’Sëëdhɛ ‑blɛɛzë
’ö Pɔlö ‑ya bɔ
Yesu ‑wun ‑dhɛ ’wun gia‑ ‑mɛ ‑nu ’wo
Tesalɔnikö
plöö ‑an ‑dhë bhë ’ö ꞊nɛ
11’Sëëdhɛ ꞊nɛ, ma Pɔlö ’dhö, Timote ’dhö, Silivɛn ’dhö, ’yi‑ bɔ ‑Zlan ‑bha mɛ ‑nu, ’ka ‑klu ‑sü ’ka ‑Zlan ’ö kwa Dë ’ka waa‑ Yesu Klito ’ö kwa Dëmɛ ’ka ‑an ‑bha, ’ö ’ka Tesalɔnikö plöö ka ‑dhë.
’Glusë waa‑ ꞊zuöyagluu ’ö go ‑Zlan ’ö kwa Dë ’ka waa‑ Yesu Klito ’ö kwa Dëmɛ ’ka ‑an ’piö, ‑yö kë ka ‑gɔ!
Tesalɔnikö ‑mɛ ‑nu wɔ ‑kɔ waa‑ ‑an ‑bha ‑zo ‑yö ‑Zlan ‑bha ‑sü
2꞊Ya kë yi ꞊bhɛa’ ‑na ‑Zlan ‑dhë, yi ‑zo ‑yö ‑büö ka ‑wun ’ka ‑dhɛkpaɔyi ’plɛ ’ka, ’ö ’yi ‑Zlan zuö pö yi ’saadhö ’ka mɛ ’plɛ ka ‑wun ’gü. 3Bhii ꞊ya kë ‑nu wo, kwa Dë ‑Zlan wöödhö, yi ‑zo ‑yö ‑büö ka ‑bha ‑Zlan ‑bha yuö kë ‑kɔ ’ö ‑zo yö ‑sü ’ka, waa‑ ka ‑bha ‑Zlan ‑dhɔ kë ‑sü ’iin ka ‑bha ‑dhɔ ‑kë ’kuë ‑sü ’ö ꞊ya ka kë ꞊faanzë ‑Zlan ‑bha yuö ’gü bhë ‑a ‑wun ’gü. ’Go mü ’zü, ka ‑bha ‑zo yö ‑sü ’ö ‑kë ꞊nɛ kwa Dëmɛ Yesu Klito ‑dho yɛ ö ’zü bhë ‑yö ka ‑dɔ ‑sü ’ka kpinngdhö.
4Dhegluzë ‑nu, yi‑ ’wun ‑dɔ ꞊nɛ, ka ‑dhɔ ‑yö ‑Zlan ‑kë. ‑A ‑wun ’gü ’ö ka sü ’kpongtaamɛ ‑nu ziën kö ’ka kë ‑a ‑bha ’ka bhë. 5Bhii ’ö tɔɔ ’wuntaɔsë ’ö ‑gban Yesu ‑wun ‑bha bhë, ‑lo ’yi‑ woë ka ꞊plöö ’ma bhë, yaa kë ’wun ꞊blɛɛ’ ‑wo ’kpaan ’ka, ’kɛɛ pë ’ö‑ ’gü ‑pë ‑yö ‑kë ka ꞊zuö’ ’gü ’piigbeedhɛ ’ka yö mü ’dhö, ‑Zuu ’ö go ‑Zlan ’piö bhë ‑a ‑bha ‑nu yi ‑dhë ‑sü ’ka. ’Ö kë‑ wo ’dhö bhë ’pö ’ö ‑kë ’wun bhë ‑a ‑bha ‑ya yi ꞊zuö’ ’piö kpinngdhö ‑sü ‑wun ’gü.
Ka ‑de, ka‑ ’wun ‑dɔ ꞊nɛ, yi ‑bha wɔ ‑kɔ ’ö ’yi ꞊kaa’ ka ziën ’ma bhë, ‑yö ‑kë ka ‑bha ’wun ‑së ’ka.
6’Wun ꞊zuan’ ‑së ’ö ’yi‑ ‑zɔn ka ‑dhë ’ö kwa Dëmɛ ’ta ‑kɔ ’ka bhë, ka ‑ziö ‑a ’piö; ‑wo bhë ’ka‑ kun ꞊zuögludhi ’ö go ‑Zuu ’slööslö ’gü bhë ‑a ’ka, ’kɛɛ kö ’töng bhë ‑a ’ka, ka ‑kë bɔ ꞊dhia ’wun ’gbee‑ ‑nu ’gü. 7‑A ‑kë ’dhö ‑sü ’gü, ’ka kë ’wun ꞊zuan’ ‑së ’ka, ‑Zlan ‑bha mɛ ‑nu ’kpɛkpɛ ’wo Maseduanë ‑sɛ ’gü waa‑ ‑an mɛ ‑nu ’ö ’wo Akai ‑sɛ ’gü ‑an ziën.
8‑Kɔ bhë ꞊nɛ ’ö kwa Dëmɛ ‑wo bhë ’ö bɔa ka ’gü, ’ö mɛ ‑nu ’wo Maseduanë ‑sɛ waa‑ Akai ‑sɛ ’gü ’wo‑ yö ‑a ’ka giagia ’ka. ’Kɛɛ ‑a ’dhiö yaa ’to bhë. Ka ‑bha ‑zo ‑yö ‑Zlan ‑bha ‑sü ’ö bhë ‑a ‑taɔ ꞊ya sa ‑dhɛ ’plɛ ’gü. ‑A ‑wun ’gü, ‑a ’bhaa ‑nu ꞊ya kë yi ‑bha ‑wun ’yaa‑ ‑bha ’zü kö ’yiën‑ ‑a ‑wun ꞊blɛɛ’‑ zlöö mɛ ‑nu ‑dhë. 9Yi ‑nia bun ‑kɔ ’ö ’ka‑ wo ’töng ’ö ’yi‑ ‑kë ka ’piö mü bhë ‑a ’ka bhë, mɛ ’plɛ ‑wa ‑tɔmɔdhɛ ‑kë. ’Ö ‑kɔ ’ö ’ka ka ‑bha gbapë ‑nu toë, ’ö ’ka ka ‑ta yöë ‑an ‑bha, ’ö ’ka ꞊dhië ‑Zlan ’piö kö ‑Zlan ’bhee‑ ’ö ‑Zlan giagia ’ka bhë ’ka‑ ‑bha yuö kë, ‑wa ’plɛ ‑tɔmɔdhɛ ‑kë ’pö. 10’Go mü ’zü, ‑Zlan ’ö bhë ‑a Gbö Yesu, ’ö‑ bɔ ga ’gü, ’ö kwa bho ‑a ‑bha ‑naadhe ’ö dho nu ‑a ‑gɔ bhë, ka ka ’yan ‑to ‑a ‑bha ‑yɛ ’zü ‑yi ’ö dho goë dhang‑ ’gü bhë ‑a ‑gɔ.
