2 Piɛɛ

’Sëëdhɛ ꞊plɛ ‑naa ’ö

Piɛɛ

‑ya bɔ ‑Zlan ‑bha mɛ ‑nu ‑dhë bhë

’ö ꞊nɛ

¹’Sëëdhɛ ꞊nɛ ma Simɔ Piɛɛ ’a Yesu Klito ‑bha bɔmɛ ’ka bhë ꞊nɛ ’a‑ bɔ mɛ ‑nu ’ö kwa ‑bha ‑Zlan ’ö kwa Dhamɛ Yesu Klito ’ka ’ö ’yaa mɛzëgüdhe kë ‑a ‑wun ’gü ’ö kwa ‑nu kwa ‑bha ‑zo ‑yö ‑a ‑bha ‑sü ‑wungbeezë bhë, ’ö‑ ‑ta ’dhö do bhë, ka ‑dhë. ²Kö ‑Zlan waa‑ kwa Dëmɛ Yesu ‑an dɔ ‑sü ’gü, ’glusë ’ö ’wo‑ kë ‑na ka ’ka waa‑ ꞊zuöyagluu ’ö ’wo‑ nu ‑na ka ‑dhë bhë ‑wo ’dho ’dhiö ‑kplawo.

’Ta ‑kɔ ‑së ’ö ‑Zlan ‑bha zian ‑ta ‑a ‑gɔgɔ ‑nu ’wo‑ ‑ta

³‑A ‑bha ’piigbeedhɛ ꞊ya kwa gbaa pë ’saadhö ’ö kwa ‑bha ‑tosiadhe ‑bha ‑wun ‑yö yö ‑a ‑bha ‑a ’ka kö ’kwaan‑ ‑kë ‑a ’gü ‑sü kë ‑klu ‑Zlan ‑bha ‑sü ’ka; ’ö ꞊yaa‑ kë mɛ ’ö kwa ꞊dhɔɔ ‑kë ‑a ‑de ‑bha ’tɔbhɔdhe waa‑ ‑a ‑bha këwun ‑së ’gü bhë ’kwa‑ dɔ. ⁴Yö ꞊ga ’ö‑ ‑zo kun, ’ö ’tɔ ‑go mɛ ‑dhë ‑pë ‑nu ꞊vava ’ö ‑an ‑wun ’dhö ’gbee‑, ’ö ‑an nu kwa ‑dhë kö ’kaan‑ bɔ ‑an ‑ta ’kaan‑ ’kan ‑ya pë ‑dhɔ ’ka ‑sü yaya ’ö dho mɛ ’ka ’gü ꞊siö’ ‑dhɛ ‑bha ’kpongtaa zö bhë ‑a ‑bha. ‑Yö kë ’dhö kö ’kaan‑ bhɔ ‑a ‑bha. ⁵Pë ‑de ’ö ‑kë ’ka dho pë ’plɛ kë kö ka ’ta ‑kɔ ‑yö kë ‑së, ka ‑bha ‑zo yö ‑Zlan ‑bha ‑sü ’gü, ’ö ’ka dho ‑Zlan ‑bha ’wun ‑nu dɔ ‑sü ‑da ka ’ta ‑kɔ ‑së ’ö dho kë ‑a ‑ta ’ö bhë. ⁶‑Ka ‑de ‑kun ’wun ‑nu ’gü ‑sü ‑da ka ‑bha ’wundɔdhe ’ö ‑Zlan ‑bha ’wun ‑nu ’gü bhë ‑an ‑ta; ’wun ‑kë ‑de ꞊tian’ ‑sü bhë, ka ‑dho ꞊zuösaadhɛ ‑da ‑a ‑ta; ka ‑dho ‑klu ‑Zlan ‑bha ‑sü ‑da ꞊zuösaadhɛ ‑ta ’pö. ⁷꞊Ya ’go mü, dhegluzë ‑nu ‑bha ’ko ‑sü ‑së ‑sü bhë, ‑kaa ‑da ka ‑bha ‑klu ‑Zlan ‑bha ‑sü bhë ‑a ‑ta. ’Ö ‑kaanta ’ka zlöö, ’ö ka ‑bha ka ’ko ‑sü ‑së ‑sü ’ö bhë, ’ka dho ‑dhɔ ’ö go ‑Zlan ’piö ’ö ’wo‑ ‑kë mɛ ’saadhö ’ka bhë ‑a ‑zuö ‑a ‑ta. ⁸Bhii ‑kɔ bhë ꞊nɛ ’ö wɔ ‑kɔ ‑së ‑nu ’wo bhë ’ö ꞊wa kaa ka ’gü ꞊va ’ö ka ’ka ’dho kaa pë ’kpaan ’ka ’iin ’ö ka ’ka ’dhö ‑bo kwa Dëmɛ Yesu Klito dɔ ‑sü bhë ‑a ’gü. ⁹’Kɛɛ mɛ ’ö wɔ ‑kɔ ’ö bhë ’yaa‑ ’gü, ꞊ya ‑dhɛ ‑ga, ‑a ’yan ‑nu ’waa ‑dhɛ yö ’ma ꞊gbiin ꞊nɛ ’yënngtiimɛ ’dhö, bhii kö ‑a ꞊zlöö ꞊ya trö ziö ’ö ‑Zlan ‑ya wo ‑a ‑bha ꞊sɔɔn yaa ‑nu ‑ta bhë ‑a ’ka.

