’Sëëdhɛ ’ö Pɔlö ‑ya bɔ
Yesu ‑wun ‑dhɛ ’wun gia‑ ‑mɛ ‑nu ’wo
Kolɔsö
plöö ‑an ‑dhë bhë ’ö ꞊nɛ
1’Sëëdhɛ ’ö ꞊nɛ ‑a ꞊bɛɛnmɛ
1Ma Pɔlö, ’ö ‑kë ‑Zlan ‑zo ’kun ‑wun ’ka kö ’a kë Yesu Klito ‑bha bɔmɛ ’ka, yië‑ kwa dheglu ’nëgɔɔnzë Timote, 2’yi ’sëëdhɛ ’ö ꞊nɛ ‑a bɔ mɛ ’ka yi dhegluzë ‑nu ’ö ‑Zlan ‑yö ka sü ö ‑bha ’ka ’ö ’ka ‑klu ‑sü ’ka Klito ‑bha ’kpëdhö, ’ö ’ka Kolɔsö plöö ka ‑dhë ’ö ꞊nɛ. Yië‑ Timote yi‑ ’piö kö kwa Dë ‑Zlan ‑yö ’glusë kë ka ’ka, kö ‑yö ka gbaa ꞊zuöyagluu ’ka.
Pɔlö waa‑ Timote ‑an ‑bha ‑Zlan zuö pö ‑sü waa‑ ‑bhɛa Kolɔsö ‑mɛ ‑nu ‑wun ’gü ‑sü
3꞊Ya kë yi ꞊bhɛa’ ‑na, ‑Zlan ’ö kwa Dëmɛ Yesu Klito Dë ’ka bhë, ’yi‑ zuö pö ‑kplawo ka ‑wun ’gü. 4Bhii ’ö tɔɔ ka ‑bha ‑zo ‑yö Yesu Klito ‑bha ‑sü waa‑ ka ‑bha ‑dhɔ, ’ka‑ ‑kë ‑Zlan ‑bha mɛ ‑nu ’kpɛkpɛ ’ka bhë, ’yië‑ ma (Epaflasö ’dhii).
5‑Zlan ‑bha ’wun giagia ‑naɔ ’ö ‑kë ’wuntaɔsë ’ka bhë, ꞊dhɛ ’ö ‑wo ka ‑ta ‑blɛɛzë ’ka, yö ꞊nɛ ’ö pë ‑nu ’ö ‑Zlan ’dhö ‑a ‑ya ‑na ka ‑gɔ dhang‑ ’gü ’ö ka ‑zo ’dhoë‑ ‑dhë bhë, ’ö‑ ‑zɔn ka ‑dhë.
‑Kɔ bhë ‑a ’ka, ka ‑bha ‑zo ‑yö ‑Zlan ‑bha ‑sü waa‑ ka ‑bha ‑dhɔ ‑kë ka ’kuë ‑sü ’wo bhë ’ö ‑an ‑gɛn ‑yö ‑gban pë ‑nu ’ö ka ’yan ’dhö ‑a ‑gɔ, ’wo ‑kë pë ‑nu ’ö ‑Zlan ‑yö ‑an ‑ya ka ‑gɔ bhë ‑a ’ka dhang‑ ’gü. 6’Wuntaɔsë ’ö bhë ‑yö ‑pɛn ‑sü ’gü; ‑a ’piö ‑pë ‑nu ’wo ‑kë ’dhuë‑ ’ka, ‑wo ’kpɔ ‑na ’kpongtaamɛ ‑nu ’kpɛkpɛ ‑bha ꞊nɛ ‑kɔ ’ö‑ kë ‑na ‑a ’ka ka ‑gɔ ’sɛ ’gü bhë ‑a ’dhö, ’ö sü yi ‑blɛɛzë ’ö ’ka ‑Zlan ‑bha ’glusë ’ö bhë, ’ka‑ ‑wun ma ‑a ‑bha. Yi bhë ꞊nɛ ’ö ‑Zlan ‑bha ’glusë bhë, ’ka‑ ꞊löö giagia ma ‑a ’ka ’fɛfɛdhö ’pö. 7Epaflasö, ’ö yi ‑nu ’yi yuö kë ‑na yi ’kuë‑ ’nö bhë, yö ꞊nɛ ’ö ka ꞊daan ’wuntaɔsë ’ö bhë ‑a ’ka. Yuö ’ö‑ kë ‑na ’ma bhë, ‑ya ‑kë yi ‑bha kë ’ka, ’ö tɔɔ Klito ‑bha yuökëmɛ, ’ö mɛ ‑yö ‑mɔ ‑a ‑bha kö ‑yö ö ‑zo yö ‑a këyuö ‑bha yö ‑mü ‑a ’ka. 8Yö ꞊nɛ ’ö ’wun ’ö ‑gban ‑dhɔ ’ö ‑Zuu ’slööslö ‑ya ‑ya ka ’gü ’ö ’ka‑ kë ‑na ‑Zlan ‑bha mɛ ‑nu ’kpɛkpɛ ’ka bhë, ’ö‑ ‑wun ꞊blɛɛ yi ‑dhë.
9‑A ‑wun ’gü, ’ö go ’töng ’ö ’wun ‑nu ’wo ‑gban ka ‑bha, ’yi‑ ma, ’ö dho ’ö yöë ’töng ’ö ꞊nɛ ‑a ‑bha, yi ꞊bhɛa’ ‑na ka ‑wun ’gü ‑kplawo. Yi‑ ‑dhɛ ‑Zlan ‑gɔ ꞊bhɛa’ ‑sü ’ka kö ‑yö ka pa ’wundɔdhe ’ö ‑gban ‑a ‑zo ’kun ‑wun ‑bha ‑a ’ka. ’Go mü ’zü kö ’kpaakpadhɛ waa‑ ’wunbhokoudɔdhe ’ö go ‑Zuu ’slööslö ’piö ‑yö kë ka ‑gɔ. 10‑Yö kë ’dhö kö ka ‑bha ‑tosiadhe kë ‑kɔ ‑yaan kwa Dëmɛ ꞊bhlë ‑ya, kö ’kaan‑ ‑a ‑dhi ‑a ‑dhë ‑wun kë ka këwun ‑nu ’saadhö ’gü. ꞊Ya kë ꞊nɛ ’ka‑ kë ’dhö, ka ‑dho ‑mɔ ‑a ‑bha kö ka këyuö ’saadhö ‑waan kë ‑së, kö ’kaan‑ ’dho ’dhiö ka ‑bha ‑Zlan dɔ ‑sü ’ka ‑kplawo. 11Yi‑ ‑dhɛ ‑Zlan ‑gɔ ’pö kö ‑yö ka ꞊faan’ ’më ‑kɔ ’kpɛkpɛ ‑ta, ‑a ‑bha ’piigbeedhɛ ’ö‑ ’dhiötodhɛ ’yaa ’dhö bhë ‑a ’ka. ‑Yö kë ’dhö kö ’ka bɔ ’wun ’gbee‑ ‑nu ’kpɛkpɛ ’gü ꞊zuösaadhɛ ’ka.
