2 Tesalɔnikö

’Sëëdhɛ ꞊plɛ ‑naa

’ö Pɔlö ‑ya bɔ

Yesu ‑wun ‑dhɛ ’wun gia‑ ‑mɛ ‑nu ’wo

Tesalɔnikö

plöö ‑an ‑dhë bhë ’ö ꞊nɛ

¹Ma Pɔlö ’dhö, Silivɛn ’dhö, Timote ’dhö, ’yi ’sëëdhɛ ’ö ꞊nɛ ’yi‑ bɔ ‑Zlan ‑bha mɛ ‑nu ’ka ‑klu ‑sü ’ka ‑Zlan ’ö kwa Dë ’ka waa‑ Yesu Klito ’ö kwa Dëmɛ ’ka ‑an ‑bha, ’ka Tesalɔnikö plöö ka ‑dhë.

²‑Zlan ’ö kwa Dë ’ka waa‑ kwa Dëmɛ Yesu Klito ‑wo ’glusë waa‑ ꞊zuöyagluu nu ka ‑dhë.

Za ’kan ‑sü ’ö dho kë Klito nu ‑yi ’ka

³Dhegluzë ‑nu, yi ꞊dua’ ‑mü kö ’yi ‑Zlan zuö pö ’töng ’plɛ ’ka ka ‑wun ’gü. ‑Yö kpengdhö kö ’yi‑ kë ’dhö ’ö tɔɔ ka ‑bha ‑zo ‑yö ‑Zlan ‑bha ‑sü ‑yö ’dho ‑na ’dhiö ’töng ’plɛ ’ka. ’Ö ka ’ko ‑nu ‑dhɔ ’ö ka ziën ’ma ’ö ’dho ‑na ’dhiö ’pö. ⁴‑A ‑wun ’gü, yi ’gɔugɔ (kwa Dëmɛ Yesu ’gü), ‑a ‑wun ‑dhɛ ’wun gia‑ ‑mɛ ‑nu ‑dho ’kuë‑ ‑sü ‑nu ziën ka ‑wun ’gü, ’ö bhii ka ‑bha ‑dɔ ’gbee‑ ‑sü ’ö ’wun ’gbee‑ ’kpɛkpɛ ’gü waa‑ ka ‑bha ‑dɔ ’gbee‑ ‑sü ’ö ’klobhɔdhe ‑nu ’ö ’wo‑ ‑wɔ ka ‑ta ‑an ’gü ‑zo ‑yö ‑Zlan ‑bha ‑sü ’ka bhë ‑yö yi ꞊zuö’ ’glu ‑dhi.

