’Sëëdhɛ ꞊plɛ ‑naa
’ö Pɔlö ‑ya bɔ
Timote
‑dhë bhë ’ö ꞊nɛ
11-2Timote, bhi ’ö ü ‑dhɔ ‑yö n ‑kë ꞊nɛ ‑kɔ ’ö n ‑de gbö ‑dhɔ ‑yö n ꞊kaa’ ‑a ’dhö, ma Pɔlö ’a ’sëëdhɛ ꞊nɛ ’a‑ bɔ ü ‑dhë. Yesu Klito ‑bha bɔmɛ ‑mü n ’ka, bhii ‑Zlan ‑dhi ‑a ‑dhë ‑wun ‑mü kö ’a kë ‑a ’ka. ‑Zlan ‑ya ‑pö n ‑dhë, pë ’ö‑ ’piö kö ‑yaan ‑a kë ’a‑ ꞊blɛɛ’‑ mɛ ‑nu ‑dhë. Pë ’ö bhë ’ö tɔɔ ꞊toëpö ‑këdhösü ‑yö ‑dho kë ‑an ‑bha ’ka, ‑klu Yesu Klito ‑bha ‑sü ’gü. A‑ ‑dhɛ kwa Dë ‑Zlan waa‑ kwa Dëmɛ Yesu Klito ‑an ‑gɔ kö ‑wo ü ’yena yö, ‑wo ’glusë kë ü ’ka. ‑Wo ü gbaa wo ‑bha ꞊zuöyagluu ’ka.
Pɔlö ‑bha ‑Zlan zuö pö ‑sü waa‑ ‑a ‑bha mɛ ‑nu ꞊faan’ ‑më ‑to ‑wo ’gü ‑sü ‑bha ‑sü
3A ‑Zlan ‑bha yuö ‑kë, n ꞊zuö’ ’puu ’ka ꞊nɛ ‑kɔ ’ö n ’bhɛma ‑nu ‑wa ꞊kaa’ bhë ‑a ’dhö. A ü ‑bha ꞊bhɛawodhe ‑kë ‑kplawo ‑Zlan ‑dhë ’töng ’saadhö ’ka, ’ö ’a‑ zuö pö ü ‑wun ’gü. 4A n ‑zo ‑ta ’töng ’ö ’kwa kaan kwa ’kuë‑ ’iin ü ‑bha ’gbo ‑nu ’ü‑ bɔ ’töng bhë ‑a ’ka bhë ‑a ’ka. A‑ ’piö kö ’ko ‑kpën ko ’kuë‑ ’zü. ꞊Ya kë ’dhö n ꞊zuö’ ’glu ‑dho dhi ’sönggö ‑sönggö. 5‑Zo ‑yö ‑Zlan ‑bha ‑sü ’yö ‑kë ü ’na Loisö waa‑ ü dhe Nisö ‑an ‑gɔ bhë, ‑a ‑bha ‑kë ü ‑gɔ ‑sü ’ö bhë, ’ma n ‑zo ’ta ‑a ’gü a ‑Zlan zuö ‑pö ’sönggö ‑sönggö. 6‑A ‑wun ’gü ’a ü ‑zo ‑büö ‑kɔ ‑mɔ ’wun ‑bha ‑sü ’ö ‑Zlan ‑ya nu ü ‑dhë kö ’ma n ‑kɔ kpa ü ‑ta ꞊bhɛa’ ‑sü ’ka bhë kö ’üën‑ ‑a ’kun ’gbee‑! (’Ö tɔɔ ‑Zlan ‑yö yuö ’bhaa waa‑ ‑a kë ‑sü ‑faan ‑nu ü ‑dhë kö ’üën‑ ‑a kë.) 7Yuö ‑nu ’ö ‑Zlan ‑yö ‑an nu ü ‑dhë bhë kö ꞊kun ’ö ’suö ‑yö ü ‑kë ‑an kë ꞊dhia, bhii ‑Zuu ’slööslö ’ö‑ nu kwa ‑dhë bhë ‑yö kwa ‑zo ‑gban ’yö‑ ‑kë kö ꞊kun ’ö ’kwa dho suö pë gbɛ ‑dhë, ’kɛɛ ‑ya ‑kë kö ’kwaan‑ kë mɛ ꞊faanzë, ’ö ‑Zlan waa‑ mɛ ‑nu ‑dhɔ ‑yö ‑an ‑kë waa‑ mɛ ’wo wo ‑de ꞊kɔɔn ‑an ’ka.
8‑A ‑wun ’gü kö ꞊kun ’ö lë‑ ‑yö ü ‑kë, ’wun ’ö ‑gban kwa Dëmɛ ‑bha ‑a ‑blɛɛ mɛ ‑nu ‑dhë ‑sü ’ka! Ma ’a ‑kanso ’gü ’wun ’ö ‑gban Yesu ‑bha ‑a ꞊blɛɛ’ ‑sü ‑wun ’gü bhë, kö ꞊kun ’ö lë‑ ‑yö ü ‑kë n ‑dhë ’pö! ’Kɛɛ ‑bhö ꞊nëng n ‑ma, ’ü ’we ‑a ‑bha kö ko ’klo ‑yaan bhɔ, ko ‑bha ’wuntaɔsë ꞊blɛɛ’ ‑sü bhë ‑a ‑wun ’gü! ’Ö tɔɔ ꞊faan’ ’ö go ‑Zlan ’piö bhë ‑yö ‑dho ‑a kë kö ’klobhɔdhe ’ö bhë ’üën‑ ‑a bun. 9‑Zlan ‑yö kwa ‑dha ’ö‑ pö kwa ‑dhë ’kwa kë ’slööslö kö ’kwaan‑ kë ‑a ‑bha ’ka. Yaa kë ꞊nɛ kë ’kwa‑ wo ’wun ‑së kë mɛ ‑nu ‑dhë ‑mɛ ’ka. ‑Ya ‑kë ’dhö, bhii ‑ya ’piö kö ’ö ’wunsë kë kwa ‑dhë. ’Wunsë ’ö ’dhö bhë ꞊dhɛ ’ö‑ ‑ya ö ꞊zuö’ ’piö ‑yaan kë kwa ‑dhë bhë ‑a ‑dhɛ ꞊ya ꞊glɔɔ. ꞊Dhɛ ‑kë ’dhö ‑ya ‑kë kwa ‑dhë ꞊bɔa’ Yesu Klito ’gü ‑sü ’ka. 10’Kɛɛ ꞊dɛɛ bhë ꞊yaa‑ ‑zɔn kwa ‑dhë ꞊nɛ ö ’glu ꞊yö ‑së kwa ’ka kwa Dhamɛ Yesu Klito ‑bɔ kwa ‑dhë ‑sü ’ka. Yesu Klito ꞊ya lë‑ ’kpɔ ga ‑ta ’ö tɔɔ ꞊ya kë ꞊nɛ ’kwa ga, pë yaa ’gbee‑ gbɛ ’ka ’dho kë kwa ’ka. ’Ö‑ pö kwa ‑dhë ꞊nɛ ꞊ya kë ꞊nɛ ’kwa‑ ‑bha ’wuntaɔsë ’ö bhë ’kwa‑ ma ’ö ’kwa ’we ‑a ‑wun ‑bha, ‑Zlan ‑yö ‑dho bun ‑dëü ’ö ’yaa ꞊siö’ ‑a nu kwa ‑dhë kö ꞊toëpö ‑këdhösü ‑yaan kë kwa ‑bha ’ka.
