Galatö

’Sëëdhɛ ’ö Pɔlö ‑ya bɔ

‑Zlan ‑bha mɛ ‑nu ’wo

Galatö

‑sɛ ‑an ‑dhë bhë ’ö ꞊nɛ

꞊Wekadhe

¹Ma Pɔlö, ’ö n ‑ma ‑kë Yesu Klito ‑bha bɔmɛ ’ka ‑sü bhë ’ö yaa kë ꞊nɛ bɔ ’a‑ wo mɛ ‑ta ’iin mɛ ’ö n ‑ya, ’kɛɛ ’ö sü Yesu Klito waa‑ kwa Dë ‑Zlan ’ö‑ bho ga ’gü ‑an ‑ta bhë, ma ꞊nɛ ’ö ’sëëdhɛ ’ö ꞊nɛ ’a‑ bɔ ka ‑dhë. ²Dhegluzë ‑nu ’wo ’nö ‑wo ‑kpa yi ‑bha, ’ö ’sëëdhɛ ꞊nɛ, yi ‑nu ’yi‑ bɔ Yesu ‑wun ‑dhɛ ’wun gia‑ ‑mɛ ‑nu ’ka Galatö ‑sɛ ’gü ka ‑dhë ꞊woë’ ꞊nɛɛ: ³Kwa Dë ‑Zlan waa‑ kwa Dëmɛ Yesu Klito ‑wo ’glusë kë ka ’ka, ’iin kö ‑wo ka gbaa ꞊zuöyagluu ’ka. ⁴Klito gia‑ ‑yö ö ‑de ‑nu kö ’kwa dha kwa ‑bha ꞊sɔɔn yaa ‑nu ‑gɔ, kö ‑yaan kwa bho pë yaa ‑nu ’wo ’kpongtaa ꞊dɛɛ ‑an kwɛɛ ꞊nɛ ‑kɔ ’ö kwa Dë ‑Zlan ‑zo ’kun ‑wun ’dhoë‑ ’ka bhë ‑a ’dhö. ⁵꞊Ɛɛ, ’tɔbhɔdhe ‑yö kë ‑Zlan ‑bha ’ka ꞊toëpö ’ka! Amɛn.

’Wuntaɔsë giagia

⁶’Wun ’yö n ’te ’tun ‑wun giagia ’ka ’ö ꞊nɛ: Kö ‑yö ‑kë ꞊dhë ’ö ’ka ‑kan ’zodhö ‑Zlan ’ö ka ꞊dhɔɔ ‑kë Klito ‑bha ’glusë ꞊paa’ bhë ‑a ‑bha ’ö ’ka ꞊dhië ’wun ‑taɔ gbɛ ’piö ee? ⁷‑A ‑de ’wuntaɔsë ’bhaa gbɛ ’yaa ’dhö. ‑A pö ’a‑ wo ’dhö bhë ’ö tɔɔ mɛ ‑nu ‑wo ‑dhö, ’wo‑ ’piö kö ’wo ka dɔ ‑gbɔudhö, bhii ‑wa ’piö kö ‑wo Klito ‑bha ’wuntaɔsë bho pin ꞊taa. ⁸A‑ ‑pö ka ‑dhë: Kö ꞊kun ’ö ’ka mɛ gbɛ ‑bha ’wuntaɔ gbɛ ꞊blɛɛ’ ‑wo ‑dhɛ ’wun gia‑. ‑A ‑de, ’kö ‑kë ꞊nɛ ‑Zlan ‑bha bɔmɛ do ‑mü ’ö go dhang‑ ’gü, ’ö nu, ’iin yi ‑de ꞊nɛ ’yi nu ’ö ’yi ’wun ‑taɔ gbɛ ’ö ’yaa‑ mɛ ’yi‑ ꞊blɛɛ ka ‑dhë bhë ‑a ’ka ’yi‑ ꞊blɛɛ, ’dhangga ‑yö yi ’kun. ⁹Pë ’yië‑ ꞊blɛɛ’‑ ka ‑dhë do yö ‑mü; ’kɛɛ a‑ ’piö kö ’a ziö‑ ’gü do ka ‑dhë ꞊nɛɛ: ’Wuntaɔsë ’ö ’yaa‑ mɛ ’ö ’ka ‑we ‑a ‑wun ‑bha bhë ‑a ’ka, mɛ ’ö ꞊yaa‑ ‑wun ꞊blɛɛ’‑ ka ‑dhë, ’dhangga ‑ya ’kun.

¹⁰Kë‑ wo ’dhö bhë, yaa kë ꞊nɛ n ‑de ’tɔ ’a‑ ꞊mɛɛ’ ‑na bhë. ‑Zlan ꞊nɛ ’a‑ kë ‑na ꞊zian’ kö n ‑wun ’yi ‑yö ’kan ‑a ’dhi bhë. ꞊Ya kë ’dhö, kö ‑a kë ’pö ’a‑ wo ‑na kö ’aan‑ kë mɛ ‑nu ’yan ’dhiö ‑së ’pö bhë ꞊ee? ꞊Ya kë ꞊nɛ ‑yö ’dhö ‑bezë kö n ’ka kë yuö ‑kë Klito ‑dhë ‑mɛ ’ka gbɔ ꞊nɛ bhë ’sa.

Pɔlö ‑bha ‑kë Dëmɛ ‑bha bɔmɛ ’ka ‑kɔ

¹¹N dhegluzë ‑nu, a‑ ‑pö ka ‑dhë: ’Wuntaɔsë ’a‑ ꞊blɛɛ’ ‑na bhë, mɛ ’bhee‑ ‑de ‑gɔ ‑zotadhe ’yaa ‑mü. ¹²Yaa ’go mɛ gbɛ kwɛɛ kö ‑yaan ‑a nu n ‑dhë ’iin mɛ gbɛ kun ’ö n ꞊daan ‑a ’ka; ’kɛɛ Yesu Klito ꞊nɛ ’ö ’dhɛ bho ‑a ‑ta n ‑dhë.

¹³Ka gia‑, ‑kɔ ’a ꞊kaa’ kö a ꞊tun ‑klu ‑sü ’ka Zuifö ‑nu ‑bha ꞊bhɛa’ ‑kɔ ‑bha bhë ka‑ ‑wun ‑ma; ’ö ‑kɔ ’a ‑kë ’wun ꞊wɔa’ ꞊dhia ꞊faan’ ’ka ‑Zlan ‑bha mɛ ‑nu ‑ta kö ’aan‑ ‑an ’gü ꞊siö’ bhë ’ka‑ ꞊tɛi’ dɔ. ¹⁴’Töng bhë ‑a ’ka, n ’bhamɛ ‑nu ’wo ‑kë Zuifö ’ka ’pö bhë, a ‑kë ’gbee‑ ‑an ‑bha, Zuifö ‑nu ‑bha ꞊bhɛa’ ‑kɔ ’gü. N ꞊zuö’ ‑de ‑yö ‑luu yi ’bhɛma ‑nu wɔ ‑kɔ ‑wun ’gü.

¹⁵’Kɛɛ ‑Zlan ‑bha ’glusë ’gü, ‑yö n ‑sü ’ö n ‑ya ‑de ‑ta, ‑a ‑de kö a ꞊tun n dhe ’guu, ’yö n ꞊dhɔɔ ‑kë kö ’a yuö kë ö ‑dhë. ¹⁶’Ö ꞊dhɛ ’ö yi ’ö‑ ‑ya kö ’wuntaɔsë ’ö ‑gban ‑a Gbö ‑bha bhë, ‑yaan ‑a ‑ta ’po n ‑dhë kö ’aan‑ ‑wun ꞊blɛɛ’‑ mɛ ‑nu ’waa Zuifö ’ka ‑an ‑dhë bhë, ’ö ꞊ya ‑lo, n ’ka ’dho mɛ gbɛ ’piö kö ‑yaan n ꞊kpaɔ, ¹⁷’iin n ’ka ’dho Zeluzalɛmë, mɛ ‑nu ’wo ‑kë Yesu ‑bha bɔmɛ ‑nu ’ka n ’dhiö bhë ‑an ’piö kö ‑waan n ꞊kpaɔ. ’Kɛɛ ꞊dhɛ ’a go mü a ‑dho vɛɛdhö Alabi ‑sɛ ’gü ꞊zian’ (n ’sloo ’ka); ’ö ꞊dhɛ ’a go mü, ’a dho Damasö. ¹⁸꞊Dhɛ ’ö ‑kwɛ ‑yaaga ꞊ya ziö, ’a dho Zeluzalɛmë kö yië‑ Piɛɛ ’yiën‑ ‑kpën yi ’kuë‑ ’yiën‑ yi ’ko dɔ. ’Ö yi ‑nu ’yi ’dhɔɔgɔ ꞊plɛ ‑kë yi ’kuë‑ mü. ¹⁹Yesu ‑bha bɔmɛ ’bhaa gbɛ ’a dho ‑kpën ‑a ‑bha ’ma ’zü yaa ‑kë ‑dhö ‑a ’ke yaa kë kwa Dëmɛ dheglu Zakö ’ka.

²⁰Pë ‑nu ’a ‑an ‑ya ’sëëdhɛ ꞊nɛ ‑a ’gü bhë, ’wun gia‑ ‑mü; ‑Zlan ‑de ‑yö n ꞊goo‑ ’ka.