12‑Ka kwa Dë ‑Zlan zuö pö ’gludhi ’ka! Bhii yö ꞊nɛ ’ö‑ ‑kë, ’ö ’ka kë ‑a ‑bha kɔɔ ’në ‑nu ’ö pë ‑nu ’ö ‑an ‑ya mɛ ‑nu ’wo‑ ‑bha ’ka ‑an ‑gɔ, ‑gludëdhɛ ‑pö ’ö ‑dhɛpuudhɛ ’gü dhang‑ ’gü ‑a ’gü bhë, ’ö ’wo ‑kë ka ‑bha ’ka. 13‑Zlan ꞊nɛ ’yö kwa bho ‑dhɛtiidhɛ ‑bha ’piigbeedhɛ kwɛɛ, ’ö kwa ‑ya ö Gbö ‑dhɔkësüzë Yesu Klito ‑bha ‑gludëdhɛ ‑bha ’ka. 14Yesu Klito bhë ꞊nɛ ’ö kwa ‑gɔ ‑ta ‑bɔ dü ‑gɔ, ’ö‑ ’sia‑ ’gü, ’ö ‑Zlan ‑yö ‑ziö kwa ‑bha ꞊sɔɔn yaa ‑nu ‑ta.
Mɛ ’ö Yesu Klito ’dhö ‑a ’ka waa‑ ‑a këyuö
15Klito ’ö bhë, ‑Zlan ’ö mɛ gbɛ ’yan ’yaa ‑kpën ‑a ‑bha, ‑a ’bin ‑mü. Yö ꞊nɛ ’ö tɔɔ ‑Zlan ’ö kwa Dë ’ka bhë, ‑a ‑bha ’në ‑blɛɛzë; ‑yö ‑Zlan ‑bha ‑kë ꞊kwaa’ ‑pë ’kpɛkpɛ ꞊suu’‑ ’saadhö ‑ta dhuö ‑mɛ ’ka. 16Bhii pë ’kpɛkpɛ ’ö ‑Zlan ‑ya ‑kë, ‑ya ‑kë ‑bɔ Yesu ’gü ‑sü ’ka; ‑a mɛ ‑nu ’wo ’kpongtaa ’iin ’wo dhang‑ ‑nu ’gü, ‑a mɛ ‑nu ’wo mɛ ’yan ’dhiö oo, ‑a mɛ ‑nu ’waa mɛ ’yaan ’dhiö oo, ‑zuu ꞊suu’‑ ’kpɛkpɛ ’ö ’piigbeedhɛ ’dhö ‑an ‑gɔ bhë, ‑Zlan ‑yö ‑an ’plɛsɛn ‑dɔ Yesu Klito kwɛɛ, ’yö ‑an ‑kë ‑a ‑bha ’ka. 17Yesu Klito ‑yö ‑kë ‑dhö kö ‑Zlan yaa pë gbɛ ‑da ꞊kun. ‑A ‑bha ’piigbeedhɛ ꞊nɛ ’ö‑ kë ‑na, ’ö pë ’kpɛkpɛ ’ö ‑an ‑kë ’ö ’wo ’to ‑sü ’ka wo pin ꞊taa. 18‑Zlan ‑bha mɛ ‑nu ’kpɛkpɛ ‑dho ’kuë‑ ‑sü ꞊tɛi’ ‑yö ‑kë ꞊nɛ mɛ ’bhee‑ ‑lü ’böü dosɛn ’kpaan ’dhö, ’ö Yesu Klito ‑yö ‑kë mɛ ‑lü ’böü ’ö bhë ‑a ‑gɔ ’ka. Yesu Klito ’ö bhë, ’yö tɔɔ pë ’kpɛkpɛ züdɔdhɛ. Yö do bhë ’zü, ’ö go ga ’gü ‑blɛɛzë ’ka, ‑yö kë ’dhö kö ’ö kë mɛ ‑blɛɛzë ’ö ’dhiö pë ’saadhö ’gü ‑a ’ka. 19Bhii ‑a ’yi ‑yö ‑kan ‑Zlan ‑dhë kö ’ö kë ö Gbö Yesu Klito ’gü ö ’plɛ ’ka. 20‑Yö kë ’dhö kö ’ö bɔ ö Gbö ’gü kö waa‑ ö ‑kɔ këpë ’saadhö ’wo ’kpongtaa oo, ’iin ’wo dhang‑ ‑nu ’gü oo, kö ’wo dhi ’kuë kö ꞊zuöyagluu ‑yö kë ‑dhö. ꞊Zuöyagluu ’ö bhë ‑Zlan ‑yö ꞊bɔa’ ö Gbö ’ö ga ‑gaatalü ‑bha, ’ö‑ fɛi ‑yö ‑lo bhë ‑a ’gü, ’ö‑ nu ö ‑kɔ këpë ‑nu ’saadhö ’wo bhë ‑an ‑dhë.
21Ka ‑de ’pö, ka ‑kë ‑Zlan ’ka ꞊gbiin ’dhiö ‑bezë, ’ka ‑kë ‑Zlan yaagümɛ ‑nu ’ka, bhii ka ‑bha ‑zotadhe ‑nu waa‑ ka këyuö ‑nu ‑wo ‑kë yaya. 22’Kɛɛ zlöö ꞊nɛ, ga ’ö‑ Gbö ‑ya wo ö mɛbheedhɛ ‑bun ’gü bhë, ‑Zlan ‑yö ‑bɔ ‑a ’gü, ’yö ‑dhi ’kuë ‑da ka ‑nu ka ziën. ‑Yö ‑ga ’dhö, kö ‑Zlan wö ’dhiö, ’kaan‑ kë ‑a ‑bha mɛ ‑nu ’ö ‑an sü ’ö ‑an ‑ya ‑de ‑ta ‑an ’ka, kö ka ꞊zuö’ ‑yö kë ’puu; ꞊ya kë ’dhö ’wun yaa gbɛ ’ka ’dho kë ka ‑bha. 23’Kɛɛ ka ꞊dua’ ‑mü kö ’ka ’to ka ‑bha ‑zo ‑yö ‑Zlan ‑bha ‑sü ’ö‑ ‑gɛn ’dhö ‑gban ‑sü ’ka kpinngdhö bhë ‑a ‑ta.
’Ö go yi ’ka ’wuntaɔsë maa ‑a ‑bha, ’ö dho ’ö yöë ꞊dɛɛ ‑bha kö ꞊kun ’ka bhɔ ’yan ‑to ‑a ‑gɔ ‑pë ’ö ka ‑bha ’ka ‑a ‑dhë ꞊taa’. ’Wuntaɔsë ’ö bhë ’wo‑ ꞊blɛɛ mɛ ’bhee‑ ’plɛsɛn ’wo ’kpongtaa zö ‑an ‑dhë. Ma Pɔlö, ma yuö ꞊nɛ ’ö tɔɔ ’wuntaɔsë ’ö bhë ‑a ꞊blɛɛ’ ‑sü.
