2 Kolɛntö

’Sëëdhɛ ꞊plɛ ‑naa

’ö Pɔlö ‑ya bɔ

Yesu ‑wun ‑dhɛ ’wun gia‑ ‑mɛ ‑nu ’wo

Kolɛntö

plöö ‑an ‑dhë bhë ’ö ꞊nɛ

¹’Sëëdhɛ ’ö ꞊nɛ ‑yö ‑go ma Pɔlö ’ö ‑Zlan ‑zo ’kun ‑wun ’ka ’ö ’a Yesu Klito ‑bha bɔmɛ ’ka bhë ma ’dhö yië‑ kwa dheglu Timote yi ’piö. ‑Yö ‑dho Yesu ‑wun ‑dhɛ ’wun gia‑ ‑mɛ ‑nu ‑dho ’kuë‑ ‑sü ’ö ’ka Kolɛntö plöö waa‑ ‑Zlan ‑bha ’sɛgɔgümɛ ‑nu ’slööslö ’ka Glɛkö ’saadhö ka ’piö. ²’Go, kwa Dë ‑Zlan waa‑ kwa Dëmɛ Yesu Klito ‑wo ’dhuë‑ ’kpɔ ka ‑bha, ‑wo ka gbaa ꞊zuöyagluu ’ka.

Pɔlö ‑bha ‑Zlan ꞊sɛɛ‑ bho ‑sü

³‑Kwa kwa Dëmɛ Yesu Klito Dë ‑Zlan ’tɔ ‑blü, bhii yö ꞊nɛ ’ö tɔɔ ’glusë Dë, yö ꞊nɛ ’ö tɔɔ ‑Zlan ’ö mɛ ’yënng ꞊dhuë’ ’töng ’saadhö ’ka. ⁴‑Yö kwa ’yënng ꞊dhuë’ ’yena ‑wun ’saadhö ’ö nu kwa ‑ta ‑a ’gü, ‑yö kë ’dhö kö kwa ‑de ’pö mɛ ‑nu ’wo to ’wo bɔ ‑na ’klobhɔdhe ꞊suu’‑ ’saadhö ’gü kö pë do ’ö‑ ‑kë kwa ’yënng ꞊dhuë’ ‑pë ’ka ’ö go ‑Zlan ’piö bhë kö ’kwaan‑ ‑an ’yënng ꞊dhuë’ ‑a ’ka ’pö. ⁵Bhii ‑kɔ do ’ö kwa ’klo ’dho bhɔ ‑na ‑a ’ka Klito ‑wun ’gü bhë, ’ö kwa ’yënng ꞊dhuë’ dhe ꞊va yö ‑a ’ka ꞊bɔa’ Klito ‑ta ‑sü ’ka. ⁶‑Ka ‑dhɛ ‑ga! Yi ’klo ’ö bhɔ ‑na ꞊nɛ ‑yö ‑bhɔ ’dhö kö ’kaan‑ ’yënngdhuëdhe waa‑ dhasü ‑an yö. ’Ö ꞊ya kë ꞊nɛ ’yië ’yënngdhuëdhe yö kö ‑yö ‑kë ’dhö kö ’yië ka ’yënng ꞊dhuë’ kö ’klobhɔdhe ‑nu do ’ö ’yi bɔ ‑na ‑a ’gü bhë kö ka ‑de ’pö ’kaan‑ bɔ ‑a ’gü ꞊zuösaadhɛ ’ka. ⁷Yi ‑zo yö ‑sü ‑mü ꞊nɛ ‑kɔ do ö ’klobhɔdhe ‑nu ’dho nu ‑na ‑a ’ka yi ‑ta bhë ’ö ka ‑bha dho kë ‑a ’ka ’pö bhë, ‑kɔ do bhë ’ö ’yënngdhuëdhe ’ö ’yi‑ ’gü, ’ö ka ‑bha ’dho kë ‑a ’ka ’pö. ⁸Yi‑ ’piö, dhegluzë ‑nu, kö ’klobhɔdhe ꞊suu’‑ ’yi‑ yö Azi ‑sɛ ’gü bhë ’yi‑ ‑wun ꞊blɛɛ’‑ ka ‑dhë. ‑Yö ‑kë ꞊va, ꞊dhɛ ’to ‑na zlöö kö ‑to ’bhee‑ ‑sü ’yaa yi ’yaan gbɔ. ⁹’Kɛɛ yi ‑we ‑a ‑wun ‑bha ’ö ’yi yi ꞊kwaa yi ‑de ‑wun ‑zü ‑yö kë ’dhö kö ’yi yi ‑zo bho yi ‑de ꞊faan’ ’piö, ’yi yi ‑zo yö ꞊zian’ ‑Zlan ’yö gamɛ ‑nu bho ga ’gü bhë ‑a ‑bha. ¹⁰Yö ꞊nɛ ’ö yi bho ’wun ’gbee‑ ’ö ‑kë ga ‑wun ’ka bhë ‑a ’gü; pë ’ö ‑kë ’yö ‑kë yi ’yaan ꞊nɛ ’wun ’gbee‑ ꞊suu’‑ ‑nu ’wo bhë ‑yö ꞊tun yi bho ‑an ’gü ’zü bhë ’ö bhë. ¹¹’Ö tɔɔ ka giagia, ka ‑dho nu yi ‑dhë ‑bhɛa yi ‑wun ’gü ‑sü ’ka bhii ꞊ya kë ’dhö ‑Zlan ‑yö ‑dho ꞊bhɛa’ ‑wo ꞊plëëzë ’ö ’dhoë‑ kë yi ‑wun ’gü bhë ‑a ‑daa kë. ꞊Ya kë ’dhö ‑yö ‑dho we ’wun ‑nu ’yö ’dhoë‑ kë ’dhö bhë ‑a ‑wun ‑bha kö zuöpödhe ꞊va ‑yö kë yi ‑wun ’gü.

Pë ‑nu ’ö Pɔlö ’dho ‑a ’piö kö ’yö ‑an kë ‑a ꞊dhië ‑kwaa ‑sü

¹²Pë ’yi dho ‑mɔa ‑dewo kö ’yiën‑ kë ‑a ’gü ’gɔugɔ ö ꞊ga tɔɔ ‑wo ’ö ’we ‑na yi ’gü bhë ‑ya ‑zɔn yi ‑dhë ꞊nɛ yi ‑bha ’ta ’sü ‑kɔ ’ö ’kpongtaa zö ’iin ’ö ka buëndhö ‑yö ‑kë ’puu ’ö ‑kë ’wun gia‑ ’ö go ‑Zlan ’piö ‑a ’gü ‑pë ‑nu kë ‑sü ’ka. ’Yaa mɛ ’bhee‑ ‑bha ’wundɔdhe ’ka, ’kɛɛ ‑Zlan ‑bha ’glusë ’ö‑ ‑kë mɛ ‑dhë ꞊zian’ yö ‑mü. ¹³Bhii kë‑ wo bhë, ’sëëdhɛ ‑nu yi‑ bɔ ‑na bhë, ’wun ‑nu ’wo ‑ya ‑sü ’ka ‑an ’gü bhë ’wun ’kpaan gbɛ ’yaa‑ ’gü ‑a ’ke yaa kë pë ‑nu ’ka‑ pö ‑na, ’ö ’ka‑ ma ‑a ’gü bhë ‑a ’ka. ‑Kaa ’sü ꞊nɛ ‑kɔ gia‑ ’ö ’ka‑ pöë bhë ‑a ’dhö, bhii ’wun gbɛ ’yaa‑ ꞊löö. A‑ ꞊tɛi’ ‑dɔ ꞊nɛ yi do ’ka, ka ‑dho ‑a ‑gɛn ma ’fɛfɛdhö. ¹⁴Dɔ ’kwa‑ wo ꞊nɛ ka‑ ‑ma ö ’pian do ’ka. ’Kɛɛ yi ’ö kwa Dëmɛ Yesu dho nuë bhë ’ö ’ka dho ‑dhɛ yö ’wun ‑nu bhë ‑an ’gü ’fɛfɛdhö; yi bhë ꞊nɛ ’ö ’ka dho kaa ’gɔugɔ yi ‑wun ’gü ꞊nɛ ‑kɔ do ’ö dho kaa yi ‑gɔ ka ‑wun ’gü bhë ‑a ’dhö. ¹⁵N ‑ma ‑zo yö ‑sü ’gü a‑ ‑dhɔ ꞊kaa’ kö ’aan‑ nu ka ’piö ’ma ’dhiö ‑be, ‑yö kë ’dhö kö ‑Zlan ‑yaan pë ‑së kë ka ‑dhë ’zü. ¹⁶A‑ ‑ya n ꞊zuö’ ’piö ‑bezë kö ’aan‑ bɔ ka ꞊plöö ’aan‑ ’dho Maseduanë, ’go mü kö n ’go ‑sü ’ka Maseduanë ’aan‑ bɔ ka ꞊plöö ’zü kö ’kaan‑ nu n ‑dhë ’aan‑ ’dho n ‑ma ’ta ’ka ’dhiö Zude ꞊zian’. ¹⁷꞊Ya kë ’dhö kö ’wun bhë ‑a ’sü ’pö ’a‑ wo ‑kɔ ꞊taa ’dhö bhë ꞊ee? ’Iin a n ‑ma ’wun ‑nu yö ‑na ’ko ’dhiö, ‑a kë ’pö ’a‑ wo mɛbheedhɛ ‑kwaa ‑yö kë ’dhö kö ’aan‑ ꞊ii‑ waa‑ ‑daa ’dee‑ ‑an pö ’ko ꞊yië’ bhë ꞊ee? ¹⁸’Wun ‑nu ’wo bhë ꞊ii‑ waa‑ ‑daa ’dee‑ ‑wun ’yaa ‑mü kö ’yiën‑ ‑an ‑wun ꞊blɛɛ’‑ ka ‑dhë. ‑Yö kë ka ’yaan ꞊nɛ ’wun ’a‑ ꞊blɛɛ’ ‑na bhë ’wun gia‑ ‑mü. ¹⁹‑Zlan Gbö Yesu Klito ’ö ma ’dhö, Silivɛn ’dhö, Timote ’dhö, ’yi‑ ‑wun ꞊blɛɛ ka ziën bhë yaa kë ꞊ii‑ waa‑ ‑daa ‑an ‑wun ’ka, ’kɛɛ ‑yö ‑Zlan ‑bha ꞊ii‑ ’ka kwa ziën. ²⁰꞊Ii‑ ’ö pë ‑nu ’ö ‑Zlan ‑ya ’tɔ go kwa ‑dhë bhë ’ö ‑an ’piö ‑pë ’ka yö ‑mü. Bhii yö ꞊nɛ ’ö ꞊ya kë ’kwa kwa ‑zo yö ‑a ‑bha ’ö ’kwa amɛn pö ‑Zlan ’tɔ ‑blü ‑sü ’ka. ²¹Bhii ‑Zlan ‑de gia‑ ꞊nɛ ’ö kwa sü ’ö kwa ‑ya ‑de ‑ta ’ö ka ’dhö, yi ’dhö ’ö kwa kpa ’kuë‑ ’ö kwa dɔ gɛnngdhö Klito ‑bha zian ‑ta. ²²’Yö ꞊duakëpë ‑ya kwa ‑bha ꞊nɛ kwa‑ ‑bha ’ka, ’go mü ’yö ‑Zuu ’slööslö ‑ya kwa ꞊zuö’ ’gü ‑a ‑zɔn ‑sü ’ka ꞊nɛ pë ‑nu ’ö‑ ’tɔ go kwa ‑dhë bhë ‑wo ‑to kwa ‑gɔ ‑pë ’ka.

²³‑Zlan ‑de ‑yö n ꞊goo‑ ’ka. ’Wun dho ꞊gbaɔn ka ‑ta ‑be, ’ka dha ‑a ‑gɔ bhë ’ö tɔɔ n ’ka nu Kolɛntö ’ma gbɔ. A‑ kë ’dhö kö ’kaan‑ ‑ya ka ‑de ’flëë ’gü. ²⁴’Yiëë‑ ’piö kö pë ’ö ka ꞊dua’ ’ka ‑zo yö ‑sü ’gü bhë ’yi ka ’gbee‑ ‑ta bho ‑a ‑wun ’ka, bhii ka gia‑ ’ka kë ’gɛngɛn ‑a ’gü. Yi‑ ’piö ꞊zian’ kö kwa ’plɛ ’kwa ’dho kwa ’kuë‑ ka ‑bha ꞊zuögludhi ’gbloo ’piö.

¹Pë ‑kë ’ö n ’ka nu ka ’piö ’ma gbɔ bhë ’ö tɔɔ ‑yö kë ’dhö kö ꞊kun ka wö dho ‑siö. ²Ka ꞊nɛ ’ka tɔɔ ma ꞊zuögludhi ‑wun. ꞊Ya kë ꞊nɛ ’ma ka wö ‑siö, ma ’gludhi ‑yö ‑dho ’go më ’zü ii? ³Pë ’ö ‑kë ’a ’sëëdhɛ ꞊nɛ ’a‑ bɔ bhë ’ö bhë ‑yö kë ’dhö kö ꞊kun ’ö ’a nu ’ma ’ö mɛ ’ö ’ka dho n ꞊zuögludhi bhë ’ö ’ka n wö ‑siö. Bhii ma ‑de gia‑ a‑ ꞊tɛi’ dɔ ꞊nɛ n ꞊zuö’ ’glu ꞊ya dhi ’ö ka ‑de ’pö ’ö ’ka kë ꞊zuögludhi ’gü. ⁴’Ma ꞊nëng giagiawo, n ꞊zuö’ ‑yö ’zëzëdhe ’kun ‑na; ’gbo ‑de ‑yö ‑da ‑na n ’ka, ’ö tɔɔ ’sëëdhɛ ꞊nɛ n ’ka‑ bɔ kö ‑yaan ka ꞊zuö’ ꞊kaan’ ’kuë ’kɛɛ kö ‑yö kë ’dhö kö ‑dhɔ ꞊suu’‑ ’ö n ’gü ka buëndhö bhë ’kaan‑ ’zü yö.

Mɛ ’ö ’wun ’ö ’dhö bhë ‑a ‑kë ‑ziö ‑a ‑bha ’wun ꞊zaa’ ‑sü ‑ta ‑sü.

⁵’Ö ꞊ya kë ꞊nɛ wö ‑siödhe ‑wun bhë ‑a ‑gɛn ‑go ‑a ‑ta ‑mɛ ꞊ya kë ‑dhö kö ma kun ’ö n wö ‑siö; kö mɛ ’bhaa ‑nu ‑mü ka ziën ꞊zian’; ‑a ‑de ’ö ꞊ya kë ꞊nɛ n ’dhi ꞊ya kë ‑së, a ‑dho ‑a pö kö ka ’plɛ ꞊nɛ ’ö ka wö ‑siö bhë. ⁶’Kan ’ka‑ wo ‑a ‑zü bhë ꞊ya ‑mɔ ‑a ‑bha; ’klobhɔdhe ꞊va ‑mü ’ö ka‑ ‑wɔ ‑a ‑ta bhë kö kë ꞊nɛ ka ’plɛ ’kaa ‑mü, ’kɛɛ ka ꞊va ’ka ‑ziö mɛ ‑nu ’wo to ‑an ‑ta. ⁷‑Yö ’to ’dhö; pë ’ö ’ka dho ‑a kë ꞊zian’ ’ö tɔɔ ‑ziö ‑a ‑bha ’wun ꞊zaa’ ‑sü ’ö bhë ‑a ‑ta ‑sü kö ’kaan‑ nu ‑a ‑dhë. ‑Yö kë ’dhö kö ꞊kun ’ö wösiödhe ꞊va dho ‑a ꞊faan’ bho ‑a ’gü. ⁸A‑ ‑dhɛ ka ‑gɔ ꞊zian’ kö ’ka ’dho ‑a ’piö ‑a ‑dhɔ ’ka. ⁹‑Ka ‑dhɛ ‑ga, ’sëëdhɛ ’ö ꞊nɛ ‑a ‑bɔ ka ‑dhë ‑gɛn ꞊ga ꞊nɛ: A‑ ‑ya n ‑zo ’piö kö ’a ka ꞊zuö’ ‑ga ’kö ‑kë ꞊nɛ ka ꞊tun n ‑wo ꞊bhlë ‑ya kö ’aan‑ ꞊tɛi’ dɔ. ¹⁰꞊Ya kë ꞊nɛ ’ka ziö mɛ ‑bha ’wun ꞊zaa’ ‑sü ‑ta, kö ma ‑de ’pö, a ‑dho ziö ‑a ‑bha ’wun ꞊zaa’ ‑sü ‑nu ‑ta. Bhii ꞊ya kë ꞊nɛ mɛ ꞊ya kë ‑dhö ’aan‑ ziö ‑a ‑bha ’wun ꞊zaa’ ‑sü ‑ta kö a‑ ‑kë ka ‑wun ’gü Klito wö ’dhiö, ¹¹‑yö kë ’dhö kö ꞊kun ’ö Satan ‑kɔ dho ziö kwa ‑gɔ, bhii ’ö tɔɔ kwa gia‑ kwa‑ këwun ‑nu ‑dɔ ‑së ’ka.

