1 Timote

’Sëëdhɛ ‑blɛɛzë

’ö Pɔlö ‑ya bɔ

Timote

‑dhë bhë ’ö ꞊nɛ

꞊Wekadhe

¹Ma Pɔlö ’a Yesu Klito ‑bha bɔmɛ ’ka, kwa Dhamɛ ‑Zlan waa‑ Yesu Klito ’ö ’kwa ‑yaa ‑gɔ bhë ‑an ‑zo ’kun ‑wun ’gü bhë, ²ma bhë ꞊nɛ ’ö ’sëëdhɛ ꞊nɛ ’a‑ bɔ bhi ’ü ‑kë ꞊nɛ n gbö ’dhö (‑Zlan ‑wo ’a‑ ꞊blɛɛ ü ‑dhë ’üën‑ ꞊tun ‑a ‑wun ‑dhɛ ‑na ’wun gia‑ ‑a ‑wun ’gü) bhë ü ‑dhë, kö kwa Dë ‑Zlan waa‑ kwa Dëmɛ Yesu Klito ‑wo ’glusë kë ü ’ka, ‑wo ü ’yënng yö, ‑wo ü gbaa ꞊zuöyagluu ’ka.

‑Zo ‑kë ‑de ’piö ‑sü mɛ ꞊daan’ ‑wo ꞊suazë ‑gɔ ‑sü

³‑Bhö ’to Efɛzö ꞊nɛ ‑kɔ ’a‑ pöë ü ‑dhë kö a ’dho ‑na Maseduanë bhë ‑a ’dhö. Bhii mɛ ‑daan ꞊sua ‑wun ’ka ‑mɛ ‑nu ‑wo mü; ‑bhö ’wun ꞊blɛɛ’‑ ‑an ’ka kö ‑waan ꞊gbaannu! ⁴‑Bhö ‑a pö ‑an ‑dhë ‑wo wo ꞊kwaa’ ꞊kwɛzü ‑wun ‑nu waa‑ mɛ ’bhɛma ‑nu ’tɔ ‑bhüö ‑nu ‑yö ’ko ’dhiö ‑sü ‑nu ’ö ꞊ya kë ’wo nu zaɔdhe ’ka bhë ‑an ꞊blɛɛ’ ‑sü ‑zü. ‑Zlan ‑bha mɛ dha ‑kɔ ’ö sü ‑zo ‑yö ‑a ‑bha ‑sü ‑bha bhë, ’yaa‑ ’gbloo ‑ta. ⁵‑A pö ’a‑ wo ’dhö bhë ’ö tɔɔ a‑ ’piö kö ‑dhɔ ’ö ka ’gü bhë, ka‑ kë ka ꞊zuöga ’puu ’ka, kö ’ka pë ‑nu kë, ka ꞊zuö’ ‑yö kë ꞊yaannu ꞊süë’ ’iin kö ka ‑bha ‑zo ‑yö ‑Zlan ‑bha ‑sü bhë, ‑yö kë ’kpëdhö. ⁶Mɛ ’bhaa ‑nu ꞊wa ’go zian bhë ‑a ‑ta ꞊wa ’to zaɔbhodhe ’flëëflëë ‑nu ’piö ꞊wa wo ‑de ‑püö. ⁷‑Wa ’piö ’wo kë ‑Zlan ‑bha tɔnggɔmɛ ’ka ’kɛɛ kö wo ’wo bhë, pë ‑nu ’wo ’go ‑na ‑an dhiö waa‑ pë ‑nu ’wo mɛ ‑nu ꞊daan’ ‑na ‑a ’ka ‑zogbandhe ’ka bhë, ‑a ’zü ’ö‑ ꞊löö ’ö ꞊ya kë mɛ ‑nu ‑wa ma bhë, wo ‑de gia‑ ’waa‑ dɔ.

⁸Tɔng ’ö ’ka‑ ‑ga ‑na bhë, ꞊waa‑ ’kun ö ’kun ‑kɔ ’ka, ‑yö ‑kë ‑së; ’ö ’kwa‑ dɔa ’dhö. ⁹’Kɛɛ kë‑ wo ’dhö bhë, ‑yö kë ka ’yaan ꞊nɛ tɔng yaa ‑da mɛ kpengdhö ‑nu ‑wun ’gü; ‑yö ‑da ꞊kian’ yaa ‑mɛ ‑nu, ꞊gɔü’ ’gbee‑ ‑mɛ ‑nu, ’gluyaamɛ ‑nu, ꞊sɔɔnyaakëmɛ ‑nu, mɛ ‑nu ’ö ‑yö ‑Zlan ’piö oo, ‑yö pë ’slööslö ‑nu ’piö oo, ’ö‑ gbɛ ꞊bhlë ’yaa ‑an ’gü ‑nu, mɛzëmɛ ‑nu, mɛ ‑nu ’wo wo ’kpɔmɛ ‑nu zë ‑na ‑nu, ¹⁰꞊sɔɔnkëmɛ ‑nu, gɔɔn‑ ‑nu ’sloo ’iin dhoo ‑nu ’sloo ‑bha ‑wɔ ’ko ’piö ‑mɛ ‑nu, ꞊nua ’dhɔɔdɔmɛ ‑nu, ꞊suakëmɛ ‑nu, ‑wobhömɛ ‑nu ’ö ’waa ’to wo ‑wo ‑ta waa‑ mɛ ‑nu ’saadhö ’ö mɛ ꞊daan’ ‑wo giagia ’ö bhë ’ö ’waa‑ ‑zian ‑ta ’wo bhë ’saadhö ‑an ‑wun ’gü. ¹¹Mɛ ꞊daan’ ‑wo bhë, ‑yö ’wuntaɔsë ’ö ‑gban ‑Zlan ’tɔ bhɔ ‑sü ‑zë ’ö ’dhuë‑ ’dhoë‑ ‑ta bhë ‑a ’gü; ’ö‑ ‑wun ‑yö tën n ‑ma kö ’aan‑ mɛ ‑nu ꞊daan’ ‑a ’ka.