⁵’Wun ‑nu ’wo bhë ‑wa ‑zɔn ka ‑dhë ꞊nɛ ‑Zlan ‑bha za ’kan ‑sü ‑yö ‑dho kë kpengdhö ’ö tɔɔ ’wun ’gbee‑ ‑nu ’kpɛkpɛ ’ö ’wo nu ‑na ka ‑ta, ka ‑bha ‑kë ‑Zlan ‑bha ‑gludëdhɛ ‑pö ’gü ‑sü ‑wun ’gü ’ö ’ka dɔ ’gbee‑ ‑a ’gü bhë, yö ꞊nɛ ’ö dho ka kë ꞊bhlëzë kö ’ka kë ‑Zlan ‑bha ‑gludëdhɛ ’ö bhë ‑a ’gü ’në ‑nu ’ka. ⁶’Wun giagia ’ka ‑Zlan ’ö bhë ‑yö kpengdhö, ‑yö ‑dho ’klobhɔdhe wɔ mɛ ‑nu ’wo ka ’klo bhɔ ‑na bhë ‑an ‑ta. ^7-8’Töng ’ö kwa Dëmɛ Yesu waa‑ ‑Zlan ‑bha bɔmɛ ’gü ’gbeezë ‑nu ’wo dho go ‑a ’ka dhang‑ ’gü kö ‑wo ‑wo ’siö nɛ‑ kpö ’gü, ‑a ’töng ’dhö bhë ‑a ’ka, ‑Zlan ‑dho ‑ya ‑de ’flëë‑ ’gü ‑sü nu mɛ ‑nu ’ö ’ka ꞊saan’ ‑na bhë ka ‑dhë; ‑yö ‑dho ‑ya ‑de ’flëë‑ ’gü ‑sü nu yi ‑dhë ’töng ’dhö bhë ‑a ’ka ’pö. ‑Yö ‑dho ’wun wɔ mɛ ‑nu ’ö ’waa ‑Zlan dɔ ’ö ’wuntaɔsë ’ö ‑gban kwa Dëmɛ Yesu ‑wun ‑bha ’ö ’waa‑ ꞊bhlë ‑ya bhë ‑an ‑ta. ⁹’Wun ’ö dho wɔ ‑an ‑ta bhë, ‑yö ‑dho kë ’güsiödhe ’ö ꞊toëpö ’ka ‑a ’ka. ‑Wo ‑dho kë kwa Dëmɛ wöödhɛ ’ka ꞊gbiin, ’ö ‑an ’yan ’ka ’dho ‑da ‑a ‑bha ’gügbeedhɛ ’bhüzë bhë ‑a ‑ta. ¹⁰’Wun ‑nu ’ö ’wo bhë ‑wo ‑dho kë ‑dhɛkpaɔyi ’ö kwa Dëmɛ dho nu ‑a ’ka bhë ‑a ’ka; mɛ ‑nu ’wo‑ ‑wun ‑dhɛ ’wun gia‑ ’ö ’wo‑ ‑bha ’ka, ‑wo ‑dho ‑a ꞊bhlë ‑ya, ’go mü ’wo‑ ‑ga ꞊zuögludhi ’ka. Ka ‑de ’pö, ka ‑dho kë mɛ ‑nu ’ö ’wo bhë ‑an ziën, ’ö tɔɔ ‑Zlan ‑bha ‑naɔ ’ö ’yi‑ ꞊blɛɛ ka ‑dhë bhë, ka‑ ‑wun ‑dhɛ ’wun gia‑, ’ö ’ka‑ ‑sü ka ‑bha ’ka.

¹¹’Wun ‑nu ’wo bhë ‑an ‑wun ’gü, yi ‑bhɛa ‑Zlan ‑dhë ka ‑wun ’gü ’töng ’plɛ ’ka. Yi‑ ‑dhɛ kwa ‑bha ‑Zlan ‑gɔ kö ‑yö ka ꞊bhlë ’kpɔ ka ‑bha dha ‑sü ’ö ka ‑dhɛ ‑a ’ka bhë ‑a ’gü. Yi‑ ‑dhɛ ‑a ‑gɔ ’zü kö ‑a ‑bha ’piigbeedhɛ ’gü, ka ꞊zuö’ ’piö ‑wun ’ö ‑kë ’wun ‑së kë ‑sü ’ka, ‑ya kë ka ‑dhë; kö ka ‑bha yuö ‑nu ’ka‑ ‑kë ‑zo yö ‑sü ’ka bhë kö ‑yö nu ka ‑dhë kö ’ka‑ ’dhiö ’to ‑së ’ka. ¹²꞊Ya kë ’dhö, kwa Dëmɛ Yesu ’tɔ ‑dho bɔ ka ‑ta ’ö ‑kë ꞊bhlëzë ’ö ka ‑de ’pö, ’ka dho kë ‑a ’gü ꞊bhlëzë, kwa ‑bha ‑Zlan waa‑ kwa Dëmɛ Yesu Klito ‑an ‑bha ’glusë ‑wun ’gü.