11‑Zlan ‑yö ’wun ‑nu ’wo ꞊nɛ ‑an ’kluën ‑bho n ‑ma kö ’aan‑ ꞊blɛɛ’‑ mɛ ‑nu ‑dhë. ‑Yö n ‑sü kö ’aan‑ kë ‑a ‑bha bɔmɛ ’ka, ’go mü ’zü kö ’aan‑ mɛ ‑nu ꞊daan’‑ ’wun ‑nu ’wo bhë ‑an ’ka.
12Pë ’ö ‑kë ’ö n ’klo ’dho bhɔ ‑na ‑kanso ’gü ꞊dɛɛ bhë ’ö bhë. ’Kɛɛ ’kö ‑kë ꞊nɛ n ’klo ‑yö ‑bhɔ ’dhee, lë‑ ’ka ’dho n kë, bhii ’ö tɔɔ a Yesu Klito ‑dɔ, ’a n ‑zo yö ‑a ‑bha, ’ö ’a‑ ꞊tɛi’ dɔa ꞊nɛ pë ’a‑ ’kluën bho ‑a ‑bha, ‑yö ‑dho ‑a ꞊waannu ‑së ’ka, ’ö dho ’ö yöë yi ’ö dho za dɔa mɛ ‑nu ‑bha bhë ‑a ‑bha.
13Timote, ‑bhö ’dho Yesu ‑wun ‑dhɛ ’wun gia‑ ‑sü ’ka ’dhiö! ’Go mü ’zü ‑dhɔ ‑yö kë ü ’gü ‑yö kë ‑dhɔ ꞊kaa’ do ’ö kwa ‑klu Yesu ‑bha ‑a ’ka! ꞊Ya kë ꞊nɛ ’bha ’wuntaɔsë ꞊blɛɛ’‑ mɛ ‑nu ‑dhë, ‑yö kë ’wun ‑taɔ gia‑ ’a‑ ꞊blɛɛ’‑ ü ‑dhë bhë ‑a ’ka. 14’Wuntaɔsë ’ö ‑Zlan ‑ya ’kluën bho ü ‑bha kö ’üën‑ ‑a ꞊blɛɛ’‑ mɛ ‑nu ‑dhë bhë ‑a ’kun ’gbee‑! ‑Zuu ’slööslö ’ö kwa ’gü bhë ‑yö ‑dho ü gbaa ꞊faan’ ’ka kö ’üën‑ ü ‑zo kë ‑a ’piö.
15Ü‑ ꞊tɛi’ dɔ ꞊nɛ Yesu ‑wun ‑dhɛ ’wun gia‑ ‑mɛ ‑nu ’töüdhö ’wo Azi ‑sɛ ’gü ꞊wa wo bo n ‑wun ’ka. Fizɛdhö waa‑ Mozɛnë ‑nu ‑wo mɛ ‑nu ’wo bhë ‑an ’piö. 16-18(Nezifɔdhö ‑de ’pö ‑yö ö bo n ‑wun ’ka). ’Kɛɛ Nezifɔdhö ‑bha ’ö bhë, a‑ ‑dhɛ ‑na kwa Dëmɛ ‑gɔ kö yö ’dhö waa‑ ö ‑bha ’kɔɔmɛ ‑nu ’dhö ‑yö ‑an ’yena yö. ’Ö tɔɔ lë‑ ’yaa‑ kë ma ’a ‑kë ‑kansogümɛ ’ka bhë n ‑dhë. ꞊Dhɛ ’ö nu Wlɔmë plöö zö, ‑yö n ‑mɛɛ ö ꞊faan’ ’ka ’tɛngdhö kö ‑yaan ꞊tun n yö ‑na. ‑Yö ‑nu ’ö ‑büö ‑da n ‑dhë, ’yö n ꞊faan’ ‑më ’töng ’bhaa ‑nu ’ka ‑kanso ’kɔɔdhö zö. ’Go mü ’zü ‑kɔ ’ö nu n ‑dhë ‑a ’ka kö a Efɛzö plöö bhë ’ü‑ ‑dɔ. ‑A ‑kë ’dhö ‑sü ‑wun ’gü a‑ ‑dhɛ kwa Dëmɛ ‑gɔ kö ‑ya ’yena yö, ‑a ‑bha zakanyi ’ka.
21(Mɛdhɛvadhɛ ꞊wa ’kan n ‑ma; ’kɛɛ) Timote, bhi ’ü ‑kë ꞊nɛ n gbö ’dhö ü ‑bha ‑zo ‑yö Yesu Klito ‑bha ‑sü ’gü bhë, ‑bhö ’to ‑klu ‑sü ’ka ‑a ‑bha kö ’glusë ’ö‑ ‑kë kwa ’ka bhë ‑yaan ü gbaa ꞊faan’ ’ka! 2‑Wo ‑nu ’ü‑ ma n dhiö mɛ ꞊plëëzë wö ’dhiö bhë, ‑bhö ‑a ꞊blɛɛ’‑ mɛ ‑nu ’wo ‑mɔ ‑a ‑bha kö ‑waan ‑a kuënnu ‑së ’ka bhë ‑an ‑dhë kö wo ‑de ’pö ‑waan mɛ ‑nu ’wo to ‑an ꞊daan’‑.