‑Zlan zuö ‑pö ‑a ‑bha ’glusë ‑wun ’gü ‑sü

¹²Kwa Dëmɛ Yesu Klito ’ö n pa ꞊faan’ ’ka ‑Zlan ‑bha yuö ’gü bhë, a‑ zuö ‑pö. A‑ zuö ‑pö bhii ‑yö n ‑yö ‑zo ‑tën ‑a ‑dhë ‑mɛ ’ka, ’ö n sü kö ’aan‑ yuö kë ‑a ‑dhë, ¹³’kö ‑kë ꞊nɛ kë‑ wo ’dhiö ‑be bhë a‑ ‑wun yaa ‑blɛɛ, ’a‑ ’klo bhɔ, ’ö ’a ’si ‑nu bho ‑a ‑gɔ ’dhee. ’Kɛɛ ‑yö n ’yënng ‑yö ’ö tɔɔ kë‑ wo ’dhiö bhë, pë ‑nu ’a ‑kë ‑an kë ꞊dhia bhë, n ’ka kë ‑a ‑bho ’kou dɔ ꞊dhia; ‑zo ‑yö ‑a ‑bha ‑sü ’ö yaa kë n ‑gɔ bhë, yö ‑mü. ¹⁴Kwa Dëmɛ ‑yö ö ‑bha gbaɔ ‑kë n ‑dhë ꞊va ‑ziögɔüsüzë ’ka, bhii ‑ya ‑kë ’ö ‑zo yö ‑sü waa‑ ‑a ‑dhɔ ’wo ‑kë n ‑gɔ yi ‑nu yi ‑bha ‑kë do ‑sü ’gü. ¹⁵’Wun ’a ’dhoë‑ ꞊blɛɛ’‑ ꞊nɛ ’wun gia‑ ‑mü. ‑Ka dɔ ’dhɛ! ’O tɔɔ Yesu Klito ‑yö ‑nu ’kpongtaa kö ‑yaan ꞊sɔɔnyaamɛ ‑nu dha; ’ö waa‑ pö ꞊sɔɔnyaamɛ kö ‑wa ‑pö ma; ma ’a tɔɔ ‑a mɛ yaa ‑an ziën. ¹⁶’Kɛɛ ‑Zlan ‑yö n ’yënng ‑yö; ‑ya ‑kë ’ö Yesu Klito ‑yö n sü kö ’aan‑ kë ’wun ꞊zuan’ do ’ka, ‑a ‑zɔn ‑sü ’ka ꞊nɛ ’kö ‑kë ꞊nɛ ꞊sɔɔnyaamɛ ‑nu ‑gɔmɛ ‑mü n ’ka ’dhee, ‑a ꞊zuö’ ‑yö ‑saa n ’piö, ‑yö kë ’dhö kö ‑dhɛkpaɔ ꞊dhia’ ‑bha, mɛ ‑nu ’wo dho bɔ ’wun bhë ‑a ‑ta ‑waan ‑a ‑wun ‑dhɛ ’wun gia‑ bhë, kö ꞊toëpö ‑këdhösü ‑yaan kë ‑an ‑bha ’ka. ¹⁷Mɛa‑, ꞊toëpö ‑gludë ’ö ’yaa ga, ‑Zlan do ’ö ’waa‑ yö bhë, ꞊bhlëyadhɛ waa‑ ’tɔbhɔdhe ‑wo kë ‑a ‑bha ’ka ’dhö ‑kplawo! Amɛn.

¹⁸Timote, ma ’në, ‑dhio ’a‑ dɔ ‑na ü ‑dhë ꞊nɛ, a‑ ‑dɔ ’dhö ’wun ’ö ‑gban ü ‑gɔ ‑wun ‑bha ’ö ‑Zlan ‑wodhiölomɛ ‑nu ‑wa ꞊blɛɛ ü ‑dhë ’dhiö bhë ‑a ’gbloo ’piö; ‑wo ‑nu ’wo bhë, ‑bhö ‑an kuënnu ü ꞊zuö’ ’piö ꞊zian’ kö ’ko ’ö kwa ‑gɔ ‑zo yö ‑sü ’gbloo ’piö bhë ’üën‑ ü ‑bha ‑së zë; ¹⁹‑zo yö ‑sü ’ö ü ‑gɔ bhë ‑a ’kun ’gbee‑; ‑wo ’ö ’we ‑na ü ’gü bhë, ‑bhö ’wun ma ‑a ‑ta ‑kplawo! Kö ꞊kun ’ö ü zuö ’dho za dɔ ü ‑bha. ‑Dhɛ ‑ga ’dhɛ! Mɛ ’bhaa ‑nu ‑wo ‑dhö ’ö waa ’we ‑a ‑bha kö ’wo ’wun ma ‑wo ’ö ’we ‑na ‑an ꞊zuö’ ’piö bhë ‑a ‑ta, ’ö ꞊wa dhoë ’dhö ꞊ya ‑an ‑bha ‑zo ‑yö ‑Zlan ‑bha ‑sü ‑kɔ yö zuë‑. ²⁰Imene waa‑ Alezandrë ‑wo ‑an ’piö, ’yö ’a ‑an ’kluën bho Satan ‑bha; bhii ꞊wa ’go mü, waa ’dho ’wun yaa ꞊blɛɛ’‑ ‑Zlan ‑gɔ gbɔ.

Mɛ ꞊daan’ ‑wo ’ö ‑gban ꞊bhɛa’ ‑sü ‑bha

¹Pë ‑blɛɛzë ’a dho ka ꞊kpaɔ ‑a ‑wun ’ka ’ö tɔɔ ’ka ‑bhɛa ‑Zlan ‑dhë; ‑ka pë ‑dhɛ ‑a ‑gɔ; ‑kaa zuö pö mɛ ‑nu ’saadhö ‑wun ’gü! ²‑Ka ꞊bhɛa’‑ ’sɛdë ‑nu waa‑ mɛgɔtamɛ ‑nu ’kpɛkpɛ ‑wun ’gü ‑yö kë ’dhö kö ‑ya diindhö ‑sü waa‑ ꞊zuöyagluu ‑wo kë ‑dhö kwa ‑bha ‑klu ‑Zlan ‑bha ‑sü waa‑ ’ta ’sü ‑kɔ ’ö ꞊wa ’ta ‑sü ‑a ’ka ’ö ’ko ꞊bhlëyadhe ‑yö ‑kë bhë ‑an ‑wun ’ka; ³’wun ‑kë ’dhö ‑sü ꞊yö ‑së; ’ö‑ ’yi ‑yö ‑kan ‑Zlan ’ö kwa Dhamɛ ’ka bhë ‑a ’dhi. ⁴Yö ꞊nɛ ’ö‑ ’piö kö mɛ ’plɛ ‑wo dha kö ’wun gia‑ ’ö ‑dhö bhë ‑wa dɔ bhë. ⁵Bhii kë‑ wo bhë, ‑Zlan ‑yö dosɛn, ’ö mɛ ’ö ‑yö mɛ ‑nu waa‑ ‑Zlan ‑an ziën ‑mɛ ’ka ’ö ’dhö do Yesu Klito ’ö mɛ ’bhee‑ ’ka bhë ‑a ’ka. ⁶Yö ꞊nɛ ’ö ö ‑de nu mɛ ’plɛ ‑gɔ ‑ta ‑bɔ ‑pë ’ka. ‑Kɔ bhë ꞊nɛ ’ö yi ’ö ‑Zlan ‑ya ‑ya bhë, ꞊dhɛ ’ö ꞊ya ‑lo, ’ö pë ’ö‑ ‑zɔn ꞊nɛ ‑Zlan ‑ya ’piö kö ’ö mɛ ’plɛ dha bhë, ’ö nu ‑a ’ka. ⁷Pë ’ö ‑kë ’ö ‑Zlan ‑yö n sü ’ö n ‑ya bɔmɛ ’ka kö ’wun ’ö ‑gban ‑zo ‑yö ‑Zlan ‑bha ‑sü waa‑ ’wun gia‑ ’ö ‑gban Yesu Klito ‑bha ‑an ‑bha bhë, kö mɛ ‑nu ’waa Zuifö ’ka, ’aan‑ ‑an ꞊daan’‑ ‑a ’ka ’ö bhë. ’Wun ’a‑ ꞊blɛɛ’ ‑na bhë ’wun gia‑ ‑mü.

⁸꞊Dhɛ ‑kë ’dhö, a‑ ’piö kö gɔɔn‑ ‑nu ’wo dho ꞊bhɛa’‑, ‑dhɛ ’oo ‑dhɛ ’wo‑ ‑bha, ‑wo ꞊bhɛa’‑ ꞊zuö’ ’puu ’ka. Kö ꞊kun ’wo ‑naa ‑wun ’iin ’wo ’dhinaa ‑kë ’kuë ‑sü ‑wun to wo ꞊zuö’ ’piö ’ö ’wo ꞊bhɛa ‑a ’ka!