¹⁰꞊Dhɛ ‑kë ’dhö, n dhegluzë ‑nu, ‑kaa ’slë ꞊mɛɛ’‑ kö ’ka dɔ gɛnngdhö ‑klu ‑sü ’ka ka ꞊dhɔɔ ’ö ‑Zlan ‑ya ‑kë ’ö ka ‑ya bhë ‑a ’wun ’gü; ’ö tɔɔ ‑a ‑kë ’dhö ‑sü ’ka ꞊nɛ ’ö ka ’ka ’dho ‑püö ’wun yaa kë ‑sü ’gü. ¹¹‑Kɔ bhë ꞊nɛ ’ö ‑Zlan dho ’kwɛɛ poë ka ‑gɔ ’gbɛa ’ka kö ’kaan‑ ‑da kwa Dëmɛ, kwa Dhamɛ Yesu Klito ‑bha ‑gludëdhɛ ‑pö ’ö ’tɔbhɔdhɛ ’dhoë‑ ‑bha ꞊toëpö ’ka bhë ‑a ’gü.

¹²’Kö ‑kë ꞊nɛ ’wun ‑nu ’wo ꞊nɛ ’ka ‑an dɔ ’saadhö ’ö ’ka ‑ya ‑sü ’ka kpinngdhö ’wun gia‑ ’ö ’ka‑ ma bhë ‑a ’gü, a ‑dho n ‑zo kë ka ‑zo ‑büö ‑a ’ka ‑sü ’piö ‑kplawo. ^13-14Bhii kwa Dëmɛ Yesu Klito ꞊yaa‑ kë ’ma‑ dɔ ꞊nɛ ‑a yi ’yaa ꞊gbiin gbɔ kö ’aan‑ ’go bun ’ö ꞊nɛ ‑a ’gü. ꞊Dhɛ ’ö ‑kë ’dhö, kö ’töng ’ö n ‑gɔ kö a ꞊tun ka ’piö ’kpongtaa zö bhë, a ‑dho ka ‑ya ’yaan ‑kplawo mɛ ‑zo ‑büö ‑wo ‑nu ’ka. ¹⁵‑Wo ‑nu ’wo bhë, a ‑dho pë ’saadhö ’plɛ kë kö ꞊ya kë ꞊nɛ ’maa ka ’piö zö gbɔ, kö ‑waan ‑ya ka ꞊zuö’ ‑bha ‑kplawo.

’Wun ’ö ‑gban mɛ ‑nu ’wo Klito ‑bha ’bhü yö ‑an ‑bha

¹⁶Kwa Dëmɛ Yesu Klito ‑bha ’piigbeedhɛ waa‑ ‑a ‑bha nu ‑sü ’ö bhë, yaa kë ꞊nɛ ‑wo ‑go ꞊kwɛzü ‑wun ‑nu ’ö mɛ ‑nu ‑wa yö ’ko ’dhiö ‑a ’gü ’ö ’yi ka ꞊daan ‑a ’ka. ‑A ‑bha ‑kë ’gblüünzë ‑sü ’ö bhë yi‑ ‑yö yi ’yanga gia‑ ’ka. ¹⁷Bhii yi ’ö kwa Dë ‑Zlan ‑yö ꞊bhlë waa‑ ’tɔbhɔdhe nu ‑a ’ka ‑a ‑dhë bhë, ‑yö ‑kë yi ’yaan, ’ö yi bhë ‑a ’ka ’ö ‑Zlan ‑bha ’bhü ’gblüünzë ‑yö ꞊yɔɔ ‑a ‑ta ’ö ‑wo do ‑yö ‑we ’ö‑ pö: Mɛ ’ö ꞊nɛ n Gbö ‑dhɔkaasüzë ’ö ’a n ‑zo ’kun ‑wun ’plɛsɛn ‑lo ‑a kwɛɛ yö ‑mü. ¹⁸‑Wo ’ö ’dhö bhë, yi‑ ‑ma ’dhö kö ‑yö ’we ‑na dhang‑ ’gü. ‑A yi bhë ‑a ’ka, yi ‑kë ‑tɔn ’slööslö tuö.