2Pɔlö ‑bha yuö ’ö‑ ‑kë Tesalɔnikö ‑sɛ ’gü
1Ka ‑de gia‑, ka‑ ’wun ‑dɔ, dhegluzë ‑nu, yi ‑bha ‑nu ka ’piö ’ma ‑sü ’ö bhë yaa kë ’kpaan. 2Ka‑ ’wun ‑dɔ, ‑wo yi ’klo ‑bhɔ Filipö ’yië ꞊tun ‑lo ‑na ka ꞊plöö Tesalɔnikö.
’Yö ꞊dhɛ ’yi ‑wo ka ‑sɛ ’gü, ’wo ‑nu yi ‑gɔ ’gbee‑ ’ka ’zü, ‑a pö ‑sü ’ka ꞊nɛɛ kö ꞊kun ’yi ‑Zlan ‑wo pö. ’Kɛɛ ‑Zlan ‑yö ’gü ‑dɔ ’gbee‑ ‑sü ‑nu yi ‑dhë, ’ö ’yi ’wuntaɔsë ’ö ‑gban dhasü ’ö go ‑Zlan ’piö ‑a ‑bha bhë, ’yi‑ ‑wun ꞊blɛɛ ka ‑dhë. 3’Kɛɛ yi ‑bha ‑Zlan ‑wo ꞊blɛɛ’ ‑sü bhë ’yaa ‑gban ’wun ꞊zaa’ ‑sü ’iin pë ‑nu ’waa kpengdhö ‑an ‑bha. ’Go mü, yiëë‑ kë kö ’yiën‑ mɛ ‑nu ‑püö. 4’Kɛɛ ’wun ’kpɛkpɛ ’ö ’yi‑ ꞊blɛɛ’ ‑na zö bhë ’wun ’ö ‑Zlan gia‑ ‑yö ‑we ‑a ‑bha ꞊zian’ yö ‑mü. Bhii ’ö tɔɔ ‑a ‑de gia‑ ꞊zuö’ ’glu ‑yö ‑dhi kö ’wun ‑nu ’ö ‑gban ’wuntaɔsë ’ö ꞊nɛ ‑a ‑bha, kö ‑ya ‑wun ‑lo yi kwɛɛ kö ’yi‑ ꞊blɛɛ’‑ mɛ ‑nu ‑dhë. ‑A ‑kë ’dhö ‑sü ’ka, yiëë‑ ꞊mɛɛ’‑ kö ’yiën‑ kë mɛ ’bhee‑ ‑nu ‑dhë ‑së, ’kɛɛ yi‑ ‑blɛɛ ’dhö ꞊zian’ kö ’yi kë ‑Zlan ‑dhë ‑së; bhii yö ꞊nɛ ’ö yi ꞊zuö’ ’piö ‑wun ’plɛ dɔ.
5Ka‑ dɔa ‑së ’ka ꞊nɛɛ: Mɛ ‑dian kë ‑wo yaa bɔ yi ’dhii do yiëë‑ ꞊blɛɛ’‑; ’ö yi ‑bha ’wun ꞊blɛɛ’ ‑sü ’gü, ’wëü‑ yö ‑sü ‑dhɔ ’ö bhë, yië‑ ’slë kë. ‑Zlan ‑de ‑yö ’wun ‑nu ’wo bhë ‑an ’plɛ ‑tɔmɔ ’ka. 6꞊Bhlë ’ö go mɛ ’bhee‑ ‑nu ’piö yiëë‑ ꞊mɛɛ’‑ ka ’gü, ’iin mɛ ’kpaan gbɛ ‑nu ’wo to ‑an ’gü. 7꞊Ya kë ꞊nɛ yi‑ ‑mɛɛ ‑bezë, yi dhoë‑ kë tɔng ’ka ’yi‑ pö: ‑Ka yi ꞊bhlë ‑ya! ’Ö tɔɔ yi ‑kë Klito ‑bha bɔmɛ ‑nu ’ka. ’Töng ’ö ’yi ꞊kaa’ ka ’piö mü, yi ‑kë ’lëëlë ka buën‑ ꞊zian’, ’ö ’yi ‑kë ’wun ‑nu ‑kë ka ’ka ꞊dhia ’lëëlë ꞊nɛ ‑kɔ ꞊ya kë, ’ö dhebɔ ‑yö ö ‑bha ’në ‑nu kuën ‑së ’ka bhë ‑a ’dhö. 8Ka ‑dhɔ ’ö yi ’gü bhë ‑a ‑wun ’gü, yi‑ ‑ya yi ꞊zuö’ ’piö kö ’yi yi ‑bha ‑tosiadhe kë ka ‑bha ’ka ꞊nɛ ‑kɔ ’ö ’yi ’wuntaɔsë ’ö go ‑Zlan ’piö ’yi‑ nu ‑a ’ka ka ‑dhë bhë ‑a ’dhö. ’Ö tɔɔ ka ‑wun ‑yö yi ‑gɔ ’gbee‑ ’töng ’plɛ ’ka.