Pɔlö ‑bha ꞊zuö’ ‑to zlöö ‑wun ’ö ‑kë Troasö

¹²꞊Dhɛ ’ma ‑lo Troasö kö ’wuntaɔsë ’ö ‑gban Klito ‑bha ’aan‑ ꞊blɛɛ’‑, ‑yö ‑kë Dëmɛ ‑zo ’kun ‑wun ’ka, ’ö n ’yan ‑yö ‑da yuö do ‑ta mü kö ’aan‑ kë ‑bezë. ‑Yö ‑kë ’dhö, ’kɛɛ n ꞊zuö’ ‑yö ‑kë ‑to zlöö ‑sü ’ka ’ö tɔɔ n ’ka ‑kpën kwa dheglu Titö ‑bha mü. ¹³꞊Dhɛ ‑kë ’pö kö a n ‑wo ‑da ‑na Troasö ‑mɛ ‑nu ‑dhë a ’dho ‑na Maseduanë.

‑To ‑a ’gbee‑ ’ka ‑sü ’ö Yesu Klito ’gü

¹⁴’Kɛɛ ‑Zlan ’ö ‑to ‑a ’gbee‑ ’ka ‑sü nu ‑na bɔa Klito ‑ta ‑sü ’ka bhë ‑a ’tɔ ‑yö kë ꞊va. Yö ꞊nɛ ’ö kwa bɔ ‑dhɛ ’saadhö ‑a ‑bha kö ’kwaan‑ Klito ’tɔ ‑pɛn ꞊nɛ ‑kɔ ’ö pë ’yi ’tëë ‑sëëzë ’tëë ’dho ‑pɛn ‑na ‑a ’ka ‑dhɛ ’saadhö ’gü bhë ‑a ’dhö. ¹⁵Kwa ‑kë ꞊nɛ ’güö ‑pë ’tëë ‑sëëzë ’ö Klito ‑ya nu ‑Zlan ‑dhë ‑a ’dhö. ‑A ‑de kwa‑ ’ka mɛ ‑nu ’ö ꞊wa dha waa‑ mɛ ‑nu ’ö waa dha ‑an ziën. ¹⁶Mɛ ‑nu ’ö waa dha bhë, pë ’tëë ‑sëëzë ’ö ’kwa‑ ’ka bhë, kwa ‑an ‑gɔ mɛ zë ‑pë ’yi ’tëë ’ö dho mɛ ’ka ga ‑dhɛ ‑bha ‑a ’ka; ’ö mɛ ‑nu ’ö ꞊wa dha ‑an ‑bha ’ka, ‑yö ‑kë ‑a ’gü ‑sü pë ’yi ’tëë ‑sëëzë ’ö dho mɛ ’ka ‑kë ‑a ’gü ‑dhɛ ‑bha ‑a ’ka. ꞊Dhɛ ‑kë ’dhö ꞊nɛ, dö ’ö‑ ‑kɔ ‑dho ‑mɔa ‑bha kö ‑yaan pë ꞊suu’‑ ꞊nɛ ‑a kë ꞊ɛɛ? ¹⁷’Ö tɔɔ ’kwaa kë ꞊nɛ mɛ ’bhaa ‑nu ’wo pë ꞊mɛɛ ‑Zlan ‑wo ꞊blɛɛ’ ‑sü ’gü bhë ‑an ’dhö. ‑Abi’; ꞊dhɛ ‑kë ꞊nɛ ‑Zlan ꞊nɛ ’yö kwa bɔ ꞊zian’, yö ꞊ga ’kwa ’wun ꞊blɛɛ’‑ ‑a ’dhiö kpengdhö ꞊nɛ Klito ‑bha yuökëmɛ ‑nu ’wun ꞊blɛɛ’ ‑kɔ ’dhö bhë.

‑Dhikuëdhe ‑dëü ’gü ‑yuökëmɛ ‑nu

¹’Wun ꞊blɛɛ’ ‑kɔ ’ö ’dhö bhë ’yië‑ wo ’dhö, yi ‑dho yɛ yi ’zü ’zü ’yi yi ‑de sü ꞊va ꞊a? ’Iin yi ‑dho ‑a kë ’zü ꞊nɛ mɛ ’bhaa ‑nu ’dhö, ’ö ’yi mɛ ꞊kɔɔn ‑wo ’sëëdhɛ bɔ ka ‑dhë, ’iin ’ka ꞊nɛ ’ö ’ka dho ka ‑bha bɔ yi ‑dhë ꞊ee? ²Ka gia‑ ’ka tɔɔ yi ‑bha ’sëëdhɛ ꞊bɛɛn’ ‑yan ’ö ‑ya ‑sü ’ka yi ꞊zuö’ ’piö; mɛ ’plɛ ‑wa ‑dɔ, ’go mü ’wo‑ pö; ³‑yö gia‑ ’ka ꞊nɛ ka Klito ‑bha ’sëëdhɛ ꞊bɛɛn’ ‑yan ’ö ’yi‑ bɔ ‑a ’ka. Yaa ꞊bɛɛn’‑ ’sëëdhɛ ꞊bɛɛn’ ‑pë ’yi ’ka, ’kɛɛ ‑yö ꞊bɛɛn’ ‑sü ’ka ‑Zlan ’ö ’bhee‑ ‑a ‑bha ‑Zuu ’slööslö ’ka. ’Yaa ꞊bɛɛn’ ‑sü ’ka ’zü ‑guö ’fa ‑bha ’kɛɛ mɛbheedhe ꞊zuö’ ’gü. ⁴Yi ‑yɔɔn ’wun ’ö bhë ‑a ‑ta ‑gɛn ’ö tɔɔ ‑zo ’tën ‑sü ‑yö yi ‑gɔ ‑Zlan ‑dhë Klito ’gü. ⁵Pë ’ö mü ’ö tɔɔ yi ’ka ’dhoë‑ pö yi gia‑ yi ‑kɔ ‑yö ‑mɔ ‑a ‑bha kö ’yiën‑ pë ‑nu kë yi ‑de ꞊kwaa’. Pë ’ö‑ ‑gɛn ‑yö go ‑Zlan ’piö yö ꞊nɛ ’yi ‑mɔ ‑a ‑bha kö ’yiën‑ ‑a kë. ⁶Bhii yö ꞊nɛ ’ö‑ ‑kë ’ö ’wun ’ö ‑gban ‑dhi ’kuë ‑dëü ’ö waa‑ tɔng ’ö ‑an ‑bha pë gbɛ ’yaa ’ko ’piö bhë, ’kɛɛ ’ö ‑Zuu ’slööslö ‑bha ’wun ’piö bhë ’ö ’yi ‑kë ‑a ‑bha yuökëmɛ ’ka. ‑Ka ‑dhɛ ‑ga, tɔng ‑bha yuö tɔɔ mɛ zë ‑sü; ’kɛɛ ‑Zuu ’slööslö ‑zë, ‑kë ‑a ’gü ‑sü ꞊nɛ ’ö‑ nu mɛ ‑nu ‑dhë.

⁷Tɔng ‑yö ‑bɛɛn pë ꞊bɛɛn’ ‑yan do do ’ka ‑guö ’fa ‑nu ‑ta, ’ö ‑Zlan ‑bha ’piigbeedhɛ ‑yö bhü ‑a ’töng ’ö ’dhö bhë ‑a ’ka; Moizö wöödhɛ ’bhü ‑kɔ ’ö ꞊kaa’, ’ö Izlaɛlö ‑mɛ gbɛ yaa kë ‑dhö kö ‑yö ‑dhɛ ‑ga ‑a wöödhö, ’kɛɛ kö ’bhü ‑kɔ ꞊suu’‑ ’ö ’dhö bhë ‑yö kë ziö ‑pë ’ka ’ö bhë. ꞊Dhɛ tɔng ’ö‑ ‑bha yuö ’ö dho ‑a kë ’ö ‑kë ‑dho mɛ ’ka ga ‑zian ’piö ‑sü ’ka ’ö ’piigbeedhɛ ꞊suu’‑ ꞊nɛ ’ö ‑kë ‑a ’piö, ⁸kö ‑Zuu ’slööslö ‑bha yuö ‑nu ‑mlë ’ö ’piigbeedhɛ ꞊va yaa ’dho kë ‑a ’gü i! ⁹Yuö mɛ ’ö ‑kë mɛ ‑da ’gan ’gü ‑yuö ’ka ꞊nɛ, ꞊dhɛ ’ö‑ ’tɔ ’dho bhɔ ‑sü, kö yuö mɛ ’ö ‑kë mɛ ‑kë kpengdhö ‑sü ‑yuö ’ka ‑Zlan wö ’dhiö, ’tɔbhɔdhe ꞊suu’‑ ‑mlë ’ö dho kë ‑a ’piö ‑oo! ¹⁰Kwa ‑dho ‑mɔa ‑bha ’kwa‑ pö ’tɔbhɔdhe ’ö ‑kë ’töng ‑nu mɛ ’ö ꞊wa ziö ꞊nɛ ‑a ’gü waa‑ ’tɔbhɔdhe mɛ ’ö ꞊dɛɛ ꞊nɛ ‑a ’gü bhë ‑an ‑zɔn ’kuë ‑dhɛ gbɛ ’yaa ’dhö, bhii ‑a mɛ ’ö ꞊nɛ ꞊yö ꞊va. ¹¹Ka gia‑ ‑ka ‑dhɛ ‑ga bhë ’dhɛ! Pë ’ö ’töng ’bhe ’tee ‑kë, ꞊dhɛ ’ö ’tɔbhɔdhe ’dhö ‑kë ‑na ‑a ‑gɔ ꞊nɛ, kö ‑a mɛ ’yö dho ꞊glɔɔ ꞊toëpö ’ka bhë ‑a ‑bha ’tɔbhɔdhe ‑yö ‑dho kë mü ꞊dhë ꞊ɛɛ?

¹²‑Zogbandhe ꞊va ꞊suu’‑ ’ö ꞊nɛ ‑a ‑bha ‑kë kwa ‑gɔ ‑sü ‑gɛn ‑yö ‑go ‑zoyösü ꞊suu’‑ ’ö kwa ‑gɔ pë ‑nu ’wo bhë ‑an ‑wun ’gü bhë ‑an ’gü. ¹³’Kwaa ꞊nɛ Moizö ’dhö. Bhii ’ö tɔɔ ’kpa bhë, Moizö ‑yö sɔ ‑lo ö wöödhö ‑yö kë ’dhö kö ꞊kun ’ö Izlaɛlö ‑mɛ ‑nu dho ‑a ’bhü ’ö dho ‑ziö bhë ’wo dho wo ’yan dɔ ‑a ‑bha. ¹⁴’Kɛɛ dɔ ’ö ’kwa‑ wo ꞊dɛɛ ꞊nɛ ꞊wa ’dho zlöö ‑an ꞊zuöga ꞊ya kë ’glɔɔglɔ. Bhii ‑dhikuëdhe ’sëëdhɛ ‑be zii bhë ꞊waa‑ ’dhi ’po, ꞊waa‑ pö, ’waa‑ ’gü ma. ‑Yö kë ꞊nɛ pë ’wo‑ pö sɔ ‑yö ‑lo ‑sü ’ka ‑a ‑ta ‑a ’dhö ꞊nɛ ‑kɔ ’ö sɔ ‑yö ‑kë ‑lo ‑sü ’ka Moizö wöödhö bhë ‑a ’dhö. ’Kɛɛ sɔ ’ö ‑lo ‑sü ’ka ‑an wöë‑ bhë, ’yaa ‑mü mɛ ’ö ‑klu ‑sü ’ka Klito ‑bha ‑a ‑bha ’ka. ¹⁵’Ö ꞊dɛɛ ꞊nɛ ‑a ’gü bhë, Zuifö ‑nu ꞊wa Moizö ‑bha ’sëëdhɛ ‑be ‑nu pö, sɔ ‑yö ꞊tun ‑lo ‑sü ’ka ‑an ‑bha ’wundɔdhe ‑ta. ¹⁶’Kɛɛ pë ’ö ꞊bɛɛn’ ‑sü ’ka ‑ya ‑pö: Mɛ ’ö ꞊ya ꞊dhië’‑ Dëmɛ ’piö kö sɔ ’ö bhë ꞊ya ’go mü. ¹⁷Dëmɛ ’ö pë ꞊bɛɛn’ ‑yan ‑yö ’wun ‑gban ‑a ‑bha ’ö‑ ꞊blɛɛ zö ꞊nɛ ’ö tɔɔ ‑Zuu ’slööslö, ’ö ‑dhɛ ‑Zuu ’slööslö ’dhö ‑a ‑bha kö ‑dhɛ bhë ‑potaasü ‑ya ‑bha. ¹⁸Mɛ ‑nu ’saadhö ’ö kwa ’yan ꞊ya ’po, kwa ’yan ꞊ya ‑kpën Dëmɛ ‑bha ’tɔbhɔdhe ‑bha; ‑kɔ bhë ꞊nɛ ’kwa dho ꞊dhië’‑ ‑a ’ka ‑kwaa kö ’kwaan‑ kaa ꞊nɛ Dëmɛ ’dhö, ’go mü ’kwaan‑ bɔ ’tɔbhɔdhe ‑nu ’gü ’kwaan‑ ’tɔbhɔdhe ꞊va yöë ’zü. Dëmɛ ‑bha ‑Zuu ‑bha ‑kë kwa ’gü ‑sü ꞊nɛ ’ö pë ‑nu bhë ’wo dho kë ‑a ꞊kwaa’.

’Wun ’ö ‑gban ’tɔbhɔdhe waa‑ lë‑ ‑wun ‑an ‑bha

¹‑Zlan ‑bha ’glusë ’gü, ‑yö yuö ’ö ꞊nɛ ‑a ‑wun ‑sü ’ö‑ tën yi ‑bha. Pë ’ö ‑kë ’ö yi ’gü ’yaa ga bhë ’ö bhë. ²Yi ‑kan këwun ‑nu ’wo ‑bin ‑sü ’ka yi ’gü ’ö ’wo lëzë bhë ‑an ‑bha; ’yiëë ’wun kë ‑gleng ’ö mɛ ‑püö ‑sü ’dho ‑a ’gü waa‑ ‑Zlan ‑wo ‑kë ꞊suazëmɛ ‑nu ’ka. Pë ’ö ’yi‑ ‑kë ꞊zian’ ’ö tɔɔ ’wun giagia ꞊blɛɛ’‑ ’yi‑ wo kpengdhö. ‑Yö kë ’dhö kö mɛ ’ö ‑dhö ꞊ya ꞊yaannu diindhö ꞊ya ö ‑zo ’ta, ‑yaan yi këwun ‑nu ’iin yi pö ‑pë ‑nu ‑dhɛ ’wun gia‑. ³’Kɛɛ kë‑ wo ’dhö bhë ꞊ya kë ꞊nɛ ’wuntaɔsë ’yi‑ ꞊blɛɛ’ ‑na bhë ‑yö ‑bin ‑sü ’ka, ’ö‑ ‑gɛn ma ‑sü ’yaa ’dhö kö mɛ ‑nu ’ö ’wo ’gü ꞊siö’ ‑zian ‑ta bhë, ’yö ‑an ‑dhë ‑bin ‑wun ’ka. ⁴’Waa‑ ‑dhɛ ’wun gia‑, bhii ’ö tɔɔ dü ’ö ‑an ꞊kɔɔnmɛ ’gluyaazë ’ka ’kpongtaa zö bhë ꞊yaa‑ ‑an ‑bha ’wundɔdhe ’dhi ta. ‑Zlan ’gluyaazë ’ö ’dhö bhë ’yaa ’we ‑a ‑bha ‑an ‑gɔ kö ‑wo ‑dhɛpuudhɛ ‑wun ’ö‑ ꞊blɛɛ’ ‑na ’ö ‑gban Klito ’ö ‑Zlan ’bin gia‑ ’ka bhë, ‑wa ‑bha ’tɔbhɔdhe ’bhü yö. ⁵꞊Ya kë ꞊nɛ yi ‑Zlan ‑wo ꞊blɛɛ’ ‑na, ’yiëë yi ‑de gia‑ ‑wun ꞊blɛɛ’‑; ’kɛɛ Yesu Klito ’yi ’wun ‑gban ‑a ‑bha ’yi‑ ꞊blɛɛ ꞊nɛ yö ’ö tɔɔ kwa Dëmɛ; ꞊ya kë yi ‑zë yi ’ka, yi yi ‑de ‑kë yuö ‑kë ka ’dhiö ‑mɛ ’ka Yesu ‑wun ’gü. ⁶‑Zlan ’yö‑ pö ‑dhɛpuudhɛ ‑yö ’bhü ‑dhɛtiidhɛ ’gü bhë, yö gia‑ bhë ꞊nɛ ’yö ö ‑bha ‑dhɛpuudhɛ bhü kwa ꞊zuö’ ’gü kö ‑kɔ ’ö‑ ‑bha ’tɔbhɔdhe ’dho ’bhü ‑na ‑a ’ka Klito wöödhö bhë ‑yaan ‑a ‑ta ’po kwa ‑dhë ’kwaan‑ dɔ.