²¹꞊Dhɛ ’ma ’go mü, a ‑dho Sili ‑sɛ waa‑ Silisi ‑sɛ ‑an ’gü ‑dhɛ ‑nu ‑bha. ²²’Töng bhë ‑a ’ka, kö Klito ‑bha mɛ ‑nu ‑dho ’kuë‑ ‑sü ’wo Zude ‑sɛ ’gü bhë, ‑an ’yan yaa ‑kpën n ‑ma ꞊kun. ²³Pë do ’ö ‑da ‑an ’toudhö ’wo‑ dɔ ’ö tɔɔ ‑wa ‑pö ’ö bɔ ‑na mɛ ‑nu ’dhii do do ’ka ꞊nɛɛ: «Mɛ ’ö ‑kë ’wun wɔ ꞊dhia ‑be kwa ‑ta ’wuntaɔsë ‑wun ’gü bhë, yö ꞊nɛ ’ö ’wuntaɔsë ’ö ‑gban ‑zo ‑yö Yesu ‑bha ‑sü ‑bha bhë ’ö‑ ‑wun ꞊blɛɛ’ ‑na zlöö bhë; ’kɛɛ kö ‑yö ‑kë ’slë ꞊suu’‑ ’saadhö ꞊mɛɛ’ ꞊dhia ‑be kö ‑yaan ‑an ’gü ꞊siö’‑.» ²⁴’Ö ꞊ya kë ’dhö, ’wo ‑Zlan ’tɔ ‑kë ꞊va n ‑wun ’gü.

Pɔlö ‑bha ‑dho Zeluzalɛmë ‑gɛn

¹꞊Dhɛ ’ö ‑kwɛ ’gɔɔ‑ do ö ga ‑yiisië ꞊ya ziö, a ‑yɛ n ’zü ’a dho Zeluzalɛmë ‑dëüwo, yië‑ Baanabasö yi ’ka, ’ö ’a Titö kpa n ‑ma. ²’Dho ’a‑ wo bhë ’ö tɔɔ ‑Zlan ꞊nɛ ’ö‑ pö n ‑dhë ’dhö. ’Yö ꞊dhɛ ’a dho ’a ‑lo ’ma, ’ö yië‑ ’dhiö ‑sü mɛ ’ka ‑mɛ ‑nu ’yi ‑ya ’kuë‑ ‑kë yi ’sloo ’ka, ’ö ’wuntaɔsë ’a‑ ꞊blɛɛ’ ‑na mɛ ’waa Zuifö ’ka ‑an ‑dhë bhë, ’ö‑ ‑gɔgɔ ‑nu ’wo‑ ‑ta, ’a‑ sü ’a‑ ꞊blɛɛ ‑an ‑dhë; ‑yö ‑kë ’dhö kö yi ‑nu yi ‑wo ‑yaan kë ‑a ’gü do, ꞊kun ‑kë ’ö ma yuö ‑nu dho to ’kpaan. ³’Kɛɛ Titö, ’yö ‑kë n ’piö, ’yö ‑kë Glɛkö ’ka bhë waa‑ ’gbee‑ ‑ta bho kö ‑yaan ’dho ’bɔng. ⁴’Kɛɛ dhegluzë ꞊suazë ‑nu ‑wo ‑kaan yi ’ka ‑yö kë ’dhö kö mɛ ‑nu ‑waan ’dho ’bɔng, dhasü ’gbloo ’piö. Mɛ ‑nu ’wo bhë, ‑wo ‑da yi ziën ꞊nɛ ‑glunaɔkëmɛ ‑nu ’dhö kö ‑potaasü ’ö yi ‑gɔ Yesu Klito ’gü bhë ‑waan ‑a ’piö ‑ga; bhii pë ’ö ‑kë ‑an ‑zo ’piö ‑be ’ö tɔɔ kö ’yiën‑ kë ‑an ‑kɔ ꞊löö. ⁵’Kɛɛ yiëë ’töng ’bhe ’tee gbɛ nu ‑an ‑dhë, ‑yö kë ’dhö kö ’wuntaɔsë ’ö ’wun gia‑ ’ka bhë ’yiën‑ ‑a ‑wun ’to pin ꞊taa ka ‑dhë.

⁶’Kɛɛ mɛ ‑nu ’ö ’wo ‑kë ꞊nɛ ’dhiö ‑sü mɛ ’ka ‑mɛ ‑nu ’dhö bhë, pë ’wo dho ‑a ꞊blɛɛ’‑ n ‑dhë ‑yaan kë pë ‑dëü ’ka yaa kë ‑dhö. ‑A ‑de pë ’wo‑ ’ka, n ’to ‑de yaa kë ‑a ’piö, bhii ‑Zlan ’yaa mɛ ‑ga mɛbheedhɛ bun ‑bha. ⁷’Kɛɛ ‑wa ‑yö ꞊zian’ ꞊nɛ ‑Zlan ꞊ya ’wuntaɔsë bhë ‑a ‑wun ‑lo n kwɛɛ kö ’a‑ ‑wun ꞊blɛɛ’‑ mɛ ‑nu ’waa Zuifö ’ka ‑an ‑dhë ꞊nɛ ‑kɔ do gia‑ ’ö‑ ‑wun ꞊blɛɛ’ ‑sü tën ‑a ’ka Piɛɛ ‑bha Zuifö ‑nu ‑bha ’ka bhë ‑a ’dhö, ⁸bhii ‑Zlan ‑yö n ‑ya kö mɛ ‑nu ’waa Zuifö ’ka bhë ’aan‑ kë bɔmɛ ’ka ‑an ’piö ꞊nɛ ‑kɔ ’ö Piɛɛ ꞊yaa’ kö ‑yaan kaa bɔmɛ ’ka Zuifö ‑nu ’piö bhë ‑a ’dhö. ⁹Zakö ’dhö, Piɛɛ ’dhö waa‑ Zan ’ö ‑an ‑ya ’ti ‑yö ‑kë ꞊nɛ ‑gɔmɛ ‑nu ’dhö bhë, wo gia‑ ‑wa ‑dɔ ꞊nɛ ‑Zlan ‑yö yuö ’ö ‑ya ‑sü ’ka ‑de ‑ta bhë ‑a ‑wun ‑tën n ‑ma. ’Yö ’wo wo ‑kɔ ‑sɔ ma ’dhö, Baanabasö ’dhö yi kwɛɛ, ‑a ‑zɔn ‑sü ’ka ꞊nɛ yi ‑mɔ ‑sü ’ka ‑a ’gü do kö ’yiën‑ ’kan yi ’kuë‑ kö ’yiën‑ ’dho mɛ ‑nu ’waa Zuifö ’ka ‑an ’piö, kö wo ‑zë ‑waan ’dho Zuifö ‑nu ’piö. ¹⁰’Yö ’wo‑ pö yi ‑dhë yi ‑zo ‑yö ‑büö wo ‑bha ’fɛɛmɛ ‑nu ‑wun ’ka. Pë ’a‑ ‑de ‑kë yö ‑mü.

Pɔlö ‑bha ‑we Piɛɛ ‑dhë ‑gɛn

¹¹꞊Dhɛ ’ö Piɛɛ ‑yö nu Antiɔsö, a ’wun ‑blɛɛ ‑a ’ka mɛ gbung ’gü ’ö tɔɔ ‑yö ‑kë ’wun ꞊zaa’ ‑sü ’gü. ¹²‑A ‑kë ’dhö ‑gɛn tɔɔ: ꞊Dhɛ ’ö mɛ ‑nu ’ö Zakö ‑yö ‑an bɔ bhë ’ö waa ‑lo ꞊kun, ‑yö ‑kë pë ‑bhö ꞊dhia dhegluzë ‑nu ’ö ’waa Zuifö ’ka ‑an ’piö; ’kɛɛ ꞊dhɛ ’ö mɛ ‑nu ’wo bhë ’wo ‑lo, ’yö ‑kan pë ‑bhö ‑an ’piö ‑sü ‑bha, bhii ‑yö ‑suö mɛ ‑nu ’wo Zuifö ’ka ’ö ’wo bɔ ’wun ’ö ‑gban ‑dho ’bɔng ‑sü ‑wun ‑bha ‑a ’ka bhë ‑an ‑dhë. ¹³’Yö dhegluzë ‑nu ’wo Zuifö ’ka bhë, ’wo yö ‑ziö Piɛɛ ’piö ‑sü ‑bha ’suö ’ka. Baanabasö ‑de ’pö ‑yö ‑to ‑an ’piö ‑an ‑bha ’suö bhë ‑a ’gü. ¹⁴꞊Dhɛ ’a‑ yö ꞊nɛ ’waa ’ta ’sü ‑kɔ kpengdhö kë ‑na ꞊nɛ ‑kɔ ’ö ’wun gia‑ ’dhoë‑ ’ka ’wuntaɔsë ’gü bhë ‑a ’dhö, ’a‑ pö Piɛɛ ‑dhë mɛ ’plɛ wö ’dhiö mü ꞊nɛɛ: «Bhi ’ü Zuifö ’ka, ’ö‑ ‑dhɛ ꞊ya ꞊glɔɔ ’ö ’bhaa Zuifö ‑nu ‑bha tɔng ꞊löö gbɔ ‑potaasü ’ö ü ‑gɔ ’wuntaɔsë ‑wun ’gü bhë ‑a ‑wun ’gü, ‑yö ‑kë ꞊dhë ’ü‑ ’piö kö mɛ ‑nu ’wo ꞊nɛ ‑wo Zuifö ‑nu ‑bha tɔng ꞊bhlë ‑ya ’zü ii?»