9Dhegluzë ‑nu, ka ‑zo ‑yö ‑büö ꞊nɛ ’töng ’yi ꞊kaa’ ka ’piö bhë, yi yuö ‑kë yi ꞊kwaa’ ꞊sëëbhodhe ’ka ’töng ’saadhö ’ka, ‑yö kë ’dhö kö ꞊kun yi ‑nia ’gbiin‑ dho më mɛ ’bhaa ’ka ’töng ’ö ’yi‑ sü kö ’wuntaɔsë ’ö go ‑Zlan ’piö ’yi‑ ꞊blɛɛ’‑ ‑a ’ka ka ‑dhë bhë ‑a ’ka.
10Yi ‑bha wɔ ‑kɔ ’ö‑ ‑kë mɛ ’ka ‑Zlan ‑wo ’gü ka ’piö mü bhë, ‑yö ‑kë ‑Zlan ‑bha zian ‑ta; ‑yö ‑kë kpengdhö ’ö ’wun gbɛ yaa kë ‑a ‑bha. ’Wun ’ö bhë, ka‑ ‑tɔmɔ ’ka; ’ö ‑Zlan ‑de ’pö, ’ö‑ ‑tɔmɔ ’ka. 11Ka‑ ’wun ‑dɔ ꞊nɛɛ, ‑kɔ ‑nu ’ö ’yi ka kun ‑a ‑bha ’ma bhë, ‑yö ‑kë ꞊nɛ ‑kɔ ’ö ’në dë ‑yö ö ‑bha ’në ‑nu kuën bhë ‑a ’dhö. 12Yi ka ‑ta ‑kun, ’gü ‑dɔ ’gbee‑ ‑sü waa‑ ka ꞊zuö’ ꞊dhuë’ ‑sü ’ka, ‑dhio ‑dɔ ka ‑dhë ‑sü ’ka, ‑a ‑pö ka ‑dhë ‑sü ’ka ꞊nɛɛ: ‑Ka ’ta ’sü ‑Zlan ‑zo ’kun ‑wun ’ka! Bhii ‑Zlan ‑yö ka ‑dhɛ ö ‑bha ‑gludëdhɛ waa‑ ö ꞊bhlë ‑ya ‑sü ‑wun ’gü.
13Yi ‑Zlan zuö ‑pö ’töng ’plɛ ’ka ’wun do ’bhaa ‑wun ’ka; ’ö tɔɔ ꞊dhɛ ’ö ’yi ‑Zlan ‑wo ꞊blɛɛ ka ‑dhë, kaa ‑dhɛ ‑ga yi ‑bha ‑kë mɛ ’bhee‑ ’ka ‑sü ’piö, ’kɛɛ ka ka ’to ‑to ‑wo ’yi‑ ꞊blɛɛ bhë ‑a ‑bha ’ö ’ka‑ ‑gɛn ma; ’ö ’ka‑ dɔ giagia ’ka ꞊nɛɛ: ‑Zlan ‑wo ‑mü, ’ö ’ka‑ sü ka ‑bha ’ka. ‑Yö ’dhö; ‑wo ’ö ’yi‑ ꞊blɛɛ ka ‑dhë bhë, ‑Zlan ‑wo giagia ‑mü. Bhii ’ö tɔɔ ‑wo ’ö bhë ‑yö yuö kë ‑sü ’gü mɛ ‑nu ’ö ’ka ‑Zlan ‑wo ‑dhɛ ’wun gia‑ bhë, ka ꞊zuö’ ’piö. 14‑A pö ’a‑ wo ’dhö bhë ’ö tɔɔ, dhegluzë ‑nu, ‑kɔ dosɛn ’ö ‑Zlan ‑bha mɛ ‑nu ‑dho ’kuë‑ ‑sü ’wo Zude ‑sɛ ’gü ’ö ’wo ‑klu ‑sü ’ka Yesu Klito ‑bha, ’wo bɔa ’wun ‑nu ’gü bhë, ’yö ’ka‑ wo bhë ’pö. ’Ö tɔɔ ka ‑saan ka ‑bha ’sɛgümɛ ‑nu ’dhiö ꞊nɛɛ ‑kɔ do ’ö ’wo ꞊saan ‑a ’ka Zuifö ‑nu ’dhiö bhë ‑a ’dhö. 15Zuifö ‑nu ’wo bhë, wo ꞊nɛ ’wo kwa Dëmɛ Yesu zë. ‑An ’bhɛma ‑nu ꞊nɛ ’wo ‑Zlan ‑wodhiölomɛ ‑nu zë ‑an ‑bha ’töng ’ka. Wo do ’wo bhë ’zü ‑an ꞊suu’‑ ‑ta ‑nu ꞊nɛ ’wo yi ’klo bhɔ ‑na ꞊nɛ. ‑An këyuö ’ö bhë ’yaa ‑Zlan ꞊zuögludhi ‑wun ’ka. ‑Wo ‑kë ’zü mɛ ’kpɛkpɛ yaagümɛ ’ka. 16‑Wa ’slë ‑mɛɛ kö ‑wo yi ’dhi ’kun, dhasü ‑wun ’ö bhë ‑a ꞊blɛɛ mɛ ‑nu ’ö ’waa Zuifö ’ka ‑an ‑dhë ‑sü ‑wun ’gü. ’Wun yaa ‑nu ’wo‑ ‑kë ‑a züdɔyi ’ka ’ö dho ’ö yöë ꞊dɛɛ ‑bha bhë, ’wo‑ ‑takpatoodhe kë ‑na bhë; ’kɛɛ ‑Zlan ‑bha ‑naazuëdhe ꞊ya ’dho ‑an ‑ta ’saadhö.