⁷’Kɛɛ kwa ’ö ’kwa ꞊bhɔɔpë ’ö ‑Zuu ’slööslö ’gü ꞊zian’ ’kwa‑ bun ‑na bhë, kwa ‑kë ꞊nɛ ’sɛ gbɔ ’ö‑ ’wü ‑sü ’yaa ꞊gbiin bhë ‑a ’dhö, kö mɛ ‑nu ‑waan ‑a dɔa ꞊nɛ ’piigbeedhɛ ’gblüünzë bhë ‑yö ‑go ‑Zlan ’piö, yaa ’go kwa ’gü. ⁸’Klobhɔdhe ꞊suu’‑ ’saadhö ’ö‑ bundhɛ ’dho ’gbee‑, ‑yö ‑nu yi ‑ta, ’kɛɛ ’yiëë ’to ‑a ’gü; ꞊ya kë ’ö yi ꞊zuö’ ‑yö ‑to ꞊zlöö, ’kɛɛ ‑zoyösü ’yaa ’go yi ’gü. ⁹Mɛ ‑nu ‑wo ’wun ‑wɔ yi ‑ta, ’kɛɛ ‑Zlan ‑zlö ’yaa trö yi ‑wun ’ka; mɛ ‑nu ‑wo yi ‑kun, ’wo yi zë ‑dhɛ ‑kë wo; ’kɛɛ ’yiëë ’to ‑an kwɛɛ sia‑ mü; yi ‑luu. ¹⁰Yesu ‑bha ga ‑sü bhë ‑yö yi ’gü ‑kplawo; ‑yö kë ’dhö kö ‑a ‑bha ‑tosiadhe kë ‑kɔ ‑yö kë yi ’gü ’pö. ¹¹’Ö yi ‑bha ‑tosiadhe kë ‑sü ’gü ’yi dɔ ‑sü ’ka ga ‑sü kwɛɛ Yesu ‑wun ’gü, ‑yö kë ’dhö kö ‑a ‑bha ‑kë ‑a ’gü ‑sü ‑yö ‑tosiadhe kë yi ’sɛbun ’ö dho ga bhë ‑a ’gü. ¹²‑Kɔ ’ö bhë ꞊nɛ ’ö yi ‑bha ‑Zlan ‑wo ꞊blɛɛ’ ‑sü ’gü, ’yi dho ga ’kɛɛ kö ka ‑zë ’ka ‑kë ‑a ’gü ‑sü yö ‑a ’gü ꞊zian’.

¹³Pë ’ö ꞊bɛɛn’ ‑sü ’ka ‑ya ‑pö ꞊nɛɛ: ’Wun ‑dhɛ ’a‑ wo ’wun gia‑ bhë ꞊nɛ ’a ‑kë ‑a ‑dhë ’wun ꞊blɛɛ’ ‑mɛ ’ka. ‑Kɔ do bhë ꞊nɛ, ꞊dhɛ ’ö ’yi Yesu ‑wun ‑dhɛ ’wun gia‑ ’yi ’wun ‑nu ꞊blɛɛ’ ‑na ‑a ’ka bhë. ¹⁴Yi‑ ꞊dɔa’ ꞊nɛ ‑Zlan ’yö Dëmɛ Yesu bho ga ’gü bhë, ‑yö ‑dho yi bho ga ’gü yi ‑kpa Klito ‑bha ‑sü ’ka, ’ö mɛ ’plɛ ’kwa dho ‑a wö ’dhiö. ¹⁵Pë ‑nu ’wo ’dhö ’saadhö bhë ‑wo ‑wo ka ‑wun ’gü. Bhii ‑kɔ ’ö ‑we ‑Zlan ‑wo ‑bha ‑mɛ ‑nu dho kaa ꞊va bhë, ‑kɔ gia‑ bhë ꞊nɛ ’ö ꞊sɛɛbhodhe ‑nu dho kaa ꞊va ‑yaan dhoë ‑Zlan ’piö ‑a ‑bha ’glusë ꞊va ‑wun ’gü, kö ‑yaan kë ‑a ‑bha ’tɔbhɔdhe ’ka.

‑Tosiadhe kë ‑sü ’ö ‑zo yö ‑sü ’gü

¹⁶Pë ’ö ‑kë ’ö yi ’gü ’yaa ga bhë ’ö bhë. ’Kö ‑kë ꞊nɛ yi bun ’ö ’kpongtaa zö bhë ‑a ’gü ‑yö ‑siö ’dhee, ‑yö yi ’yaan ’ka ꞊nɛ ‑këdhösü ’ö ‑Zlan ‑ya nu yi ‑dhë bhë ‑yö ‑gla ‑dhɛkpaɔyi ’saadhö ’ka ’ö ‑kë ‑dëü ꞊zian’. ¹⁷’Kö ‑kë ꞊nɛ ’klobhɔdhe ’tee ‑mü ’ö nu yi ‑ta ’töng ’tee ‑bha ’dhee, ‑a ’dhiö ‑to ‑kplawo ’tɔbhɔdhe ‑wun ꞊va ’ö dho kë ꞊toëpö ’ka ‑a ’ka yi ‑bha ’ka, ’ö‑ ꞊zuan’ gbɛ ’yaa ’dhö. ¹⁸Bhii kë‑ wo bhë, ’yiëë yi wö kë pë ’ö ’yan ‑bha ‑kpën ‑a ‑bha ‑pë ’ka‑ ’piö, ’kɛɛ pë ’ö ’yaa ’yan ‑dɔ ‑a ‑bha ‑pë ’ka ꞊zian’. Bhii pë ’ö ’yan ‑dɔ ‑a ‑bha ‑pë ’ka bhë ’yaa ꞊glɔɔ, ’kɛɛ pë ’ö ’yaa ’yan ‑dɔ ‑a ‑bha ‑pë ’ka bhë ‑yö ‑to ’dhö ꞊toëpö ’ka.

¹Kwa gia‑ kwa‑ ꞊tɛi’ dɔ ꞊nɛ ’kö ‑kë ꞊nɛ kwa ’sɛbun ’ö ‑kë ꞊nɛ sɔ ’kɔ ’ö ’yaa ꞊glɔɔ ‑a ’dhö bhë ‑yö ‑siö, kwa ’yan ‑yö pë do ‑bha; ’ö tɔɔ kwa ‑yadhɛ do ’ö ’yaa mɛbheedhe ‑kɔ këpë ’ka ’ö ‑Zlan ‑de gia‑ ꞊nɛ ’ö‑ dɔ bhë ‑yö ‑ya ‑sü ’ka kwa ‑gɔ dhang‑ ’gü. ²Kwa ‑zo ꞊nɛ ’kwa‑ ‑lo ‑sü ’gü zlöö ‑bha, bhii ’ö tɔɔ pë ’kwa‑ ’piö zlöö ’ö tɔɔ ’kwa ’dho kwa ‑bha këdhɛ ’ö dhang‑ ‑nu ’gü ‑a ‑bha. ³꞊Dhɛ ’ö ’dhö, ’kwa ‑dho bun ‑dëü ‑da kwa ‑bha ‑yö kë ’dhö kö ꞊kun ’kwa dho ‑lo ’ma kwa ’kpaan ’ka. ⁴꞊Ya kë ꞊nɛ ’kwa ’to kwa ’sɛbun ’ö ꞊nɛ ‑a ’gü ‑kplawo, kwa ‑dho kwa ‑zo ‑lo ꞊nɛ pë ’wo‑ pö ’kpa ‑yö ꞊kwɛɛ‑ ’gbiin‑ ꞊löö ‑a ’dhö. Yaa kë ꞊nɛ kwa‑ ’piö kö ’kwa kwa ’sɛbun ’ö‑ ’gü dho ꞊siö’‑ ꞊nɛ ’kwa ’go ‑a ’gü; ’kɛɛ pë ’kwa‑ ’piö ’ö tɔɔ kwa dhang‑ ’gü ‑bun ’ö‑ ’gü ’yaa ꞊siö’ bhë ‑yö kë kwa ‑bha ‑yö kë ’dhö kö pë ’ö gapë ’ka kwa ’gü bhë, ‑yö ꞊slëë’ ‑ta kö ‑kë ‑a ’gü ‑sü ‑yaan kë kwa ‑gɔ. ⁵‑Zlan gia‑ bhë ꞊nɛ ’yö kwa ‑ya kö ‑dhië ‑kwaa ‑kɔ ꞊suu’‑ ’ö bhë ’kwaan‑ bɔ ‑a ’gü, ’go mü ’yö ‑Zuu ’slööslö nu kwa ‑dhë kö ‑yaan ‑zɔn kwa ‑dhë ꞊nɛ pë ‑nu ’ö‑ ‑ya kwa ‑gɔ bhë ‑wo ‑dho kë ‑to kwa ‑gɔ ‑pë ‑nu ’ka. ⁶Pë ’ö ‑kë ’ö ꞊faan’ ’dho yi ‑gɔ ‑kplawo bhë ’ö bhë. Kwa gia‑ kwa‑ ꞊tɛi’ dɔ ꞊nɛ ‑a ’ke ’kwa ꞊tun kwa bun ’ö ꞊nɛ ‑a ’gü kö kwa kwa Dëmɛ ‑bha këdhɛ ’ka ꞊gbiin. ⁷Bhii ’ö tɔɔ ’ta ’sü ‑kɔ ’kwa‑ ’sü ‑na ‑a ’ka zö ꞊nɛ, kwa‑ ‑sü ‑zo yö ‑sü ’gü. Yaa kë ꞊nɛ pë ’wo‑ pö kwa ’yan ꞊ya dɔ ‑a ‑bha ’ö ’kwa ’dho ‑na ‑a ‑gɔ ‑a ’dhö. ⁸(’Kɛɛ kë‑ wo ’dhö bhë,) yi pa ‑sü ’ka ꞊faan’ ’ka ’ö ’yi‑ ’piö kö ’yi ’go yi bun ’ö ꞊nɛ ‑a ’gü kö ’yi ’dho kwa Dëmɛ ’piö ‑a ‑yadhɛ ‑bha. ⁹’Kɛɛ pë mɛ ’ö‑ ‑wun ’dho ’gbee‑ yi ‑gɔ ’ö tɔɔ ’kö ‑kë ꞊nɛ yi ‑tun bun ’ö ꞊nɛ ‑a ’gü oo ’iin yi ‑dho go ‑a ’gü oo, yi kë ‑Zlan wö ’dhiö ’kpëdhö. ¹⁰Bhii ’ö tɔɔ kwa ’saadhö kwa ‑dho ‑wo Klito wö ’dhiö kö yö gia‑ ‑yaan kwa ‑bha za ’kan, ‑yö kë ’dhö kö mɛ ’ö ‑dhö, pë ’ö‑ ‑kë kö ‑yö ꞊tun bun ꞊nɛ ‑a ’gü bhë ‑yö pë ‑së ’ka oo, ‑yö pë yaa ’ka oo, kö pë mɛ ’ö dɔ ‑a ꞊tian’, ‑yaan nu ‑a ‑dhë.

Dhidhe ’ö Klito ‑ya ‑da kwaa‑ ‑Zlan ‑nu kwa ziën

¹¹Pë ’wo‑ ‑dhɛ ‑suö Dëmɛ ‑dhë ‑sü bhë kwa ’saadhö kwa‑ ‑dɔ. Pë ’ö ‑kë ’ö ’kwa‑ këdhɛ ꞊mɛɛ’ ‑na kö mɛ ‑nu ‑wo ‑Zlan ‑wo ‑dhɛ ’wun gia‑ bhë ’ö bhë. ‑Zlan ‑yö kwa ‑dɔ ’fɛfɛdhö; ’a n ‑zo ’ta ꞊nɛ ka ‑de gia‑ ka n ‑dɔ ’pö. ¹²’Yië‑ ’piö kö ’yi yi ‑de kë ‑së ka wö ’dhiö kö ’kaan‑ bɔ yi ’ka ’kɛɛ pë ’yi‑ ’piö ’ö tɔɔ ’ka kë ’gɔugɔ yi ‑wun ’gü. ꞊Ya kë ’dhö mɛ ‑nu ’wo wo ‑de ’sü ‑na ꞊va, ’wo ’wun ’ö ‑gban mɛ ’bhee‑ plaan ‑dhɛ ‑bha ’wo‑ ‑ga ‑na ꞊bhlëzë mɛ ꞊zuö’ ’piö ‑wun ‑bha bhë, ’ka dho ’wun ꞊blɛɛ’ ‑an ‑dhë ‑kɔ dɔ. ¹³’Ö ꞊ya kë ꞊nɛ yi ’blɔɔnzë kö yi‑ ’ka ‑Zlan ‑bha ’ka, ’kɛɛ ’ö ꞊ya kë ꞊nɛ yi ’wun ‑dɔ, kö ka ‑bha ‑mü yi ’ka. ¹⁴Bhii ‑dhɔ ’ö Klito ‑ya ‑kë kwa ’ka bhë, ‑a ’siö ‑yö dɔ ‑na yi ‑ta; pë ’ö ‑kë ’yi‑ ‑bha yuö kë ‑na bhë. ’Ö tɔɔ yi ‑zoyösü ‑mü ꞊nɛ yö Klito ‑mɛ dosɛn ꞊nɛ ’ö ga kwa ’saadhö kwa ‑wun ’gü; ꞊ya kë ’dhö kö ‑a ‑bha ga ‑sü bhë kwa ’saadhö, mɛ ’ö ‑dhö ꞊ya ö ‑bha wo. Kwa ’saadhö, ’wun bhë ’kwa ‑dhɛ yö ‑a ’gü, Klito ‑bha ‑dhɔ ‑yö ‑gɔ ‑dhɛ kë ‑na kwa ’gü. ¹⁵‑Yö ‑ga mɛ ’saadhö kwa ‑wun ’gü ‑yö kë ’dhö kö mɛ ‑nu ’wo ‑tosiadhe kë ‑na bhë kö ꞊kun ’wo dho ‑a kë wo ‑de ‑bha ’ka, ’kɛɛ kö ‑wa kë zlöö mɛ ’ö ga, ’go mü ’ö go ga ’gü bhë ‑a ‑bha ’ka ꞊zian’. ¹⁶꞊Ya kë ’dhö zlöö kö kwa ’ka ’dho mɛ gbɛ ‑ga ‑a mɛbheedhɛ ’ö plaan ꞊zian’ ‑a ‑kwaa gbɔ; ’kö ‑kë ꞊nɛ kwa Klito ‑ga ’dhiö ꞊zian’ ꞊nɛ ‑kɔ do bhë ‑a ’dhö ‑a ‑bha ‑kë mɛ ’gü ga ‑zë ’ka ‑sü ‑wun ’gü, ꞊ya kë kwa ’yaan ꞊nɛ ’yaa ’dhö ’gbönggböng, ’kwa‑ dɔa ’dhö. ¹⁷Mɛ ’ö ꞊ya kpa Klito ‑bha kö ꞊ya kë mɛ ‑dëü ’ka, kö pë ziizii ‑nu ’wo ’dhiö ꞊wa ziö; kö ‑a ‑bha pë ’plɛ ꞊ya kë ‑dëü. ¹⁸Pë ‑nu ’wo ’dhö ’saadhö bhë, ‑wo ‑go ‑Zlan ’ö dhidhe ‑da kwa ‑nu kwa ziën kwa ‑bha ‑kpa Klito ‑to ‑bha ‑sü ’ka, ’go mü ’ö yuö ’ö ‑gban ‑dhi ’kuë‑ ‑yuö ‑nu ‑bha ’ö‑ ‑wun tën yi ‑bha kö yö ’dhö waa‑ mɛ ‑nu ’wo to ’yiën‑ kë kö dhidhe ‑yaan ‑da wo ‑nu wo ziën. ¹⁹Bhii ‑Zlan ‑yö ‑bɔ Klito ’gü kö ‑yaan dhidhe ‑da waa‑ mɛ ‑nu ’saadhö wo ziën ö ‑zo ‑bho mɛ ’bhee‑ ‑nu ‑bha ’wun ꞊zaa’ ‑sü ‑nu ’piö ‑sü ’ka; ’ö ‑dhi ’kuë‑ ‑yuö bhë ’ö‑ ‑wun tën yi ‑bha kö ’yiën‑ ‑a ‑wun ꞊blɛɛ’‑. ²⁰꞊Dhɛ ’ö ’pö kö ’wun ‑nu ’yi‑ ꞊blɛɛ’ ‑na ka ‑dhë bhë yi‑ ‑blɛɛ Klito ꞊woë’ ꞊nɛ ‑kɔ ’ö ‑Zlan ‑de gia‑ ‑yö ka ꞊dhɔɔ ꞊kaa’ ‑a ‑bɔ yi ’gü ‑sü ’ka bhë ‑a ’dhö. ꞊Dhɛ ’ö ’dhö ꞊bhɛa’ ’yi‑ wo ka ‑dhë Klito ’tɔ ’ka kö ’ka dhi ‑Zlan ’ka. ²¹꞊Sɔɔn yaa gbɛ yaa kë Klito ‑bha, ’kɛɛ ‑Zlan ‑yö kwa ‑bha ꞊sɔɔn yaa ‑wun ‑lo ‑a tuö kwa ‑wun ’gü, ‑yö kë ’dhö kö kwa ‑bha ‑kpa Klito ‑bha ‑sü ’gü kö ’kwaan‑ kë kpengdhö ꞊bɔa’ pë ’ö ‑Zlan dhoë‑ kë kö ‑yaan Klito kë kpengdhö bhë ‑a ‑ta ‑sü ’ka.