¹⁹꞊Ya kë ’dhö, ’wun ’ö ‑Zlan ‑wodhiölomɛ ‑nu ‑wa ꞊blɛɛ bhë ‑yö ’dhö gia‑ ’ka. ꞊Ya kë ’dhö kö ꞊yö ‑së ’ka ka ‑zo ’to ‑an ‑dhë bhii ‑wo kë ꞊nɛ ꞊labang ’dhö ‑dhɛtiidhɛ ’gü, kwa ꞊zuö’ ’gü. ’Yö ꞊ya kë ’ö ꞊labang ‑nu ’wo bhë ’wo bhü ’dhö gbeng gbeng ’ö ‑toë ’pö ’ö ‑dhiadhiö ’susongga (’ö Klito ’ka bhë) ’ö ‑wo ‑a ’ka ’ö ‑dhɛ ꞊poë’ ka ꞊zuö’ ’gü (’papadhö). ²⁰’Kɛɛ kë‑ wo ’dhö bhë, ‑yö kë ka ’yaan ꞊nɛ ’wun ’ö ‑Zlan ‑ya ꞊blɛɛ ’ö bɔa ö ‑wodhiölomɛ ‑nu ‑ta ’ö ꞊bɛɛn’ ‑sü ’ka bhë, ’yaa pë ’ö mɛ ‑ya ‑gɛn pö ö ‑de ꞊kwaa’ ‑wun ’ka ‑a ’ka. ²¹Bhii ‑Zlan ’dhi ‑wo pö ‑sü ’ka‑ ‑ga ‑na bhë, mɛ ’bhee‑ ‑de ꞊dhɔɔbhaa ‑wun ’yaa ‑mü ’kɛɛ ‑Zuu ’slööslö ꞊nɛ ’ö yö mɛ ’bhee‑ ‑nu ’wo bhë ‑an ‑dhë ’dhiö ’ö ’wun ’ö ‑gban ‑Zlan ‑bha, ’ö ’wo‑ ꞊blɛɛ.

’Wun ’ö ‑gban mɛ ꞊daan’ ‑mɛ ꞊suazë ‑nu ‑bha

(Zudë 4-13)

¹Kë‑ wo ’dhiö bhë, ‑Zlan ‑wodhiölomɛ ꞊suazë ‑nu ‑wo ‑kë ‑dhö; ‑kɔ do bhë ꞊nɛ ’ö mɛ ꞊daan’ ‑mɛ ‑nu ꞊suazë ’dhoë‑ ’ka ka ziën. ‑Wo ‑dho mɛ ꞊daan’ ‑wo ꞊suazë ‑nu ’ö dho kë mɛ ’gü ꞊siö’‑ ‑wun ‑nu ’ka‑ yö ’ko ’dhiö kö ‑waan ka ꞊daan’‑. ‑Wo ‑dho ‑kɔ kwa Dëmɛ ’ö ‑an dha bhë ‑a ‑wun ’ka ’ö ’wo wo ‑de ‑da ’güsiödhe ’ö nu ‑na mɛ ‑nu ‑ta ’zodhö bhë ‑a ’gü. ²Mɛ ꞊plëëzë ‑wo ‑dho ziö ‑an ‑bha ‑tosiadhe ’ö ’wundɔdhe gbɛ ’yaa‑ ’gü bhë ‑a ’piö; ’ö ‑an kë ‑kɔ ‑wun ’gü ’ö mɛ ‑nu ‑wo ’wun yaa ꞊blɛɛ’ ’wun gia‑ ‑zian ‑bha. ³’Wëüga ‑wun ’gü, mɛ ꞊daan’ ‑mɛ ꞊suazë ‑nu ’wo bhë ‑wo ‑dho ka ‑püö ‑an ‑de ‑yö ’ko ’dhiö ‑wun ‑nu ’ka. ’Kɛɛ kë‑ wo ’dhö bhë, za ’ö dho kan bhë, ‑an ‑bha ꞊ya ‑lo ‑an tuö ’saadhö ’kpa ‑pë. ‑An ’güsiömɛ ꞊ya ‑da zian‑.

