑bha ’glusë ’gü bhë ‑a ‑bha, kö ’kwaan‑ kë ‑a ‑bha kwa ’yena yö ‑sü ’gü ’iin kö ‑a ‑kɔ ‑së ‑bha ‑to kwa ’piö ‑sü ‑yaan kë kwa ’yaan yi ’gbee‑ ‑nu ’gü.

¹’Ö bhii mɛ ’oo mɛ ’kö ‑Zlan ‑ya ‑ya slabhomɛ ꞊va ’ka ö ‑gɔ kɔɔ bhë, ‑ya ‑ya ’dhö kö ‑yö mɛ ‑nu ’wo bhë ‑an ‑bha ’wun ‑nu ‑lo ö ‑ta ’iin kö ‑yö ‑an ‑bha sla‑ ‑nu bho ‑an ‑bha ꞊sɔɔn yaa ‑nu ‑wun ’gü. ²’Yö ꞊dhɛ ‑kë ꞊nɛ yö ‑de ’pö, ‑kë ’tëëtë ‑sü ’ö bhë ‑yö ‑bɔ ‑a ’gü ’pö bhë, ‑a ‑wun ’gü ꞊nɛ ’ö mɛ ‑nu ’ö ’waa pë gbɛ dɔ ’ö ’wo ‑püö ‑na ꞊sɔɔn yaa ’gü bhë ’ö ‑mɔ ‑a ‑bha kö pë ‑nu ’ö kë ‑na ‑an ’ka bhë ’ö‑ ‑gɛn ma (kö ’yaan‑ kë ’lëëlë ‑an ’ka), ³’iin yö do bhë ’zü, ꞊dhɛ ‑kë ꞊nɛ yö ‑de ’pö ‑yö ’tëëtë bhë, ‑a ꞊dua’ ‑mü kö ‑yö sla‑ bho yö ‑de gia‑ ö ‑bha ꞊sɔɔn yaa ‑nu ‑wun ’gü; ’ö ꞊ya ’go mü zlöö ’ö‑ bho ’pö ‑Zlan ‑bha mɛ ‑nu ’wo bhë ‑an ‑bha ꞊sɔɔn yaa ‑nu ‑wun ’gü. ⁴Mɛ gbɛ ’yaa ‑kë slabhomɛ ꞊va ’ka ‑sü ꞊bhlë ‑ya ö ‑de ‑bha ‑a ’ke yaa kë ‑Zlan ‑bha mɛ ꞊dhɔɔ kë ‑sü ’ka ꞊nɛ ‑kɔ ’ö ꞊kaa’ Aalɔn ‑bha ’ka ‑a ’dhö.

⁵Pë do bhë ’ö‑ ’ka Klito ‑bha ’ka. ’Ö tɔɔ yaa ‑kë slabhomɛ ꞊va ’ka ‑sü ’tɔbhɔdhe nu ö ‑de ‑dhë. Mɛ ’ö‑ nu ‑a ‑dhë ’ö tɔɔ ‑Zlan ’ö‑ pö ‑a ‑dhë: Ü n Gbö ’ka, ’ma kë ü Dë ’ka ꞊dɛɛ. ⁶’Yö ’sëëdhɛ ꞊bɛɛn’ ‑yan do ’bhaa ’gü ’zü, ’yö‑ pö: Ü ‑dho to slabhomɛ ’ka ꞊toëpö ’ka ꞊nɛ zian ’ö Mɛsisedɛkö ‑yö ꞊kaa’ ’tɔbhɔsüzë ’ka bhë ‑a ’dhö.

⁷Yesu bhë ꞊nɛ ’ö ’töng ’ö ꞊kaa’ ’kpongtaa zö ö mɛbheedhɛ ’gü, ’ö ꞊bhɛa ’gbo ’ka ‑Zlan ’ö ‑kɔ ‑mɔ ’wuën‑ ‑sü ‑yö ‑kë ‑a ‑gɔ kö ‑yaan ‑a dha ga ‑gɔ bhë ‑a ‑dhë. ’Yö ö ’to ‑kë Yesu ‑wo ‑bha, ‑a ‑bha ’wun ‑ma ‑a ‑ta ‑sü ‑wun ’gü. ⁸Yesu ’ö bhë yaa zë ö ‑bha ‑kë ‑Zlan Gbö ’ka ‑sü ‑wun ‑dhë, ’kɛɛ ’wun ’gbee‑ ‑nu ’ö bɔ ‑an ’gü bhë, ‑yö ‑bɔ ‑an ’gü ’ö ’wun ‑ma ö Dë ‑ta ‑sü ꞊daan. ⁹꞊Dhɛ ’ö ꞊ya yën ’wun ’gbee‑ bhë ‑bɔ ‑a ’gü ‑sü ‑bha ’dhö, ’ö ‑Zlan ꞊yaa‑ ’wun dɔ ꞊nɛ ‑yö kpengdhö, ’wun gbɛ ’yaa‑ ‑bha, ’yö‑ sü ’ö‑ ‑ya ‑këdhösü ’yaa yën bhë, mɛ ’wo wo ‑gɔ dho ‑a ‑dhë sia‑ bhë, ‑a ‑nu ‑an ‑dhë ‑mɛ ’ka. ¹⁰’Yö ‑Zlan ‑ya sü ’zü ’yö‑ ‑ya slabhomɛ ꞊va ’ka ꞊nɛ Mɛsisedɛkö ’dhö.

‑Zo ‑kë ‑de ’piö ‑sü ’ö ‑dhö ‑zo ‑yö Yesu ‑bha ‑sü ’gü

¹¹’Wun ’ö ‑gban Klito ‑bha ‑kë slabhomɛ ꞊va ’ka ‑sü ‑bha bhë, yi ‑dho ‑mɔ ‑a ‑bha ‑be ’yi ’wun ‑nu ‑gban ‑a ‑bha ꞊va ’yi‑ ꞊blɛɛ ka ‑dhë; ’kɛɛ yö ꞊ga ’ö kë‑ wo ’dhö bhë ’sa, ’ö‑ ’bhaa ‑nu ’dhö mü ’ö ‑an ‑gɛnmadhɛ dho kë ’gbee‑ ka ‑gɔ ’ö bhii ka ‑dho ‑a sü ‑kɔ ’yan ꞊taa ’ka. ¹²‑A pö ’a‑ wo ’dhö bhë ’ö tɔɔ zian ’ka‑ ‑ta bhë ‑a ‑dhɛ ꞊ya ꞊glɔɔ ’ö ’ka‑ ‑ta. Ka ’ö dɔ ’kwa‑ wo ꞊nɛ ’ö ’ka ’dhö kë ‑bezë mɛ ꞊daan’ ‑mɛ ‑nu ’ka bhë, yö ꞊ga ’ö ka ꞊tun ‑ya ‑sü ’ka kö ‑wo ka ꞊daan’‑ pë ‑nu ’ö ’wo pë ‑blɛɛzë ’ka ‑Zlan ‑bha zian ‑ta ‑an ’ka bhë. Pë ’ö dhö kë ka ‑gɔ ꞊nɛ ‑bhöpë ’gbee‑ ’dhö bhë yö ꞊ga ’kaa‑ ‑bhö ’ö ’ka ꞊tun ’yɔn ’yi mü bhë. ¹³Pë ’ö mü ’ö tɔɔ mɛ ’ö ꞊tun ’yɔn ’yi mü kö yaa bɔ ’wun ‑nu ’gü ꞊va ꞊kun kö ‑yaan ’dhö ‑a yaa dɔ ’iin ‑a kpengdhö dɔ, bhii kö ‑yö ꞊tun ’në ’ka. ¹⁴’Kɛɛ kö ‑bhöpë ’gbee‑ ’ö bhë ‑yö mɛ ‑nu ’ö ꞊wa kë mɛ ziizii ‑nu ’ka, ’ö ꞊wa bɔ ’wun ‑nu ’gü, ’ö ’wo ‑dhɛ yö ’wun ’gü ‑dhɛ dɔ, (’ö ’wo pë ‑nu ‑bho ’kou kë ‑dhɛ dɔ) ‑an ‑bha ’ka.

¹‑A ‑kë ’dhö ‑sü ’gü, pë ’kwa dho ‑a kë ꞊zian’ zlöö ’ö tɔɔ ’kwa kwa ꞊kwaa’‑ ’wun ‑dhɛ mɛ ’wo ’wun züdɔdhɛ ’ka Klito ‑bha zian ‑ta bhë ‑an ‑zü ’kwa kwaa‑ ’dho wo kwa ’dhiö, kö pë mɛ ’ö ‑kë mɛ ’wo mɛ ziizii ’ka Klito ‑bha zian ‑ta ‑an ‑bhöpë ’ka bhë ’kwa‑ ‑bhö. Kwa ’ka ’dho yɛ ’zü ‑dëüwo kö ’kwaan‑ pö ‑ka ’kan ’wun ‑nu ’ö ‑an ‑yö ‑a ‑bha ‑pë gbɛ ’yaa ’dhö bhë ‑an ‑bha kö ’ka ‑Zlan ‑wo ‑dhɛ ’wun gia‑, ²’iin kö mɛ ꞊daan’ ‑wo ‑nu ’wo ‑gban ‑bɔ yiö ‑sü ‑bha ‑nu, ‑an mɛ ‑nu ’wo ‑kë, ‑kɔ ’wo‑ kpa ‑na mɛ ‑ta ꞊bhɛa’ ‑sü ’ka bhë ‑nu, ’wun ’ö ‑gban gamɛ ‑nu ‑bha ‑go ga ’gü ‑sü waa‑ ‑Zlan ‑bha za ’ö dho kan, kö mɛ ’ö ‑dhö ‑a ‑bha ‑dɔdhɛ ’ö dhö kë ꞊toëpö ’ka ’wo bhë ‑nu, kwa ’ka ’dho bhɔ kwa züë ’kwaan‑ nu ‑an ‑ta ’zü. ³‑Kwa ’dho kwa ’dhiö ꞊zian’! Pë ’kwa dho ‑a kë ’ö bhë kö ‑Zlan ꞊ya ’we ‑a ‑bha kwa ‑gɔ.

⁴‑A ‑kë ’dhö ‑sü ’gü, mɛ ‑nu ’ö ‑an ’yan ’dhi ꞊ya ’po ’saadhö ’ö pë ‑nu ’wo ‑gban ‑Zlan ‑bha gbaɔ bhë ‑a ‑bha, ’ö ꞊wa kë ‑a ’gü ‑mɛ ’ka do ‑Zuu ’slööslö ’ö go dhang‑ ’gü ‑a ’gü bhë, ⁵wo ’ö ‑Zlan ‑wo bhë ꞊waa‑ dɔ ꞊nɛ ‑yö pë ‑së ’ka, ’ö pë ‑nu ’ö ’piigbeedhɛ ’dhö ‑an ‑gɔ ’ö ’wo dho nu bhë ’ö ꞊waa‑ ’piö ‑ga bhë, ⁶꞊ya kë ꞊nɛ ꞊wa wo ‑ta yö ‑zo yö ‑sü ‑bha, ‑an ꞊luu’‑ ‑dhɛ gbɛ ’ka ’dho kë ‑dhö gbɔ ’zü ‑dëüwo ‑waan ’go ’wun yaa ’gü. ’Ö tɔɔ ‑a ‑kë ’dhö ‑sü ’gü kö ‑Zlan Gbö ’ö bhë, ‑a dɔ ꞊nɛ ’wo‑ wo ‑na ’zü ‑gaatalü ‑bha bhë; ‑a ꞊bhlë ꞊siö ꞊nɛ ’wo‑ wo ‑na mɛ ’plɛ wö ’dhiö bhë.

⁷‑A pö ’a‑ wo ’dhö bhë ’ö tɔɔ Yesu ‑wun ‑dhɛ ’wun gia‑ ‑sü bhë ‑yö ‑kë ꞊nɛ pë ta ’kwa‑ wo ‑na bhë ‑a ’dhö. ꞊Ya kë ꞊nɛ ꞊wa pë ta, ’ö dha ꞊ya ban ‑a ‑ta piindhö, kö pë ’wo‑ ta bhë ‑yö dhi ö tamɛ ‑gɔ, kö ꞊ya kë ‑a ’yaan ꞊nɛ ’sɛ bhë, ’sɛ ‑së ’ö ‑Zlan ‑bha ’dhuë‑ ’dhö ‑a ‑ta yö ‑mü. ⁸꞊Ya kë ꞊nɛ ’sɛ bhë ꞊ya kë ’ginng ‑nu, ꞊blëë’ ‑kpɔɔzë ‑nu ‑bhɔ ‑a ‑ta ‑dhɛ ’ka, kö ‑a ‑yö ‑a ‑bha ‑pë gbɛ ’yaa ’dhö ꞊nɛ bhë; ‑Zlan ‑bha ’dhangga ‑ya ‑a ’ka ‑sü ’yaa ’ma ꞊gbiin gbɔ ’iin kö ‑yaan ’siö ‑da ‑a ’gü.

⁹’Kö ‑kë ꞊nɛ yi ’wun ‑nu ‑blɛɛ ꞊nɛ ‑kɔ bhë ‑a ’dhö, ‑yö yi ’yaan ’püë‑ wo ꞊nɛ ka ’ta ’sü ‑kɔ ’ö bhë ꞊yö ‑së; ‑yö dhasü ’gbloo ’piö. ¹⁰’Ö tɔɔ ‑Zlan ’yaa mɛ ’wo dho ‑a pö ’yaa kpengdhö ‑a ’ka. Pë ‑nu ’ka‑ kë ‑na bhë, ‑a ‑zlö ’ka ’dho trö ‑a ‑bha; ’iin yaa kë ꞊nɛ ‑a ‑zlö ‑dho trö ka ‑bha ‑a ‑dhɔ ‑kë ‑a ’ka ‑sü ’ö ‑kë yuö ‑nu ’ka ꞊tun ‑dewo ‑a kë dhegluzë ‑nu ’wo Yesu ‑wun ‑dhɛ ’wun gia‑ ‑mɛ ‑nu ’ka ‑an ‑dhë bhë ‑a ’ka. ¹¹’Kɛɛ kë‑ wo ’dhö bhë, yi‑ ‑dhɔ ꞊kaa’ kö mɛ ’ö ‑dhö, yuö ‑nu kë ‑faan do ’ö ‑kë ‑a ‑gɔ ‑a züdɔyi ’ka bhë, ‑yö ’dho ‑a ’ka ’dhiö; ‑yö kë ’dhö kö pë ’ö ka ’yan ’dho ‑a ‑gɔ bhë, ‑a ‑de ‑yö kë ö ’plɛ ’ka. ¹²’Ö tɔɔ ’yiëë‑ ’piö kö ’ka kë ’fiasü; yi‑ ’piö ꞊zian’ kö pë ’ö ‑Zlan ‑ya ’tɔ go kwa ‑dhë ‑to mɛ ‑gɔ ‑pë ’ka bhë, mɛ ’ö ’wo ‑ya ‑sü ’ka‑ ‑gɔ ꞊zuösaadhɛ ’ka, ‑zo ‑yö ‑a ‑bha ‑sü giagia ’ka bhë, ’ka ‑an kë ka ‑bha ’wun ꞊zuan’ ’ka kö pë gia‑ ’ö bhë ’kaan‑ ka ‑bha yö.