’Wun ’ö ‑gban dha ‑kɔ ‑bha

¹⁵Yi gia‑ ’yi Zuifö ’ka ’yi bhɔa, ’yiëë tɔng ‑lö ’gü ‑mɛ ‑nu ’ka ꞊nɛ ’sɛgɔ gbɛ ’gü ‑mɛ ‑nu ’dhö. ¹⁶’Kɛɛ yi‑ ‑dɔ ꞊nɛ mɛ ‑bha ‑kë kpengdhö ‑sü ’ö ‑Zlan wö ’dhiö bhë ‑yö ‑sü dosɛn ‑a ‑bha ‑zo ‑yö Yesu Klito ‑bha ‑sü ‑bha, yaa ’sü ‑a ‑bha tɔng ’kun ‑sü ‑bha. Yi ‑de ’pö, pë ’yi‑ ‑kë kö ’yiën‑ ꞊tun kë ‑na kpengdhö ‑Zlan wö ’dhiö yö kun tɔɔ tɔng ’kun ‑sü; ’kɛɛ ’we ’yi‑ wo Yesu Klito ‑wun ‑bha ’ö ’yi yi ‑zo yö ‑a ‑bha bhë ‑a ‑wun ‑mü; ’ö tɔɔ mɛ gbɛ ’ka ’dho kë kpengdhö ‑Zlan wö ’dhiö ö ‑bha tɔng ’kun ‑sü ‑wun ’gü. ¹⁷꞊Ya kë ꞊nɛ yi ’ö ’yi‑ këdhɛ ꞊mɛɛ’ ‑na kö ’yiën‑ kë kpengdhö ‑Zlan wö ’dhiö, yiëë‑ Klito ‑nu yi ‑bha ‑kë do ‑sü ‑wun ’gü bhë, ’yië kë ꞊sɔɔnyaakëmɛ ‑nu ’ka, kö Klito ꞊ya kë ꞊sɔɔn yaa ‑gɛn ‑gban ‑dhɛ ’ka; ’wun ‑yö ꞊gɔa’ ‑kɔ ’yaa kë ’dhö! ¹⁸꞊Ya kë ꞊nɛ pë ‑nu ’a‑ ꞊wüü bhë, ’ma‑ pö ’a‑ dɔ ’zü, kö kë ’pö ’a‑ wo ’wun ‑ma tɔng ‑ta ‑mɛ ’ka bhë ꞊aa? ¹⁹’Wun mɛ ’ö ‑gban tɔng ‑bha bhë, a ga ‑sü ’ka ‑a ‑gɔ, ’ö bhii ꞊dhɛ ’maa tɔng ꞊bhlë ‑ya bhë, tɔng ‑de gia‑ ꞊ya za ‑lo n tuö, kö ‑yö kë ’dhö kö ’a ‑kë ‑a ’gü ‑sü kë ‑Zlan ‑bha ’ka. Yië‑ Klito ꞊nɛ ’wo yi dɔ ‑gaatalü ‑bha, ’yi ga bhë; ²⁰꞊ya kë ’dhö kö ma gia‑ ’maa ‑tosiadhe kë ‑sü ’gü gbɔ, ’kɛɛ Klito ꞊nɛ ’ö ‑tosiadhe kë ‑na n ’gü bhë. ‑Tosiadhe ’yö n ‑gɔ zlöö bhë, a‑ ‑kë ‑zo ‑yö ‑Zlan Gbö ’ö n ‑dhɔ ‑kë ’ö ö ‑de nu n ‑wun ’gü bhë ‑a ‑bha ‑sü ’ka. ²¹N ’ka ꞊duë ‑Zlan ‑bha ’glusë ‑dhë. ’Kɛɛ ꞊ya kë ꞊nɛ mɛ ‑bha ‑kë kpengdhö ‑Zlan wö ’dhiö ‑sü ‑yö ‑bɔ tɔng ‑ta, kö Klito ‑yö ‑ga ’kpaan ’sa!

‑Zoyösü waa‑ tɔng ’kun ‑sü, pë ꞊plɛ ’wo bhë ‑a ‑mlë ’ö dhasü ‑yö sü ‑a ‑bha ‑ɛ?

¹’Öö, Galatö ‑mɛ ‑nu, ’kaa ’wun dɔ ꞊dhɛɛ! Dö ’pö ka ’bɔnkan bhë? ’Kɛɛ kö ka ’ö ’ka bhë, Yesu ‑bha ‑ga ‑gaatalü ‑bha ‑sü bhë ‑a ‑wun ‑yö ‑bho ’kou ka ‑dhë ’papadhö ka ’yaan. ²꞊Dhɛɛ’ do ’kpaan ‑yö n ‑gɔ. ‑Zuu ’slööslö ’ö go ‑Zlan ’piö bhë ‑a yö ’ka‑ wo ꞊nɛ, tɔng ’kun ’pö ’ka‑ wo bhë yö ‑mü ’iin ’wuntaɔsë ‑dhɛ ’pö ’ka‑ wo ’wun gia‑ bhë yö ‑mü ‑ee? ³Ka ‑dɔ ‑gbɔudhö ꞊dhë? ‑A zü ’ka‑ dɔ ‑së ’ka ‑Zuu ’slööslö ’ka bhë, ka ‑dho ‑a ’dhiö to zlöö ka ‑de ꞊faan’ ’ka a? ⁴’Wun ‑nu ’ka bɔ ‑an ’gü bhë, ’to ’pö ’dhoë‑ wo ’dhö ’kpaan bhë ꞊a? Këpë ’yaa ‑mü ’sa! ⁵‑Zuu ’slööslö ’ö ‑Zlan ‑ya nu ka ‑dhë, ’ö ‑dhidhaapë ‑nu kë ‑na ka ziën bhë, tɔng ’pö ’ka‑ kun bhë yö ‑mü ’iin ’wuntaɔsë ‑wun ’ka‑ ma ’ö ’ka‑ ‑wun ‑dhɛ ’wun gia‑ bhë yö ‑mü ee?

⁶‑Ka ‑dhɛ ‑ga ’dhɛ! Pë ’ö ꞊bɛɛn’ ‑sü ’ka ’ö ‑gban Ablaamö ‑bha ‑ya ‑pö: ‑Yö ö ‑zo ‑yö ‑Zlan ‑bha ’ö ‑Zlan ‑ya yö mɛ kpengdhö ’ka; ’kɛɛ kë‑ wo ’dhö bhë, ‑yö ‑sü ‑a ‑bha ‑zo yö ‑sü ‑bha. ⁷꞊Dhɛ ‑kë ’dhö, ‑yö kë ka ’yaan ꞊nɛ mɛ ‑nu ’ö ‑zo yö ‑Zlan ‑bha ‑sü ’dhoë‑ ‑an ‑gɔ bhë, Ablaamö gbö giagia ‑nu ꞊nɛ ’wo bhë. ⁸Pë ’ö ꞊bɛɛn’ ‑sü ’ka ‑ya ‑pö ‑Zlan ‑yö ‑dho mɛ ‑nu ’waa Zuifö ’ka ‑an kë kpengdhö ö wö ’dhiö, ’kɛɛ ‑yö ‑dho sü ‑an ‑bha ‑zo yö ‑sü ‑bha; ’wunsë ’ö bhë ’yö‑ to ’dhiö ’ö‑ ꞊blɛɛ Ablaamö ‑dhë ꞊nɛ: ‑Zlan ‑yö ‑dho bɔ ü ’gü ’yö ’dhuë‑ kpɔ ’sɛgɔgümɛ ‑nu ’saadhö ’wo ’kpongtaa ‑an ‑bha. ⁹’Wun bhë Ablaamö ‑ya ‑dhɛ ’wun gia‑; ’yö ‑Zlan ‑yö ’dhuë‑ kpɔ ‑a ‑bha. Mɛ ‑nu ’saadhö ’ö ’wo ’dhoë‑ wo ‑zo yö ‑Zlan ‑bha, ’dhuë‑ ‑dho kpɔ ‑an ‑bha ꞊nɛ ‑kɔ ’ö kpɔa Ablaamö ‑bha bhë ‑a ’dhö.

¹⁰Mɛ ‑nu ’wo wo ‑zo yö ‑na tɔng ’kun ‑sü ‑bha bhë, ’dhangga ‑yö ‑dho ‑an kun. Bhii pë ’ö ꞊bɛɛn’ ‑sü ’ka ‑ya pö: «Pë ‑nu ’wo ‑ya ‑sü ’ka tɔng ’sëëdhɛ ‑be ’gü bhë, mɛ ’ö yaa ’dho ‑a do ꞊bhlë ‑ya, ’dhangga ‑ya ’kun.» ¹¹‑A ‑de ‑a ‑ta ‑yö ’po ‑sü ’ka ꞊nɛ mɛ gbɛ ’ka ’dho kë kpengdhö ‑Zlan wö ’dhiö ö ‑bha tɔng ’kun ‑sü ‑wun ’gü; bhii pë ’ö ꞊bɛɛn’ ‑sü ’ka ‑ya ‑pö: Mɛ ’ö ’dhoë‑ kë kpengdhö ‑Zlan wö ’dhiö ö ‑bha ‑zo ‑yö ‑Zlan ‑bha ‑sü ‑wun ’gü, ‑yö ‑dho ‑kë ‑a ’gü ‑sü yö. ¹²’Kɛɛ ‑kwa ‑dhɛ ‑ga ‑a ’gü ‑së ’ka; tɔng ’kun ‑sü ‑wun yaa ’go ‑zo ‑yö ‑Zlan ‑bha ‑sü ’gü. ’Ö tɔɔ pë ’ö ꞊bɛɛn’ ‑sü ’ka ‑ya ‑pö ꞊zian’ ꞊nɛɛ: Mɛ ’ö ’dhoë‑ tɔng ꞊bhlë ‑ya ö ’plɛ ’ka, ‑a ‑bha ‑kë ‑a ’gü ‑sü ‑gɛn ’godhɛ ꞊nɛ ’ö bhë. (’Kɛɛ kö ’pian do ’piö, ꞊ya kë ꞊nɛ kwa ‑kɔ yaa ‑mɔa ‑bha, kö ’dhangga ‑yö kwa ‑ta.)