⁴Ka gia‑, ‑ka ‑dhɛ ‑ga bhë ’dhɛ! ‑Zlan ‑bha bɔmɛ ‑nu ’ö ’wo ꞊sɔɔn yaa ‑kë bhë, yaa ‑an kuënnu ö ’piö, ’kɛɛ ‑yö ‑an ‑zuö ‑dhɛtiidhɛ ‑bha ‑glu ’kpa ’dhi ꞊va ’gü; ’ö ’wo dho to mü ’dhö kö ‑Zlan ‑bha zakanyi ‑yaan ‑lo ‑a ’ka. ⁵Mɛ ‑nu ’wo ‑kë ’kpa bhë, ‑Zlan yaa ‑an ’to; ’kɛɛ ‑yö ’yi ꞊va ‑pa ’kpongtaadhɛ ‑dhiizë ‑ta ’ö mɛ ’plɛ ‑wo to ‑a ’gü ‑a ’ke yaa kë Noe ’ö ‑kë ’wun ’ö kpengdhö ‑a ꞊blɛɛ’ ‑mɛ ’ka waa‑ mɛ ’slaplɛ ’bhaa ’ö ’wo dha ’yi bhë ‑a ‑gɔ ’pö ‑an ’ka. ⁶‑Zlan ‑yö Sodɔmë ‑pö waa‑ Gomɔɔ ‑pö ‑an ’gü ‑siö ’siö ꞊kwaa’. ’Wun ‑nu ’wo bhë ‑wo pë ‑nu ’wo dho kë këpëyaamɛ ‑nu ’wo dho nu bhë ‑an ’ka bhë ‑an ‑bha ’wun ꞊zuan’ ’ka. ^7-8’Kɛɛ yö ꞊ga ’ö Lɔtö ’ö ‑kë mɛ kpengdhö ’ka, ’ö‑ ꞊zuö’ ‑yö ‑da ‑wɛɛ ’gü mɛ ‑nu ’ö ‑kë ‑an ziën bhë ‑an wɔ ‑kɔ ‑nu ’ö‑ ’yan ‑yö ‑daa ’gü yi ’saadhö ’ka bhë ‑a ‑wun ’gü bhë, ‑ya ‑dha. ⁹Ka‑ ‑yö bhë ꞊a! ꞊Ya kë ’dhö kö mɛ ‑nu ’wo ‑klu ‑sü ’ka ‑a ‑bha bhë ‑yö ‑an dha ’güdandhe ‑gɔ, ’ö mɛ ‑nu ’ö ’waa kpengdhö bhë ’ö ‑an ‑ya ’klobhɔdhe ‑gɔ ‑Zlan ‑bha zakanyi ’ka. ¹⁰꞊Ii‑ ’kɛɛ mɛ ‑nu ’ö dho ‑an ’klo bhɔ ’wo tɔɔ mɛ ‑nu ’wo ’wun ‑nu kë ‑na mɛ ’bhee‑ ‑de ‑zo ’kun ‑wun ‑bha ‑de ‑kë ‑dhiizë ‑sü ’ka ’ö ‑Zlan ‑bha ‑kë kwa Dëmɛ ’ka ‑sü bhë ’ö ’yaa ‑an ‑dhë pë gbɛ ’ka bhë.