¹꞊Dhɛ ’ö ’pö mɛ ‑nu ’yi yuö kë ‑na ‑Zlan ’piö bhë, yi‑ ‑dhɛ ka ‑gɔ kö ꞊kun ’ka ka ꞊kwaa ’glusë ’ö‑ ‑kë ka ‑dhë bhë ‑a ‑zü ’ö ’ka dho ‑bo ‑a ’gü. ²Bhii ‑Zlan ‑wo ’ö ꞊bɛɛn’ ‑sü ’ka ‑ya ‑pö: ’Töng ‑së ’ka, a n ’to ‑kë ü ‑wo ‑bha; ’ö dha ‑yi ’ka ’ö ’a‑ dɔ ü ‑gban ‑gɔ. ꞊Dhɛ ’ö ’dhö ‑a ’töng ‑së ’ö bhë yö ꞊ga ’ö ꞊nɛ, ‑ka ’we ‑a ‑bha!

³’Yiëë‑ ’piö kö mɛ ‑nu ‑wo ’wun yö yi ’ta ‑kɔ ‑bha kö ‑yaan ’dho kë ‑an ‑gɔ yi ‑bha yuö ‑zë ’dhi ‑gɛn ’ka, ‑a ‑wun ’gü ꞊nɛ ’yië‑ ’piö kö pë ’ö dho go yi ’piö ‑yaan kë ‑yɛ mɛ ‑bha ‑pë ’ka ‑yö kë ’dhö kö mɛ ‑nu ‑waan bɔ ‑a ‑ta ‑waan yi ‑wun ꞊blɛɛ’‑. ⁴Pë ’yi‑ ‑zɔn ö ’plɛ ’ka ’ö tɔɔ ‑Zlan ‑bha yuökëmɛ ‑nu ‑mü yi ’ka. Yi yi ꞊zuö’ ‑kun sia‑ ’klobhɔdhe ‑nu ’gü, ’yena ‑wun ꞊va ‑nu ’gü ’iin ’siökangluudhe ꞊va ‑nu ’gü. ⁵‑Wo yi ‑ma, ’wo yi ‑zuö ‑kanso ’kɔɔdhö; ‑wo ’dhinaa ‑kë yi ’piö kö yi yuö ’gbee‑ ‑nu kë ‑na, ‑to ’yaan ‑sü ‑nu waa‑ din ‑nu ‑an ’ka. ⁶Yi yi ‑de ‑zɔn ꞊nɛ ‑Zlan ‑bha yuökëmɛ ‑nu ‑mü yi ’ka yi ‑bha ꞊zuö’ ‑kë ’puu ‑sü, yi ‑bha ’wundɔdhe ‑nu, yi ‑bha ꞊zuösaadhɛ kë ‑sü, yi ‑bha ’wun ‑së ‑kë ‑Zuu ’slööslö ꞊kwaa’ ‑sü waa‑ yi ‑bha ‑a ‑dhɔ ‑kë mɛ ‑nu ’ka ‑sü giagia, ⁷yi ‑bha ‑Zlan ‑wo ’ö ’wun giagia ’ka bhë ‑a ‑wun ꞊blɛɛ’ ‑sü waa‑ ‑Zlan ‑bha ’piigbeedhɛ ‑bha ‑nu yi ‑dhë ‑sü ‑nu ‑an ’ka. Pë ’ö kpengdhö ꞊nɛ ’yi‑ sü ’yi‑ ‑kë yi ‑bha ‑dhaa ’ka kö ’yië‑ dhoë mɛ ‑gɔ, ’iin kö ‑yaan kë yi bho pë yaa ‑gɔ ‑pë ’ka. ⁸‑A ’bhaa ‑nu ꞊ya kë ‑wo yi ꞊bhlë ‑ya, ’ö‑ ’bhaa ‑nu ꞊ya kë ’wo lë‑ kpɔ yi ‑ta; ꞊ya kë ‑wo ’wun ‑së ‑blɛɛ yi ‑gɔ, ’ö ꞊ya kë ’wo ’wun yaa ꞊blɛɛ yi ‑gɔ ’pö. ‑A ’bhaa ‑nu ꞊ya kë ‑wo yi ‑ga ꞊suakëmɛ ‑nu ’ka, ’kɛɛ kö ’wun gia‑ ꞊nɛ ’yi‑ ꞊blɛɛ, ⁹‑wo yi ‑ga ꞊nɛ mɛ ’ö ’waa ‑an dɔ ‑an ’dhö ’kɛɛ kö mɛ ’kpɛɛkpɛ ‑wo yi ‑dɔ; ’wo yi ‑ga ꞊nɛ mɛ ‑nu ’ö ꞊wa ga ‑an ’dhö ’kɛɛ kö yi ’bhee‑, ’ö ka gia‑ ’ka‑ yöë. ‑Wo za ‑lo yi tuö, ’wo yi ’klo bhɔ ’kɛɛ waa yi zë ’sa! ¹⁰’Wo yi wö ‑siö ’kɛɛ yi ꞊zuö’ ’glu ‑yö dhi ‑sü ’ka ‑kplawo. ‑Wo yi ‑ga mɛ ’fɛɛzë ‑nu ’ka ’kɛɛ kö yi mɛ ‑nu ‑kë ꞊bhɔɔzë; ‑wo yi ‑ga ꞊nɛ mɛ ‑nu ’ö pë gbɛ ’yaa ‑an ‑gɔ ‑a ’dhö ’kɛɛ kö pë ’plɛ ‑yö yi ‑gɔ.

¹¹Dhegluzë ‑nu ’ka Kolɛntö, ’yië yi ꞊zuö’ ’piö ‑wun ꞊blɛɛ’‑ ka ‑dhë. ¹²Yiëë yi ꞊zuö’ ’piö ‑wun ‑nu gbɛ ‑bin ka ‑gɔ, ’kɛɛ ka ‑zë ka ka ‑bha ‑bin yi ‑gɔ. ¹³꞊Dhɛ ‑kë ’dhö, a ka ‑sü ꞊nɛ ma ’në ‑nu ’dhö; a‑ ‑pö ka ‑dhë: ‑Ka ka ‑zo ’ta yi ‑wun ’gü ꞊nɛ ‑kɔ ’ö yi ‑zo ’dho ‑a ’ka ka ’piö bhë ‑a ’dhö!

‑De ’kun mɛ ‑nu ’ö ’waa ‑Zlan ‑bha mɛ ‑nu ’ka ‑an ‑gɔ ‑sü

¹⁴Kö ꞊kun ’ö mɛ ‑nu ’ö ’waa Yesu ‑wun ‑dhɛ ’wun gia‑ ‑mɛ ‑nu ’ka ’ö ka ‑nu kaa‑ pë ‑yö ‑kë do, bhii mɛ ‑nu ’ö ka ‑nu ka ‑bha ’wun dho kë do wo kun bhë. ‑Yö ‑dho kë ‑kɔklë kö pë ’ö kpengdhö waa‑ pë yaa ‑wo kë wo ’kuë‑ ‑ɛ? ‑Yö ‑dho kë ‑kɔklë kö ‑dhɛpuudhɛ waa‑ ‑dhɛtiidhɛ ‑wo kpa wo ’kuë‑ ‑ɛ? ¹⁵‑Yö ‑kɔklë ’ö Klito waa‑ dü ’wo ’wun ma wo ’ko ‑ta ‑ɛ? ’Go mü ’zü Yesu ‑wun ‑dhɛ ’wun gia‑ ‑mɛ waa‑ mɛ ’yaa‑ ‑wun ‑dhɛ ’wun gia‑ ‑mɛ ’ka ‑an ‑bha ‑më ‑wun ’ö dho kë ’kuë‑ do ꞊e? ¹⁶‑Yö ‑dho kë ‑kɔklë kö gbapë ‑nu gbadhɛ ‑yaan kë ‑Zlan ‑gba ‑a ’gü ‑kɔ ’ka ɛ? ‑Më ’ö dho ‑a ꞊mɛɛ’ ꞊dhia ’ma ɛɛ? Bhii kwa ’kwa tɔɔ ‑Zlan ’ö ’bhee‑ ‑a ‑bha këdhɛ mü ꞊nɛ ‑kɔ ’ö yö gia‑ ’ö‑ pöë ‑a ’ka ’dhö ꞊nɛɛ: «N këdhɛ waa‑ n ‑wɔdhɛ ‑yö ‑dho kë ‑an ziën, a ‑dho kë ‑an ‑bha ‑Zlan ’ka kö wo ‑zë ‑waan kë ma ’sɛgümɛ ‑nu ’ka.» ^17-18‑A ‑wun ’gü ꞊nɛ ’ö Dëmɛ ’piigbeezë ꞊ya pö: «‑Ka ’go ‑an ziën, ’ka bhɔ ‑an ‑dhë ꞊taa’, kö ꞊kun ’ö ’ka pa pë ’ö ‑dhuuzë ‑a ’ka! ꞊Ya kë ’dhö, ka ‑dho kë ma ’kɔɔmɛ ‑nu ’ka, ’a ‑kë ka Dë ’ka, ’ö ’ka ‑kë n gbö ‑nu, n ’dhu ‑nu ‑an ’ka.»

¹Pë ’tɔ ’go ‑wo ‑nu ’wo ꞊nɛ ‑an ’plɛ ‑wo kwa ‑bha pë ‑së ’ka, n dhegluzë ‑nu. ꞊Dhɛ ‑kë ’dhö, ‑kwa kwa ‑de kë ’slööslö pë ’yö dho kwa bun waa‑ kwa nii ‑an kë ‑dhuuzë ‑an ‑gɔ, ’kwa kwa ’gü dɔ ’gbee‑ ’kwa ‑kë ’slööslö ‑sü ꞊mɛɛ’‑ ’kwa dhoë ’dhiö ‑kplawo kö kwa ’ta ’sü ‑kɔ ‑yö ‑kë ‑suö ‑Zlan ‑dhë ‑sü ’gü.

Pɔlö ‑bha ꞊zuögludhi ‑wun

²‑Ka ka ꞊zuö’ ’dhi ’po yi ‑gɔ! Bhii yiëë pë yaa gbɛ kë mɛ ’ka, yiëë mɛ gbɛ ‑bha ’wun ‑nu ’gü ꞊siö’‑; yiëë ’wëü‑ sü mɛ gbɛ ’gü. ³’Wun ‑nu ’wo ꞊nɛ n ’ka‑ ꞊blɛɛ’‑ kö ’aan‑ za ‑lo ka tuö. ’Ö tɔɔ ’ma‑ pö ’saadhö ꞊nɛ ka yi ‑bha mɛ ‑nu ‑wungbeezë ‑nu ’ö ‑kë ꞊nɛ dha ‑sü ‑wun ‑nu ‑mü oo, ’iin ga ‑sü ‑wun ‑nu ‑mü oo, ’ö ’kwa dho to kwa ’ko ’piö ‑an ’ka. ⁴A n ‑zo ‑yö ka ‑bha, ’ö ’a ’gɔugɔ ka ꞊wuën’; ꞊faan’ ‑yö n ‑gɔ, ’ö n ꞊zuö’ ’glu ’dho dhi ‑sü ’ka ‑kplawo, ’kö ‑kë ꞊nɛ ’yena ‑wun ‑nu ‑wo ‑nu yi ‑ta ’dhee. ⁵Bhii ꞊dhɛ ’yië ’dho ’yië ‑lo Maseduanë, yiëë yi ’tɛɛ pa. ’Wun ‑nu ‑wo yi ‑yö ‑kɔ ’saadhö ’plɛ ‑ta; ’wun ‑nu ‑wo ‑da ‑na yië‑ mɛ ’bhaa ‑nu yi ziën kö ’suö ‑yö ‑da ‑na yi ꞊zuö’ ’gü. ⁶’Kɛɛ ‑Zlan ꞊ya kë ’yö ꞊faan’ nu ‑na mɛ ‑nu ’ö ’wun ꞊ya ‑an kun ’iin ’ö ‑an ꞊zuö’ ꞊ya ’to zlöö ’wun ’bhaa ‑nu ’gü ‑an ‑dhë bhë ‑ya kë ’ö Titö ‑yö nu yi ’piö ’ö yi ꞊faan’ më. ⁷Yaa kë ꞊nɛ ‑a ‑bha nu ‑sü ‑wun do ’sloo ꞊nɛ ’ö yi ꞊faan’ më; ’kɛɛ ‑a ꞊faan’ ’më ‑kɔ ’ka‑ ꞊kaa’ bhë ’ö nu ’ö‑ ‑wun ꞊blɛɛ ’nö, ’ö ‑kɔ ’ö ’ka ‑ya ‑sü ’ka kwa ‑bha ‑kpën ’kuë‑ ‑sü ꞊wuën’, ’ö ’ka ’gbo ‑nu bɔ ‑na n ‑wun ’gü ’iin ’wun ‑nu ’wo ‑gban n ‑ma ‑kë ‑a ’gü ’siözë ‑sü ‑nu ’ö bhë, ’ma n ‑zo ’ta ‑a ’gü, ‑yö n ꞊zuö’ ’glu dhi giagiawo.

⁸‑A ‑kë ’dhö ‑sü ’ka, ’kö ‑kë ꞊nɛ ’sëëdhɛ ’a‑ bɔ ka ‑dhë bhë ‑yö ka wö ‑siö ‑wun ’ka, dɔ ’kwa‑ wo ꞊nɛ ’yaa n ꞊zuö’ ‑to zlöö ‑wun ’ka gbɔ. ‑Yö ‑kë n ꞊zuö’ ‑to zlöö ‑wun ’ka ’töng ’bhle ’ö ka wö ‑siö ‑a ’ka bhë ‑a ’ka. ⁹Ka wö ‑siö ‑wun ’ö bhë yaa kë ꞊nɛ pë ’wo‑ pö ‑yö ‑kë n ‑dhë ‑së yö ‑mü, ’kɛɛ ’kö ‑kë ꞊nɛ ‑yö ‑kë ka wö ‑siö ‑wun ’ka, a ‑bɔ ‑a ’gü ’ö n ꞊zuö’ ’glu ‑yö ‑dhi ’ö tɔɔ ‑ya ‑kë ’ö ka ‑bha ’ta ’sü ‑kɔ ‑yö yö zian ‑së ‑ta. Wösiödhe ’ö bhë ‑Zlan ‑yö ‑bɔ ‑a ‑ta ’yö ö ‑bha yuö ꞊kaa’. ꞊Ya kë ’dhö kö yiëë pë yaa gbɛ kë ka ’ka ꞊nɛ bhë ’sa. ¹⁰Bhii wö ‑siö ‑wun mɛ ’ö ꞊yaa‑ ’sü ꞊ya yuö kaa ‑yö ‑gla ꞊zuö’ ꞊dhië’ ‑kwaa ‑sü ’ö dho mɛ ’ka dha ‑zian ’ka bhë ‑a ‑ta, ’ö mɛ gbɛ ꞊zuö’ ’ka ’dho to zlöö ‑a ‑wun ’gü. ’Kɛɛ wö ‑siö ‑wun mɛ ’ö ’kpongtaadhɛ ‑bha ’ka, ‑yö ‑dho mɛ ‑nu ’ka ga ‑zian ’ka. ¹¹‑Kɔ ’ö ’wun ’ö na ka ‑zuë, ’ö ‑Zlan ‑ya sü ’ö yuö ꞊kaa’ bhë, ‑a ‑yɛ ’zü ’ö bhë ‑kaa ‑ga ’dhɛ! ‑Ka ‑kɔ ’ö ka ‑bha wö ‑siö ‑wun ‑yö ka ‑bha ’wun ‑nu ‑yö ’ko ’dhiö ‑kɔ ꞊kaa’ ‑së ’ka, ’go mü ’ö ’ka ‑kë ꞊naazë kö ’kaan‑ ka ‑de dha ‑wun ‑nu kuën ka kwɛɛ bhë ka‑ ‑yö bhë ꞊a! ꞊Luu’ ’ka‑ wo ka dɔ ’wun bhë ‑a ‑gɔ ’yënng bhë, ’ka ‑kë ’siözë ꞊zluun ‑sü ’ka ‑yö kë ’dhö kö ’kaan‑ ka ’yan dɔ n ‑ma kö ’wun yaakëmɛ bhë ’kwaan‑ ’klo bhɔ bhë, ka‑ ‑yö bhë ꞊a! ‑A kë ’ka‑ wo ’dhö bhë ‑ya ‑zɔn ꞊nɛ ’wun bhë ka ‑kɔ ’yaa‑ ’gü. ¹²꞊Ya kë ꞊nɛ ’ma ’sëëdhɛ bɔ ka ‑dhë kö n ’ka‑ bɔ ’wun yaakëmɛ ’iin ‑a ꞊kaa’ ‑mɛ ‑an ‑wun ’gü, ’kɛɛ kö a‑ ‑kë ’dhö kö ‑kɔ ’ö ’ka ‑ya ‑sü ’ka n ꞊wuën’ ‑Zlan wö ’dhiö bhë ’kaan‑ kë ’aan‑ dɔ. ¹³Pë ’ö ‑kë ’ö pë ‑nu ’ka‑ kë bhë ’ö yi ꞊faan’ më bhë ’ö bhë; yaa kë ꞊nɛ yi ꞊faan’ ꞊nɛ ’ö më ’kpaan ’ka; ’kɛɛ Titö ‑bha ‑lo ‑sü ’ka ’nö, ‑kɔ ’ö ka ’saadhö ’ka‑ ꞊faan’ më ‑a ’ka bhë, ꞊dhɛ ’yi‑ ‑wun ma, ‑yö ‑kë yi ‑bha ꞊zuögludhi ‑wun ꞊va ’ka. ¹⁴Bhii ’wun ‑nu ’wo ‑gban ka ‑bha, a‑ ‑blɛɛ ‑a ‑dhë ’dhi ꞊va ’ka ’kɛɛ kaa ’kun n ‑wo ’ka. ‑Kɔ do gia‑ ’ö ’yi ’wun gia‑ ꞊blɛɛ’ ‑na ‑a ’ka ka ‑dhë bhë ꞊nɛ ’ö ’a ka ‑wun ꞊blɛɛ ‑a ’ka Titö ‑dhë ’dhi ꞊va ’ka; ’kɛɛ ‑yö ‑dho ’yö ‑kë ’wun gia‑ ’ka. ¹⁵‑Kɔ ’ö ’ka ꞊mɔa’ ‑a ’gü ꞊bhlëyadhe ’ka ’go mü ’ka‑ kuën ’suö ꞊va ’ka, ꞊ya ö ‑zo ’ta ‑a ’gü ‑yö ‑kë ka ‑dhɔ ‑wun ꞊va ’ka ‑a ‑gɔ. ¹⁶N ꞊zuö’ ’glu dhi ‑sü ‑mü, ’go mü ’ö n ‑zo yö ‑sü ’dhö ‑mü ka ‑bha ’wun ’plɛ ’gü.