¹³’Dhangga ’ö ‑ya kwa ‑bha ‑be bhë, ꞊ya ‑ya Klito ‑bha kwa pin ꞊taa. ‑Kɔ bhë ꞊nɛ ’ö Klito ‑yö kwa dhaa ’dhangga ’ö kwa kun tɔng ‑wun ’gü bhë ‑a ‑gɔ; bhii pë ’ö ꞊bɛɛn’ ‑sü ’ka ‑Zlan ‑bha ’sëëdhɛ ’gü ‑ya ‑pö: Mɛ ’oo mɛ ’ö ’wo‑ dɔ ‑gaatalü ‑bha, kö ’dhangga ꞊yaa‑ ’kun. ¹⁴‑Yö ‑kë ’dhö kö ’dhuë‑ ’ö ‑Zlan ‑ya ’tɔ go Ablaamö ‑dhë (’ö ‑gban Yesu ‑wun ‑dhɛ ’wun gia‑ ‑sü ‑bha dhasü ‑wun ’gü) bhë ‑yaan nu ’pö mɛ ‑nu ’waa Zuifö ’ka ‑an ‑dhë ‑bɔ Yesu Klito ‑ta ‑sü ’ka ’iin kö kwa ‑bha ‑zo yö ‑sü ’gü kö ‑Zuu ’slööslö ’ö ‑Zlan ‑ya ’tɔ go kwa ‑dhë bhë, ’kwaan‑ yö.

Tɔng waa‑ pë ’tɔ ’go ‑wo ‑an dɔ ‑kɔ

¹⁵N dhegluzë ‑nu, ‑ka ka ’to ’to ’dhɛ! ’Wun ꞊zuan’ do ꞊ga ꞊nɛ: ꞊Ya kë ꞊nɛ gɔɔn‑ do ‑yö ö ‑bha ’wun ‑kaanta ‑nu ꞊blɛɛ’ ‑na ‑mɔ ’kuë ‑sü ‑zë ’ka, mɛ gbɛ yaa ’dho kë ‑dhö kö ‑yaan yö züë‑ ’iin kö ‑yaan ‑wo ’waa gbɛ ‑zuö ‑a ‑ta. ¹⁶꞊Ao’! ‑Ka dɔ! ‑Zlan ‑yö ö ‑bha pë ’tɔ ‑go Ablaamö ’dhö waa‑ ö ꞊suu’‑ ‑ta ‑në ‑an ‑dhë. Pë ’ö ꞊bɛɛn’ ‑sü ’ka ‑Zlan ‑bha ’sëëdhɛ ’gü yaa‑ pö: Kaa‑ ü ꞊suu’‑ ‑ta ‑në ka ‑dhë ꞊nɛ ꞊dhɛ ’wo‑ pö ‑a ‑bha ’kpa mɛ ꞊plëëzë ‑mü ‑a ’dhö. ’Kɛɛ ‑ya ‑pö: Kaa‑ ü ꞊suu’‑ ‑ta ’në ka ‑dhë. ꞊Yaa‑ pö ’dhö kö ‑ya ‑pö mɛ dosɛn; mɛ dosɛn bhë ’ö tɔɔ Klito. ¹⁷’Ma‑ pö ’dhö kö a‑ ‑pö: ‑Zlan ‑yö pë ’tɔ ’go ‑wo ‑nu (Ablaamö ‑dhë), ’yö‑ pö ‑yö ‑dho to pin ꞊taa. Tɔng ’ö nu kö ‑kwɛ ꞊këng’ ‑yiisië ’ö ‑kɔ ‑yaaga ꞊ya ziö bhë yö ’pö ’yö dho ‑Zlan ‑bha pë ’tɔ ’go ‑wo bhë ‑a yö züë‑ kö ‑yaan ‑a ‑bha pë ’tɔ ’go ‑wo ‑nu ’to ’kpaan bhë ꞊ee? ¹⁸’Kɛɛ ꞊ya kë ꞊nɛ gbaɔ ’ö ‑Zlan dho ‑a nu ꞊nɛ ‑to mɛ ‑gɔ ‑pë ’dhö bhë ꞊ya ’sü tɔng ‑bha kö yaa ’sü pë ’tɔ ’go ‑wo ‑bha gbɔ ꞊nɛ bhë ’sa. ’Kɛɛ kë‑ wo ’dhö bhë ’tɔ ‑go mɛ ‑dhë ‑pë bhë ꞊nɛ ’ö ‑Zlan ‑yö bɔ ‑a ‑ta ’yö ö ‑bha ’glusë ‑kë Ablaamö ’ka.

¹⁹꞊Dhɛ ‑kë ’dhö ꞊nɛ tɔng ‑yö ‑dɔ ‑më ‑wun ’gü i? Nu ’ö tɔng ‑ya wo ’ö ‑daa ‑ta bhë, ‑yö ‑nu ’dhö kö ’wun ‑nu ’waa ‑Zlan ‑zo ’kun ‑wun ‑zian ‑ta bhë kö ‑yaan kë kö mɛ ‑nu ‑waan dɔ, ‑yaan kaa ’dhö ‑bezë ‑yaan ’dho ‑yaan yöë Ablaamö ꞊suu’‑ ‑ta ‑në ’ö ’wun ‑yö ‑gban ‑a ‑bha ’ö ’wo‑ ’tɔ go bhë, ‑a ‑bha nu ‑sü ‑bha. ‑A ‑de ‑Zlan ‑yö ‑bɔ ö ‑bha bɔmɛ ‑nu ’gü ’ö tɔng dɔ, ’ö mɛ do ‑ya ‑wun ‑lo mɛ ‑nu ‑bha; ²⁰’kɛɛ ‑dhɛ ’ö ‑Zlan ’dhoë‑ ö ‑bha pë ’tɔ go (Ablaamö ‑dhë), yaa bɔ mɛ gbɛ ’gü.

Tɔng ‑da ‑gɛn

²¹Kë‑ wo ’dhö bhë, kë ’pö tɔng ‑ya wo ‑dɔ ‑Zlan ‑bha ’tɔ ’go ‑mɛ ‑dhë ‑pë ‑gɔ ’yënng ‑pë ’ka bhë ꞊a? Yaa ’dho kë ’dhö ’dhɛ! ’ö ꞊ya kë ꞊nɛ tɔng ‑yö ‑kë ‑dhö ’ö mɛ ‑nu ‑wo bɔ ‑a ‑ta ’wo ‑kë ‑a ’gü ‑sü yö kö mɛ ‑yö ‑dho ‑mɔa ‑be ‑yö kë kpengdhö ‑Zlan wö ’dhiö tɔng ’kun ‑sü ‑wun ’gü. ²²’Kɛɛ pë ’ö ꞊bɛɛn’ ‑sü ’ka ‑ya ‑pö, ’kpongtaamɛ ‑nu ’töüdhö ‑wo ꞊sɔɔn yaa ‑bha ’piigbeedhɛ ꞊löö, ‑yö kë ’dhö kö gbaɔ ’ö ‑Zlan ‑ya ’tɔ go bhë ‑yö kë mɛ ‑nu ’wo ’dhoë‑ wo ‑zo yö Yesu Klito ‑bha bhë ‑an ‑dhë.

²³꞊Dhɛ ’ö ꞊tun ‑be kö ‑zo ‑yö Yesu Klito ‑bha ‑sü ’töng yaa ‑lo ꞊kun, kwa ‑kë tɔng ‑gɔ ‑kanso ’gü ’ö toë ’dhö ’ö ‑zo ‑yö ‑Zlan ‑bha ‑sü ‑yö yöë plaan. ²⁴Tɔng ‑bha ‑kë ’yan ‑to kwa ‑bha ‑mɛ ’ka ‑gɛn ’ö ꞊kaa’ bhë ö ꞊ga bhë. ’Yö‑ ꞊kaa’ ’dhö ’ö dhoë ’ö yöë yi ’ö Klito ‑yö nuë ’ö ’kwa ꞊kaa’ kpengdhö ‑Zlan wö ’dhiö kwa ‑bha ‑zo yö ‑sü ‑wun ’gü bhë ‑a ‑bha. ²⁵Zlöö ꞊nɛ, ‑zo ‑yö Yesu Klito ‑bha ‑sü ’töng ꞊ya ‑lo. Pë ’ö ö ’yan to kwa ‑bha ‑be bhë, ’kwaa‑ ‑kɔ ꞊löö gbɔ.