⁹A‑ ’piö kö dhoo ‑nu ‑de ’pö, ‑wo ’dhoë‑ woë‑ sɔ ‑nu kë wo ‑bha, ‑yö kë ‑a kë ‑kɔ gia‑ ’ka; kö ꞊kun ’ö ‑kë ‑dɔ ’siö ’ka. Kö ꞊kun ‑kë ’ö ’wo wo ‑bha wun ‑nu ‑pë ‑kë ’ö dɔ ‑an ‑gɔ ‑bha ꞊nɛ ’yan ‑to ‑a ’piö ‑pë ’ka ’iin ’wo ’sënng ꞊baa’ ‑pë ‑nu waa‑ ‑zlɔɔga ‑nu ‑kë wo ‑bha ’iin ’ö ’wo sɔ ꞊sɔnng’ ’gbeezë ‑nu ‑kë wo ‑bha. ¹⁰’Kɛɛ ‑an wɔ ‑kɔ ‑nu ‑sɛɛbɔ ‑nu ‑wo kë ꞊nɛ sɔ ‑nu ’dhö ‑an ‑bha ꞊nɛ ‑kɔ ’ö dhoo ‑nu ’wo‑ ’piö kö ‑an ‑wun ‑yaan ‑Zlan ‑zo ’kun, ’ö ‑an ‑ma kuën bhë ‑a ’dhö. ¹¹Dhebɔ ’ö ‑dhö, ‑yö ö ’to ’to ‑na mɛ ꞊daan’ ‑wo ‑bha, ‑ya diindhö ‑sü ‑yö kë ‑a ‑gɔ, ‑gɔ ‑yɔɔ sia‑ ‑sü ’ka! ¹²N ’ka ’we ‑a ‑bha kö dhebɔ ‑yö mɛ ꞊daan’‑ ’iin kö ‑yö ‑ya gɔɔn‑ ‑gɔ ’dhiö; ‑a ꞊dua’ ‑mü kö ‑dhɛ ‑yö ga ‑a ‑ta diindhö. ¹³Bhii Adan ꞊nɛ ’ö ‑Zlan ‑ya ‑da ‑blɛɛzë ’ka ‑yaan ꞊tun Ɛvö ‑da ‑na; ¹⁴yö do bhë ’zü, Adan kun ’ö‑ ’bɔn ‑yö ‑kan (‑blɛɛzë ’ka); dhebɔ ꞊nɛ ’ö‑ ’bɔn ‑yö ‑kan (‑blɛɛzë ’ka); ’ö tɔng ’ö ‑Zlan ‑ya ‑da bhë, ’ö yaa ’wun ma ‑a ‑ta. ¹⁵Kë‑ wo ’dhö bhë ‑yö ‑dho dha ’në ‑nu ’ö dhoë‑ ’kpɔ bhë ‑a ‑wun ’gü. Dhebɔ ‑nu ‑wo ‑dho dha ’dhö ‑oo, ’kɛɛ kö ꞊wa kë ꞊naazë ‑zo ‑yö ‑Zlan ‑bha ‑sü ’gü, ‑dhɔ ’ö go ‑Zlan ’piö bhë ‑a kë ‑sü ’ka, ‑kë ’slööslö ‑sü waa‑ wo ‑bha ‑de ‑sü ’tee ‑sü ‑wun ’gü.

’Dhiö ‑sü Yesu ‑wun ‑dhɛ ’wun gia‑ ‑mɛ ‑nu ‑dho ’kuë‑ ‑sü ’ka ‑mɛ ‑nu

¹‑Wo ’ö ’wun gia‑ ’ka ’ö ꞊nɛ: ’Ö ꞊ya kë ꞊nɛ mɛ ‑yö ‑dhö ’ö‑ ’piö kö ’yö kë ’dhiö ‑sü Yesu ‑wun ‑dhɛ ’wun gia‑ ‑mɛ ‑nu kpö ’ka ‑mɛ ’ka kö yuö ‑së ꞊nɛ bhë. ²’Kɛɛ ‑yö kë ka ’yaan ꞊nɛ ’dhiö ‑sü mɛ ’ka ‑mɛ ’ö dho kë, ‑yö kë mɛ ’ö mɛ gbɛ ’ka ’dho ’wun yaa yö ‑a ‑bha ‑a ’ka; ‑yö kë dhe do ’kpaan ꞊gɔn ’ka; ‑yö kë mɛ ’ö ’yaa ‑de ‑nu yɔ ‑dhë ‑mɛ ’ka ‑a ’ka; ‑yö këdhɛ ‑ga ’wun ’gü ‑mɛ ’ö ö ‑de dɔ ‑a ’ka, ‑yö ‑kë ‑nia ‑kun ‑së ‑mɛ ’ka, ‑yö kë mɛ ’ö ‑mɔ mɛ ‑nu ꞊daan’ ‑sü ‑bha ‑a ’ka; ³kö ꞊kun ’ö ‑kë ‑de ‑nu yɔ ’yi ‑dhë ‑mɛ ’ka, ’iin mɛ ’ö‑ ‑kɔ dhɛi ’dhö ’siö‑, ’ö‑ ’dhi ‑wo ’dhö ’dhiö‑ ‑a ’ka, ’kɛɛ ‑yö kë mɛ ’ö ’lëëlë, ’ö ‑siökuëdhe ‑dhɔ ’yaa‑ kë ‑a ’ka. ‑Yö kë mɛ ’ö ’yaa pë ’plɛ bɔ yö do ’sloo ö ’ka ‑a ’ka. ⁴‑Yö kë mɛ ’ö ‑mɔ ö ‑de ‑gɔ ’kɔɔmɛ ‑nu ꞊kɔɔn ‑sü ‑bha ’ö‑ ‑bha ’në ‑nu ‑wa ꞊bhlë ‑ya ‑a ’ka. ⁵Bhii ’ö tɔɔ mɛ ’ö‑ ‑kɔ ’yaa ‑mɔ ö ‑de ‑gɔ ’kɔɔmɛ ‑nu ꞊kɔɔn ‑sü ‑bha, ‑yö ‑dho ö ‑zo kë Yesu ‑wun ‑dhɛ ’wun gia‑ ‑mɛ ‑nu kpö ’gü ‑mɛ ‑nu ’piö mü ꞊dhë ꞊ɛɛ? ⁶Kö ꞊kun ’ö ‑kë mɛ ’ö ö ꞊zuö’ ꞊dhië ‑Zlan ’piö ‑dëü ‑a ’ka; bhii ꞊ya kë ’dhö ‑yö ‑dho ö ‑de sü ꞊va ’ö za ’ö ꞊ya dü ’kun ’saadhö bhë ’ö‑ ‑bha ‑ya kun ’pö. ⁷‑Yö ‑dho kë mɛ ’ö mɛ ‑nu ’ö ’waa Yesu Klito ‑wun ‑dhɛ ’wun gia‑ ‑mɛ ’ka, ’wo ‑tɔmɔdhɛ ‑së ‑kë ‑a buëndhö ‑a ’ka, ‑yö kë ’dhö kö ꞊kun ’ö mɛ ‑nu dho ‑a ‑sanzë ’ö dho kë ‑a ‑bha ‑püö dü kwɛɛ ‑sü ‑gɛn ’ka.