Pë ‑nu ꞊zuö’ ‑së ’ka ‑sü

¹Dhegluzë ‑nu, yi‑ ’piö kö pë ’ö ‑Zlan ‑bha ’glusë ’gü ’ö‑ ‑kë Yesu ‑wun ‑dhɛ ’wun gia‑ ‑mɛ ‑nu ‑dho ’kuë‑ ‑sü ‑nu ’wo Maseduanë ‑an ‑dhë bhë ’ka‑ dɔ. ²‑Kɔ ’ö ‑towotamɛ ‑nu ‑wo bɔa ’klobhɔdhe ’gü bhë ka‑ ‑yö; ’kɛɛ ‑an ‑bha ’gludhi ‑bha ‑kë ꞊va ‑sü ’gü ‑wo wo ‑zo ‑bho wo ‑bha ’fɛɛ ’gblüünzë bhë ‑a ’piö ’ö ’wo ’glusë ‑kë mɛ ‑nu ’ka. ³A‑ ꞊blɛɛ ka ‑dhë ’wun gia‑ ’ka ꞊nɛ pë ’ö ‑an ‑kɔ ‑yö ‑mɔa ‑wa ‑nu. ‑A ‑de ‑wo pë ‑nu ‑nu ‑ziögɔüsüzë wo ‑de ꞊zuë’. ⁴’Ö ’wo ꞊dhɛɛ’ ‑nu kpɔ yi ‑gɔ ꞊naazë ’ka ꞊ya kë ꞊nɛ ‑wo ‑mɔa ‑bha ’wo gbaɔ bɔ ‑Zlan ‑bha mɛ ‑nu ’wo Zude ‑sɛ ’gü bhë ‑an ‑dhë ’pö. ⁵Pë ‑nu ’wo‑ ‑kë bhë ‑yö ‑ziö ‑kɔ ’yi yi ‑zo ꞊taa’ ‑be bhë ‑a ‑ta. Bhii ’ö tɔɔ ’dhiö ‑blɛɛzë ’ka ‑wo wo ‑de ‑nu Dëmɛ ‑dhë; ’go mü ’zü, ’ö ‑Zlan ‑zo ’kun ‑wun ’ka, ’wo wo ‑de nu yi ‑dhë. ⁶Pë ’ö ‑kë ’ö ’yi‑ pö Titö ‑dhë ‑yö ’dho ‑yö yuö kë ka ꞊plöö ꞊nɛ ‑kɔ ’yö‑ zü dɔ ‑a ’ka ‑a ’dhö ’ö bhë kö ‑yaan kë kö ka ‑bha ’glusë ‑yuö bhë, ’kaan‑ ‑a ’dhiö ’to. ⁷Ka ꞊bhɔɔzë pë ’plɛ ’gü: ‑Zo yö ‑sü oo, ’wun ꞊blɛɛ’ ‑sü oo, pë dɔ ‑sü oo, ‑kë ’siözë ‑sü ’ö‑ ‑naa ’kan ‑dhɛ ’yaa ‑dhö waa‑ yi ‑dhɔ ’ö ka ’gü bhë; ‑a ‑wun ’gü yi‑ ’piö kö ’ka ka ‑de ‑zɔn ꞊bhɔɔmɛ ‑nu ’ka, ka ‑bha ’glusë ‑yuö ‑nu ’ka ‑an kë ‑na bhë ‑an ’gü ’pö. ⁸Yaa kë tɔng ‑nu ka ‑dhë ‑wo ’ka; ’kɛɛ ’wun ’ö ‑gban mɛ ’waa gbɛ ‑nu ‑bha ‑kë ’siözë ‑kɔ ‑bha ’a‑ ‑wun ꞊blɛɛ kö ‑dhɔ ’ö ka ’gü bhë, ’kaan‑ ‑a ’gü ‑pë ‑nu kë, kö mɛ ‑nu ‑waan ‑an yö. ⁹Bhii ka kwa Dëmɛ Yesu Klito ‑bha ’glusë ‑dɔ! ’Ö tɔɔ yö ’ö ‑kë ꞊bhɔɔzë bhë ‑yö ö ‑de ‑kë ’fɛɛzë ka ‑wun ’gü, ‑yö kë ’dhö kö ‑a ‑bha ‑kë ’fɛɛzë ‑sü bhë, ka ‑zë ’kaan‑ bɔ ‑a ‑ta ’kaan‑ kë ꞊bhɔɔzë ꞊zian’.

¹⁰꞊Dhɛ ‑kë ’dhö, ’ma n ‑zo ’ta ’wun bhë ‑a ’gü; pë ’a‑ yö mü ’ö tɔɔ kö pë ’ö ’ka‑ zü dɔ ‑kwɛ ’ö ‑ziö ꞊nɛ ‑a ’gü bhë ’ka‑ kë ’ka dhoë ’dhiö, bhii ka ꞊nɛ ’ka ‑kë mɛ ‑blɛɛzë ‑nu ’ka kɔlɛtö ‑wun bhë ‑a ’gü; ’ö yaa ’sü ka ‑bha ‑a ’gü ‑pë kë ’ka‑ wo ‑blɛɛzë ’ka bhë ‑a ‑wun ‑bha. ’Kɛɛ ‑yö ‑sü ka ‑bha kë ’ka‑ wo mɛ ‑nu ’wo ‑we ‑a ‑wun ‑bha ‑blɛɛzë ’ka bhë ‑a ‑bha. ¹¹꞊Dhɛ ’ö ’pö, ‑kaa kë ’ka dhoë ’dhiö ’kaan‑ ‑a ’dhiö ’to. ‑Kɔ gia‑ ’ö ’ka ꞊weë’ kɔlɛtö ‑wun bhë ‑a ‑bha bhë, ‑kɔ gia‑ bhë ’ö ’ka dho ‑a ’gü ‑pë kaa ‑yö kë ’dhö kö ꞊ii‑ waa‑ ö ’gü ‑pë ‑waan ‑mɔ wo ’kuë. Pë ’ö ka ‑kɔ dho ‑mɔ ‑a nu ‑sü ‑bha ꞊nɛ ’ka dho ‑a kaa. ¹²Bhii mɛ ꞊ya pë nu mɛ ‑dhë ö ‑de ꞊kwaa’, ’ö ‑Zlan ‑yö ‑we ‑a ‑bha gbaɔ ’ö bhë ‑a ‑wun ‑bha. ‑Yö ‑sü ‑kɔ ’ö pë ‑yö ꞊kaa’ mɛ ‑gɔ ’ö ’wo gbaɔ ꞊kaa’ bhë ‑a ‑bha. Yaa ’sü pë ’ö ’yaa mɛ ‑gɔ ‑a ‑bha. ¹³Yaa kë ꞊nɛ ‑kɔ bhë ’ö ’ka dho ꞊daa’ pë ꞊mɛɛ’ ‑sü ’gü ’zü, ’kɛɛ pë ’plɛ ’dhiö ‑yö ‑mɔ ka ‑gɔ ’kuë ꞊zian’. ¹⁴Bhii ’töng ’ö ꞊nɛ ‑a ’gü, pë ‑yö ka ‑gɔ ꞊va, ’ö ’ka ‑mɔa ‑bha kö ’ka nu mɛ ‑nu ’ö ‑an ‑bha ‑wun ’dho pë ‑nu ‑bha ‑an ‑dhë. ꞊Ya kë ’dhö ’pö, yi ’ö ka ‑bha ‑wun dho yöë pë ‑bha, kö wo ‑zë pë ‑yö ‑an ‑gɔ ꞊va, ‑wo ‑dho nu ka ‑dhë ’pö. Pë ‑bha ‑mɔ ’kuë ‑sü bhë yö ꞊ga ’ö bhë. ¹⁵Bhii pë ’ö ꞊bɛɛn’ ‑sü ’ka ‑Zlan ‑bha ’sëëdhɛ ’gü (’ö ‑gban Izlaɛlö ‑mɛ ‑nu ’wo ’manë ‑lö ’kpa ’yënng ꞊taa ‑an ‑bha,) ‑ya ‑pö: Mɛ ’ö‑ sü ꞊va ’yaa ’to ‑a ‑gɔ; ’ö mɛ ’ö‑ sü ’tee ’ö‑ ‑bha ‑wun ’yaa yö ‑a gbɛ ‑bha ’pö.

Titö waa‑ ö ’bhamɛ ‑nu

¹⁶‑Zlan ’ö ‑kë ’siözë ‑sü nu Titö ‑dhë ka ‑wun ’gü ꞊nɛ ‑kɔ ’yi‑ ’ka ‑a ’dhö ’pö bhë ‑a ’tɔ ‑yö kë ꞊va! ¹⁷꞊Dhɛ ’yi‑ pö ‑a ‑dhë ‑yö nu ka ’piö ’ma, ‑a ’yi ‑yö ‑kan ‑a ‑dhë giagiawo; ’kö ‑kë ꞊nɛ yië‑ pö ’dhö ‑be, ‑yö ‑dho ‑a sü ö ꞊deë’ ’ö nu ’ma bhii ka ‑kpɛ ‑ya ‑ta. ¹⁸Dhegluzë do ’ö kpa ‑a ‑bha ’ö wo ‑nu ’wo nu ‑na ’ma bhë ’ö tɔɔ mɛ ’ö mɛ ’plɛ ’dho ‑a ‑wun ‑së ꞊blɛɛ’ ‑na ‑Zlan ‑wo pö ‑kɔ waa‑ ’wuntaɔsë ꞊blɛɛ’ ‑kɔ ‑wun ’gü bhë. ¹⁹꞊Ɛɛ, mɛ ’ö nu ‑na ’ma bhë, Yesu ‑wun ‑dhɛ ’wun gia‑ ‑mɛ ‑nu ‑dho ’kuë‑ ‑sü ‑nu ꞊nɛ ’wo‑ sü ’wo‑ yö yi ’piö kö ‑yaan ’dho ‑dɔ yi ‑gɔ ꞊dhia, ’ta ’yi dho dho ‑a ’gü ’wun ‑së kë ‑sü ’ka Dëmɛ ’tɔ ‑kë ꞊va ‑sü ’ka, ’go mü ’yiën‑ ’sü ’yiën‑ nu mɛ ‑nu ‑dhë bhë ‑a ’gü. ²⁰Yi‑ ’piö kö ꞊kun ’ö mɛ ‑nu ‑wo yi ’tɔ ‑siö ’wëü‑ ꞊va ’ö bhë ‑kɔ ’yi dho pë ‑nu kaa ‑a ‑wun ’gü. ²¹Yi‑ ’piö kö ’yi ’wun ‑së kë; ‑yö yi ꞊zuö’ ’piö kö ‑yö kë Dëmɛ wö ’dhiö ‑së, ’kɛɛ kö ‑yö kë mɛ ’bhee‑ ‑nu wö ’dhiö ‑së ’pö. ²²Yi dheglu ‑mɛ do ’bhaa ’ö ’yië‑ ’piö ‑ga ’wun ꞊plëëzë ’gü ’ö‑ ’gü kpengdhö ꞊nɛ ’ö waa‑ mɛ ‑nu ’wo bhë ’wo nu ‑na ’ma bhë. ’Kɛɛ zlöö ‑bha bhë ‑a ‑bha ‑kë ’siözë ‑sü ꞊ya ’dho ’dhiö ‑a ‑bha ‑zo ‑tën ka ‑dhë ‑sü ꞊va ’ö bhë ‑a ‑wun ’gü. ²³Titö ’ö bhë, ‑ziö n ’piö ‑mɛ ’ö yi ‑nu ’yi yuö ‑kë ka ‑dhë yö ‑mü; dhegluzë ‑nu mɛ ’wo‑ ’piö bhë, Yesu ‑wun ‑dhɛ ’wun gia‑ ‑mɛ ‑nu ‑dho ’kuë‑ ‑sü ‑nu ’wo ’nö ꞊nɛ ’wo ‑an bɔ kö ‑waan pë ‑nu kë ‑yaan kë Klito ’tɔ ‑blü ‑gɛn ’ka. ²⁴‑Kaa ‑zɔn ‑an ‑dhë ꞊nɛ ‑an ‑dhɔ ‑yö ka ’gü giagiawo, ‑yö kë ’dhö kö Yesu ‑wun ‑dhɛ ’wun gia‑ ‑mɛ ‑nu ‑dho ’kuë‑ ‑sü ‑nu ‑wa yö ’wun gia‑ ’ka, ’go mü kö ‑wo yi ‑bha ‑kë ’gɔugɔ ‑sü ‑wun ‑gɛn dɔ.