²⁶Ka ’saadhö ka ‑bha ‑kë ‑Zlan ‑bha ’në ‑nu ’ka ‑sü ‑yö ‑bɔ ka ‑bha ‑zo ‑yö Yesu Klito ‑bha ‑sü ‑ta. ²⁷’Ö tɔɔ kë‑ wo bhë ka ’plɛ ’töüdhö ‑wo ka ‑bɔ yiö kö kaa‑ Yesu Klito ‑nu ’kaan‑ kë do; ’go mü ’zü, ’ö ’ka ‑tosiadhe ‑dëü ’ö Yesu Klito ’gü bhë, ’ka‑ ‑da ka ‑bha. ²⁸꞊Ya kë ’dhö kö ‑nii gbɛ ’yaa Zuifö ‑nu waa‑ mɛ ‑nu ’waa Zuifö ’ka ‑an ziën; ’yaa ꞊nua ‑nu waa‑ mɛ ‑nu ’ö ‑potaasü ’dho ‑an ‑gɔ ‑an ziën; ’yaa gɔɔn‑ ‑nu waa‑ dhoo ‑nu ‑an ziën. Ka ’saadhö ka ‑kpa ’kuë‑ ‑sü ‑mü do Yesu Klito ’gü. ²⁹꞊Ya kë ꞊nɛ ’ka kë Klito ‑bha ’ka kö ka Ablaamö ꞊suu’‑ ‑ta ‑nu ’ka, ’ö ‑to mɛ ‑gɔ ‑pë ’ö ‑Zlan ‑ya ’tɔ go ‑a ‑dhë bhë ’ö ’ka dho ‑a yö.

¹‑Ka dɔ, ’a ’wun ꞊zuan’ do ‑zɔn. ’Në gɔɔn‑ ’ö‑ dë ‑bha pë ‑nu dho to ‑a ‑gɔ ‑yö ꞊nɛ ꞊nua ’dhö; bhii ’kö ‑kë ꞊nɛ yö ꞊nɛ ’ö ꞊ya ’to zlöö pë ‑nu ’wo bhë ‑an dëmɛ ’ka, ‑a ‑bha ‑kë ’tee ‑sü ‑wun ’gü, ‑a ‑kɔ ’yaa pë ‑nu ’wo bhë ‑an ‑ta. ²’Töng ’ö‑ dë ‑ya ‑ya bhë, ꞊ya kë ꞊nɛ yaa ‑lo ꞊kun, kö ‑yö ꞊tun mɛ ‑nu ’wo wo ‑zo kë ‑na ‑a ’piö bhë ‑an kwɛɛ, ‑a ‑bha ‑kë ’tee ‑sü ‑wun ’gü. ³Kwa ‑de ’pö, ‑kɔ gia‑ bhë ꞊nɛ ’kwa ꞊kaa’ kö kwa ꞊tun ꞊nɛ ’në ’sɛɛn‑ ‑nu ’dhö bhii kwa kwa ‑zo ’plɛ dɔ Zuifö ‑nu ‑bha tɔng ‑nu waa‑ ‑an ‑bha pë ‑nu kë ‑kɔ ‑nu ‑bha (’ö tɔɔ kwa ‑de ’pö ‑yö ‑kë kwa ‑zo ’piö ꞊nɛ pë ‑nu bhë ꞊nɛ ’wo dho kwa dha ‑be). ⁴’Kɛɛ ꞊dhɛ ’ö yi ’ö‑ kpɔ bhë ꞊ya ‑lo, ‑yö ö Gbö ‑bɔ; ’yö bɔ dhebɔ do ’gü ’yö bhɔ. Yö ‑de ’pö ‑yö ‑kë Zuifö ‑nu ‑bha tɔng ꞊löö. ⁵‑Yö kë ’dhö kö mɛ ‑nu ’wo ‑kë tɔng ꞊löö bhë ‑yö ‑an bho ’gan ’gü, ‑kɔ bhë ꞊nɛ ’ö ’kwa ꞊kaa’ ‑Zlan gbö ‑nu ’ka.

⁶Pë ’ö‑ ‑zɔn ꞊nɛ ka (’dhö, yi ’dhö, kwa ’saadhö kwa) ‑Zlan gbö ‑nu ’ka bhë ’ö tɔɔ ‑Zuu ’slööslö ’ö go ‑a Gbö ’piö bhë ‑a ‑ya ’ö‑ wo kwa ꞊zuö’ ’piö bhë; bhii kë‑ wo bhë, ‑Zuu ’slööslö bhë, ꞊ya kë ‑yö ‑we ꞊woë’ ꞊nɛ: «N Dë!» ⁷꞊Ya kë ’dhö, kö ’kaa ꞊nua ’ka gbɔ, ’kɛɛ ’ka kë zlöö ‑a gbö ‑nu ’ka. ’Yö ꞊dhɛ ‑kë ꞊nɛ ’ka kë ‑a gbö ‑nu ’ka bhë, ‑Zlan ‑yö ‑dho ka gbaa pë ‑sɛɛbɔ ‑nu ’wo‑ ‑gɔ ’wo ‑ya ‑sü ’ka ka ‑bha ’ka bhë ‑a ’ka.

’Wun ’ö Pɔlö ꞊zuö’ ‑to zlöö ‑wun ’ka Galatö ‑mɛ ‑nu buëndhö

⁸Kë‑ wo ’dhiö ꞊zian’ ‑be bhë, kaa ‑Zlan dɔ; ka ‑kɔ këpë ‑nu ꞊nɛ ’ö ’ka ‑an ‑ga ‑Zlan ’ka, ’yö ’ka ‑kë ‑an ‑gɔ ꞊nuadhɛ ’gü ’kɛɛ kö ’waa‑ ’ka. ⁹Zlöö ꞊nɛ bhë, ꞊dhɛ ’ö ’ka ‑Zlan giagia dɔ, ’iin ’ö ‑Zlan ꞊ya ka dɔ bhë, ‑yö ‑kë ꞊dhë ’zü ’ö ’ka ꞊dhië ‑de nu ‑a ‑dhë ‑pë ’tëëtë ‑nu ’ö ’wo mɛ ’bhee‑ ‑bha wɔ ‑kɔ ’gü bhë ‑an ’piö e? ‑Yö ‑kë ꞊dhë ’ö ’ka dho ‑an ’piö ’zü kö ‑waan ka ꞊nuadhɛ ‑kë wo ꞊e? ¹⁰‑Ka ‑dhɛ ‑ga bhë ’dhɛ! Ka ‑dhɛkpaɔyi ’bhaa ‑nu, ’su ’bhaa ‑nu, ‑kwɛ ’töng ’bhaa ‑nu waa‑ ‑kwɛ ’bhaa ‑nu ‑wun ‑kun ’gbee‑ ‑a ’bhaa ‑nu ‑bha. ¹¹’Suö ‑yö n ‑kë ka ‑wun ’gü ’ö tɔɔ ꞊ya kë a n ‑de ꞊dhɛɛ’ kpɔ ’a‑ pö kö yuö ‑nu ’a‑ ‑kë ka ‑wun ’gü bhë ’to ’pö ’dhoë‑ wo ’kpaan bhë ꞊e?

¹²N dhegluzë ‑nu, ꞊bhɛa’‑ ’a‑ wo ka ‑dhë; ‑ka kë ꞊nɛ ‑kɔ ’a‑ ’ka ꞊nɛ ‑a ’dhö bhii ’maa tɔng ꞊löö gbɔ.

¹³Kaa ’wun yaa gbɛ kë n ’ka. Ka gia‑ ‑yö ꞊tun ka ’yaan ꞊nɛ ’töng ’ö ’wuntaɔsë bhë ’a‑ ꞊blɛɛ ‑a ’ka ka ‑dhë ’ma ‑blɛɛzë ’ka bhë, ’yua ‑yö ‑kë n kë ꞊dhia. ¹⁴’Yua ‑bha n kë ’ö‑ wo ’töng bhë ‑a ’ka bhë, ‑yö ‑kë ka ‑gɔ ’wun ’gbee‑ ’ö nu ka ‑ta ‑a ’ka, ’kɛɛ kaa n ‑san zë. Pë ’ka‑ ‑kë ꞊zian’ ’ö tɔɔ n ‑nia ’kun ’ö ’ka‑ wo ꞊nɛ ꞊dhɛ ’wo‑ pö ‑a ‑bha ‑Zlan ‑bha bɔmɛ ‑mü ’iin Yesu Klito ‑mü ‑a ’dhö. ¹⁵’Töng bhë ‑a ’ka, ꞊zuögludhi ‑yö ‑kë ka ‑gɔ. ꞊Dhɛ ‑kë ’dhö, ‑më ’pö ‑kë kaa ꞊ɛ? ’Kɛɛ a ‑mɔa ’a‑ pö: ’Töng bhë ‑a ’ka, ꞊ya kë ꞊nɛ ka ‑kɔ ‑yö ‑mɔa ‑be, ka ‑dho ka ’yanga ‑nu bho mü ’ka n gbaa. ¹⁶Dɔ ’kwa‑ wo ꞊nɛ, kë ’pö ’ma‑ wo ka yaagümɛ ’ka ’wun gia‑ ꞊blɛɛ’‑ ’a‑ wo bhë ‑a ‑wun ’gü bhë ee?