3‑Bhö ’we ‑a ‑bha ’pö kö ü ’klo ‑yaan bhɔ ꞊nɛ Yesu Klito ‑bha ’dhasi këwunsëëzë ’ö ꞊faan’ ’dhoë‑ ‑gɔ ’ö ꞊wa ‑bhö ‑na ‑a ’dhö! (’Ö tɔɔ mɛ ‑nu ’ö ’wo mɛ ꞊daan ’wuntaɔsë bhë ‑a ’ka ‑së ’ka bhë, ‑an ’klo ‑yö ‑dho bhɔ. ‑Kɔ do bhë ‑a ’ka, ‑bhö ’we ‑a ‑bha kö kwaa‑ mɛ ‑nu kwa ’klo ‑yaan bhɔ kwa ‑bha mɛ ‑daan ’wuntaɔsë ’ka ‑sü ‑wun ’gü.) 4‑Bhö kë ꞊nɛ ’dhasi ’ö‑ ’piö kö ö ‑gɔmɛ ꞊zuö’ ’glu ‑yö dhi ö ’piö ‑a ’dhö! Bhii ꞊ya kë ö ‑gɔmɛ ’piö, ’yaa ö ‑de ‑dhi ‑a ‑dhë ‑wun kë; ’kɛɛ ’wun ’ö‑ ‑gɔmɛ ‑zo ’kun ‑wun ’ka ꞊nɛ ’ö‑ ‑kë. 5꞊Gɔɔnmɛ yaa ’dho ‑mɔa ‑bha ‑yaan ’to ‑a ’gbee‑ ’ka kö yaa ‑gɔn tɔng ’kun. (‑Kɔ do ’ö bhë ’ö bhi ‑de ’pö, ’ü dho Yesu Klito ‑bha yuö kaa ꞊nɛ ‑kɔ ’ö‑ pöë bhë ‑a ’dhö kö ’üën‑ ‑a ꞊truën yö!) 6’Go mü ’zü ü ‑bha yuö kë Yesu Klito ‑dhë ‑sü bhë, ‑a ꞊tɛi’‑ ‑kë ꞊nɛ pëtamɛ ’ö yuö ‑kë ’gbee‑ ’ö yö ‑blɛɛzë ’ö‑ ꞊dua’ ’dhö ‑mü kö ö ‑bha tapë ‑nu ’wo bhë, ‑ya bhɛ dan bhë ‑a ’dhö. 7’Wun ‑nu ’a‑ ꞊blɛɛ bhë, ‑bhö ü ‑zo ’ta‑ ’gü kö ’üën‑ ‑dhɛ yö ‑a ’gü! ’Ö tɔɔ kwa Dëmɛ ‑yö ‑dho ‑a ‑ta po ü ‑dhë kö ‑yaan kë ü ‑gɔ ’pëëpë.
8Yesu Klito ’ö ‑kë ‑gludë Davidö ꞊suu’‑ ‑ta ’në ’ka bhë, ‑bhö ü ‑zo ’ta ‑a këwun ‑nu ’gü! ꞊Dhɛ ’ö ga ‑Zlan ‑ya ‑bho ga ’gü. ’Wuntaɔsë ’a‑ ꞊blɛɛ’ ‑na mɛ ‑nu ‑dhë ’ö bhë. 9Pë ’ö ‑kë ’a ꞊wa ‑bhö ‑na ꞊dɛɛ ’ö bhë. ‑Wo n ‑da ‑dëüwo ‑kanso ’gü zö ꞊nɛ mɛ mɛzëmɛ ‑da ‑kanso ’gü. ’Kö ‑kë ꞊nɛ ‑wa ‑kë ’dhö ’dhee, ma ’wo n ‑zuö kɔɔ, waa ‑Zlan ‑wo ‑zuö kɔɔ; (‑Zlan ‑wo ꞊blɛɛ’‑ ‑mɛ ‑nu ’bhaa ‑nu ’wo to, ‑wo mɛ ‑nu ꞊daan’ ‑na ‑a ’ka ‑kplawo). 10Pë ‑kë ’a ‑we ‑a ‑bha kö ’a bɔ ’wun ’gbee‑ ꞊suu’‑ ’ö ꞊nɛ ‑a ’gü ’ö bhë. ‑Yö kë ’dhö kö mɛ ‑nu ’ö ‑Zlan ‑yö ‑an sü ö ‑bha ’ka bhë, ‑waan dha ’pö, ‑zo ‑yö Yesu Klito ‑bha ‑sü ’gü kö ‑wo kë ‑a ’piö, ‑a ‑bha ’tɔbhɔdhe ‑dhɛ ‑bha ꞊toëpö ’ka.
11(A ‑we ‑a ‑bha kö ’a ꞊wa ‑bhö ’pö, bhii ’ö tɔɔ) ’wun ‑nu ’wo ꞊nɛ ’wun gia‑ ‑mü. ꞊Ya kë ꞊nɛ ’kwa kwa ꞊kwaa’‑ kwa ‑bha ‑tosiadhe yaa ‑nu ’ö ’kwa ‑kë ‑an ’gü ’dhiö bhë ‑an ‑zü, ‑a ꞊tɛi’ ‑yö ‑kë ꞊nɛ ‑kɔ ’ö kwaa‑ Yesu ‑nu ’kwa ga ‑a ‑bha, kwa ’ko yöë ‑a ’dhö. ꞊Dhɛ ’ö ‑kë ’dhö bhë kwaa‑ Yesu ‑nu kwa ‑dho kwaa‑ ‑tosiadhe kë kwa ’ko ꞊bhaa. 12꞊Ya kë ꞊nɛ ’kwa ’we ‑a ‑bha kö ’kwaan‑ ꞊wa ‑bhö ꞊zuösaadhɛ ’ka, kwaa‑ Yesu ‑nu kwa ‑dho ‑gludëdhɛ kë. ’Ö ꞊ya kë ꞊nɛ ’zü ’kwa‑ pö ’kwaa‑ dɔ, ‑yö ‑dho ‑a pö ’pö ’yaa kwa dɔ. 13꞊Ya kë ꞊nɛ ’kwaa ’to kwa ‑wo ’gü, yö ’pö ‑yö ‑to ö ‑wo ’gü, ’ö pë ’ö‑ ’tɔ go mɛ ‑nu ‑dhë, ’ö‑ ‑kë, bhii ’ö tɔɔ ‑yö ‑to ö ‑wo ’gü ‑kplawo, pë ’ö‑ pö ‑a kë ‑sü ’ka.