Mɛ ‑nu ’wo bhë, ‑wo wo ‑de ‑sü ꞊va ’ö ’wo wo ‑de ‑ga ’gianzë mɛ ‑nu ’wo to ‑an ‑ta; ’suö pë ’tee ‑de ’yaa ‑an ꞊zuö’ ‑bha yö ꞊ga ’ö ’piigbeedhɛ ’tɔbhɔsüzë ‑nu ’wo dhang‑ ’gü bhë ’ö ’waa ‑an ꞊bhlë ‑ya bhë. ¹¹’Kɛɛ kö ‑Zlan ‑bha bɔmɛ ‑nu ‑de ’wo dhang‑ ’gü kwa Dëmɛ ’dhiö ’ö ’wo ꞊faanzë, ’wo ’piigbeezë ’wo ꞊zië’ mɛ ꞊daan’ ‑mɛ ꞊suazë ‑nu ’wo bhë ‑an ‑ta ’waa ’wun yaa ꞊blɛɛ’‑ ’piigbeedhɛ ’tɔbhɔsüzë ‑nu ’wo bhë ‑an ’ka Dëmɛ wö ’dhiö. ¹²’Kɛɛ mɛ ‑nu ’wo bhë ‑wo ’wun ‑nu ‑kë wo ꞊zuö’ tii ‑bha ꞊nɛ ’blü ’wü ‑nu ’wo ‑da kö ‑waan ‑dhaa ‑da ‑an bhɔɛɛ ‑an ’dhö. Pë ’ö ’waa‑ dɔ bhë, ‑wa ‑kë ’yee ‑to ‑a ‑bha ‑wun ’ka. ’Kɛɛ ‑wo ‑dho to wo ‑de këwun bhë ‑a ’gü, ’ö ‑an ’gü ‑yö ꞊siö ꞊nɛ wü ‑nu ’wo bhë ‑an ’dhö. ¹³’Klobhɔdhe ’ö ’wo mɛ ‑nu ‑da ‑a ’gü bhë ꞊nɛ ’ö ‑an ꞊saan’ dho bhoë. ‑Wo wo ‑de ꞊dhɔɔbhaapë ‑yö wo ’yi ‑kan ‑a ‑dhë pë ‑nu ’wo‑ kë ‑na ꞊dhɛ ’po ‑yi ’ka bhë ‑a ’gü. Mɛ ‑nu ’wo bhë ꞊wa kë ‑dhiizë; ‑an ‑bha ‑kë ka ’piö ‑sü ’gü ka ‑bha ‑kɔ ‑da ’ko ’piö ‑sü ‑nu ’gü ‑sü ’ö bhë, ‑yö lë‑ ‑wun ’ka, ’ö ya; bhii ‑yö ‑an ꞊zuö’ ‑bha ‑waan wo ‑de kë kpengdhö ka wö ’dhiö ‑an ‑bha ‑kë ka ’piö ‑sü ’gü. ¹⁴Pë ’ö ꞊ya ‑an ’yënng ‑dhɛ pa ’ö tɔɔ ‑dadheüsü. ‑An ’gü ’yaa ga ꞊sɔɔn yaa kë ‑sü ’ka; kö mɛ ’wo ’tëëtë ‑zo yö ‑sü ’gü ‑wo ‑an ‑püö ‑na. ‑An ꞊zuö’ ‑yö ‑klu ‑sü ’ka ’slë ’wo dho ‑a kë ‑waan ’wëü‑ yö ‑a ‑bha; ꞊wa kë zlöö ‑bha mɛ ‑nu ’ö ‑Zlan ‑bha ’dhangga ’dhö ‑an ‑ta ‑an ’ka. ¹⁵Mɛ ’wo bhë ꞊wa ’go zian ‑së ‑ta, ꞊wa wo ‑de ‑da ’blü Balaamö ‑bha zian ‑ta. Bozɔɔ gbö Balaamö ’ö bhë kë‑ wo ’kpa bhë, ‑yö ‑Zlan ’dhi ‑wo ‑pö; ’kɛɛ ’wëüga ‑dhɔ ‑yö ‑kë ‑a kë ꞊dhia giagiawo. ’Wun yaa ꞊nɛ ’ö‑ ‑kë ’ö ꞊ya kë ’ö ’wëüga yö. ¹⁶’Kɛɛ kë‑ wo ’dhö bhë, ’wun ‑yö ‑blɛɛ ‑a ’ka ‑a ‑bha ꞊gɔügbeedhɛ bhë ‑a ‑wun ’gü; yö ꞊ga tɔɔ yi do ’ka, ꞊soofang mu do ‑yö ’wun ꞊blɛɛ mɛ ’bhee‑ ‑wo ’gü; ‑kɔ bhë ꞊nɛ ’ö mɛ bhë, ’ö‑ ‑bha ’wun ‑nu kë ‑sü ’ö ’wun dɔ ‑sü ’yaa‑ ’gü bhë, ’ö ꞊gbaannu ‑a ’ka.