꞊Wa ’ö Pɔlö ‑ya ‑bhö Yesu Klito ‑bha yuö ’piö
24Dɔ ’ö ’kwa‑ wo ꞊nɛ, n ꞊zuögludhi ‑sü ‑mü ꞊wa ’a‑ ‑bhö ‑na ka ‑wun ’gü ‑Zlan ‑bha yuö ’gbloo ’piö bhë ‑a ‑wun ’gü. ‑A mɛ bhë, ‑a ꞊bhlë ꞊yö ꞊va. A‑ ’wun ‑dɔ ꞊nɛ Klito ‑bha mɛ ‑nu dho ’kuë‑ ‑sü ’plɛ ‑wun ꞊nɛ ’ö ’a‑ ꞊wa ‑bhö ‑na bhë. ‑A ‑kë ’dhö ‑sü ’gü, ꞊wa ’ö mɛ ‑nu ’ö ’wo Yesu Klito ‑bha ’ka, ’ö ’wo dho ‑a ‑bhö ‑be bhë, ’ö ma gia‑ ’a n ‑ma ‑bhö ‑na ꞊klöödhö bhë.
25‑Zlan ‑yö n ‑sü kö ’a kë ö bha yuökëmɛ ’ka ‑a ‑bha mɛ ‑nu ziën; ‑ya ’kluën bho n ‑ma ’dhö kö ’aan‑ kë ka ‑dhë. Yuö bhë ’ö tɔɔ ’wun ‑nu ’wo ‑gban ‑a ‑bha ’wuntaɔsë ‑bha kö ’aan‑ ꞊blɛɛ’‑ ‑kɔ ’ö‑ ’ka ‑a ’ka. 26’Wun bhë ’ö tɔɔ pë ’ö ‑kë ‑bin ‑sü ’ka ‑bezë mɛ ’plɛ ‑gɔ ꞊kwɛzü ’mɔmɔ bhë, ꞊yaa‑ yö mɛ ‑nu ’wo‑ ‑bha ’ka ‑an ‑dhë ‑dhɛgbɛadhɛ ’gü ’sabla. 27Pë ‑kë ’ö ’yi Yesu Klito ‑wun ꞊blɛɛ mɛ ’saadhö ‑dhë bhë yö ꞊ga ꞊nɛ: ‑Yö ‑dhi ‑Zlan ‑dhë kö pë ’ö ‑kë ‑bin ‑sü ’ka ’ö ’gianzë ‑kɔ ꞊suu’‑ ’saadhö ‑ta ’ö‑ ꞊bhlë ’dhö ꞊va ’sönggö ‑sönggö bhë, ‑ya ‑zɔn ö ‑bha mɛ ‑nu ‑dhë. ’Wun ’ö bhë ‑yö ’kpongtaamɛ ‑nu ’kpɛkpɛ, ’wo ’sɛgɔ ’saadhö ’gü, ‑an ‑bha ’ka; ’ö tɔɔ Yesu Klito ‑yö ka ꞊zuö’ ’gü. ’Yö‑ ‑kë ’ö ’ka ‑a ’wun giagia dɔ ꞊nɛɛ ‑Zlan ‑yö ‑dho ö ‑bha ꞊bhɔɔpë ‑glu ka ‑nu ka ’ka.
28Yi mɛ ‑nu ‑zo ‑büö, ’ö ’yi ‑an ꞊daan ‑gleng ’ka, pë ‑nu ’wo ꞊nɛ ‑an ’ka. ‑Yö ‑kë ’dhö kö mɛ ‑nu ’kpɛkpɛ ’wo ‑klu ‑sü ’ka Yesu Klito ‑bha, ‑wo kë mɛ ‑kiansü ’ka Klito ’gü. 29Yuö ꞊suu’‑ ’ö bhë ’a‑ kë ‑na ’gbee‑ ’ka ꞊faan’ ꞊va ’ö n ’gü ’ö go Yesu Klito ’gü ’ö‑ nu n ‑dhë bhë ‑a ’ka.
21Mɛ ‑nu ’ö waa wo ’yan dɔ n ‑ma do ꞊nɛ Kolɔsö ‑mɛ ‑nu ka ’dhö, ’iin ꞊nɛ mɛ ‑nu ’ö ’wo Laodise ‑an ’dhö, a‑ ’piö kö ’ka‑ ’wun dɔ ꞊nɛ, yuö ꞊suu’‑ ’gbeezë ’a‑ kë ‑na ka ‑wun ’gü bhë, ꞊ya kë n ‑gɔ zlöö ꞊nɛ ’ko zë ‑sü ’dhö. 2’Ko ꞊suu’‑ ’ö bhë, ’a‑ ‑zë ’dhö kö ka ꞊faan’ ‑yaan ’më kö ’kaan‑ kë do ‑dhɔ ‑kë ’kuë ‑sü ’gü. ’Go mü ’zü, kö ’wun ‑nu ’wo ‑gban ‑Zlan ‑bha pë ’ö ‑bin ‑sü ’ka ‑an ‑bha, ’ka‑ ‑gɛn ma, kö ’ka ‑an dɔ kpinngdhö. Ka ꞊dua’ ‑mü ’ka mɛ ’ö Klito ’dhö ‑a ’ka, ’ka‑ dɔ ’wundɔdhe ꞊va ’ka. 3Bhii Klito do ꞊nɛ, ’ö‑ ‑kɔ ‑yö ‑mɔa ‑bha kö ‑yö ’wun bho ’kɔu dɔ ‑sü ’yö ’gianzë ꞊duö ‑a nu mɛ ‑nu ‑dhë, kö pë ‑nu ’ö ’wo ’wun giagia ’ka kö ‑waan dɔ.
4’Wun ‑nu ’wo ꞊nɛ a ‑an ‑blɛɛ ka ‑dhë ’dhö ’ö tɔɔ ’maa‑ ’piö kö mɛ ’waa gbɛ ‑yö ꞊sua ‑wun ’nɛɛnɛɛ ‑nu ꞊blɛɛ’‑ ka ‑dhë kö ’kaan‑ ‑püö. 5’Kö ‑kë ꞊nɛ a ‑kë ka ’ka ꞊gbiin ’dhee, n ꞊zuö’ ‑yö ka ’piö ’ma ‑kplawo. ’Go mü ’zü, n ’gludhi ‑sü ‑mü ’ö tɔɔ ’kaa pë gbɛ ꞊kaan’ ’kuë ’iin ka ‑bha ‑zo ‑yö Klito ‑bha ‑sü bhë ‑yö ’kpëdhö.
‑Tosiadhe ’ö Klito ’gü
6꞊Dhɛ ’ö ‑kë ꞊nɛ mɛ ꞊daan’ ‑wo ’ö ‑kë Yesu Klito, ‑yö kwa Dëmɛ ’ka, ꞊ya ka ‑zo ’kun bhë, kö ka ’ta ‑sü ‑kɔ ‑yö kë ꞊nɛ mɛ ’ö ‑klu ‑sü ’ka Yesu Klito ‑bha ‑a ‑bha ’dhö.