’Wun ’ö ‑gban këpëyaamɛ ‑bha nu ‑sü ‑bha

¹Dhegluzë ‑nu, ’wun ‑nu mɛ ’wo ‑gban kwa Dëmɛ Yesu Klito ‑bha nu ‑sü waa‑ kwa ‑bha ‑kpa ’kuë‑ ‑sü ’ö‑ wöödhö ‑a ‑bha, yi ‑bhɛa ka ‑dhë ‑a ‑wun ’gü, ²kö ꞊kun ’ka ka ꞊kwaa ka ‑de ‑zü ’siösiö ’ö ka ꞊zuö’ ‑yö ‑kaan ’kuë ’iin ’ö ’siö ‑yö ‑kan ka ’gluu ꞊nɛ kwa Dëmɛ ‑bha zakanyi ꞊ya ‑lo. Mɛ ’bhaa ‑nu ‑wo ‑dho ka ꞊zuö’ ꞊kaan’ ’kuë; ‑wo ‑dho ‑mɔa ‑bha kö ‑wo ꞊sua kë ka ‑gɔ ‑a ‑pö ka ‑dhë ‑sü ’ka ꞊nɛɛ ‑Zuu ’slööslö ꞊ya ’wun ꞊blɛɛ’‑ wo ’gü; ‑ya ‑pö kwa Dëmɛ ‑bha zakanyi ꞊ya ‑lo. ‑Wo ‑dho ‑mɔa ‑bha kö ‑wa pö ka ‑dhë ’zü ‑Zlan ‑wo ꞊blɛɛ’ ‑sü ’ka ’iin ‑wo ‑dhoë pö ka ‑dhë ’zü ꞊nɛɛ ’yië ’sëëdhɛ bɔ ka ‑dhë ꞊nɛ kwa Dëmɛ ‑bha zakanyi ꞊ya ‑lo. ’Kɛɛ ’wun ‑nu ’wo bhë ’saadhö kö ꞊kun ’ka ‑an ‑ga ’wun gia‑ ’ka! ³Kö ꞊kun ’ka ka ꞊kwaa ka ‑de ‑zü ’ö mɛ gbɛ ‑yö ka ‑dian ‑kë ‑kɔ ’bhaa ‑ta! ‑Yö kë ka ’yaan ꞊nɛ yi ’ö ’yi ’we ‑na ‑a ‑wun ’ka bhë, ‑a kë ‑sü ’ka kö ‑yö ‑wo mɛ ’bhee‑ ‑nu ‑ta, ‑wo ‑dho wo ‑ta yö ‑Zlan ‑bha. ’Yö këpëyaamɛ ’wo‑ ‑dhɛ ’yaa tɔng ’kun, ’ö‑ ‑bha ‑tosiadhe ’dhiötodhɛ dho kë ’güsiödhe ’ka bhë, ‑yaan ꞊tun nu ‑süë ‑a ’töng ’ka. ⁴Këpëyaamɛ ’ö bhë yö ’ka ’dho we ‑a ‑bha kö mɛ ’waa gbɛ ‑yö gbapë ꞊suu’‑ ’kpaan gbɛ ’sü ö ‑bha ‑Zlan ’ka kö ‑ya gba kö yaa kë yö dosɛn ö ’ka. ‑Yö ‑dho ’ko zë ‑zlan ꞊suu’‑ ’kpɛkpɛ ’ö ’wo ’kpongtaa ‑an ’ka. ‑Yö ‑dho dho ‑dewo ’ö ‑da ‑a ’ka ‑Zlan (’bhee‑) ‑gba ‑a ’gü ‑kɔ ’gü ’ö ꞊yaannu ‑a ’gü, ‑a pö ‑sü ’ka ꞊nɛɛ yö ꞊nɛ ’ö tɔɔ ‑Zlan.

⁵’Wun ‑nu ’ö ’wo bhë ’ma‑ ꞊blɛɛ’‑ ka ‑dhë ’töng ’ö ’a ꞊kaa’ ka ’piö ’ma ‑a ’ka; ’yaa ’dhö a? A‑ ‑dɔ ꞊nɛ ka ‑zo yaa ‑büö ‑a ’ka. ⁶’Wun do ’bhaa ’ö pë ‑nu ’wo bhë ’ö ‑an kë ‑sü to zlöö ‑yö ‑dhö. ’Wun ’ö bhë ka‑ ‑dɔ ’pö. ꞊Dhɛ ‑kë ꞊nɛ ‑yö ’dhö, këpëyaamɛ ’ö bhë ‑yö ‑dho nu ‑a ‑bha nu ’töng ’ö ‑Zlan ‑ya kpɔ ‑a ‑gɔ ‑a ’ka. ⁷’Wun yaa kë ‑sü ’ö ‑bin ‑sü ’ka ‑a ‑bha ꞊faan’ ‑yö yuö kë ‑na; ’kɛɛ ’wun ‑nu ’ö ’yi‑ ꞊blɛɛ ka ‑dhë bhë ‑a kë ‑yi ’ka kö ‑yö kë, kö pë ’ö zian ta‑ ‑gɔ bhë kö ꞊ya zian ’po ‑a ‑gɔ. ꞊Ya kë ’dhö ’ö dho ziö.

