’Sëëdhɛ ‑blɛɛzë ’ö
Piɛɛ
‑ya bɔ ‑Zlan ‑bha mɛ ‑nu
’wo ‑pɛn ‑sü ’ka ‑an ‑dhë bhë ’ö ꞊nɛ
11Ma Piɛɛ ’a Yesu Klito ‑bha bɔmɛ ’ka, ’a ’sëëdhɛ ꞊nɛ ’a‑ bɔ mɛ ‑nu ’ö ‑Zlan ‑yö ka sü ’ö ’ka ‑nia ’ka, ’ka ‑ya ‑sü ’ka Pɔng ‑sɛ, Galatö ‑sɛ, Kapadɔsö ‑sɛ, Azi ‑sɛ waa‑ Bitini ‑sɛ ’gü ‑dhɛ ‑nu ‑bha bhë ka ‑dhë. 2Ka ’sü ’ö kwa Dë ‑Zlan ‑ya wo ’dhö bhë, pë ’ö‑ ‑ya ’ti ‑kë ö ‑de ꞊zuö’ ’piö ‑be yö ‑mü; ’yö‑ ‑kë ’dhö kö ’kaan‑ kë ‑a ‑bha ’ka ‑Zuu ’slööslö ꞊kwaa’, kö ’kaan‑ ’wun ma Yesu Klito ‑ta, ’kaan‑ kë ’zü ’slööslö ‑a fɛi ꞊kwaa’. Kö ‑Zlan ‑bha ’glusë ‑yö kë ka ’piö, ’iin kö ‑yö ꞊zuöyagluu nu ka ‑dhë ‑kplawo.
’Yan ’to ‑a ‑gɔ ‑pë ’ö dhang‑ ’gü
3‑Kwa ’we kwa Dëmɛ Yesu Klito Dë ‑Zlan ’tɔ ’piö! Yö ꞊ga ’ö‑ ‑bha ’wun ‑së kë ‑sü ꞊va ’gü ’ö ꞊ya kwa gbaa ‑tosiadhe ‑dëü ’ka Yesu Klito ‑bho ga ’gü ‑sü ’ka bhë. Kwa ’yan ‑to ‑a ‑gɔ ‑pë bhë ‑a ‑bha ‑kë ’bhee‑ ‑kɔ ꞊ga ’ö bhë. 4꞊Yö ‑së kö kwa ꞊zuö’ ’glu ‑yö dhi ‑to mɛ ‑gɔ ‑pë ’ö ‑Zlan ‑ya ‑ya ö ‑bha mɛ ‑nu ‑gɔ bhë ‑a ‑wun ’gü, bhii yö ’dhö bhë ’zü pë ’yaa ꞊siö’, ’yaa ‑dhii ’kun ’iin ’ö‑ bun ’yan ‑bha bhɔ ‑sü ’yaa yën yö ‑mü. ‑To mɛ ‑gɔ ‑pë bhë ꞊nɛ ’ö ‑Zlan ‑ya ‑ya ka ‑gɔ dhang‑ ’gü. 5‑Zlan ‑bha ’piigbeedhɛ ‑yö ‑dho to ka ’piö ka ‑bha ‑zo ‑yö ‑a ‑bha ‑sü ‑wun ’gü ‑yaan dhoë ‑yaan yöë yi ’ö‑ ‑ya yi ‑kaanta ’ka kö dhasü ’ö bhë ‑yaan ‑zɔn ‑a ’ka bhë ‑a ‑bha.
6Pë ’ka‑ kë ‑na bhë, ꞊yö ‑së ’ö tɔɔ ’töng ’ö ka ‑gɔ ’kpongtaa zö bhë, kö ‑Zlan ꞊ya ’we ‑a ‑bha kö ’wun ’gbee‑ ‑nu ‑wo nu ka ‑ta, ka ꞊zuö’ ’glu ‑yö ‑dhi. 7Bhii kë‑ wo ’dhö bhë ’ö tɔɔ ’wun ‑nu ’wo nu ‑na ka ‑ta bhë, ‑wo ‑nu ’dhö kö ka ‑bha ‑zo ‑yö ‑Zlan ‑bha ‑sü ‑gɛn ‑gban ‑kɔ bhë ’piö ‑yaan ga. Ka ‑de gia‑ ka‑ ‑yö ‑o! Ka ‑bha ‑zo ‑yö ‑Zlan ‑bha ‑sü ’ö bhë ‑a ‑wun ‑yö ’gbee‑ ’ö ꞊zië’ ’sënng ‑ta ’ö ’ka‑ dɔa ’pö ꞊nɛ ’sënng ’ö bhë pë ’ö‑ ’gü dho ꞊siö’ yö ‑mü. ’Kɛɛ kö ’sënng ’ö bhë ’sa, ‑yö ‑bɔ ’siö ’gü kö ‑a ‑bha ‑kë ’sënng ’ka ‑sü bhë ‑yaan yö ‑dhɛpuudhɛ ’gü. ‑Kɔ bhë ꞊nɛ ’ö ka ’tɔ dhö bhɔa, ’ö ‑Zlan dho ka ꞊sɛɛ‑ bhoë, ka ꞊zëë ‑zë ’tɔa ‑sü ’ka Yesu Klito nu ‑yi ’ka. 8Yesu Klito ’ö bhë ‑a ‑dhɔ ‑yö ka ‑kë, ’kɛɛ kö kaa ka ’yan dɔ ‑a ‑bha do ’sa, ’ö ’ka‑ ‑wun ‑dhɛ ’wun gia‑, ’kɛɛ kö ka ’yan ’yaa‑ ’dhiö ’sa. ꞊Zuögludhi ꞊va ’ö ’dhi yaa ‑mɔ ‑a ‑wun ꞊blɛɛ’ ‑sü ‑bha bhë ‑a ‑gɛn ꞊ga bhë. 9Bhii ka ‑bha ‑zo ‑yö ‑Zlan ‑bha ‑sü bhë ‑a ꞊truën ’ö ’ka dhoë‑ yö ’ö tɔɔ ka nii ‑bha dha ‑sü.
10-11Dhasü ’ö bhë, ‑Zlan ‑wodhiölomɛ ‑nu ‑wo ‑dhɛ ‑ga ‑a ’piö, ’wo yuö ‑nu ‑kë ‑a ‑ta piindhö, kö ‑wo ꞊kpɔɔ’ ‑na ’sëëdhɛ ‑nu ’gü, kö ’töng ’ö pë ‑nu ’wo bhë ’wo dho kaa ’iin ’wun ‑nu ’wo ‑gban pë ‑nu ’ö ‑Zuu ’ö go Klito ’piö ’ö‑ ꞊blɛɛ ‑an ‑dhë bhë, kö ‑wo ‑an ꞊mɛɛ’ ‑na; kö ’glusë ’ö ‑Zlan dhoë‑ kë ka ’ka bhë, ‑wa ‑wun ꞊blɛɛ’ ‑na. ‑Zuu bhë ’pö, ‑yö ‑kë ‑an ’piö kö ’wun ‑nu ’wo ‑gban Klito ‑bha ’klobhɔdhe ‑nu waa‑ ‑a ꞊bhlë ‑nu ’wo dho kë bhë ‑ya ‑ta ’po ‑na ‑an ‑dhë. 12’Kɛɛ kë‑ wo ’dhö bhë, ‑Zlan ‑ya ‑ta ‑po ‑an ‑dhë ꞊nɛ ’wun ‑nu ’ö‑ dɔ ‑an ’dhi bhë ‑an ‑de ‑bha kun, ’kɛɛ ka ‑bha ‑mü. ’Yö ’wun ’ö ’dhö bhë, ꞊ya ‑lo ka ‑ta dɔ ’kwa‑ wo ꞊nɛ ‑a ’gü, bhii ’wuntaɔsë ꞊blɛɛ’ ‑mɛ ‑nu ’ö ’wo ’wun ꞊blɛɛ ‑Zuu ’slööslö ’ö ‑Zlan ‑ya bɔ ’ö go dhang‑ ’gü ‑a ꞊faan’ ’ka bhë ꞊waa‑ ꞊blɛɛ’‑ ka ‑dhë. ‑Zlan ‑bha bɔmɛ ‑nu gia‑ ‑de ’pö ‑wa ‑kë kö ’wun bhë ‑waan dɔ.