14’Wun ‑nu ’a‑ ꞊blɛɛ bhë, ‑bhö mɛ ꞊daan’ ‑mɛ ‑nu ‑zo ‑büö ‑an ’ka! ‑Bhöë pö ‑an ‑dhë ‑Zlan wö ’dhiö, ü ‑wo ‑yɔɔn ‑a ‑ta ‑sü ’ka kö ꞊kun ’wo zaɔdhe ‑kë mɛ ‑nu ’ka, ’wun ’ö‑ ‑gɛn ’yaa ’dhö ‑a ’gü! ’Ö tɔɔ mɛ ꞊daan’ ‑mɛ ‑nu ‑wo ’dhinaa kë ‑na, ’yaa pë ‑së kë mɛ ‑nu ’wo to ‑an ‑gɔ, ’kɛɛ pë ꞊siö’‑ ’ö‑ wo ‑an ‑gɔ. 15‑Bhö ü ꞊faan’ ’plɛ ’sü kö ’üën‑ kë mɛ ꞊daan’ ‑mɛ ’ö‑ ‑bha yuö ‑yö ‑Zlan ‑zo kun ‑a ’ka! ‑Bhö kë ꞊nɛ yuökëmɛ, ’ö lë‑ ’yaa‑ kë ö ‑bha yuö ‑nu kë ‑sü ’gü ‑a ’dhö! Ü ‑dho kë mɛ ꞊suu’‑ ’ö ’dhö bhë ‑a ’ka kö ’üën‑ mɛ ꞊daan’‑ kpengdhö, ‑Zlan ‑wo giagia ’ka. 16Mɛ ‑nu ’wo ‑Zlan ‑wo yaa ꞊blɛɛ’ ‑na ’iin mɛ ‑nu ’wo ’wun ‑nu ’ö ‑an ‑gɔ ’yaa ’dhö ’wo ‑an ꞊blɛɛ’ ‑na bhë, kö ꞊kun ’ü ꞊kaan ‑an ’ka! ’Ö tɔɔ ’wun ‑nu ’wo bhë mɛ ‑nu ’wo‑ ꞊blɛɛ’ ‑na ’dhö bhë, ‑wo bhɔ ‑na ‑Zlan ‑dhë ꞊taa’ ꞊gbiin ‑kplawo. 17’Go mü ’zü ‑an ꞊blɛɛ’‑ ‑wun ‑yö pë yaa ‑kë, mɛ ’bhaa ‑nu ‑gɔ ’pö ꞊nɛ ‑kɔ ’ö bhüö ’dho ’kan ‑na ‑a ’ka mɛ ‑nu ‑bha bhë ‑a ’dhö. Mɛ ꞊suu’‑ ‑nu ’wo ’dhö bhë ‑an mɛ ’bhaa ‑nu ’wo tɔɔ Imene waa‑ Filɛtö. 18‑Wo mɛ ‑daan ꞊sua ‑wun ‑nu ’ka, ‑a ‑pö ‑an ‑dhë ‑sü ’ka ꞊nɛɛ kö ꞊kun ’ö ’wo ‑ya ‑Zlan ‑bha mɛ ‑bho ga ’gü ‑sü ’töng ‑gɔ gbɔ, bhii ’ö tɔɔ ‑Zlan ꞊ya mɛ bho ga ’gü ’saadhö. Mɛ ‑nu ꞊daan’ ‑kɔ ꞊suu’‑ ’ö bhë, mɛ ‑nu ’wo‑ ma, ‑yö ‑an ‑dɔ ‑gbɔudhö, ’ö pë ’wo dho wo ‑zo yö ‑a ‑bha ’waa ‑a dɔ. 19’Kɛɛ ’kö ‑kë ꞊nɛ pë ‑nu ’wo bhë ‑wo ‑dhö ’dhee, ‑an ‑kɔ yaa ’dho ‑mɔ ‑a ‑bha kö ’wuntaɔsë giagia ’ö go ‑Zlan ’piö bhë, ‑wa bho ö pin ‑ta. ‑Zlan ‑wo ‑yö ‑kë ꞊nɛ ’kɔ ’kpan ’dhö. ‑Kɔ do ’ö bhë ‑a ’ka ’pö, mɛ ‑daan ꞊sua ‑wun ’ka ‑sü ’ö bhë, yaa ’dho ‑mɔa ‑bha kö ‑yö ‑Zlan ‑wo bho ’gbloo. Bhii ’ö tɔɔ ‑Zlan ‑wo ‑gban ‑a ‑ta ‑pë bhë, pë ’ö ‑gban ‑sü ’ka ‑a ‑bha ’ö ‑ya ‑sü ’ka ‑Zlan ‑bha ’sëëdhɛ ’gü ’ö tɔɔ: Mɛ ‑nu ’wo ‑Zlan ‑bha ’ka, ‑yö ‑an ‑dɔ. ’Go mü ’zü: Mɛ ’ö‑ pö ö ‑Zlan ‑bha ’ka, ‑yö ‑dho ö ꞊kwaa’‑ pë yaa ‑nu kë ‑sü ‑zü.
20꞊Naɔmɛ ‑gɔ kɔɔ, ’tia‑ ‑nu ’wo ‑kë ’sënng ’ka ‑wo mü, ’ö ’tia‑ ‑nu ’wo ‑kë zënng ’ka ’wo mü. ‑A ’bhaa ‑nu ‑wo mü ’wo ‑kë ’lü ’ka, ’ö‑ ’bhaa ‑nu ‑wo ‑kë gbɔ ’sɛ kpö ’ka. ’Tia‑ mɛ ‑nu ’wo ‑kë ’sënng ‑nu, zënng ‑nu ’ka, ‑wo ‑an ‑sü ’wlaan‑ ‑yi ꞊vava ‑nu ’ka. ’Ö ‑an mɛ ‑nu ’wo ‑kë ’lü ‑nu ’ka ’iin ’sɛ kpö ‑nu ’ka, ’wo ‑an sü ’wun ‑nu ’ö ‑an ‑wun ’yaa ’gbee‑ ꞊duö ‑an ‑yuö ‑kë ‑a ’gü ‑pë ’ka.
21‑Kɔ do bhë ‑a ’ka, mɛ ’ö ‑kan pë yaya ‑nu ‑bha, ‑yö ‑dho kë mɛ ’ö ‑Zlan dho ‑a sü ‑yaan ‑a kë pë ‑wun ’gbeezë ‑kë ‑a ’ka ‑pë ’ka ꞊nɛ ‑kɔ ’ö ’wo ’tia‑ ‑së ꞊waannuë ‑de ‑dhë, ’ö ’wo‑ sü kö ‑wo pë ’giangian ‑nu ꞊suu’‑ ’saadhö kë ‑a ’gü bhë ‑a ’dhö.