7‑Ka ’to ‑klu ‑sü ’ka ‑a ‑bha; ‑ka ka ‑bha ‑tosiadhe ’kpɛkpɛ ‑da Klito ’gü! ’Go mü ’zü, kö ka ‑bha ‑zoyösü ‑gɛn ‑yö ‑gban kpinngdhö Yesu ‑ta, ‑yö dhoë ’dhiö ‑kplawo ꞊nɛ ‑kɔ ’ö ’wo ka ꞊daan ‑a ’ka bhë ‑a ’dhö. ’Go mü ’zü, ‑ka ‑Zlan zuö pö yi ’kpɛkpɛ ’ka, ka ꞊zuö’ ’plɛ ’ka, pë ’plɛ ‑wun ’gü!
8‑Ka kë ’slë ’ka kö ꞊kun ’ö mɛ gbɛ ‑yö ka ‑dian ‑kë ö ‑bha ’wundɔdhe ’flëë ’ö mɛ ‑nu ‑püö ‑wo ’ka bhë ‑a ’ka! Bhii ’wundɔdhe ꞊suu’‑ ‑nu ’wo bhë, ‑wo ‑go mɛ ’bhee‑ ‑nu ’kpaan ’wawa ’gü; ’ö tɔɔ ’wun ‑nu ’wo bhë, ‑wo ‑gban ‑zuu ꞊suu’‑ ’kpɛkpɛ ’ö ’piigbeedhɛ ’dhö ‑an ‑gɔ ’wo ’kpongtaa ‑an ‑gɔ. Waa ’go Klito ’piö. 9-10Klito ’ö bhë, ‑zuu ꞊suu’‑ ’kpɛkpɛ ’ö ’piigbeedhɛ ’dhö ‑an ‑gɔ, ‑yö ‑an ꞊kɔɔnmɛ ’ka. Klito ’ö bhɔ mɛbheedhɛ ‑kwi ’gü bhë, yö ꞊nɛ ’ö ‑Zlan ’dhö ‑ya ‑sü ’ka ‑a ’gü ö ’plɛ ’ka. ’Ö ꞊ya kë ꞊nɛ, ’ka ‑klu ‑a ‑bha, pë ’saadhö ’ö ‑Zlan ‑ya nu mɛ ‑nu ‑dhë bhë, ‑yö ‑dho kë ka ‑gɔ ’fɛfɛdhö.
11Ka ‑bha ’klu Klito ‑bha ‑sü ’gü, ’ka go ’bɔng ’pö ꞊nɛ ‑kɔ ’ö Zuifö ‑nu ‑bha wɔ ‑kɔ ’dhö ‑a ’ka bhë ‑a ’dhö. ’Kɛɛ ’bɔn ’yö bhë, yaa kë ’bɔn zë ‑sü ’ö mɛ bun ‑bha ‑a ’ka; ’kɛɛ Klito ꞊nɛ ’ö ka bho ka ‑bha wɔ ‑kɔ yaa ‑nu ’gü; ka bun ’plɛ ’yaa ꞊sɔɔn yaa ‑bha ꞊nuadhɛ ’gü gbɔ. 12’Ö tɔɔ ꞊nɛɛ, ꞊wa ka bɔ yiö; ‑ya ‑zɔn ꞊nɛɛ kaa‑ Klito ‑nu ’ka ga. ꞊Wa ka ‑bin ’ö ‑Zlan ꞊ya ka ‑nu ka bho ga ’gü. Ka bho ’ö‑ wo ga ’gü bhë, ‑a ‑gɛn tɔɔ ka ka ‑zo ‑yö ‑Zlan ’ö Klito bho ga ’gü bhë, ‑a ‑bha ’piigbeedhɛ ‑a ‑bha. 13’Dhiö ‑bezë (kö kaa Yesu ‑wun ‑dhɛ ’wun gia‑ ꞊kun bhë), ‑tosiadhe ‑dëü yaa kë ka ‑gɔ. Ka ꞊tɛi’ ‑yö ‑kë ‑Zlan wö ’dhiö ꞊nɛ mɛ ‑nu ’ö ꞊wa ga ‑an ’dhö. ’Yö tɔɔ ka ‑kë ꞊sɔɔnyaamɛ ‑nu ’ka. ’Go mü ’zü, ’ö kaa kë ‑Zlan ‑bha ’sɛgümɛ ‑nu ’ka. ’Kɛɛ zlöö ꞊nɛ, kaa‑ Klito ‑nu ‑Zlan ꞊ya ka bho ga ’gü; ꞊ya ziö kwa ‑bha ꞊sɔɔn yaa ‑nu ’kpɛkpɛ ‑ta. 14Kë ’ö‑ wo ’dhiö ‑bezë bhë, ‑Zlan ‑bha za ‑yö ‑kë ‑lo ‑sü ’ka kwa tuö. ‑A ‑gɛn ’ö tɔɔ kwaa ‑Zlan ‑bha tɔng ‑nu ꞊bhlë ‑ya. ’Kɛɛ ‑Zlan ꞊ya kwa ‑bha ꞊sɔɔn yaa ‑nu ’wo bhë, ꞊ya ziö ‑an ‑ta ‑an ‑lo ‑sü ’ka Klito ‑ta, ’töng ’wo‑ ꞊dua’ ‑gaatalü ‑bha bhë ‑a ’ka. 15’Töng ’ö Klito ‑yö ga ‑a ’ka ‑gaatalü ‑bha bhë, ‑yö ‑to ‑a ’gbee‑ ’ka, ‑zuu yaa ꞊suu’‑ ’kpɛkpɛ ’ö ’piigbeedhɛ ’dhö ‑an ‑gɔ ‑an ‑ta, ‑a ‑zɔn ‑sü ’ka ‑dhɛgbɛadhɛ ’gü ’kpongtaamɛ ’kpɛkpɛ wö ’dhiö ꞊nɛ yö ꞊nɛ ’ö ’piigbeedhɛ ’dhö ö ‑gɔ ’ö ꞊zië’ ‑an ’plɛ ‑ta. ’Go mü ’zü ’ö‑ ’tɔ ’dhö ꞊va ’ö ꞊zië’ ‑an ’plɛ ‑ta.