¹⁷Mɛ ‑nu ’wo‑ ’piö kö ’ka tɔng ’kun ö ’plɛ ’ka bhë, ka ‑wun ‑yö ‑an ‑gɔ ’gbee‑; ’kɛɛ ‑an ꞊zuö’ ’piö ‑wun ’yaa ‑së. Pë ’wo‑ ’piö ’ö tɔɔ ’ka ’kan n ‑ma kö ’ka ka ꞊zuö’ ꞊dhië’‑ ‑an ’piö. ¹⁸꞊Dhɛ ’a‑ ‑ga ‑a ’gü bhë, ꞊yö ‑së kö ’ka ka ‑zo ’tën pë ‑nu ‑dhë, ’kɛɛ ‑yö kë pë ’ö ‑së ‑a ‑wun ’gü ’iin kö ‑yö kë ’dhö ‑kplawo; kö ꞊kun ’ö ‑kë n ‑ma ‑kë ka ziën ‑sü ’töng ’sloo ’ka. ¹⁹Ma ’në ‑nu ‑wungbeezë, n ’yënng ‑yö bhɔ ‑na ka ‑wun ’gü ꞊nɛ pë ’wo‑ pö ’në ’kpɔ ‑sü ’yënngbhɔdhe ’ö dhebɔ ‑gɔ ‑a ’dhö; ’kɛɛ ‑yö ‑dho toë ’dhö ’ö dhoë ’ö yöë yi ’ö Klito dho ‑kian ‑a ’ka ka ’gü bhë ‑a ‑bha. ²⁰Dɔ ’a‑ wo ꞊nɛ, n ‑ya ‑sü ‑mü ‑a ꞊wuën’ kö ’a nu ka ’piö ’ma kö ’aan‑ ’wun ꞊blɛɛ’‑ ka ‑dhë ‑kɔ ’bhaa gbɛ ‑ta bhii pë ’a dhoë‑ kë zlöö ka ‑dhë ’maa‑ dɔ.

’Wun ꞊zuan’ ’ö ‑gban Agaa waa‑ Saala ‑an ‑bha

²¹Mɛ ‑nu ’ö ’ka‑ ’piö kö ’ka kë tɔng ꞊löö ꞊nɛ, ‑ka ka ’to ’to ’dhɛ! Pë ’ö tɔng ‑ya pö bhë, ka‑ ‑ma ‑a? ²²‑Ya ‑pö Ablaamö ‑bha ’në ‑nu ‑wo ‑kë ꞊plɛ. ‑A mɛ do ‑yö ‑kë ꞊nuadhe do (’wo‑ ‑dhɛ Agaa), ‑a gbö ’ka, ’ö‑ mɛ do ’bhaa ‑yö ‑kë dhebɔ ’ö ’yaa ꞊nua ’ka (’wo‑ ‑dhɛ Saala bhë), ‑a gbö ’ka. ²³’Në gɔɔn‑ ’ö waa‑ ꞊nuadhe ’wo‑ kpɔ bhë ‑yö ‑bhɔ ꞊nɛ ‑kɔ ’ö ꞊kaa’ ‑an mɛdhɛ ꞊dhɔɔbhaa ’ka ‑a ’dhö; ’kɛɛ ‑a mɛ ’ö waa‑ dhebɔ ’ö yaa kë ꞊nua ’ka ’wo‑ kpɔ bhë, ‑yö ‑bhɔ ꞊nɛ ‑kɔ ’ö ‑Zlan ‑ya ’tɔ goë Ablaamö ‑dhë bhë ‑a ’dhö. ²⁴’Wun bhë ‑wo ‑mɔa ‑wa ma ꞊nɛ ’wun ꞊zuan’ ’dhö. ’Kwa ‑dhɛ ‑ga ’wun bhë ‑a ’piö, dhebɔ ꞊plɛ ’wo bhë, kwa ‑dho ‑an ‑zɔn ‑dhi ’kuë ꞊plɛ ’ka. ‑A do ’ö ’kwa‑ ‑zɔn dhebɔ mɛ ’wo‑ ‑dhɛ Agaa ‑a ’ka bhë, yö ꞊nɛ ’ö tɔɔ ‑dhi ’kuë ’ö ‑kë Sinai ‑tɔn tuö. Yö ꞊nɛ ’ö ’në ‑nu kpɔ ’ö ’wo ‑kë ꞊nua ’ka. ²⁵Agaa bhë, yö ꞊nɛ ’ö tɔɔ Sinai ‑tɔn ’ö Alabi ‑sɛ ’gü; yö ꞊nɛ ’ö ’töng ’kwa dɔa ꞊dɛɛ ꞊nɛ ‑a ’gü ’ö tɔɔ Zeluzalɛmë ’ö waa‑ ö ‑bha ’në ‑nu ’ö ’wo (Moizö ‑bha tɔng ‑gɔ) ꞊nuadhɛ ’gü. ²⁶’Kɛɛ Zeluzalɛmë ‑dhɛ mɛ ’ö dhang‑ ’gü bhë ꞊nɛ ’ö ‑potaasü ’dhoë‑ ‑gɔ. Yö ꞊nɛ ’ö tɔɔ kwa dhe. ²⁷Bhii pë ’ö ꞊bɛɛn’ ‑sü ’ka ‑ya ‑pö: Dhebɔ, bhi ü ’ka ’në gbɛ ’kpɔ bhë, ‑bhö ꞊zuögludhi kë; bhi ü ’ka bɔ ’në ’kpɔ ‑sü ’yënngbhɔdhe ’gü do ꞊nɛ, ‑bhö ’we ꞊zuögludhi ‑tan ‑nu ’ka! Bhii ꞊saandhe bhë ‑a ‑bha ’në ‑nu ‑wo ‑dho kë ꞊va ’wo ꞊zië’ dhebɔ mɛ ’ö ꞊tun kun ‑së bhë ‑a ‑ta.

²⁸’Kɛɛ n dhegluzë ‑nu, ka ‑zë ka ’në ‑nu ’ö ‑Zlan ‑yö ‑an ’tɔ go ’ö ’ka bhɔ ‑an ’ka ꞊nɛ Izaakö ’dhö. ²⁹Kë‑ wo ’kpa bhë, ’në ’ö bhɔ ꞊nɛ ‑kɔ ’ö ꞊kaa’ mɛ ’bhee‑ ꞊dhɔɔbhaa ’gü ‑a ’dhö bhë ‑yö ‑kë ‑a mɛ ’ö bhɔ ‑Zuu ’slööslö ꞊kwaa’ bhë ‑a ’klo bhɔ ꞊dhia ꞊nɛ ‑kɔ ’ö‑ ’ka ꞊dɛɛ ꞊nɛ ‑a ’dhö; ’ö ’dho ‑na ‑a ’ka ’dhö ’dhiö ‑kplawo bhë. ³⁰’Kɛɛ pë ’ö ꞊bɛɛn’ ‑sü ’ka ‑ya ‑pö: ‑Bhö ꞊nuadhe waa‑ ö ‑bha ’në ‑an kë; bhii ꞊nuadhe ‑bha ’në bhë, pë ’ö yö ’dhö waa‑ dhebɔ ’ö ’yaa ꞊nua ’ka, ‑a ‑bha ’në ’dhö ’ö ‑an dë ‑bha pë ‑nu ’ka, ‑a ‑bha ’yaa‑ ’gü. ³¹꞊Ya kë ’dhö kö, n dhegluzë ‑nu, ’kwaa ꞊nuadhe ‑bha ’në ‑nu ’ka, ’kɛɛ kwa dhebɔ ‑potaasüzë ‑bha ’në ‑nu ’ka. (꞊Ya kë ’dhö kö pë ’ö ‑Zlan ‑ya ’tɔ go bhë, kwa ‑dho ‑a yö.)

Mɛ ꞊kpaɔ ‑wo ’ö ‑gban ‑potaasü ‑bha

¹Klito ‑yö ‑potaasü ‑nu kwa ‑dhë kö ‑potaasü giagia ‑yaan kë kwa ‑gɔ. ‑Potaasü ’ö ka ‑gɔ bhë, ‑kaa ‑wun ’kun ’gbee‑, ’go mü ’ka ka ‑zo kë ka ‑de ’piö kö ꞊kun ’ka dho kë ’zü ꞊nua ’ka.

²‑Ka dɔ! Ma Pɔlö ‑mɛ a‑ ‑pö ka ‑dhë: ꞊Ya kë ꞊nɛ ’ka ’dho ’bɔng (‑a pö ‑sü ’ka ka ꞊zuö’ ’piö ꞊nɛ yö ꞊nɛ ’ka dho bɔ ‑a ‑ta kö ’kaan‑ dha), kö Klito ‑yöë ‑bha ‑pë gbɛ ’yaa ’dhö ꞊nɛ bhë ’sa. ³A‑ ’piö ’a bɔ ‑a ’gü ’zü ’a‑ yö sia‑ ka ‑dhë ‑së ’ka ꞊nɛ: Mɛ ’oo mɛ ’ö ’dhoë‑ ’wun ‑yö ’ko ’dhiö ‑kɔ ꞊suu’‑ bhë ‑a kë ö ꞊zuö’ ’piö kö ‑yaan ’dho ’bɔng, kö ‑a ’gbee‑ ‑ta bho ‑sü ‑mü kö ‑yaan tɔng ‑to ’dhö ‑sü ’plɛ ’kun. ⁴‑Yö kë ka ’yaan ꞊nɛ mɛ ‑nu ’ö ’ka‑ këdhɛ ꞊mɛɛ’ ‑na kö ’kaan‑ kë kpengdhö ‑Zlan wö ’dhiö ka ‑bha tɔng ’kun ‑sü ‑wun ’gü bhë, ’ka ’dho Klito ’ka ꞊gbiin; ‑Zlan ‑bha ’glusë ’ö bhë ’ka ka ‑de ’kan ‑a ‑bha ꞊nɛ bhë. ⁵Mɛ ‑nu ’kwa to bhë, kwa ‑zo yö ‑sü ‑mü ꞊nɛ ‑Zlan ‑yö ‑dho kwa kë kpengdhö ö wö ’dhiö. Pë ’ö kwa ‑bha ‑zo yö ‑sü ’gü ’ö ‑Zuu ’slööslö ’dhoë‑ kë ‑na ’piigbeedhɛ ’ka kwa ꞊zuö’ ’piö bhë ’ö bhë. ⁶Bhii ’ö tɔɔ ꞊ya kë ꞊nɛ ’kwa kë Yesu Klito ‑bha ’ka, ’kö ‑kë ꞊nɛ kwa ‑dho ’bɔng oo, kwaa ’dho ’bɔng oo, kwa ’to ’ka ’dho kë mü: Pë mɛ ’ö‑ ‑wun ’dho ’gbee‑ dha ‑sü ’ö bhë ‑a ’gü ’ö tɔɔ ‑zo ‑yö ‑Zlan ‑bha ‑sü ’ö ꞊ya kë mɛ ‑gɔ ’ö ’wo pë ‑nu kë ‑na ‑dhɔ ’gü bhë.