22‑A ‑wun ’gü kö ꞊kun ’ü pë yaa ’ö ‑dadhëü ꞊plëëzë ‑nu ’dho ‑an kë ‑na bhë, ’ü ‑an kë! Bhi ‑zë, ü ‑de nu pë ’ö kpengdhö ‑a kë ‑sü ‑dhë! ’Go mü ’zü, ‑bhö ’dho ü ’dhiö Yesu Klito ‑wun ‑dhɛ ’wun gia‑ ‑sü ’ka! ‑Zlan waa‑ mɛ ‑nu ‑dhɔ ‑yö ü ‑kë! Mɛ ‑nu ’ö ’wo ‑Zlan ꞊bhlë ‑ya ’ö ‑an ’ta ’sü ‑kɔ ’dho kpengdhö ‑Zlan wö ’dhiö, ka ‑nu ‑ka ‑tosiadhe kë ꞊zuöyagluu ’ka ka ’ko ꞊bhaa!
23꞊Kun ‑kë ’ü zaɔdhe këwun ‑nu ’ö ‑an ‑gɔ ’yaa ‑dhö ‑an ꞊blɛɛ’‑ ‑mɛ ‑nu ’piö! Mɛ ‑nu ’wo bhë, ’waa ’wun ‑bho ’kou gbɛ dɔ. Kö ꞊kun ’ü‑ ‑kë ’dhö ’ö tɔɔ ü‑ ꞊tɛi’ ꞊dɔa’ ꞊nɛ mɛ ‑nu ’wo‑ kë ‑na ’dhö bhë, ’dhinaa ꞊nɛ ’ö ꞊ya kë ’ö ‑an ’dhiö dho to ‑a ‑ta. 24’Kɛɛ kö Dëmɛ ‑bha yuökëmɛ ꞊dua’ ’yaa ‑mü kö ‑yö ’dhinaa ‑nu kë. Pë ’ö dho ‑a kë ’ö tɔɔ ‑a ’glu ‑dho kë ‑së mɛ ’bhee‑ ꞊suu’‑ ’kpɛkpɛ ’ka! ‑Yö ‑dho kë ’zü, mɛ ꞊daan’ ‑mɛ ’ö‑ ‑kɔ ‑mɔ ‑a ‑bha kö ‑yaan mɛ ꞊daan’ ‑së ’ka ꞊zuösaadhɛ ’ka ‑a ’ka! 25Kö mɛ ‑nu ’ö ’wo zaɔdhe ‑da ‑Zlan ‑bha mɛ ꞊daan’ ‑wo ’ka bhë kö ‑yaan ‑an ꞊dɔɔ’‑ ‑wo ’pëëpë ’ka. ‑Yö mü ’zü ‑Zlan ‑yö ‑dho ‑a kë ’ö ’wo wo ‑ta yö wo ‑bha ꞊sɔɔn yaa ‑bha ’ö mɛ ꞊daan’ ‑wo ’ö bhë, ’wo‑ ‑dhɛ ’wun gia‑ ’ö ’wo wo ‑zo yö ‑a ‑bha ’zü. 26꞊Ya kë ’dhö ‑an ‑kɔ ‑yö ‑dho ‑mɔa ‑bha kö ‑dhɛ ‑yö ’wun ’gü ‑sü ‑yaan kë ‑an ‑gɔ kö ‑waan ’go dü ‑bha ’piigbeedhɛ kwɛɛ. Dü ’ö bhë ꞊nɛ ’ö ‑an kë ö ‑zo ’kun ‑wun ‑nu ‑kë ‑an ’ka ‑pë ’ka ‑be.
3’Wun ‑nu ’wo dho kë yi ’dhiötoyi ’ka
1A‑ ’piö kö ’ü‑ ’wun dɔ ꞊nɛ ’kpongtaadhɛ ’dhiötoyi ‑yö ’to ‑na ’tee, yi ’gbee‑ ‑yö ‑dho kë ‑dhö. 2’Töng bhë ‑a ’ka, ꞊zuöyaamɛ ‑nu ’ö ’wo wo ‑de ‑dhë ‑së, ’ö ’wëüga ‑dhɔ ‑yö ‑an ‑kë ꞊duö, ‑wo ‑dho kë ‑dhö. ‑Wo ‑dho wo ‑de ‑wun ꞊blɛɛ’‑; ‑wo ‑dho wo ‑de sü ꞊va; ‑wo ‑dho ’wun yaya ꞊blɛɛ’‑ ‑Zlan waa‑ wo mɛ ‑nu ‑an ‑gɔ. ’Në ‑nu ꞊gɔü’ ’gbeezë ‑nu, ‑wo ‑dho kë ‑dhö. Mɛ ‑nu ’wo bhë wo ’ka ’dho ’wun ’slööslö gbɛ ꞊bhlë ‑ya; yö do bhë ’zü mɛ ‑zlö trö ‑sü ‑zë ‑nu ‑mü ‑an ’ka. 3Mɛ ‑nu ’ö ’wo ’dhö bhë, ‑an ‑bha ’glu yaa ꞊duö bhë ‑a ‑wun ’gü, mɛ ‑nu ’yena yaa ’dhö kë ‑an ’gü. ꞊Sua ‑wun ‑nu ꞊nɛ ’wo ’dho ‑a dɔ mɛ ‑nu ‑bha; ‑wo ‑dho kë ꞊naazë ꞊duö, pë ’dhiö‑ ‑kë mɛ ’ka ‑mɛ ‑mü ‑an ’ka. 4Wo ’ka ’dhö to mɛ ‑nu ’piö ‑dhɔ kpinngdhö ’ka; ‑zo ‑yö ‑an ‑bha ‑mɛ ‑nu ’waa ‑mü ‑an ’ka; ‑naazuëwunkëmɛ ‑mü ‑an ’ka. ‑Wo wo ‑de ‑sü ꞊va ꞊duö. ‑An ‑de ’yi ‑kan ‑an ‑dhë ‑wun ꞊nɛ ’wo‑ ’piö kö ’wo‑ kë, ’kɛɛ ‑Zlan ’yi ‑kan ‑a ‑dhë ‑wun ‑dhɔ ’yaa ‑an kë. 5’Wo‑ ‑kë ꞊nɛ mɛ ‑nu ’wo ‑Zlan ꞊bhlë ‑ya giagiawo ‑an ’dhö, ’kɛɛ ‑Zlan ‑bha ’piigbeedhɛ (’ö‑ ’piö kö ’ö‑ nu mɛ ’bhee‑ ‑nu ‑dhë ‑waan ‑tosiadhe ‑së kë ‑a ’ka) bhë, ’waa ’we ‑a ‑bha kö ‑wo wo ‑zo kë ‑a ’piö. ‑Bhö ’kan mɛ ‑nu ꞊suu’‑ ’wo ’dhö bhë ‑an ‑bha! 6‑An mɛ ’bhaa ‑wo ꞊sua ‑kë ’slë ’ka, ’wo ‑da mɛ ‑nu ‑gɔ kɔɔ, ’ö ’wo dhoo ‑nu ’ö ’waa pë gbɛ dɔ, ’ö ’wo ꞊sua ‑wun ‑nu ꞊blɛɛ ‑an ‑dhë kö ‑yö kë ’dhö kö ‑wo ‑an ‑wun ‑dhɛ ’wun gia‑. Dhoo ‑nu ’wo bhë, pë yaa ꞊va kë ‑mɛ ‑nu ‑mü ‑an ’ka; ’ö pë yaa ꞊suu’‑ ’kpɛkpɛ ‑dhɔ ‑yö ‑an ‑kë. 7‑Wa ’piö kö ’wo kë ’wundɔmɛ ’ka ‑kplawo, ’kɛɛ ‑Zlan ‑bha mɛ ꞊daan’ ‑wo kpengdhö ‑gɛn dɔ ‑sü ’ka ’dho kë ‑an ‑gɔ ’gbɛɛdhö. 