¹⁷Mɛ ‑nu ’wo bhë ‑an kë ‑kɔ ‑nu ‑wo ‑kë ꞊nɛ ‑dhɛ ’ö dhoo ‑nu ‑wo dho ‑a ‑bha ’yi ’tɔɔ‑ ꞊bhaa ’ö ’wo‑ ‑yɛ ‑a ‑bha wo ‑kɔ ’flëë ’ka ‑a ’dhö, ’iin ꞊nɛ ‑dhɛ ’ö dha kpö ‑nu ‑wo nu ‑a ‑bha dhang‑ ’gü ‑a ’dhö; ’ö ‑dhɛ ’ö mɛ ‑nu ’dhö ‑kpɛ kë ‑na, ’ö ’tëë ‑nu ‑wo nu ’wo ‑ziö ‑an ’ka ‑a ’dhö. Pë ’ö ‑Zlan ‑ya ‑ya ‑an ‑gɔ ’ö tɔɔ ‑dhɛtiidhɛ ’ö ‑trö ’sënsëndhö. ¹⁸꞊Wa ’wun ‑nu ꞊blɛɛ’, ‑a ‑gɛn ’yaa kë ‑dhö ’ö ’wo‑ ꞊blɛɛ ‑de ‑sü ꞊va ’ka; ’ö mɛ ’bhee‑ ꞊dhɔɔbhaa ‑wun ‑nu ꞊lɔɔzë ’ö ’wundɔdhe ‑së ’yaa‑ ’gü bhë ’ö mɛ ’wo ’go ‑na dha ꞊dhia mɛ ‑nu ’wo ‑tosiadhe kë ‑na ’wun ꞊zaa’ ‑sü ’gü ‑an ziën bhë, ’wo‑ ‑da ‑a ꞊zuö’ ‑bha kö ‑wo ‑an ‑püö. ¹⁹‑Wo ‑potaasü ’tɔ go mɛ ‑nu ‑dhë ’kɛɛ kö wo gia‑, wɔ ‑kɔ yaa ‑nu ’wo dho mɛ ’ka ’gü ꞊siö’ ‑dhɛ ’gü bhë, ‑wo ‑an ‑gɔ ꞊nuadhɛ ’gü. ‑A pö ’a‑ wo ’dhö bhë, ’ö tɔɔ mɛ ’ö ‑dhö, pë ꞊ya kë ‑dhö ‑yaan kë ’gbee‑ ‑a ‑ta, kö ‑ya ‑gɔ ꞊nuadhɛ ’gü. ²⁰Bhii ’ö tɔɔ ꞊ya kë ꞊nɛ mɛ ’bhee‑ ‑nu ꞊wa bhɔ ꞊taa’ ‑dhiipë ‑nu ’wo ’kpongtaa zö ‑an ‑dhë, kwa Dëmɛ, Mɛdhamɛ Yesu Klito dɔ ‑sü ‑wun ’gü, ’go mü ꞊wa ’yɛ wo ’zü ꞊wa ’dho ’kpongtaa ‑dhiipë ‑nu ’gü, kö ‑an kë ‑kɔ ’ö zlöö bhë ꞊ya ziö ꞊gɔü’ ‑a mɛ ’ö ‑kë ’dhiö bhë ‑a ‑ta. ²¹‑Yö ’gian ‑an ‑bha ’ka ‑bezë kö ꞊kun ’ö ’wo zian kpengdhö dɔ ’ö ꞊zië’ zian dɔ ‑sü, ’ö ’wo ’go ‑na tɔng ’slööslö ’wo‑ ꞊daan bhë ‑go ‑a ‑ta ‑sü ‑ta. ²²‑Piën bɔ ‑wo do ‑ya ‑pö: Gbɛn‑ ‑yö ’yɛ ö ’zü ’ö ’dho ö ‑pe ꞊taa. ’Yö‑ pö ’zü: ‑Bhɔ tii ’ö ꞊ya ’zlu ’saadhö bhë, ꞊ya ’dho ‑dëüwo ’zü ꞊glöng ’glö ꞊dhia böü‑ ’gü. (Mɛ ‑nu ’wo bhë, pë ’ö ‑kë ‑an ’ka bhë, ‑ya ‑zɔn ꞊nɛ ‑piën ’ö bhë ’wun gia‑ ‑mü.)