‑Tosiadhe kpengdhö ’ö ‑Zlan ‑yö kwa ꞊dhɔɔ ꞊kaa’
13꞊Dhɛ ’ö ’pö, ‑ka ka ‑zo kë ka ‑de ’piö; ‑ka ‑ya ka ’yaan, ’ka ka ‑zo ’to dosɛn gbaɔ ’ö dho kë ka ‑dhë yi ’ö Yesu Klito dho nuë bhë ‑a ‑dhë! 14‑Ka kë mɛ ‑nu ’wo ’wun ma ‑Zlan ‑ta ‑an ’ka; kö ꞊kun ’ö ’ka ‑kë ‑ya pë ‑dhɔ ’ka ‑sü ’gü gbɔ ꞊nɛ ‑kɔ ’ö ‑Zlan dɔ ‑sü yaa kaa ka ‑gɔ ’ö ’ka pë ‑nu ‑kë ‑kɔ gbɛ ‑ta bhë ‑a ’dhö. 15’Kɛɛ ꞊dhɛ ’ö ‑kë ꞊nɛ ‑Zlan ’ö ka ꞊dhɔɔ ‑kë bhë ‑yö ’slööslö, kö ka ‑de ’pö, ‑ka kë ’slööslö ka këwun ‑nu ’saadhö ’gü!
16Bhii pë ’ö ꞊bɛɛn’ ‑sü ’ka ‑Zlan ‑bha ’sëëdhɛ ’gü ‑ya ‑pö: ‑Ka kë ’slööslö, bhii a ’slööslö. 17꞊Ya kë ꞊nɛ ka ‑bha ꞊bhɛa’ ‑sü ‑nu ’gü, kwa Dë ’tɔ ’ö bhë ka‑ ‑ya ‑Zlan ’ö mɛ ’saadhö ‑bha za ‑kan mɛ ’ö ‑dhö ‑a këwun ‑nu ‑bha, ’ö ’yaa mɛzëgüdhe gbɛ kë ‑a ‑bha bhë, kö ‑ka ka ‑de kë ’slë ’ka ’töng ’ö ꞊tun ka ‑gɔ ka ‑bha ‑tosiadhe kë ‑sü ’gü bhë ‑a ’gü ‑a ꞊bhlë ‑ya ‑sü ’ka! 18Bhii ka ‑de gia‑ ka‑ ꞊tɛi’ ‑dɔ ꞊nɛ wɔ ‑kɔ ꞊suu’‑ ’ö ka ’bhɛma ‑nu ‑wo ‑kë ‑a ’gü ’ö‑ ‑yö ‑a ‑bha ‑pë gbɛ yaa kë ‑dhö ’ö ’ka ‑da ‑a ’gü bhë, ‑kɔ ’ö ka bho ‑a ’ka ‑a ’gü bhë ka‑ ‑dɔ. ’Gü ꞊siö’ ‑pë ‑nu ’wo ‑kë ’wëüga waa‑ ’sënng ‑nu ‑an ’ka ’waa ‑mü ’ö ka ‑gɔ ‑ta dhɔa. 19‑Abi’! Pë ’ö ka ‑gɔ ‑ta dhɔa bhë ’ö tɔɔ Klito fɛi ’ö‑ ‑wun ’dhö ’gbee‑ bhë. Klito bhë ꞊nɛ ’ö‑ ‑kë ö ‑bha sla‑ ꞊bhoë’ ’bhlanë ’ö‑ ‑dhɛ ’yaa‑ ‑bha ’iin ’ö ‑dhuu ’yaa‑ ‑bha ‑a ’ka. 20’Kɛɛ kë‑ wo ’dhö bhë, ‑yö Klito ‑ya ‑a ‑de kö ’kpongtaadhɛ zü yaa dɔ ꞊kun, kö ’töng ‑kaanta ‑nu ’kwa‑ ’gü ꞊nɛ kö ‑yaan ‑wun ‑zɔn ‑a ’ka; ’yö pë ’ö ’dhö bhë, ’yö‑ ‑kë ’dhö ka ‑bha ’dhuë‑ ‑wun ’gü. 21Yö ꞊nɛ ka bɔ ‑a ‑ta ’ö ‑Zlan ’ö‑ bho ga ’gü ’ö ’tɔbhɔdhe nu ‑a ‑dhë bhë, ’ka‑ ‑wun ‑dhɛ ’wun gia‑. ‑Kɔ bhë ꞊nɛ ’ö ka ‑bha ‑zo ‑yö ‑Zlan ‑bha ‑sü waa‑ ka ‑bha ’yan ‑to ‑a ‑gɔ ‑pë ‑nu ’wo bhë, ’ö ‑an ‑gɛn dho ‑gban ‑a ’ka ‑Zlan ’gü.
22’Wun gia‑ ’ö ‑Zlan ‑wo ’gü bhë, ka ‑bha ‑a ꞊bhlë ‑ya ‑sü ’gü, ’ka ka ‑de kë ’slööslö kö ka dhegluzë ‑nu ’wo ‑zo ‑yö ‑Zlan ‑bha ‑sü ’gü bhë, ’kaan‑ ‑an ‑dhɔ kë giagiawo. Kö ‑ka ka ’ko ‑nu ‑dhɔ kë ka ꞊zuö’ ’plɛ ’ka; 23’ö tɔɔ ’ka bhɔ ‑dëüwo; ’ö yaa kë ꞊nɛ pë ’ö ‑kë ka bhɔ ‑gɛn ’ka bhë ‑a ’gü ‑dho ꞊siö’ yö kun. ‑A ’gü ’ka ’dho ꞊siö bhii ‑Zlan ‑wo ’ö ’bhee‑ ’ö ‑dhö ꞊toëpö ’ka bhë ‑ya ’gü. 24’Ö tɔɔ pë ’ö ꞊bɛɛn’ ‑sü ’ka ‑Zlan ‑bha ’sëëdhɛ ’gü ya ‑pö: Mɛ ’kpɛkpɛ ‑wo ziö ‑pë ’ka ꞊nɛ ꞊blëë’ ’dhö, ’ö ‑an ‑bha ’tɔbhɔdhe ‑yö ‑kë ꞊nɛ ꞊blëë’ ’bin ’dhö. ꞊Blëë’ ‑yö ‑ga, ’ö‑ ’bin ‑yö ‑lo, 25’kɛɛ kwa Dëmɛ ‑wo ‑yö ‑dho to ’dhö ꞊toëpö ’ka. ‑Wo ’ö bhë ꞊nɛ ’ö tɔɔ ’wuntaɔsë ’wo‑ ꞊blɛɛ ka ‑dhë bhë.