‑Zo ‑kë ‑Zlan ‑bha ’kɔ ’piö ‑mɛ ‑nu

⁸‑Zo ‑kë ‑Zlan ‑bha ’kɔ ’piö ‑mɛ ‑de ’pö, ‑yö kë mɛ ’ö‑ ꞊bhlë ‑ya ‑sü ’dhö ‑së ‑a ’ka; ‑yö kë ’wun gia‑ ꞊blɛɛ’‑ ‑mɛ ’ka. Kö ꞊kun ’ö ’wo yɔ mü ‑sü ‑ziö ꞊gɔü’ ’iin ’ö ’wo ꞊naɔ ꞊mɛɛ ‑kɔ yaa ’ka. ⁹‑Wo ’to ‑klu ‑sü ’ka ’wun giagia ’ö ‑kë ‑bin ‑sü ’ka ’ö‑ ‑gɛn go ‑zo yö ‑sü ’gü bhë ‑a ‑bha, ꞊zuö’ ’puu ’ka. ¹⁰‑Wo ‑dho ‑an ’piö ‑ga ꞊kun ‑blɛɛzë ’ka; ’ö ꞊ya kë ꞊nɛ waa ’wun gbɛ yö ‑an ‑bha, kö ‑waan ꞊tun yuö zü dɔ ‑na ’sabla Yesu ‑wun ‑dhɛ ’wun gia‑ ‑mɛ ‑nu kpö ’gü. ¹¹‑An bɔɔ ‑nu ‑de ’pö, ‑wo kë dhoo ‑nu ’ö ‑an ꞊bhlë ‑ya ‑sü ’dho ‑së ‑an ’ka; kö ꞊kun ’ö ’wo ‑kë ꞊tɔɔkëmɛ ‑nu ’ka; ‑an ‑kɔ ‑yö ‑mɔ wo ‑de ‑wun ‑bha; ‑wo kë mɛ ‑nu ’wo to wo ‑wo ’gü pë ’saadhö ’gü ‑an ’ka. ¹²‑Zo ‑kë ‑Zlan ‑bha ’kɔ ’piö ‑mɛ mɛ ’ö ‑dhö ‑yö kë dhebɔ do ꞊gɔn ’ka; ‑yö kë mɛ ’ö ö ‑bha ’në ‑nu waa‑ ö ‑bha ’kɔɔmɛ ’wo to ’ö ‑an ꞊kɔɔn ‑a ’ka. ¹³Bhii ‑zo ‑kë ‑Zlan ‑bha ’kɔ ’piö ‑mɛ mɛ ’ö yuö kë ‑na ‑a kë ‑kɔ giagia ’ka bhë, ‑yö ‑kë ꞊bhlëzë, ’ö‑ ‑kɔ ‑yö ‑mɔa kö ‑yö ’wun ꞊blɛɛ’‑ ‑zogbandhe ’ka ‑zoyösü ’ö kwa ‑gɔ kwaa‑ Klito ‑nu kwa ‑bha ‑kë do ‑sü ’gü bhë ‑a ’ka.

Pë ꞊va ’ö ‑bin ‑sü ’ka

¹⁴A ‑dho nu ü ’piö ’ma ‑dëü, ’a‑ dɔa ’dhö n ꞊zuö’ ’gü; ’kɛɛ ’sëëdhɛ ꞊nɛ a‑ ‑bɔ ü ‑dhë ’dhö ’pö. ¹⁵꞊Ɛɛ, ’kɛɛ ꞊ya kë ꞊nɛ a ꞊glɔɔ ‑na ’nö, ’sëëdhɛ ’a‑ bɔ ‑na ꞊nɛ, ’ö ’ta ‑sü ‑kɔ ’ü dho ’ta süë ‑Zlan ‑gɔ ’kɔɔmɛ ‑nu ziën bhë, ‑a yö ‑a ’gü. ’Ma‑ pö ‑Zlan ‑gɔ kɔɔmɛ ‑nu kö a‑ ‑pö ‑Zlan ’ö ’bhee‑ ‑a ‑bha Yesu ‑wun ‑dhɛ ’wun gia‑ ‑mɛ ‑nu ‑dho ’kuë‑ ‑sü ’ö ’wun giagia ‑gban ’lü waa‑ ‑a kuënnupë ’ka. ¹⁶Mɛa‑, kwa ‑bha ‑Zlan ‑bha wɔ ‑kɔ bhë, pë ’bhle ’ö‑ ’gü ’ö ‑bin ‑sü ’ka bhë, ‑yö ’gblüünzë. ‑A ’bhaa gbɛ ’ö dho ziö ‑a ‑ta ’yaa ’dhö. ‑Yö ‑nu mɛbheedhe bun ’gü ’yö ‑Zuu ’slööslö ‑ya ‑bha ‑kë kpengdhö ‑sü ‑zɔn. ’Yö ‑Zlan ‑bha bɔmɛ ‑nu ’yan ‑yö dɔ ‑a ‑bha. ‑A ‑wun ‑yö ꞊blɛɛ’‑ ’sɛgɔ ’saadhö ’gü ’ö ’kpongtaamɛ ‑nu ‑wa ‑wun ‑dhɛ ’wun gia‑, ‑yö ‑da dhang‑ ’gü.

Mɛ ꞊daan’ ‑mɛ ‑nu ꞊suazë

¹‑Zuu ’slööslö ‑ya ‑pö ‑a ‑yö sia‑ ‑sü ’ka ꞊nɛ: Yi ‑kaanta ‑nu ’ka, mɛ ’bhaa ‑nu ‑wo ‑dho wo ‑ta yö ‑zo ‑yö ‑Zlan ‑bha ‑sü ‑bha, ‑waan ’to mɛ ‑püö ‑zuu ꞊suazë ‑nu waa‑ ‑zuu yaa ‑nu ‑bha mɛ ꞊daan’ ‑wo ‑nu ’piö. ²‑Wo ‑dho wo ꞊kwaa’ wo ‑de ‑zü ’ö mɛ ’yaan‑ ’kun ‑mɛ ‑nu ’iin ꞊suakëmɛ ‑nu ’ö ‑an ꞊zuö’ ’yaa ’dhö gbɔ ꞊nɛ pë ’wo‑ pö ‑piö ’wo‑ ‑da siö ’ö ma ‑banbandhö ’ö ’wo‑ ‑yɛ ‑an ꞊zuö’ ‑bha ’dhö bhë ’ö ’wo ‑an bho zian ‑ta ‑a ’dhö. ³Mɛ ‑nu ’wo bhë ‑an ‑bha mɛ ꞊daan’ ‑wo ’bhaa ‑nu tɔɔ: ’Yaa ‑së kö gɔɔn‑ waa‑ dhe ‑wo wo ’ko ’sü ’iin ‑bhöpë mɛ ’ö ꞊nɛ ‑yö ya ’iin ‑a mɛ ’ö ‑de ꞊zian’ bhë ’yaa ‑së. ’Kɛɛ kë‑ wo ’dhö bhë ‑bhöpë ꞊suu’‑ ‑nu ’wo bhë ‑Zlan ‑yö ‑an ‑da kö ꞊ya kë ꞊nɛ ‑a ‑wun ‑dhɛ ’wun gia‑ ‑mɛ ‑nu ’ö ’wo ’wun gia‑ dɔ bhë ꞊waa‑ ‑bhö ’kɛɛ kö ꞊wa ꞊bhɛa’‑ ‑ta, kö ‑waan ‑a zuö pö ‑a ‑wun ’gü. ⁴Bhii pë ’saadhö ’ö ‑Zlan ‑ya ‑da bhë, ꞊yö ‑së; ‑a gbɛ ’yaa ‑sanzë ‑pë ’ka. Kwa ꞊dua’ ‑mü ꞊zian’ kö ’kwa kwa ‑kɔ ’kpɔ ‑a ’plɛ ‑gɔ ‑Zlan zuö pö ‑sü ’ka. ⁵Bhii ‑Zlan ‑wo waa‑ kwa ‑bha ꞊bhɛawodhe ‑nu ’wo bhë ‑wo pë ’plɛ ‑kë ‑Zlan wö ’dhiö ‑së.