Pë ’ö ‑Zlan ꞊yaa‑ ’tɔ go kö ‑yö ‑dhö ‑a ‑de kë

¹³Kë‑ wo ’kpa bhë, ‑Zlan ‑yö pë ’tɔ ‑go Ablaamö ‑dhë; ’yö kë‑ wo ’dhö bhë ’sa, ’yö‑ ‑kë ‑wo ‑bhö ‑sü ’ka; ’kɛɛ ꞊dhɛ ‑kë ꞊nɛ mɛ ’ö dho kë ꞊va ‑yaan ziö yö ‑Zlan ‑mɛ ö ‑ta yaa kë ‑dhö kö pë ’ö‑ ’tɔ go bhë ‑yaan ‑a ’gü ‑wo ‑bhö ‑a ’tɔ ’gü bhë, ’yö‑ ‑bhö ö ‑de ’tɔ ’gü ’ö‑ pö: ¹⁴A‑ ‑blɛɛ ü ‑dhë giagia ’ka ꞊nɛ a ‑dho ’dhuë‑ kpɔ ü ‑bha, ’a dho ü ꞊suu’‑ ‑ta ꞊bhɛɛ. ¹⁵꞊Dhɛ ’ö ‑Zlan ‑ya pö ‑a ‑dhë ’dhö, Ablaamö ‑yö ö ꞊zuö’ ‑kë ‑saa ’ö ‑ya pë ’ö ‑Zlan ‑ya ’tɔ go ‑a ‑dhë bhë ‑a ‑gɔ. ’Yö pë ’ö ’dhö bhë, ’ö‑ ‑de ‑yö ‑kë ‑a ‑dhë. ¹⁶Mɛ ’bhee‑ ‑nu ’ka ‑an ‑ga ‑na bhë, ꞊ya kë ꞊nɛ ꞊wa wo ‑wo ‑bhö, kö ‑wa ‑bhö mɛ ’ö ꞊va ‑an ‑bha ‑a ’tɔ ’gü kö ‑yaan ‑zɔn ꞊nɛ pë ’wo‑ pö ‑na bhë ’yaa ꞊troo’ ꞊kaa’ ‑pë ’ka, ‑yö kë ’dhö kö za ‑yaan ’go ’wun ’ö ’wo ‑wo ‑bhö ‑a ‑wun ’gü bhë ‑a ’gü. ¹⁷’Kɛɛ kö ‑Zlan ‑bha ’ka, ‑wo bhë ‑a ‑bhö ‑sü ’ka, ‑ya ‑kë ’dhö kö ‑yaan ‑zɔn mɛ ‑nu ’ö pë ’tɔ go ‑an ‑dhë bhë ‑an ‑dhë ꞊nɛ ’yaa ‑lö ö ‑wo ‑zü ’gbɛɛdhö; ‑a ‑wun ’gü ꞊nɛ pë ’tɔ ’go ‑wo ’ö‑ ‑kë bhë, ’ö‑ ‑gɛn ‑gbaan ‑yö ‑kë ‑wo ’ö‑ ‑bhö bhë ‑a ’ka. ¹⁸’Kɛɛ kö kwa ‑dhɛ ‑ga ’wun bhë ‑a ’gü ‑së ’ka, kwa dɔ ‑sü ’ka këwun ‑gɔ ꞊plɛ ’ö ‑ziö ‑a ‑ta ‑dhɛ ’yaa ’dhö, ’ö ‑kë pë ’tɔ ’go ‑pë waa‑ ‑wo ‑bhö ‑a ’gü ‑wun ’ka ‑an ziën. ’Wun ‑nu ’wo ’dhö ’ö ‑Zlan ꞊ya ‑mɔ ‑an kë ‑sü ’gü ’dhö bhë, ‑a këdhɛ ’yaa ‑dhö kö ‑yö ‑an ꞊dhië’ ‑kwaa, bhii ’ö tɔɔ ‑yö ‑Zlan ’ö ’yaa ꞊sua kë ‑a ’ka. Mɛ ’ö ’kwa kwa ‑ya ‑dhɛ yö ‑a ’sɔɔ bhë, kwa ꞊faan’ ’më ‑gɛn kun bhë ꞊a; ꞊ya kë ’dhö, ‑më ’kwa ‑ya ‑a ‑gɔ ’ö pë ’ö kwa ’yan ’dhö ‑a ‑gɔ bhë ’ö ’kwaa ’to ‑klu ‑sü ’ka ‑a ‑bha bhë ꞊ɛɛ? ¹⁹Pë ’ö kwa ’yan ’dhö ‑a ‑gɔ bhë, ‑yö kwa ‑gɔ ꞊nɛ ‑piö kpö ’ö ꞊bhüö’ ’dhö ‑a ‑bha ’ö ꞊ya kë ’yitagɔgümɛ ’dhoë‑ ꞊zuö’ ‑na ’yi ꞊löö kö ꞊wa ꞊gbaannu ‑yö kë ’dhö kö ‑waan ’to pin ꞊taa gɛnngdhö ’tëë ’gbee‑ ‑nu ‑gɔ bhë ‑a ’dhö. ‑Zo ‑yö ‑a ‑bha ‑pë giagia ’ö‑ ‑gɛn ‑gban ‑a ‑ta ‑pë ’dhö ’gbee‑ yö ‑mü. ‑A ‑dee sɔ ’ö ‑klu ‑sü ’ka ’kɔ ’dhiö ‑Zlan ‑gɔ kɔɔ bhë ‑yö ‑bɔ ‑a ’gü, ’yö dho slabhodhɛ ’slööslö bhë ‑a ‑bha. ²⁰‑Dhɛ ‑de bhë ꞊nɛ ’ö Yesu ‑yö ‑da ‑a ‑bha kwa ’dhiö kwa ‑wun ’gü; ’yö ꞊ya kë slabhomɛ ꞊va ’ka ꞊toëpö ’ka ꞊nɛ Mɛsisedɛkö ’dhö.

’Wun ’ö ‑gban Mɛsisedɛkö ‑bha

¹Mɛsisedɛkö ’ö bhë ‑yö kë ‑gludë ’ka Salɛmë; ’kɛɛ ‑yö ‑kë ’pö ‑Zlan ’ö ‑ziö pë ’plɛ ‑ta bhë ‑a ‑bha slabhomɛ ’ka. Kë‑ wo ’kpa bhë, ꞊ya kë ꞊nɛ Ablaamö ‑yö ’go ‑na ‑glu ’piö ‑to ‑a ’gbee‑ ‑sü ’ka ‑gludë ‑nu ‑ta, Mɛsisedɛkö ‑yö ‑dho ‑a ‑gɔ zian‑ ’yö ’dhuë‑ kpɔ ‑a ‑bha. ²Yö ꞊nɛ ’ö Ablaamö ‑yö ö ‑gɔ ‑pë ‑nu ’gü ‑kan ’gü ’gɔɔ‑ do ‑naa ’wo‑ ‑dhɛ dimë bhë ‑a bho ‑a ‑dhë. ꞊Waa‑ pö Mɛsisedɛkö, kö ‑wa ‑pö ‑gludë ’ö kpengdhö, yö ’ö ’dhö bhë, ’ö ‑kë ‑gludë ’ka Salɛmë; ꞊waa‑ pö ’dhö ’pö kö ‑wa ‑pö ꞊zuöyagluu ‑gludë. ³Kë‑ wo bhë, Mɛsisedɛkö dë waa‑ dhe ’iin ‑a ꞊suu’‑ ‑ta ‑mɛ ’ö dho kë ‑dhö kö mɛ ‑nu ‑waan pö ’wo kë ‑na ‑de, yi ‑an ‑dɔ waa kë ‑dhö. ‑A bhɔ ‑kɔ ‑nu, ‑a bhɔ ‑dhɛ ‑nu waa‑ ‑a ‑bha ga ‑sü ‑nu ‑an ‑wun yaa bɔ mɛ ’dhi do kö ‑waan pö ‑yö ‑kë ꞊nëdhö, yi‑ ‑dɔ, yaa kë ‑dhö. ‑A ‑bha sla‑ bho ‑yuö ‑yö ‑kë ꞊nɛ ‑Zlan Gbö ‑bha ’dhö; ’ö bhii ‑yö slabhomɛ ’ka ’dhö ꞊toëpö ’ka.

⁴Ka gia‑, ‑ka ‑dhɛ ‑ga bhë! ꞊Waa‑ pö Ablaamö ’ö kwa ’bhɛma ꞊vava ‑nu ’wo bhë ‑a mɛ do ’ka, pë ’saadhö ’ö ‑kë ‑a yö ꞊dhia ‑glu ‑nu ’piö ‑ya ’gü ‑kan ’gü ’gɔɔ‑ do ‑naa ‑bho mɛ bhë ‑a ‑dhë, kö mɛ bhë ‑yö ꞊va giagia ’ka. ⁵Levi ’ö ‑kë Ablaamö ꞊suu’‑ ‑ta ’ka bhë, ‑yö ‑de ’pö ‑a ꞊suu’‑ ‑ta ‑nu ’wo bhë, ‑an mɛ ‑nu ’wo slabhomɛ ‑nu ’ka, ‑yö ꞊bɛɛn’ ‑sü ’ka tɔng ’sëëdhɛ ’gü ꞊nɛ ‑an ꞊dua’ ‑mü kö ’sɛgümɛ ‑nu ‑wo wo ‑gɔ ‑pë ‑nu ’saadhö ’gü ‑kan ’gü ’gɔɔ‑ do ‑naa bho ‑an ‑dhë. ’Sɛgümɛ ‑nu ’wo bhë ’wo tɔɔ ‑an dhegluzë ‑nu ’kɛɛ kö wo ’wo ’dhö bhë ‑wo ‑go Ablaamö ꞊suu’‑ ‑ta ’gü. ⁶Kë‑ wo bhë, Mɛsisedɛkö yaa ’go Levi ꞊suu’‑ ‑ta ’gü ’kɛɛ Ablaamö ‑yö ö ‑bha pë ’gɔɔ‑ do ‑naa ‑bho ‑a ‑dhë, ’yö ‑dhɛ ‑ya, ’go mü ’yö ’dhuë‑ kpɔ Ablaamö ’ö ‑Zlan ‑yö pë ’tɔ go ‑a ‑dhë bhë ‑a ‑bha. ⁷’Kɛɛ kö kë‑ wo ’dhö bhë ’sa, ’kwa ‑dhɛ ‑ga ‑a ’gü ‑së ’ka, mɛ ’ö ’dhuë‑ kpɔ mɛ ‑bha bhë ‑yö ꞊va ’ö ꞊zië’ mɛ ’ö ’dhuë‑ ‑yö kpɔ ‑a ‑bha bhë ‑a ‑ta. ⁸꞊Ya kë ꞊nɛ ’kwa ꞊dhië’‑ slabhomɛ ‑nu ’wo ‑kë Levi ꞊suu’‑ ‑ta ‑nu ’ka bhë ‑an ’piö ꞊zian’, kwa‑ yö ꞊nɛ mɛ ‑nu ’wo pë ’gɔɔ‑ do ‑naa bho ‑na ‑an ‑dhë bhë, ‑wo mɛ ‑nu ’wo gamɛ ’ka ‑an ’ka, ’kɛɛ kö Mɛsisedɛkö ‑bha ’ö bhë, mɛ gbɛ yaa‑ ‑bha ga ‑sü ‑wun ma kö ‑waan ’dhoë‑ ‑wun ꞊blɛɛ’‑ bhë ꞊nɛ ’ö dimë ‑yö ‑bho ‑a ‑dhë ꞊nɛ ‑kɔ ’ö ꞊bɛɛn’ ‑sü ’ka ‑a ’ka ‑Zlan ‑bha ’sëëdhɛ ’gü ‑a ’dhö. ⁹’Ö ꞊ya ’go mü, ’kwa ‑dhɛ ‑ga ’zü kwa ’dhiö ꞊zian’, Ablaamö ‑yö ö ‑bha pë ’gɔɔ‑ do ‑naa ‑bho; ’kɛɛ Levi ’ö‑ ꞊suu’‑ ‑ta ’në ‑nu bhë ’ö mɛ ‑nu ‑wo dimë bho ‑an ‑dhë bhë, yö ‑de gia‑, ‑yö ö ‑bha ‑bho ’pö. ¹⁰‑A bho ‑kɔ ’ö bhoë bhë ’ö tɔɔ ’kö ‑kë ꞊nɛ ‑a ’töng bhë ‑a ’ka, kö yaa bhɔ ꞊kun, ‑yö ‑kë ’püë‑ wo ö ’bhɛma Ablaamö ’gü ’töng ’ö Mɛsisedɛkö ‑yö dho ‑a ’ka Ablaamö ‑gɔ zian bhë ‑a ’ka. (Kö ꞊dhɛ ‑kë ꞊nɛ Ablaamö ‑yö ö ‑gɔ ‑pë ‑nu kë ’gɔɔ‑ do ‑naa ‑bho Mɛsisedɛkö ‑dhë bhë, kö Levi ‑de ’pö ꞊ya ö ‑bha bho ꞊nɛ bhë).

¹¹’Ö ꞊ya kë ꞊nɛ Levi waa‑ ö ‑gɔ kɔɔmɛ ‑nu Aalɔn ‑nu ‑an ‑bha sla‑ bho ‑sü ’ö ‑Zlan ‑dhë bhë ‑yö ‑kë ꞊nɛ ‑kɔ ’ö ‑Zlan ’dhoë‑ ’piö kö ‑yö kaa ‑a ’dhö, kö slabhomɛ gia‑ ’ö dho kë ꞊nɛ Mɛsisedɛkö ’dhö, ‑a ‑wun ’ka ’dho ‑da ‑be, ’ö bhii ’ö tɔɔ ‑Zlan ‑bha tɔng ‑nu ’wo‑ dɔ Izlaɛlö ‑mɛ ‑nu ‑dhë bhë ‑a ‑gɛn ‑yö ‑go Levi waa‑ ö ‑gɔ kɔɔmɛ ‑nu ‑an ‑bha sla‑ bho ‑Zlan ‑dhë ‑sü ’gü. ¹²’Ö tɔɔ ꞊ya kë ꞊nɛ ꞊waa‑ pö slabhomɛ ꞊suu’‑ ‑dëü ꞊ya nu kö tɔng gbɛ dɔ ‑sü ‑mü; ¹³‑ka dɔ ’dhɛ! Kwa Dëmɛ Yesu ’ö ’wun ‑nu ’wo bhë ’wo ‑gban ‑a ‑bha bhë, yaa ’go Levi ‑gɔ ’gunng ’gü, ’ö mɛ gbɛ yaa ’go do ‑a ‑gɔ ’gunng ’gü kö ‑yaan yuö kë slabhodhɛ ‑bha; ¹⁴’ö tɔɔ ‑yö mɛ ’plɛ ’yaan ꞊nɛ yö ’ö bhë, ‑yö ‑bhɔ Zuda ‑gɔ ’gunng ’gü. ’Kɛɛ kö ’wun ’ö ‑gban sla‑ bho ‑sü ‑yuö ‑bha bhë, Moizö yaa Zuda ’tɔ bɔ ‑a ’gü do.

Slabhomɛ ’ö bhɔ Mɛsisedɛkö ‑bha

¹⁵‑Ka dɔ ’dhɛ! ’Wun do ’ö dho ’wun ꞊nɛ ‑a ‑ta po ka ‑dhë ꞊ga ꞊nɛ: Slabhomɛ do ’ö ‑kë ꞊nɛ Mɛsisedɛkö ’dhö ‑yö ‑nu. ¹⁶‑Ya ’ö‑ wo slabhomɛ ’ka bhë, yaa ’sü mɛ ’bhee‑ ‑nu ‑bha ’wun ‑yö ’ko ’dhiö ‑sü ’ö‑ tɔng ‑nu ’dhö mü ꞊nɛ mɛ ꞊nɛ ꞊ya kë ꞊nëdhö, kö ‑kwaa ‑ya slabhomɛ ’ka ‑a ’dhö, yaa ’sü ‑a ‑bha; kë‑ wo slabhomɛ ’ka bhë, ’piigbeedhɛ ’ö go ‑këdhösü ’ö ’yaa yën ‑a ’gü bhë ꞊nɛ ’ö ‑kë ‑a ꞊kwaa’. ¹⁷‑A ‑de ’wun ’ö bhë ‑Zlan ‑bha ’sëëdhɛ ꞊bɛɛn’ ‑yan ’bhaa ‑yö ‑dhö ’ö‑ pö: Ü ‑dho kë slabhomɛ ’ka ꞊toëpö ’ka ꞊nɛ Mɛsisedɛkö ’dhö. ¹⁸Tɔng zii ’ö ‑kë Moizö ‑bha tɔng ’ka ’ö dɔ ’ö ‑gban slabhomɛ ‑nu ‑bha bhë, ‑a ’go ‑kɔ ’ö goë ꞊ga ’ö bhë ’ö bhii yaa kë ’gbee‑ ’iin ‑a ‑yö ‑a ‑bha ‑pë gbɛ yaa kë ‑dhö. ¹⁹꞊Dhɛ ’ö Moizö ‑bha tɔng bhë ’ö ꞊ya ziö ’dhö, ‑a ‑bha kwa ‑kë ’slööslö ‑sü ’ö ‑Zlan wö ’dhiö bhë ‑a ‑da ’ö yaa‑ wo ’dhiö bhë, yö ꞊ga ’ö ‑zo ‑yö ‑a ‑bha ‑pë ’ö ’gianzë ’ö ’kwa bɔ ‑a ‑ta ’kwa ꞊yɔɔn ‑Zlan ‑bha bhë ’ö ꞊yaa‑ ‑da kwa ꞊zuö’ ’piö bhë.

²⁰’Go mü ’zü ‑Zlan ‑yö ö ‑wo ‑bhö ’wun bhë ‑a ’gü. ’Kɛɛ kö mɛ ‑nu ’wo to bhë, ‑an ‑bha ‑kë slabhomɛ ’ka ‑sü bhë, ‑a ‑wo ‑bhö ‑sü ꞊suu’‑ ’ö bhë yaa kë mü. ²¹’Kɛɛ Yesu ‑bha ’ka, ‑a kë ꞊yië’ kö ‑yaan ‑ya slabhomɛ ’ka, ‑Zlan ‑yö ö ‑wo ‑bhö ꞊nɛ ‑kɔ ’ö ꞊bɛɛn’ ‑sü ’ka ‑a ’ka ‑Zlan ‑bha ’sëëdhɛ ’gü ‑a ’dhö ꞊nɛɛ: Pë ’ö Dëmɛ (‑Zlan) ꞊ya ‑wobhödhe kë ‑a ’gü kö pë ’ö‑ ‑de dho kë yö ‑mü ’ö bhii ‑ya ‑pö Yesu ‑dhë: «Ü ‑dho kë slabhomɛ ’ka ꞊toëpö ’ka»; ’ö yö ’ka ’dho ‑lö ö ‑wo ‑zü. ²²‑A ‑kë ’dhö ‑sü ’ka, Yesu bhë yö ꞊nɛ ’ö tɔɔ mɛ ’ö kwaa‑ ‑Zlan ‑nu kwa ‑bha ‑dhikuëdhe bhë ’ö ‑yö ‑a songmɛ ’gianzë ’ka.