2’Wun ꞊zuan’ ’ö ‑gban ’kɔ ’bhong ’piö ‑guö ’ö ’bhee‑ ‑a ‑bha
1‑Ka ’kan ꞊kian’ yaa ꞊suu’‑ ’kpɛkpɛ waa‑ ꞊sua kë ‑sü ‑an ‑bha; ‑ka ’kan mɛ ’yaan‑ ’kun ‑sü, ꞊druɛi kë ‑sü waa‑ ’dɔɔ yaya dɔ ‑sü ‑nu ‑an ‑bha. 2-3Pë ’ö ꞊bɛɛn’ ‑sü ’ka ‑Zlan ‑bha ’sëëdhɛ ’gü ‑ya ‑pö: ’Ka‑ yö ꞊nɛ kwa Dëmɛ këwun ꞊yö ‑së. ꞊Dhɛ ’ö ’dhö ꞊nɛ kö ‑ka kë ꞊nɛ ’në ’blë ’puu ‑nu ’ö ‑an ‑bha ’yɔn ’yi ‑wun ’dhö ’gbee‑ bhë ‑an ’dhö ’sa; ’ö tɔɔ ‑an ‑bha ‑bhöpë ꞊nɛ bhë; bhii ‑bhöpë ’ö go ‑Zlan ’piö ’ö ‑kë ‑a ‑wo ’slööslö ’ka bhë ꞊nɛ ’ö ’ka ’dhoë‑ ‑bhö kö ’kaan‑ ꞊kpɛa’ ’iin kö dhasü ‑yaan kë ka ‑gɔ.
4Kwa Dëmɛ ’ö ‑guö ’bhee‑ ’ka ’ö mɛ ’bhee‑ ‑nu ‑wa ‑wun bho yunng, ’kɛɛ ’ö ‑Zlan ‑ya sü ‑a ‑wun ‑kë ’gbee‑ ‑sü ‑wun ’gü bhë, ‑ka ꞊yɔɔn ‑a ‑bha. 5‑Ka ꞊yɔɔn ‑a ‑bha kö ka ‑de ’pö ’kaan‑ kë ꞊nɛ ‑guö ’bhee‑ ‑nu ’dhö kö ‑Zlan ‑bha ’kɔ bhë ’kaan‑ kë ‑a dɔpë ‑nu ’ka; ka ‑dho kë slabhomɛ ‑nu kpö ’gü ‑mɛ ‑nu ’ka, ’ö bhii ka ‑bha ‑tosiadhe ‑yö ‑dho kë ꞊nɛ sla‑ ‑së ’ka‑ bho ‑Zlan ‑dhë kö ‑yaan ‑a ‑zo ’kun ꞊bɔa’ Yesu Klito ‑ta ‑sü ’ka bhë ‑a ’dhö, 6bhii pë ’ö ꞊bɛɛn’ ‑sü ’ka ‑Zlan ‑bha ’sëëdhɛ ’gü ‑ya ‑pö: ‑Guö ’ö‑ ‑wun ’dhö ’gbee‑ bhë ’ma‑ ’sü ’ma‑ këdhɛ ’bhong ’piö ‑guö ’ka Siɔn ’gü; lë‑ ’ka ’dho kpɔ mɛ ’ö ꞊yaa‑ ‑wun ‑dhɛ ’wun gia‑ ‑a ‑ta. 7Mɛ ’ö ’ka‑ ‑wun ‑dhɛ ’wun gia‑ bhë, ‑guö bhë ‑yö ka ‑bha ’kpëdhö ‑wun ’ka. ’Kɛɛ mɛ ’ö ’waa‑ ‑wun ‑dhɛ ’wun gia‑ bhë, (pë ’ö ꞊bɛɛn’ ‑sü ’ka ‑Zlan ‑bha ’sëëdhɛ ’gü ‑an ‑bha ’ka ’ö tɔɔ:) ‑Guö ’ö ’kɔdɔmɛ ‑nu ‑wa ‑zuö wo ‑kɔ ’yan ꞊taa bhë, ꞊ya kë ‑guö ’gian ’ö ’wo dho ‑a ‑da ‑dhɛ ’bhong ’piö ‑a ’ka. 8‑Zlan ‑bha ’sëëdhɛ ‑dhɛ ’bhaa ’gü ’zü ‑yö pö ‑sü ’ka ‑an ‑bha ’ka ’zü ꞊nɛ: ꞊Ya kë ‑guö ’ö mɛ ‑nu ‑gɛn ‑yö ‑zuö ‑a ‑bha, ‑guö gbɔng ’ö mɛ ‑nu ‑wo bɔ ‑a ‑ta ’wo ‑püö ‑a ’ka. ’Ö bhii ‑gban ’wo‑ wo ‑a ‑bha bhë ’ö tɔɔ ‑kɔ ’wo‑ wo ’wuntaɔsë bhë ‑a ’ka bhë; pë ‑de gia‑ ’ö ‑ya ‑an ꞊tian’ ’ö bhë.
9’Kɛɛ ka ‑zë ka ꞊nɛ ’ka tɔɔ mɛ ꞊suu’‑ do ‑zë ‑nu ’ö ‑Zlan ‑yö ka sü, mɛ ‑nu ’ö ’ka ’sɛdë ‑bha slabhomɛ ‑nu ’ka, ’sɛgɔ ’ö ‑ya ‑sü ’ka ‑de ‑ta ‑Zlan ‑bha ’ka. Ka ‑gɔ ‑ta ’dhɔ ’ö‑ wo ’dhö bhë, ‑yö ‑kë ’dhö kö ‑Zlan ’ö ka bho ‑dhɛtiidhɛ ’gü ’ö ka ‑kë ö ‑bha ‑dhɛpuudhɛ ’gblüünzë ’ö bhë ‑a ’gü ‑mɛ ‑nu ’ka bhë, ’kaan‑ ‑a këwun ‑së ‑nu ‑wun ꞊blɛɛ’‑; 10bhii ka ’ka bhë, kë‑ wo ’dhiö ‑be, kaa kë ‑Zlan ‑bha ’sɛgümɛ ’ka, ’kɛɛ zlöö ꞊nɛ ’ka kaa; ka ’ö ’dhiö ‑bezë kaa ‑Zlan ‑bha mɛ ’yena yö ‑sü dɔ bhë, zlöö ꞊nɛ ’ka‑ dɔ.
’Wun ’ö ‑gban ‑Zlan ‑bha yuökëmɛ ‑nu ’ta ‑kɔ ‑bha
11N dhegluzë ‑nu, a‑ ‑dhɛ ka ‑gɔ, ꞊dhɛ ‑kë ꞊nɛ ‑nia ‑mü kaa, ’ö ’ka ’tasümɛ ’ka ’kpongtaa bhë, kö mɛbheedhe ꞊dhɔɔbhaapë yaya ‑nu ’ö ꞊ya kë ’wo ’ko ‑ya kwa nii ‑bha bhë, ’ka ’kan ‑an ‑bha! 12Ka ’ta ‑kɔ ‑yö kë ‑së mɛ waa wo ꞊zuö’ ꞊dhië’‑ ‑Zlan ’piö ꞊kun bhë ‑an ziën, kö ‑dhɛ ’ka‑ ‑bha, ’kö ‑kë ꞊nɛ ‑wo ka ‑wun yaa ‑blɛɛ ’wun ‑dɔ ka ‑bha ‑sü ’ka ꞊nɛ këpëyaamɛ ‑nu ‑mü ka ’ka, kö ‑wo ka këwun ‑sɛɛbɔ ‑nu yö, kö ‑wo ‑Zlan ’tɔ bhɔ yi ’ö dho ö ‑de ‑zɔn ‑a ’ka bhë ‑a ’ka.