Pë ’tɔ go ‑wo ’ö ‑gban Klito ‑bha nu ‑sü ‑bha

¹N dhegluzë ‑nu, ka‑ ‑yö bhë ꞊a! Ma ’sëëdhɛ kë ꞊plɛ ‑naa ’yaa ‑mü ’ö ꞊nɛ ꞊a; pë ‑nu ’a‑ ‑ya ‑an ’gü ’wo tɔɔ kö mɛ ꞊daan’ ‑wo ’a ka ‑zo ‑büö ‑na ‑a ’ka ‑kplawo bhë ‑wa kë kö ka ꞊zuö’ ’piö ‑wun ‑nu ‑wo kë ’kpëdhö, ²‑yö kë ’dhö kö ka ‑zo ‑yaan ‑büö ’wun ’ö ‑Zlan ‑wodhiölomɛ ‑nu ’slööslö ‑wa ꞊blɛɛ ’kpa bhë waa‑ kwa Dëmɛ ’ö Mɛdhamɛ ’ka bhë ‑a ‑bha tɔng dɔ ‑wo ‑nu ’ö‑ ‑bha bɔmɛ ‑nu ‑wo ka ‑daan ‑a ’ka bhë ‑an ’ka. ³’Kɛɛ ‑yö kë ka ’yaan ‑blɛɛzë ’ka ꞊nɛ yi ‑kaanta ‑nu ’ka, ’yee ‑to mɛ ‑bha ‑mɛ ‑nu ‑wo ‑dho kë ‑dhö; ‑wo ‑dho wo ‑de ‑dhi ‑a ‑dhë ‑wun ‑nu kë ’ta ’sü ‑sü ’ka ‑ya pë ‑dhɔ ’ka ‑sü ’ka. ⁴‑Wo ‑dho ’yee to ka ‑bha ‑a pö ‑sü ’ka ꞊nɛ: «Kë‑ wo ꞊nɛ Yesu yaa‑ pö ö ‑dho yɛ ö ’zü ’ö nu ꞊a? ’Yaa ’dhö a? ‑Yö ’më ’sa ’ö ‑dhɛ ‑kë ’dhö ꞊nɛ ’ö mɛ ‑nu ’ö ‑wo bhë ’ö ‑we ‑an ‑dhë ’ö ’waa ‑dhö gbɔ, ’ö ’kpongtaadhɛ ’dhö ꞊tun ꞊nɛ ‑kɔ do ’ö ꞊kaa’ ‑a züdɔyi ’ka ‑a ’dhö ꞊nɛ ꞊ɛ?» ⁵’Kɛɛ kë‑ wo ’dhö bhë, ‑an ‑zlö ꞊ya trö ’saadhö ꞊nɛ ’kpa bhë, ꞊dhɛ ’ö ‑Zlan ‑yö ‑we, ’ö dhang‑ ‑nu ‑wo ‑kë, ’ö ’yi ‑nu ‑wo dho wo ’kuë‑ ’pian do ’ka ‑dhɛ ‑nu ’gü, ’ö ’sɛ ‑yö ‑kë ‑dhö bhë, ⁶’kpongtaadhɛ zii ’gü ‑yö ‑siö ‑kɔ do bhë ‑a ’ka ’yi ꞊va ’ö‑ pa bhë ‑a ꞊kwaa’. ⁷‑Kɔ do bhë ‑a ’ka ’ö dɔ ’kwa‑ wo ꞊dɛɛ ꞊nɛ ’ö ’kpongtaadhɛ waa‑ dhang‑ ‑nu ’dhö ‑ya ‑sü ’ka ‑a ’ka kö ‑an ’gü ‑yaan ꞊siö’ ’siö ꞊kwaa’ ‑Zlan ‑wo do bhë ‑a ’ka. ‑Yö ‑dho kë ’dhö yi ’ö za dho dɔa ꞊kian’ yaa ‑mɛ ‑nu ‑bha kö ‑an ’gü ‑yaan ꞊siö’ bhë ‑a ’ka.

⁸’Kɛɛ n dhegluzë ‑nu, pë ’ö ka ’ka ’dho kun ‑a ‑wun dɔ ‑sü ’ka ’ö tɔɔ kwa Dëmɛ ‑bha ’ka, ‑dhɛkpaɔyi do ‑yö ꞊nɛ ‑kwɛ ‑vuu do ’dhö, ’ö ‑kwɛ ‑vuu do ’dhö ꞊nɛ ‑dhɛkpaɔyi do ’dhö. ⁹’Wun (’ö ‑gban kwa Dëmɛ ‑bha nu ‑sü ‑bha) ’ö‑ ’tɔ go bhë, yaa kë ꞊nɛ ‑a yi ‑blü ’ö‑ wo ’dhiö ꞊nɛ ‑kɔ ’ö‑ ’ka mɛ ’bhaa ‑nu ꞊zuö’ ’gü bhë ‑a ’dhö; ’kɛɛ kë‑ wo ꞊zian’ ꞊zuösaadhɛ ’gü kwa buëndhö, bhii ’ö tɔɔ ’yaa‑ ’piö kö mɛ gbɛ ’gü ‑yö ꞊siö’; ‑ya ‑kë ’dhö ꞊zian’ kö mɛ ’plɛ ‑waan ’go wo ‑bha ꞊sɔɔn yaa ’gü, kö ‑waan ꞊dhië’‑ ‑a ’piö.

¹⁰Kwa Dëmɛ ‑dho nu ꞊nɛ ꞊kwaanmɛ ‑yö nu mɛ tii ’ka. ‑A yi bhë ‑a ’ka, dhang‑ ‑nu ‑wo ‑dho ziö ’wo dho; wo ’ka ’dho kë ‑dhö gbɔ. ’Kɛɛ ‑an ’dho ‑zuö ‑yö ‑dho kë ‑ziizë. ‑A yi bhë ‑a ’ka, pë ‑nu ’wo dhang‑ ‑nu ’gü, ‑an ’gü ‑dho ꞊siö’ ’siö ꞊kwaa’; ’sɛ waa‑ ö ‑ta ‑pë ‑nu ’plɛ, ‑an ‑bha ‑këdhösü ’dhiö ‑dho toë yi bhë ‑a ’ka. ¹¹Ka‑ ‑yö bhë ꞊a! Kwa gia‑ ‑yö kwa ’yaan ’ka ‑wun ’ka ꞊nɛ pë ’plɛ ’gü ‑dho ꞊siö’ ꞊nɛ ‑kɔ bhë ‑a ’dhö. ꞊Ya kë ’dhö kö ’ta ‑kɔ ’ö ’ka dho taa ’yaa ka ’yaan a? Yö ꞊nɛ ’ö tɔɔ ‑tosiadhe ’ö kpengdhö ’ö ’wo‑ ‑kë ‑klu ‑Zlan ‑bha ‑sü ’gü, ¹²‑ya ‑a ‑gɔ ‑sü ’ka, ’iin kö ’kwaan‑ kë kö ‑yaan nu ’zodhö kwa këpë ‑nu ’gü. Yi bhë ꞊nɛ ’ö dhang‑ ‑nu ’gü dho ꞊siö’ ’siö ꞊kwaa’ ‑a ’ka, ’ö pë ‑nu ’wo dhang‑ ’gü ’ö ’wo dho kpö ’siö bhë ‑a nɛ‑ ‑bha. ¹³’Ö bhii pë ’kwa ‑ya ‑a ‑gɔ ’ö tɔɔ dhang‑ ‑nu ‑dëü waa‑ ’sɛ ‑dëü ’ö ‑kë kpengdhö ‑sü ’dhö ‑a ‑ta ’ö ‑Zlan ‑ya ’tɔ go bhë.