⁸꞊Ya kë ’dhö kö këpëyaamɛ bhë ‑a nu ’töng ꞊ya ‑lo. ’Kɛɛ ‑a ‑bha yi ’dhiö ’to ’töng ꞊ya ‑lo, kwa Dëmɛ Yesu ‑dhoë zë ö ’tëë ’ö dho go ‑a dhiö ‑a ’ka; ‑yö ‑dho ‑a ’gü ꞊siö’‑ ö ‑bha mɛdhɛ ’bhü ’ö dho nuë ’piigbeedhɛ ’gü bhë ‑a ’ka ö nu ’töng ’ka. ⁹Këpëyaamɛ ’ö bhë ‑a nu ‑yi ’ka, ‑yö ‑dho nu Satan (’ö dü ’ka bhë ‑a) ꞊faan’ ’ka; ’yö ’slë ꞊suu’‑ ’plɛ ‑kë, ‑dhidhaapë ꞊suazë ’iin ꞊duakëpë ꞊suazë ‑nu waa‑ pë ’gblüünzë ꞊suazë ‑an kë ‑sü ’ka. ¹⁰‑Yö ‑dho ’wun yaa kë ‑kɔ ꞊suu’‑ ’kpɛkpɛ ’plɛ ‑ta kö mɛ ‑nu (’ö wo ’ka ’dho kë ‑Zlan ‑wo ‑dhɛ ’wun gia‑ ‑mɛ ‑nu ’ka) ’ö ’wo dho kë dhɔng ‑mɛ ‑nu ’ka bhë, kö ‑yö ‑an ‑püö. Mɛ ‑nu ’wo bhë ’ö ’wo dho ꞊dhɔng ’ö tɔɔ ’wun giagia ’ö dho ‑an gbaa dha ‑sü ’ka bhë waa‑ ‑dhɔ kë ‑waan ‑a ’kun wo ꞊zuö’ ’gü. ¹¹‑A ‑wun ’gü mɛ ‑nu ’wo bhë ‑Zlan ‑dhoë kë kö ‑wo ‑püö ‑zo yö ‑sü ’ö ꞊suapë ’ka ‑a ‑bha ‑sü ’gü. ¹²‑Kɔ bhë ‑a ’ka mɛ ’kpɛkpɛ ’ö waa ’wun gia‑ ’sü wo ‑bha ’ka ’ö ’wo ’wun yaa kë ‑sü ‑dhɔ ‑kë wo ꞊zuö’ ’gü, za ‑yö ‑dho ‑püö ‑an ‑ta.

‑Zlan ‑bha mɛ ‑nu ’ö ‑an sü kö ‑waan kë dhamɛ ‑nu ’ka

¹³Dhegluzë ‑nu, ‑yö yi ‑bha kö ’yi ‑Zlan zuö pö ’töng ’plɛ ’ka ka ‑wun ’gü. Ka ‑dhɔ ‑yö kwa Dëmɛ ‑kë. Yö ꞊nɛ ’ö‑ ‑wun ’gü, ’yö ka sü ‑a züdɔyi ’ka kö ’ka kë dhamɛ ‑nu ’ka ꞊bɔa’ ‑Zuu ’slööslö ‑ta ‑sü ’ka. ‑Zuu ’slööslö ’ö bhë ꞊nɛ ’ö ka ‑kë ‑Zlan ‑bha mɛ ‑nu ’ka ka ‑bha ‑zo ‑yö ’wun gia‑ ‑bha ‑sü ‑wun ’gü. ¹⁴’Wuntaɔsë (’ö ‑gban Yesu Klito ‑bha) ’ö ’yi‑ ꞊blɛɛ ka ‑dhë bhë, yö ꞊nɛ ’ö ‑Zlan ‑yö bɔ ‑a ‑ta, ’ö ka ꞊dhɔɔ kë ‑yö ‑kë ’dhö ’tɔbhɔdhe ’ö kwa Dëmɛ Yesu Klito ’piö bhë ’kaan‑ ka ‑bha yö. ¹⁵Dhegluzë ‑nu, ꞊dhɛ ‑kë ’dhö bhë, kö ‑ka dɔ ’gbee‑! ’Wun ‑nu ’ö ’yi ka ‑daan ‑a ’ka dhiö ’iin ‑a mɛ ‑nu ’ö ’yi‑ ꞊blɛɛ ka ‑dhë ’sëëdhɛ ’gü, ka ‑zo ‑yö ’to ‑an ’piö ’töng ’plɛ ’ka!