13‑Ka ’wun ma ‑wogbiindhɛ ’kpɛkpɛ ’ö ‑ya mɛ ’bhee‑ ‑nu ‑gɔ ‑ta ‑a ‑ta bhii kwa Dëmɛ ‑zo ’kun ‑wun ꞊nɛ ’ö bhë; ‑yö ’sɛdë ’piö ’dhee, bhii mɛ ’ö ‑ya ka ‑gɔ ’dhiö yö ‑mü, yö ꞊nɛ ’ö ‑kɔ ‑mɔ ’wuën‑ ‑sü ’plɛ ’dhoë‑ kwɛɛ. 14‑Yö ’sɛ ꞊kɔɔnmɛ ‑nu ’piö ’dhee, bhii ’sɛdë ꞊nɛ ’ö ‑an bɔ kö ‑waan këpëyaamɛ ‑nu ’klo bhɔ ’iin kö ‑waan ’wun ‑së kë ‑mɛ ‑nu ꞊faan’ ’më. 15Bhii pë ’ö ‑Zlan ‑zo ’kun ‑wun ’ka ’ö tɔɔ kö ka ‑bha ’wun ‑së ‑nu kë ‑sü ’ka, mɛ ‑nu ’ö ’waa ’wun dɔ, ’ö ’kpaakpadhɛ ’yaa ‑an ‑gɔ bhë ‑waan ‑kpën kö ‑waan dɔ diindhö. 16‑Potaasü ‑yö ka ‑gɔ; ’kɛɛ kö ꞊kun ’ö ka ‑bha ‑potaasü ‑yö ‑kë ꞊nɛ ‑kpa pë ’dhiö ‑pë ’dhö ’ö ’ka ꞊kian’ yaa ‑ta kpaa; ‑ka ’wun kë ꞊nɛ ‑Zlan ‑bha yuökëmɛ ‑nu ‑wo ’wun ‑kë. 17‑Ka mɛ ’plɛ ꞊bhlë ‑ya; ‑ka Yesu ‑wun ‑dhɛ ’wun gia‑ ‑mɛ ‑nu ‑dhɔ kë; ‑ka ’suö ‑Zlan ‑dhë; ’ka ’sɛdë ꞊bhlë ’kpɔ!
’Wun ꞊zuan’ ’ö sü Klito ‑bha ’klobhɔdhe ‑bha
18Yuökëmɛ ‑nu, ‑ka ka ‑gɔ ꞊yɔɔ’‑ ’wlaan‑ ’ka ka ‑gɔmɛ ‑nu ‑dhë! Kö ꞊kun ’ö ‑kë ‑gɔmɛ ‑nu ’ö ‑an këwun ’dho ‑së, ’wo ’lëëlë wo ‑de ’sloo ‑an ‑dhë; ‑kaa kë ’dhö ’pö ‑a mɛ ‑nu ’ö ‑an ‑bha ’wunkëdhɛ dhö ’gbee‑ wo ‑de ’pö ‑an ‑dhë. 19Bhii ‑Zlan ‑yö ’wun ‑së ‑kë mɛ ’ö‑ ’klo ‑yö bhɔ, ’kɛɛ kö ‑a ‑de ꞊zuö’ ‑bha bhë, yaa ’wun yaa gbɛ kë ‑Zlan wö ’dhiö ‑a ‑dhë. 20Kë ‑dewo poo ꞊nɛ, ‑kë ’gɔugɔ ‑dhɛ ‑yö mü kö mɛ ‑yö pë yaa kë kö ‑wa ’klo bhɔ ꞊a? ’Kɛɛ ꞊ya kë ꞊nɛ ’ka ’wun ‑së kë ’ö ꞊wa ’go mü, ꞊wa ka ’klo bhɔ, kö ka ‑bha ’wun ‑së ꞊nɛ bhë ‑Zlan wö ’dhiö. 21Pë ’ö ‑Zlan ‑yö ka ꞊dhɔɔ ‑kë ‑a ‑bha bhë ’ö bhë, bhii Klito ‑de ’pö, ‑a ’klo ‑yö ‑bhɔ ka ‑wun ’gü. ‑Yö ’wun ꞊zuan’ ’ka ka ‑gɔ ’dhö kö ’kaan‑ ’to ‑a pin ’piö, 22(꞊nɛ ‑kɔ ’ö ꞊bɛɛn’ ‑sü ’ka ‑a ’ka ‑Zlan ‑bha ’sëëdhɛ ’gü ‑a ’dhö ꞊nɛ:) Yaa ꞊sɔɔn yaa gbɛ kë ’iin ꞊sua ‑wun yaa bɔ ‑a ’dhii do. 23Yö bhë ꞊nɛ ’ö ’wo ’si bho ‑a ‑gɔ ’ö yaa ö ‑bha bho; ’wo‑ ’klo bhɔ, ’ö ’dhi ‑wo ‑yaan yaa ’go ‑a dhiö ꞊nɛ ö ‑dho ö ‑bha ’pë bho ‑a ’dhö. Pë ’ö‑ ‑kë ꞊zian’ ’ö tɔɔ ꞊ya kë ’dhö, ’yö ö ‑de ‑wun ‑lo ‑Zlan ’ö za kpengdhö ’kan ‑na bhë ‑a kwɛɛ. 24Yö ꞊nɛ ’ö kwa ‑bha ꞊sɔɔnyaa ‑wun ‑nu ‑wo ‑lo ‑a ‑ta ‑gaatalü ‑bha, ‑yö kë ’dhö kö ’kwaan‑ bɔ ‑ga ꞊sɔɔn yaa ‑bha ‑sü ’ö bhë ‑a ‑ta kö ‑tosiadhe ’ö kpengdhö bhë ’kwaan‑ kë; bhii ‑yö ꞊bɛɛn’ ‑sü ’ka ‑Zlan ‑bha ’sëëdhɛ ’gü ꞊nɛ: ‑A ‑bha ‑gi pin ‑nu bhë ꞊nɛ ’wo kwa ‑dhɛ bo. 25’Ö tɔɔ kë‑ wo bhë, ka ‑kë ꞊nɛ ’bhla ‑nu ’wo ꞊dhɔng ‑an ’dhö; ’kɛɛ ka ‑yɛ ka ’zü ’ka nu mɛ ’ö ’bhla ‑maakëmɛ ’ka ’ö ‑zo ‑kë mɛ nii ’piö ‑mɛ ’ka bhë ‑a ’piö.