⁷‑A zü dɔ ‑kɔ ‑blɛɛzë ’ka‑ zü dɔa bhë, ‑yö ‑kë ‑së. ꞊Dhɛ ‑kë ’dhö ꞊nɛ dö ’pö‑ ‑kë ’ö ’ka ka bo ’wun gia‑ ꞊bhlë ‑ya ‑sü ’ka ɛ? ⁸Pë ’ö mɛ ‑nu ‑wa ꞊blɛɛ kö ’kaan‑ ka ‑zo tën ‑a ‑dhë bhë, ‑Zlan ’ö ka ꞊dhɔɔ kë ‑na bhë, yaa ’go ‑a ’piö. ⁹Pë ‑de ’ö ‑kë ’ö mɛ ‑nu ’dho ‑piën bɔ ‑na ’wo‑ pö ‑na: «꞊Bluubhɛɛpë ’bhle ’tee ‑yö ꞊bluu’‑ ‑to ’dhö ‑sü ‑da ’ö bhë.» (Bhii mɛ do ꞊ya kë ka ziën kö ‑a këwun ‑yaan kë ya; ‑yö ‑dho mɛ ’plɛ ‑gɔ ’gü ꞊siö’‑.) ¹⁰’Kɛɛ kë‑ wo ’dhö bhë, ‑Zlan ‑yö ꞊zuöyagluu ‑nu n ‑dhë ka ‑wun ’gü bhii ‑ya ‑kë ’ö n ꞊zuö’ ‑yö ‑kë ‑saa ꞊nɛ ’wun ’ö bhë, ka ’dhö, ma ’dhö, kwa ꞊zuö’ ‑ya ’gü do. ’Kɛɛ mɛ ’oo mɛ ’ö ka ꞊zuö’ ꞊kaan’ ‑na ’kuë bhë, ‑Zlan ‑yö ‑dho ‑a ’klo bhɔ.

¹¹Ka‑ ‑yö bhë ꞊a, n dhegluzë ‑nu; ’ö ꞊ya kë ꞊nɛ kë‑ wo bhë ‑dho ’bɔng ‑sü ꞊nɛ ’a‑ ‑wun ꞊blɛɛ ‑bezë ꞊nɛ ‑a ‑wun ‑yö ’gbee‑ dha ‑sü ’gbloo ’piö, kö ‑wo ‑dho n ’klo bhɔ ‑be ‑a? ꞊Ya kë ꞊nɛ ‑yö ‑kë ’wun gia‑ ’ka ‑bezë kö ’wun ’ö ‑gban Klito ‑dɔ ‑gaatalü ‑bha ‑sü ‑bha bhë ’a‑ ‑wun ꞊blɛɛ’ ‑na bhë kö yaa ’dho yɛ mɛ gbɛ ‑bha. ¹²‑A ‑de a‑ ’piö kö mɛ ‑nu ’wo bhë, ‑wo ’dho ’wun bhë ‑a ’ka ꞊gbiin ‑wa ziö ꞊gɔü’, ‑wo wo bo ‑kë gɔɔn‑ ’ka ‑sü ’ka.

¹³N dhegluzë ‑nu, ka ‑zë, ‑Zlan ‑yö ka ꞊dhɔɔ ‑kë kö ’kaan‑ kë ‑potaasü ’gü. ’Kɛɛ kö ꞊kun ’ö ‑potaasü ’ö bhë ’ka‑ ‑kë ꞊saandhepë ’ka ka ‑de ‑gɔ ’ö ’ka ka ‑bha ‑tosiadhe ꞊kaa’ ka ꞊dhɔɔbhaapë ‑nu ’gü. ’Kɛɛ ‑ka dɔ, ‑dhɔ ‑yö yö ka ‑dhë ’dhiö kö ’kaan‑ yuö kë ka ’ko ‑nu ‑dhë. ¹⁴Bhii tɔng ‑nu ’wo bhë ’kwa ‑an ’plɛ ’dho ’kuë‑ ‑wo do ’ka, ‑ya ‑pö: ‑Bhö ü ‑ya ’yɔɔ ‑dhɔ kë ꞊nɛ ü ‑de ’dhö. ¹⁵’Kɛɛ ꞊dhɛ ‑kë ꞊nɛ ka kë ‑kɔ ‑nu ꞊wa kë ꞊nɛ wü ‑nu kë ‑kɔ ’dhö ka ’ko ‑nu ‑gi ‑sü ’iin ka ’ko ‑nu ’yënng bhɔ ‑sü ‑nu ’ka bhë, kö ‑ka ka ‑zo kë ka ‑de ’piö kö ꞊kun ’ö ’ka dho ka ’ko ‑nu ’gü ꞊siö’‑!

‑Zuu ’slööslö ‑bha ‑yö mɛ ‑dhë ’dhiö ‑sü

¹⁶꞊Ɛɛ, ꞊ya kë ’dhö, a‑ ‑pö ka ‑dhë: ‑Ka ka ꞊kwaa’‑ ‑Zuu ’slööslö ‑zü ‑yö yö ka ‑dhë ’dhiö ka ‑bha ‑tosiadhe ’gü; kö ꞊kun ’ka ’wun ma ka mɛbheedhe ꞊dhɔɔbhaapë ‑nu ‑ta ka ’gü; ¹⁷bhii ’ö tɔɔ mɛbheedhe ꞊dhɔɔbhaapë ‑nu ‑wo ‑de ‑ta; ’waa ‑Zuu ’slööslö ‑bha zian ‑ta; ‑kɔ do bhë ’ö ‑Zuu ’slööslö ’dhoë‑ ’ka mɛbheedhe ꞊dhɔɔbhaapë ‑nu ’ka; ‑wo ‑de ‑ta ’gbönggböng. ꞊Ya kë ’dhö ka ’ka ’dho ‑mɔa ‑bha kö pë ’ö ‑dhi ka ‑dhë ’kaan‑ kë. ¹⁸’Ö ꞊ya kë ꞊nɛ ‑Zuu ’slööslö ꞊nɛ ’ö yö ka ‑dhë ’dhiö, kö ’kaa tɔng ꞊löö.

¹⁹Kwa gia‑, ‑kwa ‑dhɛ ‑ga ’dhɛ! Mɛ ’ö ziö ‑na ö ‑de ꞊dhɔɔbhaapë ‑nu yaa ’piö bhë, ‑a këpë ‑nu ’saadhö ‑wo ‑gban ꞊sɔɔn kë ‑sü, ‑dhuupë ‑nu, ꞊sɔɔn yaa kë ‑sü ’ö ’wo ’to ‑na ‑a din ’piö ’wo ’dho ‑na ‑a ’ka ’dhiö ‑kplawo, ²⁰pë gba ‑sü ‑nu waa‑ ‑dɛ bɔ ‑sü ‑nu; kö mɛ ‑nu ‑wo ꞊gluɛng’ kë ‑na wo ’ko ‑nu ‑bha, ‑yö ’gla ‑na ‑an ‑gɔ ꞊druɛi ’gü, ‑wo ‑da ‑na ‑naazuëdhe ’gü wo ’ko ‑nu buëndhö, ‑wo ’dhinaa ‑nu kë ‑na, ‑wo kë ‑na yaagümɛ ‑nu ’ka wo ’ko ‑nu ‑dhë; kö ’gügludhe ‑yö ‑da ‑na ‑an ziën kö ‑wo ’pɛ ‑na ’gü. ²¹‑Wo ‑ya ‑sü ’ka mɛ ’waa gbɛ ‑bha pë ‑dhɔ ’ka; ‑wo wo ‑de ‑nu ‑drɔɔn mü ‑sü ‑dhë, ‑wo ꞊kian’ yaa ‑nu ‑kë, ’wo ’wun ’vlanvlan ’bhaa ‑nu ‑kë ‑ziögɔüsüzë ’ka. ’Kɛɛ a ka ꞊kpaɔ ‑na ’zü ꞊nɛ ‑kɔ ’a‑ ꞊kaa’ ’dhiö bhë ‑a ’dhö. Mɛ ‑nu ’wo wɔ ‑kɔ ꞊suu’‑ bhë, ’wo‑ kë ‑na bhë, wo ’ka ’dho ‑da ‑Zlan ‑bha ‑gludëdhɛ ‑pö ’gü.