16꞊Dhɛ ’ö ꞊ya kë ’dhö bhë, kö ꞊kun ’ö ’ka ’we ‑a ‑bha ’ö mɛ ’waa gbɛ ‑yö za ‑nu dɔ ka ‑bha, ka ‑bha ‑bhöpë ’iin ka ‑bha müpë ‑nu ‑wun ’gü. ’Iin kö ꞊kun mɛ ’waa gbɛ ‑yö za ‑nu dɔ ka ‑bha ’zü, ‑a ‑pö ka ‑dhë ‑sü ’ka ꞊nɛɛ: ‑Më ‑kë ’ö Zuifö ‑nu ‑bha ’wlaan‑ ‑nu ’wo ‑kwɛ ‑bha, ’wo ’su ‑bha, ’wo ’dhɔɔgɔ ‑bha, ’kaa ‑an ꞊bhlë ‑ya ‑ɛ? 17Pë ‑nu ’wo bhë ’töüdhö, ‑wo kë ‑sü ’ka ꞊nɛ pë ‑nu ’ö ’wo dho nu ’kɛɛ ’ö waa nu ꞊kun ‑an ’bin ‑nu ’dhö. ’Kɛɛ Klito ꞊nɛ ’ö pë ‑nu ’wo bhë ‑a ‑de giagia ’ka. 18Kö ꞊kun ’ka ‑we ‑a ‑bha kö mɛ ’waa gbɛ ‑yö za ‑lo ka tuö ‑a ‑pö ‑sü ’ka ka ‑dhë ꞊nɛɛ: Ka ꞊dua’ ‑mü kö ’ka ka ‑de ’sü ’tee ’iin kö ’ka ‑Zlan ‑bha bɔmɛ ‑nu gba. ’Iin ’zü ’wo‑ pö ꞊nɛɛ ‑Zlan ꞊ya ’wun ’bhaa ‑nu ‑zɔn wo ‑dhë ’yanpiöpë ’gü. Mɛ ‑nu ꞊suu’‑ ’wo bhë, ‑wo wo ‑de ‑sü ꞊va ’kpaan ’wawa. ‑An ‑bha ‑zotadhe ‑yö ‑go ’kpongtaa zö ꞊zian’. 19Mɛ ‑nu ’wo bhë ’waa ’we ‑a ‑bha kö ’wo ‑klu Klito ’ö ‑ya ‑sü ’ka ö ‑bha mɛ ‑nu ‑dho ’kuë‑ ‑sü kwa ‑gɔ ’dhiö bhë ‑a ‑bha. (Wo ‑de ‑püö ’wo‑ wo). Bhii ka ‑de gia‑ ka‑ ‑dɔ ꞊nɛ, mɛ ’oo mɛ ’ö ‑klu ‑sü ’ka Klito ‑bha bhë, ‑a ‑bha ꞊faan’ ‑yö ‑go Klito ’gü, ’ö wo ‑nu ’wo ‑klu ‑sü ’ka wo ’kuë‑ bhii ‑naa gbɛ ’yaa ‑an ziën ꞊nɛ ‑kɔ ’ö mɛ ’bhee‑ dɔ ‑nu ’dhö ‑a ’ka mɛ buën‑ bhë ‑a ’dhö; pë ’ö ‑an ziën ’dhö bhë ’ö ‑kë ꞊nɛ mɛ ꞊mlëë waa‑ mɛ ‑gɛn ‑an ‑yö ’ko tuö ‑dhɛ ‑nu ’ö mɛ ga ‑nu ‑klu ‑na ’kuë‑ bhë ‑a ’dhö. Klito ‑yö ö ‑bha ‑to ö ’piö ‑mɛ ‑nu ‑lo ’kuë‑ kö ‑waan kë ꞊nɛ mɛ ‑lü dosɛn ’dhö. Yö ꞊nɛ ’ö Yesu ‑bha mɛ ‑nu ‑dho ’kuë‑ ‑sü ’ka, ‑yö kë ’dhö kö ‑wo ꞊kpɛa’ ꞊nɛ ‑kɔ ’ö‑ ’ka ‑Zlan ‑zo ’kun ‑wun ’gü bhë ‑a ’dhö.
20꞊Dhɛ ’ö ‑kë ꞊nɛ kaa‑ Klito ‑nu ’ka ga bhë, kö ’ka ’go ‑zuu yaa ꞊suu’‑ ’kpɛkpɛ ‑nu ’ö ’piigbeedhɛ ’dhö ‑an ‑gɔ ’ö ’wo ’kpongtaa bhë ‑an ’piö. ‑Më ’ö ‑kë ’ö ’ka ka ‑bha ‑tosiadhe ‑kë ꞊nɛ ’kpongtaamɛ ‑nu ’ö ‑zuu yaa ’piigbeezë ‑yö ‑an ꞊kɔɔn ‑an ’dhö e? ‑Më ’yö ‑kë ’ö ’ka ‑we ‑a ‑bha ’ö ’wo ka ’gbee‑ ‑ta bho wo ‑bha tɔng ‑nu ’ka ꞊nɛ ‑kɔ ’ö ’ka ꞊tun ‑a ’ka ’kpongtaa ‑a ’dhö e? ’Ö tɔɔ ‑wa ‑pö ka ‑dhë ꞊nɛɛ: 21«Pë ꞊suu’‑ ’bhaa ‑nu ’wo ꞊nɛ kö ꞊kun ’ka ‑an sü, ‑an ’bhaa ‑nu ’wo ꞊nɛ kö ꞊kun ’ka ‑an ‑bhö, ‑an mɛ ‑nu ’wo ꞊nɛ kö ꞊kun ’ka pa ‑an ’ka!» 22Tɔng ‑nu ’wo ’dhö bhë, ‑wo ‑go mɛ ’bhee‑ ‑nu ‑bha ‑zotadhe ’gü, waa ’go ‑Zlan ’piö, ’wo tɔɔ pë ‑nu ’wo ‑gban ‑an mɛ ’ö wo ’ka dho to, ’wo ‑an dɔ ‑na ka ‑dhë bhë; ‑Zlan ‑yö ‑an ‑nu kwa ‑dhë, kö ’kwaan‑ ‑an kë ‑bhöpë ’ka ’iin kö ’kwa kwa ‑bha ‑wun kë ‑an ’ka. 23’Wun gia‑ ‑mü, tɔng ꞊suu’‑ ‑nu ’wo bhë, ‑wo ‑kë mɛ ’bhee‑ ‑nu wö ’dhiö ꞊nɛ tɔng ’ö‑ ’kun ‑sü ’dhö ‑së ‑an ’dhö. Bhii ‑wa ‑kë kö ‑zuu ’piigbeezë ‑nu, ’ö ’waa mɛ gbɛ ’yan ’dhiö bhë kö mɛ ‑nu ‑wo ‑an gba ꞊nɛ ‑kɔ ’ö ‑an ꞊zuö’ ’piö bhë ‑a ’dhö. ’Iin ’zü, ’wo‑ ‑kë kö ‑waan wo ‑de ꞊yɔɔn sia‑. ’Go mü ’zü kö ‑waan wo ‑de bun ’klo bhɔ. ’Kɛɛ tɔng ‑nu ’wo bhë, ‑an ꞊bhlë ’yaa ’dhö, ’ö tɔɔ ‑kɔ ‑mɔa ‑bha ‑sü gbɛ ’yaa ‑an ‑gɔ kö ‑waan nu mɛ ’bhee‑ ‑dhë ‑zo ‑kë ‑de bun ’piö ‑sü ‑bha.
31꞊Dhɛ ’ö ‑kë ꞊nɛ kaa‑ Klito ‑nu ’ka ’go ga ’gü bhë, kö pë ‑nu ’ö ’wo dhang‑ ’gü, ‑dhɛ ’ö Klito ’dhö ‑ya ‑sü ’ka ‑Zlan ꞊kwɛɛgüdhɛ gia‑ ’ö ꞊bhlëzë ‑a ‑bha bhë, wo ꞊nɛ ’ka dho ‑an ꞊mɛɛ’‑ kö ’kaan‑ ‑an yö. 2’Ka ka ‑zo bho ’kpongtaapë ‑nu ’piö kö ’ka ka ’yan ‑klu pë ‑nu ’wo dhang‑ ’gü bhë ‑an ‑bha! 3Bhii ka ga ‑sü ’ka ’kpongtaapë ’kpɛkpɛ ‑nu ‑gɔ, ’ö tɔɔ ka ‑bha ‑tosiadhe ‑dëü waa‑ Klito ‑wo ‑bin ‑sü ’ka ‑Zlan ’gü. 4Ka ‑bha ‑tosiadhe giagia ’ö tɔɔ Klito. ’Töng ’ö Klito dho ‑wo ‑a ’ka ’kpongtaamɛ ‑nu ’kpɛkpɛ ’yan ’dhiö bhë, ka ‑de ’pö, ka ‑nu ka ‑dho ‑wo ‑a ’ka ’kpongtaamɛ ‑nu ’plɛ ’yan ’dhiö; ’yö‑ ‑bha ’tɔbhɔdhe ’ö bhë, ’yö ka ‑nu ’ka dho kë ‑a ’gü.