8Bhii ’ö tɔɔ mɛ ‑lü ꞊suu’‑ yaa‑ ‑zë ‑nu ’wo bhë, ‑wo ‑dɔ ‑Zlan ‑bha mɛ ꞊daan’ ‑wo kpengdhö ’ö bhë ‑a ‑gɔ ’yënng mɛ ‑nu ’ka ꞊nɛ ‑kɔ ’ö Zanɛsö waa‑ Zamblɛsö ’wo dɔ ‑a ’ka Moizö ‑gɔ ’yënng ’kpa bhë ‑a ’dhö. Mɛ ꞊suu’‑ ‑nu ’wo ’dhö bhë ’wun yaa dosɛn ꞊nɛ ’wo wo ‑zo ‑ta ‑a ’gü. ‑Zlan ꞊ya ’kan ‑an ‑bha, ’wun ’ö go ‑a ’piö ‑a ‑dhɛ ’waa‑ wo ’wun gia‑ bhë ‑a ‑wun ’gü. 9Mɛ ‑nu ꞊plëëzë, waa ’dho ziö ‑an ’piö, ’ö tɔɔ ‑wo ‑dho ‑a ꞊tɛi’ dɔ ’fɛfɛdhö ꞊nɛ, ’wunbhokoudɔdhe ’yaa ‑an ‑gɔ ꞊nɛ, ‑kɔ do ’ö mɛ ‑nu ‑wa yöë Zanɛsö waa‑ Zamblɛsö ‑an ‑gɔ ’kpa bhë ‑a ’dhö.
Pɔlö ‑bha Timote ‑zo ‑gban ‑wo
10Bhi ’pö, ‑Zlan ‑bha mɛ ꞊daan’ ‑wo ’a mɛ ‑nu ꞊daan ‑a ’ka bhë, ü‑ ‑dɔ ’fɛfɛdhö. ‑Kɔ ’a ‑tosiadhe ꞊kaa’ bhë ’ü‑ dɔ. Pë ’a‑ yö ‑na ’ko ’dhiö n ꞊zuö’ ’piö ’ü‑ dɔ. N ‑ma ‑zo ‑yö ‑Zlan ‑bha ‑sü, n ‑ma ꞊zuösaadhɛ, n ‑ma mɛ ‑nu waa‑ ‑Zlan ‑dhɔ kë ‑kɔ ’ü ‑an ’plɛ dɔ. ’Go mü ’zü ’ü‑ ꞊tɛi’ dɔ ꞊nɛ n ’ka n ꞊kwaa’‑ kwa Dëmɛ ‑bha ’wun ‑nu ‑zü 11kö a ꞊wa ‑nu ‑bhö ‑sü ’gü. Mɛ ‑nu ‑wo n ’klo ‑bhɔ Tiɔsö, Ikɔnë waa‑ Litrë plöö: A ꞊wa ‑bhö mɛ ‑nu ’wo mü ‑an kwɛɛ, ’kɛɛ a n ‑kwaa n ‑de ‑wun ‑zü, ꞊wa bhë ‑a ‑bhö ‑sü ’gü. ꞊Dhɛ ‑kë ’dhö, kwa Dëmɛ ‑yö n ‑bho ’klobhɔdhe ꞊suu’‑ ‑nu ’wo bhë ‑an ’gü ’töüdhö. 12‑Kwaa ꞊tɛi’ dɔa ꞊nɛ mɛ ’töüdhö ’wo‑ ’piö kö ‑wo ‑klu Yesu Klito ‑bha ‑Zlan ‑dhi ‑a ‑dhë ‑wun kë ‑sü ’ka, ‑an ’klo ‑dho bhɔ. 13꞊Zuöyaamɛ ‑nu ’ö ’wo mɛ ‑nu ‑dian ‑na bhë ‑an ‑bha ꞊zuöyaadhɛ waa‑ ‑an ‑bha mɛ ‑dian ‑sü ’wo bhë ’dho ’ö dho ‑a wo ’dhiö ‑kplawo. ‑Wo ‑dho mɛ ‑nu ‑püö, ’ö dü ‑de ’pö ’ö ‑an ‑püö. 14’Kɛɛ ü ‑bha ’ka, pë ’ü‑ ꞊daan, ’ö ’ü‑ ꞊tɛi’ dɔa ꞊nɛ ’wun gia‑ ‑mü bhë, ‑bhö ’dho ü ’dhiö, ‑a ‑dhɛ ’wun gia‑ ‑sü ’ka ‑kplawo! Bhi gia‑, ü mɛ ‑nu ’wo ü ꞊daan ‑Zlan ‑wo ’ka bhë, ’ü ‑an ‑dɔ. (’Go mü ’zü ’ü‑ ꞊tɛi’ dɔa ꞊nɛ mɛ ꞊daan’ ‑wo giagia ꞊nɛ ’wo ü ꞊daan ‑a ’ka.) 15’Go ü ’nëdhɛ ’gü ’ö yö ꞊dɛɛ ‑bha, ‑wo ’slööslö ’ö ‑ya ‑sü ’ka ‑Zlan ‑bha ’sëëdhɛ ’gü, ü‑ ‑dɔ. ‑Zlan ‑wo bhë ‑yö ‑mɔ ‑a ‑bha kö ‑yö ’wun ‑bho ’kɔu dɔ dhe nu ü ‑dhë kö ’üën‑ dha Yesu Klito ‑wun ‑dhɛ ’wun gia‑ ‑sü ’ka. 16Pë ’saadhö ’ö ‑ya ‑sü ’ka ‑Zlan ‑bha ’sëëdhɛ ’gü, ‑Zlan ‑yö ‑bɔ ‑Zuu ’slööslö ’gü ’ö‑ ‑ya mɛ ‑nu ꞊zuö’ ’piö, ’ö ’wo‑ ‑ya ’sëëdhɛ ’gü. ‑Zlan ‑wo ’ö bhë ‑yö kwa ‑daan ’wun gia‑ ’ka. ’Go mü ’zü ‑ya ‑kë ’ö pë ‑nu ’ö ’waa kpengdhö ’kwa ‑an dɔ. ‑Zlan ‑wo ’ö bhë ’zü, ‑yö kwa ‑dɔɔ ’ö kwa ꞊daan pë ‑së kë ‑sü ’ka. 17‑Kɔ ’ö bhë ‑a ’ka, ‑Zlan ‑wo ‑ya ‑kë ’dhö kö mɛ ’ö ‑Zlan ‑bha ’ka, kö ‑a ‑kɔ ‑mɔ pë ‑së ꞊suu’‑ ’saadhö kë ‑sü ‑bha.