²³Slabhomɛ ‑gwaa ꞊plɛzë ’wo bhë ‑an ‑bhokoudhɛ ’bhaa ‑yö mü ’zü. ’Ö tɔɔ slabhomɛ ‑nu ’wo ‑kë ’dhiö bhë, ‑wo ‑kë ꞊va; mɛ do ꞊ya ga, ’ö‑ mɛ ’bhaa gbɛ ‑yö yö ‑a pin ꞊taa kö ‑yaan ’dho ‑a kë ‑sü ’ka ’dhiö. ²⁴’Kɛɛ Yesu ’ö bhë ‑yö ’bhee‑ ꞊toëpö ’ka; ’ö ’go mü ’ö‑ ‑bha sla‑ bho ‑yuö bhë ’ö‑ ‑wun ‑lo mɛ ’bhaa gbɛ kwɛɛ ‑sü gbɛ ’yaa ’dhö. ²⁵‑A ‑wun ’gü ꞊nɛ ’ö mɛ ‑nu ’wo bɔ ‑na ‑a ‑ta ’wo ꞊yɔɔn ‑na ‑Zlan ‑bha, ’ö ‑mɔa ‑bha kö ‑yö ‑an dha; ‑yö ꞊tun ‑an dha ꞊dɛɛ ’ö dho dhoë ’dhiö ‑kplawo, bhii ‑yö ’bhee‑, ’ö dhö toë ’dhö kö ‑yaan ‑bhɛa ‑Zlan ‑dhë ‑an ‑wun ’gü.

²⁶’Kwa ‑dhɛ ‑ga ‑a ’gü ‑së ’ka, kö Yesu bhë ꞊nɛ ’ö tɔɔ slabhomɛ ꞊va ’ö‑ ‑wun ’dhö kwa ‑bha. ‑Yö ’slööslö, ’ö tɔɔ ’wun ’yaa‑ ‑bha. Yö ’ö bhë ‑yö ‑kan ꞊sɔɔnyaamɛ ‑nu ‑bha, ’ö sü ’dhuu, dhang‑ ’gü ‑Zlan ’piö. ²⁷’Yaa ꞊nɛ slabhomɛ ꞊vava ‑nu ’wo to ‑an ’dhö bhii ‑a ‑bha ‑wun ’yaa sla‑ ‑bho ‑sü ‑bha yi ’saadhö ’ka yö ‑de gia‑ ö ‑bha ’wun yaa ‑nu ‑wun ’gü, kö ‑yaan mɛ ‑nu ‑bha wo ’pö. Sla‑ ’ö‑ bho kö ꞊ya ö ‑de kë slabhoëpë ’ka bhë ’ö tɔɔ sla‑ do ’ö dho to ’dhö. ²⁸Tɔng ’ö Moizö ‑ya dɔ bhë, mɛ ‑nu ’ö ‑an ‑bha ‑kë kpengdhö ‑Zlan wö ’dhiö ‑sü bhë ’ö ’yaa ‑mɔ ’kuë ‑sü ’ka bhë ꞊nɛ ’ö ‑an ‑ya slabhomɛ ꞊va ’ka. ’Kɛɛ ‑Zlan ‑wo ’ö‑ ‑bhö zlöö kö tɔng ꞊ya dɔ ’saadhö bhë, mɛ ’ö‑ ‑ya slabhomɛ ꞊va ’ka ’ö tɔɔ ö Gbö ’ö‑ ‑bha ‑kë kpengdhö ‑sü bhë ’ö‑ ’dhiö ’dhö ‑mɔ ’kuë ‑sü ’ka ꞊toëpö ’ka bhë, yö ‑mü.

¹’Wun ’ö ’kwa ’go ‑na ‑a ꞊blɛɛ’ ꞊dhia ꞊nɛ ‑a ‑gɔ ’ö mü ’ö tɔɔ kwa ‑bha slabhomɛ ꞊va do ‑yö ‑dhö; ‑yö ‑ya ‑sü ’ka ‑Zlan ‑bha ’gɔ ‑gbloo ’ö dhang‑ ’gü bhë ‑a ꞊kwɛɛ‑ ’gü ꞊zian’. ’Gɔ ‑gbloo ’ö bhë ꞊nɛ ‑Zlan ’ö ‑kɔ ‑mɔ ’wuën‑ ‑sü ’ö ‑ziö pë ’plɛ ‑ta ‑a ‑gɔ bhë ’ö ‑ya ‑sü ’ka ‑a ‑ta. ²Yesu ‑yö ö ‑bha ‑kë slabhomɛ ꞊va ’ka ‑sü ‑yuö kë ‑na slabhodhɛ ’slööslö ’gü. Slabhodhɛ ’ö bhë mɛ ꞊kwaa’ ‑pë ’yaa ‑mü. Kwa Dëmɛ ‑de gia‑ ꞊nɛ ’ö‑ dɔ. Sla‑ ‑bho ‑a ’gü ‑kɔ ’ö bhë ꞊nɛ ’ö tɔɔ ‑a giagia ’ö‑ ’bin ’dhö ’kpongtaa.

³Slabhomɛ ꞊va ’saadhö ‑yö ‑ya kö ‑yaan pë ‑nu gbaɔ kë ’iin kö ‑yaan sla‑ ‑nu bho; kö ‑yö kwa ‑bha slabhomɛ ꞊va ‑bha kö pë ‑nu ‑wo kë kö ‑yaan gbaɔ ’pö. ⁴Kë ‑dewo poo bhë, ‑yö ‑kë ’kpongtaa zö ‑be, yö ’ka ’dho kë slabhomɛ ’ka; ’ö tɔɔ slabhomɛ ‑nu ‑wo zö bhë, ꞊ya kë ‑wo sla‑ ‑nu bho ꞊nɛ ‑kɔ ’ö‑ ’ka Zuifö ‑nu ‑bha tɔng ’gü bhë ‑a ’dhö. ⁵’Ö bhii pë ‑nu ’ö slabhomɛ ‑nu ’wo bhë ’wo‑ kë ‑na bhë, ‑wo pë ‑nu ’wo dhang‑ ’gü ‑an ’bin waa‑ ‑an ‑bhɔa ’ka; ‑yö pë ’ö ‑kë Moizö ‑bha ’töng ’ka bhë ‑a ꞊zuan’ ’ka, ’ö tɔɔ ‑dhɛ ’ö ’dhoë‑ sɔ ’kɔ dɔ, ‑Zlan ‑ya ‑pö ‑a ‑dhë: Pë ’a‑ ‑zɔn ü ‑dhë ‑tɔn tuö bhë, ‑a kë ‑së ’ka kö ’üën‑ ‑a ‑bhɔa dɔ ꞊nɛ ‑kɔ gia‑ ’ü‑ yöë bhë ‑a ’dhö. ⁶’Kɛɛ ’ö sü ꞊dɛɛ ‑bha, ’ö dhoë ’dhiö, yuö ’ö ꞊va ’ö ‑ziö ‑an ‑bha ‑ta, ‑a ‑wun ‑ya ‑lo Yesu kwɛɛ kö ‑yaan kë. ’Ö tɔɔ ‑dhikuëdhe ’ö ꞊va ’ö ‑ziö ‑a ’saadhö ‑ta ’ö ‑gban pë ‑nu ‑wungbeezë ‑nu ’tɔ ’go ‑wo ‑nu ‑ta bhë, yö ꞊nɛ ’ö tɔɔ ‑an mɛ ’ö ‑an ziën.

⁷‑Dhikuëdhe ‑blɛɛzë ’ö ‑kë bhë, ꞊ya kë ꞊nɛ ’wun ‑go zian‑ ‑sü ‑zë yaa kë ‑a ‑bha ‑bezë, kö ‑a ‑peedë ‑naa ‑yö ‑a pin ꞊taa ‑wun ‑de ’ka ’dhö ‑da. ⁸’Ö tɔɔ ‑Zlan ‑yö ’wun yaa ‑yö ö ‑bha ’sɛgɔgümɛ ‑nu ‑bha, ’ö ’wun ‑gban ‑a ‑bha ’ö‑ ꞊blɛɛ ꞊nɛ ‑kɔ ’ö ꞊bɛɛn’ ‑sü ’ka‑ ’ka‑ ’dhö ꞊nɛ: ‑Zlan ‑ya ‑pö: Yi ‑nu ‑wo nu ‑na ’a dho ‑dhikuëdhe ‑dëü kun Izlaɛlö ‑mɛ ‑nu ’ka, ’ö ’a‑ ‑kë ’pö Zuda ‑mɛ ‑nu ’ka. ⁹Yaa ’dho kë ꞊nɛ ‑dhikuëdhe ’a‑ ‑kë ‑an dë ‑nu ’ka kö ’ma ‑ya ‑an ‑kɔ ‑bha ’ö yi ‑nu ’yië go Ezitö ‑sɛ ’gü bhë ‑a ’dhö. ’Ö ‑Zlan ‑ya pö ’zü: ‑Dhɛ ‑kë ꞊nɛ ‑dhikuëdhe ’ö bhë waa‑ ’kun ‑kɔ ‑së kë bhë, yö ꞊ga ’ö ma ‑de ’pö ’ö ’a n ‑ta yö ‑an ‑bha bhë. ¹⁰’Kɛɛ ‑dhikuëdhe ’a dho ‑a kun Izlaɛlö ‑mɛ ‑nu ’ka bhë ’ö ꞊nɛ; ’ö Dëmɛ ‑ya pö: ’Töng ‑nu bhë ꞊wa ziö, a ‑dho ma tɔng ‑nu ‑da ‑an ‑bha ’wundɔdhe ’gü, ’ö dho to ꞊bɛɛn’ ‑sü ’ka ‑an ꞊zuö’ ’gü. A ‑dho kë ‑an ‑bha ‑Zlan ’ka, ’ö ’wo ‑kë ma ’sɛgɔ ’ka. ¹¹Yi ‑nu bhë ‑an ’ka, mɛ gbɛ ’ka ’dho pë ‑zɔn ö ’bha ‑dhë, ’iin mɛ gbɛ ’ka ’dho pë ‑zɔn ’ö dheglu ‑dhë ꞊woë’ ꞊nɛɛ: ‑Bhö Dëmɛ dɔ! ’Ö tɔɔ, mɛ ’kpɛkpɛ ‑wo ‑dho n dɔ ’ö sü ’në ’sɛɛn‑ ‑nu ‑bha ’ö yöë mɛ ꞊vava ‑nu ‑bha. ¹²’Yö tɔɔ a ‑dho ziö ‑an ‑bha ’wun yaa ‑nu ‑ta; ’ö n ’ka ’dho ‑an ‑bha ꞊sɔɔnyaa ‑wun ‑nu to n ‑zuë gbɔ. ¹³Kë‑ wo ’dhö bhë, ’wun ’ö ‑gban ‑dhi ’kuë ‑dëü ‑bha, ‑Zlan ꞊yaa‑ ꞊blɛɛ’ kö ‑a ‑blɛɛzë ’ö ’dhiö bhë ꞊ya kë zii ꞊nɛ bhë; ’kɛɛ kö ꞊waa‑ pö pë mɛ ꞊nɛ ꞊ya kë zii ’iin ꞊ya ꞊glɔɔ, kö pë bhë ‑a ’gü ꞊siö’ ‑sü ‑mü.

¹‑Dhikuëdhe ‑blɛɛzë bhë tɔng ‑nu ’wo ‑gban ‑Zlan gba ‑kɔ waa‑ ‑a ‑gba ’gü ‑kɔ ’ö ‑kë dɔ ‑sü ’ka ’kpongtaa zö bhë, ‑wo ‑kë ‑a ’gü. ²Sɔ ’kɔ do ‑yö ‑kë dɔ ‑sü ’ka; ‑a ’gü ‑kë ‑glu ‑sü ’ka. ‑A ’gü ‑dhɛ ‑blɛɛzë bhë, ’wo‑ ‑dhɛ ‑dhɛ ’slööslö. ‑Dhɛ ‑blɛɛzë ‑dhɛ bhë ꞊nɛ ’ö ꞊labang waa‑ sla‑ ꞊bhoë’ ꞊gba ’ö ꞊bluu’‑ ’ö ꞊waa‑ gbaɔ ’ö‑ ‑ta bhë ’wo ‑kë ‑a ‑bha; ³‑a ‑dhɛ mɛ ’ö ‑dun ’kɔ ’dhiö ‑sɔ ꞊plɛ ‑naa ꞊zlöö bhë, ’ö ’wo‑ ‑dhɛ ‑dhɛ ’slööslö ‑dhɛ ꞊duö. ⁴‑Dhɛ bhë sla‑ ‑bho ‑a ‑ta ‑pë ’ö ‑kë ’sënng ’ka ’ö ’wo pë ’tëë ‑sëëzë ’güö ‑na ‑a ‑ta bhë waa‑ tɔng ꞊gbëü ’ö ’sënng ‑yö ‑kë ’më ‑sü ’ka ‑a buën‑ ‑dhɛ ’saadhö ’gü bhë ‑wo ‑kë ‑a ‑bha. ’Ö ’sënng ‑gblɔng bhë ꞊nɛ ’ö ’sënng gbɔ ’në ‑yö ‑kë ‑a ’gü. Yö ꞊nɛ ’ö ꞊bluu’‑ ꞊suu’‑ ’ö go dhang‑ ’gü ’kpa ’wo‑ ‑dhɛ ’manë bhë ’ö ‑kë ‑a ’gü. Aalɔn ‑bha ’lü ’në ’ö‑ ’bin ‑yö bhɔ waa‑ ‑guö ’fa ‑nu ’ö ‑dhi ’kuë ‑wo ‑nu ’dhö ‑ya ‑sü ’ka ‑a ‑ta bhë ’wo ‑kë ꞊gbëü do bhë ‑a ’gü mü ’pö. ⁵‑Zlan ‑bha bɔmɛ ‑nu ’tɔbhɔsüzë ’bin ‑yö ‑kë dɔ ‑sü ’ka ꞊gbëü bhë ‑a ‑ta dhuö ‑a ‑zɔn ‑sü ’ka ꞊nɛ ‑Zlan ‑yö ‑dhɛ bhë ‑a ’gü. Wo ꞊nɛ ’ö ‑an gban ‑nu ’dhö dɔ ‑sü ’ka ‑ziö mɛ ‑nu ‑bha këwun yaa ‑nu ‑dhɛ bhë ‑a ‑ta. ’Kɛɛ kë‑ wo ’dhö bhë pë ‑nu ’wo bhë ‑an ‑wun ‑blɛɛ ‑yö sia‑ ‑sü ’ka ‑sü ‑dhɛ ’yaa ‑mü ꞊nɛ.

⁶Pë ‑nu ’wo bhë, ‑an ’plɛ dɔ ‑kɔ ꞊nɛ bhë; ’ö ꞊ya kë ’ö slabhomɛ ‑nu ‑wo ‑da ‑a kɔɔdhɛ ‑blɛɛzë ‑bha wo ‑bha yuö ‑nu kë ‑sü ’ka. ⁷’Kɛɛ kë‑ wo ’dhö, ’kɔ bhë ‑a ‑dhɛ ‑peedë ‑naa bhë, slabhomɛ ꞊va ꞊nɛ ’ö ‑da mü. ’Kɛɛ ‑ya ‑kë ’dhö do ‑kwɛ ‑bha. Pë ꞊ya kë ’ö dhoë ’ma ’ö tɔɔ wü fɛi ’ö ꞊ya kë ’ö ‑Zlan gba ‑a ’ka, yö ’dhö waa‑ ’sɛgümɛ ‑nu ’saadhö wo ‑bha këpë yaa ‑nu ‑wun ’gü ’iin pë mɛ ‑nu ’wo ‑kë ’waa pë dɔ ‑bha bhë ‑a ‑wun ’gü. ⁸‑Dhɛ bhë ‑a ‑bha ‑Zuu ’slööslö ‑ya ‑zɔn ꞊nɛ ‑dho ‑dhɛ ’slööslö ‑dhɛ ꞊duö ‑zian ’dhi yaa ’po ꞊kun, kö ’töng bhë ‑a ’ka sɔ ’kɔ ‑yö ꞊tun ‑dhö. ⁹’Wun bhë ‑yö ’wun ꞊zuan’ ’ka ’töng ‑nu ’kwa‑ ’gü ꞊nɛ ‑an ‑bha ’ka. ‑A ‑gɛn tɔɔ gbaɔ ‑nu waa‑ sla‑ ‑bho ‑a ’ka ‑pë ‑nu ‑kë ‑Zlan ‑dhë ‑sü bhë waa ’dho ‑mɔa ‑bha kö pë ‑nu ’wo bhë ‑a këmɛ ‑nu ꞊zuögüdhɛ ‑yö kë ’slööslö, ‑an ꞊zuö’ ‑bha ‑to zlöö ‑sü ‑wun ’gü. ¹⁰Pë ‑nu ’wo bhë ‑wo ‑gban ‑bhöpë ‑nu, müpë ‑nu ’iin ’wun ‑nu ’wo ‑gban mɛ bun ‑bha ‑kë ’slööslö ‑sü ‑nu ‑bha ‑an ‑bha. ’Kɛɛ kë‑ wo ’dhö bhë, pë ‑nu ’wo bhë ’saadhö ‑wo mɛ bun ‑bha ‑pë ‑nu tɔng dɔ ‑sü ’ka ’dhö ꞊kun ‑yaan ꞊toë’ ’dhö ‑yaan yöë ’töng ’ö ‑Zlan dho pë ’plɛ ꞊sië’ ‑a ’ka bhë ‑a ‑bha.