’Wun ’ö ‑gban ‑tosiadhe zii waa‑ ‑tosiadhe ‑dëü ‑an ‑bha
5꞊Dhɛ ’ö ’ka ga ’kpongtaapë ‑nu ‑gɔ bhë, kö ‑ka ka ꞊kwaa’‑ pë yaa ꞊suu’‑ ’saadhö ’ö ‑kë ka ‑bha ‑tosiadhe ’gü ‑an ‑zü! ‑Yö ‑kë ’nuëbɔ ’kun ‑sü ’ka oo, ‑da dhe ’piö ‑sü ’ka oo, ꞊mlaabɔ ’kun ‑sü ’ka oo, ‑zotadhe yaa ’ö ‑gban ꞊sɔɔn kë ‑sü ‑bha oo, ꞊zuöyaadhɛ ’ö ‑kë ‑Zlan wö ’dhiö ꞊nɛ gbapë ‑nu gba ‑sü ’dhö, waa‑ ‑to pë ‑nu ’piö ‑ziögɔüsüzë ’ka ‑sü ’wo bhë ’saadhö, ‑ka ka ꞊kwaa’ ‑an ’plɛ ‑zü! 6Wɔ ‑kɔ ꞊suu’‑ ‑nu ’wo bhë, ’yö ‑an ‑wun ’gü, ’wun ‑yö na ‑Zlan ‑zuë, ’yö dho za ‑lo mɛ ‑nu ’ö ’waa‑ ꞊bhlë ‑ya bhë ‑an tuö. 7꞊Dhɛ ’ö ’ka ‑kë ꞊sɔɔn yaa ‑nu ’wo bhë ‑an ‑bha ’gan ’gü ‑bezë, ka ‑kë wɔ ‑kɔ ꞊suu’‑ ’ö ’dhö bhë ‑a ’gü.
8’Kɛɛ zlöö ꞊nɛ pë ‑nu ’ö ’wo ‑gban ‑naadhe ‑bha ’iin ꞊zuö’ ’dhiö‑ ‑dhɛ ‑bha ’iin ’zü ꞊zuö’ ’piö yaa ‑dhɛ ‑bha, ‑ka ka ‑kɔ bho ‑an ’gü! Kö ꞊kun mɛ gbɛ ‑yö ’si bho mɛ ‑gɔ ’iin kö ꞊kun ’ö mɛ gbɛ ‑yö ’dhi yaa ’dɔɔ dɔ! 9’Go mü ’zü kö ꞊kun ’ka ꞊sua ‑kë ka ’ko ‑nu ‑gɔ! ’Ö tɔɔ ’ka ka ‑loo zii waa‑ ö kë ‑kɔ ‑nu bho ka ‑bha. 10’Ö ‑Zlan ‑yö ka gbaa ꞊sɔɔn ‑dëü ’yö dho ‑a ꞊dhië’ ‑kwaa ’dhö ‑kplawo kö ‑yö ’dho, ‑yö kë ꞊nɛ yö ’ö mɛ ’bhee‑ ‑nu ‑kë bhë ‑a ‑de ꞊sɔɔn ’dhö ‑a ’ka. Bhii ‑kɔ do bhë, ’ka dho dhoë kö ’ka ‑Zlan ꞊dɔa’ ’fɛfɛdhö. 11Mɛ ’oo mɛ ’ö bɔ zian ꞊suu’‑ ’ö ꞊nɛ ‑a ‑ta, ‑yö Zuifö ’ka oo, ’yaa Zuifö ’ka oo, ‑yö ‑go ’bɔn ’iin ’yaa ’go ’bɔng, ’iin mɛ ‑nu ’ö ‑an wɔ ‑kɔ ’yaa ꞊nɛ Glɛkö ‑mɛ ‑nu ‑bha ’dhö ’iin ’wo ‑wɔ ꞊nɛ ꞊kwɛzümɛ ‑nu ’dhö oo, ‑yö ‑kë ꞊nua ’ka ’iin ’yaa ꞊nua ’ka oo, pë ‑nu ’wo bhë ‑an ꞊bhlë gbɛ ’yaa ’dhö. Pë do ’ö ’gianzë ’ö ꞊zië’ pë ’plɛ ‑ta ’ö tɔɔ Klito ’ö mɛ ‑nu ꞊suu’‑ ’kpɛkpɛ ’ö ’wo bhë ’ö ’wo ‑klu ‑sü ’ka ‑a ‑bha bhë, ‑yö ‑an ’gü.