Pɔlö ‑ya ’piö ’zü kö ’ö ‑kpën Tesalɔnikö ‑mɛ ‑nu ‑bha ’zü ‑dëüwo
17Dhegluzë ‑nu, ‑a ’töng ’bhaa ꞊ya ziö kwaa kë kwa ’ko ‑nu ’piö kwa ’sɛbun ’gü; ’kɛɛ yi ‑zo ‑yö ka ’piö ’töng ’plɛ ’ka. ‑Kpën ka ‑bha ‑dëüwo ‑sü ‑yö yi ꞊zuö’ pa ‑sü ’ka giagiawo. Pë ’ö ‑kë ’ö ’yi‑ ’slë ꞊mɛɛ’ ‑na ‑kɔ ’plɛ ‑ta kö ’yiën‑ nu ka ’piö ’ö bhë. 18Yi‑ ’piö kö ’yi ’yɛ yi ’zü kö ’yi nu ka ’piö ’ma ’zü do. Ma Pɔlö ‑mɛ ‑zë, a ’slë ‑mɛɛ ꞊plëëzë ’ka kö ’aan‑ nu ka ’piö, ’kɛɛ Satan ‑yö zian ‑ta yi ‑gɔ. 19A‑ ‑pö ka, n ’ka‑ pö mɛ gbɛ; ka dosɛn ’kpaan ꞊nɛ ’ka tɔɔ yi ‑zo ‑yö ‑an ‑bha ‑mɛ waa‑ yi ‑bha ꞊zuögludhi ‑wun. Ka ‑kë ’zü yuö ‑nu ’ö yi‑ ‑kë ka ziën ‑to ‑a ’gbee‑ ’ka ‑sü ’ka bhë ‑a ꞊truën ’ö kwa Dëmɛ Yesu nu ’töng ’ka ’ö dho yi ‑gɛn kë ꞊vava ‑a wöödhö ‑a ’ka. 20꞊Ii‑, ‑yö ’wun giagia ’ka ꞊nɛ ka ꞊nɛ ’ka dho yi wö po, ’ö ’ka dho kë yi ‑bha ꞊zuögludhi ‑wun ’ka yi bhë ‑a ’ka.
31꞊Dhɛ ’ö ‑nu ka ’piö ’ma ‑sü ’ö bhë, ’yi‑ ‑zian ‑mɛɛ ’ö yaa ‑mɔ ’kuë, ’yi‑ pö: «꞊Ɛɛ, ‑kwa ’to Atɛnë zö ꞊klöödhö, ’yaa ya ’pö.» 2’Kɛɛ kë‑ wo ’dhö bhë ’yië Timote ‑zë bɔ ka ‑dhë ’ma. Yö ꞊nɛ ’ö tɔɔ dheglu ‑mɛ ’ö yi ‑nu ’plɛ ’yi ‑Zlan ‑bha yuö kë ‑na ’wuntaɔsë ’ö ‑gban Klito ‑bha ‑a ‑blɛɛ mɛ ‑nu ‑dhë ‑sü ’ka bhë; yi‑ ‑bɔ ka ‑dhë kö ‑yö ka ꞊faan’ ’më ’iin kö ‑yö nu ka ‑dhë, ’gü ‑dɔ ’gbee‑ ‑sü ’gü, ‑zo ‑yö ‑Zlan ‑bha ‑sü ’gü, 3‑yö kë ’dhö kö ꞊kun ’ö mɛ gbɛ ‑yö ‑kë ’gü ga ‑mɛ ’ka, ’wun ’gbee‑ ‑nu ’wo‑ wɔ ‑na kwa ‑ta bhë ‑a ’gü. Ka ‑de gia‑, ’ka‑ ꞊tɛi’ dɔ, ’wun ‑bha ‑wɔ kwa ‑ta ‑kɔ ꞊suu’‑ ’ö bhë ‑Zlan ‑de gia‑ ꞊nɛ ’ö ‑dhi ‑a ‑dhë kö ‑yö nu kwa ‑ta ’dhö. 4Kë ‑de ’ö‑ wo bhë, ꞊dhɛ ’yi ꞊tun ka ’piö ’ma kö ’wun ‑nu ’wo ꞊nɛ waa kë ꞊kun, yi ‑kë ‑a pö ‑sü ’gü ka ‑dhë ꞊nɛɛ: ‑Wo ‑dho ’wun wɔ kwa ‑ta. ‑Kɔ giagia ’yi‑ ꞊blɛɛ ‑a ’ka bhë ’ö‑ ‑de ‑yö ꞊kaa’ bhë; ’ö bhii ka ’yaan ’ka ‑wun ‑mü. 5Pë ’ö ‑kë, ꞊dhɛ ’ö n ’ka nu ’ma gbɔ bhë ’a‑ yö zlöö ‑së kö ’a Timote bɔ ka ‑dhë kö ‑yö ‑naɔ ‑nu ’ö ‑gban ka ‑bha ‑zo ‑yö ‑Zlan ‑bha ‑sü ‑bha ’ö dho goë ka ’piö kö ‑yaan ꞊blɛɛ’‑ n ‑dhë ’ö bhë. ꞊Dhɛ ‑naɔ ‑nu ’ö go ka ’piö ’ö n ’ka‑ ma ꞊kun, ’suö ‑yö ‑kë n ‑ma ꞊nɛ dü ‑yö ’dhoë‑ ka ‑püö ’ö tɔɔ ‑Zlan ‑bha yuö ’ö ’yi‑ ‑kë ka ’piö ’ma bhë ‑yö ‑dho ‑a ’gü ꞊siö’‑.