’Wun ’ö ‑gban mɛ ’ö Yesu Klito ‑bha yuökëmɛ giagia ‑bha

⁶꞊Ya kë ꞊nɛ ’bha dhegluzë ‑nu ꞊daan’‑ ꞊nɛ ‑kɔ bhë ‑a ’dhö, ü ‑dho kë Yesu Klito ‑bha yuökëmɛ giagia ’ka, ’ö ’ü dho ‑a ‑zɔn ꞊nɛ pë ’ö ü ‑bhöpë ’ka ‑Zlan ‑bha zian ‑ta ꞊zian’ ’ö tɔɔ ‑zo ‑yö ‑a ‑bha ‑wo ‑nu waa‑ mɛ ꞊daan’ ‑wo giagia ’ö ’wo ü ꞊daan ‑a ’ka bhë. ⁷’Kɛɛ ꞊kwɛzü ‑wun ‑nu gbɛgbɛ ’ö ’wo ‑an ‑gɛn bho ‑na bhë, ‑bhö bhɔ ‑an ‑dhë ꞊taa’ ’ö tɔɔ ’yaa ‑zo yö ‑sü ’gbloo ’piö. ‑Bhö ’to ꞊zian’ ‑klu ‑sü ’ka ‑Zlan ‑wo ‑bha. ⁸’Wun ’ö ‑gban ‑Zlan ‑wo ’kun ‑sü ‑bha bhë, ‑bhö ꞊yɔɔn ‑a ‑ta! Bun ‑kun ‑së ‑sü ’ö ‑gban ‑bla ’sü ‑sü, ‑lö ‑sü waa‑ ꞊gɔɔn ‑sü ‑nu ‑bha bhë, ꞊yö ‑së ’kɛɛ ‑a ꞊truën ’gian gbɛ ’yaa ’dhö. ‑A mɛ ’ö ‑kë ‑klu ‑Zlan ‑bha ‑sü ’ka bhë, ꞊yö ’gianzë pë ’plɛ ’gü, bhii yö ꞊nɛ ’ö ’kwa dho bɔ ‑a ‑ta kö ‑tosiadhe ’ö zö waa‑ ‑kë ‑a ’gü ‑sü ’ö ‑dhɛkpaɔ ꞊dhia’ ‑bha bhë ’kwaan‑ yö. ⁹꞊Yö ‑së kö ’ka ka ’to ’to ’wun bhë ‑a ‑bha, ’ka‑ ‑wun ’kun ’gbee‑ ka ꞊zuö’ ’gü. ¹⁰Pë ’ö ‑kë ’ö ’kwa yuö kë ‑na, ’ö ’kwa ‑glu gɔn ‑na bhë ’ö bhë; bhii ’ö tɔɔ ’kwa kwa ‑zo yö ‑Zlan ’ö ’bhee‑ ’ö ’kpɛkpɛ Dhamɛ ’ka, ’ö Yesu Klito ‑wun ‑dhɛ ’wun gia‑ ‑mɛ ‑nu Dhamɛ kpinngdhö ’ka bhë ‑a ‑bha. ¹¹’Wun ‑nu ’wo bhë, ‑bhö ‑an ꞊daan’‑ ‑a ’ka ü ‑wo ꞊yɔɔn ‑a ‑ta ‑sü ’ka!

¹²Kö ꞊kun ’ö mɛ gbɛ ‑yö ’yan ꞊ziö’ ‑kë ü ’ka, ü ‑bha ‑kë ‑dadhëü ’ka ‑sü ‑wun ’gü! ‑Bhö kë mɛ ’ö Yesu Klito ‑wun ‑dhɛ ’wun gia‑ ‑mɛ ‑nu dho ’wun ꞊zuan’ ‑sü ‑a ‑bha ’ka, ü ‑bha ’wun ꞊blɛɛ’‑ ‑kɔ ‑nu, ü ‑bha ’ta ’sü ‑kɔ ‑nu, ‑dhɔ ’ö ü ’gü bhë ’dhö, ü ‑bha ‑zo ‑yö ‑Zlan ‑bha ‑sü waa‑ ü ‑bha ‑kë ’slööslö ‑kɔ ‑nu ‑an ‑wun ’gü. ¹³Ü ‑zo kë ’sëëdhɛ pö ‑sü ‑së ’piö mɛ ‑nu ‑dhë, ’ü ‑Zlan ‑wo ꞊blɛɛ’‑ mɛ ‑nu ‑dhë; ’ü ‑an ꞊daan’‑ ‑yö ’dho ‑yö yöë n ‑ma nu ‑yi ‑bha. ¹⁴Gbaɔ ’ö ‑Zuu ’slööslö ’ö go ‑Zlan ’piö ’ö‑ nu ü ‑dhë yi ’ö ‑Zlan ‑wodhiölomɛ ‑nu ‑wo ’wun ꞊blɛɛ ‑a ’ka ’ö mɛ ziizii ‑nu ‑wo wo ‑kɔ ‑nu kpa ‑a ’ka ü ‑ta ꞊bhɛa’ ‑sü ’ka bhë, kö ꞊kun ’ü‑ ‑wun zuö ü ‑kɔ ꞊taa. ¹⁵Pë ‑nu ’ö ’wo bhë, ‑bhö ü ‑de nu ‑an kë ‑sü ‑dhë kö ü ‑bha ‑dho ’dhiö ‑kɔ bhë mɛ ‑nu ‑waan ‑a yö giagia ’ka. ¹⁶Ü ‑zo kë ü ‑de ’piö ’ü ü ‑zo kë ’pö ü ‑bha mɛ ꞊daan’ ‑wo ‑nu ’piö! ‑Bhö ‑ya ü ’yaan ’wun ‑nu bhë ‑an ’plɛ ’gü! ’Bha‑ kë ’dhö, ü ‑dho ü ‑de dha, ’ü mɛ ‑nu ’wo wo ’to ’to ‑na ü ‑bha bhë, ’ü ‑an dha ’pö.

Pë mɛ ’ö këpë ’ka ’ö ’dhiö ‑sü ‑Zlan ‑bha mɛ ’ka ‑mɛ ‑nu dhoë‑ kë ‑Zlan ‑bha mɛ ‑nu kpö ’gü

¹Gɔɔn‑ ꞊klöö ’ö pë ’bhaa ‑kë, ’ü dho ’wun ꞊blɛɛ’‑ ‑a ’ka, ‑bhöë kë ’lëëlë ’ka ꞊nɛ ꞊dhɛ ’wo‑ pö ‑a ‑bha ü dë ‑mü ‑a ’dhö. ‑Bhö ‑dadhëü ’në gɔɔn‑ ‑nu ’sü ꞊nɛ ü dhegluzë ‑nu ’dhö. ²‑Bhö dhoo ‑nu ‑deebɔ ‑nu ’sü ꞊nɛ ‑kɔ ’ü ü dhe ’sü ‑na ‑a ’ka bhë ‑a ’dhö; ’ü ’në dhoo ‑nu ‑dadhëü ‑nu ’sü ꞊nɛ ü dheglu ’në dhoo ‑nu ’dhö. ’Në dhoo ‑nu ’wo bhë, ‑bhö kë ‑an ’piö ’slë ’ka!