3’Wun ’ö ‑gban dhe waa‑ ꞊gɔn ‑an ‑bha ‑kë ’ko ’piö ‑kɔ ‑bha
1Dhoo ‑nu, ka ‑de ’pö, ‑ka ’wun ma ka ꞊gɔn ‑nu ‑ta! ‑Yö kë ’dhö kö ‑a mɛ ’bhaa ‑nu ’ö waa ‑Zlan ‑wun ‑dhɛ ’wun gia‑ ꞊kun bhë, ’kö ‑kë ꞊nɛ waa ’wun ꞊blɛɛ’ ‑an ‑dhë, kö ‑zoyösü ‑yaan kë ‑an ‑gɔ ka ‑bha ’ta ‑kɔ ‑wun ’gü. 2Bhii kö ‑Zlan ꞊bhlë ‑ya ‑kɔ ’ö ’puu ka ’ta ‑sü ‑kɔ ’gü bhë, ‑an ’yan ‑yö ‑da ‑a ’gü. 3Kö ꞊kun ’ö ’ka ka ‑de ‑kë ‑së plaan ꞊zian’ ꞊nɛ ka ‑bha wun kë ‑kɔ ‑nu, ka buënpë ‑nu ’wo ‑kë ’sënng ‑nu, sɔ ‑sɛɛbɔ ‑nu ’ö ’ka dhoë‑ ‑da ka ‑bha bhë ‑an ’ka! 4’Kɛɛ ka ‑bha ‑kë ‑së ‑sü ‑yö kë ka ꞊zuö’ ’gü ꞊zian’. ‑Yö kë ‑së ‑dhɛ ’ö‑ ’gü ’yaa ꞊siö’ ‑a ’ka; yö ꞊nɛ ’ö tɔɔ ꞊zuö’ (’ö ‑Zuu ’slööslö ꞊ya yuö kë ‑a ’gü), ’ö ’lëëlë, ’ö ‑ya diindhö ‑sü ’dhoë‑ ‑gɔ; yö ꞊nɛ ’ö‑ ‑bha ‑sëdhɛ ꞊sɔnng’ ’dhö ꞊va ‑Zlan wö ’dhiö. 5Dhoo ‑nu ’wo ‑Zlan ꞊bhlë ‑ya ’ö ’wo ‑kë ’dhiö ꞊zian’, ’wo wo ‑zo dɔ ‑Zlan ‑bha (꞊nɛ pë ’ö‑ ’tɔ go ‑an ‑dhë bhë ‑wo ‑dho kë), ’ö ’wo wo ‑gɔ ꞊yɔɔ wo ꞊gɔn ‑nu ‑dhë bhë, ‑kɔ bhë ꞊nɛ ’wo wo ‑de ꞊kaa’ ‑së. 6‑Kɔ bhë ꞊nɛ ’ö Saala ‑yö ꞊kaa’. ‑Yö ’wun ‑ma Ablaamö ‑ta, ’yö‑ ‑dhɛ ö dëmɛ. Yö ꞊nɛ ’ö ’ka go ‑a ’gü, ’ka ‑kë ‑a ’dhu ‑nu ’ka, ‑a ’ke ’ka ’wun ‑së kë ’ö kaa ka ꞊kwaa’ ka ‑de ‑zü kö ’kaan‑ dɔ ‑gbɔudhö ’suö ’gü.
7Gɔɔn‑ ‑nu, ka ‑bha ‑kë ka bɔɔ ‑nu ’piö ‑sü bhë, ‑ka kë ’lëëlë ‑an ’ka ‑an ‑bha ‑kë dhe ’ka ‑sü ’ö ‑an ‑kɔ ’yaa ‑mɔ pë ’gbeegbee ‑nu kë ‑sü ‑bha bhë ‑a ‑wun ’gü; ‑ka ‑an ꞊bhlë ‑ya, bhii gbaɔ ’ö ‑kë ‑këdhösü ’ö ’yaa yën ’ö ‑Zlan ‑ya nu ka ‑dhɛ bhɛ, ka ‑dho ka ‑bha kɛ ’ko ꞊bhaa. ’Ö tɔɔ ꞊ya kë ꞊nɛ ’wun ꞊ya kë mü, ka ‑dho ꞊bhɛa’ ’dhö ’kɛɛ ‑a ‑yɛ ’zü gbɛ ’ka ’dho kë ‑dhö.
’Wun ’ö këpë ’ka dhegluzë ‑nu ziën
8꞊Ɛɛ, ‑ka kë do ka ‑zo ‑ta ’gü ‑wun ‑nu waa‑ ka ‑bha ’wun ‑nu ‑dan ’kuë ‑kɔ ‑nu ’gü. ‑Dhɔ ’ö ꞊ya kë ’ö dhegluzë ‑nu ‑wa ‑kë wo ’kuë bhë ‑yö ‑ya ka ’gü ’iin kö ka ’ko ‑nu ’yena yö ‑sü waa‑ ‑de ‑dho sia‑ ‑sü ‑wo kë ka ‑gɔ. 9Kö ꞊kun ’ka ’wun yaa ’pë bho ’wun yaa ’ka, ’ö ’ka ’si ’pë bho ’si ’ka; ’kɛɛ ‑kaa ‑yɛ ’zü kë ’dhuë‑ ’ka, bhii pë ’ö ‑Zlan ‑yö ka ꞊dhɔɔ ꞊kaa’ bhë ’ö bhë, ‑yö kë ’dhö kö ’dhuë‑ ‑yaan kë ka ‑bha ’ka. 10‑A ‑de ’wun bhë ‑a ‑wun ’gü ‑yö ꞊bɛɛn’ ‑sü ’ka ‑Zlan ‑bha ’sëëdhɛ ’gü ꞊nɛ: ꞊Ya kë ꞊nɛ mɛ ’bhaa ꞊yaa‑ ‑dhɔ kë ‑tosiadhe kë ‑sü ’ka, kö ’ö yi ‑së ‑nu yö, kö ‑yö ’ö nɛga kuënnu ’wun yaa ‑gɔ; ‑yö ö ‑bɛn ‑nu kuënnu mɛ ‑püö ‑wun ‑nu ‑gɔ; 11‑Yö bhɔ ’wun yaa ‑dhë ꞊taa’, ‑yö ’wun ‑së kë; ‑yö ꞊zuöyagluu ꞊mɛɛ’ ’kö ‑kë ꞊nɛ ‑yö ‑dho ‑a ’piö kë ’dhee. 12Bhii Dëmɛ ’yan ‑yö mɛ kpengdhö ‑bha, ’ö‑ ’to ’dhö dɔ ‑sü ’ka diindhö ‑an ‑bha ꞊bhɛawo ‑nu ‑gɔ. ’Kɛɛ kwa Dëmɛ wö ‑siö ‑sü ‑mü pëyaakëmɛ ‑nu ‑bha kö ‑yaan ‑an ’klo bhɔ.