6’Kɛɛ Timote ’ö go ka ’piö ’ma, ꞊ya ‑lo yi ‑ta zö, ‑naɔsë ’ö go ka ’piö ’ö ‑gban ka ‑bha ‑zo ‑yö ‑Zlan ‑bha ‑sü waa‑ ka ‑bha ‑dhɔ ’ö ’ka‑ ‑kë ka ’kuë‑ bhë ꞊yaa‑ ’plɛ ꞊blɛɛ’‑ yi ‑dhë. ‑Ya ‑pö yi ‑dhë ’pö ꞊nɛ ka ꞊zuö’ yaa bhɔ yi ’ka, ka ‑zo ‑ta yi ‑wuën ‑sü ’gü, ‑dhɔ giagia ’gü. ‑Kɔ do ’ö ’ka ‑ya ‑sü ’ka‑ ꞊wuën’ kö ’kwa ‑kpën kwa ’kuë bhë ꞊nɛ ’ö yi ‑gɔ ’nö ’pö. 7Dhegluzë ‑nu, ‑kɔ bhë ꞊nɛ ’kö ‑kë ꞊nɛ ꞊zuökaankuëdhe waa‑ ꞊saan’ ‑nu ‑wo ‑nu yi ‑ta ’dhee, ’ö ’gü ‑dɔ ’gbee‑ ‑sü ‑yö ‑kë yi ‑gɔ. ’Kɛɛ kë‑ wo ’dhö bhë ka ‑bha ‑zo ‑yö ‑Zlan ‑bha ‑sü bhë ꞊nɛ ’ö yi ꞊faan’ më. 8Bhii dɔ ’kwa‑ wo ꞊nɛ, yi ꞊faan’ ꞊ya ’më ’zü ‑dëüwo ka ‑bha ‑klu kpinngdhö ‑sü ’ö kwa Dëmɛ ‑bha bhë ‑a ‑wun ’gü. 9Yi kwa ‑bha ‑Zlan zuö ‑pö ꞊duö, ꞊zuögludhi ꞊va ’ö ’ka‑ nu yi ‑dhë kwa Dëmɛ wö ’dhiö bhë ‑a ‑wun ’gü. 10’Töng ’saadhö ’ka, yi‑ ‑dhɛ ‑Zlan ‑gɔ ꞊naa’‑ ’ka kö ‑yö ’we ‑a ‑bha kö ’yi ‑kpën ka ‑bha ’zü ‑dëüwo, ‑yö kë ’dhö kö pë ‑nu ’ö‑ ‑wun ‑yö ka ‑kë, ‑zo ‑yö ‑Zlan ‑bha ‑sü ’gü, kö ’yi‑ nu ka ‑dhë.
11Yi‑ ‑dhɛ ‑Zlan ‑de gia‑ ’ö kwa Dë ’ka waa‑ kwa Dëmɛ Yesu ‑an ‑gɔ kö zian ’ö nu ka ’piö, ‑wa ’po yi ‑gɔ kö ’yiën‑ ‑wo ka ’piö ’ma. 12Yi‑ ‑dhɛ ’pö kwa Dëmɛ ‑gɔ kö ‑dhɔ ‑kë ’kuë ‑sü waa‑ ‑a ‑dhɔ ‑kë mɛ ’plɛ ’ka ‑sü ’ö ka ziën bhë ‑wo ꞊kpɛa’‑, ‑wo ’dho ’dhiö ‑kplawo. Yi‑ ‑dhɛ kwa Dëmɛ ‑gɔ ’zü kö ‑dhɔ ‑kë ’kuë ‑sü ’ö ka ziën ’ma waa‑ ka ‑dhɔ ’ö yi ’gü ’nö ’pö, kö ‑an ’plɛ ‑wo kë do. 13꞊Ya kë ’dhö kwa Dëmɛ ‑yö ‑dho ka ꞊faan’ më ’ö pë yaa ’kpɛkpɛ gbɛ ’ka ’dho kë ka ‑bha; kö ’kaan‑ kë kpengdhö kwa Dë ‑Zlan wö ’dhiö, kwa Dëmɛ Yesu waa‑ ö ‑bha mɛ ‑nu ’kpɛkpɛ ‑an nu ‑yi ’ka.
4’Ta ’sü ‑kɔ ’ö ‑Zlan ꞊zuö’ ’glu dhi
1Dhegluzë ‑nu, ’ta ’sü ‑kɔ ’ö ‑Zlan ꞊zuögludhi ‑wun ’ka, ’yi ka ꞊daan ‑a ’ka bhë, ’ö ’ka‑ ‑de wo ‑na bhë. ’Kɛɛ pë ’ö ’yi‑ ‑dhɛ ka ‑gɔ ’zü yi ꞊zuö’ ’plɛ ’ka kwa Dëmɛ Yesu ’tɔ ’gü ’ö tɔɔ: Ka ‑bha ’ta ’sü ‑kɔ ‑yö kë ‑së ‑yö ꞊ziö’ ‑a ’ka ‑a ‑blɛɛzë ‑ta. 2Tɔng ’ö go kwa Dëmɛ Yesu ’piö ’ö ‑gban ’ta ’sü ‑kɔ ’ö bhë ‑a ‑bha, ’ö ’yi ka ꞊daan ‑a ’ka bhë, ka gia‑ ka‑ ‑dɔ. 3Pë ’ö ‑Zlan ‑zo ’kun ‑wun ’ka ’ö tɔɔ ’ka kë ’slööslö ’ka ka ‑de dhɛ ’kan ’wun ‑gɔ ‑go zian ‑sü ‑zë ‑nu ‑gɔ! 4Kö mɛ ’ö ‑dhö, ’ö dho dhe ‑sü, ‑a ‑bha ö ‑de ‑bha dhe ’sü ‑kɔ ‑yö kë ‑Zlan ‑zo ’kun ‑wun ’ka ’iin kö ‑yö kë ꞊bhlë ’ka. 5Kö ꞊kun ’ka ka ꞊kwaa ka ‑de ‑zü ’ö ’wun yaa kë ‑sü ’ö ‑gban ’nuëbɔ ꞊mɛɛ’ ‑sü ’iin ꞊mlaabɔ ’kun ‑sü ‑bha bhë ’ö‑ ‑dhɔ ‑yö dhebɔ ’bhaa ’iin gɔɔn‑ ’bhaa ‑kë; kö ꞊kun ’ö ’ka ka ꞊kwaa ka ‑de ‑zü ’ö pë ‑nu ‑wo ‑ziö ka ’gü ꞊nɛ ‑kɔ ’ö mɛ ‑nu ’waa ‑Zlan dɔ ’wo‑ kë ‑na ‑a ’ka bhë ‑a ’dhö! 6’Wun yaa ’ö bhë ‑a ’gü mɛ gbɛ yaa ’dho go ka ziën kö ‑yö za yaa ’sü ö dheglu ’ö ‑kë Yesu ‑wun ‑dhɛ ’wun gia‑ ‑mɛ ’ka ‑a ‑bha, ‑a ‑bha pë ‑nu ‑kun ‑a ‑gɔ ’gbee‑ ‑ta ‑sü ’ka! ’Yië ’wun ‑gban ‑a ‑bha ’yië‑ ꞊blɛɛ’‑ ka ‑dhë ꞊duö ka ‑zo ‑büö ‑sü ’ka pinpiindhö ꞊nɛ: Mɛ ‑nu ’ö ’wun yaa ꞊suu’‑ bhë ’ö‑ kë ‑na, kwa Dëmɛ ‑Zlan ‑yö ‑dho ’wun wɔ ‑an ‑ta ‑a ‑wun ’gü. 7‑Zlan yaa kwa ’sü kö ’kwaan‑ kë ꞊sɔɔnkëmɛ ‑nu ’ka; ‑yö kwa ‑sü ꞊zian’ kö ’kwa kwa ‑bha ‑tosiadhe kë ‑a ’sɛa‑ ’gü. 8꞊Dhɛ ’ö ’dhö mɛ ꞊daan’ ‑wo ’ö ‑gban ’ta ’sü ‑kɔ ’ö ‑Zlan ꞊zuö’ ’glu dhi ’ö ’yi ka ꞊daan ‑a ’ka ꞊nɛ, mɛ ’oo mɛ ’ö yaa ö ’to ’to ‑a ‑bha, kö yaa ö ‑ta yö mɛ ’bhee‑ ‑wo ‑bha, ’kɛɛ kö ‑Zlan ’ö ö ‑bha ‑Zuu ’slööslö nu ‑a ‑dhë bhë ꞊nɛ ’ö ö ‑ta yö ‑a ‑wo ‑bha bhë.
9Ka ‑bha ‑wun ’yaa‑ ‑bha kö ’wun ’ö ‑gban ‑dhɔ ‑kë ’kuë ‑sü ’ö ‑zo ‑yö ‑Zlan ‑bha ‑mɛ ‑nu ka ziën kö ’yi‑ ꞊blɛɛ’ ka ‑dhë ’sëëdhɛ ’gü. ‑Kɔ ’ö dhegluzë ‑nu ’ö ’ka dho ka ’ko ‑nu ‑dhɔ kaa, ‑Zlan ‑de ꞊nɛ ’ö ka ꞊daan ‑a ’ka. 10‑A ‑de ‑kɔ gia‑ bhë ’ö ’ka ’ta sü ‑a ’ka, ka dhegluzë ‑nu, ’ö ’wo Maseduanë ‑sɛ ’gü ’töüdhö, ‑an ‑dhɔ kë ‑sü ’ka. ’Kɛɛ, dhegluzë ‑nu, yi‑ ‑dhɛ ka ‑gɔ ’zü kö ’ka‑ kë ‑së, ’ka ziö ‑a ‑blɛɛzë ‑ta! 11‑Ka ka ’gü dɔ ’gbee‑ kö ’ka ‑tosiadhe kë ꞊zuöyagluu ’gü! ‑Ka ka ’yan ‑klu ꞊zian’ ka ‑de ‑gɔ ’wun ‑nu ‑bha! ‑Ka yuö kë, kö ’ka ka ‑de ‑gɔ ‑bhöpë ‑nu yö ꞊nɛ ‑kɔ ’ö ’yi‑ ꞊blɛɛ ‑a ’ka ka ‑dhë bhë ‑a ’dhö! 12‑A ‑kë ’dhö ‑sü ’gü, ka ‑dho kë ꞊bhlëzë, mɛ ‑nu ’ö ’waa ‑Zlan dɔ ‑an wö ’dhiö, ’ö ka ꞊kwɛɛ‑ ’gbiin‑ ’ka ’dho mɛ ’waa gbɛ kë.
’Wun ’ö ‑gban kwa Dëmɛ ‑bha nu ‑sü ‑bha
13Dhegluzë ‑nu, yi‑ ’piö kö ’yi‑ pö ka ‑dhë ’wun ’ö ‑gban mɛ ‑nu (’ö ’wo to ‑Zlan ‑bha zian ‑ta) ’ö ’wo ga bhë ‑a ‑wun yaa ’dho ka kun, ’ö ’ka ‑ya ’yena ’gü ꞊nɛ mɛ ‑nu ’ö ‑zo yö ‑sü ꞊nɛ wo ‑bha mɛ ‑nu ’wo ga bhë wo ’ka ’dho ‑an yö ’zü do ‑a ’dhö. 14‑Zo ‑yö ‑Zlan ‑bha ‑mɛ ‑nu, kwa‑ ’wun ‑dɔ giagia ’ka ꞊nɛ Yesu ‑yö ‑ga; ’ö go ga ’gü. ‑Kɔ do bhë ‑a ’ka, kwa‑ ’wun ‑dɔ ’pö ꞊nɛ mɛ ‑nu ’kpɛkpɛ ’ö ’wo to Yesu ‑bha zian ‑ta ’ö ’wo ga bhë, ‑Zlan ‑yö ‑dho bɔ Yesu ‑ta ’ö ‑an bho ga ’gü.