³꞊Gɛandhoo ‑nu ’wo ꞊gɛandhoo ‑nu giagia ’ka bhë, ‑bhö ü ‑zo kë ‑an ’piö! ⁴꞊Gɛandhoo ‑nu mɛ ’ö ‑an ‑bha ’në ‑nu ’iin ’ö ‑an ‑bha ’në ‑bha ’në ‑nu ’dhö ‑dhö, ‑yö ‑an ꞊dua’ ’ka kö ’në ‑nu ’wo bhë, pë mɛ ’ö ‑an ꞊dua’ ’ka ‑Zlan wö ’dhiö wo ’kpɔmɛ ‑nu ’iin wo ’kpɔmɛ ‑nu ’kpɔmɛ ‑nu buëndhö bhë ‑wa kë, bhii ‑a kë ’dhö ‑sü ’yi ‑kan ‑Zlan ‑dhë. ⁵Dhe ’ö ꞊gɛandhe giagia ’ka, ’ö ‑ya ‑sü ’ka ö ‑de ‑ta, ‑yö ö ‑zo ‑yö ‑Zlan ‑bha, ‑yö ‑kë ꞊naazë ‑bhɛa ‑Zlan ‑dhë ‑sü ’gü pë ‑dhɛ ‑a ‑gɔ ‑sü ’ka gbeng waa‑ lënng. ⁶’Kɛɛ ꞊gɛandhe ’ö ö ‑bha ‑tosiadhe kë ‑na ‑de ꞊dhɔɔbhaapë ‑nu ’gü bhë, ‑a ’dhiö ‑ya ‑da ꞊nɛ bhë. ⁷Pë ’ü dho ‑an ‑zo ‑büö ‑a ’ka ’ö bhë, ‑yö kë ’dhö kö ꞊kun ’ö mɛ gbɛ dho ’wun yö ‑an ‑bha. ⁸Mɛ ’oo mɛ ’ö ‑dhö, ‑yö ‑dho ö ‑zo kë ö ‑mɛ ‑nu ’piö; ’kɛɛ ‑yö ‑dho ‑a kë ’dhö ö ‑de ‑gɔ kɔɔmɛ ‑nu ’ka. Mɛ ’ö yaa‑ kë ’dhö, kö ꞊ya ’kan ‑zo yö ‑sü ‑bha; ‑a ‑de kö ꞊ya ziö mɛ ‑nu ’ö ’waa ‑Zlan ‑wo ‑dhɛ ’wun gia‑ bhë ‑an ‑ta.

⁹꞊Gɛandhe ’ü dho ‑a ’tɔ ‑da ꞊gɛandhoo ‑nu ’tɔ ‑bhüö ’gü, ‑a ‑kwɛ ‑yö ‑mɔ ’gɔɔ‑ ’slado ‑bha; ’kɛɛ ‑yö kë dhe ’ö dho gwaan do ’kpaan ‑a ’ka. ¹⁰‑Yö kë mɛ ’wo‑ dɔ ö këwun ‑së ‑bha ‑a ’ka; ‑yö kë mɛ ’ö ö ‑bha ’në ‑nu ‑to ‑së ’ka, ’ö ‑nia ‑nu ’kun ‑së, ’ö ‑Zlan ‑bha mɛ ‑nu ꞊bhlë ‑ya, ’ö nu ’yenamɛ ‑nu ‑dhë ‑a ’ka. ‑Yö kë mɛ ’ö‑ këwun ‑nu ‑wo ‑kë ‑së ‑kɔ ꞊suu’‑ ’saadhö ‑ta ‑a ’ka.

¹¹’Kɛɛ ‑bhö ‑kɔ ꞊gɛandhoo ‑nu ‑dadhëü ‑nu ’ka! Bhii kë‑ wo bhë, ꞊ya kë ꞊nɛ pë ‑dhɔ ‑yö ‑da ‑na ‑an ꞊zuö’ ’piö, (kö ‑an ’kan ‑sü ‑mü pë mɛ ’wo wo ‑de ‑da ’gü Klito ‑bha zian ‑ta wo ‑bha ‑kë ꞊gɛan ’ka ‑sü ’gü bhë ‑a ‑bha); kö ‑an ‑dho gwaan ‑sü ‑mü. ¹²Bhii waa‑ kë ’dhö kö pë ‑blɛɛzë ’wo wo ‑de ‑da ‑a ’gü, ’wo‑ pö wo ‑dho ‑a kë bhë, ’waa‑ ’gü gbɔ; ‑a ‑wun ꞊ya ‑an ’kun. ¹³꞊Ya kë ’dhö ’wo ꞊nië ꞊nɛ ’dhɛ ‑ta ‑ma ’dhö, ’wo bɔ ’kɔdhi ‑nu ’gü; ’ö ’yaa ’to ꞊nië’ ‑sü ‑de ’sloo ‑bha, ’wo ‑kë ’dɔɔdɔmɛ ’ka; ’wo wo ‑de dɔ mɛ ‑nu ‑gɔ ’wun ’gü, ’ö ’wun ’yaa ꞊blɛɛ’ ‑wun ’ka, ’wo‑ ꞊blɛɛ. ¹⁴Pë ’ö ‑kë ’a‑ ’piö kö ꞊gɛandhoo ‑nu ‑dadhëü ‑nu ‑wo ’dho gwaan bhë ’ö bhë; ‑wo ’në ‑nu ’kpɔ; ‑wo wo ‑zo kë woë‑ ’kɔɔmɛ ‑nu ’piö, ‑yö kë ’dhö kö ꞊kun ’ö kwa yaagümɛ ‑nu dho bɔ ‑an ‑ta kö ‑waan ’wun yaa ꞊blɛɛ’‑ kwa ‑gɔ. ¹⁵Kë‑ wo ’dhö bhë ’ö tɔɔ ꞊gɛandhoo ‑nu ’bhaa ‑nu ꞊wa ’go zian ‑së ‑ta ’saadhö ꞊wa ziö Satan ’piö. ¹⁶’Kɛɛ ꞊ya kë ꞊nɛ ‑Zlan ‑wo ‑dhɛ ’wun gia‑ ‑dhe do ‑gɔ ’kɔɔmɛ ‑nu ziën, ꞊gɛandhe ‑yö mü, ‑a ꞊dua’ ‑mü kö ‑yö nu ‑a ‑dhë. Kö ꞊kun ’ö‑ ‑wun to Yesu ‑wun ‑dhɛ ’wun gia‑ ‑mɛ ‑nu ‑dho ’kuë‑ ‑sü ‑kwaa, ‑yö kë ’dhö kö Yesu ‑wun ‑dhɛ ’wun gia‑ ‑mɛ ‑nu ‑dho ’kuë‑ ‑sü ‑yaan nu ꞊gɛandhoo ‑nu ’wo wo ‑de ‑ta giagiawo bhë ‑an ‑dhë ꞊zian’.

¹⁷Mɛ zii ‑nu ’wo ’dhiö ’sü ‑na Yesu ‑wun ‑dhɛ ’wun gia‑ ‑mɛ ‑nu ‑dho ’kuë‑ ‑sü ’ka, ’kɛɛ ’ö ‑an ‑zo ’dhö giagiawo ‑Zlan ‑wo ꞊blɛɛ’ ‑sü waa‑ ‑a ꞊daan’ ‑sü ’piö bhë, ‑yö ‑an ꞊dua’ ’ka kö ‑an ꞊saan’ ‑yö kë ꞊va, ¹⁸bhii pë ’ö ꞊bɛɛn’ ‑sü ’ka ‑ya ‑pö: ꞊Ya kë ꞊nɛ ‑du gɔn ‑yö ‑mlü ꞊sië’ ‑na, kö ꞊kun ’wo‑ ’dhi kun, ’yö‑ pö ’zü: Yuökëmɛ ꞊saan’ bho ‑sü ‑ya ‑ma ‑kun. ¹⁹Kö ꞊kun ’wo ’wun dɔ mɛ zii ‑bha ’ö ’ü‑ ‑kë ’wun ’ka kö ’wun ‑dɔa ‑bha dhe ‑tɔmɔ ‑nu waa kë ꞊plɛ ’iin ‑yaaga. ²⁰Mɛ ꞊ya ’wun yaa kë, ‑bhö ’wun ꞊blɛɛ’‑ ‑a ’ka mɛ ’plɛ wö ’dhiö kö ’suö ‑yaan ‑da mɛ ‑nu ’wo to ‑an ‑bha.