41Yesu Klito ‑yö ‑dho nu ’zü ’kpongtaa kö ‑yaan ‑gludëdhɛ kë. ‑A ‑kë ’dhö ‑sü ’gü ‑yö ‑dho mɛ ‑nu ’wo ’bhee‑ waa‑ mɛ ‑nu ’ö ꞊wa ga ‑an ‑bha za kan. ‑A ‑wun ’gü, a‑ ‑pö ü ‑dhë ‑wo ꞊yɔɔn ‑a ‑ta ‑sü ’ka, ‑Zlan waa‑ Yesu Klito ‑an wö ’dhiö: 2‑Bhö mɛ ‑nu ꞊daan’‑ ‑Zlan ‑wo ’ka! ‑Kë ’siözë ‑sü ‑yö kë ü ‑gɔ ‑kplawo kö ’üën‑ ‑Zlan ‑wo ꞊blɛɛ’‑ ‑an ‑dhë ’kö ‑kë ꞊nɛ yaa dhi ‑an ‑dhë ’dhee. ꞊Ya kë ’zü ꞊nɛ mɛ ‑nu ‑wo pë yaa kë ‑na, ‑bhö ‑an ꞊dɔɔ’ ‑a ‑zɔn ‑an ‑dhë ‑sü ’ka ꞊nɛ pë ’wo‑ kë ‑na bhë, ‑wo wo bo ‑a ’ka. ‑Bhö ‑an ꞊faan’ ’më! ‑Bhö ‑an ꞊daan’‑ ꞊zuösaadhɛ ’ka! 3’Ö tɔɔ yi ‑nu ‑wo nu ‑na, ’ö mɛ ‑nu waa ’dho we ‑a ‑bha kö ‑wo wo ’to ’to ‑Zlan ‑bha mɛ ꞊daan’ ‑wo giagia ‑bha. ’Kɛɛ mɛ ꞊daan’ ‑mɛ ‑nu ’ö ‑an ‑wo dho ‑an ‑zo kun ’wo dho ‑an ꞊mɛɛ’‑. ’Ö tɔɔ ‑wa ’piö kö ‑wo pë yaya ꞊plëëzë ‑nu kë. 4‑A ‑gɛn ’ö tɔɔ wo ’ka ’dho kë ‑a ’piö kö ’wo wo ’to ’to, ’wun ’ö ’wun giagia ’ka ‑a ‑bha, ’kɛɛ ꞊kwɛzü ‑wun ‑nu ’wo dho to ‑a ’piö. 5’Kɛɛ ꞊ya kë ü ‑bha ’ka, a ‑dhio ‑dɔ ü ‑dhë kö ’wun ‑ma ö ‑gɛn ’ka ‑sü ‑yö kë ü ‑gɔ, ‑kɔ ꞊suu’‑ ’saadhö ’plɛ ‑ta! ‑Bhö ’we ‑a ‑bha kö ü ’klo ‑yaan bhɔ! ‑Bhö ’wuntaɔsë ’ö ‑gban Yesu Klito ‑bha, ‑a ꞊blɛɛ’‑ mɛ ‑nu ‑dhë! Ü ‑bha yuö ‑nu ’wo ‑gban ‑Zlan ‑bha, ‑bhö ‑an ’plɛ kë ‑së ’ka!
6(’Wun ‑nu ’wo bhë ’töüdhö a‑ ‑blɛɛ ü ‑dhë, ’ö tɔɔ n ’ka ’dhö kë ü ’piö ꞊glɔɔsü gbɔ ’kpongtaa zö kö ’aan‑ ’yɛ n ’zü ’aan‑ bɔ ‑a ’piö ü ‑dhë zlöö.) ‑A yi ꞊ya ‑lo kö ’aan‑ ’go ’kpongtaa. N ‑ma yuö ‑kë ‑Zlan ‑dhë ‑sü ’ö bhë ‑a ‑wun ’gü, mɛ ‑nu ‑wo ‑dho n zë. N ‑ma ga ‑sü ’ö bhë, ‑a ꞊tɛi’ ‑yö ‑dho kë ꞊nɛ sla‑ bho ‑sü ’dhö. 7Yesu Klito ‑bha yuö mɛ ’ö dɔ n ꞊tian’, a n ’gü dɔ ’gbee‑ ’a‑ ‑kë ‑së ’ka. Pë ’ö ‑Zlan ‑yö ‑kë ‑a ’piö kö ’aan‑ kë, a‑ ‑kë ꞊nɛ ‑bla ’sü ‑mɛ ’ö zian ga ’ö dho ‑bla sü ‑a ‑ta, ’ö bɔ ‑a ’plɛ ‑bha ‑a ’dhö. A n ‑zo ‑yö ‑Zlan ‑bha ’ö dho ’ö yöë ꞊dɛɛ ’ö ‑kë ‑a ’dhiötoyi ’ka bhë ‑a ‑bha. 8‑A ‑wun ’gü kwa Dëmɛ ’ö dho mɛ ‑nu ‑bha za kan kpengdhö bhë, ‑yö ‑dho n ‑ma ‑kë kpengdhö ‑sü ’gɔ ꞊gblaa’ nu n ‑dhë, ‑a ‑bha mɛ ‑nu ‑bha zakanyi ’ka (’ö tɔɔ pë ’ö kpengdhö ’a‑ ‑kë ꞊nɛ ‑bla ’sü ‑mɛ ’ö ’to ‑a ’gbee‑ ’ka bhë ‑a ’dhö). Yaa ’dho ma do n ꞊saan’ nu; mɛ ’saadhö ’wo dɔ ‑a nu ‑sü ‑gɔ, ‑a ‑dhɔ kë ‑sü ’ka, ‑yö ‑dho ‑an ‑bha nu ’pö.