15‑A pö ’a‑ wo ka ‑dhë ’dhö bhë ’ö tɔɔ ’wun do ‑yö ‑dhö ’ö kwa Dëmɛ ‑ya ꞊blɛɛ mɛ ꞊daan’ wo ’ka; ’ö tɔɔ mɛ ‑nu ’ö ’kwa dho to ’bhee‑ ’kpongtaa, ’töng ’ö kwa Dëmɛ dho nu ‑a ’ka, kwa ’ka ’dho ‑da kwa Dëmɛ ’piö mɛ ‑nu ’ö ’wo to ‑Zlan ’piö ’ö ꞊wa ga bhë ‑an ’dhiö. 16Kwa Dëmɛ gia‑ ‑bha ‑go dhang‑ ’gü ‑sü waa‑ ‑wo do ’ö dho we ꞊nɛɛ: «‑Ka nu ka ’kuëdhö!» waa‑ ‑Zlan ‑bha bɔmɛ ‑gɔmɛ do ‑bha ‑gbla ’gbee‑ ’ka ‑sü waa‑ ‑Zlan ‑bha ’truu ‑bha ’we ‑sü ‑an ’plɛ ‑dho kë ’kuë‑ dosɛn, ’yö mɛ ‑nu ’ö ’wo to Klito ’piö ’ö ’wo ga bhë ’yö ’wo go ga ’gü ‑blɛɛzë ’ka. 17꞊Ya ’go mü ’ö mɛ ‑nu ’ö ’kwa ‑zo ‑yö ‑Zlan ‑bha ‑mɛ ‑nu ’ka ’ö ’kwa to ’bhee‑ bhë waa‑ mɛ ‑nu ’wo go ga ’gü bhë ’ö ’kwa ‑lo ’kuë‑ do, ’yö ‑Zlan ‑yö kwa sü kwa Dëmɛ ’piö dha kpö ‑ta. Kwaa‑ kwa Dëmɛ ‑nu ’yö ’kwa dho to kwa ’ko ’piö ꞊toëpö ’ka. 18꞊Dhɛ ‑kë ’dhö kö ‑ka ka ’ko ‑nu ꞊faan’ ’më ‑wo ‑nu ’wo bhë ‑an ’ka!
51Dhegluzë ‑nu, ka ‑bha ‑wun ’yaa‑ ‑bha zlöö kö ’wun ‑nu ’wo ‑gban ’töng ’iin ‑dhɛkpaɔyi ’ö pë ‑nu ’yi‑ ꞊blɛɛ ka ‑dhë bhë ’ö ’wo dho kaa bhë kö ’yiën‑ ‑a ꞊blɛɛ’‑ ka ‑dhë ’sëëdhɛ ’gü. 2’Ö tɔɔ ka ‑de gia‑ ka‑ ꞊tɛi’ dɔ ꞊nɛɛ: Kwa Dëmɛ ‑bha zakanyi bhë ‑yö ‑dho kan kwa ’gü ꞊nɛ ꞊kwaanmɛ ‑bha ‑da mɛ ’piö kɔɔ ‑sü ’ö ’yaa mɛ ‑zo ‑büö ’ö nu gbeng ‑a ’dhö. 3’Töng ’ö mɛ ’bhee‑ ‑nu ’wo dho ‑a pö ‑a ’ka: «‑Ya ‑de ’flëë‑ ’gü ‑sü ’töng ꞊ya ‑lo; ’wun ’gbee‑ gbɛ ’yaa ’dhö zlöö gbɔ» ‑a ’töng gia‑ bhë ’ö ’güsiödhe dho kan ‑an ’gü ‑a ’ka, wo ’ka ’dho dha ‑a ‑gɔ. ‑A ‑bha ‑wo ‑sü ‑yö ‑dho kë ‑kan mɛ ’gü ‑sü ’ka ꞊nɛ koyiga ‑bha ‑ya dheguzë ‑bha ‑sü ’dhö. 4’Kɛɛ dhegluzë ‑nu, ’kaa ‑dhɛtiidhɛ ’gü zlöö gbɔ; kö ꞊kun ’ö ‑dhɛkpaɔyi bhë, ’ö ‑kan ka ’gü ꞊nɛ ‑kɔ ’ö ꞊kwaanmɛ ‑yö ‑da ‑a ’ka mɛ ’piö kɔɔ mɛ tii ‑a ’dhö. 5‑Kɔ ’ö ’ka‑ ‑bha ’kpɛɛdhö, ka ‑dhɛpuudhɛ ’gü ’në ‑nu ’ka; ’kwaa ‑dhɛtiidhɛ ’gü ’në ‑nu ’ka gbɔ. 6‑A ‑wun ’gü kwa ꞊dua’ ’yaa ‑mü kö ’kwa yi zë ꞊nɛ mɛ ’waa ‑nu ’ö ’wo to ‑an ’dhö. ’Kɛɛ kwa ‑zë, kwa ꞊dua’ ‑mü kö ’kwa ‑ya kwa ’yaan kö ‑zo ‑kë ‑de ’piö ‑sü ‑yö kë kwa ‑gɔ. 7Gbeng ‑yi ꞊nɛ ’ö mɛ‑ yi zë; ’ö gbeng ‑yi ꞊nɛ ’ö yɔ ‑yö mɛ kun. 8’Kɛɛ kwa ‑zë, kwa ‑dhɛpuudhɛ ’gü ’në ‑nu ’ka, kwa ꞊dua’ ‑mü kö ’kwa kwa ‑de ’kun ’wun ‑nu ’gü. Kwa ꞊dua’ ‑mü kö ’kwa ‑zo ‑yö ‑Zlan ‑bha ‑sü waa‑ ‑Zlan ‑dhɔ ‑an kë kwa ‑bha ꞊nɛ ‑piö ’bhɛi ’ö ’kwa‑ ‑da kwa ‑bha ꞊nɛɛ ’dhasi ’ö dho ‑glu ’piö ‑a ’dhö.