²²’Kɛɛ mɛ ’ö ‑Zuu ’slööslö ’dho ’dhiö ’sü ‑na ‑a ’ka ‑a këpë ‑nu ’wo tɔɔ ‑dhɔ, ꞊zuögludhi, ꞊zuöyagluu, ꞊zuösaadhɛ, këwun ‑së ‑nu, ’glusë, ‑to ‑wo ’gü ‑sü, ‑kë ’lëëlë ‑sü waa‑ ‑de kuënnu ‑sü. ²³Pë ‑nu ’wo bhë ’saadhö mɛ ’ö ꞊ya ’to ‑a ’gü, ’klobhɔdhe ’ö sü tɔng ‑bha bhë, yaa ’dhö nu ‑a ‑ta. ²⁴Mɛ ‑nu ’wo Yesu Klito ‑bha ’ka, mɛbheedhe ꞊dhɔɔbhaapë ‑nu ’wo bhë ꞊wa ga ‑an ‑dhë ’ö bhii ꞊waa‑ kpa Yesu Klito ‑bha, ꞊waa‑ dɔ ‑gaatalü ‑bha. ²⁵‑Zuu ’slööslö ꞊ya kwa gbaa ‑kë ‑a ’gü ‑sü ’ka; kö kwa ꞊dua’ ‑mü ’kwa kwa ꞊kwaa’‑ ‑zü ‑yö yö kwa ’ta ‑sü ‑kɔ ‑dhë ’dhiö kwa ‑bha ‑tosiadhe ’gü ’pö ’sa. ²⁶Kö ꞊kun ’ö ’kwa ‑kë ‑desüvamɛ ’ka, ’ö ’kwa kwa ’ko ‑nu ꞊woo’ ꞊mɛɛ ’iin ’ö ’kwa ‑ya kwa ’ko ‑nu ‑bha pë ‑nu ‑dhɔ ’ka.

‑Ka ’dho ka ’ko ‑nu ‑dhë

¹N dhegluzë ‑nu, ꞊ya kë ꞊nɛ ꞊wa mɛ do ’kun ’wun ꞊zaa’ ‑sü kë ‑sü ‑ta, mɛ ’ö ‑Zuu ’slööslö ’ö go ‑Zlan ’piö ’ö ka ’gü bhë, ‑kaa kë ‑yö yö zian kpengdhö ‑ta; ’kɛɛ ‑kaa kë ’lëëlë ’ka. ‑A ’bhaa tɔɔ: Mɛ ’ü ‑dhö, ü ‑zo kë ü ‑de ’piö kö ꞊kun ’ö ’ü zian ‑po ’güdandhe ‑gɔ ’ö bhi ‑de ’pö, ’ü ꞊sɔɔn yaa ‑kë. ²‑Ka ’dho ka ’ko ‑nu ‑dhë ’wun ’gbee‑ ‑nu ’gü; ‑kɔ bhë ꞊nɛ ’ö ’ka dho Klito ‑bha tɔng kun ‑a ’ka. ³꞊Ya kë ꞊nɛ mɛ ꞊ya ö ‑de sü pë ’bhaa ’ka ’kɛɛ kö ’yaa pë gbɛ ’ka, kö ö ‑de ‑püö ’ö‑ wo. ⁴Mɛ ’ö ‑dhö, ‑yö ö ‑de ’ta ‑kɔ ‑ga; ’ö ꞊ya kë ꞊nɛ ꞊ya ö ‑de ’ta ‑kɔ ‑ga ’ö dho kë ’gɔugɔ ‑a ‑wun ’gü kö ‑yö ‑dho ö ‑de ‑zɔn ö ‑de ’ka, ’kɛɛ yö ’ka ’dho ö ‑de ‑zɔn mɛ gbɛ ’ka; ⁵’ö tɔɔ mɛ ’ö ‑dhö, ‑yö ‑dho ö ‑de ‑bha ꞊kwɛɛ‑ bun.

⁶Mɛ ’ö ’wo ka ꞊daan’ ‑na ’wuntaɔsë ’ka bhë, kwa ꞊dua’ ‑mü kö pë ‑nu ’wo ka ‑gɔ bhë, ’ka ‑an ‑bha nu ’pö.

⁷꞊Ya kë ’dhö, (n dhegluzë ‑nu), ‑kaa kë ’slë ’ka ka ‑bha ‑tosiadhe kë ‑kɔ ’gü; ’ö tɔɔ ’waa ’yee ’to ‑Zlan ‑bha. ‑Ka ‑dhɛ ‑ga ’dhɛ! Pë ’ö mɛ ‑ya ta ꞊nɛ ’ö‑ ‑kan. ⁸꞊Ya kë ꞊nɛ pë ’ö mɛbheedhɛ bun ‑dhë ‑së ꞊nɛ ’ö mɛ ‑ya ‑kë, kö yi ’dhiötoyi ꞊ya ‑lo, ‑a ‑bha ‑dho kë ga ’ka; ’ö ꞊ya kë ꞊nɛ pë ’ö ‑dhi ‑Zuu ’slööslö ‑dhë ꞊nɛ ’ö‑ ‑kë, kö ꞊toëpö ‑këdhösü ꞊nɛ ’ö dho kë ‑a ‑gɔ. ⁹Kö ꞊kun ’ö kwa ‑kɔ ’yi ‑yö ga ’wun ‑së kë ‑sü ’ka. Bhii ‑kɔ bhë ꞊nɛ ’ö ’dhuë‑ ‑pë ‑nu ’wo ‑ya kwa ‑gɔ bhë ‑a yi ꞊ya ‑lo, ’kwa dhoë‑ yö; ’kɛɛ kö kwaa ’to zian ’kluë‑. ¹⁰Kö ꞊dhɛ ’ö ’töng ’dhö ꞊tun kwa ‑gɔ bhë, ‑kwa ’wunsë kë mɛ ’plɛ ‑dhë; ’kɛɛ ꞊yö ‑së kö ‑yö kë dhegluzë ‑nu ’ö ‑zo ‑yö Yesu ‑bha ‑sü ’dhö ‑an ‑gɔ ‑an ꞊zian’.

‑Zo ‑kë ‑de ’piö ‑wo ‑nu waa‑ ꞊wekadhe

¹¹‑Ka ‑dhɛ ‑ga bhë ’dhɛ! N pë ꞊bɛɛn’ ‑kɔ pin ’gblöögblöö ‑nu ’wo ꞊nɛ ‑ka ‑an ‑ga bhë ’sa!

¹²Mɛ ‑nu ’saadhö ’wo‑ ’piö kö ‑wo ‑gban ka ‑bha kö ’ka ’dho ’bɔng bhë, ’wo tɔɔ mɛ ‑nu ’ö ’wo‑ ’piö kö ’wo wo ‑de kë ’gianzë mɛ ’bhee‑ ‑nu wö ’dhiö. Kë‑ wo ’dhö bhë ‑wa ‑kë ’dhö kö ꞊kun ’ö mɛ ‑nu dho ’wun wɔ wo ‑ta Klito ‑bha ‑gaatalü ‑wun ’gü. ¹³Mɛ ‑nu ’wo bɔ ‑dho ’bɔng ‑sü ’ka bhë wo ‑de gia‑ ’waa tɔng ’kun; ’kɛɛ ‑wa ’piö kö ’ka ’dho ’bɔng ‑yö kë ’dhö kö ‑yaan kë ‑an ‑bha ‑de ‑sü ꞊va ‑gɛn ’ka, ꞊duakëpë ’ö ‑kë ka kwi ’gü bhë ‑a ‑wun ’gü. ¹⁴N ‑ma ’ka, pë do ’ö‑ ‑wun ’gü ’a dho n ‑de kë ’gɔugɔ, ’ö tɔɔ Dëmɛ Yesu Klito ‑bha ‑gaatalü ‑wun. ‑A ‑gɛn tɔɔ Klito ‑bha ‑gaatalü ‑wun ’gü, ’kpongtaadhɛ ’yaa n ‑dhë pë gbɛ ’ka gbɔ. ’Ö ma ‑de ’pö, ’ö ’ma kë ‑bhaazë ’kpongtaadhɛ ‑dhë. ¹⁵’Wun ’ö ‑gban ‑kë ’bɔn ’ka ‑sü waa‑ ‑kë ꞊druɛn ’ka ‑sü ’ö ’ka ‑an ‑ga ‑na bhë, n ’to ’yaa‑ gbɛ ‑dhë; pë mɛ ’ö‑ ꞊bhlë ’dhö ‑dhö ꞊zian’ ’ö tɔɔ kë ’ö ’kwa‑ wo mɛ ‑lü ‑dëü ’ka bhë ‑a ‑wun. ¹⁶’Wun mɛ ’ö ‑kë ‑kë mɛ ‑lü ‑dëü ’ka ‑sü ‑wun ’ka bhë, mɛ ‑nu ’saadhö ’wo ’to ‑na ‑a ’piö bhë, wo ’dhö waa‑ ‑Zlan ‑bha mɛ ‑nu, kö ꞊zuöyagluudhe waa‑ ‑Zlan ‑bha ’glusë ‑wo ’to ‑an ’piö!

¹⁷Kö ‑dhɛ ꞊kpaɔ ꞊dhia’ ‑bha, kö ꞊kun ’ö mɛ gbɛ ‑yö n ’yënng bhɔ gbɔ bhii ’ö tɔɔ ’kpa ‑nu ’wo yɔn n bun ‑bha ꞊nɛ, ‑wa ‑zɔn ꞊nɛ a Yesu ‑bha ꞊nua ’ka.

¹⁸Dhegluzë ‑nu, kwa Dëmɛ Yesu Klito ‑bha ’glusë ‑yö ’to ka ’piö! Amɛn.