12꞊Dhɛ ꞊ya kë ’dhö, ’ka kë ‑Zlan ‑bha ’sɛgümɛ ‑nu ’ka, bhii ka ‑dhɔ ‑ya ‑kë, yö ꞊ga ’ö ka sü kö ’ka kë ‑a ‑bha ’ka bhë. Kö ka ‑bha wɔ ‑kɔ ’gü, ‑ka kë mɛ ‑nu ’yena yö ‑mɛ ‑nu ’ka, ’iin ’wunsëkëmɛ ‑nu ’ka. Ka kë ‑de ‑yɔɔn sia‑ ‑mɛ ’ka. ’Go mü ’zü kö ’ka kë mɛ ’lëëlë ’ka ’iin ’zü ꞊zuösaamɛ ’ka. 13‑Ka kë ’lëëlë ‑da ‑naadhe ’gü ꞊dhia ka ’ko ‑nu buëndhö! ’Ö ꞊ya kë ꞊nɛ mɛ ’bhaa ꞊ya ’wun yaa ‑kë ka ’ka, ‑kaa ‑bha ‑wun ’to ꞊nɛ ‑kɔ ’ö kwa Dëmɛ ‑yö ‑ziö ‑a ’ka ka ‑bha ꞊sɔɔn yaa ‑nu ‑ta ‑a ’dhö! 14’Kɛɛ pë ’ö‑ ꞊bhlë ’dhö ꞊va ’ö tɔɔ kö ’ka ka ’ko ‑nu ‑dhɔ kë. ‑Dhɔ ꞊suu’‑ ’ö bhë ꞊nɛ ’ö dho ka ‑klu ’kuë‑ ’kpëdhö. 15꞊Zuöyagluu ’ö Klito ’dhö ‑a nu ‑na ka ‑dhë bhë ’ö dho yö ka ‑dhë ’dhiö kö ka ‑bha ’ta ’sü ‑kɔ ‑nu ’ö ka ’ko ‑nu ’piö ‑yö kë ꞊zuöyagluu ꞊suu’‑ ’ö ‑Zlan ‑yö ka ‑dhɛ ‑a ’ka bhë ‑a ’gü. ꞊Ya kë ’dhö kö ka ‑dho kë dosɛn ’kpaan ꞊nɛ mɛ ‑lü do ’dhö. ‑Ka ‑Zlan zuö pö pë ‑nu ’wo bhë ‑an ‑wun ’gü! 16꞊Ya kë ꞊nɛ ’ka ’dho ka ’ko ꞊bhaa, ‑ka ’we ‑a ‑bha kö ‑wo ’ö ‑gban Klito ‑bha ‑wa ꞊blɛɛ’‑ ka ‑dhë ö ’plɛ ’ka! ‑Ka ka ’ko ‑nu ꞊daan’‑ ‑Zlan ‑wo ’ö bhë ‑a ’ka! ’Go mü ’zü kö ’ka ka ’ko ‑nu ꞊faan’ ’më ’wun dɔ ‑sü ’ö go ‑Zlan ’piö bhë ‑a ’ka. ‑Ka ’tan ‑nu bho ‑Zlan zuö pö ‑sü ’ö ka ꞊zuö’ ’plɛ ’ka ‑a ’ka! ‑Ka ’Tan ’sëëdhɛ ’gü ‑tan bho ‑Zlan ’piö! ’Go mü ’zü, ‑ka ’tan ’ö dho Yesu ’tɔ kë ꞊va, ’ka‑ ‑da ’iin ’tan ‑dhɛ ‑nu ’ö ‑Zuu ’slööslö ‑ya ‑zɔn ka ‑dhë, ‑ka ‑an ‑da ’pö! 17Pë ‑dhɛ ‑nu ’ö ’wo dho kwa Dëmɛ Yesu ’tɔ bhɔ, ‑ka ‑an kë ka këyuö waa‑ ka ‑bha ’wun ꞊blɛɛ’ ‑sü ‑nu ’plɛ ’gü! ‑Zlan ’ö kwa Dë ’ka bhë, ‑kaa zuö pö pë ’plɛ ’ö bɔ ‑a ’ka Yesu Klito ‑ta ’ö‑ nu kwa ‑dhë bhë ‑a ‑wun ’gü!
’Kɔɔmɛ ‑nu ‑bha wɔ ‑kɔ
18Gwaan ‑dhoo ‑nu, ‑ka ka ’to ’to! Dhebɔ ꞊dua’ ‑mü kö ‑yaan ö ‑gɔ ꞊yɔɔn ö ꞊gɔn ‑dhë sia‑. Bhii dhoo ‑nu ’wo ‑klu ‑sü ’ka kwa Dëmɛ ‑bha bhë, ‑a ‑kë ’dhö ‑sü ‑yö ‑an ‑ma ‑kun.
19Dhe ‑mɛ dë ‑nu, ka ‑de ’pö, ‑ka ka ’to ’to! Gɔɔn‑ ꞊dua’ ‑mü kö ‑a bɔɔ ‑dhɔ ‑ya kë; kö ꞊kun ’ö ’ka ‑an ’yënng bhɔ!
20’Në ‑nu, ‑ka ’wun ma ka ’kpɔmɛ ‑nu ‑ta, pë ’saadhö ’plɛ ’gü! Bhii ‑a ‑kë ’dhö ‑sü ‑yö ‑dhi ‑Zlan ‑dhë, mɛ ’ö ’ka ‑klu ‑sü ’ka kwa Dëmɛ ‑bha ka ‑bha ’ka.
21’Në dë ‑nu, kö ꞊kun ’ka ‑we ’në ‑dhë ‑kplawo ‑kplawo! ꞊Ya kë ’dhö, ‑an ’gü dho ga ka ‑wun ’ka ꞊tëë’ ꞊tëëdhö.
22꞊Nua ‑nu, ‑ka ’wun ma ka ‑gɔmɛ ‑nu ‑ta, pë ’saadhö ’plɛ ’gü! Kö ꞊kun ’ka mɛ ‑nu ’yan ’dhiö ‑yuö ‑kë kö ‑waan ka ‑wun ‑së ꞊blɛɛ’‑, ’kɛɛ ‑ka kaa‑ yuö kë ꞊zuö’ ’puu ’ka ꞊nɛ ‑kɔ ’ö mɛ ‑nu ’ka kwa Dëmɛ ꞊bhlë kpɔ ’ö ka ‑ma kuën bhë ‑a ’dhö. 23‑Yö ‑kë yuö ꞊suu’‑ ’oo ꞊suu’‑ ’wo‑ nu ka ‑dhë ‑a ’ka, ‑kaa kë ka ꞊faan’ ’plɛsɛn ’ka ꞊nɛ ‑kɔ ’ö ’ka kwa Dëmɛ ‑bha yuö ꞊kaa’ ‑a ’dhö! 24Bhii ka ‑gɔmɛ giagia ’ö ’ka yuö kë ‑na ‑a ‑dhë bhë, ’ö tɔɔ Klito; yö ꞊nɛ ’ö dho ka ’kian ’ö ‑kë pë ’ö ‑Zlan ‑ya ‑ya ö ‑bha ’sɛgümɛ ‑nu ‑gɔ bhë ‑a nu ka ‑dhë. 25Bhii ’wun yaakëmɛ ‑nu ’wo bhë, ‑Zlan ‑yö ‑dho ‑a bho ‑an ‑gɔ, yö ꞊ga tɔɔ ’yaa mɛ gbɛ ‑zë ’gü.
41‑Gɔmɛ ‑nu, pë ’ö ka ‑bha ꞊nua ‑nu ꞊dua’ ’ka, ‑kaa kë ‑an ‑dhë ö ’plɛ ’ka! Bhii ‑yö kë ka ’yaan ꞊nɛ ka ‑de ’pö, ka ‑gɔmɛ ‑yö ‑dhö; ‑yö dhang‑ ’gü.
2‑Ka ’dho ’dhiö ‑bhɛa ‑Zlan ‑dhë ‑sü ’ka ‑kplawo! Kö ꞊kun ka ’gü ‑yö ga ‑Zlan zuö pö ‑sü ’ka! 3꞊Bhɛa’ ‑sü ’ö ’dhö bhë, ka‑ wo ‑na, ‑kaa wo yi ‑wun ’gü ’pö, kö ‑Zlan ‑yaan zian ’dhi ’po yi ‑gɔ kö ’yiën‑ ‑a ‑wo ꞊blɛɛ’‑ mɛ ‑nu ‑dhë, pë ’ö ‑gban Klito ‑bha ’ö ‑bin ‑sü ’ka kö ’yiën‑ ‑a ‑gɛn pö mɛ ‑nu ‑dhë. Bhii pë ’a‑ ‑kë ‑kanso ’kɔɔdhö zö ’ö bhë. 4‑Ka ꞊bhɛa’ ’dhö kö pë ’ö ‑kë ‑bin ‑sü ’ka bhë ’aan‑ ‑a ꞊blɛɛ’‑ mɛ ‑nu ‑dhë kö ‑waan ‑a ‑gɛn ma ’papadhö; bhii yuö ’ö ‑Zlan ‑ya ’kluën bho n ‑ma ’ö bhë.