Pë ’wo nuë dhegluzë ‑nu ꞊dhia

¹’Ma ‑dhɛ ‑ga ‑a ’gü, ‑yö ‑zɔn n ‑dhë ꞊nɛ n ’ka ’dho ’sëëdhɛ bɔ ka ‑dhë pë ‑nu ’ka dho ‑a nu ‑Zlan ‑bha, mɛ ‑nu ’wo Zude ‑sɛ ’gü ‑an ‑dhë bhë ‑a ‑wun ’gü. ²A ka ‑wun ‑blɛɛ ’dhi ꞊va ’gü Maseduanë ‑sɛgümɛ ‑nu ‑dhë n ‑de ‑kë ’gɔugɔ ’ka, bhii a ka ꞊zuö’ ’piö ‑wun ‑sɛɛbɔ ‑nu ‑dɔ. Pë ’a‑ pö ‑an ‑dhë ’ö tɔɔ: «‑Kwɛ ’ö ‑ziö ꞊nɛ ‑a ’gü, dhegluzë ‑nu ’wo Glɛkö ‑sɛ ’gü bhë ‑wo ‑mɔa ’gü kö ‑waan pë ‑nu bɔ dhegluzë ‑nu ’wo Zude ‑an ‑dhë.» ‑Ka ‑dhɛ ‑ga bhë ’dhɛ! Ka ‑bha ‑kë ’siözë ‑sü bhë ꞊nɛ ’ö‑ ‑kë ’ö mɛdhɛvadhɛ ‑wo yö wo ‑bha nu ‑sü ‑bha bhë. ³‑A ‑kë ’dhö ‑sü ’ka, dhegluzë ‑nu ’wo ꞊nɛ, a ‑an ‑bɔ ka ‑dhë yi ’dhiö, ‑yö kë ’dhö kö ka ‑wun ‑së ’yi‑ ꞊blɛɛ ’wun ’ö bhë ‑a ‑wun ’gü bhë, kö ꞊kun ’ö‑ ‑wun dho to ’kpaan; ’kɛɛ pë ’a‑ ’piö ’ö tɔɔ ’ka ka ‑de ‑pë kë ꞊nɛ ‑kɔ ’a‑ ꞊blɛɛ ‑a ’ka ka ‑dhë bhë ‑a ’dhö. ⁴’Yaa ’pö, yië‑ Maseduanë ‑mɛ ‑nu ’yië nu, ’ö waa ka yö ka ‑de ‑yuö kë ‑sü ’ka, ‑yö ‑dho kë yi ‑bha lë‑ ‑wun ’ka yi ‑zo ’yi‑ tën ka ‑dhë bhë ‑a ‑wun ’gü; ’ö ’go mü ’yö dho kë ka ‑bha lë‑ ‑wun ꞊va ’ka ’pö. ⁵Pë ’ö ‑kë ’a‑ yö ‑së kö dhegluzë ‑nu ’wo bhë ’a ‑an bɔ kö ‑waan nu ka ꞊plöö n ’dhiö bhë ’ö bhë; ‑yö kë ’dhö kö ‑waan ’glusë gbaɔ ’ö ’ka‑ ’tɔ go bhë kö ‑waan ‑a ’dho ’kuë‑. ꞊Ya kë ’dhö, ‑a kë ‑yi ’ka kö ’aan‑ nu, kö ‑an ’plɛ ’dhiö ꞊ya ‑mɔ ’kuë kö ’aan‑ ‑a dɔa ’zü ꞊nɛ ka‑ ‑nu ka ꞊zuö’ ‑së ’ka; kaa‑ kë ꞊zuötozlöödhe ’gü. ⁶‑Yö kë ka ’yaan ꞊nɛɛ: Mɛ ꞊ya pë ta ’tee, ‑yö ‑dho ‑a kan ’tee; ’ö mɛ ’ö ꞊ya pë ta ꞊va, ’ö ‑a kan ꞊va ’pö. ⁷꞊Dhɛ ’ö ’dhö, kö mɛ ’ö ‑dhö ‑yö pë ‑nu nu ꞊nɛ ‑kɔ ’ö‑ ’ka ‑a ꞊zuö’ ‑bha ‑a ’dhö, kö ꞊kun ’yö‑ nu ꞊zuötozlöödhe ’ka ’iin ꞊nɛ pë ’wo‑ pö ‑a ’gbee‑ ‑ta ’wo‑ bho ‑a ’dhö. Bhii mɛ ’ö pë nu ꞊zuögludhi ’ka bhë, ‑a ‑dhɔ ‑yö ‑Zlan ‑kë. ⁸‑Zlan ‑kɔ ‑yö ‑mɔa kö ‑yaan pë ‑sɛɛbɔ ꞊suu’‑ ’saadhö nu ka ‑dhë ꞊va, ‑yö kë ’dhö kö pë ‑nu ‑wo kë ‑kplawo ka ‑gɔ ꞊va, kö ka ‑bha ꞊ya ’go ‑a ’gü, ‑a ’bhaa ‑yaan ’to kö ’kaan‑ gbaɔ ‑nu kë ‑an ’ka. ⁹Bhii ’wun ’ö ‑gban ‑sü ’ka ‑Zlan ‑bha, ’ö ꞊bɛɛn’ ‑sü ’ka ‑ya ‑pö: «‑Yö pë ‑nu ’fɛɛmɛ ‑nu ‑dhë ’glusë ’gü; ‑a ‑bha ’wun ‑së kë ‑sü ‑yö ‑dho ’dhiö ꞊toëpö ’ka.» ¹⁰‑Zlan ’yö pëga nu pëgatamɛ ‑dhë, ’go mü ’yö ꞊bluu’‑ nu ‑a ‑dhë ‑bhöpë ’ka bhë, ‑yö ‑dho pëga ’saadhö ’ö ka ‑bha ‑wun ’dho ‑a ‑bha ‑a nu ka ‑dhë; ’yö ꞊kpɛa, ‑yö kë ’dhö kö ka ‑bha ’glusë kë ‑sü bhë ‑a bhɛ ‑yaan ‑ya ꞊va. ¹¹‑Yö ‑dho ka kë ꞊bhɔɔzë ’töng ’saadhö ’ka, ‑yö kë ’dhö kö ’kaan‑ ’bhaa gbaɔ ‑nu kë. ‑Kɔ bhë ꞊nɛ ’ö mɛdhɛvadhɛ dho ‑Zlan zuö pöë gbaɔ ’ka‑ ‑kë ‑an ‑dhë ’ö ’yi dhoë ‑an ꞊dhia bhë ‑a ‑wun ’gü. ¹²Bhii yaa kë ꞊nɛ gbaɔ ‑nu ’wo bhë pë ’ö ‑Zlan ‑bha mɛ ‑nu ‑bha ‑wun ‑yö yö ‑a ‑bha bhë ‑a ’gü ‑pë ’sloo ‑mü, ’kɛɛ ‑yö ‑kë ‑bhɛa ‑Zlan ‑dhë ‑sü ‑a zuö pö ‑sü ‑gɛn ’ka ’pö. ¹³Gbaɔ ’ö ’dhö bhë ‑yö ka kë ‑kɔ ‑nu ‑zɔn ‑dhɛgbɛadhɛ ’gü kö mɛ ‑nu ‑waan ‑Zlan ’tɔ kë ꞊va, ’wuntaɔsë ’ö ‑gban Klito ‑bha bhë, ‑a ‑dhɛ ’ka‑ wo ’wun gia‑ ꞊bhlëyadhe ’gü bhë ‑a ‑wun ’gü; ’ö ’wo dho ‑Zlan ’tɔ bhɔ, ‑kɔ ’ö ’ka pë ‑nu ‑glu ‑a ’ka, ka ’dhö, wo ’dhö waa‑ mɛ ‑nu ’wo to ka ‑nu ka ziën ’glusë ’gü bhë ‑a ‑wun ’gü. ¹⁴‑Wo ‑dho ꞊bhɛa’‑ ka ‑wun ’gü, ’ö ‑an ꞊zuö’ ‑yö ‑kë ka ’piö ’glusë ꞊va ’gblüünzë ’ö ‑Zlan ‑ya ‑kë ka ’ka bhë ‑a ‑wun ’gü. ¹⁵‑Zlan ’tɔ ‑yö kë ꞊va gbaɔ ’ö‑ ꞊zuan’ gbɛ ’yaa ’dhö, ’ö yö gia‑ ’ö‑ ‑kë kwa ‑dhë bhë ‑a ‑wun ’gü.

Pɔlö ‑yö ‑dɔ ö ‑bha yuö ‑gban ‑gɔ

¹Ma Pɔlö ‑mɛ, ’ö mɛ ‑nu ‑wa pö ’ma kë ka ’piö ’maa ’we, ’ö ’wo‑ pö a ‑dɔ kö yi ’ö ’maa ka ’piö kö ’aan‑ kë ’dhiözë bhë, a‑ ‑pö ka ‑dhë Klito ‑bha ‑kë ’lëëlë ‑sü waa‑ ‑a ‑bha ’wun ‑së ‑kë mɛ ‑dhë ‑sü ’ka: ²Kö ꞊kun ’ka‑ ‑kë ’ö ’a ’wun ‑nu ‑kë ’dhiö yi ’a dho kaa ka ꞊plöö ‑a ’ka. Bhii a‑ ꞊dɔa’ ꞊nɛ a ‑dho ‑kë ’dhiözë ‑sü ‑zɔn mɛ ‑nu ’wo‑ pö ‑na yi pë ‑nu ‑kë mɛbheedhɛ ꞊kwaa’ bhë ‑an ‑dhë. ³‑Yö ’wun gia‑ ’ka ꞊nɛ kwa ‑tosiadhe ‑kë kwa mɛbheedhɛ ‑kwi ’gü; ’kɛɛ ’yiëë ’ko zë ꞊nɛ mɛ ’bhee‑ ‑nu ‑bha ’ko zë ‑kɔ ’dhö. ⁴’Ko ꞊zaa’ ‑piö ‑nu ’yi ’ko zë ‑na ‑a ’ka bhë ’waa kë ꞊nɛ ’kpongtaamɛ ‑nu ‑bha ’dhö; ’kɛɛ ‑Zlan ‑bha ’ko ꞊zaa’ ‑piö ’piigbeezë ‑nu ꞊nɛ ’wo‑ ‑kë ’yi ‑glu ‑gla ‑nu ꞊wüü ‑an ’ka; ’wo tɔɔ ꞊sua ‑wun. ⁵’Ö ꞊ya kë ’ö pë ‑nu ꞊ya kë ’ö mɛ ’bhee‑ ‑nu ‑bha ‑de ‑sü ꞊va ’gü, ’wo dɔ ‑na ‑Zlan ‑bha ’wundɔdhe ‑gɔ, ’yënng bhë yi ‑an ‑lo. Yi‑ ‑kë ’ö mɛ ’bhee‑ ‑nu ‑bha ‑zo ‑ta ‑a ’gü ‑wun ‑nu ‑wo ‑kë Klito ꞊bhlë ‑ya ‑wun ’ka. ⁶‑A ‑de ’kwa yö ‑dhɛ ’bhaa ’gü ꞊sia mɛ mɛ ’ö ꞊ya pë yaa ’tee kë ‑yaan ’kun ‑Zlan ꞊bhlë ‑ya ‑sü ’ka, yi ‑dho ‑a ’klo bhɔ.

⁷Ka pë ‑nu ’piö ‑ga mɛbheedhɛ ‑kwaa. ’Kɛɛ a‑ ‑pö ka ‑dhë, mɛ ’ö ö ‑de dɔ Klito ‑wun ‑dhɛ ’wun gia‑ ‑mɛ ’ka, ‑yö kë ‑a ’yaan ꞊nɛ ‑kɔ do ’ö‑ ’ka bhë, ‑kɔ do bhë ’yi‑ ’ka ’pö. ⁸‑A ‑de ’yaa‑ ‑bha kö lë‑ ‑yö n kë, kë ’a‑ wo ’gɔugɔ pë ’ö Dëmɛ ‑ya ‑lo yi kwɛɛ, kö ’yiën‑ ka ‑bha ‑zo yö ‑sü ꞊kpɛa’‑ ’ka ’dhiö bhë ‑a ‑wun ’gü, ’ö tɔɔ n ’ka ’wun yaa gbɛ kaa ka ’ka. ⁹’Maa‑ ’piö kö ’a ’siö ’kan ka ’gluu ’sëëdhɛ ‑nu ’a‑ bɔ ‑na ka ‑dhë bhë ‑an ’gü. ¹⁰Bhii mɛ ‑nu ‑wa ‑pö: «Pɔlö ꞊ya ’sëëdhɛ bɔ, ‑yö kë ’dhiö‑ ‑a ’gü, ’kɛɛ yö gia‑ ꞊ya kë kwa ziën, ‑yö ‑kë ’gügasüzë ’ka ’ö‑ ‑wo ‑nu ‑wo ‑kë ’lëëlë ’ka.» ¹¹Mɛ ‑nu ’ö ’wun ꞊suu’‑ bhë ’ö ’go ‑na ka dhiö bhë ‑yö kë ka ’yaan ꞊nɛ: ‑Nii gbɛ ’yaa pë ’yi‑ ‑ya ’sëëdhɛ ’gü ’yi‑ bɔ ka ‑dhë waa‑ pë ‑nu ’yi dhoë‑ kë ka ’piö ’ma bhë ‑an ziën.

¹²꞊Ɛɛ, ’kɛɛ ’yiëë‑ ’piö kö ’yi yi ‑de ‑zɔn mɛ ‑nu ’ö ꞊wa wo ‑de ‑ga ’ö ’wo wo ‑de sü ꞊va bhë ‑an ’ka ’iin ’yi yi ‑de kë ꞊nɛ ‑an ’dhö; bhii ’kpaakpadhɛ ’yaa ‑an ‑gɔ. ‑Wo wo ‑de ‑bha ’wun kë ‑kɔ ‑nu ‑kë, kö ’waan‑ ‑kë wo ‑bha ’wun kë ‑kɔ ‑nu ꞊zuan’ ’ka, ’ö tɔɔ ‑wo ’wun ꞊zuan’ ‑sü wo ‑de ‑bha, ’go mü ’wo wo ‑zo gɔn wo ‑de ‑dhë. ¹³꞊Ya kë yi ‑zë yi ‑bha ’ka, yi ’ka ’dho yi ‑de kë ’gɔugɔ ‑yaan zië ‑naa ’gü. Yi ‑dho yi ‑bha kë ‑a ‑naa ’ö ‑Zlan ‑ya ‑ya ö ‑bha yuö kë ‑kɔ ’ö‑ ‑zɔn yi ‑dhë ’yi nu ’yi ꞊loë’ ka ꞊plöö bhë ‑a ’ka. ¹⁴Yiëë ‑lö ‑a ‑naa ‑zü ꞊nɛ ꞊dhɛ ’wo‑ pö ‑a ‑bha ’kpa kë‑ wo ’dhiö bhë yiëë ꞊loë’ ka ’piö ‑a ’dhö. Bhii ’ö tɔɔ yi ‑nu ’yi ‑lo ka ’piö, ’ö ’yi Klito ‑bha ’wuntaɔsë ꞊blɛɛ ka ‑dhë. ¹⁵‑Kɔ bhë ꞊nɛ ’ö ’yiëë ꞊löë’ ‑a ‑naa ’ö ‑ya ‑sü ’ka bhë ‑a ‑zü; yiëë yi ‑de ’sü ꞊va yuö ’ö mɛ gbɛ ‑nu ‑wa ‑kë bhë ‑a ’gü. Pë ’ö yi ‑zo ’piö ꞊zian’ ’ö tɔɔ ka ‑bha ‑zo yö ‑sü ‑yö ’dho ’dhiö, ’iin kö yuö ꞊va ‑wungbeezë ’ö ꞊tun ka ziën bhë ’yiën‑ kë ‑to ‑a ‑naa ’ö ‑Zlan ‑ya ‑ya bhë ‑a ‑bha ‑sü ’ka ‑kplawo. ¹⁶꞊Ya kë ’dhö ’yi ‑dho dho ’wuntaɔsë ’ö bhë ‑a ’ka ’sɛ ‑dhɛ mɛ ’wo to ‑an ’gü; ꞊ya kë ’dhö, yi ’ka ’dho yi ‑de sü ꞊va yuö ’ö mɛ ’waa gbɛ ‑nu ‑wa ‑kë bhë ‑a ’gü. ¹⁷‑A ‑kë ’dhö ‑sü ’ka, pë ’ö ‑ya ‑sü ’ka ‑ya ‑pö: «Mɛ ’ö‑ ’piö kö ’ö ö ‑de ’sü ꞊va, kö ‑yö ö ‑de ’sü ꞊va pë ’ö Dëmɛ ‑ya ‑kë ‑a ‑wun ’ka.» ¹⁸Bhii mɛ ’ö‑ ‑wun ‑yö ‑Zlan ‑zo kun yö kun tɔɔ mɛ ’ö ö ‑de sü ꞊va ö ‑de këwun ‑nu ’gü ’kɛɛ mɛ ’ö Dëmɛ ‑ya ‑wun ‑së ꞊blɛɛ.

Pɔlö waa‑ bɔmɛ ꞊suazë ‑nu

¹Mɛa‑, ‑ka dɔ! ‑Ka ’we n ‑wun ‑bha n ‑ma ‑kë ’blɔɔnzë ‑sü ‑wun ’gü! ²A ka ‑ta ꞊druɛi kë ‑na. ’Kɛɛ ma ꞊druɛi bhë ‑yö ‑go ‑Zlan ’piö. Bhii ka n ‑gɔ ꞊nɛ ’nëdhezë ’ö yaa gɔɔn‑ ‑wun ꞊tɛi’ dɔ ꞊kun ’ö ’a‑ ’piö kö ’a‑ dɔ gwaan Klito ‑gɔ ‑a ’dhö. ³’Kɛɛ pë ’ö‑ ’suö ‑yö n ‑kë ’ö tɔɔ kö ꞊kun ’ö ka ‑bha ’wundɔdhe ‑yö yö yaan ’ö kaa Klito ‑nu ka ‑bha ‑klu ’kuë‑ ‑sü ’puu ’ö bhë ’ö ’ka‑ ‑to ‑dhɛ gbɛ ’gü ꞊nɛ ‑kɔ ’ö Ɛvö ‑yö ö ‑zo bhoë ö ‑de ’piö ꞊mɛɛ ‑bha ꞊sua ‑yö ’ko ’dhiö ‑sü ‑zë ‑kë ‑a ‑gɔ ‑sü ‑wun ’gü bhë ‑a ’dhö. ⁴Bhii ka ka ‑kwaa mɛ ’bhaa ‑nu ‑zü ’ö ’wo nu ’ö Yesu ’ö ’yi‑ ‑wun ꞊blɛɛ ka ‑dhë bhë ’ö ’wo‑ ’bhaa gbɛ ‑wun ꞊blɛɛ ka ‑dhë; ’ö ‑Zuu ’slööslö ’ö ’ka‑ yö bhë, ’ö ’wo‑ ’bhaa gbɛ ‑wun ꞊blɛɛ ka ‑dhë ’ö ’wuntaɔsë ’ö ’ka‑ ‑dhɛ ’wun gia‑ bhë ’ö ’wo ’bhaa gbɛ ‑wun ꞊blɛɛ ka ‑dhë, ’ö ’ka ka ‑kɔ kpɔ ‑an ‑gɔ, ’ka ‑an ‑nia kun ‑së ’ka.