¹⁶‑Zlan ’ö kwa Dë ’ka yö ꞊nɛ ’ö kwa ‑dhɔ ‑ya ‑kë; pë ’ö ‑kë ’ö kwa gbaa ‑zo ‑yö ö ‑bha ‑sü ꞊nɛ kwa ‑dho dha, waa‑ ’gü ‑dɔ ’gbee‑ ‑sü, ’ö ꞊toëpö ’ka ‑an ’ka ’ö bhë. ‑Zlan ’ö bhë waa‑ kwa Dëmɛ Yesu Klito ¹⁷‑wo ka ꞊zuöga pa ’gü ‑dɔ ’gbee‑ ‑sü ’ka. Kö ’wun ‑së kë ‑sü ’ö ’wun ꞊blɛɛ’ ‑sü ’gü ’iin ’ö ’wun ‑nu kë ‑sü ’gü ‑yö ꞊faan’ nu ka ‑dhë.

Pɔlö ‑nu ‑wa ‑dhɛ mɛ ‑nu ’wo Tesalɔnikö ‑an ‑gɔ ‑sü kö ‑wo ꞊bhɛa’‑ wo ‑wun ’gü

¹꞊Ya ’kan ‑a ‑bha, dhegluzë ‑nu, yi‑ ‑dhɛ ka ‑gɔ kö ’ka ꞊bhɛa’‑ yi ‑wun ’gü kö kwa Dëmɛ ‑wo ’ö bhë ‑yö ’dho ’dhiö, ‑yö ‑wo ‑dhɛ ’plɛ ’gü ‑bla ’ka kö ‑yö kë ꞊bhlëzë ꞊nɛ ‑kɔ ’ö ꞊kaa’ ka ’piö ’ma bhë ‑a ’dhö. ²‑Ka ꞊bhɛa’‑ ’zü kö ‑Zlan ‑yö yi bho mɛ ꞊suu’‑ yaazë ‑nu ’ö ‑an ꞊zuö’ ’dhö ya ‑an kwɛɛ. ’Ö tɔɔ mɛ ’plɛ kun ’wo ‑we Yesu ‑wun ‑dhɛ ’wun gia‑ ‑sü ‑bha.

³’Kɛɛ ‑zo ‑yö ‑a ‑bha ‑mɛ ‑mü kwa Dëmɛ ’ka. Yö ꞊nɛ ’ö dho ka gbaa ꞊faan’ ’ka. ’Go mü ’ö dho ka ‑maa kë këpëyaamɛ (’ö ‑kë dü ’ka bhë) ‑a ‑gɔ. ⁴Kwa Dëmɛ ’ö bhë ’ö yi gbaa ‑zo ‑yö ka ‑bha ‑sü ’ka ꞊nɛ ’wun ‑nu ’ö ’yi‑ ꞊blɛɛ ka ‑dhë bhë, ka‑ kë ‑sü ’gü. ’Go mü ’ka dho dho ‑a ’ka ’dhiö. ⁵Kwa Dëmɛ ‑ya kë kö ‑Zlan ‑dhɔ ‑yö ka kë, ’iin kö ꞊zuö’ ‑saa ‑dhɛ ’ö go Klito ’gü ‑yö kë ka ‑gɔ!