Kwa ‑bha ‑zo ‑yö ‑Zlan ‑bha ‑sü ꞊nɛ kwa ‑dho dha bhë, ‑yö kë kwa ‑gɔ ꞊nɛ ‑piö ꞊gblaa’ ’dhö kö ’kwaan‑ ‑a ‑ya kwa ‑gɔ ‑bha ’pö. 9’Ö tɔɔ ‑Zlan yaa kwa ‑dhɛ kö ‑a ‑bha ‑naazuëdhe ‑yaan wɔ kwa ‑ta; ’kɛɛ kö ’kwaan‑ dhasü yö ꞊zian’, ‑bɔ kwa Dëmɛ Yesu Klito ‑ta ‑sü ’ka. 10Bhii Yesu Klito ‑yö ‑ga kwa ‑wun ’gü, ‑yö kë ’dhö kö ’kö ‑kë ꞊nɛ kwa ‑ga oo ’iin kwa ‑to kwa ’yaan oo, ’töng ’ö dho nu ‑a ’ka bhë kö kwa ‑nu ’kwa kë kwa ’ko ꞊bhaa ꞊toëpö ’ka.
11‑A ‑kë ’dhö ‑sü ’gü, ‑ka ka ’ko ‑nu ꞊faan’ ’më, ’ka ka ’ko ‑nu ’yënng ꞊dhuë’ ꞊nɛ ‑kɔ ’ö ’ka‑ kë ‑na ‑a ’ka bhë ‑a ’dhö!
‑Dhio ‑kaanta ’ö dɔ Tesalɔnikö ‑mɛ ‑nu ‑dhë waa‑ ꞊wekadhe
12Dhegluzë ‑nu, yi‑ ‑dhɛ ka ‑gɔ kö ‑Zlan ‑bha mɛ ‑nu ’wo yuö kë ‑sü ’gü ka ziën ’ma bhë, ’ka ‑an ꞊bhlë ‑ya. Mɛ ‑nu ’wo bhë kwa Dëmɛ ‑yö ‑an ‑sü kö ‑wo ka ‑da ‑Zlan ‑bha zian ‑ta, ’iin kö ‑wo ka ꞊daan ‑Zlan ‑wo ’ka. 13Mɛ ‑nu ’wo bhë, ‑an ꞊bhlë ‑yö kë ka ’gü ‑kɔ ’plɛ ‑ta; ‑an ‑dhɔ ‑yö ka kë ꞊va ‑Zlan ‑bha yuö ‑nu ’ö ’wo‑ kë ‑na ka ziën ’ma bhë ‑a ‑wun ’gü. ‑Ka ‑tosiadhe kë ꞊zuöyagluu ’ka ka ’ko ‑nu ’piö!
14Yi ‑bhɛa ka ‑dhë, dhegluzë ‑nu, kö ’ka ’fiamɛ ‑nu ‑zo ‑büö! Mɛ ‑nu ’ö ’wo ’suö ‑sü, ‑ka ‑an ‑zo ‑gban; mɛ ‑nu ’ö ’wo ’tëëtë ’güdandhe ‑nu ’gü bhë, ’ka nu ‑an ‑dhë! Ka ꞊zuö’ ‑yö kë ‑saa mɛ ’plɛ ’piö! 15‑Ka ka ‑de ’kun ‑së! Kö ꞊kun ’ö mɛ ‑yö ’wun yaa ’pë bho ’wun yaa ’ka; ’kɛɛ ‑ka ’wun ‑së ‑kë ka ’ko ‑nu ‑dhë ‑sü ’iin mɛ ’plɛ ‑dhë ‑sü ꞊mɛɛ’‑ kö ‑yö kë ka ‑gɔ ’töng ’saadhö ’ka!
16-18Pë ‑nu ’ö ‑Zlan ‑ya ‑dhɛ ka ‑gɔ ka ‑bha ‑tosiadhe ’ö Yesu Klito ’piö ‑a ’gü ’ö tɔɔ: Ka ꞊zuö’ ’glu ‑yö dhi ‑kplawo! ‑Ka ‑bhɛa ‑Zlan ‑dhë ’töng ’plɛ ’ka! ‑Ka ‑Zlan zuö pö ’wun ’saadhö ’gü!
19Kö ꞊kun ’ka zian ta ‑Zuu ’slööslö këyuö ‑gɔ! 20Kö ꞊kun ’ka ‑wo ’ö ‑Zuu ’slööslö ‑yö bɔ mɛ ‑nu ’gü ’ö‑ pö ’ka‑ bho yunng! 21’Kɛɛ ‑ka pë ’plɛ ’piö ‑ga kö ‑a mɛ ’ö ‑së ’ka‑ ’sü ka ‑bha ’ka! 22‑Ka ka ‑zo kë ka ‑de ’piö ’wun yaa ꞊suu’‑ ’saadhö ‑gɔ!
23‑Zlan ’ö ꞊zuöyagluu nu mɛ ‑dhë bhë, ‑yö ‑dhoë kë kö ’ka kë ‑a ‑bha ’ka ‑kɔ ’plɛ ‑ta. ‑Yö ‑dho ka ‑lü ‑de ‑maa kë bhii ka ‑zuu ’dhö, ka nii ’dhö, waa‑ ka bun ’dhö ‑yö ‑dho ‑an ’plɛ ‑maa kë. ‑Yö ‑dho ka kë ’slööslö. ꞊Ya kë ’dhö ‑dhuu gbɛ yaa ’dho to ka ‑bha ’yö yöë kwa Dëmɛ Yesu Klito nu ’töng ‑bha. 24‑Zlan ’ö ka ‑dhɛ kö ’ka ziö ‑a ’piö bhë, ‑zo ‑yö ‑a ‑bha ‑Zlan ‑mü. ‑Yö ‑dho pë ‑nu ’wo bhë ‑an ’plɛ kë ka ‑dhë.
25Dhegluzë ‑nu, ‑ka ꞊bhɛa’‑ yi ‑wun ’gü! 26Dhegluzë ‑nu ’kpɛkpɛ ’wo to, ’yië ’we ‑an ’ka ꞊duö!
27A ‑bhɛa ka ‑dhë kwa Dëmɛ ’tɔ ’gü, ’sëëdhɛ ’ö ꞊nɛ ‑kaa ‑wo pö dhegluzë ‑nu ’kpɛkpɛ ’wo ka ziën ’ma bhë ‑an ‑dhë!
28Kwa Dëmɛ Yesu Klito ‑yö ’dhuë‑ ’kpɔ ka ‑bha!