’Wun ’ö ‑gban Pɔlö ‑de ‑bha
9-11Mɛ ‑nu ’ö ’wo nu n ‑dhë ’dhiö bhë, Lukö do ’kpaan ꞊nɛ ’ö n ’piö zö zlöö. Demasö ꞊ya ’kan n ‑ma, ꞊ya ’dho Tesalɔnikö plöö; ’ö tɔɔ ‑yö ’kpongtaapë ‑nu ‑dhɔ ‑kë ꞊duö (’ö ‑ziö ‑a ’ka pë ‑nu ’wo ‑Zlan ‑bha ’ka ‑an ‑ta). Klesaan ꞊ya ’dho Galatö ‑sɛ ’gü; Titö ꞊ya ’dho Damasi ‑sɛ ’gü ’pö. ‑A ‑kë ’dhö ‑sü ’gü, ‑bhöë këdhɛ ꞊mɛɛ’‑ kö ’üën‑ nu n ’piö zö ’zodhö. ꞊Ya kë ꞊nɛ ü nu ‑na, kaa‑ Maakö ‑ka nu! ’Ö tɔɔ n ‑ma ‑wun ‑yö ‑dho yö ‑a ‑bha nu n ‑dhë ‑sü ’ka kwa Dëmɛ ‑bha yuö ’gü. 12’Ö tɔɔ ’ma Tisikö bɔ Efɛzö plöö. 13Ü nu ‑na, ‑bhö nu n ‑ma gblang ’a‑ to Troasö plöö Kaapusö ‑gɔ kɔɔ bhë ‑a ’ka n ꞊dhia! ‑Bhö nu ’zü n ‑ma ’sëëdhɛ ‑be ‑nu bhë ‑an ’ka. ’Kɛɛ ‑a mɛ ’ö ‑kë wü kwi ’ka, ’a pë ‑nu ꞊bɛɛn’ ‑na ‑a ‑ta bhë, ’ö n ‑ma ‑wun ‑yö yö ‑a ‑bha kpinngdhö.
14Alezandrë ’ö ‑kë ‑piöbhomɛ ’ka bhë, ‑yö ’wun yaa ꞊gbaɔnsü ‑kë n ’ka. Kwa Dëmɛ ‑yö ‑dho za ‑lo ‑a tuö, pë yaa ‑nu ’ö ‑an ‑kë n ’ka bhë ‑a ‑wun ’gü. 15Bhi ‑de ’pö, ‑bhö ‑a kë ’slë ’ka kö ꞊kun ’ö dho pë yaa kë ü ’ka ’pö! ’Ö tɔɔ ‑Zlan ‑wo ’ö ’kwa‑ ꞊blɛɛ’ ‑na mɛ ‑nu ‑dhë bhë, ‑dɔ ‑a ‑gɔ ’yënng ‑mɛ ‑mü ‑a ’ka.
16’Dho ‑blɛɛzë ’a‑ wo zakanmɛ ‑nu ’dhiö bhë, mɛ gbɛ yaa kë n ’piö mü. ‑Wo n ‑to n ‑de ’sloo ’ka. ’Kɛɛ a‑ ‑dhɛ ‑na ‑Zlan ‑gɔ kö ꞊kun ’ö dho ‑an ’klo bhɔ. 17(’Kö ‑kë ꞊nɛ mɛ ’bhee‑ ‑nu ‑wo n ‑to do ’ka,) kwa Dëmɛ ‑yö ‑kë n ’piö; ‑yö ꞊faan’ ‑nu n ‑dhë, ’ö ’a‑ ‑wo ꞊blɛɛ mɛ ‑nu ’waa Zuifö ’ka ’ö ’wo ‑kë mü ‑an wö ’dhiö ’fɛfɛdhö. ’Wun ’gbee‑ ’ö bhë ‑Zlan ‑yö n ‑dha ‑a ‑gɔ ꞊nɛ ‑kɔ ’ö mɛ dha ‑na ‑a ’ka ꞊laa’ ’dhi ‑gɔ bhë ‑a ’dhö. 18’Go mü ’zü a‑ ꞊tɛi’ dɔ ꞊nɛ, ‑yö ‑dho n dha ’wun ’gbee‑ ꞊suu’‑ ’kpɛkpɛ ’wo dho nu n ‑ta ‑an ‑gɔ. ‑Yö ‑dho dho n ’ka ’zü, ‑kɔ ‑sëëzë ‑ta, dhang‑ ’gü ‑dhɛ ’ö ö ‑bha ‑gludëdhɛ kë ‑na ‑a ‑bha bhë ‑a ‑bha. ‑Kwaa ’tɔ bhɔ, ’kwa dhoë ’dhiö ‑kplawo! Amɛn.
’Wun ’a‑ ‑kë ’aan‑ ꞊blɛɛ’‑ ü ‑dhë bhë ’ö bhë
19’Ma ’we Plisilö waa‑ Akilasö ‑an ’ka! ’Ma ’we Onezifɔɔ ‑gɔ ’kɔɔmɛ ‑nu ’ka! 20Elatö ‑yö ‑to Kolɛntö plöö. A Trofimë ‑to Milɛtö plöö, ’ö tɔɔ yaa kë ‑potaasü ’ka. 21Ü ’gü ‑gban kö ’ü nu n ’piö zö ’nɛnɛ ’töng ’dhiö! Bulusö, Pudan, Linisö, Klodia waa‑ kwa dhegluzë ‑nu mɛ ’wo to ’wo ‑klu ‑sü ’ka Yesu Klito ‑bha, ꞊wa ’we ü ’ka!
22A‑ ‑dhɛ kwa Dëmɛ ‑gɔ kö ‑yö ’to ü ’piö, kö ‑yö ’dhuë‑ ’kpɔ ka ’plɛ ka ‑bha!