’Wun ’ö ‑gban yuö kë ‑sü ‑bha ‑a ‑dhio ’ö Pɔlö ‑ya dɔ

⁶Dhegluzë ‑nu, ’yi‑ ‑dhɛ ka ‑gɔ kwa Dëmɛ Yesu Klito ’tɔ ’gü kö ’fiamɛ ‑nu ’ö pë ‑nu ’ö ’yi ‑an ‑daan ‑a ’ka ’ö ’waa ’we ‑na ‑a kë ‑sü ‑bha bhë kö ’ka ’kan ‑an ‑bha! ⁷‑Kɔ ’ö ’ka dhoë‑ kaa kö ’kaan‑ yi ‑bha ’wun ꞊zuan’ ’sü, ka‑ kë ‑kɔ ‑dɔ; ’ö tɔɔ ꞊dhɛ ’yi tun ka ’piö mü yiëë kë ’fiasü. ⁸Yiëë yi ꞊kwaa’ yi ‑de ‑zü kö mɛ ’kpaan gbɛ ‑yö yi ’dhi gba ’kpaan kö yiëë pë ’bhaa nu ‑a ‑dhë. Yuö ꞊nɛ ’yi‑ ‑kë ’töng ’saadhö ’ka, ’ö ’yi bɔ ’gügadhe ꞊va ‑nu ’gü. ‑Yö ‑kë ’dhö kö ꞊kun ’ö yi ’gbiin‑ dho mɛ ’bhaa kë. ⁹‑A kë ‑nu ’ö ’yi‑ wo ’dhö bhë yaa kë ꞊nɛ kö yiëë ‑mɔ ‑a ‑bha kö ’yi‑ pö ka ‑dhë ’ka nu yi ‑dhë; ’kɛɛ yi‑ kë ’dhö ꞊zian’ kö ‑yö kë ka ‑bha ’wun ꞊zuan’ ’ka. ¹⁰’Ö bhii ’töng ’ö ’yi ꞊kaa’ ka ’piö mü bhë, yi‑ ‑pö ka ‑dhë ꞊nɛ mɛ ’yaa‑ ’piö kö ’ö yuö kë bhë ‑a ꞊dua’ ’yaa ‑mü kö ‑yö pë ‑bhö.

¹¹‑A pö ’yi‑ wo ka ‑dhë ’dhö bhë ’ö tɔɔ yi‑ ‑ma ꞊nɛ mɛ ’bhaa ‑nu ‑wo ka ziën ’ma ’ö ’waa yuö kë; ’ö ‑an ‑bha ‑tosiadhe ‑yö ‑kë ‑de ‑dɔ wo ’bhamɛ ‑nu ‑bha ’wun ’gü ‑sü ’ka. ¹²Mɛ ‑nu ꞊suu’‑ ’wo bhë, yi‑ ‑dhɛ ‑an ‑gɔ tɔng ‑dɔ ‑an ‑dhë ‑sü ’ka kwa Dëmɛ Yesu Klito ’tɔ ’gü ꞊nɛ ‑wo yuö kë ’töng ’plɛ ’ka kö ‑wo wo ‑de giagia ‑bha ‑bhö ‑pë yö.

¹³Dhegluzë ‑nu, kö ꞊kun ka ’gü ‑yö ga ’wun ‑së kë ‑sü ’ka! ¹⁴’Wun ‑nu ’yi‑ ꞊blɛɛ ka ‑dhë ’sëëdhɛ ’ö ꞊nɛ ‑a ’gü bhë mɛ yaa ’we ‑a ꞊bhlë ‑ya ‑sü ‑bha, ‑kaa ’piö ‑ga, ’ka ka ‑ta yö ‑a ‑bha, ‑yö kë ’dhö kö lë‑ ‑yö ’kpɔ ‑a ‑ta. ¹⁵’Kɛɛ kö ꞊kun ’ö ’ka‑ sü ka yaagümɛ ’ka! ‑Ka ‑a ‑zo ‑büö ꞊zian’ ꞊nɛ ka dheglu ’dhö.

¹⁶Kwa Dëmɛ ’ö ꞊zuöyagluu nu mɛ ‑nu ‑dhë bhë, ‑yö ka gbaa ꞊zuöyagluu ’ka, ’töng ’plɛ ’ka, ‑kɔ ’plɛ ‑ta! Kwa Dëmɛ ‑yö ’to mɛ ’plɛ ka ’piö!

¹⁷’Sëëdhɛ ꞊bɛɛn’ ‑wo ’ö ’a‑ ‑ya n ‑de giagia ‑kɔ ’ka ’yö ꞊nɛɛ: Ma Pɔlö, ’ma ’we kaa! ‑Kɔ ’ö ’a n ‑kɔ pin ꞊kaa’ ma ’sëëdhɛ ‑nu ’plɛ ‑ta ’ö bhë. Ma ’sëëdhɛ ꞊bɛɛn’ ‑kɔ ’ö bhë.

¹⁸Kö kwa Dëmɛ Yesu Klito ‑yö ’dhuë‑ ’kpɔ ka ‑bha!