5‑Ka kë ’kpaakpa mɛ ‑nu ’ö ’waa Klito ‑wun ‑dhɛ ’wun gia‑ bhë ‑an ’piö! ’Ö ꞊ya kë ꞊nɛ kaa‑ mɛ ‑nu ’wo bhë, ’ka kë ka ’ko ꞊bhaa, kö ꞊kun ’ka‑ ‑kë ’ö ’töng bhë ’ö ‑ziö ka ‑ta ’kpaan ’wawa, ’kɛɛ ‑ka ‑Zlan ‑wo ꞊blɛɛ’‑ ‑an ‑dhë! 6Ka ’wun ꞊blɛɛ’ ‑na, ka ’dhi ‑wo ‑nu ‑wo kë ‑së, ‑a din ‑yö ’to mɛ ‑nu ’dhii! ’Ka ’wun ‑nu ‑daa kë mɛ ‑nu ‑gɔ ꞊nɛ ‑kɔ ’ö‑ ’yi dho ‑kan ‑a ’ka ‑Zlan ’dhi ‑a ’dhö!
Pɔlö ‑nu ‑bha ‑we Kolɔsö ‑mɛ ‑nu ’ka ‑sü
7Tisikö, kwa dheglu ’nëgɔɔnzë ’ö ‑kë Yesu ‑bha mɛ ‑nu ‑bha yuökëmɛ ‑to ‑wo ’gü ‑sü ‑zë ’ka, ’ö ‑kë n yuökëyɔɔ ’ka kwa Dëmɛ ‑bha yuö ’gü bhë, yö ꞊nɛ ’ö ’wun ’ö ‑gban n ‑ma, ’ö dho ‑a ’plɛ ꞊blɛɛ’‑ ka ‑dhë. 8A‑ ‑bɔ ka ‑dhë ’dhö kö ka ꞊faan’ ‑yaan ’më yi ‑bha ‑tosiadhe ‑nu ’ö ’yi‑ kë ‑na ’nö bhë ‑a ꞊blɛɛ’‑ ’ö ’dhoë‑ wo ka ‑dhë bhë ‑a ‑wun ’gü. 9Onezimë ’ö ‑kë kwa dheglu ’nëgɔɔnzë ‑to ‑wo ’gü ‑sü ‑zë ’ka, ’ö ‑kë Kolɔsö ’në ’ka bhë, ’ö waa‑ Tisikö ’wo dho nu ka ’piö ’wun ’saadhö ’ö kë ‑na zö, ’ö ‑gban yi ‑bha ‑a ’ka bhë.
10Alitaakö ’ö yi ‑nu ’yi ‑kanso ’kɔɔdhö zö bhë, ꞊ya ’we kaa! Maakö ’ö ‑kë Baanabasö dë dheglu ‑bha ’në ’ka bhë, ꞊ya ’we kaa ’pö! ꞊Ya kë ꞊nɛ ꞊ya nu ka ’piö ’ma, ‑kaa ‑nia ’kun ‑së ’ka ꞊nɛ ‑kɔ ’a ka ’paan bhoë bhë ‑a ’dhö! 11Yesu ’wo‑ ‑dhɛ ‑na Zutusö bhë, ꞊ya ’we kaa ’pö. Zuifö ‑nu ꞊plëëzë ’wo Yesu ‑wun ‑dhɛ ’wun gia‑ bhë ‑a mɛ ‑yaaga ’kpaan ꞊nɛ ’ö yi ‑nu ’yi ‑Zlan ‑bha ‑gludëdhɛ kë ‑sü ‑yuö kë ‑na. ‑An ‑bha yuö ‑kë n ’piö ‑sü ’ö bhë, ‑ya ‑kë ’ö n ꞊faan’ ‑yö më ꞊duö.
12Epaflasö, ka ‑de ‑gɔ ’sɛ ’gü ’në, ꞊ya ’we kaa! Yesu Klito ‑bha yuökëmɛ ‑mü ‑a ’ka. ‑A ’gü ’yaa ga ’gbɛɛdhö ꞊bhɛa’ ka ‑wun ’gü ꞊faan’ ꞊va ’ka ‑a ’ka. ‑Yö ꞊bhɛa’‑ ’dhö kö ’kaan‑ dɔ ka ‑bha ‑zo ‑yö ‑Zlan ‑bha ‑sü ’gü, ’iin ’zü kö ’kaan‑ kë mɛ ‑kiansü ’ka ‑Zlan ‑bha zian ‑ta. ’Go mü zü kö ’kaan‑ ‑Zlan ‑zo ’kun ‑wun ’plɛsɛn dɔ ’fɛfɛdhö kö ’kaan‑ ’we ‑a kë ‑sü ‑bha. 13A ‑mɔa ‑bha kö ’a ‑tɔmɔdhɛ kë Epaflasö ‑bha ‑a pö ‑sü ’ka ꞊nɛɛ: ‑Yö ö ꞊faan’ ’plɛ ‑sü ’ö ꞊bhɛa ‑a ’ka, ka ’dhö, ‑Zlan ‑bha mɛ ‑nu ’wo Laodise waa‑ ‑an mɛ ‑nu ’ö ’wo Ilapolisö ka ’plɛ ka ‑wun ’gü. 14Lukö, kwa ‑bha ꞊dhɔngtrɔ ’glusëëzë waa‑ Demasö ꞊wa ’we kaa!
15’Ma ’we kwa dhegluzë ‑nu ’wo Klito ’gü ’ö ’wo Laodise ‑an ’ka! ’Ma ’we Nɛfa waa‑ ‑Zlan ‑bha mɛ ‑nu ’wo bhɔ ’kuë‑ kë ‑na ‑a ‑gɔ kɔɔ bhë ‑an ’ka! 16꞊Ya kë ꞊nɛ ’sëëdhɛ ’ö ꞊nɛ ’ka yën ‑a pö ‑sü ‑bha, ‑ka ka ‑zo kë ‑a ’piö kö ’kaan‑ ‑a bɔ ‑Zlan ‑bha mɛ ‑nu ’wo Laodise ‑an ‑dhë, kö wo ‑de ’pö ‑waan ‑a pö. Laodise ‑mɛ ‑nu ‑bha ’a‑ bɔ ‑an ‑dhë bhë, ‑wo ‑dho ‑a bɔ ka ‑dhë; ‑kaa pö ’pö! 17꞊Ya ’go mü, ‑kaa pö Asipö ‑dhë ꞊nɛ kwa Dëmɛ ‑bha yuö ’ö‑ ’kluën ‑yö bho ‑a ‑bha bhë, ‑yö ö ‑zo kë ‑a ’piö, ‑ya kë ‑së ’ka!
18꞊Wekawo ’ö ꞊nɛ n ‑de ‑kɔ pin giagia ‑mü: Ma Pɔlö, ’ma ’we kaa! Kö ꞊kun ’ö ka ‑zlö ‑yö ‑trö ꞊nɛ a ꞊tun ‑kanso ’kɔɔdhö!
‑Zlan ‑yö ’dhuë‑ kpɔ ka ‑bha!