13‑Yö kë ka ’yaan ꞊nɛ mɛ gbɛ yaa ’dho ’wun yaa kë ka ’ka kö ’ka ka ‑de nu ’wun ‑së kë ‑sü ‑dhë. 14‑A ‑de ’kö ‑kë ꞊nɛ ka ’yënng ‑yö ‑bhɔ ka këpë kpengdhö ‑nu ‑wun ’gü, ‑ka ꞊zuögludhi kë! ‑A ‑wun ’gü, ‑yö ꞊bɛɛn’ ‑sü ’ka ‑Zlan ‑bha ’sëëdhɛ ’gü ꞊nɛ: Kö ꞊kun ’ö ’suö gbɛ ‑yö ka ‑kë mɛ gbɛ ‑dhë ’iin ’ö ’ka dɔ ‑gbɔudhö! 15’Kɛɛ Klito bhë ‑yö kë ‑dhö ka ꞊zuö’ ’piö, ’ka‑ ’sü ka Dëmɛ ’ka. ‑Ka kë ꞊baa’ ‑sü ’ka ‑kplawo kö mɛ ‑nu ’wo ka ꞊dhɛɛ’ ’kpɔ ‑na ka ‑zo ‑dɔ ‑a ‑bha ‑pë ’ö ‑Zlan ’piö ‑a ‑gbaan ’ka bhë, kö ’kaan‑ ‑a ‑daa kë ‑an ‑gɔ; 16‑yö kë ꞊zuö’ ‑së ’gü, ’iin ‑yö kë ’kwi ’suö ’ka ‑Zlan ‑dhë, ’iin kö ka ‑de ꞊zuö’ ’gü ’ka ka ‑de dɔ kpengdhö; ‑yö kë ’dhö kö ka ‑bha ’ta ‑kɔ ‑së ’ö‑ ’ka ka ‑bha ‑kpa Klito ‑bha ‑sü ’gü bhë, mɛ ’wo ’wun yö ‑na ‑a ‑bha bhë, lë‑ ‑yaan ’kpɔ ‑an ‑ta. 17’Ö tɔɔ ꞊ya kë ꞊nɛ ꞊ya kë ‑Zlan ‑we ‑a ‑bha ‑wun ’ka kö ka ’yënng ‑yaan bhɔ, kö ꞊yö ‑së kö ‑yö kë ’wun ‑së kë ‑sü ’gü ’ö ꞊zië’ ‑a ‑kë ’wun yaa ’gü ‑sü ‑ta. 18’Ö bhii Klito ’ka‑ ‑ga ‑na bhë, ‑yö ‑ga kwa ‑bha ꞊sɔɔn yaa ‑nu ‑wun ’gü; ’kɛɛ kö yö ’ö bhë ‑yö ‑kë kpengdhö, ’ö ga ’dhö ’sa mɛ ’ö ’waa kpengdhö ‑an ‑wun ’gü. Kë‑ wo ’dhö bhë, ga bhë ‑ya wo ’dhö dosɛn ’kpaan; ‑yö kë ’dhö kö ‑yaan ’dho kwa ’ka ‑Zlan wö ’dhiö; ’yö ’wo‑ zë ‑a mɛdhɛ ‑bun ’gü ꞊zian’. ꞊Dhɛ ‑kë ’dhö ‑yö ‑go ga ’gü ‑Zuu ’slööslö ‑bha ’piigbeedhɛ ꞊kwaa’. 19‑Zuu ’slööslö do ’ö bhë ꞊nɛ ’ö‑ ‑bha ’piigbeedhɛ ‑yö dho ‑a ’ka ’ö ’wun ꞊blɛɛ mɛ ‑nu ’wo ‑kanso ’gü ꞊glööbɔɔ bhë ‑an ‑dhë. 20Mɛ ‑nu ’wo bhë ’wo tɔɔ mɛ ‑nu ’ö ’dhiö ‑bezë, ’wo ‑Zlan ‑wo ‑zuö ‑kɔ ’yan ꞊taa Noe ‑bha ’töng ’ka; ’wo to wo ‑wo ‑ta ’kɛɛ kö ‑Zlan ‑yö ‑kë ö ‑bha ꞊zuösaadhɛ ’gü; ’ö toë ’dhö ’ö yöë yi ’ö Noe ‑yö ’yitagɔ ꞊kaa’ ’ö mɛ kpö ’dɛdɛ ’wo dho ‑mɔ mɛ ’slɛaga ‑bha ’wo ‑da ‑a ’gü ’ö ’wo dha ‑a ‑yi ‑bha. 21’Wun bhë ‑yö ‑bɔ yiö Yesu ’tɔ ’ka ‑sü ’ka ’ö ’ka‑ wo ’ö ’ka dha ꞊dɛɛ bhë ‑a ’bin ’ka; ‑bɔ yiö ‑sü ’ö bhë ’yaa‑ mɛ ’ö mɛ bun ‑zlu ‑dhiipë ‑nu ‑gɔ ‑a ’ka ’kɛɛ ‑yö ꞊zuögüdhɛ ‑bha ‑kë ’puu ‑sü ‑dhɛ ‑Zlan ‑gɔ ‑sü ’wo wo ‑de ‑da ‑a ’gü ‑a ’ka; yö ꞊nɛ ’ö ’ka bɔ ‑a ‑ta ’ö Yesu Klito ‑bha ‑go ga ’gü ‑sü ‑yö ka dha bhë. 22Yesu Klito ’ö bhë ꞊ya ’dho dhang‑ ’gü. ‑Yö ‑ya ‑sü ’ka ‑Zlan ꞊kwɛɛ‑ ’gü. ‑Zlan ‑bha bɔmɛ ‑nu, ‑wogbiindhɛ ‑nu, ’piigbeedhɛ ‑nu ‑wo wo ‑gɔ ‑yɔɔ ‑a ‑dhë, ’ö ’wo ’wun ma ‑a ‑ta.
4’Wun ’ö ‑gban ’ta ‑kɔ ‑dëü ‑wun ‑bha
1꞊Dhɛ ‑kë ꞊nɛ Klito ’yënng ‑yö ‑bhɔ ö bun ’gü bhë, ka ‑de ’pö ‑zotadhe do bhë ‑yö kë ka ’gü, bhii mɛ ’ö‑ ’yënng ꞊ya bhɔ bun ’gü do bhë, ‑a ‑bha ’wun gbɛ ’yaa ꞊sɔɔn yaa ‑bha. 2꞊Ya kë ’dhö kö ’go ꞊dɛɛ ‑bha, ’töng ’ö ꞊tun ka ‑gɔ ka ‑bha ‑tosiadhe ’gü ’kpongtaa zö bhë, kö ꞊kun ’ö ’ka‑ ‑kë mɛ ’bhee‑ ꞊dhɔɔbhaapë ꞊kwaa’; ’kɛɛ kö ‑yö kë ꞊zian’ ‑Zlan ‑zo ’kun ‑wun ’gü. 3Kë‑ wo ’dhö bhë, ka ‑kë ’dhiö ‑bezë ’wun kë ꞊dhia ꞊nɛ mɛ ‑nu ’ö waa wo ꞊zuö’ ꞊dhië’‑ ‑Zlan ’piö bhë ‑an kë ‑kɔ ‑nu ’dhö; ’ö ’ka pë ‑nu kë, ’waa kë tɔng ’gbloo ’piö; ’ka ‑ya pë ‑dhɔ ’ka ꞊nëdhö; ’ö ’ka yɔ ‑nu mü ’ö ’ka pë ‑nu ‑bhö ‑ziögɔüsüzë ’ka; ’ö kwiga ‑nu ’ö ‑an ‑wun ’yaa dhi ‑Zlan ‑dhë bhë ’wo ‑kë ka ‑gɔ. 4Zlöö ꞊nɛ, ka ’bhamɛ ‑nu ’ö waa wo ꞊zuö’ ꞊dhië’ ꞊kun bhë, ‑an ’te ꞊ya ’tun kö ‑waan ’kun ka yö ‑sü ’ka ‑an ’piö ’wun ‑nu ‑ziögɔüsüzë ‑nu ’iin ’wun yaa ‑nu kë ꞊dhia. ‑A ‑kë ’dhö ‑sü ’ka, ‑wo ’wun ꞊blɛɛ’ ‑na ka ‑bha, ’iin ‑wo ’yee ‑nu ’to ‑na ka ‑bha. 5’Kɛɛ ‑ka ka ꞊kwaa’ ‑an ‑zü! ‑Wo ‑dho ’wun ‑gɛn bho ‑Zlan ’ö ꞊ya dɔ kö mɛ ’bhee‑ ‑nu waa‑ mɛ ‑nu ’ö ꞊wa ga ‑yaan ‑a ‑bha za ’kan bhë ‑a ’dhiö. 6Pë ‑de ’ö ‑kë ’ö ’wuntaɔsë ‑yö ꞊blɛɛ mɛ ‑nu ’ö ꞊wa ga ‑an ‑dhë ’ö bhë; ‑yö kë ’dhö, ’kö ‑kë ꞊nɛ za ꞊ya ‑lo ‑an tuö ‑an mɛbheedhɛ ‑bun ’gü ga ꞊kwaa’, kö ‑waan ‑kë ‑a ’gü ‑sü yö wo nii ’gü ꞊zian’ ‑Zlan ‑bha ’piigbeedhɛ ꞊kwaa’. 