¹¹’Kɛɛ yö ꞊ga ’sa ’ö Klito ꞊ya nu bhë; yö ꞊nɛ ’ö tɔɔ pë ‑nu ’wo dho nu bhë, ‑a slabhomɛ ꞊va ’ö‑ ‑bha slabhodhɛ bhë ’ö‑ ‑wun ’dhö ’gbee‑, ’ö ’slööslö ’ö ꞊zië’ ‑a ‑blɛɛzë ‑ta. Mɛ ‑kɔ këpë ‑de ’yaa ‑mü kö ‑waan ’dhoë‑ pö ‑yö ‑go ’kpongtaa zö. ¹²‑Da do ’ö Klito ‑ya wo ‑dhɛ ’slööslö ‑dhɛ ꞊duö ’gü bhë yaa kë ꞊nɛ ‑bho gɔn ’iin ‑du ‑nu ꞊nɛ ’ö sla‑ bho ‑an ’ka ’ö ‑an fɛi kë gbaɔ ’ka; ’kɛɛ yö ‑de gia‑ ꞊nɛ ’ö ö ‑de kë sla‑ ‑bho ‑a ’ka ‑pë ’ka ’ö ö ‑de fɛi ‑kë gbaɔ ’ka kö ‑yaan kwa ‑gɔ ‑ta dhɔa ꞊sɔɔn yaa ‑gɔ ꞊nuadhɛ ’gü, ’ö dhö toë ’dhö ꞊toëpö ’ka. ¹³Bhii ’kpa bhë, ‑dhɛ ’ö ‑bho gɔn ‑nu, ‑du gɔn ‑nu fɛi waa‑ ‑du mu ’güö ’yoo ‑bi ’dhoë‑ ‑bha ’ö ’wo‑ kë ‑na mɛ ‑dhiizë ‑nu ‑bha kö bun ‑bha ‑kë ’slööslö ‑sü ‑yaan kë ‑an ‑gɔ bhë, ¹⁴kö ‑yö ‑dho kë ꞊dhë mü Klito fɛi ’piö ee! ’Ö tɔɔ ‑Zuu ’slööslö ’ö ‑dhö ꞊toëpö ’ka, ‑ya ‑kë ’ö ö ‑de ‑kë sla‑ ꞊bhoë’ pë ’ö‑ ꞊zaadhɛ gbɛ ’yaa‑ ‑bha bhë ‑a ’ka; ’yö ö ‑de gbaɔ ‑Zlan ‑dhë. ‑A fɛi bhë ꞊nɛ ’ö dho kwa ꞊zuöpiödhɛ kë ’slööslö pë ‑nu ’ö ‑an ‑yö ‑a ‑bha ‑pë gbɛ ’yaa ’dhö bhë ‑an ‑gɔ, ‑yö kë ’dhö kö ‑Zlan ’ö ’bhee‑ bhë, ’kwaan‑ yuö ‑nu kë ‑a ‑dhë. ¹⁵Klito ’ö bhë ‑a ‑bha ‑kë ‑dhikuëdhe ‑dëü ’ö bhë ‑a ‑da ‑mɛ ’ka ‑sü ‑gɛn ꞊ga ’ö bhë; ‑yö kë ’dhö kö mɛ ‑nu ’ö ‑Zlan ‑yö ‑an ꞊dhɔɔ ‑kë bhë, pë ’ö‑ ’tɔ go ‑an ‑dhë ’ö ‑dhö ꞊toëpö ’ka bhë, ‑waan yö. Kë‑ wo ’dhö bhë, ‑a ‑bha ‑kë ‑an ‑gɔ ‑sü ’ö bhë, ‑yö ‑sü ‑a ‑bha ga ‑sü ’ö ‑da ’wun bhë ‑a ’gü, kö ‑yaan mɛ ‑nu ’ö ’wo ‑kë ꞊sɔɔn yaa ’gü kö ‑wo ꞊tun ‑dhikuëdhe zii bhë ‑a ꞊löö bhë, ‑an ‑gɔ ‑ta ’dhɔ ‑sü ’ka ‑an ‑bha ’wun yaa ‑nu ‑gɔ.

¹⁶’Wun ꞊zuan’ do ga ꞊nɛ. ’Wun mɛ ’ö ‑gban pë ‑nu ’wo dho kë kö mɛ ꞊ya ga ’ö ‑kë mɛ ‑wo ‑kaanta ’ka ‑yaan ꞊tun ga ‑na bhë, ꞊waa‑ pö ‑wa ‑wun yö ’sɛi, kö mɛ ’ö ’wun ‑yö ‑gban ‑a ‑bha bhë ꞊ya ga. ¹⁷’Ö tɔɔ ’wun ’ö ‑gban mɛ ‑wo ‑kaanta ‑bha ’ö dho kë, ‑a ‑wun ‑yö ‑yö ’sɛi ’kɛɛ kö mɛ ’ö ’dhö bhë ꞊ya ga, ’kɛɛ ‑a ‑wun ‑yö ’flëë kö ‑a ‑mɛ ‑yö ꞊tun ’bhee‑. ¹⁸Pë ’ö ‑kë ’ö ‑dhikuëdhe ‑blɛɛzë bhë, ‑a kë ‑yi ’ka kö ‑yaan ‑gban, ’ö fɛi ‑yö ‑lo ‑a ‑wun ’gü ’ö bhë. ¹⁹‑Blɛɛzë ’ka, Moizö ‑yö tɔng ‑dhoo ‑bho Izlaɛlö ‑mɛ ‑nu ‑dho ’kuë‑ ‑sü ’dhiö ꞊nɛ ‑kɔ ’ö tɔng ‑nu ’dhoë‑ ’ka bhë ‑a ’dhö. ꞊Dhɛ ’ö ꞊ya yën, ‑yö ‑du ’në ‑nu waa‑ ‑bho gɔn ‑nu ‑an fɛi ‑sü ’ö ’yi ꞊kaan ‑a ’ka; ’yö‑ ’bhaa ꞊kpënng tɔng ꞊bɛɛn’ ‑wo ‑ta; ’ö‑ ’bhaa ‑kë ’sɛgümɛ ‑nu ‑bha; ’kɛɛ kë‑ wo ’dhö bhë, ’lü ’wo‑ ‑dhɛ izɔpö bhë, ‑a ‑gbiö do ’ö ’bhla kaa‑ nuɛazë ‑yö ‑kë ‑a ’dhiö bhë ꞊nɛ ’ö‑ ‑kë ‑a ’ka ‑a pö ‑sü ’ka ꞊nɛɛ: ²⁰Pë ’ö ꞊nɛ ’ö tɔɔ fɛi ’ö ‑Zlan ‑ya ‑kë ‑dhikuëdhe ’ka ’ö‑ ꞊blɛɛ ka ‑dhë. ²¹‑Kɔ do bhë ’ö‑ ꞊kaa’ sɔ ’kɔ waa‑ pë ‑nu ’ö ’wo ‑Zlan ꞊gbaa’ ‑pë ‑nu ‑yuö ꞊kaa’, ’ö‑ ‑Zlan gbadhɛ ‑bha bhë ‑an ‑bha, fɛi ‑kpëng ‑an ‑ta ‑sü ’ka ’pö. ²²‑Wo pë ’plɛ ‑kë ’slööslö ‑Zlan wö ’dhiö fɛi bhë ‑a ’ka ꞊nɛ ‑kɔ ’ö tɔng ‑ya pöë bhë ‑a ’dhö; ’ö tɔɔ ‑a ’ke fɛi yaa ‑lo, ‑ziö ꞊sɔɔn yaa ‑nu ‑ta ‑sü ’ka ’dhö kë ‑dhö.

²³Pë ‑nu ’wo dhang‑ ’gü bhë ‑an ’bin ‑nu ’wo ’kpongtaa zö bhë ‑an ‑bha ‑kë ’slööslö ‑kɔ ꞊ga bhë. ’Kɛɛ kë‑ wo ’dhö bhë ‑a gia‑ ‑nu ’wo dhang‑ ’gü bhë ‑an ‑bha ‑wun ‑yö sla‑ ’gianzë ‑nu ‑bha. Pë ‑kë ’ö Klito ‑yö ö ‑de ‑kë sla‑ ’ka bhë ’ö bhë. ²⁴’Ö tɔɔ yaa kë ꞊nɛ slabhodhɛ ’ö dhang‑ ’gü bhë ‑a ’bin ’ö mɛ ‑nu ‑wa dɔ wo ꞊kwaa’ ꞊nɛ ’ö Klito ‑yö ‑da ‑a ’gü. ‑A gia‑ ’ö dhang‑ ’gü bhë ꞊nɛ ’ö ‑da ‑a ’gü; ‑dhɛ bhë ꞊nɛ ’ö dɔ ‑sü ’ka ‑a ‑bha ‑Zlan wö ’dhiö kwa ꞊wuën’. ²⁵Zuifö ‑nu ‑bha slabhomɛ ꞊va ‑yö ‑da ‑kwɛ ‑bha do sla‑ bho ‑dhɛ ’gü wü fɛi ’ka; ’kɛɛ Klito ‑bha ’ka yaa ‑da mü ꞊plëëzë ’ka kö ‑yaan ö ‑de kë slabhoëpë ’ka. ²⁶’Ö ꞊ya kë ꞊nɛ ‑yö ’dhö, kö ‑yö ‑dho bɔ ’klobhɔdhe ’gü ‑bezë ‑gwaa ꞊plëëzë ’ka, ’go ’kpongtaadhɛ züdɔyi ‑bha. ’Kɛɛ pë ’ö ‑kë ꞊zian’ ’ö tɔɔ ‑dhɛ ’ö yi ‑kaanta ‑nu ꞊wa yö ꞊klöö’, ‑yö ‑nu ’dhö do ’kpaan kö ‑yaan ꞊sɔɔn yaa ’gü ꞊siö’‑; yö ꞊ga ’ö‑ ‑de ‑kë ’dhö ö ‑de ‑nu slabhoëpë ’ka ‑sü ’ka bhë. ²⁷Mɛ ’oo mɛ ’ö ‑dhö, ‑yö ‑dho ga dosɛn ’kpaan; ’ö ꞊ya ’go mü ’ö ‑lo ‑Zlan ’dhiö kö ‑a ‑bha za ‑yaan ’kan. ²⁸‑Kɔ do bhë ꞊nɛ ’ö Klito ‑yö ꞊kaa’ do slabhoëpë ’ka kö ‑yaan mɛ ’bhee‑ ‑nu ꞊va ‑bha ꞊sɔɔn yaa ‑nu bho ‑an ‑bha. ‑Yö ‑dho nu ’zü; ’kɛɛ yaa nu kö ‑yaan mɛ ‑nu ‑bha ꞊sɔɔn yaa bho ‑an ‑bha; ‑yö ‑nu kö mɛ ‑nu ’wo ‑ya ‑sü ’ka ‑a ‑gɔ bhë, ‑an dha.

¹Zuifö ‑nu ‑bha tɔng ’yaa pë ‑nu ’ö ’wo ’dhö giagia ’ka ‑an ‑yö ‑an pin ꞊taa ’ka, ‑yö pë ‑sɛɛbɔ ‑nu ’wo dho nu ‑dhɛkpaɔ ꞊dhia’ ‑bha bhë ‑an ’bin ’ka; ’ö yaa ‑mɔa kö mɛ ‑nu ’ö ’wo ꞊yɔɔn ‑na ‑Zlan ‑bha bhë, ‑yö ‑an kë ’slööslö. Kë ‑de ’ö‑ wo poo bhë ‑an ‑kë ’slööslö ‑kɔ ‑yö ‑dho kë ’më ’ka ɛɛ? Kö sla‑ ‑nu ’ö ’wo‑ bho ‑na do ‑kwɛ ‑bha ’ö ’waa yën ‑a kë ‑sü ’ka bhë yö ‑mü ꞊ee, ’iin ‑a ‑mlë ‑zë ‑mü? ²꞊Ya kë ꞊nɛ ‑Zlan gba ‑kɔ ꞊suu’‑ bhë, mɛ ‑nu ’wo‑ wo ‑na bhë, ‑wo ‑kë ’slööslö do ‑bezë ꞊klöödhö, wo ‑bha ꞊sɔɔn yaa ‑nu ‑gɔ, kö waa ’dho wo ‑de ‑ga ’zü ꞊sɔɔnyaamɛ ’ka kö ‑waan ’dhö sla‑ bho ’zü. ³Kë‑ wo ’dhö bhë giagia ’ka, sla‑ ‑nu ’wo bhë, pë ’ö ‑an këpë ’ka ’ö tɔɔ mɛ ‑nu ‑zo ‑büö ’ö‑ wo ‑an ‑bha ꞊sɔɔn yaa ‑nu ’ka ‑kwɛ ’saadhö ’ka, ⁴’ö tɔɔ ‑du gɔn waa‑ ‑bho gɔn ‑nu fɛi yaa ’dhö mɛ ‑nu ‑bha ꞊sɔɔn yaa bho ‑an ‑bha ’gbɛɛdhö.

⁵‑A ‑wun ’gü, ‑dhɛ ’ö Klito ’dhoë‑ ‑da ’kpongtaa, ‑ya ‑pö ‑Zlan ‑dhë: ’Bhaa sla‑ ’piö ’iin ’bhaa gbaɔ gbɛ ’piö; ’kɛɛ ’bha n bun kë. ⁶Gbaɔ ’ö ‑kë wü ‑nu ’wo ‑an ’güö ‑na slabhodhɛ ‑bha ’iin sla‑ ’ö ‑kë mɛ ‑nu ‑bha ꞊sɔɔn yaa ‑bho ‑an ‑bha ‑pë ’ka bhë, ‑an ‑wun ’yi ’yaa ’kan ü ’dhii. ⁷꞊Dhɛ ‑kë ’dhö ’a‑ pö: Ma ꞊ga ’a ꞊nɛ, (n Dë) ‑Zlan; a nu ‑na kö ’aan‑ ü ‑zo ’kun ‑wun kë ꞊nɛ ‑kɔ ’ö pë ’ö ꞊bɛɛn’ ‑sü ’ka tɔng ’sëëdhɛ ’gü n ‑gɔ ‑wun ’gü ’ö‑ pöë bhë ‑a ’dhö. ⁸’Kɛɛ ‑a ‑ga ’ka‑ wo bhë, ‑ya ‑pö ꞊kun: Sla‑ nu, gbaɔ ‑nu, wü ‑nu ’wo ‑an ’güö ‑na slabhodhɛ ‑bha bhë ‑nu, waa‑ sla‑ ‑nu ’wo‑ bho ‑na mɛ ‑bha ꞊sɔɔn yaa ‑nu ‑bho ‑a ‑bha ‑sü ’ka bhë ‑nu, ’bhaa ‑an gbɛ ’piö kö ‑waan ’dhoë‑ pö ‑a ’yi‑ ‑kan ü ’dhii. ’Kɛɛ kö sla‑ ‑nu ’wo bhë, ‑wa ‑bho ꞊nɛ ‑kɔ ’ö tɔng ‑wo ’dhö ‑a ’ka bhë ‑a ’dhö. ⁹꞊Dhɛ ꞊ya ’go mü zlöö ’ö‑ pö: Ma ꞊ga ’a ꞊nɛ, (n Dë) ‑Zlan, a nu ‑na kö ’aan‑ ü ‑zo ’kun ‑wun kë. ‑Kɔ bhë ꞊nɛ ’ö ‑Zlan ‑yö sla‑ zii nu ’plɛ bho ‑a ’ka sɛa‑, ’ö ꞊ya Klito ‑bha yö ‑an ꞊zian’ dhö bhë. ¹⁰꞊Dhɛ ‑kë ꞊nɛ pë ’ö ‑Zlan ‑dhi ‑a ‑dhë ‑wun ’ka, Yesu Klito ꞊yaa‑ ‑mɔ ’kuë bhë, kwa ‑bɔ sla‑ ’ö‑ bho ö bun ’gü do ’kpaan ö ’plɛ ’ka bhë ‑a ‑ta ’kwa kë ’slööslö kwa ‑bha ꞊sɔɔn yaa ‑gɔ.

¹¹Kë‑ wo ’kpa bhë, slabhomɛ ’ö ‑dhö, ‑yö ‑dɔ ö ‑gɛn ‑ta yi ’saadhö ’ka kö ‑yaan ö ‑bha yuö kë; ‑a ’bhaa ‑nu ꞊ya kë, sla‑ ’ö ꞊yaa‑ bho do bhë ’ö ꞊ya kë ’ö‑ bho ’zü; ’kɛɛ kö waa ‑mɔ ‑a ‑bha ‑wo mɛ ‑nu ‑bha ꞊sɔɔn yaa bho ‑an ‑bha ’sa. ¹²Klito ‑bha ’ka, sla‑ do ’kpaan ꞊nɛ ’ö‑ bho ꞊sɔɔn yaa ‑wun ’gü; ’yö‑ sla‑ ’ö ’dhö bhë, ’ö ‑kë yuö ’ö‑ ’piö ‑pë dhö ꞊glɔɔ ‑kplawo ‑a ’ka. ꞊Dhɛ ’ö ꞊yaa‑ bho ’dhö, ‑yö ‑ya ‑sü ’ka ‑Zlan ꞊kwɛɛ‑ ’gü ꞊zian’. ¹³Dɔ ’kwa‑ wo ꞊nɛ, pë ’ö ‑yaa ‑gɔ ‑dhɛ bhë ‑a ’gü zlöö ’ö tɔɔ kö ‑Zlan ‑yö ö yaagümɛ ‑nu kë ö ‑gɛn ꞊löö ‑pë ’ka. ¹⁴’Ö tɔɔ sla‑ do ’kpaan ’ö Klito ‑ya bho bhë, ꞊yaa‑ kë mɛ ’ö ꞊wa dha wo ‑bha ꞊sɔɔn yaa ‑gɔ bhë ꞊wa kë ’puu ’fɛfɛdhö ꞊nɛ ‑kɔ ’ö ‑Zlan ’dhoë‑ ’piö bhë ‑a ’dhö ꞊toëpö ’ka.