²¹A‑ ‑blɛɛ ü ‑dhë ‑zogbandhe ’ka ‑Zlan ’dhö, Yesu Klito waa‑ ‑Zlan ‑bha bɔmɛ ‑nu ’ö ‑an sü ‑an wö ’dhiö ꞊nɛɛ ’wun ‑nu ’wo bhë ’ü ü ‑zo kë ‑an ’piö kö ꞊kun ’ü ‑an ‑kë mɛ ‑zë ’gü ‑sü ’ka ’iin ’ü‑ ‑kë ‑dɔ mɛ ’piö ‑sü ’ka! ²²Kö ꞊kun ’ö ’siö ‑yö kpa ü ‑ta ’ü ü ‑kɔ kpa mɛ ‑ta ꞊bhɛa’ ‑sü ’ka yuö ‑nu ‑a ‑dhë ‑sü ’ka ‑Zlan ‑gɔ kɔɔ. Kö ꞊kun ’ü ‑da mɛ gbɛ ’piö ’ka ꞊sɔɔn yaa ‑kë. Ü ‑zo kë ü ‑de ’piö kö ’ü ’to ’slööslö!

²³Kö ꞊kun ’ü ’yi ‑de ’sloo mü ‑kplawo, ’kɛɛ ‑bhö ‑drɔɔn mü ’dɛdɛ ’ka ü ’guudhɛ ‑wun ’gü ’ö tɔɔ ü ‑ta ’yaa ’po ‑sü ’ka.

²⁴Mɛ ’bhaa ‑nu ‑wo ‑dhö ’ö ‑an ‑bha ꞊sɔɔn yaa ‑yö ‑kë ‑dhɛgbɛadhɛ ’gü, ’ö mɛ ’plɛ ’yan ‑yö ‑da ‑a ’gü, ’ö ꞊ya kë ’dhö zlöö, ’wo‑ ‑wun ꞊blɛɛ; ’kɛɛ mɛ ’bhaa ‑nu ‑wo ‑dhö ’pö, ’ö ꞊wa ꞊sɔɔn yaa kë, ’ö‑ ‑dhɛ ‑yö ꞊glɔɔ kö mɛ ‑nu ‑waan ꞊tun ‑a ‑wun ma ‑na. ²⁵‑Kɔ do bhë ’ö këwun ‑së ‑nu ’dhoë‑ ’ka. ‑A ’bhaa ‑nu ‑wo ‑kë mɛ ’plɛ ’yan ’dhiö, ’ö‑ ‑de ’ö‑ ’bhaa ‑nu ’dhö mü; ’kö ‑kë ꞊nɛ ’waa mɛ ’yan ’dhiö ‑wun ’ka ’dhee, ’ö wo ’ka ’dho to ‑bin ‑blü ’wo ‑dhö.

¹Mɛ ‑nu ’saadhö ’wo ꞊nua ’ka, ‑an ꞊dua’ ‑mü kö ‑wo wo ‑gɔmɛ ‑nu ꞊bhlë ‑ya. ‑Yö kë ’dhö kö ꞊kun ’ö mɛ gbɛ dho ’wun yaa ꞊blɛɛ’‑ ‑Zlan waa‑ kwa ‑bha mɛ ꞊daan’ ‑wo ‑nu ‑gɔ. ²꞊Nua ‑nu mɛ ’ö ‑an ‑gɔmɛ ’dhö Yesu Klito ‑wun ‑dhɛ ’wun gia‑ ‑mɛ ’ka bhë, ‑an ꞊dua’ ’yaa ‑mü kö ‑wo ’kun ‑an ꞊bhlë ‑ya ‑sü ’ka ꞊woë’ ꞊nɛ wo ‑nu ’wa kë dhegluzë ‑nu ’ka. Pë ’wo dho ‑a kë ꞊zian’ ’ö tɔɔ yuö ’wo dho ‑a kë ‑an ‑dhë ‑ziögɔüsüzë ’ka. Bhii mɛ ‑nu ’wo yuö kë ‑na ‑an ‑dhë bhë, Yesu ‑wun ‑dhɛ ’wun gia‑ ‑mɛ ‑nu ’ö ‑an ‑dhɔ ‑yö ‑an ‑kë wo ‑mü. Pë ‑nu ’ü dho mɛ ‑nu ꞊daan’‑ ‑a ’ka ’ö ’ü dho ‑an ꞊blɛɛ’‑ ’wo bhë. ³꞊Ya kë ꞊nɛ mɛ ‑yö mɛ ꞊daan’ ‑na mɛ ꞊daan’ ‑wo gbɛ ’ka, ’ö ’yaa ‑mɔ ‑a ’gü ‑sü ’ka kwa Dëmɛ Yesu Klito ‑wo giagia ‑nu waa‑ mɛ ꞊daan’ ‑wo ’ö ‑gban kwa ‑bha wɔ ‑kɔ ’ö ‑Zlan ‑wo ’gü ‑a ‑bha ‑an ’ka, ⁴kö mɛ ’ö ’dhö bhë, ‑de ‑sü ꞊va ꞊yaa‑ pa, ’yaa pë gbɛ dɔ; ꞊ya ꞊yaannu ꞊nëdhö kö ’wun ‑nu ’wo ‑gban ‑wo kpö ‑nu ‑bha ‑a zaɔdhe ‑da ‑sü ‑ya ’kan ‑na kö ‑waan bɔ ‑a ‑ta ‑yaan kë ‑an ‑gɔ ’dhinaa ’ka. ‑Dhɛ bhë ꞊nɛ ’ö pë ‑nu ’wo ꞊druɛi ‑nu, ’dhinaa ‑nu, ’si ‑nu bho ‑sü ‑nu, ’wun ‑nu ‑kun ꞊zuö’ ’piö ‑sü ‑nu ’ö ’wo go ‑a ‑bha; ⁵‑Dhɛ do bhë ꞊nɛ ’ö zaɔdhe ‑nu ’ö‑ ’bhaa ‑nu ꞊ya kë ’waa yën mɛ ‑nu ’ö ‑an ‑bha ’wundɔdhe ꞊ya yö yaan ’ö pë ’ö ’wun gia‑ ’ka, ’ö ’waa‑ dɔ ‑an ziën bhë ’wo go ‑a ’gü. Pë ’ö ‑an ‑zo ’piö ’ö tɔɔ ’wun ’ö ‑gban ‑Zlan ‑bha bhë, ꞊bhɔɔ’ ꞊mɛɛ’ ‑kɔ ꞊suu’‑ do ’bhaa ‑mü.