7Pë ’plɛ ’dhiötoyi ꞊ya yö ꞊klöö’; ’ka ’wun ‑nu kë, ‑yö yö ’ko ’dhiö ‑së ’ka; ‑ka ka ‑zo kë ka ‑de ’piö, ’ka ‑ya ka ’yaan kö ’kaan‑ ‑klu ꞊bhɛa’ ‑sü ‑bha. 8‑Blɛɛzë ’ka, ‑ka ’dho ka ’ko ‑nu ‑dhɔ kë ‑sü ’ö ka ꞊zuö’ ’plɛ ’ka bhë ‑a ’ka ’dhiö, bhii ’ko ‑dhɔ kë ‑sü ’ö ’ka‑ ‑ga ‑na bhë, ‑yö ꞊sɔɔn yaa ꞊plëëzë ‑ta ‑kpa kwa ’ko ‑nu ziën. 9‑Ka ka ’ko ‑nu ‑nia ’kun ‑së; kö ꞊kun ’ö ‑kë ’wun ‑nu ‑blɛɛ ‑wo ꞊löö ‑sü ’ka. 10Mɛ ’ö ‑dhö, ‑yö ’glusëgüpë ‑nu kë ö ’bha ‑nu ‑dhë ꞊nɛ mɛ ‑nu ’ö ‑Zlan ‑yö ‑an ‑ya ö ‑bha gbaɔpë ‑nu ’dhiö ‑an ’dhö. ’Ö tɔɔ mɛ ’ö ‑dhö, ‑Zlan ꞊ya gbaɔ kë ‑a ‑dhë ‑a ꞊tian’. 11Mɛ ’ö ‑Zlan ‑wo pö ‑na, ‑yö ‑Zlan ‑wo ’sloo ꞊blɛɛ’‑; mɛ ’ö pë ‑nu kë ‑na mɛ ‑nu ‑dhë, ‑ya kë ꞊faan’ ’ö ‑Zlan ‑ya nu ‑a ‑dhɛ bhɛ ‑a ’ka. ’Ö ꞊ya kë ꞊nɛ ka‑ ‑kë ’dhö giagiawo, kö ‑Zlan ’tɔ ‑yö bhɔ ’wun ’saadhö ’gü ꞊bɔa’ Yesu Klito ’ö ’tɔbhɔdhe waa‑ ’piigbeedhɛ ’wo‑ ‑bha ’ka ꞊toëpö ’ka bhë ‑a ‑ta ‑sü ’ka, amɛn.
’Wun ’ö ‑gban ‑Zlan ‑bha mɛ ‑nu ‑bɔ ’wun ‑nu ’gü ‑kɔ ‑bha
12N dhegluzë ‑nu, kö ꞊kun ’ö ka ’te ‑yö tun ’wun ’gbee‑ ‑nu ’wo nu ‑na ka ‑ta ’ö ’ka bɔ ‑na ‑an ’gü bhë ‑a ‑wun ’gü ꞊nɛ pë ’wo‑ pö kë pë ’yaa ‑mü ‑a ’dhö. 13‑Ka ꞊zuögludhi kë ꞊zian’ ’ö tɔɔ ‑kɔ ’ö ’wun ‑nu ’dho nu ‑na ‑a ’ka ka ‑ta bhë ꞊nɛ ’ö ꞊kaa’ Klito ‑bha ’ka ’pö. ꞊Ya kë ’dhö ’ö ’ka dho ‑mɔa kö ‑kpɛ ꞊va ‑yaan kë ka ‑gɔ yi ’ö‑ ‑bha ’tɔbhɔdhe dho nu ‑a ’ka bhë ‑a ’ka. 14’Ö ꞊ya kë ꞊nɛ ꞊wa ’si ‑nu bho ka ‑gɔ, ka ‑bha ‑kë Klito ‑bha ꞊guë’ ’ka ‑sü ‑wun ’gü, ka ꞊zuö’ ’glu ‑yö dhi bhii ‑Zuu ’tɔbhɔdhe ‑zë ’ö ‑Zuu ’ö go ‑Zlan ’piö ‑a ’ka bhë ‑yö ka ‑ta. 15Kö ꞊kun ’ö mɛ ‑yö go ka ziën ’ö‑ mɛ zë ‑tɔ, ‑a ꞊kwaan ‑tɔ, ‑a këpë yaa ‑tɔ, ’iin ‑da mɛ ’kpaan gbɛ ‑bha ’wun ’gü ‑tɔ ‑yö ‑kë ‑dhö kö ‑a ‑wun ’gü ’wun ‑yaan wɔ ‑a ‑ta. 16’Kɛɛ mɛ ’ö ’wun ꞊ya wɔ ‑a ‑ta ꞊zian’ ‑a ‑bha ‑bɔ Klito ’ka ‑sü ‑wun ’gü, kö ꞊kun ’ö ‑kë ‑a ‑gɔ lë‑ ‑wun ’ka; ‑yö ‑Zlan ’tɔ bhɔ ꞊zian’.
17Bhii ‑Zlan ‑bha zakanyi ꞊ya ‑lo. ’Yö za ’ö ’dhö bhë ’ö‑ zü dhö dɔ mɛ ’kwa ‑Zlan ‑bha ’kɔɔmɛ ‑nu ’ka kwa ‑ta. Za bhë ‑a zü dhoë dɔ; ’ö‑ ‑de ’ö‑ zü ꞊ya dɔ ’saadhö. ’Ö ꞊ya kë ꞊nɛ za ’ö dho kan bhë ‑a zü ꞊ya dɔ kwa (’ö kwa‑ ‑bha ’në ‑nu ’ka kwa) ‑bha, kö mɛ ‑nu ’ö ’waa ’wun ma ‑Zlan ‑wo ‑ta bhë ‑an ’dhiötodhɛ ‑yö ‑dho kë mü ꞊dhë ꞊ɛɛ? 18‑A ‑de ’wun ‑yö ‑gban ‑a ‑bha ‑Zlan ‑bha ’sëëdhɛ ’gü ꞊nɛ: Mɛ ‑nu ’ö ’wo kpengdhö bhë ‑wo ‑dho dha. ’Kɛɛ ꞊dhɛ ’ö za ’ö ‑an ‑bha bhë ’ö kë ‑na ’gbee‑, kö ’gluyaamɛ ‑nu waa‑ ꞊kianyaamɛ ‑nu, ‑yö ‑dho kë mü ꞊dhë ‑an ‑bha ’ka ɛɛ? 19꞊Dhɛ ‑kë ’dhö, mɛ ‑nu ’ö ’wun ’dho wɔ ‑na ka ‑ta ‑Zlan ‑zo ’kun ‑wun ’ka bhë, ‑ka ’dho ka këwun ‑së ‑nu ’wo bhë ‑an ’ka ’dhiö ’iin ’ka ka ‑de ‑wun ‑lo ‑Zlan ’ö pë ’plɛ ‑da, ’ö to ö ‑wo ’gü ö ‑bha pë ‑nu ’ö‑ ’tɔ go mɛ ‑nu ‑dhë ‑a ’gü bhë ‑a kwɛɛ ’fɛfɛdhö.