¹⁵’Wun ’ö ‑gban ‑a ‑bha, ‑Zuu ’slööslö ‑ya ‑blɛɛ ’ö‑ pö ‑blɛɛzë ’ka: ¹⁶’Yö kwa Dëmɛ ya pö: ‑Dhikuëdhe ’a dhoë‑ kë ‑an ’ka kö yi ‑nu ’wo bhë ꞊wa ziö ꞊ga ꞊nɛ: A ‑dho ma tɔng ‑nu ‑da ‑an ꞊zuö’ ’gü, ’ö ’a‑ ‑ya ‑an ‑bha ’wundɔdhe ‑ta. ¹⁷꞊Dhɛ ꞊ya ’go mü, ’yö‑ pö: N ’ka ’dho ‑an ‑bha ꞊sɔɔn yaa ‑nu waa‑ ‑an këwun yaa ‑nu ‑wun kun n ‑zuë gbɔ. ¹⁸Bhii ‑dhɛ ’ö ‑ziö ꞊sɔɔn yaa ‑nu ‑ta ‑sü ’dhö ‑a ‑bha, kö sla‑ ‑bho ꞊sɔɔn yaa ‑wun ’gü ‑sü gbɛ ’yaa mü gbɔ.

¹⁹꞊Ya kë ’dhö, n dhegluzë ‑nu, kö ‑potaasü ‑yö kwa ‑gɔ ’kwaan‑ ‑da ‑dhɛ ’slööslö ‑dhɛ ꞊duö ‑bha Yesu fɛi ’ö ‑lo bhë ‑a ‑wun ’gü. ²⁰꞊Ya zian ‑dëü ’ö ‑dhö ‑a ‑dëü ’gü bho kwa ‑dhë ‑dun ’kɔ ’dhiö ‑sɔ ’ö bhë, ꞊pɛɛ’‑ ’ö‑ wo bhë ‑a ’ka; ‑dun ’kɔ ’dhiö ‑sɔ ’ö bhë ꞊nɛ ’ö ‑dhɛ ’slööslö waa‑ ‑dhɛ ’slööslö ‑dhɛ ꞊duö ‑an ’gü ‑kan ’gü ‑pë ’ka. ‑Kwa ‑dhɛ ‑ga ‑a ’gü ‑së ’ka, ‑yö Yesu bun ’bin ’ka kwa ‑dhë. ²¹Kwa ‑bha slabhomɛ ꞊va ‑yö ‑dhö ’ö ‑ya ‑sü ’ka ‑Zlan ‑bha mɛ ‑nu ’kpɛkpɛ ‑gɔ ’dhiö. ²²꞊Ya kë ’dhö kö ‑kwa ꞊yɔɔn ‑Zlan ‑bha, ꞊zuö’ ’puu ’ka, ‑zo yö ‑sü ’ö‑ ’yan ‑toë ‑gɔ ‑pë ’dhö ‑gban ‑sü ’ka kpinngdhö ‑a ’gü bhë ‑a ’ka. Kö ꞊kun ’ö ’wun ‑yö to kwa ꞊zuö’ ‑ta ’ö ‑kë kwa ‑gɔ ꞊zuö’ ‑to zlöö ‑pë ’ka. Kwa bun ‑yö kë ’zlu ‑sü ’ka ’yi ’slööslö ’ka. ²³‑Zo ‑tën ‑a ‑dhë ‑pë ’ö ’kwa‑ ‑wun ꞊blɛɛ’ ‑na bhë, ‑kwaa ‑wun ’kun ’gbee‑, bhii ‑yö kë ka ’yaan ꞊nɛ pë ‑nu ’ö ‑Zlan ‑ya ’tɔ go kwa ‑dhë bhë, ‑yö ‑dho ‑a ‑de kë. ²⁴‑Kwa kwa ‑zo ’to kwa ’ko ‑nu ’piö kwa ’ko ‑nu ꞊faan’ ’më ‑sü ’ka ‑dhɔ ‑kë ’kuë ‑sü ‑bha ’iin kö pë ’ö këpë ‑nu ‑së ’ka kö ’kwaan‑ kë. ²⁵Kö ꞊kun ’kwa kwa ‑ta yö ‑dho ‑bhɔkuëkëdhɛ ‑nu ’gü ‑sü ‑bha ꞊nɛ ‑kɔ ’ö mɛ ’bhaa ‑nu ’dhoë‑ kë ‑na ’ka bhë ‑a ’dhö. Pë ’kwa dhoë‑ kë ꞊zian’ ’ö tɔɔ ’kwa kwa ’ko ‑nu ꞊faan’ ’më ’ö tɔɔ ka gia‑ ka‑ ꞊tɛi’ ‑dɔ ꞊nɛ kwa Dëmɛ ‑bha nu ‑yi ’ö‑ ‑ya bhë ꞊ya yö ꞊klöö’.

²⁶Bhii ꞊ya kë ꞊nɛ ’wun giagia dɔ ‑sü ꞊ya kë kwa ‑gɔ ’ö ’kwa ’go ‑a ’gü ’kwa ꞊sɔɔn yaa kë kwa ‑de ꞊dhɔɔbhaa ’ka, kö ꞊kun ’ö ‑kë kwa ‑zo ’piö ꞊nɛ sla‑ ‑bho ꞊sɔɔn yaa ‑wun ’gü ‑sü ’bhaa ‑yö ‑dho kö ‑yaan kwa ‑bha ꞊sɔɔn yaa ‑nu bho kwa ‑bha. ²⁷Pë ’ö ‑ya kwa ‑gɔ zlöö ’ö tɔɔ kö ’kwa dɔ kwa ‑de ‑wun ꞊zɔnng’ ‑ta za ’gblüünzë waa‑ ö ’piö ’siö ꞊va ’ö dho ꞊gɔü’ ’gbee‑ ‑mɛ ‑nu ’gü ꞊siö’‑ bhë ‑a ‑gɔ. ²⁸Kë‑ wo ’dhö bhë, mɛ ’ö Moizö ‑bha tɔng dɔ ’gü, kö ‑a ‑tɔmɔ ‑nu ‑wo kë ꞊plɛ ’iin ‑yaaga, ‑a zë ꞊nɛ ’wo‑ wo; ‑a ’yënng yö ‑sü gbɛ ’yaa kë ‑dhö. ²⁹Pë ‑nu ’wo bhë, ꞊wa kë ꞊nɛ ‑kɔ bhë ‑a ’dhö, kö mɛ ’ö ‑Zlan Gbö giagia sü ‑bha ‑zë, ’ö‑ fɛi ’ö ‑lo ‑dhikuëdhe ‑pë ’ka ’ö ‑Zlan ‑yö bɔ ‑a ‑ta ’ö mɛ ‑ga ’slööslö bhë, ꞊yaa‑ sü ꞊nɛ pë ’ö‑ ‑yö ‑a ‑bha ‑pë gbɛ ’yaa ’dhö ‑a ’dhö, ’ö ꞊ya ö ’dhi ‑ya ‑Zuu ’ö go ‑Zlan ’piö ’ö‑ ‑kɔ ‑së ’dhö kwa ‑ta bhë ‑a ‑bha, kö ‑a ‑mɛ bhë ’klobhɔdhe ’ö dho nu ‑a ‑ta bhë, ’ka ‑dhɛ ‑ga ‑a ’gü ‑yö ‑dho kë ‑a ‑gɔ mü ꞊dhë ꞊ɛɛ? Ka gia‑, ’ka ‑dhɛ ‑ga ‑a ’gü, yö ’ka ’dho kë ꞊gbaɔnsü mɛ ’ö bhë ‑a ‑bha ’ka a? ³⁰Bhii ‑Zlan ’ö ’wun ꞊blɛɛ ’ö‑ pö: Ma ꞊nɛ ’a dho n ‑de ‑gbɔ bho, ma ꞊nɛ ’a dho ’wun bho ’wunyaakëmɛ ‑nu ’gü bhë, kwa‑ dɔ. Yö do bhë ꞊nɛ ’ö‑ pö ’zü: Kwa Dëmɛ ‑dho ö ‑bha ’sɛgɔgümɛ ‑nu ‑bha za kan. ³¹(N dhegluzë ‑nu,) ‑Zlan ’ö ’bhee‑ bhë, ‑da ‑a kwɛɛ ‑sü ꞊suu’‑ ’ö bhë ‑yö ’wun ’gblüünzë do ’bhaa ’ka.

³²‑A ‑kë ’dhö ‑sü ’gü, kö ꞊kun ’ö ka ‑zlö ‑yö ‑trö ’wun ‑nu ’ka bɔ ‑an ’gü kö ’ka ‑da ‑Zlan ‑wo ’gü, ꞊saan’ ‑nu ’ka‑ wo kö ‑Zlan ‑bha ‑dhɛpuudhɛ ’ö bhë ’ka‑ yö, ’wun ’gbee‑ ‑nu ‑wo ‑nu ka ‑ta, ’kɛɛ ’ö ’ka to ‑a ’gbee‑ ’ka ’wun ‑nu bhë ‑an ’gü bhë ‑an ’ka; ³³kö ‑wo ’si ‑nu bho ‑na ka ‑gɔ, kö ‑wo pë ’dhiö‑ ‑nu kë ‑na ka ’ka mɛ ’kpɛkpɛ wö ’dhiö; ’ö‑ ’bhaa ‑nu ꞊ya kë, kö mɛ ‑nu ’wo pë kë ‑na ‑an ’ka ’dhö bhë kö ka ’dho ‑na ‑an ‑dhë; ³⁴’iin ’zü mɛ ‑nu ’ö ’wo ‑kanso ’gü, ka ‑da ‑na ‑an ’yënng ’gü; ka ‑bha pë ‑sɛɛbɔ ‑bho ka ‑gɔ ‑sü bhë, ka ‑we ‑a ‑bha ’gludhi ’ka. ’Ö tɔɔ ka‑ ’wun ‑dɔ ꞊nɛ pë ‑sɛɛbɔ ’gian ‑zë ‑nu ’ö ’wo dho ꞊glɔɔ ꞊toëpö ’ka ‑wo ka ‑gɔ. ³⁵꞊Ya kë ’dhö, ‑zogbansü ’ö ka ‑gɔ bhë, kö ꞊kun ’ka kun ‑a ’ka; bhii ‑a ’piö ‑pë ’ö ‑Zlan ‑ya ‑ya ka ‑gɔ ‑yö ‑dhö. ³⁶’Kɛɛ kë‑ wo ’dhö bhë, ka ‑bha ‑wun ‑yö ‑kë ꞊naazë ‑sü ‑bha kö ’kaan‑ ‑Zlan ‑zo ’kun ‑wun kë ‑yö kë ’dhö kö pë ’ö‑ ’tɔ go bhë ‑yaan ‑a nu ka ‑dhë. ³⁷’Ö tɔɔ pë ’ö ꞊bɛɛn’ ‑sü ’ka ‑Zlan ‑bha ’sëëdhɛ ’gü ‑ya ‑pö: ‑A ’töng ꞊ya ’to ’tee, ’tee giagia ’ka, kö mɛ ’ö dho nu bhë ‑yaan nu, yö ’ka ’dho lan‑ bhɔ nu ꞊dhia. ³⁸’Kɛɛ kö kë‑ wo ’dhö bhë mɛ ’ö kpengdhö n wö ’dhiö ‑yö ‑këdhösü ’ö n ’piö bhë ‑a yö ‑a ‑bha ‑zo ‑yö n ‑ma ‑sü ’gü, ’kɛɛ ꞊ya kë ꞊nɛ mɛ ꞊ya ’yɛ ö ’zü ꞊ya bhɔ ö züë ‑a ‑wun ’yi ’ka ’dho kan n ’dhii. ³⁹Kwa ’pö, ’kwaa ꞊nɛ mɛ ’ö ’wo bhɔ ‑na wo züë ’ö ’wo zian yaa ’sü ‑na bhë ‑an ’dhö. ‑Zo ‑yö ‑Zlan ‑bha ‑sü ‑yö kwa ‑gɔ; ’ö kwa dha ‑zian ‑ta.

’Wun ’ö ‑gban ‑zo ‑yö ‑Zlan ‑bha ‑sü ‑bha

¹‑Zo yö ‑Zlan ‑bha ‑sü ’ö bhë, yö ‑mü ‑më ’ka ɛ? ’Ö tɔɔ pë ‑nu ’ö ‑Zlan ‑ya ’tɔ go, ’kɛɛ ’ö waa kë ꞊kun bhë ‑a ‑dhɛ ’wun gia‑ ‑sü; ’ö tɔɔ pë ‑nu ’ö mɛ yaa‑ yö do (’kɛɛ ’ö‑ ‑wun ’dhö ‑dhö) bhë, ’yan ‑to ‑a ‑gɔ ‑sü. ²‑Zo ‑yö ‑Zlan ‑bha ‑sü bhë ꞊nɛ ’ö ‑kë ’dhiö mɛ ‑nu ‑gɔ ’ö ‑an ‑wun ’yi ‑yö ‑kan ‑Zlan ’dhii bhë.

³‑Zo ‑yö ‑Zlan ‑bha ‑sü ꞊suu’‑ ’ö ’dhö bhë ꞊nɛ ’ö‑ ‑kë ’ö ’kwa‑ ’wun dɔ ꞊nɛ ‑yö ’kpongtaadhɛ ‑pë ‑kë ö ‑wo ’ka; kö ꞊ya kë ’dhö pë ’ö kwa ’yan ’dhoë‑ ‑bha bhë ‑yö ‑go pë ’ö ’kwaa‑ yö ‑a ’gü.

⁴‑Zo ‑yö ‑Zlan ‑bha ‑sü do bhë ꞊nɛ ’ö ‑kë Abɛlö ‑gɔ ’yö sla‑ ‑nu ’ö waa‑ ö ꞊dhoo Kaɛn ’wo‑ bho bhë, ’ö‑ ‑bha ‑yö ‑Zlan ‑zo kun ’ö ‑ziö ‑a ’ka Kaɛn ‑bha ‑ta. ‑A ‑bha ‑zo ‑yö ‑Zlan ‑bha ‑sü ‑wun ’gü, ’yö ‑Zlan ‑ya yö kpengdhö, ’ö‑ ‑bha gbaɔpë ‑nu kun ꞊zuö’ ‑së ’ka. Abɛlö ’ö bhë ’kö ‑kë ꞊nɛ ꞊ya ga, ‑a ‑bha ‑zo ‑yö ‑Zlan ‑bha ‑sü bhë ‑yö ꞊tun ’wun ꞊zuan’ ’ka kwa ‑bha ’ka ꞊dɛɛ.

⁵Enɔkö ‑de ’pö, ‑a ‑bha ‑zo ‑yö ‑Zlan ‑bha ‑sü ‑wun ’gü, ‑yö ‑to ’bhee‑, ’yö dho dhang‑ ’gü ‑Zlan ’piö; ’ö pë ’wo‑ ‑dhɛ ‑ga ’ö yaa‑ dɔ. Mɛ gbɛ yaa‑ yö gbɔ. ’Kɛɛ kë‑ wo ’dhö bhë, ‑Zlan ‑bha ’sëëdhɛ ꞊bɛɛn’ ‑yan ‑ya ‑pö ‑dhɛ ’bhaa ’gü mü ꞊nɛ: ‑A kë ‑sü ’ka kö ‑yaan ’dho dhang‑ ’gü, ‑a ’ta ‑sü ‑kɔ ‑wun ’yi ‑yö ‑kan ‑Zlan ’dhii. ⁶’Ö tɔɔ mɛ gbɛ ‑wun ’yi yaa ’dhö kan ‑Zlan ’dhi ’kpaan ’ka kö ‑zo ‑yö ‑a ‑bha ‑sü ’yaa mɛ bhë ‑a ‑gɔ. ‑A ‑gɛn ꞊ga tɔɔ mɛ ’ü dho ꞊yɔɔn ‑Zlan ‑bha, ü ꞊dua’ ‑mü kö ’ü‑ ‑dhɛ ’wun gia‑ ꞊nɛ ‑Zlan ‑yö ‑dhö; ’ö ‑mɔa kö ‑yö ’wun ‑së kë mɛ ’ö‑ ꞊mɛɛ ‑a ‑dhë.

⁷‑Zo ‑yö ‑Zlan ‑bha ‑sü bhë ꞊nɛ ’ö ‑kë Noe ‑gɔ ’ö ’wun ‑nu ’ö ‑Zlan ‑ya to ’dhiö ’ö‑ ꞊blɛɛ ‑a ‑dhë bhë, ’ö‑ ‑wun ‑dhɛ ’wun gia‑ ’kɛɛ kö ‑a ’yan yaa ‑da ‑a ’gü ꞊kun. ’Yö‑ ‑wo ꞊bhlë ‑ya; ’yö ’wun bhë ’ö‑ to ’dhiö ’ö ’yitagɔ ‑pë ‑kë; ’ö ‑dhɛ ’ö ’yi ꞊ya pa, ’ö waa‑ ö ‑gɔ kɔɔmɛ ‑nu ’wo ‑da ‑a ’gü, ’wo dha. ‑A ‑bha ‑zo ‑yö ‑Zlan ‑bha ‑sü bhë ‑a ‑wun ’gü ꞊nɛ ’ö za ‑yö ‑dhi ‑a ‑bha ‑Zlan wö ’dhiö, ’ö za ‑yö ’kpongtaamɛ ‑nu kun yi bhë ‑a ’ka, ‑zo ‑yö ‑Zlan ‑bha ‑sü ’ö yaa kë ‑an ‑gɔ ꞊nɛ Noe ’dhö bhë ‑a ‑wun ’gü.