⁵’Kɛɛ a‑ ꞊dɔa’ ꞊nɛ n ꞊bhlë ‑yö ‑dhö ’pö ꞊nɛ ka ‑bha bɔmɛ ‑nu ‑wungbeezë ‑nu bhë ‑an ’dhö, ’maa ‑an ꞊zlöö ꞊zian’. ⁶‑Yö ‑mɔa ‑bha kö ‑yö kë ’wun gia‑ ’ka ꞊nɛ n ’dhi ’yaa ’kan ‑sü ꞊duö; ’kɛɛ ‑a mɛ ’ö ‑gban ’wundɔdhe ‑bha, ka gia‑ ꞊nɛ ’ö ‑kë ka ’yaan ’ma, ’wun ’bhaa ‑nu ’gü. ⁷Yi ’a ‑Zlan ‑bha ’wuntaɔsë ꞊blɛɛ ‑a ’ka ka ‑dhë, n ’ka ‑kë ’wëüga ‑wun ’gü ’ö ’a n ‑de dho sia‑ ‑yö kë ’dhö kö ka ‑zë ka ‑gɔ ‑yaan ꞊luu’‑; ’ma‑ kë ’dhö kö ’wun yaa ’a‑ kë ꞊a? ⁸A ‑we ‑a ‑bha Yesu ‑wun ‑dhɛ ’wun gia‑ ‑mɛ ‑nu ‑dho ’kuë‑ ‑sü ’bhaa ‑nu ‑gɔ kö ‑wo n ꞊saan’ ‑nu bho. ꞊Ya kë ’dhö kö ‑an ꞊kpoo’ kun ’a‑ wo kö ’aan‑ ma ‑tosiadhe kë ‑a ‑ta ma yuö ’gü ka ziën bhë ꞊aa. ⁹’Töng ’a ꞊kaa’ ka ꞊plöö bhë, n ’ka kë mɛ gbɛ ‑kɔ ‑ta, n ‑ma ‑wun ‑yö ‑a ‑bha ‑pë ‑nu ’gü. Bhii dhegluzë ‑nu ’wo go Maseduanë ‑wo ‑nu n ꞊dhia n ‑ma ‑wun ‑kan ‑pë ’plɛ ’ka. A n ‑zo ‑kë n ‑de ’piö kö ꞊kun ’a dho ’wun wɔ ka ‑ta ‑kɔ ’saadhö ’ka. ’Yö ’a dho ‑a kaa ’dhö ‑kplawo. ¹⁰’Wun bhë ‑yö ’wun gia‑ ’ka; Klito ‑de gia‑ ‑ya ꞊goo‑ ’ka. A‑ ‑pö ka ‑dhë ’wun mɛ bhë, ‑yö ‑gban n ‑ma ‑kë ’gɔugɔ ‑sü ‑bha; ’ö Glɛkö ‑sɛgümɛ gbɛ ’ka dho ‑mɔa ‑bha kö ‑ya bho n ’gü. ¹¹‑A ‑pö ’dhö ‑gɛn tɔɔ ‑më ’gbödhö ꞊ee? Ka ‑dhɔ ’pö ’yaa n ’gü bhë ꞊ee? ‑Abi’ ’sa! ‑Zlan ‑de ‑ya ꞊dɔa’ ꞊nɛ ka ‑dhɔ ‑yö n ‑kë.

¹²A ‑dho dho ‑a ‑kë ’dhö ‑sü ’ka ’dhiö ꞊nɛ ‑kɔ do bhë ‑a ’dhö, ‑yö kë ’dhö kö mɛ ‑nu ’wo zian ꞊mɛɛ’ ‑na kö ‑waan wo ‑bha ‑de ‑sü ꞊va yö ‑dhɛgbɛadhɛ ’gü ‑a pö ‑sü ’ka ꞊nɛ yi ‑nu yi yuö kë ‑kɔ ‑yö do bhë ’aan‑ zian ’ta ‑an ‑gɔ. ¹³Mɛ ‑nu ’wo ’dhö bhë, bɔmɛ ‑nu ꞊suazë ‑mü ‑an ’ka. ’Waa wo këyuö giagia yö ‑dhɛgbɛadhɛ ’gü ’ö ’wo wo ‑de ‑kë Klito ‑bha bɔmɛ ‑nu ’ka. ¹⁴Mɛ ’te ’tun ‑wun gbɛ ’yaa ‑mü, bhii ’ö tɔɔ Satan gia‑ ‑yö ‑mɔa ‑bha kö ‑yö ö ‑de kë ‑Zlan ‑bha bɔmɛ ’ö ‑dhɛpuudhɛ ’gü ‑a ’ka. ¹⁵꞊Ya kë ’dhö kö ‑më ’ö ‑kë ’ö‑ ‑bha yuökëmɛ ‑nu ‑de ’pö waa ’dho wo ‑de kë yuö kpengdhö kë ‑mɛ ‑nu ’ka ɛɛ? ’Kɛɛ pë mɛ ’ö ‑ya ‑an ꞊tian’ ’ö dho kë ‑an ’dhiötodhɛ ’ka ‑yö ‑dhö ’wa!

’Klobhɔdhe ꞊va ‑nu ’wo nu Pɔlö ‑ta ‑a ‑bha ‑kë Yesu ‑bha bɔmɛ ’ka ‑sü ‑wun ’gü

¹⁶A‑ ꞊blɛɛ’ ‑na ’zü do ꞊nɛ: Kö ꞊kun ’ö mɛ gbɛ ‑yö n sü ’blɔɔnmɛ ’ka. ’Ö ꞊ya kë ’zü ꞊nɛ ka n ‑sü ’blɔɔnmɛ ’ka, kö ‑ka n ‑dhɛ ’blɔɔnmɛ ’gbönggböng. ‑Yö kë ’dhö kö ’a n ‑de ’sü ꞊va pë ’bhle wo. ¹⁷‑Yö ’dhö ’kɛɛ pë ’a‑ ꞊blɛɛ’ ‑na zlöö bhë ’yaa pë ’ö Dëmɛ ‑zo ’kun ‑wun ’ka ‑a ’ka. ’Ö ꞊ya kë ꞊nɛ ‑tosiadhe ꞊suu’‑ ꞊nɛ, ’ma kë ‑a ’gü, kö a ‑dho n ‑de sü ꞊va ’ö ’a ’wun ꞊blɛɛ ꞊nɛ ’blɔɔnmɛ ’wun ꞊blɛɛ. ¹⁸꞊Dhɛ ’ö ‑kë ꞊nɛ mɛ ‑nu ’wo to ‑wo wo ‑de ‑sü ꞊va mɛbheedhɛ ‑pë ‑wun ’gü bhë kö ‑më ’a dɔ ‑a ‑gɔ ’ö ma ‑de ’pö ’maa n ‑de ’sü ꞊va bhë ꞊ɛɛ? ¹⁹Mɛa‑, mɛ ’ka ’kpaakpa ’ö ’ka ka ꞊kwaa ’blɔɔnmɛ ‑nu ‑zü ’wo wo ‑bha ’blɔɔn‑ ‑zɔn ka ‑dhë bhë, ‑ka ka ’gü dɔ ‑a ‑bha ’gbee‑! ²⁰Bhii ‑yö ka ‑dhë ‑së kö mɛ ‑nu ‑wo ka ꞊nuadhɛ ‑kë wo, kö ‑wo ka ‑bha ꞊naɔ ‑nu ’sü ’kpaan, kö ‑wo ka ‑püö, kö ‑wo ꞊taa’‑ ka ‑gɛn ‑ta, kö ‑wo lë‑ kpɔ ka ‑ta. ²¹Ka ‑bha lë‑ ‑wun kun bhë ꞊a! ꞊Faan’ yaa kë yi ‑gɔ kö ’yiën‑ ’wun ꞊suu’‑ ‑nu ’wo bhë ‑an kë bhë yö ‑mü.

‑Ka ka ’to ’to ma ꞊ga ’a ’dhoë‑ ’blɔɔn‑ ‑wun ꞊blɛɛ’ bhë! ꞊Ya kë ꞊nɛ mɛ ‑yö ‑dhö kö ‑yaan ö ‑de ’sü ꞊va kö ma ‑de ’pö a ‑dho ‑a kë ’pö. ²²A Eblö mi ’ka ꞊nɛ ‑an ’dhö. A Izlaɛlö ’në ’ka ꞊nɛ ‑an ’dhö. A Ablaamö ꞊suu’‑ ‑ta ’ka ꞊nɛ ‑an ’dhö. ²³‑Wo wo ‑de ‑kë yuö ‑kë Klito ‑dhë ‑mɛ ’ka; ‑ka dɔ, ’blɔɔnmɛ ’dhoë‑ ’wun ꞊blɛɛ’‑: ’Ö ꞊ya kë ꞊nɛ Klito ‑bha yuökëmɛ ‑mü ‑an ’ka, kö ma ‑de ’pö a‑ ‑mɛ ’ka ’a ꞊zië’ ‑an ‑ta; ‑wo n ‑zuö ‑kanso ’gü ‑kplawo, ‑wo n ‑ma ꞊va ’ö ꞊zië’ ‑an ‑ta; a ‑bɔ ga ‑dhɛ ‑bha ‑kplawo, ²⁴Zuifö ‑nu ‑wo ‑klaa ‑yaan ’gɔɔ‑ ‑yaaga ’ö ga ’sɛisië ‑sü n ‑ma ‑gwaa ’sɔɔdhu ‑zë. ²⁵Wlɔmë ‑mɛ ‑nu ‑wo n ‑ma ‑gwaa ‑yaaga ‑zë; ꞊wa n ‑zuö ‑guö ’ka do kö ‑waan n zë; ’yitagɔ ‑yö ‑wüü n ’ka ‑gwaa ‑yaaga ‑zë, ’a ‑dhɛkpaɔyi do waa‑ gbeng ‑yi do ‑kë yiö do. ²⁶’Ö ’ta ꞊plëëzë ’a‑ sü bhë ’a bɔ ga ‑bha mɛ yö ‑dhɛ ‑nu ‑bha, ’wo ‑kë ’yi ‑bha pa ‑sü ‑nu, këpëyaamɛ ‑nu, n ‑de ‑sɛgümɛ ‑nu ’wo Zuifö ‑nu waa‑ ‑a mɛ ‑nu ’ö ’waa Zuifö ’ka ‑an ‑bha n zë ‑dhɛ ‑kë wo ‑sü ‑nu, ga ‑bha mɛ yö ‑dhɛ ’ö pödhɛ ‑nu ’gü ‑nu, ga ‑bha mɛ yö ‑dhɛ ’ö ’yënng ꞊taa ‑dhɛ ‑bha ‑a ’gü ‑nu, ga ‑bha mɛ yö ‑dhɛ ’ö ’yoo ‑ta ‑dhɛ ‑nu ’gü ‑nu, waa‑ ga ‑bha mɛ yö ‑dhɛ ’yö bɔ n dheglu ꞊suazë ‑ta ‑nu, a ‑bɔ ‑an ’plɛ ’gü. ²⁷A yuö ’gbegbe ‑nu ‑kë; ’ö ’a bɔ ’güdandhe ’gbee‑ ‑nu ’gü; ’ö‑ ’bhaa ‑nu ꞊ya kë ’maa yi zë, ’ö din ‑nu, ’yi mü ‑dhɔ ‑nu ‑wo n ‑kë. ‑A ’bhaa ‑nu ꞊ya kë ‑wo n ’gbee‑ ‑ta ‑bho ‑nu wo ’ö ’a to din ’ka ꞊plëëzë wo; ’nɛnɛ ‑nu ‑wo n ‑kë, bhii sɔ yaa kë n ‑gɔ. ²⁸’Ö ꞊ya kë ’ö n ꞊zuö’ ‑yö to zlöö Yesu ‑wun ‑dhɛ ’wun gia‑ ‑mɛ ‑nu ‑dho ’kuë‑ ‑sü ’saadhö ‑wun ’gü. N ’dhi yaa ‑mɔa ‑bha kö ‑yö bɔ ‑a ’plɛ ’gü. ²⁹꞊Ya kë ꞊nɛ ꞊faan’ ‑yö yën ‑na mɛ ’bhaa ’gü, kö ma ‑de ’pö ꞊faan’ ‑yö yën ‑na n ’gü. ꞊Ya kë ꞊nɛ mɛ ’bhaa ꞊ya ’wun yaa kë, ‑yö ‑më n ’ka ꞊duö.

³⁰’Ö ꞊ya kë ꞊nɛ ’ma‑ pö ’a n ‑de ’sü ꞊va kö a ‑dho n ‑de sü ꞊va pë ’ö ’a ’tëëtë ‑a ’gü bhë ‑a ‑wun ’ka. ³¹‑Zlan kwa Dëmɛ Yesu Dë ’ö ’dhuë‑ ’dho ‑a ’tɔ ‑ta ꞊toëpö ’ka bhë yö gia‑ ‑ya ꞊dɔa’ ꞊nɛ n ’ka ꞊sua kë. ³²‑Ka dɔ ’dhɛ! A ‑kë Damasö ’ö ’sɛdë ’ö ‑kë yuö kë ‑dhiadhö ‑gludë Aleta ’dhiö bhë, ’yö ’yan ‑to ’kɔ ‑bha ‑mɛ ‑nu dɔ ‑da plöö ’kɔdhi ‑bha kö ‑waan n ’kun. ³³’Kɛɛ mɛ ‑nu ‑wo n ‑ya ꞊kpasɛn ’gü ’wo n bɔ böü‑ ’kplong ’ö ꞊nië pö‑ ‑zü bhë ‑a ‑du do ‑bha ’wo n ꞊yɔɔ ‑a ꞊zlöö ꞊zian’. ‑Kɔ bhë ꞊nɛ ’a dhaa ‑a ‑gɔ.

’Yanpiöpë waa‑ pë ‑nu ’wo dho kë ’ö ‑Zlan ‑ya ‑zɔn Pɔlö ‑dhë

¹‑De ‑sü ꞊va ‑sü ’yaa ‑së ’kɛɛ ‑ka dɔ! ’Dho ’a ’dhoë‑ ‑de kë bhë. ’Yanpiöpë waa‑ pë ‑nu ’wo ‑kë ‑bin ‑sü ’ka ’ö Dëmɛ ‑yö ‑we ‑a ‑bha n ‑gɔ kö ’aan‑ ‑an yö bhë a ’dhoë‑ ‑wun ꞊blɛɛ’‑ bhë. ²Yesu ‑wun ‑dhɛ ’wun gia‑ ‑mɛ do ’ö ‑Zlan ‑ya sü ’ö dho ‑a ’ka dhang‑ kë ‑yaaga ‑naa ’gü, a‑ ‑dɔ. ‑Yö ‑kë ’dhö ‑a ‑kwɛ ’gɔɔ‑ do ö ga ‑yiisië ‑mü ꞊dɛɛ; (kö kë‑ wo ꞊nɛ, ‑da ’pö‑ wo dhang‑ ’gü ’iin kö ’yanpiöpë ’kpaan ’pö‑ yö ee; ‑Zlan do ꞊nɛ ’ö ö ‑bha pë dɔ). ³’Kɛɛ gɔɔn‑ bhë ‑yö ‑da ’ö dho ’tɛɛpadhɛ ’ö ‑Zlan ’piö ‑a ‑bha. (A‑ ‑pö ’zü ꞊nɛ, kë‑ wo bhë ‑da ’pö‑ wo, ’iin ’yanpiöpë ’kpaan ’pö‑ yö ee; ‑Zlan dosɛn ꞊nɛ ’ö ö ‑bha pë dɔ.) ⁴’Yö ‑dhɛ bhë ‑a ’gü, ’ö ‑wo ’ö yaa ‑mɔ ‑bɔ ‑a ’piö ‑sü ‑bha ’ö‑ ma. ‑Wo ’ö bhë, ‑wo ’ö mɛ ’ö ꞊tun ö ’sɛbun ’gü, ’waa ’we ‑a ‑bha ‑a ‑gɔ kö ‑ya pö yö ‑mü. ⁵A ‑dho n ‑de sü ꞊va gɔɔn‑ ’ö bhë ‑a ‑wun ’gü, ’kɛɛ n ’ka ’dho n ‑de sü ꞊va n ‑de ‑wun ’gü, ‑a ’ke yaa kë pë ’ö ’a ’tëëtë ‑a ’gü ‑a ‑wun ’gü. ⁶’Ö ꞊ya kë ꞊nɛ ’ma‑ pö ’a n ‑de ‑sü ꞊va, kö ’blɔɔnmɛ ’yaa ‑mü n ’ka, bhii pë ’a dho ‑a pö bhë ’wun gia‑ ‑mü. ’Kɛɛ ’maa‑ ’piö kö ’a n ‑de ’sü ꞊va. Bhii ’maa‑ ’piö kö mɛ ꞊ya n ‑ga n pö ‑pë ‑bha, ’a kë ‑a ‑zo ’piö ꞊va ’a zië ‑kɔ ’a‑ pë ‑nu kë ‑na ’ka ’iin ’a ‑Zlan ‑wo pö ‑na ‑a ’ka bhë ‑a ‑ta.