¹⁴’Wun bhë ‑a ‑wun ’gü, n dhegluzë ‑nu, ꞊dhɛ ’ö ‑kë ꞊nɛ kwa ‑ya pë ‑nu ’wo ’dhö bhë ‑an ‑gɔ, ‑ka dɔ ’gbee‑ kö ‑waan ka yö mɛ ’ö ‑dhii ’yaa ‑an ‑bha, ’ö ꞊zuöyagluu ’dhö ‑an ‑gɔ ‑Zlan wö ’dhiö ‑an ’ka. ¹⁵Kwa Dëmɛ ‑bha ꞊zuösaadhɛ bhë ‑yö kë ka ‑gɔ ꞊nɛ ’töng ’ö ꞊tun ka ‑gɔ kö ’kaan‑ ka ‑de ꞊baa’‑ dhasü ’gbloo ’piö ‑a ’dhö ꞊nɛ ‑kɔ ’ö ‑Zlan ‑bha ’kpaakpadhɛ ’gü ’ö Pɔlö, kwa dheglu ‑dhɔkaasüzë ‑ya ꞊bɛɛn ‑a ’ka ’ö‑ bɔa ka ‑dhë bhë ‑a ’dhö. ¹⁶’Wun bhë ꞊nɛ ’ö ’wun ‑gban ‑a ‑bha ’ö‑ ‑ya ö ‑bha ’sëëdhɛ ’plɛ ’ö‑ bɔ ‑na ka ‑dhë bhë ‑a ’gü. Yö ꞊ga ꞊dhɛ ‑kë ꞊nɛ ‑a ‑bha ’sëëdhɛ ‑wo ’bhaa ‑nu ‑gɛn ma ‑sü ‑yö ’gbee‑ bhë, ’ö mɛ ‑nu ’ö ’waa ’wun ‑gɛn dɔ ’ö ‑dɔ gɛnngdhö ‑sü ’yaa ‑an ‑gɔ ‑zo yö ‑sü ’gü bhë, ’wo‑ ‑gɛn bho ’gbloo ’gü ꞊nɛ ‑kɔ ’wo‑ kë ‑na ‑a ’ka ‑Zlan ‑bha ’sëëdhɛ ꞊bɛɛn’ ‑wo ’bhaa ‑nu ’gü bhë ‑a ’dhö bhë. ’Kɛɛ kë‑ wo ’dhö bhë, wo ‑de ‑da ’wo‑ wo ‑na ’gü ꞊siö’ ‑zian ‑ta bhë.

¹⁷’Kɛɛ ka ‑zë, n dhegluzë ‑nu, ka ’paan ꞊ya bho ’saadhö ꞊nɛ bhë; ‑ka dɔ ka ‑de ’slë ’ka kö ꞊kun ’ö ’ka dho ka ꞊kwaa’ ka ‑de ‑zü ’ö këpëyaamɛ ‑nu ‑bha ’wun ‑kun ’kuë ‑sü bhë ’ka ka ‑de to ‑a ’gü ’ö pë mɛ ’ö ꞊ya ‑ya ka ’gü bhë ’ö dha ka ‑gɔ. ¹⁸‑Ka ’dho ’dhiö ꞊zian’ kwa Dëmɛ, kwa Dhamɛ Yesu Klito ‑bha ’glusë waa‑ ‑a ‑bha ’wun ‑gɛn dɔ ‑sü ’gü. Kö ’tɔbhɔdhe ‑yö kë ‑a ‑bha ’ka ꞊dɛɛ, ꞊toëpö ’ka! Amɛn.