⁸Ablaamö ‑de ’pö, ‑a ‑bha ‑zo ‑yö ‑Zlan ‑bha ‑sü ‑wun ’gü ꞊nɛ, ’ö kë‑ wo ’kpa bhë, ‑a ꞊dhɔɔ ’ö ‑Zlan ‑ya ‑kë ’ö‑ bɔ ’sɛgɔ ’ö dho kë ‑to ‑a ‑bha ’në ‑nu ‑gɔ ‑pë ’ka ‑a ’gü bhë, ’ö yaa ‑kɔ ‑a ’ka. ’Yö ꞊luu ö ‑de ‑gɔ ’sɛ ’gü ’ö dho, kö ’yaa ö ’dhodhɛ ‑de dɔ. ⁹‑A ‑bha ‑zo ‑yö ‑Zlan ‑bha ‑sü ‑wun ’gü ꞊nɛ ’ö ‑kë ’sɛ ’ö ‑Zlan ꞊ya ’tɔ go ‑a ‑dhë bhë ‑a ’gü ꞊nɛ ‑nia ’dhö bhë; ’ö ’wo ꞊kaa’ ’dhö sɔ ’kɔ ‑nu ’gü mü yö ’dhö, Izaakö ’dhö waa‑ Zakɔbö ’ö wo ‑de ’pö ’ö pë ’tɔ ’go ‑wo do bhë ’ö ‑an ‑bha ’ka ’pö bhë. ¹⁰’Ö tɔɔ Ablaamö ’yan ‑yö ‑kë pödhɛ ’ö ‑Zlan yö ‑de gia‑ ’ö dho ‑a dɔ, ’ö ’yaa ’wü bhë ‑a ‑gɔ.

¹¹‑Zo ‑yö ‑Zlan ‑bha ‑sü ’ö ‑kë ‑a ‑gɔ bhë ꞊nɛ ’ö‑ ‑wun ’gü ’ö yö Ablaamö ‑mɛ, ’ö waa‑ ö bɔɔ Saala ’ö ꞊wa ziö ’në ’kpɔ ’töng ‑ta bhë ’ö ’wo ‑mɔa ‑bha ’wo ’në kpɔ. ’Ö tɔɔ kë ’ö‑ wo ’dhö bhë ‑wa ‑wun ‑dhɛ ’wun gia‑ ꞊nɛ ’wun ’kö ꞊ya ’go ‑Zlan ’dhi ꞊ya yö plaan pë ’tɔ ’go ‑wo ’ka, kö pë ’ö dho ‑a kë yö ‑mü. ¹²‑Kɔ ’ö ꞊kaa’ zlöö ’ö Ablaamö ’ö ꞊ya kë zii ‑be, ’ö‑ ’nëkpɔdhɛ ’yaa ‑dhö gbɔ bhë ’ö ’në kpɔ, ’yö ’waa ‑mɔa kö ‑wa ꞊suu’‑ ‑ta ‑dho ’kuë‑ ‑sü dɔ ꞊nɛ ‑kɔ ’ö ’susongga ‑nu ’dho ‑a ’ka dhang‑ ‑bha ’iin ’zü ꞊nɛ ‑kɔ ’ö ’yënng ga ‑nu ’dhoë‑ ’ka ’yoo ꞊bhaa ‑a ’dhö bhë.

¹³Mɛ ‑nu ’wo bhë ‑wo ‑to ‑zo ‑yö ‑Zlan ‑bha ‑sü ’gü, ‑wo ‑ga, ’kɛɛ kö pë ‑nu ’ö ‑Zlan ‑ya ’tɔ go bhë waa‑ yö; kë‑ wo ’dhö bhë ‑an ’yan ‑yö ‑da ‑an ’gü ’ö ’wo to ꞊gbiin ’wo wo ‑kɔ ꞊luu ‑an ‑dhë; ’ö tɔɔ kö ꞊waa‑ ’wun dɔ ꞊nɛ wo ‑nia ’ka, ziö ‑mɛ ‑nu ’ka ’kpong ꞊nɛ ‑a ꞊taa. ¹⁴Kë‑ wo ’dhö bhë mɛ ‑nu ’wo ’wun ꞊blɛɛ’ ‑na ’dhö bhë, ‑wa ‑zɔn gia‑ ’ka ꞊nɛ ‑wo ’sɛ ’ö dho kë wo ‑de ‑gɔ ‑sɛ ’ka ‑a ꞊mɛɛ’ ‑na. ¹⁵’Ö ꞊ya kë ꞊nɛ ’sɛ ’wo go ‑a ’gü bhë ‑wo ‑kë wo ‑zo ‑ta ‑a ’gü ꞊dhia ꞊zuötozlöödhe ’ka ‑be, kö ‑wo ‑dho yɛ wo ’zü, ’wo dho ‑a ’gü. ¹⁶’Kɛɛ kë‑ wo ’dhö bhë pë ’ö ‑kë ‑an ꞊zuö’ ’piö ’ö tɔɔ ’sɛgɔ ’ö ꞊bhlëzë ’ö ‑ziö ‑a ’ka ‑a mɛ ’wo go ‑a ’gü ‑a ‑ta bhë. Yö ꞊nɛ ’ö ‑kë ‑a mɛ ’ö dhang‑ ’gü bhë ‑a ’ka bhë. Pë ’ö ‑kë ’ö ’yaa ‑Zlan ‑bha lë‑ ‑wun ’ka kö ‑wa ‑dhɛ wo ‑bha ‑Zlan ’ö bhë ’ö bhii yö gia‑ ‑de ꞊nɛ ’ö ‑an ‑bha pö‑ dɔ ’ö ‑ya ‑sü ’ka ‑an ‑gɔ.

¹⁷Ablaamö ‑bha ‑zo ‑yö ‑Zlan ‑bha ‑sü bhë ꞊nɛ ’ö‑ ‑wun ’gü, ’yö ö gbö Izaakö ’ö ‑kë ‑a ‑gɔ ’dhö do ’kpaan bhë ’ö‑ ‑kë slabhoëpë ’ka kö ‑Zlan ꞊yaa‑ ꞊zuö’ ‑ga, kë ꞊nɛ ‑yö ö ‑wun ‑dhɛ ’wun gia‑ kö ‑yaan ꞊tɛi’ dɔ. ’Yö Ablaamö ‑ya ‑kë kö ‑yaan ö gbö bhë ‑a kë sla‑ ’ka ’kɛɛ kö ‑a gbö ’ö ’dhö bhë ꞊nɛ ’ö ‑Zlan ‑yö ’wun ‑gban ‑a ‑bha ’ö‑ ‑kë ‑a ‑dhë pë ’tɔ go ‑wo ’ka bhë. ¹⁸’Kɛɛ kö ‑Zlan ‑ya ‑pö ‑a ‑dhë ’dhiö: Izaakö bhë ꞊nɛ ’ö dho kë ü ꞊suu’‑ ‑ta ‑nu ‑go ‑a ’gü ‑mɛ ’ka. ¹⁹‑Yö ‑kë Ablaamö ’yaan ꞊nɛ ‑kɔ ‑mɔ ’wuën‑ ‑sü ‑yö ‑Zlan ‑gɔ, ’ö ‑mɔa ‑dewo ’ö mɛ ‑nu bho ga ’gü. Pë ’ö ‑kë ’ö ‑Zlan ‑yö Izaakö nu Ablaamö ‑dhë ’zü ‑dëüwo bhë ’ö bhë ꞊nɛ pë ’wo‑ pö mɛ ’ö ga bhë ꞊ya ’go ga ’gü, ꞊ya ‑wo ‑a ’dhö.

²⁰‑Zo ‑yö ‑Zlan ‑bha ‑sü do bhë ꞊nɛ ’ö ‑kë Izaakö ‑gɔ, ’yö to ’bhee‑, ’yö ’dhuë‑ kpɔ ö gbö Zakɔbö waa‑ Ezau ‑an ‑bha ’wun dho kë ‑an ’ka ‑dhɛkpaɔ ꞊dhia’ ’piö bhë ‑a ‑wun ’gü bhë. ²¹‑Zo ‑yö ‑Zlan ‑bha ‑sü do bhë ꞊nɛ ’ö ‑kë Zakɔbö ‑gɔ, ’ö‑ ‑wun ’gü ’ö Zozɛfu gbö ‑nu ’wo bhë ’ö ’dhuë‑ kpɔ ‑an ‑bha do do ’ka ‑yaan ꞊tun ga ‑na; yi bhë ‑a ’ka, ‑yö ö ‑bha ’lü ’në ‑gban ö ‑gɔ ’ö dɔ gɛnngdhö ö ‑gɛn ‑ta ’ö ‑Zlan gba.

²²‑Zo ‑yö ‑Zlan ‑bha ‑sü bhë ꞊nɛ ’ö ‑kë Zozɛfu ‑gɔ ’ö ꞊dhɛ ’ö ’dhoë‑ ga, ’ö ’töng ’ö Izlaɛlö ‑mɛ ‑nu dho go ‑a ’ka Ezitö ‑sɛ ’gü bhë ’ö‑ to ’dhiö ’ö ’wun ‑gban ‑a ‑bha ’ö‑ ꞊blɛɛ; ’ö ’wun ‑gban ‑kɔ ’wo dho ö ꞊glöö ga ’lü ‑nu kaa ‑nu ’ö‑ ’plɛ ꞊blɛɛ ‑an ‑dhë.

²³‑Zo ‑yö ‑Zlan ‑bha ‑sü bhë ’ö ‑kë Moizö ’kpɔmɛ ‑nu ‑gɔ ’ö ’wo‑ ’blë ꞊biin bin ’su ‑yaaga ’piö kö ꞊kun ’ö ’wo dho ‑a zë (꞊nɛ ‑kɔ ’ö Ezitö ‑gludë ‑ya pö ‑wa kaa Zuifö ’ka ’kpa bhë ‑a ’dhö); ’kɛɛ kë‑ wo ’dhö bhë, waa ’suö ‑gludë ’ö bhë ‑a ‑dhë kö ‑wa ‑wo ꞊bhlë ‑ya ꞊nɛ ‑kɔ ’ö‑ pöë bhë ‑a ’dhö ’në bhë ‑a ‑bha ‑kë ‑së ‑sü ‑wun ’gü.

²⁴‑Zo ‑yö ‑Zlan ‑bha ‑sü bhë ꞊nɛ ’ö ‑kë Moizö ‑gɔ; ’yö ꞊dhɛ ’ö ꞊ya kë ꞊va, ’ö yaa ’we ‑a ‑bha gbɔ kö ‑wo ö ‑dhɛ Falaɔn ’dhu ‑bha ’në. ²⁵’Ö‑ ‑dhɔ ‑kë kö waa‑ ‑Zlan ‑bha ’sɛgɔgümɛ ‑nu wo ’klo ‑yö bhɔ ’ö ꞊zië’ ‑kë ‑Zlan ’ka ꞊gbiin ‑sü ’ö ’wo ‑kë wo ‑de ꞊dhɔɔbhaapë ‑nu ’ö dho ziö bhë ‑a ’gü ‑sü ‑ta. ²⁶’Yö lë‑ ‑kpɔ ‑a ‑ta ‑sü ꞊nɛ ‑kɔ ’ö ꞊kaa’ Klito ’ka ‑a ’dhö bhë, ’ö‑ yö ’gianzë ’ö ‑ziö ‑a ’ka ꞊bhɔɔpë ‑nu ’wo Ezitö bhë ‑an ‑ta. Kë‑ wo ’dhö bhë ’ö tɔɔ kö ‑a ’yan ‑yö pë ’ö dho kë ‑a ꞊saan’ ’ka ’dhiö ꞊zian’ ‑Zlan ’piö bhë ‑a ‑bha.

²⁷‑Zo ‑yö ‑Zlan ‑bha ‑sü bhë ꞊nɛ ’ö ‑kë Moizö ‑gɔ ’ö yaa ’suö Ezitö ‑gludë ‑dhë; ’ö to ö ‑wo ‑ta ’ö go pödhɛ bhë ‑a ’gü ꞊nɛ pë ’wo‑ pö ‑Zlan ’ö mɛ gbɛ ’yaa‑ yö bhë, ‑ya ’yan ’dhiö ‑a ’dhö. ²⁸‑Zo ‑yö ‑Zlan ‑bha ‑sü ’ö ‑kë ‑a ‑gɔ bhë ꞊nɛ ’ö‑ ‑wun ’gü ’ö tɔng dɔ Izlaɛlö ‑mɛ ‑nu ‑dhë kö ‑wo Paakö ’wlaan‑ kë; ’ö ’go mü ’ö‑ pö ‑an ‑dhë ’bhlanë ‑nu ’wo dho ‑an zë bhë, ‑wo ‑an fɛi kë kpong ‑nu ‑bha ꞊kun ‑kë ’ö ‑Zlan ‑bha bɔmɛ ’ö dho nu pë ’gü ꞊siö’ ꞊dhia bhë ’ö dho ‑da Izlaɛlö ‑mɛ ‑nu ‑gɔ kɔɔ ‑yaan ’në gɔɔn‑ ’saadhö ’ö dhe ‑bha ’në ‑blɛɛzë ’ka ‑a zë. (‑Kɔ ’ö ꞊kaa’ zlöö ’ö Paakö ’wlaan‑ ‑yö ꞊daa’ ’ö bhë.)

²⁹‑Zo ‑yö ‑Zlan ‑bha ‑sü ꞊nɛ ’ö ‑kë Izlaɛlö ‑mɛ ‑nu ‑gɔ ’ö‑ ‑wun ’gü, ’ö ’Yoo nuɛazë ‑yö ‑kan ’kuë‑ ’ö ’wo‑ ‑kan ꞊nɛ pë ’wo‑ pö ‑dhɛ ’kpɛa ‑dhɛ ‑mü ‑a ’dhö bhë, ’kɛɛ kö ꞊dhɛ ’ö Ezitö ‑mɛ ‑nu ‑wo yö mü ’ö ‑an ’plɛ ‑wo to yiö.

³⁰‑Zo ‑yö ‑Zlan ‑bha ‑sü ’ö ‑kë Izlaɛlö ‑mɛ ‑nu ‑gɔ bhë ꞊nɛ ’ö‑ ‑kë ’ö ꞊dhɛ ’ö ꞊wa ꞊nië’ Zeliko ‑pö ‑zü ’to ‑dhɛkpaɔyi ’slaplɛ ’piö ’ö‑ böü‑ ’kplong ’ö‑ ‑zü ’to bhë, ’ö ‑lo. ³¹‑Zo ‑yö ‑Zlan ‑bha ‑sü ’ö ‑kë Laabö ’ö ‑kë ꞊sɔɔnkëdhe ’ka ‑a ‑gɔ bhë ꞊nɛ ’ö‑ ‑wun ’gü ’ö mɛ ‑nu ’ö waa ’wun ma ‑Zlan ‑ta bhë ’ö wo ‑nu waa ga bhë ’ö tɔɔ ‑glunaɔkëmɛ ‑nu ’wo go Izlaɛlö ‑mɛ ‑nu ziën ’töng bhë ‑a ’ka bhë, ‑yö ‑an ‑nia ‑kun ‑së ’ka Zeliko plöö.

³²’Wun ‑yö n ‑gɔ ꞊va kö ’aan‑ ꞊blɛɛ’ ’wun ꞊zuan’ ’ka ’wun ’ö ‑gban ‑zo ‑yö ‑Zlan ‑bha ‑sü ‑bha ‑a ‑bha; ‑a kë ꞊yië’ ’aan‑ bɔ Zedeɔn ‑bha ’gü, ’aan‑ bɔ Balakö ’dhö, Sansɔn ’dhö, Zɛfüte ’dhö, Davidö ’dhö, Samiɛlö waa‑ ‑Zlan ‑wodhiölomɛ ‑nu ’wo to ‑an ‑bha ꞊blɛɛ’‑, kö ’kwa ’dho ꞊gbiin. ³³’Kɛɛ ‑yö kë kwa ’yaan poo ꞊nɛ ‑zo ‑yö ‑Zlan ‑bha ‑sü ’ö ‑kë ‑an ‑gɔ bhë ꞊nɛ ’ö‑ ‑kë ’ö ’wo to ‑a ’gbee‑ ’ka ‑gludë ‑nu ‑ta ’sɛgɔ ‑nu ’gü, ’ö ’wun kpengdhö kë ‑sü ‑yö ‑kë ‑an ꞊zuö’ ’gü; ’ö‑ ‑wun ’gü ’ö pë ’ö ‑Zlan ‑ya ’tɔ go ‑an ‑dhë bhë, ’wo‑ yö. ‑Zo ‑yö ‑Zlan ‑bha ‑sü do bhë ꞊nɛ ’ö ‑kɔ ‑mɔ ’wuën‑ ‑sü nu ‑an ‑dhë ’ö ’wo ꞊laa’ ‑nu ’dhi yö ‑a ’ka ’kuë‑, ³⁴’ö ’wo ’siö ꞊vava ‑nu ꞊dhuu ‑an ’ka, ’ö ’wo dha ‑ga ‑dhaa ꞊kwaa’ ‑sü ‑gɔ. ꞊Faan’ yaa kë ‑an ‑gɔ ’kɛɛ ‑wo ‑kë ꞊faan’ ‑zë (wo ‑bha ‑zo ‑yö ‑Zlan ‑bha ‑sü ‑wun ’gü). ‑Wo ‑kë ’gbee‑ ‑glu ‑nu ’gü ’ö ’wo to ‑a ’gbee‑ ’ka ‑glugɔnmɛ ‑nu ’wo go ’sɛ gbɛ ’gü ‑an ‑ta. ³⁵‑Zo ‑yö ‑Zlan ‑bha ‑sü bhë ꞊nɛ ’ö ‑kë dhoo ‑nu ’bhaa ‑nu ‑gɔ ’kpa, ’ö ‑an ‑mɛ ‑nu ’wo ga, ’wo go ga ’gü ‑an ‑dhë.