⁷‑A ‑kë ’dhö ‑sü ’ka, ‑yö kë ’dhö kö ꞊kun ’a dho pa ‑de ‑sü ꞊va ’ka ’wun ’gblüünzë ‑nu ’wo‑ yö ‑dhɛgbɛadhɛ ’gü n ‑dhë bhë ‑a ‑wun ’gü. ’Ö‑ ‑wun ’gü, ’yua ’dhiözë do ‑yö nu n ‑ta ꞊nɛ pë ’wo‑ pö Satan ‑bha ‑naɔdɔmɛ ‑mü ’kpa ‑a ’dhö. ꞊Ya kë ’ö nu n ‑ta kö ꞊kun ’a dho pa ‑de ‑sü ꞊va ’ka. ⁸A ‑bhɛa Dëmɛ ‑dhë ‑gwaa ‑yaaga ‑zë ’yua bhë ‑a ‑wun ’gü, ’ö ’a‑ ‑dhɛ ‑a ‑gɔ kö ‑ya bho n ‑ma. ⁹’Ö‑ ‑daa ‑kë n ‑gɔ ’ö‑ pö: «Ma ’glusë ’a‑ ‑kë ü ‑dhë ’ö bhë tɔɔ pë ’ö ü ‑bha ‑wun ’dhoë‑ ‑bha. Bhii a ma ’piigbeedhɛ ‑kë ü ꞊kwaa’ ’töng ’ö ꞊faan’ ’yaa‑ ’ka ü ‑gɔ bhë ‑a ’ka.» ꞊Dhɛ ’ö ’dhö kö a‑ ’piö n ꞊zuöga ’plɛ ’ka kö ’a n ‑de ’sü ꞊va n ‑ma ‑kë ’tëëtë ‑wun ’gü; ‑yö kë ’dhö kö Klito ‑bha ’piigbeedhɛ ‑yö kpa n ‑ta. ¹⁰Pë ’ö ‑kë ’ö n ꞊zuö’ ’glu ‑yö ‑dhi n ‑ma ‑kë ’tëëtë ‑sü, ’si ‑nu ’wo‑ bho ‑na n ‑gɔ ‑nu, ꞊zuö’ ‑kaan ’kuë‑ ‑wun ‑nu, ’klobhɔdhe ‑nu, ꞊zuö’ ‑bha ’zëzëdhe ’kun ‑sü ‑nu ’ö ’wo nu ‑na n ‑ta Klito ‑wun ’gü bhë ’ö bhë; bhii ’ö tɔɔ ’töng ’ö ’ma kaa ’tëëtë, ’töng bhë ’ö ’a ꞊kaa’ ꞊faanzë (bhii kö n ‑klu ‑sü ‑mü ‑a ‑bha.)

’Suö ‑bha ‑da ’ö‑ wo Pɔlö ’gü Kolɛntö ‑mɛ ‑nu ‑wun ’gü

¹¹Ka‑ ‑yö bhë ꞊aa. Ka ꞊nɛ ’ka‑ ‑kë ’ö ’a ’wun ꞊blɛɛ’ ‑na ꞊nɛ ’blɔɔnmɛ ’wun ꞊blɛɛ bhë. Ka ꞊nɛ ’ka dho n ‑ta za dɔ ‑be. Bhii ’kö ‑kë ꞊nɛ ’maa pë gbɛ ’ka, yaa kë ꞊nɛ pë ’wo‑ pö ’maa pë gbɛ ’ka ka ‑bha bɔmɛ ‑nu ‑wungbeezë ‑nu ’wo bhë ‑an ’sɔɔ yö kun. ¹²N këyuö ‑nu ’wo‑ ‑zɔn ꞊nɛ Klito ‑bha bɔmɛ ‑mü n ’ka bhë ‑a ’plɛ ‑yö ‑kë ka ziën ma ꞊zuösaadhɛ ’ka. ‑Yö ‑kë ’dhö ꞊duakëpë ‑nu ’gblüünzë ‑nu waa‑ ‑dhidhaapë ‑nu ‑an kë ‑sü ’ka. ¹³’Wun ꞊nɛ ‑a ‑mlë ’ö ka ’kun ‑kɔ ‑yö ‑kë ‑a ’gü ya, ’ö yaa kë ꞊nɛ Yesu ‑wun ‑dhɛ ’wun gia‑ ‑mɛ ‑nu ‑dho ’kuë‑ ‑sü ‑nu ’wo to ‑an ’dhö ‑a ’ke yaa kë, kë ’ö n ’ka‑ wo ka ‑kɔ ‑ta bhë ‑a ’ka ɛɛ? ꞊Ɛɛ, kö ka ‑bha ’gën ꞊yö ‑së; ‑ka ziö n ‑ta!

¹⁴‑Ka n ‑ga, n ‑mɔa ’gü ‑sü ‑mü kö ’aan‑ nu ka ꞊plöö ‑gwaa kë ‑yaaga ‑naa wo; ’kɛɛ n ’ka ’dho kë ka ‑kɔ ‑ta; ka gia‑ ‑de ꞊nɛ ’ö n ‑ma ‑wun ’dho ka ‑bha; n ‑ma ‑wun ’yaa ’wëü‑ ‑bha. Bhii pë ꞊ya kë ’ö ‑kë yö kun ’ö tɔɔ ’në ‑nu ꞊nɛ ’wo ’wëü‑ ꞊mɛɛ kö ‑waan dɔa wo ‑mɛ ‑nu ‑gban ‑gɔ. ’Kɛɛ ‑an ‑mɛ ‑nu ‑mü ꞊zian’. ¹⁵꞊Ya kë ma ‑zë n ‑ma ’ka, pë ’ö n ‑gɔ ‑a ’plɛ ‑bha ‑dho ka ‑wun ’gü ‑sü, ’ö ma gia‑ ’a kpa ‑a ‑bha, ‑yö n ꞊zuö’ ’glu ‑dhi; ’ö ꞊ya kë ꞊nɛ ’ma ka ‑dhɔ kë ꞊nɛ ‑kɔ bhë ‑a ’dhö, n ‑dhɔ ’ö ka ’gü bhë yaa ’dho kë ꞊va ꞊a? ¹⁶꞊Ya kë ’dhö, ka gia‑ ka ‑dho ‑a pö ’maa ka ‑kɔ ‑ta kö n ’gbiin‑ ‑yaan ’dho ka kë. ’Kɛɛ mɛ ’bhaa ‑yö ‑dho ziö ’wun bhë ‑a ’piö ka ‑dhë ꞊woë’ ꞊nɛ ‑gleng ’a‑ ‑kë kö ’aan‑ ka ’kun ꞊sua ‑wun ‑nu ’a ’dhoë‑ kë ka ‑gɔ bhë ‑a ‑wun ’gü. ¹⁷Mɛ ‑nu ’ö ’a ‑an bɔ ka ‑dhë ’ma bhë, ‑a mɛ ’bhaa ‑nu ‑wo ꞊naɔ ‑sü ka ’gü a? ¹⁸A ‑bhɛa Titö ‑dhë kö ‑yö nu ka ꞊plöö; ’ö dhegluzë do ’ö ’ka‑ dɔ, ’a‑ yö ‑a ’piö. Ka ‑dho ‑mɔa ‑bha ’ö ’ka‑ pö Titö ‑yö ꞊naɔ ‑sü ka ’gü a? Yö ’dhö, ma ’dhö, yi ’wun kë ‑kɔ waa‑ yi ’ta ’sü ‑kɔ waa kë do ’pö bhë ꞊ee?

¹⁹‑Yö ‑dho kë ka ꞊zuö’ ’piö ꞊nɛ, ‑a ‑dhɛ ꞊ya ꞊glɔɔ, ’ö ’yi‑ ’piö kö ’yi yi ‑de bho ’wun ’gü ka wö ’dhiö. ’Kɛɛ ‑abi’! Yi ’wun ‑blɛɛ ꞊nɛ ‑kɔ ’ö‑ ’ka Klito ‑dhë ‑së ‑Zlan wö ’dhiö bhë ‑a ’dhö, ’ö ’wun ‑nu ’wo ’dhö bhë ’yi ‑an ꞊blɛɛ ka ‑dhë ’dhö, dhegluzë ‑nu, kö ’kaan‑ ꞊kpɛa’‑ ‑zo ‑yö ‑Zlan ‑bha ‑sü ’gü. ²⁰Pë ’a ‑ya ‑a ꞊wuën’ ’ö tɔɔ kö ꞊kun ’ö nu ’a ’dhoë‑ wo ka ꞊plöö ’ma ’ö ’a ka yö ꞊nɛ ‑kɔ ’ö ’maa‑ ’piö kö ’a ka yöë bhë ‑a ’dhö, ’ö ka ‑de ’pö ’ka n ‑ga gbɛ. Pë ’ö‑ ’suö ‑yö n ‑kë ’zü ’ö tɔɔ kö ꞊kun ’a ‑dɔn bho ‑sü waa‑ ꞊druɛi kë ‑sü ‑nu oo, ‑naazuëdhe kë ‑sü waa‑ ’wun kë ‑sü ’wo ꞊zië’ wo ’bha ‑ta ‑nu oo, ’si bho ‑sü ‑nu waa‑ ‑zuö dɔ ‑sü ’ö ’wun yaa ‑kë ’kuë ‑sü ’dho ‑a ’gü oo, ‑de ‑sü ꞊va ‑sü waa‑ pë ’plɛ ‑kaan ’kuë ‑sü ‑an yö ’ma. ²¹Pë ’ö‑ ’suö ‑yö n ‑kë ’ö tɔɔ a‑ ’piö kö n ‑ma ‑nu ka ꞊plöö ‑sü mɛ ’ö ’dhoë‑ kë ꞊nɛ, kö ꞊kun ’ö n ‑ma ‑Zlan ‑yö n ‑gɔ dho sia‑ ’ö lë‑ ‑yö ’kpɔ n ‑ta ka wö ’dhiö, ’ö ’a ’gbo bɔ mɛdhɛvadhɛ ’wo ‑da pë yaa ‑nu ’gü ’ö ’waa‑ ’piö kö ’wo ’go wo ‑bha ‑dhuupë ‑wun ‑nu, ‑an ‑bha ꞊sɔɔn kë ‑sü ‑nu waa‑ ‑nëng pë ’plɛ ‑bha ‑sü ‑nu ’wo ‑an ’gü ’ö ’waa wo ꞊kwaa’‑ ‑an ‑wun ‑zü bhë ‑an ‑wun ’gü.

‑Zobüöwo ‑kaanta waa‑ ꞊wekadhe

¹‑A ‑gwaa kë ‑yaaga ‑naa ’ö ꞊nɛ kö ’a nu ka ꞊plöö. ’Wun ‑dɔ mɛ ‑bha ‑sü ’ö dho kë, ‑a ꞊goo‑ ‑nu ‑dho kë ꞊plɛ ’iin ‑yaaga ꞊nɛ ‑kɔ ’ö pë ’ö ꞊bɛɛn’ ‑sü ’ka ‑Zlan ‑bha ’sëëdhɛ ’gü ’ö‑ pöë bhë ‑a ’dhö. ²‑Zo ‑büö ‑wo do ‑yö n ‑gɔ kö ’aan‑ pö mɛ ‑nu ’wo ꞊sɔɔn yaa ‑kë ’dhiö ’saadhö waa‑ mɛ ‑nu ’wo to ‑an ‑dhë. Ma ‑nu ka ꞊plöö ‑sü ꞊plɛ ‑naa ’ö ‑kë bhë, a‑ ’bhaa ‑blɛɛ. ’Kɛɛ a‑ ’piö kö ’a‑ ꞊blɛɛ’ ’zü, ꞊dhɛ kë ꞊nɛ ’maa ka ziën bhë; ’ö tɔɔ n ‑ma nu ‑sü ’ö ’dhoë‑ kë zlöö bhë, mɛ gbɛ ’ka dho dha n ‑gɔ. ³꞊Dhɛ ’ö ‑kë ꞊nɛ ka‑ ’piö kö ’ka Klito ‑bha ’wun ꞊blɛɛ’‑ ‑bɔ n ‑ta ‑sü ’ka bhë ’ka‑ yö bhë, kö ka ‑dho ‑a yö. Ka wö ’dhiö, Klito ’yaa mɛ ’ö ꞊faan’ ’yaa‑ ’gü ‑a ’ka. ‑Yö ö ‑bha ’piigbeedhɛ ‑zɔn ka ziën. ⁴Pë ’ö ‑kë ’ö tɔɔ ꞊dhɛ ’wo‑ dɔ ‑na ‑gaatalü ‑bha ꞊faan’ yaa kë ‑a ‑gɔ, ’kɛɛ ‑yö ‑kë ‑a ’gü ‑sü kë ‑na ‑Zlan ‑bha ’piigbeedhɛ ꞊kwaa’. Yië‑ Klito ‑nu yi ‑bha ‑kë do ‑sü ’gü, ꞊faan’ ’yaa yi ‑gɔ ’kɛɛ yi ‑nu yi ‑bha ‑kë ‑a ’gü ‑sü ‑yö ‑dho kë ka ‑wun ’gü, ‑Zlan ‑bha ’piigbeedhɛ ꞊kwaa’.

⁵‑Ka ka ‑de ‑bɔ ’wun ‑nu ’gü ‑kɔ ‑ga, ’ka ‑dhɛ ‑ga ‑a ’gü ‑së ’ka; ’ö ꞊ya kë ꞊nɛ ‑zo ‑yö ‑Zlan ‑bha ‑sü ‑yö ka ‑gɔ, kö ’kaan‑ ‑a ꞊tɛi’ dɔ ꞊nɛ Yesu Klito ‑yö ka ’gü. ’Yö ꞊dhɛ ’ka ka ‑de ’piö ‑ga bhë, ka mü ‑kɔklë ꞊ɛ? ‑A ’ke ka ‑bha ‑zo ‑yö ‑Zlan ‑bha ‑sü bhë, ’ka‑ ‑yö sia‑ ‑kɔ dɔ kö yö. ⁶’Kɛɛ ‑yö n ’gü ꞊nɛ ’kaa yi ’sü ꞊nɛ mɛ ‑nu ’ö ‑an ‑bha ‑zo yö ‑sü bhë ’waa‑ ‑gɛn ‑gban ‑kɔ dɔ ‑an ’dhö. ⁷Yi ‑bhɛa ‑Zlan ‑dhë ‑yö kë ’dhö kö ‑kun ’ka dho ’wun yaa gbɛ kë. ’Yië‑ ’piö kö pë ’yi‑ kë ‑mɛ ’ka, ’yi yi ‑de ꞊zuan’; ’kɛɛ pë ’yi‑ ’piö ’ö tɔɔ ’ka ’wun ‑së kë ‑sü ’kun ’gbee‑ ’kö ‑kë ꞊nɛ yi ‑zë yi ‑kɔ ’yaa ‑mɔa ‑bha kö yö ‑mü. ⁸’Ö bhii ꞊ya kë ꞊nɛ ’ka ’ta ’sü ‑Zlan ‑bha ’wun giagia ’gü, yi ’ka dho pë ’kpaan kë; pë ’yi dho ‑a kë ꞊zian’ ’ö tɔɔ ‑a mɛ ’yö‑ ’piö. ⁹꞊Ya kë ꞊nɛ yi ‑zë ꞊faan’ ‑yö ’go ‑na yi ’gü, kö ka ‑zë ka ’gü ‑yö kë ‑na ’gbee‑, yi ’glu ‑yö ‑dhi. ‑A ‑kë ’dhö ‑sü ’ka pë ’yi‑ ‑dhɛ yi ‑bha ꞊bhɛa’ ‑sü ’gü ‑Zlan ‑gɔ, ’ö tɔɔ ka ‑bha ’wun ’plɛ ‑yö kë ‑Zlan ’gludhi ‑wun ’ka. ¹⁰Pë ’ö ‑kë ’ö ’a ‑ya ka ’ka ꞊gbiin ’ö ’sëëdhɛ ꞊suu’‑ ꞊nɛ ’a‑ bɔ bhë ‑a ‑gɛn ꞊ga bhë, ‑yö ‑kë ’dhö kö ’töng ’a dho kaa ka ꞊plöö bhë, kö ꞊kun ’a dho pë ’ö Dëmɛ ‑ya pö ’a‑ kë bhë, ’a dho ka kun ‑a ’ka ’gbee‑. Bhii ‑ya ‑kë ’dhö kö ’ka ꞊kpɛa’ ‑zo ‑yö ‑a ‑bha ‑sü ’gü; yaa‑ kë kö ‑yaan ka ’gü ꞊siö’‑.

¹¹Dhegluzë ‑nu, ‑wo ’ö n ’dhiö dho to ‑a ‑ta ’ö tɔɔ ’ka kë ꞊zuögludhi ’gü; ‑ka ’dho ka ’dhiö ‑Zlan ‑zo ’kun ‑wun kë ‑sü ’ka, ‑ka ka ’ko ‑nu ꞊faan’ ’më. Ka ꞊zuö’ ‑yö kë do, ’ka ‑tosiadhe kë ꞊zuöyagluu ’ka. ‑Ya kë ’dhö ‑Zlan ’ö ‑dhɔzë ’go mü ’ö ꞊zuöyagluu nu mɛ ‑nu ‑dhë bhë, ‑yö ‑dho kë ka ’piö. ¹²‑Ka ‑mɛɛ ‑nu kë ka ’ko ‑nu ’ka ‑së ’ka ‑dhɔ ’gü dhegluzë ‑dhɛ ‑kwaa. ‑Zlan ‑bha mɛ ‑nu ’saadhö ’wo ’nö ꞊wa ’we kaa ꞊duö. ¹³’Glusë ’ö kwa Dëmɛ Yesu Klito ‑ya ‑kë ka ’ka bhë, waa‑ ‑kë do ‑sü ’ö ‑Zuu ’slööslö ‑ya ‑nu ka ‑dhë bhë, ‑dhɔ ’ö ‑Zlan ‑ya ‑kë ka ’ka bhë, ‑wo ’to ka ’saadhö ka ’piö.