5’Wun ’ö ‑gban ‑zo ‑kë ‑Zlan ‑bha ‑tuë ‑nu ’piö ‑kɔ ‑bha
1’Wun ‑yö n ‑gɔ kö ’aan‑ ꞊blɛɛ’‑ mɛ ‑nu ’wo mɛ ziizii ‑nu ’ka ka ziën ‑Zlan ‑bha ‑wun ‑nu ’gü bhë ‑an ‑dhë; a mɛ ‑dee ’ka ꞊nɛ ka ’dhö ’pö, ’ö Klito ‑bha ’klobhɔdhe ‑nu bhë ’ö n ’yaan ‑wun ’ka, ’ö ’tɔbhɔdhe ’ö dho kë ’dhiö ꞊zian’ ’ö mɛ ’plɛ kwa‑ ’gü ‑mɛ ‑nu ’ka bhë, a‑ ‑pö ka ‑dhë: 2Mɛ ‑nu ’ö ‑Zlan ‑yö ‑an ‑wun tën ka ‑bha bhë, ‑ka ka ‑zo ’to ‑së ’ka ‑an ’piö ꞊nɛ ‑kɔ ’ö ‑tuëmaakëmɛ ’dhoë‑ kë ‑na ‑a ’ka ’bhla ‑tuë ‑nu ‑gɔ bhë ‑a ’dhö; ‑yö kë ’wun ’ö ka ‑zo kun ’ö ’ka‑ ‑kë ‑a ’ka ꞊nɛ ‑kɔ ’ö ‑Zlan ’dhö ‑a ’piö kö ‑yö kaa ‑a ’dhö; kö ꞊kun ’ka‑ ‑kë ꞊zuö’ ‑to zlöö ’ka. Kö ꞊kun ’ka ka ‑bha yuö ‑nu ‑kë ꞊nɛ ’wëü‑ yö ‑a ’gü ‑pë ’dhö, ’kɛɛ ‑ka pë ‑nu kë ’kpaan ’ka, ka ‑de ‑zo ’kun ‑wun ’plɛ ’ka. 3Mɛ ‑nu ’ö ‑an ‑wun ’dhö tën ‑sü ’ka ka ‑bha bhë, kö ꞊kun ’ö ’ka ‑kë ‑an ‑ta ’dhiö‑; ‑ka kë ꞊zian’ ‑an ‑bha ’wun ꞊zuan’ ’ka. 4‑Kɔ bhë ꞊nɛ ’ö yi ’ö ‑tuëmaakëmɛ ‑nu ‑gɔmɛ dho nuë bhë, ’ö ’tɔbhɔdhe ’gɔ ꞊gblaa’ ’ö ’yaa ꞊siö’‑ bhë ’ö ’ka dho ‑a yö ‑a ’ka.
5‑Dadhëü ‑nu, ka ‑de ’pö, ‑ka ’wun ma mɛ ziizii ‑nu ‑ta! ‑De ‑dho sia‑ ‑sü ‑yö kë ka ’gü bhii ‑yö ꞊bɛɛn’ ‑sü ’ka ‑Zlan ‑bha ’sëëdhɛ ’gü ꞊nɛ: ‑Zlan ‑yö zian ‑ta ‑desüvamɛ ‑gɔ ’ö ’glusë ‑kë ‑de ‑dho sia‑ ‑mɛ ‑nu ‑dhë. 6꞊Dhɛ ‑kë ’dhö kö ‑ka ka ‑de ꞊yɔɔn sia‑ ‑Zlan ‑kɔ ’pii ’gbee‑ bhë ‑a ꞊löö kö ‑yaan ka ꞊luu’‑ yi ’ö‑ ‑ya bhë ‑a ’ka. 7‑Ka ka ‑bha ꞊zuö’ ‑to zlöö ‑wun ‑nu ‑lo ‑a kwɛɛ bhii yö ꞊nɛ ’ö ö ‑zo ‑kë ka ’piö.
8’Ka ’wun ‑nu kë, ‑yö kë ‑mɔ ’kuë ‑sü ‑zë; kö ꞊kun ’ö ’ka ’wun ‑nu ‑ziö ꞊gɔü’. ‑Ka ‑ya ka ’yaan bhii ka yaagümɛ, dü, ‑yö ꞊nië’ ‑na ka ‑zü ꞊nɛ ‑tiɔn ’ö ’gbla ‑na pë ’ö dho ‑a ‑bhö ‑a ꞊mɛɛ’ ‑sü ’ka kö ‑yaan ’kun bhë ‑a ’dhö. 9‑Ka dɔ ‑a ‑gɔ gɛnngdhö, ‑klu ‑zo ‑yö ‑Zlan ‑bha ‑sü ’ka ’ö tɔɔ dhegluzë ’bhaa ‑nu ‑wo ‑dhö ’ö ’klobhɔdhe do ’ö bhë ’wo‑ ’gü ’sɛ ‑to ’dhö ‑sü ‑ta. 10‑Yö ’dhö ’kɛɛ kö ꞊kun ’ö ka ꞊zuö’ ‑yö to zlöö; ‑yö kë ka ’yaan ꞊nɛ ’glusë kë ‑Zlan ’ö ka ꞊dhɔɔ ‑kë ‑kpa Klito ‑bha ‑sü ’gü ö ‑bha ꞊toëpö ’tɔbhɔdhe ‑bha bhë, ꞊ya kë ꞊nɛ ’klobhɔdhe ’töng ’dɛdɛ bhë, ’ka bɔ ‑a ’gü ꞊sia, yö ‑de gia‑ bhë ‑yö ‑dho ka ‑zo ‑gban, ’yö dho ka ꞊faan’ më kö ‑yaan ka ‑ya, ’ö ’ka ‑dho dɔ gɛnngdhö. 11Kö ’piigbeedhɛ ‑yö kë ‑a ‑bha ’ka ꞊toëpö ꞊toëpö ’ka! Amɛn.
꞊Wekadhe ‑kaanta
12’Sëëdhɛ ꞊nɛ ꞊yö ꞊klöö’; Silivɛn ’ö n ‑gɔ n dheglu ’ö ‑kpa n ‑ma ‑sü ’ka bhë ꞊nɛ ’ö‑ ‑kë n ‑dhë ’ö ’a‑ bɔ ka ‑dhë ka ꞊faan’ ’më ‑sü ’ka ꞊nɛ ‑Zlan ‑bha ’glusë ’ö ’ka ‑klu ‑sü ’ka ‑a ‑bha bhë ‑yö ’wun gia‑ ’ka.
13‑Zlan ‑bha mɛ ‑nu ’wo Babilɔnë ’nö, ꞊wa ’we kaa. N gbö Maakö ’ö kwa Dëmɛ ’gü ꞊ya ’we kaa ’pö. 14‑Ka ‑büö ‑nu pö ka ’ko ‑nu ‑dhë ka ’ko ‑nu ’sɛnɛ bho ‑sü ’ka dhegluzë ‑dhɛ ‑kwaa. ꞊Zuöyagluu ‑yö kë mɛ ’ö ’ka Klito ’gü ka ‑gɔ!