‑Wo mɛ ’bhaa ‑nu ‑kun, ’wo ‑an zë ‑kë wo ’kɛɛ ’ö waa ’we ‑a ‑bha gbɔ kö ’wo ’go ’gan ’gü, ‑yö kë ’dhö kö ‑waan ’go ga ’gü ‑këdhösü ’gianzë ‑bha ’ka. ³⁶’Wun do bhë ‑a ‑wun ’gü ꞊nɛ ’ö ’wo ’yee to mɛ ’bhaa ‑nu ‑bha, ’ö ’wo ‑an ’bhaa ‑nu ‑ma, ’wo ꞊yɔɔ’ yö ‑an ‑bha, ’ö ’wo ‑an ‑zuö ‑kanso ’gü, ³⁷kö ‑wo ‑an mɛ ’bhaa ‑nu ꞊zëë ’zë ‑na ‑guö ’ka, ‑wo ’to ‑na ‑a ꞊kwaa’ kö ‑wa mɛ ’bhaa ‑nu ’klu ’kan ‑na ’sii‑ ’ka ’iin kö ‑wo ‑an ‑gɔ ’kan ‑na ‑dhaa ’ka; ‑wo ‑kë ’fɛɛzë; ‑an ‑ya ‑dhɛ kpinngdhö yaa kë ‑dhö; ‑wo ’bhla kwi ‑nu ’iin ‑bho kwi ‑nu ‑da wo ‑bha ꞊nɛ sɔ ’dhö; kö ‑an ’klo bhɔ ‑na. ³⁸Mɛ ‑nu ’ka‑ ‑ga ‑na bhë, ‑wo ‑kë ’dhö ’yënng ꞊taa ‑dhɛ ‑nu ‑bha, ‑tɔn ’piö ‑dhɛ ‑nu ‑bha, ‑guö ꞊duu’ ‑dhɛ ‑nu waa‑ ’sɛi ‑dhɛ ‑nu ‑bha ’dhö, ’kɛɛ a‑ ‑pö ka ‑dhë ‑wo ꞊va ’ö‑ ‑de ’yaa ’kpongtaamɛ ‑nu ‑ma ’kun poo kö ‑wo kë ‑an ziën.

³⁹’Kɛɛ mɛ ’ö ’wo bhë ’saadhö, ‑an ‑bha ‑zo ‑yö ‑Zlan ‑bha ‑sü ‑wun ’gü, ‑an ‑wun ’yi ‑yö ‑kan ‑Zlan ’dhi, ’kɛɛ kö pë ’ö ‑Zlan ‑ya ’tɔ go bhë, waa‑ yö. ⁴⁰Bhii ‑Zlan ‑yö pë ’gianzë ‑ya kwa ‑gɔ. Pë ’ö ‑kë ‑an ‑bha dhasü yaa ‑da kwa ’dhiö bhë ’ö bhë, ‑yö kë ’dhö kö dhasü ’ö ‑dhö bhë ’kwaan‑ yö kwa ’kuë.

’Wun ’ö ‑gban mɛ ’kwa‑ ‑dhɛ kwa Dë ‑a ‑bha kwa ’kun ‑kɔ ‑bha

¹‑A ‑kë ’dhö ‑sü ’gü, ꞊dhɛ ‑kë ꞊nɛ ‑Zlan ‑bha mɛ ‑nu ’wo bhë ‑an ‑gbaa ꞊va ‑wo kwa ‑zü ’to ꞊va, ’ö ‑an ’yan ’dhö kwa ‑bha bhë, kö ‑kwa kwa ꞊kwaa’ pë ’saadhö ’ö ꞊nɛ ꞊kwɛɛ‑ ’dhö, kwa ‑bha ‑ta ‑sü ‑Zlan ‑bha zian ‑ta ‑sü ’gbloo ’piö ‑a ‑bha; kö ’wun yaa ’ö ‑ziö kwa ‑gɔ ‑dhɛ ’yaa ’gbee‑ bhë, ’kwa ’kan ‑a ‑bha kö ‑bla ’ö kwa ‑gɔ bhë, ’kwa‑ ’sü ö ’sü ‑kɔ ’ka. ²Yesu ’ö kwa ‑bha ‑zo ‑yö ‑Zlan ‑bha ‑sü bhë ‑a ‑gbaan ’ö yö ꞊nɛ ’ö dho ‑a ’ka ‑a ’gü ‑pë kë ‑sü ‑bha ‑a ’ka bhë, ‑kwa kwa ’yan kë ‑a ‑bha. ’Ö tɔɔ yö ’ö bhë ꞊nɛ ’ö ‑we ‑a ‑bha kö ‑wo ö zë ‑a ‑dɔ ‑gaatalü ‑bha ‑sü ’ka; ’ö‑ lë‑ ꞊suu’‑ bhë yaa‑ kë, ꞊zuögludhi ꞊va ’ö ‑kë ‑ya ‑sü ’ka‑ ‑gɔ bhë ‑a ‑wun ’gü. ’Yö dɔ ’kwa‑ wo ꞊dɛɛ ꞊nɛ, ’yö ‑ya ‑sü ’ka ‑yadhɛ ꞊bhlëzë ’ö ‑Zlan ‑bha ‑gludëdhɛ ‑gbloo ’gü, ‑Zlan ꞊kwɛɛ‑ ’gü dhang‑ ’gü bhë ‑a ’gü.

³꞊Ya kë ’dhö, kö ꞊kun ’ö ka ‑zlö ‑yö ‑trö, ’ö ka ’gü ‑yö ga ’yan ‑to ‑a ‑gɔ ‑sü ’ka ’ö ka ꞊faan’ ‑yö yën ’ta ‑sü ‑Zlan ‑bha zian ‑ta ‑sü ’ka; ’ö tɔɔ yö ’ö bhë, këpëyaamɛ ‑nu ‑wo ’wun ꞊suu’‑ ’saadhö ’ö ‑dhö ‑a ꞊kaa’, ’yö bɔ ‑a ’gü; ⁴bhii ‑yö ’dhö ’püë‑ wo, ‑ka ka ‑de ‑ta ꞊kɔɔ’‑, ꞊kun ‑kë ’ö ꞊sɔɔn yaa ‑dho ‑da ka ‑bha ‑tosiadhe ’gü ’kɛɛ ’ko ’ka dho ‑a zë, ‑yaan kë ka ‑gɔ ‑to ‑a ’gü ‑ko ’ka, kaa‑ zë do. ⁵Mɛ ꞊faan’ ’më ‑wo ‑nu ’ö ‑Zlan ‑ya ꞊blɛɛ ka ‑dhë ꞊nɛ mɛ pë ꞊blɛɛ ’në ‑nu ‑dhë bhë kö ꞊kun ’ö ka ‑zlö ‑yö ‑trö ‑an ’ka; ’ö bhii ‑ya pö: N gbö, kö ꞊kun ’ü Dëmɛ ‑bha mɛ ‑kun ’gbee‑ ‑sü ‑san ‑zë; kö ꞊kun ’ö ‑we ü ‑dhë ü ꞊dɔɔ’ ‑sü ’ka ’ö ’ü ü ‑kɔ dho sia‑. ⁶Bhii mɛ ’ö Dëmɛ ‑ya ‑dhɔ ‑kë ꞊nɛ ’ö‑ kun ’gbee‑, ’ö mɛ ’ö‑ dɔ ꞊nɛ ö gbö ‑mü bhë ꞊nɛ ’ö‑ ’klo bhɔ. ⁷’Wun ‑nu ’wo wɔ ‑na ka ‑ta bhë ‑ka bɔ ‑an ’gü ꞊nɛ ꞊dhɛ ’ö mɛ dë ‑yö mɛ ꞊dɔɔ ‑a ‑bha ‑a ’dhö. ‑A ‑de ’wun ‑nu ’wo bhë ‑wa ‑zɔn ꞊nɛ ‑Zlan ‑yö ka ‑sü ꞊nɛ ö gbö ‑nu ’dhö. ‑A ‑ga gia‑ ’ka‑ wo bhë, ’ka ’në dë yö kö ’yaa ’we ö gbö ‑dhë ’iin ’yaa ö gbö ‑ma ‑a? ⁸’Kɛɛ ‑yö kë ka ’yaan ꞊nɛ ꞊ya kë ꞊nɛ ‑Zlan ‑bha ka ꞊dɔɔ’ ‑sü ’yaa ’dhö, kö ’kaa‑ gbö ‑nu giagia ’ka. ⁹Kwa gia‑ ‑kwa ‑dhɛ ‑ga bhë ’dhɛ! Kwa dë ‑nu ’wo ’kpongtaa zö bhë, ꞊ya kë ‑wo ’wun ‑wɔ kwa ‑ta kwa ’nëdhɛ ’gü kö ’kwaan‑ ’wun ma ‑an ‑ta. Kö kwa Dë ’ö dhang‑ ’gü bhë, ‑gɔ ‑yɔɔ ‑a ‑dhë ‑sü ꞊suu’‑ ‑mlë ’ö dho kë kwa ‑gɔ kö ‑këdhösü ‑yaan kë kwa ‑gɔ bhë ꞊ɛɛ! ¹⁰Kë‑ wo bhë kwa dë ‑nu ’wo ’kpongtaa zö bhë ꞊wa kë, ‑wo ’wun ‑wɔ kwa ‑ta pë ’ö ‑an ’yan ’dhiö kpengdhö ’kpongtaa zö ’töng kpö ’bhle ’ka ‑a ‑wun ’gü. ’Kɛɛ ‑Zlan ‑bha ’ka, ꞊ya ’wun wɔ kwa ‑ta, kö ‑ya ‑kë ’dhö kwa ‑wun ’gü (kwa ‑bha ’wun ‑së ’ka ꞊toëpö ’ka), kö ’kwaan‑ ‑kë ’slööslö ’pö ꞊nɛ ö ’dhö. ¹¹’Yö ’wun ꞊ya wɔ kwa ‑ta, ’ö ‑kë kwa ’gü ‑a ’töng bhë ‑a ’ka ꞊nɛ ꞊zuö’ ‑kaan ’kuë ‑wun ’dhö ’ö ’yaa kë kwa ‑bha ꞊zuögludhi ‑wun ’ka. ’Kɛɛ kë‑ wo ’dhö bhë, mɛ ‑nu ’ö ꞊wa bɔ ’klobhɔdhe ’gü ꞊va, ‑a ’piö ‑pë bhë, ‑wa ‑kun ’yee ’ka. ‑A ’piö ‑pë ’ö ’dhö bhë ’ö tɔɔ ꞊zuöyagluu waa‑ ‑këdhösü ’ö kpengdhö.

’Wun ’ö ‑gban ‑zobüödhewo ‑nu ‑bha

¹²꞊Dhɛ ’ö ’dhö, ka ‑kɔ ‑nu ’ö ‑an ’gü ꞊ya ga bhë, ‑ka ‑an ꞊luu’, ’ka ka kpɔngɔ ‑nu ’ö ꞊wa kë ’dhiö bhë ‑an gba ꞊faan’ ’ka. ¹³‑Ka ’dho ka ‑bha ‑ta zian ’ö kpengdhö ‑a ‑ta ‑sü ’ka ’dhiö kö ꞊kun ’ö ka ‑gɛn mɛ ’ö ‑ziö ’kluë‑ ‑sü ’ka ’ö dho ka kë ’kɛɛ kö ‑yö bo ꞊zian’.

¹⁴‑Kaa këdhɛ ꞊mɛɛ’‑ kö ꞊zuöyagluu ‑yö kë ka ‑gɔ mɛ ’plɛ buëndhö ’iin kö ka wɔ ‑kɔ ‑yö kë ’slööslö, ’ö tɔɔ mɛ ’ö‑ wɔ ‑kɔ ’yaa ’slööslö yaa ’dhö ö ’yan dɔ kwa Dëmɛ ‑bha. ¹⁵‑Kaa kë ’slë ’ka ꞊kun ‑kë ’ö mɛ gbɛ ‑yö ö ‑ta yö ‑Zlan ‑bha ’glusë bhë ‑a ‑bha. ‑Ka kë ’slë ’ka kö ꞊kun ’ö mɛ gbɛ ‑yö ‑kë ꞊nɛ ’blü ’dhɛ ’yi ’güüzësüzë ’dhö ’ö pë yaa ‑kë mɛ ꞊plëëzë ’ka ö ‑bha mɛ zë ‑pë ’ka. ¹⁶‑Ka kë ’slë ’ka kö ꞊kun ’ö mɛ gbɛ ‑yö ‑kë ’wun ‑yö yaansüzë kë ‑mɛ ’ka ’iin ’ö pë ‑nu ’wo ‑ya ‑sü ’ka ‑de ‑ta bhë ’ö ’yaa ‑an ꞊bhlë ‑ya ꞊nɛ Ezai ’dhö; ’ö tɔɔ yö bhë ꞊nɛ ’ö ’dhuë‑ ’ö ‑an dë dhoë‑ kpɔ ‑a ‑bha ‑bezë ‑a ‑bha ‑kë mɛ ꞊va ’ka ‑sü ‑wun ’gü bhë, ’ö‑ ‑wun ‑zuö ö ‑kɔ ꞊taa ‑bhöpë do ’kpaan ‑wun ’gü zlöö. ¹⁷Ka gia‑ ’wun bhë, ka‑ ’dhiö ’to ‑kɔ ‑dɔ! Yö bhë ꞊nɛ ’ö yi do ’ka zlöö ’ö‑ këdhɛ ꞊mɛɛ kö ö dë ‑yaan ’dhuë‑ ’kpɔ ö ‑bha; ’ö‑ dë yaa ’we ‑a ‑bha ‑a ‑gɔ; ’ö tɔɔ ’slë ’kpaan gbɛ yaa kë ‑dhö gbɔ kö pë ’ö‑ ‑kë ’dhiö bhë ‑yaan ‑a ꞊dhië’ ‑kwaa ö ‑bha; ’kö ‑kë ꞊nɛ ‑yö ’gbo bɔ ’dhee.

¹⁸’Wun ’ö ‑gban ‑yɔɔn ‑Zlan ‑bha ‑sü ‑bha ’ö kwa ‑gɔ ’iin ’ö Zuifö ‑nu ’piö bhë, ‑kwa ‑dhɛ ‑ga ‑a ’gü ’kwee‑! Ka ’ö ’ka bhë yaa kë ꞊nɛ ‑tɔn ’ö mɛ ‑kɔ ‑mɔa ‑yö ’pa ‑a ’ka bhë ꞊nɛ ’ö ’ka ꞊yɔɔn ‑a ‑bha ꞊nɛ ‑kɔ ’ö Izlaɛlö ‑mɛ ‑nu ‑wa ꞊kaa’ ’kpa bhë ‑a ’dhö; ’ö tɔɔ kë‑ wo bhë, ‑wo ‑kë ‑tɔn do ’wo‑ ’tɔ kpɔ Sinai ’ka bhë ‑a ’sɔɔ; yö ꞊nɛ ’ö‑ ‑bha ’siö ‑ziizë ’dhö, ‑dhɛtiidhɛ ‑nu waa‑ ’buu ꞊va ‑wo ‑kë ‑dhö ’kpa. ¹⁹Yö do bhë ꞊nɛ ’ö‑ ‑bha ’truu ‑piö ‑wo waa‑ pë ’wun ꞊blɛɛ’ ‑wo ‑yö ‑kë ‑dhö. ’Yö ‑dhɛ ’ö Izlaɛlö ‑mɛ ‑nu ‑wo ‑wo bhë ‑a ma, ’wo‑ pö kö ꞊kun ’ö ‑wo ’bhaa ‑zuöatadhe ‑yö ‑kë ‑dhö ’zü. ²⁰Bhii ‑wo bhë ‑yö tɔng dɔ ‑wo do ’ö ‑kë ‑an ‑dhë ‑ziizë ‑a ’ka; ’ö tɔng dɔ ꞊woë’ ꞊nɛ: ’Të ‑pë ’ö ’dhoë‑ pa ‑tɔn bhë ‑a ’ka, yö wü ’piö oo, ‑yö mɛ ’piö oo, ‑wo ‑dho ‑a ‑zuö ‑guö ’ka ’ö to ‑a ꞊kwaa’. ²¹’Wun bhë ‑yö ‑kë ‑ziizë ꞊va yaazë ’ka. ‑A ‑de ‑a ‑wun ’gü Moizö ‑ya ‑pö: «A ꞊zluun ‑na ’siö ꞊va ’ö ‑kan n ’gluu bhë ‑a ꞊kwaa’.»