⁶Kë‑ wo ’dhö bhë ’wun ’ö ‑gban ‑zo ‑yö ‑Zlan ‑bha ‑sü ‑bha bhë, ‑yö ꞊bhɔɔpë ꞊va ’ka; ’kɛɛ ‑ya ’ka mɛ ’ö pë ’ö‑ ‑gɔ ’ö‑ ‑zo kun ‑a ‑bha ’ka. ⁷Bhii ’ö tɔɔ kwaa nu pë gbɛ ’ka ’kpongtaa zö, ’ö kwa ’ka ’dho dho pë gbɛ ’ka. ⁸꞊Ya kë ’dhö ‑bhöpë waa‑ sɔ ‑nu ꞊wa kë kwa ‑gɔ, kwa ꞊dua’ ‑mü kö kwa ꞊zuö’ ’glu ‑yö dhi. ⁹’Kɛɛ mɛ ’wo‑ ’piö kö wo ‑kɔ ‑yö pa ꞊naɔ ’ka, ‑wo ‑püö ’güdandhe ’gü, ’ö ’wo wo ‑de ꞊nëng pë ‑dhɔ ‑nu ꞊plëëzë ’ö ‑an ‑yö ‑a ‑bha ‑pë gbɛ ’yaa ’dhö ’ö ꞊ya kë ’wo dho mɛ ’ka dhɔng ‑zian waa‑ ’gü ꞊siö’ ‑zian ‑ta bhë ‑an ‑ta. ¹⁰Bhii ’wëüga ‑dhɔ ’ö tɔɔ pë yaa ’saadhö ‑a ‑gɛn ’godhɛ. ’Wëü‑ ‑dhɔ ’ö bhë ꞊nɛ ’ö mɛ ’bhaa ‑nu ‑bha ’ka ’ö ꞊ya kë ‑an ‑bhɔ ‑zo ‑yö ‑Zlan ‑bha ‑sü ‑dhë ꞊taa’ ꞊gbiin ‑sü ‑gɛn ’ka ’ö ꞊wa wo ‑de ꞊zuö’ ‑dɔ ‑gbɔudhö bhë.

’Paanbhowo mɛ ’ö Timote ‑de ‑bha ’ka

¹¹’Kɛɛ bhi ‑zë, (Timote), bhi ’ü ‑Zlan ‑bha mɛ ’ka bhë, ‑bhö bhɔ pë ‑nu ’wo bhë ‑an ‑dhë ꞊taa’! ‑Bhö ‑kë kpengdhö ‑sü, ‑Zlan ‑wo ‑dhɔ kë ‑sü, ‑zo ‑yö ‑Zlan ‑bha ‑sü, ‑dhɔ ’ö go ‑Zlan ’piö ‑a kë ‑sü, ꞊zuösaadhɛ waa‑ ‑kë ’lëëlë ‑sü ‑an ꞊mɛɛ’‑. ¹²Ü ‑bha ’ta ‑sü ‑Zlan ‑bha zian ‑ta ‑sü ’ö ‑zo ‑yö ‑a ‑bha ‑sü ’ka bhë, ‑bhö ‑a ‑wo ꞊nɛ ’ko ’wo‑ zë ’ö ’wo to ‑a ’gü ’gbee‑ ‑a ’dhö! ꞊Toëpö ‑këdhösü bhë ‑a ‑wun ’kun ’gbee‑, bhii pë ’ö ‑Zlan ‑yö ü ꞊dhɔɔ ꞊kaa’ ’ö bhë, ’ö ’ü ‑zo yö ‑sü ꞊goo‑ kun ‑tɔmɔ ꞊plëëzë wö ’dhiö. ¹³‑Zlan ’ö ‑këdhösü ‑nu pë ’plɛ ‑dhë bhë waa‑ Yesu Klito ’ö ‑tɔmɔdhɛ ‑së ‑kë Pilatö ’dhiö ö ‑bha ’wun ꞊blɛɛ’ ‑sü ’gü ‑zo ‑yö ‑sü ’gü bhë ‑an wö ’dhiö, a‑ ‑pö ü ‑dhë: ¹⁴‑Bhö ü ‑gɔ ’dho Klito ‑bha tɔng ‑dhë sia‑, ’ü ü ‑zo kë ‑a ’piö, ‑yö ’to ’slööslö ö pin ꞊taa. ‑Bhö ‑a ’kun ‑së ’ka kö ꞊kun ’ö mɛ ‑nu dho ’wun yö ‑a ‑bha, ‑yö ’dho ‑yö yöë kwa Dëmɛ Yesu Klito ‑bha nu ‑sü ‑bha. ¹⁵Yi ’ö ‑Zlan ‑ya ‑ya bhë ꞊ya ‑lo, ‑Zlan ‑de gia‑ ‑dho ‑a kë ’ö ‑wo. Bhii ‑Zlan bhë ꞊nɛ ’ö mɛgɔtamɛ ꞊va ’ö ’dhö do, ’ö ’dhuë‑ ’dhoë‑ ‑ta, ‑gludë ‑nu ‑bha ‑Gludë, dëmɛ ‑nu ‑bha Dëmɛ. ¹⁶Yö do ’ö bhë ꞊nɛ ’ö ’yaa ga, ’ö ‑dhɛpuudhɛ ’ö mɛ gbɛ ’yaa ‑mɔa kö ‑yö ꞊yɔɔn ‑a ‑bha bhë ꞊nɛ ’ö ‑ya ‑sü ’ka‑ ’gü. Mɛ gbɛ yaa ö ’yan dɔ ‑a ‑bha do, ’ö mɛ gbɛ ’ka ’dho ö ’yan dɔ ‑a ‑bha ’gbönggböng. ꞊Bhlëyadhe waa‑ ’piigbeedhɛ ’ö ‑dhö ꞊toëpö ’ka bhë, ‑wo kë ‑a ‑bha ’ka! Amɛn.

¹⁷Mɛ ‑nu ’ö ꞊bhɔɔpë ‑nu ’wo ’kpongtaa zö bhë ’ö ‑an ‑gɔ bhë, ‑a pö ‑an ‑dhë kö ꞊kun ’wo ‑de ‑sü ꞊va ‑kë. ‑A pö ‑an ‑dhë kö ꞊kun ’ö ’wo wo ‑zo yö ‑an ‑bha, bhii yaa ’dho to ‑an ‑gɔ ꞊toëpö ’ka; ’kɛɛ ‑wo wo ‑zo yö ꞊zian’ ‑Zlan ’ö pë ’plɛ nu ꞊va ’ka, ’ö ‑kë kwa ‑bha ꞊zuögludhi ‑wun ’ka bhë ‑a ‑bha. ¹⁸‑A pö ‑an ‑dhë ‑wo ’wun ‑së kë, ‑wo kë ꞊bhɔɔzë këwun ‑së ‑nu ’gü; ‑wo kë mɛ ‑nu ’ö ‑an ’glu ’dho ‑së ’ö pë ‑nu ’wo ‑an ‑gɔ, ’wo mɛ ‑nu ‑bha ‑nu ‑an ’ka. ¹⁹꞊Bhɔɔpë ꞊va ’ö ‑dhɛkpaɔyi ꞊dhia’ ‑bha bhë, ‑an ‑bha ‑dho ’kuë‑ ‑kɔ ‑së ꞊ga ’ö bhë; ’yö ’wo dho bɔ ‑a ‑ta ‑waan ‑kë ‑a ’gü ‑sü giagia yö.

²⁰Timote, ü ‑zo kë ‑Zlan ‑wo ’ö‑ ‑wun ‑yö tën ü ‑bha bhë ‑a ’kun ‑kɔ giagia ’piö ‑së ’ka; ‑bhö ’kan ’wun ‑gɛn ’flëëflëë bho ‑sü ‑nu ’ö waa‑ ‑zo yö ‑sü ’ö ‑an ‑bha ’dho ‑kɔ ’yaa do bhë ‑nu waa‑ ‑da ’wun ‑nu ’gü ‑sü ’ö mɛ ‑nu ’waa‑ dɔ ’wo‑ ‑dhɛ ’wundɔdhe bhë ‑an ‑bha! ²¹‑A mɛ ’bhaa ‑nu ’wo‑ pö ’wundɔdhe ’ö bhë ‑yö wo ‑gɔ, ꞊wa ’kan ‑zo yö ‑sü ‑bha. Kö ’go, ‑Zlan ‑bha ’glusë ‑yö kë ka ’ka!