²²’Kɛɛ ka ‑zë Siɔn ‑tɔn waa‑ ‑Zlan ’ö ’bhee‑ ’ö dhang‑ ’gü bhë ‑a ‑bha pödhɛ ’ö waa‑ ö ‑bha bɔmɛ ‑vuu ꞊plëëzë ‑nu ’wo ‑ya ‑sü ’ka ‑a ‑bha, ’wo‑ ‑dhɛ Zeluzalɛmë ‑dhɛ mɛ ’ö dhang‑ ’gü bhë ꞊nɛ ’ö ’ka ꞊yɔɔn ‑a ‑bha bhë. ²³‑Zlan ‑bha mɛ ‑nu kpö ‑blɛɛzë ’ö ꞊zuögludhi ’dhö ‑an ‑gɔ, ’ö ‑an ’tɔ ’dhö ‑ya ‑sü ’ka dhang‑ ’gü bhë, ꞊yɔɔn ꞊nɛ ’ka‑ wo ‑an ‑bha bhë. ‑Zlan ’ö zakanmɛ ’ka, mɛ ’plɛ waa‑ mɛ ‑nu ’wo ‑kë kpengdhö ’kpongtaa zö ’ö ꞊wa ‑da ‑dhɛ ’slööslö ‑dhɛ ’ö ’wun ’yaa mɛ ‑bha ‑a ’gü ‑an ‑ta bhë, yö ꞊nɛ ’ö ’ka ꞊yɔɔn ‑a ‑bha bhë. ²⁴Yesu ’ö ‑dhikuëdhe ‑dëü ’ö kwaa‑ ‑Zlan ‑nu kwa ziën ‑a song ’ka waa‑ ‑a fɛi ’ö ’wun ꞊blɛɛ’ ‑na ‑kɔ ‑së ’gü ’ö ‑ziö ‑a ’ka ‑kɔ ’ö Abɛlö ‑bha ’dhoë‑ kë ‑naa ’ka bhë ‑a ‑ta bhë, yö ꞊nɛ ’ö ’ka ꞊yɔɔn ‑a ‑bha bhë.

²⁵꞊Ya kë ’dhö kö ‑ka kë ’slë ’ka! Kö ꞊kun mɛ ’ö ’wun ꞊blɛɛ’ ‑na ka ‑dhë bhë, ’ka ‑kɔ ‑a ‑wo ’ka! Mɛ ’ö ‑kë mɛ ‑nu ’paan bho ꞊dhia ’kpongtaa zö ’wun ‑nu ’wo ‑gban ‑Zlan ‑bha ‑a ‑wun ’ka bhë, mɛ ‑nu ’wo ‑kɔ wo ’to ‑to ‑a ‑bha ‑sü ’ka bhë, waa dha ’klobhɔdhe ‑gɔ. Pë ‑nu ’wo ’kpongtaa zö, ‑an ‑bha ꞊ya kë ꞊nɛ ‑kɔ bhë ‑a ’dhö, kö mɛ ’ö ‑ya ‑sü ’ka dhang‑ ’gü dhuö ’ma bhë, ‑më dho kë kwa ’ka kö ’kwa kwa ‑ta yö ‑a ‑bha ‑ɛ? ²⁶Kë‑ wo ’kpa bhë ‑a ‑wo ‑ya ‑kë ’ö ’sɛ ‑yö ꞊zluun. ’Kɛɛ dɔ ’kwa‑ wo ꞊nɛ pë ’tɔ ’go ‑wo ’ö‑ ‑kë kwa ‑dhë ’ö tɔɔ: A ‑dho ‑a ’bhaa kë ’zü ‑dëüwo; ’sɛ ‑dho ꞊zluun ’dhö ’kɛɛ dhang‑ ‑dho ꞊zluun ’pö. ²⁷‑Wo kpö ’ö ‑kë «’zü ‑dëüwo» ’ka bhë ‑ya ‑zɔn ꞊nɛ pë ‑nu ’wo ‑kë ’ö ’wo ‑da bhë ‑wo ‑dho vin ’ö ‑an ’plɛ ’gü ‑yö ‑siö kö ‑a mɛ ’ö ’yaa vinpë ’ka ‑yaan kë ‑dhö.

²⁸꞊Dhɛ ’ö ’dhö, (n dhegluzë ‑nu,) ꞊dhɛ kë ꞊nɛ ‑Zlan ꞊ya kwa ‑ya ‑gludëdhɛ ’ö ’yaa vin ‑a ’gü ‑a këmɛ ’ka bhë, kö ‑yö ’to kwa ’yaan, kö yuö kë ‑kɔ ’kwa ‑dho ‑a kaa kö ‑yaan dhi ‑a ‑dhë bhë ’kwaan‑ kaa, ‑a ꞊bhlë ‑ya ‑sü waa‑ ‑suö ‑a ‑dhë ‑sü ’ka. ²⁹Bhii kwa ‑bha ‑Zlan ’ö bhë, ‑yö ‑kë ꞊nɛ ’siö ’dhö, ’ö ꞊ya kë ’ö pë ‑nu ’gü ꞊siö.

Kë ‑kɔ ’ö ‑Zlan ‑dhë ‑së

¹(N dhegluzë ‑nu,) kö ꞊kun ’ka ka bo ka ’ko ‑nu ‑dhɔ kë ‑sü ’ka Klito ’gü, ka ‑bha ‑kë dhegluzë ‑nu ’ka ‑sü ‑wun ’gü! ²Kö ꞊kun ’ö ka ‑zlö ‑yö ‑trö ‑nia ‑nu ’wo nu ‑na ka ‑ta bhë ‑an ‑kun ‑së ‑sü ’ka; ’ö tɔɔ mɛ ’bhaa ‑nu ‑wo ‑Zlan ‑bha bɔmɛ ‑nu ‑nia ‑kun wo ‑gɔ kɔɔ, ’kɛɛ waa‑ ꞊tɛi’ dɔ ꞊nɛ ‑Zlan ‑bha bɔmɛ ‑nu ‑mü. ³Ka ‑zo ‑yö ‑büö mɛ ‑nu ’wo ‑kanso ’gü bhë ‑an ’ka ꞊nɛ ‑dhɛ ’wo‑ pö ‑a ‑bha ka ‑nu ꞊nɛ ka ‑kanso ’gü ‑a ’dhö. Mɛ ‑nu ’wo ‑an ’klo bho ‑na, ka ‑zo ‑yö ‑büö ‑an ’ka ꞊nɛ ‑dhɛ ’wo‑ pö ‑a ‑bha ka ‑nu ꞊nɛ ’ö ’klobhɔdhe do bhë ’ka‑ ’gü ‑a ’dhö.

⁴Dhe waa‑ ö ꞊gɔn ‑an ‑bha ‑kë ’ko ’piö ‑sü bhë, ‑yö kë pë ’ö mɛ ’plɛ ‑wa ꞊bhlë ‑ya ‑a ’ka; kö ꞊kun ’ö dhebɔ ‑yö ö ꞊gɔn to ’ö ꞊nië ’iin ö gɔɔn‑ ‑yö ö bɔɔ to ’ö ꞊nië. ’Ö tɔɔ ‑yö dhe ’piö o, ‑yö gɔɔn‑ ’piö o, ‑Zlan ‑bha za ‑yö ‑dho ꞊sɔɔnkëmɛ ‑nu kun.

⁵Kö ꞊kun ’ö ’ka ka ꞊kwaa‑ ka ‑de ‑zü ’ö ’wëüga ‑dhɔ ‑yö ‑ziö ka ’gü ka ’ta ’sü ‑kɔ ‑nu ’gü. Pë ‑nu ’wo ka ‑gɔ ‑wo ka ‑zo ’kun bhii ‑Zlan ‑ya ‑pö: N ‑zlö ’ka ’dho trö ü ‑wun ’ka, n ’ka ’dho kan ü ‑bha ’gbɛɛdhö. ⁶꞊Ya kë ’dhö kö kwa ‑mɔa ’kwa kwa ‑zo yö ‑Zlan ‑bha ‑a pö ‑sü ’ka ꞊nɛ: Kwa Dëmɛ bhë ꞊nɛ ’ö tɔɔ ‑nu n ‑dhë ‑mɛ; ’suö ’ka ’dho n kë. ꞊Ya kë ’dhö kö ‑më ’kpaan ’ö mɛbheedhe dhoë‑ kë n ’ka ɛ?

⁷‑Yö ka ‑gɔ ’dhiö mɛ zii ‑nu ’wo ‑Zlan ‑wo ꞊blɛɛ ka ‑dhë bhë, ka ‑zo ‑yö ‑büö ‑an ’ka. ‑Kɔ ’ö ‑an ‑bha ‑tosiadhe ’gü ’kpongtaa zö ’ö ‑an wɔ ‑kɔ ‑yö ꞊kaa’ ’iin ’ö ’wo ga bhë, ‑ka ka ‑zo ’ta ‑a ’gü kö ‑an ‑bha ‑zo ‑yö ‑Zlan ‑bha ‑kɔ ’ö bhë ’ka‑ ’sü ’pö ’dhɛ! ⁸’Ö tɔɔ Yesu Klito bhë, ‑kɔ do ’ö ꞊kaa’ ’kpa bhë, ’ö‑ ’ka ꞊dɛɛ, ’ö dho toë ’dhö ‑kplawo. ⁹Kö ꞊kun ’ö ’ka ka ꞊kwaa‑ mɛ ‑nu ‑zü ’ö ’wo nu ka ‑püö ꞊dhia ‑Zlan gba ‑kɔ ꞊suu’‑ ‑de dhe ‑zë ‑nu ’vlanvlan ’ka. ꞊Yö ‑së kö ‑Zlan ‑bha ’glusë ‑yö kwa ‑zo ‑gban; bhii yaa ’dhö kë tɔng dɔ ‑wo ‑nu ’wo ‑gban ‑bhöpë ‑nu ‑bha ‑an ’ka. Mɛ ‑nu ’wo wo ‑de nu ‑na ’wun ‑nu ꞊suu’‑ bhë ‑an ‑dhë bhë, waa pë gbɛ yö ‑a ’gü do.

¹⁰Kë‑ wo bhë, slabhomɛ ‑nu ’wo ’dho ‑na Zuifö ‑nu ‑bha ‑Zlan ‑gba ‑a ’gü ‑kɔ ’gü, ’ö ’wo sla‑ bho ‑na sla‑ ‑bho ‑a ‑ta ‑pë ‑ta bhë, pë ‑nu ’wo ’go ‑na kwa ‑bha sla‑ ‑bho ‑a ‑ta ‑pë ‑ta bhë ‑an ꞊dua’ ’yaa ‑mü kö ‑wa ‑bhö. ¹¹’Ö bhii ꞊ya kë ’kpa, ‑an ‑bha slabhomɛ ꞊va ‑yö wü ‑nu ’wo bhë ‑an fɛi ‑sü ’ö dho ‑a ’ka ‑dhɛ ’slööslö ‑dhɛ ꞊duö ‑bha, ’yö‑ ‑kë sla‑ ’ka mɛ ‑nu ‑bha ꞊sɔɔn yaa ‑nu ‑bho ‑an ‑bha ‑sü ’ka. ’Kɛɛ kë‑ wo ’dhö bhë, wü ‑nu ’wo bhë, ‑wo ‑an ‑güö wo ‑bha pö‑ ꞊taa ‑bha. ¹²Pë ’ö ‑kë ’ö Yesu ‑bha ga ‑sü bhë ’ö ‑kë pö‑ ꞊taa bhë ’ö bhë ‑yö kë ’dhö kö ‑yaan ’sɛgümɛ ‑nu kë ’slööslö ö ‑de fɛi ’ka. ¹³꞊Ya kë ’dhö, (n dhegluzë ‑nu,) ‑kwa ꞊luu’‑ ’kwa ’dho Yesu ’piö pö‑ ꞊taa kö ’wun ‑nu ’ö bɔ ‑an ’gü bhë, kwa ‑nu ’kwa bɔ ‑an ’gü kwa ‑bha ‑tosiadhe ’gü. ¹⁴’Ö tɔɔ pödhɛ ’ö dho kë kwa ꞊plöödhɛ ’ka ꞊toëpö ’ka ’yaa ’kpongtaa zö. Kö ‑a mɛ ’ö dho kë ‑dhö ‑dhɛkpaɔ ꞊dhia’ ‑bha bhë ꞊nɛ ’ö ’kwa‑ ꞊mɛɛ’ ‑na bhë. ¹⁵꞊Ya kë ’dhö kö pë dho kë zlöö ’ö tɔɔ kwa ‑bha ‑Zlan bhë, ‑a ’tɔbhɔsü ꞊nɛ, ’kwa dhoë‑ wo ꞊nɛ gbaɔpë ’kwa bɔ ‑a ’ka Yesu ‑ta ‑kplawo ‑a ’dhö. ’Ma‑ pö ’dhö kö a‑ ‑pö ’kwa ’we ‑a ’tɔ ’piö ‑kplawo kwa ’dhi ‑wo ’ka. ¹⁶Kö ꞊kun ’ö ka ‑zlö ‑yö ‑trö ’wun ‑së kë ‑sü waa‑ ‑nu ka ’ko ‑nu ‑dhë ‑sü ’gü. ‑A ‑kë ’dhö ‑sü ꞊nɛ ’ö tɔɔ sla‑ giagia ’ö‑ ‑wun ’yi ‑yö ‑kan ‑Zlan ’dhi.

¹⁷‑Ka ’wun ma ’dhiö ‑sü mɛ ’ka ‑mɛ ‑nu ‑ta, ’ka ka ‑gɔ ꞊yɔɔ’ ‑an ‑dhë bhii ‑wo wo ‑zo ‑kë ka ‑bha ’ta ‑sü ‑Zlan ‑bha zian ‑ta ‑kɔ ’piö; ’ö tɔɔ ‑Zlan ‑dho ka ‑gɔ ‑wun ꞊dhɛɛ’ kpɔ ‑an ‑gɔ. ’Ö ꞊ya kë ꞊nɛ ’ka ’wun ma ‑an ‑ta, ‑wo ‑dho wo ‑bha yuö kë ꞊zuögludhi ’ka. ’Ka ’wun ‑nu kë ’pö ‑kɔ ’bhaa ’gü, ‑an ꞊zuö’ ’glu ’kaa dhi; ’ö ꞊ya kë ’dhö ‑a ꞊truën‑ ‑dho kë ka ‑gɔ ‑më ’ka ɛ?

꞊Wekadhe waa‑ ‑wo ‑kaanta ‑nu

¹⁸‑Ka ꞊bhɛa’ yi ‑wun ’gü ‑kplawo, bhii yi‑ ’wun ‑dɔ ꞊nɛ ’wun ‑dan ’kuë ‑kɔ ‑së ‑yö yi ’gü ’ö ’yi‑ ’piö kö yi kë ‑kɔ ‑yö kë ‑dhö ‑dhɛ ’saadhö ’gü, ’yi ’wun ‑së kë. ¹⁹A‑ ‑dhɛ ka ‑gɔ kö ’ka ꞊bhɛa’ ‑Zlan ‑dhë giagia ’ka kö ‑yö ’we ‑a ‑bha, ’a ’yɛ n ’zü ’a nu ka ’piö ’ma ’zodhö.

²⁰‑Zlan ‑yö kwa Dëmɛ Yesu ’ö kwa ‑maakëmɛ ꞊va ’ka bhë ‑a ‑bho ga ’gü. ’Kɛɛ ‑yö ꞊bɔa’ ‑a fɛi ’ö ‑dhikuëdhe ’ö dho to ’dhö ꞊toëpö ’ka bhë ‑a ‑ta. ²¹Yö ’ö ꞊zuöyagluu ’dhoë‑ ‑gɔ bhë ‑yö ’wun ‑së kë ‑sü ‑faan nu ka ‑dhë kö ’kaan‑ ‑a ‑dhi ‑a ‑dhë ‑wun kaa. Pë ’ö ‑dhi ‑a ‑dhë, ‑ya ‑kë kwa ’gü bɔa Yesu Klito ’gü ‑sü ’ka. Kö ’tɔbhɔdhe ‑yö kë Yesu Klito ‑bha ’ka ꞊toëpö ’ka! Amɛn.

²²N dhegluzë ‑nu, ꞊bhɛa’ ’a‑ wo ka ‑dhë: Mɛ ꞊daan’ ‑wo ‑nu ’a‑ ‑ya ’sëëdhɛ ꞊nɛ ‑a ’gü ꞊nɛ, ‑ka ka ’gü dɔ ’gbee‑ ’ka ‑an ’kun ‑an ’kun ‑kɔ ’ka, yö ꞊ga ’ö ’sëëdhɛ ꞊nɛ ’ö yaa ꞊gbiin bhë. ²³꞊Ya ’go mü, ‑yö kë ka ’yaan ꞊nɛ kwa dheglu Timote bhë ꞊ya ’go ‑kanso ’gü; ꞊ya kë ꞊nɛ ꞊ya nu ꞊ya ‑lo n ’piö ’nö ‑dhɛkpaɔyi ’ö ꞊nɛ ‑a ’ka, yi ‑nu yi ‑dho nu ‑bhɔdhia kë ꞊dhia ka ꞊plöö ’ma.

²⁴‑Yö ka ‑gɔ ’dhiö ‑mɛ ‑nu ’saadhö waa‑ ‑Zlan ‑bha mɛ ‑nu ’saadhö ’ka ’ma, ’ma ’we kaa. Kwa dhegluzë ‑nu ’wo Itali ‑sɛ ’gü ꞊wa ’we kaa.

²⁵Kö ‑Zlan ‑bha ’dhuë‑ ‑yö ’to ka ’saadhö ka ’piö!